GABO YAMAN - 15

GABO YAMAN
CHAPTER – 15
Thantei_LauraSean
.
Minute 20 a ral ta. Zuri hmel ala rawn lang lo. Ka thutna atanga thovin pawn lam lan theihna ah ka ding a, khawpui chhung zau tak lang ut chu ngaihtuah bik pawh nei chuang lovin ka en reng a. Sana ka en zauh zauh. Zuri hi ka chentirna in atanga a lo kal anih chuan lo thlen a hun tawh.
.
Ka office kawngka inkik ri ka hriat chuan ka thutnaah letin ka chhang a. Kawngka rawn inhawng nghalin Zuri chu hmel phelh phang hian arawn pen lut nghal a. A hah hmel phian lehnghal. A thaw hlai hlai mai. Tawng lovin ka dawhkan hmaa chair awm chu thu turin ka duh tih hriattir nan ka kawk zauh a.
.
"Kawnglakah Car a chhia a, ka tum aiin ka rawn thleng har ta deuh anih hi. Argyros, Heihi en teh, i awih thei bik lovang. Mia hian min thah a tum nia ka hriat hi dawt vek a lo ni. Min thah tumtu hi Mia a ni lo__! Ka la awih thei lo.."
.
ENG MAW?! Eng thu nge a sawi hi! Ka hriat sual loh chuan amah thah tumtu kha Mia ani lo tih a sawi anih hi! Engtin nge a hriat chhuah? A hmel chu chik lutuk tak zet hian ka en a, hah hmel tak hian a thaw hliai chungin chair ah chuan a thu hnak a.
.
"Engtin nge i hriat dan?" engmah danglam lo ang hmiah leh a thu rawn sawi chuan min thawng lem lo niawm takin ka thut ngaiin ka thu a. Min chhan dan tur hriat ka chak zek zek bawk. A lehkha ken chu ka hmaah arawn dah a.
.
"Ka sum khawl zawng zawng hmang zovin min chhuisak tu tur ka ruai ve a. Tun mai khan lehkha hi min lo thawn chiah a ni."
.
"I tan ka chhui reng tih hre chungin maw?"
.
"Ah_ Aw, ni e. Min tihsak tih hre chung pawhin ka awm hle hle thei ngang lo a ni."
.
"I mi chhawr chu tunge?"
.
"Hmaichhanah kan inhmu ngai lo. Text hmang chauhin kan inbia a. Secret agent anih thu leh mi pangngai ang maia khawsak a duh zawk vanga inthup a ni awm e."
.
Min chhanna chu thudik ni thei a ni. Secret agent tha tam tak an awm tawh a, kei ngei pawhin ka hmang tangkai mek chu anih si hi.
.
.
"Engtin nge anih theih ka hrethiam lo. Kha hmeichhia khan Mia tirh a ni tih a sawi chiang a ni. Engtin nge hetiang hi a nih theih?" min zawt niawm zawk tak hian min en a, a mitmeng atang chuan thil awmzia a hrelo tak zet niin a lang bawk. Mihring chezia leh awm dan zir mithiam bik pawhin hmu se ka hmuh dan tho hian an hmu ngei ang. A mitmeng chu a buai nak a, a chunga thil thleng kha  ngaihtuah let niawm tak hian a en ngai a en vang vang a. Ngaih dan mum ka la nei thiam chiah lo. Dik taka sawiin Maverick thil hmuhchhuah leh keimah ngeiin a thusawi inkalh thin ka hriat atang khan Zuri hi ka ring pumhlum tawh lo a ni. Ka rin leh rin loh vang ngawt a dik a diklo tur a ni lo tih erawh ka ngaihtuah tel tho.
.
"Engtin nge kan tih tak ang? I tan pawh ka thusawi hi rin a har ngei ang tih ka ring. Hreawm ka ti tak zet. Khang hun chhung zawng zawng khan ka thu hriat dan a dik loh vangin i bulah dawt ka lo sawi char char tihna a nia. Hreawm ka ti_ Ka zah tak zet che."

A ngawi dat a, mitmeng tim deuh tak hian min en ta vang vang a. A thusawi chu engtin nge ka dawn sawn tih hriat a tum niawm tak a ni. Ka hmel a en atang ringawt hi chuan a thusawi chu engtin nge ka lo dawnsawn tih a hre hauh lovang. Ka ngaihtuahna hriat theih turin ka hmelah ka tilang eih lo. He thil hi thluak hmanga ka chhan a ngai tih ka hrechiang hle bawk. Zuri hi a dik emaw dik lo emaw a lakah hian ka fimkhur a ngai tawh reng reng e tih hi ka ngaih dan dik tak a ni.
.
"Mi dang han rinhlelh tur i hria em?" ka tih chuan mangan hmel zeta a lu thingin a mittui tla tur dan tum niawm tak hian a mit a khap sak sak a. Tlemin a dak deuh bawk. A insut zui hraih a.
.
"Ka hrelo. Tu pawi nge ka khawih ka hre lo a. Ka pa_ Ni lo! Ka pa chu a ni thei lo. Engtin nge a fanu a thah theih ang? Ka pa chu a ni thei lo." min bia pawh a ni ang tawh lo. A thusawi chu amah leh amah inrintir tuma inhrilh nawn mawlh mawlh a ang zawk. Tun hun hi Jose chungchang record awm miah lo chungchang zawhna hun remchang tak anih dawn hi.
.
Ka thut dan siam remin hahdam hmel tak hian ka thu tha a, ka chhungril erawh a tang ru viau.
.
"Ni e. I pa chuan a ti hauh lovang." ka tih chuan min rawn en zawk a. Ka thusawi chu awih a duh hle tih a thup hauh lo bawk.
.
"Ni e, a ti lovang. Ka pa chuan min hmangaih em em tih ka hria. Um_ Mia chungchang i sawi zui miah lo_" tawng sual inti niawm tak hian a nui hak a. "Hei chu ka buaina tur a awm lo. Mia bulah hun i hmang tam hle tih ka hria a, keimah vanga hnaih i ni tih pawh ka hria a. Tunah chuan Mia hian ka chungah eng thil mah tih a tum lo tih a chiang tawh bawk a. Mia hnaih tur hian ka duh tawh lo che." inthlahrung tak anga lang siin a duh sawi a thulh chuang der lo. Ni e, Mia ka hnaih leh hnaih lohah sawi tur a nei lo reng a ni. Amah vanga hnaih ka ni tih erawh dawt ani lo a, a tir atanga a hriat vangin han sawi mawi a Mia ka hnaih chhan chhuanlam dang siam ka tum hran lo. Eng thu pawh sawi ila thudik chu thudik a ni reng thin.
.
"I pa i sawi chhuah takah chuan, Jose chungchang record engmah hmuh tur a awm lo a. Tunah hian i unaupa a ni ngei em tih pawh a chiang ta hauh lo a nia."
.
A meng phar kawk!
.
"Eng maw? Mas chungchang record engmah a awm lo maw? Engtin_ Engtin nge anih theih a?" mak ti lutuk in a lu a thing nawk nawk mai. A thutna chair atang chuan a tla thla lo chauh.
.
"I pa ngei pawhin fapa a neih loh thu chiang takin a sawi a ni."
.
"Ka pa_" a hmai hupin a insut ta hlawp hlawp a. Sawitur ka nei rih lo. A lan dan mai atang hi chuan a unaupa chungchang a pa in a pawm lo chuan a rilru a tina hle ang pawhin a ngaih theih ang chu.
.
Ka thutna chu thawhsan in ka pan a. Amah ka rinna a tlahniam chungin a dinhmun hi ka chungah tla ve ta se ka na hle ang tih ka inhriat vangin hnem chu ka tihtur ah ka ngai.
.
A hnungah ka kutin ka vuan a, ka din hnaih tih a hriat chuan chhuak lutuk a tap chung hian ka kawngah min rawn kuah a.
.
"Ka_pa chuan__engtin nge a tih theih?_ A fapa neih chhun asin_ Ka ring thei lo_"
.
A tah tawp hun ka nghak ani ta ber. Ani pawh insum in a mittui a hru sawk sawk a.
.
"Ka tihpalh. A zialo hle mai. I thusawi khan min thawng chiang em a ni. Ka pa chuan Mas chu a fapa a ni lo tih a sawi chiang ngei si amaw?"
.
Tawngkaa chhang lovin ka lu ka bu nghut nghut. Thawk a la a, kei pawh ka thutna ngaiah ka let leh.
.
"He thil hi sawi chhuah ka duh lo hle a, mahse ka sawi lo thei ta lo anih hi. Mas leh ka pa hi ka hriat theih tirh atangin an inkar a tha ngai lo a. Chutiang bawkin Mia nen pawh ka pa hi an inkar a tha chuang lo. Mahse ka pa'n fapa a neilo tih a sawi thei hi mak ka ti_"
.
"In thlalak ho te emaw kawl i nei em?" ka tih chuan awm dan danglam lovin a lu a thing mai a.
.
"Sawi zahthlak tak chu a nih hi mawle_ Chhungkua i hriat thin ang hi keini chhungkua chu kan ni ve lo. Tichuan a tawi zawngin min hriatthiam sak ka ring." a ngawi deuh dat a. "I hun ka khawhral sak tam ta hle mai che. Kal tawh ila a that ka ring. Ka thil hriat khan min thawng em a, ngaihtuahna fim pawh ka nei thei rih lo. Kawngah ka car ka rawn kalsan ringawt bawk sia. Ka kal tawh mai ang."

A thutna atangin a tho a, a la tawi leh hrat a.
.
"Argyros, khawngaihin ka chunga thil thleng dik tak leh ka nunna min laksak hial duhtu chu min chhui chuah sak thei angem? Keimah ringawt chuan engmah tihtheih ka nei lo. Ka pa tanpuina ka dil mai dawn em tih ka ngaihtuah nain Mas a fapa ni lo ang hmiahin a sawi duh tih ka hriat hian pan loh ka duh leh ta zawk. Nang chauh hi rinngam ka neih awm chhun i ni ta tak zet anih hi."
.
"Theihtawp kan chhuah zel dawn nia. I him tih inhria la__" a hmel chu ka en a, a hma ai chuan a that hmel ta deuh.
.
"Kan inhmu leh thuai dawn nia." office atanga chhuah tumin a kal tan a, he thil hi hrilh ta ila engtin chiah nge a awm tih hriat a chakawm tlat!
.
"Uh_ Zuri_"
.
Rang zetin arawn hawi let var.
.
"Mia hi ka nupui ni turin ka sawm dawn tih hrilh ta che ila__"
.
"Eng_?" Mak tiin a ang pham mai. "Tak zet?_" arawn kal let leh. "I fiamthu tiraw?_"
.
"No."
.
"Oh!!" a nui buai nak a. Mak a ti tak zet chu anih hi_ "Chutiang tur khawp chuan i serious ka ring hauh lo a. Tunhmain i hre ngai silo a, chutiang thutlukna siam tur chuan a la rei lo mah mah__ Oh mY! Chu chu ka sawi tur a ni hauh lo mai_" sawi leh mai tur hre lovin a hmel a siam danglam zauh. "Okay. Min thah tumtu ani lo tih ka hriat khan ka ngaina chuang hauh lo nain__ Ka sawi tum i hriatthiam ka ring. Ka ngaina lo nain hlim takin awm se ka duh. I sawmna chu a lo pawm ngei ka ring."
.
A nui sak a.
"I hun dang ka pawt hek leh ta. Ka kal phawt ang. Kan inhmuh leh thuai ka beisei. Ka chungchang thuah kha chuan ka ring che ania. Kei hian engmah tihtheih ka nei chuang lo tih min hriatsak kha."
.
"Okay. Chanchinthar a awm thuai beisei ang."
.
"Aw le. Chuan lawmpuina ka hlan lawk ang che."
.
"Ka lawm e."
.
Zuri kal chhuak chu ka en reng a. Chiang taka ka chhal theihna tur thil Maverick hmuhchhuah chu bawlhhlawh ang lek a ni ta der anih hi! Engtin nge a nih theih zawk le? Maverick ka ruai tih hi kei leh Maverick bakin kan hre lo a. Chuti chung chuan Zuri khan amah thah tumtu Mia a nih loh thu hre chhuak thei a lo ruai ve tlat si. Seattle Beach House bul tuipuia a lo awm theih chhan leh tu thiltih nge tih hi ka hriat chian a ngai lehzual ta tak zet anih hi.
.
Chair nghenchhan chu nghengin thawk ka la hak a. Zuri chungchang hian min tibuai tam ta hle a ni.
Ka phone enin Mia picture message ka hmuh chuan ka nui suk. A lo thlen laii ka hre miah lo. Dar zat atang chuan Zuri nen kan inbiak lai kha anih ngei hi. He thil hi tuna ka mamawh tak chu ani. A nui hmel chu ka en vang vang a.
*Lunch i ei tawh em?” * he thu hi a thlalak ah chuan a inziak va va.
.
Sana ka en a, Lunch ei hun pangngai a lo pelh tawh vangin ei loh law law ka duh ta zawk. Lehkha chinfel tur tlem ka la nei bawk.  Ka ruahman lawk hun chatah Mia hruai ngei ka duh vangin lehkha chinfel ngai  ho chu ka en fel zui nghal mial mial a.
.
Ka phone message tone a rik chuan Mia anih ringin ka en leh zauh.
.
*Lunch i ei lo tih ka hria a nia.” tih zawng arawn thawn.
.
*😙* chiah ka thawn let. Engmah ka sawi loh vangin a lungawilo deuh ngei ang. Ka ngaihtuah zawngin ka lo nui reng tih ka inhriat chhuah chuan ka aw thian kharh a thu thain  ka thiltih lai chu ka chhunzawm leh a.
.
.
MIA VALENTINA GARCIA*
.
*😙*

Ka message dawn chu en in ka nui sak. Ka ring dik chiah tih ka hre mai. Ka phone chu dahin Laptop-a ka thil check mek chu ka tihzawm a.
.
 Chawhma lamah kan customer hlun thenkhat an lo kal tih loh chu kan awl ve deuh hlek. Nitin hian mi tam takin tlereuh duhzawng an rawn thlang reng a, mi mak deuh deuh tawn chang pawh kan ngah mai. Mipa thenkhat chuan inhualna zungbun atan an ngaihzawng ten hlu tham tak kher lo chu an duh loh thu an sawi ri leh zauh thin. Thu pangngai ang maia an sawi thin chu mak ka lo tiru thin khawp mai. Zungbun man to leh to loh hi thil pawimawh ah ka lo ngai ngai lo reng reng a ni.
.
Ka hna ka thawk mawlh mawlh a, eng chena rei nge ka thut ka lo ngaihtuah miah lo. Ka office kawngka inkik ri ka hriat chuan thu ngilin ka ring kham lutuk chu ka dawm zet phawt.
.
“Aw, Kym?”
.
Kawngka arawn inhawng a Gabo ka hmuh chuan ka phu deuh zawk a.
.
“Enge irawh tih dawn?” ka tih chuan nui sukin min rawn hnaih a, ka thutna chair tuai virin min fawp vang vang a. Kan inlakhran hnu chuan awmsawn nghal mai lovin ka tukhumah min vuan a, kan chal a insik tir vang vang.
.
“Lunch i ei lo tih ka hria ania.”
“Hm_ Ka ngai che.” a ti sup ringawt. Kan chal ala insi reng chung chuan ka meng a ani chu a la maimitchhing thung.
.
“Meng teh.” Ka tih chuan a meng ve mai a, a mitmu rawng hnai taka ka en chuan ka pil vawng vawng niin ka inhria.
.
“Khatiang khan min en reng chuan a tha lo ang.” Ka hmuiah min fawp leh zauhin a inla hrang ta nge nge. Ka kut pahnihah min vuanin ka thutna chair atang chuan min pawt tho a.
.
“Tihtur kan nei.”
.
“Enge kan tih dawn?
.
“Zingah tihtur kan neih thu ka sawi tawh kha. Vawiin hi Friday ani tih i hria em?”
“Hria e.”
.
“Kal ang le.”
.
Ka phone chu ka bagah dah lutin ka bag chu ka khai a. Dawr atang chuan kan inzui chhuak a. Ka dawrah hian Security leh hnathawkte an that tawk vangin khawiah pawh kalsan ila ka ringtawk a, bul kan tan atang khan bungraw him leh him loh chungchang ah tun thleng hian eng buaina mah kan la tawk miah lo bawk. Mi rinawm leh tha tak tak hnathawktu ka neih vang hian ka vannei hle tih pawh ka inhria.
.
Gabo car kawngkhar min hawnsak ah chuan ka lut a, Khawiah nge kan kal dawn ka ring chhin thiam lo. Eng thil nge kan tih dawn tih phei chu rinchhin dan tur ka hre lo lehzual.
.
Kan tlan chhuak a, ka rin loh lam daih kan pan tih ka hriat chuan zawhna zawt in ka en a. A thle nghut duh chauh.
.
“Min hruaibo i tum chu a ni em lo maw?”
“Tum mai thei.”
“Gabo_”
“Yes. Kartawp chawlh anih hi.”
“Ka hria a_”
.
“Ngawi rengin ilo nghak thei angem? Khawngaihin?” atih chuan ka en a, ka nui tawp. Khawi hmunah tak min hruai ang maw?
.
Engemaw chen kan tlan hnuah hmun awl zau tak kan thleng a. Kan hmalama private Helicopter ka hmuh chuan Gabo chu ka en phawk hra a.
.

.
“Lo kal rawh le.”
“Khawiah nge kan kal dawn?”
“Kan pahnih chauha kan awm theihna hmunah. I hlau em?” a
.
“Ah_ No. Hlau lo e. Hetiang thil hian min thawng deuh mai chauh a ni. Ka lo beisei hauh lo a.”
Min kuahin ka bekah min fawp zauh a. Ka bula a awm hian min khawih lovin a awm ngai meuh lo tih tunah mai khan ka ngaihtuah chhuak zawk. Hetianga mipa an awm chuan a tha lam a ni tih article engemaw ah ka chhiar tawh thin! Ka thil ngaihtuah vang chuan ka nui ru sak.
.
“Lo kal rawh le.”
Ka kutah nghet taka min kaiin Helicopter lam chu min panpui a, a chhung kan luh chuan a tih ngai a ti zung zung a.
.
“Kan thlawk rei vak lovang. I inring em?” a tih chuan ka kutzungpui ka tipir va va. Lungawi hmel zeta nui sukin a kutzungpui arawn tipir ve zauh.
.
Rei vak lovah ka mut arawn chhuak chiai chiai a, mahse ka muhil phal lo. Kan hnuaia hmun mawi tak tak lang chu enin ka hmui ka chip hleithei lo a ni ber e.
.
“Kan tum dawn e” tih ri ka hriat chuan ka lo muhil sek chu ka harh kawk. Ka muhil tih ka inhre miah lo. Ka chhing hlek chauh a niang. Kan hnuailam ka en nghal vat a. Ka hmuh theih zawng chu thil var leh hmun mawi tak ani. Gabo chu ka en a, ka hmela mak tihna lang chu hrethiam ni awm takin maimitchhing zauh hian a bu nghat a.
.

“Helai hi eng hmun nge?” 
“Big Slopes Ski Resort!”
“Eng maw?” He hmun hi ka naupan lai atanga ka kal chak em em thinna ani. Vur tlengna hmun nuam lutuk__ Ka hmu reng chung chuan rin harsa ka ti.
.
Kan tum fel a, kan thlenna tur in kan pan nghal a. In chhung kan luh chuan engkim chu ka mumang ang mai a ni. Ka thawmhnaw hhak lai nen chauh ka kal tih ka inhrechhuak ta chiah. Ka ngaihtuahna hria niawm takin Gabo chuan min en a. Bag lian tawk tak chu kawkin , “Hetah hian i mamawh engkim a awm vek ang. Engkim!”
.
Sawi tur ka hre lo. Gabo chu ka kuah tawp.
“Ka lawm e.” ka ti sap a. Ani chuan nghet takin min kuahlet thung. Kartawp chawlh hun nuam tak ka hmang ngei dawn e.
.
.
.
December thla hi exam ka neih char2 thla a nia. Gabo hi tun thla chhunga zawh hman ka duh ve khawp mai(a tlachawp zel anih vang hian a tawp hun tur ka la hre bik lo a nia😃). Nitin ziahna hun ka nei thei bawk si lo a. Tuna ka update hunbi pawh hi ka insangmar ve nasa hle tih min lo hriatsak hram ru aw. Min chhiarsak thin avangin ka lawm em em e♥