RAMSA LEH MIHRING INBIAK THEIH TAWH LOH CHHAN

RAMSA LEH MIHRING INBIAK THEIH TAWH LOH CHHAN
Translated by – Thantei
Source – Legends_All_Lessons
.
Hun tam tak liam taah khan mihring leh ramsate hi tawng pakhat hmangin an inbe thei thin a. Hna an thawk hovin an infiam ho a, inrem leh thlamuang takin an khawsa ho thin. Hun harsa alo thlen chang pawhin meipui chhepin an thu kual a, lungrual takin ro an rel ho fo thin a. Ramsate chuan mihringte hnenah an thiam thilte hrilh chhawngin khawvela Pathian thil siam ropui tak takte an hman thiam theih nan nasa takin an zirtir thin bawk a ni.
.
Sahram chuan mihringte chu Sangha man dan a zirtir a. Buikelek chuan nupui khawlum lutuk leh thlasik khawvawt hreawm lutuk laka an him theih nan mihringte chu in sak dan a zirtir bawk a. Chinghnia leh Savawm te chuan ramhnuaia khawsak dan leh ramngaw a thil chhui thiam theihna zawng zawng mihring te chu an zirtir kim vek bawk a. Keite chuan thil hlauhawm lak bihruk dan mihringte a zirtir laiin Sakawr pawhin chak taka tlan dan a lo zirtir ve bawk a. Sihal chuan nun nuam taka hman dan leh mahni thiltih ngei nuihpui bawk bawk thiam thei turin mihringte chu zirtirna a pe vek bawk a ni.
.
Hun alo liam zel a, mihringte chuan ramsate hnen atanga zir theih awm zawng zawng an lo zir zo ta. Hun reilote chhungin ramsate chuan mihringte chu an hlau ta hial a ni. Mihringte chuan ramsate tanpuina chu mamawh tawh lovin an sal atan an chhawr mai ang tih an hlauthawng ta hle mai a.
.
Mihring ten an thawhrah seng zova,  an zavaia an hahchawlh a, an mutthilh vek laiin Ramsate chu a ruk thei ang berin rorel turin an  inko khawm ta chiam a. Mihring te nena thutiam an neih chu an lo bawhchhe ta a ni.
.
An  thutkhawmna hmunah chuan ramsa fing vervek tak mai Chinghnia chu a lo ding chhuak a, “Mihring te hi kan hmelma an ni.” tiin pawr tak mai hi an a rum ngal ngal a. “Khaw chhungah va lut ila Mihring zawng zawng i va that vek ang u.” a ti leh a. Keite pawhin Chinghnia chu thlawpin mihringte chu thah a duh ve bawk a. Mahse Savawm chuan ngaih dan dang a lo nei ta tlat mai. Savawm chuan mihring te chu that lovin tunge chak zawk tih hriat nan inbeihpui/ insual  tura cho a duh zawk a ni.
.
“A dik thei lo. Ni lo ve.” Tiin Sahram chu a lo ding chhuak ve thung a. “Thlasik lo thlen hun I nghak ang u. Thlasik a lo thlen hunah zan khaw vet tak a lo thleng anga,  mihring te chenna hmun chu kan tichhe vek ang a, mihring te chu vawt tia khawng vekin an thi mai dawn a ni.” a ti ve thung a.
.
Sihal putar sual leh chimawm, phakar tak mai chu lo ding chhuak ve in a rawn tawng chhuak thaw thaw a. “Mihringte lakah chuan thiantha tak angin kan awm der ang a, a ruk thei ang  berin zanah an zavaia an mutthilh vek laiin an thlai chin zawng zawng kan tichhia  anga, riltam taka an awm hnuah tamchhawl in an thi mai dawn alawm.” Tiin fing inti tak hian a meng kual rawlh rawlh mai a.
.
Sakawr chuan , “Mihring te leh Ramsa te hi engtiklai pawhin thiantha, unau  kan ni reng thin. Kan tina tur a ni lo. Ram theihmu kan seng hunah min tanpui  turin kan sawm anga, hmun hla takah hruaiin helai hmuna an lo haw thiam tawh loh kan i hruai bo zawk ang u.” a ti a.
.
An thusawi chu Ui chuan a pawm ve thei ta hauh lo mai. “Mihringte hian engtiklai pawhin min tanpui reng thin a. Kan indo anih vaih chuan Mihringte hnenah ka kal ngei dawn a ni.” a ti charh charh a.
.
An zavai mai chuan an ngaih dan sawiin an inhnial a, an thawm a ring ta khawp mai a. An inhnial thawm chu a rin tak em avangin thlarau zawng zawng chunga thuneitu beng a lo thleng ta hial a. Ramsate rorel thalo tak mai leh ruahmanna sual tak mai a lo hriat chuan thlarau zawng zawng chunga thuneitu rilru chu a na ta em em mai a.
Ramsa zawng zawng hriatturin he thu hi a sawi ta a ni. “A ruka rorel in mihringte nena inthian thatna thutiam chu in lo bawhchhe ta a nih hi le!    Hetiang thil in tih avang hian hrem in ni ang. Mihring te nen hian unau ang maiin in awm tawh ngai lovang a,  nang, Sahram_ Khawngaihna  nei lo taka ruahmanna I siam avang hian i vun te chu mihring ten intuam lum nana an hman theih nan an veh che anga, an that ang che. Khawngaihna nei lo tak chu tumahin an khawngaih bik lovang che. Nangni Sihal leh Chinghnia te kha, thal leh thang nangmahni awhna tur ngei chu mihringte hian an siam anga, mihringte thian inni tawh ngai dawn lo a ni. Keite pawh, mihring hmelma i ni kumkhua tawh ang a, mihring ten an veh che ang a an that ang che.” a ti a.
Thlarau zawng zawng chunga thuneitu chu hawi kualin  Sakawr chu a en a. “Sakawr hian mihringte nena inthian thatna vawnhim a duh vangin mihring te tawng a la hrethiam zel ang a, mahse mihring te angina a tawng ve thei tawh lovang. Ui pawh hi a ruka rorelnaah telin dan a bawhchhe ve tho a, mahse mihring te nena inthian thatna a vawnghim a ni. Hemi avang hian mihringte chenna in ah lawm hlawh takin a cheng thei ang a, an chenna in leh naupangte venghim thintu ah a tang thei bawk ang.” tiin Ramsa ho chu a kalsan ta a.
.
He thil thleng zawng zawng  avang hian mihringte leh ramsate hi tawng inang hmangin kan inbe thei ta lo a. Amaherawhchu, Sakawr leh Ui te hi chu tawng thei lo mah se mihring tawng an la hrethiam ta reng a ni.