ZAN LO AWM DAN

ZAN LO AWM DAN
.
Written By - Elsie Eells
.
Kum tam tak a ralta, hun lo intan lai khawvel siamtirh ah chuan zan a awm lo a, chhun a ni reng thin. Tumah hian ni chhuak emaw, ni tla emaw an hre ngai lo va, arsi eng leh thla eng pawh an hre ngai hek lo. Zana hran thin sava an awm lo va, zan lama ramsa lo chhuak thinte lehzan pangparte an hre ngai lo va, thim a awm lo va, zan boruak nuam, thiang leh rimtui tak hi a awm ngai lo reng reng a ni.
.
Chumi hunlai chuan tuipui thuk taka cheng leh an ran lalber Rulpui fanu hian khawvela cheng thilsaim ropui tak, Mihring fapate zinga pakhat pasalah a nei a, an chenna tuipui thuk tak thim ruih mai chu kalsanin a pasal chenna hmun, chhun chauh awmna ram, khawmualah chuan a cheng ve ta a. Mahse khawmuala ni eng tak chuan a mitte a tina in a tichau zo a, a hmel thatna leh duhawmnate chu a lo reh ta tial tial a. A pasal chuan a khawngaih em em a, lungngai tak hian a en vawng vawng thin a, mahse engtia han tanpui tur nge a hre si lo.
.
Tuipui lalfanu chu lungngai tak hian khumah a let kual a let kual a, "Aw, zan hi lo thleng ve chu ni sela ka dam mai tur hi a ni a, helaiah chuan chhun a ni reng a, ka pa lalramah chuan zan a awm bik asin le. Zan hi awm ve se ka va han ti tak em!" a ti vawng vawng mai a. A pasal chuan lalfanu rum ri chu a ngaithla reng a, "Engnge zan i tih chu? Eng thil nge anih min hrilh la, i damna tur a nih chuan tlemte tal pawh ka laksak thei maithei che asin," tiin a zawt a.
.
Tuipui thuk taka roreltu fanu chuan, "Zan chu tuipui thuk taka awm ka pa lalram tithim thintu thim chhah tak sawina a ni. He khawmuala ni eng hi ka ngaina em em a, mahse ka chauh phah a nih hi. Ka pa lalrama thim tlemte tal kan lak theih chuan ka mitte hi a hahchawl thei ang a, ka taksa chau lutuk te hi a reh thei ngei ngei ang," a ti a.
A pasal chuan a chhiahhlawh rinawm ber ber pathumte chu a ko nghal a, "Hla taka zin turin ka tirchhuak dawn che u a ni. Tuipui thuk taka roreltu Rulpui hnenah in kal ang a, kan chenna khawmuala ni eng reng laka a fanu a thih mai loh na'n  zan thim tlemte tal in rawn dil dawn nia." tiin thu a pe a.
.
Chhiahhlawh pathumte chu Rulpui rorelna ram pan chuan an kal ta vang vang a. Ni tam tak an kal hnuah tuipui thuk taka lalin ropui leh nuam tak chu an thleng ta a. Rulpui hnenah chuan lalfanu awmdan hrilhin khawmuala hawn tur zan thim tlemte tal pe turin an ngen a. Rulpui chuan ip lianpui khatin zan thim chu a lo pe a, uluk tak hian ip chu an tawn phui ta tlat a. Rulpui fanu, an pi bul an thlen hma loh chuan hawng miah lo turin a chah thlap a ni.
.
Chhiahhlawh pathumte chu khawmual panin an chhual leh nghal a, zan thim awmna ip lian tak chu an chhipchhuan a. Ip chhungah chuan zan lama chhuak chi ramsa chi hrang hrang rum ri leh hram ri an hria a, zan sava leh rannung chi hrang hrang chevel ri te an hre bawk a. Lui kama ramngaw chhah tak chhungah zan lama i riak tawh thin anih chuan ip chhung atanga thawm lo chhuak thin chu i hrethiam ngeiin ka ring.
.
Chhiahhlawh pathumte hi zan la hre ngai miah lo an ni a, vawikhatmah zan thawm chu an la hriat ngai loh avangin an hlau ta em em mai a. Chhiahhlawh pakhatna chuan, "Zan dahna ip hi helaiah hian kalsan ila, kan theihtawpa chakin i tlansan daih ang u," tiin a rawtna chu a han sawi chhuak a. Chhiahhlawh pahnihna chuan, "Kan thi ngei ngei ang. Engpawhnise, kan thi tho tho dawn chu anih hi," tiin a tap pur tawh mai a. Chhiahhlawh pathumna chuan, " Kan thi emaw kan dam emaw, ip hi kan hawng ang a, thawm mak tak tak lo chhuak hi eng thil chiah nge anih kan hre ngei tur a ni." a ti ve thung a.
.
Ip chu leiah an dah a, an hawng ta a. Chuveleh zan lama chhuak thin ramsa chi hrang hrang te, sava leh rannung chi hrang hrangte chu an lo chhuak ta sup sup mai a. Zan thim chhah tak chu a lo chhuak tel bawk a, zan a thim chuan chhiahhlawhte chuan an hlau lehzual a, ramngawah chuan an tlanchhe ta vak mai a. Zan thim awmna ip nena chhiahhlawhte haw hun tur chu lalfanu chuan nghakhlel tak hian a lo thlir reng thin a. An chhuahtirh atang khan nitin an lo thlen ringin a lo nghak reng mai a ni. A mit chungah a kut dahin hmuntin leh kiltin, kawlkil thlengin a thlir vawng vawng thin.
.
Ni khat chu lalin bula Tum thing hnuaiah hian a ding a, chumi ni chu chhiahhlawh pathumin ip hawnga an tlanchhiatsan hi kha a ni a. Kawlkila zan thim lo kal mup mup hi a han hmu a, "Zan a lo awm ta. Zan a lo thleng e." tiin hlim lutuk mai hian a au chhuak a. A mit chu a chhing a, tum thing hnuaiah chuan thlamuang takin a muhil ta siai siai mai a.
.
Lalfanu muhil a lo harh chuan a zang ta huai a. A mit kham leh a taksa chaute chu a lo reh ta vek a, lalfanu hlim tak lo ni leh ta in chhun enga awm thei tur khawpin a taksa pawh alo chak thar leh ta a. Tum thing chung zawna arsi eng tak chu thlir chho vawng vawngin, "Arsi eng mawi, 'zinglam arsi' lo ni la, zing lo thleng tur chhinchhiahna ni ang che. Khua a var dawn laia van lam lalnu lo ni bawk ang che." tiin a phun mial mial a.
.
Chumi zawh chuan zan lam savate a ko a, "Zanlam sava hram mawi leh hram thiam takte u, khua a var leh dawn tih chhinchhiah nan in hla mawi ber berte kha sa thin turin thu ka pe a che u," a ti leh a. A bula Arpa hnenah chuan, "Nang hi zan veng tura ruat i ni. I aw-in zan lam hunte a chhinchhiah ang a, zing a lo thlen dawnin mi dangte i hrilh tur a ni ang." a ti a.
.
Zing a lo nih chuan ramngawa tlanchhe ta chhiahhlawh pathumte kha chau em em hian ip ruak nen an lo haw a, an pu chuan a lo hau a. "Chhiahhlawh rinawm lote u, engatinge Rulpui thusawi zawm lo a, a fanu awmna bul ni lovah ip kha in hawn le? In rinawmlohna avang leh thupek in zawm loh avangin Zawngteah kan chantir ang che u. In hmui kha zan thim awmna ip chhinna khawihnunah chhianchhiahna ani reng tawh ang. a ti a.
.
Chumi ni atang chuan zawngte hmuiah hian chhinchhiahna hmuh tur a awm reng tawh a, he thil thlenna hmun Brazil ramah chuan zan a lo awm tirha bang atanga rang taka an chhuak ang khan rang takin khua a thim thut a, zan a lo thleng thut thin.

.
Lalfanu thupek ang hian tun thlengin zing a lo thlen dawnin ramngawah chuan zan lama chhuak thin ramsa te, zan savate leh rannungte chu zing a ni leh dawn tih chhinchhiahna leh lantir nan an hram chuah chuah thin a ni.