THE ELVES AND THE SHOEMAKER

The Elves and The Shoemaker
.
Horace Scudder
.
Hmanlai hian pheikhawk siamtu taima tak mai hi a awm a, mahse a pheikhawk siam atang chuan a chhungkaw chawmna tur khawp a thawk chhuak thei lo. A tawpah phei chuan pheikhawk pakhat siamna tur daih chiah savun a nei ta a, a rilru a mangang ta khawp mai a. Zan lamah chuan pheikhawk siam na turin savun chu a zai sa thlap a, zinga siam tan tum chuan a mu ta a.
.
Pheikhawk siamtu hi Pathian thuawih tak a ni a, harsatna lian tak tawk mahse Pathianin a harsatnate chu a hriatpui vek tih a hria a, ngawirengin khum a pan a, a harsatna te chu Pathian kutah a hlan a, tui takin a muhil ta bawrh bawrh a.
.
A tuk zinga a harh chuan a tawngtai nghal a, a tawngtai zawhah hnathawk tur chuan a han ho chhuak ta a. A pheikhawk siamna dawhkanah chuan pheikhawk siamsa hi a lo awm reng mai! Pheikhawk siamsa a hmuh chuan mak a ti em em mai a.
.
Pheikhawk siamtu fel tak chuan ngaihtuah ber tur leh sawi tur pawh a hre lo va, pheikhawk siamsa chu a han en vang vang a. A pum chuan siam sual pakhat te pawh a awm lo. A vaiin a fel thlap mai a ni.
.
Chumi ni chuan pheikhawk lei duh mi pakhat hi a lo kal a, pheikhawk chu tha a tih em avangin nidanga pheikhawk a lei thinna man aia to daihin pheikhawk siamtu chu a leisak a. Pheikhawk siamtu chuan pawisa chu a la a, pheikhawk dang pahnih siamna tur daih savun a lei nghal a ni. Zan lamah chuan a tuka pheikhawk pahnih siam tumin savun chu a zai a, hma takah  mu in a tuk zing hma taka thawh a, pheikhawk siam a tum rilru a.
.
A tuk zingah a han thawh chuan pheikhawk siamsa pahnih hi dawhkanah chuan a lo awm leh a ringawt mai a. A harsatna chu hriatpuitu an awm a ni ngei ang. Reiloteah pheikhawk lei duh an lo kal a, pheikhawk chu mawi an tih em avangin a man pangngai aia to in an leisak leh ta a. A pheikhawk hralhna pawisa hmang chuan pheikhawk dang pali siamna tur daih savun a lei leh ta a, a thil tawn chu mak a ti rilru tawh hle a ni.
.
Zan lamah chuan pheikhawk pali siamna turin savun chu a zai sa leh ta a, a tukah ah chuan ni dang ang bawkin pheikhawk  nalh tak tak siam sa pali a lo awm leh ta a. Chuti chuan hun rei tak hun an hmang a, pheikhawk tam tak a hralh tawh a, pawisa pawh tam tak an nei tawh a ni. Zan lama savun a zai sa chu zing lamah siamsain a lo awm zel a, tunah chuan pheikhawk siamtu rethei tak chu mi pangngai a lo ni ve ta a.
.
Tlai khat chu krismas lai a ni a, pheikhawk siamtu ngilnei leh a nupui chu meilum aiin an titi a, a nupui hnenah chuan, "Zanin chu mu lovin pheikhawk  min siamsak thintute hi hmuh tumin helaiah hian ka thu teh ang. Helaia ka thut reng chuan tute nge pheikhawk hi min siamsak thin tih ka hrechhuak thei maithei a ni." a ti a. A nupui pawh chuan hmuh a chak thu a lo sawi ve bawk a. An nupa chuan sathau khawnvar chu an chhem hlum a, eng thil nge lo thleng hriat tumin tukverh puanzar phenah chuan an biru ta a ni.
.
Zanlai a l nih chuan an in chhungah chuan mite pahnih hi an lo lut a, pheikhawk siamtu thutthlengah chuan an thu a, dawhkana pheikhawk siamna tur savun zai sa chu la in an kut te tak te chuan thiam tak hian pheikhawk chu an siam tan ta a ni. Rang em emin an thui a, an chhu a, an nawttle bawk a. An thiam em avangin pheikhawk siamtu chuan makti tak hian a thlir reng a, reilote takngial pawh a hawisawn phal lo.
.
Pheikhawk an siam zawhte chu dawhkanah chuan an dah zel a, dawhkana pheikhawk tam tak an dah tlar  hnu chuan khua a lo var dawn ta a, mite pahnih chu kawlphe ang maia rang hian in atang chuan an chhuak ta a ni.
.
A tukah chuan pheikhawk siamtu nupui chuan a pasal hnenah chuan, "Khang mite pahnih khan mi hausa takah min siam a, an chungah lawmthu sawisen loh kan ba a ni. Engemaw tal kan tihsak ve loh chuan rilru  nuamin ka awm thei lovang. A nuam thei lo mai pawh a ni lo va, a hreawm takzet zawk a ni. Nizana pheikhawk min siamsak lai khan khaw vawh laia an hnungzang khuhtu tur silhfen an nei lo tih ka hmu a, an tana tih ve theih ka neiin ka inhria. Tihtur ka hrilh ang che, an tan kawr, coat, waistcoat leh kawrfual ka thuisak ang a, nangin an pheikhawk bun tur tha tak i siamsak ve thei ang em?" a ti a.
.
Pheikhawk siamtu ngilnei tak chuan a nupui ruahmanna chu tha a tihpui hle a, a tuk zanah chuan dawhkanah chuan savun zai sa dah lovin thawmhnaw leh pheikhawk an siamte chu an dah ta zawk a. A hma zan ang bawkin tukverh puanzar phenah chuan an biru a, mite pahnih lo kal hun chu an nghak ta ran mai a ni.
.
Zanlai a lo nih chuan mite pahnih chu an lo kal leh ta a, a hma ang bawkin hnathawh tum chuan an han thu a, mahse dawhkanah chuan an tana siam thawmhnaw chu an hmu a. Hlim em em hian an nui hawk hawk a, an lam a, an hlim lutuk avang chuan awmngaihna hre lovin an let tawp tawp mai a ni. Hlim lutuk avanga mit de sar sar chungin thawmhnaw chu an inbel a, pindan chhungah chuan an lam kual a, a tawpah phei chuan kawngkharah an lam chhuak a, kawtzawl phaitual hnim chungah chuan an la lam ta zel a, a tawpah chuan an pilno ta a ni.
.
Chuta tang chuan pheikhawk siamtute nupa chuan mite pahnih chu an hmu ngai ta lo. Mahse mite pahnihin mi hausa takah an siam tawh avangin an damchhungin retheihna avanga hreawm takin an awm ngai ta lo va, mite pahnih tana hlimna nasa tak an thlensak ve thei tih an ngaihtuah chhuah apiangin hlim takin an nui sak thin a ni.