LAZY JACK

JACK THATCHHIA-A
Written By - Flora Steel
.
Hmanlai hian tlangval pakhat Jack-a hi a awm a, tlangval tam tak ang bawkin a nu nen an cheng a. Mahse, Jack-a te chu an rethei em em mai a, a nu tar tawh tak chuan la kaihin ei a zawng thin a, Jack-a erawh chu a thatchhiat em avangin  engmah a thawk peih  ngai lo va. Khaw lum hunlai te hian thawveng takin a leng vel mai mai thin a ni. Tlasikah pawh engmah ti peih chuang lovin meilum bulah a thu kawm reng thin a. Engmah a tih peih ngai loh avang chuan mite pawhin "Jack Thatchhiaa' tiin an koh phah ta a ni.
.
A nu chuan Jack-a thawh awm a han ngaihtuah vang vang a, mahse eng hna mah a hrechhuak thei lo. A tawpa tawpah chuan Thawhtan zing khat chu hna a thawh ve tawh loh chuan eitur an harsat zel dawn thu leh hnathawh tur zawng turin a hrilh a, hna a thawh duh loh chuan in atanga a hnawhchhuah tur thu a hrilh ta a.
.
Jack-a chuan thatchhe taka engmah thawk lo va awm reng chu tha a ti ta bik lo va, hnathawh tur zawng tur chuan an in atangin a kal chhuak ve ta a. Chumi tuk chuan an thenawma loneitu hnenah ni khata cheng za hlawhna tur a ahmu a, nilenga hna a thawh hnuah tlaiah chuan in lam panin a haw ta a. Pawisa la thawk chhuak ngai lo leh pawisa la nei ngai lo ta chu a haw kawngah chuan khuarkhurum a paltlangna lamah a thlauuh ta daih mai a. A nu hnenah chuan pawisa a thlauh daih thu a han sawi tan dawn dek dek a, "Tlangval mawl tak i ni. I kawrlum ipteah khan ak tha ta che." tiin a nu chuan a hau a. Jack-a chuan, "A lehpekah chuan ka ak tha thlap tawh ang." tiin a chhang ve mai a.
.
A tuk a lo thlen chuan Jack-a chu hnathawh tur zawngin a chhuak leh ta a, bawngvulhtu tanpuitu ah a tang leh ta a. Bawngvulhtu chuan nilenga a thawh hlawh atan bawnghnute  bel khat a pe a, Jack-a chuan a bawnghnute bel chu a kawrlum hak ipte lian takah chuan a ak tha a. In a thlen hmain a bawnghnute ah chu a baw zo ta vek mai a ni.
.
"Jack-a tak hi chu aw... I va han a tak em! Bawnghnute te chu i lu ah khan chhipchhuan ta che." tiin a nu chuan a hau leh ta bawrh bawrh mai a. Jack-a chuan, "A lehpekah chuan ka ti tawh ang." a ti tha ve leh mai bawk a.
.
Ni dangah chuan Jack-a chu a kal chhuak leh ta a. Loneitu hnenah a inhlawh a. Loneitu chu a hnathawh lawh atan cream cheese a lo pe a. Tlai a lo nih chuan Jack-a chuan Cream cheese chhipchhuan chungin in lam a pan a. Mahse, in a thlen hmain a cheese ken chu a pherh deuh vek a, a then a thlauh bawk a. A samah chuan cream chu a kai liai luai mai a ni.
.
A nu chuan thinrim tak hian, "Mi mawlpa, i va han a tak em! Fimkhur takin i kutphahah keng ta che." a lo ti a. Jack-a chuan, "A lehpekah chuan ka ti tawh ang." a ti leh mai a.
.
A tukah chuan Jack-a chu a kal chhuak leh a, chhang siamtu hnenah a inhlawh leeh ta a. Chhang siamtu chuan thil dang pe lovin a hlawh atan Zawhte pa a pe a. Jack-a chuan zawhte chu lain fimkhur tak hian a kutin a keng a. Kawng chanve vel a thlen hnu chuan zawhte chuan a kutah a ham nasa ta lutuk a, a keng thei ta ngang lo va, zawhte chu a chhuah ta ringawt mai a ni.
.
In a thlen chuan a nu chuan, "Mimawlpa, thil i va han hre thei lo tak em, hruiin vet la, rawn kai haw ta che." a ti a. Jack-a chuan, "A lehpekah chuan ka ti tawh ang." a ti leh a.
.
Chumi tuk chuan Jack-a chu satalhtu bulah a inhlawh a. Sa talhtu chu mifel tak a lo ni a, n ilenga a hnathawh man atan hlawh tha tak mai Kel dar sahthlak lianpui hi a lo pe a. Jack chuan kel dar chu a la a, hruiin a phuar a an in thlengin leiah a hnuk a. In a thlen chuan kel dar chu leia a hnuhna avangin a bal deuh vek tawh a, silfai tlak pawh a ni tawh lo a ni. Chumi tuk chu  Pathianni a ni a, kelsa ei turin zikhlum ringawt mai an ei dawn tak avang chuan a nu chu a thinrim zual nasa khawp mai.
.
"Nang hi, i a lutuk hi i thi lo chauh anih hi. I darah pu mai ta che." tiin a hau leh ta hlawk hlawk mai a. Jack chuan tha takin, "A lehpekah chuan ka ti tawh dawn nia," tiin a chhang leh ta a. Jack chu a tuk Pathianni ah chuan sunday school a kal a, Pathianni pum chu hnathawk lovin a chawl a ni.
.
Thawhtanni a lo thlen chuan Jack chu a kal chhuak leh ta a. Ranvulhtu hnenah a inhlawh a, Ranvulhtu fel tak chuan Sabengtung a lo pe a. Jack chuan a nu thusawi kha hre rengin Sabengtung chu a dara put a tum a, a harsa a ti hle mai. Rei tak a beih hnuah Sabengtung chu a pu thei ta hram a. A hlawh tha tak mai chu in lam panin a pu ta a ni.
.
Kawng chanve vel a thlen chuan mi hausa tak pakhat chenna hmun hi a kalpel a. Chu mi hausa chuan fanu hmeltha tak mai hi a nei a, mahse, a fanu chu bengngawng tawngthei lo a ni a,a piantirh atangin vawikhatmah a la nui lo va, doctor-te chuan tuemawin an tihnuih chuan a tawng theih tur thu leh a bengngawng pawh a reh nghal tur thu an sawi a. Chuvang chuan mi hausa pa chuan a fanu tinui thei apiang hnenah a fanu chu nupui atan a pek tur thu a lo tiam tawh a ni.
.
Jack-a'n mi hausa leh a fanu chenna hmun a paltlang lai chuan mi hausa fanu chu an in tukverhah a lo dak chhuak a, Jack chuan sabengtung chu a darah a rawn pu luk luk mai a. Sabengtung ke chuan chung lam a hawi a, a ke chuan mangang tak hian boruak a pet vak vak a, talchhuah chak tak mai hian a hram tuarh tuarh mai bawk a. Jack-a sabengtung pu chu a nuihzatthlak em avangin mi hausa fanu chu za em em hian a nui chhuak ta hawk hawk mai a. Chutia a nuih tak hawk hawk avang chuan vawilehkhatah a lo tawng thei  nghal a,a  bengngawng pawh a lo reh ta nghal a. A pa chu a lawm em avangin Jack-a hnenah chuan nupui atan a pe nghal a. A lawm em avangin in lian em em mai a sak sak a, Jack-a leh a nupui leh a nu chu hlim takin an cheng ho ta ani.
.
Nu leh pa thu awih zel thin chuan a tawpah vanneihna leh malsawmna an dawng thin.