GABO YAMAN - 8

GABO YAMAN
CHAPTER – 8
Thantei_LauraSean
.
*GABRIEL ARGYROS YAMAN*
.
Ka bula awm reng chung hian engtin nge a tih theih zawk? Zuri hian min rawn hrilh lo se ka hre dawn miah lo tihna a ni bawk. Zuri awmna chin a hriat zel theih dan hi thil mak tih loh rual a ni lo. Tunah ka in-a ka thukru chung pawhin thlamuangin a la awmtir thei chuang lo. Mia Garcia hi eng ang fakaua fing leh remhria nge anih zozai le?
.
Helai kan thlen tantirh khan la kal ngai miah lo leh helai hmun hi hre ngai miah lo angin a awm a, ahmaa Zuri chunga thil thleng kha lo hrelawk lo ila chuan a hrelo der mai mai tih ka hre hauh lovang. Hmeichhe pangngai a ni  lo! Hmeichhe hlauhawm chungchuang tak a lo  nih ngei hi!
.
Eng chena rei nge hetah hian ka thut tawh? Sana ka en a Mia ka kalsan atang khan darkar hnih zet a lo ral tawh reng a. Movie a la en nge Zuri chunga a chet zel dan tur ngaihtuahin a ruahmanna khawvelah a cheng zawk? Hetiang hmeichhia nen ka sumdawnna ka thlun zawm pawh hi ka ngaih a tha tawh tehhrep lo! Zuri tanpui ka duh vang chauh ni lose ka inzawmpui lo hulhual tur hi a nia.
 Hetianga amah ngaih dan chiang tak ka nei chung hian a bula khawsak erawh hreawm ka ti tehchiam lo chu anih si hi! Ni e, a mak ve riau. Hmeichhe nalh tak a ni a, awmnem ru riau anga a lang thin hi mak ka tiru zauh zauh reng a ni. Zuri ka tanpui tluanchhuah hma hian min hmangaih ngei dawn tih ka hria. Tunah hian a dik taka sawiin a mitmenga min en dan hi ka hai lo, ka lakah a rinna a nghat mek tih ka hria. A la nghat zel bawk ang. A tawp a thlen hunah meuh chuan amah ang chiah mihring, khawngaihna nei miah lo a la tawng ve ang chu! A neih zawng zawng chhuhsak a ni bawk ang. Zuri neih zawng zawng chhuhsak anih ang chiah hian!
.
Choka atangin ka chhuak a, tv a lo in off thap tawh . A pindanah a kal tawh a ni ngei ang. Pawnlam thawm chu a hmain ka lo hre miah lo a, ruah a sur nasa khawp mai. Ka pindan panin ka kal a, thawklehkhatah light rawn thim vekin tek tla rapthlak zet hian a zui nghal a. In chu a nghing dur dur hialin ka hria. Ka phone light on in ka kal leh mai a. Min ko ri ka hriat chuan dingin ka phone light chu ka off nghal a.
.
“Gabo__Ah_?”
.
Ka piah deuhah chuan a ri khat khat a, thil tla keh ri ka hre bawk. Ka din ngaiin ka la ding reng.
.
“Ah_A nah! Awi..Lalpa__ Gabo, I awm em?”
.
Hlauthawng tawng ri a ni tih ka  hria. Kan hmeichhe huaisen chuan tek a hlau tihna maw? Ka nui suk! A mihring pui thlamuang lova nuntir duh khawp hian tek a hlau ang maw? Nuihzatthlak!
.
“Gabo__”
.
Ka awm ringa min ko pawh a ang lo. Khawpui a rik tawh loh avangin a thawm chu a hriat viau.
.
Light arawn en leh thut chuan vawn tur zawng niawm taka a phar de de ang angin a che tawp chawt. A mit a vai tih hriat tak hian a khap sak sak a, inthlahdulin a thaw hak a. Eng rawn awm leh ta chuan a chhanhim ni awm tak hian maimitchhing in a awm a dawm a, a hran ngatin thawk a la leh a. Muangchanga ding marin a robe hak chu a pawt rem a min rawn hmuh chuan phu zawk hian a awm a dawm leh chawt.
.
 Min hmuh takah chuan ngawih reng a mawi ta chiah lo.
.
“I tha em?” ka tih chuan min chhang lovin min en tawp a.
.
“Khatah khan ilo awm char char maw?”
.
Awm lo ti a ka chhan chuan mi a ber tan pawh dawtsawi ka ni  tih a chiang dawn.  Ka din dan nen dawt sawi theih a ni lo.
.
“Ko koh che kha i hre bawk tiraw?” ka mitah min en chian em vangin nuam ti chiah lo hian ka hawisawn zawk a. Thu dang a sawi leh dawn emaw ka tih laiin a inher a, a pindan lam pan a tum tih ka hria. A ding leh rih_ a kun a, a ke dinglam khaikangin a en deuh vang vang a. A ke thlakthla lehin a kal a, a kal pah chuan a kut veilam in engemaw a paih zeuh tih ka hmu. Tlem a kal hnai hretin a thil paih ka hmuh chuan engtin nge a awm ka hrethiam ta chiah bawk. Nichina thil tla keh ri ka hriat kha pangpar khawina bawm a lo ni a, Mia khan a keh them a rap ngei a nih hi.
.
Ka hawi chhuah leh chuan a pindan kawngka a khar hman chiah. Ka inthiam lo ta tak zet. Misual pawh lo nise hmeichhia anih angin khatianga a laka awm kha tun boruak ah a dik miah lo.
Ka inthiam lo ang  maw? Tuna a hliam kha chu Zuri tawrh ngaihtuahin a nep lutuk! Hetianga ngaihtuah chung hian a pindan lam chu ka pan ta tho. Kawngka ka kik a ka rin ang chiahin min chhang lo. A hmel ka hmuh zet loh chuan ka rilru a nuam chiah si lo chu a nih hi.
.
Ka kik nawn tlauh tlauh a, vawi engzat nge ka kik nawn ka chhiar seng lo. A tawpa tawpah arawn hawng ta hram. Kawngkhar vuanin min en a,  a ngawi hmak a. A hmel chu enchiangin a mitah ka en a, min enlet kiau mai.
.
“I tha em?” ka tih chuan a mit khap fak fak a, a bu nghat a. “Khawi maw i ke chu ka lo en ang?”
.
“Ka tuam tawh. A na hleinem.” A ti dam thlap! Thinura min chhan ka ring a nia, mahse ka ring sual. A mitmeng leh a aw ri ah chuan thinurna engmah a lang lo.
.
A pindanah chuan ka pen lut a, engtin nge ka awm dawn tih ngaichang in min enzui tih ka hria. Kawngkhar chu vuanin a la ding ta reng a.
.
“Engtin chiah nge a awm?” a hmel chu ka en a, luhlulna ka hmu thei. A thle deuh ha bawk.
.
“A pil hlek chauh alawm. I ngai pawimawh hran lo tih ka hria a nia. Min ngaihsak tak anga lan der kha a tul kher hleinem. Ka tha, mut i duh tawh ang. Va mu tawh rawh.”
.
Muangchangin khum lam panin a bai phei auh auh a, a awm dan hi ka hrethiam lo.  Ka ngaihsak der nia a ngaih thu a sawi a, thinurin a tawng miah bawk si lo. A mak! A nungchang hi a mak ru tlat thin. Eng thil nge ka tihtur ka hria.
.
A inrin hmain ka pawm kang nawlh a.
.
“Gabo_Keimahin ka kal thei a nia_”
.
“Min tihtir rawh.”
Khumah dimtein ka nghat a, nichin maia ka awm dan vang khan lungawi lovin min tawngkhum pawh nise a awm ka ti.
.
“Tek tla kha i hlau tiraw?” a sam nem thlep chu khawih in a biangah ka fawp a, a thle sawn nghal a.
.
“Tlemin_ Eng a thim leh kher bawk sia. Tunah chuan ka tha tawh, i duh chuan min kalsan thei tawh a nia.”
.
“Tinge ka kalsan kher ang che.”
.
“Tihtur dang i neih hmel tho a. Bakah, mutthilh__No_!” Ring zeta tek tla vang chuan inring hman lova phu zawk hian a ip chawih a. “Tek tlak hun a ni tawh lovin ka hre sia, tinge zanin hi tek a tlak char char le..” min bia pawh a ni lo. A rilru a awm a sawi chhuak mai niin a lang.
.
“Mutthilh tum rawh. I bulah ka lo awm ang.”
.
“A ngai lo. Keimaha awm ka duh zawk rih.” A ti tak nain a hmel ka en chuan a thla a muang hlawl lo tih ka hmu thiam tawh tlat. A laka ka awm dan kha zialo ka ti tak tak tawh.
.
“Hetiang hian i hlau ang tih ka ring miah lo.”
.
“Tikhan min ngaihtuah deuhin awm suh ka awm iti nuam lo zawk a nia.” A mu tha a, puan ka sintir hnu chuan a maimitchhing nghal hmiah a. Ka phone khawihin a mutna bulah chuan ka thu reng a, Zuri message 3 lai lo awm chu chhiarin ka chhang a.
.
.
Engtik laiin nge ka mutthilh ka hre lo. Thawm engemaw vangin ka harh a, ka bulah mi an awm tih ka hriat chuan ka thu chhuak zawk. Mutthilh laia min lo en reng tu an awm tih han hriat thut chu a thlamuanthlak vak loh. Mia chu nui sakin ka biangah min rawn fawp zauh a.
.
“Good Morning.”
.
Khum sira a thawmhnaw lo in pack fel thlap ka hmuh chuan  Mia chu zawhna mitmengin ka en a.
.
“Silas pa a damlo a, a serious deuh vangin a rang thei ang bera let turin min rawn hrilh a.”
.
“Engtik khan nge?”
.
“A la rei vak lo. Min rawn biak hnuah ka thawmhnaw ka pack fel deuh chiah. Tukthuan ei ila kan chhuak nghal thei angem?” 
.
“Okay.” Khum atangin ka chhuk a, kal mai ka tum chu ka kawngah min kuah chawt a.
.
“I tha meuh em?” tih min zawh chuan a ngaihna ka hrelo letling.
.
“Tha e. Tinge?”
.
“I mutthilh lai khan i tawng a. I mumang a nuam lo anih ka ring.” Min kuah nghet sauhin ka hnungah min fawp vang vang a. He hmeichhia hian min hnaih ta tak zet chu anih hi. Ka laka thinur tur zawk anih laiin ka mutthilh hlana ka tawng chhuah vang chauhin min ngaihtuah ta viau zawk a. A tha vek mai e! Ni lo! A tha lo. Eng thil nge ka lo sawi chhuah?
.
“Enge ka sawi?”
.
“Hriat theihin i tawng lo a.” atih chuan ka thaw huai.
.
“Hm_ Anih chuan enge kan ei dawn?”
“Han intifai la, ka lo siamfel ang.”
.
Ka pindanah kalin ka thawmhnaw ka khungfel zung zung a, choka ka luh chuan eitur rim namin a lo rimtui cham cham tawh. Dawhkan kilin ka thu a, a pancake siam arawn chhawp chu ka ei nghal mawlh mawlh a. Tui ka tih leh tih loh hriatchak hmel taka min en chu nuihin ka thle zoh a.
.
.
Darkar hnih a ral leh hnu chuan Mia damdawiin a ka dah hnuah Zuri ka chentirna in panin ka kal nghal. Hmaichhana kan inbiak a tul tawh tak zet.
.
In ka thlen chuan pawnah lo awmin pangpar a lo khawih melh  melh a. Min hmuh chuan a meng phar awk mai. Hlim hmel taka nuiin min rawn pan a, nghet fe hian min kuah vang vang a.
.
“I lo  kal ka ring miah lo a. I lo kal vangin ka lawm e.”
.
“Kan inbiak a ngai. Nizan i message kha enge a awmzia?” ka tih chuan hawi kual zeuhin “In chhungah lut phawt ang.” A ti sar sar a.
.
In chhung ah kan inzui lut a, engkim felfai thlap ka hmuh chuan a nungchang mawi ang  bawka chefel a ni tih ka hre nghal mai.
.
“In tur ka lo la ang.”
Choka lam pana a kal chu ka enzui reng a, kan inhmuh tirh ai khan a nungchang a zangkhai tawh zawkin a hmuh pawh a nuam khawp. In tur engemaw kengin reiloteah a lo let leh thuai a. Ka hmaa thutna awmah chuan ngil ata thuin a phone a phawrh a, thlalak thenkhat nizana min lo thawn ni lo ho chu min entir nghal a.
.
Thlalaka hmeichhe lang chu Mia Garcia a ni a, thlalak hrang hrangah chuan a mipa lo kawp tawhte thlalak a chuang bawk. Hmeichhe hlim leh harhvang tak hmel thlalaka chu ka en vang vang a.
.
“Ahma khan mipa a kawp kual hle thin tih chu ka sawi tawh thovin ka hria. Tun hnaiah i hnaih hnu hian engmah a danglam chuang lo tih hrilh che ka duh vangin nizan khan message kha ka lo thawn che anih kha. Min tanpui i tum vanga buaina i hmachhawn phah anih chuan ka inthiam thei dawn lo a.”
.
“Lo ngaihtuah hah duh suh. Engkim fel takin a thleng vek ang.”
.
Hahdam hmel deuh zawka min en vang vangin a thaw hliai a. Thil dang ngaihtuah luih tum niawm taka lang hian nui lui hakin, “I chawlh hman chu a nuam em?” a ti ta daih.
.
“Nuam chen tura kal ka ni lo tih i hria alawm.” A hmel chu chiang zetin ka en a, a hma aiin a hahdam hmel leh tawh zawk. Mak takin a hmaa ka hmuh ngai loh min ngaihtuahna hmel ka hmu teh tlat bawk.
.
“Min lo ngaihtuah viau em ni?” ka tih chuan kun deuhin a nui hak a.
.
“Lo ngaihtuah viau che ila a pawi angem? Ka sawitum chu_ Ah_ Engmah a ni lo.” A kut a khawih ta neuh neuh. Thil dang sawitur ngaihtuah niawm taka langin a hawikual a.
“Oh! Vawiin hian ahmaa ka sawi ka thian nen khan inhmu ula ka duh a. A lo thleng tep ang. I lo kal remchang hlauh bawk a. Nimin khan min rawn tlawh a tum thu min hrilh tawh a.”
.
“A tha alawm.”
.
20 Minutes vel a ral hnuah Zuri thian chu a lo thleng a, amah rual vel tur tlangval  hmel fai tak a ni. Tunhmain min lo hre hle tih a chezia atang chuan a lang bawk.
.
“Jude anih hi. Jude Mr. Yaman hi chibai rawh.”
.
Tual zawlah thu khawmin kan ti ti a, Jude chu mi tawng tlem ve tak anih hmel. Jude chuan Zuri nen naupangte annih atanga inkawm annih thu leh thiantha tak tak annih thu te pawh a sawi ve tak e.
.
“Mr. Yaman, kei chuan Zuri tan hian tihtheih ka nei tam lo a, i kutah ka innghat ve tawp mai. A thil neihte a vaia a chanlet leh theih hi ka duhsak ber a ni. Thil awmze tam zawk chu ilo hriat tawh ka ring a. Tuna Mia Garcia thil neih zawng zawng hi tihluihna hmanga a neih vek a ni a, a nihna dik takah chuan Zuri thil neihte an ni. Hmeichhe pakhat maiin hetiang taka thil a ti thei hi mak ka ti zawk.”
.
An thilsawi tam zawk chu ka lo chhui tawh atanga ka hriat vek tawh an ni. Ka tan thil thar pakhat chiah a awm. Chu chu rang taka ka tih theih nan kar thar atang hian bul tan a ni ang. Mia Garcia tana rinhlelh theih thil pakhat lek pawh a awm tur a ni lo va, ka nupui nih duh khawpin ka hneh ngei ngei bawk ang.
.
Engemaw chen hnuah Zuri chu kalsanin ka chenna hmun ka pan a, Mia pawh ka be ta rih lo. A duh anih leh aman chanchin chu min hrilh mai ang chu.
.
Zankhuain Mia a reh a, Monday chawhnu lam thleng pawhin a la reh. Biak tumin ka phone ka la kang zet a, ka dah thla leh rih a. Ka phone arawn rik thut chuan ka phu deuh zawk. Silas maw?
.
“Hello?”
.
“Hi, Mr. Yaman. Mia nen in inbe tawh em?”
.
“Be lo. Eng thil nge ni ta?” ka tum aiin ka tawng bung.
.
“Oh_In inbiak takin ka tia_ Nimin-ah damdawi in atanga a haw hnu khan a reh ta vang vang a.” a ngawi deuh dat a. “Ka lo be buai che a min hrethiam dawn nia.” Inthiam chiah lo awka hian a riat nawi ta vel mai mai. He thil hi min tihbuai tumna hrim hrim a ni thei angem? Beach House kan chhuahsan dawn zana thil thleng  vang khan Mia hian ka ngaihsakna dawn duhin game a khel a nimai lo maw?
.
“Biak ka lo tum ang.” Ka ti ta tho.
.
“Okay. I biak theih chuan khawngaihin a that leh that loh min lo hriattir thei angem? Nimin pawh khan a that loh hmel lutuk a.”
.
“Okay. Ka lo hriattir ang che. I pa chu enge a an?”
.
“Um_ Ngai a awh a nimai e. Kan beisei a sang lo khawp mai.” A ti chuai raih a. Kan inbiakna chu kan titawp ta rih.
.
Mia ka call nghal a, a phone a tinung lo anih hmel. Khawiah nge a awm ang?
MG Jewels ah a awm ringin ka call leh a, a awm chuang lo.
.
“Zingkarah min rawn bia a, a lo kal dawn loh thu arawn sawi a. A kalna tur hmun a sawi lo a.”
.
“Okay.”
.
Khawiah nge a awm ang? A chenna in ah ka la kal miah lo a, a awmna hmun erawh ka hrechiang thung. Office atanga kal chhuakin a chenna hmun lam ka pan ta ngawt a.
.

                           (MIA'S HOME)
.
In lian lem lo tak, tual zawl zau vak lo hring dap kawtah chuan car ka tiding a. Chhuk mai lovin ka thlithlai deuh phawt. Hmeichhe harhvang leh tunlai tak anga lang thin, suma buaina nei lo chenna hmun atan chuan a inhmeh chiah lo. Eng thil nge ka ngaihtuah hi ka hre hrep lo. Car atang chuan chhukin in chu ka pan a, kawngka ka kik dat dat a. Min chhangtu an awm lo. Pawnlam atanga a lan dan chuan chhunglama inkalh a ni tih a hriat thung. A mipa kawp thinte zing ami nen an inkhung pawh a ni thei! Chu ka thil ngaihtuah chuan kawngka chu hawn ngei duhna rilru min neihtir a, a hma aia nain kawngka chu ka chum leh a. Thawm ngaichang leh deuh vang vangin in chhung lama thawm ri niawm tak ka hriat chuan ka ner suk!
.
“Mia_?”
.
Inthiarfihlim nan hun an mamawh ngei ang. Rang taka kawngka hawn a ni lo pawh hi thil mak a ni lem lo. Mia ko chungin kawngka chu ka chum leh a.
.
A tawpa tawpah arawn inhawng ta hram. Mia hmel ka hmuh chuan ka ding ngil zawt. Meng tha thei mang lova min enin a nui lui sak a. Eng thil nge ka hmuh hi?
.
Ka hmel min hmuh chuan a nui lui sak a, in chhungah lut turin min duh tih lantir nan a bu zauh a. Ka pen lut nghal hmiah. Ani chu puanin a intuam hlan a, puanin a tuam loh chin a thawmhnaw lang chu nimina a hak tho kha a la ni! A hmaah ka kal a, arawn kal mai lo ni a ka hriat vanga ka hawi let chuan engvanga hetianga awm hi nge anih ka hrethiam ta chiah. A ke tuamna chu inphelhin a vung nasa hle a, a pen hleithei lo. Hetianga awm chung hian min hrilh a tum miah lo_ Engvanga thinur nge ka nih ka inhre hek lo.
.
“Eng thil nge i tih hi?” ka ti hrawk a, a mitmeng dul tak chung chuan phawk deuh hra hian min en a. A lu thing a maimitchhing zawkin a chal a khawih zauh a.
.
“Enge?” a ti sep ringawt.
.
“Damdawi in a kal i mamawh anih kha?” ka tih chuan a nui hak.
.
“Engmah a ni lo. Tui lum in ila a zia mai ang.”
.
“I a em ni?” ka inveng hman lo. Ka tum aiin ka tawng ring bawk. Ka pawm nawlh a, kawngka ah chhuahpuiin ka car dahna ka panpui a. Tang turin tha a nei lo. Heti chung hian ‘engmah a ni lo’ a ti a maw? Car chhungah ka thuttir a, engemaw sawiin a phun sep sep a. Eng ber nge a sawi a hriat theih loh.
.
“Khawiah nge i in chahbi i dah?” min chhang lovin a mit a chhing chial a. A bianga ka khawih chuan a sa lutuk.
.
“Mia_Mia_ I harh em?”
.
A awm dan hi a tha lo tawp mai.