WHAT I NEVER KNEW I ALWAYS WANTED (2017)

WHAT I NEVER KNEW I ALWAYS WANTED
.
By. Thantei_LauraSean
.
“Min lo nghak duh suh, minute 20 hnuah ka lo thleng ang.”
“Okayyy…”
Phone a off hmain Norah nui ri chu ka la hre pha tho mai.
.
Uluk zetin ka inchei a, ‘Pheikhawk tha hian thil tha a thlen thin’ tih ngaihdan mak zet ka neih hi ka sim dawn lo a nih hmel! Ka pheikhawk duh ber mai chu nui sakin ka bun a, ka inpeih fel hnu chuan rilru hmanhmawh angreng deuhin in ka chhuahsan a.
.
Lazarus Hotel-a kan pindan hauh ka thlen chuan an lo ri dup dup tawh.
#Love_Myself _ Hailee Steinfeld  sak ngei mai kha play-in an lo su nghawng nghawng a, min hmuh veleh Norah chuan phur mah mah tawh hian min rawn pan var a.
.
“Kan hla thulkhung I lo thlen hmain kan play anih hi.. Lo kal rawh..” a au lawng lawng a, ka thian-I hi a lo kai hman tawh anih hmel e… Music rem chuan a lam a, light eng tha vak lo hnuaia an lam naah chuan min pawt lutin zai chu a zawm zat zat mai.. Hlim awm pawh a ni e. Tun hun hi a hnaa a kaisan lawmna a ni a, a duh dan angin han lawm phawt mai teh se.
.
Ka’n lam pui nawk nawk a, ka riltam tawh bawk nen ka hah hma khawp mai. Lamna hmun atang chuan kalsawnin chair-ah ka thu a, ka phone nghawr dar dar chu ka bag atanga la chhuakin room atang chuan ka chhuak a.
.
“Aw. Pa..?” Eng thil tak ni ang maw?
“….Khawiah nge a awm?”
“I tawng ka hre tha thei lo.. Han sawi tha leh mai teh..”
“ I tawng ring lutuk.. Khawiah nge ka tarmit a awm..?”
A va buaithlak thin tak! A rawn tawng dan atang chuan a zawng leh fe tawh ang tih ka hre mai.. Ri lovin ka nui sak a.
.
“I lehkha chhiarna pindan ah khan a awm loh chuan in mutna pindan ah, I lukham sir..anih loh paw’n khum sir-a dawhkan ah khan a awm ang..” hmun dangah a dah ngai pawh a ni lova.. “Chuan..”
“Aw le.. Ka hmu e..”
Ka chhan leh hmain a phone a off nghal daih..Haihawt ah ka pa ka chhun lo hlauh hi thil lawmawm tak a ni. Keini pafa inbia hi chu ‘anih aw’ han tih thip thlep hi a awm vak ngai lo. A duh a sawi zawh hi chuan  a off vei hmak zel.. Ka nui zui sak a.
.
“Beng tha pangngai ngaihthlak atan chuan I tawng ring mah mah a nih kha.”
Ka bul maia mipa aw lo chhuahna lam chu ka en a, ka va hmuh mipa chu min bia awm pawhin a awm lo. Phone a hmang ve tho a niang ti dawn ila bang ngheng a dingin a kun deuh a, a kekawr ipte a zen daih bawk sia. A hmel ka hmuchiang thei lo. Suit pawlduk nalh zet hi mar thlapin a ha zuih a.. Ah.. ka rawng ngainat ber zinga pakhat anih vang chauha ka mit la chat a ni. A sam chu fai hmel zet hian a lang hnawng sar lehnghal a..Ho lutuk! Ka tawng rin leh rin loh chu ka thu thu! Ti rilru chungin kawngka ka hawng a, pindan ah chuan ka lut leh a, boruak pawh a hot ngaiin a la hot reng mai..
.
Ka hnung lamah min si deuhthawa lo ding thut chu tunge anih en tumin ka inher a, min rawn hnaih mah mah a ni. Tupawh nise mipa anih hrim hrim chuan min hnaih taka awm turin ka duh lo.
.
A suit hak atang chuan nichin lawka ka hmuh mipa kha a ni tih ka hre nghal mai. Hnai zeta min en chhuk runin hmui chip hian a nui suk a.. ‘Hmp..inla mi hip thei vel lutuk..’ ka ngaihtuahna chu ka hmelah alang a ni ngei ang, a nui hmel chu a reh nghal hmak! A dinna erawh a sawn lova, din sawn tum hmel pawh a pu lo. Norah nen hmelhriat tha kan neih zingah hetiang mipa an awm ngai ka hre lo. Mipa hmelhriat hi ka nei tam lo hrim hrim bawk a ni ber. Ka hriat ngai pawh ni lo mipa taksa si renga awm chu duh lovin ka kalsawn a, a nui suk hmel chu ka mitsirin ka va hmu leh hram pek. Hetiang mipa hi chu ka tana engkim tih huam leh ka engkim ni tur ang chi a ni lo. Nilo, chutiang mipa chu an awm lo.. Ka nghak ngailo a ni zawk. Ka thinlung kawngkhar hi nghet taka kalh thlap a ni e. Buaina  tur engmah a awm lo.!
.
Ka nun hi mipa, hmeichhiate rilru natna chiah thlen thei, insawi rinawm zut zut leh piangthar tha tak anga lang ngaihzawng kawp tun tun ching ho tan hmang ral tawh lo turin kum li liamta, kum 23-a upa ka nihlai khan ka intiam daih tawh. Ka intiam atang khan mar patin ka thutiam chu ka la kaltlangpui zel a ni. Mipa hi ka mamawh lo! An tello hian ka hlim zawk.. Pasal neih phei chu ka ngaihtuah peih lo hrim hrim. Ka intodelh a, ka mamawh tawk ka thawkchhuak a, buaina tur dang ka nei lo. Mipa rinawmlo ho hian khawvel ah hian buaina chiah an thlen! Mipa tha leh rinawm hi pakhatmah an piang lo’ tih hi ka vawng nghet tlat reng tur a ni tawp mai. Ni lo deuh! Mipa rinawm hi an lo awm ve mial anih pawhin ka tana ruat an awm lo a ni tal ang tih hi ka rilru ah chi nung angin a awmreng tur a ni! Ka thiantha ber Norah hi keimah ang chiah tho a ni a, rilru thuhmun nei kan nih vang hian kan inkawmngeih lehzual em em bawk.
.
Ka thutiam pawh chu engvanga ngaihtuah chhuak ngawt nge maw ka nih le! Ka thutiam ka ngaihtuah chhuah rualin ka ner sak a. Ka bul maia chair-ah chuan thu lehin ka thiannu enghelh nei miah lova lam chu ka en a. Ka nui lo thei lo…
.
“Lo kal rawh..” Norah chu la nui reng chunga enin ka lam peih tawh lo tih lantir nan ka lu ka thing a, min sawm luih a tum bik lo.
.
Minute 10 vel hnuah chuan music titawp in dawhkan kan kil ta thap a. Ka riltam tawh zia chu sawi kher pawh ngai lovin ka mitmengah a lanchhuah vek tawh zawk ka ring hial!
.
“Riltam laiin I lam chiam a, I chelh lehsi lo ang e” Norah beng bulah ka va phun sar sar a,
.
“Teuh lo mai.. Zanin chu I bulah ka riak dawn a nia..” a tawng zawi lem hlei lo va..
“Ka hmuh phat atang che khan ka rin dan a ni sa hrim hrim”
“Ka thiannu hian min hrechiang ber mai” tawng ring mah mah chungin min rawn kuah nawk nawk a..
“Inthunun ve deuh la..” a beng bula ka phun leh sap chuan “Ho lutukkkk..’ tih pahin ring zet hian a nui chiam a..Ka thiani hi chu a tha thin a nia. Tuna a awm dan ka sawilan chin zawng atang khian ka thiani hi lo teh ngawt lo la..! A ni aia mihring rilru tha hi an tam lo khawp a nia.
.
Zanriah kan eikham  fel hnu rei vak loah boruak a tang lehnghal phat mai.
.
“Ate, a ni hi Alan anih hi. Ka cousin.. In chibai ruu.. Alan, ka thiannu Atei. A+A=A anih chu” a nui tak kar kar a!
Norah bula ding mipa chu ahma a ka lo chhinchhiah deuh tawh mipa suit pawl ha kha a ni. Norah cousin a lo ni reng a. Ka chhinchhiah ni lovin ka lo hmuh tawh tih zawk tur! Ngaihtuahna hi chu a chak teh e. Ka nui lui sak a.
.
“Ka lo hre hauh hleinem.. In chibai ila..” tiin Alan chibai tur chuan ka kut ka phar chhuak a, a hmui tiche zauhin a mithmul a san ak bawk. Min chibai tum hmel a pu lo.
“Alan!”
Norah meng ram ram chu eng vang nge tih ka hria. Chhuang tak maiin a unaupa min hmelhriattir a tum a, a unaupa lah chuan nungchang mawi a lo hre vak si lo a nih hi maw!!
.
“A ho lutuk…” Norah enin ka nuilui a “Eng thilin nge min hmuak dawn.” ka tizawm zat a. Alan nungchang vang chuan ka awm dan tih danglam ka tum eih lo. Eng vangin nge ka awm dan a danglam ngawt ang..
.
“Helai hmuna awm ve tur hian ka sawm che pawh ka hre lo.” Norah chu thinrim lo se ka duh. A unaupa awm dan chuan a tilawm lo takzet tih ka hria. A hun nuam tak hman tur hi keimah vanga a tlawlh ka duh lo bur.. Alan chu a la melh ram ram reng a. Alan chuan Norah thusawi chu a ngaih thutak loh hmel khawp lehnghal.
“Norah.. A ho lutuk..” ka lo ti ve leh hram a.
.
“Ka rawn kal loh I hlauh em kha.. I thiannu hi zanin chu ka chanpual ni rawh se.”
.
Alan thusawi ka hriat rualin kan bula awm ve ten kan thusawi an hriat leh hriat loh ka en kual vat.. Tuman min ngaihsak lo hlauh e.. Hmeichhe awm thenkhat chuan an rawn ngaihven viau nain a tawng hre pha tur khawpin an hnaih lo hlauh.
.
“I mumang ah pawh a thleng lovang.”
Heichu ka ka atanga chhuak a ni ve thung. Ka tawngkam vang chuan Norah chu nui hakin a hmui a hup zui a, min rawn melh zawk a. A mitmeng atang chuan ka lamah a tang lo tih ka hre nghal hmiah..
 .
“Min fiah thei ang.” Ti nghutin min en reng a, a thusawi chu a thleng dawn lo chiang lutuk tih lantir nan a mit ah en letin ka nui lui sawng a. Zanin zet chu ka nuih luihna lamah ka hmui a rawl vek dawn anih hi. Ka duh hunah chuan ngeiawm taka awm  ka thiam ve tho alawm! Kei aia a lo naupan phei chuan ka hnehsawh viau maithei!! Nula puitling kum 27 zet ka ni ve tawh.. Ho mai mai leh mipa tawngkam eng emaw mai mai a zam rual ka ni tawh hleinem le..
.
“Eng thil nge I tih chuan ang?” tiin Alan chu cho zet hian ka enlet ran a, Norah chuan min en phawk hra mai.
“In inmil dawn lo tawp mai. Kalsawn teh ang.” Tih pahin Norah chuan min kai a, kan kalsawn hman lo.. Alan chuan na zet hian ka banrek ah min vuanin a lamah min pawthnai a, ka inrin hmain ka hmuiah min fawp a nih chu!!
Mitkhap kar lek tak tak a ni. A inla hrang lehnghal vat a. Ka beisei loh tawp thil anih vang nge ni ka hamhaih vek. Hnehsawh viau tura ka lo inngaihtuahna kha chu mitkhap kar lekin a thlawk bo vek a ni ber. Tawng mai nachang pawh hre lovin  ka en ngar ngar a, ka ngaihtuahna a thil lo awm leh hmasa ber chu thinrimna a ni! Thinrimna, ka la hriat ngai loh thinrimna!
.
“Ouchh.” Alan chu a then sak a, a ngal chu a na ve khawp ang le. Ka duh angin ka tha ka sawmkhawm tha hman lo zawk a! Tawng nachang ka la hre chuang lo. Ka kut hum ruhin ka khur dar dar tih chiah ka hria.
.
“Ate, I tha em? Nang hi kalsawn rawh..” A awma Norah nemna vang chuan Alan chu a pai deuh dat a, enzui duh lovin  Norah chu ka zui ve tawp.
.
Room atanga kan chhuah chuan ka thaw hawk a. Ka taksa danglam dan chu ka hrethiam chiah lo.
.
“Ate, a pawi ka ti. Min hrethiam rawh aw. Alan khan khatiang thil kha a tih ka beisei miah lo..”
Ka thiannu chu ka la chhang thei lo..
“Alan hi khatiang khan a awm turah ka ngailo reng reng.. Ka tihpalh lutuk aw. Lo kal ve lo tawp se tha tur a nia..”
.
Ka thiannu inthiam lo lutuk hmel chu enin “I thiam loh a ni hleinem.” Ka ti sap a. ‘Infawh mai mai a ho e’ tia ngaihtuah ka duh.. Mahse, ka thei lo. Ka thei ve ngai lovang. Ka tan chuan thil serious tak a ni. Nula leh  tlangval an infawp anih chuan an induhtawn tur a nih mai bakah inngaizawng nghet annih loh chuan nupa anni tur a ni.. Hmelhriat ngai pawh ni lo nen infawh ringawt kha ka tan thil dik a ni thei lo.!
.
“Ka lo hau ang. Naupang pawh a ni tawh lo va, khatiang thil ti ngawt tur kha a ni lo hrim hrim..” ka thlavang hauh takin a tawng leh hlak hlak a..
“Haw hma ila pawi iti em? I hun hman nuam tak tur ka tih khawloh sak vek che anih hi..” ka ti ta zawk a.
.
“I haw chuan keipawh I rualin ka kal ve nghal mai ang. I bulah ka riak dawn tih kha i theihnghilh ange.”
“A changtunu ber i haw daih te’n. Va lut rawh.. Ka tha.. Motor i keng tho a..”
.
“Keimah vanga haw tum inih chuan kei hi ka haw hmasa ang e.”
Thawm lo chhuahna lam chu Norah nen chuan kan en rual thawt a.
“Nang kha lo kal hnai duh suh.. Haw rawh..”
.
“Norah, a haw kher angai hleinem.. Keipawh ka haw lovang.. Lut ang.”
Norah ngaichang lovin inchhung ah ka lut a, ka luh hnu rei vak lovah an unau chuan an rawn inzui lut ve bawk a. Alan nen chuan kan inbe tawh lo chiang khawp mai. Ka bulhnai a lo kal a tumin ka kalsawn zel a, eng thu pawh sawi se a ni nen hian kan inrem tawh kher lovang!
.
Zan dar 11 rik dawnah Lazarus hotel chhuah sanin kan haw ve ta hram. Ka room-ah lutin kan intifai sawk sawk a, kan mut fel hnu reilote ah Norah chu a muhil nghal bawrh bawrh a, kei erawh ka harh tulh tulh thung. Eng tehchiam ka ngaihtuah lo. Ka phone on in ka online neuh neuh a, zan dang ang bawkin story chhiar tur ka enkual a, ka chhiar duhzawng tak ka hmuh chuan thil dang reng reng ka ngaihtuahna ah a lut tawh lo. Ka thawnthu chhiarlai a a changtute chu mitthla chungin ka chhiar zel a, ka mutthilh lai pawh ka hre lehpek lo.
.
Ka alarm riin min tihharh chuan ka thochhuak nghal hlawl a, ka sirah Norah pawh a la hnar barh barh mai. A rawn harh rualin a lu a na ngei dawn tih ka chiang.. Nizan khan a in viau a, damdawi a mamawh ngei bawk ang.. Zanlam ka ngaihtuah chuan a cousin Alan ka ngaihtuah chhuak zat a, ka ner sak.. Kha mihring kha chu ka thiantha ber cousin pawh ni se, ka ngei kumkhua tawh ang!
.
Khum bula damdawi leh tui ka dah hnu chuan ka phone keng chungin bathroom-ah ka lut a, ka hla duh ber play-in ka inbual nghal sar sar a.. Dam man hi a awm thin a nia. Enghelh nei lem lo leh ngaihtuahna hman hah ngai em em lova awm hi a lo nuam ber mai.’ Tia inngaihtuah chungin ka hla play chu ka sakpui rat rat a, Alan hmel ka mitthla a a lo lan rualin ka zai tawp nghal chawt.. Ringawt hian..kha pa kha ka ngaihtuah peih hleinem.. Scrubber chuan ka innuai nawk nawk a, ka inbual zawh chuan ka thip sup supin ka inhre hial mai. Kha Alan-a vang vek kha. Kan inhmu leh a, eng tin emaw a awm leh anih vaih chuan a inchhir ram ramna tur thil eng emaw ka ti tawh ngei ang!
.
Norah pawh ngui burin khumah a lo thu a, min hmuh rualin a rawn nui lui sak a.
.
“Morning sunshine..”
“Ka lu a na lutukk..” a ner nang nang mai.
“Damdawi ka dah kha..”
“Ka ei tawh..” tih leh khuma mut a rual a. Ka lo nui tawp.
.
Kan inah hian a mikhual lo hrim a, ka nu leh pa leh ka unaute nen pawh an inkawmngeih vek mai. Hmanhmawh lovin chaw kan ei a, kan insiam zawh hnu chuan kan hna a kal turin kan chhuak a. Nizan khan hotel-ah a scooty a hnuchhiah vangin an office lamah ka thlah kual leh te te a, motor atanga a chhuk hnu chuan tlanchhuah leh mai tumin motor ka her rem a, ka hma a lo ding thut awm vang chuan ka ding chawt a, ka bu deuh lawp bawk. Ka hawichhuah ruala ka hmuh hmasak ber chu Alan a ni. Min rawn panhnai tih ka hmuh rualin ka hawisawn vat a, ka tlanchhuah hmain ka bulah arawn ding hman nia!
.
“Inbe lawk ang.” arawn ti ringawt a. Chhan pawh ka tum buai lo. “Lo chhuk rawh.”
Ka melh ralh a, ka melh dan atang chuan ka rilru hria niawm tak hian a lo rum nghat thung. Thu min pe tur hian ka chungah eng thuneihna mah pek a ni lo.. Mai mai hian a! Mi zalen ka nih hi..
.
Motor ka tinung tha leh a, min biak zuina ngaithla lovin ka tlanchhuak a. Side glass-a a lan theih chhung chu ka en reng a, a lan theih tak lovah chuan ka thaw leh hawk lawi sia! A hmel ka hmuh khan ka hah ringawt aniang chu..
.
Ka thawhna office ka thlen chuan hna bakin rilru a luah leh ta lo. Buai takin ka chanpual ka thawk mawp mawp a. A chang chuan kan hnathawh dan inang lo lutuk hian ka rilru a tibuai fo mai. Thenkhat phei hi chu kumtluan hian games khel tur ringawt in office an lo kal nimai hian ka hre thin. Engtia han siamthat chi nge maw ni dawn ni? Thil tamtak hi chu a tobul fuh loh vang tih a chiang a, hahdam taka hlawh hmuh tum hi kan thahnem viau mai a nih hi. Keiin bul ka tan loh chuan tunge bultan chuang ang tih rilru hi pu theuh thei ila a tha ngawt mai. Mimal sumdawnna leh mimal in an thunun hnathawhna hmunah hian sorkar hnuaia hnathawk te an inthlahdah thin ang hi hmuh tur a awm ka ring meuh lo.
.
Lunch ei a hun dawn chuan ka hna chanve ka thawk hman der a, chawhnu lam chu ka awl ve thei deuh ang chu.
.
‘Pu berin a ko che a.” ka pindan kawngka ah Sangi, a tul apianga kan tirh thin lo dak dek dek chu ka en vat a. A ni hian ahna a tlin deuh ber mai e. Eng thil pawh a hma a tla chu phur tak hian a ti vet vet a, a kum upat tawh ngaihtuahin a zuan a zang khawp mai. A hnaah hian a lungawi em em mai bawk sia.
.
“Aw le.” Pu ber hmuh tulna tur thil engmah ka khawih rih si lo va, eng vanga min ko nge maw ni dawn le? Ti rilru neuh neuh chungin ka pindan atang chuan kan pu room ka pan a. Lut tura min hrilh hnuah lutin Alan ka hmuh chuan ka phu deuh zawk!
.
“Ate, hei Alan hian thil tulah chhuah lawk in mamawh thu arawn sawi a. Vawiin chu chawhnu zawng i chawlh theih hmel a nih hi.. In inhria tih reng reng ka lo hre lo va.” A nui ang vur vur a..
Alan ka en zawk a, sawibuai lo turin min duh tih a mitmeng atang chuan ka hrethiam. He mihring hian eng thil chiah nge maw a buaipui le?
.
Pu ber room atanga ka chhuah hnu rei vak lovah Alan rualin office ka chhuahsan a, a hmel ka en tawh lo va, ka be hek lo. Sawi duh a nei anih chuan sawi se la, kei chuan hmuh chhan tur emaw a laka sawi duh emaw ka nei lo. Ka duh ber chu a hmel hmuh loh hi a nimai. Kawmngeih ka tum hek lo. A tawi zawngin ka mamawh lo tihna a nih chu!
.
Harley Restaurant kan thlen a kan thut fel rualin “Eng vanga inhmu tur nge kan nih?” ka ti nghal tawng a. Alakah hian nungchang mawi taka awm tumna ka nei hran lo.
.
“I hmel hmuh ka duh vang.” Chiang zet hian min en a, a tawng zawi viau chungin a thusawi chu hrechiang tak ka ni. Ka insangmar nghal at bawk. A zamlo mah mah niin ka hria. A lan dan atang hian mipa tawngtam tak a ni  lovang tih a hriat a.. Engpawh chu ni se, eng vanga ka hmel hmuh duh nge anih? A chungchang leh a nungchang, eng thil nge a tih? Tih vel ka ngaihtuah buai peih lo. A tawng chu chhang lovin ka enlet a, kan awm dan chu kan naupan laia fashion show inelna kan neih thin a, inhaw taka kan tumpuite nen kan inen te pawh min ti hrechhuak! Ti ila, a mitmeng ah chuan min huat hmel vak hran lo. Keimah zawk hian ka hua alawm.. Ka mit lasawnin a hmui ka en a, ‘he hmui hian ka phalna la lovin min fawp ringawt kha a nia’ ka thil ngaihtuah vang nge ka hrelo, ka thaw a sa deuh thut.. Ka kut thlan dap chu ka hum ruh ta ngawt a.
.
“Nizan thilthleng vang khan ngaihdam ka dil dawn lo che. Kha thil kha chhunzawm ka duh.”
He mipa hi mi mak tak chu a nih hi. Chhan ngaihna reng reng ka hrelo. Ngaihdan nilo zetin ka lu ka thing a, ka chetzia zawng zawng chu hmaih palh neih hlau niawm tak hian min enchik em em reng lehnghal..
.
“Zak ve deuh rawh.” Ka ti nghat a, a ner suk duh chauh.
“Chutiang thil chu ka kalpel fel tawh.”
.
Ka chhan leh hmain waitress arawn inrawlh ta hlauh. Ka duhzawng pawh min zawt lovin Alan chuan eitur a chah a. A eitur chah hi ka ei ve dawn nge, tunah hian ka chhuahsan dawn tih ka ngaihtuah laiin ka kut chu ka en a, Alan hmel ka en leh chuan ka beisei loh dan takin a lan dan a thutak khawp mai. Eng style nge a hriat hi? Dawhkan hnuaiah a kut rawlhin ka kut chu nghet zet hian a vuan a! Miin min lo hmu fuh anih chuan ‘an va induh awm em em’ anti ngei ang. Hetiang thil min lo hmtutu ten romantic ti a an sawi tur ang chi hi ka mamawh hlawl lo!
.
“I eitur ka chah i ei zawh hma chuan chhuak suh.” Chhang lovin ka thu mawl tawp. He mipa hian min ti hamhaih zo vek tawh. Ka ngaihtuahna hre thei niawm takin a tawng leh tawh bawk.
.
“Kan inhre ngai pawh a ni lo va, ka laka i ngampat viau chhan hi engvang nge?” ka thil ngaihtuah hi a dik leh dikloh hriat ka duh. Min zah loh vang leh a zuam zawng ka nih vanga hetianga che anih chuan ka thil duh loh ber te zing ami a ni ngei ang.
“Chhan a neih kher a tulna ka hre ve lo.”
.
“Min chhang rawh? I zuam zawng ka nih vang a ni em?” a nui sak a, a nui hmel chuan a mit a thleng lo tih ka hmu reng mai. Min chhan mai loh vang chuan hawisawn duh lovin ka en ve ngar a. "I zuam zawng ka nih vang a ni em?" ka ti leh nghat a. Kei mi thinchhe ve tak hian ka thinrimna ka thup zo lo leh ngei ang!
.
Ka kut a hmer na zual sauh a, tawng tum hmel a pu tawh lo. Waitress-in kan eitur arawn dah chuan min vawnna chu a thlah ta chauh. Ngawi rengin ka ei a, ka ei zawh hma chuan vawikhatmah ka melh tawh lo.
Restaurant atanga kan chhuah dawn chuan ka kutah min rawn vuan leh a, min vawn ngheh dan ngaihtuahin talchhuah tum ta ila mi hmuhah hmuhnawm kan siam a ni mai dawn si. Min kaih ang ang chuan ka zui lo thei ta lo. Nep ka inti ru khawp mai.
.
Lunch ber kan ei tawh vangin min thlah haw mai ka ring a, mah se ka ring sual! Kan in awmna lamah kan tlan ta hauh lo. Tawng chhuak hmasa zawk nih duhlo mah ila tawng hmasa zawkah ka tang leh lo thei ta lo. He mipa hian ka ngaihtuahna a tibuai tan tlat tawh. Ka lakah hian eng thil nge a duh ang tih ka hrethiam lo. Restaurant-a kan awm laia ka zawhna lah awmze neiin min chhang lova, awmze nei chu sawi loh, min chhang lo hrim hrim a nih zawk tak kha. Tunah hian zawt nawn leh pawh ni ila min chhan ka ring chuang lo.
.
"Kan kalna tur tal chu sawi la." min rawn melh lo. "Hey..nang hi.."
"Ka hmingin min ko la." a ti nghut a. Min la melh ta chuang lo. Ka bei a tidawng. A mizia hi ka mil hlawl lo a ni ber e.
"Takzet che hian a! Khawnge kan kal dawn?"
.
Motor a her kual a, ka rilru buai talangin kan awmna chin pawh ka lo ngaihtuah tawh lo.
.
"Inhmelhriat tha pawh kan ni lova, ka thiannu cousin inih vang ringawtin ka lakah diklo takin i awm thei tihna a nilo a nia. Tunlaiah mipa tam zawk chuan nungchang mawi an hre vek. Nang hi, ka lakah thil thalo tih i tum anih vaih chuan..." ka rak thawt a, ka maimitchhing ringawt.. Kan accident niin ka hria.. Motor chet dan ngaihtuah chuan ngaihdan dang ka nei thei tawh lo. Motor ke a chik ri tuarh bawk a.
.
Ka inrin hma hauhin ka tukhum ah min vuan a, dim tak si hian ka hmuiah min rawn fawp a. A hmuiin min rawn deh rualin ka meng kawk bawk. Ka hamhaih chu thuhran ni se, hnial nachang ka hre miah lo a, min fawhna chu ka chhanglet hek lo. Ka chhanglet lo chung chuan thiam zet hian min fawp zel a, nemsawn tur ka ni tih ka inhre nain ka tithei chuang lo.. Ka va nep tak. Ka ngaihzawng pawh nilo hian a tumhnih nan min fawp leh ta anih hi! Engtinmah ka awm loh vang nge ka hrelo, thaw hakin min fawhna chu a titawp a
.
"I ngawi thei tawh angem?" ka chal la si reng chungin a phun sup a, he mihring hian min ti hamhaih lutuk takzet. Chhan tumin ka ang ziau a, ka aw a chhuak thei lo. "Ka awm dan atang hian tihnat tum che ka ang em ni?" a ti leh sup a. Ka hrelo. Ka hre hleinem.. I nungchang anga mak mipa hi ka bulhnaiah an la awm ngailo.
.
"Anih chuan ka bulah hahdam takin awm rawh. Ka tina lovang che." atih chuan ka melh a, kan inen hnai khawp mai.
"Maw?" ka ngaihtuahna ni lovin ka lo tawng chhuak anih hmel hi.
.
"Nge? Mipa hrim hrim i hnaih duhlo zawk?" Inla hrang hlekin a mitmeng chuan chik zet hian min en reng a. Ka awm a tinuam chiah lo.
.
"Chu chu ilo buai ve na tur a awm lo." ka thu rem a, tuna min en ang hian min en reng lo se ka duh. Ka zam chhe mai dawnin ka hria.!
"Ka buaina tur a ni ngei ang. Kei lo mipa hian an fawp tawh che em?"
.
"Chu pawh chu i buaina tur a ni lo. Nangmahah hian eng thil diklo nge awm a?" ka ti hluai a. A lu thingin a nui suk. Hmel hmuh hreawm zawk zawk chu a nih loh hi.. A mithmul dum hlap leh a hnar, a hmui.. Ka ngaihtuahna chu duh lovin ka hawisawn a.
.
'Ka bulhnaia i awm reng theih nan eng thil nge ka tih ang?"
.
Hepa awm dan hi avan mak tak. Nizan khan a vawikhat nan kan inhmu chauh a. Tunah hetiang thu hi a sawi leh a. A mak lutuk mah mah chu a ni. Hlauhawm leh min tina duh hmel a pu lo nain ka hlau thar ta riau mai! Min tihnat ka hlau a ni chiah pawn ka hrelo.. A hmel en hian a thusawi hi ati tak tak a ang bawk si. Ka rilru a danglam ka hlau a ni zawkin ka hria! Awih awm loh loh hian.. Ka intiam tawh kha.. Mipa reng reng lakah ka thinlung hi ka khar tlat tur a ni. Ka thutiam kha ka theihnghilh lovang.
.
"Ka bulhnaia awm tum buai duh suh. Chuan, min hruai haw thei angem?" ka ti ta zawk a.
.
Harhchhuak thut niawm tak hian a thu tha a, motor tinungin a in turn a, kan tlan chhuak leh ta. Sawitur a vang lehzual ta hle mai. Tih dikloh ka nei em tih ka inngaihtuah ta zawk hial! Tih dikloh leh tawng sual ka neih erawh ka hrelo thung.
.
"Helai ah hian ka lo chhuk ang." ka tih chuan ngawi rengin motor a tiding a, engmah sawi lovin ka chhuk ve hmiah bawk. Kan in a la hla deuh nain ke a haw nan a hla lutuk tawh lova, boruak nuamlo zet leh mipa mak zet bula awm ai chuan ke-a mel 10 kal pawh ka peih zawk! Ni leh lo..mel 10 chu a thui mah ma hang! Mel 5 vel ni mai rawh se!!
.
Ni danga in ka thlen hun pangngai aia hmain in ka thleng a, tumah an lo awm lo. Ka room-ah lutin ka inbual a, ni dang aiin ka chau zawk mahin ka hria.
.
Thla khat ral leh chhungin Alan chu vawikhatmah ka hmu leh ta lo. Ka ngaihtuahna erawh a luah ta deuh reng! Mah se, inthunun ka tu em vang hian Norah hnenah pawh engmah ka sawi ngailo. A unaupa anih vanga engmah zawt duh lo ka ni tho mai. Thiantha ni mah se a nawm lohna chin a awm ve tlat.
.
"Nizan chu kan buai hat a." Nui vawr vawr chungin Norah chu ka bulah arawn thu rem sat sat a. Buai thu sawi siin a nui tho a, eng buaina tak nimaw?
.
"Eng thil nge?" ka lo ti thuai. Vawiin hi holiday a nia, holiday dang ang thovin kan thiandun hian tihtur mumal em em nei lovin kan chhuak dun leh a nih hi. Nula nih man a nia, keini thiandun tan hi chuan nun tinuamtu pakhat a ni ve bawk.
.
"Chhungkaw chaw ei khawm ka rawn hrilh che kha, Pa Ramdingliana.."
"Awi, a hmingpum hian i sawi lawl lawl zel a." ka lo ti leh rih a.
"A rem zawk alawm.. Pa Xander-a..awi, a inhmeh thlawt lo..'a nui kawr kawr a. "Nizan chu e, kan Lawyer Xander-a ngaihdan pelin Alan a che a, ti ila Alan thiam loh pawh a ni chiah lo."
.
"Alan, i cousin i tih kha maw?" ka rilru chuan ka ding ngil awt in ka hria! "Alan leh Pu Xander-a daih daih.."
"Alan hi a fapa alawm! I lo hre nange?"
.
Ka lo hrelo reng reng. Alan hi Advocate lar lutuk Alexander Ramdingliana fapa a lo ni reng a! A hriat loh theih hle mai. An hmel ka mitthla chuan an inan zia ka hrechhuak chiah!
.
"Hre nang. I sawi takah chuan an inang lutuk tih ka lo ngaihtuah daih a."
.
"Haha..an mizia pawh a inang alawm. Nizan chu Alan bialnu a che mawilo angreng a. A pa ngaihtheih loh khawpin a che pek a. Tunlai thangthar hi chu e, zah hrelo deuh deuh hi an va lo tam tak.. Chhungkaw chaw ei khawm naah arawn kal ve a, a rui chhe angreng sia, a zialo tak tak a ni. Pa Ramdingliana khan chaw ei hmain Alan a ko hrang a, a bialnu chu a thlahtir a. Ka tawn chu ni se, ka zak ral raih ang. Khanu te reuh khan Pa Ramdingliana a chhang zawrh zawrh a nih chu.."
.
"Mak ve." ka lo ti ringawt. Alan phiangsen-a chuan ngaihzawng a lo nei reng sia. Ka ngaihtuah dan chu ka duh leh chiah lo. Kha pa kha ka tan engmah a ni lova, ngaihzawng 10 pawh nei se ka lo ngaih pawimawh nachhan tur a  awm lo.
.
"Awi, khanu tawngkam kha chu sawi pawh ka sawichhawng peih lo. Alan hian engtin nge a duh mawni.. A ni ang kum tawh ah lehnghal. Amah Alan pawh kha a zah hmel tawp a. Nu Zualtei hian nupui nei tawh rawh a ti ve sek bawk sia, mah se khatiang hmeichhia te kawp leh rih.."
.
"A la upa vak mi?" ka lo tiliam puat a, ka rilru tak chuan ka ngaihven viau!
"Keini ai hian kum 3-in a upa alawm.. Kum 30 tihna nih chu. Nupui nei vat se a tha ang." nizan buaina leh thil thleng sawi zawm lovin Alan chanchin a sawi zawm ta duah a, ka thiani hian a unaupa hi a chhuang ve hle tih a sawi dan atang pawh hian a lang reng mai. Mi bik anih zia a sawi siam siam a, a titi chu tibuai lovin ka lo ngaithla reng a. A pa hnungzui lova amah ngeia a sual chhuah a eizawnna hi a ngai hlu hle tih a sawi chuan mipa anih anga a mawhphurhna a hriat zia a tichiang khawp mai.
.
"Awi, han inngaizawng ta mai ula...a nuam ngawt ang.." teh thut chuan! Hamhaih zetin Norah chu ka en a, ka thin a phu nghal dawt dawt ringawt.
.
"I ti awm anglo e a.."
"Nge? Thla hmasa tawp lam atang khan a nungchang a danglam thu Nu Zualtei'n min hrilh a. Kan pahnih hian kan inkawm thei deuh ber a, Aizawl-a a awm loh rei tawh vang hian kan inzui tam ta lo zawk a. Awi, ka tihpui dawn chiang che.. A bialnu neih tawh te ngaihtuah chuan i dang hlak nain in in-type ngei ngei ang."
.
"Thu dang sawi zawk teh.." Alan hming a sawi rik ringawt pawh chuan ka awm a tinuam lo nghulh thei.
.
"I hmai te sen vel.. Ka va'n tihpui dawn chiang tak che em! Party zana a fawh ringawt dan atang che khan a duh che ani dawn chiang lutuk.."
"Norah, thu dang sawi teh.."
.
Ka thiani hian engmah sawilo se ka buai tam lo a nimai. A sawi hmang hian Alan chu nula mi tak a nih hmel.. Nat ka duh lo! Ve ringawt a! Ka ngaihtuah dan hi a thalo tawp mai. Amah Alan duh ang maiin ka inngaihtuah alawm le.
.
.
Kar khat a ral leh hnuah pawh eng thil danglam mah a thleng lo. Thil danglam thleng turin ka beisei lem lo bawk. Norah hnenah a sawi ang thil engmah ti lo turin ka vau nasa a, eng thil mah a ti lovang tih ka ring.
.
"Ate..Ate.."
.
"Aw, ka lo kal." tih leh ka room atanga tlan chhuah ka rual a, inleng kawmna pindan a lo thu mipa ka hmuh rualin ka ding nghal chawt. Hepa hian enge arawn tih dawn a?
.
"Alan.." a hming ka lamri chu a hriat phakloh ka beisei! Mah se ka hmui phun atangin a hming ka lam tih a hre vek tho ang tih a lo nuih suk dan atang chuan ka hrethiam tho. "Enge i lo tih dawn?" ka ti sap a, a thutna bulah chuan thut loh theih ni ta hek lo. In la confi zetin ka thu ngil at a.
.
"Ka lo leng." min melh rulh a, he mihring hi chu a mit te hi a awm hle hle lo ngawt mai! A mitmeng chuan thu tamtak min hrilh a zawhna min zawt ni bawkin ka hria. Eng zawhna nge min zawh tih erawh ka hrelo. Ka melh let ve nghek ringawt.
.
"U, i phone.." ka chhang chiah Asangtea'n ka phone min rawn pek chuan caller ID ka en zauh hnuah ka chhang a, inleng neih reng laia midang biak san hi a mawilo tih ka hria. Mah se, tunah tak hian ka ngai pawimawh lo. Engvang nge ka hrelo nain Alan chu runluih ka chak ve hrim hrim. Dik taka sawi chuan tuna min rawn betu hi ni dang ang chu ni se a call pawh ka pick up kher lovang! Keimah ah hian eng thil diklo nge awm ta pawh ka hre lo ve.
.
"Nei e, a ho lutuk..sawi rawh...Um.. ka hre lo le.. Naktuk ah anih chuan... Hey"
.
Alan chuan ka phone chu min laksak in a off a, thinrim hmel a pu hran lo. Hamhaih zetin ka en a.
"Khawi, min pe let rawh."
"Zanin atan chuan tawk rawh se." tih pahin ka phone chu a ak hmak.
"Ka phone anih kha.. I ta a ni hleinem. Khawi, min pe rawh."
Min pek tum hmel a pu lo hrim hrim. Tihngaihna awm chuang heklo le, a bulah chuan ka thu ngawi ta reng a. Ka chhungte hriat tura inhnial emaw inchuh buai emaw chi a ni lo.
.
"Naktuk dar 10-ah ka lo hruai ang che." tih pahin a tho a.
"Hey, ka phone kha.."
"A tel lovin zanin chauh chu lo awm mai rawh." a van zaklo tak.. Hetiang hi dan kalh a ni ngei ngei ang! A phone pawh ni lo, ka phone  ania. Ka phalna tel lova inkawl sak hi thil dik a ni thei lo.
.
"Naktuk ah ka pe ang che."
Thu dang ka sawi leh hmain a kal chhuak a, ka nu'n a lo biak chuan mifel ber ang maiin a chhang fel thlap lehnghal. Ka phone ka lock lo tih ka ngaihtuah chhuahin ka thin a rim lehzual.
.
Choka ah lutin eitur ka dap a, heihi chu ka tih dan than a ni hrim hrim bawk. Vawikhatah thil ka ei tam thei lova, tlem te tein ka ei reng thin.
.
"Hei, tu phone nge ri hi? Ate... I thianpa phone kha ava nih hmel ve."
Ka pa tawng ri ka hriat rualin ka thil eilai ka dah sawk sawk a, choka atangin ka chhuak nghal a. Ka pa kut atanga phone lain caller ID ka en a, ka phone number ka hmuh chuan ka mit ka chhing sawk. Kan mihring pa chet dan mai mai chu(h)!
.
"I thiltih dan hi ka lawm lo hle mai." ka ti nghal tawng a. Thaw ri chiah ka hria.
"Ka tih angai si alawm. Nang anga hmeichhe harsa leh min palzut hi ka la tawng miah lo a nia." arawn ti duah a.
"Min buaipui turin tuin nge hrilh che? Min buaipui a ngai reng hleinem." ka ti let ve hmiah.
"Naktuk-ah chuan lo inpeih sa thlap ang che."
"Tu thupek mah ka dawng ngai lo. Mipa nungchang mak zet thuawih hi ka ba hauh lo a nia.. Tunah ka.." line a tawp chuan beidawng zet hian ka thaw hak a. Eng ang mipa nge maw anih le? A duh chin a sawi a, ka thusawi ngaithla miah lovin a off leh hmak a..
.
Ka room-ah lutin khumah ka mu a, a phone hnuchhiah chu check tumin ka on a, a la lock zui. A password han risk vak ngaihna ka hre lo. Phone chu dahin mutthilh ka tum lui a, a awlsam lo khawp mai.
.
Ka muhil ka harh chuan khua a eng ut tawh a, sana ka en chuan rang zetin ka tho nghal vat a. Ka phone ka ngaihtuah chhuah rualin ka rilru a nuamlo lehnghal hmiah. Thil thalo engmah ka dah lo nain ka mimal thil midang kut a a awm daih chu ngaih a ngam zan lo chu a ni e. Ka duh emaw duh lo emaw ka phone neilet turin ka hmuh ngei chu a ngaih hmel anih hi.
.
Thil tul neuh neuh ka tihzawh hnu chuan muangchangin ka insiam a, dar 9:30 a rik chuan ka inpeih diam tawh. Alan chu a insawi ang chiahin dar 10 ah arawn thleng a, engmah sawi lovin kan inzui chhuak a. A motor-a ka chuan luh rualin ka phone ka dil nghal hmiah.
"A hmanhmawh thlak loh." tia min chhangin motor a tinung a. Khawi lamah nge kan kal dawn ka zawt duh ta biklo mai.
.
Motor a tihdin chuan ka hawichhuak a, kan awmna lai hi ka la kal awm pawh ka hrelo e a. Hmun nuam tak chu a nih hmel si hi mawle!
.
"Khawi le, ka phone chu."
Min chhang lovin hmalam a en a, thil dang daih ngaihtuah a ang..
.
"Alan, hetiang a min chhaih kual hi engtik ah nge i bansan dawn?"
Mungchanga inher in min rawn en a, a huhang na zet vang hian ka zam lovang tiin ka infuih ru lo thei lo.
.
""Ka duh che tih i hriatthiam tawh ka ring." a ti nghut a. Kei ang lo takin a tawng duah lo, a tum tak hi a sawi mai a. Mipa tawngtam tak ai chuan mipa tawng tlem chu a nih dan tur dik tak a ni tho nain..aa.ka ngaihtuah buai peih lo.
.
"Thil hriatthiam tur a awm ka hrelo. Tunah ka phone chu min pe rawh."
.
"I phone ka keng lo."
.
"Enge? Ka lakah hian enge i duh a.. Hetianga chhaih fiam rual hi ka ni lo a nia.."
"Kei aia upa zawk niawm tak hian." a nui suk a, ka huat tawk a tling em em a ni tawp mai.
.
"Min ngaizawng ti dawn ila, ngaihzawng te chu i nei del dul awm tho sia. Ka hrethiam lo.."
.
"Mi pangngai tan chuan ka duh che tih hriatthiam tawh awm tak!"
A tawng duh dan hi ka tlang mah mah thin niin  ka hria.
.
"Mi pangngai ka ni hleinem!Chu chu hre rawh. Mi pangngai ka nilo. Ka nunah hian ka lungawi tawk a, buaina min thlensak turin tu mipa mah ka mamawh lo. Ka mamawh chu ka nei vek.. Chuvang chuan.."
Min rawn fawp thut a, min fawhna chu a dam thlap. Thiam takin min thlem ni maiin ka hria. Ka harhchhuah rualin a kawr hmaah ka tham a, nem sawn tumin ka bei bawk. A che eih lo.
.
"Ka mamawh lo che." ka ti sap a. Ka chhungril tak chuan ka chiang ngam tawh lo. Nilo! Ka chiang.. He mipa hi ka mamawh lo. Amah ka hriat hma zawng pawn hlim leh zalen takin ka nun ka hmang thei. A lo lan atang hian ka buai zawk a nih hi.
.
"A tha e." Inla hrangin ka phone min pe a, motor a tinung a, chak zet hian kan tlan chhuak nghal a. Kan boruak chu a nuam ta lo khawp mai.
.
Kan in kan thlen thlengin vawikhatmah kan inbe tawh lo. Kan in kawta a din chuan rang zet hian ka chhuk nghal thuai a.
.
"Ka phone kha."
"Oh..ka tih palh!" ka bag ka hai rawk rawk a, a phone ka pek rual deuhthawin chak zet hian a tlan chhuak lehnghal a. Ka enzui reng ringawt. Ka ruak ta huaiin ka hria! Oh..Ni lo ve, ti khan ka buaina tur a kiang a ni zawk e.. Mah se, ka awm a va nuam lo si em! Kan in piah kawi a a tlan liam lai chu enin ka thaw huai a. Ka ni nghulh mai..
.
Kar khat chhung chu Alan hnen atangin eng thawm mah ka hre leh ta lo. Thil nih dan tur ve reng a ni tiin ka inhrilh a, a hmaa ka awm dan angin ka thawveng thei tawh lo. Ka hun tam zawk chu inngaihtuah buai nan ka hmang ral a, ka nun zalen leh engkim nei a hlim tawk tak niin ka inhre tawh lo.. Thil thalo tak a ni.
.
Norah nen kan inbe reng a, hunawl kan neih chuan kan inhmu fo bawk a. A unaupa chanchin erawh kan sawi ngai lo. Atan chuan Alan chanchin min hrilh ngawt nachhan tur a  awm lo a, kei lahin engmah ka hrilh lo bawk. Heti hian a tha zawk.
.
"Naktuk zanah kan in ah lo kal rawh aw. Ka nu leh pa inneih cham kan lawm lawk dawn a. A ni takah chuan kan ni leh bung bung anga i peih loh zawk ka ring."
.
"In chhungkaw hoin in lawm dawn tihna a ni em?"
"Ni chiah lo. Ka pa hian tih bung bung hi a duh vak lo a, tlem te kan ni ang. I lo kal loh chuan ka lawm lo viau ang tih i hriat kha. Nang chiah hi thiantha ka sawm tur awmchhun i nia.”
.
Alan a kal loh ka beisei. Ka ngaihtuahna chu dah thain "Chhass zawnna chance a ni dawn lo nimaw?"
"A ve lutuk che hian.." za zeta nuiin Norah chuan ka hnungah min chum dawt a.
.
Dan pangngai leh thil nih dan ve tur renga ngaiin ni kan hmang liam mai a, Norah min sawmna ngai pawimawhin an in a kal tur chuan rilru nuamlo ru deuh tak chungin ka insiam a. Frankie, Norah unaupa'n min rawn hruai a, Norah sawi lawk tawh angin an in kan thlen chuan mi an awm nak nak nain a bengchheng lo khawp mai.
.
Inchhung kan luh ruala ka hmuh hmasak ber chu Alan bawk a ni. A awm ve ka beisei chiah lo kha a nia.. Ti ila, ka beisei ru tho. Hmu duhlo leh hmu chaklo angin ka inngaihtuah lui na a, a hmel tha leh pa tak ka hmuh rual chuan ka hmuh chak zia ka inhrechhuak. Mahni inbum mai ka ni e!
.
Min rawn melh chuan ka lo nui sak a, ka nuih zawh rualin ka inchhir nghal pang bawk. A bula hmeichhe nalh zet ngaihvenin a hawi sawn a, min hmu awm pawhin a awm lo.. Hmm.. Lemchanna maw? Min ngaihven lo tih ka hmuh chuan ka na deuh zawk!Ni lo.. Ka na lo. Ka duhthu ngeiin chiang takin ka hnar alawm.. Ka rilru chu a la ngai reng.. Mipa ka mamawh lo! He ka ngaihtuahna hi a dik reng em? Ka buai nuai nuai nia ka inhriat tlat chu le..
.
"Aw..Ate, kan inhmu leh ta hlawl mai."
Ka bula mipa lo ding chuan ka rilru buai nuai nuaina atangin min tiharh a. Nui chungin Samson chu ka en a, min chibai tuma a kut rawn pharchhuah chu ka lo vuan var bawk a.
"Kan inhmuh loh chhung a rei ta hle mai. Engtin nge hetah?"
"Nia, Frankie hi ka best a nia. Nang?" Frankie leh Samson-a inkawm lai awm ka hre ve reng reng lo.
"Norah vanga kal ka ni e.."
"Kan inhmuh fo tawh ka beisei." atih chuan nui chungin ka en a, a la danglam tamlo hle mai. Mipa mamawh lo ni a ka inhriat nachhan leh ka thil thlir dan tidanglamtu chu Samson hi a ni. Hmeichhe hruai lo va a kal hi thil mak tak a ni bawk. Ka bulah chuan a awm ve ta zel a, ka laka a awmdan vanga tun hun hi thleng nimah ila ka haw em em chuang lo. Thil thlir dan dang dang a ka thlir hian a hunlaia a awm dan kha awm tihna chin ka nei tho a ni. Thinlung lam inhnaih emaw inkawmngeih leh emaw tumna tlemna pawh ka nei lo thung.
.
"Nangni hi engtik nge tih in tum ve dawn?"
Samson-a hawina lam ka en chuan en rei duh lovin ka kun daih a. Alan leh a bula hmeichhia chu an inzui ngei tih Sam-a zawhna atang chuan a hriat vek a ni.
.
"Kan nghak rei tawh vaklo maithei." nui har har chungin hmeichhia zawk chuan a chhang a, Alan erawh angawi reng. Ka hmulthi ding er er vang chuan min en tih ka hre thei. Kalsawn nachhan tur chhuanlam ka va mamawh em!
.
Engtin tin emaw zan hun chu kan tlingtla thei hram. Norah chuan min thlah a tumluih tlat vangin ka hnial hneh ta lo.
.
"Zanin chu cool ve a? Tinge? Sam vang kha a ni em?" min ngaihtuah hmel takin min melh zauh a.
"Ni lo tih i hriat kha. Kawng en rawh, kan accident ange?" ka lo tiliam puat a.
.
"Alan hian a ngaihven deuh che in i hre ve lo maw?"
"Hre lo. Kan in type tehchiam lovang.. Bakah ngaihzawng a neih kha.." Ka nui hak a "Ka sawi dan chu ka duh te pawh a ang dawn alawm.." ka nui zui hak hak a. Ka rilru hi thup theih loh chin ka nei palh ang tih ka hlau thar ta riau mai.
.
"Thiani, kan awm dan hi inthlak a tha ka ti. Pasal neih tum miah loh hi thalo riauin ka hria." Norah chu nidang a ang lo.
"Ehh, Nge, i duhzawng i hmu mi?" ka lo ti vat a.
"Hmu chuang nang. Thui deuh ngaihtuah hian a fel thei tlat lo. Hmeichhia chuan inhumhimna kan mamawh alawm. Kan rinchhan theih mipa.."
"Chutiang chu an awm dawn mi?"
"Ka hre lo le.."
.
Kan thiandun chuan kan ngawi vang vang a, kan in kan thlen chuan inchhung ka luh hmain Norah tlan chhuak chu ka enliam hmasa leh phawt a.
Ka mut hmunah kan titi kha ka ngaihtuah zawm a, Noarah thusawi kha a dik chiah tih ka hria. Tunah ka thatlai hian tumah mamawh lo leh mahni a hlim thei niin ka inngai ngei a, tunang reng hian ka awm kher lo ang. Chumi dik zia hre tur chuan tunah ngei pawh ka hriat hauh lohin nasa takin ka danglam tawh a ni. Ka hlim nia ka inhriat lai hian keimahah kim lo a awm ta tlat! Chu chu eng thil nge anih erawh ka hre lo. Eng thil ber nge keimahah hian kimlo tih ka hre hauh lo mai! Thil thar a ni..
.
Ka muhil dawn siar siar tihah ka phone ri vangin ka thuchhuak hlawl a. Min rawn biak tumtu chu a number ka save lo tlat mai.
.
"Ate, Frankie ka nia. Tunah M&M Hospital-ah kan awm mek a."
"Oh.. Eng thil nge ni ta?"
"Norah a chesual a.." sawi zawm mai tur hrelo niawm tak hian a ngawi chat a. Ka tha khur nghal dawt dawt mai. Norah.. Ka thian, ka engkim Norah chu engtin mah a awm lovang..
"A thalo viau em?" ka tawng khur chu ka thunun theilo. Norah chungah thil  thalo a thleng tur ani lo..
"I theih anga rangin lo kal phawt mai rawh."
"Aw le.. Aw le.."
.
Phone off in ka inthlak nghal sawk sawk a, Asangtea kai thovin kan unau chuan hmanhmawh takin M&M hospital kan pana, ka nu leh pa te chu chanchin lo ngaichang phawt turin in ah an lo awm rih thung.
.
Hospital kan thlen chuan an awmna lai min hrilh lam chu tlan dawr dawrin kan pan a, ka rilru mangang lutuk chu awmngaihna reng reng ka hrelo.
.
"Helam ah hian." Kan bul velah chuan tute nge awm en lovin Frankie chu ka zui hlawk hlawk a. Khuma Norah lo mu bam mai ka hmuh chuan ka insum hman lo. Ka mittui tla chu hru sawk sawkin a khum bulah chuan ka thu a.
.
"Hey, tinge tihian i awm a?" ka tah chhuak teivet pawh chu. Ka mittui ka dang hman lo reng reng.
.
Thei leh thei lova nui chungin "Ka thi em pawh a la nih loh hi." a ti sep a.
"Hey.. 'T' thumal hrim hrim kha sawi suh.." ka tih chuan a nui leh sak a. A nuih zawngin a hliam a na tih hriat tak hian a then zui sak bawk.
.
"Ka lo hmu ve thei angem?" Kawngka a mipa lo ding chu Lawmsanga a ni. Kan inhmuh lohna chin a rei tawh khawp mai. Engtin nge helai hmunah rang taka a lo thlen theih zawk ni? A nil eh ni lo angin a hmel a lang dang khawp lehnhal a. Ka kalsan dawn em tih zawhna mitmeng in Norah chu ka en a, a mit a chhin sak  hnu chuan ka chhuahsan a. Lawmsanga hian eng vanga a fala hmu duh kher nge anih tih lam chu ka buaina tur a awm lo. Amah ber a that chhuah chuan a tha vek. Oh..kha pa khan Norah hi a tina leh a nih vaih chuan a pawi viau ang.
.
Karhnih zet zawt chhung chu tlai lamah Norah ka kan ziah a, rin aiin a tha chaklo angreng. A pindan ka luh ruala ka thil hmuh chuan min tihlim khawp mai tiin sawi ila ka rilru dik tak sawi ka ni ang. Lawmsanga'n duat taka en chungin eitur a lo barh a, min hmuh ruala Norah lai hmel chu a inhmeh thlawt lo. Hmana ka hmuh tawh thin mitmeng de ser ser ka hmu leh thei hi ka lawm khawp mai.
.
"I lo tha zel tih ka hmu mai e.." tiin ka nui sang a.
"Nia, karleh ah chuan kan chhuak thei tawh ang." Lawmsanga hmel mawlh chu hmuh a nuam.. Anni pahnih hian thawnthu ngaihnawm tak an nei ngei tih hi kei aia hrechiang an awm kher lo ang.
.
Alan nen vawihnih chu kan inhmu fuh a, mah se, kan inbe lo thung. Norah pindan a ka luh rualin a chhuak nghal hmak hmak zel anih kha. Pawi chai lo! A chanchin ka ngaihven ru reng hi bansan theih ka duh hluah hluah a, chu zawng chu a ni mai!
.
Ka phone ka scroll zar zar a, ka mit la tak thil ka hmuh chuan ka titawp chawt. Engtilai mahin Alan phone number hi ka save lo a, save tumna pawh ka nei lo. Mah se, ka phone ah hian a lo awm kiau mai.
A profile picture check tuma ka luh chuan ka thin a phu deuh dawt dawt a, a thlalak ka hmu chiah a lungawilohna mak tak hian ka khat nghal vek. A hmeichhe dinpui hi a hma a ka lo hmuh tawh tho kha ania, an inhnaih viau a ni ngei ang. Mipa puitling tawhin a profile picture-a a hman chin ngat chu an inkar a nghet hle ang tih ka ring. Ka na vawng vawng mai! A hmaa alaka ka lo awm tawh dan ngaihtuah chuan na tur ka ni lo tih ka inhria.. Heng thil ka tuar peih loh vang hian alawm mipa ka hnaih duh ngailoh reng ni! Tunah chuan ka duh emaw duhlo emaw ka rilru chu a na ta tho anih hi. Mal ngawih ngawihin ka inhre nghal ringawt bawk.
.
“Hey, Bawihi. Zanin Lazarus kha theihnghilh suh aw..”
“Party leh a chhehvel boruak hi ka pension san tawh ka tih kha..”
Norah hnar tum dat ri chu ka hre pha reng tho. “A theih loh.. Lo insiam rawh. Kei nen kan nih chuan I bang thiang lo a lawm.”
“Lawmsanga a kal ve dawn tho kha..” ka aw rik chhuah dan chu ka duh lo. Riang bik anga lan pawh ka duhlo. Engkim hi ka kham ta hluah hluah anih ber hi.
.
.
"Lo insiam la, ka lo hruai ang che.. Zanin chiah.. Zanin chiah aw.."
.
A tawpah chuan ka aw leh ta nge nge. Party engilo a ka chhuah tawpna a ni tawh maithei tiin uluk takin ka inchei leh lawi a. Mi hmuh tura inlan dawn chuan min hmutu tur chu tupawh ni se, eng mi pawh ni se, mahni tawkah nalh taka lan hi chu a tul ve hrim hrim.
.
Lazarus hotel kan thlen chuan hmuh ka tumlawk ang chi ho chu ka hmu kim thawkhat in ka hria. Alan tih loh chu! A ni hi ka hmu miah lo.
.
Zan dar 10 a rik dawn hnaih chuan haw ka duh thu Norah ka hrilh a
"I haw hmain thil entir tur che ka nei a. Room 207 ah lo han kal hmasa la ka lo chho vat ang."
"Eng thil nge?"
"Thil tha deuh a nimai."
"Okay. Rei lo la aw.." Norah kal sanin room 207 ka pan a. Ka ke kham ut ut vang chuan hawikualin ka pheikhawk ka phelh a. Ka hahdam nghal sawng sawng mai. Room chhunga ka luh chuan a lo thim raih a, light ka on hnuah thutna nawm hmel zetah chuan ka thu pil ta kak a.
.
Norah chu ka rin aiin a lo lang har tawh. Minute 10 a ral hnu chuan ka ngaih a tha tawh chiah lo. Ka awmna pindan kawngka chu chum dawt ang hian a rawn ri a, ka tho chhuak nghal zawk. Thawm dang awm lovin a reh leh ta rih a. Ka phone phawrhin Norah ka call a, a pick up mai theilo. Eng thil nge ka nghah a, Norah pawh chuan enge a tih chen chen ni?
.
Pindan atang chuan ka chhuak a, corridor-a mi pahnih lo awm ka hmuh chuan ka ding chawt a. Ka hawisawn mai thei lo. Alan hmel chu chiang zetin ka en a, a nghawnga kuahtu hmeichhia pawh chu ka enchiang khawp mai. Ka thaw a tawp mai dawnin ka hria. A hma pawhin ka hmu dun tawh tho a, an chanchin hre tam lo mah ila inngaizawng nghet an ni a, ka lo nat ve ngawt nachhan tur a  awm lo. A awm lo hulhual.!
.
Harhchhuak thutin ka inher a..
"Min en reng lo khan kalsawn vat tur a ni reng ani. Mawl lutuk.." chu hmeichhia zet chu le! Ka ke pen tawpin ka ding a, ka va en leh ngat.
.
"Mi fing tan chuan inchhung a tihtur niawm tak pawnah inti anih kha mawle." Engahmah ngailo anga lan tumin ka nui lui a, ka hmui a che tha theilo. Alan mitmeng ka hmuh chuan ngawirengin ka lo kal pel mai lo a ni ka ti leh hnuhnawh a. Mah se, tawlh sawn ka tum chuang lo.
Hmeichhia in a nghawnga a kuahna chu phelhin min rawn pan a, a tawngkam ka hriat hma chuan ka lo thaw dep dep ngam tawk a ni.
.
"I thik anih kha." cho zet hian min en a, a hmelah chuan a ngaihtuahna a thil awm dang engmah ka hre theilo. Min cho em em a ni tih chiah a mitmeng ah chuan a lang.
.
"I duhthusam anih chu. Min lo hnaih lo bawk rawh." ka aw chu a ri chhuak chang chang. Ka chhungril a ka khur nasa lutuk chu ka hlauthawng zawk hial mai. Ka thik reng em ni? Awih duhlo mah ila, ka thik.. Ka chiang! Hmeichhe dang bula a awm thik leh tur si hian a hunlai khan ka lo hnawl si a nih kha.
Min en vang vang a, muangchanga min rawn hnaihin dam thlap hian min kuah a, a thinphu dat dat ri atang chuan a pangngai chiah biklo a ni ngei ang. A thinphu a rang em mai!
.
"I mitmeng atang khan ka duh ka hmu ta. Min tlanchhiatsan tawh suh." ka samah a hmai a phum a, tawngchhuah a harsat hmel khawp mai.
.
"Min thlah phawt rawh." ka ti ringawt a. Tunah hian sual let turin tha ka neilo.
"Ka thlah tawh ngai lovang che." a ti leh sup a.
.
Min kuah hma lawk hian hmeichhia nen an inkuah tih ka ngaihtuah chhuah chuan ka awm hi chhun ang maiin a na a ni..! Min kuahna atang chuan talchhuak in thawk ka la vang vang a.
"Min duh tih i inpawm theih nan hian eng thil nge ka tih leh ang?"
A tawngkam chuan min va thawng chiang em!
.
"Amah hi maw?" hmeichhia chu lo kal hnaiin min rawn en nawn leh ngat a. "Hi, Kimtei ka nia. In chibai ila. Ka tawngkam vang khan min hrethiam dawn nia."
.
Thil awmzia hi engmah ka hrethiam ta lo. Alan chu mitmeng buai nakin ka en a, chibai turin min duh tih lantir nan a bu nghat a. A thu awihin hmeichhia chu ka chibai a.
"A ni hi ka thiantha a nih hi.."
.
"Ka kalsan teh ang che u. Ka hnawk ta tlat in ka hria." nui har har chungin min kal pel a. Norah arawn lang hlawl bawk. Alan nen kan dingdun min hmuh chuan a hawi phawk nasa khawp mai. A inthunun leh vat a.
.
"Ate, hawh le.." Norah zui tumin ka inher a, Alan chuan ka banah min vuan vat a.
.
"Norah, Atei hi biak lawk ka duh."
"Huh..maw? Enge thil awmdan hi."
.
"Nakinah ka hrilh ang che." ka ti sap a. Alan ka thlawp tih a hriat chuan Norah chu a phawk zual. A inthup thei tawh lo..
.
"Thil thalo ti suh ang che.." Alan chu melhin a tawngkam a chang viau naa a mit siai zauh lai chu ka hmu hman tlat.
.
Alan nen pindan a kan inzuiluh hnu chuan ka awm dan a lai vek. Thutna lo awmah chuan ka thu thuai a. Sawitur ka hrelo. Ka aw ka thian kharh a.
.
Ka thutna hmaa Alan rawn thingthi ka hmuh chuan mak ka ti takzet!
.
"Ka hmangaih che."
.
"Oh!" Ka kut pakhat in ka hmui ka hup ringawt. Ka kut chu lain a kut lian thlurh chuan ka kut pahnih chu a humbo hneh khawp mai.
.
"Kum li liamta ka hmuh hmasak ber che atang khan ka theihnghilh leh tawh lo che. Ka hmangaih nghal che chu ka ti ngamlo. I ngaihzawng vanga i nun danglam lai pawh ka lo thlir reng thin che a ni. Hun reitak hnuah ka hmuh leh hmasak ber che khan a hmaa ka awmdan ka hriatthiam loh kha ka hrethiam ta a, chiang takin ka ta tur ini tih ka hria. I nungchang leh ka laka i awm dan ka hmuhin awlsam taka ka laka i inpek ka ringlo a. Ka rin aia nasa in a harsa ta reng a nih hi."
.
Ka ngaihtuah let pawh hian party naa ka hmuh bak kha chu Alan hi ka hmuh awm ka hre lo. Ka ngaihtuah chhuak zo lo. Samson nen kan inngaihzawn lai khan mipa dang reng reng ka melh lo va, chuvanga lo hre ngailo pawh chu ka ni mahna.
.
“Engtin nge ka rin theih ang che. Min tina thei tur reng reng hnaih ka duh lo.” Ka tih chuan ka biang tawn tawn ah min vuanin ka mitah min en a, a mitmeng ka hmuh chuan hlauhthawn ruk ka neih leh ka invenna bang zawng zawng thiahdarh a ni ta vek mai. Hetiang khawpa awlsam hian hneh theih ka ni tih ka inhre hauh lo.
.
"Ka hmangaih che ani tih i hriat fiah theih nan hun min pe rawh."
.
Ka chian ngam lohna chu min hriatthiam sak niawm takin ka bulah a rawn thu a, min kuah vang vang a. Ka kuahlet chuan thaw hakin min kuah nghet sauh a. Zawhna tam tak ka nei ngei ang.!
Ka zawhna dawhthei takin min chhan sak a, min hnaih tura a beihna ah hian Norah a inrawlh lo tih ka hriat chuan ka thaw huai.. Lo inrawlh pawh ni se tih vak dan ka hre chuang hlei lo va! Pawnlama ka thiltih tam zawk chu Alan hian a lo hre vek a, a thiltih thenkhat atthlak tak tak pawh nui chungin min hrilh a, a hmel chu ka lo en ngawih thung thung.
Zawh tur ka neih tawh loh hnu pawh chuan kan thu reng a, min en vang vangin min kuah leh hluai thin! A mitmeng atang chuan a duh tak a hmu tih hai rual a ni lo ve. Keipawh chutiang tho chu ka ni. Ka ngaihdan atthlak tak, a hun laia atthlak tih ka hriat si loh khan kan pahnih hian hun nuam lo tak min hmantir a lo ni zawk reng mai. Tunah chuan ka harhchhuak tawh. Ka mit a del tawh lo.
.
.
.
"Mampui, muhil rawh le.."
Ka fapa, ka en nin theih loh chu ka awi hliau hliau a. Nidang ang lo takin vawiin chu a muhil mai duh tlat lo. A meng kiau a, a nui seih seih bawk. "Apa a chhun a nia.. Tiraw? Mampuia hi chu apa naute a nia.." min chhang ve ang tak hian thawm a chhuah a, ka tan chuan a aia thawm ngaihnawm a awm chuang lo. Mahni fa ngei han awih hliau hliau mai hi thil ropui deuh a nia sin. Ka tan ngat phei chuan a ni lehzual.
.
"Ate..."
"Hetah ka awm... I lo va haw hma ve."
"Nia.. Thil dang rilru ah a awm theilo a lawm le." Alan chu ka bulah rawn dingin ka biangah min fawp  a. "Ka lo pawm ang."tiin naute biang chu a kut hmawrin a khawih zauh a. Alan in a  a awm chuan kan naute hi ka chang meuh lo chu a ni e.
"Han inthlak phawt la.. I hak tur chu angai ah ka dahchhuak sa aw.." min chhang lovin min en vang vang a, a hmel hmuh a nuam khawp mai.
"Ka hmangaih che." ka biang tawn tawnah min vuanin min fawp vang vang a.
"Ka hmangaih che." a kalsawn hmain ka fawp ve leh thung.
.
A inthlak chhung a reilo khawp mai. Room atanga arawn chhuah chuan Mampuia a pawm a, reiloteah a muhil nghal mai.
.
"Ava mak ve a.. apa pawm kher a duh anih dawn kha.." kan fapa a pa awma bei chunga muhil thaw sek sek chu ka en a.
.
"Ka lo pawm ve dawn che mi?" atih chuan nui chungin ka melh ralh ringawt.
.
Ka phone a rawn rik chuan ka pick up thuai a. Norah nen kan inbiak hi chuan kan tawp mai thei lo thin. Thla hnih hnuah Lawmsanga nen an innei ve dawn ta. Nupa hlim leh inngeih tak annih ka duhsak takzet. Anni ngei bawkin ka ring. Norah nen kan inbiak zawh chuan Alan bulah thuin naute kawr ka thlep melh melh a.
.
"I ringtone kha hmanni ah ka ngaithla chiang a.."
"Maw? Enge?" ka ti ha a.
"Hla tha tak a nih kha. Enge a hla thupui?"
"What I Never Knew I Always Wanted.  Ka hla alawm." ka ti ve mai a. A nui suk!
.
A dik chiah a ni. Ka duhthusam ram pawha ka ngaihtuah phak loh mipa tha tak ka tawng a, mahni a hlim tawk leh midang mamawh lo ni a inngai thin kha tunah chuan ka danglam ta. Hmangaihna hi a lo awm ngei a, mipa rinawm pawh an lo awm ngei tih fiahna ka tawng mek chu anih hi. Ka pasal angchhung a ka awm hian ka lo ngaihtuah thiam ngai loh himna leh thlamuanna ka hmu a, ka nuna hmun ruak hnawh khah ngai leh kimlo awm thin te kha Alan hian hmangaihna nen min rawn tifamkim ta anih hi.
.
Mo thuam, thawmhnaw var mawi tak ka hak ve ka inring ngai lo a, ka nunah hian lal fapa tuemaw lo lan hun ka nghak ngai lo niin ka inhre thin. Ka nuna Alan a lo tel ve atang chiah khan mahni chauhin ka hlim thei tia keimah leh keimah ka lo inhrilh thin kha dawt mai anih zia ka hrechiang ta hle bawk.
A tawp a tawpah chuan ka mamawh em em, ka mamawh tih ka lo inhriat ngai loh thil hlu leh ka duh em em chu ka hmu ve ta. Ka thinlung chhungril bera ka hmangaihte, ka pasal Alan leh kan fapa chu en in ka thinlung a hlim a. Ka nun tihfamkim a awm mek vang hian ka hlim em em a ni.


.
ULUK DEUH A CHHIAR TUR👇
AROMA QUEEN FLABIA FRESH - HERBAL PRODUCT MIZORAM A LO LUHNA LA REI LO, BUSINESS PLAN THA LUTUK. ZIRLAI TAN PAWH ZIRLAI TIBUAI MIAH LOH A SUMDAWN THEIHNA, HRECHIANG DUH TAN A HNUAIA NUMBER KA DAHAH HIAN BIAKPAWH THEIH RENG A NI E.
9612229037/ 9402365651
WHATSAPP GROUP SIAM A NI BAWK A, AN PRODUCT EN DUH HRIM HRIM TAN PAWH BIAKPAWH THEIH RENG KAN NI.
A TI HMASA TAN CHANCE A THA, MARCH NI 1/2018 KHAN OFFICE HAWN A NI A, AIZAWL AH REGIONAL CENTRE AWM A, OFFICE HMUNPUI AH DOCTOR TE'N AN THUTCHILH DAWN  VANG CHAUH PAWH HIAN A NGELNGHEH ZIA LEH EIZAWNNA TLAK ANIH ZIA A CHIANG NGHAL A NIA. BEAUTY CARE, PERSONAL CARE, HEALTH CARE, FOOD AND BEVERAGE ETC. A AWMKIM HLE. A THLAWNIN MEMBER ANIH THEIH RENG E, RAWN BELCHIANG LA I INCHHIR DAWN LO CHIANG LUTUK.
PHONE - 9612229037/ 9402365651