GABO YAMAN - 6

GABO YAMAN
CHAPTER – 6
Thantei_LauraSean
.
*MIA VALENTINA GARCIA*
.
“Ka ngaina che tih hi ka sawi tawh em?”
.
A tawngkam vanga ka hamhaih zia chu ka thup hman lo va, sawitur haihchham ngai lo nia inhria hian tawngkam khat chauh han sawirik tur pawh ka hre ta lo. A mitmeng atang hian thian anga min ngainat thu sawi mai a ni lo.! Ka chhungrila hlimna ka neih hi a nasa lutuk a, ka kang deng deng in ka inhre hial anih chu.!
.
A thutna atanga chuan tho chhuakin min rawn pan a,  ka hmaah tak a din hnuah kun hniam deuhin ka kut pahnihah min vuan a. A mitmeng thuk takah chuan ka pil ta! Tun ang hun hi a thlen ka beisei ngam ngai miah lo a, mahse a thleng ta tlat si! Ka duhthusam piah ramah ka cheng mek__
.
“Engtia lo dawn sawn tur nge ka hre lo.” ka ti sap a. Sawi awm anih leh nih loh pawh ka ngaihtuah zui duh lo.
.
“I awm dan pangngai rengin awm rawh.” A kut dinglamin ka biangah min vuan a, ka thinphu nasa lutuk vang chuan ka awm hi a kang dawrh dawrh nimai hian ka inhria. Min ngaina tih a sawi mai chauh a ni a, hetianga awm tur hi ka ni miah lo tih ka in hria. Mahse, ka chhungril a thil awm hi ka thunun theih piah lam a ni tlat. Bakah, ka hriat theih chinah Yaman hi hmeichhe tam tak kawp lawr chi a ni ngai lo a, hmeichhe kawp a neih chuan a nghet chat thin. Tunah hian hmeichhe kawplai a nei lo tih ka hrechiang. Pawnlam atanga a lan dan leh a nunphung hrim hrim ah, sumdawnna thil a ni emaw a mimal nun emaw pawh ni se a duh tak thil chauh sawi chhuak thin mihring a ni bawk. Kei aia chhui chiang nasa hmeichhia hi an lo awm palh anih pawhin an tam lo khawp ang. An awm miah loh ka ring zawk! Tinge? Engatinge ka hriat chian em em tih i hre chak maw?
.
.
 Argyros Yaman ka thinlung neitu a nihna hi tun hnai kan inhmuh mai atanga intan a ni lo! Mi thenkhat ngaih danah chuan thil ni thei lo anih na chin pawh a awm mai thei. Mahse, a theih_ thil ni thei lo tak tak hi khawvelah hian a lo awm miah lo. Mak taka siam ka nih a, khawvelah hian engti tura piang ve nge ka nih tih ngaihtuah buaia nungdama awm tawh loh mai ka chak ngawih ngawih chang pawhin he mihring mak tak GABO YAMAN vang chauh hian nun duh zawkna rilru ka nei leh thin. Mak lo ti suh_! Mihring tawh phawt hian thuruk mak tak tak, tam tak sawichhuah ngai miah loh kan nei theuh ang tih ka chiang a ni. Kei ngei pawh tiam in! Argyros Yaman leh ka nunin inzawmna a neih hi chu ka nuna thil thleng tawh ka sawi chhuah ngai miah loh zinga pakhat a ni ve chauh zawk! 
.
 JoMas thih thu hrilh ka nih ni khan ka pa nupui Miss Borden office atanga a chhuah hnuah mangang takin ka pindan-ah ka tlan lut a. JoMas thlalak min lo thawn kha la chhuakin ka pawm vawng vawng a, ka mittui a tla zawih zawih nain ka tap chhuak thei lo. Awmngaihna hre lovin zankhuain chhuatah ka thu a, khua a var tawh tih pawh ka lo hre lo.
.
*Khaleesi, mangang suh. I bulah ka awm reng ang. Ka hmel i hmu lo anih pawhin thiantha tak ka nei tih i hre tawh a, i mangang anih chuan ani hian a lo tanpui zel ang che. A ti ngei ngei ang*
.
Ka harh chuan Miss Borden mutna pindanah ka lo awm a. Engmah hre lovin chhuatah khan ka lo tlu a ni awm e. Ka mutna bula Miss Borden phun mawlh mawlh chuan enge a sawi ka hre lo a, JoMas min biakna tawngkam kha ka ngaihtuah let ngut ngut a. Ka mangan lutuk vangin ka mumangah ka lo hmu pawh a ni mai thei. Mahse, ka ngaihtuah chiang a, a tawngkam thumal tin fiah taka ka hriat danah  ka mumang mai mai ni theiin ka hre lo. Vawiin ni thleng hian ka thinlungah chiang  takin ka la vawng thlap a ni.
.
Khatiang a ni chung khan a hranpa in Yaman hi pan emaw inhmelhriattir emaw ka tum ngai lo. JoMas thih atanga kum hnih chhung kha chu a chanchin hriattur a awm mumal lo hrim hrim bawk. Kum 20 a upa anih kumah a pa sumdawnna a enkawl tan a, chanchinbu-a a hmel ka hmuh phat atangin tunge anih ka hre nghal chat a ni.
 Ral khat atanga hmuh kha ka duhtawk em em thin. A dinhmun ka hria a, ka dinhmun ka hre bawk. Thil mak a thleng a, hun tha a awm anih chuan ka hun a her chhuak ve mai ang tiin insit takin ka ngaihtuah ziah thin anih kha. Ka hun a herchhuak ve ta lo anih pawhin pawi ti thei ka ni chuang lo a! A chanchin, a thiltih, a hmeichhe kawp chungchang chanchinbu-a ka hmuh leh Internet site hrang hranga ka hmuh thinte erawh thumal pakhat pawh hmaih lovin ka chhiar ziah thung. Mi mak a ni a, a chanchin tam tak hmuh tur a awm ngai lo. Ka hriat theih chinah JoMas awm loh  hnu hian Yaman chanchin ka hriat apiangin engkim ka hrilh theihna awmchhun ka note bu (JM) ah ka ziak chhuak vek thin. Engtiang taka ngaihven thin  nge ka tih tih hi ka sawi kim vek dawn chuan in ning zawk hial ang!!
.
Kum tam tak hnuah, tunah hian Silas zarah_ Ni e, Silas zarah ka ti lo thei lovang__ thil mak thlengin hmaichhanah ngei ka hmu tawh a, ka thinlung duhzawng anih vanga ka pan chawp ni miah lovin tun hun hi a lo thleng ta hial anih hi. Ka vanneih hun tur lo thlengin khawvel ah hian hreawmna tuar tur chauha piang ka ni bik lo tih a lo lang ve tan dawn pawh a ni mai thei.
.
.
“Hun dang daiha cheng ang maiin i lang alawm.” A nui hak ri ka hriat chuan ka harhchhuak zawk. A hmel chu ka lo en veng veng tih ka inhrechhuak chiah bawk. Mak min ti ngawt ang chu!
.
“Khawiah emaw kal i duh angem? _” a nui suk a, a nui hmel ringawt pawh chuan min tizam mai dawn alawm le.
.
Ni lo, ni lo. Min sawmna apiangah awlsam taka ka zui zel chuan a tha lo zawk ang.
.
“Um_ Ka in ah tihtur pawimawh ka nei a, hun dangah_remchang  a awm a nih chuan__”
.
“Okay. Ka hrethiam e. Ka hmanhmawh mah mah anih hmel. Thil thalo engmah ka ngaihtuah miah lo a nia.” Inthiam lo hmel niawm tak ka hmu zawk. A bo leh rang lutuk a ka ngaihtuahna mai mai anih ka ring leh ta zawk.
.
“Ka hria alawm. Ka kal phawt ange.” Tih leh ka thutna atanga thawh ka rual a, a awmna a sawn chuan loh vangin kan insi lo chauh a ni ta. Hnai set sawtah kan inen ta ran a. Muangchang hian a kut pahniha ka kawnga min kuahin a taksa si turin a lamah min pawt hnai a, ka hnial lo, ka nial phal lo a, hnial tur ka ni hek lo. Ka thil duh ngawih ngawih chu engtin nge ka hnial phal ang!
.
Ka ngaihtuah lawk pawh ni miah lovin a awm ah ka biang ka nghat riai riai a. A thinpu dat dat ri ka hriat chuan ka maimitchhing a. Hetah hian ka him! Ni e, ka him! Ka neih ngai loh min venghim theitu neita nia ka inngaihna chuan ka chhungrilah hian ka awm a tinuam veng veng tlat a ni.
.
“Kal tawh ila a tha ang.” Ti chungin ka la maimitchhing reng tho a, a khabe ka chhipa a nghah chu a lasawn ve ta thung.
.
“Zanriah ei turin ka lo hruai ang che.”
Tlema inla hrang  hlekin ka hmel min en a, ka inngaihtuah buai hmel a hmuh chuan a nui suk a.
.
“I ngaihtuah nawn leh phawt dawn maw?”
“Maw?!”
Engtin nge ka ngaihtuahna a hriat theih? Sawi chhuah chu ka tum miah lo, mahse min sawmna apianga kal nghal zel hi a dik ber angem tiin ka ngaihtuah tak tak.
.
“Engtin nge i hriat?” ka ti ta ngawt a. Keimah ang bawkin a nui__ Lalpa, a nui hmel hi min hmuh tir fo ang che. A bik takin keimah vanga a nui hmel hi!
.
“Dik tak chuan tunkar chhung hian hmun dangah chhuak thei ka ni lo a. Karleh lamah ti ila..”
.
“A ni tak zet em?” min ringtawk lo niawm tak hian min en uluk ngang mai. Tawngkaa chhang lovin ka bu nghat. Dawt ka sawi hian ka hmelah a lang chhuak nghal zel thin tih Silas sawi vawi tam ka hre tawh a, a dik pawh ka ring. Chuvang chuan tunah hian dawt sawi ai chuan ka lu ka buk mai hi a tha zawk.
.
Gabo chuan a office atangin min zui chhuak a, a secretary’n min hmuh chuan nelawm tak hian min rawn nuih a. Helai hmunah hian a Boss ngaihzawng hmeichhia engzat tak lo nuih liam tawh ang maw? Engzat nge tih ka ngaihtuah lovang. Ka lo ngaihtuah hah a  ngai miah lo. Eng thil nge ka hriat le? Hmeichhe thilthu chhe lutuk ang mai ka ni nghal der anih hi! Min ngaina tih ka hriat veleh ka thikthu a chhe nghal em em ang maw? Ni love, heihi Mia nungchang tur ani lo.
.
Gabo chu elevator thleng lo kal vein ka luh hnuah pawh elevator inkhar hma chu a kalsawn lo. He thil hi a thleng tak tak em tih fiah turin ka insik ru hial!
.
.
Ni a liam a, Friday tlai anih meuh chuan MG Jewels-a ka pindan chhung chu pangpar hmun a ni ta ringawt mai. Nuam ka ti. Tun hmain pangpar dawng ngai lo ka ni lo va, mahse tuna ka pangpar dawnte nen hi chuan khaikhin chi rual a ni lo thung. Ka pa mi duh te__Mipa tam tak__ Ngaihtuah ka duh lo. Khatiang thil kha tunah chuan ka tawng tawh dawn lo. Ka pa thuhnuai ah ka awm tawh hek lo. Ka duh tak mipa ka hnaih thei tawh dawn a, ama duh thu ngeiin ani pawhin min hnaih bawk. A bak eng thil nge duh leh mamawh ka neih chuan le?
.
Ka pindan kawngka inkik ri ka hriat chuan ka thlalak enlai chu ka dah tha vat a. Kawngka rawn inhawng a Kym arawn dak ka hmuh chuan hahdam takin ka nui sak.
.
“Mia, ka duty a zo a__”
.
“Oh! Sana ka lo en miah lo anih hi. Kartawp hun nuam deuhin i hmang dawn nia.”
.
“Nang pawh le. Tuemaw chuan a nghakhlel tawh viau che a nia.”
.
“Tunge?” tiin Kym chu  ka en a, min lo nghaktu an awm anih chuan ka hre tur a ni dawn lawm ni?
.
“I pindana awm chung chuan i  hmu thei lovang. 10 minutes vel chu a thu tawh. A awm tih hrilh lo tur chein min ti tlat a.”
.
Ka thutna atangin rang zet hian ka tho a, ka pindan atanga ka chhuah chuan customer thutna tur sofa kan dahah chanchinbu chhiar-a Gabo lo thu chu ka hmu ve ta chiah.
.
Kar tluan khan kan inhmu lo_ ti ila kan inbe reng tho nain a taka inhmuh leh phone-a hmel inhmuh hi chu a inang thei lo. Mipa ngaihawm tak ani ang tih ka hre thiam lawk vek tawh tho nain hetiang ema ngaihawm hi a nih ka ring pha miah lo anih kha. A tak ngeia tawn chu a dan pawh a dang tak zet. Min ngaihsakna, min ngai pawimawh tih a tihlan zawng zawng te__ Ka lunch tur a hranpa ngata mi arawn dahtir thin te.. Ni e, mi romantic tha tak a ni ngei tih hi kar khat chhung lek khan a taka hmua a taksa ka khawih kher loh pawhin ka hmaa thu mipa hmeltha em em hian a lantir vek  a ni.
.
Kym nen chuan inbe mawlh  mawlh chungin kan kal a, kan  thawm a hriat chuan a chanchinbu chhiar lai chu dahin ka mipa duh em em chu arawn ding chhuak a. A mit chuan ka keler atanga ka chhip thlengin min en chhuak vek. Ka tukhum sam a tho sang sang thei nia!
.
“Hi_” ti sapin min kuah tuma a ban lo pharsa chu ka kuah a, min kuahna thlah chuang lova tlema inla hrang hlekin ka biang tawn tawnah min fawp a, min vawnna chu thlah tum hmel a pu lo.
.
“A tawpa tawpah kar tawp chu a thleng ve ta hram alawm.” Tia a phun nuah nuah hmel chu ka en tawp. “Kartawp chawlh nuam tak kan hman theih ka beisei.” A chal a khawih zauh a. A hmel chu en chian lehzualin a chauh hmel tak zet.
.
“I chawl leh rih deuh dawn nge_?”
.
“I lo chhuah hma khan ka lo chawl tawh a.Tunah chuan tih duh pakhat chiah ka nei_” mitmeng de sawr sawrin min en a, a nui deuh hmel chu___ He mihring hian min ti a thei takngial dawn!
.
Ka aw ka thian kharh a, “Chuan?” ti chiahin ka chhang thung. Engtin nge kan awm dawn tih ka zawt a ni ber zawk.
.
“Hun nuam tak hmanna tur ka hria. Kan kal nghal mai dawn em niang?”
.
“Umm_ ka bag kan la ange.” Ka kalsawn dawn a, min kuahna chu a la thlah ta mai lo. 
.
“Ka ngai lutuk che.”tih sap pahin rang deuh hian ka hmuiah min fawp zauh a. Min kuahna chu a thlah ta chauh.
.
Ka bag ka lak hnuah Security ka be fel leh zet phawt a, kan inzui chhuak ta a.
.
Ahma khan kartawp chawlh hmang dun turin kan in thurual sa tawh a, ka in a kal kher ngai tawh lo turin ka thawmhnaw tur ka keng sa vek tawh  bawk.
.
“Khawiah tak  nge kan kal dawn min hrilh thei tawh em?” ka tih chuan min chhang mai lovin Car steering wheel a vawn lohna lam zawk chuan ka kut arawn hmer vang vang a.
.
“Kan thlen hunah i hre mai ang.”
.
“Gabo_”
.
“Min ko nawn leh rawh_” min rawn melh rulhin ka kut chu a lakang a, a fawp vang vang a. Hmangaih leh thlakhleh nih nawm zia hi_mihring tawngkama sawifiah thiam chi rual a ni lo. Hmangaihna maw? Umm_Gabo hian min hmangaih tih sawikher lo mah se a chezia in a tilang vek a, min ngaina tih a sawi kha ka tan chuan a tawk em em rih. Kei pawhin ka hmangaih  thu ka sawi bik hleinem_ Ka hmangaih em? Hmangaihna hi tuna ka awm dan bak hi anih chuan ka ring lo. A tawk e! Ka ngaihtuah leh nasa mah mah dawn tlat.
.
Ka thutna nghenchhan chu nghengin ka thu rem a, rilru thlamuang takin music ri riai riai chu ka ngaithla ta vang vang a.
.
“Mia_” ka bianga thaw lum ham ham ka hriat chuan chiang lo ruaiin ka harh a, ka hmaiah min fawp kual dan dan tih ka hriat chuan ka harhchiang ta chauh.
.
“Kan thleng tawh e. I mutui hle mai_” ka hmai la si reng chungin a tawng a, ka ban pahnihin a nghawngah ka kuah a. He thil hi ka tihchakna a rei tawh lutuk! Kar tluanin ka mumang lam thlengin hetianga kuah chak hian ka ngaihtuah reng anih kha.
.
“Ka tha alawm_” ka chhungril awm dan ka sawi chhuak mai chauh a ni. A nghawngah ka hmai phumin a rimtui zet chu ka hip vang vang a. A hahdam thlak a, a nuam em em bawk.
.
Car atanga ka pen chhuah chuan khawilai ah nge kan awm tih hriat tumin ka hawi kual a, kan awmna lai hi khawilai tak nge tih ka hre fuh mai thei lo. Ka lo mutthilh vang khan khawi kawngah nge kan kal  ka hrelo a ni.
.
“Kan awmna hi khawi lai nge?”
Ani chu car hnung lamah kalin kan bag a la chhuak pah a.
.
“Seattle Beach House!”
.
“Oh_ hmun mawi tak anih hi.”
.
“Chuvang alawm ka hruai che.” Min enin a nui a, ka bag a ken chu lak tumin ka ban vat a. Hmeichhia nih vanga tihkep vek tur ka ni bik lo.
.
“Ka keng thei alawm.”
“Ka bag hi chu ka lo keng ve ang.”
.
“Ka biangah min fawp la min tanpuiah ka ngai ang.”
“Gabo_”
“Yes_”
.
Min kentir dawn chuang lo tih ka hriat vangin ka chuh buai duh ta lo.
.

.
Khua a tlai tawh vangin in chhungah kan inzui lut a, ril a tam raih raih tawh mai.
Kan inthlak fel hnuah kan pahnihin zanriah tur kan siam a, a hlimawm tih piahlam a ni.
Zanriah kan ei kham chuan boruak a nuam bawk a tuipui kama kal turin kan chhuak a. Khawpui thawm ri nuai nuai hriattur awm lo ringawt pawh chu a hahdamthlak tak zet zet.
.
Gabo chuan ka darah min kuahin ka ban chuan a kawngah min kuahtir a. Tuipui rim nam chek chek boruak thiang tak chu hip chungin muangchang hian kan kal bek bek a.
.
A phone arawn ri a, min kuahna chu phelh chuang lo hian a phone chu a kekawr bul hak ipte atangin a phawrh a. Caller ID chu lo en ve kher pawh ka tum lem lo.
.
“Min lo hrethiam lawk.” tih paha min kuahna chu phelhin a kal hrang hlek a, a tawng ka hre phak ta lo. Tunge a biak tih ka ngaihtuah lo a, tuna ka ngaihtuah zawng chu hlimna chhan tur ka nei ve ta tih mai te hi a ni e.
.
Ka ke bula thingtang chu lain ka thusawp a, tiuvutah chuan engemaw ka ziak a. Tuna ka hlimna hi tumahin min laksak lovang. He hlimna hi ka ta a ni. Gabo Yaman nen chauha kan ta a ni tawh.
.
“Let tawh ila_”
.
Hawi chhuakin Gabo chu ka en a, a hmel chu a danglam deuh tih ka hre thei nghal.
.
“I tha em?” ka tih chuan nui sukin a bu nghut a. A kut chu ka vawn tura rawn phar chhuakin min pawt tho a. Ka kut chu thlah mai lovin a  nghawnga ka kuah theih nan arawn kun hniam deuh a duhthawh leh ngenngawl tak  hian min fawp a. Chhum chunga thlawk ang mai ka ni leh ta.