VIDA-SheKnows 6-10

VIDA – SheKnows
(Vee-Da)
.
By. Thantei_LauraSean
.
CHAPTER - 6
.
Eng thil nge ka tih leh dawn hre mai lovin Hotel-ah ka tawm nileng ta ngawt a. Chanchinthar dang a awm anih loh chuan chet leh mai dan tur ka hre tawh rih lo. Ka dinhmun ngaihtuahin pawng beih hun a ni lo tih ka hrechiang a, Jeff emaw ka nu leh pate emaw ka pawh ngam tawh rih lo bawk.
.
Khua a thim dawn hnaih chuan awm ngaihna hre lovin ka pindan chhungah ka vir sek a, thu thar hriat in beiseiin tv ka en a, channel ka thlak kual sek bawk a. Ka chungchanga thu thar an hriat ang angte news channel engemaw berin an puan mai ka ring deuh a ni. Mahse engmah a thleng lo. Zing lama ka mi hmuhte khan report an thehlut lo anih ka ring a, chutiang a nih loh pawhin Jeff leh Kiara te khan rinhlelhna neiin ka chungchang thuthar puang chhuak miah lo turin hma an la thei bawk. Khua han thim chiang se la, ka kal chhuak leh nge nge ang. Awlsam zawka ka veivah theih nan car ka hawh te pawh angai ang chu. Mitthi tawh anga ka awm zui vang hian ka tan thil awlsam a awm thei ta meuh lo anih hi. Ka theih ang ang ka tih a hun khawp mai. Thawm reh vung vung hian ka ngaih a titha thei tawh hek lo.
.
Ka jacket ngai bawk ha lehin Hotel atangin ka kal chhuak a, tunah hian thiantha neih hlut zia a takin ka hrethiam ve ta chiah a ni. Hun chhe ber ka tawn laia pan ngam ka neih chu Maddie_ka thian tha ber Maddison chiah hi!
An in panin ka kal a, ani hian min tanpui anih loh chuan car hawh pawh ka tan a theih chuang loh. Ka mimal lehkha pawimawh leh rintlak ngei  ka ni tih fiahna ka show theih loh chuan tu sumdawng mahin an car min hawhtir lul lovang. Maddie te chenna ka thlen chuan fimkhur takin min hmu an awm leh awm loh ka en kual te te a, eng thil pawh thleng zui dawn se ka Maddie hian thil thalo a tawn phah ka remti dawn lo.
In chhung lam atanga hlim thawm lo chhuak ka hriat chuan Maddie leh a chhungkaw tan chhiatna thlentu ni dawna in hriain ka tim takzet a, mahse tunah hian duhthlan tur dang ka nei tawh chuang lo. Door bell ka hmet ri ta ral ral a.
.
Rei nghah a ngai lo, ka thian mi hlim thei tak chuan nui sang chungin kawngka arawn hawng a.
.
"Tihsak theih che ka nei em?" la nui reng chunga tiin ka hmel min en a, min hre mai lo tih a chiang.
.
"Maddie!" ka ti sep a. Phu deuh zawkin ngaihtuahna buai hmel a pu a, min enchian lehzual hnu chuan thaw halhin a ka a hup chawt a. A mitmenga mak a tih zia lang chu thil makah ka ngai lo. Ka thi niin a ngai ve tho dawn tlat a ni.
.
"Lalpa! Aw Lalpa. Eng_Eng thil__ Vee!" tawng zui lovin ka banah min vuan a, rang lutuk hian in chhung lamah min pawtlut nawk nawk a. Kawngka khar rawpin nghet lutuk hian min kuah a, a tap nghal hlawp hlawp a. "Eng thil nge thleng? Thlarau i ni lo__Ka khawih thei che! Thlarau i ni lo..." eng thu nge a sawi a inhriat pawh ka ring chiah lo, min kuahna chu thlahin ka biang tawn tawnah min vuan a, a mittui la luang zawih zawih chung chuan min en ta reng a.
.
"Engtin nge a nih theih? Eng thil nge thleng? Oh! Vee_" tiin min kuah leh a, thaw huai chungin nghet tak hian ka kuahlet a. Kei pawh ka mittui ka dang thei bik lo. Hetiang taka min hmangaihtu thian ka nei hi mi vannei tawpkhawk ka ni. Ka thiannu awm dan hi lemchang mai a ni lo tih ka hrechiang em em bawk.
Kan inthlah leh meuh chuan kan bulah Gregor(Maddie pasal) chu mak ti taka mengphawk chungin a lo ding reng tawh a. An fanu neihchhun Dusty erawh engmah hrethiam ve lovin a pa ke vuan chungin a ding a, min melh ve kiau tho.
.
"Vee? Engtin nge hetah hian i awm theih?" Gregor chu ka en a, za lo takin ka nui lui sak a. Sawitur a tam khawp mai. An nupa chuan min ngaihven takzet tih lah phat rual a ni lo. "Helam ah lo kal teh u." Engmah sawi lovin Maddie nen kan inen a, Dusty pawm chunga Gregor kal chu kan zui vat a.
.
"Eng thil nge thleng?"
An nupa hmachhawn zawngin ka thu a, ka lak atangin an mit an lasawn lo reng reng.
.
"Sawi tur a tam khawp mai."
"Chu chu hriatsa. A bul atangin engkim sawi rawh." hetiang taka nelawm loh hmelpu hian Gregor hi ka la hmu ngai lo hrim hrim. An in pana ka kal hma ai khan ka tim ru lehzual tawh.
.
"Mooney atanga kan haw kawngah Kiara kha kan rualin a haw ve a, car hnunglam atanga Kiara min pek tui ka in hnu reiloteah ka  mumal lo nghal a. Jeff hian hun engemawchen atang khan min lo phatsan daih tawh a ni. An tawngkam chu anih ang takin ka sawichhuak thiam tawh lo_" dawt ka sawi! Anih ang kilhkelha sawi hi a tulna ka hriat loh vang zawka sawi lo ka ni. Bakah khatiang tawngkam, ka thih  ngei an duh thu an sawi kha sawinawn ka chak hlawl lo.
.
"Karei leh! Mi tenawm pahnih chu! An hrawka va reh nghal nawk nawk mai ka va'n chak em!" Maddie chuan a tawng a sehchilh nawk nawk a. Gregor chuan a kutah a vuan vat thung a. An inhrechiang dun a nia. Maddie hian a thusawi hi a ti leh duh tak tak ang tih kei aiin Gregor hian a hrechiang zawk fe ang.
.
"Honey, relax!"
"Eng maw? Eng a? Engtin nge hahdam in ka awm theih ang? Ka thiantha ber hi en ta che! a ti vin hlar a.
.
"Maddie, Gregor sawi chu a dik alawm. Tunah hian va mantir ringawt dawn ila insawi fihlimna tur hmanrua tha ber ber an nei tawh ngei ang. Jeff fin zia chu i hriat kha. A nupui nitin a bula khawsa pawh min uiresan a, a thawi pawha rinhlelh miah loh tur  khawpa a khawsa thei anih chuan_I ngaihtuah thiam tawh mai em? Khami zan khan an tan mitthi ka ni tawh a, nungdam in ka awm tih an hriat ka duh lo."
.
"Anih leh eng thil nge ka tih ang? Engti turin nge min duh? Thil thalo i ngaihtuah em lovang chu tiraw?"
Maddie chu ka en tawp. Ka ngaihtuahna hi hria se min hlau zawk hial ta ve ang! Jeff leh Kiara te chungah hian eng thil nge ka tih duh? He zawhna hi ka dam chhung hian a riin ka chhang ngai lovang!
.
"Tunah chuan Car ka mamawh. Hawh ka tum zet a, mi tam takin ka thihna thubuai an ngaihven lai hian khawi atang mahin ka hawh chhuak thei dawn lo tih ka hria a. Gregor hian min tanpui dan a hriat chuan ka lawm khawp ang." ka ti zung zung a.
.
"I mamawh anih chuan ka car hi i hmang thei alawm."
"Ni lo. Ka_ Tunah chuan_" sawi zawm tur ka hre ta lo. Maddie leh Gregor te hian min tanpui anih chuan eng thil pawh ti ila an hming a lan theihna chance a awm dawn. Chu thil chu ka ti thei lo. Eng ngaihtuahna nge maw ka neih a, ka pan chawt reng reng le? Ka ngaihtuah tlem leh ta. Ka dinhmunin a zir loh chuan ka dinhmun milin ka che mai ang chu.
.
"Ka kal phawt a ngai." ka ti thut a, Maddie chu a meng phar nasa. Mahse, ka sawi ang hian ka awm ang. "Maddie, khawngaihin min ngaihtuah suh. Engkim a tha vek ang. Ka theih leh hmasak berah ka lo hmu leh ang che."
.
"Ni lo, Vee_ Kal suh. Gregor, dang rawh_"
.
Hmanhmawh takin ka kal chhuak a, Gregor tan pawh dan hman ka ni lo. Hla deuh tak ka thlen thleng chuan chawl lovin ka kal ngat ngat a. Dan ang thlapa tih ngai lo tur motor hawh chi a tam ang chu, a lei pawhin ka lei mai ang. Khua han var leh phawt se la__
.
Taxi-in Hotel ka pan a, ka pindan ka luh veleh thil dang ti lovin tv ka on a, sofa-ah hahdam thei ang berin ka thu a. Eng channel nge ka en tih pawh ngaihtuah lem lovin tv screen chu ka en ngar ngar a, ka pindan kawngka kik ri ka hriat chuan ka phu deuh zawk.
Kawngka hawng turin ka thutna ka thawhsan a, ahma ang bawkin fimkhur tak hian tunge kawngka kiktu tih hriat tumin ka bih hmasa leh zet a. Ka inring hman lo, na lutuk hian kawngkhar chu a rawn inhawng thuai a, pai nawkin ka tlu thal chiang khawp mai.
.
“Amah a ni em?”
Aw thum hlauhawm zeta tawng chu thei leh thei lovin ka melh a, a hmel ka hmuchiang thei lo. Engtiklaiin nge light hi an lo off hman?
“A chiang e.” min dim lo baksak hian min phih tho dawrh a, ka te thawt a. Engtin nge ka awm ka hre zui tawh lo.
.
.
Chiang lo ruaiin ka harh a, ka awmna hmun rimchhe lutuk chuan min tiharh chiang nghal kawk thei nia. Ka hnar hup ka tum a, ka kut a che thei lo. Ka hnunglamah nghet taka phuar a ni. Min phuar rek tawk a niang ka chet deuh chuan a thip nghal vawng vawng mai. Ka chhehvelah chuan mihring hmuh tur an awm lo va, a thim deuh ruih vangin ka hmu chiang thei lo pawh ani maithei.
.
“Tunge awm?” ka aw a tham tiak a, tun aia ring hian ka au thei dawn lo tawp mai. Ka hrawk chu a ro tih piahlam a ni bawk. Engtin nge helai  hmunah hian ka awm theih ka  ngaihtuah  let a, ka hriatchin zawng chu Hotel-a kawngka inhawng thuai leh mipa lo lut zing ami pakhatin ka hnar arawn hup a___
.
Tuna ka awm dan hi thil mak a ni ta lo. Engmah hre lo va ka awm theih nan hnimhlum an hmang ngei ang tih ka chiang. Pen ri niawm tak ka hriat chuan thei leh thei lovin ka che a, a ri khap a ka awmna vel chu a eng ta vek a.
.
“Ka khawvelah ka lo lawm a che!”
.
“Tunge I nih?” ka ti sep a.
“I la hre ning hlei hlui ang. Engtin nge kha thil atang khan dam a I chhuah theih zawk le?” min be lovin amah a inbia a ang zawk. He mihring hi tunge anih?
.
"Min la hmu ngai lo ang mai khan awm vel duh suh. I tuar a chhel zek a ni maw?" a thusawi awmzia chu ka hrethiam lo.
.
"Tunge i nih?" ka ti leh a. Ka hmai zawnah a rawn thu hniam a, ka hmuh chian loh hlau ni awm tak hian ka mitah min en a.
"Cappolo fanu neihchhun! A pasalin uiresanin thah a tum a, eng angah nge i lo inngaih le? Tuma hriat loh a phuba lak theih i inring chu a ni em lo maw?" min nuihzat hmel taka a mitmeng de sawr sawr chu en duh lovin ka hawisawn a, ka awm dan chu a hrethiam khawp ang.
"A tha e. I pasal leh a ngaihzawng chu engtin nge hremna pek i tum?"
.
"Pasal ka nei lo." ka tih chuan za zet hian a nui ta hawk hawk a, ka rin loh lutuk a a nuih vang chuan ka hamhaih letling zawk. Mahse hamhaih tak anga lan erawh ka tum bik lo. He mihring hi tu a pawh chu lo nise min biak kual a duh tih chu ka hrethiam ta phawt.
.
"Ka lak atang hian eng thil nge i beisei?" ka ti ta ngawt a. A nui tawp nghal chawt mai.
.
"Eng thil nge ka beisei? Beisei nei tur ka ni em? Huh?" a kut in ka hmai a khawih tur chu duh lovin ka thle sawn dawn a, ka che hleithei tawh lo.
.
"Tui_tui ka duh?" ka taksa a zawi deuh hnawk a, tunah chuan tawng tur pawhin ka tha ka sawmkhawm peih tawh lo.
.
"Jasper, tui." a ti hluk a, ngawi reng hian ka awm dan chu chik lutuk in min en a. Ka tider lo tih a hrethiam a niang chu ka hnunglama ka kut an phuarna chu a phelh ta hlauh a. Ka che zui thei chuang miah lo. Tuna ka dinhmun ngaihtuah hi chuan tlanchhuah lam ngaihtuah chi a ni rih hek lo.
.
Jasper tia a koh chu tui keng chungin hmanhmawh tak hian a lo let leh a, 'Sir' tiin ka bula mipa chu a pe a. Chupa chuan min dim lem lo tak hian ka lu a dawm kang a, ka hmui bulah rawn dahin tui chu a leihbua a ni ta ber! Ka hak bawrh bawrh nain ka dang a hnawng thei tal a, ka lawm tawk tho.
.
"Ka lawm e" ka ti sap a. Awih loh hmel zetin a dar a tiche dut duh chauh.
.
"Nizan lama thil thleng kha i la hrelo tak ang. Putar khawngaihthlak Cappolo thi-a an chhar thu kha_"
.
"Eng maw?"
"Ka tawng kha i hre hman tih ka hria." a ti leh ringawt a. A aw atang chuan min lainatna chhete mah a nei lo hulhual ang tih ka ring.
.
Ka chhang tawh lo. Ka pa_ Ka pa thiin an chhar maw? Engtin nge hetiang thil hi a thlen theih? Ka kun a, ka biang lum pap chu ka mittui a ni tih ka hria. Ka theih tawpa nghetin ka kut ka hum ruh a, tap ri lovin ka khur dawt dawt a. Ka nu engtin nge a awm ang? Hetiang thil zawng zawng hi engvanga kan chhungkaw chunga thleng nge anih?
.
"Kalsawn rawh." ka tawng chu a hre ngei ang. Mahse a che eih lo. "Kalsawn rawh. Keimaha awm ka duh." ka ti leh chuan engmah sawi lovin a kalsawn a. Ka ngaihtuah leh hmasak ber chu helai hmun atang hian engtin nge ka chhuah theih ang tih a ni.
“Papa_ Eng nge thil awmzia?” tiin ka phun sep sep a, min chhangtu tur an awm lo tih hrereng chungin ka sawi ngai chu ka sawi nawn ngat ngat a.  Engtin nge chakna ka neih ka hre lo, muangchangin ka tho a, kawngka awmna lam ka pan a. Kawngka bul ka thlen chuan ka chau chhia chu a ni der a. Engmah ka tihtheih loh vanga thinrim em em chungin ka thu a, tunah chuan ka chungchang chauh a ni ta lo, ka pa chunga thil thleng hian ka chhungrilah thinrimna nasa zawk a siam a, ka taksa a che thei rih lo chungin ka chhungril erawh a so  bulh bulh thung a.
.
Ahma khan thawm ri deuh vung vung a awm tih ka lo notice miah lo a, chu thawm ri deuh vung vung chu a reh thut chuan ka awmna pindan pawh a thim ve nghal a. Thawm ka hriat theih awmchhun chu zana hram chi rannung chi hrang hrang  thawm chiah a ni ta. Kawngka nghengin ka thu a, ka taksa vawt deuh sung sung chu zual zelin ka muhil ta niin ka inhria.
.
.
“Mordecai, he hmeichhia hi engtin nge i tih dawn?” chhanna a awm lo. “Mordecai!” thawm chu pawn lama ri a ni a, an thawm zawi tial tial atang chuan ka awmna lama lo kal ni lovin min kalsan zawk tih ka hrethiam thuai a. Engmah ka hriat loh lai khan an lo lut anih ka ring. Anih chuan tunah hian keimah chauhin ka awm leh ta tihna a ni. Ka tho chhuak a, ka tha la chak lo deuh mah se ahma ai kha chuan ka zia tawh. Ka piah deuh a tui bottle let ngat chu la in ka in a, kawngka lamah kal lehin ka nem a, pawnlama an kalh miah lo chu mak ka tiru takzet. Che thei miah lo turah min ngai a ni ngei ang chu.
.
Ka mitin a tlin tawka hla chu ka thiam tawka uluk taka  ka en  hmasak zet hnuah  min khungna pindan atang chuan ka chhuak ta a, ramhnuai ah ka awm tih nizan khan ka hriat lawk tawh vangin thing hmun ka hmachhawn chu mak pawh ka ti lo. Ka theihtawpa thawm dim chungin thing hmunah chuan ka pen lut ta a.
.
“Mordecai! Tunge Mordecai chu? Kei min hria a, ka chunga thil thleng leh kan chhungkuaa thil thleng hretu hi tunge anih?”
VIDA – SheKnows
(Vee-Da)
.
By. Thantei_LauraSean
.
CHAPTER - 7
.
Thing hmun chhah takah chuan ka kal zel a, ka chhungrila hlauhna leh manganna vang chuan ka huai sawt zawk. Hlau em em mah ila kal zel loh chu tih theih ka nei rih lo tih ka hrechiang em a, ka dang ro huam huam leh ka khup zawi thut thut vang chuan chawlh ka tum eih lo. He hmunah hian zan hun ka hmang anih vaih chuan ramsate chaw atan ka inpe tihna a ni ang! Tihtur tam tak ka neih laiin ramsate ka intihhlumtir ang maw? Mihring lakah emaw ramsa lakah emaw pawh nise ka duh ka tih hma chuan ka thih a thiang lo reng reng.
Ka theih tawka chakin ka kal bek bek zel a, ka thlen chin eng ta deuh chuan ramngaw pik zual ka pel ta tih min hriattir a, dar zat ka hrelo nain khua a tlai lam tawh tih ka hria.
.
"Whoa!" ding chawtin ka thu hnawk a, pen khat chauh pawh pen leh ila ko sang zetah ka liam ngei ang. Thu chungin ko ah chuan ka dak a, hmun sang ka hlauh em vangin ka tawlh let leh thuai a. Ngawi lawk! Eng thil nge ka hmuh kha? Ka hlauhna chiah ka hria a, he ko sang tak hnuaiah hian kawngpui a awm! Engtin nge kawngpui khu ka thlen theih ang?
.
"Lalpa, min pui hram rawh!" tiin ka phun chhuak hial a.
.
Khawii laiah emaw hian pumpelh a awm ngei ang. Awm lo pawh ni se thing lian lo tak tak to rinchhan chungin muangchangin ka tawlh thla thei bawk. Ko pang ah chuan hnim leh thing to tam deuhna zawn ka zawng a, thing rinawm hmel deuh to tamna zawnah chuan kawngpui pawh tumin ka insiamrem ta sauh sauh a.

Muangchang takmeuh hian awih pangah chuan ka tawlh thla hret hret a, vawn tur awm apiang vuan zelin ka tan hnuailam en a thiang lo. Ka awmna hmun san zia ka hmuh rualin hnuailamin min hip anga ka lum nghal ngei ngei ang. Ka vawn apiang chu ka tha neih zawng zawng hmangin nghet thei ang ber hian ka hum chawt chawt a. Tuna ka hun tawng hi hmun sang hlau ve bawk lo chuan min hriatthiampui dawn lo tih ka chiang. Hnuailam en a thiang lo ka ti chungin kawngpui pawh ka duh anih chuan ka en loh theih loh chang a tam hle. Ka rah tur ka en apiang deuhthawin hlauh lutuk vangin ka te thawt thawt a.
.
Ka tang thei tawh lo nia ka inhriat hnuah thil sakhat ka rap a, ngam leh ngam lova ka en chhuk chuan lei ka rap tih ka hmu. Nghet taka ka vawn thing lian lo tak chu ka thlah riai riai a, ko pang ngheng chuan thu hnawkin ka mittui a tla ta zawih zawih a. Hetiang thil zawng zawng ka paltlang a tul chhan hi tunge tih ka ngaihtuah chhuah chuan ka mittui ka hru hul nawk nawk a, ding chhuakin kawngpuiah chuan khawilam nge ka pan tih pawh inhre chuang lovin ka kal a. Min tanpui thei ka hmu ngei ang! Hmeichhe tan hlauh tur a tam zia ka hai bik lo, mahse ka hun tawng mek ah hian hlauh sawi thei ka ni rih si lo.
.
Rei ka la kal hman lo tihah ka hnunglam atang hian motor horn a rawn ri tuarh a, ka ding chiang khawp mai. Engtin nge ka awm zui dawn hrethiam mai lovin ka din dan ngai chuan ka ding ta ngawt a. Tlanchhiat tum pawh ni ila tha ka nei tawh lo hrim hrim bawk.
.
"Helai hmunah eng thil  nge i tih?"
Ka zawnah Car chu rawn dingin hmeichhia arawn dak chhuak a, amah chauhin car-ah chuan a chuang a nih hmel. Min en dan atang chuan mi tha tak hmuhin min hmu hauh lo bawk ang tih ka ring.
.
"Ka_" ka dang ro lutuk vangin ka tawng ring thei hauh lo mai.
"Lawk, khawiah emaw ka hmu tawh che."
.
Ka ngaihtuahna chu a kal kual zung zung a, mihring ngaihtuahna aia chak thil dang hi awm pawhin ka ring lo. He hmeichhia hi eng mi pawh nise tunah chuan ka mamawh. Min tanpui tur khawpa rilru tha a lo nei ta lo anih pawhin engmah chan leh chuan tur ka nei lo va, atan hmelhriat ngai pawh ni lo tanpui  ngawt turin risk a sang hle tih pawh ka hrethiam tho. Chuti chung chuan ka tih theih tawk hi ka ti mai lo thei lo.
.
Keimah pawh ka inrin hmain kawng lei charah chuan ka tlu hnawk a, chu hmeichhia chu a te that a. A thawm atang chuan hmanhmawh takin car atangin a lo chhuak tih ka hrethiam. Ka che tawh eih lo! Tunah chuan nikhua ka hre rih lo tlat! Lemchan thiam chu ka ni hauh lo nain tuna ka lemchan erawh hi chu hnehsawh taka hlenchhuah ngei ka tum bur.
.
"I tha em? Karei, i taksa chu a sa vek anih hi. Eng thil  nge ka tih tak ang? Eng thil rapth;lak nge maw i hmachhawn le?" min tihharh tumin min sawi dawt dawt a, ka harh dawn reng reng lo tih hria se min sawih buai lo law law tur hi a nia!
.
"Eng thil nge ka tih dawn?__" a sawi ngai sawi nawn mawlh mawlh chung chuan ka zak tawn tawnah min dawm a, min hnuk sawn hrawih hrawih a. Kawngsirah min dah a tum a ni em lovang chu. Ka mengru ngam der si lo.
Car kawngkhar a inhawng ri khap a, awlsam lo tak hian a car chhungah min dah lut ta. Ka lawm zia chu sawi ngaihna a awm lo. Lawm lutuk vangin ka thinlung a tap ve ta thung a.
.
Ka hmai arawn khawih leh a, ka hriat tham  loh hian phun sap in ka bul atang chuan a kalsawn tih ka hria. Reiloteah kut dai raih leh dam thlap hian ka chalah min rawn dek a. "I tha leh vat ang." tiin a phun sep sep a.
.
"Damdawiin-ah ka hruai ang che. Hlau suh__ I tha leh vat ang.."
.
Car hnunglam seat-ah chuan rem zawka ka mut theih nan min siamrem leh zet a, amah chu driver seat lamah kalin a car a tinung a, kan tlan chhuak ta a.
.
"Bawihte, ka lo haw tep. Lo hlau suh aw." a phone a dah a, min rawn en nia ka hriat vangin ka che ta talh talh a. Tuna ka harh lo anih chuan damdawiin lamah min hruai ngei dawn a, damdawiin-a kal chi ka ni lo.
.
"I tha em? Khawiah nge ka hruai dawn che?"
A tawng chu ka chhang nghal mai lo. Muangchangin ka thu a, "Khawngaihin tui min pe thei angem?" ka ti sep a. Rang tak hian tui bottle min pek chu hawngin ka in khawlh khawlh a.
.
"Damdawiin ah hruai che ka tum a, i lo harh tak si chuan__"
.
"Khawngaihin i in-ah min hruai thei angem? Chumi hma chuan misual ka ni lo tih ka sawi phawt ange.." a hmela hlauhthawnna niawm tak ka hmuh rualin ka ti thuai a.
.
"Ka beisei? I chungah eng thil nge thleng?"
.
"Thawnthu thui tak a ni." tih chiahin ka chhang.
"Khawiah emaw ka hmuh tawh tlat che a ni." a ti leh a.
.
"A ni maithei."
.
"Ka rin hi a diklo anih chuan min lo ngaidam la, Vida Cappolo i ni em?" tim deuh taka hian min rawn en zawk chuan ka lo bu nghat a. A thaw zui hak mai. Engmah a sawi zui tawh lo thung.
.
Thui fe kan tlan hnuah in lian vak lo kawtah hian a car chu a tiding a, “Kan thleng e. In chhungah lut phawt teh ang. Chawlh I mamawh takzet tih ka hria.”
.
“Ka lawm e.” ka ti sep a. Dik tak chuan tanpui ka mamawh lai bera puitu ka hmu hi ka hnuk a ulh tlat a ni. He hmeichhe tan hian eng thil mah ka ti lo a, chuti chung chuan inhuam takin min tanpui si anih hi.
.
Kawngka a hawng a, hmeichhe naupang harhvang ther thawr hi alam pana rawn tlanin a kuah chang chang a.
“Ma, I lo thleng har lutuk a, api nen kan ngaihtuah che a.”
.
“Hei tunah chuan min kuah ta alawm. Ka ngai lutuk che. I lo fel em?” tiin a fanu chu dam thlap hian a chhang zung zung a, a fanu in min hmuh chuan tim deuh tak hian min en a, anu chu zawhna zawt mitmengin a en nghal vat a.
.
“Vantirhkoh anih hi!” tia a fanu a hrilh chuan hmeichhe naupang chu meng phawk deuh hra hian a ang pham mai.
.
“Anu, vantirhkoh an bal ngai ami?” tiin min en a, chu hmeichhe naupang rilru thianghlim tak chu ka thiam tawka nelawmin ka lo nuih sek a.
.
“A chau anih hi. Api bulah han kal la, keiin vantirhkoh hi inbualna tur ka lo siamsak ang.”
.
“Okay. Anu vantirhkoh sam hi a pawl thin ami?” tia a zawh leh chuan anu chuan a biangah a fawp a, “Nakinah kan sawi tha leh dawn nia. Api bulah chuan han kal phawt rawh le.”
.
Hmeichhe naupang chu thuawih takin pindan panin a zuang auh auh a, pindan a lut pah a vantirhkoh ahmuh thu a sawi ri lang lang chu kan la hre phak.
.
“Vantihkoh chungchang kha eng nge a awmzia?” ka nghak zo lo. Kei ve mai hi engtin nge vantirhkoh tia min sawi theih? Mak ka tih rualin ka ngaihtuahna a tithui lutuk takzet!
.
“Intifai phawt la, nakinah ka sawi dawn nia. I pa chanchin kha ka lo hria a, pawi ka ti lutuk. Tin,__” a ngawi leh rih a, “A vuina hun hman I duh ngei ang.” Min lainat tih hriat tak hian min en a, chhan ngaihna reng reng ka hre lo. Min lainat tih hriat tak mitmeng ka hmuh loh rei tawh vang nge ka hrelo, ka hnuk a ulh tlat mai.
.
“I chungah ka lawm takzet.” ka tawng chhuak thei tawk a ni.
“Lawmthu sawi chu nakin atan dahtha teh ang. Tunah chuan intifai la, hahchawlh I mamawh tih ka hria. Eitur ka lo buatsaih ang. Helam ah min lo zui rawh.” Zangkhai tak hian a ti tak zung zung a. Tuna ka hun tawng  mek hi ka tan chuan mumang ang mai a ni. Chu hmeichhia, a hming pawh ka la hriat loh chu ngawi rengin ka zui ta a.
.
Tui sa ver vawra ka inchiah chuan ka taksa kham them thum leh ka tang ru teuh chu ka inthlahdul huai huai a. Ka taksa chauh zia ka hre dawn chauh nimai hian ka hre bawk. Hun engemawchen hnuah thlamuang taka ka awm thei hi ka awih lo zawk.
.
“I zawh tawh chuan khumah hian I thawmhnaw hak tur ka dah e aw.” Ka phu deuh zawk. Ka lo muhil hman tep a ni.
“Aw le.” tiin ka chhang thuai a.
.
Bathroom atang chuan chhuakin khuma thawmhnaw lo awm chu ka ha a, min tanpuitu leh a fanu lo lut ka hmuh chuan ka nuih sak a.
.
“Khawngaihin I hming min hrilh thei angem? Min tanpui avang hian engtin nge lawmthu ka sawi dawn pawh ka hrethiam lo. Ka thinlung takin ka lawm takzet zet.”
.
“Serafina ka ni e. Kan tana I thiltih ngaihtuah chuan tuna ka thiltih ve hi chu engmah tham a ni lo. I mut hahchawlh hmain eitur ka siam saw ei la, chuan I chawl hahdam dawn nia.. Sweety kal ang le.”
.
Pindan atang chuan kan inzui chhuak diah diah a, dawhkana eitur tuihnai tak khu vang vang ka hmuh chuan ka riltam tawngkhawng tawh zia ka ngaihtuah thiam chiah a ni.
Tawng nachang pawh hre lovin ka thlenga eitur awm chu ka ei mial mial a, hmeichhe naupangte chuan ngun tak hian min en vang vang a.
.
“Vantirhkoh ka hmuh tawhah chuan I la hmeltha ber.” a ti ta reuh a. Ka thil eilai chu dahin a biang tai tekah chuan ka khawih a, a hahmai bal seu mai lang chuan min nuih ver ver a. An tan hian eng thil nge ka lo tih tawh ka la ngaihtuah chhuak zo chuang lo.
“Nangmah hi vantirhkoh hmeltha ber nia lawm.” ka ti sap a.
“Anu pawhin chutiang chuan min hrilh thin. Mahse,” tawng zawm lo  hian a nu chu a en a, a thil eilai chu a ei zawm leh ta rih a.  Naupang fing tak anih ngei dawn hi.
Serafina chu ka en a, a fanu chu hmangaih tih hriat taka enin min rawn en leh a, engmah a sawi lo.
.
Kan thil ei na kan tihfai hnuah ka pindan tura min pek ah chuan lutin khumah ka mu a, ka ngaihtuahna a kal ding leh tan ta. 
.
Ka pa vuina hmunah awm ngei ka duh a, engtin nge mi dang hriatchhuah loh turin ka awm theih ang tih hi zawhna chhan har tak a ni. Tihdan tur hrang hrang ka ngaihtuah kual chiam hnuah pawh eng thil nge tha ber ang tih ka ngaihtuah chhuak thei lo. Khumah chuan ka let tawn sek ringawt a.
.
Kawngka kik thawm ka hriat chuan hlauthawng tak hian ka thu chhuak nghal hlawl a. Eng thil nge thleng tih hriat tumin ka hawikual zung zung a, ka awmna chu ka hai thelh a ni. Nimina ka thil tawnte kha ka hrechhuak thuai a, rang taka thovin kawngka chu ka va hawng a.
.
“Tukthuan ka peih tawh a, vawiin hi Mr. Cappolo vui ni a ni tih ka hria a_” min ngaichang niawm tak hian Serafina chuan min en leh rih a_ “I kal ve duh ngei ka ring..” a ti zui sap a.
.
“Ualau takin ka kal thei lovang. Jefferson mithmuhah ka inlan thei lo.”
Nizan atang tawh  khan Serafina hian min zawh duh thil tam tak a nei ang tih ka ring a, tunah chuan ka tan mi hlauhawm a ni lo tih ka hriat tawh vangin engemawchen chu hrilh ve pawi ka ti ta lo.
.
“Engtin nge kan tih tak ang?” tiin min en a. Jeff nen kan inkar buaina hriatchak hmel a pu hauh lo.
“Tihdan pakhat chu ka ngaihtuah chhuak a, a him angem ka hrethiam chiah lo. Mahse, ka pa thlah tur chuan eng pawh ka huam ang chu.”
.
“Ka hrethiam e. Ka hruai thei ang che.”
.
“Ni lo. Ka chungchang thuah hian inhnamhnawih ve lo la ka duh. Ka inhnamhnawih der tawh zawk a ni.”
.
“Eng nge I sawi awmzia?” ka tip hawk hra a.
.
“Nimin-a ka hmuh phat che atang leh nangmah ngei I ni tih ka hriat hnu khan i chungah eng thil nge thleng ka hre vek lo nain eng chen pawh ka kalpui ang che tiin ka intiam vek tawh.” a ti nghet leh charh a.
.
“Ni lo, Serafina__”
“Ka fanu nunna min pe lettu tan chuan engpawh ka ti ang! Khawngaihin ka tanpui let theih nan che hun min pe hram rawh. Khawngaihin _ Mrs_ Vida..”
.
“I fanu nunna maw? Mahse, engtin__”
.
“Tunah chuan sawina hun a ni rih lo. Insiam ila kal vat zawk ang. Dar 10 ah thlahna hun an hmang dawn niin ka hria.” Hnialna hun emaw thu dang sawina hun min pe lovin ka pindan atang chuan a kal chhuak a. Ka inphih fai sawk sawk hnuah tukthuan ei turin ka pindan atang chuan ka chhuak a, Serafina leh a fanu, leh nu pakhat Serafina nu ni ngei tur hi an thu a, ka thutna tura ka thut fel hnu chuan ka kutah min rawn vuan a. Kan zavai chuan kan kut invuan theuhin Serafina chu a tawngtai a. Eng thu nge a chham ka lo ngaihtuah lo! Chu ai chuan ka tetlai zawng zawng pawh khan hetiang hian kan chhungkua in hun kan hmang ve ngai miah lo tih ka ngaihtuah daih..
.
Ka kut min hmer zauh hnu chuan ka meng a, “Amen!” ka ti ve ta ngawt a.
.
.
9:45AM
.
“Hetah hian ka lo nghak ang che.” Serafina chu ka en zawk a.
 Tukthuan kan ei zawh hnuah ka pa thlahna hun an hmanna tur lam panin kan chhuak nghal kha a nia. Helai hmunah hian 10 minutes vel zet kan thu tawh.
.
“10:20 hmaa ka lo let lo anih chuan helai hmun hi chhuahsan ang che.” Thupe aw tak hian ka tawng lui a, eng pawh tawk thei ka nih vangin Serafina hian keimah vanga thil tha lo a tawn ve ka duh hauh lo. Tuna ka tihtur hi a hlauhawm zia chiang takin ka hria. Chuti chung chuan ka pa hun hnuhnung bera awm ve loh erawh ka tum lo bur thung.
.
Car atangin ka chhuak a, ka inthuamna hnawk zet chu ka rah loh nan tlemin ka chawi kang a. A awlsam zawngin hneh taka ka inthup theih nan Burqa ka ha a ni. (Burqa - Muslim hmeichhiate hak thin chhip atanga keler thleng khuh vek thei kawrfual, mit zawnah hmuh tlang theih puan pante hman a ni thin. ~T)
.
Ka pa ruang awmna pindan ka luh chuan mi an lo tam tawh kawp mai. Ralkhat tangin ka nu hmel ngui leh dang lap mai chu ka en reng a, ka mittui ka dang zo lo. Lang thei lo turin ka kut ka hum ruh a, ka pa chanchin chhiar chhuak tura Jeff arawn din chhuah chuan  a hmeltha tak chu ten naa khat chungin ka theihtawpa na hian ka melh ngawt ngawt bawk a. Ka ten a, ka haw hluah hluah bawk. Heihi chu ka chunga a thiltih vang chauh pawh hian ka tihtur awm reng a ni. Mahse, saw mihring, mi tenawm tak saw ka hmangaih tih erawh ka pha thei lo. Takzet hian! Ka la hmangaih cheu anih chu_!
.
Hun pawimawh a zo a, ka pa thlah turin a kuang bulah an kal hnai a, a thiantha nia ka hriat thinte chuan an thlahna thu tawi sawiin an mittui an hru fap fap hlawm bawk a. Ka hun a thleng ve ta! Ka pa kuang chu zawimuangin ka pan hnai a, a hmel ka hmuh chuan tap chhuak rawih lo turin ka inthunun thei lo thelh a ni. Ka rawl ka chhuah anih chuan Jeff leh ka nu hian min hai dawn hauh lo. Min hriatchhuah ka duh lo anih chuan ka insum a ngai. Thil zawng zawngah hian a harsa ber mai awm e.
.
Ka pangpar ken chu ka pa awm zawnah ka dah a, inher vatin ka nu ka pan a. Rinhlelhawm taka awm miah lo tur ka ni tih ka inhre chungin ka nu chu ka pan lo thei lo. A kutah ka vuan a, a menphawk deuh ak dan atang chuan a kut ka vawn rualin keimah ka ni tih a hria tih a lang. Kuah tumin a beng bulah ka kun hnai a,
.
“Nu, chak takin awm ang che. Jeff lakah fimkhur la, lo hmuh thuai che ka tum ang.”
Rang takin ka inla hrang a, Jeff tan rinhlelh tur ka siam lo niin ka inhria. Pawn lam panin ka kal zui nghal a.
 Muangchanna hun a ni lo tih ka hrechiang bawk a Serafina min lo nghahna lam panin hmanhmawh tak hian ka kal nghal hlawk hlawk a, ka tlan a ni ta deuh ber.
.
“Lo ding teh!” tih ri ka hriat chuan ka kal chak zual sauh. Ding tura min ko tu chu ka hriatthan tak aw a ni lo nain fimkhur tluk a awm lo.
.
“He thil hi i thlauh palh a,” arawn ti leh a. Ka ding chuang lo. Serafina car awmna ka hmu phak tawh a, ka speed ngai patin ka kal hlawk hlawk zel a.
Mahse!! Serafina bula mipa ka hmuh chuan ka ding nghal chawih. A ni thei lo! A mitmenga hlauhna ka hmuh rualin thil thalo a thleng fel vek tawh tih ka ring thiam bawk. Chetlak dan tur ka ngaihtuah hman lo, ka tukkhum a hit chuai a Serafina te thawt ri ka hriat chuan zawi hnawkin ka mit a thim ruai ruai a.
.
“I pa, Cappolo tenawm kha mi han biak dawn nia!”
Ka hmai khuhna rawn inhawngin kut hnawng chuap hian  ka hmai a rawn khawih a, chiang lo ruaiin mipa ka hriat ngai loh hmel ka hmu bawk a.
“Serafina_Sera_fina_kha tina_suh _” ka ti tawk tawk a. Ka thusawi chuan a beng a thleng pha lo ang tih a mitmeng tenawm tak atang chuan a lang nghal vek.
.
“I chanpual tur rel fel a ni vek tawh. Mangtha le! Ka nupui duhtak!”
Chu aw ka hriat chuan ka meng leh kawk a, kut hnawng chuap pa chu  kal sawnin chiang taka mihring hmel ka hmuh leh chu Jeff__ Jefferson DeLourde!  A nui hmel chu ka theihnghilh leh tawh lovang..
.
VIDA – SheKnows
(Vee-Da)
.
By. Thantei_LauraSean
.
CHAPTER - 8
.
JEFFERSON*
.
Ka beisei aiin engkim hi a kal chak vek! Hnungtawlh thei ka ni tawh hek lo. Mr. Cappolo thlahna hunah hian Vida lo lan hi ka beisei lo hulhual a, fing taka thilti tur nia ka rin laiin a pa ruang in a ko chhuak ta anih hi. Ka beisei lo ka ti  nain a lo inlan theihna tura hmanraw tha ber nia kan rin chu a lo dik chiah thung.
.
Mr. Cappolo ruang dahna pindan-a a lo luh khan amah a ni ang tih rin ngaihna ka hre hauh lo a, mahse a nu a pan chiah khan engkim a chiang ta vek a nih kha.
.
Vida lei chara a  mu chu ka en a, tunah chuan engti zawng mahin a dam chhuak tawh lovang!
.
“I chanpual tur rel fel a ni vek tawh. Mangtha le! Ka nupui duhtak!” ka ti sup a.
.
Kiara tur pek a in hnua thi paiha kan paih hnu khan a dam chhuah rinna ka nei hauh lo a, kan chenna in-a a lo inlan pawh khan a tisa ni lovin a thlarau ni ah ka ngai hmiah. Ka hlauthawng hle bawk anih kha. Mahse, a fing tawk lo. Kan paihna hmun kan mi chhawr ten an en fiah leh hnu khan a thi lo tih ka ring nghet ta hmiah a ni. Dahthat tuma kan zawng nasa hle chungin a hnuah zel kan che a, min bei let  nghal si lova hetianga a khawsa hi mak ka titawp thei hek lo. Tunah erawh engkim a tawp ta. Kei  ngei pawh hi ka rinphak aia thui ka kal ta reng mai. Tawp leh hnihne chi a ni tawh lo va, kan dahtha ngei anih loh chuan thiamloh changa damchhung hun hreawm taka ka hman a ngai ngei ang. Chu thil chu kei Jefferson DeLourde hian thlentir ka tum therte lo.
.
Thaw tha thei lo tih hriat taka a ang deuh chawp chawp chu ka en a, ka chhungrilah hian inthiam lohna ka nei anih chu! Inthiam lo tur ka ni lo. Ka lu ka thing nawk a. A vawi za tam tak nan ka kal thui tawh tih ka inhrilh nawn leh ang.
Atir atang reng khan Vida hi ka hmangaih vanga nupuia nei ka ni lo va, a rosum ka neih theih nan ruahmanna ka nei sa vek anih kha. Kei chauh ni lovin Kiara nen kan ruahmanna a ni. Tunah chuan ka duh tawkin ka leng vel thei tawh ang!
.
Vida chu thaw kawk hian arawn meng leh a, chiang lutuk hian min rawn en a. A mit chu ka en rei duh lo. Ka hawisawn thuai a.
.
"Carter, la bo rawh."
Carter chu nui suk chungin a kun hniam a, zo zet hian chakna nei tawh lo tih hriat taka zawi vek tawh ka nupui__Oopss! Nupui hlui chu a chawi nawlh a. Tihtur engkim chiang taka ka sawilawk vek tawh vang leh a lawmman a that tawk bawk avangin a tihtur a hlen ngei ang tih ka chiang em em.
.
Helai hmuna lo hruaitu hmeichhia Serafina tia a koh khan kan chet dan hi a hmuh vangin kan dah bo tel a tul bawk tak e.
.
"Hmeichhia saw hruai tel rawh u."
"Yes sir." a ti nghut a.
.
Vida leh Serafina car-a an dah luh fel  hnu chuan hmanhmawh takin Mr. Cappolo ruang dahna lamah ka kir thuai a, in chhung ka luh rualin Mrs. Cappolo chuan min lo pan thuai a, a mitmenga zawhna chu ka hrethiam mai.
.
"Ka hmu hman ta lo. Pawi ka ti lutuk. I hmuh leh theih nan ka theihtawp ka chhuah ang." hnem tum ang taka langin ka kuah a, a tap hlawp hlawp a. A tan chuan a na ang tih ka ring nain ka ngaihtuah zawm duh lo.
.
"Hlim taka awm hi a phu ve asin."
.
"Ka hria alawm. I hmu leh ngei ngei ang tih ka tiam che. I tan a hlut ang  bawkin ka nupui a ni a, ka tan a hlu lutuk tih i hria.." ka kuahna atang chuan tal chhuakin a mitmeng fiah tak chuan min melh a. Hei pawh a fanu ang chiah_ Mi a! Min ringhlel tih thup nachang a hre lehpek lo! Mi a chu dahthat zel tur!!
.
Fanu leh pa ka dahthat theih chuan pitar pakhat lek dahthat leh chu pheikhawk phelh tluk leka awlsam a ni tawh! Min hmuh loh lamah hawiin ka nui suk a.
.
.
NI HNIH HNUAH*
.
"Jeff honey, Cappolo chenna in-a kangmei chhuak chanchin chu i lo hre ve tawh em?"
.
"Eng thil maw? Kangmei maw?"
"Tunah khawiah nge i awm? I nupui nu in chhung atangin an lachhuak chiah tih ka hria a, beisei tur a awm tawh lo a ni awm e. Engmah i la hrelo chu mak ka ti hle mai."
.
"Engkim hre tura min ngai chu mak ti tur ka ni zawk in ka hria. Ka kal nghal a tul anih chu." Kiara min chhan lehna tur pawh nghak lovin phone ka off a, ka thutna chair chu vir tirin lungawi zet hian ka nui hak a. Tunah chuan min phuartu eng thil mah a awm ta lo. Ka duhthusam ang chiahin sum ka ngah a, duh duh  nei thei ka ni ta!! Sum chuan zahawmna leh thuneihna a keng tel an ti maw kha? Jefferson DeLourde hi mi ropui a ni ta tih lo hre mawlh teh u!!
.
.
VIDA*
.
“Papa_Mama_ Khawiah nge ka awm?”
.
Ka bula phun ser ser thawm chu a ring tial tial a, engtin nge ka awm ka ngaihtuah ngial pawhin ka ngaihtuah chhuak thiam lo. Ka hit muah muah  a, thawklehkhatah tek chhuaiin  ka harh kawk ni hian ka inhria.
.
Thil engkim__ Jeff_ Serafina_ Ka tukkhum-a min vuak vangin nikhawhrelovin ka tlu ta anih ngei kha. Kat hi tihna em ni? Ni lo, Ka thi lo! Thi ni ila phun ser ser thawm hi ka hre lo ang.
"A lungphu pawh a pangngai tan a, reiloteah a lo harh beisei ang."
.
"A lawmawm e. Hmeichhe pakhat kha eng nge a an?"
.
"Ani kha chu hliam engmah a nei lo va, pindan lehlamah sawn a awm."
.
"A tha e. In theihtawp min chhuahsak vangin ka lawm e."
.
"Ka dinhmun ah hian awm la nang pawhin i ti ve ngei ang. Ah! Hei a lo harh dawn e."
.
"Ka kalsan phawt ang. Min hmu lo se a tha zawk! Enkawl a ngaih chhung chu he hmunah hian awm se, hmun dangah a kal tur a ni lo. I hrethiam em?"
.
"Hrethiam e."
.
Ke pen ri ka hria a, kawngka ri khap ka hriat chuan mipa pakhat zawk chu a chhuak ta anih ka ring. Ka mit ka men mai theih loh vangin an thawm atanga ngaihdan siam mai ka ni. An inbiakna kha mak ka ti takzet. Mak tihtur ka ngah lutuk.
Ka thi lo hi thil mak tawp a ni bawk. Ka ngaihtuah let theih chin tawp ber chu Jeff nui hmel ka hmuh kha a ni a, min en duh lovin a hawi sawn a nih kha. Tunah hian engtin nge ka la dam theih? Tu mihringin nge min tanpui? Jeff mitmeng ah khan thi turin min duh tih chiang takin ka hmuh  ngei si kha mawle..
.
Awlsam lo takin ka kut ka tiche a, tawng tuma ka tang deuh chu ka bula mipa aw chuan ka tha seng hah lo turin min lo hrilh thuai a. Mahse, ka dinhmun hi hriatchian ngei ka duh.
.
"Khawi_ah_nge_ka _awm?"
.
"Hmun bikah enkawl mek i ni. I chak hle mai. Bei nasa hle lo la chu kan chan ngei ang che."ka khum bulah chuan a thu  niin ka hria.
.
"Khawi_hmun_"
.
"Tang hah lo turin ka duh che. I tan a tha lo. Ka thusawi hi awih rawh. Itan vek a ni." a ti leh zung zung a. A awri a zaidamna lang chuan tlemin ka thla a timuang ve deuh ringawt.
.
"Tunge_min_"
.
"Shh! Thu i awih lo hle mai. A hun takah engkim i la hre vek ang. Tunah chuan ka thu awih phawt rawh. Tichuan, a tha em?"
.
Tawng ka tum ta lo. A thusawi chu ka pawmpui tih lantir nan ka kut ka tiche leh a.
.
"A tha e. A tlem berah i thatchhuah leh theih nan hian thla 5 tal hun kan mamawh dawn a.." a thusawi chuan min nghawr nghing chiang lutuk.
.
"Eng_"
"Shh! Lo tawng lo la. Ka hrilh theih chin zawng che chu i tha leh ngei ngei dawn tih hi a ni. Thihna ata nangmah leh nangmah i in chhanchhuak a_ Hmeichhe tuarchhel tak ni lo la thi ngei tur hi i ni a. Bakah_Sir_Ermm_ Sir kha a hun takah a che bawk a, i dam chhuah leh ngei hi Pathian duhdan a ni ngei ang."
.
"Sir_chu_ Tu_nge?"
.
"Hmm..hmm.. A tha e. Tunah chuan i bulah awm rih lo ila a tha zawk anih hi. I ngawi thei dawn lo tlat mai. Tikhan i ngaihtuahna lo kawm rawh. I rilru hmang rim lutuk lo thung la."
.
Ka bula thawm ri chu ka ngaithla ta ngawt a. Ke pen thawm atang chuan pindan atangin a kal chhuak anih ka ring. A reh zui vang vang mai. 
.
NI THUM HNUAH*
.
Ka tawng thei tawh a, ka khaw hmuh pawh a fiah ta. Min enkawltu sawi dan atangin Serafina pawh a tha a, hmun himah a awm a ni awm e. Pindan atang hian ka chhuah an remti lo bur a, ka himna an duh vang anih thu min hrilh  bawk.
.
"Serafina chu hmuh ka duh. He pindan ah hian mitang ang maiin ka awm reng thei lo." ka ti nghat a. Khum ka la thawhsan lo tluk a ni. Ka thu a, ka mu a_ bathroom-ah ka kal zeuh zeuh  bawk_chu zawng chu.
.
"Hmun himah a awm tih i hriat hi a tawk rih. Jefferson lak atanga a him chuan i duhtawk rih mai angai."
.
"Thil i hriat thui hmel hle mai."
.
"A dik alawm. Ka hre thui khawp mai." a ti bul ve hmuk a. Ka harh atanga a vawi khat  nan chhum bung taka min chhan awmchhun a nih ka ring. Amah (Dr. Mori) bak hi mihring hmel ka hmu lo reng reng bawk a, mak ka tiru takzet tawh. Ka awm a nuam lo va, ka ngaihtuahna ka seng nasa khawp mai.
.
"Ka hrilh tha leh ang che. Kei pawh hian dan tha taka ka zawm a tul a, zawm ngei ka tum bawk. Hrilh tura min tihchin bak engmah ka sawi thei lo. Serafina chu a dam tha a, a fa leh a nu pawh an tha. Hmun himah an awm. Tichuan i lungawi thei mai em?"
.
Ka chhang lo.
"A theih dawn em tih phei chu ka hre lo a, mahse sir hnenah ka lo sawi hrim hrim ang." pindan atangin a chhuak a, ka awm ngaiin ka awm tawp. Tunge sir a tih teivet hi? Amah ngei pawh hi Jefferson mi rawih a ni thei. Serafina a tha tia min hrilh pawh kha rin tur nge rin loh tur ka hrethiam tehnuai lo. Jeff hian a hmaa ka lan tawh miah loh nan he hmunah hian min khung a ni thei angem? A ni thei lo.. Nichin mai khan Serafina leh a chhungkua Jefferson lak atanga an him thu  min hrilh tak e__ Ngaihtuah dan tur pawh ka hre tawh lo. Thil ni thei nia ka ngaih zawng zawng ka  ngaihtuah kim vek tawh. Ka a zo tawh niin ka inhria.
.
Ni a ral a, ka ngaihtuahna a buai zual telh telh. He pindan ah hian mitang ang maiin eng chen nge ka awm dawn? Khawvel dangah chhuak lo va min khungbeh tlat chhan pawh hi hriat ka duh.
.
Ka awmna pindan kawngka a rawn ri tak a, phu zawkin ka en thuai a.
.
"Serafina!"
Serafina chuan rang tak hian min rawn panin min kuah a. Min hmu chu hlim tak tak hmel a pu.
.
"Ka hmu leh thei che hi ka lawm hle mai. Hetah hian i him ang tih ka ring reng a ni."
.
"Sera, helai hi eng hmun nge tih ka hre duh." a beng bulah ka phun sep sep a, Dr.Mori chuan kan tawng a hriat phak loh ka beisei. Serafina chuan a melh zeuh a, a chetzia atangin Dr.Mori chuan thil awmzia a man a niang chu, min rawn hnaih vat a.
.
"Serafina, dan i bawhchhe tur a ni lo." a ti chang ta fak a.
.
"Ka hrilh theih chin che chu he hmunah hian i him tih hi a ni. Tunah chuan i landan pawh a tha tawh e. A rem chuan lo hmuh leh thuai che ka tum ang." a ti zung zung a, Dr.Mori mitmei a veng lutuk chu ka lo ngei hmanhmawh.
.
"Tun atan chuan duhtawk phawt rawh u. Serafina sawi ang chuan in inhmu leh thuai ang." Dr. Mori chu a thle nghat a, Sera chu muangchang hian pindan atangin a kal chhuak nghal a.
.
A tha e! Tunah chuan engmah in min dang tawh lo vang. Khua thim se la, ka theih ang angin he hmun hi ka chhuahsan dawn chiang khawp. Ka ban la intuam bur chu enin thinrim zet hian ka insehruh ta ringawt a. Ka hmel ngei ka hmuh lohna chin pawh a rei ta..
.
Khua a thim a, zanriah ka ei zawh hnu chuan Dr. Mori min kalsan hun ka  nghak ta ran a. Zan dar 9 a rik hmain min chhuahsan ziah a, a chhuah hmainmuhil nghet tak anga ka lan a tul ang.
.
Eng eng emaw a sawi luam a, ka taksa a that chak thu leh reiloteah exercise ka lak theih tur thu min hrilh bawk a. A thusawi chu ka rilru chanve chiahin ka ngaithla. Chhuah dan tur ka ruahman lawk char char tawh. Ka ruahman lawk ka ti  nain he hmun ka awm tantirh atang khan vawikhatmah ka la chhuah miah loh vangin ka ngaihtuah thui thei tehchiam lo thung.
.
Dar 8:30 a rik chuan ka ham lui ngial a, mutchhuak tak anga langin ka mu rem a, ka awm dan chu nidang ang bawkin Dr. Mori chuan a chik lehpek hle.
.
Dar 9 a pelh fe hnuah min chhuahsan ta. Thawm dang a awm em tih ka ngaichang a, eng thawm mah ka hre ta lo.
Khum atang chuan thawm dim takin ka tho a, khum bula pheikhawk awm chu bunin pindan kawngka chu ka hawng riai riai a.
.
Ka pindan atanga ka chhuak chiah chu mak tiin ka phu deuh zawk! Hmun pilril taka hospital-ah ka awm niin ka inngai kha ania. Mahse a ni lo nasa lutuk. In chhung ropui takah ka lo awm reng a ni. He hmun hi ka la hre ngai lo. Ka awmna hmun ka ngaihtuah buai hmain in hi ka chhuahsan theih phawt a ngai.
.
Thing hmanga siam step thui deuh tak leh hnum hlurh chu thawm dim takin ka zawh thla zai zai a, min hmu an awm palh em tih hriat tumin ka hawi tawn sek bawk a. Thaw dep dep chungin step chu ka zawh chhuak a, ka lam pana lo kal thawm ni awm tak ka hriat chuan ka theih tawpa chakin ka ding lamah ka kal a, pindan lo awm hmasa berah chuan ka lut rawp rawp a.
.
Ka him leh ta phawt! Kawngka chu khar in ka  ngheng a, ka thaw ham ham a. Ni lo__
Ka hmalam ka en chuan mak tiin ka ang phawm ringawt__
"Nang_?"
.
A hmaa dawhkan lian leh hnum hlurh chu rinchhan in a kiu a nghat a, nuihza lo tih hriat ngawih ngawih hian min en run run a. Ka beisei loh ber mihring a ni...
.
"Nang?__" sawi zawm tur ka hre lo.
.
"Ka in ah hian ka lo lawm a che!" a aw nelawm loh zia chu hetia sawi mai hian a tifiah phak lo nasa lutuk.
.
"Engtin nge a nih theih?" ka ti tham chal a. Daik taka sawi chuan ka hlauthawng lutuk takzet.
.
"Khawvelah hian thil thleng theilo a awm hleinem." a ti chhum leh hmuk ringawt.
.
Ka hmel landan atangin chhan ngaihna ka hre lo tih a hria a ni ngei ang, lehkha chhiar nan chauha a hman ni ngei tur a tarmit vuah chu phelhin a mit a hmet vang vang a, hmanmawh lo zet hian ding chhuakin min rawn pan a.
.
"Mordecai Sloan! Ka in ah hian ka lo lawm a che Miss Cappolo."
A kut arawn phar chhuah chu enin a hmel ka en leh a, amah hlau hmel ka put vang nge min nuihzat ve hrim hrim ka hre lo; a hma aia nelawm deuh zawk hian a nui leh suk a, ka lo mur ur ur thung. Kan in san hleih em vanga nuihza pawh a ni mahna le. A kut ka vawn mai loh vang chuan a kut chu la letin a khabe a tuai zeuh a. A mit chu ka lak atangin a lasawn eih lo thung.
VIDA – SheKnows
(Vee-Da)
.
By. Thantei_LauraSean
.
CHAPTER - 9
.
"Hetah hian eng nge ka tih ve?" ka ti sep a, amah chu ka ngaina lo tih ka thup hran lo. Tim ru zet hian ka tawlh hla hret a, a taksa lian zet leh huhang ngah lutuk chuan ka awm a tinuam lo takzet. Min tihnat a tum em tih hriat mai theih inring chung hian ka en a, ding zetin min en reng tih mai loh chu a chechang miah lo.
"Hetah hian eng nge ka tih ve?" ka tih leh chuan a nui ta suk a.
.
"Ka pindan-ah hian eng nge i rawn tih ve? Ka zawt zawk tur che niawm tak a ni." a ti chhum hmuk a, ka zawhna atthlak zia min ngaihtuahtir chiah. Zam viau mah ila ka zamna tihlan loh a fuh zawk ang. Mordecai Sloan! Ka hmuh hmasak tum khan a landan leh a hmelhmang hrim hrim hriatchian tumin ka en lo va, misual tuemaw Jefferson tana thawk ve mai nia ka rinna kha a lo dik lo em ni? He in hi a ta anih chuan mi namai ani hauh lovang tih ka ring thiam. Anih chuan engvangin nge ka nunah hian a lo inrawlh ve? Phat rual lohin Jeff khan min thah a duh tih a chiang tawk tawh a___ka ngaihtuahna a buai vek.. Tunah Mordecai in ah hian nungdam mai ni lo, enkawlna tha tak hnuaiah ka awm leh si__
.
"I inah hian engtin nge ka awm theih?"
.
"I la ngaihtuah chhuak thiam lo anih hmel." a ti duh lek. Hmanhmawhna nei miah lo hian a thutna chair lam a pan leh a, chair-ah chuan thuin chik tak hian min en leh ta a.
.
"Sawifiah pawi i tilo ang chu tiraw?" ti nghatin ka ding ngil a, a hma zawng zawng khan kawngkhar rinchhan in ka lo ding reng tih ka inhre chiah a ni. Sazu dan chep ang maiin! Min chhang ta mai lo chuan a kutzungpuiin a khabe a khawih a, chik taka thil ngaihtuah hmel a pu ta bawk. A khabe ah sawn eng thil diklo nge awm ni, a khawih sek a, a mitmeng hlauhawm ru tak zawng zawng nen sawn ka awm a tinuam lo hle lehnghal. A kut chu la thlain a nui ta suk a.
.
"Cappolo fanu neihchhun i nihna hi ka tan thil awmze nei awmchhun a ni. I pa laka ka tih hman loh zawng zawng i chungah hian ka ti ang!"
.
"I thusawi awmzia chu ka hre lo." ka ti bah nak a. Ka pa laka a tih hman loh ka chungah hian a ti ang maw? Chu chu eng thil vak nge ni chuang ang?
.
"I hriatthiam kher a tul lovang. I pindan-ah kal leh tawh rawh." a ti hmuk a, min ngaihsak zui lo tih hriat fahran hian dawhkana a lehkhabu chhiar lai niawm tak chu la kangin min bihsan ta daih a. Ka biak luih a tul nachhan ka hre ta bik lo.
Kal tumin ka inher a, a rawn tawng leh chuan ka ding chawt a.

"In atanga hian chhuah ruk tum buai duh suh."
Amah chu ka en a, min rawn en tawh chuang lo. Chhang buai peih lovin a pindan atang chuan ka chhuak a. Hmela khan chhuahruk ka tum tih engtin nge a hriat? Phiangsen hian a! Min khungna pindan ah khan camera a awm mai thei.. In chhung pumpui hi endik rengna hnuaiah a awm thei bawk. Ka lo ngaihtuah tlem leh ta pek a nih hmel.
.
Muangchang in ka pindan ka pan a, kal chak duh pawh ni ila chak taka kal thei ka la ni lo hrim hrim bawk a. In ngaihtuah thinrim mai loh chu tihtheih ka nei tehchiam rih lo anih hi. Ngawi lawk! He in atanga ka chhuah a remtih loh chhan tal chu ka hre tur a ni. Mitang ang maia ka awm chhan tur hi ka hre lo. He in ni lo khawvel dangah eng thil nge thleng hriat ka duh bawk.
.
Mordecai_ Mr. Sloan pindan lam panin ka inher leh a. Ka duh ang chhanna ka hmuh loh chuan a awmna pindan atangin min theh chhuak lo tawp ang. Kawngka kik lovin ka lut tawp a, ka thawm a hre ngei tih ka hria. Chuti chung chuan arawn hawi chhuak chuang lo.
.
"Eng thil  nge ni leh ta?" tih pahin a lehkhabu chhiar lai phek chu a keu a.
.
"Nang hian min rubo tiraw?" ka ti  nghal tawng mai.
.
"Inrukbona chungchang chu hriat ka nei lo."
.
"Mr. Sloan!" ka ti that a. Arawn hawichhuak ve ta. Eng nge ka sawi min zawt nawn niawm tak hian a mithmul a tiche zeuh duh lek a. Ka huat tawk a tling em em hi a ni tawp.
.
"A tha e. I pasal Jefferson DeLourde hi hremna pek ngei i duh tih ka hria a__"
.
"Tuin nge hremna pek ka duh tih sawi?"
.
"Ka thusawi chu awih mai rawh. I mitmenga huatna mei alh kha ka hmuhhmaih hauh hleinem."
.
"Chu thu chu engvanga sawi nge i nih? Tunge i nih chiah? Ka hre ngai lo che a, ka laka thunei awm taka khawsak kha bansan rawh. Chuan, i lo hriat atan he in hi ka chhuahsan bawk ang."
.
A chek hluk a, a thutna atang chuan thovin min rawn pan hnai a. Ka hmazawnah tak min hnaih  mah maha dingin ka bianga rawn khawih a tum chuan ka thlesawn vat a.
.
"Han tum chhin ta che!" a ti nghut a. A mitmeng chu hlauhawm tak hian a de sawr sawr ni maiin ka hria. "Min hre ngai lo anga awm hi tum buai lo bawk rawh." a tizui sup a.
.
Ka hre ngai hleinem mawle!
.
"Pindan tawp taka kan inhmuh kha ka hmuh hmasak ber na che a ni__" ka sawi zawh hma hmain hlauhawm taka nui suk chung hian a hawisawn zeuh a, ka hmai zawna arawn awm leh chuan a hmel chu a thutak tih piahlam a ni.
.
"Ngaithla teh! Ka hriat theih chinah Joaquin Cappolo anga mihring tenawm leh verther kha an awm lo. A fanu hi amah aia a danglam tam vakna tur ka hre lo bawk. Tunah chuan tumah i nei tawh lo va, i nunna hi ka kutah a awm tih hre phawt la. Ka sawi anga i awm a tul bawk ang. Tun ang hun tha ka nei hi ka awih lo zawk hial mai__ Khawilai emaw a thi ral mai mai tur ka chhanchhuak che a, ka chungah hian lawm hle tur i ni_"
.
Ka pa chungchang a sawi chu hnial ka duh a, mahse, ka pa kha eng thil emaw ah a inhnamhnawih niin ka ring ve tho. Fiahna erawh ka nei hman ta lo. Ka pa ni mah se thil thalo taka a inhnamhnawih a nih chuan ka hlat ngei ang tih chu ka inhria a, mahse tunah chuan khawvelah a awm ve tawh lo. Mr. Sloan chungah hian eng thil nge a lo tih ka hre hek lo. Hei aia ka tana pawimawh zawk chu tumah ka neih loh thu a sawi kha a ni. Ka nu ka nei alawm! Ani chuan dinhmun chhe berah ka awm anih pawhin min vuan tlat ang tih ka chiang. Ka nu a ni tlat!
.
"Ka thi ral mai mai tur min chhanchhuah vangin ka lawm e. Mahse, chumi avang chauh chuan ka nunna hi i kutah a awm tihna a ni lo. I hriat angin NU ka la nei alawm__"
.
"Umm, i nu maw? Cappolo mansion kangmei chhuak kha i la hre lo tak ang?" a hmel landan chu tlemin a nem ta deuh. A thusawi erawh chuan min thawng dawt thung!
.
"Eng maw i sawi chu?" tiin ka phawk nghal hra a. Ka selenna in, ka nu chenna hmunah kangmei a chhuak maw?
Mr. Sloan chuan min chhang lo. Tawng sual inti hmel a pu deuh niin ka hria. Chu chuan ka hlauhthawnna a ti nasa lehzual sauh.
.
"Engtik ah? Eng hunah nge? Tu tih nge? Ka nu_ " ka sawi zawm mai thei lo. Zam lutuk hian ka chil ka lem khalh a. "Ka nu chungah eng thil  nge thleng?" ka tizui sep a.
.
"Ka tawngkam khan a sawichiang tawkin ka hria."
.
Ka nu_ Ka nu__ Ka mit deuh sulh a, sawitur hre lova ang pham chung hian tlemin ka tawlh hnung hret a. Eng ang pawhin mak tiin na mah ila he mihring hmaah hian ka kehchhe tur a ni lo. Ka kut ka humruh ta ngawt a. Sawitur engmah ka hre ta lo. A sawi ang khan kangmei a chhuak  ngei anih chuan__ka nu chu chhantu nei lovin khawvel atang hian nawrchhuah ani tihna a ni! Pindan chhung zim sulh sulh chu ka awmdan dik loh vang a ni tih ka hria.
.
Ka inher a, muangchang hian a pindan atang chuan ka kal chhuak a. Kawngka ka khar a, ka insum theihna a kehchhe ta. Bang ka ngheng rawk rawk a, ka awm chhung na lutuk chu ka kutphahin ka dawm ta ngawt a. Ka tap thei lo. Ka thaw a chham dawnin ka hria.
.
Hetianga ka awm lai hi Mordecai Sloan khan min hmu tur a ni lo. Thaw tha thei lo chung chuan ahmaa ka chhuahsan ka pindan lam panin ka kal a, step kal chhuah pawh ka tan a harsa lutuk. Ka mittui chu tlaktir loh tumin ka insum nasa fe a, ka mit a phe vek tawh.
Ka pindan zawn ka thlen chuan kawngka nem hawngin ka lut rawp a, ka thu nghal hnawk a.
.
Ka pasalin a tenawm thei ang  berin min phatsan a, ka pa thah anih hnuah tu pawi mah sawi ngai lo ka nu pawh zuah a ni chuang lo. Mordecai Sloan sawi kha a dik! Kei hian tumah ka nei lo va, mi zawng zawng kalsan leh duh loh ka ni! Mahse ka la dam_ Vanneihthlak takin ka la dam!
.
Chhuat atang chuan ka tho a. 'HEIHI KA HRINGNUN TAWP DAN TUR A NI LO! A NI NGAI LOVANG!’
 Ha aiah ha, mit aiah mit.. Mordecai Sloan hian ka pa laka a tih hman loh eng thil pawh ka chungah hian ti rawh se, ka nunna a la anih em loh chuan a tha vek. Chutih rual chuan kei pawh hian tih ve tur ka nei. Ka nun zawng zawng tichhe tu Jefferson DeLourde hi hremna ka pe ang__ka pe khawp ang. Tuna ka hriat loh thil tam tak a la awm ngei ang tih pawh ka ring. Eng thil pawh hmachhawn thei turin tih hmasak tur erawh ka nei. Ngaihtuah nawn ngai miah lovin ka thiltih tumah hian za-ah za hnihin ka chiang!
.
.
MORDECAI SLOAN*
.
I rilru a nem tur a ni lo! Mordecai Sloan , rilru sakhat leh a thil tuma chiang tak hi awlsam takin a rilru a nem lovang!
.
FLASHBACK*
 “Mordecai hian engmah a hre tur a ni lo.”
“Honey_”
"Ka sawi chu i hria em? Mi huat nei reng renga a nun a hman ka remti dawn lo. Nun nuam tak hmang turin ka duh tih i hria alawm. Duhtak_" ka pa chu a thaw hawk a, rilru hahna thuk tak a nei tih hai rual a ni lo. Kum 13 leka upa ni mah ila ka pa hi ka hrechiang a, awlsam taka harsatna tlansan ngai lo mihring anih bakah ka nu leh keihi a khawvel kan ni tih chiang takin ka hre bawk.
.
"Mahse, engtin nge kan tih ang. Cappolo hian i chungah hetiang thil a tih hi ka la ring thei lo." ka nu'n ka pa a kuah a, an pahnih chuan an ngawi ta reng a.
.
An tawng chu engmah hrelo anga awmin ka pindan-ah ka lut a, thawm dim thei ang berin ka mu ta a. Joaquin Cappolo_ Kum hnih liam ta khan ka pa nen sumdawnna an din tih ka hrethiam a, tunah an hlawhtling tan tawh tihah Cappolo hian rilru  verther tak puin ka pa hi a phatsan a ni. He thil avang hian leiba rapthlak khawpa tam ka pa hian a nei ta tih ka nu nen an sawi dan atang khan ka hrethiam vek. He thil thleng hian kan chhungkua min kehdarhtir ang tih ngaihtuah phak lovin ka muhil mai a. Ka hma hunah harsatna tam takin min hmuak ang tih ka ngaihtuah phak hek lo.
.
"Ben_Ben, duhtak_harh teh.. Khawngaihin harh teh!" ka nu mangang tap thawmah ka harh hlawl a, rang taka thovin ka pindan atang chuan ka kal chhuak nghal a. Ka nu leh pa pindan ka luh ruala ka thil  hmuh hmasakber chuan khuarkhurum thuk tak, hlimna reng reng a awm lohna leh rinna reng reng a awm lohna hmunah min nem liam ta a ni. Ka pa inkhaina hrui chu ka en a, a hmel hmuh nuam lo tak zawng zawng nen chuan__ chet nachang pawh ka hre ta lo.
.
"Ka naute, kalsawn rawh.. i pindan-ah kal rawh_" ka nu a tah vanga a mit sen vek chu ka en a, tanpui ka duh_mahse tihtur ka hre lo. Hetiang dinhmuna ka pa a awm hi ka hmuh a duh lo tih erawh chiang takin ka hrethiam.
Ka pa nunna  nei tawh lo va la inkhai reng chu ka pan chhat chhat a, ka nu'n pindan atanga chhuak tura min hrilh chu ka hre chang tawh lo. Ka pa ke chu kuahin ka tap chhuak hawk hawk a.
.
Thil thlen zel dan chu a chhe takzet. Ka pa thih chhan chu 'mahni intihlum' tiin Police ten a hmawr an bawk anih chu! Ka pa'n thihna a thlan zawk nachhan Joaquin Cappolo, phatsantu tenawm erawh zalen takin a nun a hmang a, ka nu nen eitur mumal nei lova kan awm laiin a fanu leh a nupui nen khawvel nawmna an chen a! Vawi engzat fakau nge thinrimna leh rilru natna vawrtawp tuar chunga an chenna in saw ka thlir thin? Pathian chauhin a hria ang!
.
Joaquin Cappolo ka paihthlak theih nana harsatna ka paltlang zawng zawng sawi ka tum lo. Ka duh ka tih hmaa min chet khalhtu an awm erawh pawi ka ti! Ka ti takzet! Chuvang chuan a fanu neihchhun, khawvela thil tha leh nuamsa zawng zawng a neihtir, retheih hre ngai lo leh a duh apiang nei thei hian apa tihsual rah a seng ngei tur a ni.  Saw Jefferson phiangsen sawn min chetkhalh lo ni se kum hnih liam ta khan Vida Cappolo hi ka nupui niin amah hmang hian Joaquin chu ka hrem mai tur!!
.
Ka rin ang ema hmeichhe tlawktlaw a lo ni biklo nge ni, a pasal thang atangin a tal chhuak a. Felfai takin a che dawn emaw ka tih laiin thil atthlak lam a pan tih ka hmuh khan a tawm rukna Hotel atangin ka tana thawk ten an la chhuak ta a ni. Hmun fal taka kan khungna atang khan a tlan chhuah theih ka ring lo hulhual a, he hmeichhia te reuh hian min barakhaih leh ta a ni. Duh ni ila a tlan chhuah lai la la khan ka man leh  nghal thei. Mahse_ Apa thih thu a hriat vang nge huaisen takin a che a, a huaisen mah  mah a ni e. A vawihnih nan a pasal leh thihna lak atangin ka chhanhim leh ta.
.
Joaquin vuina hun an hman lai khan Jasper(Sloan bodyguard) a tel ve a, engkim chiang taka thlithlai tura ka tih vangin fimkhur takin a che ang tih pawh ka ring. Tlai lamah nikhua hre miah lo hmeichhia ka in a alo hruai luh khan  phuba ka lak ve theih nan he hmeichhia hi Pathianin ka in ah a lo hruailut  a ni ang tih ka pawm hmiah a ni. Joaquin min tuartir ang chiah hreawmna kha he hmeichhia, nuam tinreng chen thin hian a tuar ngei bawk ang.!
END OF FLASHBACK*
.
.
Vida Cappolo ka library atanga a chhuah hnuah Jasper ka ko a, chanchinthar a awm leh ngei tawh ka ring. 
.
“Sir.”
“Thu thar a awm em?”
“ Miss Cappolo leh a thiannu kha damin an awm tih an hre lo va, engkim a tha ah an ngai vek.”
.
“Chuan_”
“An mi rawih kha?”
“Miss Cappolo te chhanchhuah an nih rual khan khawvel a chhuahsan fel nghal a ni. Kan tih ngai lovin ama duhthlanna vanga chhuahsan a ni e.”
.
“Miss Cappolo hi thlithlai reng ang che.” ka tih chuan a bu nghat a.
.
“Chiang sa a ni e. Tun mai khan a pindan-ah a inkalh hnan a, a tap a ang khawp mai.”
“A tawk. I kal thei tawh.” Ka ti hmuk a. Jasper chu a phawk deuh hra mai.
“Yes sir.” Min ngaihtuah hmel la pu chungin a kal chhuak a. Ngaihdan ni lo vak lo chungin ka thutna chair chu ka thawhsan ve bawk a.
. 
Ka duh danin ka awm ta tlat lo! Vida Cappolo chungah hian nuam lo tihna nei miah lo va chet ka duh a, ka tum bawk. Mahse… Ralkhat atanga ka hmuh thin hmeichhia, ka lo ngaihdan chhe tak leh huatnaa khat chunga ka lo en thin mitmenga natna thuk tak awm ka hmuh khan__Eng phiangsen nge ka ngaihtuah hi!  Ka la ngai reng. Keimah Mordecai Sloan, Benjamin Sloan fapa_harsatna tam tak tawk chunga tun dinhmun thleng thei_awlsam taka rilru nem ngai lo kha ka la ni reng! A nu a chan a ni ve mai a, ka lo tuarpui viau a tulna chhan pakhatmah a awm lo. Ka tuar zawng zawng ngaihtuah phei chuan a la nep lutuk.
.
Library atanga chhuakin ka mutna pindan ka pan nghal a. Ka inbual a, ka mut hnu pawh chuan mitmeng ngui tak ka mita cham reng chu a bo thei lo.. He thil hi a tangkai lo khawp mai. Khwiah emaw intih harhna tur ka mamawh niin ka hria. Kha hmeichhe mitmeng ka mitthla-a a cham vang ni lovin ka duh vang zawkin a ni thung ang.
.
Muangchang lem lo tak hian in ka chhuahsan a, ka kal ziah thinna hmun ka thlen chuan ka beisei lawk ang ka hmu hmiah bawk. He lai hmunah hian zan tin deuhthaw mi thar hmuh tur an awm a, hmeichhe nalh leh itawm zawn buai a ngai hran lo.
.
Ka thutna lam pana hmeichhe lo kal chu  ngaihven lem lovin ka intur chu ka lem hlek a, ka no ka dah thlak leh meuh chuan ka malchungah arawn thu lo chauh tawh.
.
“Hun nuam tak hman I duh ka ring..” ka beng bulah arawn ti sar sar a. Ka mamawh lai tak niin ka hria.
.
10 minutes vel hnuah Bar atang chuan chhuakin Car-in ka tlan chhuahpui a. Ka in thlen nan hun kan mamawh rei hran lo. Ka awm nuam chiah lo tihreh vat ka duh vang hian ka hmanhmawh ve hrim hrim bawk. In kan thleng a, a lo reh thap mai. Zan a rei tawh deuh bawk a ni. Jasper erawh a pindan-ah mengin a tihtur a ti ang tih ka hria.
.
In hnuai lama pindan awl ka hman fo tawh thin lam panin hmeichhia chu ka kai a, a mitmeng atang chuan a beisei a langchiang hle. Pindan kan luh rualin a thawmhnaw hak a phelh a, a taksa nalh zet chu ka hmuh loh hlau niawm fahran hian a che nghal a. Duat taka inchul hliau hliau lam ka ngaihtuah lo.
.
Pindan pawna thawm awm ka hriat chuan ka thiltih lai chawl datin ka ngaichang a, thawm a awm ngei a ni. Kawngka a rawn inhawng nghal mai reng a. Thaw hak ri ka hriat chuan tunge tih hresain ka hawi chhuak a.
Vida Cappolo chu kawngkaah dingin a ang pham a, a bulah inthiam lo hmelpu chung hian Jasper a ding bawk.
“Sir, ka dang thei ngang lo_”
Eng emaw sawi tur nei  niawm tak hian Vida chu a ang zuau a, a ngawi leh rih a. Ka hnuaia hmeichhia chu lungawi lo zet hian a lo tal ve sek bawk.
.
“Ti zawm ru_Ka tihpalh!” ti bah nakin Vida chu a inher a, pindan kawngka a inkhar zui nghal hmiah. Ka mood a chhe vek hman tho mai!
.
“F*ck!__”
Khum atangin ka chhuk a. Ka kawr ka ha nghal mawlh mawlh a. Ka chetdan chu makti awm zet hian ka hmeichhe hruai hawn chuan min en reng ringawt. Ani min ngaihdan tur hi ka care lo.
.
“Ka thlah hawntir ang che.  Melo_”
“Melanie zawk! I ti tak tak lo tiraw?” lungawi loh hmel fe hian khumah a thu tum bar a. Khuma thu mek ai hian min rawn tibuaitu kha ka rilruah a lang lian zawk tlat!
.
Ka wallet atangin pawisa ka phawrh a, khuma hmeichhe awm chu pe in ka chhuahsan nghal a. Thlah hawtu tur an tam lutuk. In chung pan chhohna ah chhovin Jasper hnenah  in hnuaia hmeichhe awm thlahtu tur kohsak mai turin ka hrilh a. Ka chetdan hi a mawi lem lo anih pawhin lo ni liam mai rawh se.
.
Vung zetin Vida awmna pindan ka pan a, a pindan kawngka chu kik lovin ka hawng rawp a. A phu nasa hle ang tih a hmel atangin a hriat.
.
“Eng thil phiangsen nge i rawn tih kha?” ka ti  nghal hrawk a.
.
“Ka_um_biak che ka duh a.” a tim deuh chu pawisa lo zetin ka hnaih a, a tawm deuh chawih chawih a. Khumah chuan lawn vein amah hnaih thei ang ber hian a bek sir ve ve ah ka kut ka nem a, a taksa dek lovin ka bawhbet a ni ta deuh ber.  Hnai zetah ka en chhuk reng a, a mit chu a de zeuh zeuh ni hian ka hria.
.
“Eng thil nge i tih hi?” a ti tham tiak a, a aw-a min hlauhna lang chu thup tum hle mah se ka hrechiang khawp mai, ka pawisa duh hek lo.
.
“Inbiak chauh lo pawh i duh ngei ka ring.”
“Mr. Sloan!”
“Ka sawi chu a dik ani maw? Ka lak atang hian eng thil nge i duh?” awm nuam lo taka a awm chu ngai pawimawh duh lovin a bekah ka kut zungchalin ka khawih zai zai a.
“Nangmah!” tiin chiang lutuk hian ka mitah min en let ta kal mai. Ka beisei loh lutuk chhanna ka dawng chuan min ti hamhaih ta zawk!
VIDA – SheKnows
(Vee-Da)
.
By. Thantei_LauraSean
.
CHAPTER - 10
.
MORDECAI SLOAN*
.
Ka hamhaihna tilang lovin ka inla hrang a, khum atang chuan chhukin za lo zet hian ka nui zui hak a.
.
“Hmeichhe a tak i ni tih chu ka hria a, ka ngaih aiin i lo la a lehzual anih dawn hi!” ka tawngkam chuan tina mahse pawi ka ti therte lo.
.
“Tunge pawiti? Nangmah maw? Nilo!" min la en kal chung chuan arawn tho chhuak ve a, ka hmaah dingin min en chho ha a. Nichin lawkah min hlau niawm takin a awm a, tunah lem a mitmengah hlauhna pakhatmah a lang tawh lo. "Ka pa chunga thlentir i duh i tih hman loh zawng zawngte kha ka chungah hian thlentir i duh tiraw? I duh apiang iti thei ang."
.
A nungchang danglam thut chu chik lutuk takzet hian ka mit tizim in ka en a, he hmeichhia hian nungchang engzat fakau nge a neih le?
.
"Min chhang rawh. Ka sawi chu a dik tiraw? I ta vek a ni e. I duh chu ti rawh!" tinawn leh sak sakin a ban pahnih chu sang vak lovin a phar chhuak a, a pian zia mawi zet chu a kawr hak pan tak chhanah chuan a lang chiang khawp mai. Thawk ka la hawk a.
.
"Eng thil  nge i hriat a?" ka ti hul hak a. Hetianga danglam ngawt tur hi ka ni miah lo. Takzet hian!
.
"Heihi i thil duh a ni lo. Na tam tak min tuartir i duh tih ka hria. I duh apiang ti rawh. Ka tuar vek ang. Eng thil  nge hlauh leh chuan tur ka neih?"
.
"Tawp teh. Eng thil  nge i hriat a?" ka tilet ve ta thung a. A awmdan hi ka hrethiam chiah lo tak tak. Ka kut kuangkuahin a chezia chu ka en reng a, a hmui pet sawi zeuhin a then zui sak a.
.
"Mr. Mordecai Sloan, hmeichhe a tak ka ni tih i hre ta bawk a, zawhna pakhat ka zawt ang che." ka chhan hun pawh a nghak chuang lo, muangchang hian khum lam pan lehin a thu a, "Engvanga min thihtir mai lo nge i nih? Ka rilru a tibuai deuh tlat_ Nang hian ka pa vanga min hua anih chuan ka thih pawiti  miah lo tur i nia_Engvang nge? Engvang tehlulin nge min thihtir mai loh?"
.
"I rilru i hmang ve nasa hle mai. Eng thil dang nge sawi duh ila neih?" ka ti  nghut a.
.
"Ka dam i duh chhan chu eng thil pawh nise a tha vek. Eng anga nasa pawhin min hua la ka tan chuan danglamna a awm lo. Min hip lo va, ka mipa duhzawng i ni hek lo. Chu thil chu ka sawi tum ber pawh a ni lo va_" a ngawi leh dat a. A thusawi chu sawifuh inti chiah lo hmel a pu. Hmeichhe mak leh danglam tak a ni reuh tlat! Ka hriatthiam hauh loh hian ka hip loh thu a sawi chuan min tiphur tlat! Hmeichhe tam zawk ka hip tih keimah ngei pawh hian ka inhria! Chutih laiin he hmeichhia hi ka hip hauh lo anih chu! Nuih te pawh a tiza e!
.
Nui lo tura insum chungin "Sawi zel rawh." ka ti nghut a.
.
"Ruahmanna ka nei. Nungdama ka awm chhan tur pakhat chiah a awm a, chu thil chu Jefferson hremna pek a ni. Ka sawi kher ngai lovin chu chu i hresa!" min rawn melhin a meng kual ralh a, a phurawm telh telh mai. Eng thil nge maw keimahah hian diklo awm le?

.
"Ka nihna hi thlak ka duh. I duh dan danin min hmang thei tih ka sawi rual khan nangpawh hian min tanpui ve a ngai ang. Ka lak atang hian eng ber nge i duh? Ka taksa chu ani lo phawt a!" a dar tiche zeuhin a mitmeng paw deuh ram chuan min en chik khawp mai. "Eng thil nge ni ta ang?" min zawt pawh a ni tawh lo, ama hriattur chauha sawi a nih zawk hmel.
.
A thusawi zawng zawng kha ka ngaihtuah let a, ka lak atanga a dawn tur chu eng thil pawh nise a pawm vek tih a sawi a, chutih rualin min hman tangkai ve ngei a tum tih a thup buai hek lo. Eng thil nge ka tih ang? He hmeichhia hian rilru a tibuai thei reuh zek dawn tlat.
.
"Ka ringchhin thei angem? A hmasa berah chuan Cappolo sumdawnna zawng zawng hi i pa ta tur anih vangin engkim neihlet i duh ngei ang chu tiraw?" ka pa chungchang awlsam taka a sawirik dan chuan dawn awm miah lovin ka thinurna a kaiharh chiang teh e! Ka kut kuangkuahna phelh chuang lovin ka kut ka hum ruh ta ngawt a. Ka rin ang ngawta hmeichhe ngaihtuahna tlem tak nei a ni lo tih a chiang nghal vek bawk.
.
"Cappolo Corporation hi neih let ka duh tih ngaihdan chu engtianga nei ngawt nge i nih?" ka ti chang bawng a. Pawisawi lo hmelpu zet hian min enlet ram ram nia.
.
"Kei ni ila ka tum hmasak ber tur anih dawn vang  mawle." a ti awlsam et a. Thluak hmang lo zawk zawk chu a ni lo tawp mai.
.
"I ring sual anih chu. He pindana ka lo kal chhan chu eng thil pawh ti ila ka in chhung ah hian min tibuai tawh suh tih hrilh che ka duh vang a ni. Ka thusawi chu hrereng rawh." min chhan hmain ka inher vut a, a pindan atang chuan ka kal chhuak nghal a. A phun zui bal bal nain eng thu chiah nge a sawi ka hre hman tawh lo.
.
"Mr. Sloan_" min ko ri ka hriat chuan ding chuang lovin ka kal muang deuh thung a. Eng thil nge maw ka hriat phiangsen ni? Hmeichhe thusawi tur ngaichangin ka khawmuang chu anih si hi!
.
"Naktuk ah ka ruahmanna neih chu ka hrilh nawn ang che. Chuan,_" a tim leh deuh tih ka hria. "I pindan-ah ka lo lut tawh lovang. Khatiang thil i tihlai phei chuan__" ka melh let hrawk a, ka en a inring lo nge meng phar deuh ak hian a kut a phar chhuak zeuh a, "khatiang thil kha ka hmuhchak zawng a ni lo bawk a_" tiin a riat zui niah niah a. Rang taka hawiletin ka nui zui suk ringawt. Engvanga nui nge ka nih_takzet hian a!!
.
"Min hmuh in beisei tawh suh." ti hmukin chak zet hian step-ah ka chhuk nghal a. Ka thusawi awmzia chu eng nge anih pawh  ka hre hrep lo.
.
Ni thum a ral ta. Vida enkawlna in ah ka kal ta  miah lo a, a chanchin erawh Jasper hnen atangin ka dawng kimchang viau a. Thil danglam deuh engmah a tizui lo tih ka hriat chuan mak ka ti deuh khawp mai.
.
“Mahse, sir, a nungchang a cool , a nui ngai lo.”
.
“Ka care hran lo. Min hmuh tumin vawikhat tal a zawt lo che maw?”
.
“Zawt miah lo. Tunah khawiah chiah nge I awm?”
.
“ Brooklyn Villa ah. Naktuk hian lo kal ka tum ang.” Jasper min chhanna ngaichang tawh lovin phone ka off a. Vida ruahmanna chu engpawhnise ngaihthlak sak a hun ta niin ka hria.
.
Vida ka dahna hmun (Sloan Mansion) ka thlen chuan a lo reh thiap a, in chhungah lutin choka-ah ka lut tlang a, helai hmuna hnathawk nghet ka chhawrte tih loh chu tumah an awm lo.
.
"Sir, Miss Cappolo chu in chung pindan-ah a awm a."
.
"A that chu. Tihtur tul a awm anih chuan ka lo ko ang che." In enkawltu a kalsawn rualin in chung pindan ka pan hmiah. Engvanga hmanhmawh nge ka nih ka inhre lo.
Vida pindan pangngai zawnah dingin kawngka ka kik a min chhawntu awm lovin a reh thiap a.
.
"Miss Cappolo!"
.
"Hetah ka awm."
Ka veilam ka hawi a, thawm lo chhuahna chu tv room atangin a ni teh tlat. Muangchang lovin ka pan nghal a.
Pindan kawngka inhawngsa ah chuan ka lut a, ka rin loh tak thil ka hmuh chuan ka ding leh chawt a. Vida chu hahdam leh thatchhiat hmel zet hian sofa-ah a thu mu in a bulah popcorn bowl lian fe hi a awm bawk a. A sam chu a chhipah tawm khawm vekin en lo hian popcorn chu a ban a,a hmawm zauh a. Amah kotu chu tunge anih a ngaihven lo anih hmel.
.
Ngawi rengin a hmaah ka ding a, ka hmel min hmuh chuan thu ngil nghal vatin hamhaih hmel a pu a, naupang thiltisual man ang mai hian a kawr a zut mam ta ngawt a.
.
"Eng nge i rawn tih dawn?" a ti ha mai. Min zawhna atthlak zet vang chuan ka ner suk ringawt.
.
"Ka in ah hian ka duh hun hunah ka kal thei." ka ti hmuk a. He hmeichhia nen kan inhmachhawn hian ka mizia a danglam tlat thin tih tunah hian ka hrechhuak chiah a ni. Tawngkam pangngaia chhan theih reng hi ka ti lo tlat thin. Nuam ka ti riau bawk.
.
"I sawi tum chu chiang takin ka hria e."
.
"Hunawl i ngah mah mah anih hmel."
.
"Ka hmu tawh dawn lo che emaw ka tia. Inngaihtuahna hun ka ngah khawp mai_" ngawi leh chatin a thutna bul chu a melh zeuh a, thu ve turin min duh tih ka hria. Thut ve ka tum lem lo thung.
.
"Ka ruahmanna chungchang chu__"
"I ruahmanna ngaithla tur ringawta lo kal ka nih i ring elaw?"
.
"Ring chuang lo ve." tih pahin min melh ralh a, a hmel a thutak ta ran mai. "Min ngaithla tura lo kal i nih loh pawhin ka sawi tho ang. Eng ang pawhin min ngai la pawi ka ti lo." chiang zet hian min melh a, a mitmenga tumruhna lang chu mi a ber pawhin an hrethiam ngei ang.
.
"Ka landan hi thlak ka duh. Chumi ti thei tur chuan ka mamawh che_ Ka_ I tanpuina ka mamawh. I sum hmanral zawng zawng ka rul leh vek ang che. Khawngaihin__" ka hmel chu chik lutuk a min enin a ngawi chat a. "Min tanpui thei angem?"
.
A sawi hmang hian surgery tih a duh tihna a ni. Keichuan a tulna ka hre lo hulhual.
.
"Mr. Sloan_"
.
"Min ngenna chu awlsam taka ka pawm i lo beisei ani em lovang chu tiraw?" ka mithmul ka tisang zauh ringawt.
.
"Ka_ Ni e, itan chuan thil pawimawh a ni lo tih ka hria. Mahse, ka tan he thil aia pawimawh hi a awm lo. Ti tura min tih apiang ka ti ang." a ti nghet charh a. A mitmeng ah zamna emaw hlauhthawnna emaw a lang lo. A lo inngaihtuah lawk fe tih a chiang viau. Engkim a huam anih chu!!
.
"Engkim_?" ka ngaihtuahna tilang lo turin ka inthunun ve bawk.
.
"Engkim_ Duhthlan tur dang ka nei chuang hleinem. Ka nun hi ka ta a ni tawh lo hrim hrim ani lawm ni?" min rawn melh lehin a nui hul hak mai. Chutah chiah chuan ani a mitmenga beidawnna thuk tak ka hmuh tak! Ka pa boral atanga kum tamtak chhung kha darthlalanga ka inen apiangin hetiang mitmeng hi ka hmu thin a nih kha.
.
"Ka lo ngaihtuah ang." tia chhangin ka inher vut a, a pindan chhuahsan tumin ka kal nghal a.
.
"Mr. Sloan_"
Ka ding leh rih.
.
"I nupui, hmangaih taka i neihin mipa dang umsan chein i nunna lak tum tase engtin nge i chhanlet ang? I ngaidam thei angem?_" a ngawi dat a_ "Min chhan a ngai chuang lo. Thu awmze neilo ka sawi anih chu.. Ka a zo tawh anih hi.." a tawng tawplam chu ka hre pha meuh lo. Chhang chuang lovin pindan atang chuan ka kal chhuak a.
Ka ngaihtuah zawm a tulna a awm lo va, ka tanpui a tulna a awm hek lo. A pa thiltih vang chauh pawh khan he hmeichhia hian ka tanpuina a dawng hauh lovang. 
.
VIDA ELVES CAPPOLO*
.
A rilru hneh thei turin eng thil nge ka tih chuan ang? Lalpa min tanpui lul teh!
.
Mr. Sloan ngawirenga kal chhuak chu enin a thawm a reh fe hnuah pawh ka en ngai ka la en reng a. Tuna a landan chuan he mipa rilru sakhat leh zahngaihna tlachham zet hi min tanpui turin ka hneh dawn lo. Engkim ka huam takzet asin. Tuna ka hmel leh ka nihna, ka nihphung engkim hmang hian Jefferson hrem turin ka hlawhchham tawh a, tih leh tur dang ka hre tawh lo.
.
Ni thum dang a ral leh ta.
Mr.Sloan hmel hmuh leh chu sawi loh a thawmvang engmah ka hre eih lo. A in lian takah hian kei leh hnathawk thenkhat, in atanga ka tlanbo tur min vengtute bak kan cheng lo tih ka hrechiang a. Uluk taka min vil reng avangin tlanbo ka tum buai hek lo. Tum pawh ni ila ka hlawhting dawn lo chiang em a ni. Pawn lam boruak ka hip duh a nih pawhin mipa rinawm zet zet pahnih in kawt zawla ka kal min phalsak a, ka lak atanga mit lasawn miah lovin min vil reng bawk a. Ka hne hluah hluah a, ka a mai dawn hian ka inhria. A mai dawna inhriatna hi nitin a zual zel a ni.
.
"In hnuai ah chhuk rawh." engtiklai pawha min veng rengtu Boni chu enin ka ner sak a. Hnial buai a sawt hauh lovang. Bakah hun hei leh chen hnuah min hmu duh an awm a nih chuan eng mihring pawh nise phur takin ka hmu mai ang chu.
.
In hnuai panin ka chhuk chhat chhat a, ka hnunglam atanga Boni'n "Library ah kal rawh." arawn tih pawh chuan a tawng chu hrelo anga awmin ka kal muang zual sauh a. A phun bul bul mai. He Boni nen hian kan inhrawn rei ta viau mai, tawngkam bung tak taka kan inbiak bak chu engmah kan sawi ngai lo hulhual thung. Ninawm vel vek hi a ni ber. An pu hian thupek a pe khauh viau anih hlawm hi.
.
Library ah ka lut a, Mr.Sloan chair-a lo thu ka hmuh chuan ka awm dan ti danglam chuang lovin a hma zawna chair awlah chuan ka thu a. Ka chawmawlh vek tawh.
.
"Min ngen angin ka tanpui ang che. I sawi ang khan min rulhlet ngei erawh angai ang."
.
Ka inthunun hman lo. Ka thutna atangin ka tho hluai a, "Ka lawm e." ka ti hmanhmawh bawk.
.
"Lawmthu inhrilh nan chuan ala hma mah mah."
.
"Pawi ka ti lo. Engpawh ka huam tih ka sawi tawh kha."
.
"I inchhir tur a ni lo." a ti leh hmuk a. Chik zeta min melh dan chuan ruahmanna fel tak a nei ngei ang tih min rintir a. Eng ruahmanna pawh nei se ka pawisa thei chuang lo.
.
"Naktukah doctor i hmu anga, i duh ang takin ti ang che. He in hi ita angin i en thei bawk ang."
.
"Chuan, eng thil  nge ka pek let ve ang che." ka ti sap a. A nui suk ringawt. Ka rilru ah thil tam tak a awm nain sawi chhuah hun a ni lo tih ka hria a, sawi pawh ni ila thu awmze nei kan sawi dun chuang lovang.
.
Dawhkan ah a kiu nghatin a hmui a khawih zeuh a.
“Card hi la rawh. Thla thum chhung chu kan inhmu rih lovang.”
A thutna a thawhsan a, engmah sawi tawh lovin library room atang chuan a kal chhuak a. Ni dang ang bawkin ka en liam leh ta.
.
Ni a ral a, a insawi ang chiahin Mr.Sloan chu a reh zui hmak.
.
.
“Ani hi i doctor tur.” Boni hmel landan chu a dang deuhin ka hria. Engmah sawi chuang lovin ka hmaa nu thau lampang ding chu enin ka nuih a, hmel nung sar chu hmuh anuam takzet. Hun reitak hnuah pangngai taka biak theih mihring bulah ka awm ve thei dawn ta niin ka inhria a, ka awm a nuam deuh sawt.
“Andrea tiin min ko thei ang.”
“Vida Elves.”
.
“Vida Elves ini reng dawn em kan la hria ang chu.” A nui hak hak a, “ Kan hna kan tan nghal dawn nia. Min lo zui rawh. Mr.Boni, kan kal thei nghal ani lawm ni?” a tih chuan Boni chu a bu vei nghut a.
.
Khawilam nge kan pan dawn tih ngaihdan ka nei thiam lo. Thui tak kan tlan hnu chuan kan ding ta hram a. Car atangin kan chhuk a, Andrea tawng barh barh reng chunga kal chu zuiin kan chhehvel chu ka en uluk ngial bawk. A hmun nawm zia ngaihtuahin min an tam lo hle a, ka hmuh chhunte chu a taka ka hmuh ngai loh milar tak takte an ni.
.
Pindan pakhatah kan lut a, thu tura min hrilhna hmuna ka thut fel hnu chuan Andrea chuan a tihtur a ti nghal zung zung a.
.
“Hun engemawchen enkawlna tha tak I dawng tawh a, nghah rei ngai lovin kan tihtur kan ti nghal thei ang. I hmai tlema khawih danglam bak chu thildang ti lo turin Mr. Sloan khan thu min pe a, duh dan dang i nei anih pawhin ka tihsak thei kher lovang che.”
.
“A dik alawm. A hma thei ang bera tihtheih chu ka duhthusam a ni.”
.
“Good. Tikhan check ngai chu ka check kim a, hna kan tan thei e. I taksa a fit tha khawp mai.”
.
Thil harsa tak ka paltlang dawn tih vawi tam ka ngaihtuah lawk chung pawhin ka taksa (hmai  vun) zai nana hman tur hmanrua nelawm loh tak tak ka hmuh chuan zam tak ka ni. He thil ka hmachhawn a tul chhan ngaihtuah thar lehin ka inhumruh sauh sauh a. 
.
Andrea puitu tur dang an lo kal a, tawng dang hmangin an inbe ta daih a, Sloan hming an sawi bak an tawng awmzia ka hre lo. Injection min pek hnu chuan ka vai ruai ruai a, engmah ka hre zui ta lo.
.
.
“A na viau em?”
Chiang vak lova harhin ka meng a, Andrea nui sang hmel ka hmuh chuan nuih mai ka tum a, ka thei lo chiang teh e.
Ka hmai chhah deuh luk chu ka feel nghal mai a, ka hmel ka hmuh leh hun chuan ka danglam tawh dawn tih ka ngaihtuah hmasa ber. Na ka nei tih lantir tumin ka kut ka tiche zeuh a.
.
“Anih dan tur reng a nih kha. Na chhawkna ka pe che anga,  kar hnih/kar thum vel bak na i tuar lovang. I duhthusam a thleng ngei dawn e.” a ti sarh sarh a.
.
Heihi ka duhthusam ti hlawhtling thei tura bul intanna hun pawimawh tak a ni. Pen khat ka pen ta!