THE MISER AND HIS GOLD

Mipa naupang pakhat hian pawisa a khawl a, anu chuan, "I pawisa khawl chu mi tanpui  nan hmang ang  hmiang." a ti a.
Mipa naupang chuan, "Ka phal lo. Tihian ka khawl zel anga mi hausa tak ka ni dawn alawm." tiin a nu chu a chhang a.
A nu chuan, "Ka fapa, pawisa te hi tangkai taka hman an nih loh chuan hlutna nei lo, lehkha ve mai mai an nia sin. Lo kal hnai teh thawnthu ka lo hrilh ang che." tiin a fapa chu duat takin a kuah a.
.
THE MISER AND HIS GOLD
.
Source - Kids Hut Bedtime story compilation
.
Translated by - Thantei & Bawihtei(8yrs)
.
Hmanlai hian pa pakhat thilkawm em em mai hi a awm a. A rangkachak pawisa thirte chu hmang phal lovin bawmah a khung khawm vek a, nitin hian a rangkachak pawisa thirte chu hmuhnawm ti takin a en deuh deuh mai thin a.
.
Ni khat chu a in bula huante ah chuan lei a lai khuar a, a rangkachak pawisa zawng zawng chu a phum ta a. Nitin hian a pawisa a phumna thing bulah chuan kal ziahin a pawisa chu a bo leh bo loh a en dik thin a. Chiang taka a pawisa phum chu en a duh thin avangin lei a lai ziah mai a ni. A pawisa phum chu kim takin a awm tih a hmuh chuan hlim tak hian a nui vur vur mai thin a.
"Hahaha_ Ka va han hausa tak em! Hetiang zata tam rangkachak pawisa thir hi ka ta vek an nih hi." tiin ama hriat turin a sawi suap suap a. Chu thil chuan a tihlim tawk em em mai a ni.
.
Ni khat chu rangkachak pawisa a phumna huan sirah chuan mi pakhat hi a lo kal a, a kal pel pah chuan mi thilkawmpa- in a rangkachak pawisa a lai chhuak lai chu a hmu fuh ta hlauh mai a.
"Awhaw! Thing hnuaiah rangkachak a phum ru a nimaw! Khaw thim thlengin ka nghak teh ang. Khua a thim hunah a rangkachak saw ka ruksak vek dawn a ni." a ti a.
.
Khua alo thim a, rukruk hmang chuan thawm dim tak hian thing hnuaia rangkachak pawisa phumna hmun chu a pan them them. Hmanhmawh takin lei chu a lai a, rangkachak pawisa inphum chu lai chhuakin vannei inti tak hian a bawm chawp chuan a la ta daih a.
Khua alo var a, mi thilkawmpa chu a pawisa a la awm leh awm loh endik turin a huanah chuan a lo kal leh a. Hlauhthawnna nei miah lo hian lei chu a lai turh turh a. Mahse, eng thil  nge thleng ta le?
A rangkachak pawisa phum chu a lo awm ta hauh lo mai! Thinur leh makti em em hian, "Eheu! Khawiah nge ka rangkachak pawisa kha a awm tak? Khawiah nge ka pawisa zawng zawng kha?!" tiin a au ta chiam mai a. A rangkachak pawisa a phumna hmun chu a hai palh anih ringin lei chu a lai zel a, a bawm phum ruk chu a hmu zo si lo. Zau taka lei a laih hnu pawh chuan a rangkachak pawisa dahna bawm chu a hmu zo ta lo a ni.
A pawisa zawng zawng a bo tih a hriat chuan a ui em em a, a luhaiin a tlu ta rup mai a. "Tu in nge ka rangkachak pawisa ru?" tiin a tap hluam hluam a. Chutia mi thilkawmpa tap ri hluam hluam thawm an hriat chuan a thenawmte an lo tlan khawm a.
.
"Eng thil nge thleng ta? I rilru a va buai hmel em em ve?" tiin an zawt a.
Mi thilkawmpa chuan a thenawmte hnenah chuan a lei laihkhuar chu hmuhtir in, rangkachak pawisa tam tak a neih thu leh a thuhruk dan te, a bo tak dan te chu a hrilh vek a. A thenawmpa pakhat chuan, " I rangkachak pawisa te chu i hmang tawh ngai reng reng em?" tiin a zawt a.
Mi thilkawmpa chuan, "Hmang ngai lo. Ka thuhrukna hmunah hian ka dah reng a. Ka en apiangin ka hlim em em thin a ni." tiin a chhang a. A chhanna chu a thenawmte chuan mak an ti em em mai a.
.
"Pakhatmah i hmang ngai miah lo a maw?" tiin an zawt nawn a. Mi thilkawmpa chuan chhan dan tur pawh a hre tawh lo. A thenawmpa chuan, " I rangkachak pawisa zawng zawng kha hmang lo va lei hnuaia i phum daih avangin thil tangkai lo leh lungte ang mai mai a ni. I tan thil tangkai ani chuang lo bawk a, tunah chuan i lei laihkhuar kha en la, i rangkachak pawisa bawm la awm reng anga ngaiin hlim takin nui leh vur vur mai rawh." tiin a hrilh a.
A thenawmte zawng zawng chuan chu mi thilkawmpa chu an nuihzat a, a lei laihkhuar bula a thut reng lai chuan an kalsan ta vek a.
.
Kan thil neihte hman tangkai thin hi mifing tih dan tur a ni tih mi thilkawmpa pawh chuan a lo hriat phah ta a ni.