THE LAZY HORSE

THE LAZY HORSE
Source - Moral story for children
.
Translated by - thantei
.
Mipa naupang pakhat hian hmuhnawm ti em em in cartoon a en a, tlai lama tihzawh  vek tawh tur a homework pawh pakhatmah a la ti lo a ni. A tv enna bula a nu a lo kal chuan, "Nu, ka homework min tihpui thei angem?" a lo ti a. A nu chuan, "Timmy, tunah zanriah ei a hun tawh a, i homework ila ti miah lo a maw?" tiin a chhang a. Timmy chuan a nu chu a chhang lo. "I homework i tih loh chuan in zirtirtu a thinur ngei ngei dawn tih i hriat ka ring." a nu chuan a ti leh a. Timmy chuan, "Ka cartoon enlai hi a zawh veleh ka ti dawn alawm. Mahse khawngaihin min tihpui la, chuan, ka tizo vat dawn alawm." a ti leh a.
.
A nu chuan, "I school ban veleh tv i en char char a, tv i en hma khan i homework chu i tizo hmasa vek tur a nia sin." Timmy nu in chutianga a tih  veleh chuan Timmy chuan, "Nu, zing atang khan ka kut hi a na a, chuvang chuan ka chawl lawk alawm. Anih chuan ka room-a ka bag leh ka pencil min laksak thei angem?" a ti leh zat zat a.
A nu chuan a fapa in chhuanlam a siam zung zung mai chu mak a ti ru ta deuh a, a fapa chuan nun dan dik leh ngaih pawimawh hmasak tur a hriat theih nan eng thil nge a tihsak dawn tih a ngaihtuah ta roh roh mai a ni.
.
Eng thil nge a tih dawn a ngaihtuah chhuak ta. Timmy room-ah a kal a, a bag atang chuan a lehkhabu lachhuak vekin lukham hnuaiah a dah thukru ta daih a. Chutiang a tih hnu chuan bag ruak keng chungin Timmy awmna lamah chuan a kal leh ta a ni.
.
Timmy chuan bag chu lawm takin a la a, a homework tinghal mai lo chuan cartoon bawk chu a en leh ta rih a. A cartoon en a tawp hnu chuan a bag chu a hawng a, a bag chhungah chuan a lehkhabu chu a lo awm ta hauh lo mai.
"Ehe! Ka bag-ah hian ka lehkhabu a awm miah lo, school-ah ka theihnghilh a ni ngei  ngei ang. Engtin nge ka tih tak ang aw? Kan zirtirtu hnenah engtin nge ka sawi tak ang?' tiin a mangang ta hle a. Chutihlai chuan a nu chuan a lo enru reng a, a fapa bulah lo kal hnai lehin a lehkhabu chu a pe a, "Timmy, i lian ve tawh a, i mawhphurhna dik tak i hre ve tur a nia sin. Engpawhnise, tunah chuan i homework chu han ti phawt la, a lehpekah chuan i fimkhur tawh dawn nia." a ti a. Timmy chuan a nu thusawi awihin a homework chu a ti ta thuai thuai a.
.
Zanah mut hun a lo nih chuan a nu chuan Timmy chu thawnthu a hrilh ta a ni.
.
.
THE LAZY HORSE
.
Hmun hla tak maiah hian sumdawng ngilnei leh thawkrim tak mai hi a awm a, chi a hralh thin a. Chu sumdawng chuan Sakawr thatchhe tak mai hi a nei a, a sakawr chuan hna thawk peih lovin pumpelh dan a zawng tang tang thin a ni.
Sumdawngpa chuan a sakawr chu an khaw thenawm khawpuia hralh tur chi a phurhtir thin a, nilengin ke in an kal ngat ngat thin a ni.
Ni khat chu sumdawngpa chuan a chi hralh turte chu bag-ah a khung khawm a, a sakawr thatchhe taka muhil thlurh thlurh hnenah chuan, "Tho rawh le. I hnungah khan heng chi bagte hi ka lo phurhtir ang che. Lui lian tak piaha khawpui ah sawn i va hralh teh ang." a ti a.
.
A sakawr chuan, "Vawiin chu ka chau lutuk a ni. Engatinge nitin hna ka thawh angaih bik!? Nilenga hahdam taka mut veng veng ka chak hle asin. Mahse heng chi bag rit tak takte hi ka phurh a ngai si" tiin a phun nung nung a. Peihlo tak chung hian a tho chhuak a, apu chuan a hnungah chi bag chu dahin a phuarbet mawlh mawlh a. A phuarbeh zawh vek hnu pawh chuan sakawr chuan kal a tum eih lo.
.
"Khai le, ka sakawr, kal tan rawh le. Lui chunga lei(Bridge) i kan chhungin ka eitur ka lo pack ang e." a tih hnu chuan sakawr chu a kal ta chhut chhut a.
.
Zawi nen nawn tak mai hian Sakawr chu a kal zel a, a pu sawi lei kan tura a kal lai chuan tihpalh thilthu hian a ke a rap tleuh a, luiah chuan a tla ta bawrh mai a. Tuia a tlak avang chuan a chi phurh chu tuiin a chiahzawp ta a.
Lui atanga a chhuah hnu chuan a bag phurh rit tak chu a lo zang ta vek mai a. Sakawr chuan makti tak hian a bag phurh chu a en a, tuia a tlak vang khan a chi phurh chu zawp ralin a zang ta vek tih a  ngaihtuah chhuak ta a.
.
A chi phurh lo zang ta vanga lawm taka nui vur vur chung hian tihian a ngaihtuah a, "Wow! Thil tha tak anih dawn hi. Tuia ka tlak apiangin ka chi phurh hi a zawp ral anga, tichuan bag rit tak tak hi a lo zang ziah tawh dawn a ni. Thil rit tak tak ka phurh a ngai tawh lovang. He thil hi ka tih fo angai tawh dawn a nih hi, ka pu in min lo en reng loh ka beisei." tiin a kal ta turh turh a.
.
Nakinah chuan a pu a lo thleng a, khawpuiah an chi phurh chu an hralh ta a. Chi an han buk chuan in atanga a phurhchhuahtir rihna zatve zetin a lo zang reng mai! Sumdawngpa chuan a hma khan a lo chhut sual palh anih ringin chi tuia inchiah ral lo tlemte chu a man zatve lekin a hralh a, a sakawr nen chuan a chenna in panin an haw leh ta a.
.
Zanah an mu a, khua alo var leh chuan sumdawngpa chuan chi bag chu sakawr a phurhtir leh a, a eitur chaw a fun leh ta bawk a.Chutia a chaw tur a fun lai chuan a sakawr chu hma lam panin a kal zel a, a pu lo thlen hma chuan lei chu a thleng leh ta a ni. Lei a thlen leh rual rualin Sakawr thatchhe tak mai chuan, "Ka pu lo thlen hmain hetah hian ka tlu der anga, Luiah hian ka pil leh ngei tur a ni." tiin a ngaihtuah a. A ke chu rap pial luiin tuiah chuan a pil leh ta bawrh mai a. Rang tak hian tui atang chuan chhuakin chi zawp ral chu a en a, fing inti tak hian thawveng takin a thil phurh chu a kalpui vawk vawk a.
.
A pu a lo thleng a, khawpui ah chi chu an han hralh leh ta a. A hmaa mi ang bawkin chi chu in atanga an chhuah lai ai khan a lo zang leh vek tawh. Sumdawngpa chuan a chi lo zang leh ta vek chu makti takin a en ta reng a.
.
Nitin hian sakawr chu leiah chuan tlu luiin tuiah chuan a inchiah pil ta ziah a, chuvang chuan a chi phurh pawh a zang zual telh telh mai a ni. Chutiang hlira a tih ziah hnu chuan ni khat chu sumdawngpa chuan a sakawr chu a zuiru ta a, thingbuk phena biru chungin a sakawr chu a enthla reng a. Sakawrin lei a thleng a, amah hmutu an awm leh awm loh a en hnuah tuiah chuan a tla lui leh ta bawrh a. Thil thlen dan sumdawngpain a hmuh chuan mak a ti em em a, "Aw, he sakawr thatchhe tak hi zirtirna ka pek thuai angai dawn anih hi." tiin engmah thleng lo ang mai hian sakawr awmna chu a pan ta a.
.
A tuk khua a lo var leh a, sumdawngpa chuan chi bag ah chuan chi aiah lapua(cotton) a dah ta thung a. Sakawr chuan a pu thiltih chu engmah a hre lo. A pu in a hnunga bag a phuarbeh zawh hnu chuan khawpui panin a kal leh ta a, a bag phurh chu nidang aiin a zang riau hian a hria a. Tichuan, a kal zel a, lei a thlen chuan tlu lui lehin tuiah chuan a pil leh ta bawrh a.
.
Fing inti taka nui sang chung hian tui atang chuan a chhuah a tum a, mahse eng thil nge thleng ta hi! A bag phurh chu a hma aiin a let hnih vel zet hian a rit zawk ta tlat mai. Makti em em hian tuiah chuan a inchiah nawn leh a, a inchiah nawn tam poh leh a thil phurh chu a rit zual ting mai a. A bag phurhah chuan chi ni lovin lapua a awm tih a hre silo.
.
"Aw, ni lo, ni lo. Eng thil nge thleng ta hi? Ni dang nen a va inang lo em, a rit lutuk_a rit lutuk. Ka hnung te hi na them thum mai." tiin a te ta chel chul mai a ni.
.
Tichuan, harsa takin lui atang chuan a chhuak a, chau leh hah takin lei chu a kan ta tuih tuih a. Thui lote a kal a, hah lutuka thaw hlui hlui chung hian a chawl a. A bag phurh chu a rit telh tleh mai bawk a. Nakinah chuan a pu sumdawngpa kha a lo kal a, hah taka a sakawr lo thaw hlui hlui chu enin a nui a.
.
"Ka sakawr, kei hi i pu ka ni a, i hna chu chi bag tha taka phurh kha a ni. Hah takin hna ka thawk a, hna tawk lova ka awm theih nan chhuanlam ka siam ngai lo va, hahdam ka duh vang leh hnathawh pumpelh ka duh vangin midang ka bum ngai hek lo. I hnathawh tur pumpelh i duh vanga min bum vang khan zirtirna ka pek che angai ta a ni kha. Tunah chuan hnathawh peih loh vanga mi tihder leh chhuanlam siam i sim tawh ang chu. Tinawn tawh reng reng suh ang che." a ti ta a.
.
Chumi hnuah chuan Sakawr chuan a zirlai zirin hna a thawh peih loh vanga mi dang tihder leh chhuahlam siam a chin thinte chu a sim ta a ni.