CALL HIM BACK! (2015)

CALL HIM BACK!!!
.
Thantei_LauraSean
.
.

REACHI’S (Ri-a-chi) POV*

“Rea, in inneih ni tur kha 8th  September  tiraw?”
“Aw, lo kal ngei ngei ru aw.. In lo kalloh chuan Adina a lungawilo viau ang..”
“Tehreng mai.. Awii..enteh helai rannung mak zia hi..a che ngual ngual mai..”
“Hey..ka hlau ania.. hey..hey..”
Ka thuchhuak hlawl a, ka thin a phu dup dup a. Ka khum bula ka dah ka phone chu la in ka hmet eng a.. 
 7th . October. 2015  2:07AM
Ka muhil leh mai thei tawhlo..
Ka mumanga ka thilhmuh khan ka tha a tikhur a..A tak tak a hmuh pawh ka duhlo, Television a an chetla lai en pawh ka duh ngailo.. Ramhuai ai pawn ka hlau zawk..! Ka mumang chu mak ka ti deuh bawk a, ka ngaihtuah zawm neuh neuh a, ka hriatloh karin ka lo muhil leh ani ngei ang..
Ka alarm ri chuan min kaitho a, ka muhil chiah amaw ka tia, zing dar 6:00 alo ri leh reng tawh…
  Naktuk hian Aizawl lam panin ka haw dawn a, vawiin chu ka bazaar nileng thak ang..
Zan lamah chuan thawmhnaw ka pack mawlh mawlh a..
Room atang chuan ka phone pick up turin hmanhmawh takin ka tlanchhuak a, ka ringtone (Dear Diamond – Miranda Lambert) a rik tawh hi chuan ka Dear Diamond-a’n min rawn biak aduh tihna ania, hmanhmawh lo thei ka nilo…
“Ka in pack fel vek tawh..” hlim zetin ka nui nghal har har a..
“ Ka lo hmuak ang che”
“Chute chu a hma pawn min hrilh tawh kha.. I mu dawn tawh em?”
“Umm.. Ka ngai che, ka muhil theilo”
“Keipawn ka ngai chee..”
“Thutak ve deuh thin la..”
“Ka thutak em hi.. Tikhan minti ve ziah.. Ka lo haw lehlo mai ang..” min hmu theilo mahse ka tum nghal bar a..
“Dear Diamond…tikhan ti suh.. Ka ngaih em vang che lawm”
D ear Diamond tiin kan inko mai a, ka bialpa, ka ngaihzawng, ka thiantha ber ni bawk..ka hmangaih em em hi Laldintluanga (Adin-a) ania.. Kum 3 chhung kan inngaizawng ve ta. Kei aiin kum 5 in a upa a, min dawm thiam hle thin . Ka hmangaih ang zat, a aia tam daih pawh ani maithei..ka hrelo..!! Min hmangaih em em tih ka hria.. Tuna I zirlai  hi i zawh veleh  kan innei tawh ang, ka nghak thei tawhlo tiin min hrilh ziah thin.. Keipawn a bula ka damchhung hun hman chu ka duhthusam ani.
Delhi University a zirlai ka ni a, MA(Education) 4th Semester ka exam zo chiah ani. Nihnih chhung Calcutta ah ka cham leh rih a, naktuk hian ka ngaih em em ka chhungte leh ka hmuhchak, ka ngaihtuahna luah tam bertu ka hmangaih Adin-a te ka hmu thei tawh ang…
Aizawl ka thlen huna ka awmdan tur leh ka hun hman danturte suangtuahin ka muhil mai thei biklo…

ADIN-A’S POV*
Vawiin hian ka Reachi hmuak turin Lengpui Airport lam panin, phur takin ka inkhalh chhuak a. Ka chhuak hma bawk a ka hmanhmawh hranlo. Min nghakhlel taka alo awm ka hmuhchak vangin ka tlai lui leh hlek bawk ang..!! A thinrim ngat ngat hanthlem hi nuam kai tlat ani.   
Ka thil ngaihtuah avang chuan ka nui sak a..
Ka Dear Diamond (Reachi) ka thinlung luahtu ka hmuh hmasak ber ni kha ka theihnghilh thei tawhlo.. Engvangin nge ka theihnghilh reng ang ni..?? Ka nun a mi pawimawh ber ka tawnni ani tlat alawm..
Kum 3 a liam ta…
FLASHBACK**
Kan exam result chhuah atanga ni 5 ni chiah ania, tunah chuan M.Sc(Mathematics) 1st  class degree ka nei ve ta reng mai. Rilru hlim leh phur takin Mizoram University, Tanhril lam panin ka in khalhchhuak a. MZU thlenhma  kilometre ½   vel ala awm ang tih ah kawngsir a hmeichhe pakhat a scooty tihnun tuma lo kick tlauh tlauh ka hmuh chuan ka ding a..
“ Puih I ngai em?” tiin motor atanga chhuk chuanglo chuan ka bia a, chu hmeichhia chu rawn hawichhuak in min rawn en a, a hmel ka hmuh rual a ka rilru a thilawm chu mak tak ani..
“He hmeichhia hi ka tan a siam ngei ani tih hi..!”
A hmel nung sar leh pawisawilo zet chuan  min enin “Ka lawm viau ang.. A tha leh mai dawn mawni ka tia.. Ka thiam a tlem bawk sia..” tiin a nui hek hek a.. A scooty chhia chuan a tilungngai chuanglo niawm tak ani.. A hmel a hlim ser tho mai.. A scooty chu awlsam taka siamthat leh mai theih alo ni lova, scooty ni lovin a neitunu zawk chu ka phurh a ngai ta..
Khalai hmuna ka hmeichhe tawn kha tunthleng hian ka la thlah leh talo reng reng ani.. Ka hmangaih em em ka Reachi hi ka thlah ngai hauhlo ang.. Mi hlim sar reng a niin rualpawl a thiam a, thian pawh anei zau hle.. Ka mizia nen a inpersan hlak aniin min tihlim em em thin.. Kei aiin a naupang zawk nain a hun ah chuan puitling leh zahawm takin a awm leh thlap thin.. Ka chhungte, a bikin ka nu nen phei chuan an in ngaina hle bawk.
END OF FLASHBACK**
Muangchangin ka tlan zel a, kawngsir remchang laia reilote din tumin motor chu ka khalh a, ka duhna hmunah motor chu ka tiding thei ta hauhlo mai..! Motor atanga zuangchhuak turin hun a awm tawhlo.. Ko pang sang tak chauh ka hmuthei..
‘Reachi.. Ka chhungte..ka thiante…’ ka ngaihtuah kim vek hman.. Mihring ngaihtuahna hi ava chak em..!
Ka thlawk vung vung in ka inhria. A ri dup a, engmah ka hre zui talo…

REACHI’S POV* 
            Minute 10…20…30…
Ani tawh em em lo.. Rawn tlai lui leh pawh nise, darkar chanve em em te chu.. Aman min rawn hruai dawn avangin ka chhungte pawh lo kal buai lo turin ka hrilh vek a.. Phone a pick up duh miahlo lehnghal.. Vawi 10 vel chu a ring quit tawh.. Min theihnghilhin hmeichhe dang bulah hun a hmang chu ani em lovang chu… !!
Ka thutna atang chuan main gate lam chu ka en chhen a, ka thlen rualpui te pawh an bo zo vek tawh.. Ka hmuh hun chuan a chaklo khawp ang.. Taxi ka hmang anga ani mai.. Min rawn hruai kherloh pawn ka haw thei tho..
Rilru a lungawilo takin taxi ka hmang ta ringawt a.
Airport atanga minute 10 vel kan tlan hnu chuan ka chuanna taxi chu a ding a, driver chu hmanhmawh zetin motor atang chuan a chhuak a.. Ka va hawichhuah ve chuan mi anlo awm sup sup a..
Eng thil nge maw thleng le??
Ka taxi hman driver chu rawn let lehin motor accident a awm thu arawn sawi a.
Kan hma a motor ho an din vek avangin tlanchhuah theih ani lova, motor atanga chhuah pawh tum chuang lovin, ka thlen tlai deuh tur thu hrilh in ka chhungte ka phone a.
Lungawiloh ruk nen, Adina ka hmuh huna ka thinrimna ka tihlan dan tur ka ngaihtuah rauh rauh a..
Ka phone a rawn ri a..(Dear Diamond ringtone) Hmm.. Tuna rawn phone ve chauh..
“Lo kal duh tawh suh..” ka thinrim tih ka thup hleithei lo..
“Ah..ka biak hi Dear Diamond ani em?” Enge maw a hriat le..? Ngawirawh.. Adina aw ani miahlo..
“Tunge ka biak hi?”
“Ah.. ka pi, hei, Lengpui Airport kawngah motor accident a awm a, he  phone ah hian missed call a lo awm teuh sia, in inhre tha anih ka ring..” ani theilo..!! Ka phone pawh ngaihsak lo chuan taxi atang chuan ka chhuak rawk rawk a, mi awmna lamah chuan tlan pheiin mi awmkhawmna karah chuan ka in zep tawlh tawlh a..
Ko pang ka en thlak chuan car ka hmu a…ka car hmuh chu…ka duh theilo.. Adina car ang chiah chiah…
“Tunge min rawn phone tu kha.. Tunge..tunge..” tiin ka au a, ka khur dawt dawt a.. Ka au ri hria chuan patling pakhat hian hmanhmawh takin min rawn pan a..
“Mami, Dear Diamond tih kha..”
“Keimah..keimah.. Kawnge phone chu? Khawnge amah chu a awm??” Ka hma a ding pa chuan phone a rawn lek chhuak a, ka hmet eng a, ka hmuh hmasak ber chu ka thlalak ani.. A tihdan ngai rengin a phone chu a lock lo…
“Adin..Adin” ka phun mawlh mawlh a, engmah ka ngaihtuah theilo.. Ka awmdan hi a thalo.. Ka duhlo.. Ka khur hlawk hlawk a, ka ding thei talo.. Ka bula mite chu ka vuan nawk nawk a, ka tlu hnawk a.. Ka in hip kawk kawk bawk a..
“Ani theilo..ani theilo” ka thaw hlawp hlawp a
  Awihpang a car lumna lam atang chuan hruizen in an rawn inpawt chho a, mi thenkhat chu an au lawng lawng bawk a..
“Thilmak tak ani, mihring reng reng hmuh tur an awmlo.. Thisen niawm tak chu car ah khuan a kai nel nual a”
“Aaa..han enkual zau deuh sela, hliam tuar chungin alo vaksawn ve pawh ani thei a..a awmna a hla lo tawp ang..”
“Phone bak kha engmah thildang hmuh tur a awmlo..”
“Ava mak awm ve mawle..!!”
Engmah ka hrechiang lo.. Midangin min biak leh thilthleng zawng zawng chu mumang ang ruaiin a chianglo a… He ka mumang rapthlak tak atang hian harhchhuah ka duh..
‘Min kaitho rawh u..min kaitho rawh u’ tiin ka phun mawlh mawlh a..
  Engtin nge ka tih tak ang..? Keimah vanga he accident hi thleng a ni si a..
ADIN-A’S POV*
Ka lu chu a rit bur a, ka men chuan ka bula thil zawng zawng chu a eng em em vek mai.. Ka awmna hi khawilai hmun nge le?
“Ka tawng I hrethei em?”
“Noni, Doctor va ko rawh.. Vat vat in..” zawimuangin ka mit ka chhing leh a.. Ka awmna hmun hi damdawiin ni niawm tak ani..
Ka harh  leh chuan ka bulah tumah anlo awmlo.. Ka mutna room kawngkhar chu a rawn inhawng riai riai a, hmeichhe pakhat hi thawmdim takin a rawn lut a, ka harh ani tih min hmuh chuan a nui sak a..
“I tha em? Na I nei em?” min biakna chu chhang lovin ka maimitchhing leh a.. Ka chhungte hi khawiah nge maw an awm zawh vek le..?
“Ka tawng I hre thei em?” he hmeichhia hi ka hre ngailo..!
Ka chhanloh avang chuan min be zawm ta biklo a. Ka lo muhil leh ani ngei ang, ka harh chuan ka khum bulah nu  pakhat hi ngawi rengin alo thu  a. A rilru a hah ani ngei ang, a hmel chu a hlimlo hle..
“Tui ka duh”  ka aw ri chu a tham tuak in a diklo deuh hu in ka hria.
“Noni, tui kha lo la ta che?” ka bula thu nu in Noni  ti a a koh chu ka en a, nichin a hmeichhia kha ani..
“Na I nei em?”
“Ka tha e. Khawi ah nge ka awm?” min chhang lovin a nui sak ringawt a.
“Hetah hian ka awmrei tawh em?”
Min en vang vang hnu chuan min chhang ta chauh a, a tawng chu a zawi hle..
“Nikhaw hrelo a kan hmuh hmasak ber che atanga chhiar tan in vawiin hi thla 4 a pumhlumna chiah ani.. mahse tunah chuan I tha vek tawh ang.. Na dang I nei miahlo tiraw?”
Thla 4 chhung helai hmun ah hian ka awm tawh a maw…??!! Ka ngaihtuahna chu a buai hle.. Ka mit ka chhing vang vang a..
Ka bula hmeichhe pahnih awmte chu an inbe mawlh mawlh a, an tawng chu ka ngaithla reng a..
Thilmak dang ala awm..!! An trawng chu a awmzia ka hre vek a, mahse ka tawng hman thin MIZOTAWNG ani miahlo..!! Eng vanga helai hmun a awm hi nge ka nih ka inhre lo bawk..!! 

REACHI’S POV*
Minute aral a, darkar a ral a, ni a liam a… Ka nun hi awmze neilo mai niin ka hria.. Ka tap a, a chang leh ka thil en ngai ka en tlawk tlawk a.. Ngaihtuahna mumal ka neilo..
Ka  ‘Dear Diamond’  chetsual atang khan thla 4 a liam ta.. Chanchin engmah hriatzui tur a awmlo a, a reh vawng vawng ringawt mai ani. Nunphung pangngai ka zawh hleithei lova, in ah ka tawm tlawk tlawk a..
‘Keimah vang ani..keimah vang.. A tel lovin engtin nge khawvel hi ka hmachhawn tak ang..’
A chetsual atanga ni 7 chhung kha ngawrh takin an zawng a, hnuhma hmuh tur engmah a awmlo.. Tlawmngai pawlten an chawlhsan hnuah pawh thla hnih chhung chu kan chhungkua leh Adin-a chhungte chuan beidawng lovin kan zawng reng a, thil awm ngailo zawn ang mai ani. Tunah chuan beiseina tlemte neiin alo let leh hun kan nghak a, tun thlengin a lola kirlo..
 A chetsual dan leh bo dan mak tak chu mi zawng zawngin an ngaihven a, TV leh chanchinbu te en ila Adin-a chungchang bawk.. A chanchin an sawi ka hriat apiangin ka inthiamlohna a zual a, thih mai duhna in ka khat thin.. Thlarau khawvel ah tal ka hmu maithei asin tiin ka ngaihtuah fo a, ka muhil tlem hle bawk..
“Rea, insiam tawh teh..” ka nu chu ngawi rengin ka en ngar ngar a “Rea, heihi ha rawh..” tiin ka khumah chuan ka thawmhnaw hak tur a dahchhuak nghal bawk a.. Eng tihmah ka phurlo…
“Ka nu, ka chhuak peihlo.. In a awm ka duh zawk..”
“Rea, I intihchak angai alawm.. Tunang renga I awm chuan I khawlo thuai ang.. I insiam zawh hunah ka eitur siam khu I ei anga..Lucy pawh arawn thleng tep ang..”
Ka nu thusawi chu a dik chiah ani.. Adin-a lo let leh hunah hrisel tha taka kalo hmachhawn angai ang.. Thil ei mumal loh a phal ngailoh kha..
Lucy chu ka thiantha ber ania, engkim ka hrilh vek thin. Ka thiltawn mek ah pawh hian nasa takin min pui a, min buaipui deuh chawt ani..
Lucy nen chuan bazaar ah kan kal a, mamawh neuh neuh kan lei zawh hnu chuan in lam panin muangchangin ke in kan kal a..
“Reachi, lo ding lawk teh u” min ko tu lam chu kan hawi a
“Bs, I dam maw?” Adina farnu chu nidang a a landan aiin alo cher ta hle mai. A mitmeng chu mi huatna in a khat a..
“Nangmah anglo takin..ka dam theilo.. Kan chhungkaw nun a buai vek.. Kan hlimna min laksak ani..”
“Bs, a pawi kati lutuk..”
“I ti reng ang chu.. Ka u kha nangmah hmuak turin kal lo se chu tunah hian kan bulah ala awm ngei ang.. Nang phiangsen hian eng thil nge I tih hi..” tiin ka kawr ah min rawn pawt a, lo beihlet ka tumlo.. A tihawm reng ati ani.. A unaupa kha a ngaisang em em a, engkimah a entawn thin bawk. Adina pawn a farnu chanchin hi sawi nuam ati em em thin..
“Bs, thlah rawh.. Khawlai anih hi..” Lucy chuan minlo vuan a, a hawikual zak zak bawk a.. Bs-I pawh chuan harhchhuak thut ni awm takin min thlah a. Rum zetin min en a, engmah sawi lovin min kalsan nghal a..
“Awm anglo emai.. I tihsual pakhatmah a awmlo, accident te chu tuman thleng turin kan duh hleinem..” Lucy chu a phun zui mawlh mawlh a.. Sawitur ka hrelo..
In kan thlen chuan ngawireng in room ah ka lut a, Lucy chuan min rawn zui bawk a..
Adina ka hloh vanga ka rilru hreawm tawh sa bakah a farnu in min la haw em em zui a.. Ka dam biklo tih hre tur ania sin..

ADIN-A’S POV*
Ka dam tha ta viau mai..
Min enkawl tute hi an fel in min ngaihsak hle a, keipawhin ka theih ang angin ka pui ve bawk a. Mak ka tih em em chu ka tawng an hrethiam vek a, an tawng pawh ka hre vek a.. Mahse an tawng hman hi eng hnam tawng nge anih ka hrelo.. Hnamdang tawng ka hriat ve chhun chhun te ka ngaihtuah kual pawhin a ang deuh tur awm ka ngaihtuah chhuak zo lo.
Hmun zau  tak chhungah kan cheng a, thil reng reng a var ani deuh vek a, engtiklai mahin a thim ngailo.. ‘Dimi-a-kota’ ramchhung anih thu min hrilh a, ka la hriat ngai miahloh ram hming a ni.. An awmdan leh chetphung te chu ka awmdan nen a danglam chuanglo a.. He hmun zau tak chhungah hian thil engkim a awm ni maiin alang. Kan kalna chin apiang chu tawpchin awm lovin a var vek a, in lian tak a ang ber. Helai hmun atang hian tumah kan chhuak ngailo..
“Rodibe, khalai puan kha minlo pe ta che?” Rodibe tiin min ko a, enge a awmzia ka hrelo..
Ka bula hmeichhia ‘Bilesa’ ti a kan koh thin chu en in puan chu ka pe a..
“Engtik ah nge pawn lamah ka chhuah theih ang?”
“Enge I sawi awmzia? Pawn lam chu enge?”
“He inchhung nilo, hmun dangah engtik ah nge ka kal theih ang?”
“Helai bak hi kalna tur dang a awm hleinem..” tiin ka zawhna chu a ngaihna hrelo takin min chhang a.
“Chaw ei a hun e.. Helam ah lo kal ru le” tiin mipa pakhat a rawn au lauh lauh a, ka bula hmeichhia nen chuan mipa awmna lam ah chu kan pan a..
Dimi-a-kota hmunah hian thil var lo tlemte zinga mi chu eitur te hi ani. Rawng chi hrang hrang an hung thluah a, a vaiin a tui em em vek a, ka la ei ngai hauhloh thil te anni hlawm..
Kan eitur theuh kan eizawh chuan ‘mut a hun e’ tiin mi pakhat arawn au leh a, tumah inbe lovin kan mutna hmun theuh kan pan leh a..
Heihi nitin a kan hun hmandan ani..!
Keimah ah hian thil enge maw kimlo a awmin ka hria a, chu chu eng thil nge tih erawh ka ngaihtuah chhuak zo lo.. Ka tana thil hlu tak, ka zawn hmuh ngei ngei ngai a awmin ka hria a, chu thil hlutak chu enge anih ka hre silo ani..
‘He in pawn lamah hian ka chhuah angai ani’ tiin ka mutna hmun ah chuan ka thuchhuak hlawl a, midang thawm ngaichangin ka ngaithla vang vang a, eng thawm mah ka hrelo.
Ka mutna atang chuan thochhuak in ka kal kual vak vak a, kawngkhar pakhatmah ka hmulo a.. Beidawng takin ka mutna lamah chuan ka let leh vang vang a..
Vawi tamtak chhuahna tur zawngin ka kalkual ru ta fova, ka tha ka seng hah thlawn mai mai niin ka inhria.. Helai hmunah hian eng chen a rei nge ka awm tawh tih hre turin an hun chhiardan ka hrethiam lo.. Khua a thim ngailo miau a, ka tan chuan thil buaithlak tak ani..
REACHI’S POV*
Kum hnih a liam ta..
Tunah chuan ka nunphung pawh a pangngai ve tawh viau a, Private company ah ka inhlawh a, nitin hnathawkin ka chhuak a, chhun lama hunawl ka neih chuan ka rilru la peng turin a remchang apiang ka ti bawrh bawrh thin.
Zan lamah erawh ka tihdan pangngaiin Adina ka ngaihtuah a, khawi ah nge a awm ang? A dam angem? Ka hmu leh angem tiin ka ngaihtuah ziah thin.. Ka thinlung ah hian mipa dang reng reng in hmun an chang thei ngai dawnlo tih ka inhrechiang a, eng chen a rei pawh nghah ngai dawn mahse ka nghak mai ang..
Inrinni chhun a ni a, keimah chauhin in ah ka awm a. Nidang ang bawkin tihtur ka zawng ruai a..
Doorbell a ri ral ral a, kawngkhar ka va hawng a, Nu Sangpuii (Adin-a nu) chuan minlo nuih sang a.. Engvang a lo kal nge anih ang..? Kan inhmuin kan titi dun fo na a, keimah vangin a fapa a hloh a, ka inthiam thei ngailo. Adin-a accident tirh ah leh kan inhmuh a kan titi dun apiangin mahni indem leh inthiamlo taka awm tawhlo turin min hrilh ziah a, mahse a thusawi hi ka pawmsak thei ngailo..
“Rea, vawiin chu ka ngaihtuah riau che a, tihtur dang ka nei lemlo bawk a, ka rawn kal leh ngawt mai anih hi.. Bakah sawiduh te pawh ka nei bawk a” a dan pangngaiin a tawng siam siam a.
“Bs-I a dam em?” eng eng emaw kan sawi neuh neuh a. Nu Sangpuii bula ka awm hi chuan ka hahdam thin. Thil reng reng a eng zawnga thlir thiam mi ani a..
“Rea, ti teh.. Hetia awm tawp ringawt mai hi a dik ber lo.. Nula tha leh nungchang mawi tak ini a, mitha tak I phu ani.. Kan duh emaw duhlo emaw, thil tha leh thalo pawh kan tawk thei vek a..” a thusawi thin ngaiah bawk a lut leh ta nge nge a.   
Ka chhang lova, mahse engvang mahin ka rilru hi ka sawhsawn dawn rihlo tih ka inhre chiang.. Ka thinlung hian Adin-a hi khawvel ah hian a awm ve tawhlo tih ka pawm thei lova, beiseina maktak ka nei tlat.. Enge ka beisei ber tih erawh ka hre chuanglo a..! Mahse thilmak alo thlen hi ka beisei tlat ani…
xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx
Zan ka mu chu ka tal sek a, muhil chiang thei silo, harhchhuak thei silo in ka awm a..
Ka hma a Adin-a kal chu umphak tumin ka um a, ka au vak vak a, min nghak lovin alo kal chak sauh sauh a..
Thawklehkhat ah rawn inher thutin chak zet hian ka lam pan chuan arawn tlan a, min hmu awm pawhin a awmlo.. Min tlanpelin thaw hlawp hlawp chung hian a tlan zel a.. Ka theihtawp a chakin ka um a, ka au vak vak bawk a..
“Rea..Rea..” ka men chuan ka bulah ka nu alo awm a, min tihharh tumin min sawi nawk nawk a.. Ka thlan hluam bawk a.. Adin-a awmloh atang khan a khat tawkin mumang mak tak tak ka nei fova, ngaiah ka nei theilo..!
ADIN-A’S POV*
“Dil ah kan kal dawn asin, lo kal ve ta che” tiin min sawm a
Tuna kal tura min sawmna Dil ah hian ka la kal hauhlo..
Hmeichhe ho hnungah chuan ngawirengin ka kal ve zel a. Dil kan thlen chuan a boruak pawh a danglam a, hmun nuam tak ani..
Kan piah hla deuh atang chuan thawm mak tak arawn chhuak a, ka bula awm ve ten chu thawm an hriat rual chuan hlauthawng takin an inen kual, chet mai nachang pawh an hrelo.. Chu thawm ri mak tak chu arawn hnai zel a..
“Rodibe.. tlan rawh..” tiin ka bula hmeichhia chu a rak tuar a
“Enge a awmzia..?”
“An rawn thlen hmain tlan mai rawh, Riodibe..tlan rawh..” tiin a au tuar tuar a, enge thil awmzia tih pawh hrelo chuan ka hma zawnah chuan ka theihtawp a chakin ka tlan a..
Thawm mak tak kan hriat khan hmeichhe ho awmna chu rawn pelin min rawn um zel a, hnunglam hawilet hauh lovin ka tlan zel a.. A tawp theilo..
Thawklehkhat ah ka lum pup a, ka awmdan chu a mak hle.. Reilote chawlh tumin ka ding a, ka hawikual chuan ka awmna hmun chu ka hrethiam lo.. Ka dinna bulah chuan thingkung sang zet zet a ngir khup a.. Hmun var vek ah khan ka awm tawhlo tih ka inhre bawk.. Thawm mak tak min um tu pawh kha a reh duk a, uluk takin ka han ngaithla vang vang a, eng thawm mah hriattur a awm tawhlo..
Tui ka mamawh ani.. Ka hrawk a ro huam huam a, ka theihtawp a chakin ka tlan leh a. Ka mit deuh sulh sulh a, ka intiharh hram hram a.. Ka mit a vaiin, ka thil hmuh pawh a phe vek tawh..
“Ehee..!! Helai ah hian mihring nikhaw hrelo a tlu ka hmu ania..”
“Lo tlan vat teh u..”
“A thawmhnaw kha dap teh, tunge tih hriattheihna tur a awm em?”
“Tlangval I harh em..?”
“****864017” ka tawng ring theilo..
“Hei..engemaw sawi anei ania..”
Ka rilru a number ka hriatchian em em chu ka tha neih zawng zawng sawmkhawm in ka sawi a..
REACHI’S POV*
Ka phone ri chuan ka muhil lai min kaitho a. Tunang hunah tunge mawni le??
“Hello”
“Rea, Bs-I ka nia, Agatha Hospital ah rawn kal rawh..”
“Eng thil nge nita?”
“I rawn thlen hunah I hre mai ang. Thiltha lam ania, hlauthawng suh tih chiah ka hrilh phawt ang che..” phone chu a off zui nghal a. Eng thil tak ni ang maw? Bs-I hian min haw viau thin a, tuna min biak dan kha nidang a anglo…
Ka khum chu thawhsan in bathroom ka pan nghal a, bang a sana intar ka en chuan ka phu chiang lutuk..
6:00am   8th . September. 2018
Ka mumang ka ngaihtuah nawn fo kha ka hrechhuak a.. Ka mumang a Adin-a nen kan inneih ni tur ka sawi ni kha vawiin hi maw..! Thilmak tak ani..
Ka insiam sawk sawk a, ka chhungte chu ka kalna tur hrilhin Agatha Hospital pan chuan ka chhuak nghal a.. Eng thil nge ka hmachhawn tur hi ka hrelo..!! Hlauthawng viau dawn ila Bs-I khan hlauthawng suh min ti bawk sia.. Rilru putdan tur pawh ka hrethiam lo..
Hospital kawt ah chuan Bs-I’n minlo nghak a, min hmuh chuan min rawn nuih sang a.. A awmdan hi ka hrethiam lo.. Engmah sawi chuang lovin Hospital chhungah chuan min luhpui a.
ICU (Intensive Care Unit) bulah chuan min dinpui a.. Enge beisei tur ka la hre chuang lo..
“Room ah hian lut rawh le..”
“Enge? Tunge awm?”
“Lut la I hre mai ang..!”
A ngaihna hrelo tak in cabin chhungah chuan ka lut a..
Khum ah mi 1 a mu a, khum bulah chuan Nu Sangpuii a thu bawk a.. Ka kal hnai zel a, khum a mu ka hmuhchian chuan ka thinphu nasa lutuk chu ka awm atang hian a rawn chhuak dawn in ka hre hial a..
“Adin..a tak ani em? Adin-a..” mak ti takin Nu Sangpuii chu ka en a. Hlim avanga lungchhe chungin Nu Sangpuii chu a bu nghauh nghauh a..
“Engtin nge..? Engtin nge a thlen..” khum bulah chuan ka thu a. Ka harhchhuak anga ka mumang mai ani ang tih ka hlau zek zek..
Dimtein  Adin-a kut chu ka khawih de de a, a lo lum vat vat a.. Ka mumang anilo.. A tak tak ani..
“Engtin nge..? Engtik ah nge alo let?” zawh tur leh hriat duh ka ngah lutuk..
Awmdan tur ber pawh ka hrelo..
ADIN-A’S POV*
Ka rilru a harh a, ka taksa erawh a chau hle. Khum ah hahdam takin ka mu a, ka bulah chuan hmeichhe pahnih an phun ser ser a.. Ka kut chu tuemaw hian a hmer vang vang a..
“Nu Sangpui, enge thil thlen dan?”
“Nimin tlai dar 4:00 vel khan Adin-a phone ah mipa pakhat in a rawn phone a, Lengpui ram chhung a ramvak an nih thu leh tlangval pakhat an hmuh thu min rawn hrilh a, phone number a sawi hnu ah tlangval chu biak zui tlakin a harh ta lo tih min rawn hrilh bawk a. Hmanhmawh takin kan tlan thla nghal a, kan beisei phak loh thil lawmawm a thleng ta anih hi.. Ala rawn harh lehlo na in doctor chuan a taksa ah thatlohna a awmloh thu a sawi a..”
An titi chu ngaithla zawm lovin thildang ka ngaihtuah daih a.. Ka mumang a ka hmuh hmun var vek te, eitur tui tak tak te, kan khawsak dante kha.. Khatiang hmun kha a tak tak ah hian awm tase a mak khawp ang…
Engvangin nge helai hmunah hian ka mut reng le.. Ka hriat hnuhnun ber chu Airport a kal turin motor ka khalhchhuak a, ka motor khalh tiding thei lovin ko pang awih zetah ka tlan liam ani... Helai hmun a ka mut danah hian ka la thi lo chu ani phawt mai a..
“Aw le,a rawn harh veleh ka rawn hrilh vat ang che.. I duh hun hun ah rawn kal rawh”
Ka nu tawng ri chu rei tak ka hriat tawhloh hnu a hre leh ta chauh niin ka inhria..

REACHI’S POV*
Damdawiin atang chuan rilru zangkhai takin ka haw a, ka chhungte hnenah chanchin ka hrilh nghal a, ka hlim takzet ani.. Amak ka ti bawk.. Ka duhthusam thin leh beiseina mak tak nei a ka nghah thin chu alo thleng ta ngei alawm.. Ka va hlim tak em..!!
Engemaw zawng a ngaihtuah chuan Adin-a hi ka ngaihzawng mai ala ni a, a chhungte ka laka an tha viau pawh hi a nawm rualin a mawi tawk ngaihtuah a ngai ve tho a, ka rilru in a bula awm char char duh mah ila a harh thu min rawn hrilh hma chu va kal sek ka tum biklo.. Ka rilru ah erawh thildang reng reng ka ngaihtuah theilo.
Diktak a sawi chuan hmuh theihin ka nunphung a zangkhai nghal tih ka inhre reng mai.. 
A tuk chawhnu dar 1:00 velah chuan Nu Sangpuii’n Adina harh thu phone in min rawn hrilh a, hmanhmawh deuha insiamin damdawiin lam ka pan nghal a.
Damdawiin ka thlen chuan kum 3 dawn ka lo nghah tawh, ka hmangaih, engtiklai mai pawh a ka ngaihtuah reng thin, ka hlimna (minlo hrethiam ru..ka sawi duah lo theilo..!).. Nia, adik alawm Adina hian ka ngaihtuahna zawng zawng a luah vek ani..
A awmna cabin lam pan chuan ka kal nghal a, cabin a ka luh chuan Nu Sangpuii alo awm a, ani pawh a hmel atangin a hlim ani tih ka hre mai. Khum bulah chuan ka thu a, Adina chu nuihin ka en vang vang a.. A hma ai khan tlemin a cher deuh a, a lang pawr deuh bawk..
Nu Sangpuii chuan chhuanlam siamin min chhuahsan thuai a..
“Dear Diamond, I tha tiraw?” a kut ka vuan a, ka hlim lutuk chu ka tah a chhuak zawk.. Min chhang mai lovin min en reng a.. He mihring hi chu a zia a thlak dawnlo anih hi..! A kut chu la kangin ka fawp zauh a..
“Heyy.. I tha em ka tih chu?” zawite a tawngin ka melh ralh a..
“Tunge I nih..?”
“A hunlo e..”
“Min hrethiam la, tunge I nih ka hre miahlo che..”
“Adin..” a hmel chu ka enchiang lehzual a, a mitmeng te..a inngaihtuah buai ani.. Adina hian a thusawi hi a ti tak tak.. A mitmeng ka en hian min la hmu ngai miahlo leh min la hre ngai miahlo angin a awm ani…
“Dear Diamond… I ti tak tak em?”
A kut ka vawn chu phelhin a lasawn a, a awmdan hi ka duhlo.. Mihrang leh a hriat ngai miahloh anga min en hi ka duhdan ani lo.. Min thlahlel taka min kuah tur anih laiin..min hriatloh thu min hrilh maw!!
“Adin..”
“Ka nu kha min kohsak thei angem?”
“Maw..?” ka hria..a thusawi hi ka hria..
“Adin....min hria tiraw? Min enchiang rawh.. Min hria em?” ka thutna atang chuan thovin ka ding a.. Ka hlauthawng takzet..
“Ka hre miahlo tak tak che..” chiang takin min en a, Adina hi a fiamthu miahlo..
“Adin.. ac..ac.. Adin..” ka tap dawn in ka hria, mahse ka tapchhuak theilo.. Ka mangang lutuk.. Ka kut ka hum ruh trang trang a..
“Aw, ngati nge? Hei eitur ka rawn la ania..” Nu Sangpuii chu alo luh leh lai ka hre miahlo..
“Ka nu, enge thil awmzia hi?”
“Eng ber maw..?” Nu Sangpuii chu ala nui sang a..
“Ka nu..”
Adina awmdan chu hrethiamin kawngkhar lam ka pan vat a..
“Ka nu khanu kha ka hre ngailo.. Tunge?”
“Bawiha..”
An inbiakna chu ngaithla zawm ngam lovin kawngkhar chu ka khar phui a.. Awmdan tur ka hrelo.. Ka rilru a buai vek.. Cabin pawn ah chuan ngaihtuah mumal pawh nei lovin ka thu vang vang a.. Kawngkhar chu rawn inhawngin Nu Sangpuii a rawn dak a, a landan in a rilru a buai ve tho anih hmel..!
“Doctor kha..” a thusawi tum chu hrethiam in ka bu nghat a, Doctor ko turin ka kal ta nghal a..
Engkim tha hram teh se.. Hahdam takin muhil leh vang vang sela, a rawn harh leh hunah engkim a tha leh vek mai ang..!!
Doctor ka kohsak hnu chuan Adin-a hmel hmu ngam tawh lovin in lam panin ka haw nghal a..
Ngati nge hetiang thil hi ka chungah a thlen bik le.. Beidawng duh hauh lovin khang hun chhung zawng zawng khan alo kir leh hun ka nghak a, ka hrethiam theilo… A fair lo takzet.. A nu pawh a hre reng a, ngatinge min hriat ve loh.. A fiamthu ani ngei ngei ang.. A fair lo lutuk..!! Min hmangaih anih chuan engvang mahin min theihnghilh tur ani biklo asin…
 KA HNENAH KA KO KIR LEH NGEI ANG..!
Karkhat chhung zet chu zan lamah muhil thei lovin thil ka ngaihtuah kual vak vak a, ka tap bawk a. Ka tum tiruh lui in nitin damdawiin ah ka kal a, Adina awmdan leh a tawngkam te chuan min tina zual deuh deuh ni maiin ka hria.. Eng vakmah sawi lovin reilote ka awm hnuah ka haw lehnghal thin.
Doctor chuan kan hun hmandun tawhte a hnenah sawilo turin min hrilh a, a ngaihtuahna a hmanrim lutuk chuan atan a hlauhawm thei dawn tiin min hrilh ani..
Nikhat damdawiin a ka kal leh chuan Adina chu hmeichhe pakhat nen chiah anlo awm a. Kawngkhar kik lova ka luh vangin min rawn en rual thawt a.
Chu nu chu..ava zaktheilo tak.. Nunziri hi.. Adina nen kan inngaihzawn that lai  reng pawh khan, kan inngaizawng tih hre reng chungin Adina hi a ngaizawng huam huam a.. A landan in a hmel atang chuan min lawm vaklo tih ka hre mai..
Adina kut chu a vuan tlat a.. Kei min theihnghilh in henu hi a hre bik ang maw..??
Ka tuar theih bak ani ta..
“Kan titi laklawh a, ka kal hunah lo kal nawn mai ta che..” zakktheilo mange.. Em em lutuk hian…Insumlo leka a sam a va pawh bawrh bawrh mai ka chak lutuk.. Adina chuan engmah sawi lovin min en reng a..
Hepa hian min hriatchhuah a tum miahlo ami a..!!? Adina chuan ka thlavang a hauh ringin ka en reng a
“Nia, I duh chuan nakinah lo kal leh mai rawh.. Bakah I rawn kalzing tho a, tihtur dang I neih tho ka ring a..” ka chhang thei lo.. Ka hman em em vanga helai a kal hi ka ni bik hleinem.. Nunziri hriat lai a ka kalzing atih thu asawi ri kher chuan ka thinlung a tina takzet bawk..
Hamhaih taka inherin cabin atang chuan ka chhuak a.. Ka theihchhung chu hepa hmutur hian ka kal leh tawh lovang..
Ka insum thei ta nganglo, ka lo nghah hun chhung zawng zawng leh amah ngaihtuah a rilru hah reng reng a ka hun hmante ka ngaihtuah let a, damdaawiin bathroom remchang ah chuan ka lut rawp a, ka tap ta zawih zawih a..
Bathroom kawngkhar chu a khat tawkin an rawn kik zut lehnghal a, tap aw pur in lo nghak turin ka lo hrilh ta hlawm anih kha..

ADIN-A’S POV*
Ka nu chuan engtiklai pawhin min awmpui chawt a, a thilsawi thenkhat te chu ka hria a, thenkhat erawh ka hriat ngailoh ani.. 
Damdawiin a hmeichhe lo kal fo ‘Dear Diamond’ ti a min kotu kha ka hmelhriat ngai a nilo a, mahse a awmdan kha mak ka ti viau.. Min thlahlel takin min en a, ka hre ngailo ani tih ka hrilh lai a a mitmeng buai nak leh a rilru na hmel khan engtin emaw tak min khawih ani… Kar liam ta chhung khan nitin arawn kal a, tawng lemlo in rei vaklo a awm a, a haw leh mai thin. Ka nu nen an inpawh hmel hle a, ka hriatlai chuan engmah an sawi ngailo thung.
Hriatchhuah tumin ka ngaihtuah ngut ngut a, engmah ka ngaihtuah chhuak lo. Ka nu hnenah tunge tih ka zawt a, ‘han dam fel deuh la ila hre mai ang’ ti ringawt in min chhang a.. A hming takngial pawh min hrilh lo..
Nimin a min kalsan tura ka tih laia a mitmeng a natna lang kha a thuk hle tih ka hmu. Min hnungchhawn zawnga a ding ka hmuh khan thil pakhat ka hrechhuak…
A sam trawn dan leh a pianhmang zawng zawng te.. ka hmu tawh thin ani.. Ka harhchhuah hnu atang hian zantin ka mumangah ka hmu thin ani.. A hmel ka hmuh hmain ka muhil ka harh ziah bawk a.  Nidang a alo kal khan a sam a trawn ngai miahlo.
Engpawh nise, kha hmeichhia kha hre ngailo mah ila, a hmel leh a awmdan te, min ngaihven dan leh ka bula a awmdan te, a tawngkam ka hriatchhun te  kha ka duhzawng vek ani..!!
“Reachi..Reachi..” ka rilru a hming ka lam mawlh mawlh hi tunge ni ang? nui ri ka benga ka hriat leh a nui hmel hlim sar ka mitthla a lang reng hi ka bula hmeichhe lo kal fo nen khan an inang viau a.. Mahse kha hmeichhia kha a nui ri ka la hre miahlo..!
KAR HNIH HNUAH
Damdawiin atang a kan chhuah hnuah pawh thenawm khawveng leh chhungkhat te engtik lai mai pawhin an rawn kal zut a, hunrei tak inhmu tawhlo ang maiin min be hlawm bawk a..
Ka pa hnenah thil awmzia diktak min hrilh turin ka zawt a, accident thlen dan leh kum 3 dawn chin hriatloh a ka bo thu min hrilh chuan mak kati lutuk a sawitur pawh ka hrelo. Doctor in thil thleng te min hrilh nghal vut  vut lo tura a hrilh vangin min hrilh mai ngamlo alo ni..
Ka mumang ni a ka hriat hmun mak tak ah khan ka kal tak tak tihna ani thei angem..? ‘Dimi-a-kota’ hmun kha..!!
Hun reitak ka bo hnua kan in ngei a ka let leh vanga Pathian hnena lawmthu sawi nan, chaw eikhawm turin chhungkhat leh thenrual thate kan sawm khawm a.
Ka room atang chuan kan in hnunglam tualzawl a awmte chu ka thlir reng a. Nui ri ka hriatna lam chu rang zetin ka en vat a, damdawiin a alo kal bak kha ka hmu leh ta miahlo a, mahse a nui ri chu ka benga cham reng hi ani tih ka chiang..
Tualzawl a anlo dinkhawmna lam chu ka pan a
“Reachi..” en bik pawh nei chuang lovin ka rilru a hming awm chu ka sawichhuak a.. He hming hi midangin ka hriatlai a an sawi pawh ka hre chuang lova, ka rilru ah a awm ngut ngut vanga sawichhuak ka ni..
Nichin a hmeichhia hlim hmel taka nui kha hamhaih hmel taka la nui reng chungin ka lam a rawn hawi a.. A hmel chu ka enchiang a.. Hei ngei hi ani.. He thil hi chiang takin ka hria.. He hmeichhia hi ka tan a ruat ngei ani tih hi…!!

A TAWP TA…

(6th . October. 2015 zan khan ka mumang ah ‘I pasal neih hun tur chu 8th  September. 2018 ah ani’ tiin tuemawni hian minlo hrilh a..haha.. ( Chuan ka ngaihtuah zawm neuh neuh a, he thawnthu hi alo chhuak ve ta ringawt ani ee..
Min chhiarsak tute chungah lawmthu ka sawi mawlh mawlh a, min lo like saktu  zawng zawng leh comment tu zawng zawng te in chungah ka lawm lutuk.. Thawnthu dang ngaihtuah chhuak tura chakna min petute in ni e..