VIDA - SheKnows 1-5

VIDA – SheKnows
(Vee-Da)
.
By. Thantei_LauraSean
.
.
KHUH HAWNNA
.
'Ka zungbun! Ka dam chhung leh ka thih hnu thleng pawha phelh miah lo tura ka tiam he zungbun hi engtin nge hetah hian a awm theih?' Neitu neilo ang maia ka zungbun lei a tla bal chu chhar turin ka kun a, thahrui ka neih tam loh vangin kun chu ka tan a harsa lutuk mah mah a ni. Ngawi lawk teh! Khawiah nge Jeff a awm?
"Jeff.." ka aw chu a ri chhuak lo hrim hrim. Ka pasal hi khawiah nge? Thil awmzia hi ka hrethiam lo. Keimah ang bawk khan Jeff chu tanpuitu nei lovin khawi laiah emaw a awm ve ngei ang. Keimah anga chakna nei zo lo va a awm anih phei chuan__ka ngaihtuah ngam lo zawk.
Thil thleng kha__Chak takin Jeff khan kan Car a khalh a, min umtu an awm ngei anih kha__ Ka hrechiang thei tawh lo!
Ka taksa chirh leh bal tinrengin a bawm khah luk chu ka bal tih inhresa rengin ka ennawn leh a, ka rimtui lo lutuk chuan ka luak a tichhuak hluah hluah bawk. Ka pasal awmna ka hriat ngei ngei a ngai a, ka hmuh hma chuan ka zawng ang. Mahse ka thil tum ka tih hmain ka intihfai a, ka taksa chau lutuk hi ka tihreh phawt angai a ni.
.
'Jeff, ka duhtak! Min lo nghak hram hram rawh. Khawiah pawh awm la min lo nghak hram hram rawh aw. Tanpui tur chein ka lo kal dawn e.'
Ka sana bun chirhin a tihbalh nuau chu ka en leh a. Ka harhchhuah leh tun inkar, kha hmun atanga kan in pana ka kal hun rei zawng kha darkar thum vel chiah a ni.
.
CHAPTER - 1
.
.
DARKAR THUM LIAMTA KHAN*
 
"Ahh!.."
Ka che thei lo. Chet luih tuma ka'n tanglui deuh chu thawm mak tak ka hriat vangin ka tawp chawt a. Chu thawm chu eng nge? Nghet taka min tuamtu chu eng thil nge ka hre bawk hek lo. Ka thaw a sak a, ka taksa chu a khur der der bawk a. Vawt ka ti deuh tho nain vawt ka tih vanga khur erawh ka ni miah lo.
Ka mit pawh chu ka meng ve taknain engmah ka hmu thei chuang lo va, min tuamtu chuan ka khawhmuhna tur a dal hneh lutuk mah mah a ni e.
Ka bul hnaia thawm chu ka han ngaithla chiang a, mihring thawm a ni lo. Ui anih loh pawhin ramsa engemaw tak chu a ni ngei ang, a thaw ri suk suk ni mai hian ka hria. Hlauhna nasa lutuk hian ka tirilah min man a, ka khur nasa zual sauh a. Ka bula awm chuan thawm dang a nei! Ka inrin hmain a u ta ruah ruah lehnghal! Ui ni lovin Sihal a ni tih ka chiang. Ka tha hmang lovin ka che hrut hrut tih ka hria a, ka ke lam atangin chu ramsa chuan min hnuk ngei a ni. Tihtheih ka nei chuang lo va; ka chunga thil thleng zel tur chu ka nghak ta tawp a. Ka tawp dan turah duhthlan tur ka nei chuang reng reng lo tih ka inhrechiang khawp mai.
.
Engemawchen hnuah nghet taka min tuamtu chu a thawl hret hret tih ka hria a, tunah chuan ka taksa pawh a che thei ta. Thahrui ka nei hlawl lo mai chu mak ka inti takzet! Ka rilru leh ngaihtuahna chiai vang chuan ngaihtuah ber tur pawh ka hre chuang hek lo.
.
Che hmanhmawh thei ta lo chuan muangchang takmeuh hian min tuamtu puan tih dawna ni chiah si lo, thil na deuh relh rulh chu ka phelh thei ta hlauh mai. Thawk khat chuan ka thaw thei ta. Khawi hmunah nge ka awm tih hriat tumin ka hawikual nghal ruai ruai a, engkim mai chu a thim em em vek mai. Chunglam ka en a, thing hnah ang tak kara thla eng zung lang deuh suar suar ka hmuh chuan ramngaw chhah takah ka awm niin ka inngai ve ta ngawt a. Ka rilrua thil lo lut leh hmasa ber chu 'Helai hmun hi engtin nge ka chhuahsan ang?' tih a ni.
.
Thei leh thei lovin ka ding chhuak a, nichin maia ka bula awm reng leh min tanpuitu (Sihal khan min tanpui tiin ka sawi lo thei lovang) Sihal kha a lo awm tawh lo. Ka ke chu a inthlep nimai hian ka hria a, pen ka han tum a ka ke zungtang chu a inthlep/ a kawm ta tlat. Kal a har lutuk. Leiah chuan thu lehin a tawlhin ka tawlh ta zawk a. Engmah hre lova ka awmlai khan ruah a sur anih ka ring lei chu a hnawng chuap in a nal purh mai.
.
Ka awmna tlang lam atanga eng lo lang chu ka en reng a, thawm pawh ka hria. Motor tlan thawm a ni. Au turin ka aw a chhuak thei lo va, motor tlan chu ka enliam lo thei ta lo va. Mahse ka awmna atang hian kawngpui ka pawh thuai dawn tih ka ngaihtuah a, ka lawm lutuk vangin ka mittui a hnam sawk mai. Ka tha neih zawng zawng sawmkhawm nawn lehin ka tawlh leh a, ka lum a ni mah zawk. A tawpa tawpah chuan kawngpui ka pawh ta.
Ding ngil tha thei lo chung chuan ka banrek ka vuan a, ka sana bun ka khawih fuh rualin eng hun nge tih hriat tum hian ka sana-a chirh kai luai chu ka tuai fai nawk nawk a. Thla eng rinchhan chungin ka hmu phe ruai thei chauh a ni. Motor dang a lo kal leh mai ringin kawngsirah chuan ka thu kawi ta nuaih a. Ka ke kawm leh zawi lutuk chu tihreh tumin ka chum taih taih a, tlem chuan awmzia a nei ve deuh.
.
Ka beisei angin motor a lo kal ta reng reng lo mai. Hetia ka awm reng chuan nikhawhrelovin ka awm leh thuai dawn tih ka hria. Ka taksa a chak loh em vang hian rei ka daih dawn hauh lo a ni. Ka dang ro huam huam chu tihhnawn tumin chil lem ka tum a, chil pawh ka nei mumal lo! 'Ka chungah hian eng thil nge maw thleng chiah le?'
.
Muangchangin din tum hian ka han bei leh fat fat a, nghet lo takin ka ding thei ta hram. Ka ke hnuk hrawih hrawih chungin kawngpui zau leh thim ruih maiah chuan ka kal sawih sawih a, eng chena rei nge ka kal ka lo chhinchhiah lo, ka tan chuan hun rei tak chhung ani tawp mai. Kawngpui sira board intar ka hmuh chuan ka rum chhuak hak a. Ka awmna hmun hi kan chenna atangin a hla lutuk lo tih ka hriat vanga lawm lutuk a rum chhuak ka ni. Motor vek vel a awmlo pawh kha thil mak a ni hek lo.
.
Muangchangin ke hnuk chung chuan ka kal bek bek zel a. Rei tawk tak hnuah ralkhat atanga kan chenna in ka hmuh chuan chakna ka neih belh niin ka inhria. Ahma khan luak tichhuak nghur mai rim chu eng thil nge ka lo ngaihven lem lo va, kan in kawt ka thlena eng pangngaia ka inen theih hnu chuan rei ngaihtuah ngai lovin keimah ka ni tih ka inhre nghal. Chirh uih ka kai nuaih bakah ar hmul nge sava hmul tih pawh hriat loh te, hnahthel tawih kawih niawm takte ka kai nuaih mai. Mahse tunah chuan kan in ka thleng tawh__Engkim a tha leh vek ang. Tunah chuan mamawh pakhat chiah ka nei rih. Tui! Thildang zawng zawng aiin tui in tur ka mamawh! Ka pen leh chiah chuan ka ke bula thil tle zauh chuan ka mit a la zawk a. Jeff nen kan inneih zungbun a ni tlat mai!
.
'Ka zungbun! Ka dam chhung leh ka thih hnu thleng pawha phelh miah lo tura ka tiam he zungbun hi engtin nge hetah hian a awm theih?' Neitu neilo ang maia ka zungbun lei a tla bal chu chhar turin ka kun a, thahrui ka neih tam loh vangin kun chu ka tan a harsa lutuk mah mah a ni. Ngawi lawk teh! Khawiah nge Jeff a awm?
"Jeff.." ka aw chu a ri chhuak lo hrim hrim. Ka pasal hi khawiah nge? Thil awmzia hi ka hrethiam lo. Keimah ang bawk khan Jeff chu tanpuitu nei lovin khawi laiah emaw a awm ve ngei ang. Keimah anga chakna nei zo lo va a awm anih phei chuan__ka ngaihtuah ngam lo zawk.
Thil thleng kha__Chak takin Jeff khan kan Car a khalh a, min umtu an awm ngei anih kha__ Ka hrechiang thei tawh lo!
Ka taksa chirh leh bal tinrengin a bawm khah luk chu ka bal tih inhresa rengin ka ennawn leh a, ka rimtui lo lutuk chuan ka luak a tichhuak hluah hluah bawk. Ka pasal awmna ka hriat ngei ngei a ngai a, ka hmuh hma chuan ka zawng ang. Mahse ka thil tum ka tih hmain ka intihfai a, ka taksa chau lutuk hi ka tihreh phawt angai a ni.
.
'Jeff, ka duhtak! Min lo nghak hram hram rawh. Khawiah pawh awm la min lo nghak hram hram rawh aw. Tanpui tur chein ka lo kal dawn e.'
.
In chhungah ka lut a, in reh thuap chu mak ka ti lo. Ngaihtuah chiang deuh chu ni ila kawngka inkalh lo kha chu makti tur chu ka ni. Mahse ka pasal ka ngaihtuah a, ka pasal zawng hmu thuai turin muang taka che thei ka ni lo tih ka inhre si anih hi.
Ka theih tawka hmanhmawhin thlengsilna ka pan a, tui herh hawin chintawk nei lo lek hian tui chu ka ka-in ka dawh a, ka hak bawrh bawrh mai reng a. Ka duhtawk ka in hnuah fridge ka pan leh a, eitur ka hmuh hmasak apiang chu ka hmawm hmiah hmiah a, duhtawk ka nei hlei thei lo. Ka chetna hnu chu a berh zel mai bawk a.
.
Ka duhtawk ka ei hnu chuan ka harh ta deuh. Fridge chu nghengin chhuatah ka thusawp a, ka pasal awmna tur chu khawi hmun nge ni ve ta ang tih  bawkin ka ngaihtuahna a luahkhat lehnghal vek. Banga digital sana kan tar calendar anga ni zat lan theihna ka hmuh rual chuan mak  tiin ka mengphar kawk kawk mai!
.
NI HNIH_NI HNIH CHHUNG tehmeuh kan in ah hian ka awm tawh lo! Ka ngaihtuahna a fim tial tial a, zawimuang hian chhuat atang chuan ka tho ta  a. Thil thlen dan zawng zawng a malte tein ka ngaihtuah chhuak a, ka mit nawn sulh sulh nimai hian ka inhria.
.
Bathroom panin ka kal a, ka ke chu a kawm tawh loh vangin kal pangngaiin ka kal thei tawh bawk. Ka thawmhnaw phelh lovin tui vawt zet chu ka inphuhtir a, “Jeff_ Jefferson DeLourde! Jef-fer-son-De-Lourde!” tiin ka phun mawlh mawlh a.
.
Ka inbual zo a, kan nupa pindanah lutin ka thawmhnaw bawm ka hawng a. Ka inthlak fel hnuah ka sulhnu berh zawng zawng chu ka tifai ta mial mial a. Engkim hi a hma ang chiah khan danglam awm miah lo va ka siam vek angai a ni. Rilru hmanhmawh ru deuh takin ka che zung zung a, in pawn lama  thawm ri niawm tak ka hriat chuan ka duh ang ka tizo vek tawh. In chhung chu ka enkual thuak thuak a, he in ah hian ka let leh tawh kher lo ang, chuvang chauha engkim ennawn leh ngat ka ni. Kawngka inhawng ri ka hriat hnu chuan in hnunglam atanga chhuahna kawngkhar atangin ka in tia ka sawi thin ka pasal nena kan chenna hmun chu ka chhuahsan ta.
.
Ka la awih thei lo! Ka rilru a fim hma khan ka pasal ngaihtuahin ka rilru ka seng a nia leh! Jefferson DeLourde hi ni hnih liamta atang khan ka pasal a ni tawh lo. Amah leh a ngaihzawng khan an awm dun theih nan min that a ni! Min paihna hmun atang khan damin ka chhuak leh tih an hre hauh lo anga, ka dam chhuah an beisei hek lovang. Kha hmun tawp takah khan thi paihin min paih a, tunah hian khawvelah ka awm ve tawh lo nia ngaiin thawveng takin nuam an chen ngei bawk ang chu!
Ka in tia ka sawi thin chu ralkhat atangin ka thlir a, ka pasal leh a ngaihzawng hlim taka an nui tur hmel mitthla chungin ka thawmhnaw berh nuai ka khungna bag chu ka hmer ngawt ngawt a. Ka ngaihtuahna leh ka thisen zam zawng zawng hi huatna/khakna in a luahkhat vek! A dik, khakna nasa tak, mihring tawng reng rengin a sawifiah theih ngai loh tur khakna.
.
‘Jefferson DeLourde, I duh loh I nupui I thah tak mitthi tho leh hian engtiang chiahin nge a tihbuai theih che ilo en chhin dawn ang hmiang!’
VIDA – SheKnows
(Vee-Da)
.
By. Thantei_LauraSean
.
CHAPTER - 2
.
Zan dar 12 a pel tawh. Ka pasal ngeiin thi tura min hnuchhiahna hmun panin ka kal chhat chhat a, ka mittui tla chuan ka khawhmuh a tiphe zo vek tawh. Jeff ka ngaih vang emaw, ka hmangaih em vang emaw a tap erawh ka ni lo. Ka mittui chu ka thinurna a nasat em vanga tla a ni.
.
Ka light ken chu ti engin a hmaa harsa taka ka kalsan hmun tawp tak chu ka lut leh ta a. Ruahmanna thenkhat chu ka nei ve alawm! He hmunah hian chhan engemaw avangin Jeff leh a hmeichhe kawp, ka tana hmeichhe tenawm ber kha an la kal ngei ang tih ka hria. An ni'n fing inti taka min dahtha thei nia an inhriat chuan kei hian ka finkhalh thei tih pawh engtik niah emaw an la hrechhuak dawn khawp mai.
.
Ka thawmhnaw huh zawr vek chu ka khung chhawnna polythene bag atangin ka la chhuak a, lei tawih uih deuh nghur ah chuan ka vawm hlawm tawp a. Ka bag fai zawk ka mamawh tur thil ka khungkhawmna atang chuan bakcheh ka phawrh a, mumal lo tak leh ramsa seh chhiat anga lang thei turin ka thawmhnaw chu ka chep nawi ta a ni. Thil hriam tak hmanga chehnawi anga a lan loh nan ka hna chu ka uluk khawp mai. Thil rinhlelhawm hnuchhiah ka tum lo. Ahmaa min tuamna thil na deuh relh rulh nia ka hriat pawh kha enga ka hmuh theih hnu chuan ka hriat than tak chhuat puanphah a ni tih ka hria. Ka thinlung na lutuk chu ka rum chhuak ta hawk hawk a. A rapthlak hi ka ti em a ni. Mipa, amah hmangaih em em tu nupui neitu hian a nupui chu hmeichhe dang vangin thah a pawiti lo va_a pawiti lo ringawt pawh ani lo, min that a ni_Min that! Tunah hian a nun atanga min paihchhuah tak avangin lawmin a nui ngei ang chu... Ka mitthlaa ka pasal hmel hmu chung chuan ka theih tawpa nain ka chep sawk sawk a.
.
Thi tuama min tuamna chhuat puanphah chhah deuh tleuh tloh pawh chu ka chep chhe tel ta zel a. Hetiang thil hi an hmuh hun chuan ka ruang chu ramsate'n an eizo vekah an ngai ngei ang. Ka thiltih ka zawh meuh chuan ka kutchang a pilh pheng phung a, mahse na ka hre eih lo. Ka kut pilh ai chuan ka thinlung natna hi a nasa zawk fe a ni.
.
Hmanhmawh hauh lo leh ka sulhnu chulmam zel chungin chulai hmun chu ka kalsan leh ta a. Mutna tur hmun ka mamawh tih ka hria. Ka taksa a chau lutuk tawh reng reng bawk. Ka tui pai chu ka in khawlh khawlh a, khawpui pawna riahna tur ka tana hmun him lam nia ka hriat chu ka pan leh ta poh a.
.
Zing lam dar 3 a pel tawh. Hotel lun lo tak pindanah awmin khumah ka thu meng kar a. Tunah hian ka chunga thil thleng mek hi beihlet dan tur ka duang mek a ni. Ka awm chhung na deuh vet vet chu ka dawm vang vang a. Ni hnih liam taa ka chunga thil thleng kha ka ngaihtuah chhuak leh ta bawk. Mangchhia ah pawh a chhe ber, mihringin ataka kan tawng ngai loh tur thil nia ka ngaih ka chunga thleng mek hi a rapthlak lulai em a, muhil thei chi ziazang ka ni lo. Tunah chuan engkim chiang lehzualin ka hrethiam tawh a, hun rei tak chhung bumin ka awm tih inhre miah lovin hlim takin ka nung a, keimah ang mihring hi an awm pawh ka ring lo. Jeff ka rinna chu ka tan thang  hlauhawm ber a lo ni a, a hunlaia engmah ka lo hrethiam lo kha thil mak a ni lo. Mihring hi a thil tuma hlawhtling turin a lo inthup thei em a lo ni e. Chinghne beram vun sin chu nepte nepte!
.
NI HNIH LIAM TA KHAN –
FLASHBACK*
.
"I inpeih dawn tawh em?" Jeff chu kan nupa pindan kawngka bulah dingin a inpeih thlap tawh a, ka bengbeh beh tha mawlh mawlh chung hian ka pan a. "Ka nupui hmeltha tak hi a nalh takzet. Kal chhuak lovin zankhuaa hmangaihna chenpui ka duh zawk.." ka beng bulah a phun sar sar a, zei lutuk hian ka nghawng a fawp kual dan dan a.
.
"Kan dam chhung atan hun kan nei alawm." hlim zet hian ka nui har har a, a nghawngah ka kuah chial a. Amah ang tho hian in-a awm ka duh zawk ve tho. Mahse zanin hi hun pawimawh tak a ni. Kal loh ngawt theih a ni lo. Jeff hian kan intawn hma atang tawhin ama pualin sumdawnna a buaipui a, zanin hian a hlawhtlinna kan lawm dawn a, kan chhungte leh kan thianthate zawng zawng pawh an lo tel vek ang. Ka pasal tana hun pawimawh takah hian nuam taka hun a hman theih nan kei pawh ka theihtawpa nalhin ka inchei ve reng a. Thil nalh leh mawi hre tak ka pasalin nalh minti anih chuan ka nalh ngei tih ka pawm hmiah bawk.
.
"Hetah hian lo awm lawk." ka hmuiah min fawp zauhin pindan ah chuan a lut leh rih a. Reiloteah lo kir leh thuaiin thil engemaw hi a keng a, a kut chu hnunglamah a dah tlat thung.
.
"Eng thil  nge a?"
"Inher rawh." tiin min nuih sak a. A thuawihin ka inher ve mai bawk a. Ka nghawngah thil vawt thlerin min deh chuan ka phu deuh zawk. Ka awm chu ka khawih vat a, eng thil  nge tih ka hriat chuan ka thaw halh a.
.
"Darling!"
"Ka hmangaih zia che lantirna anih hi. Min han en teh le?" ka banrek tawn tawnah min vuanin a lam hawi tur chuan min kuaiher a, ka hmel min en leh zet hnuah ka  nghawnga thi hrawl zet chu a en leh a. "Ka rinlawk ang chiah.. Khawvel hmeichhia zawng zawng zingah i tha filawr lak.."
.
"Oh! Duhtawk teh!" ka nui hak a, amah chu hnaihin a hmuiah ka fawp a. Inla hrang leh thuaiin
"Kan kal vat loh chuan party min lo tansan ngei ngei ang. Kal tawh ang." ka serious tih a hmuh chuan thildang ti tawh lovin pindan kan chhuahsan a, kan in atang chuan kan kal chhuak ta a.
.
"Mrs.DeLourde, tunah hian eng thil nge i duh ber?"
"Ka pasal baka thil duh dang ka nei lo."
"Chhanna dang min pe ngai dawn lo anih hi." a mitmenga lawmna langchhuak hian min en a, ka kut chu car steering wheel a vawn lohna lam zawk chuan a hmer vang vang a. "Ka hmangaih che."
.
"Chu aia nasa chuan ka hmangaih che." tia ka chhan chuan mawi zet hian min nuih a. Ka sawi uar hauh lo a nia, ka pasal tluk tur emaw a aia tha emaw hi khawvel ah hian an awm ka ring lo. Ka ring lo chauh pawh ani lo, an awm lo hrim hrim. Kum khat chauh kan la innei a, ka hriat theih chinah ka nuna kum khat hlimawm ber a ni. Engtiklai pawhin ka hlimna tur a duh tih ka hria a, min duhsak ang chiahin kei pawh hian atan engkim a tha ber vek ka duh sak a, ka theihtawp ka chhuah bawk. Zanin pawh hian a beisei miah loh thil a tawng ngei dawn a ni. Lawm avanga a hamhaih tur hmel mitthla chungin ka nui seih a.
.
Party-na hmun tura kan ruat 'MOONEY YATCH'awmna hmun kan thleng a, kan mi sawmte an la thleng lo tih ka hmuh chuan ka thaw huai mai. Ka duhthusam ang chiahin kan hun ruat aia 20 minutes zeta hmaah kan thleng a ni. He Yatch hi pasal ka neih min lawmpui nana ka pa min pek a ni a, tunah chuan ka ta ni lovin Jeff ta ani ta zawk mah. Kei aiin a hmang tangkai zawk daih bawk. Kan misawm lo kalte welcome turin Jeff chuan min kalsan ta rih a.
.
"Hey, Vee_ Vida (Vee-Da tia lam tur~Thantei), ka lawmpui che. Pasal tha leh fel nei chuan hun hlimawm i hmang reng mai anih hi." nghet mah mah hian Maddie chuan min kuah thlawp a, a nui hawk hawk bawk a. Ka thiani hi chu ka hlim chuan a hlim a nimai. Hetiang thiantha ka nei hi tuma'n min thik ka ring lo.
"Khawi maw, ka lo en chiang che! Umm, hmanni-a i hak ai chuan tuna i kawr hak chu i nalhpui zan mai." ka hmaah dingin a kungzungpui a tipir va va a.
.
"Hmanni pawh khan nalh min tih em kha."
"Ka hria alawm_ Mahse..tlemin tlemte chiahin tun ami hi a nalh zawk.." a ti tha leh a.
"Nang pawh i lang nalh reng tih ka hrilh phawt che angai leh ta a ni maw..." kan thian dun chuan kan nui hawk hawk a, kan bula Jeff lo kal chu hriat pawh kan lo hre mai lo.
.
"Eng chungchang nge kan sawi mek kha?" tih pahin ka kawngah min rawn kuah a, ka chalah min fawp zauh a.
.
"Oh, Jeff, ka lawmpui che. Hlawhtlinna ropui tak anih hi. Hlim reng ang che u."
"Kan lawm e. Gregor a lo kal thei dawn lo tih ka nupui hian min lo hrilh a."
"Nia, nangni pawh kum khat dang a ral leh hmain kan awm ang hian in awm ve tawh maithei asin. Naupang an awm tawh chuan kan duh dan danin kan khawsa thei tawh lo anih hi. Mahse a hlimawm zia in la hrethiam ve mai ang."
.
Maddie thusawi awmzia hriain Jeff chuan mitmeng nung sar hian min en a, "Ka beisei." tiin a chhang sap a.
.
Party vanglai a thlen meuh chuan ka chau tan der mai. Tun mai khan Maddie chu a fanu khawsik a zual vangin a haw tawh a, Lawng bathlar thleng bak ka thlah ta lo. A fanu pawh a dam leh thuai ka beisei a, ka lo tawngtaipui tur thuin ka thlah ta ngawt anih kha.
.
Lawng chhung lamah ka lut leh a, lamna tura hmunawl zau takah chuan mi thenkhat an lam a, music Tang zet chuan ka chauh a tizual ni hian ka hria. Jeff chu ka mitin ka zawng a, ka hmu mai lo. Lawng chuanhnuai lamah a awm a nih ringin muangchang hian thinga siam step hnum hlurh chu ka zawh thla a. Zanin ang hun nuam tak turah chawpchilh deuha ka nu leh pa an lo kal theih loh tur thu ka hriat khan ka hnual deuh rawih a ni. In atanga kan chhuah khan Jeff hian min hrilh nghal mai lo va, Party tan anih hnuah ka zawta min hrilh ta chauh lehnghal a. Lungawi lohna tihlan hun a nih loh vangin engmah ka sawilang ta lo. Jeff hlawhtlinna hi an mit ngeiin min hmuhpui ve se, an bulah chhuang taka ka pasal thawhrim zia sawite pawh ka duh ve bawk a. Keimah vang chauha tun dinhmun thleng  hi a ni lo tih tihlan ka duh em em laiin a engamah min rawn hmuhpui dawn ta lo anih hi.
.
Lawng hnuailam choka zau tak awmna chu ka pan a, hnathawk ho pawh a tha ber leh a tui ber ber kan mi sawmte hmaa an chhawp chhuah theih nan eitur leh intur siamin an lo la phe buai khawp mai. Wine cabinet panin ka wine ngainat ber chu ka hawng a, no-a thli chhuak lovin ka lem khalh a.
Jeff pawh chu khawiah nge maw a awm le?
.
Lawng chuanhnuai atang chuan chunglamah chho lehin ka pasal chu ka zawng ru reng a, tunang hunah hmuh mai theih loh tura lo kalsawn daih  nachhan tur thil pawimawh a awm ka hre si lo. Bakah, ka ngai tawh reng reng bawk.
.
Mi thenkhat an lam luih luihna sir, lawng bathlar tlema fal deuhah chuan ka pasal chu ka va hmu ta hram. Hmeichhe pakhat nen hian an lo inbia a, chu hmeichhia chu ka hmu tawh thin nain khawiah nge ka hmuh tawh thin chiang takin ka hre mai lo. Min hmuh rualin Jeff chuan an dinna hmuna kal turin min duh tih tihlang hian min lo hui ve vat a.
.
"Poncik, heihi ka hnathawhpui tur Kiara anih hi. Chuan, ani hi ka nupui duhtak Vida_Mrs. Vida DeLourde."
.
"Chibai le. Mr. DeLourde hian hun reilote chhungin i hming vawi engzat nge a sawi hman i hre duh em?" tiin nelawm tak hian min chibai turin a kut sin sil sel chu arawn pharchhuak a, hawihhawm takin ka lo vuan thuai a.
.
"Chibai le. Kan inhmu thei chu ka lawm hle mai. In laklawh loh chuan ka pasal hi biak lawk ka duh a." Kiara chu nelawm taka nuih chungin Jeff lamah chuan ka thle zauh a.

"Oh! Tehreng mai. Kan la inhmuh leh fo ka beisei."
"Kei pawhin le."
.
Kiara a kal hnu chuan Jeff banah ka kuah a, 'eng thil nge i sawi duh chu' tih melha min melh chungin min kuahlet a.
.
"Thil engemaw hmuhtir tur che ka nei a nia."
"Thil dang hmuh ka mamawh tih ka inhre miah lo mai." chiang zet hian ka mitah min en a, ka hmuiah min fawp vang vang a. Engemaw chen hnuah ka inlahrang ta hram.
.
"Helamah lo kal rawh." a kutah vuanin ka kalsawn pui a.
.
Lawng bathlar hmar lamah kalin ka duh hun taka hmeh tur ka purse-a khawl tereuhte ka dah chu ka phawrh a, ka hmeh rual chiahin kan awmna piah tlang bial, feet sangthum zeta zau chu a eng vek dawn a ni. Ka pasal hlawhtlinna ka lawmpui nana ka thilpek a ni bawk.
.
"Maimitchhing rawh le." tiin ka nuih seih a, a ngaihna hriat loh hmel tak hian min en ringawt. "Vat vat_Maimitchhing rawh."
.
"Engnge i tih dawn?"
"Ka sawilawk chuan a ho zo vek ang. Khawngaihin, maimitchhing teh_"
"Anih le.."
.
Thuawih tak hian a maimitchhing a, ka khawl tereuhte ka hmeh hnu chuan meng turin ka hrilh a. Ka beisei lawk ang chiah! A makti hmel chu hlim lutuk takzet hian ka en a, ka kuah lo thei lo.
.
"Ka thilpek che hi i pawm theih ka beisei."
"Eng maw?"
"Aw, heihi i thawhrimna vanga thilpek anih hi." amah la kuah reng chung chuan a sir zawngin ka thilpek chu ka en a, ani pawh chuan mit khap miah lo hian a en ve reng bawk a.
.
"Hetiang thilpek dawn hi ka phu reng em?"
"Awww, come on. Darling. Khawvel hi hel chhuak vek mah ila nang aia thawkrim hmuh tur an tam kher lo vang. Bakah, i nupui ka nih angin thilpek ka pe theilo ang che maw? He thil hi tu min pek nge?" tiin ka thi awrhlai chu ka khawih zauh a.
.
"Ka pawm e. Ka nupui thilpek anih vang chauha pawm ka ni ang."
"Ka lawm e. I duh chuan 'JEFFIDA' (Jeff & Vida) tiin a hming i phuah thei ang. I duh loh pawhin_"
.
"Ka pawm e, ka pawm e! Tunah lawmthusawi nan ka nupui hi ka fawp thei tawh angem?" ka chhanna pawh nghak chuang lovin lungchim zet hian min fawp vawng vawng a. Ka lo chhang phur fahran bawk.
.
Ka pasal hmangaih leh ringtawk em em a ka fawh hnuhnun ber_ Ni lo, ka damchhunga ka theihnghilh tawh loh tur ka pasalin min thlahna a ni tih hrelawk ila ka fawp hauh lovang.
.
Engemawchen hnuah chulai hmun atang chuan kan kalsawn a, zan a lo rei ta khawp mai.  Kan misawm thenkhat ten min tinsan tan a, 15 minutes vel chhungin an haw zo deuhthaw nghal mai a. Kei pawh ka mut a chhuak a, in a haw vat a ka pasal kuahna hnuaiah thlamuang taka mut ka chak tawh takzet.
.
"I chauh hmel hle mai.." a kut lum thar thar chuan ka dar arawn hmet a, ka ring kham tihreh tumin ka dinglam leh veilamah ka thle tawn a.

"I hre sual ngai miah lo. Mut ka mamawh tawh takzet."
"Engnge i mamawh chu ka hria alawm.." ka dar la hmet reng chung chuang ka beng ah min fawp a, a nui deuh hak bawk a. "Kan haw ve nghal mai dawn nia. Kei pawh ka chau ve tho mai. Um, Kiara kha kan ruala a haw ve angai a, pawi i tih loh ka beisei."
.
"Pawi lo ve. Ka pasal hnathawhpui tur chu hriatchian te pawh ka duh ve ang chu." a lam hawia inherin ka nuih sak a, ani chuan ka kut la kangin a fawp zauh thung a.
.
"Okay, anih chuan kal nghal mai ang aw."
"Okay."
.
Mooney Yatch atanga kan chhuah hnu chuan Kiara chu a tawng barh barh reng a, hmeichhe tha leh fel tak a nih ka ring ve tawp a ni. Jeff-a'n car kawngkhar min hawnsak hnu chuan ka thu lut thuai a, Kiara pawh passenger seat ah a thu ve bawk a. Kan tlan chhuak a ni nghal deuh mai.
.
"Darling, tui in tur kha hetah hian ala awm em?" ka thil ei thenkhat khan ka tui a tihal anih ka ring.
"Ka hre miah lo."
"Kiara, i thutna bulhnaiah khan a awm mial lo maw?" tui in tam thang ka nih vang leh tui in tam that zia ka hriatchian vangin Jeff pawh hian in tam se ka duh a, a car-ah pawh hian nitin tui ka dahsak ziah a, tunah pawh hian a awm ngei tur a ni.
.
Kiara chuan min chhang mai lo. A enkual anih ka ring.
"I thutna dinglamah khan a awm ang." ka ti leh a.
"Oh! A awm e. Hei aw." arawn tih chuan amah pawh en lem lo chuan ka hmai bul seta a bottle rawn lekchhuah chu lain ka in nghal a. Ka dai sawng sawngin ka hria.
.
Mahse ka tui in chuan rim a nei ta tlat! Zingah khan keimah ngei hian car-ah hian ka dah a, tui thianghlim ngei ka dah tihpawh ka chiang khawp mai.
.
"Tui hi a rim a dik lo. Thil dang dah nan i hmang em?" Jeff chu ka en a, min en lo hian kawng a en ngur ngur a. A biang a sehruh deuh talh talh niin ka hria. A thinrim ti dawn ila thinrimna tur engmah a awm si lo. Min chhan loh vang chuan ka ngawi zui ve mai a, Kiara a awm ve bawk avangin a thinrim em tih zawhna hun pawh a ni chiahin ka hre lo.
.
Kan tlan zel a, 5 minutes pawh a la ral lovang tihah ka pum arawn na tan ta! Na tak a ni. Thawtlawkna awm miah lo hian ka thlanfim a bawl nghal tawk tawk a, ka thaw hleithei ta lo.
.
"Darl_ing_ Ding teh_ Ka thaw thei lo!"
Jeff chuan motor chu a tiding mai dawn emaw ka tih laiin chak lehzual hian kan tlan ta hlauh zawk a, tawng leh ka tum chuan ka aw a chhuak thei ta miah lo. Ka hlauthawng lutuk takzet! Kan hnunglamah min umtu an awm niawm tak han Kiara chu phun nawk nawk chungin a hawilet zawk zawk tih ka hmu a, ka mit a phe zui ta bawk nen chiangin engmah ka hmu thei lo. Ka rilru chuan Jeff chu ka ko mawlh mawlh a, ka mangan tawpah kawngsirah hian motor chu a ding chik ta tuarh a.
.
Kan din rualin phun hluk chung hian Jeff chu motor atangin a chhuk a, ka thutna lam kawngkhar chu hawng rawpin min rawn kuah a.
.
"Eng thil phiangsen nge i tih hi? Hmanhmawh a tulna a awmlo tih vawi engzat nge ka hrilh tawh che.." a ti khur khur a. A tawng chu ka hriat a hlau eih lo. Keimah min be lovin Kiara chu a bia tih ka hria.
.
"Ka nghak thei tawh hleinem. A khawih ringawt che pawh hi hmuh ka duh tawh lo. A thih hi a tha zawk!"
.
"Lalpa, Poncik_ I harh em? Ka tawng i hria em? Meng teh, meng teh.." min sawi nawk nawk a, tha reng reng ka nei ta lo. Ka rilru pawh a harh lo thuai dawn tih ka inhria. An inbiakna tawngkam chuan ka thinlung hi a vit sawk sawk bawk.
"Eng thil nge i hman? Phiangsen che hian! Kiara??"
.
"Tikhan buaipui duh suh. A nih tur ang angin damdawi khan a hna a thawk vek tawh. Nang leh kei hi kan zalen ta tihna anih kha, lawm hle zawk rawh." chiai miah lova Kiara tawngri chu ka hriat theih hnuhnun ber a ni ta.

END OF FLASHBACK*
.
Khum lu lam kotlang chu na vak lo hian ka tukkhumin ka tauh tlauh tlauh a, khatiang thil zawng zawng kha ka theihnghilh thei dawn lo. Theihnghilh tum pawh ni ila ka dam chhung hian theihnghilh tih ni ka nei dawn chuang lo reng reng.
Ka en ngai ka en tlawk tlawk chu duhtawkin tukverh lam ka hawi a, khua a var ta tih puanzar chhah vaklo chhana ni zung lo lut raih atang chuan ka hre mai a. Ka pindan kawngkhar a rawn ri ve chiah bawk.
 
VIDA – SheKnows
(Vee-Da)
.
By. Thantei_LauraSean
.
CHAPTER - 3
.
Ka ngaihtuahna a lo lut hmasa ber chu min hmu turin tunge lo kal tih zawhna hi a ni. Khum atang chuan ka tho awt a, tupawh lo kal se ka inring nghal a ni ber.
.
"Room service." tih ri ka hriat chuan ka inthlahdul thuai a. Kawngka bulah dingin hawn tumna ka nei lo. Ka dinhmun hetiang anih rih vang hian ka tan mihring tupawh an  hmel hmuh rih loh a tha zawk tih ka hria.
"Eng nge ni ta? Ka laklawh khawp mai." tiin room service chu ka chhang a.
"Tukthuan i duh dawn em? Chanchinbu ka lo keng bawk a." ati bah deuh nak a. Tun ang khawvar tantirh chauhah tukthuan ka duh leh duh loh minzawt chu thil pangngai niin ka hre lo. Chanchinbu chu thuhran ah lo dah ila.
.
"Duh ka neih chuan ka lo order mai ang. Chanchinbu chu lo dah la, ka lo la mai dawn nia." pangngai thei ang bera lang turin ka tawng a, buai tak tak anga ka lan theih nan thawm ka siam lui bawk a.
.
"Aw le." tia min chhan hnu chuan a kalsawn ta anih ka ring a thawm a reh vang vang mai.
.
Engemaw chen hnuah kawngkhar chu zimtea hawngin ka lu chiah lawrin ka dak chhuak a, thil danglam deuh hmuh tur a awm lo. Zan lama a lan dan aiin khua a han en chuan Hotel hlui tawh zia chu ka hmuchiang ta chauh. Room service-in a hnuchhiah chanchinbu chu lain kawngka chu ka khar a, chhung lamah ka kalh nghal thlap a.
.
Chanchinbu phek hmalama ka thlalak awm ka hmuh chuan ka phu deuh dawrh mai. Uluk zet hian la ding reng chung chuan ka chhiar a. Ka hmel chiang tak lanna thlalak hnuaiah chuan ka bo thu leh keimah ni awm ang hmu apiang chuan hrilh tura ngenna phone number leh email address a awm thlap bawk. Chung address zawng zawng chu tu dang ni lovin ka pasal address vek a ni. Min ngaihven leh hreawm ti niawm taka chanchinbu darh zau ber pawla ka bo thu a chhuah ngam ringawt pawh chu rapthlak ka ti a, rapthlak ka tih tluk zetin ka thinurna a sosang leh ta bawk. Insum hman lo hian chanchinbu ka hlawm khawr nawk nawk a.
.
"Mihring pawh i ni lo! DeLourde_DeLourde! Zak ngawih ngawihin ka la siam dawn khawp che." insehruh chungin ka tawng khur hlawk hlawk a. Ka aw chauh ni lovin ka taksa pawh a khur tel. Heti khawpa  nasa hian mihring thin a lo ur thei a nimaw?
.
Ka chanchinbu hlawm chu bawlhhlah bawmah vawm lutin khum-ah ka thu hnawk a. Tunah chuan ka hmel pangngai pu chung hian khaw en laiin pawnah ka chhuak thei lo. Min hmua min lo hria an awm palh hlauh chuan ka thiltih tur zawng zawng a hlawhchham nghal ang a ni ang.
.
Phone la kangin tukthuan tur ka order a, kawngka bula hnuchhiah mai turin ka chah nghal thlap a. Tui sa tha ver vawrah inchiah phawt ila thil tha zawk ka ngaihtuah thei ang chu.
.
30 minutes vel a ral hnu chuan bathroom atanga chhuakin ka thawmhnaw hak ngai bawk ka ha leh a, in atang khan thil langsar tur ka lakchhuah ngam loh vangin thawmhnaw dang ka nei rih lo hrim hrim a ni.
Room service-in ka tukthuan tur a lo dah diam tawh chu ka lalut a, ka riltam vang ni hauh lo hian ka ei bawrh bawrh a. Thahrui tam tak ka neih a ngai dawn tlat a ni. Engkim hi uluk taka ka ngaihtuah lawk vek a ngai tih ka hrechiang em em bawk.
Tukthuan ka ei zo va, khaw en chhung chuan ka chhuak thei dawn chuang lo bawk nen tangkai taka hun hman duh siin pindan chhungah chuan ka vei tawn sek a.
.
Tlai lam dar 3 vel a  nih chuan pawna chhuah chakin ka za sek tawh. Tunah hian ka nu leh pa pawh mangang takin an awm  ngei dawn a, ka dam tih thu hi phone emaw hmanraw dang hmanga hrilh chi anih loh vangin keimah ngei ka nu leh pa in ah ka kal ang. Khua chu thim vat vat se tiin tukverh-ah ka va dak leh ringawt thin.
.
Jeff nen kan chenna in atang khan ka nu leh pa chenna hmun hi darkar hnih chhung zet kal a ni a, rel hmanga ka kal anih chuan tlemin ka thleng hma deuh thung ang. Khua a thim tan tihah ka pindan chu ka chhuahsan a, zana ka riah man an chhiar aia tam daih chu ka khumah ka hnuchhiah bawk a. Nizan hotel ka thlen khan pitar upa tawh tak pakhat chauhin min hmu kha a nia, ka tan thil a awlsam phah ta zawk anih hi.
.
Ka kawrhak lukhum chu khumin ka hmai lang lo tur ang berin kawng sirah ka kal a, ka rilru a hmanhmawh khawp mai. Ka kawr ipte-a pawisa la awm chuan Rela kalin ka nu leh pa awmna hmun min la thlen tawk tawk ang.
Lungkham nei hauh lo leh hlim taka kawtthlera kal suau suau ka hmuh te chu ka awt a, ka buaina ang leh ka thil tawn ang tawng ve hi an awm ka ring lo. Nupa, inngaizawng niawm tak inthlahlel hmel taka inkuah rial rial ka hmuh te chuan ka thin an tiur hlur vek a, hlim taka thianho nui thawmte pawh chuan ka vanduai bik zia min hrilhnawn nimai hian ka hria. Nu leh pa pan tur neilo  ni phei ila.. Ka ngaihtuah ngam lo zawk e!
.
Lei hnuai rel awmna luh thlakna tur pengah chuan chhukin ka kal hlawk hlawk zel a. Ka rel chan a lo thlen chuan lut vatin mi dangin ka hmel an hmuh chian theih loh nan ka thutna bula chanchinbu awm chu ban vatin ka hmai zawnah ka pharh a, a chhunga thu inziak chu ka chhiar miah lo thung. Mipui hman thin Rel-a ka chuan vawikhatna a ni tih ka ngaihtuah chungin ka bul hnaia thu pa upa tawh lam chu ka melh zauh a, ani chuan chik zet hian min lo en a. Hawihhawm chhuahin ka nui ta ringawt.

Chu putar hmela thil chikna awm ka hmuh chuan ka tim deuh nain pangngai thei ang ber hian ka chanchinbu ken chu ka ensan a, ka thlalak awm kuau mai ka hmuh chuan hawisawn ngam tawh lovin ka bih ta ngar ngar a. Putar pawh chuan min chik zui ta lo niin ka hria. Chanchinbu ah hian ka incheina thlalak tarlan a ni a, tuna ka landan nen chuan min ringhlel hauh lovang tiin ka ngaihtuah leh rih. Bakah tumah hian Cappolo hmingpu he relah hian an chuan ve an ring dawn lo hrim hrim.
.
Chanchinbu a thu inziak thenkhat chu ka chhiar a, zinga ka hmuh tawh  nen khan a thu ziak chu a danglam. Hetah hi chuan ka bo dan chipchiar deuh zawkin a inziak a, ka chhiar zawng chuan ka ner sawk sawk lo turin ka insum fe mai. Mi fing verther Jefferson DeLourde hi ka rinphak bakin a lo fing verther anih ngei dawn hi. Thu inziak zozai chu engtin nge a phuah thiam zawk? Atana mi pawimawh  ber hloh ta ang maiin a inziak kur luai a, hetiang taka thu thiam a nih pawh ka lo hre ngai lo. Ama hming aiin ka pa hming vang hian mipui ngaihven a hlawh em em dawn tih ka hria, tunah chuan ka bo thu hi mi tam zawkin an hre tawh hial ang. Hmaichhana in hmuha a sual verther zia leh ka chunga a thiltih tenawm zia sawi chunga a hmai, a hmeltha taka nawr sawk sawk mai ka chak hluah hluah. Ka ngaihtuahna avang chuan ka chanchinbu ken chu ka hmer ngat ngat a. Min lo chik an awm anih chuan mak min ti ve khawp ang.
.
Chak takin ka chuanna rel chu a tlan pur pur zel a, darkar khat leh a chanve awm vel kan tlan hnu chuan ka tumna hmun station a thleng ta. Ka kawrhak siam tha sauh sauhin rel atang chuan ka chhuak a, ke in ka nu leh pa chenna hmun ka pan ding nghal a. 20 minutes chhungin ka thlen theih ka ring.
.
Ka nu leh pa chenna hmun ka thlen chuan ka thlan hluam tawh a. Ka awm chhung na deuh vang vang chu ka hre leh ta. Ahma pawh khan ka hre tawh. Gate chu duh duha luh mai theih anih loh vangin security code enter na tur pad chu hmeh tumin ka ban a, motor tlan thawm ka hriat chuan ka tawlhkir leh rih.
.
Ka lam pana car lo tlan ka hmuh chuan rem leh rem lo hian thingbuk hniamte bulah chuan ka bawk rawk rawk a. Jeff car a ni tih ka hmu hman hram. Ka nu leh pa bulah hian eng thil nge tihtur a neih? Gate chu in inhawng a, in chhung lama awm ten a lo kal dawn tih an hresa tihna a ni. Ka nu leh pa te'n Jeff thiltih hi engmah an hrethiam dawn lo tih chiang takin ka hria a, kei, a nupui  ngei pawhin rinhlelhna ka neih miah loh chu ka nu leh pa phei chuan rinhlelh nachang an hrelo lehzual ang. Gate-ah chuan car chu a tlan lut a, gate inkhar leh hmain ka tawlh lut ve vat a. Eng thil chiah nge thleng tih hre hman tura helai ka thleng hma hlauh hi ka lawm khawp mai. Jeff hian ka nu leh pa chungah eng thil nge tih dawn tuma hriat a ni lo. A tha zawngin ka ngaihtuah thei der lo bawk.
.
Ka nu kawngkhar hawna Jeff lut lai chu ka en reng a, kawngka a inkhar leh hma chuan ka nu'n lainat takin Jeff chu a kuah tih pawh ka va hmu hman. Phiangsen hian a!
Thawm dim takin in chu ka pan hnai a, min hmutu an awm loh ka beisei. Nausen ka nih atanga pasal ka neih hma zawnga ka chenna in hi ka hrechiang tawk a, in chhunga awmte hriat miah loh a luh dan pawh kei aia hrechiang an tam lovang. High school ka kal laiin vawi engemawzat ka nu leh pa hriat lohin ka chhuak ru fo tawh thin.
.
In chhim lam atanga luhna chu awlsam taka hawn theih a ni tih ka la hrereng a, he kawngkhar hian hunbik a kan chhungkaw thutkhawmna pindan a pawh a ni. Tun ang hunah tumah an awm dawn lo tih lah ka hrechiang. Chhim lam pindan-ah chuan awlsam takin ka lut a, Jeff leh ka nu leh pate awmna tur nia ka rin lam panin thawm dim tak bawk hian ka kal them them a.
.
"He thil hi ka awih thei lo. Engtin nge a thlen theih? Aw, ka fanu neihchhun, tanpui theih che ka va duh tak em!" ka nu chu sofa-ah thuin a tap hlawp hlawp a, ka pa pawh hmel diklo tak hian ka nu kuah chungin a bulah chuan a thu bawk a, a mitmeng atang chuan a mittui a seng fe ang tih ka ring. Keimah vanga ka nu leh pa lungngai hmel chuan ka thinrimna tizual sauh a ni. Jeff pawh chu chair-ah thuin a kun deuh lap a, a lungngaih hmel khawp mai! Chinghnia! Mi tenawm!
.
"Police te chuan a ruang an la hmu lo amaw? Eng mihring nge an nih, chuti em em a an hna a han chak loh mai chu?” ka pa tawng chu a ring lo khawp mai hetiang hmelpu hian ka la hmu ngai hek lo. Thu chiang hriat vat vat ka duh rualin ka ngaihtuahna a  buai tak meuh meuh. An tawngkam atangin ka thih dan ni awma lang thei thu an hria tih a lang a, chu thu chu enge anih ka hre si lo.
.
“Karei! Engtin nge chulai hmunah chuan a kal theih reng reng. Khami zan khan eng thil nge thleng?” k anu chu a tawng hleithei achha chu a ni e.
.
“Chiangin ka hre rih bik lo. Mooney atang khan lungawi chiah lovin min hawsan a, kawnglakah misual tuemaw ten an lo tiding pawh a ni thei. Dik tak chuan khalai hmun tawp takah khan__” tiin Jeff chu a ngawi dat a, a sawi tur chu sawi huphurh awm em em hian a thaw hawk a_ “a thawmhnaw them an hmuh teuh thu min hrilh a!” a aw chu a tham ral a, a kuta a hmai hupin a khur ngat ngat nimai hian ka va hmu.
Jeff thusawi ka nu’n a hriat chuan awih thei lo hmelpuin a dang sawp sawp a.
“A ni thei lo! Eng thil emaw han ti teh u” tiin a talbuai chu a ni ta der a. Hetiang thil a thlen hi ka hlauthawng reng a ni. Ka nu hian hunrei tawh tak atang khan thawhah natna a nei nasa a, uluk takin inenkawl mah se a fanu thih thu leh a thawmhnaw hak them chauh  hmuh thu hrilh anih meuh chuan a khawlo ngei dawn anih hi.
.
Ka nu chu ka en thei tawh lo. Ka awmna hmun atang chuan anmahni pawh tumin ka pen a, vanneih thil ka ti dawn nge vanduai thil ka ti dawn, ka bula vase awm chu khawng palhin a tlu keh chhuai a. Kawngka phena awm ka nih vangin keimah chu min rawn hmu thei lo hlauh thung. Vase keh chuan thil atthlak ka tihna tur lak atangin min chhanhim tih hriain a rang thei ang ber hian ka kalsawn ta nghal a. Ka nu ka lainat vanga ka mittui tla chuan ka khawhmuh a tiphe ruai mai bawk. Ka rilru let phut khan va pawh ni ila Jeff leh Kiara ten ka laka an thiltih hi ka rullet thei dawn lo tih ka ngaihtuah let chuan vase ka khawng hlauh chu ka lawm letling hle zawk. Hun remchang a awm anga ka nu leh pa te hi ka pawh hmasakber tur anni tho tho a, Jeff erawh hi chuan alaka ka duh ka tih hma chuan ka dam tih a hre dawn lo hulhual thung.
.
An tawng ngaithla tura let leh a chi tawh loh vangin pawnah ka chhuak a, vase keh vang khan rinhlelhna an neih loh hram ka beisei. Thim chinah thu sawpin kan in lam chu ka thlir vang vang a. Eng chena rei  nge ka thut ka lo chhinchhiah lo, in atanga hmel ngui nghiai chunga Jeff a lo chhuah chuan ka sana bunlai chu ka en zauh a. Zan a lo rei ta viau mai. Ka pa leh Jeff inbia chu mit lasawn miah lo hian ka en reng a, an inthlah hnu chuan ka pa chu in chhungah lut lehin Jeff pawh chu a tlan chhuak ta nghal a. Ka nu damdawiina-a an hruai mai lo chu mak ka ti deuh khawp mai.
.
Ahmaa ka luhna kawngkhar atang bawk khan in chhungah lut lehin sofa lian zet kan dahah chuan ka mu a. Zanin hian ka nu leh pa ka pawh dawn em tih ka ngaihtuah a ni. Pawna ka pa leh Jeff inbia ka hmuh khan an thusawi hre pha chiah lo  mahila inpawh  hmel tak hian an awm niin ka hre tlat a, thil awmzia chiang zawka ka hriat hma chuan ka nu pawh ka pawh ngam dawn hauh lo mai. Ka pa hi sumdawnna kawngah mi khrih khauh tak ni mah se, kei leh ka nu lakah chuan pa tha ber leh nunnem tak a ni a, a fanu neihchhun pasal nen thil thalo an ruahman ka ring hauh lo. Mahse... Chutichung chuan ka ring ngam rih si lo chu anih hi.
.
Ka lo muhil a ni ngei ang thawm ri deuh nawk nawk ka hriat chuan rang lutuk hian ka tho vat a, ka awmna pindan atang chuan chhuakin ka nu leh pa pindan ka pan ta ngawt a. Thawm chu an pindan atanga chhuak ngei a lo ni bawk. Pindan dang atanga hriattheih khawp chu a ring tawk hle tih ka hrethiam mai.
.
"Duhtak, i tha em? Engtin nge i awm?" ka pa chuan ring tak hian ka nu chu a ko a, reiloteah pindan kawngka chu a rawn inhawng a. Ka tawlhsawn rang teh asin. Ka nu taksa zawi vek chu ka pa'n a pawm a, in hnuai lam panin chak tak hian a kalpui a, a ko pah mawlh mawlh bawk a. Ka rilru buai nasat zia chu min hriatthiampui phak lovang. Ka nu, khawvela ka nu neihchhun keimah vangin thi chhawngin a awm a, engtin nge ka umzui loh theih tia min dem anih pawhin ka dem lo che. Mahse tuna ka dinhmun atang hi chuan engmah ka tithei rih lo. Thihna atanga talchhuak hlim hian thihna bawk pan leh ka hlau rih em a ni.
.
In chhung reh ruai maiah chuan ka veikual rak rak a, ka pa hian zan lamah kan in enkawltute a hawtir vek thin avangin in ah hian tumah an awm lo tih ka hria. Ka nu leh pa pindan ah ka lut a, thil tla darh nuai ka hmuh chuan nichin maia an tal buaina a nih ka ring mai. Ka nu damdawiin-a a awm si chuan ka tan pawh ngaihna a awm lo lehzual ta rih bawk. Anih chuan tunah hian ka theih ang angin ka landan thenkhat hi ka tih danglam a tul a ni.
.
Ka nu leh pa pindan atang chuan chhuakin ka pindan ni thinah ka lut a, ka kal hnuhnun ber tuma a awm ang chiahin engkim a lo la awm thap. Pindan chhung rimtui chek chek chu hipin thawk ka la vang vang a. Ka nu luhna a la rei vak lo tih ka hre mai.
.
Ka thil dahkhawmna bawm pakhat hawngin ka sam rawng tih danglamna tur ka la chhuak a, sam rawng pawl neih hi ka ngaihtuah ngai miah loh ani nain tunah chuan loh theih loha ka put rih a ngai. Ka lei laia ka nuihzat ruk zia ka ngaihtuah a, tun atan hian a tangkai ang tih hre pha lo hulhual chunga ka lei anih tak kha mawle. Bawm chhunga awm ka card pakhat chu ka la ta bawk a. Lirthei  lei nan ka mamawh ngei  ngei dawn, ka lei thar ngam ta lo anih pawhin ka vah velna tur car ka hawh tho a tul dawn tlat a ni.
.
Bathroom-ah ka lut a, ka sam chu la khawm tawpin ka tan hmawk a. Ka chehrual leh deuh hnu chuan hair colour chu ka samah ka tat nghal mial mial a.
.
Minutes engemawzat hnuah darthlalanga lo lang hmeichhia ka hmuh chuan ka nui hak. Ka nuihzat em vanga nui erawh ka ni hran lo. Ka landan chu a mak ta em a ni! Hmeichhe mitmeng paw thip ram mai leh sam tawi deuh pawl vek si chu ka la hmu ngai lo! Nungchang uluk lo taka zanreia vak vel thin hi ang ka inti khawp. Ka nui hmel chu a reh riai riai a. Hetiang thil a tih a tul chhan ka ngaihtuah chhuah chuan ka thinlung a nain thinurnain min luahkhat leh nghal vek.
.
Ka sulhnu ka thenfai vek hnu chuan in chu ka chhuahsan leh ta a. Tunah chuan taxi ah ka chuang ngam ta.
.
"Franklin Avenue."
"Yes ma'am."
.
Zanin hian ka pasal duhtak ni thin khan engtin nge hun a hman hriat ka chak zek zek a ni. Ka nu ka ngaihtuah erawh chuan huatna leh thinrimna nasa tak ka pai chu zia deuhin ka tawngtai ta ngawt a. Misual tawngtaina hi vana Pathian khian a lo ngaithla anih chuan min chhang ngei ang.
VIDA – SheKnows
(Vee-Da)
.
By. Thantei_LauraSean
.
CHAPTER - 4
.
TIP-TOP BAR & GRILL*
.
"Hetah hian ding rawh." taxi fare ka pek hnuah ka chhuk a, Bar chhunga luh tumin ka kal nghal a. Jeff hmun ngainat tak a ni a, rilru hahna a nei anih chuan helai hmunah hian a kal ngei ang. Mi hausa tam takten hun an hman thinna hmun changkang tak tak aiin helai hmun a ngainat zawk zia ka hriatchian vanga helai hmun hi pan chat ka ni bawk. Bar chhungah chuan ka lut a, ahmaa Jeff nen kan kal dun thinlai ang bawk khan engkim a la pangngai_ Ka thil hmuhte chuan ka awm mek dan leh ka dinhmun min hriat chhuahtir a, rilru thlamuang tak chunga a bula ka thut thinna hmun ka hmuh phei chuan ka bing deuh mup mup hial a. Helai hmun la danglam si lo leh Jeff nen kan inkar danglam vek tawh si hian ka lung a tiawi thei lo!
.
"Miss, eng nge i duh ang?"
"Engmah ka duh rih lo." tiin bar nghaktu chu ka chhang a, ka inthununna ka hloh tih ka inhriat ruala nuih lui sakin "Ka tih palh." ka ti sep a.
.
"A tha vek e." a ti ve mai bawk. Kei chauh ni lo nungchang mawi lo tam tak an hmachhawn thin ngeiin ka ring, chutiang a ni chung chuan hawihhawm lo taka ka chhang chu ka inthiam chiah lo. "ka hre tawh ngai che em?" a rawn ti leh a. Mak ka ti deuh.
.
"Hre lo mai thei." tih chiahin ka chhang.
"I hmel ka hmuh thut khan ka hmuh tawh thin i ang em a, mahse i ni lo tih ka hrechiang e. In tur i duh chuan a thlawn in ka pe thei ang che." ti pah hian a mit veilam chu a siai zauh a. Ka nuih zui sak ringawt. A mitmei chu ka hrethiam ve tlat. Zan khat chauh inkawp a, zalen taka hun han hman vel ang hi ka ngainat zawng a ni ngai lo va, a ni ngai hek lovang. Tuna ka hun tawng mek nen phei chuan_nuih a tiza zawk!
.
Ka thutna atang chuan kal chhuah leh mai tumin ka tho a, ka beisei lawk angin Jeff ka hmu dawnin ka inhre lo.
“Sir, a in tam tawh mah mah a ni.”
Bartender hawina lam chu ka en a, kil khata Jeff lo thu reng ka hmuh chuan ka ding leh chawt a. Min rawn hmu lo hian no dawm chungin a en ngai a en ngar ngar a, amah thlithlai anga lang lo tur siin ka thutna ngai lamah ka let leh a. A awmdan han hmuh hrim hrim pawh chu ka mamawh niin ka inhria.
.
Engemawchen ka thu ta. Jeff chu a awmdan ngaiin a la awm ngar ngar a, a thaw leh hawk thin tih ka hmu. A jacket hak ipte a zen a, a phone phawrhin a en ngur ngur phawt a. A pick up dawn lo emaw ka tih hnuah a pick up ta hram. Bul hmuk hmukin a tawng tih hriat tak hian a hmui pawh a che meuh lo. Reilote ah a phone chu off in a ak leh a.
.
"I en uluk hle mai. I mit la zawng atang chuan ka tan chance a awm loh hmel." bar nghaktu pakhat bawk kha a ni. Tawngkaa chhang lovin ka dat ka tiche zeuh ringawt. Kal mai ka duh tawh a, mahse thil thleng tur a awm ni a ka hriat vangin langsar lo lamah ka thu sawn ta nge nge a. Ka thutna atang chuan bar a lut leh chhuak chiang takin ka hmu thei bawk.
.
10 minutes pawh a la ral hman lovang tihah Bar-a Kiara lo pen lut zan zan chu ka hmu ta. A hawiher atang chuan helai hmunah hian a tlangnel lo hle ang tih pawh a chiang nghal mai. Chu ka ngaihtuahna chuan atthlak zet hian lawmna min pe a nih chu! Jeff hian he bar-ah hian a hruai ngai miah lo tihna a ni. Ka lawmna ho leh atthlak zet chu thinurna bawkin a rawn thlak lehnghal.
.
Jeff pana Kiara kal chu ka enzui a, Jeff bulah thuin duat hmel tak hian a kutah a  vuan a. Jeff chu a hmaa a awmdan ang chiah khan a la awm reng. A tawng meuh lo. Rilru hah hmel pu chung hian Kiara tawng sep sep chu a en vung vung a, a fawp ta anih chu! Keimah ang bawkin Kiara pawh chu a hamhaih ta ve ang. Ka thutna hmunah chuan ka kut ka hum ruh ngawt ngawt a, an lak atang chuan ka mit ka la sawn eih lo. An bulah chuan midang tumah an awm ve lo ang mai hian an infawp ngawng ngawng a, an inthlah chuan ka lo thaw ve hawk.
Kiara chu Jeff bengbulah kun hniamin verther zet hian a nui sak a, a phun zui ser ser tih ka va hmu. Anmahni en lo anga lan tumin ka kawr chuar miah lo chu ka zut mar ta ngawt a. Hetiang thil hmuh hi ka mamawh lo tih ka inhria. Ka hriattur thenkhat chu ka hre tawh. Ka laka an duh tak an tih hnu hian ka hun hekin ka zuiru a, ka thil hmuhlet chu rilru natna chiah. Thil dang ka beisei pawh a ni chuang hlei lo va. Mahse ka bansan thei dawn chuang lo tih ka inhre chiang em em. Ka thinlung zawng zawnga ka hmangaih  mipa hian min phatsan tih hi pawm har ka la ti cheu a ni!
.
Kiara chuan Jeff banah vuanin a thutna atang chuan a kaitho a, a in hnem tih hriat takin Jeff chu a ding nghet hlei thei lo. Amah in thunun zo lo khawpa zu a in ka hriat vawikhatna a ni. Engtin nge ka awm dawn in hrethiam chiah lo hian an chhuak tur chu ka en reng a, ngaihtuah lawk lovin ka thutna chu ka thawhsan ve leh ta poh a. Ka umzui zel a tul tih ka chhungril hian min hrilh tlat.
.
Pawn boruak chu a hma aiin a lo vawt ta deuh a, ka kawr hak lum lem lo tak chu pawtkhawm tat tatin ka thinlung tikeh sawm tute zui tur chuan taxi lo kal hmasa ber chu ka lo phar ding a. Kan in lam an pan ngei ang! 'Kan' tia sawi ka tan a rem tawh lo! Chu ringawt pawh chuan ka chhungril hi a vit ngat ngat nia. Na ka ti lutuk.
.
Jeff nen kan chen thinna in atanga hnai lutuk lovah taxi chu ka dintir a, mi dang tan pawh rinhlelhawm loh thei ang bera awm hi ka tum ber tur pakhat a nih tel bawk avangin ka tan fimkhur tluk a awm lo. Tawite kein ka kal a, in ka thlen chuan in chhungah an lut fel tawh tih ka hmu thiam nghal mai a. Jeff hian PIN a la thlak lo anih chuan awlsam takin in chhungah ka lut thei ang.
.
Security PIN chu chu kut khur ru dar dar chungin ka type a, Jeff hian a lo la thlak miah lo. In chhungah chuan thawm dim thei ang berin ka lut a, bedroom ah an awm ka rin vangin khawilam nge ka pan dawn tih ka hre nghal mai. Min hmu palh anih  vaih chuan ka rinphak baka rapthlak ka chungah a thleng nawn ngei ang tih ka ring. Tur min intir duhtu khan min thah nawn a hreh dawn lo hrim hrim.
.
Ka rinlawk ang chiahin bedroom lamah thawm ka hria a, in chhunga awm ve reng hi a him lo tih ka hriat vangin tual zawl light ka off vek hnuah thawm dim tak bawk hian in chhak lam bedroom dep lamah ka kal chhuak a. Puanzar an pawtphui anih loh chuan chhak lamah hian glass vek kan hman vangin eng thil nge an tih ka hmu thei ang chu.
.
Dikna sual chhuaktu tur zawkin misual ka veh hi atthlak ka tih zia ka la sawi lovin ka hria. Mahse kei hian eng thil dang nge tihtheih ka neih chuan le? An khawsak zui dan hmuh hi ka tan a tul ber lo tih pawh ka hre ve tho. Mahse maw_hmangaih taka ka lo kuah thin ka pasal ngeiin min phatsanna hian min ti a vek tawh a ni. A dik! Ka a vek, ka rilru-a awm apiang ka ti zel dawn.
.
Ka duhthusam ang chiahin puanzar pawh phui a ni lo. Room ah sawn kei leh Jeff hi awmdun chu ni ila puanzar zawng zawng saw ka tiphui vek ang. Zan anih tawh chuan ka pawtphui ziah thin. Pawnlam atanga lang thei anih vangin ka awm a nuam chiah lo thin a nih kha. An awm dan chu thim chin atangin ka en reng a, mimal zalenna tihbawrhban tih lamin ka ngaihtuahna a luah pha lo reng reng. He in hi ka in a ni a, mi tenawmin an tihbawrhban hi ka phal lo. Keimah ka nih loh chuan hmeichhe dang tan hmun a awm hek lo.
.
Kiara chuan Jeff jacket hak chu phelhin khumah chuan a muttir a, kawr dang haktir a tum tawh lo tih a chet zui dan atang chuan ka hrethiam. Light eng zawk chu off in eng dul raih hnuaiah chuan Jeff chu a pan hnai leh a. A nui hmel ka hmuh chuan ka ip chawih chawih mai. Ka pum chhung hi na takin a insawr ngawt ngawt ni maiin ka hria. Tu hmeichhia hian  nge an pasalte hmeichhe dang nen an mudun lai hmuh duh ang?!
.
Jeff taksa chu a chul a, a fawp pah bawk a. A duhthawh sawt khawp mai. Jeff erawh chu a la che eih lo. Kiara chu ding chhuakin a thawmhnaw hak a phelh a, inringtawk zet hian Jeff chu hnaih lehin a hmuiah a fawp a. Tunah chuan Jeff pawh a che ve ta. A kut chuan Kiara hnungzang a chul a, a chul thla zel a, a khawih chin hriat fe hian Kiara chu a er ta ngang ngang a. Hetia en mai pawh hian an boruak chu a sosang hle tawh tih a hriat. Hetah hian ka tih loh tur ka ti a ni! Ka awm lohna tur hmunah ka awm a ni! Eng thil beiseiin nge ka kal? Anmahni tihnat emaw kutthlak tuma bei turin ka in ngaihtuah miah lo a, mahse an khawsa lai ka hmuh hian__ A dik thei lo!
.
Jeff chu a thu a inhmachhawn hian Kiara chuan a kherhbet chial a, an taksa indek thei lai zawng zawng chu a indek vek tih ka hmu. Ka biang lum pap pap chu ngaihven lovin kan nupa pindan ni thina thil thleng mek pan chuan ka pen chhat chhat a. Eng thil nge ka tih dawn ka hre lo.
.
Ka chhungrila thinurna leh natna zawng zawng tihlan tumin glass chhah tak chu ka kut pahnihin ka nem a, chutah tak chuan a ni chiang lutuk hian Jeff chuan min rawn en tak! Ka chalin glass chu ka si a, ka chhehvel a thim vangin ka taksa erawh a hmu thei lovang. Ka kawr lukhum ka khum hlauh chu ka tan vanneihna a ni tel bawk ang chu. Che zui lovin ka mitah min en a, ka mitmeng thinurnaa khat chu a hmu  ngei tih a men phar deuh awk dan atang chuan ka hria. Mit khap miah lo hian ka en reng a, a awm dan danglam thut chu Kiara chuan mak tiin a en a, Jeff hmel erawh a dang lawp lawp thung.
.
Min la en reng chung chuan rang zet hian Kiara chu a kawngah vuanin a chawi sawn nawlh a, ka lam panin arawn kal a, a taksa ruak ngal ngata awm chu ngaihven awm pawhin a awm hek lo.
.
Kiara chuan mak tiin Jeff chu a en a, min hmu ve lo a ni ngei ang Jeff chu amah (Kiara) enin a hawilet zawk a, chu chu ka tan insasengna hun tha ber a ni tih ka hria. Ka theihtawpa rangin ka kal sawn nghal a. He hmun hi ka hriatchian em vangin min hmuh hman lohna tura pan tur hmun chu ka hria.
Thingbuk tawi te te awmna ah chuan ka bawk rawk rawk a, kar a awm tam hman lo kawtzawl light arawn eng zui hmiah a. Min rawn nangching  vaih se chuan tih theih ka nei kher lo vang. Ka vanneihna a kal tluang rih hlauh zawk a ni. Hetiang renga awm hi a chi dawn loh tih pawh ka ngaihtuah thleng nghal vek. Hlauthawnga siam ringawt hi a tawk zo dawn lo.
.
Jeff chu bathrobe chauh hain a lo kal chhuak a, a hnungah Kiara'n a rawn zui bawk a. An hmela hlauhthawnna leh mak tihna chu lunghlu mawi tak ai pawhin hmuh nuam ka ti zawk! An hawikual a, thli thawt zawnga thinghnah che ri leh rannung hram chiah chiah ri bak hriattur emaw hmuh tur emaw engmah a awm si lo. Ngaihngam lo zet hian in chhungah an inzui lut leh ta a.
Tunah chuan hmuh zui chakna ka nei ta lo. An rilru buai tawk chauha an hmaa ka inlan thei chu ka hlim ru zawk ta phian a. Tunah chuan min paihna hmunah khan kal lehin engkim chiang zawka hmuh an duh  ngei dawn tih ka hria. Chutiang anih chuan kei hian tihtur pakhat ka la nei. Ka taksa them tal pawh an hmu lo anih chuan ka dam chhuak leh angah an ngai palh thei a, ka thi tawh tih an rin theih nan fiahna pakhat tal an hmuh ngei ngei tura ka dah angai dawn a ni. Ka thi ngei tih fiah nana ka taksa tihnat erawh ka ngaihtuah chhin eih lo.
.
Ka tawmna hmun atang chuan chhuakin kawngpui ka pan a, taxi lo kal remchang hmasa ber chu lo phar dingin ka nu leh pa chenna hmun ka pan leh ta vang vang a. Ka nu leh pa chenna hmun thlen hmaa ka paih ka sam ka fun khawm kha a la awm ngei  ka ring. A lo awm lo anih chuan ka che buai ngei dawn. Dahthat nghal nachang ka hre lo kha a ngaihtuah tlem thlak hle a ni.
.
Ka duhna hmun kan thlen chuan ka chhuk nghal a, taxi a kalsawn leh rual rualin ka sam ka paihna bawlhhlawh bawm chu ka pan a, a paihna hmun ngaiah a la awm tih ka hmuh chuan ka thaw huai huai mai. Zan a rei tawh deuh bawk vangin thi paiha min paihna hmun panna hun a ni tawh lova tunah chuan ka nu hmuh phawt ka duh. Ka pa hriat loha ka hmuh theih inbeisei ru chungin muangchang hian ka kal a, zanrei tawha hmeichhia mahni chauha kal hi a him lo tih ka hriat ve tho vangin ka rilru erawh a hahdam zat lo khawp mai. Helai atang hian damdawiin a hla vak lo bawk a engmah tawk lovin ka thleng thei mai ang chu.
.
"Ka fanu ka chan tawh a, ka nupui chungah hian thil thalo a thleng leh anih chuan ka ngawi hauh lovang. Chu chu chiang takin hria ang che." a ngawi leh vang vang a. "Thu awmze nei lo ngaihthlak nan hun ka nei lo." ka pa chu inher vutin damdawiin chhungah a lut a, ka rinhlelhna kha dik lo se ka duh takzet. Ka nu damdawiin a hruai a tul chhan hi keimah vang a ni lo em ni?
VIDA – SheKnows
(Vee-Da)
.
By. Thantei_LauraSean
.
CHAPTER - 5
.
20 minutes vel tur damdawiin pawna ka awm hnu chuan muangchang lo zeta ka pa lo kal chhuak ka hmu a, ka beisei hauh loh thil a ni. A car dahna lam panin a car-ah chuan a lut a, a tlan chhuak nghal a. Ka nu damlo a kalsan thei anih chuan a kal sawn chhan chu thil namai a ni hauh lo bawkin ka ring. Mahse ka pa chu zui ka tum lo, tunah chuan ka nu hmuh phawt ka duh. Nichin maia ka hriat dan khan ka thih thu a hriat vanga damlo a ni lovang tih rinhlelhna ka nei a, ka pa awm loh hlana ka biak theih hlauh chuan ka tan leh atan a tha khawp ang.
.
Ka pa a tlan liam chiah tihah damdawiin chhungah ka lut ve nghal a, duty lo awm hnenah chuan ka nu hming sawiin a awmna cabin ka zawt a. Min chhang mai lo. Chik tak hian min en a, "A chhungkhat tan lo chuan hmuh theih a ni rih lo a. Min hriatthiam mai angai ang." a ti dam thlap a.
.
"Ka nutei a nia, ka nu aiawhin hmuh ngei ka duh." ka tih chuan min en leh vang vangin a bu ta  nghat a.
"10 minutes hun i nei."
.
"Ka lawm e."
Ka nu awmna lam pan chuan hmanhmawh deuh takin ka kal a, ka pa kha khawiah pawh kal dawn se alo kitr leh hmain ka kalbo hman ngei ngei a ngai.
.
Ka nu awmna cabin kawngka chu dimtein ka hawng a, khumah chauh hmel taka a lo mu ka hmuh chuan ka mittui a hnam sawk a. A chak loh hmel takzet a ni. Muangchang lo leh thawm dim siin a mutna khum chu ka pan a, khum bulah chuan thuin a kut ka vuan a. A maimitchhing tlat a, a muhil a ni maithei. Ka pa pawh khan a mutthilh rih vanga kalsan lawk a ni thei tho.
.
"Kal bo tawh suh aw!" ka nu chu a tawng zawi khawp mai. A lo harh emaw tiin ka en vat a, mahse ala maimitchhing reng.
"Nu_ Keimah Vida."
Ka nu chu muangchang hian arawn meng a, ka hmel min hmuh chuan lungchhiat hmel tak hian min en vawng vawng a.
"Ka naute, khawiahmah min kalsan suh aw. Ka mumang a ni lo tiraw?"
.
"Ni lo. I mumang a ni lo. Nu, ngun takin min lo ngaithla rawh. Tunah chuan engkim sawi vek nan hun kan nei rih lo. Jeff leh ka pa lakah hian engmah sawi lo turin ka duh che. Ka la dam tih hi nangmah chauhin hria la ka duh."
.
"I sawi awmzia chu eng nge?" a ti zawi raih a, a kut chuan a nghet thei ang ber hian ka kut a hmer vang vang a. A beka mittui luang ngiai ngiai chu ka la dam tih a hriat vanga a lawmna mittui a nih ngei ka ring.
"Min kalsan lo tih hi ka hrereng a ni. Ka mumang a ni ang tih ka va hlau em!"
.
"Nu, ka la dam alawm. Jeff hi ka laka a thiltih vangin ka ngaidam thei dawn lo. Mahse i tanpuina ka mamawh. Ka pa nen hian inzawmna an nei maithei bawk."
.
"A mitmeng atang khan thil diklo a awmin ka hre reng a ni. I bo zan khan in ah ka awm a_"
.
"Mooney-ah khan lo kal ve ngei tur in nia_"
"Mooney-ah hun in hmang dawn tih ka hre hauh lo a ni. I pa pawn a hre chuang lo."
Ka nu thusawi chu  mak ka ti. Jeff khan ka bulah ngei chiang takin ka nu leh pa a sawm thu a sawi a, mahse ka nu hian engmah a lo hre miah lo amaw? Ka awih thei thlawt lo! Min dahthat tum hian eng chen zeta rei  nge Jeff hian a lo nghah tawh. Dawt hmanga nung kha engtin nge ka lo rin pumhlum thak theih?
.
"Nu, tunah chuan ka kal leh rih phawt ang. Ka dam tih hria la, ka lo hmu leh thuai ang che.”
“Thil thalo ti hauh suh aw.”
Ka pha lo, ka nu thusawi chuan ka thinlung a thleng pha lo chiang khawp mai.
.
“Khawngaihin engmah sawi chhuak suh aw. Nu, ka ngen che_”
.
“Aw le, engmah ka sawi lovang.”
“Ka lawm e. Rilru hreawma I awm ka duh loh vang chauhin ka rawn hmu che a ni. Min ngaihtuah suh aw. Ka tha a nia. Ka kal phawt ang e.”
.
Ka nu chuan engmah a sawi tawh lo. Thil tam tak a ngaihtuahnaah a lut tih a mitmeng atangin a lang a, ka kut chu hmer leh vang vangin ka kal a remti tih tihlan nan a  lu a tiche a. Ngaihtuahna buai tak a nei tih hre chunga kalsan chu har ka ti takzet zet. Mahse tunah hian ka kal lo anih chuan thil tha aiin thil thalo zawk a thleng ngei ang. Ka la dam tih a hre lo turin an hriat rual rualin ka tawp nghal a nimai.
.
Damdawiin ka chhuahsan a, tunah chuan ka rilru leh taksa hian chawlh a mamawh takzet. Taxi hmang bawkin ka riahna tur hotel ka pan leh a, ka pindan turah lutin khumah ka mu nghal thlawp a. Ka chauh tawngkhawng tawh vang a ni ngei ang, mumang bo thakin ka muhil ta bawrh bawrh a.
.
Ka pindan kawngka kik thawmah ka harh chuan peih lo zeta thovin tunge tih hriat tum hian ka bih hmasa te te phawt a. Ka mi hmuh chu helai hmuna  hnathawk a ni lo ang tih ka ring. A hawi zak zak a, ka hawn mai loh vang nge ni a kalsawn leh mai a. Mak tiru tak chungin khumah ka let a, ka harhchhuak zawk mai! Ni lo! Fiahna tur, ka thi ngei tih fiahna tur ka sam kha, min paihna hmunah ka la dah lo!
.
Khum atang chuan zuang thovin sana ka en a, dar 8 a pel tawh. Ka chhe ta vek anih hi! Engtin nge ka mangnghilh theih zawk? Bathroom-ah ka tlan lut a, inphih fai sawk sawkin khum bula ka bag chu ka la lawp a, hotel atang chuan hmanhmawh thei ang berin ka kal chhuak hlawk hlawk a.
Taxi remchang hmasaber ah ka chuang a, kal na tur ka hrilh hnu chuan a chak thei ang bera kal turin ka hrilh zui a. Ka awm hle hle thei lo. Ka ke ka tiche sekin ka kut pawh a awm hle hle thei chuang lo.
.
“Miss, kan thleng e.”
“Oh! Ok. Hei fare.” Driver chhuan ka pawisa pek chu a en vung vung a, a nawi min kir tur a neih loh thu sawi a tumah ka ngai hmiah.
“A nawi chu nei mai rawh.” ka ti var a.
“ Helai hmunah eng thil  nge I tih dawn? Hmanni lawk khan Cappolo chhungkaw zing ami ruang an chhar thu kha I lo hre ve lo mi?”
.
“Maw? Hre miah lo.” Ka ti liam puat a, a thusawi chu ngaihven ang pawhin ka lang duh lem lo.
.
“New York-ah hian nangmah chauhin I  awm a ni em lo maw?”
“
“Ka tana tangkai lo thil chu ka ngaihven ngai lo ang ah min ngaihsak mai rawh.” Tiin ka nuih a, a nui ve suk ringawt.
“Anih chuan nula, fimkhur ang che.” A ti leh nghut a, taxi chu tinungin min kalsan ta a.
.
Kawngpui sir zai zaiah fimkhur ru tak hian ka kal a, ka rin aiin thawm a reh. Jeff leh Kiara te kha an muangchang hauhin ka ring lo va, nge ka ring sual leh ta zawk? Kawng chhakah pengin thi paiha min paihna hmun chu thawm dim thei ang berin ka pan ta a ni.
.
Thing hmun ka pel a, ka tum hmun ka hnaih hle tawh tihah ka rin loh lutuk hian thawm ka hre ta! Ui an bauh a, tawngri pawh ka hria.
"A mak hle mai_"
"Heng mi hausa ho hian eng thil nge maw an hriat ni? Awmngaihna an hre hlawm lo chu anih hi. He case pawh hi awmze nei lo bawkin a tawp leh tho ang. Engtianga thi nge tih chu hriat a chakawm viau tho a, tukin chanchinbu chhuak kha I lo hmu ve em?"
.
"Lawk, Jumbo hian hriat a nei." an ui awm dan chu ngaichang in an ngawi a, an ui lah chu hriat nei niawm tak hian a bauh uar sauh a, ka lam panin arawn tlan ta nimai hian ka hria. Dawn ka nei hman lo, ka kal tawhna lamah ka theihtawpa chak hian ka tlan a, ka tlu pah nawk nawk mai. Na a sawi hman loh. Ka rin angin min umzui lo aniang thui tawk tak ka tlan hnu chuan an thawm ka hre phak ta lo.Ka thawm hre awm tak annih laiin an hrelo hlauh a ni ngei ang.  Rindan ka neih chu khang mite kha engemaw zawng turin an ruai ngei tih hi a ni. An tawngkam atang khan a chiang vek. Engmah an hmuh loh chuan_ Ka thi ngei tih nemngheh theihna tur eng thil emaw tal an hmuh loh chuan an chawlhsan dawn lo tih ka chiang em em si. Ui khan ka rim a chhui thei tih ka hria a, ka kal let  ngam tawh lo.
.
Hlawhchham inti tak hian Hotel-ah ka let a, tunah chuan ka sam them hian tangkaina a nei ta lo.
.