WHAT IF!!?

 WHAT   IF..!!!
By. Thantei_LauraSean   

3:47PM
Ka room atanga chhuakin, khaw thlir nan tura kan siam hmun bikah chuan ka ding vang vang a… 
Kan naupan lai chuan kan chenna in hi a fal deuh thin a, tunah erawh khawpui thang zel vangin fal deuh tia han sawitur ani tawh lo. Khawpui chhungte ngaihtuah erawh chuan ri luih luih a la tam lutuk lova, a nuam tawk viau a ni. Boruak a thianghlim bawk.
Kan in thlang kawngpui a hmeichhe lo kal ka hmuh chuan ka phu zawk! Makti zetin ka en reng a, a rawn hnai zel a.
Lallawmtluangi ngei ani.. A la danglam lo.. Ka trek chhawk ni maiin ka inhria..!!
  A taksa rem thlap kawr bantluan dum  leh half-pants  hain a sam a tawn sang vah a, a taksa lang chhun chu a no chek in a ngo hle. A uite kaih lai chu din puiin a thu hniam a, a uite chu a bia niin ka hria…

 “Lawmtluangi maw..?”  ka hriat tham lekin ka phun sap a..
.
Hmingthantluanga ka ni a, Buangpui tiin min ko daih thung. Kan unau hi 5 kan ni, ka u chiah hi Matthew Malsawmzela a ni a, nupui nei tawhin nikum khan in hrang an chang ve tawh a. Phirpui Andrew ka nei a, nau pahnih Christopher leh Leah-I te ka nei bawk. Lehkhazir ka tan phat atangin ka pa anga Doctor (Medicine Specialist) nih ve ka tum tang tang thin. Ka than len hnuah ka thiltum chu tlemin a danglam ta hlek..
.
All India Institute of Medical Sciences (AIIMS), Delhi ah  Bachelor of Optometry (Mit (Eye) lam zirna) ka zo tawh a, ka pa Hospital-a ka thawh ve hnuah tunah hian  private clinic hawng in bul ka tan mek. Ka zir hunlai  (Kum 3 chhung zir leh kum 1 chhung Internship) kum 4 chhung khan haw miah lovin Delhi ah ka awm char char a ni.
.
Lawmtluangi kal liam lai chu ka en reng a.. Kan inhmuh lohna chin a lo rei ta hle mai. A hmel leh pianphung mawi tak chu ala ngai reng. Kan inkar boruak erawh nasa takin a danglam tawh. Kan inkara thil thleng zawng zawng te kha...!!!! Tun thlenga hriatthiam tak loh thil ka neih te pawh..!!!
.
Amah nena kan nun hman dan tur a duhthu ka lo sam thin te.. ‘Nupui ah neiin, in nuam takah kan chengdun ang a, inhmangaih takin kan fate kan enkawl dun ang’ tiin ka ngaihtuah thin anih kha.
.
Keimah chauh hi a mipa hmangaih ni ila, amah chauh hi ka hmeichhe hmangaih awmchhun ni bawk se.. Kan pahnih hian engtin nge kan nun kan hmandun ang?? ‘Pathian remruat angin kan intawng anih hi tiraw’ tiin ka bulah a sawi sep sep thin kha ania.
.
A chanchin ka ngaihven duh loh ngar ngar hnu ah, tunah hian ka hmu leh ta a, a laka ka rilru ala danglam loh zia ka inhrechhuak bawk.  Amah hrechhuak lova  ni ka hman liam zauh zauh theih tawh hnu hian.. Engvangin nge ka hmuh leh kher ni..!
.
‘Bul ka tanpui leh ngei tur ani…’ ti a ka inngaihtuah nghal ringawt  chu..
.
FLASHBACK**
.
TRAIN  STATION – DELHI*
.
BUANGPUIA’S POV* (Point Of View)
.
“Dar 4 ah tiraw kan Train (Rel) tur alo thlen dawn?”
.
“Va nghakhlel ve”
.
AIIMS a ka zirpui tur te nen kan zirna tura buaipui ngaite kan tihfel hnuah Mizoram panin kan haw leh rih dawn a ni. Train in kan kal ngailo tlang a, sawi ve reng reng ah tiin tun tumah hian a huho in kan haw dawn a. A huho in ka han ti hluai na a kan thian ho hi 4 kan ni. Kei, KC-A, Chhandama,  Rinchhana te.. 
.
Kan Train tur arawn thleng a, kan compartment (pindan) turah lutin kan indahfel ta hlawm a. 
.
 “Nawm dawn hi.. Vai rimnam lo chuang ve lo sela..” Kc-a sawi zawh hmain kan compartment kawngkhar chu arawn inhawng a, Sikh pachal, palian zet hi arawn lut a. Kan inen ha hlawm a, kan nui ringawt. Sikh pa chu a hawihhawm  khawp mai, Calcutta (Kolkata) thleng kal ve tur tho alo nia. Rei vak lo ah kan titi ho thei nghal mai a.
.
Kan compartment kawngkhar chu arawn inkik dawt dawt a, kan titi lai chu tawpin kan inen thap a, kawngkhar chu ka va hawng thuai a..
.
“Please, help me..?” hmeichhe ngo zet, hmel phelh phang leh hlauhthawn vanga khur dat dat hian chhiang zetin min lo en a, ka kawr hmawrah arawn pawt nghal titih a. Min enchiang lehzual a “Mizo ini em? Khawngaihin min pui rawh..” lut tura ka sawm hmain kan pindan chhungah chuan arawn lut nghal rawp rawp a, kawngkhar chu kharin a kalh nghal bawk a.
.
“Eng thil nge thleng?” tiin ka zawt vat a, ka zawhna pawh min chhang ta mai lo chuan a thinphu nasa lutuk thunun tum niawm tak hian a awm a dawm vang vang a, a thaw hawk hawk bawk a.
.
Ka thiante chuan an en thap a, engmah an sawi lo.
.
“Kan compartment ah keimah chiah hmeichhia ka awm a, mipa 2 te khan min khawih an tum a..ka rawn tlanchhuak thei hram a ni.. Ka..hlau..lutuk..” asawi zawng pawh chuan a dang sawp sawp a, a hlau tak zet a ni tih hai theih a nilo.. A kawrhak lai chu a siamtha zauh a, a kawr chu a tet tih kan hmu ve chiah..
.
“Vai ho mai mai chuh..!!” Chhandama chu a ding hluai a.. “Khawi compartment ah nge I awm?”
.
“Thu phawt teh.. Vai ho style I hriatchian kha..” Kc-a chuan alo ti vat a..
.
“Thiannu, hlauthawng lo la, kan bulah hian awm ve rih phawt rawh. Ticket an rawn check hunah kan lo sawifiah dawn nia..” ka lo ti ve bawk a. Sikh pa chu kan thusawi awmzia hre lo in hlauhthawn hmel zet hian a lo hawi ve hu hu a, thu awmzia ka hrilh hnu chuan a thinrim ve hle.. “Ka theih dan zawng zawngin ka pui ang che u” a ti sawk sawk a.
.
“Kal pui I nei lo em ni?”
.
“Ah..aw, nei lo.. Ah..ka hming chu Lallawmtluangi ania, In lo awm ve hlauh chu ka va lawm em..” a mittui a hru fap fap a…
.
A hmel en chuan ala upa lo tih a hriat. A hmeltha in a chhelo hle.. College kal lai anih ka ring.. A dinhmun chu ka farnu neihchhun Leah-I chan ni tase tiin ka lo ngaihtuah hman pek.. Ka khawngaih khawp mai.. Ka bag chu ka va hai rawk rawk a, ka T-Shirt pakhat chu phawrh in ka pe a, ngawireng in a ha nghal a..
.
Thlamuang taka awm tura hrilhin thil thlen dan kan zawt bawk a..
.
LAWMTLUANGI’S POV*
.
“A fair lo e..keimah chauh te chuan engemaw pawh ka tawk palh thei a.. A hmain min hrilh lawk tur ania..”
.
“Sorry, engmah I tawk lovang.. tihpalh lutuk”
.
“OK” ka phone ka off nghal hmak..
.
Ka thiante awmdan chu fair lo ka ti tak zet.. Intiamrual vek hnua inphatsan leh te chu.. Keichuan ka thulh thei tawh lo.. Anmahni vangin ka flight ticket ka cancel ve em em a. Vawikhatmah ka thurualpui tawh lovang’ tiin ka insawh tau nghawng nghawng a. Eng em ka tawk bik lo ang. Mahse ka huphurh. Train a ka vawikhat kalna tur ani bawk si.
.
Train ka nghah lai pawh chuan ka thin ala rim reng. Ka chhungte ka bia a, anni pawn min ngaihtuah hle. Train a lo thlen chuan ka pindan tur zawngin ka buai nghal phawt..
.
Vai rimna zet zet pahnih an lo awmsa a, 1st class a chuang thei chin te chu an rim anat loh deuh te ka beisei ve ania…!! India ram ani tlat a.. Masala rim chu hre reng turah inngai phawt ang..!!
.
Vai pahnih te chuan fel hmel takin min be sek a, ka nel lo hle tih tilang lo turin ka in thunun ve hram hram. Hmeichhe dang lo chuang ve se ka ti tak zet.
.
Helai hmun atanga Calcutta thleng tur hian ni 1 mai kan la chuang ho dawn lo lehnghal.. Tunah darkar 1 em pawh ala ral lo a, rei ka ti tawh ania.. Ka inthlahdul thei lo.. Hla ka ngaithla a, ka bula mipa awm te chu ka ngaichang ru kar.. Enge ka hriat pawh ka hre bik lo.. College ah pawh hnamdang tamtak ka kawm tho a, tun anga hlauthawng ru tak hian ka la awm ngai lo.. A hmunin a zir loh vang te pawh ani mahna..
.
A rul tawk chauh a ka chhan avang chuan min be zui ta vak bik lo..
.
An pahnih chuan an inmelh zuk zuk a, pakhat chuan kawngkhar chu ava kalh zal zal a.. An in melh  dan chuan ka ngaih a titha lo nghal..
.
“North East mi ini tiraw?” tiin pakhat chuan min rawn hnaih a, pakhat dang chuan tv a kan en thin ang chiah chiah hian vai style  diktak maiin min rawn hnaih hruau hruau bawk a.. Ka tha a khur ru nghal zawih zawih.. An awmdan leh mitmeng atang chuan an thiltum a chiang..!!
.
Ka inrin hmain min dawmbet a, pakhat in ka hmui a hup nghal bawk.. A kut thlan chuap chuan ka luak a tichhuak nghal ut ut..
.
‘Lalpa chakna min pe rawh’ tiin ka rilru in ka tawngtai mawlh mawlh a.. Ka tal nghal vak bawk a. He mite lakah hian ka tlawm lovang… Ka hmui hup tu kut chu ten tak chungin ka theihtawp a na in ka seh vak a, a rak thawt a. Pakhat chuan ka kawr arawn pawt hrawk a a tet nghal hawk a..
.
Rem vak lo chungin Pakhat chu a point takah ka tlawh a, ana ve tawk aniang a let nghal hlawl mai. Ka theih anga rangin kawngkhar chu ka pan a, a kut ka seh sak zawk khan ka samah min pawtin min paihlet dawrh a.. A hmel tenawm zia leh rapthlak zia chu ka sawi thiam lo zawk.. Min rawn hnaih leh chuan ka theihtawp chhuahin ka ham buan buan a, a hmai a ka chum chuan a rum hrawk a, a mit a hup chat a.. Khur zawih zawih chungin compartment atang chuan ka tlanchhuak a, pawnlam ah ka kalh nghal..
.
Hlauh vanga la khur zawih zawih chungin helai ka mizo puite awmna hi ka thleng hram a ni. 
.
Ka hlauhna leh ka tha khur ala reh thei lo. Ka tah a chhuak em em bawk..
.
Rei vak lo hnuah Ticket an  rawn check chuan thil awmzia an lo sawifiah a, station lo awm leh hmasa ber ah Police ko in vai pahnih tenawm zet zet te chu an man nghal a, Compartment kawngkhar pawn lama ka kalh vang khan chhuak thei lo in an lo la awm hlauh a ni.
.
Calcutta atangin flight in ka haw ta a, Train a min tranpui tute pawh an phone number ka la vek a, anni chu Calcutta ah anla cham lehrih dawn ani. An hnenah lawmthu ka sawitawp thei ngailo ang... Vawikhatmah Train in ka zin tawh ngai lo bawk ang.. Vawikhatmah..!!
.
Tunah hian kan in ah..ka nu leh pa leh ka chhungte bulah ka awm tawh a.. Ka thiltawn khan min la nghawng takzet a, ka la muhil tha ngamlo..
.
.
Ka phone ri chu rang zetin ka en vat a, phur zetin ka pick up nghal vat.. Diktak chuan ka ngaihtuah ruk reng ania..!! Kan inhriat dan in a zirlo viau na in ka rilru a luah a, a hmel pa lutuk kha ka mitthla ah a cham reng ani..!
.
“I tha zel em? Buangpuia ka nia..” ka nui hak a.. Ka hriatloh a inring emaw nile..??
.
“Ka hria che alawm.. Ka tha e.. Tunah khawiah nge I awm?”
.
“Nimin khan ka rawn thleng ve chiah a.. In in ah rawn len I phal angem?”
.
Ka rilru chuan ka nui var var..
.
“Ah..phal e.. ka chhungte pawn an hmuchak lutuk che u”
.
“Keimah chauh a lo kal ka tum a”
.
“Ah..nia..lo  kal rawh..” ka bahlah vek.. Ka lai ringawt lehnghal.. Ka trawng sual tih ka inhre chiah bawk..
.
“Naktuk zanah kan lo kal ang.. Anih phawt..” ka chhan leh hmain a phone a off nghal a..
.
Ka phone chu en in ka khumah ka mu thlawp a, ka nui var var… Min biak ringawt pawn nuam ka ti… Min theihnghilh nghal ka ring ania.. Khatiang mipa chhelo lutuk kha... Ahun taka min tranpuitu ani bawk..
.
A tukah chuan ka nu nen bazaar ah kan kal a, ka riltram vangin Harley Restaurant ah thil ei turin kan lut a..
.
Kil khatah chuan class 12 ka zirlai a ka thiannu ka hmu thut…abulah chuan mipa a awm bawk.. a hnunglam atang chuan ka en vang vang a, ka hriat tawh hnu a ang ka ti… Ka hrechiang alawm.. Buangpuia ani chiang lutuk.. Min deng dawt… Leah-I hi hmeichhe ler ani ngailo a, nungchang zawi leh ngaihzawng ngaihven ngailo tak ani thin kha ania.. Tunah chuan ka mipa duh ruk nen hian an inngaizawng ani ngei ngei ang..!! A chhelo a, an hausa bawk a, Buangpuia pawh a chhelo bawk.. an inhmeh dun ngawt ang…
.
“Hey..Lawmtluang..” ka hlauh ang ngeiin…ka biru trawk trawk asin le.. “Minlo zawm ve ru” Leah-I chuan min rawn hui zauh a.. Hnial a mawi ta hauh lo mai..
.
Ka nu chu ka kai a, Leah-I te thutna lamah chuan kan kal a.. Buangpuia’n min hmuh chuan a phu zawk in ka hria..
.
“In inhria law?” tiin Leah-I chu a en a..
.
“In inhre zawk ami? Lawmtluang..heihi ka u nih hi.. Buangpuia.. engtin nge in inhriat aa..”
.
Huiii..ka thaw huai.. Unau anlo nireng a maw?? Kan inhriat dan kan han sawi a, ka nu chuan Buangpuia chu lawmthu hrilhin an han in chibai lehrih a..
.
Thil kan ei lai  chuan kan inmelh fuh zauh zauh.. Ka ngaihbel nge mawni min en deuhreng in ka hria..!! Ka lai chhe der chu anih ber hi..
.
BUANGPUIA’S POV*
.
   Harley Restaurant atanga kan haw hnu chuan ka rilru ah thildang a awm thei tawhlo.. Nia, ka phalo.. Train a ka hmuh hmasak ber atang tawh khan chhelo ka ti tawh.. Ka thiante pawn chhelo an tih thu an sawi zawm nasa..
.
Hriatchian chak si, ka ngaihven tih tilang hreh bawksi in Leah-I chu zawhna ka zawt zauh zauh.. Mahse ka farnu hian min hrechiang khawp a, ka hriatduh tur awm ang chu min hrilh thlap.. Lawmtluangi chu mark a pe tha khawp mai..!!
.
.
Tunah tak hian hmeichhe kawplai 2 ka nei..!! Ka rilru han pek tak tak erawh ka nei hranlo.. Engpawh nise, ka hmeichhe kawplai te dahtha rih in Lawmtluangi kha ka belchiang phawt dawn ani.. Enge ka ngaihtuah pawh ka hre tehnuai love..
.
Zan lamah chuan Kc-a nen Lawmtluangi te in a leng turin kan inkhalh chhuak a, an in awmna te kan zawt chawp lehrih..
.
An in kan thlen chuan an chhungkua in anlo awm thap a, a nu leh pa te pawh an fel khawp mai. Kan phutawk aia nasa mahin lawmthu min  hrilh mawlh mawlh a. An chezia atangin chhungkaw inpawh tlang tak anni tih a hriattheih.. Rei vaklo hnuah anu leh pa chuan ‘tikhan lo inkawm rawh u’ tiin room dangah an kal thuai a..
.
Kc-a’n sawitur a hre bawk a, kan titi tui ta phian.. Tawng ve vak lovin Lawmtluangi chu ka lo en leh veng veng thin.. Kan mit a intawn chuan a lai deuh thin tih ka hria.. A inthup thei viau na in, mitmeng hian dawt a sawi ngailo tih ka hre ve khiau alawm..!
.
Kan haw hnu chuan phone a be nghal lo turin ka insum a ngai hial nia..! Hei zet chu ka tan thilthar ani ta tlat..
.
Ni hnih a ral leh hnu chuan ka va be leh ta nge nge.. Hmeichhe ti zawk zawk lo tak leh mipa umzui chi a nilo  tih ka hre vek tawh alawm le..
.
ME -  “I hmel hmuh kha anuam”
LAWMTLUANGI – “Hehe..ka van lawm”
A nui hmel tur ka mitthla nghal ringawt.. Aa..keihi ka diklo tawp mai..
ME – “Naktuk ah ka rawn hmu ang che”
LAWMTLUANGI – “Ka hmanlo maithei..”
ME – “I hman angai tihna”
.
Ka rin angin a awlsam hmelloh.. A mitmeng atang kha chuan min haw biklo ang tih kha ka ring ve ngawt a… min rawn chhang mailo.. a reh deuh vang vang hnua ka whatsapp tone a rik chuan rang zetin ka check nghal vat a..
.
LAWMTLUANGI – “Ka lo hrilh zel ang che.. Huii..tunah hian min rawn bia..Nuam lutuk, ka hit chuai chuai in ka hria.. ‘Ka rawn hmu ang che..i hmel hmuh kha nuam’ te rawn ti vel.. Awiii..nuam lutuukkk..ani mai..”
.
Hei chuh… vawihnih ka chhiar nawn hnu chuan ka nui sak.. A rawn inpuang nge a thawn sual..!!
.
ME – “I rawn tisual nge? Buangpuia ka nia..”
.
A reh ta vang vang mai..
   .
LAWMTLUANGI’S POV*
.
Message ka check chuan ka zuang dawrh… Machhuani thawn tura ka type kha Buangpuia ka thawn..!! Ngawireng in ka phone chu ka melh tlawk tlawk a, za lo zetin ka nui tawi tak mai… Message chu ka chhiar nawn a, ka sa pup pup..ka thlan bawrh bawrh thei… Ka zak lutuk… ZAK tih hian a sawifiah zo lo..
.
Ka thiannu chu ka va phone a, thil awmzia ka sawi chuan min nuih vak vak ringawt.. Ani chauh hi ka thiantha neih awmchhun ania, engkim ka hrilh ve thin.. Unau pianpui hmeichhia ka neilo a, ani hi ka unaunu ang chiah ani..
.
“A ho lutuk.. tikhan a duh che chuan arawn be zawm mai ang che..” a rawn ti awlsam et a..
.
“I tawn ani lova I hrethiam lo anih kha.. Min ngai khawlo ngawt ang.. Ka thawnsual anih aring vetho angem.. Awii..ka zak lutukk”
.
.
.
Machhuani nen kan inbiak zawh chuan khumah ka tlu tawp a, ka mittui a tla ringawt..! Zah lutuk vang hian mittui alo tla thei anih hi.. Ka phone chu ka en vang vang a..
.
“Sorry.. Thawn sual..” tih chiah ka va thawn.. Sawitur dang a vang em ani..!! A hun hmain ka inpuang ani ringawt.. Min nuihzat dawn lutuk..
.
A tuk tlai ah chuan ka rinloh lutuk in Buangpuia chu kan in ah arawn lang hlawl.. Han tlanchhiat san em chu a dik bik silo, sawitur leh biak dantur ka hrelo a, ka nuih tawp.. Mipa nge nge, engmah thlenglo ang maiin min bia a, ka zak zual deuh deuh.. Rei awmlo in a haw leh vat a..
.
Zan ah whatsapp ah min rawn bia a, ka chhang ngam tawhlo. Ahnu ah min rawn call char char a, a vawi 5 na ah chuan inthlahrung deuhin ka pick up a..
.
“Min be duh tawh dawnlo emaw ka tia” a nui hak a..
.
“Ka buai deuh a” ka thluak chiah a buai..
.
“Anih chuan naktuk hian ka thiante in ah kan party dawn a, ka lo sawm ang che”
.
“Ah, ka hman lovang..”
.
“I Hmanloh chuan keipawh ka kal peih chuang lova.. Enge I tih dawn?”
.
“Ka buai dawn..” tihpalh thil vangin ka duh ani tih hre tawh mahse min zuam sual khawp ang.. Ngaihzawng pakhat chauh neih ka duhang bawkin mipa kawp kual mai mai theih nih ka duh biklo.. Ka thil huat ber ani bawk..! Mahse hepa hi ka duh lutuk..
.
“Tunah khan in ah I awm em?”
.
“Awm e”
.
“A that chu..lo awm rawh..”
.
Ka chhan leh hmain phone a off nghal a.
. 
.
BUANGPUIA’S POV*
.
Motor ka lachhuak a, Lawmtluangi te in lam ka pan nghal a.. A message avang khan ka zuam nghal ringawt chuanglo.. Hmeichhe dang ang chu nise ka zuam phah ngei ang! Mahse Lawmtluangi hi chu a danglam.. Kha message pawh kha min rawn thawn sual palh tak tak anih ka ring hmiah bawk.
.
An in ka thlen chuan a chhungte tumah anlo awmlo.. Amah chauh a tv en chung hian buai a inti maw..?? Hmeichhe mak tak chu anih hi..
.
“I va buai ve..” ka ti hram a..
.
“Nia..”
.
“Anih chuan ka sawi duh hi ka sawi anga ka haw lehnghal mai ang..” mak tih hmel deuh hian min en ha a..
.
“Enge a??”
.
“Kan  inngaizawng ang..Tun atang hian.. Ka duh che a, nangpawn min duh tih ka hre tawh a..”
.
“Message vang kha anih chuan ngaihtuah zawm duhlo zawk rawh..”
.
A rilru puthmang tlang taka a sawi chu ka duhzawng ani zawk.. Amah chiang taka en in ka nui sak a.. A zak cheih cheih tura ka ngaih laiin chiang zet hian min en kal a.. Ka rinloh dan hlir a awm chi hmeichhia hian min hip.. A inringtawk a, a sexy ka ti..!!!
.
“Message I rawn thawn hma khan ngaizawng tur che in thutlukna ka siam vek tawh..”
.
“Min ngaizawng peih lovang..ah..” a thusawi chu inchhir leh niawm takin a ngawi ta daih a..
.
“Ka duh che.. Ka chiang..”
.
Ka hawsan hnu chuan ka ngaihtuah zawm nasa. Ka ngaihtuahna luah vang vang tu hmeichhia hi ka tan a hlu khawp mai..
.
NI 21 HNUAH**
.
Vawiin hian Lawmtluangi nen Lengpui Airport atangin Calcutta panin kan kal a, Calcutta atangin flight bawk in Delhi kan pan leh ang. Vanneihthlak takin kan class tran hun tur a rual deuhthaw a, nuam kan ti khawp mai..
.
 Vawiin hi kan inngaihzawn tak tak ni atanga chhiar a NI 11 na chiah ani..!! Ka lo chhiar thlap anih hi..!!
.
Delhi kan thlen hnuah a awmna Hostel a ka thlah hnu chuan ka in luah lam ka pan nghal a. Ka nu in Hostel a awm a remtih loh vangin in ka luah ani. Ka u hi sumdawnna thilah a zin deuh reng bawk avangin inluah hi kan tan a awlsam phian zawk. Lawmtluangi awmna Hostel leh ka in luah hi a inhlat viau bawk.
.
Hun aral bek bek a, kan zirlai kan tran ta bawk nen, nitin inhmuh a harsa tran a kan inthlahlel zual telh telh bawk.. Mak deuh chu ka bulah ngei min duh ve thu a sawi atang khan ka hmeichhe kawplai te kha ka thlah hmiah ve ve ani.. Lawmtluangi duhang takin amah chauh hi ka kawp ang. Ka rilru tak tak in ka thlahlel a, ka ngai em em reng bawk.
.
Ani pawh keimah ang tho ani.. Tunah hian 5th  Semester (3rd Year) B.Sc (Chemistry) a zir mek.. Kei aiin kum 1 in a naupang a, kan inbelhchian zel hnu hian kawng thenkhat ah chuan tluk lohna ka nei niin ka inhre hial thin.
.
 Hunawl kan neih remchan apiang in kan lengchhuak dun a, ka in ah ka hruai fo bawk. Sex ah kan fihlim.. Nia, diktak chuan mipa ka nia, ka tumchhin lo ani biklo, mahse mi invawng fel leh thil reng reng fair taka tihduh thin Lawmtluangi thusawi vang khan kan inneih hma chu sex hmanpui lo turin ka intiam ani.. A hriatlai chuan ka sawi kherlo na in, ka rilru hian tihluih tumna ka neilo.. 
.
Ka phone ri chu nui sakin ka pick up a..
.
“I buai em? I inbulah ka lo kal a, in ah I awm chuan ka lo peng lawk ang ka tia..”
.
“Lo kal la.. Min ngai leh tawh ani maw?”
.
“Minute 15 hnuah ka lo thleng ang aw” nui hek hek in phone chu a off a..
.
Inchhung chu ka enkual thuak thuak a, nidang ang bawkin a hnawk angreng.. Sofa leh hmun dang dang  a ka thawmhnaw darh nuai chu ka lakhawm nawk nawk a, bathroom ah luhpui in machine ah ka vawmlut leh hmiah.. Mipa, mahni chauh a awm nih chuan chetfel thlip thlep hi a har ani..
.
Door bell a rik chuan phur zetin ka va hawng vat a.. A rawn inkhai bawr lak a..
.
Alo luh rual chuan kawngkhar ka khar a, ka lamah pawtin a hmui ah ka fawp vang vang a..
.
“Nangman min ngai zawk anih hi” a thaw ham ham a.. A thusawi chu chhang lovin ka fawp leh a..
.
Ka inlakhran deuh hnu chuan a thilken chu ala khai reng tih ka hmu chiah.. A thilkhai lai chu melh zauh in “Engmah I la eiloh ka ring a” ati sap a..
.
Thla 3 chhung chiah kan la inngaizawng a, ka awmdan tlangpui chu alo hre viau mai.. Ka nui ringawt.. Kitchen lamah a eitur ken chu a luhpui a, ka zui ve mai a.. Lawmtluangi hian eisiam a thiam khawp mai.. Hmeichhe eisiam thiam tak hi ka ngaisang a, mahse tunah tak hian eitur aia duh ka nei.. Thildang a khawih mawlh mawlh lai chuan a hnunglam atangin a kawngah ka kuah a.
.
“Eitur ai chuan heihi ka duh” zawite a trawngin ka kun hniam hlek a a nghawng ah chuan nalo te in ka seh zeuh a.. A rimtui chem chem han hip ringawt pawh hi a hahdamthlak.. A kawngah chuan ka kuahnghet sauh bawk a..
.
“Thil tui deuh I eiduh chuan minlo tibuai lo khan I kawr va ha rawh..” nui sakin min melh ralh a.. Thu min pek hi nuam ati riau anih hmel..
.
A hnunglam atang chuan a kut ah vuan in a thil khawih lai chu ka dahsawn sak a, ka lam hawi turin ka kuai her a.. Ka tih ve theihchhun chu duhthawh taka fawh chauh ania, ka tihtheih awmchhun chu ka ti reng mai dawn ani.. Pawmkang in dawhkan ah chuan ka lam hawiin ka thuttir a. Ka awmdan chu hrethiam chiahlo in min enkal a..
.
“Min kuah rawh”
.
“Tinge tihian I awm a?” kan boruak serious ta thut chu a hrethiam a, tih zangkhai tumin min be lui tih ka hria..
.
“Min kuah rawh” tiin a ban pahnih chuan ka nghawng ah ka inkuah tir a, din hnaih sauhin a kawngah ka vuan a.. Kan inen hnai hle..
.
“Min fawp rawh” engemaw sawi tumin thawk ala halh a, engmah sawi talo chuan a lu a thing nar nar a, ka biang ah a fawp zauh a..
.
“Tikhan a tawk em? I kawr va ha phawt rawh..”
.
“NO..” kuah nghet lehzualin ka en hnai hle..
.
“Hmingthantluang..” a trawng chu a zawi in a tham chal a.. Alaka ka awmdan avang chuan a danglam ve tho tih ka hria.. Ka hmingpum in min la ko ngai miahlo bawk.. A kut pakhat chuan ka thukhum sam ah nalo te a thram in ka hmui ah min fawp ta a. Ka chhang phur hle.. Kan infawh vang vang hnu chuan ka awmah a hmai phumin kan inkuah vang vang a..
.
“Buangpui..ka hmangaih che in ka inhria..”
.
Nia, keipawh chu chu ka inhriat dan ani.. Chhang lovin a sam chu ka fawp zauh a..
.
“Ka awmdan a danglam ania.. Khawngaihin I kawr va ha rawh..” rawn hawichhuak in ka hmui ah min fawp leh zauh a, nui sangin min namsawn a..
.
Rum hak a inla hrang in ka kawr ha tur chuan ka kalsawn a, ka inhriat miahloh laiin ka lo nui suk suk.. He hmeichhia ka tawng hi vannei ka inti ta viau bawk..
.
Thil eng eng emaw sawiin a eitur siam chu ka en reng a,
.
“Karleh hian test kan nei dawn a, vawiin bak chu tunkar chhung in kan inhmu thei tawh awm silo a.. I zirlai enge I an??”
.
“A harsa em em rihlo.. Karleh eng ni ah nge test I zawh ang?” Apple chu la in ka keih hmawk a..
.
“Friday ah.. Tlaiah movie endun I hman angem?”
.
“Ticket ka lo leilawk vek tawh..”
.
“Ka movie en duh..”
.
“Khoobsurat..!!”
.
“Yes..engtin nge I hriat a..” hlim zeta au raih in min rawn kuah thuak a.. Tifuh inti zetin ka nui hak a.. Diktak chuan a duh tih ka hre miahlo a, ticket ka lei risk ve tawp ani..
.
LAWMTLUANGI’S POV*
.
 Test ka titha viau.. Kan test chhung khan kan inbe tamlo.. Lehkha han zir tak tak dawn hi chuan rilru lapeng tu awmlo se ka duhdan ani thin a, chuvang chuan thil pawimawh leh kan damthat leh damthat loh inhrilh zawk zawk bak chu tunkar chhung khan Buangpuia nen kan inbe lo..
.
Tunah hian minlo hruai hun ka nghak mek.. Ka movie enchak ber min enpui dawn a, engtin nge Khoobsurat hi ka duh tih a hriat pawh ka hrelo..!
.
 Ka hmangaih in ka inhre tak tak nia.. Lawm tur nge lawm loh tur tih pawh ka hrethiam lo.. Hmangaihna hi khawvel a thil hlu ber leh hlimna min pe thei tu anih theih laiin lungngaihna khuarkhurum mawng tawp neilo a min nawr liam theitu pawh ani.. Han inkawp zel phawt ila enge thleng dawn kan la hria ang chu..
.
Tuman kan hma hun kan hrelawk thei silo a, mahse thil kan hriatlawk lohna hi khawvel tinuam tu leh hlim taka kan awm theih chhan ani a, chuvang chuan tun hunah hian hlim takin ka awm dawn ani.. Naktuk ah enge thleng dawn kan hre silo..!!
.
Enge maw ka ngaihtuah duah le..!!
.
Ka hawichhuah chuan Buangpuia ka lam pana lo kal ka hmu a, min rawn hui zauh a.. Alam pan chuanglo chuan ka ding a, ka en reng a.. He mihring hi ka hmangaih ani.. Mahse hmanni a ka hmangaih ni a ka inhriat thu ka sawi khan engmah a sawilo kha ania.. Keipawh in ka sawiri tawh rih lovang..!
.
Ka bul a rawn thlen chuan ka kut ah min kai a, ka kut chu la kang in a fawp zauh a.. Ka trek chhuai chhuai.. Hmanni a in kan awmdan kha ka ngaihtuah let a, ka insum theihna leh pasal ka neih hma chu sex ka hmang lovang tia ka lo intiam thin chu ka bawhchhe trep anih kha.. Engpawh nise, ka lo intiam tawh ang khan ka la him hram hram chu anih hi.. Buangpuia hian min nawrlui lo hlauh bawk a…
.
Movie en tur chuan Metro in kan kal a, ka bula a awm reng reng hian ka kut vuan lovin a awm ngailo. Kan bula vai ho chuan min dek ang tih hlau niawm tak hian min veng deuh run in ka hria..
.
Movie en chhung chuan kan inbe buai lo.. Hmuhnawm a tih ve leh ve loh pawh ka hrelo. Ka thilen laiah ka rilru zawng zawng a awm vek.. A changtunu (Sonam Kapoor) rilru na taka a trahlai te chuan ka mittui alo tla ve dawn dawn a.. A hlimawm lai ah ka lo nui ve bawk a.
.
* *
‘Thudik sawi chu enge a pawina?
‘I rilru a thilawm apiang I sawichhuak tur tihna a nilo, thil thenkhat hi chu thinlung a vawn mai chi a awm’
‘Nia, a dik alawm.. Mahse ka upat hunah kha thil kha ka lo ti talo a, engatinge ka lo hrilh loh tiin inchhir leh ta si ila.. Keichu chutiang mi chu ka ni velo.. Ka rilru a thu awm apiang ka sawichhuak thin’**
.
Kan movie enlai a achangtute tawngkam chu ka ngaihtuah zawm vang vang.. Buangpuia chu ka melh zauh a min lo en ve chiah bawk.. Ka kut chu a hmer zauh a.. A mitmeng zawng zawng nen.. Tawng silo in thu tamtak min hrilh ni maiin ka hria..!!
.
Hun a liam ve zel a, chawlh hmangin ka haw ve leh dawn hnai ta.. Buangpuia nen buaina lian tham kan nei hran lo. Enge maw changa inhnial deuh rap rap te hi chu inngaizawng zawng zawng hian kan nei vekin ka ring. A chang leh thikthu vangin..a chang leh min ngaihtuah tawklo a ka hriat vangin kan inhnial fo bawk.
.
A zirlai ah a rilru a pe nasa zual bawk a, keipawh ka dang vak chuanglo..
.
Chawlh hmangin Aizawl ah ka haw a, a nuam viau nain ka lungaleng.. A taka inhmuh theihloh chu tuar har ka ti viau mai.. Thil ka ngaihtuah vak vak a, a chang leh ka mumang vangin Buangpuia chu ka thinrim khum bawk thin.. Ka mumang a ka hmuh dan vanga ka thinrim trum chuan tihvak ngaihna hrelo in min nuih tawp.. Mahse thil tamtak ka ngaihtuah loh theihloh chhan chu ka thiannu thu min hrilh ka hriat vang ani..
.
Buangpuia nen kan inngaihzawn tran lai vel khan ngaihzawng kawplai alo nei reng a, a ngaihzawng thin nu leh ka thiannu Machhuani te hi an inhria a. Ka thu hriatthar avang chuan Buangpuia ka rinna pawh a tlahniam tih ka chiang..
.
“Chutiang te chu tinge a hmain min hrilh loh”
.
“Ka hriatna ala rei bikloo.. Mahse tunah te chuan an inthen tawh tho a.. I rilru tibuai suh.. Nunhlimi’n biak leh a tum pawn Buangpuia’n a phone a pick up ngailo hrim hrim tih a sawi alawm..”
.
Ka rilru a nuam thei nganglo a Buangpuia chu phone ah ka hrilh ta hram.. Nunhlimi chauh lo pawh hi ngaihzawn thin chu a nei teuh ang.. Hrriat vekpawh ka duh chuanglo.. 
.
“Engahmah ngai suh, thildang pawh sawi se, ka lak atanga I hriat anih loh chuan engmah awih suh”
.
“Chutiang ringawt chu a ni reng thei dawnlo ania.. Midang  inkawp san ang chi anih chuan keichuan engmah sawilo in ka kalsan ang che..” ka rilru tak tak ani bawk..
.
“Min then pawh chu I cho hle maw?”
.
“Ka cho vang anihloh chu.. Midang ilo kawp anih chuan katih mawlh mawlh chu..” ka awmdan hi ka hrethiam biklo. Phone ah hian thinrim a awl.. Hmaichhan ah chuan sawi ila tunang hian ka thinrim miahlo ang. Amah hmuh theihloh bawk nen..
.
“Ok. Midang nang aia duh ka neih chuan ka hrilh ang che.. Mi thusawi nazawng lo awih suh.. Tichuan I lungawi thei em?” ka ngawi vang vang a..
.
Duat taka inthlem chu a awmlo ve chiang alawm.. Midang kei aia duh a neih chuan min hrilh ang maw..?? Chu hun chu engtik ah tak thleng ang maw..?? Naktuk ah pawh ani maithei.. Karleh ah pawh.. Ka rilru a hahdam thei ta hlawl lo mai..!
.
Ka chawlh theih hunchhung a zo a, trumdang ang chu nise huphurh deuh in Aizawl ka chhuahsan leh ngei ang. Mahse tun trum chu thlakhat rei ka tih ber trum ani chiang.. Rilru phur zetin Delhi lam ka pan leh ta..
.
BUANGPUIA’S POV*
.
Lawmtluangi chawlh hman chhung chu a rei takzet.. Kan inhmuh theihloh chu thuhran nise, thinrimna tur leh lungawilohna tur a rawn hre ta viau chu ka duhdan anilo..
.
Tunah hian Airport ah ka lo hmuak a, kan inhmuh loh chhung zawng zawng a rilru nuamlo a min siam avang leh min thinrim khum fo avangin ka hrem mawlh mawlh ang..
.
A rawn thlen chuan Hostel lamah hruai lovin ka in ah ka hruai a, a chawlhhman dan min hrilh siam siam a.. A trawnglai chu ka en leh vung vung thin.. A hma ang kha ani leh ta in ka hria. Kan awmdun chuan kan thinrim ngailo ve ve.
.
A intihfai hnuah ka khumah kan mu a, duat tak a inkuah in kan titi dun ani.  A ngawih tak vang vang hnu a ka en chuan alo muhil daih.. A hmel chu ka en reng a, a hmui ah ka fawp zauh a. Ka chet avang chuan harhchiang lovin arawn meng a, a awmdan siamtha in min kuah nghet sauh a, ka nghawng ah a hmai a phum kak a a muhil zui lehnghal a.. Engemaw sawiin a phun sep sep a, enge a sawi tih ka hre theilo.. Inthlahdul in reilo ah ka muhil ve ta a.
.
Ka zirlai ka bei ngawrh lehzual tran viau a, kar 2 chhung zet chu Lawmtluangi nen pawh kan inhmu leh talo. Phone ah erawh kan inbe reng.
.
Zan dar 8 vel bawrah door bell a ri trat trat a, tunang hunah tunge lo kal ang tih han rinchhin tur ka hrelo.. Kawngkhar ka hawn chuan ka rinloh deuh ka hmu bawk..
.
“Rinsangi maw..?”
.
“Ka lo lut thei angem?”
.
“Lo lut la..”
.
“I van ngaihawm em em.. Biakpawh I harsa ta hle mai” a tihthin dan pangngaiin min melh sar sar a.. A lem thin mah mah.. A landan a a zahzum hmel ang hi a nilo thin..
.
“Enge I rawn tih dawn?”
.
“Hetah hian thla 2 chhung training ka nei dawn a, ka awmna nen I in hi a inhlat lo hlauh a a van tihchi tak.. Ka cousin in alo hria che a, tunah pawh hian min rawn hruai alawm..”
.
“Khawnge I cousin chu?”
.
“Dar 9 velah minlo hruai leh ang.. A remchang em a, ka rawn tlawh ve hrim hrim che. Thiltih laklawh I neih chuan tihzawm la”
.
“Lo thu rawh..” ka titawi tak a..
.
Dar 9 rik hmain Rinsangi cousin chu arawn thleng a, an haw hma ta hlauh..
.
Ka mut dawnah ka phone ka en chuan Lawmtluangi missed call alo awm nual. Ka call back nghal a.. Ka phone ka silent daih a, alo call lai ka hre miahlo ani..
.
“Naktuk ah ka rawn hmu ang che, dar 2 velah a ngai ah lo awm la..”
.
“Ok.. keipawh tihtur ka nei tho a” arawn ti ve bawk a. Lawmtluangi mak ve na chu a phone call ka pick up loh a ka call back hian alo thinrim nghal ngai miahlo.. Thildang ah erawh ho te a ka ngaih ah pawh a thinrim thin tho.. A mizia hi ka hrethiam ngai dawnlo anih hi..
.
Kan tihtur pawimawh kan tih zawh hnuah kan tihdan thin pangngai angin kan leng kual a, Lawmtluangi nen a nih tawh chuan khawi hmun pawh hi hmun nuam ber ani mai zel e.. Ka ngaihtuahna luahtam ber tu chu amah hi ania, kan zirlai kan zawh hnua kan awm duhdan te kan sawidun fova, kan duhthusam te nen..
 .
THLAKHAT HNUAH*
.
“Buangpui naktuk chu min chhuahpui la, karleh hian ka haw tawh dawn a” Rinsangi hi thla liamta chhung khan ka in ah hian arawn kal zauh zauh.. Alaka ka awmdan avang hian min beisei ang chuan a lang tawh biklo. Ka hrilhchiang em bawk ani..
.
“Ka hmanlo ang..”
.
“Hman hram la.. Tun bak hi chu ka sawm miahlo ang che.. Khawngaih inn..”
.
Min zawtlui trang trang a, a hnialtu tana inthlahrunawm khawpin.. Chuti na na na chu tiin ka kalpui tur thu ka hrilh ve ta mai.. Miin khawngaih an dil tawh chuan han tih hlawhchham tawl hi a nuamlo ve thin..
.
A tukah chuan min rawn sawm ta ngei a, ka lo la inpeih loh vangin room a ka insiam chhung chuan minlo nghak a..
.
A sawidan aiin tihduh alo ngah zek a, zan dar 9 dawn ah in kan thleng leh chiah. Tlai lamah ruah a sur vangin tum angin kan awm talo ani..
.
Ka mut dawn chuan vawiin hian Lawmtluangi’n min la rawn be miahlo tiin ka ngaihtuah vang vang a.. A buai ve deuh ani ngei ang. Tunhnai hian ka be tamlo khawp mai. Ka zirlai vang ani tih min hriatthiam sak hlauh zawk a..
.
Ka phone ka en chuan alo in switch off a, ka off lai ka hre miahlo. Nilengin ka phone a ri miahlo tih ka hrechhuak chiah bawk.. Zinga Rinsangi’n min nghah lai khan ka phone kha room ah ka luhsan mai a, Rinsangi khan alo khawih chu ani em lovang chu..! A battery a low aniang. Ka charge leh hnuah biak tumin ka call a, phone a pick up theilo.. Vawi 3 vel a ring quit hnu chuan ka duhtawk ta a. Missed call alert lo thleng treuh vang chuan min rawn biak a tum ngei tih ka hre tal alawm le..!
.
LAWMTLUANGI’S POV*
.
Buangpuia hi ka hrethiam lo.. Karhnih liamta vel atang khan a awmdan a danglam tih ka hria. A zirlai vang ani tih min hrilh kha rinhlelhna nei miahlo in ka awih hmiah a, mahse vawiin thilthleng leh ka thil hmuh khan ka rinna zawng zawng a tichhe vek..!! Tichuan tunhnai a min rawn be thintu hmeichhe thusawi engahmah ka ngaih loh thin kha thudik ngei ani ang tih ka ring ta..!! Fiahna tur dang ka mamawh love..!!
.
Zing dar 10 vel khan Buangpuia ka phone a, a reject zel.. A buai laklawh aniang tiin tlai lamah City Hospital a min kalpui hman dawn leh dawnloh message in ka zawt a, tlai dar 4 ah ka lo nghah tur thu ka thawn leh a, a hmu ngeiin ka ring..
.
A hnu deuh ah a lo kal tur thu message in min rawn hrilh a, min rawn call back lo chu mak ka ti..
.
Nihnih liamta atang khan ka damtha tawhlo a, ka damlo khat viau nain ka tuar a chhel a, inentir leh damdawiin a kal hi loh theihloh takzet thilah lo chuan ka duh ngailo..
.
Ka lo nghahna tur hmun ka hrilh ah chuan tlai dar 3:40 ah ka thleng a. Ka rin aiin alo thleng har..nidang ah chuan a sawi hun chat ah arawn thleng thin.. Dar 4…4:15…4:30.. a rawn lang thei reng reng lo.. Ka call leh a a phone a switch off tlat bawk..
.
Lungawilo zetin Damdawiin ah chuan keimah in ka kal a, In entir turin ka lo tlai tawh. Ka Doctor rawn tum ber alo haw tawh vangin Hostel lam panin ke in ka haw leh ta ringawt a..
.
Ka thil hmuh chuan min thrawng.. Buangpuia leh hmeichhe pakhat ka hmu a, an hlim hmel khawp mai.. Ka hmuhreng lai chuan ka call lui leh ngat a, a phone ala off tho.. Za lo zetin ka then sak a.. Min rawn be thintu hmeichhia kha anih ngei ka ring bawk.. ‘Kan inthen tak tak theilo..kan ni leh tawh’ rawn titu kha..!!
.
Hetiang anih chuan amah pawh ka hrilh tawh ang khan ka then mai ang chu.. Ama sawi ngei ka hriat erawh angai ang.. Ka na khawp ang.. Ka thinlung ana nghal vawng vawng.. Hetiang thil hi a thlen tak tak ka ring ngai miahlo ania..
.
Ruah a rawn sur a, nihliap ka keng bawk silo.. Ka thinrim nen..ke in ka kallui a, ka do han thak.. Hostel ka thlen chuan ka huh zawr vek, ka mittui leh ruahtui chu a inchawhpawlh nuai ta ve ang..
.
Zan lamah chuan ka khua a sik hluah a, damdawi ei pawhin min chhawk zolo.. Zan dar 10 dawn ah Buangpuia’n min rawn call ve ta hram a, mahse ka pick up theilo.. Zanin hian uluk takin ka inngaihtuah phawt anga, naktuk ah rilru fim in ka bia ang.. Thil awmzia a sawifiah duhloh chuan ka thil duhloh ber hi ka tih a ngai bawk ang..
.
Ka khawsik reh theilo leh rilru buai bawk nen, ka mu tlem khawp mai. Zing dar 9 velah Buangpuia ka phone a, vawi 3 a ring quit hnuah min rawn chhang ta hram..
.
“I tha maw?”
.
“Tha alawm.. Sawifiah tur a awm ta in ka hria..” ka tinghal ringawt a
.
“Enge sawifiah tur awm?”
.
“Min ngaihsak lo.. Hetiang ringawt chuan ka peih tawhlo.. Sawifiah rawh.. Ngatinge min ngaihsak tak miahloh chhan hi..?”
.
“Diktak chuan ka buai em ani.. I hriat vetho kha..”
.
‘Chu chiah chu I sawifiah dantur maw?’
.
“Enge sawitur dang awm?” a ti ve hmak a. Ka ngaihbel zota nge pawh ka hre tawh biklo..min biakdan chu min ning riau in ka hre bawk..
.
“Anih chuan a tawk anih chu” tiin phone ka off nghal a. Min rawn call back ring in ka nghak vang vang a, min rawn call back miahlo..
.
Ka inngaihtuah lungchhia a, ka mittui a tla zawih zawih a. Dam thatloh bawk nen, ka chhungte ka ngai vawng vawng.. ‘Ka buai em ani..i hriat ve tho kha’ tih chiah kha maw a insawifiahna ni dawn..
.
Ka phone arawn rik chuan Buangpuia anih ringin ka en vat a..
.
“Hello”
.
“Keimah.. Rinsangi..” min rawn be thintu hmeichhia kha ani.. A hmain a hming ka hrelo a, zawh pawh ka tum buailo bawk.. Heichu Nunhlimi a nilo phawt.. Hmeichhe dang engzat tak awm ang maw..? Ka ngaihtuahna a kaldik thei tawhlo..
.
“Enge ni leh ta?”
.
“Vawiin khan Buangpuia’n I chanchin min hrilh a..a ning viau che tih min hrilh bawk a, hmeichhe chanchin hi a sawi vak ngailo a, keichu ni ila ka zak viau ang.. Chuan ka hmeichhiat pui I nia, duhsak deuhin ka hrilh ang che.. Buangpuia hi ka ta chauh ania, lo be buai tawh suh.. I chanchin tuitang lo zet a sawi duhdan atangin a ngainep hle che tih ka hrethiam a, chuvang chuan ania ka tihloh tur tia ka rawn biak fo thin che..” arawn ti duah a.. Sawitur pawh ka hrelo.. Ka thin a rim a, ka rilru ana bawk.. Hmeichhe dang bulah ka chanchin a sawi a maw.. Chanchin tuitang lo sawitur enge ka neih.. Engkim ah min hrechiang em em tu ani lehnghal..
.
Chhang tawh lovin phone ka off a, ka rilru ka siamfel nghal hmiah bawk. Hmeichhe puitling tawhin dawt muhlum ringawt an sawi duhin ka ringlo bawk..
.
Enge ka tih pawh ngaihtuah lovin ka phone ah chuan message ka type mawlh mawlh a.. Buangpuia ka thawn nghal a.. Message a inthen na thu inhrilh hi ka tih ngai miahloh tur zinga ka dah thin ania.. Mahse tunah chuan hmaichhanah engmah ka sawi thei dawnlo.. ka mualpho ngei ngei dawn tih ka inhriatlawk vangin ka tilo theilo ani..
.
*Kan inkar thu hi tawp rawh se.. Min ngaihsak lova, engkim ka hre vek tawh bawk a. Hlim takin awm ang che.. Mangtha*
.
*Ava mak awm vut vut ve* tihchiah in min rawn chhang.. Engmah min zawhfiah a tumlo a, min then a duhloh thu sawi a min chelh pawh a tum heklo.. Engkim a chiang.. Ka inchhir hauhlo ang.. Mahse ka rilru a hahdam lo…!! He thil avang hian ka la na fovang tih chu ka hria, mahse mipa ngaihnep leh sawizui nih ai chuan ka la thlang zawk fan..! Khanu bulah khan minlo sawi tak tak ta se ka tuar zolo ang..! Ka rilru chhungril tak chuan min sawi ka ringlo a, mahse mihring hi kan rinloh dan lutuk a an awm chuan damchhungin kan inngai diklo reng tawh thin..
.
Tuna ka ngaihdan aia thalo lehzual hian Buangpuia hi chhe taka hriatreng ka duhlo bawk.. Ka buai nuai a, thil tha ber leh dik ber tur ka hrethiam senglo..
.
Engpawh nise, kan intawn dan  kha Pathian ruat niin kan ngai ve ve a, Pathian ruat kan nih tak tak chuan kan la intawng leh tho ang’ tiin ka inhnem ta ngawt a.. Ani lo hi chu ka thinlung ah mipa dang in hmun an chang thei dawn tawhlo tih ka hrechiang em em bawk..
.
Khuarkhurum mawng tawp neilo ah ka zuanglut ta chu anih ber hi..!
.
BUANGPUIA’S POV*
.
Lawmtluangi rawn awmdan chuan min thrawng a, mak ka ti takzet.. Min then a duh thu message a min rawn hrilh hi mak ka ti lehzual.. Hmaichhan ngei a thil sawifel duh chi ani tih ka hrechiang a, ka ngaihsak loh thu arawn sawi pawh ka pawm thlap.. Mahse min then a duh chhan tak hi ka ringchhin thiamlo.. Message a inthen na thu inhrilh hi ka huatzawng ber leh ka tawn atana ka la ngaihtuah ngailoh thil ani..
.
Ni 3 chhung chu a reh ta hmak a, ka awm a nuam theilo.. Engvanga min then duh tlat nge anih ka hrelo a, sawifiah tura min duh ber pawh ka ngaihsak talo ni a a inngaih na kha niin ka hria.. Ka buai zia ka hrilh bawk. Thinrimna tur leh chhuanlam tur zawnglui  tralh tan lo chuan inthen chhan tur reng reng ka hre velo..
.
Ka insum thei ta nganglo a, hmeichhe laka ka la tih ngailoh angin min then thu min hrilh hnuah ka va phone a.. A phone a pick up duh miahlo.. Tlawm ka inti… Hmeichhia in min then hmasa ngailo..chu chu thuhran nise.. Min then hmasa tu awmchhun ala ni.. Ka luhlul na a cho chhuak phat bawk..! Engmah a chhan leh vang pawh sawichiang lova hmeichhia zawkin min then theih chuan ka thei ve lutuk!!!
.
 A chanchin reng reng ka ngaihven zui lovang…!!
.
Ni a ral a..
.
Thla a ral a..
.
Kan inthen..Nilo..Lawmtluangi’n min then thu min rawn hrilh atang khan kum hial a ral ta.. Ka tumdan ang ngeiin a chanchin engmah hriatzui vak ka neilo.. Ka thianten a chanchin an sawi dawn pawhin ka pawtchat hmak hmak thin.. Chutiang bawkin ka farnu pawhin chanchin min rawn hrilh atum leh min zawh chang pawhin engmah ka ngaithla duhlo a, ka sawi duh heklo..
.
Tunah chuan a zirlai zo tawhin Aizawl ah a awm in ka ring.. Kan inthen atanga thla 2 vel aral hnu khan vawikhat chu Palika Bazaar ah kan inhmu a, inhmulo angin kan awm ve ve.. Chumi trum chuan Rinsangi nen kan inzui..!!
.
Nia, Lawmtluangi’n min rawn then atang khan Rinsangi kha arawn regular zual a, ka ngaizawng let tawh hauhlo nain kan inzui zauh zauh.. A training hun thla 4 lai in an rawn pawtfan a..!! Hetiang thil hi a thlen ngai pawh ka hrelo e.. Rinsangi sawidan ania.. Thudik hriattum a zawh chian kher pawh ka tum hranlo.. 
.
Lawmtluangi hian ka rilru a luah reng thin.. Mahse hun liam zel hian kan nundan pawh a liampui a, tunah chuan amah ngaihtuah chhuak miah lova ni ka hmanliam a awm ta zauh zauh…!!!
.
Kan inthen thut kha kan thiante zawng zawng mak tih a tling a, engmah min zawtlo tur leh a chanchin ka bula sawilo tura ka tih avangin an ngawi ve ta chauh hlawm ani..
.

END OF FLASHBACK**
.
2015***
.
BUANGPUIA’S POV*
.
Ka thianpa Kc-a nupui neihna  ah Leah nen kan kal a, Suzi (Ka u chiah Matthew fanu) kan hruai bawk.. Suzi hian min ngaina zual a, naupang fel leh lawmawm tak ani..
.
Thianten nupui an han neih tak sap sap ah chuan nupui neih lam ka ngaihtuah ve ta zauh zauh mai..
.
Lawmtluangi kan in bula ka hmuh atang khan karhnih lai a liam leh tawh a, ka la hmu nawn leh lo.. Han be pawp nghal mai turin a phone number ka nei tawhlo bawk. Ka beisei phak bakin Clinic a lun chho ta a, thim hnuah ka haw hman trawk thin.. Vawiin pawh hian nidang ang bawkin ka tlai leh viau anih hi…
.
7:35PM
.
 Motor ka dahfel a, motor atanga ka chhuah chuan Lawmtluangi’n ka hming a min koh ri ka hria a, makti zetin ka en kual a.. Ka beng chhe ri mai mai anih ka ring.. 
.
“Buangpui..keimah..” ka piah deuh a Lawmtluangi lo ding ka hmuh chuan ka en reng a.. Tunang zan ah lehnghal ka beisei loh ber thil ani.. Inthlahrun hmel takin a ding a, a hmalam ah a kut suih in a hmet niap niap a.. A nervous apiangin tuna a awmdan ang hian a ti ziah thin..
.
“I va haw tlai em em..ka lo nghak reng che a.. Buangpui , ka ngai lutuk che..” a thusawi vang chuan inthiam chiahlo hmel a pu.. A awmdan chu mak kati deuh bawk a, sawi mai tur ka hrelo..
.
“Ah..ka hmu ta bawk che a ka kal lehnghal mai ang.. Mangtha aw..” tiin a inher a kal mai a tum a..
.
“Engin nge I rawn kal? Ka lo thlah ang che..” min chhanna pawh nghaklo chuan motor ka lachhuak leh a, kawngkhar ka hawnsak hnuah ngawireng in arawn chuang a..
.
“Kan inhmu lo rei ta hle mai.. Hmanni khan kawngpui a I kallai hi ka hmu che a, ka rawn biak hma che in I kalliam leh ta daih sia..”
.
Thil engemaw ngaihtuah angin a awm a, thawk ala hak a..
.
“Buangpui..ngatinge inentir na a min kalpui tura ka sawm che khan ilo kal miahloh? Ka nghak reng che a..hmeichhe dang kha I chhuahpui daih sia.. Ka hmu reng che a, rawn phone che ka tumin I phone I off bawk sia.. Tunthleng hian ka rilru a hahdam theilo a, inthen ka duh thu ka rawn hrilh hnu che khan rawn zawhfiah leh che ka tum a, mahse ka rawn phone che apiangin hmeichhia in I phone a lo pick up ziah a..”
.
A thusawi dan atang chuan nimin maia thilthleng sawi a ang mah zawk.. A thusawi hi engmah hriat ka neilo.. Minlo phone lai awm pawh ka hrelo..!!
.
“I thusawi chu ka hre miahlo..” mak tih hmel takin min en ha a.. A hmel chu a hlim hlawl lo..
.
“Khami ni khan min kalpui tur thu message in min rawn hrilh ngei kha.. Ka mamawh lai che in ka bula awm lova hmeichhe dang bula hlim taka i awm ka hmuh khan ka rilru ana lutuk a, bakah Rinsangi khan in inngaihzawn leh thu min rawn hrilh bawk a.. Ka chanchin abula I sawi thu pawh min hrilh asin..”
.
Motor chu ka tiding hrawk a.. Chutiang thil zawng zawng chu min hrilh lovin thutlukna a siam a, min then phah amaw?? Chiang takin ka bulah sawi nise kan inthen hauh lovang..
.
“A hunlai khan insawifiah turin minti ringawt a, ka insawifiah chhan tur engmah min hrilh lovin min then ringawt anih kha.. Ka ngaihsak tawklo che ni a I inngaih vanga min then ah ka ngai che a..midang kei aia duh I nei niah ka ngai tel bawk.. Ngatinge tunah I sawi chauh??” tiin ka dem let ve thung a..
.
“I bulah ka sawi miahlo ang tiin ka intiam a, engtiklai pawhin ka ngai ngawih ngawih thin che.. Tunah chuan ka thawl ta huai mai.. Hahdam takin ka awm thei tawh ang.. Rinsangi nen chuan inla inkawp em?” a awmdan chu nidang a anglo.. A mizia alo danglam veta deuh ani..
.
“Kan inngaizawng nawn tawhlo hrim hrim.. I bula a thusawi pawh chu engmah ring suh. Keiman ka hrilh che anih loh chuan midang thusawi ring ngailo turin ka hrilh che kha.. Tuna ka rilru diktak ah chuan bultran that pui leh che ka duh ani..”
.
“Ka hmangaih che ni a ka inhriat thu ka hrilh che kha ila hrereng em?” ka la hrereng tih lantir nan ka bu nghat a.. “Tun thleng hian nang chauh hi ka hmangaih ber I la ni reng ani.. Mahse, bultran that leh chu a theih tawh ka ringlo..”
.
“A theihloh chhan tur engmah ka hrelo.. Ka hmangaih che.. Min thendan avang khan ka thin a rim a, ka awmdan tur chu I hrethiam thoin ka ring.. I chanchin ka ngaihven duhlo lui a, mahse ka hmuh leh che hian ilaka ka rilru ka lo pek nasat zia leh ka hmangaih che ani tih hi ka inhrechiang tawh.. Tunah hian min hmu turin lo kallo mahla ka rawn hmu dawn tho che a” tiin ka en a. Chiang taka min en let in a nui sak a.. A hlimlo hmel kha hmuhtur a awm tawhlo..
.
“Min hmangaih tih I sawi a, ka lawm e..” a ngawi dat a “Tunah chuan min thlah tawh la..”
.
Motor chu tinungin an in lam panin ka tlan a, engmah kan sawizawm tawhlo. Ka motor khalh lai chu uluk zet hian min en reng a.. An in kan thlen chuan motor ka tiding a..
.
“Naktuk ah ka rawn kal ang.. Bul kan trantha leh dawn tih hrereng ang che..”
.
Ka lam ah rawn awn in ka hmui ah min fawp zauh a, inlahrang lehnghal in “Ka hmangaih che..” ati sap a.. Min en vang vang a, muangchang in motor atang chuan a chhuak a..
.
Ka tlan liam thleng a min rawn thlirin a kut a vai lauh lauh a, keipawn ka hmuhtheih chhung ka en ve bawk.. ka nui hak a..
.
Rilru hlim takin ka muhil leh thei ta..!
.
A tukah chuan dar 1 vel ah Clinic khar meuhin Lawmtluangi te in lam pan in ka kal a, abula ka awmdan tur te ngaihtuahin ka rilru a hlim veng veng.. Kan inhmangaih ve ve a, tunah chuan ka hma hun hlimawm tak tur chiah ka ngaihtuah.. Ka duhthusam thinte ka ti hlawhtling thei tawh bawk ang..
.
Kawngkhar chu anu in min rawn hawn a, kan inhmuh lohna arei tawh bawk a min hmuh chuan mak a tih hmel hle..
.
“Inlo dam tlang maw?” inchhung ah chuan ka lut a, ka thilhmuh hmasak ber chuan min ti hamhaih…ngawireng in ka thilhmuh chu ka panhnai a..
.
Bawm mawi tak chhunga Lawmtluangi hlim taka a nui lai thlalak pangpar mawi takin a hual chu ka en reng a.. Hetiang thil hi mihring damlai chungah anti ngailo..!!
.
“Heihi enge a awmzia??”
.
Lawmtluangi nu chu min chhang lovin a trap ta tlawk tlawk a..
.
“A sawireng thin che asin, damlo na taka a awm hnuah pawh I chanchin asawi chuan a hlim hmel kan hmu thin.. Min kalsan tawh ani..Khawvel ah hian a awm ve tawhlo..min chawlhsan tawh.. Kar thum liamta khan min kalsan tawh” tiin a trap zawih zawih a..
.
Ka mit sulh.. awmdan tur ka hrelo.. Thlalak intar chu ka en tlawk tlawk a.. Ka thu hriat chu ka awih theilo.. Anih chuan nizan a ka bula awm Lawmtluangi kha…karhnih liamta a kan inbula ka hmuh te..kan inbiakna tawngkam zawng zawng te.. Kan hun hmandun tawhte chu ka mitthla ah arawn lang zut zut a..
.
Nizana thilthleng kha ka mumang emaw, ka ngaihtuahna mai emaw anilo tih ka hrechiang.. Thilmak ani..!! ‘Min hmangaih tih I sawi a ka lawm e’ ati maw kha.. Kan inzui lai khan ka hmangaih tih ka hrilh hauhlo.. Min hmangaih tih min hrilhlai khan ka hmangaih ani tih ka sawiri hauhlo a, khami trum bak kha min hmangaih thu a sawi nawn tawh biklo kha ania..
.
Anu bulah hian nizan a ka hmuh thu leh kan inbiak ngei  thu ka hrilh theilo ang.. A mittui hruhul nawk nawk in min en a.. “A zialo hle mai, ka hmuh thut che khan ka insum thei nganglo ani.. Lo thu phawt rawh.. I thil tur ka han la lawk ange” tiin room ah min luhsan lehrih a..
.
Reilote ah rawn chhuak leh in bawm lian vaklo hi arawn keng a.. chu bawmte chu uluk taka cheimawi leh char thlap ani..
.
“Heihi lo pe ngei ngei tur che in min chah a”
.
Anu chuan Lawmtluangi damloh dan leh min sawi reng thin thu bak sawitur a hrelo.. A mittui a tla reng bawk.. Rei lutuk thu lovin an in chu ka chhuahsan a.. Khawilam nge ka pan pawh inhre lovin motor chu ka khalhchhuak a.. Ka ngaihtuahna a harh meuh chuan ka hawichhuak a, khawpui pawnah ka lo awm der tawh..!
.
Lawmtluangi nu min pek bawmte chu la kangin ka hawng a.. A chhungah chuan Note bu tetakte leh zungbun bawm niawm tak hi alo awm ngat a.. Note bu chu ka keu thuak a, a chhah lemlo a, a phek awl awm miahlo in a inziak khat vek..
.
Ka laka Lawmtluangi awmdan hian ka lung a tiawi thlawt lo.. Ka thawpik lutuk chu ka thaw hawk a.. Ka mittui tla sawk chu ka kut in ka hru nawk a..
.
**A phek hmasa berah chuan thudang inziak lovin ka hming hlir a inziak..!
.
Ka keu leh a..
    Buangpui…hmeichhe dang min kawpsan ngei em tih hriatchian tumin ka zawtfiah ngam talo che ani.. Ka thuhriat leh ka thilhmuh te kha a fiah nan a tawk ka ti ringawt a.. I tawngkam ngei a min hnawlna thu hre turin ka huaisen tawklo a..nep ka inti..ka dawihzep tih ka inpawm..
.
Demna tur che ka nei miahlo tih ka inhria.. Thudik tak hrelo a ka kalsan che hi ka inthiam thei lova, rilru hahdam in ka awm thei talo reng anih hi..
Ka duhber chu I hlimna chauh ani.. Kan damchhung hun hmangdun thei dawnlo mah ila mi tuemaw tana hlimna thentu inih chuan ka hlim tho ang…
.
Ka hmangaihna che a nasat ang zat chiah a hmangaihtu che I tawn a I damchhung hun hlim taka I hman theih nan ka tawngtai fo thin.. I nupui tur chuan ka hmangaihna ang zat a a hmangaih velo che anih chuan ka lungawilo khawp ang..!!
.
Hlim taka I awmlai hmuh ka duh..
.
Ka chhiar zel a, ka hriatloh laiin ka mittui a tla bawk..! A phek tawp lam chu a kutziak chhiar a har ta deuh..
.
*Ka damloh dan hi ka hrethiam lo..karkhat chauh ala rala, ka taksa a chaklo ta khawp mai.. Ka damrei lovang tih ka inhrethiam.. Reitak ka daih tawh dawnlo.. Doctor te pawn ka natna hi enge anih tak an hre theilo..
.
Thlarau khawvel ah ka lo hmuak ang che.. Thlarau khawvel ah inhmangaih bik kan awm dawn tawhlo tih hre mah ila, ka hmangaih bik tho che in ka inring..
.
Pathian hnenah malsawmna I dawn zel theihnan leh I hlim reng theih nan ka lo dilsak ang che..
.
Min hmangaih ani tih hria ila rilru thlamuang takin ka chawl ang..
KA HMANGAIH CHE.. Ka damchhung a hun hlimawm ber min hmanpui avang khan ka lawm e.. Ka duhber leh ka duhthusam chu hlim taka I awm hi ani..
.
A thinlung zawng zawng a nangmah hmangaihtu tur che mi tuemaw I hnenah ka rawn tir ang..!! Ka ti tak tak ania..
.
E, chuan maw thil pawimawh ber pakhat chu kan inkar a thilthleng leh kan tawp tak dan zawng zawng ah khan I tihsual engmah a awmlo. ‘Kan hma hun kan hrelo a, engkim kan tawh apiang hi kan tana tha zawk tura Pathian ruatdan ani’ ti a min hrilh thin kha ka theihnghilh ngailo.. Nangpawhin he thu hi midang tana dah lovin lo hrereng ang che..
.
Nangmah avanga inngaihtuah lungngai in ka trap ngailo a, ka thinlung chhungril bera min nuihtir thintu chu nang hi ini.. Hlim taka awmtur a min duh chuan lungngai takin lo awm ngai suh…. Ka hmangaihna che avang tal pawh hian lungngai lovin I hlim reng tur ani…
.
Chuan, zungbun hi fanu I neih hun atan.. Ka hmuhpui ve thei dawn ta silo che a..Fanu leh fapa hmeltha tak tak ila nei ngei dawn tih ka hria ani..
MANGTHA **
.
Car steering wheel chu bawh in ka trap ta tlawk tlawk a.. Kan awmdun lai khan engvangin nge ka hmangaih thu ka hrilh loh.. Hmuh leh ka duh.. Duat taka kuah a ka hmangaih thu hrilh ka duh ani.. Chhan mumal awmlo a min then ni a ka ngaih vangin ka luhlul ka chhuah a, khatianga awmlo khan a bulah kal a a rilru a a thilveite zawtfiah tur zawk ka ni..  In ngaihtuah lungngai lova hlim taka awm turin min chah tak trawk trawk a..
.
Thawk ka la hawk hawk a, in ngaihtuah fimin ka en ngai ka en tlawk tlawk a..
.
Rei tawktak ka thut hnu chuan ka hawichhuak a, Khua alo tlai ruih tawh.. Muangchangin  motor chu ka khalh a, Lawmtluangi thlan lam panin ka tlan a…
.
A thlan chu anla siam lo tih hriat takin leivung pawh ala tharlam hle.. Ka thu vang vang a..
.
“Lawmtluang, ka chunga I thiltih dan hi a fair lo takzet….. Ka hmangaih che tih I hre tawh tiraw?? I hlim chuan keipawh ka hlim reng ang.. Thlamuang takin I chawl tih hriat ka duh ani….”
.----------------------------------------------------------------------
KUMHNIH HNUAH**
.
“Buangpui, ka thlan ah lo kal tawh suh.. Ka awmna ah hian ka hlim ania.. Min lo ngaihtuah tawh lo la..umm” ka nghawng ah a ban pahnih a min kuah in a mitmeng a nungsar a. Min melhdan leh a nui hmel atang chuan dawt a sawi hauhlo ang.. “Naktuk hi kawr pawl hakni tih theihnghilh suh aw..”
.
Ka alarm riin min tiharh a, engmah ka sawi ve hma a ka harh chu ka ui vawng vawng.. Lawmtluangi kha mumang ah ka hmu thei ngai miahlo a, ka mumang chu ka ngaihtuah zawm nauh nauh a..
.
Clinic kal tura ka insiam lai chuan ka room kawngkhar a rawn inkik dat dat a, ka phirpui Andrew alo lut a.. Ani hi hmundang ah a awm ve char char a, tunlai te hian a rawn haw ve zawk ani..
.
“Ka kawr lei hi alo lian deuh a, kha..ha rawh” kawr pawlduk  nalh zet hi khumah chuan a dah a. Engmah dang sawilo in a chhuak lehnghal a..
.
Ka mumang kha ka hrechhuak zawk..!! Maimitchhing in thawk ka la vang vang a..
.
Clinic ah chuan Rinsangi arawn lang hlawl.. a nu inentir turin arawn kalpui a nih hmel. A hmel pawh ka en peihlo.. Ngaihdam dilna min rawn thawn chamchi thin a, diktak chuan kei leh Lawmtluangi inkar a alo inrawlh dan tenawm tak kha ka hre vek tawh a, ka be peih hlawl lo ani..! Thup buai pawh ka tumlo..!
.
Dan pangngaiin ka hna ka thawk zawm mawlh mawlh a. Kawngkhar arawn inhawng a, mi pakhat lo lut leh in patient chair ah chuan a thu a
.
“I hming?”
.
“Lallawmtluangi”  ka hawichhuak zawk a, a hmel ka hmuh chuan ka meng kawk..!! Ani chu zahzum hmel takin a nui seng a, a mitmeng ah chuan Lawmtluangi ka hmu tlat nia..!!!!!!!!
.
“Eng harsatna nge I neih le?”
.
Min en kal in a mit lama harsatna a neih chu a sawi a.. Ka mit pawh khap manglo in ka lo en ngur a..
.
Lawmtluangi.. Ka hmangaih Lawmtluangi’n ‘i hnen ah mi tuemaw ka rawn tir ang’ tia min chah kha he hmeichhia hi ani angem le..??
.
TAWP TA. .
~~~LS Virgo (Vanlalthanpuii Pautu)