GABO YAMAN - 18

GABO YAMAN
CHAPTER – 18
Thantei_LauraSean
.
 GABRIEL ARGYROS YAMAN
.
 “Mia!”

“Chhuak rawh.” A ti that a.
.
Video-a thil lang leh a thawm zawng zawng kha ka hmuin ka hre hman vek a, Mia hian engtin nge a dawnsawn tih pawh chiang takin ka hmu. Video kha siam chawp a ni lo tih hrechiangtu ka ni bawk. Zuri khan a lo record vek tih ka hre miah lo. Zuri chungchanga hriattur awm chu ka hre vek tawh a. A thil tum ber erawh ka lo rin thelh deuh a ni.
.
Restaurant-ah khan ka thil hriatte Mia hrilh ka tum ngei a, zawhna tam tak ka neihte chhanna hriat ka in beisei bawk kha a nia.  Zuri khan dawt hlang hlak a asawi bik lo tih pawh ka hria. Mahse, kan sawi tan hma hauhin Zuri khan min rawn chimbuai ta a ni.
.

Mia chu ka en a, a video en khan a inthunun theihna a hlohtir vek tih ka hmu. A pangpar  khawina vawm keh pawh chu hria angin a awm lo. A kut hum ruhin mitmeng hriatthiam theih miah loh hian min en a, hnaih tuma ka pen rual chiahin a tawlh hnung ve zel bawk a. Rang taka chein ka pan hnai lui a, ka kuah rualin te that chung hian  a tal nghal bat a, a theih tawpa nain min chum nghal nawk nawk. Kan insual a ni ta ber!

Rei vak lo hnuah chuan a tal ta lo. Min sual let tawh dawn lo nia ngaiin ka ngaichang hlek a. A tawng miah lo chu mak ka ti ta deuh. Ka kuah nghet sauh a, mahse a awm dan a dik ta lo. A thaw miah lo niin ka hria!
.
“Mia?”

A tal leh thut a, ka inrin hman loh vangin ka kuahna atang chuan a tal chhuak a. Min hmachhawn tha lehin huatna a khat mitmeng hian min en ta thung a. A mitah chuan ka en reng thei ta lo.
.
“Engtin nge min la khawih ngam zawk? Mihring I ni chiah em?”
.
“Mia, thil awmze dik tak ka hrilh ang che.”
Rapthlak ti zet hian a nui hak.

“Eng thu chu nge min hrilh ang? Tum buai lo zawk rawh. Khawngaihin min chhuahsan teh. Zuri khan I inah alo nghak dawn che ani lawm ni? Tenawm lutuk!”
Ner sak chung leh kut khur dar darin kawngka lam a kawk va a.
.
Tuna thil  sawi fiah tum hian awmzia a nei dawn lo. Chuti chung chuan a duh anga chhuahsan nghal erawh ka tum hauh lo thung. Ka dinna bul thutna awmah chuan thuin amah chu ka en a, engmah sawi tawh chuang lova min en let ram ramin a ding reng thung a. Atthlak taka che buan buan lo turin a thinurna chu thunun a tum ngar ngar tih ka hai lo.
.
Eng chena rei nge chutiang chuan kan awm ka hre chiah lo. A rei tak viau hnu chuan a ke a kham ta aniang muangchang hian ka thutna hlat thei ang berin thutthleng hmawrteah chuan min hnungchhawn zawngin a thu a. Va kuah lo turin ka insum a ngai tih ka hria. Ngawi renga thut tlawk tlawk chu ka tuar thei ta lo bawk.
.
“Mia_”

“Eng chena rei nge la awm I tum?’ a ti bul hmak.

“Sawi dun tur tam tak kan nei a, engtin nge ka kalsan ngawt theih ang che?”
.
“Kan inkar a tawp tawh.”
.
“A tawp lo.” Ka ti ve thung
.
“Ni love. A hrana tihtawp pawh a ngai miah lo zawk tak e. A tir atang khan a lem vek a ni.” a ti dam thlap a, a aw chu hmun reh taka ri ang mai a ni. A rilru a siamfel thawkhat ang tih ka ring.
.
“Mia_”

“Sawi tur ka nei tawh lo.”

A ding chhuak a, a zungbun bunlai chu phelhin a kutphahah a dah a, ka hmaah a kut chu arawn pharh a. Lak tumna ka nei lo. Amah hnaih taka dingin a mitah ka en a. Tunah hian engmah ngaithla duh rih lo mah se reiloteah thu dik a la hria ang.
.
A hmel tha zet dang deuh lap chu la en rengin a chala fawh tumin ka kun hniam a, ani chu che miah lovin a ding tawp. A chala ka fawh vang vang hnuah a TV-a la in connect Pen Drive chu lain a in atang chuan engmah sawi tawh lovin ka kal chhuak a. Ka tlan chhuah hmain phone ka hmang a, tunah chuan ka tihtur dik tak ka ti thei  ta. Ka tum lawk dan aiin ka tlai ta deuh mai pawh a!
.
Zuri ka chentirna in panin chak zetin ka tlan chhuak a, ka thiltih turah hian ka chiang tawk bawk. Tunah chuan  Maverick chhui chhuah bak keimah ngei pawhin fiahna ka neih hmang hian a dawt sawi zawng zawng phochhuah a ni ang a, a phu tawk hremna a hmuh ngei pawh a tul ang. Ama siam ngei hmanrua hi a chhiatna thlentu tur fiahna tha tak a ni dawn ta bawk anih hi.
.

.
Zuri’n kawngkhar arawn hawn chuan ka lut tlang nghal a, ka hmel atangin thil thleng tur a ring thiam tih a awm dan atangin lang mah se a thiltih vanga inchhir hmel erawh a pu lo.
.
“Engvanga ti nge I nih?” ka ti nghal tawng a.

“Ka neih tur apiang min chhuhsak zel hi ka tuar thei tawh lo.”
.
Sofa-ah thuin Zuri hmel chu ka en a, a nungchang hi a mak em em tih ahma khan ka lo hrethiam tawk lo tih ka hrechhuak thar leh bawk. Kan benga kan hriat thu, dik nia kan ngaih kan vawn ngheh tlatna hian thudik hriatna tur lakah mit a lo tidel tlat thei tih hi a tharin ka zir leh chu anih ber hi a.
.
“Thi tep khawpa tuia I tlak der hma khan eng chen zeta rei nge ruahmanna ilo siam tawh? A tawp thlenga min bum theih I in beisei lovang chu tiraw?”
.
Ka thusawi chuan a thawng chiang hle. A thiltih tam tak ka hrechhuak ang tih chu a ringlawk ngei ang a, engkim ka hrechhuak tawh tih erawh a ring lo a ni ngei ang. Sawi mai tur hre lovin a ang pham a. Boruak tlachham niawm taka thawk lain a dang ro lutuk tihreh nan a chil a lem khalh. Chutih chhung chuan a sawi tur a ngaihtuah pah ngei ang.
.
“Ni lo. Chutiang a ni lo. Ka tum chu_”
.
“Tuna ka bula insawi thiam hian a pui tam kher lovang che.”
.
“Argyros__” sawi mai tur a haihchham chiang hle.
.
Pawn lama Police car thawm a hriat chuan mangang zetin a te that a. Tlanchhe turin a tlai tawh tih a inhriat chuan a hmelah thinurna nasa tak a lang nghal a. Seattle Beach house-a ka hmuh atang khan tun ang reng renga a hmel lan dan danglam nasa hi ka la hmu ngai lo. 
.
In chhungah Police pahnih an lo lut a, man theihna lehkha annei tih Zuri hmaa an pharh hnu chuan an inhruai chhuak ta.
.
.
Ni hnih a ral leh chhung chu Mia chanchin ka hre hauh lo a, biak pawh tumin awmzia a nei tam lo khawp mai. Ka theih hmasak berah MG Jewels-a ka kalin hmuh tur a awm lo a, chutiang bawkin a inah pawh a awm chuang lo. A biak pawh tur nia ka hriatte pawhin a awmna chin an hre chuang lo a. Tun hi a vawi khatna  a ni tawh lo bawk. Ahma pawh khan tumahin an hriat lohna hmunah kar khat vel zet a lo bibo tawh a nih kha. Engkim chiang zawka ngaihtuah turin hun thawl a zawng pawh a ni mahna..
.
Ka phone ri chu enin ka pick up vat a.
.
“Mr. Yaman, tunah kan tan leh dawn a, lo awm ve ngei la kan duh khawp mai.”

“A tha e. Ka lo kal ang.”

Phone chu dahin ka office ka chhuahsan a ,Police station lam panin Car ka khalh chhuak nghal a. Ka thlen chuan min kawhhmuhna pindan ah ka lut nghal.
.
Pindan zau tak ruak huai chhungah chuan mipa pahnih an lo awm a, min hmuh chuan an bula thutna awl awm chu min kawhhmuh a.

Darthlalang chhah takin a pin dan chhunga awmte chuan min rawn hmu thei lo tih ka hria. Zuri leh hmeichhe pakhat chu dawhkan lian vak lo kila thuin an in hmachhawn a.
.
“Heihi tunge anih I hria em?” dawhkanah thlalak niawm tak a dah chu Zuri chuan a en zawk a.
.
“Hria e.”

“Mimal zalenna tibuai zawnga chet hi dan kalh ani tih pawh I hriat ka ring.”
.
“I thusawi zawng zawng kha ka hria a, helai hmuna min khung reng theihna tur khawpa sual lian a ni lo tih pawh ka hria. Helai hmun atang hian min chhuahtir rawh. Anih loh chuan ka dikna chanvo min rahbeh sak vangin ka khinglet zawk ang che.” A ti fel fak a. Zuri hmaa hmeichhe thu chu za vak lovin a nui sak.
.
“I sawi dik e. Helaia khung I nih chhan chu heihi a ni.” Zuri tana hmuh chian theih lohin lehkha pakhat a lek chhuak zauh zauh a. “I unaunu hrawn laka I chet dan zawng zawng te, dawt tam tak I sawi zawng zawngte khan tan inah a khung thei lo che a ni mai thei. I thiltih sual fiahna hi nangmah ngeiin I siamte pawh a awm a. Chu aia pawimawh zawk chu__ I dawt sawi leh Miss Garcia I puh chhiatna zawng zawng te vang ni lovin he I thiltih vang hian I dam chhungin tan inah awm zawk ang!”
.
A thlalak ken chu dawhkanah a dah a. Zuri’n a en chuan a hmel a danglam zawk tih a hriat theih. Rang zetin a insiamrem leh thuai a.
.
“Ka nu nen hian inzawmna kan nei lo.” A tichang fak a. Ka rin aiin a tal buai lo.
.
“Tukin khan a thi ta tih I hria em?”
“Hre hauh lo mai.” Ati vawt raih a. A nu thihna chuan a nghawng vaklo tih a thup lo chu mak kan ti tlang hle.
.
“In inhmuh hnuhnun ber hun I la hre thei em?”

“Hre tawh lo.”

“Engtik nge in inbiak tawp?”

“Ka nu nen hian kan inbe ngai lo.”

“Anih chuan Thla khat liam taa Hotel-a in inhmuh kha I theihnghilh tawh a nimaw? Thi turin I kalsan tih nen?”
.
Zuri chu a hmela a ngaihtuahna tilang lovin a thu ngil a.

“Ka lawyer min koh sak rawh.”

“Miss Zuri LeBoeuf, hotel pindanah khan Mrs. Ophelia LeBoeuf kha thi turin I kalsan reng em?”
.
Chhanna a awm lo.

“Miss LeBoeuf, nangmah hringtu ngei_”

“Ka lawyer hmuh ka duh.”

“Miss LeBoeuf_”

“Ka lawyer min kohsak rawh ka tih chu_” Zuri chu ding thutin a dawhkan kil chu a kut pahnihin a chum dawt a.  Thu zawh belhin awmzia a nei tawh dawn lo tih a lan rualin a thil tihsual a nemnghet tih a rin theih bawk.
.
.
Rin phak bakin thil a kal ta. Ni hnih hnuah Zuri LeBoeuf chung thu ngaihtuah a ni dawn tih chanchinbu tam zawkah a chhuak chuai chuai a. Mahni hringtu nu ngei thah tum thubuai anih vangin mi zawng zawngin an ngaihven niin a lang.
.
Court-a thubuai ngaihtuah ni a lo thleng a, ka beisei ruk angin Mia pawh ka hmu thei ta. Sumdawng langsar tak Benjamin LeBoeuf chhungkua inpawh lo tih hriat taka thutthleng tlar khata thute chungah chuan pindan chhunga awmte mit a fu thup a. Ka mit erawhin Mia chiah  a hmu thung.
Ka thutna atang chuan pindan chhunga a lo lut lai chu ka lo en reng a. Ka notice hmasak ber chu a kut zungtangah zungbun a awm lo tih hi! A in ka chhuahsan hmaa a hmel lan dan ang reng khan a dang deuh lap a, a mitmeng ah chuan phurna reng reng a lang lo. Amah bei a, dawt tam taka puhtu chung thu ngaihtuah anih dawn vanga phur ru viau tur anih laiin chutiang hmel chu a pu lo hauh lo a. A thawmhnaw hak simple leh taksa lang tam lo tak  chuan a nalh zia a thup zo hek lo.
.
Rorel tan a ni a, box-a Zuri arawn din chhuah chuan zawhna a chhan dan chu kan zavaiin kan ngaichang thup a. Thu dik sawi tura a intiam hnuah zawhna hmasa ber zawh a ni ta.
.
“Mrs. Ophelia LeBoeuf nen in in laichinna min hrilh thei em?”

“Ka nu a ni e. Tualthattu a ni bawk!”
A thum hak a, Benjamin LeBoeuf bula thu a nupui pawmlai Ophelia chu a dang sawp sawp a.

“Thu dik chiah sawi turin I intiam tih theihnghilh lo la. Hotel-ah khan engti turin nge in nufa hian in inhmuh?”
.
Zuri chu a ngawi dat a, tawng mai tum hmel a pu ta lo.
.
“Miss LeBoeuf, I nu chunga I thiltih kha chiang takin I la sawi thei em?”

“Engmah ka ti lo. Ka thiltih chiah min zawt lovin ani hian Jose Mas LeBoeuf kha engtin nge a thah zawt zawk rawh.”
.
Zuri kawhna lam chu kan en thup a, Ophelia chu nunna nei lo ang hialin a dang tak zet tawh. Mia ka en a, a thu hriat chu a awih thei lo tih hriat tak hian hmel phawk deuh hrain a thu ngil at a. Benjamin hmelah erawh engmah a lang lo thung.
.
Ophelia LeBoeuf chu koh chhuah niin thu zawh fiah a ni ve ta.
.
Thla khat liam taah khan Zuri hian anu biain inhmuh a duh thu a hrilh a. Hun rei tak chhung inhmu lo leh inbe tawh ngai lo annih vangin mak a ti viau. Hotel pindana an awm dun hnu chuan Mia chunga a thiltihte a sawi a.

“Khatih lai khan ka hmaa thu, ka fanu Zuri chu ka en a. Hetiang taka mi rilru rethei lutuk tak maia a lo seilian hi pawi ka ti em em a ni. Benjamin hian a hmangaih em em tih ka hria a, a mamawh pek loh a nei ngai lo. A fanu Mia ai pawhin a ngaihsak zawk hial a_”

Chu thu a sawilai chuan Mia chu ka va en a, ani chu a lo kun daih thung. Ka hmeichhe hmangaih hian eng ang taka hreawm nasa nge a lo paltlang tawh le?

Ka thil ngaihtuah chu dah thain Ophelia chu ka en leh a.
.
“Mia tibuai lo tura ka hrilh khan a thinrim insum zo lovin a bula hmanraw awm lain ka luah min chhu a. Chu chu ka hriat tawp ber a ni.”
.
“Mia unaupa Jose Mas nen khan inlaichinna tha in nei reng em?” tih zawhna a dawn chuan thawk a la vang vang a.
.
“Tunah chuan ka kum pawh a lo tam ta a. Ka thiltih tawh thenkhat vang khan ka inchhir fo thin_”

“Aw emaw aih emaw chauhin min chhang rawh. Jose Mas nen khan inlaichinna tha in nei reng em?”
.
“Nei hauh  lo mai. Chumi avang chuan Zuri min puhna thu erawh kha chu dawt muhlum a ni.”
.
“Aw emaw aih emaw chauhin_”
.
Darkar thum zet hnuah thubuai ngaihtuah hun tihtawp a ni ta.
.
Pindan pawnah chhuakin Mia lo chhuah hun ka lo nghak a, ka tel lova helai hmun a chhuahsan hi ka remti thei lovang.
Benjamin LeBoeuf nen an rawn inzui chhuak a, an inbe miah lo. Zawhna zawh tum mi tam tak an rawn kal pelh veleh Mia chu ka pan a, engmah sawi lova a banreka vuanin Car-ah ka hruai lut nghal a. Thui fe kan tlan hnuah pawh kan tawng lo. Ka chenna in kawta kan din hnu chuan Car atanga chhuak lovin kan la thu dun vang vang a. Mia chuan min rawn en ta. Thinur hmel a pu lo a, hmun hla tak ngaihtuah ang hian a lang ni maiin ka hria.
.
“JoMas_ Amah chauh kha ka neih chhun a nia. Ka unaupa kha i hria.” a tawng ring lo nain a thusawi erawh ka hre chiang hle. Ka hriat leh hriat loh min zawt lovin a unaupa kha ka hriat thu min hrilh mai a ni.

“Hria e.” tia ka chhan chuan a nui sak a. Keimah min pawm leh vanga  nui erawh a ni lo.

“Kum 12 leka upa ka nih lai khan in inhria tih ka hre tawh. Ka hriatna che a rei tawh tihna anih chu.”

A thusawi chu hrethiam chiah lovin amah chu ka en a. Eng ber nge sawi a tum ka ngaihtuah thiam chiah lo. Hmalam enin a thu a, hmuh nei ang pawhin a awm chuang hauh lo nia.