KA HLAU A NI!

KA HLAU ANI…!!!

Vanlalthanpuii Pautu
.
.

“Nu Par, tu naute nge I awm a?”
“Awi..! Hmingsang  I hmanhmawh viau loh chuan lo thu teh, ka lo hrilh ang che..”
Ka thiantha ber Sangbawihi nu, Nu Pari bulah chuan thuin a naute pawm la buchip tak chu ka en a..
Ka thiannu Sangbawihi hi hmundangah hnathawkin a awm a, amah awmlo mahse a chhungte hi hun ka neih deuh chuan ka tlawh fo a. Vawiin pawh hian a remchang em a, school kan ban hma avangin ka haw pahin an in ah hian ka peng lawk ani..
Tichuan, keihi Hmingsangi ka nia, tunah hian MA zo tawhin private school ah ka inhlawh mek. Sorkar hna a lut turin sawipuitu tha leh min tanpui tu tur beisei tur ka nei lova, kan chhungkhat hnaivai ah politician thiltithei deuh te laka han tlatlum tak kan awm heklo. Mite tranpui chawp leh sawipui chawp ngailo a ka thiamna vang ngei a hna tha tak leh hna nghet ka la neih ve theih nan ka theihtawpin school a thawk chung hian ka bei mek ani..
“Han sawi la..” Nu Pari chuan min thuthnaih sauh sauh in naute an neih tak dan chu a sawi ta mial mial a..
“Kar hmasa thawhlehni khan zing tawngtai turin I pa Hmuna(a pasal) nen Biakin ah kan kal a, Biak In atanga kan haw leh chuan kan verandah ah hian he naute hi alo awm ringawt mai ani.. Puan pan te hian a intuam a, kan han enchian chuan a khua alo sik nasa mai a, damdawiin ah te hruaiin kan buaipui a, tun thleng hian a hringtu nu han chhui dantur pawh hre chuang lovin kan in enkawl ta anih hi..” a ngawi dat a..
“Aa..a hringtu nu hi hre talo pawh ni ila, tihian kan enkawl mai ang.. Kan tunu ani mai.. Han in enkawl takah chuan ka rilru tak hian ka hmangaih tlat asin..” tiin a naute pawm chu a sawi hliau hliau a..
“Ani thei lutuk ang.. Naute chu a lainatawm hle mai.. Mi thenkhat fa nei theilo a awmin an mangang em em a, thenkhat in an fa hrinte ngei tihian an thehthang duh chu ani sia.. Mihring hi a inanloh theih teh e..” ka lo ti ve bawk a..
“Amak thin teh e tiraw.. Kan khawvel hi a chhe tawh em ani han tih mai pawh hian a fiah zo tawhlo.. Thalai nun kan hmuh ve theih chin pawh hi a chhe tawh em asin..”
“Nia, school ah pawh hian naupang chi hrang hrang nitin kan hrawn a, school naupang nungchang ni tur awma mawilo hi kan tawng nitin alawm.. Nu leh Pa te han dem vek ngawt chi pawh ani in ka hre chuanglo a.. Naupang nungchang mak tak tak, ai a upa zah chu sawiloh..zirtirtute zahder ngai miahlo naupang hi an tam lutuk tawh..”
“Ani lutuk ang.. Keini ai chuan in hrechiang viau tak ang.. Enteh hmanni chu  kan thenawm nau pawh saw..”
Nu Pari bulah hi chuan titi duahlo in a awm theihloh.. Ka duh aia rei ka thut hnu chuan ka hawsan a. Kan thusawi leh an naute thar neihdan te ngaihtuah zawm neuh neuh in ke in ka kal a..
“Hmingsang.. Helam ah..” ka bula lo ding chu ka en vat a..
“Awii.. The DOO.. Kan va inhmu khat em em.. Pasal neih I ngeih ani maw?” M.A ka zirlai a ka classmate Sawmsangi, The DOO ti a kan koh fiam thin  nen chuan kan in chibai lawp lawp a.. Inkoh dan han thlak thut hi alo har aniH HI..
“Pasal nei ve tawh rawh.. Anih loh chuan ka faten I fate an la vel an la vela mi ang..” tiin Sawmsangi chu a nui bawk bawk a…
“La hnailo lutuk.. Zei thut dan ka la zir anih hi..”
“Awii.. I zir chhungin khua I tlai hman ang.. Nidangah la rawn leng rawh aw..”
“Tehreng mai” tiin kan in kalsan a..
Thiante hian pasal nei ve tawh rawh min ti ngawt zel a.. Hmeichhia nimah ila, pasal te chawmhlawm nih chu ka duh bik teuhlo mai.. Pasal neih chu nakiiinn ah.. Pasal neih hma a tihtur leh tihduh ka la ngah lutuk..
In ka thlen chuan ka buai lehnghal char char.. Inchhung chet neuh neuh tur mipa in an hmuh kan mai thin hi hmeichhe tan chuan tihtur a tam thin.. Huiha..Lalbuairengi ka ni mai.. Paper check tur ka la ngah em em zui.. Zanah kohhran thalai hnatlang ah kal ka duh bawk.. Ka va indaihlo tak em..!! Pasal neih chu sawiloh..ngaihzawng pawh ka nei hmanlo anih hi..
Ni a liam ve bek bek a, ka hun hmandan erawh a danglam tam tehchiam lo..
Zirtawp zan ani a, zanin chu thildang zawng zawng dahtha in paper ka check ngei ngei angai..
*YMA Information Centre atangin.. Chhiat tawh thu kan han puang ange. Zanin dar 6:20 khan Lalzirmawia, kum 19 Lalhmahruaia fapa chu accident vangin a boral a, zanin hian tlaivarpui tur ani..*
  “Ehee..an thilpuan chu Pu Hma-a fapa ani ngei ngei ang.. ava pawi thin tak em aw.. Mami pa, I va kal ve vat teh ang” ka nu chu room ah lutin reilote ah puan bih tha mawlh mawlh chungin arawn chhuak leh a..
“I inpeih der elaw? Va kal phawt ila, Mami, nangni pawh in unau in in va tlaivar ve ang chu.. Kan rawn haw har lutuk lo ang..” tiin ka pa chu a thutna atangin a tho a, an pahnih chuan  an chhuak nghal a..
“Vala, keichu paper check tur ka ngah lutuk, ka kal ve hman dawnlo ania..”
  Ka nau chu a thil eilai la hmuam trun chungin ka bulah arawn thu a..
“A van mak em em.. Nimin pawh khan Zirmawia chu damtha varin ka la hmu a, mihring hian kan hma hun hi kan va hrelo tak..”
“Kan vai hian kan la thi vek dawn alawm.. A hun kan hrelawk lo mai pawh a.. Dar engzat ah nge I kal dawn?”
“Dar 9 velah niang.. tLaivar dawn chuan kalhma vak angai ka tilo”
“I trawng hriat a har emai.. I thilei lai kha lem phawt teh.. Thil hmuam trun chungin an trawng trulh trulh ngailo..”
“Hmm.. I school naupang pawh ka nihloh hi.. Ka insiam dawn”
“Ka kal ve leh si dawn mawni.. Minlo kalsan suh aw..”
Ka paper check lai chu ka dahfel leh rih a..
Chawlhni inkhawm ban chuan ka thiante anlo kal a..
“Hmingsang..tlai chaweikhawm kha..tihian kan rawn sawm nghal che ani mai” Nancy leh Zawmpuia te chu tlangnel takin an rawn ri bawrh bawrh a..
“Ka lo theihnghilh hman trep alawm.. Hmanhmawh vut vut lo ang u.. Enteh u, thildang daiih.. Kar hmasa a Zirmawia boral chungchang an sawi sep sep kha inlo hre ve em?”
“Keichu ka awihlo..” Nancy chuan alo ti vat a
“Nun hi uluk angai reng ani.. Thih hnua hetiang chanchin mawilo neih hi ka hlauh zawng tak” Zawmpuia chuan alo ti ve bawk a..
Tlailam dar 3 ah kan in atang chuan kan chhuak a, la titi mawlh mawlh pahin kan kal a, Nancy te inbul kan thlen chuan tlangval rual insual buai an awm vangin anlo pungkhawm luai luai a..
“Va tel ve miah suh.. Tunlai angah mi insual trelh hi a risk a sang lutuk” tiin Nancy nen Zawmpuia chu kan chelh a..
Thawm a ri pawp a, Zawmpuia chu a kun ngawih a, ka lamah arawn awn ruai ruai a..
“Awii..ka duh theilo.. Zawmpui..i harh em..i harh em..??”
Zawmpuia chuan min rawn delh a, ka tlu ve lo thei ta lo.. Nichin a kan hriat silai ri niawm tak kha ari leh pawp a.. Ava mak mawlh mawlh ve mawle.. Ka rilru a buai vek.. Zawmpuia chu bawihsawm tumin min rawn din hual tuau tuau a..
“Police phone ru.. Police phone ru..”
“Ehe!! Hmeichhia pawh hi a fuh anih hi..”
“Khapa kha lo man ru..”
“Ava rapthlak ve..”
Ka lo buai ve chung a, han tihtheih erawh ka nei lo hle..
“An marphu a awm tawh miahlo..”
Taxi a mihring taksa zawi vek an hlan luh chu ka en reng a.. Zawmpuia leh KEIMAH…!! Ka awih theilo.. Ka tel ve…!!! Ka kalhnai a, ka taksa zawi vek  taxi ah an hlang lut chu ka hmuchiang ngang mai, ka hawikual ruai ruai a, Nancy trap hlawp hlawp leh ka chhungte phone a a be thawm chu ka hre ruai ruai a..
Ka taksa ka hmuh si chuan..keihi helai ah hian ka la ding si a.. Ka thi tihna ani em..?? Ka duh theilo.. Ka la thi theilo.. Ka la inpeih lo.. Tihtur leh tih duh ka la ngah lutuk..!!!
Taxi chu ka zui ve ta ngawt a..
DAMDAWIIN*
Ka unaupa leh ka nu leh pa te..kan chhungkhat te chu anlo kal khawm a, an hmel atang chuan an mangang hlawm hle tih a hriat..
“Ka fanu..awii..ka lainat lutuk che..” tiin ka nu chu a trap hlawp hlawp a..
Lehlam ka hawi chuan Doctor leh ka pa inbia ka va hmu a..
“A pawi khawp mai.. Kan inchhan hman talo ani.. Silai mu khan a lu ah a fuh hlauh ani.. Mipa zawk pawh kha chhan theih ani tawhlo..”
“Awii..ani theilo.. ka phal lo..” tiin hmeichhe ho chu an trap ta chuah chuah a..
Damdawiin khum a mu chu chiang takin ka va en a, keimah ngei ka ni.. Mahni hmel leh taksa nunna nei tawhlo hmuh chu a nuamlo in a rapthlak takzet.. Ka bulah chuan Zawmpuia pawh a mu..
Heti mai hian ka thi dawn ani tih chu inhria ila, ka nun ka lo hman tawh dan aia tha khan ka nun ka hmang ngei tur hi ania..!! Tunah chuan awmzia a awm tawh lo..
“Hmingsang..ava mak ve.. Kan thi ringawt ania..” ka bulah chuan Zawmpuia alo ding reng a.. A thusawi chuan ka nuih a tiza lo takzet..!!
“Kan thi lo.. Kan la thi theilo.. Ka la inpeih hleinem” mangang lutuk in ka trap a..
Ka thinlung chu thil engemawni hian arawn deng dawt..!!
*Ka thi anih chuan ka chungchang thu hi rorelna hma ah ngaihtuah ani ngei ang.. Ka nundan leh ka hun lo hman tawh dan chu ka ngaihtuah kual zut zut a..
Naupan lai atanga naupang harhvang leh thiankawm nuam ti em em thin ka ni.. Khawvel thil..zu leh ruihtheih thil ah ka in hnamhnawih ngailo.. Sex ah ka fihlim bawk.. Mahse chutiang thil ringawt chu vanram kai nan a tling tawklo..!! Thinlung entu kan Pathian hian ka thinlung hi a hmuchiang lutuk..
Pathian rawngbawl chungchang ah chuan lehkha ka zirlaiin lehkhazir chhuanlam in Pathian rawng ka bawl hmanlo..ka ti thin a, hna ka thawh hnuah pawh ‘ka hna avangin ka buai a, kohhran ah a zawng zawng in ka inhmang hmanlo..hun ka neilo’ kati leh a.. Chawlhni a ka inkhawm leh zan inkhawm hun apianga inkhawm kha ka duhtawk em em thin.. Mite tranpuiin ka hun ka hmang tam ngailo bawk niin ka inhria.. Mite tana thiltha tih chu lo dahtha ta ila.. Ka thinlung in Pathian ka be tawh thin reng em..??
Keichuan Pathian hi a awm ngei tih ka hria a, ka ring bawk.. Kei hian Pathian ka hria a, Pathian mihriat kani ve angem..???
Tunah hian thiltha tih leh duhin tum pawh ni ila hun ka nei tawhlo..
Hun nei leh chu ni ila, thinlunga Pathian pawh tumin ka hun ka hmang tawh ang.. Ka theihna zawng zawngin Pathian ka bia ang.. Ka theihna zawng zawng in.. Hun tha neih leh ka duh.. Hun tha neih leh ka mamawh..!!
Ka va mangang tehreng em..!! Ka mumang nise ka duh.. Mumang hlauhawm ka neih apianga ka tih thindan angin harhchhuah tumin ka bei a.. Mumang hlauhawm ka neih apianga harhchhuah ka tum hian chhawng thumin ka meng thin.. Chhawng thum a ka men theih chuan ka harh ani mai..!! Tunah hian ka mumang atanga harhchhuah tumin ka bei ang.. Heng thil zawng zawng hi ka mumang ani..
Chhawng khatna…ka meng thei a..
Chhawng hnihna..ka meng thei..
Chhawng thumna…..KA MENG THEI TAWHLO.. 
Hlauhthawnna a khatin ka khur hlawk hlawk a.. Tuna thilthleng mek hi ka mumang anilo..
“Zawmpui..Zawmpui..” ka bul vel chu ka en a, keimah chauhin ka lo awm tawh.. Ka hlau ani.. Thih ka duhlo.. Kan la thi vek dawn tiin ka sawi thin a, mahse kei kher chu…thi ve turin ka la in dahchhin ngailo..!!
Enge maw hian min rawn dek a, a vawt thlur lehnghal..!!  ka meng kawk a…!!
Ka phu chhuak zawih zawih.. ka harh ta..! Hnai set sawt ah hian ka nutei fanu chuan minlo en reng a..
“Ahmingsang.. I thiante anlo kal.. I va harh theilo em em..” a kut vawt thler chuan ka chalah min dek a..
KA VA LAWM EM..Ka mumang ani…!! Ka mumang..!
Ka mumang vanga zirtur ka neih chu ngaihtuah chungin khum atang chuan ka tho a….
Ka mumanga ka thiltawn ang kha atak tak ah hian ka tawng ang tih ka hlau.. KA HLAU ANI.. Thlarau khawvel a ka awm hunah hlauhna nei miahlo a ka awm theihnan ka damchhung hian ka theihtawp a THA in ka HUN neihte ka HMANG tawh ang..!!
Kha thil manganthlak leh rapthlak tak kha ka tawng tak tak ang tih KA HLAU ANI.. KA HLAU TAKZET…
“Lalhmingsang..chhun chhun ah I mut thlurh thlurh aa..” Zawmpuia chuan minlo fiam a, a bulah Nancy a thu bawk..
“Ka mu mai mai a, ka lo muhil daih lawm le… Enge aa?” ka mumang avang khan ka awm a nuam theilo.. An bulah chuan ka thu ve nghal a.
“Kanlo peng lawk mai mai.. E.. Chawlhni leh khian Nancy te in ah chaw kan eikhawm dawn a, kan lo hrilhlawk pah che...”
“Maww??” mak tih hmel zetin an pahnih chuan ka en hu a.
“Enge..? Mak I van tih hmel.. Sunday leh khian  Nancy te in ah chaw eikhawm… thrulh thiang lo ka ti anih chu..”
Sunday leh..!! Nancy te in a chaw ei khawm..!! Eng thil tak thleng ang maw? Kan hma hun kan hre der si lova....
.
.
TAWP TA..

Zing thawh veleh atangin ka rilru ah a awm ngut ngut a, a tawi khawp mai.. Ka ziah chhan ber khi min lo hriatsak turin ka duh em em che u..!!