GABO YAMAN - 3

GABO YAMAN
CHAPTER – 3
Thantei_LauraSean
.
An awmna lai chu ka pan a, an bula ka din chuan an lam chu titawpin min en dun ha a. A thiannu chu Mia bengbulah kun hnaiin engemaw a sawi hnuah nui rah rah chung hian min en in a kalsawn a, enzui lovin Mia hmel chu ka en thung.
.
“Kan inchibai nawn dawn em?” ti chungin a nui sak a, ahma aia chiangin a mitmeng chu ka en thei ta.
.
“Nichin lawk khan min hre ngai miah lo angin i awm a, tun mai khan ahma pawhin min lo hresa tih ka hre thei.” ka ti duah. A thiannu chezia thup tum nei si khan a tilang chiang vek a ni. Awlsam taka bum mai theih ka ni lo.
.
Ka thusawi chu a bengrawngah a lut lem lo  niawm fahran hian a intur ken chu lem zauhin a mit tizim ser ser chung hian min en a.
.
“Ni maithei! Ni lo maithei bawk!” pawisawi lo zet hian a nui leh seih a.  “Ka lo hresa che emaw hresa lo che emaw pawh ni ila thil pawi a awm hleinem tiraw? Tunlai i thiltih a tluang maw?”
.
“Enge ka tih?” chik zetin ka en a. He hmeichhia hian min hria, eng thil nge ka tih thin pawh a hre ngei ang.
.
“Um_i thiltih. Ka hre ber lo. Eng pawh a nimai.” A mitmu a tiche a, a hmui a tisawi zeuh a. “Zawhna dik lo ka zawt che niin ka inhria. Engahmah ngai suh. Min lo hrethiam lawk_” tih leh kal sawn tuma pen a rual a. A banah ka lo vuan vat.
.
“I hriat duh tak chu min zawt thei alawm.” Thutak hmel thei ang berin ka lang lui tlat a, he hmeichhia hian min ngaihven a ang tlat. A hmaa a nungchang inringtawk tak ang khan a awm tawh miah lo.
.
“Eng maw i sawi?” ka thusawi chu a awih thei lo anih hmel. A lu a thing nar nar a, nui ni chiah si lo hian a hmui a che dar dar a. Engemaw sawi tumin a ang ziau a, a  ngawi leh ta rih.
“Ka thusawi kha i ngai kawi niin ka hria. I thiltih ah i tluang em tih ka zawt mai che a nia.” A ngaihna hriat loh hmel tak hian a dar a tiche a, “Zawhna dik lo ka sawi palh anih kha. Ka sawi tawh ang khan theihnghilh daih rawh. Engmah ka zawt lo che.  Tichuan a tha em?” thle deuh hain min ngaichang a.
.
Ka tumlawk ni hauh lo thil tihchakna ka nei ta tlat! A bek bulah thle hnaiin ka rimtui hman rim chu ka hip vang vang a, a che eih lo.
.
“Enge kha kha?” a ti sep.
.
“Ka rim ngainat tak kha hriat nawn ka duh mai mai mawle!” ka tiliam puat. Ka chet dan leh ka tawngkam chu ngai pawimawh lo ang  taka langin engtin nge a awm ka  ngaichang a, a hmai sen ap ap chu ka hmuh hmaih hek lo.
.
“I thusawi chu enge anih i  ngaihtuah  miah lo. Ka kal ange.”
.
A ban ka vawnna chu phelhin a kal sawn a, a thiante bul a pan dawn nia ka ngaih laiin a ti ta hauh lo. A bag a la zet a, Silas bulah chuan eng emaw sawiin kawngka lam a pan ta tlat. Kawngka-a a kal chhuak lai chu ka en reng a, a hmanhmawh hmel viau.
.
A chhuah hnu chuan a thiante chu an phun ser ser a, bu  nghat nghat in reiloteah an nungchang pangngai in an lam zui lehnghal bawk bawk a. Thil awmzia ka man ta meuh lo. Ka thiantha an awm lo a, ka hmelhriat chhun Silas ber pawh chu mipa pakhat nen kal hrangin hmuh tur a awm zui lo. Helai hmuna ka kal chhan leh ka tihtur chu a zo ta rih anih ber hi.
.
Kar tawp chawlh hun a ral a, hnathawh tur tam takin min hmuak tih hre chungin kar thar bul ka hmang tan leh ta.
.
Mia Garcia chanchin ka hriat theih chin zawng chu ka hre kim khat ta bawk. Ama pualin tlereuh dawr lian tak ‘MG Jewels’ a nei a, Silas Bikovic nen hian an inpawh thuk hmel hle bawk. Tlereuh zuar anih chuan thil niawm reng anihna chin a awm. Chhungkhat hnai a nei anih pawhin langsarin an inpawh lo a ni ngei ang. Tu chanchin mah han hriat mai tur a awm lo. Mak ka tiru khawp mai. Ballevue ah amahin a cheng a, hmeichhe harhvang leh mahni inringtawk tak, huaisen tak leh mahnia ding thei a ni. Mipa a kawp kual viau a, rei tak a kawp ngai lo thung.
.
 Mipa a kawp kual viau thu ka chhiarlai hian ka nui suk. Silas Mansion-a kan inhmuh tuma a chezia atang kha chuan mipa ngam tak chu a nih hmel si loh kha mawle! Harhvang tak erawh a ni ang tih ka ring.
.
Thawhlehni tlai a ni a, ka hna ka zawh hnuah Beach House panin ka kal nghal a. Zuri nen kan inbiak pawh loh vangin enge a an hriat ka duh tawh reng reng bawk. BeacH House ka thlen chuan a lo reh thap a, kawngka hawngin in chhungah ka lut a. Eng thawm mah hriat tur a la awm lo. Choka ah ka lut a, engkim felfai thlapin a awm tih ka hmuh chuan kal chhuak lehin living room ka pan ta zawk a.
.
Rei ka thu hman lo. Pawn lamah thawm arawn awm a, zai rat rat chungin Zuri chu arawn pen lut a. Min hmuh chuan a phu deuh zawk.
.
“Oh! I lo thlenna a rei tawh em?” a sam pawr deuh phang chu tuaimam in a nui sang a. Ka en reng tih a hriat chuan a awm a nawm loh hmel ta deuh. “Um_ Tuipui kamah intithawveng turin ka chhuak a. In chhunga ka awm chawrh chawrh chuan ka a thei mai dawnin ka inhria a.. I lo kal dawn tih lo hrelawk ila chu eitur ka lo siam tur a nia.” A ti zung zung a.
.
“I tha tih ka hmua ka duhtawk e. Harsatna a awm em?”
.
“Awm lo e. Ar_ Mr. Yaman min ngaihsakna hi ka phu lo tak zet a ni. Ka lawm tak zet zet a nia.” A tinem thlap a. Helai hmuna khawhar taka a awm hi ka khawngaih ta hial mai.
.
“I duh chuan khawpui chhungah i awm thei ang__”
.
“Ni lo. Awm lo ila ka tan a tha rih zawk. Mahse, khawngaihin ilo kal zing deuh thei angem? Dik tak chuan.. a khawharthlak lutuk a..” a thusawi chu inthiam leh chiah lovin a hawi sawn a, “Mahse, a tul vang a nia, ka tuar thei lutuk. Thil tullo ka sawi anih hi..” nui lui hakin ka thutna bulah arawn thu a. A hmel atang chuan sawi duh a nei tih a lang.
.
“Um_ Mia chu i hmu ta em?” a ti sep a.
.
Ka hmu tih hriattir nan ka thle nghut ringawt.
.
“Enge a an? A tha em?”
.
“A that hmel. A that leh that loh chu ila ngaihven tho ani maw?” ka tih chuan a nui hul  hak.
.
“Ka duh emaw duh lo emaw ka unaunu a la ni tho a. Eng thil nge kan tih zel dawn le?” a tita daih a. Ngaihtuah uluk hmel tak hian a melh ngai a melh vang vang a, min rawn en leh chuan eng thil nge a ngaihtuah ang tih ka hrethiam ruai ruai.
.
“Hmanraw tha dang a awm lo.” Ti sapin enge ka ngaihtuah tih hriat tum niawm tak hian min en vang vang a.  “Tihnat ve kher ka duh hi ka diklo tih ka inhria. Mahse, a phu a ni__a phu..” a kut pahnihin a hmai a hup a, “Ka ngaihtuahna hi a kal dik thei tawh lo. Ka sawi loh tur tur ka sawi leh ta anih kha. Mas chu la awm se hetiang hian ka awm miah lo tur a nia. Min hrethiam rawh. Tuna ka sawi kha chu ka rilru buai vanga sawi ka ni ngei ang.. Keimah pawh hi ka inhrethiam tawh lo.”
.
“I chunga a thiltih phu tawk a hmuh ve ngei chu a dik lohna a awm lo.” Ka rilru dik tak sawi ka ni. Ka farnu anga ka ngaih ve tak vang nge a natna hi ka natna ang maiin ka ngai tlat a ni.
.
Thawk la hakin ka lamah arawn awn hnai a, “A chak lohna laia kan bei anih loh chuan  a chungah engmah a thleng lovang. I hmuh tawh chuan i hria ang a, hmeichhe nep tak a ni hauh lo a nia.” Ngaihsan hmel tak hian a unaunu hrawn chanchin chu a sawi  nimai hian ka hria.
.
“A chak lohna chu ka hria tih sawi ila mak iti angem?”
.
“Ti lovang. Mi zawng zawngin an hria alawm.” A ngawi leh vang vang a. “Ka unaunu chungchang hetianga ka sawi hi ka ring ngai miah lo. Ka tuar theih tawh ngang loh vang a ni ngei ang. Ka tuar let veleh angem le?” a ti niap niap a.
.
“I ngaihtuah nasa lutuk anih kha. Hahdam rawh.”
.
Engemaw chen hnuah Beach house chu ka chhuahsan a, tunah chuan Jose duhthusam ka tih hlawhtlin sak theih nan leh a farnu, enkawl tura min chah hi ka enkawl a, a chanvo dik tak ka chantir theih nan ka tihtur ka ti tan tawh ang. Thil harsa em em tur engmah a awm lo. Ka duh reng vang ni lo mah se hnaih ka tum ber tur hmeichhia ka ngaihtuah hian a phurawm ru viau tho mai. Reilote chhung infiamna nuam tak nei turah ka inngai mai a. Ka thiltih tibuai thei an awm loh lai a ni lehzel bawk. Hmeichhe kawplai nei chu ni ila he thil hi ka thlang kher lovang.
.
Ni a liam bek bek a, Mia Garcia ka la hmu leh lo. Rang taka ka hmuh leh vat chuan a tha lo zawk dawna hriatna ka neih vangin ka la pan lo mai chauh a ni. Min hnar lovang tih hrethiam turin kan inhmuh hmasak bera a nungchang kha ka duh tawk viau bawk. Hmeichhia, neih awlsam lo tak anga inlantir thiam ang chi hi chu ka lo tawng nual tawh. A lan dan ang hi a lo ni  ngai lo.
.
Kar tawp chawlh hun a lo thleng a, ka inpeih ta!
.

.
Tlai lam a ni a, MG Jewels kawtah ka Car chu din tirin hmanhmawh lem lo tak hian Car atangin ka chhuak a. Dawr chhungah lutin ka hawi kual a, lunghlu man to tak tak lakkhawm ho chu a theuneu lo hle tih ka hmuh mai hian ka hre thei.
.
“Ka pu, eng hi nge i duh ang? Lo en__” ka hmaa hmeichhia chu ka hmel min hmuh chian chuan a ngawi chawt. A aw a thian kharh kharh a, ngil lehzuala ding chung hian , “Eng hi nge i duh ang le? I enkual dawn em?” a ti tha leh a. Hnathawk ve dang pahnih la awmte pawh chu min hmuh rualin an nungchang a danglam tih ka hre thei.
.
“Miss Garcia hmuh tumin ka lo kal a.”
.
“Oh! Ani chu a chhuak lawk a, a lo let leh tep tawh ang. Hetah hian thuin lo nghak rawh. In tur i duh em?” a ti leh zung zung a. An nungchang chu mak tih loh rual a ni lo. An za deuh sek niin ka hria. Thil hlu zuar thin chuan tunge ka nih an hai ngai lo reng a ni.
.
Hnathawk pakhat chu kal sawnin pindan dangah a lut ta daih a. An chezia chu mak ka ti telh telh. Zuri thu min hrilhte kha min ngaihtuah let tir bawk. Ka thu hriatsa nen hmehbel pawhin a inmil chho viau dawn anih hmel hi mawle!
.
Rei ka thu hman lo, kawngka atanga Mia Garcia lo penlut ka hmuh chuan ka thutna atanga  thovin ka pan a. Min hmuh chuan meng phawk deuh hra hian a ding chawt a. A awm dan chu rang taka inthunun vatin min rawn pan a, pangngai tak hian a nui sak phawt.
.
“Kan inhmu leh chu mak ka ti hle mai.”
.
“Ka tan chuan a mak hran lo.”
.
“Eng maw?”
.
“Hmu tur chein ka lo kal. Hun i neih chuan zanriah kan kil dun ang chu tih ka lo ngaihtuah a.”
.
“Oh_” sawi tur a haihchham chiang kher mai. “I sawi awmzia chu ka hre lo.” A ti bah nak a. A beisei loh lutuk thu a hria tih a mitmeng atang chuan a lang chiang lutuk mah mah.
.
“Hun I neih chuan zan riah kan eidun thei angem?” Italian-a ka tih chuan la hamhaih deuh tak hian a nui hak. A dawra hnathawkte chuan min rawn ngaihven ru hle tih an thup hleithei lo.
.
“Kym_?” dawr ka luh tantirh a min lo betu kha a en a, ani chuan tawng lova a lu a thin nawk nawk hnuah a lu a bu ta zauh.
.
“Okay. Anih chuan ka hman anih chu.” Mia chuan min rawn en ta thung. A harsat vak ka ringlo sa reng a ni.
.
.
Min chhiarsak tute lawmthu ka hrilh vek che u..💗