GABO YAMAN - 2

GABO YAMAN

CHAPTER – 2

            (Seattle's Beach House - Inside)

Thantei_LauraSean
.
“I chungah eng thil chiah nge thleng han sawi teh?” ka ti nghal tawng a. A hmel chu ka en chiang ngang mai. Zam hmel pu deuh tak chung hian a mitmeng a de zak zak a, a tha a khur deuh bawk niin ka hria.
.
“Tuipui ah khan engtin chiah nge ka awm ka hre lo. Ka hriat hnuhnun ber chu ani khan thil pawimawh sawi dun tur kan neih thu min hrilh a, eng thil nge kan sawi dun dawn tih ka hre miah lo. A lawng ah khan darkar thum vel zet kan awm hnuah pawh thu mumal engmah a sawi lo va…” tawng zui hlei thei lovin a inhip a, a hmai hupin a sai hlawk hlawk bawk a.
.
“Hlau tawh suh. Tunah chuan i him alawm.” tih pahin a hnungah ka chul a, ka awmah a hmai rawn phumin a tap zui hlawp hlawp a. Awm dan tur ka hre chiah lo. Hmeichhe tap hlep hlep han buaipui vel hi ka tithang lo khawp.
.
Engemaw chen hnuah tap bangin a thu ngil a, inthiam loh hmel taka min enin, “Ka tihpalh, ka ngaihtuah let hian ka hlau em a ni. Hetiang khawpa nasa hian min hua ang tih rin ngaihna ka hre lo a, min dahbo mai duh khawpa min hua hi mak ka ti. Ka hrethiam lo tak zet. A pawi ka sawi miah lo asin.” Intihpachan tum takin a insangmar a, thawk a la halh halh bawk a. A chunga thil thleng a sawi hun nghakin ka lo ngawi tawp.
.
“Um_ Lawnga kan awmlai khan intur min pe a, rinhlelhna nei miah lovin ka in a, reilote chhungin engmah ka hre zui tawh lo. Ka hriat leh hmasak ber chu vau kama ka harh chiah kha a ni mai.”
.
“I chunga hetiang thil titu hi min la hrilh lo.” ka ti chhum hmuk a.
.
“Min tanpui thei dawn anih loh chuan sawi ka tum hran lo. Ka nunna min chhanhim sak avangin ka lawm e. Hetah hian ka riak ve ringawt thei lovang.___ Nangmah chauha awm i nih phei chuan__” a tizui leh nauh nauh a. Mi ti zawk zawk lo leh inthlahrung tak anih hmel bawk. Jose nungchang nen pawh a inmil zel mai.
.
“Harsatna a awm lovang. Kalna tur hmun dang i hre chuang em ni?” ka tih chuan za vaklo hian a nui seih a. A lu a thing zui mat mat a.
.
“Hre hauh lo  mai. I remtih chuan hetah hian ka mu mai ang.” A thu rem sat sat a, hma lamah awn deuhin a no ruak ken chu dawhkan teah chuan a dah a.

.
“Khawiah nge i chen?”
.
“Tunah chuan chenna tur hmun ka nei lo. Ka thil neih engkim chhuhsak ka ni tawh a, rem i tih chuan__” a ngawi leh ta daih.
.
“Sawi rawh_”
.
“Tunge i nih ka hre lo a, i bulah hian ka him em tih pawh ka hre lo..” a nuam ti lo lutuk hmel chu enin ka nui ta suk. Ngaihtuahna chu a hmang ve tho anih dawn hi. “Mak min ti lo la, ka unaupa min hriatchhuah tir tlat a ni.” a hmui a pet fan fan a, a hmel lan dan chu tap lo tura insum hmel a ni.
.
“Ka hriat theih chinah thil hlauhawm a awm ka ring lo. I unaupa chu khawiah nge a awm?”
A ngawi  vang vang a, min chhang dawn lo emaw ka tih hnuah, “Van ah!” tiin a kun ta daih. A kut a khawih niap niap a, a mittui a far tih ka hmuh chuan a darah ka kuah leh ta nge nge.
“A awm loh hnu hian nun pangngai ka hmang tawh ngai lo. Khawi hmunah mah ka leng lo a, ka neih zawng zawng chhuhsak vek ka ni bawk a..”
.
“I unaupa chu khawi hmunah nge a boral?” Sawi tlang lo mah se Jose farnu a ni ngei tih ka ring nghet hmiah tawh. Enge a chhan ka hre lo. Ka chhia leh tha hriatna hmang hian ka hria ni berin ka inhria.
.
“Rangkachak laihchhuahna khur chimah a boral tiin min hrilh a, a ruang pawh ka hmu lo. Khatihlai khan kum 8 chauha upa ka la ni a, ka unaupa tan khan engmah ka ti thei lo a ni.”
.
Kan ngawi dun ta rauh rauh a, sawi mai tur ka hre tlat lo. A unaupa ka dawm hlum tih ka sawi ngam lo a, a natna tihthar sak ka duh loh vang a ni pakhat. Khatih hunlai khan kum 8 chauha upa anih chuan tunah hian kum 22 a upa a ni ve tawh tihna a ni a, a hmel lan dan nen pawh a inphu tawk viau.
.
“I unaupa thlan chu i tlawh duh angem?” ka tih chuan phawk hra hian min en a. Sawitur a haihchham chiang khawp mai.
.
“Ka_ka hre lo. Nang_ A awmna i hria_? Ka unaupa i hria maw?” a ti ta he haw a. a mitmeng buai ta nak chu chik takin ka en reng a. “Tunge i nih chiah? Kum 14 liam taah khan ka unaupa nen __ Ka rin dan hi a dik em?” a ti bah nawk nawk a. Ka hmui ka tiche zauh ringawt. A rin dan chu enge anih pawh ka hre hauh hleinem mawle!
.
“Jose Mas LeBoeuf kha i unaupa anih ngei chuan ka thiantha a nia lawm.”
.
“Lalpa!” ti sapin a hmai a hup a, a khur dar dar a.

“I hria em? A chungah eng thil chiah nge thleng i hria em? Oh!___” a insut hlawp hlawp a, a kut chu la sawnin a mittui luang zawih zawih chu hruk pawh a tum tawh lo. A lainatawm tak zet.
.
“I thiantha anih chuan engkim ka hrilh ngam ngei ang che.__ Min tanpui ngei bawk ang chu tiraw?”
.
“Ka hriat tur chin chu hriat vek ka duh ngei ang.” Ka ti nghet charh a. ka rilru tak tak ka sawi bawk. Kum 14 chhung tehmeuh zawn chhuah ngaihna ka hriat loh Jose farnu ngei ka hmaah a thu tawh a, engvangin nge ka thianpa duhthusam kha ka tih hlawhtlinsak mai loh ang. A farnu chu ka farnu ah ka ngai hmiah a nih hi. A mak khawp mai. Mak taka kan intawng ta pawh hi Pathian remruat a ni ngei bawk ang chu. Mihring tihtheih a tawp hnuah leh zawn ngaihna hre lova ka beidawn tawh hnuah lehnghal.
.
“Engkim hriat vek ka duh.” ka tih chuan min ring ngam chiah lo ang mai hian min en vang vang a, ka ti tak zet tih ka mitmenga lang chhuak chu a hmu thiam a ni ngei ang, a mittui hru hulin min en let ngar a. A chanchin sawi turin a inpeih ta tih ka hrethiam.
.
“Mas a boral thu kan hriat khan ka nu__ ka nu hrawn chuan ka pa a vau bet a, engmah ti lo turin a vau bet anih chu. Thil awmzia tak tak kha ka hrethiam lo. Mas kha ama duhthu ngei a Saudi Arabia pan a ni lo tih erawh chiang takin ka hria. A kal hma zan khan ka pindanah lo kalin min kuah a, a mittui a tla tih ka hria. Inthup tum hle mah se ka hre reng a ni. Ka ngaihtuah let leh hian ka nu tihluihna vang chauh a kal a ni tih ka hrethiam a. Ka nu khan damin lo let tawh suh ati hial asin. Ka unaunu hrawn__” a ngawi dat a, a mitmenga a unaunu hrawn a huat zia lang chu a thup hman lo.

“Huat ka duh lo a, mahse haw lo thei lovin min siam a ni. Ka dikloh a ni em? Hetiang em em a ka unaunu ka hua hi ka dik lo a ni tiin ka ngaihtuah fo a, mah se ka dang thei lo. Tawrh theih awm zawng zawng min tuartir vektu ka hua hi ka thiam loh ani em?” zawhna zawt mitmeng in min en a, a mittui a tling pam bawk. Engmah sawi lovin ka en reng a, thawk la halhin a sawi zawm a.
.
 “Mas khan ka pa sumdawnna ah 30% share a nei a,  chu chu ka tan a dah tih an hriat chhuah rualin ka nu leh ka unaunu te chuan ka chanpual zawng zawng chu min chhuh vek a__ He thil hi sawi tur ka ni em ka hre lo__ Nikum hmasa khan ka nu hrawn chu a thi a, a thih chhan tumahin kan hre lo. Ka unaunu hrawn chuan test engmah tih a phal lo. Ka ringhlel tih a hriat chuan ka lakah nasa lehzualin a tuan a, min thah hial a duh ta anih hi. Nung dama min hmu leh anih chuan min chhuah hauh lovang. Kei pawhin hmuh ka duh lo. Ka hlau__ Ka hlau a ni_” a aw chu a tak ngal a, a hmel pawh chuti bawk. Tuna a sawi bak hi sawi duh loh tam tak a nei bawk ang tih ka ring.
.
“I pa chuan itan engmah a ti lo em ni?”
Tawngkaa min chhang lovin a lu a thing mat mat a.
.
“I ngaihtuah phak lo zawk ang. Sawi loh ka duh zawk.” a ti nem thlap a. Thawl ta huai ang mai hian thawk a la ri ham ham a, za vaklo a nui chungin min en a.
.
“Hetiang thil zawng zawng ka sawi chhuak hi ka awih thei lo zawk. Ka sawi chhuah ka inring ngai miah lo. Mak min tih loh ka beisei. A hmain ka hria che pawh a ni lo a, vawikhat hmuh naa ka rin ngam mihring awmchhun i ni.” vawt ti niawm takin a dar a tikum hlan a, a inthlahdul hnak a.
.
“Ka thawl huai mai. Ka awm leh zel dan tur chu engpawhnise ka hahpui ruk em em min hriatpuitu i awm tawh a, ka thla a muang tawh ang.”
.
A ham bai bai a, ka lo en reng tih a inhriat chuan zak leh deuh niawm tak hian a kimki chaih chaih a. Engemaw zawng tak chuan a duhawm reuh khawp mai.
.
“I chau anih kha. Saw lamah sawn pindan ruak a awm a, i mu thei ang. Zingah kan sawi zawm leh dawn nia. Helai hmunah hi chuan i him a nia.”
.
“Ka lawm e.” a ti sep a.
.
.
Ka mutna pindanah ka lut a, ka mut a chhuak lo mai pawh a ni lo mutthilh tumna ka nei miah lo. Zuri LeBoeuf thusawi zwng zawng te kha a mal te tein ka ngaihtuah let vek a, hmeichhe pakhat chauh tawrh atan chuan a nasa mah mah a ni. Jose kha boral lo se hetiang hreawmna hi a tuar miah lo tur a ni a. Jose awm tawh lo mahse keihi a tan ka awm! Hreawm tuartirtu chuan a letin a tuar ve ngei a ngai bawk ang. A tan ka ding zel dawn a ni. A sawi bakah khan thil tam tak a awm ang tih ka ring a, thil tam tak a tuar tawh chung leh amah thah hial duhtu  a hua kha a thiam loh a ni em tih min zawt te khan ka rilru a khawih tak zet. Hmeichhe mak tak zawng a ni e. Hetiang mihring hi ka la tawng ngai hauh lo.
.
Dar 2 a pelh hnuah ka mu a, mak takin ka mutui hle. Kar tluana ka chauh tawngkhawng tawh vang pawh a ni mahna.

Ka muhil ka harh hlawl a, tho nghal mai lovin tuipui luang ri hriat hahdam zet mai chu ka ngaithla reng a. Thil rim, eitur rimtui tak ka hriat chuan ka thuchhuak hluai a.
.
Zinglam routine ka tihzawh hnuah choka lam ka pan a, dawhkana eitur lo awm ka hmuh chuan ka nui sak. Mahni ritur insiam chawp a ngai lo hi ka lawm tawk hle. Chair-ah thuin Pancake tui hmel zet chu ka plate-ah ka la a.
.
“Good morning.”

“Good morning. I tho hma awm hle mai.” a hmel tharlam sar chu hmuh a nuam khawp.
.
“Nizan i mutui em?” a ti sep a.
.
“Hetah hian lo thu teh.” Ka bula chair awl chu ka kawk zauh a, muangchang raih hian arawn thu a. Ka thil ei chu tui ka tih leh tih loh hriat tum niawm takin min en kiau a.
.
“Tunge a nih?” ka ti nghal tawng. Muangchang taka hmalak ka tum lo. Thil diklo a alo awm anih pawhin a rang thei ang berin ka hrechhuak ang. Zuri LeBoeuf hian a chanpual tur dik tak a chang ngei bawk tur a ni.
.
“Argyros_Um_” ka hminga min ko chu inthiam leh chiah lo niawm tak hian a tim leh deuh a. “Ah_ Nizana ka sawi kha chu engahmah ngai suh. Breakfast hi ei zo ila helai hmun hi  ka chhuahsan ang. Min tanpui vangin lawmthu ka hrilh nawn leh che.”
.
Chik zetin ka en a, a awm dan atang chuan nizana ka laka a thusawite kha laklet leh vek duh hmel a pu tlat. Vanneihthlak takin thusawi tawh a laklet theih loh hlauh!
.
“Tunge a nih?” ka tinawn leh a, a awm a nuam lo tih a sam a khawih sek dan atang chuan ka hre mai.
.
“Khang thil kha sawi miah lo tur ka nia. Mia hi tihnat ka duh lo. Ka lakah thalo hle mah se amah anga awm ve ka duh lo. Khawngaihin amah hria pawh ni la eng thil mah ti lo turin ka duh che. “
.
“Chu thu chu engvanga sawi nge I nih?” min en a, a awm a nuam lo tak zet tawh.
.
“I phenah ka awm reng thei dawn lo a, a let leh tuar turin ka chak tawk rih lo.”
.
A unaunu hrawn rawn che let leh tur a hlauh vanga che chhuak lo turin min duh tihna maw? Ka nui suk. He hmeichhia hian tanpuitu a mamawh hle tak mai. A duh emaw duh lo emaw ka thlazar hnuaiah ka venghim ngei ang. Ka intiam nawn leh e!
.
“Mia? Chu chu a ni em?”
Hreh zet hian a bu ban chat a.
.
“Mia__?”
“Mia Valentina Garcia.” a tawng ring lo nain a hming sawi chu ka hrechiang tawk khawp.
.
“Beach House ah hian i duh chen chen i awm thei ang. Engemaw changin ka kal zauh zauh chauh a, he hmunah hian i him tih inhre nawn leh ang che. Chuan, Miss Garcia thlalak chu i kawl em?” ka zawhna atthlak zia chu ka sawi zawh rualin ka hre chhuak nghal. He hmeichhia hian engmah neih a nei lo. Tuipui atanga thichhawnga chhanchhuah hmeichhia hian engmah min kawhhmuh thei lovang.
.
Breakfast ei zawhah ka ruahman lawk ang  ni lovin Beach House chu ka chhuahsan a, Zuri mamawh tur thil thenkhat dah tura mi ka tirh hnuah Mia Valentina Garcia chu tunge anih hre turin ka hna ka tan ta nghal a ni. Thil hriat harsa a lo ni hauh lo mai!
.
Zanin hian Ballevue-a Silas Mansion-ah a kal dawn tih ka hria a, address kimchang ka hriat hnu chuan zan dar 9 rik hma zawng hahchawl leh rih turin ka apartment ka pan leh ta rih.
.
SILAS MANSION
BALLEVUE, WASHINGTON
8:45PM

.
Sawm bik leh thian hnai chauh kal khawm tur anni tih ka hria a, hetiang hmunah hian mihring mize dik thenkhat a lang chhuak thin. Mi hriatchianna tura hun tha duhthusam pakhat a ni bawk. Thian thate lakah tu mihring nge inthup tit tet ngai le?
.
Silas Bikovic nen hian vawihnih/thum chu kan indawr ve tawh a, chhuanlam siam tur ka haihchham lovang. Ka  hmel min hmuh chuan min hnar haw ngawt phal dawn lo tih ka hrechiang hle bawk. Silas hian engtiklai pawhin Yaman Co. nena thawhdun a chak reng thin tih hrechiang em em tu awmchhun ka ni hial ang chu.
.
Ka rin ang ngeiin gate duty chuan sawmna card ka neih leh neih loh min zawt ta ngei a, ka theihnghilh thu ka sawi chuan a awih loh hmel nasa mai.
.
“Ka thusawi  i rin loh chuan Silas chu ka lo bia ang. Min hnar tih a hriat chuan a lawm dawn hauh lo a nia.” ka ti liam puat a. Ka thiltih hi dik chiah lo mah se ka tih ngei a ngai si a ni. Min en vang vang hnu chuan min hnar ngam ta lo. Silas hi mi thinram ve tak a ni tih kei ai mahin he security hian a hrechiang zawk daih dawn chiang.
.
Car atangin ka chhuak a, kawngka pui lam panin ka kal nghal a. Kawngkaa ka pen luh rualin Silas chuan min lo hmu ta chat. Mak tia mengphawk deuh hra chungin min rawn pan a, a hamhaih chiang khawp mai.
.
“Mr. Yaman, I lo kal ve chu _rin har _ka ti hle mai.” A ti bah nawk nawk.
.
“Thu ka lo dawn danin kal loh phal chi ah ka ngai lo.”
“Oh! Tu hnen atangin nge sawmna i dawn ka hrelo nain, ka lo lawm a che.” Phur fe hian a kut arawn phar chhuak a, ka lo vuan ve vat. “Hun nuam tak i hmang dawn nia. Aww, min lo hrethiam lawk.” Ka kut a vawnna chu thlahin min kal pel a, kawngka pui lamah mi dang lo kalte welcome turin a kal sawn a.
.
“Mia_ Oh My God! Min lo kuah teh..”

Mia hming lam rik ka hriat rualin ka mit chuan ri lo chhuahna lam chu a hawi nghal. Hmeichhe kawr dum a taksa rem thlap ha chuan Silas chu a kuah a, an inkuahna chu thlahin an kut pahnih an invuan a, Italian nal zet hian a tawng sar sar bawk. An inpawh hle tih a chiang.
.
Silas banah chuan vuanin ka lam panin an rawn kal a, a thawmhnaw hak ka hmuh chian chuan ka chhungril a ner sawk.

.
“Mia, Mr. Yaman nen hian inhmelhriat rawh u.”
.
“Oh! Hi!”
Mia chuan a kut arawn phar chhuak a, a thawmhnaw hak chu ka lo la en char char tih ka inhre chiah. Muangchang in ka mit ka lasawn a, a nui hmel chu chiang zetin ka en ta zawk a. A kut chu vawn pawh ka tum hran lo.
.
A mitmeng nungsar chu a paw chiai a, hmui senlar tak hmuh ka inbeisei laiin a hmui a hnawih sen hauh lo. A mitmeng tinung zual thei rawng dal lam, tak nalh hlarhin a hnawih a, eng rawng chiah nge ka sawi thiam lo.
.
A kut ka  vuan lo chu ngai pawimawh lem lo tak hian la letin a kut a beng thak a. A nui hmel chu a ti danglam eih lo.
.
“Kan inhmu chu a lawmawm hle mai__ Mr. Yaman!” ka hming chu a sawi dik em tih zawt  niawm tak hian Silas chu a melh ralh a. A mitmeng paw chiai atang chuan min ngai pawimawh lo tih  a lang chiang hle. Ka ngaih pawimawh loh zia ka tilang chu min chhanglet  ni maiah ka ngai.
.
“Silas, Ann a lo thleng tawh em?” Italian bawk a hmang leh ta.
.
Boruak chu hrethiam takin Silas chuan a lo thlen tawh thu a sawi var a.
.
“Ka va hmu ange. Mr. Yaman, hun nuam tak hmang ang che.” Nui then sak chungin min kal pel a, ka tum vang  ni hauh lovin a rimtui  hman rim chu ka hnarah a cham vang vang. Rim na tak a ni hauh si lo.
.
“Kha hmeichhia kha tunge anih?” ka tih chuan Silas chu inveng  hman lovin a ka a hup chawt a. Zahzelah a khuh zui kharh kharh.
.
“Ka sawi zawh chiah ang khan Mia a nih kha.”
.
“Mia__?”
“Mia Garcia” tih pahin a thle nghal nghal a, a thiannu chu a chhuang hle tih a thup der lo. Hengho, Mia thian inti te hian an thiannu hi hmeichhe hlauhawm, tualthah tum hial khawpa duham leh mi nunchhia a ni tih an hre lo pawh a ni mahna.
.
Music ring zetin a rawn ri a, music ri kara hmeichhe nui thawm lo chhuahna lam chu kan hawi thap.
Mia leh hmeichhe pakhat chu music rem chuan tang alh hian an lam a. Thildang reng reng a ngaihtuah buai lo tih hriat tak hian Mia chu dak chunga maimitchhing in lu a tiche a. Engin a hmai a chhun chuan a nui deuh tih ka hmu thei. Hmeichhe hmuhnawm tak a ni! Ka pha thei hauh lo mai!


TUESDAY-THURSDAY-SATURDAY ah update zel tur a ni e.