HIDDEN LINE - 2 (July2016)

HIDDEN LINE - 2
"Copyright ©

HIDDEN LINE - 2
.
LauraSeanVirgo
ⓐⓚⓐ
ⓣⓗⓐⓝⓣⓔⓘⓟⓐⓤⓣⓤ
.
.
*COLVA, GOA**
.
"Ka puar leh em em hi a ni tawp"

Ka thiannu chu en in ka nui sak a, a mamawh lo lo hian eitur hi kan duh thin ni berin ka hria. Ka ei let zet chu a ei leh kha maw..!
.
Kan thlenna Hotel (Casa Roiz) ah let leh mai lovin kan lengkual a, khua a thim hnu pawhin reh tih tak tak a awm thei lo..
Kan thian dang ten min rawn zawm a Beach ah kan kal leh rih a. A thenin tui an cheng a, an te ring khawp mai. Harhfim vak lo te an nih nual tawh vangin bengchheng viau mahse a awm tho..
.
Nuamsa zeta thuin ka thiante chu ka thlir a..
.
Ka mit la zawk thil ka hmuh vangin ka thu ngil a, ka mitvai in thil ka hmu sual a nih ringin ka mit ka khap sak sak a.. Mahse ka hmusual lo..
.
Kan awmna piah hla deuh hlek ah chuan mi 2  ka hmu a, a landan chuan tuicheng ve satliah an ni lo tlat.. Pakhat zawk chu tuiah chuan a pil leh thin a..
Engmah sawi lova dingchhuak in ka thil hmuh lam pan chuan ka theihtawp a chakin ka tlan a, tuiah chuan ka zuang lut nghal bawrh a..
.
"Min rawn chhanchhuak dawn tho.. Min tina thei chuang lovang"
Hmeichhia mangang tih hriat zeta thaw hlawp hlawp chunga tawng ka hriat chu ka hnaih zel a.. Mizo ngei an ni lehghal..!
.
Hmeichhia tui a lang lawp lawp chu a ban ah vuan in vaukam lamah ka let pui a. Nichin mai a ka hmuh abula awm ve kha khawnge a kalbo hman ka hre lo..
.
Vaukam ka thlen chuan ka thaw hlawi hlawi a, kan bulhnai ka enkual pawhin hla deuh hlek a ka thiante tuicheng hlim nui ri bak thildang thawm emaw mihring emaw ka hmu lo.
.
Ka thiante chu ka theihtawp a ringin ka au a, ka awmna lam a lo kal turin ka hui a..
Ka hmeichhe chhanchhuah chu thawk tir leh tumin ka bei a, ka tlai hman a nih hmel.. A hmel chu a dang vek a, nunna pai hmel a pu tawh lo..
.
"Tang rawh..thaw ta che...i thi ringawt thei lo" tiin a awm ah ka nem a..
.
"Angaih, ngatinge lei kha i nem vak vak a.."
.
Ka thiannu chu phawk zetin ka en a, huh hluam in ka bulah chuan a ding a.. A thaw hluam hluam bawk a.
.
"Lei ka nem loh hi...en ta che...."ti paha ka kun leh chuan engmah a awm lo..!
A dik lo reng reng.. Tun maia tui atanga ka lakchhuah hmeichhia kha hmundanga kalsawn tur chuan hun a awm lo mai pawh a ni lo.. Amah kha a thi tawh..! Thlarau ka hmu leh ta pek a ni maw....!!
.
"Intihderhna chi loh emai.. Tui i cheng lehsi elaw...hahaa.. Ka rindan chiah.. thiante sawn haw an duh tawh a.. kal ila.."
.
Ngawirengin ka ding chhuak a, ka ngaihtuahna erawh a buai hle.. Nichin mai a thilthleng kha ka sawi chuan mi a emaw min ti ngei ang.. A nih loh pawhin an hlau anga, an nun a nuam lo mai mai zawk ang.

Keipawh hian thlarau leh mihring ka la thliarhrang thiam lo fo a nih hi. Tun hi thlarau ka hmuh vawikhatna chauh pawh a ni tawh lo. Mahse tuna mi bik hi chu a hma a ka lo tawn tawh nen a inang lo tlat a ni..!
.
Hotel kan thlen leh hnu pawhin ka awm a nuam thei lo. Kha hmeichhia kha..a hmel dang bel te.. Ka maimitchhing vang vang a..
.
"Angaih, i zo dawn tawh em? A rualin kan inbual mai lova.. a vawt tan a nia"
.
Towel in ka intuam sawk sawk a, bathroom atang chuan ka chhuak a.. Ka inthlak fel hnu chuan TV en chungin ka mu a..
.
Goa a kan cham chhung chuan thildang engmah a thleng leh tawh lo.
.
* AIZAWL, MIZORAM*
.
Ka tihthan dan pangngaiin office ka chhuahsan hnuah Central Park ah ka thu vang vang a, tlai ni tla tur eng suar suar chu ka thlir a. Helai hmun hian ka tan pawimawhna engemaw tak a nei.. Ka hmangaih awmchhun leh ka hmangaih reng tawh tur..mahse ka pawm emaw pawm lo emaw ka ngaihdam theih loh tur mihring nen a kan sulhnu tamtak awmna a nih vangin nitin deuhthaw ka la kal ziah tho a, rilru hah tak leh pik mup mup chunga ka pan pawhin minute 10 vel ka thut hnu chuan ka thawl leh huai thin.. Ka tanpui hmasak ber thlarau ka hmuhna hmun a ni bawk.

.
Ka thutna atang chuan muangchang a thovin in lam ka pan a. Kan in ah hi chuan boruak thar vak han thleng tur a awm lo. Ngawi rengin chaw kan ei a, chaw eikham ah mahni room ah kan awm leh mai a. Ka u nupui ang hmuar hmuar ri hi kan hriat tam ber pawl chu a ni mai e.
.
Ka room ka lutin light ka off a, ka khum bul chair a hmeichhe lo thu ka hmuh chuan ka phu zawk.. Ngai ah ka nei thei lo..
.
Arawn dakchhuak a..
He hmeichhia hi Goa a ka hmuh ngei kha a ni.. A dang lep a, a hmel chu a ngui ngawih ngawih bawk.
.
"Min chhanchhuah vang khan ka lawm e.. Tui atanga min lakchhuah vang chauh a helai hmun a rawn kal thei hi ka ni.."
.
"I thusawi awmzia chu ka hre lo.. I sawifiah thei em?" ti pahin khum ah chuan ka thu a..
.
"Min tanpui i inpeih hunah engkim ka sawi vek ang"
.
"Min tihbuai rei dawn ai chuan tuna sawifiah mai tha ka ti.. Diktak chuan thlarau nen a inbiak fo hi ka duhdan a ni lo.."
.
"Naktuk dar 1 ah Harley Restaurant ah kal la, i mi hmuh tur pawh a rawn kal ang.. Chumi hma chuan Ramhlun N' thlanmual ah i kal phawt dawn nia.. Hun ka ngah lova ka kalsan phawt ang che.."
.
Thildang ka sawi leh hmain a ral riai riai a.
.
Chhum zing chuai chuai vang chuan kawng ka hmufiah thei lova, ka hmalam a In awm chu ka pan tang tang tho a. Ka chahbi ken chu ka hum nghet sauh sauh bawk.. Ka lehkhabu dahna a ka hmuhchhuah chahbi hmang hian a awm tih pawh ka hriat loh bawm ka hawn theih phah tawh a, bawm chauh ni lo thildang ah pawh pawimawh na a awm dawn tih ka hria.
In hlui tawh lam kawngka chu ka chahbi ken hmang chuan ka hawng a, inchhung ka luh chiah chuan putar hmel tihbaiawm zet hi ka lam panin arawn kal a, a hnungah chuan nunna nei tawh lo tih hriat tak ruangam hmuh nuam lo zet zetin an rawn zui bawk a.
.
"DUHTAWK TAWH RAWH..I NUNNA IN A TUAR HMA LEH I CHHUNGTE PAWHIN AN TUAR HMAIN..TI TAWH SUH.." an vai chuan min rawn pan hnaiin an thusawi ngai chu an sawirual thup thup a. An aw rapthlak zia chu ka sawichhuak thiam lo.. An nui bawk a.. Pitar/Putar tawh hetiang taka rapthlak a an nui thei hi thil mak a ni. An zavai chuan min din hualin min rawn hnaih tuau tuau a. Mangang zetin ka au a, ka che thei der lo lehnghal...
.
Ka mumang rapthlak zet vang chuan ka harh hlawl a, khum atang chuan thoin  bathroom ah  ka lut a, tuivawt in ka hmai ka theh thawt thawt  a.. Hetiang mumang mak tak tak hian min tibuai zing ta khawp mai..
.
Khua a var chhunzawm deuh mai avangin mu tawh lovin inhnuai ah ka chhuk a.
.
Office ka thlen chuan nidang aiin kan buai dan a ziaawm hlauh a, ka hna ka zawh hnuah Rammhlun N' thlanmual panin ka inkhalh chhuak a. Enge ka tihtur ber pawh ka hre chuang lo. Thlanlung ding thut chu ka thlir vang vang a..
.
"Hetah lo kal rawh" aw lo chhuahna lam chu en in min hui na lamah chuan ka kal nghal a.
.
Boruak rawn vawt raih raih chu ka hre thei..
"Heihi ka thlan a nia.."
.
KAN HMANGAIH
Mercy Lalmuanawmi
Kum 21
2. June. 2014 hian a Lalpa hnenah a chawl ta.
.
"Accident vanga thi kani lo..Kha mihring phiangsen vang kha a ni.."
Thinrim rawl rapthlak zeta tawngin a hmel a danglam bawk a, rapthlak tak a ni.. A dang var puap leh a hmel sawi nasa lutuk chu hmuh a nuam fahran lo hle..
.
"Ngawi lawk teh.. 2014 a thi i nih si chuan a hma khan khawiah nge i awm?"
.
"Tunah hian eng kum nge?"

"2016"

"Ka la tlai lo.. Tui chhung atang khan min lachhuak lo la chu tunah pawh hian i bulah ka awm thei hauh lovang... Ka thlarau tanna hmun atanga min chhanchhuak thei tur zawngin khalai hmun(Goa) ah khan vawi tamtak ka inlan alawm.. A tam zawkin min hmu thei lova, min hmu thei thenkhat in min tanpui tum lovin min hlau zel a..."
.
"Khawiah nge i thlarau chu a tan..ka hrethiam lo.. Mihring taksa atanga thlarau a chhuah hian a zalen in a duhna hmunah a kal mai thei lo em ni?"

"A inang lo... Chiang taka ka hrilh che beisei suh.. Minung leh mithi inkar ah hian thuruk sawichhuah hauh loh tur tlemte zinga mi thlarau ten mi la dam laite bula kan sawi ngailoh tur thil a nih chu.. Engpawh nise, khawngaihin he thil hi keng la, pe tura ka tih veleh che i pe dawn nia.. I pek hma chuan i bulah ka awm zel ang"

Thlanlung bula bawm awm chu ka la a, a chhungah enge awm ka hrechak thut..

"A chhungah hian enge awm?"
"I la hre mai ang" ti ringawt in min chhang.
.
Harley Restaurant ka thlen chuan a lo lun lehpek hle. He restaurant hi hunbik engemaw ah lo chuan ka kal zen zen lo. Mi hausa leh sum hman tur chuangliam neite kalna tur hmun a ka ngaih vang a ni pakhat.. An thilsiam reng reng a to uchuak vek ni maiin ka hria.. Mahse..a tui em em vek..!!
.
Eitur ka order ka nghah lai chuan ka piah a mipa leh hmeichhe thu chuan ka mit an la chat a, an landan atang pawhin mi hausa chhungkua a mi anni ang tih a hriattheih nghal mai..
.
"I eitur i eizawh hunah sawlai mipa hnenah sawn bawm kha i pe anga hawng nghal turin i ti dawn nia.. A bak chu thil awmdan a zirin i i siamrem thiam ka ring.."
.
Ka tihtur hmabak neih avang chuan ka eitur tui leh tui loh pawh ka hre mumal ta love a..

Ka eizawh chuan muangchangin ka piah a thute lam chu ka pan a, ka hriat ngai mi an ni lova, anni pawn min hre hek lo.. He pa hi tualthat tu a nih teh chuan a va chak dawn lo rua em.. Tunah pawh hmeichhe dang a bulah an awm nghal pang a nia...
.
"Thianpa, bawm hi i hnena pe tura hrilh ka ni a, tunah khan i hawn nghal a ngai a ni awm e.."

Bawm chu lain a hawng mai bawk a, bawm chhunga thilawm a hmuh chuan phawk zet  hian min rawn en a.

"He thil hi khawiah nge i hmuh?"
A tawng chu a zawi hle a, a aw a khur deuh bawk.
.
"Ka phone number ka pe che anga i duh chuan min rawn be thei ang" ka ti ringawt a. Ka phone number ka ziahna lehkha ka pek hnu ah Restaurant atang chuan ka chhuak nghal a. Rei ka nghah a ngai lo tawp mai..

A hmeichhe kalpui chu kaiin an rawn inzui chhuak nghal a, a kalchak em vangin hmeichhia chuan a zui dat dat a. Hmeichhia chuan thil awmzia a hre ve lem lo a nih hmel.

Dar 3 a ri chiah..
Ka phone a rawn nghawr dar dar a, caller ID ka en chuan rin ka nei nghal.
.
"Khawiah nge ka hmuh theih ang che?" arawn ti nghal thawr a.
"Central park ah rawn kal rawh"
"Minute 10 chhungin ka rawn thleng ang"
.
Kan inbiak zawh atanga minute 10 chiah chiah ah ka lam pana rawn kalin ka bulah arawn thu a.. Restaurant a ka hmuh laia a hmel awmdan leh tuna a hmel landan chu a dang daih. Tap hrep hmel a pu teh tlat.. Thil awmzia engmah ka hriat bik loh vangin a tawng chhuah hun ka nghak a..
.
"Bawm kha khawi ah nge i hmuh? Engtin nge kei kher min pek theih?" a hmel ah chuan hlauhthawnna ka hmu thei..

"Mercy thlan ah.. I hnen a pe tur che in min hrilh a ni"

"Tuin nge hrilh che?"

"Amah Mercy ngeiin min hrilh"

Ka thusawi chu awih loh hmel zetin a nui hawk a..
"Ani chu a thi tawh.. Ka hmangaih kha a thi tawh.. A pumchhung a ka fa a pai lai nen.. Min ngaihtuah miah lovin min kalsan tawh.."
.
A hma a rindan ka lo neih kha enge a awmzia ni ta ang? A tawngkam atang chuan Mercy chu a hmangaih hmel viau si hi mawle..
.
"Tunah hian engkim ka hrilhfiah dawn tih hrilh rawh"
Mercy chu ka bulah thuin a hmel a lang dam thlap a. An awmdan hi ka hrethiam neih nuaih lo..

"Tunah hian engkim a hrilhfiah dawn che a nih chu"
"Ben-a a nih hi.." Mercy chu a nui sak a, Ben-a a endan atang ringawt pawh chuan a hmangaih em em tih a hriat reng mai..
.
"Bawm ah khan nau a pai lawm nan a ka pek bengbeh a awm a, mahse pakhat chiah a awm.. A khing lehlam a awm lo.. Mercy khan ka pek atangin vawikhat te pawh a phelh ngai si lo.. Thil inphum ru engemaw tak chu a awm a ni.." thawk a la halh a..
.
"Ben-a, tunah hian Mercy chu kan bulah a awm a, engkim hrilhfiah che a duh a ni.... Pawi khawihtu chu tunge tih zawng zawng nen.."

"Nang hi i a chu a ni em lo maw? Mi thi tawh hmangin min bum tum suh ang che.. Mi mawl ka ni bik lo a nia."

"Big Bear, i rin a ngai.. Ka bengbeh khing leh lam kha Tlani'n a kawl.. Zanin hian an in ah va kal ang che. Chhuanlam siamin a room ah lut la, a thuamhnaw dahna bawm hnuai ber ah khan a dah.. Ka chunga a thiltih vang khan hreawm tihna leh inthiam lohna pakhat mah a nei lo.."

Mercy thusawi ka sawichhawn zawh chuan phawk lutuk tak mai hian Ben-a chuan min en tlawk tlawk a. Min ringhlel ta lo a nih hmel bawk..

"Hmeichhe tenawm lutuk... Ka lusun khawharna hmanrua ah hmangin thiam takin min thlem a.. Ka awih thei lo zawk.. Vawiin a ka bula i hmuh hmeichhia kha Tlani chu a ni.. Tenawm lutuk..."
.
"Bengbeh khing lehlam a awm hunah thil engkim a fel vek thei ang.." Mercy chuan a ti leh sap a.
.
Park atang chuan chau zetin in ka pan a, engmah ka ngaihtuah peih rih lo..
.
A hahthlak ru riau.. Engkim hretu Mercy berin thu awmzia a sawi chiang nghal si lo. A ma duhdan ang thlap a min chinfel tir a tum hi thil buaithlak tak a ni..
.

Ka muhil thei ngang lo.. Muthilhna damdawi chu duh vak lo chungin ka ei leh ta nge nge a.
.
Ka harh hlawl a, sana ka en chuan zing dar 7 a lo ri reng tawh a. Ka mutna khum bula lo thu ka hmuh chuan ka rum hak a..

"Em em a... Mahni a awmna hun pawh min siam hleinem.. Zingkar atangin.." ka phun mawlh mawlh a..

"I harh thei lo a nih kha.. Tunah chuan nangman engkim i tih a ngai tawh ang.. TV hi en rawh"

Enge i sawi awmzia? Ni lo.. Nang hi.. Ben-a hi engtin nge helai ah hian a lo awm theih.

Ka thuchhuak hlawl a. Tv chu ka on chawp ngai lovin a rawn in on a..Thlaraute hian electric zungzam an hmanthiam zia chu ka lo hre tawh a, ka tan thilmak a ni lo.
.
*Tukin zing dar 5 vel bawrah khan mi ruang chhar a ni leh ta. He ruang hi a nghawng ah hrui a rehna hnuhma ni awm tak a awm a, kan thudawnna in a sawi danin an ruang chhar hi Benjamin Lalnunmawia S/o Thangliana Ramhlun S' ni ngeia hriat a ni"
.
"Eng thil nge thleng? I chungah eng thil nge thleng?"ka ti tuar a..
.
"Nizan khan Tlani te in ah ka kal ngei a, Mercy bengbeh pawh ka hmu. Ka phone a thla ka lak zet hnuah Tlani rawn lut thut in min rawn hmu a, diktak chuan ka thiltum leh ruahmanna a lo hrelawk vek.. Hlauhthawnna nei miah lova a coffee siam ka in kha ka tihsual lian ber a ni.. Hmeichhia in awlsam takin min thah phah ta a nih hi..."

"Engtin nge a chet?"

"Muangchang in ka zawi riai riai a, a khum bula ka tluk kha ka hriat hnuhnun ber a ni mai. Ka harh leh chuan khawlai ah ka lo awm a, ka taksa engmah hre tawh lo ka hmuh rualin ka thi tih ka hre nghal a ni.."

"Anih chuan Mercy i hmu thei em? Ahh..i hmu tawh em ka tihna a nih chu.. Tunah hian room ah a awm ve lo tih kan hmu ve ve a.." ka nuih sak a...

"Ka thil chak ber a ni.. Khawiah nge ka hmuh theih ang?"

"Ka hre lo. Ka hmuh theih tura a rawn lang tawp a nih loh chuan khawiah nge a awm ka hre lo"

Khum bula Tv in on lai chu phe zuk zukin a thi hmuk a.. Tv bul ah phun mawlh mawlh chungin Mercy chu a vei tawn sek a, Ben-a a hmuh rual chuan ding chawtin a en vang vang a, engmah sawi lovin an inkuah nghal chawih bawk a. An phun dun mawlh mawlh a, mahse eng thu nge an sawi ka hre thei lo..! An hmel atang chuan an hlim tih ka hmu thei a, an inhmangaih lutuk hmel chuan ka hnuk a tiulh hial mai..!

Thihna rapthlak tak thleng mahse inhmangaih te an intawn tak hi..!

"Anih chuan..tikhan kan hna a zo tihna a ni em?"

An pahnih chuan ka lam an rawn hawi a..

"Zo lo...thilsual titu in hremna a hmuh angai alawm" an thusawi rual vang chuan in enin an nui sak a..

"Kan chhungte hnenah min sawisak la, Tlani pawhin a thil tihsual a pawma dan hmanga a tuartur diktak a tuar chuan engmah thildang duh kan nei lovang. Kan rawn tibuai tawh lo bawk ang che." 

An chhungte bula ka sawi chuan a tirah min ring mai lova, mahse thusawi tur min hrilh zawng zawng te ka sawi zawh meuh chuan lungngaihna leh hlimna inpawlh nuai in an mittui an hru mawlh mawlh hlawm a. Keipawh ka bang chuang lo..
.
Thil thlen dan Mercy leh Bena te sawi ang chiah a ka sawina eng atangin  police ten Tlani chu thu zawhfiah turin an la a, an thuzawh reng reng a pha fai vek..! Police ten tih vak ngaihna an hriat loh khawpin a pha felfai a, a tawngsual duh hauh lo niawm tak a ni. A thiltih sual fiahna/tichiangtu police te hnen a pek tur engmah a awm loh vangin tihvak dan a awm lo. Finfiahna awm thei zawng zawng chhui tur awm miah lovin a thup bo vek niin a lang.
.
"Engmah ka tihsual loh tlat chuan helai hmuna min hrwn theihna dan hi in nei lo Mimal dikna chanvo tih chingpen vangin ka khinglet ngei ngei ang che u"

Kawngka atangin Tlani chu ka en vang vang a, tualthat tu ngei a ni tih ka hrechiang a, hetiang taka a tang na ngam hi a mak ka ti lutuk..

"Finfiahna chiang tak a awm lova, tihtheih kan nei lo.. Mahse nuam takin a awm zui kher lovang" Mercy chu Ben-a ban a kuah chungin a phun sap a..

"Angaih, min tanpuina avangin kan lawm e. Tunah chuan helai ah hian kan awm thei tawh lo. Kan hun neih a tawp tawh. Kan lawm e.. Mangtha.."

Thildang ka sawi leh hmain an ral riai riai a...

Karkhat chhung zet chu eng thawm mah ka hre leh ta lo. Mercy leh Ben-a te pawh an chawl ta a nih ka ring. An mahni thattu ngeiin a phutawk hremna a hmu lo chuan ka rilru a tinuam thei lova, tihtheih erawh ka nei lo.
.
Ka phone ri avang chuan ka hnathawh lai chu dahin ka pick up a.

"Angaihi i ni em?"

"Aw ni e. Enge nita?"

"Thil pawimawh ah hmuh che a tul hle mai a, hun i neih theih chuan ka lawm khawp ang"

Minute 5 dawn kan inbiak hnu chuan office ban a min rawn hruai mai turin kan inbiakna chu kan titawp a.

Kan chuanna motor chu In lian leh nawm hmel tak kawtah a ding a, pawn lam atanga a landan ringawt pawh pui tak a ni.

Inchhung kan luh chuan nu upa lam tawh hian min lo pan vat a.

"Nangmah hi Angaihi chu i ni tiraw? Min lo zui ta che"
Inchung chhohna step ah chuan ka zui a. Room pakhat kawngka chu hawngin amah zui turin min hui zauh a.

Pindan chhung zau hek hawk a khum nawm hmel zetah chuan hmeichhe pakhat a mu a, damlo na tak leh dawldang zet a ni. A hmel landan atang chuan chakna thahrui nei hmel a pu lo..

"A hma khan i hmu tawh em ka hre lova, kan fanu hi engtin emaw tak i tanpui theih kan ring a, phone a ka sawi tawh ang khan keini chuan engtia han tih chi nge kan hre lo a ni.. A manganthlak khawp mai..."

Nu zawk chuan khum a mu chu zawite in a sawi det det a.. " Mate...Tlante i harh em?"

Khum a mu hi Tlani kha a ni maw!!!! A hmingin ko lo se chuan Tlani kha a ni tih ka hre miah lo. A danglam nasa lulai em a ni..

Tlani chu arawn meng a, a mit bul chu a mu tha lo tih hriat zetin a duk kual ruih a.. Karkhat chhung leka a danglam nasat zia chu a awihawm loh zawk..

"Zan lamah hian a mu tha thei lova..Thil enge maw in a tibuai a ni.. Mangang in a rak chiam chiam mai thin a.. Thu awmze nei a sawi ngai bawk si lo.."

Tlani chu a rawn rum dat a.. Thawklehkhat ah rawn thuchhuak zawtin a mengrang a, a taksa cher chhe zet, thahrui pawh nei awm lo a lang chu khum ah chuan a zuang zawt zawt a, a sam a pawt vak vak bawk a..

Phu nasa tak ka ni...

Rum zet a mengrang in a nu chu a pan chhar chhar a, hlau thlabar zetin a nu chu a rak nawk nawk a..

Ka thilhmuh chu ka awih lo zawk. Thlarau ka hmuhtawh a zawng a rapthlak ber mai hian Tlani chu a vuan bet tlat a, ama duhdan a che thei lek lo in a thing nawk nawk a..

Aw teng chher chhuai a arawn tawng chhuak chu hriat a nuam lo takzet...

"Mercy kha ka thah a nih kha..a pum chhunga naute nen.. Ka pawi a sawi lo, mahse Ben-a nen an innei mai tur kha ka ngaingam ngang lova, chhuanlam siamin ka hruaichhuak a tuipui ah khan ka hnim hlum ta anih kha.. Benjamin-a kha maw... Ka thiltihsual pholan tumin ruahmanna a siam vel a..hmangaih viau mah ila ka dahtha lo thei ta lo a ni... An thi tur hmel kha hmu ve ula chu maw...keimah ang bawk hian hlimin in nui ve tho ang... an phutawk a hmu a nih kha....!!!"
Rapthlak zetin a nui zui a...

Chhuat ah chuan a tlu zawi hnawk a, thlarau rapthlak zet pawh kha a bo zui bawk..

"Ka nu, min chhan rawh.. Ka duh tawh lo..ka duh tawh lo" a phun sep sep a, a tawng chu a hriattheih chang chang a ni..

Amah tibuaitu thlarau ka hmuh rual khan engmah ka ti thei lo tih ka hria. Ka tanpui na mamawh vanga min rawn be thin thlarau te chungah lo chuan tihtheih engmah ka nei lo..!

Ni 2 hnuah Tlani chu mi a dahna ah dahluh a ni a, a chhungte tan enkawl ngaihna a awm ngang lo. A awmdan a rapthlak telh telh a, ka hmuh hnuhnun ber tum chuan thlarau pakhat mai ni lo tamtak in an hual tawh a ni.

A thiltih sual pawm duh lovin mihring in a sualna finfiahna tur chiangtawk a nei thei lova, mak takin thlarau in an tibuai zui ta zawk a ni.

Thla 3 a ral leh hnu chuan Tlani thih thu ka hria a, engtin tak a thlarau chu awmzui ang maw??

.
END OF HIDDEN LINE - 2