TMH - 23 - 34

TMH!!
CHAPTER – 23
TAKE MY HEART!
By. Thantei_Pautu a.k.a Laura_Sean_Virgo
.
LUCA GIOVANNI'S P.O.V*
.
"Lo kal rawh.. Stella! A ni hi ka fapa Luca Giovanni a ni e. Ka fapa, he hmeichhe nalh tak hi Stella Ryder."
.
"Miss Ryder." a kut la kangin chibai nan ka fawp zauh a. Ka lak atangin a mit a la sawn lo tih chik vak pawh ngai lovin ka hre reng mai. A nui seih a. Hmeichhe nungchang mawi tak a nih hmel hi..
.
"Ka fapa, ka kalsan ang che u. Stella hi amah chauhin a lo kal a, i lo buaipui dawn nia." Stella nen chuan inbia in an phun sep sep a, an tawng chu ka ngaihven lem lo bawk nen enge an sawi ka hre lo.
.
"Mr.Giovanni, i sumdawnna a kal tluang em?" ka bulah thuin a no ken chu a tuai nauh nauh a. Sawi tur a hriat hlawl loh chuan ka sumdawnna chungchang min zawt lovin ngawi hle hle se la ka lawm zawk ang. Min zawhna chu chhang lovin ka thle nghat a.
.
"Ka pa hian hna i thawh nasat zia a sawi fo a.."
.
"Kan lam dun dawn em ni ang?" ka kut ka pek chuan thawveng huai hmel pu in a nui seih a, rang zet hian ka kut arawn vuan var a. Mi dang lam kan va zawm ve chuan min rawn hnaihin ka nghawng ah a ban pahnihin min kuah a.. A rimtui chek chek chu Allison rim ang chiah a ni! Ni e, Allison rim ang chiah!
.
A nghawngah ka hmai phumin ka phun hluk a, thawk ka la bawk. A rim ngaihawm leh hmeichhia zet hi ka thlahlel tih ka pha lo. Ka inhriat hmain ka kuah nghet salh a, a taksa awm dan atang chuan min hnial hauh lo tih ka hria. Engvang nge ka hre lo, a insangmar at tih ka hriat chuan ka kuahna ka thlah dul deuh a.
.
"Um.. Allison ni lovin Stella.. Ka hming chu Stella!" mitmeng buai deuh nakin min en a. A nui lui sak a  "Allison tiin min ko a."
.
"Oh.. Sorry." ka tiliam puat a, ka kuahna ka thlah nghal bawk. Allison rim nam chek chek ka hriat khan ka ngaihtuahna ramah ka lo cheng nghal reng a ni tih ka hre hauh lo. "Min lo hrethiam lawk." tiin lamtual atang chuan ka kalsan a. Ka kalsan rualin a thaw halh tih ka hria. Ni e, an music play a tawp hmaa lampuite kalsan hi a mawi lo tih ka hre tehmeuh mai. Mah se, ka thei lo.. Kha hmeichhia kha Allison a ni lo!!
.
Boruak ni hulh hulh ah awm peih lovin pawnah ka chhuak a, rei pawh ka awm hmain ka lam pana ka nu lo nghal hlawk hlawk ka hmuh nghal hmiah.
.
"I chetdan a mawi lo hle mai. Giovanni mipate hi mawi lo taka awm tur an ni lo asin." ka bulah arawn thu a, chhan ka tum buai lo. Ka nu hi chuan a duh duh a sawi a, a sawi zo a a thusawi tam zawk a theihnghilh leh thin.
.
"Luca, Stella zak taka i siam vang khan ka lawm lo hle mai. Tha taka i biak ka beisei a nia."
.
"Mama, puitling ka ni tawh_"
"Puitling angin awm ta reng che.." a ti hlar a. A aw ki tihniam leh deuhin "Khawngaihin, ka fapa, Stella hi hmeichhe tha tak a ni a, itan nupui in a tihtur dik tak a ti thei ngei bawk ang. I hriat kha, fa nei turin i naupang tawh lo ania. Stella lakah hian that chhuah ang che. Tunah haw a duh a, i thlah a ngai a nia."
.
"Amahin arawn kal thleng thei a, amahin a haw leh rawh se!" ka tih chuan ngaihdan ni lo zet hian a lu a thing nar nar a.
"Engvanga luhlul em em  nge maw i nih le??"
"Giovanni mipa ka nia lawm."
"Tih ngaihna i awm hlawl lo."
.
Ka kut rawn vuanin min en vang vang a, a koki thlah dul hnakin a mitmeng a dul raih bawk.
.
"Luca, Allison khan in inneih chhung zawng khan nau a pai lo a. He thil ka sawi angai hi hreawm ka ti. Mah se, khawngaihin Stella hi pawm rawh. A ni chuan nau a pai duh ngei ang."
.
"I thusawi awmzia chu enge?"
"Ka..theihnghilh rawh. I duh dan bakin i awm ngai chuang hleinem." thu dang sawi tawh lovin min thawhsan a. A thusawi kha.. Stella hian nau a pai duh ang maw? Allison khan a pai duh lo em ni? Ka nu hian eng thil nge hriat a neih? Allison chungchang ah engmah hriat a nei lo. Tunah thiamthu sawitura a awm tawh loh vang mai hian a duh dan danin a puh chhe thei tihna a ni chuang lo. Ka ring a ni! Allison kha ka ring. Eng pawh chu ni se, nau a pai duh emaw duh lo emaw, a dinhmunah khan nau pai ngam turin ka siam reng reng lo.. Engkim tisualtu leh tichhe vektu chu keimah hi ka ni lawm ni?
.
Stella chu ka hmu leh tawh lo. Hmeichhe nalh tak chu a ni ngei a, mah se, a ni kha Allison ni lovin Stella a ni. Kei chuan Allison chiah ka mamawh a, ka duh bawk! Awmzia erawh a awm tawh lo. Allison chu eng ang pawhin thlahlel mah ila khawvelah hian ka hmu dawn tawh lo.
.
Inchhung ah lut tawh lovin car ka lachhuak a, in lam panin ka haw nghal a.
.
In ka thlen chuan a reh ruih a, pindan ah lutin ka thawmhnaw ka thlak a. He in ruak leh hlimna awm miah lohna hmun ah hian eng chen nge ka chen dawn le? Allison awm lai khan tunang hian a ruak ngai lo a... Ka thil ngaihtuah chu duh lovin inhnuaiah ka lut a, intur la chhuakin pawnah ka chhuak leh a. Zanin hian ka mu leh dawn hauh lo mai.
.
Hun a liam a, tunah chuan awmze nei lo a inngaihtuah hah ka tum tawh lo. Hmalam ka pan a hun tawh. Ka siamthat theih tawh loh thil vanga hnungtawlh mi ka ni ngai lo a, ka ni ngai hek lo ang. Kan nunah hian kan thil duh chauh a thleng lo fo a, engpawh tawk ila tuarchhuak turin mihring hi kan chak tawk.. Kei hi ka chak tawk!
.
Office-ah ka hun tam zawk ka hmang a, sumdawnna thil ah ka zin tam lehzual ta viau bawk. Ka nu leh pa leh Adelina min beisei angin kartawp chawlh an bulah ka hmang ta fo a, Stella nen pawh pangngai takin kan awm dun thei tawh. Ti ila, a dawhthei a, ka awm dan ang apiang leh ka duh dan min zawmsak a, a theih anga tam ka bulah hun hmang turin a inpe tawp a ni ber. Pawi ka ti em em lo!
.
"Luca, khawngaihin min hruai ve rawh?" Stella chuan no zeta min melhin ka malchung ah a thu a, a ban pahnihin ka nghawngah min kuah bawk a.
.
"No."
"Khawngaihin.."
.
Perth, Australia-ah ka hna tul vanga kal a ngai a, ni thum chhung cham tur ka ni bawk. Stella hian ka bula kal min dil ngawrh viau nain hruai ve tumna ka nei lo. Min zar hneh mah mah thin niin ka hre bawk. Hmeichhe no leh buaipui ngai lutuk hi engtik atang khan nge ka lo ngaihtheih tak viau ka hre hek lo. Stella hian ka thinlung a khawih pha em ka hre lo a, heti chung hian ka bulah a awm tam em em a, thil nihna tak hre lo chuan innei mai tur angin min sawi leh luai luai tawh bawk. Vawitam tak kan infawp a, ka danglam ngai lo. Engvang nge ka hre lo.. A pian a nalh a, a hlim thei em em bawk a, mah se, ka lakah hian nghawng a nei vak lo niin ka hre thin. Ka la danglam ve thei mahna le!
.
"Khawngaihin, Luca. I awm loh chuan engtin nge ka lo awm ang?" ka hmai ah min fawp dan dan a. A awmdan atang hian vawi engzat nge infawh aia thui kal a duh tih a tihlan tawh ka hre seng lo.
.
"A lehpek ah i kal ve thei ang." ka tih chuan lunghnur zetin ka malchung atangin a chhuk a.
.
"Anih chuan engtik ah nge i lo let leh ang? Ka ngai viau dawn che a nia."
.
"Ni thum hnuah."
.
"Okay. I lo let hunah thil eng emaw pek tur che ka nei a nia." ti sepin awmze nei zet hian a nui a, ka nui ve suk.
.
"I lang tha lutuk tih i hria em? I hlata awm hi ka thei miah lo a nia." min rawn hnaih leh a.
.
.
"Sir, tun atanga minute 30 ah kan chhuak thei ang." Kawngka bula Marcelli ding chu ka en zawk a, Stella chuan a melh rum nasa mai bawk. Marcelli hian engmah a sawi ngai lo nain Stella hi a ngaina tehchiam lo tih ka hmu thiam thin. Eng thil nge ka tih chuan ang? Mihring zawng zawng a in ngainat vek theih hleinem.
.
Perth-a ka awm chhungin thil danglam thleng a awm hran lo. Ka kal chhan meeting-ah ka awm tluk tluk a, han chhuah harh velna hun pawh a awm miah lo tluk a ni. Manhattan-a kan let leh hma ni, tlai ah hunawl tlem ka nei ta hlauh. Perth-ah hian ka kal zen zen lo a, len chhuah vel pawh a chakawm tho mai.
.
Marcelli nen kan leng chhuak a, boruak a lum khawp mai. Ka thawveng ru riau bawk. Hetianga ka awm lohna chin hi hun rei tak a ni tawh. Allison min kalsan atanga a vawikhatna a ni hial ang.. Allison.. Ni e, Allison.. Ka mumang ah ka la hmu fo a, kan inbe ngai lo.. A chunga ka awm thin dan vang khan ka mumang ah takngial pawh min be duh lo a ni ngei ang. Ka laka lungawi lohna nei ang tak hian ka hmu thin bawk a. Tunah hian engvanga ngaihtuah chhuak leh nge ka nih ka hre lo. Ka thawveng leh ta lo tawp mai!
.
Kawngsir a thutna nuam zet awmah chuan ka thu a, kan piah hla deuha mi vei vak neuh neuh chu thlirin ka mitthla ah Allison hmel ka hmu bawk.. Engtik ah nge a tawp ang? Ka kalsan tawh nia ka hriat thil hian min umzui tawp ngai dawn lo anih hi..
.
Hmeichhe pakhat, mipa naupang kai hlim taka nui ka hmuh chuan dawn awm lovin ka ding zawt a. Hmanhmawh zetin ka pan nghal a, Marcelli chuan ka awm dan hrethiam lovin min rawn zui vat bawk a.
.
Ka hmuhna hmun ka thlen chuan helai ka pan chhan ber hmeichhia leh mipa naupang kha an awm leh tawh lo. Ka mitvai mai niin ka hre si lo. Nge? Ka ngaihtuahna vangin thil awm miah lo ka hmu zawk le??
.
"Sir, kan kir leh a hun tawh a.."
.
"Ka hria e." tia chhangin ka inher a, ka rilru erawh a nuam hauh lo mai.
.
Muangchang lovin car-ah ka lut a, kan tlan chhuah hnu chuan ka thutna seat nghengin ka maimitchhing vang vang a.
.
Mipa naupang nui ri ka hriat chuan ka meng chhuak zawk mai. Thu ngilin ka hawichhuak a, nichin lawka ka hmuh hmeichhia leh mipa naupang bawk kha an ni tih ka hre nghal. Car a din vangin ka hmuchiang khawp mai. Hmeichhia chu kunin mipa naupang chu a fiam a, mipa naupang kut chum biang chuan amah fiamtu hmeichhia chu ngaina tih hriat taka en in a nui hak hak a. Car kawngka hawnna ka vuan nghal rawk rawk a, mah se, ka che rang tawk lo. Marcelli a tlan leh tan a, mipa naupang leh hmeichhia te chuanna motor pawh a tlan ve bawk.
.
"Saw motor saw zui rawh!"
Angaihna hriat loh hmel zetin Marcelli chuan min en a, thu ka pek angin motor chu a zui a.
.
"Sir, eng vanga zui nge kan nih?"
"Zui tawp rawh."
.
Minute 10 vel dawn kan zui hnu chuan mak takin kan hloh ta tlat.. Phiangsen hian! Movie ang mai a ni.. Kan meng ve reng a, engtin nge kan hloh theih zawk? Ka hre lo.. Kha hmeichhe sam buang leh mipa naupang kha ka la hmu ngai lo a, mak takin hmuh chian ka chak tlat anih kha. Hmeichhe hmel kha ka hmu chiang lo a,a pianphung erawh ka hriathnu a ni. Ka hmusual hauh lo ang! Thil ni thei ani dawn em ni?
.
"Marcelli, hmeichhia leh mipa naupang kha i lo hmu ve em?"
.
"Yes, sir. "
"I hriat tawh hnu an ni em?" Marcelli lak atang hian ka rinhlelh hi ka ringhlel mai ni lovin thil dik ani tih hriat ka tum a ni berin ka hria.
.
"Sir, ka la hmu ngai lo. I laina hnai te annih ka lo ring ringawt a."
.
"Allison niin i hre ve lo maw?" ka tih chuan phawk zetin min en a.
"Ka hre hauh lo mai, sir. Mrs.Giovanni.. Ah.. Allison niin ka hre lo." min lainat hmel zetin min en a. Min endan vang chuan ka hmu sual ngei niin ka hre ve ta bawk. Ka thil ngaihtuah dan mak tak hian ka rilru ti danglam zovin thil ka hmu sual a ni ngei ang!
.
"Let rawh." ka ti hmuk a. Marcelli paw'n min chhang tawh lovin kan thlenna hotel lam panin car chu a khalh a. Ka ngaihtuahna erawh a chawl lo chiang khawp mai. Nunphung pangngai ka nei ve dawn ni a ka inhriat apiang hian thil mak ka tawng zel mai anih hi. Engtik ah nge a tawp ang? He zawhna ka chhan theih si loh hian eng chen nge min la tihbuai dawn le?
.
Manhattan kan let leh hnu kar khat chhung chu ka ngaihtuahna atangin Allison a paih bo thei lo! Tun chauh pawh hi a ni tawh lo, Stella ka bula a awm lai ngei ngei pawhin Allison hi ka theihnghilh ngai reng reng em ni?
.
"Luciano, thil eng emaw min tihsak turin ka duh che."
.
"Engpawh ka tihtheih apiang ka ti ang."
.
Luciano ka biak zawh hnu chuan library room-ah lutin ka thu vang vang a. Stella lo kal tum pawh ka hnar fithla ta hmak a nih kha. Tunah chuan ka bula awm turin eng thil mah ka mamawh rih lo.
.
Ka beisei ruk ang thil Luciano hnen atangin ka hre mai lo a, mak takin ka beiseina erawh a tawp mai dawn lo tih ka hrechiang. Khawvelah hian mitthi tawh an lo let tawh ngai lo tih ka hrechiang viau mai. Damon pawh a thih hnuah a lo let tawh miah lo! Naupangchhia ang maiin thil ka ngaihtuah leh tan ta anih hi.
.
Kawngka a ri rak a, pindan a ka nu rawn lut ka hmuh chuan thu thain ka lo en reng a.
.
"Luca, Adelina a lo kal em?" hmm.. Tun tum chu ka beisei loh tawp danin bul arawn tan tlat mai.
.
"Kal hauh lo mai."
.
"Ohh.. Stella nen khan an chhuak dun anih dawn chu. Chuan...ah.. Engtik ah nge inneihna kan buatsaih dawn le?" nui sakin ka hmaah a thu a.
.
"A hmanhmawh thlah hleinem." ka tih chuan a ner sak a.
.
"A bul atangin kan tan leh dawn a va ang ve."
.
"Mama, ka nuna thutlukna siam tur chu keimah ka nia lawm."
.
"Ka hria e. Mah se, muangchang suh." a ti hmarh hmarh a. Pawn lama thawm lo chhuak ka hriat chuan Adelina leh Stella te an lo kal ve tih ka hre mai. Tunah tak hi chuan a tuamah ka hmu chak lo. Keimah chauha awm ka duh ber.
.
Ka nu chu pindan atangin a chhuak a, phur lo zetin ka zui ve lo thei lo.
.
"Min hrilh lawk lovin enge in rawn tih dawn?"
.
"Hi, honey.." Stella chuan min rawn kuah hnuah ka bulah a ding a, Adelina leh ka nu chu ka hriatthiam hauh loh danin an inmelh zauh thung.
.
"Grande Fratello, bungraw thenkhat kan rawn tihfel sak dawn che anih hi." Adelina chu awih lo zetin ka en a, heihi ka in a nia, ka nu leh ka farnu te hian ka nuna inrawlh chintawk an hre tawh lo anih hi.
.
"Heihi ka in a nia, a chhunga bungrua te hi ka thu lo chuan tuman an khawih lovang."
.
"Oh.. Thinrimna tur a awm lo a nia. I hriat alawm.. Nang leh Stella te hi reiloteah in innei mai dawn a.." na zetin Adelina chu ka melh a, a sawitum sawi tluan lovin a riat ral vel ta mai mai.

An ti mah mah tawh a ni e!
.
"Tunge Stella nen hian kan innei thuai dawn tih sawi?" Stella thaw hak ri chu ka hria. Tunah tak chuan ka pawi sa lo.
.
"In thunun rawh. Luca.."
.
"Min chhuahsan thei ang." ka tih chuan ka nu thinrim hmel tak ran chu ka hmachhawn fel der tawh.
.
"Adelina, Stella nen hian min lo va chhuahsan lawk ta che u. Ka fapa luhlul zet nen hian kan han inbia ange."
.
"Mama, min nawrlui suh." ka aw a tihluih theih ka nih loh zia lang vangin ka nu chuan ang phamin min en a. Stella chu nuam tih loh hmel zetin a lo che ve sek bawk. "Khawngaihin, min chhuahsan thei ang."
.
Ka nu chu thinrim zeta inherin kawngka a pan a, Adelina'n a zui vat bawk. Stella erawh chu tim daia ding chungin min melh zauh zauh a.
.
"Luca..?"
"A zia lo hle mai. Nangpaw'n min chhuahsan thei ang."
.
"No. Ka kalsan ngai lovang che.." tiin min rawn kuah thlawp a, ka  beisei lawk loh vangin min ti hamhaih deuh. "I bulah ka awm reng ang. Ka kalsan miah lo ang che." ka awm ah bei thlapin ka hnungah min chul hauh hauh a. Mak takin ka inthlahdul ta deuh.
Stella chu a dar tawn tawnah vuanin a mitah ka en a, a mitmenga min thlakhlelhna lang chu hmuh hmaih theih pawh a ni lo. Mah se, ka thinlung khawih pha lo tu hmeichhia hi engvangin nge ka bulah ka awm tir kher ang? Tumah tihnat ka duh tawh lo! A tawk tawh e. Mi dang ka tina tawh lovang.
.
"Eng thil mah min tiam suh." tiin ka kuah a, ka kuah vanga lawm ni awm tak hian nui hak a.
.
Stella nen pangngai taka kan inzui atangin thla khat a liam leh ta. A mak khawp mai, hun hi a liam chak mah mah niin ka hria.
.
"Mr. Giovanni, ka fanu hlim taka ka hmuh theih vang hian i chungah ka lawm hle mai." ka bula Mrs. Ryder ding chu ka en a. Eng thil vak ka ti lo. Ka duh dana nun ka thlah lo a, ka awm dan apiang hi Stella hian a zawm vek a, eng thu ah mah min hnial ngai lo. A ngaih dan lo a thil a thlen pawhin min hnial ngai chuang lo a, a hlim reng ni maiin ka hria. Min thlahlel tih a thup ngai hauh lo bawk. A tha a nimai..
.
Zanin hian Stella nu leh pa te chenna ah kan kal a, Stella chuan min kuahin a chhungte hnenah min chhuang tih hriat tak hian min inhmelhriattir dan dan a, an mita min ngaihsanna lang chu an thup hauh lo hlawm lehnghal a. Ka hausak zia an hria a, an fanu nen kan inhnaih zel theih nan hian eng thil mah tihhreh an nei lovang. Ka thil ngaihtuah vang chuan ka ner sawk.. Sum! Sum thlahlel lo leh sum um miah lo mihring hi an awm paw'n ka ring ta lo ve!
.
Ka phone nghawr dar dar chu ka ipte atanga phawrhin caller ID ka en a, Stella chuan min en hau bawk. "Min lo hrethiam lawk." tiin Stella min kuahna chu ka phelh a, pawnah ka chhuak a.
.
"Luciano, sawi rawh."
.
"Mr.Giovanni, chanchinthar ka nei. Nangpaw'n i awih lovang. Mak tak a ni."
.
"Tunah hmuh che ka duh." ka ti nghut a.
.
Stella lungdam zan lo chungin an in kan chhuahsan a. Tuna ka rilru a lian ber chu Luciano hmuh chiah a ni rih.
.
"Luca, ka tawng i hre miah lo a nia."
.
"Enge sawi rawh."ka tih chuan ka kutah rawn vuanin min melh sar sar a. Ka ngaihtuahna kal ding lutuk vangin eng thu nge a sawi ka lo hre miah lo a ni.
.
"Ka nu khan mi tha tak inih thu a sawi a."
.
"Min hrechiang lo anih chu."
"Oh.. Honey. Keipawh hian mi tha tak ini tih ni tin ka hmu alawm."
.
"I in kan thleng e."
Car ka tiding a, Stella thutna lam kawngkhar hawnsak turin ka chhuak nghal a. Ngaihdan nih vak lo hmel tak hian a la thu ngal thung.
.
"Lo kal rawh le."
.
"Luca, engvangin nge i bulah ka riah theih loh?" a tih chuan ka en tawp. Chhan buai leh ka bula a riah theih loh chhan sawifiah ka tum lo. "Keimah chauha khawhar taka riah hi ka ning tawh." a ti zawm sep a.
.
"Tunah chuan a theih rih loh. Khai le, lo chhuak rawh le."
.
"No. Zanin chu i  bulah ka riak ang." nidang ang lo takin a luhlul a chhuah ve dawn anih hmel.
.
"Inhnial buai nan hun ka nei lo a nia."
"Luca.."
Motor atangin ka chawi chhuak nawlh a, a te that a. Lei a ka nghah leh rualin min kuah a, duhthawh zet hian min fawp a.
Min thlah hnu chuan inchhunga a lut lai ka thlir a. Inchhung a luh fel rualin car-ah ka lut a, chak zetin Luciano awmna hmun ka pan nghal vang vang a.
.
"He thil hi en teh."
.
Ka hmaa Luciano thlalak dah chu la in, chik zet hian hmeichhia hlim taka nui hmel chu ka en a. Ka zawi hnawk mai! Luciano hmel thutak ram mai chu en zawkin thlalak chu ka en leh a.
.
Allison!! Ka thinlung luah rengtu Allison ngei a ni! Engtin nge anih theih? Ka nupui, ka hmangaih hmeichhia hi a thi tawh a ni lawm ni? Ka hmangaih maw??? Keimah ah hian eng thil dik lo nge awm le???
TMH!!
CHAPTER – 24
TAKE MY HEART!
By. Thantei_Pautu a.k.a Laura_Sean_Virgo
.
ALLISON'S P.O.V*
.
Ka taksa awm dan nuam lo lutuk vangin ka harh a, ka che sawn thei lo. Ka lu na lutuk chu a tur tluk tluk bawk.
.
"Tu nge awm?" ka aw a ri chhuak thei lo tih ka hriat chuan mangang zetin ka rum a. Helai hmunah hian engtin nge ka awm ka hre lo.. Ni lo, Ka ngaihtuah theih hnuhnun ber chu.. In ah khan mipa tunge anih ka hriat loh a lo lut a, a hmai tuamna a phelh pawh khan tunge anih ka hre ngai lo. Min dimna nei hauh lovin ka chungah a che anih kha! Ka chungah eng vanga hetianga che hi nge anih ka hre lo hul hual.
.
"Tu emaw in awm em?" ka hrawk a ro lutuk. Tui ka mamawh. Ka awmna pindan eng tha lo zet chu ka en kual a, hetiang dinhmun a awm tur hian vawikhatte pawh ka la inngaihtuah chhin ngai lo. Kawngka a rawn inhawng a, eng lo lut vang chuan meng hleithei lovin ka kun a. Ka taksa awm dan lah chu rem lo tih piah lam a ni.
.
"Enge i an?"
Tunah chutiang thu chu engtin nge min zawh theih zawk. Ka awm dan leh ka hmel a hmuh rualin ka tha lo tih a hre ngei ang. Ka chhang thei lo. Chhan tum pawh ni ila ka tawng ring thei chuang lo. Ka thi mai dawnin ka hria.
.
Dim lo zet hian ka samah min tham a, a hmel ka hmuh theih nan min pawt dak a. Ka ring na lutuk.. Ka englai ber nge na pawh ka hre lo. Ka taksa ah hian na lo lai a awm paw'n ka hre lo.
.
"Chhanchhuahna beisei duh suh. I khawvel hun hman tawpna tur chu he pindan hi a ni."
Sual let turin chakna ka nei chuang lo a, min khawih ang ang chuan ka awm tawp a ni ber. Mi dang pahnih an rawn lut a, ka kut an phuarna chu phelhin puan var  lian zet an rawn ken luh chuan min tuam a, hnehsawh zeta min pawm kangin min muttir a, ka chungah hian eng thil nge an tih dawn ka hre lo. Ka mangan lutuk vangin engtianga han awm tur nge ka hre chuang der lo  bawk a.
.
An phun sur sur a, ka hmai min khuh tel vek vangin enge an buaipui ka hre lo a, reiloteah min tuamna puan chu hlipin chair ah bawk min thuttir leh a.
.
"Hmeichhe nalh tak chu a nih hi. Nuam kan chen thei ang chu.." a aw ri rapthlak lutuk vang chuan ka maimitchhing a, ka awmna hmun atang leh heng mihring lak atang hian engtin nge ka zalentheih tawh chuan ang. Khawi hmunah nge ka awm tih ka hre lo mai ni lovin, tlam chhuak thei turin ka taksa ah hian thahrui a awm lo.
.
"Nawmchen chu vawikhat pawh ngaihtuah suh. Min ruaitu in a hriat chuan damin kan chhuak lovang. Mipat hmeichhiatna zawnga che lo turin ka hming ka sign vek tawh." a cher deuh ber chuan a ti sar sar a.
.
"Ti pawh ni ila a hre tawh chuang lovang. Helai atang hian dama chhuahtir kan tum chuang lo a ni lawm ni?"
.
"Ngawi hmak rawh. I *** kha ka tan a ni mai!!"
.
An tawngkam lah chu an duhtui lo em em lehnghal.
.
"Miss, i harh em?" chiang lo riai in min betu hmel chu ka en a, mak takin min lainat hmel a pu tlat nia. Ka tha sawm khawmin ka lu ka thing a.
.
"That chhuah duh suh.. Awmzia a awm lo. Engtin nge kan tih zel dawn? Kan awmna chin hriat anih chuan kan dam chhuak lo tawp ang."
.
"Dawihzep lutuk.. Hetah hian kan kalsan ang. A dam chhuak zo tawh dawn chuang lo. Amah tanpui turin mi tumah an rawn kal lo bawk ang."
.
An tawng chu ka ngaihven ber tawh lo. Heta tang hian dama ka chhuak hlauh a nih chuan heng mite hi ka hriat ngei an ngai ang chu. Ka mit ka meng a, an hmel chu uluk zetin ka en a.
.
"En ta che. He hmeichhia hi a huaisen hle mai. Awlsam taka kan thah theih lai hian.." min rawn panhnaiin ka hrawk ah min rek a, reilote chhungin engmah ka hre leh ta lo.
.
.
"Allison, harh tawh teh.. Mi huaisen tak inih kha. Tuar hram hram rawh aw." hmeichhe phun sep sep ri ka hriat chuan muangchangin ka harh riai riai a, ka mit ka meng mai ngam lo.
.
"Allison, i harh tiraw?? Lalpa.. Hlau suh aw, hlau suh. I him a nia.. I him.." Min betu chu tunge tih hre thei lo mah ila ka thla a muang huai mai. Engtin nge mi hlauhawm tak tak te lak atang leh min khungna pindan atang khan min chhanchhuah theih zawk le?
.
Muangchang in ka meng a, ka hmai bul seta min entu hmeichhia chu tunge anih ka hre mai lo.
.
"Allison, keimah_keimah_ Garcia.. Tui i duh em?" reilote kal sawnin tui min intir a.
.
"Khawiah nge ka awm?"
.
"Ohh... Hahdam rawh. I him tawh alawm.. Muangchangin thil thlen dan ka hrilh dawn che nia. " dam thlap hian ka kutah min vuan a, min hnem tum takin ka kut a chul hauh hauh bawk a. Garcia tan hian eng thil mah ka ti lo a, engvanga min tanpui nge anih le??

.
"Engvangin nge min tanpui?" ka tawng chu a hre pha lo a niang, ka hmui bulah arawn kun hniam a. "Engvanga min tanpui nge i nih?" ka tawng a hriat chuan a nui sak a.
.
"Pathian remruat a ni ngei ang. I taksa hahdam lehzual se la, kan titi dawn nia. Tunah chuan chawl leh phawt rawh.." Ka puansin lai siamtha in min kalsan a. Rei tak ngaihtuahna harhin ka awm thei chuang lo. Ka taksa chau lutuk vang a nih ka ring, ka harh hman lo reng reng mai.
.
Chhun leh zan ka hrehrang lo a, ni engzat nge hetiang hian ka awm tawh ka hre hek lo. Ka muhil a, ka harh a, khum thawhsan lovin ka muhil leh a.. Hetiang ringawt hian ka awm rei ta viau niin ka hria. Ka awmna hmun hi damdawiin a nih leh nih loh pawh ka la hre chuang lo.
.
.
Rilru zang deuh zawkin ka muhil ka harh a, tunah chuan ka taksa pawh ka tiche thei tawh. Garcia lo lut ka hmuh chuan thut ka tum a, ka thiltih tum hriain min pui vat a.
.
"I tha tawh hle mai. Hma i sawn chak hle a nia."
.
"Min tanpuina hi engtin nge ka rulhlet theih ang che." Garcia hmel min ngaina tih hriat reng chu ka en vawng vawng a. A chungah hian engtin nge lawmthu ka sawi anga, engtin nge min tanpuina hi ka rulhlet ang tih ka hrethiam pha lo.
.
"Hetiang ti thei a ka awm hi malsawmna a ni zawk tih hrilh che i la, i awih angem?" a tih chuan ka nui sak a.
.
Tunah chuan Garcia chenna in Perth-ah ka awm tih ka inhre tawh a, ka thla a muang bawk. Ka taksa a chak telh telh a, ka chunga thil thlen dan leh Garcia in a ka lo awm tak dan hre tur pawhin ka chak tawk tawh tih ka hria.
.
"Tunah min hrilh tawh rawh le.."
.
Min chhang  mai lovin a bu nghat nghat a, ka bulah rawn thu hnaiin ka kutah min vuan a.
.
"Khami ni.. Mak takin, kha mi ni khan Manhattan-a i pasal nen in chenna in ah khan nangmah hmu turin ka lo kal a. Thil thlen dan chiah chu ka hmu lo. Mipa pakhatin in atanga hmeichhia a rawn pu chhuak lawp lawp ka hmuh khan nangmah i ni tih ka hre nghal mai a. Engtia awm tur nge ka hriat mai loh vangin in chuanna car kha ka zui ta ringawt a ni." a ngawi leh rih a. Sawi zel turin ka duh tih lantir nan ka lo nawr ve thung.
.
"Chuan, khawpui atanga hla tak thlengin ka zui zel che u a, in hlui deuha a hruai luh hnu che khan min tanpui thei tur ka hriat hmasak ber ka be ta ringawt a.." Ka hmela zawhna awm chu hrethiam ni awm takin "Nia, police ka biak loh chhan kha ka hre bik lo. Mah se, tuna thil thlen zel dan ka hriatzui atang hian ka tifuh a ni tih ka hria.. Nangmah in atanga la botu bera te pawh kha an hmel ka hmu miah lo. In chhunga nangmah la chhuak tura kan luh khan nangmah chauhin I awm a. Mak ka ti tawp thei lo." A thaw halh a.
Thil dang zawng zawng aiin Garcia’n thil thlen zel dan a tia a sawi chuan ka thin a phu nghal dawt dawt mai.. Luca.. Ni e, Luca Giovanni, ka pasal hian min ngaihven zui em tih pawh ka hre miah lo. Mihring nun tak tak hmang ni lovin movie, miin hmuhnawm ti taka an thlir tur chang ni awm zawk ka niin ka hria.
.
"Ni engzat nge helai hmunah hian ka awm tawh?"
.
"Vawiin hi kar 2-na chiah a ni."
"Anih chuan, Luca.. Ah_ Ka pasal in ka awmna hmun hi a hria em?" ka tih chuan min lainat hmel taka min en in a lu a thing a. Ka awm chhung na vawng vawng chu ka thinlung nat zia tichiangtu a ni.
.
"Ka hrilh lo hrim hrim a ni. A zawng ngei ang che tih chu ka hria a.."
.
"A ti hauh lovang.." ti sapin thawk ka la ham ham a. Luca hian min hmangaih ngai lo a, alak atanga lak bo ka ni ta hi a thawveng huai zawk ang chu! Ka unaupa chungchang kan hriat theih hun nghak turin min hrilh kha a nia. Ka unaupa chanchin hriat chu sawi loh, kei ngei pawh alak atanga lak bo ka nih theih nan  hian ruahmanna a siam a ni ngei ang chu! Ni lo.. Ni lo hram rawh se.. Hetiang khawpa mihring nunrawng hi an awm thei lovang. Tunah pawh hian mangang takin min zawng ngei ang?? Ngaihtuah buai viau tur ka ni em ni?? Min zawng ni se, min ngaihven ni se.. Tun thleng thleng hian Garcia bulah ka awm ka ring lo. A duh chu awlsam takin a nei thei ziah a, Tomas chanchin pawh a hria ang. Min hrilh duh loh vangin chhuanlam dang a siam a ni khawp ang..
.
"Luca hnena engmah i sawi lo chu a tha zawk mai thei. Tum ni se tunah pawh min rawn hmu tawh ngei ang."
.
"Ka hre lo le. I duh chuan i taksa chak deuh hunah amah pawh i hmu thei ang chu."
.
"Ka hre lo."
.
Garcia min kalsan leh hnu chuan ka mu meng reng a. Thup tum mah se Garcia khan ka laka la sawi duh loh thil zep a la nei ang tih ka ring.
.
Hun a liam bek bek a, ka ngaihtuahna hi mak takin a chawl tlat thung. Eng thil nge beisei tur ka hre lo. Engmah hrechiang lo a Luca chhe taka ngaih ringawt hi a dik ber chuang lo mai thei a, amah va hmu ila a that ka ring. Kalsan tumsa tho ka ni a, a ni paw'n min dan a tum chuang lo a. Tomas chanchin hriat hun nghak rih turin min hrilh chauh kha a nia.
Tuna hetianga ka awm chhan pawh hi ka zawtfiah thei bawk ang chu.
.
Thla a ral a, ka taksa a hliam ka neihte a dam fel tawh. Ka chal erawh a ser dawn anih hmel.
Darthlalang ah uluk takin ka inen a, ka chal veilam a ser inrin deuh raih chu enin ka khawih a. Heihi chhinchhiahna a ni... Luca lak atanga lak hran ka nih chhinchhiahna!
.
Tunah ka hmuh angai a ni. Thil chiang lo ngaihtuah mai lo hian, kan inthenna lehkha kan tihfel pawh angai bawk ang chu.
.
Garcia in ah hian eng chen nge ka awm dawn ka hre lo a, midang rinchhan a awm reng pawh hi ka duhdan a ni lo bawk a. Luca hmuin kan inthenna lehkha kan tifel anga, keimahin khawvel ka hmachhawn tawh ang. Tunah chuan keimah chauh ka ni tawh. Tomas a awm tawh lo a... Hmm.. Mah se, mal ngawih ngawih angin ka inngaihtuah tur ani lovang. Ka pa leh Tomas te, khawvel ah hian awm ve tawh lo mah se ka bulah an awm reng tho. Chiang takin ka hria. An taksa khawih thei lo mah ila, an thlarau chuan min awmpui reng tho.
.
Ka pindan kawngka inkik dat dat ri ka hriat chuan lo lut turin ka hrilh a.
.
"Mama.."
"Ohh..Lo kal rawh.."
.
Elario, mipa naupang duhawm ber leh min tihlimtu.. Ka lam pana lo tlan ter ter chu panin ka pawm kang vat a. A sam dum hlap chu chulin a biangah ka fawp a.
"Mama.."
"Hmm.. Thil eng emaw min hrilh tur i nei tih ka hria a nia.."
.
"Ice cream ka ei duh a, mah se.. Mommy'n ei a phal lo a." a nur nang nang bawk a.
.
Oh.. Ka lo sawi theihnghilh dawn.. Elario hi Garcia fapa a ni a, tunah hian kum 5 a tling ve tawh. Mipa naupang duhawm ber a ni tiin sawi ila, min pawmpui vek ka ring. Hrilh ngai miah lovin Mama tiin min ko ve tlat bawk.
.
"Anih chuan, ice cream ei turin kal ang aw."
.
"Mama hi a tha ber.." ti chungin a hahmai pakhat bal seu maiah chuan a lei a tilawr tat a. A duhawm takzet.
.
Elario pawm chungin pindan atangin ka chhuak a. Choka ah luhpuiin lungawi zeta ice cream a eilai chu ka en reng a.
.
Luca nena kan fa ni ta se... Ngaihtuah zawm ka duh lo.
.
Garcia rawn lut chu ka en a, min hmuh rualin a awm dan a danglam deuh tlat.. A awm dan ka hrethiam tih hriain a nui a..
.
"Ah.. Nizan thil thleng a nia.." eng thil emaw chu a thleng a ni..
.
"Eng thil nge?" hriat chak zetin ka zawt a. A hmel awm dan atang chuan chanchin tha lam a nih phei chu ka ring chuang lo a.
A phone ka hmaah arawn lekkang a.
.
"Heihi eng thil nge?" mipa leh hmeichhia lam dunlai thlalak a ni a, inhmangaih taka inkuah chunga lam dun.. Luca a ni em!!
.
"Nizan khan he thlalak hi upload a nia. An sawi dan chuan inneih mai an tum a ni awm e." ka nghilh dup mai. Hetiang khawp hian a ni maw Luca tan khan ka lo hnawksak le!
.
"I tha em? Allison??" min ngaihtuah takin min rawn kuah a, ka insum thei miah lo. Ka mittui a tla zawih zawih bawk. Hetiang khawpa rang hian a che duh dawn em ni? Kum em pawh a la ral lo a.. Ni lo, kum chu sawi loh..! A la rei lo lutuk em a ni. Luca hian dam leh hrisel takin ka awm tih a hre ngei anga.. Thi angin min ngai pawh a ni maithei.. Chu pawh ni se.. A la hma lutuk..! Lo thi tak tak pawh ni ila, he mihring Luca Giovanni hian min sun dawn hauh lo a lo nih hi.. A na ka ti lutuk! Ngati nge ka lo thih zawk mai loh le.. Garcia hian min tanpui lo ni se thlamuang takin ka thi tawh nimai tur.! Hetiang thil hi ka hre lo bawk anga.. Engtin nge maw ka awm dawn le??
.
Garcia chu kalsanin ka pindan ah ka lut a, lusun nawn leh ang mai ka ni. Ka nun kawng bumboh zetah hian kawngrem rah ni ka nei ve ngai dawn lo anih hi.
.
Khumah ka mu meng reng a, hetiang hian ka en liam ngawt mai dawn em ni? Luca hi ka hmangaih a, ni e, ka hmangaih. Ka duh emaw duh lo emaw ka hmangaih a lawm. Vawikhat chauh.. Vawikhat chauh chu ka hmu leh ang!
.
Khum atangin ka tho a, tuivawtin ka hmai ka theh thawt thawt a. Harhfimin uluk takin ka ngaihtuah ang. Luca Giovanni nun atangin paihchhuah ka ni a, he thil hi tu tih nge tih ka ngaihtuah buai dawn lo. Thudik hriat hian min tina zual thin. Luca tih lo ni se engtin  nge ka tuarchhuah zawh tehlul ang ni?? Min hmangaih lo tih hrereng chung pawh hian engvangin nge ka thinlung ala luah reng? A bula ka chen chhung pawh khan min hmangaih turin a rilru ka hneh thei pawh a ni lo a. Mahse, vawikhat chauh.. vawikhat chauh chu a hmel ka hmu leh dawn chiang a ni.
.
.
"Allison?"
.
Garcia ka pindan kawngka a lo dak chu lut turin ka huih a.
.
"Allison, thil dang hrilh tur che ka nei. Um_ka hrilh kher duh che angem tiin ka hmuh hmasak ber che atang khan ka ngaihtuah tawh a.. Ka hrilh che hi a tha ber dawn niin ka hre ta. I awm dan ka hmuh che hian nun thar hlaka bultan i mamawh tih ka hrethiam a. Heihi han en teh."
.
Garcia frame min pek chu ka en a, ka phu chiang lutuk! Keimah ang chiah hmeichhia, hmel inang,  mitmu rawng pawh inang, kan sam rawng pawh a inang!
.
"He thil hi enge?" ka ti tham tiak a. Mak ka ti lutuk takzet.
.
"Allison Caren Adams!"
.
"Eng maw?" lehzel chuan. Hetiang thil hi khawvel ah hian a awm thei dawn em ni?
.
"Awm thei e. He hmeichhia hi Allison Caren Adams a ni."
.
"Thil ni thei a ni lo."
.
"A ni si a ni. Ka thiantha ber a ni bawk a. He thil hi ka hrilh nachhan che chu i hriat ngei atul vang a ni. Ngaithla teh.." ka thlan a tla bawrh bawrh hialin ka hria. "He hmeichhia thlalak a i hmuh hi ka thiantha ber a ni. He mi a nih vang hian Manhattan-a Cocoa Cafe-a ka hmuh hmasak ber tum che a ka awm dan kha i la hriat reng ka ring, ka beisei phak hauh lovin ka hmu che a, a hunlai khan ka inthunun zo miah lo anih kha."
.
"A mak hle mai."
.
"Ni e, khawvel ah hian thilmak a thleng fo alawm. Ka thiantha ber hi khawvel ah hian a awm tawh lo a.."
.
"A pawi ka ti lutuk." ka ti sep a.
.
"I lung tha lo thin kha i dam tawh a. Tiraw??" amah ring turin min duh tih lang ngawih ngawihin min en a. Ka bu nghat. Ni e, mak takin Luca ka tawn atang khan ka natna kha a dam tlat a ni. Ka doctor paw'n mak a ti em em anih kha. Ka dam dan leh Garcia hian inzawmna an nei dawn em ni?
.
"He ka thiantha ber Allison Caren Adam hian itan, itan chauh a nun a hlan a ni!"
.
"Aw Lalpa.. Engtin nge a nih theih? Engtin nge ka rin theih ang? Hetiang thil hi atakah a thleng thei dawn em ni?"
.
"Hlauthawng suh. Hlauhthawnna tur a awm lo. Ka hrilh chhan che chu nang hian engmah i hrechhuak dawn lo a, nun thar nei turin ka duh che a, ka tanpui thei ang che."
.
"Nun thar neih chu ka duh reng em ka hre lo a ni. Garcia, min tanpuina zawng zawng pawh hi a tam tawh lutuk..".
.
"Han nghak  hlek la, nun thara bultan chu i duh ngei ang. Keichuan eng chen pawh ka nghak thei alawm." nui sakin min kuah a.
Min chhuahsan hnu chuan a frame hnuchhiah chu ka en ngawih ngawih a. Mahni hmel leh nihphung ang chiah mihring hmuh hi ka inring nngai lo reng reng. Thil nuam pawh a ni hek lo. Engtin nge la inhmu ngai lo leh piang ve tih pawh inhre miah lo, inang chiaha kan awm theih le? A mak tih bakin ngaihtuah dan tur pawh ka hre lo. Kan hming a la inang vek lehnghal!! A ni hian ka tan a nun a hlan maw?? Engti kawngin nge ka tan a nun a hlan tih chu ngaihtuah ngaihna pawh ka hre lo..
.
.
Engmah ka ngaihtuah chhuak dawn chuang lo tih hriain ka pindan ka chhuahsan a. Ngaihtuahna hman hah vak vak loh ka zir anih loh chuan ka a thei mai ang. Mi pangngai ve mai tawn atan chuan a tam tawh lutuk mah mah a nih hi.
.
Kar khat a ral leh hnu chuan ka thiltum tih hlawhtlin tumin thutawp ka siam ta. Garcia hnenah Luca hmu tura kal ka tum thu hi hrilh ve hrim hrim ila a thain ka hria.
.
Garcia bula ka sawi chuan engmah sawi lovin min kuah a, duhsakna min hlan ringawt.
.
"In inang lo takzet a ni. Nangchu mi chak tak ini a, ka hlauthawng hauh lo mai."
.
"Chak taka ka awm angai reng a ni."
.
"A tha e. Luca i va hmuh chuan eng thil nge itih ang?" ka beisei hauh loh zawhna a ni. Ka hre lo! Vawikhat chauh ka hmu ang tiin ka ngaihtuah a, ka hmuh chuan eng thu nge ka sawi anga, nupui nei lo turin ka ngen ang maw? Ni lo.. Ka hmangaih thu ka hrilh ang maw? Awmzia a awm lovang.. Min hmuh huna a awmdan danglam dan a zirin engthil nge ka tih dawn ka hria ang chu.. Ngaihtuah vak vak lo turin inthunun ka mamawh tih ka hriat reng angai takzet anih hi.
.
.
Manhattan ka thleng a, Luca nen kan chenna hmun ka pan thei tawh lo a, mak takin Luca nen hian kan inkar a hla em em in ka hre tawh tlat bawk. Ka thlenna hotel atang hian Luca in.. Kan pahniha kan in ni thin kha a hla lo a, ka ngaihtuah zawng ringawt pawh hian ka tha a khur dar dar mai. Luca chu hmu ta ila eng hmel nge a put ang? A hmel a la tha reng angem? Nuihzat thlak zawk hian a! Kan inhmuh loh chhung kum khat em pawh a la tling hleinem maw le. A la danglam tam lo tawp ang.
.
Hotel atangin zanriah ei turin ka kalchhuak a, Sarah pawh hmuh ka chak khawp mai. Mahse, hun a ral deuh a nih loh chuan ka hmuh a rem rih lo ang. He khawpui tan hian mithi ka ni tawh tlat a ni.. A va buaithlak tehnuai em!!
.
Eng emaw chen ka kal kual hnu chuan ka ril a tam raih raih tawh. Ichimura ka pana, pawn lama zanriah ka ei dawn chuan ahma pawh khan helai hmun hi ka pan fo thin a nih kha. Ka eitur chah ka hmaa waiter-in arawn dah hnu chuan tuiti takin ka ei a, tui ti taka eitur ka ei lohna chin pawh a rei tawh viau reng a ni.
.
Ka piaha mipa thu ka hmuh thut chuan ka thil ei lai a tawp chawt a. Luca! Lalpa.. Ka pasal Luca Giovanni ngei a nih saw! A hnunglam chiah ka hmu thei nain ka chiang lutuk. Khawiah pawh hmu ila ka pasal hi ka hai dawn lo.. Ka hai ngai miah lo ang. A bula hmeichhia chu a nalh lutuk takzet. A tawng sep sep a, Luca chu kun deuhin a bula hmeichhe tawng chu a rilru zawng zawngin a ngaithla ang tih a chiang! Ka awm a tawt up up a, ka dingchhuak hluai a.
.
Ka va pawh dawn em? Min hmu ve ta se engtin nge a awm ang? Lawm takin min kuah angem? Ka pen chhuak zeta ka ding leh a. Min hmu ngei ang. An thutna hmun thleng tur sawn min kal pelh ngei ngei angai a, helai hmun ka luh lai khan ka la hmu lo bawk. A awmzia chu helai hmunah hian ka luh hnuah rawn lutin  min kalpel ngei a, min hmu ngei  bawk ang! Duh ni se min be ngei bawk ang chu.. Ka pawh thei lo.. Ka va pawh ngawt thei lo. Min lawm lovin min ngaihthah ta se..! Ka tuar thei lovang.. Ka thei tawh lo. Allison, Manhattan-a i kal chhan hi Luca hmu turin a ni lo em  ni?? Chu pawh ni se, ka thei lo.!
.
Inherin ka ei man ka pe a, ka chhuah hmain Luca chu ka en leh hram! Ka inthunun thei ngang lo a ni. Tuna ka dinna atang hian a hmel chiang takin ka hmu thei a, ka thaw a chham lo chauh bawk. A hmel landan chu a thim raih a, hahdam hmel a pu.. Ka awih thei lo. A lan dan atang pawh sawn ka awm ta lo hian a nunphung a tibuai lo tih a va langchiang em? Allison eng thil nge maw i beisei chuan le??
.
"Miss, Luca Giovanni saw i hriat zawng a ni em ni? Min lo hrethiam la, a nupui thi ta nen khan in inang khawp mai." ka bula hmeichhe ding chu ka en a. A thusawi chu inthiam leh chiah lo hmel puin a nui sak a. Hmelhriat sa ni lo bula hetiang thu sawi ngawt chu a mawi chiah lo tih a hre ve tho tih a lang reng mai.
.
"Oh.. Chuti maw? Inang tak tak hi kan awm nuk anih hi tiraw?" ka tih chuan a inthiam lo hmel chu a bo leh mai a. Ka rindan in sawiduh a  ngah hmel ka ti. A tul ber lo tih hre chungin ka be zui hram bawk a. Eng thil nge maw ka hriat hrep ni.
.
"Nia. Mi sawi i hre thovin ka ring. Mr. Giovanni hian ruahmanna siamin a nupui kha a ruk bo tir tih an sawi a. I ring em? Keichu ngaihdan siam thiam a har ka ti. Mahse.. Tuna a bula hmeichhia nen sawn an innei dawn an tia, mi sawi hi a dik ni maithei. A hmanhmawh vut vut emai. A nupui kha a lainatawm ka tia sin. A thih leh dam pawh tuman kan hre ta lo a nih hi. Tisawn an inzui ngun tluk tluk bawk sia."
.
"Hm..ngaihdan ka nei ve hauh lo mai."
.
"Oh.. Ka tih palh. Kal chhuah i tum tawhin ka hria " a tih chuan ka nuih sak a. A hmel chu chik zetin ka en zui ta hial. A tawngduh viau mai hi mak ka ti viau a, ruahman lawk ang maia ka bula a thusawi hi a pangngai chiah lo reng reng bawk a ni. Chu chu lo dahtha ta ila, a tawp nan Luca ka mit ngeiin ka hmu a, ka duhtawk ta e. Na leh tur chuang ka awm tawh lo tih ka chiang. Tawp vek rawh se!
.
Ichimura chhuahsan in ka thlenna hotel ka panding nghal a. Ka chau zual nghulh mai. Tunah chuan engkim ka kalsan ang. Ka kalsan ta e. Garcia sawi ang chiah khan ka nun hi a bul atangin ka tan tha leh dawn a ni.
.
Hmeichhia a pasal laka hlutna nei lo, mi dang hmanrua..amah chauha awm hmeichhia hi.. Zalen ka ni lo em ni?
.
Duh loh leh paih bo ka nih vang hian lungngai in ka indawm kun ang maw? Ka hnungtawlh dawn em ni?? Teuh lo!! Thinlung nei thei tawh lo hial tur khawpin ka na  ngei a, ka kehsawm vek bawk. Mah se, mihring ka la ni!
Zalen tak, sava ang maia zalena nun bul tan tha leh tur hian eng in nge min dang thei? Engvang tehlul in nge sava ang maia zalen in ka nun hi ka hman mai loh ang!!
.
TMH!!
CHAPTER – 25
TAKE MY HEART!
By. Thantei_Pautu a.k.a Laura_Sean_Virgo
.
LUCA GIOVANNI'S P.O.V*
.
"Tunah khawiah nge a awm?"
.
Allison.. Tunah ka hmuh ngei angai a ni. Ka ngaih zia leh a bula awm ka thlakhlelh zia te, ka hmangaih a ni tih pawh vawikhatmah ka hrilh lo. Mak takin ka tha a khur a, ka beisei piahlam thil thleng hian min thawng tak zet zet. Min chhnan mai loh vangin Luciano chu ka en leh a. "Tunah khawiah nge a awm?"
.
"A awmna hmun tak ka la hre thei lo a ni. He thlalak hi Perth-a ka thawhpui Madison min rawn thawn a nia. Nimin lama a lak a nih hmel."
.
"Tunah Madison chu min biaktir rawh." ka dawhtheih loh zia leh ka rilru hmanhmawh zia ka hmela lang chu Luciano hian a hai hauh lovang.
.
"Mr. Giovanni, he thlalak a hmeichhia hi i nupui kha a ni ngei tih nemnghehna emaw fiahna emaw a la awm lo a nia." a nui sak a, tun hunah hian keichuan nuihna tur a awmin ka hre lo.
.
Thlalak chu uluk zetin ka ennawn leh thin a. Amah a ni ngei a ni. Allison ngei a ni.
.
"Madison chu tunah be rawh. A rang thei ang berin Allison awmna hi ka hriat angai."
.
"Okay. I duh ang chuan ka ti ange."
.
Luciano leh a thiannu inbia chu ka ngaithla reng a, ka duh angin an hmanhmawh tlat lo a hriatna ka nei. Engvangin nge keimah ngei hi Perth-ah chuan ka kal mai loh ang.
.
Luciano chu nghak lovin ka phone ka phawrh a, hmanhmawh takin Manhattan ka chhuahsan nghal a.
.
Darkar 25 leh minute 25 zet a ral hnu chuan Perth-ah ka awm ta. Zinkawng thui leh rei ber a ni chiang. Tun ang reng renga phurna leh huphurhna inpawlh nasa hian ka la awm ngai hek lo. Ka ngaihtuahna a chawl lo chiang khawp mai. Tuna ka pan mek leh hmuh ka tum hmeichhia hi Allison ani ngei anih chuan engvanga min rawn be pawp miah loh nge anih ang? Ni e, a pasal ka ni a, a lakah ka tha tawk lo mai ni lovin hlimna ka pe ngai lo tih ka hria a. Tomas chunga thil thleng zawng zawng te nen. Tun thlenghian Tomas chanchin pawh ka la hre ta chuang lo lehnghal. Chuti chung chuan a pasal ka nihna a bo chuang lo. Min rawn be ngei tur anih laiin ka lak atangin a bo pil ta vang vang zawk a nih hi. Ka nupui, Allison kha alo ni nilo zawk em niang?? A ni ngei ang. Thlalak atang kha chuan ka nupui ngei kha ani tih ka chiang em em a ni tawp. Mihring nihna hrang, hmel inang chiah chiah hi an  awm theih ka ring ngai hek lo. Phir pawh an inang chiah chiah ngai lo. Nge, min kalsan a lo tum ru reng zawk?? Min biak pawh leh a tum tawh miah lo pawh ani maithei..! Tuna ka rilru a zawhna tamtak awmte,a chhanna hre thei tur chuan a tak ngei a ka hmuh a tul a ni.
.
Airport atangin Luciano min hrilh, a thiannu Madison chenna hmun ka pan a.
.
.
"Mr. Giovanni, engamah hmain kan beisei kan tisang lutuk thei lo a nia. Thlalak kha ni reilote liamta a ka lak a ni a, ka lak hunlai khan ka lo hre miah lo zawk a. In ka thlen hnuah i nupui thlalak Luciano min lo thawn nen ka entawn khan an inan zia ka hre chauh a ni. Khawiah nge a chen ka hre hauh lo a nia."
.
"Perth-ah hian a awm a nih chuan kan hmu har hauh lovang."
.
"I ngaih anga awlsam a ni lovang tih ka hlau khawp mai." a ti sap a.
.
Perth ka thlen hnuah ni hnih a liam leh der tawh a, Allison chanchin engmah hriat zui ka la nei lo cheu! Nilengin khawpui chhungah ka kal kual a, thil awm ngai lo zawn ang mai a ni. Ka hna tam tak ka kalsan a, pawi tihna erawh ka nei lo. Tuna ka mamawh ber chu Allison hmuh chauh a ani.
.
Lunch ei turin ka thu a, ka eitur ka chah hnuah ka phone phawrhin mail ka chek mawlh mawlh a.
.
"I lo hria em? Ni hnih hnu hian hmuh theihna hun a awm dawn alawm. Ka kal chiang khawp ang. A lehkhabu atang khan ka ngainat zawng a ni tih ka chiang alawm."
.
"A.C.Adams a ni lawm ni?"
"Ni e, a hmel hmuh tur erawh a tam lo khawp mai. Allison Caren Adams a nia.."
.
Eng thil nge an sawi hi?? Ka bula hmeichhe pahnih chu ka en rang lutuk takzet. An thusawi chu eng chungchang nge tih ka hre chiang lo nain Allison hming an sawi erawh ka hrechiang ngang mai. Ka thutna atanga thovin an thutna bulah chuan ka ding a, phawk zet hian min en dun ha a.
.
"Min lo hrethiam ula, Allison Caren Adams chungchang in sawiin ka hria. A dik em?" an pahnih chuan min chhang mai lovin an inen leh ren rawn a. Nui sangin pakhat zawk chuan min rawn en leh a. An mitmeng a tha min tihna ni awm tak chu an thup hauh lo lehnghal! Tunah hian hmeichhia ni lovin ka nupui chungchang chiah hriat ka mamawh..
.
"Oh..ah..um.. Heihi a lehkhabu a nia. Kar khat liamta khan a tichhuak a.." a bag atangin lehkhabu a rawn phawrh a.
 *BE A MAN - By. A.C.ADAMS*
"Tunah khawiah nge a awm?"
.
An pahnih chuan zawhna awm ang lo lutuk min zawt anih hi' I a ami? tih melhin min melh a.
.
"Kan hre bik lo. A hmel kan la hmu bik lo a. A lehkhabu hi lei ve la, engvanga a chanchin sawi nge kan nih i hre mai ang."
.
"Anih loh pawn ni hnih hnuah hian amah hmuh theihna hun a awm dawn a, i duh chuan ka hruai thei ang che." pakhat zawkin a rawn tih chuan a thiannu chu a nui hak a, an inkheuh bawk niin ka hria.
.
"Khawi hmunah nge a hmuh theih ang?"
.
A hmun min hrilh hnu chuan ka kalsan a, engin nge min mawlh ni, ka eitur chah pawh ka hrechang tawh lo. Dawhkan ah pawisa dahin ka kal chhuak nghal a.
.
Ni  hnih chhung chu hmun dangah kal lovin ka hna thenkhat min rawn thawn tura ka hrilh te ka thawk a, helai ka awm chhung hian meeting tam tak ka cancel a, Manhattan ka thlen leh chuan ka buai fe dawn tih ka hrelawk bawk. Sum ka hloh anih pawhin Allison vang anih chuan a pawi lo! Ka pawi sa zo tawh lo anih ber hi.
.
Madison hruaiin hall lian zet awmna, a hmaa hmeichhe pahnih ten Allison awmna tur nia min hrilh hmun kha kan pan a, kan thlen chuan ka rinphak bak aia tam mi an lo awm tawh. Madison min lo lei sak Allison lehkhabu chu ka keng ran a. Hetiang mipui innek luih luih karah hian ka la awm ngai lo a, ka tih tur a ka dah ngai hauh loh mi tuemaw hmuh tumin mi tamtak karah ka inzep ve tawlh tawlh ang tih phei hi chu vawikhatte pawh ka la ngaihtuah chhin ngai lo. Ka kalna hmun apiangah mi ngaih pawimawh leh dah lal ka ni ziah a, khawiah pawh kal ila VIP treatment ka hmu ziah thin. Tunah chuan a dan a dang. Ka bula awm te chuan mak tih hmel takin min en ha ha a, min ngaihven zui lovin kan hmalam a thil thleng tur an ngaihsak leh nghal zel bawk a. Mak takin tuna ka awmna hmun leh ka awm dan vang hian ka nuih a za hial nia!!
.
Thawm a reh deuh a, phun mer mer ri bak hriattur a awm ta lo. Kan hma lam hla deuh taka dawhsan ah chuan hmeichhe pahnih an rawn chhuak a, pakhat zawk chu dawhkan bulah a thu a, pakhat chu a la ding thung. Ka hriat hauh lovin ka kal hma a, hmeichhia chair-a thu zawk ka hmuh chuan ka pan nghal ruak ruak a ni ber. Allison ngei a ni! Aw Lalpa.. Engtiang khawpa nasa in nge ka thlakhlelh ka hrethiam pha lo. Amah chu khawih a, kuah a, fawh ka duh..!!
.
"Mr! Min kalpel ngawt thei lo a nia. Line kan siam ang hian i ding ve mai thei lo em ni?"
.
Ka bula tleirawl tawng lar lar chu ka en a, ka hmel min hmuh chuan a tim leh deuh zak a.
"Ah.. Line ang hian.." a nui sak a. A thusawi awmzia ka hriat chuan dawhsan ka hnaih tawh khawp mai. Ni e, mumal takin an in line thlap a, ka hmaa ding ho kal pela, fair lo taka awm hi a dik lo ang. Ahmaa ka dinna hmunah ka let leh a. Ka hmanhmawh viau angai chuang hleinem! A tawp berah, mi zawng zawng kalsawn hnuah ka hmu thei alawm. Ka thil tih tum hi mi zawng zawng hmaa ka tih chuan Allison, ka nupui, midang hmaizah thei tak lawm zawng a ni kher lo ang!
.
"Mr.Giovanni, i duh chu i hmu em?"
Ka bula Madison rawn ding chu en chhukin ka lu ka thing a.
"A tawp kan nghah mai angai ang."
.
"Oh.. Ka hrethiam e." tiin ka bulah a ding a, ka ngaihven zui tawh lo.
.
Ka dinna hmun atangin Allison chu ka en a, amah betu te chu dawhthei taka nuihin a tawng ve sep sep a. Kawr sen banbul hak chuan a vun nalh zet chu a tilang chiang khawp mai. A sam tlemin a kawi deuh a.. Kan awm dun lai khan thawmhnaw sen a hak awm ka hre miah lo!! Nge, ka lo ngaihven ngai loh vang zawk ni!!
.
Mi tam zawk an kalsawn tawh. Ka hmaah mi 5 la awm te chu kalpel lo turin ka insum hial mai.
Allison bula hmeichhe ding chu kun hniamin Allison chu a hrilhru sar sar a, a ni chu hawichhuak lovin a bu nghat thung. Min la hmu miah lo niin ka hria. Min hmuh huna a hmel awm dan tur ngaihtuah lawkin ka nui suk a. Ka ti mah mah niin ka inhria!
.
Ka hun a thleng ta!
Ka hmaa mite tih angin ka lehkhabu ken chu Allison hmaah ka dah a, min la rawn en chuang lo.!
.
"Engtin nge ka ziah dawn le?"
Min rawn en a, ka beisei ang thil a thleng lo! Min hmuh ruala rawn dingin min kuah anga, a bula ka kal vat loh vanga min demna thu hriat pawh ka beisei a! Min ngaih zia thute nen!!
.
"Hello! Mr.? I duh dan han sawi teh le?" a ti dam thlap a. Min hria  angin a lang lo mai pawh a ni lo,a lehkhabu ziah leitu pakhat, hawihhawm takin, midang ang bawkin min bia ani.. chu zawng chu!!
.
"Luca Giovanni!"
Bu nghatin lehkhabu kawm chhungah chuan ka hming a ziak a.. Ka thil hmuh mek hi ka ring thei lo! Tun hun thleng tur hian mi dang zawng zawng kal darh hun ka nghak a, darkar thum lai ka nghak asin.
.
"A dang ziah duh i nei em?" nui sangin hawihhawm tak hian min en a, ka tuar thei ta ngang lo.. Eng tin nge hetiang thil hi anih theih? Amah ngei a ni a, a nui hmel leh a pianphungte, a engkim hi Allison ngei ani. Engtin nge min hriat loh theih zawk le??
.
"I pasal Luca Giovanni."
"Um_ I nupui i pek tur anih ka ring." nui leh sakin a kun a, ka thusawi a ziah leh hma chuan lehkhabu chu lasawn in dawhkan nemin ka kun hniam a.
.
"Allison Caren Adams, ni lo.. Allison Caren Giovanni hian a pasal hi a theihnghilh tawh anih hmel!"
.
Mak tih hmel takin min en a, nui sakin a kut veilam hian a awm a dawm a. Khawiah nge kan inneih zungbun ka buntir ngei kha a awm tak? A kut zungtang zen thlerh chuan amah ngei ani tih a tichiang leh zual a..
.
"Ka tih palh, eng thu maw i sawi kha? Mr.?"
.
Ka lu thingin ka en a, amah paw'n min en ve reng. Min hria niawma lang turin mitmeng danglam zeuh pawh a awm miah lo.!
.
"Min hrechiang khawp mai, ka taksa engkim hmaih palh lai awm miah lovin nang hian min hmu in min hrechiang vek alawm."
A thaw hak a, a sen ap ap bawk. Ka tawngkam vang kha ani ngei ang.
.
"Oh! Thil hriatsual palh a awm anih ka ring. Ka la hmu ngai miah lo che a, tuna i tawngkam kha inzahlohna ah ka ngai thei ang. Chuan, khawngaihin min kalsan ta che. Ka lehkhabu i lo lei ve avangin ka lawm e."
.
A thutna atangin a tho a, kalsan rih mai tur ka ni tih ka inhria. Mah se, ka thei lo. Ka ngaihtuahna chu ka taksa in a zawm thei lo.
A kalsawn tur chu a banrek ah ka vuan a. A la danglam lo, amah ka khawih apianga ka taksa a danglam thin ang chiahin ka deh rual chuan ka awm a ni.
Kan bulhnai a mipa lian pui pui pahnih chuan min lo dang vat a.
"Engkim kha ka lo hmu ve vek ania. Kan beisei kan tisang lutuk thei lo tih ka sawi lawk reng kha." Madison chu ka en lo. Ka chhungril hi mak tih vang te, ka hriatthiam loh thil tamtak inhnawh khawm vang te in ka so bulh bulh ni maiin ka inhria.
.
"Engtin nge anih theih? Amah ngei a nia lawm!"
.
"Mr. Giovanni, engtin nge i chian em em? Khawvelah hian mi hrang daih ni si inang tak tak an awm teuh alawm."
.
"Chutiang thil chu ka awih ve ngai lo." tia Madison chu chhangin Car-ah ka lut a. La tlanchhuak lo turin driver chu ka hrilh nghal bawk a. Zanin hian Allison chenna hmun ka hre ngei tur a ni. Mumal zawkin ka be tur a ni bawk ang.
Nichin maia ka awm dan ka ngaihtuah let a, kei hian ka ti mah mah a ni maithei! A chunga thil thleng zawng zawng vang khana hriatna a hloh pawh a ni thei a, chutiang a nih chuan ka thusawi vang khan a buai phah thei bawk.. Ka hmel min en laia a awm dan leh a mitmeng danglam miah lo te..
.
Tehhrep hian!!
.
Ka phone a rik chuan ka pick up vat a.
.
"Hi, honey.. Ka ngai tawh lutuk che. I awmna hmunah khan ka rawn kal ve dawn a nia." Stella rawn chik ngher ngher ka hriat chuan ka thaw hawk a. Tunah chuan ka thil mamawh loh ber a ni chiang khawp mai.
"Min lo be buai rih suh." ka ti hmuk a.
.
"Honeyyy.. Ka ngai che tih ka sawi chu. Ka ngai che.."
.
"Nakin ah inbe zawk teh ang." min chhan leh hmain phone ka off hmak.
.
Ka phone a rik leh chuan phun hlukin caller ID ka en a, hei chu Madison a ni ta hlauh.
.
"Aw, sawi rawh."
"Tunah khan Allison chuanna car a chhuak chiah. Corolla Hatch, silver rawng.”
.
“Ka hmu e.”
.
.
Driver chu tlanchhuak tura hrilh in Allison chuanna car chu kan zui a, thui fe kan zui hnu chuan ka beisei lohna lamah a peng ta daih mai.
Hmun fal angreng takah a ding a, min hmuh theih lohna tur chinah dingin ka thlir reng a. A luhna in chu in lian tak a ni hran lo, tualzawl zim te ah chuan pangpar a par vul chek a. Khawharthlak riauin ka hmu pek! Ka ngaihtuahna kal dik tawk loh vang pawh a ni maithei.
.
Minute 30 dawn kan awm hnu chuan inchhung atanga Allison leh mipa naupang lo chhuak ka hmu a. Mipa naupang chu khawiah emaw ka hmu tawh chiang! Ni e, a hmaa helai hmuna ka kal tuma ka hmuh ngei kha a ni. Allison chuan ngaina tih hriat takin a pawm a, kan pahnih a kan fapa ni ta se, sawtiang sawn a pawm ve angem? Mipa naupang duhawm tak saw kan fa a ni lo tih ka chiang a, kum 1 leh a chanve zet ka hmuh loh chhung hian sawtiang rual fapa neihna tur hun a awm lo hrim hrim. Thil awm ang lo lutuk ka ngaihtuah leh dawn tan a anih hi.
.
Allison te hnunga mipa lo chhuak ka hmuh chuan ka ding ngil zawt a. Allison kut atangin mipa naupang chu a pawm a, Allison biangah a fawp zauh bawk a. Ka hit sung sung mai.
.
Ani thei lo! Allison hian mipa dang tawngin min theihnghilh ang maw? Chutiang thil chu ka dam ve chhung hian a thleng lovang. Ka remti ngai dawn lo.
.
Rilru thawveng lo zetin kan kalsan a, engtin nge ka awm dawn ka hrethiam rih lo. Kha in ah khan ka kal leh ngei chu angai dawn chiang tih erawh ka hrechiang khawp mai.
.
Ka thlenna hmuna ka let leh chuan khua a tlai lam ruih tawh. Allison lehkhabu ziah chu chhiarin khum ah hahdam takin ka thu a. Ka beisei loh thil ka chhiar chuan mak takin min ti danglam tlat bawk. A suangtuahna khawvel ah chuan ka cheng a, ka hun tawng mek ka theihnghilh hial a ni! Engtik laiin nge ka mutthilh ka hre lo. Ka harh leh chuan zing lam dar 3 a lo pel tawh.
.
Khum atang chuan thovin ka inbual a, ka inthlak fel hnuah pawn lamah ka chhuak a. Kal tumna mumal pawh ka nei chuang hlei lo a.
.
Car ka tiding a, muangchangin ka hmaa in chu ka pan a. Pindan tam zawk chu a thim thiap a, in sir lam pindan pakhat erawh a la eng kalh thung. Tukverh arawn inhawn chuan ka tawlhhnung a, thim chinah ka ding leh rih a. Pindan chhung leh tukverh bula hmeichhe ding chu ka hmuchiang viau..
.
"Allison, ka ngai che asin!" ka phun sup a. Amah hnaih taka awm ka duh a, ka kut hian nghet taka kuah ka duh em em bawk. Ka taksa a na thumin ka hre hial mai. Engtik lai atang khan nge hetiang khawpa nasa hian ka chungah thuneihna a lo neih le?
.
Ka la en reng lai chuan a ban pahnih a lu chungah pharin ding lam leh veilam ah a thle tawn a. A ring chu a kutin a dawm leh vang vang bawk a. Hna a la thawk ani chiang ang. Tu mihringin nge tunang hunah hna thawk ngai? Hahdam taka awm tur ania sin..
.
Tukverh chu rei vak lo hnuah kharin light pawh a thim zui deuh mai a. Ka ruak huai nia ka inhriat tak chu!
.
Khua a var a, car-ah ka la awm ta reng a. Inchhunga naupang hlim thawm ka hriat hnu chuan car atanga chhuak lehin in chu ka pana, kawngka ka kik a, an rawn hawn hma chuan darkar tam tak a ral hman ang maiin rei ka lo ti hmanhmawh bawk. Kawngka rawn hawngtu chu Allison a ni lo.
.
"Hi.. Um_Ka hria che em?" hawihhawm tak siin min en a.
.
"Allison hmu turin ka lo kal a. Amah hnaihtu inih chuan tunge ka nih i hria ang chu." ka tih chuan a meng kual ralh a, a insiamtha leh vat a.
.
"Khawiah emaw chuan ka hmu tawh che in ka hria. Tv ah anih loh chuan Newspaper-ah a nih ka ring. Ka sawi dik em? LO lut rawh." a ti ta hram.
Inchhung chu ka enkual a, a zau lo nain engkim a fel thlap thung. Mipa naupang chuan tim dai hian min en a, han fiam dan tur ka hre miah lo mai. Naupang bulhnaiah ka awm ngai loh mai bakah ka ngaina lem lo. An lawm zawng tur pawh ka hrethiam tehchiam lo.. Ka buaina tur anih loh vang te pawh a niang.
.
"Coffee i duh em?"
"Ka lawm khawp ang."
"Mu miah lo hmel i pu alawm.." tiin a nui hak a. "Elario, Mama hnenah amah hmu turin mi an lo kal tih i va hrilh dawn em niang?"
.
Mama maw?? Eng thil phiangsen nge?? He mipa naupang nu hi ka Allison hi a ni ang maw?? Coffee no chu  ka tlauh thelh a ni.
.
"Min lo hrethiam la, he naupang hi..??"
.
"A hming chu Elario a nia. Naupang fel tak anih hi."
.
Mipa naupang kalsawn chu ka en reng a, tunhnai ah hian ka thil beisei lohin min deng hnem ta mawlh mawlh e.
.
"Mama hian eng thil nge a pek ang che.." thawm lo chhuahna lam chu rang lutuk mah mah hian ka en a, Allison chuan naupang chu pawmin a biangah a khawih a, a mitmeng a a duatna lang pawh chu ka va hmu thei hial mai. He hmeichhia hian a hma pawh khan fa lo nei rengin min lo bum tihna ani thei angem?? Engti kawng mahin a theih loh! Ka nupui a ka neih Allison kha hmeichhe thianghlim a nih zia keimah ngei hian ka hria a lawm! He hmeichhia ka lam pana lo kal, mipa naupang pawmtu hi ka Allison kha ani lo tihna em ni ang??
.
Min rawn hmuh chuan min ngaina lo tih hriat takin mipa naupang chu a tawm chaih a.
.
"A tha vek e. Tuman an hau dawn miah lo che a nia. Mama biangah hian fawp rawh le."
An chezia chu ka en uluk tak zet zet. Ka thutna bul chair-ah chuan Allison chu arawn thu a, ka awm vanga danglam ang pawhin a awm chuang lo.
.
"Allison, um_a ni hian nangmah hmuh a duh thu a sawi a."
.
"Oh, ka hmu alawm. Eng thil nge ni ta?" ka lam arawn hawi a. A hmaiah engmah a hnawih lo tih a chiang. A phih zo chiah bawk anih ka ring. A rim fai sar chu ka hre pha a, a hmai fai sar chu khawih lo turin ka kut ka hum ruh tang tang bawk.
.
"Helai ah lo hian kan inbe thei angem?" ka tih chuan kawngka rawn hawngtu hmeichhia kha a melh zauh a.
.
"Garcia, ka pindan ah kan va inbia ange. Min lo zui rawh." a thutna atangin a tho a, an lo chhuahna pindan lam a pan chu ka zui vat a.
.
Pindan ah ka zui lut a, kawngka ka khar rualin ka inthunun theihna ka hloh nghal pang bawk. A hnunglam atangin ka kuah a, a beisei hauh lo tih hriat tak hian a ding ngil at a.
.
"Allison.. Eng chena rei nge ka lakah hian i awm bo dawn?" ka lam hawiin ka kuai her a, a  hmai fai sar chu ka kutin ka khawih a. Chesawn miah lovin chiang zet hian min en thung.
.
"Kan inbe dawn niin ka hria a. Hmelhriat loh hian min kuah ngawt ngai lo asin." ati chang fak mai.
.
"Min hria em?" ka ti tham tuak a, ahmaa ka thil ngaihtuah kha thlengdik lo hram se tih hi ka duhthusam a ni. Ani hian a hriatna hlohin min hre tawh lo a ni ngei ang.
.
"Ka hriat dan chuan nimin a ka hmuh tawh kha i ni. Mr.." a mit tizim in ngaihtuah let vang vang ang hian min en a, ka tuar thei ta thlawt lo mai.!
.
"Giovanni.. Luca Giovanni! Come on Allison, min hrelo tak tak anga awm tum miah suh."
.
"Hah.. Ka tum em ni?" atih chuan keimah ngei pawh hi ka chiang ngam ta lo!   
TMH!!
CHAPTER – 26
TAKE MY HEART!
By. Thantei_Pautu a.k.a Laura_Sean_Virgo
.
LUCA GIOVANNI'S P.O.V*
.
Ka chian ngam lohna hi ka tihlan erawh a tul kher lo ang.
.
"Aw! I pasal ka nia lawm."
A biang ka la dek reng a, ka kut chu a kut nel thep chuan min rawn vuan a.
.
"Hmm.. Ka pasal inih chuan eng chena rei nge kan inhmuh tawh loh le?" ka kut la vuan reng chungin min en a, a awm dan hi ka hrethiam miah lo. A inringtawk a, zam hmel a pu miah lo. Ka nupui, Allison kha ni ta se tun ang hian a awm angem tih ka ngaihtuah daih. A hme lan dan leh a engkim hi amah ngei kha chu a ni si.
.
"Kum 1 leh thla ruk, ni 15 leh darkar 14!" Ka sana bunlai ka en zauh a. "Leh minute 26 leh 31 seconds!" ka fiamthu hauh lo mai. Ka kut chu thlahin a nui hak a. A sam hui kiangin a kalsawn hlek a, a chetdan zawng zawng chu ka enchiang lutuk tak zet zet vek mai!
.
"A nih chuan.. I sawi hun chhung chuan khawiah nge i awm le?" chik zet hian min rawn en leh a. Takzet reuh hian a! "Bakah, helai hmunah hian engtin nge i rawn thlen theih. Engtin nge i nupui chu i lak atanga lak bo anih? Nge, amahin a kal bo?" ka chhanna hriat chak tak ni awm fahran hian a khabe a khawih zauh zauh a. A chet phung hi Allison a ang chiah em ka hre lo. Chet dan phung neuh neuh a neih thin zingah a tel awm pawh ka hre hauh lo.
.
"Sawitur a tam khawp ang." a awm dan hian ka dawhtheihna a tipan sawt khawp mai tih ka pha buai lo mai ange. Mi tumah reng rengin hetiang hian min chhaih kual ngai lo..
.
"Ni anga i ngaih i nupui chu ka ni lo hlauh ang tih ka hlau khawp mai."
.
"Hremhmun a awm tih ka hriatchian tluk zetin ka hrechiang che alawm!"
.
"Oh!" awih lo ni awm tak hian a kut zen thlerh chuan a awm a dawm a. "Min hmuh ang hian ka hriat theih chinah helai hmun hi ka la chhuahsan ngai miah lo a. Anih si chuan engtin nge i nupui ka nih theih ang?"
.
"Sawi tura min duh chu heihi ani maithei. Ka nupui chuan a hnute dinglam ah khuavang chhinchhiah nalh zet a nei tih sawi ta ila.." a hmel chu chiang zetin ka en a, a meng kual ralh a. Ohh..inthunun rawh! Ka ngaihtuah ang chuan awm i la, a mit meng kual vel ka hmuh ringawt pawh hian min tiphur tawk a nia, helai hmunah hian hmangaihna ka chenpui ngei ang..! Ngaihtuahna fim tak ka neih angai anih hi. "Chubakah.." sawi zawm duh lovin a taksa chu ka melh kual dan dan a.
.
"Sex bak ngaihtuah i nei lo a nih hmel! Min chhuahsan thei tawh ang."
.
"Ka duh ka hriat hma chuan ka chhuak hauh lovang. Allison, hetianga awm kher hi a tul hauh lo a nia."
.
"I sawi awmzia ka hre lo. Mr. Giovanni, ka hre ngai lo che tih ka sawi tawh a, a bak eng thil nge hriat i la beisei cheu?" aw ki pangngai thlapin min la be thei a, eng thil nge ka tih leh chuan ang? Ka rilru a lang hmasa ber ang zelin che ta i la..
.
Ka panhnai a, a dar tawn tawnah vuanin a mitah ka en a.
.
"Ka hmuh theih nan che hian ka tih theih zawng zawng ka ti vek tawh a sin. Allison, ka mamawh che! I tan thil tha tih ka nei lo a, natna bak ka thlensak lo che tih pawh ka hria. Mah se, ka hre lo.. Engkim siamthat ka duh a ni. Ka ngai che a, i taksa khawih phaka awm reng ka duh bawk a.."
.
"Allison, Elario hian... Oh, sorry. Ka tibuai che u em?"
Kawngka kan en rual thawt a, Allison chu ka vawnna atanga talchhuak in a kalsawn a.
.
"Tibuai lo e. Ka duh aia tam ka ngaithla tawh zawk. Elario chu ka chhuahpui ang tih ka tiam a." kawngka a pan a, ka din ngaiin ka ding tawp. Hetiang khawpa ngaih pawimawh loh leh ngaih hniam ka la ni ngai lo.
"Chuan, hriat duh a neih chuan lo hrilh mai ta che aw.."
.
Ka din ngaiin ka la ding reng!
.
Garcia tia a koh chu ka hmaah arawn ding a. Sawi mai tur a hre bik lo a niang.
.
"Ka tih palh, Mr. Giovanni. Allison nen khan eng thu nge in sawi ka hre lo nain khatianga a awm kha ka la hmu ngai miah lo." a nui hak hak a. "Um, hriat duh i neih chuan min zawt thei ang?"
.
Pindan atanga a chhuak chu ka zui a, ka hamhaih a ni ber. Hetiang hun hi ka tawng dawn tih nimin khan mi tu emawin min hrilh lawk ni se ka awih loh tur zia chuh..
.
"Ka nupui a ni  tih chiang takin  ka hria a ni."
"Thil eng emaw sawi i nei em?" tiin Garcia chuan min en ha a. Ka lu ka thing nawk.
.
"Engtik atangin nge Allison nen hian in chen dun?"
.
"Kum 12 kan nih atangin. College pawh kan kal dun a, pianghmun kan ni lo nain ka unaunu ang chiah a ni. Hmeichhe tha tak a nia sin." a ti duah a. Dawt a sawi nge sawi lo tih hriattumin ka en chiang khawp mai.
.
"A tichiang tur thil ka duh." ka tih chuan a nui hak a.
.
"Oh, ka hmuhtir thei ang che. Min lo zui rawh."
.
Pindan pakhat ah ka zui lut a, banga thlalak intar dal chu uluk zetin ka en a. Engtin nge a nih theih le?? Thlalak a ka hmuh chu Allison ngei hi a ni bawk si. Thlalak chu hlim taka an nuihna a ni deuh vek hlawm a, Allison hmel la naupang tak chu chik zetin ka en a. A then chu an graduate ni a an lak te pawh a ni. Allison hian kan awm dun chhung zawng khan Garcia tih hmingpu thian a neih thu a sawi ka hre ngai lo a, ka hriat ve zawng chu Sarah chauh kha a ni. A mak ka va ti em! Kei hian a chungchang hriat ka nei tlem khawp mai tih ka hrechhuak bawk.
.
"Chuan, mipa naupang kha Allison fa a ni em?"
.
"Zawhna i ngah hle mai. Chiang taka ka hrilh theih che chu Allison hian pasal a la nei lo. Pasal a neih loh ang bawkin fa pawh a la nei chuang lo. Tichuan i lungawi em?" min ning tawh niawm tak hian a thaw halh bawk a.
.
Ka beisei anga Allison a lo ni lo anih chuan kei hian eng thil nge ka tih leh tak ang??
.
An chenna in chu chhuah sanin car-in chak lutuk hian ka tlan chhuak a, tih dan tur dang ka ngaihtuah angai tih chiang takin ka hria. Ka duh ang zana fiahna ka hmuh hma chuan ka kalsan dawn lo. Ka kalsan ngai lovang.
.
Manhattan-ah ka let leh rih anih chuan Allison bula ka awm theih hun tur a hla deuh deuh dawn tihna a ni a, helai hmunah hian ka hna tam zawk ka thawh theih nan ruahmanna ka siam angai bawk ang chu. Thil awlsam tak ani dawn lo chiang a, eng pawh ni se, chak taka hma ka lak erawh a tul ngei ang.
.
Ni thum a ral leh ta. Allison ka la hmu leh lo a, a chanchin hriat belh tur em em a awm lo. Amah hmuh tumin Garcia te nen an chenna hmun ah ka kal leh fo a, inchhung lut turin ka huaisen tawk tawh lo ani mah na. Hetiang hian ka la awm ngai lo. Thudik hriat ka duh chuan huaisen taka ka awm angai tih ka hria. Mipa a duh apiang  nei thei thin khan engvangin nge ka theihtawpa ka beih leh mai loh ang.
.
Ka phone ka pick up a.
"Madison, sawi rawh."
.
"Mr. Giovanni, tunah hian Ciao Italia restaurant-ah Allison a awm mek. Ka hmuh veleh hrilh tur chein min chah in ka hria." a nui har har a. Madison hian eng thil nge a hriat a phur taka min buaipui reng theih ka hre lo. Kei hian nuih nachhan tur pawh ka hriat tawh loh lai lehnghal in.
.
"Ka lawm e."
.
Ciao Italia ka thlen chuan rei nghah ngai lovin kil khata tukverh bula Allison thu chu ka hmu nghal mai a, dawn awm lovin ka pan nghal a. A dawhkan kila ka thut hnu pawh chuan min hmu angin a awm lo. A lehkhabu ken chu uluk zet hian a bih ngar ngar mai.
.
"Allison." a la rawn hawi chhuak chuang lo. Min ngaihthah lui a ni lo tih erawh ka hmu chiang e. A lehkhabu chhiar lai ka laksawn chuan a rawn hawichhuak ta chauh. Lehkhabu chu min chhuh tumin a rawn ban a, ka keng sawn daih a.
.
"Eng thil nge i duh leh tak?" thaw halhin a thu zawi hnak a.
.
"Nangmah!"
A kut ka vuan a, a banrek chhunglam ah ka fawp zauh a. A thaw halh thung. A banrek chhunglama khuavang chhinchhiah awm chu...
.
"Engkim ka ti vek ang. Ka hnena i lo let leh theih nan engkim ka ti vek ang."
.
"I mi zawn, i nupui ka ni lo tih hi vawi engzat nge ka sawi dawn."
.
"Tunah hian fawp tur che in min duh em? Min hrechhuak thei mahna!"
.
"Angai lovang. Ka lawm e." Min tiel tih ka hria. Kan bul vela kan awm dan mak tia min en hrek hrek tute chu a en zauh a. Tuna a awm dan hi chu ka nupui Allison awm dan ngei a ni bawk.
.
A thutna atangin a tho a, a thawmhnaw hak chu! Hetiang thawmhnaw a inbel lai hi ka la hmu ngai lo.
.
"Eng thawmhnaw nge i hak hi?" ka insum hman lo.
"Enge? Dik lo a awm a mi?" a ti ha a. Dik lo maw? Hetiang thawmhnaw bul tak tak hi a hak ngai loh bakah a rawng pawh a lar lutuk mah mah.
.
"Nangmah ang lo takin.."
.
"Ka thawmhnaw hakah sawitur i neih ka hre hauh lo mai. Henghi ka duhber an nih hi. Ka lehkhabu kha min pe la, ka kal a hun ta hle mai."
.
Ka thutna atangin ka tho a, a lehkhabu pawh ka la keng. A inrin hmain ka dinhnaih a, a kawngah nghet zet hian ka kuah a,a hmuiah ka fawp a. Rang zetin ka inla hrang lehnghal.. Enge sawi theih ka neih.. A hmui no chek hian 'min fawp rawh' ti niawm takin min hip bet tlat alawm!
.
"Wow..hmuh ava nuam em! Kan naupan lai min ti hrechhuak alawm.." kan bula nu upa lam tawh nui var var chu ka en a, Allison ka en leh chuan a sen ap ap thung.
.
"Min lo zui miah suh." a lehkhabu ka ken chu rawn phih thla lawpin vung zet hian pawnlam a pan a. Kan awm dan naupangchhia ru zet vang chuan ka nui suk.
Pawnah ka chhuak ve nghal a, a car-a a luh hmain a banah ka vuan a.
.
"Tider tawh suh. Tomas chanchin hriat i duh chuan min rawn bia ang che." a awmdan ngaichang lovin ka kalsan nghal a. Ka thil tih hi a dik tawk lo maithei, mah se, hmanraw dang ka nei tawh lo. Min rawn umzui ringin ka ngaichang ru leh deuh hnuhnawh a. 
.
Ka awm hle hle thei lo. Thil eng emaw thleng tur awm in ka hria a, eng thil nge ni ang tih erawh ka hre chuang hlei lo a.
.

Allison min hmu turin a lo kal hek lo. Ka lo rin dan leh ka thil hmuh te kha a diklo anih ka ring ta. A nungchang leh a chetzia hrim hrim kha ngaihbel luih ka tum pawhin ka thei ta hauh lo mai. Ka nunah hian a vawikhat nan ka hlawhchham dawn ta a nih hi. Mihring hmel leh pianphung inang chiah hi an lo awm thei a ni ngei ang.
.
Manhattan-ah ka let leh ta. Pangngai takin ka nung ang tiin ka inhrilh reng a, thil tam zawkah chuan ka inthunun thei tehmeuh mai. Allison  ngaihtuah miah lo  tur erawh chuan ka inthunun thei lo. Stella pawh a dan pangngaiin a tam thei ang ber ka bulah ka awm a, ka ngaihsak emaw ngaihsak lo emaw  atan danglamna a awm lo. Atir atang reng khan ka ngaihsakna a dawng ngai lo a, ka hre lo, rilru hah leh ka ngaihtuahna chawl lo zet ti ziaawm turin Pathianin arawn tir a ni tal ang. Min chhawk tak tak em tih ka hre chuang lo. Ka nun hian awmzia a nei lo niin ka hre thin. Ka mamawh ber leh ka ngaihtuah reng hmeichhia ber ka hmu thei tawh lo a, ka tan a hlutna ka hriatchhuah meuh chuan ka lo tlai reng tawh a nih hi. Hei hi hringnun chu a ni. Thil tha leh kan tana mi pawimawh takte an bo hnuah chiah an hlutna kan hre thin.
.
Allison nen kan pindan ah ka lut a, a thawmhnaw a kalsan ang ang a la awm te chu ka en kual dan dan a. Ka ngai tak zet a ni. A sulhnu hmuh tur ka la neihte hi ka tan an hlu a, he in atang hian tuman an lachhuak ngai dawn lo.
.
Pindan atangin ka chhuak a, ka phone ri chu caller ID ka en hnuah ka pick up a.
.
"Honey, ka lo kal dawn a nia. Tunah In ah i awm tiraw?"
.
"Khawiah nge i awm?"
"Oh, i theihnghilh tih sawi miah suh."
"Eng thil nge?"
"Zanin hian Nona in ah kan kal dawn kha.. Honey, i tha em?"
.
"Ka lo hruai ang che." tiin phone ka dah a. Ka lo hre tawh miah lo a ni. Stella hnenah hian ka in a lo kal tum buai tawh lo turin ka hrilh angai bawk ang chu. He in ah hian Allison ni lo hmeichhe dang reng reng tlangnel taka awm turin phalna ka pe ngai dawn lo. Engvanga Allison hi la ngaihtuah reng nge maw ka nih le? Kha hmeichhia Allison ang tak kha.. Amah a ni lo tih ka inrintir angai a ni. Thil theih loh leh thil thleng ngai lo tur beisei hian ka va buai rei tawh em.
.
Stella hruaiin Nona chenna hmun kan pan a, dan pangngaiin Stella chu an eng eng emaw a sawi reng a, a chang chuan hahdamna min thlen ve tho mai.
.
"Hey. Honey, i lo kal thei a ka va'n lawm em." Stella'n Nona tia a koh, a pa farnu neihchhun, nu upa lam tawh chuan Stella chu a kuah vang vang a. Min hmuh rualin a meng phar ak a.
.
"Ohhh.. lo kal teh. Luca Giovanni.. Ka hmu che chu ka lawm hle mai. Stella hian i chanchin bak sawi tur a hre hauh lo a nia." tiin a nui hawk hawk a. Min rawn kuah ve bawk a. Helai hmuna kan kal chhan ber hi ka la hre hauh lo tih ka lo ngaihtuah daih thung.
.
"Khawnge midang ho hi?" Stella chuan ka bana min rawn kuah pahin Nona chu a en a.
.
"A then chu an lo thleng tawh a. Thiantha tlemte chauh ka sawm a. An lo thleng kim tep ang. Pawn lam huanah sawn an awm hlawm a."
.
Pawn lam huana kan chhuah chuan zanriah kilna tur felfai takin an lo inbuatsaih thlap tawh a, Nona pawh rei vak lo ah rawn chhuakin zanriah kan ei theih thu arawn sawi a.
.
"Thenkhat chu an rawn kal thei dawn lo a nih ka ring. Khawngaihin in thutna ah in thu thei tawh ang." boruak zangkhai takin an titi hlawm a, ka hmelhriat sa an awm lem loh bakah titi mood-ah ka awm lo ve reng reng bawk. Engkim hi ka tan chuan ninawm a chang zung zung vek mai.
.
"Oh.. Ka va kal a nge." Nona chu a thutna atanga thovin a kalsawn a, ka lo ngaihven lem lo.
.
"Thiante u, in hriat vek kha. Be A Man lehkhabu ziaktu kha. Ka sawmna ngai pawimawhin a lo kal vang vang a nih hi."
.
Nona bula Allison ding chu ka en a, ka chhehvela thil awm zawng zawng chu ka ngaihven tawh lo. Amah chauh in arawn kal anih hmel. Ka lo hahdam deuh huai ringawt a. Ka hahdam rei lo khawp mai. A hnungah  mipa arawn ding a, Allison kawngah arawn kuah a, a biangah a fawp zauh bawk. Ka chhungril atangin ka sa nghal pup pup mai. An pathum chuan danglamna awm hauh lovin dawhkan an rawn kil ve a.
.
"Honey, i tha em?" Stella chuan min ngaihtuah takin min bia a, ka bu nghat a "I hmelhriat a nih ka ring. I en char char a." ka banah min rawn vuan a. Allison chuan min lo en em tih ka ngaihven ni berin ka hria. Ka va'n nep tak.
.
Midang awm ve te chuan Allison chu biak loh bik hlau niawm tak hian biak an inchuh a ni ber a. Thil dang zawng zawng ai chuan Allison bula mipa thu chuan min kap deuh run thung.
.
Perth-a awm tur anih laiin helai hmunah hian eng thil nge arawn tih? Hmuh leh chakin ka ngaihtuah reng naa ka hmua ka hahdam phah chuang silo.
.
"Hetah hian Cardamom a tel anih ka ring." Allison ruala lo kal Benedetto tia an koh chuan Allison chu ngaihtuah hmel takin a en a.
.
"Aw, tel e. Engtin nge i awm?" Nona chu a thutna atangin a tho hluai a.
.
"Ka_ Allison hian Cardamom a ei thei lo a." Allison chuan sawi lo turin a duh tih hriattir nan nui sak chungin Benedetto banah a dawm zauh a.
.
"Oh.. Ka tih palh, a va pawi em.." Nona inthiamlo hmel chu a khawngaihthlak zawk.
.
"A pawi lo.." Allison chuan a tisap a,a awm dan a dik lo tih thup tum pawh ni se hai theih a ni lo.
.
"Ka lo hruai ang che." ka thutna atangin ka tho a, an mak tihna thup hauh lovin min en nghal thap a.
.
"Honey!"  Stella chu arawn ding ve bawk. Ka banah min kuah vat a. Ka awm dan hi a mawi lo tawp mai.
.
"Benedetto nen hian kan kalsan mai ang che u. Hun tha dang a awm leh mai ang. Nona, kan inhmu leh thuai ang chu." Allison ding chhuak chu Benedetto chuan a pui vat a. An kalchhuah thlengin ka la ding reng a.
.
"A that ka beisei." Stella chu a thu zawi hnak a. Nona chuan chik zet hian min lo en reng thung.
.
"Nona, a tha vek ania. Luca hi chuan hmeichhia tupawh a care vek alawm." Stella rilru nuam lo hmel chu...
.
"Keini pawh kan kal ange." ka tih chuan rang zet hian Stella chuan min zui vat a.
.
Stella chenna hmun kan thlen chuan car ka tidingin a chhuk hun ka nghak a, chhuk a tum lo anih hmel.
.
"Kha hmeichhia kha Allison a ni tih ka hria. Amah khan a hre lo che tih ka hre bawk a nia. Ka lakah eng ang pawhin awm la ka kalsan chuang lo ang che. Engtik ah emaw chuan min la hmangaih ve tho ang."
.
"Chhuk phawt rawh." ka tih chuan lungawi lo zet hian min en a. Tunah chuan eng thu mah ka sawi peih lo. "I lo buai angai lo bawk ang."
.
"I nunrawng hle mai!"
"Ka hria."
.
"Luca, khawngaihin.."
.
"Chhuk rawh."
.
Min chhang tawh lovin muangchangin a chhuk a. A chhuk fel hnu chuan chak lutuk in ka tlan chhuak nghal a. Mihring ka ni pawhin ka hre tawh lo. Engtin nge hetiang hian ka awm theih? Thil engkim ka hua a, ka thil hmuh apiangin ka nun a tihreawm bawk. Hlimna a awm lo.
.
Ka ngaihtuahna a thil lo lang vang chuan ka ding chawt a. Ahma khan engtin nge ka ngaihtuah chhuah miah loh zawk le!
.
Vawikhat chiah_vawikhat chiah ka bei leh ang. Ka thiltih hian a la tichiang  chuang lo anih chuan ka bansan tawh ang. Ka thinlung takin Allison hian min kalsan tawh tih ka pawm angai bawk ang. A thi tawh.. Thi tur ani lo a, mah se, ka thi tawh a ni. Keimah vang a ni bawk. Hetiang hian ka dam chhungin ka ngaihtuah angai tawh bawk ang.!
.
Car steering wheel ka bawh a, thawk ka la hawk a.
.
“Allison, hetianga ka awm hi i duhthusam a ni ngei  ang  tiraw? Ka tuarlet ve ngei hi i duh dan ani bawk tih ka hria a ni. Mumal lo taka awm hi ka phu tawk chiah..! Mipa chak tak kha ka ni tawh lo.. Allison , ka mamawh che. Ka chakna, ka engkim ni turin ka mamawh che. Khawiah nge i awm? Vawikhat chauh pawh ka hmu leh che anih chuan ka kaltir tawh lo ang che. ALLISON, KHAWIAH NGE I AWM?”
.
Darkar 29 a ral leh hnu chuan ka kal tumna hmun thlengin kawngkhar bulah ka ding a, dawhthei lo zetin kawngka ka kik a. Kawngka a rawn inhawn chuan timna nei miah lovin inchhung ah ka penlut nghal hmiah bawk.
.
“Engvangin nge dawt min hrilh?”
A beisei loh a hmu tih hriat taka hlauthawng hmel pu chungin Garcia chuan a awm a dawm a, a mitmeng buai nak bawk. A insiam tha leh vat a.
“Enge i thusawi awmzia?” Zam miah lo anga lan a tum nain a hlawhchham chiang khawp mai.
.
"Allison chungchang hi engkim ka hre vek tawh."
Ka hria maw? Hre vek tawh ni ila helai hmunah hian ka kal hauh lo tur a nia.
.
"Thil ni thei a ni lo.." a phun sap a, a tawng chu ka hriatphak loh a ring tih a rawn hawichhuah leh a, a insanmar dan atang chuan ka hre mai. "Thil hriatchian leh tur chuang a awm hleinem." a nui lui sak a.
.
"Khawiah nge a zungbun kha i dah that? Kan inneih zungbun kha?" thutak lutuk tak zet hian ka en a, ka thusawi a hriat rual chuan a hmui a hup chat a.
.
"Karei leh! I hmu lo.. Engtin nge a nih theih!" min ngaichang lovin Allison room lamah a tlan a, a hamhaih nasa. Ka zui nghal vat bawk. Tun ang hian thil a thleng dawn tih chu hria  i la, a hma pawh khan ka lo ti daih tawh tur a nia. Mihring ngaihtuahna hriat awlsam lai ber chu an beisei loh tak thil an tawn lai hian a ni thin. Inveng hman hauh lovin thudik an sawichhuak thin bawk.
.
"Tunah khawiah nge a awm?"
Ka tawng a hriat chuan Garcia chu arawn inher vat a. A kuta bawm a ken chu a hnunglamah a keng nghal vat a. Ka hmu hman tho. Allison ka nupui  a ni tih chhinchhiahna zungbun bawm  ngei a ni ang tih ka hria. Ka chiang khawp mai. A chhungah sawn zungbun a awm ngei  bawk ang chu. Allison khan a bun lo tlat a, bawmah sawn a awm ngei tur a ni. A la paih bo lo! Min la theihnghilh lo tihna ani bawk ang chu.
.
"Min rawn zui lut tur i ni hleinem. Engkim i hriat tawh chuan engvanga Allison awmna min zawt nge i nih?" awm nawm loh hmel tak hian min en a. Tunah chuan nawrlui lovin thil awmzia thutak zawka ka sawipui a tul ta tih ka hria.
.
"Garcia, i tanpuina ka mamawh a ni. Allison hi ka hmangaih a.."
.
"Ka rin che beisei suh. Khatih lai zawng pawh khan i hmangaih ngai lo tih ka hria alawm. Allison hi a na tawk tawh. I hnena let leh tawh lo tura a beih nasat zia hi hriat pawh i phu lo zawk. Tunah nunphung pangngai a nei ve thei dawn chauh a, i rawn lang leh a. Thil engkim i tibuai zo vek anih hi."
.
Thil dang zawng aia pawimawh zawk chu ka nupui, Allison hi amah ngei a ni tih Garcia tawngkam atanga ka hriat chu a ni. Natna a tuar hnem tawk tawh maw? Ka hnena rawn let tawh lo turin a bei nasa tawk tawh maw? Anih chuan Allison hian a hriatna a hloh lo tihna a ni. Ka hnena let leh a duh tawh lo.. Engkim a la hre vek! Lalpa chu fakin awm rawh se!
.
Dawn awm lovin Garcia chu hlim zetin ka pawmkang a "Min dah thla rawh." tiin a te that that a.
.
"Ka lawm e. Ka lawm e."
.
Chhuatah ka nghat a, ka awm dan chu hriatthiam loh hmel tak hian min en a. A hamahaih hmel a la reh chuang lo.
.
"Engkim i hriat vek tawh thu kha i sawi sia.. Ka rei.. Kei hi.. Luca Giovanni, engtin nge dawt i sawi theih? Nang hian engmah i hre lo."
.
"Tunah chuan ka hre tawh alawm." mak takin ka nui hawk hawk a. Min delh bettu thil rit tak lak kian a awm ta ang maiin ka zang hawk mai.
.
"Engtin nge Allison hnenah ka sawi tak ang? Keimah vang a ni.. Nang_Nang hi.." thinrim takin min en a, a kut a hum ruh nasa bawk.
.
"Ni e, kei hian Allison ka neih let leh theih nan engkim ka ti vek ang." ka thusawi chu ka ti tak zet tih a hrechiang khawp mai. A lu thing mat mat in thawk a la hak a.
.
"Min chhuahsan phawt rawh." a tih chuan engmah sawi tawh lovin ka chhuahsan a. Ka kal hla nghal mai lo. Garcia hi engtin nge a awm zui ka hriat a tul tlat. A tum loh takin thudik a sawi chhuak a, ka tan chuan malsawmna a ni.
.
Kawngka kharphui loh atang chuan Garcia tawng ka la hre thei a, a rilru a hah hmel khawp mai. A tawng dan atang chuan inthiamlohna nasa tak a nei tih hriat a harsa lo bawk.
.
"Allison, ka tihpalh! A ni khan_ah_ka sawi tum chu_ ah_ Luca'n engkim a hre tawh.. Allison, ka tih palh.. Accident thil tak meuh a ni.. Ka tum vang a ni lo.. A ni khan__"
.
Engkim a chiang ta! Garcia thawm chu  ngaithla zui lovin ka kalsawn a. Mi a ang maiin hlim zetin ka nui bawk. Ka pan lam tur hrechiang zetin Car ka tinung a, chak zetin ka tlan chhuak nghal a.
.
TMH!!
CHAPTER – 27
TAKE MY HEART!
By. Thantei_Pautu a.k.a Laura_Sean_Virgo
.
ALLISON'S P.O.V*
.
Ka lehkhabu ka tihchhuah hnuah a hmasa ber atan ka thuziak ngaina tute nen  inhmuhna hun kan siam a, lo ti lo tawp i la tha tur a nia. Ka beisei ngai loh leh ka ngaihtuah phak hauh lohin khami hmunah khan Luca arawn lang a, Garcia khan min hrilh lawk lo ni se la chu ka chebuai ngei ang tih ka chiang. Hei leh chen hnuah eng vanga min rawn hmuh tum nge anih? A chhan engmah ka hre lo. Kum khat leh a chanve zet a liam tawh. Vawikhatte mah min ngaihven lo a, heng thil zawng zawng thlen hmaa, amah hmu tura Manhattan ka kal tum khan hmeichhe dang a lo kawp leh der tawh tih ka mit ngeiin ka hmu a, ka awm dan tur fel takin ka ngaihtuah ta zawk anih kha. Luca Giovanni hian a nuna min mamawh loh ang bawkin keipawh hian ka mamawh tawh lovang tiin. Engtin nge min rawn hmuh theih ka hre lo. Chiang taka ka hriat erawh chu ka nunah hian natna min pe leh turin phalna ka pe dawn lo tih chauh hi a ni.
Hun a ral fe hnuah ka thinlung natna vangin keimah ngei pawhin ka hriat ngai loh, keimaha theihna awm ka hriatchhuah phah thung. Ka thinlung natna hian keimah chauha min awm tam tirin ka suangtuahna ka ziak a, ka beisei phak loh khawpa hlawhtlinna ka neih phah ta a. Mah se, Luca ka nuna a lo lan leh phahna tur ani tih hria i la,ka thuziak te hi midang chhiar theih tur leh mi dang in min ngainat a, ka phak loh tawp khawpa sanga min teh lehsi nan ka tichhuak hauh lo tur hi a nia.
Mihring famkim lo ve mai ka ni a, thil tha lo tak tak suangtuah ve thin hmeichhe pangngai mai ka ni bawk. That lohna tamtak ka nei ngei a, mi dangten hmeichhe tha leh famkim, nunnem tak ni a min ngaih ang hi ka ni lo fo thin. Engvanga heng thil zawng zawng hi ngaihtuah chiam nge ka nih ka hre lo. Mi dang laka thurawn pe turin rilru lamah thiamna ka nei pawh a ni lo.. Thil tam tak vang hian ka hah hluah hluah anih hi.
Pawiti tur ka ni em ni? Ka suangtuahna ziaka ka au chhuahpui hian ka thinlung a thawl hawk thin zawk a ni reng sia. Thil dang chu eng pawh ni se, a pawi ta ber zawk chu Luca ka hmuh theiha a lo awm leh ta hi a ni. Garcia thurawn angin awm lo ta i la.. Thil awmze awm lo mai a ni. Thil thleng tur a thlen vek tawh hnuah hian inchhir a sawt ngai lo.
.
Ka page ka check a, thil pawimawh bik a awm hran lo. Inbox ka check leh a, angai bawk.
.
*1"AC, engtin nge ka bialpa rilru ka hneh theih ang?"

*2"Mipa thinlung hneh dan min hrilh thei em? I thurawn ka lo chang reng e."

*3"Hmeichhia, fa pahnih nei tawh ka ni a, ka pasal hian min bum in ka hria a, thlamuangin ka awm thei lo. I lehkhabu Be A Man kha ka lo chhiar a, i lehkhabu a mipa ang hi khawvel ah an awm thei lo tih ka chiang. Mipa zawng zawng hi mi tenawm mai an ni. Ka lawm e. Min lo ngai diklo suh, ka ngaih dank a rawn sawi ve mai a ni."

*4"I lehkhabu Be A Man kha ka lo chhiar a, ka buaina ah hian thurawn min pek theih ka beisei...."
.
Engtin nge ka buaina ngei pawh ka chinfel hleih theih loh lai hian mi dang buaina chu ka chinfel sak theih tehlul ang??
.
Ka phone ri ka hriat chuan ka thil tih lai kalsanin ka pick up a.
.
"Garcia, min ngai leh der tawh e law??"
.
"Allison, ka tihpalh! A ni khan_ah_ka sawi tum chu_ ah_ Luca'n engkim a hre tawh.. Allison, ka tih palh.. Accident thil tak meuh a ni.. Ka tum vang a ni lo.. A ni khan__"
.
"Eng thu nge i sawi? Engtin nge a hriat theih?"
.
"Ka_Ih_ Engkim hre sa ang chiahin a lo kal a. Ka inring hman lo a ni. Mah se, engkim ka sawichhuak tihna a ni lo a nia.." Garcia chu a thaw halh a. A inthiam lo dawn nasa lutuk tih ka hrethiam a, a rilru tih hreawm belh ka duh lo. Garcia hian ka tana tha ber tur a duh reng a, keipawh hian hetiang hun hi ka tawng ang tih Luca rawn lan leh atang khan ka ring ru tawh reng reng bawk. Ka beisei aiin a thleng hma thung.
.
"A pawi lo. Luca Giovanni hian a thil duh, a duh ang taka a thlen hma chuan a tawp san ngai lo. I tih sual a ni lo a nia. Hreawm ti suh aw.."
.
Garcia nen kan inbiak zawh chuan ka thu hnawk a. Dik tak chuan amah Luca hre lo anga awm kha ka tum lawk a ni hauh lo a, ka ti ve tawp a ni. Eng ang taka harsa nge anih min hriatthiam pui lovang. Garcia hian ka rilru hrethiamin a theihtawp in min tanpui zawk a nia. Tunah chuan Garcia hian eng vanga min tanpui nge anih ka hre tawh bawk. Kha hmeichhia, ka tana inhlan kha.. Ka hming ang chiah, ka hmel ang ni bawk nen an hun hman dun te min hrilh a, Luca hian fiahna a phut anih pawhin ka lo hmuh vek ang tiin min hrilh a. A sawi ang chiahin a ti bawk. Luca mi zawn ka ni lo tih a awih tir theih nan a theihtawp a chhuah ve tho a ni. Khang fiahna zawng zawng a hmuh hnu pawh khan Luca hi engvanga beidawng mai lo nge anih le?
.
"Tunah ka lo haw ang." Garcia message ka thawn a. Ka thawmhnaw pack felin taxi ka la a, airport ka pan nghal a.
.
Dik tak  chuan Manhattan ka pan nachhan hi Luca thusawi vang kha a ni a, Tomas chanchin ka hriat duh chuan amah be turin min hrilh anih kha. A hriat loh dan tur bera ka ngaih angin ka ngaihven a, Luca khan keimah ngei ka ni tih hriatchhuah a duh vanga Tomas hming lam ri ve hrim hrim a nih ka rin rualin ka nihna dik tak hriat a duh vang chauha khang thu te kha sawi anih ka ring bawk. A enga pawh chu lo ni se, ka unaupa chanchin hre tur chuan engmahin min dang zo ta lo anih hi.
.
Nona khan Manhattan-a ka awm thu engtin nge a hriat ka hre lo a, a thian thenkhat te nen kan inhmuh theih nan hun special tak a buatsaih thu min rawn hrilhin zanriah ei ho a chak em em thu arawn sawi bawk a. Nona nen hian ka lehkhabu chhuah tirh atang khan inbe tawh thin. Hmel hmu miah lo a ka ngainat theih tlemte zing a mi a ni bawk. Min sawmna ka ngaih pawimawh em vanga kal ta kha ka ni a. Luca leh a hmeichhe kawp te kha hmuh ka in beisei hek lo. Thil intawng fuh palh atan chuan a mak mah mah chu a ni. Benedetto kha ka hruai lo ang tih a hlauhawm tak zet bawk. Garcia hnenah lawmthu awm rawh se!
.
 Ka thutna  bul tukverh ah dakin chhum leng del del chu ka en a, thlawhna ang mai hian ngaihtuah nei miah lo a thlawh kual ve ka chak takzet mai. Tunah tak hian engtin nge ka awm zel dawn ka ngaihtuah thiam rih lo. Engtin nge Luca ka hmachhawn ang? Hei phei chu ngaihtuah lawk theih a ni lo lehzual.
.
In ka thlen chuan a lo reh thiap a, thil mak a ni hran lo. Sana ka en a, Elario kan lenchhuahpui hun anih angin tunah chuan Garcia leh Elario chu park-ah an awm ngei ang. Ka pindan ah lutin ka intifai a. Engtik ah nge Luca a lo lan dawn ka hre lo a, ka rilru chu hahdam lo tak a ni.
.
Garcia leh Elario te thawm ka hriat chuan ka pindan atangin ka chhuak vat a, ka beisei loh zeta Luca ka hmuh chuan ka ding leh rih a.
.
"Hey" ti sapin Garcia chuan min rawn kuah a, Elario chuan ngaisang tih hriat zetin Luca a en thung. Nidang ang chu ni se min lawmin a au leh chul ngei ang. He mihring Luca Giovanni hian engtin nge a lo hneh hman hrep ni!
.
"Um_a_" sawi mai tur hre lova nui sakin Garcia chuan a dar a tiche zauh a. Luca a en bawk. Ngawi lawk! Engtik karin nge Luca leh Garcia hi thian an lo nih hman? Signal inpe tur khawpa inpawh an lo ni hman a maw..? Ka awih thei thlawt lo.
.
"Kan inbiak a ngai." awki hniam zetin Luca chu a tawng a, ka chhungril awm dan chu ka hrethiam lo. A hmaia ham bawrh bawrh ka chak a, Garcia chuan min phatsan niin ka hre bawk. Engkim a dik lo vel vek.
.
Dak vah chungin Luca chu ka en a, "Tehreng mai." ka lo ti chiam a. Ka awm dan chu Garcia chuan a hrethiam ngei ang. Elario chu pawmin pindan dangah a kalpui a. Elario chuan "Uncle Luca, ka mutthilh hmain min kalsan suh aw." arawn tizui lauh lauh a. Thinrim zetin ka nui hak mai.
.
Luca chuan chiang zeta min en run chungin muangchang hian min rawn pan a, a lan dan chu a hlauhawm lek lek rualin mak takin a mitmeng chu a de sar a. Engvanga meng de sar nge anih ka hre lo a, hriat pawh ka duh hrep lo.
.
"Allison" thaw hawk chunga min kuah a tum chuan a awmah ka lo nem vat a, hnunglamah ka awn deuh bawk. Ka awm dan chu alo beisei lawk ang maiin a lang naa, a hmela na tak tuar niawm tak lang zawk chu ka hmu hman tho. A danglam rang em a, ka ngaihbel pawh a ni zawk mai thei. A nui hul hak a, hmun dang en lovin a hmel ka la en reng thung.
.
"Ka lawm e." a ti sup a. Ka bo leh mai ang tih hlau niawm fahran a chiang hian a mitmeng thim khap chuan min en chik tak zet.
.
"Eng vangin?" ka tichang fak a.
.
"Nang.. Ka hmaah nung damin i awm, i mitmeng mawi tak ka hmu leh thei bawk a__ Ka ngai tak zet che asin"
.
"Hm..Hla thu ang mai anih chu." ka tih elna tawngkam chuan a tina niawm tak hian a thle nghut a. Min rawn khawih tum hmel a pu lo a, luhlul hmel zeta ding chung hian min en ngur ngur ringawt mai.
.
"Allison.. Oh God! Ka ngai lutuk che tih ka sawi a nih chu!" a aw ril ruih ka hriat chuan ka khup a zawi hnawk mai. Tihngaihna hriat loh hmel zet hian min en a, ka hmaah mihring piang tawh zinga ka taksa leh ka rilru zawng zawng neitu dingin min ngaih thu a sawi a, eng ang taka hnar harsa nge anih min hriatthiampui phak lo.. Khawvel minung tawh reng reng hian tuman min hriatthiampui hauh lovang! Tomas ngaihtuah in ka insehruh a. Ka rilru no a chhuak tur a ni lo a, tuna ka hmaa ding mipa, awihawm loh khawpa mipa tak leh hmeltha, mi hip thei ni bawk hian hmanruaah min hmang leh lo ang tih tunge sawi thei?? Tunah ngei pawh hian a rilru chuan min hneh  ngei ringin a nui ru hial ang chu!! Chu thil chu a thleng ngai lovang.. Ka thlentir tawh dawn lo.
.
"I sawi chu ka hria alawm. Vanneihthlak takin ka beng a chhet lo hlauh a!" ka beisei aiin ka tawng ri chu a pangngai. "Chuan, Tomas chungchang i hriat chu engvangin nge tunah hian min hrilh mai loh ang?" cho zet hian ka en chho ha a, hetiang khawpa huaisen hmel hian ka lang thei ang tih tunge ring lawk bik ang! Kei ngei pawn mak ka ti anih hi.
.
"Thil tam tak i bulah hian sawi tur ka nei reng a ni." a ti nghut nghut a. A thusawi mood-ah chuan a cheng lo tih ka hre tlat nia! Engtik laiin nge Luca mood hi ka hriatthiam tawh ngai le? Kan chen dun chhung zawng zawng pawh khan a rilru puthmang leh awm danah hriat ka nei tam ngai hauh lo a nih kha.
.
"Anih chuan.." amah dek lo tura tawlh sawnin sofa ka kawk a. Hmanhmawh lo zet hian min rawn zui a, ka thut hnu ah pawh thu ve mai lovin a jeans hak ipte hmalam zen chungin min en chhuk a.
.
"I lo danglam nasa ta hle mai. Thil mak tak a ni." min bia pawh a ang lo. A hmel lan dan chu ngaihtuahna dang daih a nei a ang khawp mai.
.
"Okay. Anih chuan Tomas chu tunah khawiah nge a awm le? Ka hriat duh ber ka zawt nghal anih loh chuan tul lo zetin thil tullo kan sawi ngei ang.
.
"Engvang in nge heng thil hi i tih?"
"Ka zawhna chu chhang phawt rawh."
.
"Tak zet che hian! Allison, thi tawh ang leh nangmah ni lo ang khan engvanga lan tum kher nge i nih?" a hmel chu a thutakin a thim khap a, thinrim hmel ni si lo..a hmel lan dan hi engtia han sawi tur nge ka hre hauh lo mai.
.
"Chu chu ka buaina a nih chu. Ka zawhna che chu min chhang rawh. Khawiah nge Tomas a awm?" zawite in ka tawng thei tawh lo.
Ka dan hman hauh loh khawpa rang hian min rawn hnaih a, nghet lutuk in min kuah thlawp a. A marphu rang zaih zaih chu ka hre thei. Keipawh hi amah ang tho hian ka lungphu a rang ve tho ang tih ka ring.
.
"Min thlah rawh!" ka aw khur deuh chu ka haw tak zet. Na zet hian ka hmui hnuailam ka pet fan fan a. "Luca, tunah_"
.
"Shh.. Tawng tawh suh" min kuah nghet zual sauh a, thawk a harsa deuh hial.. A kut thiltithei zet chuan ka hnungah min chul hauh hauh a, kan thaw rang dun khawp mai. Hei chu thunun theih piahlam a ni.
.
"Hetiang thil tih hian kan dinhmun hi a siamtha dawn chuang lo." ka tih chuan a kut chu a chawl dat a. Harhchhuak ni awm tak  hian min kuahna a thlah a, ka bulah chuan a thu a. A mit chuan min kalsan hauh lo thung.
.
"Tunah min hrilh rawh? Tomas khawiah nge?"
.
"Ka hre lo!" a hmel a ruh talh talh a, "Khawiah nge ka nupui, hmeichhe inngaitlawm leh ka ngainat em em kha a awm tak?" Engtin nge ka awm dawn tih ngai changin a mit a tizim a, ka inchhir leh ta tur khawpa nasa a ka chet loh nan ka maimitchhing ta zawk a. Ka men leh pawh chuan min lo la en reng tho. A tha e. Tomas chungchang min hrilh tur a nei anih loh chuan kan inbiak nachhan tur eng thil mah a awm lo. A hriat thin Allison, hmeichhe nunngil leh pangngai tak kha chu a awm tawh lo. Chu thil chu ka hmuhtir bawk ang.
.
"A tha e." ka thutna atangin ka tho a, a rawn tho ve vat a. "Tomas chu a thi tawh! Chu chu i hria tiraw? Nang hian mithi tawh i kaitho thei hleinem. I lak atang hian eng thil nge maw ka beisei le..? I hmel ka hmuh leh nachhan tur eng thil mah a awm tawh lo. In atang hian i chhuak thei ang."
.
Ka kalsawn tur chu nghet zet hian ka banrek ah min vuan a, eng emaw sawi tum chu a nei ang. Tawng lovin a ngawi leh rih a. Ka duhtawk ka la sawi lo. Engkim, ka thinlung tawt lutuk a ka pai zawng zawng hi bunchhuak vek thei ila ka duh ngawih ngawih.. Mah se, mihring tawngkam hian a sawi chhuak zo thei chuang lo ang.
.
"I unaunu duhtak i  bulah a lo let tawh a, itan chuan engkim a dik vek tawh. I duh ang ngeiin Tomas pawh lakbo a ni tawh bawk. Eng thil nge ka lak atang hian i la beisei? Kei hian pek tur che emaw ka lak atanga lakbo leh tur eng thil mah ka nei tawh lo. Ka nun leh ka taksa, engkim hi i duh ang taka tihchhiat a ni vek tawh... Luca, a vaiin i tichhe vek tawh. I duhtawk tawh em em lovem ni?" ka inveng hman miah lo, ka mittui a tla zawih a, ka kut hnunglamin ka hru tawk a.

Luca chuan engmah sawi lovin min kuah bet thlawp a.
.
"Ka tih palh!" a aw ri atang chuan tawng chhuah a harsat hmel khawp mai.
Mah se, a tawngkam chuan awmzia pakhatmah a nei lo!
"Allison, ka tih palh.. Ka mamawh che. I tel lova awm ka duh tawh lo."
.
"Engvang nge?" ka tawng chhuak thei tawk tawk a ni. Min kuahna chu thlah dulin ka biang tawn tawn ah min vuan a. Engvanga min khawihna te hi la tuarthei nge maw ka nih le?
.
"Ka mamawh che avangin ka mamawh che!"
.
"Engvang nge ka tia lawm? I bula ka awm loh ruala i khum i tawmpui hmeichhiate khan an mamawh ang che. Kei chuan ka mamawh lo che."
.
Chik zet hian min en vang vang a, min chhang tawh lo. Min vawnna chu thlahin chak zet hian inchhung atang chuan min chhuah san a. A tawk chiah.. Khatiang bak thil thleng tur a awm chuang lo. Kha mihring khan min mamawh lo a, keipawh hian ka mamawh hek lo. Hmeichhe nalh zet tawng ngaithlaa a thu lai ka mitthla a lo lang chu duh lo zet hian ka thaw kawk kawk a. Ka sawi duh thenkhat ka sawi tawh a, tlemte pawhin ka thawven phah chuang si lo. Khum tawmpui chungchang kha chu.. Ni e, ka mit ngei hian ka hmu lo nain chanchinthar ah hmeichhe chi hrang hrang nena an thlalak ka hmu tam tawk a, dawt ka sawi lo turah ka ngai. Engvang in nge ka ngaihtuah buai duh ang.
.
Ka pindan ah ka lut a, khumah ka mu nghal thlawrh a. Thawk ka la vak vak a, ka ippik zual zel zawkin ka hria.. Luca Giovanni vang vek a ni. Kha mihring khan min hnaih leh ka remti tawh dawn lo. Mah se, ngatinge ka thinlung hian a la mamawh cheu si le.. Hmeichhe chak lo tak ka lo nih hi!!
.
.
Ka pindan kawngka kik kauh kauh ri ka hriat chuan thuchhuak in ka sam ka chul mam thuak thuak a, lo lut tura ka hrilh hnu chuan Garcia arawn lut a.
.
"I tha em?" a ti sap a. Ka lu ka thing ringawt. Ka tha lo reng a ni. Dawt sawi a tha lo pui tha anga insawi hian min chhawk zangkhai ngai lo.
.
"I dinhmun hi a harsa tih ka hriatpui che. Allison, thurawn pe tur che ka ni em ka hre lo a, mah se, Luca pawh hian a tuar nasa tih ka hria a nia."
.
Garcia tawngkam chuan min tina zual. Ka hre lo.. Ngati nge hetiang hian ka awm le... Thinlung nat hreawm zia leh tuar a har zia ka hrechiang a.. "Luca lamah i tang tihna ani em?" mumal lo zet hian ka nui a, Garcia chuan min kuah vang vang a.
.
"Tu lamah nge ka tan tih i hria alawm. Luca vang hian natna tam tak i tuar ngei a, mah se, i la hmangaih reng tho anih hi!"
.
"No, ka hmangaih lo. Nang hi Luca lamah i tang tiraw? Nichin pawh khan in insignal lai kha ka lo hmu reng alawm."
.
"Oh.. Allison, naupangchhia viau lo teh." a nui hak hak a. Mak takin keipawh ka nuih a za tho. Ka awm dan hi ka hrethiam lo.
.
"Zanriah ka siam dawna min pui thei a ngem?" tih pahin min kuahna a thlah a, a ding chhuak nghal a. A tha khawp ang. Rilru lakpenna tur ka mamawh alawm.
.
.
Zanriah kan siam chhungin thil dang kan sawi a, lehkhabu chungchang leh thil dang tam tak.. Garcia hian ka chungchang eng chen nge a hriat ka hre lo nain ka rilru la peng thei thil enge anih a hrechiang a, min ngaihsak in unau ang chiahin min en tih ka hrechiang bawk a. Tomas aiawh tura Pathian mi tirh ani ngei ang tih ka ring nghet hmiah a ni. Luca chungchang kan sawi leh ta miah lo. Ni e, sawi mai a engkim fel vek thei ni hek lo le.
.
Ni hnih chhung chu engmah ti mumal lovin ka tal kual vel mai mai  ti i la, ka pindan ah ka inkhung deuh chawt a ni ber. Tlai lamah Elario ka len chhuahpui a, park-ah kalin thil dang zawng zawng theihnghilh tumin ka infiam pui a, ka thawven ve lai ber chu Elario bula ka awm lai hi anih ka ring. Naupang rilru thianghlim tak bulah chuan ngaihtuahna tha lo a neih theih loh a, thil tha tak chu a ni.
.
“Mama, Uncle Luca kha i tir bo em? Ka lo kal leh ang a tia, a lo kal tawh miah lo a. Papa ai pawhin min infiampui peih zawk asin. I bula infiam ai pawhin Uncle Luca bula infiam chu a nuam zawk daih. Eng tikah nge a lo kal leh ang?" chhanna tha tak a dawn in beisei tak hian min en a, a ha hmai bal seu mai lang chuan a nui seng bawk a.
.
"Ka tirbo hauh lo mai. A buai a niang. Anih chuan tui ah kan cheng dawn em le?" thil dang sawipui ka tum tih hrethiam ni awm tak hian a lu a thing mat mat a.
.
"Mama, Mommy chuan uncle Luca chu mifel tak a ni a tia. Nangin fel iti ve em?" Eng thil nge maw a hriat reuh le? Luca ngaihtuah loh tuma awm lai lehnghal in..
.
"A fel ka ring." ka tih chuan a ner sak a.
.
"Uncle Luca nen hian insual ta ula i hneh miah lo ang. A chak lutuk.." ka nui hawk hawk a. Ni e, Luca chu a chak alawm, ka hneh hauh lo ang. Mak takin Luca huatna nei miah lovin ka mitthla a ka thil hmuh vang chuan ka la nui zui hak hak a. Elario hian eng emaw tak hriat chu a nei ve ngei anih hi.
.
"Nang hian min puih loh chuan ka hneh miah lo ang."
.
"Naahh.. Kei chu i lamah ka tang lo alawm.." nui sang hian min en a, a rilru tak tak a sawi reuh bawk ang chu.
.
"Anih chuan in ah kan haw a hun tihna anih chu.."
.
"Hmm.. Uncle Luca chu kan in ah lo kal turin sawm la. Nangman i sawm chuan a lo kal ka ring."
.
Chhan mai dan tur ka hre ta lo. Naupang bula dawt muhlum sawi ka duh chiah lo bawk a.
.
"Engtik ah emaw a lo kal leh ngei ang."
.
Bu nghatin a thil ei lai chu a ei zawm a. In kan thlen chuan a tal chau deuh bawk aniang a muhil tui hle tawh.
.
"Allison, naktuk hian kan pathumin kan lengchhuak dawn em niang?"
"A nuam khawp ang. Kan pathuma kan chhuah ho lohna chin pawh a rei tawh alawm." ka ngawi dat a.
"Garcia, Elario hian Luca chungchang a zawt ve che em?" Garcia chu chiang takin ka en a,a nui hak a.
.
"Tehreng mai. Benedetto leh a pa tihloh hi mipa angaina lem lo a, min zawt tam khawp mai. Luca chuan tupawh a hip anih hmel." awm ze nei zet hian min melh zauh a, ka lo haider hmak thung. Ka lo sawichhuak ta kher kher a ni.
.
Zanah dan pangngaiin eng emaw ka ziak a, ka mut meuh chuan zing lam dar 2 a pel der tawh. Ka mu tam lo tih ka hrereng chung hian mut a chhuah loh tlat chuan tihngaihna a awm chuang lo.
.
"Tomas, hey, duhtawk rawh.." ka nuih nasat lutuk vangin ka pum a na hial. Tomas chuan ka nakah vuanin min thlah duh der lo lehnghal. "Khawngaihin.. Tomas..khawngaihin.. Mi_thlah rawhh..."
.
Min thlahin chak zet hian a tlan sawn a, man ngei tumin ka um a. Ka umpha thei lo. Inchhung atanga a tlanchhuah hmain ka man hman ziah thin kha a nia!
"Tomas, ding rawh.."
.
.
Ka phu chhuak zawk a, "Tomas" tiin ka phun zui sep sep a. Ka mumang mai a ni. Tomas hi ka hmu leh tawh dawn lo.
.
Khum atangin ka tho a, khua a var tawh tho vangin ka mu zui peih tawh lo. Ka intihfai a, ka inthlak fel leh hnu chuan hmanhmawh lem lo takin breakfast tur ka siam a. Ka nun a hniam ruih mai. Tomas bak ka ngaihtuah thei miah lo bawk. Ni e, ka mumanga ka hmuh apiangin nilengin ka ngaihtuah na a luah ziah thin a, tunah pawh a la danglam chuang lo a nih hi.
.
Garcia leh Elario te nen dar 11 velah in kan chhuahsan a, vawiin chu hlim taka hun hman ka duh tak zet. Ka ngui ru riau tih Garcia chuan hriain Elario chu a buaipui chawt a.
.
Lunch ei turin Wildflower restaurant-ah kan lut a, Elario chu hlim zet hian a au raih a. Elario hawina lam ka en chuan ka hawi sawn rang khawp mai. Luca! Helaiah daih daih eng thil nge maw a tih hrep le? Min zui ru a ni em lovang chu! Ka thil ngaihtuah vang chuan ka inthiam leh chiah lo. Min zui ru hauh lovang.. Hetiang hmun nuam lutuk ah hian hmeichhe hruai lovin a kal hauh lo bawk ang.
.
"Momy, Uncle Luca saw'n min nuih let miah lo. A bula hmeichhia saw tunge?" Elario chu a phun sar sar a. Kha maw! Ka tih reng kha. Hmeichhe hruai lovin hetiang hmunah hian a kal lovang.
Ngaihtuah lawk lem lovin Luca te awmna lamah chuan ka hawi phei a, rang zetin ka hawilet leh nain Adelina au raih ka hriat chuan ka tlai hman tho tih ka hrechiang.
.
"Awi, karei.. Allison.." a thutna atanga rawn thovin thawm dim hauh lo hian min rawn panhnai a, ka nui lui sak a.
.
"Grande Fratello! Engtin nge min hrilh miah loh theih zawk? Ka awih thei lo.." ka din ve hun pawh nghak lovin min rawn kuah a, ka hamhaih khawp mai.
.
Luca chu thovin kan awmna lam arawn pana, a hmelah a  ngaihtuahna a hriat theih loh nain a hmel chu a tak ngul thung. Kan bul a lo thlen chuan dawn awm miah lo hian ka banrek ah min vuan a, min dim lo khawp lehnghal! Ka thutna atanga min pawt tho in chak zet hian min kalsawn pui dawr dawr a. Eng thil nge maw a hriat le??
  TMH!!
CHAPTER – 28
TAKE MY HEART!
By. Thantei_Pautu a.k.a Laura_Sean_Virgo
.
LUCA GIOVANNI'S P.O.V*
.
Ka hria alawm! Thuk takin ka tina a, min haw tur pawh a ni. Mah se, a tak ngeia a mitmeng min huatna a khat chunga min en ka hmuh khan ka thinlung a na a ni. Ka la hriat ngai hauh loh angin ka na tak zet. Atan a unaupa a lo hlut zia ka hrechiang lehzual chauh bawk. Ni e, unau chu kan inhmangaih ngei a, Allison tan erawh a unaupa hi a engkim a ni tih ka lo hre tawk lo a ni. Engtiang chiaha nasa in nge min huat ang tih ka ngaihtuah ngam lo..ka ngaihtuah duh lo tiin ka sawi zawk ang e.
.
Tunah hian min hnar chiang hle a, awlsam takin min lo pawm nghal mai ni se, mak tih vangin ka thidang hial ang chu! Hnaih ngam tur pawh ka ni lo tih ka hria. A laka ka lo awm tawh dan leh Tomas chunga thil thleng zawng zawngte.. A sawi kha a dik chiah a ni. Kei hi Allison tan chuan chhiatna thlentu chauh ka ni. Allison chauh lo pawh, ka hnaiha awm te tan natna thlentu ka ni ziah thin a ni lawm ni? Mah se, engtin nge ka tih chuan ang? Allison hi ka mamawh a, a tel lo a nun hman ka tum lo.. Ka tih theih apiang ka ti ang. Ka hnena a lo let leh theih nan ka tih theih zawng zawng ka ti ang! He thu hi khawvelah ka hmu tawh ngai dawn lo nia ka inhriat lai pawh khan ka ngaihtuah fo a, nung dama ka hmuh leh hnu phei hi chuan ngaihtuah nasa tak ka ni. Ngaihtuah nasat ringawt hi a tawk zo lo tih ka hrechiang em em bawk. Thil ropui tak tak ngaihtuah kual chiam ai chuan ataka chetchhuah hian kawng ro a su zawk tih pawh kei aia hrechiang tur an awm chuang lo.
.
Luciano nen kan inbe pawp reng a, ka nawr hmanhmawh tawk loh vang nge Tomas chanchin engmah kan la hre chuang lo a, Allison zawhna pawh kha a dik takin ka chhang reng a nih kha. Tunah hian Tomas awmna ka hre bik lo mai ni lovin a thi nge a dam tih ka hre bik lo. Tuma hriat loha bo pil ringawt thei a ni lo a, Allison hian a mamawh.. Allison mamawh mihring chu ka tan pawh mi pawimawh ber a ni bawk.. Hetiang zawng hian ka la ngaihtuah ngai miah lo! Allison ka nuna ka lakluh hnu hian thil danglam tam tak a awm a, a danglam nasa ber chu keimah ngei hi ka ni tihchiang takin ka hre bawk. Allison hlutna leh ka tan enge a nih tih hi ka lo hrechiang tlai mah mah chu anih hi.
.
Khua a duai ruih a, ka mood nen pawh a inmil khawp mai. Eng thil nge ka tih ber dawn pawh hre lovin ka kalchhuak a, park-ah ka thu a. Ralkhata mipa naupang leh nu pakhat infiam ka hmuh chuan Allison leh Elario te anni tih ka hre mai a, anmahni hmuchiang thei turin ka kalhnai a. Allison chezia zawng zawng leh Elario a buaipui dan chu mit lasawn miah lovin ka en char char a.
Allison nen hian fapa nei ve ta ila enge a an ang? Ani hi chu nu tha tak a ni ngei ang tih ka ring. Nu, hmangaihna a khat thinlung tha tak nei… A pasal tana a tihtheih zawng zawng ti thin leh hlim thei tak.. Kei hian eng ang nge a nih chu chiang takin ka hre tawh alawm. A hunlai khan ka ngaihven tawk ngai lo chungin min ngaihsak thin zia leh ka tan a inpek zia te kha.. Kei hi eng mihring nge maw ka lo nih le? Huatna thinlunga khat leh mi dang ngaihtuah ngai lo ka lo ni reng em  ni? Ka hma ka sial vanga khang thil zawng zawngte kha ti ka nih zia lah kei aia hrechiang an awm lo. Ka nu hmangaihna hlawhchhuak chawp tura ka thil tih in min vuak let nat dan ka ngaihtuah hian hmangaihna hi hlawhchhuah chawp tur a ni thei dawn em ni tiin ka ngaihtuah let hial a ni. Allison hian min hmangaih thin ngei a, phat rual a ni lo. Ka nupui a ka neih chhan dik tak a hriat hma khan min hmangaihna a mita lang kha ka hmu fo thin.. Miin min hmangaih anih chuan kan nih ang angin min hmangaih mai a, min hmangaih tak tak lo tuin min hmangaih theih beisei a ka thil tih khan thil tha a lo thlen hauh lo mai. Thil thenkhat hi chu anih anga enliam mai angai thin. Thil danglam thei chuang lo tur buaipui hian awmzia a lo nei lo e. Hetianga ngaihtuah chuang hian Allison hmangaih awmchhun mipa nih ka duh leh tho si.. Ni e, mi pakhat lakah miin a rilru zawng zawng pe a a hmangaih tawh anih chuan awlsam takin a bansan thei lo ngei ang. “Mahni induhtawkna a neih leh thil dang tam tak vangin a na a, min hmangaihna erawh angai reng.” Hetiang chiah hian Garcia khan min hrilh alawm.
.
Naupang thawm vang chuan ka hawichhuak a, ka bulhnai maiah Allison leh Elario te chu an kal a, min hmuh loh nan ka kalsawn vat a. An thusawi thenkhat erawh ka hre thei. Elario ka lam tang a ni tih ka hriat ringawt pawh chuan beiseina min siam sak a.. Ni e, Allison hian mi hmangaih thei tak ka ni ve a ni tih leh ka nunna hial pawh atan ka hlan phal ang tih hi eng tikah emaw chuan min la hriatsak ngei ang. 
.
An kal liam hnu chuan ka car-ah lutin ka tlanchhuak a, thui pawh ka la tlan hman lo, ka thil hmuh vang chuan mak ti zetin ka car ka her a, ka mi hmuh chuanna car chu ka zui a. Engmah min hrilh loin hetah hian eng thil nge arawn tih? Ringhlel tur ka ni em ka hre lo nain Adelina helai hmuna ka hmu thut hian min thawng deuh chu a ni. Min rawn hmu turin a lo kal anih ka ring tia ka ngaihtuah rualin Perth-ah ka awm mek tih a hre dawn lo chiang tih ka hria.
Ka zui zel a, ka rin lohna lamah a kual ta daih bawk. Ka ngaih that lohna a zual a, eng thil ah nge ka rinhlelh ber pawh ka hre chuang lo. Adelina car dinna bulah dingin in pakhata a lut chu a lo chhuah hun ka nghak a. Darkar khat zet hnua a rawn chhuah chuan a hmel a hlim sar mai. Kei hian thil awmze nei loah ka farnu hi ka lo ringhlel ngawt anih hmel. Mipa zui bik a nei lo tih ka hrechiang a, helai hmunah hian eng thil nge a tih amah ka zawt mai aniang chu.
.
Min rawn hmuh chuan a phu zawk a, hlim zeta nui chungin min rawn pan a.
.
“Fratello, helai hmunah hian hmuh che ka in beisei hauh lo a.”
“Keipawn ka beisei hauh lo mai. Enge I tih?” ka tih chuan ngawi chatin min kuahna a thlah a.
“Stella hnenah engmah I sawi lo tih ka lo hria a, a khawngaihthlak viau a nia. Helai hmuna I lo awm chu ka va’n lawm tak em.. Thil eng emaw hrilh tur che ka nei a.” ka banah min kuahin ka rualin a kal a, amah ah danglam engmah a awm hmel loh. Stella chungchang bak min hrilh dawn lo tih ka hria a, ka ngaithla chak tehchiam lo. A rang thei ang berin Stella nen kan inkar hi tihtawp a tul tih ka hria. Allison ka buaipui vang hian ka lo hre tawh hauh lo a ni.
.
“Ka zawhna che I chhang lo a nia. Hetah hian enge I tih?”
.
“Ohh! Danglam ve tawh teh..” a sir zawngin min en ram ram a “Hmeichhe thil.. Um, hmeichhe titi chu I hriat kha..” a nui zui kar kar a. “Anih chuan, ka thil hrilh tur che chu I ngaithla dawn em?”
.
“Nidangah ni zawk rawh se. Tunah chuan ka kalsan phawt ang che. Buaipui ngaiin awm lo la..”
.
“Huh.. Naupang ka nih loh hi..” a nur nang nang chu ngai pawimawh lo zetin ka kalsan a. Ka hun ka khawhral thlawn hle mai.
.
“Fratello, naktuk ah lunch min eipui hman chuan ka lawm viau ang. Ka thil sawi tur pawh chu aw..” rawn tizui tawk tawk a, amah en tawh lo a ka ban vai zauhin car-ah ka lut nghal a.
.
Zana Luciano nen kan inbiak hnuah kal chhuak lovin ka mu a, Luciano thusawi atang khan thil mak leh beisei loh deuh a thleng dawn niin ka hre tlat. Thil tha lam a thlen beisei phawt ang.
Ka muhil ka harh chuan ka tho vat a, mak takin nizan khan mumang nei miah lo khawpin ka mutui a,  Allison min kalsan atanga a vawikhatna a ni hial ang chu.
.
Adelina hruai turin lunch ei hun dawnah ka chhuak a, a duhna hmun a sawi Wildflower kan pan vang vang a. Engvanga helai hmun hi thlang kher nge maw anih ni.
.
Wildflower kan thlen chuan mi tam zawk awmna kal pelin pindan pakhat ah kan lut a. Adelina awm dan chuan nidang a ang chiah lo bawk.
.
“Fratello, thil eng emaw hrilh tur che ka nei. I bulah ka sawi  ngam dawn em tiin ka zep tawh a.”
“Eng thil nge?” ka ti nghut a. Ka farnu hian buaina dang min siam belh sak loh ka beisei.
.
“I awm dan atang chuan hrilh lo che ila a tha zawkin ka hria.” Zam hmel tak hian a kut a khawih niap niap a, eng thil tak ni maw?
.
“I thil sawi tur neih ngai pawimawhin ka hna kalsan meuhin ka chhuahpui che tih hria la.”
.
“Ah.. Tomas chungchang a nia!” a tawng zawi khawp mai. Ka beisei loh ber thil a ni chiang khawp mai. Adelina hian Tomas chungchang ah enge hriat a neih?
.
"Sawi rawh." mak ka tih zia ka thup hmak thung.
.
"Nimin khan Tomas ka hmu a. Min rawn zuina in ah khan a awm mek a." sawi leh dan tur ngaihtuah ni awm tak hian a  ngawi leh rih a.
.
"Chuan.."
.
"Fratello, keimah ah hian eng thil nge dik lo awm ka hre lo a, mah se, ah.. Tomas hi ka hmangaih a ni." min hlauh hmel zet hian a thaw dep dep a, ka chhang mai lo. Engtin nge anih theih? In a a lo let leh hnu khan engtin nge Tomas nen hian an inhmuh leh? An birukna hmuna kal a sawi leh thil thleng a sawi te kha dawt vek a ni ang maw? Amak hle mai!
.
"Adelina!"
.
"Aw, ka sawi ang.. Ka_ atirah kha chuan Tomas kha ka haw ngei a, ka hnial chungin min hruai lui bawk a. Mah se, Tomas hi mi tha tak a ni. Min hmangaih tih ka hrethiam tawh a, ka_um, sawi tur a tam khawp mai. Allison thih thu hi ka la hrilh lo a, ka hrilh ngam ngang lo a ni." ka rilru a zawhna tam lutuk awm vang chuan tawng mai nachang pawh ka hre lo. Khang hun zawng zawngah khan khawiah nge Tomas hi a lo awm ang? Adelina hian a lo hre reng a, Tomas a thi nia kan ngaih vanga Allison tuarna nasat zia pawh a hre vek a, chuti chung chuan engmah a sawi chhuak lo a maw? Tomas a la dam a ni tih hi sawi a har viau em ni?
.
"Tunah Tomas chu ka hmuh angai anih chu." ka thinrimna leh mak ka tihna vangin ka aw a ri chhuak chang chang a ni.
.
"Ni lo, i hmu thei lo." hlauthawng zet hian ka kutah min rawn vuan a. "Nasa takin i hua ang tih ka hria. Allison i neih chhan pawh kha hrethiam lo turah min ngai suh. Khatiang thil i ti duh anih chuan Tomas pawh tihnat i tum ngei ang.. Khawngaihin, Fratello.. Thil awmzia ka hriatthiamna a la rei lo a.. Mah se.."
.
"Min dang thei lovang. Engtin nge a nih theih?"
.
"Khawngaihin min sawi zawhtir phawt rawh. Sawitur tam tak a awm ka tih kha."
.
Thawk la hakin a thu tha a, inringtawk taka a tawng theih nan a insangmar at bawk a.
.
"A tir berah chuan Alessandro nen kan inhual hma khan Tomas nen hian kan inhre tawh a. Kan inhmuh hmasak ber atangin min zui chhun zawm a ni ber. Ka ngaina lo chu a ni miah lo a, mah se, ka neih in remti ngai dawn chuang lo a ka hriat vangin ka hnaih ngai lo. Alessandro nen kan inhual hnu khan ka hlim ngai lo a, en vang nge ka hre bik lo.. Chuan, khami ni khan, Tomas nen kan inhmuh leh hmasak ber ni khan ka hnial chungin min hruai lui ta a ni. Nasa takin alakah ka hel a, alak atanga ka kalbo loh nan min phuarbet hial a. Mah se, Tomas hi mipa tha ber a ni. Mihring ka hriat tawh ah chuan a tha ber.. A unaunu nupui ah i nei tih a hriat khan a buai nasa a, zanah pawh a mu ngai miah lo. Chuan, kha in ah khan.. Kan hriat ngai loh mi rawn kal te khan dimna nei miah lovin an sawisa a, khami te kha i tirh te anih ka ring hmiah a, Tomas paw'n a ring hmiah bawk. Fratello, khang mite kha i rawn tirh an ni em? Oh! Ka van mawl tak em, nang hian tharum hmangin tumah i tina ngai lovang tih ka hria alawm.. Min venhim i duh tih chu ka hria a.."
.
"In a i rawn haw hnu khan Tomas nen engtin nge in inhmuh leh theih? Khalai hmun atang khan a chanchin hre zui lovin i kalsan ni khan i sawi a..?"
.
"Nia, ka ti ngei a, mah se, in pana ka rawn haw hma khan khang mi lo kal te kal sawn hnuah ka let leh alawm. Min tina miah lo leh min nawrlui miah lo a khatiang chen min enkawl vang khan Tomas kha misual a ni lo tih ka ring vek tawh a, ka hre lo, khatih lai pawh khan ka hmangaih tawh ani mai thei.." a nui hak a. Engmah sawi lovin ka en a, a sawi zawm leh a.
.
"Tomas khan hliam na tak a tuar a, amah enkawl thei tur mi ka ruai a, ka rawn hawsan ta anih kha. Chuan, a la dam tih i hriat chuan i chhuah dawn hauh lo tih a hrechiang a, in zavaia hriatah thi anga lan a duh ta zawk a ni. Allison chungchang ah eng thil nge a sawi i hria em?" min en kiau a, ka lu ka thing ringawt. Heng thil zawng zawng hi a mak zozai em a ni. Tomas thi anga Adelina'n min hrilh vanga Allison tuarna nasat zia kha.. Adelina chauh hi dem theih pawh a ni lo..
.
"Allison chu a chak a, ka thi nia a hria anih pawhin reiloteah chak takin a awm leh thei ang. Ka unaunu aia hmeichhe chak hi an awm thei lovang tiin Tomas chuan a sawi a. Hun a ral hnuah, i thinrimna a nep hunah chauh Allison chu hmuh a duh thu a sawi a sin. Tomas hnenah a unaunu a thi tawh tih hi ka sawi thei lo. Ka ngam ngang lo a ni.. Engtin nge heng thute hi i bulah ka sawi ngam tak le.. Sawi ka tum ngai miah lo asin.. Ka unaupa i ni a, ka thatna tur i duh reng thin tih ka hriat vang a ni ngei ang."
.
"Chanchinbu leh thil dangah Allison ruk bo anih thu an chhuah te kha engtin nge a hriat loh theih zawk."
.
"Khang kha chu a harsa lo. A hriat loh nan ruahmanna ka siam vek alawm. Khatih lai vel khan Perth-ah hian ka kal reng tih i hriat miah loh kha.." a thluak chu a hmang ve khawp mai.
.
"Tomas chungchang chu tu hnenah mah i sawi tur a ni lo. Thil tha lo tak ti tura min duh anih loh chuan i sawichhuak tur a ni lo."
.
"Ka hria e." a ti sap a. Tomas ka huatna thu emaw an pahnih tana hlauhthawnawm tur tawngkam ka hman loh vangin thawveng huai hmel a pu ta bawk.
.
"Eng chen nge Tomas hnenah hian ka zep theih dawn ka hre lo a.."
.
"A buaina chu thil lian tham a nih loh chu.." ka ti nghut a.
.
"Engtin nge a lian tham lo tih i sawi theih zawk. Tomas rilru na taka a awm tur chu hmuh ka ngam hleinem.. Ka ti thei lovang."
"Tomas hnenah chuan eng emaw chen chu i la zep thei ang chu."
.
"Ka beisei.. Mahse, kan dam chhungin ka zep thei dawn lo asin.." a ti leh halh a.
.
Allison dama ka hmuh thu hi hrilh a tulna ka hre rih lo. Thil a tibuai zo mai mai. Bakah ruahmanna ka nei!! Ka tih ngei tur thil dang a la awm bawk. Tomas zawn buai angai tawh lo a, an birukna hmuna kal te kha tu tirh nge tih ka hriat thuai angai ta thung dawn anih hi.
.
"Adelina?"
"Aw, enge?"
A hlauthawng nghal phat hmel ka hmuh chuan ka lainat reuh khawp mai. Mumal taka awm dan tur ka hrilh angai niin ka hria. Hetiang thu lian tham zep thei tur leh ka bula engkim sawi ngam tur khawp hian a huaisen tawk ka la ring thei lo zawk hial mai. Hmangaihna hian mihring ah huaisenna nasa tak a lo awmtir thei dawn a lo nih hi.
.
"Mihring, minung hrim hrim bulah Tomas a la dam tih hi i sawi chhuak tur a ni lo tih hre reng ang che. Chu chuan nasa takin min pui thei ang. In birukna in a lo kal te kha tute nge annih tih leh tu tirhte nge annih kan hriat theih nan a pawimawh lutuk tih hria ang che."
.
Adelina chu a bu nghat nghat a.
.
"Tunah chuan ka thawl huai mai. Tomas chu zanah chiah a chhuak thin a, chu pawh kar khatah vawi 2 chiah. I la zawng ru reng nia a inhriat thu a sawi a."
.
"Chutianga a awm zel chu atan a tha zawk reng a ni. A hlauh tur chu kei ni lovin kan hriat ngai loh amah tihnat tumtu te kha an ni."
.
Pindan atanga chhuakin eitur kan chah a, Adelina tawng chu ka hre mumal tawh lo. Ka ngaihtuahna ah thil dang a tam lutuk tak zet.
.
“Saw saw Allison a ni em? Fratello!”
.
Ka chhan hmain Adelina chu a tho thut a, a tlan nghal ni berin ka hria.
 “Aw, karei, Allison..” Allison chu a kuah thlawp a. Tomas chungchang a sawichhuah hmain ka chet vat a tul!

"Grande Fratello! Engtin nge min hrilh miah loh theih zawk? Ka awih thei lo.” Adelina tawng chu ngai pawimawh lovin Allison banah ka vuan a, chak zet hian Wildflower atang chuan ka kal chhuahpui dawr dawr a.
.
“Eng thil nge I hriat leh pek a?”
.
Car-ah ka nawrlut a ni ber e. A ban ka vawnna ka thlah rualin min vin that a, a banrek chu a tuai zui vat vat a.
.
"Ka bulah i chen angai!"
.
"Eng a? I a ta anih hi!" min melh rawm rawm a, a lawm loh hmel khawp mai. Kei hian eng thil nge ka tih ka hre bik lo. Allison ka bula a lo let leh theih nan hian dawt bawkin bul ka tan leh dawn em ni? Dawt ka hman angai anih pawhin enge pawi! Allison min ngaih dan ang chiah hian ka a tak tak te pawh a ni mahna! Ka neihlet leh theih dan tur anih chuan engpawh ka ti mai ang ka tih kha maw!
.
"Allison, ka thutak a nia. Tomas hmuh leh i duh anih chuan ka bula i awm angai. Tuna i awmna hi a him lo a ni." Ni e, a him lo tihlai tak hi chu thudik anih na chen a awm alawm. Adelina leh Tomas te birukna hmuna kal te kha kan hriatchhuah hma chuan venhimna a mamawh reng a ni. Tomas chenna hmun pawh kha venhim a ni bawk ang.
.
Tomas hmuh leh thu ka sawi vang chu anih ka ring, Allison hmel chu a dang lawp lawp a. A inthunun hman bik lo anih ngei hi.
.
"Huh! I thusawi chu hrechiang rawh. Nang phiangsen bula ka chen vanga Tomas hi lo let leh tur anga sawi chu.. Chutiang thu chu mi a pawhin an sawi lovang. Ngaithla rawh, Luca Giovanni! Tomas hi a lo let leh dawn a nih chuan i bula ka chen leh vang ni lovin tuna ka awmna hmuna ka awm lai pawh hian a lo let ngei ang. Eng thu nge ka sawi chu? I bulah hian chutiang thu sawi chuan awmzia a nei lo. Mithi tawh an tho leh ngai lo tih hrethiam tur khawpin ka upa tawh! Theihnghilh rawh." thip zeta min melhin a chek tlak a.
Car kawngkhar chu thinrim zeta hawngin a chhuak a.
.
"Lo ngaihtuah ang che. Uluk takin. Tomas hi a thi ngei tih fiahna a awm lo."
.
Rawn inherin rapthlak tih hmel zet hian min en a, engmah a sawi tawh lo. Chak zetin Wildflower restaurant lam panin a kal hlawk hlawk a.
Adelina khan engmah a lo hrilh loh ka beisei. Ni lo.. A tum loh takin lo sawi palh ta se.. Ni lo e! Tomas hi a hmangaih tak zet anih chuan ka thusawi kha a vawng ngei ang. Tu hnenah mah sawi lo turin ka hrilh chian em kha maw... 
.
TMH!!
CHAPTER – 29
TAKE MY HEART!
By. Thantei_Pautu a.k.a Laura_Sean_Virgo
.
ALLISON'S P.O.V*
.
Ka awih thei lo. Tomas lo kir leh ka duh chuan Luca bula ka chen kher a tul ang maw? Engvang mahin a thleng lovang. Kei hi midang tana hmanrua chauh ni turin ka piang em ni? A teuh lo.. Tu hmanrua mah ka ni tawh dawn lo. Engtin nge ka bulah khatiang thu kha a sawi ngam zawk? Zakthei lo lutuk mai. Mihring na hre thei leh ngaihtuahna nei ve, duhthlang thei tura puitling ka ni tih hi a hre lo a ni ange! A duh anih chuan thuneihna leh a thil tih theihna hi ka chungah ni lovin a thunun theih mihring chungah hmang mai rawh se.. Ka ngaihtuah thui telh telh a, ka thin a rim tulh tulh zawk.
.
Garcia leh Elario te chu va pawh nghal mai lovin wash room-ah ka kal leh rih a, tui vawtin ka hmai ka theh thawt thawt a. Minute 5 vel hnuah wash room atangin ka chhuak a, ka beisei loh zetin Adelina pawh a lo la awm. Min hmuh chuan a nui sang a. Hei pawh hi lemchang tho a ni ngei ang! An unau lakah hian rinna chhete mah ka nei tawh lo. An thuneihna leh an sum leh pai hmanga mi hman tangkai tum ve ve an ni. Unau ni awm tak pawh an lo ni e. Adelina hian ka unaupa, ka neih chhun, ka hmangaih em em kha thi turin a kalsan a nih kha.. Chu chu tunah hian ka ngaihtuah nawn leh a ka hriatchhuah nawn leh a ngai kher em ni?
.
"Ka hmu leh thei che hi ka lawm tak zet. Ka hmuh leh che pawh ka in beisei tawh lo a.."
.
"Keipawh ka lawm e. Garcia, kan kal mai dawn em niang?" ka ti zawm zat a. Adelina hi eng chungchang mah ka sawipui chak lo.
.
"Allison, ah_ka unaupa khan i la dam reng tih hi min hrilh miah lo a. I bo tak hnu khan a nun a buai nasa khawp asin. Mi dang reng rengin kan hnem zo lo a."
.
"Ka thi tawh reng alawm!" Ka tawngkam chu mak ati tih thup hauh lo hian min en phawk hra a. "Ngaih loh lamah min lo ngaih sak lo la, kan kal phawt ange. Kan inhmuh tawh loh ka beisei." Elario ka kai a, Garcia pawh a thutna atangin a tho vat a.
.
"Allison, min huat nachhan tur i nei hauh lo a nia. I chunga thil thleng kha kan zavaiin pawi kan ti em em a, Fratello Luca hian.."
.
"Adelina, khawngaihin... Min tuarpuina ah ka lawm e. Ka haw hauh lo che a nia. Thil liam tawh sawi leh ka duh tawh lo. A nih phawt le." Adelina laka ka nungchang hi a mawi lo anih chuan lo mawi lo mai rawh se. Anni lakah hian nungchang mawi ka lantir kher a tul pawhin ka hre lo. An hmel ka hmuh hian natna bak min pek belh lo a, ka tan chuan an hmel hmuh loh hi ka damna tur a nimai.
.
Wildflower tangin kan chhuak a, ka mood dik lo zet chu Garcia chuan hrethiamin engmah a sawi lo. Hetiang khawpa nasa hian ka chhungril ngaihtuahna ka tilang nasa ngai lo a, ka inthunun thei ngang lo a ni ber.
.
"Allison, lo ding teh!"
.
Car-a ka lut tur chu kan lam pana Adelina lo tlan hlawk hlawk leh min ko ri ka hriat chuan ka ding leh rih a. Hetiang em kalsan chu a mah mah ka ti ve tho. Ka bul arawn thlen chuan a thaw hlap hlap a.
.
"Allison, Luca chungchang a_ah_nupui a nei dawn tih vel kha i hriat ka ring a.." ka lo hresa reng em tih hriat tum niawm tak hian min ngaichang dat a. "Khang thil kha thutak a ni lo a nia. Uh_ Engvanga hrilh che nge ka nih ka hre bik lo. Hlim taka awm tura ka duh vang che anih ka ring. In inbiak tawh tho chu ka ring a.."
.
"A duh chuan a nei leh thei alawm. Ka inhnamhnawih dawn hauh hleinem. Min ngaihtuah vangin ka lawm e."
.
"I unaupa ang chiah i nih hi. I luhlul hle mai." a phun sap a, a tawng chu ka hriat a ring kher lo ang. Ring taka tawng aiin ka hrechiang zawk hial ang chu!
.
"Ka unaupa chungchang chu enge hriat i neih?"
.
"Uh! Eng maw? Thil eng emaw sawi ka nei em?" a ti he haw a. Ka nui liam ringawt thei lo. Tomas nen kan inang atih thu a sawi a, engmah sawi lo ang maiin a awm leh ang maw? Mi a ka ni bik hauh hleinem.
.
"Anih, ka kal phawt ang. I duh emaw duh lo emaw kan la inhmu leh thin ngeiin ka ring tlat." a nui sak a. Biak zui hlau zet hian a inher a, a kal nghal hlawk hlawk a. Thil dik lo a awm a va ang ta ve! Luca khan Tomas ka hmuh duh chuan abula ka chen atul tur thu a sawi a, tuna Adelina nungchang mak tak kha.. Uluk zawka ngaihtuah turin ka dah phawt ang. Vawiin hian khawvel a tawp dawn pawh a ni chuang lo a.. Tawp daih se ka duh zawk mai thei! Ngaihtuah vak vak pawh ni ila, chiang taka min hrilhtu leh thu awmze nei min hrilhtu an awm anih loh chuan kei hian awlsam takin thil nihna dik tak ka hre thei kher lo ang. Engvang in nge ka nun hi a buai nuai nuai mai le..
.
In kan panna kawng tluanin ka tawng meuh lo. Garcia leh Elario chuan eng eng emaw an sawi a, an nui leh hak hak thin tih chauh ka hria. Eng thu nge an sawi ka hre miah lo. In kan thlen chuan ka pindan ah lutin ka tui vawtah ka inchiah a, vawt tih vanga ka khurh hlawk hlawk hnuah bathtub atangin ka chhuak ta hram. Ka inthlak fel hnuah  Garcia a lo lut a, sawi duh a nei ang tih ka hre mai bawk.
.
"Thil pakhat hrilh che ka duh." khumah thuin min en a, a hmel a thutak khawp mai.
.
"Lo ngaithla ila.."
.
"Allison, ka thutak viau a nia." a ti nghat a.
.
"Ka thutak lo ami?"
.
"Ngaithla teh. Luca hi i hmangaih tih ka hria a, engvanga nangmah leh nangmah inhrem reng nge i nih? Luca hian a hmangaih che tih alang reng bawk a.."
.
"Engtik laiin nge Luca Giovanni, mi ngeng leh mahni thuduh, amah chauh inngaihtuah thin hian min hmangaih tawh ngai.. Garcia, ka tawngkam hi a mawi lo mai thei, mah se, a sir atanga alan ang hi a tak nen chuan a in persan nasa lutuk a nia."
.
"Chu chu ka hria. Thil thenkhat hi chu a sir atanga langchiang tak a awm ve bawk. I chapona leh tuar nasa i intih vang hian i nun hi hremhmun ang maia hreawm in i siam mek anih hi. Dik tak chuan kei hi Luca ni ta ila, ka bansan daih tawh ang che."
.
"A lawmawm khawp ang!" ka ti  nghat a.
.
"A ni lo zawngin lo ngai hmanhmawh lo la! Luca hian a hmangaih che tih hmu thiam miah lo khawpa mitdel ini tih hi ka lo hre hauh lo a ni."
.
"I bulah chuan eng thu pawh a sawi ang chu. Ka lakah chuan a dang daih. A hmanrua mai mai ni tur hian ka piang hleinem.."
.
"I hmangaih alawm.." Garcia chuan a lu a thing mat mat a.. "A ni lawm ni? Luca hi i hmangaih.."
.
"A dik alawm." beidawng zetin ka thaw hak a.
.
"Chu tak chu a ni. I hmangaih a, tunah abula i let leh theih nan a bei a, i rilru hneh tur hian engtiang chiaha nasa in nge a la beih zel dawn?"
.
"Chu chu ka buaina tur ani paw'n ka hre lo. Garcia, dik tak chuan, ka chunga a thil tih tawh zawng zawngte vang khan ka ring thei tawh lo a ni. Chu chu ka thiam loh ani thei dawn em ni? Ka nun, hmalam hun duhthusam ka neih zawng zawng pawh a tichhe vek alawm. Chu aia pawimawh zawk chu ka neihchhun Tomas min lak bo sak bawk a."
.
"Mahni hmasial chu Luca ni lovin nangmah hi i ni ngei ang."
.
"Garcia!!" ka ti that a.
.
"Luca hian i lak atangin Tomas hi a la bo ngei em?"
.
Chu zawhna chu engtin nge ka chhan ang? Luca hian ahma khan Tomas chunga thil thleng hi a hre lo tih a sawi tawh ngei a.. Ni e, Luca hian tualthat turin tumah thu a pe ngai lo ang tih ka ring. Mah se, tunah hian Tomas ka hmuh leh theih nan hmanrua ah min hman a, a bula cheng turin min hrilh.. Tomas hi a thi lo em ni zawk? Ngati nge awmze nei miah lo a ka ngaihtuahna ka hman chu le?? Tuna ka thil ngaihtuah hian awmzia a nei miah lo!
.
"Ka hre lo." ka ti sep a.
.
"Anih chuan Luca hi chance pe rawh."
.
"Chu pawh chu ka hre chuang lo. Garcia, khawngaihin.. Min chhuahsan phawt rawh. Ka ngaihtuah phawt angai." ka ti ta ngawt a. Tunah hian mumal takin engmah ka ngaihtuah hleinem mawle.. Hun thawl ka mamawh anih hi.
.
"Uluk takin ngaihtuah la, thutlukna dik tak i siam ka beisei. Allison, mi chak tak inih thin kha. Hlim taka nun hman hi i phu a nia." min kuah leh vang vang hnuah min chhuahsan a. Mi chak tak ka ni a, hlim taka nun hman ka phu! Hlim taka nun hman chu mi zawng zawngin an phu vek lo em ni? Tumah hian lungngaihna leh chhiatna thleng thin te hi kan duhin kan chunga thleng turin kan thlang ngai hleinem..
.
.
Kar khat zet a liam ta. Luca ka hmu ngai lo a, vawikhatte pawh min rawn be hek lo. Pawi ka ti pawh a ni chuang lo bawk a. Adelina pawh ka hmu leh ta lo. Garcia nen kan titi na pawh ka ngaihtuah zawm chuang lo bawk a. Engtik lai pawha rilru hah renga hun hman hi ka hne ve ta viau anih hi. Sava ang maia zalen a nun hmang tura inngaihtuah kha keimah ngei hi ka nia. Ka ngaihtuah ang khan zalen takin ka nung bawk ang chu.. Ka duh dan leh nuam ka tih ang takin.. Pawisak nei lovin..
.
Ka ngaihtuahna chu umzuiin kartawp chawlh ka hmanna tur hmun nuam zet ka thlang chhuak a, keimah chauh in hun nuam leh zalen tak ka hmang dawn a ni. Garcia leh Elario te pawh ka ngaihtuah lovang. Ka ngaihtuah ngai lovin Elario pa bulah chawlh hmangin an kal ve dawn tho a, keimah chauha in a lo awm ka peih lo bur. Elario a awm loh chuan ngaihtuahna lapeng tu tur an awm dawn lo.. Nin lutuk vangin ka damlo thei hial ang.
.
Ka chawlh hmanna tur hmun, vaukam a in te fel tak khaw hawina nuam tak lam chu ka bag khai chungin ka pan a, ralkhat atang pawhin hmuhnawm tham a ni. Rilru leh taksa a hahdam nghal sawng sawng hial alawm.
In te ka thlen chuan a bula mipa lo awm chuan min rawn pan vat a. A pian a nalh khawp mai. A sam a buang uk deuhin a mitmeng a pawl thuk raih a..
.
"Miss Adams inih ka ring. Helai hmunah hian kan lo lawm a che. Heihi i awmna tur in chahbi a nia." ngaihawm taka nui sukin chahbi chu a khai phe lauh lauh a.
.
"Ka lawm e." tiin chahbi chu ka la a. A nalhin mi a hip viau naa Luca nen khaikhin chuan.. Huh.. Luca nen ka khaikhin buai pawh a tul lem lo e!
Inchhunga ka luh rualin ka bag khai ka dah tawp a, inchhung awm dan leh a bathlar atanga hmun mawi leh hmuh nuam lutuk lang ruih chu ka en kual nghal zung zung a. Damchhunga awm nan ka it khawp mai.
.
Muangchangin ka thawmhnaw ka phawrh a, tuiluma ka inchiah vang vang hnuah ka pen leh note bu lachhuakin in hmalam bathlar a chair lian zetah chuan hahdam thei ang berin ka thu a. Ka rilru a thil lo lang chu awmze nei lem lo hian ka ziak zel a, ka mutthilh lai ka hre miah lo. Vawt seng seng vang chuan ka harh a, khua alo thim fel der tawh mai. Ka mutthilh hlana chhuata lo tla ka pen leh note chu chharin inchhungah ka lut a. Ka ril a tam khawp mai.
.
Ka thawmhnaw thlakin ka awmna piah hla deuh a in eng chiai chiai chu ka pan a, music thawm leh mihring hlim au thawm a ri chiah chiah bawk. Helai hmunah hian hlim taka awm turin kan kalkhawm hlawm anih hmel hi..
Reiloteah ka thleng thuai a, a hmunah chuan thawm a tha khawp mai. In tur an lek suau suau a, a then an lam a, a then hmun kilkhawr deuh pawh pan chuang lovin duhthawh tak hian an infawp ngawng ngawng bawk a. A then hlim takin an titi a, midang han ngaihsak bik an awm chuang lo. Ka riltam zia hrechuak in kil khata dawhkan chu ka pan a, eitur ka chah fel hnu chuan a lo thlen hun nghakin dawhkanah ka kut ka nghat dat dat a.
.
"Helai ah hian mahni chauha thu atan chuan i nalh mah mah lo maw?"
Ka hawichhuak a, ka hmaa mipa ding chu khawiah emaw ka hmu tawh thinin ka hria.
.
"Luiz! Nang maw?"
.
"Kum engzat nge ral ta? Ka hriat sual loh chuan ka hmuh hnuhnun ber tum che khan ha hmai hlai tak i nei chiang! Ka la hai hauh lo mai che.." a nui zui hawk hawk a.
.
"Mipa lian takah i lo thanglian ta hi ka awih thei lo."
.
"Mi hip thei tak tih i sawi tel lo!" fiamthu tih hriat tak hian a nui zui leh hawk hawk a. "I pa boral thu ka hriat khan ka lo tuarpui khawp che asin. Tomas a tha em?"
.
"Ah_ an pahnihin an awm tawh lo." ka tih chuan phawk fe hian min en a. "Oh.. Ka tih palh. Ka tuarpui hle mai che."
.
"Hetah hian i thu thei ang." ka thutna bula chair awlah chuan a thu nghal vat a.
.
"Tun thleng hian i la single a ni em lovang chu?"
.
"I hre rei hle mai." ka tih chuan thutak deuh zawk hian arawn kun hnai a.
.
"Ka hun a thleng ta tihna a ni thei em?"
.
"Khatiang fiamthu kha i lo la hre reng elaw?" ka tih chuan a nui leh hawk a.
"Serious ta ila.." Ka kut arawn vuana hriatthiam har zet hian min en ta reng a.
.
"Cherry, min lo nghak rei tawh em?" kan dawhkan kil bula Luca ding ka hmuh chuan ka phu nasa lutuk tak zet! Min ngaichang miah lo leh hnialna hun awm miah lo hian ka hmuiah min rawn fawp zauh a. Luiz chuan ka kut a vawnna chu a thlah nghal vat bawk.
.
"Oh! Ka tihpalh.. Ka lo hre lo.." a ti bah nawk a.
.
"Luiz, kan inhmu leh ta hlawl mai. Ka nupui Allison.." Luca hmel nelawm loh leh thutak ran a hmuh chuan Luiz chu a thutna atangin a tho hluai a. An pahnih hian an lo inhria anih hmel bawk.
.
"Eng thil.." sawi ber tur ka hre lo. Luiz ang bawk hian ka hamhaih lutuk.
.
"In pahnih hian in innei amaw?" Luiz hmela mak a tihzia lang chuan ka nuih a ti za hauh lo mai. Ka nuih a za lo tak zet. Luca hi engtin nge helai hmunah hian a lo awm ve ngawt theih?
.
"I hmuh ang hian"
"Ni lo" ka lo ti ve thung. Rilru buai hmel zet hian Luiz chuan min en tawn sek a.
.
"Ka kal phawt ange." tih leh ka thutna atanga thawh ka rual a. Ka che rang tawk lo. Ka kawngah ban tha chak zetin min rawn kuah a, Luca malchungah ka thu hnawk a. Ka dinhmun lai tak chu remchang ah lain min kuah nghet deuh deuh lehnghal.! Hetiang thil hi ka mamawh lo. Chutih rualin helai mi chi hrang hrang awmna hmunah hian hmuhnawm siamtu nih ka duh hek lo.
.
"Oh! A chiang e. Ka kalsan phawt ang che u. Allison kan inhmu leh thuai dawn nia."
.
"Ka nupui hi lo hnaih miah lo la a that zawk ka ring! Luiz Cesarino!" Luca chuan Luiz chu en lovin ka mitah min en a,a hmel awm dan chu ka hrethiam lo. Tunah tak hian ka rilru a mang vek.
.
A lu thing nghat nghat chungin Luiz chu a kalsawn a, ka beisei loh lutuk a lo thleng anih vangin engtianga han awm tur nge ka hre mai bik lo.
.
Luiz a kal liam chuan Luca min kuahna chu phelh tumin a kutah ka vuan a. Thinrim tur ka ni nge ni lo pawh ka hre lo. Tuna Luca nungchang ah khan ka hriatthiam loh thil a awm a, chutih laiin ka zalenna zah lo taka min palzut sak angin ka ngai tel bawk. He mihring hian amah chiah a inngai  pawimawh thin ka tih kha maw.. Tunah pawh a lo langchhuak leh ta anih hi.
.
"Ka kuahna che hi phelh turin min hrilh suh. Engpawh sawi la, tunah chuan i thu engmah ka zawm lovang." ka awm zawnah a tawng a, a tawng zawng chuan min vawnna chu thlahdul a hnekin min kuah nghet telh telh zawk.
"Luca.."
.
"Hm.. My love! Khawngaihin min kuah let rawh!" a tawng chu ka hre thei chang chang a ni. A hmel en tumin ka che hret a,a maimitchhing daih tih ka hmuh chuan a hmel chu ka en vang vang a. Kuah let tumna ka nei lo. A cher deuhin ka hria. Huh.. Ka khawngaih vang leh ka lainat vang a ni em ka hre lo a, mah se, a hmel ka hmuh hnuhnun ber lai aia a lang cher deuh leh a hmul mehfai loh to siar siar chu.. Engtin nge ka sawi dawn ka hre lo! Sawitur ka hre miah lo. A taksa lum ham ham si a awm chuan ka thla a timuang riau.. Ni lo.. Ni lo! Ka thil ei ah khan eng emaw dik lo a awm a ni ngei ang! Ka rui a ni hial lo maw?
.
"Min rawn be lo a. I hmel ka hmu miah lo bawk a. Eng thil nge ka tih dawn ka hre tawh lo. Allison, eng thil ti turin nge min beisei."
.
"Tun maia Luiz laka mawi lo taka awm tur khan ka beisei hauh lo che a."
Muangchang in arawn meng a. Ka aw ri atang khan eng mood-ah nge ka awm a hrethiam chiah lo tih hriat tak hian a mit a tizim a. "I malchung atang hian min chhuk tir theih ka beisei?"
.
"Eng emaw tak chu i ni e."
Min kuahna a thlahdul rualin a malchung atang chuan ka chhuk vat a.
.
"Anih chuan Allison, ka bula cheng tur chuan i lo inngaihtuah ta em?"
.
"Engvang in nge ka ngaihtuah ang. Ka ngaihtuah i lo ring chu a mak zawk hle mai." ka awm dan pangngai a awmin dawhkana juice awmna no chu la in ka in zauh a.
.
A bu nghut nghut a, a tawng leh mai lo. A mitmeng thim raih leh a ngaihtuahna tilang miah lovin min en run a.
.
"Stella chungchang vang kha anih chuan_"
.
"Stella chu tunge?"
.
A nui hawk! Chiang zeta min la en reng chungin muangchang hian dawhkan ah a kiu pahnih nghatin a kutzungpuiin a hmui a khawih zauh zauh a.
.
"Allison"
.
Engahmah ngai lo anga lan ka tum ngar ngar nain a mitmeng danglam dan chu ka hrechiang khawp mai. Ka duh vang ni hauh lovin keipawh ka danglam. Kan pahnih inkar ah hian boruak a inmung mek tih ka hai lo a, tunah hian ka inthunun angai tak zet! Erotic movie chang ang maia awlsam lutuk a ka danglam chu ka inhaw hluah hluah. A mitmeng chu ka en rei duh lo.
.
"Tunah. Allison. Ka mamawh che."
.
A thusawi awmzia hre tur khawpin puitling ka ni a, nula thianghlim ka ni tawh hek lo. A lakah ngei hian thinlung hlim leh hmangaihna luangliam zawih zawih khawpin kan inneih zan khan ka inpe thlap anih kha..
.
"Kal bo rawh!"
.
Ka tho zawk a, ka juice in bang dawhkana la awm chu ka la khawng baw zui. Ka theih tawpa chakin ka kal hlawk hlawk a, min lo umzui lo hram se tiin ka rilru in ka tawngtai mawlh mawlh bawk.
.
Thaw hlawp hlawp chungin ka kal zel a,  ka awmna in ka thlen hma chuan na zet hian ka hnunglam atangin min rawn pawt nawk a.
.
"Luca, ti suh!"
.
"Keimah, Luiz! I tha em? Tanpui theihna che ka nei em?"
.
"Ka tha.. Keimah a awm ka duh.."
Min ngaihtuah hmel zet hian Luiz chuan min en reng a, min vawnna pawh a thlah chuang lo.
.
"Luiz, ka tha. Ahma ang reng khan keimahin ka chingfel vek thei." ka ti halh a. A lo ner nung thung.
.
"A lan dan chuan i pasal mahni hmasial tak bula chen chu a hahdam lo hle anih hmel."
.
"Luiz, chu chu i sawi tur a ni lo a nia." ka tisap a. Luca thlavang ka hauh vang pawh a ni chiah chuang lo a, tunhma, hun rei tawh taka ka hmelhriat thinin kei leh Luca chungchang ah hian sawi ve tur a neia ka hriat loh vanga hetianga tawng hi ka ni.
.
"Okay. Inchhungah ka hruai lut ang che. Chuan, ka kal lehnghal ang."
.
"Luiz"
.
"Min tih tir rawh."
.
Min vawnna chu phelhin ka kal a, min rawn zui tih ka hria. Inchhung kan luh hnu chuan Luiz chu min chhuahsan thei tih hawihhawm thei ang berin ka hrilh a. Mipa dang buaipui nih pawh ka duh chuang lo tih chiang takin ka hria.
.
Choka ah ka lut a, Luiz chu a chhuak mai turah ka ngai. Thil ri dawp leh mipa rum hrawih thawm ka hriat chuan rang zetin ka tlan chhuak a. Ka awih thei lo!
Kawngka ah Luca thinrim taka ding ka hmuh chuan angaihna hre lo zetin ka en a, Luiz chhuata tlu ka hmuh chuan thil thleng chu zawt chawp lovin ka hre mai. Rang zetin Luiz tlukna bulah chuan ka thingthi a.
.
"Ka tha.. Ka tha.." Luiz chuan a khabe a tuai nawk nawk a, a hmui bul a thi ser ser bawk.
.
"Luiz Caserino, Allison hi hnaih lo turin ka hrilh che kha." a aw hlauhawm zet chu tunhmain ka la hre ngai lo.
.
"Luca, a tawk.." ka ti that a, tawng mai lovin chiang lutuk hian min en a. Luiz chu chak zet hian a kalchhuak nghal bawk. Koh let pawh tum ila a lo let lovang. Heng thil thleng hi hmu lo vin hre miah lo se tih hi ka duhthusam a ni hrim hrim bawk.
.
"Mrs. Giovanni, ka duh loh tawp thil ka tih loh nan min nawrlui tawh suh." min koh dan hrep chu!
Atan hian a duh ti turin Luiz awm leh awm loh khan kawngro a su miah lovang.

"Eng thil nge i tih ang? Eng thil nge i tih ang?" ka khur dar dar a, awmze nei lo leh mawi lo taka arawn chet mai bakah a duh loh thil a tih loh nan nawrlui lo turin min la hrilh ngam a maw? A dinhmun hi chiang taka ka hrilh angai anih hi.. Hlauhna nei miah lovin Luca chu ka hmachhawn a.
.
"Allison.."
.
"Eng thil nge i tih ang? Huh.. Min that dawn ami? I duh duh ti rawh!"
.
"Tak zet che hian! Ka duh chu ka ti ang!"
.
Dawn awm miah lovin min rawn kuah bet a, ka tang ve phat bawk. Dim lo zet hian ka hmuiah min fawp a, ka hmui a thi ngei ang. A samah ka theihtawpa nain ka tham a, a thaw hrawih a. Min thlah chuang lo. A tih dan thlakin dim deuh zawk hian min fawp a, ka duh emaw duh lo emaw ka khup a zawi hnawk tho tho. Min fawhna erawh chhanglet lo turin ka insangruh nasa khawp mai.
.
"Hahdam rawh." ka hmui la si reng chungin a tawng a, duhthawh zet hian min fawp zui lehnghal a.
Ka thin a phu dawt dawt a, ka hua niin ka inhria a, min khawihna chu ka dang phal der si lo! Ka inten zawk! A sam ka thamna chu ka thlahdul tial tial tih ka lo hre miah lo. Ka sam karah a kut a rawlh a, a kut lehlam in ka kawngah min kuah bawk a.
.
Muangchangin min fawhna chu a titawp in ka mitah min en a, min kuahna chu a thlah theih nan a kut ah ka vuan a, min hnial lovin min thlah a. Maimitchhing zawkin a thaw hawk a.Keipawh ka pangngai tawh bik lo.
.
"Allison, ka hmangaih che!"
"Honey, hetah i lo awm reng a.. Oh.. Ka zawng nasa lutuk che.."
.
Luca chu enin a bula hmeichhe lo ding chu ka en a. Stella! A nalh ngaiin a la nalh reng. Inti neitu zet hian Luca banah arawn kuah a. Luca chuan a kuahna chu phelhin min rawn en a.
.
"Allison, ka sawi kha i hria em?"
.
Eng thu maw a sawi kha? Luca hian ka hriatlai ngeiin min hmangaih tih thu_
.
"Heihi Allison.. Oh.. Allison hian hetah eng thil nge a tih? Karei, Luca nang hian engmah i la hre lo tih ka theihnghilh tep. Ka rawn umzui chhan che hi a tlai hmain ka hrilh che angai anih hi.."

Stella chu Luca nen kan inkar ah dingin Luca a en a.
.
Stella chuan eng thu nge a sawi dawn ka hre lo. Luca hian eng thu nge hriattur a neih?
.
"He Allison hian eng thil nge a tih i hria em?" a ti leh halh a. Ka lo nui hak thung. Ka thil tih sawi tur a hria maw? Hriat a chakawm khawp mai!
.
"Luca.." Luca chu hnaihin a bengbulah a phun sawr sawr a, eng thu tak sawi ang maw? Kan pathum chauhin kan awm a, chuti chung chuan a lem thei ang berin a hrilhru vel a nia!
.
Luca a hrilhruk zawh chuan nui pawt pawt chung hian min rawn melh a, Luca lam a hawi leh rualin a hmel lan dan chu a thlak lehnghal hmiah a.. Hmeichhe mak tak chu anih hi maw le..
.
"In pahnih hian min chhuahsan thei ang." ka tih chuan Luca chu a nui suk a, a mitmeng erawh hlauhawm tih piahlam a ni.
.
"A ni maw? Engtin nge i sawifiah dawn?"
.
"Engmah sawifiah tur ka nei lo. Min chhuahsan ula ka lawm khawp ang." ka tih chuan rang zet hian min rawn tham nawk a, ka kawr awm ri that vang chuan ka te ve thawt bawk. Luca chu thinrim insum nasa lutuk chungin a khur dawt dawt tih ka hre thei.
.
"A ni em?" hlauhawm zet hian ka hmai bulah arawn kun hniam a.
.
"Enge maw ni ang? Min thlah rawh."
.
"Stella, i thusawi kha han sawinawn leh teh." Stella a be chungin ka lak atangin a mit a lasawn eih lo. Ka kawr awm pawh a la tham reng.
.
"Thil engkim, Adelina a pasal hual lak atanga lak hran anih dan leh Tomas chunga thil thleng pawh kha i ruahmanna vek a ni tih chiang takin ka hrechhuak a, a fiahna pawh ka nei. Chu thil hrilh tur chuan Luca hi ka rawn zawng a ni. A ni hian engmah hre lovin a umzui reng che a. Ka hne tawh.. Luca leh a hausakna zawng zawng awt miah lo leh engahmah ngai lo anga i lang hi dawt vek a ni. Luca hi i nun tichhe tu ah i puh a, a lakah neih harsa tak ang leh amah duh miah lo angin i lang a, hmeichhe tenawm ber i ni. Tunah hian Luca beilet tura i ruahmanna neih hi ka sawi nghal dawn em?" thaw mang lovin a sawi par par a, a thusawi duk dak lo zet vang chuan ka danglam eih lo! Lem lutuk.. He hmeichhia hian thawnthua awlsam taka mi dawt sawi an awih mai thin ang hi a thleng dawn anih a ring a ni mahna! Atthlak lutuk!! Atthlak mai pawh a ni lo, hetiang hi a tak takah a thleng ngai lo. Ka unaupa thihna hi ka ruahmanna ani ang maw.. Stella thusawi hi thu dik chu ni se nungdam a awm tlak loa inngaiin ka intihlum tawh hial ang! A awihawm loh lutuk vang chuan ka nui lo thei lo. Ka nuih erawh a za miah lo.
.
Luca chu a mitah ka en a, he mimawl hian Stella thusawi hi a ring anih teh chuan thil mak tawp aniang chu.
.
"Chu chu i ring em?" ti sapin thutak zet hian Luca chu ka en a, ka kawr nghet taka a thamna a kut chu ka vuan a.
.
"Luca tunah hian sawifiahna hun i pe thei alawm." Stella chuan zam hmel a pu miah lo. A mak tih ai mahin rapthlak ka ti zawk mah. Luca thatna duh ber niawm tak hian a hmel chu a ti danglam hneh khawp nasa mai bawk. Hetiang mihring hi an awm thei dawn em ni? Tuna a thusawi zawng zawngte kha vawikhat pawh ka la ngaihtuah ngai loh thilte a ni lehnghal.
.
"Ka rin lohna turin sawifiah rawh." ati hrawk a. Stella thusawi a ring tihna anih chu.! Min ring miah lo chung hian engtin nge ka hmaah 'hmangaih' tih thu kha a sawi ngam zawk!
.
"I duh duh i ring thei ang."
.
"Allison??"
"I duh duh i ring thei. Sawitur ka nei lo!"
.
"Phiangsen che hian!" ka awm a thamna chu dim lo zet hian a thlah a, ka pai nawk a. Stella hmela hnehtu inti hmel lang ka hmuh chuan ka thaw a tawp lo chauh a ni. Luhlul chhuah lo hian a thusawi awm ang lo leh lem tak tak kha ka sawifiah dawn em niang?
.
"Engmah ka hriat loh leh ka tih miah loh thil chu engtin nge ka sawi fiah chuan ang." ka tawng chhuak ngei naa ka sawifiah a tul kher em tiin ka la inzawt tho. Luca chu engtin nge a awm dawn ka ngaichang a, Stella pawh chuti bawk.
.
"Min lo hmangaih ngai reng reng em? Nge, khang zawng zawng pawh kha dawt vek a lo ni zawk?"
.
"A hmasa in Stella, hetiang kan sawi dawn anih chuan i fiahna neih chu han phawrh ta che." ka ti chang fak a. Ka inringtawk mah mah a ni. Ka tih miah loh vangin eng fiahna mah a awm dawn lo tih lah ka hrechiang nasa. Hun liam tawh buaina hian vawi engzat fakau nge buaina min thlen dawn le??
.
"Min chhang rawh. Min lo hmangaih reng em?"
.
Engpawh thleng dawn se thu dik danglam ngai lo tur hi ka sawi ngei ang.
.
"Aw. Luca Giovanni, ka hmangaih che."
.
Luca chu a phun hluk a, Stella a lo nui hak thung!
Heihi maw Luca Giovanni ka hmangaih tih hun rei tak hnua ka sawichhuah leh vanga lawmman ka dawn tur chu.. Pakhatin min nuihzat a, pakhat chu a tawng hriat theih lohin a phun hluk ringawt ang maw?? A mitmeng ah hian ka hmangaih tih thu ka sawi vanga hlimna a lang miah lo lehnghal.!
TMH!!
CHAPTER – 30
TAKE MY HEART!
By. Thantei_Pautu a.k.a Laura_Sean_Virgo
.
ALLISON'S P.O.V*
.
.
"Engtin nge ka rin theih tak ang che?" Luca tawng chu a zawi khawp mai. A zawi em em nain ka hrechiang lutuk. Tunah hian Luca hian kei aiin Stella hi a ring zawk a ni. Makti tur pawh ka ni chiah em? Kei hian rin ka hlawh ngai lo, atan chuan engmah lo mai ka la ni reng tho a nih hi. Min hmangaih thu a sawi zo chauh a, kei lahin ka hmangaih tih ka lo sawi hmanhmawh bawk. Engvanga fing thei miah lo nge maw ka nih le? Vawi engzat fakau nge buma ka awm dawn? Ka ka atanga thu chhuak reng reng hian rin a hlawh ngai chuang lo tih hre tur khawpin thil ka tawng tam tawh a ni lawm ni?
.
Luca hmel chu ka en a, a ngaihtuah naa thil awm tur awm ang engmah ka hre lo. Ka hriat zawng leh ka hmuh chu he mihring hian min ring reng reng lo tih hi a ni. Ka thinlung na lutuk vang chuan ka thisen zawng zawng hi ka taksa tangin a luangchhuak vek dawn niin ka hre hial mai. Ka thaw tha thei lo. Ka awm ka dawm a, ka awmdan danglam chuan amah ah nghawng a nei lo tih hriat zet hian a che eih lo bawk.
Aw le, a tha e. Luca Giovanni ka tawng hi vanduaina tawpkhawk a ni e. Lo tawng hauh lo ila ka nun hi a pangngai zawk ang.. Thil thleng zawng zawng kha..
.
.
"Stella thusawi kha a dik vek tih sawi ila ka thusawi hi i ring angem?" ka tawng chu hrechiang lo ni awm takin ka lamah arawn ding awn deuh a, Stella chu a lo hawi sang vah thung a. Chiang zet hian a meng kawk a, a awmzia ka hria.. Dawt chiang lutuk a min puhna kha ka pawm anih chuan ani hian mak a ti em em tur a ni reng a ni. Engtiang pawhin awm rawh se, ka tan a pawi lo. Ka chau zo tawh. Luca nen kan inzawm theihna awm zawng zawng hi engkim tihchah vek ka duh a ni. Na leh tur chuang ka awm tawh lo ka tih hnu hian vawi engzat nge ka nat belh leh tawh le. Tomas hmuh ka duh chuan Luca bulah hian ka cheng tur a ni a, tuna kan boruak en hian ka tan chuan Tomas hmuh lehna tur chance a awm thei tawh lo hulhual niin ka  hria. Min rinna chhete pawh nei lo bulah hian ka rilru leh thinlung hlan nawnin ka let tawh lovang.
.
"Allison?" Luca chuan chiang zetin min en a, ka awm chhung na ut ut vang chuan ka tawng leh mai thei lo. Ka na lutuk em a ni. Ka kut ka hum ruh a, tunah hian ka sawi nghal vek angai. Luca nen hian inhmuh leh ka duh tawh lo. Ka tuar theih bak a pel tawh tak zet a ni.
.
"I ring anih chuan ka lawm khawp ang. Engkim kha ka ruahmanna a ni tih ring ang che. Khawngaihin min chhuahsan tawh rawh u."
.
Luca chu amah ang lo takin chiang lo hmel a pu a, ngawi rengin min en a.
.
"Anih chuan Honey, kal ang. Hetiang hmeichhe bawlhhlawh vang hian i buai tam tawk tawh."
.
"Stella thusawi chu a dik. Luca, keihi min rin nachhan tur i nei lo a, ka ruahmanna vangin engkim hi a buai zo a, mah se, nang chuan engmah i hloh chuang hleinem tiraw? A tawk tawh e. I bulah cheng leh turin thutlukna ka lo siam tawh a, chu pawh Tomas hmuh leh ka duh vang ni lovin i rosum thenkhat lo chan ve ka beisei ruk vang chauh a ni. Stella hian ka ruahmanna zawng zawng a hre bawk a, hmun dangah in inhrilh tawh mai dawn  nia." ka tidam thlap a. Tunang hunah hian engtin nge dam thlapa ka tawng theih ka hre bik lo. Ka rilru so bulh bulh leh awmze awm miah lova tal vak vak ka chak zia ngaihtuah phei chuan thil mak tak a ni.
.
"Engtin nge i ngam zawk?" Luca aw zawi leh chiang tak chu ka hria a, a hmel erawh ka en duh tawh lo. A tawngkam atang chuan ka thusawi kha a ring nge ring lo pawh ka hre chuang lo a. Hriat pawh ka duh tawh lo.
.
Kalsawn tumin ka inher a, inchhung atanga an chhuak lai hmuh ka duh loh vang a ni pakhat. He chawlhna inchhung atang chauh ni lo, ka nun atang hian kumkhua atan a kal bo tawh dawn a ni. Chu thil hmuh chu ka duh lo. Ka nun kawng buai tak mai hian engtik ah nge chawlhna a hmuh ve ang? Thil tha lam leh ka dikna tilang tura ka lak atanga thu chhuak reng reng Luca hian a ring thei lo a, a chhe lam erawh a ring hmak mai anih hi maw..
.
Ka banrek ah  nghet zet hian min rawn vuan a, alam hawi turin min kuai her lawp bawk a. "Nangmah ngei hian sawifiah rawh." atih chuan ka puakkeh ta vek. Insum ka tum buai tawh lo.
.
Ka tal thut a, ka theih tawpa nain a awmah ka chum pawp pawp a, ka nam pah bawk. A inrin lawk loh vangin a inveng miah lo. A hmel pawh en chuang lovin ka tal buan buan a.
.
"Chhuak rawh u, chhuak rawh u. Helai hmun atang hian min chhuahsan rawh u. Tunah..tunah.." ka au tuar tuar a, ka taksa a sa pup pup mai. Sawi hleihtheih loh khawpin ka rilru a buai a ni. An hmel hi ka hmu peih tawh lo.
.
Stella chuan Luca chu a lo vuan ve bawk a, inchhung tang chuan an chhuak ta. Luca hmel ka en thuak a, a rilru a buai hmel khawp mai, a hmel pawh a phelh ve deuhin ka hria. Ka ngaihtuah zawm lovang.
.
An chhuah fel rualin kawngka ka khar a, chhung lamah ka kalh nghal a. Ka taksa a khur hlawk hlawk a, ka buai chhia a ni deuh ber mai.
.
In hnunglam kawngka atangin ka chhuak a, hmalam enin ngaihtuahna hmang miah lovin ka kal nawk nawk a. Tuipui tui vawtin ka kawng thleng min chim tawh tih ka hriat chuan ka phu chhuak zawih zawih mai. Ka la kal zel tho. Tunah chuan thil dang mamawh ka nei lo. Tuipui ah chuan ka inchiah a, awmze nei lo zet hian tui chhungah chuan ka au a, ka thaw a chham hma nasa khawp mai. Mahni intihhlum tumah min lo ngai ngawt ange! Thih ka la tum hauh hleinem.
Tui fawn dul dul chu ka awm ang angin ka inlen tir a, ka pil leh bawrh thin. Tha sen ngai hauh lo a tui chhunga awm chu a hahdamthlak riauin ka hria. Hahdam nia ka inhriat ngai lohna chin hi a rei ta khawp mai..
.
Thawk leh khatah tha chak zet hian min rawn pawm nawk a, hlauthawng thutin ka tal chiam a. Kal tal thut vang nge, tui tla chhanchhuah ngai ka ni lo tih a hriat tak vang nge ni zawk, a phun hluk a. Tunge tih ka hai hauh lo mai. Eng thil ti turin nge maw a lo let leh ni.?
.
.
LUCA GIOVANNI’S   P.O.V*
.
Allison bula Luiz Cesarino hmuh kha ka beisei hauh lo a, ka beisei lo mai a ni lo, ka ngaihtuah chhin lo hrim hrim a ni zawk e. An inhmelhriat hi thil mak tak a ni. Luiz nen hian inngainat loh chhan tha tak kan nei a, eng vanga inngaina hauh lo nge kan nih tih hi sawi kher pawh tul ka ti lo. Mipa in ka ngaina lo tih ka sawichhuah meuh chuan a nep hauh lo angtih erawh thil chiang sa a nia.
.
Allison chungchang ah chuan helai hmunah hian a kal tih Garcia hnen atangin ka hria a, ka hnena a lo let leh theih nan beih zui zel tuma umzui ka ni bawk a. Dik taka sawi chuan a tawngkamin min hnial thin mah se, a mitmeng a de zeuh awm thin hi ka hmuh hmaih lo tiin sawi ta ila.. Ni e, nasa takin a thup  ngei a, mah se, mihring hian tum viau pawh ni ila kan thinlung leh ngaihtuahna hi thup vek theih loh chin kan nei thin. Kei ngei pawh hi ka ni tho ang. Kan mitmeng hian dawt a sawi ngai lo tlat a ni.
.
Tuipui kam Bar atanga min kalsan khan ka umzui vat a, ka beisei loh thil bawk ka hmu leh a, ka insum hman miah lo. Allison awmna inchhung a Luiz ka hmuh khan ka hnek ta reng a ni. Engkim a kal fuh tawh dawn nia ka ngaih laiin Stella a lo lang leh a. Ka tum lawk miah loh danin ka awm atul ta bawk.
.
Stella thusawi kha a dik lo ang tih ka hria a, a chhan pawh hun eng emaw chen atang khan a awm dan hi ka ringhlel ru tawh a ni. Allison ring lo anga ka awm kha ka tih loh tawp tur a ni bawk. Tomas hmuh leh a duh vang ni lova sum duh vanga ka bula let leh tur anga a insawi kha chu ka ring lo hulhual a ni. Dik tak chuan ka bula lo let leh tumna a neih ka ring lo hrim hrim. Engkim a buai leh zo vek tawh. Kha thil thlen lai tea ka ngaihtuahna ang kha chu ni se, tunah hian engkim a fel tawh hial ang.
Tun tum chu Allison hian a mitmeng ah thup nei hauh lovin a chhungril a a ngaihtuah angin a che chhuak ta bawk anih kha. Allison lakah khatianga awm kher lo pawh khan Stella thil tihsual leh tihsual loh te, fiahna a nei reng em tih te pawh hriat dan a awm tho ngei ang. Mihring famkim lo leh tihtheih chin nei ka nih zia a lang chhuak leh ta anih hi. Engkim tithei ka nih bik loh zia te nen.. Mah se, mipa ka ni. He thil hi chu a danglam dawn lo a, mipa ka nih ang takin ka hmaa tihtur awm hi felfai takin ka chingfel vek ang. Tihsual palh a awm chuan siamthat leh hun a awm thin.
.
Stella a thlenna hotel ah ka dah let a, a bulah engmah ka la sawi lo. Tifuh intih hmel zet hian thawveng takin a thaw ham ham a, ka ngaihtuahna hi hria ni se la, a thawveng hauh lo tur a nia. Tunah chuan be tur pawhin ka tlawmngai thei rih tlat lo. Hotel kawtah Stella chu car atangin ka chhuktir a, engmah sawi lovin ka tlan chhuak lehnghal a. Allison kha mumal zawka ka biak a tul a, amah ring lo anga ka awm chhan kha ka sawifiah a tul bawk. Hmeichhe luhlul tak a ni nain a fing a, thudik ka sawi ngei a ni tih hre tur khawpa a fin pawh ka beisei. Allison bul ka tanpui dan tluka siam that leh chak hi ka nei hek lo. Ka bultan dan a diklo a, min ring hauh lo pawh ni se thiamthu sawi tur emaw dem theihna emaw ka nei hauh lo tih ka inhrechiang khawp mai. Chutih rualin neihlet  leh a, ka dam chhung hun min hmanpui turin amah aia duh leh mamawh hi ka nei lo.
.
A chawlh hmanna in ka thlen chuan kan kalsan laia a awm ang angin a reh thiap a, kawngka ka kik a, thawm engmah a awm lo. Kawngkhar ka nem a, chhung lamah a inkalh tih ka hre mai a. Eng thil nge maw ka hriat ni tukverh a puanzar kau deuh atang chuan inchhung ka bih a, in hnunglam kawngka a inhawng tih ka hmuh chuan hlauhthawnna mak tak ka nei ta tlat. Ka ngaihtuahna a thil lo lut chu duh lovin ka lu ka thing nawk a.
.
In hnunglam ah tlan pheiin tuipui panna kawngah chuan ka tlan a. Tuipui kam ka thlen chuan thil eng emaw hmuh in beiseiin ka hawi kual a, eng a awm tha vak lo nen mumal in engmah ka hmu tha thei lo. Chik zet hian ka  hmuh theih chin chu ka en zel a.
Tuipui thuk chin thleng lova mihring ruangam ni awm tak lang ka hmuh chuan ka thaw hrawih mai. Tui fawnin a len ang angin a awm a, a pil leh bawrh thin. Ka hlauhthawn ruk thil a thleng ta niin ka hria. Ka hriat hman hmain chak zet hian ka thil hmuh lam pan chuan ka tlan nghal  a. Midang annih ka ring lo reng reng. Allison hian mahni intihhlum a tum ka ring chhin ngai miah lo.. Ka thin a phu dawt dawt a. Tun ang reng renga hlauthawng hian ka la awm ngai hauh lo mai.
.
Ka ban phak rualin ka pawm nawlh a, a tal thut chuan ka phu chiang lutuk. Ka phun hluk a. Ka rin ang thil a lo nih loh vangin lawmthu ka sawi zawk pawh a ni mai thei.. Eng thu nge ka sawi ka hre lo. Mahni intihhlum tum a ni lo tih ka hriatna chuan min ti thawveng hawk lo thei lo a ni.
.
“Min thlah rawh.” Na zet hian a tal leh a, ka lo inrin lawk chiah tawh loh vangin ka thlauh a, tuiah a pil leh bawrh a. A rawn chhuak leh rang khawp mai. Mak takin a awm dan chuan ka nuih a tiza tlat nia. Nuihsawh ang zawng erawh chuan a ni hauh lo. A kutin a a sam a huih a, a hmai a tuai bawk a. A landan chu duhawm tiin sawi ila a fiah ber ang. Hmeichhia, tui atanga lo chhuak hlim, thinrimna nei tih lang reng bawk hi engtin nge a lan duhawm viau theih le? Amah khawih tum tawh chuang lovin ka kawng ka dawm a, ka en reng ringawt a.
.
“Eng thil ti turin nge I rawn kal leh?” ati hlar a, ka hmaah dingin min hmu leh chu a lawm lo tih a thup lo chiang khawp mai. A thawmhnaw hak huh vek chu a taksaah a bet thlar a. A landan ngaihtuah hauh lovin zawhna min zawt a, chhan buai ka tum lo. Ka rilru a thil awm chu a dang daih.. A hun lo khawp mai..
.
“Kal bo rawh.” A ti nghat a. Tunah hian eng thu pawh sawi ila min awmzia a awm tam dawn lo tih ka hria. Chutianga ring chung chuan ka pan tho chu a nia.
.
Min ngaichang lovin tuipui kam lam panin a kal a, ngawi reng bawkin ka zui a. Ka rin loh dan takin tiau vutah chuan a thu sawp ta niai a, rei lovah zawi zet hian a mu riai riai a. Enge ngaihtuah tur ka hre lo. Sawi tur ka hre hek lo. Hetiang dinhmunah hian keimah vanga awm a ni tih ka hriatna chuan min tina vawt vawt a ni.
.
A mutna bulah chuan thuin engmah ka sawi lova, a ni pawh ka awm tih hre lo ang hmiaha awmin a maimitchhing chial a. Kan inkar boruak chu tawngkama sawi theih pawh a ni hrep lo ve. Tuipui fawn ri hlup hlup bak thawm dang hriattur a awm lo.
.
Ka aw thian kharhin ka la en reng a, thawm ka chhuah hnu pawh chuan engtinmah a la che chuang lo.
"I tha em?" ka tih chuan tawng lovin a lu a tiche a, a awm dan hi ka hrethiam ngai dawn lo anih hi. Nungchang chi hrang engzat tak nei ang maw? Ka hriatchian theih lohna hi alama min hipbet tlattu pakhat a ni chiang khawp mai. A awm dan tur sawilawk theih a ni ngai lo. Zantir lama a awm dan nen khaikhin chuan a danglam leh vek tawh.
.
"Hahdam turin helai hmun hi ka pana, ka hahdam chuang lo anih hi." a ti sep sep a. Min bia pawh a ang chiah lo. A la maimitchhing reng tho. A la thinrim reng em tih pawh ka hre lo. Ka rilrua ka duhna kalpui a, hnehlak tum a chi dawn hauh loh mai.
.
"Eng thilti turin nge min duh?" ka ti ta ngawt a. Min chhang mai lo. Ka tawng a hre lo a ni mai thei.
.
"Ka hmuh phak lohah awm la ka hahdam deuh mahna!" tia min chhan chuan ka thaw hawk a.
.
"Thil theih loh ti turin min beisei thei lovang." Ni e, a hmuh phak loha awm hi ka tum reng reng hleinem. Amah dek pha reng leh ka mit hmuha awm reng tura ka duh lai hian engtin nge ka kalbo san theih tehlul ang.
.
"Kei hi chutiang thu sawi zawk tur chu ka niin ka hria." rawn mengin chiang zet hian min en a, tuipui boruak rawn vawt ta deuh leh eng tha vak lo zawng zawng nen kan boruak chu a hahdamthlak ru riau thung.
.
A bulah chuan muangchangin ka mu ve a.
.
"Ka bula rawn let leh tura thutlukna i siam thu i sawi kha i ti tak tak em?" ka tih chuan a nui hak a. Ngaihdan nih loh vanga nui a ni nge ni lo ka hre lo.
.
"Ka sawitum tak chu i hriat tawh kha. Tunah chuan hnaih leh che tumna ka nei tawh lo. Tomas hmuh ka duhna ai chuan i bula awm ka duh tawh lohna hi a nasa tawh daih zawk a ni. Tomas hmuh leh chu ka duh ngei a, i bula ka rawn let leh kher loh pawh hian ka hmu tho ang.."
.
"Chu chu engtin nge i rin theih?"
"Tomas la dam anga ka ngaih theihna tur khawpin nang leh Adelina hian tawngkam in nei tlat alawm. Ka rilru a buai khawp mai.. Oh! Engvanga i bula sawi kher nge maw ka nih le..." thawk a la vang vang a, tunah chuan a maimitchhing leh tawh.. A hmel chu ka en vang vang a, tun anga mumal tak leh inhnial buai miah lova kan awm thei hi a mak khawp mai. A hmui hnuailam a pet zauh a. Ka kiu pakhata inbeng kang deuhin ka la en ta reng a, arawn men chuan a rin aiin ka lo hnaih tawh a ni ngei ang a tawlh hla hret a. Min hlau hmel erawh a pu hran lo. Mah se, a mitmeng ka hmuh leh chuan ka lak atanga hla ta vawng vawng ang hian ka ngai tlat nia. Hmeichhia ang maiin engkim ka dawn ta thlip thlep chu anih ni maw...
.
"Tomas a la dam ngei tih hi thudik a ni tih tunah hian min hrilh thei em?" Heite hian ka rilru a nem theih nan lem a chang a ni thei angem? "Luca, min chhang rawh.. Khawngaihin!"
.
"Fawp tur chein min duh maw?" amah hnaih belh chuang lovin ka kun hniam deuh a, za lo zet hian a nui hak a.
.
"No.. Zawhna ka zawt che anih chu.." a ngawi leh dat a "Min hrilh chuang lovang tih hre tur ka nia. A tha tho e. Ka la zawng hmu tho ang. Ka hun hman min rawn tihbuai vangin ka lawm e.." min tiel tih ka hria. A tho chhuak a, min ngaichang lovin chawlhna in lam panin a kal nghal hmiah a.
.
Angai ah bawk ka kuallut tawh dawn lo. A ninawm tawh. Dawhtheih ka zir nasa viau asin. Thutlukna pakhat ka siam anga ka thutlukna ang chiahin ka che ang. Allison hneh tur hian dawhtheihna hian awmzia a nei tam dawn lo tawp mai. Ka rilru hi vawi engzat nge ka thlak dawn? Eng ang pawhin ka ngaihtuahna danglam mah se ka tum chu a la ngai reng. Allison ka hnena a lo let leh theih nana ka tih vek a ni.
.
Rang zeta thovin Allison chu ka zui a, inhnial buai miah loa kan awm khan hmasawnna a thleng tlat lo. Ka tihtur hi eng thil nge anih ka hrilhlawk dawn hauh lo mai.
.
Ka umphak rualin a banah nghet zetin ka kai a, ka lam hawi turin ka kuaiher nghal bawk a.
.
"Eng_"
"Tih luihna ka hmang lovang. Nang hian i duh thu ngeiin min rawn pan ngei ngei dawn a ni. Ka lo nghak ang che." min chhan hmain a chalah ka fawp zauh a, engtin nge a awm ngaihven miah lo anga lang zuiin ka kalsan a.
.
“A thleng chuang lovang.” thinrim hmel zetin min rawn au zui a, ka nui suk ringawt!
.
Ka story dahkhawmna group a duh tan a join theih reng e. 29~august [stories of laura sean virgo]
TMH!!
CHAPTER – 31
TAKE MY HEART!
By. Thantei_Pautu a.k.a Laura_Sean_Virgo
.
ALLISON'S P.O.V*
.
Hmanhmawh miah lo leh danglamna awm lova min kalsan chu ka en reng a, ka thinrim zia chu ka sawi chhuak thiam lo zawk. A kal liam thlengin ka en reng a, a kal liam hnu chuan thinrim zeta pen chawrh chawrh chungin chawlhna in lam chu ka pan a. Eng maw a sawi kha?? Kei hian ka duh thu ngeiin ka pan ang maw? A bulah hian pangngai takin a awm theih hlawl loh.. Thinrimin a bulah eng thu mah ka sawi lovang tiin tuia ka awm lai khan ka ngaihtuah a, ka tum lawk ang chiahin ka awm reng bawk a. Mah se, min kalsan dawna a thusawi vang khan tunah hian nasa takin ka thin a ur leh ta anih hi..
.
In chhungah ka lut a, ka inbual leh zet hnuah ka mu a. Ka mut a chhuak lo chiang khawp mai. Khatiang khawpa inringtawk khan engtin nge a bula ka let leh tur thu a sawi theih le? Ka hnial theih hauh loh tur thil eng emaw tih a tum a ni thei angem? Ka hnial theih miah loh tur thil chu eng thil nge ni ang? Kei pawhin eng thil nge tih ka hriat loh chu Luca Giovanni hian a hre awm lo emai..!! Khumah ka inlet tawn sek a, ka ngaihtuah nasat poh leh a thiltih tum awm ang ka hre lo telh telh zawk niin ka hria.
.
Tunah ngei pawh hian ka bulah awm se tiin ka ngaihtuah a.. Ka ngaihtuah rualin ka inten zawk hial.. Hetiang mipa hi eng vanga tawng leh duh em em nge ka nih? Haw tur ka nia.. Ni e, nasa taka haw tur ka ni. Thil thleng zawng zawng te kha ka ngaihtuah chhuak kim thei tawh lo hial a nia.. A tam tawh lutuk. Ka duhthusam chu engmah ngaihtuah buai miah lo a, khawvel danga kal bo daih hi a ni..!! Aw.. Ni e, he thil hi ahma khan engvanga ngaihtuah chhuak daih tawh lo nge ka nih.. Luca Giovanni min zawn hmuh theih ngai lohna tur hmunah awm ila, thlamuang takin ka nun hi ka hmang thei ang. Ka thlamuang ngei a ngem? Luca hmu tawh miah lo hian ka nun hmang ta ila ka hlim angem? Ka hlim chuang lo mai thei! Aaaa... Ka hmu thin chung pawhin ka hlim chuang lo anih hi.. Ka va'n nep tak em..
.
Ka muhil ka harh chuan ka taksa a na them thum mai. Naktuk hian Garcia in ah ka let leh tawh dawn a, helai hmun ka pan chhan ber lah a fail chiang em em bawk si. Hahdam chu sawi loh, a hma aiin ka hahdam lo zawk daih. Ka thil ngaihtuah reng reng pawh a dik thei lo. Thinrimnain ka khat anih ber hi. Chu pawh eng dang vang ni lovin Luca Giovanni vang a ni lehnghal..
.
Pawn lama thawm ri nak nak ka hriat chuan khum atanga tho chhuakin ka inphihfai a, choka ah lutin coffee ka siam a. Pawnah mi chetla en pahin ka coffee siam tak zet chu ka in hlak hlak a. Vawiin chu nilengin tuiah awm ila ka taksa tang tlat leh ka rilru chawl lo lutuk hi a zia mai thei.
.
Coffee ka in zawh chuan inchhung ah lutin ka inthlak a, tui cheng turin ka chhuak lehnghal a. Ni sa at maiin ka vun min em chuan ka hahdam sawng sawngin ka hria. Rei fe tui ka chen hnuah puan phahin hahdam zet hian ka mu a, lehkhabu chhiar tur ka ken chu ka chhiar mial mial a.
.
Ni sa reh ta thut chu eng vang nge maw ni le? Ka lehkhabu chhiar lai dahin ka hawi chhuak a. Luca ka hmuh chuan ka hawi sawn nghal hmak. Engvanga helaia la awm ve reng nge maw anih le? Hahdam zet hian ka bulah arawn thu a, biak tumna ka nei lo hrim hrim.
.
"I lan dan pawh a hahdam ta deuh alawm." ka chhan beisei chuang lovin min be sek a, eng thu pawh sawi se tawng ka tum lo.. Ka rilru chhungril tlemte chuan nuam ka ti tho mai.. Ka bula a awm hian...Oh..Karei leh.. Ngaihtuah lo zawk ang!
.
"He thil hi enge a?" ka bula thil awm enge tih pawh ka hriat loh chu a la kang a, ka la en duh chuang lo. Nui ri hak chung hian ka en loh theih loh turin ka hmai zawnah thi nalh zet hi a rawn ti uai nalh nalh a.
.
"Mi tuemawin an thlauh a nih dawn kha." ka ti nghat. Amah bia ang pawhin ka awm duh chuang der lo.
.
"A tawpah chuan i tawng ve ta hram alawm.. I ta tur anih ka ring." tih pahin thi chu min awrhtir tum niawm tak hian a che sawn hrut a.
.
"Engvanga min tibuai reng nge maw inih le? Tihtur dang i nei miah lo ami?" ka tawngkam chu a mawi lo tih ka hre tho nain ka pawi sa tehchiam lo.
.
"Ka nupui bula hun hman bak tihtur dang ka nei hleinem."
.
"I nupui.."
"I ni a lawm. Inthenna lehkha pawh kan nei hauh hleinem." ka huat tur ngeiin a awmlui tih ka hria. .
"Duhtawk teh. A ninawm thawkhat e."
.
"Ka ning ve hauh lo."
.
Ka chhang duh tawh lo. A thi min pek tum chu a khawih nuap nuap a, sawi mai tur a hre tawh bik lo a niang. Awm lo ang hmiaha ngaih luih tumin ka lehkhabu chhiarlai ka bih leh a, tlar khat pawh vawitam ka chhiar nawn, ka thil chhiarlai awmzia chu ka hre chuang miah lo lehnghal.
.
"Allison.." ka beng bula arawn tawng chuan ka phu deuh zawk a, thil tha lo tih tum ang mai hian a  nui suk a, ka beisei ang thil erawh a ti mai lo. "Cherry.."
.
"Eng? Engvang a.."
"Thil eng emaw tihtur ka nei a." a thle nghut a, a thusawi awmzia ka hre pha lo reng reng. Eng thil pawh tiduh se, min hrilh kher a tulna pawh ka hre lo.
.
"I duh duh i tithei alawm.."
.
"Naupang chhia ang maia awm hi engtik ah nge a tawp dawn?"
.
"Tunge naupang chhia chu?"
.
"Kei chu ka ni lo."
.
"Awmze nei lo.. No.. Luca.." dawn awm lovin min chawi kang nawlh a, kan bula mite chuan kan infiam emaw tiin min nuih thaw hlawm tih ka hmu hman, Luca chuan chak zet hian tuipui lam panin min kalpui a, rihna nei miah lo ang mai hian min zo lutuk mah mah a ni.
.
"Duhtawk teh.. Eng thil nge tih i tum.."
.
Min chhang lovin a kal zel a, ka inrin hma bawkin tuiah kan pil ta bawrh a.
.
"Luca..aaa.." ka inham buai a, ka din hmain kan pil leh bawrh a. Hneh zet hian min rawn kuah a, min dinpui takah chuan min en chungin a nui hawk hawk a. A chet dan leh a awm dan chuan min ti hamhaih khawp mai. Ka thin arim deuh bawk. Angaihna hre lo zetin Luca chu ka en a. Sawi mai tur ka hre lo. Tuna ka hmaa ding mipa nui hmel hi.. Hetianga a nui hmel hi ka la hmu ngai lo.. A sam atangin tui a far tluar tluar a, a hmai a hui pawp a. Min en chungin a la nui reng tho, mah se,a nui ri tawh lo. Ka nui ve hauh lo tih a hmuh chuan a nui tawp riai riai a. Chet dan naupang chhia zawk chu amah hi anih hi..
.
"I a tawh anih hi!" ka thusawi engahmah ngai lovin min en a, a hmel a thutak ta riau bawk. Ka hrethiam teh nuai lo.. Min tihhlum tuma che chu a ni lo phawt a..
.
"I lan dan kha.." a hmel chu chiang zetin ka en a, he mipa hi ka hrethiam thei lo. Tunah hian eng vanga serious leh viau si nge maw anih chu le.. A nui zo chauh kha a nia
.
"Ka lan danah buai su_" min rawn hnaih thutin ka kawngah a ban pahnihin min kuah a, ka thusawi tum ber kha enge ni kha..? Ka thluak a chawl duk mai!
.
"I lang nalh lutuk!" ka en chho ha a, ka tawng leh hmain ka hmuiah min rawn fawp a. Hei chu ka beisei miah lo! Vawiin hian ka beisei ang thil engmah a thleng reng reng lo. Min fawh dan chu a dam thlap a, ka pil riai riai niin ka inhria. Ka awm dan chu ka va'n duh lo em! Min fawh dan thakin a rilru a min ngaihsakna leh min thlakhlelhna zawng zawng lantir tum niawm tak hian min fawp zel a, mak takin ka inla hrang thei hram.. Ka thaw halh a..
.
"Tawp rawh!"
"Tawp turin min duh lo!" a ni pawh a pangngai bik lo.. A mitmeng a ka thil hmuh chu hrethiam lovin awmze nei lo zet hian ka nui hak a. "Ka hmangaih che! Chu chu i hria!" atih chuan ka hamhaih lehzual.
.
"Ni lo.."
.
"Allison.." tawng zawm mai lovin ka chalah min fawp vang vang a, a taksa chu a khur deuh ni a ka hriat tlat chu.
.
A hmel chu en reng duh lovin ka hawi sawn a, kan vela awmhnai thenkhat chuan min enin an nui sang a, a then chuan min ngaihven lem lo.
.
"Miin min nuih a nia.." min kuahna chu phelh tumin a kutah ka vuan a, a che eih lo.
.
"Ka pawi sa lo."
"Keiin ka pawi ka ti.."
"Allison, duhtawk tawh rawh!" a kut zungpuiin ka hmui a tuai zauh a, a nui zui suk a. Engvanga nui nge anih ka hre lo. Ka thin a lo phu dawt dawt thung.. Hetianga ka danglam kher hi tulllo hulhual.. Mah se, tinge ka inthunun theih miah loh.. Ka hre lo! Hahdam leh thlamuang taka awm ka chak em em a ni.. Luca angchhung ah hian hahdam leh thlamuangin ka awm thei dawn em ni?
.
"Engkim a tha vek ang." a tawng ring lo. Ka beng bula tawng chu ni lo se ka hre pha kher lo ang. Nghet takin min kuah a, ka inhriat chhuah hmain a kawngah ka ban pahnihin ka kuah let a. Tunah chuan engmah ka ngaihtuah buai rih lo ang.
.
Tuipui ah chuan eng chena rei nge inkuah chunga kan din ka hre lo.
.
"Vawt iti anih kha." muangchangin min kuahna a phelh a, tuipui kam lamah min kalpui a. Ka ngaihtuahna pawh muangchangin arawn harh tial tial bawk.
Mi mawl ka nih hi! Engvanga awlsam zeta kuah ve ringawt nge ka nih?
.
A hmaa kan awmna hmun kan thlen chuan ngawi rengin ka puan phah leh lehkhabu, ka thil ken dangte ka lakhawm a, Luca chu ka zah a ni. Kei hian ka duh lo tia hnar reng chungin ka infawhtir a, ka kuah let bawk. Ka zak.. Ka nep ka inti lutuk.
.
"I tha em?" ka bulah lo kalin ka thil ken chu min laksak a tum a, ka lo tan deuh takah chuan min chhuh luih pawh a tum ta chuang lo. Min zawhna chu tawngkama chhang lovin ka bu nghat a. Min ngaihtuah hmel zet hian ka hmaah kalin ka lam a hawi a, a hnung zawnga a kal chu tluk a hlau lem lo a niang chu.. "Allison, i tha miah lo." a ding a, ka kalna tur a dal tlat vangin ka ding ve lo thei ta lo.
.
"Thil thleng kha a ni lo zawngin ngaihtuah suh. Ka ngaihtuahna buai vang anih kha." Ka thusawi chu keipaw'n ka awih lo. Ka duh ve reng vang ni lo se min fawh khan duh lovin ka lo hnial thei alawm. Ka kuah let lo thei bawk..
.
"Ka hria alawm."
Min rawn hnaihin ka dar tawn tawnah min vuan a, arawn kun hniam deuh bawk. Kan insan hleih dan ngaihtuah in ka hmel chiang taka hmuh a duh chuan a kun hniam reng ang chu.. A taksa lian zet chuan ka khawhmuh pawh a titawi vek reng alawm. Tuna ka hmuh zawng chu a awm leh a dul taksa chuang awm miah lo leh khawih chakawm zet!!!
.
"Ka nawr hauh lo che ania. Min en teh.." tunah chuan a awki a dang leh tawh. Thupek ka hmu a ni leh ta ngawt e. Ka thil lo ngaihtuah hmanhmawh vang chuan ka awm a nuam ta chiah lo bawk.  Ka ngaihtuahna a hriat loh ka beisei. "A hmasa ber atan chuan ka hmangaih che tih i hriat hi ka tan a tawk rih. Ka kalsan dawn hauh lo che a nia. Eng chena rei pawh nghah ngai dawn se, ka nghak ang."
.
"Ni lo.. I hrethiam lo.."
.
"Engkim ka hria. In chhungah lut phawt teh ang." ka thil ken lai chu hneh zet hian min laksak a, ka zui dawn tih hrechiang em em ni awm fahran hian chawlhna in lam panin a kal a. Ka zui mai loh chuan.. Kalna tur hmun dang a awm chuang lo. Tuiah ka cheng leh duh pawh a ni chuang lova..
.
Hmanhmawh miah lovin a hnungah ka kal a, chawlhna in kan thlen chuan kawngka ka hawn hun nghakin a ding a. A bula awm hi ka duh nge duh lo pawh ka inhrechiang tawh lo. A ni hian min hmangaih tih ka hriat chuan a duhtawk rih thu kha a sawi a, eng tik atang khan nge min hmangaih? Min hmangaih tak tak reng angem? A tira min tihnat tum rana min hnaihtu hian min hmangaih thei dawn em ni? Dik tak chuan, min hnaih chhan leh a nupui ni tura min sawm chhan ka hriat chhuah atang khan ka laka a rilru put dan zep hauh lovin a nung a, a ruka ka nat tam zia lah awlsam taka theihnghilh mai theih a ni hek lo. Mihring hian atira a hmangaih hauh loh hi thil tam tak thlen hnuah a hmangaih thei dawn em ni? Tuna hmangaihna chungchang ringawt lo ngaihtuah pawh hi a finthlak ber lo khawp mai.
.
Kawngka ka hawng a, inchhunga ka lut chu min rawn zui ve mai a. Awm dan thiam a har angreng. Zawh duh tam tak ka nei a, ka zawhnate hi tuna sawichhuah chi a ni angem pawh ka hre lo.
.
"Zawhna ka nei?" ka tih chuan min ngaihven hmel tak hian min en vat a, ka tawngchhuak hmanhmawh chu ka inchhir leh deuh. Eng dang nge ka tih chuan ang? Ngawi renga in zau vak lo chhunga awm dun reng ai chuan eng emaw sawi chu a tha zawk tho alawm tiin ka ngaihtuah leh rih a. Eng thu nge ka zawh dawn tih ngaichangin min en a, ka rilru a zawhna tam tak awm hi eng ber nge ka sawi hmasak ang. Nichin lawka thil thleng vang khan alakah ka lungawi a, a bulah ka let leh tawh tihna pawh a la ni chuang lo. Ka rilru a hliam tam tak ka neihte hi awlsam takin a bo nghal vek thei dawn lo chiang bawk. Chu chauh pawh a ni lo, thinlung dam takin a hnenah hian ka let leh ngei ang tih ka sawi thei lo.
.
Ka tawng leh mai tak loh vang chuan min rawn pan hnai a, enge ka hriat pawh ka hre lo, min khawih ang tih hlauin ka tawlh sawn a. A awm dan a danglam lo. Chiang zet hian min en reng ringawt. Ka taksa englai pawh min dek anih chuan ka duh loh tawp dana awm leh ka hlau a ni.
.
"I zawhna chu enge?"
"A pawimawh leh lo. Min kalsan thei tawh ang." ka tita zawk a.
.
"A tha alawm." tiin a bu nghut a, a thil ken ho chu sofa ah dahin kawngka lam a pan nghal a. Ka enzui duh lo.
.
"Kan inhmu leh thuai dawn nia."
Alam hawiin muangchangin ka inher a, a thawm a reh tak deuh reng vang khan a chhuak tawh turah ka ngai ania. Kei chuan kan inhmuh leh thuai a tul nachhan ka hre hauh lo mai. Ka ngaihtuahna let but but leh danglam zung zung hi ka hrethiam ta bik lo.
.
"Zanin hian helai hmun hi ka chhuahsan ang. Kan inhmuh fo hian eng thil tha mah a thlen dawn lo tih i hriat ve tho kha."
Ka sawi zawh hmain ka bul a lo thleng leh der tawh. Chhuah tumin kawngka pawh a hawng vek tawh kha a nia.
.
"Ka duh anga awlsamin thil a thleng dawn lo tih chu ka hria a, mah se, nghah theih chin ka nei a nia." nichin maia min dawhtheih tum tak hmel kha a pu tawh lo. A landan chu ka sawi chhuak thiam chiah lo bawk.
.
"Eng thil nge i nghah? Kei hi min nghak anih chuan min nghak chhuak lovang tih ka hlau khawp mai." ka tichang ta fak a. Khawi atangin chakna ka neih ka hre hek lo. Ka tawng chhuak ve tawp a ni. Ngaih dan nih loh hmel zet hian a ner suk a.
.
"Ni lo ve_"
.
"I lo lan tawh chuan ka tan buaina a awm ziah thin. Chu chu nangpawh hian i hria.." Hei pawh ka sawi ve leh ringawt. Min tihnat a tum vang renga ka chunga a thiltihte khan keimaha nghawng a neih nasat zia hi sawichhuah ka tum ngai lo. Tlawmna ah ka ngai tlat thin a nih kha. Tihnat ve ka duh fo thin a, vawitam tak ka ngaihtuah thin bawk.
.
"Eng maw i sawi?" a ti nghut a, ka tawng a hriat loh vanga ka thusawi min zawt a ni lo tih ka hrechiang.
.
"Luca, thil zawng zawng hi awlsam taka theihnghilh theih a ni lo. Ka tilawm zo lo che tih nangmah ngei hian chiang takin min hrilh tawh kha. I lungawina thlen zo lo hmeichhia, hmeichhe dinhmun hniam tak hi engvanga neih leh duh nge inih?"
.
"Duhtawk rawh!" a ti hrawk a. A hmel landan chu na tak tuar ang mai a ni. Mah se, ka la duhtawk lo cheu!
.
"Ni lo, dinhmun hniam lutuk hmeichhia hian i nun ka tawmpui thei tawh lo ang che tih hi chiang takin lo hre tawh rawh. I duh ang takin.. Dinhmun hniam lutuk nen inhnaih i duh ngai loh thu i sawi pawh kha ka la hrereng. Engkim kha ka la hre vek, avaiin! I lak atanga lakbo ka nih hma, i nupui anga i in ropui..ni e, i in, lal in ropui leh mi tha fate chauh awmna tur hmuna ka chen lai khan hmeichhe engzat fakau nge khum i tawmpui tihte pawh! Eng ang taka nasa in nge theihnghilh ka tum tih hi i hrethiam pha lo.. Ka ngaihtuah zawng ringawt pawh hian ka thinlung hi hmun tam takah a keh nawn ziah asin. Engvang in nge nang hi tawn pawh ka lo tawn che? Oh.. ka dan theih ani hleinem tiraw? Mi ropui takin sa angin min pel a, a duh ang thil chu ka chungah pawh a tita ngei reng anih hi.."

A thaw hawk a, a lu a thing nawk bawk. Ahmaa min tawngkhumna tawngkam ang chiaha vawmlet chu hriat a nuam zawk zawk lo a ni ange. Ka tum hauh loh ka sawi ta teuh bawk. Kei pawh hian ka chhungrila ka lo pai reng thin ka natna thenkhat leh theihnghilh ka duh ngawih ngawih thin thumalte hi tun hunah hian ka sawichhuak ang tih ka hre lawk bik lo.
.
Eng emaw sawi tum niawm tak hian a awm zawk a, ngawi leh rihin a sam a tuai puat a. Tuna a landan ang hian ka la hmu ngai miah lo. He mipa fing leh chak tak, hnehsawh taka min paihthlak dan tur hre ziah thintu hian sawitur a hre lo ve ta a ang khawp mai. Hlim tur ka ni! Mah se, ka hmaa mipa hmel ka hmuh hian hlimin ka nui thei lo. ka phur a rit zual sauh zawkin ka hria. Hetianga awm tur hi ka ni miah lo. Lawm taka nui chungin hnehtu ka ni tih a hmaichhanah ngei hrilhin ka hawisan anga. Ka tuar ang chiah natna ka tuartir ang' tiin ka ngaihtuah thin anih kha. Tunah hian ka lo ngaihtuah lawk angin ka awm lo. Keimahah hian eng thil diklo nge awm ta le? A hmela tlawm intihna lang chhuak ka hmuh chuan ka tawngkam kha lakkir leh ka duh tak hial chu! Ni lo, keihi ka rilru a nem lutuk anih hi.
.
"Khawngaihin i duhtawk thei em?" a tawng ring lo a, tawng chhuah a harsat hmel khawp mai bawk.
.
“Khawngaihin min chhuahsan rawh.” Ka tisep a. Ka hrawk ro hulh hulh chu eng vang nge ka hre lo. Engmah sawi tawh lovin a kal chhuak a, kawngka a inkhar rualin ka dinna hmunah chuan ka thu nghal hnawk a. Ka chhungril hi kawrawng leh ruak ta vek ang mai a ni. Ka awm dan hi a tha lo.. A tha lo tak zet!     
 TMH!!
CHAPTER – 32
TAKE MY HEART!
By. Thantei_Pautu a.k.a Laura_Sean_Virgo
.
LUCA GIOVANNI'S P.O.V*
.
A tawngkam tin kha.. Ni e, ka phu tawk chiah. Tihnat tuma khatiang tawngkam ka hman lai khan a nat dan tur ka ngaihtuah tel hauh lo. Ni lo, ka ngaihtuah lo ni lovin ka pawi sa lo zawk anih kha. Eng ang taka na in nge ka lo siam thin tih tunah hian ka hrethiam ta chiah a ni. Ahma pawh khan a natna hi ka hria niin ka lo hre tawh thin, mah se, a chanve pawh ka hriatthiampui pha hauh lo ta ve ang. A mitmenga natna ka hmuh kha keimah vang a ni tih ka chiang a, sawi tur reng reng ka hre ta lo anih ber kha. A duh anga kalsan erawh ka tum lo bur. Natna tam tak ka lo siamsak  tawhte kha keimah ngei hian ka thawi dam leh vek dawn a ni.
.
A chawlhna in atangin ka awmna a hla lova, helai hmun ka kal nachhan pawh thil dang ni lovin amah chauh hi a ni reng reng bawk a. Ka beisei anga muangchanga kan inremna erawh a thleng ta lo anih hi. Rang tak leh hun reilote chhunga ka hnena a lo let leh hi ka beisei lo hrim hrim bawk. Ka thil lo tih tawh khan khatiang khawpa thuk khan a thinlungah hmun a la luah ang tih hi ka lo ngaihtuah tel lo a ni. Ka thiam lo tih ka pawm e.
Muangchangin ka thlenna hmun ka pan a, tunah chuan ahmaa ka ruahmanna siam kha ka siamthat leh a tul dawn ta a ni. Tomas ka hmuh phawt a tul ngei ang.
.
Zan khuain ka muhil meuh lo. Naktuk hian Garcia chenna hmunah a kir leh dawn a, chumi rual chuan keipaw'n helai hmun hi ka chhuahsan ve dawn tho bawk. Ka phone la chhuakin Adelina ka bia a.
.
"Fratello, i tha em?"
"Naktuk ah kan inhmuh ngei angai."
"Eng thil nge? Thil thleng a awm em ni?"
"Kan inhmuh hunah a tul ka tih chin ka hrilh ang che." ka tih chuan a thaw hak a. Tun ang huna inbiak chu ngaih that loh awm pawh a ni ve tho mai. Ngaih tha lo hma chi a lo ni ve kher bawk a.
.
Hma takah ka kal chhuak a, Adelina awmna hmun ka thlen chuan kal chhuak thei turin a lo inpeih thlap tawh. A hmel ka hmuh chuan a zam tih ka hre mai a, eng vanga zam nge a nih erawh ka hre lo. Tomas kan hmuh dawn vang chauh a zam hmel pu chu anih loh hmel.
.
"Tomas chu i ngaina ngei ngei ang. Thil tha lo a thlen loh hram ka beisei. Fratello, khawngaihin Tomas thin ti ur zawngin awm lo hram ang che aw.." Adelina chuan eng eng emaw a sawi reng a, a thusawi chu ka hre mumal lo. Tomas ka dawr dan tur ka lo ngaihtuah daih. A unaunu ang anih chuan a luhlul ngei dawn a, awlsam takin ka thusawi a ring kher lo thei bawk.
.
"Helaiah hian ding rawh." Adelina chuan a awm dawmin thawk a la halh a.
.
"Hlauh nei ang maiin.. Eng thil nge hlauh tur awm?" ka tih chuan min melh zak a. A nui zui hak hak a.
.
"Hlau hmel ka pu em ni? Ka zam anih hi. Fratello.. Hetiang hian i la awm ve ngai miah lo tih ka hre mai."
.
"Eng thil nge?  Tomas hi itan a hlauhawm anih chuan I hnaih lo thei reng alawm."
.
"Oh! Engmah.. Tomas ka hmuh dawn chuan hetiang hian ka zam ziah alawm. A bulah ka awm anga a reh leh mai ang. Ka tana hlauhawm maw? Teuh lo. Min tina duh ni sela ahma khan min tina daih taw hang." a ti awlsam then a. Chutiang ni si engvanga zam viau nge maw anih reuh ni?
.
"Ngaihtuah buai duh suh. Tomas hi ka hmangaih alawm, chuvang chu anih ka ring, ka hmuh dawn apiang hian ka lungphu a danglam ziah.." tiin a nui har har a.
.
Kawngka ka kik a, rei vak loah hmeichhe pakhat hian arawn hawng a. Ka hmel a hmuh chuan a phawk hra mai. Kei chuan he hmeichhia hi ka vawikhat hmuhna a ni. A ni hi chuan min hria tih a langchiang reng mai.
.
“Hi, mama Calisa.”
“Hi. Ani hi Luca Giovanni a ni tiraw? Engtin nge helai hmunah I lo hruai theih..”
.
“Engkim a tha vek tawh alawm. Fratello, ani hi Calisa a nia.”
.
“Chibai le.” Tim zet hian a kut arawn phar chhuak a, Adelina khan engkim a that vek thu sawi mah se hlauthawng deuh hmel a la pu tho.
.
"Ka unaupa hian Tomas hmuh a duh a." Adelina chu enin a phun sap a, kai hrangin ka hriat phak loh tur hian a be sar sar a. Adelina'n thil tha lo titura kal ka ni lo tih a sawi chu a ring ta a ni ngei ang, min rawn en in a nui ta sak a. A nui hmel chuan a mit a la thleng chuang lo. Hetiang khawpa hlauhawm nia min ngai hi mak ka ti hran lo bawk. Ahmaa ka rilru put ang kha la pu ni ila chuan tunah hian thil thlentir tura ruahmanna ka lo siam tawh kha a thleng fel vek tawh ngei ang.
.
"Tomas chu a pindan ah a awm a ka han ko ange. Lo thu rawh u." tiin Tomas pindan lam a pan nghal a.
.
"Helai hmuna i kal hi mak a ti khawp mai. A ni kha Tomas nu a ni tih i hre miah lo in ka hria."
.
"Eng maw i sawi?" ka tih chuan Adelina chu a meng phar ak a. 'I lo hre miah lo maw?'tih melhin min melh bawk.
.
"Tomas leh Allison te hi nu hrang laka piang an nia lawm. Allison pa leh Tomas nu an inneih lai hian Allison chu kum 1 mi chauh a la nia."
.
Tomas nu maw? Allison hian a nu chungchang ka bula a sawi chhun chu 'ka nu chu a awm tawh lo' tih zawng hi a ni. Tomas hi a unaupa dik tak a lo ni lo em niang? Ka nupui chungchang hi a chanve pawh ka lo hre hauh lo anih hi. Tomas a hmangaih zia leh a himna tur anih phawt chuan a nunna hlan hial pawh a duh thu a sawi vang khan a unau pianpui dik tak ni turah ka lo ngai hmiah a ni. Unau pianghmun ngei pawh in tanpui chu sawi loh inhaw em em tam tak an awm laiin Allison chuan a pianpui dik tak ni lo, a unaupa hi a hmangaih em em si. Tomas nu hi amah hringtu a ni lo tih a hre ngeiin ka ring. A nu ngaiin a tap ru ve fo ngei ang. Chutih laiin kei hian natna bak ka thlensak hauh si lova.. Thil engkim a khawloh vek hnua inchhir hian awmzia a nei lo tiin kan sawi thin a, kei chuan he thil hi dawtah ka chantir ngei ang. Inchhir ringawta tawp lovin ka thiltih sual tawh kha a tam thei ang ber leh ka tihtheih zawng zawng tiin ka siam tha leh ngei tur a ni.
.
Tomas a lo chhuak a, ka lo en chiang khawp mai. Tun anga hnaiah hian Tomas nen hian kan la inhmu ngai lova, hnai taka hmuh chuan Allison nen inanna lai pawh an nei ve deuh.
.
"Kan inbiak a tul khawp mai." ka ti nghal tawng a. Ka ep chiah chair-ah thuin min en chik ve khawp mai bawk. Kan fimkhur dun viau bawk niin ka hria.
.
"Allison a tha em?" a tih chuan ka bu nghut a. Ka lak atanga Allison lak bo anih dan leh thil thleng tam zawk a hre lo tih ka lo ngaihtuah tel tawh miah lo a ni. Adelina hian sawitur chin tawk a lo hre ve khawp anih dawn hi. A unaunu chanchin min zawh rual chuan a mitmeng atangin a ngaihtuah hle tih a lang reng bawk.
.
"Engvanga Allison hi tuartir ve kher nge inih?" a tichang bang a. Ka rin ang ani hauh lo mai. Ka hmaah thuin a ti dek ang chu ti khan ka lo ngaihtuah lawk ngawt kha a nia. Ni e, tina theitu zawk leh thuneihna tam tak neitu zawk chu keimah hi ka ni ngei a, mah se, tunah tak hi chuan Tomas hi ka mamawh tlat a ni. Allison ka neih let leh theihna tur leh him taka a awm theihna turin Tomas tanpuina hi ka mamawh a ni.
.
"Allison hmu turin ka duh che a." ka tih chuan chik theihpatawp hian min en a.
.
"Tunah khawiah nge a awm? Hmu tur hian ka la inpeih em ka hre lo a. Keimah vanga a tuarna tamtak vang hian a hmel hmuh ka huphurh khawp mai." Adelina chu Tomas bulah thuin a kut a lo vawn sak thuai a. "Engkim a tha vek ang. Fratello hian kan pahniha kan inhnaih hi a phal alawm." a lo ti sap sap a. Tomas awm dan erawh a danglam eih lo. He Tomas hian Adelina sawi ang em khan min hlau lo tih awlsam takin ka hre mai bawk.
.
"Dik tak chuan Allison nen kan awm dun tawh lova."
.
"A chungah enge thleng? I bula a awm tawh loh chuan engtin nge a tha tih i hriat theih?"
.
"I thi ni a a hriat atang khan pangngai takin a awm thei tawh lo a ni. Chu chauh lo pawh thil thleng dang a awm a, nakinah ka la hrilh ang che. Tunah chuan Allison hmu turin ka duh che  ani. I la dam ngei tih a hriat chuan a hlim khawp ang."
.
A tawng hriat tham lohin a phun a, a hmel lan dan danglam atang chuan eng thil nge a ngaihtuah a hriat theih chuang miah loh. A mitmeng danglam kual dan chu Allison ang chiah a ni bawk. An pa hnen atanga an chhawm anih  ngei ka ring.
.
"Zanin hian Allison chenna hmunah chuan ka hruai thei ang che."
.
"A tha e."
.
Tomas chenna hmun ka chhuahsan a, Adelina erawh Tomas bulah a la awm thung. Ka hnathawh tur pawimawh zual ka tifel zung zung a, khua a thim har ka ti khawp mai. Allison nen kan inrem emaw inrem lo emaw arang lama Manhattan ka pan a tul tawh tak zet bawk. Helai hmunah hian ka hna tam tak thawk thei mah ila, Manhattan office-ah thil pawimawh tam zawk a la awm a, meeting tam tak ka pawt khawtlai tawh bawk.
.
Zan dar 7 rik dawnah ka chhuak a, Tomas chenna hmun ka thlen chuan Adelina pawh lo la awmin an lo inpeih thlap tawh a. Tomas chu a hmel en thuak pawhin a zam deuh tih a hriattheih. Allison tan buaina tam tak a siam sak tih a hria a, chu mi vanga hmuh huphurh em em a ni bawk tih ka hriatthiampui.
.
"Kan kal thei em?"
.
In atangin kan chhuak a, Garcia chenna hmun kan thlen hma chuan tumah kan tawng lo. Garcia in kawtah car ka tiding a, muangchang in car atang chuan kan chhuak a. Kawngka ka kik a, reiloteah Garcia nen kan inhmachhawn a. Min hmu thut chu mak a tih hmel deuh. Adelina leh Tomas te a hmuh chuan zawhna ngah hmel tak hian min en a.
.
"Ah.. Lo lut ru." a ti bah nak bawk a.
"Allison a awm tiraw?" ka tih chuan a bu nghat ringawt.
"A pindan ah a awm a, ka han ko ange. Lo thu r'u." a nui lui sak a, Tomas chu chik zet hian a en a. Engmah sawi tawh lovin Allison pindan lam a pan ta nghal a.
.
Allison pindan atanga Garcia a lo chhuah hnu reiloteah Allison chu kan thutna lam panin arawn kal a. Tomas a hmuh rual chuan a ding chawt a, hmuh theihin a dang nghal sawp sawp mai. Tomas chu a thutna atanga thovin Allison chu a pan a, ani chuan mit khap miah lo hian a lo en ngawt ngawt thung a.
.
"Tomas.." phun sepin Tomas chu a kuah thlawp a. Kan zavaiin kan ngawi thap a. "Lalpa.. Tomas.." hmel buai nak hian Tomas a kuahna chu a thlah a, a tak ngei a ni em tih fiah tum niawm tak hian Tomas biang tawn tawnah vuanin a en ngawih ngawih a. Tomas kut chu lakang in a en a, a hmel lan dan chu a danglam vek. A unaupa a hmangaih zia leh a thlakhlelh zia a hmela langchhuak chu thil hmuhnuam tak a ni.  "Oh..Tomas.. Ka naute.." tiin a kuah leh a. Tunah chuan a tap ta! A insut hlawp hlawp a. Amah ka hriat atangin a tap lai vawihnih ka hmuhna a ni. A vawikhatna chu Tomas a thi nia a hriat ni kha a ni a, tunah chuan hlim avangin a tap a ni ta thung.
.
A mittui hru mawlh mawlh chungin a nui a, midang reng reng chu min hmu awm pawhin a awm lo. Tomas chu kaiin thutna a panpui a, a bo leh mai ang tih hlau niawm tak hian a kawngah a kuah bawk a. Tomas pawh a dang chuang lo.
.
Sofa-a an thut hnu pawh chuan Tomas chu a la vuan ta reng a, a la hawisawn miah lo bawk.
.
"Engtin nge.. Tomas, engvanga min lo hmu vat lo nge inih? Khawiah nge i awm? Ohh.. Lo hnai teh.." tiin a kuah leh a, a taksa chet dar dar dan atang chuan a tap tih a hriat theih. "I thi niah ka lo ngai asin.. Ka ngai lutuk che.." a insut leh hlawp hlawp a.
.
"Tunah chuan engkim a tha tawh alawm. Ka kalbo tawh lovang. Ka tihpalh.. AC, ka tihpalh."
.
"Ka hria alawm.." a ti tham tiak a, Tomas chuan a hnungah a chul hauh hauh a.
.
Eng emaw chen hnuah Allison chu a rawn hawi chhuak ta. Min hmuh chuan thawk a la hak a, min biak tum awmin a awm lo thung. Tunah chuan a unaupa a hmu a, a hlim a ni tih ka hmuh hian ka duhtawk rih em em a ni.
TMH!!
CHAPTER - 33
TAKE MY HEART!
By. Thantei_Pautu a.k.a Laura_Sean_Virgo
.
ALLISON'S P.O.V*
.
Ka mumang a ni nge ni lo tih fiah tumin ka hmaa Tomas ding chu ka kuah a, ka mumang a ni miah lo! Awlsam taka rin mai pawh a harsa hial a nih hi. A makin a ropui em asin. Ka unaupa, ka neih chhun, thi tawha ka ngaih leh nasa taka ka lo sun tawh nungdama hmuh leh hi ka beisei ngam miah lo kha a nia. Tu hnenah nge lawmthu ka sawi dawn tih pawh ka hrethiam lo. Khang hun liam ta zawng zawngah khan Tomas hi khawiah nge a lo awm daih tih ka ngaihtuah naa lo lut thut  vang chuan ka hawi chhuak a.
Luca hian engkim a lo hre vek tawh a ni. Luca chauh ni lovin Adelina pawh. An unau hian thil thleng zawng zawng hi an ruahman vek pawh a ni maithei. Luca chu ka melh reng a, sawi tur ka hre miah lo. Engvanga a tha zawnga ngaihtuah thei ngai miah lo nge ka nih pawh ka inhre chuang lo. Ka dik lo pawh a ni maithei.
.
"Kan pahnih hian kan inbiak phawt a tul." Luca tawng chu hla taka ri angin ka hria a, chhan pawh ka la tum buai chuang lo. A ni hian a duh duh thlentir tumin engkim a thunun thei niin a la inngai ani maithei bawk. Tunah tak hian ngaihtuah ber tur ka hre lo a,thil thleng mek hian min thawng em a, ka ni deuh huih pawh hi a awm ve tho mai. Tomas chu ka en leh rih a.
.
"I tha em?" min ngaihtuah hmel takin Tomas chuan ka kut a vuan a, min zawhna chhan nan ka lu ka bu nghat a. Thil dang ka sawi leh hmain ka thutna bulah Luca chu arawn ding a, ka vawn turin a kut a rawn phar chhuak a. Tunah hian eng thu nge sawidun tur kan neih? Tunah chauh lo pawh Luca nen hian sawi dun tur kan neih ka hre chuang lo.
.
"Lo kal rawh le." Luca chuan a tidam leh thlup a. Tunhnaia ka laka a nungchang hi mak tih ka ngah mai. Sawi vek sen pawh a ni lovang. Ka hnial kalh reng chung hian dawhthei takin min ngaichang reng a, chutih rualin a duhdan erawh kal tlang pui ziah tho. Mipa mak tak a la ni reng.
.
"Sawidun tur kan neih ka hre lo." tiin ka kut ka hum ruh a, zui tumna rilru pawh ka nei eih lo.
.
"Khawngaihin" a ti nghut a. A tawng zawi viau a, a aw a dam thlup nain a hmel ka en chuan hnial luih chi niin a lang lo. A mitmeng ah chuan thil tam tak ka hriatthiam loh a lang tlat a ni.
.
"AC, kan lo nghak ang che." Tomas chu ka en a, a ni hian Luca nen kan innei tih a hre ngei a, kan inthen tawh a, kan inkarah hian thil tamtak a thleng tawh tih a hre miah lo ang tih ka hrethiam mai.
Ka thutna atanga thovin ka ding a, Luca kut chu ka vuan duh lo. Ka awmdan hrethiam in Luca chuan a kut a lalet vat a. Min hnaih taka dingin ka kawnga min kuah chuan ka lo tang mar nghal at a. "Hahdam rawh." ka beng bulah a rawn phun sup a, ka maimitchhing sak a. Eng ang pawhin min hip mahse ahnenah hian let leh ka tum chuang lo a, ka ring leh thei tawh hek lovang. Thil thleng atam tawh lutuk. Ka ngaihtuahna letling chiahin ka taksa chuan ka thlahlel em em lawi si. Chutiang zawng chuan ngaihtuah lo zawk ang!
.
"Eng thil nge sawidun tur kan neih?"
Ka pindan a kan luh rual deuhthawin Luca chu ka hmachhawn a. A kekawr ipte zenin cool ruih hian min en a, min chhang mai lo. Eng thil nge maw tih a tum ni?
.
"Tomas hian kan awmdun lo tih a la hrelo a."
"Eng ruahmanna nge I neih leh? Kan awm dun emaw awm dun lo emaw Tomas tan awmzia a awm lo. Ka nun a nia lawm.."
"Awmzia a nei ngei ang. Ruahmanna chungchang ah chuan I ngaih dan a diklo." Muangchangin min pan hnaia ka lo en tawp. A mitmeng dul deuh ruih atang chuan a chau hle ang tih a hriattheih bawk. A ni chauh leh chauh loh hi ka lo buaina tur pawh a ni lem lo e' tia ngaihtuah luih ka duh a mahse, ka thei lo. Luca Giovanni hian ka duh reng vang pawh ni lovin ka thinlung hi a luah thuk mah mah a ni e. "I mitmeng a min ngaihsakna lang kha ka hre thei.." a tawng zawi lutuk mah mah.. Ka  bengbula tawng chu ni lo se ka hre pha miah lovang. Min kuah chuan ka ding tawp a, ka maimitchhing bawk. Engvanga chak tawk lo em em mai nge maw ka nih le. Luca tan hian hneh ka va awlsam thin em! Kan awm dan chu duh lovin min kuahna atang chuan ka tal chhuak a, min thlah ve mai bawk a. Min kuah reng anih chuan ka rilru nemin ka duh hauh loh danin ka awm dawn tih ka hrechiang em a, ka thil duh hauh loh chu ka thlentir tur a ni lovang.
.
"Engtianga rei nge i thinlung duhdan hi i do reng dawn?"
"Enge i sawi awmzia?" ka tilui a. A thusawi awmzia chu kei aia hrechiang an awm lo. Muangchanga ka lam rawn hawiin a hmel atang chuan a ngaihtuah awm ka hre thei lo.
.
"Ka thiltih sual siam tha tura chance min pek hi thih i hreh tluk zetin i hreh a ni ngei ang. Dem tur che pawh ka ni chuang lo a. I duh ang chuan i nung thei alawm. I duh anih phawt chuan vawikhatmah i hnaihah ka awm tawh lovang. Min hneh ta e!" Che hrutin chiang lehzual hian min en a, hetiang zawnga a tawng hi ka beisei miah lo. A bulah ka let tawh lovang tiin vawitam ka ngaihtuah a, chutih rualin min duhna tilanga ka bula a awm hian nuam ka ti ru em em si. Han hnial luih vel pawh a nuam ka ti tel tho.. Min nawrlui thinte pawh hi haw tur ka nih laiin nuam ka ti tho bawk a. A thiltih engkim hi.. Ni em em love.. Engkim chu a ni bik lo! A chet phung tam zawk leh a awm dan.. Ka thinlung hi engvanga nei tlat nge maw anih le..?? Hrem ka duh a, na taka siam pawh ka duh. Amah vang hian vawi engzat nge thinlung khauh tak neiha, hnial fithlak thak thak theih ka chak thin ka hre seng tawh lo. Mahse, tunah hian a bula awm turin min nawrlui se ka duh a ni mai thei!! Rapthlak hian!! Ngaihtuah loh tur tur  a ni.
.
"Chu chu i duhdan a ni em?" atih leh chuan ka en ringawt. Chhan dan tur ka hre mai lo. "A ni ngei ang. I duh ang chuan ni rawh se. I bulhnaiah ka awm tawh lo ang. Min ngaihdan thalo tak leh a chhe thei ang bera min ngaihna pawh hi a zia mahna."
.
"A tha e." ka ti sep a. Ka aw chu a ri chhuak chang chang a ni. Luca ka pindan atanga a chhuak chu ka en tawp. Kei hian a nih loh dan tawpin ka lo ngai lui tang tang em ni? Ka hre hauh lo mai.. A sawi hi a dik tho.. Ka ngaihdan chhiat zia a bulah hian ka zep buai ngai hauh tak hleinem. Min nawrlui lo a, vawitam min nawrluih a tum loh thu pawh min hrilh tawh thin ngei kha. Pindan kawngka a inkhar ri khap a, ka mit ka chhing sawk mai. Ka awm chhung atang hian eng emaw a chhuak ang maiin ka hria a,  chu thil chuan  ruak ta huaiin min inhriattir tlat nia.!
Ka pindan atanga ka chhuah ve chuan Luca leh Adelina te an lo awm tawh lova, min hmuh rualin min ngaihven tak hian Tomas chuan min lo pan vat a.
.
"AC?"
"I hmel ka hmu leh a, i dam tha tih ka hmu bawk a, ka tha tawh e. Hetah riak ve nghal la, thil sawidun tur tam tak kan neih ka ring." tiin a kutah ka vuan a, thutna lamah ka hruai a. Sawi dun tur kan ngah tawh lutuk. Engkim hriat ka duh a, kan inhmuh loh kara thil thleng te pawh hriat vek ka duh..
.
"Adelina hnenah khan amah hmu turin ka kal ang tih ka hrilh tawh a. Hun remchang dangah kan titi zawk dawn nia." Tomas tan hian kei aia mi pawimawh an awm tawh tih ka lo theihnghilh a ni. Inthiam chiah lo hmel a pu tih ka hmuh chuan ka nui sak a.
.
"Um.. In serious dun awm hle mai.."
.
"A dik alawm. A tello chuan engmah ka ni lovang. A ni hian ka chungchang chu engkim a hre vek a ni."
.
"Engkim maw?" ka ti deuh that a. Oh! Unaunu khirh tak ang maiin ka awm alawm le! Tunah chuan Tomas hi puitling a ni tawh. Kei ai pawhin a puitling tawh zawk hial ang chu.
.
"Ni e, engkim! Kan inringtawn alawm. I thil hriat thenkhat hmangin i lo judge a ni mai thei a. Adelina hi hmeichhe tha famkim a ni bik lo a, famkim tur pawhin ka beisei lo. A famkim bik lohna vang tak hian ka hmangaih zual a ni. A tir atangin kei hian pangngai lo takin bul ka tana, chuti chung chuan a ni pawh hian min hmangaih ta tho a.. Mipa vannei ber ka nia sin.."
.
"Ohh.. Hla phuah thiam ang mai i ni ta a nimaw.." tiin ka nui hak hak a. Adelina hming a sawi zawng ringawt pawh chuan a mitmeng chu a de sawr sawr maiin ka hria. Ka naute hi hmangaihna vangin a lo danglam ta vek anih hi.
.
"Kan inkar thil hi hriat loh tam tak i nei ngei ang." a tih chuan a hmel a thutak ta ran a.
.
"Hriat ka nei tlem khawp mai. Thi turin Adelina hian a kalsan che a ni lawm ni? Tomas, engti zawng mahin i nat hi ka duh hauh lo a nia. Chu chu i hria tiraw?"
.
"A letling chiahin thil i hria anih chu. Adelina hi awm lo se tunah hian nung damin ka awm tawh lovang. Keipawh hian thil tam tak ka ngai sual ve tho mai. Luca hi ka ngaih anga misual a lo ni miah lo a. Min tihnat a duh vanga nangmah nei angah ka ngai nghet hmiah thin a, Adelina sawi anga mi tha tak anih ka ring duh ngai lo. Mahse, ka tisual tih zanin hian ka hria a ni. Nangmah hmangaihtu em em tu pasal i nei hi lawm em em tur ka lo ni reng zawk a."
.
"Luca chungchang chu tunah sawi ka duh rih lo."
.
"Engvangin? AC, keimah vangin hreawm tam tak i tuar tih ka hria a, chuvang chauh pawh chuan tunah hian hlim i phu ve tawh a ni. In chen dun lohna a rei tawh tih Adelina khan min hrilh a. A chhan erawh a sawi duh lo a.."
.
"Ka duhthlanna alawm. Luca nen kan inkar chu a tawp tawh." ka ti hmak a. Ka sawi zawnga ka thinrim ringawt chu a chhan ka hre bik lo.
.
"Hmangaihna ah chuan i luhlulna hian harsatna bak a siamsak lovang che." tiin min rawn kuah a. A nui bawk tih ka hria. 
.
"Tomas..!"
"Ka sawi chu a dik chiah.." min kuahna phelhin ka melh dan vang chuan a kut pahnih a phar chhuak a.
.
"Okay..Okay.. Engmah ka sawi lovang. Mahse, uluk zawkin inngaihtuah ang che." tih pahin a thutna tang chuan a tho a. "Adelina'n min lo nghak rei lutuk palh ang. Hun nuam tak hmang tur ka ni bawk a, ka kalsan phawt mai ang che.." la nui hawk hawk chungin min chhuahsan a. Kawngkhar a ding chungin a tlanliam thlengin ka thlir vawng vawng a, a chhan ka hriat lem lohin ka nui sak bawk. Kha Tomas kha ka unaupa anih kha.. Ka hmangaih em em ka unaupa neih chhun. Hlim taka a awm hi ka duhthusam a ni reng fo ang.
.
Hun a liam bek bek a, Luca chu a insawi ang chiahin ka hmu ngai ta miah lo. Ka ngaihtuah tih ka inhriat miah loh lai pawhin ka lo ngaihtuah fo a, ka inhriatchhuah rualin thil dang ka ngaihtuah lehnghal vat thin. A chang chuan ka awm dan hi atthlak ka ti thin khawp mai. Mahse, eng ang pawhin awm ila Luca hi pan ka tum chhin ngai miah lo thung. Ka chapona leh 'kei ka ni' ka intih vena vang pawh hian ka ti ngai hauh dawn lo tih ka hrechiang a ni. He ka ngaihtuah dan hian hmun nuam leh hlimna min thlen ta lo anih pawhin ka pawi sa chuang lo. Luca laka ka zahawmna ka la humhim tal ang chu. A tello hian ka nung thei takzet tih a lang chiang bawk anga.
.
Ka lehkhabu pahnihna tichhuak turin ka inbuatsaih sauh sauh a, hunawl ka nei ngai ta meuh lo. Ka  thawnthu ziah turah min pui theih beiseiin hmun hrang hrang ah ka kal kual nasa khawp mai. Mihring hmahmawh taka in kalpel sung sung thin leh thingkung te, mi tam zawkin an enliam mai thil tam tak hian ka ngaihtuahna thui takin a hruai fo a, engkim hi kan nun, hringnun phochhuak tu a ni thei vek tih ka hrechhuak nawn leh thin.
 Garcia in atangin ka insawn chhuak a, ngaihdan ni lo tak chungin ka duhthlanna min zahsak vang chauhin ka insawn chhuak thei hram a ni. Kartawp chawlh erawh hmun danga hmang ngam lo tur khawpin anmahni tlawh turin min phut na thung a, heihi chu kei pawhin ka hnial ngam bik lo. Elario hian min ngai em a, min ngai ngawih ngawihtu bula awm chu ka lo thlahlel ve tumhrang bawk.
.
Tunah hian Paula Dean, ka lehkhabu tihchhuah hmasak zawk pawha nasa taka min puitu hmu turin  restaurant ah ka thu mek a, kan hun tiam minute 10 zetin a pel tawh.
.
*UNKNOWN*
.
Thla khat liamta chhung khan vawikhatmah an inhmu lo! Vawiin pawh hian a kalna tur hmunah ka mi chhawr pakhat chuan a zui leh a, Paula Dean kal tur dangin a aiah Allison chu a va hmu dawn a ni. Engkim a fel thei dawn ta e. Ka chak ngawih ngawih tihtheihna hun a inhawng ve ta hram alawm! Ka nghak rei ngat ngat asin.
.
Luca tan hian Allison hi hmanrua mai a ni thin kha a nia, hun eng emaw chen atang khan chu thil chu a danglam vek tawh. Ka mit hmuhlai ngeia Luca che buai ka hmuh khan a sumdawnna zawng zawng ka kephah hnuaia ka dah theih dan tur hi ngaihtuah buai ngai lovin ka thluakah hian a inrem fel thlap tawh a ni. Allison hi hmanraw tha mi ni turin khawvelah hian a lo piang chhuak ve niin a ngaih theih hial ang chu.. Ri hlu tha mi! Maktaduai tam tak hu hmeichhia.. Awlsam takin Luca Giovanni, engtik lai maha ka tluk theih ngai loh hi chirhdup hmunah ka hnuklut thei dawn ta e. A chhuak tawh hauh lo bawk ang. Khawvel ah hian tihthiang lo tak tak a awm hleinem mawle!
.
Darkar khat zet aral leh hnu chuan ka mi chhawr hnen atangin chanchin kimchang ka hre tawh a, Allison hi nihnih hnuah ka kutah a awm tawh ang. Ka intur dahna no chu chawikangin ka in khawlh a, tuna min hmuaktu chu nawmna hlir a ni ta e. Keihi tumahin min ringhlel dawn hauh lo tih hi chu sawi kher ngai lova chiang sa a ni. Tomas Adams leh Adelina Giovanni te tawm bona hmun ka va luh chhuah pawh tun thleng hian tumahin an hrechhuak reng reng hleinem! Za zet hian ka nui hawk hawk a.
.
"Reilote.. Reilote chiah.." tia phun bul bulin ka bula chair awn lian zetah chuan ka thu hnawk a, a nuamsa thei ang bera mu zalin ka mitthla a thil lo lang vang chuan ka nuih a za zual sauh bawk.. Ka hlim hle mai. Hlim tur hian ka bulah mi tamtak an awm a lo tul kher lo a nih hi a!
.
ALLISON'S P.O.V*
.
Paula Dean aiawhtu lo kal nen kan indawr zawh hnuah restaurant atanga chhhuakin ka chenna hmun ka pan a, nihnih hnuah kan inhmu leh dawn chauh a ni. Ka beisei aia tluang leh thain kan indawr a, mi tha ka tawng leh hlauh thin hi mi vannei tak ka niin ka inhria.
.
In ka thlen hnu chuan ka thawmhnaw thlakin coffee ka siam a, ka thuziahna pindanah ka inkalh khum nghal hmak a. Vawiin atan chuan tumah hmuh tur ka nei tawh lova, hahdam tak leh rilru zalen takin ka lehkhabu tur ka ziak chhunzawm dawn a ni.
.
Ka thuziak tawp lam chu ka chhiar nawn thuak thuak hnuah ka rilru a lo lang hmasa apiang chu ka type zawm mawlh mawlh a, ka thil chhinchhiahna bu te chu ka en zauh zauh bawk. Ka hriat loh karin ni a ral a, a tuk leh pawh khawiahmah chhuak lovin in ah ka inkhung nileng leh ta ngawt a. Nuamti tak leh zalen taka suangtuahna han ziah chhuah tawh hi chuan hun hian awmzia a nei meuh lo a ni e.
.
Thawm danglam deuh ka hriat vangin ka hawi chhuak zawk a, ka thil type lai tawpin khawilai atanga thawm chu lo chhuak nge tih hriat tumin ka ngaichang vang vang a. Banga sana ka en chuan zing lam dar 5:22 chiah a ni. Ngaihthat lohna pawh nei lovin ka type zawm leh a. Rei  pawh ka type hman lo. Pawnlam thawm vang bawkin ka tawp leh a. Tun tum chu thawm danglam a ni tawh lo thung. Kawngka kik thawm a ni. A la hma hle a, tunang huna min hmuh tumtu chu min hrechiangtu a ni ngeiin ka ring.
.
Ka thu type zawh chiah ka saved hnuah pindan atangin ka chhuak a, kawngkapui panin ka hawng nghal a.
.
"L_Luca??"
Min chhang lovin arawn pen lut a, kawngka chu kharin a kalh nghal hmiah.
.
"Engtin nge hetah hian ka cheng tih i hriat?" mak ka ti em a ni. Thla liamta chhung zawng khan vawikhatte mah ka hmu lo a, Tomas hnenah ka awmna hmun a zawt em tih ka zawh khan ka chungchang engmah an sawi ngai loh thu min hrilh mai bakah Adelina paw'n ka chanchin hriattumin a zawt miah lo tih min hrilh a nih kha. Tunah Luca hian engtin nge ka in hi arawn thlen theih?
.
"Thil harsa a ni hleinem." a ti duh chauh. Min ngaichang anga lang miah lovin a hawi kual hnuah ka mutna pindan a pan a, angaihna hre lo takin ka zui ve ringawt a.
.
"Eng thil nge tih i tum?"
.
Min chhang chuang lovin ka thawmhnaw bawm a hawng a, ka thawmhnaw thenkhat phawrhin bag ah a khung hmiah hmiah a, ka ngaih dan a pel lutuk mah mah tawh..
.
"Duhtawk teh.. Eng thil nge tia i inhriat a?"
.
"Lo ngawi mai mai rawh! Hetiang hi engvanga lak tum buai nge maw ka nih le.." ka thawmhnaw a phawrh ho chu en in min rawn en leh a, min rawn hnaih thutin ka banrekah nghet zet hian min vuan a. Eng emaw sawi chu a nei, eng thu nge a sawi ka hre hman lo.
Chak zeta kalin pawnah min kai chhuak dawr dawr a.
.
"Eng thil nge i hriat? Luca, duhtawh rawh.."
.
Car kawngkhar na zeta hawngin min luhtir a, a hmanhmawh hmel viau bawk anih hi. Eng buaina nge maw a neih hi le?
.
"I hre thuai ang." tih pahin motor a tinung a, chak zet hian kan tlanchhuak  nghal a.
.
Ka en tih a hriat hlau ru tak chungin ka melh a, a awm dan hi ka hrethiam lo. A kamiz hak ban chu a kiu thlengin a thlep a, mut a kham lo tih a mithnuai val deuh raih atang chuan a hriat bawk.
.
"Hahdam rawh, ka tina lovang che." a ti nghut a, a chhan pawh ka hriatthiam lohvin inthiamlohna ka nei tlat nia.
.
"Min tina dawn lo tih ka hria alawm." ka tih chuan a nui hak a. Ka thusawi chu a awih lo tih a chiang reng mai.
.
Kan ngawi ta vang vang mai. Tunah hian inhnial buai ka peih lo.
Ka dara min sawih det det vang chuan mutchhuak zetin ka meng a.
"Kan thleng e. I duh chuan i muhil leh vat thei ang. Lo chhuak phawt la." Luca chuan ka kut vuanin car atang chuan min kai chhuak a, min duat hmel taka min biakna leh a mitmeng dam ruih vang chuan ka hamhaih lek lek zawk. Ka hawichhuah chuan kan awmna hmun ka hre ta chiah bawk.
.
"Hetah hian.."
.
"Manhattan ah ka hruai dawn che. Min hnial thei lovang."
.
"Luca, engvang__"
.
"Kal phawt ang. Min nghak rei tawh a nia." tih pahin hnial hman hauh loh hian private plane awmna lamah chuan min kalpui hlawk hlawk a. Plane chhungah kan luta kan thut fel hnu chuan tihtur pawimawh a neih thu sawiin min kalsan a. Helai hmuna min hruai chhan hi ka bangbo tak zet. Ngaihtuah  ber tur pawh hre chuang lovin rilru buai ru tak chung hian ka melh ngai ka melh tlawk tlawk a.
.
"Mrs. Giovanni, i duh chuan i mu hahchawl thei a nia. Mr. Giovanni chu darkar khat hnuah a lo chhuak thei chauh ang. Hnathawh tur a nei a." ka thutna bula hmeichhe nalh zet ding chu enin ka nui sak a.
"A pawi lo. Margaret, kan inhmu khat hle mai." a hming ka la hria chu mak tih hmel tak hian a ang pham a, a nui zui ta hak hak a.
.
"Mrs. Giovanni, i la danglam miah lo. I nalh telh telh zawk anih hi. Mr. Giovanni buai reng pawh hi a awm ka tihpui. Oh! Ka sawi loh tur ka sawi leh ta.. Hmeichhe vannei tak inih hi.." nui sangin inthiamloh hmel tak hian a sen ap ap a. A thusawi ah khan inthiam lohna tur thil a awm pawh ka lo hre ve lo.
.
"Ka lawm e. Nangpawh i nalh telh telh mai." ka tih chuan lawm hmel tak hian a sam a huih zauh a.
"Matteo ka hrilh ngei ang."
.
"Matteo maw?"
.
"Um, thla hmasa khan kan innei alawm.."
.
"Wow.. Ka lawmpui che. Matteo chu mi tha tak a ni tih ka hria. I vannei hle mai.."
.
Margaret kalsawn hnu chuan Luca awmna pindan nia ka rim lam chu ka pan a, Manhattan-a min hruai a duh nachhan hi ka hriat angai a ni. Bungrua ang maia a duhna hmun apianga a laksawn tur ka ni lo. Ka ngaihtuah dan hi a dik chiah lo. Oh! Eng ber nge ka ngaihtuah anga, engtin nge ka ngaihtuah chuan ang. Ka buai zo vek anih hi. Engmah hi a mumal lo..
.
Pindan kawngka ka hawng a, Luca thu ka hmuh chuan ka ding leh rih a. Margaret khan hnathawk angin a sawi ve bawk a, engmah ti hmelin a lang lo. Min hmu peih lo leh min pumpelh nan chhuanlam siamin pindan ah hian a inkhung a ni ngei ang. A bawp dinglam chu a mak veilamah hlangkangin a kiu chu a thutna chair banah a nghat a, a khabe a tuai nauh nauh a. Ka thawm pawh hre awmin a awm lo. A ngaihtuahna a kal ding hmel khawp mai.
.
"Hey.." ka ti sep a, ka thawm a hriat chuan arawn hawichhuak ta chauh. A thutna atanga thovin min rawn pan nghal thuai a.
.
"Mamawh i nei em?"
.
"Ka neih ka ring. Manhattan ah hian engvanga min hruai let nge i nih?" ka hriat duh tak ka zawt nghal hmiah a nih loh chuan inhnialna awm ze nei lo tur kan tan leh ngei ang.
.
"Venhim che ka duh vang a ni. Ka tibuai hauh lovang che. Him taka i awm chuan ka duhtawk em em ang."
.
"Min venhim maw? Engvang in? Luca.."
.
"Thil thleng tur a awm alawm. Hre ve rih lo la a tha zawk mai thei."
.
"Eng thil nge? Chu chu eng thil nge?"
.
"Tunah ni lo." a ti sup a. A hmel landan chuan ka ngaihtuahna a lapeng lo thei lo.
.
"I landan chu i chauh hmel hle mai.."
.
"Ka tha alawm."
.
"Ni lo, i tha lo."
.
Keimahah hian eng thil nge thawk ka hrethiam lo. Luca chu din hnaihin a biang veilam ah ka vuan a. Ka tawh rual chuan a maimitchhing a, thawk a la hak a.
.
"Ka ngai che! Allison.. I tello chuan engmah lo mai ka ni."
A aw ril ruih chuan a thusawi chu a ti takzet tih a tilang. Keipawh hian ka ngai em em reng a ni. Oh! Eng thil nge ka ngaihtuah tak hi.. Ni e, ka do tawh lovang.
.
"Engtin nge ka rin theih ang che."
.
"I zawhna ngai bawk min zawt a nia. Min vuan tawp la eng thil nge itan ka tih dawn lo thlir tawp rawh. Hun min pek loh chuan rintlak ka ni tih leh ka hmangaih che tih hi ka tilang thei dawn hauh hleinem."
A biang ka vawnna ka kut chu ka lasawn a, tlemin ka tawlh hla deuh a. Kalsawn tum vanga tawlh erawh ka ni lo. A hmel hi chiang taka hmuh theih ka duh a ni. Rang zet hian ka kutah chuan min rawn vuan a, min kuah bet nghal thlawp a.
.
"Ka mumang a ni lo hi ka lawm hle a ni." tiin ka beng bulah a phun sup sup a. Thawklehkhata ka rilru inthlak thut leh Luca ka thlakhlelhna ka thup ta miah lo hi mak ka va ti em!!
.
Min kuahna chu thlah dul deuhin ka mitah min en a, a hmel landan chu nichin maia a landan nen khan a inang tawh miah lo. Beiseina nei hmel a pu tlat a ni. Kei hian awlsam takin Luca Giovanni ngaihtuahna hi ka hre thei anih chu.. A mak lutuk..
.
"Chance min pe thei angem? Khawngaihin.. Cherry.. Chance min pe rawh?"
.
Ka lu ka bu nghat a, ka lamah rawn kun hniamin duhthawh zet hian ka hmuiah min fawp vawng vawng a.
.
"Ka lawm e. I ngaihdan ni lo thil a thleng hauh lovang." awmze nei zet hian a nui suk a. Ka ngaihtuahnaa thil tha lo awm thei zawng zawng hnawl kiang vekin ka kuah let ve ta.
.
"Ka mamawh che a ni. Allison. Taksa inhiptawnna ringawt a ni lo, ka bula i awm loh chuan ka ngaihtuahna ka hmang thei lova, i tello chuan engmah lo mai ka ni. Min hmuh fuh lohna tura inthup reng pawh ka ning tawh reng reng a.."
.
"Hmuh fuh loh turin i biru maw?"
.
"A dik alawm!"
.
"Khawiah? Engtik ah? Engtin nge?"
.
"Tunah chuan ka fawp phawt ang che." tiin ka biang tawn tawnah duat takin min vuan a.
.
Ka tum lawk hauh lohvin thawklehkhatah kan inkar siamthat duhna rilru ka nei ta thut hi ka hrethiam lo. Ka inchhir hauh lovang tih erawh ka beisei. Thinlungin a thlakhlelh em em  do tang tang hian khawharna leh mal ngawih ngawihna bak min thlen chuang lo. Ka hmangaih ber mipa hian ka lakah thil tam tak lo titawh mah se ka hmangaih ber a la ni reng a, chu chu a pawimawh lai ber chu a ni. Ngaidam thei tura ka huaisen ve tawk pawh a tul ang chu. Hun liam tawha ka natna ka hriatreng hian nat zualna a siam a, chu thil chuan rilru hrisel lo leh mahni hreawm taka insiamna a thlen thin tih hi chiang taka hretu ka ni. A rei tawh.. Ka pawm duh ngai hauh lo anih kha..
.
"Harh tawh rawh le.." ka nghawngah min fawp dan dan a, ka thu chhuak nghal hlawl mai. Khawiah nge ka awm ka hrechhuak thuai a.
.
"Minute 15 hnuah kan tum ang. I harh chiang em?" ka kawngah min rawn kuahin a bulah chuan min kuai tlu leh a. Ka lo muhil daih thei kha a mak zawk. Thil tam tak kan sawi dun a, Tomas chungchang ka la hriat hauh lohte pawh Luca hian min hrilh vek a ni. Adelina nen hian an la inneih ngei pawh ka ring. A sawi tam ber chu ka laka a thil lo tihtawh vanga a inthiam lohna nasat zia leh min hnaih ngam tawh lo tur ani tih a inhriat thute.. A sawi duh loh thil tam takah nasa takin keimah vang hian a tuar ang tih ka ring. Tlawm taka a awm vang leh a tihsual a hrechianga inthiam lohna tak tak rilru a neih vang hian ka lainat zawk.. Induh tawn leh inthlahlel takin kan infawp ngawih ngawih a.
.
Darkar khat leh a chanve zet aral leh hnu chuan Manhattan-a Luca nen kan in ni thin ah khan kan awm a. Engmah a la danglam chu mak ka ti lutuk tak zet. A hunlai khan engkim hi ka duhdan in ka chei vek a, engmah a la danglam miah lo tak tak..! Sawi mai tur hre lovin ka ang pham hian ka en kual a..
.
"Engmah a la danglam lo." ka tih chuan Luca chuan ka hnunglam atangin min rawn kuah vat a.
.
"Danglam turin ka phal lo alawm." a ti sup a.
.
"Ka beisei miah lo asin. Hmeichhe dang nen ka hmuh hnu che u khan i nun atang hian ka kalbo hlen atul tih ka ring hmiah a. Hetiang thil hi.. Ka kut hnu reng reng chu i paih bo vek ka ring bawk a.."
.
"Chutiang thil chu a thleng ngai dawn lo. Ka thawk tawp thlengin nang leh i sulhnu zawng zawng hi ka ngai pawimawh ber fovang.."
.
"Oh! Luca.. Ka tihpalh.." Inherin a awmah ka hmai ka phum ta kak a.
.
"Tih palh tih sawitur chu kei hi ka ni ngei ang." ka hnungah chulin min sawih hliau hliau a.
.
Kan inkuahna kan phelh hnu chuan kan nupa pindan ni thinah chhovin ka inbual a, ka thawmhnaw engmah ka keng lo tih ka ngaihtuah chhuak chiah. Luca thawmhnaw thenkhat hak hawh lawk theih a awm tho ang chu maw.
.
Ka inbual zawh chuan towel a intuam in bathroom ka chhuahsan a, thawmhnaw dahna bawm ka hawn chuan ka thaw hak a. Ka thawmhnaw, ka kalsan ang anga la awm leh uluk taka enkawl zui tih hriattak chu ka khawih de de a. Kei hian ka beisei hauh loh thil engzat fakau nge ka la hmuh zel dawn le?
.
UNKNOWN*
.
"Zawngsen!! Engtin nge i thlentir theih? Sum engzat nge ka pek tawh che?"
.
"Ka tihsual a awm lo. Beisei lawk loh danin thil a thleng anih hi. I tawngkam fimkhur rawh."
.
"Tu phiangsen nge inih? Ka tawngkam hman sawisel tur hian tu phiangsen nge i nih?"
.
"Duhtawk rawh. Engmah tithei lovin kan awm pawh a ni hleinem. A lo a luakchhuaka i awm chiam le.." ka chhan leh hmain phone a off hmak a. Ka thinrim zia hi hria se khatianga zah lo leh pawi sa lo tak khan min be hauh lovang. Thinrim zet hian ka phone chu ka melh nghek a. Ka biak leh mai lohin tih mai theih ka nei chuang der lo. Hun hei leh chen hi kan in chhawr tawh a, tun ang hian kan ruahmanna a la tlawlh ngai lo.
.
Vawi thum zet a ring quit hnuah a phone chu arawn pick up leh ta hram a.
.
"Han sawichiang leh teh?" ka ti nghal tawng mai.
.
"Zing karah, khawvar hmain in a chhuahsan  a ni. Kan ruahmanna hi a lo hre lawk pek a niang. Thil mak tak a ni. Tunah mai khan Manhattan atangin report ka dawng a, Luca Giovanni chenna hmunah a awm tawh."
.
"Hah.. A tha deuh deuh a nih chu. Tun tumah chuan tu mihring mahin an chhanchhuak tawh lovang. Nge, Luca Giovanni zawk hi kan dahtha dawn? A tu zawk zawk pawh dahtha ila ka thil duh chu ka nei dawn tho tho a.. Hmm.. Luca Giovanni hi dahtha ila a dik zawk ang. Nawmna ka hlep dawn a ni mai.."
.
"I ngaihtuahna tenawm tak kha tun atan chuan ngaihtuahna mai a la ni. Kan chet chhuah phawt a ngai. I thutiam kha hrereng bawk ang che. Ka dah a nia."
.
Ka phone chu ka en vung vung a. Tunah hian ka tinghal mai ang chu..
.
Ka number duh tak hmet chhuakin ka call a, eng thil nge a tih phiangsen ni? A phone a pick up thei reng reng lo mai.
.
Vawi 10 dawn ka call hnu chuan a pick up ta hram.
.
"Eng thil nge?" arawn tihriam hrak a. A thuneihna hi a tluchhe tep tawh tih hrilh nghal mai ka chak ut ut. Tunah chuan ni rih lo ve.. Tunge ka nih pawh a hre rih hauh hleinem mawle!
.
"Tlai dar thumah hmuh che ka duh. A hmun chu message in ka lo hrilh ang che. I bodyguard te i rawn hruai tur a ni lovang."
.
"Tunge ka biak?" a ti leh hmuk a.
.
"I la hre mai ang. Message chu lo ngaichang rawh." tiin phone ka off zui nghal hmak.
.
.
ALLISON’S POV*
.
"Enge i en reng a?" ka hnunglam atangin Luca chuan min rawn kuah a, ka bengah a fawp pah zauh a. Pindana a lo luhlai ka hre miah lo.
.
"Ka thawmhnaw hi.."
"Hmm.."
"Luca..?"
"Hmm.. Tunah thawmhnaw i mamawh ka ring lo." a lam hawiin min kuai hera duhthawh zet hian min fawp a. Thawmhnaw a inbel mumal lo tih ka hriat chuan ka thaw hak.. "Ka nupui duh tak nen hian hmangaihna chen dun ka duh.."
.
"I duh ang chuan ni rawh se!"
.
A ban tha chak tak chuan zo zet hian min pawm kang nawlhin khum ah chuan dimte hian min nghat riai riai a. A mitmenga hmangaihna nasa tak lang chhuak chuan phurna nasa tak min pe bawk. Sawi hleihtheih loha nawmna nasa takin min tuam hlup hlup hnu chuan chau zetin kan mu dun ta thlar a.
.
.
"Cherry, ka chhuak lawk dawn a nia. Ka lo kir leh thuai ang." ka biangah min fawp kual dan dan a, ka harhchiang mai thei lo. Kawngka inkhar ri ka hriat hnu chuan nui sak chungin ka inlet thawk a ka muhil lehnghal mai bawk.
.
"Tinge i kal tir a? Dang ta che? Tho rawh! Harh teh.." ka thuchhuak hlawl a, ka bulah tu emaw hmuh ka tum a nia, tumah an awm lo. Min be tu kha tunge maw ni le??
.
Ka phone ri tat tat chu la in ka message dawn chu ka en a.
.
*Tlai dar thumah hmuh che ka duh. I pasal hnenah engmah sawi suh." tih zawng hi. Tunge maw ni le?
.
Sana ka en a, chawhnu dar 2:38 a ri chiah. Khum thawhsanin ka inbual zung zung a, thawmhnaw hain ka bag ka la a, in chu ka chhuahsan nghal a.
.
Ka phone lo ri leh chu pick up in mipa hian ka kalna tur hmun min hrilh a, kal tura min hrilhna hmun chu hmun ual au tak anih vangin hlauhawm a awm ka ring lo.
.
Ralkhat atangin piah deuha mipa thu chu ka en a, ka lam lo hawiin min huih zauh a. Ka penchhuak leh chiah tihah ka thil hmuh vang chuan ka ding leh chawt! Luca a ni! Helai hmunah hian eng thil nge a tih ve? Ruahman lawk anga koh chhuah ka ni em?
.
Thawklehkhat ah ka nghing lawih a, ka te chhuak tuarh a. Luca tlu riai riai ka hmuh chuan sawihleihtheih loh khawpa hlauthawng chungin Luca awmna lamah chuan ka tlan nghal dawr dawr a. Ka tlai tho anih hmel. Kawngpui lei chara Luca thisen nen inchiahpiah nuai a tlu chu ka kuah a, a mit pawh a meng lo. Ka ko mawlh mawlh a, a chechang lo reng reng.. A ni thei lo! Min thihsan thei lo a. Kan nun bul kan tan leh dawn chiah a, min kalsan thei lo. Chiai lutukin Luca chu ka kuah nghet sauh sauh a. Ka tap thei miah lo. 'Ni lo. Ni lo.. A ni thei lo!' tiin ka phun mawlh mawlh a.
.
"Ka pi, damdawiin ah kan hruai angai a nia. Kan chhan hman lo hlauh ange." ka bulah chuan mi an phe suau suau a, mumalin engmah ka hre thei tawh lo. Luca hian min thihsan thei lo tiin ka la phun mawlh mawlh a.
.
"Lo kiang teh u.." kawr var ha mipa pakhat hian min rawn kai a, ambulance-ah min kailut a. Ka hamhaih lutuk takzet a ni e. Luca mu chu ka en a, kan chuanna ambulance pawh a chak thei ang berin a tlan chhuak nghal bawk.
.
Luca chu a thaw hrawp hrawp a, a mit a la meng chuang lo. A thaw chu a zawi riai riai a, ka bula awm ho chuan an buaipui a, ka thaw a chham ve mai dawnin ka hria. Ka inhip kawk kawk mai. Ka en reng laiin Luca chu a zawi ta riai riai a. Ka awih thei lo. Ka hmangaih, ka innghahna, hun rei tak chhung ka chapona vanga ka lo hnar ngar ngar thin hian tunah min kalsan lehsi a nih hi!
.
"Ni lo.. Luca, khawngaihin..khawngaihin min kalsan suh aw.. Ka hmangaih che. Ka hmangaih che. Min tihlau a nia.. Tinge hetiang hian i awm?? Khawngaihin min en teh.." ka bula awmte chu zah zo lovin Luca chu ka kuah a. Ka tawng chu a hre thei tawh lo a nih ka ring, a mit a meng lova, min chhawn hek lo. Hetiang ringawt tur hi a ni lo asin.. Hma hun thlir thui tak ka nei a, amah ngei pawh hian min kalsan a duh hauh lovang. Min thlakhlelh em kha.. Min kalsan thei lo!
.
"Ka pi, a pawi hle mai. Kan inchhan thei ta lo anih hi." ka bula kawr var ha palian tak chuan a ti zuai ruih a. Chu pa hmel chu chiang lutuk hian ka en ta ngawt ngawt a.
.
"Dawt i sawi! I chhan thei! Doctor ini lawm ni? Chhan rawh.. Ka pasal hi chhan rawh.. Luca, khawngaihin lo harh teh.. Min tihlau a nia.. Khawngaihin  harh teh.." ka lu a hai mum mum a, ka mit sulh sulh bawk in ka hria. Ka thidang tur a ni lo. Keiman ka pasal hi ka chhan ang!  A tuar ai zawng zawng pawh ka tuar mai ang.
.
Mangang tih ber tur hre si lovin ka hawi kual a, ka a vek ani ber mai. Ambulance hnung kawngka hawnna chu ka vuan thut a, ka awm dan min hmuh rualin an te dual a!
.
.
"Come on! Harh teh! Engtin nge i awm?"
"Min thlah rawh.." ka tawng chhuak tha thei lo.
.
"Cherry, keimah.. Min hre thei em?" Luca hmel ka hmuh chuan ka kuah chawih a. A mitmenga a manganna lang chhuak chu engvang nge ka hre lo. Dan theih hauh lohin ka mittui a luang nghal zung zung a, ka insut nghal hlawp hlawp bawk a. "I tha em? I harh thei miah lo a. Min timangang hman alawm.. Min en teh."
.
Ka biang tawn tawnah min vuan a, ka chalah min fawp vang vang a.
.
"Khawiah nge i kal dawn? Kal suh aw."
.
"Ka kalsan lovang che.. Shh.. Khawiah mah ka kal dawn lo."
.
Ka harhchhuak thut. Thil thleng chiang taka ka hmuh kha ka mumang mai nge ataka thleng tur ka lo hmu lawk? Ka va'n duh lo thin em!! Mang chhia hian min tibuai tawh ngai miah lo a nia. Ka ngaihtuah leta Luca thisen en inchiah nuaiha a tluklai khan keimah ang chiah hmeichhia ka hmu a ni! Eng thu emaw min hrilh a tum a, a tawng kha ka hre thei miah lo.
.
"Tunah dar engzat nge?"
Ka zawhna chu mak tih hmel takin min en vang vang a, a sana bunlai chu a bih zauh a.
.
"Dar 3:15.. I tha tawh em? Tui i duh em?"
.
"Khawnge ka phone a awm?"
"Hei.." ka phone chu ka hmaah arawn lek kang a, hlauthawng ru tak chungin ka phone chu ka check a. Message inhawng lo pakhat awm chu ka hawng a, ka thaw hrawih mai! A mak lutuk..!
.
"Eng thil nge?"
.
"Ka hre lo. Ka_" ka chal ka dawm vang vang a. Thil thleng tur ka hmulawk ni lo hram rawh se. Ka tihtheih zawng zawng ka ti mai ang. Luca hi ka chan thei lo.
.
"Nichin khan min chhuahsan em?"
.
"Mi hmuhtur ka nei a, pindan ka chhuahsan hnu lawkah ka phone ka theihnghilh vangin ka lo let leh a, i awm dan danglam ka hmuh khan ka kalsan ngam ta lo che a ni. Mangchhe tak mang ang maiin i awm a.."
.
"I mi hmuh tur chu tunge tih i hria em? Ka hre bik lo, thil tha lo thleng tur ang maiin eng emaw ka hmulawk niin ka hria. Ka hrethiam bik lo. Ka chan thei lo che. Ka hmangaih che.."
Luca chuan min pawm kang deuhin a malchungah min thuttir a, ka kuah nghet sauh sauh a.
.
Eng emaw chen hnuah a malchung atang chuan chhukin khumah chuan ka thu tha a, "Ka message dawn hi en teh." ka phone chu ka entir a, a number chu a phone ah copy in a phun zui hluk a. "Eng thil nge?"
.
"Min umzui reng a nih hi."
"Enge i sawi awmzia?"
.
"Mi tuemaw, kan la hrechhuak thei lo. Perth-ah pawh khan an umzui ru reng tawh che a. An tih chhan hi nangmah ni lovin keimah a ni."
.
"Eng thil nge? Chuvang chuan helai hmunah hian min hruai tihna a ni tiraw?"
.
"A chanve chu a dik alawm."
.
"Luca..? I mawhphurhna a min ngaih vang chauha min hruai let i ni em? Min hmangaih vang leh ka tello a i awm theih loh vanga min hruailet i ni lo tiraw?"
.
"Ni lo.. A diklo zawngin ngaihtuah suh. Ka dam chhunga i kianga awm ka duh vanga hruailet che ka ni. Ka hmangaihna che hi ringhlel suh. Ka venhim loh che chuan engtin nge kan awmdun theih ang. Chan nawn leh tur chein ka huaisen tawk lo a ni. Min ring rawh. Chuan tihtur pawimawh tak kan nei."
.
"Eng thil nge?"
Tunah hian inhnial buai hman kan ni lo tih ka hria. Ka phone a message min lo thawntu number a hmuh ruala Luca awm dan khan thil eng emaw a awm ngei tih min hriatthiamtir tawh tlat a ni.
.
"Luciano ka'n bia ange?"
.
Luciano chu tunge anih ka hre lo. Luca che vel chu ka thlir tawp a. Ka hlauhthawn rukna pawh a nasa telh telh mai.
.
Tomas a him angem? Hlauthawnna in ka khat a, ka awm hle hle thei lo. Luca'n phone a hman zawh rualin ka lo zawt nghal vat a.
.
"Tunah message lo thawntu che number hi an chhui mek a, chanchin min lo hrilh leh vat ang. Nichin khan eng thil nge i hmuh?" thutak zet hian min rawn hnaih a. Ka thil hmuh chu engpawh ni se min nuihzat lo leh ho mai maia min ngaih sak loh vangin ka thaw huai a.
.
"Ka hmu che a. Park-ah, thisen in a lo bual vek che a. Mumang mai mai ani tih chu ka hria a.."
.
"Shh.. Min lo kuah rawh." nghet zetin ka kuah a, a rimtui hman dai raih leh mipa hluah hluah chu ka hip vang vang a.
.
"I chungchang hi Garcia khan engkim min hrilh vek alawm. Allison Caren Adams inhlanna zawng zawng nen. Heng thil zawng zawng ka hriat hma hian ka hmangaih tawh che a, ka tan engmah a danglam lo. a lawmawm zawk daih a ni."
.
"I ring em?" ka tih chuan a taksa chet dan atangin a bu nghat a ni tih ka hria.
.
"A takah hmu thei ila lawmthu ka hrilh ngei ang. Thil thenkhat hi chu mi zawng zawngin an rin loh thil a ni thin a, kei chuan uluk taka ka ngaihtuah hian thil thleng thei ani tih ka hria a. Ni e, mak chu a mak deuh alawm.." a ti ve mai a. Kan ngaih dan a inang chiah a ni. Mi tam zawkin thil pangngai lo leh thleng thei lova kan ngaih hi a thleng leh tlat thin. Ka chunga thil thleng vang hian pangngai lo leh mak tak, mihring danglam bik erawh ka ni chuang lo. Chu chu kei leh ka bula chengte, ka thiantha leh ka pasal ngei pawh hian kan hrechiang a ni.
.
Zanriah kan ei hnuah mi pakhat a lo kal a, Luca chuan Luciano anih thu min hrilh vat a.
.
"Thil thleng kha in la hre lo anih hmel."
.
"Eng thil nge?"
.
"Tlai lam khan park-ah bomb a puak a, thil mak chu Allison hnena message thawntu number kan chhui kha bomb puah rualin kan bo ve chiah a ni. A awmna hmun pawh bomb puahna lai chiah hi a nia. A hmuna kan va endik khan thil hmuh kan nei a. Phat rual lohin a thi ve ngei tih kan nemnghet bawk a. Zawhna la awm thei chu rawn call tu che kha tunge tih hi a ni?" Luciano chuan Luca a melh a. "Kha number kha kan chhui thei miah lo a, thil rin theih pakhat erawh chu nangmah hrechiangtu che anih ngei a rinawm." a ti charh charh a.
Keichuan tunge ni thei ang tih ka lo ngaihtuah kual nghal ruai ruai a. Han rinhlelh tur ka hre der lo. Luca hian amah hretu a ngah em em a, aman a hriat ve kher loh mi tamtakin an hre bawk.
.
UNKNOWN*
.
“A va han nep ber mai em?  Fing inti takin ruahmanna a siam a, ka duh ang zawm lovin ama thuin a kal a, a chan tawk chu a hmuh mai lohin. Awlsam takin an chhui chhuak ang tih hrethiam tur pawh a ni. Allison hnena message a thawn khan a thawnna number kha chhui theih loh turin a tichhe nghal tur a ni a, chuatiang chuan a ti lo. A aikaih ve te pawh a niange. Tunah chuan a ruahmanna atthlak, a luhlulna, min zah lohna zawng zawng nen ka thawnbo ta anih kha. Ahma pawhin keimah ngei hian Allison ka ru chhuak tawh a, ka kalsan ve leh Allison chhanchhuahin a awm a. Tun tumah chuan keimah ngei hian engkim ka ti vek ang!
.
Uluk taka trained thlap ka ni a, mipui hmuha ka thil tih nen inrem tehchiam lo. Hei tak hi ka tan thil tiawlsam tu a ni. Zanin hian ka duh ang takin ka che chhuak anga, naktuk ah chuan chanchinthar mak danglam leh rapthlak, lungchhiatthlak bawk buaipuiin mipui an phu mur mur ngei ang le!
.
Ka pindan thuhruk ah lutin ka hmanrua ka la a, ka thawmhnaw ka thlak vek bawk. Hmanhmawh hauh lovin motor ka khalh chhuak a, ka kal tumna hmun ka thlen chuan ka beisei loh takin a lo reh thiap mai. Thil thlengte kha an la hre lo pawh ani mahna. Fimkhur theihtawpa fimkhur tur an nih vei nen. Luca Giovanni hian Luciano aia fing lo ruai ni se la tha tur. An fimkhur rei ta lo a nih hmel khawp mai. Ka mi chhawr ber thih atanga kar khat chhung kha chu an fimkhur em em tih ka fiah thlap a, ka rin aiin an thla a muang.. Thih hun a thlen hi chuan tihat in an awm thin tia an lo sawi hi a lo dik ngei anih hi.
.
Awlsam takin gate chhungah ka lut a, security pakhat lo muthlu lawp lawp chu hmusit zeta nuih chungin ka kal pel a. Inchhung light zawng zawng leh an camera dahin hna a thawh lohna tura tihtur ka tih zawh chuan hmabak pakhat chiah ka nei ta.
.
Inchhung ka luh chuan ka duh ang takin a thim thiap a, thawm engmah hriattur a awm lo. Inchung pan chhohna ah chuan thawm dim takin ka chho a, pindan pakhat ka hriatchian em em chu awlsam takin ka hawng a. Ka beisei aia thil engkim a awlsam hian ka ngaih a titha ta chiah lo.
.
TMH!!
CHAPTER - 34
TAKE MY HEART!
By. Thantei_Pautu a.k.a Laura_Sean_Virgo
.
LUCA GIOVANNI'S P.O.V*
.
"Hetah hian lo awm rawh." a zawi thei ang berin ka tawng a, Allison chuan ka kutah min vuan bet tlat thung a.
.
"Kalsawn lovang. Eng thil nge thleng dawn a hriat loh."tiin a phun ser ser a, a hlauthawng tih ka hria a, ka kuah leh rih a. Mahse, hetah hian kan awm reng ringawt thei lo. Ka in ah hian ka biru reng ang maw? Teuh lo mai.
"Engtinmah kan awm lovang. Security team an lo thleng tep ang."
.
Zanin khera hetiang thil a thleng hi a mak khawp mai. Ka in a hnathawk thinte zingah pawh tlemte chauh hian kan nupa kan awmna tur hmun leh kan thiltih tur an hrelawk thin a, kan mi chhawr zingah aruka information pe chhuak an awm anih loh chuan tuna thil thleng ang hi a thleng thei lo. Ka rintlak zual ho ka ngaihtuah chhuak den den a, an zavai maiin rinawm lo turah ka dah chhin ngai miah lo hlawm a ni. Han rinhlelh deuh tur pawh ka hre lo hulhual.
.
Light a thim khan ka  muhil ka harh hlawl a, ka chet rualin Allison pawh a lo thuchhuak ve nghal phat bawk. Ka hminga min koh chuan a hlauthawngin thil pangngai lo a thleng tih a hrethiam ve nghal vek tih ka hria. Ka phone lain Luciano  message tur ka type zung zung a, ka thawn nghal bawk a. Kan nupa pindan atang chuan chhuakin pindan ruakah Allison chu ka kalpui a, thawm dang hriattur engmah a awm loh vangin inchhungah thawmdim taka lo lut an awm tih ka hre thei ta mai bawk. A huangtau hle mai.
.
Allison min vawnna chu phelhin a chalah ka fawp a, ngawirenga lo awm tura ka hrilh hnuah pindan atang chuan thawm dim takin ka chhuak a. Thil thalo tak thleng tur awm ang mai hian ka tukhum a hit sang sang mai. Ka inah hian tupawh lo lut se chetlak dan tur ka hrechiang a, awlsam tak chuan thil thalo a thleng hauh lo ang.
.
Kan pindan kawngka bulah dingin Inchung pan chhohna stepa muangchang leh thawm dim thei ang bera mipa ruangam rawn kal chu ka en a. Ka thil hmuh chu ka beisei loh leh ka ngaihtuah ngai miah loh, ka rinhlelh phak loh a ni. Tunang hunah hian min titipui tur emaw, sumdawnna chungchang emaw sawi tura intlawh hun a ni lo tih a chiang em em bawk. A bik takin tuna ka hmazawna thawm dim taka lo kal phei nen hi chuan kan titi dun lo lehzual ang.
.
Ka dinna hmun atang chuan pen chhuakin stepa lo kal thauh thauh lam chu ka pan a.
.
"Charlwood. Tunang hunah ka in ah hian eng thilin nge lo hruai thleng che." ka tawng a hriat rualin a ding chawt a, engpawh titurin ka inpeih ti niawm tak hian a taksa lekkawh dan a danglam nghalin min rawn pan ta chat reng a. Inchhung light a rawn eng a, a thawven thlak huai mai. He in sak anih lai khan in pumpui eng lakna ber a chhiat pawha emergency thila inchhung a en theih nan line hrana kaltirin awlsam taka hriatchhuah loh turin light ka fit tir vek a, a lo tangkai khawp mai.
.
Inchhung lo eng thut chu Charlwood hian a beisei hauh lo tih a mitmeng ah a lang zawk a. Rang lutuk hian min rawn hnek a, ka lo beisei lawk loh vangin a biang a ri no chak mai. Ka pai deuh nawk a. Hetiang khawp hian a che rang tih hi chu hman atangin ka hre tawh. Rang zeta insiamrem in ka hnek leta a ri no chak a, a hnar atangin thisen a baw  nghal zawih a. Thinrim mengsen vek chung hian min rawn bawh nghal ruak a, mipa thankim tha tawpa inbei chu kan thawm a tha khawp mai. Inchung pan chhohna stepah chuan kan lum dun a. kan thawh leh rual chiahin a bawp dinglam chuan min rawn kick a, a mal veilam a zawi al al a. A kutthlak nat zia ka lo theihnghilh tawh a nih hi. Min kick nawn a tum chuan a bawp chu lo dangin ka kick ve thung a a khup a thlep hnawk a, a thaw hrawih bawk. Kan pahnih chuan chetzui tum lovin kan inmelh ta ran a.
.
"Ka tihtur hi hrilh kher che a tulin ka hre lo." a ti bul hmuk a, a aw atanga thinrimna nasa tak langchhuak chu eng chen zeta rei nge alo thup tawh ang hriatphak a ni lo.
.
"Ka in a ni tih i hria alawm. Ka phalna lo chuan eng thil mah a thleng lovang."
.
Ka thusawi vang chuan a ner nawk. "Anih chuan i ina hnathawk thenkhat ten an phatsan che pawh hi i phalna thlap a ni ang maw?" tiin kha zet hian a nui zui a. "Oh.. Ka duh tak leh ka lo kal chhan pakhat chu ka hmu ta alawm." a ngaihtuahna hriat hleihtheih loh khawp hian a mitmeng danglam in ka hnunglam a en a, Allison a lo kal tih ka hre thei mai. Lo chhuak hauh lo tur khan ka hrilh sia. Eng a awm tawh vangin thil engkim a tha taah a ngai a ni ngei ang.
.
Ka bulah rawn dingin ka  banah a kut pahnihin min vuan a. A chetdan vang chuan Rafe Charlwood chu a ngaina lo hle tih chiang takin ka hria.
.
"I nupui hmeltha leh reilote chhunga taksa tidanglam thei hmeichhia hian i thiltih zawng zawng hi hria ni se la, tuna a rinchhan ang che hian a awm ange maw chu? Luca Giovanni, i thiltih tenawm zawng zawngte hi i nupui hian a hria em le?" Cho zet hian min en a, a mitmeng tenawm zeta de zawk zawk chuan Allison chu a melh zui leh sawr sawr a.
.
"Charlwood, i tawngkam kha fimkhur ang che."
.
"Whoahh.. Chu chu ka sawitur zawk niin ka hria. Ka mamawh aia tamin engkim hi ka hre vek a nia. Dik tak chuan ngawireng leh chhui chhuah miah loh tura i nupui nunna la turin ka lo kal a, ka tum ka thlak teh ang! Dam reng chunga nitin thi nawn ziah turin ka siam zawk teh ang che u." min rawn panhnai lehzual a, Allison chuan min vawnna chu a tinghet zual sauh a.
.
"Eng thil pawh tih tum la i hlawhtling chuang lovang tih ka hlau hle mai. Charlwood, nang nen kan inhriattirh atang khan ka ring ngai miah lo che a, ka lo tisual hauh lo anih hi."
.
"Chu thil kher chu pawi ka ti hauh lo mai."
.
"Nungdama awm emaw, i sumdawnna zawng zawng leh i theih neih zawng zawng engmah lo leh awm ngai miah lo ang maia an ral vek hma hian ka in hi chhuahsan rawh."
.
"Chu thil chu a thleng lovang. I nupui hian hriattur pawimawh tak a nei. Allison duhtak, i pasal a i pawm Luca Giovanni tan hian hmanraw tangkai i ni reng dawn anih hi! I damchhung in.. Bum fin theih loh hmeichhia..
.
"Eng thu nge sawi i tum?" a ti sep a. Keipawh hian Charlwod thusawi tum hi ka hre bik lo. Eng thu pawh sawi se, Allison nen kan inkar ti danglam thei khawp anih ka ring chuang lo bawk.
.
"Ka sawitum maw? Ngaihdan i nei thiam  pek lo a ni maw? Engvangin nge, Luca Giovanni hian engvanga a nupui atana duh em em che nge anih? Min hmangaih vang tiin min chhang ngei ang chu!" Za lo lutuk hian a nui leh rih a. Mihring nui thawm pawh a ang lo.
.
"Hmeichhe khawngaihthlak! Pathian hian mipa hmanrua tur chauhva a siam che hi a pawi ka ti! Allison Caren Adams.. I hming hian i hriat hauh lohin thil ropui  tak a keng tel teuh a nia. Maktaduai sang tam tak hu, hausakna, ropuina. Mi hmanghria Giovanni hian chung zawng zawng chu a neih vek theih nan nang leh i unaupa te hi a lamah a hnukhnai che u tih hi i la hre hauh lo a maw?"
.
"Thu awmze neilo sawi kha bansan rawh." ka kut ka hum ruh a, Allison chuan angaihna hrelo zet hian min en ha a. Charlwood thusawi dawt muhlum mai hi a ring dawn hauh lo tih ka hriat rualin a mitmenga zawhna awm chu ka hrethiam chiah lo. Nge? Allison hian Charlwood thusawi hi a ring zawk?
.
Allison Caren Adams hausakna a sawite chu ka tan engmah a ni lova, ka duh ber leh ka mamawh chu ka bula Allison awm chauh hi ka ni. Ka hlimna leh ka nun innghahna chu amah chauh hi a ni bawk. Ka chhungril a hmunruak awm hnawhkhah ngai luah theitu leh thildang zawng zawng min theihnghilh tir vek theitu hmeichhe awmchhun pawh Allison chauh hi... Hlim tak leh lungkham nei miah lova min nuihtir theitu awmchhun chu amah chauh hi a ni. Charlwood hian eng thu nge a phuahbelh zel dawn le?
.
"I thu lawilo sawi kha duhtawk rawh. Eng thu pawh sawi la rin i hlawh chuang lovang." Allison chu chhuang zet hian ka en a, a thusawi chu a ti tak tak em hriattheih turin a mitmengah a ngaihtuahna engmah a lang chhuak lo. Aw Lalpa!
.
"Wow! Anih chuan ka thuhriatte hi Garcia Labraska hnen atanga ka hriat ni ta se, enge a an ang?"
.
"Enge i sawi awmzia?" ka  ban a vawnna chu thlahdulin Charlwood chu a dinhnaih deuh a, Garcia hming lamrik anih chiah chuan phat rual lohin a danglam a ni.
.
"Garcia Labraska hian nangmah ang chiah hmeichhia thiantha tak a nei a, a bak thawnthu mak tak chu i hria tih ka hria e. I pasal leh a chhungte laka thi anga i lan lai khan i pasal duhtak hian eng thil nge a lo tih? Engmah! I pasal nu leh farnu te hian eng thil nge an lo tih? Thil tam tak! I hlutna an hriat meuh chuan awm leh mawi pawh dawn lovin Giovanni hian arawn umzui ta reng che a. Nang lah hneh i awlsam.." a nui chiam a.. A tak ni lovin movie a thil thleng ang mai a ni. A awihawm loh takzet.. "Chuan nizan khan i pasal hian tu nen nge hun a hman i hria em? Stella! I pasal hian nang chauh hi khum a tawmpui lo tihte hi lo hre ta la.."
.
"Charlwood duhtawk rawh." ka ti hrawk a. Ni e, Charlwood hian engtin nge nizan khan Stella nen kan inhmu tih alo hriat ka hre lo. Khum tawmpui tih thuah chuan dawt muhlum a ni. Ka nupui nen kan inneih atanga vawiin thleng hian, Allison thi anga ka ngaihlai hun zawng zawngah pawh khan hmeichhe dang ka khawih lo hrim hrim a ni. Pathianin a hria e.
.
"Kha maw! Ka mamawh aia tam thil ka hria tih ka sawi kha. Mi nunna lak ai chuan hremhmuna awm ang maia hreawm tuara kan mi huat berten an nun an hmang tih hmuh hi a nuam daih zawk dawn anih hi. Thudik kha tak hi pai reng ai chuan a hretur dik tak hian i hre ngei tur pawh a ni."
.
"Khawngaihin min chhuahsan rawh." Allison chu a khur der der a, chu chuan mak takin hlauhthawnna min pe tlat  nia. Min rawn melh zawka, a mitmeng a ka hmuh chu ka hlauhthawn ang chiahin min rin ngam lohna a ni!
"I sawi vang ni lovin ka duh reng vangin he in bawlhhlawh hi ka chhuahsan ang."
Pawnlama thawm awm vang chuan a phun zui hluk a. Him damin a chhuak dawn lo chiang khawp mai. A ruka ka inchhung a lo luh vang leh mi tihnat tum a nihna hrim hrim pawh hi dan chuan a ngaidam hauh lovang.
.
"Rafe Charlwood, che tawh suh. I ban phar rawh."
.
"A teuh lo mai."phun hlukin a mitmeng a de zawk a. Rang lutuk a min rawn hnaihin Allison chu a tham nawk a, a nghawngah a ban chuan dimna nei hauh lo hian a kuah nghal a. Allison chu a te chhuak hauh lo nain a hmei senduk nghal leh a tan talh talh dan atang chuan thawk a harsa tih a lang reng mai.
.
"Thlah rawh!"
"Teuh lo. Ka tum ka thlak leh ang Giovanni. He hmeichhe tel lova nun hman hi enge a an i tih i hriat nawn leh atul dawn ta anih hi.. Ka tum tawh chuan ka hlawhtling ziah thin.
.
A hnunglam atangin silai arawn phawrh a, Allison lu ah a tin ta chat mai le. Ka panhnai anih chuan silai hi a hmetpuak ngei ang. Ka hmuhlai ngeia ka nupui duhtak leh a tel lova ka awm theih loh, ka hmangaih awmchhun hmeichhia hi a thi anih chuan.. Ka chhan theih loh vangin dam ka duh bik lo ngei ang.. Allison tel lova nun hman chu ngaihtuah pawh ka duh lo.
.
Allison chu a ang chawp chawp a, a mitmeng atang chuan a mangang tan hle tih a hmuh theih. Ka tuar thei ta hauh lo mai.
.
Ka theihtawpa rangin ka awmna hmun atang chuan Charlwood chu ka bawh rawp a, chumi rual chiah chuan silai a puak ta. Vawihnih nge vawithum lai a ni! Ka ban a thip zawk a, a lum zui nghal pup pup a. Rang zetin ka inbeng kang a, Allison chu ka ban a, ka ban thip zawr zawr leh mu nghal chuah chuah vang chuan engmah ka feel thei tawh lo. Charlwood mutna atang chuan thisen arawn luang chhuak a, a lu atanga rawn chhuak a nih hmel. Ka hmu sual pawh a ni maithei. Allison taksa atanga rawn chhuak a ni em?
.
"Hmanhmawh ru! Damdawiin ah kan kal nghal angai anih hi.." Luciano chu au tuarin arawn kun hniam a, ka mit deuh sulh sulh a, chiang taka thil hriat ka nei ta mang lo.
.
Ka harh leh chuan khumah muin thawm a reh thiap a, ka mutna khum chu kan nupa khum a ni hauh lo mai.
.
Kawngka hawng ri rak ka hriat chuan ka hawi a, ka sil them thum vek mai. Ka ring na lutuk vang chuan ka then sawk a.
.
"Fratello.. I tha em?" Adelina leh Tomas lo lut chu ka lo en reng a. Ka beisei ber erawh ka hmu lo. Allison chuan Charlwood thusawi kha ringin min kalsan anih teh chuan.. Engmah sawifel lo chuan min kalsan hauh lovang. Adelina leh Tomas hmel chu ka enchiang a, an ngui lap tih ka hmuh chuan ka ngaih a thalo lehzual.
.
"Khawiah nge ka nupui?"
An pahnih chuan an inen zawk a. An awmdan chu ka dawhtheih zawng a ni ta lo.
"Khawiah nge ka nupui?"
.
"Ah. Fratello, a ni chu_ pindan lehlam ah sawn a awm a. A la harhchhuak lo a."
.
"Engmaw? Eng.."
.
"A lo harh leh ngei ang. AC chu hmeichhe chak tak a nia lawm." Tomas aw rik dan atang chuan a thusawi chu amah ngei pawhin a ring lo tih a langchiang lutuk.
.
"Engtin.."
.
"Charlwood khan thurualpui dang a nei a, chu chuan thil thlen lai kha nang fuhin Allison chu a kap ta ani. Kha nu kha in inhnial buai lai zawng zawng pawh khan a lo awm reng a ni maithei."
.
""Kha nu? Tunge kha nu intih chu.?"
.
"I_ah_Fiorenza!"
"A mak hle mai. Fiorenza chu ram dangah awmin a inbeng bel tawh niiin ka lo hria a." ka hriatdan dik tak a ni bawk. Engtin nge hetiang thil thalo tak hi a tihtheih zawk.
.

"Allison chu tunah hmuh ka duh." tunah hian a hmel ka hmua ka kut k avuan anih loh chuan ka a thei hial ang. Min kalsan dawn hauh lo a ni. A tellovin ka nung thei lo tih hriain, ka nupui rilru tha tak hian min kalsan dawn lo. Thil theih a ni lo.
.
"A theih loh ang tih ka h lau khawp mai."
.
"Tunah ti rawh u. Khawiah nge Doctor a awm?"
.
"Mr. Giovanni, tihluih chi a ni lovang."
.
"Ka nupui a nia, tuman min khap thei hleinem." thawh tumin ka inbeng kang a, ka ban na emaw ka tih kha ka awm zawk a lo ni. Ka awmdan min hmuh chuan min hnial luih chi niin an hre lo a ni ngei ang Tomas chuan min lo vuan vat a.
"Hahdam rawh, Doctor chu ka va hmu ange." tiin pindan chu a chhuahsan a.
.
Minute 30 rei ber aral hnu chuan ka pindan atangin min nawr chhuak ta hram a. An zavai mai chuan hlauthawng hmel an pu vek a, engvanga hlauthawng nge annih ka zawh lahin tumahin mumalin min chhang chuang hlei lova.
.
"A pawi lovang maw? Ka hlauthawng nasa a nia. Hetiang thiltih hi a fuh ber lo tawp ang." ka nu chu enin a kutah ka vuan a, a mittui tling pam chu a khap kir sak sak a. Thihna kotlanga ka din meuh chuan ka nu hian fapa hlutna a hre ve ta anih hmel. A mitmengah chuan tunhmaa ka la hmuh ngai hauh loh min ngaihvenna tak tak ka hmu tlat a ni.
.
Muangchangin ka mutna khum chu an nawr kal zel a, pindan dangah min nawr lutin ka mutna khum chu an hungrem a. Allison hmel ka hmuh chuan ka dam sawng sawng niin ka hria. Khumah chuan maimitchhingin a mu a, a nghawng an cher bur a, khawl chi hrang hrangin a hual khat vek mai. Adelina khan a la harh lo tih a sawi tak e. Rei tak nghah ngai lovin a lo harh ve thuai turah ka ngai.
.
Kawngka arawn inhawng a, ka pa lo lut chu ka lo en reng a. Ka khum bulah thuin ka kut arawn vuan a, a thusawi tur huphurh tak hmel a pu chuan ka ngaih a titha ta lo lehzual. Midang zawng zawng hlauthawng hmel kha chu min ngaihtuah lutuk vangah ka ngai thei a, mahse, ka pa hi chu mipa ah pawh mipa tak mai, ka entawn ber ani. A hlauthawng anih pawhin a hmela langchhuak khawpin a awm ngai meuh lo.
.
"Ka fapa, nungdama ila awm hi a vanneihthlak hle a ni. In nupa hian kan chan ta che u emaw kan ti hman hial a, Allison pawh a lo harh thuai tawh turah ngai ila.” Ngawi leh datin a aw a thian kharh a, chanchin lawmawm lam a sawi dawn lo ngei tih ka lo hrethiam. “In naute erawh kan chan ta a ni!"
.
"Eng..?" Min thawng takzet! Ka lo ngaihtuah miah loh lam a ni. Ka nupui muhil bel hmel chu ka en a, a hriat hun chuan a na khawp ang le. Engvanga min hrilh miah lo nge anih? Thla khat pawh a la tling lo ngei ang. Ni e, kan mut dun leh hmasak ber hun ka chhut letin..
.
"Engtiang pawhin awm se dawhthei taka i enkawl atul dawn a ni. Allison chungchang hi ka sawi i hre ngai lovang, mahse, ka fapa, ka hmuh vawikhatna atang khan hmeichhe tha tak a ni tih ka hria a, in pahniha in tangdun anih loh chuan hetiang thil thleng hian nupa inthenna hial a thlen thei a nia. Damon a boral khan nasa takin i nu nen hian kan bei a, ka ngawihsan tawp vangin tun hnuah hian kan inrem leh thei chauh a ni. A hunlai khan a awmdan kha hrethiam duh lovin ngaihven lo ni ila chu kan inthen ngei ang. Ka sawitum ber i hriat ka ring e."
.
Minute 10 vel hnuah ka pa'n min chhuahsan a, ka thu hriat vang khan ngaihtuah mai tur pawh ka hre lo. Ka ban dinglam phar chhuakin Allison kut vawt thler chu ka va vuan a.
.
"Ka hmangaih che" tiin a hmel chu ka en ngawih ngawih a.
.
Darkar engzat chiah nge ral tawh ka hre lo. Ka lo muhil sek a, thawm eng emaw awm vangin ka meng chhuak zawk a. Allison khum bulah chuan Doctor awmin a bulah nurse pahnih an awm bawk a. Allison pawh a lo harh ve ta.
.
"Karkhat chhung chu hahdam takin in awm tur a ni. Mrs. Giovanni pawh a tha e. A  ring tuamna hi karhnih hnuah kan phelh ang." Doctor chuan thil pawimawh leh kan zawm ngei tur a sawi duah hnu chuan an vaiin min chhuahsan ta dial a.
.
"Na i nei em?" Allison kut ka vuan a, ka hmer vang vang a.
.
"Chu chu zawt zawk tur che ka nia." a ti sep a.
"Keichu ka tha. Thil eng emaw hrilh tur che ka nei a."
.
A hmel landan chu eng thil nge ka sawi dawn tih a ring thiam a ni ngei ang. A mitmeng a khup lap a, ka kut chu nghet zetin a vuan ve bawk a.
.
"Stella chungchang kha thudik anih loh ka beisei." a tih chuan hlauhthawnna in ka khat nghal vek. Ni e, kei hian ka nupui lakah dawt sawiin ka hna chungchang vanga chhuak tur angin ka insawi a. A nihna takah chuan Stella khan thil pawimawh tak ka nupui nen inkungkaihna nei thil mak tak chungchang ah min hmuh a duh thu min rawn hrilh vanga hmu ka ni. Min kohna hmun ka thlen khan min hmuh theihna chhuanlam atan chauh ka nupui chungchang kha sawi a ni tih ka hre thuai a, rei pawh awm lovin ka kalsan lehnghal. Stella khan min kuahin min fawh a tum ngei a, ka ngaihtuah zawm duh lo zawk. Ka duh reng vanga thleng ni lo mahse ka nupui lakah hian ka inthiam lo tho tho a ni.
.
"A chanve kha chu a dik!" thaw halhin ka kut a vawnna chu rang zet hian a thlah a. "Khawngaihin, tun hun hi hetiang sawina hun a ni rih lo.."
.
"Nupa inkarah hian thleng miah lo tur thil a awm a, chu thil chu itih chuan_ Eng thil nge ka tih ang ka hre lo a ni. Ka thutak takzet."
.
"Ka hria alawm. Ka rinawmloh san ngai lo ang che. Chu thil chu hrechiang em em tur i ni. Allison, ka hmangaih che. Khawngaihin i kut kha ka vawn phakah dah rawh.." a hmel ka en a, chian ngam lohna a mitmenga lang zawk chuan ka thinlung a tina khawp lutuk takzet. Ka nupui tan hian eng thil nge ka tih ang? A thinlunga min rin leh theih nan enge ka tih ang? "Sawi ber tur pawh ka hre lo. Stella khan I chungchang ah eng emaw thil pawimawh min hrilh tur aneih thu min hrilhin min rawn bia a, I chungchang anih chuan venhim che ka duhna nasa tak vanghian ka hnial thei lo a ni. Min koh chhan ka hriatchhuah khan ka kalsan nghal a, ka kal sawna thudik ka hrilh loh vang che khan ka inthiam lo takzet.. Mahse, nang.. Allison, itan ka rinawm tih chu Pathianin a hria e.. Ka nupui  ni tur hian ka phu lo che a, mahse ka hmangaihna che vang hian tiamchin nei lovin, itan ninawm khawpin ka umzui thin che tih pawh ka hria. Min hria alawm.. I laka ka rilru puthmang hi a lem mai chu ni se ka thiltih thin tam tak hi ka ti hauh lo ang.. Khawngaihin i kut kha min vawntir rawh.. Ka hmangaih, ka ngai lutuk che.."
.
Allison chu muangchanga lo hawichhuak in min en a, tunah chuan a mitmeng pawh a danglam ta.
.
"Reilote chhung kha chu min phatsan niin ka ngai a.. Ka hlauthawng a_"
"A thleng ngai lovang." ka lo ti vat a. "Kei hi hlauthawng zawk tur ka ni. Ka rindan chuan Charlwood thusawi kha ringin min kalsan mai ang tih ka hlauthawng a. Min kalsan anih chuan ka dam zo lovang. Allison min hrechiang rawh.. Tawp chin awm hauh lovin ka hmangaih che tih hria la.."
.
"Ka tihpalh.."
.
Chiang zet hian min en a. Ka nupui ka hmangaihna hi tawngkamin ka sawifiah thiam hauh lovang le. Hla phuah mi niha hla thu mawi leh ropui taka ka hmangaihna thu hi puanchhuah ka duh ngei ang. Hla thu mawi leh ropui tak tak paw’n a la phawkchhuak chuang lo maithei bawk.
.
"Ka hmangaih che."
"Keipawn ka hmangaih che."
.
Aw thian kharh ri kan hriat chuan kan hawichhuak rual thawt a, Allison chu a then sakin a nghawng cherna chu a khawih zauh a.
.
"Min mamawh hmel loh hle mai." Garcia chu nui sangin kan en a, a hnunglam atangin Elario arawn dak dek dek a.   Allison a hmuh chuan insum hman lovin a au raih a.
.
.
Damdawiin kan chhuahsan atangin thla khat zet a ral leh ta. Allison hian naute chungchang a la sawiri miah lo a, keipawh hian a sawichhuak hmasa zawk nih ka duh lo. Nasa takin mahni inthiam lohna a neih phah ang tih ka hlau a, chutih rualin engtik ah emaw hrechhuak lehsiin ka chungah a thinrim ka hlauthawng tho bawk. Naute a pai tih a lo inhre hauh lo em ni ang? Chutiang thil chu a thleng thei reng angem? Hre reng chungin a sawichhuak duh lo pawh a ni ve thei tho.
.
Kan pindan ah lutin darthlalang hmaa ding ka nupui chu ka pan a, a hnunglam atanga kuahin a nghawngah leh a bengah ka fawp dan dan a.
.
"I rimtui hle mai.."
"Chu thu chiah chu ka sawi ve thei ang." darthlalang ka en a, a ni pawh chuan min en vein a nui sak a.
"I nui hmel ka hmuh hian ka awmdan ka theihnghilh ziah thin.."
.
"I ti mah mah niin ka hria Mr. Giovanni.."
.
"A ni maw? Anih chuan.."
.
"Anih chuan.." tiin a inher a, a ban zen thlerh chuan ka nghawngah min kuah a.
.
"Hetiang hian a tidanglam che em?" a sawi zawh hma deuhthawin ka hmuiah min fawp a, min fawp chung chuan a la nui ta reng a. I hmangaih tak kha i hmui si reng chungin a nui a, a nawm dan leh min fan dan chu sawifiah tum buai lo law law zawk teh ang.
.
"Hetianga i awm chuan kan kal chhuak dawn hauh lo a nia." a hmui la hrangin min en a.
"Ka hlau hauh lo mai." a ti sap a. He hmeichhia hian min hrechiang ta mah mah a ni. Kei hian engtikah mah min khawihna hi ka kham thei dawn lo.
.
"Tomas leh Adelina ten min nghak thlawn dawn tihna a nia. I hlau hauh lo amaw?"
.
"Engvangin nge ka hlauh ang. Ka bulah i awm chuan tumah ka hlau  ngai hleinem." tiin a nui har har a,a nui ri chuan ka taksa chhungril thlengin a fan nia!
.
.
A insiam zawh chuan in atangin kan chhuak a, Adelina leh Tomas te nen zanriah hlim takin kan kil ho a, anni pawh tunah chuan dan ang thlapin an inhual ve ta. Giovanni thisen ah hian mahni kawppuite atchilhna a awm tel a ni hial ang, Adelina hian Tomas lak atangin a mit a lasawn thei meuh lo. Tomas pawh a danglam tehchiam chuang lo va..
.
In kan thlen leh hnu chuan inthlak felin khumah ka thu a, Allison bathroom atanga a lo chhuak chu ka lo en reng a.
.
"Thil diklo a awm mi? I hmel landan kha nidanga ang lo." a sam la huh deuh chu khawih niap niapin ka malchungah arawn thu a.
.
"Tunah hian hrilh che ila a that zawk ka ring."
.
"Oh! Luca,  min ti hlauthawng dawn a nia."
.
"Damdawiin ah khan engmah i sawi lova, tunah pawh engmah i la sawi chuang lova. Naute chungchang kha.."
Phawk hra hian min en a..
"Naute chungchang maw? A mak hle mai. Ka hriat loh thilthleng a awm a nih chuan hriat ngei ka duh ang."
.
"Engtianga sawi tur nge ka hre chiah lo. I hre miah lo maw?" ka ti let leh rih.
.
"No" tih zawngin min chhang.
"Anih chuan tunah hian naute dang kan siam dawn em niang?" a biangah chul zai zaiin ka nui suk a. A mak dangdai hle a ni. Ka nupui hian naute a pai tih a lo inhre hauh lo tak tak a nih dawn hi.
.
"Luca, ka _ a dang maw?"
.
"Hmm.." a hmuiah duhthawh zetin ka fawp vawng vawng a. Naute chungchang chu hun dangah ka la hrilh mai ang chu. Engpawh chu ni se, ka nupui hian thiam lohna engmah a nei lo. Kan chhungkaw doctor hnenah dilchhut takin engkim ka zawt vek tawh a, hmeichhiain nau a pai hian nau a pai tih a hre miah lo thei tih min hrilh khan mak ka ti hle a ni. Taksa ah danglamna thleng emaw thil ei chak huam huam a awm miah lo leh hreawm tuar miah lovin nau hi a lo pai theih reng a nih chu. A tha lamah ka ngai mai ang e.
.
KUM 7 HNUAH*
.
"Daddy, khawngaihin Albi hi i bulah a lo awm lawk thei em?" ka nghawngah min rawn kuahin ka biangah min fawp a. Amah chauha tibuaitu nei lova awm a duh chuan hetianga tlawn hi ka hlawh fo thin.
.
"Engtin maw min koh?" ka tih chuan anui hak a.
"Daddy! Khawngaihin Albi hi i bulah lo awmtir lawk la."
.
"Albi chu khawiah nge a awm?"
"Lo kal la.."
.
Ka nupui chuan min kaiin a inhnuaiah min chhukpui a, ka hmuh hmain eng thil nge thleng tih ka hrethiam vek tawh tho. Albizzo, kan fapa kum 6 mi lek hian a nu a chhun dawn a ni mahna, anu thuziahna pindana a awm tawh chuan a tibuai ngei ngei thin.
.
"I hmu em? En la.."
Albizzo chu dawhkan bulah dingin laptop keypad chu awmze neilo leh rang zet hian a lo khawih zat zat a. A thil hmuh thin angin a timai a ni.
.
"Buaina siam kan awm em?" ka tih chuan rang zet hian arawn hawi vat a.
"Daddy.. En teh, Mommy ang chiahin ka ti thiam a nia." thiam inti tak hian laptop keyboard chu a hmet leh zat zat a.
"Wow.. I thiam hle mai. Mahse, apa hian ka ngai tawh che a. Min infiam pui thei angem?"
.
"Mommy nen infiam ru.." min ngaihven zui lovin laptop bawk chu a khawih leh a.
.
"I lo hmu em? Thil pakhat a rilrua a awm tawh chuan thildangin a rilru a lapeng thei miah lo. I fapa ngei anih hi.." Allison chu a nui sang a.
.
"Carina a lo thleng tawh em?"
"Choka ah a awm kha.. Tunah Carina awm leh awm loh tinge i sawi daih a."
.
"Hm.. Ka nupui nen kan infiam chhungin Carina chuan.."
"I rilru a chak hle mai.."
.
Albizzo chu lehkhaziahna pindan atangin ka pawm chhuak a, Carina nen infiam turin an chhuak a. Tunah chuan ka nupui nen chauh kan awm ta.
.
"Anih chuan, infiampui tur pakhat chauh ka nei ta.."
.
"Ka hrethiam a nia.." a hmui hnuailam petin a nui sek a, a mitmeng a lang nung ser ser bawk. Pan hnaiin ka pawmkang nawlh a, min kuahlet chial in min hmangaih thu min hrilh sep sep a.
.
Heihi ka nun chu a ni. Hlimna, sawifiah theih loh khawpa lungawina. He hmeichhia, ka nupui ka hmangaih em em hi ka thinlung neitu a ni. Hmangaih neih hian engtianga awm tur nge ka hrethiam ngai lova, hmangaihna chu engtianga lantir tur nge tih ka hrethiam ngai hek lo. Tunah hian ka nupui mitmeng mawi tak ka en a, engkim a chiang takin ka hmu a, engtin nge ka awm dawn tih ka hrethiam tawh. Tuna ka awmna hmunah leh chatuan thleng pawhin ka nupui hi ka thinlung neitu a ni reng tawh ang. Tichuan, kei hi mi vannei ber Luca Giovanni, a nupui leh a fapa, a chhungkua hmangaihtu, a nupui innghahna leh a nupui chawimawia a vawng him tlattu ka ni.