HIDDEN LINE - 1 (2016march)

HIDDEN LINE
.
CHAPTER-1
.
By. Thantei LauraSean Virgo
.
.
Tlai dar 5 a ri tawh a, in a haw lovin Central park ka pan a. Helai hmun ah hian nitin office ban apiangin ka kal ziah a, nidang aiin ka tlai tawh na a, ka kal hram loh chuan ka kim tlat lo. Mahni chauh a awm a, inngaihtuah ka mamawh bawk..
.
Diktak chuan in thlen veleh ka u nupui ang ri ka hre lehnghal dawn a, ka chak fahran lo ani.
.
Indang ka luah mai ange' ka tih in ka u hian min hnial bur a, 'thisen zawmpui ka neihchhun ini a, awmhran ka phallo' a ti ve ziah.. A nupui bula chen hreawm zia hi min hriatpui der lo. Hmeichhe sual hrawn aia thil hreawm dang hi a tam vakin ka ringlo. An chhungkaw khawsak nawm zia leh kan in hreawm a tih thu min sawikhum sak sak duh ve ngat bula chen a nawmloh tur zia chu min hriatthiampui vek lovang!
.
Ka thut thinna ah chuan thuin ka hawi vang vang a, vawiin tak hian midang hmuhtur tumah an awmlo.. Zing lama ka mi hmuh hlauh ber ka hmuh vangin ka ni hman a nuamlo bawk nen ka ngaihtuahna a zing chuai mai. Kha mihring kha ka nun ah hian ka mamawh tawhlo.. Lo let tawh lo se ka duh bawk.. Thinlung kehchhia a min kalsantu khan ka hmangaihna hi a phulo..
.
Thaw huai in ka thutna atang chuan ka tho a, ka haw tlai lutuk chuan minlo ngaihtuah vak ang tih ka hlau ve deuh..
.
Ka piah ah chuan hmeichhe tleirawl ni awm tak hi a thu kun chal a, nichin khan ka lo hmu miahlo ani.. Ka sana chu ka en zauh a..
.
Dar 5:40 chiah ani. Ka piah a tleirawl thu chu ka en leh a, a awmdan ala danglam lo. Tunang tlai tawh ah..puitling zawk pawh ka haw tawh dawn ania..Engemaw nghah a nei ani ngei ang..
.
Gate atanga ka chhuah dawn chuan ka va en leh hram a, engin emaw min mawlh tlat.. ka phone ri avangin ka ding a, ka bag chu ka dap rawk rawk a, ka dap hmu mai theilo..
.
Gate lam hawia ka inher leh chiah chuan ka hmaibul set ah hian hmeichhe hmel rapthlak khawp a dang var vek hian a mitmeng rang ruai in minlo en kuau a.
Ka tre thawt a ka khawng nghal vek niin ka inhria. Tlansawn ka duh a, mahse ka che theilo..
.
'MIN HMU THEI..MIN HMU THEI TIRAW??' a aw tial rang ruai chu rapthlak tih hian a sawifiah zo lo.. A nui khek nghal tuar tuar a..
.
'MIN HMU THEI TIH KHA KA HRE RENG ANI.."
.
Thli thaw hum hum ri ka hria a, ka bul vela thinghnah pakhat pawh a che silo.. Ka thaw dep dep a, ka mit ka chhing ta ringawt a. Thawm mak tak dang ka hriat avang chuan ka mengchhuak a
.
 "MIN PUI RAWH...MIN PUI RAWH" tiin hmeichhe hmel rapthlak tak chu a rak tuar tuar a, engemaw chak tak hian a hnuksawn tih hriat takin  a tal vawn vawn bawk a. Thil hmuhnuam  tak ava nilo chiang em..
.
"I tha em?"
Min rawn be tu chu ka en a, ka la tawngchhuak theilo.
.
"Thiannu, i tha em? I dang vek ania, thil thalo hmu ang mai i ni"
Ka bula mipa lo ding chuan ka dar ah min vuan a, ka phu chhuak zawk.
.
Ka thilhmuh kha ka awih theilo.. Ka mitvai mai anilo tih ka hrechiang. Ka kut in ka hmai ka hup a, ka thaw kawk kawk a.
.
"Ka tha e" tiin ka bula mipa ding chu ka en a, min endan atang chuan ka thusawi chu a awihlo tih ka hre mai.
.
"Ka tha ka tih chu.." engvang a vin ringawt nge ka nih pawh ka hrelo. La khur dar dar chungin ka kalsawn a.
.
.
Khatiang thil kha ka vawikhat tawnna a nilo. Ka mitvai leh thil hmusual ni a ka ngaih thin kha...thlarau..miten an hmuh theihloh ka hmu thei tihna ani em? Thil thalo tak ani.. Hmanni a kan thenawm naute a boral tum pawh khan ka room chhungah naute ka hmu fo anih kha..! Ka mitvai ah ngaiin hlau ru tak chungin ka ngawih bopui ani..
.
.
Ka ngaihtuahna kawm chungin muangchang in in lam ka pan a, rinlawk ang ngeiin in ka thleng chauh a Unu-i (ka u nupui) ang ri leh thil sawisel ri in inchhung a luahkhat leh vek tawh..
Ka room ah lutin ka inthlak zung zung a, ka inthlak zawh veleh kitchen ah lutin tlai a kan eitur ka siam nghal a.
.
Diktak chuan eirawngbawl hun pangngai pawh a ni tawhlo tih inhriat ve vek ka ring. Dar 6 a ri dawn tawh a, tlai chawei tur engmah siam a la nilo..
.
Eitur ka siam zawh chuan ngawireng in chawhlui kan kil ho a, zan lam programme ka neihloh vangin chaw eina ka tihfel hnuah ka room ah lutin TV ka en a.
.
#Vawiin khan hmeichhe ruang chhar a ni a, he hmeichhia hi tunthlengin tunge tih hriat ala nilo. A ruang hi a chhe tawh viau a...#
.
 Chhiatna rapthlak deuh deuh hi a thleng reng mai anih hi..
.
.
"KEIMAH KA NIH KHI..MIN PUI THEI ANGEM?"
.
Ka phu dawrh a, tawng ri lo chhuahna lam ka en chuan ka room kawngka bula hmeichhe pakhat ding ka hmu a.
.
Ka vawt nghal sung sung..
.
"Tunge i nih?"
Ka aw chu thunun theihloh khawpin a khur dawt dawt a..
.
"KA TIHPALH..TIHNAT CHE KA TUMLO.. KHAWNGAIHIN MIN PUI RAWH"
.
"Engtin nge ka hmuh theih che.. Engtin nge min hriat.."
.
"Ka hriatna che chu ni 2 kalta khan ani. Mi danglam bik i ni a, rin thuhruk (Hidden Line) rawn khawih danglam tu i ni, nangchauh hian min tanpui thei..khawngaih in min pui rawh..?"
.
Chu hmeichhe thusawi chu engmah ka hrethiam lo. Rin thuhruk chu enge a nih ka hrelo a, ka tanpui theih dan tur kawng khat chauh tal pawh ka hrelo.. Engmah ka hrelo..!
.
"Ani..Ani..kawngka lo hawng teh"
.
Ka u fanu thawm ka hriat rual chuan ka room kawngka bula hmeichhe ding chu a bo ve nghal a..
.
.
Rin thuhruk chu enge ni?? Engtin nge chu rin thuhruk khawih danglam tu chu ka nih theih?? Ka ngaihtuahna a buai nuai nuai a.

Muhil theilo in ka letkual sek a, mutthilh ka tum nasat poh leh ka harh telh telh zawk niin ka inhria. Ka lehkhabu dahna bawm lian zet chuan ka rilru a la peng thut..
.
He ka lehkhabu bawm hi thing tha chi a siam niin a hnum hlurh a, ka piantirh atanga ka pual liau liau a siam anih thu ka pa khan min hrilh fo thin. Ka pian atanga ka chanchin a te ber thleng a ka nu leh pa in a ziah ho te pawh ka kawltha vek a, ka khawhar zual chang leh ka ngaih ngawih ngawih changin ka chhiar fo thin.
.
.
Khum atang chuan thochhuak in room light ka on a, lehkhabu dahna bawm chu ka pan a, enge maw chhiar ila ka mut te pawh a chhuak thei mahna le?... Ka lehkhabu ngainat ho chu kalpel in a chhawng chung bera lehkhabu kawm dum awm that zinga pakhat chu ka lachhuak a. Ka pual liau liau a siam ni mahse ka pa khan a lehkhabu thenkhat a dah ve teuh ani.
.
Ka lehkhabu lakchhuah chu ka en vang vang a, ka la chhiar awm pawh ka hrelo..
.
Lehkhabu ka keu rual chuan thil engemaw tla ri ral ka hria a, ka ke bul chhuat chu en in chahbi dangdai zet chu ka chhar nghal a..
.
Chu chahbi chu a hmanna a awm ngei tur ani.. A sin rat in a sei hle..
.
Ka lehkhabu bawm chu uluk leh chik zetin ka enkual a, rei fe ka enkual chiam hnuah bawm chhawng hnuailam sir dinglam a kaw tereuhte ka hmuh chuan ka thaw hak a, ka thin a phu nghal dup dup bawk.
.
..
.
HIDDEN LINE
.
Kaw tereuhte a chahbi ka rawlhluh rual chuan a awm tih pawh ka hriatloh drawer(pawhdawh) a rawn dawk chhuak zawk a. Ka phu chiang ngei mai.
.
Pawhdawh chhung a  lehkhabu 1 (Diary ni awm tak) lo awm chu la chhuak in khum ah ka let leh a.
.
Dated 15.06.1982…
.
Heichu ka pian hma kum 10 lai liam tawh a ziah ani.. Ka pa ziak a nilo a, ka nu ziak pawh a nilo..
.
Tuna ka thiltawn mek min pui thei thil a inziah ringin ka chhiar a..
.
Awihawmloh lutuk.. Uluk taka in dahtha ve thlap, Diary a thu inziak ka chhiar chuan ka nui hak a..
.
*Kumin hian kan Leipui a buh te a tha hle a, kan chhungkaw tan kum that kum ani dawn anih hmel.
.
Vawiin kan Sawhthing ling chu ka chau hle mai.
.
Kan vawkpui ‘Rang-I’n no 5 a nei..*
.
Ka tumlawk dan leh thu inziak inpersan lutuk chu ka nui hawk hawk a.. Min pui thei thil a inziah loh hmel.. Keu puat puat in lehkhabu dahna lamah ka let leh a.
.
Mahse Diary phek tawp ber a pentui sen a thu inziak chuan ka mit a la zawk a.
.
*Ka tunu tan..
Tun hun hi I tawng ngei dawn tih ka hre lawk a, puitu tur I mamawh ngei ang. Tuna I thil tawn mek vang khan hlau lola, mite tanpui theitu mi bik tak ini tih inhria ang che.
I hmuh laiin rapthlak takin inlan thin mahse an tina theilo che. Thlaraute hian an thiltih zawh loh kalsan siamtha tur leh an tihduh ngawih ngawih an tih hman siloh te avangin chawl theilo in an awm ve thin. Thil inthup haichhuak thei turin I chaktawk e.
TANPUITU NI RAWH..
.
Ka tunu Vanlalhmangaihzuali tan..*
.
.
Ka pian hma kum 10 liam tawh a ziah.. Ka hming diktak inziak ka chhiar chuan ka mur chuai thei nia..
.
Rilru nuamlo zetin ka khumah chuan ka let a, ka hriatloh karin ka muhil ta hlauh.
.
“Tho teh..Tho teh...”
.
Lukham ah ka hmai phum in ka rum hak a. Ka muhil chauh emaw ka tihlai in zing a lo nileh reng tawh..
.
Ka khum che dawt dawt avang chuan ka hmai hupna lukham chu lasawn in ka meng a..
.
ENG THIL NGE..???
.
Ka khum chu an lo dinhual tuau a, an hmel landan chu hmuh a nuamlo hlawm hle..
.
Nimin a ka hmuh hmeichhia kha ka khum bulah thuin minlo nuih a, heichu a hmelhmuh a nuam deuh..
.
“I tanpuina kan mamawh ani.. Khawngaihin tho la min tanpui rawh..”
.
Hetia min tihbuai reng dawn chuan a thalo tawp mai. Nun hmantur ka nei ve bawk a, mahni duhzawng ti thei miahlo a min tihbuai ka duh hauhlo ang..
.
“I nun tibuai khawp a rawn tihbuai che kan duhlo.. I ngaihtuah kan hria e..”
.
Mak takin ka hlauhna a bo vek a, engmah titheilo tana mi tangkai nih chu nuam dawn riau a hriatna ka nei a, Ka rilru thenkhat chuan ka huphurh viau bawk.
.
Khum atang chuan thovin bathroom ah ka lut a, ka inbual nghal a. Ka inbual lai lehzel hi chu min rawn zuiloh ka beisei.
.
Chaw eilai chuan ka ngawi reng a, ka U nupui pawh chu a vawikhatna atan chawei laiin a ang lo ve mial.
.
Hna a kal turin ka insiam a.
Hna thawkin ka buai nileng a, ka ngaihtuahna lapeng thei thil mak dang tawnglo in ni ka hmang ral dawn anih hmel..
.
Dar 4 a rik chuan office atangin ka chhuak a, vawiin chu Park ah ka kal lo ang.
.
Muangchang in ke in ka kal a, in lam ka pan a.
.
“TUNAH MIN LO ZUI RAWH”
.
Ka hma ah chuan a hma a ka hmuh tawh hmeichhia kha ding in ka kalna tur min dang a.
.
Duhthlan tur ka nei chuangin ka hrelo. Engmah sawilo in ka zui a..
.
Hmeichhia chu ka zui zel a, in pakhat zawn a kan din chuan kan awmna lai chu ka enkual a.. Helai ah hian ka la kal ngai miahlo.
.
 Pawn lam atanga an in landan atang ringawt pawhin chhungkaw hausa tak anni ang tih a hriat..
.
“Kawngkhar kha vawi 3 kik rawh”
.
Rang zetin kawngka chu a rawn inhawng a, kawngka rawn hawngtu chuan nui sangin min en a, ka hmel a hmuhchian chuan a nui hmel a reh riai riai a..
.
“Tunge I nih?”
.
“Ah.. Ka pi..ka thusawi hi minlo ngaihthalk sak la..Ah..” ka bula nula thlarau ding chu ka en leh te te a.. “I hmingpum enge?” tiin ka phunsap a..
.
“Ka pi I fanu Zirsangzuali chungchang ah ka hmu duh che a”
.
Kawngka min rawn hawnsak tu chuan phawk zetin min en a, a hmel chu reilo ah thinrim hmelin a thlak nghal bawk.
“Helai hmunah hian ka fanu chhuanlam a hmanga pawisa I beisei anih chuan I kalbo nghal thei ang” ka tawng leh hmain kawngka chu a khar nghal bur a.
.
Eng thil nge a sawi hi..?? Pawisa maw..?? An pawisa chu engatan nge ka tih ang a..
.
“Diklo taka min ngaih phah dawn anih chuan eng thil mah ka tihsak lovang che..”
.
“Ka nu a nih kha.. Ka room a ka box dah chungchang hrilh ka duh.. Kawngkhar hi kik leh rawh.. Ka chanchin hria ni a insawiin an tlawh fova, tuna a awmdan kha chu hrethiam rawh..”
.
Kawngkhar chu ka kik leh a
.
“Vawi 3 kik la a rawn hawnloh chuan vawi 2 I chum  dawn nia. Ka tih thindan ania”
.
Min  hrilh ang chuan ka ti a, kawngkhar chu muangchang in arawn inhawng leh a.
.
“Khatiang a kawngkhar kik tur khan tunge hrilh che?”
.
“Ka pi, helai hmuna lo kal hi ka duh lova, I fanu hian min turlui tlat ani.. A sawiduh hi ka hrilhchhawng che anga ka kal lehnghal ang..”
.
“Lo lut rawh..”
.
Inchhungah chuan ka lut a, thutna tur min kawhhmuh ah chuan ka thu a, min hmachhawn zawngin Ziri(thlarau) nu chu a thu a, min en chiang hle.
.
Bultan dan tur pawh ka hrelo. Tawngkam thiam tak ka nilo a, min awih duh miahlo anih phei chuan tihluih ka tumlo chiang khawp ang.
.
“Enge ka sawi dawn?” Ziri chu ka en a.
.
“Ka nu hi Pi Nun tiin ko mai rawh.. Amah vanga intihlum ah min ngai a, ka hmangaih a keimah vanga mahni indem lo turin ka duh..”
.
“Hmundang daihah an chhar che ani lawm ni?”
.
“Nia, helai atanga kan chhuah hnuah hmundang ah ka hruai ang che..”
.
“Hun ka nei tawhlo.. Khua a thim dawn tawh a, in a ka haw angai..”
.
Pi Nuni chuan makti in min en reng a.. Ka lo theihnghilh.. Ziri hmu velo tu tan chuan boruak bia ang in ka lang ngei ang.
.
“Nula, enge I sawiduh chu”
.
“I fanu hi nangmah vanga intihlum a nilo.. A hmangaih che a, a thihna avanga mahni inthiamlo taka I awm a duhlo anih hi.. Chuan..aa..ama duhthu ngei a intihlum a ni..”.. “Ka pi sawi a nuamlo hle mai..”
.
“Lem I chang thiam hle mai.. Ka awih hman tep che ani..” Pi Nuni chuan ngaihdan nihloh hmel zetin min en ram ram a..
.
“I fanu chu I bulah khan a thu.. Lemchang hman ka nilo a, I fanu hian min tibuai hle zawk ani..” Ka ngawi dat a.. “Ziri sawiduh dang I neih chuan sawi la”
.
“Ka nunna ka chan chhan hriat duhin Police tibuai tawh suh se.. Hahdam takin awm se ka duh.. Ka nu..ka room a ka box dah..nangmah nen chauh a kan hriat kha..khami chhungah khan I thil tur ka dah a, khawngaihin pawm ang che.. Keimah vangin I rilru tihah tawh suh.. Box a ka thildah I hmuh chuan I rilru hah na a reh theih ka ring. Engkim a fiah vek ang.. Ka nunna ka lak chhan pawh I hrechiang anga, ka thiltawn avanga ka nunna ka la hi min dem lovang che.. Ka hma ka sial vang ani tih ka inhria a, min ngaidam theilo anih pawhin ka hrethiam che.. Ka nu ka hmangaih che tih I hre reng dawn nia.”
.
Ziri’n a sawi ang chuan ka sawichhawng zel a, ka sawi zawh chuan Pi Nuni chu a hmaihup in a tap tlawk tlawk a..
.
“Ka fanu..ka fanu mi thianghlim ni thin khan a harsatna min hrilh a tum laiin ka ngaihthla duhlo a.. Keima vang ani.. Ka fanu ka tihpalh..” a inhnit hlawp hlawp a, an nufa inkar a buaina an neih leh an thusawi erawh engmah ka hrethiam lo.. Rindan erawh ka nei..!
.
“Lungngai taka I tah khan engmah I siamtha tawh dawnlo a, rilru dam taka I awm chauh in I fanu hian a chawlh theih tur thu a sawi ani..”
.
.
Ziri te in atanga ka chhuah hnu chuan khua a thim tawh a, mak takin a hma a hlauhna..thlarau hlauhna ka neih kha a reh vek..
.
Zui tura min tih ang in Ziri chu ka zui a.
.
In lian lo tak, chhawnghnih a sang kan thlen chuan ka thaw hluai a.. He in ah hian enge kan tih dawn?? Thil thalo tak anihloh hram ka beisei..
.
Kawngkhar ka kik chuan nu naute pawm la naupan hmel tak hian arawn hawng a..
.
“In lo dam maw?” tiin ka nuih a, MC-I hian min hrelo anih ka ring.. A awm vetho mai..
.
“Robert a awm em?”
.
“Awm e.. Ka han ko ange. Minlo nghak lawk rawh”
.
Room atanga Robert rawn chhuak chu ka lo en reng a, ka hmel a hmuh chuan a mengfiah kawk a..
.
Ka naupanlai thian Robert nen hian kum 15 kan nih thleng chu thiandang kawm lovin kan inkawm chawt a, nupui a neih hma kum 3 chhung chhiar telin tun hi kan inhmuh leh vawikhatna ani. A hmel a la danglam tamlo..
.
“Thil pawimawh ah biak che a ngai a.. a fal in kan inbiak a ngaih ka ring”
.
“A ngailo.. A nupui pawh hian a hriat ve angai..” Ziri chu ka en zawk a, ka awmdan chu Robert chuan a chik viau tih ka hria..
.
Ka thutna ep chiah a sofa ah chuan Robert leh MC-I chu an thudun a, MC-I’n naute a pawm bawk a..
.
“Eng thil nge ka sawi dawn ka hrelawk biklo a, khawngaihin MC, lo chebuai lo la.. Robert..nangpawh.. Tunah hian Zir a awm ve a, in hnenah hian sawiduh a nei ani”
.
Ziri hming ka sawirik rual chuan MC-I chuan phawk zetin min en a, a mitmeng a rilru natna thuk tak awm chu ka hmuhhmaih lo. Engmah sawi lovin Robert chu a melh zauh bawk a, Robert awmdan atang chuan nuam a tilo in a insangmar teuh tih ka hmu bawk..
.
“Engtin nge Ziri chu hetah a awm theih? A thi tawh..a thi tawh ani lawm ni?”
.
“Nia, sawitur a tam khawp mai.. I sawi duh chu sawi rawh le” tiin Ziri ka thutna bula ding chu ka en a..
.
“MC-I hnenah hian ngaihdam dil ka duh.. MC.. I pasal nen mu dun anga ka insawi kha dawt ani.. I pasal hi ka ngaizawng ngei a, mahse ani chu itan chauh a rinawm ani.. Phone a ka thu rawn hrilh thin che kha chu I pasal I then theih nan a ka lemchanna vek ani.. Ka thiltih sual ka inhriatchhuah meuh chuan thil pawi tak ka lo khawih hman reng anih hi..”
.
Ka thusawi chhawn chu nuam ka tihloh zia  ka hmel atangin an hriatthiam ka ring..
.
“Robert..he thil hi engvanga ti nge I nih?? Min tina tawk tawh viau asin.. Dawt hmanga thiamchan tum hi enge a tul na”
.
“MC..he thil hi keipawhin ka hrethiam biklo..” Robert chuan MC-I kut vawn tumin a ban a, Mc-I chu a thutna atangin thinrim zetin a tho hluai a..
.
“Min khawih tum buai lo mai rawh.. Ka tuar theih bak ani tawh.. Ka chhuahsan mai che angai dawn ta anih hi..”
.
Ka thutna atang chuan ding ve in MC-I chu ka dawm a..
.
“MC, I pasal hi ka thiantha tak ni thin a ni a, ka hrechiang ve thawkhat bawkin ka inhria.. Chuan..ka tan pawh a thilmak deuh chu thlarau ka hmuthei ani.. Ka thusawi hi I awih angai.. Tuna ka sawi kha keipawh in ka vawikhat hriatna ani a, hetiang buaina hi in tawng tih ka hre miah lo.. Kan bulah hian Ziri a awm ve ani”
.
“Phone a thu inhrilh chungchang kha engmah ka hrelo.. MC..” Robert-a mangang hmel ka hmuh chuan tanpui ka duh takzet.
.
Thawklehkhat ah inchhung ah chuan thli lum pup arawn thaw a, kan 3 chuan kan inen thap a.. MC-I chuan ka thusawi awihloh pawh tum se thil awmdan avang chuan a awihlo ngawt thei tawhlo ang. Tukverh pakhatmah inhawng lova inchhung a thli lum pup rawn thaw chu mihring siamchawp a nilo tih a chiang reng ani.
.
“Thu phawt teh u..”
.
Ziri thusawi chu ka sawichhawng a, Ziri chu a hmel en aiin a nasa ka ti a, a thiltih dan a sawi chu hmeichhe nasa ber pawhin an tihduh ka ring ngailo. A hmel en erawh chuan a inchhir takzet tih erawh ka hmu thei..
.
Nula pangngai takin mipa, pawmlai nei tih a hriatreng a ngaizawng a, mipa in a hnar chung pawhin a nawrlui a.. Mipa in lo duh ve pawh nise nupui/pasal nei tawh ngaihzawn chu thil bawlhhlawh ani tho tho. Kawplai nei zawk te bultan pawh nise..ka la pawmpui thei chuanglo. Mahni in kan tawrh atana kan duhloh chu midang chungah thlentir loh mai tur ani..
.
*ZIRI
.
Thla 5 liamta khan..
Khami ni kha..zirtawp ni tih ka la hrechiang..dawr atanga haw turin ka insiam a, dawr atanga ka chhuah chuan Robert hi ka hmu a.. Eng thil nge ka chungah thleng ka hrelo.. Ka hmuh rual khan ka thinlung takin ka duh nghal ani. Zungbun a bun tih ka hmu a, nupui neilai ngaihzawn hi ka duhdan ani biklo.. Mahse ka ngaihtuahna hi ka thunun theilo ani. 
.
Ka zahtheihlohna zawng zawng sawmkhawm in Robert chu ka bia a, min chhandan atangin alakah beisei tur ka neilo tih ka hrechiang.. Mahse ka bansan theilo.. A nupui be pawp thei turin ka buai nasa a, thil thlenglo leh dawt muhlum hmangin an nupa inkar ka tibuai ta ani. Thlalak thenkhat siamchawp leh tawngka ngei hmangin vawi tamtak MC-I hi ka tibuai a.
.
Mahse ka thiltih chuan min vawlet a, ka hma ka sial avang in ka nunna ka lak phah hial ani.. Ka rilru hahna te min chhawk turin min tanpuitu pakhat pawh an awmlo a, ka thiltih avang khan ka inchhir takzet.. Hun liamtawh ah khan let leh thei chu ni ila, ka thiltih ang kha ka tinawn hauhlo ang.
.
Ka inchhir a, mahse ka inhriatchhuah meuh chuan ka lo tlai tawh anih hi. Midang nun a buaina thlensak hian engmah hlawkna min pe lo. Mahni hreawmna kan insiam tam mai ani.. Ka thiltih sual ang hi tuman rawn ti velo se ka duh. Ka thiltih sual vangin puh tur ka zawng a, ruihhlo ka khawih phah a.. Ka harhchhuah chuan ka tlai tawh..
.
Ka thil tihsual avang leh keimah ngeiin ka nunna ka lak avang khan ka thlarau in ngaihdamna chang dawnlo mahse anni nupa hian min ngaihdam theih chuan ka tuar tur ang ang chu ka tuar mai ang.*
.
Ziri thusawi ka sawichhawn zawh chuan ngawi thapin kan in en a..
.
.
In ka thlen chuan zan dar 8 a pel tawh. Ka room ah lutin ka intifai a, vawiin ka thiltawn zozai vang khan ka chau viau mai. Khum ah ka mu mengkar a..
.
“Hmangaih..min tanpui vang khan ka lawm e.. Tunah chuan ka chawl thei tawh ang.. Ka thiltawn ang kha mi tamtak in an tawng mek tih ka hria.. Robert-a ang letling chiah a nupa nuna rinawmlo tam tak te hnenah heihi min sawisak la ka duh..
Kei anga mi vannei..thih hnua mahni thil tihsual thenkhat siamtha leh tura puitu nei an ni vek dawnlo.. Chuvang chuan an damlai leh hun tha an neih lai ngei hian an thil tihsual leh an rinawmlohna hi bansan se ka duhsak vek ani.. Inchhir a sawt tawhloh hnuah chauh an harhchhuak ve ang tih ka hlau em ani.
.
Mi bawlhhlawh ka ni a, midang hnena thuchah tlak lo khawp a bawlhhlawh ka ni tih ka inhria.. Mahse thu tha chu mi bawlhhlawh ka atanga chhuak pawh nise, mifing chuan an chhawr tangkai tho ang tih ka beisei tlat ani”
.
A hmel lungngai tak chu ka en a, ka mittui ka dang thei lo.. Mi beidawng hmel hmuh hi ka duhlo.. A hmel lungngaihna a khat chuan min fan a, a biang a mittui tla chu hruksak tumin ka ban a, mahse ka khawih theilo..
.
A mittui luang ngiai ngiai chung chuan a nui lui sak a, mitkhap kar lekin boruak ah chuan a zam ral ta..
.
.
Ni 3 hnuah Pi Nuni ka hmu hlawl a, hmanni ka hmuh ai khan a hmel pawh hmuh a nuam ta.
Min hmuh chuan min rawn pan vat a..
.
“Nula..lo ding lawk teh”
.
“Ka hming chu Vanlalhmangaihzuali a ni e..”
.
“Awle.. Hming tha leh mawi tak ani.. I thiltih avang khan ka lawm hle mai.. Tunah chuan ka fanu chunga thilthleng te kha tuardam dan ka zir mek a, I thu min hrilh te avang khan ka lawm lutuk e.. En tura min hrilh box pawh kha ka en tawh a, kha thil avang khan  ka fanu min kalsan hi tuardan ka thiam dawn ta anih hi.. Ka lawm takzet ani”
.
“Keipawh ka lawm e”
.
Box ah chuan enge lo awm tih hriattum in ka zawt lo a, engpawh nise a fanu thihna tuardam tir thei khawp thil anih chuan thil pawimawh tawpkhawk ani ngei ang..
.
Keichuan ka hriattur chin bak hriat talh tumna ka neilo.. Kan mamawh tawk bak thil hriat hian min tanpui ber lo tih ka hria ani.
 .
.
.
Member tharte kan lo lawm a che u A PURE thah kan nih ka ring a..kan TAM kati tawh lutukk.. Ka tan in hlu em em vek e..♡♡♡ In thiante a add churrrr churrr theih reng ania.. Comment leh like hian keimah ah thu a sawi thui hle tih minlo hriatsak theuh ka ring e.. In vaiin kutzungpui tha deuh in neih vek kha..
.
Member tam ringawt ai pawh a ka ngaih pawimawh zawk chu min lo chhiarsak ngei em tih hi ania, in chhiar ngei chuan thawnthu tin ah hian in feedback hmuh ka chak hle mai.. :)