GABO YAMAN - 12

GABO YAMAN
CHAPTER – 12
Thantei_LauraSean
.
A awmzia ka hre lo maw? Ka hria! Vawikhat tlawm taka dah kha Zuri hian a harhchhuah phah lo tihna a ni. Anu (ka pa nupui) mak taka a thih hnuah rei tak chhung a kal bo a, tunah arawn lang leh thut a. Thil tha tih tuma rawn let a ni lovang tih hi ka rin dan a ni. Zuri hlim hmel i hmuh chuan mi tuemaw talin amah vangin khawilaiah emaw thil hreawm tak an lo tuar ngei ngei thin! Ka hriat theih chin atangin heihi thudik tak chu a ni. Ka unaunu angin ka pawm ngai lo a, ka pawm ngai hek lovang.
.
“Mia, i tha em?” ka bula Gabo arawn din chuan awmze nei lovin Zuri kalna lam ka lo la en eng tih ka inhre chiah.
.
“Ka tha alawm.”
.
“Zuri kha khawiah nge?”
.
“A kal ta rih anih kha_” Zuri nen hian engtin nge an inhriat tih ka zawt nghal mai dawn em ni? Thil tha ber chu a ni lo mai thei, mahse ka zawh ngei a ngai.
“Zuri nen khan engtin nge in inhriat?”
.
Min chhang mai lovin Gabo chuan min en a, keimah atanga thil engemaw hriat chhuah tum niawm tak hian min en niin ka hre tlat pek. Zuri nen lo inhria pawh nise thuk taka an inhriat ka ring hran lo. Zuri tihdan a ni ngai tlat lo. Ka hriat theih chinah Zuri hian tu lakah mah a nihna dik tak a puangzar ngai lo a, fel taka inhung in a thiltih tur a chhutlawk thlap thin. Sawi a nei anih pawhin thudik hrulah mar takin dawt a sawi ngei bawk ang chu.
.
“Sawi vak tur a awm lo. Hmun pakhatah kan inhmu fuh a, tanpuina a mamawh vangin ka tanpui ta anih kha.” A tiliam puat a. Thil serious tak ang pawhin a sawi lo. Yaman Co. hian tanpui ngai tam tak an tanpui fo a, chutiang zinga pakhat chu Zuri hi a ni ve maiah a ngaih theih ang chu.
.
“Unau in ni tih i sawi miah lo a_”
.
“Kan ni lo.” ka ti hmak! Ni e, kan ni lo reng a ni. Zuri hi ka unau anga ka en loh mai piah lamah ka ngaina lo mai ni lovin amah  vanga ka thil pal tlang tawhte vang khan ka hua! Ka hua tih hi ka zep ngai hek lo! Zuri ka huat vanga mi sual ka lo ni ta anih pawhin pawi tihna ka nei eih lo bawk. Engvanga hua nge ka nih tih erawh keimah chauha hriat hi ka duhtawk thung. Thil hriat zawng zawng sawichhuah hian thil thalo lehzual a hring chhuak thin tlat a ni.
.
“I ngaina lo tih ka hmu thei mai e.”
.
“A dik alawm. Ka ngaina lo.”
.
Engemaw sawi leh a tum chu a phone in arawn pawtchat ta rih. A kekawr ipte atangin a phone a phawrh a, caller ID  a en hnuah “Min lo hrethiam lawk.” Tih leh kalsawn a rual nghal a. Reiloteah lo kir lehin ka beng bulah arawn kun hniam a, party –na hmun atanga kan kal mai a ngaih thu arawn sawi a.
.
Ka kutah min kaiin pawnah kan chhuak a, engvanga hun laklawha haw ngai nge kan nih a la sawi lo. A hmel atang chuan thil engemaw pawimawh tak vanga party na hmun kalsan ta kan ni tih erawh a chiang.
.
“Eng thil nge thleng?”
.
“Ka pa nen kan inbiak a ngai thut anih hi. A fel leh mai ang.”
.
“A that chu. Thil pawi tak a thleng emaw ka ti hman alawm.” Ka thaw deuh huai.
.
“Pawi tak ni hran lo e. A hmanhmawh thlak deuh a. In ah ka dah phawt che anga ka pa chu ka va hmu mai ang.”
.
“Silas rualin ka haw thei  tho sia__”
.
“Shh! Keimah ngeiin ka dah loh che chuan ka rilru a nuam lovang.” Ka biangah min khawih zauhin  ngaihawm zet hian a nui suk a.
.
Ka in kawtah min chhuktir ta mai lo chuan in chhungah min zui lut a, duhthawh zeta kan infawh vang vang hnuah min kalsan ta chauh. Kawngka a ding chungin a tlan chhuak lai chu ka en a, a tlan liam hnu chuan nui sakin in chhungah ka lut leh a. Zanin chu rin aiin ka mu hma thei dawn hlauh anih hi.
.
Hmanhmawh lem lovin ka inthlak a, ka hmai cheina ka tihfai hnuah hahdam tum tak hian khumah ka mu nghal a. Ka rin angin ka hahdam ta lo. Zuri ka mitthla a lo lang vang chuan ka tang nghal toh mai. Gabo bulah khan ka unaunu a ni lo tih ka sawi a, ka rilru taka ka pawm dan pawh a ni. Amaherawhchu, ka duh vang ni hauh lovin ka pa nupui fa anih vang chauhin, thisena inzawmna nei lo hi unau kan ni! He thil hian buaina tam tak min lo thlen tawh bawk.
.
JoMas kalbo hma khan Zuri hi kan hre ngai lo. Ka pa nupui (A nuhrawn hi Ophelia tih zelin ka sawi tawh ang ~T) khan fa a nei tih kan hre  ngai lo  hrim hrim. JoMas a kalbo hnu leh vanduaina a tawh hnu daih Boarding school atanga min lak chhuah hmasak ber ni khan a vawikhat nan Zuri hi ka hmu chauh anih kha. Kha ni kha ka ka dam chhung hian ka theihnghilh tawh dawn lo!
.
Ka pa ngaihsakna ka dawng ngai lo tih hi ka sawi tawhin ka hria. Ka nu min hringtu  ngeiin min kalbo san hma pawh khan ka pa ngaihsakna hi ka dawng ngai chuang lo a. Min kalbo santu tia tuihnai lo taka ka pa’n ka nu chanchin min hrilh chung pawhin ka nu bula chen kan chak zawk tho a, ka pa hian a remti ngai lo reng reng  a ni. Ka nu ka ngaihtuah chhuah chuan ka ngai vawng vawng a. Min kalbo san atang khan vawikhatmah kan inhmu leh tawh lo. JoMas khan kan zawng chhuak leh ngei ngei ang tiin min tiam ziah thin anih kha.
.
Khami ni, Boarding school atanga Ophelia’n min hruai chhuah ni khan kan in kan thlen veleh a ka hmuh hmasak ber leh ka thinlung tina em em tu chu Zuri hi a ni. Ophelia min huatna mitmeng aia nasa zawk mitmeng thip ramin min en a, ka pa thiltih ka hmuh khan ka thinlung na lutuk kha ka rum chhuak lo chauh lo a nih kha. Ka chunga vawikhat pawh a tih ngai miah loh angin Zuri chu a kuah a, a hmangaih tih a hrilh bawk a. Engmah ka sawi lo. Ka thawmhnaw neih ve chhun khaiin ka pindan ka pan a, in chung chhohna step pathum vel bak ka rap  hman lovang. Zuri chuan min rawn pawt dingin ka pindan tur chu in chungah ni lovin in hnunglama pindan ruak kan neih thin kha anih thu min hrilh a. A thusawi chu awih lovin ka pa ka en a, ani chuan engmah a sawi lo. Ka pindan lehzel min chhuhsak duh chu ka ngawi thei ta biklo bawk. Ka hriat ve theih chinah ka nu khan mahni dikna leh chanvo humhim tur chuan kan bei ve ngam tur a ni tih thu hi min hrilh thin.
.
Zuri thusawi chu ngai pawimawh lovin ka pindanah chuan ka lut a. Engkim a lo danglam vek tawh! Ka sulhnu hmuh tur a awm lo chauh pawh a ni lo, ka la hmuh ngai loh thil vekin ka pindan chu a lo inchei anih chu. He in a Zuri a lo luh ve atangin ka pindan pawh ka chan nghal tihna ani. Lungawi lo zetin inhnuaiah ka chhuk leh a, ka pa bulah Zuri chu kut kuangkuaha dingin a sir zawng ngat hian min lo  melh a. Min hnuaichhiah in min nuihzat hle bawk tih a thup lo. Khami ni atang khan Zuri nen hian engtiklai mahin kan inkar a tha tawh ngai lo. Kei aiin a naupang hlek chauh a, ka pa’n Ophelia a neih tirh khan a pa bulah a cheng thin tih tun hnuah hian ka hre ta chauh bawk.   Ka hreawmna hi atan chuan hlimna a ni!
.
An nufa-a an mamawh kha a san em vangin reiloteah ka pa sumdawnna lian tak ni thin khan a tuar ta reng bawk a. Chu chu kei hian ka tuar lehsi a ni. Ka pa’n a sumdawnna ngaiawh tir leh tuma a beihna hmanrua ka ni a. Inzawmna neihpui a tum apiangte lakah tawktarh ka ni thin. JoMas chanpual ka hmingin a awm tih ka hriat ni khan ka pa hnial turin chakna ka nei ta chauh a ni.
.
.
Muhil thei lovin ka thu chhuak hlawl a. Zuri hmel ka hmuh leh tak vangin ka ngaihtuah duh tawh ngai loh ka ngaihtuah chhuak a. Ka thinlung thuk taka hliam hun rei tak chhung thisen chhuak tawh lo hi a hliam tih tharin a awm leh ta anih ber hi!
.
Khum atangin ka chhuk a, ka phone hmet eng in ka contact list ka en thla zai zai a. Gabo call ka tum zet a, zan a rei tawh vangin ka ti leh ta lo. Bia pawh ni ila eng vak nge ka sawi chuan ang? Zuri ka thinlunga huatna ka neih hi a bulah ka sawi ngawt thei lo reng reng bawk. Atan tangkaina a awm lo chauh pawh ni lovin hmeichhe thalo tak anga min hmuh ka duh bik lo. Hmeichhe rilru tha pumhlum ka ni bik lo a, ka chhungrila khakna awm zawng zawng tihlan duh lo tur tawkin inven nachang ka hre ve tho bawk.
.
Ka muhil thei dawn chuang lo tih ka hriat vangin movie en tur ka thlang a, nuamsa taka thu chungin movie chu ka en a.
.
Ka phone ri ka  hriat chuan ka phu chhuak zawk. Ka ring kham them thum vang chuan ka thle kual zet phawt a. Min lo call tu chu tunge tih ka en hnuah ka pick up ta chauh.
.
“Hi, Gabo_”
.
“Good Morning. Nizan khan ka lo be leh hman ta lo che a.”
.
“I tha em? I chauh hmel hle mai.”
.
“Ka chau khawp mai. Mutna hun pawh ka nei ta lo a. Ka rin aiin hun a duh rei ta zek a.”
.
“I n buaina chu a fel thei em?” ni e, nizan khan a pa nen thil chinfel tur an neih vanga min kalsan anih ngei kha.
.
“Fel thawkhat e. Vawiin hian ka zin chhuah a ngai dawn a. Ni hnih hnuah ka lo kir leh ang. Chumi chhung chu ka tel lovin ilo awm thei ang chu tiraw?”
.
“Awm thei mai ang.” Ka nui hak. Ni hnih chhung lek a tel lova awm chu ka thei mai ang.
.
“A harsat tur thu talte chu sawi ve la_” arawn ti leh. Ka mengkual ralh ringawt.
.
“I awm dan kha ka hmu thei vek a nia.”
.
“Ka ring chiah lo.” Nui hak hak chungin ka ti ve thung. “Dar engzat ah nge i chhuah dawn?”
.
“Tunah Airport ka pan mek.”
.
“Tluang deuhin i kal dawn nia.”
.
Kan inbiakna kan tihtawp hnu chuan intifaiin eitur ka siam a. Dawr pana ka chhuah meuh chuan dar 10 a ti thuak tawh.
.
Dawr ka thleng a, nizan lama tlangzarh thar tlereuh a lo thleng fel der tawh a. Kym pawh a lo phe vat vat tawh mai. Tlereuh te chu kan remfel a, an zavai mai chuan special tak anni vek maiin ka hria.
.
Hun a ral zung zung a, Silas nen inbia in lunch ei turin ka kal chhuak a. Thil pawimawh deuh min hrilh a duh thu a sawi khan ka rilru a luah a reuh reuh bawk.
.
Restaurant ka thleng a. Lunch ei hun runpui anih vangin a lun khawp. Silas thutna ka hmuh rualin ka pan nghal vat.
.
“Mi nghah kan nei a, a lo thleng tep ang.” Silas chu zawhna mitmengin ka en a, min chhang lovin min en let nghek ringawt.
.
“Mr. Yaman a zin chhuak tih ka lo hria a. Enteh, ka lo sawi tur a ni em tih ka hre lo a. In inkawp nghet dawn anih chuan chik rawh aw.” Silas thusawi chu ka rin loh lam daih a ni. Ni e, inngaihzawnna a awm tawh chuan thil chik tluka pawimawh a awm lo.
.
“Chu chu engvanga min hrilh nge i nih?”
.
“Um__ Ka sawi ve hrim hrim anih chu. Ka thiantha hian rilru natna i tawng ang tihte pawh ka hlau ve bawk a.”
.
“Min ngaihsakna vangin ka lawm e.” ka ti tak tak. Silas chuan ka kut rawn vuanin a nui sak a.
.
“Thil pawimawi sawi tur i neih chu enge a?”
.
“Oh!! Kha kha maw? I hre mai ang.” Ka hnunglam a en a, a nuih hmel inthlak dan atangin kan mi nghah chu a lo thleng ta anih ka ring. Silas enna lam ah ka hawi ve a, kan lam pana hmeichhe lo kal chu ka hmelhriat a ni lo. Kan bula arawn thlen chuan tlangnel tak hian a thu nghal a.
.
“Mia, ani hi EvaCoo.”
“Hi_”
.
Kan in chibai a. Hetah hian engti tura lo kal ve nge anih ka la hre lo ta fo.
.
“Mia, ani hi official takin ka bialnu a ni tih hrilh che ka duh vanga hmuh che duh ka nia_”
.
Min thawng lutuk anga lan ka hlau hnuhnawh. Mahse, phat rual lohin min thawng tak zet. Silas hian kan inhriat tantirh atang khan a hmeichhe duhzawng a sawi ngai lo. A sawi loh piah lamah hmeichhia ai chuan mipa in an hip zawk tih a sawi thin! A mizia, a chetphung atang pawhin chu chu thil mak a ni lem lo bawk. Mahse Ka pawmpui ngai lem lo thung. Pathian hian mipa leh hmeichhia chiah a siam tih hi a bulah pawh ka sawi mai thin. He thil hi chu khawvelah inhnialna tawp thei ngai lo tur anih vangin ka thiana nen hian kan sawi zui tam tehchiam thin lo. Pianpui anih tlat chuan tih theih loh chinte pawh a awm tehmeuh ang.
.
“Ka lawmpui che_ Tak zet in_” Silas kut chu ka duh aia nain ka hmer a, ani chu a nui hawk hawk thung. Min thawng tih a hre ve tho. Eva Coo chuan chik taka min enin a nui ve tho a. Min en dan chu min thik a ni em lovang  chu maw!
.
Ka beisei aia thain kan ti ti zui bawrh bawrh a, EvaCoo pawh mi pawh awlsam tak a ni tih ka hrezui ve mai a. Silas nungchang chu mak ka tiru nawn leh thin tih mai loh chu engkim a tha. Mipa tak tak anga a han che chhuak hmuh chu nuam tak ani. Hun remchang hmasa ah chhuak ho tura intiamin restaurant chu kan chhuahsan ta hlawm a.
.
Dawr ka tlen leh chuan ka pindan bikah ka lut a, ka phone message ka en chuan Gabo message pakhat a lo awm. Thu pawimawh em em a awm hran lo. A message chu chhiar nawnin ka nui sak sak a. Ka ngai hle! A message chu chhang lovin ka call ta zawk.
.
“Hotel-ah ka lut fel chiah_”
“I chau em?”
.
“Ka ngai che.” A tawng zawi sup.
.
“I sawi ring ngam  nange?”
.
“Ngam tereng_”
Hnung lama a hminga ko ri ka hriat chuan ka sawi tum chu sawi lovin ka ngaichang, ani pawh a ngawi ve tho. Ka hriat sual loh chuan Zuri awri a ni tlat a ni. Ka hriatsual ka ring lo zawk.
.
“I la awm em?__Hello_ Mia?”
.
“Uh_aw, awm e.”
.
“Ka han indah fel anga ka lo be leh dawn che nia.”
.
Ka thil hriat chu fiah phawt ka duh. Anih loh chuan rilru nuamin ka awm thei lovang.
.
“I  bulah khan tunge awm?” ka ti thawr a. Tawngki pangngai ka hmang thei hram.
.
“An awm teuh mai. Tinge?” a ngaihna hre vaklo aw ni a ka hriat vangin ka hahdam leh ta deuh.
“I hmingin an lo ko chein ka hria a.”
.
“Ni e, keimah chauhin ka kal lo a. Hnathawk pahnih ka hruai a. Ka inpeih veleh ka lo be leh ang che. Phawt_”
.
Ka chhan leh hmain phone a off a. Ka phone chu ka en vung vung ringawt. Thil thalo a awm loh ka beisei.
.
Ka pindan pawnlam atanga Kym min ko ri ka hriat chuan ka chhang thuai a.
.
“I box tur a lo thleng a. Ka lo dahlut dawn nge?”
.
“Ka lo chhuak ang.”
.

.
Chair chu thawhsanin ka pindan pawnah ka chhuak a, box hrawl zet ka hming inziak kuau ka hmuh chuan mak tiin ka ang pham a. He thil hi khawi atanga lo kal nge anih? Gabo lo thawn a ni maithei. Ni lo mai thei bawk.
.
Rin dan ka thiam loh vangin ka pindanah dah lut tura ka hrilh hnuah kei pawh chu ka pindan ah ka let leh a. Box chhungah chuan eng thil nge awm tih hriat duhin ka hawng nghal. A chhunga thil awm ka hmuh chuan hrethiam chiah lovin ka la chhuak a. Bawm dang awm leh chhunga thlalak ka hmuh chuan ka thaw a tawp lo chauh a ni e! Dawhkan chu dawmin ka pai rawk rawk mai.
.
Ka nu! Ka nu! Ka nu hmel chu ka ennawn a, ka ring ngam lo.
.
“Nu!” ka indawm ding zo lo. Chhuatah ka thu hnawk a, nunna nei lo hmelpu ka nu thlalak ka hmuh zawh chiah chu ka mitthlaah a cham nghal hmiah.
.
He thlalak ringawt dah nan hian hetiang khawpa bawm lian hi hman a tul nachhan tur a awm lo. Khawi atanga lo kal  nge anih? Ka rilru-a lo lang hmasa ber chu Zuri!
.
Kut khur nasa tak chungin ka ding chhuak leh a, thlalak chu hlauhna a khat chungin ka la kang a. Nichin khan ka hmu sual palh ani ngei ang tih rilru pu chungin thlalak chu ka ennawn leh. Mahse, ka hmu sual lo. Ka nu thlalak ngei a ni.! A hmel chu a dang bem a, kan  inhmuh tawp ber, naupang tetakte ka nih laia a hmel nen khaikhin chuan danglamna a nasa lutuk mah mah a ni e.
.
Box te zawk chu a bawm atangin ka la chhuak leh a, a hnuaia note awm chu la lehin thu tawite inziak chu ka chhiar a.
*I nu thlah i duh a nih chuan Ballevue Central Church ah lo kal rawh.* tih zawng a inziak!
.
In ngaihtuah nawn turin hun ka nei lo. Hmanhmawh takin dawr atang chuan ka tlan chhuak a. Mak ti taka min lo entu Kym leh hnathawk dangte bulah pawh engmah sawifiahna hun a awm lo. Ka car-ah lutin chak thei ang ber hian Ballevue Central Church lam panin ka tlan chhuak nghal a.
Engtin nge anih theih? Khang hun zawng zawngah khan ka nu hi Ballevue-ah a lo cheng ve reng tihna em ni? Anih si chuan engvangin nge vawikhat chauh pawh kan inhmuh loh? He thil hi dawt vek ni hram teh se.
Ka ngaihtuahna buai lutuk chu tihngaihna hre si lovin ka tap hlawp hlawp ani ber. Central Church hung chhungah tlan lutin Biak In kawtah chuan Car chik tuarh khawpin ka ding chawt a. Car atang chuan ka chhuak nghal mai ngam lo.