Vida-SheKnows 26-39

VIDA – SheKnows
(Vee-Da)
.
By. Thantei_LauraSean
.
CHAPTER - 26
.
VIDA*
.
"Tunge ka nih?" ti nghutin ka banrek thlah chuang hauh lo chuan a mit tizim in min en a, a hmel en ringawt pawh chuan a ngeng tih hian a sawifiah zo lo. "Nimin-a ka khawihna__"
.
"Kha vang tak khan a ni tunge i nih tia ka zawh che? Ka hriat thin Mordecai Sloan_ Ni leh lo, Mordecai hi ka hmelhriat a ni reng reng em?" ka ti tha veleh ngat. Ka zawhna chuan a ngaihtuahna a tibuai ve deuh anih hmel, a lu a thing nak a. Jefferson erawh ka bulah a ngaihna hre vak lovin a lo ding ve tawp. Engpawh thleng se engpawh tih a huam tih a hmelah a lang chiang hle thung. Kan thusawi awmzia tak erawh a hriat atan ka duh fahran lo.
.
"Ka at vang anih kha. Hmeichhe fing tak ka ni lo tih chu i hriatsa a nia. Chuvang chuan nang leh kei hi inhmu in inbe fo lo ila a tha zawk tih ka lo ngaihtuah a." ti chung siin engahmah  ngai lo thei ang bera ka lan theih nan dam thlap hian ka banrek a vawnna chu ka phelh a. "Lo inhre sa tawh mah ula tunah hian a tharin inhmelhriat leh ula ka duh. Jeff, ani hi Mordecai a ni tih i hriatsa kha. Ka thian hlui anih hi." Mordecai chu enin pawisawilo thei ang ber tura ka ngaih angin ka nui lui a, alo ner sawk thung.
"Mordecai, ani hi ka bialpa anih hi. I chibai thei angem?" ka tih leh chuan a nui hawk.
.
"Nasa lutuk lo teh." a ti nghut a.
.
"Ka thian ilo nih tawh vang chauhin i lakah that ka chhuah anih hi_" ka ti leh hram.
.
"Lem lutuk lo teh!" a ti leh nghut.
.
"Oh! Jeff, kal ila." phur hmel takin Jeff banah ka vuan a, ani chuan a ngaihna ahriat loh hmel telh telh thung. Ka awmdan hi a puitling zia lo hle tih ka hre nain Mordecai hmuh phak loh a awm ka duh hluah hluahna vang hian ka ti lo thei lo a ni.
.
"Theihnghilh i nei a nia_" a tih pawh chuan ka hawilet duh tawh lo. Mangtha nan hawilet lovin ka kut ka phar zeuh duh chauh.
.
.
Thui pawh kan la kal hman lo tihah Jeff chu ding chawtin chiang zet hian min en a.
.
"I bialpa ka ni tak tak em? Nichina i sawi kha i fiamthu a ni lo tiraw?"
"Naupangchhia viau lo teh.." ka ti ringawt. Ka lo tih mah mah anih hmel. Eng thil tehhrep vangin nge kha thu kha ka sawirik reng reng  ni?
.
"Ka thutak a nia."
.
"A dik alawm." ka ti sap a. Engmah ka pawisa lovang tiin ka inhrilh rilru nghal mawlh mawlh. Mordecai khan eng ang pawhin min ngai se__chu chu ka lo ngaihtuah tur pawh ni lo. Hmela kha_ka haw hluah hluah! ka ngaihtuah rualin ka chhungril hian a haw tak tak tih erawh ka hre kur tho. Eng nge pawi??
.
"Ka lawm e. I hlim theih nan ka theihtawp ka chhuah ang."
Khawiah nge kan awm a ngaihtuah lo tih hriat tak hian min hmachhawn a dingin, ka bek tawn tawn ah min vuan a. Uluk takmeuh meuh hian ka chalah min fawp vang vang a. Ka awm nuam lo ru lutuk chu a ziaawm phah nia! Ka in hrethiam tawh bik lo. Hetianga ngaihsakna hi ka lo mamawh reng pawh a ni mahna le! Tunge ngaihsak leh ngaihven nih duh lo awm ang?
.
"Lo kal rawh le." ti chunga nuiin min kai a, min tlanpui a ni ta deuh ber a. Ka inring hman lo ka nui ri hawk hawk mai.
.
Thui deuh tak kan tlan hnu chuan hah vanga thaw hlawi hlawi chungin tlang chhip ah kan ding a, kan hnuai tuipui cham put, fawn hlup hlup chu kan en a. Kan tawng lo ve ve. Tuipui kama mihring awm  neuh neuh chu an hmuhnawm letling phian mai.
.
"Helai hmunah hian hruai che ka duhna a rei tawh a_"
"A rei tawh maw?"
.
"Um.. Ka hmuh hmasak ber tum che khan mak takin  helai hmun hi ka ngaihtuah nghal a ni. Ka naupan lai atanga ka lo suangtuah thin a nia.." a tih chuan a tawng chu uluk taka ngaithla in ka bu nghat nghat a. Ka tilui pawh a ni bik lo. A mitmenga thudik a sawi tih lang chiang lutuk vang chu ni berin ka hria.
.
"Mi vannei tak i nih chu. Suangtuahna ti hlawhtling thei mihring hi an tam lo asin."
"Ka hria alawm. Mipa vannei berah  min siam la tih hi ka duh ber a ni."
.
"Umm, i kal thuk mah mah ange?" tia ka nuih chuan ka fiamthu tih hrethiamin a nui sak a.
.
"Thuk tak thlenga kal ka duh alawm."
.
"Thil reng reng thatna nei chuan that lohna pawh a nei tel thin a nia."
.
Min chhang lo a nui chungin ka kut a vuan a, thutna tur remchang melhin kan tawlhsawn hlek a.
"Ruahmanna ka nei." a tih chuan ka en tawp. Tuna ka mipa hmuh hi mipa rinawm lo leh tenawm, min lo phatsan tawhtu mipa kha ani ta hauh lo mai! Nge? Kei hi bum nawnin ka awm mek zawk le?
.
"Enge?"
.
"Tun atan chuan ni rih lo rawh se. Nichin khan engmah kan ei hman ta si lo a, i ril a tam em?"
.
"Tlemin_"
.
"A tha. I thil ei tawh zawng zawnga tui ber ei i duh chuan min zui ngei a ngai ang." tih pahin a tho a, min pawt tho ve nghal a. Jefferson DeLourde hi mi thar ang mai anih tak hi!
.
Ni lengin hun kan hmang dun a, a naupan lai chanchin a sawi zingah chuan tunhmaa ka la hriat ngai miah loh chanchin a awm nual mai. Min ringtawk takin min hrilh a, mak ti takin ka lo en leh veng veng thin. Ka pasal lo ni tawh Jefferson nen khan a nunphung a danglam ta em a ni. Mihring hi hun reilote chhungin hetiang tak hian an danglam thei ang tih ka lo ngaihtuah chhin ngai miah loh vang a ni.
.
Khua a thim chhelh chhelh tawh tihah a chenna in ah kan let a, he in a awm zui hi ka tum hauh lo. Sloan mansion ah let leh ka tum chuan loh bawk vangin Hotel-a awm ka duh thu ka sawi chuan Jefferson chuan min en vang vang a.
.
"A tha alawm. Sawm lui che mahila min hnial dawn tho a."
"Min va dah theih chuan a lawm ngawt ang."
"Thil chiang sa a ni. Min lo nghak lawk la, kawrlum ka'n ha lawk ang e." tih pahin a pindanah min luhsan a.
.
Cappolo Hotel kan pan a, he hotel hi ka nu leh pa leh kei, Jefferson nuna kan awm loh china din a ni. A la tharlam khawp mai. Jeff chuan a chhuang ru hle tih ka hria a, tunge ka nih chiah hria se ka lakah a tilang hauh lo tur hi ania.
.
'I duh chen chen hetah hian i awm thei ang."
"Ka lawm e. Mahse a thlawn a awm ka tum hauh lo a nia." ka tih chuan a lawm chiah lo a ang.
.
"Chu chu sawiri tawh miah suh." a ti hmak.
A thlawn a awm erawh ka tum lo bur reng tho nain ka ngawi ta zawk. Mi thilphalna mahni hlawk nana lo hman hi ka duh ngai hauh lo a, nakin zelah pawh ka duh  ngai chuang lo ang.
.
Hotel atanga Jefferson a kal chhuah meuh chuan zan dar 10 a hnai thuak tawh. Chhun lama kan hun hman dan vangin ka chau ve deuh anih hi. Ka mut a chhuak chiai chiai a, ka thawmhnaw hak lai phelhin mutnaa hak tur thawmhnaw awmsa chu ka ha a, khumah chuan ka mu ta kak a.
.
Ka pindan kawngka kik thawmah ka phu chhuak zawk mai. Sana ka en vat a, darkar khat vel bak ka la muhil lo tih ka hre thei. Kawngka ka hawn loh chuan a reh leh mai ringin mutthilh lehnghal tum hian ka inlet thawk a, mahse a hma aia ringin a la in kik ta cheu. Thil pawimawh a ni maithei tih ka ngaihtuah__ Rikrum thil thleng pawh a ni palh thei_ Ka harh chiang nghal kawk mai. Thawm ka ngaithla a, thil danglam thleng thawm chu ka hre lem hlei lo a. Kawngka hawng tur chuan ka tho chhuak ta nge nge.
.
Ka mutkawr hak chu pawt phui tat tat chungin kawngka chu ka hawng a, Mordecai chu engmah sawi lo hian rang lutuk takmeuhin a rawn penlut nghal a. Dan hman ngaihna a awm lo. Kawngka chu a kalh nghal hmiah. Kan pahnih chauha inhmachhawn hi ka chak zawk zawk lo asin.
.
"Enge i rawn tih dawn?" ka tih rual chiah in, "Eng thil nge tih i tum chiah?" a ti thum chhak a. Tawng zui lovin kan inen leh ren rawn..
.
"Sawi duh i neih chuan sawi la, min chhuahsan leh nghal ang che."
"Chu thil chu a thleng lovang." a sawi ang hian a awm ngei ngei ang.
.
"Mahni chauh in ngai pawimawh chi hi chu khawiah pawh hmuh tur an awm zel dawn anih hi_" amah ngai pawimawh lo anga lan tum tak chungin khum ka pan a, ka tawng chu a hre phak em tih pawh ka hre lo. A hriat tura sawi chu ka ni tho a_
.
"Min ngaihthah lo la itan a tha zawk ang." a mitin min umzui a, amah chu a ding nghet ngur lawi a.
.
"Ngaih pawimawh i ni e_" ka tiliam leh puat. A thaw halh ri chu ka hre phak nain ka ngai pawimawh duh chuang lo. Ni e, hetiang hian awm khum ila a tha zawk. Eng tih tumin nge a lo kal reng reng ni? Hetah hian ka awm tih engtin nge a hriat reng reng?
.
Khumah ka lawn a, a hmaa ka mut ang chiaha mut leh tumin puan ka hlim a, rem zet hian ka mu leh ta than a. Mordecai chu a awm ngaia awmin min la en ngar ngar tih ka awm nawm theih miah loh dan atang chuan ka hria.
.
"Tho teh." a ti sup a, a tawng chu ka hre thei tho nain a zawi lutuk mah mah a ni. A hlauhawm tel lek lek bawk. Ka che ngam tawh lo.
.
"Nimin mai khan hmangaihna min chenpui inpeih thlapin i kut ngei khan min khawih a, kha i kut ngei khan mi tenawm Jefferson i khawih lehnghal a. Vawiin khan eng thil nge i tihpui? Nang hian i mutpui a maw? Hetiang taka mipa mamawh i nih chuan__"
.
"Ngawi hmak rawh!" engtik laiin nge ka lukham kham lai chu a bulah ka vawm phei hman ka hre lo. A tawngkam hman vang chuan ka sa zawk ni berin ka hria. "Chu thu sawi tur ringawt a ilo kal anih chuan chhuak nghal rawh_ CHHUAK RAWH_"
.
"Kawngka saw a inkalh niin ka hria_" ngeng ngulh hian min rawn pan hnai a. Min tham lo lutuk mah mah nia ka inhriatna chuan min tina in min ti thinur khawp mai.
.
"I landan chu a nalh takzet_" a tawng ka hriat rualin ka awm ka khawih vat a. Lukham ka vawm khan ka kawrhak hmalam suihna a lo inphelh tih ka lo hre miah lo. He kawr phiangsen pawh hi.. Eng thil mah hi ka lamah hian an tang lo anih hi!!
.
"Ka nalh thu hrilh nawn ka mamawh lo. CHHUAK RAWH_"
.
"Nah! Zan a rei tawh a, mut a hun." tih pahin a kawrhak hmalam kilhna a phelh mial mial a, a mit a ka en chu ka tisual chiah bawk.
A tawngkam chauh hriata min deuhsawh nia ka inhriat laiin a mitmeng chuan thu dang daih a sawi.. Rapthlak lutuk! Vida_I va han nep ber mai em!
.
"I kut hmawr pawh khan min khawih lovang." ka aw a khur a, ka hlauthawng tih a lang ta vek mai le. Ka inrintawkna zawng zawng pawh a bo nghal vek. Rapthlak ti zet hian Mordecai chu ka en a, a landan thim deuh raih chuan ka taksa ah hian nghawng a nei nain ka hlauhthawnna a nasa zawk. Ka chungah thil tenawm ber a tihluih duh ka ring lo chungin ka hlauhna chu a nasa lutuk. "Ni lo_" ka ti thawt a, a ding nghal chawt. Hlauthawngin ka thaw nghal hlawp hlawp anih chu! Rapthlak lehzel hian__
.
A mitmeng danglamin min rawn hnaih a, ka lo tawlhsawn thung a.
.
"I tha em?" a aw a min ngaihtuahna chu hai theih a ni lo. Inthunun ka duh a, mahse ka awm dan hi ka hrethiam lo. "Ka tihpalh!" a tizawi sup a, khum bulah chuan a ding ta reng. Chhang lovin ka maimitchhing ta ngawt a. "Tih hlauh che ka tum miah lo_ Ka a tawh a nih hi." ti chungin khum sirah chuan a thu a, a hmel chu ka hmuh duh lo niawm tak hian a kun ta daih a.
.
“Ka tihpalh_” a ti leh ringawt. Ka la chhang chuang lo. “Jefferson kianga i awm ka hmuh vang khan nileng in ka awm a nuam thei lo a. I him em tih ka ngaihtuah nileng asin. Ka thinur a, i thinlung neitu ka ni lo tih ka inhriat vangin thinrimna in ka khat a. Hetiang hian engvangin nge ka chungah a thlen? Hmangaih tur che hi ka ni miah lo! Tunah pawh hlauin ka siam che a nia. Engmah ka ngaihtuah dik thei lo.." ka awm dan ngaichang in min rawn en zawk a, a ding ta thut a.
.
"Ka kal phawt ang e. Tihnat che ka tum ngai lo_ Chu chu i hria_"
.
Kawngka pana a kal chu ka en a, min hmangaih a duh lo maw? Min hmangaih a duh lo anih chuan__ Min hmangaih tawh reng tihna a ni.! He khawvel ramzau ah hian eng thil  nge thleng ta hi?? Mordecai Sloan hian min hmangaih a duh lo anih chu!? I lo hria em??
.
"Anih chuan tlawm ngawih ngawiha min siam hi i tawp thei tawh angem?"
.
A ding a muangchang hian min rawn en a. A taksa chu a zawi ve hnawk ni hian a lang.
.
"Ka tihpalh_" tih chiah a sawi. Thudang sawi tawh miah lovin ka pindan atang chuan a kal chhuak a.
CHUAN, thil dang daih.. FLABIA FRESH HI LO JOIN VE RU. BUSINESS PLAN A THA, NIKUM JUNE-A LO LUT CHAUH KHA A NIA, BELHCHIAN A DAWL KHAWP MAI. A FREE IN MEMBER ANIH THEIH A, SUM SEN TAM NGAI SI LOVIN MAHNI KEA DIN THEIHNA CHANCE THA TAK A NI. LO JOIN VE NGEI NGEI RU.
VIDA – SheKnows
(Vee-Da)
.
By. Thantei_LauraSean
.
CHAPTER - 27
.
VIDA*
.
Ni thum chhungzet chu Mordecai nen kan inhmu leh ta lo. Ka tum em vangin a chungchang ka ngaihtuah lo viau a, ka hun tam zawk Jefferson nen kan hmang bawk. Kiara kan hmuh tura a awm ta miah lo chu mak ka tiru viau a, Jeff erawh engmah ka zawt lo. An inkarah eng thil nge thleng zui ka hre hek lo. Vida Elves Cappolo ka ni tih rinhlelhna a nei miah lo tih a chiang a, ka tan chuan a tawk em em. A thinlungin min hnaih tih ka hria a, duhtawk chin erawh ka nei dawn hauh lo. Mihring chuan a aia tam zel kan duh thin ani lawm ni kha?
.
Ka phone nghawr dar dar chu ka bag atanga phawrhin caller ID ka hmuh chuan ka nui sak. Thursday a ni tak alawm_ Phone chu ka pick up thuai a.

"Dar 2 hian hun ka nei dawn a, ka lo hruai ang che."
"Hotel ah ka awm lo a, vawiin chu kan inhmu lo mai dawn em niang?"
.
"Ka ngai che alawm."
"Umm_chuti anih chuan zanriah ei turin hun ka lo siamrem ang. Zan dar 7 velah  min lo hruai dawn nia." ka tih chuan ngaihdan ni chiah lo tih hriat hian a thaw hak a. "Zanriah min eipui duh l anih pawhin tihtur dang ka nei tho a." ka fiamthu tih lantir nan ka nui lui hak a, a rawn chek tlak thung.
.
"Okay. Dar 7 ah chuan ka lo hruai ang che." a ti ta nge nge.
.
Phone ka off a, ka thutna atang chuan tho vin ka tum hmun panin ka chhuak nghal a. Zan dar 7-a kal chhuah ka ngai dawn anih chuan chumi hmaa tih ngei ngei tur thil ka neih hi thulh thiang a ni lo bur.
.
Darkar thum zet a ral leh ta.

Ka bag chhunga ka thil duh tak awm chu khawih leh zauhin zana ka thawmhnaw hak tur lei tumin ka kal leh a, ka thawmhnaw tam zawk ka leina dawr ka thlen chuan Juni chuan a dan ngai tein min lo lawm var a.
Brand thar ber ber arawn phawrh zung zung a, amah chuan min thlansak a ni leh ta deuh ber. Tuna ka hmel ka neih hma pawh khan helai hmun tho hi ka pan ngar ngar thin. Khawvel hriata langsar kutchhuak awm khawmna hmun ni lo mah se ngainat zawng riau hi a awm ve a, a man to zawng ringawt hian min tibuai tehchiam lo.
10 minutes vel zet chu Juni tawng ka ngaithla a, sawiduh hi a ngah ve em em reng mai a ni. Hlim tak leh lungkham em em nei lo va a titi hi hmuh a nuam riau alawm. Kan ngaihtuahna inpersan lutuk thin erawhin nuih a tiza zawk thin.
Ka hnunglama thawm awm chu a rin tak deuh vangin ngaihven duh lo viau mah ila en loh theih a ni ta lo. Ka beisei loh lutuk ber Mordecai nen kan inmelh chiang teh e. Ka hmel min hmuh rual chuan a lang rum deuh sawt ni hian ka va hmu pek a nih chu. Ka ngaihdan mai mai pawh ani ve thei tho. A bula hmeichhe awm pawh chu a ngai bawk. Ani chuan min rawn hmu lo thung. Pir fe a dak chung hian Morai chu a hmachhawn a, Morai chu a zam bik hauh lo tih a hriat hle.
.
"Miss Gwen i duh ang siamna turin hun a awm tawh lo. I duh chuan i duhthusam ang tak dawr chu pan mai rawh." Mordecai chu a melh zauh a, a tawngkam chu a inhmeh lem lo khawp mai tiin ka lo ngaihtuah hman. Morai hi mi nunnem tak leh tawng tam lo tak a ni tih ka hrechiang a, tawngkam mawi hnai tak pawh zawng hman lo a a tawngkhum ngai khawp chu a tuar theih chin a pel hle a ni phawt ang.
.
"Mr.Sloan, khawngaihin min chhuahsan  mai rawh u. Khatiang taka in ngaih hniamna tawngkam kha ka la dawng ngai lo." a ti nghet charh charh mai.

A hmaa ka lo hmuh tawh thin ang bawkin Gwen chu a tlawm dawn lo tih ka hrethiam.
"Huh? He dawr ka rawn rap duh ringawt pawh hi lawm tur i nih laiin khatiang khan min tawngkhum ngam a maw? Zak teh_"
.
Morai chuan dawhtheihna pan takin., "Khawngaihin_" a ti leh nghat.
.
"Min hrethiam r'u" tih pahin Mordecai chuan Gwen chu a kai a, dawr atang chuan an kal chhuak a. An kal liam thleng chuan kan en thap. An liam rualin an thaw ri huai hlawm a.
.
"Khatiang mihring kha vawikhat pawh hmuh leh ka duh tawh lo..SHH..SHH" ti tlak tlak chunga kut vaiin Morai chu a kal sawn a, Juni pawh lu thing mat mat chungin a thawmhnaw ken lai chu a khawih zawm leh mai bawk a.
.
"Kha nu kha chu ahma atangin ka ning tawh. Mr. Sloan bulah khan engtin nge a awm theih zawk ni?"
Mordecai hming a lam rik chuan min rawn melh zauh a. A hmaa chanchinbua kei leh Mordecai chanchin an ziah kha a lo chhiar ve ngei tih ka hrethiam. A chhe thei ang bera ka chanchin an ziah zawng zawng nen__ Juni chuan a awm a thian kharh a, "Tihpalh."
.
"A pawi lo. Hun liam tawh alawm." ka lo ti thuai. Sawizui ka duh lo tih a hrethiam ang. Min zawt pawh ni se, khang thil zawng zawng kha thu diklo anih thu sawi tumna pawh ka nei chuang lo.
.
"Khang thil kha ka ring miah lo a nia. Ka hre ve che niin ka inhria a.."
.
"Juni, a tha vek alawm. Ka kawr hak tur chu i thlang vat zawk teh ang." ka ti ta zawk a.
"Okayy.. A dum aiin serthlum rawng hi ha la i mit rawng nen khan a inchawih zawk ang. Han ha chhin phawt teh.."
.
Ka duh kan thlang fel a, muangchang tawh lovin hotel ka pan nghal a. Jefferson lo thlen hmaa lo inpeih hman ngei ka duh.
.
Uluk thawkhata ka insiam zawh hnu chuan Jefferson lo thlen hun nghakin ka  thu a, ka ngaihtuahna a Mordecai awm tlat chu ka duhlo takzet. Ngaihtuahna thunun thei nih ka mamawh leh ta anih hi. Lo inhmu fuh lo tawp ila tha tur.
.
.
MORDECAI SLOAN*
.
Ka rin loh tawpna hmunah khan eng thil nge a lo tih tehhrep! Min rawn en chiang a nih kha. Gwen lah zahthlak takin a khawsa ta lehnghal a. Khatiang nungchang kha alak atang hian ka beisei lo. Midang hmu hniam a deuhsawh ngam tur khawp mihring hi a awm theihin ka hre lo a ni. Engtiklai pawhin mihring dinhmun hi a inthlak thei reng a__ Chu zawng ai chuan Vida khan khalai hmunah khan eng thil nge atih tih ka ngaihven zawk tur a ni lawm ni. Tun ni tam vaklo liam ta chhung khan kan inhmu lo a, hotel-a ka va kal kha vawiin tih lovah ka hmuh hnuhnun ber ani. Eng thil nge a tih ang' tih ngaihtuah in ka ngaihven reng a, engmah hriat theih lohin a khawsa tlat. Heihi thil tha a ni lo.
.
"Sloan, ka inpeih. Kal ila."
Thawmhnaw rawng lar zet ha a Gwen lo chhuak chu ka lo en reng a, a vul tekmeuh anih hi mawle!
.
"Khawi lam nge kan pan dawn? Ka ril a tam tawh over.." a tih chuan ka chhang buai peih rih lo. Ngawi rengin motor ka khalh chhuak a.
.
La Trattoria kan thleng a, zanin khera Gwen hruai chhuah ka lo intiam hi ka inchhir hial tawh.
.
"Whoa! A nalh lutuk." a hawi kual a, helai hmun ala kal miah lo  hi mak ka tiru viau thung. He hmeichhia hian eng thil nge a tum ruk ka hriat rual rualin ka hlat dawn tih inhria se engtin tak awm ang maw? A nungchang hi a khamawm thawkhat tawh hrim hrim. Vida venhim ka duh vang chauh hian ka la tuar hram hram a ni.
.
Kan table hauh min kawhhmuh tu chu kan zui a, Vida leh Jefferson inhmachhawn a lo thu ka hmuh chuan ka hit deuh mup thei nia! Phiangsen hian! Helai hmunah kher engtin nge an lo kal ve theih? Khawpui chhung ah hmun tam tak zanriah eina tur a awm laiin.
Vida kut chu Jefferson chuan a vuan a, huat loh hmel tak hian Vida chu a nui seih seih a. Ka kut ka hum ruh ta ringawt. Gwen hian hmu lo se ka duh takzet. Ka duh chu a hlawhchham tih Gwen min rawn nghawk salh chuan ka hrethiam nghal bawk.
.
"Engmah sawi suh." ka ti hmuk a. Gwen chu ka kai nghal a. Vida chuan min lo hmu em tih ka en tawh lo.
.
Zanriah chu mumal pawhin ka ei ta hrep lo. Vida awmna lam chu ka melh ru zeuh zeuh a, min rawn hmu awma a awm miah lo chu ka lungawi lehsi lo. Be tura va pan erawh tum lo tak ka ni.
.
"Thil thleng palh ni tur atan chuan a mak mah mah lo maw?" kan dawhkan kil bula Vida ding chu ka melh a, Ka thluak in hawisawn leh mai tura min duh laiin ka mit erawh ka lasawn mai thei lo. A kawrhak serthlum rawng chuan a mitmeng chu mak tak hian a tilang  nung ser ser a, enghelh nei miah lo niawm taka min nuih chuan min tilungawi lo fe bawk. Hetianga min hmachhawn tur hi a ni miah lo. A ni lo hulhual. Ka hawisawn a, chhan ka tum lo. Ka duh loh tawp dana ka chet mai loh nan ka inthunun a tul zawk.
.
"Zanriah kan ei tih i hmuh ka ring." Gwen chu a vin deuh hlar a, ani hian chhan tha tak vangin Vida hi a haw hle tih ka hre tawh a, hetianga a chhang pawh hi a mak hran lo.
.
"A dik chiah. Hun hman nuam ule." tia inher in Vida chu a kalsawn a. Jefferson lo nghahna lam a pan tih ka hmu.
.
"Saw hmeichhia sawn engtin nge ala biak ngam zawk__"
"Ngawi hmak rawh." ka tih chuan a tawng tawp chawt a. Engmah a sawi zui ta biklo. Ka mood hi a fuh lo tih piahlam a ni ta.
.
La Trattoria kan chhuahsan chuan ka thaw huai mai. Gwen chu a chenna hmunah ka thlah a, vung zet hian Mansion lam panin ka kal lehnghal a. Mansion ka tlawh lohna chin pawh a rei ta. Vida kal chhuah hnu khan ka la kal leh ta miah lo.
.
Ka phone nghawr dar dar chu ka pick up thuai a.
.
"Jasper, sawi rawh."
.
"Zawng tura min hrilh kha ka hmu tawh e. Tunah hian Mansion ah ilo kal thei angem?"
.
"Ka lo thleng tep."
.
Motor chu chak lehzualin ka khalh a, Jasper thil hmuh chhuah chu ka hrechak tih hian a sawifiah zo lo.
.
Mansion ka thleng a, car pawh hung rem lovin in chhungah ka luhsan nghal a.
.
"Jasper."
.
"Sir."
"Library-ah lo kal rawh."
.
Library-a ka thut fel hnu reiloteah Jasper chu file pawm chungin a lo lut a, a hmel landan atang chuan chanchin tha lam ka hre ngei dawn niin ka hria.
.
"Min han entir teh le?"
.
"He file hi Jefferson hnena pek JEFFIDA ni thin JEFFIRA tia hming thlak tak ram dinhmun enfiahna a ni a, tunah hian Jefferson hmingin a awm lo. Mak i ti khawp ang."
.
"Thil mak anih loh chu." ka lo ti hmanhmawh."
"Sir, thil mak ni e. Jeffira ram hi Kiara hmingin a awm tlat a ni. Hetiang anih chuan Jefferson hian a chan nasa khawp ang. Saw ram hlutna saw a namai lo lutuk."
.
Ka rin loh dan a ni ta tlat! Jeffira ram hi Jefferson hminga a awm lo anih chuan Vida hming emaw ESMA CELIK hmingin a awm ngei tur a nia. Ka hrethiam ta lo tawp mai. Kiara hian Jefferson hi a  hnunglam atangin a bei reng tihna a ni. Thil thleng thei chu Vida leh Jefferson inkawp leh hi an thutak hle a, chu chu Kiara hian a enliam dawn lo tihna a ni thei!
.
"Ka ngaihtuah hi a dik em?" ka tih chuan Jasper chu a hawi a hau  mai.
.
"Sir?"
"Jefferson leh Esma Celik inkar hi thudik tak hriat ka duh."
.
"Thil harsa a ni lovang." Jasper chuan a lo ti awlsam et a.
Keimah ngei hian Vida ka hmuh a tul niin ka hria. A dinhmun hi a him hauh lo nia hriatna lian tak ka nei bawk. Ka venghim zo lo anih chuan ka in ngaidam thei dawn hek lo.
.
Jasper a chhuak a, ka thutna ngaiah thuin ka ngaihtuah nasa khawp mai. Sana inkhawng ri bul bul chu enin zan dar 12 a ri der tih ka hmuh chuan ka thutna ka thawhsan ta chauh a. Tunah hian Vida hmu turin ka kal mai ang chu. Midang ka atanga hriat ai chuan amah ngei hmuin ka duh ka zawt thei reng alawm.
.
Vida awmna Hotel panin car ka khalh chhuak a, reception counter-a Vida lo thu ka hmuh chuan ka pan nghal vat a. Tun ang zan rei tawhah a pindana a awm lo chu thil thleng a awm a ni ngei ang. A hmelah chuan chiai hmel emaw thil diklo thlen vanga mangang hmel a lang hauh lo thung.
.
“Eng thil nge thleng?” Vida chu hmachhawn lovin receptionist chu ka en a,
“Ah_ Sir?”
“Eng thil nge thleng ka zawt che anih chu.”
“Um_” ka beng bulah a rawn awn hnai a. “Miss room-ah hian thil thalo tak hmuh a ni a, tunah police ten an enfiah mek..”
.
“Chutiang thil a thlen lai chuan amah hi hetah hreawm takin engtin nge in lo awmtir theih?”
.
“Sir, amah hian hmun danga kalna tur a neih loh thu a sawi a, thuneitute pawh an lo thleng tep ang.”
.
“Kalna tur i nei lo amaw? Khawiah nge__”
.
“Khawngaihin, buaina tur a awm lo. An enfel zawh hunah ka pindan ah chuan ka lut leh mai dawn alawm.” ka bula vawt a ti tih hriat taka ding Vida chu ka en a, ka lu ka thing ringawt. Tunang dinhmunah hian engtin nge a pindana let leh a ngaihtuah theih zawk? Awm ang lo leh lutuk.
.
“I pindan ah chuan i let tawh lovang. Min lo zui rawh.”
Ka inheiat hmain a banrekah ka vuan a, rang zet hian ka vawnna atang chuan a tal chhuak vat a.
.
“Min ngaihtuah avangin ka lawm lutuk. Mr. Sloan, min hruai turin Jeff a lo kal mek a, a lo thleng tep ang.” Thil pangngai leh anih dan tur dik tak ang mai hian chu thu chu ka hmaah hian a sawi anih chu! A hmel chu chiang zawkin ka en a, a hmaa min en thin dan mitmeng leh tuna a mitmeng hi a inang ta hauh lo. He thil hi enge a nih phiangsen??
.
“Jefferson bulah chuan i him tawklo tih vawi engzat nge ka hrilh tawh che.” mi dang hriat phak loh tura zawiin ka tawng a, ka thinur rukna chu ka insum  a tul tih hrechiang bertu ka ni.
.
“A bula ka him lohin tu bulah nge ka him chuan? Min ngaihniam ngawih ngawihtu bula awm ai chuan min ngaihsaktu bula awm chu a tha zawk daih.” Hei pawh! Thu pangngai sawi ang maiin a tawng leh ta? Tuna ka hmaa ding, chiang taka min entu hi ka hriat thin Vida Elves Cappolo, phuba lak duhna a khat hmeichhia kha a ni ta hauh lo! Engtin nge huatna nasa tak a pai zawng zawng te kha hun reilote chhungin a bo theih? Thil theih loh hulhual a ni.
.
“Harhchhuak rawh.” Hnai set sawtah ka en a, danglam miah lo hian min enlet kal lehnghal a.
.
“Ka harhchhuak tawh a lawm.”
.
Chunglam khian min pui mawlh teh se! Ka hmaa ding hmeichhia hian ngaihtuahna fim a neih theih nana ka thin nawk loh nan min pui hram rawh se!
.
“I a tawh anih hi.”
“I sawi dik chiah.” a ti leh hmiah. Tihngaihna a vang khawp mai.
.
Kan piah deuhah chuan thawm a ri hak a, ka hawi phei chuan kan lam pana Jefferson lo kal hlawk hlawk chu ka hmu nghal a. Ka chhungril awm dan hi ka sawifiah thiam lo.
.
Kan bul a rawn a thleng a, min ngai pawimawh lem lo taka min en zawkin Vida lam chu a hawi nghal a.
.
“I tha em?” tih pahin Vida chu a kuah a, a hmel phelh deuh phung atang chuan a hlauthawng ve tawk hle tih pawh a hriat. Ka tana chatuan tluk zeta rei an inkuah hnu chuan an inthlah ta hram. Jefferson chuan Vida dara kuah chungin min rawn en a.
.
“Hetah hian enge i tih?”
“Min zawhna ang chiah chu ka zawt thei ang che?” ka ti hmuk a.
.
“Heihi ka Hotel a ni tih i hria a, ani hi ka ngaihzawng ani bawk a.”
.
“Um_ Hriat a nuam hle mai. I ngaihzawng hi i venghim zo ngei tur a ni dawn lawm ni?”
.
“Ka venghim ngei ang.” tih pahin Vida chu a en a. Sawitur pawh ka hre ta hrep lo.
.
“Hriat a nuam hle mai. Kan inhmu leh thuai dawn nia.” Tih pahin ka kalsawn a, an phun zui sep sep chu ngaihthlak pawh ka duh tehhrep lo. Ka chhungril so  bulh bulh hi ka bengdaih thuai a tul hmasa ber.
.
Mansion lamah kir tawh lovin ka nu chenna hmun ka pan a,   chiang zawk leh uluk zawka ka ngaihtuahna ka hman a tul. Thil awmdan hi a chuar hnawk telh telh nimai hian ka hria. Ka nu bulah chuan rilru hahdam deuhin ka awm thei mahna.
.
.
Kar khat chhung zet chu Vida hmu lo turin hun ka hmang a, Gwen pawh ka hmu lo. He hmeichhia hian Vida awmna hotel pindana thil thleng nen khan inkungkaihna a nei em tih ka chhuitir mek a, chanchin hriat tur a awm eih lo. Jefferson chungchang thu thar hriattur a awm miah lo bawk.
.
Jasper min kohna hmun panin car ka khalh a, file thenkhat ka enpui ngai a awm vanga inhmu tur kan ni. La Trotteria hmunah kher hian engvanga min ko nge anih erawh a hmun ka thlen hunah ka hria ang chu.
.
Ka tum hmun ka thleng a, Jasper min lo nghahna lam ka pan thuai a. A bula bag te chhe lo tak a dah ah chuan ka tan thil pawimawh a awm ngei ang.
.
“Min lo nghak rei tawh em?” ka ti thuai a.
.
“Ka thleng fel ve deuh chiah. Ka thu hriat hi i awih thei lo zawk ang.” Jasper hmel chu a hlim sur a, angaihna ka hrelo lek lek mai.
.
“Sir, Jeffira leh Cappolo Corporation chungchang a nia. Mak takin Cappolo Corporation hian__”
Kan piahah chuan thawm a ri huk a, hlim thawm nge hlau thawm tih pawh hriathran hleih theih lohin thenkhat chu an ri le lu a. Ka hawi pheia ka thil hmuh vang chuan ka ding zawk mai! Engtin nge a nih theih? Thil intawng fuh nge ka vanduaina a kal tluang ve hrim hrim pawh ka hre hrang thiam tawh lo.
.
Vida chu dingin a phawk deuh hra a, a hmaah Jefferson chu zungbun bawm keng chungin a thingthi a. Anmahni hmu thei zawng zawng chuan thil thleng tur ngaichang in an vek__keipawh tiamin!!
.
“A ni thei lo!” tiin ka phun hluk a. Jasper tawng ka hriat hma chuan ka tawng chhuak tih pawh ka lo inhre lo.
“Kan ngaihdan a inang chiah.” a ti vei hluk a. Min ngaihuah fe niawm tak hian min la en ta lehnghal. Ka awmdanah hian Vida laka ka rilru puthmang hi ka lo thup thei lo viau em  ni?
.
Jefferson chu eng thu emaw hi a sawi a, an bulhnaia awm te chuan khawvela thil romantic ber hmu niawm  tak hian thawm an lo chhuah hak hak bawk a. Ka lungphu chu a ri ring ta mah mah ni hian ka hria.
Thawklehkatah a reh ta duk mai! Thawk lain ka maimitchhing a, thil thleng tur chu  hmuh ka duh lo.
.
‘Ka tihpalh lutuk, ka nei thei lovang che!” Vida tawng ri ka hriat chuan ka meng a, anmahni hmu phak leh an thawm hre phak, kan vela awm zawng zawng chuan thawm chhuah nachang hrelo leh makti hmelpu in kan en thup a. Kei leh Jasper ngei pawh tiamin!!
.
“Oh God!!” ti paha Jasper thu hnawk chu enin ka nui ta suk a.
.
VIDA – SheKnows
(Vee-Da)
.
By. Thantei_LauraSean
.
CHAPTER - 28
.
JEFFERSON*
.
"Ka tihpalh lutuk, ka nei thei lovang che!”
Esma hmel chu tim deuh takin ka en chho a, ka bing mup mup ringawt. Eng thil  nge thleng mek hi? Hetiang baka zahthlak leh zahna nasa hi ka tawng ngai hauh lo. Ka ngaihtuah phak loh zahna nasa tak a nih hi mawle! 'Aw' tia min chhan ngei ka ring asin. Ka theihtawp takmeuhin a rilru hneh tum hian ka bei a_amah neih ngei hi ka tum ruh hle bawk anih kha. Tunah 'aw' tiin min chhang rih lo mah se nakin ah chuan min la nei dawn tho.
.
Esma chu rawn kun hniamin a kut zen thlarh chuan ka dar tawn tawnah min vuan a. Chu chuan ka zahna tlemte pawhin a tinep lo. Kan vela awmte chuan min en vek tih ka hria a, tumahin thawm an chhuah lo chu a zahthlak lehzual. Min nuihzat thawm tal awm se la a zia deuh mahna! A zahthlak zual zawk mai thei bawk.
.
"Ka tihpalh lutuk. Hetiang thut thut hi ka lo beisei hauh lo a. Khawngaihin tho teh." tih paha min kaihthawh tumtu hmeichhia chu keimah ang bawkin a zak ve tho a niang, a biang a sen ap ap mai. Zah nachhan tur a neih ka hre reng reng lo. Ka tan hian a tlawm thlak em em tih mai loh chu tunah tak hian ngaihtuah tur dang ka hre lo ve.
.
"Jeff, a tha vek a nia." a ti leh sap a. Muangchang in ka tho a, hawi ngaihna reng reng ka hre lo. Ka thil ngaihtuah chhuah lah chuan min deng na em em mai lehnghal! Tunah kher engvanga ngaihtuah chhuak thut nge ka nih?
"VIDA!" tiin ka phun chhuak a, zawhna min zawt hmel pu chung hian Esma chuan a mit tizim deuh chungin min en ta reng. Engmah a sawi chhuak lo thung. Keimah chauha awm ka duh. Tuna ka awmna hmunah hian ka hmuh theih si loh mihringin nasa taka min nuihzat nia ka hriat tlat chu! Ka ngaihtuah zawng ringawt pawhin ka mur sung sung thei nia!
.
Esma chu ngaichang lovin chak thei ang ber hian La Trattoria atang chuan ka kal chhuak hlawk hlawk a.
Ka car chu chak zet hian ka khalh chhuak a, khawilam nge ka pan ka ngaihtuah lo. Thui tawk tak ka tlan hnu chuan thawklehkhatah car break chu rap thutin car chu a ding chik tuarh a. Ka hmalam ka en a, ka awmna hmun ka hre ta chiah. Engmah ngaihtuah lo chung khan engtin nge helai hmun hi ka thlen theih zawk le?
.
Ka hmaa sign board uluk taka cheimawi JEFFIRA tih inziak chu ka en a, mak takin Vida kha ka bulah hian a awm niin ka hre ta tlat! Thil theih a ni lo hulhual.
.
"I awm lo._I awm lo. Nang chu i thi tawh. Ka nunah hian sawi theih engmah i nei tawh lo." phun mawlh mawlh chungin car atang chuan ka chhuak a, ka pai ta nawk nawk lehnghal a. Thil diklo a awm tlat hi ka hrethiam thei lo. Hetiang hian ka che buai ngai hauh lo asin.
Vida chunga ka thiltih vang khan hremna ka tuar dawn em ni? Ni lo! Vida, hmeichhe tha leh nunnem tak khan engvang mahin min tina let duh hauh lovang. Ka ngaihtuahna atthlak zet vang chuan mumal lo zet hian ka nui chhuak hawk hawk a. Mitthi tawh hian mi nung khawvelah engmah a ti thei lo tawp ang.
Hetianga ka ngaihtuah chung pawh hian thil diklo boruak ni deuh hulh chu a reh chuang lo. Phiangsen hian!
.
Inher leh vutin ka car ka pan a, Esma kha engmah sawi lovin ka kalsan ringawt anih kha. A hrilhhai ngawt ang. A mitmeng atang khan min ngaihtuah tih ka hria a, ka ngaihtuahna buai thut vang khan ka kalsan ta ringawt a. Tun atang hian engvang pawhin Vida kha ka ngaihtuah tawh tur  a ni lo. Khawvela awm tawh lo ngaihtuah fo turin hun ka nei hek lo.
.
La Trattoria ka thlen leh chuan zan a rei tawh deuh a, hun dang nen khaikhin chuan a reh deuh raih tawh bawk. Maw; inti zetih ka chek tlak a. Tun ang hunah Esma a la awm ka ring hi ka a hle a ni. Hotel ah a awm ngei ang.
.
Hotel panin ka tlan chhuak lehnghal a, ka ngaihtuahna tihfim ka tum nasa hle. Fim taka ngaihtuahin Esma rilru ka hneh a, min neih a duh thlengin tha takin ka awm zel ang.
Hotel ka thleng a, muangchang lovin Esma pindan lam ka pan nghal a. A pindan kawngka ka kik chuan min chhang mai lo. Rei deuh tak ka nghah hnuah tim deuh tak hian kawngka arawn hawng de de a, min sawm hun pawh nghak lovin a pindan ah chuan ka  pen lut nghal hmiah.
.
“Ka tihpalh! Kalsan daih lo tur che ka nia.” A banrek a vuan chungin a hmel chu ngun tak hian ka en a. A mitmeng chuan Vida bawk min hriatchhuahtir leh ta!  Mak tak hian a inang tlat a ni. An mitmu rawng a dang a, mahse a mit atanga lang thin khawngaihna nge huatna niawm tak ka hriatthiam theih loh chu Vida mitah khan ka hmu thin tlat a ni. Kei hian hmangaihna mitmeng leh huatna mitmeng pawh ka thliar thiam ta meuh lo chu anih hi!
.
“Engkim a tha vek. Nangmah chauha i kal chhuak kha ka inthiam lo takzet a nia. Khatiang thil ka beisei loh lutuk vang khan ka hamhaih vek a__”
.
“A pawi lo. Hun tam tak kan la nei zel dawn alawm” tih pahin ka kuah bet ta thlawp a. Tunah tak hian duat taka kuahtu neih chiah ka mamawh rih.
“Min kuah let rawh.” ka tih chuan min kuah ve mai bawk.
Tun hi min kuahlet tura ka hrilh vawikhatna a ni hek lo. Tum dangah pawh kan inkuah fo a, kan infawp thin bawk. Mahse, ‘infawp’ tih thumalin a sawi tak hi kan thleng ngai lo thung. Kan hmui a indek zauh hi a ni ber thin. Mutdun phei chu a hla lutuk. A tir khan hrethiam lovin ka thinur dawn dawn a, mahse thil awmzia dik tak min hrilh hnuah leh a harsatna neih min hrilh hnu khan nasa takin ka ngaihdan a dang ta chauh a nih kha. Naupang a mai anih laia khuaikhem lo tawk tawh chuan hlauhna nasa tak a nei ngei ang tih ka ngaihtuah thiam a, ngaihngam taka ka bula a awm theih ka duh ta ber zawk anih kha. Ni e, he hmeichhia hi ka duh angina ka hrechiang mai thei rih lo nain ka hmangaih em em tih erawh engti zawng pawhin ka hrechiang tawk khawp mai.
.
“In tur i duh chuan ka lo lak ang che. Hahdam i mamawh a nih kha.” Min kuahna atanga inlahrang chungin a nui a, a nui hmel ka hmuh chuan ka dam huai huai.
“Aw le.” Tih pahin thutna lam ka pan a, chau zet hian thutna ah chuan ka thu thla hnawk a.
In tur min lo pek chuan la vatin ka tlak nghal pawp.
“Ka bulah hian lo thu teh? Esma__” a hmel ngui deuh lap chu ka en a, keimah vanga ngui anih loh hram ka beisei.
“Ka_ Um_” a nui hak a. A awmdan chu ka hrethiam lo.
.
“Ka sawmna che min hnar vang khan hreawm titur i ni miah lo. I inpeih tawh ni a ka ngaih vangin ka ti mai a, kei hi hriatthiam ngai zawk chu ka nih hi.”
Min chhang lovin muangchang hian ka bulah a rawn thu a, a kut chu ka vuan thuai a. A taksa ka deh hrim hrim hian thlamuanna mak tak ka nei tlat thin.
.
“I chauh hmel hle mai. Hahchawl vat la a that ka ring.” a ti sap a. A sawi hi a dik. Ka chau takzet.
.
10minutes vel ka thut hnuah a pindan atang chuan ka kal chhuak leh ta nge nge. In kalsan ngai lo va hmun khata chen dun ka chak tawh zia ngaihtuah chungin ka car ah ka thu lut a. Hmanhmawh lem lo takin ka chenna hmun ka pan ta vang vang a.
.
Ni dang ang lo takin ka in pawnlam light chu a thim thuap mai. Ni thum chhung chu security tam zawk ka chawlhtir tawh a, chuvang ringawt a thim tur erawh a ni hauh lo. Big Man tia ka koh mai chuan gate arawn hawng a, a hmel chu a lang dang(pale) deuh luap mai hian ka hria. A ni suk a, engmah a sawi lo thung.
.
In chhungah ka lut a thil diklo a awm tih hre turin rei ka enkual a ngai lo. Choka lamah ka lut a, a hmaa Kiara lo chet tawhna hnuah chat khan hnuhma a awm a, ka nui suk. Helai khawihtu chuan a duh a hmu phiangsen lo ange! Hmanhmawh takin file pawimawh ka dah that nawnna hmun ka pan nghal a, khawih a ni tih ka hmuh chuan hlauthawng lutuk hian ka hnaih nghal ruak ruak a.
File thenkhat uluk lo taka dah chu lain ka keu thuak thuak a, mangang leh chiai zetin ka thaw kawk kawk mai. Ka documents pawimawh zawng zawng a bo vek!
“Kiara!” ka ti tuarh a.
Hmanhmawh tak bawkin ka mutna pindanah ka lut a, laptop on in ka documents thenkhat ka en leh a, JEFFIRA ram Vida min pek ngei kha Kiara hmingin a awm tih ka hmuh chuan ka insum hman lo Laptop chu chhuatah ka paih nghal thuai. Engtin nge anih theih? He hmeichhia hian min tibuai thei tih hrereng chungin engvanga lo inveng fimkhur lo nge ka nih? Zanin chu ka mu hauh lo ang le!
.
Big Man ka ko lut a, an duty inthlak dan kimchang muang ban churha a sawi zawh hnuah awmze neilo mai anih vangin ka chhuahtir lehnghal a. Thuneitu lam ka hrilh vat anih loh chuan he thil vang hian ka neih zawng zawng zatve chan vek thei dinhmunah ka ding ngei ngei dawn.
“Ni lo_Ni lo” mangang zetin dawhkan ka chum pawp pawp a, ka thiltih chuan tlemte pawhin min pui eih lo thung a. Atthlak lutuk.
.
Zankhua deuhthawin ka ngaihtuahna sengin ka mut pindanah ka vei tawn sek a, mutna tura khum nuam tak awm chu ka tan engmah lo mai a ni. Sum hian khum nuam tak chu a lei thei a, muttuina erawh a lei thei der si lo. Ka buaina neih hi a namai lo em a, ka duh emaw duh lo emaw Kiara ka hmuh ngei a tul bawk. Ka va chak zawk zawk lo ber mai em!
.
Khua a var a tukthuan ei lam ngaihtuah reng reng lovin in atangin ka inkhalh chhuak nghal a. Kiara chenna hmun thleng turin darkar hnih chuang hun ka mamawh tih ka inhria. Motor chu ka khalh muang fahran lo.
.
Kiara chenna ka thleng a, dawhthei lo zet hian kawngka ka kik a. Rei deuh tak hnuah ka hmelhriat ngai miah loh mipa hian kawngka arawn hawng ta hram. Chik zeta en chungin Kiara hmuh ka duh thu ka hrilh a, in chhunga lut tura min tih chuan ka lut nghal vat.
.
Choka ni awm tak atangin Kiara chu arawn chhuak a, min hmuh chuan a phu nasa teh e!
“J_Jeff_ Ka_ Enge i rawn tih dawn?” a ti bah nawk nawk mai.
.
“Kan inbiak a tul.”
“Muddy_khawngaihin min lo hrethiam lawk aw.” tinem diai chung hian kan inbiakna tur lam kawk zauhin  a kal nghal a. Muddy tia a koh chu a hamhaih deuh a ang.
“Thil thalo lam a ni lo a nia.” ka’n tih ve ngial kha.
.
Kiara nen pindan chhunga kan luh fel rualin min rawn hnah nghal ruak a.
“Eng titurin nge ilo kal?”
“Hmeli! Engtin nge Jeffira ram hi i hmingin a awm theih?” zankhuaa ka mutthilh theih loh chhan hi tunah ngei hriat vek ka duh.
.
“”Eng thu maw i sawi?” a ti vin hlar.
“I la vin ngam zawk a? Ka in-ah dan kalh a i luh vang chauh pawh khan hremna hmu tur i ni a, ka khawngaihna che vangin I chungah engmah ka ti talo tih hi theihnghilh suh. Nang hian ka hnunglam atanga min beih hi bansan bawk ang che.” ka ti hriam hraih a.
.
“Ka tihpalh! I in-a ka luh ruk vang khan ngaihdam ka dil nawn leh che. Mahse, tuna i sawi hi engmah hriat ka nei lo. Ka mipa hmangaihin midang a duh zawk vanga thil tenawm tak tizui duh tur khawpa min ngai chu ka rilru a na hle mai.” A tizui nghat nghat a.
.
“Pha buai lo zawk rawh. Document ah khan i signature a awm thlap! Awlsam taka i tawngkam hnih/khat lekin min hneh dawn ni a i ngaih chuan ngaihtuah nawn leh rawh. Awmze neilo a lo kal ka ni hauh lo a nia.”
.
“Khawngaihin, Jeff. Ka thutak takzet. I sawi hi engmah hriat ka nei lo. Min ringhlel hi mak ka ti lo, mahse engmah hriat ka nei lo tak tak. I duh chuan_ Ni lo. Tunah hian Vida chunga kan thiltih khan min vawlet mek nia hriatna ka nei__” a ti ta daih a. A hmelah chuan hlauhna a lang bawk.
.
“Mitthi tawh chuan eng thil nge an tihtheih tawh chuan ang? I thiltih thup nana chutiang chhuanlam hmang i nih phei chuan chhuanlam tur dang ngaihtuah zawk teh.”
.
“Chutiang a ni lo. Khawngaihin Jeff_”
“Tunah hian min zui rawh. Engkim kan fiah vek ang.”
.
“Muddy a awm ve reng saw..”
“Sawlai i ui khawi kha maw?”
“No_ Jeff, ani saw mi tha tak a nia. Khatiang khan i sawi thei lovang”
“Thu awmze neilo sawi nan hun ka nei lo. Tunah min zui rawh.”
.
Pindan atangin ka chhuak a, phun bal bal chungin min zui chhuak a. Mipa lo awm bulah chuan engtin nge a insawi mam ka ngaihven lo. Pawnah ka chhuak a, Kiara lo chhuah hun ka lo nghak a. Ka rin aia rangin arawn chhuak. Chu chuan a thusawi kha thudik a ni ve thei tih min ngaihtuah tir nain engmah ka sawi lo thung. Dik taka sawiin Kiara hi rinna tur chhan reng reng ka nei ngailo a, ka bula chen a duh vanga Vida chunga a chet dan vang khan amah ka rinna zawng zawng hi a chhe vek tawh a ni. Keipawh ka thiam chuang lo tih ka inhria_Heihi chu ngaihtuah fo pawh ka duh lo. Hun liam tawh  anih angin ngaihtuah chhuah fo a tulna pawh a awm tawh hek lo.
.
Ngawi rengin motor ka khalh a, tun atanga reiloteah hian Kiara dik leh dik loh ka hre thei ang. Chu chiah chu ka ngaihtuah tur pawh a ni. A insawi ang ngeia dik a lo nih loh vaih chuan a lakah hian ngaihdamna ka lantir lehtawh lovang.
.
Hruai ka tumna hmun kan thlen chuan ka ang pham hian min en a.
“Jeff,__” sawi zui tur hre lovin a ngawi leh ta daih.
.
“I dik ngei anih chuan hlauh tur a awm lo.”
“Ka hlau hauh lo. Mahse, hetiang em em a min ringlo hi mak ka tic he.”
.
“Mak ti suh.”
A lu a thing nawk nawk a, a mitmenga rilru natna lang chu ka ngaih pawimawh sak duh lo.
.
In chhungah kan lut a, kan mi hmuhtur hun reitak chhung ka lo hriat tawh leh ka rawih ber thin nen kan inhmachhawn leh takah chuan thutak zet hian thil awmzia ka sawi nghal hmiah hmiah a.
.
“Mr. DeLourde, ahmaa ka lo hrilh tawh che ang khan ka hmuh theih chin zawng zawng chu fel takin ka lo lakhawm vek a, Miss hian han en teh se. Heihi i signature a ni chiah em” tih pahin a lehkha ken chu Kiara hmaah a pharh a. Kiara chuan uluk fe hian a thlek ta vang vang mai. Ka duh aiin a chhang har ta bawk.
.
“Engtin nge anih theih? Heihi ka signature chu anih ngei si hi.” A ti ban chat a.
“A ni reng ang chu. Tikha chuan engkim a chiang anih kha. I thiltih vanga hremna hi pumpelh tum sateh mah la engti zawng mahin i pumpelh lo hulhual ang.”
.
“Ni lo. He thil hi engmah ka hrelo takzet. Khawngaihin! Jeff. I ram hi engvangin nge ka chhuhsak kher ang che? A tello hian ka nung thei alawm.”
“Takzet che hian!” ka ti hluk. Ngaihtuah muk hmel tak hian a kun ngaih a, a sawi fel dan tur a ngaihtuah pawh a ni mahna.
.
“Mr. Trippolio, tihtur engkim i hria. A rang lamin hma lo la ang che.”
Ka thutna atangin ka tho a, thip zet hian Kiara chu ka melh a. A khur tih ka hria. He hmeichhia hian engtikah mah a nunrawnna leh a rilru chhiatna hi a sim lovang tih ka hrechiang em a ni. Chuvang taka helai hmuna hruai lui hi ka ni reng bawk a. *Ka hrelo, he thil hi ka hrelo* a tih chiam chiam vang khan a dik tihna a ni chuang lo tih hi ka hrechiang tawk ve em a ni.
.
“Jeff, lo ding teh_”
Car ka tinung zet tawh nain ka ding ta tho.
“Thil diklo a awm ngei ngei ang. Khawngaihin ngaihtuah tha leh rawh. He thil hi engmah hriat ka nei lo tak tak..” Thu ngai bawk a sawi leh ta.
.
“A lawmawm e. Hriat i neih thu i sawi nghal lo kha ka rinlawk dan chiah. Tikhan i chungchang ngaihtuah anih huna sawi dan tur lo  ngaihtuah lawk rawh. Finfiahna tha tawk tak awm kha hnialthlak theih dan ilo ngaihtuah chhuah ngei a tul dawn anih kha.”
“Jefferson, thu dik ka sawi.” A ti that a. Ka ngai pawimawh tehchiam lo. 
 .
“A that chu!”
Kiara chu ngaichang tawh lovin ka tlan chhuak a, side glass-a a thinrim insawh zui nghawng nghawng lang chu enin kha zet hian ka nui suk a. Tun tumah chuan ngaihdamna a awm tawh lo ang. Hetiang chiah hian a hma pawh khan ka ngaihtuah a, ka ngaidam leh kha a nia. Tunah chuan engvang mahin a ngaihdam theih tawh loh.
.
Office pan lovin Esma awmna ka pan a, a hmel ka hmuh phawt loh chuan hahdam takin vawiin hun hi ka hmang thei dawn lo. A nui hmel ka hmuh a, engkim a tha vek tih a sawi ri hriat phawt ka mamawh takzet.
.
Hotel kawtah motor dahin in chhungah ka lut a, ka lam pana Mordecai leh a thuihhruaite lo kal chu hmuh loh der a har khawp  mai. He mihring hi ka ram chinah a rawn tla tam ta mah mah a ni. Tun ang hunah eng thil tehhrep nge arawn tih reng reng  ni?
.
A awm ang chiaha awmin inhmu lo ang hmak hian kan in kalpel a, ngaihtuah zui duh lovin Esma pindan lam ka pan nghal a. Hlim ser chunga kawngkhar min rawn hawnsak chuan ka rilru hahna leh ka ngaihtuahna pik mup mup chu a bo nghal vek. Duh tak hian ka kuah nghal vawng vawng a.
.
“Nizan kha i mu thei em?” a sam fai ser hui zauh paha min bia chu chhan mai nachang pawh ka hrelo. “ I tha em?” a ti leh a.
.
“Ka hmu che a, ka tha leh chiah e.” ka tih chuan a nui hak hak.
“Tun ang huna ilo kal hi ka beisei lo a. Tukthuan i ei ang chu maw?” ngawi lawk teh! A tawngkam hman chu ka hre tawh thin tlat! No! Atthlak lutuk. Mihring hrang hlak leh pian leh seilenna hmun pawh hrang hlak hi engvangin nge ka ngaih pawlh fo le?
.
“Ei lo. Ka ril a tam khawp mai.”
“Tunah lunch ei a hun dawn tawh a. Zingkarah eng thil nge i tih a?” min melh deuh ram ram chu hmuhnawm ti zet hian ka en reng. Tukthuan ka ei loh vangin a thinrim anih hi_ Min ngaihtuah lovin min ngaihven lo ni se hetiang hian a awm lovang. Min ngaihven a, min ngaihtuah..
.
“Min lo hnaih teh..”
“Enge ni leh ta?” huatawm hauh si loh ngeng ru tak hian a sir zawngin min melh a, he hmeichhia hian min ti a lo chauh chu anih tak ber hi a!
.
“Min lo hnaih phawt rawh_Khawngaih ka dil phawt a ngai ami?” ka tih chuan nui hak chungin min rawn pan hnai a. A rimtui hman ka hip chuan ka thu ngil zawt mai. Ni lo_ Engtin nge he rim hi a nam theih?
.
“Chu chu eng rim nge?” inthunun ka tum viau chungin ka hlawhchham chiang teh e.
“Enge? Eng rim  nge i hriat a?” a ngawi deuh chat  __ nui var var chung hian “Ka rimtui hman rim hi i ngainat zawng a ni lo tihna a ni em?” a ner zui nang nang a.
.
“Ni lo_Ka_ Ka ngaina alawm.” Rilru nuam lo zetin ka kuah a, Vida kuah nia ka inngaih vang nge ni ka tim deuh.
.
“I awmdan hi a diklo a nia. Nizan i mut that loh vang a ni em?”
“Anih ka ring.”
.
“Ahh_” a ti that a, ka phu zawk.
“I tha em?” ka ti thuai a.
“Rannung in min seh niin ka hria. Nge i kawrah hian min chhun turin pin i pai ru zawk?” a nak veilam chu a tuai vat vat a.
“Ka lo en i phal em?”
“No” ti chungin a tho a, bathroom lam a pan nghal a. Enge ka hriat ka hre biklo ka zui ve nghal chawt.
Bathroom ah a lut a, kawngka a khar phui loh vangin a kawr hak chu a phelh tih ka hmu thei. Thil sual ti angah ka inngai dawn hial alawm le! Nihzatthlak hian a!
.
“Puih i ngai em?” ka tih chuan min chhang mai lo. “Esma, i tha chiah maw?” tih paha bathroom kawngkhar chu hawngin ka penlut nghal a. Ka lu tih a hrereng nain pawiti thawm a chhuah lo.
A sir zawnga dingin a taksa chunglam chu a bra hak chauh chuan a khuh a, a vun thianghlim zet khawih ka chak zia chu mipa chauh lo chuan min hriatthiampui lovang!
.
Amah en kana a sir darthlalang-a a taksa ka va hmuh chuan ka kawchhung a let nghal but mai! A ni thei lo! Ka thlanfim a bawl nghal tawk tawk bawk tih ka inhria.
“Enge a?” a tih chuan ka chhang thei lo. Hei lehzel hi chu a ni thei tawh lo.. Darthlalang chu ka en leh a, a hmaa ka hmuh kha ala ngai reng. A nak dinglam a hnute zawn, a bra hrenna hnuai chiah a tattoo awm chu Vida tattoo ang chiah kha a ni!
“Tunge i nih?” ka ti tham tuak a. A ngaihna hriat loh hmel zet hian min en thung. “Tunge i nih?” ti lehin muangchang leh tim deuh tak hian ka pan hnai a, a ngaihna a hriat loh hmel telh telh thung.
.
“Tunge ka nih chuan ang? Hei, min hmu reng alawm.” A dar a tiche zauh a. “Min tihlau a nia.” a tizui sap.
.
“Kha kha ka enchiang thei angem?” ka tih chuan a ban pahnih phar meuh hian “Enge??” a ti ha a.
.
Ka pan hnai a, tim takin a tattoo chu ka enchiang a. Thil theih a ni lo!
Ka tha a khur a, ka thaw tha theilo mai dawnin ka inhria. Ka hmaa hmeichhia a ngaihna hrelo tih hriat tak leh ka awm dan makti hmel tak chu enin “Tunge i nih?” ka ti leh a.
Min chhanna chu ka hrechiang hman tawh lo. Chiai nasa tak chungin bathroom atang chuan ka chhuak a, engmah ka ngaihtuah chiang thei lo. A mit ngeia ka hmuh thil hian min thawng nasa rih lutuk! Mumal lo zet hian Esma pindan atang chuan ka kal chhuak a. Pawnah ka chhuak a, ka car lo thlen rualin ka thu lut nghal hnawk a.
.
VIDA – SheKnows
(Vee-Da)
.
By. Thantei_LauraSean
.
CHAPTER - 29
.
JEFFERSON*
.
Mit phe ruai chungin car chu a chak thei ang ber hian ka khalh chhuak a, ka chenna hmun ka thlen chuan ka thaw hlawp hlawp tawh. Ka chiai dan hi namai lo tak a ni.
.
In chhungah tlan lutin ka mutna pindanah ka lut tlang nghal a, Vida nen kan inneih thlalak leh kan pahniha kan thlalak hrim hrim ka dah khawmna chu ka hai chhuak rum rum a. Ka mit ngeia ka thil hmuh kha ka la ring ngam lo.
.
Chhuat a thlalak darh nuaih chu hai let nawk nawkin ka duh tak ka hmuh hma chuan chawlh ka tum lo. Vida thlalak a sir zawnga a lanna ka hmuh chuan ka chawl dat a. Kut khur dar dar chungin ka lek kang a. Ka mit a thim mup mai. He thil hi thil thleng fuh palh a ni thei lo! Anih chuan??
.
Esma ka tawn hnua ka nuna thil thlengte chu rang tak hian ka mitthla zut zut a. *A NI THEI LO!* he thumal chiah hi ka sawi ri thei. Chhuatah chuan ka thu zawi hnawk a. Thahrui reng reng ka nei ta lo. Esma Celik, hmeichhe inringtawk leh lu zo tak, ka ngaihtuahna ngei pawh ka thunun zawh loh khawpa min hip bet tlattu hi sum ka duh vanga ka neih VIDA ELVES CAPPOLO kha a ni reng a maw? Ka hmangaih asin! Chintawk leh bithliah chin nei thei miah lo khawpa ka hmangaih hmeichhia Esma hi__ "A ni thei lo!" phun mawlh  mawlh chungin chhuatah chuan ka mu a, awm ngaihna reng reng ka hrelo a ni ber mai.
.
"Vida a ni lo! Esma Celik a ni. He thu hi engvang mahin a danglam lovang. Vida chu a thi tawh. Keimah ngei hian sum tam tak senga mi ruaiin ka dahtha anih kha. Nung dama lo let leh theihna chance tlemte pawh a awm lo. Engvangin nge atthlak taka ngaihtuahin ka intihbuai duh ang?"
.
Eng chen zeta rei nge chhuatah chuan ka mut ka hre lo. Ka harh tial tial a, ka mutna atang chuan tho chhuakin chhuat a thlalak darh nuai chu a mal te tein ka chhar nghauh nghauh a. Thil pakhat chiah ka hria_Esma Celik hi ka hmangaih a, ka nei ngei ang. Eng thil mahin min dang thei lo. Ka ta anih hma chuan neih tumin chawl lovin ka bei ngei ngei dawn. Mitthi tawh nen inanna tlemte an neih vanga ka ngaihtuahna a buai ringawt hi mawl ka inti tawh! Khawvelah hian mihring inang leh duhzawng inang nei maktaduai tam tak kan cheng a, phir nih loh chu sawi loh unau, thisen inzawmna nei miah lo pawh hmel inang hmun hrang hrangah tam tak an awm. Ka mitah chuan ka Esma leh Vida khan hmelah inan na an nei lo va, an tattoo inan vang ringawtin ka lo chiai a__Mipa tihawm pawh a ni hrep lo ve.
.
Thlalak zawng zawng chu ka khungkhawm a, in hnung lama mei chhemna hmunah keng chhuakin ka hal ral nghal vek a. Vida khan ka nunah thuneihna a nei ngai lo va, a awm tawh loh hnuah leh lek phei hi chuan a  nei lo lehzual. Mumal lo taka ka kalsan vang khan Esma hnenah ngaihdam ka dil ngei a ngai anih hi. Atthlak taka chiai leh mumal lo chungin ka kalsan anih kha. Chu pawh thil hote ka ngaih sual vang chauh lehnghal in!
.
*VIDA*
.
Ka pindan kawngka dim lo bak saka kiktu chu tupawh ni se tha takin ka be lo tawp ang tih rilru pu chungin kawngjkhar ka hawng a, nelawm loh theihpatawpa Mordecai lo ding ka hmuh chuan ka hamhaih leh si! Min hmu tura a lo kal hi ka ring chhin eih lo.
.
“Eng_Enge ilo tih dawn?”
“Helai lo kal tur hian chhan leh vang ka neih a tul maw?” chimawm thei ang bera nui chungin arawn pen lut a, a chezia chu ka en tawp.
.
“Chhan a awm ngei chu ka ring.” ka ti  nghat a.
"I pasal hlui ngeiin a nupui ni tura a sawm nawn leh che chu enge a an?" a sir zawngin min melh rulh a, a awm dan hi ka ngei hluah hluah. Min tham lo em em a a khawsak hian amahah nuam tihna a awm a ni chek ang! Mahse, engtin nge Jefferson min sawmna kha a lo hriat?
.
"Thil hreawm zawk zawk chu a nih hran loh kha. Engtin nge ilo hriat zawk?” ka chhanna chu a rin ang a ni lo tih a hmel atangin a lang chiang ve thlawt. Hetiang taka inveng hman lo hian Mordecai hi ka la hmu ngai lo.
“Tsk!Tsk! Nangmah ngei kha ila ni em?” a tihniam ruih a. A mitmeng chu hriatthiam theih pawh a ni leh tawh lo.
.
“Hei ka hmaah dingin tunge ka nih chu min hmu thei reng alawm. Zawhna atthlak chhang zel tur hian hun ka neilo a nia. Tihtur dang tam tak neih ve tho ka ring a__Mahni kawngah ve ve kalin kan intibuai lo tawn ang chu_”
“Takzet che hian!” vanvadak meuhin a nui hak a,  a mitmeng ah erawh nuihzatna a lang eih lo. A lang hlauhawm lek lek zawk. “Uluk deuhin lo ngaithla teh_” ngawi leh rihin min rawn hnaih a, min khawih ang tih ka hlauh vangin ka tawlhsawn vat a. Ka tawlhsawn tih min hmuh chuan a ner suk.
“A tha e. Ka hrilh fo che pawm lovin i duh angin i awm a, I duh ang tak chuan han awm zel phawt teh. A tawpah min rawn pan hauh suh ang che.” A thutak takzet. Ka hnungtawlh bik hauh lovang. Mahni inngaisang leh engkim ti thei, mi chungnunga a inngaihna hi ka tan engmah a ni bik lo tih ka la hmuhtir ang. Hnaih ka tumin min nawr hla a, natna bak min pe chuang em ni? Ka ngaihtuah dan hi a dik chiah! Mordecai Sloan hi ka hnaih a ka thinglungin a ngaihtuah tam apiangin natna chiah ka dawng let thin. Mahni natna tur thil chu tu in nge pan hnai talh ngai le?
“I sawi tha ka ti. Eng pawh tawk ila ka pan lovang che tih tal hi lo hrechiang ve tawh tur i niin ka hria. Min ngaihtuaha min lo tlawh vangin ka lawm e.” ka tiel sak sak a, ka rin loh dan takin a ngawi ta daih. Uluk fe hian min en ngur ngur a. Eng thil nge ka hriat ka inhre biklo, a mitmeng atanga a ngaihtuahna hriat tumin a mitah ka enlet ve bawk a. A mitmeng lang thim deuh ruih ah chuan engmah hmuh tur  a awm lo. A ruak mai a ni.
.
“A tha e.” tih chiah sawiin a inher vut a, ka pindan atang chuan vung zet hian a kal chhuak nghal a. Mak takin ka ruak ta huai ni hian ka inhria. Ngaihtuah zui ka duh lo.
Thawk la hawkin *Ka ngaihtuah zui lovang che* ka ti chhuak sep a.
.
5 minutes pawh a ral hman lo tihah ka pindan kawngka kik ri ka hriat chuan ka vir zawk mai. Mordecai anih ringin rang fe hian kawngka hawng turin ka kal a. Hlim ngawt nachhan tur ka nei lo tih ngaihtuah reng chung chuan ka nui tho. Mahni inhrechiang theilo ber mihring zing ami chu ka nih ngei hi!
Kawngka ka hawng a, ka beisei loh zawk Jefferson lo ding ka hmuh chuan ka hnual deuh rawih nain ka la nui ta reng a. Tun hun hi bultanna tur hun atan hun tha tawk tak a ni ta tih hi ka ngaihtuah hmasak ber a ni. Ka bulah hian thlamuang takin a khawsa rei ta e. Lang lo lama ka thawh hahna leh ka thahrui sen tawh zawng zawng te hi awmzia ka neihtir ngei ang.
.
Jefferson chu a chauh hmel hle a, nizan a mu tha lo tih a lang chiang viau bawk. Tunah i ruahmanna chu tan rawh le Vida Elves Cappolo. Jefferson tana mihring nungdam i nihlai khan i thatna lam chauh i hmuhtir reng thin a, tunah chuan a tha lam ni lovin a phu tawk a hmuh ve  a hun ta! I lemchan chu tan rawh le.
.
Engmah thleng lo chungin ka nak chu thil engemaw in a chhun niawm takin ka awm a, bathroom ka pan chuan min zui tih ka hria. Makti hmel taka min en leh thin kha ka hrethiam vek tawh. Tun atang chuan ka bula a awm paingin awm nawm lohna nasa tak a nei zel tawh ang. Amah vanga ka tuar tlang tawh zawng zawng ngaihtuah phei chuan tuna a hlauhthawnna tur hi chu a la nep lutuk.
.
Ka tattoo a hmuh a, a chiai nasa lutuk hmel chu engmah hrethiam lo anga lang chungin ka en a, mumal lo taka ka in atanga a chhuah hnu chuan ka thawmhnaw inbelin ka zui chhuak nghal a. Khatiang taka a makti leh a hlauthawng hmel  ka hmuh khan ka nihna dik tak Vida Elves Cappolo ka nihna kha a ngaihtuah chhuak tih a chiang vek. Eng thil nge a tih zui dawn hriat chakna in ka khat vek bawk.
.
A chenna hmun a thleng a, pawn hla deuh tak atangin ka lo thlir reng a. Ka rin aiin in chhungah a inkhung rei. Engemaw chen hnuah in hnunglam atanga meikhu lo chhuak ka hmuh chuan ka nui ta sak a.
.
Jefferson hian min lo pan leh ang! Ka tan chuan lo nghah tawp bak tihtur a awm tawh lo. Min lo pan leh hmasak berah engkim chiang takin ka lantir tawh dawn a ni. Na taka min siam ang chiah khan na takin ka kalsan ang. Ni e, hmeichhe nunnem leh pawisak ngah tak ni thin khan tunah chuan pawisak ka nei tawh lo.
.
Ka phone phawrhin Jefferson number ka dial a, vawi khat a ring quit hnu chuan ka phone chu off in ka ak ta hmak. Vawiin hian Jefferson phone call ka pick up tawh lovang.
Ka awmna hmun atang chuan hmanhmawh lo takin ka nu leh pa chenna hmun (thlanmual) panin ka kal a, nungdama hmuh tur leh biak tur awm tawh lo mah se ka chanchin kimchang hrilh ka la duh fan a ni.
.
Thui tak ka thlen hma atangin Jefferson call ka dawng tan ta pang! A peih chhung chu lo call ve tlauh tlauh rawh se.
.
Thlan ka thleng a, ka nu awmna bulhnai phul hring pharh duai ah chuan puan phahin ka thu a. Min ngaithla ngei ang tih ring chungin ka rilru a awm apiang ka hrilh mial mial a. A changin ka mittui a tla a, a chang leh ka nui bawk a.
Darkar hnih vel zet ka thut hnu chuan  ka thawl ta huai mai.
.
“Khua a tlai tawh a nia.”
Ka hnunglama lo tawng ri chuan nasa lutuk takzet hian min tiphu! Ka te that a. Ka inveng  hman miah lo a ni. Helai hmun fal takah hian keimah chauhin ka awm niin ka inngai a, ka thinlung thuruk zawng zawng pawh ka phawrh vek anih kha.
Nasa taka inthunun tum chungin tho chuang lo hian ka hnunglam ka hawi a, inthiam chiah lo hmelpu a Mordecai lo nui suk hmel chu ka en tawp. Engtin nge helai hmunah hian ka awm tih a  hriat? Engtin nge min zui ruk theih?
.
“Eng chen nge ilo awm tawh?” ka ti tham chal a. Ka nu bula ka thusawi zawng zawng kha a hria anih chuan_ Ni lo_ ! Muangchang in ka tho chhuak a, ka ke a la mu chuah chuah zui.
.
“Eng chena rei nge awm tura min duh?” a ti sup a.
“Min chhang duh suh.” ti hmakin kal sawn ka tum a, ka ke mu nasa lutuk vang chuan ka pen dik theilo. A va hun lo thin tak em.
.
Thinur ru tak chungin ka mal dinglam chu ka chum chat chat a, Mordecai lak atang hian tlanchhiat vang  vang ka duh. Tlanchhiat maw? Tlan chhe lovin hnaih loh ka duh tiin ka sawi zawk mai ang. A bula awm tam hi ka tan a him lo. Tunah phei chuan Jefferson kawp anga ka lan vangin ka hnaih tur a ni lo lehzual. Ka tawng zawng zawng kha a lo hriat phei chuan__ Ka bag lain ka puan phah chu ka thlep tha a, ka bag-ah ka khung a. Amah chu ka en duh lo lui ngar ngar.
“Hey, enge i tih?” ka ti that a. Anih tur ang a ni vek hman tho.
"Awm tha hle hle rawh."
Min zo zet hian min pawm nawlh a, car awmna lam panin min kalpui a.
.
"I duh hun huna i duh dan anga chet hi i ching thang ta mah mah." ka ti hlak hlak a.
.
"Min hnial peih mah mah."
"Min chhuktir rawh."
.
"Ka hnaih apiang che a min hnialna tur i hrereng mai hi mak ka ti." min enchhuk a, a nui suk bawk a. Ka khup a zawi hnawk mai. Hei vang hian alawm amah hnaiha awm ka duh loh. A nui hmel hmuh hi ka mamawh lo.
Chawhma lamah nelawm lo thei ang berin min kalsan a, a duh duh a sawi bawk a. Tunah engmah thleng lo ang maiin min nuih leh a. Mihring mak tak a ni ve bawk tih hi a inhre lo anih dawn hi.
.
"Min nuih suh." ka ti ta ngawt. Ka sawi zawh rual chiahin ka inchhir nghal. Ka tawngkam vang nge ka hrelo a taksa nghawr datin a nui zui leh a.
.
"Mak takin a hlimawm tlat thin." a tawng chu a zawi viau a, kan inhnaih em vangin ka hre thei chauh zawk a ni. Ka en chho ha a, min lo en lo thung. A tawngkam khat lek vangin ka ngaihtuahna a buai lehnghal chu a ni der. He thil hi alawm ka mamawh miah loh thil chu.
.
A car dahna kan thleng a, min nghat thla chuang miah lovin a driver chu signal a pe zeuh a. Ani chuan car hnunglam kawngkhar a lo hawng vat.
.
"Car ka keng a nia. Helaiah hian ka kalsan ringawt thei lo. Bakah_"
.
"Shh_ I car chu hetah a awm tawh lo."
.
Hnial awmzia a awm leh ta lo.
.
Ka bulah arawn thu lut a, a hmel chu nidang ang lo takin a lang nung deuh sur hian ka hria. Thil tha tak hriat a nei nge? Mordecai bula ka awm hian zawhna hlirin ka ngaihtuahna a luah khat ziah thin. Tunah pawh a la danglam chuang lo.
.
"Nangmah chauhin helai hmunah hian kal tawh suh."
"Engvang in?" a hmel ka en a, ka rin loh takin min lo en hnai ngang mai. Tul vaklo hian ka aw ka thian kharh a, ka mit ka khap sak sak bawk.
.
"Khatiang khan min en suh." ti zawi ruih pahin a hawisawn a, a kiu chu car kawngkhar tlangah nghatin a hmui a tuai zauh a.
"Helaia nangmah chauha i kal loh chhan tur chu keiman ka hria a, chu chu a tawk. Ka sawi anih chuan zawm tawp mai rawh."
.
Thaw halhin ka hawi sawn a, a vawikhat  nan hnial let lo turin ka insum ve ta. Dik taka sawi chuan ka laka a tawngkam reng reng hi ka hnial chak zawng tak a ni zel a, chu chu thil tha ber a ni lo tih ka hrethiam ve tho.
.
"Anih chuan__ Eng chena rei nge khalaiah khan ilo awm ve hman?"
.
"Eng chena rei awm tura min duh?" ahmaa min chhanna ngai chiah. Ngaihdan ni vak lovin ka meng tal tap a.
"Chu chu ka zawhna chhanna a ni lo. Okay. Min chhang buai duh lo mai rawh. Eng chen pawh awm la ka tan a pawimawh hran lo. Ka duh loh zawk chu ka hriat loha min zui ru hi a nia."
.
"Ka zui ru che maw?" a ti hluk a. Ka en chuan mak deuha mitmeng nung sar chung hian min lo en leh reng tawh. Khua a thim dawn hnai a, khaw awmdan vang nge min en dan chu romantic riau hian ka hre pek! Ka a leh ta!
.
"Theihnghilh rawh." ti sapin ka thutna nghenchhan chu ka ngheng a, ka maimitchhingta daih a.
.
“Guzel” tia min ko ri ka hriat chuan chiang lo ruai hian ka harh a, ka awmdan hahdam thlak zet vang chuan ka chesawn phal rih lo.
“Guzel” ka darah dimtein min sawih det a. “La kal kual leh rih mai rawh.” tih ri ka hriat chuan ka thu ngil nghal zawt a.
"I tha em?" Mordecai hmel chu chiang lo ruaiin ka hmu thei. Khua a thim fel vek tawh tih ka hriat rualin ka sana bun chu eng thlemte awm rinchhan in ka en vat. Ni lo!
.
"Khawiah nge kan awm?" ka ti zui zat.
"Kan kalna tur hmun kan thleng tawh."
"Khawi_?" Car darthlalang chhanah chuan khawiah nge kan awm tih hriat tumin pawnlam ka en a, khawiah nge kan awm ka hrethiam mai lo.
.
"Tihtur pawimawh ka nei asin." ka tizui sap a. Hun ka en hian ka lo muhil rei thawkhat tih ka inhria. Mordecai ngheng chung lehnghal in. "A zialo hle mai. Min kaihthawh vat tur che a nia." ka ti leh ngawt a. Dik taka sawi chuan zanin hian Jefferson hnenah engkim sawi vek ka tum kha a nia. A hun dik tak a la thleng lo pawh a ni maithei. Mak takin Mordecai hi ka hnial reng thin chung hian thuk takin ka rinchhan thin tih ka inhrechhuak leh ta chu anih ber hi. Ka chhungril ah erawh pawm har ka ti.
.
"A tha vek. Zanin atan chuan i tihtur chu i thulh mai angai ang. Thil entir tur che ka nei. I harh ta bawk a, kan tihtur chu kan ti nghal mai ang chu." tih pahin a thutna lam kawngkhar a hawng a, a chhuak zui nghal a. Ka bo deuh hu mai.
Ka thutna lam kawngkhar arawn hawng a, engmah sawi lovin ka chhuak ve mai a. Eng thil nge thleng zel dawn tih han ngaihtuah lawk dan pawh ka hre chuang  hlei lo a.
.
"Helai hmun hi i hria em?"
.
Kan hmaa in lian tak awm chu ka en a, ka la hmu ngai lo.
"Hre ngai lo." ka ti sep a.
.
"Lo kal rawh." ka kutah min vuanin in lam pan chuan min kalpui nghal a. Thil nihdan tur ve reng ang mai hian ka kut chu laksawn pawh ka tum chuang lo. Ani chuan in chu tu in nge anih tih leh engvanga kal tur nge kan nih tih pawh a sawi chuang bik lo a. Keipawhin ka zui mawl tawp.
.
Kawngka bul kan thleng a, a kik dawn emaw ka tih laiin a kekawr ipte atang chuan chahbi phawrhin kawngkhar chu a hawng a. A ngaihna ka hrelo telh telh mai.
.
In chhungah ka zui lut a, sawitur ka hre lo. Amah zawk pawh chu a ngawi leh reng sia. Enge maw thil awmzia hi le?
.
Thutna pindan zau takah min kai lut a, "Lo nghak lawk rawh." a tih hnuah min kalsan a. A kalna lam chu ngawi rengin ka en tawp.
.
Reiloteah file ni awm tak keng chung hian a lo let leh a, a hmel chu a serious leh tawh viau bawk.
.
"Kha kha enge?"
.
"I tih ngei tur thil anih hi."
Ka thutna bul dawhkan ah file chu a dah a, hmanhmawh hauh lo hian file chhunga lehkha chu a phawrh zui a.
.
"Hetah hian i hming sign rawh. Tuna i hming ang ni lovin Vida Elves Cappolo i nihna ang zawkin."
.
A ngaihna hre chiah lovin ka en tawp. Lehkha chu ngawi rengin min pe a, lehkhaa thu inziak ka chiar chuan ka awih thei hlawl lo. Eng thil  nge anih hrereng chungin ka awih theih hlawl loh vang chuan,
"Heihi eng thil nge?" ka ti sap a.
.
"I chhiar zo chiah a, enge anih i hria ang chu."
.
"Mordecai_" sawi zawm mai tur ka hre lo! "He thil hi maw ka lak atanga i duh chu?" ka hrawk a ro hulh hulh mai. Chak takin keimahin ka kal emaw ka intih lai leh felfai takin engkim a hmawr ka bawk dawn emaw ka intih laiin Mordecai hian min lo chet khalh vek! He thil vang hi a ni ngei bawk ang ka laka a lo that thut chhan pawh kha!
.
"I sawi chu a dik." a ti hmak. Engmah sawi zawm a tum lo.
.
"Heihi sign lo ila engtin nge min tih ang?"
"I ngaihtuah phak loh thil a ni ang." a sawi ang chu a ti  ngei ang. A aw a nghet churh a, tun hun hi eng chena rei nge alo nghah tawh ang? Tu hriatphak mah a ni lo.
.
"A tha e. Atir atang khan he thil hi lo ngaihtuah phak tur pawh ka ni." ka tah a chhuak a, mahse ka tap tur a ni lo. Za lo zet hian ka nui lui hak a. "Hnehna chu i chang ta e. A tir atang khan i duh i neih theih nan hian ka do hauh lo che a, i duh dan ang taka ka chunga che tur pawhin ka hrilh che anih kha. Chakna chu chang mawlh rawh. Heti khawp hian i duh tih hria ila tun hun thleng thleng hi ka nghahtir hauh lo tur che a nia."
.
Ka chhungril nat zia hi ka hrethiam phak lo zawk. *A tha vek e!* tia ngaihtuah ka duh a, mahse engmah a tha lo, a chhe vek zawk. Jefferson ka hrem theihna tura ka thawhrimna zawng zawng leh ka beihna zawg zawngte... Zan mu hauh lo a ka thiltih zawng zawng kha_ Jefferson bum a a bula khawsa tam luiin Cappolo Corporation ka neihlet theih nan hian ka bei asin.__Ka ngaihtuah let lo zawk mai ang e.
.
Ka bag atangin ngawi rengin ka pen ka phawrh a, uluk tak hian ka hma a lehkha, CAPPOLO CORPORATION neih zawng zawng dan ang thlapa Mordecai Sloan hnena ka pekna tur lehkha chu ka chhiar nawn leh a! Ka  hming sign na turah chuan engmah sawi tawh lovin ka sign nghal bawk. Ka thinlung nat zia a hmuh ka duh loh vangin Mordecai hmel chu ka en duh lo. Ka na tih hmu pawh ni se atan hian engmah a ni chuang lovang.
.
Ka sign zo a, ka pen chu ka bag-ah khung lehin ka thutna atang chuan ka tho a. A tawp nan, ka dam chhung zawnga a tawpna tak tak ni turin Mordecai hmel nelawmna reng reng nei lo leh insehruh tlat chu ka en a. A bulah hian sawi duh thumal pakhat lek pawh ka nei ta lo.
.
Ka phone ka bag-a ka ah  nghawr dar dar thawm chu kan pahnih ngawi reng inkar boruak reh lutuk ah chuan a ri ring khawp mai. Ngaihtuah lovin ka phone chu ka phawrh a. Min lo call tu chu tunge anih en lovin ka pick up nghal. Phone-a tawng chu ka ngaithla a, engmah sawi lo va off lehnghal in Mordecai chu ka en a,
“Tunah ka haw duh.” ka tihrual chiahin in chhung light zawng zawng chu a thim nghal thup a.
 
VIDA – SheKnows
(Vee-Da)
.
By. Thantei_LauraSean
.
CHAPTER - 30
.
MORDECAI SLOAN*
.
"Che suh."
"Enge thil awmzia?"
"Shh!" ka ti leh ringawt. A thim vek hmaa a awmna zawn ni a ka hriat lai chu ka ban a, ka khawih fuh chuan a phu zawk tih ka hria. A hlauh loh nan ka kuah bet vat a. Tuna thil thleng hi ka hrethiam bik lo.
.
"Mordecai?" a ti sar sar a, a che zui ngam lo anih hmel.
"Shh!"
.
Thawm hriat tur a awm leh awm loh ngaichangin kan ngawi vang vang a, thawm hriat zui tur a awm lo. Vida thawk zawnga a taksa che dat dat chauh chu ka hriat awmchhun a ni. Thil dang zawng zawng dah thain ka kuah nghet sauh a, a taksa danglam dan atang chuan a ngaih a thalo zual tih ka hriatthiam vangin ka kuahna chu tlemin ka thlah dul leh hlek a.
.
“Oh!” a ti hliai_
In chhung eng thut vang chuan ka mit a vai chum chum mai. Ka mit ka khap sawk sawk a, chutih lai mek chuan Vida pawh ka lak atangin a inla hrang vat bawk a. Min melh dan chu ka hrethiam lo.
.
“Ka kal a hun khawp mai.”
“Ka rualin kal ang che.” ka tih chuan a nui hak. 
.
“Ka kal ang chu. Helai hmuna min hruaitu hi i ni alawm.” A hmel chu ka en tawp. Danglam engmah awm lo ang maia a awm hi ka hrethiam thei hlawl lo. Nichin mai khan Cappolo Corporation neih zawng zawng ka hminga a awm theih nan min hnial miah lovin engtin nge a hming a ziah hnan mai theih zawk? Ka tumlawk dan a ni lo hulhual!
.
Dik takin, Cappolo Corporation hi ka hminga dah chakna ka nei lo a, ka mamawh hek lo. Vida hian Jefferson hnaih lo se ka duh vang chauha vau tum ka ni a, an chhungkaw neih zawng zawng ai hian Jefferson a thlan loh zawk ka rin vanga heihi hmanruaa hmang ka ni bawk. Mahse, engkim a buai zo vek. Tunah hian a ngaihtuahna hriat theih miah lo leh min hnial buai miah lovin a hming a ziah hnan vek tawh. Thinurin min hnial se ka awm a nuam zawk ngei ang. Mahse, engmah a ti lo. A nui hmel chu ka en a, sawitur ka hre ta der lo mai.
.
“Ka hmanhmawh thei angem?”
"No."
"Enge tihtur dang awm tawh chuang. Ka hmanhmawh a nia." Chiang zetin min en a, dawhthei lo tih hriat tak hian a thaw halh a. "Okay, keimahin haw dan tur chu ka ngaihtuah mai ang."
.
Min ngaichang tawh lovin kawngka lam a pan a, engtin nge helai hmuna ka hruai chhan dik tak hi ka hrilh tak ang? Mordecai, chiang zawka lo ngaihtuah lawk vek tur i nia sin le* tiin keimah leh keimah ka indem mawlh mawlh a. A va sawt tehchiam si lo em.
.
"Lo ding teh." ka tawng chu hrelo angin a awm hmiah. Hmeichhe luhlul tak kha a lo let leh ta. "Vida Elves Cappolo!" khauh deuh taka ka tih chuan a ding chat a, a lo hawilet chuang lo.
.
"Inbiak ka duh vanga helai hmun pan pui che hi ka ni. Ka duh ka sawi hma chuan i kal thei lovang."
.
A rawn hawilet a, a mitmenga luhlulna nasa tak lang chu hai rual a ni lo.
"A ni maw? Ngaithla peih lo ta ila?" a aw a min tihelna lang chu a chiang viau e.
.
"Min zawt dawn miah lo maw?"
.
"Zawhna ka nei lo." a ti hmak.
.
"Relax!" thiam taka ka tih loh chuan engmah an sawi dun dawn hrep lo.
"Hetah hian lo thu phawt teh." ka theih tawka damin ka tawng a, ka inthunun nasa khawp mai.
.
Chek tlak tlak chungin a lu a thing na na a.
"Mr. Mordecai Sloan! Lemchan lamah chuan i hlawhchham ve anih hi tiraw? I rilru ang khan awm mai la enge a an ang?" a hmel lan dan chu danglam deuhin a a insehruh a, "Naupang ang maia chithlum hmanga thlem kual rual chu ka nih tawh bik loh hi maw! I duhamna rah chu nangmahin nei vek rawh. Ka mamawh ber thil engmah i nei lo." muangchang hian min rawn pan a, a hmel lan dan duhawm zia chu a inhre hauh lo tih lah a langchiang reng mai.
.
“I mamawh thil ka nei lo maw?”
“I nei em ni? Ka hun khawhral loh hi ka duh zawk.”
Ka bul rawn thleng lovin a inher leh a, kawngka atanga a kal chhuak chu ka en tawp. Eng chena rei pawh kalna tur motor dang zawng se a hmu dawn lo tih ka chiang. Rei tak pawna awmtir erawh a chi kher loh ang. He in ah hian zanin hun kan hman a ngai tih hre phei se engtin tak awm ang maw?
.
Muangchangin pawnah ka chhuak a, boruak a vawt deuh sur mai. Gate pawn lama motor lo kal leh kal loh en niawm taka a hawi kual chu ralkhat atangin ka en reng a, va pawh mai ka tum rih lo. A beidawng har lo tawp ang.
.
15 minutes vel zet a ral hnu chuan vung zet hian gate ah arawn lut leh a, min hmu lo tih ka hria. Kawngkhar bulah dingin door bell chu hmeh tumin a ban a, hmet duh lovin a  ban a dah thla leh riai riai a. A bag atanga a phone phawrhin mi tuemaw a bia a, gate lam pana a kal leh chuan ka awmna hmun atang chuan ka kal chhuak a. Min hmuh chuan a phu deuh zawk.
.
“Enge i hriat a?” min melh ram ram a, a dawhthei vak tawh lo tih thup a tum buai hek lo. “Helai hmunah hian motor hman hawh tur emaw taxi emaw pawh a awm miah lo tih i hre vek. Tiraw? Eng thil nge maw I ngaihtuah le?” 
.
A tawng chu chhang lovin kawngka ka hawng a, lut turin ka duh tih lantir nan ka kut ka phar zauh a. Duhthlan tur danga nei lo tih a hrethiam a ni chek ang, ngaihdan nih loh hmel takin a lut ta nge nge.
.
A hnungah ka zui a, kan inkar boruak chu thil engemaw puak mai tur awm ang vel nimai hian ka hria.
“Heihi i in a ni tiraw? Hetah hian lehkhaa hming sign tur ringawt khan min hruai lo nia hriatna ka nei. Ka lak atang hian eng thil nge duh dang ila neih? Ka ning tawh! Hetiang reng renga nun hman hi ka kham tawh takzet. Kan inkarah hian sawi tur ala awm anih chuan zanin ngei hian engkim i sawi fel thei ang.”
.
“A dik. Engkim kan sawi fel ang.”
“A that chu.” Ti nghatin amah hnaih ber sofa ah chuan a thu pil thaih a. Kei hian eng atangin nge ka sawi tan dawn?
.
“Cappolo Corporation hi ka mamawh tak takin i ring em?” ka tih chuan min chik hmel fe hian a mit tizimin min en a, tlemin a thu ngil deuh bawk.
.
“Hei bak hi pek tur dang ka la nei anih ngai chuan ka pe leh ang che.” A ti hniam raih a. A mitmeng atang chuan hriatthiam a har reuh khawp lehnghal.
.
“Ka zawhna chu chhang rawh. Cappolo Corporation hi ka mamawh tak tak i ring em?” a hma zawn chiahah dingin ka en chhuk a, kan inen ren rawn hnu chuan thaw hliai chungin a hawi sawn a.
.
“Ka hrelo. I chungchang hi engmah hriat ka nei lo. Ka hriat zawng chu ka kham tawh hle tih zawng hi a ni. Eng chen nge ka nunah hian ila inrawlh dawn?”
.
A tawng chu ka chhang lo.  Muangchang in ka hnaih a, a hma zawnah chuan thu hniamin a mal sir tawn tawnah a taksa si lo tawkin ka kut ka dah a.
“Enge i tih dawn?” a ti sep a, a tawng zawi khawp.
.
“Eng ti turin nge min duh? Jefferson lak atang hian engtin nge ka laksawn theih ang che?”
.
“Bungrua anga laksawn theih chu ni ila min lasawn daih tawh ang chu tiraw? Bungrua ka ni lo hlauh hi vannei ka inti hle mai.”
.
“Ka hmangaih che!” ka tih chuan a nui hak.
“Chu chu enge a awmzia?” a awki hniam raih chu sexy tih hian a sawifiah zo lo. Ka thil ngaihtuah zet chu leh! A hun tehchiam lo hle mai. Tawng lovin chiang lutuk hian ka en ta zawk a. Ani pawhin min en chiang khawp mai. “Hey, Mordecai! Hetiang infiamna hi ka tan hnawksak mai a ni tih hrechiang em em turah ka ngai che asin. Hmangaihna maw? Theihnghilh rawh. Chutiang thu ni lo chu sawitur a tam ang chu..”
.
A phone nghawr dar dar chu lak tumin a ban a, a banrekah ka vuan a.
.
“Cappolo Corporation hi ka mamawh lo a, ka mamawh zawk chu nangmah hi i ni.”
“Khawngaihin_”
“Ngaithla teh.. Guzel_ Kei hian hmeichhe bulah ka hmangaih thu ka sawi ang tih ka la ngaihtuah lawk ngai miah lo a. A tir atang khan_ Hmeichhe buaina ngah tak leh phuba lak duhnaa khat hi ka hmangaih ang tih phei chu ka la ngaihtuah chhin eih lo.”
.
“A that chu! Tunah pawh buaina ngah tak ka la ni reng__”
“I lo ngawi rih thei em?” a kut pahnih chu vuanin nghet takin ka hmer a, enge ngaihtuah tur tih ka hre miah lo nia. Tunah tak hian thil dang reng reng ka rilru ah a leng lo. Ka hmaa hmeichhe thu chiah hi ka duh awmchhun chu a ni.
.
“Lo nghak lawk_” tiin ka thawhsan a, a hmaa a hming a sign na lehkha ka dahna file kan piah dawhkana awm chu la in amah chu ka pan leh thuai a.
.
“He lehkha hian ka tan awmzia a neih ringin hmanruaah hman ka tum a.” file atanga lehkha chu phawrhin Vida mal chungah chuan ka dah a. “He lehkha hi i duh chuan tunah hian i pawt chhe thei. Cappolo Corporation hi engvangin nge ka hminga a awm kher ang.? Ka duh ber chu nangmah chauh hi i ni. Ka mitah hian min en la, min zir rawh.”
.
“Mordecai_” a mitmeng chu zawhna hlirin a khat ta. Ni e, ka mitah hian min en anih chuan ka chhungril a hmu ngei ang chu. Ka thutak takzet a, amah chauh hi ka duh ber awm chhun a ni tih pawh a hrethiam ngei ang.
.
“Guzel_”
A ngaihna hriat loh hmel taka a lu thing nakin a nui hul hak a, a rilru a buai tih ka hria.
“Ka kut hi thlah rawh. Helai hmun atang hian kal ka duh. Khawngaihin?”
Ka chhang lo. Ka maimitchhing tawp. A vawikhat nan ka chapona zawng zawng dah thain hmeichhe hmaah ka hmangaih thu ka puang a. Chhanna ka dawn chu hei chauh hi maw?
.
“Ka_Um_ I thutak tih ka hria. Mahse, helai hmun hi chhuahsan phawt ka duh. Khawngaihin_” a ti leh sap a. A phone nghawr dar dar lam bawk chu a en leh ta.
.
A kut ka vawnna chu thlahin a phone chu ka la a, caller ID ka hmuh chuan za lo zeta nui suk chungin a phone chu ka pe a.
.
“Hello.”
Phone-a tawng chu ngaithlain a reh vang vang a, amah chu tawng tawh lovin  a phone a off a.
.
“Helai hmun hi chhuahsan ang. Mordecai, ka_ I nu bulah kan kal a ngai.”
Eng maw? Ka nu bulah maw?
“Ka nu maw?” ka ti ringawt. Engvangin? Eng vangin nge ka nu bulah kan kal ngawt ang?
.
“I  nu chenna hmunah thil thalo a thleng_” tih chiah a sawi. Dawn awm miah lo hian nghet takin min kuah chawt a. “Ka tihpalh!” a tizui sap a. A thusawi leh a chetzia chuan min harhchhuah tir ta chiah!
.
Ka nu chenna hmunah thil thalo a thleng a, ‘ka tihpalh’ tiin min kuah ringawt bawk a. A awmzia chu?? Ka nu chungah thil thalo a thleng tihna a ni.
Min kuahna chu phelhin a hmel ka en a, hreawm ti hmel taka min en chuan engkim a tichiang.
“Engtin?” tih chiah ka sawi nain ka ngaihtuahna chuan thil tam tak a fangkual hman vek thung. Kei min hrilh lovin engvangin nge Vida hi an lo phone? Jefferson khan engvangin nge ka nu chenna hmuna thil thleng chu Vida kher hi a hrilh? A tihpalh thu a sawi maw? Ka nu chungah thil thalo a thleng anih chuan__ Ngaihtuah zawm ka duh lo.
.
“I tihpalh maw?” tiin Vida chu ka en a, hreawm ti hmel la pu reng chung hian a bu nghat a. Min kuah leh tum niawm taka min ban chuan ka tawlhsawn vat.
“Engvangin? Engvanga ka tihpalh tih thu kha sawi nge i nih?”
.
“A chhan chu_ I nu a awm tawh lo.”
Vida tawng chu zawi hle mah se ka tan chuan a ring tawk. Ka nu a awm tawh lo! He thu hi he hmeichhe ka atang hian a chhuak zo chiah. Ka hmangaih thu ka hrilh hmeichhe ka atang hian ka nu awm tawh loh thu leh a a tihpalh anih thu ka dawng zo chiah anih chu!
.
Ka ngaihtuahna a let but a, rang tak hian Vida pawhchhiat tura ka tih lehkha chu file ah ka khung sawk sawk a.
.
“Mordecai____”
A thusawi chu ka ngaithla lo nge, eng thu nge a sawi ka hrelo. Car chahbi ka la a, hmanhmawh takin pawn lam ka pan nghal a. Ka hnunga thawm awm atang chuan min lo zui tih zawng ka hria.
.
Car bul kan thleng a, car kawngkhar ka hawn chuan ka banah min rawn vuan chawt a.
.
“Keiman ka khalh ang. Chahbi kha min pe rawh.”
Ka chet hun nghak lovin ka kut atang chuan chahbi chu a la a, car kawngkhar ka hawn saah chuan thu lutin a tinung nghal a. Ka tihtur chu ka hria. Ni lo. Kei hi ka mumal hauh lo mai. Ka ngaihtuahna let but but hi ka thunun phawt a tul.
.
Passenger seat-ah ka thu lut a, thil thalo ka thluak a lo ut zut zut chu duh lovin ka lu ka thing nawk a.
.
5 minutes vel kan tlan hnu chuan ka ngaihtuahna pawh tlemin a fim ta. Vida chu ka en a, fimkhur tak hian motor chu khalhin a ngawi ngar a. Kan tlan chhuah atang khan engmah kan la sawi lo ve ve.
.
“Ding teh.” Ka tih chuan min melh zawk a, din a tum lo tih hriat tak hian a tlan chak zual sauh. Ka thil ngaihtuah hi a dik anih ngai chuan__ “Ding rawh.” ka ti leh hrawk a.
.
“Kan hmanhmawh a ngai.” ti sapin din a la tum chuang lo. A lamah chuan awn pheiin motor a tihdin theih nan steering wheel chu ka vuan a. A duh emaw duh lo emaw a din ngei a ngai.
.
“Mordecai, eng thil nge i hriat a? Kan hmanhmawh a ngai asin.”
Te that chungin motor chu a tiding a.
.
“Chhuk rawh.” ka tih chuan phawk fe hian min en a_ Ni e, a phawk khawp mai.
.
“Maw?”
“Chhuk rawh. Ka motor atang hian chhuak rawh!”
“Tunah hian maw?” tia min chhan chuan ka nui hawk.
.
“Tunah_Chhuk rawh.”
Hamhaih hmel tak hian a chhuk a, a chhuk fel veleh driver seat lamah thu phei nghalin car chu ka tinung a. Ka tlan chhuak a ni nghal mai.
.
“Mordecai_ Ni lo! Mordecai_” a aw ri vau vau chu reiloteah motor ri chuan a luahlan a, side glass atangin chiang lo ruai hian ka va hmu thei. Ngaihtuah zui duh lovin chak lehzual hian car chu ka khalh a.
.
Thui ka la tlan hman lo, ka tlan chak ang vel bawka chak hian car in min rawn tlan pel a. Kan insu lo chauh a ni e. Phun hluk chung hian ding chuang lovin ka khalh zel a.
Car seat hnunglama thawm lo chhuak chu ka en zawk.
“Fu*k!” Vida phone leh a bag let ngat chu ngaihdan ni lo zetin ka en a. Khalai hmun reh lutuk ah khan a thawmhnaw haklai nen chauh ka kalsan tih ka inhria. Pawi ka ti ang maw? Teuh lo mai! A phu tawk chiah!!
VIDA – SheKnows
(Vee-Da)
.
By. Thantei_LauraSean
.
CHAPTER - 31
.
MORDECAI SLOAN*
.
Ka nu chenna hmun ka thleng a, car atangin ka chhuak nghal a. Ngaihthat thlak loh zet hian a reh duk mai. Vida khan thil thalo a thlen thu a sawi chian si kha maw! Enge thil awmzia ni ta ang?
.
Ka phone lak chhuah mai tumin ka ipte ka zen a, a lo awm miah lo. Car-ah let lehin ka phone chu ka zawng a, kil khata a lo let bal chu ka la vat. A lo in off lehzel anih hi!
Thinur zetin ka phone chu ka on a, Jasper ka call nghal a.
.
"Sir, thil awmdan hi a thalo khawp mai. Tunah Hospital-ah kan awm mek."
.
"Khawi hospital ah nge?"
.
Jasper lo sawi hospital lam panin ka chhuak lehnghal. Ka thin a phu dup dup a, ka nu chan mai tur hian ka in ngaihtuah chhin ngai miah lo. Eng thil pawh lo ti ila ka nu tana hlauhawm tur khawp ka tih ka hre hek lo. Ngaihtuah ber tur pawh ka hre ta lo ve.
.
Hospital kawt ka thleng a, Jasper hmel ka hmuh chuan eng thu nge ka ngaihthlak dawn ka hrethiam. Ka nu chu beisei tur a awm tawh kher lo ang.
.
"Thil thlen dan han sawi phawt teh." ka ti nghal tawng a.
.
"Nakinah chiang zawkin ka hrilh ang che. Sir, tunah chuan ka thusawi tur hi_"
"I sawitur chu ka hria. Ka nu chu a awm tawh lo! A dik em?"
.
Jasper chuan a lu a thing ringawt.
"Chu aia pawimawh__"
.
"Tunah ka nu chu ka hmu phawt ang." tih pahin Jasper chu ka kalsan nghal a. Eng thu pawimawh mahin ka nu ka hmuhna tur min tih khawtlai a thiang lo.
.
Ka nu awmna cabin ka luh chuan a lo mu bam a, a hmel chu ka tumlawk dan aiin hmuh a hahdam. Hahdam taka muhil siai siai ang mai a ni. A bula doctor awm chu a bu zauh a. Ka nu mutna  khum bulah chuan thuin a kut chu dimtein ka vuan a, muangchang hian rawn mengin min melh a. A mitmeng en chuan a dik tlat lo.
.
“Ka fapa, kha_kha_hmei_chhia_kha_ Kha_hmei__” a thaw kawk kawk a, a tal awrh mai. Ka kut chu a theihtawpa nghet  hian a hmer a, tawng tumin a hmui a che nain engmah a ri chhuak zo tawh lo. A khum bula lungphu endikna khawl rik dan atang chuan a dinhmun a tha lo zual tih ka hria.
.
"Mama, i tha em? Mama_mama”
Doctor chuan min rawn hnaih nghalin ka kal sawn theih nan min nawr a, nurse an rawn lut nghal bawk. Pindan chhunga ka awm ve an phal tak loh vangin min nawr chhuak a ni ta ber. Awmngaihna ka hrelo. Ka nu khan thu min hrilh duh a nei. Ka nu hian min kalsan a duh hauh lo, keipawhin min kalsan mai turin ka phal hek lo. Ni lo_ He thil hi a thleng thei lovang.
.
Mangang takin kawngka bulah ka ding a, chhunglam thawm engmah ka hriat theih loh vang chuan ka mangang lehzual.
.
Reiloteah doctor chu a thu min hrilh tur hriatlawk theih hmelpu hian arawn pen chhuak a, a hmel ka hmuh chuan ka zawi hnawk. A ni thei lo!!
.
A hnua thil thleng chu ka mumang ang mai a ni. Tunah ka nu, ka neihchhun leh khawvela ka thinlung zawng zawnga ka rin theih awmchhun chuan min kalsan ta. A rapthlak tih hian a sawifiah zo lo ve.
.
Darkar engemaw zat a ral leh hnuah Jasper nen kan inhmu ta chauh. Ka nu chenna in chu tuma luh theih loh turin Police ten an endik a, thil rinhlelhawm hmuh tur a awm loh thu Jaspera’n a sawi chuan ka awih lo lutuk chu ka nui hawk. Engemaw tal chu a awm ngei tur a ni. Ka nu khan a  taksa lang thei chinah hliam na engmah a nei lo a, chuti chung chuan a nunna la thei khawpa na a taksa chhunglamah a tuar_ Ka nu chunga hetiang thil titu hi eng mihring pawh  nise ka ngaihdam ngai loh tur mihring a ni. Mahni inzawh buai ngai miah lovin heihi chu ka chiang. Tupawh chu lo nise ka lak atang hian a tlan bo dawn lo khawp. 
.
“Sir, thil thleng dang a awm a_”
“Tunah ka nu chungchang ni lo eng thildang mah ka ngaithla duh lo.” Ka ti chhum hmuk a. Ka rilru dik tak a ni bawk. Ka nu thusawi tum kha eng thil nge anih? Tu chungchang nge tih hi ka hriatchhuah a ngai.
.
“Aw le. Sir, mahse Miss Celik _”
“Ka ngaithla duh lo.”
Jasper chuan a lu thingin ka awmna pindan atang chuan min chhuahsan a_ Eng thu maw a sawi kha? Vida maw? Ka kalsanna hmunah khan ani hi a lo khawlo mai angem_?
.
“Jasper?”
.
Rang fe hian Jasper chu lo lut lehin ka hmaah a ding a.
“Sir, miss Celik ka be pawp thei lova, hotel a la thlen loh bawksi vangin a awmna chin i hriat leh hriat loh zawh che ka tum a.”
.
“Engvangin nge ka hriat ngawt ang?”
“Engmah a ni lo ve. Keimah zawk hian biak ka mamawh a. Thil thenkhat_han zawh lawk duh ka nei a.”
“Ka hriat ve loh tur thil enge awm?”
“Sir, ka_Ka sawi hun hi a fuh lo niin ka hria. Biak theih dan tur dang a awm mai ang. Ka kal phawt ange.” A ti ta zung zung a. Ka ngaih a tha ta lo tawp mai.
.
“I sawi hlauh chu a tha e. A chanchin I hriat veleh min lo hrilh ang che.”
.
Jasper a chhuak a, Vida call tumin ka phone ka phawrh nghal. Ka kalsan hnu khan car-ah a bag leh a phone a awm tih ka ngaihtuah chhuak leh chiah. Engvangin nge ka care ang? Ka nu chunga thil thlengah hian a inhnamhnawih ngeia ka rin vangin ka kalsan kha a nia. A tihpalh tih min hrilh ngei kha. Tihsual nei lo se ka lakah khatiang thu sawi nachhan tur kha a nei lo hrim hrim. Tunah ka nu ka sun mek lai hian ani ka lo ngaihtuah nachhan tur pawh a awm lo bawk.
.
.
VIDA*
.
Engtin nge hetiang hmunah min kalsan ringawt theih zawk? Mihring pawh a ni lo. Atan  a nu hlut zia ka hriat vangin a nu chunga thil thleng awm pawi ka tih thu ka hrilh_ah_ka tihpalh tih ka hrilh mai a nia. Tunah hetiang hmun hlauhawma min kalsan duh tur khawp hian a nunrawn ka ring lo reng reng. A nu chunga thil thalo thlentirtu pawh ka ni chai hleinem maw le!
Hlauthawng ru zetin kawng sirah ka kal a, eng chena thui nge ke-a kal  ngai dawn tih pawh ka hrethiam lo. Chak zeta ka lam pana motor tlan thawm ka hriat chuan Mordecai anih ringin ka nui sak a. Mahse, ka ring sual. Chu motor chuan chak lutuk hian min tlanpel fua a.
.
Thim hi ka ngaina ngai lo. A khat tawkin in a awm pheuh pheuh a, mihring chenna a ni pawhin ka hre lo. Mahse ramhnuai pil rila awm ai chuan a la zia. In awm lo phei se mahnia kalna chi a ni lo hrim hrim. Rannung an hram tan ta. Ka theihtawpa chakin ka kal zel a, ramsa ai chuan mihring thalo tawn palh ka hlau zawk. Kei ve mai hian engtinmah ka beilet thei dawn lo tih ka chiang. Hlauhawm thleng thei zawng zawng reilote chhungin ka ngaihtuah kim vek hman.
.
 Ka pheikhawk bun sang mah mah chu thinur zet hian ka phelh a, kelawng a lei ka rah chuan a sa hum hum thei hial a, mahse ka hlauhthawnna chuan pawisak min neihtir thei tawh lo. Ka theih tawpa chak hian ka kal ta ngat ngat.
Minutes engzat nge ka kal ka lo chhinchhiah lo. Ka thlanin min bual huh vek tawh hnua ka bula taxi arawn din chawt chuan ka lawm lutuk vangin ka mittui a tla sawk thei. Pathian rawn tirh a nih ngei pawh ka ring. Taxi khalhtu chu eng mihring pawh nise ka chuang lo thei tawh lo. Ka thihna tur lam ka thlang anih pawhin ni mai rawh se. Pawi ka ti hrep tawh lo. Pathian hian ka thihna turin ka lam pana mihring a lo tirh ka ring lo reng reng bawk. Ka ngaihtuahna atthlak zia hi!
Taxi-ah chuan lutin ka rilru chuan Mordecai ka huatna thu ka sawi nghal mawlh mawlh. Vawikhat pawh ka melh leh tawh lovang. Amah ka ngei em em rualin a nu chungah eng thil nge thleng ang tih ka ngaihtuah a, hlauhthawnna ka nei tho. Thil thalo lutuk a thleng em lovang chu maw.
 Ka kephah thip vut vut chu chiang zawka ka en chuan thinur zet hian ka insehruh tha leh a. A durh a lo keh hman anih hi. A thip zek lehnghal. A pilh nasat zia ka hmuh hnu hian a na lehzual in ka hria.
.
Hotel pan lovin Maddie te chenna hmun hming ka sawi chuan ngawi reng hian a tlan chhuak ve mai a. Kan inbe tam lo khawp mai. A nupui chenna hmun pana kal anih thu a sawi a, keimah vang liau liauin khawpui lamah a let leh rih a ni. Han biak zui vak dan ka hre lo. Lawmthu erawh ka thiam tawkin ka hrilh thung.
.
Maddie te in kan thlen chuan driver chu min lo nghak lawk tura hrilhin door bell ka hmet a, min chhan mai loh vang chuan makti hmel pu chung hian driver chuan min rawn en hu tawh. Dawhthei lo zeta door bell ka hmeh leh hnu chuan kawngka an rawn hawng ta hram.
.
“Vee!! Eng thil nge thleng?” Maddie hmel chu phawk tak a ni.
“Pawisa ka mamawh phawt. Ka chuan man pek a ngai” Mordecai laka ka lungawilohna leh ka thinurna chu Maddie lakah ka hrithla anih tak ber hi.
.
“Oh! Okay_Okay.”
.
Lawm taka driver a tlan sawn leh hnu chuan in chhungah Maddie nen kan inzui lut a, a hmela zawhna tam lutuk chu enin ka hawisawn hmak a.
“Tunah chuan engmah ka sawi dawn lo. Ka ke hi enkawl phawt a ngai a nia. Mordecai Sloan hi mihring pawh a ni hrep lo.. Ka bulah vawihkat pawh fak tawh suh ang che.” Ka ti nghal pawp pawp.
Maddie nui ringawt pawh chu ka ngei lo chah tawh. Engmah sawi lovin bathroom-ah kan inzui lut a, an fanu leh a pasal thawm ka hriat chuan ka nui thei ta chauh.
.
Ka ke-ah damdawi kan  hnawih a, kan intihfel hnu chuan Maddie chuan mu turin min kalsan a. Zingah mumal zawkin kan la sawi tha leh ang chu.
.
Muhil thei lovin ka tal sek a, ka taksa chhung hi a na vek nimai hian ka hria. Rilru lakpen duhin TV ka on a, en duh mumal pawh ka nei chuang lo. Ka ngaihtuahna vak kual chuan lungawi lohna leh natna chiah min pe a, Mordecai hian keimahah rinna tlemte tal pawh a lo nei lo tih ka ngaihtuah phei chuan__thil awmze neilo mai a ni e.
.
Engtin tin emaw ka lo muhil a ni ngei ang, min sawih harhtu awm vang chuan chiang lo ruai hian ka harh a. Khua alo var vek tawh.
.
“Dar 10 a pel tawh a, breaking news a awm bawk a nia.” Maddie hmel chu ka en a, a thutak khawp mai.
.
“Eng thil nge a? Reilote tal ka la muhil thei em?” ka maimitchhing tha leh.
.
“Thei lo. Mordecai nu a thi anih chu!”
.
Mak tiin ka thu chhuak a, min thawn zia chu sawi ngaihna a awm lo.
.
“Eng_engtin nge a thlen? Chanchin kimchang hriattur a awm em?”
.
Maddie chuan min chhang mai lovin min melh ren rawn a, engkim ka awmdan zawng zawng a chik hle tih ka hmuh chuan a thutak lutuk chhan chu ka ring thiam mai.
.
“Nizana thil thleng kha min hrilh rawh. Eng thil  nge thleng?” hlauhthawn hmel zet hian a phun sar sar a, kan tawng chu midangin an hriat a  hlau hle tih a lang chiang reng.
.
“Eng thil diklo mah ka ti lo. I hlauhthawnna hi a awm. Min ngaihtuah vang tih ka hria. Maddie_”
Tlai lam atanga thil thleng leh Mordecai min kalsan dan te, an in ka thlen hma zawnga thil thleng ka hrilh zawh chuan a thaw huai a.
.
“A tha e. Tukthuan ei phawt la Mordecai chu va hmu rawh.”
“Eng a?” Maddie chu ka en a, Mordecai hmu tura ka kal a tulna chhan tur reng reng ka hrelo. Ni e, a dik! A nu a sun a, rilru hreawm takin a awm ngei ang. Mahse_ Ka hre lo. Ka va kal kher a tulna ka hre rih lo.
.
“I va hmuh ngei ngei a ngai.”
“Ka kal lovang. Ka ke vang hian ka kal chhuak thei rih lo hrim hrim bawk a. Nakinah ka tuarpui thu chu ka la hrilh mai ang.” tia ka chhan chuan keimahah inthiam lohna a awm ringawt lehnghal a. Mordecai hian ka khawngaihna leh lainatna hi a mamawh reng em? Ka nu ka chan tawh a, a nat zia ka hria. Mahse Mordecai hian ka tuarpui a mamawh loh thu min hrilh in, min rindan chhe zet ni tura ka ngaihtuah lawk kha lo dik ta se? Keimah bawk hi na tur chu ka ni. Mahni hmasial min ti anih pawhin pawi ka ti lo, mahse, tunah hian Mordecai hmuh ka duh rih lo a ni tawp mai.
.
“I ngaihtuah em? Vee, engvangin nge motor atanga chhuktir che in ke-a thui tak i kal a tul? Ngaihtuah rawh. Phone i dawng a, anu chunga thil thalo thleng chu i tihpalh anih thu a bulah i sawi ani lawm ni? Engtin nge a lo ngaih i rin?”
.
“Eng thil nge sawi i tum ka hria. Ka ngaihtuah  vek tawh. A chhe thei ang ber leh a nu chunga thil thalo tiduh tur hial khawpa min ngai hi ka taksa hliam ai hian ana zawk daih asin. Mordecai hian ka lainatna leh ka tuarpui dawn a mamawh lo zia min lo hrilh ngei ngei ang. Bakah, hmuh ka chak lo. “
.
“A tha e. Keimah nen kan kal ang. Mr. Sloan chu ka tuarpuina lantir ka duh ve hrim hrim bawk. Min hnial miah suh.” min melh ram ram chungin min chhuahsan a. Maddie hian min nawrlui ngai miah lo, tun tum chu a dan a dang tlat. Ka kal  ngei hi a tha zawk pawh a niang. Amah Mordecai ka hmuh duh hrim hrim vang ni lovin anu a sunna tawmpui tur chauhin ka kal ang.
.
Choka lamah ka bai phei auh auh a, ka rin ai takin ka ke na chu a zia. Pheikhawk bun erawh a harsa deuh dawn a nih hi.
.
Maddie min nawr hmanhmawh vangin tukthuan ka ei zung zung a, an in kan chhuahsan chuan chhun dar 12 a pel fel tawh.
.
Sloan mansion kan pan a, tun ang hunah a office-ah a awm dawn lo chiang a, kan hmu ngei angem tih pawh a hriat loh.
Mansion kan thlen chuan mi an lo awm neuh neuh a, Jasper chuan min hmuh rualin min lo pan vat a. A buai hmel khawp mai.
.
“Mr. Sloan a hmuh theih ang chu tiraw?” Maddie chuan ka tawng hma hauhin min lo tawng khalh zung zung. Enge maw a hriat ni?
.
“Ani chu hetah a awm lo. Thil pawimawh ah a chhuak a. Amah hmuh in duh anih chuan mansion ah hian a cheng lo hrim hrim a.”
Maddie chuan min en ha mai. Ka lo lawm rilru hmanhmawh bawk. Mak takin Mordecai hmuh hian thil tha aiin thil thalo a thlen dawn nia hriatna ka nei a, Maddie hian min nawrlui zel lo se ka ti tak zet.
.
“Maddie, hmuh loh hi a tha zawk. Nakinah kan la inhmu dawn tho alawm.” Ka tih pawhin Maddie chu a hawi sawn hmak.
.
“Mr. _Um_ Mr. Sloan chu__ Ah_ saw a lo thleng alawm.” Maddie hawina lam ka en a, Mordecai hmel dur zet ka hmuh chuan ka hawisawn thuai a. Min rawn kal pelh lai pawhin min hmu angin a awm lo tih ka hria. Ka en kher a ngai lo, ka hre mai a ni. Ka rinlawk dan chiah a ni bawk. Amah ang bawkin ka be chak bik hlawl lo.
.
Maddie chu ka en a, awm nuam lo hmel a put takah chuan a beng bulah ka phun sar sar a.
“Kha_ka tih reng kha. Tun hun hi hmuh tumna hun tha a ni lo. Kan tuarpuina hi a mamawh hran lo a nia.  A hmel kha i lo hmu em?”
.
“I dik ka ring. Kal leh mai ang.” a ti ta sap a. Kal  buai loh law law tur hi a ni zawk a__
.
“Miss Celik, sir chuan a hmu duh che. Tunah!”
.
“Tunah maw?” tia chhang pahin Maddie chuan keimah min en daih thung. “Va kal rawh. Ka lo nghak ang che. Ka tuarpuina hi mi han hlan kep dawn nia.
.
Huphurh ru zetin bai deuh auh auh chung hian Jasper chu ka zui a, hun engemaw chen ka lo chen tawhna inchhung ka han rap leh ta chu a dan a dang riau lehnghal. Library lam kan pan tih ka hria.
.
“I ke chu engtin nge i tihnat a?”
“Ka tina palh anih hi. A serious lo.”’
Ka chhan dan chu nuihzat awm tak hian Jasper chu a kiai suk.
“Kan inhmuh loh chhungin danglamna i lo nei hman miah lo. I ke chu dam thuai rawh se.” tih pahin Library kawngkhar hnum hlurh chu min hawnsak a. Ka luh fel chuan a khar zui hmiah.
.
Mordecai chu chair-ah thuin min hnungchhawn a, ka thawm chu a hriat ngei ka ring. A lo hawi miah lo thung. A thutna ep dawhkan bul chair ka thlen chuan thu tura min tih hun nghak lovin ka thu nghal mai a.
.
“Engtin nge i lo kal  ngam zawk?” a tawngkam kha lutuk vang chuan ka chil ka lem khawlh. Ka lam a la rawn hawi chuang lo bawk. Maddie min nawrluih vang chauha kal ka ni tih sawi kher ka tum lo.
.
“A nat zia ka hriat vangin ka lo kal a, ka_” a thutna her thut a min rawn en chuan ka ngawi chawt. A hmel chu ka en rei duh lo. Ahmaa ka ngaihtuah, ka duh loh em em ang chiah khan min en tlat a ni. Ka care lo tia palzam mai ka tum pawhin a theih loh.
.
“I tuarpuina ka mamawh nia i lo ngai anih chuan i kal lehnghal thei.” Chhang lovin ka en tawp phawt. A chhungrila natna hi a thuk dawn em em tih ka hriat vangin ka nat vena hi ka dahthat a ngai ani. Hetiang hian engtin nge ka ngaihtuah theih ka inhre bik lo.
.
“I mamawh hauh lo tih ka hria.” A hmel ka en chuan a nat zia ka hmu a, ka ngaihtuah lawk miah loh thil  ka rilrua lo lut hi ka tithei angem ka hrelo.
.
Ka thutna atang chuan thovin dawhkan sir zai zai dawm chuan ka pan hnai a, a bul ka thlen chuan tim deuh tak hian a darah ka vuan a. Engtinmah a awm lo. Ka pan lai pawh khan min en lo hrim hrim tawh zawk.
.
“Engkim a tha vek ang tiin ka hrilh dawn lo che. Mahse, i chak tawka nang chuan engkim i hmachhawn thei ngei ngei ang_” ka thiam ang tawka damin ka tawng a, a hnunglam atang chuan ka rilru zawng zawnga hnem tum takmeuh hian ka kuah a. *Oh! Vida he thil hi I ngaihtuah hauh loh kha aw* tia inhrilh chungin ka maimitchhing a. Ka nawmna tur ka duh vang leh amah ka thlakhlelh hrim hrim vanga kuah erawh ka ni lo tih ka inhrechiang em em.
“Ka nu’n min kalsan khan hetiang hian ka ngaihtuah a_ Khawvel ah hian_”
“Duhtawk teh!”
Dawn awm miah lo hian a ding thut a, ka kuah na chu thil tenawm tak niawm fahran hian a phelh bawk.
.
“I nu leh ka nu chu khaikhin duh suh! I tuarpuina ka mamawh lo tih ka hrilh che kha. Nang hian ka nu min laksak in tunah min hnem i rawn tum vel ang maw? Tenawm! Fin vervek hian chintawk a nei ngai asin..”
.
A tawngkam zawi set sawt chuan tek ang mai hian min deng sawk sawk! Ka inbeng dai thei angem ka hre lo. Tum erawh ka tum khawp mai.
.
“Min mamawh lo tih chu ka hria e_” ka ti sap hman chauh, min rawn pan hnaiin  hnai set sawtah min  en a,
.
“Nang hian hmangaihtu neih i lo phu loh reng vang anih hi Jefferson pawh khan a lo phatsan che_” a tawngkam hman vnag chuan ka maimitchhing sawk! Ka awih thei lo. Mordecai hi hetiang em a nunrawng hi a ni thei lo.
.
“Mordecai??”
Ka meng a, a mitmeng hlauhawm zet vang chuan ip chawihin ka awm ka dawm a, a tawngkam chuan min tina tawk bawk e. Tlemin ka tawlh hla hlek nain awmzia a awm lo. Penkhat lekah min rawn hnaih lehnghal.
.
“Nuam in i nung hauh lovang. I laka ka thusawi tawh kha nangmah ang bawka ka lemchanna a ni tih hre bawk ang che.!”
A dik ang! Ka tih reng kha_Hmangaihna tak tak dawn tur hi ka tan siam tel a ni ve lo! Ka hria alawm. Ka thahrui neih zawng zawng a zo ta ang mai hian ka inthlahdul hnawk a. Ka inthunun na hi a kehchhiat vek hmain he pindan hi ka chhuahsan tur a ni.
.
“Ka hria!” ka ti thei tawk. A mitah ka en ngam tawh lo. A thu rawn sawi hi ka ngaihtuah fo tawh, tawngkam ngeia ka dawn ka rin ngai loh thil a ni. A na lutuk mah mah a ni e.
.
Ka ke ka pen a, ka ke na chu ka lo hre chang  tawh lo. A thip zawr zawr vang chuan loh theih lohin dawhkan tlang chu ka vuan a. Mordecai chu a che niin ka hria. Mahse, ka en thei tawh lo. Insehruh tha leh in muangchang hian library atanga chhuah tum chuan ka kal a.
.
“Vida_”
Ka ding chawt. Ka rilru a lo awm hmasa ber angin ka chhang ang.
.
“He pindan ah hian mihring damlai an awm lo. Kha hming neitu kha a thi tawh. Hmangaihna dawn phu lo hmeichhia hian hming neih pawh a phu dawn em ni?__” ka hnuk a ulh vangin ka tawng zawm thei lo. Nghet taka  ka kut hum ngat ngat chungin muangchang hian ka kal bek bek a.
VIDA – SheKnows
(Vee-Da)
.
By. Thantei_LauraSean
.
CHAPTER - 32
.
VIDA*
.
"Lo ding teh."
.
Engvangin? Engvang in nge ka din ang? A tawk ta viau e. A tawngkam na tinreng dawnga a duh anga awm turin helai  hmunah hian ka kal hauh hleinem.
.
"Guzel_"
Mordecai min kohna chu ka hre lo! Ka hmaah hian lo dingin min dan tum pawh nise a hlawhtling hauh lovang. Tunah chuan ka laka a rilru put hmang a chiang tawh a, engmah care tur ka nei lo. A tawngkam hman zawng zawng kha ka theihnghilh tawh ngai loh tur vek a ni.
.
Ka kal chak theilo chu ka thinur tak zet bawk. Ka ke chu ka rah luih apiangin ka taksa pum hian ka za chhuak vek nimai hian ka inhria. Kawngka chu hawn tumin ka pawt a, a inhawng thei lo. Jasper khan pawn lamah a kalh anih ngei dawn hi. Engtin nge ka tih tak ang?
.
Ka hawng thei dawn lo tih hre chungin kawngka chu ka pawt nawn a, pawh mai duhtawk lovin ka chum dat dat a.
.
"Guzel_Lo nghak teh."
Mordecai chu chhang lovin kawngka chu hnai zetah ka en ngar a, a hmel en tura hawilet ka tum loh nasat zia chu sawi ngai lo ni zawk rawh se.
"Ngatinge an inhawn theih miah loh a." kawngka chu ka pawt nawn leh a, a la inhawng thei chuang lo.
.
Ka hnunga Mordecai lo ding chu en kher ngai lova ka feel theih vangin ka maimitchhing tawp. Engtin nge ka tih dawn?
.
"Jasper, kawngka a hawn theih." awki hniam zeta tawngin a phone a off lehnghal tih hriat tak hian a che a, ka la che ngam lo thung. Ka chet hlek chuan a taksa ka va dek dawn nia ka hriat vang a ni.
Kawngka kalhna inhawng ri ka hriat rual chiahin ka pawt a, a inhawng ta hram e.
.
Ka hmel min hmuh rualin Jasper chu a bu zauh a, chhang lovin ka kal pel nghal a. Tlan thei ni ila ka tlan hial ang chu.
.
"I kal hleithei lo chu anih ber hi.." min pawm kang nawlhtu chu tunge anih ka hria. Te chhuak lo turin ka insum a, min en tih ka hriat chuan ka hmel a hmuh theih loh nan ka hawisawn vat a. Min hmutu apiang makti hmel chu ka en lo thei ta lo. Ka in sanmar nasat zia chu pui tak a ni.
.
"Hahdam rawh." a tih nghut chuan chhan tumna pawh ka nei lo. A bulah hian engmah sawi tawh loh ka duh ber zawk.

Pawnah min pawm chhuak a, Maddie chuan phawk fe-a min en chungin min rawn pan thuai a. Leia min nghah rualin ka theih ang angin ka pen sawn nghal bawk. Maddie chu ka ngei hial tawh. Helai hmun kal tur hian min nawrlui lo se Mordecai tawngkam na tak takte kha ka hre kher lo ang. Maddie chu kal ka duh tawh tak zet tih hriattir nan ka melh a, min hrethiam tak hian min rawn hnaih thuai a.
.
"Enge?" a la ti tak deuh deuh. Khawiah nge engkima min  hrethiam thintu Maddie kha a awm tak? Lang lo thei tur ang bera ka ngaih angin a banah ka vuan a, a beng bulah thle hnaiin 'Kal ang." tih chiah ka sawi hman.
.
"Jasper va hruai haw rawh." Mordecai chu a tawng a la bung nghut tho. Tum lawk miah lo hian ka melh zawk a, min lo en reng tih ka hmuh chuan ka hawisawn rang khawp.
.
"Maddie, kal ila." ka ti ve zat a. 'Jasper hruai ngai lovin kan haw thei' tia Mordecai chu au khum chiam ka chak tak zet. Chak nazawng tih vek erawh a tha kher lo tih ka hriat vangin ka ngawi hram hram a, awm ve lo ang hmiah a khawsak luih ka duh ta zawk.

.
"Maddie?" tih pahin ka thiani banah ka vuan a, kal mai tum hmel a la pu lo. Library pindan-a Mordecai min tawng khum dan kha hria se tun ang hian a awm hauh lo ang. A thinrim nasa zawk a ni ngei awm sia.
.
"Maddison, Jasper hian a hruai haw ang che u."
.
"Jasper, Maddie car-in kan lo kal a, kan duh hunah kan haw thei. I tihtur dang va ti rawh." ka ti ve nghal zat a. Mordecai chu ka melh tawh eih lo. Maddie banah chuan na deuh tak hian ka hmer salh a, Mordecai nen kan boruak chu a hrethiam ve ta riai ruai a niang, a bu ta nghat a.
.
"Mr. Sloan, ka tawrhpui tak zet che. Kan kal phawt ange."
.
Mordecai chuan engtin nge a chhan ka hre lo. Hmun dang ka melh tlat a, Maddie a chet chuan ka theih anga rangin ka pen ve nghal a.
.
Kan haw lam kawng tluanin Maddie nen chuan kan inbe lo tluk a ni. Ka ngaihtuahna ka kawm a, dik tak chuan Mordecai tawngkam tin kha ka ngaihtuah nawn vek. Thil tul ber a ni lo tih ka hre chungin ka ngaihtuahna ka thunun thei thlawt lo.
.
"Vee__Vee?? I tha meuh em?"
"Uh_Maw? Eng maw i sawi?"
"I tha em? Pindanah khan eng thil nge thleng?"
.
"Eng vak mah." ka ti liam puat a. Maddie ner deuh nang nang dan atang chuan ka sawi chu a awih lo hulhual tih a lang reng. Thil thleng dik tak hrilh tumna ka nei lo. Enge sawt chuang ang? Min thinrimpui ngei ang a, chu chuan engmah a siamtha chuang lovang. Chuvang chuan ngawih mai hi a tha zawk.
.
"Mr.Sloan awmdan hi ka hrethiam thei lo. A changin mi nunnem tak niin ka hria a, a chang leh mi rothap tak angin ka hmu  bawk a. Engemaw chu a thleng ngei tih ka hria. Tunah min hrilh dawn nge ka zawh vak vak hnuah che min hrilh dawn? In inkarah hian eng thil nge thleng?"
.
"Maddie, engmah a thleng lo. A chanchin sawi ka peih lo a nia."
.
"Hm, a that chu." lungawi zan lo tih hriat tak hian a thle nghat a, kan tawng zui ta lo.
.
"I phone kha nilenga ring tir i tum a ni em lo maw?"
.
Ka phone phawrhin caller ID ka en a, ngaihtuah lawk lem lo hian ka pick up thuai a.
.
"Oh God, Esma! Khawiah nge i awm? Min ti mangang tak zet tih i hria em?" Jeff aw ka hriat chuan chhang mai lovin ka ngawi deuh reng a. Ka awmdan hi ka hrethiam biklo. Ka chawmawlh ni berin ka hria.
.
"Esma? I tha em?"
"Tha e. Min ngaihtuah suh. Naktukah kan inhmu dawn nia."
"Tunah khawiah nge i awm?"
"Ka hahchawl rih a__" sawi zawm mai tur hre lovin ka ngawi dat a.
.
"A that chu. Lo sawi la ka lo hruai ang che. I phone kha i bulhnaiah dah reng la_"
"Okay."
Phone ka off a.
Ka awm zel dan tur hi ka ngaihtuah fel thuai a tul hmasa ber dawn a ni. Ka pan lam lam chu ding taka ka pan a tul tawh.
.
MORDECAI SLOAN*
.
"Tunah finfiahna i neih zawng chu min lo pe rawh. Hun khawhral tur a awm lo." ka tawt up up a, ka rilru awm dan hi tuman min hriatthiam pui lovang. Keimah ngei pawh hian ka hrethiam rih lo. Ka nu thihna nena inkaihhnawih thil ka hriat theih chinah engkim hi Vida nen a inzawm vek a, ka ring phal lo a, ka ring lo thei si lo.
.
A hmel ka hmuh khan ka inthunun theihna ka hloh ta vek anih kha. Ka tawngkam khan a tina tih pawh ka hria.
Pindan atanga a chhuak tur kal bai ka hmuh khan na a nei tih ka hre chiah a, a kal thei hlawl lo chungin kal a tum tang tang tho. A awm zui dan khan thup tum hle mah se ka tawngkamin a tihnat zia chu a lang bawk. Hreawm ka titur a ni lo. A phu tawk ang chiahin ka tawngkhum ani tia ka inhrilh mawlh mawlh chung pawhin ka rilru a nuam thei chuang lo.
.
Darkar hnih hnuah finfiahna dang ka hmaa awm chu uluk takin ka en a, hmasawnna a awm tam lo khawp.
.
.
Ni a ral a, ka nu kan vui liam ta. A taksa endikna report lo chhuak chu ka thinlung natna tizualtu chauh a ni ber e. Thinurna in ka khat a, ka tana tha ber chu Vida hmel hmuh loh hi a ni tih ka hria.
.
KAR KHAT HNUAH*
.
Darkar 6 zet office-ah ka thu tawh a, vawiin hian kar kalta chhunga ka hna dah khawl ka chinglet ngat ngat a ni. Ka phone ri pawh chu ka lo hre mai lo. Laklawh zet hian ka phone chu ka pick up a.
.
"Mr. Sloan, thil thar a awm a, tunah police station-ah ilo kal theih chuan a lawmawm khawp ang."
"Ka lo kal nghal e." tih leh phone dah ka rual a. Thil awmze nei a nih ngei tawh ringin beiseina ka nei sang khawp mai.
.
Ka office atanga chhuakin hmanhmawh tak hian min kohna station lam ka pan nghal vang vang a.
.
"Officer Ray pindanah a lo nghak tawh che."
"Ka lawm e."
.
Officer Ray pindana ka luh chuan ka beisei loh ber ka hmu nghal pang! Vida chu inringtawk zet hian chair-ah a thu ngil at a, ka lut chu min hmu awm pawhin a awm lo. Officer Ray nen chuan khunkhan zet hian an inbia a, min hmuh veleh Officer Ray chu a lo ding thuai a. Vida erawh a thut ngaiin a la thu reng.
.
"Mr.Sloan, lo thu rawh. Han sawi nghal mai ila. I nu in a chhiatna a thlen zan khan Miss Celik nen hian in awm dun ngei em tih hriatchian a ngaih vangin Miss Celik hi helai hmunah hian koh a ni a. Video clip chhe tawh nia kan ngaih kan hmuh atangin in pahniha in awm dun lai ngei hian Miss Celik hi zawhna ka zawt dawn a ni." aOfficer hmel thutak zet chu ka en meuh lo. Vida mawlh chu ka lo en a. Ani erawh a thut dan ngaiin a la thu ngil at reng.
.
"Mr. Sloan, khami ni khan Miss Celik nen hian in awm dun ngei em?"
"Aw."
"Tu rawt nge? Ka sawi tum chu__"
"Keimah."
"Miss Celik, Mr.Sloan sawi hi a dik ngei em?"
"Dik e." a ti sap a. Min la en chuang lo.
.
Zawhna chi hrang hrang min zawn tawn zak zak a, a zawh chin chiah chu felfai takin Vida chuan a chhang zel a. Vawikhatte pawh min la en lo thung.
.
"A tha e. Tunah clip hi kan en ang a, clip-a lo lang hi in hmelhriat zawng anih chuan in lo sawi dawn nia."
.
Kan pathum chuan ngawi thap hian video clip chu kan en a, lang chiang tak anih loh vangin mihring ruangam a lo lan chuan video chu a tichawl lailawk a.
.
"Heihi in hriat mi a ni em?"
.
"Ni e" kan ti rual thawih! Vida chu engtin nge a awm tih hriat duhin ka en a, screen chu a en ngar ngar. Ka ngaihtuah chhin miah loh ber screen-a lo lang chu hmuh chian lehzual tumin ka bih hnai a. Engtin nge anih theih? tih chiah hi ka rilru-a thumal awm a ni.
.
"A tha e. Screen-a lang hian record thalo engmah a nei lo a. Mahse, hemi ni hian i nu chenna hmunah a kal ngei tih erawh phat rual a ni lo a. Engkim chiang zawkin kan lo chhui zel ang a, dikna chu a lang chhuak ngei ang. In lo kal avangin inchungah ka lawm e. In duh chuan min chhuahsan thei tawh ang."
.
Vida chu a thutna atangin a tho a, engmah sawi lo hian pindan atang chuan a kal chhuak nghal a. Ka umzui nghal vat.
.
"Inbe lawk teh ang."
A bulah ka kal a, ka tawng chu a hrelo tak tak nge a hrelo der tih hriat theih loh khawp hian a kal ngauh ngauh a.
.
Tawngkam ringawt chuan awmzia a nei leh dawn lo tih ka chiang. A banrekah nghet zeta ka vawn chuan a ding ta chauh.
.
"Zawh tur awm thei zawng zawng chu Officer Ray khan min zawt tawh in ka hria. Min lo hrethiam la hun ka nei lo tlat mai." a ti fiah kalh a. Min la en chuang miah lo.
.
"Min hrelo anga awm hi duhtawk teh." ka ti hrawk a. A awmdan hian ka ngeng a chhun ngaih ngaih khawp.
.
"Ka tawng chu i hre thei tih ka hria. Hun ka nei lo.  Min lo hrethiam la?" hawi sawn chuang miah lo hian a banrek ka vawnna chu phelh tumin a ban a, a ti mah mah tawh ani.
.
"Heta tang hian kan inpawm chhuah leh ngai suh se." a hriat tur tawk chauhin ka tawng a, a nui sak. A nuih dan chu a tha lam a ni hrep lo bawk.
.
"Han tum chhin ta che! Mr.Sloan?" a ti kha fal mai.
.
He thu hi ka sawi tawh em? Vida Elves Cappolo hian pindan-a kan awm atanga tun thleng hian min la melh eih lo! Ka sawi tawh! Ni e, mahse ka sawi nawn leh ang. A mitsir pawhin min la melh eih lo.
.
"A bul atangin kan tan tha leh dawn anih hmel." muangchangin ka vawnna chu ka thlah a, ka thlah rualin a kal lehnghal mai a. Eng thil nge a hriat tehhrep ni? Office atanga a kal chhuak chu ka en reng a, muang lovin ka zui chhuak ve nghal.
.
"Bultan that leh chu pawi tihna ka nei miah lo."
A hnunglam ah ka kal a, ka tawng chu a hre ngei tih ka chiang. A speed ngai rengin a la kal tho.
.
"Miss Cappolo,"
.
A ding a, chiang taka min en chungin min rawn hnaih a.
.
"Bultan turin nang leh kei hian tawpna emaw bultanna emaw kan la nei ngai lo hrim hrim. I nu chunga thil thalo titu hi hrechhuak ngei la tih ka duh vang chauhin helai hmunah hian ka kal tih hria ang che. I nunah hian engti zawng  mahin inrawlh ka duh lo, ka duh ngai lo bawk ang. A chiang em? Mangtha le_ Mr. Sloan."
.
A inher a, taxi lo kal chu phar dingin a chuang nghal vat a. Vawikhat pawh min melh tawh lo. Chu hmeichhia zet chu leh!? 
.
Tih ngaihna dang awm heklo le, office ah chuan ka lut leh a. Officer Ray khan engkim chiang zawkin min hrilh thei tih ka hria.
.
Officer Ray pindana ka luh leh chuan nui suk chungin thutna min lo kawhhmuh thuai a.
.
“Miss Celik khan a hriat chin zawng chu a sawi vek tawh a, amah leh thil thleng inzawmna nei tlat mai hi mak ka ti tawp thei lo. Mahse, tunah chuan kawng chanve kan thleng thei ta anih hi. Mihring verther nasat theih zia hi hriat vek sen pawh a lo ni hrep lo. Nghah rei a ngai tawh lovang.” a ti zung zung a. Rilru buai tur nia ka inrin laiin ka thaw hawk thung.
.
Darkar khat chuang zet officer Ray nen kan ti ti hnu chuan Police station ka chhuahsan ta rih. Vida leh ka nu chunga thil thleng inzawm vek chhan chu ka hre ta a. Mak ka ti hle bawk! A tira ka thu hriat zawng zawng kha dawt alo awm hauh lo a, Vida ka ringhlel mai pawh kha thil awm tak a ni. Engkim khan a lam an hawi vek a, tlemin lo dawhthei hlek chu ni ila Vida kha na takin ka tawng khum kher lovang. Mahse ka tlai! Thil nih tur ang a ni tawh a, a khawih pawi tur ang ka khawih pawi vek tawh. Engtianga siam that leh tur nge tih chu chunglam chauh khian a hria! 
He mihring tenawm lutuk hian engtiklai atang khan nge he ruahmanna  hi a lo siam tawh? Engkim felfai takin a kalpui vek a, a tum tak a hlawhtling bawk! Engvang nge? He zawhna hi a chhanna ka duh! Engvanga hetiang thil hi ti nge anih? Eng chiah nge a duh le? Engkim a mamawh zawng zawng ka pe vek a ni lawm ni? A neih theih ngai loh tur engkim ka pe a, a la tawk zo lo cheu a maw? Mi tha ber angin a la lang ta zawk lehnghal a!
.
VIDA*
.
Tunge rin a, tunge rin loh tur tih pawh ka hrethiam tawh lo. Engkim hi ka kham ta hluah luah a ni ber. Pawnlam lan dan hian min lo va bum kual nasa thei em!
.
Hun engemaw chen chu kal bo rih ila a that ka ring. Tunah chuan na taka min tawng khum vang khan Mordecai hi ka dem tawh lo. A tan duhthlan tur dang a awm loh  vang a ni. Engkim, rinhlelh theih tur zawng zawngin ka lam an hawi vek vang khan min haw awm reng pawh a ni. Min rinhlelhna khan ka laka a rilru dik tak a phawrh tir a, ka nihna dik tak ka hriat phah ta bawk anih hi. Kan chunga thleng apiang lungawi taka pawm mai hi thil harsa ber a ni a, mahse kan tana ruat hi chu kan pumpelh thei chuang lo. Chuvangin tuna ka thutlukna hi ka sawhsawn tawh hlek lovang.
Mordecai hi ka hmangaih anih pawhin kan pahnih hian damchhunga inngeih leh inhmangaih taka khawsa dun tur kan ni lo tih hi ka pawm mai a ngai ani.
.
“Khawi lam nge i pan ang?” Maddie hmel ngui lap chu enin ka nui lui sak a.
.
“Ka hre rih lo. Ka awmna hmun tur dik takah chuan ka thleng tho ang. Min ngaihtuah suh.” Tiin ka kuah vang vang a. Maddie nen hian kan inhmu leh angem tih pawh ka ngaihtuah ngam tawh lo. Ka hnaih apiang ten buaina an tawk anih chuan mahni chauha khawsak hi ka thlan mai a ngai.
.
 Darkar 5 zet a ral leh hnu chuan hmun reh raihah awmin tuipui fawn hlup hlup chu ka en reng a. Tuna ka awmna hmunah hi chuan tumahin min hmu lovang.
.
Rei tawk tak tupui kama ka thut hnuah ka thlenna in panin ke in ka kal a, engemawti zawng tak chuan ka thawveng ta deuh. Thil tam tak ka ngaihtuah duhlo lui ve bawk.
.
Tuipui atanga hla vak lo in hlui tawh lamah chuan lutin ka taksaa tiauvut kaite tifaiin ka inbual a. Ka awmna in hi a hlui deuh tawh e tihmai lohah chuan a fai a, engkim uluk taka enkawl tih a chiang em em.
.
Ka inbual zo a, ka inthlak fel hnuah zanriah siamin ka buai nek nek a, khua a lo thim der mai. Zanriah ka ei kham hnu chuan lehkhabu chhiar in nuamsa zet hian in bathlarah ka thu mu a. Thawm hriat theih awm chhun chu tuipui fawn ri hlup hlup chauh a ni. Helai hmunah hian mi cheng an tam lo ve hrim hrim bawk.
.
Ka lehkhabu chhiar chu dahin ka hawi chhuak vang vang a. Hla deuh takah tlang chhipa in eng va va chu a thim riai riai a, inrinlawkna hman pawh awm lo hian ruah a sur nghal buan buan a. Ka awmna arawn theh huh thawt thawt vang chuan hmanhmawh tak hian in chhungah ka tlan lut a.
.
Kawngka ka khar rawp rawp a, ka inher leh chiah chuan ka ip nghal chawih mai!
.
“Nang? Hetah _enge i _tih? ka ti bah nawk nawk mai. Ka phu nasa tih piahlam a ni.
.
“Ka tihtur min zawt maw? Ka nuna thil pawimawh tawp ber titurin ka lo kal tih sawi ila engtin nge i ngaih ang?”
.
“Ka ngaihdan a pawimawh vanga min zawt i ni lo.” ka ti halh a. A mitmeng ka hmuh chuan a tihtur pawimawh em em chu eng thil nge anih ka hai lo. A chiang tawk.
.
“Ka bulah hian lo kal hnai teh_” a mit de sawr sawr chu en rei duh lovin ka hawisawn a, za lo lutuk hian a nui hak a.
.
“Ahuh! Engtiklai atang khan nge hlauhawm ka lo nih tak? Tsk_tsk_ I tan mi  tha tak ka ni reng thin tih hi i ngaihtuah a.. Ka sawi dik tiraw?”
.
“I sawi awmzia chu ka hre lo.” Ka ti taknain ka hrethiam, ka hrethiam lutuk mah mah zawk.
.
“Ohh…. Mi thianghlim ang maia awm kha duhtawk teh.. Ka nghak rei ta bawk e. Tunah chuan ka duh engkim ka nei thei dawn lo tih ka hriat tawh vangin ka buaina leh ka nun hreawmna tantu hmeichhe vanduai hi ka dah tha tawh mai ang chu_” a kawr hak hnuai atangin chemte a phawrh a, a vilik zauh zauh a. A mitmeng rapthlak zia chu ngaihtuah theih piahlam a ni.
.
“Serafina!__” sawi tur dang ka hre lo. A hming ka lam chu thil nuihzatthlak ber ni awm tak hian a nui hul huk a.
“Serafina_Vantirhkoh hming ang mai anih chu mawle!” tih pahin kha lutuk tak maia min en chung hian a thutna a thawhsan a, hmanhmawhna nei reng reng lo hian min rawn pan hnai a. Ka tan chet ngaihna a awm lo. “Umm..heihi i hlau anih chuan rei tak na tuar lovin ka siam thei bawk che a_” a kut veilam chu a hnunglam ah dah zauhin a kut arawn lan leh chuan silai a keng tih ka hmu.
.
A tha e! He ka nun buai leh khamawm tak mai hi chawlhsan ka duh tawh reng a ni. Buaina, harsatna, lungngaihna, natna__ Ka hriatthiam theih loh chingchivet nuaih mai hi kalsan ka duh.
.
“I ngaihtuahna chu ka hria_ I duh angin i awm ngai lo a, tunah pawh i duh angin a thleng leh chuang lovang..”
.
Thawkleh khatah hneh taka min chawikang lawptu awm ang mai hian ka leng nawk a, eng thil nge thleng ka hmu hman lo. Pawnlam thawm ri ka hre zawm zat a. Hmeichhe te that thawm ka hriat leh hnu chuan engkim a reh ta duk mai. Ka taksa ka khawih a, engtin mah ka awm lo. Ka la dam! Na pawh ka nei lo.
Pen ri khup khup thawm a lo awm a, kawngka a inhawng ri zui thlawp bawk. Ka bula mihring let reng chu tunge anih en tumin ka che hret a, thisen baw nuaih ka hmuh chuan hlauhthawng lutuk in ka bawh nghal rawp rawp a. A hmel ka hmuh chuan ka tawp chawt.

Ni lo! A ni thei lo! 
VIDA – SheKnows
(Vee-Da)
.
By. Thantei_LauraSean
.
CHAPTER - 33
.
VIDA*
.
"Jasper! Ka duh thei lo_"
Jasper chu a ang chawp chawp a, mi chak tak ni thin khan vawikhat thawk la tur pawhin a bei fe tih ka hmu thei.
.
"Min lo tanpui r'u. Jasper i harh em?" ka bula thil thleng chu engmah ka ngaihven tawh lo. Jasper chu ka en a, a thaw a zawi tial tial.
.
"Lo awm sawn rawh."
"A la thaw em?"
"Hmun lo kian ru"
"Ambulance ko rawh_Muang suh."
.
"Hmeichhia kha khawiah nge a awm?"
"Ani kha hruai ru_ A him lo."
"Hmanhmawh r'u."
An ri nawk nawk a, min nemsawn dawt dawt nimai hian ka hria. Pawnah min hruai chhuakin motor-ah min luhtir a, chak takin kan tlan chhuak nghal tih chiah ka hria. Thil thleng hi a rang lutuk a ka inring hman lo.
.
"Khawiah nge Jasper kha? Khawiah nge an hruai dawn?" ka tawng chu ka bula thu chuan a hriat ka ring.
.
"Hospital-ah an hruai nghal ang. Thil thlen dan chu a makin a rang hle mai. I tha em?"
Chhan ngaihna ka hrelo. Ka that leh that loh ka hre hek lo.
.
"Khawiah nge Serafina kha?"
"Kha hmeichhia kha anih chuan a hmuna la awmte khan an chingfel vek ang."
.
"I sawi awmzia chu?"
"Kha hmeichhe kawlhrawng zet kha a put chhuak hman anih kha. Hlau suh, tunah chuan i him tawh." min rawn melh zoh. A hmel a bumro viau nain a mitmeng chu a dam thlup thung.
.
Sawi leh tur hre lovin ka ngawi ta ran mai. Ka nak thip vang vang chu eng vang nge tih hriat tumin dap a, a lo hnawng chap tih ka hriat chuan ka en nghal vat a. Eng a that loh vangin ka hmu chiang thei lo. Hliam ka tuar ve a nih ngei hi!
.
"Eng a awm em? Ka nakah hian hliam a awm niin ka hria."
Motor khalhtu chuan phawk fe hian min en a, hmalam en lehin a remchan leh remchan loh pawh ngaihtuah  lovin kawngsir ah motor chu a dintir hrawk a.
.
"Lo che suh."
.
Hmanhmawh takin a che zung zung a, ka vai ruai tawh. Ka mit a phe a intihharh tumin ka mit ka khap sawk sawk a.
.
"Intiharh hram hram rawh_ Phiangsen chuan le!"
.
Hmanhmawh tak bawk hian driver seat lamah rawn thu lut lehin motor chu a tinung a, harh leh harh lo inkarah ka awm anih ber hi.
.
Chatuan tluk zeta rei kan tlan hnuah motor atang chuan min pawm chhuak tih ka hre rei ruai a, phe zut zut leh eng ka hmuh hnu chuan khumah ka mu niin ka hria.
.
"A hliam hi thuk khawp mai. Kan zai nghal a ngai ang. A la harh anih hmel hi_"
"A chhel hle mai a.._"
.
"A laichin hnai biak tur hria an awm em?"
.
Ka nak chu a thip zual vawt vawt a, engmah ka hre zui ta lo.
.
MORDECAI SLOAN*
.
"Sawi nawn leh teh. I hrechiang em?"
"Chiang e. Tunah Hospital hnai  berah an hruai a, Jasper erawh chhan theih a ni ta lo. Kan tlai hret  a ni."
.
"Jasper_ Guzel_"
.
Phone ka off a, hmanhmawh takin Hospital panin ka kal chhuak nghal a. 'Kan tlai hret a ni' engtin nge kan tlai theih? Serafina kha engtiklai pawhin thlithlai reng a nih thu ka dawng zo chiah a ni lawm ni?
.
Ka tlan chak bawk a Hospital chu ka thleng rang khawp.
.
"Esma Celik maw? Ani chu darkar khat vel liamta khan Hospital danga enkawl turin an la chhuak fel tawh."
"Engtin nge anih theih? Tunge hruai chhuaktu chu?"
"Sir, min hrethiam la, kimchang takin ka hrilh vek thei lo che. I duh chuan Hospital__"
.
A thusawi chu ka ngaithla zui lo. Eng chen pawh zawt ila min hrilh chuang lovang. An dan neih bawhchhe tura lo innawr luih hun a ni lo. Rin dan erawh ka nei nghet hle.
.
Hospital atanga chhuakin Boni ka call a, Jasper tan thil engkim lo buaipui vek tura ka hrilh hnuah Serafina fanu leh a nu chenna hmun ka pan nghal a. Engkim buai nuai nuai mai hi a rang thei ang bera chinfel a tul hmasaber tawh. Tunah hian thunun theih loh khawpin thil rapthlak a thleng zo chauh nain a lehpek a thlen tawh loh nan ka tihtheih zawng zawng ka tih vek a tul tak zet.
.
Serafina te chenna hmun ka thleng a, tualzawl zau taka hmeichhe naupang infiam ka hmuh chuan gate-a lut nghal mai lovin ka thlir lehrih a. He hmeichhe naupang hma hun tur ka ngaihtuah hian hreawm ka lo tihpui tak zet a ni. A duh reng vang ni hauh lovin anu vangin hreawm a la tuar ngei dawn si a. Ka lam panin arawn tlan a, min hmuh reng vanga lo tlan erawh a ni lo. A ball lum chu manin min hmuh chuan a ding chat. Chik tak hian min en reuh anih chu.
.
"Api__Mikhual a lo kal a nia." ti lang langin in lam panin a tlan let a. Gate chu hawngin ka lut ve nghal bawk.
.
Kawngka rawn inhawngin Serafina nu arawn dak a, min hmuh chuan a hmel a danglam zawk. Min hmuh a in beisei hauh lo tih a hriat hle.
.
"Mr. Sloan? Khawngaihin lo lut rawh. Eng thilin nge helai hmun thleng thleng lo kaltir ta che?" a ti zung zung a. Helai hmuna an chen dawn khan vawikhat chu kan inhmu tawh a, an chenna hmun hi ka pek ani tih a hriat khan a tap hial anih kha.
.
"Serafina hmu turin ka lo kal a. In ah a awm em?"
.
"Oh! Kei aiin i hmuh zin zawk ka lo ring asin. Hna pawimawh lutuk vangin i mansion-ah  kar khat chhung a chen a tul thu a sawi a. Esma chungchang ani e a tih vangin ka lo zawt chiang lem lo a."
.
"Anih tak chu. In inbe tawh reng reng em?"
.
"Aw, be zeuh zeuh e. Thil thalo a thleng nia ngaihna ka nei tlat mai ka ti_" chik deuh tak hian min en vang vang. "Mr.Sloan, khawngaihin min hrilh rawh, ka fanu chungah thil thalo thleng a awm em?"
.
“Api, mikhual hian enge a lo tih dawn?”
“Bawihte, mikhual a ni hleinem.”
“Vantirhkoh dang leh ami?” hmeichhe naupang chu min en chungin a nui ta.
“Vantirhkoh maw?” ka ti sup. A thusawi hi ka man chiah lo.
.
“Ni e, kan chhungkaw tan hian Vantirhkoh i ni e tiin Sera pawhin a sawi fo alawm. Mr. Sloan__” a tunu chu melh zeuhin awm nuam lo hmel a pu ta. Thil engemaw tak chu a awm a ni.
.
“Bawihte, I pindanah han infiam la, ka hman veleh ka rawn infiampui ang che.” Nelawm taka nui chungin a tunu samah a chul zauh a. Naupang chu thuawih takin a kalsawn nghal bawk.
.
“Mr. Sloan, thu phawt teh ang. Sera chungchang ah zawh duh che ka nei. Ah_ zawh duh che han ti ila hrilh duh che ani zawk mah ang chu.”
.
Thutkhawmna pindan kan pan dun a, a hmel chu a thutak ta hle. A kut chu a malchungah suihin a che sek a.
.
“Mr. Sloan, ka fanu nungchang vang hian ka mangang ru tawh tak zet a ni. Min tanpui theih beiseiin ka hrilh rawih mai ang che. A thui deuh dawn a nia..” tiin min melh zauh a.
.
“Sera hian nau a pai khan a la naupang hle a, a talbuai nasa khawp mai. Ka tunu a pian hnuah a talbuai zualpui chu a reh a, ka tunu hian natna khirh tak a neih vangin hun harsa tawpkhawk kan tawk ta bawk a. Chutihlai chuan mak takin tanpuina sum tam tak kan dawng a, chumi hmang chuan kan tunu hi zaiin a lo dam ta hlauh bawk a. Ka sawi tum tak zawk chu kha sum tam tak mai kha khawi atanga kan dawn nge tih kei hian ka hre lo va, han ngaihtuah vak ngaihna pawh ka hre lo.
Mahse, hun engemawlai khan hmeichhe pakhat Serafina hian in-ah arawn hruai haw a, chu hmeichhia chu ‘vantirhkoh’ tiin sera leh ka tunu hian an ko a. Kan in-a zan a riah hnuah Sera nen an kal chhuak a, kha hmeichhia kha vawikhatmah ka hmu leh ta lo. Hetiang thil ka sawi duah  chhan chu kha vantirhkoh ti-a an koh an bo leh hnu chiah khan Serafina hi a danglam leh tan ta a ni. A ngawi reng a, biak pawhin a hre ngai lo. A nungchang danglam dan hian ka ngaih a tihthat hlawl loh vangin Doctor rawn turin ka hrilh a, ka thusawi a ngaithla duh der si lo. Tun hnaiah hian a khawsak dan a mak lehzual nasa lutuk a, ka ngaih a tha lo tak zet zet. Min tanpui theih dan i hriat takin tih thuah ka hrilh rawih mai che a ni.”
Serafina nu hmel chu ka en a, engtin nge a fanu chanchin leh a thiltih tawh rapthlak takte hi zahngaihna nei miah lovin ka hrilh theih ang? A fanu a ngaihtuah zia lah a langchiang reng a.
.
"Api, anu chuan apa in ah a lo hruai haw dawn tih min hrilh asin_" hmeichhe naupang pindan kawngkaa lo dak dek dek chu kan en rual thawt. A rawn kal chhuak chu a pi chuan a pan vat a.
.
"Oh..Bawihte.." api chuan a pawm kang a, lainat hmel tak hian a kuah ta ngawih ngawih a.
.
"A fanu hnem nan a sawi fo thin a. Sera chu a lo haw veleh nangmah be turin ka lo hrilh ange. Ka tihpalh. Keimah chiah ka lo inngaihtuah a, lo thu la, coffee emaw intur dang ka lo la ange." a ti bah nawk nawk mai.
.
"A ngai lo ve. Ka kal phawt ang. Serafina chu in-a a lo haw veleh min lo hrilh theih chuan ka lawm khawp ang."
.
“Tehreng mai. Ka lo hrilh ngei ang che.”
Kan inthlah fel hnu chuan ka chhuahsan a, ka rilru a buai ta map mai le. Serafina hian eng thuruk nge a lo neih? Tuna a khawsak dan en hian thuruk namai lo tak a nei ngei tih a chiang vek tawh. Ka nu in-a thil thleng te, a ruahmanna felfai tak te. Ama thluak chauh a ni thei pawhin ka hre ta lo. Ngaihtuah tur a va tam em! Mi thalo tak ni tur hian vawikhat chauh pawh ka la ngaihtuah chhin miah lo kha a nia. Hospital atanga Vida hruai chhuaktu anih teh chuan! A chenpui anu meuh pawh a mangang tak zet chu anih si kha.. Serafina hian engpawh a tiduh mai ang tih ka ringhlel ta lo.
.
Car chu chak taka khalhin streering wheel chu nghet zet hian ka hmer ngawt ngawt a. Vida hi ka chan anih chuan__Ni lo! Engtizawng mahin Vida hian min kalsan thei lo. Thil theih a ni lo hulhual.
.
Ka phone ri chu caller ID enin ka pick up rang khawp mai.
“Boni, ka ngaithla.”
.
“Sir, Jasper chungchang chu a fel vek tawh a. Miss Cappolo pawh Care Hospital-a a awm thu tunah khan ka dawng chiah e. A dinhmun erawh hriat ka nei lo.”
“Care Hospital-ah chuan tuin nge hruai?”
“Chu pawh ka hre lo. Tunah hian Care Hospital ka pan mek.” A ti zung zung a.
“In ah let leh rawh. Hospital-ah chuan keimah ka kal ang.”
.
“Yes sir.”
.
Care Hospital pan turin motor ka her rem a, hlauhthawnna mak tak nei chung hian ka thin a phu dup dup a.
.
Hospital ka thleng a, muangchang lovin Vida chanchin ka hriat hma theihna ber tur nia ka rin lam ka pan tawp.
.
“Helai hmunah hian i hmel hmuh ka in beisei hauh lo va.”
Ka hnunglam atanga min betu chu en ka tumlo zet nain ka hawi ta nge nge.
.
“Chibai, Mr.DeLourde.”
“Ka nupui nimai tur ngaihvena lo kal inih chuan kal lehnghal la a that zawk ka ring.”
.
Kan inpan hnai a, a tawngkam hman duh dan chu ka ngeng chhun tak ni mah se tunah chuan ka inthunun a tul rih. Vida vang chauhin ka inthunun bawk ang.
.
“Miss Celik chu enge a an?”
“I lo ngaihven chhan tur a awm lo.”
“Chuti maw? A chunga hetiang thil titu hi lo hre ta ila enge a an ang?”
.
“Eng thu nge i sawi chu? Min chhaih kual tum duh suh. Tupawh nise ka chhuah hauh lovang.”
.
“Chutiang i tum anih si chuan min mamawh anih chu.”
“Huh? Ka mamawh lo che. Tunge anih ka hre thuai ang.”
.
“Anih chuan Esma chu a dam thuai theih nan duhsakna ka hlan e.”
.
“Mr. DeLourde, Miss Celik chu tunah a harh chiah e. Hmuh erawh a la theih loh a. 15 minutes hnu velah a hmuh theih ang. Ka lawmpui che.” Nurse chu nui sakin a kal sawn lehnghal a. Kei pawh ka thaw huai nain ka hmelah erawh ka tilang lo. Engmah sawi tawh lovin ka kalsawn ve nghal.
.
Serafina thuhnuaiah Vida a awm lo tih hriat kha tun atan chuan tawk rih mai rawh se. Engkim a awmna tur hmun dik takah a awm leh vek theih nan ka theihtawp ka chhuah thung ang.
.
VIDA – SheKnows
(Vee-Da)
.
By. Thantei_LauraSean
.
CHAPTER - 34
.
THLA HNIH HNUAH*
.
VIDA*
.
"I kal lovang. Ka remti lo. A him lo."
Serafina hmu tura kal ka tum thu hi sawiri miah lo tur zawk ka nia. Ka lo ngaihtuah chiang tawk lo a ni. Min huat em em chhan leh ka nunna hial lak a duh chhan hi hriat ka mamawh tak zet a, Jefferson bula sawi lo hian ngawi rengin kal ila engkim a fel ni zawk mai tur.
.
Chawlh hmanna in-a thil rapthlak tak a thlen hnu khan thla khat vel zet chu Hospital-ah ka awm a, mi vanduai nia ka inngaih lai hian vanneihna nasa tak ka tawng baw leh thin tih ka ngaihtuah thiam tawh. Doctor leh nurse, ka hliam hmutu apiang ten damchhuak lo tura min ngaih laiin mak takin ka dam chhuak a. Ka huaisen em vang leh ka tuarchhel vang ngawr ngawr a tun dinhmun thleng hi ka ni biklo tih ka inhrechiang em em. Ro min relsaktu hian mihring thunun theih piahlamah remruatna fel tak a nei ngei tih hi vawikhat mai ni lo vawi tam tak ka tawng ve ta. Chik lehzual duh ni phei ila harsatna ka tawrh aiin lawmna tur a tam zawk hial ta ve ang.
.
"Ka tel lovin khawiahmah i kal lovang. I nunna lak duh khawpa hawtu che khan a rilru a thlak thut dawn lo. Vawikhat pawh ngaihtuah tawh suh. I hmel a hmuh rualin thil tha lo a ti lehnghal duh mai ang." Jefferson chu ngaih dan ni lo zeta min en chungin ka hmaah a ding a,hmuh ka tum ringawt pawh hi a hlauthawng nghal tih a hmelah a langchiang khawp mai.
"Tunah chuan endikna hnuaiah hun a hmang a, i hmu ngawt thei lo hrim hrim bawk a."
.
"Okay. Ka hmu lovang. Hahdam rawh."
Ka rilru ah chuan thil dang daih a awm. Jefferson chu enin ka nui sak a, a ngaihna hriat loh hmel takin min en thung. Min thah ngei tumtu leh a nuna ka awm ve duh hauh lotu khan tunah chuan min venhim a duh ta hluah hluah chu anih hi. Nuihzatthlak!

"A tha e." ti nghatin hahdam hmel deuh zawk hian ka bula chair awl awmah chuan a thu a, min en reng ti ila ka sawi sual tam lovang. Tun atanga hun reiloteah hian a duh emaw duh lo emaw thudik hian a la deng dawn tho tho a, engtin tak la awm ang maw? Chu chu ka lo buaina tur a ni lem lo.
.
Khua a thim a, zanriah kan ei hnu chuan ka awmna Hotel panin Jefferson ka chhuahsan a. A bula cheng mai tur hian vawitam min sawm a, ka rilru a la ngai reng. Jefferson a ni emaw Mordecai__ Ni lo, Mordecai chu ka ngaihtuah tel a tul miah lo. Min ngaihsak miah lotu hi ka ngaihtuah ang maw? Teuh lo! Mipa hrim hrim hi ka nunah awmze neia an lo tel ve ka remti tawh ngai dawn lo!
.
"Naktuk ah ka lo hmu ang che."
Ka tlan liam thlengin min enzui reng tih ka hmu. Tlemin_tlemte chauh tak takin ka awm a nuam lo.
.
Hotel pan lovin Serafina fanu leh a nu chenna hmun panin motor chu ka her a, chak tak hian kawngpui ah chuan ka tlan par par a.
Ralkhata eng pup pup ka hmuh chuan ka tlan chak sauh.
Jefferson chenna hmun atanga ka tlan chhuah atang khan 30 minutes vel a ral tawh a, Serafina te chenna in pawh ka hnaih tawh viau. Eng pup pup lo chhuahna hmun ka hmuh theih rualin rang thei ang ber hian kawngsirah car chu ka hung thuai a. Kangmei ka hmuh tawh zawng zawngah a la rapthlak ber mai awm e. Mei alh inhlap ri hlup hlup ka hriat chuan rapthlak tih lutuk tak zet vangin ka hmulthi a ding sung sung mai.
.
"Tumah kal hnai suh u."
Kangthelh motor a ri ruai ruai a, a bulhnaia awm ho chu kalsawn vek tur tiin mi pakhat hi arawn au tuar tuar a. Engkim mai chu a thleng chak lutuk vek.
.
"A chhungah mi an awm anih pawhin inchhanchhuah ngaihna a awm tawh lo. A rapthlak lutuk. Kal sawn r'uu.."
.
"Helamah_helamah lo pawm phei rawh."
Mi pakhat rawn tlan hlawk hlawk, puan a tuam mi pawm nei lo tlan chu ka lo en ve reng a, ka piah mai Ambulance ah chuan hmanhmawh tak hian a mi pawm chu an dah lut a. Ka va pan ve lo thei ta lo.
.
"Hmeichhe naupang kum 4/5 mi vel aniang. In thlanglam ah sawn a lo let reng a, in chhung atanga thehchhuah niawm tak a ni. A bak chu mihring thawm leh hmel hmuh tur a  awm lo."
Rapthlak ti zet hian hmeichhe naupang chu ka en a, a mitmeng chau tak chuan min rawn melh ve tawk tawk bawk. Min la hre ve ngei anih hmel.
.
"Ka lo kal ve thei angem?" ka ti ta ngawt a.
"I chhungkhat a ni em?"
"Ka chhungkhat anih leh nih loh a buai hun a ni em?" Ambulance ah chuan ka lut a, hmeichhe naupang chuan a kut mang niau chuan min lo ban tak tawk tawk a. Ka lainat zia chu tawngkam hian a sawichhuak zo lo.
.
Ambulance a tlan chhuak a, hmeichhe naupang chuan hliam engmah a nei lo tih ka bula rawn thu chuan a sawi a. Ka thaw huai mai.
.
"Mei khu a hip tam deuha, hlauhawm lutuk a ni lo. A tha leh mai ang."
.
Hlauthawng hmel la pu reng chunga mu bam hmeichhe naupang chu enin ka hnaih theih ang angin ka hnaih a, a kut tetakte chu ka vuan a.
.
"Api_ api kha khawiah nge a awm?" 
Chhan ngaihna ka hrelo. Ka bula thu chu ka en a, ani chu rawn thu hnaiin a phun sep sep a. Eng chiah nge a sawi ka hre phak lo. Naupang chu tlema thlamuan hmel deuh zawk hian a maimitchhing ta.
.
.
JEFFERSON* 
Ka muhil ka harh hlawl a, ka taksa pumpui thlan vek vang chuan ka tho nghal. Boruak a lum em em pawh ani hauh lo chunga ka thlan hluam mai chu a mak ka ti deuh khawp mai. Bathroom-ah lutin morning routine ka tizova, office kal tura insiam nghal a hun tawh tho mai. Nidang aiin ka hma deuh dawn a nih hi.
.
Tukthuan ei lovin in ka chhuahsan a, Esma hmuh hmasak ka duh vangin Hotel ka pan a. A pindana a awm loh bakah ka call pawhin a phone a pick up thei der lo.
.
Office panin ka chhuak a, ka ngaih erawh a tha zan lo chu anih hi. Office ka thlen ruala ka hmuh hmasak ber mihring chu ka beisei loh ber a ni bawk.
.
"Kiara?"
"Ni e, keimah Kiara. Mitdel mit tivar turin ka lo kal anih hi." a nungchang chu kan inhmuh hnuhnun ber tuma a nungchang nen khan khaikhin chi pawh a ni lo. A dak vah a, hetiang hmelpua min hmachhawn tawh chuan thil thleng tur chanve chu a thalo lam a ni ngei ang. Mihring hian a nungchang thup viau thin mah se a lan chhuah hun a awm leh nge nge thin.
.
“Engmah sawi tur ka nei lo. I kal lehnghal thei ang.” ka rilru tak tak sawi ka ni. Kiara bulah hian engmah sawitur ka neilo.
.
"I chiang chiah maw?" a nui tat tat a, kal a tum therte lo tih ka hre mai.
.
"Min lo zui rawh."
Ka kal pel a, min lo zui khawp ang. A mitmenga thil awm vang chauh pawh khan min zui ang tih ka chiang.
.
"Kan inhmuh loh chhungin thil tam tak a lo danglam hman anih hi. I hmel hmuh a nuam khawp mai"
Ka dawhkan hmaa chair-ah thuin a sam a khawih a, ahmaa ka hriat thin Kiara kha ani leh ta. A mitmeng chu vertherna leh duhamna in a khat a, tur thami pai ran ang mai hian a hmui chu a sen ling hlar bawk.
.
"I sawi duh chu sawi la, min chhuahsan thuai rawh. Hna ka ngah nasa a nia."
.
"Oh! Ka thusawi tur i hriat hnuah phei chuan hna i va ngah lehzual dawn em. Jeff Honey, nun hi a fair hlawl lo i ti ve em?"
.
"I thusawi chuan awmzia a nei lo. Kiara_ Eng thil chiah nge sawi i duh?"
.
"Ka_Ermm_ A tha e. Tunah hian i hmeichhe hmangaih Esma Celik hi khawiah nge a awm i hria em?"
.
Ka thu ngil deuh a, ka hmelah erawh engmah tihlan loh ka tum hle.
"Ani chu ngaihven ve lo zawk la ka duh."
"Uhh.. A hming ka sawi chauh pawh i phal lo ang maw?" za lo zet hian a nui sak. A nui pawh a ni chiah lo, a ner a ni zawk mah. "Tunah hian i fanu bulah a awm tih hrilh ta che ila__?"
.
"Phiangsen che hian. Kiara, i kuang lo nawr i tumruh hle mai. I inchhir ange." ka ti kha fak a. Fanu maw? He hmeichhia hian enge a hriat?
.
"Jeff Honey, ka lakah hian thuruk i neih theih i inring reng reng em maw ni le? Nangmah pawhin i hriat hmain fanu i neih thu hi ka lo hre daih tawh tih theihnghilh suh. Serafina laka i fanu neih thu hi eng chen nge zep i tum?"
.
Fuc*k_Fuc*k_Fuc*k!!! Ka hmaa hmeichhe hnaisailo lutuk ring hi ka thuai tliak mai zawk em ni!?
.
"I ka kha veng tha rawh!" ka aw a thinurna lang chu ka thup hleithei ta lo.
.
"Engvangin? Engvangin nge ka ka hi i lakah hian ka ven that kher ang? Nuihzatthlak zawk hian a. Tunah hian i theih chhung thupbo i tum i fanu kha, i hmeichhe hmangaih in kangmei atanga la chhuakin Hospital-ah a awmpui mek tih hrilh che ila min thah mai duh hmel kha i la pu tho angem? Chanchintha thlentu chu ka ni hauh lo a mahse i tana thu pawimawh tak thlentu erawh ka nih chian hi maw.."
.
"I ka kha chip hmak la min chhuahsan rawh."
.
Ka chhungril chu a buai vek. Agnetha, ka fanu chu kangmei atanga lak chhuah a ni maw? Tunah eng dinhmunah nge a awm ang? Lalpa, khawngaihin venghim rawh. A bulah Esma a awm lehzel bawk. Ka fanu a ni tih hria se engtin nge min ngaih ang? Thla hnih liamta mai khan ka fanu hringtu ngeiin thah tumin a bei a, chutiang hnuah ani chuan a la tanpui cheu a nia.
.
"Ka la sawi zo lo. Jeff, min en teh. Engkim hi i hriat a hun tawh. Vawikhat chauh pawh Esma Celik hi Esma Celik dik tak a ni em tih hi i ngaihtuah em? I nupui thah i tum ngei Vida Elves Cappolo kha lo ni reng tase engtin nge i tih ang?"
.
"Thu awmze neilo sawi kha bansan la, tunah min chhuahsan rawh. I hmel hi vawikhat chauh pawh ka hmaah hian lo lan tawh suh. I kal nghal thei e." dawhkan hnuaiah ka kut ka hum ruh a, heng thil zawng zawng hi Kiara hian engtin nge a hriat ka hre lo. Zawh ka tum miah lo  bawk. Esma chungchang hi chu engpawhnise Vida, ka nupui hlui kha a ni thei lo tih ka fiah vek tawh. Tuna a sawi vang mai hian ka buai dawn therte lo.
.
"He thil hi lo en rawh. Khawngaihin Jeff, bumin awm tawh suh. I nunna hial pawh a laksak duh ang che."
.
"Ka nunna hlauhthawnawma a awm anih chuan Esma ni lovin nang hi ka hlau tur zawk che ani ang chu. Ni lawm ni?" ka tiel ngial a, Kiara hmel ka en chuan a inringtawk tlat thung. Ka duh ang hmel ka hmu lo.
.
"Rin leh rin loh chu i thu. Ka tihtheih zawng chu ka ti ta e. He thil hi chu i kutah awm rawh se."
.
Dawhkanah chuan file chhah deuh tak hi dah ri thlapin a ding a, a kawr zutmam in a kal nghal a. Engmah ka sawi lo. Dawhkana a file dah chu drawer ah dah nghalin ka tho chhuak ve nghal.
.
Hmanhmawh takin office ka chhuahsan a, ka fanu chenna hmuna thil thleng ka hre miah lo hi mak ka ti takzet zet. Esma ka call a, a hma ang bawkin min la chhang chuang lo. Khawi Hospital-ah nge an kalpui tih ka hriat phawt loh chuan pan tur lam ka hre chuang der lo va.
.
Car ka la chhuak a, ka phone nghawr dar dar chu rang zet hian ka pick up thuai a.
.
“Khawiah nge i awm? Ni lo, Hospital-ah i awm tih ka hria, eng thil nge thleng?” ka ti nghal bawrh bawrh a.
.
“Hahdam rawh. Ka tha.”
“Engtin nge ka hahdam theih ang?”
“Jeff_” a ti dam raih a, a aw chuan ka chiai nasa lutuk chu a tiziaawm deuh. “Hmanhmawh lovin City Hospital rawn pan rawh. I lo thlen hunah thil awmzia ka hrilh ang che.”
.
“Naupang chu__” tunah ka zawt nghal thei rih lo. Ngaihtuah fim hmasa lovin ka tawng hman ta lehnghal a.
“Naupang chungchang engtin nge i hriat?” arawn ti nghal chat.
.
“News-ah an puang chuai chuai alawm.”
“Jeff, dawt i sawi tih ka hria__” ngawi leh datin,  “Hmanhmawh lovin lo thleng ve phawt mai rawh.” ati ta zawk a. Phone a off zui hmiah.
.
VIDA – SheKnows
(Vee-Da)
.
By. Thantei_LauraSean
.
CHAPTER - 35
.
VIDA*
.
"Guzel_" ka hnunglam chu ka hawi duh lo. Gezel tia min ko thintu mi pakhat chiah a awm a, tun hunah hian engvanga inhmu teh tlat nge kan nih ka hrethiam pha lo. Hliam na tak ka tawrh hnu khan a aw chauh pawh ka vawikhat hriat lehna a ni bawk. Ka maimitchhing ta ngawt a. Min lo hnaih lo se ka duh zawk.
.
"Guzel, nangmah i ni tih ka hria a nia. Hetah enge i tih?"
.
Hetah hian eng nge arawn tih ve zawk? Ka la hawi duh chuang lo.
Tunah hian Agnetha an endikna pindan pawnah ka thu a, keimah chauhin ka thu rei tawh khawp mai. Ka bulah arawn thu tih ka hriat chuan tlem ka tawlh a, Mordecai chu ri lovin a nui nghawr dat. Ka chet dan chu naupanchhiat thlak ka ti leh hnuhnawh nain ka ti zo vek hman tawh. A pawi thei a nia!
.
Pangngai thei ang bera lang chungin ka en ta nge nge. Chik zet hian min en a, thla hnih dawn ka hmuh tawh loh vang nge a hmel chu a danglam riauin ka hria. A mitmeng chu a hma zawng ai khan a lang thim deuh a, a nui hmel chu hmuh loh law law ka duh zawk e. Ka hmulthi a ding ar ar.
.
"Hetah eng nge i tih? Ka ngaihtuah hi a dik em?"
.
Chhang lova hawi sawnin ka hnar ka tum dat a. A ngaihtuahna dik leh dik loh chu amah hian a hria ang chu. Eng thil nge a ngaihtuah pawh ka hriatpui hrep hleinem.
.
"I tha tawh hle mai. Min lo en teh." a ti nghut a, ka ngei tawk a tling der.
.
"Min ngaihutuah vangin ka lawm e." nui lui sanga tawngin ka tawng zawh rual chiahin ka nui tawp nghal hmak a.
.
"Ngaihtuah tur dang ka neih loh vanga ka ngaihtuah angah che ilo ngai anih chuan i diklo."

A tawngkam chu ka hrethiam tehnuai lo. Ka en ha a.
.
"Khatiang khan min en suh." tih pahin min rawn hnaih zual a, harhchhuak leh thut niawm tak hian a tawlh hla leh hlek a. A nui suk bawk. Mordecai ka hriat than em em ang kha ani tlat lo.
.
"Agnetha chu enge a an?" a ti ta daih. Engtin nge Serafina fanu hming hi a lo hriat? Engtin nge thil thleng hi a hriat vat theih zawk? Hei chu thil mak a ni leh lo, Serafina te chenna hmun hi Mordecai ta a ni tlat a. Kangmei a chhuah rual khan a hre nghal ngei ang.
.
"A that ka ring. Mrs. Toppy (Serafina nu)chanchin hriattur a awm tawh em?" ka ti ve sap. Thil dang daih a sawi chu lawmtur nge ka nih lawm lo tur tih pawh ka inhrethiam lo. Ka lawm zawk tur a ni.
.
"Hospital ka lo pan hma chiah khan an la chhuak a. A kang chhe hneh khawp mai."
.
"A va'n lainatawm tak em! Agnetha hi tukverh atangin a paih chhuak  niin ka lo hria a."
.
"A dik alawm."
Kan ngawi ta ve ve. Sawiduh dang nei ang mai hian kan inen vang vang a, ka kut arawn vawn chuan khawvel tak takah ka let leh ta chauh.
.
"Guzel, ka ngai che!" tawng mai a! A ngaihna hre chiah lovin ka nui a, ani erawh a thutak tih piahlam a ni.
.
"Hetah hian Agnetha chanchin ngaihvena lo kal i niin ka hria." ka tih chuan thle nghut in a kut dinglamin a chal a tuai zauh a. A kut veilam chuan min la vuan reng.
.
"I awm tih ka hresa alawm. Hmuh theih loha awm i tum hi i bansan thei tawh angem?"
.
"I sawi tum chu ka hrethiam lo."
"Jefferson a lo kal dawn em?" a ti leh daih.
.
Ka hrechhuak chiah. Min lo biak a tum tawh ngei ang. Ka bag ka hawng a, ka phone ka phawrh vat a. Missed call alo awm teuh tawh.
.
"Agnetha hi Jefferson__ Kan inhmu leh thuai dawn nia." ka kut min vawnna a thlah a, a ding chhuak nghal a. Sawi tum a nei tih ka hria.
.
"Jefferson chu be rawh. Thu pawimawh tak hrilh tur che a neih ka ring." ka chhanna pawh a nghak tawh chuang lo. Chak deuh tak hian min kalsan a, ka enzui tawp. Mordecai hian thil engemaw hriat a nei leh tawh tih ka hrethiam. Min hrilh thei reng a, engatinge min hrilh nghal mai loh.
.
Thawk la halhin ka phone chu ka hmet eng a, Jefferson ka call nghal a. Phone a pick up a, a rawn tawng ka hriat rualin a chiai hle tih ka hre nghal.
.
Lo thleng phawt teh se.
.
20 minutes a ral leh hnu chuan Agnetha awmna pindanah ka lut a, khuma a lo muhil bem mai ka hmuh chuan ka thinlung tak hian ka lainat ngawih ngawih. Anu'n ka chunga a thiltihte kha ani hian engmah a hre lo. Hria pawh nise a awmzia a hrethiam chuang lo ang. Naupang rilru thianghlim hian puitlingte ngaihtuahna bawlhhlawh vangin hreawm a tuartur a ni lo asin.
.
A khum bulah chuan thuin a kut tetakte chu ka vuan a, nu mamawh em em rual hian a duh hunah a nu a hmu thei lo a, rapthlak thei ang berin a pi in a kalsan bawk. Ka mittui tla chu ka lainat lutuk vang a ni ngei ang.
.
Kawngkhar inhawng ri rak ka hriat chuan ka hawi chhuak a, hmel chiai leh pangngai lo zeta Jefferson lo ding ka hmuh chuan ka ding thuai a.
.
"I tha em?"
"Ka hre lo. Naupang hi a tha em?" Jefferson chuan min en lovin Agnetha chu a en a, hetiang taka midang ngaihtuah hmel hi a pu khat khawp. Vida anga a bula ka chenlai zawng zawng pawh khan hetiang hmelpu hian min en ngai lo va, Esma anga ka awm hnu erawh hi chuan ka hmu zeuh zeuh thung.
.
"A hming chu Agnetha a nia." ka tihsap chuan a bu nghat a.
Hrilh ngai lovin Agnetha mutna chu arawn pan hnai a, a mit a lasawn lo reng reng. Agnetha muhil chu arawn harh ve chiah bawk.
.
"Vantirhkoh in ni em?" a ti sin ret a, Jefferson hmel chu mak lutuk hian a danglam vek. Tap tur insum hmel a ang zawk. Rang takin Agnetha chu ka hnaih vat a.
.
"Min hria tiraw? Tlemtein i damlo deuh a, i dam leh vat dawn a nia. Eng nge i ei duh le?"
.
"Anu bulah ka awm duh. Anu chuan apa a lo hruai haw dawn a nia." a nui sen sen a, Jeffferson chu tho thutin pindan atang chuan a kal chhuak a. Thil dik tawklo chu a awm ngei a ni. Jefferson hian danglam chhan a nei ngei ang.
.
"Mipa kha vantirhkoh a ni ve em? Anu chuan apa chu vantirhkoh a ni ve tho a tia."
.
"I nu sawi chu a dik alawm. Eitur i duh em?"
"Duh lo. A nu bulah ka awm duh."
.
Chhan dan tur ka hre ta lo. Dawt hrilhin anu chu alo thleng tep tih ka hrilh mai dawn em niang?
.
Kawngka chu arawn inhawng leh a hmel pangngai deuh tawh puin Jefferson a lo lut leh a.
.
"Serafina chu a fanu hmu turin an lo hruai dawn a, min hmuh hmain naupang hi kalsan ila a that ka ring."
.
"Chumi hnu chuan Agnetha hi engtin nge a awm dawn?" ka ngaihtuah lo thei lo. A pi a awm tawh lo a, anu'n a enkawl thei lo tih lah thil chiangsa.
.
"Engkim a fel vek ang."
Ka bag a khai a, pindan chu a chhuahsan leh hmiah. Agnetha ka mangtha hnuah pindan atang chuan ka kal chhuak ve nghal a.
.
.
Ngawi rengin Jeff chuan car a khalh a, a chenna hmun lam kan pan lo. Khawiah nge kan kal dawn ka hre miah lo bawk.
.
"Sawitur ka nei." min rawn melh zawk chauh a ni.
"I duh chu i sawi thei alawm. Ka lo ngaithla ang."
"A awlsam lo." ti leh ringawt in car chu a khalh chak telh telh.
.
"Hahdam phawt teh."
.
Remchang hmasaberah car chu tidingin steering wheel a vuan a, arawn hawi chhuak tawh lo.
.
"I tha em?"
"Tha lo."
"Okay. Ka ngaithla e."
.
Muangchang hian rawn hawi chhuakin min hmachhawn a, a mit a sen ram tih ka hmuh chuan ka ngaih a tha tehchiam lo.
"Agnetha hi ka fanu a ni!"
.
A thusawi chu ka hrechiang em? Fiamthu hmel a pu miah lo lehnghal. Fiamthuna hun pawh a ni lo reng reng bawk.
"Chuan_?" ka ti ringawt. Sawi zawm zel tura ka nawrna pawh a ni tel bawk ang chu.
.
"Kei hian fanu ka nei tih ka hrilh che a nih chu. I thinur dawn lo em ni?"
.
Ka mipa hmangaih em em in ka hriat miah lohin mi hrang daih lakah fa lo nei se ka thin a ur angem? Min phatsanna vangin thinur tur chu ka ni ngei ang. Mahse tunah hian ka hmaa thu mipa hi ka hmangaih thin mah nise ka hmangaih ber ani tlat lo! 

"Tunah chuan Agnetha kha i lainat tawh hauh lo ang chu tiraw?"
"Chu chu engtin nge i sawi theih? Naupang chu naupang a ni. Naupang engmah hrelo khan thiam lohna a nei hleinem. Ka thin a ur dawn anih chuan i lakah hian ka thin a ur ang."
.
"Oh__Esma!" ti tham tuakin min rawn kuah a. “Ka phu hauh lo che ani tiraw?”
.
“Chutiang sawi suh.”
Ka ngaihtuahna chu mak ka ti. Jefferson hi ka pasal hlui, ka nun tichhe vektu a ni. Chu chu chiang takin ka hria. Hreawm tuartur awm zawng zawng tuartir ka tum vanga hnaih ka ni bawk. Mahse Agnetha kha_ Kha naute khan tihsual a nei lo. Jefferson hian a enkawl anih loh chuan tuin nge enkawl ang?
A fanu a hmangaih ve ngei tih chu a chiang. Mihring nunrawnna a khat hlawm hlak chu a lo ni bik hauh lo mai.
.
"Engtin nge i tih dawn?" ka tih chuan min kuahna thlahin chiang takin min en a.
.
"Chu chu ka zawt zawk tur che a ni. Engtin nge ka tih dawn?"
"Agnetha khan a mamawh che."
.
"Ka hria. Ka tihpalh."
.
"Engkim a tha vek. Hahdam rawh." ka rilru tak tak a ni bawk.
.
Jefferson hmel hahdam ta huai huai chu mit ngeia hmuh theih khawpin a chiang. Mak takin ka hlim anih chu! Agnetha tan_kha hmeichhe naupang tan khan ka hlim a ni.
.
MORDECAI SLOAN*
.
“Engvang nge?” thinur tak hian Phillip chu a au tuarh a! Darthlalang chhanah chuan dawhkan kila mi pahnih thu chu ka en reng.
Thinurna nasa tak vangin ka tha a khur ve bawk. Chu hmeichhia, inchhirna tlemte pawh nei lo hmel ka hmuh chuan ka chhungril hi a so bulh bulh lo thei lo a ni. A nungchang mak lutuk chu ka rin phak bak a ni bawk.
.
“Engvang nge ni ang? Officer, mihring hian kan duh reng vangin thil thalo kan ti thin. Chu thu chu hre tawh tur i nia sin. Ka inchhir hauh lo mai. Ka duh ber ka ti hman lo erawh pawi ka ti!” a dak ngat ngat a, a chezia chu mak tak a ni.
.
“Mrs.Sloan khan i pawi a sawi hauh lo tih ka hria.”
.
“Kei pawn ka hria. Ka kawngah a awm tlat si a ni.”
“Sawi zel rawh.”
“Ka fanu kha i hmu ve tawh em? Hmeichhe naupang fel leh hmeltha em em kha. Ka fanu tana ti ka ni. Engkim hi ka fanu tan vek a ni. Chu chu I hria em? Thil dik tak ti ka ni.” a au tuarh tuarh a. Reiloteah a tawng zawi leh ta. “Pa a neih ve theih nan_ DeLourde sawn ka fanu hi duh lovin vawikhat pawh arawn ngaihven lo a, I hria em? Ka fanu sawn pa a mamawh ve bawk. Engvanga rawn ngaihven lo nge anih? Saw hmeichhia vang sawn a ni. Ka nuna buaina zawng zawng hi he hmeichhia vanga thleng hi a ni. Natna tam tak tuar zel rawh se! Vanneihthlak taka ka hmaa tanpui ngaia a awm kha ka lawm asin. Duhthusam piahlam a ni!” hmel danglam rapthlak zet hian Serafina chu a hawi kual a, a taksa leh rilru chu huatnain a tidanglam vek tih hai rual a ni lo.
.
“I anchhe lawh ri ni lovin i thu awmze nei sawi chiah ka ngaithla duh.” Phillip chu thuneih hmel takin a tawng a, Serafina chu engtianga treat tur nge tih a hrechiang tawk hle.
.
“A dik ang. Tihpalh aw Officer! Vida Elves Cappolo hian ka mipa hmangaih ber, ka fanu pa ni bawk chu neiin nun nuam tak chen a tum a, mahse eng thil nge thleng i hria em?” a kut pahniha dawhkan nemin Phillip lamah chuan a awn daw a.  “DeLourde chuan a lo hmangaih lo.. Nuihzatthlak lutuk__ A pasal ngeiin thah a tum lai hmuh kha anuam asin!__Enteh, ni khat chu maw, a thi tawh emaw tia ka hun ka hman hnuah hun reitak chhung ka lo chak em em thin duhthusam piahlam vang vanga tha chu ka hmaah a lo chhuak a, amah tanpui siin hreawm tinreng a tuar theih nan hremhmun lamah ka hnukhnai zel a. Mordecai Sloan hi awm lo se chuan ka duh tak hi a thleng daih tawh ang. Mrs.Sloan kha chu ka kalkawnga awm ka hmanrua anih kha__ Ka fing iti viau lo maw? Lemchanna khawvelah kan cheng tih hi ilo hre ve tawh em?”
Nuam tih hmel zetin chair-ah chuan a thu thla a, a bawp a khawkherh ar ar a. Mi pangngai a ni tawh lo.
.
“Mordecai Sloan hian hua se ka duh vangin a nu kha__Esma_ Nah! Ka tan chuan engtiklai pawhin Vida Elves Cappolo a ni reng._ Mrs.Sloan kha Vida thah anga lantir a har lo lutuk. Ka hrilh vek duh che hi i vannei ka ti hle mai_”  a tawng chu mi dangin an hre ve ang tih hlau niawm tak hian tizawiin a phun sar sar a.
.
“A talbuai leh hreawm a tuar lai hmuh kha nuam ka ti asin. Mahse maw__he hmeichhia hi ka nunah a hnawk reng. A bul atanga a tawp thlengin. Tunah hian DeLourde neih tumin a hnaih lehsi tih i hria em? Ka haw lutuk_Ka haw lutuk.. Saw Jefferson mimawl-a sawn Vida a ni tih hre lovin a la hmangaih ta lehnghal em mawni? Chu thil chu ka tuar zo lo.. Ka tuar zo lo..” a samah a inkek ta nawk nawk mai.
.
Thu tha lehin zawite hian a tawng leh a. “Tunah hian min thawhpui rawh. Saw hmeichhia saw ka thah hma chuan ka nun hi a hahdam dawn lo. Khawngaihin_aw_khawngaihin min thawhpui rawh_”
.
“Serafina, lo ngaithla teh le. Tunah  hian i nu leh i fanu chenna in a kang fai vek a, i nu chu hahdam takin a chawl ta. I fanu erawh a dam chhuak a_”
“Dam chhuak ang chu, ka fanu alawm.” a ti awlsam then a, Serafina chu a harhfim tawh lo hulhual niin ka hria. “Lawk, ka nu chu tunah biak ka duh.”
.
“Hun remchang dangah kan inbe leh dawn nia.” tiin Dr. Phillip chu a ding a, Serafina nen an inbiakna pindan atang chuan a lo chhuak a.
.
“Officer, ka nu thih thu i sawi kha ka ring hauh lo che a nia.” tiin arawn au zui lawng lawng a.
.
Dr.Phillip ka bul arawn thlen chuan a thaw hawk mai.
.
“Enkawl dam theih a ni tawh lovang. A thluak a chhe nasa lutuk tawh.”
“Min puia ka lawm hle mai.”
“Ka theihtawp ka lo chhuah zel ang. Chutih rualin mi pangngai erawh a pha tawh ngai lovang tih a chiang a, tlang takin ka hrilh mai che a ni. A pawi khawp mai.”
“Ka hrethiam e.”
.
Centre ka chhuahsan a, ka nu vanduaina khan min khawih na nawn a ni ber mai. Tihtheih leh siamthat theih erawh engmah a awm tawh lo. Vida ka ngaihtuah kai a, ani hian a tihsual miah loh rah a seng hnem ta mah mah ani e, tunah chuan hlim taka a nun a hman ve a hun ta. A laka ka tawngkam hman tawhte ngaihtuah chhuak zelin ka rum hawk a.
“Hmangaihna dawn phulo” tiin keimah ngei hian a mita en chungin ka tawngkhum anih kha. Mi a ka nih hi! Tu mihring mah hian an hmangaihte khatiang khan an tawngkhum ve hauh lovang.
“Ka hmangaih che Guzel,  i nat ka phal leh tawh ngai lovang.”
.
VIDA – SheKnows
(Vee-Da)
.
By. Thantei_LauraSean
.
CHAPTER - 36
.
VIDA*
.
Jefferson chenna hmunah darkar khat dawn ka awm khawtlai a, a awmdan a pangngai hnuah ka kalsan ta chauh. Sawi duh tam tak a nei ang tih a hmelah a lang nain a ngawi reng a, a fanu chungchang ka bula sawi chu nuam a ti chiah lo pawh ani ve thei tho tiin ka ngaihtuah sak ta mai. Hun kha leh chen ngaihven miah lo a a awm thei kha demna chin ka nei. Mahse, a nun a ni a, a thu thu a ni. Ka lo sawi ve vak hian awmzia a neih tehchiam dawn loh bakah ka kuang lo nawr fo hi a tul lemlo tih ngaihtuah thiam turin ka intawng harh ve tawh pawh a ni mahna. Ka nunah hian buaina tur ka ngah tawk a, tun atanga hun reiloteah Jefferson hi ka kalsan tawh bawk ang. Tunah chuan phuba lak duhna nasa tak ka neih thin kha Agnetha vang hian ka tithei tawh chuangin ka ring lo. He hmeichhe naupang hian keimah vanga tumah nei lova a nun a hmang anih chuan ka damchhung hian ka inthiam thei ngai dawn lo. Chuvangin phuba lak duhna leh Jefferson laka huatna tam tak ka pai hi hun a liam zel ang chiah hian ka liamtir ve mai a ngai dawn ta anih hi.
.
Hotel ka thleng a, ka pindanah lutin chau zetin ka thu hnawk a. Ka lu a na ta viau lehnghal. Boruak chi hrang hrang ka hip nasat vang anih ka ring.
Zawi zetin ka tho a, damdawi lain ka ei a, ka thawmhnaw pawh thlak lovin khumah ka mu leh nghal hmiah.
.
Thawm ri engemaw vangin ka harh hlawl a, ka lu rit deuh luk chu a la reh ta lo cheu. Thawm chu ka'n ngaithla chiang a, thil dang nilovin kawngka kik ri a nih hmel. Chiang vaklo chungin ka tho a, kawngka hawng turin ka kal a. Ka beisei loh tawp hmel ka hmuh chuan ka harh deuh kawk mai.
.
"Ka lo lut thei angem?"
"Lo lut rawh."
"Kan inhmu khat hle mai a.." Kiara chu lo penlutin zangkhai hmel fe hian a hawi lawl lawl a, ka dinhmun nen a inmil chiah lo.
.
"Jefferson enge a an?" nui hmel pu si hmel danglam deuh tak hian min en a, ka awm dan danglam miah lo hian ka en ve reng bawk. "Umm__ Ka hriat thin ngei kha i ni e." a ti sap a. A meng tal tap bawk. Eng thu nge arawn ken dawn i han ngaichang deuh chhin teh ang.
.
"Sawi duh neia lo kal inih hmel. Lo thu rawh." ka tih chuan a nui hak. A mizia thalai leh thalo lai ka hmu tawh ve ve a, Kiara lakah hian ti deka awm ka tum therte lo. 'Ti' tih tawngkam pawh chu ka ngaihtuah peih zawk hi ka intia!
.
"Tunhma thil i sawi dun teh ang. Miss Vida Elves Cappolo!" chiang zet hian min melh a, ka zam ringlawk rana tawng ani tih ka hriat vangin ka thle zauh duh chauh.
.
"Hun liam tawh. Kiara, hun liam tawh chu sawinawn kher ngai lovin kan hrechiang ve ve tho a ni lawm ni." hahdam zeta kalsawnin a thutna ep chiah sofa-ah chuan ka thu pil thaih a. Ka bawp ka hawkherh nghal zat bawk. A mitmeng danglam zawk dan atang chuan a beisei loh tawp danin ka lo chhawn tih a chiang. "Zep tur engmah a awm hleinem. Ni lawm ni?" nui sak chungin ka melh ran a. Awm nuam chiah lo hmel a pu ta.
.
"Buaina tam tak hmachhawn thei i ni tih hi i inhria em?" inringtawk tak anga lang turin a thu ngil a, a landan ngawt chuan a inrintawk a ang ve khawp. 'Ang' chu 'nilo' tihna!
.
"I nunah buai la a tawk viau lo maw?" la nui sang chungin ka ti nghat a, a ner ve ta sak. A ngeng chhun tura tawng hi ka tumreng pawh a ni. A thin a ur phawt anga,  ngaihtuah chiang lovin a duh loh tawp thu a sawi chiah ang. Mihring chakloh lai ber chu thinur lai hi a ni ve tlat. Inthunun theih a pawimawh lai ber pawh thinur lai tho a ni. Kiara bulah hian thinura awm ka tum lo eih lo.
.
"Jefferson hian tunge i nih ahriat chhuah hun hunah a kalsan dawn che tih i inhria em?"
.
"Chuan__?"
"Huh? Ngai pawimawh miah lo ang khan awm duh suh. Jeff Honey i nuna a pawimawh zia leh i hmangaih zia hrechiangtu ka ni tih hi i theihnghilh ka ring lo."
.
"I sawi dik, a pawimawh khawp mai."
"A hmangaih ve lo che tih erawh hrilhnawn che ila a that ka ring. Jeff hian keimah chiah min hmangaih__keimah chiah."
.
"Ni ngei rawh se.."
.
"Nang_Zawngsen__"
.
"Tsk_Hahdam rawh.." ka tih chuan ter at hian a ding a, a thinur vangin a khur anih hmel. Ka pindana a lo kal hma hian thinur lawkna nasa tak a nei anih ka ring, beisei aiin a thinur tha duh tlat mai.
.
"I nun lem lutuk hian ala eizo ang che."
A bag chu dimlo zet hian a la nawk a, inthunun tum niawm takin thawk a la halh. Chhuak turin kawngka lam a pan a, muangchang hian arawn inher leh a.
.
"Milem i ni. Milem! A lema nung, hming lem, nun lem_" ngawi datin thawk a la a, "Dan bawhchhiatna nasa tak a ni tih i hria ang chu. Lo nghak rawh. Jeff nun atang hian chatuan atan ka dahbo ang che."
.
"Ka lo chhinchhiah ange." tia chhangin chiang zet hian ka en a, a mit tizim san a min en leh hnu chuan inher hmakin min chhuahsan ta. Duh ni ila min thah tumtu hmeichhe pakhat lek lehnghal hi tanin ah ka khung daih tawh ang chu!
.
Mitthi anga ngaih tawh hming lem hmanga nun hi dan bawhchhiatna a ni tih ka hria. Ka inveng lawk vek. Eng thil pawh tih tum se a thangah ka inawk chatuan tawh lovang e! Hmm_ Kiara_Thil awmze nei lo, atana hlawkna leh thatna awm hauh lova a buai zui vak tur chu a khawngaihthlak zawk hle a ni.
.
Bathroom-ah luta ka intifai hnuah ka nuna buaina zawng zawng dahtha vekin ka muhil siai siai a.
.
.
Ni thar a lo chhuak leh ta.
.
Khum ah thu chhuakin ka zi mar ar ar a. Vawiin chu Agnetha va tlawh ila a that ka ring.
.
Ka tihtur ka tifel zung zung a, tukthuan ei fel veka Hotel ka chhuahsan chuan dar 10 a pel der tawh. Ka phone ka bih zeuh a, tun hun thlenga Jefferson call ka dawng lo hi dan pangngai ang a ni lo tih ngaihtuah chungin car chu Hospital panin ka khalh par par a.
.
Hospital ka thleng a, ka car ka hung fel awrh tihah ka lam pana Jefferson lo kal chu ka lo en tawp. Car atanga chhuakin ka bul a lo thlen hun ka nghak a, min rawn hnaih deuh chuan ka lo nuih sak. Ka banah min kaiin min kalsawn pui hlawk hlawk a. Eng thil nge a hriat leh tak le? A hmel a thutak khawp mai.
.
A car awmna lam kan pan tih ka hriat chuan ngaihthat lohna ka nei ta tlat.
.
"Enge thil awmzia?"
"Min zui tawp mai rawh."
"Khawiah?"
"Zawhna min zawt suh."
.
A car-ah ka thu lut a, driver seat-ah rawn thu lutin car tinung ta mai lo chuan min en deuh vang vang phawt a.
.
"Fimkhur ang che." tih leh nghet taka ka kut rawn vawn a rual a. A awm dan hi mak ka ti.
.
"Jeff?"
"Kiara lakah hian fimkhur rawh. Tunlai a nungchang hi a hlauhawm tih ka hria. Ka sawi chu ring tawp mai rawh. Kiara hi kei aia hrechiang an awm lo."
.
"Chutiang thute chu kal pah pawhin a sawi theih alawm.." nui chungin ka en a, a thutak tulh tulh emaw tih mai tur a ni.
.
"I thi tur a ni lo." nghet zet hian min rawn kuah a, a awm dan chuan min ti hlauthawng.
"Jeff, i tha em?"
.
Min kuahna thlahin chiang tak hian min en a, inthiam chiah lo hmel a pu ta.
"Ka tih palh. Ka ti hlauthawng che a nimaw? Engkim hi a nih tur ang thlapin awm vek se tih hi ka duh dan a nia. I nat ka duh lo. Kei hian ka venghim thei lo che anih pawhin Mordecai Sloan hian a venghim thei ang che."
.
Eng thu nge a sawi hi? A hmel en hian a pangngai vek bawk sia. Thil engemaw tak hriat a nei anih ngei dawn hi.
.
"Dik taka sawi chuan kei hi dam tlak ka ni lo. Khawngaihin min ngaidam rawh."
"Jeff, min tihlau a nia. I tha chiah em?" tunah chuan a der ni miah lovin ka ngaihven tlat. A tawng duh dan hi Jefferson mi ngeng tak ang kha a ni tlat lo.
.
"Engkim ka hre tawh. Vida! Vida i ni tih ka hre tawh." tawng leh tumin a ang zuau a, a ngawi leh ta daih a. Kiara chu ka rin aiin a che rang daih mai. "Zak tur ka ni. I hmaa awm tlak hi ka ni miah lo. Engkim i hria. Engtin nge ka lakah rilru pangngai ila put theih zawk? Keimah hi thi tur ka ni!"
.
"Chutiang sawi suh."
.
"Ngaihdam dil ngam tur che niin ka inhre lo a, mahse ngaihdam ka dil che. Vida, i chunga ka thiltih zawng zawng vang khan khawngaihin min ngaidam rawh."
.
Vida, a nupui ngei kha ka ni tih a hriatchhuah hun tur hi vawitam ka ngaihtuah tawh thin. Tuna a awm dan anga awm tur hian vawikhatmah ka ngaihtuah lo thung. Jefferson DeLourde hian inchhirna a neih ka ring ngai lo a, ngaihdam min dil phei chu ka ring ngai lo lehzual. Min huatnaa khata min en chungin min thah tumin min rek nghal duh hial ang tih hi ka lo rindan a ni. Jeff hi ka ngaidam reng em? Ngaidam tur ka ni em? Ka tawrh zawng zawng kha ngaihtuah chhuah sen pawh a ni lo..
.
"Min hua ang. Min haw em em tur i ni? Engtin nge ka bulhnaiah hian ila awm theih zawk?"
Jeff chu ka chhang lo. Sawitur ka hrelo hulhual. Ahma khan a fanu vang chauhin a lakah hian phuba ka la theilo tiin ka lo ngaihtuah tawh a. A fanu vanga ka phuba lak tum tulh ka ni tak tak meuh em?
.
"Thil engemaw entir tur che ka nei."
A kekawr ipte a zen a, bawmte arawn phawrh chuan ka phu zawk. Engtin nge anih theih zawk? He thil hi engtin nge a la kawl theih?
.
"Jeff?" ka ti ringawt. Ka awih thei hlawl lo.
.
"Kha ni tenawm, ramsa ang maia i laka ka khawsak ni kha_" a thaw hawk a, a hmui a pet ta fan fan. Tawng leh mai thei lovin a aw a thian kharh a, bawm chu muangchang hian a hawng a. Ka hnuk a ulh tur a ni lo. Phiangsen hian_ Hetiang thil zawng zawng hian Jefferson ka huatna a kaitho tur a ni. Mahse, chu thil chu a thleng silo anih hi!
.
"Ka mithmuh ah ngei i taksa engmah hre tawh lo an laksawn hnu khan ni khat chauh pawh thlamuangin ka awm ngai lo. I nui hmel leh min hmangaihna mitmeng te_ Ka tihpalh_" a tap chhuak hawk a, thawm chhuah zui lovin a insehruh talh talh a. A insum nasa hle tih ka hre thei.
.
Bawm chu ka en a, kan inhmuh hmasak ber ni a kan thlalak ang chiah rangkachak a ker. Duh taka ka kawl that thin kha ani.
.
"He thil hian min nuntir hram hram a, ka tihsual siamtha leh thei tura huntha herchhuahtir theitu anih ringin nitin nangmah hre chungin ka en ziah thin. I hmel ka hmuh hmasakber ni_ Esma anga ka hmuh hmasakber ni che kha ila hria em? Pindan pakhatah lutin ka tap asin! I mitmeng pawisawi ngailo leh i nuiri vang hian ka hai ngai lovang che."
.
Bawm chu ka kutah a dah a, min en lovin hmalam a en ta daih.
.
"Mordecai Sloan hi lawmthu ka hrilh ngei ang." a ti sup a. Ka beisei loh hlir thil thleng vang hian ka hamhaih ta tlat a ni. Ngaihtuah ber tur ka hrelo. Jeff hi rin tur a ni em? Engmah ka hrethiam lo.
.
Khawngaihin min hrilh rawh? Jefferson DeLourde hi ka ring ngam dawn em?
VIDA – SheKnows
(Vee-Da)
.
By. Thantei_LauraSean
.
CHAPTER - 37
.
KIARA*
.
NO_NO_NO!!!
Heihi ka ruahman dan a ni lo. Mahse ka hmanraw neih theih zawng zawng chu ka hmang zo tawh. Hetiang khawpa nasa hian Jefferson hian Vida hi a lo hmangaih tih hria ni ila...
.
Thinur zetin ka ke ka per sawk a. *A ni thei lo, tawpna hlimawm an neih ka phal ngai dawn lo. Jeff hi ka ta chauh a ni. Ka ta chauh! Min hmangaih emaw hmangaih lo emaw ka bulah a awm ngei tur a ni tawp. Thu dang a awm thei lo.* Keimah chauhin ka phun mawlh mawlh a, ka awmna hmun atanga kalsawn turin car chu ka tinung a.
.
Ka nileng hun hman danah lungawina tur pakhatmah a awm lo. Enge ka tih leh tak ang? Jefferson hian min phatsan lehsi dawn tih hrelawk ila a tir atang khan inremsiamna ka neihpui hauh lovang.
.
*A fair lo! A fair hlawl lo. Min ngaihthah man hi i rul dawn, i rul dawn chiang khawp*
Ka hmaah min tawk zawnga car lo tlan ka hmuh chuan te thawt chungin ka car khalh lai chu ka her pai nawk a. Thawm a ri zui chuah chuah nimai hian ka hria.
.
'Ka him hram e. A va teuh ther ther ve le.'
.
"Eng thil phiangsen nge i hriat a? I kalna i en miah lo anih kha_"
Ka car sira lo ding mipa chu ka melh chho a, a mitmeng paw muk raih thinur vanga lang hlauhawm lek lek ka hmuh chuan sawi tur reng reng ka hre lo.
.
"Ka tihpalh_Ka_ Ka rilru a buai deuh a.."
.
"Rilru buai deuh chuan engvangin nge car i khalh? Lo chhuak teh." a ti khur khur a. A kutzungtang sei thlurh chuan a kawng a dawm a, min en uluk hle.
.
"Kalna tur ka nei, ka hmanhmawh viau a nia."
"Chhuanlam siam buai duh suh. I motor atang khan lo chhuak rawh."
Hnial ngam chi pawh a ni lo. Tim deuh takin ka chhuak a, min dimna nei miah lo hian min kai nawk a.
.
"Zirtirna pek deuh hlek i mamawh anih hi." a mitmeng chu hlauhawm tak a ni. Min rawn hnaih zual deuhin a hnar a len a, "I rim a diklo hle mai." a ti leh hluk a. Ka chan a va tha dawn tehchiam lo ve. Thiamthu sawi tur ka nei dawn miah lo lehnghal a.
.
A carah min luhtir in driver seat-ah arawn thu lut ve nghal a, chak zet hian kan tlan chhuak nghal. Khawilam nge min panpui dawn a chiangsa reng mai.
.
Darkar khat chuang Police station-ah ka thu ta ran mai. Min chhanchhuak turin tumah beisei tur ka nei lo tih ka inhria. Keimah leh keimah ka intlawh ping vek tawh a, ka fimkhur loh man chu ka tuar ngei dawn anih hi.
.
"Miss, i chhuak thei."
.
Ka phu deuh zawk. Ka awmna pindan atang chuan muangchang in ka kal chhuak a, pindan pawnlama min lo nghaktu ka hmuh chuan ka ding ngil zawt mai. Awihawm loh lutuk!
.
“Chibai!” a kut chu ka vawn turin arawn phar chhuak a, a mitmeng atangin engvanga helai hmun atanga min lachhuak nge anih ka hrethiam. Tawngkaa sawi duah a tul hran lo. Kawng zawh duh inang chuan kan zawh mai reng ang chu. Come on! Tunge ka lama tang ta hi?
.
Nui chhuak hakin a kut chu ka vuan a, engmah a sawi lo. Ngawi renga a kal chhuak chu ka zui ve bawk a. A laka ka lawmthu sawina chu a hun takah tawngkam mai ni lo, chetzia ngeiin ka la hmuhtir ang chu.
.
VIDA*
.
“Hi!” ti sapin ka bula chair awm hnai berah chuan ka thu a. Ka malchungah ka kut suihin ka kut chu ka en a, ka zam tih ka inpawm.
Boruak chu a rit ru tlat. Sloan mansion ka chen thinna tih loh hmun dang  Mordecai chenna hmun hi ka la hmu hauh lo a, 10 minutes liamta khan Jefferson ngeiin he in ah hian min hruai thleng a ni. Amah chuan min kalsan tawh thung. Jefferson awm dan hi ka hrethiam kim chiah lo niin ka hria. Aw thian kharh ri ah chuan ka hawi chhuak ta chauh.
.
Ka hmaa thu Mordecai hmel chu a thutak hle a, a kutin a khabe a tuai nauh nauh a.
.
“Kan thil duh chauh ni lo, thil thalo leh harsatna chi hrang hrangte hi kan ta ani vek tih i hria a_” a mitmeng leh a thusawi inmil lemlo tak vang chuan ka meng kal ralh a. Mordecai a ni tlat! Engtiang pawhin awm se a inhmeh vek thei zel. Kan boruak leh ka thil ngaihtuah hi a inpersan lutuk mah mah.
“A dik alawm.” ka tih chuan Mordecai chu a nui hul hak.
.
“Thil reng reng i hrethiam mai thei zel hian mi tha tak i nih zia a tichiang thin_”
“I sawi tum takah lut rawh. Infakderna khan hmun ropui min thlen dawn lo a nia.” ka ti nghat a. Ka zam viau nain ka zam vang maia bawl kual theih erawh ka ni lo. Ka hmaah hian ka mipa hmangaih a thu a, thutak sawi tur kan ni bawk. Ka damchhung hun hman dan tur hril thei tur thu sawi tura inhmachhawn kan ni.
.
Esma anga ka nun dan chungchang hrechiang bertu chu Mordecai chauh hi a ni a, a hmaa ka sawi tawh ka  invenlawkna te kha a lo tawk zo lo. Mordecai hian kei aiin engkim a hrechiang zawk.
.
Mitmeng danglam tak hian min en ta reng a. Ngaihtha lo hmelpua ka en chuan nui sukin a phun a, eng thu nge a sawi ka hre phak lo. A tawng zawi mah mah a ni.
.
A thutna atangin a tho a, kan hnunglam lehkhabu dahna bawm lian tak chu hawngin file a lachhuak a. Ngawi rengin min pe tawp. Kan boruak hi ka hrethiam lo va, eng chiah nge beisei tur tih pawh ka chuang hek lo. A file min pek chu hawngin a chhunga lehkha awm chu ka en dan dan a. Chutih chhung zawng chuan min en reng tih erawh ka feel thei thung. Felfai taka engkim a lo vawngtha thlap hi lawmthu hrilh mawlh mawlh tur ka ni tih ka inhre chungin tawng chhuah a harsa tlat.
.
Lehkha ka en zawh chuan file-ah ka khung leh vek a, ka thutna atanga thovin Mordecai chu ka en a. A mitmeng thuk zet chuan min lo la en reng.
.
“Ka kal lehnghal mai ang.” tih chiah ka sawi  thei.
“Ka hruai ang che.”
“Ni lo, ka tibuai belhchhah lovang che.”
“Guzel?” a ti hluk a. Muangchang hian min rawn pan a, engmah sawi lovin nghet tak hian min  kuah ta ringawt. Ka beisei loh em avangin engtia han dawnsawn tur nge hre lovin min kuah ang ang chuan ka ding ve tawp a.
 “Hlim zel ang che.” ka beng bulah phun supin min kuah nghet zual sauh a. Min mangtha hlen tawh tur niawm fahrana a awm vel hi ka hrethiam chiah lo. Kei hi hmun dangah ka kalbo dawn pawh a ni lo va.
.
“Nang pawh le.” ka tih chuan a rum hakin min kuahna a thlah a, a hmel ka en leh chuan mi dang daih ang mai hian a awm leh tawh. Heihi chu thil mak a ni lo. Mordecai a ni tlat. Hriatthiam theih a ni ngai lo.
.
Pindan chu kan chhuahsan a, ka chenna Hotel kan thlen thlengin kan inbe leh tawh lo. Kan ngaihtuahna khawvelah kan cheng ve ve aniang chu ka timai.
.
Hotel kawtah car a tiding a, ka chhuk hnuah “Ka lawm e.” ti sapin ka kut ka vai zauh a. A bu nghut duh chauh. A tha vek e.
.
A tlan liam hun nghak lovin in chhungah ka luhsan a, ka pindan ka pan ding nghal a. Engpawh thleng thei a ni a, hmachhawn tura inpeih atin ka awm a ngai. 
.
Ni thar a lo chhuak a, ka beisei ang thil engmah a thleng lo. A reh tlawk tlawk a ni  ber mai.
Ka phone ri ka hriat chuan towel-a ka intuam sawk sawk hnuah bathroom atangin ka chhuak a, caller ID ka hmuh chuan ka pick up thuai a.
.
“Pawnah ka awm. Kawngka lo hawng rawh.”
“Lo nghak lawk.”
Ka phone off in khuma ka hak tur thawmhnaw ka dahsa chu ka inbel sawk sawk a. Tun ang huna Jefferson lo kal hian chhan a neih ngei a ngai.
.
Kawngka ka hawng a, Jefferson hmel ka hmuh chuan ka rinlawk loh dan takin a zangkhai khawp mai.
“Agnetha hmu turin ka kal dawn a, vatirhkoh hmuh a beisei thu a sawi a.”
.
“Khatianga min koh khan nuam ka ti lo. Lo thu la, ka’n insiam ange.”
“Okay.”
Hotel kan chhuahsan chuan chawhma dar 11 a pel fel awrh chauh a la ni. Hospital panin kan tlan par par a, Jeff chu zangkhai tak hian a titi a, kan nui duh leh hak hak thin a.
.
“Mordecai khan sawi a nei em?” a hmel chu ka en zeuh a, nui hmel a pu tawh lo.
“Enge sawitur awm a?”
“Engmah ni chuang lo e. File a pe duh che kha mak ka ti deuh mai mai mawle. Mi tih awlsam a ni lo tih i hre tho a.”
“A dik alawm. Mahse, kha file kawl reng kha atan awmzia a awm chuang lo a.” ka tiliam mai a.
.
“A dik tho. I lakah hian tumahin rilru chhia an pu thei ngai dawn lo anih hi.”
A tawng tawp chat a, a thusawi ber kher chu tisual a inti deuh pawh a niang. A ngawi zui ta daih.
“Kan thleng e.”
.
Agnetha chu khumah thuin min hmuh chuan a nui ver ver a. Jeff chu a lo ban thuai bawk. Ahmaa Jeff min hrilh danin a nu chanchin a zawt tawh miah lo ani awm e. Pa leh fa na na na chu an in ngaina thuai bawk anih hi.
Police ten a fanu hmu tura hruai an tum laiin Serafina chuan a hnial fithla thak a, pawna chhuah hrim hrim a duh lo bur tih a sawi laia Jeff hmel chu ka hrethiam chiah lo. Agnetha tan a nu chu mitthi nen danglamna a awm tawh lo tih a sawina ang mai hian ka lo ngaihsak.
.
Darkar khat dawn hnuah Hospital kan chhuahsan a, Jeff chuan a rang thei ang berin Agnetha chu abulah a chentir dawn tih min hrilh lai chuan a hlim hmel khawp mai. Ka kutah vuanin min hmer vang vang a.
.
“Thil tha ti leh thei tura min tanpui vang hian ka lawm tak zet.” Tih pahin ka kut chu a fawp zauh a.
Kan boruak cool ta ruih hi ka hrethiam chiah lo.
.
“Ka ril a atam khawp mai. Khawiah nge kan kal ang? Vawiin chu nilengin i bula hun hman ka duh a nia.” Boruak tih zangkhai tum takin a awki a tizang vah a.
.
Lunch kan ei zo a, dawr atanga kan chhuah chuan a hmaa ka rinhlelh ruk motor ngei kha kan piah lawkah a lo awm leh reng tawh. Ni thum chhung chu kan piah lawka car dum sawn min zui tawh.
.
“Car dum saw i hmu em?”
“Hmu e. Engmah ani lovang.” A tiliam puat a. Ka hlauhthawn ruk angin a hlau ve lem lo anih dawn hi.
.
Tihtur em em a awm tawh loh vangin hotel lama let ka rawt a, Jeff chuan min hnial hran lo.
.
Kan tlan chhuak chauh a, a phone a rik chuan rang zet hian a pick up vat a. Caller id chu ka hmuh hman a hlauh hmel khawp mai.
.
“Lo awm rawh. Okay.”  Chhang zung zungin phone chu a off lehnghal a.
.
“Ka kal a ngai. Zanriah ei turin ka lo hruai leh ang che.”
“Thil diklo a awm ami?”
“Chutiang a ni lo. Hotel ah ka va dah phawt che anga, zanriah ei hunah kan inhmu leh dawn nia.” a nui sak a. A hmel ka en vang vang chuan ngaihthat lohna tur a awm hranin ka hre lo.
“A tha lawm.”
.
Hotel kan thleng a, Jeff chu lo chhuk ve tawh lovin a kal tumna lam panin a tlan chhuak lehnghal a. Zanriah kan ei duh dawn anih chuan kei pawh ka lo inpeih sa angai ang chu.
.
.
MORDECAI*
A kut ka en a, engmah chhinchhiahna a awm lo. Jefferson khan a nupui ni tura a sawmna chu Vida hian  a pawm tawh tih min hrilh ngei si kha. Amah hi zawt pawh ni ila_Nah! Zawt mualpho lo law law ang! A hmel chu chik takin ka en a, a rilru tur awmang ka hrethiam lo. Engtiklai atang khan nge rilru hriattheih miah loh tur inthunun dan hi a lo hriat tak.
.
A duhthlanna a nih chuan lo sawisak theih ka nei lo. Ka tanpui theih dan anga tanpui chauh hi ka tihtheih tawk a ni. Mi i hmangaih takin a thlang si lo che anih pawhin nawrluih theihna dan i nei lo va, nangmah hmangaih turin i sumin i lei thei hek lo. Heihi hringnun nihna dik tak chu a ni.
.
Ka tawngkam vanga a meng tal tap chu hmuhnawm ti zetin ka en reng a, a mizia dik tak a lan chhuah hian ka duhna a zual thin. Damn it! Hetianga ngaihtuah tur hi ka ni miah lo.
.
File ka pek hnu chuan a en niap niap a, a himna turah chuan a fimkhur ve theihtawp tih ka hmuh hian venhim ka duhna a zual sauh. Jefferson hian a tina leh emaw a venghim zo lehsi lo anih teh chuan__.
.
Kal turin a ding chhuak a, tun chiah hi chance ka nei tawh. Ka hmeichhe hmangaih hian min kalsan tawh dawn. Mi dang nupui niin ka khawih phak tawh dawn lo. Min tihbuai a duh loh thu a sawi chuan ka ngaihtuahna ka hmang hman tawh lo.
.
Amah chu hnaihin ka kuah vawng vawng a. Engtinmah min chhanglet lo. Jefferson sawi kha a dik ngei ang tih ka ring ta bawk. Duhsakna hlan mai loh chu tih theih dang a awm ta lo ve.
.
Hotel thleng ka thlah hnuah ka chenna hmun panin ka let leh a, motor dum a hmaa min zuitu khan min zui ta miah lo. Vida ka bula a awm chhung chiah khan min zui! A dik lo! A dik lo!
.
Dr. Phillip ka bia a, Vida tana hlauhawm ni a ka hriat Serafina chanchin ka hriat chuan ka thaw deuh huai nain ka rilru erawh a chawl miah lo thung. Kha car dum khan engvangin nge Vida a zui zel?
.
Jefferson khan Esma Celik ni lovin Vida ngei a ni tih a hre tawh a, ka bulah pawh a sawi ngei kha. Ka hrethiam thei lo. Vida hian engtin nge Jefferson hi a pawm leh theih?
.
Ka mu meuh lo a ni e. Ka ngaihtuahna a kal kual nasa. Tunah chuan chhuna ka Guzel ka pek tak  file te khan tangkaina a neih ka ring ta lo. Tupawhin hming lem hmanga a nun hman hi khin buai tum ni tase thil thleng tur ang ang a thlen a hun tawh. A awmzia chu__ thil dang thalo zawk a thleng thei tihna a ni.
.
Khawvar dawn hnaihah ka muhil ve ta hram.
Ka muhil ka harh chuan dar 8 a lo pel tawh. Rang takin ka tho a, office kal turin ka insiam nghal a. Vida ka biak ngei ngei a ngai.
.
Phone-a biak ngawt ai chuan hmaichhanah hmuh a that zawk ringin a chenna Hotel ka pan a, hmuh tur a lo awm lo. Ka call ve taknain a phone a in off tlat a. Hotel a thawkte chuan a kal chhuak tih thu chiah min hrilh thei a, eng ti turin nge a chhuah min hril lo thung. An hrelo tih an hmelah khan a lang vek bawk.
.
Ni lengin ka call khat tawk reng a, ka mangang ru ta viau.
Tlai lam dar 6 a ri a, beidawn nan hrim hrim pawh tiin ka call nawn leh ta ngawt a. A ring ta hlauh mai.
“Pick up rawh, pick up rawh.” ka ti mawlh mawlh a.
.
“Hello.”
Lalpa chu fakin awm rawh se!
“I tha em?” ka ti nghal tawng. A nui hak a. Ka zawhna chuan a nuih a tiza a ni ngei ang.
.
“Tha alawm. I tha em? Thil pawimawh a awm ami?” arawn ti ve thung. A dik alawm. Thil pawimawh tak a awm anih loh chuan kan inbiak nachhan tur a awm lo reng bawk a.
.
“Tunah khawiah nge i awm?”
“Ka pindanah ka awm.”
“Lo kal chhuak suh.”
“Engvangin? Ka ngaih i titha lo a nia. Zanriah ei turin ka kal chhuak dawn chiah a.”
“Lo chhuak suh.”
“Eng thil nge anih sawi teh.”
“Chutiang thil engmah a awm lo.” Thil thleng tur sawi fak theih a awm lo a, ka rinthu hmangin ka ti hlauthawng ngawt thei lo.
“Anih chuan ka kal chhuah theih lohna tur chhan engmah a awm lo a nih chu.” ka chhan lehna tur nghak lovin phone a off a.
.
Tak zet reuh hian! Line a in cut a ni zawk ang!
.
Hahdam lo zetin ka pindan ah ka vei sek a. Ka awm nawm loh dan hi mak tak a ni. 30 minutes vel hnuah ka phone a rik chuan ka pick up rang teh e.
.
“TV en rawh.” tih chiah arawn sawi. Min betu chu tunge anih ka hre hek lo. Mipa aw chhe zet a ni tih chiah ka hria. A channel rawn sawi chu hmet chhuakin thin  phu dup dup chungin ka en a.
.
BREAKING NEWS*
Tunah hian Jeffira hmun bula Yatch-ah kangmei a chhuak a, kangmei hi thelh theih loh khawpa a nasat vangin___*
Thil puak ri ring lutuk awm vang chuan chanchinthar puangtute pawh hmanhmawh takin an kalsawn hlawk hlawk a,. Eng thu chiah nge an sawi zui hriat theih a ni ta lo.
.
Hmanhmawh takin ka car chahbi ka la a, in atang chuan ka tlan chhuak nghal.
Ka phone phawrhin Vida number ka dial a, phone a pick up thei lo.
.
Chak taka car chu khalhin Jeffira hmun lam panin ka tlan pur pur ringawt.
VIDA – SheKnows
(Vee-Da)
.
By. Thantei_LauraSean
.
CHAPTER – 38
.
MORDECAI*
Jeffira hmun ka hnaih chuan mi an awm nuaih nuaih a, hmanhmawh tak  bawkin car atang chuan ka chhuak nghal a.
Ka phone phawrhin Vida ka call a, a ring char char.
.
Ka hawi kual a, mi an bawr laih laihna lam pana kalin phone chu min chhangtu an awm leh awm loh ka ngaichang reng bawk a.
.
“Mordecai!”
“Yes! Yes! Keimah_”
Ka piah lawkah min hmachhawn zawnga ding hmeichhia chu ka en a, ka Guzel ngei a ni. Mi tam tak karah pawh ka mitah chuan a langsar nalh. Phone chu ka ipte ah ak rawh rawkin ka pan nghal ruak ruak a. Mipui karah inzep nawk nawkin a bul ka thlen chuan engmah dang ka ngaihtuah hman lo, ka theihtawpa nghetin ka kuah nghal thlawp a.
 .
“I him e. I him.” Ka kuahna thlahin a biang tawn tawnah ka vuan a, a hmel a dang lapin a hmui chu a khur der der a. Tawng tumin a ang ziau a, a tawng chhuak thei lo.
.
A hmuiah chuan ka fawp a, ka kuah bet leh a.
.
“Helamah hian lo kal rawh u. Hliam a nei lo nain thil thleng hian a thawng hle ang.”
Kan  bula mi pakhat lo kal chu kan zui a, nghet takin ka Guzel kawngah chuan ka kuah a. A taksa zawi deuh ngiai dan atang chuan a hlauthawng tak zet tih ka hria. A khur der der bawk.
.
“Engtin nge thil thlen dan?”
.
“Ka hrechiang bik lo. Kan thlen chuan engkim a thleng tur ang a thleng vek tawh ve bawk a. Ruang pakhat chu an hmu tih ka hria a.” ka bula pa chuan a hre tam tehchiam biklo a nih hi.
.
Ka car dahna kan thleng a, kan mizui pa hnenah chuan Vida chu ngaihtuah a ngaih tawh loh thu leh ka bulah a him thu ka hrilh hnuah min kalsan theih thu ka hrilh a. Ngaihngam takin a kalsawn ve mai bawk.
“Tha takin enkawl ang che. Mr.Sloan.” a nui sak a. Kan pahnih chuan min en tawn zak zak mai. Tunhma thil thenkhat kha a lo hre ve anih ngei dawn hi.
.
Car kawngkhar hawnsakin Vida chu dimte hian ka thut luhtir a, a hmel la buai nak chu a lainatawm khawp mai.
.
Driver seat-a ka thut luh chuan “Jeff_Jefferson kha_” tiin a phun sap a, a tawng zui hleithei lo.
.
“Hahdam phawt rawh. Hmun himah ka hruai ang che.”
“Nichin khan_Jefferson chu an lo zawn chhuak a.. A thi_ a taksa a kang vek.”
“Shh_ Hahdam rawh..”
A kut pahnih suihin a khabe ah a nghat a, hnunglam leh hmalamah a insawi dat dat a. A chiai tak zet tih a hriat e.
.
“I pasal nimai tur i chan hi pawi ka ti.” Ka thusawi chu a va hun ber lo em!
.
“Mordecai?”
“Tih palh. Chutiang thu sawi chu a  hun lo tih ka hria.”
.
“Hahchawlh ka duh.” atih chuan chhang tawh lovin car ka tinung a, ka chenna hmun panin kan thlan chhuak ta. Kawng tluan in engmah kan sawi tawh lo. A mittui tla chu a thunun thei lo tih ka hria a, hnem vak dan tur ka hrelo thung.
.
In kan thleng a, in chhungah inzui lutin a pindan turah ka hruai a. A khur chu a la reh meuh lo.
.
“Hahchawl rawh. I bulah ka lo awm ang.”
.
A puansin ka siamtha a, maimitchhing nghal chialin “Ka lawm e. Mordecai_ Ka lawm e.” a ti sep sep a.
.
.
VIDA*
.
Ka phu zawk a, ka muhil chu ka harhchiang khawp mai.
“I tha em?”
Hnai zetah Mordecai chuan min en run a. A mithnuai val deuh kalh atang chuan nizan a mu tha lo tih a lang.
Nizan! Ni e, nizan khan thil rapthlak tak a thleng anih kha. Engtin nge ka mutthilh theih zawk le? Jefferson_ Jefferson khawvel ah hian a awm ve tawh lo.
.
Nizana Mordecai nen kan inbiak hnu khan rilru nuam chiah lovin ka awm ren rawn a, hlauhthawnna hian ka nunah hmun a khuar nghet tawh hle a ni tiin ka ngaihtuah hial a. Jefferson nen pawh kan inbe leh ta rih lo anih kha. Zanriah ei tura min hruai hun tur a sawilawk ah pawh a lo thlen tak loh vangin ka phone a, Jeffira bula Yatch-ah a awm thu arawn sawi a. A aw atangin thil diklo a awm tih engmah a hriat loh. A phur hmel hle zawk. Nge, amah pawh khan thil thleng tur engmah hrelawk bik lo zawk?
.
Jeffira ka pan a, Yatch ka thlen hmain thil puak ri ring tak ka hria a, a rapthlak thei ang berin engkim kha a thleng vek. Kangmei a zia hnuah Jefferson ruang kang nasa tak an lo zawnlai ka hmuh khan a tak ni theiin ka hrelo. Ka taksa ka khawih a, ka mumang mai a ni lo. Ka chawmawlh vek anih kha.
.
“Heihi in rawh.” Min ngaihtuah tih hriat taka min en rengtu Mordecai chu ka en a. “Guzel?”
.
“Agnetha engtin nge a awm?”
“Heihi in phawt rawh. Agnetha chu a tha.” A no ken chuan ka hmui arawn siktir a, glass no a thil awm chu ka in lo thei ta lo. A kha em em lehnghal.
.
“Tikha chuan i tha leh vat ang. Na i nei em?”
Ka lu ka thing ringawt. Heti taka min ngaihsak hi ka tan a zahthlak hle a ni. Vawi engzat fakau nge Mordecai hi ka tihbuai tawh? Chhiarsen pawh a ni tawh lo zawk. A hun hlu tak ka tan a senral leh hi ka remti dawn tawh lo. A zahthlak zozai ta e. Atana engmah ni lo, mi hnawksak mai hi engtin nge min buaipui fo peih zawk le?
.
“Ka tha e. Hnathawk in i kal dawn lo mi?”
A hmel thutak zet chuan min en reng a, engmah sawi lo hian min hnaihin ka biangah a kut hnunglam chuan a nul zai zai in, “I tha tak zet em?” a tihniam ruih a. A hmel lan dan chu a thuk tak zet zet. En rei duh lovin ka hawisawn thuai a, thil tullo leh awihawm loh tak tak ka ngaihtuah leh hmain Mordecai hi ka hlat vat tur a ni.
.
“Aw. Kal tawh ila a that ka ring.”
.
“Kan pahnihin kan kal ang.” Inla hrangin khum bulah a ding a, a hmel chu hriatthiam theih a ni leh tawh lo.
.
"Mordecai, khawngaihin_ I tan buaina thlen ka duh tawh lo."
.
"A tha alawm." a ti nghut a. "I thawmhnaw hak tur a lo thleng tawh a, ka lo dah chhohtir ang."
Ka chhan leh hmain pindan atang chuan a kal chhuak a, kawngka a khar rik khap hnu chuan thawm dang hriattur a awm ta lo.
.
Minutes engemaw zat hnuah pindan kawngka chu rawn inhawng in Boni arawn lang hlawl a. A bawm ken chu khum bul dawhkanah dahin engmah sawi lova chhuah leh mai tum hian a kal sawn nghal a.
.
"Boni?"
"Miss Cappolo?" nui suk chungin min rawn en a, a nui hmel chuan ka awm a tinuam deuh huai.
.
"Kan inhmuh lohna chin a rei ta hle mai. I tha em?"
"Tha e."
.
"Chuan heihi enge?"
"I thawmhnaw hak tur anih kha. Mr. Sloan chuan in hnuaiah a lo nghak ang che."
.
"Oh. Okay. Ka lawm e."
.
Boni a kal chhuak a, bawm chu hawngin thawmhnaw lo awm chu ka ha nghal a. A dum a ni. Ka mitthla a Jefferson hmel lo lang vang chuan ka thiltih lai chu ka tawp chawt a.
.
Jefferson chu a thi tawh. A rapthlak thei ang berin a ni bawk. Kan hun hman dun tawh leh kan inkara thil thleng zawng zawng te arawn inlar zut zut a, ka mittui ka dang zo leh t alo. Khumah chuan ka thu zawi hnawk a. Heihi a tawpna tur tak tak ani ang maw? Hetiag ema rapthlak tawn hi a phu reng bik em ni? A ni thei lo. Thil sual tam tak lo tiin ka nun tichhe vektu pawh nise thi tur chuan ka lo duh hauh lo. Hremna nasa tak tuartir tumtu ngei hian thi turin ka la duh hauh lo tih ka inhrechiang lutuk. Mahse, awmzia a awm tawh lo.
.
Eng chena rei nge chutiang chuan ka thut ka inhre lo. Kawngka kik ri ka hriat chuan phu zawkin ka ding chhuak hluai a. Kawngka chu arawn inhawng zui mai bawk.
.
"I inpeih dawn tawh em? Kan tlai dawn a nia."
.
"Ka_Khawiah nge kan kal dawn?" ka ti tham chal a. Ka thawmhnaw hak tur hian kan kalna tur hmun a tichiang vek tawh nain rin har ka tih tak zet zet vangin ka zawt nawn hram a ni.
.
"Jefferson kan thlahliam a ngai alawm. A pawi ka ti tak zet."
Mordecai chu ka bulah arawn ding a, chiang zeta min enin min hnem tum tak hian ka ban bulah min chul hauh hauh a.
.

Darkar thum a liam leh hnu chuan Jefferson chu kan thlah liam ta. Thihna hi chu a va'n tawp chiang tak em! Agnetha tap hlap hlap chu ka kuah a, naupang thil awmzia tak tak hre rual ni lo mah se a pa chu vawikhatmah a hmu tawh ngai dawn lo tih in hrethiam ve niawm tak hian a tap tawp hleithei lo. Dik taka sawiin Jefferson min kalsan thut hian min thawng na hle a, ka rilru chhungril takin hreawm ka ti em em bawk. Chutih rualin ka ngaihtuahna erawh a tikal thui khawp mai. Khawvelah hian kumhlun tur engmah a awm lo a, he thu hi hrereng chungin pawisak nei miah lovin kan tanghma kan hai fo thin. Mi dangte tan hreawmna kan thlen em tih kan ngaihtuah duh hek lo. Thil thalo titu chu thil thalo bawkin a inrin hmain a nangching thin!
Jefferson chunga thil thleng hi a thiltih vuaklet tiin ka sawisak ngam lo nain thil thalo tih pawi zia leh nunrawnna hrin chhuah chhiat zia min ngaihtuah tir thung. Thiltihsual nei miah lo Agnetha hian a nu leh pa tel lovin engtin nge khawvel hi a hmachhawn ve tak ang? Jefferson thihna rapthlak tak hi tu thlentir nge ni ta ang le? Zawhna thenkhat chhanin a awm a, zawhna dang chhanna tur zawn a ngai leh bawk a. Hringnun ah hian zawhna chhan tur a awm tawp thei ngai dawn lo.
.
.
.
Jefferson kan thlahliam atangin thla li a liam ta.
Thawklehkhatah engkim a danglam ta vek a ni ber zawk. A tha lam nge anih a chhe lam tih vawiin ni thleng hian ka la hrethiam lo. Ka hmaa tihtur awm hi tha taka ka hlenchhuah theih nan ka theihtawp ka chhuah tawp rih ngawt mai a ni.
Cappolo Corporation ka kutah a awm a, Jefferson damlai khan Mordecai hnenah hian neitu nihna engkim ka pe vek tawh anih kha. Pawi tihna ka nei miah lo. Engmah hi ka thlahlel hek lo. Mahse Jefferson a awm loh chiah khan thil nihna dik tak chu ka tlanchhiatsan thei ta chuang lo anih hi.
.
Mordecai hian  ka enkawl anih loh chuan Cappolo Corporation hi a tla chhe ngei ngei dawn tih min hrilh a. A thusawi kha ka awih mai duh lo. Min vau nan a hmang anih ka ring hmiah.
Mahse, a ni lo! Mordecai Sloan hian Cappolo Corporation tluchhe tur chu thu chungin a en liam thei tih ka hmuh khan tuna ka dinhmun hi ka vuan lo thei ta lo. Ka nu leh pa leh kan chhungkaw innghahna ni thin ka mit hmuhlai ngei a a tlusawp mai tur chu ka ngaingam ngang lo a ni.
.
“15 minutes hnuah meeting tan a ni ang.” Intercom ka off a, conference room a kal turin ka office ka chhuahsan nghal a.
.
Conference room lo la thim vek chu mak ka ti khawp mai. Thil awmzia hre tura chhuah lehnghal tumin ka inher a, ka hnunglama thawm awm vang chuan ka ding leh chawt. Room light arawn eng ta chiah bawk.
.
“Miss Vida Elves Cappolo!”
.
Mordecai! Hetah eng thil nge arawn tih dawn? Thla hnih chhung chu vawikhatte pawh ka mit hmuh phakah a awm tawh lo. Eng thil nge a hriat a tuna taka arawn lan? Muangchanga inherin ka hmachhawn ta.
.
A sam chu a hma aiin tlemin a sei deuh a, a tukhum lam sam chuan a nghawng a hawlh pha det det. A vun rawng chu nidang aiin  a lang sen deuh bawk. Nisa ah a awm tam tihna a ni. A mitmeng erawh a ngai. A lang thim deuhin a muk raih__
.
“Hetah hian meeting nei turin ka kal a. Kan inhmu leh thei chu a lawmawm e.” ka ti bah nak a. Ka awm dan a lai. Ka sawithiam chiah lo. Pangngai taka chhawn tur ka ni. Amah do zawnga awm a tulna  a awm lo. Min lo tanpui tawhna zawng zawng vang chauh pawh khan_ Mahse, pangngai takin ka en thei lo. Heihi chu ka thiam loh liau liau a ni bawk. Ka rilru leh thinlung ka thunun theih loh vang chiah!
.
“Meeting chu kan tan nghal thei ang.” a ti nghut a.
“Kan pahnih chauh hian maw?” ka ti ha mai. A mak reng bawk a.
.
“Ni e. Kan thusawi dun tur hi mi dang hriat ve tul lem lo thil a nia.” Dawhkana file awm chu kawk zauhin a thu a, duhthlan tur dang ka neih chuan loh vangin dawhkan chu ka pan hnai a, ngil at hian ka thu a.
.
“He lehkha hi uluk takin han chhiar phawt teh.”
.
A lehkha min pek chu ka chhiar a, ka chhiar chhung zawngin a pen chu dawhkanah chuan a khawng ri kauh kauh reng a.
.
“Heihi engtin nge ka tih dawn?”
“I thu thu a ni e.” tih chiahin min chhang.
“Mord_Mr.Sloan, engtin nge hetiang thil hi ka pawm theih ang? Ka thawh hahna zawng zawng kha a thlawn vek dawn asin.”
“I thutlukna ah a innghat reng a ni. I thawh hah tawhna kha thlawn turin I duh nge duh lo.”
.
“Thlawn turin ka duh lo tih chu i hrechiang ang chu. Mahse, heihi engtin nge Esma Celik ka nihna nen hian a kalkawp theih?”
.
“Nimin khan Cappolo Corporation neitu i nihna ah hian thil fel tawklo a awm tiin thubuai thehluh a ni.” a hmel chu chiang zetin ka en a, engmah a hriatthiam theih rih loh.
.
“Engkim hrechiangtu chu nangmah hi i ni. Thubuai chu tuin nge thehlut?” rilru buai ang a lan ka tum therte lo.
.
“Han ring chhin teh?” ngaih pawimawh loh hmel fahran hian a thle nghut a, kei pawhin a awm dan hi ka ngaithei lo tan ta bawk.
.
“I hriat chuan han sawi mai ta la. I hresa tih a lang reng bawk a.”
.
“Nangmahin i zawng chhuak ve ang chu.” a ti duh lek. Ka thin a ur tan tih pawh a hre ngei ang. Engtia ka tih nge a beisei?
.
“A tha e. I tanpuina ka dil tawh lovang che. Min hrilh avangin ka lawm. Tihian kan meeting chu a zo.”
.
Ka thutna atangin ka tho a, kal chhuah mai tumin ka pen chhuak hmiah bawk.
.
“Ka tanpuina dil chu a tlawm thlak viau em ni?”
Dingin ka hawilet a. A thutna ngaiah thuin chiang lutuk  hian min en a. Za lo zeta nui sak chungin ka lu ka thing a.
.
“I tan hian eng chiah nge ka nih? Ka puihna dawng duhlo tur khawpin min en hrang  tih hriat chu a lawmawm loh khawp mai.” Min en reng nain a che eih lo thung.
.
Sawitur reng reng ka hre lo. Ka hamhaih tiin sawi ila a dik be rang.
.
Muangchangin a thutna atang chuan arawn tho a, min rawn pan hnai chu ka lo en tawp. Ka rin loh dan daihin  a awm leh tawh bawk. Min ngaihniam niawm takin min fiamkual zet a, chumi hnuah a tanpuina dil turin min beisei leh a! He mihring hi ka hrethiam thei ngai lovang.
.
“Nge, ka dam chhung hian ka hlim ve i remti miah lo zawk?”
Ka bo ta map mai le! Tuna kan sawi mek leh a hlimna chungchang in inzawmna engmah a nei lo. Engtianga min chhaih kual nge a tum?
.
“Ka nghak rei tawk tawhin ka hria_” ka hmazawnah tak dingin min en chhuk run a, a mitmeng chu hriatthiam theih miah loh hian  a de bawk.
.
“I sawi awmzia engmah ka hrelo.”
.
Min rawn hnaih lehzual a, kan hmai a insi lo chauh tawh.
.
“Morde Honey,__”
Conference room kawngkhar chu engtik laiin nge a inhawn ka hre miah lo. Inhnaih taka kan ding dun tih min hmuh rualin Violet chu a ang pham a. A tawng tawp chiang nasa mai bawk.
.
“Nang?_” a mit tizim sanin min en a, laklawh nei zui miah lo hian min rawn pan hnai a. Mordecai chu a banah kuahin *ka ta anih hi* tih melh hian min melh nghal ram ram a.
A ngaihna hre lovin ka nui tawp. Hetiang thil hi enge a awmzia ni ngai a? Conference room-ah hian meeting kan nei tih hrereng chungin engtin nge Violet hi a lo luh theih?
.
Mordecai chu ka en a, ka nuih a za miah lo. Mahse hamhaih zet hian ka nui leh hak a. Tawng ka tum zet a, ngawi leh rihin ka hmui hnuailam chu na zetin ka seh ta ngawt. Dik taka sawi chuan ka chhungril ah ka na. A la danglam lo. Mordecai tan hian infiamna hmanrua chauh ka la ni reng. Ka hmulthi ding ar ar chu engvang nge ka hre phiangsen lo ve!
.
Hetiang thil zawng zawng hi tlansan vek ka duh. Engmah sawi tawh lovin ka file chu ka la a, conference room atang chuan ka kal chhuak nghal a.
VIDA – SheKnows
(Vee-Da)
.
By. Thantei_LauraSean
.
CHAPTER – 39
.
VIDA*
.
Ni thum chhung chu ka office-ah ka inkhung chawt a, meeting awm zawng zawng ka cancel tir vek bawk. Ka nun hi a bul atanga ka tan that leh a ngai! Engkim a thar vekin. Thil thleng tawh zawng zawng kha ka nuai bo thei lo va, ka theihnghilh thei hek lovang. Mahse ka nun erawh bul ka tan thar leh thei. Bultan tha turin eng hun pawh hi hun tha a ni*
.
Office kawngka a inkik ri dat dat a, ka secretary chu tim dek hian arawn dak a.
.
"Mr.Sloan a lo kal a, kal mai tura ka hrilh pawhin a kal duh tlat lo."
Kawngka chu arawn inhawng zau a, Mordecai chu arawn lut hmiah. Ka thu ngil a, ka hmelah ka ngaihtuahna a lang chhuak tur a ni lo. Chu chu thupek a ni!
.
Amah chu en duh lovin dawhkana paper ka enfel mek lam chu ka ngaihven a. Min rawn pan hnai tih erawh ka hria.
.
Thu ta mai lo chuan dawhkan chu a kut pahniha nemin ka lamah arawn awn a,  thawm a nei miah lo.
.
“I biru rei ta hle mai.” A ti hniam ruih a, ka paper chauh chu ka la ngaihven ta hram. Amah en chuang lovin “Lo thu rawh.” Ka tiliam puat a. A hnar a tum dat.
.
“In ngaihthah der khan a pui lovang che. Guzel, harhchhuak tawh teh.”
.
“Ka muhil hleinem. Nang meuh lo kal chu thil pawimawh a awm aniang maw?” paper chu en zovin file –ah ka dahlut a. Che hmanhmawh duh miah lo hian chair-ah ka thu ve ta chauh.
.
“Court-a i inlan hun kha naktuk hi niin ka lo hria a.”
“A dik alawm.” Tih chiahin ka chhang. Min ngaihven  ang hian awm tawh miah lo se ka duh zawk. Khawiah nge Violet kha? Helai hmunah hian Mordecai alo kal tih hria se alawm hauh lovang. Violet lawm lo tur chu pawi ka ti pawh a ni lo. Mordecai zawk hi hmuh tawh loh ka duh mai zawk a ni. Ka hmuh hian ka tan a tha ber lo tih ka hrechiang em a.
.
“Court-ah chuan ka lo awm ve ang.” Ka chhan dan tur ngaichangin min en ngur a, keipawhin a mitah ka en ve ta. Tawng mai lovin ka thutna chair nghenchhan chu ka ngheng leh te te.
.
“Tinge?”ka tih chuan a dar tiche zauhin a ner suk a.
“Tinge niang? Awm ve ka duh vangin ka awm mai ang chu.”
“A tha alawm. Chuan_?”
.
“Chuan_ Enge?” a dawhtheihna a pan tan tih ka hria.
.
“I hun hlu tak hmanral nan chuan a ho mah mah lo maw? Thil dang tam tak tihtur i nei ngei dawn tih a chiang a. Mordecai, dik takin ka sawi ang. Keimah vanga i hun awmze nei lova i hman hi ka duh tawh lo. Ka sawi awmzia i hria. Keimahin ka chingfel ve thei ang.”
.
“Nangmahin i thei tih ka hria. Mahse, awm ve ka duh.”
“Mordecai, khawngaihin. I  nunah buaina thlen ka duh tawh lo. Ka tibuai tam tawk tawh che.” Heihi ka rilru dik tak a ni. A hmel en chung ngeia ka sawirik erawh ka inring ngai lo. Ka lo ngaihtuah lawk lem lo bawk.
“Chutiangin ka ngai ve hauh lo. Bakah_” dawhkan bawhin min en hnai sawt a, a hma aiin a awki a hniam bawk. “Ka tihtur leh tih loh tur min hrilh turin tunge i nih le?” a mitmeng chu a de sawr sawr a, a hawisawn hmasa zawk ka ni leh ta.
.
“Chu tak chu a ni ka buaina ah tel tawh lo tura ka duh chhan che chu.”
.
“Tel duh tlat ta ila?”
Ka kut dawhkan chunga ka dah chu rawn vuanin a hmer vang vang a.
“Ka duh chu ka ti ang. I bula ding turin Jefferson a awm tawh lo a, Jefferson ai ka awh ang!”
Engvanga Jefferson hi rawn sawilang kher nge a nih? Jefferson ai a awh ang maw? Engtin nge he ngaih dan hi a neih theih zawk a?
.
“Aiawh maw? Jefferson la awm pawh nise tuna ka thubuai ah hian a inrawlh nachhan tur a awm chuang lo.”
.
“I pasal a ni dawn chung pawhin maw?”
“Eng maw i sawi chu?” ka ti ha mai. Mordecai thusawi hian chhan a nei ta tlat. “Pasal maw?”
.
“I hre dik. In innei mai dawn tih ka hria alawm. Thuruk ah I lo la ngai anih chuan ka lakah zep a tulna  a awm lo.”
.
Ka nui hak ringawt. Jefferson nen khan inneih kan tum maw? Khawi atangin nge Mordecai hian a hriat?
.
“Ka hriat miah lo ilo hria anih chu. I source a tha awm hle mai.”
.
“Eng maw?” a ti sup. Ka thusawi chuan a thawng hle tih a thup hman bik lo. “Sawi chiang teh?” a ti nghal zat.
“Enge sawi chian tur awm? I source chu i ringzo meuh nange?”
.
“A ni lo tihna?” a thutna atangin a tho hluai a, dawhkan chu rawn kal pelin ka thutna chair chu a lam ka hawi theih nan a kuaiher lawp a. “A dik em?” a hmel chu thutak tih piahlam a ni ta. A mitmeng thuk zet chuan ka chhungril thleng hian a en tlang vek ni maiin ka hria.
“Nang hian_ Guzel, atir ah khan engvangin nge min hrilh loh!”
“Enge ka hrilh ang che?”
“Jefferson DeLourde kha pasal atan i pawm nawn lo tih hi. Engtiang taka nasain nge min tih hreawm i inhria em?” a thu hniam a, ka dar tawn tawnah min vuanin a hmelah chuan chian ngam lohna a lang.
“Ka hmangaih che tih i inhre chung pawhin min kalsan i tum ngar ngar chu anih hi tiraw? Ka hnaih theih nan che chhuanlam awm zawng zawng ka hmang kim vek tawh. Tunah chuan engvang mahin ka hlatah i awm thei tawh lovang.”
.
A thusawi hi ka hrechiang em? Mordecai Sloan hnen atanga ka hriat duh ber thin chu min hmangaih tih thu a sawi hi a ni lawm ni kha. Ka chhungrila ka awm dan ang hian langchhuak nghal ta ila nakinah ka tan zahthlak a ni zawk hial ang ta ve ang! Naupang a thil duh ngawih ngawih nei, hlim lutuk vanga a lam ang mai hian ka zuang in ka lam mai dawn em ni? Ka thinlung zawng zawnga ka hmangaihin min hmangaih thu a sawi aia ngaihnawm leh thu lawmawm hi a awm thei ngaiin ka ring lo.
Mahse__ tunah hian hlim viau tur ka ni reng em le? Min hmangaih thu a sawi vang ringawt a ka lo hlim nghal a nih chuan mi a ber ka ni ngei ang! 
.
Buainain ka ban phak rengah min nghak a, Mordecai min hmangaihna vang ringawt hian buaina zawng zawng hi a kiang nghal ngawt dawn lo. Mordecai hi ka buaina ah  a tel ve ka duh tawh lo bawk. Hmangaihna zinkawng hi zawh nawn ngam tur ka ni tawh pawhin ka inhre hek lo. Ka tan chuan hmangaihna hian  buaina, lungngaihna, hahchawlh theih lohna, chhiatna nasa tak a kengtel zel thin. Risk ka la ngam tawh lo.! Keimah chauh ni lovin ka bulhnaia awm apiang ten buaina an tawn phah bawk.. Ka thlen nawntir tawh dawn lo! Bakah Mordecai hian Violet a nei a, ka lo ngaihtuah buai a ngai lo hrim hrim bawk.
.
.
MORDECAI*
.
Ka hmangaih tih ka sawirik chuan thil rit tak min delhbet reng thintu kiang ta ang mai hi a ni!
A mitmeng a de zawk a, mitkhap kar lek tak takah hmuh ka duh tawh lo lungngaihna leh hlauhna thuk taka khat reng thin mitmeng chuan min en ta vang vang a. He a mitmeng hi a ni, ka chhungrilah keimah leh keimah ngei pawh ka inhnial buai thin nachhan chu. Min hnial in min kalh reng thin mah se a bula awm ka ning ngai lo va, ka thlakhlelhna a danglam hek lo. Chak tak anga a lan theih nan min kalh zel thin tih hi ka hrechiang tawk tawh.
.
“Ka ril a tam!” a ti sap a. A hmel pawisawi lo zet chu ka en tawp.
In lo hria em? He hmeichhia hi ka hmangaih thu ka hrilh a,a ril tam thu min hrilh let anih chu! Ka awih thei hlawl lo. A rilru zawng zawng hrethiam vek lo mah ila a riltam thu a sawi chuan thil dang sawizawm a duh rih lo tih a lantir thiam dan a ni tih ka hre thung. Min hnar lo va min pawm rih hek lo. A awlsam lovang tih hresa ka ni a, ni e, a awlsam lo__ Vida Elves Cappolo_ka Guzel neih tum hi a awlsam lo tak zet!
.
Muangchangin ka ding a, ka kut pahnih chu a vawn turin ka phar chhuak a. A lo vuan ve mai bawk.  A kut zen thlarh chu nghet taka vuanin chair atang chuan ka pawt tho a. Kan riltam dan inang lo lutuk hian ka nuih a tiza!!
.
Lunch ei turin kan chhuak dun a, a office atanga kan inzui chhuak leh lunch ei tura kan chhuah dawn thu a secretary a hrilh khan a secretary khan kan chhuak tur chu hnuk ulh teuha min enin hmui phunin lawmthu min hrilh hial anih kha. Ka Guzel hian engtin chiah nge hun a lo hman thin le?
.
Lunch kan ei dun a, kan pahnih chungchang kan sawi leh ta miah lo. A lan dan ngawt atang pawh hian Vida hi a la inpeih tlat lo a ni. Cappolo Corporation dinhmun ziaawm chho ve zel chungchang a sawilai chuan a rilru lapengtu thil dang engmah a awm lo tih hriat tak hian a tawng sep sep a. A va hmuhnawm em!
.
Office lam panin kan let leh a, kan ngawi dun ta rauh rauh. Engemaw zawng tak chuan a hahdamthlak phian mai. A hmaa kan awm dun tawh phawta boruak tang at ang leh inhnial inring  ran ang khan kan awm tawh hauh lo.
.
“Violet enge a an?” sawiri lo zawk ila inti niawm tak hian a ahmui hnuailam a pet zauh. “Theihnghilh rawh.” ti leh sapin a lu a thing  a, pawnlam a en ta daih a . Ngaihtuah lawk miah lo vin  a tawng chhuak tih a chiang. Ka awm a nuam huai thung.
.
“Ani chu enge?’ ka tilui salh a. Ni thum liam taa conference room-a thil thleng vanga sawi chhuak kha anih ka ring. Violet nen hian inhnim hnaih leh chu sawi loh kan inhmu khat ta viau a, khami ni khan enge arawn kal chhan ka hre miah lo. Vida kal hnu khan eng teh vak sawi lovin min hmu tur hrim hrima lo kal anih thu a sawi a. A bulah engmah sawi lovin ka kalsan nghal bawk anih kha. Khami hnu khan Violet chungchang engmah hriat ka nei zui lo. Vida khan engtin nge a ngaih ang tih ka ngaihtuah tho nain va umzui a, awmze nei lova nawr tumna ka nei miah lo thung. Engkim hian ‘hun’ a nei thin!
.
“Mi dang hun ka lo chhuhsak anih takin ka ti mai mai.” A ti tha ve mai a. Ka hmeichhe hriat tawh zawng zawngah Vida nungchang leh mizia hi hriat chian a har ber chiang a ni. Sawi vak ngaihna a awm lo.
.
Office kan thleng a, car atanga a chhuk hnu chuan kal mai lovin min en ren rawn a.
.
“Hun nuam tak min hmanpui avangin ka lawm e.” a nui ta sak. Min mangtha nan a kut vai zauhin a kal a, ka duh sawina hun pawh min siam chuang lo. Office chhunga a luh fel hnuah ka ka kalsawn ve ta chauh.
.
Naktuk lo thleng se la ka tihtur dik tak ka tih a hun ta viau.
.
.
VIDA*
.
Ka office ka thlen chuan kawngka kharin ka ngheng a, thawk ka la vang vang a. Mordecai bula Violet hming ka sawiri kha a ka inti tak zet. Lo ngawi hle hle ila tha zawk tur. I lo hria em? Engmah a sawifiah miah loh kha! Conference room-ah khan engti turin nge Violet kha alo kal a sawi lo va_’Violet chu enge?’ tih chiah a sawi anih kha. Ngatinge ka ngaihtuahna a la tihbuai fo mai le? Nun thara bultan ka tum tawh a ni lawm ni?
.
Tlai dar 6 ah office ka chhuahsan a. Jefferson awm loh hnu atang khan Hotel ka chhuahsan nghal tih ka la sawi miah lo in ka hria. Kan chhungkaw chenna hmun, kangmei nasa tak chhuahna hmun kha chei that a ni tawh a, mahni chauha luah atan chuan lian deuh mah se ka in la lut ta tho a ni. Khua a har duh khawp mai.
.
In ka thleng a, ka inthlak fel hnuah zanriah tur siamchawp lehin ka ei fel meuh chuan dar 9 a pel fel der tawh.
Ka mutna pindanah lutin naktuk court ka inlan huna pawimawh tur file ka en nawn leh a. Hlauhthawnna ka nei miah lo. Ka tihtheih bak thil thleng a awm anih pawhin ka tan hloh tur engmah a awm tawh chuang lo bawk. Mordecai vang chauhin Cappolo Corporation property zawng zawng fel fai thlapin ka kutah a awm a, Jefferson hminga la awm zawng Agnetha hmingin dahfel a ni vek tawh bawk.
.
Ngaihuahna vak kual ruai ruai chungin ka muhil a, mumang ka nei miah lo niin ka hria.
.
Ka alarm ri-ah ka muhil ka harh a, ka tho nghal vat. Hlauthawng lo mah ila court-a inlan ngai nih hrim hrim hi nunphung pangngai ve reng anih loh vangin rilru a kam ran mai. Tihtur ka neihte chu ka ruahman lawk angin ka ti par par a, dar 11 ah court room ka thlen hman a ngaih vangin muangchang thei pawh ka ni lo.
.
Dar 11 a ri ta. Thutna tur bik min kawhhmuh ah chuan ka thu ngil at a. Rorel tan a ni a, Mordecai hmel ka la hmu lo. A lo kal duh lo angin a bulah khan ka awm naa lo kal se ka duh tak zet. Keimah chauh chuan ka thla a muang zo lo.
Ka piah hlam hnih vela thu Kiara hmel chu ka en zawk a. Jeff awm loh hnuah kan vawikhat inhmuh lehna chiah a ni. Ani hian ka nihna, hminglem hmanga ka hun lo hman tawh vang khan min khing a ni. Atan hlawkna a awm pawh ka hrelo. A a tawh anih ka ring hial zawk. Property min chuhna thubuai pawh a la tel cheu bawk.
Jeffira hmun leh Jeff chenna in (Jeff nen kan inneih laia kan chenna) Kiara hminga dah a nih thu  a aiawha dingin arawn sawirik chuan court chhunga awm mi tlemte chu an phun mer mer a.
.
“Fiahna tihlan tur a awm thlap.” Tih pahin Kiara Lawyer chuan Judge hnenah lehkha a pe a.
“Heihi original copy a ni lo tlat mai.”
Kiara hmel chu phawk deuh hrain a dingchhuak a. “Death Certificate pawh keimah ngei hian ka lachhuak.” Arawn tichhuak phawng mai.
.
“Death Certificate chu tunah khawiah nge a awm? Ka hmaah in rawn tarlang thei em?” Judge en lovin Kiara zawk chu kan en thap a. Engtin nge a chhan dawn le?
.
“Jefferson DeLourde chenna hmunah a awm ang.”
.
Phun ri a ring zual a, an ri ta nuai  nuai a ni ber. Death Certificate! Jeff ngei khan engkim min hrilh hnuah ka thi ngei tih nemnghehna certificate kha a tichhe daih tawh. Tichhe mai chauh pawh a ni lo, record awm thei zawng zawng a nuaibo vek tawh bawk. Kiara hi engmah hrechiang lovin engtin nge a lo dinchhuah ngam zawk le? A mak!
.
“He hmeichhia hi bumhmang a ni. Jefferson DeLourde kha ama thah a ni bawk.” Min rawn kawkin a thutna atang chuan a tho thut a, min beih tum hian min rawn pan ta mai a. “Yatch-a bomb a puah khan nang hi a bulah I awm reng. I ruahmanna a ni. Mi tenawm i ni. Jefferson kha ka hmangaih asin_ Engvanga that nge i nih? Yatch-ah khan nangmah ngei hian awm turin i kaltir tiraw?” ka bula rawn thlen hmain an dawm bet a, mumal nei lovin court chhung chu a buai ta nuaih.
.
Judge chuan dawhkan chhu ri khauh khauhin bengchheng lo turin a khap a. Darkar khat chhung rorelna chawlh anih thu a puang zui  nghal zat bawk.
.
Pindan pakhatah ka lawyer nen kan lut a, thil kal dan chu mak kan ti lutuk ve ve.
“Kiara khan engvanga khatiang thu kha sawi chhuak nge anih? Tuna kan case bik leh Jefferson DeLourde thihna kha sawizawm tur niin ka hrelo.” Ka lawyer hmel chu enin mak a tih ve zia ka hmuh chuan sawitur min ti hrelo zawk.
.
“Ka hre biklo.”
“Tualthata inpuh ringawt pawh kha case tling tham a nia. Kiara hi a rilru a buai tawh a ni ngei ang.” A ti leh a.
.
Kan awmna pindan kawngka chu rawn inhawngin Mordecai arawn lut hlawl mai. Min rawn pan hnaiin ka thutna bul chair-ah chuan a thu nghal a. Ka kut arawn vawn chuan ngaihtuah lawk miah lovin ka lo hmer let ve ringawt.
“I tha em?” min tih chuan ka bu nghat a. “Ka lo thleng hma thei lo va, engtin nge thu a kal?”
.
Lawyer chuan a hrilh zung zung a, Mordecai hmel danglam zawk zawk chu ka lo en reng.
“Ka ngaihtuahna luah reng tawhtu anih chu. Kiara hi Jefferson thihna ah khan a inhnamhnawih lo anih pawhin hriat engemaw tak chu a nei ang.” Ngaihtuah chik hmel fein a ti nghet charh charh a. “Jefferson thihna ah khan Kiara hian rinhlelh leh thu zawhfiah a tawk miah lo. Engtin nge Vida hi Jeff thihna nen a sawizawm theih? Chhan a awm ngei ngei tur a ni.”
.
40 minutes hnuah Court room-ah kan lut leh ta. Boruak a reh duk a, ngaihthat thlak loh khawp hian a ni a reh! Mordecai ka va en chuan ‘ngaihtha takin awm rawh, ka awm alawm’ ti niawm tak hian a lo bu nghut a.
.
Minute 10 dang a ral a, minute 20____ Kiara a lo lang thei ta reng reng lo.
Kiara aiawha ding Lawyer hmanhmawh taka arawn luh chuan kan lo ngaichang thap a. A tlai vanga ngaihdam dilin a dinsak ber Kiara chu arawn inlan theih tawh loh thu arawn sawi ta mauh mai le! Min khinna thubuai hnuhlet a duh thu a sawi chuan kan inen he haw hlawm a. Engati hni hne nge?
.
Jeff thihna ah khan Kiara hi ka ringhlel miah lo. Vanduai vang liau liau a thil thlengah ka ngai mai anih kha. Mahse, tuna a lan dan atang hi chuan thil inthup ala awm a ni. Min khinna a hnuklet vek erawh ka thaw huai a. Min hneh theihna chance a awm lo tih a hriat vanga thubuai hnuklet ta mai nge anih chhan dang vang zawk?
.
KIARA*
.
“Thu pawimawh hrilhtur che ka nei. Goana huanah lo kal rawh.”
.
Minute 10 hnuah Court room-a ka awm ngei ngei a ngai tih hre chungin he message hi min lo thawn ang tih ka ring. Ahma atang khan he mihring hi ka ring tak tak  ngai lo. Message chu chhang lovin phone chu ka dah a, ka awmna pindan atanga ka chhuah dawn chuan min rawn call ta ngei. Ka rinlawk ang chiah.
.
“Goana huanah lo kal rawh. Vida i khin hian i duhthusam a thleng dawn chuang lo. I hneh ngai lovang. Ka kutah dah rawh.” a ti chhum hmak a.
.
“Engtin nge ka hneh dawn lo tih chu i sawi theih? Vida hi ka hmangaih nunna latu a ni a, ka chhuah dawn reng reng lo.” Ka aw khur chu ka thinur lutuk vang leh Vida ka huat  vangah a ngai ngei ang. Vida hi ka hmangaih nunna latu a ni lo tih ka hrechiang daih tawh. Court room chhunga ka nungchang pawh kha a lem vek a ni. He mihring cho chhuak a ka rinhlelhna hi a dik ngei tih chian tur hian lem ka chan a ngai tlat! Za lutuk hian a nui nghek a, ka phone chu ka beng atanga hla deuh takah ka dah a ngai hial.
.
“A a lo teh. Goana ah chuan lo kal phawt rawh.” A nuihza insum tawngri chu ka ngaithla peih lo.
Ngawi lawk teh! Nuihzat tur thil a awm reng reng hleinem maw le! Engkim hian lanchhuah hun a nei thin. Ka beihna hi a thlawn lovang. He mihring hian mi a ka ni tak tak emaw a ti a ni ange.  Ka laka a game khelh hmang hian ka hneh let theih chuan engkim hi ka chawlhsan thei tawh ang. Ka hmangaih ber chunga thihna thlentirtu mihring ka hriatchhuah theihna tur a nih phawt chuan engpawh ka huam thak zak!
“I tan chhan tur zawng zawng kha nuai reh a ni vek tawh. Mordecai Sloan a inrawlh tawh chuan i hneh ngai reng reng lovang. Tunah ka sawina hmunah hian lo kal la, ruahmanna tha zawk ka nei.”
.
“Min lo nghak rawh.”
.
Phone ka off a, ka lawyer awmna pindanah kalin thubuai hnuhlet ka duh thu ka hrilh a. Helai hmun ka chhuahsan atanga minute 10 tal a ral hma chu court room pan rih lo turin ka ngen lawk bawk a.
.
Goana huan ka thlen chuan a lo reh raih mai. Khawi hmunah tak nge min lo nghah dawn ka hrelawk tawh a, ka pan nghal chat.
.
“Ka lo thleng e. Violet!”
.
“Hi! I lo kal chu a tha e.”
“I ruahmanna chu min hrilh rawh?” a bulah ka thu hnai a, Violet mitmeng ka hmuh chuan ruahmanna tenawm zawng zawng zinga tenawm ber a phuhchhuak ngei dawn tih ka hria.
.
“Court-ah khan Vida bula awm turin Mordecai kha alo kal tih ka hria. An awm dun ka remti ngai dawn lo. Ka beih theih dan chikim in ka bei a, tuna ka tih leh tur hi chu kan pahnih tan hlawkna nasa tak a ni ang.”
.
A thusawi chu pawmpui niawm takin ka bu nghat a.
.
“Kan hlawkna tur chu eng thil nge?” ka tih chuan kha zet hian a nui hak hak a.
“Cappolo hi i duh chuan i nei thei ang. Ka pui ang che. Chumi hmain nangmah ngei hian Vida Elves Cappolo hi dahtha la ka duh a ni. He hmeichhe hnaisai lo hi Jefferson rual khan lo dahtha hmak ila tha tur a nia!” min melh zawk a, a tawng sual tih ka hriat ang chiah in amah pawh a inhria.
“Ka sawi awmzia chu Jefferson thihna hmunah khan thleng hman ve se ka tihna mai a nia. Jeff thihna khan_”
“Ka hria alawm..” engahmah ngailo ang chiaha langin ka nuih a, a rilru nuam huai hmel ka ten zia leh ka chhungril so nasat zia chu! “Jefferson khan min kalsanin Vida a vuan a, ka ngaidam thei lo. Sawifiah zawh loh khawpa na min tuartir a ni.”
Violet chu ka en reng a, ani pawhin chik takin min en ve bawk.
“Anih chuan Vida dahthat chu kan remti dun ah ka  ngai e.” ngaihngam tak hmel a pu ta.
.
“I sawi dik. Chumi hma chuan__”
Nui sangin a nak nemah ka silai ken chu ka chuktuah a.
“Chumi hma chuan_Ka hmangaih ber nunna latu hi a dam ka remti lo!”
A ri thawp sat a, Violet chu a meng nghal kawk bawk. Ka lamah arawn awn riai riai a, ka huatna zawng zawng lang chhuaka nui chungin Violet chu ka hmel en turin a hrawkah ka vuan a.
“Hremhmunah kan la inhmu dawn nia!”
.
Dimna nei miah lo leh hlawhtling inti takin Violet chu chair atangin leiah ka nem thla nawk a. A chantawk a hmu anih hi. A tal awrh a, a zal ta riai riai a.
Duh pakhat chiah ka nei_Duh pakhat chiah ka nei_Duh pakhat chiah ka nei ta_!!
.
.
VIDA – He hmeichhia hian ka pawi a sawi lo va, Jefferson ka hmuh phat atanga ka hmangaihna khan ka mihringpui pawh zah zo lo khawpa min siamin ka dai pelh zo ta vek ani. Vawikhat a thlen tawh chuan a tawp thei tawh lo.
He hmeichhia ka dam chhunga ka beih hian min hneh ta! Ka tlawm chiang ta e. Duh nise min bei letin a chunga ka thlentir ang chiah kha ka chungah a thlentir ve thei. Mahse chutiang chuan  a ti lo. A nuna harsatna leh thil rapthlak tak tak lak atanga a dam khawchhuah theih nan tu pawi mah sawi lovin a  bei mial mial a ni. Beih dan dik chu a hria a, mihring famkim chu a ni bik lo. Mahse he hmeichhia hian ka hriat loh thil tha chu a hre tlat a ni. Eng thil nge tih chu ka dam chhung hian ka hre ve dawn ta lo. Ka duhthlanna hian kawng diklo ah min hruai a, thlan khur ka luhpui dawn ta!
.
Ka car ah thuin  rorelna in atanga Vida leh Mordecai rawn inzui chhuak chu ka en reng a. Mordecai hian hmangaihna mitmenga khat chunga Vida a enlai hi ka lo hmu fo tawh thin. Tunah pawh dimdawi taka kuahin a hmai bula kun hniamin a bia a, Vida chuan khawvela thu mawi ber a sawi nimai awma lang hian a hmui a chet rualin Mordecai chu a nui a, a mit chu Vida ah chauh a fu tih pawh ka hmu. Tunah chuan hlimna chauhin hmuak tawh rawh se.
.
Car ka tinung a, ka duh ber panin ka tlan liam leh ta.
.
“Jeff_ Jefferson DeLourde! Hremhmunah tal chuan min hnar tawh suh ang che.”
Ka kuta ka thil ken chu hmet perin thei leh thei lo hian ka hmangaih ber Jefferson DeLourde thlan chu ka kuah tawk tawk a. Ka khawvel chu a thim ta!
THE END!
THANK YOU_THANK YOU_