EBENEZER

EBENEZER
(TRUE STORY)
.
By. Thantei_LauraSean
(20-2-18)
.
.
Tv screen hnaih thei ang berah thuin, vawi tam tak ka en tawh leh ka ennawn fo thin video ka play chu ka en tlawk tlawk a.
“Helam lo hawi rawh__Aw, tikhan a tha. Nalh lutuk__ Tlemin i kuah hnai deuh thei em?” "Tha lutuk. A kawngah kuah la."
Ka biang lum pap pap chu ka mittui ani tih ka hre nain hruk pawh ka tum buai peih lo. Tun hi a vawikhatna a ni lo va, a tawpna pawh ala ni kher lo thei bawk. Kei hmeichhe pangngai ve mai hian tih dan tur ka hre seng tawh lo chu anih tak ber hi.
.
Kawngka inhawng ri rak ka hriat rualin ka video enlai chu ka titawp nghal a. Eng thil nge thleng dawn tih ngaichangin thinphu dap dap chung hian ka thu ngawi reng a. Ka pasal tawng ri ka hriat chuan ka thutna atangin ka tho ta hram.
.
"Chaw_chaw ei siam rawh. Eben, ngui bura thu lo khan ka sawi chu ti vat ta che." ka hmel a hmuh hma hauhin min vin nghal khur khur a. Keimah chauha ka awmlai anih loh chuan ka lungngaih rukna hi tihlan loh hram ka tum ngar ngar thin nain ka thup sen loh chang pawh a awm ta fo mai. Ka thlamuanna leh ka innghahna ni thin mipa, ka hmangaih em em hi engtik lai atang khan nge mi hrohrang na tak leh kutthlak ching khawpa insumna tlachham a lo nih tak ka hre lo va, tun hun thleng hian a chhanna ka hre reng tih inhre chungin ka la inzawt nawn tluk tluk tho chu a nih hi.
.
Kan in te fel khar mai leh ka theih tawka fel fai taka ka enkawl ve thin ah hian kan hlim em em thin a nih kha. Ka duhthusam thin ang in ah chengin hma hun hlimawm tak ka beisei fo thin. Khatihlai hun kha hman tia sawi em tur chuan a la rei lo lulai lutuk.
A lungngai zawnga in ngaihtuah loh tum chung leh pangngai thei ang bera lang turin ka pasal chu chaw ei tur ka siam sak a. A mitmeng ka en chuan rui em em pawhin ka hre lo. A thutna atang chuan min en ngur ngur a, keimah ang bawkin a ngawi reng ve tho.
.
"Vawiin i hna lam a tluang meuh lo ami?" tiin ka en a, a lu min thin khum ringawt a. "A ei theih e aw. Tihian lo ei la i inbualna tur tui ka lo siam ang." min chhang leh dawn chuang lo tih ka hriat vangin ka kalsan a, bathroom-ah lutin a inbualna tur tui ka siam a.
.
Chaw a ei kham hnuah a inbual a, a hmaa inkawmngeih tak thin ang kha kan nih tawh loh vangin kei pawh mu turin ka insiam a. Tihian ngawi rengin a rawn mu ve ang a, inhawisan chungin tui lo takin ka muhil leh ngei ang. A duh hunah min kuai lettawp anga nupa nun min hmapuiin amah chiah a inngaihtuah tawh bawk. Ka bei ve ngial thin taknaa beihna awmze nei lo a ni. Hlim taka nupa nun hman chu kan hlat lutuk tawh. Social media-a thu tha tak tak leh thawnthu tha tak tak, ka dinhmun anga ding vete chanchin leh hnehna an chan dante ka chhiar chamchi a. Mahse a tam zawk chu thawnthu an ni. A takah chuan thawnthu ang maiin duhthusam tawpna a awm ve thei si lo. Tihdan tur tha nia ka hriat leh ka chhiar thinte pawh ka hmang nasa tawh! Ka pasal lakah hian awmzia a awm pawhin ka hre chuang lo. Ka rinlawk ang chiahin ngawi reng hian arawn mu a, min hawisanin puan a sin tha a, a che zui tawh lo.
.
"U Muanpui..." min chhang lo. "U Muanpui, i muhil lo tih ka hria a nia. Rilru hahna i neih chuan sawidun ang.." ka han ti leh ngawt a. Min chhan pawh ka beisei tawh tak tak chuang lo. Hetiang hun hi ka tawng tam tawh a, beiseina tlemte nei chungin ka la bei ve tak ngar ngar chu a nia!
.
"Ka mut a chhuak. Zan a rei tawh. Titi hun pawh a ni tawh lo." a ti hmuk hmuk a, a inkhuh nghal daih a. Ka beisei ang tawk vel chiah chhanna ka dawn vang chuan lungawilohna tihlan emaw titi luih talh emaw pawh ka tum ta bik lo.
.
Tunhmaa ka nun hman dan leh ka chunga thil thlengte ngaihtuahin ka mu meng ta reng a.
.
Kum 17 ka tlin hma kha chuan chhungkaw pangngai tak atanga seilian ka ni tiin ka insawi ve thin. Mahse ka nunah hian ka thlan ni hauh lo leh ka duh ngai loh, ka chunga thleng tur pawha ka ngaihtuah chhin ngai loh a thleng tlat si. Thiante nen kan titi changa kan thian thenkhat nu leh pa kara seilian ni lote nungchang mawi lo a an awm changin an dinhmun hriatthiam sak hauh lova 'nu leh pa kara seilian lo hi chuan sawi kher loha nu leh pa kara awm chunga kan hriat leh kan zir ang hi an hrelo tlat zel.' tia kan lo sawi liam mai thin ang kha sawi  ngam tur ka ni ta bik lo. Zan khat thil thuah chhungkaw kehchhia tia sawi tur kan ni ve ta tlat mai. Engmah hriat lawkna awm lova ka nu leh pa inthen thut chuan min thawng na em em a, ka zak takzet bawk a. Ka zahna ai mah chuan ka rilru natna chuan ka chhungril a tina zawk. Kar hnih chhung vel chu khawlai pawh chhuak ngam lovin ka tawm ta tlawk tlawk a ni ber mai. Class ka kal ngai lova, kan zirirtute pawhin min rawn tlawh hial a ni.
.
Kan chhungkaw keh darh vanga ka nun a chhiat ve duh lovin ka insangmar a, mite mak tih khawpa tha a nun tumin ka pen chhuak ta zawk a. Mahse a awlsam lo_A awlsam lo takzet. Ka nu leh pa inthen chhan kha mi zawng zawng hian hriain ka hmel an hmuh rual hian min nuihzat nia hriatna ka nei reng a, mihring hmel ka hmuh apiangin min nuihzat nia hriat chu thil zawng zawnga duhawm lo ber pawl a ni. Ka nu'n ka tana a dah lehkha ka chhiar nawn tluk tluk a, chu chuan tlemte in chakna min pe leh thin.
.
Hun a ral bek bek a, ka zirna lamah tan la thain ka phaktawk in kohhranah ka tal tam bawk a. Ka chhungril nun erawh a kim lo ru fo thin. Hei chu ka sawi tum ber lam a ni rih lo.
.
Kum 20 ka nih kumah U Muanpuia nen hian kan inngaizawng tan a, kum 8 zetin kan inthlau naa min dawm thiamin ka ngaihtuahna hi min hriatsak vek emaw ni ka ti hial thin. Mi tha, khawtlangah pawh mite fak rawn a nih vang leh ka laka a that em vangin rinchhan tlak niin ka hria a, chhungkaw nghet tak neih loh hlau reng thin tan chuan mi tha ber a ni ka ti lo thei lovang. Kum hnih zet kan inzui ve hnuah palai arawn tira Pathian leh kohhran hriatpuinain kan innei ve ta a. Khatih hunlai khan kei aia hlim an awm kher lovang. U Muanpuia pawh a danglam chuang lo. Keimah ang bawkin mi hlim thei tak leh min duat em em tu a ni.
.
Kan inneih atangin thla hnih a ral a, nau ka pai tih ka hriat ni chuan U Muanpuia a hnathawhna office-a a awm chu ka call nghal chuk chuk a. Ani pawh laklawh nei miah lova lo haw nghalin doctor kan pan nghal a, kan duhthusam thin thleng mek chuan hlimna avangin khua pawh min hmuhtir meuh lo chu a ni ber. Eitur tha nia kan hriat leh naupai laia tihtur leh tih loh tur, engkim kan hriat theih chin chu kan ngaihven vek a, thil dang reng reng kan ngaihtuah lo.
.
Ka naute pai thla thum a tlinna tur thla kan hman lai mekin zanah ka pumna vangin kan mu thei ta lo va. Hmanhmawh takin damdawiin kan pan a, ka naute pai lai chu ka lo chhiat fel der tawh! Na ka tihzia chu sawi ngaihna a awm lo zawk. Umuanpuia pawh kei tluk zetin a na tih ka hria. Inhnem tur chuang kan awm lo. Uluk zawka doctor-in min check hnu chuan ka chhulah bawk a awm tih an hrechhuak a. Bawk pangngai mai, paiha tha leh mai tur ang chi a lo ni lo leh zel a! Ka dam chhunga nau pai thei tawh ngai lo tur ka ni tih doctor-in min hrilh ni chuan ka khawvel hi a tawp ni maiin ka hria. Tuar dan ka thiam mawlh lo. Mangangin ka tal kual vel a ni ta ber mai.
.
Nau ka chhiat atanga thla 5 a ral chuan Umuanpuia awm dan a danglam tan a, kei pawh lungngaia indawm kun reng lovin Umuanpuia tihlawm dan ngaihtuah reng rengin ka hun ka hmang ral a. A chang chuan ka chau hluah hluah thin. Fa nei thei lo mahila nupui tha ka ni thei tho tia infuih thar reng chungin ka nung a, mihring hmeichhe pangngai ve mai hian bawhchhiat erawh ka nei pheng phung chuan ka ring.
.
Ka thian thenkhatte ka atanga Umuanpuia ngaihzawng neih thu ka hriat ni chuan ka kehchhe der a! Ka tap zan khua thak a ni. Ahmaa ka sawi tawh ang khan thu tha tak tak chhiar tur zawngin ka zawm theih ang ang ka zawm a, mahse a takah chuan thawnthu ang a lo  ni thei si lo! Mahni chunga a lo thlen meuh chuan mi dangin an rilru hahna leh an harsatna chinfelpui tura min zawhnate chhang a 'chuti chuan tirawh, chutianga tih chu a tha' tia kan inhrilh liam ang ngawt hi a lo ni ikhaw si lo! Heti kan ni chung hian beidawn erawh ka tum lo bur thin. Ka bei nasa viau emaw ka inti chungin tun hun hi kan thleng ta chu a nih hi.
.
.
"Eben, tho teh." min sawi dawt dawt vang chuan ka muhil ka harh a. Ka mutna sir chhuata Umuanpuia lo thingthi reng ka hmuh chuan ka tho thuai a.
"Titi teh ang?" a ti tawi taka. Kan pindan banga sana intar chu ka en a, zinglam dar 3! Eng thil nge han beisei tur ka hre lo.
.
"Kan nun hman dan hian min ti chau zo tawh. Hun reilote chhung chu i pa in lamah va haw phawt la, ka lo hruai leh ang che. Kan pahnih hian hun thawl kan mamawh ve ve anih hi." Umuanpuia chu khuma la thu reng chungin ka en ngawt ngawt a. A tawngkam a dam thlap a, beidawng aw ni tur chuan ka ngaihtuah phal teuh lo. A rawtna pawh hi kan tan a lo tha zawk mai thei asin!
.
"Uluk taka ka ngaihtuah hian itan pawh a chauhthlak zozai tawh a, kei pawh hi insiam that ka ngai. Hun thawl inpe lawk ang. Kar hnih vel bak a ni lovang" a ti leh a. Engtianga han chhan chi nge ka hre chiah lo. Ka chhan mai loh avang chuan min en a, rilru hah hmel tak hian a thaw halh a. "Hlauhthawnna i nei anih chuan engmah hlauhthawn tur a awm lo tih ka hrilhlawk ang che. Ka tan leh itan reilote chhung awm hran hi a tha zawk ang. Hmeichhe tha leh fel tak ini a, i ngaihtuah thiam ve tho kha." a ti leh a.
.
"Ka hlauthawng hleinem. Mahse ka tel lova mahni chauha khawsa tur chuan ka ngaihtuah deuh che a ni. Engtin nge i awm ang? Ka nu leh pate (Muanpuia nu leh pate) i fin rih mai dawn em niang?"
.
"Chutiang lam chu ngaihtuah buai angai rih lo. Ka insiam that theih nan chuan engpawh ka ti mai ang." a ti dam leh thlup a. Tawngkam tha pangngai leh dam thlupa  min biak lohna chin a rei tawh ngaihtuahin makti tur ka ni a, mahse mak ka ti miah lo. Ka pasal hi ka hrechiang niin ka la inhre fan a ni. Mi tha tak a ni tih pawh ka pawm thlap. Eng emaw changa inhau leh kut min thlak chang awm hial mah se ka thiam loh vek a ni tih ka pawm nawn fo thin. Fa ka hrinsak theih loh tlat chuan atan tihtheih ka nei tlem em hian ka hria a ni.
"Eng pawh tih i huam anih chuan awm hran kher chu a tul em ni? Kei pawhin tanpui che ka duh alawm."
.
"Duhtawk ang. Ka sawi ang chuan awm phawt ila." chhuat atang chuan a tho chhuak a, a la hma tehlul nen bathroom-ah lutin a va inbual niin ka hria. A mitmengah khan thil dang ka hmu tel niin ka inhria a, ka ngaihtuahna mai mai a nih ringin ka ngawi ta a. A sawi anga awm hran phawt chu pawm sak lo thei lo dinhmunah min dah a ni ta ber.
.
Khua a var a, ka thawmhnaw tlem a zawng ka pack a. Hun rei tak kan awmhran ka rin chuan loh vanga inkeng tlem pawh ka ni. Umuanpuia chuan min thlah thlap a, ka pa hnenah pawh thil nih dan dik tak felfai takin a sawi ka ring. 15 minutes vel zet ka pa pindanah an inkhung ngei kha.
.
Kar khat a ral a, ka lung a leng tawh khawp mai. Umuanpuia chuan min rawn be miah lo va, a zu in  thinte sim tumin a bei nasa hle niah ka ngai hmiah a, ka phaktawkin ka tawngtaipui ve reng  bawk a. Mahse, kei mimawl hian engmah ka lo hre lo.
.
Kan awm hran atanga kar hnih a tlin dawn niah chuan Umuanpuia nupui ruk thu ka hre ta anih chu! Awm dan tur ka hre miah lo. Awmze nei lovin ka nui a, ka tap a, in chhungah chuan ka tal kual tawp tawp a ni ber mai. Ka chan tawk hi lungawipui har ka ti lutuk a ni! Hetiang tawng tur hian eng thil fakau nge tihsual ka neih? Nulat tlangvalna kawngah nise ka pasal bak mipa mutpui ka nei lo va, ka pasal tan ka theihtawp ka chhuah takmeuh thin tih chu vana kan Pathian pawh khian a hria! Ngaihtuahna mumal nei thei lovin eng chen nge ka awm ka inhre lo va, tha nia ka inhriat ve nate ngaihtuah kual a sawt hek lo. Ka chunga thleng tur chu a thleng tho tho si.
.
Umuanpuia nupui nei thar chu an hlim dun zia mite ka atangin ka hre ta fo a. Mite hi ka lakah an tha lutuk  mah mah nge ka mamawh loh chanchin, min tina zualtu hi ka hre tam lutuk niin ka inhre thin.  Ka thinlung nat vanga awmngaihna hrelo nia ka inngaih hnuah Umuanpuia laka rinawm lo leh nau ka pai theih chuan loh vanga uire fo, hmeichhe tenawm tak anga min sawina ka hriat tum chuan ka rum a, ka tap thei tawh lo va, keh chhe leh tur chuang ka awm tawh lo a ni ber. Ka rinawm tih hi Umuanpuia aia hrechiang hmihring an awm lo bawk. Ka pa'n 'ngawih hi a tha e' a tih zel avangin engmah sawi lo chuan ka ngawi ta reng a. Ka chhungril erawh a va so nasa thin em!
.
Thu diklo zawk chuan hmuntin a fang emaw tih mai turin mi nikhualo enin mi tam takin min en thin tih ka hria. Ngawih hi eng nge a that zawkna? Ka dikna sawi ngam lo khawpa dawihzep ka lo ni reng em ni? he zawhna hi vawi tam tak ka inzawt nawn thin. 'Thudik chu a tawpah a langchhuak dawn tho tho." tih thu hi ka pa ka atangin a chhuak reng a, chuvang chauha ngawi thei chu ka ni bawk. 'A tawp' tia ka pa'n a sawi hun hi a thleng har ka ti lutuk thin.
.
Thil mak a thleng ta! Ka awm dan diklo nghulh thin vangin ka inentir a, khawvel thil zawng zawnga ka beisei loh ber 'KA NAU PAI THU' ka hre ta anih chu. Khawvel damdawi lam thiam ten thleng ngai lo tura an sawi chu a thleng tlat si a ni. Lawm tur ka ni bawk! Mahse thil thleng thei tam tak ngaihtuahin ka lawm ngam rih lo. Ngaihtuah tur hi a tam em bawk a ni e. Ngaihtuah tam loh ka tan a tha zawk reng reng. Ka pa, Umuanpuia, ka thiantha ber Thangtei leh kei tih loh chuan ka naupai thu hria apiangin tu fa nge ka pai tih an inrin siak luai luai dawn tih ka hrechiang em a ni. A tuartu chan ngaihtuah miah lovin an ngaihdan chhe thei ang berin min vawm hmiah hmiah dawn tih hi ka ringlawk a, ka hmelhriat ni miah lo pawh an bang chuang lo. Khawvel a nih hi tia en liam mai hi a har thin asin!
.
Ka pa a hna atangin a pension a, kei pawh naupai puar chung chuan ka thawh theih tur awm zawngin ka exam theih apiang ka exam lawp lawp a. Nau ka pai tih Umuanpuia'n a hriat chuan min hmu turin kan in ah; ka pa in ah hian a lo kal anih chu! Sawitur a hre hlawl lo. A mitmenga inchhirna lang chu kei mimawl ve mai pawh hian ka hrethiam a lawm. Kei lah ka tuar tawh zawng zawng vanga ka thinlung natnate theihnghilh tum lova hriatreng ka duh tawh zawk vangin leh mi thar anga ka nun hmang tura thutlukna ka siam tawh vangin thil mawi pawh zawn ka tum tawh lem lo. Min biakna chu a kamrul tawk chauhin ka chhang a, a hnuah kan inneih naa min dinpuitu Thangtei ka hrilh chuan 'Chhan pawh i chhang duh zawk e." min ti then a.
.
Ka fapa pian ni chuan ka tan khawvel hi alo thar leh ta. Ka fapa, khawvela naute tha berin kum khat a tlin hnuah thawnthu ang mai hian malsawmna dawngin ka phaktawk hna thawh tur ka hmu ve ta bawk a. Mi thenkhatin Pathian hnathawh, thudik tilangtu leh dawta min puhna tam tak ka sawi ngai miah lo va tihlana awm ta nia min sawi sak thin chu ka fapa in Umuanpuia a ang lutuk hi a ni. Ka lawm dawn nge ka thinrim dawn ka hre lo fo mai. Thil tha leh thalo min hriatchhuahtir tum a tam thin. Ka fapa min chuhpui tuma Umuanpuia te chhung an lo thawh tum chuan khawvela hmeichhe nasa ber an tawng tih an inhriat ka ring. Ni e, khawvela mihring zawng zawng hian kan chhungrilah a tha lam leh chhe lam kan nei theuh a, tunah chuan keimaha a chhe lam an hmu ve ta anih hi ka ti liam ta mai.
.
Tunah chuan ka fapa pawh kum 3 a tling ve tawh a, naupang fel leh ka tana hlu em em a ni. Umuanpuia leh a nupui pawh fa neilo bawkin an inthen a. Ka laka a lo awm tawh dan vanga inchhir leh  min neih leh tuma a beih nasat zia chu sawi ngai lo leh sawi tul lem lo thil ni zawk mai se. Engemawchen kha chu tawngtaipui turin rinnaah ka chak tawk bik lo va, tunah erawh ka nuna thil thleng zawng zawngte kha zirlai tha zawk zir tura ka tawn a ni tih pawm thiam tumin ka tawngtaipui leh thei ta.
.
Ka nuna ka thil tawn, thawnthu thenkhat nimai awm vang hian Pathian ropui zia leh fel taka remruat thin anih zia hretu ka lo nih phah ta zawk a ni. Mihring hian kan mangan tawpah chuan Pathian bak belh tur kan hre chuang lo. Kan chak loh lai ber hi Pathian kan mamawh zual lai ber a ni tih leh harsatna, sawi hleihtheih loh khawpa manganna kan tawh changin amah chauh hi i pan zel ang u. Kan tawrh theih baka nasa kan chungah hian harsatna a thleng ngai lo. Kan harsatna atanga tal chhuak thei turin kan Pathian hian rem min ruatsak zel thin. Hmanraw ngah Pathian kan nei hi kan va han vannei tehlul em! Ka tawn ang tawng ve palh in awm anih chuan ‘Pathian rinchhan chunga hmeichhe chakna thuruk neitu a ni tih in hriain hnehna a chang thei a ni.’ tih lo inhre ve mawlh rawh se.
.
EBENEZER - 'HEI LEH CHEN HI LALPAN MIN PUI A NI' (1 Samuela 7:12)