GABO YAMAN - 21

GABO YAMAN
CHAPTER – 21
Thantei_LauraSean
.
GABO*
.
AL YAMAN GOLD MINES  ka thlen atangin ni 5 a ral ta. Thlaler thlipui  tleh a reh tukah helai hmun hi ka pan nghal a, thu maia min hrilh ang aiin Mia dinhmun chu a lo thalo tak zet a ni tih ka hmuh khan sawi fiah theih loh khawpin ka mangang a. Tihtheih erawh ka nei chau khawp. Phurh sawn ngam anih loh vangin a harh hun  kan nghak tawp mai a ni.
.
A bawp dinglama kahna vangin thisen a hloh hnem hle a, helai hmuna inenkawlna an neih ang ang hmangin theihtawp an lo chhuah ve a, kei pawhin mu thei lovin ka vil chawt a ni ber.
.
Rangkachak lai chhuak tura hnathawkte thlaler thlipui a tleh apianga an tawm himna hmun hi awm lo se chuan tunah hian nung damin a awm tawh lovang! Ka ngaihtuah zawng ringawt pawhin ka nghilh dup thei nia. 
.
“Gabo_”
A aw chu a ri chang chang. Khum bula tui chu lain ka intir a.
.
“Khawiah nge ka awm?”
“Lei hnuaiah_”
“Ka thi chu a ni em lo maw?” harsa tih hmel takin a then sak a, a chhel reuh zia tak hi aw..! Chhang lovin a rem dan ang ber chuan ka kuah leh rih.
.
A taksa a la chau hle a, rei tak harhtir lovin an chiu mu leh ta rih a. Tunah chuan kei pawh ka muhil ve ngam tawh ang. A khumah chuan lawn vein la kuah reng chung chuan ka mu ve a. A lo harh leh hunah thil thleng min zawt ngei ang. Ka chhan dan tur ngaituahin ka maimitchhing vang vang a, engtik laiin nge ka mutthilh ka hre lo.
.
Min rawn sawi det dettu awm vang chuan ka harh a. Dr. Abner hmel ka hmuh chuan Mia tihharh hlau takin ka tho a, enkawlna tha zawk dawng turin Mia pawh kan phur ngam tawh ang tih a sawi chuan ka thaw hawk.
.
“Hmeichhe tuarchhel tak a nih hi. A thisen hloh hnem zia ngaihtuah khan tuna ala dam hi thil mak tawpkhawk a ni. Hun engemaw chen chu thil thlengte kha a vaia hrilh rih lo turin ka chah nawn leh ang che. Tuarchhel hle mah se thu thinthawng tak hre tur chuan a la chak tawk rih lo a nia.”
“In lo enkawlna vang hian lawmthu ka hrilh seng hauh lo ang che u.”

.

KAR HNIH HNUAH*
.
“Silas, ka lawm e.”
“Chutiang sawi suh.”
.
An thian dun inbia chu ka en reng a. Tunah chuan Mia pawh a hmel a dik ve ta. A hriat  bak thil thleng erawh engmah ka la hrilh lo.
.
Silas chhuah hnuah lunch kan ei dun a. Office-ah hna tam takin min hmuak tih hre chungin kalsan mai hi har ka ti tlat thin. Bakah vawiin hian Mia tan thil tha tak tihsak tur ka nei!
.
“Gabo, eng tikah nge helai hmun hi ka chhuahsan dawn? Dik taka sawi chuan ka hne tawh lutuk.” A ke na lam chu a dam tawh zia tihlan tum niawm tak hian a tiche zauh zauh a.
.
“Nihnih hnuah I chhuah theih ka ring.”
.
A thaw hliai a, ka mitah chiang taka min enin ka kut arawn vuan a. Eng thil nge ka tihtur ka hria. Amah chu hnaihin a hmuiah ka fawp vang vang a. Kan inlakhran hnuah pawh ka la kuah ta reng.
.
“Gabo, thil thalo a thleng tih chu ka hria a. Ka pa__ Ka pa ka hmu thei ang em?” he zawhna hi ka chhan a tul hun a awm ngei dawn tih ka hrelawk vek nain a hun a han thleng ta tak tak a, a sawitu nih a la nuam dawn chuang hauh lo anih hi.
.
“Thlipui khan a nunna a la ta a ni.”

“Lalpa!” a ti sap a.

“Tun thlengin a ruang pawh hmuh a la ni lova, theihtawp an chhuah nain beisei a bo khawp mai. A mi rawih erawh kha chu thlan atanga hla takah hmuh a ni a.”
.
Thlipui tleh hmaa thil thlen dan chiah kha engmah a sawi lo nain thil thalo tak a thleng ang tih ka hrethiam a. Chutiang ani chung chuan a pa chungchang hi a thalo zawngin a la sawi hauh lo. He hmeichhia hi ka hrethiam kim thei ngai dawn lo niin ka hria.
.
“Ka la awih thei lo.” Tiin a phun leh sep a. Min kuah ngheh sawt dan atang chuan eng thil nge a ngaihtuah ka hrethiam ruai ruai.
.
“Ka chungah khatiang thil em kha chu a tih duh ka ring miah lo asin. A mak I ti ve em? Pa in a fanu nunna lak a tum a nia! Ka pa a nihna erawh a bo thei hauh si lo.”
.
“Tunah chuan I him tawh alawm.” a samah ka fawp zauh a. “Mi tuemaw hmu tur chein a lo kal dawn a.”
A mit tizim deuhin min en a, a nui deuh sak bawk.
.
“Tunge?” tunge lo kal dawn tih ngaihtuahin a meng kual relh relh a, a ngaihtuah chhuak zo lo a niang, min rawn enin “Tunge?” a ti leh a. A awmna pindan kawngka arawn inhawn chuan kawngka lam chu ka kawk zauh. A thaw a tawp chawt mai! A mit a khap sawk sawk a, a mitvai anih ringin a kut pahnihin a mit a nuai a, a thil hmuh erawh a la ngai reng. Insum hman miah lovin a insut nghal hlawp hlawp a.
.
“Mama_”
.
Anu chu rawn kal hnaiin duat tak hian arawn kuah a, an pahnih chuan an tapin an nui bawk a. An hlimna leh an lungchhiatna an hmela lang chu hmuh hmaih theih rual a ni lo.
.
“Ka fanu_ Mia_”
.
Engemaw chen hnuah chuan pangngaiin an inbe thei ta.
.
“I vanneih zia hi I inhria em? I bulah mipa tha tak I tana engkim tih huam a awm a. Gabriel, lawmthu ka hrilh nawn leh che. Ka lawm e.”
.
“Tunah chuan engkim a tha vek tawh alawm.”
 .
.
Hun a ral duak duak a ni ber mai. Mia damdawiin atanga a chhuah hnuah a chenna inah a nu nen an khawsa a. Ka hmangaih ber hmeichhia hlim taka a awm ka hmuh apiang hian ka chhungrilah ka nuam veng veng thin. Hlimna zawng zawng pe vek thei lo mah ila, ka theih chin erawh engkim pek ka duh.
.
Tuna hian ka inah zanriah ei turin ka hruai a, ei ala hun chiah loh vangin a duhna hmunah kan awm mek a ni. A intur kenga dingin pawn lama thlir vang vang a, a hmel chu ka lo en ngawih ngawih thung.
.

.
“Gabo, ka tawng I hre miah lo.” Min rawn en a, ka awm dan ka ti danglam lo.
.
“Hetah hian lo thu teh.” Ka malchung ka beng thak thak a hmuh chuan min rawn pan a, a in tur ken chu dawhkanah dahin ka malchungah a sir zawngin arawn thu a. Ka nghawngah min kuah bawk.
.
“Ka sawi kha I hre miah lo__ tiraw?” nui sakin ka hmuiah min fawp zauh a. Ka ngaihtuahna la pengtu a awm. A hma khan a lo thukru nge ka hmu miah lo nia!
.
“Heihi_?”

Ka nghawnga min kuahna chu phelhin a kung veilam chu ka la a, a zungbun chu enin a mitah ka en leh. A hmui pet zauhin a nui sak a.
.
“Ka inpeih tawhin ka hria.” A ti sep a. Chu thu hriat chu ka tan a tawk em em! Ka malchung atanga chhuk tirin ka ding a, ka hmaah ka taksa si cheta din tirin a kawngah ka kuah a, a mitah ka en bawk.
.
“Ka hmangaih che! Mia_ Chu chu ka thinlung a ni.”
.
“Ka hmangaih zawk che!” hnukulh tih hriat takin a hmui a pet fan fan a, a kutin ka nghawngah vuanin a kungzungpui chuan ka biang a khawih nauh nauh a, ka mitah chiang takin min en bawk. Kan pahnihin kan tawng thei tawh lo. Thua sawi ngai tawh lovin kan inkara thil thleng mek chu kan hrechiang tawk.
.
Kan thil tawn zawng zawngte kha in hmangaihna fiahna a lo ni. Ka tana Pathian min ruatsak hmeichhia hian ka lung a dum em em!
.
.
THLA HNIH HNUAH*
.
Music a ri ruai ruai a, maicham pana ka pa ruala lo kal hmeichhia ka hmuh chuan thawk ka la chiam a! Ka mita ka hmuh tawh zawng zawng zinga thil mawi ber chuan min rawn pan mek a ni. Ka dam chhung hun min hmanpuitu tur chu!
.
.

.
.
INNEI tharte lawmpuina hmun pindan zau tak kil sir tea mi pakhat ding chuan tu ngaihven mah a hlawh lo. Pindan chhunga awm a tumah chuan an hmelhriat lo pawh a ni mahna. A thawmhnaw hak chu a hlui hlein a pawr chip chep a. A sam tuak var vek leh a hmai zur tak te, a mitmeng ngui takte avang chuan lungngaihna nasa takin a tuam mek tih haih rual a ni lo.
Chu Putar chuan chhuatlai zau taka mipa leh hmeichhia inhmangaih tih hriat taka inkuah chunga lamte chu a en ngawih ngawih a. A thiltih thalo avangin lungngai takin a thi ang a, amah hmangaihtu tumah an awm loh vanga lungngaia kun chungin thlan chhungah a lut dawn a ni tih ngaihtuah chungin chu pindan hlimnaa khat pindan chu thinlung lungngaihnaa khat chungin a chhuahsan ta hna hna a. Tunah chuan a thiltih vang khan an hmaah a inlan ngam tawh ngai dawn lo tih a in hrechiang em em!
.
A ro sum, a ngaih hlut em em te kha a ngaih angin an lo thlahlel ve hauh si lo. A thil neih zawng zawngte kha duh lovin a thih thu nemngheh a nih hnu khan a nupui lo ni tawh thin, a fate hringtu nu leh a thisena a hrin a fanu chuan fahrah chawmna atan a bo a bang awm lovin an pe vek tih a hriat ni khan a rosum an neih ve a hlauh vanga a thiltih zawng zawng khan a lung la phu reng chung siin thlanah a nawr liam daih tawh zawk a ni.  Sum I lo ngah hle anih pawhin chu chuan mi tha leh mi hluah a siam nghal hauh lo che a, mi ngainatawm inih nghal phah hek lo. Mihring hlutna chu a thil neihah ni lovin a nungchang leh mihringpuite laka a khawsak dan atangin teh a ni thin!
.
TO TELOS
.
.
KA THIAM ANG TAWKA KA ZIAH VE NAWK NAWK THIN KA THAWNTHUTE MIN LO CHHIAR SAK THIN AVANGIN KA THINLUNG TAKIN LAWMTHU KA HRILH NAWN LEH CHE. TUN TUM KA STORY PHEI CHU LOH THEIH LOHNA AVANGIN KA CHAWLHSAN REI HLE A, I DUHTHU PAWH A SAM TEHCHIAM LO MAI THEI. ANIH ANG ANGA KA KHAWRPUM THEI TA ERAWH KEIMAH BER HI KA LAWM HLE MAI. BA TAM DEUH RUL FEL ANGAH TE KA INNGAI DEUH REUH.
PATHIAN ZARAH KAN DAM ANGA THAWNTHU DANG NEN KAN INHMU LEH NGEI DAWN  NIA.
WITH LOVE
THANTEI