GABO YAMAN - 10

GABO YAMAN
CHAPTER – 10
Thantei_LauraSean
.
Ni hnih a ral a, Mia ka la be pawp thei chuang lo. Ka rinhlelhna a zual zel bawk. Kar khat chhung tuma hriat lohna hmuna a kal hian chhan tha tak a nei ngei ang. Eng thil chiah nge a tih? Ka rilru ah zawhna a tam lutuk. Ka dawhkana lehkha inpharh nuai chu a ziak hmu chuang miah lovin ka en reng a. Hnathawh tur ka  ngah tehlul nen ka thawk sawt thei der lo.
.
Karleh hian tlereuh siam chhuah thar phochhuah anih dawn vangin kan inbuatsaih a ngai nasa hle a, a pawimawh zia pawh ka hria. Chutiang a ni chung chuan hna lamin ka rilru a luah thei lo. Ka phone dawhkana ka dah nghawr dar dar chuan ka ngaihtuahna atangin min kai harh zawk a. Zuri_
.
“Eng thil nge ni ta?” ka ti nghal thawr. Zuri’n min rawn biak tawh chuan thu thar engemaw a awm ziah thin.
.
“Thil engemaw entir tur che ka nei a. Engtikah nge kan inhmuh theih ang.”
.
“Tlaiah ka lo kal ang.”
.
“Aw le.”
.
Ngaihtuah luih tum chungin file ka enfel ta ngat ngat. Tlai dar 4 a rik chuan office chhuahsan in Zuri chenna hmun ka pan tlang nghal a. Ka thlen chuan ni dang ang bawkin a lo reh leh thiap mai. In chhungah ka lut a, in ngaihtuah muk hmel tak hian living room ah thuin a malchungah file niawm tak a awm bawk.
.
Tawng lovin a ep chiah ah ka thu a, a malchunga  file chu ngawirengin min pe ve nghal mai bawk a.
.
“Eng thil nge?”
.
“En la i hre mai ang.”
.
File chu ka hawng a, uluk zet hian ka en a. Mak takin he thil hian min thawng lem lo! Rinhlelhna ka lo neih nasat tawh vang pawh a niang. Zuri chanpual Mia hminga thlakna document chi thum zet chu hmaih palh neih hlau takin ka chhiar chhuak a.
.
“Heihi engtika i neih nge? Thil neih awlsam a ni lo tih ka hria.”
.
“A dik alawm. Neih a harsa khawp mai. A hma zawng zawng khan Mia hi  beihlet ka tum ngai lo a, mahse tunah chuan ka chunga a thiltih zawng zawng hi a lutuk ta a ni.Ka ngawih bopui thei tawh lo. Kei aiin i hrechiang zawk ang chu_Misual vau beh loh chu an pawng tual tual tih hi_.”
.
Zuri hmel chu ka en a, a thusawi chu a ti tak zet tih a mitmeng chuan a tilang chiang hle.
.
“Hemi hmang hian eng thil nge i tih dawn? Min entir chhan hi enge?” Engvanga min entir nge anih ka hria. Chuti chung chuan ama sawi ngei hriat ka duh. Tuna ka hmuh theih chin leh ka chhui chin atanga a lan dan chuan Zuri hian a chunga thil thlengte hi a tuar thlawn rei tawh hle zawk a ni.
.
“I hriat ka ring. Keimah chauh chuan Mia bei tur hian ka chak tawk lo. Ka chunga a thiltih zawng zawngte kha ka rilru a hahdam ve theih nan beihlet ka duh mai chauh a ni. Nangmahah ka rinna nghat lo ni ila he thil hi ka entir hauh lovang che.” A ngawi vang vang a, a hmel chu ka lo en reng thung.
.
“Ka nunah mi rintawk pakhat chiah ka nei thin. Jude hi a nia. Tunah chuan mi rintawk pakhat ka neih belh leh thei ta anih hi. Ka nun hreawm tak hi ka hne tawh tak zet a, zalen taka ka awm ve theih nan min rapbet tlattu hi min lakkian sak thei ngem? Mia hi thil la serious zen zen lo a ni tih ka hrechiang a, nang chuan a rilru sak tak hi i hneh thei ngei ang tih ka hria.”
.
“Thil pakhat ka la sawi lo. Mia hi thil dang zawng zawngah chuan  i hneh thei lovang.”
.
“I sawi awmzia chu enge?” ka ti sup. Zuri hmel chu ka hawisan lo hrim hrim. A chhungrila rei tak hreawm em em a a lo up beh tawh te chu a baw zawih zawih nimai hian ka lo hmu. A hmel chuan a chhungril hreawmnate chu a tilang chiang em bawk a ni.
.
“Thil pakhat la entir tur che ka nei.” Tih pahin a hnunglam atangin envelope hlai help hlawp arawn phawrh a.
.
“A chhunga thil awm kha en rawh.”
.
Envelope chhunga thil awm chu phawrhin ka en a, hei zet chuan min thawng ta!
.
“Tunah Mia i be pawp thei lo em? Tuman an be pawp thei lovang. A chhan chu kha hmunah khan kum tin a kal ziah_ Kum tin mai a ni lo..” a nui hak a, a nui ri chu thil tenawm tak ngaihtuah chunga nui ri a ni. “Mipa leh hmeichhe puitling hmun fala awm, inlaichinna nei lo, thian ngawt ni lo bawk chuan eng thil nge an tih thin? Puitling chuan kan hre vek ang chu.”
.
“A tawk e.”
.
A chhan ka hre lo, a thusawi chuan ka chhungril ah hian min tham tlat. A chhan ka hre lo maw? Mi tha a ni lo tih hrelawk chunga hnaih ka ni chungin Mia hian ka rilru a lo luah reng tawh tih ka hriatchhuahna chuan min thawng na tak zet zet a ni!
.
“I tha em?” Zuri chu ka bulah arawn thu hnai a, ka thil ken lai chu min lak sakin envelope atang bawk chuan pendrive a phawrh a.
.
“Hetah hian fiahna dang a la awm bawk. Nangmahin en la i ngaih dan i siam chauh dawn nia. Min tanpui turin ka ngen ngei che a, mahse phuba lakna hmanrua atana hmang che ka ni lo tih i hriat theih nan. Ka thu hrilh zawng zawng che hi Mia i huat theih nana sawi ka ni hek lo. Thudik hria la, ka dikna chanvo min humhim sak turin ka ngen chauh che a ni. I tihtur leh tih loh tur sawi phak ka nih loh mai bakah sawi ngam tur pawh ka ni lo a. Mahse, khawngaihin ka dik a ni tih hi min hriatsak hram rawh. Mia hi i hnaih tan tih ka hria a, a lakah eng rilru nge i put erawh ka hre lo. Ka unaupa neihchhun thian tha awmchhun i nih vangin a lakah hian inven dan i thiam ka duh em em bawk a.” nui hakin thawk a la a, inthiam lo nui a ang.
.
“Ka sawi tam ta hle mai. I tan ninawm mai anih ka ring. Keimah ngei pawh hi ka mumal lo nuaih tawhin ka hria.” a tizui sap a.
.
Engmah ka sawi lo. Envelope chu ka la a, Zuri chenna hmun chu ka chhuahsan ta rih. Rilru mumal ka nei chiah pawhin ka hre lo.
.
Ka chenna hmun ka pan a, pendrive-ah hian eng thil nge awm tih a rang taka ka hriat a ngai. Min nawr tut tut a ni ber e. Ka awm dan hi ka duh dan a ni hek lo. Mia Garcia_ Tunah biak pawh theih lohin a awm a, a duhna hmunah nuam a lo tawl reng si tih ka hriat hian ka chhungril a che tlat a ni! ka duh thei lovang! Ka ngaina hek lo! Thinur zetin car steering wheel chu ka chum dawt a. Keimah leh keimah  dawt ka inhrilh tih ka hriatna hian ka thin a tiur! He thil hi keiman ka pan a, ka cho chhuah a ni. Ka bulah min duh tak anga awmin a nawmchenna a thlah chuang lo. Engvangin nge tunah mak ka tih lehsi? A tir atang khan Mia Garcia hi mi tha a ni lo tih hre chungin tum nei ranin ka hnaih ani lawm ni? Lo let rawh se. A tan hian eng thil chiah nge ka tih theih a hmu ve ang chu! Hnunglam atanga inbumna hi ka enliam ngai lo a, ka hma hunah pawh en liam hun ka nei dawn hek lo. Tunah hian Zuri tan ni lo, ka tan_ ka duh dan takin ka che ang.
.
In ka thleng a, ka pindanah lutin pendrive-a thil awm chu enge anih chiah hre turin Laptop ka on nghal a. Hei pawh ka beisei loh thil bawk a ni leh ta.
*
*
“Min thlah rawh_ Mia_Khawngaihin min thlah rawh!” Zuri chu mangang zetin a te tuar tuar a, Mia chuan a vuan nghet tawk anih hmel. Zuri chu a paih thlu hnawk a, video chu a fiah tawk lo nain Mia thinrimnaa khat hmel chu ka hmu chiang hle thung. Ka hriat tirh atang khan hetiang hmelpu hian ka la hmu hauh lo. Mi hlim thei tak ang chauh a ka laka a inlantir tlat thin vang a ni.
.
A sam a hui a, mitmeng huatnaa khat chungin Zuri chu a en a.
.
“Buaina min thlensak tawh lo turin ka hrilh nawn leh che. Nang hi ka nunah vawikhat pawh rawn lang tawh suh. I lo lang leh anih chuan pawisak ka nei lovang. I hrechiang em?”
.
“Engtin nge hetiang hi ka chungah i tih theih? Mia, ka unaunu neih chhun i ni a, ka hmangaih che tih pawh i hria. Engtin nge hetiang hi ka chungah i tih theih?” Zuri chu insum thei lova tap tih hriat tak hian a inhip hlawp hlawp a. Mia chu za lo zet leh kha zet hian a nui lui thung.
.
“Unaunu ka nei  ngai lo. Ngaithla rawh. Unaunu ka nei ngai lo. Ka unaunu i hek lo. I damchhungin chu thu chu theihnghilh suh!”
.
A dinna bul dawhkana bag chu lain a inher a, thil hriatchhuah nei niawm taka inher lehin  dawhkana paper awm chu Zuri chhuata tlu reng hmaah chuan a thehdarh a. Engemaw sawi leh a nei nain eng thu nge a sawi a hriat theih tawh loh thung. A taksa awm danah thinurna nasa tak la nei tih hriat tak hian pindan atang chuan a kal chhuak a. Video chu a tawp zui ta.
*
*
Video chu mak tiin vawi thum lai ka ennawn. Mia nungchang chu mak ka ti em a ni e! Tunah chuan tunge dika tunge dik lo tih ka hrechiang ta in ka hria.
.
Document leh file te chu ka dahtha a, he thil hian tangkai hun a la nei ngei ang.
.
Tha tho lo zet hian ka thawmhnaw ka phelh a, bathroom-ah lutin tuivawt zet chuan rei tawk tak ka inphuh tir a. Tui vawt tak chuan ka ngaihtuah bing mup mup chu a tikiang der lo lehnghal.
.
.
Ni a liam bek bek a, ka thinurna a nasa telh telh thung. Mia a la biak pawh theih loh reng bawk. Vawiin hi ni 6 a ni tawh a, Silas sawi kha a dik anih chuan naktuk ah Mia chu a kal bona hmun atangin a lo kir ang. Mi thar hlak a hmu dawn tih hi hrelawk lo se atan a tha zawk. Ka ngaihtuahna hi thunun ka duh, mahse ka thei lo!
.
7th SEPTEMBER
.
Ka duh vang ni hauh lovin ka rilru hian Mia a ngaichang tlat. Saturday anih vangin in ah ka awm a. Hun dang ang chu nise kartawp chawlh hmang turin hmun reh takah ka kal ngei ang. Mahse ka ti lo. Ka phone ka en chhen a, hun khawhralna tur ka zawng ruai bawk. Tlai dar 5 a pelh hnuah pawh Mia thawm hriattur a la awm chuang lo. Ani nuam tawl chuan min hre chang tawh hauh lovang chu mawle.
.
Rilru bet lo zetin movie ka en a, engemaw chen hnuah ka phone ri ka hriat chuan ka phu deuh zawk. Caller ID ka en a, Mia a ni tih ka hmuh chuan pick up mai lovin ka nghak hlek a.
.
“Hey.” ka ti sup ringawt.
.
“Gabo, i tha em?” min ngaihtuah niawm takin! Ri lo leh za hauh lovin ka nui suk.
.
“Khawiah nge i awm?” ka ti bung nghut a. Ka thin a ur tih ka thup thei lo.
.
“Ka in ka thleng chiah. I lo kal dawn em? Ka ngai che.”
.
“I chauh hmel hle mai.” ka tih chuan thawk a la ham ham a.
.
“A dik alawm. Ka lo nghak ang che.”
.
Ka chhanna nghak tawh lovin phone a off a, he hmeichhia hi Zuri sawi ang khan hriatthiam harsa tak chu a nih ngei hi. Kei min kawp siin nuam chenin a kalbo a, min biak veleh khan engmah sawi lova a kalbo vanga ka hriatthiamna min dil ka ring a ni. Mahse, a ti lo. Min ngaih thu sawiin min thlakhlelhna a tilang chuang miah lo. Kum 31 chhung hian hetiang hmeichhia hi ka la hre ngai lo reng reng!
.
In atanga chhuakin Mia chenna hmun ka pan a, a hmel hnai taka en a a mitmengah inthiam lohna a nei em tih hmuh ka duh em em. Hmeichhia vanga buai mipa! Ngaih dan ni lo zetin ka nui suk.
.
Mia in ka thlen chuan pawnlam atangin a eng pam a. Muangchang in kawngka ka pan. Kawngkhar arawn hawng a, a chau hmel ka hmuh chuan ka insehruh nghal pang. In chhunga ka pen luh fel rualin ka kawngah min kuah a, ka awmah a biang nghatin a maimitchhing  vang vang a.
.
“Ka ngai lutuk che.”
.
“Ka hria alawm.” Ka tih chuan a nui hak a.
.
“Min ngai ve miah lo tiraw?”
.
Tawngkaa chhang lovin a biang tawn tawnah ka vuan a, a hmel hi chiang taka hmuh phawt ka duh. Ka mitah min en a, ka tukhum samah na lo te a thamin min fawh tum hian min kuai a. Ni lo ve! Ka duh dan chauhin thil a thleng ang!
.
Ka inlakhran chuan a meng phar ak tih ka hria. Ka lo hnar a beisei lo tih a chiang bawk.
.
“I chauh hmel hle mai.” Ka tita daih a. A hmui no chek chu ka en reng thung.
.
“A dik alawm.” Lai deuh taka nui sakin ka kawnga min kuahna chu a thlah a. A kalsawn nghal bawk.
.
“I lo thu dawn em?” a ti sap a, a inlahrang nghal hmiah. Min fawp tur ka lo hnar kha ka tidik nge tidik lo tih pawh ka hre ta lo.
.
Chhang lovin a hnungah ka zui a, a living room-a thutna, mi pakhat chauh thut theihna ah chuan a thu a. A bula thu turin min duh lo tihna a ni. Chu chu keiin ka tum lo thung.
.

                     (MIA'S LIVING ROOM)
A thutna chair atang chuan ka pawm kang nawlh a, sofa pangngai ah thuin ka malchungah ka thutir a.
.
“Gabo_”
.
“Min ngai anih chuan i duh danin min khawih thei ang.” A biangah ka fawp a, a nuih dan atang chuan a la tim tih a hriat theih. Mize mak tak chu a ni.
.
“I duh loh kha.” ti chungin ka nghawngah min kuah chial a. Harh chhuak thut niawm tak hian ka malchung atang chuan a thu sawn a, chik takin min en ta.
.
“Tunah hian sawi ila a thain ka hria.”
“Eng thil  nge?”
.
A ngawih deuh vang vang hnuah muangchang hian min en a.
.
 “Gabo_ Ka hrethiam lo. I laka ka rilru awm dan hi ka hrethiam lo. Thudik tak sawi chuan_um” a ngawi leh ta daih. Eng thil chiah nge sawi a tum le?
.
“Eng thil nge?”
.
“Seattle Beach House-a thil thleng khan ka rilru a tibuai tak zet a ni. Reilote chhunga mihring hriatchian hi thil theih a ni lo tih chu ka hria a. I lakah hian ka beisei sang lutuk nge_ Khami zan tek a tlak zan khan_ Thim zingah khan ka che buai tih i hria tiraw? Mahse, i care miah lo anih kha. I hmel kha_ Hnaih tur che ka ni lo niin ka inhria.”
.
“Eng chiah nge sawi i tum?”
.
“Ngaihtuah dan pawh ka hre tawh lo. I tan engmah lo ka lo ni anih si chuan engatinge ka hnaih turin i awm?”
.
“Chutiang chuan engtin nge i ngaihtuah theih?” a sawi hi a dik! Zuri vanga hnaih niin ka inngai ngei alawm. A dik. A tirah khan Zuri vanga hnaih ka ni. Mahse, tunah hian ka hmaa hmeichhia hian a ngaihtuahna min hrilh mek a ni. Mak takin ka thinlung tak hian ka dawngsawng bawk. Ni lo. A mak lo. He hmeichhe nalh tak hian ka rilru a luah reng tawh zawk tih hi Zuri’n a chungchang thil thenkhat min pek zan khan ka hrechhuak daih tawh zawk anih kha!
.
“I tan engmah lo, ngaih pawimawh loh mihring ka lo ni anih chuan min bansan turin ka duh che.”
A mitmeng ka en a, a thutak zia hai rual a ni lo.
.
“Chutiang chuan engtin nge i ngaihtuah theih?” ka ti leh ngawt a. Kha zan ka ngaihtuah let khan Mia thusawi hi a dik a ni. Ka hmu reng a, Zuri thusawiin min hneh zawk vangin ka ngaihsak duh lo anih kha.
.
“Kha thil khan ka chhungrilah hian chian ngam lohna min neihtir a ni. Ka ngaihtuah_ Ka ngaihtuah nasa lutuk a_Ka__”
.
A mitmeng leh a hmel buai nak chu ka hmuh ka duh lo a, a sawi zawh hun nghak thei lovin a hmuiah ka fawp a. Ka chet dan chuan a thawng tih ka hria. Nghet takin ka kuah vang vang a. Tawngkaa chhan dan tur ka hriat loh vang leh sawimam dan tur a awm chuan loh vangin ka thiam angin ka che mai a ni. Tuna Mia bula awm Argyros Yaman rilru leh Seattle Beach House-a  Argyros Yaman rilru kha a inang tawh tlat lo!