THE LOST PRINCE

THE LOST PRINCE
.
Written By - Alexander Chodsko
.
Hmanlai hian lal hausa lutuk mai hi a awm a. Chu lal chu hausa em em mahse fapa a neih loh vangin a hlim lo hle thin a, a upat tawh bawk avangin fapa a nei lo chuan a lungngaihna a belhchhan nasa em em bawk a ni. Nitin hian a nupui nen chuan fapa an neih ve theih nan Biak Inah an tawngtai ziah thin a, rei tak an nghah hnuah a tawpa tawpah chuan Pathianin an tawngtaina chu a ngaithla a, an duh leh an dilnate hriatsakin an dil fapa chu a pe ta a ni.
.
Mipa naupang lo pian ni chuan mumang mak tak mai hi lal chuan a nei a, a mumangah chuan a fapa chu kawng khat chauhin a dam chhuak thei tih a hmu a. Kum sawm pahnih a tlin hma chuan a kein lei a dek tur a ni lo va, lei a deh vaih chuan a dam chhuak dawn lo a ni. A mumang mak tak avang chuan lalfapa lo piang chu fimkhur thei ang  bera enkawl a ni a, a ke-in lei a deh a thian loh avangin amah enkawl tur leh engtik lai pawha veng turin nurse rinawm tak tak engemawzat an chhawr nghe nghe a ni.
.
Kum engemawzat a ral hnuah pawh lalfapa chu uluk taka enkawl a ni reng a, nurse-te chuan an pawm a, a chnag chuan rangkachaka siam khumah an muttir thin bawk a. A ke chuan vawikhatmah lei a dek  ngai lo.
.
Mipa naupangin kum sawm pahnih a tlin dawn chuan lal chuan a fapa kea a kal theihna tur lawm nan ruai ropui tak theh a tum ta a.
Ni khat chu ruai tur siama an buai mup mup laiin lal inah chuan thawm hlauhawm tak mai hi an hria a, au thawm hlauhawm tak mai hian lal in chu a nghawr dur dur mai a ni. Nurse chuan a hlauh em avangin lalfapa a pawm lai chu a thlauh palh a, tukverh panin a tlan a. Chutia nurse-in lalfapa a thlauh ve leh chuan chuan thawm hlauhawm tak chu a reh ve nghal hmiah mai a. Lalfapa pawm leh tuma nurse a kal let leh chuan lalfapa chu a thlauhna hmunah a lo awm ta hauh lo mai! Lal thupek khauh tak mai a bawhchhiat tak avang chuan a hlau em em a, a chunga lal rorel dan tur pawh a ngaihtuah ngam lo va, a ngaihtuah thiam hek lo.
.
Nurse te thawm leh tap ri rawih rawih thawm an hriat chuan lalina chiahhlawhte hcu nurse awmna lam panin an lo tlan khawm ruih ruih a. Lal pawh chuan nurse awmna hmun chu a lo pan ve bawk a.
"Engnge thil awmzia ni ta?" Eng thil nge thleng? Khawiah nge ka fapa a awm?" tiin a zawt a. Nurse chuan lal a hlauh vang leh lalfapa bo ta daih mai hreawm a tih lutuk avang chuan tap hlawp hlawp chung hian lalfapa bo thu chu lal hnenah chuan a sawi ta a ni. Lalfapa bo thu a hriat a lalpa rilru nat zia hreawm tih zia chu khawvela mi awm zawng zawng hian tumah reng rengin an hriatthiam pui hauh lovang.
.
A fapa zawng tur chuan chhiahhlawhte chu a tir chhuak nghal a, chhiahhlawhte hnenah chuan hmun zawng zawng enkual a dap chhuak vek turin thu a pe bawk a. Pathian hnenah a fapa chu pelet leh ngei tura dilin a tawngtai a, a fapa a hmuh leh theihna tur a nih phawt chuan eng thil pawh tih a huam vek a, a fapa hmuhsaktu hnenah chuan pawisa tam tak pek a tiam nghal bawk a ni.
.
Chhiahhlawhte leh sipaite chuan lalfapa chu hmuntin ah an zawng nghal a, mahse khawvelah hian a lo piang ve lo ang maiin a bo hmiah mai si. A thawm emaw, amah niawm ang takngial pawh khawiah mah hmuh tur a awm lo.
.
Kum engemawzat a ral leh hnu chuan lal hlim lo tak chuan a lalin chhung pindan  mawi leh nuam tak zinga pakhatah ke pen thawm te, chhuk leh chho zawnga kal thin te, lungngai taka rum rite hriat a ni thin tih a hre ta a. Chu thil thleng chu hriatchian a chak ta em em mai a. Chu thil chuan a fapa bo ta nen inzawmna a neih a ring  tlat a ni.Chu pindan hranga zan khuaa thil awmdan en thlithlai ngam hnenah rangkachak pawisa za thum pek a tiam ta a.
.
Mi tam takin an hming an pe lut a, pindanah pawh chuan an awm ve ngei a, mahse a tawp thlengin an awm ngam ngai lo va, zan laia rumri hlauhawm lutuk an hriat chuan an tlanchhe  zel mai a, rangkachak pawisa za thuma an nunna thap chu an ngam ngang lo a ni. Lal khawngaihthlak tak chu a beidawng ta em em mai a. A lal in chhunga thil thleng mak tak chu eng thil chiah nge anih hriatchhuah dan tur kawng dang a hriat si loh avangin a mangang tawh hle mai a.
.
Lalin atanga hla vak loah hian hmeithai hi a cheng a, buhhera eizawng a ni a. Fanu pathum a nei a, an retheih em avangin nitina an ei khawp an thawkchhuak ve tawk tawk chauh a ni. Lalin pindan pakhata zan laia thawm an hriat thin thu leh zankhuaa thlithlai ngam hnenah rangkachak tangka zathum an pe dawn tih thu chu a lo hre ve a. Hmeithai fanu upa ber chuan,
"Kan retheih em avangin engmah hloh leh chan tur kan nei chuang lo va, lalin pindana zan khat chauh awma rangkachak tangka zathum hlawh theih a nih chuan ka bei ve chhin reng reng teh ang. Ka nu, mi phalsak phawt chuan beih ve chhin ka duh a ni." a ti a.
.
Hmeithai chuan a dar a tiche zauh ringawt a, chhan mai dan tur pawh a hre lo. An retheih zia leh nitina eitur hmu thei tur pawha an thawhrim a tul zia a ngaihtuah chuan a fanu upa ber chu pindan hranga zan khat chauh a awm tur chuan phalna a pe ta a. Hmeithai fanu chu lalin panin a kal nghal a, lal hnenah chuan pindan hrang en thlithlai a inhuam thu a hrilh ta nghal a.
.
Zan khuaa thlahrangte awmna pindana awm a, thil awmdan zawng zawng en thlithlai turin ni huaisen tak tak meuh ang maw? Nula, i hlau miah lo ang maw?" tiin lal chuan chik tak hian a lo zawt a.
.
Hmeithai fanu chuan, "Zaninah hian beih chhin nghal ka duh a ni. Amaherawhchu thil pakhat ka ngen ang che. Ka ril a tam em avangin zanriah atan chaw min pe thei angem? Min pek theih chuan ka lawm hle ang." a ti a.
.
Lal chuan a chiahhlawhte chu a ko a, hmeithai fanu chu a mamawh apiang pe turin thu a pe a. Zan khat chauh ei tur pawh  ni lovin, zan thum ei khawp lai eitur an pe a ni. Chutichuan hmeithai fanu chuan ei tur chu kengin thing tuah tur leh eirawngbawlna tur hmanrua nen pindan chu a pan ta a. Pindana a luh veleh chuan nupui tha tak ang maiin mei a chhem nghal a, meiah chuan thleng a chhuang a, dawhkanah chuan thlengte chu a rem a, mutna tur khum a siam nghal bawk a.
Eirawng a bawl chhung vel chuan zan a lo rei dawn ta der mai a,a  hriat loh chhungin dar sawm a lo ri der mai. Dar sawm pahnih a pelh fel chuan ke pen thawm a lo ri a, tuemaw kal thawm chuan pindan chu a ti  nghing lawih lawih mai a. Lungawi lo rumri hriat tur a awm zui bawk a. Hmeithai fanu chuan a hlauh avangin bangkil a chuh rawk rawk a, tumah hmu lo mahse ke pen thawm leh rumri chu a hlauhawm tial tial emaw tih mai tur a ni. Vawilehkhatah tlangval pakhat hian a lo pan a, "He chaw hi tu tana siam nge anih?" tiin a zawt a.
.
Hmeithai fanu chuan, "Ka tana siam anih kha." tiin a chhang a.
Tlangval hmel ngainatawm tak leh hmeltha em em mai chu a lungngaih hmel ta sawt hian a hriat a, a han ngawi deuh vang vang a, "Dawhkan hi tu tana buatsaih nge?" a han ti  leh a. Hmeithai fanu chuan, "Keima tan." tiin a chhang leh a.
Tlangval hmel chu a dur khaih khaih tawh mai. A mitmeng dum pawl nalh tak chu mittuiin a khat tawh a, zawhna pakhat chiah a zawt leh a, "He khum hi tu mutna tur atana buatsaih nge?" a ti leh a.
.
Hmeithai fanu chuan, "Keima tan," ti bawkin a chhang leh a, tlangval biangah chuan mittui a lo luang a, a bo ta a ni.
A tukah chuan hmeithai fanu chuan lal chu a thil hmuhte a hrilh a, mahse a chhanna avanga tlangval hreawm ti hmel leh lungngai hmel te, a mittui tlate erawh chu a sawi lang lo. Zan khuaa pindan hranga a awm manah rangkachak tangka zathum chu a lawmman atan pek a ni a. Lal chu a fapa bo ta nena inzawmna nei thei chanchinthar a hriat avangin hmeithai fanu chungah chuan a lawm hle a ni.
.
A tukah chuan hmeithai fanu pahnihna chu a u chuan tihdan tur a hrilh vek a, tlangval a lo kal leh huna lo chhan dan turte nen lam a hrilh vek a. Zan lama thil awm dan thlithlaia rangkachak zathum hlawh tur chuan a thawk chhuak ve ta a ni.
Lal chu a lo lawm hle a, zan lama a mamawh tur apiang pe nghal turin chhiahhlawh ho chu thu a pe leh ta a. Engmah nghak khawtlai lovin hmeithai fanu chu pindan hrang lamah chuan a kal nghal a. Mei a chhem a, bel a chhuang a, dawhkanah puan var a phah a, khum a siam leh hnuah eirawng a bawl zawh leh chuan zanlai thlen hun chu a nghak leh ta a  ni.
.
Reiloteah zan lai chu a lo thleng thuai a, tlangval alo lan chuan a u zawk a zawhna ang bawk khan a zawt a, "Chaw hi tu tana i siam nge? Dawhkan hi tu tana i buatsaih nge? Khum hi tu tana i siam nge? tiin a zawt a, hmeithai fanu chuan a u sawi ang chiahin, "Ka tan, keima tan chauh," tiin a chhang a.
.
Zan hmasa ang bawkin tlangval chu a mittui a tla a, a ban a vai a, a bo leh ta thut mai a.
.
A tukah chuan hmeithai fanu pahnihna chuan lal chu thil thlen dan zawng zawng a hrilh a, mahse tlangval awmdan erawh a sawi tel lo. Zankhuaa thil awmdan a thlitlai avangin rangkachak tangka za thum pek a ni a, hlim takin an in ah a haw leh ta a.
.
A ni thumnaah chuan hmeithai fanu naupang ber chuan lalin pindan hranga zan khuaa awm a, rangkachak tangka za thum hlawh chu a tum ve ta a, "Ka u te u, rangkachak pawisa zathum in hlawh ve ve ang hian kei pawhin kan chhungkaw inenkawl nan leh ka nu ka tanpui ve theih nan in hlawhtlin anga hlawhtlin ve ngei ka duh a ni, pindan hranga zan khat riak tur chuan ka kal ve ang e," a ti a.
.
Hmeithai chuan a fanute zingah a naupang ber chu a duat zual a, a naupang ber anih vangin hmun hlauhawma kaltir chu a hreh em em mai a, mahse a u te pawh an hlawhtling a, a hlawhtlin ve ngei beiseipui chungin a kal ve chu a remtih sak leh ta a.
.
A u te chuan a tihtur leh tlangval alo kal huna chhan dan tur an hrilh vek a, pindana riah ve a tum thu lalin a lo hriat chuan a lo lawm em em a. Khaw thim rualin pindan hrangah chuan a lut ve ta a ni.
Mei a chhem a, dawhkan a khuh a, khum a siam a, eirawng a bawl a, a tih zawh vek hnu chuan zan lai thlen hun chu hlau deuh bawk si leh beiseina nei chungin a nghak ta ran a.
Sana-in zan lai dar sawmpahnih a khawn rik bal bal lai chuan mi tuemaw ke pen ri hian pindan chu a sawi nghing dur dur a, pindan chhung chu tap ri leh rum ri hian a khat nghal vek bawk a. Nula chuan kiltin a en kual vel a, mahse mihring chu sawi loh, thil nung takngial pawh hmuh tur a awm lo.
.
Thawklehkhatah a hmaah chuan tlangval hmeltha tak, sang zeih zawih hi a lo ding thut a, aw mawi tak mai hian, "Chaw hi tu tana siam nge?" tiin a zawt a.
.
Nula chuan a u te'n chhan dan tur an hrilh chu ngaihtuah letin tlangval chu a en a, tlangval mitmenga lungngaihna thuk tak mai a hmuh chuan a u te aia that chhuah zawk a tum ta a ni.
.
Nula chuan a chhan mai loh avangin tlangval chuan, "Ka zawhna che min chhang lo a nia, chaw hi tu tana i buatsaih nge?" tiin a zawt  nawn leh a. Nula chuan, "Ka tana buatsaih a ni a, mahse i ei ve duh phawt chuan i ei ve thei ang," a ti a.
.
Chu a chhanna avang chuan tlangval hmel chu a hlim deuh hlek niin a hriat a.
"He dawhkan hi tu tana buatsaih nge?" tiin tlangval chuan a zawt leh a.
Nula chuan, "Ka tana buatsaih a ni nain ka mikhuala i tan duh a, zanriah min kilpui duh anih chuan ka lawm khawp ang." tiin a chhang a.
Tlangval hmela lungngaihna awm zawng zawngte chu a lo reh ta vek a, tunah chuan mawi takin a nui tawh a ni.
"Anih leh khum hi tu mutna atana i buatsaih nge?" tiin a zawt leh a. Nula chuan, "Ka tana ka buatsaih ani a, mahse chawlh i mamawh anih chuan ka mut ai i mu thei ang." tiin a chhang leh a. Tlangval chu a lawm em avangin a nui ri hawk hawk a, a kut a beng ta hial a. "Ka va han lawm tak em! Min sawmna chu lawm takin ka pawm e. Ka chunga i thatna avangin ka lawm takzet a ni. Mahse khawngaihtakin min lo nghak la, min enkawl thinna avangin ka thiantha tak takte hnenah lawmthu ka han hrilh hmasa phawt ang e." a ti a.
.
Chu thu a sawi zawh chuan pindan chu boruak lum nuam tak hian a lo khat a, chumi rual chuan pindan lai tak chu a lo inhawng a. Tlangval chu muangchang hian a lut a, nula chuan thil thleng tur hriat a chak em avangin tlangval chu a zui ru a, chhuat inhawng ah chuan an lut dun ta a ni.
.
In hnuai lamah chuan khawvel dang hi a lo awm reng mai a. Ding lamah chuan rangkachak tui hlir luanna lui hi a awm a, vei lamah chuan rangkachak hlang tlang hi a awm bawk a. A laiah erawh chuan pangpar maktaduai tam tak awmna phaizawl zau tak leh  mawi em em mai hi a awm a. Tlangval chuan hma lama pangpar hmun mawi lutuk mai chu a pan a, nula chuan a zuiru zel bawk a. Phaizawla pangparte chu a thian hluite ang maiin chibai a buk a, duat takin a chul a, ngaih hmel tak hian a khawih diat diat hlawm a.
Chumi hnuah chuan ramngaw zau tak, rangkachak thing hlir dinna hmun hi an thleng a, ramngawah chuan sava chi hrang hrang mawi takin an hram chiah chiah a. Tlangval chu an hria a ni tih hriat tak hian chibai lo bukin an thlawh hual luih luih mai a, thenkhatte phei chu a koki ah te an fu hial a ni. Savate chu a bia a, a mal te tein a chul a, chutiang a tih vel lai chuan nula chuan rangkachak thing zar pakhat chu thliakin a thawmhnaw chhungah a dah tha a, chu khawvel mak tak mai chu hriatreng nan hawn a duh a ni.
.
Rangkachak thing awmna ramngaw an kal pelh hnu chuan tangkaraw thing hlir awmna hmun an thleng leh ta a. Tlangval chu ramsa chi hrang hrang hian an lo lawm luih luih a, thiantha tak an ni vek a ni tih hriat tak hian an inhnim tawn a. Tlangval chuan ramsa zawng zawng chu duat takin a bia a, a chul hlawm bawk a. Chutihlai chuan nula chuan tangkaraw thing zar pakhat chu a lo thliak leh a, "Hei hi he ram mak tak hriatreng nan ka hawn teh ang, ka hawn loh chuan ka nu leh ka u ten a thu a ka sawi ringawt chu an awih lo palh ang e." a ti rilru a.
.
Tlangvalin a thiante zawng zawng a chibai zawh hnu chuan lehlam a hawi a, an lo kalna lamah khan a let leh ta a. Nula pawh chuan a rukin a zui haw ve leh ta a ni.
Pindan chhuat inhawng an thlen dawn chuan kawng chho a lo awm a, nula chuan a zui ve zel a, a tawpah chuan pindan chu an thleng leh ta a. Pindan chhuat chu inhawng tih pawh hriat miah loh hian a inkhar leh vek a. Nula chu tang tak hian meichhemna bulah kal nghalin tlangvalin a rawn biakna laiah khan a ding lehnghal a.
.
Tlangval chuan, "Ka thianthate zawng zawng chu ka thlah zo ta e. Tunah chuan zanriah kan kil thei tawh ang." a ti a.
.
Nula chuan a eitur siamte chu thlengah sahin dawhkanah chuan a hung sawk sawk a, chaw an ei lai chuan inhmachhawnin an thu a, chaw an ei kham chuan tlangval chu a mut a lo chhuak ta a, "Tunah chuan ka mut a hun ta." a ti a.
Nulain uluk taka puan a phahah chuan tlangval chu a mu a, tlangval a mutthilh veleh nula chuan khawvel dang atanga a lak rangkachak leh tangkaraw thing zarte kha phawrh chhuakin a khum sir thutthlengah chuan a muhil ve ta a ni.
.
A tukah chuan ni a chhuah san fe tawh hnuah pawh nula chu a thil tawnte sawi turin pindan atang chuan alo la chhuak lo cheu a. Lal chuan chanchin a hre chak tawh em em si. Rei tak a nghah hnuah pawh a lo la chhuah loh fo avangin a awm a nuam ta lo hle mai a. A tawpa tawpah chuan pindana luh a thil awmdan chu amah ngeiin hmuh ve a tum ta a.
.
Pindana a han luh chuan a beisei loh lutuk hian hun rei tak chhung a hmuh tawh loh , a fapa bo  ngei mai chu khumah tui takin a lo muhil bawrh bawrh mai a, a sirah chuan hmeithai fanu naupang ber hmeltha em em mai chu a lo thu muhil bawk a ni.
Lal leh a hote pindan chhunga an luh chuan lalfapa leh nula chu an lo harh a, lal chuan a fapa lo let leh lawm nan ruai ropui tak a theh dawn a ni tih a puang nghal a. A lawm em avangin lal ina awm zawng zawngte chu thilpek tha tak a pe dawn a ni tih a tiam nghal bawk a.
.
Lalfapa chuan rangkachak leh tangkaraw thing zarte chu a hmuhin makti leh lawm em em hian nula chu a en a, "Ka thil hmuh hi eng nge ni? Min lo zui reng a ni maw? I thiltih avang hian ka chunga anchhia awm chu thiah a ni dawn ta anih hi. Tunah chuan nangmah avangin ka zalen ta. Heng thing zar pahnihte hi kan chenna tur lalin sak nan a hman theih ang." a ti a.
Thing zar pahnihte chu lain tukverhah a paih chhuak a, thawklehkhatah lalin nalh em em pahnih hi a lo awm  nghal a. Pakhat chu rangkachak in a ni a, pakhat chu tangkaraw in a ni.
.
Lalfapa leh hmeithai fanu naupang ber chu an innei a, lalin mawi leh nuam tak chuan hlim takin an awm zui ta a ni.

ADVERTISEMENT CLICK TUR KA NEI VE TA A, CLICK LEH CLICK LOH ERAWH I DUHTHLANNA A  NI E😍😍