GABO YAMAN - 9

GABO YAMAN
CHAPTER – 9
Thantei_LauraSean
.
“246170 security code, pawn lam chu kalh lo mai rawh.” A phun sep sep chauh na a ka hnaih em vangin a tawng chu ka hre thei. A harh tih ka hriat chuan ka thaw huai bawk.
.
“Reilote min nghak rawh. Reilote_” hmanhmawh takin ka kalsan a. Secret code hmanga a in kawngka ka kalh hnu chuan hmanhmawh tak bawkin Car-ah ka let leh a.
“Mia_ I harh tiraw?” a biangah ka dek leh a, a harh tih min hriattir nan a mitmu a tiche ralh peih chauh a ni. “Reiloteah damdawi in kan thleng ang. Hahdam deuhin awm rawh.” Ka ti leh zung zung a.
.
A chak thei anga tlanpuiin Damdawi in kan thleng thuai a, reivaklo ah Emergency Room atanga Doctor a lo chhuah chuan ka lo pan thuai. A taksa a chak tawk loh thu leh a ke-a hliam vanga a khawsik a san hle thu min hrilh a. Enkawlna tha a dawng anga a  ziaawm leh thuai ang tih min hrilh chuan ka thla a muang ta deuh. Khatiang khawpa hlauthawng khan ka awm khat khawp. Mak ka inti zawk hial a ni.
.
Doctor in a mutna pindanah ka lut thei tih min hrilh chuan ka lut nghal vat a. A chanchin hmuh theih awm zawng zawng chu ka lo en vek tawh tih amah ka hnaih hma khan ka sawi tawhin ka hria. Ka thil lo hriat tawh atangin tun ang hun harsa a tawh laia a bula awm tur an awm miah lo hi mak ka ti lem lo. Mahse, a hnaih ber nia lang ka hnenah takngial pawh engmah a sawi lo hi mak ka ti. Ka rin angin min lo hnaih lo a ni ngei ang. Venthawn tur a ngah vang pawh a ni thei tho. Chutiang thil ngaihtuah hun pawh a ni chiahin ka hre lo ve.
.
A rawn meng a, min hmuh chuan a nui sak a. Ahma ai kha chuan a ziaawm hmel ta deuh bawk.
.
“Ka tibuai hle mai che. Ka lawm e aw.”
.
Awihawm loh zawk hian a! A ngaihzawng anga min ngai anih chuan hetiang hian lawmthu min hrilh tur niin ka hre lo.
.
“Engvang nge? Engvangin nge lawmthu min hrilh?”
.
Min chhang mai lo. Min melh ralh hian ka vawn turin a kut dinglam arawn phar chhuak a, ka lo vuan vat.
.
“Mikhual anga ka ngaih vang che a ni lo a nia. Min tanpui thin mi tlemte zinga mi i nih vangin lawmthu ka hrilh che anih kha..” min chhanna chuan min ti hrilhhai thelh a ni. “Min kuah dawn nge dawn lo?” nui saka min melh chuan engmah sawi lovin ka kuah vang vang a. A taksa inthlahdul hnakin ka awmah a hmai a phum a, a maimitchhing ta daih bawk.
.
Ka kekawr ipte-a ka phone ah nghawr dar dar vangin kan inkuahna chu kan thlah ta hram. Caller ID ka en a, Mia hriat laia biak chi a ni lo. Zuri hian engtin nge tun ang hunah min rawn biak teh tlat ni? Kal sawn hlekin phone chu ka pick up a, Zuri rawn thaw hlawp hlawp vang chuan ka ding ngil deuh zawt.
.
“Argyros, tunah lo kal rawh. Khawngaihin! Tunah _ Tunah_” thil keh chhuai riin a zui a, phone chu a tawp zui hmiah bawk. Eng thil nge thleng leh ta? Buaina thleng ta reng mai hi enge maw a awmzia  ni ta le?
.
Phone ka ak a, Mia ka en chuan min ngaihtuah hmel tak hian hmalama awn deuhin min lo en a.
.
“I tha em?”
.
“Ka kal a ngai. Thil hmanhmawh thlak a thleng thut a ni. Ka kalsan ngam che angem?”
.
“Tehreng mai. Ka tha tawh alawm. Min ngaihtuah suh.”
.
Kal hnaih lehin a chalah ka fawp zauh a. Hmanhmawh takin ka kalsan ta rih. Tuna ka rilru-a thil awm chu Zuri chungah eng thil nge thleng tih zawng hi a ni e. A rawn tawng dan atang khan thil tha lo tak a thleng ngei tih a chiang sa reng tawh.
.

       (GABO'S HOUSE - ZURI A CHEN TIRNA)

Zuri ka chentirna hmun ka thlen chuan kawtah Car pakhat a lo awm a, Jude car a ni tih ka hria. Hmanhmawh takin in chhungah ka tlan lut nghal a. In chhung luh phata hmuh theihin Zuri chu chhuatah a thu a, a bulah Jude chu hlauhthawn hmel fe hian a lo awm bawk. Min hmuh chuan Zuri chu rawn thovin min rawn kuah a. A hmaia hliam awm chu chemte hnu a ang khawp mai. Tap tha hleithei lovin a inhip hlawp hlawp a, tawng a tum nain a tawng thei lo. A inhip kawk kawk a.
.
“Hi, Jude_?”
.
“Mr. Yaman, kei pawh ka thleng ve chiah a ni. Zuri min rawn biak lai chuan mipa tawng thawm ka hre tel a, Zuri hi fing viau lo se tun aia na hian an khawih hman ngei ang.”
.
“Mipa maw? Zuri hi thu hahdam phawt teh se.”
.
Living room lamah kalpuiin ka thuttir a, thil awmzia a sawi phawt loh chuan eng thil chiah nge thleng tih kan hre thei lovang.
.
“Min kalsan hnu reivaklo ah khan ka inbual a, ka inbual zo ka pindana ka luh leh chuan ka khumah a lo thu reng tawh!”
.
“Engtin nge anih theih?” ka lo ti vat. He in hi a him tawk turah ka ngai. Zuri awmna chin apianga buaina in a umpha zel mai hi thil mak tak a ni. Tun hmain he ka in ah hian thil mak deuh thleng a la awm ngai reng reng lo.
.
“Chuan?” dawhthei vak lo vin ka ti hluk a. Zuri chuan meng ti dak chungin min en thung. Keimah ang bawkin Jude pawh chu a dawhthei lo tih ka hria.
.
“Kha_kha pa khan thawmhnaw ha phawt turin min hrilh a, chuan_chuan_ In atang hian min hruaichhuak dawn tih min hrilh bawk a. Ka duh lo anih chuan min that ang tih a sawi a_”
.
“Eng ang hmelpu nge? Engvangin nge an kalsan mai theih loh che? He thil hi ka hrethiam tawh zozai lo.” Jade chu thinur zetin a vei  nghauh nghauh a, a sam a tuai nawk nawk bawk a.
.
“Ka_ a hmel ka hmu thei lo.._ Tikhan vin suh min tihlau zual a nia_”
.
“Engtin nge a hmel i hmuh loh theih?” Jude chu a inbengdai hleithei lo a ni ber. An pahnih chuan chik takin ka lo en reng a, hetiang thil thleng hian Jude hi a tibuai tak zet tih ka hrethiam. Kei pawh ka bang chuang lo.
.
“A hmai a tuam tlat alawm.” Zuri chu tap lo tura insumin a in kuangkuah than a.
.
“Chuan engtin nge ni zel? Engtin nge a tih che?”
.
“A sawi ang chuan ka thawmhnaw ka ha a, ka pindan atanga chhuak tura min tih vangin ka chhuak a min zui nghal zel. Chuan_ Ka phone ka la ru hman hram a. Ka inven theih zawkna tur ngaihtuahin choka ah ka lut a, chutah pawh chuan engtin mah min la ti lo. Enge ka tih dawn min zawt a, chemte ka lak hman tawh vangin ka bei a__”
.
“I a tawh a nih hi_”
.
“Enge ka tih chuan ang. Chuan, chemte min chhuhsak a ka hmaiah hian a zai ta anih kha__Ka lakah hian eng thil a duh ka hre lo. Tinge thlamuang taka min awmtir mai  mai theih loh.”
.
“Engtin nge min lo phone theih?” Jude chuan a en chik hle.
.
“Frying pan in a hmaiah ka hlap ve tho a, chuan min beih leh hmain ka lo call thei che anih kha..”
.
“Okay. Ka hrethiam e. Hlauthawng tawh suh.” Thlamuan tumin Jude chuan nghet tak hian a kuah a. Kei chu ngawi rengin choka lamah ka kal thung.
.
Choka chhuatah Frying Pan let ngat a, dining chair a tlu rem rum bawk. Zuri hmaia a zai hman anih chuan duh nise mipa chak pangngai chuan a nunna a laksak thei. Engatinge a nunna a laksak si loh? Chokaa thil awm hote chu endik annih hma chuan khawihsawn loh turin ka kalsan leh rih a. Chemte, Zuri zai nana hman ber pawh chu hmuh tur a awm lo. Zuri leh Jude awmna lamah ka kal leh a.
.
“Chemte chu khawiah nge a awm?” Zuri chu ka en a, ani chu a hawi a deuh ha thung.
.
“Ka_Ka hrelo. A keng chhuak  nghal anih ka ring. Jude ka biak khan a hlauthawng a__”
.
“Han rinhlelh tur thil sawi a nei em?” ka ti leh. Thil engkim hi chik lehzual a ngai tawh tak zet tih ka hria.
.
“Kan inbeih lai khan tihpalh thil takmeuhin hming pakhat a lam ri a_ A bak engmah a sawi lo. Jude lo thleng anga ka biak vangin a tlan chhuak nghal __”
.
“Tu hming nge a lam rik chu?”
.
“Ka_ Engmah a ni lo. Tunah chuan ka him tawh alawm. Jude min awmpui rih mai thei angem? Khawngaihin?”
.
“Thil thleng zawng zawng i sawikim hma chuan ka kalsawn dawn hauh lo a nia. Chupa chuan tu hming nge a lam rik?” ka aw atang chuan ka thutak hle tih a hria ang. A chil a lem khalh a.
.
“A pawimawh ber lo..”
.
“A pawimawh. Tu hming nge?”
.
“Ka_ Mia_” a tizuai raih a. Rilru  nat hmel zetin a kun zui ta daih bawk.
.
“Ka hrethiam lo. Mia hian engtin nge ka awmna chin a hriat zel theih tih hi ka hrethiam lo tak zet. Engvang nge ni ta ang? Hetiang khawpa min tihnat a duh chhan hi engvang nge tih ka hre duh tak zet zet.”
.
Chu thu chiah chu kei pawhin ka inzawt a ni. Mia hian Zuri awmna chin engtin nge a hriat zel theih? Hetiang a ni chung hian vawikhat pawh ka bulah a sawi ri hauh si lo. Thil engemaw ka tih ngei a ngai dawn ta anih hi. Nizan khan damdawi in ah keimah ngeiin ka hruai a, phat rual lohin a khua pawh a sik ngei anih kha.  A bulhnaia awm zeuh zeuh chauh hi Mia hrechiang tur hian a tawk zo tawh lo tih chiang takin ka hre ta.
.
Police ka phone a, in an rawn thlen chuan an tih theih ang ang an ti zung zung a. Finfiahna awm thei tur nia ngaih thil thenkhat an la bawk. Zuri sawi hmangin mipa khan a hmai a tuam bakah kutkawr a bun bawk avangin fiahna rintlak leh chhui zui theih erawh hmuh ka beisei tehchiam lo.
.
Ka rilru tibuaitu thil pakhat awm chu Mia khan engtik laiin nge he in a kal tur hian kha mipa kha a tirh? A in ka va thlen hma khan engkim a lo ruahman em ni? Engtin nge a in ah ka kal dawn tih hrelawk a ruahmanna a siam theih? Thil theih a ni lo! Mihring pangngai tan thil tih theih a ni lo hulhual. Ka sawi tawh ang khan eng thil chiah nge thleng tih hrechiang turin Mia Garcia hi ka hnaih lehzual chu a ngai ngei anih hi.
.
Police ten min kalsan hnuah Zuri leh Jude te chu kalsan in Damdawi In lam ka pan leh a. Zuri chenna hmuna ka awm chhung kha darkar thum pawh a ral hman lo. Chuti chung chuan Mia chu Damdawi In atangin a lo chhuak fel hman vek anih chu!
.
Hmanhmawh zetin Mia chenna hmun lam ka pan lehnghal a. Thil awm dan hian ka lu a tihai ta tak zet mai. Mia chenna hmun ka thlen chuan a lo thim thap. Kawngkhar bulah ka ding a, Damdawi In-a ka hruai hma khan kawngka pawn lam zawk hi ka kalh lo tih ka chiang.  Tunah hian a inkalh thlap. Ka phone phawrh in a number ka dial a, a phone a switch off tih ka hriat chuan ka inseh ruh talh talh a.
.
Thil dang tihtheih ka neih chhun chu Silas biak a nimai. Silas ni lo hi thian a neih pawh ka hre hek lo. Hmeichhe dang ang lo takin hmeichhe thian a kawm tam lo a, hun kan hman dun tawh zawng zawngah khan a thian hmeichhe hming a sawi rik ka hre miah lo bawk. Eng thuruk nge he hmeichhia hian a neih le?
.
Silas ka call leh a.
.
“Vawiin ah Mia nen kan inhmu lo.”
.
“Zanin ah a lo bia che em?” ka ti bul hmuk a.
.
“Be miah lo. Ngawi lawk_ Vawiin hi ni engzat nge?”
.
“2nd September. Tinge?”
.
“Oh_ September thla tirah Mia ka hmu ngai lo. Ni 2 atanga ni 7 inkar chhung chu kum tin biak theih lohin a awm ziah alawm. A tha ang. Ngaihtuah suh_” a nui hak a. Tun ang hunah hian engtin nge Silas hi a nuih theih zawk?
.
“Enge a chhan? “
.
“Maw?”
.
“Biak pawh theih loha a awm chhan chu eng nge?”
.
“Ka_ ka hre bik lo. Mia hian a chhan min hrilh ngai miah lo. Ngawiteh, nangni pahnih hi in thutak ta viau a nimaw?”
.
“A awmna han rinchhin tur tal i hria em?”
.
“Hre mai lo. In inti lungawi lo ami a?” a la nui tih ka hria. He Silas hian eng thil tangkai mah min hrilh dawn hrep lo ve. Ka phone ka off a, tihngaihna ka hre ta lo. 
.
.
ZANIN CHU KA INDAIH LO VE LUTUK A, ZAN DANG AIIN A TAWI HLEK A NIA. MIN CHHIAR SAK VANGIN KA LAWM EM EM E..♡♡♡