GABO YAMAN - 11

GABO YAMAN
CHAPTER – 11
Thantei_LauraSean
.
MIA VALENTINA GARCIA*
.
“Ka mitah min en rawh.” Gabo chu a tawng zawi khawp mai. A mitmeng thim raih chu ka en a, a hmaa ka hmuh ngai loh eng thil emaw ka hmu! Mahse ka chiang ngam lo thung. Nichin lawka ka fawh a duh lo tih a tihlan khan ka zak a, zahpuiawm taka che ah ka inngai hman anih kha. Tunah min hnaih duh angin a lang leh tho si. Ka chian ngam lohna hi a thuk lutuk tawh niin ka hria. Uluk taka ka ngaihtuah hian a tir atang khan Gabo hi ka pawh tak tak turin a awm ngai lo tih hi ka ngaih dan a ni. Heti chung hian JoMas sawi ang khan mi tha leh rintlak anih ka ring tho si. Ngaihtuah dan tur pawh ka hre tawh lo.
.
Ka biang tawn tawnah min vuanin chiang takin min en a. Reilote chhunga a nungchang inthlak thut thin hi engtik ah nge ka hriatthiam dawn le? Ka tan hnar a har zia hi min hriatthiam pui hauh lovang.
.
“I awm dan hi ka hrethiam lo_I danglam thut thut a,” ka rilru buai ru tak chu ka hmelah a lan ngei pawh ka ring.  “Khami zan atang khan ka tan hnaih che hi thil tha a ni dawn lo tih ka ngaihtuah thiam tawh.” Ka ti tawi tak a.
.
“Eng thu nge sawi tura min duh?” atih chuan sawi tur ka hre lo. A lakah hian duh ka ngah lutuk pawh a ni mahna!

.
“Min kuah rawh.” Atih chuan ka nuih ringawt. “Min kuah turin ka mamawh che.” A mita ka en chuan a thutak hle tih ka hmu thei. Thil dang zawng zawng ngaihtuah duh lovin ka kuah ta nge nge a.
.
“I lakah hian ka serious ngei em tih hriat i duh chuan min fiah thei ang.”
.
A thusawi hi a hriatchian ka beisei.
.
“Engtin nge ka fiah ang che.”
.
“I duh danin_”
.
“Ni rawh se.” tia nui chungin ka kuah nghet sauh a.
.
Engemaw chen chu kan ngawi dun ta vang vang. Ka lakah a thutak tih fiah turin min hrilh zo chauh  naa kan boruak chu a hahdam lo ru tlat. Ka sawi thiam chiah lo.
.
“Kar liam ta chhung khan khawiah nge i kal? Engmah min hrilh lo a, biak pawh theih lohin i awm bawk a.” min kuahna thlahin hriatthiam har tak hian min en a, a zawhna chu ka chhan ngei a duh tih erawh a tilang chiang tawk thung.
.
Ka rinlawk ang ngei zawhna ka dawng ta a nih hi. He zawhna chhan dan tur hi ka lo ngaihtuah lawk vek tawh bawk. Ngawi renga ka kal kha ka thiam loh a ni tih erawh ka hrechiang hle. Ka unaupa Birthday lawm turin Al Yaman ah ka kal tih hi hrilh ka tum hran lo.
.
“Inngaihtuahna hun ka mamawh vang a ni. I awm dan khan ka rilru a tibuai tak zet a. He thil hi kalpui zel tur nge tihtawp mai tur tiin ka ngaihtuah a__Bakah_ thil dang_”
.
“Chu chu a chhan dik tak anih chuan buaina tur i nei lo. Mahse, keimah hian buaina ka nei!” A ti nghet churh a. Eng thu nge a sawi leh dawn tih ka lo ngaichang tawp.
.
“I inngaihtuah chhung chuan hei hian a lo ngaihtuahpui che anih ka ring.”
.
A phone a phawrh a, a phone screen-a thlalak ka en chuan ka phu zawk! Ni lo. Hlauhna vangin ka mur sung sung zawk a ni. He thlalak hi engtin nge a neih theih? A sawi hmang hian tuna thleng mek ang maiin a sawi lehnghal.
.
“He thlalak hi engtin nge i neih theih?” ka tih chuan a nui suk. A tha lam a ni lo.
.
“Thil hriat harsa a ni hleinem!”
.
“Thil  hriat harsa anih loh chuan ka pa nen sumdawnna ah an inzawm tih i hre tel ang chu tiraw?”
.
“I pa sumdawnpui nen chuan tumah hrilh lovin kar khat chhung in zin bo a. Ka rin i beisei thei lovang.”
.
“He thlalak hi hun liam tawh ami anih hi.” thu dik ka sawi vangin Gabo mitah ka en a, a mit tizim in chik lehzual hian min en a.
.
“Kar hmasa kha hun liam tawh chu a ni ngei alawm.” Awlsam taka ngawih pui mai a tum lo tih a tilang chiang tawk e.
.
“Kum liam tawh ami pawh hun liam tawh a ni tho.”
.
“Pehhel lovin ka hriatthiam turin sawi rawh.”
.
“Kha thlalak kha engtiang a i neih nge tih chu ka hre lo a, a petu che chuan tum nei rana a pek che ka ring. Ka pa nen sumdawnna ah an inzawm thin tih zawng ka sawi ang.” A phena thu awm hi ka sawi thei ngai pawhin ka ring lo. Ace! Ace Dermont! Ka awm a nuam lo ta tak zet. Ace Dermont chungchang hi tu hnenah mah ka la sawi ngai lo. Ka nunah hian ka duh hauh loh thuruk tam tak a inphum tih ka sawi nawn a ngai leh thin dawn chu anih hi.
.
“Tunah sawi rawh. He mihring nen hian kar liamta khan in awm dun tih i pha thei lovang.”
.
“Kum liam ta tiin sawila a dik zawk ang. Vanneihthlak takin kan inhmu tawh ngai lo.”
.
“I sawi awmzia chu enge?”
.
“Kum hnih liam ta khan ka pa vangin kar khat vel chu kan inzui a. Mahse, a tawp dan a chhe khawp mai. Ka nunah tunge awm tih i hriat duh chuan heihi en rawh.” Amah ka sawina a ni tih lantir tumin ka kut dinglam chuan a hmai ka khawih a, ka kut chu rang zet hian a lasawn nghal. Ka chhan danah lungawina a la hmu lo tih a lang chiang.
.
Sofa-ah chuan ka ke pahnih hlang chhovin ka khawkherh a, amah hmachhawn zawngin ka thu ngil auh a. Ka thusawi hi ka ti tak zet tih hria se tunah chuan ka duh ber. A kut pahnih ka vuan a.
.
“I sawi ang chiah kan I lakah hian ka thutak tih i hriat duh chuan min fiah thei ang. Kan inringtawk lo anih chuan eng chen mah kan thleng dawn lo a nia.”
.
Kan inen vang vang a. Ka thusawi chu a ring ta em tih pawh a tilang chuang lo. Min rawn hnaihin ka chalah a fawp a, ka hnarah fawp lehin ka hmuiah a fawp leh a. Keimah zawkin kuahin a awmah ka hmai ka phum vang vang. Helai hmunah hian ka him tih keimah leh keimah ka inhrilh nawn leh ta.
.
.
Min hawsan chuan zan a rei tawh khawp mai. Karleh lamah Yaman Co. tlereuh pho chhuah anih dawn vangin inbuatsaih nasat a ngai hle ang tih ka hriatpui a, Yaman Co. nen inzawmna nei zawng zawng pawh kan tel vek ang. Hun ropui tak kan hmang leh ngeiin ka ring bawk.
.
Mu turin ka insiam a, ka mutthilh hmaa ka phone-a message lo thleng chu check lo lovin ka muhil nghal ve teh tlat a.
.
.
Ka muhil ka harh rualin ‘Monday’ tih ka ngaihtuah nghal. Kartawp chawlh chhung hi hei ai hian rei thei se tih hi chu mi zawng zawng duh dan a ni ve bawk ang chu. Khum atangin ka tho a, ka tihtur ka ti nghal zung zung a. Dawr ka thlen chuan zing dar 9 a ri vel chiah.
.
Vawiin hian kan tlereuh kawlsa thenkhat te hi Yaman Co. a dah let tur a ni a, keimah kal lovin Kym ka kal tir mai a ngai ang. Naktuk zanah tlereuh thar pho chhuah anih dawn vangin inbuatsaih a ngai nasa hle dawn a ni.
.
Buai tak chungin ni kan hmang ral a, dawr atanga ka haw meuh chuan a tlai tawh angreng. In kawngkhar ka hawng a,  ka phone ri chu ka bag atanga phawrhin tunge min lo cal tu tih ka en thuai a. Gabo tih ka hmuh chuan ka nui sak. Ani pawh nilengin a buai hle ve tho ang. Zinga a message ka hmuh bak kan la inbe leh miah lo.
.
“Hey.”
.
“I hnunglam lo hawi rawh”
.
Ka inher vat a, ka in gate pawnah a Car bula a ding ka hmuh chuan ka nui sak.
.
“Eng thil nge ka lo ken hi en la.”
.
“I lo kal hnaih phawt loh chuan ka hmu phak lo.” Ka tih chuan a nui hak. Gate chu hawngin a let leh zet a, a car-ah lutin arawn inkhalh lut nghal a. In chhungah ka luhsan thung.
.
Ka inthlak hnuah ka pindan atanga ka chhuah chuan choka ah thawm ka hriat vangin ka pan nghal a.
.
“Enge i tih dawn?” a thiltih ka hmu reng chungin ka zawt lui ta tho.
.
“Ka bialnu hmel tha tak tan eitur ka siam dawn anih hi_”
.
“Ka lo pui ang che.”
.
Min rawn hnaihin nghet zet hian min kuah a, ka hmuiah min fawp zauh a.
.
“Thil dang kan tihsan chuan eitur kan nei lovang.” Nui hak hak chungin ka inla hrang a, a thiltih lai chu kan chhunzawm a. Kan ni hman dan sawiin kan ti ti a. A hmel en chungin ‘He thil hi ka duhthusam thin ang chiah kha a ni’ tih thu hi ka inhrilh nawn mawlh mawlh a.
.
“Naktuk zan dar 8-ah ka lo hruai ang che.” Tiin kan inthlah ta rih.
.
Zan dar 8 minute 10 in a la ri lo tihah Gabo arawn thleng a, kan kalna tur hmun kan pan nghal a. Engmah thil danglam a awm lo. Car chu khalhin steering wheel a vawn lohna lam chuan ka kut vuan in a hmer vang vang a.
.
“I nalh lutuk tih ka sawi tawh em?” a fiamthu tih ka hria. Tun hi a vawi 4 sawina a ni tawh! Chhang lovin ka en a, ka mitmeng hian engkim a sawifiah ka ring e. Ka kut chu la kangin a fawp zauh a.
.

.
Kan tum hmun kan thlen chuan mi tam zawk an lo awm tawh. Car atanga chhuak in ka awmna lamah arawn kal thuai a. Ka chhuah ve chuan ka kawngah min kuah vat. Mi zawng zawng ngaihven nih hi ka duh lem lo.
.
“Gabo, a hrangin lut ila a that zawk ka ring.” Ka tih chuan a lu a thing ringawt. Min kuah nghet sauh chuan a ngaih dan a tilang chiang tawkin ka hria. Ka hnial lui thei hauh lovang. In chhungah kan lut a, ka rinlawk dan ang chiahin mi zawng zawng mit kan la tih ka hre nghal. Thenkhat chu min en chungin an phun zui sar sar a, hetiang thil hi thil zawng zawnga ka hmachhawn peih loh ber a ni reng a, a la ni zel bawk ang.
.
Kan thutna tur hmun theuh kan pan fel a, ka bulah Gabo chu rawn thuin ka kut a vuan lehnghal chat a. Kan bula thu ve te chu an inhrilhru chawl miah lo niin ka hria. Engahmah ngai lo tur ka ni tih ka inhrilh chungin a har khawp mai.
.
Dawhsan atanga Gabo an rawn koh chuan ka kut a vawnna chu thlah lovin a tho a. Dawhsanah min hruai chhoh ve a tum nia ka hriat vangin ka hlauthawng hman thelh a ni. Ka beng bulah rawn kun hniamin  “Ka lo let leh vat ang.” A tih chuan nui chungin ka bu nghat a.
Dawhsan lam pana a kal chu ka en reng a, thu tawite sawiin a tihtur chin felfai taka a tih hnuah a rawn let ve leh mai a. Hun ruat bik a zawh hnu chuan kan thutna atangin kan tho chhuak ta hlawm. Kan hmelhriat te kan pan sung sung a ni zawk mah ang chu.
.
“Hey_ Honey! Engvanga inhmu khat em em nge kan nih le?”
Silas chuan nghet mah  mah hian min kuah a. Kei pawhin ngai takin ka kuah ve bawk.
.
“I chawlh hman chu a nuam bawk em?”
“A ngai ang a nimai. I pa chanchin ka lo hria a, ka lawm tak zet.”
.
“Beisei aiin a tha chak a. Kan lawm khawp mai. Khawiah nge i duhlai Mr. Yaman chu a awm a?” a ti sawr sawr a. Silas chu ka nghawk zauh.
.
“Ohhh.. ka hria alawm. Helai hmuna awm hmeichhia zawng zawng hian I mitmu kher chhuah chak hmel taka an en lai che kha ka lo hmu alawm_ Lungngai suh., ka awm chhung chuan a thleng lovang.” A nui zui nasa. Ka lu thing nar narin Silas chu ka en a. A bula awm hi  a thawven thlak riau thin.
.
Gabo kan bula arawn let leh chuan mi ngawichawi tak ang maiin a awm leh nghal hmiah.
.
“Mr. Yaman, tlereuh tharte chu kan beisei aia nasa in kan hralh ngei ngei ang tih ka ring.”
.
“Beisei phawt ang.” Gabo chu Silas lamah a bu zauh.
.
“Hmaih ka nei em?”
.
Hmeichhe aw ka hriat than zet lo rikna lam chu ka hawi a, ka inthunun hman lo thelh a ni e! Engtin nge a nih theih? Zuri!! Zuri!!
Silas chu a thianten an rawn koh vangin a kalsawn ve nghal bawk a.
.
“Mak i tih viau tih ka hre mai. Unaunu, min ngaih thu pawh min hrilh i tum miah nange?” a awmzia ka hriat thiam miah loh hian Gabo chu enin a nui sak! Heihi eng thil nge anih chiah? Gabo lakah hian Zuri hi mikhual a ni miah lo! A ni lo reng reng! Min thawng tih hian a sawifiah zo lo!
.
Zuri chuan min rawn kuah a, mak ka tih em vangin engtin chiah nge ka awm tih pawh ka inhre lo. Min kuahna chu thlahin Gabo a kuah leh a, a beng bulah engemaw a sawi sap.
.
“In pahnih hian in inhria maw?” mak ka tih zia chu ka thup thei ngang lo a ni e.
.
“Hria e. Argyros hian nasa takin min tanpui alawm.”
.
“Oh_?” a ni chiah em tih chian tumin Gabo chu ka en a, ani chuan chik taka min en chungin a lu a bu nghut. An lo inhre ngei anih chu! Ka lan dan hi ka mawl  hmel viau ta ve ang.
.
“Argyros ilo la hriat loh takin Mia nen hian unau kan nia. Ka unaunu neihchhun anih hi.” min ngaina lutuk ang mai hian min kuah a, awm dan tur ka hre der lo nia! Mak ka ti lutuk hi ka hmahaih vek zawk.
.
Thil mak lutuk chu maw__ Zuri hian tuna a nungchang ang hi a neih ngai ka hre lo. A tawng a nemin a chezia pawh a danglam. Nungchang zawi tak angin a lang  bawk. Ka unaunu hrawn, ka hriat thin Zuri nungchang  nen khan a inpersan hlak anih chu!!
.
“I lo kal theih ka beisei lo a. I lo kal chu a lawmawm e. Jude a lo tel ve em?” Gabo chu ka en a, ani chuan Zuri chu a en thung.
.
“Thil tihtur dang a lo nei a. Keimahin ka lo kal ta mai.”
.
“I lo kal a, a lawmawm e.”
.
Mak ka ti telh telh. Gabo hian Zuri hi engtin nge a tanpui tihah ka buai lo. An inhre tha hle tih an tilang hian min tibuai zawk! Buai tur ka ni em? Ni lo.. Mahse ka rilru a tibuai si anih hi! 
.
“Mia hian unaunu a neih thu ka bulah a sawi miah lo a.” Gabo chu makti zetin ka en a, ka mitmeng  a mak tihna lang nasa lutuk tur chu ka theih anga rangin ka thup leh thuai. A dik alawm. Gabo bulah hian unaunu ka nei tih ka sawi lo. Ka neih loh vangin sawi tur pawh a awm lo reng a ni. Zuri LeBoeuf hi ka unaunu a ni ngai lo va, a ni ngai lo chatuan bawk ang!
.
“Oh_ Sawi lovang. Um_ Unau pianghmun kan ni lo a. Mahse ka tan chuan ka unaunu neihchhun a ni reng tho.” Nuihzatthlak!! Vantirhkoh ang mai hmelpuin Zuri chu a nui ta anih chu! Mi rap zawk e a. Hetiang khawpa nasa hian mihring hi a danglam theih ka ring ngai lo. Ka mita ka hmuh mek hi mak ka ti nawn awn awn mai chu a nih hi!
.
Kan bulah chuan mi pakhat rawn kalin Gabo chu arawn hrilh ru a.
.
“Min lo hrethiam lawk, ka lo let leh thuai ang.” Tih pahin Gabo chu a kalsawn a, a kal sawn rualin ka hriat thin Zuri hmel ka hmu ta chiah!
.
“Kan in hmuh lohna chin a rei ta hle mai.” A aw a khakna lang chu hre lo ang hmiahin ka awm.
.
“Hmuh che ka lo in beisei lo a.” ka ngaihtuahna chiah a ni ka sawi chhuah ni.
.
“Argyros hian eng vanga hnaih che nge anih vawikhat tal i ngaituah tawh em? Nang hian i ngaihtuah lul lovang_ A ngai te bawkin_ I hriatchhuah meuh chuan maw, I tlai lehpek ang.”
.
“Gabo nen kan inkar hi engmah hriat i nei lo.”
.
“Huh? A ni maw?” nui ri ngeiawm ber mai chu! “Kan la hria ang chu. Gabo? Argyros hi engtiklaiin nge Gabo alo nih? I hma zelah ka kal tih hi theihnghilh suh.”
.
Ka chhan hmain kan bula in tur keng  lo kal chu pawt dingin in tur a la a, a in hma hauhin a intur ken chu ka ke bulah a leihbua a.
.
“Ooops! Unaunu, Argyros hian engvanga hnaih che nge anih tih hi vawikhat tal lo zawt ang che. Nangmah chauh hi a nuna hmeichhe awm i ni em tihte pawh mawle” tih paha inher in chalak zet hian a kal lawh lawh a.
.
A sawi awmzia hre lova ding chungin a kalsawn lai chu ka en tawp.   
.
.
Zanin zet chu a plot vawihnih ngawt ka thlak hman! Ziahlawk hi ka thiam der bawk si lo a. In zahawm ka ti hleeee mai.