RED FEATHER

RED FEATHER
Native American Story
.
Translated by-thantei
.
Hmanlai hian pa pakhat Ivan tia an koh thin hi a nupui nen rethei takin ramngaw ah an cheng dun a, an retheih em avangin an riltam pawhin eitur an nei lo va, an khawsak dan chu an khawngaihthlak hle a ni. Ivan chu ramngawah sa pelin a chhuak fo a, mahse sa kap thei tak a ni lo lehzel a, sava te tak te te puarna tham pawh ni lo hi a hawn ve zauh zauh chauh a ni.
.
Ni khat chu ramngawah chuan sa kah tur zawngin a chhuak leh ta a, hemi ni hian a vanneihna a kal tluang lo lehzual em em lehnghal a. Sava te tak te takngial pawh hmu zo lovin rei tak a vak kual a, a chau ta hle mai a. Engmah a hmuh loh avang chuan a thinrim tun tawh bawk a. Thing hlimah a hah lutuk chu a thu chawl a, chutih lai tak chuan sava hram mawi em em hi a han hria a, chunglam a han en chhoh chuan sava te tak te hmul sen thir ther te hi a han hmu ta a.
.
Chu sava chuan, " I retheiin i ril a tam hle tih ka hria a, tanpui che ka duh a ni. Ka hmul zinga pakhat hi ka pe che anga chutichuan ka hmul chu i hawn ang a, belah i chhum dawn nia. Tichuan, zanriah tui tak i nei thei ang. Naktukah lo kal leh la, ka hmul dang hi ka lo pe leh dawn che nia." a ti ta reuh a.
.
Ivan chuan sava hnenah chuan lawmthu a hrilh a, sava hmul sen keng chung chuan hlim takin in lam a pan ta a ni. Sava in a hrilh ang khan a hmul chu belah a chhum a,a nupui hnenah chuan engkim thil thlen dan zawng zawng chu a hrilh ve bawk a. A nupui chuan Ivan-a thusawi chu a awih sak lo nasa hle mai a, "Engtin nge sava hmul chu chaw tui tak a nih theih ang? Thil atthlak lutuk anih chu. Sava chu man la, that in lo hawn zawk ni la a tha fe zawk tur a nia leh. Sava chu kan chhum ang a, a sa kan ei thei mai tur." a ti a.
.
Ivan-a chuan a nupui chu a chhang lo. Bel chu a han en a, mak tak maiin belah chuan chaw leh chawhmeh tuihnai tak mai hi a lo awm ta teuh mai a. Chuta tang chuan nitin ramngaw panin a chhuak ta ziah a, sava sen chuan a hmul a lo pe ta ziah bawk a. Ivan-a leh a nupui chuan hun rei tak chhung chaw leh chawhmeh tuihnai tak eitur an neih theih phah ta a ni. Mahse Ivan-a nupui chu mi duham tak mai anih vangin a lungawi thei ta lo. An eitur neih chu a duhkhawp lo a ni.
.
Nitin hian a pasal hnenah chuan sava chu that a in a hawn turin a hrilh ziah a, "Sava hmul sen ringawt i lo hawn ziah a, a sava tak hi lo hawn ta che. A sava i lo hawn chuan nitin a hmul pathum pali kan chhum ang a, tun aia tam hian zanriah tuihnai zawk kan ei thei dawn a ni." a ti thin a. Mahse Ivan-a chuan, "He sava hi ka thian a ni a, ka tihlum thei lo vang," tiin  a nupui chu a chhang ziah thin.
.
Ni khat chu Ivan-a chu a nupui chuan a zui ru a, ani chuan a nupuiin a zui ru tih chu a hre hauh lo a. A nupui chuan sava sen hram mawi tak a hriat chuan lung a la a, a ruka pan hnaiin sava thingzara fu chu a vawm thla ta tawp mai a. Sava chu a thi ta der mai a ni.
.
Sava lei a tla thi chu Ivan-a'n a hmuhin a thinur a, a nupui chu lungawi lo tak hian a en vang vang ringawt a, han tih vak ngaihna a hriat loh avangin a ngawi ta ringawt mai a.
.
Tichuan, an nupa chuan sava sen chu kengin an haw a, inah chuan anupui chuan sava sen hmulte chu a pawt thla a, belah chuan tui so nen a chhum ta a. Rei tak a chhum hnuah pawh sava hmul chu chaw leh chawhmeh tuihnai takah a chang thei ta reng reng lo mai. Sava hmul sen satliah a ni ta ringawt mai a ni.
.
Chuti chuan Ivan-a leh a nupui chu a nupui duhamna avangin an ril tam huna eitur pawh nei lovin an awm leh ta fo mai a ni.