Vida- SheKnows 16-25

VIDA – SheKnows
(Vee-Da)
.
By. Thantei_LauraSean
.
CHAPTER - 16
.
MORDECAI SLOAN*
.
A lungphu zaih zaih chu ka hre thei! Kei chauh ni lovin ani pawh hi a danglam ve tih ka chiang. Muangchang hian a dar tawn tawna vuan chungin ka inla hrang a, a ngaihtuahna zawng zawng hriat duhin a mit ah ka en a. Rei tak thaw lova awm tawh ang maiin thawk a la ham ham a, a kut pahnih ka awma a nghat ringawt pawh chu ka tan danglamna tham a ni! Tawng tumin a ang ziau a, engmah sawi lovin  ngawi leh rih. A mitmeng a hlauhna niawm tak leh rinngam lohna lang chu nuai bo ka duh zia hria se engtin nge a ngaih ang?
.
A kut chu la thla riai riai in a nui sak a,
"Ka dinhmun chhiat vanga min ngainep duh anih pawhin hetiang zawng chu ni lo hram rawh se." eng thu nge a sawi phiangsen hi! Takzet hian! Nang hmeichhia hi! Vawi khat chauh pawh a dinhmun sawi langin ka hnuaichhiah tawh ngai em? Ngai phiangsen lo! Eng thil nge a hriat tehhrep? A ngaihtuahna pawh a hmang dik thei tawh lo anih hi. Chik duh nise tuna ka awm dan atang hian hai tur a awmin ka hre lo. Thil tam tak hrethei inti si hian engtin nge min hriatthiam loh theih.
.
"F**k!" ka phun hluk a, a hriat phak ka ring lo a nia. A meng phar deuh ak ka hmuh chuan ka thusawi kha a hria tih ka hrethiam. Sawi dan tur ka hre lo. Thusawi duah ka thiam ngai lo va, tunah hian ka duh vangin ka thiam thar thut thei hek lo. Ani pawh chu sawitur hre lovin a ngawi ran a, muangchang hian min tawlh hlatsan hret hret a. Ka fawh zawh chiah a hmui no zet chu enin ka inhriat hmain thawk ka la hak. He hmechhia hi engtin nge ka buaipui dawn ka hrethiam ta lo. Thil hlauhawm lakah venhim ka duh a, a luhlul zia leh a thuduh zia ka hriat tawh vangin a awlsam dawn lo. Min ngaihdan danin min ngai rawh se. A duh emaw duh lo emaw a nunah hian ka inrawlh zel tawh dawn!
.
Eng thil nge ka ngaihtuah tak hi? Engmah sawi tawh lovin a pindan chu ka chhuahsan ta ringawt. A bula ka awm reng chuan ngaihtuah chiang lovin thui tak kal ka tum ang tih ka hlauthawng a ni. Ka hlauthawng anih chu! Takzet hian! Hmeichhe lakah ka hlauthawng!
Ka sam ka tuai puat a, chak zetin ka pindan ka pan ding nghal a. Ka rilru let but hi a reh phawt loh chuan thil dang ti chi ka ni rih lo. Engtik atang khan nge hetiang zawng hian Vida Elves Cappolo hi ka lo en? Pathian chauhin a hria ang. Kei ngei pawh hian ka hre lo. Ka tan hmeichhe pakhat chauh a awm reng thin. Chu hmeichhia ngei chu tunah pawh ka duh ber a la ni reng! Mipa a zawnga inti mipa ber mai na leh tawh tur chuang awm lo va min phatsantu hmeichhia kha, na taka siam ve tumin Vida hi hman ka tum ani lawm ni? A la ngai reng, ka rilru ka sawhsawn lo. Vida hi Violet Smith ka tihnat theihna tur hmanraw tha ber a ni. Keimah ang bawka phuba lak duhna rilru pu_ A hlawhtlin theihna tura engpawh paltlang huam hmeichhia hi ka ngaihven hauh lovang.
.
Bathroom-ah ka lut a, shower hnuaiah dingin tui vawt lutuk in min phuh chuan ka phu zawk thei. Ka rilru buai erawh a reh lo nasa. Ka duh loh thleng thlengin ka ngaihtuah leh ngei dawn e. Nun awlsam tak ka hmang lo va, sum ka ngah a ni maithei, mahse ka rosumte hian chhungrila ka mamawh ber min pe thei lo tih keimah ka inhriat chian tluk zetin ka hrechiang tawh. Ka nuna hmeichhe hmangaih ka neih awmchhun nia ka lo hriat thinin min phatsan ni atang khan hlim taka ni hmanral ka nei lo tiin sawi ta ila thu sawi uar ka ni hran lovang. Violet Smith_ Ka tihtum pakhat pawh ka la ti hauh hleinem mawle.
 Tunah chuan ka ngaihtuahna a fim leh ta! Vida Elves Cappolo, ka pa neih zawng zawng chhuhsaktu fanu ngei hi min phatsantu na taka ka siam ve theihna tur hmanraw tha ber a ni. Ka ruahman lawk ang khan engkim ka ti ngei ang. Atthlak  zeta Vida lo ngainat hi ka tih hauh loh tur leh ka tih ngai loh tur thil a ni.
.
Ka maimitchhing a, ka mitthla a Vida hamhaih hmel lo lang vang chuan bang ka chum dawt a.
.
Engvang nge? Jefferson nen an inneih hma khan vawi tam tak ka hmu fo tawh thin a, khatih hunlai khan Violet nen kan inzui ngawrh hle a, Vida ka hmuh apianga danglam nia ka inhriat thin lai khan tun ang hun hi a thleng ang tih ka ngaihtuah pha eih lo. Violet chauh kha ka tan hmeichhe tha ber niin ka ngai reng fo a, min phatsan hnu pawh khan chu ka rilru chu a la ngai reng niin ka hre bawk anih kha. Hetiang thil tuna ngaihtuah chhuah hi eng nge a tulna? Jefferson nen khan hmu dun lo ni ila ka ngaihtuah hauh lovang. Phiangsen hian!
.
Bathroom atangin ka chhuak a, khawiah mah kal tawh lovin ka mu nghal a. Ka phone ka on chuan message a lo lut zut zut mai. Violet hming lo lang chu ka en thuak a, a message engmah chhiar lovin ka phone chu ka off lehnghal a. A hma ang kha chu nise ka chhang emaw chhang lo emaw a message chu ka chhiar maithei le.
.
Ka pindan kawngka kik ri karh karh ka hriat chuan ka chhang mai lo. A rik nawn leh chuan lo lut turin ka hrilh a. Kawngka chu inhawng riai riai in Vida chu tim hmel deuh tak hian arawn dak dek dek a. Vida_huh_ Vida tia koh aiin Guzel tia koh ka duh zawk. (Guzel-Beautiful ~T) Amah hian eng hming pawh amah koh nan thlang chhuak se ka tan chuan Guzel a ni reng tho. Hman tangkai ka tum dan nen pawh a inmil zawk. Takzet hian!!
.
Ka mumal tawh lo takzet anih hi. Tun hun reilote chhung pawh hian vawi engzat nge ka ngaihtuahna a inkalh le? Ka hnaih tur a ni lo, ka hmanrua chauh a ni tih ka ngaihtuah zo chauh a, a letling chiahin a chungchang ka ngaihtuah lehnghal a nia. Ka ngaihtuahna chu dah thain ka en a, "Eng nge i duh?" ka tichhum hmuk a. Ka tum dan aiin ka tawngkam chu a bung lehzual.
.
"Ka muhil thei lo." a ti tham chal mai.
.
"I mutthilh theih loh thu sawi tur chauh a lo kal inih chuan i chhuak lehnghal thei ang." eng nge maw ka hriat hrep le?
.
Min chhang lovin thle deuh hian min en ha a, ka tawngkam chu a dawngsawng thiam chiah lo anih hmel.
.
"Sawi chian duh ka nei. Min tawngkhum danah fimkhur ang che. Min rapbet tak ang khan tawng kher suh. Mamawhna che ka neih ang bawkin nangpawh hian min mamawhna i nei ve tho tih ka hrethiam a, chuvang chuan chiang zawkin sawi tha ang." a tifiah kalh a. A tawngkam zawng zawng chu hmaih nei hauh lovin ka hrechiang hle.
.
"Dan siamtu tur chu keimah hi ka ni." ka tih chuan chek tlak in min lo pan hnai a, min hnaih viau lo se a him zawk tih inhre tur a nia.
.
"Kei pawhin ka siam ve thei. Ka lak atang hian eng thil chiah nge i duh tih ka hriat a ngai. Nichin maia ka pindana i sawi kha chu i rilru tak tak a nilo tih ka hriat vanga lo kal ka ni tih hre hmasa bawk la. Nang nen hian inmilna kan neih miah loh vangin kan pahnih tan thil a awlsam zawk theih  nan engkim sawi chian vek ka duh. Ka duh ber chu i hria a, chumi tithei tur chuan i tanpuina ka mamawh. Jefferson hi ka pan dawn a__"
.
"Duhtawk teh." ka ti hrawk. Ngawi chatin min en a, zawhna nei mitmeng in min en a. "Ka tihtur kan ti hmasa ang."
.
"Naupangchhia viau lo mai teh." a ti hlak a. A sawi ang chiah khan kan inmil hlawl lo tak tak pawh ani mahna. Mahse min hip em em tho si anih hi!
.
"Min mamawh nasa zawk a, ka thuhnuai a awm i ni bawk."
.
"Takzet che hian."
.
"Ka hmaichhan ah tawngkam mawi lo i hmang tur a ni lo. Chiang takin ka sawi ang. Jefferson i hnaih hma hian thla khat chhung chu mi zawng zawng hriatah ka hmeichhe kawp angin i khawsa phawt tur a ni. Thla khat a ral hnu chuan khawvel hriatah kan inthen ang. Chumi hnuah chauh Jefferson chu i duh ang takin i hnaih thei tawh ang. Ka sawi chiang tawkin ka hria. Thla khat chhung hian Jefferson chungchang ngaihtuah lovin awmze neiin i nung tur a ni. Min chhuahsan thei tawh e."
.
Ngaihdan ni vak lo tih hriat tak hian a lu a thing mat mat a, a duh chuan min hnial lui thei. A hriat tura khauh taka ka sawi ang hian awm duh lo tlat se tihtheih ka nei chuang lo tih ka hria. Keimah ngei pawh ka inhrethiam lo chu anih hi! Jefferson a hnaih lohna tura ka ruahmanna mai a ni tih pawm harsa ka ti hle. Mahse thudik a ni tlat.
.
"A tha e. Thla khat. Vawiin atang hian chhiar tan ang che. A bak engmah kan sawi buai tawh tur a ni lo. Chuan, vawikhat pawh ka pindan ah sawn lo lut tawh suh." a ti khar khar a. A hmel thutak khar chu ka en tawp. Ka mutna thawhsana va fawp mai lo turin ka inthunun a ngai hial.
.
Chhuah tumin a inher a,
"Lo ngaithla teh." ka tih chuan a ding leh a. "A hmaa ka sawi kha i theihnghilh tur a ni lo. Tun atanga thla khat chhung chu i mipa hmangaih ber ka ni. Engtianga tihlan tur nge i hria em?" a ner nang nang mai. Nuam ka ti tan ringawt nia! Takzet hian_
.
"I la hre mai ang. I thusawi chuan khum a huap tel lo tih hre ve bawk la." ka chhan leh hmain ka pindan a chhuahsan a.
.
Ka inhriat chhuah leh meuh chuan ka nui tawp hmak! Ngaihtuah miah lovin a tanwgkam leh chezia vang khan ka lo nui anih chu.
.
Thil dang ngaihtuah tawh lem lovin ka mu tha a, reiloteah ka muhil ta hlauh. Hun reitak chhunga ka mutthilh awlsam ber tum a ni hial ta ve ang.
.
.
Ka phone riin min tiharh a, harh chiang lovin phhone chu ka pick up a.
.
"Duhtak, vawiin hi min tlawh tura i insawi ni kha a nia. Ka lo ngaichang dawn che a nia.."
Phone chu chhang lova ngaithla reng chungin ka tho a. Thil chi hrang hrang vangin ka lo mangnghilh titih der a ni.
.
"Duhtak_"
"Aw, ka lo kal ang. Eitur i siam chuan mi pahnih tan ilo siam thei ang em?"
.
"Oh!! Tehreng mai. Ka fapa, ka rin hi a dik em?" a ti hliai a. Duh aiin ka sawiri hma anih hmel.
.
"Chuah dawnah ka lo phone leh ang che." tia chhang in phone ka off a, a vawihnih nan beiseina thlawn ka siamsak leh dawn ta anih hi. Ka duh vang erawh ani hauh lo. Violet kha ka nu hian a ngaina ngai hauh lo va, ka bulah engmah a sawi lo nain chiang takin ka hrethiam ve a ni. Guzel erawh a ngainat ngei ka beisei. Ka ngaituahna vanga nui suk chungin ka phone chu khumah ka dah a, ka nu nen hian
thla thum chhung zet chu kan inhmu tawh  miah lo tih ngaihtuah chungin Bathroom ka pan a.
.
Ka inbual zo a, thawmhnaw ka inbel hnu ah ka pindan atanga chhuakin choka ka pan a. Choka a nui ri ka hriat chuan lut mai loin ka ding leh rih.
.
"Vawk ang maiin a mu ngei ngei ang." Vida aw a ni.
"Ka awih thei lo. Mahse a sexy tho a ni lawm ni?"
.
"Oh! Duhtawk teh Sera_" Vida chu za lutuk hian a nui hak hak a. Ka chungchang an sawi chiang. Choka ah chuan ka penlut a, min hmuh rualin an ngawi nghal hmak a.
.
"Good morning Mr.Sloan." Serafina chu enin ka bu zauh a, Vida erawh nuihza insum tih hriat zet hian a hmui a pet fan fan thung. Engtiang chiahin nge ka hriat hma khan min lo sawi ni.
.
"Thil diklo a awm em?" thutak lui chungin Vida chu ka en a, a hmui la pet fan fan chungin a lu a thing a.
.
"Dar 9 a chhuak turin lo inpeih ang che. Kalna tur kan nei. Thawmhnaw hak nuam deuh ha la."
"Oh!" a ti sep a, a nuihza a reh chiang khawp ang chu. Thu dang sawi lovin dawhkan kilin ka thu a, an eitur siam rim chuan ka ril a ti tam rawih rawih thei. Nizan khan engmah mumalin ka ei  miah lo tak e.
.
"Tunah dar 8 a ri tawh a nia. Ka insiam nghal a ngai a nih chu." Serafina chu enin min rawn en leh a, ka hmela engmah tilang lovin ka lo en tawp.
.
"Tukthuan ei phawt rawh." ka tih chuan choka atangin a chhuak fel der tawh. He hmeichhia hi ka hrethiam thei lo.
.
“Kei pawh hian ka la hrethiam thei biklo.” Serafina chu ka en zawk a. Ka lo tawng chhuak  anih hmel hi. “Mahse, sir, hun rei tak hnuah a mitmeng thleng phaka a nuih ve tum anih dawn kha. Chu pawh I chungchang a ni lehnghal._” Serafina chu a nui sak a.
.
“Eitur min pe dawn em?”
“Oh! Sorry.. Ka’n  la ang e.” tih pahin a che ta zung zung a.
.
Tuk thuan ka ei zo a, 20 minutes vel zet a ral leh hnu chuan in chung pawhna step-a Vida lo chhuk chu ka lo nghak a. Hmuh a nuam takzet.
"Kan kalna tur i sawi chiang si lova, a inmil em?" a ti hul hak a. Phurna a nei miah lo tih a

chiang. A inthuam dan chu ka en vang vang a, ka chhang mai lo. Kawr rawng no zet par chhiai chuan a

hmel a tilang nung sar a, Kekawrbul a malte chen vel a ha a, a kekawr hak chuan a mal nalh zet chu

khuhbo vek se ka duh zawk chiang. pheikhawk flat bun nawm hmel zet a bun bawk.
"Min chhang miah lo a nia."
.
"A tha mai. Inthlak lehna hun a awm tawh lo." tih pahin ka kal vut a, ka hnunga pen ri ka hriat

chuan ka nui suk.
.
Car kawngkhar ka hawnsak ah chuan lutin a ngawi leh ngar tawh a, kan awm tlan apiang hian mize dang

zel a nei ni berin ka hria. Hriatthiam sen a ni lo. Khawiah nge ka hruai dawn min zawt lo va, kan

kalna a hlat dawn leh dawn loh pawh min zawt hek lo.
.
"I tha em?" ka tita ngawt.
.
"Tha e." a ti tawi tak a, pawn lam enin ngaihtuah ding hmel zet hian a awm zui daih lehnghal. Kei

pawhin engmah ka sawi zui ta bik lo.
.
Darkar khat dawn kan tlan hnuah ka nu chenna hmun kan thleng a, Car atanga a chhuk chuan hawi kualin

a thaw hliai a.
.
"Tunge kan hmuh dawn?" phawk deuh hra hian min en a, ka ban ah arawn vuan bawk a. Harhchhuak thut

niawm tak hian ka ban a vawnna chu a thlah leh rang khawp mai.
.
"Min vuan la a that zawk ka ring."
.
"Eng vangin?"
.
"Ka nu'n min lo thlir reng tawh ang." ka ti leh ringawt a.
"I nu bulah chuan lemchan a ngai lo ang chu tiraw?" a aw ri atang chuan a mangang deuh anih hmel.
.
"A tul ber zawk." ka tih chuan a phun hlak a. Eng chiah nge a sawi ka hre thei lo.
.
"Ka awih thei lo. I nu bulah chuan lemchanin awmzia a nei lovang. Nute chuan engkim an hrethiam vek

zel tho. A hrechiang che a_"
.
"Ka sawi ang chuan awm mai rawh."
"Ka awih thei thlawt lo che." a theih tawka nain ka banah chuan a hmer a, ka nui suk ringawt.
.
"Kal ang le. I awmdan tur theihnghilh suh."
.
Thawk a lak leh hnu chuan ka nu in chhunga lut turin ka kalpui nghal a. Min hmer ngheh telh telh dan

atang chuan a zam hle ang tih ka ring. Kei pawh ka zam tho mai.
.
Door bell ka hmet a, reiloteah hlim zet hian ka nu'n kawngkhar arawn hawng a. Min kuah vang vang hnu
chuan vida chu a en a, nui sang chung hian  amah kuah turin a duh tih lantir nan a ban pahnih a phar chhuak a. Makti bertu chu kei hi ka ni.
.
"Ka hmu thei che hi ka lawm hle mai. A awlsam lo ang tih ka hria a nia."
"Mom!" ka ti nghat a, ka nu chu a nui hak hak thung. "Mom, Esma anih hi. Guzel, ka nu Vivian_"
.
"Helai hmun thleng thleng lo kal hian ka nu tia min koh loh chuan ka lungawi hauh lovang." ka nu
hmel chu ka en a, ka inthiam lo tan chu a ni der. Ka beisei loh lutuk hian Vida chuan ka kut arawn
vuan a, min hnem tum niawm tak hian a hmer salh a.
.
"Ka lawm e. Ka nu." a ti sep a. Mak tiin ka en tawp. Hetiang a tih duh mai hi ka ring lo hulhual.
.
In chhungah kan inzui lut a, ka nu chu zangkhai tak hian a tawng seh seuh a. Eng thu nge a sawi ka
ngaithla meuh lo. A thusawi apiang chu ngaihnawm ti niawm tak hian Vida chuan a ngaithla a, a chhang
zeuh zeuh bawk.
VIDA – SheKnows
(Vee-Da)
.
By. Thantei_LauraSean
.
CHAPTER - 17
.
MORDECAI SLOAN*
.
Thutkhawmna pindan kan pan a, Guzel chu ka nu bulah thuin keichu awm ve lo ang mai ah min ngai niin ka hre hial. Chuang riaua inhriat hi a lo nuam miah lo. A hranga thu reng duh bik lovin Guzel veilama thutna awl awmah chuan ka insawn a, mak tih hmel deuh hian min en ha a. Ka nu hmuh loh lamah chuan min en dan a dang daih tih ka hai bik lo. Ka nu lam a hawi leh chuan min en laia a hmel ang kha a bo leh vek thung. A awmdan danglam vel han hmuh chu a hlimawm ka ti phian si hi ka in hrethiam lo takzet.
.
"A ngaihsak tha che em?"
.
"Aw, mi tha tak ni lo se chuan ka ngaina miah lovang."
"Mom_" ka lo tih ve chuan lo tawng rih lo turin min duh tih min hriattir nan langsar lo thei ang ber hian a kiuin min nghawk zauh a, nui chhuak lo turin ka insum. Ka tumlawk vang reng  ni hauh lo hian a hnunglam ah ka kut dahin ka kutzungpuiin a hnungzang ruh ka chhui zai zai a. A aw thian kharhin a thu rem a, ka thiltih chu ka tawp duh chuang lo.
.
"Anih chuan, engtin nge ka fapa nen hian in intawn le?" Ka nu hian a vawihatna ah engkim hriat a tum ka beisei hauh lo a nia. Ka rin aiin thil a chik tlat. Guzel chu thu thain min rawn melh zeuh a, aman a duh dan anga kan intawn dan vel han sawi chu a duh chiah lo a ni maithei.

"Mordecai_" chhan mai nachang hre lovin a hmui chu ka en reng a, a hmui hnuailam chu na deuh taka petin min melh kawk mai. Ka awm dan hi a dik lo. "Mordecai_?" a ti leh sap a.
.
"Mom, Eng nge kan ei dawn?" ka ti ta daih.
.
"Eitur sawi a la hun lo. Kan titi tui alawm."
.
"Dik takin kan inhmuh hmasak ber tum chuan a nelawm loh khawp mai. Mahse_"
.
"Keiman ka sawi ang. Mom, kum thum liamta a Brooklyn-a office kan hawn thar tum kha ila hrereng em?" ka nu chu a bu nghauh.
"Khami tum khan Brooklyn a branch hawn thar a tangkaina ka hriat ve loh thu ka sawi nghe nghe kha. I tilui tlat a." tizui siam siamin ngainat hmel tak hian Guzel chu a en a, a kutah a vuan zauh bawk a.
.
"Khami tum kha kan inhmuh hmasak ber chu a ni. Min hrechiang a, engtin nge ka thil duh ka umzui thin i ring thiam tawh mai em?" ka tih chuan chik zet hian ka nu chuan min en a, dawt ka sawi loh vangin ka mitmengah thudik ka sawi tih a hria ang. Thudik sawi ka ni reng bawk.
.
"Ka hria e. Ka lak atanga i zep rei lutuk erawh ka lawm hauh lo ania." a fiamthu tih hriat tak hian a nui zui sang a. Thil nihdan dik tak hi hria se engtin tak min dawngsawng ang maw! Tuna a awm ang hian a awm hauhin ka ring lo.
.
"Ka duhtawk ang e. Eitur ka va ngaihven ang a, hahdam takin lo awm rawh u." ka nu chu a thutna atangin a tho a.
.
"Puih theihna che ka nei em, ka nu?" Guzel chu ka melh tawp. A hmelah chuan ka nu a ko ve mai chu inthiam lohna a nei niin ka hmu a, mahse ka beisei aiin a lang pangngai tho. Chu bakah nungphung hre vaklo anga ka lo  ngai liam mai thin kha ka tisual niin ka hre hial tawh. Ka tan a theihtawp a chhuah nge atan a bei pawh ka hrethiam tawh lo ve.
.
"A ngai lo ve. In duh chuan in hi lo fang kual mai mai zawk rawh u." tih pahin zangkhai tak hian choka lam panin a kal nghal a.
.
Ka nu a kal liam chuan Guzel chu a thaw hak mai.
.
"I nu chu ngainatawm hle mai. Inthiamlo tur ka ni em?" mitmeng mak tak hian min en a, ka chhang mai thei lo. A biangah ka kut hnunglamin ka nul zauh a, ani a lo tawlh hla deuh thung.
.
"A tha vek alawm. A tak takah ngai la, itan a awlsam lehzual ang." ka tiliam puat a. Ka chhan dan chu kei pawh hian ka awih lo zawk.
.
"Engtin nge a tak tak anga ka ngaih theih ang? Nuam ka ti lo tak tak a nia."
.
"It's Okay. Tho rawh, ka nu ngaihthat nan in hi ka fan kual pui ang che." tih pahin ka thutna atangin ka tho a, a vawn turin ka kut ka pe a. Phur hmel fahran loh hian ka kut chu a vuan ve mai a. In hmar lamah kalpui ila a that ka ring.
.
"In hi a la upa lo tih ka hre mai." min bia pawh ni lovin amah a inhrilh ani zawk mah.
.
"A dik alawm. Ka puala sumdawnna ka tan atanga kum 6 hnuah he in hi kan sa chauh a ni." hmarlam kawngka ah ka chhuahpui a, piah deuh awl zau laia ka seilenna in tak tak zawk in upa tawh tak a hmuh chuan thawk a la hliai a. Engmah sawi lo hian in chu a pan a, a hnungah hmanhmawh hauh lo hian ka zui a. Helai hmuna hruai hi eng nge a tulna? Ka ti loh tawp tur ka ti niin ka hria. Chutih rualin ka seilenna hmun hi a hmuh atan ka duh chu a ni reng si. Ka thil  ngaihtuah chu duh lo zetin ka lu ka thing ringawt. Ka ngaihzawng tak pawh ni lo leh ka duh ka tih puitlin theihna tur atan chauha ka hnaih mihring hi engvanga care si nge ka nih? Chunglam chauhin a hrethiam ang! 
.
"He in hi hmuh tawhna ka nei." ngaituah chhuah tum tih hriat tak hian a kut zungtang in a hmui a khawih neuh neuh a, chu chauh pawh chu ka tan hmuhnawm a ni leh ta. Ka hawisawn ta ringawt. "Thlalak ah ka hmu tawh. Nausen ka nih lai ami_ka hrechiang lo. Mr. Sloan__" min rawn en a, ka ngaihtuahna thupin ka lo en let ve bawk a. Ka nu bulah Mordecai ka ni a, tunah Mr.Sloan ka ni leh tawh anih chu. Takzet reuh hian!
.
"Ka hming hmasa in min ko thei ang."
"Maw?"
.
"Midangin an lo hriat chuan i thiltih ah i hlawhchham tihna a ni dawn a."
.
"Tunah te chuan kan pahnih chauhin kan awm tih ka chiang alawm."
.
"Ni lo." ka hnaih a, a kawngah kuahin ka pawt hnai a.
.
"Hey, eng nge a?"
"Shh!" ka tih chuan a meng kal ralh a. Ka nui suk. A tih loh zawng hi a tilang chiang ve thei asin.
.
"Khatiang khan min en tawh miah suh." a ti sar sar a. Tawng rin chu a hlau ve tho.
.
"Engtin nge ka en che?"
"Min nuihzat niawm taka min en kha ka duh lem lo."
.
"Anih chuan heihi i duh em?" tih pahin a hmuiah ka fawp zauh a, a chet hman hmain ka inlahrang leh vat a.
.
"I van zaktheilo tak." ati nain a sen ap ap tih ka hmu thei. A nuam riau. "I duh hun hunah i duhdanin i che a, ka tih ve hun chuan i chaklo ngawt ang." a ti bal bal a.
.
"Ka nghakhlel khawp mai." ka ti nghut.
.
Kan bul deuh lawka thawm lo chhuak chu kan en rual vat a, ka tan chance tha tak ani. Tikha chuan chhan awm lo va amah fawp ringawt angah min ngai tawh lo ang chu. Huan enkawltu Paul, putar kum 60 chuang tawh chuan min rawn pan a, min hmu chu a hlim hmel khawp mai. Ka naupan lai atang tawha ka hriat a ni a, vawiin thleng hian inpawh takin kan la khawsa reng a ni. A nupuiin a kalsan(thihsan) hnu hian a khua a har zual nasa a, ama duhthlanna in kan in bula huan thenkhat hi a enkawl ve a ni, a nun a hlim phah chuan a tha vekah ka ngai mai. Kan inbiak luam hnu chuan, "Nula hmeltha tak anih hi. Hlim reng ang che u." tia nui chungin min kalsan a.
.
"Ka lo hmu miah lo va. Engtin nge kan bulhnaiah a awm tih i hriat theih zawk a?"
.
"Helai ah hi chuan engkim ka hre vek alawm." ka tiliam mai a, a awih loh hmel nasa.
.
Ka nu'n min rawn koh hnu chuan choka lam panin kan let leh ta rih a.
.
Lunch kan ei a, ka nu leh Guzel chu an titi siam siam reng a, ka chuang leh ta. A naupan lai chanchin te chu tawi fel takin a sawi ve seuh seuh a, ka nu tan ka pa thattu fanu(?) a ni tih a hriat miah loh! Ni e, Mr.Cappolo khan a kut ngeiin ka pa kha that lo mahse ka pa nunna tawp chhan erawh amah ngei kha a ni tlat. Ka thil ngaihtuah chhuah chuan ka chhungrila huatna awm chu a kaitho chiang teh e.
.
"Kan let leh a hun tawh viau mai. Mom, ka lo kal leh thuai ang."
.
"Esma nen anih ka beisei." min ngai takin ka nu chuan min kuah vang vang a, Vida a kuah leh hnu chuan in atangin kan chhuak ta a.
.
"Ni nuam tak min hmanpui avangin ka lawm e." car seat-ah a thu rem sauh sauh a, a awm a nawm hmel khawp mai. Kei erawh ka chhungrila thinrimna in min hneh mek a ni. "Um, i tha em?" a ti leh sap a, a nui hmel a reh riai riai bawk.
.
"Ka tha."
"Oh!" ti sapin a thu tha a, a thutna seat ngheng chuan a maimitchhing ta daih a.
Thui deuh tak kan tlan hnuah phone call ka dawn chu ka chhan  ngei a tul vangin kawngsirah motor ka tiding a, ka thu dawn vang chuan ka rilru a nui sak. Ka duh pakhat chu ka nei dawn hnai tih a chiang ta. Uluk taka ruahmanna siam ka ni bawk a thil nih dan tur a ni reng a ni.
.
“Deal chu khar ani e. Tunah chuan Cappolo Corporation-ah hian 10% share i nei ta. Ka lawmpui che.”
.
“I thawk tha e. Kan inhmu thuai dawn nia.”
Phone ka off a, car chu tinung lehin ka tlanchhuak lehnghal a. Vida chu a muhil niin ka hria, a che miah lo.  Kawngkhar glass chu a tihphui loh vangin thli thawin a sam chhawl leng chu a chhem a, a hmai a zar deuh tih ka hmuh chuan ka tum hauh loh ka ti leh ta. Ka kut veilam phar chhuakin a sam chu ka hui kiang a, “Guzel” tiin ka phun sup a.
.
.
VIDA ELVES CAPPOLO*
.
Khaw awmdan sawilawk dik theih loh ang chiah a ni leh ta! Anu bulah fapa fel ber angin a awm a, kan pahnih chauha kan awm veleh mitkap kar lekin a danglam lehnghal a. Sakei ang mai anih leh tawh hi.
Mood fuh lo lutuk na na na chu biak tum buai peih bik lovin ka muhil der ta ngawt a, ka hriat loh karin ka lo muhil tak tak daih lehnghal.
Ka hmai rawn khawihtu awm vang chuan ka harh zawk a, meng chhuak lovin ka awm ngaiin ka awm reng thung a. Ka hmai rawn khawih zauhtu chu Mordecai a ni tih ka hria. "Guzel" tiin a phun sup a. He hming hi engvanga min vuah tlat nge anih ka hre lo. Esma tia min ko ve mai lo hi mak ka ti deuh tawh. Dik tak chuan Turkish hming ka hmang ve bawk a, an tawng awmzia hriat ka nei meuh lo. Ka seilenna min zawt an awm emaw tawng ka thiam miah loh chhan min zawt an awm palh ta hlauh emaw anih pawhin 'hnar hnuaiah phatna a bo hleinem' tih hi ka vawng ve tlat. Vawiin pawh khan Mordecai nu khan ka seilen dan min zawt chik viau a, mahse khatiang ah kha chuan buaina tur ka nei lo. Pangngai takin ka seilen dan ka sawi mai a, dawt sawi kual vak a ngai lo kha ka lawm viau zawk. Engtikah emaw chuan dawt sawi a tul hun a thleng ngei ang tih ka ring a, chutiang hun atan chuan han inbuatsaih lawk vak dan ka hre der lo. Mi tha tak, sawiselna tur awm lo ka ni bik lo  nain dawt hlang hlak sawitur hi chuan huaisen tawk har ka ti. Heihi Jefferson laka hnehna chang tur pawha ka harsatna lian ber tur a ni. Ni leh lo! Jefferson lakah a nih chuan a dan a dang. Min lainatna nei miah lo a min dahthat duhtu lakah chuan engpawh ka sawi ang, thil sual ti ah pawh ka inngai dawn eih lo.
.
Car a ding a, muhil harh chiah anga lang turin muangchang hian ka meng chhuak a. Mordecai ka en chuan min lo en reng tawh. Ka hawisawn rang khawp mai. Darkar tam pawh ral lovah mood fuh lo tawkin min awm khum a, tunah lem a fuh leh hmel tawh viau si hi.
.
Amah chu ngaiven duh lovin ka thutna lam kawngkhar chu ka hawng a, ka chhuk thuai a. Biak pawh ka tum buai peih lo. A awm ang chiah khan ka awm ve thiam tihte hi hre ve hrim hrim rawh se.
In chhung panin ka kal a, ka hnunga a lo ka lehkal loh ka ngaihven hran lo. Ka ngaihven lo tak tak!
.
Ka pindan ka pan ding nghal a, khawlum deuh vang nge ka ni deuh nghulh mai hian ka inhria. Ka pindan ka luh rualin ka thawmhnaw ka phelh sawk sawk a, bathroom-ah lutin tui vawtin ka inphuh seng seng a.
.
Ka inbual zawh hnuah inthlak felin in hnuai lamah ka chhuk a, Mordecai thawm ka hre miah lo.
Lunch kan ei laia Mordecai mood fuh lo thut vang khan engmah tham ka ei lo va ka ril a tam khawp mai. Fridge hawngin eitur ka dap a, ka duh ka hmuh chuan tilumin plate-ah ka dah chhuak a.
.
"Zanriah ei turin kan chhuak dawn a nia."
Ka hnungah min hnaih mah mahin Mordecai chu a ding a, ka chetna dalin a ding tih ka mitmeiin ka hrilh a, hrethiam angin a awm duh thak lo.
.
"Ka tel lovin i kal mai thei angem?" a awm dan ka ngaithei vak lo tih thupin ka tawng dam thlap a. Min melh dan leh a awm dan ngeng lutuk vang chuan chum chawrh ka chak em em thung.
.
"NO!"
"Riltam chung chuan khawiah mah ka zui dawn lo che."
.
"Lunch kha i ei ngei sia." a ti leh ringawt a. A rilru puthmang hriat theih turin a awm leh tawh lo.
Chhang lovin ka kalsawn a, a dinna in a zir loh vangin a taksa ka dek lo thei ta lo. Ka kal pelh hmain hneh zet hian ka dulah min kuah a, ka te that a.
"Eng nge i hriat a?"
.
"30 minutes hnuah inpeih ang che. Ka hlawhtlinna kan lawm ang chu."
.
"Ka ngaihven lo tih i hriatthiam ka beisei."
.
"Nah! I ngaihven tih ka chiang. I hmangaih em em i pasal hlui pawh a awm dawn tih hrilh che ila i phur deuh angem?" a tawngkam ngeiawm lutuk chu ka paidam thei lo. Rem vaklo chunga ka lu herin na zet hian ka melh a, a ner suk duh chauh. A mitmeng chu sawifiah thiam chi pawh a ni hrep lo.
.
"I va sawi ngam zawk ve! Min thlah rawh." ka duh vang reng ni hauh lovin ka aw a khur deuh lehnghal. Ka rilru natna chu ka thup hman lo a ni ber. Ni e, Jefferson hi ka hmangaih takzet thin anih kha. Ka hmangaihna nasa tak paihthlaa rap hrualtu_Ka nun dan zawng zawng thlaka ka hmuh ngai loh hmel ka put a tul nachhan_ Ni lo, Mordecai hian hetiang thu hi engtin nge ka bulah min hnehsawh nan a sawi rik theih zawk? Ka vanduaina hi min nuihzat nana hmang turin thuneihna a nei lo. A nei lo hulhual.
Ka theih tawpa nain Mordecai ban ah chuan ka tham vak a, a rum deuh hraih. A na tawk ve bawk turah ka ngai.
.
"Min dek suh." ka ti hraih a. Ka hnukulh ringawt vang chuan ka thinrim zual sauh. Ka thil ei chakna zawng zawng a bo vek bawk.
.
Min kuahna a thlah rualin hmanhmawh zet hian choka atang chuan ka kal chhuak a, ka mittui a tlak zui avangin ka hawilet ngam tawh lo hrim hrim. Ka mittui tla lo pawh ni se ka hawilet chuang lovang. Min koh zuina chu hrelo anga awmin in chung panna step-ah ka tlan chho zawi zawi a.
.
Mordecai min beisei ang ngeiin zanin hian ka zui chhuak ang. Ka duh dan ngeiin ka che bawk ang. Min nuihzat reng nge nuihzat reng lo kan hria ang chu.
.
Thinrim tawt up upin ka insiam a, thawmhnaw dum thehlep ru zet chu ka ha sawk sawk a. A dar bahna sinte te inkawkalh neuh neuh nalh ka tih em vanga lei ka nih tak kha mawle. Taksa a lang tamin a sexy mah mah a, ka hak tak tak pawh ring chuang lovin ka lei ve ringawt anih kha.
.
Uluk zetin ka hmai ka chei a, ka inpeih meuh chuan ka tinrimna chanve chu a reh tawh. Ka tih tum erawh ka chiang tawh hle thung.
.
Ka pindan atangin ka chhuak a, 10 minutes liam ta khan Mordecai hun tiam a ral tawh tih hre chungin ka muang lui ve ngat bawk. Step-ah muang changin ka chhuk a, ka pheikhawk sang zet bun chu chak taka tlanpui tura siam a ni lo tih ka hre ve kar.
.
Ka kal chhuk min hmuh chuan a thutna atangin Mordecai chu a lo tho vat a, a hmel ka en duh lo. Min rawn pan a, ka vawn tura a ban arawn dawh chu hmu duh lovin ka kal pel a. A phun hluk.
.
"Tsk__" a chek tluk pawh chu ka hre duh chuang lo.
.
Boni'n car kawngkhar min hawnsak ah chuan lutin lawm thu ka hrilh sap a, a chhan pawh ka hriat loh hian Mordecai chu a melh zoh zoh a. Awm nuam chiah lo hmel a pu. Ka thu rem hman meuh lo, Mordecai chu ka bulah arawn thu lut a, ngaihven duh chuang lovin Boni chu a that leh that loh ka zawt vel a. A awm a nawm loh hmel telh telh.
.
Mordecai chuan kan thutna leh driver seat pindanna glass chu a tiphui hmak a, Boni chu ka lainat reuh khawp mai. Ngawireng in kan mood fuh lo a tuar ta anih ber.
.
"Kan thlen hmain i kawr hi thlak ang che." mit tizim deuhin min en a, hawi sanin dak deuh vahin ka thu lui a. Chhan ka tum buai hek lo. "Ka sawi chu i hria em?" a ti chhum hmuk a, ka inchei danah thu a neihna chhan tur ka hre lo reng reng.
.
Ka ngaih pawimawh loh zia tihlan nan tul lo zet hian ka kut ka khawih nauh nauh a, ka taksa lang lai a en tih ka hriatna chuan ka awm a tinuam lem lo khawp mai. Tihlan erawh ka tum lo nasa.
.
"I thlak anih loh chuan ka kawr hi ha ang che." a kawrchung hak phelh a tum tih ka hmuh chuan ka nui lui hak a.
.
"Huh_ Tum buai lo zawk mai rawh." ka ti nghat. Ka bag atanga ka phone phawrhin ka khawihsan ta daih a. Ka ha dawn chuang lo tih hria niawm tak hian a kawrchung hak chu a phelh ta bik lo. Min en tlat tih ka hriatna chuan ka hmulthi a tiding sang sang thei anih chu. Rapthlak hian a! Ka thawmhnaw hak vang hian ka inchhir loh ka beisei. Teuh lo! Ka inchhir dawn reng reng lo.
.
Kan ngawi reng a, car a din chuan kan tum hmun kan thleng ta tih ka hrethiam.
.
"Lo la che suh." ti nghutin car atang chuan a chhuak a, eng  thil  nge ka hmachhawn dawn ka hriatchian lawk loh vangin a thu hnial a lo chhuah thawt thawt chu thil finthlak tak a ni dawn lo tih ka hriat vangin kawngkhar min hawnsak hun ka nghak a. Car kawngkhar min hawnsak a, a kut vuanin ka pen chhuak a. Ka beisei loh tawp thil ka hmachhawn dawn tih ka hrechiang ta hle.
.
Boruak a vawt deuh suk a, car atanga enlawk nachang ka hriat loh thil chu security tam lutuk chu a ni. Kan kalna tur in chu ka rin loh lamah a kawngka a awm a, in chhung kan luh rualin camera a de nghal chuai chuai a. Phun mur mur thawm nasa lutuk chu thil pangngai reng a ni lo tih hre turin hetiang hun hi ka lo hmachhawn fo tawh thin.
Mordecai chuan nghet zet hian ka darah min vuan a, kan thla lak loh hlaua innek ho chuan min rawn dek ang tih hlau niawm fahran hian min veng run a. A phun bul bul nain thawm tam lutuk vang chuan eng nge a sawi ka hre thei lo.
.
Thlalatute kan kal pelh rualin ka thaw huai mai. Ka hawi chhuak a, ka mihring hmuh zawng zawng mit chu ka chungah a fu vek niin ka hria. Mordecai chuan min vawnna a thlah a, eng thil nge atih ka hriat hmain a kawrchung hak chu min haktir mial mial a. Mi zawng zawng hmuh laia a tihduh ka ring hauh lo kha a nia. Ka ring sual leh ta.
Kawrchung min haktir zawh rualin ka biang tawn tawnah min dawm a, a mit thim raih a min en reng chung chuan rawn kun hniamin hmanhmawhna nei miah lo hian ka hmuiah min fawp a. Ka hamhaih vek! Thawm ri mur mur a reh duk tih ka hriat chuan thil thleng tur a thleng zo vek tawh.
.
Mordecai Sloan!
.
Min vawnna chu thlah chuang lovin a inla hrang hlek a, hriatthiam har lutuk hian min en ta reng a. Keipawhin ka en ve reng. Eng thil dang nge ka en chuan ang?  A mitmeng thuk raihah chuan ka pil riai riai niin ka inhria. Hei aia thil hlauhawm hi a awm thei dawn em ni?!
VIDA – SheKnows
(Vee-Da)
.
By. Thantei_LauraSean
.
CHAPTER - 18
.
Mitmeng la danglam chuang miah lo hian min hnaih tha lehin ka chalah min fawp vang vang a, ka lo maimitchhing tawp. Ka chhungrila ka hriatthiam phak hauh loh hian ka awm a nuam veng vengin him riau niin ka inhria anih chu_ Ka hrethiam pha ta hauh lo mai.
.
Mordecai chu a inla hrang leh hlek a, "I awm a nuam deuh tawh em?" awki hniam taka a tih chuan ka meng chhuak ta chauh. Sawitur ka hre miah lo. Ka bu nghat ringawt a.
.
"A tha e. Helai kan chhuahsan hma chuan kawr hi ka lalet lovang." ka sirah a ding a, a he deuh zawnga min melh rulh chu ka hmu hman reng. A nui deuh suk bawk. Mi heti zozai hi awm lo se hetianga min ngaihsak vel hian a awm miah lo vang tih ka hria. A tha vek e. A thiltih hi ka zui ve mai loh chuan! Mi zawng zawng  hriatah inngaizawng, inhmangaih tak anga lan a duh maw kha? Mordecai Sloan min lo thlir rawh!
.
A ban ka vawn tura arawn dah chu vuan thuaiin ka zui a, amah biak chak hlir kal khawm an ni mai hian ka lo hria. Tupawh mai chu a lakah an tha em em vek a, a zarah keipawhin lawm ka hlawh viau anih hi. Tunang dinhmun tha ah hian awm lo tase helai hmuna mihring tam zawk hian an ngaihven awm hauh si lova. Mihring nihphung ve reng hi a chang chuan pawm thiam a har thin.
.
"Khawimaw min lo en teh?" tih paha ka nek deuh chuan makti hmel pu hian min en chhuk vat a. A hmel tha zet chu enin ka nuih sak. Eng nge ka tih dawn ngaihtuah buai kual lovin a hmui hnuailam chu ka khawih/tuai a. A ngaihna hrelo hmel deuha a awm chu a tha lutuk mah mah a ni.
.
"I hmuiah khan ka lipstick rawng a kai a."
"Hmm_" a mithmul tiche zauha nui suk chung hian a hmui chu a tuai nawn a, mak zet hian min melh zui rulh bawk a. Engmah a sawi ta lo.
.
.
Darkar khat zet a liam hnu chuan ka ke a na ut ut tawh. Thutna tur remchang ka melh zauh zauh chu hrethiamin min kalsawn pui ta thuai a.
.
"Ka lawm e. Ka ke hian min zo tawh lo anih hi.." ka thut fel hnuah ka ke chu ka tuai nauh nauh a. Hetiang anih vang hian alawm pheikhawk sang lutuk ka ngainat ngai  miah loh.
.
"I lang nalh lutuk tih ka la hrilh lo chein ka hria." ka bulah hahdam hmel tak hian a thu a, ka beisei miah loh tawngkam anih bakah a lak atang hian fakna tawngkam ka dawn ka rin ngai loh vangin ka lai deuh tlat anih chu.
.
"Mi fak i thiam hle mai." ka ti ringawt a. Ka ke ka ensan daih. Ka awih thei lo zawk, ka lai chhe vek a nih ber hi. "Mi dang hriatlai anih loh chuan khatia tih kher kha a tul chuang hleinem. Ka phut hran lo tih i hriat kha_" ka tizui nang nang a. Lo  ngawi mai  mai zawk ta ila tha tur.
.
"Takzet?" min rawn hnaih nghal ruakin ka hmai si deuhthaw hian a thu a. Zanin a awm dan hi ka ngaih a tha lo tawh zawk hial.
.
"Hi, Miss Celik. Helai hmuna hmuh che hi ka beisei hauh lo a." ka phu deuh zawk. Ka hawi chhuak a, hmel insehruh deuh, nui lui hmelpu si a Jefferson lo ding chu enin ka thutna atang chuan ka tho hluai mai. Mordecai erawh a phun hluk thung.
.
"Hi, kan inhmu khat hle mai." min chibai tuma  a kut arawn pharchhuah chu ka lo vuan thuai a, a insehruh deuh tlat chu a eng nge ka chhan ni ang tih ka ngaihtuah daih.
.
"Jeff Honey_Oh_Mr.Sloan.." tho thang tha zet hian Kiara chu Jeff bulah arawn ding a, Mordecai lak atang chuan a mit a lasawn lo tih ka lo notice nghal hmiah. Mordecai chunga a mit a fuk chat vang nge min hmu awm pawhin zu awm miah lova.
.
Mordecai a thut dan ngaia la thu reng chu ka melh a, min lo en ve reng bawk. Kiara pawh chuan min en ve ta chiah. Min chik hmel fe hian a mit tizimin a nui lui sang a, min melh kual zak zak hlawm. Hriatchak nei hmel a pu tih a hai theih loh reng reng.
.
"Kan inhmu tawh ngai em?" Kiara chuan min en a, ka kut chu Jefferson chuan a la vuan reng tih ka lo ngaihtuah tel tawh lo. Ka kut lasawna nui chungin
"Khawiah emaw chuan kan inhmu tawh mai thei." ka tifiah kalh a.
.
"Oh_ Jeff_" ti halhin ngaihsak phut zet hian Jefferson chu a ban ah a kuah a, hriat tham loh hian a beng bulah a phun zui sar sar mai. An chezia chu ka lo en tawp.
.
"Kiara, Esma Celik a nih hi." Jefferson hmel chu a thutak khar a, hetiang hmel a put tawh chuan a  ngaihdan pel thil a awm tihna a ni. Kiara nungchang hi a ngaithei lo a ni ngei ang.
.
Mordecai bulah ka thu thla leh a, kan thutna bul awl laiah chuan Kiara leh Jefferson chu an thu ve ta bawk a. In tur keng an lo kal a, an pahnih chuan an lo ban vat.
.
"Um, Esma Celik_ka hriat ve atulna a awm ka ring chiah lo?" a tih hlak chuan ka insum hman lo ka nui sak a. A duh aia nasa in min la buaipui dawn tih inhria se hetiang hian a awm dawn hauh si lova.
.
Mordecai chu che hrutin ka kut a vuan a, a hmui bulah la kangin a fawp vang vang a. Jefferson mit chuan Mordecai chet dan apiang chu a enzui zel tih kan hai lo theuhin ka hria.
.
"Mr.Sloan, Esma hi i farnu ang mai niin ka lo hria a." Jefferson chu ka melh zawk nain ka hmelah engmah ka tilang lo. Mordecai insangmar deuh chu ka en a,
.
"A ni maw?" ti hlukin chiang lutuk hian min en ngur mai. A hma khan Jefferson bulah hian ka lo tawng chhuak tawh tak alawm. A hre rei tehhrep hle mai. Engtin nge ka sawimam tak ang?
.
"Ka thian i nih bakah ka unaupa ang mai i nih thu Jefferson bulah hian ka sawi alawm. Hero!" nek deuhin ka nuih a, Mordecai awm dan chu a danglam eih lo. Jefferson chu a en ta thung a. Hmela chuh! Engvanga Hero tia ko duat vel nge maw ka nih le?
.
"A dik alawm. Chuan, kan pahnih chauha awm hi kan thlahlel viau." Mordecai chuan a ti hmuk a. Jefferson chu a meng de zawk zawk tawh. Hetiang khawpa inthup hlei thei lo mihring a ni tih hi kan inneih chhung zawng khan ka hre ngai hauh lo a, tun hnuah hian a lo danglam nasa ta hle em ni?
.
"A that chu. Keini duh dan pawh a ni ve chiah." Kiara chuan Jefferson awm dan danglam chu a notice tih ka hria a, zanin atan chuan a tawk rih viau. Min kalsan ang chiah khan Jefferson hian engtik niah emaw chuan a la kalsan ve ngei ang.
.
Ka thutna atangin ka tho a, ka kawnga Mordecai min rawn kuahna chu Jefferson chuan a melh chat tih ka hria.
Dak deuhin Mordecai chu ka en a, ka tumlawk ang ni lovin a duh danin a che leh hmiah bawk. Rang tak hian ka hmuiah  min fawp zauh a.
.
"Mr.DeLourde kan inhmuh leh thuai ka beisei." ti supin min kalsawn pui a, a thusawi awmzia chu  ka hrethiam pha lo. Mi thenkhat kan mangtha hnuah party na hmun atang chuan kan kal chhuak a, pawn lamah Boni'n min lo nghak reng tawh.
.
"I ti mah mah lo maw?"
.
"Eng chu?" a ipte atanga a phone phawrhin ka bulah arawn thu lut a, tunah chuan min ngaihsak angin a awm leh tawh lo. Heihi chu thil nih dan tur ve reng a ni. A ruk tak chuan ka lawm lo anih chu! Rapthak hian! "Boni, kal chhuak rawh le." a ti zui hmiah a. Hawi chhuak tawh miah lovin a phone chu a bih zui ngar ngar bawk.
.
Ka tawng duh ta biklo. Pawn lam hawiin ka thu a, ka ngaihtuahna a kal ding khawp mai. Hetianga kan awm reng chuan kei hian awmze nei lovin ka ngaina dawn tlat. Ka ngaina anih chuan a lakah thikthu ka nei  ngei bawk ang. Chu thil chu thleng turin ka duh lo.
.
Dawr lian tak pakhat kan tlan pelh lai chuan hmeichhe pakhat naupang kai ka hmu a, ka thu ngil nghal zawt. Helai hmunah hian eng thil nge an tih ang? Hun engemaw chen chu a chungchang pawh ka ngaihtuah tawh meuh lo a nia. Inthiamlohna nasa takin ka khat nghal vek
.
"Ding teh. Boni."
.
Mordecai chuan "Ding suh." a lo ti hmuk thung. Amah chu ka en a, a hawichhuak chuang  miah lo. Thil pawimawh ber ang mai hian a phone chu a la en reng bawk.
.
"Ka sawi chu i hria em? Boni, ding rawh."
.
"Ding suh."
.
"A din loh pawhin ka chhuk tho ang."
.
"I duh chuan i tithei."
Eng thil nge a hriat a? Ka lakah hian thinrimna tur engmah a nei lo.
.
"Ka ti ang!" ka inveng hman lo. Ka thutna lam kawngka lock-na chu ka hawng a, motor tlan chung chuan chhuk ka tumlui tih a hmuh rualin phun hluk chung leh rang lutuk hian ka kawngah min rawn kuah nawk a.
.
"I a mi?" a hmel chu mak khawpin a danglam. Ka chhang lo. Boni pawh chu sawinawn ngai lovin  kawngsir ah a ding nghal a, a din rualin Mordecai min kuahna chu ka phelh  nawk a, kan tlan pelh tawh dawr lam panin ka tlan let nghal. Min lo zui em tih ka ngaihtuah lo.
.
Dawr lian tak chu ka thleng a, ahmaa ka hmuh hmeichhia kha hmuh leh tumin ka hawi kual a. A awm tawh lo. Khawiah nge an awm tak? Hun harsa tak ka tawn laia ka hmuh hnuhnun ber hnu khan an awmna an sawn tih ka hria a, keimah ka inbuaipui a tul vangin vawikhat chauh pawh hmuh leh tumin ka bei ta lo anih kha. Eng ang mihring nge ka nih le? Amah leh a pasal khan an theihtawpin min tanpui an tum a, ka tan chuan engpawh tih an huam a nih kha. A thian ni tlak pawh ka ni lo. A bulah engtin nge ka sawi ang? Atan chuan a vawihnih nan mitthi ka ni. Ka nu leh pa chunga thil thleng an hriat ngei ka ring a, ka chanchin pawh a ngaihven ngei ang tih ka chiang.
.
"Maddie, khawiah nge i awm?"
.
Ka inven hmain ka mittui a tla zawih a. Chhuat ka en chuan kelawngin ka awm tih ka inhre chiah. Ka hawichhuak a, min hmu apiang chuan min en hrek hrek bawk. Thil awm lo pawh a ni hran lo. Tun ang zanah hmeichhia pheikhawk pawh bun lo, thawmhnaw thlehlep angreng tak inbel chunga vak vel chu maktih awm reng pawh a ni.
.
Ka darah puana min lo khuhtu chu ka en a, min khuhna chu puan a ni lo. Kawrchung bawk! Mordecai chu ka en a, ani chuan dawn awm miah lo hian min kuahbet thlawp a.
.
"A awm tawh lo!" tiin ka phun sep a, ka tap zui ta hlawp hlawp a.
.
"Shh! Engkim a tha leh  vek ang." ka hnungah min chul a, a chhan pawh ka hriat  hauh loh hian ka tah a chhuak zual em em ringawt lehnghal.
Eng thil nge ka tih mek tih ka hriatchhuah chuan anih tur ang a ni vek tawh. Ka chaklohna hmu lo tura ka duh ber mihring awm ngheng chungin ka tap mek anih hi. 'Vida_mi tlaw tak chu i lo ni e!'
.
VIDA – SheKnows
(Vee-Da)
.
By. Thantei_LauraSean
.
CHAPTER - 19
.
MORDECAI SLOAN*
.
He hmeichhe mak tak hi ka hrethiam thei lo! Motor tlan lai reng a chhuk a tum luih ngam ka ring lo reng reng. Chhuk luih tuma car kawngkhar a hawnluih chiah khan sawifiah theih loh khawpin ka hlauthawng a, khatiang khawpa nasa khan ka la hlauthawng ngai pawhin ka inhre lo. Dik tak chuan Jefferson laka a hawihhawm vang khan a chungah ka thin a ur a, awmze neilo a ni tih ka hrereng chungin ka thin a ur tho. Phiangsen hian! A unaupa ang maiin min ngai tih a lo sawi tih ka hriat khan ka lungawilo hle bawk. Tih dan dang ka hriat loh vangin ka phone ka en lui ngar ngar zawk a ni. Tawngkama tihlan ka tum therte lo. Mordecai Sloan hian hmeichhe lakah thikthu a nei ngai lo va, a nei ngai bawk hek lovang! Thukthu maw? A hnai lo mai!
.
Car din rualin a chhuk a, ka zui lo thei chuang der lo va. Eng thil nge a hriat tehhrep ni. Phun hluk chungin a tlanna lam ah ka kal a, dawr chhung a thlen chuan zawn nei niawm tak hian a hawi kual ruai ruai a. A bawp nalh zet chuan amah hmutu mipa tawh phawt mit a la tih ka hria. Ka kawrchung phelhin ka pan hnai a, a dar ruak kang chu ka khuh a. Ka zui tih hrelo niawm tak hian inherin min en a, a mitmeng ka hmuh chuan ka tek sawk! Lungngai taka a awm hi ka lo hmu thei hauh lo. Ka a tawh anih hi. Ka inngaihtuah fim hmain nghet zet hian ka kuah bet nghal thlawp a.
.
Phun sepin eng emaw a sawi a, eng thu nge a sawi chiah ka hre lo nain engkim a tha leh vek ang ka ti ta ngawt. A taksa khurh der der dan atang chuan a tap tih ka hre bawk. Ka kuahna atang chuan chhuah tumin a che a, ka awm ngheng a tap nih chu a thil duh loh ber ni ang mai hian a mit hnawng chap chuan min en a, ka ngaihtuahna zawng zawng a chawl duk nimai hian ka hria. Ka chunga thil thleng mek hi eng thil chiah nge anih ka hre phiangsen lo!
.
"Ka tihpalh. Kal tawh ang. Ka tha." a ti zung zung a, a aw khur dar dar atang chuan a thalo tih a chiang em em. Takzet hian! Ka lakah chaklo tak anga lan a duh lo nia ka hriatna chuan ka chhungril ah min hnawh up up hial nia!
.
Pawn lam pan tumin a kal a, chak zet hian a hnungah ka kal ve nghal a. A awmdan chuan ka awm a tinuam lo takzet. Eng thil nge a zawn pawh min hrilh miah lo. Dik taka sawi chuan Vida Cappolo hian ka lakah a ngaihtuahna leh amah tina a ti hreawmtu, eng thil pawh nise, engmah a sawi ngai lo. A awmzia chu a rilru takin min pawh lo tihna a ni. Jefferson mi tenawm khan a kutah a vuan lehnghal anih kha!! Ka ngaihtuah zawng ringawt pawh hian engemaw hnek chawrh tur ka mamawh nghal.. Keimah ka nih loh chuan tu mipa mahin ka hmeichhia hi an dek tur a ni lo. Ka hmeichhia chauh a ni tur a ni! Ka Guzel! Ka thil ngaihtuah vang chuan ka nui suk. Chhungrilah hian danglam a awm ta tlat anih hi mawle!
.
Guzel chu ke lawngin a kal a, tlemin a kun deuh bawk. A mi zawn chu tupawh nise a ngaih hlut tak leh atana mi tha tak a ni  ngei ang tih ka ring. Kei hian tunge anih ka hrechhuak ngei tur a ni.
A bul ka thlen chuan engmah sawi set set lova pawmkang nawlhin pawn lam ka panpui nghal a. Min lo hmutute thawm chhuah chu engahmah ka ngai therte lo. A taksa chauh vang nge ka rin loh takin Guzel chuan min hnial lo ve teh mial.
.
Dawr atanga kan chhuah fel hnu chuan, "Min chhuktir rawh." a tita sap. Tum dang nen a inang tlat lo. Thinur emaw duhlo tak hmel emaw a pu hauh lo va, a hmel landan chu a tak ngal thung. Tilui lovin ka chhuktir a, tawng tawh miah lovin car awmna kan pan a, Car-ah chuan thu lutin Boni chu tlan chhuak turin ka hrilh nghal a. Kan pahnih inkar boruak chu tawngkaa sawi thiam chi ni si lo hian a danglam ta tlat.
.
In kan thleng a, kan inbe leh ta rih miah lo. Ka awm thiam ta meuh lo lehnghal. Hetianga ka awm hi ka awih thei hlawl lo bawk. Car atanga chhukin a thutna lam kawngkhar hawn tumin ka kal a, a lo chhuk fel hman vek tawh.
.
"Min ngaihsak angin lang buai duh suh. I khawngaihna ka mamawh lo a nia." a ti tham chal a. A tawngkam hman duh dan chuan min khei zar mai. Chhang lo leh a awm dan chu engahmah ngai lo angin ka kalsan nghal hmak a. Takzet reuh hian! Ka ngaihven hauh hleinem.. Phiangsen a! Ka ngaihven lo hulhual ang!
.
Vung zet hian in chhungah lutin ka pindan ka pan a, ka thinur tlat chu tihreh tumin bathroom-ah ka lut a tui vawt zetin ka inphuh nghal chiam a. He in hi ka ta ni mah se ka chen tam rih loh a tha zawk dawn tlat. Loh theih loh thil anih loh chuan Vida pawh hi ka hmu tawh rih lovang. Ni hnih/thum ral se ka awm dan pawh a dik veleh maiin ka ring.
Ka inbual zo a, rilru la thawveng chuang hauh lo hian inthlak zung zungin car chahbi ka la a, engemaw chen he in a kal tawh rih lo turin ka kal chhuak nghal a.
.
.
Ni hnih chhung chu ka buai takmeuh meuh. Ka hna tul mai bakah buaipui tur ka zawng a ni deuh ber. Hunawl nei ngai miah lo khan ka nuna Vida Cappolo a lan hnu hian a bula hun hmang turin hunawl ka nei thei ta viau kha a nia. Tunah chuan ama duh ang ngeiin a danglam tawh  ang. Min mamawhna a nei anih pawhin ka duh hun teah lo chuan ka hmu tawh dawn reng reng lo. Chutih rualin eng thil nge a tih  tih leh a dinhmun a him em tih erawh ka hriat a tul thung. Amah venghim tur hian ka intiam tawh tlat a ni. Ka duh hunah ka duh angin ka hmang tangkai zel bawk ang.
.
Chhiar hauh lo a 15 minutes vel zet ka en tawh ka file chu dawhkanah thehthla in ka tho chhuak hluai a. Intihharh deuh ka mamawh niin ka hria. Thian tlemte ka neih zinga ka ngainat ber Max biain inhmuh ka duh thu ka hrilh hnu chuan office ka chhuahsan a. Zanin chauh chu ngaihtuahna chawlhtir a ngai anih hi. Ka car tinung in Fiorenza Club, kum 10 dawn Max-a'n lo enkawl tawh lam chu chak zetin ka pan a.
.
Fiorenza Club ka thlen chuan Max pawh a lo awm tawh a, a bula hmeichhe awm chu ka la hmuh ngai loh hmeichhia a ni tih ka hre mai. Ka thiana pawh hian thil tam tak tlakchham ngai loh tur a nei a, chumi zinga pakhat chu 'hmeichhia' a ni.
.
"Hey, man! I tha meuh maw?"
Kan inkuah thawk a, nui suk chungin a thutna bulah chuan ka thu thla hnawk a. Thla hnih aia tam mah kan inhmu tawh lo tak e.
.
"Ka tha alawm. Scotch_" intur ka lam nghal zat.
.
"Whoa! Muangchangin. I that hmel lem loh si ve." Max chu a nui suk suk a, a bula thu  hmeichhia chuan a kuah tak hiam hiam a.
.
Ka intur lamin ka bul a lo thlen ruala thli chhuakin ka tlak nghal pawp a, ka pum a sa thla vang vang mai.
.
"I tha meuh maw?" Max chu ka en a, a hmel a thutak ta. Ka awm dan a dik chiah lo tih hriat theih tura ka awm leh ka inthunun hleithei lo chu ka inhaw tuk mai.
.
"Tha meuh lo chu anih hi." ka ti nghat a.
.
"Eng chungchang tak nimaw? Tori, ka thiana nen hian kan han inbe lawk ang e." hnehsawh zet hian a bula hmeichhia chu a fawp nawk a, thle sawn pahin Tori tia a koh chu kalsawn turin a duh tih a lantir chiang khawp mai. Ka thiana hi chu a danglam mai dawn biklo tawp.
.
"Eng chungchang nge?" ka lamah rawn thle hnaiin a tawng zawi ta viau a. Hetiang anih tawh chuan a tu ve ve pawn thudik chauh kan sawi tawh thin. "Sumdawnna chungchang chu a ni lo phawt ang a?"
.
"Nia_tihtur ka ngah khawp mai. Hmeichhe buaipui harsa zet hi engtin nge ka tih dawn?"
.
"Eng hmeichhia nge? Hmeichhe buaipui har chu_?" awih lo hmel fe hian a ner suk a.
.
"Ka hrethiam biklo. I lakah thurawn lak tur a awm dawn hauh lo tih hre chungin ka sawi anih chu.." ka tawngkam vang chuan Max chu za zet hian a nui a, kan inhrechiang dun viau bawk ani. Hmeichhe buaipui dan turah a lak atang hian eng thu tha mah ka dawng hauh lovang. Ka hriatchian tluk zetin ani pawh hian a chiang ang. Rilru hahdam tuma kal chhuak hian eng chungchang nge maw ka sawi chiam le. Ka hmaa no chu la kangin ka in leh pawp a, ka hma zawn ka en leh chuan ka beisei loh ber leh rilru hahdam duha helai hmun ka pan nachhan ber Vida Cappolo, ni lo_ Ka Guzel ka va hmu. Damn it! Helai hmun mipa mit nghal zetna hmunah hian eng tehhrep nge a tih ve?
.
"Fu*k_"
"Eng nge?" ti chungin Max chu ka hawina lamah a hawi thuai a. "WOW_Hot ve!"
.
"Ka ta anih saw. Lo inrawlh miah suh." ka tih chuan za zet hian a nui leh ta.
.
"I danglam ngei chu anih hi. Tanpui dan tur che ka hre hauh lo tak ang. Eng zan nge maw anih phiangsen le? Violet saw i hmu em? I ko khawm a ni hial lo maw? Hetah pakhat, sawtah pakhat!" Max hawina lam ka en a, Violet chu eng thim deuh chinah amahin a thu tih ka hmu.
.

Eng thil nge ka ngaihtuah ka hre lo. Ka thutna atanga thovin Vida dinna lam chu ka pan a, min rawn hmu tih ka hriat veleh ka ding lamah kalin Violet thutna chu ka pan ta zawk a. Violet chuan min lo hmu rang khawp mai. Meng phar ak chung hian a thutna atanga thovin min kuah inring ran hian a che sek sek a. He hmeichhia hi chu ka hrechiang ve tawk. A bul ka thlen chuan min lo kuah nghal reng a. A tukhum samah na vak lova thamin ka kuai dak a, a hmui sen vam tha hem hawmah chuan ka fawp a. Min dawngsawng tha tih piahlam a ni. Ka nghawngah min kuahlet nghalin duhthawh lutuk mah mah hian min fawplet a. Ka inlakhran chuan a thaw hak hak mai.
.
"Eng chen nge ka lo nghah che i hria em?" thaw ham ham pahin ka hmai zawnah a tawng a, a thil in rim chu a na phian.
.
"Hey, Violet! Kan inhmu leh ta hlawl mai." Max chu kan bulah arawn ding a, a mitmeng de sur sur chu eng vang nge anih ka hrechiang khawp. Vida awmna lam a melh zoh a.
.
"Hi, Max. I club ah hian ka lo kal fo alawm.." Violet chu a hlim mah mah. Ka kalsan hlau awm tak hian ka banah min kuah tlat lehnghal a.
Max chuan ngaihven zawk dang a nei, Vida chu engtin nge a awm chiah tih a ngaihven ru reng  tih ka hriatchian vangin Vida awmna lam chu ka melh a. Ani chuan min hmu fuh lo pawh a ni mahna, a bula hmeichhe tawng sar sar chu ngaithlain an nui dun a. Ka insehruh talh talh ringawt.
.
Ngaihtuah lawk duh lova che in Violet ka pan a, tunah pawh ngaihtuah lawk duh lo  bawkin ka che leh ang!
.
Hmanhmawh lo tak hian Vida leh a thiannu niawm tak ka hmelhriat ni ve hauh silo awmna lam chu ka pan a, Violet pawh phur zet hian ka bulah a kal ve bawk. Ka ban a vawnna chu phelh rih lo turin ka inthunun hial. Ka awm dan hi a diklo anih pawhin tunah tak hi chuan pawi ka ti therte lo. Engahmah min ngailo ang maia Vida awm chu ka hmu thei tawh hlawl lo a ni ber. Min lo hmu lo tak tak anih chuan thuhran_ MIn hmuh ngei si kha!
.
Vida hma zawnah dingin, "Hetah eng nge i tih?" ka ti nghal thawr a. A nui hmel a reh riai riai. A aw thian kharhin min en a.
.
"Hi, Mr. Sloan! Helai hmun kal tur hian i phalna ka mamawh lovin ka hria." thutak angreng tak hian min en ngar a, a hmelah a rilru a lan hauh loh mai bakah a mitmengah chuan ka duh ang thikna ka hmu lo. Takzet reuh hian! Eng thil chiah nge ka beisei hi?
.
"Ani hi party naa ka hmuh tawh kha ani tiraw?" intineitu zeta min kuah chungin Violet chu a hawisang ar a. He hmeichhia hian eng nge a hriat hrep ni? Zanin chu engmah a fuh lo_ a  fuh lo vel vek!
.
"Tihtur in neih chuan min kalsan thei a nia. Ni lawm ni?" Vida bula hmeichhia chu dak deuh ar chunga tawngin min cho hmel zet hian a ding a, a thiannu chu chhan a inhuam hle tih a mitmeng tihzim deuh dan atang chuan a hriat.
.
Vida chu a ngawi reng. A thiannu chu a en a, engmah sawi lo hian a thiannu kutah chuan kaiin pawn lam pan tum niawm tak hian a inher a. Ka inthununna ka hloh ta chiah!
.
Violet min vawnna chu phelhin Vida chu ka zui a, nghet zet hian a banrekah ka vuan chawt a. Ka tihtur hresa niawm taka ding chawtin ka lam arawn hawi lo.
.
"Min lo zui rawh." ka ti hrawk a. Ka awmdan hi ka hrethiam lo. Ngatinge mumal nei miah lo a ka khawsak le? Ka hrethiam lo takzet. He hmeichhia hian ka ngaihtuahna zawng zawnga tibuai vek tawh tih chiah hi chiang taka ka hriat awmchhun a ni rih.
.
"Thlah nghal rawh." a theihtawka rumin a thiannu chuan min melh a, Vida erawh ala ngawi.
.
"Mr.Sloan??" a thiannu hian tunge ka nih a hria!
.
"Maddie, ani hi Mr. Mordecai Sloan, ka bialpa engkim ti thei-a anih hi."
.
Maddie_ Chu hming chu ka hre tawh. Mangang taka dawr chhunga mi a zawnlai khan chu hming chu a sawiri ngei alawm.
Vida chu ka lam hawiin arawn inher a, chiang lutuk hian kan inen ta ran a. A awri a min tihelna chu ka hai hauh lo.
.
"Engtin nge i ngaihzawng angin i sawi ngam zawk a?" Violet chu kan en rual thawt.
.
"I ni lo ami? I ni em?" ka beisei loh lutuk hian Vida chuan ka nghawngah min kuah a, a nungchang chu ka hrethiam lo hulhual. Eng thil nge a ngaihtuah lah ka hre hek lo. Inringtawk zet hian ka mitah min en a, "Ka hmuh laiin hmeichhe dang i khawih tawh tur a ni lo." ati nghet charh a.
VIDA – SheKnows
(Vee-Da)
.
By. Thantei_LauraSean
.
RECAP*
MORDECAI SLOAN*
.
"Maddie, ani hi Mr. Mordecai Sloan, ka bialpa engkim ti thei-a anih hi."
.
Maddie_ Chu hming chu ka hre tawh. Mangang taka dawr chhunga mi a zawnlai khan chu hming chu a sawiri ngei alawm.
Vida chu ka lam hawiin arawn inher a, chiang lutuk hian kan inen ta ran a. A awri a min tihelna chu ka hai hauh lo.
.
"Engtin nge i ngaihzawng angin i sawi ngam zawk a?" Violet chu kan en rual thawt.
.
"I ni lo ami? I ni em?" ka beisei loh lutuk hian Vida chuan ka nghawngah min kuah a, a nungchang chu ka hrethiam lo hulhual. Eng thil nge a ngaihtuah lah ka hre hek lo. Inringtawk zet hian ka mitah min en a, "Ka hmuh laiin hmeichhe dang i khawih tawh tur a ni lo." ati nghet charh a.
.
CHAPTER - 20
.
Ka awih thei lo! Mahse a hot takzet! Ka taksa chhungril ah hian che dawt a awm tiin sawi ila a dik ber ang. A mitah en letin a hnungah ka kut ka dah a, ka taksa si thlapin ka lamah ka tihnai a. Kan bulhnaia thil awm zawng zawng chu hriatzui ka nei lo. Kan pahnih chauh kan ni_kan pahnih chauh!
.
A mitmeng light vanga lang danglam deuhah chuan ka pil vawng vawng niin ka inhria. Hetiang thil hi a takah a awm ang tih rin ngaihna ka hrelo mai pawh a ni lo, ka la ngaihtuah chhin ngailo hrim hrim.
.
A hmui fawh chakawm zet lang no deuh serah chuan fawh tumin ka kun hniam deuh a, ka sik hmain a thle sawn ta daih! Takzet reuh hian!
Ka beng bulah thaw lum ham hamin, "Vawi tam tak inbuala i intlengfai phawt anih loh chuan i nghawng chin chunglam hian min deh tum hauh suh." a ti sar sar a. A tawng chu keimah chauhin ka hre thei tih ka chiang. Ka nui chhuak hawk! In ngaihtuah hman miah lo hian a nghawngah ka hmai phumin nghet thei ang ber hian ka kuah vang vang a.
.
Faifuk raih ri ka hriat chuan khawi hmunah nge ka awm tih ka hrechhuak ta chauh.
.
"Hetiang hian maw min thungrulh dawn? Ka awih thei lo!" thinrim em em hmel puin Violet chuan min rawn hnaih a, Vida khawih tum nia ka hriat vangin ka banin Vida chu ka veng vat.
"Huh! Engtin nge hetiang hian min tihtheih zawk a? Ka awih thei lo! Nang nu kha__ Morde hi i nei ngai chuang lovang. Hre rawh_" rilru fim pu nise hetiang hian a che duh kher angem ka hrelo le. Vida chu ka veng chungin khawih tum hian arawn bawh titih a, Max a lo che ta hlauh.
.
"Mr. Argyros pawi ka ti hle mai." Vida chu Max enin a bu zeuh a, ka bul atanga kal sawnin a thiannu chu a kai a, "Maddie, kal ang." ti sapin an thian dun chuan an kalsawn nghal a. Engahmah min ngailo ang chiahin a awm leh tawh. A awmdan hi ka hrethiam thei lo.
.
"Min lo hrethiam lawk." tih leh Vida te thian dun umzui ka rual a. Pawn ah chhuak vein Vida leh a thiannu awmna lam chu ka pan a, min hmu tih ka hria. Chuti chung chuan a thiltih thulh miah lovin Car kawngkhar a hawng a, a lut hmiah a.
.
"Guzel!"
.
"I hmel hmuh ka duh tawh lo." a aw chu a fiah khawp mai. A thiannu car chhunga a luhfel veleh car chu a tinung zui hmiah bawk.
.
"Kan inbiak angai."
"Ni dangah ni rawh se." tih pahin a tlan chhuak a. A duh dan dana min palzam thei nia a inngai anih chuan tunge ka nih chiah ala hrelo tihna a ni ang.
.
In chhungah ka lut leh rih. Max chu amah chauhin a lo thu tawh a, min hmuh chuan a nui suk ringawt.
"Violet chu a kal chhuak ta anih kha. Thiana, kha hmeichhia kha eng nge anih chiah?" a hmel chu a thutak ta khawp mai.
.
"Hmeichhe pakhat ve mai anih kha." ka ti liam puat nain ka tan hmeichhe pakhat ve mai a nih loh zia keimahah hian a chiang vek tawh.
.
"Hmeichhe pakhat ve mai chu ni thei se ka duhpui hle mai che. Anih loh chuan i nun pumpui a danglam ngei ngei ang." ngaihtuah chik tak hmelpu hian a no a khawih zui nuap nuap a.
.
"Engtianga danglam in? Chutiang thil hmuh chu beisei duh suh."
.
"Man! Hmangaihna hi eng nge anih chiah i la hrelo tih min hrilh suh!"
.
"Ka tan chuan engmah lo mai ani reng a lawm."
.
"Kan la hria ang chu. Engpawhnise, engtin chiah nge i awm? Kha hmeichhia kha_ Nang meuh khatianga ti theitu chu a namai hauh lovang. Khum lamah pawh_"
.
"Duhtawk teh. A chungchang nilo sawitur a tam lutuk." ka ti hluk.
.
"Amah ngaihtuah loh tum khan min ko ani tih ka hrethiam ta chiah. Violet khawngaihthlaki chu leh! Hmeichhiate hi thil siam mak tak chu an lo nih ngei hi_" a no la kangin a in pawp a. Ani pawh hi a danglam ve tho a va nih hmel ve.
.
Zan dar 11 a pelh hnuah Fiorenza chu kan thian dunin kan chhuahsan a, ka apartment pan ka tum zet nain ka tum ka thlak leh. Vida Cappolo ka hmu leh phawt anih loh chuan ka mu dawn hauh lo tih ka inhriat chian em vanga ka rilru thlak ka ni.
.
Muang lo zet hian motor ka khalh a, Mansion ka thlen chuan a lo reh thiap. Pawna security duty te erawh an tihtur tiin an harh hra thung.
.
"Jasper."
"Sir_?"
"A lo haw tawh em?" ka ti ringawt a. Ka sawi awmzia a hria.
.
"A lo thlen hnuah 30 minutes vel a liam tawh."
.
Tawng zui lovin in chhungah ka lut a, eng thil nge ka ngaihtuah ka hre lo, in chung panna step-ah chhovin Vida pindan kawngka ka kik a, chhanna ka dawng lo. Kawngka chu hawngin a pindanah ka pen lut a, a lo reh thap tho. Thawm ka ngaihthlak deuh hnu chuan bathroom-ah a awm anih ringin bathroom ka pan ta ngawt a. Ka rin ang chiah! Bathtub-ah inchiahin a maimitchhing a, a sam chu a chhipah a tawn hlawm thung. A hmai fai han chu ka en reng a, ngaihtuah lawk lem lo hian ka pheikhawk tlawh phelhin bathtub-ah chuan ka thawmhnaw ha vek chungin ka pen lut a. Ka thawm kha alo hre miah lo nge tui ka tihchet chuan meng chhuak zawkin thawm a chhuah that!
.
A thu ngil a, engmah a inbel lo tih a theihnghilh a ni ngei ang a awm khuhtu awm lo chu chiang takin ka hmu thei. Min rawn en a, ka mit fukna lai a hriatthiam chuan a awm a hup a,
.
"Chhuak rawh.. Eng thil nge i hriat a?" a ti that that a. Engahmah ka ngai lo. Bathtub-ah chuan amah epin,in hmachhawn zawngin ka thu a, tui lumin ka taksa a tih huh chuan ka ngaihtuah na tlemin a fim ta deuh.
.
"Kan inbiak atul ka tih kha."
"Tunah ni lo. Engtin nge ilo luh theih zawk a?" a awm a nuam lo nasa tih a chet zek dan atang chuan ka hre mai.
.
"Engmah i inbel lo tih ka hria a nia." nui duh miah lovin ka en a, a hmui pet ran hian min en kha kha a. A mitmenga zamna chu ka hmuh hmaih chuang lo. A bawp tawmin a khupah a kuah hlan a, ka khawih hlau  niawm tak hian a awm bawk.  Bathtub chhungah  na na na chuan kei hian ban phak loh ka nei hauh hleinem.
A mita en reng chungin a bawp dinglamah ka man a, a te leh that a.
"Zaktheilo lutuk! Min thlah rawh_"
.
"Shh"
Hneh zetin ka kuai her a, ka mal inkarah thut tirin scrubber ka la a.
"Eng thil nge i tih hi? Mordecai, min tihlui theihna i nei miah lo a nia."
.
"I duh loh chuan min thawhsan thei."
.
"Engmah ka inbel__Okay, sawi duh i neih chuan min dek lova thu chungin sawi rawh." tlemin a tawlh hlek a, ka kuah hnai leh a.
.
"Come on!" ka ti hluk. "Tikhan che lovin awm rawh." ka tih leh chuan a sir zawngin min rawn en a, ka mit ka siai zeuh a. A phun zui sap.
.
"Eng nge i sawi duh chu?" a tizui sap a.
.
"Ka hre biklo."
"Eng a?"
.
"Fiorenza a i thusawi kha i hrechiang em? Kei hian hmeichhia tumah ka khawih tur a ni lo tih thu kha?"
.
"Oh! A hunin a zir em a_"
"Shh_ Dawt min hrilh a tul lovang."
.
"Ka_"
"Lo ngawi rih rawh."
.
Ka scubber ken chuan a hnung ka nawt a, ngawi rengin a dawh ve mai bawk. Reiloteah scrubber chu dahin a darah ka vuan a, dimtein a darah ka fawp zauh a.
.
"Khawngaihin_ Mordecai, min chhuahsan rawh."
.
"NO! Ka hrechiang phawt tur a ni. Nang hian min ngaina reng em?" ka tih chuan a reh ta vang vang mai. Chatuan tluk zeta rei nia ka hriat hnu chuan,
.
"Ka hrelo, ngaina tur che ka ni em tih hi min hrilh ta che?" a ti sap a. A zawhna chuan thil kentel a ngah lutuk.
.
"I duh chuan min ngaina thei ang." ka tih chuan a nui hak.
.
"Engmah sawi tawh rih lovang." a tawng chu ka hre thei chang chang. A theih chinah chuan inven a tum hle tih hrethiam turin ka lo chik rei tawh a, hmeichhe a tak a ni lo tih hrechiang tu zingah kei hi ka tel bawk.
Tlema thurem hlekin a taksa tuiin a tihhuh vanga nel thep chu ka kuah a, a hnungzangin ka awm a sik thlap thlengin ka lamah ka pawthnai a. Kan ngawi dun ta vang vang mai. Mipa ka nih angin a taksa ka deh hian ka nung ngei a, mahse amah hi ka zah a ni. Nawrluih ngai lovin sex hmanpui thei dawn pawh ni ila tunah tak hi chuan ka ti hauh lovang. Nawrluih maw? Teuh lo!
.
Minutes engzat nge ngawi renga kan awm ka hrelo. Tui a vawt tan a, a khur deuh tih ka hriat chuan ka aw ka thian kharh a. Hetiang hun hi ka vawikhat tawnna ani! A makin a special takzet.
.
"I kawr kha phelh teh?" a tih chuan mak ka ti deuh. "Phelh teh_" a tihnawn leh chuan ka kuahna phelhin ka kawr haklai chu ka phelh a. Ka pek chuan a lo ban rang khawp mai. Kawr chu a ha a, a private parts ka hmu ang tih hlauh hmel tak hian ka kawr a hak chu pawtremin bathtub atang chuan a pen chhuak a. Ka hmuh hlaua inkhuh hram hram si chu ka en reng tho. Hawisawn nachang ka hre miah lo! Ka awmdan hi ka awih thei lo.
.
"Ka zawh hunah i ti ve mai dawn nia." tih pahin shower a on a, a taksa ka hmuh theih loh nan shower puanzar chu a pawtphui hmak. Bathtub kotlangah ka tukhum nghatin ka chhungril thleng hian ka nui anih chu! Hetiang feelings hi ka la hre ngai lo.
.
 Maimitchhing vang vangin shower ri sar sar thawm chu ka ngaithla ta reng a.
.
"Ermm_Hmm" ka awmah min khawih zauh chuan ka meng ta chauh. Ka lo muhil hman lo chauh a ni.
.
"Va intleuh rawh. I hritlang mai ang."
Bathtub sir-ah Vida chu bathrobe-a intuam phui hlan chungin a ding a, a tawng bul viau nain a nui sak tih ka hmuh chuan ka awm a nuam ve ringawt.
.
"Hritlang mahila pawi hleinem."
.
"Nuam i ti miah lovang. Ka buaipui dawn miah lo che a nia. I duhthlanna a nia_ Ahh_" Tho thutin ka ding chhuak a, tui a per chhuai a, bathtub atangin a baw bawk. Huh hlau niawm tak hian Vida chu tawlh sawnin a nui a, a mitmeng a nung sar bawk. Ka hriat thin hmeichhia kha ani ta lo em ni ka ti hman hial. A tawlhsawn hmain rang zet hian ka hnaih a, a kawngah kuahin ka pawm a.
.
"Min tihuh leh ange_" ka awmah a kut pahnih a nghat a, tunah chuan ka hnar thei tawh lo. A hmui engmah hnawih loh, no ser ah chuan lungchim zetin ka fawp ta vawng vawng a. Min fawplet lo turin a inveng tih ka hria. Kuah nghet lehin duhthawh lehzual hian ka fawp a, tim deuh tak hian ka fawhna chu min chhanglet ta!
Thil thalo tak ti harhchhuak thut ang mai hian a lahrang thuai a, a kun ta daih.
.
"Va intleuh tawh rawh." ti sepin ka awma a kut a nghah chu a lasawn ta riai riai a.
.
Tihluih ka tum lo. Kei pawh hian kal chak mah mah hlauhna ka nei tho. Engtin chiah nge ka ngaihtuahna hi a awm ka hrethiam rih hek lo.
.
Engmah sawi lovin towel ka la a, shower ka pan nghal. Ka hawilet leh zawk chuan bathroom atangin a kal chhuak tih ka va hmu. Engvanga nui nge ka nih inhre lova nui chungin tui lum nuam takin ka inphuh ta seng seng a. Shower gel chu ngaihtuah lem lovin ka bun chhuak a, a rim ka hriat chuan ka phun sup. Zanin chu a vawikhat nan hmeichhe rim ka nam chuk chuk dawn anih hi!
.
Ka inbual zawh chuan towel veng chungin Bathroom atangin ka chhuak a, Vida lo mu fel thlap tawh ka hmuh chuan ka en tawp. Ka thawm hriain a kiuin a inbeng kang a,
.
"Muttui le." tih pahin a a mit a tuam a, "Pawnlamah kawngka kalh suh aw." ti zuiin puan a sin tha sat sat a. Ka chhang lo. Zingah khua var se la, mumal zawkin biak ka duh ang. Min hnar lo ang tih rinna ka neih vangin ka awm a nuam ru tawk rih viau tho mai.
.
Engmah sawi tawh lovin a pindan ka chhuahsan a, kawngka ka khar chiah tihah thaw halh ri ka hriat chuan ka hawi zawk mai. Claire chu ka ang pham hian alo ding a, ka hmel min hmu chu thilmak hmu ang mai hian a awm lehnghal a.
.
"Sir_Ka_Um_ Miss room-ah tui ka dah dawn a. Ti turin ahma khan min chah a." a ti bah nawk nawk mai.
.
"A mu tawh a, thawm dim ang che." ka tih chuan a bu nghat a, ka kalsan nghal a.
.
Ka pindan ah lutin ka hawikual a, zanin hi ka boruak a danglam tlat anih hi mawle. Ka pindan kawngka kik karh karh ri chu la ding reng chung chuan ka chhang thuai a.
.
Claire bawk chu!
.
"Sir, i phone! A ri char char a." ka pindan chhunga lo lut lovin pawnah a ding a, pan vatin ka phone chu ka la a. Bathtub ka luh hma khan ka dah sawn tak e. Caller ID ka hmuh rualin ka pick up nghal.
.
"Mr.Sloan, zanreia ka lo tibuai che hi pawi ka ti khawp mai. Mahse thu hmanhmawh thlak a ni si a_"
.
"Sawi rawh_"
.
"Naktuk ah Jefferson hian Cappolo Corporation hming thlak chungchang a tifel dawn a, nangin i dang anih loh chuan ama hmingin Cappolo Corporation hi a thlak dawn a ni. Jefferson dang tur hian nang chauhin thuneihna i nei tih i hriatchian kha."
.
"A tha e. Zing dar 5:30 ah Jefferson chu hmuh ka duh tih lo hrilh rawh."
.
"I sawi ang chuan ka lo ti ang."
.
Phone chu off in khumah ka theh thlaa, thawmhnaw ha a khuma ka let leh chuan mut chakna ka nei ta lo.
.
Cappolo Corporation hi Jefferson hmingin a awm tur a ni lo bur! Document pawimawh thenkhat  ka nei tawh nain Jefferson dang thei tur khawp a la tling lo a, eng thil chiah nge ka tih dawn ka ngaihtuah chhuah a tul. He thil hi Vida tana titur ka ni lo va, ka pa tana titur ka ni zawk. Hah taka a din hi mi verther satliah mai maiin a chhuhsak a, a hming a puttir ka phal ngai lovang. A teuhin a hnai lo! Cappolo hming chauh a pu ringawt pawh hi ka hriattheih tirh ata tawh ka helh em em reng thin anih kha.
Thawk la huaiin ka tho a, balcony ah chhuakin hmun hla tak ka en a.
Ka hria e! Eng thil nge ka tih dawn chiang takin ka hria. Jefferson dang thei tur hian ka thei ve tawk tih ka hrechiang khawp.

VIDA – SheKnows
(Vee-Da)
.
By. Thantei_LauraSean
.
CHAPTER - 21
.
VIDA ELVES CAPPOLO*
.
Kawngka khar ri khap ka hriat chuan ka mit tuamna phelhin ka thu chhuak nghal hlawl a. Ka awmdan hi ka hrethiam hlawl lo. Ka phur lutuk nge ka hlauthawng zawk? Ka pindan chhuahsan duh lovin min lo hnaih leh tase eng thil nge thleng ang tih ka ngaihtuah ngam lo. Ka ngaihtuah zawng ringawt pawhin ka mur sung sung anih chu!! Ka kut pahnih a ka hmai hupin ka inthing nawk nawk a. Kawngka inhawng ri ka hriat chuan rang mangkheng hian mu nghal sawk sawkin ka che zui ngam tawh lo. Phurna leh zamna inchawhpawlh nuaiin ka thaw dep dep a ni ber mai. Mordecai a lo let leh a ni chiang_Lalpa, engtin nge ka lo hnial theih tawh ang!?
.
Ke pen ri chuan min hnaih tial tial a, ka mit ka chhing nghet telh telh. Che ngam tawh chuang si lovin ka ngaichang ta ringawt. Thawm a ri rak rak a, ka rin angin ka khum a che lo! Ka ngaihtuahna bawlhhlawh vanga ni hauh lo a nia aw! Phone ri ka hriat chuan ka phu nasa teh e. Inthunun chungin ka inlet riai riai a, Claire ka hmuh chuan ka meng nghal kawk mai. Ka muhil lo tih a hriat chuan a thaw ri halh a.
.
"Oh! Phone ri chu_" a mitin thawm lo chhuahna lam a zawng a.
.
"Bathroom atanga lo chhuak anih chu. Va la mai ta che. Mr.Sloan phone anih chu." mutchhuak hmel takin ka tawng lui a, ngaihsak zuilo ang taka lang chungin ka mu tha leh a. Ka awmdan chu ka nuih a za zawk e a.
.
Claire chu bathroom lamah kalin phone keng chungin a lo chhuak leh a, min mangtha hnuah hmanhmawh takin ka pindan chu a chhuahsan a. A chhuah fel chuan thaw huai chungin ka puansin ka hlim a, ka thu chhuak hluai a. Mak deuh hian lungawi chiah lohna ka nei. Ka rilru awmdan chu duh lo zetin ka mu leh thlawp a. Naktuk khuavar sela Mordecai chu min be turin a lo kal ngei ang. Bathroom -a kan awmdan ngaihtuah kha chuan engemaw kan inkarah a awm ngei tih ka chiang. Min zawhna ka chhan dante ngaihtuah letin khumah ka let sek a, Ooh, hmeichhe awlsam leh duh dan dana khawih theih angah min ngai loh hram ka beisei. Tuna chiang taka ka hriat tak chu Mordecai Sloan hi ka ngaina mah mah tawh tih hi a ni. Ka thunun theih piahlam a ni bawk. Eng mihringin nge a ngaihtuahna te a duh dan dana thunun thei ngai ni? Thawk la leh huaiin zingah tha taka ka lan theih nan mutthilh thuai tumin ka maimitchhing a, ka muhil nghal deuh mai niin ka inhria.
.
Ka muhil ka harh hlawl chuan meng chiang mang lovin sana ka en a, 5:30 chiah a ni. A la tlai lo ve. Tuk dang ang lo takin phur tak hian ka tho a, zai rat rat chungin bathroom ka pan nghal a. Hetiang taka mood fuh hian ka thawh ngai lohna chin a rei tawh lutuk a, nuam ka ti veng veng mai.
Ka inbual zo a, thawmhnaw ka hak leh hnu chuan in hnuai lamah chhukin choka ka pan a. Eitur tui deuh siam a chakawm thar riau mai.
.
20 minutes vel a ral leh hnua Claire a lo luh chuan mak tiin min en ha a. Zingkar ah choka ah hian ka awm ngai meuh lo a, maktih pawh a awm.
.
"Good Morning. Hmuh i nuam hle mai."
.
"Morning." nidang aia lan danglam chiam ka tum lo hnuhnawh. Mak minti zual ve thei tlat.
.
"Eng nge kan siam dawn a?"
"Pancake ka siam a, artui kang leh ila." ka ti pangngai mai a. Claire chu bu nghauh nghauh chungin fridge a pan a.
.
Eitur kan siam zawh chuan Juice lain dawhkan ka kil a, kan thilsiam chu tuiti takin ka ei a. Ka rilru chuan Mordecai ka ngaichang reng bawk. Thawm a awm hlekin amah anih tawh ringin ka en ru zeuh zeuh. A lo kal huna ka biak dan tur ka ngaihtuah thul! Ka ti mah mah em ka hrelo_Mahse, ka in control thei lo chu a nih ber tho si hi! Eitur hmaa thu chung siin nizana kan awm dan ka ngaihtuah let a, na zet hian ka hmui ka pet ta ngawt a. Min khawihna leh a hmuia min fawhna, sawifiah theih loh khawpa chhungril fan raih raih thei_ 'Vida_iti mah mah' keimah leh keimah ka inhau rilru mawlh mawlh mai. Ka hmai a sen chhuak hial maithei. Rapthlak hian a! Thil engkim dai vek tawh awmdan atan chuan a naupanchhiat thlak  mah mah a ni.
.
Tawng thawm ka hriat chuan ka ngaihtuahna atanga harhchhuak in ka thlenga eitur chu ka ban a.
.
"Jasper, tukthuan i ei ve nghal dawn em?"
.
Jasper chuan Claire chu chhang mai lovin min en a, "Good morning." a ti vut a. Nuih sakin ka chhang vat a.
.
"Claire, pawn lamah ka ei tawh a. Ka lawm tho tho e."
.
"Oh, ni dawn tak. I chhuak lehnghal dawn em?"
.
"Tlaiah Mr.Sloan sir hruai turin ka chhuak leh ang. Tui in tur ka va duh ve."
.
"Ka lo pe ang che."
.
An inbiakna atang chuan Mordecai a chhuak tawh a va nih hmel ve. Zingkar hma takah a chhuak ngai meuh lo niin ka lo hria a, eng thil tak nimaw? Ka lo ngaihtuah lawk leh ka lo inring ru ve ringawt chu ka zak ru chem chem.
.
Ka eitur chu eizo vat vatin dawhkan ka thawhsan ta thuai a.
.
"Miss, chhuahna tur i neih chuan nangmah chauha kal chhuak lo turin Sir in thu min chah a."
.
"Tunah khawiah nge a kal?" ka inrin hmain ka rilru a awm hmasa ber ka zawr ringawt a nih hi. Atthlak hian!
.
"Ka_ Mi hmuhtur pawimawh a nei a. Tunge a hmuh ka hre lo."
.
"A that chu. Ka chhuak dawn anih chuan min hruai turin Boni a awm alawm."
.
"Boni chuan tunah Sir a nghak mek a,a lo let har rih ang. Keiman ka hruai mai ang che."
.
"Anih chuan keimah pawhin ka kal thei alawm."
.
"Ni lo, miss, i chhuak dawn anih chuan nangmah chauhin kal chhuak lo hram rawh."
.
Jasper chu chhang tawh lovin choka ka chhuahsan a, ka chhuak duh anih pawhin keimahin ka chhuak ang. Dik taka sawi chuan vawiin hian kal chhuah chhan tur thil engmah a awm lo.
Ka pindanah ka let a, ka lungawi lo ru tlat chu ka duh lo. Ka beisei anga thil a awm lo anih pawhin thil thleng apiang pawm thiam ka zir thar fo a tul takzet.
.
Maddie ka call ta ringawt. Sawitur em em pawh ka hre chuang lo. Nizan khan min ngaihuah tak chungin min hawsan kha a nia. Gregor leh Dusty reitak kal chhuah san a theih bik loh a, vawiin hian an awmna hmunah va tlawh ila a tha tak ang. Ka beisei loh tawpna hmunah kan inhmu leh hi Pathian ruat  ni lose eng thil dang nge ni chuang ang le? Mordecai hian ahmain Maddie hi a hre lo tih nizan khan ka hrechiang chiah a, tunge ka hnaih thin tih a hre vek tura ka lo ngai ngawt kha alo dik vek bik lo. Maddie nen engtin nge kan inhmuh leh tih pawh a hre lovang. Ka hrilh kher pawh a tul hek lo. An chenna hmun a hrelo pawh hi ka duhthusam a ni rih zawk. Ka nun dan engkim a hriat fai vek a tulna awm lo. Tunah pawh engmah sawi lovin zingkarah a chhuak hmiah a, eng thil nge a tih, khawi hmunah nge a kal tih min chah mai a harsa miah lo. Chuti chung chuan engmah a sawi lova, ama kawngah a kal mai a ni. Keipawh amah ang chiahin ka duhna kawngah ka kal ve mai ang chu. Alak atang hian engmah beisei lo tur ka nia, ka at em vangin awmze neilo beisei ka lo tum hman der anih hi.
.
Ni lo, ka a lo. Ka pawm duh emaw pawm duhlo emaw Mordecai hi ka ngaina in a bula awm ka thlahlel. A tul bakin ka thinlung hian a lo hnaih reng tawh! Engtin nge anih theih? Amah hi ka mamawh reng em?
“NO_NO!” ka phun chhuak sap a. Ka ngaihtuahna chu keimah ngei pawh hian ka hlau! Violet hmu tura kal ni tase? Rapthlak hian! Ka rilru kal dan hi ka duh lo. Ka duh lo hulhual. Ka thik lo. Eng hmeichhia pawh hnaih se ka thik lo. Ka thik chhan tur pawh a awm lo. Ka mipa a ni lo va, a ta ka ni lo bawk. Tinge ngaihtuahna awm ang lo deuh deuh hi ka ngaihtuah zut zut a?? Thil dang tihtur ka mamawh anih hi.
.
 Ka thawmhnaw hak thlakin ngawi reng hian ka pindan ka chhuahsan a, Jasper min hmuh hmain in hi ka chhuahsan ang.
.
In hnuai ka thlen thlak chuan choka lamah tawng ri ka hria a, thawm dim taka kawngkhar hawngin ka kal chhuak a. Gate duty bula dawt sawi hlek chu a har tawh lo. Bakahmin hnial lui ngam dawn lo tih ka hrechiang ve bawk.
.
Gate pawn ka thlen chuan Taxi a awm mai dawn lo tih hriain 15 minutes vel ke in ka kal a. Vanneihthlak zetin Taxi a lo kal ta hlauh. Maddie te chenna hmun sawiin kan tlan ta vang vang a. Vawiin hian Sloan Mansion ah ka kir tawh kher lovang.
.
Maddie te chenna hmun ka thlen chuan amah leh a fanu Dusty chiah an lo awm a, Gregor erawh a hnaah a lo kal hman thung.
.
“Hmuh ve che a chak viau a, I lo thleng har ta deuh sia.”
“A pawi lo. Kan la inhmu fo dawn tho alawm. Come on_ Dusty hian anutei hi a infiam pui duh angem?”
Dusty chu pawmin ka infiampui a, reiloteah a mut a chhuak thuai mai. A mutthilh hnu chuan Maddie nen thu dunin kan ti ti a, Mordecai chungchang min zawt miah lo chu ka lawm ru khawp mai. Ka lawm hma mah mah!!
.
“Vee, Sloan hi I ngaina a ni em lo maw?”
.
“Engvang in? Engvangin nge ka ngainat ngawt ang?”
“Whoa! Min vin vak kher a ngai hleinem. Nang_wow_ A ni em?” chik zet hian min en a, ka thiani hian min hrethiam hma mah mah anih hmel.
.
“I  ngaihtuah ang thil chu engmah a thleng lo.” ka ti hmak a.
“Hey! Eng  nge ka ngaihtuah chu?”
.
“Thil dang sawi rawh.”
“Ka hrethiam e. Mi tha tak I phu reng a ni. I phu tawk hlimna a pek che ka beisei.”
.
“Khawngaihin, Maddie. Kan inkarah engmah a awm lo.”
.
“Okay. Engmah ka sawi tawh lovang.. Tsk_Tsk” chek tlak tlak chungin a nui rah rah a. A ngaihtuah ka hre mai.
.
Tihtur a neih ang ang ka tihpui a, min hnial chungin ka awm vanga a tihtur a thulh phah ka duh lo bur. Chawhnu dar 2 a rik chuan inhmuh leh thuai tumin ka hawsan ta rih a.
Sloan mansion-a let ka tum chuan loh vangin ka duhna hmun hmunah ka tei kual a, zalen taka ka vahkual lohna chin rei tawh zia ngaihtuah chungin park reh raih ah ka thu vang vang a, ka malchungah chip bawm lian zet ka inchhawp ran bawk.
Ka piah hla deuh hlekah chuan dil lian vaklo awmin tui varak an hram uak uak a, mahni chauha thut ai chuan tiin chips bawm nen Varak awmna lam chu ka pan a. Ka rin aiin an lo tam. Chips chu tuiah ka theh a, an ei duh vak pawhin ka hrelo.
.
“Hetah hian eng nge i tih?” ka phu chiang lutuk. Min lo betu chu tunge anih ka hriat loh vangin rang tak hian ka en vat a. Kiara!
.
“Hi!” nui chungin ka en a, “Kan inhmu tawhin ka hria.” Ka tizui zat.
.
“A dik. Min hriat ka beisei. Kiara. Helai hmuna ka hmu hlauh che chu ka lawm hle mai. I chenna hmuna kal ka lo tumsa reng reng a.”
Eng maw? A mak deuh lo maw? Tuna ka nihna ang hian inhmelhriat tha pangngai pawh kan ni hauh lo a, chuti chung chuan ka chenna hmuna lo kal a tum a maw?
“Oh. Eng thil nge ni ta?”
“I lo hriat tawh tho chu ka ring a, zanin hian JEFFIRA ISLAND-ah kan thawhpuite zawng zawng nen hun kan hmang dawn a,”
.
“Ka hre miah lo.” ka titha ve mai a, kal tumna ka neih loh hrim hrim vangin pangngai taka chhan hi a tawk viau.
“ Mr.Sloana-n a la hrilh lo che chu mak ka ti hle mai.”
.
“Um_Zing atangin kan la inhmu miah lo va.” Ka tih chuan a nui sak a. Amah hrechiang tak ni lo ila chu mi tha angah ka ngai ngei ngei ang. “A hmun hming kha?”
.
“JEFFIRA. A hming hi kei leh Jeff hming lakkawp a nia. Mak ilo tih takin. Hmuh ngei che ka lo inbeisei ang aw.” A ti nem diai a. Nui chungin ka bu thei hram a ni. A kalsawn lai chu insehruh ru teuh chungin ka en reng a.
.
JEFFIRA! Ka awih thei hlawl lo! Jefferson hnena ka pek kan nupa hming lakawp a ‘JEFFIDA ISLAND’ hming ka puttir ngei anih kha. Jefferson zawngsena hian engtin nge a lo thlak ngam zawk? Ka kal ngei ang. Eng thil nge ka tih dawn tih erawh ka hre rih mai biklo.
.
“Jeffira Island!” tiin ka phun sap a.
Zan lamah ka chhuak zing viau a, zanin chauh chu Hotel reh reih rawih ah ka riak bo ang ka ti zet kha a nia. Ka tum ka thlak chiang e. Ka kal dawn tih hi Mordecai pawn a hre lovang. Engmah min hrilh lo a, a kal ve ngeiin ka ring. Kal turin min duhlo pawh a ni mahna. A pawi thak lo! Keimahin ka kal thei. Kiara khawvel sawinghing tur talin ka kal ngei ngei ang.
.
Park atangin zana hak tur thawmhnaw en turin ka kal nghal a. Darkar khat dawn ka en kual hnu chuan ka duhthusam ka hmu fuh ta. Ka mamawh an pack fel thlap chu kengin Sloan Mansion ka pan a, ka zangkhai riau mai chu ka hrethiam chiah lo. ‘Thinrim tur ka ni. Jefferson thiltih dan vang chauh pawh hian thinur hle tur ka ni.’ tia ka ngaihtuah chung pawhin ka zangkhai tho! Ka hrethiam lo. Jefferson ka huatna aiin Mordecai runluih ka chakna a nasa zawk tih ka ngaihtuah chhuah chuan rapthlak ti zet hian ka rum hak a.
.
Mansion ka thleng a, min hmuh rualin Jasper chu ka lamah arawn tlan nghal ruak ruak a ni ber.
.
“Lalpa ka lawm e. Ka tel lovin i chhuak tih Sloan sir chuan hria se helai hmunah hian ka awm tawh hauh lovang.”
.
“Hlauthawng duh suh, Keimahin ka inenkawl thei tih I hria alawm. Dar 8 ah kal chhuah ka duh dawn a, lo inpeih lawk ang che.”
Thaw huai huai chungin “Aw le.” A ti vut a. In chung panin ka chho a, tun thlengin keimah chauha ka chhuah thu Mordecai chuan a la hre lo, a chhan chu nilengin ka chanchin a zawt lo tihna! Engah nge ka lo buai ang? Ka buai phiangsen lo ve.
.
Ka pindan ah lutin ka inbual a, ka harh hawk mai. Ka inhruk hul zawh hnu chuan darthlalang hmaah dingin ka hmai ka khawih a, ka hmel chu ka en vang vang a.
.
 Tum bulfuk tak rilru sakhat nelh nawlh ka nei ta miah lo. Ka nghing dawt anih chu!
.
Tunah hian eng thil nge tih ka tum chiah? Jefferson hremna pek tuma tun hun hi thleng ka ni a, ka hmel thlengin ka tidanglam a. Heng thil zawng zawng hi Mordecai vanga ti ni lovin Jefferson vang chauh a ti ka ni. Anih si chuan engvangin nge Mordecai hi ka ngaihtuahna ka tihbuai tir? ‘Vida Elves Cappolo, uluk takin ngaihtuah nawn rawh. I thiltum leh nung dama I awm chhan hi ngaihtuah nawn rawh.”
Darthlalang vawt thlur chu ka chala siin thawk ka la ham ham a. Ka hria e. Eng thil nge ka duh tih leh eng chiah nge ka tum tih chu ka hria e!   
.
Ka thawmhnaw lei thar hain ka hmai ka chei thuak thuak a, ka inpeih chuan 7:30 a pel tawh. Muangchang lova pindan chhuahsan in Jasper ka ko a, ka rilrua ka ruahmanna sawi nawn mawlh mawlh chungin JEFFIRA ISLAND panin kan tlan chhuak ta.
Island kan thleng a, ka hmun hriatchian sa anih vangin khawi lam nge pan tur tih ka hrechiang bawk. Jasper chu a duh dan anga zalen taka hun hmang tura hrilhin ka kalsan a, dar 10 ah motor dahna hmuna let turin ka hrilhlawk vek bawk. Rei tak party na hmuna awm ka tum lo. Ka duh ka tih zawh veleh party na hmun ka chhuahsan mai dawn a ni.
.
Ka rinlawk ang chiahin main building chhawng chung zawk ka thlen chuan mi an lo awm laih laih tawh a, thawm a la zawi angreng khawp zawk.
Inringtawk takin ka pen lut a, ka tum lawk ang chiahin mi tam zawk mit ka la tih ka inhria. Kiara ka lam pana lo kal chu nui chungin ka pan a, kan inkuah hnu chuan eng engemaw sawiin min kalsan leh thuai a. Jefferson ka la hmu lo.
.
Nui thawm a ri hak hak a, thil nih dan tur ve reng a ni. Zu ka in theih loh vangin an Juice sem chu ka la a, mi chezia thlir turin pawn lam balcony ka pan a. Ka dinna atang chuan kawt zawl zau tak eng pupa mi che vel pawh an lang chiang khawp mai.
.
Car dum lo thleng ve chiah chu Mordecai motor a ni tih ka hrechiang. Ngaihtuah miah lovin ka en reng a, Boni chu driver seat atanga chhuakin Mordecai tan passenger seat a hawng a. Mordecai chu lo chhuak vein ka awmna in lam arawn pan ta mai lo. Ka la en reng. Car kawngkhar lehlam hawng turin a kal tih ka hrethiam.
.
Car atanga hmeichhe lo chhuak chu mitkhap miah lovin ka lo en reng a. Kawrsen lar zet leh tawngchham zet haa lo chhuak hmeichhia chu Violet a ni tih hai rual a ni lo. Engemaw sawiin an inbia a, za zet leh vanvadak meuh hian Violet chu a nui a. Hawisawn tawh tur ka ni tih ka inhria, mahse ka thei lo!

Violet chuan a ban pahnihin Mordecai nghawngah a kuah a, chatuan chen zeta rei an infawp ta anih chu! Ka thaw a tawp dawnin ka hria!
An inla hrang a, inhawlo tih hriat lutuk mah  mah hian ka awmna, party na tur hmun panin an lo kal phei ta. Eng nge a chhan ka hrelo, ka taksa a khur dar dar a. Ka intur kenna no chu nghet takin ka hum ngawt ngawt ringawt.
.
'In thing harh rawh Vida Cappolo! Helai ah hian Mordecai khawsak dan vanga rilru tina tur mai maiin i kal lo. Vida Elves Cappolo,harsatna leh natna tam tak paltlang tawh i ni lawm ni? A dik! Mordecai vanga helai hmun hi thleng ka ni lo."
.
La khur dar dar chungin thawk ka la vang vang a, ka intur ken chu in zo pawpin in chhung lam ka pan a. Ka no ken chu en in ka nui sak. Ruih theih pawh ni nghal lo chuan a!!
.
Ka hawi chhuah rualin kawngka a Mordecai leh violet rawn inkai lut chu ka va hmu ta chiah. Anmahni hmulo anga lang turin ka ding sawn hlek a,  ka hmelhriat tawh biak tur an awm em tia hawi kual ka ni ta deuh ber. Ka che buai tur a ni lo. Mordecai vang ringawt hian ka chebuai phiangsen lovang.
.
"Hey, beautiful Esma! Helai hmun i lo kal ve chu ka lawm hle mai."
Ka lehhawi a, hmel hlim tak chunga min lo entu Jefferson DeLourde chu ka hmachhawn a.
"WOW_ I lang nalh lutuk." a tawng chu midang hriat tura sawi a ang lo. A tawng zawi khawp mai.
.
"Eng maw i sawi?" nui chungin ka en a, a hmel hamhaih dan atangin a tawng kha ka hriat a ring lo tih a lang ta chiah.
.
"Ka lo lawm a che." a ti ta zawk a. A kut chu ka vawn turin arawn phar chhuak a, lawm takin ka lo vuan vat.
"Ka lawm e." ka ti sap a.
.
Jefferson chu a hawi chhuak a, Mordecai leh Violet a hmuh chuan mak a ti tih thup hauh lo hian min en leh a, engahmah ngailo ang takin ka la nui reng. Kar a awm hman meuh lo Mordecai leh Violet te nen chuan kan inhmachhawn nghal der. Mordecai chu min hmu angin a awm hauh lo a, Violet chauh chu a hmuh theih awmchhun nimai hian a lang. Hmela chuh!
.
"Mr. Sloan phalna min pek vangin ka lawm e." Jefferson tawng chu Violet leh kei, Mordecai chauhin kan hria.
Eng phalna chungchang nge a sawi hi? A sawi awmzia nia ka rin hi a dik a nih teh chuan! Mordecai chu ka melh a, min en lova hawisawn in Violet chu a en a. Ka thaw hlei thei ta lo. 
VIDA – SheKnows
(Vee-Da)
.
By. Thantei_LauraSean
.
RECAP*
Jefferson chu a hawi chhuak a, Mordecai leh Violet a hmuh chuan mak a ti tih thup hauh lo hian min en leh a, engahmah ngailo ang takin ka la nui reng. Kar a awm hman meuh lo Mordecai leh Violet te nen chuan kan inhmachhawn nghal der. Mordecai chu min hmu angin a awm hauh lo a, Violet chauh chu a hmuh theih awmchhun nimai hian a lang. Hmela chuh!
.
"Mr. Sloan phalna min pek vangin ka lawm e." Jefferson tawng chu Violet leh kei, Mordecai chauhin kan hria.
Eng phalna chungchang nge a sawi hi? A sawi awmzia nia ka rin hi a dik a nih teh chuan! Mordecai chu ka melh a, min en lova hawisawn in Violet chu a en a. Ka thaw hlei thei ta lo.
.
CHAPTER - 22
.
VIDA ELVES CAPPOLO*
.
Jefferson chuan ka kut la kangin a fawp zauh a, ka chhungril awmdan chu ka hrethiam lo. Ka luak a chhuak niin ka inhria.
Violet chu Mordecai taksa ah a bet tlat ang mai hian a ngheng telh telh reng a, ei zawh mai duh hmel pu a en in, a mitmenga a ngaihtuahnn lang vang chuan ka chhungril hi a so bulh bulh.

"Helai hmun hi a mawi hle mai, min fan kualpui ta che." ka theih ang tawka novin Jefferson chu ka melh a. Mordecai leh Violet te hian ka ngaihtuahna an tibuai tur a ni lo. Chu chauh pawh a ni lo, an nun hman dan leh eng thil nge an tih tih hi ka ngaihtuah hauh lovang. Violet mitmeng bedroom awmchak hmel lutuk chu ka tham nawk nawk chak takzet! Ka ngaihtuahna hi a diklo. Engtiang pawhin awm rawh se, ka engmah an ni hrep lo ve.
.
Jefferson banah vuanin kan pen sawn dawn a, ka tum reng vangni hauh lo hian Mordecai ban leh ka ban chu a intawk zauh a. Mei sa takin min dep zawk ang mai hian ka awm sawn ve ve tih ka hria. Chuti chung chuan engmah thleng lo ang  maia dak vah chungin Jefferson phur zeta nui reng mai chu ka zui a. Zan ninawm ber tur anih rualin hmasawnna ka neih ngei a tul ang. Hreawm ka tuar thlawn tawh dawn lo. Jefferson bula awm hi ka tan chuan hremhmuna awm nen a danglam tam lo khawp. Mi tenawm leh phatsantu, rinawmna reng reng neilo tiin ka dam chhung hian ka hrereng tawh dawn a, amah ka ngaihdan vang chauh pawh hian a bula awm ka chak loh tur zia chu i ngaihtuah thiam ve maiin ka ring.
.
"In hi tu design nge le? Oh! A atthlak hle mai. Zawh loh tur ka zawt che em?" ka ti nghal zat.
Jefferson hmel chu a hahdam hmel phian a. A nui deuh reng bawk.
.
"Ka duh dan ang taka sak anih ve hi." min chhanna ka hriat chuan ka rilru in vawi thum ka mengrang! Takzet che hian_Jefferson leh!!
.
"WOW! Thil mawi i hre hle mai. Keimah ang tho hian midang pawhin an fak thin ka ring. Ka tidik em?"
.
"A dik alawm. Keipawhin ka chhuang khawp asin."
.
Huh! Jefferson hmaiah chuan ka beng chak zek zek! Zanin chu thinrimna hlirin a khat anih ber hi. He in hi keimah Vida Elves Cappolo ngei hian ka duhthusam thin angin ka design a, in chhung cheina zawng zawng pawh tumah ruai lovin keimah ngei hian ka chei vek anih kha. Bungrua zawng zawng tiam in! He ka pasal hlui lak tlak loh zet tan hian ka thawkhah em em asin. Duh taka JEFFIDA tia ka koh hi a hming thlak chauh pawh duhtawk lovin ama din ang leh a design angin a la sawi cheu anih chu.. Tenawm!
.
Ralkhat atangin in chu kan thlir a, ngaisang awm tak hian a tawng chu ngaithlain ka bu nghat nghat a. A tawng chu engmah ka hre lo.
.
"Kiara nen hian inhual tawh niin ka lo hria a." ka tih chuan a nui tawi tak mai.
.
"Uh_Um_ Nia, mahse nizan khan kan inhualna tihtawp ka duh thu ka sawi thawi tawh a. Dik taka sawi chuan_" tawng tawp leh rihin min hnaih zual a, ka kut a vuan nghet sauh bawk. "I hmel ka hmuh atang khan Kiara hian ka lakah awmzia a nei tawh lo_" a ti sur sur a.
.
"Oo! Min fak derna ah ka ngai mai dawn nge?" tiin ka nui sak.
.
"Fakderna chu ni lul lo ve. Ka rilru dik tak ka sawi a nih chu. Nang ang hmeichhia tlang tak leh min hip bet tlat theitu ang hi ka la tawng ngai lo tih sawi ila min ring duh angem?"
.
"I ti mah mah anih chu." lai niawm taka nuiin ka hmai ka khawih zauh a. Dik tak chuan ka ner sak hmel chu min hmu lo se tih ka duh vanga ka hmai khawih lui ka ni pah.
.
"Ka ngaihzawng i ni duh angem? Engkim, i duh apiang ka ti ang!"
.
Ka beisei phak bak a ni. Mipa hi a duhzawng ah hetiang khawp hian a lo chaklo thei ang maw? Nge, Jefferson DeLourde, mi tenawm leh rinawmna neilo thusawi hi ka awih leh tawh reng zawk? Ni lo, tuna a mitmeng ang hi Vida ka nihna anga kan inhmuh hmasak ber leh kan inneih chhung zawng zawng te khan ka la hmu ngai lo. Ka ngaihdan leh ka chhan dan tur ngaichang hian inngaitlawm takin min en a. Hrelawk lo chu ni ila a hmelthatna vang chauh pawh hian ka tlu nghal hial ang chu mawle!
.
"Ka_Um_ Mi tha tak i ni tih ka hria a, mahse inlaichinna hi chu hmanhmawh taka thutlukna siamna tur chi ah ka ngai lo va."
.
"Ka nawr hmanhmawh hauh lo ang che."
Ka hma zawnah tak dingin ka kut pahnih a vuan ta. Dawn awm miah lovin ka ngaihtuahna chu hun liam tawhah a kir vawn vawn anih chu!
.
Jefferson hian a nupui ni tura min sawm tum khan tuna min vawn dan ang chiah chiah hian min vuan anih kha__ Kha thil kha ngaihtuah chhuah ka duh tawh lo.
.
"Engkim pek che ka huam. Khawngaihin 'aw' tiin min chhang rawh."
.
"Min nawr lovang tih kha i sawi zo chiah sia_" ka ti halh a. Tunah tak hian engkim hi lemchanna ni lovin a tak tak ang maiin ka feel pek anih chu.
.
"Ka tihpalh. Ka nghak ang_ Eng chen pawh nise ka nghak ang. Mahse, hunawl i neih changin min hmuh remti la?" tih pahin a nui sak a. A hmel na na na hi chu a tha thlawt! Duhtaka ka lo pawm tawh ka pasal hlui, ka duh vang reng ni lova ka then mihring hian eng chen pawh min nghak thei anih chu.
.
Ka rilru tak takin ka nui ta!
.
"Ka khirh viau tih Mordecai hian a hrilh tawh che ka ring a." ka tih chuan a nui hul hak a. A hmel a danglam deuh bawk.
.
"Mr.Sloan nen hian in inkawp tak tak emaw ka ti hman a, tukin khan ka hrechiang chauh a ni. Nangmah hnaih tura phalna min peklai phei chuan ka kuah lo chauh asin."
A tawngkamin min thawn nat zia chu mihring tawnga sawifiah theih chi ani lo. Ka chhungril ah hian min vit vawng vawng mai.
.
"A chang chuan ka boss ang maiin a inngai ziah alawm." tia chhangin ka nui lui a, ka mitthlaa Mordecai hmel lang chu duh lovin ka mit ka chhing sawk a. Awmzia a awm lem lo thung. Eng angah nge alo inngaih le? Jefferson hnenah hian min ngaizawng thei ang tiin phalna a lo pe a maw? Ka awih thei hlawl lo mai. Hetiang titur si chuan nizan khan__ Oh!! Ka tap mai dawnin ka hria. Jefferson hmel chu en lovin ralkhat hla tak ka en ta daih.
.
Mordecai Sloan! Amah ngaihtuah chungin nilengin hun ka hmang a, ani chuan engkim hre chungin ka pasal hlui hnenah hian min ngaizawng thei ang tiin phalna alo pe a nih chu! Mihring hian engtin nge a tih theih? Nizan khan_ Ni lo! Ka ngaihtuah let tur a ni lo. Mordecai hian mihring ka ni ve bawk tih a hrelo anih ngei dawn hi. A duh ang chiahin Jefferson hi ka ngaizawng ngei ang. Phiangsen hian! Ka ti ang, ka ti khawp ang. Ka lakah feelings neilo hlawl a ni bik lo tih nizan khan chiang takin ka hre ve bawk a, min lo thlir rawh se. Eng thil nge ka tih dawn lo thlir mawlh rawh se.
.
"I lang nalh takzet a ni. Min ti a zo mai dawnin ka hria_ A vawikhatna pawh a ni tawh lo." Jefferson chuan ka hnunglam atangin min rawn kuah a, a nghet thei ang berin ka mit ka chhing vang vang a. Ni rawh se! Jefferson DeLourde hi ka ngaihzawng chu ni ngei rawh se. Tunge pawiti ang? Kei hian pawi ka ti ang maw? Keichu ni lo ve! Ka mi hriatchian tawh sa laka inven hi ka tan thil har pawh va ni hrep suh a!
.
"I ngaihtuah chik awm hle mai." tiin nui hak chung hian min kuahna a thlah a, amah enin ka inher ta chauh.
.
"Ni e. Kiara tan hian mi hnawksak nih ka duh lo tih ka sawilawk ang. Thil fair tawk lo a awmin ka ngaidam thei lo tih pawh sawitel nghal ila a that ka ring." pawisawi lo hmel pu chungin ka nuih a, ani chu thutak fe hian a bu nghat nghat a.
.
"Mr.Sloan pawhin chu chu a sawi a, Violet a hnena a kir leh theih nan i tanpui nasat thu pawh a sawi a. Kei lahin ka lo ngai kawi nasa mai sia. Thil hi a lan ang  ngawt a ni lo fo tih hi ka hrenawn ni berin ka hria." a tawng chu ka ngaithla uluk fe mai. Mahse ka tawngkam hi min la chhang lo. Mordecai lo sawi dan chu eng pawh mi se ka tan hian natna belhtu mai chauh a ni. Violet a neihlet theih nan ka lo tanpui reng anih chu!
.
"Fair leh fair loh chungchang ka sawi chu min chhang miah lo a nia." ka ti sap a. Jefferson chu a meng phar ak mai.
.
"Ka fair tawk lo a nih chuan hremna engpawh hmachhawn ka huam e." a ti nghet ta charh a. A mitmeng ah chuan a thusawi chu a ti tak tak tih a langchiang tawk niin ka hria.
.
"In chhung lamah lut leh tawh ila. Party huaihawttu ber i bo rei chuan mak an lo ti ang."
.
"I duh ang zelin le."
.
Thaw huai hmel puin a ban chu ka vawn turin a siamrem a, nui sak chungin a banah chuan ka vuan thuai a. In chhung lam kan pan ta.
.
Jeff sawi ang ngawt hian Kiara hi awlsam takin a lungawi dawn lo tih hriatlawkna ka nei. Inthen chungchang pawh a pawm nghal ngawt lovang. Chu chu ka duhthusam a ni zawk mah! Mihring ve mai ka nih vangin natna ka tuar tawh ang kha Kiara hian tuar ve se ka duh a, he ka thil duh avang hian rilru chhia pu taah ka inngai hek lo! Ka tawrh kha a na em a, a them tal chu a tuar ve ngei ang chu. Mi hmangaih leh duh ngawih ngawih lai chhuhsak hi eng chiah nge anih tih leh eng ang taka na nge tih a la hre ve dawn khawp.
.
In chhung kan luh hma hlekin Jeff ban ka vawn chu ka thlah a, mak tih hmel deuh leh zawhna mitmengin min en a. Ka sawi chhuah ngai lovin eng vanga thlah nge ka nih a hrethiam a ni chek ang, a bu zeuh a ka lo nui sak thung a. Mordecai leh Violet te ka va hmuh leh chuan ka taksa peng zawng zawng hi eng pawh titurin a inpeih ni berin ka hria.
.
"Hey, Jeff honey. Khawiah nge i kal bo daih a. Ka lo zawng char char che a." tih pahin Kiara chuan Jeff a kuah a, hmulo angin ka awm hmak. Chuti chung chuan Jeff chuan kuahrei hlauin a thlah thuai a, a mitmeiin min veng thawng hle tih ka hrethiam. A hlimawm dawn riau mai a!! Chutih rualin ka chuang ta riau. Kiara leh Jeff an inkuah a, an bul maiah Mordecai leh Vangvati! Tihpalh_Violet an awm bawk a, an inchar mai ang tih hlauhawm khawpa inhnaih in an la awm zui ta lehnghal a. Ka kalsawn vat angai. Hetiang hmunah hian tihtur ka hre tam mah mah zawk maithei. Ni leh lo! Ka kal sawn lovang. Mordecai hi eng eng emaw ka han sawipui ang e!
.
"Hi, Hero. I thawk chak hle mai." ka tawng chu Vangvati hian hre ngei se ka ti. Mordecai erawh a awmdan a danglam lo. Ka duh ang chiahin thip fe hian Violet chuan min melh ram ram a.
.
"Uh_Oh.." meng kal ralh a Mordecai chu nek salh chungin ka kalsawn a, Violet phun zui sar sar chu ka hre pha reng. A duh emaw duh lo emaw min thik thawkhat chu a nih kha. Chumi ka ngaihtuah rual chiah chuan awmze neilo mai anih zia ka ngaihtuah chhuak bawk. Hetianga ka khawsak luih hian thil tha a chhuak lovang.
.
Pawn lamah chhuah tumin ka kal a, ka mit vai thut chu ka hrethiam lo. Thawklehkhatah ka mit sulh a, ka pai nawk mai. Eng thil phiangsen nge ka chunga thleng hi? Ka ding ngil leh a, ka mitin a hmuh theih chin zawng chu an lang luap luap vek mai. Tawng ri pawh mumalin ka hre thei lo. Ka zawi leh hnawk a.
Ban tha chak tak min rawn chawi nawlh a, chu ban tha chak tak neitu chu tunge anih ka hre thei tawh lo. Mumal lo deuhin ka tawng a, men ka tum lui ngial nain a theih ngang loh a ni e.
.
"Intiharh rawh_ I mit chhing suh." mipa hlauthawng aw chu ka benga a rik dan a mak lutuk a, ka nui niin ka inhria. "I harh em? I harh em?"
.
A bak chu engmah ka hre ta lo.
.
Ka sam khawih niap niap tu chu tunge tih hriat tumin ka meng a, Jefferson hmel ka hmuh chuan ka harhchiang tih piahlam a ni.
.
"Good morning beautiful!"
.
Pindan chhung chu ka en kual a, khum zau takah keimahin ka mu tih ka hria. Khawi hmunah nge ka awm ka hre bawk. Mahseka tilang thei lo.
.
"Khawiah nge ka awm?" ka ti sap a.
.
"Ka inpeih tawh a nia."
Pindan kawngka ah Kiara arawn dak a, min hnaih taka Jefferson lo awm a hmuh chuan a hmel a danglam nghal vek.
.
"Kan mikhual pawh kha a tha ta viau a ni maw?" a tizui nghat a.
.
Muangchang in ka thu a, min pui tuma Jefferson che vat chu tilo turin ka duh tih lantir nan ka kut ka vai zauh. Kiara lakah hian misual angin ka lang tur a ni lo. Chutih rualin ka lama Jefferson ka hip lehzual theihna tur ani tih ka hre kar. Min bum fing zo tawh a ni ngei ang!
.
"Kiara, pawi ka ti lutuk."
Min chhang lovin khum arawn pan hnai a, Jeff chu melh zauhin min en leh a. A rilru a buai tih ka hria.
"Pawi tihtur a awm lo. Nizan khan mi tuemaw in i inturah mutthilhna a lo telh anih hmel a. Ka sawm inih angin pawiti tur zawk ka ni. Jeff honey pawh hi a inthiam lo khawp mai." a tita zung zung.
.
Mutthilhna damdawi maw? Engtin nge anih theih? An zavai hian an lo thlen hmain Juice ka in ngei a, kha bak kha engmah ka ei tawh lo kha a nia.
.
"A mak hle mai." ka ti sap ringawt. Mak ka ti tak tak.
.
"Tunah chuan i tha tawh alawm. Han intifai la ka thlah dawn che nia." Jefferson chu ka en a, Kiara pawhin thip zetin a melh leh ta.
.
"A ngai lo ve. Ka tibuai nasa hle mai che u. Keimahin ka haw thei ang."
.
Khum atangin ka tho a, bathroom awmna min kawhhmuh tak nain ka hresa vek. Hmanhmawh deuh tak hian ka intifai zung zung a, ka thawmhnaw hak  ngai hain bathroom atang chuan ka chhuak a. An pahnihin an lo la awm. Kiara chuan lungawilo tak hmel a pu bawk.
.
"Tihian taxi ka chang mai ang."
.
"Tum buai duh suh. Ka rualin i kal ang." Jeffchu a tawng bul hmak hmak khawp. Kiara chuan min rawn en a, lungawilo hmel a puzui ngam ta lo anih ka ring.
.
In atangin kan pathum chuan kan inzui chhuak a, tumah kan tawng lo. Jeff car-ah lutin kan tlan chhuak nghal deuh mai a, Kiara chuan min lo thlirzui vang vang tih side glass atangin ka hmu hram.
.
"Kiara kalsan kha nuam ka ti miah lo." ka ti sap a.
.
"Engahmah ngai suh. Engkim ka hrilh chiang vek tawh. Venthawn a ngai lovang." Jeff chuan ka kut arawn vuan a, min ngaihtuah hmel taka min melh zauh chungin "I tha tawh takzet maw?" a ti sup a. A duh chuan mi caring tawpkhawk a ni thei tih pawh ka lo hriat tawh hnu vek!
.
"Tha e. Min buaipui avangin ka lawm e."
.
"Lawmthu min hrilh fo dawn chuan engmah ka ti lovang."
.
"I duh chuan i ngainatawm thei hle dawn anih hi." ka ti zui sap sap a. Ka tawngkam vang hian a lawm tawk hle dawn tih ka hria. Min chhang lovin ka kut a vuan nghet sauh.
.
Kan ngawih vang vang hnu chuan, "Hmun dangah kan in ei puar phawt dawn nge, in a haw nghal i duh zawk?"
.
"Haw nghal ka duh mai ang. Dik tak chuan ka la chau deuh anih hi."
.
"Ka rin dan chiah." ti pahin Sloan mansion panna tur kawng peng lamah motor chu a turn a. 15 minutes a ral leh hnu chuan Mansion kan thleng ta hram. Kawngkhar min hawnsak hun ka nghak a, car atanga ka chhuk chuan kan inhmachhawn leh rih a.
.
"Ka lawm e." ka ti nawn leh. Tun tum hi chu a der a ni lo. Nizan khan min buaipui nasa hle ang tih ka ring a, tihnat duh vanga hnaih ni mah ila nizan ang kha chu a case a dang tlat a ni. Mordecai zawk pawhin engahmah a ngai lovang tih a chiang reng a, chutih laiin ani hi chuan min buaipui tlat a ni.
.
"Engmah sawi suh." tih pahin min dimdawi tak hian min rawn kuah a. Ka lo hnar duh bik lo. "Chanchin ka lo zawt dawn che nia."
Min kuahna chu thlahin ka biangah min fawp zauh a, a hmel hmuh hman loh a inher vutin car-ah a lut lehnghal a.
.
"Kan inhmu leh thuai dawn nia." tia a ban phar zauhin a tlan chhuak ta nghal a. Mansion gate-ah lut mai lovin minute khat awm vel chu ka ding deuh vang vang phawt.
.
"Hmuh a nuam hle mai."
Mordecai aw ka hriat chuan lang lo thei ang berin thawk ka la halh a. Ka bag haiin ka phone ka phawrh a, a lo in switch off daih anih hi. Mahse tunah hian Mordecai biak ka peih rih loh vangin phone hi ka hman ngei ngei a ngai. On tumin ka hmet vang vang a, battery tlem chu a lo la awm. Maddie number ka dial a, a ring quit thak.
.
"Tumah i be thei lovang." a ti leh nghut a. Ka ngei tawk a tling hle nain ka la melh peih chuang lo. Maddie number chu ka dial nawn leh a, a pick up hmain ka hnunglam atang hian ka phone chu min rawn  chhuhsak a.
.
"Nizan khan eng thil nge thleng?" ka phone chu a kekawr hak ipte ah a ak hmak a, ka hma zawn takah a ding ta bawk. Ka mit niin min enkhalh deuh bawk vangin a hmel ka hmu chiang thei lo. Chhan tum buai peih lovin gate a luh tumin ka inher a, a phun hluk mai. Eng chiah nge a sawi ka hre lo thung.
.
Ka hnunglam atang hian hneh lutuk takzet in min pawtlet a, a nat dawn leh dawn loh pawh ngaihtuah duh lovin ka kiu-in ka nghawk let ve sawk sawk a. Engahmah a ngai lo.
.
Leiah min nghat lehin ka dar tawn tawnah nghet lutuk mah mah hian min vuan a.
"Ka mitah min en rawh." a ti hniam hraih mai. Ka luhlul theihpatawp chhuah chungin a ngeng thei ang  ber leh zam hauh lo hian ka en a. A beisei lo a ni ngei ang za miah lo hian a nui hawk.
.
"Nizan khan eng thil chiah nge thleng?" a ti hriam leh  hraih a.
.
"Eng thil nge thleng?" a tawng ang chiaha zawiin ka chhang.
.
"Ka zawt che anih chu. Inhnialna atthlak a inhnial ka hman hauh lo a nia. Thil thleng dik tak sawi rawh. Nizan khan i tider tiraw?"
.
Nang hi!!
"Fu*k you!" ka inveng hman lo. A awmah ka nem sawk a, a che deuh hlek chauh. Chu chuan ka thin a tiur zual thung.
.
"A nih ngei chu. Violet sawi ang chiah!" a ti hluk.
.
Tun ang khawpa nasa hian ka piana hnulamah ka la thinur ngai lo. Ka tawng thei lo. Maimitchhing in thawk ka la a, ka kut ka hum ruh ngat ngat a. Ka kalsan rih a tha zawk. Tuna ka thinurna hi ka insum lo anih chuan thil thalo zawk a thleng ngei ang.
.
Kal sawn tumin ka inher a, ka tha khur tih ka inhria. 'Min dang suh_min dang suh_' ka ti rilru mawlh mawlh a. Ka bana min rawn vawn leh chuan ka ding chawt.
"Ni lo." ka ti sap a. Ka tawng chu a hre phak em ka hrelo.
.
"Khatiang khawpa awlsam khan i pasal hlui chu i lo hnaih lehnghal thei reng sia__ Tsk_" a tawng chu ka ngaithla zui thei lo.
.
Keimah ngei pawh ka inrin hmain ka inher a, ka theih tawpa na takmeuh hian a awmah ka kut pahnihin ka nem a__
"Tunge i nih? Tu phiangsen nge i nih? Hetiang khawpa mi hnuaihnunga min dah tur hian eng ang khawpa sang nge ilo nih le? DeLourde hnenah khan min kawp turin phalna ilo pe a maw? Ka lak atang hian eng chiah nge i beisei let?" ka au a ni ta ber. Ka thin a ur emmm a khaweng ka hmu lo a anih tak ber hi. A hmel chu ka en chiang duh lo. Ka rilru a awm hmasa sa ka sawi pawp pawp_
"Kei hi tunge ka nih? Chu chu itan a pawimawh lo. Kei hian eng thil nge ka tih hre miah lovin i ngaihzawng i neihlet theih nan ka lo pui che a maw? Min hrilh teh? Tu hi nge mi tenawm chu?"
.
Ka tawng tawp chawt.. Ka chhungrila ka ngaihtuahna sawi chhuah hian eng hmun mah min thlen lovang. Min ngaih hniam zia pawh a chiang tawk e! Min ngaih hniam zia_ Ni e_ ahma khan ngaihtuah nachang ka lo hre miah lo.
Ka kut pahnihin ka hmai ka hup a, thawk ka la hak a. Mordecai chu ka hmaah a ding tih ka hria, chu zawng chu_
.
"Ka a tawh anih hi. Mihring ka ni ve bawk tih hre miah lotu bulah hian eng thu nge sawi ka tum a?" za lo zetin ka nui hak. A mitah ka en a, engtin nge min dawnsawn ka ngaihtuah lo, "I duh dan danin min ngai thei ang. Engatan mah ka ti lo. Ka pa laka i phuba chu la mawlh rawh__ I ngaihzawng i neihlet leh avangin ka lawmpui che! Chuan, phalna i lo pek vang ni lovin ka duh vang ngeiin kei hian DeLourde hi ka kawp dawn tih lo hria ang che."
.
Min chhan hun nghah ka tum lo, engmah sawi tawh lova inher hmakin  ka theih tawpa chak hian in chhung panin ka kal a.
VIDA – SheKnows
(Vee-Da)
.
By. Thantei_LauraSean
.
RECAP*
VIDA*
"Ka a tawh anih hi. Mihring ka ni ve bawk tih hre miah lotu bulah hian eng thu nge sawi ka tum a?" za lo zetin ka nui hak. A mitah ka en a, engtin nge min dawnsawn ka ngaihtuah lo, "I duh dan danin min ngai thei ang. Engatan mah ka ti lo. Ka pa laka i phuba chu la mawlh rawh__ I ngaihzawng i neihlet leh avangin ka lawmpui che! Chuan, phalna i lo pek vang ni lovin ka duh vang ngeiin kei hian DeLourde hi ka kawp dawn tih lo hria ang che."

Min chhan hun nghah ka tum lo, engmah sawi tawh lova inher hmakin  ka theih tawpa chak hian in chhung panin ka kal a.

CHAPTER - 23

MORDECAI SLOAN*
.
Takzet hian! Eng thu maw a sawi kha? Phalna ka pek vang ni lovin DeLourde a kawp ang maw? Ka ngaihtuah zawng ringawt pawhin ka ner sawk! Chak zetin ka umzui nghal. 'Insumtheihna nei turin min pui rawh.' tiin ka phun hluk a. Tu lakah nge tanpuina ka dil ka inhre hrep lo.
.
Dik takin Jefferson hian Cappolo Corporation hming a thlak theih loh nan a lakah thutiam ka nei ngei tih ka pha lo a, mahse, kan inbiakna khan midang beng a thleng ang tih ka ngaihtuah pha hauh lo zawk ani. Chubakah, Vida hian hnaih tak tak duhna rilru a put ka ring lo hulhual bawk. He hmeichhia hi ka hrethiam ngai dawn hauh lo niin ka inhre nawn leh ta. A mitmeng a natna awm kha ka hmu a, engvanga khatiang khera min en nge a nih ka hre lo, ka ngaihtuah thiam lo. He hmeichhe mak tak lakah hian ngaihtuah thiam loh thil ka tawng tam ta mah mah anih hi.
.
In chungah chhovin a pindan kawngkhar chu kik lovin ka hawng rawp a.
.
Ka thawm a hriat chuan min en chuang hauh lo hian "Chhuak lehnghal rawh." a ti chang rat a. Engahmah min ngai lo hian kal pahin a thawmhnaw hak chu a phelh  mawlh  mawlh thung. Shit! A taksa nalh lutuk chu ka hmuhhmaih theiin a ring emaw ni le? Min ngaihven zui miah lo hian a thawmhnaw hak tur a la chhuak a, a ha nghal mawlh  mawlh a. A thawmhnaw dahna pindan kawngka chu a khar hek lo.
.
A thiltih mek chu pawisa duh lovin ka pan hnai a, ka thinlungin a duh hi ti turin tuman min dang tawh lovang.
A kawngah hneh taka ka kuah chuan te thatin "Eng thil nge i hriat a?" ti bak hlar chungin a tal bat bat mai. A hmel en ai hian tharum a nei zek lehnghal. A chet zawngin a sam chuan min zar a, a rimtui chek chek chu haider theih pawh a ni lo. Itawm lutuk!
.
"Reilote tal tha takin i awm thei em?" ka ti hluk. A taksa dekin ka awm  a, ka rilru harh mahse ka taksa erawh a danglam mek. Kei hi tha taka awm hleithei lo zawk chu ka nih si hi mawle!
.
"Ka thin ala ur reng a nia. I hmel hi ka hmu peih lo bawk." a tizui nghat nghat hmel chu ka en ta reng. Ka en reng chu makti niawm tak hian, "Eng nge?" a ti ha a. Tunah tak hian tihduh pakhat chiah ka nei.
Amah ngaichang lem lovin ka kun hniam a, a hmui no serah chuan ka fawp a. Ka duhthawh rualin tihnat ka hlau khawp. Ka tihlau mai  ang tih pawh ka hlau. Ka hmui chu lasawn hlekin kan hnar in dek ranin kan inen a, ka lungphu a danglam ang bawkin ani pawh a danglam tih ka hria. 
.
"Thil diklo i in a ni lo maw? Violet ka ni lo ania!" a ti chang fal a, a taksa chu a tang deuh teuh bawk tih ka feel thei. Chuti chung chuan inlak hran a tum chuang miah lo. "Nge, in i thlen veleh a pindanah lutin i fawp tur a ni tiin a hrilh che?" a ti kha fak a, a sawi awmzia chu eng nge? Violet a thik tihna ani thei angem?

"I thik maw?" ka tih chuan a lu thingin a thaw halh a.
.
"Kei hian lo thik buai nachhan tur ka nei hleinem. Ran vulh ang mai a i duh huna min hnaih leh min hlat tum hi bansan teh." danglam eih lo hian min en ngar a, mak ka tih em vangin ka en tawp.
.
"Chutiang a ni lo."
"Mordecai_" sawi leh duh lo niawm takin a kun ta daih.
"Sawi rawh_"
.
"Ka chau a nia. Mut ka duh. Khawngaihin min chhuahsan rawh. Khawngaihin_" a ti sep sep a,a hmel ka en chian chuan a chau tak tak tih a lang reng mai.
Ka vawnna chu ka phelh theih  nan ka kut lasawn in a kal a, ka enzui reng. Khumah muangchang hian a mu a. Ni a intan dawn chauh laiin khum a pan hmak a maw? Nizan khan eng fakau nge a tih le? Hetiang khawpa chau tur khawp chuan__ Ni lo, Violet sawi kha a dik lovang.
.
A mutna ka pan a, khuma ka thut hnu pawh chuan che miah lo hian a la mu ta reng.
.
"Tihder kha duhtawk phawt teh. Chiang zawka kan inbiak a tul a nia." a la che chuang lo. "Cappolo Corporation hming hi thlak a ni dawn tih i hria em? Chu pawh tudang ni lovin Jefferson hminga thlak tum a ni."
A la che chuang lo.. A ni ta em em lo.
A puansin chu ka keu a, a hmel ka hmuh chuan ka hnaih nghal rawk rawk mai. A hmai chu a sen thliah thliah in a thlan vek a, a mit a chhing tlat bawk.
.
"Guzel? I harh em? Guzel.." ka khawih ang angin a awm tih ka hmuh chuan hlauthawng lutuk hian a chalah ka dek a, a nghawng hnunglamah ka kut zen lutin a kaihza ah ka kut lehlamin ka dawm a hmanhmawh takin pindan atang chuan ka pawm chhuak a. Thawm a chhuah lo va, a taksa a zawi vek.
.
In hnuai ka thlen chuan Jasper ko vin hmanhmawh takin damdawiin kan pan nghal a. Ngaihtuahna mumal ka nei thei rih lo.
.
Damdawiin kan thleng a, rang takin an check nghal zung zung a. Pawnah chhuak tura min hrilh chuan hreh zetin ka chhuahsan a. A hmel landan khan ka ngaih a titha lo takzet.
.
Nizan party naa a tluk khan kaihthawh tumin ka pan thuai a, Voilet ka bula a awm vang leh Jefferson khan tha taka a enkawl tur thu a sawi vangin in chung pindana an pawm chhoh khan ka zui ve ta lo anih kha. Voilet khan a tider tih chiang taka a hriat thu min hrilh a, a tir ah Violet kha ka ring miah lo. Mahse, a sawi dan hmangah rinhlelh loh theih loh anga a lan tak avangin zankhua in ka mu miah lo. Jefferson bula hun a hman duh vangah ka ngai lo thei lo a ni. Hmeichhe luhlul leh a tum tawh tum tlat mi a ni tih ka hriatchian vang leh Jefferson bula phalna ka lo pek vang chauh pawh khan min runluih ngei ang tih ka ring sa vek.
Nizan khan a tider a nih si chuan tunah engtin nge hetiang hian a awm leh theih? Dik tawk lo chu a awm ngei a ni. Zinga kan inbiakna ngaihtuah letin ka maimitchhing vang vang a.
.
"Kei hi tunge ka nih? Chu chu itan a pawimawh lo. Kei hian eng thil nge ka tih hre miah lovin i ngaihzawng i neihlet theih nan ka lo pui che a maw? Min hrilh teh? Tu hi nge mi tenawm chu?"
"Ka a tawh anih hi. Mihring ka ni ve bawk tih hre miah lotu bulah hian eng thu nge sawi ka tum a?"
.
Violet ka neihlet leh theih nana hmanrua ah ka hmang nia a inhriat chhan kha engvang nge ni ang? Tu phiangsen in nge a bulah lo sawi?
.
"Mr. Sloan?"
Ka bula doctor ding chu ka lo hmu miah lo.
"Eng nge a dinhmun? A tha em?"
.
"Kan chhan hman hlauh hi a lawmawm hle a ni. Engemaw chen chu a chak lo viau rih ang. A taksaa tur awm saw a chak khawp mai a, a harh lohna chin a rei tawh em?" a ti zung zung a. Thil thlen dan ka hrilh hnu chuan min kalsan leh ta rih. Pindan-a ka luh theih tawh thu min hrilh chu thu lawmawm ka dawn awmchhun a ni.
.
Ka secretary biain meeting ka neih tur zawng zawng cancel vek tura ka hrilh hnuah Vida awmna pindan ah chuan ka lut a. A hma aiin a hmel chu a lang dang lehzual tawh. Tider ni a ka lo ngaih vang khan ka inthiam lo hluah hluah bawk. A khum bul chair-ah thuin ka en reng a, thil nuam lo tak tawng ang mai hian a hmel chu a nur deuh nang tih ka hmuh chuan pan hnaiin a kutah dim tein ka vuan a.
.
"Guzel, ka tihpalh!" ka tawngkam chu kei pawh hian ka awih lo zawk hial. Engemaw chen hnuah ka thutna chair-ah chuan ka let leh ta chauh a.
.
.
"Karei leh! Eng nge a an tawh? Engtin nge hetiang hi a thlen theih zawk a." phun sar sar thawm ka hriat chuan ka phu deuh zawk. Ka lo muhil anih ngei hi. Ka ring a kham hle bawk. Muangchang in ka thu ngil a, khum bula Maddison thu leh zawitea Vida tawng sepp sep chu ka en a. Sana ka en nghal vat. Pindan ka luh atang khan darkar hnih zet alo liam tawh.
.
"I tha takzet maw? Ka thinphu ala reh thei lo."
.
"Ka tha alawm. Ka thi thei lo tih i hriatchian tawh em kha.." fiamthu a tum ve hle nain a mitmeng chu a chau takzet.
.
"Hi, Maddison_"
.
"Ouch! Ka phu nasa lutuk." a awm dawm chungin Maddison chu a ding hluai a. A insiamrem leh ta thuai.
.
"Oh, Mr.Sloan.. Ka thian tha ber ilo buaipui avangin ka lawm lutuk e. I duh chuan i kalsan thei a nia. Ka lo awmpui ang." a ti zung zung a, a thiannu a ngaihsak zia ka hmuh chuan hetiang khawpa thiantha neih ve hi ka chak hial. Ka khawvel ah hian rin pumhlum thak pakhat chiah ka nei a, chu chu ka nu a ni. Ani bak hi chu tumah rin pumhlum thak ka nei lo, ka tan a thiang lo a ni mah zawk.
.
"A lawmawm e. Ka lo let leh thuai ang." tiin ka chhuahsan ta rih. Awmpuitu tur a neih chuan tih ngei ngei  ngai ka nei tlat. Hmahmawh deuh takin ka chhuak a, ka kal tumna hmun ka pan nghal vang vang a.
.
VIDA ELVES CAPPOLO*
.
“Hey, Beautiful!” Jefferson aw ka hriat chuan ka meng a, Mordecai ni zawk se tia ka ngaihtuahna chu a atthlak zia ka ngaihtuah nghal.
“Hey.”
“Eng nge i an?”
“Ka tha..”
"Hetah hian eng eng irawn tih ve?" Mordecai aw rum deuh tak ka hriat chuan ka hawi rang khawp mai. A hmel chu a dur deuh khap a. Chiang takin Jefferson chu a lawm lo hle tih a lang bawk. Ka mutthilh chhung reiloteah khan eng thil nge maw thleng hman le? Maddie leh Jefferson te__ Ni lo, an inhmu anih vaih chuan Jefferson hian tunge ka nih a ring thiam ngei ang.
.
"Whoa! Hahdam rawh. Ka bialnu hmuh hi ka tan sual a ni hleinem."
.
"I bialnu maw? Helaiah hian i bialnu awm ka hmu hauh lo mai. Thil pawimawh sawidun tur kan nei a, min lo va chhuahsan rawh. " a ti bung nghut nghut a. A ngaihna ka hrelo telh telh. Tawngkam mawi deuh zawk pawhin a hrilh theih reng sia. Bakah Mordecai hian min chhuahsan dawn khan diklohna engmah a nei lo. A lo let leh  vat tur thu sawiin a kal anih kha.
.
"Kan inhmu leh thuai dawn nia." Jefferson chu rawn kunin ka chalah  min fawp zauh a, hmanhmawh duh hauh lo hian pindan atang chuan a kal chhuak a. Engmah sawi lovin Mordecai chuan a enzui reng.
.
"Mawihnai takin i chhuahtir thei reng sia."
.
"Lo ngawi hmak rawh. Jefferson hi i hnaih tawh tur a ni lo." khum bul a lo thleng phei hman der.
.
"Engvangin?" ka ti hram.
.
"Tun dinhmuna i awm chhan hi i ngaihtuah chhuak thiam miah lo anih hmel. Jefferson hian tunge i nih chiah a hre tawh reng maithei tih hi i ngaihtuah em?"
.
"Chiang takin a nupui hlui ka ni tih a hrelo tih ka hria."
.
"I nunna derthawnga a awm leh hnuah pawh i la harh chuang lo.. Ka sawi chu pawm ang che. Jefferson hi hnaih tawh suh."
.
"Eng nge i hriat a? Ka lakah thinrimna tur i nei  miah lo." ka tih chuan a thaw huai ringawt.
.
Kawngkhar a inhawng ri rak a, Doctor lo lutin injection a hun tawh thu a sawi chuan kan ngawi ta rih. Doctor chuan a tihtur ati mawlh mawlh a, a thiltih apiang chu uluk lutuk mah mah hian Mordecai chuan a en zel a. A nungchang hi mak ka ti ta deuh khawp mai.
Doctor a chhuak chauh a, Mordecai chu khumah rawn thuin chiang zet hian min en a. Thinurna nei hmel a pu tawh lo.
.
"Muhil la, in ah ka hruai haw ang che." ti supin ka lu ah min khawih a, damdawi hnathawh vang chuan ka mit ka chhing riai riai a.
Mordecai hian in ah min hruai haw dawn anih chu! Ka ngaihtuahna chuan ka hriatthiam hauh loh hlimna min pe anih chu..
.
Ni thum zet a ral ta. Jefferson nen kan inhmu leh ta miah lo a, ka dam tha vek tawh bawk. Mordecai nen pawh kan inhmu tam chuang lo. Jasper hnen atanga ka hriat danin a in pakhat zawkah a awm a ni awm e. Pawm ka duh miah lo chungin ka chhungril hian a ngai veng veng reng a, ngaihtuah loh ka tum nasat poh leh ka ngaihtuah nasa zawk niin ka inhria.
.
Ka thawmhnaw ka thlak a, Sloan corporation pan turin ka chhuak nghal a. Eng thili nge min mawlh ni, Mordecai hmuh ngei ka duh tlat.
Sloan building ka thlen chuan tawi khawmuang lovin private elevator ah ka lut a, Mordecai office ka pan nghal a.
.
"Mr.Sloan chu a la hmuh theih rih loh."
"Ka lo nghak mai ang."
"Chutiang ani lo_ I nghak chhuak chuang lovang. Chawhnu lamah lo kal leh zawk mai rawh." a tihlai mekin Mordecai canbin atang chuan hmeichhe nui har har thawm a lo chhuak a. Secretary Pears hmel chu hmuh a nuam ta fahran lo. Kal sawn deuhin Cabin kawngkhar chu a va khar phui ta ringawt. Ka nui tawp.
.
"Ka sawi ang chuan ti mai rawh. Khawngaihin_ Boss chuan tumah luhtir lo turin min hrilh a, ka tihluih chuan ka hna hi ka chan a ni mai. Khawngaihin__" 
.
"A tha e. Hlauthawng suh. Ka lo kal leh mai ang." ka tih chuan a thaw hliai a, hmuh theihin a hahdam nghal bawk.
.
Kal tuma ka inher rual chiahin kawngka hawng ri ka hria a, hmeichhe phun sar sar ri vang chuan ka ding leh rih a. Lo kal daih ila tha zawk tur!
.
"Ah! Tlawhtu i nei anih hi." a la nui zui har har tho. Mordecai chu a tawng miah lo. Muangchang hian ka inher a, Mordecai bana kuah chunga ding hmeichhia chu ka tumlawk aia chiang mah hian ka en a.
.
"Hey, eng? Nimin chanchinbu-a ka hmeichhe hmuh kha  ani chiang. Hetah eng nge i tih dawn?" a ngaihna hre lovin ka en ringawt.
.
"Min lo hrethiam la," ka ti hman chauh a, ring zeta nui chung hian a kut a vai zauh a. A kuttin hnawih sen zet chu a langsar khawp.
.
"What? Ka awih thei lo. Zahna chang hre miah lo hmeichhia chu a lo nih ngei dawn hi. Mordecai, i tha leh lutuk a hmeichhe thalo tak pawhin i kalsan hnuah a la pan ngam cheu che anih hi__ A hmel pawh hi ka hmu tui lo, kal vat teh ang.  Duhtawk chin a nei dawn lo anih chuan kei hian tihdan tha deuh ka hria" a ti ta zung zung a. A sawia chu keimah ka nih ringngam chiah lovin midang an awm leh awm loh ka en hial. Mahse, Secretary Pears chauh lo chu midang an awm lo. He hmeichhe thusawi hi a ngaihna reng reng ka hrelo bawk.
.
“Engmah hrelo ang mai khan awm lo mai rawh. Miss Pears, engmah a la hrelo tak tak anih tak hlauh in chanchinbu kha kan nula hi han entir ta che..” a aw a min tihelna chu hai rual a ni lo chungin ka la ngawi hram hram. Mordecai chu ka en a,a hmel atangin engmah ka hre thei lo. A tawng miah lo chuan ka awm a tinuam lo nasa ta viau_
.
Secretary Pears chuan tim deuh tak hian chanchinbu kengin min rawn pan a, ka chungchang ziahna phek ka en chuan ka hmel a dang(pale) chhuak lawp lawp ngeiin ka ring e. Ka inthunun thei ngang lo. He chanchinbu hi engtin nge ka hmuh miah loh theih? Heng thil zawng zawng hi engtin nge a thlen theih? Zawhna ka ngah lutuk.
Mordecai chu ka en leh a, a bula hmeichhia chu enin a nui deuh tih ka hmuh chuan ka ip chawih a. Thawklehkhatah engkim hi a danglam leh dawn ta tih chiang takin ka hria. Kar khat lek chhung hian thil thleng a va tam em! Chu pawh ka hriat loh veka thleng a ni. Engtin nge ka hmachhawn ang?
.
Mordecai chu ka en a, ngaihtuah lawk ngai miah lovin ka thutlukna tur ka hre nghal vek. Engmah hi ka pawm hlek lovang. Chu chu tunah leh ka damchhunga ka thutlukna  ngai reng tur a ni hial ang chu! “Ka laka i thilphalna vangin ka lawm e. Mahse, kei hian heng thil zawng zawng hi engatan mah ka ti lo_” chanchinbu chu nghet thei ang bera hmer ngat ngatin ka inher a, tluk mai hlau tak chung hian fimkhur takin ka kalsawn a. Ka khur nasa lutuk mah mah a ni e.
.
VIDA – SheKnows
(Vee-Da)
.
By. Thantei_LauraSean
.
RECAP
.
Mordecai chu ka en leh a, a bula hmeichhia chu enin a nui deuh tih ka hmuh chuan ka ip chawih a. Thawklehkhatah engkim hi a danglam leh dawn ta tih chiang takin ka hria. Kar khat lek chhung hian thil thleng a va tam em! Chu pawh ka hriat loh veka thleng a ni. Engtin nge ka hmachhawn ang?

Mordecai chu ka en a, ngaihtuah lawk ngai miah lovin ka thutlukna tur ka hre nghal vek. Engmah hi ka pawm hlek lovang. Chu chu tunah leh ka damchhunga ka thutlukna  ngai reng tur a ni hial ang chu! “Ka laka i thilphalna vangin ka lawm e. Mahse, kei hian heng thil zawng zawng hi engatan mah ka ti lo_” chanchinbu chu nghet thei ang bera hmer ngat ngatin ka inher a, tluk mai hlau tak chung hian fimkhur takin ka kalsawn a. Ka khur nasa lutuk mah mah a ni e.
.
CHAPTER - 24
.
VIDA ELVES CAPPOLO*
.
Ka awih thei lo! Mordecai hian eng thil chiah nge tih a tum?
Elevator a inkhar rualin zawi hnawk hian thir bang vawt thlur chu ka ngheng rawk rawk a. Kha hmeichhia a bula awm kha tunge anih a, eng mihring nge anih ka tan a pawimawh ber lo. A pawimawh zawk chu Mordecai a ni. Nghet taka ka hum newspaper chu muangchang a pharhin ka en nawn leh. A thu inziak chu hawrawp pakhatte pawh a la danglam si lo.
.
*Billionaire Mordecai Sloan chuan a hmeichhe kawp Esma Celik a then a, innei mai tawh tura ngaih annih laia hetianga a then thut hian mi a thawng hle. Mordecai thu puangtu hnen atanga thu kan dawn danin Esma Celik hian Mordecai neih zawng zawng 20% a nei dawn a ni. Tunhma nun tuihnai lo tak  nei hmeichhia a lo hnaih chu thil pawi tak anih thu dawn a ni bawk.*
A bak thu inziak chu ka chhiar zawm duh tawh lo. Hetiang thil a thlen hma hian Mordecai phalna lak a ni vek ang tih a chiang a, ka thinlung nat zia hi mihring tawnga sawi ngaihna a awm lo. Ka mittui tla chu thinur zetin ka hru tawk a. Ka thinlung hian a tul bak aia nasa in ka lo hnaih tawh reng tih ka inhriatchhuah na hian min tina zual em a ni.
.
Elevator a ding a, dak lui vah chungin ka pen chhuak a. Ka chhungril erawh a tap tlawk tlawk thung. Vawiin ni ngei hian Mordecai Sloan in ka chhuahsan ngei tur a ni.
.
Taxi ka phar a, Sloan mansion panin ka kal nghal vang vang a. Ka ngaihtuahna a tawi khawp mai.
.
Mansion ka thlen chuan dan pangngai in a reh thiap a, ka thil hmuh apiang chu an ngui nghiai hian ka hre pek. In chhung ka lut min hmuh veleh Jasper chuan min lo pan vat a.
.
"Sloan sir chuan in atanga chhuak lo turin a duh che a. Khawngaihin i pindan ah i awm dawn nia."
.
Jasper chu ka chhang lo. Chhan buai a tulna chhan pawh ka hre hek lo. Ngawi rengin ka pindan panin ka chho a, ka tah chhuak ut ut vang chuan ka tang teuh a.
Ka room-ah lutin ka thawmhnaw ka khung khawm a, ka mamawh zualpui bak ka chhuahpui lovang. Reiloteah ka inkhung fel thuai a, thawmhnaw chet vel pui awlsam tura ka inthlak leh hnu chuan ka inpeih ta. Ka pindan chu uluk fe hian ka thlek nawn a, he pindan hi ka ngai hle dawn a ni. Atthlak ti zetin ka nui hak!
He in hi engtiklai mahin ka in a ni ngai lo va engvangin nge ka ngaih ngawt ang le?
.
Ka thawmhnaw dahna bag chu khaiin ka room atangin ka chhuak a, ka bag a zang vaklo bawk nen ka kal chak hleithei lo. Step tawp ka thleng a, ka hmaa Mordecai arawn din thut chuan phu deuh zawk.
.
"Kha kha enge?" ka bag ken chu a melh zoh a. A hmel chu en rei duh lovin ka hawisawn nghal vat. Chhang lo va kal ka tum chuan bag chu dim lem lo tak hian arawn phih thla nawk a.
.
"Duhtawk teh." ka ti that a. Ka insum thei tawh ngang lo.
"Eng maw?"
.
"Mi ropui buaina tham a ni lo ve." ti nghat in ka pen leh a, a hma aia na mahin ka banrek ah min vuan leh a.
.
"Kan inbiak a tul takzet tawh anih hi." a ti bung nghut mai. Min ngaichang lovin library lamah min kai a, min vawnna chu phelh tum buai chi a ni lo hrim hrim bawk.
.
Library chhungah min kai lut a, kawngkhar hrawl zet chu dim lem lo tak hian a khar thlawp a. Muangchang leh hlauhawm zet hian min pan hnai a, tawlh ka tum miah lo chungin ka tawlh lo thei ta lo.
.
"Bag ah khan eng thil nge awm?"
"Ka thawmhnaw."
"In hi chhuahsan i tum a ni em lovang chu."
"Tum e. He in hi mi ropui Mordecai Sloan in a ni lawm ni? Helai hmuna ka la awm chhan tur pakhat chauh pawh a awm hleinem. Mihring ka ni ve bawk tih hria la, infiamna hmanruaa min hman hi duhtawk tawh rawh. He in a chen hi ka duh tawh lo__ Ilak atang hian eng thil mah ka duh tawh lo." Mordecai chuan ngawi rengin min en a, tawng tum hmel a pu lo hrim hrim.
"Chanchinbu a an thu chhuah kha chu engpawh ni se ka tan awmzia a awm lo. I thil neih pakhat pawh hi i lak atang hian ka dawng lovang. Chu chu hrereng rawh. Mihringa min ngai miah lo tu bula awm leh biak chauh pawh hi ti miah tawh lo tur ka nia._ Eng_ Eng nge i tih dawn?"
.
Muangchang takmeuh hian min hnaih zel a, bang ngheng chetin ka ding tawh. A kut dinglam in ka biang a nul zai zai a, a mitmeng chu hlauhawm zet hian a de sawr sawr bawk.
.
"Ka mamawh che!" a ti zawi ruih a. A aw chauh pawh chuan ka taksa pum a fan! Ni lo! Tun ah ngei pawh hian engvangin nge keimahah nghawng ka la neihtir cheu le? "Ka in hi i chhuahsan lovang." a hmui lam thar thar chuan ka chal arawn si a, ka maimitchhing tawp. "Min mamawh ve tho tih ka hria_"
.
"Ni lo!"
"Min dan han tum la." a inringtawk lutuk chu ka haw takzet. "Beautiful!" ka hmai a fawp kual dan dan a, amah kuah lo turin ka kut ka hum ruh ngat ngat a. Ka hnunglam atangin ka kawr chhungah a kut a zenlut a, a chetdan zawng zawng chuan ka khup a tizawi vek tawh. Ka hmui ah dim takin min fawp a, ka chhanglet tur a ni lo tia ka inhrilh mawlh mawlh chung pawhin ka ngaihtuahna chu ka taksa hian a zawm eih lo. A nghawnga ka kuah chuan na deuh taka min kuah nghet sauhin a rum hak a.
“Ka mamawh che!” hmai insi reng chungin thawk a la hak a, keipawh ka dang chuang lo. He mipa hi ka mamawh a ni. Rang zet hian ka kawr haklai chu a phelh pawp a, ngawi reng chung leh mitmeng danglam tak hian min en kual dan dan a, ka awm ka hliah chuan ka ban a lo dawm vat..
.
“Min entir rawh_” tih pahin ka ban a lasawn a, a thaw a mumal tawh lo takzet. A kawrhak hmalam kilhna chu phelhsak tumin ka ban a, ka banrek ah dim tak  hian min vuan leh rih a. “Hmanhmawh suh_” a ti leh sup a. A thusawi apiang chu ka tan thu thiltithei ani vek tawh. Hetiang taka ka laka thu a nei hi kei ngei pawh hian awih hark a ti lutuk takzet. Ka mipa mutpui awmchhun ka pasal khan hetiang khawpa nasa hian phurna min siamsak ngai lo, ka lo lungawipui thin kha mak ka ti zawk hial anih chu! Rapthlak lutuk hian!
.
Tlemin a tawlh hla hlek a.
“Mordecai__”
“Yes_ Min lo hnaih rawh.” ka hlat deuhah dingin ka vawn turin a kut pahnih arawn phar chhuak a, ka vuan vat a. Hnehsawh lutuk hian amah si chetin min kuah a, duhthawh takin kan infawp leh ta.. Tunah chuan a hma aiin kan boruak a sang tawh zawk.
.
“Ka chungah hian eng thil nge i tih le?” a tawng chu a zawi hle. Ka tan a nawm zia min hriatthiam pui phak kherin ka ring lo. Min pawmkang nawlh a, a kawngah ka bawp kherhin a nghawngah ka kuah a. Engtiklaiin nge thutthleng lian leh zau takah chuan min nghah ka hre hman lo. Ka taksa chu karkalak in ka chungah arawn thingthi a, ka bek tawn tawn ah a kut tha chak zet chuan dimtein min dawm a.  Ka nghak zo lo, a hmui chu ka fawh theih nan a tukhumah ka dawm a_
.
“WOW!”
Thawm ka hriat chuan ka thiltih lai chu ka chawl chiang khawp. Ahmaa office-a ka lo hmuh tawh hmeichhia ka hmuh chuan tihngaihna hre lovin ka en tawp.
.
“I sawi aiin i che rang a ni maw?” a nui hmel ka hmuh chuan ka maimitchhing a, ka thaw ngam lo ni ta berin ka inhria. Mordecai hi engtin nge a awm ve?
Ka meng a, Mordecai hmel ka en vat a. Ani chu a awm ngaia la awm rengin a lo maimitchhing ve bawk. He hmeichhia hi hetianga kan awmlai hmuh tum renga lo lut anih ka ring hauh lo mai. Engtin nge Sloan mansion ah hian a lo kal ve theih zawk?
.
“A va tha em! Ka chak ta lo a ni e. Mordecai, ka chak ta lo.” A sawi awmzia chu hrethiam mai lovin ka hawihai a, Mordecai chu muangchang hian a chesawn a, awm ngaihna hriat a har khawp mai.
.
Mordecai hmel ka en leh chuan chu hmeichhe thusawi chu ka hrethiam ta chiah bawk. Hetianga min awmpui theih leh theih loh turah hian an lo inchawi tihna a ni! Hei aia zahthlak leh chuang tur hi a awm thei dawn em ni?
“Lalpa_Lalpa_” ka ti rilru mawlh mawlh a.  Ka hmui hnuailam chu na theihtawpin ka pet a, sawitur reng reng ka hrelo. Zahthlak tih tawngkam hian tuna ka dinhmun hi a sawifiah zo lo a, nakin ah__engtikah mah a sawifiah zo ngai lovang.
.
Couch ah chuan ka thu chhuak a. Ka kawr kha khawiah nge  a awm? Ka khur nasa lutuk.
“Awih a va har ve. Khatiang hnuah pawh mutpui che ala hnial lo hi mak ka ti thlawt_Tsk_tsk” a chek zui tlak tlak a, Mordecai chu a ngawi reng. Chu chuan engkim a tichiang. Ka taksa hi a mur chhuak vek.
.
Ka ding chhuak a, chhuata  ka kawr tla chu chhar tuma panin ka kun nghal a.
“Guzel_”
“Min_khawih_suh” ka aw khur chu ka  thunun hleithei lo.
“Chhuak rawh.” Mordecai chuan tunge a biak zawk ka hre lo a, ka en duh tawh hek lo. Ka theih anga rangin ka kawr chu ka ha nawk nawk a, ka bana min rawn vuantu awm vang chuan hlau zet hian ka te thawt. Mordecai hmel chu ka en a, keimah ang bawkin a mumal bik lo a ang khawp mai.
“Kal suh.” a tawng chu a ri chhuak chang chang.
Ka kal lo ang maw? Engvang in? Engvang phiangsen in nge ka kal loh ang. Zahthlak theihpatawp ka tawng zo chiah a, enge ka la tih cheu anga?
.
“Miss Celik_”
“Nang kha ilo ngawi thei em?” Mordecai chuan hmeichhia chu nem lo zet hian a melh a, mak takin chu hmeichhia chu a la nui nia! Muangchang hian library atang chuan a kal chhuak a, inzahderna emaw mihring anga min en awm pawhin a awm der eih lo.
.
“Enge thil awmzia?” Mordecai chu ka panhnai a, ka la khur. Ka inthunun thei lo. A lutuk mah mah tawh ve em  bawk a ni.
.
“Engmah a ni lo.”
“Khatiang khan min rawn hmua engmah a ni lo maw? Nge ilo tum lawk reng zawk?”
“Chutiang a ni lo.”
“Sawitur pawh ka hre lo. Hmeichhe tan khatiang baka tlawma indah dan kha a awm tawh chuang lo. I sawi ang chiah khan hmeichhe a tak chu ka lo ni e. Min lo tanpui tawhna vangin lawmthu ka hrilh  nawn leh che. Mutpui mai che duhna rilru ka lo neih vang khan min ngaidam teh_! A thleng leh tawh lovang.” sawi tullo ka sawi tih ka inhria. Ka ngawi chawt a, a hmel ka en duh  tawh lo.
Ka theihtawka chakin library atang chuan ka kal chhuak nghal dawr dawr a. A tawng zui tih chu ka hria a, eng chiah nge a sawi hre turin ka ngaihtuahna a fim lo.
Rang takin he in atang hian ka kal chhuak ang’ Chu chiah chu ka ngaihtuah thei.
.
In atang chuan hmanhmawh thei ang berin ka kal chhuak a, ka mittui tla chu ka zah vang nge ka thinrim vang ka hre hrang phiangsen tehhrep lo!
.
Ka nep vang a ni. He thil thlen chhan ah hian tumah dem tur an awm lo, keimah hi ka ni_keimah hi.. Tu tan mah ka hlu lo a, infiamna hmanrua mai chauh ka ni fo a, tunah pawh ka la ni ta reng. Ka pasal min bumna leh min thah a tum hialna ai pawh khan tuna ka hun tawn hian min sawinghing nasa zawk hial ta ve ang. Mualphona tawp a ni e. Kha hmeichhe mitmenga min nuihzatna lang kha_ Mordecai_ “Ni lo__” ti hawkin kawngah chuan ka thu hnawk a.
Tunah chuan ka duh emaw duh lo emaw Jefferson ka pan ang. Mumal taka ka ngaihtuahna ka hmang leh phawt anih loh chuan Mordecai hmachhawn thei ka ni rih lo. 
.
VIDA – SheKnows
(Vee-Da)
.
By. Thantei_LauraSean
.

CHAPTER - 25
.
VIDA ELVES CAPPOLO*
.
Jefferson chenna hmun tunhmaa kan nupaa kan chenna ni thin ka thlen chuan khua a thim chhelh chhelh tawh. Hmun reh takah kalin ka ngaihtuahna tihfim tumin rei tak ka thu a, awmzia a awm tam lo khawp anih hi. Tunah pawh ka awm dan a dik tawk lo va, ngaihtuahna mumal ka la nei chuang lo.
.
Door bell ka hmet a, ka nghah deuh vang vang hnuah kawngka chu a rawn inhawng ta hram.
.
"Oh! I tha em?"
Jefferson chu ka chhang lo. Ka hmelah ka awmdan dik lo hi a lo lang viau a niang, dimdawi takin ka banah min rawn kai a. Hnial tur pawhin chakna reng reng  ka nei lo. In chhungah lutin choka lam min panpui a. Engmah a la sawi rih lo.
Dawhkan bula chair chu ka thutna turin a hung rem sawk sawk a. Choka chhung chu ka enkual lo thei lo. Ka kalsan lai ang chiah khan engkim hi ala awm vek. Engtin nge anih theih?
.
"Tui i duh em? I dang lutuk." Jefferson chu ka en a, eng maw a sawi kha?
.
"Engtin maw?"
"Tui i duh em? I thalo takzet anih hmel. I mu hahdam dawn nia. Zanin hi ka chhuah ngei ngei a ngai si a, nangmahin lo awm la hreawm iti angem?" a ti tak zung zung a. A hmel chu chiang lehzualin ka en a, lem a chang hauh lo ang. A nupui kan nihlai zawng zawng pawh khan hetiang taka ngaihsakna hi alak atang hian ka dawng ngai lo.
.
"Min ngaihtuah suh."
.
"Eng thil nge thleng?" tih pahin ka bulah arawn thu hnai a, chik tak hian a mitmeng mawi zet chuan min en ta reng a.
.
"Nakinah kan sawi dawn nia. Khawngaihin ka mutna tur min kawhhmuh thei angem?"
.
"Tehreng mai. Lo kal rawh."
Ka darah min kuahin choka atang chuan kan chhuak a, mikhual pindan atana kan hman thin lam kan pan tih ka hria.
.
Pindan chhung chu engemaw chen luah a ni tawh lo ang tih ka hrethiam a, banga lemziak intar enin ka nui sak. Hei pawh ka tar tho kha a ni.
.
"I inchhung chu a mawi hle mai." ka tih chuan Jefferson chu a hamhaih hmel deuh. A tukhum khawih zauhin a nui sak a. Engmah a sawi lo.
.
"Tikhan hahdam deuhin mu la, naktuk ah kan inbe dawn nia. A hma thei ang berin ka lo let leh ang."
Tim deuh tak si hian ka chalah min fawp zauhin puan min sin thattir a, min kalsan hreh hmel tak hian muangchang in pindan atang chuan a chhuak a.
.
Kawngka a khar rik khap hnu chuan ka mit ka chhing ta vang vang a. Ka mitthla a thil chi hrang hrang lang vang chuan ka thu chhuak leh hlawl. Mordecai hi ka haw miah lo! Ka hrethiam bik lo. Mahse ka haw lo ka tih vang hian hnaih leh tumna erawh ka nei miah lo. Thil pawi tak kan ti hman lo kha ka tan vanneihna a ni zawk tia ngaihtuah ka tum tang tang bawk. Tlawm vawng vawnga ka inhriatna chu lo let lehin ka rum chhuak hak a. Tih theih ka nei chuang lo. A hun a zir zelin ka nung tawh mai ang. Ruahmanna ka siamlawk ve in engmah a fuh ngai lo a, ka hlawhchham ngei ngei thin. Chuvang chuan ngaihtuah lawk vak vak lo leh pawisak nei lovin a tlachawpin ka che zel tawh ang.
.
Khumah chuan ka mu leh riai riai a, ka taksa leh ngaihtuahna hian chawlh a mamawh takzet tih ka hria.
.
Thawm ri deuh rawp ka hriat chuan ka meng zawk. Ka lo muhil hman a ni ngei ang. Che lovin thawm chu ka ngaithla a, he pindan atang hian pawnlam thawm a lo hriat hle tih tunah hian ka hrethiam ve chiah.
Ka hriat chu phun ser ser thawm a ni. Ka chhungril mur er er dan atangin thil tha a ni hauh lovang tih rindan ka nei mai. Thawm dim thei ang berin ka tho a, pheikhawk pawh bun lovin kawngka chu dimte  bawk hian ka hawng dek dek a. Mihring thawmhnaw dum veka inthuam Jefferson mutna pindana lut lai chu ka va hmu hman. Tunge ni ta ang?
.
Eng thenkhat a thim vangin ka hmu chiang thei lo a, a lehlamah chuan eng a thim then chu a tha zawk. Muangchang lo tak leh thawm dim thei ang berin Jefferson mutna pindan chu ka pan them them a.
.
"A in kalh. Engtin nge ka hawn dawn?__ A tha e... Ka hria... Shit! Zawngsena hian enge a hriat? Ka hawng thei lo.. Ok_Ok"
.
A aw atang chuan Kiara a ni tih ka hrechiang khawp. Thil awmdan hi a mak telh telh dawn tlat. Kiara hi tu nen nge an thawhdun?
.
Thawm dang a ri rap a, pen thawm chuan min rawn hnaih hle. Bang thim chinah ka bet rawp a, Kiara chu pindan atangin a lo chhuak zui hmiah. Tumah an awm lo tih hrechiang inti niawm tak hian ngampa takin kawngkapui lam a pan a. A chhuak mai dawn emaw ka tih laiin choka lamah a lut leh ta tlat mai. Choka ah tihtur enge a neih?
.
"Tunah ka chhuak dawn chiah. Ok_ Minute khat a tawk!"
Ka beisei loh lutuk hian cabinet a hawng a, bawm lian vak lo hi la thlain a hawng a, a chhung atang chuan lehkha a phawrh a. A thil lak tum saw eng thil pawh ni se kei hian ka dang ngei ngei ang.
.
In chhung zawng zawng light thununna khawiah nge a awm ka hria. Muangchang lovin in hmar thlang lam ka pan a, Kiara'n a duh a tih hmain light zawng zawng hi ka off hman a ngai.
Switch lian deuh tak chu ka off a, Kiara thawm ka hre zui lo. Ka hriatchian em em in chhung anih vangin ka tan chetbuai chhan tur a awm lo a, thima awmrei deuh chuan chiang vak lovin ka hmu thei thuai bawk a.
.
Choka lam ka pan leh chuan Kiara chu choka ah a la awm tih a thawm ri thet thet atang chuan ka hre thei. Hmanhmawh takin ka pan a, keimah ang bawkin thima a awm rei chuan min hmu thei rei ruai dawn tih ka hriat vangin muang thei ka ni lo. Ka hmuh theih hmasa ber hmanrua ka ban a, hmeichhe pakhat ve mai vaw thlu thei turin ka chak tawk.
.
A indap chawp da da lai chu thawm nei miah lo a panin ka bawh rawp a, a beisei lo lutuk vang nge a te thawt mai. A eng lai laiah nge ka khawih ka hre lo.
Kawngka a ri leh rak a, hlauthawng taka ka ngaihchan laiin Jefferson aw ka hriat chuan ka thaw huai mai. Kiara erawh ka la vuan reng.
.
"Esma?"
.
"Hetah ka awm. Light on rawh." ka ti nghal tawng a.
"Eng thil nge thleng?"
"I beisei loh thil a nih ka ring."
.
Jefferson chu muangchang lovin a che tih a thawm atangin a hriat theih. Light a on a, Kiara chu a mit a meng lo a, a che hek lo. Pawi lutuk khawpin ka khawih lo tih erawh ka hrechiang hle.
.
"What the fu*k! Eng thil nge?"
.
"Ka hre bik lo." tawng tam hun a ni rih lo.
.
"Engtin nge hetah hian Kiara hi a awm theih? Zanin khan meeting hmanhmawh thlak taka tel tur a nia. Hna pawimawh lutuk a neih thu sawiin a pha a_"
.
"He in a kal hi a pawimawh zawk ani ngei ang." ka lo ti zauh.
.
"Ka awih thei lo. He mihring hian ka hnunglam atangin min bei a maw?" thil thleng chu mak a ti lutuk takzet tih hriat  hian a nui hawk a, a sam a tuai puat puat a.
.
"A harh lo ami?" atih leh chuan Kiara ka vawnna chu thlahin ka ding chhuak a, thisen ka chhuah miah lo_ Ka thaw hawk mai.
.
"Han en teh."
.
Thinrim insehruh talh talh chungin Jefferson chu a thu hniam a, Kiara chhuata mu chu dim vak lo hian a biangah a khawih a. A phun sup sup bawk.
.
Kiara bag chu dim vak lo  bawk hian a la a, a chhung a lehkha awm a phawrh chuan tawngkam mawi lo zet a chhak chhuak zui a.
.
"Ka tan mi hlauhawm a ni tih hre tur ka nia. Ka ngaidam hauh lovang." Lehkha chu thlepin a kawrchung hak ipteah a khung hmak. Engthil tak ni maw?
.
Kiara chu a che telh telh a,a rawn men chhuah a Jefferson hmel a hmuh chuan a meng phar kawk kawk mai.
.
"Je_Jeff Honey_ I ngaih ang kha ani lo ania."
"Enge ka ngaihdan chu? Hetiang thil ka chunga i ti duh hi ka awih thei lo. I chunga ka tihtur hi i cho chhuah liau liau a ni tih i theihnghilh dawn lo nia. __Tho rawh_" a ti vin thawt a. Hetiang taka Jefferson thinrim hmel hi ka la hmu ngai lo.
.
"Kha lehkha kha i kawl tur ni lovin ka kawl tur a ni tih i hria_" Kiara chu a tim eih lo.
"Ngawi chipcham khan ka in hi chhuahsan rawh." Jefferson chuan hlauhawm theihpatawp hian Kiara chu a en a, ka lo ip deuh chawih thei.
.
"Heihi i in maw? Huh? Takzet che hian Jefferson_ He in hi i ta a ni amaw?"
.
"I tawng leh chuan khawvel ah hian i awmzui tawh lovang_" Kiara chu a hnaih a, a rek duh mai dawnin ka hria.
.
"Duhtawk ru_"
.
"He in atang hian chhuak nghal rawh."Jefferson hmel chu hnial ngam chi a ni lo. Kiara chu lungawi lo tak hmelpu chungin a kal a, "Thil dang i tizui ngam anih chuan i duhthlanna a ni ang."
.
Kiara chhuak chu ka en ve reng a, dimte a kawngka a khar hnu chuan a reh ta tlawk tlawk mai.
.
"Ka chungah hetiang thil a ti duh hi awih a har hle mai."
.
"Sawi ve tur ka hre lo. Thil pawimawh tak anih chu ka ring." ka ti sap a. Jefferson chuan min en tawp.
.
"I lo awm chu ka lawm takzet."
.
Chhang lovin dawhkan bul chair-ah ka thu a, ani pawh chu tawng miah lo hian in tur lain a kal ve bawk a. In tur chak tak a mamawh reng ang chu. Hetianga a che buai hi nuihzat tur ka nih laiin ka nuih a za lem lo. Ka ngaihtuah zawk chu an lehkha inchuh kha eng lehkha nge anih ang tih hi a ni.
.
Jeff chu in tur kengin  a lo let a, dawhkanah chuan no dahin a thli karh karh a. No chanve dawn chu a in nghal pawp mai. Ka duh ve leh duh ve loh min zawt niawm takin min melh a, ka lu ka thing ringawt.
.
"Ka lo ring ngam tawk lo che kha ka indem dawn hial mai a_"
Chhang lovin ka en a, a sawi awmzia chu ka hre lo.
.
"Ni e, Mordecai bula khawsa hmeichhia hi ngaihven hle mah ila ka ring hauh lo che alawm." ama thusawi chu nuihzat niawm tak hian a nui hul hak a. "Ka a tawh anih ber hi. Rin tur ring lovin rin loh tur ka thurualpui a. Kiara khan he thil hi tih ka ring ngai miah lo asin. Ka ring pumhlum ngai lo nain hei kher hi chu a tih ka ring lo__"
.
"Eng thil nge anih ka zawt thei che angem?"
.
"Ka nupui hmasa in min pek ram lehkha a nia. Kiara hian min dil fo tawh thin a_"
.
"Oh_" ka tisap ringawt.
.
"Ani kha ka hmangaih ngai miah lo nain min kalsan meuh kha chuan ka na khawp mai." a hmel chu uluk fe hian ka en a, a mitmeng ngui lap chu a der a ni miah lo.
.
"Pawi ka tihpui hle mai che. Accident vangin a thi tawh niin ka lo hria a."
.
"A dik alawm."
Zawh zui tur ka hre ta rih lo.
.
"Duhtawk rih teh ang. Hahchawlh i mamawh kha. Han mu leh tawh rawh. Naktuk ah khawiah emaw hruai che ka duh ang." a nui sak a, a hmel hi chu dik taka sawi chuan tha ka la ti em em reng. A mitmenga min rinna lang zauh pawh chu ka tan hmuh hreawm a ni hran lo bawk.
.
Ka thutna atangin ka tho a, ka tumlawk miah loh hian pan hnaiin a samah ka chul zauh a. "Muttui le." ka ti sap. Ka kal pelh hmain ka banrek ah min vuan a, ka hnial duh lo.
.
"Ka lawm e."
"Lawmthu min hrilh chhan tur a awm hleinem."
.
"Zanina thil thleng hian min thawng hle a, ka tan chuan thil mak tak a ni. Ka tan i inhuam thui hle tih alan vang hian ka lawm takzet." muangchanga dingin engmah sawi zawm lo hian min kuah vang vang a. A lungphu dap dap ka hriat chuan keipawh ka hahdam deuh huai__ Eng thil nge ka hriat leh tak pek? Hlauthawng suh! Jefferson hi ka mipa hmangaih ani tawh lo! A aia hlauhawm zawk, ka tlanchhiat san mek mipa hi Jefferson aiin a hlauhawm fe..
.
"Muttui le." ti leh sapin min kuahna atang chuan ka tal chhuak a, ka mutna pindan lam ka pan ta nghal a.
.
Beisei loh  takin ka mu tui hle.
.
Thawm ri rak rakah ka harh hlawl a, Khum sira Jefferson lo thu ka hmuh chuan ka harhchiang nghal kawk mai. Ka tho nghal vat a.
.
"Good morning, beautiful."
"Good morning.."
.
"Coffee i duh ka ring a."
.
"Oh, ka lawm e."
.
A coffee min pek chu ka ban vat.
.
"I in zawhah muangchang in han inthlak la, khawiah emaw hruai che ka duh a."
.
"Khawiah nge tih ka hriatlawk a rem em?"
.
"Ka hre lo le."
Jefferson danglam ka hmu leh ta. Tlangval tantir lai ang maiin a awm leh tawh.
.
"Hmun nuam tak anih ka beisei." ka tih chuan min thlahlel hmel taka min en vang vang hnuah ka samah rawn khawihin a tho ta vut a.
.
"Choka-ah ka lo nghak ang che."
.
Jefferson chhuak chu ka en reng a, a coffee min pek tui zet chu thlamuang fe hian ka in zui dalh dalh a.
.
Ka inbual a, zingkar routine ka tihzawh hnuah bathroom atanga ka chhuah chuan khuma thawmhnaw lo awm chu ka pan vat a. Bathroom ka awm hlan khan a lo dah a ni ngei ang.
.
Kawrfual par chiai, hak nawm hmel tak ka khawih chuan ka nui sak. Hetiang thawmhnaw ka hak lohna chin hi a rei ta hle mai.
Ka inthlak fel zung zung a, choka lam pan tumin pindan chu ka chhuahsan a. Eitur rim ka hriat chuan ka riltam tawh zia ngaihtuahin ka pum ka khawih zauh.
.
"Tui i tih ka beisei."
Dawhkana eitur in chhawp chu en kual dan dan in ka bu nghat nghat a.
"I siam vek a ni maw? A tui hmel hle mai"
.
"Ei chhin phawt la_ min la fak dawn nia.."
"Okay.." nui sak chungin chair-ah ka thu a, hun engemaw chen atang khan tun ang tak hian mumal takin tukthuan ka ei tawh miah lo tih ka ngaihtuah chhuah rualin Mordecai hmel ka mitthla zawm zat a. Ka hmel a lo danglam a ni ngei ang_
.
"I tha em? A tui lo viau ami?"
.
"No, chutiang ani lo. Mumal taka tukthuan ka ei khat tawh zia ka ngaihtuah chhuak a.."
.
"Ohh>"
.
Tawng lovin ka ei mial mial a, Jefferson chuan uluk takin min lo en reng bawk a.
.
30 minutes vel a ral leh hnu chuan in atangin kan inzui chhuak ta nge nge. Khawiah nge kan kal dawn tih a sawi loh vangin a car ah chuan ka chuang mawl ve tawp.
.
Darkar khat zet kan tlan hnuah hmun pakhat kan thleng a, boruak vawt deuh sur chu mak ka ti angreng. Tun ang hunah hetiang boruak a awm hi a mak ve reng reng bawk.
.
"A boruak a nuam hle mai. Helai hmun hi eng nge a hming?"
.
"Helai hi_" Jefferson ngawi deuh chawt chu ka en a, a melh lam ka va en chuan vung zet hian kan awmna lam panin Mordecai alo kal tih ka va hmu. Hmu lo ang taka lan tumin nui chung hian Jefferson chu ka en a. Kar a awm hman meuh lo, na zeta ka bana min vuantu chuan engpawh tise hmachhawn turin ka insangmar nghal at a. 
.
“Khawih suh..” Jefferson chu ka en vat a, engmah ti lo turin ka mitmei thuai a.
“Khatianga min tawng khum tur khan tunge i nih?” cho lutuk tak mai hian Mordecai chuan Jeff chu a en a, nimin maia ka chunga a thiltih vang khan intiam lohna pawh a la  nei chuang lo a nih dawn hi. Mihring ngaihtuahna pangngai nei a lo nih loh tawp hi.. A mitmeng thim raih chuan chik lutuk hian min melh a, a en chin chu a sa deuh ham ham hian ka hria.. Rapthlak hian!!
.
Ka banrek a vawnna chu  muangchang in ka en a, amah en lehin mahni inringtawk thei ang ber hian, “Tunge i nih?” ka tichang fal a.
.