GABO YAMAN - 20

GABO YAMAN
CHAPTER – 20
Thantei_LauraSean
.
 GABRIEL ARGYROS YAMAN*
.
 Zuri thih thu ka hriat khan pawi ka ti hle! A sawi bak thuruk  a awm ngei ang tih ka ring a, amah berin a nunna a lak tak si avangin tih theih a awm ta lo. Mia a la him tawklo tih hre tur khawpin an chhungkaw thuruk ka hre tam tawh tlat a, ka awm mai mai thei der lo. Mia erawh min la hmu duh lo tluang zel. A chungchang bikah hi chuan tih vak theih ka nei rih lo. Ama chan ngaihtuahin thiam lohna a nei hauh lo bawk. A tir atanga tisualtu chu keimah ka ni a, ka thiltih hmang ngeia min rinna ka hlawhchhuah leh ngei a ngai tih ka hrechiang em em . Thil awlsam tak a ni hauh lo ang le!
.
Ophelia hmuh tumin a tanna hmun ka pan a. Ka source tha viau lo se tuna ka thiltih tum hi mi nazawng tan tih chi a ni kher lovang tih kan sawilang ve hrim hrim ang e.
.
Tan in ka thlen chuan inbiakna tur pindan ah Ophelia an rawn hruai chhuah hun ka lo nghak a. Minute 5 zet ka thu ta.
.
Ophelia an rawn hruai chhuak a, a hmel ka hmuh chuan ka phu deuh zawk! A hmai a lang dangin a zur hle a. A mit hnuai duk tak ruih atang chuan a mu tlem hle ang tih a hriat bawk. Min hmuh chuan a beisei loh ber hmu ang mai hian a meng phar deuh ak a.
Darthlalang chhana inbe tur kan nih vangin phone receiver chu phur vaklo hian a la kang a.
.
“Ka beisei loh ber ka hmuh tlat che chu_”
“Anih ka ring. Min tanpui theih ka beisei.” Ka tih chuan a nui hak a. A lawm zawng thu ka sawi theih loh vangin nuam ka ti lo hial.
.
“Han sawi ta che.” Phurna nei hauh lo leh a mitmeng thi bul chuan min en chik hle.
.
“Mia Garcia hian eng vanga a nu hming chhawm nge anih I hriat ka ring a__” ka duh ka sawi zawh hmain min lo pawt chat nghal pang.
.
“He mite nufa vanga kan buaina neih zawng zawng hre chunga he zawhna hi min zawt anih chuan, ka sawi chak loh zawng tak min zawt tih I  inhriat ka ring.”
.
“Ka hre hauh lo mai.” Tia ka chhan chuan rilru inthlak thut niawm tak hian thaw hliai in a tawng zawi deuh sawt a. “Patricia khan a hranpain ka pawi a sawi hauh lo a, tunah hian khawiah  emaw nung damin a la awm tih hrilh ta che ila_”
.
“I sawi chiang deuh thei em?” a thusawi chuan ka beng a verh tih piahlam a ni. Min chhan hmasak dan atang khan hetiang lam a sawi duh hi ka ring hauh lo a nia.
.
“Chu zawng chu a nimai e. Patricia a la dam tih zawng chu.” Phone receiver chu a a dah hniam a, a lu thing deuh nak nak chungin a la kang leh a. “Ka nih tur ang ang ka ni tawh a, eng vangin  nge ka zep tawh ang?” Chiang zeta min rawn en in a tawng zawi lehzual ta.
.
“Lo ngaithla teh. Ka fanu a boral hma zawng kha chuan Patricia dah botu hi amah anih ka ring reng thin a. Mahse, a boral tak hnuah khan Patricia chungchangah a inrawlh lo tih erawh ka hre chhuak. Zawn chhuah awlsam tak chu ni kkher lovang a, tih theih loh erawh a ni lovang.”
.
“Patricia dah botu chu rinhlelh I nei em?”
.
“Ka hrethiam tawh lo.”
.
“In hun a zo e.” an rawn tih chuan Ophelia chu a nui sak a.
.
“Min tanpui beisei vanga hrilh che ka ni lo a nia. Kei chu ka thiltih vang khan thiam ka chang thei tawh dawn chuang lo a. ka tawpna tur pawh a hnai ta. Mangtha le!”
Ka chhan leh hmain receiver chu a dah thla a, a thutna atanga thovin a kal nghal hmiah a. Min ti hamhaih ta zawk mah.
.
.
Tanin atanga ka chhuah hnuah Maverick nen kan inbia a, thu thar engmah a awm rih loh thu  a sawi chuan rin tur nge rin loh tur ka hriatthiam chiah loh thu sawi pahin Mia nu a la dam thu ka hrilh a. A theih ang anga hma la turin ka ngen bawk a. Ka ngaihtuahna a buai ta map map mai.
.
.
Mia hmu turin ka kal a, a pindanah a awm reng chungin min hmu tur pawhin a lo chhuak duh lo. Nawrluih theih ka duh a, mahse ka thei lo. Rei tawk tak ka nghah hnuah ni dang ang bawkin hun tha dang a her chhuah leh beiseiin ka kalsan leh ta nge nge a.
.
Ka office-ah let lehin meeting pahnih ka thut tluan leh zak hnuah ka chenna hmun ka pan ta chauh.
.
Ka in ka luh rualin library ka pan nghal a, phone ri ang tak ka hriat kha a lo ni ngei bawk. Rang takin ka pick up thuai a. Ka in number-a min rawn bia anih chuan thil pawimawh tawk tak a ni ngei ang.
.
“Mr. Yaman, Mrs. Ophelia LeBoeuf hian a hmuh ngei che a tul tih dilna arawn thehlut a, phalsak a ni tih ka rawn hrilh che a ni. Naktukah I lo kal thei ang em?”
 
.
“Aw le. Ka lo kal ang.”
.
Eng thila min hmuh duh nge ni ta ang le? Hmanni ka hmuh khan a hriat chin zawng sawi ang khan a insawi tawh si a. Ka ngaihtuahna vak vel vangin zan pawh ka mu tha ta lo.
.
.
Khua a var a, chawhma chhung office-a ka awm hnuah tannin lam panin ka chhuak leh ta.
.
Ophelia an rawn hruai chhuak a, ka hmel min hmuh chuan a nui ta sak. Ka lo bu nghat thung. Eng thil nge beisei tur ka hrethiam chiah lo.
.
“Thil ngaihtuah chhuah ka nei a, he thil hi ka dam  chhunga Mia tana ka tihthat ve awm chhun pawh a ni mahna!”
.
A sawi tur chu ngaihtuah nawn leh niawm takin thawk a la leh te te a.
.
“Jose Mas thihna tura ruahmanna ka siam khan a taka a thlen vek hnuah ka ruahmanna ang ni lovin a thleng tih ka ngaihtuah chhuak a ni. Ka ruahman ang ni lova thil a thlen tak thu kha sawi pawh ni ila helai hmun hi ka chhuahsan theih phah erawh ka beisei lo a. Biak che ka duhna chhan chu kha thilah khan kei aia inrawlh thuk an awm tih hrilh che ka duh a.”
.
“Sawi zel rawh.” Ka ti ngawt. Ka thu hriat chuan min thawng thawkhat!
.
 “Patricia awmna hmun pawh rinhlelh ka nei a, helai hmun ka luh hma khan fiahna hun  ka nei thei ta lo mai pawh a. Patricia leh Mia te hi an him lo tih erawh ka chiang em em. Kei leh ka fanu dinhmun chu I hrechiang a, engmah tihtheih  a awm tawh lo. Mahse Patricia leh Mia erawh I chhanhim ka duh a ni.”
.
A lu thing nar narin za lo zet hian a nui a.
“He thil hi ka ngaihtuah chhuak har lutuk zawk a ni. Anni nufa khan ka tan eng thil thalo mah an ti hauh lo a, ka tan mi hnawk anga ka ngaih tlat nachhan I hre duh em? Fiahna chiangsa I neih si loh chuan kan thu hriat tam ber ber hian mihring rilru hi a hruaisual nasa thei teh a nia!”
.
A hmel chu chik zetin ka en a, a sawi tum chu__ A thu hriat tam ber!
.
“Ka rin hi a dik em?”
.
“A dik ka ring. Tunah chuan ka tihtheih awm chhun ka ti ta a, I tihtur I tih a hun ve ta e. Hmun pakhat chenna in awmna pangngai tlawh ngai miah loh kan nei a, a awmna hmun ka hrilh ang che!”
.
Ka awih thei lo zawk! Engtin nge anih theih? Ophelia nui hmel chuai riai riai chunga a tanna pindan pan lai en reng chung chuan ka tawng chhuak tih pawh inhre lovin ka phun chhuak hluk a.
.
Hmanhmawh taka ka chet a tul tih ka hrechiang hle.
.
.
MIA VALENTINA GARCIA*
.
“Ka pa!”
.
Ka pa hmel chu ka awih thei lo zawk. Ka hriat theih chinah ka lakah hian hmangaihna a lan tir lo tih chu ka hre teh meuh mai. Mahse, tun ang em a nunrawng hmelpu hian ka la hmu ngai lo!
.
“Tunah chuan I chawlh a hun ve ta. Jose khan ka thu hnialin min do a, ka duh anga nung lote chungah chuan ka thuneihna ka lantir thin. Chu chu I hria! Kei aiin I nu I thlang zawk tih ka hriat ni atang khan ka fanu I nihna hi a bo daih tawh.” Ri hauh lo hian a nui a, nui hmel ka hmuh tawh zawng zawngah a la rapthlak ber! Heihi ka pa a ni thei lovang.
.
“Ka nu chungah khan eng thil nge I tih? Zungbun pawh kha?”
.
Hlauhna nasa lutuk in min man a, ka duh vang ni hauh lo hian ka khur ru zawih zawih. ‘Ka nu thih tawh thu sawi lo hram rawh’ tiin ka tawngtai ru hial!
.
“Ni tam a dam tawh lovang. Ka thil neih min chuhpui theitu chu tupawh nise ka tan hmelma inni vek tih hi ka hrilh tawh che em?”
.
“I thil neih engmah ka duh lo. Ka nu chu khawiah nge a awm?”
.
“Hrilh che pawh ni ila engmah I ti thei tawh chuang lo.”
.
Kan piah hla vaklo a car ding lam chu hawiin a ban a phar zauh a. Chu Car chu engtik laia lo ding nge anih ka hre miah lo. Mipa kan lam pana lo kal ruangam chu ka hmu thei.
.
Mak takin thli arawn thaw nasa lehzual a, kan lam pana mipa lo kal pawh chu chiang takin ka hmu thei lo. Thli chu a thaw nasa zual zel anih chuan reilote chhungin engmah a hmuh theih tawh loh ang.
.
“A hun lo phiangsen e!”
.
Ka pa chuan min dawm beh tumin min rawn ban a. ka tha neih zawng zawng sawm khawmin ka lo nam ve thung. Eng ber nge a sawi hriat theih lohin a phun hluk a. Thli thaw chu a nasat zual zel avangin engmah a hmuh theih tawh loh. Ka nunna innghahna a ni tih hre chungin ka tha nia rin lamah chuan ka pai phei nawk nawk a. Ka mit ka meng ngam lo. Ka men rual rualin vaivut chu ka mit khatin ka dawng nghal dawn tih ka hria. Thli thaw a reh ruala an mithmuh phaka ka la awm anih chuan mitthi ka ni ngei dawn!
.
Eng chena rei nge chutiang chuan ka pai nawk nawk ka hre lo. Hun rei tak chu a ni thei lovin ka hria. Thil sakhat ka sut chuan ka te thawt a. Tunah chuan a tawp ta! Ka thih hun a thleng ve ta anih hi! Hun ka va ti lo em!
.
Ka hit chhawk a. Ni lo! a thleng thei lo. Ka thih a la hun lo. Ka intihharh hram hram a ngai.
.
.
GABRIEL ARGYROS YAMAN*
.
Hmanhmawh zetin MG Jewels ka pan a, in chhung ka luh ruala  phawk fea min lo entu Kym hmaah chuan ka ding a.
.
“Khawiah nge Mia?”
.
“I rawn tlai hlek a ni.”
.
“A lo let dawn hnai ang em?”
.
“A unaupa a tlawh dawn thu a sawi a.”
.
Ka hlauhthawn ang ngeiin.

“A tawk e.”
.
MG atangin ka chhuak lehnghal. Benjamin LeBoeuf awmna chin ka hriat nghal a ngai. Maverick ka call a, muangchang lovin thil awm dan ka hrilh zung zung a. A theih anga ranga chanchin min lo hrilh tur thu a sawi hnu chuan chanchin ngai changin ka awm ta rih.
.
Minute 30 rei ber a ni hial awm e! Maverick call chu ka pick up thuai a.
.
“Benjamin LeBoeuf chu tunah a zin chhuak mek a, a fapa thlan a tlawh a ni awm e. A lo haw hun kan nghah mai a ngai ang.”
.
“Kan nghak thei lo. Tih dan dang kan ngaihtuah a ngai.”
.
Maverick nen kan inhmuh meuh chuan a mangang hle tih hriat tak hian a thlan a tla hluam a. Kan thiltih chhanna kan hmuh hma chuan a sam a tuai leh ngawt thin a.
.
“Tunah Saudi Arabia-a ka biak theih chin chu ka bia a. Kan tlai loh hram ka beisei.
.
“Mrs Garcia chanchin chu hriat theih a awm tawh em?
.
Min chhan hmain a phone a ri a, min melh zawk hnuah a pick up nghal a.
.
“Maverick. ___Aw le. A theih anga rangin.____ A lawmawm e! Damdawiin ah hruai nghal rawh u.”
.
Phone a dah ruala  min enin a nui suk a.
.
“Chanchin lawmawm pakhat. Mrs. Garcia chu Ballevue pawn-a chenna in pakhatah khung a lo ni ngei anih chu. Damdawiin ah kan va hmu thei ang.”
.
.
Darkar hnih a ral leh hnuah pawh Mia chanchin hriat a la ni lo. Awm ngaihna ka hre tawh lo tak zet. Kan chhungkua kan inzawmna ka ngaihtuah a, pa in engtin nge mahni fa ngei chungah hetiang thil hi tih theih ka hrethiam phak hauh lo mai. Chutih rual chuan ka nu leh pate nen inzawmna tha kan nei hi ka vanneih zia ka hre tel bawk.
.
“Mr. Yaman, thlaler thli a tleh nasa hle a, Rijadh atang pawhin rangkachak laihchhuahna hmuna thawk biak pawh theih an awm lo a. Ni hnih hnuah thli tleh a reh anih chuan hma lak leh dan a awm chauh ang.
 .
Thlaler thli a tleh dawn tih chu ka hre daih tawh. Chuvanga mangang zual em em ka ni. Jose Mas thlan awmna atangin Al Yaman Gold Mines a hla lutuk lo a. Keimah hian____ Aw le. He thil hi a lo theih tawh hlauh chuan____ A hmaa ka tum kha chuan ka hlawhchham ngei a, tunah erawh ka vanneihna leh Mia vanneihna hi a tangkawp anih chuan__
.
.
Office-ah let lehin ka tih theih hnuhnung ber chu a hlawhtlin theih beisei ngam chiah lovin ka tinawn leh a.
.
.
MIA*
.
Nghet zeta ka bana min rawn vuantu awm avang chuan ka harh leh deuh kawk a. Ka chawn tha a zawi vek avangin lo bei let thei ka ni tawh lo.

‘Lalpa, min tanpui rawh.’
.
Zo takin min chawi kang nawlh a, engmah chiangin ka hre zui tawh lo. Ni e, tuin nge mahni thih hun pumpelh thei ngai le? A hun a thleng anih si chuan duhlo chung pawhin ka pawm mai ani ang chu. Ka ngaihtuah hnuhnun ber chu Gabo a ni. ‘Gabo___’
.
.
Chiang lo ruaiin ka harh a, hmun thim ruiha ka awm chu ka hrethiam chiah lo. Ka awm a nuam lo rapthlak tak zet! He hmun hi hremhmun em ni?
.
Mi pakhat ruangam fiah lo ruaiin ka hmu a, min rawn khawih chuan sawi fiah theih loh khawpa rapthlak hian ka taksa chu a na zual a. Hetiang tehhrep na tuar ai chuan engah nge min tihhlum nghal mai loh le.
.
Ka taksa na lutuk vang chuan ka ral leh ta riai riai a. Chawlh hlen mai ka duh ta!
.
.
Tawng thawm, phun ri sur sur a awm avangin ka harh a. Ka taksa na a awm tawh lo tih ka hre thuai a. Ka bula awmte tawng chu ngaihthlak chian ka tum ngial pawhin a rikna a hla tial tial ni mai hian ka hria.
.
Thawklehkhatah dawn awm miah lo hian ka harh kawk!
.
“I tha em?”
.
Muangchangin ka meng a, ka awmna pindan la thim ruih chu ka hrethiam chiah lo.
Ka harh chiang telh telh a ka khaw hmuh a fiah ta. Pindan thim ruihah ka awm ngei a, ka bula mipa awm bakah pindan kawngkhar niawm tak bula mipa dang ruangam ka hmu bawk.
.
“Gabo!”
.
Hmel hriatthiam har tak pu chunga min rawn pan hnaiin khum bulah chuan arawn thu a. Engmah sawi lovin ka chalah min rawn fawp vang vang a.
.
Tunah chuan ka him ta!