GABO YAMAN - 14

 GABO YAMAN
CHAPTER – 14
Thantei_LauraSean
.
"He thil hmang hian ka zawhna che chu pumpelh i tum thei lovang." ti nghet charhin a inla hrang hlek a. A kut pahnih chu ka awmah a dah thlap bawk. A mit paw chek chuan min en chik nasa khawp mai.
"Gabo_?"
"Eng vang nge ni chuang ang. Ka hnaih chhan che hi i hre lo maw?"
"Hria ila ka zawt lovang che. Engvang nge?"
.
"Ka hnaih chhan che chu heihi_" a hmuiah ka fawp leh zauh. Min melh dan atang chuan ka chhanna chu a pawm lo tih a chiang. 
.
"Ka serious tih i hria? Gabo_ Zuri nen hian eng inzawmna nge in neih?"
.
Engemaw tal ka sawi anih loh chuan Mia hian a ngai liam hauh lovang. Zuri nena kan inbe pawp ringawt pawh a ngaimawh anih chuan a tir atanga Zuri nen kan inpawhna zawng zawng kha hrechhuak ta se engtin tak awm ang maw? Zuri vang chauha amah hnaih ka nih zia te. Khang thil kha tunah hian ngaihtuah pawh ka duh lo.
.
"Ka tanpui ngei a. Chu zawng chu. A bak engmah a awm lo."
.
"Engtik atang khan nge Zuri nen hian in inhriat?"
.
"A la reilo. Zuri ka lo tanpui chu itan a pawina a awm hleinem."
.
"I sawi dik! Ka tan a pawina a awm lo. Sawi tur ka nei ta hauh lo mai. I duh duh ti ang che."
.
Inla hrangin a kalsawn a, a in ngaihtuah buai tih a thup miah lo. Hmel muk ngal chunga sofa-a a thu chu muangchanga pan hnaiin a bulah ka thu a, duat takin ka kuah vang vang. Min hnial lo hlauh.
.
“Nang hnaih tur che hian chhan leh vang a awm kher ka mamawh lo. Silas in a ka hmuh hmasak ber tum che kha ila hria em? Kha hmunah khan ka lo kal lo ang tih ka hlau asin. Anih chuan heihi ka zawt let ang che_ Engvanga ka bula awm nge i nih tih hi i ngaihtuah tawh ngai em? Tunah hian chiang takin ka hrilh ang che, ka hnaih chhan che chu ka duh vang che a ni. Ka thinlungah thuk takin hmun i chang bawk.”
.
Mi en ran ran in a mit a khap fak fak a.
.
“Silas in ah khan sawm ini miah lo chungin ilo kal tih ka hria a nia.” ka nui hawk! He hmeichhia hi a nalh ang bawkin a thluak pawh a chak tha tak zet  anih hi mawle!
.
“I sawi chu a dik. Come on! Mia_ Eng chiah nge sawitur a min duh le? Silas nen hian tuna kan thawh dun hma pawhin kan inhmu fo a, party thuhmunah sawm dun kan ni fo bawk a. Amah ngei pawh ka sawm lohin a lo kal fo alawm. Chutah chuan enge diklo awm.” Silas chungchang ka sawi hi chu thudik a ni. 
“Min en teh.” Ka lam hawi turin ka kuaiher a, a biang mam thel chu ka kutzungpuiin ka khawih hauh hauh a. “Ka nun min tawmpui turin duhlo che ni ila tun ang hunah hian ka lo pan che i ring em? Ka in pan hmasa lova ka lo kal chhan hi eng vang nge nia i rin? Hnathawh tur tam tak kalsanin hun   kan hmang dun fo a. Khang kan hun hman dun tawhte kha tihur ka neih loh vanga hmanpuiah che min ngai thei lovang. Chutiang bawkin nangpawh keimah ang tho ini tih ka hria..”
.
“Zuri hi hnaih lo turin ka duh che.” a ti sap a. “I nun i hman dan tur sawitur hian dikna ka nei em ka hrelo a, mahse, Zuri hi hnaih suh. Kan in ngainat loh vang chauha he thu hi hrilh che ka ni lo a nia. Thudik ka hrilh che anih chu.”
.
“Ka hria e.” ti dam thlupin a chalah ka fawp a, a hmai chu ka fawp kual leh dan dan a. Min kuahlet ve ta. A rimtui chek chek chu ka hip vang vang a, ka hahdam ta deuh. Amah ka hnaih chhan chu engpawh lo ni rawh se, tuna pawimawh ber chu Mia hi ka hmangaih a ni tih zawng hi. Ni e, chinfel tur tam tak a awm tih ka hria. Chinfel ngai zawng zawng ka chingfel phawt anih loh chuan ka hmangaih thu hi ka hrilh thei lo bawk. Ka vawng thei angem tih erawh ka hre lo! Ka hre hauh lo mai. Zuri sawi kha dikin Mia hian thah lo tum ngei tase enge ka tih tak ang? Mia hi ka zawt ngawt thei lo. Tu mihringin nge an ngaihzawngte tualthah tumtu anih leh nih loh zawt ngawt ang ni! Ahma aia chik lehzualin kha thil fiahna kha ka neih ngei a ngai tih ka hrechiang em em.
.
“I mut a chhuak tawh anih kha.”
“Mu turin min sawm har ka ti reng a ni.” ka tih chuan a nui hak. Min kuahna chu thlahin a tho tharh a. Ka hmazawnah tak dingin ka vawn turin a kut arawn phar chhuak a. A la nui deuh tat tat bawk.
.
“Lo kal rawh.”
A kut chu ka vuan ve mai a. Ka mut erawh a chhuak miah lo.
.
A pindan lam kan pan dawn emaw ka tih laiin a ni lo lamah min kalpui ta daih.
.
“Enge kan tih dawn?”
“I  mu dawn?”
.
 Pindan kawngka a hawng a, kan inzui lut a. Pindan chhung inchei dan chu mipa pindan tur bik atana siam ang mai ani.
.

“Hetah hian i mu dawn nia.”
“Heihi tu pindan nge?”
“Ka in a pindan pakhat a nih hi.”
“Chu chu ka hria a. Mipa pindan sa ang mai anih hi.”
“I mut a chhuak tawh emaw ka tia.” A sir zawnga thle deuhin min en a, a nui sang bawk.
.
“Keimah chauhin ka mu lovang.”
A inrin hmaa pawm kang nawlhin khumah chuan kan tlu dun a, a nui hak hak a.
.
“Gabo_”
“Enge?”
“Anih chuan khawi_ Ka malchungah mu rawh.” Thu thain a malchungah lukhamah a dah zet a, lukham chu a beng thak thak a. Ka mu thla ve nghal hmiah.
A malchunga mu chung chuan a nghawngah vuanin ka kuaikun a, kan infawp vang vang a. Mipa na na na chu ka thinsen a lum nghal mai bawk. Ka duhtawh sawt hle. A kawr chhungah ka kut ka zenlut a, ka nghawngah min kuah letin a rum tiah tiah a. A kawrhak phelh tuma a kawrtlang ka vawn chuan a tawp chawt.
.
“Kan ti thei lo_ Gabo_”
Chhang lovin ka thiltih lai chu chhunzawm ka tum a, min dang ve tang tang a.
.
“Gabo_ Kan ti thei lo.”
“Engvang nge?” ka aw pawh a dik ta lo. Mia hi ka mamawh a ni ka pha hauh lo mai. Mia mamawhtu nih hi ka zak hek lo.
.
“Min kuah rawh.” ka tih chuan min hmachhawn zawnga ka malchunga thuin nghet tak hian ka nghawngah min kuah bet a.
.
“Ka la ti ngai lo. Tunah kan ti thei lo.” Atih chuan ka harhchhuak deuh zawkin ka hria. Awih tur nge awih loh tur tih ka hrethiam chiah lo bawk. Nula puitling a kum ang zat tawhah__ Kan inkawp hma hian mipa tam tak a kawp tawh tih hre chung phei chuan awih mai a harsa. “Ka tihpalh.” a ti leh sap a. Thupha a chawi maw?
.
Muangchangin thawk ka la raih raih a, ka inthunun a ngai tih ka hria. A kawngah nghet tak bawka kuahin kan ngawi dun vang vang phawt. Ka tan inthunun leh mai a awlsam lo khawp.
.
“Engti turin nge min duh?” a tawng chu a zawi hle. Ka bengbula tawng anih vangin ka hre thei chauh a ni.
.
“Min kuah rih rawh.” Ti zawngin ka chhang. A awm dan atang hian a thusawi kha a dik ang tih rinna ka nei.
.
Engemaw chen hnuah inlahrangin a malchungah lukham chu ka dah tha leh a. A malchungah chungah chuan ka mu a. Ka awm dan chu min ngaichang khiau tih ka hria.
.
“I tha em?” ka chhang mai lo. “Gabo_ I tha em?”
.
“Um_ Ka tha e.” saisir in la  mu reng chung chuan a kawngah ka kuah a.
“Enge ka tih dawn? Gabo_ Ka awm a nuam lo  a nia.”
Zan reh tak hnuaiah a tawng zawi tak chu a ri a fiah khawp mai. Ka ngawih reng vangin a awm a nuam lo hle tawh tih pawh ka hria.
.
“Ka bulah i awm chuan a tawk e. Engmah i tih a ngai lo.” Ka tih chuan a thaw deuh huai a.
.
“I  mut a chhuak lo tih ka hre mai. Ka tihpalh aw.”
“Chutiang sawi suh. Min kuah tawp mai rawh.” Ka tih chuan ka bekah min fawp zauhin “Okay.” a ti zawi raih a.
.
Ka sam a khawih niap niap a, kan tawng lo nain boruak hahdamthlak leh thlamuanthak tak chuan ka mut a tichhuak chiai chiai thung. Engtiklaiin nge ka inthlahdul a ka mutthilh ka hre lo.
.
Ka muhil ka harh hlawl a, ka bul maia thaw ri sak sak ka hriat chuan ka phu deuh zawk. Khawiah nge ka awm tih ka ngaihtuah chhuah chuan ka bula muhil tihharh hlau takin ka inlet a. Mia hmel ka hmuh chuan ka nui suk. Muhil harh veleha hmuh atan chuan a tha lutuk mah mah a ni. A puansin chu tlem pawtin ka sin ve a, ka lamah pawthnaiin ka kuah ta hle hle a. Ka la hriat ngai hauh loh, thil ni thei tur pawha ka la ngaihtuah chhin ngai loh leh ka la tih ngai miah loh chu Mia hian min hriattir a ni. Dik taka sawi chuan nupa ni lo chunga nula leh tlangval in sex an hman hian tunlai khawvelah mak tih a hlawh lo mai ni lovin mi thenkhat hi chuan thil ni ve tur rengah an ngai a, kei ngei pawh ka tel. Ka hmeichhe lo kawp tawhte nen pawh kan hmang ngei mai. Khang hmeichhia te khan ka duh ang duh lovin min hnar ta se lawm lo takin ka kalsan nghal ngei ka ring. Ka rin hi a dik bawk ang. Mahse, Mia nen anih chuan a dang. Min dang tura a tawngchhuak ringawt pawh kha ka tan chuan thilmak a ni tawh. Thiltha zawkin min hmuak ah ka ngai thei tlat! Inhmangaihna leh induhna, inpawhtawnna tizual tur hian sex chu a pawimawh tehmeuh mai, mahse a pawimawh hmasa ber a lo ni lo tawp chu a nih hi mawle!
.
Ka lo muhil nawn leh a ni ngei ang, ka harh leh chuan Mia chu alo awm tawh lo. Ka inlet thawk a, zangthal in ceiling ka en vung vung a.
.
“Good Morning Handsome!”
.
Phu zawkin  ka ke lam ka en a. Mia chu nui sang leh fai sar hian ka ke bulah a thu tung at. Ka mutthilh chhung kan min lo en char char anih hmel. Pawi ka ti pawh ani chuang lo va. A nuam ru zawk mah.
.
“Hey_” ka aw a la dik lo.
“Ka rawn hnaih dawn miah lo che.” A fiamthu tih hriat tak hian a nui ar ar a. A thusawi awmzia niawma ka ngaih vangin ka nui suk.
.
“Lo hnai teh_”
.
“No! Zingkarah mipa hi an hlauhawm zual tih khawiah emaw ka chhiar tawh, an sawi ka hre bawk_”
.
“Zingkarah lo pawh kan hlauhawm tho_”
“Tak tak?”
.
Min rawn hnaihin ka dulah arawn thu a, engtin nge a awm dawn tih ka ngaichang a. Hetianga infiam hi engemaw kan ti dawn anih si loh chuan a chi fahran loh ang. A kawngah ka kut pahnihin ka dawm a, ani chu rawn kunin ka hmui bulah min fawp zauh a. A sam la hnawng leh rimtui chek chek chuan min tiharh kawk in ka hre hial. Ka kut chu vuanin a lasawn a, la nui chung chuan khum atangin min chhuksan a.
.
“Breakfast tur ka peih tawh a, inphihfai la kan ei dawn nia.”
“Tunah maw? Dar engzat nge?” tih ka zawh rualin khum sira sana ka hmuh chuan ka thu chhuak nghal. Dar 8 a lo pel duai tawh. Khum atang chuan rang takin ka chhuk a, Mia chu pindan atanga a chhuah hmain fawh leh phawt ka duh.
.
Ka chet ran zawk vangin ka man bet a, a kawngah kuahin ka fawp vang vang a.
.
Kan infawh tawh loh hnu pawh chuan la invuan in kan inen vang vang a. Ka nghawng hnunglamah vuanin ka thukhum sam a khawih niap niap a, a hmel nung sar chunga min enin a nui sang a. A hmelah chuan min rinngamna ka hmu! Heihi ka tan thil pawimawh tawpkhawk a ni. A tirte atang khan tun anga min ringtawk chung hian min la en hauh lo tih ka ngaihtuah chhuah chuan nghet lehzualin ka kuah bet leh a.
.
“Gabo_ kan tihtur kan tlai phah ange.”
“Um_ Ka’n intifai ange. Tihtur ‘kan’ ngah khawp mai.” Ka kuahna thlahin ka kalsawn nghal a, “’Kan’ maw?” a tih pawh chu ka chhang tawh lo. Nizan khan ka tumlawk angin atana ruahmanna ka neih hi ka hrilh lo. A hmun kan thlen hunah a hre chauh ang. Tlai lam chhuak tura engkim ka tihfel tawh vangin chhun lamah erawh thil pawimawh tak ka ti thung ang chu.
.
Breakfast kan ei zo a, Mia a insiam zawh hnu chuan ka ruala kal turin ka duh tih ka hrilh hnuah ka Car-in kan chhuak nghal a. A hmel nungsar chu ka en kham thei lo. Hetiang taka nasa hian mihring ka la thlahlel ngai lo bawk. He thil hi thilmak tih loh rual a ni lo ve.
.
MG kan thlen chuan min chhuksan a, tlai lamah ka hruai leh ang tih ka hrilh chuan min chhang lovin ka hmuiah min fawp zauh a.
.
Mia dawr chhunga a luh fel hnu chuan ka tlan chhuak nghal. Ka thiltih tur hian hun dang zawng aiin min nawr na tawh. He thil hi ka fiah thei anih chuan_ Mia hi tualthat duh khawpa mi nun chhia a ni lo tih ka fiah theih chuan_ Car steering wheel chu nghet zetin ka hmer ta ngawt a.
.
Ka Office ka thlen veleh nimin chhun lama ka biak special investigator number chu hmetchhuak in ka call nghal. Ahmaa ka mi chhawr ten an hmuh hmaih awm theite a hmuh theih beiseiin ka ruai nawn leh ngat a ni. Sum pawh ka seng tam narawh e!
.
“Mr. Yaman. Lo biak che ka lo tum chiah a. Office ka lo pan mek e.”
“A tha e. Thu thar a awm ka beisei.”
“I beisei chu a thlawn hauh lovang.”
.
Kan inbiakna kan titawp a, Maverick (Special Investigator) lo thlen hun chu dawhthei lo zetin ka lo nghak a.
.

Maverick a lo thleng a, file chhah tawk tak a lo keng tih ka hmuh chuan ka nui suk.
.
“Eng thil nge i hmuh belh le.”
.
“Mia Garcia leh Zuri te hi unau pianghmun an ni lo ngei a, an inkar pawh a tha hran lo. Mia tan hian Zuri nunna lak duh hial tur khawpa thil thleng a awm lo a.”  ngawi deuh vung vungin a lehkha phek ken pakhat  chu a en a.
.
“Hetah hian unau pianghmun anni lo tih chu a chiang a. Mia hi Benjamin LeBoeuf nupui hmasa fa a ni a, a pa hming tawm lovin kum a tlin hnuah a nu hming a chhawm ta zawk anih hi. Lehkha ah hian a fiahna i en thei ang.”
.
“Unau pianpui dang an nei em? Unaupa_”
.
“Record awm zawng zawng ka chingchhuak vek a, unaupa an nei ngei tih record engmah a awm lo. Benjamin LeBoeuf hnenah mi tirin ka theih chin chin kan zawt chhuak bawk a. Fapa a neih loh thu chiang takin a sawi tlat a ni.”
.
Maverick thusawi zawng zawng chu chik takin ka ngaithla a, ka duh tak chiang takin ka la hre lo.
.
“Zuri nunna lak tum chungchang chu_”
.
“Khami ni khan Seattle Beach House lam pana Lawng chhuak hmutu chuan Lawngah hmeichhe pahnih an chuang ngei tih a sawi a. Zuri leh Mia te thlalak kan han entir khan Lawnga chuang hmeichhia a hmuhte chu hetiang hmelpu annih loh thu a sawi a. Thil dang Mia Garcia hi Zuri thah tuma hmalatu anih loh theihna chance a sang khawp mai. Khatih hunlai tak khan amah Mia hi Paris-a a awmlai a nia. Kha thil thlen hma thla khat chhung leh a thlen hnu vawiin ni thlenga a phone record zawng zawngah Silas Bikovic leh hnathawka a chhawr te, a thian thenkhatte bak a be lo. Chuan, i number pawh a lang zing khawp mai.” A nui deuh suk. Kei pawh chuti bawk. Inhmuam up tha lehin a sawi zawm a.
.
“Tualthah tum chungchang ah kher hi chuan a fihlim tih a chiang e.”
.
“A lawmawm e.”
.
“Kei pawh ka lawm e. Min mamawhna i nei  anih phawt chuan engtiklai pawhin itan ka awm reng ang.”
.
Ka hriat duh ber chu ka hre ta. Ka lo rinlawk ang chiah a ni. Fiahna arawn ken te kha a rintlak ngei bawk ang tih ka ring. Ama hriat hauh loha Mia ka chhuitir erawh ka inthiam lo tak zet.
.
Thil nih dan ka han hriat chian lehzual takah chuan Zuri thusawi inkalh kha a chhanna ka nei thei ta anih hi. Chiang takin Mia nungdama a hmu leh anih chuan a dam zui lovang tih a sawi ngei kha maw!
.
Zuri phone number hmetchhuak in ka call nghal a. Thudik ka hre tawh a ni tih ka sawi laia a hmel awm dan ka hmu  chak tawh khawp mai. Phone chu a ring quit a, ka call nawn leh dawn lai mekin ka phone chu arawn nghawr dar dar a. Zuri call a nih hi.
.
“Zuri_ ”
“Argyros, min lo be hlauh chu ka lawm e. Lo biak che ka tum lai tak a nia. Hmuh che ka duh. Khawiah nge kan inhmuh theih ang.” arawn ti zung zung a. A aw atang chuan a hmanhmawh hmel angreng.
.
“Thil thleng a awm em ni?” ka’n ti khawmawi ve bawk a, ka rilru tak  chuan inhmachhawn mawlh ani ka duh tawh ni!
.
“Aw, awm e. A pawimawh khawp mai. Thil danglam dawrh theihna tur thil a ni. Kei pawhin awih har ka la ti”
.
“Hm_ Office-ah lo kal rawh.”
.
Kan inbiakna kan titawp a, eng thil chiah nge arawn sawi ang tih ngaihtuah in ka kut zungtang chu dawhkanah ka tlir dat dat a.