HIDDEN LINE - 3

HIDDEN LINE
CHAPTER - 3
thantei_lauraSean
.
Angai ang bawkin Park-ah thuin ni tla tur ka thlir a, a chhan ka hriat hauh lohin pik ru zet hian thawk ka la halh a.
Hetiang hian ka la awm ngai pawh ka hre lo. Ni e, hun harsa tak tak ka pal tlang fo tawh a, a thente chu mihring pangngaiin an hmuh ngai loh leh hriat ngai loh te a ni hlawm. A then phei chuan min ring hauh lo tih pawh ka hria. Mihring ngaiha thil mak tak tak ka tawh lai pawhin tuna ka  thawpik ang hian ka awm ngai miah lo. Hlauhna vang ni miah loin ka khur der der a, ka kut pahnih nghet zeta suihin ni tla tur chu ka nunna innghahna nimai awmin ka en ngawih ngawih a.
.
"I khua a va har awm ve!" tawng ka hriat rualin ka hnung lam chu rang zet hian ka en vat a, ka en hma pawh khan a aw ka hriat rualin tunge tih ka hre tho chungin a hmel ka hmuh chuan ka dar zawi hnakin ka thu tha a.
.
"Hetah te enge i rawn tih ve dawn?" ka ti bul hmak a. Vawi engzat nge a hmel hmu tawh lo tur hian ka hel kual thin. Vawitam a ni! Ka chhiar seng lo. Vawiin taka helai hmuna arawn kal ve pawh hi thil mak tiin a sawi theih hial ang chu.
.
"Vawiin chu ka khua a har em a, helai hnaiah hian ka kal remchang bawk a ka rawn hmu fuh hlauh che a..."
.
"Enge?" awmze nei lo zet hian ka  nui hak a. Min hmuh vanga helaia rawn kal ve hi a ni tih a sawi chu ka awih sak lo mai ang.
.
"I hlim zel em?"
Ka chhang dawn em ka hre lo. Ka bulah arawn thu a. Nupui pawmlai nei bula thut ringawt hi chu sual a ni lo tih ka hria a, mah se, tuna ka bula thu hi chu mi nazawng a ni lo. Ka thinlung zawng zawng ka pek thin mipa a ni tlat a ni. Chu pawh ni se, ka beisei tihna a ni chuang hleinem mawle! Ka pan pawh ni lo, kan inngaizawng dawn tihna pawh a la ni lo leh zel!
.
"Hlim zel chu anih hi." sawi leh mai tur hre lovin ka hawi vang vang a. Ka chapona vanga mahni chauha ka tuar natna tam takte kha tun thleng hian a hriatturin ka la tilang ngai lo hrim hrim a ni. Ka thinlung nat vanga tlaivar thaka ka tah pawhin ka chhungril chak lohna hi tihlan ka duh ngai lo anih kha. Tunah pawh chutiang chu ka la ni reng tho.
.
"Naktuk hi ka birthday a nia, min wish lawk ve la.." hmana ka hmuh thin, hun rei lutuk ka hmuh tawh ngai loh mitmeng nung sar chu ka en zawk a, ka en rei ngam lo. Ka ngaihtuah dan hi a dik dawn lo tlat mai!
.
"Oh! A ni maw? Ka lo hre hauh hleinem.." dawt ka va sawi chiang tak em. Engtik laiin nge a birthday hi ka theihnghilh tawh? Kan inngaihzawn lai kha tun hun atanga chhut let hian kum 5 a lo tling ta zan mai.. Hei pawh ka tan chhut buai angai lo..
Ka chhang har ti niawm tak hian min en a. A mithmul nalh zet te, a hmui chung sir deuha a khuavang nalh zet te chu.. 'Heihi nalh ka ti' tiin ka khawihsak thin kha a nia. A va mak tak! Tinge vawiin hi hetiang hian ka awm le.
.
"Happy Birthday in Advance" ka ti sep a, ka duh aiin ka tawng ring lo.
.
"Ka lawm e." a kut arawn phar chhuak a, ka lo chibai ve mai bawk a. Kan invuan vang vang a, ka phone a rik chuan naupang thil tiru man ang mai hian kan phu zawk a, kan inthlah chiang khawp mai.
.
Ka phone ka pick up a, ka u nupuiin haw tawh tura min duh thu min hrilh zawh hnu chuan phone chu dahin ka bula 'mi pasal' thu ka chibai zawh chiah chu ka en a. "Ka haw a hun a. Ka kalsan mai ang che. Dam takin aw." ka tih chuan a ha var rual that langin a nui sak a. Hei pawh.. Ooo.. thil hriatchhuah tur hi a va tam em! Heng zawng zawng vang hian alawm hmuh tawh ngai loh ka duh em em. Ka duh emaw duh lo emaw hun liam tawh a kan thiltih dun tam takte kha ka hrechhuak leh lo thei lo a ni.
.
"Anih phawt te ti ve la. Dam takin intih te chu a.." a nui zui hak hak a. Hah! A nui ri te chu maw..!
.
"Anih leh phawt le. Hrisel zel ang che." nia, tha taka inthlah hi a tha. Kan inhmu fo dawn pawh a ni lo a.
.
Ka kal liam dawn chuan ka hawilet leh hram.. Enge maw ka hriat hrep  ni! A ban arawn vai lauh lauh a, ka vai let ve lo thei tlat lo.
.
Ka hawilet leh rualin "Tikhan a tawk. Ngaihtuah zawm miah suh.. Ngaihtuah zawm suh." tiin ka phun zui mawlh mawlh a.
.
In ka thleng a, kan buai nuai nuai a ni ber. Ka u nupui min rawn koh chhan kha heihi a ni tih chu hria ila ka haw kher lo ang. Inthlak hman miah lovin eirawng ka bawl a, engmah a lo tih loh chhan a sawi lah chu ho hi ka ti khawp a. Sawichhawn pawh ka peih lo!
.
Buai nuai nuai bawkin zanriah kan kil a, ka u thiante mi 3 in chaw an rawn ei bawk a. An ri hluah a ni ber mai. Zanriah ei kham chuan thil ka tifel zo a, muangchang lo a inbual in ka mu nghal daih a.
.
Thawm eng emaw vangin ka muhil ka harh hlawl a, ka harh hlawl danah eng thil nge thleng chhunzawm dawn tih ka hre mai.
Ka rin ang chiahin ka khum bula mipa la naupan hmel tak thu chu ka hmu nghal mai reng a. A hmel ngui lap ka hmuh ringawt pawh chuan ka lo ni ve nghulh mai nia.
.
"Eng thil nge ni ta?" ka tawng hmasa lo ang ka ti zet nain ka thei ta lo.
.
"A tam mai." a ti sap a. A hmel en aiin a aw a lian phian. Aw mawi tak i nei reuh anih hi ka ti rilru hmanhmawh a. Dawt ni hek lo le.
.
"A tam mai chu enge? Hetah hian thu ho mai mai sawi a ka mutthilh hun tihbuai tuma lo kal inih ka ring lo." ka ti duah a. Tum dang ang lo takin keimah hi he tleirawl pui tur hian ka inpe a ni ringawt mai.
.
"Ni lo e. Bultan na tur ka hre lo a ni. Sawi duh ka ngah em a ni." a thaw hak a. A thaw hak ka ti nain a thaw ri pawh ka hre chuang lo. A boruak rawn ken tel chuan ka pindan chhung boruak chu a ti uap churh a, a nuam lem lo khawp mai.
.
"Fapa mal ka nia. Zolawmsanga ka ni."
.
"Nimin piaha thil thleng kha nangmah hi i ni tihna ani maw?"
Chanchinbu ah ka hmu alawm. A bu nghat a.
.
"Anih chuan eng thil nge i sawi duh chu i sawi tan mai dawn em niang?"
.
"Fapa mal ka ni a, ka nu leh pa ten min duat dan chu khatia i ngaihtuah ringawt pawh khan i hrethiam pha lo ang. Mahse, chu chu a tawk lo a ni."
.
"Nu leh pa hmangaihna dawn chak dawng thei lo an tam asin." kei ngei pawh tiamin ka ti rilru rauh rauh mai.
.
"Ka hre ve alawm. Mah se, a tawk zo lo ka tih chu.." thinrim hmel a pu zawk a. " Ka lo mawl em a ni. Damdawi ka khawih nasa a.." a tih chuan bu nghatin "Tunlai ah thalai tam tak an buai reng lawm." ka lo tihpui chuan min rawn melh ram ram a.
.
"I lo tawng ve zel a. Ka mangang teh mai nia."
.
"I hmel ka hmuh khan ka hre nghal vek alawm."
.
"Ngaihzawng ka nei a. Ngaihzawng ti ila, amah chuan min ngaizawng lo. Min tanpui a tum vanga min be tha a niin ka hria a, chu chuan ka thin a tirim em a ni. Ka nih ang hian min pawm thei mai lo mi? Keipaw'n ka thil tih thin hi sim ka tum ve reng tho a.."
.
"Ngawirawh, aw, nia, han sawi zawm phawt teh.." ka ti leh ta zawk. Sawi duh ka ngah mai. Mah se, ka sawi tum hi minung tan lo chuan awmzia a awm tawh tlat lo. Siam tha leh turin  he rawlthar hmeltha tak hian hun a nei tawh lo tlat.
.
"Thil tam tak siam that duh ka nei a, chu chu ka mawl vangin ka tithei tawh lo. Ka nu leh pa hnenah ngaihdam dil ka duh a, Rosa-i hnenah pawh ka hmangaih tak zet tih hrilh ka duh bawk a. Ka thiante zawng zawng hnenah pawh.. Keichuan kawng dik zawh leh turin hun ka nei tawh lo a, anni tal chuan kawngdik rawn zawh se ka duh. Mahni taksa nawmna zawn vanga ruihhlo tih hian awm zia a nei lo. A mawhphurtu chu keimahni tho kan ni leh thin. Naktuk ah ka chhungte hnenah min kal sak la, keimah vanga lungngai taka an awm loh nan thuchah hnuhnung sawi ka duh a ni. Sawi tur a tam ka ti nain ka sawitur tam zawk hian awm zia a nei tawh lo. Ka sawi vek lo mai ang." A kun ngaih a, a lu a thing nar nar a.
.
Ka tawng leh hmain a bo a, mak tiru takin ka mu ve leh mai a. Reiloteah ka muhil leh nghal mai bawk.
.
Ka muhil ka harh leh chuan sana ka en vat a, zing lam dar 4 chiah a ni. Thawm ka hriat vanga harh ka nih loh vangin ka inlet thawk a. Ka muhil leh dawn chiah tihah ka hmai rawn lum pep pep vang chuan ka meng zawk a, ka phu nasa lutuk!! Ka mur chhuak nghal vek bawk.
.
"Enge i rawn tih dawn?" ka khur dawt dawt a, sawi tur ber pawh ka hre lo. A ni thei dawn em ni? Tlaiah kan inhmuh pawh khan engkim a pangngai vek sia. Engmah dik lo a awm lo. A mak lutuk..
.
"Mak i va ti awm ve? Ni e, a thleng ve ta anih hi." kan awm dan ngaiin kan la awm reng. Kei ka mu a, a ni ka hmai si lo chauhin a la awm reng bawk.
.
"Engtin nge anih theih? Tlaiah pawh khan.." ka tawng zawm thei lo. A mak in min thawng lutuk deuh em a ni. 揇am takin aw� tia ka lo thlah ta kher kher kha ka inngaih chhiat rum rum mai.
.
"Ni e, Mate, ka hun a thleng a, mihring dan theih a ni lo a nih hi." a thaw halh a.
.
"Chutiang chuan min ko suh."
.
"Hah, a pawi tawh hleinem. Nung dama ka awm chhung khan hetiang hian ka ko leh thei che pawh a ni lo a."
.
"Engtin nge an awm ang? A ni thei lo. I fanu kha.. A la naupang lutuk.." ka tawng khur dawt dawt lo thei lo a ni. Ni e, ka mipa hmangaih awm chhun leh hei leh chen mipa dang reng reng ka ngaihtuah theih loh chhan hian nupui a nei a, fanu kum 4 mi lek a nei alawm! A la thi thei hleinem!
.
Ka rilru a thil tam tak lo lut zut zut chu ka ngaihtuah seng lo.
.
"Engtin nge kan tih dawn?" mangang zet hian ka en a. Hun pangngai leh hmun pangngai, mihring dam thaa inhmu chu ni ila tun ang hian ka awm lo ang tih ka hrechiang. Ka hmuh pawha amah be lo tura kal kual ngat ngat thin ka ni tih ka sawi tawh kha. Tunah chuan engkim a danglam. He mipa, ka bula awm hi mihring dam  lai a ni tawh lo!
.
Ka manganna chu min hriatthiam sak niawm tak hian a nui sak a. A nuihzat vanga nui erawh a ni lo chiang khawp mai.
.
"Mate, i bulah hian eng ber nge ka sawi ang tih ka hrethiam lo a ni. Tunang dinhmuna awm hian ka bia ang che tih ka ngaihtuah ngai miah lo a, ka thusawi tur erawh hi chu vawitam tak ka ngaihtuah asin. Vawi tamtak.. Hmeichhe tha tak ini tih ka hrilh thin che kha ila hria em?"
.
Thu chhuakin ka bu nghat nghat a. Tun hun bak hi he khawvel ah hian kan inhmu tawh dawn lo. A taksa vawt vek tawh khuma mu tur ka mitthla a. Ka phal emaw phal lo emaw tunah hian an chenna in ah a taksa chu a awm ngei dawn tih ka hria.. Ka awm arawn inhnawh up up a. Kan inthen lai khan ka rilru na tihngaihna hre lo khan amah emaw keimah emaw hi thi i la a nuam zawk daih ang' tiin ka ngaihtuah thin anih kha.. A lo ni lo.. Ka lo duh hauh lo. Ka tan dam dawn lo mah se, a fanu leh a nupui la naupang tak tan a dam angai asin!
.
"Ka sawi tur hi vawikhatte mah ka la sawi chhuak ngai lo a, tun bak chu sawi pawh ka sawi leh tawh lovang. Mate.." min en vang vangin a hmui a pet zauh a. "Ka hmangaih che. Ka thinlung takin ka hmangaih che."
.
"Ni lo.. Chutiang chu sawi tur a ni lo. Ngatinge tunah i sawi chauh? A ni lo.. Engtin nge khang thil zawng zawng kha i tih si? Ngatinge ka at vanga thutlukna ka siam lai khan min dan i tum loh. Ka hma ka sial vanga ka then che tih ka hrilh lai che khan engvangin nge he thu  hi min hrilh loh?" ka insum thei lo. Ka tap hlawp hlawp a. A na em a ni! A na lutuk tih hian a sawifiah zo lo. Tunah, a taksa thlahliam mai tura a awm tawh lai hian a thlarau chuan min hmangaih thu min hrilh a.. Ka insut hlawp hlawp a, ka thawm chu ka u ten an hre pha ang tih hlauin ka ka ka hup a, ka thup zo chuang lo. Ka puansin hmawr lam chuan ka ka ka hnawh a, ka taksa a khur dawt dawt bawk a.
.
"Kan inbiak angai a nia." a tih chuan harhchhuak deuhin awm ze nei lovin ka tap tih ka inhre chiah. Ka ka ka hnawhna chu phawrhin ka mittui ka hru sawk sawk a.
.
"I duh apiang min zawt thei ang? Ka thawng thut che tih ka hria a, mah se, i hriat kha.. Ka awm dan hi mak ti suh aw. Keipawh hian ka duhthlanna ka hmang sual ve tho a, ka nun a nuam bik lo a."
.
"Ni lo e. Duh taka i neih i nupui leh i fanu chauh hi i hmangaih ber tur an nia lawm."
.
"Ila ngai reng. Hei vang hian ka hmangaih em em che a ni."
.
"Vee, chutiang sawi suh.." ka koh dan vang chuan anui sak a. Kan inngaihzawn lai khan koh duat nan 'Vee' tiin ka ko thin a, kan inthen hnua a vawikhatna leh a tawp nan tunah hian ka ko leh ta anih hi.
.
"Ni e. Ka nupui leh ka fanu chuan ka ngaihsakna tam tak an dawng a, hlim taka an awm theih nan ka theihtawp ka chhuah thin alawm. Chu chu i duhdan a ni ang tih pawh ka hria a. Ka hmangaihna, ka thinlung neitu chu nang hi ini. Ka nupui pawhin a hria alawm."
.
Ka tawng thei tawh lo. Ka mangang a, ka na a, ka beidawng. Thlarau bula tah chiam hian awm zia anei lo tih ka hria. Mah se, amah a ni. Tuna ka bula thlarau awm hi amah, ka hmangaih ber kha a ni tlat a tin ni!
.
"A pawi ka ti.." ka insut leh hlawp hlawp a.
.
"Ka kuah ang che aw?"
.
"Vee..." nasa taka tah insum chungin ka vanvadak a, ka insum zo chuang lo. Ka mittui tla zawih zawih chungin ka bu nghat nghat a.
"Min kuah rawh."
Ka taksa lum pap chu eng vang nge tih ka hria. A damlai taksa in min kuah tawp ber kha kum 5 liamta khan a ni. Chumi tum chuan thikthu vanga thinrimin ka nem sawn a nih kha!
.
"Ka then che tih ka sawi khan engvangin nge min lo dan loh? Min lo dang tur i nia. A hnuah pawh, nupui i neih hma kha chuan ka hnena i lo let hun ka nghak reng asin. Min tihnat tam zia hi i hre pha lo zawk ang.. Engvanga min dang lo nge inih? He thu hi ka damchhunga ka inzawh tur niin ka hria a.. Keimah leh keimah vawi tamtak ka inchhang a, chhanna ka inpek chu a inang ngai lo.."
.
"Ka hmangaih vang che a ni."
.
Aw, Lalpa.. Ni lul suh se. Engvangin nge hetiang thil hi a thlen? Ka lo mawl em vang a ni. Tunah chuan a hma zawng zawng ai khan ka na lehzual tawh zawk! Keimah leh keimah chhanna ka inpek kha chuan ka duhdan in chhanna ka inpe a, ka inhnem thei zawk thin.
.
"Eng tin nge anih theih?" ka tah nasat tawh vangin ka aw pawh a dik tawh lo.
.
"Thik tur awm miah lo i thik vang khan min then turin chhuanlam i zawng ah ka ngai hmiah anih kha. Ka tum loh tawpa nupui ka neih khan ka tihsual ka hria a, mah se, lo let leh turin ka tlai tawh! Nangmah nen ngei pawh kan sawi thin kha tiraw.. Thihna vang anih loh chuan fahrah siam loh tur kan tih thin kha.."
.
"Ka hria.. Ka hria.." ti sap sap in ka kut ka hum ruh tang tang a.
.
"Khua a var dawn. Ka kalsan che a hun ta. Mipa tha tak ila tawng ngei dawn a, Mate, hlimna zawng zawng nei turin ka duhsak em em che tih hrereng ang che aw. Nitin park-a i thu lai hi ka lo thlir ziah che ania.."
.
"Ka hmangaih che.. Vee.. Mimawl ka nih hi.. Kei aia mawl hi an awm thei ngai lo ang."
.
"Nang aia mawl chu kei hi ka nia lawm. Kan hun liam tawh vang khan inchhirna nei turin ka duh lo che. Tun ka hun tawpah hian i damchhung hun hlim taka i hman theih ka duhsak che vangin ka hmangaih che tih hi ka hrilh che a ni."
.
"I fanu leh i nupui te chu engtin nge ka tanpui theih ang? I nupuiin min hriat chuan ka pawh ngam dawn si lo.."
.
"Hreawm ti suh. Ka fanu chu ka nu leh pa ten tha takin an enkawl ang. Ka nupui erawh chu kum a ral hmaa pasal a neih leh loh chuan mak ka ti viau ang!"
Phawk lutuk in ka en a, a mitmeng ah chuan rilru natna ka hmu a, a nui si.. Rilruna chungin an nui  ngai em ni?
.
"Vawi tam tak min phatsan tih ka hria a, chuti chung chuan thihna vang ni lo a fahrah siam ka duh lo a, thinlung dam si lovin ka ngaidam leh thin."
.
Sawitur reng reng ka hre lo. A pawi, a rapthlak, a mak, a mak lutuk tak zet.
Kan inthen atang khan hreawm tuara awm chu keimah chauh hi emaw ka lo inti a, kei aia tuar nasa zawk chu amah hi a lo ni si. Amah dem reng renga hun ka hmanliam takte kha kohkir theih ni se ka ti.. Ka thil ngaihtuah beiseina awmze awm lo chu ka mit ka men a 'Vee' hmel ka hmuh rual chuan a thi nghal vek.
.
Ar a khuang al al a, min kuahna chu a thlah rualin ka vawt seng seng a.
.
"Ka kal a hun ta. Mangtha.. Ka hmangaih mangtha le."
.
Ka kut vuanin min rawn hnaih a. Tunah hian a tawp nan eng thil pawh ti ila tuman min dem ka ring lo.
.
"Min fawp rawh." ka ti sep a. Ka tawng a hriat ruala a hlim hmel chu khawvel mi zawng zawng hmuh atan hian ka awt tak zet asin. Mah se, tumah reng reng in an hmu ve tawh dawn si lo.
Min rawn hnaih a, ka maimitchhing phal hek lo. Ka hmui a rawn deh chuan ka meng phal leh si lo. Ka thinlung zawng zawnga a tawpna hi feel ka duh a ni!
.
Ka men leh chuan a lo awm tawh lo! He khawvel ah hian a taksa ka hmu tawh ngai dawn lo a, a thlarau pawh ka hmu tawh hek lo ang.
.
"Vee.. Ka hmangaih che.." tiin ka phun zui sep sep a.
.
.
"Tho teh..tho teh.."
Ka thuchhuak hlawl a, ka rilru a lo lang hmasa ber chu chanchinthar  hre tura ka phone en a ni. Khum sira ka dah ka phone chu la in ka en kual zung zung a.
21 April 2017
Ka piancham a lo thleng leh ta.
TwoOneFour* Thank You*
.
He facebook status awmzia hi kei aia hrechiang an awm thei lo!
Khum atangin ka zuang tho a ni ber. Anih chuan khawvar dawn hnaiha ka thil tawn kha..! Status update hun ka en a. 5 minutes ago! A mak hle mai.. Lalpa chu fakin awm rawh se. A tak leh mumang pawh ka thiarhrang thiam tawh lo anih hi.!
Nilengin park-a kal chakin ka awm a nuam lo a, tlaiah office ban rualin park ka pan nghal dawr dawr a. Ka thut ziahna thing hmanga siam thutna a mi pakhat lo thu ka hmuh chuan ka ding chawt. Ka thinphu nasa lutuk chu a thlawk chhuak ang tih a hlauhawm zawk.
.
Muangchang in thutna chu ka pan a.
"Hmanhmawh ve deuh la.." tih ri ka hriat chuan ka ding leh rih. Ka hun tawng mek hi ka mumang a nih chuan harhchhuah leh pawh ka duh tawh lo mai thei!
.
"Thil hrilh tur che ka nei a nia. Ka bulah hian lo thu rawh." ka lam rawn hawiin a nui sak a. A hmelah chuan ka hriat tawh thin leh ka la hriat ngai loh chi hrang hrang ka hmu nuai mai.
.
"Vee.." keimah chauh a ka hriat tawk lekin ka phun sep a. Ka mumang anih leh nih loh fiah nan ka insik a, ka mumang a ni miah lo! Mah se, engtin nge atak ang chiaha ka feel si le? Tunah hian helai hmunah hian eng vanga lo kal nge anih?
.
"Engkim siam tha turin ka lo kal a ni. Engtin nge ka hriat min zawt lo la, mah se, engkim ka hria. Tukin khawvar dawn hnaih khan tlawhtu ka nei a!" makti lutuk in Vee chu ka en a. Keimah chauh lo pawh hian tlawhtu an lo nei ve thin a nih dawn hi..
.
"mak itih hmel hle mai. Sawmpuii kha I la hria em?" atih chuan ka bu nghat a. Engah nge ka hriat loh tehlul ang. Amah nen kan inhriat nachhan a nia lawm. A pasal nen an inthen a, a muhil thei lo mangang in min rawn kai tho a." oh! Anih chuan amah tlawhtu chu thlarau a ni lo tihna a nimaw.. A tha tho e. Ka ngaihtuahnaa thil lo lang hmasa ka ring ringawt thin hi a fuh ber lo fo mai.
.
"Sawmpuii thusawi khan min harhchhuah tir a ni ber ang chu. Engmah sawi lovin I ngawi ta reng sia. Kei hian bul ka tan mai loh chuan.."
.
"I thusawi chu a awmzia ka hre miah lo." Ka tih chuan chiang zet hian min en a.
.
"Min ngaihven tawh miah lo ni a ka hriatna hi a lo dik ngei anih chu. Anih chuan ka sawitur chu ka sawi leh lo mai ange."
.
"Nia. Helaia kan inhmu fuh ringawt pawh hi tuman min hmu lo mahse I nupui pawh a zahawm alawm.. Hre kher lo mah se.."
.
"Kar hmasa khan kan inthen a. Sawi a nuam chiah lo nain mipa dang min umsan a ni. Atir atang khan kan inhmangaih lo tih kan hresa ve ve a, a nun danah ka hrethiam tam ta bawk a, kan inkar kan titawp ta anih kha.."
.
A mak awm hle mai. Tukin zing lam dar 4 vela ka thil tawn kha a tak tak a ni lo a, tunah Vee hi ka bulah thuin mihring dam lai ngei a ni bawk a.
.
"I harhchhuah theih nan ka thil hmuh leh hriat hmangin ka pui che anih kha. I mawl in I luhlul em mai a." Vee bula hmeichhe thu chu mihring dam lai a ni lo! Engvanga min pui nia insawi ve ngawt nge anih? Tunah ka bia anih chuan Vee hian mak  a ti dawn lutuk.. Midang hmuh ve loh hi mi hmuh laiin ka be thei lo.
.
"Ka hre vek a nia. Ka kalsan rih ang che. Zinglama thil thleng kha chu ka buainaa min tanpui theih nana ka tih anih kha. I chance tha neih hi bawh pelh suh. Ka kal phawt ange.. Hepa hi mi tha tak anih hi.." Vee chu a melh a, thu dang sawi tawh lovin a bo nghal a.
A thusawi awmzia kha.. Vee te nun dan leh an nupa inkar a hre tak tak emaw ni le? Felfai takin ka ngaihtuah thiam rih chiah lo.
.
"Ka tawng I ngaithla miah lo tih ka hre mai. Helai hmunah hian lo kal miah lo tur ka nia. Min hnar fithla thak tawh ang tih ka rin lawk kha a dik chiah anih hi. Kan luhlul dun em a, awmzia a awm chuang lo ang."
.
I sawi nawn leh thei em?" ka tita ngawt a.
.
"A eng ber kha nge ka sawi nawn ang? Ka hmangaih che tih thu kha em ni? Mate, mihring tam zawk hian an damchhungin an thil tih sual leh an lo bawhpelh palh tawh emaw, duhthlanna an hman dik loh palh te emaw siamthat lehna hun an nei thei lo a, keini chuan kan nei anih hi. I lo ngaihtuah nawn dawn nia. Mi vannei ah I inngai nge mi vanduai hmangaihtu nei lo leh phatsan angah ila inngai reng dawn?"
.
"Chutiang thu chu engvanga sawi nge inih?" ka tih chuan za vaklo hian a nui sak a.
.
"A ruh lang rawta sawi angai anih hi. Nangnen a bultan tha leh tur hian ka zalen ta tih ka sawi anih chu. I duh chuan min hnawl thei a, min pawm beisei ngam lo chunga sawi ka ni tih I hriatthiam ka ring. Ka mizia I hriatchian kha
.
Chhang mai lovin ka en reng a. A sawi chu a dik chiah. Kan dam chhung hian thil siam tha thei tura chance kan nei a nih hlauh chuan bawhpelh miah loh tur a ni. Tuna ka ngaihtuah ngei pawh hi mi dang hnenah ka lo sawi fo tawh thin. Mi dang tan ni lo, keima tan ngei pawh a lo ni. Vee chu enin ka nui sak a. Ka chhanna chu a hrethiam ang. Mah se, ka nihna dik tak hi min hriatsak se, thlarau khawvel nen inzawmna ka nei tih hria se, min pawm kher angem?
End of chapter - 3
.
.
A thawk thut a, ka mittui a tla ang bawrh bawrh a. A thawh leh thut hunah next chapter chu aw..  Kan group-ah chauh hian ka post a, hmun dangah suan lo hram ang u. Ke mu chuah chuah khawpa type ka ni bawk sia. ^_^
Eng tiklai taka ka ziah nge ka hre tawh lo, ka hmuchhuak hlawl mai. A ngaihnawm leh ngaihnawm loh pawh ka hre lo, uluk taka chhiar chuan ka ziah chhan leh tum ber in hriat tho ka ring! Ve ringawt a!