VIDA - SheKnows 11-15

VIDA – SheKnows
(Vee-Da)
.
By. Thantei_LauraSean
.
CHAPTER - 11
.

"Tikhan engtin nge a awm?"
.
"Hmm_ Engtin maw?" ka tih chuan Dr.Andria chu a nui sak a.
"A na a zia tawh hle tihna anih kha. A hhnuhma a hil chak khawp mai_"
.
A tawng chu ka ngaithla zui meuh lo. Darthlalanga ka hmel lo lang chu ka en vang vang a. Engtin chiah nge ka hmel a danglam dawn ka hrethiam rih lo. Ka ngaihtuahna rang zeta vak kual zung zung vang chuan Dr. thusawi pawh chu ka lo ngaihven vak lo a ni.
.
"In lama inenkawl itan a nuam zawk dawn a, i thawmhnaw pack fel a ni tawh bawk a. Boni pawh a lo thleng tawh."
.
"A that chu."
"A tlem thei ang ber tawng rih la, na danglam deuh a awm chuan min lo hriattir vat dawn nia." a tih leh chuan ka bu nghat a. 15 minutes vel hnuah damdawiin kan chhuahsan ta.
.
Sloan Mansion kan pan nghal a, kan thlen chuan ka pindanah lutin pawn lam bathlarah ka kal tlang nghal a. Boruak reh raih leh muanawm ruih vang chuan mahni in thleng ta ang maiin ka inngai a, ka hahdam khawp mai. Boruak hipin thawk ka la vang vang a. Ka awmdan atthlak zia ka ngaihtuah chhuak thut. He in hi ka in a ni ngai lo va, a ni ngai pawhin ka ring hek lo. Mordecai Sloan thuneihna hnuaia awm ka ni_tunah ngat phei hi chuan ka duhthlanna ngeiin alakah leiba ka ngah ta hle zawk anih hi.. Pawi chai lo! He thil vang hian nun thar neiin ke ka pen thei zawk dawn_ka inhrilh nawn fo ang.
Jefferson leh Kiara hmel ka mitthla a lo lang vang chuan ka rum chhuak hak mai.
.
In chhungah lutin khumah ka mu zawi ta thlar a.
.
Hun a ral bek bek a, Andria mak tih khawpin ka hmai zaina hnuhma pawh a dam chak. Dam thuai thuai ka duh vangin titura min hrilh apiang a sawi angin ka zawm thlap thlap a, chu chuan min pui nasa khawp mai. Ka taksa mamawh tawk eitur tha ei leh awm hahdam, nisa hnuaia awm loh leh damdawi a hun taka ei. Ka rilru ang pu tan chuan thil zawm harsa a ni vak lem lo. He in lian zeta hnathawk thenkhatte nen pawh kan inbe ve ta zeuh zeuh a, ngainat bik erawh pahnih khat chiah ka nei thung. Mi dang daih nen inpawh taka awm mamawh ka inti hran lo va, chuti chung chuan ngainat loh theih loh an awm ve bawk a. He in a ka awm chhan leh Mordecai nen kan inlaichinna erawh tuman min zawt lo hulhual thung. In neitupa chungchang sawi takah chuan kan la inhmu leh ta miah lo. Engtin nge a khawsak ka ngaihven tehchiam lo bawk ani ber. Hmuh tura a awm lo hi ka lawm a ni zawk mah ang chu.
.
In hnuai lama thawm ri nak nak ka hriat chuan ka beng ka chhi hra a. 'Michhe sawi koh aiin a hnai' tih zawng zawng ka neih zo aniang, Mordecai_ Mr. Sloan tawngri ka hriat chu hmeichhe nui har har ri hian a zui zat a. Ka ner deuh sawk. Hmu tura chhuah ka tum eih lo. Eng nge a chhan ka hre biklo an thawm chu a ring hauh lo nain hre peih lovin ka beng ka hnawh hmak a. Tunhnaia ka ngaihthlak deuh chawt hla chu playin ka lu nghawr dut dut khawpa ringin ka ngaithla a.
.
Ka dara min sawi det dettu awm chu ka hre duh mai lo. Muhil der hi kaihthawh an har ber an tih thin kha maw!
Ka headphone arawn phawi a, ka mit ka men chuan Serafina ngaihtha lo hmel ka hmu hmasaber. Ka tho nghal thuai a. Ani chuan chik zet hian ka hmel min en reng thung.
.
"W.O.W.!"
"Eng nge?" ka ti ngawt a. Min en nasat zia chu pui tak a ni.
.
"I landan chu_"
"Eng nge ka landan chu? A thalo viau em?" ka tih chuan a nui hawk hawk a.
.
"Chutiang a ni lo. Tha lutuk. Tlemin i danglam deuh chauh anih kha_ Tlemte mahse dang hlak_"
"I sawi awmzia ka hrelo_"
.
"I hmel i inen khan i hrethiam ve mai ang chu. Inzai i paltlang tih ka hriatlawk vangin nangmah ini tih ka hre mai a, i thil paltlang hre lo tan chuan in anna nei tho siin nangmah ngei kha i ni tih an hre miah lovang."
.
"A tha lam anih chu." tiin ka thaw hak a. Vawitam chik lutuk in ka inen fo nain midang ka atanga hriat chuan ka inrintawkna a belhchhah sauh anih hi. "Lawmthu ka hrilh mai ang che." Sera mitmeng nung sara nui chu ka en a, a hma zawng aiin ani pawh a hrisel hmelin ka hria.
.
"Ka chunga thilthleng hi i awih lo zawk ang." min thuthnaih sauh sauhin ka kutah min vuan a, "Mr. Sloan hi mi ngilnei tak ani tih ka sawi ngam sak, i theih hmasak berah kan chenna hmun i lo tlawh ngei ka beisei. Kei ka hlim a, kan inhriat hmaa ka eizawnna aiin tuna ka eizawnna hi a tha zawk fe a, ka fa a hlim a, ka nu leh kei_ Kei phei chu hlim tak ka ni. Mr. Sloan hian amah ngeiin min lo tlawh fo bawk asin. Ka ngaihdan chuan in pahnih hian_Eng emaw_"
.
"Eng thil chiah nge sawi i tum?" ka lo pawtchat lo thei lo. Kei leh Mr. Sloan_ Eng emaw.. "Eng emaw chu eng thil nge?" ka nui lo thei lo.
.
"Hetiang taka min ngaihsak nachhan hi nangmah vang ni lo se eng thil nge ni chuang ang? Ka lo rindan chuan in pahnih hian_Erm_ In lo inhnaih anih ka ring a.."
"Ohh.. Serafina.. I thluak ah khan eng thil nge awm a?" za zet hian ka nui hak hak a. Hamhaih deuh tak hian a nui ve ta ngawt bawk a.
.
"Eng thil dang nge ni chuang ang?" a la ti cheu nia.. He nu tha tak hi a a ta anih ngei dawn hi.
.
"Okay_ I thluak kha lo chawl hahdam rawh se.  I beisei ang thil a thleng lo hi lawm tur nge lungngaih tur pawh ka hre lo. I laka a that chuan ka lawm khawp mai. Kan inhmu ngai miah lo a." ka tih chuan a meng phar awk a.
.
"Ka awih i ring lo ang chu tiraw?"
"Eng thil chu?
"Mr. Sloan nen in inhmu miah lo tih chu_"
"I awih ngei ang chu. Kan inhmu miah lo tak tak alawm."
.
"Hmm_ Ka lo hriat dan chuan.."
.
"Mr. Sloan chungchang chu duhtawk teh ang. I chhungkaw chanchin hriat ka duh." ka ti ta daih a. Ani chungchang sawi hian khawi chen mah min thlen lo ange.
.
"Mr. maw? Guzel, khatianga min koh kha duhtawk teh_"
Kawngkhar nghenga thatchhiat hmel zeta ding Mr. Sloan chu kan en rual thawt a. A thusawi awmzia chu ka hre hek lo.
.
"Guzel a?" ka tisap a.
.
"Ohh!! A lehpekah chuan ka bulah engmah zep tawh suh.." min vau titih hmelpu nui sang si hian Sera chuan a kut min hmuh va va mai. Chhan ngaihna hre lovin ka dar ka tiche ringawt.
"Ka chhuahsan phawt ang che u. In duhtawk hun in hman zawhah in hnuai lamah kan inhmu dawn nia." a ti leh zat zat a. Min ti hamhaih lehzual. Ka hau chungin a kal chhuak chu ka en tawp.
.
"I hmel hmuh a nuam ta hle mai." dam thlup hian Mr. Sloan chu ka bulah arawn thu a, amah chauh pawh a nilo, Serafina nen an nungchang hi ka hrethiam lo.
.
"Eng nge thil awmzia hi?"
.
"Eng nge?" min melh chhuk run chungin a nui suk.
.
"Serafina bulah khan engtin nge lem i chan a?" ka ti kha kha a, a hmel atanga ka thusawi a ngaih pawimawh loh zia lang chu a nuihzatthlak zawk! Atir atang khan kan inngaina lo va, tunah pawh keichuan ka ngaina chuang lo. Min tanpui vang erawh hi chuan misual tak anih ka ring lo deuh mai chauh a ni.. Ka ngaihtuah dan thawt thawt pawh hi a dik chiah em? Ka laka a duh a neih nan chuan engtin pawh a awm thei. Kei hi a laka leiba nei zawk ka ni tlat.
.
"Ka zawhna che chu theihnghilh rawh. Min tanpui vang hian lawmthu ka la hrilh miah lo che a. Ka lawm e." pangngai takin ka ti ve vei thlap a. Chutih chhung chuan min en ngur ngur. Ka rin loh deuh hian a thutna atang chuan a tho vut a. Khaw awmdan tur sawilawk theih loh ang chiah mizia hi engtin nge a neih theih zawk le?
.
"Andria hnen atangin i that chak thu ka lo hria a, ka lawmpui che. Bul tan i duh hunah min hriattir dawn nia." a ti chhum hmuk a.
"Aw le." ka ti tha ve hmiah. Engpawh ti dawn ila hrilhlawk tumna erawh ka nei miah lo. Ka pindan atang hian chhuak vat vat se ka duh. Ka rilruin sawitur ka dap nghal ruai ruai mai. "Serafina khan in hnuai lamah kan inhmu dawn nia a tia_" ngawi leh rihin ka en a. Keihi ka lai deuh emaw ni! Nuihzatthlak zawk hian a! "Ka kal dawn asin." ka ti leh a. Kei hian eng thil nge maw ka hriat le?
.
"Kal rawh." atih chuan engmah sawi lovin pindan atang chuan ka kal chhuak nghal hmiah. Ka hrethiam lo, engvangin nge kan awm dan hi a danglam deuh tlat le? Ka ngaihdan mai mai anih ka ring.. Ngaihtuah zui lovang.
.
In hnuai panin ka chhuk a, step-a ka kal thla chu ka dara min vuantu awm vang chuan ka ding deuh chawt a, tunge tih hriat tumin ka melh vat bawk a. Mr. Sloan bawk! Eng thil  nge maw a hriat le?
.
"Hahdam rawh." ka beng bulah rawn kun hniamin a tawng zawi khawp mai. Thui lo te kan chhuk leh hnua ka hawichhuah chuan in hnuai lama awmte chu ka hmu ta chauh. Ka awih thei lo! Eng thil nge an hriat a!!
.
"Kan lo lawm a che.." tiin an au rual ta lehnghal! Mangang ru zet hian Mr. Sloan chu ka en a, nui suk chung hian ka hmuiah min rawn fawp anih chu! Ka awih thei lo. Rei chu ani miah lo va, mahse ka taksa pumpui fanchhuak tur khawpa rei a ni thung! Eng thil rapthlak nge thleng ta hi? Ka chiai tih hrethiam niawm tak hian a ban pahnih chuan min kuah hlu hlu a, a chetdan vang chuan thawm an nei hak hak a.
.
"Duhtawk rih ru... Hetah hian kan awm vek a nia__" mipa tawngri chu ka hre ruai ruai chauh a ni.
.
"Eng thil  nge i tih hi?" ka ti sap a. Ka bangbo takzet. Ka beisei loh thil anih chu sawi loh, ka ngaihtuah chhin eih loh thil a ni. Kei leh Mr. Sloan_ Hetiang zawng hian maw ni dawn? Ka tan hian a awlsam dawn lo tawp mai.`
.
"Thil harsa a awm lo. I ba i rulh tanna tur anih hi." ti supin min kuahna a thlah zui a. Ka khur thei mai dawn. Hetiang zawnga rulh hi a ngai ang tih ka ngaihtuah phalo reng reng.
.
"Kan duhtawk thei tawh em?" lo ti chang faktu hmeichhia chu ka en zawk a, a meng thip ram ram khawp mai.
.
"Lo kal rawh le." an zavaia hriat turin Mr. Sloan chu a tawng a, a awri ah chuan ka la hriat ngai hauh loh min dimdawih awm em em ri a tel.
.
"Takzet hian!" ka ti sap a. Nui hmel pu lui chung siin amah chu ka melh pawk a. Midangin min hmuh loh ka beisei.
.
Ahnu zela thil thlen dan chu ka beisei loh ber thil a ni vek! Mr. Sloan chuan bialpa tha ber lem a chang char char a ni ber. Ka hawichhuah apiang a lungawi hmel taka Serafina min en dan chuan ka lung a tiawi ve hlawl lo.
.
"Guzel tan hian chawlh a hun tawhin ka hria. Kan sawmna ngai pawimawha in lo kal avangin kan lawm takzet zet e." ka darah a kut nghatin ka insangmar teuh chu tih ziaawm tum niawm fahran hian min chul hauh hauh a. He thil hi ka duh lo!
.
Mi sawm vel zet tur zinga ka hmelhriat sa awmchhun chu Serafina chauh a ni. An hming pawh ka chhinchhiah vek seng rih hek lo. Hetiang thiltih tum chuan min hrilhlawk ve awm tak hi a nia. Mr. Sloan thusawi chu hriain rei vaklo hnuah min hawsan ta hlawm a. An chhuak zo fel nia ka hriat  hnuah ka pindan panin ka chho nghal hmiah. Dik taka sawi chuan ka chiai tih piahlam a ni.
.
"Kha hmeichhia kha maw? Mord, ka ngaidam thei lo che."
.
"I ngaihdanah ka buai lo tih ka sawinawn leh ang."
.
Ka ding chawt lo thei lo. Ka hawilet a, hmeichhe pakhat leh Mr.Sloan inhmachhawn ka hmuh chuan ka ip deuh chawih a. Eng thu pawh sawi se ngaihthlak zawm ka mamawh na chhan tur ka hre lo. Ka kal zui hmiah a, ka pindanah lutin chhung lamah kawngka ka kalh nghal hmak a.
.
Mordecai Sloan hian engtin chiah nge min hman tangkai dawn le? Hnial thei ka ni lo tih lah ka chiang nasa mai si.
Khumah thuin thawk ka la a, 'Ka chiai lovang' tiin ka phun mawlh mawlh a.
.
Pindan kawngka arawn inkik chuan ka phu deuh zawk. Hawnsak tumna ka nei miah lo.
.
"Lo hawng rawh. Kan inbiak a tul." a dawhthei lo ti hriat zet hian kawngka chu a chum zui a. Ahmaa dam thlup anga a lang thei kha thilmak a ni thilmak! Ka bihruk reng theih dawn chuan loh vangin muangchang hian kawngka chu ka pan ta nge nge a.
.
"Ngaithla teh." ka hmel min hmuh rualin a ti chang nghal bawng mai. Ka chhang buai peih lo.
.
"Tun atang chuan ka ngaihzawng i ni. Tihsual i neih chuan i chan a chau viau ang tih hre bawk ang che." a duh a sawi zova pindan ah pawh lo lut lovin a kalsawn nghal hmak a. Zanin thil thleng zawng zawng hian min thawng dawt dawt a ni ber. Sawi dan tur dang ka hre lo.
.
Kei hi engtin nge ka awm ang tih a ngaihtuah lo tih a chiang reng. Ka tana nun ka hman theih nan hun min pek a tum eih lo. Na zawng zawng tuarchhuak a hmel thar ka neih chhan hi engtin nge ni ve dawn? Tihsual ka neih chuan ka chan a chau ang maw? Ni e, alakah leiba chu ka nei ngei a, chumi vang ringawt chuan a duh dan danin min thunun ang maw?
.
Bathroom -ah lutin darthlalang hmaah ka ding a, ka hmaia zaina hnuhma awm tawh miah lo leh vun nun hmel sar chu enin ka tihtur hmasaber chiang takin ka hria.
Zantin ka mut hmaa ka tih ziah angin uluk tak hian ka hmai chu damdawi ka hnawih hliau hliau a, naktuk atang hian ka nun thar chu a intan tak tak tawh ang.
.
.
Ka alarm ri-ah harhin thatho fe hian ka tho nghal at a. Ka taksa ka la sawizawi theih loh vangin ka inbual zawh hnuah choka ka pan a. A la hma deuh bawka thawm hriattur a awm lo. Phur fe hian ka eitur ka siam nghal mial mial a.
.
Mordecai Sloan thusawi vang khan ka thiltum hi a thuanawp ka phal dawn lo.
.
Tukthuan ka ei zawh hnuah ka pindanah lut lehin hun rei tak chhung ka tih tawh loh tih tumin ka inthlak a. Ka insiam zawh meuh chuan dar 10 a pel der tawh. In hnuaiah chhukin Boni ka ko a, ani hi ka mamawh hun chhung chu ka tan a awm reng dawn a ni.
.
"Yonataz Salon-ah kal ang aw." ka ti zang vah a. Hmel danglam pu miah lovin Boni chuan kawngkhar min hawnsak a, kan tlanchhuak nghal a.
.
Darkar 4 zet a ral hnu chuan ka sam rawng thar chu duh zetin ka khawih a. Nalh ka ti tih ka thup hauh lo. Ka lungawi khawp mai.
.
"Noreen, i thiltih hi han en teh. Hetiang khawpa fuh hi ila hmu miah lo tih ka sawi chiang ngam sak."
Ka bula hmeichhe pahnih phur zette chu enin ka nui a. Yonataz hi ka tan hmun pawimawh tak ani zui ngei dawn tih ka hrechiang.
.
Boni hriattura ka duh lem loh thil tihzui ka tum vangin haw turin ka hrilh a, Salon atang chuan ka kal chhuak nghal a. Boni chu a ngawi reng nain min hawsan a tum lo chiang khawp tih a chetzui dan atang chuan ka hrethiam. Ngai pawimawh duh lovin ka kalsawn a, taxi lo kal remchang chu pharin ka chuang zui hmiah a. Ka inngaihbel nge min hmu apiang chuan min enzui zel ni maiin ka hria. Pawi ka ti hran lo.
.
Lunch ei a hun tawh vangin ahma atanga ka ngainat em em hmun pan turin taxi driver chu ka hrilh a, ka eitur ngainat ber ei bakah beisei dang ka nei chiang khawp.
.
Ka tumna hmun kan thleng a, dawr chhungah lutin ka lo hriat than em em rimnam chuk chuk chu ka hip vang  vang a. Theihnghilh ka duh em em, ka dam chhunga ka theihnghilh ngai tawh loh tur thil tam tak ka mitthla ah a lang nghal zut zut a. Helai hmun ka kal apianga ka thut ziahna hmun lam chu ka pan a, vanneihthlak takin a lo awl hlauh bawk.
.
Dawr kawngkaa Boni lo penlut ka hmuh chuan ka phun hlak a. Min rawn hmufuh rang khawp mai. Ka hui zeuh a, ka bul arawn thlen chuan ka thutna ep chiaha thu turin ka hrilh a. Thut tum hmel a pu lo. A tihchi miah loh. Helai hmunah hian bodyguard hruai anga lan ka duh reng reng lo.
.
"Khawngaihin thu rawh." ka hmel min en a, min hnial chi niin a hrelo a ni ngei ang, muangchang leh huphurh hmel zet hian a thu ta nge nge a.
.
Ka lamah arawn awn hnai deuh a, "Miss, khawngaihin fimkhur ang che." a ti sur sur a. Zawhna zawt mitmengin ka melh let thung. Rang zet hian a dinglam a melh zeuh a, a melhna lam ka en chuan ka beisei loh ber thil ka hmu ta. Jefferson! Helai hmun hi a ngaina ngai reng reng lo anih kha. Min kalpui tur pawhin ka sawmlui ngawng ngawng thin.
.
A dawhkana eitur awm chu ngawirengin a ei a, Boni aw thian kharh ri ka hriat chuan tullo zetin ka lo en reng tih ka inhre chiah. Ka hawisawn nghal thuai a.
.
"Eng nge kan ei ang?" engmah thleng lo leh Jefferson chu engahmah  ngai lo anga lan ka tumruh viau nain ka hlawhchham titih der.
.
"Min lo nghak rei tawh em?" tih ri ka hriat chuan ka hawilet zawk a. Mr.Sloan!! Ka chhan hmain ka bul chiaha chair-ah chuan arawn thu nghal a. Nizana ka hmuh hnuhnun ber dan nen khaikhin chuan mi dang hlak ang mai a ni leh tawh.
.
"Eng nge irawn tih dawn?" ka tihniam chal a. Min chhang lovin hriatthiam har zet hian min en run run a. A lak atang hian thil tha nge thil thalo lam ka beisei dawn ka hrethiam lo hulhual. Zam duh lovin ka en let ve ngar a.
VIDA – SheKnows
(Vee-Da)
.
By. Thantei_LauraSean
.
CHAPTER - 12
.
"Engvanga lo kal nge ka nih i rin?" ka mitah min enin ka kut chu nghet fe hian a hmer a. A tum reng vanga min hmerna lui a ni tih ka hria. Na deuh mah se engahmah ngai lo angin ka awm a, ka kut lehlam erawh a tang ru khawp.
.
"Eng thil nge tia i inhriat?" tlema thu awn deuhin ka tawng ka sehchilh rap rap a, ka awmdan chuan a ti danglam pha eih lo. Hahdam hmel zet hian a thutna chair chu a ngheng ur ur a, mit tizim deuh hian min la en ta reng a. Engtiang chiaha awm nge a tum reng reng? Ka bulah engmah a sawi lo va, awmdan tur leh thiltih dan tur engmah a sawi loh vang chauh pawh hian ka tan chuan awm ngaihna a awm meuh lo chu a nih hi. Bakah, rilrua ruahmanna ka neih leh awm tura min duh dan hi a inmil thei kher lovang. Awmze nei deuha kan sawi dun a tul anih hi.
.
Kan eitur chah a lo thlen hnu pawh chuan ka kut a vawnna chu a la thlah duh ta lo cheu a. Kan vela awmte mit kan la tan tih ka hria. Kei ni lovin amah zawk hi miten min ngaihven nachhan a ni bawk. A kalna hmun apiangah a chanchin leh thiltih hriat chaka umzuitu a nei reng a, tuna kan awm dan hi lo hmuin chanchinbuah mipui hmuh theihin chhuak ta se! Ka thiltum ah ka hlawhchhamna kalkawng a intan tihna a ni ang. Chu chu thlentir ka phal dawn lo.
Ka kut a vawn lam chu la kangin ka hmai bulah ka lek chho a, ka seh dawn emaw tiin min thlah ta vat a. A phun zui hluk bawk. Rang zet hian ka fork ka ban vat a, min rawn  vawn tum awmin a awm ta bik lo. Ngawi rengin kan eitur theuh kan ei ta mial mial a. Boni pawh ka tihluih vangin kan bulah a ei ve bawk.
.
"Mr. Sloan, i dam tha  maw?"
Ka thutna SIR veilama mipa tawng ka hriat chuan ka tang ru nghal at mai. Jefferson a ni. Mr. Sloan nen hian an inhmelhriat tih ka hre hauh lo va, hetiang hmuna Jeff zawkin arawn pan mai dan atang hian inhre tha tak annih ngei ka ring bawk. Eng thil pawh thleng se hmachhawn thei turin ka lo inbuatsaih rilru nghal a.
.
Mordecai chu muangchang hian a hawi chhuak a, a thil eilai tihbuai a ni chu a lawm vak lo anih hmel. Thle nghut hian "Tha alawm." a ti sup a. A hmelhriat laka a induhtawk lutuk chu Jefferson ka tan vang ni hauh lovin ka lo ngei hman. Jefferson chu ka en a, a awm dan atang chuan min ngaihven tih ka hre thei nghal mai. Hetiang khawpa chiang hian a rilru le lo zet hi a tilang thin tih tunhma khan ka lo hrethiam ngai lo. Ka hmangaihna vang khan ka lo hmuh hmaih a ni ngei ang. Ka rilrua ka huatna letling chiahin Jeff chu ka nuih sak a.
.
"Kan inhmu tawh thin em?" a ti nghal chat mai. A mitmeng atang chuan min la hre ngai lo tih a lan rualin min ngaihven tih pawh a chiang.
.
"La inhmu ngai lo anih ka ring. A ni em Mordecai?" tih pahin Mr. Sloan chu titak hmelpu zet hian ka en a, a lo nui suk. A nuih chhan chu amah chauhin a hria ang.
.
"Oh! Kan la inhmuh fo ka beisei." dang ro hmel zet hian Jefferson chu a nui hul hak a. Lai laklawh deuh taka kal sawnin ala rawn hawilet tak tawk tawk a.
.
"Kan mi tenawm pa zet chu leh!" Mr. Sloan phun hluk chu ka en tawp. Engmah sawi lovin ka thlenga eitur la awm chu ka ei zui mial mial a. Ka rilru erawh chuan Jefferson kha a umzui nghal ani ber. Kha mihring kha nuam takin a khawsa rei tawh lovang. A thil neih engkim saw a mal te tein ka la chhuhsak vek dawn. Ka hmaah thingthiin ngaihdam min dil pawh nise alakah sawn khawngaihna samzai tiat pawh ka lantir lo hulhual ang.
.
"I tha em?"
Ka hawichhuak a Mr. Sloan chuan chik zet hian min lo en leh reng tawh. Ka tha tih lantir nan ka bu nghat a. Ka tha tawklo tih a hrethiam tho chuan ka ring.
"I eitur kha i zai sawm vek hmain kalsan ila a that ka ring."
.
"A hriat a nuam hle mai." ti hlakin chemte leh fork ka dah thla a. Dawhkana ka kut ka nghah rualin min rawn vuan vat a. Ka khur dar dar tih ka inhre chiah. Min ngaihsak tak tak niawm fahran hian ka kut chu a tuai hauh hauh a.
.
"Hahdam rawh." a tih chuan ka en a, a mitmenga ka hmuh chu min ngaihsak tak takna a ni. Ka thil hmuh chu ring ngam lovin ka mit ka khap a, ka en leh chuan a lo danglam leh daih tawh. Ka hmusual a ni ngei ang.
.
"Boni i haw thei ang." a tih chuan Boni chu tho vatin a kalsawn nghal a.
.
"Sawi duh i nei em?" ka kut a vawnna chu thlah tum hmel a pu lo. Hetianga ka laka that a chhuah hian ka awm a nuam lo zawk niin ka inhria. Mahse sawi duh ka nei. Chiang leh felfai takin engkim kan sawi ahun tawh takzet.
.
"Khawiah emaw kal ila a that ka ring." ka ti sap a.
.
.
Restaurant atangin kan chhuak a, 20 minutes vel chhim lam pana kan tlan hnu chuan car chu a tiding a.
.
"Eng thil chiah nge itan hian ka tih dawn?" ka rilrua lo lang hmasaber ka sawi nghal pawp. Min chhan hun pawh ka nghak chuang lo, ka duh ka sawi zo vek phawt ang. "I ngaihzawng anga ka lang a nih chuan Jefferson saw ka hnaih thei dawn lo, chuvangin i ngaihzawng anga min lantir tum tawh suh. A der pawhin ka ngaithei lo tih hria ang che."
.
"Thuneitu zawk i theihnghilh anih hmel." a ti bung nghut a. Ka rinlawk ang chiah! Kan pahnih chauha kan awm chuan kan inkarah hian thu tha a awm thei lo reng reng.
.
"Theihnghilh hauh lo mai. I lakah leiba tam tak ka nei tih hi min hrilhnawn ngai lovin engtiklai pawhin ka hria. Chuti chung chuan thil pakhat ngen che ka duh__"
.
"Jefferson kha hnaih i tum anih chuan ka dang dawn che tih inhrelawk la_" a tawng zawi lutuk chu a hlauhawm zawk.
.
"Chu thil kher chu i inrawlh lohna tur thil a ni. Atir atangin eng thil nge ka duh ber i hria alawm."
.
"Ka hriatchian vanga sawi ka ni. Min en teh_" a tih chuan a tawng chu hrelo ang hmakin hmalam ka en a, mahse he mihring Mordecai Sloan hi runluih chi a ni lo tih ka la hre dawn chauh a nih hi. Hneh zet hian ka dar tawn tawnah min vuanin amah hmachhawn zawngin min kuai her a, a mitmeng lang thim deuh raih atang chuan a ngaihtuahna a hriat theih loh.
.
"Tawi fel takin ka han sawi ange. Jefferson DeLourde hi nangin i beih angai lo, ka kutah dah rawh. I tihtur zawng chu ka ngaihzawng lema chan chauh a ni. I hrethiam em?" thupe thang tih hriat lutuk, a aw zawi leh khauh deuh far chu zawm ka tum chhin eih lo.
.
"Ka phuba chu keima'n ka la ang."
.
"Duhtawk teh. Mipa i ni lo tih hi tuemaw talin an hrilh tawh che em?" ngaihdan nih loh hmel fe hian a lu a thing a, min vawnna chu a thlah ta bawk.
.
"Ka duh tithei turin mipa ka nih kher a ngai tih tumahin min la hrilh ngai lo. Hmeichhia ka nih vanga ka tihtheih loh tur a awm pawh ka hre hek lo."
.
"Takzet? I lo tih tawh chinah khan khawi chen nge i kal tawh le?" a ti ta khauh mai. Takzet zawk hian a!
.
"Tihsual nei miah lo mihring an awm i hre tawh ngai em? Vawikhat tihsual kha a tawk tih ka hria. Tun tumah chuan tihsual leh ka tum tawh lo."
.
"Come on! Guzel!"
.
"Ka sawi chiang tawkin ka hria." ka ti hmak a. A hmel atang chuan min pawmpui lem lo tih a lang reng nain a rilru hneh tuma a hranpaa hnial ka tum tawh lo.
.
"A tha e. Eng buaina ah mah i inhnuk lut tur a ni lo."
.
"I sawi tum chu ka hria." ka sawi ang chiah hian ruahmanna fel tak ka nei fel vek tawh. Chumi ti thei tur chuan Mordecai Sloan hi mamawh miah loh ka tum ruh hle nain ka mamawh miah lovang tih erawh sawi huai viau theih lohna chin ka nei thung.
.
"Ngaithla teh. I tum dan chu engpawh nise i duh emaw duh lo emaw ka ngaihzawng anga i awm a ngai tho tho tih hria ang che." tawngkam pangngai hian engmah a sawi ve thei lo anih hi. Thupe aw lo hian a sawi ve theih reng.
.
"Duh lo ta ila?"
.
"I duh lo anih chuan Jefferson hian tunge inih a hre nghal ang!"
.
"I ti lovang." ka ti halh a. A mitmeng atang chuan a ti duh ngei ang tih a langchiang lutuk mah mah a ni. "Khawngaihin?" ka ti ta ngawt a.
.
"Khawngaih in dil khan awmzia a nei lo. Guzel. Ka sawi chu thu tawp a ni."
.
"Ka chungah hetiang thil iti hi ka awih thei lo. Mi tha tak chu i nih bik loh tawp hi." ka ti bal bal a. A ban dinglam car steering wheel ah nghatin min en a, a hmui a tisawi zeuh a. Hnial thei dinhmunah ka awm lo tih hrechiang  bertu chu keimah tho hi ka ni. Ka duh ka tihtheih nan a duh anga ka awm a tulna chin a tam zawk. Tihngaihna hrelo zetin ka thaw halh a.
.
"I ngaihzawng ka ni dawn anih pawhin  Jefferson leh a bula awm thin ten hrelo se ka duh. Khawngaihin Mr. Sloan_"
.
"Ka hmingin min ko thei ang. Bialnu tha tak nih ngei tum ang che." pawnlam a hawi zawk a, thu rem lehin a hmel  hmuh theiha a awm leh chuan a thutak tih piah lam a ni leh tawh. Car a tinung a, kan tlan chhuak nghal a. Khawi lam nge kan pan dawn ka hre lo.
.
Thui vak lo kan tlan hnu chuan dingin car atang chuan a chhuk a, ka hawichhuak a khawilaiah nge kan awm ka hre chiah.
.
"Hetah hian eng nge kan tih dawn?"
.
"Hetiang hmunah hian eng nge an tih thin?" min en chuang lovin ka thutna lam kawngkhar min hawnsak a. Chhuk mai turah min ngai a niang chu.
.
He mihring bulah hian ka nungchang ka hloh vek ngei ngei ang. Eng pawh sawi ila tawngkam pangngaiin min chhang ngai lo hrim hrim. Tha takin sawi se tha takin ti tura min duh thil ka ti maiin ka ring. Hmeichhe khirh tak ka ni hran lo va, mahse he mihring bulah hian a harsa zawnga awm a awlsam zawk.
.
"Kawngka hi khar rawh. I bulah ka kal tawh dawn lo." min en miah lo chungin thip zet hian ka melh a.
.
"Hun ka ngah lo hle a nia."
"Hun i ngah lo a nih phei chuan kawngka hi khar rawh."
"Hmeichhe tihhar deuh buaipui chi ka ni lo a nia." a dawhtheihna a pan tan tih ka hria, mahse a nungchang vang  hrim hrim hian tlawm ka tum lo. A duh dan dana a koh phar tur ka ni lo va, a thuhnuaia kun ngar  ngar tur pawh kan ni hek lo. A tawng chu chhang lovin ka ngawi a, engtin nge ka tih ang tih ka ngaihtuah.
.
"Ka pawm chhuah kher che phut suh."
"Movie anih loh hi." ka ti nghat a.
.
"A tha e." a ti nghut a, chutih rual chuan kei pawhin eng nge ka tih dawn ka hria. Ka theih tawka rangin driver seat lamah ka bawk phei rawp a, ka thiltih tum a hriatthiam chuan rang lutuk hian driver seat lama lo luh tumin car hmalamah a pen pawk pawk a. Ka theih tawpin ka che rang ve bawk. Min rawn khawih hman hmaa thu remin car chu ka tinung a.
.
"Ti suh!" a ti hrawk a, a bak chu eng thu nge a sawi ka hre phak tawh lo. Tlema tlan muang deuhin car kawngkhar ah chuan ka dak chhuak a, ka kut zunglai ka hmuh zauh a. A lungawi lo hmel ka hmuh chuan ka nui var var mai. Thui deuh tak ka tlan hnu chuan mansion lam panin car chu ka khalh a. Ka nui zo chiah nain a let leh tur tuar erawh ka chak em em hran lo.
.
In kawtah motor ka dah tawp a, in chhungah ka lut tlang nghal a. Ka pindan ah lutin ka thawmhnaw ka phelh a, bathroom-ah ka lut a. Tui vawt zeta ka inphuh chuan ka harh sawng sawngin ka hria. Rei deuh hnuah bathroom atang chuan ka chhuak ta chauh a.
.
Ka rilru nuam chiah lo chu eng vang nge ka hre lo. Mr. Sloan thawm ka ngaichang deuh reng a, thil awm lo nghah ang mai a reh vung vung lawi a. Kawngka kik ri ka hriat chuan ka zung tho zawk mai. Tim ru zet hian kawngka panin ka hawng dek dek a, ka rin loh deuha in enkawltu Claire ka hmuh chuan ka thaw hawk.
.
"Eng nge ni ta?" ka ti thuai a.
.
"Heihi Mr. Sloan thupek angin i pindan a dah tur a nia." tiin a nui sek a. Box lian deuh tak chu lain kawngka ka khar a, khumah dahin ka hawng nghal a.
Bawm chhunga silk puan nem thlep chu khawih in, hetiang thil hi engvanga ka ta tura rawn thawn nge anih ka ngaihtuah lo thei lo. Silk puan chu phawrh in ka pharh a. Kawr ka hmuh tawhah chuan hak ala chakawm ber hial ang. Chhuata lehkha them rangkachak rawng tla chu chharin kut ziak mawi zet chu ka en ta reng a. Vawitam ka chhiar nawn hnuah pawh thuziak chu a danglam chuang lo.
.
*Dar 7-ah lo inpeih ang che.
 M.S*
.
Ka hnial ngam tawh hauh lovang. Thu  tam tak a sawi aiin tawngkam tawite hi hnial dan tur a vang zawk. Box te deuh la awm chu ka hawng leh a, hei chu phone a ni ve thung. Pheikhawk nalh zet leh thi chu ka la chhuak a, a man tam tur zia ka chhut duh lo. Bawm chu khum sirah ka dah thla a.
.
Sana ka en chuan dar 6:10 chiah a ni. Dar 7 a inpeih hman tur ka nih chuan muangchan a hun tawh lo. Kawr chu uluk takin ka ha a, ka size a hredik chat chu mak ka ti takzet. Kawr nghawng chu a zau deuh nain thi ka awrh hnu chuan ka awm nuam lo pawh a zia deuh. Ka hmai uluk takin ka chei a, tunhma ang kha chu ni se makeup ka inbel tam hauh lovang. Tunah erawh mi thar, mi dang hlak ka ni tawh.
Ka lungawina zana ka inchei hnu chuan darthlalang hmaah dingin ka sam a dik leh dik loh ka ennawn thuak thuak a. Ka pindan kawngka kik ri ka hriat chuan thawk lain hahdam tak hian kawngka lam ka pan a.
.
"Guzel_" chik zet hian min en a, a hmel atang chuan lungawi lo hmel a lang hran lo. Ka landan ah a lungawi tawk aniang chu.
.
"Kha hming kha ka duh lo a nia. Esma Celik! Ka hming chu Esma Celik." ka tawng a hrechiang lovang tih hlauin a mitah ka en a, engmah danglam a awm lo.
.
"I landan pawh a chhiat hran loh hi." a ti sup a. Ka awm tihnawm loh a tum hrim hrim vanga sawiah ka ngaihsak mai ang.
.
"Ka lawm e." ka tiel salh a. A hmela engmah hriat theih loh hian a ban chu ka vawn turin a siamrem a, ngawi rengin ka vuan ve mai bawk. In hnuai lam panin muangchang hian min kalpui a, keichuan sawi tur ka hre lo.
.
"I talbuai loh nan thil thenkhat ka hrilhlawk ang che. Zanin hian ka nuna hmeichhe pawimawh tak kan hmu dawn a, rinhlelh awmin i awm tur a ni lo. Min hmangaih tak angin awm ang che."
.
"Engtin nge__"
"Ka sawi chu i hrethiam tih ka hria. Hmeichhiain mipa hmangaih taka a en angin min en tur a ni. Ka duh loh tawp thil ka tih a tul loh nan_" ka hnial dawn em tih ngaichang in min melh chhuk run a. A thusawi chu a thutak hle tih ka hrethiam. A tana hmeichhe pawimawh tak mit hmuhah amah hmangaih tak anga ka lan a tul_ Tha taka ka tihsak chuan ka tan pawh a tha zawk ngei ang.
.
Ka bu zauh a, a mitah enin, "Ka theihtawp ka chhuah ang." ka ti sap a. A vawikhat nan Mr. Sloan tana theihtawp chhuah ka tum hmasak berna a ni. Atana hmeichhe pawimawh ber chu a ngaihzawng hlui a ni emaw a nu a ni emaw, tupawh ni se atan hian vawikhat na na na chu theihtawp ka chhuah ngei ang chu.
.
VIDA – SheKnows
(Vee-Da)
.
By. Thantei_LauraSean
.
CHAPTER - 13
.
"WOW! A hmun chu a va'n mawi em em.." ka ti chhuak hliai a. Ka mita ka hmuh ve tawh chinah chuan a mawi ka tih ber pawl a ni tak tak. Ka hriat theih tirh atangin mi hausa te chenna hmun leh an khawsak dan engkim ka hmu tam hle a, kei ngei pawh hi an zinga chhiartel theih ka ni. Chuti chung chuan tuna kan kalna hmun anga mawi hi ka la hmuh awm ka hrelo. Mr. Sloan chu a ngawi reng a, in kan chhuahsan dawna thil pawimawh min hrilh bak kha a tawng leh ta lo hrim hrim. A lungawi nge lungawi lo tih hriat theih turin a hmel atangin engmah a lang hek lo. Ka melh zeuh pawh chuan a awm dan danglam miah lo hian car atangin a chhuk a. Tun tum chu aman a khalh lo ve teh tlat bawk.
.
Ka thutna lam kawngkhar min hawnsak a, ka vawn turin a kut arawn phar chhuak bawk a. A kutah vuanin car atang chuan ka chhuak a, amah en lovin lawmthu ka hrilh sap a. In mawi leh dangdai zet atang chuan ka mit ka lasawn hleithei lo. Hetiang khawpa mawia chhuah tur hian tha leh sum an seng nasa khawp ang le.
.
"Helai hmun hi i hriatna a rei tawh em?" ka melh chhoh chuan min lo en sa reng vangin ka nuih sak a. Ka nui tih min hmuh chuan min melh rum zual sauh zawkin ka hria.
.
"I thiltih turah i ngaihtuahna hmang zawk rawh." a ti nghut a, a hawisawn nghal hmak bawk. Min chhang bung lutuk chu ka ngei tawk a tling. A lakah that chhuah ka tum a, tawngkam thaa biak ngai tilo tu hi amah en chungin ka nui hial tawh zawk a nia. Ka mizia ka sim theih miah loh a lo langchhuak ve hmiah. Chek tlak hian ka melh a, a ban ka vawnna chu ka thlah nghal a. Hriat theih loh hian a phun hluk thung. A hmaah kalin kan luhna tur nia ka rin kawngkhar lam chu ka pan a.
.
Ka kutah nghet zeta arawn vawn chuan duh lovin ka kut chu laksawn tumin ka bei a, a hmer nghet telh telh.
"Ah!"
.
Ka banrekah vuan lehin ka kut chu ka hnunglamah a la a, ka hnungah nghet mah mah hian a dawm bet a. Min kuahbet a ni ta ber. Muangchang hian arawn kun hniam a, ka chal si deuh thawa a awm hnu chuan ka mitah min en a. A chetdan chu ka beisei lawk loh vangin ka en let tawp. Ka thaw dep dep a. Dik taka sawi chuan min hip vang pawh  ni lovin taksa inhnaih lutuk a awm hian ka awm a tinuam lo.
.
"Naupangchhia takin awm suh. Thil tak tak titur i ni tih inhrereng rawh." a tawng zawnga a taksa che deuh chu ka feel vek thei. Keimah ang bawkin a inthlahdul bik lo tih pawh ka hre thei bawk. Ka chhipah a khabe a nghat a, inthlahdul tum niawm tak hian thawk a la raih raih a. Tlema inlahrang deuh hlekin ka rin loh lutuk hian ka chalah min fawp vang vang a, ka rilru a inlakhran ka duh tehreng nen a chet nachang ka hre miah lo. Ka che thei lo ani zawk mah. Ka banrek chu ka hnunglamah  nghet taka vawnbeh a la ni tlat a.
.
"Eng thil nge i tih hi?" ka aw tehhrep chu! A hriat phak pawh ka ring lo.
.
"Shh" a ti ringawt a, min chelhbehna chu thlahin hneh zet hian ka kawngah min kuah a. Engmah sawi lo hian ka hmai zawnah arawn kun hniam leh a. Ka ngaih tihthat nan ti niawm tak hian za lo zetin a nui zui suk a, a awmdan chu ka hrethiam phalo hulhual. Meng kal ralhin ka ding ngil a, hmalam ka en rualin kan piah hlam hnih vela hla kawngkhar bula hmeichhe ding chu ka hmu ve chiah. Mordecai chuan a kutin ka biang arawn nul leh zeuh a, inringtawk fe hian hmalam a hawi ve ta chauh a. Hmeichhia chu va ngaihven awm pawhin a awm lo. A hmuh leh ngaihven zawng chu keimah chauh ni ang chiah hian a awm zui hmiah hmiah.
.
Hmeichhe lo awm chu kan hnaih zel a, a hmel ka hmuh chian theih hnu chuan nichin lawka Mordecai chetdan zawng zawng khan chhan a nei ang tih ka ring thiam ta chiah! Ka nuih a za miah lo_a za lo takzet. Min ngaihsak tak tak vanga khatianga awm kha nise ka ti pawh a ni chuang lo. He hmeichhia runluih a duh vanga ti ani tih ka hriatthiamna hian danglamna min neihtir tlat.
.
"I lo kal thei chu a ropui hle mai." rem vaklo chung hian chu hmeichhia chuan Mordecai chu arawn kuah a, ani lahin min thlah a tum der lo. Ka lai ta zawk mah. Pangngai taka lang turin ka nui lui sang a.
.
"Guzel, ani hi Violet." ka hmaa hmeichhe hmeltha zet a mitmenga a rilru a na hle tih  lang reng chu ka en a, harsa ti zeta nui chungin min en a, Mordecai chu a en leh a.
.
"Engtin nge ka koh ve dawn?" tap tur insum hmel a pu niin ka hmu hial nia.
.
"Oh! Esma, Esma Celik." a thusawi ngaihven lo tih hriat reng hian ka bekah min fawp zauh a, Violet chu en lovin keimah min en a. Kan bula hmeichhe awm tan min biak zui vak ngaihna a awm ta lo.
.
"Hun nuam tak in hmang dawn nia." ti sapin Violet chu a kalsawn a. Amah ngaihsak zui miah lo hian kan awmna lam pana lo kal mipa pahnihte chu Mordecai chuan nui chungin a chibai a, a nui hmel hmuh tur a awm zin lem loh vang nge ka hrelo, hmuhnawm ti zet hian a hmel chu nui sang chungin ka en reng a.
.
"Helai sava pahnihte hi pindan kan pe mai dawn em ni?" mipa sam buang zawk chu a nui huah huah a, a nui reng chung chuan chik zet hian min en reng thung.
.
"Joel.." Mordecai chuan ka darah min kuah a, a thianpa chu a melh rulh a.
.
"Ka hria. Engtiklai atang khan nge i bula hmeichhiate i lo ven tak em em? Violet nen in inhmu tawh em? Oh..sorry.. Ka sawi hun a fuh lo.." Joel tia a koh chuan min melh zuk a, Mordecai darah vuanin ka hriat tham loh hian a beng bulah a phun zui sup a. A nungchang hi ka ngainat zawng a ni lo.
.
"Duhtawk teh u. Joel hmeichhe hruai lova ilo kal chu mak ka ti hle mai." Mordecai chu a thutak phian a, Joel chu a awm a nuam ta lo tih hriat hian a tukkhum thak lo pui a hiat ta nuah nuah a. A point ah a khawih fuh anih ngei hmel.
.
Kan kalsawn hnu chuan ka thaw deuh huai. Ka tan nungchang lem taka awm thin hote hi mikhual anni hran lo va, an khawsa zia leh nunphungte hi a der mai anni deuh vek tih lah ka hrechiang em em.
.
"In tur i duh em?" Mordecai chu ka en a, ka chhang mai lo. "I duh em?" a ti leh a.
.
"Hetah hian kan awm rei dawn em?" ka tih chuan min en tawp.
.
"In tur i duh leh duh loh ka zawt che anih chu." tawng rin hlau deuh tak hian ka bengbulah arawn kun hniam a.
.
"Alcohol ka in thei lo tih i hriat kha." tilui takmeuh hian ka nuih lui a, ani chu nuihza tak tak tih hriat hian a nui suk thung a.
.
"In tur ka va lak ang che. Lo kalsawn lo la."
"I thu ang zelin le!" ka tizui hram. Kan la awm rei lo nain ka ning tan der. Boruak lah chu a la sang dawn chauh anih hmel lehnghal. Hetiang  boruak lian thamah hian ka kal lohna chin a lo rei ta tih ka ngaihtuah chhuah chuan tunge ka nih tih ka inhrechhuak thar leh a.
.
"Kha le. I duh ber chi anih ka beisei."
Mordecai kut atanga Juice chu lain lawmthu ka hrilh sap a, ka in nghal a.
.
"Eng nge a an?"
"A tui khawp mai." min ngaihsak riau hian ka nuih a tiza deuh tlat anih chu. Hmun danga ka laka a nungchang nen khaikhin phei chuan mi dang hlak ang a ni. "Mipa caring tak inih hi ka lo beisei miah lo va."
.
"Eng maw i sawi?" arawn kun hniam a, a mitmeng thim deuh raih leh nung de sar ka hmuh chuan ka phu deuh zawk.
.
"Engmah a nia. Sawlaia mite sawn biak che an duh anih hmel.." ka hawina lam enin a inher hlek a, "Ka va be lawk ang e. Lo kal sawn lo la." ka chhan hmain a kalsawn hman. Thupek tel lovin a kalsawn thei lo ni ber hian ka hre tawh.
.
"Hey, Esma_ Ka sawi dik em?"
Ka hnunglam en turin ka inher a, Violet ka hmuh chuan ka nui sak a.
.
"Dik e. Violet tiraw?"
.
"Theihnghilh miah suh. Tun atang phei chuan i duh aiin ka hming hi i hre zing tawh dawn ania." nui hmel a pu nain a mitmeng chuan min vau tih ka hrethiam.
.
"Ka lo hrereng ang." ka ti ve salh a.
.
"Oh! Tunang hunah pitar ang maiin Juice i in elaw? Georgie hetah lo kal teh." kan piah deuha hmeichhe harhvan hmel ther thawr chu a huih zeuh a, min hmuh rualin phur zet hian min rawn pan a.
.
"Georgie, ani hi Esma_ “
“Oh! Mordecai  hmeichhe khawi lai chu maw.. Eng chen nge a daih ka lo chhinchhiah a tul leh dawn ani maw."
.
A hmel chu ka en a, thu pangngai sawi ang mai hian a nui zui tlawrh tlawrh a. Hetiang mize pu a lo awm theih ngei chu a ni phawt a. Ngaihdan ka nei hma lutuk min ti pawh a ni maithei. Mahse, vawikhat inhmuhna ah hian an tawngkam hman duh zawng atangin mihring tha leh thalo chu ka thliar hrang thiam ve bawk.
.
“Georgie_ I duh duh sawi lo teh.” Violet hmel atang chuan engmah a hriat loh. Mordecai ngaihzawng ka nih vanga min huatna emaw min lawm lohna emaw a lo nei anih pawhin a tilang miah lo.
.
“Hetiang hmeichhia ang hi chu kawngsirah an tam lutuk_” Georgie chu ka en reng tawp. Hmaichhana tawng huai ber ka hmuh awmchhun ala ni hial lo maw!
.
"Min lo hrethiam teh u." ka kalsawn loh chuan kei mi zaidam zawk zawk bik lo hian ka chhanglet dawn. Ka tawngkam a mawi dawn bik loh vangin ka kalsawn a tul.
.
"Lawk_" Georgie zawk chuan ka banah min vuan a, min dim lo reuh khawp lehnghal. Insual ila min hneh dawn loh tehlul nen!! "Mordecai sakawrah hian i tang rei dawn lo tih ka lo hrilhlawk ang che." hnehsawh lutuk hian a tlak zui karh karh a. Ka insum zo dawn lo..
.
"Min vawnna hi thlah rawh." Georgie mitah chiang theih pa tawpin ka en a, a tim deuh zawk.
.
"Hey Georgie, ilo tel ve ani maw?" Mordecai aw a hriat chuan rang lutuk hian min vawnna chu a thlah thuai a, a hmel landan danglam nghalin a nui var var a. A nui hmel hmuh chuan mize ngeiawm nei hmel pawh a pu lo.
.
"Hi, Morde! Eng nge a an?" min melh a, a zawhna awmzia chu mi pangngai tan hai rual a ni lo.
"Khawngaihin Georgie_" Violet mitmeng ah chuan duhtawk turin a duh hle tih a lang a, a thiannu chuan a ngaih pawimawh hmel fahran loh.
.
"Hun nuam tak hmang ang che u." Mordecai chuan min kuahin min kalsawn pui a, lawmthu ka hrilh lo chauh a ni e. Helai hmun hi chhuahsan thuai ka chak et et tawh. 
.
“Engahmah ngai suh.”
"Ka hria alawm. Ka engahmah a thawk lo." ka ti ve mai a. A chanve chiahin a dik thung. Khatiang zahpah nei lo lutuk ang chi kha chu eng treatment nge pek tur tih ka hre ve khawp. Kan hmachhawn reilo kha a lawmawm hle a ni.
.
 Mordecai thian dangte bulah kalin kan inhmelhriat hlawm a, an hmel ka hriat sate leh ahmaa min hretu ngei ngeite tan pawh tunah chuan mi thar ka ni a, engemaw zawng tak chuan a nuam ta phian. Eng engemaw kan sawiin kan ri laih laih a. Ka zun a chhuah vangin washroom ah ka kalsan ta rih a.
.
.
"Khatiang khan langsar takin che tawh suh. Morde hi neihlet leh ka tum anih chuan fing taka ka chet angai a nia." Violet aw ri a ni tlat!
.
"Sorry_ Kha hmeichhe hmel ka hmuh khan ka insum thei thlawt lo. Eng nge anih, tunge anih ka care lo. Ka thiantha ber duhlai lo hnaihtu chu tupawh nise ka hmelma a ni mai."
.
"I rilru chu ka hrethiam, kan inang chiah. Mahse, 'fing' tih thumal hi kan nunpui a ngai rih a nia. Ka sawi chu i hrethiam em?"
.
An tawng chu hriat loh duh mahila hriat loh theih pawh a ni lo. Ka kut ka sil a, an awmna hmun atanga an lo chhuah hmain kalsawn hman ka duh. Kawngka a ri rak a, ka chhuahsan hman lo chu a ni ta der a. Ka lo awm reng tih min hmuh chuan an thaw hak.
.
"Awhaw! Enteh_ Kan kawngsir nula chu a nghal hle mai a.." Georgie chuan min rawn pan hnai tih ka hria. Ka kut ka tihul a, amah en tura hawi chhuah ka tum hran lo. Min kalsan ve mai tura ka ngaih vang a ni pakhat. Mahse ka ring sual!
.
Georgie chu ka bulah dingin min neksawn a, tui chu herh hawin a kutin a dawh a. Kar a awm hman lo, amah leh amah a intheh huh ta anih chu! A chet dan chu mak tiin ka en tawp. Keimah ang bawkin Violet pawh a phawk ve hra tho. A kawr huh chu duhtawk lovin min rawn theh thawt a.
.
"Georgie, eng thil nge i tih?" Violet chuan arawn hnaih nghal a.
.
"Karei leh! I va'n nasa em em ve. Ka ring thei lo_" thinrim lutuk hmelpu chung hian Georgie chuan min en a, thinur tawng hlawk hlawk chung hian washroom atang chuan a tlan chhuak a. Engmah sawi hman a ni lo, Violet chuan a um chhuak a kei pawh ka kal chhuak ve bawk. Eng thil chiah nge tih a tum ka hrethiam lo. Thil tha erawh a ni lovang.
.
"Enteh u, Mr. Sloan_ helai hmun i lo kal hi kan lawm hle nain i hmeichhe rawn hruai erawh hi chuan nungchang a hrelo hulhual a nih hi__" a au a ni ta ber. Pindan chhunga awmte chu an rawn hawi thup a. Thil awmze hriatchak, sawi sep sep tur duh hlir kal khawm anni tih kan theihnghilh tur a ni lovang. An beng neih zawng zawng chu kan lamah an rawn pawtparh a ni nghal ngawt mai.
.
"He hmeichhia hian thu hote vangin tuiin min theh huh anih chu.. Ka kawr hi a chhe vek__" thip lutuk hian min rawn en a, chiang lutuka a dawt sawi chu tumahin an awih ka ring lo. "Nang hmeichhe hur vakvel khan engvanga min tihuh ngam nge i nih?" tiin min rawn pan a, lo indang turin ka inring hman lo. Nghet zet hian ka samah min tham a, ka hamhaih zawh vek vangin chet dan tur pawh ka hre ta lo. A banrekah ka vuan ta ngawt a.
.
Tha chak zetin Georgie arawn pawh hran chuan ka ding ngil a, mak tiin Georgie chu ka en tlawk tlawk tawp.
.
"Hmelchhenu, lo hnai teh.." Georgie chu a rak tuar tuar a, hetiang thil tehhrep hi ka la hre ngai lo. A mualpho thlak tih piahlam a ni.
.
Violet chuan Georgie chu a kuah a, min dem hmel tak hian min rawn en ve bawk a! Ka thil hmuh chu ka ring thei lo. Thil awmzia sawi hmain pindan chhunga awmte chuan min dem nghal vek tih an mitmeng atangin a lang vek bawk. Sir khat chauh an hmu a, thutlukna an siam nghal der a! Mihring nunah hian sir khat chauh hmu chunga ngaihdan siam hi thil mak a ni hran lo. A thleng fo tawh thin a, a la thleng zel bawk dawn anih hi!
.
"Eng thil nge?" Mordecai chu ka bulah a ding a, tunge dik zawk a hriat loh vangin min tan nghal ngawt thei biklo tih ka hrethiam.
.
"Ka hre bik lo. Washroom ka luh khan__"
.
"Ngawi chipcham rawh_ Dawt bak i sawi leh chuang lovang.. Morde, hetiang hmeichhia hi engtin nge i inhnaihtir theih zawk.. A_rapthlak lutuk mai" Georgie chu a tap ta lehnghal. A kawr huh chu ui lutuk niawm fahran hian a en kual leh a, Violet chuan a lo hnem mawlh mawlh a.
.
"Inbengdai rawh..Georgie, khawngaihin_"
.
Sawi ngaihna ka hre lo, an chezia chu ka en ngawt ngawt tawp. Violet hian chiang takin thil thlen dan kha a hmu reng sia.
.
"Esma, khawngaihin ngaihdam dil rawh! I tisual der anih hi.." Violet thutak hmel zet chu ka en a, a ngaihna hre lovin ka nui hak ringawt.
.
"Engkim i hmuh ve vek kha_ Sawi ngaihna pawh ka hre lo. Amah leh amah__"
.
"Ngaihdam i dil thei lo anih pawhin dawt sawi kher lo la."
.
"In pahnih hian eng nge in hriat a? Violet engkim i hmuh ve vek kha. Amah leh amah__"
.
"Party boruak kan tichhia a pawi ka ti hle mai." Mordecai chuan ka ban rekah arawn vuan a, chak zet hian min kalsawn pui a. Min vawnna chu phelh ka tum nain awmze nei lo mai a ni e.
.
Ka pheikhawk bun sang zet vang chuan ka kal chak thei lo tih a hre duh thak lo, min kal pui dawt dawt a, ka ke a in elh nawk nawk mai. Na taka ka ulh lo hi ka vanneih ni anih vang a ni ngei ang! Ka tiel tih in hriatthiam ka ring. Vanneih ni maw? Huh!
Kawngka atanga kan chhuah fel rualin driver a call nghal a. A tawng dan atang chuan a lungawi lo lutuk tih a chiang ngawih ngawih.
.
Kan hmaa motor arawn din rualin a hnunglam kawngkhar a hawng a, min dim lo zet hian min thut luhtir nawk a.
"Kal rawh." driver lakah pawh a tawng bung tho.
.
Engemaw chen chu ngawi rengin kan thu a, driver chu in lama haw tlang tura a hrilh hnuah kan tawng a hriat theih loh nan glass a up te te a, chiang zeta min enin min hmachhawn a.
.
"Awmna hmun a zira nun dan i hriat ve bawk ka lo ring a. Ka ring sual a ni e. Min tizak hle mai. Mi hausa fanu duatsual, nungphung hre lo hul hual chu i lo nih ngei hi" a ti bul hmuk hmuk a. Tunah chuan ka tawng thei rih lo_ka thin a ur lutuk. A tawngkam hian min tina a ni lo va, min rinna a neih  miah loh vang zawk hian ka lawm lo takzet.
.
"Nang_"
"Engmah ka ngaithla duh lo." keimah ang bawkin a thinur hle tih a chiang e.
.
"Sawi ngaihna pawh ka hrelo. An pahnih khan an intiamrual anih kha_ Vawikhat hmuhna ah_"
.
"Tawp rawh!" na zetin min melh a, ngaihdan ni lo lutuk hian a lu a thing a. He mihring bulah hian insawifiah chhan tur ka nei reng reng hleinem mawle. A duh dan danin min ngai rawh se. Min rin ka in beisei reng reng em ni? A a lo zawk teh ang.
.
"Min zawt pawh ni la i bulah hian engmah ka sawi lovang" ka thinur lutuk chu ka hawi sawn a, ka tah a chhuak ringawt lehnghal. Phiangsen hian a! Ka tap lovang.
.
Amah hlat thei ang berin ka tawlh hla a, pawnlam ka en ta daih a.
.
"Kha kha eng nge?" a ti sup a, ka en duh lo. A aw chu a dam thlup a, ka ngei zual deuh deuh tawh. Min rawn hnaih a ka hriat vangin ka tawlh hla sauh a. "Khawi maw." atih leh pawh chuan ka la en duh chuang lo.
.
"Min rawn hnaih suh."
.
"Kha kha thisen a ni em?"
.
Nichin deuh atang tawh khan ka kerek a thip tawh a, ka ngaihven duh lo kha a nia.
.
"Ka lo en chiang ang." a ti leh a, amah chu ka en lo thei ta lo. Ka theih tawka thipin ka melh a, a mit tizim deuh hian min en ve bawk a.
.
"Tum buai duh suh. Hey__"
Ka ngal rekah arawn vuan a, ka sual let nawk nawk a. Ka chet zawng chuan a thip zual zel nain ka tawp duh chuang lo. A rem lai laiah ka chum a, 'min khawih suh." ka tawng chu hrelo angin a awm hmak.
Hneh lutuk hian seat hnunglamah min nek betin ka ke chu a en a, ka theih tawkin ka tal ve tang tang a.
.
"Thlah teh.."
.
"Damdawiin a kal angai anih hi." a tih chuan ka nui hul hak. "I ngal rek hi a kak alawm."
.
"Pawi chai hleinem. Min thlah rawh."
.
"Luhlul lutuk." a ti hluk a, min thlah a tum chuang miah lo.
.
A tawng chu chhang lovin ka theih ang angin ka nem ngat ngat a, motor a ding ta hlauh. Driver biak tuma glass a down lai chuhin ka thutna lam kawngkhar chu ka hawng rawp a, ka pen chhuak nghal a. Ka ke na chu pawisa duh lovin ka kal nghal hlawk hlawk a. A thip lutuk vang chuan ka then ru sak sak mai.
.
"Ding teh."
.
A tawng chu hrelo ang hmiaha awmin ka kal lui ngat ngat a. In chhung ka pen luh chuan tuar thei tawh lovin ka pheikhawk ka phelh a, in chung pan chhohna stepah kal chhoin ka pindan ka lut a chhung lamah ka kalh nghal hmak a. A theih chhung chu Mordecai Sloan hian ka hmel a hmu tawh lovang. A ngaihzawng anga awm lah ka tum tawh hek lo. 
VIDA – SheKnows
(Vee-Da)
.
By. Thantei_LauraSean
.
CHAPTER - 14
.
Ka clutch chu khumah vawmin ka thu hnawk a, ka ngal rek chu a thip tawh takzet. Ka khupah hlang kangin ka en a, silfai phawt a that ka ring. Ka kawr hak phelhin bathroom lamah ka bai phei auh auh a. Ka intihfai hnuah ka pem chu damdawi hnawihin ka tuam a, mut hahchawlh ka mamawh tih ka inhria. Party naa thil thleng khan ka rilru a chhuahsan miah lo bawk. Khatiang mihring nen khan inhmachhawn tawh loh ka duh ber a, loh theih loh thila kan inhmawchhawn leh anih hlauh chuan engmah ti lovin ka chhuah tawh lovang tih ka inhria. Chu chu thil tha ber pawh a ni dawn hek lo. Mordecai Sloan vang veka thleng a ni. Amah hi ka dem lo thei lo. Kha hmunah khan min hruai lo se khang thil kha a thleng miah lo tur a nia. 
.
Bathroom tangin ka chhuak a, khum-a Mordecai lo thu ka hmuh chuan ka phu deuh zawk nain engahmah ngai lo anga lang lui chungin ka thawmhnaw dahna ka pan a. Amah pawh chu a ngawi reng.
.
Ka kawr ka phawrh a, ka ha mial mial a. Ka inhak fel hnu chuan khumah lawn kaiin puan ka sin tha a, ka chezia chu min en reng tih chu ka hria.
.
"I ke chu eng nge a an?" a tawng zawi hle.
.
"Ka tha. Mutthilh ka duh a nia." ka ti hmak a.
.
"Zanin thil thleng chu zialo ka ti khawp mai."
.
"A dik chiah. Chuvang chuan min chhuahsan mai rawh." ka ti hmak hmak a. Kha hmun atanga thiam lo zawk niawm fahran a min chhuahpui vang khan ka lungawi lo hle tih hria se pawi ka ti lo. Chutih rualin a bula ka thiam thu sawi pawh ka tum chuang lo va. Car-a min tawngkhum dan kha ka theihnghilh tur a ni lo. A bulah hian engmah ka sawi dawn lo a ni tawp mai.
.
"Eng thil chiah nge thleng?" a tih chuan za lo lutuk hian ka nui hak a. Engatan nge a tih a? Min ngaihdan leh diklo zawk anga min ngaih zia chu a hma khan a lang chiang vek tawh.
.
"Eng atan nge i tih? Ka thusawi awih chuang lo tur bulah engmah ka sawi ngai lo. Khawngaihin min chhuahsan teh. I hmel hi ka hmu peih lo." ka tawng tam mah mah anih pawhin pawi ka ti lo ber!
.
Min chhang chuang lovin a thu ngawi reng a, chhuah tum hmel pawh a pu chuang lo. Engtin nge pindan ah hian a lo luh theih zawk le? Tunah ka ngaihtuah chhuak chiah. Kawngka saw chhung lamah ka kalh chiang sia. Ka melh zawk a, kun deuh hian a thut dan ngaiin a la thu reng a. Heta thut reng hian awmzia a nei lo, a duh chen chen thu se a zawhna ka chhang dawn chuang lo tih a hriatthiam hunah a kalsawn ve mai ang.
.
"Georgie khan tunhmain a hre tawh thin che niin a insawi a," a thusawi chuan ka beng a verh. Tunhmain min hria maw? Ka intih danglamna hi lo tawk zo lo tihna a ni em? Ka kiu rinchhan in ka inbeng kang a, Mordecai chu ka en a.
"Washroom atanga in lo chhuah khan ngaihtuah chian nachang ka lo hre lova, Georgie thiltih kha engpawh nise engahmah ngai duh suh." a ti leh ringawt a. A tawng ve duah chu mak ka ti. Thil sawimam erawh a thiam fahran lo anih hi.
.
"A thiam lo zawk i hriat si chuan tinge khalai hmun atang khan a thiam lo zawk ang mai a min hruaichhuah kher. Awmna hmun a zira nun dan hrelo ka nih pawhin itan a pawina a awm lo. I ngaihzanwg angin khawiah mah ka kal tawh dawn lo tih hria ang che. Keimah vangin vawikhatmah i zak tawh lo bawk ang. Ka sawi awmzia chu i hriat ka ring. Min chhuahsan thei tawh ang."
Hmui chip hmak hian a mit tizimin min en a.
.
"Mipa ka ni tih theihnghilh suh." a ti nghut a.
.
"Mipa maw? Khalai hmunah khan engvanga min hruai nge i nih? I ngaihzawng hlui thik atan a ni lawm ni min hruai." ka ti leh a. Ka tawng tam mah mah tawh tih ka inhre nain ngawih ka tum chuang lo.
.
"Mu tawh rawh. Zingah kan inbe tha dawn nia." tih pahin a tho a, kawngka lam a pan nghal a.
.
"I lakah engmah sawitur ka nei lo. Min hmuh tum duh suh." ka tizui a, ka tawng chu hre awm pawhin a awm tawh lo. Pindan kawngka chu dimte hian a khar ri khap a. Ka thaw huai mai. Ka mu meng ta reng a. Mordecai Sloan bulah hian engvang in nge ka nungchang a danglam ziah le? Thil tha a ni lo. Tun atang chuan a hmuh loh turin ka khawsa zel tawh ang. Chubakah tihtur tam tak ka nei a, Mordecai nun dan chungchang ah hian buai hman ka ni lo, buai tur pawh ka ni hek lo. Ka muhil thuai tur ani.
.
.
Kawngka inhawng ri chu hrelo angin ka awm a, ka mut dan ngaiin che miah lo hian ka mu a.
'Guzel' ka hnungzang ah min chul riak riak a, ka nakah vuanin ka dulah arawn khawih a. Ka la hriat ngai hauh loh phurna nasa lutuk vang chuan ka inlet thawk a, Mordecai hmel lang thim deuh raih chu enin a bekah ka vuan a,min fawh theih nan ka insiamrem a.

'I nalh lutuk. Hetiang chen chen hi engtin nge ka nghah theih zawk." duhthawh zet hian ka hmuiah min fawp a, engtik karin nge ka mal inkarah a inzeh hman ka hre lo. Ka kekawrte hak thehlep tak chu phelh tumin ka khel tawn tawnah a vuan a. Min fawhna chu a thlah miah lo "Ka mamawh che." a aw ri ril raih chuan ka chhungril zawng zawng a fan chhuak vek ni maiin ka hria. Amah mamawh zetin taksa mar tang leh phiar deuh fat chu ka chul ruai ruai a. Ani pawh a awm hle hle lo khawp mai. Mipa khawihna hian hetiang tak hian taksa a fan thei tih ka hre ngai lo hulhual.
.
"Miss Cappolo_"
.
Ka thuchhuak hlawl a, ka taksa a thlan vek. Ka mumang rapthlak zet vang chuan ka hmai a sa nghal pup pup a. Khatiang khan engtin nge ka hmuh theih zawk a! Ka kut pahnihin ka hmai ka hup a, pindan pawn atanga min kotu chu ka chhang ta chauh a.
.
"Tunge?" ka aw ri pawh a dik lo. Rapthlak lutuk! Ka awm ka dawm a, ka thinphu rang zawih zawih chu ka hrereng mai. Ka zak ru chem chem bawk.
.
"Keimah Claire. Mr. Sloan inhnuai ah a awm tawh a, kaitho mai tur che in min hrilh a. A hmanhmawh thlak a ni awm e." a tawng dan atang chuan a inthlahrung tih ka hrethiam. Chutih rualin Mordecai chu ka hmu chak hlawl lo. Ka mumang zahthlak zet vang khan a hmel hmuh ka chak lo takzet. Bakah nizan khan amah hmu tam lo thei ang bera awm turin ka inngaihtuah fel vek tawh.
.
"Ka awm a nuam chiah lo va, Mr. Sloan hnenah chuan hun dangah kan inhmu mai dawn nia ati lo ti mai ta che." ka ti ta ringawt a. Claire chuan min chhang zawi khawp mai.   
.
Claire kalsawn hnu awm velah khum atangin ka tho a, bathroom-ah lutin ka in tifai zung zung a. Darthlalang hmaa ka inen chuan ka hmel a la danglam nia. A zahthlak takzet!
"Vawikhat pawh hetiang zawng hian ngaihtuah suh." tiin darthlalanga ka hmel lang chu ka be ta ngawt a.
.
Mordecai Sloan ngaihtuah lo hian ka tihtur ka tih vat vat a tul lutuk tawh. Vawiin atang hian ka tan bawk ang. Jefferson leh Kiara hmel hmuh pawh a khat ta alawm le.
.
Bathroom chhuahsan in thawmhnaw ka inbel a, pheikhawk bun nuam tak ka bun hnuah makeup tlem inhnawihin ka pindan atangin ka chhuak a. Mordecai a chhuah tawh ka beisei bawk.
.
In hnuai ka thlen thlak chuan a lo reh deuh thiap a, min hmu hman ang tih hlau ru takin in ka chhuahsan a. Boni hruai lovin ka chhuak mai ang chu. Rei tak kal chhuah pawh ka tum hran lo.
.
.
Taxi-in Cappolo Corporation ka pan a, hun kha leh chen thahnemngai tawpkhawk a ka lo thawh tawhna hmun hmuh leh chu ka chak em em rualin ka zam tel tho mai. Building lian zet kawta Taxi a din chuan ka chuan man pein ka chhuk nghal a. Pawnlam atang chuan thil danglam hmuh tur a awm hran lo. Thawk ka la vang vang a, inringtawk tak anga ka lan theih nan insangmar chungin building chhungah chuan ka penlut ta.
.
Hnathawk ho buai taka phe suau suau chu enin ka tum bik lam pawh nei chuang lo hian lobby ah chuan ka ding det a.
.
"Helai hmuna ka hmu che chu mak ka ti hle mai."
Muangchangin ka hnunglam en turin ka inher a, Jefferson nui sang hmel ka hmuh chuan ka nui lui sek a. Min biakna ka chhan hmain ka bul arawn thleng fel der tawh.
.
"I tha maw? Ka hmuh leh theih che ka inbeisei chiah lo va." a hmel chu ka en chiang khawp. A mitmeng a lang nur sar mai. Ka la chhang miah lo tak e.
.
Tlema thle zeuhin ka nuih a. "Hetiang hmun ropui hmu lo hian hun ka lo khawhral hnem hle mai." ka ti sep a. "Khawiah nge kan inhmuh tawh kha(h)" ka tizui zat bawk. Amah hre tak anga ka lan a tul rih lo.
.
"Oh! Ni dawn tak e. Mr. Sloan nen lunch in eidun lai ka lo be buai che kha ania.." zak awm zet hian a tukhum a khawih zauh. Chu a chezia chuan hun liam tawhah min hnuk kir vawng vawng tih ka pha lo mai ange.
.
"Ka hriatna tha tawk lo vangin thupha ka chawi e. Helaiah hian hna i thawk ve tih chu ka hrethiam a_"
.
"Ka tihpalh. K_ Okay." a nui leh te te. A lai hamhaih ve tak takte pawh a ang khawp. "A bul atangin tan tha teh ang. Cappolo Corporation CEO, Jefferson DeLourde. Helai hmunah hian ka lo lawm a che."
.
"Esma Celik. Min lo lawm chu ka phu lo hle mai."
Ka vawn tura a kut arawn phar chhuah chu ka lo vuan vat. Ka kut chu a hmer vang vang a. A zialo lam hlek a ni nain ka hnar duh ta bik lo.
.
"Tunah hian meeting ka nei dawn chiah a, hun remchang i neih chuan zanriah kan eidun theih ka beisei." beisei tak hian min en a, ka bu zauh a.
.
"Kan la inhmu leh dawn nia." a kut thlah ka tum chu ala vuan nghet leh rih.
.
"Engtin nge ka lo biak pawh ang che." a tawng zawi viau. Hetiang taka hmanhmawh hi ka lo tum lem hleinem. Mahse hun tha tak ani. Ka beih hah ngai hauh lovin amah zawkin min hnaih a duh chuk chuk mai anih hi. Tiamchin awm lo va ka fimkhur erawh a tul thung ang.
.
JEFFERSON*.
.
Helai hmuna ka hmu hi rin har ka la ti. Sloan bula ka hmuh khan a hmeichhe kawp tam takte zinga pakhat anih ka ring nghal hmiah a, chuti chung chuan ka va pawh ta tho kha ania. Mahse mak takin Sloan hmeichhe kawp a ni lo. Ka vawikhat hmuh naa min hip chat awm chhun hmeichhia  a ni tih ka chiang sak. A awm dan atang hian ka hip lem lo ang tih ka ring a, chu chuan ka chhungrilah hian chona nasa tak min  siamsak  thung. Zawh duh tam tak ka nei a, tuna zawh vek chi anih loh vangin kan  inhmuh leh theih nan chet dan mawi zawk pawh ka ngaihtuah hman ta lo.
.
Ka biakpawh theih dan tur ka zawh chuan a mitmeng tuipui thuk tak ang mai a paw duk raihah chuan mak tihna a lang zauh a, ka ngai pawimawh zo chuang lo. A nui seih a, hetiang taka hmeichhia neih ka duh hi an la awm ngai reng reng lo. Ka sawi nawn sek mai ange.
.
"Khawngaihin_" ka tih chuan a bag a khawih neuh neuh a, rangkachak rawng card phawrhin min pe a. Lawmthu ka hrilh a, min chhang lo va bu zauhin a kalsawn ta nghal a. Conference Hall ka pan tak nain ka rilru erawh chuan Esma a umzui vawn vawn thung.
.
.
Ka nupui ka dahthat fel hnu khan engemawchen chu ka nun dan a mumal lo va, hlauhthawn nain ka khat reng a ni ber a. Kiara nen kan inkar pawhin a tuar khawp mai. Tunah hian Cappolo sumdawnna peng thenkhat enkawl turin Chicago ah ka tir a, kartawp a kan inhmuh zeuh zeuh bak hun kan hmang dun tam lo. Alak atanga zalen ka duh a, mahse kan pahniha kan thiltih vang khan awlsam takin ka zalen mai dawn lo tih ka ngaihtuah thiam. Kiara hi hmeichhe nasa tak a nih zia ka hrechiang tawk a, thiam taka ka thlim anih loh chuan ka duh ka ti thei hauh lovang.
.
"Mr. DeLourde, he deal pawimawh zia hi i hrechiang a, tunah i ngaihdan kan mamawh." Mr. Logan hmel thutak run mai chu ka en a, a thusawi ka lo ngaithla miah lo.
.
"Han sawi nawn leh teh. I thusawi thenkhat ah khan thil chiang lo a awm niin ka hria. Ngaihdan siam thei tur chuan chiang taka hriat phawt ka duh ang." ka ti chhum hmuk a. Ngaihdan ni lo zeta a thutna atanga a tho leh thum thum chu nuihza ru zetin ka en reng a. Tunah chuan ka ngaithla tawh ang.
.
"Sloan Corporation hian 5% share an neih tawh hi an vawnghim reng dawn tih a chiang a, tuna an offer hi kan pawm anih chuan Cappolo Corporation-a an share hi 10% in a pung ang. He deal hi kan pawm dawn nge pawm dawn lo."
.
Sloan Corporation nen kan thawhdunna a nghet zual anih chuan Esma Celik ka hnaih zual thei ngei ang. Tluang takin sumdawnna hi a kal zel turah ngai ila, Esma ka ta anih hunah Sloan Corporation share hi chu ka thluak hmangin ka neilet leh mai dawn ani. Harsatna a awm lo.
.
"Deal chu ka pawm e. Min thlawp zawngin in ban dinglam phar rawh u." inringtawk takin ka ban dinglam ka phar a, mi 10 zinga panga chuan rang takin min thlawp mai a, mi dang 5 te erawh an lawm lo tih an hmel atangin a langchiang khawp. Heng putar hmelchhe zet zet ho hmel hmuh hi ka kham ta hle mai.
.
"Deal pawm a ni e. Naktuk hian Sloan Corporation nen meeting neih tur a ni anga, information felfai tak pekchhuah ni rawh se." ka thutna atangin ka tho a, ka cabin lam panin ka kal nghal a.   
.
.
"Surprise!!!" ka hnathawhna dawhkana Kiara thu chu ka en reng a, ani chuan ka lawm lem lo tih inhre miah lo hian min rawn panin min kuah a. "Ka ngai lutuk che.." ka beng bulah a phun sar sar a. Hna dang thawh hmaa kan tihtur a chiang nghal. Engahmah kan ngai tawh hek lo. A thawmhnaw hak chu dim lo zetin ka phelh a, dawhkana lehkha thenkhat chu ka hnawl thla rawp a. Ka dim lem lo khawp. Ahmaa phurna ka neih ang kha a bo vek ani ber. Ka duh ka tihlai ngei ngei pawh chuan Esma nui hmel ka hmu a, maimitchhingin Esma laka che angah ka inngai lui a.
.
Ka duh ka ti zo a, dawhkana Kiara mu zawi thlar chu pawt thoin a thawmhnaw ka haktir a.
.
"Honey, i danglam a nia. I tha em?" ka awmah a kut pahnih nghatin min melh sar sar a, ka khawngaih ve deuh.
.
"Tha e. Hna ka ngah lutuk a, chuvang anih ka ring." ka tiliam puat a. A awm ve reng ang tih ka hlauh ruk vanga hna chhuanlam ka ni.
.
"Thawk tlem deuh rawh. I hah lutuk tih hi vawi engzat nge ka hrilh tawh che.." ka kawr chuar hauh lo chu a zut mar a, ka hmuiah min fawp leh a.
.
"A tawk rih e. Hna ka ngah lutuk. Tlai lamah kan inhmu dawn nia."
Min chhang lovin Kiara chu a tum bar bar a, mahse hnathawh a tul zia engemawchen a hriatthiam ve tho vangin ka cabin atang chuan a kal chhuak a.
.
"Tlaiah in ah ka lo nghak ang che. Ni hman nuam le." nui lui chunga a kal chhuak lai chu engmah sawi lovin ka en liam tawp. Kawngka a khar ruala ka rilru a thil lo awm hmasa ber chu 'he hmeichhia hi ka hne tawh' tih zawng hi a ni. Ka thutna chair vir theiah chuan thu awnin Esma Celik card min pek ka kekawr iptea ka ah chu ka phawrh a, phurna mak tak nei chungin card-a thil inziak chu ka chhiar nawn sek a. A phone number chu dial chakin ka kut zungtang a za zek zek mai.
.
.
NI HNIH HNUAH*
.
A vawi thum nan Esma Celik ka call a, min chhan ka beisei ngam chiah lo. Ni hnih liam ta khan nghak zo lovin ka call nghal a, thiam takin hun a neih loh thu sawiin min hnawl anih kha. Hlawhchham ka tum loh zia hi hria se chuan min hnial buai lo law law ang.
.
"Hello." a aw zawi sap chu ka hriatthan tak ang mai ani.
.
"Hi, Miss Celik_"
"Esma tiin min ko thei ang. I beidawng mawh hle mai." a thutak hmel phian.
.
"Ka beidawng dawn lo tih i hrethiam ve ta chu ka tan thu lawmawm tak a ni. Hunawl i neih theih chuan vawiin hian lunch ei puiah sawm che ka tum a_"
.
"A hmun min lo hrilh ta che. Hetiang taka mipa tumruh hi hriatchian ka chak ta riau mai." a ti zang vah a. Ka zuang zawk lo chauh a ni.
.
"10 minutes hnuah ka lo hruai ang che. I awmna hmun sawi la." ka ti hmiah.
.
"Kalna tur sawi la, keimahin ka kal ve thei alawm."
.
"Bloomers Hut, dar 1:00 ah aw niang."
.
"Okay."
Ka chhan leh hmain a off a, ka phone chu enin ka thutna ka thawhsan nghal a. Ka phur tih piahlam a ni e. Hun reitak ka tih tawh loh angin washroom-ah ka lut a, ka landan that tawk leh that tawk loh rei fe ka thlek hnu chuan office ka chhuahsan nghal a.
.
BLOOMERS HUT*
.
Ka table hauh lawkah 5 minutes dawn ka thu tawh. Kawngkhar lam ka melh sek a, mawnga hawlh ang mai ka ni.
Ka mi nghah a lo lan chuan ka thutna thawhsanin ka ding a. Ka bul a lo thlen hma chu hmuhnawm thlir takin ka thlir a. A mak lutuk! Amah ka hmuh hian ka hriat than tawh anga ngaihna mak tak ka nei ziah lehnghal! A kawrhak var dara bahna sinte awm chuan a vun nung sar chu a tilangsar zual a, a sam buang siau kir deuh chiat khawih chhin ka chak zia chu tawngka hian a sawifiah zo lo. Mitmeng nung sarin a nui a, ka bul a lo thlen chuan a thutna tur ka lo siamrem sak thuai a.
.
"Min lo nghak rei tawh em?"
"Rei lo ve. Hmuh i nuam hle mai."
"Ka lawm e." a ti sep a.
.
Ka thutna lamah kalin ka thu rem a, amah ngaichanga ka en chuan chik zet hian min lo en reuh a. Ka zam anih chu! Ka zam! A mitmeng pawl hian mak riauna a nei!
.
"Engkim a tha em?" ka tita ngawt. Mipa ka ni a, ka zam tur a ni lo.
"Tha e. Ka ril a tam khawp mai." a ti leh sap a.
.
Order la tura waiter kan bula arawn din chuan ka hawisawn ta chauh. Esma chu hawi sawn zeuhin min en leh a, a awm dan danglam deuh nia ka hriat vangin a hawina lam chu ka en ve thuai a. Phiangsen hian! Saw mihring, Sloan sawn eng thil  nge rawn tih ve a tum?
VIDA – SheKnows
(Vee-Da)
.
By. Thantei_LauraSean
.
CHAPTER - 15
.
.
VIDA ELVES CAPPOLO*
.
Jefferson hmel danglam zauh chu ka hmu chiang ngang mai. Rang lutuk mah mah hian a insiam rem vat a.
.
"Eng nge a?" ngaihven hmel deuha lang duh lovin ka zawt a, awm nuam chiah lo chunga nuiin "Engmah a ni lo. Eng nge kan ei ang?" a ti zung zung a. Mordecai lo lut chu ka hmu ve ta chiah. Jefferson awmdan danglam pawh kha a mak hran lo. Min rawn pawh ang tih ka hlauh zia chu sawi ngaihna a awm lo zawk. Hmu lo anga awm in Jeff chu ka nuih sak a.
.
"Eng wine nge i ngainat le?"
.
"Ngainat ka nei lo." ka tih chuan makti hmel a pu leh ta. Wine changkang leh man to ber ber duh turah min ngai tih a chiang reng. 'Mak ila ti dawn chauh' ti rilru chunga en in, "Ka in ngai miah lo va, tui ka lo in zawk mai ang." ka ti nghet charh a. La in thei dinhmuna ding chu ni ila '75 Cheval Blanc hi ka ngainat berte zing a mi a ni thin.
.
"Mak tihtur ka la ngah dawn chauh niin ka hria." chik zetin min en a, a mitmenga ka  hmuh chu kan inneih hma leh inneih hnu zawng zawng pawh khan vawikhatte mah ka la hmu ngai lo. A mit chu a nung sar sar ni ber hian ka hria.

"Ni maithei." ka ti sap a. Fiamthu angin ka lang naa ka rilru tak tak sawi ka ni. Jefferson DeLourde hian min hnaih tuma thutlukna a siam rual khan a tlak hlum ngei ngei na tur kham hlauhawm tak a pan tan reng tawh. Ka sawi awmzia chu in hriat ka ring. Ka chunga a thiltih zawng zawng leh ka paltlang tawh te, ka nu leh pa nunna latu anih vang chauh pawh hian ka ngaidam ngai dawn lo.
.
"Nilengin en che pawh ni ila ka duh angin i hmel hi ka hmuchiang thei chuang lovang." dawhkana ka kut ka nghah chu rawn vawn a tum a, nui chung hian ka kut chu ka lasawn a. Kal chak a tum mah mah. Awlsam taka alaka lo tlu tawh hmeichhia hian ka duhtawkin ka chaih kual ve thung dawn. Hria nise min hnaih loh tur zia ka ngaihtuah in ka nuih a za!
.
"Muangchang in le." ka hmui ka petsawi zeuh a, amah chu engahmah ka ngai lo tih ka tilang lui viau bawk. A thaw hak ri ka hriat chuan ka hlawhtling thawkhat ang tih ka ring. Hun kha leh chen ka pasal lo ni tawh hi thil tam takah ka hrechiang tawk ve viau a, a duhzawng leh duh loh zawng pawh kei aia hrechiang tur an tam lo khawp ang.
Dawhkan hnuai lamah ka ke chu tiche zeuhin a ke ah ka khawng a, tihpalh anga langin thupha ka chawi zeuh a. Pawi a ti lo tih hi ka hrechiang ve e!! Tun aia thui hi kalpui duh ni ila a phur viau dawn tih lah a mit atang hian ka hrechiang viau bawk a. Vawiin atan chuan heti chin hi ka duhtawk ang. Vawikhata thil tam tak tih hi a tul hran lo.
.
Sawi tur ngaihtuah niawm tak hian a wine glass chu a hmui bulah a chawi kang a, a mit chu ka chungah a la fu reng mai. Hetiang khawpa mi phur thei hi a lo ni reng a_
.
"Pianna hmun atangin bul kan tan dawn em niang?"
.
"Istanbul-ah ka piang a, sawitur ka nei tam lo. Mite anga naupan lai hun hlimawm han sawi tur ka nei tam lo khawp mai."
.
"A pawi ka tihpui hle mai che." a tih chuan ti tak tak hmel a pu.
.
"It's Okay. I thiam loh a ni hleinem." tiin ka nui sak a. "Nang ve le?"
.
Kan eitur chah a lo thleng a, a bulte atanga hriat vek duh niawm tak hian kan inzawt zui zel a. Ka tan thu thar hriattur a awm hran lo. A lo seilen dan leh an chhungkaw dinhmun ka hrechiang sa vek a, a nu leh pate a ngaihven lem loh zia ka hriatchian sak aiin tunah hian a nu leh pa a hmangaih zia a sawi uar phian.  A tha vek e.
.
"Hetah hian i kal dawn tih min hrilhlawk la tha tur." ka thutna bula Mordecai lo ding chu ka en chho ha a, ka rilru puthmang ka hmela tilang lo turin ka inthunun nasa hle. A lo luhna kha a rei tawh deuh a, eitur pana lo kal chu ni se tunah ka bula awm theihna chance  a awm lo. A hmel chu ka en rei duh lo. Ka mumang khan min la chenchilh nghet mah mah anih hi.
.
"Sorry!" ka ti sap a.  Ve bawk a, ka hmela pawi ka tih si loh zia lang chu a hmuh hmaih ka duh lo. A nui tawi tak mai
.
"Tlai lamah kan inhmu dawn nia." a tibul hmuk a.
.
"Hun ka neih chuan ka lo hrilh ang che. Tunah chuan ka laklawh rih tih i hmuh thiam ka ring." pawisawi loh hmel zet hian ka nuih var var a, tlema thle deuhin min ner khum suk. Jefferson chuan min chik hle tih ka hriat vangin Mordecai hi thiantha leh hmelhriat pangngai ang chauhin ka be lui ve hrim hrim a ni. A mitmeng rum ru deuh tlat chu ka hrethiam chiah lo thung.
.
"A that chu. Hun i neih loh pawhin ka lo kal mai ang. Hun nuam tak hmang r'u." Jefferson chu a address ta zawk mah. Thip deuh taka min rawn melh leh hram hnu chuan a kalsawn ta hram.
.
"In inpawh hmel hle mai." Jefferson chu ka en vat. A ngaihdan hi ka duh dan chiah a ni.
.
"Ani hi chu thian bakah ka unaupa a ni zawk mah. Tih a har deuh thin tih lohah chuan kan inpawh khawp mai."ka ti tha ve mai a, thil ropui tak anga sawi pawh ka duh chuang lo. Engkimah hian chintawk nei thiam taka ka khawsak a tul tlat a, a mitmenga Mordecai a chung en zia ka hmuh vang ringawt hian uar taka sawi chiam ka tum lem lo.
.
"Mr. Sloan nen khan in inhmu em?" min thlahin ka hmaah a ding a,
.
"Hmu zuai e."
"Engmah a sawi lo em ni?" a ti leh ringawt.
.
"Sawi lo."
.
"Vida, dik tak chuan Mr. Sloan hian a ngaihven hle che a nia. Hmeichhe a tak ka ni bik lo va, a ngaihven dan che hi engkimah venhim vek che a tum niin ka hria. I lo hriatthiam ve tho ka ring a__"
.
"Ni lo ve, rilru puthmang i neihsa leh ka tana duhthusam i neih sa vangin i ngaihbel mai mai anih kha. I ngaihtuah dan chu ka hrethiam alawm. Helai hmun hi kalsan phawt teh ang."
.
Serafina nen chuan in zuiin a car rawn ken ah kan chuang a, Sloan mansion kan pan nghal a. Mordecai khan kan inhmuh a tul thu kha a sawi a, a sawi anga a awm chuan tlai lamah a lo kal ngei ang. Hmuh erawh ka chak zawk zawk lo khawp mai. Ka mumang zahthak zet khan min la chenchilh reng a, a hmel ka hmuh khan ka tum reng  vang pawh ni lovin ka mitthlaah a lang uai uai lehnghal anih kha. Inthunun fe lo ila chuan ka chesual palh ngei bawk ang.
.
Sloan mansion kan thleng a, Serafina chuan min kalsan lehnghal a. Inhmuh leh thuai a duh thu a sawi nain ka duh hunah kan inhmuh theih ka ring chiah chuang lo. A duh hunah min hmu thei a, kei hian ka duh hunah ka hmu ve thei chuang der lo va.
.
Ka pindan ka pan a, ka chau deuh nghulh chu engvang nge ka hre chiah lo. Chau viau turin ka che hah pawh a ni hauh si lo va. Ka inthlak zung zung a, lukham nghenga thu mu pahin phone ka khawih neuh neuh a. Ka pindan kawngka inhawng ri niawm tak ka hriat chuan ka phu deuh zawk.
.
Mordecai lo pen lut chu ka lo en reng a, a danglam chiang. Ka khum mawng lamah a ding a, chiang lutuk mah mah hian min en ta reng a. Ka awm a tinuam ta lo.
.
"Eng nge a?" ka ti ringawt a, min chhang lo. Muangchang hian khumah arawn lawn a, a hmel chu a diklo reng reng. Eng nge maw thil awmzia ni le?
.
Ka thutna bulah rawn mu a, a mit a chhing chual a. A ngaihna ka hrelo telh telh mai.
.
"Hey, harh teh!" ka sawi dat dat a, a che zui lo. Ka sawi ang angin a awm tawp mai. "Mr. Sloan_"
.
"Hmm"
"I tha em? Eng nge thil awmzia?"
.
"Ka tha." a tawng zawi lutuk, ka hrepha chang chang a ni.
.
"Tho teh. Hetah i mu ringawt thei lo." ka tawng chu a hre miah lo niin ka hria. A pang ka khawih a, a sa vur lehnghal. A awmdan hi a diklo.
.
Tihharh tum lovin ka theih ang angin a mut dan chu ka siamrem a, tui taka muhil ang mai hian a la awm ta reng a. Bathroom-ah lutin tuivawt ka la a, tuivawt ah chuan puan nem chiah huh in a pangah ka dep a, a kawr hak chuan a phuar hreawm ang tih hlauin ka phelh thawl deuh a, amah harh lo mah se a kawr hak phelh chu nuam ka ti lo nasa mai. Ka mumang bawk kha ka mitthla ah arawn lang leh ta. Tuman min hmulo tih hre chungin ka sa pawp pawp tho nia.
.
A kawr ka phelh zawh chuan puan ka sin thattir a, doctor ka koh a tul tih ka hria. Mipa chak tha lai hetianga a awm ringawt hian ka ngaih a titha thei lo. Dr.Mori ka call chuan rang taka alo kal nghal tur thu sawiin phone a off nghal a.
.
Khua a thim vek hnuah pawh Dr.Mori chu a lo thleng thei ta reng reng lo. Mordecai pang chu ka khawih sek a, ahma ang em em kha chuan a sa tawh lo. A mutthilh ngheh hmel tho vangin a that leh mai ka beisei ve tawp a, khumah mu lovin khum sir a sofa-ah chuan hahdam lo zet hian ka mu ve ta ngawt a. Saisira mu chungin Mordecai chu ka en reng a, a hmel tha leh pa tak chu ka en ning thei lo. A mithmul sei sang chu a khup hlap a, a hnar invuah fuh zet leh tihhar hmel taka a hmui chip hmak te… Thawk la hawkin ka maimitchhing a, ka thil ngaihtuah chu ka zak zawk e a!
.
Eng chena rei nge chutiang chuan ka awm ka hrelo, thawm ri niawm tak ka hriat chuan ka tho zawk mai. Rang tak hian Mordecai chu ka en vat a, khum tlangah thuin min lo en reng a, a bulah Dr.Mori a awm tawh bawk. Ka thu chhuak nghal vat a.
.
"That lohna dang engmah i nei lo. Ka lo kal nghal theih loh vangin thupha ka chawi mawlh mawlh e." a tawng pah chuan ka harh tih hriain min rawn en a, a nui vei suk. Ka sam chul mam thuak thuakin ka tho chhuak nghal a.
.
"Mr.Sloan chu a tha tawh e. Tun ai hian hahdam deuh thei se ka duh khawp mai. Ka thusawi a awih duh tlat lo va, i thu tal a awih duh ang chu_" Dr.Mori chu melhin ka aw ka thian kharh ringawt. Ngawirengin a inkhung fel mawlh  mawlh a, ka pindan atang chuan a kal chhuak a, Mordecai erawh a thut ngaiin a la thu reng.
.
"I tha ta chu a lawmawm hle mai. I pang a la sa em?" ngaihtuah lawk miah lo hian a pang khawih tumin ka ban a, a thlesawn rang nasa mai.
.
"Kan inbiak a ngai ania." a ti chhum hmuk a. A duh duh a sawi leh ang chu.
.
"I kawr kha ha phawt rawh." ka ti ve nghat a. A ngaih pawimawh hmel loh hle thung.
.
Chiang zet hian min en a, ka beisei loh lutuk in ka ban rekah min rawn vuan a. Ka hamhaih, chet  ngaihna ka hre lo.
.
"Jefferson saw hnaih tawh suh!" a thusawi chu ka hriatchian loh hlau niawm tak hian thumal tin chu a lam chiang kalh kalh khawp mai.
.
"Engvangin?" dak deuh vahin ka en a, thu min pe ringawt zel tur hian engah nge maw a inngaih le?
.
"Ka duh loh vangin." a tih chuan ka thaw hak ringawt. Ani duh loh vang ringawt hian hremna ka pek tur ka thulh ang maw? A teuh lo mai!
.
"Tuin nge ka chunga thuneitu ah siam che?" ka ti chang fal a. Ngaihdan nih loh hmel fe hian min rawn melh chho rulhin ka taksa si deuhthaw hian a ding chhuak a, zam duh lovin ka enlet ve ngar a.
.
"Ka duh a vang che in! Ka duh che_ Chuvang chuan Jefferson saw i hnaih tawh tur a ni lo!" a aw atang chuan thutawp a sawi tih a tilang chiang hle a, a zawmtu tur erawh kei ka ni. Ka zawm kher lovang.
Za lo zet hian ka nui hul hak a, ka awmdan chu hmaih palh neih hlau niawm tak hian min en chik reng thung.
.
"Ka rin i beisei lovang chu tiraw?" Tunah chuan ka nuih a za tak tak tawh! "Awlsam taka mi thusawi nazawng ring lo tur hian ka intawng harh ve tawh alawm. Ka chunga i thiltih duh ngaihtuah phei chuan_" ka ngawi dat a, "Hei aia thu awihawm deuh i zawn a ngai ang. A hma khan ka sawi tawh tiraw? Hetianga tih kher ngai lo hian ka pa laka i tihduh i tih hman loh zawng zawng, hremna engpawh nise ka chungah hian i ti thei vek_ Chuvang chuan romance game hi chu khel lovang."
.
Min chhang lo. A mitmeng thim raih chuan min la en reng a, muangchang hian ka hmai zawnah arawn kun hniam hret hret a. Chetsawn nachang ka hre chuang miah lo. A ni lo! Ka chesawn thei lo a ni zawk, a mitmeng thuk raih chuan min hip bet tlat a ni! Ka mamawh loh ber thil a ni tih ka ngaihtuah thei chungin ka taksa erawh a che thei hauh lo.
.
"He thil hi hremna i tawrh tur chu nise i tuar thei angem?" ka chhan hun nghak lovin dimdawi tak si, dawhthei lo tak si hian ka hmuiah min rawn fawp a, ka dang thei lo! Ka dang thei em ni? Min fawhna chu ka chhanglet lo chungin rum deuh hak chung hian ka kawngah min kuah a, a taksa thlawp thlapin min kuahbet ta hle hle a. 
.