GABO YAMAN - 16

GABO YAMAN
CHAPTER – 16
Thantei_LauraSean
.
.
Boruak a vawt ver vawr khawp mai.
.
"Tunah vur tlengna hmunah kal i duh angem? Boruak a vawt deuh mah mah mai thei a, i duh chuan naktuk ah pawh kan kal thei a."
.
"Naktuk ah kal zawk ila."
.
"Anih chuan zanin chu hun nuam tak hmang ang aw." awmze nei zetin min melh rulh a, a fiamthu a ni tih ka hria.
.
"Tehreng mai." ka tih chuan min rawn pan a, min man hmain ka tlan sawn vat. In chung chhohna a ka tlan chho chu thui ka tlan hman lo. Ka dulah min rawn kuah a, min chawi kang nawl nawl mai. Chhuat a min nghah leh chuan thil dang reng reng ngaihtuah lovin hlim takin ka nui tih ka inhrechhuak chiah. Gabo pawh a ni ve tho. Kan inhriat tantirh atang khan tun ang taka engmah dang ngaihtuah miah lo a hlim tak leh  nasa taka kan nuih dun hi a tam lo.
.
Nui hmel la pu reng chungin hnai takah min en a, ka sam a zut hauh hauh bawk a. A mitmeng thuk raih leh hlimna vanga lang nungsar atang chuan ka mit ka lasawn thei lo. A awmah ka kut pahnih nghatin kan inen ta vang vang.
.
"Ka lawm e!" a tih chuan engvanga lawmthu min hrilh nge anih tih ka hriat loh vangin ka nui ri hak a.
.
"Tinge?"
Min chhang mai lovin min la en reng. Ka kut chuan a nghawngah ka vuan a, a maimitchhing ta daih. A nui hmel a la reh lo thung. A rawn meng leh a, rawn kun hniamin hnai lehzual hian min en a.
.
"Nang ka nuna ka neih che avang hian ka hlim a ni."
.
"Ohh! Gabo." ti sapin ka kuah a. A aw a thutakna lang chu ka hria a, ka thinlung a hneh tak zet a ni. Kei pawh amah ang chiah hian ani ka nuna ka nei hi ka hlim em em. Tawngkama sawifiah theih rual loh khawpa nasain ka hlim anih hi.
.
Kan inthlah a, in chung lamah kan thawmhnaw hak thlak turin kan chho dun a.
Ka thawmhnaw tur lo awmsa ho chu ka tawk chiah chiah vek mai. Engtin nge ka hak tawk chiah tur hi a lo  hriat theih zawk ni. Ka inthlak zawh chuan darthlalangah in enin ka nui sak a. Pindan kawngka arawn kik chuan ka chhang vat. Ka inthlak fel tawh tih min hmuh chuan rawn lut lovin kawngka ah a ding a, min nghak tih ka hrethiam ve mai.
.
In hnuaiah chhuk lehin hot chocolate ka siam zawh hnuah mei chhemna bula sofa-ah chuan inkuah chialin kan thu dun a. Kan awm dan chu romantic movie-a ka en thin ang mai hi niin ka hria. Eng eng emaw sawiin kan titi dun a, engtiklaiin nge ka mutthilh ka hre miah lo.
.
Lum ka tih em vangin ka harh hlawl a. Thil engemaw in min delh  niin ka hria. Ka puansin lai chu hlim mai ka han tum chuan ka hlim thei der lo. Harh chiang deuhin ka meng ta chauh a. Gabo chu ka sirah mu in a ban chuan ka awm zawnah min kuah a, ka ke lamah min khan bet tlat bawk. Lum ti lo chi ziazang ka lo nih loh hi. Tlema inher rem hretin amah hmachhawn zawng chuan ka mu a, a hmel tha zet chu duh zetin ka en ta reng a.
.
A chal, a mithmul, a mit a chhing a, a mithmul dum hlapin a mit a khuh te. A hnar,a hmui. Ka kut dinglam la chhuakin a hmai zawnah ka phar a, a la mu tui hle tih aniang engtinmah a awm lo. Ka kut chu dahthla leh ta mai lovin a hmai chu ka khawih a. A sam fai sur ka khawih chuan arawn che ta tulh tulh. Rang lutuk tak maiin ka kut chu ka lasawn vat a.
.
"A pawi lo. Khawih rawh. Nuam ka ti." a tih chuan ka hmai a sa deuh pawp pawpin ka hre hial. A lo muhil miah lo anih hi. Arawn meng a, nui sukin amah hnaih lehzual tur chuan min kuah bet a.
.
"Min kuah ve rawh." mutchhuah hmel zeta a tawng chu a sexy tak zet! Keimah zawk hi ka ngaihtuahna a kal dik dawn lo tlat!
.
Rilru timru leh inveng deuh tak chungin ka kuah let a. Ka mut a chhuak tawh lo nasa. Gabo chu a muhil leh mai niin ka hria. A awmah ka hmai phum kakin ka maimitchhing vang vang a.
.
"Gabo_"
"Dar 8 a pel tawh a nia."
"Hmm_"
"Gabo_"
"Tihian la mu rih ang. Dar 10 velah kan chhuak dawn nia."
Ka chhipah min fawp zauhin a mu rem a, a kut chuan ka hnungah min chul hauh hauh a. A kut che chu a zawi tial tial a. Kei pawh mak takin ka muhil ve leh mai bawk a.
.
.
"Good Morning!"
.
Ka harh hlawl. Gabo chu khum sirah thuin a lo inthlak vek tawh. A inbual tawh tih hriat tak hian a sam a la hnawng chap bawk.
"Tho tawh rawh le."
.
Khum bula dawhkante ah chuan no a inhung khu hlat hlat tih ka hmu chiah. Ka kutah min vuanin min pawt tho a.
.
"Heihi enge a?"
.
"Tui lum anih kha. Zingah i in ziah tih ka hria alawm."
.
"Ka lawm e." tiin ka nuih sak a. Ka lamah rawn awnin ka hmuiah min fawp zauh. "Min duat sual zo vek dawn anih hi." ka tih chuan engmah sawi lo a nui sukin ka biangah min khawih leh zauh a.
.
"Breakfast ei zawh hnuah kan chhuak dawn nia."
.
.
Ka inbual hnuah ka inthlak fel a, breakfast ei turin inhnuaiah kan chhuk thla a.

Kan thlenna hmun kan chhuahsan chuan dar 10:10 vel chiah a ni. Ni a lang tho nain a sa na lo khawp mai. Vur tlengna tur hmanrua nen kan inkeng bawr phian a, kan thitih tur ngaihtuahin ka phur hle.
.

.
Kan kalna tur hmun kan thleng a, kan thuam inbel kimin vurah chuan kan tleng a. Vur hmanga infiamna awm thei chi hrang hrang chu kan tikim khawp mai. Gabo en chunga hlim taka ka nuih lai reng pawh chuan 'hetianga hlim leh lungkham nei miah lo hian ka damchhung hun hmang thei ila.' tih hian ka rilru a luah reng mai.
.
"Lo inring rawh le." tih ri ka hriat chuan ka tlu nghal ni maiin ka hria. Min hnaih taka Gabo nui ri  ka hria a, vurah chuan kan let tawp tawp tih ka hre bawk. Gabo nghawngah ka kuah a, thil dang zawng zawng theihnghilh vekin hlim tak hian kan rak ta chel chul a.
.
.
ZURI
.
"A ni lo! A theih loh! A_THEIH_LOH!"
.
Ka rak tuar tuar a. Heihi ka ruahmanna ah a tel lo. A thleng tur a ni lo, a thleng thei lo! Chhuatah thu tungin ka thinurna nasa lutuk thunun tumin ka mal ka hmer ngat ngat a. Ka thinurna thunun thei tur khawpin ka inhmer na thei lo. Ka tho thut a, ka tha neih zawng zawng sawmkhawm in bang chhah zet ah chuan a sir zawngin ka insawh nghek nghek a. Ka chauh hnep hnu chuan ka thinur lutuk pawh a zia ta! Ka taksa na chuan min chhawk reilo lehpek kher mai.
.
Ka maimitchhin rualin Argyros hmel ka mitthla ah arawn lang nghal a. A tir atang khan amah hnaih theih nan hian ruahmanna ka siam uluk tak zet asin! Tunah nasa taka ka beihna kha a thlawn ang maw? Chu pawh Mia Garcia, mihring nunna nei zawng zawng zinga ka mi huat ber vang lehnghal in. Argyros hian ka tan ni lo, Mia tan hian engkim a chhui chiang zawk dawn tih ka hriat ni atang khan amah lehkhalh dan tur ngaihtuah reng reng in zanah pawh ka mu ngai lo.
.
Ka thu phuahchawp zawng zawng chulmam leh tur khan sum ka hmang nasa lutuk. Ka finkhalh hleithei lo chu anih tak ber hi. Hetiang mai mai hian ka awm thei lo. Ka awm dawn lo hrim hrim. Mia_ Mia hian ka chanpual tur apiang min chhuhsak thin. A tleng tawh lovang. He mihring hi ka dahbo dawn_ Engvang pawhin ka dah bo ang. Argyros hi ka ta tur liau liau ani bawk. Amah vang hian Seattle beach House bulhnai tuipui ah khan ka thi thelh anih kha!
.
Ka bultan dan a fuh tehreng nen Mia a lo tel ve atang chiahin engkim a buai leh zo ta vek anih hi. A pindan thuhrukah khan engvang mahin ka lut nawn thei tawh dawn lo tih ka hria. Kha hmuna ka lut leh anih loh chuan hmanraw tha uchuak ka nei thei tawh lo. Ka mawl anih hi, mi mawl ka ni! Engvangin nge khang a note bu te kha ka dah let! Kawl ila ka tan thil a awlsam ni mai tur. A unaupa lak tlak loh zet Jose Mas, engmah sawi thei tawh lo leh hmuh tur awm tawh lo tal hi ka hmang tangkai anih loh chuan enge ka tih tawh chuan ang. Hei lo pawh hi ka la ngaihtuah chhuak leh dawn khawp. 'NGaihtuah rawh, ngaihtuah rawh_'
.
Ka ngaihtuahna ka sawrbing a, ka tihziah thin angin ka lu ah chuan ka theihtawpa na hian ka beng pawp pawp a. Heti hian ka ngaihtuahna a kal ding thei deuh!
.
Engemaw chen hnuah engmah ngaihtuah chhuak chuang lovin Argyros mut thinna pindanah ka lut a, light ka off hnuah a khumah chuan ka thu a. Engkim bul intanna bawk ka ngaihtuah let leh ta.
.
Kum 14 ka pum ni chiah a ni a, school ka kalpui thin thian thenkhatte nen a ruka chhuakin Bar-ah kan kal a. Chumi tum chuan kan piah hla deuh hleka mipa, pa lian tak ding chuan ka mit a la hle. Kum tling anga insawi a Bar-a lut thei chauh kan nih vangin kan duh ang tak pawhin kan chevel ngam chiah lo. Zu ka in deuh nual hnu chuan kan piah a mipa chu ka pan a. A bul ka thlen hmain hmeichhe pakhat hian min rawn dang chat a.
"Argyros duhlai, kal tawh ang le." a tih ri kha ka la hrereng.Kha tlangval ngeng tak khan min hip a, ka zawng ru reng thin anih kha.
.
Khata tang khan vawikhatte pawh Argyros hi ka theihnghilh tawh lo. Ka duhthusam zawng zawngah min chhanchhuaktu lal fapa ah ka tantir reng thin. Vawiin ni thleng pawhin! Ka duhthusam hi vawikhat chauh pawh hlawhtling lo turin ka la ngaihtuah ngai eih lo. Mia vanga chance ka nei tih ka hriat ni tluka hlim ni kha ka nei leh tawh rih bawk!

Ka nu, mahni hmasialnaa khat vang hian ka khawvel hi hremhmun ah a chang a, hremhmun hreawm tak ti ziaawm turin ka duh dana ka nun leh ka duh apiang ka tih hi sual a nihna ka hre hek lo. Ka nu khan min ngaihsak ngai lo a, min ngaihsak ka duh vanga ka thiltih thin zawng zawngte kha ka hre seng tawh lo.
.
Sum um ta reng reng chuan mi nu lan ngatin pasal min neihsan a. A nawmsakna tur anih phawt chuan fahrah chawmna in-a ka awm a pawi sa hek lo. Pasal a neih atanga kum li chhung chu kha fahrah chawmna, hmun rapthlak leh hreawm takah khan min kalsan a. Tuman min ngaihsak ngai lo. Mahni ka invenhim theih nan leh reilote tal ngaihsak ka hlawh ve theih nan a tul apiang ka ti mai a. A rei deuh hnu phei chuan nuam ka ti ta hle bawk. Tun thleng pawh hian heihi chu a la ngai reng. Ka tihtur tak ka ti mai thin anih hi!
.
Fahrah in-a kum 4 ka awm hnuah ni khat chu ka nu leh a pasal te an rawn kal a, min la chhuak tawh dawn tih an rawn sawi a. Min enkawltu nu lawm hmel ka hmuh khan ka chhungril a so bulh bulh thei. Ka awm loh  vangin a hlim dawn niah a inngai aniang chu. A tum angin a thawveng chai lovang. Ka thawmhnaw neih ang ang min pack sak lai chuan ka khum hnuaia rei tak ka dah tawh Acid bur chu la chhuak in a chhin ka hawng a. Khumah lawnin ka khum chunga ka thil khai lak tum ang tak hian ka zuang a, min enkawltu nu hmaiah ka acid ken chu ka tihbuak a. A rak thawm ka hriat chuan ka nui ru var var. Ka awm loh vanga hlim tur nia a inngaih vang khan ka pawi a sawi a ni. A sawi tlat!
.
Ka nu leh ka pahrawn bulah ka cheng ve ta a. Nuam tinreng chen tur ka nei chu awmngaihna ka hre meuh lo. Mak takin ka pahrawn chuan min ngaihsak ve hlauh thung. Ka nu erawh a la ngai reng. Ka pahrawn chuan fanu leh fapa a nei tih ka hria a. Ka hriat phat atangin ka pahrawn ro zawng zawng khawm vek tumna rilru ka nei nghal a. Ka phu ve reng vanga chang vek tur ka ni. Achhan chu ka pahrawn hian a nupui hmasa a ngaihsak loh bakah a fate pawh engatanmah a ngai lo tih ka hre ru khiau a. In chunga pindan inchei nalh thlarh chu ka pindan atan ka duh tih ka sawi pawhin ka thu an hnial ngam lo a, pindan ka duhtawka ka chei hnuah a chhunga bungrua awm zawng zawng pawh pindan dangah ka dah tir nghel vek.
Ka la hrereng. Mia Boarding School atanga arawn haw ni kha. Kan vawikhat inhmuhna ani a, ka ngaina ngai dawn lo tih a hawiher atang khan ka hre vek. Hreawm a tuar theih nan ka theih theih ka ti reng bawk anih hi.  Tunah ka mipa duh berin a hnaih a, a hnaih mai pawh ani lo. Nupui atan a sawm dawn tih min hrilh lai hmel kha ka theihnghilh tawh dawn lo. Argyros hian Mia Garcia hi a hmangaih tur ani lo bur.
.
Argyros lukham kham thin chu kuahin ka mu a, ka bula awm anga ka ngaihtuah chuan nuam tihna in ka khat!
.
“Mia bulah ka kaltir lovang che. Argyros, ka ta chauh ni ang che. Ka ta chauh!”
.
Mia note ka hmuh zara ka thawnthu phuah chawp a hman tlak tak loh vangin hmanraw dang ka mamawh. Thil dangah ka buai lo. Argyros hnena fiahna ka pek zawng zawng kha a tak vek a ni. Ka chanpual min chhuhsak te, a mipa lo kawp tawhte nen lam khan thudik a ni vek. Hmeichhe tenawm bula Argyros a awm hi ka enliam dawn therte lo ve.
.
Ka thu chhuak hluai a. Ngaihtuah chhuah ka nei! Ka thil ngaihtuah chhuah tawh zawng zawngah chuan a la tha ber hial ang. Agryros ka hmuh leh hunah he bomb hi tipuak ta ila?
Ka awm hle hle thei lo. Hlim zetin khum atang chuan ka chhuk a. He in Argyros min chentirna in ngei pawh hi ka ta a la ni ngei dawn. A vaiin! A VAIIN! Ka nui ring lutuk chu keimah pawh ka inthlahrung deuh zawk e a!
.

He ka thil ngaihtuah chhuah hi lawmna hun ka’n hmang phawt ange aw!
.
Ka phone phawrhin number ka hmet chhuak a, ka call  nghal a.
.
“Hey, Jude. I thiante lo hruai la, zanin chu nuam deuhin hun hmang teh ang.”
.
Ni dang ang bawkin Jude chu a phur lehpek. He mimawl pa hian engmah hre hek lo le! Amah ang chiaha mimawl dang lo hruai turin kan hrilh nghe nghe teh ang!
.
“EvaCoo pawh lo hruai rawh! A duhzawng tak ka nei a nia.”
.
“30 minutes hnuah kan lo thleng ang.”
.
“A tha e. Hetah engkim ka nei a nia.” phone off in hahdam thei ang ber hian  sofa-ah ka mu ar ar a.