GABO YAMAN - 19

GABO YAMAN
CHAPTER – 19
Thantei_LauraSean
.
 ZURI
.
Naktuk hian ka chunga thleng tur, roreltuten thu tlukna an siam an puang dawn tih ka hria. Min khung hran lai khan ka nu thih thu min hrilh a, thi pawh nise pawi ka tih loh vangin min thawng hran lo. Thi ngei se ka duh vangin a lu-ah ka chhu reng anih kha. Mahse, court-ah khan arawn inlan leh si! Ka hmelma hlirin min hual vel a, ka lama tang tumah an awm lo. Naktuk hian ka sawi theih zawng zawng ka sawi vek dawn a ni! Pawisak ka nei tawh lo. Ka bei a, ka theih tawpin ka tih theih zawng zawng ka ti vek  a, chuti chung chuan hnehna ka chang chuang lo. Ka ta ni lo tur leh ka neih chuan loh tur neih tuma beih hi ka ning ta. Ka chau ta lutuk a ni e. Ka dawn ngai loh hmangaihna dawn tum tur pawhin chakna reng reng ka nei ta lo.
.
Khum te leh chep zetah chuan ngil atin ka mu a, a tawpna atan ka duhthusam ramah ka cheng leh ta. Tun bak chu duhthu pawh ka sam leh tawh lovang.
.
Khua a var meuh chuan inpeih hle tawhin min khungna pindan zim teah chuan ka vei tawn sek a. Thu tlukna puan chhuah anih hmain darkar tam a awm tawh lo.

Ka pindan atanga min hruai chhuah chuan ngawi rengin ka kal a, rorelna pindan kan luh lai chuan dak vaha kalin pindan chhunga awm ho chu ka en kual a. Mak min tih hmel taka min lo entute chu ka nuih hlawm a.
.
Ka hun a intan ta! Chief judge-in thu tlukna a puan hmain ka thutna atang chuan ka ding a, ka lawyer-in mangan hmel taka min rawn en chuan ka nui sak.
.
“Ka sawitur neih hi sawi min phalsak turin ka ngen che.” Chief Judge chu chiang takin ka en a.
.
“Phal sak I ni e.”
.
“Ka chungah eng thu tlukna pawh thleng se ka pawm a. Ka sawi tur hi khawngaiha min chhui chiansak turin ka  ngen thung ang che u.”
.
Ka nu ka en a, rei min en ngam lo.
.
“Ka unaupa hrawn Jose Mas LeBoeuf thihna kha Ophelia thlentir ngei a ni tih nemnghehna tur fiahna ka nei a. Ballevue-a ka chenna in-ah a awm. Ka lawm e.”
.
Thui tak sawi tur ka nei nain avaia sawi nghal a tulna ka hrelo. Ka nu’n he thil ka sawi  chhuah a hlauh vanga sum tam tak min pek lai khan ka thih ni thlenga zep turin ka intiam a. Kum 8 lai a liam ta. Tunah hian ka lung la phu reng mah se khawvel tan chuan mitthi ka ni tawh dawn tlat a ni.
.
A thum mam mam a, ka thutna hmuna ka let leh  hnu chuan ka chungthu puan a ni ta.
.
 Kum 15 chhung chhuahlawk phal loh-a tang tur ka nih bakah kum 15 hnuah pawh kum 10 chhung zet ka chetdan zawng zawng enthlak anih tur thu roreltuin a puan chu khawvel laka ka thih thu nemnghehna a ni.
.
.
THLA KHAT HNUAH*
.
MIA VALENTINA GARCIA
.
Chanchinbu phek hmasa bera Ophelia thlalak awmna chu lain chair-ah ka thu a, a chhunga thu inziak chu ka hriat tawh hnu tho mah nise ka chhiar nawn leh a. Vawiin-ah vawi thum ka chhiar nawnna a ni ta.
.
*Ophelia LeBoeuf chuan Benjamin LeBoeuf fapa Jose Mas chu ruahmanna tenawm tak siamin a thahtir tih a pawm ta a. Finfiahna a awm  that em avangin a pha thei ta lo. A fanu Zuri LeBeouf tanin-a a luh zana a thih thu puan anih hnuah a chungthu puan anih hmaa a thusawi bawh zuiin Ballevue-a a chenna in enfiah a ni a, Ophelia thiltih fiahna zawng zawng haichhuah vek a ni. He thil thleng hian Benjamin LeBoeuf a thawng hle a. A fapa thih hnu khan fapa a neih loh thu a sawi mai thin tih sawiin a fanu Mia Valentina Garcia nen an inkar a that leh  theih a beisei thu a sawi bawk.
A fanu hian eng vanga a hming chhawm lo nge anih tih zawhna chu chhangin__*
.
Chanchinbu chu dahin thawk ka la vang vang a. Hetiang zawng zawng a thlen hnu hian Gabo hnena lawmthu sawi tur ka ni tih ka inhria a. Thudik a lan theih nan a theihtawp a chhuah a, nasa takin hnuchhuitute a tanpui tih pawh ka hria. Mahse, ka be thei rih lo. Tum lawk leh ruahmanna nei thlap a min hnaih anihna khan sawifiah phak loha nasain min nghawng a, amah hnaiha awm leh ka duh tawh lo. 
.
Ka phone ri chu phur lo zetin ka pick up a.
.
“Mia, kan inhmu thei ang em?”
.
Ka pa thusawi chu awih ngam chiah lovin ka ngaithla a. Pa leh fa kan nih anga kan inbiak tawp berna pawh ka ngaihtuah thiam tawh lo zawk. A rei lutuk tawh. Kan inkar tha ngai miah lo hi siamthat a duh ve tawh pawh a ni mahna le! Kei lo hi mihring damlai zingah chhungkua tia koh theih a nei tawh tlat lo a ni. Zuri chung thu ngaihtuah a nih lai pawh khan mumal takin kan inbe ngai lo a, Ophelia chung thu puan anih hnuah erawh hreh hmel taka min panin kan inbe ta tawk anih kha.
.
“Dar 3-ah ti ang aw.” Arawn tih chuan  “Aw le.” Ka ti sap a.
.
Ka pa sawi hmun ka thlen chuan min hmu apiang mai chuan min en duh viau vek a, thil danglam vakah ka ngai tawh lo zawk. Chanchinbu leh chanchinthar-ah kan lang nasa a, mi chi hrang hrangin kan chungchangah an duh dan danin an ngaih dan an sawi a, thu tlukna an lo siam bawk. Ka pa ka hmuh chuan ka pan vat a. A hmel chu a lang upa zual sawt ni hian ka hria.
.
Sawi tur kan hre tam lo dun khawp mai. Kan eitur chah kan ei zawh hnu chuan a kawr ipte zenin eng emaw hi arawn phawrh a.
.
“Heihi kawl turin ka duh che. I tan pa nih ka tling lo tih ka inhria a, hun liam tawh ka siam that theih loh vangin min ngaihdam erawh ka beisei ngam lovang. He thil hian I awm a tihnawm deuh ka ring.”
.
Bawmte chu lain ka hawng a, a chhunga thil awm ka hmuh chuan ka thutna chair chu ngheng rawkin ka pa chu ka en a. Ka mittui a hnam sawk. Ka nu khan he zungbun hi a phelh ngai miah lo. Ni e, he thil hi ka taksa deka a awm chuan ka nu bul hnaia awm rengah ka ngai thei ang.
.

.
“Ka lawm e.” ka ti sap a. Mahse! Engtin nge he zungbun hi ka pa hian a kawl daih theih? Ka nu a la dam anih chuan he zungbun hi a bun tur a nia. A dam tawh lo tihna em ni?
Ka ngaihtuahna hrethiam niawm takin ka pa chuan ka kut arawn vuan a.
.
“I tan a hnuchhiah anih kha. Kan chanchin hi a lo hre ve anih chuan arawn ngaihven ngei ang che. Pasal a nei leh tih min rawn hrilh bak kha a chanchin ka hre zui tawh bik lo va. In inhmuh leh ngei theih nan theihtawp ka chhuahpui ang che.”
.
Ka pa mitmeng chu ka en a, tun hmaa ka la hmuh ngai hauh loh min ngaihvenna niawm tak ka hmuh chuan mak takin ka thla a muang ve anih chu! Ka nu’n pasal dang a nei leh tih pawh ka lo hrelo hrim hrim a, ka lawmpui zawk. Amah hmangaih taktu a tawn leh tluka duh ka nei chuang lo.
.
Ka pa nen kan kal hran hnuah ka in ka pan tlang nghal a. Ka pa nen kan inkar boruak zia tain ka thaw a  tihven deuh huai rualin ka rilru kamtu erawh a la awm tho mai. Ka nu chaklo leh nunna nei tawh lo hmelpu thlalak kha tu min rawn thawn nge ni ta ang le? Zuri leh Ophelia te khan ka nu chungchang sawi engmah an nei lo a. Ka pa lahin a chanchin a hriat lohna a rei tawh thu min hrilh bawk si. Engpawhnise, heihi chu ka ko-a tla a ni tawh. Keimah ngeiin ka nu awmna chin hre turin hma ka la ang. 
.
.
Ni hnih chhung MG Jewels ka tlawh tawh loh vangin tihtur ka ngah hle tawh a, Silas nen pawh kan inbe tam lo khawp. Ka boruak tawnin a zir loh em vangin ka sumdawnna thil ka ngaihtuah thei meuh lo a, ka tel lova tihtheih chin awm zawng chu hnehsawh takin Kymi’n a lo kalpui tih ka hmuh  chuan ka lawm tak zet.
.
Ka ngaihtuah phak hauh loha rapthlak JoMas thihna kha ruahman lawk a ni tih ka hriat hnuah a thlan ka la tlawh lo bawk a, thlamuang takin a chawl em tih hmu tur pawhin ka tlawh ngei a ngai.
.
“Mia, tlawhtu I nei a, ka lo luhtir dawn em?”

“Tunge?”

“Mr. Yaman.”

“Hun ka neilo tih lo hrilh rawh.”
.
Kan inbiakna ka tihtawp hmain  Gabo tawng chu fiah vak lovin ka hre hman. Rawn luh luih a tum em lovang chu maw? Ka ngaihtuah rualin amah ka ngaih tawh zia erawh ka hre duhlo lui tlat thung. Ni e, a bulhnaia ka awm chuan ka duh dan angin ka hnar reng thei lovang tih ka hlau em em. Dawt hmangin bul min tan pui tih ka hriat rual khan ka hmangaihna a bo nghal vek si lova!
.
Darkar khat hnuah Kym chuan Gabo a kal tak thu min rawn hrilh a.
“Mia, hetia I awm reng hian engmah I chingfel dawn lo a nia.” A ti sap a. Engtinmah ka chhang lo. Ka awm loh lai pawha min hmuh tuma a kal fo vangin Kym hian a lo khawngaih pawh a ni mahna.
.
“Flight ticket chu I tifel tawh em?”
Gabo chungchang ka sawi duh lo tih a hriat chuan thawk la halhin a tihfel tawh thu a sawi a. Lu thing mat mat chungin min chhuahsan nghal a.
.
NI THUM HNUAH*
NEAR AL YAMAN GOLD MINES*
.
Al Yaman rangkachak laihchhuahna hmun atanga mel 10 zeta hla, thlan tam vak lo awmna hmunah chuan dingin JoMas thlan chu ka thlir vang vang a.
.
“JoMas.. Thlamuang takin chawl ang che. Tunah chuan a thleng tih rinhlelhna chang pawh ka hriat loh leh ka ngaihtuah phak hauh loh I chungah a thleng tih ka hre tawh a. Ka tanpui theih loh che avang khan min ngaidam rawh aw. I zalen ta__ Ni e, tunah chuan i zalen tawh..”
.
“Keiin Mia hi ka lo chawlhtir thung ang.”
.
Ka phu chiang lutuk!
.
 Ka bulah rawn ding hnaiin a mitmeng chu a dur khup a, min hmu ang pawhin a awm lo. Chetsawn nachang ka hrelo a, rannung lian zawkin an man tur rannung te zawk tihngaihna hre lova an aikaih ang mai ka ni. Min la en chuang lovin JoMas chu a be zui mawlh mawlh a. A tawngkam hman tinte chuan min timur sung sung thei nia!