HAPPY PRINCE

HAPPY PRINCE
Translated with kan naute.
Hmanlai hian, Lal fapa lim rangkachaka siam hlim hmel tak leh nui mawi em em mai hi khawpui laili, hmun lun lai tak mai ah hian a awm a. A taksa zawng zawng chu rangkachak hmanga siam hnah in a inkhuh a, a mit chu Sapphire lunghlu pawl mawi em em mai hi a ni a. A kuta a ngunhnam ken vawnna fawng hmawrah chuan ruby lunghlu sen mawi em em mai hi  a awm bawk a. Chu khawpuia cheng mi zawng  zawng mai chuan Lal fapa lim chu an duhin an ngaina em em vek a ni.
Chhang siamtu pakhat hian a chhangphut tam tham tak mai hi a tibaw palh hlauh mai a, lungngai taka a awmlai chuan Lal fapa lim chu hmuin ‘Aww! Lal fapa lim ang maia hlim renga awm ve theih ka va’n chak tak em_ Tun atang chuan amah ang sawn ka hlim reng tawh ang’ tiin a in ngaihtuah vung vung mai a.
Nakinah chuan hmeichhe naupang leh a nu hi kawtthler ah chuan an lo kal leh a. Ice cream zawrhna bul an thlen chuan hmeichhe naupang chuan Ice cream a ei chak em avangin a nu hnenah chuan Ice cream chu leisak turin a dil a. Mahse, a nu chuan pawisa a neih loh avangin a leisak thei si lo. Chutih lai tak chuan hmeichhe naupang chuan Lal Fapa lim nui hmel chu a hmu a,
“Aww! Lal Fapa hlim anga hlim ve hi ka chak emai. Tun atang chuan Lal Fapa ang hian ka nui reng tawh ang.” a ti a.
.
Chutih lai chuan khawpui bula ramngaw nuam tak ah chuan Vamur nupa hi an awm a. Vamur pa chuan a nupui hnenah chuan “Ka hmangaih, thlasik hun hreawm tak a lo thlen dawn avangin kan thiante zawng zawng chu Egypt ram pan turin an kal vek tawh a. Egypt ah chuan Pharoah Lal in ropui leh mawi tak takte an hmu ang a, Lal in huan zau leh mawi, ropui em em ah nilum an ai der der mai dawn a ni. Thei leh theihmu tui tak tak te chi hrang hrang an duh tawka eitur a awm dawn bawk asin. An kal naah chuan kan kal ve ngei tur a ni.” a ti a.
.
Mahse, Vamur nupui chuan a lu thing mat mat chung hian “Ni lo ve.” tiin a pasal chu a chhang a.
A pasal chuan “Thlasik a zawh veleh kan hawng leh mai dawn alawm. Helai hmuna kan in leh kan khawsakna hi chu kalsan ve theih tum mai ta che.” a ti a. Mahse, a nupui chuan Egypt-a kal daih chu a duh lo tih lantir nan a lu a thing leh mai a.
.
A pasal chuan “Ka nupui duhtak, I luhlulin I a hle mai. Kei chu Egypt-ah ka kal ngei dawn a ni.” tiin a nupui chu a thlawh  san ta a.
.
Ni lenga a thlawh hnu chuan Lal fapa lim awmna khawpui chu chau takin a thleng ta a. “Ka hah tawh em mai, helai hmunah hian zanah ka riak ang a, naktuk ah Egypt panin ka thlawk leh mai ang.” tih ngaihtuah chungin a hawi kual a, Lal Fapa lim chu a hmu fuh ta hlauh mai a.
“Rangkachak milim mawi tak anih hi mawle. A ke inkarah hian zan ka riak mai teh ang” tiin mutthilh nghal tumin Lal Fapa lim ke karah chuan a awm ta kak mai a.
A muhil hman tep tawh tihah a chunglam atang hian tui mal far lian em em mai hian a lu ah tak arawn far kawrh mai a.
“Eheu! Eng thil nge ni ta? Khawi atanga lo kal nge ni?” tiin mak ti tak mai hian a hawi kual a. “Khua pawh a dur si lo va, van pawh a thiang hle si.”tiin mutthilh tum chuan a insiam rem leh a. A muhil dawn chiah tihah tui far lian tak chuan a lu ah tak arawn far leh ta kawrh mai! Mak ti takin chunglam a en a, chutia chunglam a han en chuan Lal fapa lim lungngai taka tap chu a hmu ta a. A hmaa a lu a tui far nia a hriat kha milim mittui a ni tih a hriat chuan_
“Tunge i nih?” tiin milim chu a zawt a. Milim chuan “Happy Prince (Lal fapa hlimtheia) ka ni.” tiin a chhang a.
“Happy Prince I nih chuan engvangin nge  I tah si? tiin milim chu a zawt leh a. Milim chuan “Ka damlai chuan khawpui chhunga Lal In ropui takah saw’n ka cheng thin a, khawchhunga cheng mipuite pawh an hlim vek nia ka ngaih vangin lungngaihna chhan tur ka nei lo va, ka hlim reng thin. Tichuan, ka thih hnuah ka lim mawi tak siamin helai hmunah hian min dah ta a ni. Tuna ka awmna hmun atang hian khawpuia cheng mipuite lungngaihna pawh ka lo hmu thei ta a, an lungngaihna ka hmuh hnu hian ka thinlung thir hmanga siam hi a lo lungngai ta em em a ni.” tiin Sava chu a hrilh mial mial a.
Lal Fapa limin a lungngaih chhan a sawi zawh hnuah Vamur chuan, “Eng thil nge I hmuh le_ Aw, Rangkachak Lal Fapa?” tiin a zawt a. Lal Fapa chuan “Hmun hla takah sawn puanthuitu ka hmu a, chawl miah lo va puan a thui rei tawh vangin a kut zungtangte chu a sen vekin a thisen a chhuak hial tawh a ni. A puanthuina bula khum tetakte ah a fapa a awm a, a khua a sik nasa khawp mai. Serthlum ei chakin a tap keuh keuh a, anu chuan Serthlum  pek tur a nei lova, a fapa chu lui atanga a lak tui in tur a pe ringawt a. Ka khawngaih em a ni. Vamur fel tak i ni a, ka ngunhnam-a Ruby lunghlu hi la la, puanthuitu hnenah va pe hram rawh.” tiin Vamur chu a ngen a.
Vamur chuan, “Ni lo, Ni lo. Kei chu Egypt-ah ka kal ngei ngei a ngai  alawm, helai hmunah hian ka awm thei lo. Puanthuitu in-a ka kal chuan Egypt ka thleng thei dawn lo asin.” Tiin a chhang a.
Lal fapa chuan, “Vamurte, I khawngaihna ka ngen a che, naupang saw a tui a hal lutuk tawh a ni.” tiin a ngen leh a. Chutianga a ngen leh tak avang chuan Vamur chu a in ngaihtuah vang vang a, “Aw le, a tha e. Puanthuitu in ah chuan ka kal ang.” tiin a chhang ta a. Tichuan, Lal fapa ngunhnam-a Ruby chu lain puanthuitu in lam panin a thlawk ta vang vang a.
Puanthuitu in a thlen lai tak chuan, puanthuitu chu a chauh em avangin a hnathawhna dawhkan bawhin a lo muhil a. Vamur chuan a Ruby ken chu puanthuitu dawhkanah a dah ta a ni.
Vamur chu thlawk bo  nghal mai lovin mipa naupang mutna pindan ah a lut a, naupang khawsik nasa lutuk tihreh tumin a thla a zap phar phar a.
Vamur a thlawh sawn hnu chuan mipa naupang chu lo harh in a lo dam tha ta deuh a. “Haamm.. Tunah chuan ka khawsik sa vut vut kha a reh tawh anih hi. Ka dam tawh dawn a niang.” Tiin hlim tak hian a nui ver ver a. Mipa naupang nu muhil pawh chu a lo harh a, a puanthuina dawhkan-a Ruby lo awm a hmuh chuan lawm leh hlim takin a la a, a fapa leh ama tan eiturte an lei thei ta a ni.
.
Vamur chu Lal fapa awmna lamah a kir leh vang vang a, zan a nih chuan Lal fapa awmna chu a thleng leh ta a. Lal fapa hnenah chuan, “Tunah chuan Egypt panin ka kal thei tawh ang” a ti a. Chu thu Lal fapa in a hriat chuan a tap a, a mittui a tla zawih zawih mai a.
“Hmun hla takah sawn pa pakhat hna thawkrim tak leh lungngai tak ka hmu a, amah chu thuziak mi a ni. A thawnthu ziak lai a zawh vat a ngai a, mahse chaw ei tur a neih loh rei tawh vangin a chau em em a. Zanin chauh chu mi lungngai tak tanpui tur sawn I awm leh hram thei ang ngem?” tiin Vamur chu a zawt a.
Vamur chuan, “Aw le. A tha e. Mahse zan khat chauh chu ni rawh se. Nangmah chei nan chea an hman Ruby dang hi ka la leh dawn em ni?” a ti a.
Lal fapa chuan, “A va lungngaihthlak tak em! Tunah chuan mi hnena pek tur Ruby ka nei tawh lo tlat mai. Mahse ka mit hi Sapphire lunghlu thami a siam a ni a, ka mitmu pakhat hi la chhuak mai rawh.” a tih chuan Vamur chuan, “Ni lo, Ni lo. Chu thil chu ka tithei lovang!” ati vat a.
Mahse, Lal fapa chuan, “ Ti turin ka duh che a ni. Ka mitmu pakhat hi lachhuak rawh. Chu chu ka thupek anih chu.” a tih tlat avangin Vamur chuan Lal fapa mitmu chu la chhuak in thuziaktu in panin a thlawk leh ta vang vang a. Thuziaktu in a thlen lai tak chuan thuziaktu chu a riltam lutuk tawh vang leh vawt a tih em avangin chau tak hian nikhawhreloin a lo awm reng mai a.
Vamur ngilnei tak chuan a lunghlu ken chu thuziaktu dawhkanah dahin a bul hnaia thingtang ro chu a lakhawm a, in chhung a lum theih nan mei a chhem sak hnuah Lal fapa awmna hmun panin a thlawk leh ta vang vang a.
Zan a lo nih chuan Lal fapa bul a thleng a, Lal fapa chu lungngai tak mai hian a mittui a tla leh ta zawih zawih mai a.
Vamur chuan “Eng thil nge  ni ta Lal fapa?” tiin a zawt a. Lal fapa chuan, “Kawtthler lun lai tak ah sawn hmeichhe naupang nawhalh zuar khawngaihthlak tak mai a tap keuh keuh a. A nawhalh zawrh te chu kawngsir tuiluankawr-ah tla darh vekin a zawp chhe zo vek anih saw. Tunah chuan mi tumahin an lei sak duh tawh lovang. A nawhalh hralhna pawisa keng miah lova in-a a hawn chuan a pa’n thinrim takin a hau ang tih a hlau em em a ni. Vamurte, khawngaihtakin ka mitmu pakhat hi la chhuak leh la, saw hmeichhe naupang khawngaihthlak tak saw va pe rawh.” a tih chuan Vamur chuan, “Ni lo, ni lo! Ka tithei lovang. I mit a del tawh mai dawn asin!” a ti a. Mahse, Lal fapa chuan “ Ti ngei turin ka duh che a ni.” a ti leh ta tlat a.
Tichuan, Vamur chuan Lal fapa mitmu chu la chhuakin hmeichhe naupang awmna lam chu a pan ta vang vang a.  Sapphire lunghlu hmeichhe naupangin a hmuh chuan a hlim em em mai a. Hlim leh lawm taka zuang chungin in lam panin a haw ta a ni.
.
Vamur chu Lal fapa awmna hmunah a lo let leh a. Lal fapa bul a thlen chuan Lal fapa chuan, “Ka thian, tunah chuan Egypt panin I kal thei tawh ang.” a ti a. Mahse, Vamur chuan, “Ni lo ve, ka thian duhtak. Egypt panin ka kal lovang. Helai hmunah hian i bulah ka awm ang a, engmah I hmuh theih tawh loh avangin i mitah ka tang dawn a ni.” a ti a.
Tichuan, Vamur chu Lal fapa bulah chuan awmin nitin hian khawpui chhungah a thlawk kual a. Tanpui ngai leh mi rethei te, mi khawngaihthlak tak tak a hmuh chanchin chu Lal fapa hnenah a hrilh ta zel a. Chutiang mi khawngaihthlak chanchin Lal fapa in a lo hriat apiang chuan ama taksa chei nana an hman rangkachaka siam hnah te chu thlawn tirin khawpui chhunga tanpui ngaite hnenah a semtir ta zel a. Ni reilote chhungin Lal fapa taksa chei nana hman rangkachaka siam hnah te chu an thlawn zo ta vek a. Lal fapa lim chuan mawina reng reng a nei ta lo! Thir-a siam rawng buang mawi lo tak leh vawt thlur mai chauh a lo ni ta a ni.
.
Thlasik khua chu a vawt zual zel a, hun hreawm tak a lo thlen tak avangin Vamur chuan thlasik khaw vawt lutuk mai ah chuan a dam khawchhuak zo dawn lo tih a inhriat avangin Lal fapa hnenah chuan khur beuh beuh chung hian, “Ka thian duhtak, tunah chuan ka kal a hun ta.” a ti a. Lal fapa chuan, “A tawpa tawpah chuan Egypt-ah I kal dawn ta a ni maw?” tiin a zawt a. Vamur chuan “Egypt-ah ka kalsan dawn vang che ni lovin ka thihsan tep tawh che avangin ka kal a hun ta tih ka sawi anih chu. Thih te chu a hlauhawm hleinem, muhil ang chauh ka ni mai dawn ani lawm ni. Mahse, ka kal hmain ka fawp thei che ang ngem?” tiin a zawt let ve ta thung a.
Lal fapa chuan, “Min kalsan anih chuan I tellovin lungngai takin ka awm leh dawn ta anih chu.” tiin lungngai tak mai hian a mittui a tla zawih zawih a. “I duh ang tak chuan i kal hmain min fawp ta che.” a ti a. Vamur chu Lal fapa darah fu in Lal fapa biangah chuan a fawp a. A fawh zawh veleh leiah tla thlain a thi ta a.
Thawklehkhatah thawm ring tak mai, thil keh ri chhuai ang hi a lo ri a. Chu thawm lungngaihthlak tak mai chu Lal fapa thinlung keh ri a ni!
Khua alo var a, khawchhunga roreltu lal tak mai chu motor ah chuangin Lal fapa lim chu a motor nalh tak mai chuan a tlan pel a.
“Chu milim chu a chhia in a va han mawilo em em ve! A ke bulah khian sava thi tawh a awm lehnghal anih hi! Rang takin khi milim khi vaw chhe vek ula a aiah ka lim mawi tak dah zawk rawh u.” a ti khur khur mai a.
Darkar reilote a ral leh hnu chuan roreltu tana hnathawktute chuan Lal fapa lim chu an vaw chhiain a thinlung keh them pahnih chu an chhar a, Vamur thi tawh ruang nen chuan bawlhhlawh bawmah an paih ta daih a!
Chutihlaitak chuan Van-a Pathian-in a vantirhkohte hnenah, “Khawvela thil hlu ber pahnih ka hnenah hian han la rawh u.” a ti a. Vantirhkohte chuan Lal fapa thinlung keh them leh Vamur ruang chu chharin Pathian hnenah an pe a. Pathian chuan a vantirhkohte hnenah chuan, “Thil tha tak inti a ni. In thlang thiam hle mai. Tun atang chuan  he Vamur hi ka vanram-ah hian mawi takin a zai reng tawh ang a, Lal fapa pawh hi ka bulah nuam leh hlim takin a awm tawh ang.” a ti a.
Tanpui ngai tanpui thintu leh mi retheite khawngaiha tanpui thintu chu Pathian-in malsawmna a vur thin a, an thih hnuah pawh Vanramah nuam takin a awmtir dawn a ni.

 (Source – Kids Hut Bedtime story Compilation.)

STORY THAR NEN KA LO LET THEI ŢEP TAWH E😉