GABO YAMAN - 1

GABO YAMAN
CHAPTER – 1
Thantei_LauraSean

13th JULY, 2004
ISTANBUL, TURKEY
.
Ka thil tumah hian ka chiang a, ngaih dan ni lo taka ka pa vei kual nghat nghat chu mit khap miah lovin ka en ngar a. Ka pa hian ka thil duh hi min pawmpui hauh lovang tih ka hre lawk. Mahse, keimah ngeiin a taka tawn ka duh vangin tuna ka thutlukna hi kar hnih liam ta khan ka siam fel a, eng ang pawhin min dodal se kal tlangpui ka tum ruh hle.
.

“Ngaithla teh! Ka fapa neihchhun i ni tih hi i theihnghilh a thiang lo. Engkim, kan neih zawng zawng hi i enkawl vek tur a ni tih i hria ang chu. He thutlukna i siam hma hian i nu hi vawikhat tal i ngaihtuah em?”
.
“Ka hria alawm, Baba..”
.
“A that chu. I mawhphurhna i hriat chuan tuna kan buaina hi a thleng lo angah ka  ngai ang.” Ngaihngam ta ang mai hian ka pa chu thaw halhin chair-ah a thu a, ka thil tum hi bansan mai ka tum lo tih hria se a hahdam hauh lo ang.
.
“Baba, naktuk ah hian ka kal ang.” Ka ti nghet charh a. Ka pa chu a meng kawk ni hian ka hria. Mitmeng nelawm loh zeta min enin a chek tlak tlak a.
.
“Gabriel Argyros Yaman!” inbengdaih tumin thawk a la a, a aw chu a la nem chuang lo hle. “Naupang! Ka duh dan hi i hnial kalh lui dawn anih chuan eng thil nge ka tihtheih i hria. Kum 17 chauh ila ni.. Kum 17!”
.
“Ka duhzawng ti thei turin ka upa tawh. Ka kalna tur hmun pawh i ta tho a ni alawm. Tawrhchhel ka zir a ni bawk anga.” Ka thusawi vang chu nge ka hre lo, ka pa chu a nui suk. A nuih dan atangin lawm vanga  nui a  ni lo tih erawh ka hria.
.
“Eng thilin nge sawlai hmuna kal chakna saw neihtir che? Ka thu tawp chu *I kal lovang* tih hi a ni reng dawn. A chiang em!”
.
“Baba, ka kal ngei ang.”
.
Ka pa chuan a mit tizimin uluk tak hian min en vang vang a, amah ang chiaha luhlul leh tihmawh ka ni tih hi a hrethiam thuai in ka ring.
.
“I kal lui anih chuan ka hming hi hman tangkai tum hauh suh. I ngaihtuah phak bak hreawmna i tuar thei reng tih hre bawk rawh.” Atih chuan tawngka in ka chhang lo. Ka bu nghat ringawt. Ni e, ka pa hming ka sawiri anih chuan ka duh ang thil ka hre thei dawn lo mai ni lovin kal ka chak chhan ber, ka thiltum ka hlawhchham nghal a ni ang.
.
“A tawk e! Sawitur ka nei tawh lo.”
.
Ka pa chu a thutna atangin a tho a, pindan thim ruih atang chuan ngaih dan ni lo leh lungawi lo takin a kal chhuak a. Ka pa ka ti lungawi lo hle tih ka ngaihtuah chuan nuam ka ti bik lo. Mahse ka chhungrila ka tih chak em em thil hi tih puitlin ngei erawh ka duh si a ni. Hun nuam leh hahdam thlak tak ka hmang lovang tih ka ngaihtuah thiam a, thil harsa tak tak ka paltlang pawh a ngai ngei ang. Mahse chung thil chuan keimahah hian chona nasa tak an siam zawk tlat si a ni. Khawvel dangah eng thil nge thleng tih keimah ngeiin a taka tawn ngei ka chakna hian sawifiah thiam loh khawpa nasa in min nawr tlat.
.
Ka hriat theih tirh atangin mi nawlpui bulah ka cheng ngai lo va, naupang pangngai angin school ka kal hek lo. Ka thiltih chak nazawng ka ti ngai lo va, ka pa rorelna hnuaiah he kan in lian tak, engkim awmna hmunah hian ka awm chawt a ni ber mai. Min zirtirtu thu ka awih a, tha taka ka zirlai ka hlenchhuah theih avangin ka pa hian lawmman min pe fo a, min hmangaih em em tih pawh ka hria. Mahse, mipa ka ni a, mipa ka nih anga tihchak tam tak ka neihte hi ka tih ve ngei a ngai bawk. Ka upat hunah ‘khang thilte kha ka lo ti ta lo a ni’ tih emaw, ka chak zawng tak ti lo leh eng ang nge anih hre ngai lo tura ka inngaih hian a dik thei tlat lo. 
.                           
.
23rd JULY.2004
AL YAMAN GOLD MINE – SAUDI ARABIA
.

.
Boruak a lum hle! Istanbul aiin helai hmun hi a la lum lehzual. Al Yaman Gold Mine a thil hlu laih chhuah 50% hi ka pa share a ni a, a bak 50% dang chu tlem te tein mi chi hrang hrangin an insem darh ve a ni. He rangkachak laih chhuahna khur hi khawvel pumah hriat a hlawh hle a, hnathawk pawh an tam khawp mai. Tunah chuan hnathawk zingah ka tel ve dawn tak avangin ‘kan’ tiin ka sawi thei ang chu. Saudi Arabia-a khawpui lian ber Riyadh atanga chhim thlang lam 200km –a hlaah a awm a, mit-a kan hmuh theih chin zawng chu he hmun (Al Yaman) hian a huam vek a ni. A zau khawp mai.
.
 Ka thlen phat atang khan ka lo ngaihtuah lawk aiin a hreawm dawn tih ka hrethiam nghal mai a, mahse helai hmun ka pan hi samzai tiat pawhin ka inchhir lo.  Ka insehruh sauh sauh zawk.
.
Ka nu leh pa hnen atangin engmah ka hre zui lo va, min ngaihtuah hle ang tih ka ring. Mahse, ka pa pawmpui loh thil ti ka nih vang leh ka duh thu ngeia pan ka nih vangin min ngaihven ka beisei hauh lo. Duh duh nei thei, nuamsa taka khawvel chen thei siin helai hmun pan ka duh tlat nachhan hi kei pawhin ka hrethiam chiang fak bik lo va. Thil thar tem chakna, ka la tih ngai loh tih theihna chance ka nei ni a ka inhriat  vangin ka hlim ve hle a. Eng thil nge lo thleng zel dawn ka ngaihtuah lo a, ka nunah thil pawimawh tak pakhat, ka hriatreng tawh tur thlenna hmun ani dawn tih phei chu ngaihtuah pha lo tak ka ni.
.
Kar khat chhung chu rim takin hna ka thawk ve ta phawt a. A hahthlak tih piah lam a ni e. Hnathawhna hmun atanga kan awmna hmun ka thlen meuh chuan ka chau zal der thin.
.
Kan awmna hi hnathawk ho awmna tura siam bik in, pindan zau lo taka pindan thliah a ni a, vawiin hian ka pindan min tawmpuitu tur a lo thleng dawn tih min hrilh a, a ni chu America atanga lo kal tur a ni tih min hrilh bawk tak e.
.
Zan dar 9:30 velah ka pindan kawngka chu mi tuemaw hian arawn kik dat dat a. Kawngkhar ka va hawn chuan keimah ang rual vel tur mipa, sam buang thang mai leh mitmu pawl ram lo ding ka hmu a. Ka hmel min hmuh chuan a der ni hauh lo hian a nui ta sak a.
.
“Jose Mas” a kut chu ka vawn turin arawn phar chhuak a, amah chu chik taka enin a kut chu ka vuan zauh a. Misual tak a nih loh hmel. Chhun lamah ka chauh em vangin khawsak phung tlem a zawng ka hrilh hnuah ka khumah ka mutsan a, engtin nge a awmzui tak ka hre lo. Ka muhil lehnghal hmiah.
.
Thla khat a ral leh ta, Jose nen chuan thiantha kan ni ta ber a. A chanchin erawh tam tak min hrilh lo. Kei pawhin chuti bawk.  Invenna chin kan nei ve ve niin ka hria. Chuti chung chuan kan mizia a inmil a, inkawmngeih tak kan ni.
.
“Vawiin ah thil thawn chhuahna hmunah ka kal dawn a, thil min chah duh i nei em?”
A thawmhnaw hak thlak mawlh mawlh paha min betu Jose chu ka en zawk chauh.
.
“Nei lo ve. I rei dawn em?”
.
“Rei lovang. Zanin kan hnathawh tur vang khan ka thil thawn tur hi ka dah anga ka lo kir lehnghal ang.” a ti ve mai a.
.
Darkar li hnuah Jose chu lo letin Mine kan pan a, kan hmanhmawh lem lo. Kan hna tan tura beisei kan nih hun thlen hma 20 minutes velah kan thleng fel der a. Kan hnathawhna thawmhnaw kan inbel zung zung a, ka phur khawp mai. Zanin hian helai hmun ka awm china thil hlu laih chhuah tawh zawng zawng let thum zeta tam kan hmuh chhuah kan inbeisei vanga phur ru em em ka ni. Jose erawh a kalna hmun atanga a lo let hnu khan a nui hmel ka la hmu hauh lo a, thil vei nghet tak a nei nia hriatna ka nei nain engmah ka zawt lo thung.
.
Ngawi renga inzuiin lei hnuai thuk takah leihlawn hmangin kan chhuk a, 20 minutes vel zet kan chhuk hnuah kan tum hmun kan thleng ta. Hruizen hmanga kan inkhai thla mai lo chu mak ka tiru deuh a, kan hotu pakhat ka zawt hial reng a ni. A chhiat thu min hrilh chuan engmah ka zawt chhunzawm ta lo. Chhun lamah khan helai hmun hi an verh thar a, min kaihruaitu berin kan thil beisei leh kan tih dan tur tlangpui a sawi nawn hnuah hna kan thawk tan a. Kan phur tlang khawp mai.
.
Ngaihtuah em em nei lova ka hmabak ka thawh mawlh mawlh lai in thawklehkhatah ka piah lawk atang chuan thawm ri mak tak arawn ri huk a. Dawn a  awm lo, mangang rak thawt leh na tuar thawm ri ka hre zui hmiah.
Hmanhmawh takin thawm lo chhuahna lam chu ka pan nghal ruak ruak a, eng thil chiah nge thleng hriat thiam a har khawp mai. Kan awmna lei verh chhunga light kan lak luh chu phe zuk zukin a thi zui hmiah bawk. Ka lukhuma (helmet)  light awm rinchhan chungin ka kal zel a, ka thil va hmuh chuan min thawng nasa tak zet zet.
.
“Jose! Jose!” ka au thawt thawt a, ka bulah ka thian dangte tumah an lo la thleng lo. Thawm hi an hre ve lo pawh a ni maithei.
.
“Argyros_hetah_hetah_”
.
Thei leh thei lova Jose tawngri chu hriat a hreawm khawp mai.
.
“Helamah hian lo kal teh u. Wyat… Colt..” ka rilrua hming lo lang hmasa apiang ka ko tawp. Mi dang thawm hriattur reng reng  a awm lo. “Jose, min lo nghak rawh, ka lo hruai chhuak ang che.”
.
“Ni lo__eng_mah tihtheih a awm lo. Argyros_”
.
Jose awmna chu a hma aia chiangin ka hmu thei ta a, a sawi ang chiahin engmah tih theih ka nei lo. A taksa a kawng chin hnuailam zawng chu leiin a chhilhh vek a, thawk harsa a ti hle bawk. A lan dan atang pawh hian a taksa hnuailam chu lung leh lei inchawhpawlh chuan a chilh chhe hneh hle ang.
.
“Lo _hnai __teh_”
.
Ka kun a, Jose chu a thaw tawk tawk chauh tawh.
.
“Thianpa_ ka farnu, ka farnu__neih chhun Mi_Mi_Le__LeBoeuf”
.
“LeBoeuf__Sawi rawh, sawi rawh_” ka ti sap a. Jose chu biak zui theih a ni ta lo! A zawi hnak a, khawvel a chhuahsan ta tih ka hria!
.
 LeBoeuf! Ka theihnghilh tawh hauh lovang le!
.

20th APRIL 2018
YAMAN CO.
SEATTLE, WASHINGTON
.
*Kum 31 a upa Argyros Yaman, YAMAN CO. neitu hian a duh a hmu ta em ni?*
.
Leh ringawt hian! Chanchinbu chu dawhkanah ka theh thla a. Ka tan chhiar zui tlak a ni lo.
.
Intercom on-in Bryce ka bia a, vawiin atana ka tihtur a zo ta rih. Kar tluanin tlereuh siam thar pho chhuahna hmunah ka kal kual a, zantin party kal a ngai bawk a, a ninawm tih hian a sawifiah zo lo e. Ka nu leh pa ten kan chhungkaw sumdawnna kaihhnawih thil reng reng ah chawlh an lak tak avangin engkim ah keimah vek ka ni a, chawlhna hun reng reng ka nei lo.
.
“I haw thei ang. Bryce.”
.
“Ka lawm e, sir.”
.
Bryce hi kum 36 a upa a ni a, a hna hi nuam ati hle. Ka pa thurawn min pek zingah secretary atana mipa ka chhawr hi a fuh ber mai awm e.
.
Office ka chhuahsan a, Friday tlai anih bawk vangin ka thawveng deuh huai ni hian ka inhria. Kartawp chawlh chhung chu khawvel dangah ka cheng thei ang. Hmanhmawh em em lovin Beach House lam panin motor ka khalh a, ka kamis kilhna chu ka phelh thawl pah mawlh mawlh bawk a. Nitin suit hak hi ka nin ber pakhat a ni. Sawi thui lovang!
.
.

SEATTLE BEACH HOUSE
.

Beach house ka thleng a, ka thawmhnaw ka thlak hnuah in tur la in pawnah ka chhuak lehnghal a. Boruak sa hulh hulh a ziaawm tawh a, tuipui fawn ri hlup hlup bak thawm hriat tur a awm lo. Khawpuia chen nuam ti zawk mah ila boruak muanawm tak hi ka thlahlel zing ve ta khawp mai.
.
Darkar li hnuah zanriah ei zovin pawnah bawk ka chhuak a, khua a la thim chiang lo. Tuipui kamah kal in tuipui cham put mai chu ka en a. Ka mitthlaa Jose hmel rawn lang zawk vang chuan ka mit ka chhing sawk.
.
Kum a liam nual tawh nain kha thil kha tun maia thleng angin ka la hrechiang a ni. Jose thih atanga ni 5 velah ka pa hmel ka hmu hlawl a. Al Yaman ah khan a lo kal ka beisei hauh lo anih kha. Min hmuh rualin min kuah thlawp a, ka pa meuh a mittui a tla tih ka hmuh khan ka zui haw lo thei ta lo a ni. Jose thu min chah pawh ka hrereng a, Al Yaman ka chhuahsan hnuah a thlan pawh vawi tam ka tlawh a, tun hnaiah hian Al Yaman-a kalna hun ka neih tak rih loh avangin thla 7 zet chu ka tlawh tawh lo thung. A hunlai khan  a chhungkhat hnai tumahin an rawn ngaihven lo a, Al Yaman-ah kan phum ta a nih kha.
.

“Tun thlengin i farnu chu ka la hmu lo. Min ngaidam ang che.” ka ngaihtuahna kawmin ka kal zel a, ka kalna chin ka en meuh chuan ka lo kal thui hman fe mai. Beach house pana let tumin ka inher a, muangchangin ka kal let a.
.
Thui ka la kal hman lo, tui chungah chuan thil pangngai chiah lo ka hmu ta tlat. Mihring a nih hmel tlat lehnghal! Rang takin tuiah ka zuang lut a, ka thil hmuh lam pan chuan ka hleuh phei a. A bul ka thlen chuan a rem hmasa berah ka man chawt a. Mihring chu a lo ni ngei e.
.

Tui vawt lutuk lo mahse a taksa ka deuh chuan a lum tih ka hre thei. Hmanhmawh takin vaukam lamah ka hleuhpui a.

Vau kamah chuan muttir in a thawk leh thawk loh ka endik a, a thaw tih ka hriat chuan ka thaw hawk.

“I harh em nula?”

Muangchanga che talh talhin a khuh kharh kharh a, muangchang bawk hian arawn meng a.

“Khawi_khawiah nge ka awm?” a tawng zawi lutuk a, a thusawi chu ka ngaihruat chawp a ni ber.

“Hahdam rawh, I tha leh mai ang.”

Dim takin ka tung tho a, a hawiher atang chuan a rilru a la harh chiang chiah lo  niin a lang.

“Khawiah nge ka awm?” a ti leh sep a.

“Seattle_ Beach House fal takah i awm mek. Engtin nge helaiah hian ilo awm theih zawk?” ka zawhna chu a hun chiah lo tih ka hre tho nain tun ang hunah, helai hmun fal takah hmeichhia tuia tla, la thi bawk si lo hmuh hi a mak ve thawkhat! Thi se ka tihna ni lovin, nungdama a awm hi a mak ka tih vang a ni zawk mah ang chu.
.
“Ka hre lo. Khawngaihin min kuah thei em? Ka hlau lutuk.” Min rawn kuah a, a thinphu dawt dawt chu ka hre thei. Min kuah vanga a thlamuang anih chuan pawi tihna ka nei hran lo, hnem tumin ka kuah ve mai bawk a.
.
30 minutes vel hnuah chuan Beach house lan theihna kan kal thleng a, muangchangin kan inchhawm bek bek zel a. Pawm a kalpui mai ka tumin a duh bik der lo va, hlauthawng tawh sa tih hlauh belh ka duh loh vang chauhin dawhthei takin ka kalpui ta zel zawk a ni.
.
In chhung kan thlen chuan chau tak hian chair-ah a thu awn a, a thawmhnaw hak tur pe a ka let leh chuan a lo muhil der tawh. A thawmhnaw hak huh chunga mutthilh chu a thalo zawk tih ka hriat vangin ka kaitho a, a intur ka laksak chhunga lo inthlak turin ka hrilh a. A hmel enin mahnia inthlak thei turin a ngaihtuahna a fim tawh ang tih ka ring.
.
In tur kenga ka let leh chuan ngaihtuah ding tak hmelpu in a lo thu ngil at a, a bulah thu a ka aw ka then kharh ri ah chuan a phu deuh zawk.
.
“Ka lawm e.” ti sepin in tur chu a la a, a en ngai a en leh nghal ngar ngar a.
.
“Min tanpui thei angem?” tia min rawn en chuan a  thusawi tum ka hrethiam ta chiah lo. “A ni khan min thah a tum a ni. Min tanpui hram rawh.” A tizui leh sep sep a. Tanpui mamawh tak tak hmel a tilang ta bawk.
.
“I hming min hrilh thei em?” ka ti ta thung. Vawikhat inhmuh naah hming pawh hriat hmaa tanpui tura inngen nghal ngawt mai hi thil pangngai tak a ni lo. Tin, tunge ka nih a hresa a nih phei chuan ka tan a him lo thei ang.
.
“Ka tihpalh. Ka lo hmanhmawh mah mah a ni. Zuri_ Zuri LeBoeuf! Tunge i nih min hrilh ve thei angem?”

A hming a sawi rual chuan Al Yaman, Jose thihna hmuna thil thleng zawng zawng kha ka mitthlaah a rawn lang nghal chuai chuai a! Tuna ka hmaa hmeichhe awm, ka tanpuina mamawhtu hi ka thiantha tia ka sawi ve theih awmchhun Jose farnu kha a lo nih hlauh chuan engvang pawhin ka tanpui ngei ang. Leh lawk! Tunah khan ka hming min zawt tak e! He hmeichhe khawngaihthlak tak hian tunge ka nih a hre lo niin a lang.

“Argyros tiin min ko thei ang.”

“Oh! Aw le. Ka lawm e.” a ti leh sap. Ka hming chuan a tan awmzia a nei hran lo tih ka en vang vang hnu chuan ka chiang a, ka inthlahdul ve ta. A chanchin ngaithla tura inpeih rilruin amah hmachhawn zawng chuan ka thu rem sauh sauh a.
.
.
Min chhiarsak tute rinchhan in ka han dah tan ve leh ngawt mai ange aw. Ka blog hi chinfel ngai neuh neuh a awm vangin Wednesday atang khan ka tawlh  ka tawlh tawh a (tunah pawh a la fel chuang lo ta…) Ka lo sawilawk tawh si vangin ka rawn dah tan ve ta hrim hrim a ni e. Min lo chhiarsak theuh turin ka sawm vek che u aw.
TUESDAY – THURSDAY  - SATURDAY ah te update zel ka tum e.