TMH 1 - 11

TMH!!
CHAPTER – 1
TAKE MY HEART! (27/2/'17 - 6/6/'17)
By. Thantei_Pautu aka Laura_Sean_Virgo
.
6. JULY – 9:50PM – PERTH, AUSTRALIA
.
"Kha thil kha lo khawih suh." Garcia tawng ka hriat rualin ka phu zawka, ka ban chu hmanhmawh lo zet hian ka dah thla riai riai a.
.
Helai hmun thim rek rukah hian eng thil beiseiin nge ka kal tih ka ngaihtuah chuan ka rilru beidawnna a zual sauhin ka hre hial. Dam thlakhlelhna reng reng ka nei tawh lo!
.
"Garcia, eng thil chu nge kan tih dawn?" ka ti sap a.
.
"I thu tlukna-ah a innghat thuk khawp mai."
Garcia chu a ngawi leh vang vang a. "Chuan.." tiin ka lo nawr ve thung. A hma-a Garcia'n khawih suh a tih thil kha ka ban leh a.
"Kha thil kha khawih suh. A hun hma-a hman anih chuan a pawi thin!" Garcia chuan a ti hlak a. A thil han tih dan vel hi ka hrethiam tehchiam lo. Garcia hian mi nazawng rin a hlawh loh laiin kei chuan mak takin ka ring tlat a, mi tam takin hetiang fiahna awm lo thil hi dawt mai a ni tiin Garcia thiltih thin hi sawi mah se kei chuan ka ring nghet tlat! Kum 30 chuang Garcia te chhungkua hian tuna kan thiltih tur ang hi a rukin an kalpui tawh a, thil mak a thleng fo reng a ni. A duh nazawng tan tih theih a ni lo thung. A rukin an kalpui ti ila, kan chenna hmuna mi tam zawk chuan an hre fur tho mai. Thenkhatin an nuihzat a, thenkhatin an hlau em em a, a then chuan an bulhnaia awm pawh an duh loh phah hial. 'Tualthattu' tiin Garcia chhungkua hi an sawi thin. Ka tan erawh Garcia hi a thian tha ber a ni a, mi dangin Garcia an ngaihdan-ah ka buai ve lo. Ka mamawh hun apianga ka pan thin, ka nundan leh ka thil tawnte min hriatthiam puitu a ni a, ka tana mi hlu ber a ni bawk.
.
"I buaina chu ka hriatthiam pui che a, mah se, he thil hi i tih chuan vawikhatmah kan inhmu tawh lo ang." Garcia hmel chu ka en a, a ngai hmel khawp mai.
.
"Min ngaidam rawh. Eng thil mah ka hmachhawn peih tawh lo a ni."
"I duh ang hian ti ila.." Garcia chu a tawng ring lo.
"Duh ka thlang thei lo em ni? Ka sawi awmzia chu tu tan nge ka inhlan ka hre thei angem?" Garcia chu a nui sak a.
"My Dear, chutiang thil chu thiltihtheih ni se ka ti. Mah se, a theih lo. Mihring a lo pianchhuah hian a pian duhna hmun leh hun, hausak leh retheih a thlang thei ngai lo. Tichuan ka sawitum chu i hriatthiam ka ring."
.
"A tha e. Chutiang pawh chu ni se, ka rilru ka sawh sawn tawh dawn lo." ka awki atangin ka tumruh zia a hrechiang khawp ang. Garcia hmel landan atang chuan ka duhdan min zahsak a, min dan tumna a nei tawh lo tih ka hre thei.  Ka duhthlanna a ni a, mahni inthah a boral tawp ai chuan tuna ka thiltum hi chu a la tha zawk tho tho tih min hriatpui a ni mahna le. Tu tan mah thiltha thlen lova thih bo tawp ai chuan midang tan thil tha thlen theia boral chu a tha zawk reng a ni!
.
"Anih chuan ngun takin ngaithla rawh. He thil hi han en teh." Dawhkan-a bawm awm chu arawn lek chhuak a, hmeichhe nalh tak, hnathawhna hmuna awm lo lang chu thaw halhin ka en a. Bawma lo lang hmeichhia chuan lehkhapuan-ah hian eng emaw a ziak melh melh a, a awmna hmun chu darthlalang in ni maiin a lang. A hmel ka hmuh chuan ka phu deuh zawk! Ka hmelhriat ngai pawh ni lo, ka hmel ang chiah chiah pu hmuh chu thil mak tak a ni ve reng alawm.
.
"He hmeichhia hi lung tha lo a nia. A natna neih atang hian i chhanchhuak dawn tihna a nih chu. I taksa ah natna emaw insawiselna i nei lova, i duh ang tih puitlin anih rualin tuna i hmeichhe hmuhlai natna hi a bo ve bawk ang." Garcia chuan min rawn en in a tawng leh charh charh a.
.
"A mak hle mai. Inzai tawk lovin keimah vang hian a dam thei ang maw? A hriselna lam ni lovin eng dinhmuna awm mek nge? A chanchin dang tlem tal ka hrelawk thei em? Tuna ka ro neih zawng zawng hi atan hian dah ta ila.. Chu chu a theih em?"
"Chu thil kher chu i hriat a thiang lo tlat mai. I zawhna pakhat, Inzai tawk lo va dam thei tih khi chu tun chauh lo pawh hetiang thil hi ka ti fo tawh alawm." Garcia'n atih chuan ka lo thaw hak a. A tha e! Uluk takin a inngaihtuah tawh a, tunah hian a tihtur chu tihnghal a duh..
"Ka hriat ngei ngei tur thil dang ala awm em?"  Ka boral tawh ber chuan eng thil nge hriatzui ka la mamawh cheu le?
.
I tum lui talh ang maw? tih melhin Garcia chuan min en ran ran a, ka rilru ka thlak dawn lo tih a hriatthiam hnu chuan a thaw hak a.
.
"A tha e. He hmeichhia nen hian in hming a inang chiah a, tuna i  ngaihtuahna leh i finna hi chu he hmeichhia hian a chhawm thei mahna le! Helai hmun atanga i bo rualin helai-a i hun hman dan leh thil engkim hi theihnghilh a ni vek mai ni lovin i  sulhnu reng reng i hnuchhiah dawn lo a, engmah lo mai ini dawn tihna a nih ber chu. Thil mak a thleng anih erawh chuan he hmeichhia hian a hrechhuak leh mai thei bawk. Mah se, tun hun-ah hian a rawn let leh tawh dawn lo tih hrechiang ang  che. Tuna nangmah hi i ni leh thei tawh dawn lo. Kha hmeichhe hnathawk lai i hmuh nihna kha i nihna tur a ni tawh. Nang chu i duh ang ngeiin i boral dawn, i awm tawh dawn lo tihna a nih chu. Kha hmeichhe tan khan mi hlu tak erawh i ni ang. A natna zawng zawng a dam phah anga, chuan, ka sawi tawh ang khan thil mak a thleng anih chuan tuna kan inbiakna leh he thil i tihchhan te hi he hmeichhia hian hrechhuak leh ang. Hriat duh dang ila nei em?"
.
"A tha e. Tuna ka nun dan hi ka kalsan thei a nih chuan ka lawm vek. He hmeichhia pawh hian engmah hrechhuak tawh lo se tih hi ka duh dan a ni. Ka inpeih e. Chawlh ka duh." tiin Garcia chu ka en a, a ni pawh a lo bu nghat nghat bawk.
.
"Hetah hian rawn mu rawh le."
.
Dawhkan-a ka mut fel hnu-ah Garcia chuan bawm fim ral lain a chhunga tui rimtui tak awm chu a bun chhuak a, ka taksa ah chuan min theh thet thet a. A tihtur a tihzawh hnu reiloteah ka taksa chu hahdam takin a awm a. Ka kut ka en chuan ka ral mek tih ka inhria! Thil mak a ni.. Ka taksa ngei mihring mit hmuh theih loh tura a ral mek hmuh chu thilmak tawpkhawk a ni reng a ni. Garcia nui sak hmel chu chiang lo riai in ka hmu a, ka tek chhuai chhuaiin engkim a thim a,  ka chawl ta.!
.
"Ka hmangaih, ka thian. Allison Caren Adams tan malsawmna ini a, he thil hi mi ten hrethiam lovin mak tisuh se. Dawi thil a ni lo va, mi tha tak midang tana a inhlanna a ni zawk e. Mihring nihphung pangngai pel thilmak engmah a thleng lovang. Ka thunun theih chin a ni lo nain Allison hian nangmah vanga buaina a tawh loh ka beisei e." Garcia chuan a thiannu a awm tawh lo tih hria a phun sep sep chungin chair lian leh nawm hmel zetah chuan hahdam takin a thu pil ta thaih a!
.
6.JULY – 10:00PM – MANHATTAN, USA*
.
Ka theihtawp a chakin ka kal hlawk hlawk a, ka hnunglam a ke pen ri  chuan min rawn hnaih telh telh bawk. Ka thin phu nasa lutuk vang chuan ka awm ka dawm a, ka hlau a ni tih tilang tura thawm chhuah erawh ka tum lo bur. Ka tlan hah vak anih chuan ka lungphu a dik dawn lo tih ka hrelawk nain tlan lo thei lo dinhmunah ka awm dawn a ang khawp mai.
.
Dik tak chuan tunang hunah hian ni dangah pawh ka hna atangin ka haw zauh zauh a, tuna thil thleng ang hi a thleng ngai lo. Sarah min sawmna kha lo hnar kual lo ila hetiang thil hi ka tawng lo nimai tur.. Vawiin kher a ka car ka keng lo pawh hi tuna thil thleng tur ai ve reng hi a ni ngeiin ka ring.!
.
Office ka chhuahsan khan dar 9 a pel tawh a, zan khawthim hnuai-ah hmeichhia mahni chauh a kal hi a him tawk lo tih pawh ka hria. Zan lama Manhattan kawtthler thenkhat tawp zia leh pawisak nei lo an tam zia te, thil rapthlak tak tak thleng te pawh ka hmu in ka hre fo thin. Chung thil rapthlak tak tak thleng thin te chu ka tawn ve turah ka dah chhin ngai lo. Zanin hian ka chungah thil thalo tak a thleng ngei dawn a nih hi ti a ka ngaihtuahna chuan min hlauhthawn zual tir bawk. Hnunglam a hawi let duh chiah si lovin ka mitsir in ka hnunglam ka en a, mipa pathum an ni. Min rawn pan ding khawp mai bawk.
.
Tunah hian ka tlan vak a nih chuan emaw min zuitute hian min man hman lo emaw a nih chuan minute 15 vel hnuah ka chenna hmun ka thleng thei ang.. Chutiang a hunrei chu ka tlan thei kher lo maithei.
Ka bag ah lai chu ka vuan nghet sauh sauh a, ka taksa rawn sa pup chu ka hrethiam chiah lo. Thawk ka la hawk a, ka tha neih zawng zawng sawmkhawm in ka tlan ta phut a. Ka tlan rual chiahin min zui tute pawh chu an rawn tlan ve nghal bawk.
.
Min man hman tur a ni lo…  ti rilru mawlh mawlh chungin ka tlan zel a, ka mit a phe vek tawh in ka hre hial. Thil sakhat engemawni ka sut chuan ka te that a, ka tlu chiang khawp mai. Hlauthawng zet in ka thaw hlawp hlawp a.
.
‘I tha em?’
Ka tlukna bula ding chungin mipa pakhat hian min bia a, min kaihthawh pawh a tum der lo. Ka tlan pelh tawh lam kawngpui chu ka en a, mihring ka hmu lo. Ka hma lam hla vak lo ah chuan Club lun zet a awm tih ka hrechiang a.. Tuna ka that leh that loh min zawttu pawh hi mi hlauhawm a ni thei tho. Ka mumang nise harhchhuak hlauh ila ka tiru takzet!
‘I tha em?’ tih ri ka hriat leh chuan ka hawichhuak a, min be tu chu a hmel ka hmu thei lo.. Hmuh pawh ka chak lo. Ka chhan loh avang chuan a ngawi leh chut a. A landan chuan thil sakhat ka su ni a ka hriat kha amah hi a ni.. ! Ka sut vanga na nei ang pawhin a awm lova, a pian zia en chuan thil awmlo vak pawh a ni chuang lo. A palian in a inphut tawk hle tih a hnunglam atanga eng in a rawn chhun a, a ruangam atang chuan a hriat mai. Rawn kunhniam in ban tha chak zet chuan ka banbul ah min rawn vuan in min kaitho a. Ka dinchhuah rualin min vawnna chu rang zetin ka paihthla nawk a.
‘I va tlanchak em em ve’ a aw ri ah chuan nuihza a ang!! Nuih tiza tur thil a awm pawh ka hrelo. Ka hlauhthawn tehreng nen..
‘I lo hmu lo a mi? Ka hnungah mipa pathum in min rawn um kha..’ ka tawng khur dar dar a, min nuihzat anga a lang chuan ka thin a tirim tih ka thup hauh lo bawk. Ka thinphu nasa lutuk erawh a zia tawh deuh. A thle nghat a.
.
‘An kalsawn tawh..’ Ka hlauh tehreng nen engahmah ngailo ang maiin a tawng a..
.
‘I tha em?’ ka tha tih lantir nan ka bu nghat a. Tunang huna khawlai a hmeichhia hlauhlawp a tlanchhia chu mi pangngai ah min ngai lo ngei ang..
‘’Ka kal ange’ min chhanna pawh nghak lovin ka kalsawn nghal a. A ni kha lo awm hlauh lo se chu misual te khan min nangching ngei ang. Lawmthu hrilh awm tak ka ni a, min nuihzat anga a awm khan lawmthu hrilh min ti chak fahran lo a ni e.. Hla deuh tak atanga ka hawilet leh chuan car chhungah a lut a, chak zeta a  tlanchhuak lai ka va hmu hman hram a ni..
A pawi lo ve…
.
Chak zet a kalin ka in ka thlen a; kawngka ka kalh hnu chuan ka thaw huai huai.. Zan thil a nih tawh chuan hmelhriat sa nilo taxi ah ka chuang ngam ngai lova, a chhan pawh ka hmelhriatte chunga thil thalo thleng ka hriat tawh vang a ni.. Ke a kal pawh a lo him chuang lo a nih kha.. Khatiang thil kha vawikhatmah a thleng leh tawh lovang.. Car ka keng lo a nih pawhin ke chuan ka haw tawh ngai lo anga, taxi pawh ka la hek lo ang.. Ngaihtuah zawm turin ka chau lutuk…
.
Tui sa tha ver vawr a ka inchiah vang vang hnu chuan mu turin ka insiam a, ka unaupa ka biak leh hnuah khum ah chuan ka inthawlh ta kak a. Oh! Thil mak tak a ni.. Chak taka ka tlan lai leh in ka thlen a ka chauh hnep pawh khan anih dan tur pelin ka lungphu a danglam miah lo. Nia, ni dang ang chu ni se lungphu chawlin ka thi thei hial ang chu.! Ahma ai chuan ka dinhmun a tha tawh a ni ngei ang.
.
.
‘Nizan I rual a ka haw lo kha ka inchhir takzet..’ ka hnathawhna hmun ka thlen rual deuhthawin Sarah bulah chuan nizan lama ka thiltawn ka hrilh nghal mawlh mawlh a, min hlauhthawnpui hnuhnawh khawp mai. Hnathawh tur thil pawimawh tak tak in min hmuak a, rei vak lo kan inbiak hnuah ka cabin ah ka luhsan a.
.
‘Tunah inhnuai ah mikhual kan nei a, nangmah ngeiin zu hruai la ka office ah rawn hruai chho ang che.’ Dan pangngai te in ka hnathawhna hmuna kan hotu ber aw khauh far leh thupe aw zet chu ka hre lehnghal pang a. Mahse ngaiah ka neih tawhin ka hria. Ka thawhna company neitu Mr. Atkinson hi mi dawhtheilo leh mi ngeng, mi khawngaihna tlachham tak a ni tih hi mi tam zawkin an hriatdan leh an sawi thin dan a ni. Ka tan erawh chuan a letling chiah a ni thung. Mi taima leh thawkrim, a thiltum a chiang tak a ni a, mi thatchhia leh zelthel tan a company ah hian hmun a awmlo hulhual tih ka hrechiang bawk. Tawngkam hriam tak leh khauh tak tak hmang thin mahse a chhungril ah chuan nem na lai a nei ve tho. Tumkhat chu tihpalh thilthu tak meuhin a mittui tla lai ka hmu tawh a, chu chu kum 2 liam ta khan a ni. A nupui nen an inthenna vanga a buailai ni ta bawkin ka hria. An nupa kar buaina erawh tuman kan hriatpui lo.
.
‘Aw le, Boss..ka kal nghal e..’ thudang sawi lovin intercom chu a titawp nghal hmuk a. Heipawh thilmak a ni chuang lo.
.
Ka thutna atang chuan thovin ka pawnfen ka zut mar zauh a, inhnuai pan turin cabin chu ka chhuahsan a.
.
‘E, aw le.. Miss Adams hian a hruai thei ang che’ reception counter ka thlen rual in kan receptionist pakhat Big Bee tia ka koh fiam thin chuan a hma a ding mipa chu hmuhnawm tih hmel zet hian a en dauh dauh a..
‘Alli..’vawi engzat nge hetianga min ko tawh lo tur hian ka hrilh pawh ka hre seng tawh lo. ‘Mr. Giovanni hi Boss hmu tur a nia..’
‘Aw le.. Mr. Giovanni min lo zui rawh’
Mr. Giovanni chu en chiang lem lovin Elevator lam hawiin ka inher a, ka hnunga ke pen ri thlap thlap ka hriat  chuan  ka mi hruai berin min rawn zui tih ka hria. Rem vaklo chunga hawilet in Big Bee chu ka va melh a, awmze nei lo zet hian a rawn meng phar vak ringawt.. A awmdan atang khan Mr. Giovanni hian a hip hle tih ka hre mai..
.
Elevator chhunga kan awm hnu chuan a sir zawngin a hmel ka en ve ta chauh.  Big Bee awmdan kha mak ka ti ta lo..! Luca Giovanni..!! A hma zawn enin a ding khawng luh a, a hmel chu a tak run bawk. A sir zawng atanga a landan hi chuan lung ker thiam miin dawhtawk a an ker ang maiin a dik thlap.. Chanchinbu a a landan aiin a takah hian a lang tha lehzual.. Ka thil ngaihtuah hrep chu..! A khabe hmul to siar siar chuan a tilang tha zawk mahin ka hria. A palian tawk tih pawh phat rual a ni lo e.. A dar ka chen pha tawk a ni. A rimtui hman mipa rim fai sar leh cool raih chuan ka hnar a verh hak a. A pianphung chu khawi ah emaw ka hmu tawh thanin ka inhria! Hmu tawh ang chu..chanchinbu a a landan aiin a lang tha zawk tiin ka ngaihtuah zo chauh a.. A suit hak rawng thim lam chuan a pian nalh zet chu a nihdan tur ang thlapin a phuar.. a pheikhawk…inneih zungbun a bun em?? Ohh..hmanhmawh hian..!! Enge maw a zungbun bun leh bun loh ah ka lo buai ang le…!! Zungbun bun leh bun loh en ringawt chu thil pawi vak a ni hran lo. Chanchinbu thenkhat ah nupui hual nei angin an ziak a, thenkhat ah a ruka nupui nei angin..!! Engpawh nise, hetiang zawng a mipa ka en lohna chin hi a rei ta hle mai tih ka ngaihtuah chhuah chuan min deng dawt..
.
‘Ka tling tawk em le?’
.
A tawng chu hrelo ang hmakin ka awm a. A ruk tak chuan ka zak chem chem.. Ka en reng tih hre awm pawhin a awm miah lo a, ka en tih a lo hre reng sia..
.
‘I ti zawm leh thei ang..’ a aw a nuihzatna ri tel vang chuan a hmel chu chiang zetin ka en a, min lo en ve chiah bawk. A mithmul dum hlap chu a  ti che zauh a..
‘Enge maw sawi I nei em..?’ ka tilet ha a.. Eng nge maw ka zam ve ringawt le?
.
‘Zanrei ah khawlai a tlan vak vak I ching tawh lo turah ka ngai’ a nui suk a, ka nghing dawt bawk.. A thusawi mak ka tihna ai chuan a nui hmel vanga nghing ka ni zawk mah.. Rapthlak hian.. A pianphung ka en khan… Ni lo.. Nizan a ka sut pa kha amah hi maw!!??.

‘Lunch eipui ka phu in ka hria..’
.
‘Oh..Nizan.. Engvang in?’ ka ti nghat a. Ka chunga thuneitu ang maia a awm chu ka duh lo. Kan inhre ngai pawh a ni lo va..
‘I nilo tih sawi miah suh..’
‘Chutiang a ni lo.. Ka..’
‘Lunch ei turin ka lo hruai ang che’
Ka chhanna nghak niawm takin min en run a.
‘Ka hre ngailo che a. Bakah hun ka neilo tlat mai’ takzet hian.. Kei lunch ei tura hun neilo chu?? Ka nuih a za zawk. Diktak chuan engang pawhin buai ila lunch ei lovin ka awm ngai lo tluk a ni.
‘I hna vang a nih chuan’
‘Ni lo e.. Ka hna vang pawh chu lo ni se I hnuai a thawk ka ni lova..’ nui lui sangin ka en a. Eng thuneihna mah I neilo tiin ka ngaihtuah zui bawk. Kan mikhual te laka tawngkam mawilo tak hman chu thiltha a nilo tih ka hria.. 25th floor thleng tura hun ka la hman rei ber tum a niin ka hre bawk.
Boss office a ka hruai luh hnu chuan ka chhuak leh vat a, ka awm ve ngaihna tur thil chu nise Boss khan min hrilhlawk ngei ang. Ka cabin a ka luh chuan chair ah ka thu hnawk a.
‘Allison, ka office ah’
Thaw huaiin cabin atang chuan boss office ka pan leh a, thilthleng engemaw a awm a ni ngei ang. Boss office a ka luh chuan inhmachhawn in an lo thu a.
‘Sir?’
‘I hna khawih laklawh lai chu Mr. Paul hnenah lo la mai turin ka lo hrilh ang.’
‘Mahse, sir..’
‘Okay. Mr.Giovanni hnenah hian thil lak tur pawimawh a awm a, I kutah ka dah e.’ nithum chhunga a vawikhat nan Boss chu a nui ve suk. Thil tum tha lo tak awm ang maiin!
‘Sir, chutiang..’
‘A tha e, a tha e.. Mr.Giovanni chhuah rual hian I kal ve nghal thei ang. File ber I lak zawh chuan heta lo kal tawh lovin naktukah I rawn keng mai dawn nia. Oh. Lunch pawh in ei dun nghal thei ang.’ A tih chuan ka lo insehruh teuh mai.
Chhang buai tawh lovin office atang chuan ka chhuak a. Nidang ang chu nise chawhnu pum chawlh ka neih theih dawn vangin ka au chul ngei ang.. Tunah erawh ka lungawi lo hle.. Ah..chu pawh a ni chiah lo.. Ka zam niin ka hria..! Luca Giovanni huhang na zet bula awm chu ka ngaihtuah zawng ringawt pawhin ka hrawk ah min hnawh ut ut thei hial mai. Chaw pawh ka lem thei dawn em ni?! Engvanga zam ve em em ringawt nge ka nih pawh ka hre lo. Oh..Thilmak a ni hleinem..tu hmeichhia nge he mipa hmaah hian zamlo taka awm thei ang..?
Minute 10 aia rei mah ka cabin a ka thut hnu  chuan Mr. Giovanni chu boss office atangin arawn chhuak a, ka cabin arawn pan nghal chat. Ka hmu thei reng tih hria niawm takin cabin pawnah a ding a, a sana a bih zauh a. Abula awm chak niawm taka inpeih sa anga lan ka tum lo. A engamah hmaa ka rilru a buai ringawt pawh hi ka duhzawng a ni lo nghal ringawt bawk. Keimahah hian eng thil nge diklo pawh ka hre love!
Ka chhuah mai loh vang chuan min rawn en in a nui suk a, ka la hmu lo der hmak thung. Kawngka a rawn kik kauh kauh a, dawhkan a paper chu tullo zeta la enlui ngar chungin ka chhang a.
‘Kan kal thei e..’
‘Minute 10 hnuah ka inpeih ang.’
.
Ka dawhkan hmaa chair ah chuan a thu a, a hmel ka en kher ngei lovin min en reng tih ka hria.
Minute 10 aral hnu chuan hmanhmawh duh hauh lovin ka thutna sir a ka coat chu la in ka ha a, dawhkan a ka bag ka lak leh hnu chuan a bulah ka ding a. Ka chetphung zawng zawng chu uluk takin min en tih ka hria. Ka zam lovang..Ka zam tur a ni lo..
.
Ferrari Enzo dum tle zak kan bula arawn din chuan ani chu passenger seat lamah kalin car kawngkhar chu a hawng a, mipa diktak a nihzia tihlan a tum ngei a niang chu. Ngawi rengin a car ah chuan ka lut a, kawngkhar min khar sak leh hnuah driver seat ah rawn thuin chak zet hian kan dawk chhuak zawk a. Ka ip chawih.. Car chak tak tak ho hi ka ngaina ve lo.
.
Restaurant kan thlen chuan buaina awm hauh lovin a bika siam ni awm tak pindan ah kan lut a, midang nena kal chu ni ila restaurant chhung mawi ka tih zia ka sawi mawlh mawlh in ka ring!
‘Inthlahdul rawh’ arawn ti sup a. Engtin nge ka inthlahdul theih ang..?
Eitur duhbik ka nei em tih min zawh chuan menu en chungin an thil siam to ka tihzia ka lo ngaihtuah char char thung. Tlem te te, eitur man pawha mawilo khawp a to, hmundang aia tui bik pawh ni chuang si lo…
Kan bula waiter ding reng  chu French tawng nal zetin a bia a, French tawng hi mawi ka ti viau nain an eitur hming erawh ka hre fuh hleithei lo. Waiter chu bu nghauh nghauh in a kalsawn a.
Eitur arawn thlen chuan ngawireng in ka ei a, ka thu hrilhlawk kha a dik lo.! Ka thil ei chu a tui takzet. Ka hawichhuah chuan che chang lovin min lo en reng a. Ka thil eilai chu dah in ‘enge’ tih melhin ka melh a, min chhang mai lova, a hawisawn miah lo bawk..
‘Hmuh a nuam hle mai’
“Kan ei zawh hian file chu min pe nghal ang che.” Ka ti ta ngawt a. Ner sakin a dar a tiche zauh a.
“File kha chu ka chhuanlam anih kha.?”
‘Anih chuan lunch kan eidun chhan hi enge?’ a thusawi chu engahmah ka ngai duhlo lui.. A awlsam lo khawp mai.
‘Ka duh che.. Lunch kan eidun chhan chu ka duh vang che a ni’
Ka nui hak a. Ka nui ri ah chuan a thusawi ka awih loh zia alang bawk ang..
‘Min fiah thei ang!’
‘Ka awih I ring lo ang chu tiraw?’ mak takin ka inringtawk hle.. ‘Nizan ah kawng ah ka su che a, chuan tunah..’
‘Ka hriatna che a rei tawh..’
.
Ka eitur thial lai chu tawp chawt in a mit ah ka en a, mak ka tih zia ka thup lo.
.
Engtin nge min hriat..? Phat rual lohin keichuan ka hria.. Tunge hre lo ang? Sumdawnna sawirik a nih rualin an chhungkaw hming hi a lang hmasa ber pawl a ni ziah alawm. Helai ramchhung chauh ni lo Italy, England, China a an chhungkaw sumdawnna  te, an chhungkaw chanchin thenkhat pawh tum reng vang ni lovin ka hre nual.. Mahse.. Luca Giovanni hian engvanga min hria nge a nih..!?
TMH!!
CHAPTER – 2
TAKE MY HEART!
By. Thantei_Pautu a.k.a Laura_Sean_Virgo
.
Ka bula awm theihnghilh tumin ka thil eilai chauh chu ka ngaihtuah lui.. Awmze nei lo mai a ni e. Theihnghilh ka tum chuan ka hrereng zawk thin tlat. Thil dang ka ngaihtuah kual a, a sawt tehchiam lo khawp mai.
.
"I phone kha i chhang dawn em?"
.
"Huh..?"
"I phone."
"Oh.."
.
Ka phone ka en a, tunah ka chhang thei rih lo. Ka awmdan hi a diklo deuh hu in ka hria. A ni reng ang chu.. Khaw dang hawi miah lo a min en rengtu hi han ngaih liam mai theih a ni lo tlat atin ni.
.
"Khatia mi en reng kha a mawi lo hle tih i hriat ka ring." ka tih chuan a thu tha-a.
.
"Vawiin hi i doctor hmuh hun a nih kha, ka lo hruai ang che."
.
"Engtin nge i hriat?" ka hmaa eitur awm chu ka ngaihtuah thei tawh lo. Ka hlauthawng a ni. Ka hriselna chungchang leh ka that loh rukna hi tu hnenah mah ka sawichhuak lo va, a ni hian engtin nge a hriat theih? Min lo enthla reng thin tihna a ni thei angem?
.
"Hlauthawng suh, ka tan thil hriat harsa a ni hleinem." A ti liam puat a.
.
"I tihtur chin i hre miah lo a nih hmel. Ka kal ange."
Ka thutna atang chuan thovin ka bag ka la a, alak atanga kalsawn vat vat hi tuna ka thil duh ber a ni. Kawngka-a ka penchhuah rualin ka bulah a lo awm leh hman reng tawh. Nghet zet hian ka banrek ah min vuan a, min vawnna phelh tuma tan buai chi niin ka hre lo. Tum pawh ni ila ka thei kher lo ang. Tharum kan inngah hleih nasa emai.
.
A car a kan chuan leh hnu pawh chuan ka ngawi reng a, boruak ah thil tha lo tak a inmun mek nia ka hriat tlat chu!
.
"Ka tihlau che niin ka hria."
"Thil pangngai a ni lo alawm." ka tih chuan min hrethiam niawm takin a bu nghut a.
.
"Kan sawi that angai anih chu.' tih pahin motor a her a, kan kawng zawh kan thlak ta. Khawiah nge min kalpui dawn ka hre lo.
Boruak thalo inmun mek angin ka hria ka ti taknain min tina tur ang zawnga a chet ka ring miah lo ve ringawt. Ka tan chuan thil mak tak a ni. Tumah..tumah reng reng ka nunah hian awlsam takin ka ring ngai lo!
.
In lian leh ropui zet kawta kan din chuan ka thaw huai a. Helai hmunah hian ka kal zen zen lo va, a chhunga luh phei chu vawikhatmah ka la ngaihtuah chhin ngai lo hrim hrim. Kei ang mi pangngai ve mai hian Giovanni chenna in a kal chhan tur hi ka nei ngai lo hrim hrim bawk.
.
"Hetah hian eng vanga min hruai nge inih?"
.
"File kha hawn ngei i duh ka ring." tia min chhan chuan office atanga ka zui chhan ka hrechhuak leh chiah.
.
A in chhung kan luh chuan ka enkual lo thei lo. Mihring theuh theuh hi kan khawsak a va inang lo tak em! Mahni tawkah hah takin hna kan thawk theuh a, chuti chung chuan kan dinhmun erawh a inthlau em em lawi si a nih hi maw. A in chhunga thilawm ka hmuh theih chin zawng chu a tha ber vek ani ang tih hai theih a ni lo. Mipa chenna hmun tih takah rawng lar tak tak hmuh tur a awm lo a, a zau em em in engkim a awmna tur hmun dik takah a awm thlarh bawk niin a lang.
.
"Ohh! My dear! Eng thil nge ka hmuh hi.. Ka beisei lo reng reng.."
.
Ka inrin hma hauhin hmeichhe sa tha lam hian min rawn kuah thlawp a, kan awmna lam pana a lo kal lai ka hmu miah lo.
Hamhaih zetin ka ding tawp a.
.
"Carina.."
Luca tawng chu hre awm pawhin a awm lo a, min kuahna chu phelhin ka biang tawn tawnah min vuan a..
"I hmel a tha hle mai. Halai hmuna lo kal tur hian engtin nge a hneh theih che? Kan Luca hian thiltha chu  alo hre ve ngei anih hi." tiin a nui zui sak a. A mittui a tling pam tih ka hmuh chuan ka hamhaih lehzual.
.
"Carina, iti hamhaih zo dawn."
.
"Oh..tlangval, i mitmeng atang khan engmah ka hai hauh hleinem.. Lo awm lawk aw.." ka kutah vuanin chiang zet hian min en vang vang a, a nuih leh sak hnuah ka kut chu thlahin a kalsawn a.
.
"Engahmah ngai suh. File chu ka'n la ange." Luca kalsawn chu ka enzui reng a, reiloteah Carina tia a koh nu kha a lo chhuak leh a.
.
"Lo thu rawh.. Lo thu rawh.. Ka nungchang avang hian min hrethiam ang che aw. Ka han hmuh thut che u khan ka hlim em a ni. Eng thil nge i ei duh ang?" a ti leh zung zung a.
.
"Lunch kan ei zo chiah a, ka lawm e. I ngaih ang thil hi a ni lo a nia. Ih, kan inkarah hian engmah a awm lo tak tak." ka ti ngawt a, thu dang han sawi leh mai tur ka hre chuang der lo..
.
"Oh.. Ni love, thla nga liam ta atang khan Luca hian a buaipui tawh che alawm! Ka hria tih a hre hauh lovanga.." nui chungin ka kut arawn vuan leh a, ka hmelah hlauhthawnna a hmu a ni ngei ang. A nui lai chu tawpin thawk ala halh a. "Tih hlauhthawn che ka tum hauh lo a nia. Luca hi ka hrechiang a, mi inthup thei tak a ni tih pawh kei aia hrechiang an awm lovang. Kawngka a in lo lut ka hmuh atang khan thil awmdan ka hrethiam mai a ni. He inah hian amah leh kei bak kan cheng ngai lo va…Aw, amah a lo kal e. Ka kalsan phawt ang che."
.
Luca file keng chunga ka lam arawn pan lai chu ka en a, ka bul a lo thlen chuan file chu ka lo ban vat a. Min pek tum hmel a pu lo.
.
"Helai hmun atang hian chhuah vat ka duh a nia."
.
"Ka hruai ang che."
"Ni love. Keimahin ka kal thei. Ngaihtuah ka ngailo."
"Min ngaihthah luih tum suh ang che." atih chuan a thusawi awmzia hrethiam lovin ka en a, a mitmeng chu hmulo ila tha zawk tur!!
.
Engtin nge ka hnial theih tak ang? Hetiang khawpa mipa mi hip thei leh mi hneh theihna nei nasa hi ka la hmu ngai lo va, amah hnar tur hian chakna ka nei tawk dawn lo tih ka inhrechiang em a ni!  Amah ngaihven lo leh ngaina miah lo anga lan ka tum hi ka hlawhchham dawn chiang a ni e.
.
Ka ngaihtuahna hre thei niawm takin ka banah min rawn vuan a, a in ropui zet atang chuan Hospital panin kan inzui chhuak leh ta. A mizia ngeng ru tak si leh dam thlup hi ahmaa ka lo rinlawk ve dan nen chuan inpersan tak a ni.
.
Dr. Corenzo nen inhmachhawnin kan thu a, ka result en in mak tih hmel tak hian min en leh thin a.
“Ka tha em?”
Bu nghat nghatin a thil ken lai chu a dah thla a.
“I tha e. Thilmak tak a ni. Hman zanah hah taka i tlan thu i sawi khan ka lo hlauthawng hman viau a, mah se, tuna a land an chuan i natna hi a dam var anih hi.. Ahmaa i damdawi ei kha hei hian i thlak anga, karleh ah min rawn hmu leh dawn nia. Hlauhthawn tur engmah a awm tawh lo ve. Thilmak tak a ni.. Lawmpuina ka hlan hial teh ang che..” a hmel ka en chuan keipawh ka ngaih a tha ta khawp mai. A lehkha min pek chu ka lo la vat a.

.
KARHNIH HNUAH*
.
‘Luca..helai ah hian enge kan tih dawn?’
.
Min chhang lovin ka kawngah min kuah a, a lamah min pawthnai a, a rimtui hman amah nen a inhmeh hluah hluah chu ka hip vang vang a. Ka khup a zawi hnawk thei nia..!!
“Min nei rawh.. !”
A  mitmeng thuk raih chuan  min en a, hamhaih zetin ka enlet thung a!! Ka beisei hauh lo.. Ka beisei lo takzet. A la hma mah mah niin ka hre bawk.. Karhnih chauh kan la inhria a, tuna inneih sawi chu a la hma mah mah.. Ni lo..ka hrelo.. Ka thinlung a ka awm dan leh ngaihtuahna hi ka hrethiam lo.
.
“Ka..I hriat kha.. Karhnih chauh kan la inhria a..”
.
“Karhnih chhung chu a tawk viau a ni.. Khawngaihin min nei rawh..”
A fiamthu a nih ringin ka en a, mahse a fiamthu hauh lo mai. A hmel chu a tak run a, min en chik takzet bawk. A ban tha chak zet leh khauh tang chuan min kuah nghet sauh a. Hei baka thlakhlelh dang hi ka nei chuang em ni?? Harsatna ka neih leh hlauhthawnna ka neih thin zawng zawng theihnghilh vekin a bulah hian ka nui thei a, lemchang lovin zalen takin ka awm thei bawk a.
.
Nia..ka hrechiang… Karhnih chhung khan ka hmangaih tih ka hre vek tawh. Diktak chuan zan thim hnuai a ka sut hnu atang khan ka ngaihtuahna a chhuahsan tawh lo hrim hrim zawk a ni..
 Ka hnial thei miah lo.. Min hipna a chak em a.. Engdang nge ka tih chuan ang.? Engkim hi a thleng chak lutuk a ni. A awmdan, a chezia, ka laka a awmdan leh a mitmeng thuk raih a min melh thin dan zawng zawng te.. Karhnih liamta chhunga kan hun hmandun dan zawng zawng te.. Uluk takin ngaihtuah nawn pawh ni ila tuna ka duhthlan ang hi ka thlang nawn tho ang..!!
.
“Ka nei ang che..”
A tihthin dan pangngai..ka hnar theih ngai miah loh danin min hnaih a, ka hmuiah duhthawh zetin min fawp a, a nghawng ah kuahin ka chhanglet ve bawk. Amah a nih tawh chuan min fawp a ni ringawt lo a, neitu a nihna inhre tak ang chiahin a che thin.
.
Ka nun ah a vawikhat nan thiltha a thleng ve dawn ta a nih hi. Naupangte ka nihlai atang tawhin vanneihna hi ka lamah a tang ngai lo va, harsa taka nungin ka unaupa, ka nau chiah nen he khawvel hreawm takah hian kan lo thanglian a, chak taka ka awm a ngai tih hriain ka hun tawng hreawm tak tak ah pawh ka tap ngai lo. Mittui tihtlak hi ka tana thil thiang a ni ngai lo bawk. Ka nau tan chak taka ka awm a ngai reng thin. Tunah hian kum 25 ka tling tawh a, ka nau pawh kum 21 a tling ve ta chiah. Harsa tak chunga lehkha ka zir hram hram vang leh ka theihna zawng zawng a ka beih thin vangin record ka nei tha a, tunah hian Company lar takah hna ka thawk ta reng a ni.
Thla nga liam ta khan ka unaupa pawhin offer tha tak a hmu a, helaia a hnathawh kalsan in Australia ah a kal a, dinhmun pangngai takah kan awm ve thei ta.
 .
Kum 12 leka upa ka nih lai khan ka nu leh pa te an inthen a, kan unau in ka pa bulah kan awm thin. Ka nu kha a kalna chin kan hre ngai lo va, kan ngaihven zui hek lo. Tunhnu a ka ngaihtuah leh hian ka nu khan mipa dang a um tih ka hrethiam chauh a ni.
.
Ka pa khan ka nu awm lo kha a tuar takzet a, a hriselna tlahniamin an inthen atanga thlaruk a ral meuh chuan engmah ti thei lo vin a awm tawp a, rei pawh kan inenkawl hmain min chawlhsan ta a ni. Ka nu kan bula a chenlai pawh khan vawikhatmah alak atangin hmangaihna leh duatna ka dawng ngai lo. Ka unaupa erawh a duat em em thin. Rilru na taka ka awm pawhin mi dang hnenah ka sawi ngai lo va, hlimna ka neih pawhin ka sawi ngai hek lo. He khawvel a thiantha leh rinngam ka neih chhun chu keimah chauh hi ka ni thin.. Ka unaupa hi ka hmangaih em em bawk. Mahse ka buaina a hriat ka duh ngai lo a, ka chinfel hnuah chauh ka hrilh thin. Tuna ka hnathawhna hmun a ka thawhrei tak deuh hnu hian Sarah hi ka kawmngeih a, a rilru hahna leh a buaina te min hrilh fo thin hnuah kei ngei pawhin a bula titi nuam ka ti a, ka inhriat hauh lohin ka ngaihtuahna leh ka huntawng te ka sawichhuak ve ta fo mai.. Mahni chauh a tuar ai chuan han sawichhuah hian tlem chuan min hnem ve thei tih ka hre ta bawk….
.
 Luca Albizzo Giovanni, a nupui ni tura min sawmtu hi tunge a nih ve thung le?? Hmeichhia te duhthusam, Giovanni Corporation neitu, hmeichhia kei ka ni inti ve chin leh mi langsar tak tak in neih tuma zah pawh dawn lo a an zar buai huai huai reng a ni. Engkim a nei tiin sawi ila amah hmu tawh leh hretu chuan min pawmpui  vek ang. A hmel tha a, a mitmeng thuk raih leh a aw mipa hluah hluah te, a pian nalh tak leh a mize ngeng ngulh te. An chhungkaw sumdawnna rochuntu tur a nih vang ringawt pawh hian hmeichhe tamtak chuan an ngaihven huai huai reng a ni. Italian chhungkaw hlun leh mi zahkai tak an ni bawk..
Hun reilote chhunga ka rinngam mihring awmchhun hian a nupui ni turin min sawm a, engtin nge ka hnial theih tehlul ang? A dinhmun leh thildang zawng zawng chu lo dahtha ta ila, a nupui ni tura min sawmna ka pawm chhan chu ka hmangaih vang chauh a ni. Ka dam chhung hian a bula hun hman aia chak ka nei kher lo vang.. Nia, ni tina min kuah leh min hmangaih thu min hrilh fo turte in ka duh a, amah ang tak tak fapa neih te pawh ka duhthusam a ni tel bawk ang chu.
.
Ruah a rawn sur a, a kawrchung hak lai chu phelh in ka huh loh nan min tuam vat a, ka dar ah min kuah in a car dahna lam kan pan nghal a..
.
“I huh hman em?” Car a kan thutfel hnu chuan min ngaihtuah hmel takin min en a, driver hnen ah chuan tlanchhuak turin signal a pe zauh bawk a.
“Huh hman lo..” a kawrchung chu phelhin ka malchung ah ka dah a..
“Vawt I ti a nih kha, I hnar a sen vek alawm.. Cherry..” alam ah min pawthnai in min kuah a, ka hnar ah min fawp zauh a,  a kut chuan ka biang a tuai hauh hauh bawk. Cherry tia min koh hian mak takin ka hlim veng veng thin.. Engvang a Cherry ti a min ko nge a  nih ka hre lo a, ka duhzawng tak a ni tih erawh ka chiang e.!
.
Ni 10 chhung zet chu ka unaupa ka be pawp thei tawh lo a, kan inbiak hnuhnun ber khan a hnaah a buai zual dawn thu a sawi ngei a, engpawh nise ka pasal neih tur thu hi chu eng hunah pawh hria se min lawmpuiin min pawmpui thlap ang tih ka ring. Ka chhungkaw neihchhun ka pasal neih ni a a rawn tel thei lo tur anga ka ngaihtuah pawhin hreawm ka ti. Aman min rawn bia a nih loh chuan han biak pawh dan tur ka hre der bawk si lo.
.
Ka phone a rik chuan ka phu zawk.. Caller ID ka en chuan ka nui sak a..
.
‘Cherry, inhnuai ah ka awm a, I inpeih tawh em?’
.
Oh..vawiin hi Luca nu leh pate ka hmuh ni tur a ni. Engtin nge ka theihnghilh theih zawk!! Thildang ngaihtuah tur a tam lutuk vangin ka lo theihnghilh daih a ni.
.
Ka cabin atang chuan chhuakin inhnuai ka pan nghal a. Ka huntawng hrethiam in kan Boss pawhin min hrethiam khawp mai.
.
Luca chuan min hmuh rualin min rawn pan vat a, kan office-a hnathawk hmeichhia zawng zawng chuan kan inkawp tih an hre vek a, vannei min tih thu min hrilh fo thin. Ngaisang tih hriat zetin Luca chu an en thap tih pawh ka hria. Nuam ka lo ti veng veng..
.
Ka hmui ah min fawp zauhin pawn lamah min chhuahpui a. A bula ka awm tawh chuan min kuah loh leh ka kut ah min vuan tlat thin.
.
‘I lang nalh hle mai..’ nui sang in ka en chho ha a. Pheikhawk sang tawk tak ka bun chung pawhin chen lo tak ka ni..
.
A nu leh pa chenna hmun kan thlen a, car atanga ka chhuah chuan ka thaw hliai a.. Hmun zawl zau takah phul a hring cham dup a, an in chu a var vek niin hmanlai lal in nimai awma mawi a ni. Hmanlai lal in ang ka tih rualin engkim chu a tunlai em em vek thung.
.
Inchhung kan luh chuan nu pakhat hian min lo chhawn vat a.
.
‘Sir, helam ah..’
.
Min lo chhawntu chu kan zui a, Luca chuan ka kawngah min kuah in ka chal ah min fawp a. A awmdan chu ahma a a hahdam hmel ang kha ani lovin ka hria a, zawhna zawt mitmeng in ka en a, a lu a thing ringawt a.
.
‘Engkim a tha vek ang..’
.
‘Ka hria alawm’ ka tisap a.
.
Thing kawngkhar lian zet leh hnum hlurh chu hawngin min hruaitu chu a kalsawn nghal a. Room chhung kan luh a mi pahnih lo thu ka hmuh chuan Luca nu leh pa te anni ang tih ka ring nghal. A nu chu a inchei nalh thlarhin a thu ngil at a, a bulah Luca old version.. Luca pa tih hai rual loh a thu bawk. Min hmuh chuan a pa chu dingchhuak in min rawn pan a, a nu erawh a che eih lo. Uluk zet hian min en kal a, a zamawm khawp mai.
.
‘Cherry, ka pa Antonio Giovanni leh ka nu Nina Giovanni te hi hmelhriat rawh le..’
.
‘Mr. Giovanni kan inhmu chu ka lawm hle mai’
.
‘Oh..Luca min koh ang hian ngatinge min koh ve mai loh ang’ Ka bulah chuan rawn dingin min rawn chibai a. A hmel landan leh a tawngdan atang chuan thupe thang tih a hriat hle bawk.
.
‘Ka lawm e. Papa’ tim ru deuh takin ka ko a, a nui suk a. A mitmeng a a ngilneihna langchhuak zauh chu ka hmuhhmaih lo.
.
‘Hetah hian rawn thu teh le.. Lo inkawm teh ang’ Luca nu thutna lam chu ka en vat a. A thutna bulah chuan thu turin min duh lantir nan a thutna bul chu a melh zauh bawk a..
.
‘Chibai le.. Mrs. Giovanni..’
.
‘Mama’ ka koh dan chu min lo tihdik sak vat a. A landan aiin a sual lo a niang, a nui ve ta bawk. A thutna bulah chuan ka thu a, Luca pawh ka kut vuan in ka bulah a thu bawk a..
.
Luca pa chuan meeting pawimawh tak a kal angaih thu leh kan inhmuh leh thuai a beisei thu sawiin min chhuahsan a. Luca hian an chhungkaw sumdawnna tam zawk enkawl mahse apa hian chawlh mai a duh rih loh thu ahma khan min lo hrilh tawh a ni.
.
‘Ka la ring thei lo.. Ka fapa hian hun reilote chhungin a hmeichhe duhzawng tak a tawng ang tih tunge hre lawk ang le..’ tiin min entawn vang vang a..
‘Mama..’
.
‘Ka hria e, ka fapa. Hlim taka awm turin ka duh che u..’ a ngawi dat a.. ‘Anih chuan Allison, in chhungkaw chanchin min han hrilh teh le?’ ka beisei lawk ni tho mahse min zawh dan ki vang chuan ka ip ru zawk lo thei lo.
.
‘Ah..ka pa a boral tawh a..’
.
‘Ka tihpalh..’ a mitmeng a tuarpuina tilang hauh lovin Luca nu chuan a awm a dawm a. A pasal awmlaia  a nungchang leh tuna a nungchang hi a danglam daih.
.
‘A pawilo.. Ka chhungkaw neihchhun chu ka unaupa chauh a ni tawh..’
.
‘A ni chu tunah khawiah nge a awm le?’
.
‘Australia ah hna a thawk a..’
.
‘Mama, I duhtawk thei tawh em..? Titi dang sawi teh ang’ Luca tawngdan atang chuan a nu awmdan vangin a lawm lo tih a hriat a, ka awm a nuam lo takzet..
.
A nu chuan Italian tawng in rang zet hian engemaw a sawi a, a nui zui hak hak a.. Luca pawh a nuih ve tak  tho vangin thil tha lo lam a sawi lem lo a nih ka ring..
.
Lunch kan ei ho zawh hnuah Luca nen in atang chuan chhuakin, a naupan lai a a hun hmandan leh an infiam thin na te min kawhhmuh zel a. Luca, mipa naupang duhawm tak infiam a, hlim taka a tlankual vel tur ka ngaihtuah chuan ka nui sang a. Luca nen hian fapa nei ta ila, amah ang chiah hi ni ta se.. Mipa naupang sam dum hlap leh mitmeng mawi tak hlim taka tlankual lai mitthla chu thil nuam tak a ni..
.
Dinner kan ei hnuah Luca chuan min thlah a. Ka in kawt kan thlen chuan car atanga chhuk lovin kan thudun vang vang a, Luca chuan ka kut vuan in a fawp zauh a.
.
‘Ni nuam tak min hmanpui vangin ka lawm e..’
.
‘Kanu awmdan vang khan hreawm I tihloh ka beisei’
.
‘No. thil pangngai lo min zawt hleinem.. Nu te chuan engkim hriat an duh vek alawm..’
.
‘Ka lawm e..’ ti supin a lamah min pawt hnai a, min kuah hlu hlu a. Hetianga min kuah apiang hian mak tak leh ka hriatthiam phak bakin ka thla a muang ziah thin.
.
Ka in kawt kan thlen chuan ‘I lo lut dawn em?’ a kawrkilh chu ka khawih niap niap a, min kuah nghet sauh in a thaw hak a..
.
‘Ka lo luh ve chuan inneih hma a tih loh tur thil ka tihpui ngei ang che..’
.
‘Ka hrelo..’ ka awmdan chu siamrem in a hmel ka en a, eng a that loh vangin a hmel ka hmuchiang thei lo. A lang thim raih a.. ‘Ka hmangaih che’ a biang ah chul in a hmui ah ka fawp a.. Eng thil nge ka tih mek hi ka hrethiam bik lo. Tun hi keima thu ngei a ka fawh hmasak berna a ni! Mahni ngaihzawng te fawh hmasak chu thilsual a ni hleinem. Ngaihzawng chauh pawh a ni tawh lo, ka pasal hual a ni tawh. Duhthawh zetin min fawp let a, min kuahna pawh a thlah hauh lo bawk, ka hnungzang ah min chul chho in ka nghawng hnunglam ah amah ka hnaih lehzual theih nan min vuan a. Eng thumah sawi lo pawh nise min fawh hian a ngaihtuahna ka hrethei niin ka hria.
.
‘Ruihtheih thil chak tak ang mai I ni..’
.
A thusawi vang chuan ka nui hak a.. Inla hrangin a hmui ah ka fawp leh zauh a,.
.
‘Muttui le..’ la nui reng chungin car atang chuan ka chhuak a. Inchhung ka luh hma chuan min thlir reng tih ka hria.
.
Inchhung ka luh hnu a a car tlan thawm a reh thleng in kawngkhar bulah ka ding vang vang a.. Tun aia hlim hian ka la awm ngai lo.. Ka room ah tlanlut in naupang chhia ang mai hian ka khum ah ka lawn a ka let tawp tawp a..
‘Ka thinlung zawng zawng in ka hmangaih che Luca Albizzo Giovanni…’ tiin ka phun sep sep a.
.
A nu chungchang kha chu ngaihtuah hah ngai ah ka dah hran lo. Hmangaih taka ka en tlat chuan ani pawh a danglam ve mai ang. An chhungkaw hausak zia en in kei engmah lo mai hi a fapa nupui atan min lo duhlo pawh nise awm ka tihpui khawp mai. Ka bulah Luca a awmchhung chuan engmah ka hlau lo a, hneh theih loh ka neih ka ring hek lo.
TMH!!
CHAPTER – 3
TAKE MY HEART!
By. Thantei_Pautu aka Laura_Sean_Virgo
..
Ahnu ni 2 chhung chu Inneih na tur buaipui leh thil tul dang neuh neuh vangin ka buai hle a, a theihna apiang ah Sarah pawn min pui bawk. Kan hun neih a tlem vangin a awlsam thei ang berin engkim kalpui a ni a, inneihna ah pawh chhungkua tak tak leh thiantha zual tlemte bak an tel lovang. Luca nen kan inneih tur thu hi media lamah puanzar a nilo a, thil a awlsam phah viau bawk. Media lam hnawksak theih zia hi ka la tawn ve ngai loh vangin engang chiah nge ka hre lo na a, mihring nun tichep rawk thei khawp a hnawksak anni thei ang tih erawh ka ring.
.
Innei tura karhnih chhung inbuatsaihna hun ka neih chu vawiin hian a ral ta chiah. Naktuk atang chuan Allison Caren Adams ni tawh lo vin Allison Caren Giovanni ka ni tawh ang..
.
Ka tana hun pawimawh berah nalh taka ka lan theih nan hma takah ka mu a, mutthilh erawh a awlsam lo. Khum ah ka let kual sek a, thil tamtak ka ngaihtuahna ah a lo lut zut zut a.
.
Ka hmangaih tak pasal a ka neih ni ah ka pa a awm ve dawn lo a, ka nu pawh.. Ka unaupa a awm lo bawk ang.. Ka pa chuan ka pasal hi min hmuhsak ngai dawn lo a, ka unaupa erawh chuan a la hmu ngei ang.. A farnu in ka hmangaih em em hi a unaupa  ang maiin a ngaina ve ngeiin ka ring. Tomas hi naupangte anih lai atangin misual a ni ngai lo a, tlangval puitling a nih thleng hian buaina lian tham leh mi pawisawi a nei ngai hek lo. A fel em em vang leh ka unaupa, ka neihchhun a nih vang hian ka hmangaih em em a ni.
.
Ka alarm ri in min tiharh chuan ka thuchhuak hlawl a, thawhphan nei miah lovin khum atang chuan ka chhuk a. Ka room tukverh bulah kalin tukverh chu ka hawng a, Ni eng lum in min rawn chhun chuan ka mit chhing in thawk ka la vang vang a.. Ka tana ni chhinchhiah tlak leh ka damchhung a ni pawimawh ber pakhat hmang turin ka rilru chu phurna in a khat a.
.
Chawhnu dar hnih a rik meuh chuan inpeih thlap in kan inneihna tur hall kan thleng tawh a, Sarah pawh ka bulah kawrfual senno ha in nalh zetin a thu bawk..
.
‘Pasal I nei mai tur hi ka la awih thei lo..’ a thaw hliai a..
.
‘Oh..Sarah..chu zawng zawng ai chuan I lang nalh takzet.. Vawiin hian I prince charming tur arawn lang ve lo ang tih a sawi theih miah loh..’
.
‘Ka beisei lo..’ a ner nang nang a..
.
‘A eng zawngin thlir teh.. Awmphaw tle zak inbel in arawn lang ngei ngei ang..’
Sarah chu  a nui hawk hawk a..
.
‘Ka kal a hun e.. Tun atanga minute 5 ah kan inhmu dawn nia..’ tiin min kalsan a..
.
Music a ri ruai ruai a, Mr.Spencer [Sarah pa] chuan ka kut ah vuan in maicham min panpui a.
.
‘Tun atang chuan I pa dik tak ka ni e.. Ka fanu’ ka bengbul ah arawn tawng a, ka tumlawk hauh lohin ka mittui a hnam sawk. Inthunun leh vatin hlim taka nui chungin Mr. Spencer chu ka en a, hmuiphun  in lawmthu ka hrilh sap a.
.
Maicham lam ka enphei chuan Luca ka hmu nghal a, a ni pawh a zam ve deuh a nih hmel. Thawk ala hak tih ka va hmu thei. A bul ka thlen a ka kut ka vawn rual chuan ‘Hey..Bellissimo’ a ti sap a. [Bellissimo=Beautiful]
.
Inneih thuchham zawng zawng chu ka thinlung takin ka chham a, thu kan tiam hun chhung chuan Luca lak atangin ka mit ka lasawn lo a, ani pawh a danglam chuang lo..
.
‘Mo hi I fawp thei tawh ang..’ Luca chuan ka hmai khuhna chu hawngin min fawp vang vang a, a inlahrang mai dawn emaw ka tia ka kawngah min kuahin a taksa si thlapin min kuah a, min fawp uar sauh a..
.
‘Luca..Thiana..’ Dominik a rawn phun sup chuan a inlahrang ta chauh a, ka hmai a sa hut hut in ka hre hial..!!
.
Kan inneih min lawmpuina vanga hlim au thawmin a hall chhung chu a khat a….
.
Inneih lawmna hun tan a nih chuan Luca thianpa Dominik chu rawn dingchhuak in kan inneih min lawmpuina thu leh Luca nen naupang te an nihlai atanga an inkawm thindan leh Luca chetchhiatna tlem..ka tana a duhawmna tizualtu ni si te arawn sawi a. Kan zavai mai chuan kan hlim em em vek ni maiin ka hria. Ka hlim em avangin midang pawh hlim ve turah ka ngai a ni maithei.. Tunang hun hlimawm lutuk ah hian tumah lungngai an awm hauh lo ang..
.
Hla mawi zet an rawn play a, Luca chuan ka kut ah vuanin lamtual ah min kaichhuak a music rem chuan  kan lamdun a. An hla play chu a thu ka ngaithla uluk khawp mai. Ka phuah ni mai awm a mawi a ni..!!
~ I’ve never really know what love is
    But whatever it is
    I feel it in your kiss
    You waltzed in like someboby planned it all
    I feel right where I belong
   My knees are weak
    My Heart is strong
   So gimme your word and I’ll give you all I’ve got
   No we don’t have much
   But it sure feels like a lot
*So take my heart and take my hand
 Take my heart and take my hand again and again
 Right where we stand*
Luca chuan ka kut pahnih vuanin a nghawng hnunglam ah min kuahtir a, a mitmeng nungsar leh thim raih ka en chuan enge ngaihtuah ber tur ka hre lo. Ka kawngah min kuahin kan taksa a insi thlap a. Ka thinphu dup dup chu a hre ngeiin ka ring. Sawi thiam phak bak in ka luangliam a, Luca ka hmangaihna chu keimah atangin a luangliam zawih zawih niin ka hria.. Ka ngaihtuahna chuan ka nuih a tiza leh hnuhnawh… Mihring taksa atang hian hmuh theih turin hmangaihna a luangliam zawih zawih ngai emaw ni le??? Ka hmui pet zauhin ka nui a.
.
Luca chuan a awm ah min beitir thlar a, min kuah nghet khawp mai bawk. Ka mit ka chhing a, ka chhip a arawn fawh vang vang chuan ka taksa pumpui a fanchhuak vek. He ka mipa hmangaih hi ka damchhung in ka vuan ang.. Thil thalo leh lungngaihna te lo thleng pawh nise kan inneih thutiam ang khan phatsan lova abula awmreng turin ka rilru in  ka intiam nawn mawlh mawlh a.
.
Inneih lawmna hmun atang a kan chhuah chuan khua a thim tawh a, inneih min lawmpui tute chu halmawi chi hrang hrang hal in kan sir ah an lo ding a. Luca chuan min rawn kuah in min fawp vang vang a. Min pawm nawlhin Car awmna lam chu min panpui a.
.
Car a kan tlanchhuah hnu chuan ka chauh zia ka inhre chiah. Luca dar ngheng in thawk ka la ham ham a..

Ka nghawng a thaw lum ham ham ka hriat chuan chau zetin ka meng a. Ka lo muhil sek a ni ngei ang..
.
‘Kan thleng tawh e..’
‘Umm..’ mutthilh leh tumin ka ngheng hnai talh talh a.
‘Cherry, car ah hian riah I duh zawk a nih pawhin a pawi chuang lo a..’ mitmeng awmze nei zet hian ka awm zawn atangin min rawn melh chho a, a nui suk bawk..
A hmel tha zet chu ka en reng a, a nui hmel chu a reh riai riai a.. Ohhh…he mihring duhawm lutuk hi engtin nge ka tih dawn le..!!
.
Harhchhuak thut niawm takin car atang chuan a chhuak a, ka thutna lam side ah chuan rawn kalin kawngkhar min hawnsak a, ka chhuk rual chuan engmah sawi lovin min pawm nawlh a.
‘Luca, kal theilo khawpin ka chau hleinem..’
‘Shh..min tihtir rawh..’
.
Inchhung kan luh chuan a lo eng sa pap a, in mawi tak a ni. Pawnlam landan kha  ka lo enchiang lova, inchhung erawh bang rawng hnawih leh an cheidan zawng zawng a tunlaiin a romantic raih raih khawp mai.
.
Inchung pan chhohna tur step ah chuan min la pawm reng chungin min chhohpui a, kawngkhar pakhat chu a ke a hawngin room ah min luhpui a. Khum lian zet lo awm ah chuan dimte in min nghat a..
.
‘Intihfai phawt I duh ka ring.. I duh chuan kan tirual thei bawk a..’
Ka kawrfual hak chu siamrem in khum atang chuan ka chhuk a. Mo thuam ka la hak vek avangin keimah chauh chuan ka phelh thei dawn lo tih ka hrechiang..
‘Tirual ila..’ min rawn en zawk a, ka fiamthu tih hriain a nui suk a. Ka kawngah min rawn kuah in zo zet hian min chawi kang nawlh a..
‘Aaaa…ka fiamthu tih I hriat khaa..’ ka nui awr awr a, a ni pawn min fiam tih ka hria. A nui ve hawk hawk a. A nui ri hi hriat fo ka duh reng a ni. Chhuat ah min din tirin uluk zet hian min en a, a kut chuan ka biangah min vuan in a nui hmel chu a reh riai riai a, a hmel chu a tak leh ran tawh. A mitmeng de zawk chu ka hrethiam chiah lo. Min thlakhlelh zia thup hauh lovin min kuah vang vang a. A kawng ah nghet takin ka kuah let ve bawk a.
.
‘Ka kawrhnung hi min phelh sak la, ka va inbual hmasa ang..’ min kuai herin ngawireng hian ka kawrhnung chilhna tam zet chu a phelh mual mual a. Ka nghawng hnunglam a hmui lum thar thar in a rawn sik chuan ka thaw hak a, inher in a nghawng ah ka kuah a, a hmui ah ka fawp zauh a. Min khawih leh hma a inla hrangin bathroom pan chuan ka kal dawr dawr a. A nui ri hak chu ka hre hman..
.
Ka inbual zo bathroom atanga ka chhuah chuan khum ah a lo mu a, a thawmhnaw engmah a la phelh lo. Khum bulah dingin a hmel chu ka en vawng vawng a. A mithmul dum hlap te, a hnar dik thlap leh a hmui nalh zet te. Hetiang mipa ka nei hi mi vannei tak chu ka ni chiang e. Ka aw ka thian kharh a, ka thawm vang chuan meng in a thuchhuak nghal a.
‘I muhil emaw ka tia.. Ka zo chiah a’ ka lai deuh ringawt lehnghal. Kan innei zo chauh a, helai hmunah hian kan pahnih chiahin kan awm tih ka hrechiang bawk a, ka zam ru deuh viau pawh hi thil awmlo lutuk a ni biklo.
.
‘Ka rei lo ang.. Sawtah sawn I thawmhnaw tur a awm a’ tih pahin thawmhnaw dahna bawm lamah a thle zauh a.. ‘Thawmhnaw I mamawh phei chu ka ring lo a’
.
Nui suk suk chunga bathroom a pan lai chu ka en reng a.
.
A lo chhuah leh chuan inthlak fel vek tawhin khum ah ka thu a, ka phone a message ka check a. Ka unaupa hnen atangin message tal ka dawn tawh ka beisei tehreng nen  eng thawm mah ala rawn nei lo.
.
Ka phone min rawn laksak chuan ka en vat a, engmah sawi lovin min rawn kuah a, towel chiah a veng a, kawr pawh a ha lo. A pian nalh zet chu hmuhhmaih theih a ni lo bur..
‘I inthlak dawn lo mi?’ ka thusawi chuan awmzia a neilo..
‘Nah..thawmhnaw hak kan mamawh dawn hleinem..’ ka biang a thawk khum lum ham ham a, ka taksa pumpui min fan chhuak nghal vek bawk. Mipa dang khaikhin turin Luca aia hnaih ka la nei ngai lo a, amah chauh hi ka tan a mipa awmchhun a ni tih ka pawm thlap a ni. Ka biang atanga min fawp tanin ka nghawng ah min fawp dan dan a. Ka tihtur ka hai bik lo. Ka thiam ang tawk in ka chhanglet a. Ka mutkawr hak pan tak chu zei zetin a phelh a…
.
Tunah chuan ka pasal, ka hmangaih em em hnenah ka neih zawng zawng leh ka thinlung ka pe pumhlum ta..
.
A hnungzang thlan dap chu ka zut zai zai a, rum hakin min rawn kuah a, ka nghawng ah a hmai phum in thawk a la vang vang a..
‘Good night..Bellissimo’
‘Goodnight..Tigrotto’ (Little Tiger)
Ka koh dan vang chuan nui suk in min kuah nghet sauh a.

.
Ka muhil ka harh chuan ka inlet thak a, Luca mutna ruak huai ka hmuh chuan ka harhchiang nghal kawk mai. Min tiharh duh lovin a tho tawh a ni ngei ang. Che chang lovin ka mu vang vang a, zan lama kan hun hmandun dan ka ngaihtuah chuan ka hmai a sa pap a, ka nui sak bawk a.
.
Thawmhnaw ka hak loh vangin mutna a kan puansin nal zar chuan ka intuam hlan a. Room tukverh inhawng lam chu panin ka dak chhuak a, balcony ah Luca chu min hnungchhawn zawnga dingin phone a hmang a, kawr ha lo in boxer chiah a ha. A hnungzang a inrin raih awm chu keimah vang a nih ka ring! Ka thil ngaihtuah vang chuan ka sa pap pap a..
 .
A thusawi ka hriat chuan mak tiin ka ding chawt..!!
.
‘A unaunu ber ka thuhnuai ah a awm tawh a reilote ah engkim a fel vek ang!!’
.
A awki chu ka la hriat ngai loh huatna a khat niin ka hre bawk. Thawm nei miah lovin ka tawlh let a, a tawng kha ka hresual a nih ka ring.
.
Ka chungchang pawh a ni kher lo maithei.. Oh..keihi engmah hre lovin a chhe lam ka ngaihtuah nghal ringawt a nih hi.. Ka lu thing nar nar in Luca dinna lam chu ka pan leh a, balcony ah chhuak ve in a hnunglam atangin a kawng ah ka kuah a..
.
‘Kan inbe tha leh dawn nia..’ phone a off rualin arawn inher a, a hmel landan ah engmah danglam a awm lo. Min nuih suk in ka chal ah min fawp a..
.
‘Good morning’
.
‘Tunah pawh chawlh I nei thei chuang lo a ni maw..?’
‘Buaina pakhat a awm a, reiloteah a fel mai ang.. I ril a tam tawh ka ring’ ka bu nghat a..
.
Ka tih reng kha maw..!! Ka chungchang a nilo ang ka tih reng kha…
.
Ka riltam a rin thu a sawi khan eitur ka mamawh tawh zia ka hrechhuak chiah.. Nizan khan ka rilru phawklek vangin thil ka ei mumal lova, kitchen ah dawhkan kil a kan thut hnu chuan ka hma a eitur awm tuihnai zet zet chu en in ka plate ah ka dah a, ka ei nghal mawlh mawlh a..
.
‘Cherry’
‘Um..’ ka thil ei lai dahin a hmel tak run chu ka en a, tunang huna serious deuh awm chu mak ka ti deuh..
‘Vawiin hian emergency thilah Paris a ka kal a ngai  a..’
‘Um..Maw?’ ka lungawi vaklo tih ka thup hman lo..
‘Tlai ah ka chhuak anga, naktuk tlai ah chuan ka rawn let leh hman ang..’
‘Mahse..karkhat chhung helai ah hian..’
‘Ka tihpalh.. A hmanhmawh thlak em a ni.. Ka hrelawk bik hauh lo a..’
.
Chhang lovin ka ngawi ta ran a. Diktak chuan a hnathawh tibuai tura awm ka duh bik lo, mahse nimin ah kan innei chauh a, helai hmun nuam takah hian karkhat chhung hun hmang tur kan ni bawk. Tuna hna pawimawh awm thut chu ka hrethiam thei lo a ni ber. Amah ka thlakhlelh em vang a ni tel bawk..
.
Luca chu a thutna atanga thoin min rawn pan a, ka che duh eih lo. Ka thutna chair atang chuan min pawt thoin ka mit ah chiang takin min en a, ka biangah min chul hauh hauh a.
‘Ka tello a lo awm I hreh chuan I kal ve thei tho a..’ kal ve pawh ni ila, buai taka hna a thawh laiin enge ka lo tih chuan ang??
‘A tha alawm..Ka lo awm thei mai ang..’
Ka hmui ah min fawp in min vawnna chu a thlah a..
‘Darhnih hma chu I duh duh kan ti thei ang..’
.
Pawnlam a chhuah ai chuan in a awm ka duh zawk. Darkar hnih chhung zet chu in hnunglam a swimming pool ah kan cheng a, a hnuah hmanhmawh hauh lovin hmangaihna min chenpui leh bawk. Ka la hriat ngailoh leh a awm tih pawh ka hriat ngailoh nawmna nasa takin min tuam hlup hlup a, ka pasal hian thiam loh pawh a lo neilo a nih hi..
.
Movie kan endun leh a, zinchhuah a ngai chu a huphurh ve hle tih a lang a, zing a ka titau deuh pawh kha ka inthiam lo leh zawk hial. Sofa ah inkuah chial in kan thudun a, kan movie enlai pawh chu kan ngaihsak vak chuang hlei lo a..
.
‘Cherry..ka kal a hun a nia..’ Sofa ah kan muhil dun a, min thawhsan lai ka hre miah lo. Mut la chhuak zet chungin ka meng a, hnai taka min en in a nui suk a. Business suit ha in a lo inpeih thlap tawh. Ka mutdan ang ang chuan min rawn kuah a, min kaitho in min thut tir a..
‘Ka lo thlah ang che..’
‘Min kuah phawt rawh..’
Nui sakin ka kuah a.. Zankhat chauh a ni..Zankhat chauh..
.
Luca kal liam hnu chuan ka ruak huaiin ka inhre nghal ringawt.. Inchhung ah tihtur a awm lo a, thian kawm tur tal awm sela a zia deuh ngei ang. Ka tihtur hrelo chu ka vei kual chhen a, Library ah lutin lehkhabu ka en kual a, ka chhiar duh tak ka hmuh fuh chuan chair ah thuin ka chhiar nghal mial mial a.
.
Door bell ri ka hriat chuan ka lehkhabu chhiar ka dah vat a, library atang chuan chhuakin hmanhmawh zetin kawngkhar ka pan a. Luca a ni maithei.. A zin tur thulhin a lo let leh a ni ngei ngei ang.. Nui sangin kawngkhar chu ka hawng a, hmeichhe pakhat lo ding ka hmuh chuan ka nui hmel a reh riai riai a.
.
 TMH!!
CHAPTER – 4
TAKE MY HEART!
By. Thantei_Pautu aka Laura_Sean_Virgo
.
‘Hi..Mrs. Giovanni, Mena ka nia. He thil hi i hnena dah turin Mr. Giovanni khan min chah a." a bawm ken chu ka lo laksak vat a. Tunah Luca a kal liam chauh a, mak chu ka ti deuh.
 Mena chu in a lo lut lovin a kal lehnghal mai a, a bawm min pek chu kengin room-ah ka lut a. Ka bawm dawn thar chu hawngin a chhunga thil awm ka hmuh chuan ka thaw hawk! Hetiang thi man to hmel lutuk hi ka la inbel ngai lo a, ka mumang ah pawh ka la hmu ngai lo. Note inziak chu chhiarin ka nui sak a.
*Ka nupui tan
Inneih thilpek a ni e*
.
 Ka pasal lak atanga ka dawn a nih chuan ka inbel ngei tur a niang chu. Thi chu la chhuakin ka awrh chhin a, darthlalang hmaah dingin ka inen vang vang a. Thi-a lunghlu inphum tle ser serte chu khawihin a man to tur zia ka ngaihtuah lo thei lo. Ka dinhmunin a zir loh vanga hetiang thil man to lutuk nei ngai lo ka nih mai bakah, midang lak atanga thilpek man tam dawn hi ka duh ngai lo a, midang laka ba nei angah min inngaihtir thin tlat a ni. Eng emaw chang chuan ka khrih riau thin tih pawh ka inhria a, sim tumna erawh ka nei chuang der lo a. Mahni pianpui mizia hi chu sim mai ahar ve bawk a ni. Mahse tuna ka thil dawn hi chu ka pasal lak atanga ka dawn anih vangin a dan a dang thung. Luca hnen atanga ka dawn ho reng reng hi chu ka tan thilhlu bik a ni vek hrim hrim mai! Kan inzui chung reiloteah khan thilpek min pe fo a, hnial awmzia a awm ngai lo a, engtiklai pawhin thilpek min pek nachhan tur chhuanlam tha tak a hre ziah thin ni maiin ka hria. Thil ho tete a ka ngaih thleng pawhin a ni hi chuan angai thutak viau zel..
Thi chu phelhin thilpek dang ka dahkhawmna ah ka dah lut a, a vai hian eng tikah nge ka inbel ang tih ka ngaihtuah thiam chiah lo.
.
Engtin tin emaw ni ka hmang ral a, Luca nen pawh kan la inbe leh rih lo. A buai viau a ni ngei ang. Tuna kan awmna lai hmun hi a fal deuh em vangin han chhuah harh mai na tur ka hre lem lo bawk nen zan lamah pawh tihtur hre chuang lovin hma takah ka mu a, ka khua a har vawng vawng mai. Tomas biak tumin ka call a, ka la be pawp thei leh ta chuang lo a. Ka unaupa awm dan hian ka ngaih a titha tawh lo. Keiin ka ngaihtuah em em reng a, a dam tha tih tal min rawn hrilh se la ka awm a nuam deuhin ka ring. Kan inbiak miah lohna chin hi a rei ta khawp mai. A hnathawh vangin a buai em em reng dawn a, chu pawh ni se, a dam tha tih min rawn hrilh lawk chu thil har a ni chuang lo. Ka inngaihtuah thinrim dawn a, ka ngaihtuahna kal dan a dik chiah lo bawk. A chunga thil tha lo thleng tur anga ka ngaihtuah zawng ringawt pawh hian hlauhthawn vangin ka thinphu a danglam nghal thei nia.. Ka neihchhun a ni tlat a, ka tan a hlu em bawk a ni. Ka muhil dawn chuang lo tih hriain khum atang chuan ka tho leh rih a. Tunang hun mahni chauha awm leh mutthilh theih bawk si loh angah hi chuan movie en ila a that ka ring. Thil lungngaihthlak lam ka ngaihtuah loh phah bawk anga..
.
Jason Bourne' ka en a, nidang ang bawkin hmuhnawm ka ti lehpek hle. Movie a zawh chuan muangchangin room ka pan a, tunah chuan ka mut a chhuak ta khawp mai bawk. Ka lu in lukham a dek chauh a, ka muhil nghal ni maiin ka inhria.
.
"Shh..muhil leh rawh.."
Harhchiang lovin ka meng a, ka mutna bul hniam sat leh ka hriatthan tak rim ka hriat chuan ka harhchiang ta chauh. Luca chu ka bulah rawn mu in min kuah a, tunang huna a lo let leh hi ka beisei lo reng reng..
.
 "I lo thlenna a rei tawh em?" a awmah ka hmai ka phum kak a.
"Minute 20 vel zet chu i muhil lai ka thlir tawh che.." a nuih hak danah chuan a thutak lo tih ka hria. A taksa ka tawh rualin a inbual zo chiah anih ka ring bawk.
.
"Tunang huna i lo let leh hman ka ring lo a." ka ti leh sep a.
"Ka nupui ka ngai tawh alawm."
"Darkar 24 pawh kan la awmhran hmain min ngai hman der a maw?"
.
"Nangpawn min ngai tih ka hria.. I mutthilh theih miah loh kha.." a kut hnunglamin ka biang a nul hauh hauh a, ka thla a muang em em a ni tawp mai.
"Engtin nge i hriat a? Um..ka ngai che tih chu a dik alawm.." ka tih chuan amah en turin min kuai dak a, kan inen ran a, pindan chhung a thim deuh ruai bawk vangin a mitmeng ka hmuchiang thei lo.
.
"Ka fawp dawn che nge min rawn fawp dawn?" a aw ka hriat rualin ka tuiral ni berin ka inhria..
.
"A engmah mah.." nui har har chunga ka tih chuan rum nghatin min pawt a, ka rinlawk dan a ni nain ka te that tho..
.
"Keiman ka fawp ang che.." ka tawng leh hmain min fawp a... Ahma pawn ka sawi tawh kha.. Luca hi chuan ata chauh ka ni tih hi min fawh ringawt pawh hian a nemnghet thei thin!! Ka pasal hi ka hmangaih a ni.. A ni hi engvanga hmangaih nge ka nih tih a chhan leh vang sawi dawn ila sawitur tam tak ka nei hran lo ang. A chhhan chu amah Luca anih vang hian ka hmangaih a, chu chu ka tan leh Luca tan hian a tawk em em. Hmangaihna chuan engkim a hneh thei an tih thin kha! Tunah chuan kan pahnih hian kan nun bul kan tan ve dawn chauh a ni a, kan hma hunah eng thil nge kan hmachhhawn dawn tuman kan hrelawk lo.. Hriat lawk ka duh chiah em tih ka inhre lo bawk. Tuna kan awm danah hian ka lungawi tawk rih..Ohh.. Ka ngaihtuah hma mah mah a ni maithei.. Nimin piah khan kan innei chauh a lawm le.! Kan inneih hmaa kan inhriat hun lah hun reilote chhung chauh a ni bawk.. Chu pawh chu lo ni se, a pawimawh ber chu hmangaihna a ni tho tho.. Luca nen kan mih chhung chuan engpawh hmachhawn thei turin ka huaisen tawk ang tih thu hi ka sawilang tawh hialin ka hria..
.
Ni 4 chhung chu kan pahnih chauhin hun kan hmang dun a. Khawpui chhungah kan mamawh thil neuh neuh leia vawikhat kan kal bak chu hmun dangah kan kal tam lo khawp mai. Nitin tuipui kama darkar hnih vel kan awm hnuah inkai rial chungin in kan pan leh a, ka hawina lam apianga min ngaihsaktu hmel hmuh hi ka la tawn ngai loh hun nuam vawrtawp chu a ni tawh ber e. Amaha thiltha awm ka la hriatchhuah loh ka hre belh zel bawk a, ka pasal hi ka hmangaih nawn mawlh mawlh a ni ber mai! Helai kan hun hman theih chin a tawp huna khawpui a let leh chakna pakhatmah ka nei lo.
.
"Luca, helai hmunah hian kan awm reng thei lo em ni?" a bawp inkar ah thuin ka ngheng ar ar a, boruak a nuam tawk khawp mai. Ka zawhna hi keipaw'n a chhanna ka hresa ve tho..
"Kan ngaihtuah a inang chiah a nih chu.."
"Anih chuan hetah hian awm reng ila.." a awm dinglam nghengin a hmel ka en a, ka pasal hmelthat zia hi ka sawinawn fo angai dawn a nih hmel!! Nui sukin min en a, ka kut vuanin a fawp zauh a..

.
"Khawvel pawnah kal daih i duh em?"
"Duh lo. Helai hmunah  hian nangmah nen chauh awm reng ka duh.." ka tih chuan rawn kunhniam in kan infawp vawng vawng a.
.
.
.
"I chau em?"
Ka bag khai lai min laksak in ka kawngah min rawn kuah a, ka chau lo tih hriattir nan ka lu ka thing mat mat a. Tunah chuan Luca nen kan pahnih chauha kan hun hman theih chin chu a zo ta. Darkar khat liamta khan hun hlimawm tak kan hman dunna hmun kan chhuah san a, naktuk atang chuan kan hna pangngai thawkin kan buai leh tawh ang. Ka ngaihtuah dan hi ka duh chiah lo.. Khawvel ah hian mi pahnih chauh a falin hlim takin an awm dun reng thei lo a, mihring kan nih vangin hna kan thawh angai a, mi vannei ten chhungkua an ngaihsak atul bawk a. Tunah chuan keipawh hi mi vannei ka ni tawh. Pasal tha tak ka nei a, ka pasal chhungkua hi ka chhungkua a ni ve tawh bawk a. Kei chhungkaw lian tak awt em em thintu hian chhungkaw lian tak ka nei ve ta... Ka hlim em em tur a ni dawn lawm ni..

.
Luca nen kan pindan ah lutin kan inthlak fel a, inhnuai a kan chhuk leh chuan Carina'n min hmuh rualin a ri nghal chul a.
.
"Hmmm.. in hmel ka hmuh khan hun nuam tak inhmang dun ngei tih ka hre mai e.."
Luca ka melh zauh a, a ni pawh a lo nui suk..
.
"Dawhkan ah sawn eitur ka dah tawh a, in duh chuan tunah a ei theih nghal a.."
.
"Kan lawm e.." ka tih laiin Luca chuan "Min hawsan thei tawh ang" a lo ti ve thung a.
.
"Aw le. Ka kal nghal mai ang e. Eh, Luca, i nu i biak vat a tulin ka ring.." Carina chuan ka hriatthiam hauh loh mitmeng pu chungin Luca chu a melh zauh a, a ni chuan engtinmah chhang lovin a bu nghut ringawt. Carina nen kan in mang tha hnu chuan nui hawk hawk chungin kan in chu a chhuahsan a.
.
.
Zanriah kan eizawh hnu darkar hnih velah mu turin ka insiam a, Luca erawh thil tihtur pawimawh a neih vangin library-ah a la awm thung. A ni pawh a chau viau tih ka hrechiang a, a bula ka awm hnu hi chuan engtiklai pawha hna a thawh loh nan ka venpui angai ngei ang.
.
"Hey, Cherry.." Luca chu ka bulah rawn mu in min kuah hnai sauh sauh a, a lo mut ve hmaa ka lo muhil hman chu ka awih lo hial zawk. Ka chau takzet a ni ngei ang.
"Naktuk hian ka nu leh pa chenna hmunah kan kal angai dawn a."
"Um..a tha alawm.." ka tawng ri pawhin ka hre lo.
"Okay.. Muttui le.. Min kuah la.." ka samah fawpin keipawhin ka kuah a, thil dang ka ngaihtuah leh hmain ka muhil a ni lehnghal deuh mai.
.
.
Ka muhil ka harh chuan keimah chauhin ka lo mu tawh a, sana ka en chuan thawhphan nei miah lovin ka thu chhuak nghal phat bawk. Hnathawk tura ka insiam a tul a, ka tlai loh nan minute 45 chiah insiamna hun  ka nei. Muangchang lovin bathroom-ah ka lut a, ka chhuah leh chuan Luca pawh a lo inpeih diam tawh..
.
"Good morning.." coffee no pahnih kengin a kut dinglama a ken zawk chu a in zauh a.
"Good morning.. I thawh rualin min kaitho ve lo a.. Ka hmanhmawh angai a nia.." ka coffee tur min kensak pawh chu la lovin ka kalpel a, ka thawmhnaw hak tur lachhuak in ka inbel nghal zung zung a.
.
"I tlai lovang, ka rualin i kal dawn nia.."
"Okay, ka lawm e" coffee lain ka in zauh a, a tui ka tih leh tih loh ngaichang niawm tak hian min en run thung.
.
"Coffee ka in tawh zawng zawngah ala tui ber.." nui chungin ka en a, ka rilru tak tak ka sawi bawk..
"Thanks.. Chuan..?"
.
"Chuan..? Enge?"
"Lawmman ka dawng dawn lo maw..?"
.
"Huh.. Eng lawmman.." ka kalpel hman lo, ka hnunglam atangin ka kawngah min kuahin a lamah min pawtlet a.. Tihtheih dang enge ka neih tawh chuan le...!!!
.
Hnathawhna hmun ka thlen chuan min hmuh rualin Sarah a ri hluai a, a ni hian honeymoon report kimchang a beisei tih ka hria.. A then then chiah ka hrilh ang!!
.
Nileng in Sarah nen inkawmna hun mumal kan nei thei ta lo. Ka tan chuan a tha zawk mah. A ni hian zawhna a ngah dawn lutuk mai bakah min zawh chin tur a bituk dawn miah lo tih ka hrechiang khawp mai. Kan inhmuh apiangin nui chungin signal min pe a, lunch kan ei laiin midangin min rawn zawm ve a, a hriat duh hrilh turin hun thawl a awm ta lo hlauh bawk.
.
 Tlaiah min hruai tura Luca a lo thlen chuan ka pindan ah arawn lut tlang a, kan inzui chhuak min hmutu hmeichhia te chuan min sawizui leh ngeiin ka ring. Ka pawi sa hran lo. Thil hrechiang lo a lo sawizui hi chu hmeichhia zawng zawng tihdan a nia, thutaka lak chi ah pawh ka ngai lem lo ve..
.
Luca nen kan in pana kan tlan chhuah hnu chuan ka kut arawn vuan vat a.
.
"Dar 8 hmain kan thlen hman angai a. Kan nupa puala an hun buatsaih anih vangin inthlak i duh ka ring." min rawn melh zauh a.
.
"Ka lawm e."
"Lawmthu sawi angai lovang.." tih pahin a biang arawn dawh a, ka nui ringawt..
.
Hun khawhral lovin ka insiam zung zung a, kawrfual dum simple tak hain ka hmai tlemin ka chei deuh bawk. Luca tan nalh taka ka lan a tul tih ka hria. Chu bakah Luca hi mipa vannei tak a ni tih tihlan hi ka tum ber tur pawh a ni bawk. Inhnuai panna step-a ka kal min hmuh chuan a phone hmanlai off in min rawn pan vat a.
.
".. Cherry.." thu dang sawi lovin min en vang vang a, a mitmeng ka hmuh chuan ka nui sak a. Ka inrintawk theih nan tawngkam a thu a sawi kher angai tawh lo. Min en dan atang chuan ka lan dan a  tha tawk tih ka hre mai..!
.
Min kuah vang vang hnu chuan in kan chhuahsan a, kalkawng a kan thusawi chu ka hre seng tawh lo. Ka sawi theih zawng chu ka pasal hi ka thiantha ber a ni bawk dawn tih zawng hi ni phawt mai rawh se.
.
.
Giovanni chenna hmun kan thlen chuan in pawnlam landan atang pawhin an chei nasa viau anih hmel. Light a de sep sep a, Lal in ropui tak ang mai a ni. Ka chhungril erawh ka zam ru deuh. Nina Giovanni nen kan inhmuh hmasak ber tum ka ngaihtuah let a, a fapa tan hian min pawm thlap lo tih hre tur khawpin ka ngaihtuahna a fim tawk a, a hmel hmuh ka chak lutuk hran lo a ni. Luca hriat a sawichhuah erawh ka tum lo bur thung. A pa erawh ka hmuchak khawp mai. Luca nen kan inneih ni khan inbiakna hun mumal tak kan nei ta lo kha a nia..
.
Inchhung kan luh rualin Mr. Giovanni chuan min rawn pan vat a..
"Kan lo lawm a che u.. Ka fanu, min rawn kuah rawh le.."
Mr. Giovanni chu panin ka kuah a..
"Ka fapa hian hun nuam tak a hmanpui che ka beisei.." min fiam tih ka hre nain ka zak deuh tho mai.
"Papa, a ni chauh kha mi i kuah dawn?" Luca chu phawk zetin ka en a, apa bula han pangchan vel chu a inhmeh hlawl lo.. Mipa puitling leh rintlak tak a ni chung hian a nungchang thenkhat hian min barakhaih thin.. A pa tan chuan mipa naupang duhawm tak a la ni reng tih ka ngaihtuah erawh chuan ka awt ru khawp mai. Tunang kum zat ka ni tawh chung pawh hian pangchan theihna tur pa neih ka chak fo thin.
.
"Ka fapa, lo kal hnai la.." nui hawk hawk chungin an inkuah a, Mrs. Giovanni pawh a rawn lang ve ta. Kawrfual sen lar zet hain a  langnalh khawp mai. Min hmu ang pawhin a awm lo, a fapa chu ngai tih hriat zet hian a kuah vang vang a.
.
"In lo kal avangin ka lawm e.. Ka fapa.." min hmu angin lang lo mahse a tawngkam chuan 'in' tiin min la sawitel ve tal alawm le.
Kan lam pana hmeichhe lo kal a hmuh rualin Luca chu a phun hluk a, chu hmeichhia chu ka la hre ngai lo tih ka chiang. Luca bulah rawn dingin an inkuah a. Luca chu a inla hrang thuai a.
"Hetah hian eng thil nge i rawn tih dawn?"
.
"Oh.. Luca, nungchang mawi takin awm teh. Fiorenza hi keiman ka sawm anih hi.." pawisawi lo hmel zet hian Luca nu chu a nui sang a. "Darling, a ni hi ka fapa nupui Allison anih hi.."
.
"Oh.. hi.. Kan inhmu chu a lawmawm e."
.
Kan in chibai hnu chuan Luca nen kan kalsawn a, hmeichhe pahnih min en dan chuan ka awma tinuam ta hauh lo mai.
An chhungkaw thiante nen in chibaiin kan inkawm ho a, reiloteah Fiorenza leh ka nu (Luca nu) mitmei pawh ka theihnghilh zui ve leh mai.
.
"Washroom-ah ka kal lawk a nia." tiin Luca chu ka kal san a.
.
"Luca tan hian i tha tawk reng em tih kan lo en ang chu." ka bula hmeichhe rawn ding chu ka en vat a. Fiorenza!
.
"I sawi tum chu sawi tlang law law la?? Tlang taka sawi hi a tha zawk thin a nia." ka ti nghat a. Ka nui lui sang bawk.
.
"A landan chuan awlsam taka zam tur i ni lo anih hmel hi a.." chik zet hian Fiorenza chuan min en a, ka lo enlet ve ngar bawk. "Sawi tlang law law i duh bawk a, Luca tan hian fa han hrin sak phawt la, a hnu leh chu i hre chhunzawm mai ang.. Ahh.. Fa ka hrinsak theih loh vanga Luca'n hetiang thil a tih angai hi pawi ka ti khawp mai." min khawngaih niawm tak hian thawk a la vei halh a..
.
"I lo sawi ve tur a awm lovin ka hria. Ka kal ange."
.
"I hnunglam ah eng thil nge thleng dawn ngaihven reng ang che.."
.
Chhang tawh lovin ka kalsan a, min hmuh rualin Luca chuan min rawn pan vat a.
"I tha em?" a tih chuan ka bu nghat ringawt. Luca bulah hian Fiorenza thusawi kha ka hrilh dawn em tih ka hre rih lo. Ka rilru thenkhat chuan hrilh ka duh laiin ka rilru thenkhat chuan hrilh tul ka ti lo thung.. He hmeichhia nen hian an lo inkawp tawh ngei em tih pawh ka hre lo a, Luca chunga thinrim ringawt pawh ka duh chuang lo.
.
TMH!!
CHAPTER – 5
TAKE MY HEART!
By. Thantei_Pautu aka Laura_Sean_Virgo
.
Ka phone nghawr dar dar chu ka bag atangin ka  phawrh a,  caller ID ka hmuh chuan ka thaw halh a.  Luca bul atang chuan
kalsawn in pawn lamah ka chhuak a.
.
"Hey, Tomas, i tha em?" ka aw a ka ngaihtuah zia langchhuak chu a hre ngei ang. Kan inbiak pawh miah loh chhung kha ka tan chuan a rei tawh lutuk mah mah a ni. Tomas chuan nui hakin a that thu a sawi a, a rawn tawngring ngam lo riauin ka hria.
"I bulah tunge awm? Tawng rin i va hlau ve?" ka ti lehnghal mawlh mawlh a. Ka unaupa hi ka ngaihtuah em a ni e.
.
"Engkim a tha e. Ka rawn biak pawh mai loh che vangin min ngaidam rawh. I tha em?"
.
"Tha e.." thawk ka la halh a. "Tomas, hrilh tur che ka ngah tawh lutuk zawk a nih hi. Ka..Um..Pasal ka nei a!"
.
"Engmaw..? I sawi chiang thei em? Ka awih thei lo!"
.
"Khawngaihin ka lakah thinrim lo la. Ka be pawp thei lo che a. Ka tihpalh! Mi tha tak a nia, nangpawn i ngaina ngei ang tih ka chiang.."
.
"Ka lo be leh vat ang che. Ka laklawh thut.. Tha takin lo in enkawl ang che. I pasal pawh chu ka hmuh thuai ka beisei.."
Ka chhan leh hmain phone a off a, a awm dan chuan ka ngaih a titha lo dawn zet a, a buai laklawh anih ka ring leh ta zawk. Ka unaupa hian ka lakah thu zep then a nei ngai lo. Ka ngai takzet a ni. A hmel ka mitthla a hmu chungin balcony rinchhan in ka ding a, min lo biak leh thuai ka beisei. Tunah chuan keipawhin ka duh hun hunah ka be pawp thei tawh ang chu.
.
"Hetah i lo awm daih a, ka zawng che a."
Luca tawng ka hriat rualin ka inher a, kawngkhar nghenga dingin min lo en reng a.
"Call pawimawh ka chhang lawk a. Thil pawimawh hmaih ka nei em?"
.
"Kan pahniha kan hun a intan dawn chiah a.. I pasal kalsan a i chhan ngai khawpa call pawimawh chu ka hre chak hle mai.."
Ka bulah rawn kalhnaiin ka nghawngah min kuah a, ding hniam deuhin ka hmai zawnah arawn thaw lum ham ham a..
.
"Ka unaupa a nia.. Engkim i hriat kha.. Hrilh tur tamtak ka nei a..hmuh vat che a duh thu a sawi bawk a.."
.
"Keipawn hmuh thuai ka duh ngei ang." ka hmuiah min rawn fawp zauhin ka kut ah min vuan a, inchhung ah kan inzui lut leh a.
.
Kan pahnih puala hun buatsaih anih ang takin inchhunga awm zawng zawng te mit kan chungah a fu a, hun nuam tak a ni e. Ka pasal hian engtiklai pawhin min ngaihven tih ka hmuh ringawt pawh hian awm nawmna tham chu a ni tawh hrim hrim mai.
Zan dar 11 rik dawnah kan chenna hmun panin Giovanni (Luca nu leh pa te/ Ka nu leh pa te) chenna hmun chu kan chhuah san a. Hlim takin hun kan hmang ka ti nain ka chau viau tho mai.
.
"Fiorenza nen khan kan inbia a.."
.
"Hmm.." sawi zawm turin min duh tih lantir nan min rawn melh zawk a.
"Ah..ka sawi kher a tul lovin ka hria.. Engmah a ni lo tih ka hre tho a, mah se ka rilru a nuam chiah lo a."
"Rilru nuam lo a i awm phahna a nih chuan min hrilh ngei tur a nia lawm." a tawng dam thlup a, motor chu hnehsawh zeta khalhin kan boaruak a hahdam khawp mai.
.
"Luca, engtik ah nge fa kan neih ang?"
"Ka nupui hi a hmanhmawh a nih hmel.." a mitmeng nalh zet chuan min melh rulh a, min fiam pah tih ka hria..
.
"Ni lo.. Ka sawitum tak zawk chu Fiorenza khan fa a hrinsak theih loh che vanga hetiang thil itih angai hi pawi a tih thu min hrilh a.."
Phun hlukin motor chu a herkual hrawk a, kan din thut chuan ka bu lawp mai. Ka hmel hmuh chian loh hlau niawm tak hian alam hawi turin min kuaiher a.
"I tawng kha ka hresual em?"
.
"Fiorenza khan fa a hrinsak theih loh vang che a hetiang thil itih a ngai ta hi pawi a tih thu a sawi a.  ‘Hetiang thil’ tia a sawi kha kan inneihna hi a nih ka ring."
.
A phun leh hluk a, a tawng hman chu ka hrethiam lo. Italian language hi ka zir ve ngei angai dawn anih hi!!
.
"Chu thu chu i ring em?"
"Ka hre lo." ka tih chuan thaw hawkin min kuah a.
.
"Ka duh vang ngeiin ka nei che tih hi ringhlel hauh suh.." Inla hrang hlekin ka biang tawn tawnah min vuan a, ka mitah min enin a ngawi vang vang a. A kut zungpui chuan ka hmui a tuai nauh nauh bawk a. Ka duhthusam thu ka la hre lo niin ka inhre ve thung. Min hmangaih vanga min nei anih thu sawi se ka duh a, amah ring thlap tur ka ni tih thu te pawh sawi turin ka duh bawk. A mitmeng ka hmuh hian ri lovin ka hriat duh chu min hrilh vek tho niin ka hre leh si.
Ka hmuiah duhthawh taka min fawh chuan kuah letin ka lo chhang a.
.
"Tunah chuan keimah chauha pumbilh che ka duh. Ka sawi awmzia i hriatthiam ka ring.." nui sukin a hmui hnuailam a pet sawi zauh a.  Ka kuah hmasa ve ta thung.
.
In kan thlen meuh chuan zan a rei tawh khawp mai. Kan in tihfai hnuah mu nghalin reiloteah mumang bo thakin ka muhil nghal chiah chiah a.
.
.
Ka muhil ka harh a, mitmeng thuk raihin min lo en tih ka hmuh chuan nui sakin "Good morning." ka ti sap a. A sam hnawng chap chu khawihin a lo inbual leh vek tawh tih ka hre nghal mai.
.
"I tho hma awm hle mai."
"Nupui hmeltha tak thlirtur nei tan rei tak a mut theih loh an tia lawm.. A dik anih ka ring.."
.
"Um.. Ka ring chiah lo."
"Ka sawi dik tih i hria.. Chuan.." ka hmaiah min fawp dan dan a, ka hmai atangin ka nghawngah....
.
"Luca.."
"Hmm"
"Ka phone chu.. Tomas anih ka ring.."
"Nakin ah i be dawn nia.." tih pahin ka puansin lai chu a hlim pawp a.
.
.
Breakfast kan ei hnuah muangchang vak loin in kan chhuahsan a, hanthawhna hmun ka thlen chuan ka buai lehnghal char char a. Luca hian ka duh chuan hna ka thawk lo thei tih min hrilh fo nain hnathawk loa awm ka duh lo bur thung. Ka pasal hi eng anga mi hausa pawh ni se amah ring chawta awm ka duh ngaiin ka ring lo. Mahni thawh rah ngei senga ka nun hman hi ka duhthusam leh ka nuna ka thlah ngai loh turte zing ami a ni.
.
Sarah nen lunch ei turin kan chhuak a, zawhna ka hmachhawn tam mawlh mawlh e.
"Engkim ka hre duh..! Khawi hmunah nge a hruai che? Khumah a zei em? Oh..chu chu chiang sa.. Ka ngaihtuah zawng ringawt pawh hian ka sa pup pup thei.. Chuan.."a nui sang a, a hmel hmuh pawh a nuam khawp mai
.
"Pasal i neih hunah eng ang nge tih chu i la hre dawn tho a, engmah ka hrilh dawn lo che.." fiamthu titaka ka tih chuan titau hmel pu hian min en ram ram a. "I chungchang hi ngaihtuah ngai zawk chu a ni, tumah i date lo a, i awmdan hi ka hrethiam miah lo.."
.
"A sawi hi ka duhtawk rih.. Ka hre lo.. Mipa hnaih hi ka hlau a ni berin ka hria.."ati zuai raih a.
"I hlauh angai hleinem.. Engpawh tawk dawn ila ke kan pen ve phawt loh chuan thil tha leh thalo kan hre thei dawn lo va..."
.
"Oh..Oh..duhtawk teh.. Tunge lo kal hi han en teh le.." Sarah hawina lam ka en chuan Luca kan awmna pana lo kal ka hmu nghal mai a, helai hmuna lo kal tur hian ka beisei hauh lo mai. Hmeichhe awm ve tam zawk mit ala tih chu kan awmna lam an rawn hawi thap danah an ngaihven viau hlawm tih a langchiang viau..
.
Kan thutna bul a lo thlen chuan ka hmuiah min rawn fawp zauhin "Bellissimo" a ti sup a. Sarah aw thian kharh ri ka hriat chuan amah enin ka nui tawp.
"Hi, Sarah.." Sarah chu en in a nui suk a, a duh hunah chuan nelawm taka awmdana thiam thlawt mai.
"Hi, i lang tha hle mai." inthiam leh chiah lo hmel hian Sarah chu a nui hak hak a.
.
"Oh, Sarah, khatiang fakna a dawn fo chuan a tha tak takah a inngai mai ang." ka tih chuan "Ka tha alawm.. Ni lawm ni?" Luca min melh dan chu ka hrethiam reng mai.

"Heta i lo kal ka beisei miah lo a." ka bula chair-ah thuin a dar a tiche zauh a.
"Lunch ei zawh hian meeting kan nei dawn a, staff pakhat khan helai hmuna in kal thu hi min hrilh a. Rawn thleng hma deuh ila chu hmun dangah hruai che ka tum a.."
.
"Helai hmun hi a nuam alawm.." Luca kutin ka mal a rawn tawh chuan ka aw ka thian kharh a, thu thain "Ei ang ule.." ka tihluai a. Luca chuan kun deuhin min rawn melh a, a nui suk bawk. A kut chu a lasawn duh der lo lenghal.

Thil dang kan sawi a, Sarah pawh a dan pangngaiin a titi siam siam a. Lunch kan ei zawh chuan Luca nen Kal hrangin Sarah nen kan hnathawhna hmunah kan let a, thil ka ei mumal tak pawh ka hre lo.
.
Ka pindan ka luh hnu rei vaklo ah Boss-in min ko a, a pindan ka va luh a thu tura min hrilh chuan mak ka ti deuh. Nidangah chuan tihtur leh file pawimawh thenkhat lain ka chhuak lehnghal mai thin kha a nia.
.
"Mr. Atkinson eng thil nge ni ta?"
.
"Lunch ei tura i chhuah lai khan hmeichhe pakhat nangmah hmuh tumin arawn kal a.." a sawi dan hmangah hian thil pawimawh anih hmel si hi maw le. Min hmuh tum hmeichhia? Tunge ni ang tih han rinchhin tur reng reng ka hre lo. Fiorenza a ni thei angem? Ni lovang.. A ni nen khan inhmuh chhan tur engmah kan nei lo a, bakah a thusawi tur engpawh ni se hriat chakna ka nei lo hrim hrim bawk.
"Hmeichhia maw? A hming?"
.
"A hming ka lo zawt hman hauh lo mai. He thil hi nangmah ngei pe turin min chah a. Nangmah i awm lo tih a hriat khan he thil hi dahin hmanhmawh takin a chhuak lehnghal mai a. Midang hnena dah lova ka bulah ngei dah a duh dan atang hian thil pawimawh tak a nih ngei ka ring." Mr. Atkinson chuan a dawhkan pawhdawh atangin envelope lian tha zet hi arawn phawrh a. A ngaihna ka hre lo lehzual.
.
"Ka lawm e." ti sapin envelope chu ka la a. A pawn a ka hming chuang kalh chu khawihin a letter inchhu pawng thlap chu ka khawih nauh nauh a. Thil pawimawh tak chu a nih ngei dawn hi.
.
Mr. Atkinson chuan chawhnu lam thil pawimawh ah a chhuah tur thu sawiin ka haw hma theih tur thu min hrilh hnuah a pindan atang chuan ka chhuak a.
Ka pindan ah lutin ka phone ka phawrh a, Luca hnenah meeting zawha min hruai theih tur thu text-a ka hrilh hnu chuan chair-ah ka thu awnin ka mit ka chhing vang vang a.
.
 Ka malchunga ka envelope dawn thar ka dah chu khawihin tuna hawn a that ka ring. Muangchangin ka hawng a, a chhunga lehkha awm ho chu uluk takin ka en a, thil mak tak chu a ni. Hetiang khawpa sum tam ka hminga a lo awm reng hi awih a harsa..ni lo , a harsa mai pawh a ni lo.. Thil theih loh hulhual a ni. He lehkha rawn dahtu hmeichhia khan amah biak pawh theihna tur chu sawi loh a hming takngial pawh a hnuchhiah lo a, engtin nge ka hriat theih tak ang?
Lehkha dang chu ka en zel a, ka dam chhung pawha ka thawhchhuah sen loh tur sum tam lutuk hi thawklehkhatah ka hming in a awm a, hmun zau leh nuam tak tak tur ka hminga awm te chu ring thei lovin lehkha chu ka en ngawt ngawt a..
Thil awm thei phakhat chu Luca hian midang tirin ama tih nilo anga lantirin hetiang thil hi a ti a ni maithei.. Amah ka zawhfiah nghal ngei a tul ang.
.
Lehkha chu uluk takin envelope-ah chuan ka khung leh a. Thil pawimawh ka dahna pawhdawh ah khungin ka kalh lehnghal thlap a. Ka awm a nuam lo zo vek mai bawk.
.
Darkar hnih dawn aral leh hnu chuan min hruai turin Luca alo thleng a, kan in panin kan haw nghal a.
.
"I tha em?" min ngaihtuah hmel takin Luca chuan a kut veilam in ka kut arawn vuan a.
"Ka tha alawm."
"I ngaihtuah muk hmel hle mai." a ti leh sup a.
.
"Ka chau deuh anih ka ring. In kan thlen hunah kan titi dawn nia." tiin ka nui lui sak a.
.
In kan thlen hnu chuan ka indah fel zung zung a, ka inthlak fel hnu chuan kitchen-ah ka kal a. Inngaihtuahna hun ka mamawh.. Carina a lo awm lo hlauh chu ka lawm khawp mai.
.
Fridge hawngin chhangphut leh ka mamawh tur thil dang ka phawrh a. Inngaihtuahna hun ka mamawh nia ka inhriat chuan eitur ka siam ziah thin hrim hrim bawk a..
.
"Puih i ngai em?"
Luca chu ka hnungah rawn dingin min kuah a..
.
"Umm.. Thil engemaw ka hriat loha tih i nei em? Ah..ka hminga account hawn ang chi te..?"
.
"No.. I mamawh anih chuan tunah pawh kan ti nghal thei a.."
.
"Ni lo, nilo. Chutiang a ni lo. I ti lo anih chuan a tha anih chu. Vawiin khan ka ngaihtuahna ah a lo lut thut a.. Min ngaih dikloh loh ka beisei.." ka tih chuan a lu a thing mai a. Ka sawichhuak chu ka inchhir leh deuh hial zawk. Nupa ni mah ila a sum thlahlel anga lan ka duh hauh lo. Ka thlahlel lem lo bawk. Sum duh lo chu ka ni bik hauh lo a, mahse ka mamawh tawk ka thawkchhuak ve a...Oh..thil tullo ka ngaihtuah kual mai mai a ni.
.
"Ngai diklo hauh lo mai. Thil eng emawin i ngaihtuahna a tibuai anih hmel."
.
"Ka tha tawh e. Vawiin ka thiante thusawiin ka awm a tinuam chiah lo a. Anih chuan i cookies duh ber siam ila.. Min puih theih chuan.." nui chungin chhangphut chu ka khawih a, a biangah ka tat a. Ka tifuh vak lo anih hmel. Ka hmai chu chhangphut bawm ni zawk ang takin chhangphut ka kai ta luai mai.
.
“Luca, duhtawk tehhh…” min vawnna thlahin a nui ve hawk hawk a, a nui hmel chu ka en tawp. Tun ang taka a nuihza hmel hi ka la hmu ngai miah lo. A mitmeng a nung sar a, a lang duhawm takzet.. Ka en reng vang chuan  a nui tawp riai riai a, hmel hlim tak chungin zawhna zawt mitmengin min en a.
.
“I hmeltha hle mai..” ka tih chuan thle nghutin min rawn kuah a.
“Ka hria alawm”
“Huh..zak ve deuh la…” ka tih chuan min kuah nghet sauh a.
.
“Karei leh!! Naupang infiamna hmun ang maiin a hnawk anih hi..” Carina chu kan enrual thawt a. Kitchen hnawk tur zia ka ngaihtuah ve ta chauh. “Chhuak teh u..hna ka ngah hle mai..” tichungin a nui hawk hawk a. Kan pahnih chuan min en tawn leh hnuah rilru hlim hmel takin a zai zui rat rat a. Luca nen kitchen atangin kan chhuak ve nghal a.
.

.
Zanah hmundnga kal lovin in ah kan awm a. Kan mu hma khawp mai.
.
Ka phone nghawr dar dar vangin ka muhil ka harh a. Sana ka en a, zing lam dar 3 chiah a ni. Caller ID ka hmuh chuan Luca tihharh hlau takin min kuahna ka phelh a, khum atangin ka chhuk nghal bawk a.
.
“Tomas..”
“Giovanni lakah khan fimkhur ang che. I neih hma khan engvanga min rawn hrilh phawt lo nge I nih?” arawn ti nghal tawng a. A thusawi chuan min ti hmahaih lutuk takzet.
.
“Tomas, I thusawi chu I hrechiang em? Ka pasal hi i hrechiang lo..”
“Ka chiang lutuk mah mah zawk a ni.”
“Ngaithla teh. Min ngaihtuah tih ka hria, chanchinbu leh thildanga Luca chanchin an sawi  thin dan hi thudik a ni lo a nia. Tomas, in inhmuh hun chuan I ngaina ngei ang tih ka hria..”
.
“Thu awmze nei lo sawi nan hun ka nei lo. Ti tura ka hrilh che chu zawm phawt mai rawh.”
.
“Tomas, ka duh huna biakpawh theihin awm tawh ang che.” Thinrim ru zetin phone chu ka off a. Ka unaupa neihchhun pawh ni se, a engamah  hmaa ka pasal hlat tura thu min pe ringawt turin dikna  anei lo!
.
Kan pindan ah lut lehin, khuma Luca tui taka muhil hmel chu ka en vang vang a. Ka uanupa thusawi ka ngaihtuah let a, Tomas khan eng thil mah hriat a nei lo. A thu hriat chu engpawh ni se kan inbiak leh hunah ka hrilhfiah  ngei ang. Engvanga biak pawh har em em nge anih pawh ka hre lo  ve. A duh hunah min rawn biain a duh duh a sawi a.. Thu awmang lo tak min rawn hrilh ringawt bawk a. A buaina hi eng thil nge mawni le..?? Ngaihtuah zawm duh lovin Luca bulah chuan ka inthlawh leh ta kak a.
TMH!!
CHAPTER – 6
TAKE MY HEART!
By. Thantei_Pautu aka Laura_Sean_Virgo
.
.
LUCA ALBIZZO GIOVANNI'S P.O.V*
.
"Adelina..come on.. I phone chhang rawh.."
Vawi nga zet a ring quit tawh. He hmeichhia hi ama duh danin a kal thui ta mah mah a ni. Ka call nawn leh a, min la chhang thei chuang lo. Thinrim zetin ka phone chu ka vawm thuai a! A chhe hneh khawp mai bawk.
.
Eng thil phiangsen nge maw a tih hi le? Naktuk mai hian pasal a nei tawh dawn a, tunah biak pawh theih lohin a awm leh a.. Ka nu leh pa te hian an duat khawlo zo tawh a nih hi. Thla hnih liam ta atang khan ka farnu awm dan hi a dik tawklo tih ka hre thawi tawh a, tuna a awmdan erawh hi chu ka beisei piah lam daih a ni. A pasal neih ni ah amah a awm lo anih chuan ka ruahmanna zawng zawng a chhe vek ang. Alessandro hi mi tawhkhirh tak a ni tih chu kei chauh ni lo sumdawng mi tam zawk chuan kan hre vek. Harsa taka inremsiamna kan neih hi Adelina hian a ti khawlo zo dawn ni a ka ngaihtuah ringawt pawhin ka chhungril a so bulh bulh thei hial mai.
.
Ka phone chhuata tla keh darh nuai chu ka en a. Eng emaw chang chuan ka thinrimna hi thunun theih loh chang ka nei thin reng a ni. Sumdawnna chungchang anih phei chuan ka dawhthei lo lehzual thin. Sim tumna erawh ka nei therte lo.
.
Pindan atang chuan chhuakin library room-ah ka lut a, tunah ngei hian Adelina awmna ka hriat angai!
.
Adelina hi ka farnu tiin ka sawi naa, ka pa unau pianpui neihchhun fa a ni a, a nu leh pa an boral hma vangin kum 1 mi lek anih atang tawh khan kan bulah a cheng a, unau dang ka neih loh bawk vang hian ka pianpui unau ang chiahin ka en a, a mizia no leh pangchang tak erawh ka ngaithei lo fo thin. Hmeichhe no lutuk leh awlsam taka tap mai thin a ni a, eng emaw changin inpawh viau thin mah ila, kan awmdun tam leh ka nungchang thenkhat hi ka khap tam ni maiin ka inhria. Ka hmangaih loh vang ni lovin hmeichhe tuarchhel tak ni se ka duh vanga khap leh zilh thin ka ni. Kei aiin kum 7 zetin a naupang bawk.
.
Alessandro Marcelli, sumdawnnna lama ka thurualpui tur nen hian kum khat zet an inzui tawh a, kan chhungkua pawhin engkim kan hriatpui bawk. Thla hnih liamta khan an inhual a, inrem taka an awm reng nia ka lo ngaih laiin Adelina  awmdan hi a danglam ta tlat a ni. Eng thil tak nge a tih erawh awlsam takin ka hrechhuak thei hauh lo lehnghal!
.
Chair-ah ka thu hnawk a, ngaihtuah tur ka ngah tehreng nen... "Adelina, khawnge i awm?" phun bul bul chungin phone ka la kang a.
.
"Drago, tunah Adelina awmna ka hriat angai. Minute 5 hnuah min lo bia ang che.." phone chu dah lehnghalin ka thutna atangin ka tho a, ka awm hle hle thei tawh lo. Ka thil duh loh tawp a thleng dawn nia hriatna ka neih hi dik lo hram rawh se.
.
.
Phone arawn rik chuan ka chhang vat a.
.
"Sir, Adelina chu mipa pakhat nen an awmdun a.. An inpawt buai deuh anih hmel"
"Mipa chu tunge?"
"Ka hre thei mai lo, sir.. Ah.. Hman ni a ka lo hmuh tawh tho kha a ni.."
"Tunah I hriat chin zawng hriat ve nghal ka duh. I tihtheih apiang ti rawh."
"Aw le, sir."
.
Adelina, I chungah eng thil tha lo mah a thleng lovang!! Eng ber nge ka tih dawn hre chuang lovin ka tho hluai a. Eng thil phiangsen nge maw thleng hi le?
.
Darkar thum zet aral leh hnu chuan ka hriat duh tam zawk ka hre ta. Ka lawm lo takzet bawk! Adelina awm dan a danglam ni a ka rinhlelh tantirh khan tunang hian amah zuiru tu tur lo ruai daih tawh ni ila tuna thilthleng ang hi a thleng hauh lo tur a nia. Ka lo che muang mah mah anih hmel hi. Drago tana enzui ngaihna awm miah lovin an bibo thei tlat nia!! Adelina tibuaitu mipa erawh a hming ka hre ta!
.
Tomas Adams!  Adelina’ a pasal hual lak atanga lahrangtu  mipa chu a chanchin engkim ka hriatchian ngei atul ang. Drago hnen atanga ka thudawn chu ka ngaihtuah zawm neuh neuh a.
.
Thla hnih liam ta, Alessandro leh Adelina an inhual hnu lawk khan a rukin an lo inhmu ngar ngar tawh a. Tomas Adams hian ka farnu hi vau betin amah hnaih turin a tilui a ni ngei ang tih hi ka ring nghet hmiah. Vauna tur hmanrua tha tak a nei a ni phawt ang. Ka farnu hi mi rilru nem leh dawihzep tak a ni a, miin thiam taka an vau chuan a vautu tihdan ang angin a awm ka ring bawk. Heitiang thil a thlen loh nan hian alawm hmeichhe huaisen leh khauh tak ni tura ka zilh fo thin ni!!
.
Zankhua in ka muhil eih lo. Khua a var a, Adelina hmel hmuh tur a la awm lo cheu bawk. Kan duh emaw duh lo emaw inneih kan thulh a ngai ta. Kei chauh ni lovin kan chhungkua kan buai a ni ta ber e. Kan chhungkua chauh ni lovin Alessandro nen kan thawhdunna tur engkim a tawp vek bawk.
Drago'n a hmuh bak kha chu chhui zui theih turin an awm lo a, an bo hmiah a ni. Thil thleng thei tam tak ka ngaihtuah a, engtik lai mahin ka hahdam thei ta lo tawp mai anih hi.
.
Adelina bo thu hi pawnlam mi hriat kan duh lo a, sa koham tak ang maia kan chhungkaw chanchin ngaihven rengtu te hian an hriat rual rualin chhungkaw mualphona nasa tak kan tawn dawn mai bakah amah hruai bo tu mipa paawh hian kan zawng ngei ang tih hriain a fimkhur zual ngei ang. Kan ngawih bo theih chhung chu engmah sawichhuak lo turin thu kan titlu a, ka nu erawh Adelina ngaihtuah vangin zan a mu thei lova, chaw a ei thei hek lo. Kei leh ka pa erawh mipa kan ni a, kan chhungkaw sumdawnna angai pat a kan kalpui a tul bawk a, chawlhna hun kan nei thei reng reng lo thung.
.
Adelina awmna chhui zui reng tura kan rawih Drago pawh a beidawng titih a, hna thawk kaw si lovin hlawh a hmu reng a ni ber e. Pawi tihna erawh ka nei lo. Sum engzat  pawh sen ngai se, ka farnu lo let leh theihna anih chuan a tha vek. Buaina tur a awm lo. Ka duh zawng chu nungdama a lo let leh hi a ni.
.
.
Kut nel thepin ka biang arawn tawh chuan ka ngaihtuahna atangin ka harh zawk a..
.
"Hey, Honey.. Eng thil nge i lo ngaihtuah a.." Fiorenza chuan no zeta min melhin a kut chu a awm hle hle lo khawp mai bawk. Tunah chuan a ni hi ka mamawh rih lo. Ka office kawngkhar kik miah lo a a lo lut ringawt hi ka lawm tehchiam lo bawk
.
"Duhtawk teh" a kut manin ka paihthla a, ngaihdan nih loh hmel takin min melh ralh a.
"Eng thil in nge i ngaihtuahna tibuai a? Honey.. Naktuk hi kan inkawp atanga thla thum a tlinna chiah a nia.. Kan lawm ang tiin min tiam tawh kha.." ka malchungah thuin ka hmaiah min fawp dan dan a.
.
"Hun dang atan nimai rawh se." ka tih chuan ka malchung atanga chhukin office atang chuan a chhuak tau nghawng nghawng a. Ka engahmah a thawk lem lo! A ni lo pawh hmeichhe dang tamtak an awm tho alawm.. Tunah tak hi chuan eng hmeichhia mah ka mamawh rih lo tih ka chiang. Ka duh aiin ka nu nen hian an inti tha mah mah bawk a. Then ila a that ka ring. Ka neih chuan loh tur rei tak kawp hi ka tihdan a ni ngai lo hrim hrim bawk. A nalh tih chu ka pha lo. Mipa ten tisa thil hmeichhe laka kan beisei thin chu alak atang hian ka hmu a, ka duhtawk tawh viau in ka hria.. A ngai leh ngai ngawr ngawr hi chu a ninawm ve alawm!!
.
.
Ka phone nghawr dar dar chu caller ID enin ka pick up thuai a.
.
"Sir, ka hriat theih chin zawngah chuan Tomas khan farnu pakhat a nei a, Atkinson Corporation ah sawn hna a thawk mek. Allison Caren Adams a ni a, itan a tangkai dawn em tih ka hrelo nain a thlalak thenkhat ka lo thawn che kha i hmuh tawh ka ring."
"I thawk tha e." tiin phone ka off a. Ka mail ka check nghal bawk.
.
Hmeichhia hlim taka nui hmel ka laptop screen-a lang chu ka en vang vang a, ngaihtuahna thar ka rilru a lo awm vang chuan ka nui suk. A hlimawm viau ang chu!! A unaupa pawh a birukna hmun atangin a lo chhuah hma phah ngei bawk ang.
Thlalak chu chiang lehzualin ka en a, ka en chik mah mah nia ka inhriat tak hial chu...
.
Drago hian he hmeichhe lan thatna thlalak kher hi engvang a min rawn thawn nge maw anih le.?
 A sam tlema kawi deuh chuan a dar a vaw siau a, a mitmeng paw deuh chek chu a dangdai khawp mai.. Uluk lehzual a en chuan a mitmu rawng chu a uk deuh a, silver rawngin a kap thet niin ka hria. A khabe ah khuavang chhinchhiah tetakte fiah kalhin a awm a. A pian chu zen thlerh tia han sawi tur pawh a ni chiah lo nain a thau tia sawi theih pawh a ni lo. A tawk em em a ni tawp.. Ka nui leh suk a..
 Pawnfen pawlduk a taksa rem thlap a feng a, kawr var thianghlim zet a ha bawk. Hmeichhe lian tak chu a ni lem lo anih hi. A hmui leh a hnar invuah fuh zet atang ringawt pawh hian mi hip thei tak tur ani tih a chiang khawp mai.. A unaupa ang maiin sum vang chuan engpawh a tiduh ve ngei bawk ang chu.. Unau an hrang hlak thei lo! Thisen pakhat atanga lo chhuak chuan inanna tam tak an nei thin!
.
.
A tha e! He hmeichhia ka hnaih hma hian an chhungkaw chanchin leh an nihphung chiang takin ka hre vek phawt tur a ni ang.. Chu chu ka tan thil harsa a ni tawh lo. He hmeichhia hi ka hnaih thei anih chuan awlsam takin a unaupa pawh ka man thei ngei ang. Ka farnu chunga thil diklo titu chuan a thiltih ang chiah a hmulet ve ngei tur a ni dawn lawm ni??
.
"Allison Caren Adams" a hming ka lam sup a. Infiamna hlimawm tak a ni ngei dawn e. He thil hi chu Drago kuta dah lovin keimah ngei hian ka buaipui tur  ani ang. Ka nu leh pa leh ka bula cheng thin hrim hrim chuan engmah an hrechhuak tur a ni lo! Engkim felfai takin ka kalpui ngei bawk ang. Sumdawnna thil a ni emaw, meichhe chungchang ah a ni emaw ka tan thil harsa teh vak a awm lo ve. Ka beih nasat ber Alessandro nen kan thawh dunna tur thil tichhe vektu chu Tomas Adams hi a ni a, a phutawk hremna..a phutawk aia nasa mah hmuh a phu a ni.
.
.
Ka hun khawhral lovin Atkinson Corporation-ah ka kal a, ka mi duh tak chu ka hmu mai lo. Mr. Atkinson nen hian inhmelhriat tha tak kan ni sa a, tunhma atangin thawhdunna tur sawmna min thawn fo a, ka lo ngaihsak ngai lem lo kha a nia. Tunah chuan ka thiltum avang hian Atkinson Corporation hi ka thawhpui ngei a ngai. Hlawkna erawh a tam tehchiam lo maithei.. Sum lama ka hlawkna tur ai mahin Allison Adams ka hnaih theih dan tur kawng awlsam tak ka neih phah thung dawn a ni. Chu aia thil  hlawkthlak eng thil nge awm tawh chuang ang?
.
.
Hun  a liam a, ralkhat atangin vawi tamtak ka thlir fo a, ka hmuh apiangin hmeichhe hlim thei tak a ni ngei tih fiahna ka hmu ziah bawk. Damdawiin ah a kal zauh zauh a, eng harsatna nge a neih hre turin ka zui ve zel bawk. Atkinson Corporation-a hnathawk anih vangin hunawl a nei tam lo tih ka hria a, ka tan pawh thil a awlsam phah khawp mai. Ka hna thulh hauh lovin ka awm theih phah a, ka tumlawk ang thil tihlawhtling turin hun  rei tak ka mamawh lovang. Enge maw chen chu lem ka chan a ngai ngei bawk anga. Hmeichhe rilru hneh tur hian rei tak lem ka chan a tul erawh ka ring lo bur. Hmeichhe pakhat vanga lem ka chang tur ka ngaihtuah chuan ka nuih a za zawk hial mai..!
.
Hun aral bek bek a, ka tum angin thiltih zung zung a har deuh. Allison ka hmuh apianga ka hriatchian deuh deuh chu awlsam taka mi ring mai chi a ni dawn lo tih hi a ni. Hneh thei tura hun rei tak nghah tumna erawh ka nei chuang der lo a! Fiorenza pawh ka then thu ka hrilh a, a pawm duh hauh lo thung. Ka tan erawh engmah a ni tawh lo..
.
A hnathawk a haw tlai dawn tih ka hriat vangin amah zuitu tur leh tihnat hreh miah lo anga lang tur mi ka ruai a, hlauthawng taka a awm laiin kei hian ka lo chhanchhuak thung ang.!
.
Ka ruahman ang thlapin thil a kal a, damdawiin a kal thin chhan ka ngaihtuah lehin hlauthawng taka ka siam erawh ka inthiam chiah lo. Him takin in a thleng a, harsatna a tawk lo tih ka chian zet hnuah ka hawsan leh ta chauh reng a ni.
.
Min nei tura ka sawm laia a mitmeng ka hmuh khan nuam tih lohna ka nei a, chu erawh ka thiltum leh ka tihchhan ngaihtuahin inthiam lohna ka nei leh ta lo. Hmeichhe thianghlim a lo la ni reng tih kan inneih zana ka hriat khan mak tiin ka thaw a chham lo chauh a nih kha!! Mak takin abula awm nuam ka ti a, lemchang ka ni tih ka in theihnghilh lo chauh zel chu a nih hi.
.
He hmeichhe rinna hi ka hlawhchhuak a, thiltha ber a ni dawn em  tih ka hrelo. Lemchanna hlawhtling tak ka nei mek a ni tih erawh ka hrechiang hle. Ka farnu hre reng chungin ka lemchan pawh ka chhunzawm zel tur a ni ang! A unaupa thiltih sual man a rulh tur hi a hre hauh lo niin a lang lehnghal..!!
TMH!!
CHAPTER – 7
TAKE MY HEART!
By. Thantei_Pautu aka Laura_Sean_Virgo
.
ALLISON'S P.O.V*
.
"Minute 10 hnuah kan chhuak ang. In hnuaiah ka lo nghak ang che."
"Okay. Ka inpeih tep."
.
Kan pindan atangin Luca a chhuak a. Ka kawr hak chu siam thain ka landan ka ennawn leh zet hnuah inhnuai ah ka chhuk a.
.
Luca nen kan inneih atangin thla hnih zet a liam ve ta. Tomas erawh ka be pawp thei lo a, Luca hnaih tawh lo tura min rawn hrilh hnu khan a reh leh ta vang vang a, a thusawi kha awih lo mah ila Luca awm dan ka chik lehzual thung. Thil diklo leh pangngai lo deuh a thleng ngai lo a, ka thla a muang chawp ve leh mai bawk. Sumdawnna thil vangin Luca a zin tam ta deuh a, thil nihdan tur ve reng anih vangin hreawm tihna ka nei hran lo. Keipawh ka hnaah ka buai em em reng a, thil ngaihtuah veng veng na tur hun pawh ka nei lo a ni ber mai. Ka nu (Nina Giovanni) nen erawh kan la inkawmngeih tehchiam lo. Kar khatah vawihnih tal ka tlawh ziah a, hunawl ka neih bik loh zia ngaihtuah chuan bei nasa tak ka ni. Keiin ngainat tum viau mah ila, mi pahnih an tanrual loh chuan lung a rual thei lo tia an sawi thin hi a lo dik ngei tih fiahna ka hmu a ni ber e.
.
Zanin hian ka pa (Antinio Giovanni) piancham lawm turin kan kal dawn a, tunhma atanga chhungkaw tih dan an la chhunzawm zel angin hun bik kan hmang dawn a ni. Luca min hrilh hmangin an chhungkaw ho zawng zawng leh sumdawnna thila an thawhpui te an sawm kim viau dawn tih a sawi a, a theuneu hauh dawn lo tih ka ngaihtuah lawk thiam tho nain a hmun kan thlen chuan ka ngaihtuah lawk dan aiin a la ropui cheu mai. Engkim a ber hlir a ni tih a hriat hluah hluah bawk.
.
Ka hmelhriat pawh ka hmu nual a, kan zavaiin kan hlim tlang niin ka hria. Luca chu a thiante nen titi in a kalsawn a, pawi ka ti lo zawk. Ka bula a awmreng chuan a langmawi lo zawk ve thei tlat.
.
Ka phone nghawr dar dar chu ka bag atanga phawrhin ka message dawn chu ka en a.
.
"I pasal hriat loh turin biak che ka duh."
Message min rawn thawntu chu tunge ni ang tih ngaihtuah chungin ka phone chu ka bag ah ka khung leh a, chhan tumna pawh ka nei lem lo. Luca hi ka pasal anih angin alaka thil zep ruk neih ka duh lo a, ka awm anga awm tur hian ka beisei ve bawk.
.
Ka phone rawn nghawr leh dar dar chu ka bag atangin ka phawrh leh a.. Message bawk..
.
"AC, keimah.."
.
Tomas chiahin AC tiin min ko thin! Hlauhthawn nei ang mai hian arawn awm ziah a, Luca hriat loha thiltih ka duh lo tih ka ngaihtuah zo chauh nain kan unau chauha kan hriattur thu pawh thil awm thei a ni ve tho mai. Thil awmzia ka hriat a tul tih ngaihtuah telin  "Tunah min lo be rawh." tiin ka chhang nghal a. Ahmaa kan inbiak tawhna ngaihtuah chhuak in ka pasal hlat tura min hrilh chhan pawh kha tunah hian ka hre thei tawh ngei ang. Pawnah ka chhuak lawk dawn tih hrilh tumin Luca awmna ka pan a, ka hmu mai lo. A kalsawn lai ka hmu miah lo bawk. A thiante nen khan an kalsawn anih ka ring. A pawi lo ve.
.
Muangchangin pawnah ka chhuak a, ka phone rik hun nghakin ka phone ka hum ran a, mak takin ka tiril a khur tlat nia. Tomas hian eng thil nge a hriat? Kei, engtiklai pawha Luca bula awm hian rinhlelhna tur ka hre der lo chu a nia. Han rinlawk tur pawh ka hre hek lo.
.
Minute 5 vel ka din hnuah ka phone arawn nghawr dar dar chuan ka pick up vat a.
.
"Hey, AC.."
.
"Tomas, i tha em?"
.
"Ka tha rih e. Tunah chuan engkim ka la hrilh thei lo che. Khawngaihin min hrethiam rawh aw. Tuna i hriattur chin chu Luca lakah khan inveng la, ka chanchin engpawh a zawt che anih chuan engmah i hriat loh thu i sawi dawn nia."
.
"Eng thil nge thleng hi ka hrethiam lo... Tomas, tunah engkim hriat ka duh. Chuan, Luca hian I chanchin engmah a hranin min zawt ngai miah lo a nia.."
.
"A hun takah engkim ka hrilh ang che. Kan inbe rei thei lo a nia." a aw rik dan atangin a hlauthawng tih ka hai lo. Ka unaupa hian eng buaina nge a hmachhawn tak hi le? A landan in ka pasal nen an inhal hle anih hmel bawk a. Ngaihtuah ber tur ka hre ta lo. An buai nachhan ber ka hriat loh chuan lo ngaihtuah buai ve tur a vang reng a ni.
.
"Tomas..."
"AC, khawngaihin tunah chuan min nawrlui suh. Ka rawn bia che anih loh chuan min biak pawh tum lo la.. Ka him i duh anih chuan ka thusawi hi i zawm ngei atul a nia."
.
"Tomas, min tihlauthawng.."
.
"Ka tihpalh AC, thil awmdan hi ka beisei lawk bik lo a, ka awmna hmun dik ka hrilh thei hrih lo che. Min ngaidam rawh." Tomas aw khurh dan atang chuan a tap niin ka hria. Ka thinlung a ti mangang takzet. Ka unaupa dinhmun derthawng ah a awm mek ni a ka hriatna chuan min ti mangang a, hlauthawng a a awm chhan ber chu duh leh hmangaih taka ka neih ka pasal hi anih  hmel bawk si..
Ka chhan leh hmain phone a off a, biak leh tuma ka call chuan a phone a lo switch off leh hman tawh. Mangang ru zetin thawk ka la hak a, tunah chuan tihtheih ka nei rih chuang lo.
.
Rilru nuam lo takin ka awm a, Luca ka lam pana lo kal ka hmuh chuan ka rilru nawm lohna tihlan hlau takin ka nui lui sak a. .
"I tha em?" min ngaihtuah hmel takin min en a, a rilru ah eng thil nge awm ang tih ka lo ngaihtuah hmanhmawh. Ka pasal hi rinhlelh ka duh lo a, mah se, thil awm dan atang hian alan ang ngawt a ni dawn lo nia hriatna ka nei si a ni.
.
"Ka tha alawm." ka tih chuan a awih hmel loh khawp mai.
"I duh chuan kan haw hma thei tho a nia."
"No.. Luca, ka tha.."
.
Min chhang tawh lo a ka chal rawn dek zauhin a bu nghat a.
.
Inthunun tum viau mah ila ka rilru a nuam thei tawh lo. Ka mizia a ka duh loh em em thin arawn langchhuak leh ta anih hi.
Thil eng emaw ka rilru luahtu leh ka awm tinuam lo tu a awm anih chuan ka bul vela thil awm ngaihtuah lo leka inngaihtuah vung vung ka ching fo a, sim ka duh em em laiin ka sim hleithei lo.
.
Party a zo a, kan in pana kan haw kawngah pawh ka tawng tam lo khawp mai. Thil awmzia ngaihtuah buai reng lo hian Luca hi ka zawt thei alawm. Tomas-a'n ti tura min hrilh angin a awmna hmun erawh ka sawichhuak lo ang.. Sawi palh tur pawhin Tomas hi khawi hmunah chiah nge a awm ka hre lo hrim hrim bawk. Ka tum hauh lohin a awmna ka sawi chhuak palh thei tih a hriat vanga min hrilh duh lo anih ngei ka ring.
.
In kan thlen chuan kan pindan ah lutin ka inthlak mawlh mawlh a, ka awmdan danglam chu min hriatsak awm pawhin a awm lo.  Bathroom atanga a lo chhuak chu khum a thu chungin ka lo en reng a.
.
"Thil eng emaw zawh tur che ka nei a nia." ka tih chuan ka bulah rawn thu in min kuah a.
.
"Thil pawimawh anih ka ring. Party na hmun atang khan i awm dan a dik tawh lo tih ka hria alawm. Fiorenza chungchang a ni em?" a tih chuan ka en ha a. Party-na hmunah khan Fiorenza ka lo hmu miah lo.
.
“Ni lo. Thil eng emaw, thil pawimawh tak chu a ni.. Luca” a phone arawn rik chuan engahmah ngai lovin sawi zel turin min duh tih lantir nan min melh a.. “Pick up phawt rawh..” dik tak chuan ka thu zawh tum vang hian ka zam a ni. Tun vut vuta zawh hi a thul kher pawhin ka hre leh lo.. “Zankhuain hun kan nei tho alawm.” Ka tih chuan ngaihthat hmel takin min thawhsan a, a phone chu a pick up nghal bawk a.
.
Tunge abiak tih hriat tuma en zui tum lem lo. Tunang huna rawn be tu chu tu dang mah ni lovin a nu bak a ni lovang tih ka hrechiang. Khumah chuan ka let thawk a, ka ngaihtuahna buai nuai nuai chuan min tichau hluah hluah mai.
.
Ka unaupa hian eng thil tha lo nge a tih ang? Rinhlelh nei turin Luca awm danah thil dik lo a awm tih a lang lo a, engti hawi zawng pawhin ngaihdan siam dawn ila kawng ka bo vel vek mai. Thu awmzia engmah hre lovin ka pasal hi ka ringhlel ringawt thei lo a, ka unaupa pawh ka ring chhe ngawt thei hek lo. Tomas hlauhthawn hmel taka arawn awm dan atang kha chuan thil diklo a awm ngei ang tih ka ring.. Ka ring ringawt pawh a ni tawh lo, thil diklo a awm tih a chiang a, eng thil nge tih erawh han rinchhin tur ka hre der lo. Tomas khan felfai takin min hrilh mai se la tha tur.. Ka rilru a tibuai em em dawn tih a hre ngei awm sia..
.
Ka mutthilh lai reng reng ka hre lo. Ka harh leh chuan khua a lo var uar tawh a, min kuah chunga Luca muhil thaw ri sak sak chu ngaithla in ka mu meng reng a. Thawkehkhatah Luca awm dan chu danglam in a let thawk a, a thawk dan a danglam thut bawk..
.
“Adelina.. Ni lo….” Luca chu rum in a thaw hrawih hrawih a.
.
“Luca, I tha em? Harh teh..” tihharh tumin ka sawih a, a rawn thuchhuak nghal hlawl a, a ban vai chuan min nawr sawn deuh nawk bawk. Ka awmdan siam tha in a hnungah ka chul a, a that leh that loh ka zawt nawn mawlh mawlh a. A thawk dan a pangngai leh hnu chuan tho vutin bathroom a pan a, ka zui ve nghal vat bawk. Bathroom kawngka a kalh vangin engtin nge a awm ka hmu thei lo a, ka koh pawhin min chhang tawh hek lo.
.
Bathroom kawngka arawn inhawn chuan thaw huaiin ka en a, min en let miah lo. Mumang tha lo tak a nei anih ka ring. Bathroom-a lut ve nghal mai lo chuan ka zui a, a awm dan chu nidang nen a inang lo.
.
“Luca, I tha em?”
Min chhang lo a, ka biak chu hre awm pawhin a awm lo.
“Luca, I tha em?”
“Min lo be buai rih suh.” A ti nghut a, a awm dan chu makti zetin ka en reng a. Tibuai lo tura min duh anih chuan a duh dan angin ka awm mai aniang chu. Ngaihdan ni vak lo chunga kalsan in bathroom-ah ka lut a, rilru tibuai thei dang ka hriatbelh a ni mai e.
.
Adelina chu tunge?? Luca awm dan atang khan mumang tha tak a neih vanga rawn rum chhuak ani lo chiang a, biak theih loha a awm chhan pawh thil tha tak a ni lo phawt ang. Adelina chu tunge anih? Luca tan hian enge a nih? A ngaihzawng hlui a ni angem? A hmelma mi tha lo tak pawh a ni zawk maithei..!!! Tunah buaina dang ka neih belh leh ta.. Thil tha lam reng reng ka ngaihtuah naah a lut thei tawh lo. Ka unaupa’n fimkhur tura min hrilh chhan kha Luca awmdan diklo a hriat vang a ni thei a ngem? Luca hian hmeichhe dang a rukin a lo kawp reng pawh a ni thei tho.. Oh..Lalpa..chu thil chu thleng lo hram rawh se…
.
Thawk la hawkin ka thawmhnaw ka phelh a, tui vawt zet chuan ka inphuhtir a, tui vawtin ka taksa a deh rualin ka phu deuh zawk bawk.
.
Ka unaupa buaina eng thil nge tih ka hriatchhuah angai a, Adelina chu tunge tih ka hriatchhuah angai bawk.. Engvangin nge vawilehkhat ah ka thil hriatthiam loh a rawn lan rual sup sup mai le??
.
Breakfast kan ei lai pawhin Luca chu a tawng miah lo a, biak luih sek ka tum bik lo. A hmel landan atangin bia pawh ni ila mmin chhang dawn lo tih a lang chiang reng a, chhanna ka hmu dawn lo tih hrereng chunga lo be buai sek duh tur khawpin ka mit a del bik lo. Ngawi rengin kan ei mawlh mawlh a, dan pangngai in a hun ngaiah hnathawhna hmun panin in kan chhuahsan a.
.
Ka rilru a nuam lo nileng a ni ber. Luca awmdan danglam vang leh Tomas ka biak pawh theih loh vangin ka thin a ur ru tun a, lunch pawh ka ei peih lo hial. Ngaihtuahna mumal pawh ka nei hleithei lo.
.
Hnathawhna hmun atanga ka haw hmain ka nu’n min rawn bia a, in a haw lovin an chenna hmuna ka hmuh angaih hmel. Engvanga min hmu duh nge anih a sawi lawk lo a, Luca chungchang anih ka ring ve tawp ringawt. Mak takin vawiin hian Luca nen kan la inbe miah lo. Nidang ang chu ni se tunang hunah hian kan pahnihin hlim taka titi chungin kan in kan pan tawh ngei ang..
TMH!!
CHAPTER – 8
TAKE MY HEART!
By. Thantei_Pautu aka Laura_Sean_Virgo
.
Office atanga chhuakin ka nu leh pa chenna hmun ka pan a, ka ngaihtuah chiam pawh hian eng vanga min hmu duh nge anih ang tih han rinlawk vak dan ka hre chuang der lo. Ka nu hian Luca nen kan inneih hma min hmuh hmasak ber atanga vawiin thleng hian min ngaina tehchiam lo tih ka hrechiang a, min hmuh a duh chhan pawh hi chanchintha min hrilh a duh vang anih ka ring lo ve tawp! Thu lawmawm tak min hrilh hlauh se la' tiin ka ngaihtuah a..
.
"Miss, kan thleng e."
Taxi driver pawisa ka pek hnu chuan motor atanga chhukin gate pawnah ka ding a. Ka nu hian eng thu pawh min hrilh se, huaisen takin ka hmachhawn ang. A hranpa ngat a min koh hian chhan pawimawh tak a nei ngei bawk ang tih hi chu ngaihtuah buai pawh angai lo. Ka zam em em chhan tur pawh a awmin ka hre lo leh hnuhnawh.
.
Bernard-a'n ka luhna tura gate a rawn hawn chuan thawk la halhin ka pen lut a. Ka zam tho si chu anih hi!
.
Inchhung ka luh chuan a lo reh thiap a, thlipui tleh hmaa boruak reh duk ang hi ka chan ber. Inchung pan chhohna step-a ka nu (Nina Giovanni) rawn kal chhuk ka hmuh rualin ka nui sak a, ka rinlawk ang chiahin nui hmelin min chhawn lo a, thinrim hmel a pu hek lo.
.
"I lo kal a, a lawmawm e. I lo kal tih hi ka fapa i hrilh loh ka beisei." a aw nelawm loh zia leh engahmah min ngailo tih a tihlan chu ngaihtuah zawm duh lovin Luca engmah ka hrilh lo tih lantir nan ka bu nghat a. Polite taka nuih pawh ka tum ta bik lo.
.
"Helamah hian.." a tih chuan ka zui a, pindan pakhat te fel tak ah inzui lutin inhmachhawn sat hian kan thu ta ran mai. Chik zetin min en a, sawi mai tur hre lovin ka ngawi ran a. A sawi duh a sawi hun ka lo nghak tawp. Duhthu ka lo sam thin, pasal nu nena inkawmngeih leh inpawh taka awm a, hlim taka titi dun leh nuihdun chu hlat tak kan ni. Ka neih chak em em min hrethiam tu leh rilru hahna ka thlen ngamna tur 'NU' ka nei ve ngai dawn lo tih ka ngaihtuah chuan ka thinlung a pik ngawih ngawih mai.
.
"Ka fapa lak atang hian enge i beisei tih hriat ka duh a ni." a ti nghal tawng a. Engtin nge ka chhan ang tih ngaihtuah kualna tur hun ka nei lo tih ka hria.
.
"Mama, ka pasal anih angin ka hmangaih a, a hmangaihna dawn let ve tih loh chu Luca lakah hian beisei dang ka nei lo." ka tih chuan a ner sak a, ka thusawi vanga ner nge mama tia ka koh vanga ner anih ka hre lo.
.
"Ka fapa hi ka hrechiang a, hmeichhe pakhat bulah a damchhung hun a hmangral theiin ka ring lo." rapthlak ti zet hian ka melh a. A fapa neihchhun a hriat dan leh angaih dan chuan ka tah a tichhuak zawk hial. Hetiang zawnga ti lo hian a fapa hi a kawppui lakah a rinawm tur a ni tiin thu tha a hrilh thei zawk lo em ni? "Ka fapa tan hian ka pawm thei ngai dawn lo che tih i hriatthiam ka ring a, ka fapa hian a hmangaih lo ang che tih ka hre bawk. A hma thei angin kalsan la ka duh.."
.
"Luca hian min hmangaih.. Kalsan tumna ka nei lo.." a awmdan danglam miah lovin min en a, ka hrawk ro huam huam tihhnawn tumin ka chil ka lem khalh a. Inringtawk tak angin ka lang angem tih pawh ka chiang ta lo e. Thil tha lam sawi tura min ko anih ka rin loh rual khan tuna a thusawi ang a sawi hi ka lo ring chuang miah lo anih hi. Min thawng khawp mai!
.
"A hmangaih che tih i bulah a sawi em?"
A zawhna chuan min tihlau takzet! Sawitur hre lo a ngawih reng erawh ka tum lo bur.
.
"A sawi kher ngai lovin ka hria alawm." ka tih chuan za zet hian a nui hak hak a, ka lo maimaitchhing sawk!  Ka laka Luca awm dan leh chezia te ngaihtuah chuan min hmangaih ngei a ni. Lemchang mai a ni thei lo. Mah se, min hmangaih thu a chezia mai ni lo, a tawngkam ngeiin min hrilh tih ka sawi thei tlat lo. Luca hian tawngkam in min hmangaih tih min hrilh lo tlat atin ni.! Kei hian ka duhthusam kalpuiin ka thil duh ber hmu angin ka inngaihtuah lui mai mai em ni?
.
"Oh..Darling.. I hun i khawhral mai mai a ni. Ka fapa hian a hmangaih che anih chuan i hriatturin a sawi ngei ang."
.
"I fapa hi i ring chhe hle mai." ka ti ngawt a. Ka ngaihdan chiah a ni nain nu chuan a fapa a hrechiang thin tih erawh chiang takin ka hria.
.
"Ni lo e, ka fapa hi ka ring chhe reng reng lo. Ka chhuang a, a nihna diktak inhria a, a kawppui awm thlang chhuak thiam turin ka duh mai chauh a ni. Hmeichhe naran bula a damchhung hun hmang hian a lungawi theih ka ring lo. Ka phal hek lo ang. Mahni dinhmun hriatchian hi a tha ngai ania." a ti hmarh hmarh a. A mitmeng en lo turin ka insum a, ka ngaihtuah naa thil awm ang ang leh amah ka hmuh dan sawichhuak lo turin ka insum angai bawk. Ka  ngawi anih loh chuan mawi lo takin ka pasal nu hi ka tawng khum dawn tih ka inhrechiang.. Eng ang mi pawh ni se, ka pasal nu a ni tlat a, ka zahder tur pawh a ni. Min nawr lui lo se ka duh takzet.. Ka tuar theih bak chin leh  ka insum hram hram theih chin a pelh chuan ka chhungril a ka duh loh mizia hi a chhuak ngei ang. Tupawh hian thil tha zawk tih duh vangin keimahni a thil tha awm midangte lakah kan tilang thin a, keimahni a mizia thalo awm hi kan paih tawp theilo nain kan thunun theih chinah chuan kan thup thin.. Ngaihtuahna thalo nei ngai reng reng lo  mihring hi kan awm pawh ka ring chiah lo ve.
.
Ka chhan mai loh vang chuan a thutna atangin a tho a, a thawmhnaw hak a zut mar hnuah a ding ngil auh a.
.
"Anih chuan, Allison Adams, uluk zawkin lo inngaihtuah la, sum i duh anih phawt chuan i duh zat zat ka pe ang che. I laka ka thatna hi i hriatthiam ka ring. Min hawsan thei tawh ang."
.
Ka chhang dawn em tih ngaichang miah lo in a inher a, pindan atangin a chhuak a. Giovanni chhungkua ah hian ani hian engtik ah mah min lawm ngai dawn lo tih a chiang fek fawk viau e. Tunah a fapa nen thla hnih chhung kan innei tawh chung pawhin atan chuan ‘Adams’ ka la ni reng. Chu chu ka tan a pawi viau chuang em ni? Ka pasal nen kan inrem phawt chuan a pawi chuang lo. Hetiang khawpa min pawm lo tu hian a rilru puthmang hi a fapa hriat atan a duh lo tih a langchiang bawk..
.
Ka zawi hnawk tho mai.. Min va ngai hniam em em ve le!!
.
Rilru ngui takin in ka pan a, kan chenna hmun thlen hma la hla deuh tak atangin ke in ka kal a. Inngaihtuah na tur hun ka mamawh niin ka hria.
Ka ke kham ut ut vang chuan ka pheikhawk phelhin kelawng in ka kal a, boruak a lum deuh bawk vangin ka thlan hlap hlap mai. Tun hun hi Tomas biak nan hun tha tak anih ka ring. Hmanhmawh hmel taka mi vei suau suau te chu kal pelin kawngsir a thutna awm ah chuan ka thu a. “Khawngaihin biak theih hram rawh.” tia phun mawlh mawlh chungin Tomas number ka dial a, min rawn chhan chu sawi loh a phone a on lo hrim hrim anih hmel.
.
Minute 10 vel hnuah ka thutna atanga thoin in lam ka pan leh ta nge nge.
.
In ka thlen chuan Carina’n min lo lawm vat a.
.
“Luca a lo thleng tawh em?”
“La thleng lo.. Awi, tlaiah khan a lo haw zuai a a chhuah leh khan arawn hruai dawn che anih ka lo ring ringawt a..”
.
“A buai zual anih ka ring. Ka’n inthlak phawt ange.” tiin kan pindan ah ka chhohsan a. Ka inbual zawh hnu darkar khat zet a liam hnuah pawh Luca ala rawn thleng lo. Ni lenga kan inbe lo pawh nuam ka tih tawh loh tehreng nen..
.
A lo thlen mai ringin ka nghak zel a, dar 10 a pelh hnuah pawh a lo la thleng lo cheu. Zanriah ei lovin ka awm ta ringawt. Ei tum pawh ni ila eng tham mah ka ei dawn chuang lo.. Ka boruak tawn mek hi ka hrethiam lo a, vawilehkhata buaina tamtak inthuah tun in min delh ni a ka hriatna hian ka awm a tinuam thei ngang lo a ni e.
.
Muhil thei chuang lovin khumah ka let sek a. Ka phone nghawr dar dar chu hmanhmawh zet hian ka la vat a.
.
“Ka biak hi Allison a ni em?”
.
"Aw, ni e. Tunge ka biak?" ka tih chuan a reh lehrih a.
.
"Rafe ka nia..Luca hi i lo hruai angai anih hi.."
.
"Khawiah nge? Amah a tha em?"
.
"48 Pegu club-ah lo kal rawh. I lo thlen hma chu ka lo nghak ang che."
.
Hmanhmawh zetin thawmhnaw ka ha zung zung a, zan rei tawh lam anih vangin keimah chauh a kal chhuah ka ngam lo a, ka driver tur bika kan chhawr Marcelli ka phone chuan a lo inpeih nghal tur thu sawi hnuah phone ka off a. Engvanga kalchhuah ngai thut nge anih min zawt lo a, eng thil nge kan tihtur min zawt hek lo. Ka tihthan lem loh vang hian Marcelli hi ka tibuai khat viau a, mi hausa te nunphung leh thil nih dan tur renga an ngaih thil tam tak hi keichuan ngaiah ka neih thei lo a ni ber. A tul fe anih loh chuan Marcelli min hruai ngai lovin keimahin ka kal zel mai.
.
"48 Pegu Club ah. Hmanhmawh deuh rawh aw." ka tih chuan Marcelli chu a bu nghat a. A mitmeng atangin a muhil ka tiharh anih hmel hi a. Muhil harh hlawl hmel a pu nain mood fuh lo hmel a pu chuang lo a, a tawngtam ngai loh vang hian ka ngaina angreng. Nupui nei tawhin fa 1 an nei a, kan chenna bulhnai ah hian kan chhawr tan atang khan an rawn insawn ve tih ka hria
a, a nupui leh an fapa pawh ka la hmu ve lo. Min pawh tha ngam lo ni hian ka hre thin.
.
"I nupui leh i fapa te an tha em?"
.
"Oh..tha e.." hamhaih deuh takin a nui hak a.
.
"Engtik ah nge ka hmuh ve theih ang?" ka tih leh phei chuan phawk hra hian min en a, ka thusawi chu mak a tih hmel khawp mai.
.
"I duh hun apiangah i hmu thei alawm. Ma'am, kan chunga in nupa thatna hi kan damchhungin kan hrereng tawh dawn anih hi." a ti ve ta duah a. A thusawi chu a awmzia ka hre tam tehchiam lo. Luca hian kan inneih tantirh khan ka mamawh hun apianga min hruai thei tur mi a ruai tih a sawi a, an inrawih dan leh thildang hriat ka nei ve lem lo a. Luca hian a lo tanpui nasa anih ka ring.
.
Thil dang kan sawi kai a, a fapa chanchin a sawi chuan ka rilru takin ka lo ngaihthlak sak a.. Fa kan neih ve hun tur ka lo ngaihtuah ngawt bawk.
.
"Ma'am, kan thleng e."
.
"Hetah hian min lo nghak mai rawh." tih pahin motor atang chuan ka chhuak a, kawngkhar min hawnsak hun ka nghak hman lo.
Club chhunga ka luh chuan Luca ka zawng a, hmeichhia leh mipa thenkhat harhfim vak lo tih hriatreng a inkuah thuak thuak ka hmuh chuan ka tim sawk mai. Ka pasal hian hmeichhe dang a lo kuah ve loh ka beisei e.
.
"Allison, hetah.."
.
Min lo ko tu lam ka hawi a. Tunhmain ka la hmuh awm ka hre lo. Ka pan ta tho a.
.
"Rafe ka nia. Zanin chu Luca hi nidang a ang lo deuh a." a nui suk a.
Dawhkan bawhin Luca chu a thu a, a harh lo niin ka hria.A bulah kal in ka sawih a, a che eih lo.
.
"A mumal thei rih lo ang. A in hnem khawp mai. Ka mi hruai hi thlah ka  ngai sia ka lo ko ta mai che anih kha." An bula hmeichhe nalh zet thu ve chu a melh zauh a.
.
"A pawi lo. Ka lawm e. Chawlh a mamawh anih hi" Rafe chu chhangin Luca ka kuah a, keimah chauh chuan ka hruaichhuak thei dawn hauh lo mai.
.
"Ka lo pui ang che." a tih chuan nui lui sakin ka bu nghat. Ka pawm mai loh chuan hetiang mipa lian leh harhfim lo mahni chauh a kai chhuak tur hian tharum ka ngah tawk lo.
.
.
Club atanga kan chhuak min hmuh rualin Marcelli'n min lo pui vat a. Luca car chhunga kan luhtir hnuah lut ve nghalin Marcelli pawh a tihtur a hre khawp mai.
.
“Hei a phone.”
“Oh”
Rafe kut atang chuan phone chu ka la vat a.
.
“Ka lawm e.”
“I pasal hi enkawl tha ang che.” Nui sak chungin a ban arawn vai leh zauh a. Tawngka a chhang tawh lovin ka kut ka vai ve zauh bawk.
.
In kan thlen chuan inchhung ah kan inkuah lut a, Luca pawh ahma ai chuan a harh tawh deuh. A thawmhnaw thlak sakin ka muttir a.
.
“Luca, tinge hetiang hian i awm?” phun sep sep in a sam ka chul a, a muhil hmeltha zet chu ka en ngawih ngawih a. Ka pasal duh tak hian buaina eng emaw a nei  ngei ang tih ka ringhlel ta lo. Rinhlelh luih talh chi pawh a ni lo. Puitling, a dinhmun leh a nihna ngaihtuah phei chuan tuna a awmdan ang hi thilmak tawpkhawk a ni. Engkim a duh apiang tithei anga lang leh thuneihna tamtak nei pawh ni mahse, zawh tawk nei a nih zia leh mihring pangngai ve mai anih zia alang anih hi! A mithmul dum hlap chu ka kutin ka chhui zai zai a. A hmul met fai vang loa a awm hian a lang tha zawkin ka hria.. Ka thil ngaihtuah chu ka hun tawn mek nen a inhmeh loh zia ngaihtuahin ka nuih a za deuh..
.
Lukham nghengin ka thu awn a, Luca sam dum hlap chu ka khawih niap niap a.
.
Ka bula thil che awm avang chuan ka phu chhuak zawk a, ka thu ngil nghal vat bawk. Luca chu en in engtin nge a awm dawn ka ngaichang deuh a. A kut zungtang in a mit a hmet vang vang a.
.
“I tha em? Heihi ei rawh..”
Khum bula damdawi ka dah chu lain ka pe a, ngawi rengin a ei a. Ka hnung kham ut ut vang chuan keipawh  ka zi mar ar ar a, mut pangngai a mu lovin thu chungin ka muhil a, ka taksa a na thum mai.
.
“Engtin nge ka awm?” a ti sup a.
.
“Pegu club atangin ka hruai haw che alawm.” Ka tih chuan a phun sup a. “Luca..”
.
“Pegu-ah ka awm tih tuin nge hrilh che?”
.
“Rafe.. I in tam deuh tih min hrilh a. Nangmah ang lo takin.. Hetia awm hi I inhmeh lo a nia..” Sana ka en a, zing lam dar 4 a ri chiah.
.
“Rafe chuan thudang a sawi em?” min en lovin zawhna min zawt a. Min hnaih duh lo ang takin a awm bawk. A hmel chu ka enchiang khawp mai.
.
“Hey..” zawi raiha tiin a kut ka vuan a.. “I tha em?”
.
“Rafe chuan i bulah thusawi a nei em?”
“Luca, min en teh..”
.
“Naktuk ah kan sawi dawn nia..” ati leh nghut ringawt. Inlet thawkin a maimitchhing a, ka be tawng zui thei dawn lo tih ka hrechiang. Thaw huaiin ka thawh san a, bathroom-ah lutin ka hmai ka phih a. Mut leh pawh ka tum tawh lo.
.
Kan room tv on in sofa-ah ka thu phim kak a, en ber tur pawh hre chuang lovin ka hmet kual sek a. Luca chu ka va melh leh thin. A muhil leh mai niin ka hria.
.
Tu emaw hian puan min sintir a, tlemin a lum ta deuh. Ka hmai zawna thaw lum ham ham ka hriat chuan ka inkhuh thak a.
.
“Hna a kal I tum chuan thawh a hun a nia..”
.
Ka thuchhuak nghal hlawl a, ka beisei loh zetin Carina chuan hnai zetah min lo en a, ka harh tih min hmuh chuan thawveng huai hmel a pu bawk. Sofa ah ka mu tawh miah lo bawk..
.
“Luca chu a kal tawh a, I thawh mai loh chuan kai tho mai tur che in min chah a..”
“Oh.. Dar engzat nge?” Sana ka hmuh chuan khum atangin ka chhuk rawk rawk a. Hna a tlai a thiang lo.. Engtin nge ka mutthilh leh theih zawk le..
.
Hmanhmawh zetin ka insiam sawk sawk a, ka riltam zia chu sawi ngaihna a awm lo. Nizan khan engmah ei lovin ka mu a, tunah pawh mumal taka thil eina tur hun nei lo khawpin thawh ka hai leh bawk si.
.
Hmanhmawh zetin in ka chhuahsan a, ka chhuah dawnah Apple ka la hram. Kalkawng ah ka ei tawh mai ang chu.
.
Office ka thlen chuan thaw hlawp hlawp in ka cabin ka pan a, ka tlai lo hlauh e. Chawhma chhungin meeting pahnih a nei tih Mr. Atkinson ka hrilhnawn leh chuan meeting-a ka awm ve a tul thu min hrilh a, kan hnathawh tlema tih danglam ngai a awm thu min hrilh chuan a ngaihna ka hre chiah lo. Titura min hrilh angin thupek ka zawm a, dan pangngaiin a ninawm lehpek hle. Meeting a zawh chuan ka thaw huai mai.
.
Sarah nen lunch eiin kan chhuak a, mumal deuha eitur ka ei chuan ka harh hawkin ka hre hial. Office-a kan let leh hmain Luca ka call a, chhanna a awm lo. Min lo biak ringin ka ngaichang ru deuh reng bawk.. Ka mood a fuh thei reng reng lo mai.
.
Kan hna kan zawh veleh in panin ka haw tlang nghal a, ka beisei lawk ang chiahin Luca pawh a lo la haw lo. A lo haw veleh kan awmdan ninawm zet hi kan sawifel angai.. Awmze nei lova hetia awm kual mai mai hian ka ngaihtuahna a tibuai zual mai mai a ni.
.
.
Luca a lo thlen chuan min hmu lo ang maia  awmin kan pindan a pan nghal a, ka zui ve nghal hmiah.
.
“Inbiak kan ngai a nia..”
A thawmhnaw a phelh zung zung a, a chetdan atang chuan thinrimna a nei a ni ngei ang. Min melh eih lo.
.
“Luca.. Kan awmdan hian awmzia a nei lo.. Mumang chiang lo tak ang mai a ni..” ka duh angin ka sawi thiam chiah lo zawk. A thawmhnaw phelh lai chu chawl meuhin min en a, engmah a la sawi chuang lo.
.
“Thil eng emaw sawi teh Luca..”
.
“Zawh duh I neih chuan min zawt thei alawm.” A ti nghut a. Kan pahnih inkar mai ni lo, ka unaupa chungchang pawh ka zawt tel nghal mai a niang chu!
"Kan pahnih inkar chauh pawh a ni lo.”
“Sawi rawh.” A thawmhnaw phelh zo in T-shirt a ha a, a kekawr ha lehin min ngaihsak hmel lem loh khawp mai. Ka thin a ur tan bawk. Hetiang khawpa min namnul ringawt tur hi a ni lo reng reng. Thawk leh khata a danglam thut leh Tomas buaina, ka pasal laka fimkhur tura min hrilh chhan kha a inzawm in ka ring ta tlat!! Eng thil nge maw ka ngaihtuah chhuah hi le..??
.
“Ka unaupa chungchang a nia." a awmdan a danglam miah lo.
.
"Tomas nen hian in inhria tih min hrilh miah lo a." ka tih chuan ka mit ah chiang zetin min rawn en a, zam lo ang taka langlui chungin ka en ve bawk. A mitmeng atangin eng thil nge a ngaihtuah ka hre thei lo.
.
"I unaupa chungchang chu eng thil nge i hriat duh?" a ti hmuk a. Pangngai taka lan a duh nain a thei bik lo tih ka hrethiam.
.
"Engkim.."
.
"I unaupa chu i zawt mai lo nia.."
.
"Luca.."
.
"I unaupa chet dan tenawm zet hre lo a tun chen i awm thei hi mak ka lo ti ru tawh reng a ni. Nge, I hre lo der!" a aw ri chu a chang khawp mai.
.
A thusawi chuan min nghawr nghing chiang lutuk takzet..!!
.
"Thil i hre sual anih ka ring. Ka unaupa hian tu pawi mah a sawi ngai lo. I thusawi chuan awmzia a nei lo bawk." ka thusawi hi dik se ka duh ngawih ngawih. Ka thusawi a hriat chuan a nui hul hak a. Tuna a nuih dan ang hian ka bulah a la nui ngai lo reng reng. Chu chuan hlauhthawnna mak tak min siam sak a, ka thusawi zawh chiah chu kei pawhin ka ringhlel!! Ni lo, Tomas hian thudik chauh min hrilh thin.. Ka unaupa hian thil tha lo tak a ti thei lo.. A ti ngai lovang..
.
"I unaupa tenawm zet hi tunah hian khawiah nge a awm?"
A aw ki mak tak leh min en dan ka hmuh chuan ka ip chawih lo thei lo.. Ka la enlui ngar a, ka chhungril erawh a mitmeng danglam tak ka la hmuh ngai loh vang chuan ka khur ru zawih zawih tawh thung.
.
"Engvanga hre duh nge i nih?" ka ti leh sap a. Ka zam ruk zia chu langchhuak lo se ka duh takzet.
.
"A tha e. Ruahmanna fel tak in siam ngeiin ka ring."
.
"I thusawi awm zia chu ka hre lo." ka tih chuan min en in a ner nawk a. "Takzet che hian.." tiin a phun zui hluk a. Ngawi rengin a kalsawn a, pindan atanga chhuah a tum niin ka hria. Ka rilru a buai nuai nuai a, tih mai tur hre lovin ka en zui reng ringawt.
.
Kawngkhar a hawng dawn zet a, in ngaihtuah harh thut niawm tak hian rawn let lehin ka hmaah tak arawn ding a. A mitmeng chu ka enrei ngam lo.
.
TMH!!
CHAPTER – 9
TAKE MY HEART!
By. Thantei_Pautu a.k.a Laura_Sean_Virgo
.
LUCA GIOVANNI’S    P.O.V*
.
Ka nupui mitah chiang takin ka en a, a dar tawn tawnah nghet takin ka vuan bawk. Nimina a unaupa Tomas Adams chanchin ka hriat belh khan ahmaa ka ngaihdan thenkhat a ti danglam a, Adelina ka ngaihtuah vanga ka thinrimna a tizual sauh bawk.  Tunah hian ka farnu hi eng dinhmunah nge a awm mek tih chiang takin hria ila ka awm a nuam deuh maithei le. A unaupa hian thil sual a ti ngai lo maw? Thil tisual ngai lo leh mifel tak ka nupui unaupa bulah ka farnu a awm mek anih chu!! Ka tihel tih I hriatthiam ka ring e
.
“Min lo thlir rawh” ka tih chuan a ngaihna hriat loh hmel takin min en hau a, min chhan hmain vung zetin pindan atang chuan ka chhuak a. Zanin chu library-ah ka awm zankhua ngei ang.
.
Nizan khan inngaihtuahna hun ka mamawh a, in a haw lovin 48 Pegu Club-ah ka kal a. Rafe nen kan inhmu hlawl bawk. Rafe nen hian kan inkawm nasa thin a, tunah erawh chhim leh hmar ang hlauh kan ni tawh thung. Inthian thatna hi eng anga thuk pawh ni se thil hote avangin reilote chhungin a chhe vek thei tih ka hriat phahna a ni bawk. Midangte chunga rinna kan neih tihchhiat anih chuan siamthat leh a har tawh thin. Rinna hlawh chhuah pawh thil harsa tak a ni..  Allison hian ka laka rinna a nghah thlap theihna turin keipawh hian lem ka chang reng a ni lawm ni? Min rinna hi tichhe ta ila ka inchhir angem le!!?
Ka nui hawk!
Hmangaih vanga ka neih pawh ni lo hmeichhia vang hian ka inchhir thei dawn em ni? Heng thil zawng zawng ka tihchhan ka farnu chauh hi ka ngaihtuah tur a ni..
.
Club atanga min hruai haw tur khan  Allison a lo kal ka ring lo hulhual a, ka harh chian deuh hnuah in ah ka awm tih ka hriat khan mak ka ti khawp mai. Ka hriattheih chinah nikhaw hre mumal lo khawpin zu ka in ngai lo a, nizan khan mumal lo a awmna tur khawp ka in lo bawk tih ka hrechiang.
.
Chhun lamah  pawh khan ka mood a fuh lo nileng. Ka nupui leh a unaupa ruahmanna siam vanga tun hun hi thleng ka lo ni. Allison hian a unaupa ruahmanna hi a hre hauh lo niin ka lo ngai a, mahse, ka tisual. Tomas nen hian an inbe thin tih ka hre nain Tomas man chat tur hian tihtheih ka la nei tam lo khawp mai.
Tunah chuan ka farnu tuarna aia nasa ka tuartir a hun tawh takzet anih hi..
Ka awmdan hi a dik tawklo anih pawhin pawi tihna ka nei hran lo. Thildang chu thildang anih angin kal se la, kan nun rawn tibuaitu unau te erawh hi chu ka chhuah dawn lo hulhual a ni tawp mai!
.
Mood fuh chiah loh nen library-a awm ngawt ngawt chu ka ning thuai a, kan pindan ah chho lehin jacket ka la a, Allison ka hmu hauh lo. Eng thil nge atih ka ngeihven lem lo bawk! Ni e, ka nupui a ni ngei a, amah duh ang takin ka lang thin bawk. Hmeichhe nalh tak a ni a, mipa tupawh ka dinhmun angah hian ding se nuam tihna chin an nei ve tho ang! A hreawm lem loh bawk atin ni! Ka tina ta anih pawhin ka tihtur reng ti ka ni thei bawk ang chu! Sofa-a a muhil khuma ka sawn chhan kha chu sofa aia khuma mut a nawm zawk vang chauh a ni bawk. Ka ngaihtuah vang a ni lo!!
.
Kan pindan atanga ka chhuah chuan kan pindan pana a lo kal nen kan intawk a, min hmuh chuan a ding chawt a.
.
"Luca, tunang hunah hawnge i kal dawn?" a ti sap a. Ahma lawka kan inhmachhawn dan vang kha a ni maithei rilru buai hmel a pu tih a lang. Chhan tum buai lovin ka kalpel a, ka bana min rawn vawn chuan ning zetin ka ding a.
.
"Zawhna min zawt lo khan min lo thlir tawp rawh."
"Engvanga danglam thut nge i nih?"
Ani tereuh hian ka hnunglam atangin min lo nuihzat tawh hial maithei. A unaupa thiltih hrelo angin a lang na a.. Eng thil phiangsen nge ka ngaihtuah! Engmah ngaihtuah buai tur a awm lo. A ni hian ka awm dan hi engtin nge angaih tih emaw min lo ngaihdan tur ka ngaihtuah a tul na chhan emaw pawh a awm lo..
Min vawnna chu phelhin ka kal pel a, min koh zuina chu hrelo angin ka awm hmiah bawk.
.
Ka car lachhuak in chak zetin ka tlan chhuak a, Drago ka biak angai..
.
“Sir, Agent Luiz nen kan inbiak hnuhnun ber kha chuan tun atanga rei vak lo ah I farnu leh Tomas Adams awmna hmun dik tak kan hriat theih tur thu a sawi a, a chak thei ang berin hma kan la zel a nia.”
.
“A tha e.”
.
Phone off in kal tumna mumal pawh nei lovin ka car chu chak zetin ka khalh zel a. Ka chawl thei hauh si lo. Adelina chungchanga thudik hi ka nu leh pa te bulah ka sawi thei lo. A awmna hmun ka hria tih hrilhin chawlh a mamawh thu leh aman min rawn be pawp anih loh chuan thlah zalen turin ka hrilh ringawt a ni. Thudik an hriat chuan ka tan buaipui tur  atam belh mai mai dawn tih ka hriatchian vanga hetiang thil hi ti ka ni bawk. Ka nu hian a fanu tak tak anga enin Adelina hi a atchilh lo chauh a, tuna a dinhmun dik tak ka hrilh chuan nikhawhrelo in a awm nghal hial ang. Ka nupui lakah lemchan ka chhunzawm angai tawh lo tiin ka  ngaihtuah kai zel a, thaw hawk tura ka inngaih laiin ka thaw a veng tehchiam chuang lo chu anih hi.
.
Ka phone nghawr dar dar chu en in caller ID ka hmuh chuan ka ner sak a. Fiorenza kher hi chu hmanrua atan pawh ka duh lo. En gthil nge a hriat a ka bulhnaia awm a tum luih zel ni? Nupui ka nei tih a hre reng a, ka nupui lakah thil  ruahman ka nei ru reng tih a hre lo chung pawhin hetiang khawp hian min zar buai peih a, Allison laka ka ruahmanna hria ni phei se a nasa khawp ang.. Ngaihtuah pawh ka ngaihtuah zawm peih lo zawk e.
.
Ni a ral bek bek a, in ah ka haw tam lo khawp mai. Allison pawh ka hmu zeuh zeuh chauh a ni. Eng thil nge a ngaihtuah ka hre lo nain a nungchang ka hmuh hian rilru nawm lohna emaw a unaupa ngaihtuah vang leh ka vauna vanga hlauthawng hmel a pu  ngai lo a, chu chuan ka thinrimna tizual zawkin ka hria. Rilru hah leh hreawm taka indawm kun turin ka duh a.. Ni lo.. Tawngkam ringawt a vau kha a tawk zo lo a ni ngei ang! Anih chuan enge ka tihtur chu ka hria alawm! Ka rilru a Tomas Adams huatna ka neih hian engpawh min tihtir thei ngei ang!
.
Ka office-a riah ka tum zet nain in ah ka haw leh ta zawk a. In ka thlen chuan a reh thapin light a eng mumal tawh lo bawk. Carina a awm lo tih ka hrechiang a, thawm ka dim vak angai lo bawk ang.
Kan pindan a ka luh chuan khuma Allison muhil chu ka pan a. Thlamuan hmel takin a muhil a, a mutna bula ka thut hnu pawh chuan a harh chuang lo. Ka thawmhnaw haklai phelhin a bulah ka mu a, ka kuah chuan chiang lo riai hian arawn meng a.
.
"Luca..?"
.
Chhang lovin a hmuiah ka fawp a, ka chetdan vang chuan nui sakin min fawp let a. Kar khat chuang kan mudun tawh lo a, ka nupui hian min mamawh tur pawh a ni ve reng reng e! Ka tan rei nghah a ngai lo. Ka duh emaw duh lo emaw ka nupui taksa deka ka awm hian phurna mak tak ka nei ziah alawm! Ka duh danin ka chetpui a, nidang nen a inang lo tih a hrethiam thuai a, ka chetdan ang ang chu phur takin min chhanglet tho nia.
"Ka inthiam lohna tur eng thil mah a awm lo" ti rilru chungin keimah chiah ka inngaihtuah.. Ka duh ka tihzawh chuan a sirah ka let thla a, min rawn kuah a tum chuan a kutah manin kuah ka duh lo tih ka lantir a.
.
"Luca.. I tha em?" a ti sap a. Amah hi thalo tur zawk a nia, keichuan ka duh ka ti zo chauh alawm le!
.
"Hma i sawn thei lo anih hi.. I pasal pawh i tihlawm zawh loh chuan midang ka pan a tul hun a thleng ngei ang." khum atanga thoin bathroom ka pan a, eng thawm mah a chhuah zui lo. Ka thusawi kha chu amah ka tihnat theihna tur atana sawi ka ni thung.. A letling thawk a ni.. Mipa in kan beisei leh lungawina kan zawn thin chu amah ah hian a kim vek.. Engtiklai pawhin a lawmna tur aiin ka lawmna tur leh nuam ka tihzawnga tih a duh ziah thin..
.
Bathroom atanga ka chhuah leh chuan khumah a lo awm tawh lo a, a thawm hriattur a awm lo hrim hrim bawk. Khawilai emaw ah inngaihtuah lungngaiin a tap a ni ngei ang chu!
.
Step- 1 – A hlawhtling e!
.
Khumah ka let hnawk a.
Kan pindan kawngka ri rak ka hriat rualin ka en vat a, Allison chu thawmdim taka lo lutin khum bulah chuan a ding dat a. Min hmuh vanga ding a niin ka hria. Room light a en tawk loh vangin ka meng tih a hre kher lo ang. Ka inlet thawk a, ka mutna sir a light on-na chu banin ka on a. Tap zo hlim hmel hmuh tum ka ni a, a hmel ka ena min nuih sak ka hmuh rualin ka kawchhung a let but but ni berin ka hria! Inthiam lohna ka nei tur a ni lo!! Ka tawngkhum dan kha hmeichhe dang chu ni se thinrim leh tap chungin min an khum ngei ang tih ka chiang.. Hmeichhe bula sawirik hauh loh tur thu a hre tawh chung pawhin thil dik lo engmah a awm lo ang maiin min la nuih thei a nia.. Ka la hrechiang tawk lo a ni ngei ang!
.
Step - 1 – Engmah lo mai a ni e!
.
Min tawk palh ang tih hlau awm tak hian khumah chuan arawn mu a, ka lam hawi lo zawngin a saisir a.
.
"Light kha i off dawn em?" a mut dan ngaiin a la mu reng tho. Ka chhan miah loh danah off ka tum lo tih a hria a ni ngei ang, a lukham hnuai zenin a mit tuamna a lachhuak a, a chetzia chu makti takin ka en tawp. Min sawisel lo a, puan sin thain thawk a la ham ham a, hahdam hmel tak hian a mu zawi hnak a. Light a en chuan a muhil thei ngailo tih ka hriat vanga light on lui ka ni a, ka hlawhtling leh chuang lo anih hmel hi.
.
Engang hmeichhia nge maw i nih le..???
.
.
Ka mutthilh lai ka hre lo. Ka harh veleh Allison mutna ka en a, alo ruak hiai tawh tih ka hmuh rualin ka tho vat a. Bathroom-ah lutin zinglam routine ka tihzawh chuan office kal turin ka insiam a, ka hnathawhna hmunah breakfast chu ka ei mai ang chu.
.
Kan pindan atanga chhuakin inhnuai ka pan a, eitur rimtui tak rim ka hriat chuan ka ril a tam khawp mai.
.
"Breakfast a ei nghal theih a nia.."
Nui sangin Allison arawn dak a, a kut a eitur a ken chu a hmawm zauh a. Hnathawhna hmuna kal turin a insiam peih thlap tawh anih hhmel bawk. Amah hmu lo ang hmiahin ka kalpel a, ka duh ber chu office thlen thuai thuai a ka duhzawng tak thil ei ani rih phawt..
.
Pawnah ka chhuak a, Marcelli'n min rawn hmuh chuan chibai min bukin a bu zauh a. Allison nen kan inneih tirh khan Marcelli hi a driver bik ni turin ka ruai a, tanpui  ngai taka a awmlai a lo nih bawk vanga ruai ka ni. A nupui leh a fapa nausen hrisel lo tak enkawl ngai a ni a, a mamawh zat sum ka pe lawk bawk. Ka rin aiin Allison hian a hmang rim lo thung. Ka bula a kal loh pawhin Marcelli hi a inhruaitir khat khawp mai. Tunah hi chuan rilru thar neiin a hmang ve dawn ta anih hmel.. Tuk dangah tunang hunah hian Marcelli a lo kal ngai tlat lo.
.
"Good morning sir." tiin min rawn pan hnai a. "Sir, hna ka thawk ve tawh dawn anih hi. Tukin hma takah khan Mrs.Giovanni'n min rawn bia a, ka hruai zel a ngaih tawh tur thu min hrilh a, ka lawm khawp mai. I lak atanga hlawh hmu reng chunga engmah thawh loh kha chu thil hreawm tawpkhawk a ni.. Sir, ka lawm e. Malsawmna dawng zel ang che." a ti duah a. A hlim hmel khawp mai. A fapa dinhmun ka zawh hnuah kalsan in ka car ka lachhuak a, office ka panding nghal par par a.
.
“Sir, hmeichhe pakhat a lo kal a, I koh thu a sawi a. Ka lo luhtir dawn em?” Mrs. Olsen tawngdan ka hriat chuan ka nui suk. A duhzawng leh duhloh zawng chu a tawngdan atang hian a hriat vek thin.
.
“Lo luhtir rawh.” Ka tih chuan thaw halhin “Aw le.. sir” a ti ban charh a.
.
Ka office kawngka arawn inhawng a, ka beisei lawk angin Nicole chu a nalh tih inhre zetin arawn penlut a. Mak ka ti hran lo. Kum 16 a upa ka nihlai atang tawhin Nicole nen hian kan inhria a, puih angaih hun apiangah min rawn pan chawt thin. Tun tum hi chu a vawikhat nan ka ko ve thung anih hi. Mi tam zawk chuan hrechiang lovin kan inngaizawn thu an sawidarh chiam chiam a, chanchinbu pawh kan luah dun fo mai. Sawifiah kan tum ngai lem lo.
.
“Hey, Albizzo.. Kan inhmuh loh chhung a rei ta hle mai..” nui har har chungin min rawn kuah a.
“I la ngai reng..”
“Oh..ka nalh ngaiin ka la nalh reng I tihna ah ka ngai ang. I landan chuh.. Karei.. Engtin nge hetiang hian I lan that em em reng theih a…!”
“Come on.” Ka nui suk. A rilru a thil awm hi zep hni hne lovin a sawi phawng mai zel.
“ Chuan, enge ka lo kal chhan hi le..?”
.
“Tiam chin awm lovin ka bialnu inih angai.” Ka tih chuan a mengphawk hra a.
.
“Engtin nge ka tihtheih ang? Mi zawng zawngin I nupui I hmangaih zia an sawi huai huai lai lehnghal in! Engtin nge anih theih.. Haha.. I nupui thik turin I duh tihna a ni em? Engvang nge? Ka awih thei thlawt lo che.. Nang hi I inrintawkna a tlahniam a ni lo maw..?? I nupui hi ka khawngaih hle mai.. Hmeichhe nalh tak leh hmeltha, a hmangaih em em bawk che a.. Albizzo..”
.
“I sawi zawng zawng atang hian pakhat ka chhang ang che. Tihchhan ka nei tih chiah ka sawi ang. Abak hriat tum suh.” Ka ti hmiah a. Uluk zeta min enin a mitmeng a zawhna tam zia chu ka hai lo.
.
Allison hmel mitthla chungin ka kut ka hum ruh a. Tunah chuan awlsam takin a tuarna a thup thei tawh lo ang. Hreawm tinreng ka tuartir dawn a ni.!
.
“Sir, I nupui a lo kal a, ka lo luhtir dawn em?”
.
“Lo luhtir rawh.”
Nicole chuan meng phawk hrain min en a, a duh aiin a intan hma anih hmel hi. Tha takin lem a chang ang tih ka ringhlel lo e.!
.
Allison lo lut chu ka lo en reng a, a bawm ken chu ka dawhkan ah dahin inringtawk zet hian a ding khawng lah a. A hmel ah thinrim hmel a lang lo a, nui hmel pawh a pu chuang lo.
.
“Albizzo..” awm nawm loh hmel takin Nicole chu a thu tha a, arawn tawng chhuah hnuah Allison chuan a awm ve tih hria angin a lang chauh.
.
“Min lo hrethiam la, ka pasal hi biak lawk ka duh a.” a der ni hauh loin Nicole chu a en a, hawihhawm takin a nui sang bawk. Nicole chuan awm dan tur a hrelo tih hriat tak hian min rawn melh a.
.
“Nicole honey, I chhuah a ngai lo ang. Allison hnenah hian keipaw’n sawi tur ka nei.”
.
“Luca, kan pahnih chauh a kan hriat ngai thil a nia.” Allison chuan arawn ti sar sar a, a hmel a thutak ran bawk.
.
“Ka pawi sa hleinem.” Ka lo ti hmiah thung.
.
“Anih chuan in ah kan inbe mai dawn nia.” A ti zawi raih a. Midang awmlai a ka ngaih pawimawh lohna chuan a tina ve raih ngei ang chu.
“Ka lo haw lo ang. Nicole nen hian kan chhuak dawn.”
.
“A tha e..” Nicole lam hawiin a inher a, hahdam hmel thlap hian “Nicole.. Chibai.. Kan inhmu chu ka lawm hle mai. Ka pasal hian nungchang mawi tak a neih theih nan ka tanpui mek a.. Ka la hlawhtling lo anih hmel hi..”
.
Nicole mak ti hmel chu en in min rawn nuih sak a, engmah sawi tawh lova ka office atanga a kalchhuak chu ka en reng ringawt.
.
“Albizzo.. Buaina I hmachhawn ngei dawn anih kha.. I nupui chu ka duh hle mai..” ka hmel a hmuh chuan a ngawi chat a. “Hmeichhe tha tak a nih kha..”  a ti leh hram.
.
Nicole hian engti zawng mahin min tanpui dawn lo tawp mai…
.
Ka phone rik chuan caller ID enin ka pick up thuai a, Drago hian thu thar arawn neih tawh ngei ka beisei bawk.
.
TMH!!
CHAPTER – 10
TAKE MY HEART!
By. Thantei_Pautu a.k.a Laura_Sean_Virgo
.
ALLISON'S P.O.V*
.
Ka inthunun thei lo thelh a ni e. Amah ngaihtuah in eitur ka kensak tawk tawk a. Lawm nachang hrelo lutuk mai. Nicole tia a koh kha ka hmuh fo hnu niin ka hria a, khawiah nge ka hmuh thin tih erawh ka ngaihtuah chhuak zo hauh lo thung. Min en dan atang khan ka tan misual tak a nih loh ka ring ve tawp bawk. Luca hmel landan ka mitthla a lang vang chuan rilru tawt zetin ka kut ka hum ruh ngawt a, awmzia a awm lem lo khawp mai. Ka tan a tlawm thlak tih hre ran chunga khatianga awmlui kha ani. Min tihnat a pawisa hauh lo niin ka hre bawk.. Ka hlawhtlin tir chuang lovang! Eng ang pawhin awm se, a mithmuh ah ka na tih ka tilang tur a ni lo bur. A hmeltha leh pa zet te, a hmui nalh tak leh ka taksa a a thiltih thin te.. Ni lo.. Ngaihtuah loh ka duh zawk. Amah hnar thei tur hian chakna ka mamawh takzet dawn a nih hi.. Engtin nge ka hnar theih ang..? Ka pasal ka hmangaih em em leh engtik lai pawha ka mamawh reng mipa awmchhun hi ka bei fe anih loh chuan ka tan hnar a harsa khawp ang le!
.
Nizan a ka laka Luca awmdan ka ngaihtuah let hian ka rilru a nuam lo takzet. Nidang nen a inang lo tih pawh ka hre tehmeuh  mai. Ahma zawnga ka laka a awmdan leh tuna a nungchang hi chu khaikhin buai chi pawh a ni lo zawk. Min ngaihtuah em em reng thin a, ka tan engkim a ni thin. Luca, engtik lai pawha min ngaihtuah reng thintu kha khawiah nge a awm tak le? A lakah tihsual ka neih leh neihloh ka ngaihtuah ngial pawh hian, ka laka thinrim nachhan tur leh a lungawi lohna tur thil ka tih ka hre si lo.. Thil ka tihsual vang ni lovin ka unaupa vanga danglam ta anih ka ringhlel ta lo ve. Tomas ka biak pawh theih chuan loh  vangin eng thil mah tihtheih ka nei chuang der lo. Ka lo ngaihtuah buai vak vak hian engmah a siamtha dawn chuang lo tih ngaihtuah in ka en ngai ka en ngar ngar a.
.
Nizan min tawngkhum dan vang khan tap tur ka nih laiin ka tah a chhuak lo a, tap tura inngaihtuah lungngai thei miah lovin ka rilru a buai em em zawk anih hi. Unaupa tenawm tak ka lo nei reng em ni?
.
"Tomas, kan inbiak angai takzet.. Min lo be thuai rawh.." tiin ka phun mawlh mawlh a. Luca tana huatthlala em em thil chu eng thil nge ni ta ang le?
.
Ka hnaah ka rilru ka pe thei thlawt lo. Ka thawk dawn chauh a, thildangin ka rilru a luah nghal zel bawk. Thawk la halhin ka hmaa paper chu ka en vang vang a. Vawiin ka thawh zawh hman ngei ngai thil anih vangin rilru pe lo zet hian record ngai chi ho chu computer-ah ka type lut zung zung a.
.
.
Office atanga ka haw meuh chuan ka chau takzet. Ka thawmhnaw hak thlakin ka intifai a, zanin chu zanriah special tak ka buatsaih a tulin ka hria. Uluk taka eitur ka siam lohna chin pawh thla aliam dawn ta hial mai.
.
Choka ah lutin eitur ka siam mawlh mawlh a. Nuam ka tih bakah rilru haha inngaihtuah buaina tur hun ka neih loh phah bawk a, a tha phian.
.
Ka duh ang taka ka siam zawh hnu chuan ei tumin ka thu a, mah se, ka ei thei miah lo. Rilru hah vanga ei thei miah lo ka ni pawhin ka hre chuang lo. Ka dahfel leh ta ringawt a.
.
Kan pindan ah lutin ka vei kual sek a, ngaihtuah mumal em em nei lovin ka hahchawl thei chuang miah  lo nia. Luca biak erawh ka tum buai duh lo law law.
.
Mutthilh luih tumin khumah ka mu a, mal ngawih ngawih ni a ka inhriat thinna kha a lo let leh mek niin ka hria. Luca nen kan inzui atang khan mal leh khawhar takin ka awm  ngai lova, min hmangaiha min ngaihven rengtu awm nia ka hriat thinna khan lungawina min pe thin.. Mah se, chu thil chu ka hloh leh mek niin ka hria.
.
Ka phone a rik chuan ka thuchhuak hlawl a, Luca a ni maithei!
Caller ID ka en chuan rang zetin ka pick up nghal a. Luca ni lo mahse ka biak duh ber a ni tlat..
.
"Tomas, tunah hian engkim min hrilh rawh." ka ti nghal tawng a. A awm dan chiang takin hria ila, Luca hnenah pawh thil awmzia leh ka unaupa a ngaih dikloh zia hi ka hrilhfiah thei ngei ang.
.
"AC, ka awmna hmun chu ka la hrilh thei chuang lo che a, mahse, ka tha a, ka nupui pawh a tha e."
.
"Nupui a?? I sawifiah angai."
.
"Adelina nen kan awm dun alawm." a tih chuan ka bangbo lehzual.
.
"Adelina chu tunge? Nangmah hrilh lawk lo che a pasal ka neih vangin ka inthiam lo a, tunah chuan ka inthiam loh angai tawh lo  anih chu." ka ti nghat a. Min chhang lovin Tomas chu a thaw huai ringawt.
.
"AC, Adelina hi Luca farnu tih i hre miah lo maw? Engtin nge anih theih zawk. Kha mihring khan i bulah engmah a sawilo tih ka hre mai. A hmanrua mai ini bawk tih ka hrechiang."
.
"I tawngkam hman fimkhur rawh. A farnu nen in awmdun vanga hmanrua ka nihna chhan tur a awm lo." tiin ka chhang naa ka rilru buai zia chu sawi maia fiah thei pawh a ni lo zawk. Luca hian farnu a nei a, chu chu ka lo hre miah lo. An in a kal kal leh kan titi ho naah te pawh tuman an sawichhuak lo a, kei chuan fapa mal leh unau nei miah lo angah ka lo ngai char char a ni. Luca thiam loh pawh ani chiah em? Kei hian ka pasal leh a chhungkua hi ka hrechiang tur a ni a, hrechiang thei turin ka chik bawk tur ani dawn lawm ni..? Media lam atanga hre turin Luca farnu neih thu hi engtiklai maha sawi chhuah a ni ngai lo. Thil mak tak chu a ni..!
.
"AC, farnu a nei tih pawh i hre miah lo a, inngaihtuah harh la Luca kha kalsan rawh. Na turin ka duh lo che.. Khawngaihin AC.."
.
"Ka na lovang. Tunah pawh ka tha alawm.."
"I ngaih ang thil kha ani dawn miah lo a nia.."
"Anih chuan thil nihdan tak chu min hrilh thei alawm."
.
"AC, Adelina hi ka hmangaih a ni. Luca khan kan awmna hmun a hriat rualin min pawt then nghal dawn, chu chu ka duh lo."
.
"Anih chuan tha takin Luca chu i be thei reng alawm."
"A thleng ngai lovang. Thil i hrethiam miah lo anih hi.."
"Ka hrethiam lo ni a i ngai anih chuan tunah min hrilhfiah rawh."
.
Line a tawp ringawt..! Biak leh tumin Tomas ka call a, a phone a switch off leh tawh.. Luca hian ka unaupa tenawm tak anga a  ngai hi thil a hriatchian loh vang a ni. Lo haw se la ka sawipui theih ka beisei.
.
.
Mu tawh lovin khumah ka thu reng a, Luca lo haw huna abula sawi dan tur ka ngaihtuah a. Thil awmzia dik tak a hriat chuan ani pawh a lungawi ve ngei ang. Ka sawi tawh kha, ka unaupa hi mi tha tak a ni a, tumah a tina duh ngai lo tih ka sawi reng kha maw!!
.
.
Dar 1 a pelh hnuah pawh Luca chu a lo la thleng chuang lo. Eng thil em em nge maw a tih le??
.
Message ka thawn a, chhanna ka hmu lo. Min chhan pawh ka beisei chiah chuang lo. Keipawh hi ka chiang lo zo vek tawhin ka hria.
.
Kan pindan atanga chhuak in inhnuai ah ka chhuk a, Luca ka hmuh chuan ka phu chiang khawp mai.
Sofa-ah thu awnin a mit a chhing a, a muhil a ni maithei. Thawm dim takin ka pan a, a dar a ka khawih chuan arawn meng a.
.
"I lo thlen lai ka hre miah lo a.."
Ka tih chuan min chhang lova thoin min kal pel a.
.
"Luca, sawitur ka nei, inbia ang." a hnungah ka zui hlawk hlawk a, min ngaichang chuang lo. A awm dan hi a ti mah mah tawh niin ka hria.
.
"Luca.." a kawrah ka pawt a, engahmah ngai lo ang maiin a kal lui zel a.
Kan pindan ah kan inzui lut a, a chezia chu ka en tawp. A thawmhnaw phelhin a inthlak a, vawikhat te pawh min melh lo!
.
"Luca, Tomas leh Adelina chungchang kan sawi angai."
.
A kawr hak laklawh lai chu laklawh zeta tawpin a ding a, min la chhang chuang lo.
.
"Luca, i danglam chhan hi i farnu vang hi anih chuan kan sawidun angai. Engmah i sawi loh hian thil a siam tha dawn lo a nia."
.
"Tunah khawiah nge an awm?" a ti nghut a, min la en chuang lo.
.
"Ka hre lo." ka tih chuan za lo zet hian a nui a, a nuih dan chuan min tinghing dawt mai.
.
"Engmah i hre lo tih chu ka awih ring duh suh. I unaupa hian ka farnu hi dinhmun hlauhawm takah a dah tih i hria.. I  bulah hian engvanga sawi nge ka nih pawh ka hre nek lo ve. Nangpawh I danglam chuang lo. I unaupa ang mai a tenawm I ni."
.
"Tomas chuan a hmangaih alawm."
.
"Takzet che hian. I unaupa thusawi chu engkim i lo awih a maw? Hmangaihna tih hi chhuanlam ah hmang buai duh suh u."
.
"Luca!" ka ti that a, min ngaih pawimawh loh hmel kher mai.
.
"Ka farnu tuar ang chiah i tuar ve ang.."
.
Min en dan ka hmuh chuan ka ip chawih a. Ka ngaihtuahna a thil lo lut chu zawt nghal lo turin ka insum thei hek lo.
.
"Engvanga min nei nge i nih?" a hmaah dingin a hmel ka en a, a mitmeng chu ka en rei ngam lo. Ka zawhna chhanna ka hmu nghal niin ka hria! "I hmanrua mai ka ni em?"
.
"I hriat ka ring! Kei hian eng dang vangin nge ka neih chuan ang che.?"
.
"Ni lo, Luca!" a banah vawn tuma ka hnaih chuan a ding sawn vat a. A farnu in hreawm a tuar  ni a arin vang ringawt in kei hi min nei lovang.. Ka unaupa a huat vang ringawt pawhin a ni thei chuang lo.. “Ka unaupa hian I farnu a hmangaih a, chu chu thil diklo a ni hleinem..” ka tih chuan thip zeta min melhin ka dar tawn tawnah min vuan a, min dim lem lo khawp mai. A thusawiin min tihnat zia ngaihtuah erawh chuan min chelhna ringawt hi chu engmah tham a ni lo thung.
.
“Ka farnu hi a hmangaih vang ni lovin hreawm tuartir turin a hruai bo tih i lo hre lo a ni ange? Adelina hian mipa dinhmun hniam lutuk a hnaih ngai lo.. I unaupa hian Adelina duh lo chung a pawtlui lai pawh mit ngeia hmutu an awm."
.
“Tomas hian chutiang thil chu a ti ngai lovang.”
.
“Chutiang chiah chu keipawh ka ni.!” min tihel tih haider luih pawh tum ila, a theih loh. A ni hian min tihnat a hreh hauh lovang.. Engtin nge hetiang thil hi a thlen theih zawk le??
.
“Tunah chuan ka neih nachhan che i hre ta bawk a, ka thawveng huai e." a ti nghut a, sawi tur reng reng ka hre ta lo. Ka awih thei lo a, a hmel ka en chuan a thusawi chu a titakzet tih a lang si a ni. "Ka duh ka tihzawh hma chuan ka lak atanga kal bo tum buai duh suh.." tiin pindan atang chuan a chhuak nghal a. Ka chawmawlh vek!
.
Ka muhil lo chiang khawp mai.
.
Khua a var a, hnathawk tura ka chhuah thlengin Luca thawm ka hre tawh miah lo.
.
Hnathawhna hmun ka thleng a, ka tihtur ka ti mawp mawp a. Lunch ei tura chhuah pawh ka peih lo.  Zawhna min zawt sek turin Sarah a lo kal lo hlauh bawk.
.
Tomas thusawi kha a dik! Luca tan hian hmanrua ka ni.. Engtin nge ka lo hriat miah loh theih zawk le? Ka dinhmun angah hian midang pawh ding se an hre bik chuangin ka ring lo. Kan inhmuh hmasak ber tum leh a hnua kan awm dan te.. Kan inneih na..engkim hi a lemchan mai ni tur atan chuan a tak mah mah a ni. Lemchanna  mai a ni thei lo. A farnu  a ngaihtuah vanga thinrim hian a duh loh thleng thleng a ti a ni tal ang!
.
Luca thusawi kha thu dik a ni thei angem?? Ni lo. Tomas hian tumah tihnat a duh ngai lo. Hmeichhia ahnaih ka hre ngai lo a.. Aw Lalpa.. Thil hriatchhuah ka nei! Tomas hian a kal bo hma khan hmeichhe hmangaih a neih thu a sawi a, keiin a fiamthu ah ngaiin engmah ka sawipui mumal ta lo anih kha. Khami hnu khan engmah a sawi leh tawh lo. Khami tuma a sawi kha Adelina hi a ni ngei ang! Engvang in nge ka ngaih a sam em em mai le? Adelina hian a hmangaih ve reng angem? Luca thusawi kha dikin Tomas hian tihluihna hmangin a hruai reng em ni?? Ni lul lo rawh se.. Tomas hian thil diklo tak a lo ti ngei anih chuan a hremna tuartur chu ka tuar ngei ang!
.
Mr. Atkinsona-n min rawn koh chuan a office-ah ka lut thuai a, buaina kan neih thu sawiin kar khat chhung Paris-a kan awm ngei ngei a ngaih tur thu a sawi bawk a. Helai hmuna ka thawh chhung hian ka hriat ve theih chin buaina lian tham kan tawk lo tluk a ni. Mr. Atkinson awm dan ka en hian buaina fel mai thei a ni lo ang tih ka hrethiam.
.
“Giovanni Corporation nen kan inzawm hi kan tisual a ni. Luca Giovanni tawh khirh zia ngaihtuah hian sawmna lo pe hauh lo tur ka nia..” Luca ka pasal a ni tih hrechhhuak thut niawm tak hian arawn hawi chhuak a “I pasal a ni tih ka hria, mah se, sumdawnna leh mimal thil I thliarhran thiam ka beisei.” Atih chuan ka lo bu nghat a.
.
Atkinson Corporation leh Giovanni Corporation hi kum khat pawh an la thawk dun lo a, chuti chung chuan Giovanni Corporation hian 30% share an nei der tawh. Inthurual takin kan thawk dun reng emaw kan tih laiin tunang renga thil a kal zel chuan Giovanni Corporation hian kan duh emaw duh lo emaw Atkinson Corporation hi an thunun ngei  ngei angaih hun a thleng thuai ang. Chu aia thil hlauhawm chu Atkinson Corp. tan hian a awm chuang lo.
.
“Naktuk zing dar 6-a chhhuak turin lo inpeih ang che.”
.
“Aw le, sir.” Tiin ka chhuahsan nghal a.
.
Paris pana kan chhuah thlengin Luca nen kan inhmu lo. Min rawn be lo a, min biak  ka beisei hek lo. Awlsam taka ngaihdan thlak tur chi mihring a ni lo tih ka hrechiang a, ka lakah hian eng thil chiah nge tih a tum ka ngaihtuah duh lo bawk. Ka ngaihtuah duh loh thu ngaihtuahin ka ngaihtuah reng bawk si hian min tichau zo. Tunah chuan kan nupa kara buaina ni lovin ka hna chauh ka ngaihtuah tur a ni..
.
.
Paris kan thleng a, muangchang lovin meeting na tur hmun kan pan nghal a. Ka tihtur chin Mr.Atkinson min hrilh chu tha taka ka tih theih nan ka inbuatsaih diam bawk. Engmah tihsual a awm tur a ni lo. Tuna meeting kan neih hian Atkinson Corp. hma hun a hril dawn tih ka hrereng bawk ang.
.
Meeting tan a hun dawn a, conference room zau vak lo ah dawhkan kilin kan thu kual thap a. Kawngkhar inhawngin mi pahnih an rawn lut a, ka hawichhuah a Luca ka hmuh chuan ka ding zawk lo chauh a ni!! Helai hmunah hian kan inhmuh ka beisei hauh lo..
.
Nimin office atanga ka haw khan kan inhmu lo a, kan inbiak loh bawk avangin Paris-a ka kal tur thu hi ka hrilh hauh lo a.. Min hmuh chuan min hmelhriat ngai miah lo angin a awm hmiah.. A awmdan anga awm ve hi ka duh a,  mahse, ka thei lo.. Ka thei ve ngai lo a ng. Amah en tawh lo turin ka inthunun nasat angai vaiu dawn anih hi.
.
Meeting kan tan a, thinrim in an inhnial leh laih thin.. Chutih chhung chuan duh lo mah ila Luca chu ka en leh thin lo thei lo.. A hmel landan chu a dam raih a, thinrim taka midang an tawng pawhin dam raih leh thil nihna diktak sawiin a tawng a, a landan hahdam hmel bik lutuk chu ka lo  ngei hluah hluah.. Ni lo.. Ka ngei lo.. Amah chu va hnaih a, kuah a, fawh ka duh a ni zawk e!! Ka ngaihtuahna vang chuan mahni inten zetin ka ner nawk a. A nupui ka ni chung hian vawikhat pawh min melh duh lo.. Chutiang anih laiin amah kuah leh fawh te ka lo ngaihtuah a nia.. Ka ngaihtuahna chuan keimah leh keimah ka inbeng mawlh mawlh!!
.
Luca Giovanni hian a thiltih mek leh a thiltih tur hi a hrechiang takzet!!
.
“Ms. Adams.. Ms. Adams.. I hun a intan e.”
.
Mr. Atkinson chu ka melh a,mak tih hmel zetin min lo en ve reng bawk. Ka awmdan vang chuan a lawm lo tih pawh hai chi a ni lo. Tunah Atkinson Corp. venhim kan tum laiin engtin nge ka pasal landan leh a chungchang ringawt ka lo ngaihtuah theih zawk..
.
Ka hma zawna file chu lain ka ding chhuak a, Atkinson Corp. in rawtna kan siam chu ka theih ang tawka thain ka sawi a. Minute 15 zet hnua ka thut leh chuan Mr. Atkinson hmel hmuh pawh a nuam leh ta deuh.
.
Conference room kawngka arawn inhawng leh a, hei chu thil nihdan pangngai piah lam ani tlat mai. Mipa kum 50 awm vel mi rawn lutin Luca bulah a ding a, midang in kan hriat ve loh tur thil a ni ngei ang, Luca a hrilhruk sar sar hnu chuan Luca chu a bu nghat a. Chu mipa lo lut thar pa chu kan zavai a hmuh theih turin a dingchhuak a. Eng thu nge asawi dawn kan  ngaichang ta thap a.
.
“He thil hi tuna kan hriat thar mai a ni tawh lo. Atkinson Corp. thiltih danah hian kan lawm lo takzet. Giovanni Corporation leh Atkinson Corporation te thawh dunna hi information put ru awm thin vangin kan tihtawp angai a ni. A fiahna pawh neih thlap a ni a, Atkinson Corp. hian thiamthu sawitur nei nia an inhriat chuan an duh apiang an ti thei ang. Heng information put ru thinte hi Allison Caren Adams tih a ni!!”
.
Ka hming lam rik ka hriat chuan ka mit sulh ringawt. An zavaiin min en tih ka hria a, ka vawt nghal rawih rawih mai. Ka dang sawp sawp bawkin ka ring.. Min thawng chiang em a ni!! 
TMH!!
CHAPTER – 11
TAKE MY HEART!
By. Thantei_Pautu a.k.a Laura_Sean_Virgo
.
LUCA GIOVANNI’S    P.O.V*
.
Eng thil phiangsen nge!!
.
Jakobson hian eng thil phiangsen nge a tih hi? Information put ru chungchang vangin kan buai ngei a, Atkinson Corp. nena kan inzawmna pawh tihtawp ka duh ngei bawk. Mahse, information ru chhuak thintu hi Allison a ni lo! Jakobson pawh hian chiang takin a hria. Meeting tan anih hma khan chiang taka inbia in engkim felfai taka tihtur anih thu ka hrilh thlap a, tunah engvanga rawn ti danglam ngawt nge anih? A thiltih avanga a thil tawn tur pawh a hrechiang khawp ang chu..! Engkim, a chunga ka tihtur hi a hrechiang!!
.
An phun mar mar a, an zavai chuan mak tiin Allison chu an en thap bawk.
.
Allison chu hmel dang lawp lawp in a thu hriat chu a awih thei lo tih a mitmeng buai nak atang chuan a hriat reng mai. Ka thutna atangin ka ding chhuak a, ka din veleh an zavaiin an ngawi thap a. Ka thusawi tur ngaichangin min en thap bawk.
.
"He thil hi enge a awmzia?" ka tawng chhuah hmain arawn phun sap a. Min dem ngawih ngawih tih hriat zet hian Allison chuan min en a, a thutna atangin a rawn dingchhuak ve bawk a. Ka en rei duh lo.
.
"Nang ramsa tenawm hian eng thil nge itih tak hi?" Mr. Atkinson chu a thinrimna insum hram hram chungin a rawn ding chhuak a, Allison chu a melh khui bawk. A kut a hum ruh ngawt ngawt a, tharum thawh lo turin a insum tih a lang reng mai.
.
"Sir, eng thil mah.."
.
"Tunah min zui nghal rawh!" Mr. Atkinson chu hmai sen vekin arawn ding chhuak a,  Allison chu amah zui nghal turin a duh tih lantir nan tur zet hian a melh bawk. Allison chu a ang ziau a, a thiamthu sawi tur pawhin thil thleng hian a thawng em a, a tawng hleithei lo anih hmel. Pindan chhunga awm te chuan a tawng apiang an en thap thap zel a.
.
"Mr. Atkinson, tunah i la chhuak thei lo." ka tih chuan a ding chawt a. Min chhang tura a tawngchhuah hmain thawk a la leh te te phawt. A dinhmun angah hi chuan hetianga awm hi a mak hran lo.
.
"Nang mi tenawm hian engkim i ruahman ang tih ka hria.." sawi zawm leh mai tur hre lo niawm tak hian a ngawi leh rih a.
.
"Mr. Atkinson, kan insumdawn tawnna hi i hrechiang a, hetiang thil a thlen chuan tuna ka tih ang bak hi tihtheih a awm lo.
Engkim dik leh fair takin ka ti tih hria la, a fiahna en turin i la awm angai bawk."
.
Min chhang mai lovin a lu a thing nawk nawk a.
.
"Tunah chuan engmah ka en lovang . Allison, min rawn zui rawh."
.
Allison chuan a hmaa file a dah chu la khawm vat vatin Mr. Atkinson zui turin a kal a.
.
"Allison, kal suh." ka tih chuan na zet hian min rawn melh rawlh a, thil thleng hi ka tih ah angai ve hmiah tih ka hai lo. Ding khawmuang lovin Mr.Atkinson chu a zui a.
.
Mr. Atkinson khan eng thil pawh a ti duh ngei ang! Allison hi ka farnu tawrh ang tuartir ka tum ngei a, mahse tuna thil thleng ang zawnga tuartir hi chu vawikhat pawh ka ngaihtuah lo. Ka sawi tawh ang khan sumdawnna thil leh ka thunun theih chin thil reng reng ah chuan dik tak zelin hna ka thawk thin. Dawt hmanga inbeih leh hnehna chan tum hi ka ti ngai lo a, nakin zelah pawh ka ti hek lovang.
.
Conference room atanga chhuak in hmanhmawh zet hian ka motor-ah ka lut a. Chak zeta ka tlanchhuah hnu chuan Atkinson leh Allison te thlenna hmun ka hre lo tih ka hrechhuak chiah. Engvanga hmanhmawh em em nge ka nih pawh ka hre hek lo. Allison humhim ka tum pawh a ni mahna!
.
Ka secretary biain Atkinson Corp be pawp nghal tur leh an thlenna Hotel hre nghal turin ka hrilh a, minute 5 ral chhung a rei khawp mai.
.
Dawhthei lo zetin ka phone chu ka en sek a. A rawn rik rual deuhthawin ka pick up nghal a.
.
"Sir, thil thleng a awm vangin an thlenna hmun min hrilh duh lo a, engtin nge kan tih dawn?"
.
Ka phone ka off lehnghal. Min hrilh duh loh chuan rang taka an thlenna hmun hre turin tih theih a tam lo khawp mai.
.
Ka thlenna Hotel panin ka inkhalh chhuak leh a, tunah hian Jakobson ka hmuh nghal a tul takzet. Engvang a thil rawn ti danglam nge anih tih leh tuin nge tihtir tih ka hrechhuak ngei tur a ni.
.
Hotel ka thlen chuan ka pindan pan lovin Jakobson pindan ka pan a, kawngka a inkalh lo tih ka hmuh rualin ka pen lut nghal a. .
"Jakobson.. Jakobson.."
A mutna pindan ka luh chuan a bag-ah a thawmhnaw hmanhmawh taka khung in a lo kun kut kut a, ka hmel min hmuh rualin a meng pha nghal du bawk. Ka hmuh hmaa tlanbo turin che rang tawk lo anih hmel hi!
.
A bulah dingin a awmah ka tham a, ka thinrim zia a hre nghal ngei ang.
.
"Engvanga ti nge inih?"
.
A ang chawp chawp a, ka tham na bawka a tawng mai thei lo.
"Report engkim ka en vek hnu khan engvanga tidanglam nge inih? Tu thupek in nge report kha I tihdanglam"
.
"Ka..Ka sawi thei lo.."
.
"Tunah sawi rawh.." ka thamna chu ka tina zual sauh a. "Ka nupui diklo taka puh tur hian tuin nge hrilh che?"
.
"Ka..t..thih.. th..thlengin..k.ka..ka sawi..lo..lovang." a thaw hrawp hrawp tawh. He mihring hi ka dawp chhuak mai dawn lo a ang tlat mai. Ka that mai ang tih a hlauhawm zawk e.. Hetiang mihring dawihzep lutuk hi ka kuta thah tlak pawh a ni hrep lo..
Ka thamna ka thlah rualin chhuatah a thu hnawk a, a hrawk dawmin thawk a la kawk kawk a.
.
"A tha e. Tuna i sawi angai lovang. I hna atanga ban i ni a, thudik hriat anih hma chuan i zalen tawh lovang tih hria ang che. Khawi hmunah mah hnathawh tur I hmu tawh lo bawk ang."
.
"Mr. Giovanni.. Chutiang chuan i ti thei lo.. Ka fate.."
.
"I tih hmain I fate chu ngaihtuah la tha tur. Eng thil nge ka tih dawn lo nghak ang che."
.
Ka phone la chhuakin ka sawi duh ka sawi zung zung a, tun atanga  minute 10 ral hmain a awmna hmun tur dik takah a awm anga, engkim ka hrechhuak ngei ngei bawk ang.
.
Ka phone ka dah atanga reiloteah arawn ri leh a.
.
“Sir, Mr. Atkinson chuan tunah Paris a chhuahsan chiah anih chu.”
.
“Allison a tel em?”
“Ka hre lo sir.”
“Lo ngaihven zui ang che.” Tiin phone ka off a.
.
Jakobson an rawn hruai hnuah hmanhmawh takin Paris ka chhuahsan a, kan chenna in ka thlen chuan zinglam dar 3 a pel tawh. Inchhung ka luh chuan a reh thiap a, kan pindan ka pan nghal vat a. Atkinson rual khan Allison paw’n Paris a chhuahsan ka ring ringawt a, chutiang anih chuan kei aiin in a thleng hmasa ngei ang. A nih loh pawhin in ah hian a haw duh kher lo maithei bawk. Meeting naa thil thleng leh puh a nihna kha ka thiltih ah a ngai ngei dawn a, in ah hian lo haw lo pawh ni se a awm tho. Biak erawh ka duh..!! Eng thil nge maw ka ngaihtuah hi.. Ka ngaihtuah vanga biak duh pawh ka ni lo.. Ni lo..
.
Pindan kawngkhar ka hawng a, a thim thap. Light ka on a, Allison ka hmuh chuan ka thaw hawk. Ka thawveng huai mai..! Engvanga thawveng nge ka nih pawh ka inhrethiam chuang lo.! Khum lai takah ngil at a thuin a bawp a khawkherh a, ka thawm hre awm pawhin a awm lo. A hmalam a en ding ngar ngar a.
.
Ka thawmhnaw phelhin bathroom-ah ka lut a, tui vawt in min phuh chuan ka harh huaiin ka hria. Hmanhmawh hauh loin ka inbual a, bathroom atanga ka chhuah pawh chuan Allison chu a ahmaa a awmdan ang chiahin a lo la awm.! Pindan pakhat a awm chi pawh kan ni lo’ tih ngaihtuahin puan ka la a.
.
“Tenawm pa, eng thil nge itih hi?” ka hmaah arawn ding a, a kut a hum ruh tlat bawk. A thinrim hmel viau nain a tawng ring lo  khawp mai.
.
“Meeting naa thil thleng kha I thil sawi hi anih chuan theihnghilh rawh. Ka tih a ni lo..”
.
“Eng thil nge ka lakah hian I duh..” tharum ngah lo tih hriat zet a ban zen thlerh chuan ka awm ah min nam a, ka nghing ve dat. A mitmeng chu a thinrim vangin a de sar a, a biang a sen hlar bawk. Ka nupui hian min barakhaih fo dawn anih hi. Tap chunga min an khum lo hi a mak ka ti! A hmel landan chu duhawm ka ti takzet bawk. Ni e, ka pha lo.. Analh thlawt..!
.
A darah ka vuan a, ka vawnna chu rang zetin a thing thla a.
.
“Engtin nge min khawih ngam zawk? Min.Khawih.Suh.” thinrim zetin ka awmah min nem leh a.. “Nang hi ilo tenawm takzet anih hi.. Tihian I duh chu I hmu em.. I.Hlim.Em?” thumal tin a sawi pah chuan min nam zel a, a mitmeng atangin min hlau miah lo tih a langchiang viau bawk.
Kuah tumin ka ban leh a, mak takin a tang miah lo! Eng vanga kuah nge ka nih pawh ka inhre hrep lo ve. He hmeichhia hi ka hmanrua a ni. Ka hmangaih vang pawh ni lo, a unaupa thiltih ka rulhlet theih na tura ka neih a ni!
.
“Eng thil nge I tih leh dawn? Eng tikah nge I lungawina khawp I hmuh ang?” Ka kuahna atanga tal chhuakin min en kal a, zam hmel a pu lo a, rilruna hmel a pu hek lo. “Luca, ka unaupa’n I farnu a hmangaih vanga hremna hmu tur ka nih chuan engpawh ka tuar ang. Engmah ka hlau lo. I duh apiang ti ang che.”
.
He hmeichhia hi ka hrethiam lo. Kan chendun chhung hian a nungchang ah mak tih ka nei fo a, tuna a nungchang leh a awmdan phei hi chu mak ka ti lehzual.. Sawitur ka hre  lo.. A vawikhat nan.. Sawitur reng reng ka hre lo.. Tihnat theih a ni lo niin ka hre ta hial mai.
.
“I tihtur I tihzawh hma chuan kan inthen theih loh tur thu I sawi a, keipawh hian thil duh ka nei. He in ah hian ka la awm zel dawn anih chuan ka duh danin ka nung ang. Zanin atang hian I pindan hi ka tawm tawh dawn lo che tih I hre bawk dawn nia.”
A tawng duh dan chuan min khei ta zak mai. Kalsawn a tum chu a banah na zetin ka hmer a, a inring lo bawk nen a te that a. A hmai bul chetah kun hniamin thawk ka la a, a taksa rimtui chek chek chu ka hip lo thei lo.. Takzet hian! Tunah mipat hmeichhiatna ngaihtuah hun pawh a ni lo..
.
“Thutlukna siamtu tur chu nang ni lovin kei hi ka ni.. KEIMAH.. Kei hian I awmdan turah thutlukna ka siam ang. I unaupa chungchang hi engmah hriat I nei lo. I sawi vang ni lovin ka duh chu ka ti ngei bawk ang. Zalen chu NANG ni lovin KEIMAH bawk.. I thil duh I sawi kha theihnghilh nghal ang che.” Dim lo zetin ka vawnna ka thlah a, a pai deuh nawk a. Hmeichhe laka tharum hman hi ka duh ngai hauh lo a, tunah erawh he hmeichhia hian min cho reuh tlat anih hi!
.
“He pindan chhuahsan hi vawikhat pawh ngaihtuah tawh suh.”
.
Pindan ka chhuahsan zui a, zankhuain ka let leh tawh lo. In atangin ka chhuak a, chak zetin motor ka khalh chhuak a. Khawilam nge ka pan dawn ka hre lo. Motor ka tihdin chuan ka office kawtah ka ding der tawh a, motor atanga chhuakin ka office ka pan a.
.
Zankhuain ka rilru lakpen nan hna ka thawk a, ka chhungril tawt ut ut chu ka farnu ka ngaihtuah lutuk vang a nih ka ring.
.
Ka phone nghawr dar dar vang chuan ka phu zawk a. Engtik laiin nge ka mutthilh ka hre lo. Ka dawhkan bawhin ka lo muhil anih ngei dawn hi! Ka taksa kham thum tihreh tumin ka ding a, min rawn biak tumtu chu tunge tih ka en zet hnuah ka phone ka pick up ta chauh.
.
“Mama..”
“Oh..Luca, Adelina nen kan inbe zo chiah a.”
.
“A tha em?” ka ngaihtuah zia ka thup hman lo.
.
“Aw.. Nangmah ngeiin a that thu min hrilh kha.. Mahse..”
“Mahse, enge?”
“A lo haw theih rih loh thu a sawi a. Dinner ei turin I lo kal thei angem?”
.
Ka nu aw a ngaihthat lohna chu ka hriat hmaih lo. Thudik hria ni phei se… Ngaihtuah loh ka duh zawk..
.
“Aw, mama, kan lo kal ang.”
“Okay.. Kan inhmu thuai dawn nia.” A ti sap a, phone a tawp zui nghal bawk.
.
Office atanga chhuakin in ka pan a, tui vawtin rei tawk tak inbual ila ka harh deuh maithei.
.
Inchhung ka luh rualin eitur rimtui zet rim ka hre nghal pang a, choka a awm chu Carina a ni lo tih ka hre bawk. Tuna ka rim hriat ang a nam anih chuan choka ah Allison a awm ngei ang. A hmel hmuh ka chak hran lo. Choka a awm chu tunge anih va en kher ngai ka ti lo bawk. Ka ding chawt a, choka  luhna kawngka ka thleng tep tih ka inhriat rualin ka inher leh vat a.
Kan pindan ah ka chho a, rei tawk tak bathroom-a ka awm hnu chuan ka harh ta deuh.
.
Bathroom atanga ka chhuah chuan thawm nei lovin ka ding leh rih. Ka hmaa hmeichhe nalh zet inthlak ka hmuh chuan ngawi rengin ka en a. Ka nupui a nia, thil diklo ti pawh ka ni chuang hleinem! A hnung ruak kang leh a vun mam thal te, a bawp sei thlarh leh a taksa engkim.. Ka taksa danglam chu duh lo zetin ka rum hak a..
.
Allison chu rang zeta inherin min rawn en a, a meng phawk deuh hra bawk. Min hmuh veleh rang zeta insiam thain a kawr a ha tha mawlh mawlh a, min biak a tum loh hmel khawp mai. Min rawn panin min kuah se, min thlahlel tih sawi bawk se.. Ahmaa ka laka inhawng taka a awm ang khan awm leh se.. A hmui nalh zet leh a vun silh ang mai a nem thel… NO!!
.
Ka lu thing nakin ka kalsawn a. Ka ngaihtuah loh tur tawp ka ngaihtuah a ni. He hmeichhia hi ka thlakhlelh chhan tur a awm lo. Tunah chuan a hming mai a ka nupui a ni. Tunah chauh lo pawh, ka lakah chuan a tirte atang khan ka hmanrua ani tih bak alakah hian eng rilru mah ka pu lo.. Tun atang chuan a mitmei veng hauh lovin ka khawsa thei tawh ang. Ka tan lemchan angai tawh lo..
.
“Eng thil nge itih dawn?” office kal tur ang maiin a inthuam a, nimin maia thil thleng vang khan Atkinson Corp. atangin an ban ngei anga..
.
“Ka PASAL thiltithei zet vang hian hna thar ka zawn angai alawm.” Awlsam hmel zeta tiliam puatin a hmui ah lipstick a hnawih a. A hmui hnawih rawng chu..! Luca Giovanni..thil dik chauh ngaihtuah rawh!
.
A bag lain pindan atanga a chhuak chu ka enzui reng a. Tunah hna thar a zawng hauh lovang! Atkinson Corp. nen kan thubuai leh amah puhna avang khan awlsam takin hna a hmu dawn lo tih ka hrechiang. Information put ru kha ama tih a ni lo tih Atkinson Corp. pawhin an la hre hek lo. Mr. Atkinson hi a ngawi mai mai dawn lo a, Allison hian buaina a hmachhawn ngei ngei dawn.. He hmeichhia hian eng ang buaina pawh tawk se min pun dawn hauh lo tih kei aia hrechiang an awm lovang.. A inrintawkna chu chhuang ru takin ka nui suk..!!
Hetiang dinhmun ah hian Adelina awm ve ta se.. Ni lo.. Adelina chu tunah pawh hian hreawm takin a awm maithei..
Kha mi tenawm pa khan Allison nuamsa taka ka la en liam mai mai ang hian ka farnu kha nuamsa takin a dah hauh lovang.! Ka thil ngaihtuah vang chuan chawp leh chilhin ka mood a inthlak nghal hmiah.
.
Chak zetin motor ka khalh chhuak a. Khawi hmunah kal tur nge ka nih ka inhrechiang ngang mai.