GABO YAMAN - 7

GABO YAMAN
CHAPTER – 7
Thantei_LauraSean
.
Engemaw chen hnuah a inla hrang a, min kuahna a thlah chuan ka ruak deuh huaiin ka inhria.
.
“Ruahmanna dang ka nei.” atih chuan enge a sawi awmzia ka hriat loh vangin ka meng phar ak a. A hnung lamah pen thum velin  a tawlh hnung a, a chetdan chu ka en tawp. Eng thil nge a tih dawn ka hrethiam lo.
.
A kawr haklai chu a phelh a, eng thil  nge tih a tum tih ngaihtuah chungin ka meng phawk hra a. Chutih rual chuan a pian mipa dik tak chu enin ka mit ka lasawn thei lo. A nalh, a nalh tak zet. Hetiang pian hi awm mai mai chungin a neih theih loh. Muangchang a min rawn hnaih leh hretin mitmeng thim raih hian min en a! Eng thil nge tih a tum hi? Ka bangbo telh telh! A kekawrbul hak a phelh leh chuan mak ka tih em vangin ka au that.
.
“Enge? Enge i tih dawn?”
.
Rang lutuk hian min rawn hnaihin min pawmkang a, ka inrin loh lutuk vangin ka te that that a!
.
“Eng thil nge i tih hi__Gabo_”
.
Min chhang lo. A nui tih erawh ka hria. Tuipui lamah chuan chak tak hian min tlanpui a. Hetiang thil hi ka la tawng ngai lo hrim hrim. Naupanchhiat thlak ka ti nain a hlimawm zia hi sawifiah thiam theih chi pawh a ni lo.
.
Tuiah chuan kan pil bawrh a. Reiloteah kan lang leh vat.
.
“Engtin nge tihian i tih theih zawk a__?” ka nui hawk hawk a, a mitmeng thuk tak nisi nung sar leh za taka a nui hmel ka hmuh chuan ka chhungril a khawih. Ka sawifiah thiam lo, ka luangliam zawih zawih  ni hian ka inhria. A hmel chu ka en ngawih ngawih a. Tuna ka rilru awm dan hi hmangaihna a nih loh chuan eng thil  nge ni chuang ang le? He zawhna hi a hma pawh khan ka inzawt tawh! A dik em?
.
Gabo nui hmel chu reh riai riai in ka sam huh vek ka hmai a bet thlar chu arawn huikiang a.
.
“I nalh lutuk!” a tawng chu a zawi hle. Ka tawng chhuak thei lo. Ka kut dinglamin a nghawngah  ka vuan a. A bo thut anga ka mumang mai ani ang tih hlauin a hmel chu ka en tawp mai a ni. Hetiang khawpa nasa hian Pathianin mipa a siamte zing ami, mihring pangngai ni ve tho si hi ka thlaklelh ka inring ngai lo. Ka mitmeng atang hian ka rilru a hre ngei bawkin ka ring e. Pawi ka ti miah lo, ka ti lo tak tak! Ka nunah hian thil thup thenkhat ka nei pawh a ni thei e, mahse Gabo laka ka rilru hi a bulah hian thup ngaiin ka hrelo.
.
Tawng lovin kan inen ran a, min rawn fawp anih chuan kan kal thui ngei dawn tih ka hrechiang lutuk. Ka ngaihtuahna a fim lai hian engemaw ka ti anih loh chuan kir lehna hun a awm tawh lovang.
.
“Kal tawh ila a thain ka hria.” amah hlat chuang lovin ka nuih a. Ani pawh harhchhuak zawk hmel a pu ve tho.
.
“Tui hi a vawt mah mah anih hi. Ruah a sur dawn a ni maithei.”
.
A hawi kual zuai a, min en lehin rang deuh hian ka hmuiah min fawp a, min pawm nghetin nui suk chung hian vaukam lam panin a kal nge nge.
.
“Ka rit em?” ka tih chuan a hmui hnuailam petin a mitmeng thim raih chuan min en a. A tawng lova a nui hek lo. A hmel atang chuan a ngaihtuahna a hriat theih miah loh.
.
Vaukam kan thlen chuan dimte in min nghat a, ka kutah min kaiin Beach house lam panin kan kal nghal a. Kan tawng lo nain kan boruak chu a hahdamthak tak zet. A kut chu vuan nghet sauhin ka en chho a, kan innuih sak a.
.

.
In kan thleng a, tui luma ka inbual hnuah inthlak felin tv ka en a. Gabo chu bathroom-ah a lut ve thung.
.
“Mia_”
Chiang lo ruaiin ka harh a, min pawm tih ka hriat chuan hlauhthawnna nei miah lovin a awmah ka hmai ka phum a ka muhil zui leh hmiah. A nui hak ri ka hriat chu ka mumang nen a inzawm nghal ni maiin ka hria.
.
Ka muhil ka harh hlawl chuan ka hawi kual a, ka awmna hmun chu khawilai nge tih ka hriatchhuah mai loh vangin ka thu chhuak nghal hluai a. Gabo nen beach house-ah kan awm tih ka ngaihtuah chhuah rualin ka inthlahdul hnawk.
.
Khum atangin ka chhuk a, bang a sana intar ka hmuh chuan awih lo zet hian ka en  tawp. Chawhnu dar 1 a pel tawh. Engtin nge heti chen chen ka mut theih zawk le? Pindan atangin ka chhuak a, Gabo mutna pindan ka pan nghal chawt a. Thawm ngaichang deuhin room kawngka bulah ka ding zet a eng thawm mah hriattur a awm lo. A reh thap mai. Gabo chu ka au a, min chhangtu an awm lo. Khawiah nge maw a kal le?
.
Ka pindanah let lehin ka intifai a, ka inthlak fel nghal bawk a. Darkar khat a ral leh hnuah pawh Gabo hmel hmuh tur ala awm lo. Ka awm a nuam ta chiah lo bawk.
.
Pawnah chhuakin tuipui lamah ka kal a, tuipui luang ri leh sava hram ri thenkhat bak hriattur  a awm lo. Tiau vutah chuan  thuin tuipui chu ka thlir a, thli in min rawn chhem chuan nuamti taka dak deuhin ka maimitchhing vang vang a. Eng chena rei nge ka thut ka hre lo. Mahni chauha awm veng vengna hun ka neih ngai loh zia ka ngaihtuah neuh neuh a.
.
Gabo thawm a la reh fo vangin Beach House-ah ka let leh a, in chhung ka luh chuan a lo la reh thap tho. Eitur lo siam ila a that ka ring.
.
Choka-ah ka lut a, fridge hawngin ka thil duh ka la chhuak zung zung a. Thil ei chakna ka nei em em lo thung. Ka hman duh tak thil ka hmuh mai loh vangin Kitchen Cabinet chu ka hawng kual dan dan a. A kil sir ber ka hawng a hmeichhe slipper lo awm ka hmuh chuan ka phu deuh zawk. Thil pangngai a ni lo. Tu mihringin nge hetiang hmunah slipper dah ngai?
.
A ngai ang chiaha dahin ka khar a, ngaihthat loh ngawtna tur a awm lovin ka hre leh hnuhnawh. He hmunah hian hmeichhe engzat nge kal tawh ang? Tuemaw ber in tihpalh/tihluih in a lo dah pawh ani ve thei tho. Buaina tur awmin ka hre lo. Gabo nen kan intawn hma thil thleng a ni ngei  bawk anga, a hun liam tawh ka lo ngaihtuah hah hian eng thil tha mah a thlen lovang.
.
Slipper chungchang chu ngaihtuah duh lovin ka thil siam lai chu ka chhunzawm ta daih. Kawngka inhawng thawm niawm tak ka hriat rualin ka thil siam chu ka dah sawk sawk a, tunge lo kal tih en turin choka atangin ka kal chhuak nghal a. Gabo ka hmuh chuan ka hahdam nghal. Ka thaw chhuak hawk a.
.
“Khawiah nge i kal a?” ka ti nghal tawp. Hmel hlim sar chung hian min rawn kuahin ka chalah min fawp a, min la chhang lo. “Khawiah nge i kal a?” ka ti nawn leh ngat.
.
“Ka enkual vel mai mai.”
.
“Tak zet?”
.
“Umm_”
.
“Okay.” Min kuahna chu phelhin choka lamah ka kal a, min rawn zui tih ka hria. Ka muhil ka harh hma khan eng chena rei nge a kal chhuah tawh ka hrelo a, ka muhil ka harh hnuah pawh darkar 4 dawn a ral tawh. Chumi chhung zawng chuan thil a enkual vel mai mai maw? Ka awih a ring anih chuan mi a a ni tihna a niang chu! Mi a ani lo tih lah ka hrechiang hle sia.
.
Fridge ka hawng a, eng thil nge lakchhuah ka tum pawh ka hre lo. Ka enkual ringawt. Ka hnunglam atanga min rawn kuahin ka koki veilamah a fawp zauh a, hetianga a awm chuan ka rei tak lungawiloh khum a har ngei ang le.
.
“Min lo ngaih vanga thinur i ni em?”
.
“Tunge thinur? Nangmah maw?” ka tilui ha a. A biang leh  ka biang insiktir in a nui tih ka mitsir in ka hmu thei. “Enge nuihzatthlak a awm ami?” a sir zawngin ka en a. Nuihzatthlak a awm lo tih lantir nan a meng kual rulh duh chauh. A hmel chu a tilang thutak lui tih ka hre bawk.
.
Ka hnunglam atang chuan ka dulah a ban pakhata  min vuanin rihna neilo ang mai hian min chawi kang a, dining table ah min thuttir in ka mal leh mal inkarah a ding a, min en chhuk run bawk a. A che rang lutuk a, engmah ka ti hman lo. A kut chuan ka sam khawih neuh neuhin a mitmeng erawh a lang thim leh raih thung. Amahah hian thil bik engemaw tak chu a awm chiang alawm.
.
“I thin ala ur em?”
.
“Ka thin a ur hleinem. Ka ngaihtuah vang zawk che a nia.” Ka duh aiin ka tawng nem. Mahse, he mihring lakah hian rei tak ka thinrim theih ka ring lo. Tunah pawh ka inhriat hmain ka thinrimna a bo zo a, ka ngaihtuahna a la peng leh vek tawh anih hi.
.
Dawt ka sawi nge sawi lo hriat tumin min en chik vang vang a, dawt ka sawi loh vangin ka enlet ve bawk. Ni e, ka ngaihtuah vanga thinur ka nih rualin a kalna tur hmun leh a lo kir leh hun tur sawi miah lova ngawi renga kal daih kha a dik tawk lo.
.
“Engemaw tal lo hnutchhiah ila tha tur a nia. A thleng tawh lovang.”
Chhang lovin kan inen ren rawn a.
“Khatiang mitmeng khan min en tawh suh.” Nui sukin a awm nghengin min pawm hlu hlu a.
.
“Tinge?”
.
“Khatianga min en chuan ngaihtuah tur ber ka hre lo thin.” Atih chuan a kawngah ka ban pahnihin ka kuah let  ve ta thung.
.
“Thil engemaw entir tur che ka nei a, han insiam la_?”
.
“Tunah maw?”
.
“Darkar khat hnu velah kan chhuak dawn nia. In ha lum deuh la_”
.
“Okay. Enge kan tih dawn?” darkar khat a ral leh chuan khua a thim tawh dawn a, khaw thim hnuah eng thil nge tih vak tur awm le?
.
“I la hre mai ang.” Tih ringawtin min chhang a. Dawhkan atanga min pawm thla in ka kawngah a kut pahnihin min vuan a, choka atang chuan kan inzui chhuak a. Thil engemaw thleng tur a awm tih ka hrethiam. Eng thil chiah nge anih ang tih erawh ka ngaihtuah thiam chiah lo. A tha lam anih ka beisei.
.
Darkar khat hnuah in atangin kan chhuak a, Gabo sawilawk angin boruak a vawt reuh khawp mai. Helai hmun boruak inthlak danglam dan hi a hrechiang hle tih a lang chiang hle bawk.
.
“Helai hmun hi eng chena rei nge i neih tawh?” ka ngaihtuahna chu ka pai mai  mai thei lo. Bakah ngawi renga awm ai chuan engemaw sawi ka duh zawk hrim hrim bawk. Min chhang mai lovin min en a, ka zawhna chu mak a ti deuh a ni mai thei.  A hmui a tiche zoh ringawt.
.
“Tinge?” a tizawi ruih a. Min chhan dan vang chuan zawhna diklo zawt ah ka inngai hmiah. Tinge ka lo zawh kher kher ni.
.
“Ka zawt mai mai che. Theihnghilh daih rawh. Boruak chu i sawi ang khan a vawt deuh anih hi..”
.
Min chhang lo bawkin ka kawngah min kuah a, kan kal chak deuh sawt bawk.
.
“Kan la kal thui dawn em?”
.
Min la chhang chuang lo.
.
“Gabo_?” Ka ngaih a tha tawh lo tak zet!
.
Thui lo te kan kal leh hlek hnuah kan ding a, Gabo chu a hawi kual tih ka hria.
.
“Hetah hian lo ding lawk la, ka rei lovang.” Chhanna hun min pe lovin a kalsawn nghal daih.
.
 Ka hnunglam a thawm ri ka hriat chuan ka hlauhthawn tawh em vangin ka hawi mai ngam lo. Ka thin a phu dawt dawt tawh bawk. Ka kut hum ruhin muangchang hian ka hawi a, ka beisei loh hulhual thil hmuh vang chuan ka phu nasa lutuk!
.
“Gabo_” ka ti sap a. Ka tawng chu a hriat phak ka ring lo. 
.

“Lo hnai teh_” a kut kuangkuahin a ding a, a hmel ka hmu chiang thei lo.
.
“Gabo_Ka_Heihi_”
.
“I tan liau liau a ni e. I lung awi ka beisei.”
.
Gabo chu ka pan a, nghet zet hian min lo kuah vat a.
.
“Min ti hlauthawng hman alawm.” Ka kuah nghet sauh.
.
“Eng thil nge hlauh tur awm? Ka bulah i awm chung hian eng thil nge i hlauh a?”
.
“Ka hrelo.. Ka hlau tawh lo.” Dak chhovin a hmel ka en a, a nui suk hmel ka hmuh chuan ka nui ve thei ta chauh. Keimah chauh inngaihtuah lovin ka tana a thil lo tih hi ka fak sak a ngai ang chu. A der ni lovin_
.
“A mawi lutuk. Engtin nge hetiang thil hi i tih hman? Chhunah khan a ni em?” kan awmna lai chu ka en kual a, eng thenkhat chu a eng tial tial a ka hmufiah thei ta bawk.
.
“Um_”
“Ka lawm e. Hetiang hi ka  beisei miah lo asin_”
.
“Ka duhtak tan chuan engpawh ka ti thei ang chu.” Atih chuan ka nui ri hak. A ‘duhtak’ ka lo ni anih chu. Thil dang zawng zawng aiin chu a tawngkam chu ka tan a hlu_a hlu ber! A biang dinglamah vuanin ka en chho a, arawn kun hniam chuan dingdihlipin a hmuiah ka fawp vawng vawng a.
.
“Hetiang taka romantic inih hi ka lo ring miah lo. Ka lawm nawn leh e.”
.
“Eitur hi a daih hmaa kan ei loh chuan i sawisel lehsi ange?” ka biangah min khawih zauh a, a nui bawk. A fiamthu tih ka hria.
.
“Ka phunchiar ilo ti viau a nimaw?” ka tih chuan  meng kual rulhin min chawikang a, min virpui lai chuan vansang taka thlawk ang maia inngai in ka dak a ‘Lalpa, ka lawm e.” tiin ka tawngtai hial a.
.
Eitur tui tak tak chu eiin hahdam taka hun kan hman hnuah Beach House-ah kan kir leh a, he kartawp chawlh hun hi ral thei lo se ti. Khawvel lehlama thil awm zawng zawng tel lova hlim taka chen reng hi ka chak tak zet bawk. Mahse, chu chu thil theih a ni lo.
.
Sofa zau zetah inkuah chiala thu dunin movie kan en a. Gabo chuan ka kut vuanin a khawih neuh neuh reng a, kan movie en chuan ka rilru a la lem lo khawp mai. A hmel chu enin chhungril hlimnaa khat chungin ka nuih a. A phone a rik chuan kan inen rual chat.
.
Ngawi renga thovin a phone chu a pick up a, a tawng mai lo. Eng thil  nge ka hriat ni, a hmel chu ka en reng a. Phone-a tawng chu ngaithlain muangchanga a hmel lan dan danglam telh telh chu ka hmu thiam. A kalsawn dawn tih min hrilh nan a kutin signam min pe a, chak deuh tak hian a kalsawn nghal a. Sumdawnna thil pawimawh anih ka ring.
.
A lo let leh mai ringin ka nghak a, minute 10_15_20_! A lo let ta mai lo. Movie chu titawp in pindan atangin ka chhuak a, choka lama thawm ka hriat vangin ka pan nghal a. Dawhkanah a kiu nghat chunga lo thu Gabo hmel lan dan chu  ka la hmuh ngai loh ang a ni. Thawm ka dim vangin ka hmu tih a inhre lo tih ka hria. A buaina chu eng thil nge tih ka hriat loh vangin ka pawh ngam ta lo. Ka inrawlh miah lohna tur thila inrawlh ka duh loh vang a ni pakhat. Tunah inkawp nghet chu kan ni ta ber a, mahse kan inkawp vang ngawtin a buaina thila inrawlh vek tum tur ka ni lo. A duh anih chuan aman min hrilh thei a, chu hun chu ka  nghak mai ang.
.
Muangchang a inherin ka pindan ka pan a, ka rilru a nuam lem lo khawp mai.