GABO YAMAN - 13

GABO YAMAN
CHAPTER – 13
Thantei_LauraSean
.
Ka mittui ka hru hul sawk sawk a. Car chhunga thu chung hian helai hmun ka pan nachhan hi ka ti hlawhtling ngawt thei dawn lo. Muangchang in Car atang chuan ka chhuak a. Ka thin phu dawt dawt chuan ka taksa pum a nghawr dawt dawt nimai hian ka hria.

Biak In chhungah ka pen lut a, phat rual lohin Biak In chhungah chuan mitthi sunna an nei tih a chiang. Pangpar khawi leh dawhsan laia thil awmte chu enin ka hawi kual a. Puithiam pakhat ka hmuh chuan ka pan nghal ruak ruak  a. Ani pawh chuan ka pan tih hriain min rawn en a, a bul ka thlen hun a lo nghak a ang.
.
“Tihsak theih che ka nei em?”
.
“Khawiah nge mitthi chu?” ka ti nghal thawr. Hei aia pangngai hian han biak dan tur ka hre chuang lo.
.
“I lo tlai hlek a ni. Minute 15 vel ral ta khan hal ral turin an la chhuak tawh.”
.
“Hal ral turin maw?”
“Aw, ni e. I laichin hnai em ni?”
.
Chhan maid an tur ka hre lo. Ka rilru a buai nuai nuai mai. Biak In ah thlahna an nei thlap a, chuti chung chuan an hal ral ang maw? Hetiang thil hi a thleng ngai em ni?
.
“Mitthi hming chu min hrilh thei em?” ka tih chuan mak min ti viau tawh tih a hmel atangin a lang a, min chhang mai lo. “Mitthi chu Patricia De-Garcia a ni em?”
.
Min chhang ta mai lo chuan min en vang vang a, hetianga muangchang hi ka nghak thei lo.
Dawhsan kil lamah kalin thlalak frame a intar arawn lek chhuak a.
“Heihi han en teh.”
Kut khur dar dar chungin frame chu a kut atangin ka la a, thlalak ka en chuan ka thu zawi hnawk a. Ka nu a ni lo!
.
“I tha em?” Puithiam chu ka bulah rawn thu hniamin ka darah min vuan a. A hmel chu a buai ve nak tho mai. Ka tha tih sawi turin ka tha chiah em tih ka inhrethiam lo.
.
“Ka hre lo. Heihi_ He thlalak hi tun maia in vui liam tak chu a ni chiang maw?”
.
“Ni ngei e.”
“Ka nu a ni lo. Heihi ka nu a ni lo.” Ka insut hlawp a. Tunah chuan lawmna vangin ka mittui a tla ta thung. Mitthi ta ka lainat loh vanga lawm ni lovin ka nu anih loh vanga lawm ka ni. A awmzia chu, tuna mitthi an thlah tak kha ka nu anih loh chuan ka nu khawilaiah emaw nungdam in a la awm tihna a ni thei.
.
Muangchangin ka tho chhuak a, puithiam chuan min lo pui bawk a.
.
“Ka rawn tihbuai che avangin thupha ka chawi e.”
“Harsatna engmah a awm lo. I mangang hle ang tih ka ring e. Pathian in a awmpui ang che.”
“Ka lawm e.”
.
Frame chu a kutah pe letin Biak in atang chuan ka kal chhuak nghal a. ‘Khawiah nge ka nu chu a awm ang?’ Engvangin nge helai hmuna kal tur hian lehkha ah khan min rawn hrilh? Tu lo thawn nge tih pawh ka hre chuang si lo. Thuchiang pakhat awm chu kha lehkha leh thlalak  min lo thawntu khan ka nu awmna a hria. Thlalaka ka nu hmel lan dan ka ngaihtuahin dinhmun tha takah a awm lo ang tih ka ring a, ka manganna arawn thar leh nghal bawk. A tlai hmain ka zawng hmu ngei tur a ni.
.
Rilru leh taksa chau takin ka chenna in ka pan a, in ka thlen chuan ka pindanah lutin khumah ka mu thlawp a. JoMas ka ngai a, ka nu ka ngai em em bawk. Keimah chauha harsatna ka hmachhawn a tul thin hian min tichau tak zet a ni. Tunah Zuri arawn inlan leh te zel bawk nen. Ka nunah hian thlamuang taka awm hun ka nei ve thei  ngai  dawn lo niin ka hria.
.
Ni a ral bek bek a, ka hna a sawt thei hlawl lo bawk. Rilru a phir nuai a ni ber e. Ka nu awmna chin hriat tuma ka neihna chu a thlawn nia hriatna ka nei leh tan tawh bawk. A hma pawhin nasa takin ka zawng fo thin a, tun ang bawk hian eng thil mah hmuhchhuah tur a awm ngai lo.
 Vawiin hi Gabo lo kir ni tur a ni tih ka ngaihtuah chhuah chuan ka nui sak a. Gabo bula ka awm theih chuan ka chau lutuk leh ka rilru buai nuai te pawh hi a zia deuh mahna. Inbe reng turin kan buai ve ve a, awmna chin kan inhrilh zeuh zeuh bak chu inbe lo tluk  kan ni. Thil makah ka ngai lem lo.
.
Tlai lam dar 5 a rik chuan dawr ka chhuahsan a, In a awm a hahdam ka mamawh tak zet. 
.
In ka thlen veleh thawmhnaw hak nuam zawka inthlak in choka ka pan lehnghal a. Engmah ka ei chak lo chungin fridge atang chuan eng engemaw ka phawrhin ka siam nghal mial mial a.
.
Ka hnunglam atanga min rawn kuah thut chuan ka phu nasa lutuk.
.
“Ouch!!”
Ka awm zawna pangpar bawr mawi lutuk chu enin ka veilamah ka thle a, ka biangah min fawp vang vang a.
.
“Gabo_”
“Ka ngai lutuk che.” Min kuahna chu thlah a tum lo hrim hrim.
“I thawm ka hre miah lo a_”
“I hriat theih loh turin thawm ka dim alawm. Min ngaih thu ila sawi miah lo.” A tih chuan alam hawi tura inher in a nghawngah ka kuah a, a hmuiah chuan lungchim zetin ka fawp vawng vawng a. Ka ngaih zia hi tawngkama sawifiah mai theih pawh a ni lo.
.
“Ka ngai lutuk che.”
“A lungawithlak ta deuh.” Tih pahin ka hmuiah min fawp leh zauh.
.
“Engmah ila ei lo em?”
“Eitur ai chuan heihi ka duh zawk.” nghet takia min kuah in min sawih hliau hliau a.
.
“Pangpar hi ka’n khawi phawt ange_”
“Min la kuah rih rawh.”
.
“Gabo?”
“Ni hnih chhung khan ka ngaihtuahna i luah reng a_” ngawi lehin chik zet hian min en leh rih. “I hmel a dik lo. Thil thleng engemaw a awm em ni?” min kuahna chu a thlah ta  nge nge. “Min han hrilh teh.” Ka kut pahnihah min vuanin dining chair-ah min thuttir a, pangpar pawh chu dawhkanah a dah ta daih a.
.
Ka hrilh dawn em? Ka nu chungchang vanga ka rilru buaina hi hrilh ila Gabo hian min pui thei angem le?
Gabo chu ka en a, ani chuan a kut dinglamin ka sam a hui kiang a, ka biangah min vuan a. A mitmeng atang chuan min ngaihsak tak zet tih a thup miah lo bawk.
.
“Sawi a har chuan min hrilh kher a ngai chuang lo a.” a ti nain hriat ngei erawh a duh tih a tilang thung.
.
“Zin tura i chhuah ni khan box ka dawng a. Tu lo thawn nge tih ka hre lo.” Ka sawi tluan dawn em tih ka hrethiam lo. Ka ngawi leh rih a. Gabo chuan min en reng.
.
“Ka nu chungchang a nia. Thlalak ah chuan_ Thlalak atang chuan nunna nei tawh lo hmel a pu a. Kal tura min hrilhna hmuna ka va kal chuan engmah hmuh tur a lo awm lo. Khawiah nge a awm ka la hre chuang lo anih hi_”
.
“I nu chungchang chu a hmain min hrilh lo a_”
“Ni e, ka nu chungchang hi ka sawi khat khawp mai. Ka zawng hmu tawh ngai dawn lo anih ka ring. Nu nei lova seilen hi a rapthlak zia min hriatthiampui pha lovang.”
.
Min chhang lovin nghet tak hian min kuah a. Ka bulah a awm reng dawn tih min tiamna ni maiah ka ngai.
.
“I nu chu engtik nge i hmuh tawp?”
“Kum 8 ka nih laia min chhuahsan hma zan kha ka hmuh tawpna a ni.”
“I hriat hnuhnun berah khawiah nge a chen?”
“A chanchin engmah ka hre zui tawh ngai lo. Tunah chuan a danglam ve tawh viau ang tih ka ring.”
.
“Kan hmu ngei ang. Ka tiam che, kan hmu ngei ang.”
“Ka lawm e._” tlema inla hrang deuhin a hmel ka en a, ka nuih ta sak a.
.
“I ril a tam tawh anih kha. Ka thilsiam lai hi zo ila kan ei nghal dawn nia. _ O_ Pangpar hi kan khawi ange. Ka lawm nawn leh e aw”
.
Dawhkana pangpar chu lain ka hnim vang vang a, min ti hahdam sawng sawngin ka hre hial. Pangpar chu vase-a tui ka dah hnuah ka khawi a. Dawhkan ah uluk zet hian ka hung a. Ka chezia zawng zawng chu Gabo chuan min en reng tih ka hria.
.
“Plate min lo lak chhuahsak thei angem? Kan ei thei ani nghal deuh mai_”
.
A thutna atanga rawn thovin plate a la a, dawhkanah a rem ve mai a.
Zanriah kan ei chhung chuan kan tawng mang lo. Kan ei zo  a, ka thlengsil sa min lo hrukhul sak zel a. Kan zo ta thuai. Ka nu chungchang ka sawi vang kha nge ka hre lo a, a ngawi chawi ta deuh riauin ka hria. Ka ngaihbel pawh a ni mai thei.
.
“Thil engemaw hmuhtir tur che ka nei.” Living room-a sofa ah thuin a bula ka ding chu a malchungah min pawt thu a.
“Enge a?”
.
Naktuk ah ka entir ang che.
“Naktuk ah chiah maw?”
“I nghak thei ang tih ka hria.”
“Eng thil  nge?”
Min chhang lovin min kuah a, kan ngawi dun ta vang vang.
.
.

ARGYROS YAMAN*
.
Ka awm nghenga Mia muhil hmel chu ka en a. A laka ka rilru phuthmang hi bul ka tan dan nen kha chuan a inpersan lutuk ta mah mah ani. A mizia ka hriat belh zel a, a nungchang harhvang tak anga a lan ang hi a nihna dik tak a ni  lo tih pawh ka hrethiam tawh. Engkim hrelawka nung der tur pawhin hetiang hi chu thil theih a ni lo. A mitmenga lang chhuak thin mi dang ngaihtuahna leh lainatna ngah tak anihna hi hmuh kan tur khawpa mi bangbo ka ni bik hauh lo bawk.
.
Thil mak tak pakhat awm bawk chu Zuri khan Mia mithmuha a inlan anih chuan nungdama a chhuah loh tur thu a sawi a. Chiang takin ka la hria. Seattle Beach House-ah khan a unaunu hrawn thiltih leh a nunrawn zia a sawi zawng zawngte kha chiang takin ka la hre vek. Zuri nungchang mak ru tak thin leh a khawsak phung a thusawi thenkhatte nena inkalh ta nuai hi ka chik rukna a rei tawh bawk. Phat rual lohin Mia nen hian an inngaina lo a, chu chu ka lakah Mia hian a thup hauh lo bawk. Ka bula a thusawite ka fiah leh vek pawhin dawt pakhatmah a la sawi lo. Kei hi a bul atang khan a diklo lamah ka lo tang em ni tiin ka inngaihtuah ta hial anih hi. Engpawhnise, Jose farnu tanpui erawh ka kuta tlaah ka la ngai reng tho.
.
Mia chu harhchiang lovin a che talh talh a, a hmel hmuh nuam tak chu ka en ta reng a. Ka en ning thei lo. Ka ning ngai hauh lovang. A sam chhawlleng a hmai zartu chu ka hui kiang a, ani erawh thlamuang tih hriat tak hian a muhil zui leh mai a. Ka ruahmanna neih a hriat chhuah huna a hmel tur mitthla chungin  a kut ka la kang a. Ka fawp vang vang. A rim, a vun nem thep leh a awri hriat te, a nui ri hriat te hi ka thlahlel tak zet.
.
Ka phone nghawr dar dar chu la kangin caller ID ka en a, Zuri hming ka hmuh  chuan ka phone chu ka off a. Tunah chuan biak a tulna a awm rih lo. Chik lehzual a a thusawi te kha a fiahna ka hmuhkim hma chuan engmah ka tihsak thei tawh rih lovang. Fiahna min pekte erawh phat rual lohin a tak ngei a ni vek a. Mia hian Zuri chanpual a lo chhuhsak ngei tih pawh a chiang. Chuti chung chuan Mia hi tual hial that duh tur khawpa hmeichhe nasa niin ka hmu thei tawh tlat lo! Ka phone arawn nghawr leh dar dar a.
.
“I pick up dawn lo ami?” Mia chu rawn mengin muangchang hian a inlahrang a. Caller ID chu a hmu lo tih a awm dan atanga a lan vangin ka thaw deuh huai. Ringawt hian!
.
“Thil pawimawh a ni lo. Muhil leh rawh.” Kuah leh mai ka tum chuan nui chungin min dang a.
.
“Ka delh na che em? Ka chau deuh aniang, ka mutthilh lai ka hre miah lo.”
.
Min dang deuh chunga ka kuah luih chuan a nui har har a. He nui ri tluka hriat duh hi ka nei chuang hleinem.
.
Ka phone bawk chu arawn ri leh ta. Ka dahna in a zir bawk a, Mia chuan a hmu lo thei ta lo. Min kuahna thlahin phone chu a en a, ka hmel min en leh a. A mitmenga buai ta nak mai.
.
“Zuri maw?”
.
Ka chhang lo.
.
“I pick up dawn em?” Mia hmel chu a danglam vek tawh. Chian ngam lohna_  a hmel atang chuan zawhna chi hrang hrang a lang zut zut a.
.
“Thil pawimawh a ni lovang.” Ka tih chuan a nui lui hak.
.
“Tunah zan dar 1 a pel tawh a. Tun ang huna in call chu thil pawimawh ani ngei ang chu.”
Ni e, Mia sawi hi a dik. Tun ang huna inbiak chu thil engemaw  tak chu a ni ngei ang. Mahse, pick up ka tum chuang lo. Ka rilru ka siam fel vek tawh. Zuri ka biak leh hmain ka bula a thusawi engkim kha ka fiah nawn leh vek phawt dawn.
.
“Gabo_?”
A hmel chu chiang zetin ka en a, ka laka a chian ngam lohna ka hmuh chuan a kuta vawn tumin ka ban a. A teu hlar thung.
.
“Tunah hian zawt che ila a that ka ring..” thawk a la halh. Eng thil phiangsen nge min zawh dawn le!
.
“Engvanga min hnaih nge i nih?”
Eng thu nge min zawh hi? Zuri nen an inbiak khan eng thu nge a lo hrilh?
“Eng thu nge i sawi chu?” ka titawi tak mai.
.
“Gabo_ Tun chiah ka zawt leh ang che. Engvanga min hnaih nge i nih?”
.
Ka nui lui suk a, he zawhna hi ka chhang thei lo. Thu dik ka hrilh anih chuan min kalsan nghal ang tih ka hria. Bul ka tan dan chu eng pawh nise tunah hian Mia nen kan inkar hi tawp turin ka duh lo. Ka thinlung hian a lo hnaih tawh mah mah a ni e!
.
“A chhan i hre duh maw?” tizawi supin ka pan hnai a. Ngaih dan ni lo takin min la melh khai khai a. Ka hnaih lui zel a, a banah ka vuan thei ta. Ka lamah pawthnaiin a kawng fek ratah chuan ka kuah a, ka ban lehlamin a biangah ka nul zai zai a.
.
“Min thlah rawh. Gabo_”
.
Ka lu ka thing ringawt.
“Hei vanga hnaih che hi ni ta ila_?” a hmuiah khawihin a  khabe ka khawih leh a, a ban ka vawnna chu phelh tumin a tal laih laih a. Ka thlah dawn miah lo. Chu chu ka mita min en vangin a hre ngei ang. A tukhumah dimtea vuanin a hmui fawh chakawm taka sen no chek chu ka fawp ta nge nge!
.
A hmui la si reng chung chuan, “Ka mamawh che!” ka ti sup a.
.
Dawt ka sawi! Ni e, engvanga hnaih nge ka nih tih hi ka sawi thei lo. Ka duh  thu ngeia dawt sawi ka ni bawk! Thudik i sawi vangin i hmeichhe hmangaih chuan kalsan dawn ta che sela engtin nge i tih ang? Ka tih ang hian i tih ve tho ka ring e. Eng thil nge ka sawi chu!!!? Hmangaihna! Hmangaihna maw? A dik! He hmeichhia, tuna ka kuah mek hi ka hmangaih a ni. Nasa takin!!