VIDA - SheKnows 7

VIDA – SheKnows
(Vee-Da)
.
By. Thantei_LauraSean
.
CHAPTER - 7
.
Thing hmun chhah takah chuan ka kal zel a, ka chhungrila hlauhna leh manganna vang chuan ka huai sawt zawk. Hlau em em mah ila kal zel loh chu tih theih ka nei rih lo tih ka hrechiang em a, ka dang ro huam huam leh ka khup zawi thut thut vang chuan chawlh ka tum eih lo. He hmunah hian zan hun ka hmang anih vaih chuan ramsate chaw atan ka inpe tihna a ni ang! Tihtur tam tak ka neih laiin ramsate ka intihhlumtir ang maw? Mihring lakah emaw ramsa lakah emaw pawh nise ka duh ka tih hma chuan ka thih a thiang lo reng reng.
Ka theih tawka chakin ka kal bek bek zel a, ka thlen chin eng ta deuh chuan ramngaw pik zual ka pel ta tih min hriattir a, dar zat ka hrelo nain khua a tlai lam tawh tih ka hria.
.
"Whoa!" ding chawtin ka thu hnawk a, pen khat chauh pawh pen leh ila ko sang zetah ka liam ngei ang. Thu chungin ko ah chuan ka dak a, hmun sang ka hlauh em vangin ka tawlh let leh thuai a. Ngawi lawk! Eng thil nge ka hmuh kha? Ka hlauhna chiah ka hria a, he ko sang tak hnuaiah hian kawngpui a awm! Engtin nge kawngpui khu ka thlen theih ang?
.
"Lalpa, min pui hram rawh!" tiin ka phun chhuak hial a.
.
Khawii laiah emaw hian pumpelh a awm ngei ang. Awm lo pawh ni se thing lian lo tak tak to rinchhan chungin muangchangin ka tawlh thla thei bawk. Ko pang ah chuan hnim leh thing to tam deuhna zawn ka zawng a, thing rinawm hmel deuh to tamna zawnah chuan kawngpui pawh tumin ka insiamrem ta sauh sauh a.

Muangchang takmeuh hian awih pangah chuan ka tawlh thla hret hret a, vawn tur awm apiang vuan zelin ka tan hnuailam en a thiang lo. Ka awmna hmun san zia ka hmuh rualin hnuailamin min hip anga ka lum nghal ngei ngei ang. Ka vawn apiang chu ka tha neih zawng zawng hmangin nghet thei ang ber hian ka hum chawt chawt a. Tuna ka hun tawng hi hmun sang hlau ve bawk lo chuan min hriatthiampui dawn lo tih ka chiang. Hnuailam en a thiang lo ka ti chungin kawngpui pawh ka duh anih chuan ka en loh theih loh chang a tam hle. Ka rah tur ka en apiang deuhthawin hlauh lutuk vangin ka te thawt thawt a.
.
Ka tang thei tawh lo nia ka inhriat hnuah thil sakhat ka rap a, ngam leh ngam lova ka en chhuk chuan lei ka rap tih ka hmu. Nghet taka ka vawn thing lian lo tak chu ka thlah riai riai a, ko pang ngheng chuan thu hnawkin ka mittui a tla ta zawih zawih a. Hetiang thil zawng zawng ka paltlang a tul chhan hi tunge tih ka ngaihtuah chhuah chuan ka mittui ka hru hul nawk nawk a, ding chhuakin kawngpuiah chuan khawilam nge ka pan tih pawh inhre chuang lovin ka kal a. Min tanpui thei ka hmu ngei ang! Hmeichhe tan hlauh tur a tam zia ka hai bik lo, mahse ka hun tawng mek ah hian hlauh sawi thei ka ni rih si lo.
.
Rei ka la kal hman lo tihah ka hnunglam atang hian motor horn a rawn ri tuarh a, ka ding chiang khawp mai. Engtin nge ka awm zui dawn hrethiam mai lovin ka din dan ngai chuan ka ding ta ngawt a. Tlanchhiat tum pawh ni ila tha ka nei tawh lo hrim hrim bawk.
.
"Helai hmunah eng thil  nge i tih?"
Ka zawnah Car chu rawn dingin hmeichhia arawn dak chhuak a, amah chauhin car-ah chuan a chuang a nih hmel. Min en dan atang chuan mi tha tak hmuhin min hmu hauh lo bawk ang tih ka ring.
.
"Ka_" ka dang ro lutuk vangin ka tawng ring thei hauh lo mai.
"Lawk, khawiah emaw ka hmu tawh che."
.
Ka ngaihtuahna chu a kal kual zung zung a, mihring ngaihtuahna aia chak thil dang hi awm pawhin ka ring lo. He hmeichhia hi eng mi pawh nise tunah chuan ka mamawh. Min tanpui tur khawpa rilru tha a lo nei ta lo anih pawhin engmah chan leh chuan tur ka nei lo va, atan hmelhriat ngai pawh ni lo tanpui  ngawt turin risk a sang hle tih pawh ka hrethiam tho. Chuti chung chuan ka tih theih tawk hi ka ti mai lo thei lo.
.
Keimah pawh ka inrin hmain kawng lei charah chuan ka tlu hnawk a, chu hmeichhia chu a te that a. A thawm atang chuan hmanhmawh takin car atangin a lo chhuak tih ka hrethiam. Ka che tawh eih lo! Tunah chuan nikhua ka hre rih lo tlat! Lemchan thiam chu ka ni hauh lo nain tuna ka lemchan erawh hi chu hnehsawh taka hlenchhuah ngei ka tum bur.
.
"I tha em? Karei, i taksa chu a sa vek anih hi. Eng thil  nge ka tih tak ang? Eng thil rapth;lak nge maw i hmachhawn le?" min tihharh tumin min sawi dawt dawt a, ka harh dawn reng reng lo tih hria se min sawih buai lo law law tur hi a nia!
.
"Eng thil nge ka tih dawn?__" a sawi ngai sawi nawn mawlh mawlh chung chuan ka zak tawn tawnah min dawm a, min hnuk sawn hrawih hrawih a. Kawngsirah min dah a tum a ni em lovang chu. Ka mengru ngam der si lo.
Car kawngkhar a inhawng ri khap a, awlsam lo tak hian a car chhungah min dah lut ta. Ka lawm zia chu sawi ngaihna a awm lo. Lawm lutuk vangin ka thinlung a tap ve ta thung a.
.
Ka hmai arawn khawih leh a, ka hriat tham  loh hian phun sap in ka bul atang chuan a kalsawn tih ka hria. Reiloteah kut dai raih leh dam thlap hian ka chalah min rawn dek a. "I tha leh vat ang." tiin a phun sep sep a.
.
"Damdawiin-ah ka hruai ang che. Hlau suh__ I tha leh vat ang.."
.
Car hnunglam seat-ah chuan rem zawka ka mut theih nan min siamrem leh zet a, amah chu driver seat lamah kalin a car a tinung a, kan tlan chhuak ta a.
.
"Bawihte, ka lo haw tep. Lo hlau suh aw." a phone a dah a, min rawn en nia ka hriat vangin ka che ta talh talh a. Tuna ka harh lo anih chuan damdawiin lamah min hruai ngei dawn a, damdawiin-a kal chi ka ni lo.
.
"I tha em? Khawiah nge ka hruai dawn che?"
A tawng chu ka chhang nghal mai lo. Muangchangin ka thu a, "Khawngaihin tui min pe thei angem?" ka ti sep a. Rang tak hian tui bottle min pek chu hawngin ka in khawlh khawlh a.
.
"Damdawiin ah hruai che ka tum a, i lo harh tak si chuan__"
.
"Khawngaihin i in-ah min hruai thei angem? Chumi hma chuan misual ka ni lo tih ka sawi phawt ange.." a hmela hlauhthawnna niawm tak ka hmuh rualin ka ti thuai a.
.
"Ka beisei? I chungah eng thil nge thleng?"
.
"Thawnthu thui tak a ni." tih chiahin ka chhang.
"Khawiah emaw ka hmuh tawh tlat che a ni." a ti leh a.
.
"A ni maithei."
.
"Ka rin hi a diklo anih chuan min lo ngaidam la, Vida Cappolo i ni em?" tim deuh taka hian min rawn en zawk chuan ka lo bu nghat a. A thaw zui hak mai. Engmah a sawi zui tawh lo thung.
.
Thui fe kan tlan hnuah in lian vak lo kawtah hian a car chu a tiding a, “Kan thleng e. In chhungah lut phawt teh ang. Chawlh I mamawh takzet tih ka hria.”
.
“Ka lawm e.” ka ti sep a. Dik tak chuan tanpui ka mamawh lai bera puitu ka hmu hi ka hnuk a ulh tlat a ni. He hmeichhe tan hian eng thil mah ka ti lo a, chuti chung chuan inhuam takin min tanpui si anih hi.
.
Kawngka a hawng a, hmeichhe naupang harhvang ther thawr hi alam pana rawn tlanin a kuah chang chang a.
“Ma, I lo thleng har lutuk a, api nen kan ngaihtuah che a.”
.
“Hei tunah chuan min kuah ta alawm. Ka ngai lutuk che. I lo fel em?” tiin a fanu chu dam thlap hian a chhang zung zung a, a fanu in min hmuh chuan tim deuh tak hian min en a, anu chu zawhna zawt mitmengin a en nghal vat a.
.
“Vantirhkoh anih hi!” tia a fanu a hrilh chuan hmeichhe naupang chu meng phawk deuh hra hian a ang pham mai.
.
“Anu, vantirhkoh an bal ngai ami?” tiin min en a, chu hmeichhe naupang rilru thianghlim tak chu ka thiam tawka nelawmin ka lo nuih sek a.
.
“A chau anih hi. Api bulah han kal la, keiin vantirhkoh hi inbualna tur ka lo siamsak ang.”
.
“Okay. Anu vantirhkoh sam hi a pawl thin ami?” tia a zawh leh chuan anu chuan a biangah a fawp a, “Nakinah kan sawi tha leh dawn nia. Api bulah chuan han kal phawt rawh le.”
.
Hmeichhe naupang chu thuawih takin pindan panin a zuang auh auh a, pindan a lut pah a vantirhkoh ahmuh thu a sawi ri lang lang chu kan la hre phak.
.
“Vantihkoh chungchang kha eng nge a awmzia?” ka nghak zo lo. Kei ve mai hi engtin nge vantirhkoh tia min sawi theih? Mak ka tih rualin ka ngaihtuahna a tithui lutuk takzet!
.
“Intifai phawt la, nakinah ka sawi dawn nia. I pa chanchin kha ka lo hria a, pawi ka ti lutuk. Tin,__” a ngawi leh rih a, “A vuina hun hman I duh ngei ang.” Min lainat tih hriat tak hian min en a, chhan ngaihna reng reng ka hre lo. Min lainat tih hriat tak mitmeng ka hmuh loh rei tawh vang nge ka hrelo, ka hnuk a ulh tlat mai.
.
“I chungah ka lawm takzet.” ka tawng chhuak thei tawk a ni.
“Lawmthu sawi chu nakin atan dahtha teh ang. Tunah chuan intifai la, hahchawlh I mamawh tih ka hria. Eitur ka lo buatsaih ang. Helam ah min lo zui rawh.” Zangkhai tak hian a ti tak zung zung a. Tuna ka hun tawng  mek hi ka tan chuan mumang ang mai a ni. Chu hmeichhia, a hming pawh ka la hriat loh chu ngawi rengin ka zui ta a.
.
Tui sa ver vawra ka inchiah chuan ka taksa kham them thum leh ka tang ru teuh chu ka inthlahdul huai huai a. Ka taksa chauh zia ka hre dawn chauh nimai hian ka hre bawk. Hun engemawchen hnuah thlamuang taka ka awm thei hi ka awih lo zawk.
.
“I zawh tawh chuan khumah hian I thawmhnaw hak tur ka dah e aw.” Ka phu deuh zawk. Ka lo muhil hman tep a ni.
“Aw le.” tiin ka chhang thuai a.
.
Bathroom atang chuan chhuakin khuma thawmhnaw lo awm chu ka ha a, min tanpuitu leh a fanu lo lut ka hmuh chuan ka nuih sak a.
.
“Khawngaihin I hming min hrilh thei angem? Min tanpui avang hian engtin nge lawmthu ka sawi dawn pawh ka hrethiam lo. Ka thinlung takin ka lawm takzet zet.”
.
“Serafina ka ni e. Kan tana I thiltih ngaihtuah chuan tuna ka thiltih ve hi chu engmah tham a ni lo. I mut hahchawlh hmain eitur ka siam saw ei la, chuan I chawl hahdam dawn nia.. Sweety kal ang le.”
.
Pindan atang chuan kan inzui chhuak diah diah a, dawhkana eitur tuihnai tak khu vang vang ka hmuh chuan ka riltam tawngkhawng tawh zia ka ngaihtuah thiam chiah a ni.
Tawng nachang pawh hre lovin ka thlenga eitur awm chu ka ei mial mial a, hmeichhe naupangte chuan ngun tak hian min en vang vang a.
.
“Vantirhkoh ka hmuh tawhah chuan I la hmeltha ber.” a ti ta reuh a. Ka thil eilai chu dahin a biang tai tekah chuan ka khawih a, a hahmai bal seu mai lang chuan min nuih ver ver a. An tan hian eng thil nge ka lo tih tawh ka la ngaihtuah chhuak zo chuang lo.
“Nangmah hi vantirhkoh hmeltha ber nia lawm.” ka ti sap a.
“Anu pawhin chutiang chuan min hrilh thin. Mahse,” tawng zawm lo  hian a nu chu a en a, a thil eilai chu a ei zawm leh ta rih a.  Naupang fing tak anih ngei dawn hi.
Serafina chu ka en a, a fanu chu hmangaih tih hriat taka enin min rawn en leh a, engmah a sawi lo.
.
Kan thil ei na kan tihfai hnuah ka pindan tura min pek ah chuan lutin khumah ka mu a, ka ngaihtuahna a kal ding leh tan ta. 
.
Ka pa vuina hmunah awm ngei ka duh a, engtin nge mi dang hriatchhuah loh turin ka awm theih ang tih hi zawhna chhan har tak a ni. Tihdan tur hrang hrang ka ngaihtuah kual chiam hnuah pawh eng thil nge tha ber ang tih ka ngaihtuah chhuak thei lo. Khumah chuan ka let tawn sek ringawt a.
.
Kawngka kik thawm ka hriat chuan hlauthawng tak hian ka thu chhuak nghal hlawl a. Eng thil nge thleng tih hriat tumin ka hawikual zung zung a, ka awmna chu ka hai thelh a ni. Nimina ka thil tawnte kha ka hrechhuak thuai a, rang taka thovin kawngka chu ka va hawng a.
.
“Tukthuan ka peih tawh a, vawiin hi Mr. Cappolo vui ni a ni tih ka hria a_” min ngaichang niawm tak hian Serafina chuan min en leh rih a_ “I kal ve duh ngei ka ring..” a ti zui sap a.
.
“Ualau takin ka kal thei lovang. Jefferson mithmuhah ka inlan thei lo.”
Nizan atang tawh  khan Serafina hian min zawh duh thil tam tak a nei ang tih ka ring a, tunah chuan ka tan mi hlauhawm a ni lo tih ka hriat tawh vangin engemawchen chu hrilh ve pawi ka ti ta lo.
.
“Engtin nge kan tih tak ang?” tiin min en a. Jeff nen kan inkar buaina hriatchak hmel a pu hauh lo.
“Tihdan pakhat chu ka ngaihtuah chhuak a, a him angem ka hrethiam chiah lo. Mahse, ka pa thlah tur chuan eng pawh ka huam ang chu.”
.
“Ka hrethiam e. Ka hruai thei ang che.”
.
“Ni lo. Ka chungchang thuah hian inhnamhnawih ve lo la ka duh. Ka inhnamhnawih der tawh zawk a ni.”
.
“Eng nge I sawi awmzia?” ka tip hawk hra a.
.
“Nimin-a ka hmuh phat che atang leh nangmah ngei I ni tih ka hriat hnu khan i chungah eng thil nge thleng ka hre vek lo nain eng chen pawh ka kalpui ang che tiin ka intiam vek tawh.” a ti nghet leh charh a.
.
“Ni lo, Serafina__”
“Ka fanu nunna min pe lettu tan chuan engpawh ka ti ang! Khawngaihin ka tanpui let theih nan che hun min pe hram rawh. Khawngaihin _ Mrs_ Vida..”
.
“I fanu nunna maw? Mahse, engtin__”
.
“Tunah chuan sawina hun a ni rih lo. Insiam ila kal vat zawk ang. Dar 10 ah thlahna hun an hmang dawn niin ka hria.” Hnialna hun emaw thu dang sawina hun min pe lovin ka pindan atang chuan a kal chhuak a. Ka inphih fai sawk sawk hnuah tukthuan ei turin ka pindan atang chuan ka chhuak a, Serafina leh a fanu, leh nu pakhat Serafina nu ni ngei tur hi an thu a, ka thutna tura ka thut fel hnu chuan ka kutah min rawn vuan a. Kan zavai chuan kan kut invuan theuhin Serafina chu a tawngtai a. Eng thu nge a chham ka lo ngaihtuah lo! Chu ai chuan ka tetlai zawng zawng pawh khan hetiang hian kan chhungkua in hun kan hmang ve ngai miah lo tih ka ngaihtuah daih..
.
Ka kut min hmer zauh hnu chuan ka meng a, “Amen!” ka ti ve ta ngawt a.
.
.
9:45AM
.
“Hetah hian ka lo nghak ang che.” Serafina chu ka en zawk a.
 Tukthuan kan ei zawh hnuah ka pa thlahna hun an hmanna tur lam panin kan chhuak nghal kha a nia. Helai hmunah hian 10 minutes vel zet kan thu tawh.
.
“10:20 hmaa ka lo let lo anih chuan helai hmun hi chhuahsan ang che.” Thupe aw tak hian ka tawng lui a, eng pawh tawk thei ka nih vangin Serafina hian keimah vanga thil tha lo a tawn ve ka duh hauh lo. Tuna ka tihtur hi a hlauhawm zia chiang takin ka hria. Chuti chung chuan ka pa hun hnuhnung bera awm ve loh erawh ka tum lo bur thung.
.
Car atangin ka chhuak a, ka inthuamna hnawk zet chu ka rah loh nan tlemin ka chawi kang a. A awlsam zawngin hneh taka ka inthup theih nan Burqa ka ha a ni. (Burqa - Muslim hmeichhiate hak thin chhip atanga keler thleng khuh vek thei kawrfual, mit zawnah hmuh tlang theih puan pante hman a ni thin. ~T)
.
Ka pa ruang awmna pindan ka luh chuan mi an lo tam tawh kawp mai. Ralkhat tangin ka nu hmel ngui leh dang lap mai chu ka en reng a, ka mittui ka dang zo lo. Lang thei lo turin ka kut ka hum ruh a, ka pa chanchin chhiar chhuak tura Jeff arawn din chhuah chuan  a hmeltha tak chu ten naa khat chungin ka theihtawpa na hian ka melh ngawt ngawt bawk a. Ka ten a, ka haw hluah hluah bawk. Heihi chu ka chunga a thiltih vang chauh pawh hian ka tihtur awm reng a ni. Mahse, saw mihring, mi tenawm tak saw ka hmangaih tih erawh ka pha thei lo. Takzet hian! Ka la hmangaih cheu anih chu_!
.
Hun pawimawh a zo a, ka pa thlah turin a kuang bulah an kal hnai a, a thiantha nia ka hriat thinte chuan an thlahna thu tawi sawiin an mittui an hru fap fap hlawm bawk a. Ka hun a thleng ve ta! Ka pa kuang chu zawimuangin ka pan hnai a, a hmel ka hmuh chuan tap chhuak rawih lo turin ka inthunun thei lo thelh a ni. Ka rawl ka chhuah anih chuan Jeff leh ka nu hian min hai dawn hauh lo. Min hriatchhuah ka duh lo anih chuan ka insum a ngai. Thil zawng zawngah hian a harsa ber mai awm e.
.
Ka pangpar ken chu ka pa awm zawnah ka dah a, inher vatin ka nu ka pan a. Rinhlelhawm taka awm miah lo tur ka ni tih ka inhre chungin ka nu chu ka pan lo thei lo. A kutah ka vuan a, a menphawk deuh ak dan atang chuan a kut ka vawn rualin keimah ka ni tih a hria tih a lang. Kuah tumin a beng bulah ka kun hnai a,
.
“Nu, chak takin awm ang che. Jeff lakah fimkhur la, lo hmuh thuai che ka tum ang.”
Rang takin ka inla hrang a, Jeff tan rinhlelh tur ka siam lo niin ka inhria. Pawn lam panin ka kal zui nghal a.
 Muangchanna hun a ni lo tih ka hrechiang bawk a Serafina min lo nghahna lam panin hmanhmawh tak hian ka kal nghal hlawk hlawk a, ka tlan a ni ta deuh ber.
.
“Lo ding teh!” tih ri ka hriat chuan ka kal chak zual sauh. Ding tura min ko tu chu ka hriatthan tak aw a ni lo nain fimkhur tluk a awm lo.
.
“He thil hi i thlauh palh a,” arawn ti leh a. Ka ding chuang lo. Serafina car awmna ka hmu phak tawh a, ka speed ngai patin ka kal hlawk hlawk zel a.
Mahse!! Serafina bula mipa ka hmuh chuan ka ding nghal chawih. A ni thei lo! A mitmenga hlauhna ka hmuh rualin thil thalo a thleng fel vek tawh tih ka ring thiam bawk. Chetlak dan tur ka ngaihtuah hman lo, ka tukkhum a hit chuai a Serafina te thawt ri ka hriat chuan zawi hnawkin ka mit a thim ruai ruai a.
.
“I pa, Cappolo tenawm kha mi han biak dawn nia!”
Ka hmai khuhna rawn inhawngin kut hnawng chuap hian  ka hmai a rawn khawih a, chiang lo ruaiin mipa ka hriat ngai loh hmel ka hmu bawk a.
“Serafina_Sera_fina_kha tina_suh _” ka ti tawk tawk a. Ka thusawi chuan a beng a thleng pha lo ang tih a mitmeng tenawm tak atang chuan a lang nghal vek.
.
“I chanpual tur rel fel a ni vek tawh. Mangtha le! Ka nupui duhtak!”
Chu aw ka hriat chuan ka meng leh kawk a, kut hnawng chuap pa chu  kal sawnin chiang taka mihring hmel ka hmuh leh chu Jeff__ Jefferson DeLourde!  A nui hmel chu ka theihnghilh leh tawh lovang..
.
Nitin update hi a har talh talh khawp mai a.. Next chapter hi WEDNESDAY-ah ka rawn dah ang aw. Ni karthlakin ka rawn dah zel anga, pelh loh ka tum thung dawn nia. Chuan, MONDAY-WEDNESDAY- leh SATURDAY te hi dam chuan chapter thar dah hun nghetah puang ta mai ila..  Hunawl a awm theih chuan FRIDAY ah pawh lo dah ka tum tho ang a, FRIDAY bik hi chu dah dawn leh dawn loh comment-ah ka lo sawi mai dawn nia. Min chhiarsak avangin ka lawm em em e..