COPAS (Hearts) 11-20

COPAS (HEARTS)
.
CHAPTER - 11
.
Thantei_LauraSean
.
H & E
.
"Tukin dar 4 vel khan an in pawna thawm awm vangin Pu Thangkima ava chhuak a, Robert-a chu hmuh hreawm khawpa ingeuh hian an kawtah a lo awm reng mai a, a mar an deh chuan a lo chatthla fel der tawh a ni awm e. Khawih sawn ngam lovin police an phone a, i nu'n a lo kaihthawh hma che khan inchhungah an inla lut fel chauh a ni. A makin a rapthlak khawp mai." ka pa chuan a ti charh charh a. Ka nu ang thovin ngaih tha lo tak hmel a pu ve tho.
.
"An in singsa fel hmanin ka ring lo, hmeichhe tihtur pawh a awm ang, va kal ve thuai la a tha ang."
.
"I sawi bak chu engmah han hriat belh tur a awm rih lo tihna mi?"
.
"Awm lo. Nizan khan thil mak deuh sawi a nei miah lo amaw?" ka pa chu ka en a, Robert rawn kal chhan kha ka pa hnenah pawh hian ka sawi thei chuang lo.
.
"Sawi lo. Thil thlen dan hi a mak hle mai." kan ngawi thap mai. "Ka han insiam ange." tiin ka thawhsan a. Robert thihna hian ka tiril ah min man tlat nia.
.
Ka room-ah chhovin ka inthlak zung zung a, Robert te in a kal turin ka chhuak nghal a. An in ka thlen chuan mi an lo la tam vak lo. Nu Hmangaihi chu a tap hawm hawm a, a lainatawm tak zet. Robert ruang chu post-mortem turin an lo phur chhuak leh tawh a, ka pa sawi hmang pawh khan thih dan pangngai a thi a ni lo tih a chiang sa reng a ni.
.
Hmeichhe tihtur ni a ka hriat chu ka va tihpui ve zung zung a, ka ngaihbel nge mawni mi dang lo awm ve te chuan min en duh riau hian ka hre pek. Kan tih felfai hnu chuan in ah ka haw leh a, ka room-ah uluk zet hian Robert chunga thil thleng chu ka ngaihtuah a. Engvak phei chu ka ngaihtuah chhuak hran lo. Hmeichhe pangngai ve mai tan chuan han tihtheih vak a awm lo bawk a ni.
.
Thil pakhat ka hrechhuak! A pendrive nizana a theihnghilh tak kha!
.
Ka khum sir dawhkana ka laptop chu on in Robert pendrive chu ka hawng a, folder a tam khawp mai. Folder hmasa ber atanga tanin ka hawng zel a, thil danglam ka la hmu lo.

Folder tawp ber 'new folder' tia a dah tawp ka hawn chuan ka thin a phu nghal dawt dawt mai. Thlalak awm ho chu uluk zetin ka en dan dan a, Eleazer thalak ka hmuh chuan ka nghing lawih. Robert hian he pendrive hi a tum reng vanga theihnghilh a ni angem? Tawngkama min hrilh turin nizan khan ka ring tawk lo tih ka tilang chiang em a, kha vang khan tunge a rinhlelh tih pawh min hrilh duh ta lo kha a nia. Eleazer kher hi chu ka ringhlel miah lo asin. Min tina em em tu ni mah se hetiang thil tha lova a inhnamhnawih hi ka beisei miah lo tak tak.
.
Video pahnih awm chu eng thil nge tih hriat tumin ka en leh a, ka phu nawn awn awn a ni ber e. He video hi engtin nge a neih tih zawt turin amah ber a awm tawh si lo. Heng thil zawng zawng hi police hnenah dah ila kei hian buaina ka tawk lehsi angem le? Buaina ka tawh ve ka hlauhna ai mahin engkim buai hnawk lehzuala a awm ka hlau a ni zawk mahin ka hria.
.
Tunah chuan engmah tihtheih ka nei rih lo.
.
Robert kan vui liam a, a thihnaa inhnamhnawih thei awm ka rinhlelh ho tumah ka hmu lo. Thlalak a lang ho kha a then chu ka hmelhriat an ni ngei a, thenkhat kha chu ka la hre ngai lo mai pawh a ni lo vawikhatmah ka la hmuh ngai miah loh te pawh an awm. A chhungte hian tumah rinhlelh tur an hre lo a, rilru na takin an indawm kun tlawk tlawk tawp mai a ni.
.
Kar a liam a, Robert thihna chu mi tam zawkin an ngaihven lo zui nghal mai a, a thih dan ngaihtuah pawh khan thih dan pangngai a ni lo tih a chian tawh mai bakah post-mortem result arawn chhuak a, thah a ni  ngei tih a chiang lehzual ta bawk a. A result ka hriat dan pawh Pu Thangkima’n ka pa hnena a lo sawi ka hriat chhawn leh a ni.
Tichuan, uluk taka ngaihtuahin leh Robert pendrive ka kawl atang hian amah thattu hi a ruka ka zawnchhuah theih ka ring. Ka thil ngaihtuah chuan keimah ngei pawh min thawng dawt mai. Hmeichhe pangngai ve mai ka ni a, tharum ngah tak ka ni lem lo bawk a, ka thil neih hi police  hnenah hlanin ka buai ve lo thei ngei mai a. Mahse, ka thutlukna ang hian ka awm dawn a ni.
Robert thihna vang chauha hetianga thutlukna siam hi ka ni lo tih chiang takin ka inhria a, Alawmi thihna nena inkaihhnawih kal zel vanga Robert hi thah a ni ngei ang tih ka ring nghet hmiah. Ka tan chuan an thihna hi ka ngaihtuah ngai hauh loh ka nun dan phung thenkhat thlak danglam hlawk tu a ni dawn ta anih hi. Nge ni a, chhungrila ka nihna dik tak hi ka lo la inhre miah lo zawk. Hmeichhe pangngai mai tih theih bak pawh ka lo tithei reng maithei asin!
.
Naupang kum 6 mi lek ka nih laia ka chunga thil thleng vang khan huaisenna ka nei pawh a ni mahna. Tunge hria ang? Hun eng emaw chen chu kha thil kha ngaihtuah chhuak lovin ka nun ka hmang mawp mawp a, ka thinlung na taka hliam anih hnu pawh hian ka ngaihtuah chhuak mai chuang lo. Engpawhnise, ka thiltih tum hi Eleazer ka theihnghilh theihna tura ka thinlung tana damdawi tha tak pawh a lo  reng mai thei bawk.
.
ELEAZER*
.
An office atanga zangkhai taka a lo kal chhuak chu ka lo en reng a, a bula mipa nen chuan eng thil nge an sawi ka hre pha lo nain chupa chuan a lawm zawng tak a sawi a ni ngei ang Muffin chu za zet hian a nui a.  Engvanga Muffin tia ko tlat nge ka nih ka inhre bik lova, hming mak tak taka inkoh hi ka tih ngai loh leh ka ngaihtuah ngai miah loh a ni. Hmeichhe danglam tak anih vanga hetianga ko hi ka ni ngei ang.
.
Chu pa phiangsen chuan eng thil nge a hriat a, ei mai duh hmel pua a en ngam zawk chu le. Amah lah sawn chu chu a hre miah loh tih a lang reng lehnghal. Ral khat atanga lo thlir ngawt hi a tawk zo tawh lo anih hi. Bakah vawiin hian amah hmuh tuma helai hmun pan hi ka ni hrim hrim bawk.
.
Ka lam pana lo kal an nih tho vangin car atangin ka chhuak a, min hmuh chuan rang zet hian a hawisawn a. Min hmuh chak lo mahse a hlatah ka awm tawh dawn lo.
.
"Hmingi, ka lo nghak che a." ka koh dan teh tawl vang chuan a ni lo ta deuh hu in ka hria. Mi hriat laiin amah ka rilrua a hming ka vawn tlat dan ang hian ko ila a lawm lo lehzual ngei ang. A ner sak a, min rawn melh chuang der lova. A bula mipa kal chu a banah a vuan a, min ngaihthah a min kalpelh mai theih a inring a nih chuan a tisual chiang khawp ang.
.
An kalna tur taka ka din takah chuan min en lo thei ta lo. Ngaihthah theih miah loha awm dan chu ka hre ve alawm.
.
"Enge itih dawn?" chiang zet hian min en a, a bula mipa ban a vawnna chu a tinghet sauh tih ka hmuh chuan ka rinlawk hauh lovin ka awm chhungah hian eng emaw arawn inhnawh ut a. A laka mawi lo taka ka chet hnu khan mipa dang nen ka la hmu dun miah lova chuvanga a bula mipa hi hmumawh ta riau pawh ka ni mahna.
.
"Ka lo nghak che. Hun i neih chuan biak che ka duh a." tlemin ka tawngkam a pangngai ta deuh. Mi hmuhlaia mawi lo leh awm ang lo taka ka chet hian amah hi ka tilang nep dawn a ka hriat vang chauh a nungchang mawi zawk lantir ka ni bawk. Tuna ka chunga thil thleng mek hi ka hrethiam lem lo khawp mai.
.
"Tunah chuan hun ka nei rih lo anih hi. Te, kal ila?" a bula mipa chu a en chho ha a. Chupa chu a bu nghat a.
.
"Muffin, tunah biak che ka duh!" ka ti nghet charh a.
Hamhaih hmel pu deuh hian nui hakin a ka a ang zuau a, a ngawi leh rih. A bula mipa ban a vawn chu thlahin min rawn hmachhawn tha leh a.
.
"Engtin maw min koh?" a mit chhing zawkin a dak vah a, a chezia zawng zawng chu hmaih palh ka nei lo. Hei tak hi a danglam bikna tam tak zinga pakhat a ni. Ngaihtuah chiang lovin engmah a sawi ve ngai lo ni hian ka hria. Min rawn hnaih a, hetianga a chet hi ka beisei loh em vangin ka hamhaih let ta zawk mah. Hmeichhia vang mai maia ka hamhaih ka la hre ngai hek lo.  "Khatianga min ko ngam tur khan i engmah ka ni lo." ka beng bulah arawn phun a, engmah ti ve hman miah lova min siamin a inla hrang a, a kalpui pa lamah letin "Kal ang." a ti sap a.
.
Ka en tawp! Tun hi a vawikhatna a ni. Engmah sawi tur hre miah lova ka awm vawikhatna!
.
A bula mipa chuan a bike a tinung a, Muffin chu bike hnungah chuan chuangin an tlan chhuak nghal a.  Thil danglam eng emaw tak chu a awm a ni. Thil danglam tak. Muffin hian.. Muffin tia ka ngaihtuah teivet le! Ka hmangaih emaw in lo ti ngawt ange! Hmeichhia te hi ka hmangaih tura siam an ni lo. Ka tan chuan hmanrua an ni reng thin a, tunah pawh hian chu thil chu a la danglam chuang lo. Engvanga kha hmeichhe lakah khan inthiam lohna nei tlat nge ka nih ka inhre hek lo.
.
Kan inhmuh hmasak ber tum khan a hmel nung sar leh min ngaihven miah lo anga alan vang khan ka mit ala a, hmeichhe pian pangngai tak nei leh hmel pawh zahpuiawm loh tak chu a ni. Ka tan chuan mak ve deuhna pakhat a nei. Chu chu hmeichhe tam zawk hian min hmuhin min ngaihven lo ngai meuh lo. Nu tling tawh kum upa tawh pawh an bang chuang hauh lo ania. Ngaiah ka lo neih mai mai thin a, mahse min hmuh veleh a min ngaihven miah lo hmeichhia ka hmuh takah khan a dan a dang ta deuh a ni. Min hmuh veleh khan en chu min en ngei a, zak niawm takin a hawisawn leh nghal a. Min ngaihven mitmeng emaw hmeichhe dang mitmeia ka hmuh thin ang amah ah khan ka hmu hauh lova. Chu chu ka tan chona a ni. Chona lian tak!
.
Vanneihthlak takin ka ti dawn nge, mak takin ka motor ah khan a phone a tlauh a. Chu bakah ka thianpa Sawmzuala nupui unaunu Alawmi thiantha ber tih ka hriat khan ka thil hriat duhah min puih theih beiseiin ka hnaih ta anih kha. Infiamna nuam tak a ni bawk. Hmeichhe laka that chhuah hian thil nuam tak pakhat a keng tel a, chu chu sex a ni! An rilru hneh lah ka tana thil harsa a ni hek lo. Mahse, Hmingthansangi, Muffin.. a hming chu engpawhnise, hmeichhe thianghlim a ni ang tih ka ring lawk lo hulhual a, ka lakah a rilru puthmang a thup loh rual rual khan ka thlenpui theih tur chin chu ka hre nghal mai bawk. Ka tan hmeichhe mutpui hi thilmak leh danglam bik pawh a ni lova, ka ti ta reng a. A ti duh ang tih pawh ka rin loh thleng min umzui ta reng a ni. Mahse, thil dang ka sawi hmaih theih miah loh tur thleng a awm! Alakah feelings nei miah lo a hmeichhe dang ang bawka a liam mai ka ring a, ka tisual ta a ni.
.
Chiang taka ka hnawl lai khan a mitmenga a thinlung natzia lang chhuak kha ka hmuh hmaih hauh lova, nuam tih lohna pawh ka nei ngei alawm. Mahse, rei a daih lem lo. Hmeichhe dang ka bula engtiklai pawha awm thei an awm reng lai chuan ka hrereng lem lo. Min bansan lovang tia min hrilh kha ka tan thil thar ala ni lo fo! Ka secretary hnenah ka chanchin a lo zawt thin tih ka hriat khan ka rin aiin min zar buai rei peih dawn  niin ka hria a, mak takin ka chhungril ah hian nuam tihna ka nei a ni. Margaret hian hmeichhe dang aia a danglam thu ka hnenah vawikhat chu a sawi a, ka dam that leh dam that loh chiah a zawt thin tih a sawi bawk. Ka kawp thin hmeichhe tam zawk hian ka dam that leh dam that loh aiin ka sum an hman theih dawn leh dawn loh an ngaihven zawk tih fiahna ka hmu fo a, keimah chauh a ka awm hian ka ngaihtuah chhuak ta fo a ni. A mak khawp mai.
.
Thil dang zawng zawng ka sawi chuan a thui dawn. Tun mai khan a vawikhat nan mipa dang nen ka hmu a, keimahah hian danglam a awm a ni. Chu chauh chu a ni lo, a hma pawh khan, a bula ka awm hian.. Danglam tur ka ni lo. Ka duh vang renga ka tihnat hmeichhia hi ka hnaih kher a tul nachhan tur eng thil mah a awm lo. A vai khan hun liam tawh a ni a, ngaihtuah thar leh a tul tawh lo.
.
"Ka duhtawk ang!" ka phun hluk a. Ka car-ah lutin ka tlan chhuak nghal a.
.
Ka in ah ka haw tlang a, tui vawta ka inbual hnuah inthlak in laptop ka on a, chhuna ka endik bak statistic ka check nawn a, ka rilru ah a lut hleithei der lo mai. Thaw huaiin laptop chu ka shut down a, ka phone phawrhin Loretta ka bia a. Zanin chu chhuah harh ka mamawh a nih hi.
.
Zan dar riat a rik chuan kan kal tumna hmun thlengin pawnah car ka dah fel a, inchhung lam thawm chu a tha khawp mai. Loretta chuan ka banah min rawn kuahin inchhungah kan inzui lut a, kan thian thenkhat te pawh an lo awm der tawh bawk. Tum dang ang bawkin zanin chu an tal hiar leh khawp ang.
.
"Sawlamah sawn in tur a awm a nia." Mawizuala chu ka bulah rawn dingin ka darah min beng thawr a. Hei pawh hi keimah ang bawka nupui neih tum lo ve bawk a nia, inkawm tam lutuk lo mah ila hmelhriat tha tia sawi tur zing a mi a ni.
"Zanin chu mi thar ka rawn hruai a, a chhe lo tehmai a nia aw." ka beng bulah arawn ti sur sur a, kei aiin he mihring hian a hmeichhe khawp a thlak zing hial lovang maw?! A hmeichhe hruai a bula arawn kal chuan Mawizuala sawi ang em a nalh a ni leh lem hlei lova.
.
Darkar khat dawn ral hnu pawh chuan a vanglai kan thleng dawn chauh nimai hian ka hria. Thawm bengchheng lutuk chu ningin pawnah ka chhuak a, ka awmna hmun atanga hawi thlak chuan kan awmna in kawtzawl zau zet leh eng ut chu a langchiang khawp mai.
.
Gate ah chuan bike arawn tlan lut a, bike hnunga thu hmeichhia ka hmuh chuan ka ding ngil zawt mai. Hmuh chian lehzual tumin ka en chik a, ka hai lo chiang khawp. Amah ngei a ni. Helai hmunah te eng thil nge arawn tih  ve dawn? A bula mipa ka hmuh chu tlai lama ka hmuh tawh pa bawk kha a ni. Ka ner nawk a. Engvanga ka hmuh apianga danglam nge maw ka nih teivet ni!
.
Inchhung ah ka lut a, Loretta leh Tetei chu kai tawh zet hian kil khatah an lo thu zawi ngiai a. Min  hmuh chuan Loretta chu rawn thu chhuakin min rawn pan a, a mitmeng atang chuan eng thil nge a beisei ka hai lo. Mahse, zanin chu ka phurna a reh vek tawh. Khawih vel chakna ka nei lo!
.
"Heiii_Inchungah chho ila.." min melh sawr sawr a, a ding ngil hleithei lo.
.
"I rui tawh a nih kha. Haw zawk ila a tha ang."
Nui har harin min rawn kuah a.
.
.
"A la nuam alawm. Inchungah reilote mu ila ka harh leh mai ang."
.
Nia, a harh leh deuh phawt loh chuan hruai hawn chi pawh a ni lovang. Inchungah muttir turin ka kuah chho a, tunah mai hian ka hne hluah hluah a ni. Hmeichhe nalh tak a ni a, min hauh na thin viau bawk a. Pawi ka ti ngai lem lo kha ania. Engtiang pawhin awm se ka sawisel ngai hek lo. Ka dam chhung hun min hmanpui tur a ni lo tih ka hriatchian vang pawh ani mahna, a awm dan dik lo tak hi siam that emaw inthlak tura duhna ka nei ngai reng reng lo.
.
Inchung pindan ruakah ka kuah lut a, khumah chuan zawi zet hian thuin a bula mu turin ka nghawngah min kuah a.
"Tunah chuan a theih loh. I harhfim lo."
.
"Enge pawi.." a hmui a pet sawi a, he hmeichhia hi chu ka hrechiang alawm.
.
"Muhil rawh.."
.
Kan awmna room kawngkhar inhawng ri rak ka hriat chuan ka hawi chhuak vat a, ka beisei loh ber ka hmuh tak chu!
.
"Muffin!" ka phun hluk a, ka tawng ri chu keipawhin ka hre phak chuang lo. A ni pawh min hmuh chuan a ding chawt a. A hnungah a mipa hruai kha arawn lut ve nghal bawk. Chupa hmel ka hmuh chuan a chhan ka hriat miah loh hian thinrimna in ka khat nghal vek.
.
"Oh! Mi an awm!" za lo zet hian Mufiin chu a nui hak a, min hria angin a awm miah lo. Min hmuchiang lo aniang ti dawn ila room light a eng ut si. Loretta ban chu vuanin ka nghawnga min kuahna chu ka phelh a, ka ding ngil nghal vat a.
.
"Chhuak ang.." nui kar karin mipa chu a kai a, room atang chuan an chhuak lehnghal a. Ka umzui ve ringawt bawk.
Pindan ah khan eng tih tuma rawn lut nge an nih? Loretta rilru ang pu khan mu dun turin an lo kal ve anih chuan... Ding leh rihin ka hma zawna bang chu ka chum nghek a. Keimah ka ni lo. Hmeichhia vanga ka inthununna ka hloh thelh chu!
.
Thawk lain muangchang zawk hian inhnuai lamah ka chhuk a. Music ring lutuk vang chuan ka lu a tur lehnghal ut ut hialin ka hria. Ka mit ka len kual a, Muffin leh a mipa hruai kha ka hmu leh mai tawh lo. Room dangah kalin nuam an chen a ni ngei ang. Enge ka lo buai ve ngawt.
.
Insehruh teuhin Mawizuala bulah ka thu a, ka awm dan dik chiah lo chu a lo hre rang khawp mai.
.
"Thiana, tinge a?"
.
"Engmah." tih chiahin ka chhang. Ka hma dawhkan te a in tur an dah chu lain vawikhatah ka tlak nghal pawp a.
.
"Khawnge Loretta chu?"
"Inchungah a mu." ka tih chuan a ner suk a. Min ngaihven zui lovin a bula mi a hnaih hrut hrut a.
.
Ka hawichhuak a, kan piah lawk thutna a Muffin thu ka hmuh chuan ngaihtuah lawk lem lovin ka pan nghal ruak ruak a. A bula thutna awmah chuan thuin amah ka en a, min hre ngai miah lo ang hian a la awm ngar  ngar nia!
.
"I tha maw?" ka tih chuan muangchang hian min rawn en a, a intur ken chu a in hlak a. A hmui hnawih sen hlar chuan a lan dan a tidanglam khawp mai. Ka zawhna chu a hre lo a nih hmel. A hawisawn leh mai a. Mi ngaihthah luih chu a thiam hle dawn mai.
.
A intur ken chu laksak in ka in a, ka phuh chhuak leh lo chauh a ni. Juice maw? Nge thil dang a telh
.
"Hetah hian enge i rawn tih ve?" a beng bulah kun hnaiin ka bia a, ka tawng a hriat chuan min en ha a.
.
"Hei, min hmu reng alawm." music ring lutuk vang chuan awki pangngai pawhin kan tawng thei lo.
.
"I mipa hruai kha.." ka sawi loh tur ka sawi_ Ngaihven anga lan hi enge a tulna..
.
"Lo buai suh.." nui sang chung hian a mit a siai zauh a. A awm dan chuan min khei ngar ngar nimai hian ka hria.
.
"Nang hi.." serious zet hian ka en a, ka rilru a thil lo awm chu ka duh lo kher mai. Duh lo tur ka ni reng em? Hetiang a lo nih tak nachhan hi keimah ka ni angem? Keimah vang anih chuan..
.
"Hahdam rawh." arawn kun hnai lehzual a "Kan thiltih kha i ngaihtuah let anih chuan theihnghilh rawh. Kha thil vang khan lawmthu ka hrilh kher dawn che em?"
He hmeichhia hian min barakhaih chiang tak zet zet a ni e!
.
Ka chhan leh hmain a tho a, a mipa rawn kalpui pa awmna lam panin music rem chuan zei lutuk tak zet hian a kal phei a. Mit khap nachang pawh ka hre lo!                                                                                                                                                                                                                                                                               
COPAS (HEARTS)
.
CHAPTER - 12
.
Thantei_LauraSean
.
H & E
.
A thianpa bul a thlen chuan an lam dun a, a nghawnga a kuah ka hmuh chuan ka sa nghal pup pup mai. Sawtiang sawn a lam thei ang tih ka la ring chhin ngai lo hrim hrim. Ring chhin tur pawhin hetiang hmuna kal vak chi ni a ka hriat loh vang khan ka lo ngaihtuah lo hrim hrim bawk. Ka thutna chu thawh sanin an awmna lam chu ka pan a, keimahah hian eng thil nge dik lo ta pawh ka hre lo e. Rui khawpin engmah ka in hauh si lo. Lam ve turin ka lam ngai pawh a ni hek lo.
.
A bul ka thlen chuan a lam chawl chuang lova min rawn melhin a nui sak a. Min beisei a min nuih a ni lo tih langchiang. Ka ngaih dan anih loh zia chu ka sawi buai kual vel lo mai ang. Keimah ni lo mipa dang hnaih taka a lam chuan ka chhungrilah hian mak takin min hnawh a, a lam dan chu hmeichhia inlak itawm tuma insawih vel ang a ni hauh lo nain ka taksa ah hian danglamna a thlen si a ni.
.
A bula mipa a kuahna a thlah rual chuan a kawngah ka kuah a, min rawn enin ka khawihna chuan amah ah danglamna a thlen lo tih min hriattir tum ni zawk awm tak hian a then sak a.
.
"Engvanga hetianga awm hi nge i nih?" a beng bulah ka kun hniam a, ka thusawi chuan engtin nge hna a thawh tih hriat ka duh vangin a hmel ka en a, a ner sak. Chu zawng chu! Ka rin loh dan tak hian ka nghawngah min rawn kuah a. He hmeichhia hi Muffin tia ka hriat thin kha a ni tawh lo!
.
"Engtin nge ka awm?" a taksa chuan min rawn si thlap a, ka taksa hnuai lam danglam chu a hre ngei ang. Kei hi.. "I hmeichhe duh tak kha engtin nge i kalsan theih zawk a?" a rawn ti sap a. Ka rilru awm dan hi ka sawi thiam ta hauh lo mai.
.
"I thik tih sawi i tumna a ni em?"
"Keiman maw?" mak tih hmel deuh hian a meng phar ak a, ka nghawnga min la kuah reng chung chuan dak meuh hian a nui a. Kan bul vela thil dang awm zawng zawng chu an chawl thup ni hian ka hria! A nui hmel chu hmuhnawm ti takin ka en a. A mitmeng chu lang de sarin min cho zet hian min rawn en leh a. "Tupawh kawp la lo thik tur ka ni em ni?" a lu thing in "Ka thik lo hlauh.. A lawmawm lamah ngai mai ang aw.." he hmeichhia zet hian eng thil nge a hriat a. Nia, hmeichhia eng mi pawh kawp ila.. A dik thei lo.
Chhang lovin ka dar ka tiche zauh ringawt. Heti taka min hnehsawh thei hmeichhia hi ka la hmachhawn ngai lova kei mipa ah pawh mipa tak tak nia inchhal thin hian sawitur ka haihchham chu a nih ber hi.
.
"I la serious lutuk anih kha.." ka nghawnga min kuahna chu phelhin ka awm ah a kut pahnih a nghat a. Min khawihna lai apiang chu ka thluak hian a hrechiang hle.
.
"Ka haw a hun tawh a. A nih phawt.."
.
Tak zet hian!
.
Ka rilru ka lo pek miah loh vangin awlsam zet hian a kawnga ka kuahna chu a phelh a, min kalsan chu ani nghal mai. Ka en zui a, umzui ka tum zet nain ka thulh leh. Ka inngaihtuah leh zet a nih loh chuan hmachhawn tawh rih loh a finthlak zawk ang.
Khawi atangin nge a lo chhuah leh tih pawh hriat lohin a thianpa khan arawn pan thuai a, pawn lamah an chhuak nghal a.
.
Tunah hian helai hmun hi ka chhuahsan ve nghal angai. Ka thluak ka tih fim angai anih hi.
.
Inchungah chhovin Loretta khuma lo mu darh nuai chu ka kai tho a, a la harh chiang lo chung chuan ka kuah chhuakin ka haw pui nghal vang vang a. An in kan thlen chuan a harh chiang ta deuhin ka hria.
.
"Naktuk ah ka rawn hmu ang che." min rawn kuah tumin min ban a, ka hnunglamah awnin ka lo dang thuai a. Tunah chuan ka ngaihtuahna ah thil dang engmah a awm thei lo. Ka vawikhat tihna anih lem loh vangin a hmui hnuailam tipawrh tarh hian a nur nang nang a. "Eng thil nge diklo awm?"
.
"Chutiang engmah a awm lo. Lut tawh rawh." an in lam ka melh a, zan dang ang bawkin a thim leh thap tawh.
.
Loretta'n min kalsan hnu chuan in lam panin motor ka khalh a. Hmingthansangi hmel  hlir ka mitthla a awm vang chuan ka thinur hlur tawh. Ka in ah ka lut a, ka room-a lutin khumah ka mu nghal thawr a.
.
He khumah ngei hian ka rilru luah ngut nguttu hmeichhia khan a  thianghlimna min hlan a, a hunlai khan a thinlung zawng zawng min hlan tih a  mitmeng mawi taka min melh khan a lang chiang vek a, tunah khawvela thil thleng thei lo tur khawp a ngaih thil mak ber chu lo thlengin a danglam ta si.  A lehpek a awm ngai anih chuan a awm ang chiah khan ka tan engmah a ni tawh bik lo tih ka tilang khawp ang. Ka hnawl vanga hetianga danglam ta leh engahmah min ngai ta lo anih phei chuan a hnawltu zawk hian amah aia nasa in ka ngaihthah thei ngei bawk ang chu.
.
Ni hnih ral leh chhung chu office-a ka kal bak hmun dangah thiante hmu pawhin ka chhuak peih lo a, mahni chauha ngaihtuahna kawm ka mamawh rih ni a ka inhriat vang a ni pakhat. Eng teh vak phei chu ka ngaihtuah chhuak lem hlei lova. A ngai bawk a nimai.. Hmingthansangi bawk! Amah vang hian ka tihtur pawimawh tak pawh ka mangnghilh dawn dawn alawm le. Ka tan engmah a ni lo. Hmeichhe pakhat ka laka tlawm tawh, ka hnawl tawh a ni. Liam rawh se. Engtiang pawhin awm se ka tan engmah a ni lo. Ui tur ka ni em ni? Ka ui ang maw..? Huh.. Ka ui lul lo mai. Ka induhtawkna a khawih che hlek chauh a ni. Chu zawng chu.
.
Ka pen humlai chu ka ulh keh rawp a, ka hma zawnah thehin ka thutna atang chuan ka tho a. Kal duhna ka nei.
.
Ka car la chhuakin ka tlan chhuak nghal a, Sawmzuala te in ka thlen chuan tlai lam dar 5 a pel fel tawh. Door bell ka hmet a, min chhangtu an awm mai loh vang chuan ka hmet nawn leh a.
Hmel phelh phang hian Tabithi'n kawngka arawn hawng a, ka hmel a hmuh chuan inhui mam zung zungin a nui lui sak a.
.
"Sawmzuala a awm em?"
.
"Uh, awm lo. I lo kal dawn tih min chah miah lova." a nui hmel chu ka en a, a hmuiin a nui a, a mitmeng chuan thu dang daih a sawi thung. "I dam tha chiah lo a ni maw?" ka tiliam puat a. Ngaihthat loh hmel leh chik taka zawhna zawh vel ka duh chiah lo a ni. Thil dik lo a awm ang tih chu mi a ber pawn an hrethiam ang.
.
"Dam tha e. Ka chhun mu ka lo mu tlang daih a. Min rawn kaitho lo phei la tlai eirawngbawl ka tlai vek dawn anih hi. Lo thu ta che." a ti zung zung a. Sawmzuala ber a awm loh chuan Tabi nen hian han sawi dun tur kan nei lo. A nau chungchang a thil thleng kan chhui tih hi Sawmzuala'n a nupui hriat a duh hauh hleinem.
.
"Ka kal leh zawk mai ang. Naktuk ah pawh kan inhmu thei tho a."
.
"Chuti tur maw? A nih i lo kal tih ka lo hrilh dawn nia." tiin a meng dul leh ta lap a.
.
An in ka chhuahsan hnu chuan tihtur dang ka neih lem loh vangin ka nu leh pa chenna lam ka pan ve ta thung a. Tun thla chhung hian ka la tlawh miah lo. Ka nu ngaih dan a pel nasa tawh khawp ang. Ka u te nupa leh an fate pathum nen an cheng a, mahni chauha hun hman tam duh chi ka nih vang hian keimahin ka awm hrang ta a ni. Mi thenkhat chuan chhungkaw buaina vanga awm hrang angin min lo sawi chiam tih kan hria a, engahmah kan ngai lem lo tlang aniang. Engmah kan sawi ngai lo. Ka nu erawh hi chuan ka awm hran taka tang hian nupui nei thuai turin min nawr ve sek a, 'ka nei thuai dawn alawm.' tia chhangin nupui neih lam ka ngaihtuah chuang der lo.
.
Kan in ka thlen chuan naupang an lo ri niai niai a, min hmuh rualin an te ber Thomas chuan te chul chungin min rawn pan a, ka lo pawm vat a. Naupang hi ka ngaina lem lo ni a ka inhriat laiin an unau ho te hi chu ka ngaina ve khawp. Ka tiluam thiam lo mai pawh a.
.
Zanriah ei kham hnuah keimaha ka chenna hmun panin ka chhuak a, ka tum lawk pawh ni lem lo hian a kual zawngin ka kal a, Muffin te in ka tlan pelh lai chuan ka mit la tak thil ka hmu fuh ta tlat. Ka tlan muang lui a, ka mi hmuh pa chuan min rawn ngaihven hmelin a lang lo bawk a, uluk zet hian ka enzui a.
.
 Party naa ka hmuh pa ngei kha a ni. Nghah nei ni awm tak hian Muffin te in lam chu a hawi a, in kawngkhar chu rawn inhawngin hmeichhia arawn chhuak a. Ka tlan muang lui nain ka hmu zui thei ta lo.
An in piah deuhah chuan dingin ka ngaichang a, ka awmna lamah hian an rawn tlan dawn lo aniang a reh vang vang mai.
Tlema tlan sawn leh deuhin motor ka turn a, thil thleng tur awm tlata hriatna ka nei. Muffin hi tunhma zawng khan zan lama a chhuah vak ka hre lo. Ti ila, a chhuak vak ngaiin ka ring lo. A hma khan lo chik vak nachang ka hre lo a, mah se, a danglam tih erawh ka hrechiang fu si chu anih hi. Engtik atang khan nge a nunphung hi a lo danglam tak em em le? Kha pa nen khan an inzui tam viau bawk a nih hmel tlat. Chu thil chu ka pai dai thei tlat lo!
.
Thui pawh ka tlan hmain anmahni ni awm tak chu ka hmu ta thuai a, ka thaw deuh hawk. Ka rin lohna lamah an peng thut a, umzui zel tur anni nge ni lo ka hrethiam ta lo.
Ka duh loh tawp thil ka hmu ang tih hlauhthawnna  ka neih chu dahthain an penna kawngah chuan ka kal leh ta zawk a.
.
Thui vak lo ka zui hnu chuan an ding a, an kalna tur in atanga thawm lo chhuak ka hriat chuan hlimhlawp thilah an kal dawn tih ka chiang nghal mai.
Motor atanga chhuak lovin an lo chhuah leh hun  ka lo nghak mai ang tiin ka thu ta ran a.  Kei hian eng thil nge maw ka tih tak le? Hmeichhia ka umzui tak chiam mai chu.
.
Thawm danglam inchhung atanga lo chhuak ka hriat chuan ka thu ngil zawt a.
.
Hmeichhe thenkhat an te teng tung a, mipa rum hrawk hrawk thawm ka hriat chuan ka inhriat hmain motor atangin ka lo chhuak fel der tawh. Inchhung ah chuan ka lut a, mipa pahnih insual chu ka hmu nghal mai reng a. Thelh an tum hmel hlawm loh. Muffin hmel ka zawng a, ka hmu mai lo. Hetiang hmunah hian eng thil nge maw a tih phiangsen ni? A mipa zui khan a venghim thei lo anih teh chuan...
.
Ka rilru a thil lo lut zawk vang chuan ka mit ka chhing sawk a. A ni thei lovang..! Ahmaa inremsiamna ka neihpui thil ah khan a inrawlh zui anih chuan a him dawn lo chiang khawp!
.
Mipa awm ho chu ka melh kual thuak thuak a, ka hmelhriat ka hmu lo. Oh..! A mipa zui fo pa kha kil khatah hian a lo ding reng a, min rawn hmuh chuan a awm dan danglam lem lo hian min rawn nuih suk a. Ngaihtuah lawk lem lovin ka pan ve nghal hmiah. Muffin hmel ka hmu lo.
.
"Hetah te enge i rawn tih dawn teh tlat a?" pangngai zet hian min bia a, keipawh ka inthunun ve bawk.
.
"Kan inhmu leh ta hlawl alawm." min zawhna chu chhan ka tum lo. "I tha maw?" ka ti ta zawk a.
.
"Tha alawm." inchung lam a melh zauh chu ka hmu reng a, pangngai taka lang chungin ka kal pel a. Inchung lamah Muffin a awm ngei ang.
.
Inchunga chhoh tumin inchung panna step awm zui chu ka pan a, hmeichhe thenkhat chuan min ngaihven tih hriatreng hian min lo melh rawlh rawlh hlawm bawk a, a chep deuh bawk nen kan innek thuak thuak mai.
.
Inchung ka thleng a, ka rin loh deuhin inchung lamah pawh mi an lo awm teuh tho. Muffin chu ka la hmu ta chuang lova. Khawiah nge maw a kal reuh le? A mipa zui kha lo zawt ila tha tur.
.
Pindan chhuahsan tuma ka inher chuan kawngka ah arawn pen lut ve chiah. Min rawn hmuh chuan min beisei lo tih a hmelah a lang chiang khawp mai. A bulah kal hnaiin a banah ka vuan a.
.

.
HMINGTHANSANGI*
.
Eleazer maw! Hetah hian engtin nge arawn kal ve theih? Ka him chiah chiah a ni e.
.
Min ringhlelh hmel taka min en chik hnuah ka banah min rawn vuan a, pindan atang chuan min kai chhuak a. Hnial buaiin awmzia a nei dawn lo tih ka hria. A hmel hmuh fo hi ka duh lo asin. Tunah tak phei hi chuan ka mamawh loh ber mihring a ni chiang khawp.
.
"Eng thil nge itih?" min kalpui hlawk hlawk a, ka tawng chu hre awm pawhin a lang lo.
.
Pindan pakhatah min kai lut a, helai hmun hi a hrechiang viau anih ka ring. Ka inrin hma hauhin bang ngheng rawk hian min dawm bet a.
.
"Hetah hian enge I tih?" min hnaih lutuk mah mah a ni. A mitmeng thim raih chuan min en a, min zawhna chu chhan ka tum lo. Pindan a eng ut lo chu ka lawm tak zet. Chiang deuhin ka hmel hi hmu se min ringhlel lehzual dawn chiang. Ka thiltih hi a hre tur a ni lo. Amah chauh a ni lo, mi dang reng rengin kan thiltih an hriat hi a thiang lo. Te-a nen chauh kan hriat tur thil , thuruk tawpkhawk a ni.
.
"Enge itih zawk?" ka ti fak a. Ka chhan dan chu a beisei loh dan a ni ngei aniang, min vawnna chu tinghet zual sauhin a insehruh tih ka ka feel thei.
.
Tawng lova min rawn hnaih lehzualin ka chalah min rawn si a. A awm dan hi ka hrethiam lo. Min hmerna chu a thlah dul tial tial bawk a. Keipawhin sawi mai tur ka hre bik lova, ka hriat zawng chu tuna kan awm dan ang hian kan awm reng a nih chuan thil tha aiin thil tha lo a thleng ang tih hi a ni.
.
A kut dinglam chuan ka tukhumah  min rawn vuan a, a chet dan chu ka beisei loh em vangin ka hamhaih a ni ber. Ka ding tawp. Ka hamhaih ka tih rualin Eleazer hi ka thlahlel tih erawh ka pha thei hauh lo mai.
.
"Min kuah rawh!" kan hmui a insi lo chauh tawh a, a tawng zawi em em bawk. A tawng chu ka hresual anih ka ring zawk.  He mihring hian engatan mah min ti tak tak lova, tunah hian engvanga hetianga rawn awm nge anih reng reng? Kalsan ka tum ka thinlung natna hi tuna a awm dan vanga a thar ang maia tuar leh ka duh tawh lo. Ka tum lo bur. A va harsa tehlul em!
.
"Eleazer.."
.
"Shh!" a kutin ka hmui arawn tawk a. He thil hi ka tihtawp angai.
.
“Eleazer, duhtawk rawh. I tan engmah ka nih loh ang bawk hian ka tan engmah I ni tawh lo. Ka tan a harsa zawngin awm suh.” Ka tawng chu a ri chhuak chang chang a ni. Ka ngaihtuah thin  anga chak taka awm thei chu ni ila tunah hian an khumin ka tha neih zawng zawng seng meuhin  ka ham bawrh bawrh ngei ang. Ngaihtuah ang ngawt hi a ni thei thin si lo. Thinlunga inhmangaihna awm hi chaklohna thlentu chauh a ni e.
.
A awmah ka nem a, a che eih lo. A maimitchhing niin ka hria.
.
“Hetah hian enge irawn tih?” ka ti tha leh a. Min chhang lo. Tunah chuan ka aw pawh a pangngai ta deuh.
.
Min vawnna chu thlahin ka banah min vuan leh a, min dek lo hian awm se ka hahdam zawk ang.
“Chu zawhna chu keipawhin ka zawh che kha.” a ti nghut a.
.
“Eng thil nge ka tih.. chu chu ka buaina tur a nia. Min zui tawh suh.”
.
“Ka zui che ni a I ngai anih chuan theihnghilh rawh. I mipa zui thin hi hnaih lo bawk la a tha ang.”
.
Ka nui hak a, ahma lawka kan boruak kha a inthlak leh vek tawh.
.
“Chu chu ka buaina bawk. He pindan ah hian engvanga min hruailut nge I nih? Min zui lo anih chuan tunah hian ka kal nghal mai ang. A lawmawm e.” ti nghatin  min vawnna chu ka phelh a.
Kawngka ka pan a, kawngka hawng tura ka ban ka phar chiah tih hian ka nghing dawt a, au ka tum a, ka au chhuak thei lo. Eleazer hmel chu fiah lo ruai hian ka hmu a, min dawm tumin min rawn pan ngei a  ni. Ka hawi sawn hlek a, pindan chhungah chuan amah ni lo mi dang ka hmu bawk. Eng thil nge thleng hi??
COPAS (HEARTS)
.
CHAPTER - 13
.
Thantei_LauraSean
.
H & E
.
ELEAZER*
.
Muffin chu a tluk hmaa vawn hman tumin ka pan a, ka che rang tawk lo. Chhuatah chuan a tlu thlawrh mai. A tluk rual deuhthawin a bula mihring ruangam chu ka hmu ve chiah bawk. A hma khan khawiah nge a lo biruk ka hre lo. Nge, kan inbiak lai khan thil dang reng reng ka lo ngaihtuah lova, kan luh hmaa lo awm sa ni lovin kan inbiak lai khan a lo lut pawh a ni thei tho. Chu ruangam chuan min rawn hmachhawn a, engpawh thlen huamin ka hmachhawn ve hmiah bawk.
.
A kuta a thil ken chu enge a nih ka hre lo, ka lam hawiin a rawn lek a, ka lo indang hman hlauh. Tupawh chu nise a thil tum atih loh nan ka dan ngei angai tih ka hrechiang em em. A chet leh hmain ka hnek a, a fuh khawp aniang a ri no chawk a, a pai nghal chawn chawn mai. A thil ken chu a thlauh nghal bawk a. Ka chet leh hman hmain pai nawk nawk chung chuan kawngka a hawng a, a tlan chhuak  nghal a. Ka um dawn zet a, chhuata Muffin tlu reng chu na tuar tih hriat zet hian a rum hak a, ka rilru ah thil dang reng reng a awm tawh lo. Muffin bulah chuan thingthiin a nghawngah ka dawm kang a.
.
"I tha em?" eng thawm mah a chhuah lo. Room hi tih en phawt a tul anih hi. Muffin chu thawhsan in pindan chhung eng thalo zet rinchhan chuan light on na tur switch ka zawng kual a. Vannneihthlak zetin ka hmu har lo. Light ka on a, Muffin chu ka pan lehnghal a.
.
"I tha em?"
"Umm" a ti sap a. A hmelah  na tuar hmel a lang hran lo. A meng a riai a. Thut tuma a in nem kang chu ka lo pui  vat a. A mit a chhing vang vang a, a awm dan chu a hrethiam bik lo tih a hmel buai deuh nak atang chuan a hriattheih. A rawn men leh chuan a mitmeng a lang pangngai ta deuh. Zanin chu tum loh dan leh beisei loh thil a thleng ta teuh a nih hi.
.
"I ding thei angem?"
"Um.."
.
Tanpui tumin ka vuan a, ka vawnna chu duh lo niawm tak hian a kutin min lo dang a. Eng thil nge maw a hriat hrep ni.
.
"Ka tha tawh e. Tunge i lo hmu hman em?" a ti sap a. Chik zeta min enin a dul a dawm zauh a. A na ai chuan amah tihnat tumtu kha a ngaihven zawk tih a langchiang reng mai. Ka rin aiin a tawh a khirh reuh zek dawn a nih hi. A hmel en ang ngawta zuam chi pawh a ni reuh lo ang.
.
"A hmel ka hmu hman lo."
.
"Kha thil kha enge?" ka piah deuh chhuata thil let bal chu a kawk zauh a. A thil kawh chu enin ka pan a. Tun hmain hetiang thil hi ka la hmuh awm pawh ka hre lo. Ka chhar a, chiang deuha ka en chuan on leh off button chu ka hmu mai a. Ka on chhin chuan nghawr dar darin a hmawrah tek deuh chhek chhek a awm bawk. Current hmanga in shock-na chi khat a  nih ngei hi. Rei deuh mihring taksa nen a insik chuan khawlohna tham a ni thei ngei ang.
.
"Khawi min pe rawh." Muffin chuan ka hma zawnah a kut arawn phar a, ka thil ken chu off in ka jacket ipte ah ka ak nghal hmak a.
.
"Helai hmun hi chhuahsan teh ang. Eng tih tumin nge maw hetah hian i kal reng reng le." amah ka bia pawh ani chiah lo. Ka rilru a zawhna awm ka sawichhuak a ni mah zawk.
.
Kawngka ka haawng a, a banah vuanin ka chhuahpui a. Pawn kan thlen rual rualin ka vawnna chu a phelh nghal a.
.
"Hmun dangah kan intawn fuh tawh lo ka beisei." tiin min en tawh lovin min kal pel a. A nungchang danglam hi ka hrethiam teh nuai lo. Chuan, helaia ka zui luh chhan ber kha ka lo theihnghilh deuh der bawk. A inrawl lohna tur tawpah a inrawlh em tih hriat ka tum kha ania.
.
Inhnuai panna step-a a chhuk chu ka en reng a, a ban dah dan atang chuan a dul bawk a dawm leh niin a lang. Umzui erawh ka tum tawh lo.
.
Ka tum aia rei party na hmunah chuan ka awm a, room-a lo kal ve kha a ruangam atanga hriatchhuah theiha a lo la awm tak mialin tih thua awm khawtlai ka ni. Ka besisaei san loh ang chiahin han rinhleh tur pawh ka hmu zui lo.
.
Ka in ka thlen leh meuh chuan zing lam dar hnih a pel tawh. Ka ngaihtuahna ka hmang nasa deuh bawk nen ka chau deuh hnawkin ka hria. Ka inbual hnuah khumah ka let nghal tawp a, ka ngaihtuahna ka hman hma hauhin ka muhil der mai.
.
.
Ka phone ri vangin ka muhil ka harh hlawl a, office atangin min lo call tih ka hmuh chuan ka pick up vat a.
.
"Sir, i lo thleng dawn tawh em? Nangmah hmuh tum an lo thleng tawh a."
.
"Um, reiloteah ka lo thleng ang." tiin phone ka off a, khum atanga thovin ka insiam nghal zung zung a.
.
HMINGTHANSANGI*
.
Ka muhil thei lo zankhua thak. Pindan atanga kan chhuah hnu khan Tea hmuin kan haw nghal a, ka dul chu ka la hmu lo nain a na telh telh mai. Tu phiangsen nge min zui ru tu kha ni ta ang? Eleazer pawh khan engvanga min zui  nge anih? Ah, Eleazer kha chuan min zui pawh a ni kher lo thei tho. Party naah a kal fo a, khalai hmunah khan a lo kal ka lo ring lo ve ringawt a ni. Hei chu duhtawk ang. Na tuar deuh mah ila ka duh ber pakhat ka hmu tho alawm le!
.
Thil thleng kha Tea hnenah pawh ka sawi lo. In ka thlena ka room ka luh rualin ka duh chu ka en vat a, a lo duk/sen kual raih mai. Min dehna hmanrua kha hreciang turin Eleazer kha lo chuhlui ila tha tur.
Tui sa ver vawrin ka inbual a, ka dul na pawh a zia ta deuh. Ka mu nghal a, ka mut a chhuak lo nasa. Ka leh kual ka leh kual hnu chuan khum atangin ka tho a, ka khum bul drawer-a ka thil dah chu phawrhin ka en vang vang a.
.
Tihian Robert pendrive-a thlalak a lang ho pahnih chu ka chhui zui hlawhtling ta phawt! Robert thihna ah khan an lo inrawlh ngei em tih erawh a la chiang chuang lo. Engvanga buai hnawk em em nge maw anih le?
.
Te-a bulah hian engkim ka sawi thei rih lova, engkim ka hrilh lo tih a hriat ka duh lem lo bawk. Te-a hi Robert nen cousin anni tih ka la sawi lovin ka hria. Robert nen khan an inhnaih hle a, chuti chung chuan min pui thei thil hriat a nei tam lo. A hriat zawng chu Alawmi nen khan an lo inkawp ngei tih chauh hi a ni. Ka hriat hma daihin a lo hre tawh bawk a. Robert thihna khan a thawng ve takzet a, Alawmi tana thudik hriatchhuah ka duh ang bawkin Robert tan a theihtawp chhuah a duh ve bawk a, chu chu kan inthurual chhan leh engkim a kan inzui tak chhan a ni. Robert thih atanga kar khat vel aliam hnu khan kan in ah lo kalin kan titi dun a, a ni hian engtin nge rinhlelh a neih ka hre lo a, thil hriat ka neih beisei a min lo pan ve ngawt pawh hi a mak tho mai. Zawhna min zawh dan atangin ka rilru ang tho a pu tih ka hrechiang a, ka thil hriat thenkhat ka hrilh ta a ni. Tlaiah office ban veleh min rawn lam a, inthlakna tur keng lawk vekin office ka kal ta ziah bawk. Mahni ka inven theih nan eng emaw ka zir angai tih a sawi a, a sawi ang chiahin tlaiah mahni inven dan ka thiam theih nan an inhnuaiah ka inzir ta ziah a. Hmeichhia te hian mipa anga tharum kan ngah loh vangin thiam thil nei a inven dan kan thiam hi a lo tul takzet tih ka hrechiang dawn chauh anih hi.
.
.
Khawvar dawn hnaihah ka muhil sek a, mutthilh loh ngawt ai chuan a zia deuh. Office-ah thil thleng danglam awm lovin ka nileng a, tunlai te hian ka hna hian ka rilru a luah tam lo khawp mai. Phat theih pawh a ni lo.
.
Tea ka phone a, a lo kal theih dawn loh thu arawn sawi a. A pawi ka ti hran lo. Vawiin chu tlai lam chawlh ka nei dawn tihna a nimai.
Office ka chhuah san a, zingah Tea a lo kal thei dawn lo tih ka hriat lawk loh vangin taxi in ka kal a, tunah pawh taxi bawka ka haw mai angai dawn a nih hmel.
.
Office kawt ah dingin taxi ka chang a, ka hmaa car arawn din chuan tu car nge tih ka hre nghal mai.
.
"Ka lo thlah ang che."
.
"Angai lo mai. Taxi ka lo chang a. Ka lawm tho tho e." tia chhangin ka nui lui ngial a.
.
"Hmuh che ka duh chhan a awm tih i hriatthiam ka ring. Lo lut rawh." ka chet eih loh vangin car atang chuan chhuakin min rawn pan a.
.
"Nizan khan inzui tawh loh tur kan ti khan ka hria a." ka tih chuan a ner suk ringawt.
.
"Ka zui dawn lo che. Hriat duh ka nei a, i thil hriat duh tak ka lo hrereng maithei bawk. Nawrluih ngai lovin car-ah hian lut rawh." a hmel chu a thutak takzet. A ni hian ka thiltih mek hi a hria emawni le?
.
"I chungchang anih phei chuan hriat duh ka neih pawh ka hre lo."
.
Tawng tawh lovin nghet zet hian ka banrekah min chelh a. Tunah pawh kan innawrlui chu anih leh tak ber hi. Eleazer nen anih tawh chuan hnehna ka chang ngai lo.
.
A car-ah chuan lungawi chiah lovin ka thu lut a, a ni pawh driver seat lamah thulut in kan tlan chhuak nghal a. Khawilam nge kan pan dawn pawh ka zawt buai peih lo. Eng zawhna pawh min zawt se cool takin engkim ka hmachhawn ang.
.
A car a tih din chuan ka la ngawi ran a. Helai ang hmun fianrial pan ngai khawp hian eng thil nge hriat duh a neih le?
.
"Nizan khan i thil duh i hmu em?" a kut pahniha car steering wheel vuan chungin min en a, a mitmeng atang chuan enge a ngaihtuah a lang miah lo.
.
"Enge min zawh chu? Thil duh enge ka neih?"
.
"Zawhna ka zawt che anih chu. Zawhna pakhat ka zawt che a zawhna pahnih dawnglet turin ka zawhna kha ka zawt lo che."
Ka chhang lo.
.
"Inrawlh lo tura ka duhna che thil tul lo ah hian i inrawlh ngei tih ka hria ania."
.
"I lo buai ve na tur enge awm?" ka ti nghat a. Engmah sawi ka tum lo. Engtin nge min rinhlelh theih zawk. Amah hi engkim ah a lo inrawlh zawk pawh ani thei a, engmah a la hriat loh. Min vil tlat pawh hian chhan tha tak a nei ngei ang.
.
"Thiltih chu i lo nei ngei anih chu." a ti nghut a. Ka tawng sual zeuh tih ka inhria.
.
"I ngaihdan dan le.." ka ti sap a.
.
Min en reng chungin a lu a thing a, a nui suk bawk. A hmel chu ka enzui duh lo.
.
"Anih chuan kan pahnih chungchang hi sawi teh ang." he mihring hian ka inthununna min hloh tir talh a tum ni berin ka hria. A rin loh dan taka awm dan tur chu ka hre ve alawm.
.
"Eng ber kha nge kan sawi ang?" phur hmel fahrana lang lui chung hian ka thut dan siamthain ka hmachhawn a. A mithmul a tiche zauh ringawt.
.
"Tunah khan i lang nalh lutuk tih i inhria em?" a awm dan danglam miah lovin min en ngur a, zam tur ka ni lo, mah se a mitmeng danglam ka hmuh chuan ka zam lo tih inringtawk takin ka sawi thei tawh lo. Hetiang mitmeng hian min la en ngai miah lo bawk niin ka hria.
.
Nui luiin ka meng kual ralh a.
.
"Chu chu maw kan sawi tur. A va ho si ve. Infakna dawn chu a lawmawm alawm." ka tiliam puat a.
Ka kut arawn vuan a, a hmui bulah la chhovin ka banrek ah a fawp a. Ka kut chu laksawn leh mai tumin ka tang deuh a, min vuan nghet nasa mai. A kutzungpuiin ka banrek a marphu chu a tuai hauh hauh a. A mita ka en chuan a meng de sar bawk.
.
"Eng emaw chu ila feel ve reng tih i pha thei lovang." chhang lovin ka en tawp. Engmah ka feel lo tiin chhang ila dawt ka sawi chiang lutuk tih a hre ngei dawn a, chu chu a tul ka ti lo.
.
"Hmangaihna hi a awm tak tak i ring em?" a tawng a zawi khawp mai. A hmel a thutakin uluk taka ngaihtuah hmang a ang bawk. Hetiang hmelpu hian ka la hmu ngai lo. Ka inven vat angai dawn anih hi. Bakah inrunluih leh hnehsawh tak taka ka chhan reng hian hma ka sawn phah tlat lo. Ka cho chhuak zawk ni maiin ka hria.
.
"Mi thenkhat tan chuan a awm ang. Bakah, Eleazer.. Kan pahnih chungchang sawi i duh chhan chu eng ber nge ka hre lo nain_ kan inkara thil thleng tawh kha chu theihnghilh ang. Engmah.."
.
"Engmah thleng lo anga ngaih ka thei lo."
.
"Anih chuan i ngaih dan chu i ngaih dan ni sela, ka tan chuan engmah a ni lo."
.
"Dawt sawi suh."
.
"Enge dawt ka sawi  ngawt ang. Ka sawi tum tak zawk chu.."
.
Min rawn kuah bet thlawp a,a rem tehchiam lo khawp mai.
.
"Duhtawk tawh ang." ati hrawk a. A aw rik dan atang chuan tawng chhuah a harsa ang tih ka ring. Eng thil nge duhtawk a duh chu..? Engvang nge ka hriat  hauh lovin ka thin a rim thut bawk.
.
"Aw le, min chhaih kual hi a tawk tawh viau reng a ni. Min thlah rawh. Tlang takin ka sawi ang. I bulhnaia awm hi ka duh lo."
.
Harh chhuak thut niawm tak hian min kuahna chu min thlah a, dawn awm lovin motor a tinung a, chak zet hian kan tlan chhuak nghal a. Min melh tawh lova, keipawhin engmah ka sawi tawh lo. Kan inkar boruak awm dan chu kan inhlat ta vawng vawng ni hian ka hre ber. A hmel chu ka en zawk a, a thialpawn pawn talh talh dan atang chuan a inthunun nasa hle anih ka ring.
.
Amah hlata awm hi ka tan a tha zawk. Ka thinlung chhungril takah hian hmun chang mah se, amah hnaih loa ka awm hi a tha zawk! Ka ngaihtuahna chuan min tina nawn vawng vawng mai. Alawmi thihna ah lo inhnamhnawih ve ta se tuna ka nat aia nasa zawk hian amah hnaih loh tura ka beih angai ngei ang. Chu thil chu tuar ka duh tawh lo. Ka tuar tawh kha tawk rawh se.
.
Kan in kawtah a ding dawt a, engmah sawi lovin car atangin ka chhuak a. Amah en tawh lovin kan in lam ka pan a, inchhung ka luh hmain a tlan chhuak leh thawm tha zet chu ka hre nghal pang bawk.
.
Ni thum ral leh chhung chu ngaihtuahna mumal nei lovin ka hmang liam vel mai mai a, chanchinthar hriattur a awm lo.
.
Zanah ka room-a ka awm laiin Te-a arawn kal hlawl a, a ni pawh hi ni thum chhung khan kan inhmu lo chauh pawh ani lo, biak ka tum pawhin chhanna ka dawng ngai lo hrim hrim.
.
Ka bula arawn thut rualin "Eleazer chuan eng thil nge a hrilh che?" a tinghal tawng a.
.
"Enge i sawi awmzia?"
.
"Hmanni khan nangmah hnaih lo turin min hrilh alawm. Ka hnaih lui che anih chuan ka duh loh thil a thlen tur thu min hrilh bawk a. Hmingte, dik tak chuan, kan buai rukna thilah hian Eleazer hi a inhnamhnawih ang tih ka chiang. Engvanga Alawmi chungchang te hi  ngaihven nge anih? Sawmzuala nen an inkawm ve a nimai a, a ngaihven nachhan tur ka hre pha lo."
.
"Chuvang chu a ni em ka call pawh i chhan ngai loh?"
"Ni chuang lo. Kan hnaah ka buai zual a, chuvang chu ania." a hmel lan dan chu nidang a ang miah lo. Hlauhthawn nei ang mai hian a inring reng niin ka hria.
.
"Dawt i sawi tih ka hre vek a nia."
.
"Engmah ani lo. Eleazer hi hnaih lo la ka duh." a ti leh ringawt a.
.
"Ka hnaih hleinem. I awm dan hi amak a nia."
.
"Naktuk tlaiah ka lo hruai ang che."
Thil dang sawi leh hman hmain a tho vut a.
"Ka haw mai ang. Tihtur dang ka nei a."
.
Min chhuahsan a, eng thil nge a hriat ka hre lo nain ka ngaih a tha lo zual hle.
.
Thil tam tak ka ngaihtuah kual vak vak a, ka muhil leh thei pek lo.
.
Ka phone nghawr dar dar chu lain caller ID ka en a. U Sawmzuala maw? Tunang zan rei tawhah lehnghal. Phone ka pick up rualin "Eng thil nge ni ta?" ka tinghal a.
.
"Vawiin ah Tabi nen in inhmu em?"
.
"Hmu miah lo. Eng thil  nge ni ta?
.
"Zingah office ka kal dawn khan in inhmuh tur thu a sawi a, tlaiah in ka thlenin in ah a lo awm lova. Dar 8 vel thleng kha chu ka call in a phone a la ring a, mahse a pick up lova. Tunah ka phone tlang thei tawh lo."
.
"Biak pawh ka lo tum ve ang. Hlauthawng lo la, thil tha lo a thleng em lovang."
.
"Ka lawm khawp ang. Tunlai hi a awm dan a tha tawk lo bawk nen ka hauthawng khawp mai."
.
"Um, anih chu. Ka biak tlang theih emaw a chanchin hriat theih emaw ka neih chuan ka lo be vat dawn che nia. Lawk in, a nu leh pate i be tawh em?"
.
"Be tawh. Zanrei hnuah ka be lo. An hlauthawng nasa dawn chiang a.."
.
"Okay. Ka hrethiam e."'
.
Phone kan off a. Tabi.. Dar 8 vel atangin a biak tlang theih tawh loh. Te-a kha kan in a chhuahsan khan dar 8 vel bawr a nia.. Ni lo.. Engvanga Te-a ngaihtuah daih nge ka nih. Tabi awmna chu kan hriat vat angai.
.
Dar 10 a pelh tawh a, a la tlai chhe lutuk lo bawk a, a nu leh pate chu chanchin zawt ve pangngai angin ka be thei ang chu.
.
Nu Hmai chuan ka rin aiin a phone a pick up hma. Tabi chanchin ka zawh chuan a that a rin thu leh vawiin ah an inhmuh loh thu min hrilh a. Rinhlelhawm anga lang lo turin rei vak be lovin kan inbiakna chu ka titawp a. Ka kal chhuah ngei a ngai dawn anih hi.
.
Ka thawmhnaw hak thlakin inhnuaiah ka chhuk a, ka nu leh pa hnenah chhuanlam ka siam angai leh ta. Kan thawhpui zinga mi a pa damlo a zual vanga kal chhuah ngai angin ka insawi leh ta mai.
.
Scooty ka tinung a, Tabithi kalna awm ngaihtuah chungin ka khalh chhuak a. Enge ka ngaihtuah ka hre lo Te-a ka call a, vawi thum ka call naah thaw hluam hluam chung hian min rawn chhang a.
.
"I chhuak lawk hman em? I va thaw nasa ve." ka tih chuan a nui hak a.
.
"Ka laklawh alawm le. A tul viau ami?"
.
"Pawi lo mai." tiin phone ka off a. Ngati nge Te-a hi ka rinhlelh tlat le!?
.
Te-a te in lam panin ka tlan a, keimahah hian min mawlhtu a awm tlat. Ka chian phawt anih loh chuan ka hahdam dawn tlat lo. Tabithi chu Te-a hian.. A thawk hluam hluam dan te kha..
.
An in ka thlen dawn hnaih chuan ka tlan zawi deuh a. Te-a room hi an inhnuai ber, an in thlang kawngpui hrula awm a ni a, engtin tin emaw a room chhung hmuh dan pawh a awm mai thei.
.
Ka kawr hak chu siam thain Te-a room awmna lam chu ka pan a, ka thaw dep dep mai. Tunang zan rei tawh lama hmeichhia mahni chauha chet hi a him lo tih chu ka hria. A him lo tih ka hriat vang ringawtin in ah ka awm thei der si lo. Thil pawi a thleng em lovang chu.
.
Tukverh puanzar chhan atang chuan room chhung chu a eng dul raih a, a room hi pingdang in a awmna lehlam chiah hi tlaia ka inzirna pindan a ni. Thim chinah ka ding a, thawm dim thei ang berin bang ngheng chuan ka tawlh hret hret a.
.
Thawk leh khatah ka hnunglam atang hian min rawn kuah chawt a, ka au chhuah hmain min kuahtu chuan ka hmui arawn hup a. Hneh zetin min kuaiher a. Min vuantu hmel ka hmuh chuan ka rin loh lutuk ber a ni.
.
Eleazer!!
COPAS (HEARTS)
.
CHAPTER - 14
.
Thantei_LauraSean
.
H & E
.
ELEAZER*
.
Ka hmel min hmuh chuan a meng phar awk a. Mak a ti tih a lang chiang lutuk. Mak atih tluk zetin kei pawh hian mak ka ti.
.
"Hetah hian enge i tih?" a zawi thei ang berin ka tawng a. Tun ang hun zanrei tawh lamah hmeichhia amah chauh a a kal chhuak hi a him lo lutuk takzet. Tawh sual tawk palh ta se, amah a invenghim thei awm tawp si lo. A him loh zia ka hriatchian vang leh thil tha lo a chunga thleng thei ka ngaihtuah chuan ka thin a tawt ut ut thei hial. A hmui ka hupna chu min phelh tir tumin ka banrek ah min vuan a, ka thlah thuai a.
.
"Enge i tih zawk?" takzet reuh hian a!
.
"A him lo tih i hria em?"
.
"Lo buai suh." ngaih dan nih loh hmel zet hian min melh ram ram a. He hmeichhia hi ka hrethiam lo tawp mai.
.
"Lo kal teh.." kan awmna hmun atang chuan ka kai sawn dawr dawr a, min hnial duh teh mah se tharumah min hneh lo em a, a tang ve tak nain awmzia a nei tehchiam lo.
.
"Khatah khan eng thil nge itih?" a dar tawn tawnah ka vuan a, thin nawk nawk mai ka duh hial.
.
"Vawi engzat nge ka buaina a ni tih ka hrilh nawn dawn che. Min thlah rawh." hnai zetah min en in awki hniam tak hian min vin khar khar a, a mitmengah hlauhna a awm eih lo.
.
"Eng thil nge hriat i duh? Hriat duh i neih chuan min zawt rawh. Ka hria anih phawt chuan ka hrilh ang che. Tunang tlai tawha hmeichhia mahni chauha kal chhuah hi a him lo hulhual."
.
"Zawh duh che engmah ka nei lo." a ti leh fak a. A thianpa room lam chu a melh zauh zauh a. Helai hmun thleng tur hian eng thil nge a hriat ka hre lo nain ka duh loh ber thilah a intatlut tih erawh zawh buai ngai lovin ka hrethiam tawh. A him loh zia a hre tawk lo a ni ngei ang. Mipa zawk pawhin fimkhur thei ang bera ka chhui ruk laiin a ni hmeichhe tan hian a him lo.. A him lo lutuk takzet.
.
"I lamtang niin ka hre sia, engvanga enthlak ngai ta nge anih le?" tu chungchang nge ka sawi tih a hriat  theih nan a thianpa room lam chu ka melh a.
.
"Enge i sawi awmzia?"
.
"Tel ve lo tura ka duhna thilah che hian i tel ve tih phat buai tum duh suh." ka tih chuan a tang leh ta phat mai.
.
"Min thlah rawh."
"Teuh lo!"
.
Ka awmah a tha neih zawng zawng sawmkhawmin min nem a, kan insual chu a ni ta ber mai. Thawm chhuah vak na hun leh hmun a ni lova, tun anga min sual let ngam anih chuan midangin kan thawm an hre thuai dawn. He thil hi ka ti lo thei ta lo! A nghawnga a point-ah ka hmet zeuh a, a zawi nghal riai riai mai. Ti lo thei lova min sual let vang chauh a ti ka ni. Tang tur a awm tak lovah chuan ka pawm kang nawlh a, ka motor dahna lamah ka kalpui a. Motor hnunglam seat ah luh puiin ka la pawm ta reng a. A lo harh leh hma chu amaha muttir mai tur ka ni tih ka inhria, mah se ka thlah phal lo. A chunga thil tha lo tih tum ka ni hauh lo a nia. A harhfim laiin tuna ka kuah ang hian ka kuah thei lova__mipa tenawm tak ang mai ka nih zawh tak hi.
.
Minute 10 a ral chuan a rawn che talh talh a, ka kuahna chu thlahin motor seat-ah chuan ka thuttir a, minute 5 pawh tling lovah arawn pangngai leh dawn tih ka hriat sa vanga thlah vat ka ni.
A awmna hmun chu hriatthiam loh hmel tak hian a enkual a, ka hmel min hmuh chuan thut ngil tumin a bei a, a tha a la zawi tih hriain ka pui vat a.
.
"Ka chungah hian eng thil nge i tih?" a ti zawi raih a.
.
"Lo ngaithla rawh. Alawmi chungchang a ni emaw Robert chungchang a ni emaw, eng thilah mah hian inrawlh ve suh. Keiman engkim ka tifel vek dawn. I lo inrawlh  ve hian engmah i hmu chhuak dawn chuang lo. Ka sawi chu i hrechiang em?"
Arawn thu  ngil a, chiang zet hian min en a.
.
"Nang pawh hi i inrawlh ngei tih ka hre tawh." a thusawi chu a ringnghet hle tih a tilang chiang khawp mai.
.
"Eng maw?" Chu ngaih dan chu engvanga nei nge anih? A mitmenga min rih loh zia lang chhuak chuan ka chhungril ah hian min hnawh deuh up up.
"I dik lo." Ka ti leh nghut a..
"Eng thil nge ka hriat tih i hre hauh hleinem. I hria em ni? I hmel hmuh ringawt pawh hi ka tan a ninawm tehmai a nia." a tawngkam chuan min tina ngaih ngaih e! Chhang lovin ka mit ka chhing a, ka inthunun a tul. Thawk ka la kawk a. He hmeichhia hi ama duh thu ngei a ka laka a thianghlimna hlantu kha ani tih ka awih ta lo hial zawk. Ni e, hnaih miah lo tur ka ni. Ngaihtuah zui tawh lo tur ka ni bawk. Amah ka hmuh hian keimahah danglam awmin ka inthunun angai ziah a. Hmeichhe dangin ka hmel hmuh an nin thu hi min hrilh se engahmah ka ngai lovang. Mahse, a ni hi chu a dan a dang. Phiangsen hian..!
.
"Chhuak rawh!" ka ti hrawk a. A hmel ka hmuh hian ka duh loh dan tak leh tawp tawh tura ka duh em em amah mamawhna nasa tak ka nei ziah a, tunah hian ka bulah a awm reng anih chuan ka duh loh tawpin ka nawrlui ang tih ka hlau a ni. Ni e, mipa ka ni tlat a, ka taksa hi ka duh ang vekin a awm thei hek lo.
.
Dawn awm lova che phatin car atang chuan a chhuak a. "Ka lawm e!" tawngkam kha zeta tiin car kawngkhar chu na theihpatawp hian a khar nghal bur bawk. Za lo zetin ka nui hawk. He hmeichhia hi thunun anih loh chuan atthlak takin thil hlauhawm tawpkhawk ah amah leh amah a inbarhlut mek a ni. Amah hian a hre hauh lo tih a chiang reng lehnghal. Min ringhlel tel tih a thup hauh lo a nih kha. Ka en liam ringawt thei lo tawp mai.
.
Motor atang chuan chhuakin a lam panin ka pen pawk pawk a, a  banrek ah manin motor awmna lamah ka let pui leh a, min sual let tauh tauh a. Keimah ang bawkin thawm chhuah nasat chi ni lo tih a hre ve tho a, chuvang chu a ni ngei ang thawm nei miah lova min sual let ngat  ngat ni.
.
“Duhtawk rawh_Duhtawk rawh.” Aw ki hniam thei ang berin ka tawng a, a dar tawn tawnah vuanin car ngheng chuan ka dawm bet bawk a. Thimrim zet hian min melh a, keichuan ka dawm beh a tul chhan ka theihnghilh lo chauh tawh. A thinrim hmel lan dan duhawm zia chu a  inhre lo reng reng. Ka taksa in ka nek bet a, a chet nasat poh leh kan taksa a innawk nasa a nimai. Ka rilru a thil lo lut chu a hun lo takzet.
.
A hmai bulah kun hniamin “Che tawh suh..” ka ti leh a, hrilh loh ang chiah. “Fawp tur che a min duh anih loh chuan che tawh suh.” Kei pawh hian tun ang  hunah hetiang zawnga ka ngaihtuah leh ka vau hi mak ka ti zawk. Thinrim a vau bet tur ka ni a,a taksa ka sik rual hian ka thunun phak bakin ka danglam ziah si a ni. Ka chak lohna chu amah hi a ni e ! Ka duhna chauh a ni lo, ka mamawh a, ka thinlung ah hian hmun a chang tlat. Ka hnaih tawh lovang tiin ka ngaihtuah fo a, ka hnaih hian eng thil tha mah ka tan a thlen hek lo. Mahse, ka indang thei chuang si lo chu a nih hi. He thil hi hmangaihna  ni lo hram rawh se! Eng thil phiangsen nge ka ngaihtuah tak?!
.
“Muffin duhtawk rawh!” a hmai si lo chauhin ka tawng a, min cho zual sauh niawm fahran hian a tha neih zawng zawng sawmkhawmin a tal leh a.
“Chutiang chuan min ko suh. Min thlah rawh.”
.
Chhang tawh lovin a hmuiah dim lo zet hian ka fawp a, a thle sawn rang khawp mai.
.
“Ka hua che. “ a thaw hlawp hlawp a, ka dawm hneh em vangin engtin mah min ti thei chuang der lo. “Ka duh loh tawp thil sawi turin min nawrlui suh.”
.
“Chu chu eng thil nge?” ka vawnna chu ka la thlahdul chuang lo
.
“Eleazer..”
“Enge..” ngeng zetin ka en a.
.
“Nang ka lo hria che hi vawi engzat fako nge ka inchhir nawn dawn. Ka hua che. A chiang em? I kut hmawr pawh hian min khawih ngam tur I ni lo. I duh chuan min hmusit rawh, tawngkam bawlhhlawh tak tak pawhin min ko thei  ang. Mahse, min khawih suh.. Ka taksa I deh hian__!” a tawng tawp chawt a. Enge? A taksa ka deh hian engtin nge a awm?
.
“Engtin?”
“Min thlah rawh! Eleazer..”
.
“Sawi rawh?”
.
“Ka huatna che a zual a ni. Hmeichhe tam tak I khawihna kut bawlhhlawh hian min dek leh tawh suh!” a khur dar dar a, inthunun a tum nasa tih ka hria. Min ngaih dan hniam leh tenawm tak vang chuan ka vawnna ka thlah a. Ka chhungril ah hian ka na.. Mi thianghlim chu ka ni lo, ka hria e. Mah se, min ngaih dan ang em a che hniam leh tenawm chu ka ni bik lo asin. Dik taka sawi chuan amah nen kan mut duh hnu khan… A tawk e!
“Kal rawh.” Ka ti sap a. Ka hrawka min hnawh tlat tu thil awm chu eng enge anih ka hre lo.
.
Ka vuan tawh lo nain ka la din hnaih tho a, min khawih hreh hmel zet hian min nem sawn a, engmah sawi tawh lovin a kalsawn nghal a. A chet phung chuan ka awma thil rit takin min delh chawrh ang mai hian min nghawr dawt a ni. Mi tenawm chu ka ni reng em ni? Hetiang khawpa min deh hlek pawh duh lo tu hi engvanga umzui reng si nge ka nih? Pathian chauhin a hria ang! Keichuan ka chhungril a ka ngaihtuahna te hi ka hrethiam tawh lo. Ka hriat zawng chu he hmeichhia hian taksa leh ngaihtuahna chhungril berah hian hmun a chang a ni tih leh venhim ka duh a ni tih zawng hi ka hria. Tichuan, ka laka a awm dan vang khan ka na ngut ngut bawk.
.
Ka dinna ngaiah dingin ka enzui ta ringawt a.
.
A hawi vat vat a, a thianpa te in lam panin a kal leh ta ngauh ngauh a. Mi luhlul tak chu a va ni chiang em! Ka zui leh lo thei ta chuang lo. Eng thil nge thleng ka hriat ve angai. Tihnat anih loh nan ka venhim angai bawk. Thil a ti buaithlak zual ta vek mai. Hetiang em em a luhlul anih hi chu ka beisei hauh lo asin. Amah hnaih tum anga lang si lovin a chinchang ka hriat vek a tul lehzual dawn ta anih hi. Keimah chauh chuan ka indaih lo bawk ang. Thianpa Sawmzuala ka hrilh hriat a hun ta in ka hria.
 Engkim, hetiang zawng zawng bul intanna chu Sawmzuala hi a ni. A nupui unaunu Alawmi thihna khan a nupui duhtak Tabithi a ti a lo chauh a, Tabi hian sawi chhuak lo mah se a unaunu thihna kha a nat thut vang a ni lo tih rinhlelhna a nei tih a hriat ruk thu Sawmzuala hian min hrilh a. Keichuan Tabithi pawh hi ka ring ngam chuang lo. Eng emaw changa mak taka min melh lai ka hmu fuh zauh zauh tawh vanga ringtawk lo ka ni bawk. Muffin hnenah pawh hian Tabi hnaih lo turin ka hrilh tawh. Sawmzuala hi ka thiantha ber anih vanga tanpui inhuam chauh ka ni. Kan rinhlelh ber Alawmi'n a ruka a kawp Robert kha ka chhui zui ta ngar ngar a, fiahna ka neih theih nan Muffin hi hmanrua a hman mai tum kha ka ni bawk a. Tunah chuan engkim a danglam vek tawh.
Kan hriat loh lam atangin Robert khan beitu dang a lo nei a ni ngei ang, tikhan a tual thi ta mai a, a thih dan lah kha a rapthlak thei ang ber a ni bawk. Ka hnathawh tur hi muangchanga tih chi pawh a ni tawh lo.
.
.
Ka en reng a, inringtawk zet hian a thianpa room kawngka chu a kik a. Lehlawi si a! Nichin lawk khan tukverh atanga en ruk tum niawm takin a awm a, tunah ngampa takin a kawngka a kik leh si.
Kawngka chu a rawn inhawng a, an thusawi ka hre phak lo nain eng emaw chu an sawi ngei tih a chiang. Muffin chu a thianpa pindan ah chuan a pen lut ta thuai a. Pawn lam atanga hriat turin eng thawm mah a awm zui ta lo. Ka ngaichang deuh reng a, minute 15 vel zet tur room chhunga an awm hnu chuan kawngka rawn inhawngin  Muffin leh hmeichhe pakhat hi nui hak hak chungin an rawn inzui chhuak a, an hnungah a thianpa pawh arawn chhuak ve nghal bawk. Thil awmzia ka hre ta lo. Nichin lawkah a ruka en a tum a, tunah thiantha tak ang maiin an rawn inzui chhuak leh si. Engmah hlau lo ang maia a awm chhan hi thihna thlentu a lo nih reng zawk vang a ni thei angem? Ni lul lo rawh se!
.
Engtinnge chutiang chuan ka ngaihtuah theih zawk!
.
HMINGTHANSANGI*
.
Eleazer hnenah khan ka taksa a deh hian ka huatna a zual tiin ka sawi a, engtin nge ka hmui atang hian kha thu kha ka sawi theih zawk? A letling chiah a ni. A bulhnaia ka awm hian ka do tang tang thin amah ka duhna hi ka veng zo lo ang tih ka hlau zawk. Min fawhna hnial thei tur pawh khan ka theihna zawng zawng ka hmang tih hria se chuan min nuihzat ngawt ta ve ang. Point thenkhat ah chuan dawt muhlum sawi ka ni chuang lo.
.
Ka thinlung taka alaka ka inpek hnu khan hmeichhe dang a khawih leh tawh ngei ang! Ka ngaihtuah zawng ringawt pawhin ka thinlung nat lutuk vang hian ka thaw a tawp mai ang tih hlauhawm khawpin ka na lutuk takzet zawk a ni. Ka rilru letling chiah a hriat tura ka sawi lai khan amitah ka en ngam hek lo.
.
Ka mittui tla tur chu duh lovin ka mit ka khap sawk sawk a.
Tunah chuan tih theih pakhat chiah ka nei. Eleazer khan min enzui ka rin vangin ka insangmar a, Te-a te in lam panin ka kal lui leh ngat a. Ni e, Tabithi vang chauha helai hmun hi thleng ka nia lawm le. Tabi a him leh him loh ka hriat a tul alawm. Tunah hian Te-a room-ah khan a lo awm reng lovang tih pawh a sawi theih loh. Engvanga a ruka en thla kher kha nge maw ka nih le? Dik tak chuan ka hlauthawng lutuk.
.
La khur ru dar dar chungin Te-a room kawngka chu ka kik dat dat a, ka rin aiin arawn hawng har. Kik leh tuma ka ban ka la kang leh chiah tih chuan phun hluk chung hian arawn hawng a, min hmuh chuan a meng phar nasa mai.
.
"Enge i rawn tih dawn?"
.
"Ka lo biak che kha. I chhuak hman lo a nih chuan ka lo pan mai ang che chu. Dik lohna awm mi?" ka tilet zek a. A tukhum hiat nuah nuah pahin "Lo lut rawh." a ti nghut a, a hmela nuam lo tihna chu ka hmuh hmaih lo. Lut lo turin min hnial ngam lo ani ngei ang.
.
A room-a ka pen lut a, a khuma hmeichhe lo mu in min hmuh rual chuan a inkhuh nghal chawih chawih a. Zak lutuk tih hriat hian Te-a nen chuan min entawn zawk zawk mai. Thawmhnaw a inbel miah loh danah an thil tih lah a chiang! Helai kal tura ka chhuah hma khan Te-a hi ka ringhlel thut thut anih kha. Ka ringhlelh ang thil a thleng lo tih ka hriat rual chuan ka thaw huai mai.
.
"Te-a hi thil pawimawh zawh tur ka nei a. Ka rawn tibuai lo thei ta lo che i anih hi. A zia lo hle mai."
.
"Ah_Um_K_ Tunge i nih?" a ti bah nawk nawk a. Min ringhlel ve deuh pawh a ni maithei.
.
"Hmingte tiin min ko thei ang.." eng eng emaw ka sawi zui luam a, an mutdun chungchang ah ka fiam lo chauh ni lovin engahmah ngai lo anga ka lan vang chuan a ni pawh chu a inthlahdul thuai a. Dik taka sawi chuan sawisel ngam tur pawh ka ni bik hleinem. Kei ngei pawh Eleazer pindan ah.. Ni lo, he thil hi tuna ngaihtuah ka duh lo. Tunah chauh lo pawh.. Theihnghilh vang vang ka duh hluah hluah.
.
Minute 15 vel  hnuah Te-a room atang chuan kan chhuak a, anni an inthlah anga, keiin kan in lam ka pan thung ang. Ka chian duh ber leh ka rinhlelh thil engmah lo mai anih takah chuan tihtur dang ka nei tawh hrih lo. Tabithi pawh in ka thlen hunah biak pawh ka tum leh mai ang. Tunah chuan ani pawh an in ah a awm tawh zawk hial mai thei.
.
Te-a leh a bialnu an tlan chhuah hnu chuan keipawh ka tlan chhuak ve nghal a. Ka hnunglama min zui rutu awm tlata ka hriat vangin ka tlan chak khawp mai. In ka thleng a, ka room-a ka luh hnu chuan ka him ta niin ka inhre chauh.
.
Ka inthlak zung zung a, khumah thuin Tabithi number ka dial a. A ring nain a pick up lo. A hmaa ka call kha chuan a ring miah lo a. A tha lam niah ngaiin ka thaw deuh huai. Mahse biak theih ngei ka duh thung.
Ka mu a, ka maimitchhin rualin Eleazer hmel hlir ka hmu lehnghal pang mai. He mihring hian eng chen zet nge ka ngaihtuahna a tihbuai dawn le. Zanin kan inbiakna ngaihtuah kha chuan min hnaih duh tawh lo ngei ang. Ka duhthusam chiah a ni! Ka hre lo. Enge awmzia awm chuang? Hnaih duh pawh ni ila ka ringngam tawh dawn chuang lo. Ka duhthusam tak tak chu amah nen thlamuang taka awm dun.... Keihi ka mawl anih hi. Hmaichhan ah ka huat thu ka sawi tawh a, a ni ang mahni induhtawk leh kei ka ni ti chin chuan a mitsir pawhin min melh duh tawh lovang. Hmeichhe nalh leh kei aia tha zawk a kawp leh thuai anga, a ngaihsakin a hun tam zawk pawh a hmanpui thei.. Ni lo, ni lo.. Robert thihna ah khan a inhnamhnawih anih chuan a hausakna hian a hum dawn chuang lova, a dam chhung hun tam zawk jail-a a hman pawh angai maithei.. Engvanga ka thluak hi thil tullo pui pui ngaihtuaha function tha viau nge maw anih le!!
Ka thu chhuak hlawl a, ka mut a chhuak mai dawn lo tawp. Tihtur lah chu ka  hre der lova.
.
Laptop on in movie en tur ka zawng kual a, movie thar ka nei bawk si lo. Pawilo a hlui ka en ang.
.
The Last King en in ka lo tang ve teuh a, ka phone a nghawr dar dar ka hriat chuan ka thil en lai chu pause in ka phone ka la a. A ring tawp hman chiah. Tabithi maw?
Call back ka tum a, amah zawkin min lo call leh chuan rang lutuk hian ka pick up nghal.
.
"Hmingte, tanpui ka ngai.." a tawng zawi lutuk a ka hre thei chang chang. A aw a hlauhthawnna lang erawh a chiang khawp mai. A bulhnaiah tupawh awm se a tawng an hriat a hlau hle tih a chiang lutuk.
.
"Khawiah nge i awm?"
.
"Ka tawng i hre thei em? Hello.. Hmingte..Hello.. Eleazer__rawh__ello_Tuna_call__Ni lo.." a te thawt a, phone chu a tawp nghal hmuk a.
.
Enge thil awmzia? Eleazer hming kha engvanga rawn lam nge anih?
.
Ka contact list ka scroll pawp pawp a, Eleazer ka call ta ringawt. Min chhang duh kher lo mai thei. Vawikhat a ring quit chuan mangang zetin ka call nawn leh a, a la pick up chuang lo.
.
Ka rilru a vak kual zung zung a, ka thil ngaihtuah chhuah chhe lutuk hi thleng dik lo hram rawh se!
COPAS (HEARTS)
.
CHAPTER - 15
.
Thantei_LauraSean
.
H & E
.
Eleazer chu ka call nawn leh ngat a. A pick up chuan ka thaw hawk mai.
.
"Enge?" arawn ti bul hmuk a. Nichin lawkah ka huat thu leh hnaih ka duh loh thu hmaichhanah ka hrilh zo chauh a tuna ka call lehsi hi mak pawh a ti ang. Chutiang ngaihtuah kualna hun a ni lo.
.
"Tunah khawiah nge i awm?"ka tawng a hriat chuan a reh vung vung a. "Eleazer."
.
"Engatan nge i tih?"
.
"Lo ngai kawi suh. Tunah khawiah nge i awm?" ka rilru a hmanhmawh a, Tabi rawn awm dan kha ka hrilh nghal mai dawn em tih ka hrethiam lo. Tabi tawng ka hriat mumal theih loh vang khan ka sawi tlang ngawt ngam lo a  ni. Tunah Tabi bulah awmin a nunna a titawp dawn mek pawh ani thei!
.
"Ka awmna hmun hriat i mamawh leh si a maw? A chhan ka hre phawt thei angem? thatchhe zet hian a tawng a, a harhfim lo anih ka ring zawk hial.
.
"Tabithi bulah i awm em?" ka ti ta ringawt. Za lo lutuk hian a nui hawk a. Awm lo hram rawh. Ka ngaihtuahna tha lo tak tidik tur hian misual ni lul suh. Min chhan mai loh vang chuan ka chiai ta der bawk.
"Eleazer, tunah khan Tabi bulah i awm anih chuan tina suh. Khawngaihin.. Khawngaih ka dil che anih chu.. Ti suh.."
.
"Engmaw i sawi?
.
"Ka sawi chu i hriat kha. Tabi khan engmah tihsual a nei lo. Tina suh!" ka hlauhthawn lutuk vang nge
Eleazer awm dan tur ka ngaihtuah vang ka hre lo, Tabi ka ngaihtuah lutuk zawk vang pawh a niang ka khur nasa lutuk.
.
"Sawi chiang rawh. I thusawi awmzia ka hre lo." min ngaihven hmel ta deuh.
.
"Tunah khan khawiah nge i awm? Ka_Tabi'n min lo call a, a dinhmun a tha lo. A bulah i awm lo anih chuan khawiah nge i awm? Tabi kha i tina anih chuan a chunga itih ang chiah kha i chungah a thleng ve ang." ka tita bawrh bawrh a. Ka thusawi inkalh nawk nawk chu ka pawi sa tawh lo.
.
"I thusawi awmzia chu ka hre lo. Tabi chu khawiah nge a awm?"
"Ka hre lo."
.
"Ka lo kal ang. In ah i awm tawh em?" a tawng dan atang chuan a che nghal zung zung a nih ka ring.
.
"Awm tawh. Enge tih theih ka neih? Ka hlauthawng.."
.
"Hlauthawng suh. Engtinmah a awm lovang. I phone kha off la thawmhnaw lum ha rawh. Ka lo thlen hunah ka lo call ang che." ka chhan leh hmain phone a off a, min hrilh ang chuan thawmhnaw lum ka ha a, ka nu leh pa hriat loha chhuah a tul dawn vangin thawm ka dim khawp  mai.
.
Engtik lai atang khan nge nu leh pa hriat loha chhuah hi engahmah ka ngaih tak loh pawh ka hre tawh
lo. Thil tha tak chu a ni lo tih ka hria a, a tul tawpah chuan ka nu leh pa pawh engkim ka la hrilh tho angai ngei ang.
.
Minute 10 pawh aral hmain Eleazer chuan min rawn call a, a rang thei ang berin inchhung atang chuan ka kal chhuak nghal a. Car kawngkhar  alo hawn sa ah chuan lut nghalin chak zet hian a tlan chhuak lehnghal a. Hlauhthawnna nei miah lo a abula ka awm leh  mai pawh hi a mak! A ni chu min ngaihven hmel pawha lang lovin kawngpui a en ngur ngur a, a hmel atang chuan hlauhthawn a nei ve tho ang tih
ka ring.
.
"Khawilam nge kan pan dawn?"
.
"Ka hrethiam chiah lo. An in pan ila a that ka ring."
.
"Dar 10 vel khan U Sawmzuala'n min rawn be tawh a, Tabi awmna a hriat loh thu min rawn hrilh a.
Chuvang a nia Te-a te in ah khan ka kal."
.
"Tinge Tea te in ah kher?" Tea hming alam zawng chuan a ner suk a.
.
"Ka hre bik lo. Ka ringhlel a ni ber ang chu." min rawn melh zawk a, engmah a sawi zui tawh lo thung. "Mahse, Te-a chu a ni lo ang tih ka chiang tawh."
.
"I thluak chu i hmang ve nasa hle mai." a ti ro hulh a. A hmel atang chuan a rilru tur awm ang ka hrethiam leh tawh lo. "Hmeichhia i ni tih hi hrereng rawh. Mahni inveng thei lo tan i thil buaipui
hi a u mah mah a ni."
.
"Ka inven theih leh theih loh i hre lo bawk." ka tih chuan a nui suk a. Engvanga nui nge anih ka hre lo. Ninawm, he mihring bulah hian chhan awm lova thinrimna tur tawk ka hmu reng chu anih ber hi.
Kan ngawi ta ran mai.
.
U Sawmzuala te in kan thlen chuan a lo reh thiap a, tukverh atanga eng lo chhuak atang chuan
inchhung ah awm an awm ngei tih chu a hriat. Eleazer chuan min rawn melh zawk a, inhrilh ngai lovin motor atangin kan chhuak nghal a.
Eleazer chuan door bell a hmet a, rei vak lo ah kawngka chu rawn inhawngin U Sawmzuala chu  pawr chap hian arawn chhuak a. Kan pahniha min hmuh chuan makti hmel a pu deuh.
.
"Engtin nge in pahnih_"
.
"Tabithi awmna chu i hre tawh em?" ka lo tih khalh a. A lu a thing ringawt.
.
"Hre lo. Amah zawngin ka chhuak a, ka hmu zo lo. Ka beidawng a in ka thleng leh chiah a nih hi. Lo lut phawt ru." a hmel chu a lang ngui ruih mai.
.
"Nichin deuh khan Tabi chuan min lo call a." U Sawmzuala chu a phawk hra a, sawi vat vat turin min duh tih a ahmel atang chuan alang reng bawk.
"Chuan engtin"
.
"Ka_ A tawng ka hrechiang thei lova. Dinhmun hlauhawm ah a awm anih ka ring. Tih hlauhthawn che chu ka duh lo a mahse, mumal a kan inbiak hmain a te thawt a phone a tawp nghal bawk a."
.
"Ni lo.. Ni lo.." a inhip hlawp a, a hmai a hup nghal bawk a. A insum hman lo a ni e. A rilru mangan tur zia ka ngaihtuah pui phak kher lovang. Eleazer chuan a darah a kuah a, sawi tur a vang hle mai.
.
"Zanin hian police hnenah kan thlen nghal mai dawn em niang?" tiin U Sawmzuala chu a bia a, a chhang lo. A chiai vek ni ber hian ka hria.
.
"Zingah Tabi chu him takin a lo hawng leh ang." a tho thut a, tih ber tur hre lovin a vei kual vut vut a. Heta kan awm ringawt chuan Tabi hi kan hmu dawn lo.
.
"Eleazer" min rawn en a, U Sawmzuala chu kan bul hnaiah a awm rih loh vangin ka ngaih dan hi ka sawi ngei a tul. "Hetia kan awm ringawt hian awmzia a awm lo ania."
.
Enge kan tih chuan ang? A awmna tur awm ang kan hre hauh bawk si lo.
.
"Hmingtei hi va thlah la, kan pahnihin kan kal chhuak dawn nia." U Sawmzuala chu a hmel a phelh phung mai. A kalsawn lai khan a va tap a ni ngei ang.
.
"Kan rei lovang." ti nghutin Eleazer chuan ka banah min rawn kai a. Pawnah chhuakin a carah kan lut a. Kan in pana kan kal kawng tluan chuan kan inbe lo. Kan ngaihtuahna kan kawm ve ve ang tih ka chiang.
.
Kan in kan thlen chuan car atangin ka chhuak vat a, chanchinthar a awm chuan min lo hrilh vat turin ka chah a, bu nghatin a tlan chhuak lehnghal a. Zanin hian ka muhil bik hauh lovang le.
.
In a ka luh rual chiahin ka nu chu an room atangin a lo chhuak ve chiah. Min en ran ran a. Ka room ah ka awm lo tih a lo hrelawk tawh tih a hmel atang chuan ka hre mai.
.
"Khawiah nge i kal?" a ti hriam hraih a. Min en chik lutuk takzet. Phat buai ngaiin ka hre lo.
.
"Nu, lo thu lawk teh." ka ti sap a. A hlauthawng hmel chu hmuh nuam ka ti lo. Khawlo taka awm angah min ngai anih pawhin thiam lohna a nei hek lo. Hmeichhia zanrei tawha vak daw daw thin chuan thil tha tak ti pawh ni se, engmah hrechiang lo leh ngaihtuah chiang lovin hmeichhe khawlo ah kan society hian angaih zel chang a awm thin. Ka nu pawh hian hmeichhe zahawm tak ka nih tluka duh a nei lovang tih ka hrechiang.
.
"Eng thil nge? Thil tha lo tak iti a ni em lovang chu. Ka rintawk loh vangah che ngai lo la. Eng emaw chen atang khan zanah i chhuak tam zual hian ka ngaih a titha tawh lo." a ti nghal mial mial a.
.
"Nu.." sawi tan dan tur ka hre mai lo. "Tabithi chungchang a nia."
.
"Tabithi.. Alawmi u maw? A ni teh daih chu.. Eng thil  nge?" ka bulah arawn thu a, ka tawng hun a ngaichang ta ran a.
.
"Dar 10 vel khan U Sawmzuala'n min rawn bia a, Tabi awmna ka hriat leh hriat loh min rawn zawt a.
Tun thlengin a awmna kan la hre lo. A dinhmun a that loh hmel bawk a.." thil thlen dan ka hrilh vek a, ka sawi zawh chuan thaw huai hmel a pu. Tabithi a ngaihtuah loh vang ni lovin khaw lo takin ka khawsa lo tih a hriat vanga thawveng te pawh a niang chu.

.
"Tunah chuan tihtheih a awm chuang lova, han mu phawt ila zingah kan va ngaihven ve dawn nia. Kha, i mu tlem anih kha i hmel pawh a dik lo. I room ah han hahdam phawt rawh. Ngaihtuah hah vak vak lo la, eng em a ti lovang. Alawmi thihna a tuar nat tehreng  nen tunah hetiang dinhmun a han din leh tak chu Tabi pawh chu a lainatawm hle mai."
.
Ka nu nen rei vaklo ka titi leh hnu chuan an room ah min luhsan a, keipawh ka room ah ka chho ve
nghal a. Khumah ka mu nain ka mut a chhuak miah lo. Tabi no chu ka call ngat ngat a, min chhang dawn lo tih hrereng mah ila beiseina tlemte ka la neih vanga call ngar ngar ka ni.
.
Engtik karin nge ka mutthilh ka hre lo. Ka nu min ko thawmah ka harh a, rem lo zet hian khumah a khamphei zawngin ka mu a, ka phone ka la hum ran bawk.
.
"Bawihte, i harh em? Tabi chanchin kan hre ta anih chu."
Ka tho thuai a, lu rit bur chungin ka room kawngka ka va hawng a. Ka nu hmel ka hmuh chuan Tabi chanchin an hriat chu a lawmawm lam a ni lo tih ka hre nghal mai.
.
"Tabi chu engtin nge a awm?" ka ngaihthat loh zia chu ka hmelah pawh a lanchhuah  nghal vek ka ring.
.
"A ruang an chhar anih chu. A lainatawm emai ka ti.." ka nu pawh chu a mittui a tla zawih zawih mai.
A insut hlap a, tah insum tak chung hian "Insiam la, an in ah kan va lang ve vat dawn nia." tiin min kalsan a.
.
Ka hrawk a tawt up up mai. "Tabi..a ni thei lo!" ka mittui a tla nghal zawih zawih a, insum pawh a tum buai lo. Eng ang taka thlabar in nge a awm ang? Amah tanpui theitu tur nia min ngaiin dinhmun hlauhawm taka awm chung khan min rawn be tawk tawk a nia. A va pawi tak em! Kei hian amah ka tanpui thei ta si lo.
Bathroom-ah lutin ka inbual a, ka inbual chung pawh chuan ka mittui a la tla zawih zawih tho. Tunah chuan Tabi chu Alawmi nen an inhmu tawh bik ngei ang! Ka inhnit leh hlawp hlawp a. A fair hlawl lo.
An unau chunga thil thleng hi a fair hlawl lo.
.
Ka insiam peih hnu chuan ka nu leh pa nen Tabi te chenna hmun kan pan a, kan va thlen chuan mipui an lo tam khawp mai. A taksa endik turin Tabi ruang chu damdawiin ah a la awm a, an inchhung erawh an singsa fel vek tawh thung. Inchhung kan lut a, Tabi nu'n min hmuh chuan min rawn panin a tap hawm hawm a, keipawh ka insum thei lo. An tuar hi ana em a ni. Engtiang pawhin awm se an thiamawm vek.
.
Tabi ruang in an in arawn thlen chuan kan ri luih luih a ni ber mai. Insum thei khan awm lo. Hmuh hreawm ber chu U Sawmzuala a ni. A mitmeng a a ruai a, tah nachang pawh a hre lo. A hawi ruai ruai ringawt mai. Tabi hmel chu hnai lutuk a enin a fawp leh ngawih ngawih thin.
.
A bulah Eleazer a thu a, ngaihtuah thui tak nei hmelpu hian min rawn en reng a. Keichuan ka mit ka lasawn vat a.
.
.
Tabi kan vui liam atangin kar khat zet aral leh tawh. Police ho hian amah thattu chhui chhuak turin hma an la sawn tam lo khawp a ni awm e. Eleazer nen pawh kan inhmu leh tawh lo. Tabi bo zana thil thlen dan atang khan Eleazer hi ka ringhlel tawh lo bawk. Ti ila, pumhlum thak chu a la ni chuang lo. Tumah hi ka ring ta lo a ni ber. Tupawh mai hi ka chik zual a, landan phenah hian thil tam tak a inthup thin tih rilru puin tupawh hi ka en ta vek ni mai hian ka inhria. Te-a pawh ka hmuh theih
chinah chuan chik tak ka ni. Mahse, amahah hian danglam a awm awm pawh ka hre lova, tlaiah kan la inhmu ziah tho. Amah lah hian Tabi chunga thil thleng hi mak atih zia a sawi tawp thei lo.
.
Ka ngaihtuah vang vang hian khami zan khan Tabi khan engvanga Eleazer hming rawn sawi  nge anih ang
le tih hi ka inzawt tawp thei lo a ni. Eleazer hian thuruk hriat a nei reng angem? Thil engkim hi a inkawkalh vek mai hian ka hria. Ahma khan Eleazer hian Tabithi hnaih lo turin min hrilh a, tunah Tabi ber a thi leh a. Ka thluak hian fim takin thil a thliar hrang thiam tawh lo.
.
COPAS (HEARTS)
.
CHAPTER - 16
.
Thantei_LauraSean
.
H & E
.
Hun a ral bek bek a, kan nun dan pangngai theuhin kan nung mawp mawp ni maiin a lang. U Sawmzuala pawh vawihnih lai ka va tlawh tawh a, a la pangngai meuh lo tih a hmel enin a lang reng reng mai a, nupa tang then hi dar lehlam sahthlak ang a ni tiin an lo sawi thin a, U Sawmzuala tan chuan a dar pahnih sahthlak ang mai niin ka hria. Biak pawhin min chhang mumal ngai lo. Tabi nen an thawnthu pawh hi sawi fe tham a ni ngei ang. Eleazer pawhin a tlawh fo tih ka hria a, kan inhmu fuh ngai lo thung. A lawmawm lamah ka ngai zawk. Nge, ani hi thil buaipui a lo nei reng?
.
Nun dan pangngai theuhin kan nung mawp mawp ti khan ka sawi zo chiah nain Tabi bo zan atang khan eng emaw chang hian min zuitu awm a hriatna ka nei leh thin a, hlauthawngin awm reng lo mah ila min zuitu awma ka hriat chang chuan ka nun a nuam lo thin khawp mai. He thu hi Te-a hnenah pawh ka sawi lo. Thian dang ka kawm zau lova, tlai tin deuhthaw ka hmuh leh ka kawm deuh ber chu Te-a hi a ni deuh chawt a. A ni lah ahmaa ka rinhlelh deuh bak kha chu rinhlelh tur hian a awm leh ta lo reng reng bawk. Ka rilru a thil chhui chhuah tur nei inti si hian ka hna a sawt thei lova, ka nung vel mai mai a ni ber.
.
Ka hma dawhkana file intiang ar chu ka melh tlawk tlawk a. Vawiin hian hna kan khawp mai, hna ngah viau ni ah berkher ka ngaihtuahna a kal ding leh ta pek a nih hi. Inthing harhin file chu pakhat te tein ka en fel diat diat a, office ban a hun meuh chuan ka thaw deuh huai. Haw tura insiamin ka inkhung fel mawlh mawlh a, ka hmaa mipa ding chu min biak hma chuan ka lo hmu miah lo.
.
"Lehkha submit tur hi tu ber nge ka pek dawn?" phu deuh zawkin ka hawi chhuak a, tlangval lian thelh thawlh hian chiang zetin min lo en reng mai. Min nuih sukin a lehkha ken chu ka hmuh theih turin a lek kang va va a.
.
"Khawi maw ka lo enchiang ang?" ka tih chuan min pe ve mai. "Ka hnenah pawh a dah theih tho. Naktuk ah pu hnenah ka lo pe dawn nia."
.
"A lawmawm khawp ang." kal tumin a inher zet a arawn hawilet leh a. "Hmingtei i ni tiraw? Ka hre tlat che a ni." a tih chuan ka phawk leh ta hra mai. Ka awm dan hi a dik thei tawh meuh lo anih hi.
.
"Ah_aw_ni e." ka ti bah nak a.
.
"Min hre tawh lo tih ka hre mai. Lalmuanpuia ka nia. ML Memorial ah kan lut ho.." ka hre ta chiah!
.
"Ka hre ta chiah. I va danglam tawh ve.." nui chungin ka ti hliai a. A lunglenthlak zawk hle mai. Middle school kan kal ho ngei tak kha.
.
"Min hria chu a lawmawm e. Haw i tum hmel tawh thoin ka hria, i duh chuan ka lo thlah ang che. Hmanlai hun sawi leh pawh a chakawm alawm.." min nuih a, Lalmuanpuia hi hetiang taka nuimawi anih pawh ka hre ngai lo. Len leh hmel thatah Eleazer a tluk lo nain mizo mipa ah chuan a langsar pawl chu a ni pha tho ang. Ka ngaihtuahna zet chu leh! Engamah hmain Eleazer nen ka khaikhin ngawt chu.. Zahthlak zawk hian.
.
"Nia, pawi chuang lo. Nupui ila nei bik lo ani maw?" ka ti nghal zat a. Za zet hian a nui ta hawk hawk. "Ka thusawi chu la kawi kher lo la aw.." ka tih zui leh zat a..
.
"I lo danglam ta hle mai. A hma pawh khan.. Um..nakin ah ka sawi zawm ang. I hman chuan kal ila." a ti leh ta zawk a. Ngaih ngam takin office atang chuan kan inzui chhuak ta zan zan mai.
.
Kan in kan thlen hma zawng chuan kan titi a, a hnathawh leh a chanchin tlangpui chu a mawi tawkin min hrilh a,  a bak zawng chu kan naupan lai kan sawi char char a ni ber mai. Tlangval invawng tak anih hmel. A chhelo viau bawk! Nia, mit hian thil tha leh mawi hi chu a hmuh hmaih lo ve alawm! Ka zahpuiawm tan deuh tlat!
Kan in pawh a lo hria! A motor atanga ka chhuk hnu chuan 'kan inhmuh fo beisei ang che' tiin min thlah a, a thusawi awmzia chu ka hrethiam lo tiin sawi ila dawt chiang bal sawi ka ni ang! Ka nui sak ringawt.
.
Enge maw ka inthiam loh ringawt le? Tu ta mah ka ni hleinem! Tha tih zawng leh min hip zawng tak thil chu  mihring pangngai ka nih vangin ka nei ve ngei tur a ni dawn lawm ni. Eleazer laka ka rilru a zalen theihna tur hmanrua pawh ani maithei asin. A nih hlauh chuan ka tan malsawmna hlawm lian a ni ngei bawk ang chu.
.
Lalmuanpuia chu, a sawi lawk ang tak takin kan inhmu ta zauh zauh. Tawngkam tlang takin sawi lo mah se a mitmengah chuan min beisei ru tih ka hai bik lo. Mak takin kan inpawh riau bawk. A bulah pangngai tak leh amah pawh takin ka titi thei a, hei ringawt pawh hi ka tan chuan thil mak a tling tawh hrim hrim e. A hmingpum hian ka ko laklawh a, ka thlak mai thiam der lo lehnghal a. A hriat laiin ka la koh miah loh phah.
.
*Dik lo taka min ngaih ka duh lo a, mahse I bulhnaia awm ka duh.* tih message ka dawn chuan ka nui sak. Heihi ka tan bultan tharna a ni ve tawh ngei ang. Dinner min treat a tum thu a sawi chuan ka lo pawmpui ve ta mai.
*Naktuk tlaiah office ah ka lo hruai dawn che nia.* tiin min thlah leh thlap a. Eleazer nen khaikhin chuan a danglam lutuk. Lalmuanpuia hian chuan hmeichhia ka ni tih hriain dimdawi tak leh zaidawh takin min treat ni ber hian ka hria. Eleazer angin thu min pe thawr lova, mize hriatthiam har tak a nei ve hek lo. Eleazer pawh chu ka ngaihtuah chhuah sek le..
.
Zingkar ah office kal tura ka insiam chuan ka inchei uluk ve hle. Zai rat rat chungin ka thawmhnaw thlan chhuah chu ka ha a, darthlalang ah inen in ka lung pawh a awi e. Ka phone message lo thleng ka check hnu chuan mood fuh zetin in ka chhuah san ta nghal a.
.
Office ka thleng a, ka hna khawih tur chin khawih zung zungin dar zat pawh ka lo en lo.`
.
"Kan kal thei tawh em?"
Ka thutna bula Muanpuia lo ding reng tawh chu enin ka nui sak a. Sana ka en nghal vat. Ka lo haw thei reng tawh a nih hi.
.
"Thei tawh mai e. Ka han inkhung fel ang. Lo thu rawh." ka tih chuan thut tum hmel pawh a pu chuang lo. A hmanhmawh hmel phian.
.
Ka inkhung fel sawk sawk a, ka inpeih chuan kan inzui chhuak nghal a. Kan tlan chhuak nghal vang vang mai.
.
"Kal hlat kan va tum hmel." ka tih chuan min rawn enin a nui suk ringawt. Vawiin chu nidang a ang lo, a titi bawrh bawrh lo tlat. Ngaihtuah muk hmel deuh hian a awm leh thin a.
.
Motor a tiding a "Kan thleng e." a tih chuan kan kalna tur hmun chuan ngaihtuahna dang min neih tir.
.
"Oh! Hetah hian maw.."
"Kal ang le." ka hnungah a ban rawn dahin inchhung ah min luhpui a, hnathawk hovin min hmuh rualin kan thutna tur lam min lo kawhhmuh thuai a.
.
Bon Apetite ah hian Eleazer pawh khan min hruai tawh! Ngati nge tunah Eleazer ka ngaihtuah chhuah kher ang. A hun lo lutuk. A ni kha ngaihtuah chhan tur ka nei lo.
.
Kan eitur chah kan nghah chhung chuan sawitur hre lovin ka thu deuh tawp a, Muanpuia pawh a ngawi ve khuau mai. Min rawn en a, ka lo nui lui sak a. Sawitur ngaihtuah niawm tak hian a meng kual rulh a. A hmel hi chu a tha chiang a ni.
.
"Nuam i tih loh hmel." amah pawh a pangngai tawp si lova!
"Nuam ti e." ka ti sap ringawt.
.
A aw thian kharhin kan dawhkan kil chunga ka kut dah chu arawn vuan a. Thawk a la halh mai.
.
"Ka zep lovang, hetiang hian ka la nervous ngai miah lo. Kan pahnih hian pangngai taka inzui ka duh." ka chhan dan tur ngaichang niawm tak hian min en khuau a, a thaw tha ngam lo niin ka hria. Mipa lakah hetiang taka effect ka neih hi ka lo ring ngai miah lo.
.
Nui sakin ka bu nghat a, hriat theih hian a thaw huai mai. A awm dan chuan ka awm a tinuam ta viau zawk. Kan eitur chah a lo thleng a, eng eng emaw sawi pahin kan ei ta mial mial a.
.
"I puar em?"
"Puar lutuk."
"Tun atang chuan a tam thei ang ber i bulah hun hman ka duh ang." ka kut rawn vuan lehin a hmel a thutak ta ran mai.
.
"Chu thil chu a thleng thei kher lo ang." Muanpuia nen chuan kan hawi chhuak rual thawt a.
Eleazer!! Helai hmunah hian eng thil nge maw arawn tih le? Ka inthunun vat a, Muanpuia hamhaih hmel thinrim hmela inthlak mek chu ka hmuh hmaih lo. Ka kut chu la vuan reng chungin a thutna atangin a tho a, keipawh ka tho ve nghal bawk. Kan din chhuah fel chuan Eleazer chu kan hmachhawn lo thei ta lo. A hmel lan dan chu a mak lutuk. Kan kut chu en in a insehruh talh talh a.
.
"Tunge inih ka hre lo nain khatianga mi titi a inrawlh ringawt kha a mawi lo a nia." Ka inthunun hman lo, Muanpuia chu mak tiin ka en ha a, a ni chuan Eleazer chu hlau lo tih hriat ngawih ngawih hian a en run thung. Eleazer paw'n mit khap eih lo hian a lo enlet ve bawk. A tha dawn lo tawp mai.
.
"Muanpui kal ang." ka ti sap a. Ka tawng a hriat rualin Eleazer chuan Muanpuia lak atangin a mit a lasawn ta chauh.
.
"Thutlukna i siam hmain inngaihtuah chiang hmasa thin rawh. I chetsualpui leh hmain__" a ngawi chawt a, kei ka sa nghal pup pup thung. Eng thu maw a sawi kha? Ka tawng chhuak thei lo. Ka zak a, Eleazer ka chetsualpui tantirh leh min hnawl tantirh a ka awm ang chiah khan te chem chemin ka inhre nawn leh ta. Ka biang chhung lam ka seh ngar ngar mai.
.
Muanpuia chuan Eleazer nen chuan min entawn a, ka hlauhthawn ber thil hi thleng lo hram rawh se. Hetah hian Eleazer thusawi vang khan mualpho takin min kalsan duh hauh lovang. Mipa pangngai a nih chuan a ti thei lo.
Ka beisei loh zetin Muanpuia chuan ka kut a vawnna chu a tinghet zual sauh a, Eleazer chu chiang zet hian a en a.
.
"I ta ni lo hmeichhe bula awm dan i zir angai a nih kha." ka kut a vawnna chu thlahin ka kawngah min kuah a, dimdawi tih hriat tak hian ka beng bulah rawn kunhniamin "Kal ang le." a ti zawi ruih a. Ka tah a chhuak ut ut mai.
.
Eleazer kan kal pelh chuan inthunun tumin ka insangmar a, engvang mahin ka tap tur a ni lo. Muanpuia hi ka hmaizah lutuk. Awmngaihna pawh ka hre lova, awm loh  ngaihna pawh ka hre chuang lo.
.
A car dahna kan thlen chuan kawngkhar min hawn sakin ka thu lut thuai a, ka  hawichhuak ngam rih lo. Kha ka thil tihsual kha midang hmaa sawichhuah a nih ka ring pha ngai lo. Ka inchhir nawn eh ta vawng vawng anih hi. Tih loh tur tih chuan heihi a nih dan tur reng chu ani. A tuar ava nuam si lo em!
.
Muanpuia chu driver seat-ah rawn thulutin kan ngawi dun ran a, nuam lo ka tih zia chu sawi ngaihna a awm lo.
.
"Hreawm ti suh. Mumal taka inzui ka duh thu ka hrilh hma che khan thil thleng thei ka ngaihtuah lawk vek tawh. Nie, ka ngaihtuah lawk vek alawm.." min bia pawh a ang lo. A dar a tiche zauh a. Amah leh amah a inbia a ang ber.
.
"Tuna sawitur ka ni em ka inhre lo. Mahse, hmeichhe thianghlim ka ni tawh lo!" ka hrawk arawn inhnawh ut ut a, he thu rapthlak lutuk hi ka sawi chhuah a tul ang tih hi ka ring pha ngai lo chauh ni lovin hetiang hun hi a thlen ka ring ngai lo reng reng. Eleazer vang chauh kha a ni.
.
Min chhang lovin min en reng a, ngawi reng hian alamah min kuai hnaiin dam thlup hian min kuah ta zawk a. Tap lo turin ka insum nasa teh e!
.
Eng chena rei nge chutiang chuan kan awm ka hre lo. Min kuahna chu zawimuanga thlahin ka biang tawn tawnah a kutin min vuan a.
"Mihring hian tihsual kan nei thei theuh a, keipawh mi thianghlim ka ni bik lova. Engkim a tha leh vek ang. Khapa thusawi kha chu engahmah ngai suh. A tha em?" min nuih suk a. Hetiang mipa tha hi ka hriat lohin an lo awm reng chu a nia. A mak teh e.
Ka buk nghat hnu chuan ka biangah min fawp zauhin kan ila hrang ta chauh. A kekawr ipte a check vut vut a, chek tlakin min rawn en leh a.
.
"Chahbi inchhungah khan ka theihnghilh aniang. Lo awm la ka va en leh lawk ange. Ka rei lovang." tih leh car atanga chhuah a rual a. Inchhung lam pana a kal chu ka enzui reng a, inchhung a luh fel hnu lawkah Eleazer leh hmeichhe pakhat an rawn inzui chhuak ka hmuh chuan ka awm a nuam lo lehnghal. Eleazer hmel chu a la rum ul mai. A bana kuahtu hmeichhia chuan nui sanga en chho chung hian a be ser ser a, a ni chu a lo bu nghut ringawt a. Hmeichhia a chhuahpui ve reng chung sawn engtin nge khatianga mawi lo lutuk a ka chungchang Muanpuia hriattura a rawn sawi kher ni!
.
Ka thil ngaihtuah vang chuan meng tal tapin ka hawisawn a. Eleazer te hnunga Muanpuia lo kal chhuak ka hmuh chuan ka thaw huai mai. Muanpuia chuan arawn kal pel a, Eleazer chuan arawn enzui leh ta chiah mai. Min rawn hmuh chuan a inher hmuk a, a bula hmeichhia chuan a umzui dar dar a. Khawngaihthlak hian a..
.
Muanpuia arawn thu lut a, "Ka rei em?" a tih chuan ka lo tan nasat zia ka inhre chiah. Thaw halhin ka nuih a, ka lu la thing ta ringawt.
.
Kan in kan thlen chuan lo lenglut turin ka sawm ta lo mai. Bakah a ni pawhin tihtur a la neih thu a sawi tho a, eng eng emaw kan sawi duah nain thianghlimna chungchang kha chu kan sawiri leh ta lo. Ka lawm hle bawk.
.
Ni a ral bek bek a, Muanpuia nen pawh a khat tawkin kan inhmu ve reng a. "Inlaichinna puitling  neih kan duh chuan kan hmanhmawh vut vut tur a ni lo." a tih ang deuhin engkim hmanhmawh lo leh nghet charhin kan kalpui ni hian ka hria. Ka hre dik lem lo thei tho bawk. Nula leh tlangval inkara inlaichinna hi chu sawilawk dik hleihtheih pawh a ni love.
.
Chuan, Muanpuia nen kan inzui tak hnu hian tlaitin Te-a nen kan thiltih thin kha kan bawhpelh ta malh malh a ni ber. A pawi lo ah ngai tawh mai ang. Zir tur tam tak ka zir hman tawh tho.
.
Office ban a hun a, U Sawmzuala ka la hmuh leh miha loh vangin kan in pan lovin U Sawmzual te in lam ka pan a, tunah chuan ahma aiin hma a sawn ve tawh ka beisei.
An in ka thlen chuan a lo reh deuh thiap a, an in pawnlam pawh enkawl uluk a ni tawh lo tih a hriat hle. Tabi awmlai kha chuan engkim a fai hlarh thin kha a nia.
.
Door bell ka hmet a, ka rin aia hmain kawngka arawn inhawng a. Eleazer nen kan inhmachhawn lehta ran  mai. Hetah hian a lo awm ve dawn tih hrelawk ni ila ka kal hauh lovang.
"Lo lut rawh" a tu nghut a. Min en duh lo niawm tak hian min hawisan nghal hmuk bawk.
Inchhung ah kan inzui lut a, U Sawmzuala chu hahdam hmel zet hian common room-a mutna tur an siamah chuan a lo mu a. A hmel pawh ahma ai chuan hmuh a nuam ta deuh. A mutna bulah chuan thuin ka thil ken sak chu ka pe a.
.
"I lo tha zel em?"
Nui lui sukin a bu zauh a. Eleazer chu a melh zuk bawk. Awmze neia melh anih hmel. A awmzia phei chu ka hre chuang lova.
.
"Ka tha ve zel anih hi. I fel hle mai. Tlaiah chaw ei ve nghal ta che." a ti zung zung a, ka lo nial vat thung. Eleazer awm ve chuan min kam deuh run a, nuam ka ti tehchiam lo.
.
"Khawnge i mipa zui thin kha, i lo hruai ve lo nia." ka bula rawn thu pahin a tawng a, a aw rik dan atang chuan a hmuh rualin a hnek duh maiin ka lo ring ve ringawt.
.
"Nia, vawiin chu a buai zual deuh a." pangngai thei ang bera chhangin U Sawmzuala chu ka en san leh daih a. "Rei deuh awm hman pawh ka ni tawh lo, i lo tha zel dawn nia. Ka haw lehnghal mai ang aw."
.
Ka thutna atangin ka tho a, ka rin loh zet hian Eleazer chu arawn tho ve nghal vut a. Eng thil nge maw a hriat ni? A bulhnaia awm hi ka duh tehchiam lo tih hria se chuan ka tan hnawksakin a awm hauh lovang.
.
"Ka lo thlah ang che."
.
"A ngai lo." ka chhang rang mah mah maithei.
.
"Kawngka thleng chiah alawm ka tih." U Sawmzuala nui huk ka hriat chuan ka meng kual rawlh mai.
.
"Tikhan meng ziah suh.." tih leh ka bana rawn vawn a rual a, ka taksa min dek chu duh lovin ka ban chu laksawn ka tum a, min hmer nghet lutuk mah mah a ni. Min ngaichang lem lo hian kawngka awmna lam  panin min kai a, ka bag lain ka zui ve lo thei ta lo.
.
Verandah kan thlen chuan min vawnna chu thlahin  a thaw huai a.
.
"Hmanni kha a zialo khawp mai." a thusawi chu ka awih lo zawk. Eleazer hian thupha a chawi ang maw??
.
"Theihnghilh rawh." tiin ka kalsawn nghal a, min lo zui tih ka hriat chuan ka maimitchhing tawp.
.
"Muffin_"
"Engmah sawi suh. I thusawi kha dawt a ni hleinem. Ngaihtuah chiang lova chetsualpui che ka ni reng alawm." tawngkam pangngai thei ang bera tawng  ka duh. Ka hlawhtling reng em ka hre lo.
.
Thaw hawkin ka hnunglam atang hian min rawn kuah a. Hei chu ka va beisei lo chiang em! Khua a thim dawn ruai tawh a, miin min hmuh loh ka beisei.
.
"Eleazer.. Khawlai anih hi.." khawlai chu a ni chiah lo alawm. Mahse enge danglam chuang. Inchhung ah kan awm hleinem mawle. Gate chhung tual zawl a ni nain ka tan chuan khawlai a ni tho tho.
.
Min thlah a tum lo. Ka hnunglam atang chuan ka samah a hmai a phum a, thawk a la tih ka hria. Min kuahna chu a tinghet zual sauh a.
.
"Ka tan chuan kha thil kha tihpalh thil a ni lo ania." a tawng zawi khawp mai.
.
"Ka hria alawm. I tan chuan i hmeichhe hneh pakhat ka ni ve mai a. Ka hai bik hleinem."
.
"Ni lo.." a ti hrawih a. "Chutiang a ni lo. Ka sawi awmzia i hria. Ka tan a_"
.
"Hria e. Min thlah tawh rawh." ka ti sap a. Thinrima inhmachhawn na chi pawh niin ka hre lo. Tunah hian ngaihzawng nei lai ka ni a, mipa dangin min kuah hi Muanpuia phatsanna niin ka hria. Chu chu ka duh lo.
.
"Eleazer.." ka sam chhanah chuan ka nghawng hnunglamah min fawp a. Ka mit ka chhing sawk. A dik lo. He thil hi a dik hlawl lo. Min khawihna avang hian ka danglam tawh tur a ni lo, chu chauh ni lovin engvanga la inkuah tur nge ka nih? Ni love, ka inkuah tir hleinem. Ka thu hhmu lovin min kuah ringawt anih hi.
.
"Hmeichhia kawplai nei ka ni tih i hria a, i awm dan hi a diklo a nia."
.
"Tunge pawiti chuang!" ati leh nghut a, min kuahna chu thlah a la tum chuang lo. Ka dula a kut a nghah chu ka dawmin thawk ka la a. Engvanga ka thlahlel fo si  nge ka nih? Eleazer hi thlahlel tur ka ni tawh lo.
.
"Keimah! Kawppui laka rinawm lo mihring nih ka duh ve lo." ka tih chuan thawk a la ham ham a, ka nghawng hnunglam chu a thawkkhum lum ham ham mai.
.
"Anih chuan kal tawh rawh."
.
"Min kuahna hi i thlah loh chuan__"
.
"Aw le..Aw le!"
Min thlah hnu chuan ka scooty ka pan nghal thuai a, Eleazer chu a hmel en duh tawh lovin ka tlan chhuak nghal a. Ka tukhum mur chem chem dan atang chuan min enzui reng tih ka hria.
Ngaihtuah zui duh lovin ka scooty khalh chauh chu ngaihtuah tum chungin  k atlan zel a, in awm tlemna lai ka thlen chuan ka scooty chu ri phurh phurhin a thi ta chut mai. U Sawmzuala te in pana ka kal lam pawhkhan engmah dik lo a awm miah si lo. Inchhunga ka awm chhung khan mi tuemaw in an lo khawih a ni chiang khawp.
Ka theih ang angin kawngsirah scooty chu ka nawr sawn a, englai  nge dik lo tih hriat tumin ka bih kual ve ngial naa dik lo lai ka hmu fuh mai thei lo. Khua a thim a ni tawh deuh mai si. Taxi kal vel a awm miah lo lehnghal.
.
“Muanpuia min hruai turin ka be mai ang.
.
Ka bag aka phone dah phawrhin ka contact list ka scroll a, motor chak zeta tlan thawm ka hriat rual deuhthawin ka piah pen sawm pawh tling lovah motor dum arawn ding chik tuarh a. Ka phu dawrh mai. Hlauhthawnna in ka khat nghal bawk.
Motor atang chuan mipa pakhat hmanhmawh zet hian arawn chhuak a, eng a tha tawh lo bawk nen tunge anih ka hmu fiah mai thei lo.
.
Keihi dinhmun tha lo takah ka ding mek anih hi.. Engtin nge chet ka lak dawn ka hre lo.
COPAS (HEARTS)
.
CHAPTER - 17
.
Thantei_LauraSean
.
H & E
.
Ngaihven lo anga lang luiin scooty chu ka en leh a, ka rilru chuan engtin pawh min rawn khawih se sual let turin ka inpeih at thung.
.
Rei ngaihchan a ngai lo, ka hnung lam atanga ka dara min rawn vawn chuan rang lutuk hian a banrek ah ka man chat a. Tun hun atan hian alawm mahni inven dan ka zir. Ka tha neih zawng zawng sawmkhawmin bin ka tum a, keimah aia a len zawk chu thuhran ni se, ka tha ka pek phat atang khan ka bin zo dawn lo tih ka hre nghal. Bakah a lo tang ve hman tlat. Thiam thil nei ve ni lo se tang hman tur a ni miah lo a nia.
.
Nui hawk ka hriat chuan rang lutuk bawk hian ka vawnna chu ka thlah a.
.
"Khatianga thil kha engtin nge i thiam zawk?"
Hawi chhuakin ka en a, Eleazer makti hmel leh a nui insum hmel inpawlh nuaih chuan ka thin a tirim lutuk takzet. Hlauthawng bawk thinrim bawkin ka insehruh a, chhan ka tum therte lo. Min rawn umzui ka ring pha lo hrim hrim bawk.
.
"Enge i rawn tih dawn?" ka tilet nghat a. Min tih hlauhthawn zia kha. Ka thinphu pawh a la pangngai lo. Hmanhmawh hmel lutuk leh minti thinthawng lutuk lo zawngin min rawn pan thei reng. A enga pawh chu nise engvanga min rawn umzui nge anih reng reng?
.
"Mahni inven dan kha khawi atanga i zir nge?"
.
"Lo buai suh.."
.
"Ka ti hlauthawng viau che tih ka hrethiam mai."
"Sawi lo zawk mai teh." min hmuh theih leh theih loh ka hre lo chungin ka melh rawm rawm a. Ka kut khur nasa lutuk chu ka hum ruh ngar ngar bawk.
.
"Tih palh.. Min lo zui rawh." ka banah min kaih tumin min ban a, ka tawlh hla vat a.
"Ka zui lovang che."
.
"Kha kha a chhia a ni lawm ni. Luhlul hun pawh a ni lo."
.
"Ke in ka kal thei." ka tih chuan a rum nghut.
.
Engvanga hmanhmawh taka rawn um che nge ka nih min zawt miah lo."
.
"Zawh che pawh ka tum lo"
.
Thaw huaiin min rawn dinhnaih zual a beidawn hmel zet hian "Muffin?" a ti zawi ruih a. Thip zetin ka enlet thung. "Tunah min zui rawh. Nawrluih ngaiin awm suh." thinrim hmelin a tawng lo na a, a aw ah chuan eng emaw a lang tel tih ka hai lova, mahse ka thin a la rim vangin ka pawi sa der lo.
.
"Khatianga hlauthawng taka min siam kher lo khan i rawn awm thei reng__"
Ka dan hman loh khawpa rangin min rawn kuah bet nawk a, ka tha khur dar dar chu a hre thei ngei ang. Min khawihna vang ni lovin ka hlauhthawn vanga khur ka ni tih pawh a hrethiam ang chu.
.
"Tih hlauhthawn che ka tum hauh lo ania. Tunah chuan min zui phawt angai." ka hahdam theih nan ka hnungah min chul hauh hauh a. "Tunah le." min kuahna chu phelhin ka banah min kai a, tang chiam pawh ni ila min thlah dawn miah lo tih ka hria. Bakah ke a kal ai chuan a bula ka kal hian a him zawk reng reng.
.
"Chahbi ka phawi lo a nia." min vawnna thlah chuang lovin scooty kan pan a, chahbi chu phawiin a ak nghal hmak a.
.
"Khawi, ka chahbi anih kha."
Ka tawng chu hre awm a awm miah lovin, a motor dahna lamah min kalpui a. A chet dan atang chuan hmanhmawh eng emaw tak chu anei ngei ang tih ka ring.
.
Kan tlan chhuak a, kan pahnihin kan ngawi reng a. Ka hawi chhuah chuan kan in lam kan pan lo tih ka hre chiah.
.
"Eng thil  nge thleng a? Khawiah nge kan kal dawn?"
.
"Thil eng emaw hmuh tir tur che ka nei. Hmanhmawh taka rawn pan chhan che ka nei bawk. Tun chinah chuan mahni chauhin khawiah mah i kal tawh lovang. A him lo." aw ki hniam zet hian a tawng chhum hmuk hmuk a.
"Engtin nge ka him lo tih i hriat? Nang hian dawt hmangin min hnaih i tum ani em lovang chu." amah pawh en lovin ka tawng a, min rawn melh zawk tih ka hre tho. Engmah sawi lovin a ngawi leh daih lawi a.
.
Khawpui pawn kan thleng a, kan kalna lam hi Durtlang lam niin ka hria. Ka ngaihtuahna buai deuh vang khan kan kalna lam hrechiang turin ka lo hawi chhunzawm miah lo a ni.
In pakhat kawt ah motor a tiding a, tawng lova chhukin ka thutna lam kawngkhar min rawn hawn sak chuan hnial buai lovin ka chhuk ve nghal mai. Kan kalna tur in chu a thim thuap a, tumah an cheng lo anih ka ring ve ringawt. A thim ruih chung chuan Eleazer chu a hawi kual a, ka banah min rawn vuan lehin muang lo zet hian in chu kan pan a.
Chahbi phawrhin kawngka kalhna hrawl zet chu a hawng a, inchhung kan luh chuan a thim tha khawp mai. Light a on chuan ka mit a vai chum chum a, inchhung awm dan pawh ka hmu chiang mai thei lo.
.
"Khatah khan lo thu rawh." min vawnna thlahin a kalsawn a, pindan pakhata a lut chu ka enzui reng a. a thut fel rualin arawn chhuak lehnghal. Thir bawm ni awm tak hi a rawn keng chhuak a. Heilai hmunah hian chhan leh vang fel tak neia min hruai chu anih ngei hmel.
.
"Kha kha enge?"
Min chhang lovin ka bulah arawn thu a, a bawm ken chu a malchungah dahin chahbi te takte hian a hawng a. Bawm chhunga thil awm chu enge ka hre ve mai lo.
.
"Henghi en la i hriat ho zawng min hrilh dawn nia." a tidam thluam a. A hmel atangin a ngaihtuahna a tilang miah lo thung.
.
Ka malchunga bawm arawn dah chuan ngawi rengin a chhunga thil awm ho chu ka en a.
.
"Heihi engtin nge i neih?"
.
"En zel phawt rawh." a ti leh ringawt.
.
Thlalak thenkhat chu Robert pendrive-a awm keimah ngeiin ka chhui zuite kha an ni. Min hrilh ang chuan ka en zel a, Alawmi thlalak hmuh nuam lo zet ka hmuh chuan inveng  hman miah lo a te thawt in bawm chu ka malchung tangin ka hnawl thla rawp a. Ka awih thei lo! Ka taksa a mur chhuak vek a, dan rual lohin ka mittui a tla nghal zawih zawih  bawk..
.
"Eng_Engtin nge a nih theih?" ka tap nghal hlawp hlawp mai. "Hetiang thil hi engtin nge a nih theih? A ni thei lo! Kei hian engmah ka lo hre miah lo.."
.
Ka awm dan chu uluk zeta min enin a rawn tho a, dam thlup hian min kuah ta hlu hlu a.
.
"I tan a na viau ang tih ka hria. Ka hriat chhuah tirh chuan keipawh min thawng khawp mai. Inrawlh zui tawh lo turin ka duh che tih i hria a, chuti chung chuan ka thusawi pawi sa lovin i inrawlh ta zel si a, he thil hi ka tum hun aia hmaah ka hmuhtir ta che anih hi. Venhim che ka duh bawk.." min kuah nghet sauh a. Ka tawng chhuak thei tawh rih lo.
.
Tuin nge ring pha ang? Ka thiantha ber Alawmi kha pawngsual a lo ni reng a! Pawngsual anih thu sawichhuak miah lovin amahin a tuar a, a taksa in a tawrh zawh loh thlengin rilru hreawmna nasa lutuk a lo tuar reng a nih chu. Chu chu kei, a thiantha ber nia inchhal hian engmah ka lo hriatpui lo! Ka indem a, na ka ti lutuk a ni. Ka thiantha neihchhun khan min ring zo lo em ni? Min hrilh ni se kei hian eng emaw kawng zawng talin ka tanpui thei maithei asin. Amah chauha tuar atan chuan a na_ana lutuk a ni e.
.
Ka inngaihtuah fim deuh a, tawng tumin ka aw ka thian kharh a.
.
“Tunge a titu?”
"Hahdam phawt la ka hrilh ang che." Eleazer tawng chu ka hre thei chang chang. Nghet lutuk hian min la kuah reng a, keipawn a kawngah ka lo kuah let reng tih ka inhre chiah. Ka hriatchhuah rualin ka kuahna chu ka thlah vat a. Ka rilru chiai vang chauha kuah ka ni  ngei ang. Ka chet danah inlak hran ka duh tih hrethiamin zawimuang hian min thlah a.
.
Sofa ah chuan thu lehin Eleazer chu ka bul setah arawn thu a, ka ngaihtuahna hriat tum niawm tak hian chik takin min en bawk.
.
"Khatiang thil titu kha tunge?" ka duh angin ka tawng ring thei der lo. Alawmi thlalak a taksa, a mal vela thisen kai ka mitthla a lo lang vang chuan ka mit ka chhing sawk a. He thil vang hian eng emaw chen chu ka pangngai dawn hauh lo tih ka inhre chiang lutuk.
.
"Robert kha ka rinhlelh ber chu a nia, mahse a thih dan vang khan Robert thiltih a ni thei ta lo a ni. He thil titu hi tupawh chu lo ni se tunah hian zalen takin a la awm tihna a nia. Fimkhur tluk a awm lo."
.
"Tabi kha..?" thawk la hlahin ka mittui tla leh tur chu dankir ka tum a, ka hlawhchham. Eleazer hmaah hian hmeichhe chak lo tak ang mai a tah ka duh lova, mahse tihngaihna a awm lo anih hi. Ka insum thei ngang lo. Ka kut pahnihin ka hmai ka hup a, ka mittui tla chu ka hru nawk nawk a.
.
"Tabi khan eng emaw tak chu a hre ru tih ka hria. Amah kha a chhan pawh ka hriat miah lohin ka ringhlel dawn dawn a, amah hnaih lo tur pawhin ka hrilh che kha. Mahse, a ni pawh_"
.
"Hreawm tak tuarin a thi ve tih a chiang reng a.. Tu tih nge ni ta ang?" ka hrawk a tawt ut ut a, tawng pangngai pawhin ka tawng thei lo.
.
"Eng emaw a hriat vanga khatiang thil kha a chunga thleng ni ngeiin ka ring. Engmah fiahna a la awm theih loh  vang hian ka ngaihtuah zual em em che a ni. Keipawhin i inhnamhnawih tih ka hriat chuan hetiang thil titu hian a hre ve ngei ang. Te-a kha_"
.
"Te-a chu a nih ka ring lo. Vawikhat kha chu ka ringhlel ngei a.. Mahse, Alawmi nen inzawmna an nei lo.."'
"Chu chu engtin nge i hriat? Robert leh Alawmi an inkawp tih a hria em?" a tih chuan ka bu nghat a.
.
"A lakah inveng ang che. Ka bulah tih loh chuan mipa reng reng hnaih emaw a fal emaw fal lo emaw pawhin hmu suh." chiang zet hian min en a.
.
"Chutiang ringawt a theih hleinem."
.
"I ngaihzawng pa pawh kha ani lo vang tih a sawi theih loh. Engvanga rawn hnaih ringawt che nge anih?"
.
"Chu kher chu i lo buaina tur anih loh chu. Muanpuia nen chuan Middle school kan kal lai atangin kan inhre tawh. Kan inhrechiang.."
.
"Duhtawk teh.. Eng chen zeta thui nge hriat i neih?"
.
"Ka chungah tha lo takin a awm dawn lo tih ka hrechiang."
.
A chek hluk a. Ka ngei tawk a tling lehnghal em em bawk.
.
"Tun hun hi ka ngaihzawng chungchang a i ngaih dan sawina hun pawh ani lo. Muanpuia chungchang engmah hriat i nei lova, chuvang chauh pawh chuan i ring chhe nghal ringawt thiang lo."
.
"Thiang leh thiang lo chu keiman ka thliar hrang ang."
.
"A tawk anih chu. In a haw ka duh." ka ti nghal hmak a. A hmela engmah langchhuak lo hian min en reng ringawt.
.
"Kha mihring thlavang i hauh ang khan vawikhat chauh pawh ka thlavang i hauh ve tawh em?"
A zawhna hi enge a awmzia? Kan thusawi lai leh amah hian inzawmna a nei lo reng reng.
.
"Min chhang rawh!" a tawngkam a chang kher mai.
.
"In ah ka haw duh tih ka sawi anih chu_"
.
"Ka zawhna che kha min chhang phawt rawh."
.
"Theihnghilh zawk rawh." ti hmakin ka thutna atangin ka tho phat a. Helai hmuna min hruai chhan ngaihtuahin tunah hian kan sawi loh tawp tur thupuiah kan lut a nih hi. A thlavang ka hauh leh hauh loh hian awmzia a nei lo? "Awmzia a awm lo.." ka ti leh sap a. Ka rin loh zet hian rawn ding ve thutin ka hmaah tak ka hmai min si lo chauhin arawn ding a, a hmel lan dan ka hmuh chuan ka ip deuh chawih mai. Min tihnat hlau tak si hian ka dar tawn tawnah min vuan a, a inthunun nasa hle ang tih ka ring.
.
"Ka tan awmzia a nei.. Nang_" inthlahdul hnakin ka chalah  min rawn si a "Muffin, ka tan engkim i ni! Chu chu engtin nge i hriat loh theih zawk?" min dem ni zawk awm tak hian a tawng chhuak a. Awlsam taka sawichhuak a ni lo tih erawh ka hrechiang hle. Engvanga chiang nge ka nih erawh ka hre hauh lo mai. A ban pahnihin ka kawngah min kuah a.
.
"Chu chu ka hre hauh lo. Ni lo, ka sawi tum chu__" min rawn fawp hmiah a, ka tawng zawm thei ta lo! Ka chungah eng thil nge atih leh tak hi? Min fawhna chu a dam nain ka chhungril a fan rawih rawih thung. Kei hi engvanga danglam ve leh ngawt nge ka nih? Muanpuia... Ni lo..!
.
Ka inla hrang vat a. Nia, ka hmui chiah a nia ka lakhran. Min kuahna chu a ngheh em vang pawh ni lovin a taksa lumna ka feel chu ka kalsan mai phal lo a ni. Ka rilru zet chu! Ka mit ka meng a, Eleazer maimitchhing chunga kun deuh hmel chu chiang takin ka en a. A la ngai reng. Ka duh emaw duh lo emaw Eleazer hi ka la hmangaih reng a ni! A mithmul sei sang chuan amit a khuh a, tunah chuan min hmu thei lo. A chal a tichuar deuhin a la maimitchhing ta reng a. Ka hmui pet fan fan chungin a bianga chul mai lo turin ka insum hial nia.

Kei hi rilru uire ka ni reng zawk anih hi. Ka tan Muanpuia a awm reng laiin tunah pawh Eleazer bulah ka awm a nia. Muanpuia hi mipa tha tak a ni. Min care em em bawk. Phatsan tur ka ni hauh lo. Chu mi hrereng chung chuan a bula ka feel ngai loh ka thinlunga eng emaw famkim lohna nei ni a ka hriat thin hi Eleazer bula ka awm hian engvanga tih famkima  awm ta nia inhria nge ka nih si le? Ka ngaihtuahna kal dik lo mai a ni lo tih ka hrechiang em em lehnghal.
.
Muangchangin arawn meng a, ka en reng tih min hmuh pawh chuan a awm dan a danglam chuang lo. A aia chiang awm tawh chuang lo tur khawpa chiang hian ka mitah min en a.
.
“Ka hmangaih che!”
Ka meng phar kawk! Hnunglamah ka awn dawrh bawk. Min rawn vuan vat a. Za lo zet hian a nui hul hak hak a.
.
“ I  hmel lan dan chu ‘thah che ka duh’ tih thu hrilh ang  mai I nia lawm. Theihnghilh rawh. Haw I duh thu I sawi tak kha.. Lo kal rawh, ka thlah ang che.”
Chet nachang pawh ka la hre chuang lo. A hmel chu ka en a, a thusawi kha ka hre dik reng em tih ka ngaihtuah a ni.
.
“Theihnghilh rawh. I tan chuan thu hriat nuam a ni lo tawp tak ang. Sawi lo tawp tur ka nia..”
 A mitmeng a ka hmuh chu natna a ni. Natna nasa tak. Enge ka ngaihtuah ka hre lo, muangchang in ka pan hnai a.
.
“I sawi kha dik anih chuan. A nih chuan_Engvanga min hnawl si nge I nih?” ka tawng khur chu ka va haw em!
.
“Theihnghilh rawh ka tih kha.”
.
“Eleazer” ka ti vin that a. Hetiang taka vin hian ka la ko ngai miah lo. A sawi ang hian in a inthlah tir mai tawh tur ka nia. Mahse ka thei lo. Min hmangaih anih si chuan engvanga min hnawl si nge a nih? A chhan ka hriat hi a tul reng em?
  “Theihnghilh rawh ka tih chu.” A ti nghut a, a hmel lan dan chu a pangngai leh vek tawh. Phiangsen hian!
.
“A lo nih phiangsen chu!”
Dawn awm lovin sofa-a ka bag let ngat chu ka la nawk a, ka chhungril so bulh bulh hi ka thunun theih piah lam a ni. Amah pawh en tawh lovin vung lutuk hian kawngka lam ka pan nghal hmawk hmawk a. He mihring min thlah hi ka mamawh lo. A kut hmawr pawhin min khawih tawh lovang.
A pen thawm atang chuan min umzui tih ka hria. Ka ban arawn deh rual rualin “Min khawih suh” ka ti tuarh a, a kut chu ka theihtawpa na hian ka thingthla nghal bawk.
.
“Muffin..” a ti hrawih a, engmah ka pawi sa tawh lo.
.
“Chutiang chuan min ko suh..” thinrim lutuk in ka hmachhawn leh a, min rawn dawm a tum chuan ka duh lo tih nasa zet hian ka lantir  bawk. “I kut hmawr pawh khan min khawih suh. Ka hua che… Ka ten che.. I hmel hi vawikhat pawh hmuh ka duh tawh lo. Nang hian enge min pek? Engmah… Chuan_ Ka lak atang hian Kal. Bo. Rawh.” Thinrim lutuk a thaw kawk kawk chunga inher in  ka hma zawnah ka kal bawrh bawrh a. A thim zek. Ka awm dan hi nasa min ti pawh ni se pawi ka tih loh zia chu ka sawi peih lo zawk!
.
Thil eng emaw ka chhuih tawk a, dawn awm lo hian ka tlu bawkkhup nghal thlawrh. Thinrim lutuk bawk nen_Ka hrawkah arawn inhnawh up up a ka insawhna na bawk si nen ka ngik chhuak ta lehnghal! Ka tap pawh a ni lo, heti khawpa thinchhe nasa ka ni tih hi ka lo inhre ngai lo reng reng.
.
“I tha em?”
Eleazer chu ka bulah rawn thingthi nghal rawp rawpin min kaihthawh a tum a,  min vawn rual chuan “Min khawih suh.” Ka lo ti vin hlar a. Min thlah ve mai bawk.
.
“I tho thei angem?” a ti dam thlup a. A awm dan apiang hian tunah tak chuan ka pawi a sawi vek.
Ka chhang tawh lo. Thawh ka tum a, ka tho mai thei lo leh ta nghal a. Ka taksa hi khawilai ber nge na pawh ka hre lo, a vaiin a na vekin ka hria. Muangchang leh harsa ti zetin ka thu a, Eleazer chu a phone ti engin ka bulah a thu ngawi run a, engtin nge ka awm zel dawn tih min ngaichang ni awm tak hian min en reng tih ka hria. A phone eng rinchhan chuan a hmel ka en zawk a, a mitmeng a ka hmuh chu ka awih thei lo.
Khawvelah hian a aia thlakhlelh leh chuang nei lo hmel puin min en anih chu! Ka mumang a nih ka ring zawk hial. 
.
COPAS (HEARTS)
.
CHAPTER - 18
.
Thantei_LauraSean
.
H & E
.
ELEAZER*
.
A thusawp niai a, min la vin hlar theih danah a insawh na vak lo anih ka ring. A lawmawm ah ka ngai. He hmeichhe bulah hian engtianga awm tur nge tih ka ngaihtuah buai ziah mai hi mak ka ti thin. Keimah ngei pawh ka rilru puthmang vanga ka inhriatthiam tawk loh lai hian engtin nge ka Muffin bula awm dan tur hi ka hriat theih tehlul ang? Chhungrila  ngaihtuahna chu eng pawh  ni se kan lan chhuah tir dan hian kawngro a su thui hle si a, ka thinlunga hmun a chan hi engtiang taka lanchhuah tir tur nge ka hre lo a ni.
.
Ka phone light ka on hnu chuan a hmel ka hmu thei ta chauh. A tluk a vang khan a ni  ngei ang a sam a hnawk deuh a, inhuih mam pawh tum chuang lo. Helai ah hian tlu hlauh lo se a luhlul zia ngaihtuahin ke ngat pawhin an in thleng a kal duh ngei ang chu. Insawh na ni se kei aia hreawm ti tur an awm chuang der lovang. Tharum hmangin vuan bet duh ni ila ka thei chiang a, alakah hian tharum hman ka duh hauh si lo. Awm dan tur ka hre lo hulhual a ni e. Engtin nge 'ka hmangaih che' tih thu kha hmaichhan ah ka sawi theih ka inhre lova, ka chhungril ah hian ka inhriat hman hauh lohin ka hmangaih tih erawh ka pawm thlap tawh thung. Hmeichhe hmangaih hi thil awmsam a ni hauh lo a nia. A chhan ka hriat hauh lohin min hlau lo ang maiin a awm fo a, min suallet ngam hial bawk. A chang leh min haw em em tih ka hriat ngei ngei theih nan he a mitmeng  mawi em em hian ka pawh ngam loh na turin min melh thin bawk a. Ka lakah hetiang taka khawsa ngam an awm ngai loh vang hian awm dan tur ka hre lo a ni. Amah duat taka a bula awm ka tum apiangin min hnial a, min tina thei ang tih pawh ka rin ngai loh tawngkam mak tak takin min tina bawk a. Mahse maw_Heng thil zawng zawng hi ka lakah ti mah se, he hmeichhia ka hmaa thu mek, thinrim tak hmelpu hi ka hmangaih! Ka hmangaih a, atan eng pawh ka huam dawn a ni tih hi a lakah hian engtin nge ka tihlan ang tih erawh ka hre hauh lo. Kei hi enge ka nih pawh ka inhre ta love.
.
Ka pha lo, hmeichhe tam tak ka kawp thin ngei a. Ka tan an lawm zawng tih a harsa ngai lo. Thinlunga inzawmna tel miah lovin ka sum leh mipa ka nihna hmang hian an lawm zawng ka ti mai thin. Harsatna ka nei ngai lova, tuna ka hun tawng mek ang leh Muffin laka ka rilru puthmang ang hi ka nei ang tih ka ngaihtuah ngai lo hulhual. Ka tan chuan ka hriat ngai loh thil mak leh ka hriatthiam mai loh tur thil a ni bawk. Ngaihsak dan chin tawk ka hre lova, thil tha lo leh atana hlauhawm awm thei zawng zawng laka lak hran ka duhna leh ka bulah chauh awm tura ka duhna hi a dik reng em? Muanpuia tia a koh pa vang khan ka lakah hian a inla hrang nasa tih lah kei aia hrechiang an awm lova, kha mipa khan a mutpui anih teh chuan! Ti hauh lo se la a tha zawk ang. Muffin hi ka ta chauh a ni.. Ka ta chauh..! A bula awm aia thlakhlelh dang ka nei lo tih ka hrechiang em em tawh tlat.
.
A bula ka thusawp ve chu min ngei hmel zet hian min rawn en ram ram a. Engtin nge a awm dawn ka ngaichang tawp. Hriatthiam harsa leh mi danglam tak hi engtianga enkawl tur nge ka hre lo.
.
Muangchangin a tho a, puih ka tum chuan "Min khawih suh." a ti leh hlar a. A tawngkam chuan min tihnat zia a hre lo. A laka ka thil tih dik loh vang khan eng chena rei nge ka tuar la ngai dawn?
.
A din hnu chuan a hawikual a, eng thil nge a zawn ka hre lo nain rin chu ka nei. Helai hmun hi ka ta a ni tih tuman min hriatpui lova, chuvanga hruai chu ka ni a. Ka hruai chhan ber ti hlawhtling kim lovin a hun hmain ka hmangaih thu ka hrilh ta mai anih kha. Ka tisual chiang tih ka laka a awm dan atang hian a chiang reng lehnghal.
.
"Min thlah i tum a ni lawm ni?" a hma ai chuan tlemin a aw a nem tawh deuh nain a la thinrim tho. Ka phone light chu a hmel hmuh ka duh vangin ka keng sawn hlek a, a sam hnawk deuh niaih leh a hmui engmah hnawih loh tih hriat zet ka en rual chuan fawp lo tura ka inthunun a tul tih ka hria.
.
"Enge?" ka enreng vanga awm nuam chiah lo hmel hian min en a. Ka rilru a ka ngaihtuah mek hi hria la i lawm dawn lo. Muffin_
.
"Engmaw i sawi?" enge ka sawi hriat tum in a chal a tichuar deuh a. Ka phun chhuak tih pawh ka inhre miah hleinem. Ka inveng hman ta lo bawk. Ka kut phar chhuakin a chal a tih chuar nang chu ka khawih a.
.
"Enge?"
Thil eng emaw kai lak ka tum niin a hria aniang.
"A tha tawh e." ka ti ringawt. A chal chu khawih rei lovin ka kut ka lasawn ta vat a. Ka awm dan hian mak deuhin ka nuih a tiza deuh tlat bawk. A hriat tur ka nui anih chuan ka tisual  ngei dawn tih ka hriat vangin ka ngawi ta zawk a. Amah ka nuih niin ka ngai ngei dawn a, inhnialna dang chawh chhuah leh ka duh tawh lo. Hlauhthawn pawh chu ka va ngah ta ve mawle! Ka tan chuan thil thar vek a ni e.
.
In ka kalh fel a, ngawirenga in zuiin motor kawngkhar ka hawn sak chuan a lut ve mai a. Kan tlan chhuah hnu pawh chuan amah en lovin ka awm rei thei lo. Motor kawngkhar darthlalang ah a lu nghatin pawnlam a en a, a lubur tereuhte hian eng thil tak ngaihtuah ang maw? Min huat thu a ngaihtuah em lovang chu! Ka aw ka thian kharh a, phu deuh zawk hian min rawn en a.
.
"Naktuk hian hmuh leh che ka duh dawn a?"
.
"Eng thil nge? Mimal thil anih chuan ka thei lo." a ti hmak a. Beidawng ru zetin ka thaw huai ringawt. Muanpuia kha i hmu dawn ami? Hmuh tum duh suh.. Ka ngaihtuahna vang chuan motor steering wheel chu kut chang var pap khawpin ka hmer ngawt ngawt a. Kha mipa nen khan inkawp zui zel turin ka duh hauh lo. Duh lo tak ka ni. Mahse tunah hian tih theih ka nei rih chuang lo anih hi. Khapa lak atang khan engtin nge a rilru ka lakpen tak ang.
.
"Muffin, zanin ka thusawi kha_"
.
"Min hmangaih tih i sawi vang ringawt khan i hnena lo let leh nghal duh turah min ngai suh. Ka duh vang reng ni lova thil hriatreng tam tak ka nei tih hria ang che." Eng ti turin nge min duh sawitel nghal ta che mawle!
"Eng ti turin nge min duh?" ka tih chuan a  ngaihtuahna tilang miah lo hian min en a. Nge light that tawk loh vangin a hmel ka hmuchiang thei lo zawk pawh ka hre lo. Motor hi ka tiding phawta kan inbia anih loh chuan amah ka en lutuk na lamah kan accident palh lovang tih pawh a sawi theih loh.
 Kawngsir remchang laiah motor ka tiding a. Motor chhung light ka on hnu chuan a hmel pawh ka hmuchiang lehzual thei ta. Ka zawhna kha min la chhang lo “Eng ti turin nge min duh?” ka ti  nawn leh ngat.
.
"Ka hre lo. Engmah! Engmah ti suh." a hmela min huatna emaw min ngaihvenna emaw, eng thil mah lang lo chuan min tibuai lehzual.
.
“Engvanga harsa em em nge maw inih le? Ti tura min duh sawi la, I sawi apiang ka ti ang.” Eng thil phiangsen nge maw ka sawi hi le? Hetiang tawngkam hi ka ka atang ngei hian a chhuak chu a nia. Mahse, Muffin laka ka sawi a nih chuan engpawh, eng thu pawh ni se pawi ka ti lo.
.
Thawk la hliai in min hmachhawn zawng hian a thurem sauh sauh a, eng thu nge a sawi dawn tih ka lo ngaichang tawp. ‘Ka tan a harsa zawngin awm tawh lo hram rawh. Khawngaihin khawngaihin..’ ka ti rilru hial!
.
“Eleazer_”
“Um, ka ngaithla.”
Ka awm dan chu makti hmel thup deuh chung hian min en ren rawn a. ‘Ka ngaichang che’ tih melhin ka melh thung.
.
“Kan duh piang hi kan nei vek tur a ni tih ziak a awm lova, bungrua chauh ni lo mihring pawh tiamin._”
.
“Chuan?”
.
“I awm dan hi mak ka ti zawk hial tawh. Ka ngaih a tha lo bawk a nia. Engvanga min hnaih hi duh  viau nge inih?”
A tawngkam hman duh dan chu ka beisei loh dan a ni leh ta. Kei hian ka nawr ta mah mah pawh a ni maithei. Tunah hian kan inkar siamthat phawt tum hi a tul reng em tih pawh ka hrethiam tawh lo.
Min zawhna chu chhang lovin motor ka tinung a, an in lam panin ka tlan chhuak nghal a. A rilru ka hneh leh hma hian engkim chinfel hmasak ka duh ta zawk a ni. Inthlem hliau hliau vang leh thilpek hmanga rilru hmin leh mai tur a ni lo tih hi lo hrelawk tur ka nia. Tunah chuan eng thil nge tih hmasak tur chiang takin ka hre ta e.
.
An in kan thlen thleng chuan kan inbe leh tawh lo. A thutna seat nghengin a maimitchhing a, rilru a thuchham ruk nei ang mai hian a kut a khawih neuh neuh a. Motor ka tihdin chuan a rawn meng a, kawngkhar ka hawnsak pawh nghak lovin  motor atang chuan a chhuak nghal a. Rawn hawilet tawh miah lova inchhunga a lut lai chu ka en tawp.
Na vak lovin car steering wheel chu ka chum a. He hmeichhia hian engvanga min hip bet tlat nge anih ka hre tawh. Infiamna khelhpui dan tur tam tak hriat ka nei a, mahse a lakah hian a engmah ka hmang lovang. Muffin nen kan inkar thil anih chuan infiamna mai  ni lovin engkim hi a tak vek ni se ka duh a ni.
.
Zantir ah khan hmanhmawh taka ka pan chhan tak kha ka hrilh ta miah lo. A pawi lo zawk. Eng thil mah tih theih a neih chuan loh vang hian kei hian ka duh danin thil ka kalpui ang. Ka hmuh phak loha a awm a nih pawhin a thiltih leh awmna hmun ka hriat a tul dawn bawk.
.
HMINGTHANSANGI*
.
Ka room ka luh rualin tukverh awmna lamah ka tlan vat a, Eleazer tlan chhuak lai chu ka en a. Tunah
tak hi chuan engmah ka feel lo. Engkim hian min ti hah vek tawh ni maiin ka hria.
.
Mu turin ka insiam nghal mai a, ka mut erawh chhuak lo tak a ni. Ka let kual ka let kual a.
.
"Bestie, thil awm dan hi mak iti awm. I laka zep neih hi ka duh miah lo asin."
.
"Engtin nge ka bulah i la awm theih si? A-les..Ka mumang a ni em?" Alawmi chu hmel ngui deuh hian a nui sak a. "I laka ka thil zep vang khan i mumang ah takngial pawh min hmu duh tawh lo ami?" a ti ngui raih a.
"Heiii..Ka hmu duh lo tawh thin che em? Lo thu hnai teh.." ka tih chuan min rawn hnaih a. Ka ban phaka a thut rualin kan tih ziah danin a kawngah ka ban pakhatin ka lo kuah a, a taksa chu a vawt thler mai. Mahse ka pawi sa lo. He thil hi ka mumang pawh ni se ka thian tha ber bula awm chu ka thlahlel reng alawm.
.
"Bestie, ka chunga thil thleng kha i hre tawh tih ka hria a nia. Ka laka diklo taka awm kha tunge tih hrilh che ka duh a. Tabi i hmu tawh em?" min zawhna chu ka bo hu mai. Heihi ka mumang a ni lawm ni?
"I awm dan chu avan mak. Tabi pawh_" ka ngawi leh rih. Tabi pawh amah ang bawk hian a thi ve tawh tho a. Enge pawi. ka duh chu ka zawh a thiang tho alawm. Min pui thei thil a nih phei chuan ka duh lehzual "I chunga thil thleng kha tu tih nge tih chu ka hriat duh ber alawm. Tabi chu ka la hmu lo."
.
"Enteh, he thil hi ka hrilh che anih chuan.." ka taksa arawn vawt zual sung sung a, Alawmi chu a bo ta daih bawk.
"A-les, A-les.." ka theih tawpa ringin ka ko vak vak a, thli vawt na zet rawn tleh leh vang chuan vawt ka ti lehzual. Ka khur hlawk hlawk a.
Phu chhuak zawih zawihin ka meng chhuak hlawl a, vawt ka ti khawp mai. Ngaihthat lohna mak tak nei chungin ka thu chhuak a, ka puansin zawng zawng chu chhuatah a lo tla vek lehnghal. Hei vang hi a nih hi vawt ka lo tih em em. Ka room tukverh puanzar phe lawp lawp chu en in khum atangin ka tho chhuak a. Ka mut dawn khan tukverh hi a inkalh leh inkalh loh ka check miah lo a, a lo inkalh lo anih dawn hi.
Tukverh khar tumin ka phar chhuak a, kan in zawn kawngpui a mipa ding ka hmuh chuan ka phu deuh zawk. Uluk leh chik hmel em em hian che miah lovin a la rawn hawi reng a, ka hmu tih pawh a inhre ngei ang. A che sawn chuang eih lo. Ka pindan a rawn luh ruk tum a ni mai angem le? Ka awm a nuam ta lo nasa. Hmanhmawh deuhin tukverh chu ka kalh sawk sawk a, tukverh puanzar pawh a phui thei ang berin ka pawtphui nghal vek. Khumah let lehin ka pindan chhung chu ka enkual a, thil diklo engmah a awm lo.
"A-les." tia phun sapin ka mumang nge atak tih pawh ka hriat loh nichin maia kan inbiakna kha ka ngaihtuah a. Mumang pawh lo ni se a thusawi khan awm zia a nei ngei ngei ang. Engtik atang khan nge mumang mai mai ka lo rin theih tak le. Hei chu a dan a dang tlat.
.
Khumah chuan puansin tha thlapin ka mu leh a, ka rin loh takin rei vak loah ka muhil leh ta hlauh a.
.
Ka muhil ka harh leh chuan khua alo var vek tawh. Tho vatin ka intifai a, inhnuai ah ka nu puih tumin ka chhuk thuai a. Choka a ka lut min hmuh rualin tihtur min lo hrilh zung zung a, ka mumang leh nizana thil thleng khan ka rilru  a luah zui ta lem lo.
Chaw ei khamah office kal tura insiam in ka chhuak thuai a. Ka scooty! Nizan khan Eleazer hnen atangin ka chahbi ka la let miah lo. Engtin nge ka ngaihtuah chhuah miah loh theih zawk a.
.
Taxi a kalin office ka thleng a, nimin khua a lum tehreng nen vawiin chu a vawt sur mai lehnghal a, in a awm mai mai a chakawm khawp mai.
.
Ka phone a rik chuan ka bag atanga phawrhin caller ID ka en zet hnuah ka pick up a.
.
"Ngaih ka hlawh lo hle mai." Muanpuia aw ka hriat chuan ka nui ve sak a. Ka be hmasa miah lo tak alawm.
"Ka lo ngai viau mai thei che a. Mi buai lutuk chu ngai pawh ni ila ka hmu thei chuang lova."
Eleazer hmel ka mitthla a lo lang ringawt vang chuan ka inthiam lo. Muanpuia lakah hian ka inthiam lo takzet. Mahse, chiang taka hriat ka neih chu Muanpuia aw ka hriat hian Eleazer angin ka chhungril a khawih lo tih hi a ni! Heihi chu theihnghilh zawk teh ang.
.
"Zanin ah in inah lo kal ka tum ang ka lo tia."
"Um, lo kal rawh."
"Chu aia nasa deuha lo kal tura min duh thu i sawi ve te pawh ka ring a." a tih chuan ka nui leh tawp. Han tih vel chiam hi ka thiam lem lo tlat a ni.
.
"Hei hna ka tan dawn a, ka hman veleh ka lo be dawn che  nia."
.
Phone kan dah a, ka mimal chungchang chu ngaihtuah zui duh lovin ka hna ka khawih zawm nghal mial mial a.
.
Engtin tin emaw ni kan hmang ral a, zantir ah Muanpuia'n a lo kal leh theih loh tur thu min rawn hrilh chuan ka thaw deuh huai zawk. Ka awm dan hi a tha lo tawp mai. Muanpuia hi ka then mai dawn em niang? A hun ka khawhral sak mai mai niin ka hria.
.
Door bell a ri ral ral a, Muanpuia a nih hmel loh bawk nen hawn tumna pawh ka nei lo. Ka nu chuan kawngka hawn ka tum lo tih min hmuh chuan a tho thuai a. Tunge lo kal ngaihven lovin Adaalat chhuak mek chu uluk lutuk hian ka en a.
.
"I lo dam maw?" tih ri ka hriat chuan ka hawi chhuak zawk.
.
 "Ka lo kal dawn lo iti sia." ka ti hu a, ka inthiam leh lo deuh. "Tinge dawt i rawn sawi kher a.." nui chungin ka ti leh ta zawk a. Ka bulah thuin langsar lo tak hian ka kut arawn hmer zauh a. A nui suk bawk.
.
Muanpuia fel ve em em na chu ka nu leh pa a kawmngeih tlat hi a ni. Ka pa hi mi tawng tam a nih loh vangin Muanpuia bula a titi ve bawrh bawrh ka hmuh chang hian mak ka ti zawk thin. A fala awm pawh kan tum buai lem lo. Keichu an thingpui lum saktu ka ni pha tawk a nih mai hi.
.
Ka nu leh pa an mu a, kan pahnih chuaha kan awm hnu chuan min rawn thuthnaih ve ta viau. Ka kut a khawih nuap nuap a, a awm dan leh min melh dan, a mitmeng, ka laka a nungchang ka chik vang vang hian a thutak em em niin ka hre thar leh bawk.
.
"Tihian kan buai dun reng sia, nupui pasal nei rual kan ni tawh tho a, ti ve tawh mai ila.." ka rilru hriat tum niawm tak hian min melh chiang ngang mai. A thusawi chu fiamthua lak sakin ka nui mai a. A hranpaa hnial vak pawh ngaiin ka hre lo. Ka rilru a buai khawp mai.
Min kuah vang vang a, a chhan enge tih ka hriat hauh loh hian a thaw huai a.
.
"Ka lakah hian i serious miah lo." arawn tichhuak ringawt. "Mahse ka bansan chuang lovang che." a khabe ka chhipah nghatin ka samah min fawp zauh a.
"Pathian ruat kan nih chuan engkim hi a nih dan tur ang thlapin a awm tho ang." he mipa tha tak hi ka phu reng em le? A kawngah ka ban pahniha ka kuah chuan lungawi hmel zet hian a nui nghawr dat mai. A ban pahniha min kuah letin a insawih hlu hlu a.

A haw dawn chuan a motor dahna thleng ka thlah a, kan garage pangngai a a dah vangin a thim angreng. Min rawn hnaih a, ka ban pahnih lain a nghawngah min kuah tir a. Ka biang vei lamah fawpin dinglam a fawp leh a, ka lo dawh ve tawp. A tha e. Tunah hmangaih  lo niin la inhre mah ila, hetiang mipa fel lutuk hi chu hmangaih a harsa hauh lovang.
.
Kan in zawn kawngpui a mihring thawm niawm tak thum deuh dawt kan hriat chuan kan inen ha a.
.
"Ka va en dawn em?"
"Engvakmah anih ka ring lo." ka tih chuan ka chalah min fawp leh zauhin min kuahna a thlah ta hram.
. 
A tlan liam hnu chuan inchhungah lutin tih fel ngai ka tifel zung zung a, ka mut atanga reilote ah ka muhil ta hlauh bawk.
.
Ni dang ang bawkin office ka kal a, office ka luh chuan min lo en deuh hrek hrek hlawm hian ka hria. Ka ngaih an titha chiah lo. Ka dawhkan leh a bul vel ka hmuh phak rualin engvanga min en hrek hrek nge ka hrethiam ta chauh. Ka nui sak a.
.
"Nula vannei tak i nih hi. Hetiang khawpa pangpar tam chu.."
.
"Ka lo pe then ve dawn che mi?" ka piaha thu thin nu upa tawh lam chu ka enin ka nui a. Ka dawhkan a awm ber pangpar a card awm chu lain ka en a, ka nui hmel a reh riai riai mai. Eleazer hian eng vanga hetiang thil rawn ti hi nge anih? Vawiin hi ka Birthday a ni tih engtin nge a hriat?
Pangpar chu ka hung sawn a, min lo thawntu chu tupawh mi se pangpar mawi tak hmuh nilen chu thil hreawm anih hran loh hi. Hreawm maw? A nuam lutuk zawk.
.
Office bana hun a, ka kal chhuah chuan ka beisei loh lutuk in Muanpuia'n min lo nghak reng tawh. Chhun ah khan kan inbe miah lo a, a buai anih ringin ka be hmasa bik hek lo. Min rawn hmuh chuan min rawn pan nghal ruak ruak mai.
.
A car a ka thut luh rual deuhthawin rang deuh hian ka biangah min rawn fawp zauh a.
"Happy Birthday."
"Ka lawm e." ka tih chuan a biang a kawk zauh a. A chet dan hi a naupang ru riau zel. Miin min hmuh theih leh theih loh en zetin a biangah ka fawp zauh a, ka inlakhran hnu pawh chuan nuam tih hmel zet hian a la maimitchhing vung vung. A fiamthu tih ka hria. Nui hak hak chungin a malah ka beng taih a.
.
"Chuan, khawnge kan kal dawn?" kan in lamah kan kal lo tlat.
.
"Birthday dinner kan kil dun ang chu. Duh angin i bulah ka awm tam thei si lova. Vawiin chu special day alawm."
.
"Ka lawm e aw." Dinner eidun tura min hruai vang ni lovin ka tana ni pawimawh min ngaih pawimawh sak em em vang hian ka lawm lutuk.
"Thil dang pawh ala awm a nia." tiin a nui suk a.
.
"Helamah hian aw." dawra hnathawk chuan polite tak hian min lo welcome vat a, Muanpuia hian table a lo hauh sa thlap a nih hmel. Kan dawhkan tur panin kan kal a, kan hmaa lo ding reng ka hmuh chuan ka melh sawn vat a. Eleazer hian helaiah eng thil nge a tih ve a? Kan kal dawn vanga lo awm a ni em lovang chu maw. Ka rilru hi a dik lo a nih hi.
.
Ka duh reng vang ni hauh lo hian ka mitsirin ka hmu zui reng. Min rawn ngaihven anga a lan loh vang chuan ka thaw huai zawk. Muanpuia chuan ka kawngah min rawn kuah a, kan kal pelh chiah te chuan thawm an nei hak a.
.
"A pawi lo, a pawi lo." hmeichhe aw ka hriat chuan ka hawilet ta hram.
Ka va hmuh hmeichhia chu tunge a nih ka hre ngai lo a, a kawr hma huh erawh ka va hmuchiang hle. Eleazer kutah no ruak a awm bawk. Ka hawilet leh thuai a. Engvangin nge ka va ngaihven ngawt ang?
.
COPAS (HEARTS)
.
CHAPTER - 19
.
Thantei_LauraSean
.
H & E
.
Muanpuia nen kan dawhkan tur kila kan thut hnu chuan kan awmna chu pindan hrang ang deuh a ni tih ka hre chiah. Hetia en mai pawha thil man to tak a ni tih hriat, thil mum thilkhawm inkhai siau siau hian kan awmna chu langtlang thei chiah lo hian a lo pingdang reng anih chu. Keimahin kal ni ila ka hmaa thil awm piang ka su ngei ngei ang tih tur khawp hian engmah ngaihtuah miah lovin ka lo kal mawp mawp anih ngei dawn kha. Eleazer ka hmuh vang vek! Tunah chuan Eleazer kha ka ngaihtuah nachhan tur engmah a awm lo. Tunah chauh lo pawh a awm chuang lo. Engvanga helai hmuna hmuh tura lo awm ve nge maw anih reng reng ni.
.
"I tha em? Lungawilohna nei i va ang ve?" Muanpuia chuan ka kutah vuanin ngaihthat loh hmel angreng deuh hian min en a, ka ngaihtuahna ka lo thup lo pek a ni maw? Rang zet hian ka lu thingin ka nui ta ringawt a.
"Lungawilohna tur a awm em?" ka tilet zawk ta hlauh a. A nui tawp.
.
"A tha anih chu. I ril a tam tawh em?"
"Tam tho e."
"Keipawh a tam tawh tho. Chhuna ka ei bak engmah ka ei leh tawh lova. Anih chuan_" kan awmna pindan light chu a thim thut. Ka chiai nghal deuh der mai.
"Tinge a?"
"Ka hre biklo."
Pawnlam ah khan khua ala thim lo chiang a, tuna kan awmna pindan erawh hi chu a puk deuh vangin light a awm loh chuan ai mit thlawn ang mai a ni. A thim lutuk.
Mihring rilru chak zia hi mak ka ti zawk thin. Thil hlauhawm thleng thei chi hrang hrang ka ngaihtuah hman vek nia! Min zui rutu an awm anga hetiang thil hi min tihnat tumin an ruahman pawh a ni thei. Ka tlan chhuak mai dawn.!
.
Ka tho kang chiah tihin light arawn eng leh a, ka thaw hawk mai. Mitvai chum chum chungin Muanpuia hmel ka en a, a hmel atang chuan ka chiai tih arawn hrethiam tih ka hria. Ka kutah min rawn vuan thuai a, ka thu leh ta riai riai a. Dawhkana thil awm ka hmuh chuan ang pham chungin Muanpuia chu ka en leh a, rilru hahdam huai hian ka thutna chair chu ka ngheng hnawk a.
.
"Hetiang thil tih hi angai lo asin.." ka ti nain ka hmel atang chuan ka lawm zia a hre tho ang.
"Cake aia thil hlu hi i phu zawk a__" sawi zawm leh mai tur hre lo niawm tak hian ngawi leh datin ka kut arawn vuan a. "Happy Birthday my love!" ka kut chu a hmui bulah a la kangin a fawp zauh a. Sawitur reng reng ka hre ta lo. Engtin maw min koh kha? A hmel chu ka en a, hetiang baka mihring titak hmel pu hi a awm theih dawn em ni?
.
"Ka lawm lutuk." ka ti sep ringawt. Hetiang thil zawng zawng hi Muanpuia lakah hian ka beisei hauh lo asin. Ka kut la vuan reng chung chuan a thutna atangin a ding chhuak a, ka mitah min enin a hawisawn eih lo. Ka thutna bula arawn thingthit chuan eng thil nge tih a tum ka hrethiam..
.
"Muanpui_" a nui suk ringawt. A kawrhma ipte a zen a
Light a thim leh ta!
Engmah ka hmu thei lova,thawm ka hriat chu Muanpuia phun hluk ri niin ka hria. Kan pahnihin kan che chang lo. Thil thleng tur ngaichang ang mai hian kan ngawi dun ta ran mai. Second 30 vel a ni angem ka hre lo, light arawn eng leh a kan pahnih chuan kan thaw ri huai a. Muanpuia la thingthi reng chu en in ka nui tawp. A ni pawh a bang chuang lo. Kan pahnih chuan za lutuk hian kan nui leh rih. Hetiang thil a thlen ngai awm ka la hre lo, movie ah emaw ka lehkhabu chhiar tawhah pawh tunang hun laklawh lutuk a light thim hi ka la hre ngai lo reng reng. Dawhkan a cake chu ka tum vang ni miah lo hian ka en a, a nui tawp nghal chawt a. Ka hmel min hmuh chuan Muanpuia pawh a nui tawp nghal chawt mai. A thiltih tum mek chu a hre tawh lo a niang, rawn ding nghalin dawhkana cake chu mak a ti em em tih thup miah lo hian a en ve ta reng a.
.
Cake lai takah chuan chemte; te chhelo tak hi a bur vu a, cake zai na tur a ni lo tih a len dan atang chuan a chiang lutuk. Nichin khan he chemte hi dawhkanah pawh hian a awm lo hrim hrim.
.
"Heihi enge a awmzia?" tiin min rawn en a, ka lu ka thing ringawt. Nichin khan Eleazer chu ka hmu ngei a, mah se, hetiang thil hi a ni chuan a tih duh ka ring lo. Engvanga a ni kha ringhlel lo nge ka nih ka inhre hek lo? "A thalo tawp mai. Kal ang." a ti bung vut a, nichin maia a hlim nui hmel kha chu bo chiang tak a ni. Ka banrek ah min kaiin ka thutna bula ka bag dah chu a la lawk a, dawn awm miah lo hian kan awmna pindan atang chuan min kal chhuahpui nghal a. Engtianga reaction lo neih tur nge pawh ka hrethiam lo. Min kaih ang ang chuan ka zui ve tawp mai a ni.
.
Counter ah chuan min dinpui lawkin mi pakhat lo awm chu tur zet hian a melh a. Middle school kan kal ho lai atang tawh leh tun hnua kan inhmuh leh hnu thleng pawh hian tunang taka a thinrim hmel hi vawikhatmah ka la hmu lo.
.
"Light a thim lai khan kan awmna hmunah khan tunge lo kal?" a ti bung vut a. A biakpa chu a hamhaih hle.
"Ka hre miah lo.."
"Thil duhawm lo thleng thei a nia, in customer te in dawr chhungah hian an him lo a nih chuan dawr tlak in ni lo."
"Eng thil nge i sawi chu?" a tih bah nawk nawk mai.
.
Muanpuia chu harhchhuak thut niawm tak hian min vawnna thlahin "Lo awm rawh, ka lo let lehnghal ang." tih leh min kalsan a rual a. Kan awmna pindan lamah khan kalin reiloteah arawn let leh a, Cake kha arawn keng chhuak bawk. Mahse cake-ah chuan chemte kha a awm tawh miah lo! A mak ka ti lutuk takzet.
.
"Light thim vawihnihna kha ka request lawk a ni lova, khatihlai tak khan he cake-ah hian tu emaw in chemte a vit bur a ni. Chu chemte chu nichin lawka kan lo kal chhuah leh ka va let leh inkarah khan a lo awm lo leh hman bawk. I dawr hi a him lo takzet anih hi. Hetianga infiamna hi vawikhatmah ti leh tawh suh ang che u. Helai hmunah hian hmanhmawh taka chetla hmuh i nei reng reng em?" a biakpa chu a enchhuk run a, a thimrim insum hmel chuan dawr nghaktu nge manager nge, tunge anih ka hre lo, a tizam tih a chiang reng mai. Chhang mai lo hian a chil a lem khalh a. Ka lo khawngaih hman hial.
.
Muanpuia banah chuan vuanin "Kal mai ang, eng thil mah a thlen chuan loh hi." ti sapin a mitah ka melh zauh a. Tlem chuan a inthlahdul leh deuh tih a ban thahrui chet danah ka hre thei. Ngaih dan ni lo lutuk a a lu thing chungin a cake ken chu counter dawhkan ah chuan a dah deuh chawrh a. Engtia lo awm ve tur nge ka hriat loh vangin ka lo en tawp.
.
Min en a thle nghutin a thaw huai a. Nem deuh zawk hian "Kal ang le." tih pahin kawngka lam kan pan lehnghal chu a ni der. Ka mit ka len kual deuh nain Eleazer hmel ka hmu tawh lo. EEngvanga hmuh in beisei ru nge maw ka nih reng reng  ni?
.
Muanpuia nen a car-a kan thut luh leh hnu chuan a motor tinung mai lovin min hmachhawn a, ka kutah vuanin min en vung vung a.
"Ka tih palh. A zialo hle mai. Beisei loh thil a thleng ta sia__"
.
"Engkim a tha vek alawm. I thiam loh anih loh kha, hreawm tih chhan tur a awm miah lo." ka ti zung zung a. A hmela hlawhchham intihna lang chhuak vang chuan ka lainat niin ka inhria. "Beisei loh thil thleng a nia, ka birthday te chu kan la hmang leh fo dawn alawm."
.
"Ka lawm e." thil dang sawi zui lovin a kawrhma ipte a zen a, bawm arawn phawrh chuan ka en hau mai.
.
"Nichin khan tum angin kan awm ta si lova__ Nakin ah anih dan tur ang takin ka la ti leh tho ang. Tunah chuan ka ngaihzawng ini tih chhinchhiahna chauh ni rih mai rawh se." tih pahin bawm chhunga zungbun chu a lachhuak a, hnial tum pawh ni ila hnial hman miah loh hian ka kutzungtang ah min bun tirin ka kut a hmer vang vang a, nui hmel puin min en ta.
.
"Anih chuan hmun dangah eitur zawng ang aw." a tizang ta vah a. Kan tlan chhuak nghal a ni deuh mai.
.
Thui pawh kan la tlan hmain min rawn en zauh a, "Kha pa kha ahmaa kan pahniha kan awm laia rawn betu che kha a ni em?"
.
"Hm, eng maw?" ka lo ti haw. "Tunge i sawi chu?" ka ti leh a.
.
"Nichin khan kan awmna tur pindan kan pan lai khan ka hmu a, nangpawh i hawilet kha. Tunah khan ka hmu leh a."
"Khawiah?" ka tiliam puat ringawt. Ngaihven tak anga lan ka duh der hleinem.
.
"Kan intlan pel chiah."
"Ka hre lo. Ka lo hmu miah lo anih dawn chu."
.
"I lakah hian mi dang thik ka nei dawn anih chuan kha pa kha anih ngei ka ring." Muanpuia chu chiang zet hian ka en a, a fiamthu anih ka rin vanga a hmel en ka nih mai bakah a ni hian Eleazer a thik ang maw? Kan lo inzui__Ni lo, inzui tih tham pawh a ni lo. Kan lo inhre ve zuai tih pawh a dik chiah chuang lo. Kan thleng thui phian sia! Engpawh chu lo ni se, Muanpuia hian thik chhan tur a nei hleinem..
"A en dan che kha mipa ka nih angin ka hre vek alawm." a ti leh  mai a. Ka chhang kher dawn em? Chhan a tul reng em ka hre lo.
.
"Ka tan engmah ani hleinem." ka tih chuan min rawn melh leh zawk.
.
"I thusawi chu dik ngei rawh se." a ti nghat a.  Muanpuia nen min hmuh dun vawikhat naah khan Eleazer khan amah kha ka chetsual pui tih ngaih dan Muanpuia hian a neih theihna tur tawngkam a hmang a nih kha.. Eleazer phiangsena hi!
.
Thil dang sawiin rei vak lovah Muanpuia chu pangngai takin a awm zui leh mai a, keipawhin a thusawi kha vei zui run ka duh bik lo.
Dinner kan ei zawh hnu rei vaklo ah min thlah a, in ah inthlak zawk tura haw a duh thu leh a lo kal lehnghal tur thu sawiin car kawngkhar min hawn sak a.
“Hun nuam tak min hmanpui a ka lawm lutuk a nia.” Car atang chuan ka la chhuk mai lo.
“Chu chauh chu maw ka dawn let tur?” a sawi awmzia ka hria.
“Phutlet neiin I ti tih ka hre hleinem..” ka tih chuan za lutuk hian a nui hawk hawk mai. Eng emaw zawng tak chuan kan inpawh em asin. Amah hnaih lehzual tur hian ka inpeih dawn ni a ka inhriat veleh kawlphe ang maia rangin Eleazer hmel ka mitthla ah arawn lang nghal ziah hi engtikah nge a reh ang le? Ka mitthla a hmuh pawh ka duh lo! Ka thil ngaihtuah hi ka duh lo.. Phatsantu leh uire ka ni hauh lo ania! Eleazer nen inzawmna kan nei miah lo..
Nui ve sakin “Ka lo ngaichang ang che.” a rawn kun hniam theih nan a kawr hmaah pawtin a biangah ka fawp a. Ka inlak hran hnuah pawh ala maimitchhing zui vang vang mai.
.
“Ka lo kal ngei ang.” Tia min chhan  hnuah a meng ta chauh.
Car atangin ka chhuk a, inchhung ka luh dawn thlengin a din dan ngaia ding chungin min rawn enzui vang vang a. Kan ban vaia hawi letin “Kal tawh rawh.” ka ti ta ringawt. A nui a, ka chhuahna lam car kawngka chu kharin driver seat lamah a kal ta nge nge a.
.
A tlanchhuak lai pawh ka enzui ta lo. Kan garage zawn ka thlen chuan ka ding chatw. Ka scooty lo inkhuh fel thlap chu panin a khuhna ka hawng a. Eleazer hian engtik laiin nge a lo dah le? Chahbi a invuah leh invuah loh ka en vat a. Chahbi a invuah lo. Hmanhmawh rilru deuha khuh leh sawk sawkin inchhung ah ka lut nghal a.
.
Ka nu’n min hmuh rualin mi pakhatin ka scooty chu a lo dah thu min hrilh a, lo dah tu chu a hmelhriat a nih leh nih loh ka zawh chuan a hmelhriat a nih loh thu a sawi leh mai a. Min ngaihven zui lem lovin ka nutei thutna lam a pan nghal daih.  Ka nutei te lo leng pawh chu va pawh ve rih lovin ka room-ah ka chho a, ka intih fai hnuah ka chhuk leh ta chauh a. Ka rin aiin Muanpuia chu a lo kal leh har ta phian bawk nen ka nutei fanu chu ka room ah chhoh puiin movie kan en ta daih a.
.
“I phone kha I pick up dawn lo mi?”
.
 Rintei'n ka naka min nghawk zauh chuan amah ka en ha a. "I phone kha i pick up dawn lo mi?"
.
"A ri tih ka hre miah lo." tih paha thuchhuakin ka phone chu ka la a, min lo call tu chu Muanpuia a ni tih ka hmuh chuan ka pick up nghal.
.
"Ka lo kal thei dawn lo a nih hi, a zialo hle mai a. Zanin hian ka hna thilah Kolasib-a kal a tul thut a."
"Oh! A nih chu."
"Ka duh reng vang a ni lo tih i hria tiraw?"
.
"Aw, a ho lutuk. Tluang deuhin i kal dawn nia. Chanchin min lo hrilh la aw."
.
"Okay. Naktuk ah ka lo bia ang che."
A aw chu a pangngai chiah lova hriatna ka nei tlat anih chu. Engvang  nge pawh ka hre bik lo.
.
"I tha hrim hrim em?" ka tih chuan nuiin a that thu a sawi thuai a, kan inbiakna kan titawp zui nghal bawk a.
.
Thil dik tawk lo awm chu ni se min hrilh maiin ka ring. Ngaih that lohna em em pawh nei zui lovin Rintei bulah chuan mu chungin movie ka enzawm leh a, ka lo mutthilhsan daih lehnghal. An haw lai pawh ka hre reng reng lo.
.
Nihnih a ral leh hnu pawh chuan Muanpuia nen kan inbe leh ta lo. A thiante emaw a chhungkhat hnaite atangin chanchin chhe lam ka hre lova, a buai lutuk vang a ni ngei ang. Thil thalo thleng palh a awm anih chuan ka hre ve thuai tho ang. Engvanga thil duhawm loh a thlen palh hlau tlat nge maw ka nih reng reng ni.
.
Ka nu thil min chah lei turin office ban veleh ka thil lei duh awmna lam ka pan nghal a, keiman mamawh neuh neuh ka neih tho vangin ka en kual dan dan a.
.
"Inbe teh ang!" ka phu nasa lutuk. Ka hnungah min si lo chauh hian Eleazer chu a ding run a, ka hawikual lem loh vang khan ka lo hmu lo a nih ka ring.
.
"Hetah enge itih?"
"Ka lo zui che." min chhan dan tlang lutuk vang chuan inherin ka hmachhawn a, ka duh aiin kan inhnaih mah mah a ni.
.
"Tawlh hla rawh." kal pelh mai tumin ka pen a, ka kutah nghet zet hian min vuan a.
.
"Khawiah nge i ngaihzawng pa kha a awm?"
.
"Eng atan nge i tih?" ka tih chuan za lo lutuk hian a nui lui hak a.
.
"Amah hmuh ka duh vanga a awmna zawt che ka ni lo_"
"Anih te chuan tinge nangman a awmna chu min hrilh mai loh ang?" ka melh ram ram a. Dawr chhungah hian camera an dah vek vangin mi dang hmuhnawm tih tura awm ka duh miah lo. Kalsawn ka duh bawk.
.
"I hre lo tak tak ami?"
.
"Min zui tawh lo khan i tihtur chu ti mai la. Hre lo." min enin a sam a tuai puat a. A hmel chu ka lo enchiang lem lova a lang dang(pale) deuhin ka hria. Nge T-shirt dum a hak vang pawh ka hre lo.  "Tinge i hriat duh?" min la chhang chuang lo. Min en reng a, ka awm a nuam ta chiah lo. "Ah_Scooty kha tuin nge kan inah dah a? Ka lawm e aw." ka tiliam puat a. Nia, tupawh ni se lawmthu hrilh chu ka ba ve hrim hrim. Ka buaipui ngai miah lova a lo siamthat mai bakah kan in ah a lo dahtir leh thlap a nia.
.
"I lang  nalh hle mai." a tita daih a. Ka inthunun hman lo. Nui chungin ka en leh ta ha mai.
.
"Chutiang thu i sawi chuan khawiah emaw min be tura awm fal i duh ziah em kha?"
.
"Ngeiawm viau lo teh. Biak che ka duh vang alawm ka lo pan vang vang che." ka basket khai lai chu zo zet hian min laksak a. "Mamawh dang ila neih chuan tunah la la.."
.
"Ka nei tawh lo. Khawi basket kha."
.
"A chang chuan i bula awm hi ka ning tep thin a nia."min en chuang lovin basket khai chung chuan min zui zel a, min en lo nain ka awm dan a ngaichang reng tih ka hai bik lo.
.
"Huh.. tunge ning chung chunga ka bula awm tura tilui che?"
.
"Kha maw! I tawngkam hi a na thin viau a nia." a ti nuap nuap a.
.
Thil danglam a awm tlat a ni. Tuna Eleazer nungchang ang hi ka la hmu ngai miah lo tih ka chiang. Nungchang chi hrang engzat chiah nge maw a neih reng reng le.
.
"I tha meuh maw?" ding meuhin ka hmachhawn leh a, tawngkama min chhang lovin a dar a tiche zoh ringawt. A mitmeng dul deuh ruih chu a mut that tawk loh vang a ni maithei. Tuna taka a landan mai maiin min tibuai ru viau hi a tul hran lo khawp mai.
.
"I duh i lak zawh chuan kan kal thei em?"
.
"I duh chuan i kal thei reng."
.
"Muffin.." awki hniam zet hian a tawng a. Hetianga min ko thin hi ka duh lo. Atana mi bik ni angah ka inngai leh palh mai ang. Eng maw? Ka thil ngaihtuah zet chu! Thil dang ngaihtuah tumin ka hawi sawn a, tul lo zet hian ka thil duh pawh ni lo ka enkual ta ringawt. "I duh vanga en ini tawh lo tih ka hria a nia." ka hawi chhuak chuang lo.
.
Dik tak chuan inhmuh emaw inbiak emaw a tul atih apiang hian a ni lo lam leh ka duh loh dan thil a thleng ziah a, khawiah mah zui ka tum therte lo.
.
"Ka zui dawn chuang lo che a kal tawh mai rawh. Bakah_" ka hawichhuak a, Eleazer chu ka bulah a lo awm tawh miah lo. A va mak tak! Ka hawikual a ka hmu mai lo lehnghal.
.
COPAS (HEARTS)
.
CHAPTER - 20
.
Thantei_LauraSean
.
H & E
.
Eleazer rilru a zawng chungin ka kal kual a, counter bula a lo ding reng ka hmuh chuan ka ding chawt. Eng thilti ah nge maw a inngaih le? Ka thil lakkhawm ho kha bag-ah a khungtir fel vek tawh tih ka hre nghal mai. Ka pan nghal vat a.
.
"Tinge i lo khungtir ringawt a." ka va ti nghal tawng. Min hnial tum hmel pawh pu chuang lovin ka lamah arawn thle zoh a.
"Kal ang le." a ti ringawt. Leh ringawt a!
"Eng thil nge i hriat leh tak a?" dik tak chuan maw pangngai taka a bula awm hi a theih hlawl loh.
.
"Thu danga peng lovin zanin chuan mumal takin kan inkawm thei tawh ang." a tih chuan ka en tawp.
.
"Eng chungchang nge sawitur kan neih? A mak ka ti, Eleazer_"
.
"Chhuak phawt ang." tih pahin ka banrek ah min rawn vuan a. Min deh ruala ka feel hmasak ber chu a taksa sa vur mai chu a ni. A dam tha lo anih dawn hi. A hmel en pawh hian nidanga a lan dan nen a inang lo reng reng bawk. Nichin khan heihi ka ngaihtuah tawh a.
.
"I sa hle mai." ka tawng chu hre awm pawhin a awm hran lo. Dawr atang chuan kan inzui chhuak leh ta poh a. A duhna hmuna zui tumna erawh ka la nei chuang  miah lo.
.
Car hnunglam kawngkhar a hawng a, ka thil lei ti ila ama lei a nih tak vek hi, a seat hnungah dahin passenger seat lamah a kal leh a. A awm dan hi a dik miah lo. Nichin mai ai khan a lang dang(pale) tawh zawk. Thi dang mai tur hmel a pu alawm.
.
"Lo ding lawk.."
"Nge?" ti supin a ding chuang hlei lova. Ka zui ve ta phawt. Nichin khan thu danga peng lovin mumal taka kan inkawm theih thu a sawi tak kha  maw. Thil pawimawh tak sawi tur a nei ngei aniang.
.
A in lam panin kan kal tih ka hria a, ka hnial buai ta lo mai. Duh lo tak tak  ni ila tunah hian a car-ah ka chuang hauh lovang. Kan ngawi reng a, tumah mah chuan tawng pawh kan tum chuang lo. Rei vak lovah a in kan thleng thuai a, a chhuk rualin ka chhuk ve vat a.
.
"Kawngkhar ka hawn sak hun che lo nghak la." a hmel ka en a, thu pangngai sawi mai hmel a pu.
.
"Keimahin ka chhuk thei tho alawm."
"Hawnsak kher che ka duh alawm."
"Ka chhuk tawh reng hi." ka tih leh talh chuan za vak lo hian a nui suk.
.
"Anih chuan i bungrua hi chu tah hian lo awm mai rawh se, kan inbiak zawhah ka thlah dawn che nia." a tih chuan tawngkaa chhang lovin ka bu nghat ringawt.
.
A inchhungah kan inzui luh chuan ka tum lawk pawh ni miah lo hian ka en kual den den a, ka kal khat tawh deuh nain engvak mah danglam a awm lo.
.
"Khatah khan lo thu rawh." sofa awmna lam chu a mitmeiin min kawhhmuh a. Tun tum chu kan pahnih inkar thu sawi lovin thu mumal kan sawi ve hmel ta tak tak a nih hi. Eng chungchang ber nge min hrilh a tum tih ah ngaih dan ka nei miah lo. Sofa-a thu chungin a room lama a kal chu ka en tawp.
.
Rei vak lo hnuah a lo chhuak leh thuai a, ka beisei angin engmah arawn keng chhuak lo.
.
"Eng thilah nge kan inbiak dawn?" min chhang mai lovin ka bulah arawn thu te te a.
.
"Alawmi leh Tabithi chungchang ah hian engti zawng maha i inrawlh tawh loh ka duh a_" enge a sawi zel dawn ngaichangin ka la chhang lo. "Dinhmun hlauhawma i awm lai hmuh ka duh loh vang leh i nat tel ve ka duh loh vangin venhim che ka duh bawk a_" chiang lutuk hian min en in ka chhan mai loh vang chuan a ngawi leh rih. Ni dang anga ka hnial nghal bawrh bawrh lo chu mak a ti ve deuh pawh ani maithei. A ngawih rei tak deuhah chuan "Chuan?" ka lo ti zauh.
"Ka sawi tum ber chu tuna ka sawi chinah pawh khan a chiang tawh a. Hetiang thilah hian inrawlh ve tawh suh."
.
"Inrawlh lo tura min duh anih chuan ngati nge atirah khan inrawlh lo thei lova min siam? Nge, tunah hian thil dang hriat thar i nei?" tawngkam pangngai leh dam thlapin ka tawng a, mak min tih hmel zawk mah.
.
"Engtikah mah ka hrethiam thei ngai dawn lo che tih hi i bulah ka la sawi lovin ka hria."
.
"I awm dan hi a mak e. Thil thleng a awm a ni chiang mai." ka tih chuan hmel dam thlup hian min en reng ringawt. Tlema thukar deuhin a khupah a kiu a nghat ve ve a, sir zawnga min rawn en a ni bawk. Hetiang em em hian mihring lan dan hi alo tha thei ngai anih chuan.. Ni love, hei chu ka ngaihtuah tur a ni lo! A hun lo ber chiang lutuk..
.
"Anih chuan kan sawidun tur chu chu zawng chu a mi?" ka ti leh a. Tawng mai lova min en reng chuan ka awm a tinuam fahran lo. Tunah hian kan pahnih chauhin kan awm tih ka hrechiang ropui mai sia. Min la chhang chuang lo. Thu ngil deuhin a kut pahnihin a hmai a tuai puat a.
.
"Ni lo. Chu chauh chu ni love."
.
"Anih chuan enge thil dang sawi tur la awm?"
.
"Aw le. A tha e,. Kei hian nupuia neih che ka duh tih sawi ila engtin nge min chhan ang?" a hmel ka en duh lo, ka hawisawn nghal daih.
.
"Huh.. Fiamthu sawi hun pawh a nih loh hi."
.
"Min en la, ka fiamthu niin i hria em?"
.
"En kher che pawh tul ka ti chuang lova. I sawi duh i sawi zo tawh anih hmel bawk a, ka haw tawh mai ang." ka ti nghal zung zung. Mi mawl ka nih hi.. Engvanga zui thawt thawt nge maw ka nih reng reng ni? Tumah dem tur a nei lo, dem tur zawn pawh ka tum lo. A hmel lan dan that vak loh vang khan ka lo nem hmanhmawh a nih hi mawle.
.
"Eng thu nge ka sawi i hriat kha. Muffin, ka serious a nia." a thut dan a la tidanglam lo. Chiang lutuk in min en reng tih ka hria, a hmel ka la en duh lo ngar ngar bawk. Min neih a duh thu a sawi vang ringawt a danglam tur ka ni lo. Mahse, ka chhungril ah hian mak takin ka tha a khur der der a, ka hlauhthawn vang a ni lo. Engvanga khur ru der der nge ka nih ka inhre hauh lo mai.
.
"Kan pahnih hian kan inneih chhan tur engmah a awm lo tih i hriatchian em kha. Bakah Muanpuia nen hian inneih thuai kan tum a, i lo la hre lo tih ka hre mai." Eng thu nge maw ka sawi hi le? Muanpuia nen hian inneih kan tum maw..?? Kei pawh hian ka awih lo. Mahse ka tilang lovang.
.
Thu ngilin thawk a la a, ka rin aiin a tawng leh har.
.
"Engvangin nge in inneih ngawt ang?" a ti hniam ruih a. Thinrim hmel a pu lova, chiai hmel a pu hek lo.
.
"Mi pahnihin inneih kan tum chuan chhan chiang tak a awm ve bawk ang chu." ka nui lui ngial. Ka duh hunah chuan ka nungchanga a tel tih ka hriat miah loh nungchang pawh ka lo nei reng a nih hi!!Inringtawk tak anga lan ka tum ruh hle bawk.
.
"Muanpuia chu i hnenah lo let leh ta lo se kei hi min nei angem?"
Phawk zetin ka en a, a hmel awm dan ala pangngai reng!
.
"I thusawi chu i hrechiang lo anih kha. A lo let dawn leh dawn loh i hre lo ve chiang e.." ka ti bawng bawng mai. Ka rin loh lutuk hian a nui hawk hawk lehnghal. Tuna ka bul maia thu Eleazer hi ka hriat thin Eleazer kha ani reng em?
.
"I ringtawk viau a ni maw?"
.
"Min tina hauh lo tu chu ring tehreng e." ka ti leh salh a. A hmel ka en chuan a dur khap khap mai.
.
"Muffin.. Eng ang taka nasa in nge min tihnat tih hi i hre hauh lo tiraw?"
.
"Hriat ka mamawh ami? Nangte chu thinlung pawh nei lo i nia, i na ve thei reng reng ami? Bakah mi dang tina turin eng thil mah ka ti lo." ka tawngkam chuangtlai zet chu ka hman kher a tullo tih ka hria, mahse ka hmang tho! Cho zet hian ka en a. Ka rin loh lutuk in a thu kun deuh a, min en lo.
.
"Ni e, engmah i ti lo. Keihi ka dik lo anih hi. Haw i duh tawh kha, ka thlah ang che." muangchangin a thutna atang chuan a thochhuak a, a awm dan chuan min barakhaih tiin sawi ila a dik ber ang.
.
"Chuan, Alawmi te chungchang ah chuan ka duh danin ka awm dawn tih hria la."
.
"A tha alawm." a ti leh hmiah. He mihring hian eng thil nge a hriat a? Ni lo, kei hian eng thil nge ka beisei? Tawngkam chuangtlai tak tak ka hman nachhan hi min ngaihven ni a ka hriat  vang leh tihnat ka duh vanga hmang ka ni ngei alawm. Ka tawrh ang chhungril nat vawng vawngna kha tawng ve se ka duh vang tih ka inhria a, engahmah ngai lo anga a awm hian nuam ka ti miah lo. Hlawhchham ni a ka inhriat vang pawh ani mahna! A mak tehhrep mange! Hetiang mihring, mi dang tihnat duh ran rilru pu hmeichhia hi ka ni tih ka lo inhre ngai miah hleinem maw le.
.
Ka thutna atangin ka tho a, ka purse bak engmah ken ka nei lo. Ka thin a ur ru tlat bawk.
.
"Min lo thlah duh suh. Motor i lock loh chuan ka bungrua chu ka la mai ang." pangngai thei ang bera tawng ka tum a, ka hlawhtling chuan ka inhria.
.
"Ka va thlah ang che."
"A ngai lo. A vai khan engzat man nge?" ka bungraw man kha a nia ka zawh. Min zawt hmasa miah lovin kan chhungkaw mamawh ka lakkhawm kha aman a lo pe ngawt anih kha.
.
"Theihnghilh rawh." a ti hmuk a, tlem chuan a awki pawh a dang deuh. A ngaih dan a pel ta a niang. A pawi tawp hleinem.
.
Ka thil lei tur list ka purse-a ka la dah chu phawrhin ka en thla diat diat a, ani min pek sak hi a tulna ka hre lo. A engmah hi ka duh lo. A man zat ka rin chu ka purse atanga phawrhin a hma zawnah ka phar chhuak a, ngaih dan nih loh hmel lutuk tak zet hian min en run run ringawt a. A la duh dawn lova ka hriat vangin sofa-ah chuan ka pawisa ken chu ka dah a. Ka hmel lan dan erawh a pangngai thei ang ber a la nih ka beisei. A hmel ka en duh miah lo bawk a.
"I ti mah mah lo maw?" ti hniam ruihin sofa-ah chuan a thu a. Min umzui a tum loh zia a tilang chiangah ka ngai mai.
"Pawi ka ti hleinem" ti liam puata inherin kawngka lam ka pan nghal hmiah.
.
Ka awm dan hi ka hrethiam lo tak zet. Eng vanga thinrim em em nge maw ka nih le? Nungchang hre lo, changpat chehchhum ang maiin ka tal ni berin ka inhria. Min rawn umzui ka ring hek lo.
.
Pawn ka thlen chuan ka thaw hawk hawk mai. Engvanga hetianga awm hi nge ka nih? A in kawngkhar chu rum zet hian ka melh a, awmzia a awm lo tih ka hrechiang hle sia. A garage-ah lutin a car kawngkhar chu hawn ka tum a, ka hawng thei miah lo. A lock loh ka ring ringawt a, a lo lock pek anih hi. Ka bungrua hi ka kalsan ngawt thei hleinem maw le.
.
Muangchang lo zet hian garage atangin ka chhuak leh a, a kawngka pawh kik lovin ka lut  nghal thawr a.
.
"Motor kawngkhar i lock reng sia, ka chhuah hma khan i lock tih sawi mai la__" ka chhuah hmaa a thutna ah khan mu awn deuhin sofa ban chu  a lukham a, a banin a mit a hliah deuh bawk. "Eleazer, Car door saw i lock_" ka tawng hre lo ang hmiah hian a awm dan ngaiin a la awm reng a, panhnaiin a banah ka khawih a. A la che chuang lo. "Eleazer?"
"Hmm"
"Car door i lock a_" a awm dan hi a dik miah lo. A bana ka khawih leh chuan a sa vur mai. "Eleazer, i harh em?" a ban chu dimtein ka lasawn a, a mit a chhing tlat. A pang ka dek a, a sa tih piahlam a ni. A khawsik a sang hle a nih hi. Ka sawih det det a aharh miah loh vang chuan ka hlauthawng ta viau mai. A lakah hian ka thinrim tih ka theihnghilh nghal hmiah.
.
Mut remtir tumin a taksa chu ka siamrem a, a rit lutuk bawk nen a awlsam lo khawp. A harh phawt anih loh chuan a room-ah pawh sawn ngaihna a awm chuang lo. Kitchen-ah lutin tuivawt leh puan fai ka la a, ka che hlawk hlawk a ni ber mai. A taksa tlem tala ka tidai anih loh chuan a hlauhawm theih hial ka ring.
.
Dimtein ka puan chiah huh chuan a chal ka dep a, ka ko mawlh mawlh bawk a. Thawm a chhuah tawh lo hrim hrim. Hetiang chunga amah chauha ka kalsan anih chuan mihring tia sawi tlak ka ni lo ngei ang. Eleazer ni kher lo pawh ni se, tupawh hetiang dinhmuna awm kalsan hi a theih loh. A chhungte biak tum ila a that ka ring. A kekawr ka dap thuak thuak a, a phone a ak lo leh zel. Khawiah nge maw a phone pawh chu a dah le?
Ka hawi kual thuak thuak a, chhuata a phone tla ka hmuh chuan ka chhar thuai a. A lo lock lo hlauh. A phone screen ka en chuan ka phu deuh zawk mai. Ngaihtuah zui duh lovin a chhungte phone number ka zawng a. A nu niawm takin aw zangkhai vaha phone  alo pick up chuan thil awmzia hrilhin lo kal mai tura ka duh thu ka hrilh zung zung a. A chiai nghal chu a ni deuh mai.
.
"Serious lutuk a ni lovang. In lo thlen hma chu ka lo awmpui ange." ka tih zung zung a.
.
"Engtin nge a serious lo tih i hriat. Min lo phone nghal tur che alawm." a ti bah nawk nawk mai. Ka thiam lo hran lo. A fapa a ngaihtuah zia a aw atangin a langchiang em a, tu nu pawhin hetiang hian an tih vek ka ring. Ka chhan leh hun pawh nghak lovin phone a off a, hrilhhai zetin phone chu ka en ta ringawt.
.
Eleazer thawm ka hriat chuan ka hawi vat a, sa hal niawm tak hian harh chiang lova a kawr phelh a tum ka hmuh chuan ka panhnai nghal vat a.
.
"Lo che suh, keiman ka lo ti ang. Engtinmah i awm dawn lo a nia." a mitmeng chiang lo ruai ka hmuh chuan ka chhungril a hlauhthawnna ka neih chu a nasa lutuk. Eng thil tha lo mah Eleazer chungah hian a thleng dawn lo.
A nu te pawh chu an va rawn thleng har ve maw le..
A kawr chu phelhin a dul vel ka khuh a, awm bawr erawh a ruak. Hetianga damlo hi ka la buaipui ngai miah lo bawk nen tihtur ka hrethiam tehchiam lo khawp mai. Puan chu chiah huhin a chal leh a awm vel ka dep leh ta ngawt a.
.
"Eleazer, i harh em?" a biangah ka khawih a, chiang lo riai a rawn mengin min en a, muangchang hian a mit a chhing leh riai riai a. "Engtinmah i awm dawn lo a nia. I tha leh mai ang." ka ti mawlh mawlh ringawt.
.
A in pawnlama thawm ka hriat chuan ka thaw huai mai. Hmanhmawh takin an che tih hriat hian an ri deuh sun sun a, dawn awm lovin kawngka arawn inhawng thuai a. Mipa pahnih leh nutling pakhat an rawn tlan lut hlawk hlawk a, nu chu Eleazer nu anih ngei ka ring. An inang phian.
.
"Engtin nge a awm?" chiang lem lo hian min enin min pel thuak a, min su deuh nawk bawk.
.
Thil thlen dan ka sawi zung zung a, a nu nia ka hriat chuan "Ka hlauhthawn ang chiah. He mihring luhlul lutuk hian a taksa zawh tawk a ngaihtuah ngai lo. Mampui, hmanhmawh ru." tih pahin tlangval lian deuh deuh pahnih chu a en a. A mittui a hru zauh lai chu ka lo hmu reng.
.
"Ka fapa nen hian engtin nge in inhriat?" chiang zet hian min melh a, min melh dan chu ka lawm lo lutuk takzet. Eng hmuhin nge maw min hmuh le? Ka hamhaih zawk mah.
.
"Ka_Ih_Eleazer_"
"Eleazer a!" mak a tih zia a thup eih lo. "Eleazer tiin i ko amaw? Chu chu theihnghilh rawh. Engtia inhria nge in nih?" a ti leh ta zawk a.
.
"Thian satliah  mai kan ni."
"Thian satliah chu a inah hian a hruailut hauh lovang. Min lo phone a, a lawmawm. Min hawsan thei tawh ang." a ti leh zung zung a. A lawmawm tih thu kha chu a sawiri ve mai mai. A mitmeng ah hian lawmna pakhatmah a lang lo.
Tlangval pahnihte chuan Eleazer chu hmanhmawh zet hian an zawn chhuak a, awm mai dan tur hre lovin ka enzui tawp.
.
"I haw thei ka tih chu." ka chhang thei lo. Inherin kawngka ka pan a. Ka lawm lo hle. Chu zawng chu!

.
ULUK DEUH A CHHIAR TUR👇
AROMA QUEEN FLABIA FRESH - HERBAL PRODUCT MIZORAM A LO LUHNA LA REI LO, BUSINESS PLAN THA LUTUK. ZIRLAI TAN PAWH ZIRLAI TIBUAI MIAH LOH A SUMDAWN THEIHNA, HRECHIANG DUH TAN A HNUAIA NUMBER KA DAHAH HIAN BIAKPAWH THEIH RENG A NI E.
9612229037/ 9402365651
WHATSAPP GROUP SIAM A NI BAWK A, AN PRODUCT EN DUH HRIM HRIM TAN PAWH BIAKPAWH THEIH RENG KAN NI.
A TI HMASA TAN CHANCE A THA, MARCH NI 1/2018 KHAN OFFICE HAWN A NI A, AIZAWL AH REGIONAL CENTRE AWM A, OFFICE HMUNPUI AH DOCTOR TE'N AN THUTCHILH DAWN  VANG CHAUH PAWH HIAN A NGELNGHEH ZIA LEH EIZAWNNA TLAK ANIH ZIA A CHIANG NGHAL A NIA. BEAUTY CARE, PERSONAL CARE, HEALTH CARE, FOOD AND BEVERAGE ETC. A AWMKIM HLE. A THLAWNIN MEMBER ANIH THEIH RENG E, RAWN BELCHIANG LA I INCHHIR DAWN LO CHIANG LUTUK.
PHONE - 9612229037/ 9402365651