GABO YAMAN - 4
CHAPTER – 4
Thantei_LauraSean
.
Car kawngkhar ka hawnsak a, a thut fel hnuah driver seat-ah thuin kan tlan chhuak nghal a.
.
“I awm a nuam meuh nange?” ka ti ta nge nge. A dawr atanga kan inzui chhuah atang khan a hahdam lo reng reng tih ka hria. A inthlahdul lo hrim hrim bawk. A thu ngil at a, a bag chu a vuan nghet viau bawk a.
.
“Ka tha alawm.” Min enin a nui sak a, a tawngkam leh a hmel chu a inpersan daih. Lem a chang pawh a ni thei tho. Eng pawh tithei turin a inthunun thei ang tih ka ring a, a nungchang hi ka chik lehzual a ngai dawn a ni.
.
Kawngsir remchang hmasa berah Car ka tihdin chuan phawk deuh hra hian min en a, a mitmeng chuan thil awmzia min zawt nghal a ni ber.
Hmanhmawh hauh lovin a lam hawiin ka thu tha a, engtin nge ka awm zel dawn ngaichang ni awm tak hian ka awm dan chu hmaih nei miah lovin min en chik hle. A mizia hi a pawnga taka basa ngam ngawt chi a ni lo tih ka hriat vangin tim deuh tak hian a kut ka vuan ta nge nge. Ka zam ve deuh niin ka inhria. ‘Ka zam ve deuh anih chu! A vawikhatna a ni hial ang a. A tak tak tur pawh ni lovah hian ka zam ang maw? Teuh lo!
.
“Eng thil nge ni ta?” a ngaihna hrelo tih hriat tak hian mitmeng buai nakin min en a, ka chet dan chu mak a ti tih ka hmu thei.
.
“Inthlahdul phawt rawh.” A hahdam phawt ka duh vangin ka nuih a, ka tider hauh lo. Tang mar tlata a awm hi ka tan pawh a nuam lem lo. Amah chauh chu enin a kut chu ka vuan vang vang a.
.
“A zia deuh tawh em?” ka tawng ring lo.
.
A lu tiche deuhin a nui hak a. Nui lui a ni ta lo.
.
“Min vawnna hi thlah phawt la ka hahdam leh hahdam loh ka hre thei chauh ang.” Za deuh tak hian a nui zui ta hak hak. “Ka awih thei lo!” ti pahin a la nui zui hak hak a, a ngaihna hrelo chu keimah ka ni ta zawk.
.
“Eng thil nge i awih theih loh chu?” a hmel chu chik takin ka la en reng.
.
“Aww_ theihnghilh daih rawh. Engmah a ni lo.” La nui reng chungin hmalam a en ta daih. “Zan riah ei turin kan kal ni khan ka hria a?”
.
A nungchang chu hrethiam chiah lovin ka lu ka thing a, Car chu ka tinung nghal a. Hruai ka tumna hmun kan thlen hma chu kan tawng leh ta lo. Kan boruak erawh a hahdam thlak ta deuh. Motor khalh pah chuan engtin nge a awm hriat tumin ka en zeuh zeuh reng a.
.
Resataurant chhunga kan thut fel hnu chuan eitur kan chah a, pangngai takin kan titi dun thei ta bawk.
.
“Zanriah min kilpui i duhna chhan hi hriat a chakawm hle mai.” A thlenga eitur chu tetakte zai thlain a ei a, tui tih hmel tak hian a ei niin ka hria. Ka chik ta mah mah ni ten ka inhria. Mahse, a pawimawh tlat. Engkim, a ngainat zawng leh a ngainat loh zawng thlenga ka hriat phawt loh chuan ka tina thei dawn tlat lo a ni.
.
“I mipa chhuahpui apiang ten chu zawhna chu an hmachhawn ziah em ni?”
.
“Mai thei! Ni lo mai thei bawk. Thil thenkhat hi chu a chhan han hriat hrim hrim hi a chakawm ve thin a.” a tawng dan atang chuan a ngaih pawimawh hmel vak lem loh.
.
“Ka sawm nachhan che hriat i duh tak zet chuan tun chauh lo pawh hi min la chhuahpui leh a ngai ang?” ka ti ve thung a.
.
“Vawikhat hi lo duhtawk ta viau ila engtin nge niang?” a nui pah ralh ralh tih ka hmuh chuan a fiamthu a ni tih ka hrethiam a, ka ngai thutak lui thung. Ka tan point score na hun tha tak a ni. A hranpa a ngaihzawn tum hrim hrim anga ka lan loh nan te pawh a ni tel bawk ang chu.
.
“I remtih hma chu ka sawm lui zel ang che.” Ka thutak tih lantir nan ka eitur dah meuhin a mitah ka en a, min rawn en ve ta chiah. A nuih a za ta lo.
.
“Thian tha tak i nih ka beisei.”a tinghet ta charh. Ka beisei loh tawp chhanna a ni. Sawi mai tur ka hre ta lo. Kan ngawih dun rauh rauh hnuah, “Silas nen hian in inhriatna a rei tawh em?” a ti ta daih a.
.
Thil dang dang kan sawi a, pangngai taka ti ti in ka hriat duh thil dang a thil ngainat leh nuamtih zawng ka hriat belh nial nual bawk. Ka hlawk thawkhat niin ka inhria.
.
A chenna hmuna thlah ka tum chuan a dawra let leh phawt a duh thuin min chhang a. Mak ka tiru deuh nain engmah ka sawi lo.
.
A dawr kan thleng a, kawngka hawnsak tura chhuah ka tum chuan ka banah min vuan vat a.
.
“Keimahin ka chhuak mai ang. Zanriah tui tak min eipui vangin ka lawm e.” a ti tak zet tih lantir nan ka mitah min en a. He hmeichhia ah hian thil mak tak a inphum ru nia hriatna ka neih tak tlat chu!
Chhuah tumin Car kawngkhar hawnna chu a kut veilam in a vuan a, a kut dinglam chu nghet takin ka vuan chawt a. Thawk a la halh tih ka hria. Tawng a tum a, a tawng chhuah hmain a hmuiah ka fawp a. Ka tumlawk hran lo. Inlahrang leh vatin a biangah ka fawp leh a. Ka chet dan vang chuan a hamhaih vek tih ka hria. A lama la awn reng chungin Car kawngkhar hawnna chu a kut nen ka vuan kawp a, kawngkhar chu muangchang hian ka hawnsak a.
.
Car atangin a chhuak a, a bag chu a vuan nghet hle tih ka hmu. Min rawn en tawh lovin a dawr lam pan chuan dak vah hian a kal nghal a. Dawrah a lut fel tih ka hmuh hnuah ka tlan chhuak ta chauh.
.
*Pen khatin hma ka sawn e!* tih ngaihtuah chungin ka hmui ka tuai zauh a. Ka nui suk bawk.
.
.
JULY, 2004
BALLEVUE, WASHINGTON
.
*MIA VALENTINA GARCIA*
.
“Mia_”
.
Thawm dim taka min ko ri ka hriat chuan khum atanga thovin ka pindan kawngkhar ka pan a. Ka hawn rualin rang tak hian JoMas chu arawn pen lut nghal a.
.
“JoMas?”
JoMas chu ka khumah a thu hnawk a.
.
Ka unaupa hmel phelh phang chu enin ngaih thatlohna ka nei nghal. Kum 12-a upa ka ni ve tawh a, kan chhungkaw awmzia thenkhat chu hrilhfiah ngai lovin ka hrethiam nual tawh. Ka pa nupuiin awm dan tur min hrilh angin ka nung a, ka tawng ngai meuh lo. School ka kal bak chu pawnah ka chhuak ngai lo a, ka awm dan letling thawkin JoMas hi a nung thung a ni. Thil sual engmah a ti ngai lo ang tih erawh ka ring. Ka unaupa neihchhun anih vangin ka hmangaih a, ka unaupa anih bakah ka pa a ni tel bawk. Ka hriat theih tirh atangin ka pa hian fanu laka a tihtur engmah a ti ngai lo. Mamawh ka neih leh harsatna ka neih zawng zawng te, ka hun tawnte ka hrilh thin chu JoMas chauh hi a ni. Ka nu bula chen kan duhzawk tih a hrereng chungin ka pa hian a bulah min chentir a, duhthlan theihna min pe lo. Bei let turin ka nu khan engmah a tithei hek lo.
.
Tlai lamah khan ka pa nupui nen an inhau fe tih ka hria a, eng thu chiah nge an buaina tih ka hrelo thung. Thil thalo tak erawh a thleng ang tih JoMas hmel ka hmuh hian ka hrethiam ve.
.
“Khaleesi, lo hnai teh.” (Khaleesi – Sam buang nalh tak nei farnu, an unaupa ten an koh duatna- Thantei)
.
Khumah chuan ka thu thla a, JoMas chuan nghet tak hian min kuah a.
.
“Khaleesi, chak taka i lo awm a ngai a nia.”
.
“Enge i sawi awmzia?”
.
“Ka kal ngei a ngai a ni. Khawvar hmain ka chhuak ang.”
.
“Khawiah? Engvangin? JoMas, min ti hlauthawng a nia.”
.
Min chhang lovin min kuah nghet sauh a.
“Khawiah pawh kal dawn ila chanchin ka lo hrilh zel ang che. Naktuk hian ka pa nupuiin Boarding School ah a dah dawn che tih ka hria a, chanchin ka lo hrilh dawn che anih pawhin chutah chuan ka lo thawn zel ang. Hlauthawng lo la, nakum ah kum 18 ka tling tawh dawn a, ka lo let leh ang. Ka lo let leh hunah kan pahnih tan nun thar kan din thei tawh a, chumi hma chuan lo tuar hram hram ang che. I thei angem? I thei ang tiraw? Ka naute hi a chak tawk tih ka hria__” tawng zawm thei lovin a ngawi vang vang a, a tap niin ka hria.
.
“Tunah engtin nge hetiang hi a thlen theih? Engmah ka hrethiam lo. Tinge I kal bo a ngaih kher? JoMas, I awm loh chuan engtin nge ka awm tak ang?”
.
JoMas chu a thaw kawk a, min kuahna chu thlahin ka biang tawn tawnah min vuan a.
.
“Khaleesi_” a nui lui a, a mit chu a huh! JoMas, mi chak tak hi a tap a ni. Ka unaupa a tap tih ka hriatna chuan ka chhungril ah min tikhur a, hlauhna nasa tak ka nei bawk. Eng thil ber nge ka hlauh tih erawh ka inhrethiam lo.
.
“I kal thei lovang. Kum 1 chhung chu a rei lutuk. Tinge i kal bo a ngaih kher?”
.
JoMas chuan min chhan ngaihna a hre lo. Ka mittui luang zawih zawih chu a hru a, tihngaihna dang hre lovin min kuah leh ta ngawt a.
.
“Ka lo let leh dawn alawm.”
.
Khum bula sana chu a en a, a awm dan apiang chu ka en vangin a hawina lam chu ka en ve zel a. Zing lam dar 4:21 chiah a ni.
.
“Ka kal a hun tawh. Khaleesi, ka sawi kha hrereng ang che. Chak takin lo awm la, ka awm lo tih i hriat hmain ka lo haw leh ang. A tha em? Nui rawh le!”
.
Nuih a har ka ti. Tun ang hun lungngaihthlak lutuk ah hian engtin nge ka nuih theih ang? Mahse, JoMas hi lungngai taka a awm ka phal bik lo. Ka nuih vanga a hlim deuh dawn anih chuan ka nui zel ang.
Rilru mangang ru takin ka nui lui a.
.
“Tha lutuk. I nuih hian i hmel tha lutuk a nia.” Ka chalah min fawp vang vang a, “Ka hmangaih che. Ka hmangaih che.”
.
“Kei pawn ka hmangaih che. JoMas. I thutiam kha hrereng ang che.”
.
“Ka theihnghilh dawn lo reng reng.”
.
JoMas biangah chuan ka fawp a. Min kuahna a thlah hnu chuan rawn hawilet tawh miah lovin ka pindan chu a chhuahsan a. Kha hun kha ka hmangaih em em ka unaupa damlai hmel ka hmuh tawp berna a ni.
.
Khua a var a, ka hriat hmasak ber chu ka pa nupui thinur thawm rapthlak tak a ni. Ka pindanah rawn lutin khum atangin min pawt tho a, ka thawmhnaw bawm hawngin a khumkhawm bawrh bawrh a, in atanga min hruai chhuakin kan in chu ka chhuahsan ve ta.
.
JoMas min hrilhlawk ang chiahin Boarding School ah min dah a, hmun nuam tak a ni lo. Mahse, ka him niin ka inhre tlat thung. Mi huatnaa khat mitmeng ka hmu ta lo ringawt pawh ka tan chuan thil tha tak a ni. Ka pa emaw, a nupui emawin min rawn tlawh ngai lo va, ka lawm hle zawk. JoMas ka ngai hle a, a kalbo atanga thla khat a ral hnuah ka lehkha tur Miss Borden hnen atangin ka dawng ta a. Lehkha chu hawng mai lovin ka fawp vang vang phawt.
.
Lehkhathawn chu ka hawng a, thlalak a lo inzep tat. Eng thu nge alo ziah ka chhiar hmain thlalak chu ka en vang vang a. JoMas bula ding mipa chu tunge anih ang tih han rin chhin ngaihna ka hre lo.
.
Hlim taka nui var var chung lehkha chu ka chhiar a, thlalaka lang ve mipa chu JoMas thiantha tak Argyros Yaman a ni tih ka hre ta chauh. JoMas thianpa chuan tunge anih a sawi lo nain JoMas chuan a lo hreru reng a ni. Ka nui chhuak hak a. JoMas chu mifing tak a ni a, a hre ngei ang tih ka ring bawk.
.
Lehkhathawn ka chhiar zawh chuan ka diary karah ka zep a, thlalak chu uluk takin ka en ta vang vang a.
.
Dan pangngaiin class ka kal a, Lunch ei tura kan kal khawm laiin ka lam pana Miss Borden hmanhmawh taka lo kal ka hmu a. Ka bul arawn thlen rual deuhthawin a hnunga ka pa nupui lo kal ka hmu bawk a.
.
Miss Borden office-ah min hruai a, ka dam chhunga ka theihnghilh tawh ngai loh tur thu rapthlak ber mai chu min hrilh ta a ni. Ka tliak a, ka kehchhe vek a, khawvelah hian hmabak ka nei lo niin ka inhre nghal bawk. Ka pa nupui hmel chu ka en a, min tihder nise ka ti ngawih ngawih a. Mahse, an thu min hrilh chu dawt a ni lo tih ka nuhrawn hmela lungawina lang chuan min hriattir chiang em em si. JoMas chu a lo kir tawh dawn lo! Ka khawvel hun hman dan tur chu ka pa nupui kutah a innghat ta tih tawngkama min hrilh ngai lovin ka hrechiang em em bawk.
.
.
*2018 –BALLEVUE
MG JEWELS *
.
Ka hmel danglam nasat zia min hmuh ka duh loh vangin min fawh hnu khan ka hawilet duh tawh lo. Lalpa! Ka thlawk deng deng niin ka inhria. Ka hmai sa hut hut pawh chu dawr chhung ka luha min hmuh theih tawh loh hnuah chiah ka khawih ngam.
.
Kym chu signal zeuhin ka pindan bikah ka lut tlang nghal a. Dawhkanah ka bag chu dahin chair-ah chuan ka thu hnawk a. Drawer ka hawng nghal bawk a.
.
“JoMas, a thleng ta. A thleng ta a nia!”
.
Uluk taka ka frame, JoMas leh Mr.Yaman thlalak chu ka en ngawih ngawih a. Ka nui lo thei lo. Ka thutna chair chu ka tivir a, naupangin a candy duh ber a dawnga a hlimna ai pawhin tuna ka hlimna hi a nasa fe zawk.
.
Ka nuna thil thleng apiang JoMas bulah hian ka la thlen zel a, a taksa ka bulah awm thei tawh lo mahse a thlarau chu ka bulah hian a awm reng ang tih hi a thih thu ka hriat ni atang khan a la ngai reng. Ka hlimna leh lungngaihna zawng zawng min hriatpuitu awm chhun pawh JoMas chiah hi a ni.
.
Ka note bu JoMas tia a hming ka vuah chu ka phawrh chhuak a, ka unaupa bula ka thil tawn sawi anga inngai chungin thil thleng chu ka ziak leh mawlh mawlh a.
.
*JoMas, KA DUHTHUSAM CHU KA TAWNG TA E!*
.
.
Darkar hnih vel zet ka pindana ka inkhung hnu chuan dawr chu chhuahsan in ka chenna in panin ka haw a. Ka thiltih engkim a nuam ta halh mai. Ka hlimna hi a nasa em a ni.
.
Ka in ka thleng a, tui sa ver vawrah hahdam takin ka inchiah ta vang vang a. Tuna ka chenna in hi JoMas nen kan duhthusam thin in a ni a, a hunlai ang chiah khan engmah ka ti danglam phal lo. A chhung erawh chei that loh theih loh a nih vangin ka chei danglam thung.
.
.
Tui takin ka mu a, ka tho hma khawp mai. Silas hnen atangin phone call ka dawng a. Vawiin hi kan inhmuh hun tur a ni tih ka lo ngaihtuah thleng tawh miah lo.
.
“I tha meuh maw?” arawn tih chuan a ngaihna ka hrelo letling.
.
“Enge?” ka ti he haw a.
.
“I phur hmel hle mai.” arawn ti leh ringawt a.
.
“A ni maithei.”
.
“Kar hmasa-a kan inremsiamna kha tih danglam a ngai mai thei a, file kha lo keng hrim hrim rawh aw.”
.
“Oh! Okay. Lo keng ang.”
.
“Good. Dar 10 ah chat lo thleng ang che. Nih phawt_”
.
Kan inbiakna kan titawp a, kal chhuak turin ka insiam tan nghal a.
.
Silas Bikovic office ka thlen chuan dar 10 minute 10 in a la ri lo. A office bik ka pan ding nghal a, kan pahnih chauh inhmu tur kan nih chuan a office bikah kan tifel mai thin reng reng bawk.
.
Elevator a inhawng a, ka hmaa Argyros Yaman lo ding ka hmuh thut chuan ka phu deuh zawk. Pangngai taka lan tumin ka nui lui sak a. Ka thinphu nghal dawt dawt chu ka duh aiin a ri ring.
.
Kal chhuah mai nachang hre lovin ka en ren rawn a, sunglass dum a vuah vangin a mitmeng ka hmu thei lo. Min hmu lo niawm tak hian a ding a, min en lo niin ka hria. Ka bula ding hmeichhiain a aw a then kharh riah chuan ka harhchhuak zawk. Ka pen chhuak ta vat a. Ka chhuah rual chiahin Mr. Yaman chu Elevator-ah a lut thung. Min hre ngai lo ang hmiahin a awm anih chu_! Pawi hrep lo. Engvangin nge ka biak bik ang? Min hre lo anga a awm duh a nih chuan kei pawhin ka thei ve tho alawm!
.
Dak vah chungin Silas office pan chuan ka kal ve ta hmak. Sawifiah theih ni si lo hian ka lungawi lo lutuk tak zet!
.
Comments
Post a Comment