GABO YAMAN - 5

GABO YAMAN
CHAPTER – 5
Thantei_LauraSean
.
Silas office-ah ka pen lut a, ka hmel min hmuh chuan arawn ding chhuak hluai a. A beisei aia hmain ka thleng anih hmel. Pangngai taka ka tawng chuan hahdam huai hmel a pu nghal bawk a. Thil engemaw tak chu a thleng ngei anih hi.
.
“Good morning!”
.
“Okay!” a ti hluai ringawt. Naupang hlim lutuk ang mai hmel a pu alawm le.
“Okay? Enge? Ka thil rawn ken hi kan en nghal dawn em niang?”
.
“Oh, ni tak e. A ngai lehsi lo. Kha thil kha awmze nei lo a ni ta ber.” Silas thusawi chu awih lo zetin ka nui a.
.
“Enge i sawi awmzia?”
.
“Ohh.. Come onnn.. Honey! Thil ropui lutuk a thleng zo chiah.. Engtia awm tur nge pawh ka hre rih lo.”
.
“Silas, Hoopla tlereuh__”
“Kha kha chu theihnghilh daih rawh!”
.
“Silas, he thilah hian ka hun ka hmang tam hle tih i hriat kha. Heng tlereuh design te hi darkar hnih khat lek chhunga thlan chhuah an ni lo__”
.
“Ka hria alawm. Mahse, Yaman Co. nen thawhdun ka chakna rei tawh zia i hria a, tunah hian chance tha tak ka nei dawn niin ka hria.” Min ngaichang hlek a, engmah ka sawi lo. ‘In ka hria’ a ti tak nain a hmel ka en hian engkim a tifel tawh ngei ang! Argyros Yaman hian tunah engtin nge a sawm thut theih reng reng? Thil mak a ni, thil mak!
.
“Tlang takin inbe teh ang Silas. Mr. Argyros Yaman i office atanga lo chhuak kha ka rawn hmu hman alawm.” Ka thutak hle tih Silas chuan a hrethiam.
.
“Oh! Honey, Ka hnar theih ngai loh tur thil a thleng a ni! Tuna Yaman Co. nen kan inremsiamna hi min zawmpui ve anih loh chuan ka chhe vek ang. Khawngaihin min pawmpui ve ang tih i sawi thei em?”
.
“I sawi awmzia chu enge? Nangma thuin inremsiamna i nemnghet vek tawh si ani lawm ni?”
.
“Oh__Ka_ Um_ Tuna inzawmna ka neihpui sa ten min thlawp loh chuan Yaman Co. hian inremsiamna hi a hnukdawk nghal dawn a.  I tanpuina ka dil che anih chu. Mi dang hohi chuan an pawm dawn tih ka hresa vek tawh a. Min phatsan thei lovang.” Silas mitmeng chu a ngenngawl tak zet.
.
Kan ngawi dun ren rawn a. Tun teh thut a hetiang thil thleng hi ka beisei hauh lo. Eng thil pawh nise Silas hi ka phatsan thei lo tih erawh thu chiang sa a ni. Yaman nena sumdawnna inzawm nih erawh ka phur tehchiam lo. A chhan pawh ka hre bik lo.
.
“Hoopla tlereuh hi engtin nge ni dawn? Kan chawi teuh ngei ngei dawn a nia. I ngaihtuah chiang em?”
.
“Engmah kan chawi lovang. Hoopla pawhin Yaman Co. hi an zawm ve dawn tho alawm. Chuan, Hoopla tlereuh kan kawl zawng zawng hi kan pe let vek ang a, Yaman Co. thil siam chauh ka supply tawh ang. Ngaithla chiang teh__ Hlawkna kan dawn tur zawng zawng hi i awih lo zawk ang. Engtin nge Mr. Yaman hian a remtih theih zawk tih ka la ngaihtuah chhuak zo lo.”
.
Mit tizimin Silas chu ka en a, a thusawi chu dawnsawn dan tur ber pawh ka hrethiam lo. Mr. Yaman hian an thil siam chhuah zuar chhuaktu a zawn chawp a ngai lo va, khawvel hmun hrang hrangah an inzar pharh zau tawk tih pawh ka hrechiang. Tlereuh hmanga sumdawng zawng zawng hian Yaman Co. nena inzawmna neih hi an duhthusam a ni hial ang chu. Kei tiam lohin!!
.
“I pawm thei em?” a ti sek sek a.
.
Silas chu ka en a, he inremsiamna hi ka pawm anih chuan Argyros Yaman thuhnuaia kun ang tluk ka ni ang. A sumdawnna hnuaia mi pakhat ve mai lo nih chu a pawi viau em ni? Tunah tak hi chuan thil pawi a ni dawn angin ka ngaihtuah tlat a nih chu! Nichin maia min hmelhriat lo ang maia min kalpel kha ka lo la na lutuk em ni zawk? Vawikhat zanriah ka kilpui ve a ni mai a, ka lo inngai pawimawh lutuk te pawh a ni zawk anga?? Ka suangtuah aia pawimawh zawk chu Silas nen kan inthianthatna hi a ni dawn lawm ni? Eng thil ber nge ka ngaihtuah dawn tih pawh ka inhrethiam ta lo.
.

“Honey, khawngaihin??” Silas chuan ka kutah vuanin min nuih tlawn a, hetianga a awm tawh chuan min ngenna hi a ti tak zet zet tihna a ni. Min ngenna hi ka hnial thei lovang.
.
“Okay!”
.
“Ka lawm e! Ka lawm e!” a thutna atanga thovin min kuah chuk chuk a, a hmel leh mitmeng zawng zawng nen a danglam nghal vek. Hetiang khawpa hlim hian ka hmu khat khawp mai.
.
“Duhthlanna dik ka siam ka beisei.”
.
“Tehreng! Honey. A ropui lutuk.”
.
Silas chu phur lutuk tak mai hian a phe tak zung zung a. Tlereuh design hrang hrang arawn phawrh a, Yaman Co. ten an tihchhuah thar tur a ni. Thlan ber tur pawh hre mai lovin ka enkual tawn sek hlawm a.
.
“Heihi__heihi a mawi asin. Hei aia special hi ka la hmu ngai lo..” Silas chu a ngawi thei thlawt lo a ni ber e.
.
“A vai hian hei aia special ila hmu lo vek tihna maw?”
.
“Oh! Ka hre lo. A nih ka ring. Engtin nge hetiang thil thlang chung hian i cool raih theih a__ Ka awih thlawt lo_ I phur ve eih nange??” min la ti tak deuh deuh a.
.
Darkar 4 vel zet hnuah kan duh zawng kan thlang fel thei ta hram.
.
“He thil hi nangman Yaman Co. ah i va submit thei angem?” Silas chu awih lo zet hian ka en haw lo thei lo.
.
“Enge thil awmzia hi? Silas, mail i thawn thei reng alawm. Khawl tangkai tak a awm laiin tinge ka kal hah kher ang?”
.
“Vawiin hi eng thil nge i hriat le? Min hnialna tur i la hre char char mai. Mr. Yaman khan fimkhur zawkna thil tur anih vangin in thlan chhuahte chu a copy ka hnenah ngei in lo dah tur a ni a ti a lawm. A thlalak-a thawn a duh lo. Yaman Co. special design te hi ruk chhuah ni tase a mawh i phur ngam dawn em ni?”
.
“Nangman a mawh i phur mai ang chu.” Ka lo ti ve thung.
.
“Nasa lo mai teh. Tak takin Honey, ka pa a lo thleng tep ang. Chhungkaw thilah ka kal chhuah ngei ngei a ngai a. Chuti ni lose keimah ngei ka kal ang chu. Nge? Mr. Yaman i hmu hreh deuh em ni?”
.
“Engvang in? Hmuh hreh chhan tur nei niawm takin_ Ka nei lo.”
.
“Ohh! Anih chuan i va kal thei ang tiraw?”
.
“Okay.”
.
Kan design thlan chhuahte chu  a copy kengin Silas office chu ka chhuahsan a. Kawngka ka la khar phui hmaa Silas tawng ka hriat chuan ka hawilet leh.
.
“A chhuak chiah. Aw le, aw le.”
.
Ngaih tha chiah lovin Silas chu ka melh a, hmui phuna “Ka pa, ka pa” ti chungin a phone chu a kawk zoh zoh a. Nui chungin ka kalsan ta rih.
.
Silas anga chhungkaw hlim tak neih ve ka chak thin zia__ni love.. Ngaihtuah hun a ni lo. Ka chungah a thleng ngai dawn tlat lo.
.
Ka Car la chhuakin Yaman Co. ka pan nghal a. Silas khan amah Mr. Yaman hnenah kher dah tur a ti maw ni kha? Zinga kan intawn dan atang kha chuan hmuh ka chak lo takzet zet. Min hmelhriat miah lo angin a awm a, a awm ang chiah khan tun hunah hian ka awm ve mai ang chu. Thil harsa a ni hleinem. Tehchai a!
.
Yaman Co.  ka thlen chuan ka zam ru hle. Tak zet hian! Zam chhan tur ka nei lo. Thawk ka la ru halh halh a.
.
Reception counter panin Mr. Yaman hmu tura kal ka nih thu ka hrilh chuan tha takin min lo dawngsawng a, a office panna elevator lam min khawhhmuh chu panin ka kal lehnghal a. Ka zam em em mai chu ka inhaw hlur tawh.
.
Elevator a ding a, vawikhat thawk la lehin ka pen chhuak a. Mr. Yaman office kawngka bulah ka ding ta.
.
Mipa pakhat hian min lo chhawn a, Mr. Yaman secretary anih thu a sawi chuan ka nuih sak a.
.
“Bryce_Ka hming chu Bryce a nia. Helamah hian_” a veilamah a kut a phar a, ka kalna tur min kawhhmuh a phar a ni.
.
Office kawngkhar lian zet, thing dum hnum hlurh chu a inhawng a, hawi chhuak lovin ka pen lut nghal a.
.
Dawhkan lian tak thing tha chi a siam tih hriat ngawih ngawih bulah chuan dingin ka file chu ka pawm nghet hle. Ka dinna dawhkan lehlama chair-ah chuan mipa a thu tih ka hria a, hmuchiang turin ka en duh lo thung.
.
“Chibai, Mr. Yaman. Heihi tlereuh thlan chhuahte chu an nia__”
.
“Lo thu rawh.”
.
“Ka lawm e. Hemi rawn dah tura lo kal ka nih angin ka dah anga ka kal lehnghal mai ang.” ti pahin File chu ka dawhkanah ka dah a. Ani chu a ding chhuak thung. A nghawng chin hnuailam bak ka la melh lo hrim hrim. Eng thil vang tehhrep in nge ka zam khanglan ni? Inthlahdul tunm rilru chungin hahdam tak anga lan ka tum bawk. Ka hlawhtling em tih erawh ka inhre lo.
.
“In tur i duh angem?” a ti dam thlup a.
.
“Duh lo ve. Ka lawm e. Ka kal lehnghal mai ang. Ka hmanhmawh khawp mai.” Engtin nge ka tawng zung zung theih zawk ni? Hetiang ema nasa hian ka la zam ngai lo. Ka thin a ur ru hlur tawh bawk. Ka zam lo tih tihlan nan inringtawk takin ka en tur a ni dawn lawm ni? Ka hawi chhuak a, ka hlauh ang chiahin chiang lutuk tak mai hian min lo en reng a. Ka nuih lui sak. Ka chhungril erawh a khur! Ka inhuat zia chu sawi ngaihna a awm lo zawk.
.
“I hmelhriat ngai loh ang maiin min bia alawm.” a ti nghet churh a, nghet taka man chawt ang vel ka ni hian ka inhria. Ka chhungrilah chuan engmah tilang lo turin ka tang mar sauh sauh. Ka thei! Ka thei lutuk.
.
“A ni maw?” pawisawi lo zetin ka nui lui a, eng anga  uluk pawhin min en se ka ngaihtuahna engmah a hre chuang lovang. Mi pahnih sumdawnna thila inhmachhawn mai chauh kan ni. Ka hria emaw, hrelo emaw engmah ka tilang lo. A hmel ka en hian ka hlawhtling tih ka inhre bawk.
.
“Thu rawh.” a tinawn leh a. A hmel chu a thutak ta hle.
.
“Ka kal phawt zawk ange.” Ka inher a, kawngkhar lam panin ka kal nghal. Ka banah nghet taka min rawn vawn chuan din loh theih a ni lo. Ka ban chu ka hnunglamah la in ka kawngah min kuah tel a, ka duh aiin kan inhnaih ta mah mah. Tawng mai lovin chiang zet hian ka mitah min en a, a rilrua thil awm chu enge anih ka hre miah lo nain inthunun erawh a tum tih a thawk dan atangin ka hre thei thung.
.
“Zingkara ka awm dan vang kha a ni em?” atih chuan inveng hman lovin ka nui hul hak.
.
“Ni lo.” ti sapin a hmel chu ka en a. Lalpa__Engtin nge hetiang em em a mipa hmeltha leh mipa ngawih ngawih hi an awm theih zawk? tiin ka ngaihtuah hial. A rim, a mitmeng, min en dan, a taksa, a hmai ruh invuah dan zawng zawng te__
.
“Engvang nge? Nizan ah kan infawp a, tunah mikhual kan ni lehsi ang maw?”
.
“Chu chu nangmah leh nangmah kha inzawt rawh.”
.
Min chhang lovin min kuah hnai sauh a, kan taksa a insi thlap tawh. Ka awih thei lo. Ka ngaihtuahna a buai vek. Min kuahna atang hian ka tal chhuak tur a ni.
.
“I thinphu chu keimah vang ani em?” atih chuan inngaihtuah fim tumin ka tal sek a. Min vawnna erawh thlah a tum therte lo.
.
“Thin phuttir turin chhan leh vang a awm kher a ngai em ni? Mi nung ka nih chuan a phu ve bawk ang chu.”
.
A nui suk. A hmui hnuailam a pet zoh a. Ka banrek a vawn lohna lam chuan ka biangah min khawih a. Ka khup zawi hnawk chu a hre lo hram rawh se. Lalpa_ Min pui rawh!
.
A hmel thutak lutuk chuan ngun em em in min en a, min entlang vek a tum ni hian ka hria. Ka beisei loh lutuk hian ka hnarah min fawp a. Ka mit ka khap lek chauh nia ka inhriat laiin “Meng rawh le..” tih ri ka hriat chuan ka meng kawk! Engtia awm tur nge ka hre lo. Ka hre lo tak zet zet. Ka buai zo vek a nih tak ber hi!
.
“Zinga ka awm dan vang khan thupha ka chawi e. A thleng leh tawh lovang.” ka chhan hma hauhin min dim tak si nghet em em hian min kuah hlu hlu a. Min kuahna chu ka chhanglet dawn nge dawn lo? Chhang let lo phawt ang! Min kuahtu mipa, mipa zawng zawng zinga mipa ber mai hian min hip hle mah se awlsam taka hipbeh theih angin min ngai tur a ni lo. A rintlak ngei a ni tih ka fiah hma chuan ka thinlunga hna a thawh dan hi ka tilang hauh lovang!
.
“Kan tha tawh em?” ka bengbulah a phun a, a tawng zawnga a thaw lum ham ham chuan ka tukhum sam a titho ar ar a. A kut zungpui chuan ka hnungzang ruh a chhui thla zai zai bawk. He mihring hi ka tan a va hlauhawm tehlul em!
.
“Nangmah kha inzawt rawh. Keichu ka tha alawm.”
.
A nui ri ka hre miah lo nain a nui tih ka hria. Ka nghawngah min fawp zauhin a inlahrang ta hram a. Ka thawl huai nia ka inhriat chu! Ka zak zawk e a!
.
“I thu thei tawh angem? Khawngaihin?” ka kut chu a pahnihin a la vuan ta reng a, ka thu thei tih lantir nan ka bu ta nghat. Ka ringngam dawn em tih inzawt reng chung hian a chezia hian min hneh mek chu a nih si hi mawle! Mia, he mipa zunah hian uai tur a ni lo! Mahse, ka unaupa neihchhun khan mi tha tak a ni tih min hrilh kha__ JoMas khan dawt a sawi ngai lo. Gabriel Argyros Yaman hi mipa tha tak a ni ngei ang. Ka tan chuan GABO ni zawk rawh se. A hmel tha tak chu enin chair-ah chuan amah hmachhawn zawngin ka thu a.
.
.
GABRIEL ARGYROS YAMAN*
.
FLASHBACK*
.
Mia Garcia dawr bul atanga ka tlan chhuah hnu khan Zuri phone call ka dawng a. Hlauhthawn vanga khur dawt dawt chungin min rawn bia a.
.
“Argyros, ka him lo. He hmunah hian ka him lo.” Inthunun hlei thei lovin arawn thaw hlawp hlawp bawk.
.
“Enge i sawi awmzia?”
.
“Nichin mai khan mipa pakhat arawn kal a, Mia hian ka dam tih a hria. Min thah a tum nawn ngei bawk dawn_tih min rawn hrilh a ni.. Engtin nge ka awm tak ang? Khawiah nge i awm? Min lo hruai thei angem__Khangaihin__” a rawn ti tham tiak a.
.
“Tuna khawiah nge i awm?”
.
“Beach House hnungah_hnim zingah ka biru mek_”
.
“Mipa chu tunge anih? A tina che em?”
.
“Tina lo. Min lo hruai la, engkim ka hrilh vek ang che.”
.
Phone ka off a, a chak thei ang berin Beach House lam ka pan nghal a. Nichin mai khan Mia Garcia nen hun kan hmang dun a, thil pawi ti awmin a awm eih lo. Seattle Beach House-ah Zuri a awm tih a lo hre reng a maw? A inthup hneh kher mai.  Awih harsa khawpin a inthup hneh anih hi. Hmeichhe namai lo tak ka hmachhawn dawn tih ka ngaihtuah nawn hial.
.
Beach House ka thlen chuan a lo reh thiap a. In chhungah lutin in hnunglam panna kawngkhar ka hawn hnuah Zuri chu ka ko a. A insawi ang takin hnim kar atang hian tim takin arawn vak chhuak a. A hmel en chuan a lo tap fe tawh ang tih a hriat theih. Ka hmel min hmuh chuan dawn awm lo hian min rawn kuah chawt a.
.
Engemaw chen a tah hnuah in chhungah ka hruai lut a, thil thlen dan kimchang min hrilh ta chauh a. Mipa chu a thian neihchhun anih thu leh engkimah amah tanpui thintu anih thu a sawi a, amah humhim a dah thukru thei tur erawh chuan engmah neih a nei lo thung tih a sawi lai chuan a hmel a lungngaihna awm chu a thuk takzet.
.
He hmeichhia hi ka thinlung takin ka khawngaih ta!
.
“I thianpa chuan helai hmuna i awm thu hi engtin nge a hriat?” ka khawngaih vang ngawtin thil ka chik lo tur tihna a ni chuang lo.
.
“Lehkhathawn  hmangin ka hrilh. A pawi viau em?” ati leh rih.
.
“Pawi lo e. Mahse, nunna chungchang anih vangin keimah bakin i awmna chin hi hre lo se a fuh zawk ang. Beach House –a awm a him tawh lo a, chuvangin Seattle-a ka in pakhatah i cheng rih ang. Tichuan a tha em?”
.
“Lawmthu sawi dan tur pawh ka hre lo. Ka lawm tak zet.” Min rawn hnaihin min kuah a, thlamuang taka a awm duhin ka kuah ve bawk a.
.
Beach House ah chuan awm rei lovin Seattle-a ka in pakhatah ka hruai a, a bula ka awm vang nge ka hre lo ahma ai chuan a thlamuan hmel tawh bawk.
.
“Mia chu i hmu leh tawh em?”
.
“Zanriah kan ei dun a.”
.
“Oh! Hma i sawn chak hle mai.” Tiin a nui seih a. “Mahse, i rin ang ngawta awlsam a ni dawn lo a nia.”
.
“Ka ring lo.”
.
“Ka hrechiang alawm. I thuhnuaiah i dah phawt loh chuan engtizawng mahin i thunun lovang. Fiah chiah rawh.” Inringtawk zet hian min en reuh anih chu. Ka nui suk.
.
“Thil dang ala awm em?”
.
“Awm lo.” Thaw hliai in a hawi kual a, “In chu a nuam hle mai. Min duat sual zo vek dawn anih hi..” ngaihawm zet hian min nuih a, a hmel pawh hmuh a nuam ta.
.
Zuri mut fel hnuah ka chhuahsan a, ka ngaihtuahna a chawl lo chiang khawp mai. Mia Garcia hi engtin nge ka thuhnuaiah ka dah theih ang? Silas ka ngaihtuah chhuak zawk! An inzawm thuk zia hi a hma khan ka lo hriat vek tawh vangin thiltih dan tur ka ngaihtuah chhuak nghal a ni mai e.
.
Khua a var a, hma takah insiamin Silas ka be pawp a. Reilote chhungin Mia Garcia hi ka thuhnuaiah a awm ngei dawn a ni. Silas hian engti zawng mahin min hnar dawn lo tih ka hrechiang em em.
.
Silas office atanga ka chhuah chuan ka lungawi tawk khawp. Ani khan Yaman Co. nena inzawmna neih bak engmah a ngaihtuah lo. A hnar theih hauh loh tur offer ka siam tlat a, ngaihtuahna pangngai hmang tan chuan hnar phal chi a nilo reng reng bawk a ni.
.
Elevator inhawn rualin Mia Garcia chu ka en zawk a. Ka mit a lang lo hlauh chu thil lawmawm a ni. Zuri nun thlamuang lo taka a siam vangin keimahah hian huatna a awm tlat tawh bawk.  Min en chungin a nui sak a, a nui hmel ka hmuh chuan ka ner ru nawk thung. Ka notice lo tih a inhriat chuan dak vah chungin min kalsan a. Zuri sawi kha a dik chiah ang tih ka hrethiam ta.
.
Silas ka phone nghal a, an design thlan chhuahte chu Mia ngeiin a lo dah tur ani tih ka hrilh a. Ani chuan ka thiltum hre hauh lovin Mia ka ngaizawngah a ngai ngei ang. Nuihzatthlak! Hmeichhe nalh tak thinlung kha si hi ka nunah ka mamawh ngai lo a, ka mamawh dawn hek lo.!
.
.
PRESENT*
SEATTLE – YAMAN CO.

.
Chair-a Mia thu chu chik takin ka en a, hmeichhe hneh awlsam tak a ni lo tih ka fiah zo chiah a. Hneh theih loh erawh a lo ni bik lo. Yaman_ Hna tha tak i thawk anih hi! tia in ngaihtuahin ka nui suk. Kan inbiak dan ka ngaihtuah let a, Zuri chunga a thiltih hrelo ni ila chu hmeichhe mak leh mi hipna ngah tak a ni tih hi ngaihtuah nawn lovin ka pawm ngei ang. A lan ang ngawt hi a ni der si lo. Hmeichhe tlawm hreh tak mai hi ka lakah hian luangliam zawih zawihin a la tlawm ral thak dawn!
.
“Enge a?” nui chungin Mia chuan min en ha a, ka nui tih arawn hmu hman tih ka hria.
.
“Ka ngaina che tih hi ka sawi tawh em?” tih pahin thutak zet hian ka en a. Hamhaih niawm taka nui hakin a thutna chair hnung chu a ngheng a. Ka tawngkam chuan a thawng hle tih ka hre thei.
.
‘Yaman kal zel rawh. Hmahmawh lutuk erawh a tul lovang!’ tia in ngaihtuah chungin ka thutna chair chu ka thawhsan a, ka hmaa hmeichhe nalh leh hmeltha tak, chhungril tuiek si kut vuan turin ka kut chu ka pharchhuak a!