JADE (COMPLETED)

JADE
(Soddisfazione)
.
Thantei_LauraSean
.
CHAPTER - 1
.
"Helai hi an in chu a nia."
.
Sangtea hawina lam ka en a, in lian lutuk mah mah ka hmuh chuan ka thaw huai ringawt. Kalkawng tluan khan thil dang ngaihtuah lovin helaia ka awm chhan leh he in-a ka kal a tul chhan ka ngaihtuah ngar ngar a, ka zam viau rualin hlawhtlin ngei erawh ka duhthusam a ni. Ka mamawh tak zet tiin sawi i la a dik zawk mah ang chu. Ka hlawhchham a thiang lo. Hetiang baka hun tha hi ka hmu tawh kher lovang.
.
"I zam deuh anih hmel. Thawk la rawh." Sangtea chuan ngaihzam hmel tak hian ka darah min beng thak thak a, a nui sung bawk.
.
"Kan lut nghal dawn em?"
"I inpeih chuan.."
Ka inpeih tih lantir nan ka bu nghat a, car atang chuan kan chhuak nghal chu a ni deuh mai. Ka tang ru khawp mai. Mi khirh lutuk ina hnathawk tur hian tunge zam lo reng ang ni?
.
"Zam viau duh suh. Anmahni nen phei chuan in inhmu mang lovang. A nupui hual hi tlemin in ah a awm tam deuh anga, amah Remtluanga tak hi chu a zin chhuak tam a. A ina hnathawk te hian an hmu vak ngai lo."
Ka zamna a ti ziaawm chuang der lo. Thil dang zanwg zawng kalsanin helai hi ka pan tawh a, zam viau tur ka ni lo tih ka inhrilh nawn mawlh mawlh chung pawhin ka tirilah ka khur der der tho.
.
Sangtea'n door bell a hmet ri ral ral a, nu upa tawh lam hian kawngka rawn hawngin a nui sang a, a nelawm khawp mai.
.
"Kan eisiamtu turte innih tawh ka ring." a tih chuan ka lo nui thei tawk a ni. Ka rin aiin thil a awlsam. Mi khirh hmel zet hmaah thua interview hmachhawnin zawhna chhan nuam lo tak tak leh ka chhan duh ngai loh zawhna ka chhan a tul ngei ka ring kha a nia. Chutiang thil chu a thleng dawn lo. Thawk khat chuan ka thaw huai!
.
"Lo lut ru. In lo thleng hma hlauha a lawmawm e. Vawiin atang hian hna in tan nghal hmiah hmiah mai ang chu. Engtin nge ka koh dawn che u?"
.
Nu nelawm tak chu zuiin inchhungah kan lut a, Sangtea hi a thawk ve dawn emaw a tiin ka hria.
.
"Ka pi, ani hi Jade. Chuan, kei hi chu a thianpa, Sangte tiin min ko mai rawh. Helai hmuna lo hruaitu ve mai ka nia."
.
"Oh.. Ka hresual emaw ni le? Pahnih an lo kal dawn tih min hrilh sia. In pahnih hian inni  mai turah ka lo ngai a. Engpawhnise a tha vek e." tiin a nui huah huah a.
.
Minute 20 vel zet tur a ral hnuah Sangtea'n min hawsan a, kei chu zanriah an ei fel hnuah ka haw thei chauh ang. Sangtea'n min lo hruai leh dawn tho vangin pawi tihna ka nei lo.
.
Helai hmun kan thlen tirha min lo dawngsawngtu kha Nu Tluangpuii a ni a, eisiam tura an rawih ve tho a ni awm e. A chanchin dang engmah ka hre rih lo. Tawng lem lovin eitur kan siam mawlh mawlh a, kan peih meuh chuan khua a tlai duai tawh.
.
"Lo rem sa vek angai a nia. Chesual lo turin fimkhur ang che. Duhsaki hi a khirh ve deuh thin a." a hawi kual zuk a, a tawng chu mi dangin an hriat palh a hlau a nih hmel. Fimkhur angaih hmel hle mai.
.
"Duhsaki chu tunge?" ka ti sap a.
.
"Hotupa nupui__ah_nupui hual a ni zawk mah ang chu. Nupa angin an khawsa a, mahse an la innei lo. I la hre dawn thova ka hrilh lawk mai che a nih chu. An chungchang sawi hi ka duh tehchiam lova. Nang pawh i fimkhur dawn nia." tiin a nui leh a, a sawi awmzia chu ka hrethiam niin ka hria. Tawng tam loh a him ang.
.
"I lo thleng dawn tawh em Dear?_Umm.. Lo hmanhmawh deuh la_Um_Ka lo nghak lo mai ang che aw. Ka tamchhawl lo chauh tawh.." hmeichhe aw sin tliang ral lo rikna lam chu Nu Tluangpuii nen chuan kan en rual chawt a, mizo hmeichhia hetiang khawpa  nalh hi ka la hmuh awm pawh ka hre lo. A inkhaithli nalhin a vun pawh a nung nalh sar mai.
.
Mn ngaihven miah lovin dawhkan kil chuan a thu a, a phone chu dah mai lovin a kheuh zui mawlh mawlh a, a nui sak sak bawk. Ka lo en tui mah mah a niang min rawn nghawk tak zeuhah chuan ka harhchhuak zawk.
.
"Nimina i siam ang kha ka duh ang." rawn hawichhuak chuang lovin a tawng a, Nu Tluangpuii'n fridge-a a thil dah la tura signal min pek chuan ka che thuai a. A lo kal hmaa kan dah zawng chu la sawnin a thil lam chu dawhkanah kan dah a, kan tihfel hnu chuan ngawi rengin choka atang chuan kan chhuak a.
.
Door bell ri ka hriat chuan kawngka lam pan mai ka tum a, Nu Tluangpuii'n min lo dang vat. "Keimah ka va kal ang e. Thla khat tal i thawh hma chuan keiman kawngka ka hawng zel ang." a ti zung zung a. Ka rilruin ka ner sawk sawk! Eng dan khirh dang nge la awm ang? A tam viauin ka ring. Tuna ka hna hi ka thawk zawm duh anih chuan avaiin ka zawm ve tlauh tlauh mai ang chu.
.
Ka hawi chhuah leh chuan Nu Tluangpuii hnunga mipa lo kal chu ka va hmu hmasa ber. A necktie a pawt thawl mawlh mawlh a, a chauh hmel khawp mai. Ka mit chak zet hian ka lo enkim vek hman. Min hmu awmin a awm lo bawk a, timna nei miah lovin ka lo en reng a. A kekawr hak chuan a bawp a phuar deuh a, a lan dan ringawt atang chuan ngaih dan ka siam thiam lo. A hmel chu tha tia sawi tur a ni miah lo, mahse mipa hmel diktak a ni thung! Kum 30 a tling tawh ngei ang.  A chetzia chu a muang deuh ruih a, a mitmeng a thim deuh raih bawk. A hming kha Lalremtluanga maw ni kha? A hmel hi ka vawikhat hmuhna a ni. Ka tumlawk angin ka hmu lo. Upa tawh deuh hmel hmuh tum ka nia.. A tawng ri chuan ka thil ngaihtuah lai a ti tawp
.
Ring lo zet hian Nu Tluangpuii chu a bia a, enge an sawi ka hre pha lo chungin ka beng ka chhi kar.  Insehruh teuh chungin ka mit ka lasawn ta hram. Ka awmna lamah a lo kal a, ka kun ta ringawt. Choka luhna tur kawngka bula ka ding chu min kal pelin choka ah a lut a, min ngaihven lo chu ka lawm hle. Min ngaihven ka beisei pawh an I chuang hlei lova. Hmeichhe aw sin tliang ralin a lo lawmna tawngkam kan hrezui nghal hmiah.
.
"Kha kha Remtluanga chu anih kha. He in neitu leh kan hotupa. A hmel en ai khan a ngilnei a nia. Nel viau erawh a har a.." nui zui sukin ka bulah arawn ding a, min mamawh tak mialin tih thuah min koh hun kan lo nghak anih ber hi. Tuna ka dinhmun hniam tak hi hriatthiama pawm thiam ka zir hram hram angai dawn a ni.
.
Choka atanga min kohna bell a rik chuan ka lut thuai a, enge ka hriata Nu Tluangpuii ka luhtir mai loh ni.
.
"Ice cream ka lo duh ang. A ngai aw." Duhsaki chuan min en lo. A bula mipa thu chu enin a tawng zui mawlh mawlh a, an thusawi chu hriat nuam ka tih loh zawng tak a ni. An bulah mihring ngaihtuahna pangngai nei ka awm ve tih hre lo niawm tak hian sawi hreh a nei der lo lehnghal a. A tha vek zel e!
.
Ice cream la chhuakin dawhkanah ka dah a, Duhsaki'n dawhkan a ben dat chuan ka phu zawk.
.
"Hetiang hi engtik laiin nge ka ei tawh ngai? La sawn rawh." nelawm loh fahran hian min melh a, ice cream chu ka la sawn nghal thuai a. "Mi thar i ni em?" a tih chuan ka bu nghat. Ka beisei loh dana treat ka nih hian sawitur ka hre mai thin lo. "Zaizir ringawtin min chhang suh. Tawng rawh."
.
Ka dawhtheihna pan ve tak hi ka thunun nasat a va ngai dawn nasa em.
"Aw, mi thar ka ni e." tiin ka en a, lo en lo ila tha zawk tur. "Ka mitah  min en suh!" a ti vin leh that. Ka ice cream ken lai chuan ka theh lo chauh.
.
"Keiman ka lo ti ang. A ei thin ila hrelo palh a nih kha." Nu Tluangpuii lo lut chu ka tan malsawmna a ni chiang teh e.
.
"Ni dangah tisual tawh suh se." a la ti leh hram. Nu Tluangpuii'n a ei duh tak a dah sak hnu pawh chuan a ei leh tawp si lova!
Kan chezia zawng zawng chu mipa awmchhun chuan min en reng tih ka hria. Engmah a sawi lo chu mak ka lo ti ru tak zet zet. A hmel pawh ka ennawn leh tawh chuang lo.
.
An pahnih chuan choka atangin an chhuak a, Duhsaki chuan a banah kuahin min rawn melh rum leh hram. A mil loh chi ka ni ve hrim hrim anih ka ring. Hmel atanga mil loh chi hi a awm ve thei tih kei ngei pawn ka hria alawm. Engahmah ngai lo phawt ang.
.
Tihtur kan tifel zova, Sangtea'n min rawn lam chuan ka hah hle tih ka hre chiah. Ka awmna hostel zawnah dingin car atang chuan ka chhuk a, Sangtea tlan liam hnuah inchhung ka lut ta chauh a.
.
Muhil thei lovin ka let sek a, ka u khan min la dampui ve ni se hetiang hun hreawm hi ka tawn angai kher lovang. Ka thin a ur thar leh thin. Kan unau tan hian nun hlimna tur leh vanneih ni a awm ve lo niin ka hrenawn leh bawk. Thil tam tak nei mah ila hlimna leh chhungrila lungawina neih hi a lo pawimawh em em si anih hi. Ka lungawi hma chuan ka nun zel angai.
.
Ka hriat theih tantirh atangin Mizoramah hian ka awm ngai lova, ka u nen Delhi-ah chengin ka zirna zawng zawng pawh Delhi-ah vek ka zo a. Ka u khan kan nu leh paten min thihsan tawh tiin min hrilh a, rin mai loh chu tihtheih ka nei lo. Ka u kha ka ring hmiah bawk. Ka engkim a ni a, engmah lo atanga tun hun ka thlen theih chhan hi ka u thawhrimna vang chauh kha a ni. Mahse, ani chuan hmangaihna avangin dam a duh tawh lova min kalsan ta anih kha. Ngaihtuah nawn ka duh tawh lo chung hian zan tin ka la ngaihtuah ziah thung.  Ka nu leh pate hmel vawikhatmah ka hmulo mai pawh a ni lo, an thlalak takngial pawh ka hmu lo. Ka u bula ka chen lai kha chuan ka nu leh pate hmuh chakna ka neih thin kha a zia viau thin a, tunah erawh vawikhat tal ka nu leh pate hmuh ka chakna a zual zel chu a nih hi.  Zawn ngaihna ka hre lo hulhual thung.
.
Ka u in min kalsan atanga kum hnih chhung kha chu ka hna pangngai thawkin mumal taka nun ka tum hram hram a, ka hna nuam ka ti a, kan unaua kan din ve kan restaurant pawh a awmna hmun a fuh bakah kan eitur siamin mite a ti lungawi a, hlawk tak kan ni. In nuam tak leiin kan unauin kan awm a, sum leh pai kan mamawh aia tam mah kan thawk chhuak bawk a, ka lung a awi viau thin a nih kha. Ka u min kalsan ni atang khan ka tan hian engkim a danglam ta vek a  ni.
.
Ni khat kan dawr atanga ka haw chu ni dang aiin ka chau a. Chhun lama ka mi hmuh leh a thilsawi vanga chau em em ka ni. Ka u khan ama nunna ngei a lak chhan ka hre tak tak lo tih min hrilh a, hriat ka duh anih chuan a diary chhiar turin min hrilh anih kha. Khatiang khawpa ka u a hrechiang kha mak ka ti a, kei, a nau neichhun pawhin rin dan ka neih thiam loh thilah chiang taka ka tihtur min hrilh kha mak ka ti em em hi a ni tawp mai.
.
Chau viau chung chuan ka u thawmhnaw dahna ka hai lepse a, a chang leh thinlung nat lutuk vangin ka tap leh rih a, a chang leh ka thin a ur bawk a. Engtiang pawhin awm i la ka u chuan min kalsan tawh tho tho tih ka hriat chhuahin ka na lehzual.
.
Ka rin loh tawpna hmunah ka u diary chu ka haichhuak a, ka nun dan zawng zawng a lo danglam takna chhan leh Mizorama awm ka duhna chhan pawh ka u diary-a thu mak tak tak inziak vang kha a ni tih ka sawi lo thei lo. Ka u khan ama nunna a la lo, ka u kha thah a lo nih chu! Thih a duhna chhan pawh he mihring Lalremtluanga vang hi a ni!
Eng anga hreawm nasa pawh tuar ngai se ka tuar zel ang. Ka u tan.. Ka u tan anih phawt chuan ramri kham ka nei dawn hauh lo.
.
Link hi a tam thei ang ber min share sak theih chuan ka lawm em em ang. (peace)
KA STORY BIK DAHNA GROUP JOIN DUH TAN
29 – AUGUST STORY [THANTEI_LAURASEAN] A JOIN THEIH E.
JADE
(Soddisfazione)
.
Thantei_LauraSean
.
CHAPTER - 2
.
Harh chiang lo chungin ka phone chu dap fuh ka tum a, ka dap fuh mai thei lo. Khumah ka thu chhuak hlawl a, ka mit chhing chungin ka lu ka thing nawk nawk bawk a. Ka lu a rit bur mai. Harh chian lehzual tumin ka biangah ka beng thak thak a, meng chhuakin ka phone ka mitna sira la nghawr dar dar chu ka pick up ta thuai a.
.
"Jade ini tiraw? Nu Tluangpuii_"
.
"Oh.. Eng thil nge ni ta?" banga Sana intar chu ka en a, ka harh chiang hleithei lo pawh kha a lo awm ve reng. Zing dar 4:30 ah eng vanga min lo bia nge anih le? Nizan ka mengrei lutuk bawk nen mut ka kham lo ta viau anih hi.
.
"I la thar viau  nain i kutah ka dah lo thei ta si lo a nih hi. Ka fanu a pum ana thut a, damdawiin ah ka awm mek a. Tukthuan siamsak turin i kal mai thei angem? Ka inthlahrung viau a nia." tawng zung zungin a duh a sawi zawh chuan a thaw huai a.
"Aw, ava pawi ve. Ka lo ti vek ang. I fanu chauh chu ngaihtuah rawh."
.
"Ka lawm lutuk e. Ni dangah chuan tihbuai tawh loh che ka tum ang."
"A ho lutuk. Harsatna kan tawk thei vek alawm. I fanu bulah chuan a tul chen chen i awm dawn nia."
.
"Aw le, aw le. Ka lawm lutuk. Ka dah phawt ange aw. E, zing dar 7 ah hotupa a chhuak thin a, dar 7 hmain engkim siam peih vek angai tih ka lo hrilh lawk ang che. Anih phawt aw." ka chhanna nghak tawh lovin phone a off a. Kei pawh khum atangin ka chhuk ve nghal. Ka muangchang hman dawn miah lo anih hi. Tun ang hunah taxi hman mai tur a awm loh phei chuan ke a kal a tul ngei dawn anih hi.
.
Bathroom-ah lutin ka inbual zung zung a, inpeih at a in ka chhuahsan chuan dar 5 a ri chiah. Thui vak lo kea ka kal hnu chuan taxi lo tlan remchang phar dingin ka kal tumna hmun panin kan tlan vang vang a.
.
Inchhung ka luh chuan a reh thap mai. In kawta hmeichhe pakhat pangpar tui lo pe mawlh mawlh bak kha mihring dang hmuh tur an awm lo. Choka pan ding nghalin fridge ka hawnga ka  mamawh tur nia ka rin ka phawrh nghal mial mial a. Ka hnunglama thawm ka hriat chuan phu deuh zawkin thawm ka chhuah that. Ka hawi let rang khawp mai. Kekawrbul chauh haa Remtluanga lo ding chu eng chena rei nge a lo din tawh ka hre lo. Rei tak a la ding lovang. Kei pawh ka lut deuh chauh a nia.
.
Amah biak tum lovin ka thiltih lai chu ka chhunzawm a, ka melh nawn tawh hek lo. A thawm leh a awmna chin erawh ka ngaihven ru kar. Sangtea khan ka hmuh fo loh tur thu kha a sawi a, nimin atanga tun hun inkar lekah pawh ka duh aiin kan inhmu zing ta mah mah chu a nih hi.
.
Ngawi rengin fridge a hawng a, ka melh tih pawh ka inhriat hmain ka lo melh reng e. Ka mi huat ber leh helai hmuna ka awm chhan mipa chu ka ngaihven angai reng a ni. Ka rilrua a thawh dan erawh ka duh tehchiam lo. A taksa lang chin fit zaih  leh insawizawi thang tih hriat tak chuan ka thin a tiur ve ringawt bawk. A sek tung lova, a nih tur ang thlap a ni vek.. Tenawm lutuk hian a!
.
Tui a in zova a kal chhuak leh mai a. Kal daih tak rawh se. Tun ang la hma lutuk ah choka a lo kal chhan tur a awm thlawt lo! 'Duhtawk teh. Ama in a nia, eng hunah pawh a duhna apiangah a kal thei alawm' tiin ka inhrilh leh rih. Ka eitur siam hi a tuilo zo vek ang tih pawh a hlauhawm e. Ka huat zia hi ka tihlan a thiang hauh lo a nia. Ka duh ka tih hma lehnghal phei chuan a thiang lo lehzual.
.
Ka tihtur ka ti zawm mial mial a, dar 7 rik nan minute 15 vel a la awm tihah ka tihtur ka zo fel ta hram. Engtin nge ka lo awm dawn ka hrelo.
.
Pen ri khap khap ka hriat chuan rin dan neiin ka tang lehnghal teuh a. Ka awmna hmunah ngil zet hian ka ding nghal auh bawk. Remtluanga_Ni ve ziah lo_Ramsahlauhawma.. Ni e, ka huatna hi a nasa em a, ka tan chuan Ramsa ang mai a ni reng ang. Hetianga koh hi a phu bawk alawm le. A rawn pen lut a, tawng miah lovin a chair-ah a thu a, a thleng tura ka dah sa chu hawngin a ei mial mial a, ka eitur siam chu a tui nge tui lo tih hriattheih turin a hmelah engmah alang lo. A tui tih leh tih loh ka ngai pawimawh hek lo. Tur ka pawlh lova lawm hle rawh se!
.
"I ei ve chak chuan i ei ka phalsak ang che." a hmel ka en hma chuan keimah min bia tih ka hre lo. Ka en chuan chiang zet hian min lo en reng tawh a, ka lu ka thin rualin thil dang ka hrechhuak. Nimin khan Duhsaki khan a mita en a duh lova, zaizira chhan a duh loh bawk tak kha. He Ramsa pawh hian a mita en a duh bik ka ring lo. Kun deuhin ka inthunun a,
"Ka ril a tam lova, ka lawm e." ka tichhuak thei hram. Min la en zui reng em ka hrelo. Ka ngai pawimawh lo tih ka sawi nawn leh ang. Ka sawi zing mah mah em? Ka ngai pawimawh lo tak zet zet. Tunah hian a hnuaia hnathawk anga ka awm vang chauhin ka inthunun a tul chauh zawk anih hi. Chuti ni lo se, ka u laka a lo chet tawh dan vang khan ka ham buan buan duh hial ang chu. A tha dawn lo tawp mai. Ka huat zia hi a hun hmain a hre tur a ni lo. Mi inthup thei tak ka ni ngai lova, tunah pawh hian hma ka la sawn em em chuang lo chu a nih hi maw.
.
Chair tawlh ri niawm tak ka hriat chuan ka mitsirin ka melh a, min en tawh lo anih hmel. Thu dang sawi tawh lovin choka atang chuan a chhuak a, ka tawt up up tih pawh ka lo inhre lo. Ka thawl ta hawk mai. Kal vang vang rawh se.
.
A thil eina chu tihfai tumin ka pan hnai a, a thil ei tlem zia ka hmuh chuan mak ka ti. Tlemte chiah tak tak a khawih nia. Ka eisiam hi a tui lo ta viau emaw ni le? Ka suah chhuahna thleng ami chu tlem lain ka ei chhin a, a tui dan a danglam lo. Uluk zeta thial chungin ka chik lehzual a, choka luhna kawngkhara Remtluanga lo ding ka hmuh chuan ka thil ei lai chu hakin ka khuh nghal bawrh bawrh a. Ka hrawkah a inhnawh vek.
.
"Hei hi in rawh." ka hmaa tui no chu banin ka in a, ka lem thei lo. Ka hma zawnah chuan ka phuh thawt a, khuh zui bawrh bawrhin ka mittui a tla phung tawh. Ka men ruala ka hmuh chu kawr awm huh leh berh deuh chunga ka mi huat ber mai ka hmaa lo la ding reng chu a ni. Min ngaihtuah niawm tak hian min la rawn en ta lehnghal a. Min rawn ban chuan eng thil nge tih a tum ka ngaihtuah lo, pai nawk chungin ka tawlh sawn a, ani pawh a ding chawt tho.
.
"Ka tha tawh. Kat ha." ka ti nawk nawk a. Ka thusawi awih loh hmel zetin min melh reng thung. "Ka tha, Sir!" ka ti ta ringawt. Ka kut dinglam ka phar chhuak a, a laka indan tum ang maiin ka lan ngei ka ring.
.
Ka chet zui tak loh vang  nge ka hre lova, engmah sawi tawh lovin choka atang chuan a chhuak a. A chhuah hmain dawhkana a phone let ngat chu a la zauh tak e. A phone a theihnghilh palh vanga lo let leh a nih ngei dawn kha.
.
Ka chet thin zia ngaihtuah zui duh lovin dawhkan chu ka tifel a, engamah hmaa khatiang taka ka che chhia kha pawi ka ti lutuk tak zet. Thawk zui tura min duh loh phah phei chuan ka ruahmanna zawng zawng a hlawhchham vek dawn tihna a ni. A pawi.. A pawi lutuk.
.
Thleng ka sil laiin Nu Tluangpuii arawn thleng hlawl. "I lo buai nasa em?" arawn tilut nghal mawlh mawlh a. A fanu a damlo tih kha a sawi ngei sia, engtin nge tunah a lo thlen leh theih zawk le?
.
"Hotupa chhuak tur nen kan intawk a, tun ang hunah in a chhuahsan ngai si lova mak ka ti deuh. Khawi kha kha ka lo hru hul ang." ka thleng kenlai chu lain a hru nghal suah suah .
.
"I fanu chu enge a an?"
.
"Apa a hman ta hlauh a, ka rawn kalsan ta mai. Ngaihtuahawm a ni lo. Hetianga han awm thut hi a ching hrim hrim a. Pathian zarah a tha ve leh mai ang."
.
"A tha ve leh mai ang." ka ti ve ringawt. Hetiang hunah hian sawitur hrelo tak ka ni. Ka tlaw na leh hma ka sawn theih miah lohna thil thenkhat zing ami a ni ve tlat.
.
"Tun ang huna thleng sil tur awm pawh hi mak ka ti deuh?" min en danah chuan zawhna min zawt tih a lang.
.
"Sir_hmm_Sir khan chaw a ei kham chiah a."
.
"Chaw a ei maw? Hetah hian maw?"
.
"Ni e. Enge a mak viau a mi?"
.
"Mak! Zingah in ah hian chaw a ei ngai miah lo. Kum 3 chhung chu ka thawk tawh a, vawikhatmah in ah hian tukthuan a la ei ngai miah lo. I lo melh te hi a nia nge?"
"Enga??" ka ti that a. A nuih zui tak hawk hawk ah chuan a fiamthu tih ka hrethiam ta chauh.
.
"Zing karah in bengchheng mah mah." workout zo chiah tih hriat zet hian Duhsaki arawn lut a, nizan khan make up a inbel nasa viau aniang tuna a lan dan nen hian a dang daih. Mahse, hmeichhe hmeltha tak chu a ni tho anih hi. Nelawm takin awm phei se tupawhin an ngaina thei ngei ngei ang. A mitmeng hian amah hnaih a ti chakawm loh em mai pawh a.
.
"Salad ka lo duh ang. Nu Tluangpui, nizana ka thleng lak chhoh kha kan pindanah a la awm a.." Nu Tluangpuii lamah a thle bar a, 'han la rawh' tih a sawi ri kher lo nain a tir nghal tluk chu a ni tho mai. Nu Tluangpuii pawh a kal  nghal hmiah.
.
"Salad chu?" hmai zangthal ha hian min en a, hawi sawn leh vahin dawhkan lam a pan a.
.
A salad tur thlenga ka dah zawh hnuah dawhkanah dahin ka kalsawn leh mai a,
.
"He thil hi enge? Salad min pe turin ka hrilh che kha." a vin leh ta that that e. Muangchangin ka inher a, amah ka en chuan thinrim tak hmelpu hian min melh rawm rawm a.
.
"Cream telh loh chiahin ka ei thin. Nang hi he ina hnathawk tlak i ni lo."
.
"Ka tih palh. A dang ka lo siam ang." thleng chu lak tumin ka ban a, a lo vuan leh lawi a. Ka pawt deuh a, a pawt na ve leh sauh! Eng thil nge tih a tum a? Thleng chu ka thlah thut a, ani lo la tang si nen salad chu a awm leh a thutna sir velah chuan a baw darh ta vek. A thinrim zia chu sawi ngaihna a awm lo.
.
"Nang hi.. Nang hi.. I tilui.. I tilui tiraw? Zaktheilo lutuk.." tih pahin a awma salad kai chu a kutin a hui pawk a, ka hmai zawnah tak arawn vawm a. Ka hmaiah chauh ni lo ka kawr hmalam ah pawh a kai ta nuaih mai.
.
"Eng thil nge thleng?" Nu Tluangpuii rawn tlan lut chu ka melh tawp.
.
"Henu hi bang nghal rawh se. Nu Tluangpui, mi dang tha zawk lo zawng nghal ang che. Henu hmel hi vawikhat pawh ka hmu duh tawh lo." a ti khur hlawk hlawk a. Thu dang sawi tawh lovin choka atang chuan vung zet hian a kal chhuak a, hla deuh taka a tawng ri lawng lawng kan hriat chuan tunge a biak tih inzawh buai angai lo. Nu Tluangpuii nen chuan kan inmelh tawp.
.
"A va pawi tak em! Enge thil thlen dan? Khawi, intifai rawh. Duhsaki hi chu ka fa nise chuan ka thunun chiang ngawt ang." ka kawra cream leh thlai hnah kai chu min thenpui sawk sawk a. Mak deuhin ka hnuk a ulh tlat nia. Engahmah ngai duh lo tlat tur ka nih vei nen. Khatiang taka inhnuaichhiahna kha ka la tawn ngai loh vang anih ka ring, ka na khawp mai. Thleng kha lo thlah miah lo ila tha tur a nia. Ka tihsual nge Duhsaki tihsual zawk pawh ka hrethiam lo.
.
"Lungngai suh. Hotupa duh dan anga lo lut i nia, Duhsaki vang ringawt chuan i chhuak miah lovang." tiin min hnem mawlh mawlh a, ka ngawi reng. Sawitur ka nei lo. Nu Tluangpuii hian tunge ka nih chiah min hrechiang lo chungin ka lamah a tanga, Duhsaki ka laka a chet dan vangin a lo thinrim ve em em bawk a, amah tanpui theia ka awm ve hun a thleng a nih ngai chuan ka theihnghilh hauh lovang.
.
"Bathroom-ah va inti fai la, thil dang chu keiman ka lo ti vek ang. I haw nghal mai dawn nia. Tlai dar 2 hma chuan i zalen rih anih chu.." min hnem tum takin min nuih a, ka nui lui hleithei lo.
.
Nu Tluangpuii chu chhang tawh lovin bathroom-ah ka luhsan a, ka kawra thil kai ka sil fai hnu chuan ka kawr hmalam chu a huh val kulh a. Chawhnu lamah ka la kal leh dawn nge dawn lo ka chiang ngam lo. Duhsaki khan a thusawi kha a ti tak tak anih chuan he inah hian ka awm zui thei kher lovang. A pawi ka ti. Hmun dang atang chuan ka thiltih tum hi tih theih loh tluk a ni dawn si.
.
Bathroom atanga chhuakin Nu Tluangpuii ka hmuh leh hnuah in chu ka chhuahsan a, ka chenna hmun ka pan nghal vang vang a. Engpawhnise, chawhnu lamah ka kal leh phawt ang. A tawng tur tur chu ka tawng phawt mai ang chu.
.
In ka thleng a, tihtur dang ka neih chuan loh vangin Laptop ka la chhuak a. Hunawl ka neih tawh dek dek chuan he thil bak hi tihtur ka hrelo.
.
Ka lo  muhil a ni ngei ang, thawm eng emaw ka hriat chuan ka phu chhuak deuh zawk. Kawngka kik ri tih ka hriat rualin ka inthlah dul thuai a, Sangtea bak anih ka ring lo.
.
Kawngka hawng turin ka kal a, ka rin ang chiahin Sangtea lo ding ka hmuh chuan ka nui sak a.
.
"Ka tlai lo hlauh e." a rawn ti nghal tawp.
"Min hruai ziah chuan i buai phah viau dawn anih hi." lo lut tura hrilh pawh angai hran lo. Ka in chu a in a ni ve mai. Ani paw'n min zui ve mai bawk a.
.
Ka la sawi lo tak e. Tuna ka chenna hi Sangtea te in ruak a ni a, Delhi-a a awm laiin a harsatna namen lo tak a tawk a, kan unau khan kan theih tawka kan tanpui thin vangin tunah hian ka lakah that a chhuah ve tih ka hai lo. Mihring hian kan rin hauh loh lamah kan beisei loh takin tanpuina kan mamawh fo a, mi dang laka that chhuah hi a thlawn ngai miah lo tih hi a takin ka tawng ve ta nual mai.
Ka lakah tha em em in engkim min tihsak huam mah se, tihbuai reng hi tha ka ti bik lo. Lirthei lei mai thei dinhmunah ka ding rih lova, ka thiltih tum hi ala hautak dawn chauh lehnghal.
.
"Enge i lo tih a?" thutna awm chhunah chuan thuin laptop a la kang a, ka thil khawih lai ka close hman hlauh kha a fuh hle. Chuti ni lo se, ani hian zawhna a ngah dawn lutuk.
.
"Movie ka lo en mai mai. Ka han insiam anga chhuak nghal mai ang aw." tawngkaa min chhang lovin laptop chu a bih ngar ngar a. Thil pawi engmah a hmu chuang lovang.
.
Ka inpeih hnu chuan ka in kan chhuahsan a, Duhsaki hmuh ka chak fahran lo khawp mai. Engtin nge ka lakah a awm zui dawn a hriat der bawk siloh.
.
Remtluanga te chenna in kawtah dingin car atang chuan ka chhuk a, Sangtea chuan in chhunga min zui luh a tum nain a hnial tlat thung. Boruak muanawm tak hnuaia awm chu ni ila pawi ka ti lova, tunah chuan a dan a dang rih tlat.
.
In chhung ka luh chuan a lo reh thiap a, Choka-ah Nu Tluangpuii a awm ringin choka lam ka pan a. Ka rin loh zet hian Remtluanga_ni leh lo, ka hmelma lian ber chu a lo thu run a. Nu Tluangpuii thu min hrilh kha la thleng dik lo char char. Amah hmu lova awm hi ka duh ber a ni a, ka hmuh hian ka huatna nasa lutuk hi ka thup thei lovang tih ka hlauthawng. Ka inring zo lo a ni ber. Tun ang huna hmuh tura a lo awm pawh hi a mak reng reng.
.
"Engvanga lo kal leh nge i nih a?" ka hnunglama rawn vin hlar chu en kher pawh ngai lovin Duhsaki a ni tih ka chiang. Ani lo hetianga rawn awm tur mi dang tumah an awm lo.
.
Remtluanga chu ka en hmel thutak zet hian min lo en run a, ka hnunglamah Duhsaki'n min rawn  hnaih telh telh bawk. Mi chaklo dan chep ang mai ka ni.
.
"Nang te hian zinga ka thusawi kha ka ti tak tak loah i ngai a ni em lovang chu." min kal pelin Remtluanga thutna chair hnaih thei ang ber chuan a ding a, rem lem lo tak  hian Remtluanga darah chuan a kuah nghal chial a.
.
"Dear, zinga ka hrilh che kha i hria em? He nau hian salad in ka hmaiah min theh ngam a nih chu! Hetiang hmeichhia hi kan in a hnathawk tur hian ka duh lo." min rawn melh rawm rawm a.
.
"A sawi chu a dik em?" Remtluanga chu ka en a, ka chhang lo. A hmel chu ka choka ka luh tirha a hmel ang chiah kha a la ni. Enge ka sawi chuan ang. Ka insawi thiam ang maw?? Ni rih lo ve. Engtin chiah nge ka lakah hian an chet duh dawn ka hre phawt ang chu.
.
"Sawitur a nei tawp nang. Thiam zawk ni hek lo." Duhsaki chu a tawng leh hmak hmak a.
Ka chhang dawn em tih min ngaichang ni awm tak hian Remtluanga chuan min rawn melh leh a, ka la ngawi reng.
.
"Anih chuan tunah hian in hi chhuahsan rawh. Thil nihphung i man pha lo lutuk deuh a nih hmel. Tunah chhuak rawh." a tawng dan chuan min nghawr nghing ni ber. Engahmah min ngai lo tih a chiang ngawih ngawih. Remtluanga tawng lai chu ka en ngar a, chhang lovin ka inher a. Ka chhuak mai reng ang chu!
.
Choka ka chhuahsan hman lo. Ka hmaa Sangtea lo ding ka hmuh chuan ka ding chawt a. Nichin khan min kalsan lehnghal ngei khan ka hre sian engtik laiin nge in chhungah hian a rawn luh ka  hre lo reng reng.
.
"Tuna ka thil hriat kha a tak ngei a ni em?" keimah min be lo. Ka ban rekah min rawn vuanin Remtluanga te thutna lamah min kai let a, ka tang ve. Mahse, awmzia a awm lo.
.
"Engmah sawi tur a awm lo. Sangte, kal ang_" Sangtea chu ka en a, ngawi turin min duh tih lang reng hian min melh hrawk a. Ka ip deuh chawih mai. 
JADE
(Soddisfazione)
.
Thantei_LauraSean
.
CHAPTER - 3
.
"Enge i rawn tih dawn?"
.
"Thil nihphung man lo chu tumaw?" Sangtea hmel chu ka en ngawt ngawt.
"Enge i rawn tih dawn?" Remtluanga ka en a, che miah lo hian Sangtea chu a en a. Duhsaki erawh ka rin loh dan deuhin a zum deuh dek in ka hria. Sangtea hian Remtluanga a hriat thu a sawi ri ngai lova, an inhria ang tih ngaihna ka hrelo reng reng.
.
"He hmeichhia hi i hria maw?" Remtluanga chuan min en chiang hle.
.
"A lakah i tawngkam hman fimkhur tawh ang che." Sangtea tawng a hriat rual chuan a ner suk ringawt.
.
"Kal ang.." ngenngawl zetin Sangtea banah ka vuan a, helai hmuna inhnial buaina chhan nih hi ka duh lo. Harsa tih hmel takin Sangtea chuan min zui ta tho. In chhung kan chhuahsan rualin a bana ka vawnna chu ka thlah thuai a. Ani chu thinrim insum tih hriat tak hian a inseh ruh talh talh thung.
.
"Eng thil nge thleng min hrilh rawh?" hlauhawm zet hian min en a, ka hawisawn nghal daih.
.
"Engmah, thil hriat sual palh a nih kha?"
.
"Thil hriat sual palh tih chu enge a awmzia?"
.
"Engmah a ni lo. Kal ang."
.
"I sawi phawt loh chuan kan kal lovang."
.
"Hmeichhe thu hla mai mai alawm."
.
"A nimai lo ang tih ka ring."
Chhang lovin a car dahna lam panin ka kal lui a, min zui lo tih ka hriat chuan ka ding leh rih. .
"Inhnial emaw an in a thawh kha ka duh tawh lo." ka ti ta ringawt. Dik taka sawi chuan Remtluanga in a hnathawh hi ka duhthusam a ni. Amah leh a thiltih thinte hrechiang thei turin ka mamawh bawk a. Mahse, enge ka tih chuan ang? Duhsaki khan min ngaina lo hle a, salad tihbuak chungchang ah khan engtin chiah nge a lo sawi chhawn ka hrelo nain Sangtea hi inrawlh buai turin ka duh lem lo.
.
Ka banreka min rawn vawn chuan ka en ha a.
.
"Zing karah eng thil nge thleng? Tunah min hrilh rawh."
Ka thaw hluai. A hriat duh talh chhan hi enge ka hrelo nain ka hrilh mai ang chu.
.
"Duhsaki duh dan ni lovin salad ka siam a, laksawn ka tumin a lo vuan nghet ve tlat a. Ka thlah thut vangin salad chu a bua a. Chu zawng chu. Sawibelh tur a awm lo."
.
"Chuvang ringawt chuan khatiang khan hnuai chhiah takin an tawngkhum che a maw?"
.
"Min ngainat loh  vang anih kha. Ngainat loh zawng kan nei vek alawm. Kei pawn ka ngaina chuang lova." min vawnna chu thlahin a inher vut a, in chhung lam panin a let leh a. Eng thil nge maw a va tih chuan ang le? Va luh ve erawh ka tum lo bur.
.
Reiloteah a lo chhuak leh a, car-ah chuan lutin a ngawi hmak mai. Be bik lovin ka thu lut a, kan tlan thui deuh tawh hnuah a tawng ta chauh.
.
"Remtluanga khan thudik lo hre ve hrim hrim rawh se. A tawngkam vang khan i nat loh ka beisei."
.
"Na love."
"A tha a nih chu. I hmel ka rawn hmuh khan engtin nge i awm ka hrethiam vek alawm. Mahse, dawt min hrilh lo la aw."
.
"Dawt ka sawi hleinem."
.
"I hmel kha ka rawn hmu hman alawm."
.
"Okay. Sawi tawh lovang. In ah min hruai nghal mai la?" ka tih chuan a ngawi ve ta. Ni e, min tawngkhum dan kha uchuak tak chu a ni lo nain ka na ve tho. Thil nihphung man phalotu chu tunge tih kan la hria ang chu.
.
Sangtea chu in chhunga lo lut ve lovin a haw nghal a, naktuk ah hruai ka ngai tawh dawn lo tih ka hrilh chuan a ngawi reng. Remtluanga in a ka thawk lo anih pawhin thil tam tak ka ti thei tho ang. Eng ber nge ka tih ang tih erawh ka la hrethiam lo.
.
Eng emaw chen ka hahchawlh hnu chuan eitur ka siam a, mahni chauh hi chuan engmah a eitui theih tak tak chuang loh ni hian ka hre thin.
.
Eitur ka siam zo a, tihtur a vang. Khumah muin thil tam tak ka ngaihtuah a, ka tumlawk anga ka awm theih dawn tak loh vang hian mumal zawka ruahmanna ka siam a ngai ngei dawn a ni. Thil pakhat hriatchhuah ka nei!
Khum thawh sanin drawer ka hawng a, Remtluanga in-a ka thawh hma khan ka la mamawh ringin he thil hi ka lo lei lawk a. Tunah chuan a tangkai dawn ta anih hi. Ka thil lak chhuah chu dahlut lehin khumah ka let leh a, ka awm dan tur ngaihtuahin zawi zet hian ka mu a.
.
Ka mutthilh lai ka hrelo. Ka harh hlawl chuan khua a lo thim deuh ruai tawh a, ka eitur siamsa tilumin muangchangin ka ei a. Tlai lama ka thil ngaihtuah chhuah kha zanin hian bawhzui ngei ka duh.
.
Ka thil eina ka tihfai hnu chuan inbual in chhuak turin ka insiam a. Thawmhnaw ka inbel mawlh mawlh a, kawngka kik ri ka hriat chuan ka tawp deuh chawt. Tupawh lo kal se kal chhuak tur anga min rawn hmuh ka duh lo. Ka sam chu tuam leh sawk sawkin bathrobe ka ha a, kawngka hawng turin ka room atangin ka chhuak a.
.
Ka rin loh lutuk ber Remtluanga ka hmuh chuan "Hey!" ka ti hluai a. Awki pangngai deuh zawkin "Eng thil nge ni ta?" ka ti leh thei hram.
.
"Naktukah dan pangngaiin i hna rawn zawm ang che." kal leh mai tumin a inher a. Hemi rawn sawi tur ringawt hian maw a lo kal? Engtin nge ka awmna hmun hi a hriat? A inah ka thawk leh ang maw? Lawm tur nge lawm loh tur pawh ka hrethiam lo. Ni love, ka lawm hle tur a ni. Mahse, engvanga thawk leh tura min duh nge anih? Lawm ru hle mah ila a chhan ka hriat tho angai alawm.
.
"Engvangin? Engvangin nge ka lo kal leh ang?"
.
"Vawiin a thil thleng kha chu theihnghilh rawh."
.
"Engvanga lo let leh tur nge ka nih tih chiang taka ka hria a nih loh chuan ka lo thawk tawh lovang." ka tawngkam chu awih lo niawm tak hian min en chiang ngang mai. Ka tawng sual emawni ka ti hman hial. "I lo lut thei ang?" ka ti nghat a. Ka beisei loh lutukin a nui suk.
.
"I insawi thiam miah lo pawh kha mak ka ti ta lo."
.
In chhungah a lo lut a, thu mai lovin in chhung chu a enchik nasa mai. Ka thil neih ho chuan a nuih an tiza pawh a ni mahna. Pawi ka ti hran lo. Mi pathum thut theihna thutthleng pakhat leh dawhkante pakhat bak chu eirawngbawlna hmanrua tlem ka kawl a, fridge leh tv a ni leh tawp. Ka room ah erawh ka thil engkim deuhthaw ka dah thung a, hei vang tak hian ka room-ah tumah ka luhtir ngai lo. Thian kawm ngheh ka neih duh loh chhan pawh tunah hian keimah dik tak anga ka khawsak loh vang a ni. Sangtea hian min tlawh pawh  ber a, ani pawh ka room-ah a lut ngai chuang lo. Chubakah Mizoramah hian awm reng tumna ka nei lova, ka tihtur ka tihzawh rualin ka seilenna hmun pan nghal ka tum tho tho bawk.
.
"Lo thu rawh." ka tih hnu pawh chuan thut tum hmel a pu lem lo. Kei pawh thu bik lovin kut kuangkuah at chungin amah hlat thei angah ka ding ve bawk a.
.
"Hetah hian nangmah chauhin maw i chen?" min rawn en a, min melh dan atang chuan ka bathrobe hnuaia thawmhnaw ka inbel leh inbel loh a ngaihtuah ngeiin ka ring. Mipa ho zet hi chu! Tawngkama chhang lovin ka bu nghat ringawt. Ka rilru hria niawm takin a hawi sawn leh vat.
.
"Ramngaihsanga nen hian engtin nge in inhriat?"
.
"Kan inhriatna a rei tawh." tih ringawtin ka chhang. A hriat a tulna ka hrelo. "In pahnih hian in inhria tih ka lo hre miah lo a." ka ti dam thlap a. Ka hmuh thut khan alakah hian ka nungchang pangngai anga awm lo tura inthunun tur ka ni tih ka lo theihnghilh hmanhmawh a nih kha. Hmeichhia, mahni inringtawk ve tak leh induh ve tawk tak ka nihna hi he mihring lakah hian ka thup angai alawm. Thil harsa ber a ni hial ang. Mahni pianpui zia hi thup hleihtheih pawh a lo ni love. A tlachawp leh thil thleng thut, inngaihtuah hmasakna tur hun a awm loh hian a langchhuak tho tho. Chuvang chuan ka nih ang hian ka lang mai ang ka ti chawpchilh leh si! Rilru thlak chu a thiang alawm le.
.
"Tinge i tawng dan i thlak kher a." a ti ta chiah mai.
.
"A ni maw? Ka rin loh lutuk a ka hmuh vang che anih ka ring. Nge? I duh angin ka zah lo che tihna a ni thei em? Helai hi chu ka in a nia, ka duh danin ka awm ve thei a! I in a lal i nih ang chiah khan hetah chuan lal ka ni ve__"
.
Za lutuk hian a nui hawk hawk a, "Ka awih thei lo." a ti zui. "Hetiang nungchang hi i nei ang tih ka ring pha miah lo." Nuih tiza em em tur thil ka sawika hre miah lo. "A tha e. Kalna tur dang ka neih vangin ka thu lo mai ang. Naktuk ah i lo kal ngei dawn nia." A mak! Ani pawh hian ka rin loh tak nungchang a lo nei ve tho. "I eitur siam ka ngainat vangah ngai mai rawh." a mit min siai khum zeuh! Whoa! Eng thil nge thleng hi?
.
Min chhuahsan hnu chuan ka room-ah lutin Remtluanga awm dan kha ka ngaihtuah chhunzawm a. A in ah khan nui ve vak ngai lo ang maiin a thutak a, tun mai khan ka tawngkam vangin za lutukin a nui si a nih kha. Hmeichhe ngawi chuah chuah ai chuan hmeichhe harhvangin a hip zawk tih engvanga lo ring thiam lo nge ka nih? Thawklehkhata pawh awlsam taka a awm khan chhan a nei ngei ngei ang.
.
Ka lu thing nawk nawkin ka bathrobe hak chu ka phelh leh a, ka inchei zui mawlh mawlh a. Ka kal tumna hmunah hian miin awlsam taka min hriat ka duh lem loh vangin ka mit ka chei nasa khawp mai. Chiang taka min hresa lo chuan min hre mai thei lovang. Make up hman thiam tangkai vena ah ka ngai mai.
.
Ka inpeih meuh chuan dar 8 a ri dawn hnai der a. Ka in atanga hla deuh tak thleng ke in ka kal a, Taxi ka lo phar a, tun ang huna hmeichhia mahni chauha in chhuahsan chu inzuar turah min ngai tih Taxi driver min biak vel danah chuan ka hrethiam. Taxi hnunglam driver zawnah thuin thil thalo tih a tum anih vaih chuan a hnunglam atang hian ka bei mai dawn a ni.
.
Ka kal tumna in zawn kan thlen chuan driver chuan min melh zawk zawk a, a lo rin lawkna hmun lam ka pan loh vang tih ka hrechiang. Nui lui chungin ka chuan man ka pe a.
.
"Ka nungchang vang khan min hrethiam dawn nia." a ti zawi bal bal mai.
"I thiam loh a nih loh kha." tia chhangin ka kalsan nghal.
.
Helai hmuna an hun hman tur hi ka hriat lawkna a rei tawh deuh. Remtluanga in a ka thawh hma daih khan ruahmanna tam tak ka lo siam lawk tih ka sawilang tawh em? Tlaia ka ngaihtuah chhuak leh hlauh kha a mak zawk. Kalpui ka neih chuan loh vangin ka zalen ting a ni leh mai a. Ka hmai hliahna tur hmaikawr var, rangkachak rawnga inchei chu ka bag atanga phawrhin ka vuah a. He thil hi a ni hmaa ka lo lei lawk tawh, tangkai ta em em chu.
.
In chhungah pen lutin mipa thenkhat chuan min rawn ngaihven tih ka hria. Engahmah ngailo ang taka lang chung leh dak vahin ka tum lawkna lam bar counter chu ka pan a. Keihi tunge ka nih tih min hriat theih loh ang bawkin mi dang hmel pawh ka hmu thei bik chuang lo.
.
“Hey, I bulah ka lo thu thei angem?” ka thutna sira lo ding mipa lian zet lam chu hawiin ka bu nghat a. A mit chu ka hmu chiang thei lo.
.
“Tun hmain ka la hmu ngailo che.”
.
"Kan inang anih chu." ka aw ka ti danglam a, ani a lo nui thung. Ka hnunglamah a kut arawn dah a. A huangtau hma mah mah deuh anih hi. A hmai a hliah ve tho vanga ngampa pawh a ni maithei.
.
"I kut hi i laksawn theih chuan ka lawm hle ang." ka ti bung nghat a. Hetiang mipa kut hlei nghal lutuk ang chi hi ka ngaithei hlawl lo. Ka hriat ngai mi pawh a ni lo lehnghal.
.
"Oh! Sorry. Mapuia ka nia. I hming ka hre chak?" a kut arawn phar chhuak a, ka vuan mai duh lo lehpek. "Khawngaihin?" a ti leh a.
.
"Vansangi.. Ka hming chu Vansangi." a kut chu ka vuan ve ta hram. Ka lasawn leh rang khawp mai.
.
"Tlachawpa hming phuah i thiam vaklo a ni maw?" ka hming sawi chu a nuih chiang mai. Ring zet hian ka nui lui chiam a, a lo meng phar deuh awk.
.
"Tlachawpa hming phuah thin hi ka ngaina lova." la nui reng chungin a banah ka beng zeuh a, ka kalsan nghal. Ka ngainat theih miah loh tur mizia a nei kha a thiam loh pawh a ni love.
.
Ka intur lak chu ka tem zeuh a, ka duhthusam chiah a ni. Hetiang ni khua hian ka kal nasa thin viau nain zu hi ka in thei der lova, thildang tui zawk ka in mai zel. Kawngkaa lo lut ka hmuh chuan pindan kil lam panin ka kal thuai a. A hmel hmuh kher ngai lovin Remtluanga chu a pian atangin ka hai lo. A bula awm ve chu Duhsaki a ni tih ka hre nghal bawk. Tihian ka duh ang takin ralkhat atang hian ka lo thlithlai tawh mai dawn a ni.
.
Duhsaki nen chuan kal hrangin mipa pahnih thutna lam a pan a, ka mit fukna ber a nih vangin ka zui chawt a ni ber. Inhre lemlo pawh an inbe bawrh bawrh tho a, a thenin an hmaikhuhna an phelh zauh zauh bawk. Hlim tak angin an lang vek a, helai kan pan chhan hi a inang lo  nuaih ta ve ang.
.
Remtluanga leh a thiante titi hre pha tawk velin ka ding a, ka bula hmeichhe pakhat lo ding chuan min rawn bia niin ka hria. Remtluanga te ka ngaihven lutuk na lamah enge a sawi ka hre mai pek lo.
.
"I sawinawn leh mai thei em?" tiin ka nui a.
.
"Ka hmu tawh thin che in ka hria."
"Khawiah nge min hmu tawha i hriat?" ka tih chuan a nui hak hak phawt a.
"Ka hrelo. Model i nih ka ring. I pian ka en hian!" tunah chuan ka nui tak tak tawh. A awmang lo ka tih vang ai mahin min fakna vanga lawma nui pawh ka ni tel tho. Fak lawm lo tunge awm ang? Tuna fakna ka dawn phei hi chu ka la dawn ngai loh ania, ka lawm tak tak.
.
"Nangpawh i nalh hle mai. Mahse, i rin ang chu ka ni lo palh. Kan vawikhat inhmuhna a nih ka ring." ka tih chuan ka darah min rawn vuan a.
.
"Ka tihsual loh chuan sawlai mipa sawn a lo melh ngar ngar che. Sawpa saw ka hria asin." arawn ti sar sar a.
.
"Tunge anih?" ka lo ti tha ve mai a. Remtluanga a melh vangin amah ngei a sawi niah ka ngai.
"I ngaihven zui ka duh loh vangin ka hrilh lo ang che." nui sak pah hian a ti leh lawi a.
.
"Enge a awmzia?"
.
"Ka hmeichhiatpui ka venhim duh  vangah min ngaihsak mai rawh." za deuh hian a nui leh a, a mizia chu mak deuh ka tih rualin hriatchian ka chak khawp mai.
.
"Anih chuan ka hre duh lo ni mai rawh se."
"Ka ngaina dawn che tih ka hria. I ngaihven zui dawn loh chuan ka hrilh ang che. Remtluanga anih saw. A nupui hual pawh a rawn hruai kha. Duhsaki hi chu kan zavai hian kan ngaina hran lo. Ka tih palh, kan inhriatchian hmain i bulah mi chanchin tha lo lai ka sawi  ngam a nia. A danglam hle mai."
.
"A tha vek alawm." ka lo ti liam puat. Remtluanga chu a thutna atangin a tho a, kan awmna lam arawn pan tlat mai. Min rawn hnaih hmain kalsawn ngei ka duh.
.
"Sawlam ah sawn kal ila." tih pahin ka hmelhriat thar hmeichhe mize zangkhai tak chu a kai ta ngawt a. Min hnial lovin min zui hlauh.
.
"Tikhan kan tlanchhiatsan nghal tihna a ni maw?"
.
"I rilru a chak hle mai." amah en lovin kan kalsan tawh lam ka melh zeuh a, Remtluanga ka hmu tawh lo. Ka thaw deuh huai ringawt.
.
"Min lo en la." ka hawi let leh a, ka hmelhriat thar chuan a hmai hliahna phelhin min lo nuih sang a. A hmeltha khawp mai.
.
"I hmeltha hle mai."
"A ni tak tak em?"
.
"Ngaihtuah buai miah lovin ka chiang!" ka tih chuan a nui zui har har a.
.
"Ka lawm e. Anih chuan sawlaia mi sawn min duh i ring em? Middle school kan kal lai atang tawhin ka star tawh a." a melhna lam ka en chuan helai hmun ka luh tirha min lo pan chat tu mipa kha ani tih ka va hre thei.
.
"Amah saw i hrechiang em?"
"Middle school atangin ka hre tawh. Engtiang pawhin ka hai thei lo. A tha famkim bik lo tih chu ka hria a. Mahse, ka duh loh phah chuang lo." a mitmeng a ngui nghal raih a.
.
“Chutiang thil chu ka hrethiam ve lo. Hmangaihna niin I hria em?” mak tih hmel takin min melh a.
“A ni ngei ang. Hmangaihna hi ka thlakhlelh rualin ka duh lo bawk a.” Ngawi leh datin “Hmun dangah kal I duh em? Hmun mawi deuh hmuh theihna ah ka hruai ang che. Hetah hian i la kal ngailo nia hriatna ka nei.”
.
“A dik alawm. “
.
“Um.. Engtin nge ka koh dawn che? Ka awm dan hi a atthlak hle mai.”’ A ti leh rih.
.
“Sangpuii..”
“Cordelia.. I duh chuan Cordy tih pawhin min ko thei ang. Kal ang le.” A zangkhai leh vah tawh. A mizia hi hriatthiam a har ve viau dawn anih hi.
.
Kan kal dawn chiah tihin light arawn thim a, kan au dual mai. Muangchang hian rawng hrang hrangin in chhung chu arawn eng leh a, an au leh ruih ruih a. Pindan chhung chu ka enkual a, mawi tak a ni.  Ngaihzawng duhtak te nena awm ni ila chuan ka che romantic viau ang!! Engkim lan dan chu a cool tak zet.
.
Music ring zetin a rawn ri ruai ruai a, enge thleng zel dawn rin dan ka thiam chiah lo. Celine Dion hla Seduces me an rawn play a, Cordy chu a te that mai.
.
"Awi, lawks aw, ka kalsan lawk ang che." Cordy chuan  hmanhmawh zetin min kalsan a, ka enzui tak nain mi dang karah a inzep lut a, ka hmu zui thei ta lo.
.
Ka hnunglam atang chuan kut hian zei lutukin ka kawngah min rawn kuah a, ka phu deuh zawk. Mi dang chezia chu hmuh chuan an lam vek dawn tih erawh ka hrethiam ta.
.
Ka hnunglam atanga min rawn kuahtu chuan ka darah a khabe rawn nghatin ka bengbulah a rawn thaw lum ham ham a, ka tal chhuak dawn em tih ka ngaihtuah rualin enge thleng zel dawn tih ka hrechak bawk.
.
"Man fuh i har hle mai." music ri ruai ruai karah chuan a tawng chu ka hrechiang viau thung si. Tunge anih erawh ka la hre thei lo. "Min lampui thei angem?" a ti leh a. Remtluanga a ni tih ka hre chiah. Ka insangmar lo thei lo. "Inthlahdul rawh." a lam hawi turin min kuai her a, music rem chuan min lampui a, thil dang engmah ka ngaihtuah thei lo. Engtin nge thim zingah min rawn pan chat theih? Ka hmuh hmasak ber atanga nichin mai thleng kha chuan kan taksa ala indek ngai lova, amah a ni tih ka hriat hma hauh atang khan... Ka hnunglam atanga a kutin ka kawnga min rawn kuah chiah khan eng emaw ka feel! A taka thleng theilo leh thleng  ngai lo tura ka ngaih, taksa indeh ringawt a tek awm thin ang ka chhiar thin kha ka feel tlat nia. Heihi thil tha lam a ni thei lo.
.
"Ka hre ngai che em?" ka ti sap a. Ka aw ka tih danglam ngei a ngai bawk. A nui nghawr dat mai.
.
"Tunah min hre chiah anih hi." a ti duh chauh. Ka rin loh lutuk danin min chhang. "Umzui ngei ngei ngai i nih vang a nia." a ti leh a. Ka lo nui hak. Hmeichhe lakah chuan thei awm pawh a lo nih hi. A hmel a hmuh theih loh chung pawh hian mipa duhawmnaa khat ang maiin a lang thiam alawm le. Mahse, keichu min hneh ve lo ang!
.
"Ban phak loh tur umzui hian thil tha a thlen ngai lo a nia." ka tih chuan ka kawngah min hmer salh a. Ka awm dan a danglam tur a ni lo. Ka hmui hnuailam ka pet ta ringawt.
.
"Umzui tur dik ka hriat vang a ni ngei ang, ka umzui awmchhun i ni hlauh mai." amah hnaih lehzual turin min kuah nghet sauh a. Kan taksa a insi chial tawh. "I hmui kha i seh na ange?" nui hak paha a tih chuan ka hmui hnuailam ka sehna chu ka thlah rang khawp mai.
.
Tawng tawh lovin music rem chuan muangchangin kan lam dun a, ka hriat loh karin k ataksa tang teuh chu ka lo inthlahdul vek hman. Ka hriatchhuah chuan ka tlai tawh lutuk. Ka ban pahnihin a nghawngah ka lo kuah reng tawh. In sangmar tha lehin ka ban chu ka dahsawn dawn a, min lo vuan vat a. "Ruih theih ang mai i nih hi." ka mitah min en a tum tih ka hriat vangin ka en duh lo.
Music chu ka duh aiin an play rei ta.
.
"I hriat ngai loh hmeichhia hetianga hnaih hi a dik lovin i hre ve em?" ka tih chuan ka khabe ah min rawn dawm a, amah en thei tura min kawih dak a tum tih ka hriat vangin ka hawi sawn a.
.
"Ka mitah min en la, ka chhanna che chu i hre thei ang."
"Chu chu ka mamawh lo." ka ti ve thung.
"Hmeichhia ka hmuha ka mit la leh ka umzui awmchhun i ni tih hrilh che i la__"
.
"Chutiang thu chu hmeichhe engzat nge i hrilh tawh?" a nui hul hak mai.
.
"Huh.. Pakhat! Hmui fawh chakawm zet nei  hmeichhe pakhat hnenah chiah_" a tawngkam vang chuan sawi tur ka hre ta lo.
.
Vanneihthlak lutuk in music a tawp a, light a rawn en chuan ka inla hrang fel vek tawh. Kal sawn nghal tumin ka pen a, nghet lutuk mah mah hian ka banah min vuan chat a. "In chungah ka lo  nghak ang che." a tih chuan hrelo ang hmiaha awmin ka pen lui leh a, min vawnna chu a thlah ta hram. "Tunah_" a tih chu ka la hre hman. Ka kal dawn em? Keimah ka ni tih hrechhuak ta se engtin nge ka tih ang? Zan tirah khan a in a hnathawk leh turin min rawn hrilh a, mahse kha chu a dang daih. Tunah chuan mi hrang hlak ka ni. A in a eisiam tura a chhawr Jade ka ni rih lo!
.
Ka kal ngei ang. Amah hnaih hi ka tum ber a ni lawm ni? Ka mit sirin in chung pana a kal chu ka en a, ani pawh chuan ka kal dawn leh dawn loh ngaichang deuh niawm tak hian a kal hmanhmawh lo khawp mai.
.
*I ti thei. Tunah ti  rawh.* tia phun sepin Remtluanga lam pan chuan ka kal a. A lam pana ka kal min hmuh chuan a hmui a tisawi zauh a.
Muangchangin ka pan zel a, ka ngaihtuahna a fim hle. Amah hnaih thei tur hian a chak lohna ka hre phawt ang. Zanin hian eng thil pawh ti dawn ila ka hmaikawr vuah hi ka phelh tur a ni lo. Ka tukhuma ka hmaikawr tihbehna hrui chu a ngheh lehzual theih nan ka suih tha sauh sauh a. 
JADE
(Soddisfazione)
.
Thantei_LauraSean
.
CHAPTER - 4
.
In chung ka thlen chuan ka rin loh dan vek. In chhung ni siin hmar lam kilah pindan pakhat a awm a, a bak zawng chu awl zau tak a ni tawp a. Thutna tur nawm  hmel zet zet a khat tawkin a inhung a, pangpar a inhung thliah thliah bawk. Hetiang pindan hi eng atan nge an hman ang? Nawmchen nan bak an hmangin ka ring lo.
.
Ka sir veilam ka en chuan Remtluanga chu bang nghengin a lo ding awn deuh a, min lo en chiang khawp mai. Rang lutuk mah mah hian ka mit la sawnin a lo dinna lam chu ka pan a. Ka huaisen a ngai dawn hle mai.
A bul ka thlen chuan tawng miah lo hian a ban dinglam arawn phar chhuak a, ka lo vuan ve mai a. A taksa ka deh hian engtin emaw ni ka awm ziah. He thil hi ka duh lo. He mihring hi ka tan engmah a ni lo. Alak atanga ka duh zawng chu phuba lak chiah a ni. Ka u neihchhun tuarna nasa tak kha ka theihnghilh lovang.
.
"Thil dang daih i ngaihtuah ka duh dawn lo a nia." ka beng bulah arawn thaw lum ham ham a, ka thil ngaihtuah lai chu ka bansan rih a tul. A nghawngah kuahin ka dak deuh a, a beng hmawrah ka seh zeuh a, a thaw hrawih ri ka hriat chuan ka tumah ka hlawhtling ta phawt tih ka hria. Tawng tumin a ang zet a, engmah sawi lova rawn kun hniamin ka hmuiah min rawn fawp a. Min fawh dan chu a ngenngawl hle! Chhan let tum miah lo khan engtik laiin nge min fawhna chu ka chhan let ka hre hman lo.
.
"Eng thil nge i nih?" ka hmui la si reng chungin a tawng a, a thawk dan a mumal lo hle. Kei pawh hi engvak nge ka nih chuan le? Ka kawnga min kuahna chu tinghet leh zualin bangah min nek bet a, a hma aia duhthawh hian min fawp leh a. Ka khup a zawi vek. A nghawnga ka kuahna chu ka thlah thei bik lo.Ka hmaikawr chu phelh tum niawm takin ka tukhum lamah a khawih a, a kut chu ka vuan rang teh e.
.
"He thil hi a dik lo!" ka sawi chhuah rualin kei pawh ka harh chhuak ni maiin ka inhria. Ti ila ka vai deuh ruai tho mai. A rimtui hman rim hiar ni chiah si lo, huhang na zet leh hnimhnah rim niawm tak, a zun ngaihna zet chu ka hip a, inngaihtuah harh ka mamawh.
.
"Engmah dik lo a awm lo?" ka nghawngah min fawp dan dan a, ka kut zungpui chuan ka beng bulah eng hna emawni a thawk bawk. Hetiang thil hi ka la hre ngai lo.
.
"Nupui hual i nei tih ka hria a nia." Inlakhran tumin rem vaklo chung hian a awmah ka nem a, a che sawn eih lo. Thil pakhat theihnghilh ka nei! Ka taksa min khawihna vang hian ka inthununna ka hloh a, ka aw ka ti danglam ngei ngei tur ani tih ka lo theihnghilh hmin der! Min chhang mai lovin ka mitah min en tumin ka hmai zawnah arawn kun hniam a, ka hawisawn hmain nghet lutuk hian a kut zungtang nalh zet chuan ka khabe ah min vuan ta tlat lehnghal. Engtiklaiin nge kut a nalh tak a nei tih hi ka lo hriat hman pawh ka inhre lo. Ka va tenawm tak em! Ka u phatsan angah ka inngai hial nia.
.
"Tunhmain ka la hmu ngai lo che. I hming min hrilh rawh?" awki hniam lutuk mah mah hian a tawng a, a ngenngawl em em lawi si.
.
"Ka hming i hriat chuan awmzia a nei lovang. Kal ila a that zawk ka ring. Khangaihin min thlah rawh." ama tawng ang chiaha zawiin ka tawng a, a hmui hnuailam a liak zauh ka hmuh chuan ka chil ka lem khawlh mai.
.
Kan lam pana lo kal niawm tak thawm ka hriat chuan a awmah na lehzualin ka nem a, thawm a hriat ve tho vangin min thlah lo thei ta lo.
.
"Ka hming hriat phu nia ka ngaih hunah che ka hming chu ka hrilh ang che." amah hnungchhawn zawnga inher in ka pen sawn a, a nui hawk ri ka la hre phak. Pen tam ka la pen hman lo, Duhsaki nen kan intawk ta chat mai le. Ngaihtha lo lutuk hmela min en chu engahmah ngai duh lo leh amah chu hre ngailo ang hmiahin ka kal pel a, in hnuai panna step chanve ka thlen chuan ka chawl ta chauh. Ka thaw nghal hawk hawk mai. Min va rawn nangching teuh ther ther ve.. Ka laka Remtluanga awm dan atang khan ka rin aia awlsam in Duhsaki nen an inkar hi zawimuang leh uluk takin ka tichat thei ngei dawn tih ka hrechiang. Chu chauh pawh chu tun atan chuan a tawk em em rih. Zanin atan chuan ka duhtawk phawt ang.
.
Hawi sang vah chungin in hnuai lam panin ka chhuk a, tumah be tawh lovin in chu ka chhuahsan a. Cordy pawh ka hmu tawh lo. A mipa duhtak nen khan hmun dang an pan ta pawh a ni mahna le.
.
In a ka haw dan turah ka buai ta. Zan dar 11 a ri dawn hnai a, tun ang hunah Taxi ka hmang ngam tawh lovang. Kawt zawla lo awm ho chu ka en kual a, an zavai maiin harhfim hmel an pu tawh lo. Ka duhthusam chiah a ni. Tuna ka dinhmun ah hian mihring harhfim ka hnaih a thiang lo. Min hre zui tur leh min umzui duh tur chi ngat phei chu a chi loh lehzual.
.
Ka piah hla deuh a mi pakhat dawhkan bawh a awm chu ka pan a, a dara ka sawih chuan a rawn rum dut dut chauh mai. Heihi ka mi duh tak chu a nih hi.
.
"Thianpa, i harh em? Haw ka duh tawh a nia." ka ti ve thla rawk a. Mit sen rum leh harhfim lo lutuk takzet hian lo hawi chhuakin ka hmel min hmuh chuan a nui suk.
.
"Ga_Ka_ipte ah hian _j_ja_chahbi a awm__ddnang_ddnangman_ggkhalh drraw." ka vanneih hun a inher chhuak anih tak ber hi. A thutna chair atang chuan harsa zet hian ka kuah tho a, ka darah uai hnup chungin ka kalpui thei tawk tawk. A car zawn hmuh a har lo hlauh lehzel a.
.
A car chu hawngin passenger seat ah harsa zet bawkin ka thut luhtir a, kei driver seat ah thu lutin car chu ka tinung a, mi dangin min hmuh hman hlau ru tak chungin kawt zawl zau zet atang chuan kan tlan chhuak ta a. Car neitupa hmel chu ka ve en a, a mutui khawp mai. A chatthla nghal a nih hmel. Ka tan chuan a tha hlei hlei. A phun nuah nuah a, a tawng ka hriat theih awm chhun chu *a nilo* tih leh *pui_pui_* a tih zawng chu a ni. A hmeltha phian lehnghal.
.
"Rilru natna i nei emaw ni le?" tiin ka phun a, ka tawng chu a hrelo tih hriat tak hian a lu chauh ni lo a taksa zawng zawng nen a awn ang durh durh a.
.
Ka in atanga hla deuh takah car chu tidingin ka chhuk sana, he tlangval hian tawh sual a tawk em lovang. Ka rilru erawh a nuam lo khawp mai. In ah hawin ka inthlak zet phawt anga, tih dan ka ngaihtuah leh mai ang.
.
Rilru hmanhmawh deuhin ka kal hlawk hlawk a, ka pheikhawk bun sang bawk nen ka duh ang pawhin ka kal chak thei lo. Ka pheikhawk chu ka phelh leh te te a, ka tlan ta hlawk hlawk a. Min lo hmu an awm loh hram ka beisei e.
.
Ka in chhung ka luh veleh ka thawmhnaw hak chu phelh sawk sawkin ka inbual a, thawmhnaw hak nuam ka hak hnu chuan in atangin ka chhuak leh a. Nichin khan lo ngaihtuah chhuak ila tha tur a nia. A car kawngkhar zawng zawng kha lock ila, chhunglam atangin a hawng thei dawn tho sia, a him a nimai dawn a.
.
Car ka din tirna hmun ka thlen hma deuh atangin ka kalsanna hmunah car chu a lo awm tawh lo tih ka hmuh chuan ka thawk huai rualin ka hlauthawng tel tho. Khatiang khawpa harhfim lo chung khan engtin nge motor a khalh theih ang? A chesual anih teh chuan.. Ni lo, ni lo.. Chutiang thil chu a thleng lovang.
.
Tih theih dang ka neih chuan loh vangin awm nuam chiah lo chung chuan ka in lam panin ka haw a. Ka mu tui dawn hauh lo mai. Nak tukah Remtluanga in ah ka kal dawn nge dawn lo pawh ka la chiang ngam lo. Zanina thil thlen dan atang khan a in a hnathawh kher mamawh in ka inhre ta lo deuh bawk. Ka lemchan hmang khan ka hnaih zel theih ka ring. Engtiangin nge awm ila tha ber ang?
.
Ka inlet kual sek a, khawvar dawn hnaihah ka muhil ve ta hram a. Ka rin loh lutuk in mumang bo thak khawpin ka muhil bawrh bawrh a.
.
"Hmmmm.." chu thawm chu ka ning lutuk. Engvanga reh thei miah lo nge maw anih le. Harhchiang lovin ka inlet thawk a, thawm chu a la reh chuang lo. Ka mumang nen inpawlh nuaiin ka buai zova, ka mumang lamah vawithum zet chu ka tho tawh! A mak lutuk, ka harh chiang thei miah lo.
.
Nasa zawkin thawm chu arawn awm leh a, tunah chuan thawm chauh a ni tawh lo ka hminga min ko ri pawh ka hre tel tawh. Khumah ka thu hlawl a, harh chiang lo chung chuan khum atanga chhukin ka room atangin ka chhuak a. Kawngka ka hawn rualin thaw huai ri ka hre nghal.
.
"A va mak em em ve. Harhchhuak tur i awm tawh lo ah ka lo ngai hman thleh alawm." Sangtea hmel chu meng chiang mang lo leh mit kiai nawk nawk chungin ka en a, a nui ta hawk hawk mai.
.
"Enge a? Ka mumang ah vawithum lai ka tho hman a nia. Zing zingah.." la ham bai bai chunga ka tawng chu la nui reng chungin min en tawp. A sana bun lai chu ka hmai zawnah arawn lek kang a, dar zat ka hmuh chuan ka meng kawk mai. Tlai lam dar 3 a lo pel tawh.
.
"Ka awih thei lo. Engtin nge anih theih a.." ka ti nang nang a.
.
"Hei vang hian alawm ka hlauhthawn hman em em? I hmai kha va phih rawh. Zing thingpui tlaiah i in chhak dawn anih hi. Ka lo chhuang ang." a ti zung zung a. Vawiin chu enge a hriat a, heti khawpa a mood arawn fuh ni?
.
"I mood a va fuh awm cher cher ve."
"Thil tha deuh hriat ka nei a." a tih chuan bathroom pana ka kal tawh chu ka ding leh rih.
.
"Enge?"
.
"I hmai kha va phih phawt rawh." a ti awlsam then a.
.
Bathroom-ah lutin ka hmai ka phih a, ka harhchiang lehzual ta. Mak ka la ti tho tho mai. Engtin nge harh miah lova nilenga ka mut theih? Kei mahah hian dik lo a awm anih loh chuan thil dik tawk lo eng emaw tal a awm ngei ngei ang. Ka intihfai zawh chuan chhuakin ka thawmhnaw ka thlak a, Sangtea zai rut rut ri ka hriat chuan keimahin ka nui tawp. Eng chungchang tak hria ang maw? A tha hle a ni phawt ang.
.
Ka room atanga ka chhuah chuan ka dawhkan neih chhunah thingpui a lo khu vat vat a. Zingkar thawh hlimah thingpui ka in ngai lo nain Sangtea meuhin a chhuang sia, ka in sak ngei angai ang chu. Bakah, zing pawh a nih tawh loh hi.
.
Thingpui no chu la in ka in zeuh a, chair awlah chuan ka thu nghal bawk a.
.
"Eng thil nge a?" ka ti leh nghal tawp. Ka hriat chak em em chhan pawh ka hre chuang lova, eng chungchang nge ni ang tih pawh ka ring thiam chuang lo.
.
"I hna thar tur ka hmu a."
"Maw?" ka thingpui in lai chu ka phuh lo chauh.
.
"I hna thar tur.. I lawm vak nange?" a hmel a danglam nghal deuh titih.
"Aih_ Chutiang a ni lo. A rang teh thut em a."
.
"Remtluanga in a thawh chu nuam i lo ti hle a nimaw?"
.
"Enge chu chu.. A viau lo teh. Taka, nimin khan a in a thawk turin min rawn sawm leh a. Amah ngei hetah hian a lo kal asin. Mak ka ti__"
.
"Hetah hian a lo kal maw? Lalremtluanga maw?"
.
"Um__"
.
"Chupa chuan enge a hriat a? I hnaih tawh dawn lo tih hre phawt rawh."
.
"Enge ni vak. Amah a sual chuang lova, Duhsaki kha tlemin a harsa deuh a nimai a.."
.
"Chu, thawh leh hmiah i tum tihna a ni em?"
Ka hre lo. Ka sawi chhuak lo nain ka hre lo tak tak. Tun maiah khan Remtluanga thlavang hauh ka va ang ve!
.
"Tun thlengin ka la kal lova, ka thawk tawh dawn lo tihna a nimai ang chu." ka tih chuan Sangtea hmel chu a thawven hmel huai. Hepa pui hian enge maw a hriat le? "Thawk pawh ni ila, enge pawi vak chuang a."
.
"Khatianga tawng khum i tawh hnuah i thawk leh anih chuan Duhsaki kha a nasa zual sauh dawn tih i hrethiam lo mi? Ka rin ai hian i ngaihtuah tlem thin. Bakah_" sawi zawm duh lovin a ngawi leh daih. A hmaa ka lo ngaihtuah tawh thil kha.. Sangtea hian Remtluanga hi lo hre reng a, engtianga inhria nge ka la zawt miah lo.
.
"Remtluanga hi i hria tih i la sawi ngai miah lo a. Engtin nge in inhriat? I mmil hmel vak loh bawk a?"
.
"Tul ka tih hunah ka hrilh ang che." a ti chhum hmak mai. Min chhan dan chu ka ngei ve deuh bawk.
.
"Anih chu. Ka zawt tawh miah lovang che."
.
"Ka lawm khawp ang."
.
"Hey, nang hi enge i hriat a?" ka melh khai khai a, engahmah min ngaih hmel lem hlei lova. Sangtea bulah hi chuan ka nihna ang angin ka lang ngam a, ven thawn ka nei miah lo. Amah chauh hi ka u tih lohah inveng miah lova ka awm ngamna a ni hial ang chu.
.
"Insiam rawh, i hna thar tur chu ka hmuhtir ang che."
.
"Nak tukah a theih loh mi? Tunah chuan ka chhuak peih lo."
.
"Vawiin ah i kal a nih loh chuan an chhawr duh kher lovang che. Insiam vak pawh angai lo. Tikhan kal tawp theih. In zo la." tih pahin ka thingpui no ken chu arawn kawk zeuh a.
.
Sangtea nen kan inzui chhuak a, ka rin lohna lamah kan kal nghal pang.
.
"Helam te chu.."
.
"A hmun kan thlen hma chuan lo ngawi rih la." a tih chuan ka melh pawk a, engmah ka sawi zui ta bik lo.
.
In lian zet kawtah kan ding a, thil eng emaw tihtur a neih vanga peng lawk tur kan nia ka ngaih laiin ka thutna lam kawngkhar a rawn hawng a.
.
"Hetah enge kan tih dawn?"
.
"Helai hmun hi chhawr duhtu che chenna a nia."
.
"Sangte?"
"Lo chhuk la. Ka in anih hi." a nui sang a. Mahse kei hi ka awm dan a dik lo.
.
"Ka chhuk dawn lo. Min chhawr ringawt thei hleinem. Bakah i lak atang hian hlawh lak ka duh lo. I tan ka ti anih chuan hlawh neih ka duh lo." thaw lovin ka sawi zawm vek a, ka tawng zawh chuan thawk ka la hawk a.
.
"Lo chhuk rawh."
"Ka chhuk dawn lo." ka ti tak tak. Engvang mahin Sangtea tan hian ka thawk lovang. A hnen atanga hlawh lak hi ka duh lo bur tak tak. Ka thian a ni a, ka uanu anga ka en a ni bawk a.. Maw? Ni e. Sangtea hi ka unau ang chiahin ka en tih tunah khan ka hre thar leh.
.
"Unau hnen atanga hlawh lak ka duh lo."
.
A thinrim hman tep kha a nia, ka tawngkam a hriat chuan a hmel a nem ta thluam mai.
.
"Khawngaihin.. I tan ka tihtheih tawk a nia, thil dang engmah ka tihsak thei lo che a."
.
"Ni lo, ka thei lo."
.
Rei fe kan inhnial hnu chuan inngaihtuah tha leh tur angin ka insawi a, beiseina tlem siam sakin ka in lamah ka inthlah tir leh thei hram.
.
Dik tak chuan ka unau nia ka ngaih vang leh thil dang zawng zawng kha chu dah tha in Sangtea'n a in ni a a sawi ah khan ka lut duh lo. Ka hriatthiam phak miah loh hian min rap tlat. Chu chu ka hrechhuak tih sawitur ka nei chuang lo nain sawifiah mai theih loh khawpa nasa hian in lian leh changkang tak nia lang chu rapthlak ka ti tlat a ni. Ka hrethiam bik lo.
.
Ka in kan thlen chuan in chhungah lo lut ve tawh lovin min kalsan a, a lungawi chiah lo tih ka hrethiam. Mahse, min duhsakna kha ka pawm thei chuang lo. Ka ngaihtuah zawng ringawt pawh hian ka hmul thi a ding sung sung  thei  nia.. Mak ka ti hle mai a!
.
Thutna ka neih chhunah chuan thu hnawkin ceiling ka en a, thawk ka la vang vang a. Ka phone ri ka hriat chuan ka phu chiang lutuk. Phun hlak chungin ka bag chhunga phone ka dah chu ka phawrh a.
.
"Hello."
"Jade?"
"Aw, keimah." a ngawi leh vang vang mai. Min lo betu hi tunge anih ka hria. Ka hming a lamrik rual khan ka hre nghal.
.
"Eng thil nge ni ta?" min la chhan mai loh vang chuan ka hlauthawng ta deuh. Ka aw atang hian nizana a fawh hmeichhia, hmel hmuh theih loh kha ka ni tih a hria a ni maithei.
.
"Engvanga lo kal lo nge i nih?"
.
"Ka lo thawk duh tawh lo pawh a ni thei a."
.
"Tunah lo kal rawh."
.
"Thu min pe ringawt tur khan i mi chhawr, i chhiahhlawh ka ni tawh lo a nia."
.
"I tawngkam hman duh dan chuh!"
.
Chhang tawh lovin phone ka off daih. Ka phone rawn ri leh chu en in pick up ka tum tawh lo. A hnu lawkah Private Message tone a rawn rik chuan ka en leh ta tho.
.
*Khawngaihin lo kal rawh. Riltama mut ka duh lo." tih zawng hi!
.
*I duh chuan hmun dangah i ei chhuak thei alawm* ka inrin hmain ka chhang. Thawt thawt hian aw!
.
*I siam ngei ka ei duh.* message chu a bei tawi thei. Ka eitur siam kha tui a ti tak tak nge? Ni lo, heti zawnga ngaihtuah chhan tur ka nei lo.
.
*A nih chuan riltama i mut ziah a tul dawn a nih chu. Bye!*
Message tone ri leh chu ka en duh tawh lo. Ka phone chu ka thutna ah chuan kalsanin ka room-ah ka lut a, thawmhnaw hak nuam zawk hain laptop ka phawrh a. Ka awm dan hi ka duh lo. Mizorama ka awm chhan ber hi ka hrereng tur a ni.
.
Khumah bawk chungin ka u thlalak ka en kual a, ka inngaihtuah muk nasa mai. Kawngka kik thawm ka hriat chuan ka phu chiang lutuk. Remtluanga anih ngei ringin ka hlauthawng tel bawk. Nizan a alaka ka awm dan kha.. Min lo hre ru reng ta se??
.
A tha e. Tunah chuan ka la hmu duh rih lo. Kawngka pawh ka hawng lovang.
.
JADE
(Soddisfazione)
.
Thantei_LauraSean
.
CHAPTER - 5
.
Kawngka chu chhum lo chat lo hian a ri char char a, a thawm lo hre phak tan chuan thil diklo a awm anih an ring ngei ang. Ngaih dan ni vak lo chunga thovin kawngka ka hawng a.
.
"Eng thil nge ni ta?" ka inthunun a ngai. Ka hmaa ding hi nizana zurui a motor ka khalhsak kha a ni. Eng thil nge arawn tih dawn?
Min chhang mai lovin min en deuh ngur ngur a, zam lo ang taka lang chungin ka en let ve ngar a.
.
"He laiah hian Lalrinpuii tih hmingpu an cheng em?" min zawhna chu ka rin loh lam daih a ni. Lalrinpuii tih hmingpu helai hnaiah an chen awm ka hrelo. Bakah, rual ka pawl tam lova, hmelhriat ka nei tam lem lo hrim hrim bawk.
.
Ka lu thing zauhin "An awm awm ka va hre lo ve. Helaia ka awmna chin hi ala rei bik lova." tiin ka chhang a. A bu nghut nghut a.
.
"Anih chu. Kan inhmu tawh thin em?" a ti leh rih. A mitmeng atang chuan min hrelo tih ka hriatchian  tak avangin ka ngampa leh ta deuh.
.
"La inhmu lo a niang. Thiltih laklawh ka nei a." dawt sawiin in chhung lam ka melh a, inthiam vak lo hmelpu hian a nui ta sak a.
.
"Ka kal ange."
"Aw le." ka lo ti vat. Kawngka ka khar a, 'Khawiah emaw ka hmu tawh chiang' a ti zui bul bul ri chu ka hre reng mai. Min hrechhuak lo zawk rawh se!
.
Thut pawh ka thu hman lo tihah kawngka kik thawm a awm leh a, vawiin zet chu a mak mawlh mawlh hle mai.
.
"Enge ni ta?" kawngka ka hawn rualin ka hmaa ding chu ka en a. "Enge i rawn tih dawn?" Duhsaki hian engtin nge ka awmna hmun hi a hriat? Engti turin nge a lo kal reng reng le? A hmel dur deuh khap dan atang chuan a thinrimna hrikthlak nana min hman a tum ngei ang tih ka ring.
.
Lut tura ka sawm hun pawh nghak lovin inchhung ah a rawn pen lut a, ka inchhung chu reiloteah a enkual vek hman. A zau lo ve em kher bawk a.
.
"Hetah hian tu nen nge in chen?"
.
Chhan ka tum lo zet a, engamah hmaa amah hi ka mil bik lo tih tihlan ka duh leh loh vangin a hmel enin ka nui lui a.
.
"Keimah in."
.
"Hmm.. Hmeichhia mahni chauha khawsak chu i zalen hle ang maw?"
.
"Zalen khawp mai." ka ti ve hmiah. Ka zalen reng bawk a.
.
"Mi in luah ve mai mai hi chu fimkhur viau tur asin." a ti leh nghat.
.
"I sawi tum tak sawi mai rawh." ka ti hmak. A sawi tum tak sawi lova thil dang sawi vak hian hun a tihek mai mai.
.
"Nangte hi eng hmuh in nge maw a hmuh che le?" a phun hlawk hlawk a, ka hmel min rawn  en chuan a nui lui  ngial a. A hlauhawm zawk hle mai. A tawng kha ka hriat loh ring niawm tak hian a awm lui a, ka hriat ngei a duh vanga sawi a ni tih ka hria. A sawi awmzia erawh ka ngaihtuah zui duh lo.
.
"Engvanga lo kal nge i nih le? Thiltih laklawh ka nei a, hun hi ka ui angreng."
.
"Kan in ah hnathawk turin ka rawn sawm nawn leh che. Vawiin atang hian i lo kal leh dawn nia. Bakah, hnathawh nei lovin i awm rei thei chuang hleinem tiraw? My Dear-a hian a khawngaih em che a, chuvang chauha lo thawk leh tur i ni tih erawh i inhre dawn nia."
.
"Tuin nge ka lo thawk leh duh tih hrilh che?" ka thawk leh  mai dawn em niang ti khan ka lo inngaihtuah hman deuh kha a nia. Hetiang anih dawn chuan ka tan tha zawk dawn mah se ka thawk duh tawh hauh lovang.
.
"Nangmah hruai tur che hian alawm ka lo kal."
.
"I hun a va uiawm ve. Thawhna tur dang ka lo nei tawh a." ka tih chuan phawk deuh hra hian min en a, awihlo hmel a pu bawk.
.
"A lawmawm anih chu. Lo thawk turin ka duh reng reng lo che__ Nang ang engmah ni lo, mahni in duh ve ringawt lehnghal. Ka pasal hual i melh dan pawh hi ka hrelo emaw ti suh aw. Hun reilote i rawn kal chhung khan i nungchang awm chu ka hre vek."
.
"I rilru a chak hle mai. Min chhuahsan thei ang. I My Dear-a chu min khawngaih lo turin i lo hrilh dawn nia. Min ngaihtuah vangin lawmthu ka hrilh dawn che em?" ka tilet ve salh a. A helh awl awl ta ve ang!
.
"Khanglang che chuan a. Hetiang hmuna cheng ve mai hian chutiang thu chu engtin nge i sawi  ngam zawk? I inzawrhna hlawh bak eitur i neih pawh ka ring hrep lo ve."
.
Chhan ngai ka ti tawh lo. He hmeichhia hian min huat chhan tur a neih ka hre lova, tunge ka nih a hre hek lo. Thil engmah hrechiang lova a chhe thei ang bera mi rawn ngai hi amah hi a khawngaihthlak zawk.
"Hetah hian enge i tih?" Remtluanga chu kan en rual thawt. Hei, eng thil nge thleng hi? An pahnih hian eng thil  nge an hriat? Remtluanga chu arawn pen lut a, Duhsaki chu a melh chiang hle.
.
.
"Oh! Dear, kan in a thawk leh turin ka lo sawm mek a. Nangmah kal i tum tho tih i sawi khan ka tan a remchang tho sia ka tia, ka peng lawk anih hi." a ti zat zat a. A rilru chak zia chu a fakawm zawk hle mai a. Inthiam lo leh awm nuam lo hmel, dawtsawi hmel a pu miah lo. A nungchang ka hmuh tawh chin zawng atanga ka ngaih dan chu 'Hmeichhe pakhat chu a nih ve ngei dawn hi.' tih zawng hi a ni.
.
Remtluanga chu a tawng lo. Duhsaki chu a pan hnaia a banrek ah kaiin ka in atang chuan a kai chhuak a, kawngka an pelh rualin chhung lamah ka kalh hmak. Rawn kik leh mah se ka hawng tawh lovang.
.
.
Ka ngaichang deuh ran a, a reh ta vang vang mai. Vawiin tehhrep chu harhin hun ka hmang tam lo naa, ka harh chhunah ka hun hman a nuam zawk zawk lo hle anih hi.
Thil dang tih mai tur ka neih chuan loh vangin ka room-ah ka lut leh a, ka hna hmabak phawrh in thil dang zawng zawng ka ngaihtuah leh ta lo.
.
LALREMTLUANGA*
.
16 YEARS BACK!
.
"Saw nu saw i hre tawh ngai em?"
Ka thianpa enna lam ka hawi a. Hmeichhe sa tha ve lam pang kan awmna pana a lo kal chu hmuh loh theih pawh a ni lo.
.
"Enge?"
"A fel a nia aw. Hmanni ah pawh ka thian ten buaina an tawk a, Delhi a awmna a rei tawh aniang. A hnehsawh rap mawle_ Ka va be lawk." tih leh min kalsan a rual a. A sawi nu chu tunhmain ka la hre lo chauh pawh a ni lo ka la hmu ngai lo hrim hrim.
.
Reivaklo hnuah ka thianpa Remruata chu lo letin kan kal tumna hmun kan pan ta chauh a.
.
"Nichin a mi nu kha ka duh angem?"
"Maw?" ka ti hu. Dik taka sawi chuan ka duh pui lem lo. Tunah kum 17 chauh kan la ni a, kha hmeichhia kha a tlem berah kum 23/24 vel anih tawh ka ring. Mipa zawk naupang hi ka duhzawng a ni ve lo.
.
"Nula a la ni mi?" ka tih chuan min nuih ta chiam ringawt.
.
"Nula anih leh nih loh ah buai angai hleinem. Zanin hian an in ah ka kal dawn a, i duh chuan lo kal ve la."
.
"Ka peih lo."
"Min duhpuilo tih ka hre mai." a ti hmak a. Hetianga a tawng tawh chuan a lungawi lo hle tihna a ni. Kha hmeichhia kha duh pui lo mah ila ka thianpa hi ka kalpui ngei a ngai dawn anih hi. Ka peih loh zia chu sawi pawh ngai lo zawk teh se. Kan rualpui hmeichhhe nalh lutuk tam tak an awm lai a, amah aia upa lutuk a ngaizawng tur chu ka duh pui thei thlawt lo.
.
Class-a kan thut chhung zawng ka thiana chuan min be leh tawh lo. Thil hi a la na hma ve ania. Professor Singh class a zawh hnu chuan ngawi reng hian class atangin kan chhuak a, ka thianpa chu ka lakah a la lungawi lo tih ka hria.
.
"Ti khan lo va haw rawh." a ti vei hmuk a.
.
"Hey, ho tet tut viau thin suh. I duh anih chuan ka lo ngaihdan vanga buai angai hleinem. Kan kal dawn nia." ka tih chuan lawm zeta nui chungin ka banbulah min rawn hnek pawp a.
.
Rei fe kan kal tumna hmun kan zawn hnu chuan zan dar 9 dawnah kan hmu ta hram. Door bell pawh hmet ngam lo khawpin Remruata hi a zam nia! A va tenawm tak e aw!
.
"Mipa hetiang em em a zam chu a mak lam deuh chu ni."
.
"Ngawi mai teh. I hrethiam lo anih kha." a ti duh lek chauh lehnghal a.
.
Reivaklo ah chhun a kan hmuh tawh hmeichhe sa tha ve lampang khan kawngka arawn hawng a, chhuna a landan ai chuan ka hmu zia ta deuh. Remruata'n a fak nasat em vang pawh a niang. Mahse, ka la duh pui chuang lo.
.
"Lo kal ru. In lo kal dawn lo anih hi ka lo ti hman a." tiin a nui sang a. An inchhung chei dan chu khawsak sang tawk ve tak anni tih a chiang khawp mai. Ka thiana ngaihzawng tur hi a hming pawh ka la hre lo.
.
"Ka thianpa hi Remtluanga anih hi. Remtluang ani hi Ludy." kan in chibai hnu chuan a titi zui siam siam a, Remruata chuan mit tla lo chuah hian a en tak dauh dauh a. A englai tak hi nge tha a tih a, a duh em em chhan ka ngaihtuah pha lo.
.
"Khawiah nge ka colour ho kha a awm_" ka phu zawk! Room atangin hmeichhe naupang kum 8/9 rual vel hi arawn chhuak a. Min hmuh chuan a ding chat a. Eheu! Ludy fa a ni maw!
.
"U, ka colour ka hmu lova.." a ti sin leh rat a. Nu tiin a ko miah lo. An hmel lah chu a inang em em lehnghal.
.
"Ngawi lawk ru aw, ka'n zawnpui lawk ange." tiin Ludy chuan min kalsan a, naupang room niawm takah chuan an inzui lut a. Rei lovah naupang chu lo chhuak in min rawn kal pel a, choka ah kalin a ri rak rak a. A lo chhuah leh chuan intur niawm tak a rawn chawi chhuak ta reuh. A chezia chu ka inhriat miah lohin ka lo chik hle a ni. Naupang kum 8 mi lek chetphung atan chuan a fel ka ti reuh khawp mai. Amah te chuan eng emaw hi a ei bawk.
.
"Mami, i hming min lo hrilh?" ka tih chuan chiang fahran hian min en a, a zahthlak lek lek. A mitmeng danglam zet chu ka en reng a.
.
"Hey, thiana, engtik laiin nge naupang i lo lawm tak viau a."
.
"A fel reuh em a, ka zawt mai mai."
.
"Ka hming chu Vansangpuii a nia." a tawng fiah khawp.
.
"I fel hle mai." ka tih chuan a nui seih a. Zak niawm tak hian a kimki deuh bawk. Engmah sawi tawh lovin a pindan lamah a kal leh a, a luh hnu lawkah Remruata tawih tur pawh chu arawn chhuak ve leh mai bawk a.
.
"Ka naute anih kha. A fel ania." a chhuang tih a hriat reng. Unau an nih si chuan an kum inthlauh tur zia ka lo ngaihtuah leh hman pek. Nufa ni zawk awm tak an ni. He in ah hian midang cheng ve an awm lo anih hmel bawk.
.
"In pahnih chauh hian em ni in awm a?" Remruata chu ka melh zawk. Pangngai taka a tawng vawikhatna. A inla puitling thar ta vel riau bawk in ka hria.
.
"Aw, ni e. Hetah kan awm nghet tawh hrim hrim a. Kan kum a inthlauh deuh vang hian unau kan nih an ring lo fo asin." a nui zui var  var a, ahmaa ka lo ngaih ang ngawt kha chu a ni dawn lo anih hmel hi. A fel viau chuan ka thiana tan hian a tha khawp ang.
.
Engengemaw sawiin an titi dun melh  melh a, sawitur ka hre ve ta vak lo bawk nen an thutna piah ah thu sawnin tv ka ensan daih. Remruata chuan a thut hnaih sawt khawp mai. 
.
PRESENT*
.
"Enge i ngaihtuah a?"
Muangchang a hawi chhuakin ka hmaa thu Remruata chu ka en a, tunhmaa a hmeltha tak thin kha zu a in nasat vangin a buar hnuk a, a mit a sen rum bawk.
.
"Nizan khan hmeichhe danglam zet ka tawng a." ka tih chuan za lutuk hian a nui huah huah a.
.
"I lakah hmeichhe danglam bik an awm ka hriat vawikhatna! I tei chhuak teh ang. Intih harh i mamawh a nih kha"
.
"Ni dangah  ni rawh se. Min rawn tlawh a ka lawm khawp mai Thianpa. Zanin hian ka in ah zanriah lo ei ta che. Nizan khan kan inkawm mumal hman ta si lova."
.
"Pawi lo khawp ang."
.
Remruata chhuah hnu chuan ka dawhkan a ka dah ka phone chu la kangin ka en vung vung a. Ka tih tum ti leh ta lo chuan ka dah leh rih. Hrilh nawn ngai lovin a hna arawn zawm tho ang. A mamawh tih ka hrechiang a, ka sawm nawn leh khan tlawm hreh takin tawng mah se a lo kal ngei  ngei ang. Ka hmai ka tuai pawk a.
.
Hmanni khan Duhsaki thusawi kha ka awihsak mai a, dawt min  hrilh ngai lo ni a ka hriat vang a ni. Mahse, Ramngaihsanga thinrim taka lo kal let leh Camera check tura min hrilh hnu khan ka check a, ka rin phak hauh loh danin Duhsaki chet dan dik tak ka hmu ta a, min thawng khawp mai. A zaidam ngai lo tih ka hre tho nain a thinchhe hler te hian min hip riau thin kha a nia. Tunah chuan a dan a dang ta deuh tlat. A hriat ngai pawh ni lo, hnathawka kan chhawr chunga khatianga a che duh khan amah ka ngaihdan a ti danglam tlat a ni. Ka lungawiloh rukna ka ngaihtuah chhuah rualin nizana ka hmeichhe hmuh kha ka ngaihtuah chhuak leh ta. Ngaihtuah zui ka duh lo asin!
.
Nizan min kalsan hnu khan Duhsaki nen inhnial in thinrim khur hlawk hlawk chungin Duhsaki'n inhnuai ah min chhuk san a. Kei erawh pawn lam bathlar ah ka chhuak thung a. Kha hmeichhia, ka inrin hma hauh a ka lungphu tirang thei hmeichhia kha ka zuk hmu zui.. Thinrimna ka hriatthiam hauh loh khawpa nasa-a thinrim chungin mipa zurui tawng zet kuaha a kalpui leh kawtzawl atanga motor-a an tlan chhuak lai ka thlir ta reng a nih kha. 
.
Ka ngaihtuahna a la luah chhen ta lehnghal a. A mit chei dum hiam leh mak zeta mi hip thei si kha.. Ka kut ka hum ruh ta ngawt.. Ka hmuh theih tura a awm ka hmuh phat atang khan ka mit ka lasawn tawh miah lo. A pian nalh zet kha chu thuhran, a hmaikawr chhana a mi melh dan na zet leh mi nhip riau si kha a mak em a ni. A chet dan te reuh kha - hmeichhe ningkhawng hre tak a ni tih a chiang reng. Mipa lakah engtianga awm tur nge a hre chat chat anih kha. A tawk chauha awm dan zawng zawng nen..
.
A mitmeng kha hmuh tawhna ka nei__ Ni lo! Ka thil ngaihtuah chhuah ber kher vang chuan ka ner sawk mai! Kha chu a ni thei lo. Engvanga ngaihtuah chhuak ngawt nge ka nih?  Mitthi tawh tho leh an awm ngai hleinem! Atthlak lutuk.. Tuna ka hriat chhuah hmeichhia leh nizana hmeichhe nalh zet ka zawn chhuah ngei tur hian eng inzawmna mah an nei phiangsen lovang! Thil ni thei a ni lo.
.
JADE
(Soddisfazione)
.
Thantei_LauraSean
.
CHAPTER - 6
.
VASPI* (JADE*)
.
*Vawiin ka kalna hmun chuan thil tam tak min hriatchhuah tir leh ta. Remtluanga hian engtin nge angaih ang ka hre lo va. Mahse, ka rilru atangin ka paih bo thei lo. Engvang nge ka lo tawn leh reng reng le. Ka laka a awm dan zawng zawng te kha a der mai a ni thei lo. Ka engkim ka hlan asin. Hun hei leh chen hnuah pawh hian ka la ngaihven reng che tih i hre lova, tunah hian nangmah hnaih takah ka awm tih pawh i hre lo. Naktuk ah ka rawn hmu ang che. Min beisei lohna hmuna min hmu thut anih chuan ka laka i rilru put hmang pawh a chiang lehzual ang.*
.
Ka u Diary chu khup thawkin thawk ka la hawlh hawlh a. Ka mangang tan chu anih tak ber hi. Enge ka tih leh dawn? Duhsaki hnenah khan Remtluanga in ah hna ka thawk tawh dawn lo tih ka lo sawi thawt thawt a, lo ngaihtuah chiang hmasa phawt tur ka nia. Ka beisei loh lutuk vang khan inngaihtuahna hun pawh ka nei miah lo anih kha. Min hnuaichhiah taka a tawng ka ngaihtheih loh vang pawh a ni tel. Tunah chuan pawn lam atang hian tihtheih tak tak ka nei dawn lo tih ka hrethiam tawh tlat. Ahma khan engtiangin nge ka ngaihtuah ka hre lo. 'I hmelma chu hrechiang rawh' tih anih kha!
.                     
Sana ka en a, zan dar 10 a pel tawh. Zanriah ka la ei lo tih ka hrechhuak chiah bawk. Laptop chu shut down-in ka u diary pawh box ah ka khung leh a. Ka rilru ka thlak angai. Ka u tan ka theihtawp chhuaha a tawp thleng din tlang ka duh dawn a nih chuan anni pahnih Duhsaki leh Remtluanga te hi ka hlat thei lo. An nitin hun hman dan chiang taka ka hriat angai. Chumi hnu ah chauh chuan ka chet zel dan tur ka hre thei ang. Ka tum ber chu ka tih theih nan Remtluanga in ah ka thawk leh khawp ang!
.
Ka ngaihtuah tam telh telh a, an tan mi hnawksak nih zui zel pawi tihna ka nei ta lo. Ka lungawina ka neih hma chuan ka chapona, ka induhtawk ve na, ka zahawmna hian awmzia a nei rih lo. Lungawina ka neih si loh chuan engkim nei mah ila ka hlim chuang lovang. A theih tawpa min enkawl thintu ka u thlarau pawh a hlim hek lovang.
.
Ka phone lain contact list ka en pawr pawr a, Remtluanga number zawnah ka tawp chawt a. Inngaihtuah nawna ka tih ngam loh ka hlauh vangin ka call nghal pawp. A ring chhung pawh chuan ka thu hle hle thei lo. Ka zam em em chhan hi engvang nge tih ka hre bik lo. Phone ring chu a tawp a, a pick up ni ngei tur a ni, mahse, a tawng lo.
.
"Hello_ Ka tawng i hre thei em?" min la chhang chuang lo. Tunlai network chian vak loh vang hian a tawng ka hre thei lo a ni maithei. Ka call nawn leh mai ang.
.
"I in kawtah ka awm!" ka phu deuh zawk. Ka tawng a hre thei reng sia, min chhan ve mai awm.
Tunah ka in kawtah a awm maw? 
"Oh_Kawngka ka lo hawng ang." hamhaih ru zetin ka phone ka off a, kawngka hawn tumin ka kalsawn nghal a.
.
Kawngka ka hawn chuan kawngka bulah a lo ding reng tawh. Ka lam hawi lovin ral lehlam eng ut chu a en daih a, ka thawm chu hre awm pawhin a awm lo. A hnunglam atang chuan ka en reng a. He mipa ngei hi a ni - Ka u mipa hmangaih leh a nun pum a hlan. Dam thlahlel lo khawpa a awmna chhan mipa. Ka en lai la la chuan ka chungah hian phurrit takin min rawn delh ang mai hian ka rit luk a, ka tawng chhuah hmain thawk ka lak angai hial.
.
"I lo awm rei tawh em?" ka tih chuan che hrutin ka lam arawn hawi a, a tawng lo. A hmel chu ka en zawk a, ka en rei  ngam lo thung. Min chik lutuk a ka awm a nuam lo ani ber zawk ang chu.
.
"Lo biak che ka tum chhan chu_"
.
"Lut phawt ila." ka chhanna pawh a nghak chuang lo. In chhungah a pen lut nghal a, ama in ang maiin a thuneihna kenkawh a tum niawm tak hian.. Heilai hi chu ka in, ka thuneihna a nia, ka duh anga thil a kal ngei angai  bawk.
.
"Lo thu rawh." ti bul hmakin amah chu ka en a, ngaihtuah dang daih nei hmel a pu.
.
"Lo biak che ka tum chhan chu_"
.
"Naktuk ah i hna rawn zawm ang che. Sawi nawn ngai tawh lo se ka ti kawp mai." chu vang ringawt a ka in a lo kal hi a ni lo. A awm dan atang hian a chiang vek.
.
"Chu chu keipawn ka lo tum a."'
.
"A that chu. Ka kal lehnghal mai ang." thutna atang chuan thovin kawngka lam a pan a.
.
"Thil dang_"
.
"Mangtha le. Naktuk ah kan inhmu dawn nia." kawngka atanga a chhuak chu ka en tawp. A hmel lan dan kha ka hrethiam lo. Inveng ka tih dawn chuan ka lakah hian a inven angai tih hre turin ka chungchang engmah a la hre si lo. Nge, a lo hre reng tawh zawk? Ka thil tum a hriat vanga atana tangkaina nei pawh ni lo hi min lo ngaihven viau a ni thei angem? A in a ka thawh hi engvanga duh tlat nge a nih?
.
Ngaihtuah vak vak hian awmzia a nei rih lo tih ka hria. Tv on in reality show ka en ziah thin en ka tum a, kawngka ka la kalh lo tak e. Mahni chauha awm hi chuan kawngka kalh theihnghilh chi a ni lo.
.
Ka awmna atang chuan thovin kawngka kalh tumin kawngka ka pan a, ka kalh hman lo. Na lutuk hian arawn inhawng thuai a, a force a nat em vangin ka tlu tawm nawk mai. Ka hamhaih nasa lutuk a, thawm chhuah nachang pawh ka hre lo. Mipa pathum vel hi an rawn lut zui a, an hmel ka hmu thei lo. Mask an vuah vek.  In chhunga ka thil neih chu enin an inmelh a, pakhat chu a veikual nghal thuak thuak a. Ka che ngam lo. Pakhat chuan min din chilh run lehnghal, ka che anih vaih chuan a chem ken chuan min vit hreh  hauh lovang. Ka rilru a buai mup mup mai.
.
An mitmei atang chuan an rin angin inchhung a awm lo tih ka hria. Pakhat chu ka room-ah lutin reiloteah a lo chhuak leh a, a chezia atang chuan a thinrim tih hai rual a ni lo.
.
"Hmelchheho, in hrechiang em ka tih kha. Helai hmun hi a ni lo. A piah in zawk saw a ni ka tih  mawlh mawlh kha. Tlaw lutuk.."
.
"Hmeichhia hi tihian kan kalsan ringawt dawn ami?"
.
"Tihnat chhan tur i nei ami? Mawl lutuk. Min lo zui ru." chhuak pahin kawngka chu an tlawh ri thuai a. Ka ip chawih chawih mai.
.
Ka tlukna atang chuan thawh ka tum a, ka thakhur nasa lutuk vang chuan ka che hleithei lo.
.
Kawngka lama thawm ka hriat leh chuan ka maimichhing tawp. Kha mite kha an lo let leh anih chuan damin min chhuah hauh lovang.
.
"I tha em?" a aw ka hriat chuan ka meng a, Remtluanga!
Ka bulah chuan rawn thingthiin ka darah min rawn vuan a, ka khur nasa lutuk tih a hriat chuan zo zeta min chawiin thutna lamah min pawm phei a, ka tum reng vang pawh ni miah lo hian ka theihtawpa nghetin ka kuah a, ka thakhur nasa lutuk chu ka thunun thei lo.
.
"Engtin nge an tih che?" ka chhang thei lo. Ka lu ka thing nawk nawk ringawt.
"Engtinmah i awm lovang. Hlau suh." ka kuah nghet lehzual sauh. Keimah chauha ka awm a him nia ka lo inhriat thinna kha a chhe vek.
.
Ani pawh chu tawng lovin min kuah let ve a, engchen nge kan inkuah ka hre lo. Ka thakhur a zia deuh hnu chuan a malchung atangin ka chhuk a, min hnial bik lo. A bulah chuan rem zet hian ka thu fel at a. A hmel ka en chuan min lo en run mai. Min ngaizawng hmel emaw, engemaw riau hmel a pu lo. Chu chu ka chiang.
.
"I in ka chhuahsan khan kawt piah deuhah sawn ka tawk a, ngaihthatlohna pawh ka nei lo. Motor ka tinunga ka tlan chhuah hmain i in zawna an chhuk kha ka hmu ta sia."
.
"In an hai thu an sawi a." ka aw ri dik loh zia chu mak ka ti zawk.
.
"Hetiang anih chuan mahni chauha riak chi i ni lo." a ngawi leh chut a. Tihdan tur ngaihtuah a ang.
"Eng emaw chen chu ka in ah i cheng thei ang. Hna i rawn thawk leh tho dawn bawk a."
.
"A chi loh ang. Engtinmah ka awm lovang. Min hawsan tawh rawh."
.
"I hmel en khan i thalo tih a hriat reng alawm. Luhlul hun a ni lo ania."
.
"Ka tibuai mah mah che a ni. Sangtea ka be mai ang." ka tih chuan a inseh ruh talh talh mai.
.
"A tha alawm. Va inthlak la, thawmhnaw thenkhat keng  bawk la."
.
"I inah ka kal dawn lo ka tih chu."
.
"Kal dawn lo ve. Ramngaihsanga in ah chuan ka hruai ang che."
.
"A ngailo. Min hawsan tawh rawh. Keimahin ka kal mai ang." Sangtea in ah khan engvang mahin ka lut lovang. A in lan dan ka mitthla ringawt pawh hian ka chhungrilah ka khur nghal thei. Kha in khan mi rap lutuk.. Sawi ngaihna awm lo khawpin!
.
Che lovin ka thu reng a, tawng hriat theih si loh hian a phun hluk a. Thutna atang chuan thovin ka room lam  a pan a, a theih loh! He mihring hi ka room-a a luh a thiang lo. Ka va buai tehnuai tak em. Ka in  ah hian keimah chauha riah chu ka ngaihtuah ngam chuang bawk si lo.
.
"Ding rawh." ka ti thawt. Ka inveng hman lo. A ding chat mai reng a.
.
"Keimah ka va insiam ange. Hetah hian min lo nghak rawh. I in ah chuan zanin chauh chu ka kal mai ang."  chutiang tur chu a ni reng a ni' tih hmel pu hian inherin thutna lam chu a pan a.
.
Ka room-ah lutin ka thawmhnaw hakthlak tur ka la a, zanin chiah tak tak ka riak ang. Thil nihphung hrim hrim  ngaihtuah pawhin Remtluanga in a ka awm ve hi a dik lo a, Duhsaki tan lah pawm theih a ni hek lovang. Ka chana ka dah pawhin ka lawm dawn bik lo tih ka inhria. Remtluanga nen kan inkarah engmah a awm lo chung pawhin min thik tawh tih tlai lama arawn awm dan atang khan a hriatreng a. Zanin chiah tak tak ka riak ang. Ka rilru ka thlak leh hmain ka thawmhnaw chu bag-ah dahin k aroom atang chuan ka chhuak a.
.
"Ka hman e." nuam ti chiah lovin Remtluanga chu ka en zawk a, a hmelah engmah a lang lo.
.
Ka in kan chhuahsan a, Sangtea thil awmzia hrilh ve hrim hrim tuma ka call chuan a phone a pick up thei lo.
.
"Zanin chiah tak tak a niang." ka ti ta ringawt a. Min rawn en zawk a, min khawngaih niawm tak hmel ka hmuh chuan ka duhdan ni lo mah se tihtheih ka nei rih chuang lo. Ka  ngawi ta vang vang mai.
.
"I nu leh pate i chan tawh tih ka lo hria a." he thu hi Remtluanga lak atanga hriat ka in beisei lo.
.
"A dik alawm." ka ti sep ringawt. Thu dang sawi lo se ka duh zawk. Mahse, engtin nge ka nu leh pa an awm tawh lo tih a hriat?
.
"Ka in a i lo kal hma khan Nu Tluangpuii'n min hrilh a. A pawi ka ti hle mai."
.
"Kan la thi vek dawn tho a." ka ti leh ngawt a.
.
"In khuaah i haw tawh ngai miah lo a nimaw? Cherhlun-ah chuan hmelhriat ka nei asin."
.
Eng zawhna nge maw min zawh le? He mihring hian ka chanchin a lo ngaihven thei lovang. A hun hmaa ka nihna dik tak a hriat chuan engmah ka ti thei lo mai ang asin. Nu Tluangpuii hnenah khan thil ka lo sawi tam mah mah a ni. Ka u khan ka pa chu Cherhlun khaw chhuak anih thu min hrilh thin a, kha thu kha ngaihtuah miah lovin Nu Tluangpuii hnenah Cherhlun khua ka nih thu ka sawi a nih kha. Mahse, ka hriat theih chin mai ni lo, ka pian hma daihin Cherhlun atangin kan pem tih ka u khan a sawi thin bawk. Engtikah emaw ka pa pianna khua chu ka la kal ngei ang tih ka ngaihtuah thin kha.. Tunah pawh a la danglam chuang lo. Khaw thengthaw nuam tak a ni tih an sawi thin hi ka mit ngeiin ka la hmu ve ang.
.
Remtluanga chu chhang lovin chhuanlamah ka maimitchhing ta daih. Motor a din chuan ka meng leh ta chauh.
.
Ka thutna lam kawngka arawn hawng a, a in lian leh changkang takah chuan kan inzui lut ta zan zan a. Tun ang zanrei tawhah chuan hnathawk ho hmuh tur an awm lo va, ka hmuh chak loh ber Duhsaki hmel pawh hmuh tur a awm lo.
.
Remtluanga inhnuai lam pana a kal chu a hnunglamah ka zui det det a. Pindan kawngka pakhat hawngin light a on a.
.
"Hetah hian i mu dawn nia." pindan chhung chei dan ka en chuan mipa khawsakna a ni ngei ang tih ka chiang. Pindan chhung rawng hnawih chu rawng lar lo lam vek a nih rualin a cool ruih mai.
.
"Hetah hian_"
.
"Ka room thin a nia. I ngaih a lo that loh takin." min rawn enin a nui ta suk. A nui hmel ka hmuh khat zia ka hrechhuak. Awmzia a awm lo. A nui zing emaw zing lo emaw ka tan awmzia a nei lo. Ka hun tawn mek leh ka laka that a chhuah ziate hian a laka ka rilru puthmang leh a chunga ka thiltih tum min thulhtir tur a ni lo bur. Amah tihchhiat tumtu a tanpui tih inhria se, engtin tak ngai ang maw? A ngaihdan pawh chu ka tan a la tangkai lo lehzel! Ka chhungril kilkhawr berah chuan 'i ngainat tan vanga hetiang hi ngaihtuah i ni' tih hi zawitein a lo ri thung.
.
"Ka lawm e." ka ti sap a.
.
"Mangtha le." a inher vut a, pindan atang chuan a chhuak nghal a. Kawngka ka kalh hnuah khum lian leh puan nal zur rawng thim lama inkhuh ah chuan ka mu nghal thlawrh a. Mipa rimtui hman rim nam chem chem ka hriat chu Remtluanga rimtui hman thin kha ani tih ka hria. Duhsaki nen an pindan inchung lama awm daih siin hetah hian engtin nge a rim la hriat theih khawpin a awm si le? Chu thil chu ka lo ngaihtuah buai ve a tul lovang. Sangtea'n hetah ka awm tih a hriat hunah a lawm dawn miah lo tih ka hre lawk bawk. Biak tumin ka call leh a, a la pick up thei chuang lo.
.
Khum atang chuan thovin ka kawr hak ka thlak a, khum zau mah mahah chuan hahdam takin ka mu phim ta kak a. Ka hlau a ni tih pawh ka lo hre tawh miah lo. Ka ngaihtuahna zawng zawng Remtluanga leh a vuakvetin a lo lapeng vek anih kha. ka in ah chuan riak ila ka mut dawn loh chian nen.
.
Ka muhil ka har hlawl chuan zinglam dar 5 a lo pel der tawh. Khumah thu chhuakin ka awmna hmun lo danglam ta thut vang chuan ka buai lek lek. Nizana thil thleng ngaihtuah chhuakin khumah chuan ka mu tha leh a. Remtluanga in ah ka riak mai pawh ni lo, thlamuang lutuk in ka mu zankhua anih hi. A mak!
.
Mutthilh lehna hun a awm tawh chuan loh vangin ka tho a, bathroom-ah lutin ka inphihfai a. Ka sam tawm vekin kawrlum ka ha a, muangchang tawh lovin inchung lamah ka chho nghal a.
.
Nu Tluangpuii'n min hmuh chuan a ri hluah mai. Min beisei lo hulhual tih a hmel phawk lutuk dan atang chuan a hriat.
.
"A mak lutuk.. I lo kal leh chu ka va'n lawm tak em." tih pahin min kuah tak ngawih ngawih a. Hetiang taka min lo thlahlel hi mak ka ti hle mai. Min thlah hnu chuan thawven hmel huai hian "Enge kan han siam ang?" tih leh ka bana min kaih rualin choka lamah min kalpui a. Min lo lawm dan vang chuan ka chhungril ah hian nuam tihna ka nei veng veng.
.
Eitur kan siam mawlh mawlh a, kan peih fel meuh chuan dar 7 a lo ri thuak tawh. Ka rilru tak chuan Remtluanga lo chhuah hun ka nghak a, ka hmuh tak miah loh vang chuan mak takin ka lungawi lo ru ta riau. Hetianga awm tur hi ka ni miah lo. Nizan vang khan lawmthu pawh ka la hrilh mumal lova.. Oh! Ni lo, ka hrilh tawh kha..! Ka hrilh nawn leh duh!
.
Duhsaki arawn kal a, min hmuh chuan a ner nawk nain engmah a sawi lo. Keipawhin ka be bik hlei lo va.
.
"Eitur enge awm?" ti bul hmakin dawhkan kil chuan a thu tum bawr mai. A hmelthat vei nen, hlim lo hmel hi chu a lo lang mawi lo  ngawt mai.
Nu Tluangpuii ka melh a, Duhsaki chu a chhang ta zung zung a. Kei chuan dawhkan pawh ka va hnaih lo.
.
Engmah sawi lovin a ei mawlh mawlh a, a ei zawh veleh ngawi reng bawkin choka a chhuahsan a, a chhuah hnu chuan ka thaw huai.
.
Ka phone nghawr dar dar chu Nu Tluangpuii'n a melh a, ka pick up vat a. Sangtea chu nizan pawh khan ka be thei miah lova, tunah missed call a hmu ve chiah a nih ka ring.
.
"Hi, nizan vangin ngaihdam ka dil e. Thil pawimawh a awm anih ka ring." a rawn ti zang vah a.
.
"Awm tawh lo zawk." ka ti vei hmak.
.
"Tunah khawnge i awm? Zingah khan i in ah ka lo kal a, a inkalh thiap sia."
.
"Remtluanga in ah ka thawk leh dawn. Nakin ah kan inhmu anga ka hrilhfiah ang che." min chhang lo. A thinrim hle ang tih ka ring. Mahse, tihtheih a nei chuang lo. Ka tum ber ti tur hian min dang thei dawn chuang lo hrim hrim bawk.
.
"A that chu." ti nghatin ka chhan leh pawh nghak tawh lovin phone a off hmak a. Pawi chai lo ve a. Nizan khan be thei ni ila Remtluanga in ah hian ka riak kher lovang.
.
Zing dar 8 a pelh thlengin Remtluanga a la rawn lang lo. Nu Tluangpuii pawh haw turin a insiam a, ka haw ve nghal dawn leh dawn loh min zawh chuan min kalsan mai turin ka hrilh a.
.
Inhnuaiah chhuk lehin ka thawmhnaw kenna bag-ah ka inkhung fel a, hetah hian zanin ah ka riak tawh lovang. Pindan atanga ka chhuah hmain kawngka a rawn inhawng a, Remtluanga rawn lut ka hmuh chuan laklawh zetin ka ding chawt.
.
"Kal chhuahna tur i nei ami?" a tih chuan ka bu nghat ringawt. "Khawiah emaw hruai che ka duh a. Chhun lamah hnathawh i duh tih ka lo hria a."
.
"Ni love. Min pui tam tawh. Ka tan pawh a zahthlak zozai."
.
"Chutiang zawng chuan ngaihtuah duh suh."
.
"Min pui tawhna vang pawh hian i lakah bat ka ngah tawh lutuk." ka ti mah mah lovang chu maw!
.
"Heihi i duh zawng anih ka ring." lehkha pakhat hi arawn lek chhuak a, enge a nih hriat chakin ka lo ban vat.
.
"Heihi enge?"
"En la." tih chiah in min chhang.
.
Form chu ka en a, ka awih thei lo.
.
"Hei te chu, exam tur kha maw? Hetah.."
.
"Ka ta alawm. Written test ah i tling lo anih chuan i thawk thei dawn chuang lo a nia." atih leh chuan amah chu dak vahin ka en a.
.
"Ka inziah tlin theih i ring chiah lo anih hmel."
.
"Chu chu ka ngaihtuah miah lo. Test dang paltlang tur pawh a awm ang. A awlsam dawn lo a."
.
Hei, he mihring hian ka mizia a hre hle ang maiin a awm tlat. Engtianga min cho chhuah tur nge tih pawh a hre chat. Ka exam mawlh ang. Hetiang thil hi awm se tia ka lo suangtuah thin kha a nia. Hotel hawn thar turah Chef ni tura written exam pal tlang a tul ngai pawh ka lo hre reng reng lo va. Eng dan nge maw an hman ni? Thil hi a lo hriat loh theih dawn khawp mai.
.
"Han ziak fel la, ka lo submit ang." a pen ah lai chu phawrhin min pe a, ka lo la var.
.
Ziah tur tul ka ziah zawh hnu chuan lehkha chu ka pe a, a thlek vung vung hnu chuan pindan atangin ka chhuak a, a chhuah hnu rei vak lovah kei pawh ka chhuak ve nghal.
.
Ka in ka thlen chuan in ka tifai a, nizan thil thleng vang khan he in ah hian awmzui zel ka chak tawh lo. Awmna tur dang ka ngaihtuah angai ang. Sangtea bia ila a hriat mai ka ring. A in a awm turin min tih ngei ka ring a, a hlawhtling dawn lo tih erawh a inhre sa tho ang chu.
.
Sangtea ka biak leh hnuah in atanga chhuakin kan inhmuhna tur lam ka pan a, a hmun ka  va thlen chuan ka rin loh lutuk in Duhsaki nen ka hmu dun ta tlat mai. Sana ka en a, ka thlen hun tura ka sawi aiin minute 10 laiin ka la hma. Min rawn hmuh hmain ka kalsawn thuai a, an inbia chu an tawng hre thei lo mah ila ka en uluk ngang mai.
.
Duhsaki chu  ngaihdan nih vak loh hmel hian a tho a, a sana bih zauhin Sangtea chu a kalsan a. An awm danah khan inngaizawng anni lovang tih a hriat theih. Engvanga inhmu nge annih ang ka rin chhin thiam lo.
Ka awmna atanga chhuakin Sangtea thutna lam ka pan a, ka hmel min hmuh chuan a phu deuh zawk.
.
"Duhsaki nen kan rawn intawk a." ka tih chuan a chil a lem khawlh mai.
.
"Nia, kan inhmu zo chiah a nih kha." a tiliam puat a. Leh lawi si hian..
.
"In inhria tih ka lo hre miah lova."
.
"Kan in hmelhriat sa alawm." a tih chuan mak ka ti lehzual.
"Ka lo hre lo."'
.
"Hre vek lo la a tha zawk. Kan inngaina tehchiam lo va. Remtluanga in a i awm hi a helh ngang anih kha. Nizan pawh i riak a ni maw? Mi dangin engtin nge an ngaih ang i hria em? Ani ang hmeichhe mi lutuk hi hnaih lo la ka duh tak zet. Nupui hual nei tawh lehnghal." ka lo nui lui hak.
.
"Ka ngaihzawn i lo hlau a ni pek em?" chimawm thei ang berin Sangtea chu ka melh khawi khawi a.
.
"Ka sawi dan zawk chu.. I hnaih tam chuan.."
.
"Ka hnaih tam chuan engtin?? Ka la hnaih zel ang." ka tum loh zetin ka sawi loh tur ka sawi thelh alawm le. Ka nui lui ta chiam a. Alamah awnin "Mahni ka inveng thei tih hre phawt mai teh. Bakah, mipa pawmlai nei hian min hip ngai lo tih i hriat ve em em ka lo ring a." thutak deuh zawka ka tih chuan a hahdam hmel ta deuh.
.
Nizana Remtluanga ka zui chhan ka hrilh chuan a thin a rim tha leh rih.
.
"In luah tur  min lo zawn sak la? I in a awm tur chuan engti zawng mahin min thlem thlu dawn lo tih i hriat lawk kha."
.
Sangtea nen restaurant atanga kan chhuah hnu chuan ka in panin ka haw lehnghal a, chawhnu lamah Remtluanga in kal a tul vangin ka hmanhmawh angreng.
.
Dar 2 dawnah Remtluanga in ka thleng a, Nu Tluangpuii pawh ala rawn thleng lo. Zingah khan inhnuai ah thil ka theihnghilh  vangin ka zuk kal lawk angai bawk. Hnathawk dang ho hriat laia luh thlak erawh ka duh lem lo. A reh deuh thap tho vangin inhnuai lamah thawm dim deuh takin ka chhuk a, nizana ka mutna kawngka chu hawngin pindan chhungah chuan ka lut a.
.
Khumah thatchhiat hmel zeta Remtluanga lo mu ka hmuh chuan ding chawtin ka thaw deuh halh a. A muhil nge ni, ka thawm avang chuan a che miah lo. Ka thil theihnghilh lak tum chuan bathroom-ah lutin ka la sawk sawk a, Remtluanga tiharh miah lova chhuahsan leh ka duh.
.
Pindan atanga ngawirenga chhuah leh tumin ka kal them them a, kawngka ka hawng dawn chiah tihah ka ding leh chawt.
.
"VASPI!"
Eng maw? Remtluanga chuan engtin maw min koh? Vaspi maw?!
JADE
(Soddisfazione)
.
Thantei_LauraSean
.
CHAPTER - 7
.
VASPI* (JADE*)
.
"Engtin maw min koh?" hawi letin ka en haw a. Engtin nge? Ni lo ve. Ka hamhaih tih kla tilang dawn miah lo.
.
"I form-ah khan Jade tih i ziak tel miah lova." khumah chuan thatchhiat hmel zet hian a rawn thu chhuak a, ka la en tawp.
.
"Ka titel ngei ngei tur tih ziak a awm hleinem." ka ti hmak a, a nui suk ringawt.
.
"Lo kal hnai teh." a kut zungchal in alama kal hnai turin min huih a, ka ngei tura a tih a ni hauh lo nain a chezia chu ka ngei ber chi a ni tlat.
.
"Kal hnai lo mai ang aw.." ka theihtawpa hnehsawh a chhangin ka inher a, kawngka hawnna ka vawn rualin ka bul arawn thleng  hman nia! Ka lo inring miah lo bawk nen ka bana min pawhna vang chuan ka nek dawt mai. Hnai lutuk mah mah hian kan inen ta ran a, amah hnaih taka awm hi ka duh lem lo. Party naa min fawh hnu khan tun ang tak hian kan la inhnaih leh lova, ka danglam tih hi pawm duh lo pawh ni ila ka danglam chiang si a ni.
.
Ka aw thian kharhin ka en a, ka ban a vawnna chu thlahdul chuang miah lo hian min en let ve ngur bawk a. A ban dinglam chu muangchanga lo phar chhuak in ka sam a hui kiang a, a rawn kun hnaih lehzual deuh chuan ka thlesawn vat. Ka va han harhchhuak hman lo teuh ther ther ve.
.
"Enge a?" a thiltih tum chu eng pawh ni se, hre lo anga ka lan mai loh chuan engtin nge ka tih chuan ang.
.
"Engmah." nui leh sukin a kut chu a lasawn a. Ka ban a vawnna pawh a thlah ta.
.
"Naktuk dar 10 ah written exam nei turin lo inring ang che__ Ka pindan hi ka ngai hle mai a." khum lamah let lehin khum tlangah a thu a, ka din dan ngaia la ding chungin ka en tawp. A awmdan hi ka hrethiam teh hrep lo. A pindan hi angai anih chuan awm mai se la. Ka awm tawh dawn reng reng hleinem.
.
"I duh te chuan i awm thei reng alawm. I pindan a la ni reng a, ka awm tawh dawn hleinem. A nih phawt." tiin pindan atang chuan ka chhuak a.
.
In chungah chhovin ka bag-ah ka thil lak chu ka dah leh te te a, choka ah lut lehin thlaihnah ka phawrh a, eng ber nge siam ka tum pawh hre lovin ka sil fai a.
.
"Eheu! Vawiin chu i va hma ve." Nu Tluangpuii chu enin ka thil sil lai chu ka ngaihven tak tak lo tih ka hre chiah.
.
"Oh_Nia, ka hma ve deuh mai  mai. Enge kan siam dawn?" ka ti buai nawk nawk a.
.
"Kha i thil sil lai kha zo phawt la. Ka rawn lei ho saw kan siam dawn nia."
Nu Tluangpuii chu a titi zui mawlh mawlh a, a thu sawi chanve pawh ka hre meuh ange maw chu. Remtluanga awm hnaih leh awm hnaih loh ka ngaihven ru reng chu ka duh reng vang pawh a ni bik lo. Hlauthawng tia sawi tur ni chiah si lo hian ka awm a nuam lem lo khawp mai. Min koh dan pawh kha ngaihtuah tham chu a ni reng reng e.
.
Zanriah ei hun hmain ka in ah ka haw a, ka in ka luh rualin ka in luah neitupa chuan min zuilut ve hmiah bawk a. Ni dangah hetiang hian a awm ngai lo. Thil pawimawh sawitur a nei a ni ngei ang.
.
"Bawihi, hei nizan khan kan chhungte, a_ka nupui  nau te a ni zawk mah ang chu. Min rawn pan ve ngawt mai sia, in hi kan luahtir anih loh chuan han in chenchilh reng chi a ni meuh si lo. A va buaithlak ve maw le. A rang lama in luah tur i zawn mai angai dawn anih hi a." a ti dam thlup thlup a. Chhan mai dan tur pawh ka hre lo.
.
"A va rang awm teh thut ve. Ka thiante bula han awm mai na tur ka nei si lova. Tun kar chhung tal min nghak thei angem le?"
.
"Naktuk hian inthiar lut mai turin ka lo hrilh tawh a. Nizan pawh khan i riak chuang lovin ka hria." a awki a dang ta deuh. Nizan khan thil thleng engmah ka hrilh lo tak alawm. Thil thleng kha a rang vut  vut lutuk a, ka buai zo ta vek anih kha.
.
"Nia. Nizan khan mipa pathum an rawn lut a, ka hlauh deuh vangin ka riak chhuak a.. An kal tum lohna__"
.
"A khai a! Awihawm loh loh anih chu. Kan awm ve reng a, eng thawm mah kan hre hleinem. Naktuk chawhma lamah i lo in la chhuak dawn nia." a thutna atanga tho vutin  kawngka lam a pan a, a phun zui nuah nuah chu hrelo angin ka awm zui ta mai. Tunlai thalai nun dan a duh loh zia leh min ngaih khawloh zia a tichiang tawk viau. Engvanga ka laka ngaihdan tuihnai lo deuh nei nge anih ang ka hre bik hauh lo mai.
.
Sangtea ka call a, a pick up leh thei lo. He mihring lah hi mamawh hun apiangah biak theih lohvin a awm ve ziah. Tih mai dan tur hre lovin ka room-ah ka lut a, ka bungrua chu a theih theih ka pack ta ngawt a. In luah tur ka hmuh hma chuan Hotel-ah ka awm mai angai dawn anih hi.
.
Ka phone ri chu ka en thuai a, caller ID a Sangtea hming lo lang ka hmuh chuan ka thaw nghal huai mai.
.
"I buai em?" arawn ti nghal tawng a. Thawm rik nuai nuai dan atang chuan in ah a awm lo tih a chiang reng.
.
"Buai deuh. In hi ka chhuahsan angai dawn a."
.
"I tawng ka hre tha thei lo. Engtin maw i tih?"
.
"In hi ka chhuahsan angai dawn a. A hmanhmawh thlak khawp mai."
.
"Ka in ah pawh i lo kal thei reng alawm." a ti hmuk a. Awmze nei lova thinrim a tum leh ngawt aniang chu.."
.
"Ka thei lo alawm. In luah tur min lo zawnpui la. Ka mangan dan tur i hriatthiam ka ring.".
"Lawks aw. Ka lo be leh ang che." phone a off hma chuan hmeichhe nui ri awr awr ka hre hman. Ka lo hrilh ta kher kher a ka inchhir leh hnuhnawh. Amah hrilh buai lo pawhin keimah ka inbuaipui thei mai ang. Ka ngaihtuah rualin enge ka tih hmasak ber dawn ka hre chuang lo.
.
Ka thawmhnaw neih ang ang chu ka pack zui mawlh mawlh a, naktuk ah ka awm theihna tur hmun ka hmuh hmasak berah ka awm nghal mai ang.
.
Ka in pack zawh chuan inbual faiin ka mu a, ka mut a chhuak lo lutuk tak zet. Thawklehkhata inchung pa berin chhuak tura min nawr thut hian chhan a nei ngei ngei ang. Kan inhmu tam lo nain ka lakah an tha em em reng a, mamawh ka neih leh neih loh min zawt reng thin zawk kha a nia. Ngaihtuah buai vak hian awmzia a nei lem lo khawp. Chhuak tura min duh anih chuan ka chhuak mai ang chu.
.
Ka muhil ka harh hlawl chuan zinglam dar 5 a lo pel der tawh a. Ka awmna tur zawn a ngaih vangin Remtluanga in ah ka kal hman dawn lo tih a chiang. Ka kal theih dawn loh tur thu Nu Tluangpuii phone-a ka hrilh hnu chuan inthlak felin ka kal chhuak ta ngawt a. Hotel be duh pawh ni ila phone number engmah ka nei lo. Rei tak chhung Hotel-a ka awm anih chuan Remtluanga'n a hriat hun a awm ngei dawn a, ka hnathawh leh ka hlawh hmuh zat hrechiang tu chuan Hotel-a khawsa thei tur khawpin sum ka nei tawk lo tih a hre ngei bawk ang. Ka lemchan ngai hian thil a tibuai zo vek a nih hi. Lemchan ka ngaih vanga helai hmuna awm hi ka ni leh tho bawk sia. Hmun tawp leh chep lutuk a chen ka peih der bawk si lo. A buaithlak vel vek mai.
.
Lazarus Hotel kawtah ka Taxi hman chu din tirin ka chhuk thuai a, hetah hian kar khat chhung vel chu ka cheng phawt mai aniang chu.
Reception counter-ah kalin room ka book fel a, ka bungrua la tura motor an tirh chhuah rualin ka chuang tel ve nghal hmiah mai.
.
In atangin ka bungrua an thiar chhuak zo va, eng bungrua mah hnuchhiah ka tum lo. A rang thei ang berin in luah tur ka hmuh vat vat angai. Chu chu ka hna hmasa ber tur a ni. Sangtea emaw midang tupawh, tumah ka tibuai lo law law ang. Mahni chauha chet ka zir a hun ta anih hi.
.
Lazarus kan thlen leh hnu chuan store room awlah ka bungrua chu felfai takin an dah lut a, mamawh ka nei anih chuan awlsam takin ka la zel thei ang.
.
Ka pindan tur pana ka kal chu Sangtea ka hmu hlawl mai. Hmeichhe pakhat nen hian pindan atangin an rawn inkuah chhuak a, min hmuh hmain ka hmel arawn hmuh theih loh nan ka hawisawn thuai a. Tunah zing dar 9 a pel tawh a, tun ang hun thleng thleng Hotel-a la chambang chu a che nasa viau a ni ngei ang chu. Mamawh leh emaw biak hmasak emaw ka tum tawh lo bur. Ani pawh hian ka nihna dik tak a hre chuang lova ka hnaih lutuk loh hi a him hrim hrim. Ka inngaihtuah harh tlai ve thei a nia.! A hma pawh khan lo pawh lo law law ila tha tur a nia...
.
Sangtea leh hmeichhia ten min kal pelh hnu chuan ka pindan ah ka lut a, chhuanah tihtur ka nei hran lo bawk a, ka lengchhuak peih lem lo bawk nen ka hna ngai ka khawih leh ngat ngat mai ang chu. Ka dam chhan alawm le.
.
Ka phone ri chhen chuan ka thiltih laiah ka rilru min pektir thei lo. 'A va'n ninawm tak' tia phun chungin ka phone chu ka la kang a. Remtluanga hming ka hmuh chuan phur zat lo hian ka pick up a.
.
"Tunah dar engzat nge?"
"Ka hre nang.." Ngawi rawh.. Ni lo. Dar 11 a pel tawh. Written test neih hun kha dar 10 a ni tak e!
.
"I hun tha neih i bawhpelh ta chiah anih chu." ti hmukin phone a off nghal hmiah. A va'n pawi tak. Ka chetbuai vangin ka lo theihnghilh hmin thak a ni.
.
Ka hna thawh zawm tumin phone chu ka dah a, ka thiltih a tui thei tawh lo. Laptop dahin khumah ka mu a, keimaha thil inthup emaw ka thiltih tum leh thil dang reng reng ngaihtuah hah duh lo luiin Word Cookies ka khel ta vel mai mai a!
.
Ka lo muhil tih ka hre miah lo. Ka pindan kawngka inkik karh karh ri ka hriat chuan ka harh hlawl mai. Khua a lo thim fel der tawh. Enge maw ka hriat a nunpnung pangngai ka zawm hleihtheih der loh ni. Khum atang chuan tho vatin kawngka chu ka va hawng a.
.
"Zanriah tur i order si lova, i lo chhuak ta miah lo bawk sia. Ka lo endik che a." nui sangin room service chu a lo ding zum zat a. An hna an hnehsawh hle mai. Lazarus Hotel hi ralkhat atanga ka hriat thin aiin a lo la tha fo anih dawn hi.
.
"Ei chak pawh ka nei hran lo. Ka duh dawn anih chuan ka lo order mai ang e aw." tia ka chhan hnu chuan min kalsan thuai a. Khumah let lehin ka bawk thlawp a, ka hna ve ber tlaia eisiam tura Remtluanga in a kal pawh ka thulh chu a ni ta der. Nu Tluangpuii'n min lo phat sak mai ka ring ve tawp. Biak nawn leh pawh ka tum ta chuang lo mai. Ka chanchin an zawt pawhin ka ring lo.
.
Ka dul zawna ka phone nghawr dar dar chu peih lo zeta inlet thawkin ka la a, Remtluanga phone bawk a ni. Hepa hian enge maw a hriat le? Min biak sek nachhan tur thil a awm pawh ka hre lo. A ring quit hnu chuan ka phone ka check a, missed call a tam lutuk. Sangtea deuh vek a ni. Remtluanga paw'n vawi thum chu min lo call tawh anih hi.
.
Ka phone a ri leh a, ka pick up ta hram.
.
"Tunah khawiah nge i awm? I mawl a mi?" Remtluanga chu zawi tak si hlauhawm fe hian arawn tawng a, phone chu ka melh nghek ringawt. “Tunah khawiah nge I awm?” a ti leh hrawk a. Ka la chhang chuang lo.
.
"Vansangpui, ka tawng chu i hria em?" a aw chu! A khawih phakah chuan awm ila min khawih duh ngei ngei ang!
.
"Nang_Ka hmingpuma min ko turin enge i nih?" ka ti ve ta phat. Tumah reng rengin ka hmingpumin min ko ngai lo. Midang tan thil ho tak a ni mai thei, ka tan chuan a ni ve lo.
.
"I in atangin i chhuak a, tlaiah i hna i rawn thawk lo bawk a. Eng thil  nge i hriat? Tawhsual lo tawk palh ta ni la__"
.
"Ka tha. Min ngaihuah suh."
"I mawl tak tak anih hi!" a ti hluk a. Ka ngawi ran mai. "Tunah khawiah nge i awm?" a ti tha leh. Tunah chuan a aw a dam ta deuh.
.
"Ka awmna lai hi ka hre lo. Min ngaihtuah suh, ka tha. Naktuk ah chuan ka hna ka rawn thawk tawh ang." min chhan leh hmain phone ka off ta daih a.
.
 Ka message dawn ka chhiar kual a, Sangtea message ka chhiar chuan ka thaw huai. Tuna ka nihna ang hian Remtluanga hi ka hnaih thei lo va, ka nihna pakhat zawk ang erawh chuan ka duhtawkin ka hnaih thei thung. Anih si chuan zanin hian Sangtea min sawmna hi a dera ka hnial a tul ngei ang.
.
*Ka kal hman lo.* tih zawngin Sangtea chu ka reply a, a ngaihdan arawn ni lo lehpek hle. Azarah hun tha tak ka nei dawn tih a hre der si lo.
.
Tha tho ru zetin ka inbual a, Sangtea rawn sawina hmunah chuan khel lovin Remtluanga pawh a kal ngei dawn tih ka hria. Zanin hian a hmasa aia thui ka kal ngei ang chu!
.
Ka insiam peih meuh chuan mi thar ang hlak ka ni leh ta. Hmaikawr vuah lo mah ila ka make up vang hian awlsam takin min hrechhuak dawn lo tih ka chiang. Ka kawr hak tawngchham tak chu duh zetin ka zut mar zauh a, ka pindan atang chuan ka chhuak a. Tunah chuan kal dan tur pawh a awlsam ta deuh. Hotel motor in min hruai anga, min nghak thlap bawk ang. Hun rei tak kal chhuah tumna ka nei lem lo bawk.Ka duh chin ka tih zawh chuan ka let lehnghal mai ang chu. Ka fimkhur viau erawh angai  ngei ang.
.
A hmaa hmaikhawr vuah chunga ka lo kal tawhna in ka thlen chuan mi an lo tam tawh angreng. Kil khata Sangtea thu ran pawh ka va hmu. Mi kan thahnem tho vangin min rawn hmuh mai dawn loh bakah min hre mai pawhin ka ring love.
.
In chhung lamah chuan thawm a ri hut hut a. Mi kara inzep chungin inchung zawl ka pan a, ka kal hmasak ang lo takin in chung zawlah chuan mi an awm teuh tih ka han hmu thuai bawk. Ka hmuh duh  ber leh helai ka kal chhan Remtluanga erawh hmuh turin a la awm miah lo. A lo kal ve dawn lo a nih ka ring ta deuh. Ka chhai tum ber arawn kal loh chuan helai hmunah hian awm chhan tur ka nei lo.
.
Inhnuaiah chhukin haw mai ka rilruk ta zawk. In chung ka chhoh dawna ka tih dan chiahin mi karah ka inzep leh tawlh tawlh a, ka sir lam atanga min lo pawttu ka en chuan insum hman lovin ka nui sak. Dawn awm lovin min rawn hnaih a, mi chep lutuk chu advantage-ah arawn la ani ber. Ka kawngah min rawn kuahin a lamah min pawthnai a, ama ta ang mai a intineitu hmel taka min kuah dan chuan ka awm a tinuam!!! Zak tur ka ni. Mahse, nuam ka ti tlat!
.
"I lo kal ka ring reng a." ka beng bula arawn tih chuan ka ke ler thlengin ka mur chhuak vek ni hian ka hria.
"Engtin nge min hriat theih zawk a? Mask vuah chung chauhin min la hmu sia."
.
"Ka duh tak ka hai ngai lo." a ti nghut a. Min enin a ha var zet lang chuan a nui suk. Hetiang hmelpu a nui chung hian ka la hmu ngai lo reng reng. Mi hrang hlak ang mai niin ka hria. Chutiang  bawkin kei pawh mi hrang hlak ang maiin ka khawsa leh dawn ta anih hi. Nuam ka tih vang leh amah ka thlakhlelh ruk vanga he thil hi ti ka ni lo tih erawh ka inhrilh  nawn mawlh mawlh angai..
.
In thlang lam bathlar ah kan chhuak hlawl a, Remtluanga chuan min thlah eih lo.
.
"Zawn hmuh i har hle mai." min hnaih zeta dingin a kut chuan ka hnung a zut hauh hauh a, amah hi ka mi tum ber a ni tih hresa chu ni lo ila a lakah hian ka luangliam tawh ngei ang.
.
"Min la zawng nasa tawk lo anih chu." tih pahin a kut ka vuan a, ka hnunga a lo chet reng khan ngaihtuahna a tibuai tlat atin ni.
.
"I hming hriat ka phu tawhin ka hria." a tawng ring duh thak lo. Hmeichhe laka thei viau tur chu i lo ni e. Lalremtluang! Hmeichhe laka awm dan tur i hre hneh lutuk mah mah a nih hi.
.
"Khawiah nge i nupui hual kha a awm?" ka tih chuan a ner suk duh chauh.
.
"Ngaihtuah duh suh. Zanin chuan min tibuai tawh lovang."
"Mi pasal hual lo kawp chu ka duh miah lo ania." ka ti ngial a. Ka rilru tak tak a ni tho nain tuna ka sawi chhan chu Duhsaki laka a rilru puthmang hriatchian phawt ka duh vang a ni pakhat. Ka purse-a ka phone dah nghawr der der chuan ka rilru la pengin a lak atangin ka kal hrang hlek a. Sangtea'n min lo call tih ka hmuh rualin ka phone chu ka ak lehnghal.
.
"Khawiah nge kan kal ang? Hmun nuam deuha kal ka chak a. Hetiang hmun ri hut hut ni lovah hian.." ka theihtawp a no-a melh chungin ka nuih a, a ni chuan ka hmui atangin a mit a lasawn lo reng reng. Lipstick rawng dum lam ka inhnawih bakah ka hmui shape ka chei danglam a,ka hlauthawng lo.
.
"Lo kal rawh." tih leh in chhunga lama min kalpui rualin mi zi hut hut chu kan paltlang zung zung a, pawn kan thlen chuan ka zam ru ta viau mai. Ka duhtawk tawh rih a hun tih pawh ka hria.
.
"Kan kal hmain bathroom-ah ka  va kal hmasa lawk ang aw." inthiam lo hmel pu luiin ka pen sawn a, "Hetah hian ka lo awm ang." a tih chuan ka bu zauh a. Let leh ka tum tawh lo chiang khawp. Min biak pawh theihna tur number a kawr hak ipte ah khan ka dah tawh a, tun atan chuan a tawk viau rih. A hmu ngei dawn a, min rawn be ngei bawk ang.
.
Tuna ka tihtur zawng chu lo nghah tawp a ni ta rih e.   
.
JADE
(Soddisfazione)
.
Thantei_LauraSean
.
CHAPTER - 8
.
VASPI* (JADE*)
.
Bathroom-ah kal lovin in hnunglam kawngkhar atangin ka chhuak a, pawn lama min lo nghaktu awmna ka thlen chuan hawi letin  Remtluanga chu ka va en hram a, kawngka bulah dingin ka kalna tur ni-a a rin lam chu a melh zoh zoh tih ka va hmu hman.
.
"Kal ang le." ti sapin motor chhungah ka lut a, kan tlan chhuak nghal chu a ni deuh mai.
.
Lazarus kan thlen chuan a la tlai vaklo nain ka chau hnawk thei nia. Ka rilru ah Remtluanga bak a awm miah lo bawk. Ka pindan ka thlen chuan ka inthlak fel zung zung a, ka incheina zawng zawng ka tihfai hnu chuan ka mu nghal a. Remtluanga awm dan tur ngaihtuahin ka muhil mai thei chuang lo. Eng thil nge maw ka hriat a, ka ngaihtuah zui viau ni! Min lo biak hun tur ka nghak rilru nghal deuh run mai lehnghal.
.   
Kar khat a liam ta! Remtluanga hnena ka number hnuchhiah kha a hmu ta lo anih ka ring, vawiin thleng hian min la rawn be miah lo. Jade ka nihna ang chuan nitin deuhthaw ka hmu a, ahma angin min be tawh ngai lo thung. Pawi tih tur nge pawi tih loh tur pawh ka hrethiam lo. A chang chuan min hmu lo leh min hre ngai miah lo angin a awm a, min biak chhunah pawh a tul chin chiah a sawi thin. A sumdawnna zauhna tura exam ka pek tak loh pawh vawikhatmah kan sawi nawn leh ta lo.
.
"Pu in biak lawk che a duh a nih chu. A lehkha chhiarna pindan ah han kal rawh." Nu Tluangpuii chu phawk deuh takin ka en a, ani lah chu a nui suk suk duh chauh.
.
Eng thil nge ni ang tia ngaihtuah chungin in chung lama min kohna pindan lam ka pan a, kawngka ka kik karh karh hnu chuan lut tura min hrilh angin ka pen lut a. Helai hmun ka awm tantirh atang khan he pindan-ah hian vawikhatmah ka la lut ngai lo. Pindan chhung chu a thim deuh ruih a, pindan chhak lam tukverh bula thutna sei deuh leh nghenchhan nawmhmel fahran ka hmuh chuan hahdam tak leh engmah enghelh  nei lova lehkha chhiar nuam ka tih thin zia min hriat chhuahtir..
.
"Hetah hian lo thu rawh." Remtluanga aw ka hriat chuan ka hawisawn zawk a. A melhna lamah kalin dawhkan lian lutuk lo hmaa chair awm, amah hmachhawn chiah chuan ka thu a. A hmel chu ka phak tawkin ka chik. Mahse, a hmel atangin engmah ka hriat belh lo.
.
"Eng thil  nge ni ta?"
.
Min chhang mai lovin dawhkanah chuan lehkha arawn dah chhuak a, a lehkha rawn dah chhuah chu ka en reng ringawt. He mihring hian min hrechhuak ta a ni ngat mai! Ka tawng lo. Amah ngaichangin ka en a, chik zeta min enin a kut zungtang chu dawhkanah chuan a tiri kauh kauh a. A hmel thutak lutuk bawk si avang chuan thil tha lam a sawi dawn hauh lo tih ka ring lawk hmiah.
.
"He lehkha-a inziak number hi la la, tunge anih lo hrechhuak ang che." a ti bung vut a. A mood a fuh em em lo anih hmel hi.
.
"Eng thil nge a?" ti he haw chungin lehkha chu ka la a, lehkha-a number inziak chu kei aia hrechiang an awm hauh si lo.
.
"Kar khat chhunga i hriat chhuah hman chuan a letin i hlawh ka tipung ang." atih chuan ka melh kawk mai.
.
"A pawimawh awm hle mai. Tinge kei kher? Ka hriat zawng pawh a ni awm si lova. Bakah, nangmah pawhin i ti thei awm reng sia." ka tih chuan a ngawi reng.
.
"Min chhuahsan thei ang. Ka sawi kha i hriatchian ka ring." a ti leh hmuk hmuk a. Hetiang taka mood fuhlo hian ka hmuh awm pawh ka la hre lo ve.
.
Engmah sawi tawh lovin pindan atang chuan ka chhuak a, engtin nge ka awm ang tih ngaihtuahin ka kalna tur ka lo en miah lo va, thil eng emaw ka sut  nawk chuan ka hawichhuak chiah.
.
"Fikhur ta che. Hengah te eng nge i tih a?" Duhsaki teu hlar hmel chu en duh lovin ka tih palh tiin ka phun sep a. Kal pelh mai ka tum chu na deuh tak hian ka banah min vuan a, amah hmachhawn turin min pawt let a.
.
"Tun hi last warning a ni tih i hre dawn nia. Remtluanga hi vawikhat pawh i bia emaw i hnaih leh emaw anih chuan ka en liam dawn miah lo che tih lo hrenawn leh rawh. Kha kha eng thil nge?" tih leh ka lehkha ken lai pawhthlak rualin lehkha-a number inziak a hmuh chuan chik lutuk hian min en a.
"Heihi eng thil nge?" a ti ram hmak a.
.
"Ka hre bik lo." ka tih chuan awih lo tih hriat lutuk hian a ner sawk mai. Lehkha chu a hlawm nawk nawk a.
.
"I tichhe thei lo ania. Lehkha pawimawh anih hmel a nia."
.
"Huh! Eng lehkha pawimawh  mah a ni lovang__"meng phar zawk hian lehkha chu a khawr ang angin ka kutah min hmehbel nawk nawk a, vung zet hian a lo kalna lamah a let thla leh a. Ka hnunglam ka hawi chuan Remtluanga a lo ding reng. A hmel lan dan hlauhawm zia chu ka sawifiah thiam lo zawk.
.
Lehkha chu ka kekawr hak ipte-a dahin ka kalsawn a, Remtluanga chu ka melh leh tawh lo.
.
Mahni leh mahni inzawng an la awm ngaiin ka ring lo. Engemaw zawng tak chuan ka nuih a za a, side dang ka ngaihtuah erawh chuan ka thluak a buai lo chauh thung. Engtin nge Remtluanga bulah ka sawi tak ang. A mi hriat duh number min pek hi ka pek ngei number kha a ni a, hlawh pun leh pun loh tih mai mai ai chuan engtin nge ka tih tak ang tih hian min tibuai.. Min tibuai lutuk tak zet. Engvangin nge aman a tih mai loh? 
.
Ni thum chhung chu kan inhmu leh ta miah lo. Mak deuh chu Duhsaki nen pawh kan inhmu chuang lo. An awm dan hi hriatthiam a har khawp mai. Nu Tluangpuii nen erawh kan inkawmngeih telh telh a, ka neih ngai loh 'nu' nei ta ang mai ka ni. Ka nihna dik tak erawh tumah ka la hrilh lova, hrilh pawh ka tum hek lo.
.
Ka hun neih kar khat aral a, Remtluanga bula sawi dan tur eng thil mah ka la ngaihtuah chhuak chuang lo. Hotel-ah ka awm tih ka hmelhriat neih ve tlemte pawhin min la hriatpui lova, ka theih chin chinah ka inveng vek a ni ber. Ka zalen lo riau hian ka inhre ta tlat bawk.
.
Tlaiah Remtluanga in atanga ka haw chu nidang aiin ka chau zual a, ka pindan ka luh rualin ka mu nghal hnawk a. Ka muhil dawn siar siar tihah ka bag-a ka phone nghawr dar dar chu meng tha peih lo chung hian ka phawrh a. Mahse, ka phone hman pangngai zawk a ni lo. Thu chhuak nghal hlawl in Remtluanga ka pek number (sim card) ka vuahna zawk phone chu ka phawrh leh a. Remtluanga hming ka hmuh chuan ka thin a phu nghal dawt dawt mai. Ka awm dawm te tein phone chu ka pick up a, ka tawng mai lo.
.
"Zanin hian hmuh che ka duh." arawn ti nghal tawp.
.
"Tunge ka biak?" ka aw ti danglamin ka chhang a, amah hre nghal mai lo anga ka lang chu nuihza niawm tak hian a nui ri hak a.
.
"Bathroom-a i riahsan tak mipa kha i la theihnghilh loh ka ring ve ringawt a." a ti hul hak mai. A aw ah chuan tihelna a lang daih thung.
.
"Ka tih palh lutuk. Khami zan khan thil pawimawh lutuk a awm thut a. A pawi ka ti tak tak."
.
"Cinderella ang maiin_" awki hniam leh sexy zeta a tawng chu ka haider thei lo.
.
"Engtin nge ka number i neih? Oh! Ka tawngkam hman chu a mawi chiah lo__"
.
"Khawiah nge ka hmuh theih ang che?" ka zawhna chu hre lo ang hmiahin a awm hmak thei nia. He mihring hian mizia engzat chiah nge a neih le?
.
"Zanin chu ka chhuak dawn lova. Bakah, nupui hual i nei tih kha ka theihnghilh miah lo a nia." ngaihawm thei ang ber tura ka ngaih angin ka nui ker ker a "I single hunah kan inhmu leh zawk dawn em niang?" ka tih chuan a rum nghat a.
.
"Nupui nei ka ni lova ka zalen alawm." a ti leh hmiah.
.
"Zalen tia insawi thei tur i niin ka hre lo. I nupui hual nen khan in cheng dun niin ka lo hria a."
.
"I ngaihven tih hriat chu a nuam hle mai." engemaw a sawi zawm dawn emaw tiin ka ngaichang a, a ngawi leh daih lawi a.
.
"Chuan?" ka ti sep a.
.
"Sawitur dang ka nei lo. Hmuh che ka duh."
.
"Ka sawi tawh ang khan zanin chu ka chhuak dawn lo va."
"I awmna hmun sawi la ka lo kal ang." Eng maw? Hetiang khawp hian maw min hmuh a duh?  "Thil tharlam ka mamawh." a tih leh chuan mak tiin ka nui tawp.
.
"I in ah khan nitin mi thar i hmu ziah ang chu."
.
"Chutiang a awm lo."
"I hnathawkte pawh." enge maw ka ngaihtuah le. A in leh a in-a hnathawkte hi engvanga sawi vel kher nge ka nih le? A aw hriat ringawt pawh hi nuam ka ti a ni mahna!!
.
Tawngkaa min chhang lovin a nui a, a nuih dan chuan engkim a tichiang vek. Tuna a in-a hnathawk te,keimah pawh tiamin atan chuan a chhiahhlawh mai kan ni. Ka va han mawl em em tak. Ka nihna thupa ka inchei khan ka hip pawh ani mahna, ka lan dan pangngai hi chuan a hip hauh lo tak ang. Ka tum loh zet hian ka thil zawh awmang lo tihna rilru nei chungin ka nui ve ta chiam a.
.
"I hmui fawh chakawm zet kha engtikah nge ka fawh leh theih ang?"
.
"Oh!!" ka nui tawp chiang teh e. A tawngkam raw lutuk chuan min ti hamhaih zawk. Hetiang taka tlang tawngkam hi ka beisei miah loh rualin min hip hle tih ka pha thei lo!! Mahse, he thil hi ka mamawh loh ber thil a ni.
.
"I mumangah tal lo thleng rawh se." min chhan leh hmain ka buai laklawh thu ka sawi a, phone ka off ta ringawt a.
.
Kar a awm hman lo, ka phone hman pangngai zawk chu arawn ri leh a. Remtluanga bawk! Insangmar teuhin ka phone chu ka pick up a.
.
"I hna chu eng chen nge i thlen tawh?"
"Hello... Hello..." a tawng hre thei lo anga lang derin phone chu ka off leh daih. Tunah chuan chhuanlam siam tur takngial pawh engmah ka hre dawn rih tlat lo.   
.
A rawn ri nawn leh a, ka pick up duh tawh lo. A ring tawp ruala ka pindan kawngka kik ri ka hriat chuan ka phu chiang lutuk. Room service bak helaia lo kal tur an awm lo.. Helai hmuna ka chen thu hi tuman an hre lo.. Khum chu thawhsan in  ka thaw huai a, kawngka hawng turin ka kal nghal a.
.
Kawngka ka hawn rualin khar kehnghal tumin ka nem a, ka tlai hman ta tho.
.
"Nang hi_" Remtluanga chu arawn pen lut rawk a, ka pai deuh nawk mai.
.
"Hetah hian engtik atangin nge i awm?" a hmel chu ka en rei duh lo.
.
"Hetah hian ka awm tih engtin nge i hriat?" a hmel ka en tawh lo nain ka hmulthi a ding er er. Na zetin min melh reng tih ka mitsira ka va hmuh vang a ni. Min chhan mai loh vang chuan muangchang hian ka en a, ka pindan chhung chu uluk tih hriat zet hian a en kual a. Khum bula ka thil dah a pan tih ka hmuh chuan ka thaw a tawp dawn hial.. Ni lo! A ni thei lo. Lo fimkhhur viau tur ka nia sin..
.
"Ka thil hmuh hi enge a awmzia?" a aw chu hlauhawm tih piahlam a ni. Khum bula ka kawr khai, kan inhmuh hnuhnun zawka ka hak kha kawk chungin min en a, a mitmeng chu a danglam vek.
.
"Ka_"
Rang lutuk hian min rawn hnaih a, ka dar tawn tawnah min vuanin min sawih deuh nawk nawk a. A insum nasa lutuk tih hriat hian a insehruh teuh bawk.
.
"Ni lo hram se tiin ka ngaihtuah asin. Engvang nge? Engvanga ti nge i nih?"
.
"Ka_" engmah ka sawi thei lo. Ka inring lo lutuk em a ni.
.
"Engmah sawi suh." maimitchhingin a awm kang dawrh dawrh khawp hian thawk a la a, a hmel ka en ngam lo. "Vansangpui.. Hetiang em hi chu i nih ka ring lo__ A ni thei lo. Sawifiah rawh!" a tawng zawi telh telh a, a hlauhawm zual sauh zawk.
.
"Eng_" ka ti chauh a, ka aw a chhuak tha thei lo.
.
"Ka hlauhthawn ang chiah! Hetiang hmuna i khawsak theihna chhan pawh hi eng dang a ni lovang. Hmeichhe tenawm lutuk.." ka dar tawn tawna min vawnna chu a thlah thut a, ka lo ding nghet tawk lo bawk nen khumah chuan ka thu hnawk a. "I hmel hi hmuh leh ka duh tawh lovang.!"
.
Vung zet hian ka pindan atang chuan a chhuak a, kawngkhar na lutuka a khar rik thuai rual chuan ka ip chawih a.
.
Tunah chuan engkim a chhe vek. A ni thei lo! Eng thil maw a sawi kha? A hlauhthawn ang chiah maw? Engtik atang khan nge min lo rinhlelh tawh? A rinhlelh turin ka awm miah lo niin ka inhria a, eng laiah khan nge tihpalh thil ka lo  neih le? Eng thil nge ka tih tak ang??
.
JADE
(Soddisfazione)
.
Thantei_LauraSean
.
CHAPTER - 9
.
VASPI* (JADE*)
.
Darkar engzat nge khumah ngawi renga ka thut ka hre lo.
"Hmeichhe tenawm maw?" a duh dan danin min lo ngai rawh se. Ka duh ka tih hma chuan amah hlata awm ka tum lo bur. Ka lungawina ka hmuh hma chuan ka bansan dawn lo.
.
Khum thawhsanin kawrlum ka ha a, hotel atang chuan ka chhuak ta ringawt a. Zan dar 8:17 chiah a ni. Khawilam nge ka pan pawh ka ngaihtuah lo. Ka kal mawp mawp tawp.
.
"Min hre thei em? Tunah hian engtin nge ka awm zel dawn? Min tanpui dan tur i hria em? U..!" A reh vung vung a, thli thaw vuk vukin thing hnah a chhem ri sung sung bak thawm dang hriatttur a awm lo. Van lam hawiin ka dak a, arsi pe un leh thla eng lutuk te chuan min tanpui thei lo tih ka hria.
.
"Ludy.. U..Keimah chiah chuan eng chen mah ka thleng dawn lo. Min pui rawh." ka phun sep sep a, ka bul vel chu en kualin kawngsira lungpui lian deuh awm chu ka pan a, tih ber tur hre chuang lovin ka thu hnawk a.
Chaklo turah ka indah chhin ngai lova, ka thiltih  tum hi tluang taka tih hlawhtlin theih ka lo tum ringawt tih ka ngaihtuah chhuah chuan chakna thar ka nei leh ta deuh.
.
"Hetah hian eng chena rei nge awm i tum?" ka hnunglam ka hawi rang ngang mai. Sangtea zawi zeta lo ding ka hmuh chuan ka hawilet leh a.
.
"Eng nge i rawn tih ve dawn?" ka tih chuan za lutuk hian a nui chiam a.
.
"Hmeichhia lehnghal.. Zan hi i ngam mah mah lo maw? I hlau miah lo tak tak a mi a?"
.
"Eng nge hlauh tur awm?"
.
"Lo kal rawh. Ka hruai haw ang che."
.
"Khawiah nge ka awm pawh i hre heinem." ka tih leh chuan ka bulah arawn ding hnai a.
.
"Eng thil nge i tih a; khawiah nge i chen tih hi thil hriat har a ni hleinem. Eng chen nge a tak hian i awm dawn?"
.
"Inzirtirna chu nakin hun atan dahtha teh." ka ti nghat a.
.
"Tho rawh. Ka hruai haw ang che." ka banah min rawn vuan a, thawh loh theih pawh a ni lo. A bike hnungah chuangin kan tlan chhuak a. Engmah kan sawi tawh lo. Lazarus hotel kawta a din fel hnu chuan ngawireng bawkin ka chhuk a, lawmthu ka hrilh sap hnu chuan ka kalsan nghal a. Tunah chuan tu bulah mah ka awm peih rih lo. Hetah hian ka awm tih engtin nge a hriat ka hre lova, hriat talh pawh ka tum buai ting tang lovang. Chhui chhuah ka harsa lo anih pawhin ka tum dik tak hi chu an hre dawn chuang lo.
.
Mutchhuak lo zetin khumah ka let kual sek a, engtik laiin nge ka mutthilh ka hre lo. Ka harh hlawl chuan zing lam dar 4:30 chiah a ni. Nizana thil thleng kha chu engpawhnise Remtluanga in-a kal ka thulh dawn reng reng hleinem.
.
Thovin ka inphihfai hnuah ka inthlak a, muangchang vak lovin Remtluanga in panin ka kal chhuak  nghal a. A lo la reh thap mai.
.
Kawt zawlah minute 15 vel zet tur ka awm hnu chuan Nu Tluangpuii a lo thleng a, inchhungah kan lut a. Nidang angin kan titi bawrh bawrh lo. Keimah ang bawkin Nu Tluangpuii pawh a mood a fuh vaklo ve anih ka ring.
.
Dar 6 a rik chuan eitur kan siam fel vek tawh a, inchung atanga an lo chhuk hun nghakin kan thu ngawi khiau a.
.
"Maw?" Nu Tluangpuii chu ka en a, eng thu nge a sawi ka hre lo.
.
"Thil vei deuh nei i ang hle mai. I melh ngai i melh leh veng veng thin a.." chiang taka min enin a nui a, ani pawh hi a pangngai bik chuang lo.
.
"Han vei vak tur ka neih pawh ka hrelo. Nizan khan__"
.
"Eng ti turin nge i lo kal?" choka luhna tur kawngkaa Remtluanga ding chu Nu Tluangpuii nen kan en rual thawt. Nu Tluangpuiii chu ka melh a, Remtluanga chuan keimah min bia tih ka hre tho nain chhan nghal dan tur ka ngaihtuah chhung ka hawikual a ni ber.
.
"Hnathawk turin." hawichhuak lovin ka ding chhuak a, engtin nge a awm ka en duh lo. Nichin khan a mitmeng thip lutuk kha ka hmu hman a, hmuh nawn ka chak loh ber thil a ni.
.
"In atang hian chhuak rawh. Ka in-ah hian i thawh ve tur hna a awm tawh lo. Nang pawh.." Nu Tluangpuii chu a en tih ka hria. Ka mita ka hmuh kher ngai lovin ka hre thei vek. "He hmeichhia hi a lo kal anih chuan hawtir nghal turin ka hrilh chian che kha."
.
"Ka ti thei ngang lo a ni." Nu Tluangpuii chuan a ti sap a. Lainat hmel takin min melh a, Nu Tluangpuii chu en rei duh lovin ka hawisawn vat. Min khawngaih tih hriatreng hmel hmuh hi ka duh reng reng hleinem.
.
"Tunah chhuak rawh." a ti hriam hraih a. A aw rik dan leh a taksa lang khawng at atang chuan a insehruh tih ka hriat.
.
"Engvanga bang tur nge ka nih hriat ve ka phu em?" a awm chin enin ka hawichhuak a, a taksa chet dat dan chu a nui tih tichiangtu a ni.
.
"I hrechiang khawp mai." zawi zeta tiin a kalsawn hlek a. Dawhkan kilin chair-ah a thu a.
.
"Fiahna i nei em?"
"Mawi lo taka chet ngai lo turin tunah chhuak rawh."
.
"Kal mai rawh." Nu Tluangpuii chuan hlauthawng tih hriat tak hian min rawn hnaihin ka banah min vuan a.
.
"Kan pahnih hian inbiak kan ngai anih hi." Nu Tluangpuii chu ka en a, ka mitmeng atanga ka duh hrethiamin choka atang chuan a chhuak a. Remtluanga thung chuan ka awm tih hrelo ang hmiahin dawhkana newspaper chu lain a pharh duai duai a. A hmel ka va en chuan a chhiar  miah lo tih ka hria.
.
Ka huaisenna zawng zawng sawmkhawmin Remtluanga chu ka pan hnaia amah hnaih taka ka din takah chuan a newspaper ken chu dawhkanah a dah rawp a. A tawng miah lo. Ka dek ang tih hlau  niawm tak hian a awm niin ka hria.
.
"Ka thiltih kha engvanga ti nge ka nih hriat i tum dawn miah lo ami?" ka ti sap a. A che eih lo. "Mawh?" min chhang lovin a ding thut a, ka lo rinlawk loh vangin ka pen sawn deuh nawk a. "Engvanga ti nge ka__"
.
"Shh! Helamah hian kawngka a awm!"
.
A kut phar chhuakin kawngka awmna lam a kawk ta va mai. Min en lova, a hmel chu eng anga chik pawhin en ila eng thil nge a ngaihtuah tih ka hre ngai dawn chuang lo.
.
"Ka insawi__" amah hnaih tumin ka ban a. "Ti suh!" ti hlukin min hnaih lo turin a tawlh hla a, a hmel a ruh talh talh mai.
.
"A tha alawm. Vawiin atan ka kal ang." ti sapin ka kalpel a. Amah su deuh khera kal ka duh tlat chhan kha ka hre bik lo.
.
Choka atanga ka chhuah chuna Nu Tluangpuii'n min ngaihtuah hmel takin  min lo pan thuai a.
.
"Eng thil nge thleng? Hetiang hian ka la hmu ngai miah lo. A pawi i sawi em ni?"
.
Ka lu thing ringawtin in atang chuan ka kal chhuak a. Kawtzawl ka la chhuahsan fel hman lo, hmanhmawh zeta Duhsaki lo kal hlawk hlawk chuan min rawn su nawkin min ngaihven zui miah lo hian inchhungah a lut a. A awmzia chu nizan khan Duhsaki hi in ah hian a riak lo tihna a ni.   
.
Hotel-ah letin tlai dar 3 rik hma chu tihtur ka nei rih lo. Ka tumah ka chiang a, tullo tak leh hun lo lutuk a chet tumna ka nei lo. A hun takah ka duh tak chu ka ti mai dawn!
.
Ka darah min rawn vawn thut chuan ka phu nasa kher mai. Ka headphone vuah lai ka dah thla rawk rawk a. Ka movie en ka lo tiring deuh aniang, kawngka kik thawm ka lo hre miah lo.
.
"Inbe teh ang."
.
"Eng thil nge?" a tawng dan ang chiahin ka chhang. Duhsaki chu a ner deuh sak a. Hetah hian ka awm tih hi an hre vek tawh hlawm anih hmel tlat.
.
"Nizan khan Remtluanga a lo kal tih ka hria a, hetah hian eng nge a rawn tih? Nang hian ka lak atanga lakhran tum buai duh suh."
.
"I lak atangin maw? Tunge ka tum tih sawi?"
.
"Ka mita ka hmuh thil thenkhat vang hian rinhlelh rual lohin i vehthem vel tih a chiang reng alawm."
.
"A ni maw?" ka tih chuan min ngei hmel zet hian min melh rawm rawm a, ka pawi sa lo nasa. "Chuan engtin zel? Pawmlai nei tibuai duh tura min hmu chu a ropui hran lo hle mai a. Tih dan dang i hre si lo ami? A bulah i sawi em?" ka ti dam thlap a, a hmel buai nak chu a hmunawm phian.
.
"Zak ve deuh teh. Hmeichhe tenawm tak i nih dawn hi."
.
"Chutiang thu min hrilh tur chuan ka nun dan chanve pawh i hre lo tih ka hrechiang a, a chhe zawngin thutlukna i siam hma ve ani maw? Miring tam zawk hi chu hetiang hi kan nia lawm. Lo thu phawt rawh.."
.
"Hey, ka hrilh ang che. Remtluanga ka hloh ai chuan engpawh ka ti duh dawn a nia."
.
"Ka lo hrereng ang. Amahah tan la ta la a fuh ka va ring ve." dam thlapa tawng chunga ka hnehsawh zia a hmuh chuan sawitur hre lovin a thaw hlawi hlawi mai alawm. Duhsaki hi tihnat ka duh hauh lova, he hmeichhia hi ngaina lo mah ila an inthen phawt anih loh chuan Remtluanga hi ka hnaih thei dawn lo. Ka chunga thleng tura ka duh loh chu midang chunga ka tih a thiang bik lo tlat a. Remtluanga erawh hi chuan ka u laka a chet dan vang khan hrem ngei a phu. Hun engemaw chen chu ka nghah deuh angai dawn ta anih hi.
.
"Remtluanga duh ang khan kan in ah pawh lo kal tawh suh."
.
"Min ban fel tawh alawm."
.
"A that chu. Kan inhmuh tawh loh ka beisei."
.
“Keipaw’n ka beisei e.”
Duhsaki chu thut pawh thu lovin hmel buai ru tak hian ka pindan atang chuan a chhuak a.
.
 Hun tha a lo thlen theih hun nghakin chawlh ka lak a tul hle tih chiah ka ngaihtuah. Ka chhungrila thil tha lo tak ka feel mek hi a reh phah maithei bawk. Phiangsen hian! Engvangin nge thil hi awlsam taka ka tihfel mai theih loh le??
.
*LALREMTLUANGA*
.
Ka in a hmeichhe nalh tak, eitur tui taka siamtu ka hmuh hmasak ber ni khan tuna ka ngaihtuahna ang hi ka nei ang tih ka ring pha miah lo. Dik tak chuan, hmeichhe nalh tak hmuh chu engtiklai pawhin a nuam alawm.
.
Tunah hian engvanga ka awm dan hi diklo deuh hu nge a nih ka hrethiam pha tawh lo. Ka in atangin ka chhuahtir tawh a, ka hmuh loh chuan ka theihnghilh zui nghal mai bawk ang. Ni thum chhung chu ka hmulo ta reng a, mahse, engmah a dik thei tawh lo. Ka maimitchhinin a hmel ka hmu a, ka men lai pawhin ka hmu tho!
.
Party-na hmuna ka hmuh hmeichhia, hmaikawr vuah chunga ka fawh kha.. Kan inhmuh nawn leh tuma ka nghah thlawn atang chiah khan rinhlelhna ka nei a.. A diklo! Ka fawh  hmasak ber tuka ka in ah, ka choka ah ngei hmeichhe che vel ka hmuh leh ka hmaah a nui hmel ka hmuh khan rinhlelhna ka nei daih tawh zawk. Ni tura ka duh loh vangin ka ngaihtuah duh lo lui ngar ngar zawk a ni. Ka ngaihtuah chik poh leh... Engvanga ngaihtuah reng nge ka nih phiangsen ni! Engvanga lemchang kher nge anih? Ka lak atang hian eng thil nge a duh? Ka sawifiah thei a tih kha eng thil nge ni ang? Kei hian engmah sawifiah tir lovin ka hnar bo anih kha.
.
Chair atang chuan ka tho chhuak a, tih ber tur hre chuang lovin ka vei sek a.
Lazarus-a khawsa thei tur khawpin ka hnen atanga a hlawh hmuhin a tlin lo tih ka hrechiang. Mipa dang mutpuia sum hmu anih chuan... Ka kut hum ruhin cement bang chang zet chu ka chum nghek a! A ti lovang.. A mitmeng thianghlim tak leh pawisawi lo tak khan thil tenawm tak a ti thei lovang tih a tichiang! Anih chuan engvangin nge min ngen lai khan ka lo insawifiah tir mai loh!
.
Ka chair hnunga ka coat dah chu lain ka ha sawk sawk a, ka office atangin ka chhuak a. Lazarus-ah ka kal phawt ang. A nih loh chuan engmah ka ti thei chuang lo chu a nih hi.. Phiangsen hian!
.
Lazarus Hotel ka thlen chuan Reception counter ka pan ding nghal a, Vaspi awmna room number ka sawi chuan eng emaw check niawm tak hian ahmaa laptop chu a en ngar ngar a.
.
"Sir, tukin khan a chhuak a."
.
"Engtik nge a lo let ang?" ka dawhthei tehchiam lo. Hna a thawk anih loh chuan tihtur dang engmah a nei lo tawp ang.
.
"Ah_a inla chhuak ka tihna a nia."
"Maw?"
"Hotel atang hian a bungrua nen a chhuak tawh a."
"Khawilamah nge a kal dawn a sawi em?"
.
"Ka hre miah lo. Engmah kan hre lo. Min lo hrethiam lawk." tiin amah lo betute lam chu a ngaihven ta zawk a. He hmeichhia hian dawt min hrilh a ni chiang khawp. Amah khan tumah a hmuh duh loh vangin chhuak  tawh angin a inlantir a nih ngei ka ring. Ka ring sual hauh lo bawk ang.
.
Ngawi rengin reception counter atang chuan ka kalsawn a, inchung lamah ka chho a. Ka rinlawk ang chiahin kawngka chu pawnlamah a inkalh lo. Ka kik dawt dawt a, ka hmanhmawh tak viau chhan pawh engvang nge ka hre chuang der lova.
.
"A mak vak vak, eng thil nge?" kawng rawn hawngtu nen chuan kan inen hnai set sawt hle. "Tunge i nih?" a tichang fal mai.
.
"Khawiah nge Vansangpuii..Vaspi?"
.
"Chu chu tunge? I hai aniang."
.
"Hai love. A awm lo tih sawiturin a chah lawk che tiraw?" chiang zet hian a mitah ka en a, a meng buai ta nak mai.
.
"Ngawiteh aw.. Tukin dar 9 vel khan hetah hian ka lut ve chiah a. I hmeichhe sawi chu ka hmelhriat a ni lo tlat mai. Chhuak ta kha anih hmel."
.
Ka mitah min enlet kal a, dawt a sawi lo tih a chiang. Min chik hmel hnuhnawh hle lehnghal a.
.
"Ka rawn tibuai che a,a pawi hle mai."
.
"Pawi love."
.
"Anih phawt." tiin ka kalsan a, chu hmeichhia zet chu engmah sawi lovin khawi hmunah nge a kal chuan ang. Ka in-a alo thawh hma khan a chanchin hriattur a awm meuh lova, amah chauhin a awm tih leh chhungkhat hnai a neih loh thu chiah hriattur a awm. Ka duh emaw duhlo emaw Ramngaihsanga ka biak ngei a tul dawn anih hi.
.
Hotel atanga ka chhuah hmain Ramngaihsanga ka call a, keimah ang bawkin engmah a lo hre lo. Kei aiin a buai ta zawk anih hmel bawk.
.
tihtheih awm rih hek lo le, ka office lamah ka let leh a, Nu Tluangpuii ka phone leh hnu phei chuan ka rilru a buai zual ta hle.
.
"Dar 10 vel khan min lo bia a, min rawn mangtha a ni ber ang chu. Khawiah nge a kal dawn ka zawh lah khan mumalin min chhang hlei lova. Angaihna ka hre bik hauh lo mai. Thil pawi a thleng em lovang. Min biak hnu lawk khan ka call tlang thei ta si lova.. Ava ngaihtuahawm ta ve. A kalna tur awm ang ka ring thiam lo." arawn ti zung zung a. 
.
Nilengin ka hna a sawt lo lutuk tak zet. Tlaiah in ka thlen chuan ka rin loh takin Duhsaki a lo awm a, ala tih ngai miah loh angin eitur a lo buatsaih nasa mai bawk. Thil thalo rim ka hre tlata ka inhriat chu!
.
"Dear, i chau em?" min rawn kuahin ka kawrchung hak chu a phelh a, ka bag la bawkin nui sang hian min fawp a.
.
"I tha em?" ka tih chuan a nui ar ar a. Hetiang hi Duhsaki mizia a ni ngai lo.
"Tha mah mah. I ril a tam tawh em?" tih pahin a hmui a petsawi a, dak ha hian mitmeng  nung sarin min en a, a rapawm lek lek. Hetianga danglam hian awm kher lo se lawm takin min tihlawm tuma a lo thawh hahna hi ka faksak  ngei ang. Tunah chuan a danglam tlat.. Eng nge a chhan ka hre lo. Lungnilo taka siam erawh ka tum chuang lova.
.
"Ka ril a tam khawp mai."
"Minute 1 chiah lo nghak rawh." tih leh ka kawrchung leh bag chu kengin in a kalsawn a, sofa awm hnai berah chuan dahin min rawn pan leh vat a. Ka kawngah min kuahin choka kan pan a, a eitur siam chu phur tak hian min chhawp sauh sauh a.
.
"Kei pawh ka ril a tam tawh over. Ka lo nghak zo lo tep che a." ka bulah thuin a eitur chhawp chu a thlengah a suak a, ka ei hun nghak niawm tak hian min ngaichang lehrih a. A eitur siam chu a tui lem lo nain a vawikhat tihna a ni tih ka hriatsak a, ka sawisel lo.
.
"A tui em?" tih min zawh chuan ka bu nghat ringawt. Amah hian a ei ve dawn nge dawn lo ka ngaichang ni berin ka hria. Engvanga ring chhe ngawt nge maw ka nih le? Keimah hi ka diklo zo anih hi. Nupui atana ka duh leh ka chenpui hial hmeichhia hian ka chhiatna tur a ti duh hauh lovang. Chutiang tih ahnekin min tihlawm a tum sauh sauh a nih zawk hi.
.
A eitur chu a han ei a, tui a ti vak bik lo aniang inthiam vaklo hmel pu hian min enin a nui hmel chu a chuai raih raih a.
.
"Tinge a tui tiin min chhan a. A tui loh hi.." a ti nang nang a.
"A tui alawm. I hah phah em kha." ka tih chuan a thutna atanga thovin ka malchungah arawn thu a, ka nghawngah a hmai a phum ta tlat a. A mittui a tla niin ka hria.
.
"Ka hmangaih che. Ka nungchang thalo lai zawng zawng sim vek ka tum ang. Ka hmangaih che.." tiin a phun sap sap a. Ka thlakhlelh em em thin kha he thil hi a ni thin a, mahse, tunah hian ahma ang khan ka danglam miah lo. Thil nih dan tur rengah ka ngai nge, ka lungphu a danglam lo. A diklo tawp mai.
.
Zanriah kan ei kham a, thil danglam a thleng mawlh mawlh a ni ber mai. Duhsaki movie en duh thin kan en a, ka ngaihtuahna chu ka inchhungah hian a awm lo.
.
Door bell arawn ri ral ral a, ka inrin hmain ka tho thut a.
.
"Keiman ka va hawng ang. Tun ang hunah tunge lo kal ang le?" Duhsaki kawngka hawng tura a kal chu ka en reng a. Vaspi anih ka rin vang nge ka hre lo, ka lung phu a danglam!
.
"Eng nge i lo tih dawn?"
.
"Remtluanga a awm em?"
"Awm e. Eng thil nge?" an tawng ring lo khawp mai.
.
Kan awmna an rawn thlen chuan Ramngaihsanga hmel buai nuai chu ka lo en tawp a, chanchin tha lo tak a sawi dawn nia ka hriat vangin ka hawisawn eih lo.
.
"Eng thil nge ni ta?"
.
"Tun thlengin a awmna chin ka la hre lo." thaw huai chungin a thu hnawk a.
.
"Enge i thusawi chu a awmzia? Tu chungchang nge i sawi?" Duhsaki chu angaihna hriat loh hmel tak hian a hawi a hau mai.
.
"Vansangpuii.." a ti boh a.
.
"Chu chu tunge?"
.
"Jade."
"Hetah a awm i rin vang ami i lo kal?" Duhsaki chuan a hming lam ringawt pawh a duh lo tih a hmel atangin a lang chiang vek. "Hetah a thawk tawh hleinem. A reng rengah hetah  ber kher rawn zawn.."
a ti zui mawlh mawlh a.
.
"Nilengin a awmna tur nia ka rinah ka kal kual vek tawh a, a biak theih bawk si loh. Ka ngaihtuah tak zet."
.
"I ngaizawng ami a nang hian?" Duhsaki chuan rum zet hian Ramngaihsanga chu a melh khai khai a. "Khanu kha eng nge anih a, in ngaihven em em a.."
.
"Lo ngawi rawh."
.
"Lazarus-ah a awm reng kha. Khatiang hmeichhe dukdak lo zet kha engvangin nge i buaipui chung a.."
.
"Ngawi hmak rawh. A chungchang engmah hriat i nei lo." Ramngaihsanga chu a ding chhuak hluai a. "Engtin nge nang hian Lazarus-ah a awm tih i hriat?" ati khar khar a.
.
"Engmah a ni lo. Hmanni khan kan inhmu fuh a."
.
"Nangni hian min puih dawn loh tawp hi." a ti nghat nghat a.
.
Ramngaihsanga kan in atanga a chhuah hnu chuan ka engtih mah a tui tawh lo. Movie kan en zova, mut chhuak lo takin ka mu a, Duhsaki'n min lo khawih sek pawh chu ka ning ta hial.
.
A khat tawkin ka call deuh reng a, switch off tih bak chhanna engmah a awm lo. Dinhmun thalo takah a awm anih chuan keimah vang a ni ngei ang. A ei hmuhna ka titawp a, a hmel hmuh ka duh tawh loh thu ka hrilh bawk anih kha.
.
Ni a ral a, kar khat__thla a ral hnuah pawh Vaspi chanchin hriattur a awm ta reng reng lo.
JADE
(Soddisfazione)
.
Thantei_LauraSean
.
CHAPTER - 10
.
*LALREMTLUANGA*
.
Ka phone ri ka hriat chuan ka en ngai ka en reng chu tawpsanin ka harh deuh zawk nan ka lu ka thing  nawk nawk a, ka phone chu ka la nghal a.
.
"Hey.. Bawiha, ilo haw hma dawn em? Dar engzat ah nge ilo thlen ang?" zangkhai hmel taka Duhsaki tawng ri ka hriat chuan min tihharh phah lem lo khawp mai.
.
"Dar 5 velah ka lo thlen hman ka ring. Thil thleng a awm em?" ka tih chuan inthiamlo niawm tak hian a nui zui hak hak a, eng eng emaw a sawi zuia a rul tawka chhan zel chi zawhna a ni leh hlawm. A bei nasa tih ka hria a, ka theih hauh loh tur a tithei thin bawk a. Ka tum ang ngawta awlsamin kan inkar hi a tawp ta rih lo anih hmel. Chhan tha tak a awm loh chuan tuin nge midang thinlung tina ringawt duh bik ang! Ka ngaihtuahna erawh a uire reng chu a ni ta ber a. Ka thinlung ka lo thunun thei hauh lo tih hi thla khat liamta khan ka hrechiang vek tawh. Chu pawh, Vaspi awm loh hnu atang khan a ni. Ka nunah hian zirlai thar ka zir a tul ta anih ber hi.
.
"Okay_Lo haw thuai rawh aw. Ka lo nghak ang che. Bye."
.
Phone ka dah hnu chuan ka dawhkana lehkha thenkhat ziahfel tur ka dah rei tak mah mah ho chu ka ziak fel a, dar 2 velah ka hna zovin dawr hawn thar tur lamah ka kal leh a. Rilru lapengtu ka insiam chawp lui a nih loh chuan thil sawt lo ka ngaihtuah leh chiam thin a, hetianga buai taka awm leh rilru thil danga hman hi ka thil mamawh ber a ni ve hrim hrim rih.
.
"Sir, tuna pindan kan chei that mek hi a zawh chuan kan hawng thei thuai ang. Kar khat chhungin thil tul dang zawng zawng buaipui ka lo tum dawn nia."
.
"Helaia kan hman tur bik leh eitur siamna item agent kha in be tawh em?" tih pahin pindan chhung chu ka enkual a, a tha tawk khawp mai. Tuna hnathawka ka chhawr hi tunhma atangin ka chhawr tawh thin a, ka inchhir ngai lo.
.
"Oh! Ni tak e. Hmanraw thenkhat chu hetah pawh a ngaihtuah theih a, Italy atanga an chah bik ho chungchang ah India-a Agency nen in inhmuh a tul dawn a. I sawi chhuak hlauh chu ka va'n lawm em.. Lehkha I chhiar anga chiang zawkin I hriat theih ka ring. Ka lo mangnghilh tep alawm le. Zanin ah in ah ka lo dah mai dawn nia." a ti zung zung a.
.
An hnathawh thenkhat sawisel tur awmte ka hrilh hnuah ka office-a ka thil theihnghilh hrechhuakin ka kalsan a, ka office ka thlen leh chuan Remruata lo thu ka hmuh chuan ka phu deuh zawk.
.
"Hey, thiana. Nghah chhung a va rei duh ve." min hmuh rualin a nui nghak hawk hawk a.
.
"Eng thil nge? Lut ila." tiin ka office-ah kan inzui lut a.
.
"Hmanni i thilsawi kha ka theih ang angin ka lo bawhzui a. Nimin khan amah ang tak Ramhlun-ah sawn ka hmu a. Ka va hnaih hmain a pilbo leh hman pek alawm le. Thlalak ami nen khan an inang chiah chiah tih chu ka hrechiang a."
.
"Thildang buaipui hun lovah i buaipui vanga hloh ta inih thu sawi lo teh?"
.
"Ka umzui reng a, ka umzui tih hriain a biru taah ka ngai hmiah." a ti boh a.
.
"A that chu. Hetah a awm tih hriat hrim hrim pawh chu hahdamna a tling. Zawn hmuh a har tawh lovang."
.
"A dik chiah. Mizoram mah a zim a, Aizawl khawchhunga awm a nih hrim chuan kan hmu har lo tawp ang." thawk tha inti awm fahran hian a mit a chhing tak sur sur a.
.
"I thawk tha hran lo a nia. Engtin nge i hloh leh theih reng reng le? A lehpek ah chuan harhfimin awm tawh la ka duh hle mai."
.
"Thiana, kar hnih leh ni 1 bakah darkar 10 leh 23 minutes chhungin ka la harhfim char char." atih chuan kan nui dun hawk hawk a.
.
.
Tlai lam dar 4:30 pelh hretah ka office kan chhuahsan a, in ka pan ding nghal a. Remruata pawh ngawrh lehzuala Vaspi chenna hmun lo thlithlai turin ka chah nawn mawlh mawlh. Ka hmuh hun chuan a chaklo khawp ang. Hetiang khawpa rilru hahdam lo hian tumah reng rengin min la siam ngai lo.
.
In ka thlen chuan beisei loh thilin min lo hmuak leh ta. Kan thian tam zawkte an lo awm a, helaia punkhawm chhan tur thil enge awm ka lo hre ve lehpek lo.
.
Inthlak turin pindanah ka kalsan hlawm a, Duhsaki'n min rawn zui vat a.
.
"Eng nge an rawn tih dawn?" ka kamis hak ka phelh mawlh mawlh a.
.
"Vawiin hi kan inhual cham alawm.. I hre miah lo tak tak ami?" hmel nur deuh nangin min en a.
.
"Inneih cham em pawh a ni lova hetia tih bung bung hi ka ning viau thin tih i hriat kha. Hahdam ka duh a nia."
.
"Ka sawm pawh anni lo, anmahni zawkin an rawt alawm. Kan thiante paw'n kan inhual cham a ni tih an hriat laiin engtin nge i hriat miah loh theih zawk a." min rawn hnaihin lungawilo zet hian min melh a.
.
"Inhnial ka peih lo. Chhuk rawh. Ka inbual phawt anga lo chhuk ve ang."
.
Min chhang mai lovin a thaw hliai a. Min rawn kuah a.
"Ka tihpalh. Kan pahnih chauha hmang turin ruahmanna ka siam reng ania. I thinrim lo tiraw?" a ti sap sap a.
.
"Hm.. Lo zu chhuk phawt rawh." ka ti leh ringawt. Lungawilo tur ka ni em? Ka hrelo. Ka chhungrilah hian Duhsaki ka care thinna kha a bo ta vek ni hian ka hria. Eng thil nge ka chungah hian thleng ka hre ta tehnuai love.
.
"Min fawp phawt la.?" meng sar sar chung hian min nuih tlawn a, hetiang hi ka lo ngaithei miah lo a lo nih hi.
.
"Nui lui chungin min kuahna chu ka phelh a "Ka'n inbual phawt ange." tih leh kalsan ka rual a.
.
"Hmanhmawh a ngai lo a nia." arawn ti leh hram. Tuna a mizia ai chuan a nih ang anga alan pawp pawp ang khan awm se ka duh zawk. Mihring mize siamchawp lem lutuk hi ka ngaina lo.
.
Tuiin min phuhlai chuan maimitchhingin thawk ka la a, Vaspi bawk ka mitthla-a lo lang chu tihbo theih ka duh hle a ni. Hetiang tur hi a ni lo.
.
Ka inbual ta zung zung a, inhnuai lama ka chhuk chuan ring zet zet hian an lo nui thler leh duai duai tawh a. Hmeichhe hohi anni zual. A reng reng thuah zanina lo kalte hi ka tan thian tia sawitur an awm miah lo. Ka hmelhriatte anni zawk.
.
"Heiii.. a changtupa chuh a va cool ve a.." min rawn bawr tak tuau tuau a! An awmdan ninawm zet ka kalsan theihna remchang ni turin ka phone arawn ri ta hlauh mai. Rang zetin ka phone chu ka la thuai a. Pawnah ka chhuak ta daih bawk.
.
"Eng thil nge ni ta?"
.
"Sir, vawiina kan sawi lehkha kha ka lo dah dawn a. Tunah in in kawtah ka awm mek. Ka rawn lut mai n gam lo deuh a."
.
"A that chu ka lo chhuak ang."
.
Balcony atanga inchhung lutin chhuah lawkna tur thil pawimawh lutuk a awm thut thu sawiin Duhsaki leh a thiante chu ka chhuahsan a, an haw darh hmaa ka let leh hman chuan a tawk mai.
.
In kawta Lawmsangi lo ding vang chu panin lehkha ka lak hnuah a kal lehnghal a, kei erawh chu inchhung ri nuai nuai a ka awm peih rih loh vangin garage-ah ka lut a, motor chhungah ka thu ta veng veng a. Ka tih tawh loh lam tilo tak ka nihna hi midangin min endik dawn se an sawi nasat ber tur thil ani ngei ang. Mahse, mihring hi a hrang veka siam, inang lo vek kan nih vangin midang aia ka danglamna ni maiah ka  ngai thin a, ka la ngai zel bawk ang.
.
In chhung ka luh leh hnu chuan pangngai taka awmin Duhsaki pawh a thiante laka a zah loh nan a mawi tawkin ka ngaihsak a, ka danglam ta tlat hi kei ngei pawh hian mak ka ti.
.
Mahni awm awmin kan awm hlawm a, a then hlim zeta an nuih khek tuarh tuarh laiin a then an lo titi mial mial a. Kan pindana kal tumin ka thutna ka thawhsan a, Duhsaki pawh ka hmu ta mai lo. Zanin na na na chu thawveng takin awm ve rawh se. Eng emaw lai atang khan a nungchang pangngai angin a awm tawh lova, hreawm tiin thawveng taka awmna hun a mamawh ve ang chu.
.
Kan pindan ka luh hmain tawng deuh ser ser ri ka hria a, hmeichhe titi mai mai tia kal pelh ka tum laiin ka beng verh ber thu ka hre ta tlat.
.
"Jade khan ati ang maw? Chutiang thil tithei tur khawp chu a ni lo alawm."
.
"Bakah amah hian min kalsan dawn thoa hriatna ka nei a. Mipa hi ka hrethiam thei lo." Duhsaki chu a tap a ang khawp mai.
"Lungngai lutuk duh suh. Engkim a tha leh vek mai ang. Eng emaw chang chuan mipa hi an danglam ve thin alawm.." an tawng chu ngaithla zui duh lovin ka kalsawn a.
.
Dar 11 a rik chuan an haw darh fel ta hram a. Lawmsangi lehkha min pek kha mut hmain ka chhiar a, naktuk tuklehah ka zin a tul ngei dawn anih hmel. Engkim danglam leh Mizoram-a kan la neih ngai loh ang ka duh vangin a hautak a, eitur chah luh pawh mahni ngeiin zuk hriatchian vek angai dawn a ni. Tunhnaiah hian ka zin tlem ta deuh a, hawi harh deuh pawh ka mamawh ve tawh reng reng bawk. Zin a tul chu a lawmawm zawkah ka ngai.
.
Ka zin hmain Remruata hnen atanga chanchin dang hriat ka beisei viau a, mahse, engmah a rawn sawi leh ta lo. Aizawl a zim, kan  hmu har lovang ati ve ngial kha a nia. Beisei angin a thawk leh dawn lo tawp anih hi. Loh theih loha zin ngai ka nih vangin ka zin phawt anga, ka haw rual rualin keimah nen ngei Vaspi chenna hmun chu kan zawng chhuak ngei ngei ang. Hreawm tak pawhin a lo awm reng thei.. Chu thil chu thleng lo hram rawh se. Hmeichhe fel tak a ni a, hreawm taka awm lo turin amah a inhaikaw thei em em ang.
.
NI HNIH HNUAH*
.
UDY-JA CONFERENCE ROOM - DELHI*
.
10:00 AM
.
"Good morning, ladies and gentlemen_ Vawiin hian information kan pek chhuah ang khan Italy atanga noodles leh item dang kan chah chhuahte anihna dik tak leh a that bikna hre thei turin engkim chiang takin kan sawifiah dawn a ni. Kan hnen atanga lachhawngtu ten anihna tak in hriat kan duh bawk__" Mr. Shekrawat chu hawi chhuakin a nui ta vur vur a. "Aw le, Tunah kan food expert i lo sawm ang. Miss V'_"
.
Kut an beng dar dar a. Darkar khat chhungin a zo hman em ang chu maw.
.
Stage-a hmeichhe rawn ding chhuak chu ka en a, ka hai hauh lo! Vaspi..Vansangpuii ngei a ni. Mahse, engtin nge anih theih?? A rawn din chhuah hma khan ka lo hmu miah lo.
Ka thutna atangin ka ding hluai a. Ka bula thuin eng thil nge diklo awm tih min zawh chuan ka thu leh ta chauh.
.
Mahni inringtawk zetin a tawng a, ka hriat thin, ka in-a hnathawk hmeichhia nen an inanna chu a aw ri leh a hmel..engkimah a inang vek. Engtin nge anih theih? He thil hi tunmai khan ka inzawt tawh tak e.
.
"He noodles hi ahmaa kan pek chhuah thin nen a inan lohna chu Protein a tam zawk a, rim a nei lo bawk. Tunlaiah thau vanga buaina tawk tam tak__" Ka en tlawk tlawk a, a awphawi mawi zet chuan min ti hahdam sawng sawng nia ka hriat hial chu! Eng chena rei nge stage-ah chuan a awm ka lo chhinchhiah lo. Nui sang chungin a kalsawn a, official thutna tura chair awm hrangah chuan a thu ngil at a.
.
Meeting a zo a, pindan hrangah refreshment ei turin an kal darh ta hlawm a. Vaspi kha hmuh leh tumin ka mitin ka zawng a, ka hmu ta hauh lo.
Midang awm ve te zuiin pindan dangah ka kal a, kil khata vaipa nen an lo inbia ka hmuh chuan thil mawi zawk pawh zawng lovin ka pan nghal chawt.
.
"Vaspi!"
.
Min rawn en zawk a, 'lo nghak lawk rawh' ti niawm tak hian a kut a rawn phar chhuak zawk a. A bula mipa chu enin an tawng zawm a, za zet hian a nui zui a.
"Ka lawm e. Kan inhmu leh thuai dawn nia." a bula vaipa a kalsawn rualin amah si lo chauhin ka din hnaih a.
.
"Engtin nge anih theih?" tih thu hi ka sawi hmasa ber. Ahma khan ka hmuh leh rualin engmah sawi lova a kal bo daih vangin ka hau ang tiin ka ngaihtuah em kha?? Tuna ka awmdan hi sawifiah theih pawh a ni lo. Ka zam a, ka lungphu ran zia chu mak tak a ni. Hmeichhia ang mai ka nih tak hi!!
.
"Eng nge?" pangngai thlap leh min hmuh vanga danglam eih awm lovin ka mitah min en a.
"Him taka i awm chu a lawmawm hle mai."
.
"Him takin maw?" a ngaihna a hre lo hmel chu kuah lo turin ka insum. Hetiang taka nasa hian ka lo thlahlel reng tih hriat ringawt pawh hian min thawng tawk khawp mai.
.
"Duhsaki a dam em?"
"Maw?"
"Duhsaki a dam em?" a veilama thle deuhin a nui sak a. A mitmeng chu ka chhiar thiam lo. Kei hian Duhsaki thik turin ka duh maw? A mitmengah hian ka duh ang ka hmuh loh vangin ka lungawi lo anih hi!
.
"Dam alawm."
"I lo hruai ve lo nia." he hmeichhia hian min bawl kual vel ang maw?
.
"Engvanga engmah sawi lova kal bo nge i nih?"
.
"Lazarus hnathawkte bak ka haw tur thu hriat mamawh an awm hleinem. Chuan, meeting chu i hlawk dawn awm em?"
.
"Keimah min hrilh thei alawm." a mitah ka la en reng a, tunah chuan a awm a nawm loh hmel ta.
.
"Um..i ril a tam lo mi? Keichu ka tam a nia."
.
Thildang sawi a tum lui talh chu ka lawm lo hle. Tanwg lovin ka en reng a, a nui hak ringawt. Min kal pelh a tum chu a bana ka vuan a. Arawn meng phawk ta hra mai. "Hetah lo."
.
"Miss V, biak lawk che ka duh a. I laklawh loh chuan."
.
"Okay. Eng thil nge ni ta?" tiin amah lo betu chu a pan a, ka lak atanga kal sawnna hun remchang a hmu chu a lawm a ni ngei ang, thaw huai hmel a pu alawm le.
.
Chu hmeichhia nen chuan eng emaw sawiin refreshment room atang chuan an chhuak a, a lo let leh hun ka chang ta ngawt a. A tam zawk an kal vek tawh hnuah pawh a lo let thei ta reng reng lo.
.
Tunah chuan keimah chiah ka awm ta. Hnathawk thenkhat lo kalin hnawk an rawn thian a, makti hmela min en chuan keimah chauha lo awm chu a mawi lo tih hriain building chu ka chhuahsan lo thei ta lo. Min hmuh a duh lem lo tih a chiang a, chu chu ka duh dan letling chiah a ni thung. Khawiah nge a chen? Engkim ka hriat hma chuan Delhi hi ka chhuahsan lovang.
JADE
(Soddisfazione)
.
Thantei_LauraSean
.
CHAPTER - 11
.
*REMTLUANGA*
.
Car tlan chhuah hmain ka awmna lam pana Mr. Shekrawat lo kal ka hmuh chuan car atangin ka chhuak leh rih a. Ani hian engtin emaw tal min puih theih ka ring. Min rawn hmuh chuan min rawn ta hlauh lehnghal a.
.
"Keimah chauh ka awm tawh emaw ka tia." nui chungin ka bulah arawn ding a, amah nen tak hian kum 5 vel zet chu kan inhre tawh. Sumdawnna thil vanga inhria chauh mai kan ni a, thian anga kawm ka tum ngai lem lo kha a nia. Tunah chuan ka mamawh hmel ta tlat anih hi. Mi fel tak a ni tih ka hriatlawk tawh vangin engpawh zawt ila a pawina a awm hran lovang.
.
"Khawiah emaw kal duhna ka nei a, hun i neih chuan kal dun ila? Zawhna thenkhat zawh che ka duh bawk a."
"Tehreng mai. Thlaleh hian Mizoram kalna chance ka nei dawn a, ka laka that i chhuah chu ka lawm hle mai. Kal ila.." a ti mai a. A laka that ka chhuah vak pawh ka hre lem hlei lova.
.
A car-ah chuangin kan tlanchhuak a, a khat tawkin min ena a nui leh suk thin a. Eng thil nge maw a hriat ni?
.
"Eng thil nge?"
.
"Engmah a ni lo." a nui leh tho. He vaipa hian thil hriat eng emaw tak chu a neih hmel.
.
"Chhan awm lova nui thin chu Hindi in engtin nge in sawi thin kha.. Ah.._"
.
"Okay_Okay.. Nichina i sawi min zawh duh kha ka hrelawk in ka hria."
"Eng thil  nge?"
.
"Oh! Kha_Miss V i hmuh khan i ngaihven tih ka hria alawm. Stage atanga a chhuk hnuah pawh i enzui reng a, refreshment room-ah nen.."
.
"Chuan?" tiin ka melh a, a nui ta hawk hawk a.
.
"Miss V hi hmeichhe tha tak anih rualin i duh angin i hnaih thei kher lovang."
.
"A chhan han sawi la. Hnaih ilo tum tawh thin tihna a ni em?" ka tih chuan a mengrang  nasa mai.
.
"Engtin nge i hriat? Dik tak chuan.. Ni e, vawihnih a bulah ka sawi tawh. Engtin nge min chhan i hre duh em?" a tih chuan ang thil nge a sawi dawn hre chak ru zetin ka en reng a.
.
"Mipa hian an tiphur ngai lo tih a sawi a!"
.
"Tak zet reuh hian!" tiin ka phun hluk. Hetiang kher ni lo, mawi zawka mipa hnawl dan a tam tehreng nen. Vaspi ka mittla a hmu chungin ka nui zui suk a.
.
"Eng maw i sawi chu? In tawng hi thiam ve ila ka ti ngawt mai. A muang deuh nain a mawi ka ti."
.
"A harsa hleinem. Ila thiam ve mai ang. Chuan, Miss V chu khawi hmunah nge a chen?"
.
"I hre lo maw?" a ti vei hu a. Hria ila ka zawt dawn che mi? ka ti rilru hmahmawh. "Ka chenna hmun atangin a hla vak lo. A sawi kual chiam hnuah a chenna hmun a sawi a, Vaspi chenna lai min hrilh hnu chuan a chanchin kan sawi leh ta lo.
.
"Zanin hian hun i neih chuan Bar-ah ka kalpui ang che. A nuam a nia. Indian hmeichhe nalh zet zet kalkhawmna hmun a nia."
.
"I contact number min pe la, hun ka neih dawn chuan ka lo hrilh dawn che nia."
.
Shekrawat a.k.a Arjun nen kan kal hran hnu chuan theihnghilh palh hlauin Vaspi address chu ka phone ah ka chhinchhiah a. Zanin hian tihtur dang ka nei lem lo bawk a, amah ka hmu lo anih pawhin a chenna hmun chu ka hmuh ngei ka duh. Vawikhata a chanchin zawng zawng Arjun zawh kha thiltih chi a ni lova, min hriatthiampui ve tho ka ring. Mi chanchin kimchang hriat tuma mi dang zawh vak vak chu eng emaw zawng takin a hlauhawm deuh reuh. Min lo ngaih dikloh te pawh a hlauhawm ve bawk a. Engtiklai atang khan nge mi dang ngaihdan hi ka lo ngaih pawimawh tak viau ni?
.
Ka thlenna Hotel-ah kirin ka inthlak a, boruak a lum hnawng churh mai. AC on-in hahdam takin ka thu a. Thil dang tehchiam ka ngaihtuah lo. Sana erawh a virmuang ka ti hle.
.
Ka phone ri ka hriat chuan thil pawimawh anih ringin ka thutna tangin ka tho a. Duhsaki__
.
"Hi, Dear. Vawiin engtin nge hun i hman?"
.
"Meeting."
"A tluang em?"
"Tluang e."
"Chuan, i lo kir hun tur a chiang tawh em? Ka ngai leh der tawh che a nia."
.
"Ka lo haw hun tur ala chiang lo. Thil tul dang a awm a."'
"Oh! Ka hrethiam e. Lo kal ve turin min duh em?"
.
"Khatah khan hun nuam tak lo hmang zawk rawh. Ka buai deuh a, nakinah ka lo call ang che."
.
"Um__Ka hmangaih che."
"Dah hmasa rawh." ka tih chuan a nui hak a.
"In enkawl uluk la aw." atih leh hnuah a dah ta chauh. Ka awm a nuam chiah lo. Duhsaki hi bum ka duh lova, mi tupawh nise an lakah fair lo taka chet ka duh chuang lo. Chuvang chuan chiang taka ka sawi vat a tul dawn anih hi. Vaspi ka hnaih thei emaw hnaih thei lo emaw, Duhsaki hi ka then phawt a tul niin ka hria. Mi i hmangaih emaw itih i lo hmangaih si loh, tisa inhiptawnna vanga nupuia neih i tum.. Thawklehkhata inhiptawnna tlahniam ta thut hi.. A dik thei lo.. Vaspi hi hre ta lo ni ila hetiang hian ka awm kher engem le? Duhsaki nungchang danglam ka hriat tam telh telh hian amah atangin min hlattir a ni ber zawk. Chutihlai chuan ka hriatthiam loh khawpa nasain hmeichhe mak takin alamah min hip mek bawk a.
.
Hun a kal bek bek a, tlai lam dar 6 a rik chuan awlsam thei ang  berin Hotel ka chhuahsan a. Ka kal tumna hmun ka pan ding nghal vang vang a. Boruak lum sa huam huam pawh tlai lamah chuan a zia ta deuh e. India ram hmun danga chengte aia Mizorama chengte kan vanneih zia leh boruak nawm bik zia hi a ngaihtuah loh theih loh thin. Boruak nuam lutuk a thlawna kan nei hi lawm hle tur kan ni. 
.
20 minutes vel bawr tur ka tlan hnuah Arjun sawi hmun Vaspi chenna bawr ka thleng a, ka phone phawrhin a address ka chhinchiah kha ka ennawn leh kher a.
.
Helai ngei hi a ni e. Kawngkharah a hming a intar kalh alawm. Door bell ka hmet a, kei hi ka zam deuh emaw ni? Rawlthar ang  maiin...
.
A rawn inhawng mai lo. A vawi ngana tur ka hmet leh dawn chiah tihah arawn inhawng ta hlawl. Min hmu thut chu a phu ve zawk mai. Inthunun thuaiin a nui lui sak a, a thle deuh ngat bawk a.
.
"Arjun khan a hrilh che anih ka ring. Hmela chuh!" a ti hlak a.
.
"I lang nalh hle mai!" ka rilru dik tak. A hmaiah engmah a inhnawih lova, a vun nung sar leh nem hmel tak chu khawih ka chak hle. Hetiang feelings hi ka nei tawh ngai em ka hre hauh lo mai. Ka lo nei tawh thin a nih pawhin tuna mi ang hi a ni hauh lovang.
A hmel chu hmuhchian lehzual tumin ka kun deuh a, zam miah lo tih hriat tak hian a rawn dak ha a. Ka duh angin a hmel chu ka hmuchiang thei lo. Hetiang hian in awm ve tawh ngai em? Ka mit a fiah lo ta thut pawh a ni chuang si lo.
.
"I hlauhawm dawn alawm. I lo lut dawn nge? Ka thiltih a laklawh viau a nia."
.
Chhang lovin ka pen lut a, a ding sawn vat a. Inchhung ka pen luh rualin eitur rim a nam nghal chek chek mai.
.
"Lo thu rawh. Ka rei lovang." ti lehin a kal sawn a, thut pawh tum chuang lovin a inchhung chu ka enkual a. A rawng  ngainat zawng chu hmeichhe dang ang a ni lo tih tichiangtu a ni.
.
"I lo la thu nange?" tih ri ka hriat chuan amah en turin ka inher thuai a. A T-shirt hak lian deuh leh a kekawr hak a khup khuh baka a chawn zen thlerh lang chu a hmuhnawm tham tho mai. Kei hi ka dik tlat lo. A mitmeng ti danglamin min en a.
.
"Tikhan min en suh." tiin ka pan hnaia, ka hnaih tak tak hmain ka awmah a kut pahniha min nemin a nui ta hak hak a. He hmeichhia hi ka eizawh vek hmaa ka chhuahsan a tul ngei ang. Keimahah hian eng thil diklo nasa nge awm le??? 
.
A nui hmel chu mit khap miah lovin ka en reng a. Tunah tak hian thil dang zawng zawngin ka tan awmzia a nei lo. A nui hmel hmuh hi ka tan hahdamna nasa tak a ni. A nui hmel a reh riai riai a, a aw a thian kharh a.

"I lo kal chhan ila sawi miah lo a nia." kal sawn hlekin sofa ah a thu ngil at a. Hei chu ka hriat  thin hmeichhe vawt deuh raih kha a ni leh ta.
.
"Min zawt dawn lo emaw ka tia."
.
"Sumdawnna thil anih ka ring ringawt a." a hmel a thutak leh ran tawh.
.
"Ni chiah lo. Hriat duh ka ngah khawp mai."
.
"Okay. Eng thil nge hriat i duh?"
.
"A hmasa berah chuan ka in a hna i rawn thawh chhan kha? I mamawh lo tih a chiang reng a." a nui sak ringawt.
.
"Um_ Thil reng reng hian chhan a nei thin alawm. A chhan chu sawi rih lo ila a that zawk ka ring. Engmah i la ei loh ka ring ringawt a__ Sir?"
.
"Eng emaw tak chu i ni." ka tih chuan min chhang lo. A thutna atangin a tho tharh a, a kalsawn tur chu ka lo vuan a. Ka duh hunah chuan ka tuan a lo rang hle mai. A hnunglam atangin ka kuah a, chetsawn a tum lo. A thaw halh tih erawh a taksa awm dan atangin ka hria.
.
"Inchei danglam a tul chhan kha ka hre duh."
"I hre turah ka ngai asin." a ti sap a. A sawi awmzia chu ka hre lo.
"I sawi loh chuan hre lo."
.
"Kan duh zawng zawng tih vek hi a rem lo thin alawm. Duhsaki a awm tih hre chung phei chuan__ Ka tih loh tawp tur ka ti anih kha. Chuvang chu a nia, engmah sawi lova helai hmun ka pan. Tunah chuan ka hnaih che a rem lo.. Ka ta ni ngai lo tur hnaih tum hi a atthlak zia ka hrethiam tawh.." a ti sep sep a.
.
A thusawi chu tam lo mah se ka tan a tawk em em. Ka lam hawi turin ka kuaiher a, zam deuh niawm tak hian a kun deuh chal a.
.
"Min en rawh." ka tih pawhin a chechang lo. Helai hmuna hna a thawh theih dan leh, tuna a chenna hmun nuam tak a neih theih dan te, engtin nge a lo thanlen.. a hun liam tawh leh thil dang tam tak amahah hian hriat loh ka nei ngei mai. Chung zawng zawng chu ka tan a tangkai rih lo. Nichin maia a tawngkam atang khan keihi  min duh vanga min rawn hnaih tum a ni tih ka hria a, chu chu ka tan a tawk rih.
.
Kun hniamin rei tawk tak a chalah ka fawp vawng vawng a. Ka kawng sir tawn tawnah ka kawr hak chu a hmer ngat ngat tih ka hria. A zam tih thup tum mah se kei hian engmah ka hai lo.
.
"Hnaih che ka duh vanga hmeichhe nikhua lo tak anga ngaih ka ni ta khan min tina asin. Eng chena rei  nge i chenna hmun hre tura ka beih i hre lova, ka duhna che ka thup ve tang tang tih pawh i hre lo.. Hmeichhe dang pasal nimai tur lo hnaih tum hi sual a ni tiraw??"
.
Thil thleng mek hi a tha mah mah hial lo maw? A sawi chhuah leh hma kha chuan nupui hual nei  ka ni tih pawh ka lo hre tawh hauh hleinem..
.
A khabe ah dawmin ka kuai dak a, a hmui no chekah chuan ka fawp ta vawng vawng a. Min chhang mai lo. Duhthawh lehzuala ka fawh chuan tim deuh tak leh duhthawh tak siin min chhanglet a.. Hetiang thil aia tha hi a thleng thei kher lovang.
.
Kan inlakhran hnu chuan ngawi ngal hian a kun leh ta daih a. A mizia hi a makin ka hrethiam mai thin lo. Thawk la halhin a rawn dak chhuak a, a hmai a sen tan tan mai.
.
"Ka thaw ta huaiin ka hria. Oh! Eng thil nge ka tih le? Ka tihpalh! Hetah hian kan inkar hi tawp rawh se." tiin inlakhran a tum a, ka kuah bet vat a.
.
"Engmah dik lo a awm lo."
.
"Ka tithei lovang. Mi tenawm tak ka niin ka hria. Lehlamah keiin ka lo thlem che ani ringawt a, lehlamah i nupui hual a awm bawk a. Ka damchhunga ka theihnghilh theih loh tur leh ka inthiam tawh ngai lohna tur thil ka ti thei lo. Ka_"
A hmui chu ka kutin ka khawih a, a tawng tawp chat a. Engmah sawi lovin a nghet thei ang berin ka kuah a. Tunah chuan tawngna hun a ni tawh rih lo. Duhsaki nen kan inkar ka tihtawp phawt angai. Tuna ka kuah, ka hmeichhe duhtakin a ngaihtuah ang hi kei pawhin ka ngaihtuah ve tho. Hmeichhe dang nen inzawmna la nei reng chung a, thui tak lo  kal chu a dik lo reng a ni. Zanin hian Duhsaki nen kan inkar a tawp ngei a tul bawk ang. Ka hma ka sial mah mah tia min dem duh anih pawhin a duh chuan min lo dem mai rawh se. Mihring dam chhung hi a rei lo em a, dam chhung reilote hi ka thinlunga ka duh tak nen ka hmang ngei tur pawh a ni.
.
Min kuahna chu phelhin a pum a khawih a, a ri raih raih khan ka hre reng a! Lai zet hian min rawn en chhovin a meng kual zeuh a, nui sakin a lei tawite a rawn chhuah zeuh a.
.
He hmeichhia hian min ti a thei takngial dawn!
.
"Ka ril a tam tih ka lo hre tawh miah lo. Engmah i la ei lo ve tho em?" tih pahin a inher a, a inher pah chuan a hmai sen tan tan chu ka hmu hman tho. Ka rin danin a insiamchhe zui ngei ngei ang! A inring miah lo tih hrereng chungin ka lamah ka pawtlet leh rih a. Ka rin ang chiah! A hmel chu siamthain a hmui hnuailam a pet a, a maimitchhing ta ringawt. A lan dan leh a engkim duhawm lutuk vang chuan tih mai tur ka hre lo. A hmuiah ka fawp leh ta nge nge!
.
"Ka ril a tam tawh tak tak. Oh! Thil awm dan hi ka awih thei lo." ka awmah a bei thlar a, a ban pahnihin ka kawngah min kuah bawk a. Keiin a sam ka zut hauh hauh thung. Kan inkuahna chu thlahin a choka-ah kan inzuilut a, engkim a fel thlarh mai.
.
A eitur siam chu a chhawp zung zung a, a chet dan chu ka lo en reng a.
.
"Tlemte chiah ka ei ang. Min siamkep awm si lova.."
.
"En la, ka siam tam em hi.." thinrim hmel pu hauh si lo hian a meng tal tap a. Chaw ei lova amah hi ei mai ka duh zawk!!
.
Dawhkan kilin ngawi rengin kan ei dun mawlh mawlh a, kan inen fuh changin kan nui leh ringawt a. Ka dam chhunga nuam ka la tih ber hun min zawt ta la, tun hun hi ka sawi tel ngei ang.
.
Kan duhtawk kan ei hnu chuan kan tifel dun a, kan tawng vak lo chungin a nuam em em tho.
.
Hnathawh tur a neih thu a sawi chuan ka puih theih thu ka hrilh a, ka en reng chuan a thawh theih loh tur thu a sawi ve thung a.
.
"A tha alwm. Naktukah kan inhmu leh dawn nia."
.
"Naktuk-ah i haw nghal dawn lo mi?" a sawi zawh rualin inthiam chiahlo hmel a pu leh rih.
.
"Min hmuh duh dawn chuan ka haw lovang."
.
"A ni ngawt thei lo alawm. Duh mah ila_ a theih loh kha__" a ngawi leh chat a.
.
"I duh chuan__ I ta ka ni e!" amah en chungin alamah ka ban pahnih ka phar chhuak a, a lu thing mat matin a nui sang a.
.
"Uang lo mai teh.." a ti nghat a.
.
"Anih chuan i hna kha thawk la, ka hawsan phawt ang che. Kawngka hi kalh tha la." ka tih chuan za zet hian a nui ta hak hak a. A nuih tur tawngkam ka sawi ringawt pawh chu nuam ka ti.. Ka tenawm mai dawn!! Hetiang taka duh hmeichhia hi ka neih ka ring ngai lo reng reng.
.
A in ka chhuahsan hmain a contact number ka la a. Hei chu ka tih ngei ngei tur a nia. A chhan chu amah be lo hian ka awm thei dawn hauh lo tih ka chiang em a ni.
.
A in ka chhuahsan hnu chuan Hotel ka pan ding nghal vang vang a. Thiltih tur pawimawh takin min hmuak tlat alawm le. Ka pindan ah lutin ka inbual dai leh te te a. Duhsaki nen kan inkar ka tihtawp angai a, hmaichhan ngeia sawi ka duhthusam a ni. Uluk zawka ka ngaihtuah hian phone atanga inthen ka duh thu hrilh hi dik theiin ka hre lo. Mihring zahawmna nei ve tho anih vangin amah hnuaichhiah niawm taka ralkhat atanga then chu a dik lovang. Ka rilru tak chuan ka hmuhniam lova, ka ngainep hek lo. Amah ka duh thinna rilru erawh a danglam tawh a, ka dam chhungin hmangaih takin ka enkawl thei dawn lo tih ka hriat hian atan pawh min kalsan chu a tha zawk. Kum khat dawn ka inah min rawn chenchilh tawh a, hmaichhan ngeia inthen ka duh thu sawi loh chu inzahlohna angah angai ngei ang. Hmeichhia leh an ngaihtuahna vak vel, an thiante thurawn zawng zawng nen hian ngaih dan mak tak tak leh thil ni miah lo an ngaihruat vak vak thin tih ka hrechiang!
.
Ka phone chu la kangin Vaspi ka call a, min rawn chhang mai lo. Ka call nawn leh chuan min chhang ta hram.
.
"Ka tum dan ka thlak a. Naktuk ah ka haw ang."
"Oh! A tha alawm. Min lo hrilh kher pawh angai chuang lova."
.
"Mi khual kan ni tha leh tihna ani em?" ka tih chuan a ngawi ngal mai. "Thil pawimawh ka tifel phawt anga, ni hnih chhung bak a ni lovang."
.
"Okay." a ti sap a.
"Min lo  ngai lutuk lovang che." ka tih chuan a nui hak.
"Chu tak chu ka hre lo." a ti halh a.
"Goodnight!" thil dang sawi vak ka tum rih lo. Min chhan hmain phone ka off a. A hmel awm dan tur mitthlain ka nui zui suk.
.
.
AIZAWL*
.
In ka thlen chuan a lo reh thiap mai. Duhsaki emaw midang reng reng ka haw dawn tih ka hrilhlawk lo. Ka intihfai hnuah inthlak in room-ah ka awm a, email ka check zawh hnu chuan inhnuai lamah thawm ka hriat  vangin pindan ka chhuahsan a. Duhsaki'n min hmuh chuan a meng phawk hra mai.
.
"Engtik_Engtikin nge i lo thlen? I lo sawi miah lova..." Min rawn pan hnaiin min kuah a. Rim dang a nam tlat!
.
"Ka tihpalh! Um_ Tlem ka in a." Inthiam loh hmel takin min en a, engmah ka sawi lo. "Ka han intifai ange.." tiin min kalsan nghal a.
.
.
"Ka lo in report."
"I thleng tluang chu a lawmawm e." Vaspi aw chu a tham chal a, eng emaw diklo awm a ang ka ti.
"I tha em? I aw a diklo."
"Ka hritlan deuh vang aniang."
"Nakinah ka lo be leh ang che." ka phone ka off a, thaw huaiin ka thutna sofa nghenchhan chu ka ngheng a. Ka men leh chuan ka hmaah Duhsaki chu lo dingin kut kuangkuah meuh hian min lo en reng a. A hmel chu ka hrethiam chiah lo.
.
"Tunge i biak kha.?"
"I  hriat hmain sawi duh ka nei."
.
"Tunge i biak kha ka tia lawm?" a awki ring lutuk vang chuan ka mit ka chhing sawk mai.
.
"Tunge ka biak ka hrilh hma chein ka bulah hian lo thu phawt teh."
.
"Teuh lo. Thil thalo i sawi dawn tih ka hria. Dear.. Ka then dawn lo che."
.
"Lo thu phawt teh." ka tih leh chuan bet lo leh hlauhthawn hmel tak hian arawn thu a, a awlsam dawn hauh lo mai.
.
"Kan pahnih hian kan hlim tak lohna chin a rei tawh a.."
.
"Ni lo. Engmah ka  ngaithla dawn lo."
.
"Uluk takin in ngaihtuah la. Keichuan awm hran ka duh. A harsa zawnga i awm loh ka beisei." ka tih chuan a tap a. Tawngkam chhe tinrengin min tawng khum a, ka ngawi tawp.
.
Thil awmzia hrethiam lo tur khawpa hmeichhe a a ni lo tih ka hria. Tawngkam na leh inhau buai a inthen kher tul ka ti bik lo.
.
"Anih chuan ka dam ve i duh tawh lo tihna a nih chu. Ka thi ang! Ka thi khawp ang!" ka lu thingin ka en reng a. He thu hi vawi engzat nge ka hriat tawh. Ahmaa lo thleng tawh thin ang bawkin tap chungin inchungah a tlan chho a, a phone hmang ri chu hriat loh pawh tum ila hriat loh theih a ni lo. Thil thleng chu a sawi bawrh bawrh a. Lo hruai turin a duh tih a sawi hnu chuan a ri nghal rum rum mai. Naktuk chu Nu Tluangpuii'n hna a ngah leh hle dawn tihna a ni.
.
JADE
(Soddisfazione)
.
Thantei_LauraSean
.
CHAPTER - 12
.
REMTLUANGA*
.
Kawngkhar a ri thuai a, Duhsaki chu vung zet hian room atangin arawn chhuak a. A hmel chu hmuh a nuam lem lo khawp mai. Min rawn hnaihin hnai zet sawtah min en a. A tawng mai lo.
.
"Kal duhna i neih chuan ka hruai ang che."
"Huh.. Kan inhualna tihtawp lam ngaihtuah suh. Ka then dawn lo che. Zanin chu ka riak chhuak ang. Min hruai angai lo. Ka thiannu a lo kal mek."
.
Mumal lo zet hian a inher a, room-ah lut lehin reiloteah a lo chhuak leh a. Kal chhuah  nghal a tum tih ka hria.
.
"Ka sawi kha ka tider lo a nia. Kan inthen dawn lo tih ka sawi nawn leh ang." ka chhan hun pawh nghak chuang lovin a kal chhuak a. Eng emaw chenah ka lainat tho mai. Mahse, a duh emaw duh lo emaw thutlukna ka siam tawh a, engmah a danglam tawh dawn lo. Kei pawh hian hahchawlh ka mamawh anih hi.
.
Inhnuai lama ka room-ah chhukin light ka on a. Duhsaki nen kan intawm thin pindan-a mut chakna ka nei lo.
.
Khum lian  tak puan dum-a inkhuh chu hlimin ka mu zangthal vang vang a. He pindan-a ka awm hian Vaspi ka hnaih deuhin ka inhria. A in-a ka kal kha nimin mai kha a nia, chuti chung chuan hun rei tak hmu tawh lo ang maiin ka inngai thung. A mak teh e.
.
Thawm ri deuh dawt dawt ka hriat chuan ka muhil ka harh a, pindan pawn lama thawm chu ka ngaithla zui deuh reng a. Kawngka rawn chum ri dawt dawt ka hriat nawn leh chuan ka tho lo thei ta lo. Ka sana ka en a, zing dar 7 a pel tawh. Ka lo mu rei mah mah anih hi.
.
Kawngka ka hawng a, inchei peih thlap hian Duhsaki a lo ding vang a. Nizan a kal chhuah dawna a lan dan leh tuna a lan dan chu a dang hlak. Hlim hmel taka nui chungin min rawn kuah a, ka hamhaih deuh zawk mah.
.
"Inchung lamah i awm si lova, ka buai hman tep alawm." a ti sar sar a. A awm dan hi a mak riau. 
"Vawiin chu ka nu leh pate va hmu ila a that ka ring. Inneih hun tur pawh sawifel a tha ka ti."
.
Um_Nizana alaka ka thusawi kha ka fiamthu emaw a ti anih dawn hi.
.
"Nizan khan ka sawi tawh kha. Kan inkar hi tihtawp ka duh. Ka sawi chiang tawhin ka hria."
.
"Ni love. Ka then dawn lo che tih ka sawi tawh kha. Eng ang pawhin awm la, ka then dawn lo che." luhlul zet hian a ding a. Engvanga hetianga awm tlat hi nge anih ka hre lo. Innei tur chuan a innei tur ten kan remtih tlan angai alawm.
.
A dar tawn tawnah vuanin chiang takin ka en a, a zam hmel chu hmuh a nuam lem lo hle. Mahse, keihi ka danglam tlat tawh si a ni.
.
"Kei aia tha i la tawng ngei ang. Kan inkar hi chu a tawp ngei angai."
.
"Eng vangin? Min hmangaih thin a ni lawm ni. Kei chuan ka thlah dawn lo che tih ka sawi tawh kha. 
Eng vang nge? Hmeichhe dang vang a ni em? Tlang takin sawi rawh. Nang hian min phatsan lehsi maw?" tap lo turin a insum a, mahse, atan leh ka tan a that zawk nan dawt hmangin ka nung thei lo tih chiang lehzual a ka hrilh a tul tho.
.
"A chhan chu engvang pawh ni se, kan inkar hi tihtawp ka duh. I laka ka rilru puthmang a danglam tawh!" 
.
"Engtin nge a danglam theih? Kha hmeichhia vang kha a ni em?"
"Tu hmeichhia nge i sawi chu?"
.
"Jade kha? Kha nu khan a ngaizawng che tih ka hria alawm. Kha nu vang kha anih chuan ngaihtuah buai duh suh, i hmu tawh dawn chuang lo."
"Enge i sawi awm zia?" ka tih chuan za lo zet hian a nui hul hak a.
.
"A lo dik chiah ani maw? Khawiah mah hmuh tur a awm tawh lo. A insawi ang leh ka hrilh angin a kal bo tawh. Kan nunah hian a lo let tawh lovang. A tul chuan a nunna laksak pawh pawi ka ti miah lo ania! Chutiang thil tih ngai lovin a kal bo hlauh a, atan a tha zawk reng a ni."
.
"I lo vau amaw?"
.
"Enge pawi. Ka mipa hmangaih min laksak tumtu chu ka vau mai reng ang chu."
.
"Duhtawk teh. Min chhuahsan phawt rawh. Chuan, in atang hian insawn chhuak ang che. Sawi nawn a tul tawh loh ka beisei."
.
Pindan atangin ka chhuahsan nghal a. A thawm ka hre zui miah lo.

.
.
DUHSAKI*
.
A thusawiah a chiang a, Remtluanga hi ka chhuahsan lo thei lovang. Heng thil zawng zawng hi engtin nge ka sawifiah dawn? Mahni inswithiam zawt zawtna chi a ni lo tih lah kei aia hrechiang an awm lo. Ka sum hnar a chah loh hram ka beisei.
.
"Engtin nge ka tih chuan ang? Amah berin chhuak tura min tih chuan ka chhuak lo thei lo alawm." ka hmaa thu chu ka en a, a ngaihtuahna hriat ngaihna a awm lo. A tirte atangin ama ruahmanna angin ka awm a, tunah a ruahman anga thil a kal tak loh vang hian a lungawi lo hle tih chiah ka hre thei.
.
"A tir atangin nangman engkim i ruahman a, Remtluanga hian amah hmangaih anga ka lemchan thin hi dawt vek ani tih a hrechhuak pawh aniang. Min then a duh chhan chiang takin engmah a sawi lo. Kha hmeichhia vang kha chu a ni thei lovang. Tunah pawh a bo hmak alawm." min la chhang chuang lo. A kut zungtanga a hmui tuai nauh nauhin a en ngai a en ngawt ngawt a.
.
"Eng ruahmanna nge i neih leh dawn?"
.
"Lo ngawi rih teh!" a tih chuan ka ip chawih mai. He mihring hian rapthlak ruk riauna a nei a. Ka chhungril tak hian eng emaw chen atang khan ka hlau ru tawh. Mahse, a langah chuan mi nun tluang tak angin a lang a, khawlai leh mi hmuh turin a awm tam lo hle. Eng ruahmanna nge aneih ang ka hre chak zek zek tho si. A mitmeng ka hmuh chuan eng ruahmanna nge aneih ka zawt ngam der lo.
.
"Kan chawlh lawk rih angai anih hi. Thlipui thawh hmaa engkim a reh thiap ang chiah hian. Ka sawi awmzia chu i hriat ngei ka ring. A duh danin a nun han hmang ve phawt rawh se! Ka ril a tam riau mai." mak deuha nui chungin a thutna atang chuan a tho a, eitur awmna lam pana a kal chu ka enzui tawp.
.
Thil thlen dan thut thut hi ngaihtuahin thil hriatthiam loh ka nei teuh ang tih ka ring a, tihngaihna hre chuang miah lovin thawk ka la huai a.
Thawklehkhata Remtluanga hlat thut chu awm dan ka thiam dawn lo tih chiang takin ka inhria. A lakah lemchang ni mah ila a rei deuh hnu khan lemchang ka ni tih ka theihnghilh chang a tam zawk. Ka lo rinlawk ang mizia a nei lova, mak deuh hian zah rukna ka nei fo thin. Amah ang mipa hi an tam hauh lovang. Ka ngainat ruk em em thin rualin ka chhungril tak hian ka hnaih ngam ngai chuang lo.
.
.
REMTLUANGA*
.
.
Ni thum  chhung chu Vaspi nen kan inbe ta miah lo. Keiin ka be lo anih pawhin aman min rawn biak ka ring a, mahse, ka nghak chhuak dawn lo anih hi. A mizia ka la hre tawk lova, ani pawhin eng ang nge ka nih ala hre chuang lo. Tun atang chuan amah hrechiang turin hun ka ngah tawk turah ka ngai.
.
Ka call ta nge nge. Min chhang dawn lo emaw ka tih hnuah a rawn pick up ta hram. A thawk dan chu a tlan hah a ni maithei.
.
"Ka nghak chhuak zo lo che." ka ti nghal ngawt a. "Tunah khan eng nge i tih?"
.
"Engmah.. I reh ta vang vang sia. Eng dinhmunah nge ka awm ka hrechiang lo." tiin a nui hak a. A nui ri hriat chu ka tan a tawk leh em em si.
.
"Ka ngai che."
"A hriat a nuam hle mai." a ti sap a. "Lo nghak lawk aw." a tih chuan ka nui tawp. Eng ang taka danglam bik  nge anih ka hre chho dawn chauh a ni. Eng vanga phur em em nge maw ka nih le?
.
"I tha em?" a rawn tih leh chuan ka thu rem sauh sauh a.
"I hmel hmuh ka chak a, a bak chu ka tha.."
.
"I awmna a hla rih mah mah a ni." arawn tawng dan atang chuan a nui ngei ang.
.
"Tunah khan i bula awm turin min duh em?"
"Um_Duh e. Ka duh angin thil thleng thei se tunah hian kuah che ka duh."
.
"Min hmu har vak lovang." ka tih chuan a thaw hliai a. Eng thil nge a ngaihtuah ang tih hriat ka chak hle. Min thlahlel ve tih a thup lo ringawt pawh hian ka awm a tinuam veng veng mai.
.
"Hna lam eng nge a an?"
"Hna lam chu dahtha rih ang." eng eng maw kan sawi a, sawi mai tur hrelo niawm takin a ngawi leh Vang vang thin. Hmeichhe tawng tam tak a ni lo tih chu ka lo hre tawh a, kan inbiak leh huna sawi tur lo ngaihtuah lawk tura ka hrilh chuan a nui tawi tak mai. Dik tak chuan engmah a sawi loha a thaw ri ka hriat ringawt pawh ka tan chuan a tawk tho. Mahse, ka duhkhawp lo. Amah khawih thei a awm ka duh a, a taksa nel thep kuah chunga a tawng lai lo thlir pawh ka duh bawk. Ka duh hun hunah ka fawp thei bawk ang. Ralkhat atanga inngaihzawn hi ka thiam dawn lo. Ka hmuh phaka awm reng turin ka duh dawn tih ka chiang hle. Eng emaw ka tih a ngai ngei ang chu.
.
Ka tumlawk angin Delhi ka pan leh ta. Amah hmu tura a in ka thlen hma chuan ka be leh tawh lo.
.
Darkar eng emaw zat hnuah a kawngka bulah ka ding leh ta chu a nia. Door bell ka hmet a, ka zam ru lehpek nia. Mipa inti ve tak hian ka zam thu ka sawi ta fo mai. Vaspi chungchang anih chuan a boruak a dang tlat thin. Ka pangpar ken chu hnunglamah ka dah a, door bell ka hmet nawn leh dawn chiah tihin kawngka arawn inhawng a. Ka hmel min hmuh chuan mak tiin a ka hau mai. Hamhaih deuh tak hian a nui a.
"Engtin_Ah_Ka__ Lo lut rawh." ti bah  nawk nawkin a hmui a pet zauh a. A kut khinghnih a hnunglamah a suih a, zam hmel pu deuh hian min en reng a. Kei pawhin ka en reng.
.
Muangchangin ka pen lut a, dawhkana lehkha lo darh deuh niaih ka hmuh chuan hna a thawk laklawh tih ka hrethiam mai.
.
"Heihi la rawh." tiin ka pangpar ken chu ka lek chhuak a.
"O! Ka lawm e.." Pangpar chu lain a hnim vang vang a, la hnim reng chung chuan min rawn en chho a. A hmain ka sawi tawh em? A hmaia engmah a hnawih loh hian a lang thianghlim zual_fawh a chakawm hle_Tuna ka duh ber chu kuah vawng vawng a ni. Theih ni se thlah leh tawh loh ka duh hial ang.
"Um_ Ka kuah thei che angem?" a ti sap a. A tawng chu ka hre sual miah lo. Min kuah a duh anih chu. Min kuah mawlh rawh se.
.
Tawngkama chhang lovin ka ban pahnih ka phar chhuak a, nui sakin min rawn hnaih a. Ka awma bei thlapin hahdam hmel tak hian thawk a la a, a maimitchhing chial bawk a.
"Ka mumang anih tawh loh ka beisei." tiin a phun sep a. Min en turin ka kuai dak a,a mitmeng chuan min thlahlel hle tih a thup miah lo. A hmui no chekah chuan ka fawp vawng vawng a. A thlum dep dep in ka hria!
.
Kan inkuah leh vang vang  hnu chuan kan inthlah ta hram.
.
"Lo thu la, pangpar hi ka'n khawi ange. A mawi lutuk.." a pangpar ken chu a hnim leh vang vang a. 
"Eitur i duh em?"
.
"Ka ei tawh a. Kuah leh che ka duh." ka tih chuan min chhang lovin nui hak hak pah hian a kal sawn a. A lo chhuak leh har lo. Pangpar chu pot-a dahin arawn chawi chhuak a, a thutna piahah dim tak hian a hung a. A hmela lungawina langchhuak chu hmuh a nuam hle.
.
"Chuan__ I lo kal dawn tih i sawi miah lova. Lo beisei ngaihna che ka hre miah lo." ka piahah a thu a, tunah chuan zam hmel a pu tawh lo.
"Min lo hnaih rawh."
.
"Maw?_" a awm dan chu atthlak tih hmel tak hian a nui leh hak a. "Ka duh chen chen ka hnaih thei dawn che em?" tiin min en ta ran a. A thusawi awmzia chu ka hrechiang.
.
"Lo hnai rawh." tih pahin ka ban a, muangchang hian min rawn pan hnai a. Mi si cheta arawn thut rualin ka lo kuah vat a.
.
Hun a ral zung zung mai. Dar 10 a pelh chuan hawsan tumin ka tho a, min chelh se ka duh ru hle! A bula zankhuaa hun hman ka duh a. Ngaihdan diklo lo nei  nghal ngawt lo ula! I thinlunga i duh tak i hmuh fuh tawh chuan taksa inhiptawnna ngawt bakah thildang a awm tel. Sex ringawt a ni lo. Ni e, sex hi chu inpawh lehzual nan leh inhmangaihna tizual theitu chu a ni ngei mai. Mahse, a bak thil pawimawh tak awm hi ka sawifiah thiam chiah lo. Heihi hmangaihna anih chuan thil mawi tak a ni. Ka kham thei dawn hauh lo. A hlauhawm lek lek bawk. Feelings mak tak chu a ni phawt mai.
.
"Naktukah hun i neih chuan kan inhmu dawn nia." hun ka neih chuan maw? Amah vang liau liauin helai hmun hi ka pan a, atana awm bak tihtur em em ka nei lo.
.
"Dar engzatah nge i awl dawn? Ka lo hruai ang che." ka tih chuan phur hmel tak hian a nui a. Hun ka neih loh a ring sa a ni  ngei ang.
.
"Hun i nei dawn maw? Ah! Dar 1 velah ka awl hman tawh ka ring. Khawiah nge kan kal ang?"
.
"A hun thleng phawt se i hre mai ang."
"Hmm.." bu nghat  nghatin a meng kal ralh a. Ka kuah leh phawt anga ka kal chauh ang.
.
Hotel ka thlen hnuah ka mu nghal a, reiloteah ka muhil ta thuai a.
.
Ka alarm riin min tihharh chuan ka tho rang khawp mai. Hun rei tak hnuah hunbi nei thlap thlap a tihtur ka nei lo chu ka awm thiam chiah lo. Chawlh hmanga ka zin pawhin a rei berah kar khat vel bak a ni ngai lova, tunah chuan ka mi tawn thar vangin ka nunphung thenkhat chu a danglam ta phawt chu a nih hi.
.
Muangchangin chaw ka ei a, dar 1 rik hun ka nghak a ni deuh ber e. Kar khat chhung chiah hetiang hian ka awm thei dawn tih ka hria a, Aizawl-ah loh theih loha ka haw angai leh ngei dawn. Ralkhat atanga inngaihzawn ka thei dawn lo tih kha ka sawilang tawh em? Vawiin hian Vaspi ka sawipui ngei ang. Ka hmanhmawh mah mah min ti anih pawhin a awm tho. Mahse, amah hmu phak lo leh khawih phak lova awm ka tum lo bur.
.
Dar 12:30 a rik chuan Vaspi hnathawhna hmun panin ka chhuak a, ka mamawh tur ang pawh ka keng kimin ka hria.
.
"Oh! Hi, keimah Arjun. Kan inhmu leh ta! I tha maw?"
"Hi. Arjun, Ka tha e. I tha zawk maw?"
.
"Tha alawm. Engvanga hlim viau  nge anih ka hre ta chiah." a hawi zoh zoh a, Vaspi kan awmna lam pana a lo kal a hmuh chuan a tukhum hiat nuah nuahin a kalsawn a.
.
"Hi, Arjun khan sawi a nei chiang." a thusawi chu ka chhang lo. A inchei dan chu ka lo en daih. Hmuh a nuam tak zet. 'Eng nge' tih hmel puin min en a, la ngawi reng chungin a sam a tawnna chu ka phelh sak a.
.
"I mawi lutuk." ka mit lasawn miah lovin ka en reng. A nui hak a.
.
"Thanks." min rawn melh chho zeuh a, he hmeichhia hian min hip dan tur a zir anih ka ring zawk hial! 
Chutianga ka ngaihtuah rual rualin keimah zawk hi ka nuih a za. Thiltheih a ni lo. Mi ngainat ni turin nungchang thlak kher a tul ngai lo. Kan nihna ang anga min ngaina anih loh chuan inngainattir duh vanga nungchang thlak emaw thup emaw a theih ngai loh.
.
"Kan kal thei em? Kan kalna tur pawh ka la hre miah lo ania." min en chho hain a nui a, ka banah min rawn vuan a.
.
"Kal ang le."
Office building atangin kan inzui chhuak a, a kawngah ka kuah tlat a. Min hmutu apiangin ka ta chauh anih zia an hriat loh ka duh hauh hleinem.
.
Movie theatre kan thlen chuan kan tihtur hrilh chawp ngai lovin a hrethiam a, hlim zet hian a nui har har a. Tihtur ka thlang sual lo khawp e.
.
"Engtik nge movie ka en hnuhnun ber pawh ka hre tawh lo. Popcorn tam tawk ka duh ang." naupang a duhzawng tak titur ang maiin a phur a, a chezia zawng zawng chu hmaih nei hauh lovin ka en reng a.
.
"Khawi zawk nge i duh?" no pahnih a keng a, eng flavour nge ka duh a hrelo chu mak ka ti hran lo.
.
"Nangmah!" ka hmui phunin ka chhang a.
"Ni lo, heihi.." a no ken chu ka hmaah arawn lek a, ka hrethiam lo der tih a hre reng sia. "Ka lak ang ang hi i ei mai dawn nia." pangngai zet hian arawn ti sar sar a.
.
"I thil lak ni lo kha ka ei ang."
"Pangngai teh." tih pahin min nek zauh a. Counter nghaktu chuan nui chungin min en tawn zak zak mai.
.
Theatre kan lut a, movie a hmuhnawmna ai mahin ka bula thu chuan ka ngaihtuahna a la peng nasa ta zawk mah. Kan thil en lai chu hmuhnawm ti takin Vaspi chuan a en a, a thil ken chu ei nachang pawh a hrelo. Popcorn chu lain a hmui zawnah ka dah a,a phu deuh zawk a.
"I ei dawn lo mi?"
"Dawn e" tih pahin ka popcorn ken chu a ei zauh a. Movie bawk chu a ngaihven leh nghal. Ka hruai fuh leh mah mah zawk anih hmel hi. Movie kan en chhung chuan eitur barhtu ka ni ta ber. Nuam ka ti phian. Ka naupang tha leh a ni ber mai.
.
Movie a zawh meuh chuan ka ning hluah hluah tawh. Min ngaihven miah lova thil danga a rilru a pek khan nuam ka ti lo. Chutih rualin hun nuam tak a hmang tih ka hmuhin ka lungawi tho mai.
Ka bula lungawi hmel taka a kal chu a kutah ka vuan a. Keimah ang chiahin a kut chuan nghet takin min vuan let a.
.
"Khawiah nge kan kal leh dawn?"
"Keimah chiah min ngaihtuahna tur hmunah."
"Hmm..a la hma tho a in ah haw phawt ila."
.
"In ah chuan keimah chiah min ngaihtuah dawn em?"
.
"Engtin?" ka kut chu a hmer nghet sauh a. "Mipa naupang bulah ka awm tih ka theihnghilh a!" tiin a nui zui var var a. Min melh zui dan chu ka sawi thiam chiah lo. Min hip hle a ni tawp!
.
A in panin motor ka khalh a, kan tawng tam ta lo khawp mai. Kan inkar boruak chu nuam tak siin a tang ru ta tlat. A in kan thleng a, ngawi rengin kawngka a hawng a. In chhung kan lut a kawngka a khar fel chuan kan inhmachhawn ta ran mai.
.
"Mipa naupang ka nih leh nih loh kan fiah dawn a mi?" ka tih chuan min chhan a tum zeta a thulh leh. Hmel thutak ranin muangchang hian min rawn hnaih a, ka awmah a kut pahnih nghatin min nem deuh a, tang duh lovin min nem ang chuan ka tawlh hnung ve zel a. Dak deuh vah chungin ka mitah min en a, eng nge ngaihtuah tur ka hrelo. Ka hmeichhe duh tak ka laka thuneitu ber niawm taka a che vel chu a dan a dang riau. A hmui ka en a___hmun dang ka melh tawh lo hrim hrim. Tuna ka awm dan ang hi ka la tawng ngai miah lo. Dangdai tak a ni. 
.
Bang ka ngheng a, min la en ngar tho. A kut pakhat chuan ka biang dinglam arawn khawih a, ka taksa si thlapin arawn ding ta bawk. A kut nel thep chu ka biang atangin ka nghawngah a chhuk thlaa min fawh tumin min kuai kun deuh a. Hei ngei hi alawm nilenga ka chak leh ka ngaihtuah chu!
.
"Mipa naupang i ni lo tih a chiang e." a sawi zawh rualin min vawnna a thlah a, kal sawn nghalin a nui zui her her a. Chu hmeichhia zet chuh! Puitling thiltih dan ka han zirtir ange!
.
Rang zeta panin a kawngah ka kuah a, ka pawm kang nawlh a. Rak thatin a nui zui ar ar a, ka taksa si thlapa ka pawm beh hnuah ka duh ang takin a hmuiah chuan ka fawp vawng vawng a.   
.
JADE
(Soddisfazione)
.
Thantei_LauraSean
.
CHAPTER – 13
.
“Eng ti turin nge min duh?” a hmui la si reng chungin ka tawng a. Min chhang lovin a inla hrang hlek a. A mitmeng buai nak chu ka hmuh hmaih lo.
A ban pahnih phar chhuakin ka  nghawngah min rawn kuah leh a, a mitmeng chu ala buai deuh nak tho.
“Hmanhmawh taka thiltih vut vut loh a that zawk ka ring. Ka ring lo che ani lova__” ngawi leh rihin a nui  hak a_ “Ka sawi tum chu i hriatthiam ka ring.” Ka hriatthiam beisei takin min en chho ha a. Ni e, a sawi tum chu ka hrethiam alawm. A duh dan anih chuan ka zahsak bawk ang chu. Kei pawhin muangchang leh nghet charha thil kalpui ka duh ve tho. Chutih rualin ka hmuh phaka awm reng turin ka duh dawn thung.
.
“Lo thu la, ka inthlak anga eitur kan siam dawn nia. I ril a tam tawh em?”
“Tam lo.” tih chiahin ka chhang. Dingdihlipin ka hmuiah min fawp zauh a, min kuahna chu thlahin a kalsawn a. A kal pah chuan a pheikhawk a phelh nghal mawlh mawlh mai.
.
“Puih i ngai em?”
“Ngai lo mai. Ka lawm e. I duh danin lo awm rawh.” tiin a nui zui har har a.
.
Sofa-ah thuin tv ka on a, sana ka en sek a. Ka rin aiin a lo chhuak har tawh.
.
Ka thutna piaha a bag chhunga a dah a phone chu a ri sek a, thil pawimawh anih hmel_an lo call nawn sek mai. Lo pick up sak ringawt ka duh chiah loh vangin ka thutna ngaiah ka la thu reng a.
A rawn rik leh chuan a bag chhung atangin a phone chu ka phawrh a, a room pindan kawngkhar ka kik a, min chhang miah lo. A hmingin ka ko a min la chhang chuang lo. Ani hi nikhawhrelovin a lo tlu reng te hi a ni lo maw?
Dim tein a pindan kawngka chu ka hawng a, bathroom-a a zai ri rat rat ka hriat chuan ka thaw huai mai. A room chhung ah chuan a rim a nam chek chekin ka hria. A mut puan phah rawng sendang chu ka en a, a in chhunga hmeichhe duhzawng rawng awmchhun a ni hial maithei.
.
Bathroom kawngkhar arawn inhawng a, min rawn hmuh chuan a te that a.
.
“Ka phu nasa lutuk..”
A phalna la hmasa lova a pindana ka lut ringawt chu ka inthiam chiah lo. A phone chu ka lek kang zauh a “Thil pawimawh a niang, an lo call nawn char char a..” ka tih chuan a mithmul tiche zauhin muangchang hian min rawn pan hnai a, a   nungchang hi a mak reuhin min hip tak zet.
.
“A nimaw? Tunge a? ” tih pahin a phone chu arawn ban a. “Um..thil pawimawh a ni hran lovang. Hetiang hian rawn tih a ching hrim hrim a. Tunge anih pawh ka hre lo.” A phone chu la en reng chungin ka hmaah a ding a, towel chiah a inbel tih a theihnghilh a ni ngei ang. A kawngah ka kut pahnihin ka chelh a.
“I rimtui hle mai.”
“A ni maw?” min hnaihin min en chho ha a, ka mitmeng a hmuh chuan  thawmhnaw inbel mumal lova min hnaih chu tisual a inti leh deuh nge ni ka samah thamin a nui ta var var a.
“Thawmhnaw ka’n ha ange.”
“I hak loh pawh khan a pawi chuang lova. Hetianga min fiam fo chuan_”
“Ka tihpalh.. Ka ti tawh miah lovang. Min thlah la?” amah pawh chuan min  thlah tum chuang lovin ka sam a la khawih niap niap.
.
“Min fawp phawt la i kal dawn nia.”
Min kuai hniamin ka biangah min fawp a, min vawnna chu a thlah vat bawk. Nui har harin a kalsawn a, ka enzui tawp.
.
“I chhuak dawn lo mi?”
“Ka lo en lovang che.”
“Ka ring dawn che em?” a thawmhnaw dahna bawm hawng pahin min rawn en a, chhang lovin ka nui tawp. Ka inthunun fe chu angai dawn anih hi.
.
A thawmhnaw hak tur phawrhin a ha sat sat a, ka en leh en loh rawn ngaihven awm pawhin a awm tawh chuang lo. A khumah chuan ka thu a, hahdam taka maimitchhing in ka awm a nuam veng veng mai.
.
“Ka zo e.” ka bulah rawn thuin ka sam a khawih a, ka meng phal rih lo. “Hey.” Ka la meng duh chuang lo. “Hey..” ka chhip sama a tham leh chuan meng thutin ka kuah a, khumah chuan a sir zawngin kan tlu dun a.   Kan che zui tawh lo. Kan inen reng a.
.
“Awm hran ka thei dawn miah lo a nia.”
“Engtin nge kan tih chuan ang? Hetah keiin hna ka nei a, nangin Aizawl I chhuahsan thei bawk si lova.” a ti sep sep a. Kan tawng ring lo dun hle.
.
“Tihtur chu ka hria alawm.”
“Ni maw?” ti zawi raihin min en reng a, a biang mam thel chu khawihin a hmuiah ka fawp a.
.
Muangchanga inla hrangin a thu chhuak a, chik taka thil ngaihtuah nei a ang khawp mai.
“Hetah hian eng thil nge awm?” a lu ka khawih chuan min nuih sak a.
.
“Eitur kan siam dawn kha..” khum atang chuan chhukin min kaihthawh theih nan a kut min pe a, ka lo vuan vat.
.
Thil  dang em em kan sawi tawh lo. Eitur kan siam a, a vawikhat nan eitur ka siam ve. Ti ila ka puih a ni zawk mah. Nuam tih hmel takin thlai chan tur min pek ka chan lai chu min en a, ka chan tawh sa chu rawn banin a hmawm zauh zauh a.
.
Zanriah kan kil meuh chuan ka ril a tam  hle tawh. Hahdam takin kan ei a, eng eng maw sawiin a tawng siam siam a. A titi ngaihthlak ringawt pawh chu ka la tih ngai loh thil nuam tak a ni zel mai.
.
“Heihi a al mah  mah em?” a thil ei lai chu uluk zet hian a thial a,
“A tawk chiah.”
“I thleng ami kha a al ve lo mi?” tih pahin ka thlenga eitur chu arawn suak a, a ei lai chu ka en tawp.
“Al i tih vang a ni lo..”
“Um..i thleng ami kha a tuihmel bik em a.” a nui var var mai. Engtianga han sawifiah tur nge ka hre chiah lo. He hmeichhia hi a makin ka ngainaa, ka duh em em. Hetiang khawpa hmeichhe duhawm hi a awm theih dawn em ni tiin ka ngaihtuah hial anih hi. A sam hnawk deuh niaih chu ka chul mam sak a, chaw ei lai pawh a sawi theih loh!
.
Zanah tihtur ruahman kan neih chuan loh vangin a in ah kan awm a, thil tam tak sawi kher ngai lovin hahdam takin kan awm a ni  ber mai. Sofa-ah thu dunin tv kan en a, kan innuih leh ringawt thin. Hetiang hian awm reng thei ila ka duhthusam a ni.
.
Kar khat chhung chu harsatna awm lovin kan hmang liam a, loh theih lohin Aizawl-a ka hawn ngei ngei a tul tawh. Vaspi nen inhnaih taka kan awm reng theih nan ruahmanna ka nei tawh bawk. A lo pawm hlauh anih chuan ka lawm khawp ang.
.
An office panin ka chhuak a, naktuk ah Aizawl ka pan tawh dawn vangin vawiin hian ka ruahmanna chu ka hrilh ngei angai.
An office building ka thlen chuan a awmna floor ka thlen hmain inpawm bawr angreng tak hian ka hmu a. Min rawn hmu lo. Hmanhmawh hmel takin a kal hlawk hlawk a, pindan pakhatah lutin arawn chhuak leh thuai a. Kal pah chuan phone a hmang bawk. A hnungah ka zui a, a tawng ka hre phak lo thung. Kal chak deuhin ka umphak a, min hmuh chuan nui deuh sakin a phone chu a dah thuai a.
.
“I lo kal dawn tih I sawi lawk miah lova.”
“Ruahmanna ka nei a.”
“Eng thil nge?”
“Dar engzat ah nge I chhuah theih ang?”
“Dar 5 thleng ka awm angai dawn a. Zanah inhmu mai ila?”
“Okay. Ka lo kal dawn nia. Hnathawh  nuam le.” Thil dang engmah sawi tawh lovin ka kalsan nghal a. Min rawn enzui tih ka hria.  Min ko tih ka hre nain ka hawilet tawh lo.
.
Hmanhmawh lem lovin zan dar 9 a rik dawn hnaihah a chenna hmun ka pan a. Pawn lamah a lo inkalh thap mai.
Ka phone phawrhin ka call a, a phone  a pick up thei der lo lehnghal.
.
Hmeichhe nui ri ka hriat chuan ka hawi zawk a. Vaspi chu ka la hmuh ngai miah loh mipa nen kal dunin ka awmna lam an rawn pan a, kal sawnna hun a awm lo. Min hmuh chuan nui tawpin a ding chawt mai. Rang deuh hian a insiamrem leh vat a.
.
“I lo kalna a rei tawh em?” tia min zawh chuan ka ngawi reng. Ka ngaihdan a ni lo tih tawngkaa sawi kher pawh ka tum lo. A bula mipa chu enin a nui sak a.
.
“Naktukah kan sawi tha leh dawn nia. Min thlah vangin ka lawm e.” a ti zung zung a. Ka lo en reng. Chupa awm dan atang chuan phat rual lohin Vaspi chu a ngaizawng tih a chiang reng.
.
“Hun nuam tak min hmanpuia ka lawm e. Goodnight.” Hmanhmawh miah lo hian a kalsawn a, a kal liam thlengin kan en zui dun reng a.
.
“Kha pa kha tunge?”
“Ka thian a nih kha. Lut ila.” Thil danglam thleng  miah lo anga awm a tum chu ka ngaithei hauh lo mai.
“Tunge ka tia lawm?” chiang zeta enin a banah ka vuan a, ka hmer na mah mah maithei. Mahse, na ti awmin a awm miah lo.
.
“Ka thianpa ka tih chu. Lut phawt ang.” A ti leh ringawt a.
.
“Lo kal lo ila a that zawk ka ring.” Ka vawnna chu thlahin ka pen sawn dawn a, min vuan vat a.
“Hey.. I thik a nimaw?” a hmel ka en lo  nain a nui tih ka hria.
Ka chhang lo. Min vawnna chu phelhin ka kal lui dawn a, ka kawr hnunglamah min pawt leh a.
“I va’n mak tak. In chhungah lut phawt ang.” a nui ta lo. Ka hmaah rawn dingin min en chho ha a. “Um__lut phawt ang.”
.
“Ka lo kal lo angah ngai rawh.” tih pahin ka kal pel a. Kawngka chum ri niawm tak leh na ti niawm taka thawm a neih chuan ka ding leh rih a. Kawngka pawh a khar na khawp mai.
 Awlsam taka thinrim thin mi ka ni ngai lo niin ka inhria a, Vaspi lakah chuan a danglam leh ta anih hi. A mizia ka hriat tawh chinah min rawn umzui dawn hauh lo tih ka hria. Chu pawh nise, ka lungawi chuang lo.
.
Ka motor dahna ka thlen chuan car-ah thu lutin ka tinung nghal a. Passenger door arawn inhawng rawp a, Vaspi lo thu lut chu ka en tawp. Ka beisei loh tawp thil a ni. A hmui chip hmakin hmalam a en ngar a. Engtin nge a awm zel dawn ngaichangin ka en a, ka tlan chhuak mai lo chu ngaihdan nih loh  hmel tak hian min en ta ram ram a.
.
“Khawiah nge kan kal dawn?” a ti chhum hmak mai. Ka chhang lo. Ka en tawp. “Khawiah nge kan kal dawn ka tih chu. Tlan chhuak ta che.” A ti leh a. “I khalh thiam lo ami?” min rawn ban a, min khawih fuh hmain a ban pahnihah ka man a, ka lamah pawt hnaiin ka kuah bet a.
.
“Engmah sawi lova min kalsan kha engtin nge I tum theih zawk a? I lungawi loh chuan sawi  mai la. Awmze nei lova titau rual pawh I nih loh hi..”
A hmuiah duhthawh zetin ka fawp a, a mittui a tla tih ka hriat chuan ka fawhna chu titawpin a biang tawn tawna ka vuan a.
.
“Kha pa kha tunge?” ka tih chuan a thaw halh mai.
“Ka thian ka tih kha. Engtin nge khangte chu__”
“Khapa nen khan engti turin nge in chhuah?”
“Hna lam thil a nia. Rawn umzui lo che ila lo let I tum miah lo tiraw? Engtin nge min ngaihtuah miah loh theih zawk?” tawng zawm lovin a kun deuh a, muangchang a min kuahin ka awmah a hmai a phum ta kak a.
.
Eng chena rei nge chutiang chuan kan thut ka hre lo. Eng emaw chen hnuah inla hrangin a aw a thian a, car atang chuan a chhuak a.
.
“I lo kal dawn em?” ti sapin min nghah a tum chuang lo tih hriat tak hian a kal nghal deuh mai a. He hmeichhia hi ava mak tak. Car atang chuan chhuak vein a hnungah ka zui a, a kuta ka vawn chuan tawng lova min enin ka kut chu nghet zet hian a hmer a, engmah sawi tawh lovin a inchhung ah kan inzui lut ta nge nge.
.

.
VASPI*
.
Ka muhil ka thangharh rualin ka tho vat a. Tunah hian Remtluanga chu Aizawl panin a thlawk mek ang. Ka duh aiin ka thinlung a hnaih ta mah mah. Ka lo ngaihtuah hah vak vak angai lovang!
.
Hna-ah ka kal a, thildang ka ngaihtuah thei meuh lo. Tihfel tur lah chu a tam phian a. Tlaiah in ka thlen chuan ka chau hnap hnap khawp mai. Inti faiin ka inthlak a, engmah ka ei peih lo.
Remtluanga'n min la rawn be leh miah lova, ala buai ve ani ngei ang chu. Nizan khan amah zuia abula cheng mai turin min sawm a, mahse, ka thei rih lo. Ruahmanna mumal zawk ka neih leh phawt loh chuan eng thil mah ka ti thei rih lo. Tunah hian ka rin aiin thil a kal chak zawk mah mah tawh.
.
Kan hun hman dun dan ka ngaihtuah let a, ka tider emaw ka tih laiin a tam zawk chu ka tider lo tih ka chiang. Ka inten zawk! Ka u vang chauha hetiang thil hi ti ka ni a, ka thinlung hlan chu sawi loh alakah hian thu tak leh ka nihna dik tak engmah tilang miah lo tur ka nia. Ka ngai a, ka ngaihtuah chu a nih tak si hi! A rim te, a nui hmel te, duat taka min kuah thinna zawng zawng te.. A hmui__Oh.. Keihi ka dik lo. Ka u chuan rapthlak min ti ngawt ang chu..
.
A tawk e! Thil diklo engmah ka ti lova, Remtluanga lakah hian ka inthiam lo tur a ni lo. Ka duh tak ti thei tur hian he thil hi ka paltlang ngei ngei a tul si a ni.
.
Tun aia hun tha hi a awm thei tawh chuang lovang. Ka u vang anih chuan tihtheih loh ka nei lo tih kha ka sawi tawh kha! Remtluanga'n min hnar thei lo tih ka hriat khan ka thiltum ti hlawhtling turin kawng a inhawng ta ah ka ngai hmiah. Amah hre lo anga awm leh neih har tak anga lemchan pawh a tulna a awm lo. Amah hip bet turin ka tihtheih zawng zawng ka ti zel zawk tur a ni. Engkim hi a hun takah ala hre vek dawn tho. Eng tiang pawhin tuar na se, ka tan a pawina a awm lo. A nat nasat poh leh ka hlawhtling tihna ani leh mai. Ka khawngaih dawn reng reng lo.
.
'Nangmah leh nangmah i inbum anih kha! I chhungrilah chuan i duh. I lemchan hian thil tha a thlensak dawn lo che.' ka chhungrila ka ngaihtuahna chu duh lovin ka thutna atang chuan ka tho hluai a.
'Ka u tuar ang chiah kha ka tuartir ang. Na tuara a awmlaiin kei hian lungawina ka nei thung dawn a ni. Ka u khan a nunna chan phah khawp hialin a hmangaih a, ka u natna tuar ang chiah kha ka tuartir ngei ngei ang.'
.
Ka room-ah lutin ka u nen kan thlalak ka en kual a, ka tap leh ta! Nitin ka ngai thar zel dawn anih hi. Ka unau neihchhun chauh pawh ni lo, ka chhungkaw neihchhun- ka nu leh pa ni kawp ka u, ka hmangaih em em kha ka tan hian a hlu em a, ka nunphung hloh vek khawp pawhin atan chuan ka bei mai ang chu. Tuman min dang thei lo. Min dan tum buai lo law law zawk rawh se.
.
Ka phone nghawr dar dar ka hriat chuan ka mittui ka hru sawk sawk a. Remtluanga anih hi. Ka aw dik lo arawn hre chat mai reng a. Ka hritlan vang tih ka sawi chuan a awih lo tih a chiang reng mai. Min be rei lo hlauh.
.
Bathlar-ah ka kal chhuak a, en bik pawh  nei chuang lovin ka ding ngat ngat a. Ruahmanna lo siamlawk ka tum tawh rih lo. Remtluanga tan duh loh theih lova awm dan ka thiam angai a, keimahah chauh a mit a nghah hunah atan tawpna hun a thleng ang. Remtluanga tan tawpna a tlen rualin kei ka lungawi tawh thung ang.
.
In chhunga ka luh leh chuan dar 10 a lo pel der tawh. Khuma ka thut rual deuhthawin ka phone ka ban a, missed call a lo awm nual mai. A then chu hna kawihhnawih thil ani tih ka hre mai a, Remtluanga'n min lo call leh miah lo tih ka hmuh chuan ka lungawi lo deuh ringawt lehnghal. Hetiang chuan a tha lovang. Keihi amah ngaihtuah leh amah ngaia ka awm a thiang lo. Ka ngaihtuah a nih pawhin chhungrila inzawmna tello zawng zelin ka ngaihtuah tur a ni. Amah zawk hi keimah vanga nunphung hloh tur leh awm thei lo tur zawk chu a nia lawm. Lo thlir reng rawh. Ka thiltum hi a hlawhtling ngei ngei bawk ang. Tunah a bula cheng turin min sawm der tawh ania. Rei tak  nghah a tul tawh lovang.
JADE
(Soddisfazione)
.
Thantei_LauraSean
.
CHAPTER - 14
.
REMTLUANGA*
.
"Duhsaki nen kan inhmu a, ngati tehthut nge?"
Kawngka khar pahin Remruata chu a tawng nghal mawlh mawlh a, ka thutna bulah rawn thuin remote a la thurh a ka enlai pawh ngaichang lovin channel a thlak zut zut a. Tunhnai hian kan inhmu tam lova, hnaah ka kal a nih loh chuan in ah ka tawm ve deuh chawt hrim hrim bawk.
.
“Eng nge?”
“In lo inthen reng a.” a ti ringawt a.
"Tinge i rawn ngaihven thar teh thut a?" ka ti  mai a. Ni dangah Remruata hian Duhsaki nen kan chungchang a sawi ngailo hrim hrim a, tuna arawn sawi nawlh hi mak ka ti zawk.
.
"Ti ve mai  mai. Duhsaki khan a sawi nasa em a."
"Han sawi vak tur a awm lo."
.
"Ka rin dan chiah. Engtik nge Delhi i kal leh dawn? Kal ve ka duh khawp mai. Ex hmuh pawh a chakawm alawm." a thusawi lai vei lo tih hriat zetin anui huah huah a, a nun hi a hlim reng maiin ka hria.
.
"Tu ber?"
"Ludy kha_Khal deuh kha.." a la nui zui vur vur a.
"A rei tawh e, a hre tawh lo ang che." ka tih chuan min rawn thut hnaih sut sut a, a nui zui suk suk lehnghal.
.
"I hrelo emai a.." ti bui bui chungin tv chu a en a, a bulah hian thutak a sawi theih tak tak ngai loh.
.
"E, Remtluang, a hmaa ka zawn hmuh tak loh kha engtin nge ni ta zel?"
"Engkim a fel tawh. Tinge?"
"Nupui neih te hi kan tum ve dawn lo mi? Hey, Duhsaki chuan hmeichhe dang vangin min then tih a sawi a. A tawng tam reuh lutuk hi ka ngaina thlawt lo."
.
"A duh duh lo sawi mai mai rawh se." ka ti duh lek. Ka rinlawk dan a ni sa hrim hrim.
.
Ka message dawn ka check-a, ka phu  deuh zawk. Vaspi nen kan thlalak a ni teh tlat. Min lo thawntu number chu ka contact list-ah a awm lo. *Hma lama i pen hmain en uluk rawh.* tih zawng hi. Remruata'n min fiam anih ringin amah chu ka en a, ani lah chuan min ngaihsak miah lovin tv a en ngur ngur a. Hetiang thil hi infiamnaah chuan ka ngainat loh ber pawl a ni. Ka call a, a ring quit thak thak a.
.
Remruata haw hnu chuan ka mu nghal deuh mai a, ka ngaih a tha thei lo.
.
Ka phone arawn rik chuan khumah thu chhuakin ka pick up thuai a. Hei pawh number hriatsa loh tho a ni.
.
"Zarkawta resataurant hawn thar tur neitu kha i ni tiraw?"
"Aw, ni e."
"Hei, kangmei a chhuak a, a nasa viau mai. Biak pawh dan tur che kan hre mai lova. Lo kal la, thil thlen dan kimchang chu kan inhrilh dawn nia." phone-a min rawn betu chuan a ti zung zung a.
Khum atangin ka zuang tho a ni ber. Thawmhnaw ka inbel zung zung a, in atangin hmanhmawh takin restaurant awmna lam ka pan nghal a.
.
Ka thlen chuan mupui an lo tam nasa. Kangmei chhuak chu a nasa tih piah lam a ni. Thawm a ri nuai nuai a, mihring tan tih theih a awm meuh lo. Kang thelhtu ten an theihtawp an chhuah a, awmzia a awm tam vak loh hmel khawp mai. In a bichilh nasa si a, thenawm hnai tan pawh hlauhawm tak a ni. A thenin thawmhnaw an thiar chhuak nawk nawk bawk a.
.
Karleh  maia hawn tan tawh tur sum tam tak ka sen ralna kang hluah hluah chu thinrimna leh maktihna inpawlh nuaiin ka thlir tlawk tlawk a. Engvanga kang nge anih tih hriat hmasak ber ka duh ngei ang.
.
Darkat li vel zet hnuah mei kang a mit a, ka hmaa building awm chu mawi tak leh uluk taka chei ani tih reng reng a hriat tawh loh. Ka lungawi loh zia chu sawi maia fiah thei pawh a ni lo.
.
Chhun lamah ka buai nasat dawn vangin in ah ka haw leh rih a. Ka phone ka en chuan missed call a tam khawp mai. Vaspi chu ka call thuai a. A mangang hle tih a aw atangin a hriat theih.
.
"Nangmah i tha em? Ka hlauhthawn zia chu sawi  ngaihna awm lo zawk. Whatsapp ah ka lo hmu a. A pawi ka ti lutuk."
"Tunah chuan tihtheih a awm rih lo. Vawiin chu ka buai viau dawn a nih hi."
.
"Ka hrethiam che. Lo kal mai  ka duh hial a. I tha tak tak maw? Engvanga kang nge anih a hriattheih tawh em?" a ti leh zung zung a.
.
"Engmah a la hriat loh. Chanchinthar a awm chuan ka lo hrilh dawn che nia." tiin kan inthlah phawt.
.
Ka inthlak fel zung zunga, thil awmzia hriat vat ka duh vangin in ka chhuahsan lehnghal a.
.
Kangmei chhuahna ka thlen chuan police pali vel an lo awm a, min hmuh veleh pakhat chuan min rawn pan thuai a.
.
"Current kalsual vanga kangmei hi chhuak a nih loh hmel. Kawtah sawn thil chhar kan nei a, helamah hian min lo zui rawh." tih pahin min kal pel a, ka zui vat a.
Tu mihringin nge hetiang thil hi ka chungah ti duh ang? Rinhlelh tur ka hre hauh lo mai. Rui sualin an tipalh te pawh a ni mahna!
.
"Ka pu, heihi kan thil chhar chu a nia." sarang te chhunga thilawm chu enge anih hriat tumin ka en a, hmeichhe bakkilh a ni.
.
"Kawta chhar a nih chuan mi kawng kalin an thlauh palh pawh a ni thei a."
.
"A dik alawm. Mahse, a lo awmna kha kawnga kal thlauh a ni thei lo. Chiang zawkin kan hre thuai ang. Tunah chuan kan kutah dah phawt la, chanchinthar awm apiang arang lamin kan lo hrilh zel ang che." police chuan ati leh zung zung a. Rilru a vak kual chak khawp mai.
.
VASPI*
.
Ka muhil thei lo. Tihtur ber hre chuang lovin in chhungah ka vei kual sek a, ka taksa a hahdam thei lo reng reng. NGaihtuah tur ka ngah lutuk mah mah a ni. Nilengin Remtluanga nen kan inbe leh tawh rih lo a, heti lutuk a ngaihtuah tur ka ni lo tia inhrilh mawlh mawlh chung pawhin ka hahdam thei chuang lo.
.
Keiin a hnunglam atanga beih ka tum ve lai mekin hetiang thil hi a tawk a, Pathian hremna a tawk tan a ni thei angem? Ni lo.. Ngaihtuah loh tur tur ka ngaihtuah a ni.
.
Kei pawh hian hun dang nghak lovin ka tihtur ang ang ka tih vat vat a tul anih hi. Helai atang chuan ngaihtuah hah bak tihtheih ka nei lo reng reng. Remtluanga chhiatna tawh ai chuan ka u chungchang chauh hi ka ngaihtuah tur a ni.
.
 Ka pindan atanga chhuakin un rei tak chhung ka hawn tawh loh pindan kawngka bulah ka ding a, he pindan hawng tur hian huaisenna ka nei thei thlawt lo thin kha a nia. Ka u bawm thenkhat a awm tih ka chiang a, tuna ka hmuh theih chin ringawt pawh hian ka nun phung a thlak danglam vek tawh laiin thil dang hre belh leh tur hian ka inpeih em tih pawh ka inhrechiang ngam lo.
Ka room-ah ka let leh a, khum bul drawer-a chahbi bawr ka dah that chu ka phawrh ta nge nge a.
.
Muangchangin pindan kawngkhar chu ka hawng a, tihfai tawh ngai loh anih vangin pindan chhung chu a rimtui lem lo khawp mai. Light on in ka en kual a, engkim hi ka u sulhnu, a khawih hnuhnun ber ang veka la awm a ni.
.
A thawmhnaw tam zawk a dahna bawm chu ka hawng a, a rimtui hman thin leh a incheina thenkhat chu mumal lo tak hian a awm nuaih a. A duh em em thin a kawrlum fual chu la chhuakin ka pawm vawng vawng a. A kawrlum fual ipte -a thil awm ka khawih fuh chuan eng thil nge tih hriat tumin ka phawrh thuai a. Thlalak a ni.  Thlalaka mipa chu Remtluanga a ni miah lo!  Thlalak hnungah chuan *ONE&ONLY* tih a inziak kalh a. An hmel lan dan atang chuan an hlim hmel hle. Club vela lak a ni tih a chiang bawk. Ka awmah arawn inhnawh up up a, tah pawh tum ila ka tap hleithei chuang lo.
.
Khawvar dawn hnaih thlengin ka u pindanah chuan ka awm a, nasa taka ka ngaihtuah hnuah ka tihtura ka rin ngai loh leh ka ngaihtuah ngai miah loh thil tam tak hi ka kaltlang pui  ngei angai dawn tih ka hrechiang lehzual ta. Ahmaa ka lo ngaihtuah thin dan ang kha ani thei tawh lo. Thlalaka mipa kha tunge anih ka hriat phawt a tul. Ka thin a phu dup dup a.
.
Diary-a thu inziak, Remtluanga hming awm ngei si leh ka u kawra ka thlalak hmuha mipa hi…..!! Ngaihtuah dan tur ka hre rih lo. Remtluanga hi a lo  ni lo hlauh anih chuan.. Tunah chuan ka thil neih leh hmuh chinah eng rinna mah ka nghat thei lovang. Engpawhnise, bul ka tan tawh a, a tawp thleng turin hma ka lak vat vat a tul tak zet. Nunna hi a hlu a, nunna thleng nan chuan mihring thil neih hlu zawng zawng pawh hi a tawk zo lo.
..
Ka u pindan chhuahsanin ka pindanah ka lut a, ka thawmhnaw ka pack mawlh mawlh a. Helama ka hnathawh leh mawhphurhna ka neih zawng zawng hi chu mi rinawm takin min lo thawhsak vek thei.
.
Khua a var a, Arjun biain hun engemaw chen ka zin dawn thu leh titura ka duhte ka hrilh a, min mamawh anih chuan min biak theih reng tur thu ka hrilh bawk a. Airport panin ka chhuak zui nghal a.
.
Darkar eng emaw zat a ral leh hnu chuan Aizawl ka thleng ta. Hmun dang pan lovin Remtluanga chenna in ka pan a, ka hun hman dan ka hrilhlawk miah loh vangin min hmuh hun chuan mak a ti nasa khawp ang chu. Amah ka ngaihtuah em vanga helai hmuna awm taah hian min ngai ngei bawk ang.
.
Door bell ka hmet a, min chhangtu an awm lo. Nu Tluangpuii kha helaiah hian a la thawk anih chuan a awm ngei tur ania. Verandah-ah ka thawmhnaw zawng zawng  nen thuin Remtluanga lo haw hun ka lo nghak tawp. Sana ka en sek a, zanriah eia a chhuak daih a nih loh chuan lo haw a hun tawh. Khua a thim a, khua a vawt tan.
.
Kawt zawla motor lo tlan lut thawm ka hriat chuan chesawn lovin ka thut dan ngaiin ka thu reng a. Reiloteah ka lam pana pen thawm ka hre ta. Ka la hawi chhuak duh chuang lo. Ka hmaah tak ke pen a tawp a.
.
"Nangmah i ni tak tak em?"
Muangchangin ka hawi chhuak a, Remtluanga nui hmel ka hmuh chuan ka hahdam sawng sawngin ka hria. Hetianga awm tur hi ka ni miah lo.
.
Rawn kun hniamin hnai zetah min en a, thil dang sawi lovin ka hmuiah min fawp  vawng vawng a.
.
"Engmah i rawn sawi lova." nghet lutuk mah mahin min kuah a, ka chhang lo. Nghet takin ka kuahlet tawp. "Ka lawm e." a ti leh ringawt. Ka tawng chhuak thei lo. Remtluanga hmela tihderna tello min thlakhlelhna lang khan rit takin min delh a ni. Hetianga awlsam taka danglam mai ka nih chuan engtin nge ka chak theih ang. Ka va han mumal lo tehlul em! Mize nghet  nei lova mi an awm nia ka hriat changin ka sawisel thin anih kha.. Tunah chuan keimah ngei hi mize nghet nei lo ka nih tak hi.
.
"In chhungah lut phawt ang." min kuahna chu thlahin ka luggage a khai a, a kut lehlamin min kai a.
In chhung chu ka awm thin lai nen khan danglamna tehchiam a awm lo.
.
Luggage chu nghatin min kuah leh rih a.
"I riltam em? Eng chena rei nge i lo thut?"
"Darkar hnih dawn a niang?"
"Min lo call thei reng sia."
"Ka call tlang thei lo che a."
.
"Um_hahchawlh phawt i duh ka ring. I intihfai chhungin eitur ka lo chah ang."
.
In hnuaiah ka chhuk a, intifaiin ka inthlak a. Ka hmanhmawh lem lo. In chunga ka chhoh leh chuan eitur rim a lo nam chek chek a, ka pum a ri nghal rawih rawih mai.
.
Dawhkana eitur a chhawp chu tui ti takin ka ei a, Remtluanga chu ka bulah thuin ka thil ei chu min en a, ka melh chuan a nui leh ringawt thin. Engmah min la zawt lo chu mak ka ti deuh. Engvanga amah pan thut nge ka nih pawh min zawt hek lo. Ka pan chhan hrechiang saah a inngai a niang.
.
Ka ei kham hnu chuan thlengsil tur tlemte awm chu ka sil a, Remtluanga chuan min kalsan lo reng reng.
"Lo va thu la, ka sil zawh hunah ka lo zawm ang che." ka tih pawhin a lu a thing ringawt a.
.
Thleng ka sil zova, choka atangin kan inzui chhuak leh a. Sofa-ah thuin min kuah a, tawng si lovin min en reng a.
.
"Tinge min en reng a?" ka ti ta ringawt.
.
"Inneih ka duh." arawn tichhuak ta hlawl mai. A thusawi chuan min thawng chiang lutuk.
.
"Huh_"
"Ka hria. A la hma mah mah iti anih pawhin a dik tho. Mahse, ka ta chauh ni turin ka duh che."
.
'Sawitur ka hre lo. Hetiang em em a hmanhmawh a tul em ni? Thla khat awrh chauh kan la__"
.
"Ka thinlunga ka duh hre tur khawpa rei a ni tawh alawm."
.
"Ka hre lo." tiin ka chhang a. Ka hrelo tak tak. Inneih em chu ka la  ngaihtuah miah lo. Ka thiltih tum atan chuan duhthusam chu a ni. Mahse__ka hre lo.! Bakah tunah harsatna lian tham a awm laia inneih lo sawi te chu_
.
"I duh chuan naktuk ah pawh kan innei nghal thei a. Ropui taka tih i duh anih pawhin i duhdan angin kan ti ang."
.
"Mahse, i chhungte_i nu leh pate_"
.
"Nangmah chiah i pawimawh."
.
Chhang tawh lovin a nghawngah ka kuah ta ringawt a.
JADE
(Soddisfazione)
.
Thantei_LauraSean
.
CHAPTER - 15
.
VASPI*
.
Ka banah min vuanin a nghawnga ka kuahna chu a phelh a, ka chhan dan tur a ngaichang tih a hmel atangin a langchiang reng. Hetiang thut thuta thil thlen tir hi ka tum dan a ni ve lo.
.
"Aw tiin min chhang dawn em?" kan inen ta ran mai. A kutah ka vuan a_
.
"I laka ka rilru chu i hria a, engmah a danglam lo. Mahse, inneihna hi a serious a, thawkkhat rilru let but vanga thutlukna siamna chi ah ka ngai lova.. Ka rilru chu min hriatthiam sak tiraw?"
.
"Rilru-a a lan thut vanga sawiah min ngai maw?" a tih chuan ka lu ka thing a.
"Chutiang a ni lo.."
.
"A tha lawm. Tihtur ka nei a. Tikhan lo hahchawl rawh." tiin min thawhsan a, inchung lam panin a kal nghal a. Ka rilru a nuam lo khawp mai.
.
A awm danah khan rilru hahna a nei tih a chiang reng a, hnem theih ka duh em em. Ka ngaihtuah dan a dik leh ta lo. Hetianga a awm hi ka duh dan a ni lawm ni kha?
.
Ka thutna atang chuan thovin choka-ah ka lut a, in tur ka siam mawlh mawlh a. Ka siam zawh chuan in chung lamah chhovin pindan kawngka ka kik a, min chhang miah lo. A chau deuh anga,a muhil hman pawh a ni maithei.
.
Kawngkhar chu dimtein ka nem a, a inhawng mai a. Khumah a mu lo tih ka hmuh chuan chhuah leh mai tumin ka inher a, tawng ri ka hriat chuan ka ding leh rih.
.
"An cancel vek angai__ Naktuk ah kan inbe leh dawn nia."
Pen ri ka hria a, kawngka bula ding chungin Remtluanga khum lam pan a kal chu la en tawp. A ngaihtuahna kal ding vang nge min hmu lo aniang, khumah chuan a phone chu a thehthla tawpin a thu hnawk a. Ka va pawh mai ngam dawn em ka hrethiam chiah lo.
.
Khumah chuan a mu a, ceiling a en ngar ngar ni maiin ka hria. Pindan chhunga ding tawh reng chung chuan kawngka ka kik nawn leh a. Ka thawm hre awmin a awm miah lo nia.
.
Muangchangin khuma a mu chu ka pan a, khum sir dawhkanah ka no ken chu dahin khumah chuan ka thu a, min rawn en ta chauh.
.
"Hey." ka ti sap a. "I tha em?"
.
Min chhang lovin la mu reng chung chuan inlet thawkin ka kawngah min rawn kuah a, awm dan tur ka hrelo.
.
"Ka bula i awm chuan engkim a tha vek." a ti zawi ruih a. A samah ka khawih a, insiam remin ka malchungah a mu a. A chauh hmel tak zet anih hi.
.
"I landan chu i tha vaklo a ang. Eng thil nge thleng a?"
"Nakinah kan la sawi dawn nia. Tunah chuan chawlh phawt ka duh."
.
"A tha alawm. Tikhan muhil rawh." ka ti ve ta ringawt. Chutia ka tih veleh chuan tho thutin a kawr a phelh sawk sawk a, a awmdan chu mak tiin ka en tawp. A kekawr a phelh leh chuan ka mengphawk vek tawhin ka inhria.
.
"Mak ti vak suh." a sir zawnga min rawn melh chuan tihngaihna hre lovin ka nui chhuak hak a. Ka chetsawn hman hlau  niawm tak hian khumah chuan a rawn lawn leh a, puansin tur hlim pawpin min pawm kang nawlh a, eng thil nge a tih dawn ka hriatthiam hma hauhin kan mu fel der. Min kuahnghet em em lehnghal.
.
"Zankhuaa ka kuah che chuan ka muhil thei mai ang." a tawng zawnga ka nghawng arawn thawkkhum chuan ka duh vang pawh ni miah lovin ka lo tang ru teuh mai. "Inthlahdul rawh. Tuna ka mamawh zawng chu hetianga awm hi a ni rih mai." a aw ri zawi leh thuk raih si vang chuan ka maimitchhing tawp. Ka awm dan danglam chu a hriat hlauin aw ka thian kharh a.
"In tur ka siamsak che a. Khum sirah khan ka dah a."
.
Rum deuh pah hian min kuah nghet leh sauhin a phun a, eng nge a sawi ka hre tawh lo. A tu mahmah tawng tawh tawh lovin kan mu ta vang vang a.
.
A thawk dan chu ka chik reng a, a thaw muang ta raih mai. A muhil tawh niin ka hria. Tihharh hlau takin min kuahna chu ka phelh dawn a, phu deuh zawk hian min kuah tha leh a, a maimitchhing tlat thung.
.
Min kuahna chu phelh tum tawh lovin ka inlet a, kan hmai insi lo chauhin kan inhmachhawn a. A mit a men loh vangin ka duhtawkin ka en thei. A mithmul chu a seiin a er sang mai. A dum hlap bawk. A mitko hmul chu ka khawih zai zai a, a muhil nghet tawh aniang a che tawh miah lo. Ka u chunga thil thleng vang ni lo hian hmun dang leh hun dangah intawng ni ta ila__Ni lo. Chutiang zawng chuan ka ngaihtuah duh lo.. Thil ni thei tawh chuang lo tur ngaihtuah chu eng nge a tulna? Tunah hian ka laka a awm dan leha rilru puthmang hi dawt a ni lo tih ka chiang a. Keimah zawk hi lemchang chu ka nia lawm. Tun hunah engmah ngaihtuah ka duh lo. Maimitchhing in a nghawngah ka kut ka nghat a, ka muhil ve thuai a.
.
Ka muhil ka harh chuan min lo la kuah reng tih ka hre nghal. Ka che hret a, a phu deuh zawkin ka hria.
.
"La che suh." a ti nghut a.
"Dar eng zat nge?"
"Dar 6 a la ri lo."
"Thawh a hun tawh anih chu.."
"Thawh ka la duh hleinem." atih chuan ka nui hak. Naupang ang maiin__ Harh ve ve chunga a bula mut reng hi a tha dawn lo.
.
"Hnaa i kal dawn chuan i eitur ka siam ang chu."
"Hmmm.." tih pahin ka nghawngah a hmai arawn phum a, min fawp tan chu a ni ta der.
.
"Khawi maw..Min thlah teh.." ka tawmlawk miah lohin ka nakah arawn vuan thut a, ka inring hman lo ka te thawt a. Kei aia dek hua hi an awm ka ring lo. Ka tal nghal zawt bawk. "A za lutuk.." nui hawk hawk chungin ka tho a, ka tho chu pawiti lutuk niawm tak hian inlet thawkin lukham a beng thawk thawk a. La nui reng chungin a pindan chu ka chhuahsan a.
.
Inhnuai ka thlen thlak hnu pawh chuan ka la nui ta reng. Kawngka bula Sangtea lo ding reng ka hmuh chuan ding chawtin ka nui tawp chiang teh e. A hmel chu a thip ram ram khawp mai.
.
"Hetah hian eng thil nge i tih?" ka ti hniam chal a.
.
"Chu chiah chu ka zawhna che a ni. A lan danin__" a ngaihtuahna lang reng hian inchung lam chu a melh a, Remtluanga pindan atanga chhuk ka ni tih lo hmu vek niawm tak hian... "A dik tiraw? I mutpui tawh a ni maw?"
.
"Eng a?" ka ti haw mai.
.
"A chiang reng alawm. Hmeichhia in mipa pindanah tihtur dang a nei hleinem." a ti zui hmak. A hmel mawlh chu a ni. Hetiang ang hmelpu a ka la hmuh ngai pawh ka hrelo.
.
"Eng nge i rawn tih?"
Sangtea nen chuan kan hawi rual thawt. Inchung pan chhohna step tawpah Remtluanga chu dingin min rawn en chhuk a, kawr pawh a la ha lo. Sangtea chu rang zeta hawisawnin min rawn en leh ram ram a.
.
"Tsk-tsk-tsk! Ka thil hmuh i ka awih thei lo. Hetiang thil hi i lak atangin ka beisei miah lo asin." a tawng ring duh lo hle.
.
"Eng thil maw?" ka ti ringawt a, ka zawhna awmzia chu eng nge anih pawh ka hrelo.
.
"Ka in ah hian tihtur i neih awm ka hrelo. I farnu a awm tawh lo tih i hria em?.." Remtluanga lo kal thla chu ka en a, keimah min en lovin Sangtea chu a en ngur mai. 
.
"Lo ngawi mai teh."  Sangtea chu ka en leh. An inbiakna awmzia hi ka hrethiam lo."Ka lo kal leh zawk ang. Kan inbiak a tul hle a nia." tiin Remtluanga chu a en a, min en ve tawh lovin a inher vut a, in atang chuan a chhuak nghal a.
.
Farnu maw??
"In thusawi kha eng nge a awmzia?" Remtluanga chu ka en a, ka hmaa a rawn din thleng chuan ka hawisawn lo hrim hrim.
.
"Duhsaki kha a farnu a nia lawm."
"Oh! Ka lo hre miah lo_ Min rawn hmuh dan chu ka duhlo hle mai." ka sawi chhuak lo thei lo. Duhsaki hi Sangtea farnu a lo ni reng a maw? Hun kha leh chenah khan Sangtea'n vawikhat pawh a sawilang eih lo. Heta hnathawh tur awm min hrilh leh he in a min hruailuh ni te, a hnua thil thleng neuh neuhah pawh- vawikhatte mah Duhsaki a farnu anih thu hi a sawilang ngai lo reng reng. A farnu pasal hual ka chhuhsak niin a ngai ngei dawn anih kha!
.
"Ngai pawimawh duh suh. An inpawh ngai lo." Remtluanga chu ka bulah rawn dingin ka darah min kuah a. A sawi dan atang chuan engahmah a ngai lo tih a lang chiang em em tawp.
.
"Chupawhnise, a farnu a ni tho alawm."
.
"I ngai serious lutuk anih kha. In pakhatah pawh an cheng lova. Thawnthu thui tak ani. Ka ril a tam a nia." ka hmaah dingin ka chalah min fawp a, ka hmel awm dan hriatchian tum niawm tak hian min en vung vung a.
.
Choka-ah inzui lutin eitur ka siam a, Duhsaki leh Sangtea te inlaichin dan chuan ka rilru a luah hneh hle.
.
"I phone chu i pick up dawn lo mi?"
"Umm..dawn e." ka ti bah nak mai.
.
Dawhkan chu thawhsanin ka phone ka en a, thil hmanhmawhthlak a awm a ni chiang khawp. Tun ang huna min lo  biak ngai khawp chu a pawimawh hle ang.
.
"Arjun, eng thil nge ni ta?"
.
"Harsatna lian a awm. Aizawl-a kan supply tur restaurant khan engkim cancel turin min rawn hrilh a, contract an bawhchhiat chuan thil thleng tur hi a duhawm loh hle a ni."
.
"Ka hrethiam e." Remtluanga'n ka tawng a hriat phak hlauin a awmna lam ka en zeuh a, ka kalsawn nghal bawk a. "Han sawi zel teh." ka ti leh sap a.
.
"Kum hnih chhung supply turin an signed tih kha i hriat kha, tunah an rawn cancel tak vang hian kum hnih chhunga an senso tur ang kha an chawi tho angai dawn a."
.
"Engzat nge a sawi theih em?"
.
"Nuai 170. Vawiin hian meeting kan nei dawn a, shareholder dangte ngaih dan a nih loh em vangin contract anga kan kal a tul thu ka lo hrilhlawk che."
.
"A tha e. Rawn kalna hman a awm lova, video conference neih a tul anih chu. In inpeih hunah kan inbe leh dawn nia. Chhan tha tak a awm tih ka hria."
"Okay. A chhan chu engpawh nise, thutlukna a ngai tho ang. Kan inbe leh dawn nia."
.
Phone ka off a, Remtluanga chawi tur chu ka rin aiin a tam. Choka-ah ka lut leh a, Remtluanga chuan a hmaa eitur chu ei lovin a en ngai a lo en vung vung a. He thil vang hi a ni  ngei ang nizan pawh khan rilru hah hmel taka a awm. Lo ngaihuah thiam tur ka nia. Tunah a restaurant hawntur a kang vek a, sum sen thlawn tam tur zia chu ka ngaihtuah sak ngam lo zawk. Chutih rualin ka tan kawng a inhawng tihna chu a ni tho bawk. Ka hlim tur angin ka hlim chuang miah lo.
.
"I tha em?" dawhkan ka kik kauh chuan arawn hawi chhuak chauh.
.
"Vawiin chu ka buai deuh dawn a, ka lo haw tlai pawhin min lo nghak duh suh."
"Puih theihna che ka nei em?'ka ti nghal zat.
.
"Ka lawm e. Mahse, a fel thei mai ang." a eitur chu ei zui tawh lovin a tho a, choka atang chuan a chhuak nghal daih a.
.
Remtluanga hian UDY-JA Company ah ka thawk tih a hre ngei a, a hriat dan chuan food expert ka ni. Company pakhata food expert ve mai chuan engmah ka tihtheih a ring lovang. Thudik chu UDY-JA Company ah hian 70% share ka nei a, a neitu hming ka pu bawk! Ka u in bul a tan a, restaurant kan neih bakah UDY-JA hi ka enkawl zui ta ani. Executive member (rorel khawl tak tak) bak chuan UDY-JA neitu ka nih thu hi an hre ngai lo a, an hre ngailo bawk ang. UDY-JA vang hian restaurant enkawltu bik neiin thil tam tak ka enfel angai tho a, Remtluanga vanga ka buai tak hnu hian ka tan buai a thuahhnih ta hle bawk anih hi. Heihi ka nihna dik tak chu a ni.
.
REMTLUANGA*
.
UDY-JA Company thuneitute meeting zawh hun nghakin ka thu a, thil a danglam tehchiam ka beisei lo. Restaurant sak leh chei nan te, Agency-a contract kan signed zawng zawngte nen ka inseng nasa hle a. Ka ngaihtuah phak ngai loh chhiatna thleng vang hian ka tluchhe mai ang tih ka hlauthawng tak zet a ni. UDY-JA contract vanga ka chawi tur ai hian restaurant hawn tura kang chhia hlut zawng hi a letin a tam zawk a, chu chu ka buaina chu a ni. Tu phiangsen vangin  nge kangmei hi chhuak?? Hetiang khawpa ka chhiatna duhtu chu tunge ni ta ang?
.
Ka phone ri chu rang zetin ka pick up a.
.
"Sir, Hotel atang pawhin an chhuak nual mai. Restaurant kang vang khan Hotel-a awm hi him lovin an hria a ni. Hotel pawh hi rawn bei mai tur angin thu a darh chiam a."
.
"Ka lo kal thuai ang. In theih angin hna lo thawk ula. Engkim a tha leh vek ang." ka ti zung zung a. Ka rilru buai zia chu nasa tak a ni ta.
.
Hetiang ti duh tur chu tunge ni ang? Hotel lehzel a kangkai anih chuan ka dinhmun a tha lo ta hle a ni.
.
Duhsaki tih a nih ka ring lova, hetiang ti ngam tur hian a huaisen tawklo tih ka hrechiang. Midang awm chhun chu ka nu chiah!! A ni thei lovang. Ka lak atangin a duh apiang a nei a, hmanni lawk pawh khan eng emaw zat chu kan inpek kha mawle.
.
Dar 12 a rik chuan UDY-JA atangin min rawn bia a, ka rin dan chiah. Contract bawhchhiat vanga chawi tur chu cheng khat pawhin an tlahniam lo. Ka harsatna neih leh chhiatna ka tawh hi an tan engmah a ni lo. An thiam loh pawh a ni chuang lo. Dan angin an kal mai a ni. Vawiin atan chuan tih leh tur pakhat chiah ka nei.
.
Office atanga chhuakin Hotel ka pan a, ka thlen chuan Manager in min rawn pan vat a. A hmel atang chuan a hlauthawng nasa tih a hriat mai.
.
"Sir, a tam zawk chu an chhuak tawh a. Tukin khan Hotel pawh hi beih a ni dawn tih message an thehdarh vak a ni. Kei pawhin ka dawng a." a phone phawrhin message chu min chhiartir a. Chhiatna thlen hlauhthawn thilah hotel-a awmte an chhuak chu thiltih awm reng a ni.
.
"Chinfel harsa a ni lovang. Dawt thu thehdarh anih chungchang  a zau thei ang bera puantir a tul anih kha. I kutah ka dah e."
"Aw le. Sir. Ka lo ti nghal ang." a ti zung zung a.
.
Ka rinlawk ang chiahin ka buai nileng chiang hle. Office atanga in lam pan tura ka chhuah chuan zan dar 10 a ri thuak tawh. Zinga ka thil ei bak kha engmah ka ei leh ta miah lo a, ka ril erawh a tam miah lo thung. Buaina hi chinfel anih phawt loh chuan hahdamin ka awm thei dawn lo tih ka chiang.
.
In ka thleng a, motor ka hun fel hnu chuan lut mai lovin kawtah ka ding det a. In chhungah Vaspi a awm a ni tih ka ngaihtuah chhuah chuan ka nui sak a. Tunah chuan a mu tawh ngei ang.
.
In chhung ka lut a, light thenkhat a in off tawh tih ka hmuh chuan Vaspi room-ah chhuk tumin ka kal thuai a. Step ka rah hmain ka ding leh chawt. Vaspi chu light off vekin tv bula sofa-ah a mu a, vawt ati tih hriat tak hian a mu kawm chal a,.Ka haw hun a lo  nghak a ni ngei ang. Khawngaihthlak zawk hian__ Chhiatna ka tawh vangin a hna kalsan meuhin min rawn pan vang vang a, kei lahin ka buaipui hman der si lo. Vawiin pawh khan nilengin ka be lova, min tihbuai a hlau a  ni ngei ang chu, amah paw'n min rawn be miah lo.
.
A mutna bulah chuan thawm dim takin ka kal hnai a, kun hniamin a bekah ka fawp zauh a. A che hlek chauh. A harh miah lo.
Ka pawm nawlh a, kalpui nghal lovin sofa-ah chuan ka thu a. A rawn harh ve ta chauh. A mit a men rualin min en a,a nui zui sak a.
.
"I lo haw na a rei tawh em? Dar engzat nge?"
.
"Khumah lo mut tur che a nia. Inthiam lova ka awm i duh a ni maw?"
"Ni lo.. Chutiang a ni lo.." ka fiamthu tih hrethiam lovin nuam lo ti hmel a pu nghal hmiah. He hmeichhia hi ka tan a tha mah mah a ni. "I ril a tam em?" a tih chuan a hmel chu uluk takin ka en tawp. "Chhunah engmah i ei lo tih sawi miah suh. Hna i thawh zel duh chuan i hrisel phawt angai a nia."
.
"Ka hria alawm." kuah nghet sauhin ka fawp vawng vawng a.
Kan inthlah leh hnu chuan ka malchung atanga chhukin ka hmaah a ding a, chik zet hian min en ran ran mai.
"Engmah i ei lo tih ka hre mai. Ka rin dan chiah." a lu thing mat matin ka kutah arawn vuan a, min pawt thovin choka lamah kan inzui lut a.
Eng eng emaw sawi seuh seuhin eitur a dah fel hnu chuan a thu a, ka thut hun a nghak leh te te. A hmui  a liak zeuh a. A awm dan chu a ril a tam ve tho anih hmel.
.
"Engmah ila ei  bik lo tih sawi miah suh."
.
"Thu la, ei ang." tih chiahin min chhang. A nui zui var var a. Ka din rei leh riltamin a awmrei a nimai. Ka thutna turah chuan ka thu vat a. 
.
Chaw kan eikham hnu chuan ka inthlak fel a, mu mai lovin thil thenkhat enfel ngai ka khawih zui mawlh mawlh a. Kawngka kik dat dat chu ka chhang rang khawp mai.
Vaspi chu ka bulah rawn thuin bowl-ah eitur eng emaw rawn keng bawk a.
.
"Vawiin eng nge chanchin. Company lam atangin chanchin ka lo hria a." a hmel atang chuan min zawt turin a inngaihtuah rei fe ka ring.
.
"A tha. Thil tihfel harsa ani hran lova." ka tih chuan a bu nghat a.
.
"Tihtheih ka neih chuan engpawh ka ti duh ang. Restaurant kangah thil tamtak a chhia tih ka hrethiam a, nangmah chauhin tuar tum suh aw." ti dam thlapin ka kutah min vuan a, ka harsatna hi ka hrilh anih chuan min tanpui a tum ngei ang. A sum lo khawl ve sa zawng zawng pawh hmang vek mah se ka mamawh zat ala tling pha dawn chuang lova, chu bakah tihbuai ka duh lo bur.
.
"I ngaihtuahna ka hria a nia. Ka tihtheih zawng tih ve chu min phalsak la." tiin min en chho hau a. A hmel chu enin ka nui suk.
.
A biang tawn tawnah ka vuan a, a mitah enin ka rilru dik tak ka hrilh a.
"Ka bula i awm hian chakna ka neih phah a, chu chiah chu ka duh. Ka hmangaih che! Vansangpui!"
.
Tawngkain min chhang lo. Thaw halhin ka nghawngah a ban pahnihin min kuah a, ka bo mai ang tih hlau niawm tak hian min kuah nghet tak sauh sauh a.   
JADE
(Soddisfazione)
.
Thantei_LauraSean
.
CHAPTER - 16
.
VASPI*
.
Ni thum chhung chu chhun lamah Remtluanga nen kan inhmu ngai lo tluk a ni. A taksa leh a rilru a rim em em tih ka hria a. 'Ka tihtheih zawng zawng ka ti ang' tih a bula ka sawi khan awmzia a nei tam lo. Midang tanpuina tel lova a din chhuah leh tur thu inringtawk takin min hrilh a nih kha. Inringtawk hle mah se awlsam takin a ding chhuak mai thei dawn lo tih ka thlir thiam a, chuvang chuan ka awm mai mai thei bik lo. Engti kawng zawng emaw tala tanpui theih ka in beisei.
.
Ka ngaihtuahna hi ka hrethiam tawh miah lo anih chu! Amah hrem tura rilru inbuatsaih leh amah pantu ni si hian hreawm a tuar lai ka hmu leh thei si lo. Bakah, ka u chungchang ah khan thu chiang nia ka ngaih kha a chiang leh tawh tlat lo. A diary a thu inziak leh a kawra thlalak ka hmuh kha a inmil theiin ka hre lova, thlalaka mipa kha han zawn ngaihna ka hre rih chuang bawk si lo. Hun khawhral hman ka ni lo reng reng.
.
Mahni chauha nilenga in-a awm ka nin tawh em vangin ka kal chhuak a, tihtur em em pawh ka hre chuang lo. Rilru thawveng taka awm duhin ka kal kual vel mai mai ani ber. Dar 12 velah restaurant-ah kalin eitur ka pack tir a, Remtluanga'n engmah a la ei leh loh ka rin lawk vangin eitur keng chung chuan a office ka pan a. A office hi ka vawikhat kalna tur a ni. A in atang pawha a thawh theih reng laiin engvanga office hrang nei tlat hi nge anih ka hrethiam thei lo. Anih loh pawhin a Hotel ah hian office tur pindan siam a har chuang miah lo bawk. Keichu ni ila in atangin ka thawk ngei ang.
.
A office building ka thleng a,a chhung ka luh chuan ka lo rin angin engmah a awm lo. Hotel leh Restaurant bakah hian thil dang a buaipui tih hnathawk tam dan atang chuan a hriat theih nghal mai. Mihring mak leh special tak chu a lo ni ngei anih hi.
.
Receptionist chuan min lo welcome var a, Remtluanga ka hmu duh tih ka hrilh chuan in chung lam min kawhhmuhin a secretary thutna hmun min hrilh a. Thu dang zawt lovin in chung lam panin ka chho a. A secretary hmuh chuan a hmel atanga engmah hriat theih miah loh hian min en chik khawp mai. Remtluanga a hmuh theih em tih ka sawi zawh rualin a hmuh theih loh thu a sawi hmak. A tawngkam erawh a polite phian.
.
"Lunch a ei tawh em? Amah ka lo bia ang." ka tih chuan chik lutuk mah mah leh nuam ka tih loh rak khawpin min en a. Mahse, hnungtawlh ka tum bik thak lo. Ka ngaihtuah hle tih ka tihlan chuan min luhtir mai thei asin. Min chhanna ka hriat rualin eng pawh sawi ila min luhtir a tum dawn chuang lo tih a chiang nghal tawp.
.
"Ka tih palh. A nu chhungte i nih ka ring. Tumah a pindana luhtir lo turin min chah a. A thupek ka bawhchhe thei lovang." a nui sang  nain a mitmeng chuan min lawm ta lo lehzual hle. A nu chhungte ka nih a rin vanga hetianga awm hi maw anih? Anih chuan_ Remtluanga hian a nu leh pa chanchin ka bulah a sawi ngai lova, innei tura min sawm tum pawh khan a nu leh pa te chungchang sawi kai lovin keimah ka pawimawh ber tih chiah a sawi tak e. Anu leh pa hnaiha a awm loh bakah a inchhung ah sawn thlalakhmuh tur takngial pawh a awm lo.
.
"Vaspi a lo kal tih min hrilh sak thei angem?"
.
"Ka pi, min nawrlui suh. Tumah luhtir lo turin min hrilh alawm. Keimah ngei pawh a pindan ah sawn ka lut thei rih lo. Phone-a biak a theih loh bawk a."
.
"Eitur a lam tawh em?" ka tinawn leh hram.
"Va dah pawh a theih loh chu a nih hi." a tiram ta hmak a. Ka be zui duh ta lo. Pawnah hian ka lo nghak mai ang.
.
"Pawnah hian ka lo nghak mai ang." ka tih chuan a nui hawk mai.
.
"Pawisa dil tum inih chuan nghak duh suh. Hmanni lawkah pawh a pek teuh tawh kha." ka makti hmel min hmuh chuan min rin loh hmel zet hian  a ner sak a. 'Chintawk nei lo hlawm lutuk." a ti zui bal bal ka hriat chuan min rin dan diklo chu hrilhfiah tum lovin a dawhkan piah deuha thutna awm chu panin ngawi rengin ka thu ta ringawt a. Ka ngaihtuahna erawh a thusawi vang chuan a kal thui hle. Amah biak tumin ka call a, a secretary sawi ang chiahin a call tlang theih loh. A secretary thusawi  ngai pawimawh lova sut tlang luih erawh ka tum buai duh ting tang lo mai ang  e.
.
Darkar khat chuang zet ka thut hnu chuan a pindan kawngka inhawng thawm a rawn awm ve ta hram alawm.
.
"Darkar khat chuang a thu tawh." Secretary phun sar sar chu ka va hre phak tho. Anmahni en chungin ka ding chhuak a, Remtluanga chu enin ka nui sak a. Min hmuh rualin min rawn pan nghal ruak ruak mai. Min hmuh a in beisei lo lutuk tih a chiang. Secretary meng tal tawp tawp chu ka va hmu hman hram bawk. A ngeiawm zawng ni lovin a makti lutuk hmel a ni zawk  mah.
.
Kan bula awmte pawisa miah lovin min kuah hlu hlu hnu chuan min thlah ta chauh.
.
"Min lo nghak rei hle mai. Thu ka lo pe khauh mah mah a ni maw.." a secretary chu enin a nui suk a, a secretary hreawm ti hmel chu a khawngaihthlak zawk.
.
"Thachhangdawltu i nei tha hle mai." ka tih chuan ka bekah min fawp leh zauh a.
.
"Ka tihpalh lutuk." a secretary rawn phun sap chu enin ka nui sak a.
"I tihtur dik tak iti zawk anih kha. I rintlak tih a hriat alawm."
.
"Ruatpui, Jade anih hi. In inhmu fo dawn a nia." nui lovin a thutak phian a. Ruatpuii chuan "Ka beisei. In chibai ila.." tih paha a kut rawn phar chhuah chu ka lo vuan thuai a.
.
"Ermm__Ka lo peng zuai. Kha, i chhuak dawn chiah a va ang ve." mipa lo tawng lut lung lung ka melh rual chuan ka ding ngil zawt mai. Ka inveng hman miah lo. Hepa hi_ Hepa ngei hi a ni ka u kawra ka  hmuh thlalaka mipa kha! Tunge anih?
.
"Ohhh... Heihi.." thawveng angreng deuh hian Remtluanga a melh hnuah min rawn melh leh a. A hmel atang chuan zu a in nasa tih a hriat. A pum deuh ul mai. "Hey_hey_hey_ Heihi a hmaa ka zawn vak kha ani em?" lawm hmel deuh hian nui chungin min lo pan a, Remtluanga hmelah chuan eng emaw ka hmu zawk. A danglam leh rang em a, ka mitvai a ni zawk hial  mai thei.
.
"Ngawi mai mai teh. Hei, kan lo chhuak dawn chiah a."
.
"I zawng tih a inhre miah lo anga.." a la ti ta zel. A sawi dan atang chuan Remtluanga hian min lo zawng tihna ania. Amah chauh pawh ni lovin he mipa hi keimah zawng turin a chhawr bawk tihna a nih chu.
.
"A ni mi?" Remtluanga hmel ka en chuan nichin lawka a hmel danglam nia ka hriat kha a dik chiah. A lai deuh emaw ni le? Ka awih thlawt lo!
.
"Remruat  ngawi mai  mai teh. Ni dangah kan inhmu dawn nia. Kal phawt ang." ka kawngah min kuahin min kalsawn pui a tum a, Remruat tia a koh pa chu za lutuk hian a nui ta chiam a.
.
"Ropui ve.. Thiana_"
"Nakinah inla inhmelhriat tha leh dawn nia. Kal phawt ang."
Remtluanga chu  ka zui lo thei lo. Ka kawngah min kuah tlat alawm. Kan chhuah hma chuan pindan chhunga awmte chu an inmelh a, Ruatpuii pawh a hmui hupin a nui tih ka hria. Mak tih viau tur thil a awm pawh ka lo hre lova.
.
Pawn kan thlen chuan Remtluanga chu ding chutin ka hnunglam atang hian ka dar tawn tawnah min vuan a.
.
"An sawi kha chu engahmah ngai suh." teh ngawt a. A tawng zawi tawp lehnghal. Tlema thle deuhin ka mitsirin ka en a, a hmui a pet sawi zauh tih ka hmu hman. Engmah sawi lovin ka nui a, a kut chu vuanin kal ka duh tih lantir nan ka pawt deuh a.
Car-a kan thut hnu pawh chuan a hmel ala pangngai chiah lovin ka hria. A va mak danglam tak!
Engtin nge a awm dawn ngaichangin ka en reng a.
"Engahmah ngai suh ka tih kha." a ti nghut ringawt.
"Engmaw?" ka tilui ngat a. Remtluanga hi a lo lai ve thei tih ka hmu a, mihring pangngai ve mai anih zia ka hre thar. Ni e, mihring ani tih chu ka hre tehmeuh mai.. Mahse, hetiang zawng kher hi chu a inhmeh lo ka tih rualin a landan duhawm lutuk chu kuah mai ka duh.
.
A lamah awnin a nghawngah ka kuah a. Engmah sawi tur ka hre chuang lo. Ka hriat miah lohin ka nui reng tih ka hriat chuan ka inla hrang ta chauh a.
.
"Min lo zawng tih hriat chu a hreawm vak loh a nih hi." ka tih chuan a thle nghut ringawt.
.
"Ka ril a tam viau. Khawiah nge kan ei ang?" ka thusawi chu sawi zawm a duh lo tih a chiang.
"Eitur ka lo ken che a, office-ah khan ka theihnghilh daih. Mahse, a dai vek tawh ang. I duhna hmunah min hruai tawp rawh." ka ti zung zung a.
.
Ngawirengin motor atang chuan a chhuak thut a.
"Eng nge i tih dawn?"
"Lo nghak lawk rawh." hmanhmawh takin a kal a, eng nge tih a tum ka hre lo.
.
Reiloteah a lo let a, ka box ken arawn lek va va a. A nui hmel ka hmu leh ta. Dik tak chuan a nui hmel ka hmuh hian thil engkim ka theihnghilh vek thin. Thil engkim ka theihnghilh vek thin tih ka  ngaihtuah chhuah rualin engvanga a bula awm nge ka nih ka ngaihtuah chhuak zat.
.
"In ah lunch kan ei thei tihna nimai." phur hmel deuhin driver seat-ah arawn thu lut a, box chu ka malchungah arawn dah a. "I thilsiam ei aia chak ka nei chuang lova."
.
"Nuam thei." amah enin ka nui tawp. A nuam ka ti!
.
In panin kan tlan chhuak a, boruak hahdam takin kan ngawi duh ran a. Nichin maia lo kal pa chanchin kha hriat ka duh. Ka u thlalaka a lan chhan min hrilh theilo anih pawhin a chanchin chu min hrilh thei ngei ngei ang.
.
"I thianpa kha Remruata maw?"
"Um_ Kha chu sawi lo teh." a tawng dan chu ahmaa min lo zawn chungchang kha ka zawt dawnah angai a niang.               
.
"In inkawmna a rei tawh em? In innel hmel em a."
"Rei ve tawh. Lehkha kan zir laiin Delhi-ah kan awm ho thin a. Kan la inkawm zui ta reng a nih hi." a ti ve duah.
"Ka va'n hmu ngai si lo ve."
.
"Ka bulah ila awm tam lo em alawm. Thil dang sawi teh." ati leh tawh. Ka ngawi ve ta mai bawk.
.
In kan thleng a, eitur tilumin kan ei dun a. Office-a let leh a tum tawh lo tih a sawi chuan ka phawk deuh. Hna a ngah tih ka hria. Keimah  vanga kal tum tawh lo anih chuan ka duh miah lo.
.
"Keimah vang a ni em? Hna i thulh phah ka duh lo a nia." ka ti tak tak. Ka awm dan hi maw_ amah tihchhiat tum pawh ka ang tawh lo. Ka hriatchian duh chu Remruata chanchin kha a ni. Chawhnu lamah ka chhuak ang ka lo ti rilru neuh neuh hman a nia.
.
A lu thingin ka kutah min vuan a.
"Vawiin atan ita ka ni e." a chho zawng deuh hian min melh a, tuiral zovin ka zawr lo chauh chu a ni e.
"Chiah maw?" ka tih chuan ka kut la kangin a fawp a. Kan inen vang vang mai.
.
In chungah inthlak tura min chhohsan chhungin kan thil eina ka tifai zung zung a. Chawhnu pumin eng dang mah ngaihtuah miah lovin a bulah thlamuang takin ka awm ang. Ka ngaihtuahna chu ka hmelah lang chhuakin tuma lawm lohin ka nui vawr vawr a.
.
Thil pakhat a lo chhuk leh hmaa tihtur ka nei tak e.
In hnuaiah chhukin phone ka hmang a, rilru thawveng ru deuhin ka chho leh thuai a. Remtluanga chu sofa-ah thu awn duaiin min hmuh rual chuan a bula thu turin min duh tih lantir nan a ban a lo phar a. Ka pan mai lohin eng thil dang nge ka tih chuan ang?
.
REMTLUANGA*
.
Ka hmai khawihtu chu tunge anih ka hria. Ka mutthilh lai ka hre miah lo thung. Zawitea zai rat rat chungin ka hmai chu a khawih riak riak a, khawvel danga cheng ang mai ka ni. Hetiang thil ka tawn lohna chin hi kum engzat nge ni ta le? A tam tawh lutuk. Ka nu, min hringtu ngei khan ka hmaiah duat taka min khawih hliau hliau chungin min awi mu thin! Engtin nge ka hriatreng theih ka hrelo. Ka nuna buaina lian tak ka neih apiangin ka mumangah ka hmu thin a, chutiang hunah chuan tuna Vaspi tih ang chiah hian ka nu'n a ti thin. Ka nu ka ngaihtuah chhuah ruala lungngaihna nasa tak ka neih vang chuan ka meng chhuak hlawl a.
.
"Muhil leh rawh." ti sapin min en chhuk a, a mal ka khamna chu a mu tawh hial anga! Eng chena rei nge ka mitthilh tawh?
.
"Dar engzat nge ri tawh?" ka mutthilh zuk vangin ka aw chu a pangngai chiah lo.
.
"Muhil leh rawh." a aw ang chiaha damin dimte hian ka sam a chul a. Ka thu chhuak ta tho. Ka nu ka ngaihtuah chhuah khan ka awm dan a tidanglam nghal vek.
.
Vaspi chu thawhsanin engmah sawi tawh lovin in chungah ka chho nghal daih a. Min ko zui pawh chu ka chhang chuang lo. Keimah chauha awm ka duh rih. Ka nu chungchang hi tu  hnenah mah ka la sawi ngai lova, tunah pawh sawi ka la duh chuang lo. Amah khawvelah a awm tawh lo tih hi tun thleng hian ka la pawm thei lo a ni e.
.
Mipa naupang kum 3 leka upa min ngaihtuah lova min kalsantu hi vanah khian thlamuang taka a awm theih ka ring lo fo thin. Ka ngaihtuahna hi atthlak hle mah se ka vuan nghet hle. Ka pindanah lutin kawngkhar ka kalh a. Reilote hnua kawngka kik thawm ka hriat pawh chuan ka khumah che miah lovin ka thu reng a. Tihduhdahna tinreng tuara seilian ka nihna hi khawvel mihringin min hriatpuia min khawngaih ka duh lo bur.
Ka nu thih dan kha engtin nge ka hriatreng ka hrelo. Thil hrethiam rual ni lo turah min ngaiin a hminga ka nu tia ka koh hian min enkawl seilian a. Hriatreng duh lo mah ila thil tam tak ka theihnghilh theih loh a awm. Ngaihtuah pawh ka duh lo. Tun dinhmun thleng tur hian eitur leh silhfen min pe fo a, chuvang chuan ka hawisan thei lo mai pawh a! Ka zirnaah pawh a sum a seng ngai hauh lo. Ka nu sum tam tak kha ahmang huau huau ang chu. Class 5 ka zir atanga ka tum ka zir zawh thlengin ka scholarship hmuh ka ring ngat ngat thin anih kha.
.
Ngaihtuah let ka duh tawh lo.
.
"I tha em? Lo hawng teh." Vaspi chu a au lauh lauh a. A kalsawn mai dawn lo tih ka hriat hnuah pawh ka chhang chuang lo. 10 minutes dawn chu min au tlauh tlauh peih nia. Hetianga ngaihsakna hi ka la dawng ngai lo. Chu chuan kei, mipa_inti mipa tak hi pachang thei lovin min siam  mai dawn. Harsatna namailo tak ka tawh mek vang hian ka rilru a no zo ani ta ve ang. Phiangsen hian!
.
Inngaihsakna hi a lo hlu a nih hi.

Duhsaki kha nupuia neih tum hial khawpin kan inkawp a, mahse, Vaspi min ngaihsak thin dan ka hmuh hian Duhsaki khan min ngaihsak tak tak ngai miah lo tih ka hrethiam chiah. Thilpek a dawnin hlim takin min kuah chuk chuk a, eitur min siamsak ngai lovin eitur siamsa a sawisel zawk thin. Ngaihtuah pawh ka duh lo zawk e. Thawklehkhata a danglam thut khan chhan a  nei ngei bawk ang. A chhan hriatchhuah pawh chu ka duh ta chuang lo. A liam tawh a, ka ngaihven leh tawh lovang. 
.
Rei fe ka thut hnu chuan bathroom-ah lutin ka inphih harh a. Tunah chuan lungngaihna tur ka nei tawh lo. Hmeichhe tha tak min ngaihsaktu dik tak ka tawng a, ka  harsatna pawh a kiang ve leh mai ang.
.
Inhnuaia chhuk leh tumin kawngka ka hawng a, Vaspi ngaih thalo takin ka kalsan ringawt anih kha. Ka pindan kawngka ka hawn chuan kawngka bul maiah bang ngheng hian a lo thu tawm chal a. Kawngka ka hawng thawm a hriat ruala rawn hawi chhuak vatin a thaw huai a.
.
"Min ti mangang hman alawm." a tih rualin min rawn kuah thlawp a. A thawk zawng chuan a khur deuh dar dar tih ka hria. Tawng lovin kan inkuah zui vang vang a.
.
.
Vaspi pawh kar khat chhung zet chu a cham ta. Ni 4 dang a awm leh anga a chawlh hun a tawp tawh dawn vangin min hawsan lo thei tawh dawn lo a, ka huphurh hle tih sawi ila thudik tak sawi ka ni ang.
.
Tichuan, thil mak a thleng bawk. Sawi loh theih a ni lo! Ka beisei aia hmain ka buaina a kiang dawn niin a lang. UDY-JA Company atangin call  ka dawng a, restaurant kangmei chhuak vanga kan contract bawhchhe lo thei lo ka ni tih an hriat vangin an ngaihtuah tha leh a lo ni a. Hnara hlit phawi ang mai a ni e. Ka inpeih leh hunah contract renew mai turin min hrilh bawk a, lawm tak ka ni. UDY-JA Company laka ka thehluh tura ka dah sum hi Restaurant chei that nan ka hmang nghal mial mial mai ang chu.
.
Ni khat dang a ral a, rin loh takin Arjun-a'n min rawn call teh tlat a. Company thil pawimawh a awm anih loh chuan kan inbe ngai miah lo a nia.
.
"Miss V' Aizawl-a a cham chhung ngei khan lo zin ve ka duh a. Hun remchang dang nghak lovin ka lo zin ang. Khawpui fang tura min tiam kha ila theihnghilh lo ang chu maw?" tiin a rawn phul hlut mai.
.
"Tehreng mai. Ka tiam tawh chu ka ti  ngei ang." ka lo ti ve mai bawk a.
.
"Engpawhnise, ka lawmpui che. Sum tam tham taka tanpuitu i nei hi i vannei ka ti tak zet che a nia." Huh?? A thusawi awmzia chu ka hre ta lo.
.
"I thusawi awmzia ka hre lo." ka tih chuan "Huhh!! A nimaw?" a ti ta hu mai.
.
"Han sawifiah deuh teh. Restaurant ka peih hunah contract renew theih anih thu ka dawng ngei a, tanpuina dawn chungchang chu ka hre hauh lo mai." ka tih chuan a nui hawk hawk a.
.
"Man, fiamthu chu nakinah kan la thawh dun dawn nia. Ka dah phawt ange. Naktukah min lo beisei la aw." ti lehin ka chhanna pawh nghak lo chuan phone a off a.
Arjun kha a fiamthu miah lo. Kei hi kangmei vanga hriatthiamna chang  ni lovin mi tuemaw tanpuina vang chauha contract sign leh thei tur ka ni anih chu!!
.
Eng nge thil awmzia?     
JADE
(Soddisfazione)
.
Thantei_LauraSean
.
CHAPTER - 17
.
VASPI*
.
Zanriah tur siamin chawhnu pum chu ka buai char char mai, ka thil siam chu ka uluk zual viau. Dar 5 a rik ta. Remtluanga a lo thleng tep ang.
.
10 minutes vel a ral leh hnu chuan door bell a ri ta ral ral a, phur zet hian kawngka hawng turin ka kal nghar var.
.
"In be lawk ang." kawngka ka hawn rualin Sangtea chu arawn pen lut a, ka beisei loh em vangin a chezia chu ka en tawp. "Thut kher pawh angai lovang. Thu pawimawh hrilh tur che ka nei." a ti leh hmuk hmuk a.
.
"Eng thil nge a?" pan hnai duh chuang lovin ka en a, a hmel lan dan chu ka hrethiam chiah lo.
.
"Eng chen nge hetah hian i cham dawn? Thil awmdan hi ila hrethiam chuang miah lo ami?" teh ngawt a. Eng thil nge hriatthiam tur awm?
.
"Eng nge hriatthiam tur awm a?" ka ti pangngai mai a, Sangtea chu a nui hul hak thung a.
.
"Ka rin aiin i mawl?" tawl mai a! A tawngkam chu ka ngei lek lek. Eng thil nge a hriat hrep ni. Ka melh ta ran ran mai.
.
"Ka mawl thu min hrilh tur ringawt a lo kal inih loh hmel. Eng thil nge? Thukhuh vak a tul lovang." ka aw atang chuan ka lungawi lem lo tih hre mah se pawi ka ti lo nasa. Min rawn pan hnai a, hnai set sawt a min en hnu chuan hawisawn leh rihin thawk a la hawk a. A awm dan chuan ka ngaih a titha chiah lo. Keimah ang bawkin lungawi chiah lo hmel a pu bawk.
.
"I hre miah lo tak tak a ang. Ka hrilh ang che."
"Sawi rawh." ka ti leh hmak a.
.
"Remtluanga hi i hrechiang lova, i hnaih ngam lutuk mah mah hi a mak ka ti che."
.
'I sawi tum tak sawi tlang rawh. I farnuin a lo tir che a ni hial lo maw?" ka tawngkam chu helh awl awl hmel a pu.
.
"Thil tha lo thleng tur awm angin ka hria. Remtluanga hi hnaih lo la ka duh. I himna ka duh vang a nih chu. A tunhma chanchin hriat i nei em?" ka chhan hun nghakin a ngawi deuh a, ka chhang lo. Remtluanga tunhma chanchin ka hre tam lo tih ka sawi kher ngai lovin a hresa vek. Ka hriat zawng chu ka u thihna chungchang ah a inhnamhnawih ve niin ka ringhlel a, chu pawh engmah a la chiang lo. Thlalak dang ka hmuh khan Remtluanga hi a inhnamhnawih ve lo maithei tih ngaihdan ka nei a, a dangah hmasawnna engmah ka la nei lo. Ka ngawih reng vang chuan "I nei lo! Chuvang chuan hlat rawh. Ka laka in unau in that em vangin duhsak takin ka hrilh che anih chu." a ti leh zung zung a.
.
"Eng thil nge ka hriat loh chu tunah sawi la."
A thaw huai ringawt.
.
"Kalsan vat vat la a him a nimai."
.
"Misual a ni lo tih ka hria. Eng thil nge anih chiah sawi leh duhlo tur si chuan tinge i sawi chhuah ting tang a?"
.
"Anih chuan lo ngaithla rawh__"
.
"Hriat duh aneih chuan keiman ka hrilh thei alawm. Tinge mi pahnih inkarah ilo inrawlh ve kher duh ang?"
.
Sangtea nen chuan kawngka lam kan hawi rual thawt. Kawngka nghengin Remtluanga chu a ding awn deuh a, eng chen nge a lo din tawh ka hrelo. Sangtea chu che vutin min en a, "Fimkhur ang che." ti lehin vung zet hian in atang chuan a kal chhuak a. A awm dan mak tak chuan ka awm a tinuam lo hle mai.
.
"Ka awm loh rualin  mipa dang an tlangnel nghal hle mai maw?" awihlo zet hian Remtluanga chu ka en haw a. Engtin nge chutiang thute chu a sawi theih zawk? Amah ngaihsakin thil dang buaipui  miah lovin ka awm a nia.
.
"Maw?" ka ti tha leh.
.
"A pawimawh lo. Ramngaihsanga khan eng nge arawn tih?" a dinna ngaiah ala ding reng.
.
"Eng vak  nge arawn tih ang?" ka tilet hmak.
.
"Mipa dang i hnaih ka duh lo tih ka la hrilh lo che a nimaw? Tun hnuah hnaih leh tawh suh." a ti chhum hmuk a, ka sa ve phat. Hetiang nungchang hi ka ngaithei lo. Ahma zawng zawngin hetiang nungchnag hi ka la hmu ngai lo.
.
"Hnaih ila eng thil nge thleng chuang ang?" ka tilui ngat a. Muangchangin min rawn pan hnai a, zam miah lo leh thinrim ru teuhin ka en ngar ngar a, ka hlau lo tih pawh a inhria ang chu. A hmel atang chuan a chau tih ka hria. Khatiang kher khan rawn tawng lo se chu ngaihsak takin ka buaipui ngei ang. Mahse, tunah chuan ka ngei rih.
.
"Eng nge thleng tur min zawt maw? Hetiang thil hi a thleng ang." tih pahin na zet hian alamah min pawm bet rawk a, min dimna nei miah lovin min fawp bawrh bawrh a. Hetiang thil a thlen hi ka beisei lo hulhual. Ka theih anga rangin ka hmui chu la lasawn vat a, min fawh leh tumin min bei ani ber.
.
"Duhtawk rawh." min vawnna chu phelhtir tumin ka che nawk nawk a, min vawnna chu a thlah chuang lo. Min fawh leh tuma a beihna chu duhtawkin chiang lutuk hian min en a, in chhung a lo luh tirha ahmel nen kha chuan a danglam leh daih tawh. Ka hmui thip zek chu ka khawih a, a thi nia! Ka ngaihdan ni lo lutuk chu ka tawng mai thei lo. Thu tam tak ka sawi dawn hek lo.
.
"Min.Thlah.Rawh!" a lu a thing a, min hnial vanga lu thing a ni lo. Inthiamlo hmel a pu leh si chuan ka thin a tiur zual sauh zawk.
Ka kut hum ruhin a awmah ka nem sawk sawk a, ka thinur lutuk tih a hriatthiam vang nge ka hrelo min vawnna chu a thlah a, a hmel chu en duh lovin ka inher nghal.
.
"Vawiin atan min hmu tawh lovang. Nangmahin zanriah ei ang che." chak zetin inhnuai lam panin ka kal hmawk hmawk a. Min lo zui tih ka hriat chuan ka kal chak zual sauh. Ka banah min rawn vuan a, rang lutuk hian ka thing thla nawk a. Pindan kawngka hawng rawpin ka lut a, arawn luh hmain kawngka ka khat hnan hmak. Ka thinrim laiin ka bulah awm lo se ka duh. Sangtea nen kan inbiak vang ringawta khatianga a awm duh anih chuan min rinna chhete tal pawh a neilo tihna a ni. Khumah thu hnawkin ka hmui thip vat vat chu khawih leh a, a thi ala reh lo tih ka hriat  chuan thovin darthlalangah ka inen a. A pem hlek chauh a ni.
.
"Vaspi..." kawngka a chum a, ka hawng dawn chuang lo tih hria se chu a kalsawn nghal ang. Ka phone phawrhin headphone ka vuah a, thawm dang hre thei miah lo turin hla ka play a. Khumah hahdam deuha thu muin ka maimitchhing vang vang a.
.
Duhaiin kan inzawmna hi ka ngai serious ta mah mah em ni? Ni e, ka duhna hi ka tider hauh lo. Ka tisual tawh reng te hi a ni lo maw? Ka u vanga hnaih ka nihna hi ka lo ngai lian tawk zo tawh lo a ni. Ka thiamloh a ni e. He ti chung hian Remtluanga tunhma nun leh a kalsan tawh hun vanga danglam kher tur ka ni em? Ngawi rawh lawk__ Sangtea kha ka zawh chian ngei angai anih hi. Remtluanga kha kan thusawi arawn hriat hman vek vanga thinrim leh ka chunga khatianga che ta kha anih chuan__Mipa, hmeichhe laka tharum thawh thin anih chuan eng ang pawhin min hip mahse ka hnaih lul lovang! Tihsual hnua ngaihdam dil leh ringawt hian chhungril a hliam a tidam thei lo tih ka hre chiang em em a ni lawm ni.
.
Darkar khat dawn ka inkhung hnu chuan ka headphone phelhin ka meng a, khum mawng lama Remtluanga lo thu reng ka hmuh chuan ka phu deuh zawk. Che miah lo hian min en reng a, ka biak hmasak a ring anih chuan a tisual ang. Headphone chu vuah tha lehin a hma aia ringin hla ka play leh a, ka mit ka chhing leh nghal a. Eng hla nge ka play pawh ka hre lo. Remtluanga chu a che em tih ka ngaichang ran mai.
.
Ka headphone vuah chu arawn la thut a, ka chuh let nghal rap rap. Khhum mawng lamah a thehthla ta daih a. Min hnaih chu ka duh chuang lo. Ka rilru a hria aniang, khumah chuan rawn tlu vein ka hnunglam atang hian ka dulah min kuah a, ka ban pahnih a kuah tel daih vangin ka ban chu ka hmang tangkai thei tawh lo. A bawpin ka bawp pahnih a kherh bet ta tlat bawk a. Che thei tawh lo chuang chuan ngawi rengin ka la tal laih laih reng a, min kuah nghet telh telh thung.
.
Nui chhuak hawkin ka biangah min fawp a. "I luhlul zia ka hre ta chiah." a hmuiin ka biang a si reng chu duh lovin ka lu ka tiche a. "I duh duh min zawt rawh. Zep awm lovin ka sawi ang. Mi dang lak atanga ka chinchin i hriat ka duh lo. Hriat duh i neih zawng zawng chu keiman ka hrilh ang che." a tawng zawi em em naa hmai insi renga kan awm vangin a tawng chu ka hrechiang vek. Tunah chuan titi turin ka lungawi tawk lova engmah ka sawi lovang.
.
Ka  ngawih reng vang chuan min kuahna chu thlahin ka sirah a mu thla a, min kuahna a phelh ta bawk. Min thlah rual rualin khum atang chuan ka tho a. A phun hluk ri chu ka hria a, eng nge a sawi ka hrelo thung. Bathroom-ah ka lut a, engmah tihtur ka nei chuang lo, ka ding reng ringawt.
.
Bathroom kawngka rawn inhawng in tim hmel deuh hian arawn lut a, ka bulah arawn ding a.
.
"Vawiin chu ni nuamlo tak ka hmang a, khapa lo awm leh zel khan ka thin a tirim zual anih kha." min hmachhawnin min en a, ka bianga rawn khawih a tum chuan ka kutin ka lo dang vat. "I hmui kha chu ka fawp dam leh ang!"a nui suk chu ka melh pawk ringawt. Bathroom atanga chhuah tumin ka kal a. "Min tlansan rei thei chuang lovang."atih chuan ka ding leh chawt.
.
"Engvangin? Ka tlansan rei theilo ang che maw?"
.
"Um.. Engtin nge ilo ngaih a? Eng chena rei nge min tlanchhiat san theih i inrin?" hetiang khawpa a chian theih nan leh a tawng huai theih nan hian kei hian ka duhna hi ka thup lo leh lutuk em ni?
.
"I in ngaisang mah  mah anih chu. Min lo en rawh." ka tichang rat a. Tlawm ka inti ru em em tawp. A hmel chu en duh tawh lovin ka inher zui hmak.
.
"Whoa__I ngaihthlak dan a diklo. Ka umzui zel dawn che avangin min kalsan thei lovang. Ding teh. Hetianga i awm chuan hreawm ka ti a nia." ka hnunglam atangin min rawn kuah a. "Venhim che ka duh. Hun liam tawh vangin kan inkarah engmah thlentir lo ang. Ka hmangaih che!"
.
A tawngkam hnuhnung ber vang chuan ka nghing dawt! Sawitur reng reng ka hrelo. Kei hian ka hmangaih ve em? Ka hrelo, ka hre ngam lo a ni zawk mah.
.
"Min kalsan inpeih at renga awm hmeichhia hi ka chelh tlat dawn a nia."
"Tuin nge ka inpeih at tih sawi a?"
.
"Tunah khan ka mitin ka hmu zo chiah anih kha.." alam hawi tura min kuai herin ka biang tawn tawnah a kutin min dawm a, a kutzungpui chuan ka biang a khawih hauh hauh bawk a. Thil dang sawi lova thaw huaiin min kuah a.

"I rilru-a awnlam i neihsa chuan tawngkam pangngai pawh ngai kawiin  i haw zel dawn asin." A thusawi chu a dik chiang em a ka chhang buai ngam lo.
.
"Engmah min zawt dawn lo mi?" a tih leh chuan ka lu ka thing a. Tuna zawhna chi hrang hrang inzawh nghal chuk chuk hian awmzia a nei lo tih hi ka ngaihdan a ni.

A riltam thu a sawi hnuah in chungah chhovin eitur ka tilum nawn leh a, ka tawng tam lo khawp mai. Ka rilru a buai thar leh ta anih ber hi.
.
Chaw kan ei kham fel chuan chhuanlam siamin in hnuaiah ka chhuk thuai a, Remtluanga pawh hnathawh tur a neih thu sawiin in chung lamah a chho ve bawk a. Hna a thawh zawh hunah a lo chhuk ang tih a sawi chuan ka bu nghat ringawt.
Thil ka ngaihtuah kual vak vak a, darkar thum vel dawn hnuah pawh Remtluanga thawm a la reh. Ka nghak pawh a ni chuang lova, ka sawi ve mai mai anih hi!
Dar engzat ah chiah nge ka mutthilh ka hre lo, ka harh chuan Remtluanga nen inhmatawnin kan lo mu reng a. A ban chu ka kawngah nghatin a la muttui hmel khawp mai. Tiharh duh lovin a ban chu dimtein ka dah sawn dawn a, min kuah nghetin harh chiang mang lo hian a phun nuah nuah a. Eng emaw chen ka mut leh hnuah ka thawhsan ta tho.
.
Dar 7 rik dawnah choka-ah arawn lang hlawl a. A nghawng tiche kualin a hmel chu a hlim hmel angreng.
.
"Good morning."
"Good morning."
Dawhkan ah a kiu nghatin a thu a, min en reng tih ka hria.
"I mutthilh laiin i va'n ang zau ve."
.
Karei leh! A tawng ka hriat ruala ka hmel min hmu theilo chu ka lawm lutuk. Nula muhil ang zau deuh.. Hmpp__ Eng  nge pawi?
.
"Ka hnar chauha ka hipluh ka kham lo ani mai lawm. Eng nge..??" inherin ka en a, ka chhan dan chu a beisei lo lutuk tih a hriat. Za lutuk hian a nui hawk hawk a.
.
"Lo kal hnai teh."
"I awmna atang khan ang phuauin min lo en mai rawh.."
.
"Nang te hi.."
.
A thutna thawhsanin min rawn kuah a, kan infawp leh ta nge nge.
.
Hnathawk tura a chhuah hnu chuan kei pawh kal tumna neisain ka chhuak a, ka kal chhuak dawn tih Remtluanga ka hrilh hran lo. Ka thiltih zawng zawng hi hrilh vek a tulna ka hre lova, a thiltih zawng zawng hriat vek pawh ka tum chuang lo. A pawimawh chin leh ka duh chin ka hrilh chuan a tawk mai.
.
Sangtea chenna in kawtah dingin a in chu ka thlek vang  vang a, he in hian min rap tlat tih leh engvanga min rap tlat nge anih ka hriat lo thu ka sawi tawh kha.
.
Gate lian pui chu nemin a inhawng ri tawt tawt a, gate hungchhung tualzawl zau takah chuan ka pen lut ta. Ka tiril khur der der chu a nasa sauh mai lehnghal. Sangtea chu pawn atang hian ka au mai dawn em tih ka ngaihtuah laiin ka lam pan hian hmeichhe naupang kum 2/3 awm vel hi arawn tlan terh terh a, a hnungah nu pakhat hian hlim taka  nui chungin arawn um a. Hlim takin a nui ka ti ringawt a, a a nui ri ka hrechiang a a hmel erawh ka hmuchiang lo. Naute chu a tlu palh ang tih hlauin a ke chheh dan ka lo en ngar ngar vang pawh a niang.
.
"Anu lamah lo tlan rawh le..." tia auvin a ban pahnih chu naute lamah a phar chhuak a. Naute chu a nu lam pana tlan let lehin anu bul a thlen hma chuan anu chu a let tawp a.
.
"Ni lo.." te thawtin naute nu lamah chuan ka tlan a, naute chu mangang tak hian a lo tap ve bawk a. Naute hmel ka hmuh chuan ka awm dawmin ka ding khawng nghal awt mai! "Keimah maw!" tiin ka phun sap a, thunun ngaihna awm lo khawp hian ka khur nghal hlawk hlawk mai.
.
"Eng thil nge? I tha em?" Ka hmai zawna Sangtea'n chiang taka min en chuan ka mit ka khap zawk zawk a.
"Khawnge? Nichina naute kha?"
.
"Huh?? Eng naute maw? Khawi, in chhungah lut phawt ang." ka thakhur nasa lutuk vang chuan ka pen hleithei lo. Nichina naute kha keimah ka ni!
.
"Eng thil nge maw i hmuh le? Infiamna chi loh emai." Sangtea chu a nui deuh. Ka fiamthu emaw a ti anih ngei hi. Ka tawng thei lo. Ka hmui a khur vek.
.
In chhungah min kai lut a, in chhung chei dan ka hmuh chuan ka maimitchhing ta ringawt. Hetiang thil zawng zawng hi mak takin ka hmuh hnu vek a ni! Pawna ka thil hmuh tak zawng zawng nen khan ka ngaihtuahna ka hmang thiam lo.
.
Sangtea'n tui in tur min rawn pe a, ka kut la khur dar dar chung chuan no chu lain ka in hlek a. Ka taksa tang mar tlat chu inthlahdul theih ka duh hle.
.
"He in hi ka hre tawh." tiin ka phun sap a.
.
"I hria ang chu. Ka in alawm. I vawikhat rawn luhna tiraw? Ahma khan ilo kal duh tlat lova." a ngawi leh deuh a. "Chuan, ilo kal chhan han sawi tawh la?"
.
"Nakinah ka lo kal leh ang. Ka va haw leh phawt ange." tiin ka tho thut a, Sangtea chuan min hnial ngaihna pawh a hrelo aniang ka hau hian min en tawp a. In atang chuan ka kal chhuak hlawk hlawk mai.
.
He in chungchang hi ka hriatchian phawt angai. Sangtea kha ka zawt thei lo. Mak a tih dawn bakah a in chungchang thil mak niawm taka zawh vel chu ka thei lovang. Remtluanga'n engkim a hriat ka ring.
.
In ah ka haw a, in ka thlen veleh inthlak zung zungin Remtluanga lo haw hun ka nghak a. Ka vei kual sek ringawt.
Sangtea in kawta ka thil hmuh kha__ka hmu chiah em? Ka ngaihtuahna mitthla mai a ni angem? Naute nu kha ka nu anih chuan... A ni thei lo.. A hmel pawh ka hmu lo. Kum 2/3 lek ka nih laia thil thleng anih chuan tunah engtin nge ka hriatchhuah thut theih?  Sofa-ah thuin ka ngaihtuah ngut ngut a, ka tap bawk a. Awmngaihna ka hre hlawl lo. Ka rilru a buai tih piah lam a ni.
.
Door bell ri ka hriat chuan ka mittui hru sawk sawkin kawngka ka hawng a, Remtluanga hmel ka hmuh chuan ka tah a chhuak zual ringawt. In chhung arawn luh hma hmain ka kuah thlawp a. A hmel lo en chiang hmasa ila tha tur!
.
Ka kuahna chu phelhin lungawi lo lutuk mitmeng hian min en a, a bag atang chuan lehkha rawn lek chhuakin "Heihi eng thil nge?" a ti hriam hraih a. 
JADE
(Soddisfazione)
.
Thantei_LauraSean
.
CHAPTER - 18
.
RECAP
Door bell ri ka hriat chuan ka mittui hru sawk sawkin kawngka ka hawng a, Remtluanga hmel ka hmuh chuan ka tah a chhuak zual ringawt. In chhung arawn luh hma hmain ka kuah thlawp a. A hmel lo en chiang hmasa ila tha tur!
.
Ka kuahna chu phelhin lungawi lo lutuk mitmeng hian min en a, a bag atang chuan lehkha rawn lek chhuakin "Heihi eng thil nge?" a ti hriam hraih a. 
.
.
VASPI*
.
Lehkha ah chuan eng thil nge inziak ka hrelo. Chu aia min tibuaitu chu a mitmeng zawk chu a ni.
.
"Eng nge a?" ka ti tham chal a. A hmel en duh tawh lovin a kuta a lehkha ken chu ka en lui tlat a, a thu inziak chhiar thei tur khawpin ka hmufiah chuang lo. A mitmeng mak deuh en ai chuan tiin ka hawisawn ve tawp zawk a ni.
.
"Engvanga lo ti nge i nih?" a ti leh a, a aw chu ala hriam hraih reng. Vawiin ka thil tawn chauh thlak lutuk nen hetianga inhnial buai hi ka mamawh hlawl lo. "Min chhang rawh." a ti leh hrawk a. Ka la chhang chuang lo. Eng chungchang nge tih pawh ka hriat loh chu engtin nge ka chhan theih ang?
.
"Eng thil nge ka tih chu?" ka ti leh a. A ngawi ta reng. A chhan pawh ka hriat lohin ka tah a chhuak ut ut a, ka insum ngar ngar. Ka hrawkah a inhnawh tlat lehnghal. Ka maimitchhing a, ka mittui a luang zawih a. Ka hru rang khawp mai.
.
"I tap elaw? He thil vang hi a ni em? Ka hriatchhuah vang hian i tap ringawt amaw?" a aw chu a la dam vak chuang lo. Ka hmai zawnah paper chu arawn lek kang leh a, ka lu ka thing nawk nawk ringawt. "I tanpuina ka mamawh tih ka sawi em? He thil hi ka mamawh lo! Hetiang thil tithei tur hian ka eng nge i nih?"
 Ka sawi thiam dan in, a tawngkam chuan ka chhipah min chhu sawkin ka hniam deuh sulh hian ka inhria. A point-ah a lut ta alawm. A eng nge ka lo nih? A hria emaw hrelo emaw ka thei anih chuan lo tanpui chu eng nge a sualna. Khirhkhiap leh lutuk mai! A tawngkamin min deng na lutuk chu ka hmelah a lang a niang chu chik zawk hian min en leh a, a tawngkam chu na ka ti lutuk tak zet.
.
"Engmah! Engmah ka ni lo. I duhlo anih chuan ka la let leh ang. A tha em? I lungawi em?" ka ti nawk nawk mai. Ka kalsan nghal bawk. He in hi ka chhuahsan nghal bawk ang. Ka rilru buai lutuk hi ka a thei dawn takngial in ka hria.
Mumal lo zet hian in hnuai lamah ka chhuk a, a phone ri leh a chhang thawm chu ka hre hman rei ruai. Pindanah lut rawk rawkin kawngka ka khar a, ka kalh nghal bawk. A rawn lut duh anih chuan ahma ang khan chahbi hmangin a hawng leh tho ang. Bathroom-ah ka lut tlang a, ka kalh leh a. Hei chu chahbi hmangin a hawng thei lo.
Eng ber nge ka tih dawn? Ka thawmhnaw khung khawmin ka kal chhuak nghal  mai dawn em ni? Bathroom kawngkhar chu nghengin ka thu hnawk a, ka thawk dan a dik lo. Ka mit ka chhing a, chhuna ka thil hmuh bawk kha ka hmu nawn chuai chuai a. Hlau lutuk in ka te thawt tih ka inhria. Hetianga awm hi ka duh miah lo. Ka lu arawn na vawt vawt a, chhuatah chuan ka tlu tih ka inhria. Thil vawt nguai hian min tuam hlup niin ka inhre bawk.
.
Kha le! Hmeichhe naupang bawk kha arawn tlan leh ta. Hmeichhe naupang hmel chu chiang takin ka hmu a, anu kha__ahmaa ka hmuh ang chiah khan a tlu leh a, hlau khur dawt dawt chung hian naupang bulah chuan ka ding a. Leia tlu reng nu chu a hmel ka la hmuchiang thei chuang lo. A lu atang chuan thisen a chhuak a, ka hmu chiang lutuk. Ka hnunglam ka en a, hmeichhia lo ding ka hmuh chuan mak ka ti lehzual. In chhung atangin mipa ruangam arawn chhuak a, thawm ring tak a rik leh thuai rualin mipa ruangam pawh chu a tlu tawp a. A tluk pah chuan chiang lutuk hian a lu chu step hriam laiah a sawh chawrh mai. Ka piaha hmeichhia ding ka hmuh chuan naute chu panin a pawm kang a, hmanhmawh takin a kalsawnpui hlawk hlawk a. Chu hmeichhia chuan naute pawm lovin keimah min pawm niin ka hre bawk.
.
Ka thaw kawk kawk a, thil vawt thlur min tuamtu nia ka hriat chuan muangchangin min kiansan a. Zawimuanga meng chhuakin bathroom chhuatah ka la mu reng tih ka in hria. Tuna ka thil hmuh kha thlarau lam thil emaw thilmak tihlam a ni lo! Ka hria tih pawh ka inhriat loh ka hriatrengna thenkhat arawn let a ni zawk. Nu leh mipa inchhung atanga lo chhuak ka hmuhte kha ka nu leh pate anni ngei ang. An hmel ka hmuchiang theilo kha thilmak a ni lo. An thlalak vawikhat pawh ka hmu lova, chiang takin ka hmu theilo mai a ni.
.
Muangchangin ka thuchhuak a, min pawm sawntu hmeichhia kha ka u, Ludy ngei ani tih ka chiang. Lungchhe lutuk hian ka tap ta zawih zawih a. Ka nu leh pa an  hmel pawh ka hriat chian theih tawh loh leh ka u, thil rapthlak tak atanga min chhanhimtu ngaiin ka tap a ni ta ber. Mahni inkhawngaihna chauhin ka rilru a luah bawk.
.
"Lo hawng teh. Vaspi??" bathroom kawngkhar na lutuk a rawn inchum dawt dawt ka hriat chuan ding chhuak thutin kawngkhar chu ka hawng a, Remtluanga chu hmulo ang hmiahin ka kal pel a. Tunah hian Sangtea ka hmuh a tul. Remtluanga hi chu ka be thei rih lo.
.
"Eng thil nge thleng? Min ti mangang lutuk." a thawk dan atangin thudik a sawi ngei tih a hriat. Eng thil pawh thleng se eng nge a lo buai ve na tur awm? Chhang lovin ka kawrlum lo awm hnai ber chu la lawpin ka ha sawk sawk a.
.
"Eng nge itih dawn? Bathroom-ah khan darkar khat chuang i inkhung tih i hria em?"
Ka kal chhuak tur chu ka banah min pawtlet a.
.
"Ka buaina hrilh tur chein i eng nge ka nih?" ka ti chang fawl mai. Beidawn hmel zet hian dak zawkin min en leh a. Dik tak chuan tlaiah khan amah hi engkim a hriat ang ang min hrilh turin zawhna zawh ka tum ngei alawm. Ka buaina leh ka hriatna lo let mak tak takte hi min chinfel pui theih ka beisei em em anih kha.
.
"Thu phawt teh ang."
"I duh chuan va thu rawh. Keichu ka kal chhuah angai."
"Ka sawi ang chuan awm phawt teh."
"Eng vangin?"
"Sawi dun tur kan neih vangin. Min nawr nasa lutuk lo ang che. Ka hmangaihna che hi i duh dan dana min thunun nan hman tum suh." a tawngkam chu in lo hria em? He mihring hian thunun ka tum niin a inhria anih chu!
Min vawnna chu thlahin khum awmna lamah a kal a, ka zui ngei dawn tih a inhria a ni tehchek ang chu a rawn hawilet miah lo. Ka zui ta nge nge.
.
Khumah chuan amah hlat thei ang berin ka thu a, a tawng hun ka nghak tawp.
.
"I buaina chu han sawi hmasa la." a ti nghut a.
"Sawi tur ka nei lo. I lehkha rawn hawn chungchang kha chu i duh loh chuan ka la let ang tih ka sawi tawh kha."
.
"Engtin nge khatiang thil kha itih theih?"
"Eng thil thalo  nge ka tih?"
"Nupa kan la ni lova, chuti chung chuan hmeichhiain mipa min tanpui a nia. Ka pawm thei lovang."
.
"I pawm theih loh chuan ka la let ang tih ka sawi mawlh mawlh chu."
"Harsa taka i lo khawl pawisa chu awlsam takin ka hmang thei lo alawm. Ka sawi chu hriatthiam tum teh. Ka tan a zahthlak hle bawk."
.
Chutiang chuan maw a lo ngaihtuah. Mipa leh a chapona.. A thlirna atang chuan a dik tho mai. Mahse, tinge tawngkam na lutuk khan min tawng khum kher.
.
"Chutiang zawnga i ngaih chu ka ring miah lo. Ka hrilhlawk che chuan i pawm duh ka ring lova. Ka khawngaih vang che a ti ka ni miah lo. I tan ka lo tangkai ve thei anih chuan__" sawi zawm dan hre lovin ka ngawi ta daih a.
.
"Lo hnai teh." a tih rualin ka hnaih pawh ngai lovin min rawn hnaih a, min kuah a.
.
"Keimah vangin i sum khawlsa i hmang tih ka hriatchhuah hnuah Ramngaihsanga hmu turin i kal tih ka hre leh a. I lakah hian engvanga thinrim hma em em nge ka nih ka inhre biklo. Ramngaihsanga saw i ngaina viau em?"
.
A tawngkam hman na lutuk vang khan ngaihdam min dil a tum miah lo. He mihring hian ngaihdam a dil ngai lo a ni ngei ang chu.
.
"I eng nge ka nih tih chungchang kha?"
"Kha kha chu__theihnghilh rawh. Ka thinrim vang anih kha."
"Mm_ I thinrim apiangin i lakah eng nge ka nih tih zawhna ka dawng ziah dawn anih chuan_"
.
"Chutiang a ni lo. Aw le, a tha e. Ka tihpalh! Ka zawhna che ila chhang lo. Ramngaihsanga saw i ngaina viau em?"
.
"Dik taka chhang tura min beisei chuan 'Aw' tiin ka chhang ang che." ka sawi zawh rualin min kuahna a thlah hmiah. Eng vanga Sangtea hi helh em em nge maw anih le?
.
"A chhan ka hre thei angem?" a ti chhum hmuk a.
.
"Kan inhriatna a rei tawh. Ka u damlai-a kan unau thiantha ania__" NI LO! KA SAWI LOH TUR KA SAWI TA!
.
"I u maw? U i neih thu ka hre ngai miah lo. Ani chu tunah khawiah nge a awm?"
Ka ngawi hmak. Thil dang sawitur ka ngaihtuah a ngai.
.
"Kal chhuah ka ngai tak tak a nia. Ka lo haw har lovang." ka ding a, a ding ve nghal.
.
"Ka lo hruai ang che."
"A ngai lo. Ka lo haw har dawn lo."
.
"Zan a ni tawh tih i hria em? Mahni chauhin i chhuak lovang. Chuan, kan la sawi zo lo."
.
"Sawi tur ka nei tawh lo." ka ti ta ringawt.
.
"I nei tih ka hria alawm. Tunah Ramngaihsanga in ah a awm lo tih ka hria. Kal mah la, i kal thlawn tho ang."
.
"Eng tin nge i hriat?" Eng tin nge Sangtea hmuh tumin ka kal dawn tih a hriat theih a?
.
"Tlaiah khan min lo bia a. A in-a i va kalin i awm danah ngaihthatlohna a neih thu min lo hrilh alawm. A ngaihtuah khawp mai che." a thusawi tawp lam chu a  bung nghat nghat khawp mai. "Ramngaihsanga bula i sawi theih ka bula i sawi theih loh chu eng thu nge tih ka ngaihtuah mek anih hi." a ti leh a. A bulah hian sawi ta ila..
.
"Tlaia i lo haw khan hrilh che ka tum a, tunah chuan angai leh tawh lo mai." Min en tawp. A hmel atangin a ngaihtuahna a thup hneh leh lutuk tawh. "Mutthilh phawt ka mamawh in ka hria." amah chu kal pelin ka kawrlum hak ka phelh a, khumah chuan ka mu nghal a. Mutthilh tumin ka maimitchhing nghal. Tuna ka duhthusam awm chhun chu mutthilh nghal hmak theih a ni.
.
Sawifel tur, sawi theih loh, a laka zep ka la ngah lutuk. A bulah hian sawi ila amah ka hnaih chhan zawng zawng pawh sawitel vek angai ngei ang. Chu thil chu ti ila ka u chunga thil thleng thu dik ka hriatchhuah loh phah thei! Awm dan tur dik leh tha ber pawh tunah chuan ka tan hriat a har rih lutuk. Keimah vek hian thil ka tibuai hnawk zo vek ni berin ka hria.
.
REMTLUANGA*
.
A pindan chu chhuahsan lovin khum sira chair-ah ka thu ngawi reng a, rei vak lo hnuah a thawk dan atang chuan a muhil ta niin ka hria. Khumah chuan lawn kaiin a hmel chu ka en reng a, hetiang khawpa hmeichhia derdep hmel ni si hi chhungrilah chakna thuruk mak tak a nei si.
.
Tlaia alaka ka tawngkam vang khan keimah leh keimah hi inhnek mawlh mawlh ka duh hial. Ramngaihsanga rawn sawi ang khan buai rukna a nei ngei ang tih chu ka ring. Ramngaihsanga hnena a sawi theih ka hnena a sawi theih siloh chu eng thil nge tih ka ngaihtuah ngat ngat a ni. Tlaia min lo kuah leh a hmel, tap nasa tih hriatreng hmel hmu chung khan hnem lovin ka buaina chiah ka ngaihtuah a. Dik tak chuan ka ngaihzawng hmeichhia, keimaha innghat tur ni zawkin ka hriat miah loha min lo tanpui reng kha tlawm thlak ka ti em a ni. Min hrilhtu min hrilh danin a zir loh vang pawh a ni pakhat ang chu.
.
Darkar khat chuang zet thawm mak tak nei chunga bathroom-a a inkhung khan ka hlauhthawnna nasat zia chu tawngkama sawifiah theih pawh a ni lo. Naktuk hna hmasa berah bathroom kawngkhar hi chhe awlsam thei deuh tura siam angai bawk ang chu!
.
Vaspi muhil chu kuahin ngaihdam ka dil mawlh mawlh a. Ngaihdam ka dil chhan chu eng vang ber nge pawh ka hre lo. Thil tam tak vang a ni ber ang.
.
Zinga ka harh chuan a lo mu tawh lo. Rang zetin ka tho a, inphihfai sawk sawkin in chung lamah ka chho nghal a. Choka-ah a awm ringin choka lam ka pan a, tuk dang a ang lo. Ngawi reng hian eitur a siam mawlh mawlh a. Tuk dangah chuan a zai rat rat thin kha a nia. A awmdan atang chuan ka thawm ala hre miah lo tih ka hre mai. Zingah ka thawh veleh amah kuah hi ka lo addict hman reng tawh tih hnunglam atanga ka kuah chuan ka inhrechhuak zawk. A phu zawk mai! Heipawh ni dang ang a ni lehpek lo. Amah hi ka chik lehzual angai niin ka hria.
.
Tukthuan chu ngawi rengin kan ei a, kan inmelh fuh chuan a nui lui sak ringawt a. A awmdan hian ka ngaih a titha thei ta hlawl lo mai.
.
Tukthuan kan ei kham chuan a thlengsil ka pui a, chhunah tihtur a neih leh neih loh ka zawh pawhin min chhang mumal lo. A bula ka awmreng lai pawh hian hmun dang daiha cheng ang mai hian a awm tlat. Thil diklo a awm ngei a ni. Nizan khan U a neih thu a sawi tak e. Vawiin hian ka hriatchian ngei angai ang.
.
Office ka then veleh thil dang buaipui lovin Vaspi hrechiang tur nia ka rin ka bia a, ama sawi ang ngei khan unaunu chu a lo nei ngei e. A unaunu chu tunge anih ka hriat chuan mak tiin ka phu dawrh a ni ber. Ludy ngei kha Vaspi u a lo ni reng a! Kum eng emaw zat liam ta a thil thleng kha ka ngaihtuah chhuak lo thei lo. Nilengin hna ka thawk lova, ka ngaihtuahna a vak kual nasa lutuk. Engtin nge ani nen khan unau annih theih? Zawhna tam tak ka chhan theih si loh ka inzawt nawn tluk tluk a, awmzia a awm si lo.
.
Hun reilote chauh a ral emaw ka tih chhungin khua a lo thim dawn der mai. Office atangin ka chhuak a, rilru rit ru takin in ka pan ding nghal vang vang a. In ka thleng a, in chhung light engmah a in on lo tih hriat tak hian in chu a thimin a reh thap mai. Zinga in ka chhuahsan dawn khan Vaspi khan chhuah a tum thu a sawi lova, in-a awm nileng turin ka ngai ngawt a, khawiah emaw chhuakin a la haw lo anih ka ring.
.
Kawngka bul ka thleng a, a inkalh lo. Hlauthawng ru deuh chungin kawngka chu ka hawng a, in chhunga ka pen luh rualin light ka on nghal bawk a. Ka beisei loh zet hian Vaspi chu a lo awm tawh reng. A ngaihtuahna a kal ding hle tih hriat reng hian a thu ngil auhin a en ngai a en ngar ngar a, ka lut thawm chu a hre miah lo a niang; a che eih lo.
.
Zawimuangin ka pan hnai a, a hmazawna ka din chuan rawn hawichhuak chuang miah lo hian "Sawi dun tur kan nei." a ti nghet charh a. Kan sawi dun tura a duh thil chu ka hriain ka hria.
.
"I hria tiraw? Amah kha i hria?" rawn hawichhuakin chiang tak hian min en a. Eng thil nge a sawi leh dawn ka ngaichang phawt.
.
"Ka u kha i hria? A chungah khan eng thil nge thleng? Engkim i hria?"
.
Engtin nge min zawhna chu ka chhan ang? Sawi tan dan tur pawh ka hrelo. Sawi tur ka nei miah zawk pawh a ni maithei. A hmel chu ka en a, phat rual lohin ka hlauthawng a ni. Ka hlauthawng tak zet!
JADE
(Soddisfazione)
.
Thantei_LauraSean
.
CHAPTER - 19
.
VASPI*
.
Remtluanga in atanga a chhuah hnu rei vak lovah in chhuahsan ve in Sangtea chenna hmun ka pan a. Ka hlau emaw hlau lo emaw thil awmzia hriatchian ka duh chuan ka paltlang ngei ngei a tul. Ka aiawhin tuman min hriatchhuah sak dawn lo.
Gate pawna ka din atang rengin ka chhungrilah ka khur a, insehruh teuh chungin gate chu ka kal tlang a. Kawt zawl zau takah chuan thil eng emaw hmuh leh in beiseiin ka hawi kual ngam lo. Ka kal hmawk hmawk a.
.
Door bell ka hmet a, rei nghah ngai lovin kawngka a rawn inhawng a. Sangtea'n ka min hmuh chuan thaw huai hmel a pu nain a hahdam hmel loh khawp mai.
.
"Engtin nge i lo kal theih zawk a? Nizan khan Remtluanga ka bia a, helai hmuna lo kal lo tur hian a hrilh lo che a nimaw?" eng vangin nge ka thiltih apiang hi Remtluanga nena sawi zawm a nih zel? 
Helai hmuna kal lo tur hian min hrilh lo. Zingah pawh khan min thlahlel takin min kuah a, amahah danglam engmah a awm lo. Danglam zawk chu keimah hi ka nia. A bula ka awm pawhin amah ka ngaihtuah hleithei lo anih kha.
.
"Tuna ka buaina leh Remtluanga hi sawi zawm nachhan tur a awm ka hrelo." ka tih chuan chik zet hian min en a, engmah a sawi lo. Bu nghat  nghatin thu turin min hrilh a.
.
Sangtea ka pan chhan hi nimina ka thil hmuh vang kha a ni. In hi engtin nge a ta anih theih tih hriat ka duh a, he in neitu anih hma hian tute nge cheng thin tih pawh hriat ka duh. In chhung chu ka melh kual a, ka tana thil thar awm chu tlemte chiah a ni.
.
In tur kengin Sangtea chu a lo let thuai a, ka hma zawn sofa-ah chuan a thu a.
.
"Ilo kal chhan chu han sawi rawh le. Nimin khan ka ngaihtuah viau che a. Nizan i mu tha em?"
.
"Mu tha e. Thil zawh che ka duh a. Awm lo min tihsak loh ka beisei."
.
"Han sawi la?" tiin a in tur ken chu a in zauh a.
.
"He in hi ita anih hmain hetah hian tute nge cheng thin i hria em?' ka zawhna a hriat chuan mak a ti 
ru viau tih ka hria. Inthup tum mah se eng emaw chen chu a mizia hi ka ve alawm.
.
"Ka rin loh lam daih min zawt. Min zawh takah chuan he in chungchang hi tu hnenah mah ka la sawi ngai lo tih ka ngaihtuah chhuak chiah a ni. Ka nuhrawn min pek a nia, ka hre thui lo khawp mai. Min  zawh chhan ka hre thei angem?"
.
"Ka duh ka zawt kim phawt thei che angem?" ka ti ve thung. A bu ban deuh chat a. A rilru a buai ri hle tih a mit atangin ka hre thei. Nimina ka awm dan ngaihtuahin a ngaihbel ve pawh a niang.
.
"In chhung chei dan hi__"
.
"Heihi i hriat duh a nih ka ring. In chhung chei dan hi he in a ka awm tirh atangin ka thlak tam lo. 
Ka duhzawng tak a nih vang hian thil tam zawk hi ka tuaihnum tawp a, engmah ka thlak lo tluk a ni. I duh danin ka chhang che em?" a nui lui hak a.
.
"Duh dan hran pawh ka nei chuang lo." tiin za vaklo hian ka nui a. Zawhna erawh ka la ngah hle. "In neitu hmasate thlalak emaw thil dang mimal thil neih ang chi hmuh tur a awm em?" ka ti leh a. A rilru tibuai rutu chu a thup thei ta lo a niang, ka lamah rawn thu awnin mitmeng buai nak hian min en a,
.
"Naute i hmuh thu i sawi kha i fiamthu a nilo tih ka hrethiam ta. Nimin khan mak ka ti tawh reng a ni. Remtluanga__"
.
"A hming chu sawiri tawh lo teh. Hetiang zawhna abula ka sawi duh loh vang alawm ka rawn pan che. Khawngaihin engkim min hrilh teh. Rilru buaia awm hi ka ning tawh lutuk.." ka tita thlawt a. "Min tanpui thei angem?" ka tih chuan a sira dawhkan te-ah chuan a no ken chu dahtha te tein a thutna a thawhsan a, ka hmaah arawn thu hniam a. Ka no ken chu lain a sirah ka dah leh a, ka kut pahnih a hum kawp a. A awm dan chu mak ka ti.
.
"A tir te atang khan i thiltih zawng zawng hi Remtluanga nen a inzawm vek tih ka hria. A in-a hnathawh i duh chhan te, inchei danglama party kal a tul chhan te__Tuna i thiltih  mek pawh hi Remtluanga hnaih i duh vang leh hriatchian i duh vanga ti ini tih ka hria. Engkim hre vek chungin hnaih lo turin ka duh che a ni."
.
A tir atanga engkim a hria a nih chuan Sangtea hian min haw hle tur a ni lo em ni? A farnu, piang hmun chiah nilo mah se Duhsaki hi a farnu a ni tho a, a lainat ngei ang. Keimah vanga Remtluanga nen inthen an nihna chin a awm tlat a ni. Engkim hre chunga Remtluanga hlat tura min duh chhan chu hriat ka duh.
.
"Engkim i hre chung pawha Remtluanga ka hlat i duh nachhan chu hriat ka duh." ka ti tawl mai.
.
"Hnehna i chan dawn chuan loh vangin."
"I sawi awmzia chu ka hrethiam lo."
"A hun a thlen phawt  loh chuan i harhchhuak lovang. Tunah pawh hian i thiltih chhan theihnghilhin i hmangaih tawh hial ang chu." ka kut a vawn chu thlahin a ding hluai a. Remtluanga ka hmangaih leh  hmangaih loh sawina hun pawh a ni rih lo. A thusawi a ka  ngaih pawimawh chu heihi a ni zawk-
.
"Mahse, engtin nge ka tih chhan i hriat? Hetiang thil zawng zwng ka tih chhan i hriat chuan ka u chunga thil thleng dik tak pawh i hre ngei ang." a hmel ka en tlat a, nuam ti lo leh pha deuh hmel ka hmuh chuan ka duh hre turin ka nawrlui thei tih ka inhria. "Bakah he in chungchang ka zawhna che kha min la chhang lo." ka ti leh a.
.
"Thil zawng zawng hre turin ila inpeih lo niin ka hria. Vawilehkhata engkim i hriat hi itan a tha ber lo." a hmel chu a thutak em em a ni tawp.
.
"Hmeichhe puitling, mawhphurhna la thei ka ni tih i hria alawm."
.
"Tho rawh. Hmun pakhatah ka hruai ang che." a ti leh ringawt a.
.
Keimaha ka thutna ka thawhsan hun pawh a nghak zo lo. Ka banrekah  min vuanin ka thutna atang chuan min pawt tho a.
.
A car kawngkhar min hawnsakin a rawn thu lut ve thuai a, khawilam nge kan pan dawn ka hre hauh lova, zawh buai pawh ka tum  hek lo. Thil thleng tur chu engpawh nise, eng thil pawh tawk dan ila ka rilru ka lo inbuatsaih lawk a tha ang.
.
In pakhat zawnah dingin car kawngkhar min hawnsak hun nghak lovin car atang chuan ka chhuak thuai a. 
He in ah hian tunge cheng ang le? Ka kal pel fo thin a, a chhunga ka len luh ka ring ngai lo. Ka ring lo chauh pawh a ni lo, ka ngaihtuah ngai lo hrim hrim  zawk.
.
Sangtea chuan door bell a hmet a, rei vaklo hnuah kawngka a rawn inhawn chuan in chhungah kan lut a. Kawngka lo hawngtu kha ka hmelhriat a ni lova, mak tihtur engmah a la awm lo. Mahse, sofa-a lo thu ka hmuh chuan tunge kan hmuh dawn ka hre ta chiah.
.
"Ka hmelhriat hnu in va ang ve?" nui chunga ding chhuakin min rawn pan hnai a. Ani ber kher hi engvanga pan nge kan nih ka lo ngaihtuah thung. Thil ni thei awm anga ka rin ho chu reilote chhungin ka ngaihtuah kim hman vekin ka hria.
.
Thutna tur min kawhhmuh ah chuan Sangtea nen kan thu a.
.
"Ludy chunga thil thleng hriatchian duha lo kal kan nia." Sangtea a tawng tan chauh a, a thusawiin Remruata a nghawng zia chu haider theih a ni lo hulhual. A dang sawp sawp mai alawm.
.
"Ani chungchang chu engmah hriat ka nei hleinem" a ti tham tuak a. A tawngkamin pha mah se a hmel lan dan chuan eng emaw chen a hria ang tih a lang reng.
.
"Thudik sawi hun ani tih ka sawi lang ve hrim hrim ang. Ani hi Ludy nau a nia. Kan pahniha kan lo kal chhan chu i hrethiam maiin ka ring. Ludy nen khan in inzui thin tih pawh phat buai angai lo a nia." Sangtea aw chu a lang dam thlap nain chhanna mumal hmu lova in hi chhuahsan a tum lo hle ang tih a chiang thung.
.
"Ah! Sawi tur atam lo. Kan inngaizawng ve tawh tih in hriat chuan a tha anih chu. A bak engmah sawi tur a awm lo."
.
"Nikum tawp lam khan Ludy a boral tih i hria ang chu tiraw?"
.
"Hria e. Ka hria alawm." Remruata chuan khur dur dur chung hian a kut a hum ruh a, sawi duh loh chin a nei ngei ngei ang.
.
"Engtin nge i hriat?" ka ti boh a, min melh zawk chauh ringawt.
.
"Ngawi teh u, eng thil nge in hriat ka hre lova, ani boral chungchanga kei min rawn hmu daih hian awmzia a nei lo. Ka_Remtluanga_Ni lo! Engmah ka hre lo." a ti bah nawk nawk a. A thlanfim a bawl tawk tawk mai.
.
"Remtluanga'n hriat a nei tih i sawina ah kan ngai ang e. Kan duhtawk phawt ang." Sangtea chu tho chhuakin min melh a, ka ding ve tawp.
.
"Remtluanga paw'n engmah a hre chuang lovang. I u boral chhan kan hre bik lo. Puh tur i zawng buai mai mai a nih kha." Remruata chu mak tiin ka en a, a mitmeng chu a buai nuai mai.
.
"Kal ang." Sangtea chu ngaichang lovin ka kal a.
.
Kan haw lam kawng tluanin kan tawng lo hrim hrim. Thinrimna leh rilru natna, engtin ber nge ka awm ka hrethiam lo. Ka chhungrila ka hlauhthawnna hi a nasa lutuk a, ngaihuah tur ber pawh ka hrelo. 
Sangtea chu Remtluanga in-a min tlah nghal turin  ka hrilh a, min hnial lovin motor chu a khalh mawp mawp a. Remtluanga in kan pan lo. Thawklehkhata motor a din thut chuan ka bu dawrh mai.
.
“Hetah hian eng nge kan tih dawn?”
.
“Remruata khan ka duh ang leh ka lo hriatlawk ang chhanna a pek loh che avangin keimah hian thil awmzia ka hrilh ang che.”
.
“Engkim I hria em ni?” ka tih chuan ner deuh nawk chungin a bu nghat nghat a.
.
“I u khan duh thlan tur danga  neih loh vanga ama nunna la a ni. Ch thilah chuan I awih emaw awih lo emaw Remtluanga hi a inhnamhnawih ngei bawk. Remtluanga nen kan inngainat ngai miah loh chhan chu he thil ka hriat vang hi a ni.”
“Eng thil nge I hriat chu sawi vat ta che.” ka chil ka lem khawlh khawlh mai. Sangtea chu ka en a, a hmahmawh loh hmel em em leh nghal.
.
“I u thih hma ni khan Remtluanga leh Remruata te nen hian an inhmu a, pindan chhunga thil thleng chu a kimchanga I hriat a tulna a awm lo. Thil thleng khan I u chu nun chaklo khawpin a siam ta a ni. A nunna a lak hma khan kan inbia a__”
.
“Kei pawh naupang ka ni tawh lova, ka bulah a sawi thei  mai lo em ni? Tinge I bulah kher  a sawi?”
“I U  in ka bula a sawi ang chiahin, tunah pawh I che buai nghal chu a nih ber hi. Kum engzata upa pawh  ni la atan chuan naupang mai I ni reng alawm.”
.
“Chutiang ringawt a ni thei lo. Ka u chungah chuan eng thil nge thleng?”
.
“Remruata leh Remtluanga  hian tihluihna hmangin I u kha an nawrlui a, an duh ang a tih loh chuan a thilneih zawng zawng laksakah an vau a ni__ Chuvanga I u khan a nunna la a ni bawk. Hetianga ka hrilh che a tul ta hi apawi ka ti.”
.
“A ni thei lo__ Chutiang thil tenawm chu Remtluanga hian a ti  miah lovang. Eng ti tur chiahin nge an nawrluih?”
.
“A tunhma nun hmangin an vau a, he thil hi Remtluanga hriatah I sawi chhuah ka duh hauh lo ania. Ka rintawk vang chauh chein ka hrilh ang che. Tuna UDY-JA-a I share venhim anih theih nan hian I u kha a inhlan a ni.”
.
“Eng thilti turin nge an nawrluih ka tia lawm? Ka zawhna che I chhang lo.”
.
“A nunna laksak ah an vau a ni. A fiahna tur I duh chuan ka hmuhtir thei ang che.”
.
“Chutiang thil chu a thlen ka ring thei lo. Ka u diary-a ka hmuh nen engmah a inmil lo.” Ka ti hmawk hmawk tawh mai.
.
“I u diary-a thu inziak chu engpawh ni se dawt vek a ni tih ka chiang ngam sak. “
.
“Duhtawk rih ang. Eng ber nge rin tur pawh ka hre ta lo.” ka  ti sap a.
.
“Ka rinlawk dan chiah! Remtluanga hi I lo hmangaih hman a ni! I unaunu ai pawhin a lo pawimawh tawh zawk a. A tir atang khan engkim lo hrilhlawk vek law law che ila tha tur.”
.
“In ah ka haw duh. Min thlah rawh.” Ka aw chu a ri chhuak chang chang. Ka mangang tak zet. Thu kal vel dan hi a kual nasa lutuk a, ka buai zo vek ani ber. Sangtea chuan engmah sawi tawh lovin motor a tinung a, Remtluanga in lam kan pan a.
In kan thleng a, motor atanga chhukin Sangtea pawh be tawh lo chuan in chhungah ka lut nghal a. Min kaltir mai danah ka rilru buai zia a hrethiam a ni ngei ang. Remtluanga lo haw hun nghakin ka thu ta ngawr ngawr a ni ber. Ka ngaihtuah nasat poh leh ka hah zual ni maiin ka hria. A chhan ber sawi tur awm chuang lovin ka hlauthawng a, ka chhungrilah hian ka thinur em em bawk tiin sawi ila a dik ber ang. 
.
Khua a thim dawn hnai a, Remtluanga thawm ka hriat chuan ka rilru a inpeih vek tawh. Light a on ruala min hmuh chuan in a ka awm chu mak ati tih ka hria. Thuhma nei lovin sawi dun tur kan neih thu ka sawi a, engmah pehhel lova min hrilh ka beisei.
.
"Ka u kha i hria? A chungah khan eng thil nge thleng? Engkim i hria?"
.
Min chhan dan tur angaihtuah vang nge sawi tur a nei lo hrim hrim zawk! Ngawirengin min en a. Ka tuar thei lova ka nghak zo hek lo.
.
"Tunah hian ka u chungah khan eng thil  nge thleng hriat vek ka duh. Min hrilh dawn em?"
.
Muangchanga min rawn hnaihin ka thutna chair bulah chuan a thingthi a, a hmel lan dan atang chuan thil tha lam a ni dawn lo tih a chiangsa vek. Engtin nge ka tih tak ang?
.
"Ka tihpalh."
"Eng vangin?"
.
"Thil thleng zawng zawng vangin!"
"Eng thil nge thleng?"
Min chhan leh hmain a phone a rawn ri a, mi pawimawh tak phone call a ni  ngei ang chu, a tho a, kal hrang deuh in a phone chu a chhang a. A tawng ka hre phak lo. A lo let leh hun ka lo nghak tawp a ni. Eng tin nge ka awm dawn ka hre hek lo. Ka chawmawlh vek.
.
10 minutes vel hnua a lo let leh chuan a hmel lan dan a dang daih tawh.
.
"I u kha a duhthlanna vanga intihlum ni ta se engtin nge i tih ang?" ka thu hriat chu ka awih thei lo. Remtluanga hmelah chuan a ngaihtuahna a hriat theih loh.
"Eng thu nge sawi i tum?"
.
"Engvanga ka bulhnaia awm nge i nih?"
Ka chhang lo. Ka en tawp.
.
"Atir atang khan i lemchan vek a ni em?" a mitmengah chuan hlauhthawnna ka hmu a, a hlauhthawnna tihreh ka duh vang ringawtin dawt ka sawi thei lo.
.
"A dik alawm. Atir atanga ka tumlawk chu nangmah hnaih hi a ni." ka thusawi chu awih har a ti tih hriatreng hian a lu a thing a. Phat buai ka tum lo. Engkim hian a tawp thleng vek se ka duh tawh zawk.
.
"Tim miah lovin engtin nge chu thu chu i sawi theih zawk. I laka ka rilru hi a der a ni hauh lo tih i hria ang chu tiraw?"
.
"Ka hria alawm. Ka tan engmah a ni lo." ka sawi zawng chuan ka chhungrilah hian ka kehsawm mek a ni.
.
"I pha dawn miah nange?" tawng chhuah harsa a tih hmel khawp mai
"Phat buai tur a awm lo.." ka ti leh hmiah a. Chakna ka va mamawh nasa tak em!
.
"Min en teh?" ka rin loh lutuk hian ka thutna bulah chuan arawn thingthi leh a, nghet zet hian ka kut a vuan bawk a.
.
"I u chunga ka thiltih kha_ I bulah hian thiamthu sawi ka tum lo. Ka thiam loh a ni tih ka pawm. Khatiang thil atih duh kha ka ring miah lo. Mahse, nang nen kan inkara thil thleng hi ka tan chuan a tak tak leh hloh ka phal hauh loh tur thil a ni."
.
"Ka u chungchanga ka thu hriat kha a dik vek tihna a ni em?" ka insum zo tawh lo, ka mittui a tla zawih mai. Ka rin duh loh kha thudik alo ni  ngei anih chuan__ Ka  ngaihtuah zui ngam lo zawk e.
.
"Ramngaihsanga'n a hrilh che anih chuan a dik ka ring!"
.
"Ka kut hi thlah rawh." insum thei miah lo hian ka insut ta hlawp hlawp a. Duhthlan tur ka nei ta lo. Chiang lutuk hian min en a, thil tam tak a ngaihtuah ngei ang tih a chiang.
.
"Anih chuan, ka laka i awm dan leh i thiltih zawng zawng kha chhan nei veka ti ilo ni amaw? Engtin nge a nih theih? A ni lo tih sawi teh"
.
"Ka thiltih zawng zawng khan chhan a nei vek." ka tih chuan ka kut thlahin a ding chhuak a, a sam tuai puatin a kalsawn deuh a, ka thutna bula sofa awl awm chu a tlawh let tawp mai. Thudik hian keimah ang bawkin a deng na a ni. A mittui chu ka hmuh duh lovin a hmai a tuai pawk pawk a, engmah sawi tawh lovin in chung lamah a kal chho nghal daih a. Kei erawh ka thut dan ngaiin ka la thu reng.
.
Thil pakhat chiang taka ka hriat chu Remtluanga hi ka mipa hmangaih awm chhun ni mah se ka kalsan ngei ngei angai tih zawng hi a ni. Kan inkarah hian engtikah mah inrintawnna a awm thei tawh dawn lo. Ani hian engtiklai atang khan nge ka u nen kan inkungkaihna hi a lo hriat tawh? Ka a thei mai dawnin ka hria!
.
In chung atanga a lo chhuk thawm niawm tak ka hriat chuan ka thutna atanga thovin in hnuai lam ka pan vat a. 
JADE
(Soddisfazione)
.
Thantei_LauraSean
.
CHAPTER - 20
.
REMTLUANGA*
.
Engkim khan chhan a nei vek! Sawitur ka hre lo. Ka lo ngaihtuah lawk dan leh ka hun tawn chu inpersan tih piahlam a ni e. In chung pindan-ah lutin ni thum chhung zet ka kekawr ipte-a ka ah tawh zungbun chu ka phawrh a. Tunah chuan he zungbun hian a neitutur hnen a thleng thei dawn ta lo!
.
Ka phone ri chu phur lo zetin ka pick up a.
.
"Thiana, keimah. Vawiin khan Ramngaihsanga leh Jade-te an lo kal a, an thu min rawn zawh i hre duh em?" Remruata chu chhang lovin ka mit ka chhing vang vang phawt.
.
"Eng thu nge i lo sawi?"
"Sawi vak tur a awm em ni? Engmah ka hriat loh thu ka sawi a, i hming ka lam palh hlauh a ni."
.
"Chuan?"
"A bak engmah a awm lo. Min chhuahsan lehnghal mai a."
.
"Min lo hrilh hrim hrim a, a tha e."
.
Phone off in khumah ka thu a. Remruata'n engmah a hriat loh thu a sawi anih chuan.. Khami ni khan Remruata kha lo tanpui lo ila hetiang thil a thleng lo tur. Mahse, inchhir a sawt tawh lo. Chik zawka thu han zawt vel turin Vaspi hmel kha ka en thei tawh lo anih kha. Ka rilru ka thlak leh ang. Engkim a thuhriat ang ang zep nei lovin min hrilh ta se. Ramngaihsanga chuan eng thu chiah nge a sawi tih te pawh ka hre thei ang chu. Ani sawi anih chuan a dik ang ka tih sak ringawt anih kha. Ka mawl anih hi.
.
Pindan atanga chhuakin in hnuaiah ka chhuk a, ka thawm a hriat ruala Vaspi kal sawn leh in hnuai pindan a pan chu ka hmu hman. Zanina inbiak hi a finthlak ber angem ka hrethiam tawh lo. Mipa hi ka buai a ni e!
Naktuk hi Delhi-a a let leh hun a ni tawh tih ka hria a, zanin ngeia kan inbia anih loh chuan a awmdan atang khan kan inhmu leh tawh kher lo  mai thei bawk. Engatinge maw fel taka ka ngaihtuah theih miah loh le?
.
Vaspi room lamah chuan ka chhuk ta tho. Kawngkhar ka kik a, arawn hawn mai ka trin vanga kik pawh ka ni chiah lo. Ka rin loh deuhin arawn hawng teh tlat.
.
"Ka lo lut thei angem?" ka tih chuan a nui hul hak mai.
.
"I in alawm. I duh hun hunah i lut thei ang." min chhan dan vang chuan ka hmui chip hmakin pindanah chuan ka penlut ta tho.
.
"Enge i tih?"
"Zinga ka buai loh nan thawmhnaw ka lo pack lawk anih hi." a ti mai a. A aw atang chuan thinrimna a nei tih a hriat loh. Nichin maia kan inbiakna tawngkam ngaihtuah chuan a awm dan hi mak tak a ni. Ka laka a thiltih zawng zawng kha chhan nei veka ti anih thu darkar pawh la liam lovah khan a sawi ngei kha.
.
"Nichina kan thil sawi kha sawichian ka duh."
.
"Sawi la, ka lo ngaithla ang." khum bula ding chunga a thawmhnaw a khung khawm mawlh mawlh chu pan hnaiin ka kuah a. Ka thiltih hi a dik leh dik loh ka ngaihtuah dawn rih lo. A thiltih lai chu a tawp ve hmiah bawk. Kan pahnih chuan tawng lovin kan ding dun vang vang a, min kuah let lova ka kuahna chu thlah turin min  hrilh hek lo.
.
"Sawi tur pawh ka hre tawh lo." a tih sap chuan ka kuah nghet sauh. "In khawihtir tawh miah lo tur che ka nia. Engvanga harsa em em nge anih le? Engtin nge nangmah tihchhiat tumtu hi ila kuah theih?" a khur dar dar tih ka hria. Ka tan a harsat ang  bawkin atan pawh hian hun harsa tak a ni tih ka hrechiang em em.
.
"I duh apiang ti rawh, ka tuar vek thei. Mahse, min kalsan suh." ka thusawi chu ka awih thei lo zawk. Mahse, ka rilru dik tak a ni.
.
"Thil theih loh beisei rual kan ni hleinem. Ka tichhe vek dawn che tih i hria alawm."
"I duh ang chuan i tithei ang."
.
Hetiang thu kan sawi hi mak tak a ni. Hetiang tawngkama inbiakna hi a takin a thleng thei ang tih ka ngaihtuah ngai lo.
.
"Ka huat turin awm ang che. Ka tihchhan chiang takin i hria. Min thlah tawh rawh." thlah ka tum lo tih a hriat chuan ka awmah min nem a, min nem na lo nain ka thlah lo thei ta lo.
.
A pindan ka chhuahsan a, ka thinlung rih dan chu pui tak a ni. Ka pindanah chhovin ka thawmhnaw hak ka thlak a, ka mut a chhuak lo hulhual.
.
Vaspi'n thawm a neih leh neih loh ka ngaichang reng a, eng thawm mah ka hre lo. Zing dar 5 a rik chuan muangchangin  in hnuai lamah ka chhuk a, boruak awm dan chuan ka ngaih a titha lo. Vaspi room-ah chhukin room kawngka lo inkhar khap ka hmuh hnuah pawh ka ngaih a tha chuang lo. Kawngka chu ka kik a, a reh thiap mai. Kawngka chu  nghengin pindan chhungah chuan thawm a awm leh awm loh ka ngaithla vang vang a. A la reh thap tho. Kawngka chu a inkalh loh beiseiin ka hawng a, pindan chhung chu alo ruak vek tawh.
Vaspi chu bathroom-a a awm beiseiin ka kal kual thuak thuak a, khuma a note hnuchhiah ka hmuh chuan ka ding chawt a.
.
*MANGTHA* tih chiah a inziak!
Kalsan ka ni ta! Umzui awmzia a awm lovang tih ka hrechiang. Khumah chuan thuin lehkha chu ka en ngawt ngawt a. Tihtheih engmah ka nei lovem ni?
.
Eng emaw chen hnuah in chungah chhovin office kal turin ka chhuak a, office ka thlen hmain ka rilru ka thlak leh. Remruata chenna hmun ka pan ta zawk. Kan inbiak a tul hle-a hriatna ka nei tlat.
.
Remruata te in ka thlen chuan a lo la muhil thlurh thlurh mai. A khumah thuin ka kaitho a, min hmuh rualin thawhphan nei miah lo hian a thuchhuak nghal hlawl a. A lu chu na ti em em niawm tak hian dawm vung vungin a rum a, nizan lamah a in leh fe anih ka ring.
.
"I va rawn bei hma ve."
.
"Khami ni khan Ludy bulah eng thu nge i sawi? Eng thil nge itih?"
"Eng thil mah ka ti lo. Hey, nang hi, eng thil  nge diklo awm a?"
.
"Ama nunna la duh hial tur khawpin eng thil nge itih ka tia lawm? In biak a tul tih chiah ka bulah i sawi a. Thiana, tunah hian ka nuna thil hlu ber ka chan mek tih hria ang che."
.
"Aaa_nimin khan an bulah engmah ka sawi lo ka tih tawh kha. Ramngaihsanga khan eng emaw a hrilh anih loh chuan ka hnen atangin engmah an hre lo. Ludy nen kan inhmuh khan a hnenah engmah ka sawi lo hrim hrim."
.
"Nang rawn hmuh che hian hmasawnna min thlen dawn lo tawp  mai. Ka lakah dawt i sawi loh ka beisei. Ka tihtheih zawng zawng ka ti vek dawn a nia. Ka laka zep i neih chuan pawi iti viau dawn tih hria la."
.
"Ehiau! Min vau tihna a ni em? Thiana, min vau reng reng suh__ Thudik ka sawi tih ka chiang ngam sak. I lakah zep ka nei tawh ngai em? Ngai lo! Engmah ka zep ngai lo. Min hrechiang emaw ka tia."
.
"Engmah i zep loh chuan a that chu."
.
Remruata te in ka chhuahsan hnuah office ka pan a, Arjun hmel ka hmuh chuan a lo kal tur thu asawi lawk kha ka hrechhuak leh chiah. A insawi dan aiin a lo thleng har a nih hmel bawk hi.
.
"Hi, Miss V' hmuh ka lo in beisei asin."
"Vawiin hian Delhi a pan dawn a, in inhmu hman lo chu a zialo hle mai" ka chhan dan chu makti hmel tak hian a awm a, eng emaw sawi tumin a ang zuau a, a ngawi leh rih. Ka office-ah min zui luta a duh duh sawiin a phul hlut mai.
.
"Tunah chuan Miss V' nen in inkar a fel ta bawk a, UDY-JA nen in thawhdunna pawh a fel lehzual tawh ang chu tiraw?" Arjun thusawi chuan min dek zar mai. Vaspi nen kan inkar a that vang ringawt a UDY-JA nen kan inzawmna a that sawt nachhan tur ka hre ve lo.
.
"I sawi chhan hriat ava chakawm ve."
.
"Oh! Miss V' hi UDY-JA neitu a ni tih ila hrelo  maw? Man_ I ngaihdan chu ka hre mai. Mimal nun leh sumdawnna chu a hrang hlak a ni tih sawi i tumna a ni tih ka hrethiam. In pahnih hian in mak tak zet a ni. Thil pakhat ka hrilh ang che. Miss V' hian tun hmain mipa a hnaih ngai miah lo tih hrilh che ila i ring angem?"
.
Vaspi hi UDY-JA neitu a ni amaw? He hmeichhia hian thil thup engzat fakau nge ala neih ang le? Amah ngeiin min tihchhiat a tum dawn tih a sawi chian ngei kha, ka chhanna erawh ala ngai reng. A duh apiang a ti thei ang.
.
“Vawiin hian min len chhuahpui theih ka beisei ringawt a.”
“Okay, kan leng chhuak dawn nia.”
.
Ka tihtur hmanhmawh thlak zual ka tih zung zung hnuah Arjun nen kan chhuak a. Han kal kualpui na tur ka hre tam lo khawp. Mizoram-in tourism lama hmasawn kan ngaih nasat zia hi sawi thar vak ngai pawh a ni lo ve. Ram dang atanga lo kal te mit hmuha chhuanawm khawp thil kan ngah lo khawp.
.
Ka rin ai takin Arjun chuan nuam a ti ta phian zawk. Nilengin a titi ka ngaithla ani ta deuh ber.
.
Khaw thim dawn hnaihah ka in panin motor ka khalh a, in ah Vaspi a awm tawh dawn lo tih ka ngaihtuah chhuah chuan in haw chakna ka nei miah lo.
In ka thlen chuan a reh thiapin a thim vek a, ka nun hman lai ang mai a ni. In chhungah lutin ka thu zawi der mai.
.
Kawngka kik dawt dawt thawm ka hriat chuan ka thu chhuak hlawl a. Door bell hmet lova kawngkhar kik chu a danglam tlat. Hmanhmawh takain kawngka ka hawng a, Lawmsangi lo ding ka hmuh chuan in chhunga lo lut turin ka hrilh thuai a.
.
“Eng thil nge ni ta?”
“Sir, thil thleng a awm?”
“Eng thil nge ka tia lawm?” ka tawngkam vin deuh hlur vang nge ka hre lo Lawmsangi chuan min en phawk hra mai.
.
“Ah, restaurant-a kangmei chhuak chungchang kha a nia. Phone a sawi chi niin ka hre lova.”
“Eng thil nge sawi rawh.”
.
“Police lamin thudik an thup tih vawiin khan an sawi ka hre fuh a. An ka huptu an awm tih chiang takin an sawi.”
.
“Chuan?”
“Sir, Police ho thamna petu chu hmeichhia anih thu an sawi bawk a.”
.
“I hrechiang chiah maw?” ka rilru a lo lut hmasa ber chu Vaspi a ni! Min tihchhiat a tum thu a pha hauh lo a nih kha. Phat kual chu sawi loh, amah ngeiin a sawi alawm le. Hetiang khawpa lian tham hi a ti thei dawn em ni? Hetiang khawpa  nasa hian  maw min tihchhiat a lo duh! Ka tlakchhiat theih nan min bei lo pawh nise min kalsan vang chauh pawh hian ka thinlung ana tawk tawh asin.
“Nu lian vaklo anih thu pawh an sawi tel.”
.
“A tawk e. Ka lo bawhzui ang.”
Lawmsangi chu ngaihtha vaklo hmel pu hian a kal a, a chhuak ta mai lo.
.
“Sir, I tha em?” tiin arawn hawilet a. Hei chen hi ka chhawr tawh a, min ngaihtuah hmela a awm vawikhatna a ni hial ang. 
.
“Ka tha. Chanchin dang a awm chuan a rang  lamin min lo hrilh leh dawn nia.”
.
“Aw le, sir. Ka kal a nia.” tiin muang chang hian  a chhuak a. Kawngka a khar rik khap hnu chuan in chung pindanah ka chho ve nghal.
.
Vaspi call tumin ka phone ka phawrh a, ka tihtur ni miah lo tih ka tum tih hrechhuakin phone chu ka dah leh a. In a awm lo hian ka chhuah harh a tul anih zawk hi. Party ka kal lohna chin pawh a rei ta.
.
In atangin ka chhuak a, ka kal tumna hmun ka thlen chuan ahma ang reng kha ala ni tih ka hre nghal mai. Helai hmun hi Vaspi inchei danglam chunga ka hmuhna kha ani. Engvanga ngaihtuah chhuak leh kher nge maw ka nih le? Lawmsangi thusawi vanga ka rinhlelhna kha a dik a nih phei chuan Vaspi sawi ang khan kan inringtawn thei tawh ngai dawn lo. Chuvang chuan kei pawh hian ka rilru ka siam fel a ngai.
.
Counter pan ding nghalin ka intur lam min pek chuan ka tlak nghal pawp a. In chungah muangchang in ka chho a, engkim hian mi pakhat chiah min hriatchhuah tir. Chu thil chu ka mamawh rih lo.
.
In chung zawlah chuan nidanga an la tih ngai loh angin light an chhi eng neuh neuh a, mi an lo awm nual bawk. Kil khata ding hmeichhia ka va hmuh chu mak tiin ka en chiang  a. Ka mitvai a ni lo. Ka hmu sual anih ngei ringin ka mit ka nuai a, ka thil hmuh chu ala ngai reng.
.
Eng thil phiangsen nge ka hmuh hi? Engtin nge anih theih? Ludy maw? Thil theih a ni lo hulhual!!
.
Chu hmeichhia chu lehlam hawiin a bula mipa nen an inbia a, inkai rial hian ka din lohna lamah an kal sawn a. Ka umzui nghal nain ka che rang tawk lo. In hnuaiah an chhuk ni a ka hriat vangin step-ah chuan ka tlan thla zawt zawt a, hmuh zui tur an awm miah lo. In chhung ka en chhuak vek a, in chungah chho lehin ka en kual leh a, buhpawl zinga hriau bo zawn an sawi ang vel a ni. An hlimthla hmuh tur pawh a awm tawh lo.
.
Kha hmeichhia kha Ludy anih ngei chuan__? Kei hian tihtur pawimawh tak ka nei ta tihna a ni. A aia thil pawimawh dang a awm thei ngai lovang.
JADE
(Soddisfazione)
.
Thantei_LauraSean
.
CHAPTER - 21
.
RECAP*
Kha hmeichhia kha Ludy anih ngei chuan__? Kei hian tihtur pawimawh tak ka nei ta tihna a ni. A aia thil pawimawh dang a awm thei ngai lovang.
.
REMTLUANGA*
.
Kawt zawl lamah chhuakin ka motor dahna ka pan a, ngaihtuah pakhat chiah ka nei. Ka thil vei emaw tih ngei duh ka neih chuan thil dang ka ngaihven tawh ngai lo hrim hrim vangin Party na hmuna awm zui ka tan awmzia a awm lo.
.
Ka awm zawna min su tu chu a pai deuh nawk a, a tluk mai loh nan ka vuan thuai a.
"I na em?"
.
"Na lo ve. Ka kalna ka lo en lova. A zialo hle mai." a hmel chu hmuh chian tumin ka en chiang deuh a, nichina ka hmeichhe hmuh ngei kha a ni. Ahmaa ka hmuh ang chiah khan danglamna a awm lo reng reng. Ludy ngei kha a ni. A hmel enchian tuma en hnai ka ni tih hrethiamin a nui hak a.
.
"I hmelhriat ka ang a nimaw?" a nui zui har har a, a mitmeng atang chuan min hre ngai miah lo tih a hriat. A mak hle mai. Ka hai a ni lo maw?
.
"I hming min hrilh thei em? Ka thiannu nen in inang khawp mai." nui lui turin ka bei fe mai. Ka mitmenga amah ka chik zia chu a hriat loh ka beisei. Ka hnunglama engin a chhunkhalh tih ka hria a, chiang takin ka hmel a hmu lovang.
.
"Ka thiante chuan Nuno tiin  min ko thin. Ka hria che em?" a ti vei haw a. In tur a lem nial tawh ang tih pawh a hriat. Keihi tul lo ah thil ka lo chik fal anih hmel. Ludy nen an inan dan em em chu thilmak a la tling tho mai.
.
"Min hriat ka ring lo. I insawh na lova a lawmawm. Hun nuam tak i hmang dawn nia." eng nge ka hriat a, ka tawng duah ni!
Chu hmeichhia chu kal pelin car-ah ka thu lut a, in chhunga a lut lai chu ka la enzui ta reng. Ka rinhlelh ang thil thleng lo mah se kha hmeichhia kha hriatchian ka duh dawn chiang khawp mai. Ka chhungrilah hian thil dik tawklo awma hriatna ka nei. Hetiang thilah hian ka hrelawk dik thei viau ania!
.
Car chu khalh chhuakin muangchangin ka tlan a, thui tawk tak ka tlan hnuah hmun reh raih thleng in kawngsir remchang laiah car chu ka dah a. Hetiang hmun reh leh hahdam taka awm ka mamawh zia ka lo hrechhuak har mah mah a nih hi.
.
Dar 2 rik dawn thleng chulai hmuna ka thut vang  vang hnu chuan ka in panin ka haw ta chauh. Ka tan mutthilh a awlsam dawn lo tih ka hriatlawk vanga thil danga hun khawhral ka nihna chen pawh a awm tho  mai.
.
Ka harh hlawl chuan khua a var chiang hle tawh. Ka tho thuai a, Nu Tluangpuii ka koh leh mai angai dawn a ni. Mahni chauha awm pawi tihna ka neih loh rualin eitur ka siam peih lova, mahni chauha hmun danga chaw ei tur ringawta chhuah fo ka peih der lo bawk.
.
Coffee siamin chhang awm ang ang ka ei a, ka thil ei chuan Vaspi bawk min hriatchhuah tir lehpek. Ka ngainat zawng thlangin, eng thil nge ka duh a ngaihven hle anih kha__ Chutiang zawnga ka ngaihtuah chu a tul ber lo. Chhan nei veka ti anih tak kha mawle! Ka in atanga a chhuah atangin a chanchin ka hre zui miah lova, a hriat tura ngaihven erawh ka tum rih lo. Chhan tha tak a awm anih loh chuan ani nen khan inhnaih  nachhan tur kan nei tawh lo. Thinlunga kan duh apiang kan nei thei lo tih thu a sawi chhan kha ahun lai khan ka lo ngaihtuah thiam lova, hetiang thil hi a thleng dawn tih a hriatlawk vek vang pawh a ni ang.
.
In ka chhuahsan chuan zinglam dar 8:30 a pel tawh. Office pan ding nghalin Lawmsangi ka phone a, restaurant chungchang-ah thu thar a hriat leh tawh thu a sawi zauh chuan min ti awm hle hle thei lo. Office ka thleng a, Lawmsangi lo thlen hun nghakin ka vei sek a.
.
20minutes zet a ral leh hnuah Ruatpuii'n Lawmsangi lo thlen thu min rawn hrilh a, ka office-a lo luhtir turin ka hrilh nghal a. Office kawngkhar chu dimtea rawn hawngin a rawn dak dek dek a, ka hmel min hmuh chuan a nui ta sak.
.
"Chanhinthar chu han share nghal la."
Ka dawhkan bulah chair-ah thuin a sam a khawih neuh neuh a, a awm dan chu nidang ang a ni chiah lo. A lai deuh emaw ni?
.
"Um_naktuk hian police hnena thamna petu a hmuh theih dawn tih ka hmelhriatin min hrilh a."
"I hmelhriat chu tunge?"
.
"Sir."
"Thil thlen dan hi a chak mah mahin ka hria."
.
"Ahma khan ka sawichhuak thei lova. Thamna an pek hi ka cousin a nia. A chungah thil thalo a thleng thei tih hre chungin ka hrilh lo thei lo che anih hi." Lawmsangi chu ka en vang vang a, lai deuh taka nui chung hian a sam a khawih leh ta! Engvanga lai thar ta viau nge maw anih le?
.
"Thamna dawngtu i cousin anih chuan dan bawhchhiatna thil thleng chu tuin nge hrilh che tih ka lo ngaihtuah a_"
.
"Sir, chu chu ka sawi thei lo. A hnenah sawichhuak lo turin ka intiam tawh a. Khawngaihin min nawrlui suh."
.
"A tha e. Ka nawrlui lovang che. Naktuk ah thamna petu chu kan pahnihin kan hmuh thei ang chu."
.
"Sir, ualau taka kal chi anih ka ring lo. Um_Ka sawi tum dan chu."
.
"Ka hrethiam alawm. Hma takah lo inpeih ang che."
"Aw le, sir. Ka kal thei tawh em?"
.
"I sawi tur i sawi zawh tawh chuan i kal thei."
.
Lawmsangi kal chhuak chu ka enzui reng a, a inchei dan pawh a thlak anih kha mawle! Ka lo chik  ngai lem lova, chuti chung chuan amaha danglam awm kha hai rual a ni lo.
.
Ka hna ka thawk mawlh mawlh a, hun a ral zung zung mai. UDY-JA atanga phone call ka dawn chuan tlai lam dar 4 vel chiah a ni.
.
"Sir, restaurant siamthat hna i thawk mek tih kan hria a, i inpeih hun tur hriatlawk theih ani em?" an thu min rawn zawh chu awmze neilo mai a ni e.
.
"Sawilawk theih ala ni lo tlat mai."
"Anih chuan ahmaa inremna kan siam kha sut leh mai angai dawn anih chu. Ni 12 hian Delhi lo pan la, official meeting neih a tul thu tukin khan order a chhuak a."
.
"A chhan a hriatlawk theih em?"
"Theih loh. Confidential a ni e."
"Okay."
.
Phone kan dah hnu chuan ka thu deuh vang vang phawt. Official meeting neih a tul chhan chu engpawhnise ka tan chanchin tha lam a chhuah ka ring lo tawp  mai. Vaspi'n a hna a thawk tan nghal a ni ngei ang chu. A lungawina tur anih chuan a duh duh han ti phawt mai teh se. Eng thil nge ka ngaihtuah chhuah hi? Thamna petu naktuka hmuh kan tum hi Vaspi anih ka ringhlel ru deuh kha ania, tuna a landan ah hian Vaspi hi Delhi-a awm mek angin a lang tho bawk si.. Ni leh lo.. Thamna pe tur chuan tupawh a ruai thei ang chu. Tunlaiah pawisa vanga engmah tihhreh nei lo an tam tawh zia ka lo ngaihtuah tel lo palh a ni.
.
Office ka chhuahsan chuan tlai lam dar 5 a pel tawh. Tihtur dang ka neih hran loh vangin in ka pan a. Nu Tluangpuii chhun lama ka biak tawh vangin in ruakah ka lut dawn lo tih ka inhria a, tlem chuan ka rilru a nuam deuh ringawt a.
.
In ka thleng a, ka ngaihtuah lawk ang chiahin in chhung ka luh chuan eitur rim a nam cham cham mai. Ka ril a lo tam hle anih dawn hi. Choka ah lutin Nu Tluangpuii zai rut rut chunga che soh soh chu ka en a, a chhan pawh ka hriat lohin ka nui suk.
.
"Ka lo haw ania." ka thawm a hriat chuan a phu nasa ngang mai.
.
"Awi, karei. Ka va han phu nasa em em ve. Hei, eitur ka peih tep a nia.." tih pahin a nui a. Mak tih hmel deuh tak hian min en zui vung vung bawk a. A chhan pawh ka hriat lohin a lu a thing nu nu mai. Choka atanga ka chhuahfel hmain a phun zui nuah nuah ka hria a, ka nungchang mak atih thu a sawi ka hriat chuan vawiin ang hian alakah ka la awm ngai lo tih ka ngaihtuah chhuak ve bawk.
.
In chung pindanah chhovin ka inbual a, thawmhnaw ka hak fel hnuah email ka check leh zet phawt a. Thil tar a awm rih lo. Naktuk ka hun hman dan turin ka ngaihtuahna a luah hneh deuh bawk nen Nu Tluangpuii'n chaw ei a theih thu arawn sawi chuan darkar khat dawn ka lo thu tawh reng mai.
.
"Kan ei rual dawn em?"
"Eh? Maw?" Nu Tluangpuii makti hmel chu enin ka nui a, mak atih hmel deuh deuh.
.
"I duh chuan ka rualin i ei thei ania."
"A khaih, ka ril a tam rih lo. Ka lawm e. Ka pu, ka awm loh chhungin eitur i ei tha lo em ni?"
"Tinge?"
"A_ I cher deuhin ka hria. Awi, ka sawi chu theihnghilh daih rawh. Ka rilrua thil awm apiang hi ka sawi leh phawng mai zel a. I duh belh chuan ka siam tam nasa a nia." a eitur siam chu a kawk kual zung zung a.
.
Ngawi rengin ka ei ta mial mial. Ka duhtawk ka ei hnu chuan choka atangin ka chhuak a, Nu Tluangpuii zai ri rut rut chu tv en chungin ka ngaithla ta reng a.
.
Door bell ri ka hriat chuan Nu Tluangpuii a awm tho vangin hawn ka tum lem lo. Kawngka hawng ri ka hriat rual deuhthawin ka nu ring zeta a tawng thawm ka hre nghal a. Ka thu ngil zawt mai. Tun ang hunah eng nge arawn tih dawn? Ka hmu chak hran lo hle tih ka pha lo mai ange.
.
"Remtluanga a awm tiraw?"
"Aw, awm e."
"A that hlauh chu. In chungah em ni a awm?"
.
"Ka va hre mai lo ve."
.
"Oh, saw a awm alawm." tih pahin ka nu chuan min rawn pan hnai a. Ka lo en tawp. Amah lawma lo din khawmawi ka tum hran lo. A dera lan kher hi tul ka ti ngai lo hrim hrim bawk a.
.
"Remtluang, i chanchin ka hriat hian min tilawm lo hle mai." ka bulah a rawn thu hnawk a, a nghawnga a puan bah chu phelh sawt sawtin mitmeng nem lo zet hian min melh kul mai. "Duhsaki nen in inthen thu ka hre ve chiah a ni. Chumi hnuah hmeichhe dang ilo khawi leh hman a ni awm a. Zahna hlirrr zahna hlir mai hi min thlen a, Duhsaki nen hian in inneih ngei angai ania. Ahmaa ka sawi tawh kha ala danglam lo, hrereng rawh."
.
"Ka nupui tur chu keiman ka thlang ang." ka ti hmiah.
.
"Kha maw! Tu hi nge maw i chhun le? Ka hrin i nih loh vang hian zahlo taka min tawngkhum ngam tur ini lo tih  ka sawinawn leh ang. Ka enkawl seilian che tih hi theihnghilh reng reng suh. Nimin khan Duhsaki nen kan inhmu a, min tizak lutuk em mai."
.
Ka chhang buai peih lo. Nasa taka min tawngkhum leh hmain a kal thuai theih nan ka inthiarfihlim san mai ang chu. Ka ding a, in chung lam pana ka kal chu min rawn umzui tih ka hria.
.
"Hei, la ding teh. Ka lo kal chhan ber pawh ka la sawi hleinem." ka ding a, ka hawilet lo thung.
"Naktuka pek turin nuai 2 ka mamawh a nia. Duhsaki pawisa ka hman sak ka pek loh te chuan in lo inthen thawt thawt a, pek loha liam mai thei tur kha ka rulh a tul phah dawn anih hi. Pawisa dil fo che hi ka tum tawh loh vei nen."
.
"Ahmaa ka pek che kha engtin nge i tih?"
.
"Khangte chu a zo hneh lutuk. Mamawh ka nei ve neuh neuh alawm. In a hnathawkte hlawh pek a ngai bawk a."
.
"Naktukah i account-ah ka lo thun ang." min chhan leh hmain ka kalsan a, a phun zui hlawk hlawk mai. .
Ka pindan ka thlen chuan khumah ka thu hnawk a. Ka phone nghawr dar dar chu enin pick up ka tum lo zet a, ka rilru ka thlak leh. Ka phone-a number ka save sa anih loh vangin formal takin ka chhang a.
.
"Hello, Remtluanga."
"Keimah_" Vaspi aw sin ret mai ka hriat chuan ka nghing dawt. Delhi a pan atangin ni tam a la liam lo, chuti chung chuan hun rei tak hre tawh lo ang maiin a aw chuan min fan raih raih nia!
.
"Eng thil nge i duh?" ka ngaihtuahna leh ka tawngkam inpersan zia chu a hre lovang. Ka tawngkam bung tak vang chuan a tim deuh ngei bawk ang chu.
.
"Ah_Ka_ Ka tibuai lo mai ang che. Muttui le." ka chhan leh hmain phone a off a, ka phone chu dahthla mai lovin ka en tawp. Ka ti mah mah em ni? He hmeichhia hi ka hrethiam thei lo. Ka phone chu ka khawih let ka khawih let ta ringawt a, call back em chu ka duh chiah lo. Ka lo chhan dan vang pawh khan call back chu ka tih hauh loh tur thil a ni.
.
Mut chhuak lo zet hian khumah chuan ka mu meng reng a, ka rilru chuan Vaspi lo call leh hun ka chang ni berin ka inhria. Buaina tur ka ngah em em laia min lo call hi a tum reng vang a ni ngei ang? Chutianga ngaihtuah nachang ka hre har chu mawl ka inti. He hmeichhia hian eng tianga ka rilru hi lakpen tur nge a hria a ni  ngei ang. Phiangsn reuh hian! A thangkamah khan awlsam takin ka tang a, tunah chuan khatiang thil kha a thleng nawn tawh dawn lo.
.
Ka alarm riin min tihharh chuan ka thu chhuak hlawl mai. Darkar hnih chiah ka muhil hman. Mut kham loh sawi theih a ni lo. Vawiin hian hna pawimawh lutuk thawh tur ka nei.
.
Bathroom-ah lutin ka inbual a, ka pindan atanga ka chhuah chuan eitur rimtui takin min lo hmuak der tawh. A tih dan ngai ang bawkin Nu Tluangpuii chu a zai rut rut a, min hmuh chuan zai tawpin eitur a chhawp nghal zung zung a.
.
"Ka pu, ei teuh rawh aw."
"Tehreng mai." tia ka chhan chuan hlim hmel tak hian inher vutin eng emaw a khawih zawm mual mual a.
.
"Nimin khan ka awm loh hlanin lo kal an awm em?"
"Awm miah lo. Chutiang an awm chuan ka hrilh ang che. Ah_Ka pu,  inhnuai ka tifai a, hmeichhe thawmhnaw awm ho khu_a_ka sawi leh lo mai ang e. Ka sawitur pawh a ni lo.." a riat ral nawk nawk mai
.
"Chutiang a awm chuan i paih vek dawn nia."
"Maw?"
"Hmeichhe thawmhnaw i hmuh ho chu i lo paih dawn nia."
.
"Aw le." a ti ban chat a.
.
Tuk thuan ka ei kham chuan in chhuahsanin office ka pan a, Office ka thlen chuan Lawmsangi a lo awm vang tawh. 
"Sir, dar 9 hian kan chhuak hman angem?" sana ka en vat. Dar 9 rik nan 20 minutes ala awm. Ka tlai chhe lo ve.
.
"Khawi lam nge kan pan dawn?"
"Ramhlun N' ah sawn inhmuh thinna hmun an nei a, kan lo chan lawk loh chuan kan hloh palh a hlauhawm khawp mai." Lawmsangi tawng lai chu ka en reng a, a tawng tawplam ah chuan lai deuh tak hian a sam a khawih leh ta! A awm dan chu haiderin ka ding chhuak a.
.
"Kan kal nghal angai a nih chu. Min lo zui rawh."
.
Lawmsangi nen office atangin kan inzui chhuak a, motor chu ka khalh zawi lem lo khawp. Traffic jam vangin ka thin a ur hlur tawh mai.
"Hetah hian ding rawh. Hetatang hian kan lo en a ngai ang. Min hmuh palh chuan ka chhe vek a nimai." a zam tih hriat tak hian a kut a suih nghet sauh sauh tih ka hmu. A kut chu vuan zauhin engkim a that vek tur thu ka hrilh a, engvang  ber nge ni dawn ni, a sen tawn tawn mai.
.
30 minutes chuang kan thu ta! Engmah kan la chang chhuak lo. Lawmsangi chu awm hle hle thei lovin a che sek a, an kalna tur in nia a sawi lam chu ka melh ngar ngar thung a. Darkar khat a ral hnu chuan engmah kan chang chhuak dawn lo tih a chiang tawh. Nuam ti loh hmel tak hian Lawmsangi chuan mak a tih thu a sawi niah niah a. Engtin mah ka chhang lo. Kan chang dawn tih an lo hre ru anih ka ring ta ber.
.
"Sir, engtin nge kan tih ang?"
"Tunah chuan kan kalsan phawt mai ang. A lehpek a awm ngei turah ngai ila. Nangpawh fimkhur ang che. Kan chang dawn tih an hrelawk anih loh chuan an tum dan an thlak a niang. Hreawm ti suh." ka tih hnu chuan a hahdam hmel ta deuh hlek.
.
Office panin kan let leh a, ka ngaihtuahna kal ding lutuk vangin Ruatpuii (Secretary) tawng pawh ka lo hrelo.
.
"Eng maw i sawi?" ka tih chuan a ka hau mai.
.
"Dar 6 a pel tawh a. Kawngka ka kik ri i hre thei lova. Ka haw thei tawh angem?"
"Haw thei e. Kei pawh ka chhuak ve nghal ang." ka jacket chair hnunga ka dah chu lain ka ha sawk sawk a, Ruatpuii nen kan inzui chhuak a.
"Vawiin chu in in lamah ka lo kual ang. Kal duhna ka nei a, ka thlah nghal thei che a nimai."
"Thank you sir."
Amah chu enin ka nui suk. Kan inchhawr rei ve tawh viau a, a nungchang hi ka fak ru thin khawp.
Ruatpuii'n min chhuksan hnu chuan ka kal tumna in peng lamah ka kual a, khua a thim fel hle tawh. Kum dang ang lo takin kumin hi khua a vawt har phian zawk a nih hi.
.
Ka kal tumna in zawnah motor dahin gate ah ka lut tlang a, gate duty an dah lo hlauh chu a zia phian. Eng thil emaw hria niawm tak hian thawm ka dim viau a, ka nuih a za leh hnuhnawh. Tunhnaia ka nun phung vang hian ka inthlak danglam zo ta anih ber hi.
.
Ka beisei loh lutuk a in chhung lama nui thawm ka hriat chuan ka ding chawt mai. Muangchang hian kawngkapui awmna ka pan a, kawngka sira tukverh awm chu chhunglam puanzar a phui chiah lo tih ka hmuh rualin fimkhur lutuk tak mai hian in chhung hmuh theih tumin ka bih a. Ka thil hmuh chuan min tiphu chiang lutuk.
.
Single chair-ah inhaw lo tih hriat tak mai hian Remruata'n hmeichhia a pawm a, an infawp pah mawlh mawlh bawk a. Ramngaihsanga in-a Remruata a lo awm teh tlat chu  mak ka ti lutuk tak zet. Ka thiantha ni a ka hriat Remruata hian keimah ang bawkin Ramngaihsanga hi a ngaina ngailo niin ka lo ngai ringawt a, 'makti' tih hian mak ka tih zia hia sawifiah zo lo. Chuti chung chuan inngaizawng awm dun enthla ru-a inngaiin ka kalsawn dawn zet a hmeichhe hmel ka hmuh chuan sawi ngaihna awm lo khawpin min thawng nawn awn awn a ni ber. Party na hmuna ka hmuh hmeichhia kha Ludy a ni ngei tih ka nem nghet thei ta bawk! Enghelh nei miah lo tih hriat tak hian hlim lutukin an inkuah ngawih ngawih a.
.
Hnunglamah muangchanga tawlh hret hretin Ramngaihsanga in chu ka kalsan a, ka bing mup mup mai. Harhchhuak thutin hmanhmawh zet hian ka car-ah ka lut sawk sawk a. Helai hmunah hian ka kal tih an hriat hma ngeia ka kalsawn a tul. Hmun fal leh reh takah keimah chauha awm a, fim taka ka rilru ka hman angai a ni. Motor khalh pah chuan thinrim insum hleithei lovin steering wheel chu ka chum pawp pawp a. Ka bulhnaia awm apiangin min phatsan zel hi ka hrethiam thei lo. Ka tan tumah an rinawm ve ngai lo. Heihi ka khawvel chu a ni.
.
Zahngaihna nei hauh lova ka chet chhuah hun hi lo nghak hlawm rawh se!
JADE
(Soddisfazione)
.
Thantei_LauraSean
.
CHAPTER - 22
.
REMTLUANGA*
.
Ka ngaihtuahna a fim hleithei lo. Ramngaihsanga in ah khan engvanga ngampa em em nge an nih? Thil chi hrang hrang ka ngaihtuah kual a, ka ngaihtuahna a buai telh telh zawk niin ka inhria. Tuna ka hriat chin aia thil mak zawk inthup a la awm ngei bawkin ka ring.
.
Car atanga chhuakin Aizawl khawpui eng pe un mai chu ka thlir a, dar 2 a ri dawn hnai tih ka hria. In a haw tumna rilru erawh ka nei miah lo. Ka in a ka awm aiin helai hmuna ka awm hian ka ngaihtuahna a kal ding thei zawkin ka ring hrim hrim bawk. In ah chuan rilru lapeng turin Vaspi sulhnu hmuh tur a awm a, chu chuan ka tihtur ang min tihtir thei kher lovang. Vaspi chungchang ka ngaihtuah rualin a hma zawng zawng-a ka rilru a la awm ngai miah lo thil ka rilru a lo lut thut chuan min tiphu zawk thei nia!
.
Nizana min lo biak a tum khan engmah sawi lovin phone ka titawp a, engvanga min lo bia  nge anih tal hriat lo tum ila tha tur. Chhan tha tak awm lo chuan min be lo tawp ang. Ka rilrua lo lang hmasa ber anga ka kal hian a fuh ber lo fo anih hi.
.
Dar 3 a rik dawn chuan car-ah thu lutin in lam ka pan ta chauh a. Thil tamtak in min hmuak a, awm mai mai chu sawi loh khua var se la, ka tihtheih apiang ka tih mial mial a tul a ni. Tunah chuan keimah chauh ka ni a, ka rin tur pawh keimah chauh ka ni. Ka thian ni a ka lo hriat leh min hnaihtu apiangin min phatsan a, tumah ka ring thei lo.
.
In ka thleng a, ka pindan ah lutin alarm ka set hnuah khumah ka mu nghal thlawp a. Ka rin loh takin ka muhil nghal hmiah.
.
Ka alarm ri-ah harhin ka thu chhuak hlawl a. Ka mumang thalo lutuk vang chuan ka thaw kawk kawk bawk a. He mumang rapthlak tak hian awmzia a nei lovang. Awmzia a nei tur a ni lo!
.
Ka inbual a, ka inthlak fel hnuah in hnuaiah chhukin Nu Tluangpuii eitur siam ka ei a, office panin ka chhuak nghal a. Office panin  ka chhuak ka ti nain vawiin hian office ka tlawh hman kher lovang. Ka tihtur ngaihtuahin Car kenna chi a ni hek lo.
Remruata te in ka pan a, ni danga ka chhuah aiin ka chhuak tlai a, dar 10 a pel fel tawh. Ka ngaihtuah lawk anga thil a kal theih chuan thla a ral hmain engkim a fel vek thei ang. Kan zavai hian kan phu tawk kan hmu theuh bawk ang chu.
.
Remruata te in ka thleng a, in chhung ka luh chuan ka rinlawk ang chiahin a nu nen chiah an lo awm a. Min hmuh a in beisei lo aniang, chhuak tura inpeih vek tawh chu min hmuh veleh a pheikhawk a phelh leh rih a. Tunhma atangin mi inthup thei tak a ni ngai lova, tunah pawh ala ngai reng.
.
"Kal chhuah tum i va ang ve. Kal rual ila?" ka tih chuan pha deuh dui chunga min enin kal chhuah a peih chiah loh thu a sawi kual a.
"Ka awm a nuam chiah lova. Han len thawven ka chak rualin mut ka duh leh zawk anih hi." inthlahdah zet hian a ke hlang kangin sofa-ah a thu a.
.
"Nizan khan lo kal ka tum a, in ah i awm em?" ka tilui leh a.
.
"Awm e, lo kal la tha tur. Ka khua a har tehreng nen."a thutna bula a phone dah a rik chuan melh zoh zohin pick up tum lo hian a phone chu a off ta daih. Ludy anih ngei ka ring.
.
"I ngaihawm riau a, vawiin chu office kal lovin inkawm nileng ila ka tia.." nilenga a bula awm tum anga ka insawi veleh a awm nuam lo hmel chu ka hnek chak takzet. "Chhuah i duh chuan thuhran." ka ti leh a. A phone a ri leh ta. A screen ka hmuhpui theih loh vangin lo call tu chu tunge tih ka hmu thei lo.
.
"Aw, min lo be buai reng lo teh. Ka kal chhuak dawn lo. Hei, thianpa Remtluanga a lo kal a. Vawiin chu thiandun hnun kan han hmang ang nge." tullo zeta ka hming a sawiri tel kher chuan ka rinhlelhna a nemnghet ta chiah mai.
.
"Kal chhuahna tur i neih chuan ka kal mai ang. Tihtur dang pawimawh ka nei tho a nia." tih leh ka thutna atanga thawh rualin kawngka ka pan nghal deuh mai a.
"Chuti tur em ni? Kan inkawm nileng ang chu." a ti khawmawi ve bawk tak nain a mitmenga a thaw huai tih ka hmuh chuan ka zui ru ngei ngei dawn tih ka inhre nghal.
.
An in chhuahsanin Bike ka tinung lai chu Remruata chuan min en reng a, pawna awm rei lo leh ka tlan chhuah hun pawh nghak zo lovin hmanhmawh hmel tak hian in chhungah a tlan lut leh vut a. An in hlat deuh ka thleng a, Remruata lo kal chhuah hun tur chu ka lo chang ta ran mai.
.
Rei nghah a ngai lo. Chak lutuk hian a Bike-in min rawn tlan pel a, ka hriat hman a inring lovang. Min hmu miah lo pawh a ni thei tho. Remruata hi mi fimkhur thlip thlep  a ni ngailo tih hrechiang tawk tur khawpin kan inkawm nasa ve tlat a. A tlanna lamah chuan ka zui ve hmiah. Nizana ka thil hmuh kha nemngheh leh ka duh rualin thil dang tih duh ka nei. Ka thil rinhlelh hi a lo dik lehzel anih phei chuan a tawp dan tha a awm thei kher lovang.
.
Remruata chu ka rinna lamah a kal ta lo. Ka zui ta zel tho a. Hmun pakhat fal deuhah dingin in chhungah a lut lai ka hmu a, ka helmet pawh ka phelh duh lo. 5 Minutes vel hnuah mipa dang pakhat hi chu in ah chuan a lut ve leh a, a hmel ka hmuchiang thei chiah lo nain khawiah emaw ka hmu tawh tih ka hrechiang hle thung.
.
Hmanhmawh anga lang duh hauh lo hian bike atanga chhukin an luhkhawmna in chu ka pan a. In hmalam atanga luh ve tum chi anih loh  vangin in hnunglam luhna chep angreng takah chuan ka inzep lut tawt tawt mai. Ka lut fel chiah tihah hmeichhe aw sin ret tawng zet zet ri ka hre leh a, hrilh chawp  ngai lovin Ludy tawng a ni tih ka hria. In chhungah a lut thawm chu ka ngaithla reng a. An inhmuhkhawmna in a fal deuh bawk a, thawm an dim tehchiam lo. Ramngaihsanga hmel hmuh tur emaw a thawm hriattur emaw awm ve miah lo chu mak ka ti ru viau.
.
In hnunglam pawnah chuan bang nghengin ka ding deuh reng a, an hmel hmu lo mah ila an tawng tam zawk chu ka hre thei. Eng thil chiah nge an tih hriat ka duh  vangin bihna tur emaw anmahni hmuh theihna tur emaw ka zawng a, a vang phian mai.
.
Sang deuh hlek a ventilation awm atang chuan en tumin thing ka dawh a, ka din san hnu chuan ka hmu thei ta. Box lian tak hi an dawhkan kil khawm taihah chuan a inhung a, Ludy chu a thutna atanga tho chhuakin box a hawng a. File niawm tak a phawrh chu eng thil nge anih ka ring thiam lo.
.
Kawngka kik ri arawn awm a, an zavai chuan an tang hra hlawm a. Ludy bawk chu kawngka hawng turin a kal tih ka hmu. Ka beisei loh lutuk hian Arjun Shekrawat, UDY-JA a thawk ngei mai khan nui sung chung hian Ludy chu arawn zui lut a. Ka beisei phak piahlam a ni.
.
"Ani hi Arjun a nia, ka aiawha ka thilneih zawng zawng enkawltu. In chibai rawh u." Mipa pakhat leh 
Remruata chuan chibaiin an thu leh ta hlawm a. Ludy chuan nichin maia a file phawrh kha la chhuakin a keu thuak thuak a, a duh tak phek a keu fuh chuan a hming a sign zung zung a.
.
"Heti hian Miss V hminga share awm chu i hminga dah a ni leh ta. I thihna kha register a ni lo tih ka nemnghet tawh  bawk a, min tiam ang thil kha i tih a hun tawh e."
.
"Engkim peih fel vek a ni tawh. Naktuk hian Delhi ah i haw ang a, i lawmman tur chuan a umzui ang che. Delhi a i tihtur i tihfel leh hnuah i lawmman chu i hmu chiah ang."
.
"Good. Ka tihtur chu ka hlen ngei ang." Arjun chu ding chhuakin in atang chuan a chhuak a, Delhi ah chuan eng thil nge a tih dawn an sawi lang miah lo. Rin dan lo neih pawh thiam a har.
.
Mipa pakhat la awm nen chuan inhmachhawna thuin an ti ti a, an thusawi atang chuan ka restaurant a kangmei chhuah chhan a chiang. Khatiang thil zawng zawng tlen chhan kha eng dang ni lovin Ludy thiltih vek a lo ni e. Engvanga ti nge anih tih erawh chu keiman ka zawn chhuah a tul ngei ang. Mipa chu pawisa pe in chupa pawh chu a kal chhuak ve leh a. Tunah chuan Remruata nen chiah an awm ta. An pahnih chauhin an awm tih a chiang ta maw tih veleh ramsa koham tak ang mai hian an che buan buan a. Chu thil chu ka tan hmuh a tul ta lo. An thawm lah chu a na phian a!
.
Ka awmna hmun atang chuan kal sawnin ka bike dahna lamah ka chhuak a, tih leh nghal tur hrethiam mai lovin an inhmuhna in chu ka tlansan ta vang vang a.
.
Ka phone nghawr dar dar chu ka ipte atanga phawrhin caller ID ka en zet hnuah ka pick up chauh a. Lawmsangi chu a rawn tawng dan atangin a hmanhmawh tih a hriat khawp mai.
.
"Tunah kan inhmuh a ngai. Inthamna chungchang ah khan thu thar ka hria a, i awmna sawi la ka lo pan ang che."
.
"Keimah ka lo kal ang."
A awmna a sawi hnu chuan a rawn sawi hmun lam pan turin ka bike ka turn a, eng thu nge a sawi dawn hriat a chakawm tak zet. Vawiin ka thil hmuh tak nen khan inzawmna a neih ngei ka ring bawk.
.
Lawmsangi chu dawhthei lo tih hriat zet hian a lo vei kual sek a, min hmuh veleh engmah sawi lo hian min rawn pan hnaiin min kuah thlawp a. Ka hamhaih zawk mah.
.
"I tha em? Ka hlauhthawn zia hi i hrethiam lovang." a thaw hlap hlap chunga min enin a mittui a hru zauh a. Min kuah tih chu hrechhuak thut niawm tak hian min thlahin a hmai a sen nghal tawn tawn mai.
.
"Eng nge thil awmzia?"
.
"Ka_Ah_Phone call ka dawng a, i nunna a derthawng tih min hrilh a. Zawhna ka zawh hmain phone a off lehnghal daih a. I phone i pick up thei si lova ka hlauhthawn zia hi sawi ngaihna a awm lo. I tha tak zet maw? Thil mak deuhte i tawng em?" a ti leh zung zung a. A awm dan chu mangang tak tak a ni tih a chiang thawkhat. Min ngaihtuah em em chhan hi eng vang nge ni ta ang? A hnathawhnaa a boss ka ni mai a, a hriat loh tura ka rin thenkhat hriain min buaipui viau bawk anih hi.
.
"Engmah a thleng lo. Chanchinthar min hrilh tur i nei anih ka ring a." thutna tur awmah chuan thuin amah chu ka en reng a, lai niawm tak hian a hmai hupin a nui zui hak a.
.
"Tuna ka sawi bak kha thu thar hriat ka nei lo. Oh.. Ka awm dan hi mak min ti viau ang a. I duh loh dana ka awm anih chuan min ngaidam dawn nia." a hmui petin ka ngaih dan ngaichang hian min en kiau a. Eng emaw lai atang khan a awm dan hi mak ka ti tawh. Min ngaihven tih ka hria a, amah hi ka type anih loh hrim hrim vang leh ka hmeichhe duh zawng anih loh vangin ka ngaihven lova, han fiam vel emaw pawh ka tum hauh lo zawk a ni.
.
"Thil danglam a awm hleinem. I theih anga min tanpui avang hian ka lawm khawp mai."
.
"Ka tihtheih a tlem em hi.." tiin a nui ta var var a. "Sir, i buaina zawng zawng hi a kiang tep tawh ang. Tihtheih ka neih phawt chuan itan engpawh ka ti ang."
.
"Tuna i tihchin pawh hi a tam tawh khawp mai. A tawp hunah lawmthu ka la hrilh ang che." tiin ka nuih a, ka nui hmel la hmu ngai lo niawm tak hian lawm lutuk hmel puin min en a, min rawn kuah leh a.
"Kuah che hi ka tihtur a ni miah lo maithei. Mahse, nangmah vang hian kum 7 chhung zet chu mipa dang ka ngaihven miah lo phah a nia!" Whoa! A thusawi chu mak ka ti. Ka pha thei lo. Mak tak a ni.Ka hnuaia hnathawk rinawm leh ah hna a nih dan tur dik taka hlenchhuak thin hmeichhia hian tuna a tihlan bak hi  min ngaihven angin a lang ngai miah lo.
"Oh..Ka sawi chhuaka ka thawl hawk mai. I duh chuan min kalsan thei tawh ang. I duh loh zawng ka sawi anih chuan ngaihdam ka dil nawn leh che."
.
"I duh chuan ka rualin ilo haw ve thei ang. Khatiang thil mai maiah ngaihdam dil angai lo."
"Oh" a ti halh a.
.
Kan inhmuhna hmun atang chuan kal chhuakin ka bike ah kan lawn a, in lam panin kan haw a. Ka hnunglam tangin min kuah nghet sauh sauh tih ka hriat chuan ka tih loh tawp tur ka ti niin ka inhria. Engvanga inthiam lo ngawt  nge ka nih erawh ka hrethiam der lo. Inthiamlohna! Phatsantu ni ang hialah ka inngaih chu! Vaspi chuan min mangtha tawh. Thil thleng zawng zawng hi a fel vek phawt anih loh chuan ka hnaih thei tawh hek lo. Ka chunga harsatna thleng ah hian a inrawlh ve anih phei chuan___ A inrawlh ve theihna chance a awm tlat lehnghal.
.
Lawmsangi chu an in thleng ka thlah a, inngaitlawm taka a awm reng hian ka awm a tinuam lo. A nihna dik takah phei chuan kei hian lawmthu ka hrilh mawlh mawlh tur a ni zawk. A hlawkna tur awm miah lovin min tanpui a nia. Khawvel mihring maktaduai tam tak zingah hian mahni hlawkna tur awm miah lo leh hmingthat hlawh miah lo tura midang tanpui duhna rilru nei hi an tam lo khawp asin. Kei ngei pawh hian ka hrechiang khawp mai. Ka zaidam lova chuti chung chuan ka sawi apiang thuawih takin a zawm mai a, vawikhat chet pelh hlekah min hretu tam zawkin keimah min hrechiang lova min chirhtheh nghal thin laiin ani hi chu a ni ve ngai lo. A danglam tlat thin.
.
Ka in ka thleng a, ka ngaihtuahna kal ding deuh vang nge ka kawngka bula mi lo awm ka hmuh chuan ka phu deuh zawk mai!
.
"Arjun! I la cham tih ka hre miah lova." ka ti hluai a. Chhun lama a hun hman dan ka hre nain engmah hrelo anga awm a fuh zawk tih ka hrechiang.
.
"Ya_ Um_ Naktuk hian Delhi ah ka let dawn a, i chenna hmun chu a nuam hle mai." tih pahin kawtzawl vel chu a en kual ngial a. Lemchang mihring! Khawvela mihring awm zawng zawng zingah hian lemchang ngai miah lo mihring awm tak maw? An awm hlauha ka hre fuh anih ngat chuan chu mihring chu ka ring thei  ngei ang. Pawnlam lan dan hian min bum fo chu anih hlawm hi maw. Mi famkim lo hian mi famkim lo bawk endik nuam kan ti hlawm hle tih hi chu ka hre hne hlei hlui tawh alawm le.. He thilah hian tumah kan fihlim lo!
.
"Eng maw i sawi?" ka ti nawn leh. Ka ngaihtuahna kal ding hun chu a fuh chiah lo anih hi mawle.
.
"Oh..Ka haw hmaa hmuh leh hrim hrim che ka duh a."
"Okay.. In chhungah lut ila. Zanriah i ei ve nghal dawn nia." ka ti ve bawk a.
.
In chhungah kan inzui lut a, ka inchhunga ka hruailut hi ka tifuh chiah lo mai thei. A thil en chik dan leh a hawi kual dan atang hian thil hriat duh nei a ang tlat.
.
"Miss V lo zin lai khan i in ah hian a awm tih nimin khan ka hre chiah a."
"A dik lawm. Engtin nge i hriat a?"
"Amah nen kan inbia a. Thil theihnghilh a neih thu min hrilh a. Ka hawnsak nghal theih ka ring."
.
"Eng thil nge a theihnghilh?"
.
"A pindana a dah thu a sawi ringawt a, nangmah pawn i hriat loh tur thu a sawi tel tak e." ka nui suk ringawt. He Arjun-a hian mi a ka ni emaw a ti anih dawn hi.
.
"A dahna a hrilh che chuan i laksak dawn nia."
"Oh.. Tak tak maw?"
.
"Ni e, ka ring che alawm." ka tih chuan lawm hmel zeta nuiin "Ka lawm e." a ti phur surh a.
.
10 minutes vel a thut hnu chuan inhnuai a Vaspi room lamah ka hriatpui nain a chhuk a, a kal hnu chuan library-ah ka lut vat. Eng thil pawh ti se a vaiin ka mit ngei hian ka lo hmu vek dawn a ni.
.
Arjun-a chetla chu ka hmaa screen ah chuan ka en reng a, ka ner sawk sawk mai. A tihtur a tih zawh chuan hawi zuk zuk chungin pindan chu a chhuahsan a, in chung a lo thlen hmain keipawh library atang chuan ka chhuak ve thuai a.
Hmeichhe bakkilh arawn lek chhuak va va a, ka en lai khan khawia mi nge a lak ka lo hmu miah lo. A thil dah khan ka rilru alakpen nasat vangin bakkilh a la la tak ka lo hmu lo palh ani ngei ang.  Rei thu tawh lovin  min chhuahsan a, a chhuah veleh in hnuaiah ka chhuk nghal hmiah. Khum puan phah chu phawk hlawkin nichin maia Arjun-a dah file chu ka phawrh a. Ka lak atang hian eng thil chiah nge maw an duh phiangsen le??
.
Vaspi khan ka in ah eng emaw a theihnghilh tih Arjun hrilh lo ni se Arjun tan hriat ngaihna a awm lo. An zavai hian an tangho vek tih pawh a chiang e. File-a thu inziak a ka thil hloh tur ka uina ai chuan Vaspi'n ka chhiatna tur duha min phatsanna chuan min tina zawk. He hmeichhia hi ka hmangaih kher a tul ta lo ve___ Hetianga ka ngaihtuah vang ringawt hian amah ka mamawhna a danglam chuang der lo lehnghal a!
Tunah hian ka duh emaw duh lo emaw he lehkha vang hian ka nu in ah ka kal ngei chu angai ta a nih hi. Hmanni ka in a a lo kal bak kha kan inhmu leh ta miah lo va, khami tum pawh khan a duh duh sawiin thu min pe leh a, mipa naupang ka ni tawh lo tih chiang taka ka hrilh a hun ta anih hi. Mahni inveng thei turin tharum pawh ka nei tawh alawm.
.
Nu Tluangpuii'n eitur a siam peih vek tawh chungin ka ei chak hlawl lo a, zanriah pawh ei lo chuan ka nu chenna panin ka chhuak ta nge nge. Arjun-a file dah pawh ka ak tha thlap.
.
Ka nu chenna in ka thleng a, door bell hmetin kawngka an lo hawn hun ka nghak ta ran a. He in a ka kal khat zia hi ka lo ngaihtuah ngai miah lo. Hun rei tak a ni tawh..
.
Nula kawngka lo hawngtu chu ka nu awm leh awm loh zawtin in chhungah ka pen lut a, pindan dang atanga  ka nu lo chhuakin min hmuh chuan mak tiin a ri hluai a.
.
"Ka thupek i zawm thu min hrilh tura lo kal inih ka ring. Lo thu rawh." a ti vut vut mai. Ani leh ni lo angin min la biak that ber tum a ni hial awm e!
.
Kan thu fel chauh tihah door bell a ri leh a. Ka nu chuan nui sung chunga min en in "Duhsaki a nih tawh ka ring. Zanin hian min lo tlawh dawn tih a sawi tak e." a ti leh suah suah a.
.
Nula in kawngka a hawng a, kawngka-a Ludy lo penlut ka hmuh chuan min thawng deuh khawp mai. Mahse, engmah ka tilang lo. Ka nu hmel chu ka va en a, a thutna atanga ding hluai chung hian thlarau hmu ang maiin a dang var vek a, tawng hleithei lovin a hmui a khur hlawk hlawk a.
.
"Karei maw!! A va rapthlak em!" tia a phun chu mak ka tih zia sawilanna hun a ni rih lo. "Min hnaih suh..." tiin ka nu chu a te thawt a, Ludy hmel ka en chuan engmah danglam a awm hran lo. An pahnih hian an lo inhre reng tihna a ni. Ka nu hian Ludy hi a lawm lo  mai ni lovin rapthlak ti lutuk in a en bawk.
Eng thil dang nge awm leh ta hi? Tuna ka buaina neih mek chauh pawh hi vawikhata buaipui atan chuan a tam tawk tawh viau asin!
.
JADE
(Soddisfazione)
.
CHAPTER – 23
.
REMTLUANGA*
.
"Ka hmel min rawn hmu leh ngam tur hian engah nge i lo inngaih? Ka tan chuan mitthi i ni tawh! Ka in atang hian chhuak rawh."
.
"Thil i hre diklo! Min hlau tur ini reng a ni. I thiltih zawng zawng kha i fapa hriat lai hian ka sawi dawn em?" aw dam raih hian Ludy chu a tawng a, a mitmeng erawh tur pai kha em em ang hi a ni thung.
.
"Eng chu nge sawitur i neih? Ka fapa hian eng thil nge a tihtheih hre pha lo khan rak chiam chiam duh suh." ka nu zawk chu a rak chiam chiam a ni ber a, a thakhur chu a reh miah lo. A dang var puap chu a zia ta deuh chauh zawk a ni.
.
"Lawm ka hlawh vaklo chungin ka thu tho ang. Aizawl ka chhuahsan hmaa lo tlawh loh che chu a dik dawn lo tlat lawm tiraw?" ngeng lutuk tak zet hian ka nu dinna bul chair-ah chuan Ludy chu a thu a, zam hmel emaw nuam tih lohna hmel reng eng hmuh tur a awm lo. Min hmu lo ang hmiaha a awm chu ka tan maktih tham a ni bawk. Amah chu ka en reng a, engtin nge a awm zel dawn ka ngaichang a ni deuh ber mai. Buaina tam lutuk karah hian  thuruk dang lo langchhuak leh tur a awm anih ngai chuan zanin ngei hi chu thuruk lan chhuah hun tur chu a ni ngei bawk ang.
.
"Nangnen pawh hian kan inbiak chu a tul viau tho mai. Ka chhungrila ka thil up  beh hi a tam tawh lutuk a, keimah chauha pai atan chuan a tam lutuk a__sawi chhuah ka duh tawh zawk. Bakah, in chunga chhiatna thleng tur hi in hriat lawk pawh a hun ve tawh reng reng.."
.
"I duh duh sawi lo khan ka in atang hian chhuak rawh." ka nu chuan Ludy sam a tham tumin arawn hnaih ruak a, ka lo dang vat a. "Min thlah rawh. He hmeichhia hian min tibuai rei lutuk tawh. Engmah hlauh ka nei biklo tih han hre teh se!" Ka nu chu a tal buan buan a, thenawm khawveng zawng zawng hriat loh hlau niawm tak hian a au ring em em mai bawk a.
.
"Ngawi tawh rawh." ti hrawkin chair-ah chuan ka thuttir hnawk a. A thaw hlawi hlawi mai.
"Ka damdawi, ka damdawi.." a ti tham tuak a. Rang lutuk hian a nula awmpui chuan a damdawi lain a eitir a, chutih chhung zawng chuan Ludy chuan hmuhnawm ti niawm tak hian a lo thlir reng thung.
.
Ka nu awm dan a zia deuh hnu chuan Ludy chu thu mar tha lehin chiang kel kawl hian ka nu chu a en a.
.
"Ka nu tia koh che ka tum lova__"
"I nu ka ni reng reng lo." a ti vin hlur mai.
.
"A tha e. Nang chauh ni lo i fapa, i chhuan em em leh engkima i rinchhan pawh hi inveng hman miah lovin a tluchhe vek dawn tih lo hria ang che. Kawngsirah kut i dawh duk duk tawh dawn tihna a nih chu. Invenna hun in nei tawh lo."
.
"In buaina ah hian engvanga tel ve nge ka nih?" ka tih chuan Ludy chu muangchang hian ka lam hawiin a thu rem a, tunhmaa ka lo hriat ve thin Ludy kha ani tawh lo tih a mitmeng hriam ta hraih chuan a tilang chiang khawp mai.
.
"I lo hre miah lova. Thil mak anih chu. He mihring rapthlak tak hian i lakah engkim a zep tih min hrilh tum duh suh. Ka dam chhan leh ka thiltih engkim hi in chhiat theihna tura ti vek ka ni. Ka nunah hian lungawina ka neih ve theih nan nangni nufa hi ka tichhe vek dawn che u. Ka biru rei ta e. A tawp ka thleng tawh dawn." awki sang miah lova a sawi chhuak parh thei chu fakawm hi ka lo ti hmanhmawh a.
.
"I thu sawi zawng zawng chu engpawhnise, ka tan engmah a ni lo.In pahnih inkar buaina chu in pahnih hian chingfel rawh u. I laizawnnu pawh kha i ruahmanna ah hian a tel ve ngei tih a chiang a, in thiltuma in hlawhtlin lohna turin engpawh ka ti ang." ka tawng chhung chuan mitkhap miah lo hian min en ngar ngar a, za lo lutuk hian a nui lui ta sak a.
.
"Ka unaunu chu tunge?" a tichang fal mai! A thusawi awmzia chu ka hre ta lo. Chiang taka ka hriat chu Vaspi khan a unaunu thih naah ka inrawlh ni a ngaiin min tihchhiat tumin min hnaih a, tunah chutiang thil a tihchhan ber chuan a unaunu chu tunge anih min zawt lehsi ang maw??
.
"Hun khawhral hman ka nih loh vangin ka chhuahsan phawt ang che u. Nang kha_" tiin ka nu chu a en ren rawn a "Sawi duh ila neih chuan inhmuh i duhna hmun sawiin min hmu thei ang. Chu chu ka lak atanga i dawn san ber tur thil a ni tih hria ang che. In thil neih zawng zawng a kan ral vek hma hian dar 48 hun in nei!" a thutna chu thawhsanin kawngka a pan a, ka nu hmel chu hmun a nuam lo tih piah lam a ni.
.
Ludy a chhuak fel a, min biak tum miah lo tih hriat tak hian ka nu chu muangchangin a thutna atang chuan a tho a.
.
"Kha hmeichhia nen khan engtin nge in inhriat? Khatiang khawpa haw tur che khan alakah eng thil nge i lo tih?"
.
Min chhang lo.
"Tunah sawi rawh. Kha hmeichhia nen khan eng inzawmna nge in neih?" ka ti hrawk a. Ka nu hian min hmangaih ngai lovin rawng takin min enkawl thin mah se tuna ka biak anga awki sang hian ka la be ngai miah lo. He ka nu hrawn hian eng ang taka tam nge thuruk a lo neih a, a chhiat vekna tur khawpa che duh amah dotu an awm chhan hi thu holam mai mai ani thei lo.
.
"Hre lo la a tha zawk." a ti leh a. Ka dawhtheih chin a pel ta. Thudik hre lo chuan he in hi ka chhuahsan hauh lovang.
.
"Ding rawh." ka tih chuan a ding chawt. Phawk deuh hru hian min rawn en a, ka hmel min hmuh chuan mak tiin a meng phar nawn awk a. "Engkim tihchhiat  vek a duhna chhan kha ka hriat ngei angai. Mihring ngaihtuahna pangngai neiin engmah lo mai vangin mi dang chhiatna tur ruahmanna an siam ngai lo. He thil hi kei aiin i hrechiang zawk. Eng vanga haw em em che nge anih?"
.
Insut hlawpin a hmai a khawih a, engmah tithei lo leh tlawm hmelpua ka nurawn ka hmuh vawikhatna a ni!
.
"Ka sualnain min umphak ta tih hi ka sawichhuah ka ring ngai lo. Ludy kha ka fanu anih kha. Ka fanu_ Ka hawisan tak ka fanu anih kha.." chair-a thu ta lo chuan chhuatah  thu thla hnawkin chhuak em em hian a tap ta hlawp hlawp a. A thusawiin ka ngaihtuahna a tihbuai zia ka sawi rih lovang.
.
"Min tichhe thei  ngei ang tih pawh ka chiang. Ani khan ka fapa ka hrin ngei i ni angah a ngai hmiah a ni. Ka thiltih zawng zawng sawi chhuak leh tur hian huaisenna ka neih theih ka ring lova. I laka ka awm dan te pawh tiamin mi tha ka ni lo tih sawi kher tulin ka hrelo. Ka dam chhung hian ka thiltih khan min umphak ka ring ngai lo asin.." a tho a, a pindan pan tuma inher vutin a phun zui mawlh mawlh a. "Ka tluchhe lai leh ka neih zawng zawng ka chan lai hi tu mihring mahin an hmu ngai lovang.."a thusawi dang chu ka hre phak ta lo.
.
Ahmaa ka thutna chair-a file ka dahna bag let ngat chu lain ka ak a. Tunah chuan ka nu hnen atang hian he file chungchang sawifiahna hi ka hre dawn chuang lova, hun khawhralin awmzia a nei lo.
.
.
VASPI*
.
Ka thiltih turah hian ka timru tlat anih chu. Nizan khan Remtluanga’n min beih let theih lohna tur leh tan chhan a neih miah lohna turin file thenkhat ka tifel a, engkim a kalsual vek dawn nia hriatna ka neih hian min tibuai ru viau thung.
.
Ka kalsan dan vang khan min be duh lovang tih hre tho chungin biak ka tum a, ka rinlawk ang chiahin min be duh ta lo reng a nih kha. Naktuk hian UDY-JA Board meeting-ah ka tel  ngei ngei angai a. UDY-JA neitu ka nihna hi thup reng a tulna a awm tawh lo. Ka u tana ka tihtheih sang ber titurin ka rilru a inpeih vek tawh. Thil kal sual a awm a, tuartur an awm anih chuan ka tuar mai ang. Remtluanga ka kalsan dawn khan engkim chhan neia ti ka nih thu leh ka mangtha thu ka hrilh tawh kha. Ka inchhir tur a ni lo. Ka u chunga thil diklo thleng rulhlet nan ka lungawi hma chu ka bei ang tih ka intiam tawh a ni lawm ni!
.
Ka paper ziah fel tawh chu uluk taka chhiar nawn lehin ka hming ka sign a. Lehkha hi ka thehlut anih chuan engmah tihdanglam theih a ni  tawh lovang.
.
Mumal lo takin ka muhil a, kamuhil meuh lo a ni zawk mah. Mumang mak tak tak ka nei chhawng zut a, zing dar 4 velah ka khum ka thawhsan ta ringawt.
Bathroom-ah lutin ka inbual a, hmanhmawh hauh lovin eitur ka siam a. Chakna thahrui ka neih a ka huaisen theih nan chaw tha ka ei teuh a tul alawm le.
.
Dar 9 a rik meuh chuan engkim peih thlapin in ka chhuahsan a, police station-a ka tihtur ka tihfel hnuah office ka pan a. Ka cabin pan lovin conference hall ka pan ding nghal a, office hnathawk thenkhat chetdan ah chuan thil diklo a awm tih ka hria. Arjun hmel ka hmu miah lo bawk. Ni dang ang chu ni se file keng chungin min lo hmuak ngei tur a nia.
.
Conference room-ah ka lut a, Board member thenkhat chu hmel dur khuih hian an lo thu ngawi hmuk hlawm a.
.
Dar 10 rik nan 10 minutes a ala awm tih ah Mr. Kumar Jyoti chu ding chhuakin file arawn lekchhuak a.
.
"Vawiin hian kan zavaia hriattur pawimawh tak puan tur a awm a. Miss Jade hian Board member dangte tumah rawn lovin a share zawng zawng 70% hi a hralh a, tunah hian UDY-JA neitu thar hmel kan hmu dawn a ni. Hetiang thil a thleng hi Miss Jade chungah pawh Board member kan lawm lo hle. He company tan hian engmah ini tawh lo a, conference room hi i chhuahsan thei ang. Engvanga lo lang nge i nih? Puitling lo taka i thiltih vang hian keini chuan kan ring tawh hauh lovang che."
.
Ka thu hriat leh tuna ka hun hman mek hi ka mumang a nih ringin ka insik chhin a, mahse, ka mumang ani lo. A tak ngeia thil thleng a ni. Kei hian UDY-JA-a ka share zawng zawng ka hralh maw? Tu hnenah nge ka hralh? Thil ni thei a ni lo.
.
"Min lo hrethiam ula, tuna i thil sawi kha engmah hriat ka nei lova, ka share hi 1% pawh ka hralh lo. File kha ka lo en thei angem?" zam hmel put a hun lo tih ka hria, ka insangmar nasa lutuk tak zet.
Mr. Kumar chuan za lo zeta nui chungin file chu min pe chhawng a, file a thu inziak leh ka signature  chiang tak awm si te chu mak tiin ka en ta reng a. Hetiang hi engtin nge anih theih? Engtin nge a nih theih?
.
"Engtin nge a thlen theih? Hei thil hi a lem ani." tiin ka phun mawlh mawlh a. Ka bul chiaha thu tih loh chuan ka tawng chu an hre phak lo thung ang. Ka ngaihtuahna a vakkual zung zung a, he paper-a ka signature a awm theih chhan hi ka hrechhuak miah lo. Thil ni thei a ni lo. Ka u tan hnehna ka chan theih nan leh diknain ro a rel theih nan UDY-JA hi ka mamawh!
.
"He thil hi dawt a ni." ka ti thawt a, phawk hra leh che miah lo hian an zavai chuan min en ta thap. "A fiahna pawh ka nei thei ngei ang. He company hi ka u nen kan din anih vangin ka tan a hlu a, ka share hralh hi vawikhatte pawh ka la  ngaihtuah ngai lo."
.
"I mihring sawi i u chu kan hmu thei angem? Tumah hian kan ringngam nghal dawn hauh lo che a nia."
.
"Ka u chu in hria alawm. Ludy_ Ludy Shah!"
"Chutiang hming chu kan hre ngai lo. He company din anih khan chutiang hmingpu chu kan thiltih engahmah a tel lo. Company records pawh a en vek theih alawm. I dawt sawi chu tumah hian kan ring ngai lovang." Mr. Kumar chu mak tiin ka en a, sawi mai tur pawh ka hre ta lo hial.! Thil ni thei a ni lo reng reng.
.
"Nang chuan min lo va chhuahsan rawh. He company neitu thar Francesca Silva a lo thleng a, he pindan chhunga i awm ve hi kan mamawh lo ve."
"A theih loh!"
.
"I chhuak duh lo anih chuan security kan koh mai angai dawn anih chu."
.
Conference room kawngkhar chu rawn inhawng in business suit dum ha mipa pali zet an lo pen lut a. Kan zavai chuan tawng lovin kan en thap. Mipa pali lo lutte chu kawngka sir tawn ve ve ah dingin a lai takah chuan hmeichhia nalh taka inchei arawn pen lut a. Chu hmeichhe hmel ka hmuh chuan ka mit a vai a, ka lu hai muai muaiin ka thu zawi ta hnawk a! Ka mittui tla zawih zawih chu ka lawm lutuk vang nge mak ka tih lutuk vang..ka hrethiam lo.. A pahnihin a ni ngei ang. Tuna ka hmuh mek hmeichhia hi thi tawha ka ngaih leh nitin ka ngaih em em thin ka u kha a ni tlat alawm.
.
"Ka u!" ti sapin ka tap zui hlawp hlawp a. Mahse, chu hmeichhia chuan min hmu lo. Dawhkan lian tak an kil thup lu lamah chuan kalin hawi sang vah hian a thutna tur chair-ah chuan a thu a. A rawn hawikual a, min la hmu fuh chuang lo. Keihi thlarau ka ni anga min hmu thei lo aniang!
.
Ka thutna atang chuan ka ding ta hluai a. Room-a awm zawng zawng mit chu keimahah a fu leh ta.
.
"Miss Jade, min chhuahsan thei tawh ang."
.
"Ka sawi kha, ka u ka sawi kha amah hi a ni." nui chungin ka u chu ka en a, pindan chhungah chuan eng thawm mah hriattur a awm ta lo. 
.
.
"He hmeichhia hi a a tak tak anih hi. Hruaichhuak rawh u." Mr. Kumar chu enin  ka u chu ka en leh a, ka u chuan min hre miah lo niin ka hria. A awm ve tho. A awm loh hnu khan ka danglam nasa ta em a ni. Phuba lak duhna leh mawhphurhna tam takin min delh a, ka hmel pawh a danglam tawh a ni ngei ang.
.
"U_Keimah Vansangpuii. Engtin nge min hre miah lo ang khan i awm theih zawk a. Ka ngai lutuk che asin. Nitin.." Mizo tawng ka hman vangin pindan chhunga awm ho chuan eng thu nge ka sawi an hrethiam  lo. Ka u chu thle deuh nghatin min rawn en a.
.
"Mr. Kumar, Meeting room ah hetiang mi-anglo hi engtin a awm ve theih? Chhuahtir rawh. Hun paihral tur ka nei lo ania."
.
Ka u thusawi chu mak tiin amah ka en a, ka tawng kha hrethiam ang pawhin a awm duh lo. Hetiang thil hi engtin nge a thlen theih?
.
"Miss V, chhuak rawh."
.
Sawitur reng reng ka hre ta lo. Ka u ka ngaih em em leh amah vanga ka hmangaih ber pawh ka hnawl nachhan hian min hrelo mai ni lovin mi a tiin min ko anih chu.
.
"Security!" Mr.Kumar chu a au that a.
.
"A tawk e. Ka chhuak ang." Ka chair-a ka bag chu lain muangchang hian conference room atang chuan ka kal chhuak ta chhat chhat a. Engmah ka hrethiam lova, engtin nge ka awm dawn pawh ka hrethiam hek lo.
.
Ka share ka hralh miah loh mai pawh ni lo, hralh tuma vawikhatte pawh ka ngaihtuah ngai miah loh kha thawklehkhatah ka kut atangin lak bo ani a, a la botu chu tu dang mah ni lovin ka u ngei a ni. Min hria angin awm lo mah se ka chiang.. Ka chiang lutuk tlat. Kha hmeichhia kha ka u Ludy ngei a ni. Hetiang thil hi engtianga lo thleng nge  anih a, ka u khan engvanga ti nge a nih? A tihchhan fiah taka min hrilhfiah ngei ka beisei. In ah ka hawng anga tlaiah a lo kal ngei ngei ang. Engtin nge a nau neihchhun hi min kalsan theih ang? A thei lo.. A thei ngai lovang. Ani kha nuamsa taka awm thei lo khawpa min enkawl seiliantu a ni lawm ni?
.
Rilru buai lutuk tak zet hian in ka pan a, in ka thlen chuan ka thawmhnaw pawh ka thlak lo. Ka pheikhawk phelhin tlaia ka u lo thlen hun ka nghak tawp mai a ni. Ka thu thei lova, thil dang reng reng ka ngaihtuah thei hek lo.
.
Tlai dar 6 a rik hnuah pawh ka u chu a lo lang thei chuang lo. Ka talbuai chu a ni ta ber. Thil awmzia Arjun zawh tumin ka call a, eng thil  nge a hriat phiangsen ni, a phone a pick up thei der lo.
.
Ka thawmhnaw thlakin ka kalchhuak a, khawilam nge ka pan dawn pawh ka hre chuang lo. Bar-ah lutin ka thu ren rawn a. Ka piaha hmeichhia ka hmuh chuan ka pan nghal ruak ruak mai. Amah ka pawh hmain mipa  tha chak zet zet hian hnehsawh lutukin min lo dang a.
.
"Thlah ru!" ka u tawng an hriat chuan min thlah rang khawp mai.
.
"Min thlah ru!" ka ti ve bawk. Ka u chu ka pan a, a hmel chu chhuna kan inhmuh nen a la danglam tehchiam lo. Amah kuah tuma ka ban chuan min lo dang vat a.
.
"Engtin nge hetiang hian i awm theih? Min kalsan ah ngaiin nitin ka ngai che a, dikna i chan theih nan ka tihtheih zawng zawng ka ti asin."
.
"Chutiang chu theihnghilh rawh. Tunhmaa ka tan i hnawksak ang khan tunah chuan ka intihbuaitir dawn tawh lo che. Ka duh zawng ka nei tawh. Ka mamawh tawh lo che. Dik tak chuan maw, ka tan i inpek pumhlum thaka ka tan i beih hun ka lo nghak a. Chutiang thil a thleng dawn lo tih ka hriat takah chuan ka rawn che chhuak ta a ni. Ka thil neih zawng zawng hi ita tur engmah a awm lo. Ka hmuh phak lohah kal bo ang che."
.
"Chu zawng chu em ni sawitur i neih?" ka mittui ka dang zo lo. Ka na lutuk tak zet. Ka beih ve na zawng zawng kha atan hian a tawk zo lo anih pawhin ka theihtawp chu ka chhuah ve bawk asin.
.
"Hetiang khawpa nep tur leh mipa pakhat chauh pawh hnar zo lo tur khawp hian ka enkawl seilian lo che.. I lakah hian ka lo beisei sang mah mah a ni. In saw nei la, abak chu engmah chan tur i nei lo. Min kalsan tawh rawh."
.
"Ka tihtheih zawng zawng_"
"Kal rawh ka tih chu."
Engahmah  min ngai lo tih hriat tak hian a thutna atang chuan a tho a, enghelh nei miah lo a an lam hut hutna lam chu panin a lam a.  A awm dan chu mak ti leh angaihna hre lovin  ka en ta ngawt ngawt a.
.
Restaurant leh UDY-JA, an hlutna zawng zawng hi ka u ka tana a hlutna nen khaikhin chuan ka tan engmah anni lo ve ve. Chutiang anih lai chuan tunah hian engkim ka hloh vek a ni. Ka u ka hloh a, engmah nei lo mai ka ni ta bawk. Ka thinlunga ka duh leh ka thlakhlelh em em Remtluanga_ Zingah khan amah beihna thubuai ka thehlut a, khatiang hnuah khan engtin nge a hmel pawh ka hmuh ngam tawh ang? Khawvel ah hian lo piang lo law law ila ka tan a tha zawk tur!
.
Bar atanga chhuakin muangchang hian ka in panin motor ka khalh a. In ka thlen hnuah ka phone ka en chuan missed call a lo awm nual mai. Motor ka khalh lai khan ka ngaihtuahna kal ding lutuk vangin ka lo hre lo a ni ngei ang. Ka pick up thuai a. Hun eng emaw chen hnuah Sangtea’n min lo be leh hlawl hian chhan tha tak a neih ngei ka ring.
.
“Sangte?”
“Min ngaidam rawh aw.”
“Eng nge a awmzia?”
“Aizawla I lo kal hmasak ber, a tir atang khan I u a thih loh thu kha ka hrilh thei lo che a. Tunah hian ka tlai tawh em ka hre lo. Thil awmzia ka lo hrethiam har lutuk deuh a ni. I u ruahmanna kha I tihchiat loh chuan Remtluanga hian engkim a hloh vek dawn a nia.”
.
“Chiang zawkin I sawi thei em?”
“Hmaichhan ngeia hrilh theih che ka duh khawp mai. Mahse, ka thei ta lo anih hi. Remruata nen hian I u khan engkim felfai takin an ruahman a, he thu hi ka hrilh che tih an hriat rual rualin khawvel hi ka chhuahsan nghal ka ring. An rapthlak zia I hrethiam phalo zawk ang. Nichin mai khan keipawhin thil awmzia ka hrethiam chiah a ni. Remtluanga hnenah hrilh vat rawh. Remruata hi vaubet se la, Remruata ber a hren chuan I u khan engmah a ti ngam lovang.”
.
“Ka lawm e. Remtluanga chu biak ka lo tum ang.”
“Ka tum ang tih ringawt a hun lo. Tunah khan be nghal rawh.”
.
“Okay_Okay.”
.
Phone ka off a, tim ru tak chungin Remtluanga ka call nghal a. Phone a pick up thei lo. Vawithum zet ka call hnuah a pick up ta hram a. Ka beisei loh lutuk in a phone lo pick up tu chu hmeichhia a ni lehnghal.
.
“Remtluanga a biak theih em?” phun ser ser ri ka hria a, chu hmeichhia chuan  min chhang mai lo.
.
“Tunah tak chuan a buai deuh a. Inchah chi te anih chuan han sawi la.”
.
“Amah a biak theih hunah ka lo call leh mai ang.”
.
“Ahh_ Zanin ah chuan a biak theih ka va’n ring lo. A buai viau dawn a..” a  ngawi deuh chat a. “ Ni lawm ni..” a ti zauh chu ka hre phak. Abulah Remtluanga a awm tihna a ni! Min be peih lovin a bula hmeichhe awm a pick up tir a ni chiang khawp. Ni e, a duh duh a kawp thei, ka sawi phak a ni lo. Kei chuan ka duh thlanna ngeiin ka kalsan tawh. Chuti chung chuan ka awm chhungah hian a na vawt vawt a nih chu! Phone chu hupin  thawk ka la hawk a.
.
“I bulah khan a awm anih chuan ka lo be lawk ang chu, a pawimawh khawp mai.” ka ti leh hram a. Mipa phun bul bul ri pawh ka hre phak.
.
“Jade I ni tiraw?” chu hmeichhia chuan arawn ti leh rih a.
“Aw, ni e.” ka chhang rang mah mah maithei. Ka rilru a hmanhmawh khawp mai.
.
“Remtluanga chuan biak che a chak lo anih chu. Anih phawt aw.” Ka chhan leh hmain phone chu a off zui hmak a. Ka thin pawh a ur lo! Awm dan ber tur ka hre miah lo nia.
.
Engtiang pawhin ka lakah awm se a himna ka duh anih chuan biak ngei ngei a ngai tho tho. In sangmar tha leh in ka call nawn leh a, vawihnih zet a ring quit leh ta. A vawithum nan ka call leh a ka beisei loh hnuah amah ngeiin a pick up ta hram a.
.
“Eng nge I sawi duh?” a ti chhum hmak mai. Ka sawitur zawng zawng thawklehkhatah a bo vek.
"I tha em?" ka ti ta ringawt a. A nui hak ri ka hriat chuan ka maimitchhing tawp.
.
"Chu chu maw thil pawimawh?" a ti bul hmuk a. Ka tawng zawm mai thei lo. Ka tap chhuak mai ang tih ka hlau a ni. "Ngawi reng lo khan sawi la." a ti leh a. Alakah engmah beisei lovin a himna ka duh vang chauhin ka bia ani. Chu chiah chu tunah hian a pawimawh. Ka kut ka hum ruh ta  ngawt a.
.
"Remruata kha vau bet rawh. Anih loh chuan engkim i chan dawn. Naktuk hian ka u in i chhiat vek theihna tur thiltih a tum a__"
.
"Chuvang chuan min lo bia a? A ropui hle mai. I tana vanduaithlak takin i thu rawn sawi chu ka hriatsa a ni hlauh mai!"
.
"Oh! I hre tawh maw? A that chu_"
"Eng thil tak nge tih a tum i hriat chuan ka hre chak khawp mai." a awki a min nuihzatna lang chu tuar har ka ti. Mahse, ka lakah hetianga awm tur hian dikna a nei. Min ring miah lo hi a thiam loh a ni lo.

"Eng chiah nge atih dawn ka hre bik lo." ka ti sap a.
"Ka rin dan chiah. Inbiak chhan tur kan nei ta lo anih chu." tiin phone min off khum hmiah.
.
Ka phone chu enin khumah ka mu thlawp a, ka mittui ka dang zo lo.
.
Eng chena rei nge chutiang chuan ka mut hlawm tawp ka hre lo. Kawngka inchum bur bur ri ka hriat rualin ka phu chhuak zawk a, khum atang chuan ka zuang tho zawk mai. Sana ka en a, zing lam dar 2  a pel awrh chauh a ni. Kawngka chu dimna nei miah lo hian an chum zui bur bur reng vangin hmanhmawh tak hian kawngka chu ka pan dawr dawr a.
.
Kawngka ka hawng chiah chu eng emaw hian min rawn su nghal deuh bur nimai hian ka hria. Ka mit a vai chum chum mai.
.
"Nangte reuh hian i ngaihzawng chu tanpui i tum nghal hmiah amaw? Engtin nge ka tan i din theih ka lo beisei zawk le? Tenawm lutuk mai." ka u thinrim lutuk hmel chu tunhmain ka la hmu ngai lo hrim hrim. Tawng tuma ka ang zuau chu a kutin min zap a, ka ngawi leh rih.
.
"Engmah sawi suh. I thiltih zawng zawng kha ka hria. Ka tan bei niin i inngai a, mahse, engmah i lo ni lo. Laktlakna reng reng i lo nei lo anih hi. Tikhan i duh danin i chanchin chu i chhui dawn nia. I nihna dik tak i hriat hun chuan engmah lo leh laktlak loh zet i nih chhan hi ila hrechhuak ve ang chu." In chhung chu a enkual a, amah veng reng tute chu melhin "Helamah hian kal r'u." tih pahin a pindan lam a kawk vah a.
.
"U_"
.
"Khatianga min koh kha a tul lovang. I laka ka zahngaihna ka lantir hnuah pawh kha mihring kha tanpui ila tum cheu vangin in ah pawh hian i cheng thei lovang. Kar khat chhungin inla chhuak vek ang che." a ti hriam hraih a. Ka u, ka engkim, ka nu leh pa nih kawp thin hian hetiang nungchang leh tawngkam hi ka lakah a hman ka ring ngai lo hulhual. Ka zah a, ka lakah eng thu pawh chhak chhuak se ka chhang ngai lo. Ka rinchhan ber a ni reng thin. Mahse, tunah chuan rinchhan tur ka nei tawh lo. Keimah chauh ka ni leh ta.
.
JADE
(Soddisfazione)
.
Thantei_LauraSean
.
CHAPTER - 24
.
VASPI*
.
Engmah sawi tawh lovin ka u leh amah veng tute chetla chu ka en reng a, ka laka a rilru puthmang leh min ngaihdan chiang taka a sawi lan vek tawh vangin a bulah engpawh sawi ila awmzia a awm tawh lo tih ka hrechiang. A duh ang tak hian ka hnaih tawh hauh lovang. Ka duh naah chuan mi luhlul tak ka ni ve bawk a, engpawh tawk dawn ila keimah chauha nun dan ka zir a tul a nimai. Ka ngaihtuahna erawh reilote chhungin a vak kual nasa tak zet. Ka u chungchang bikah chuan khawvel a chhuahsan nia ka ngaih lai pawh khan nitin amah ngai chungin ka nung a, tunah pawh khatiang chiah khan ka nung leh thei mai ang. Ka thinlung nat zia erawh tawngkaa sawi chhuah thiam chi pawh a ni lo ve.
.
In atanga an chhuah hnu pawh chuan ngawi renga thuin ka en ngai ka en tlawk tlawk a. He in ah hian kar khat chhung  bak ka chen theih tawh dawn loh vangin ka awm dan tur ka ngaihtuah fel vat a tul a ni. Eng pawh tawk dawn ila ka u tanpuina dil ai chuan riltam a thih pawh ka thlang zawk hial ta ve ang!
.
Ka pindan ah lutin ka thawmhnaw thenkhat ka pack a, ka thil tum hi a tha ber a ni em ka hrelo. Mahse, ka tih ngei a tul. Ka nu leh pate eng ang mi nge annih tih leh engvanga ka u enkawlna hnuaia awm hi nge ka nih tih a bulte atanga ka hriat vek a tul a ni. Ka hriat hma chuan hahdam takin ka awm thei ngai dawn lo.
.
Ka thawmhnaw ka pack zawh chuan mutchhuak lo zet hian khumah ka mu a, ka chhungril a ruak leh  mal ngawih ngawih, rinchhan tur leh ka thinlung natna sawi chhuahna tur nei miah lo nia ka inhriatna chuan min tina tawk khawp mai. Remtluanga hmel ka mitthla-a lo lang vang chuan ka rum chhuak hak a. Ka kalsan rual rual khan hmeichhe dang a kawp nghal ngei ang. Ngaihtuah zawm loh ka duh zawk. Ka thianghlimna ka hlan pawh a ni lova, ka thinlung chiah a ni ka hlan.. Chu pawh tunah chuan awmzia a awm tawh lo_Amah hnaih leh tum pawh ni ila min hnar chiang sa tih a hriat vek tawh. Mahni inkhawngaih zawngin engmah ka ngaihtuah tur a ni lo.
.
Ka mutthilh theih thlawt loh vangin ka tho a, thil dang ngaihtuah duh lo luiin ka work out ta ngawt a. Ka tha zawng zawng ka hmang zo a, che tha peih miah lo khawpa ka chauh hnuah bathroom-ah lutin tui vawtin ka inchiah vang vang a. Ka inbual zova, ka inthlak fel hnu chuan khua a var zui chu a ni deuh mai.
Ka luggage chu kengin vawikhatmah let leh tawh lo turin in chu ka chhuahsan ta.
.
Ka phone nghawr dar dar chu enin min lo call tu chu Sangtea a ni tih ka hmuh chuan ka pick up thuai a.
.
"I tha em?"
"Tha e."
"Tunah khawiah nge i awm?"
"Eng atan nge i tih?" ka ti bul hmak a. Engkim hre chunga a ngawih reng vang khan awlsam takin a lakah that ka chhuah thei rih lo. A tanpuina ka la mamawh dawn tih hre chung pawhin ka thei rih chuang lo.
.
"Chimawm lo teh. Thil pawimawh hrilh tur che ka nei a nia."
"Han sawi la."
.
"Phone a sawi chu pawh a  ni chiah lo. Ludy kha i lakah engtin nge a chet ka hre lova, mahse thil thalo tak a tih ngei ka ring."
.
"Min ngaihtuah tih sawi i tum a nih chuan ka ring chuang lovang che. Khatiang thil zawng zawng i hre vek chung pawhin i ngawi ngar ngar alawm le.." ka thinrim deuh nain ka aw ka tinem lui hram hram.
.
"Ka tihpalh tih ka sawi tawh kha. Tak takin, hreawm ka ti tak zet ania. Hmaichhanah inhmuh ka duh hle mai." a aw atang chuan sawi duh a nei ngei tih phat rual a ni lo.
.
"Tunah Airport ka pan mek. Kan inhmu thuai dawn nia." tiin min chhanna pawh  nghak tawh lovin phone ka off a. Ka duh emaw duh lo emaw hetiang buaina zawng zawng hi chinfel vek a tul ngei ngei dawn. A tawpah ka duhang thil a thleng kher lo thei, eng pawh thleng dawn se ka ngaihtuah lawk thil hi ka ti vek dawn tho tho.
.
Darkar eng emaw zat hnuah Lengpui Airport ka thleng leh ta. Min hmuaktu tur an awm chuan loh vangin Taxi dinna lam ka pan a.
.
"Fimkhur ta che." min sutu hmeichhia chu ka en thuai a. Ka lo hawi chhuah loh vang a ni.
"Tihpalh. Ka_" a bula mipa chu Remtluanga a ni tih ka hmuh chuan ka ip chawih mai. Mahse, he hmeichhia hi tunge anih ka hre lo thung. A hmeichhe khawp thar a ni ngei ang chu. Remtluanga chu min hre awma a awm loh vangin ka hawisawn thuai a. Ka te chem chem ni ber hian ka inhria.
.
"I kalna en tawh ang che." a ti leh nghat a. Chhang lova bu zeuhin ka luggage chu ka nawr chhunzawm a. Ala phun zui mawlh mawlh chu hrelo angin ka awm tawp. Min rawn sutu chu amah zawk a nia_
.
"Lo ding teh._ Nang kha lo ding teh." ka kawr hnunglamah min rawn pawh tak vangin ka ding lo thei ta lo.
.
"I va inngai hlu ve a, ngaihdam min dil miah lova kal tlang te i tum le?" ngaihdan ni lo zetin a hmel chu ka en a, sawi mai tur pawh ka hrelo zawk. A hmel lan dan atang chuan kei aiin a lungawi lo nasa hle ta ve ang.
.
"Ka tihpalh tih ka sawi tawh kha. Miin min en thup a nia." ka tih chuan a meng tal tawp mai.
.
"Tsk, tsk.. Nangte reuh hi. Hmeichhia zawkin mipa i chenchilh mai ngam  kha a lo mak lem lo ve."
.
Ka tan chhan loh a tha zawk tih ka hria. He mihring hian tunge ka nih a hre ngei tih a chiang. Kal ka tum leh chuan na zet hian ka ban ah min rawn pawt let a, tunge anih ka hrelo  nain ka dawh thei ta bik lo.
.
"Duhtawk rawh." Remtluanga chu ka en zawk a, ani chuan min en lovin hmeichhia darah chuan a chelh a. Ka tawng hmaa a tawng chhan chu ka thlavang a hauh vang a ni lo. Mi chi hrang hrang awmna hmuna buaina thlentir a duh loh vang chauh a ni ngei ang.
Hmeichhia chu en in "Ka ban hi thlah rawh." ka ti nghat a. Min thlah tum hmel a pu lo. A ti ta mah mah a ni e.
A banrekah vuanin na deuh tak hian ka herh a, a te thawt mai. Thlah thuaiin ka kalsawn a, ka hmer nat tawk vangin min umzui ka ring lo. A banrek chu a tuai vat vat tih ka mit sirin ka va hmu hman hram.
.
"Nang kha tuman an duh lo che!" A tawng ka hriat chuan hawilet duh lova insehruh chungin ka mit ka chhing sawk a. Ka hawilet tur a ni lo_Ka hawi let lovang! Min mamawhtu an awm lo anih pawhin ka nun tho a ngai alawm le.. Ka thil ngaihtuah chuan ka nuih a tiza zawk. Tuman min duh lo mah se ka la dam ve reng dawn! Tue maw tan ka la tangkai mahna!
Taxi dinna hmun ka thlen chuan thaw halh chungin ka ding leh te te phawt. Ka khur der der tih ka inhre chiah. Ka awm dan chu duh lovin ka mit ka khap sawk sawk a. Kha hmeichhia khan ka chungchang eng chen nge a hriat le? Khatianga min tawng khum ngam a nih ngat chuan engkim a hriat ngei ka ring. Ka thin a ur a, tih theih erawh ka nei hauh si lo. Tupawh lo ni se Remtluanga bula a awm vang ringawt pawh khan ka tan chuan a danglam tawh hrim hrim. Hetiang zawnga ngaihtuahna ka hman hi a hun lem lo khawp mai.
.
Taxi remchang hmasa berah chuan chuangin kan tlan chhuak a. Aizawl-ah Remtluanga a awm dawn lo tih ka hriatna chuan min tihnual deuh ringawt lehnghal. Ka thinlung hi ka duh dan danin thunun thei ila ka ti thin tak zet.
.
Tumah pan tur ka neih chuan loh vangin Hotel ka pan a, ka pindan tura ka luh fel meuh chuan chau tak ka ni. Ka thawmhnaw pawh phawrh lovin khumah ka mu vang vang phawt a.
.
Eng thil nge ka tih hmasak ber ang? Ka sum neih ang ang hi a lo thlawn maiin ka raltir thei lo tih ka hrechiang a. Ka tihtur chu eng pawh nise naktuk atangin ka tih tan ngei ngei a ngai.
.
Tha tho lo zetin khum ka thawhsan a, ka inbual harh hnu chuan ka ngaihtuahna pawh a fim  leh ta deuh.
.
Zanriah ei peih lovin ka pindan hmarlam tukverh ah chuan ka dak vang vang a. Thil pakhat hriatchhuah ka nei!
Sana ka en a, dar 7 a pel awrh chauh tih ka hmuh chuan inthuam lum sauh sauhin Hotel ka chhuah san a.
.
Gate pawnlam atangin in chu ka en reng a, ka beisei ang chiahin a reh thiap mai. Hriat chhuah tur dang ka la nei anih chuan tun hun hi ka tan hun tha ber a ni ngei ang. Ka mit chhingin ka ngaihtuahna ka sawrbing ta ngawt a. Ka mumangah takngial pawh hmuh ka duh tawh loh thil kha a taka tawng ang maiin ka awm leh ta.
.
Ka nu tlukna bula ka din lai khan hmeichhe pakhatin min pawm sawn a, chumi hma chuan ka pa in chhung tanga a lo chhuak lo kaptu kha min pawm sawntu hmeichhia kha a ni lo. A hmel ka ngaihtuah chhuak zo tawh lo...
.
"Hetah eng nge i tih?" phu deuh zawkin ka hnunglam ka en a, ngaihthat loh hmel tak hian Sangtea chuan min lo en reng a.

.
"Ka_Uh_Nangmah hmuh tumin ka lo kal.."
"Dawt sawi duh suh." za lo zeta nui hakin ka bulah arawn ding a, ngun taka thil  ngaihtuah nei hmelpu hian in chu a en ve ta reng a.
.
"Ahma khan he in ka neih theih dan hi min zawt tawh tih ka la hrereng. Tunah hian he in ka ta a lo nih tak dan hi hrilh che ila a that ka ring." a ti charh charh a. Chhang lovin amah chu ka en tawp.
"Remtluanga nu saw i hmuh tawh ka ring?" ka chhanna nghak niawm tak hian min en a, ka lu ka thing zauh a.
.
"La hmu miah lo. A chhungte tumah ka la hmu lo."
.
"Ka rin dan chiah! Remtluanga sawn chhungkua a nei lo. Keimah ang chiahin_ He in hi Remtluanga nu hnen atanga ka lei a ni. A to khawp asin!"
.
"I sawi chiang deuh thei em?"
.
"In chhungah lut ila kan sawi zawm dawn nia. Pawn chu a vawt emai." tih pahin gate a hawng a. A thusawi tur ka hre duh anih chuan ka zui mai ang chu.
.
In chhungah kan lut a, coffee a siam leh zet hnuah inhmachhawn in kan thu ta ran a.
.
"A hrim hrimin engtik khan  nge i lo thlen? Khawiah nge i innghah? I thlenna hmun tal chu min hrilh duh ang chu tiraw?"
.
"Lazarus ah. Nichina i thusawi kha i sawi zawm dawn em?"
"I hmanhmawh a nih kha."
"A dik alawm. Hun ka ngah lova."
"I sawi awmzia chu eng nge? Nang hi?" a mitmeng chuan natna nei hmuhin min hmu nghal ngawt nia. Ka nui ta hak a.
.
"Mi thenkhat tan engmah lo  ni mah ila ka la thi mai dawn hleinem.." ka tih chuan nui deuhin a hmel a serious lehnghal a.
.
"Aizawl ah hian chhan tha tak vang lo chuan ilo kal ka ring lo."
.
"I sawi bak zawng kha han sawi phawt la, ka lo kal chhan chu ka la sawi ve dawn nia."
.
"A tha alawm... Khatih lai khan kum 23 a upa chauh ka la ni a, Duhsaki nu lak atanga inlak hran ka duh em vangin ka thawkrim khawp mai. Tichuan ka sum khawl zawng zawng hmangin he in hi ka lei ta a ni. Remtluanga hian min dan a tum nasa hle tih ka hria a, tun thleng hian kan inkar pawh a that loh phah ta anih ber hi."

"Chuan?" thu dang sawi duh loh a nei nia ka hriat vanga tilui ka ni.
.
"Thil dang vak a awm lo."
"In hi Remtluanga nu ta anih hmain tunge a neitu? An sulhnu hmuh tur a awm em?"
.
"Aa.. I sawi takah chuan thlalak hlui a awm nual a, khawilaiah emaw hian a la awm ka ring." A thusawiin ka beng a verh zia chu tihlan loh hram hram ka duh a, ka thup hleithei der lo.
A coffee no chu dahin a tho a, reilote hnua alo let leh chuan bawm lian vak lo hi arawn keng chhuak a. Ka thin phut nasat zia chu.. Ka awm atang hian a rawn chhuak mai ang tih hlauhawm khawp a ni.
.
“Eng thil nge a?”
“Thlalak anih hi. Ka paih tawh emaw ka tia a lo la awm hlauh. Engvanga hetiang thil the daih ngaihven viau nge I nih le? I awm dan hi a chang chuan a mak thin ka ti..”
A tawng chu chhang duh lovin a bawm ken chu ka la thuai a, tun hun hi ka tan a pawimawh zia Sangtea hian a hre pha lo. Hrilh pawh ka tum rih hek lo.
.
Bawm chhunga thlalak awm ka hmuh chuan ka ip chawih mai. Ka inthunun hman ngang lo.
.
“Eng  nge a?” hlauthawng deuh tak hian Sangtea chuan min lo hnaih vat a, ka tawng chhuak thei lo. Thlalak a hmeichhe naupang chu keimah ka ni! Ka bulah chuan hlim taka nui chungin mipa leh hmeichhia an thu bawk a.. Phat rual a ni ta lo ve. Thlalak ami te hi ka nu leh pate anni. Insum zo lovin ka inhip chhuak ta hlawp hlawp a.
.
“Min ti mangang a nia. Eng nge thil awm zia?”
.
“Ka tha_ka tha_” tawng zawm thei lovin thlalak chu ka awmah ka nembet a, ka mittui a luang zawih zawih a. Sangtea chuan tih ngaihna hre lovin min en tawp tih ka hria.
.
10 Minutes vel zet hnuah chuan tlemin ka pangngai leh ta deuh. Hmel buai nak hian Sangtea chu ka hma zawnah a thu a, a mitmeng chu zawhna hlirin a khat bawk. Engtin nge ka sawi tan ang? Sangtea bula engkim sawi hi  a him chiah em? Ka u lam tang a lo nih hlauh chuan..! A ni lovang. Ka u lamtang chu ni se hetiang thil ka ngaihven chhan hi a hre ngei tur a ni. Mahse, engmah a hrelo.
.
“Ka nu leh pate annih hi!” ka tawng a hriat ruala a hmel danglam nasat zia chu ka beisei phak bak a ni.
.
“Eng_eng_Eng thu maw I sawi chu?” a ti bah  nawk nawk a.
.
“Thlalak ami hi ka chhungkua te an ni. Ka nu leh pa_ Keimah_ An chungah eng thil nge thleng a vaiin ka hrelo. Engtin nge ka tih dawn? Khawi atangin nge bul ka tan ang?”
.
“Lawk_ Lawk__ Ludy hi_” sawi leh  mai tur hre lovin chunglam a en a, a thaw hawk a. “Ka awih thei lo. Engkim hi__ Eng chen nge I hriat?” tih zawng sawiin min en a, a mitmeng chu ka hrethiam lo.
.
“Ka hre tlem khawp mai.” Dik takin ka chhang lo thei lo.
.
“Tunah hian eng dinhmunah nge I awm? Vawikhat chu Ludy khan sawi a nei a__ Ahmaa ka ngaih that lohna kha a thleng dik anih chuan ka theih dan zawng zawngin ka tanpui ang che..”
“Ahmaa thil thleng chu eng thil nge?”
“Dik tak chuan ka mamawh laia min tanpui vang khan Ludy min mamawhna kha ka hnial thei lova. Eng emaw deuh lai khan ka in ah hian a cheng alawm.”
“Eng maw?” ka  meng kawk! “Chutih lai chuan khawiah nge ka awm?”
.
“Delhi ah I let leh tawh. Thil thlen dan hi mak ka ti telh telh mai.”
.
“Makti tur chu keimah hi ka ni. Thawklehkhatah ka u thi tawha ka ngaih lo let thutin kan pahniha kan beih hah em em hlawhtlinna kha min chhuhsak vek a, atan engmah ka nih loh thu chiang takin a sawi bawk asin. Tunah pawh awih har ka la ti. Mahse, ka pawm angai  tih ka hrechiang a. Tuna ka duh zawng chu tunge ka nih chiah hriat chhuah chauh hi a ni.” Sangtea hmel ka en a, eng emaw zawng talin min tanpui thei dawn ni a ka hriatna chuan ka awm a tinuam ta deuh.
.
“Min lo zui rawh.” Tih leh a thutna atanga thawh rualin a kalsawn a, ngawirengin ka zui ve tawp a. Pindan pakhata ka zui luh chuan eng thil in nge min hmuak ka hre lova, eng thil nge beisei tur pawh ka hre chuang lo.
.
“Hei thil hi I hmuh ngei tur niin ka hria” pandan chhim lam kila dawhkan puana inkhuh chu hlimin ka hmel min rawn en a, dawhkan chu muangchangin ka pan hnai ve thung a.   Ka en chian hnu chuan dawhkan naran ni lovin a sir veilamah drawer a awm tih ka hmu. Eng thil  nge tih melhin Sangtea chu ka melh a, engmah sawi lovin drawer chu arawn hawng nghal a.
.
Drawer atang chuan file phawrh in, file chhunga awm lehkha a phawrh leh a. Chu lehkha chu ka birth certificate a ni tih ka hria. Ka u khan min koh duat nan ‘Jade, lunghlu tha mi I ni’ min ti thin! Mahse, he hming hi ka u min koh duatna ringawt ni lovin ka nu leh paten duh taka ka hming atana an phuah a lo  ni.
“Ka lawm e.” ti sapin Sangtea chu ka en a, a nui sak a. “Thi ldang tam tak ala awm_”
.
“Ka hria. Ka tih theih zawng zawng ka tihsak vek ang che  tih ka sawi tawh kha. A dik lamah chuan ka tang ral raih mai ang. Khai le, inthing harh rawh. Tu chungchang nge kan umzui hmasak ber dawn?”
A  ngaihna hre chiah lovin Sangtea chu ka en a. “Pakhat aiin an tam tihna maw?”
.
“I rilru a chak hle mai. He in ka ta anih hmaa a neitu kha kan hrechiang phawt ang. Remtluanga’n a phallo chung anu khan ka hnenah a hralh lui kha a nia. Remtluanga khan phal loh chhan tha tak a nei ngei bawk ang. A phurawm dawn hle mai_”
.
“Ka inpeih e!” tia ka chhan chuan hmel mak deuh pu chung hian a nui ta sak a.
JADE
(Soddisfazione)
.
Thantei_LauraSean
.
CHAPTER - 25
.
VASPI*.
Kar khat zet a liam ta. Sangtea min hrilh angin tunah hian mi tu emaw nghakin restaurant ah ka thu  mek a ni.
.
Nu thau lam deuh ka thutna epa thu chu Remtluanga nu a ni tih ka hria a, hetah hian eng thil nge a tih ve dawn tih erawh ka hre lo. Tunge ka hmuh dawn hre chak leh hlauthawng ru deuh tak chungin ka thu ngawi ran a, Remtluanga nu pawh chu mi nghah nei niawm tak hian a che sek a.
 5 Minutes vel a ral leh hnuah ka phone arawn rik chuan ka pick up thuai a.
.
“Ka lo thleng chiah a, engtin nge ka hriat theih ang che?”
.
“Oh, I lo lut tawh em?”
“Kawngka bulah ka ding.”
.
Ka hawi chhuak a, kawngka bula ding hmeichhia ka hmuh chuan ka nui sak a. Min rawn hmu ve nghal mai bawk. Sangtea khan engvanga inhmu tur nge kan nih tih leh tunge anih chiah  min hrilhlawk hauh lova, ka  mi hmuh tur pawh hian kan inhmuh chhan a hre bik lo mai thei.
.
Muangchangin min lo pan a, ka tum reng vang pawh  ni lova Remtluanga nu thutna lam ka en zeuh chuan hmel danglam tak hian min pan mektu hmeichhia chu a en tih ka va hmu! Mak tiin ka mit laksawn nachang pawh ka hre tawh lo. Hmeichhia chu ka bulah a thu tih ka hriat thlengin Remtluanga nu chu ka la en reng a. Ka dawhkan kil min rawn tawm tih Remtluanga nu in a hmuh chuan a tal buai deuh  chu a ni ta der. A thutna chu thawhsan in min rawn pan a, a khur nasa khawp mai.
.
“Nang hi_ Tunge i nih?” a titham tuak a.
Ka bula thu chu zamlo tura ka duh zia hriattir nan a kut ka vawn sak ta ringawt a. A insangmar nasa hle tih ka hre thei.
.
“Min la hria chu ka lawm hle mai!”  tia nui chungin a ding a, Remtluanga nu hmel chu rapthlak khawpin a danglam  nia! Pakhatin tunge a nih a zawt a, pakhatin a la hriat vangin lawmthu a hrilh thung a.! Eng thil nge thleng zel dawn ka hrethiam ta hauh lo mai. Chubakah, ka rin loh lutuk thil a thleng mek a ni.
“Kal bo rawh.. Ka thutiam kha theihnghilh suh_” Remtluanga nu chu a zawi thei ang bera tawngin hlauhawm taka lan a tum tih pawh a chiang. Ka bula hmeichhia chu a insangmar nasa zual sauh a.
.
‘I thutiam khan min tina thei lo tih tun aia hma hian lo hria chu ni ila ka fapa hi ka bulah a awm ngei ang. Tunah chuan engpawh sawi la ka hlau tawh lo.” A tifiah kalh a. Remtluanga nu chu thidang tur ang mai hian a dang sawp sawp mai. Eng emaw sawi a tum a, mahse a  aw a ri chhuak zo lo. Chiang lutuk tak mai hian min rawn en a, engmah sawi tawh lovin restaurant atang chuan a kal chhuak ta nghal a. Kan awm dan chu mi thenkhat tan chuan thil mak a ni ngei ang. Min en deuh hrak hrak hlawm reng a ni.
.
Remtluanga nu a kal chhuah hnu chuan nghet zet hian ka kutah min vuan a.
.
“Engtin nge lawmthu ka hrilh ang che. Tunah chuan ka fapa hmachhawn turin ka huaisen thei tawh ang. Min chhanchhuak a nih hi_” tiin a thaw halh a, a thusawi chu ka hrethiam lo. Ngawi lawk teh u, vawiin hian ka thil hriatthiam loh hlir a la thleng anih hi.
.
“I sawi chiang deuh thei em? Ka thianpa’n helai hmuna awm tur hian min hrilh a, chuan mi tu emaw ka hmu dawn tih min hrilh bawk a..” ka tawnglai chu  min enin a nui ta sang a. A awm dan chu ka hrethiam lo deuh deuh..
.
“I thianpa I sawi chu Ramngaihsanga a nih ka ring. Ani khan nangmah vang hian min zawng chhuak ta a ni. Ka fapa hmel hmuh thuai ka duh a nia.” Ngawi leh deuhin a en ngai a en deuh vang vang a. “ Ka hmuh lohna chin pawh a rei ta..” a mitmeng danglam dan atang chuan a mitthla ah thil tam tak a hmuh ngei ka ring.
.
“I fapa chu tunah ka bia anga in inhmu thuai dawn nia. Chuan, nichina hmeichhia nen  khan in inhriat dan min hrilh theih chuan ka lawm hle ang. Thutiam in nei tih in inbiakna atang khan ka lo hrethiam bawk a.” ka ti ta nge nge. Ka hmelhriat ngai pawh ni lo zawhna tlang taka ka zawt nghal mai chu keipawhin mak ka inti deuh.
Kan bul hnaia thute chu en kual zeuhin ka lamah arawn awn hnai a, “Tuna sawi mai chi pawh a ni lo. Hmun dangah kan kal thei angem? Kha hmeichhia kha a ngawi dawn miah lo tih ka hrechiang hle  a ni. Thil tam tak sawitur a awm. Keimah chauha ka hriat thinte kha tunah chuan ka zep tawh lovang.”
.
Ka phone nghawr dar dar chu enin Sangtea a ni tih ka hmuh chuan ka pick up vat a.
.
“A lo thleng tawh em?” arawn ti nghal tawp.
“Thleng tawh e. Kal chhuah kan tum chiah zawk a. Khawiah nge I awm?”
.
“Ka in ah lo hruai rawh. Kha hmeichhia hmu tur khan ka bei  nasa teh a nia.” Zangkhai zeta nui zui hak hakin phone chu a off a. Ka bula thu hmeichhia hi Sangtea khan ‘Kha hmeichhia kha’ tiin a sawi leh si.. Anih chuan__
.
“Ramngaihsanga nu I ni lo maw? Anih chuan I fapa chu tunge?” amah chu chiang takin ka en a, dawt a sawi leh sawi loh hriat ka tum lutuk ni berin ka in hria.
.
“Aw, I hresa turah ka ngai a. Lalremtluanga hi ka fapa alawm. Ka hrin ngei, ka fapa neihchhun.” Ka nghing lawih mai. Tuna ka bula thu hi Remtluanga nu anih chu! “Mak I tih hmel hle mai. Ka fapa nen chuan in inhriat ka ring ringawt a..”
.
“Ah_ aw, hria e.” ka nui lui a, ka rilru erawh  mak tih vangin a chawmawlh vek thung.
“Ka fapa bulah chuan tunah min hruai thei angem?” atih leh chuan hamhaih takin ka nui a, ka chhang mai thei lo. “I tha em, Nula?”
.
“Kal chhuak phawt teh ang.” ka ti ta ringawt a.
.
Taxi hmangin Sangtea in kan thleng a, Nu Muani (Remtluanga hringtu _ ama duh danin Nu Muan tiin ka ko ang.) chu ka chik ru reng a ni ber. A chezia leh mitmeng ka en a, hmeichhe nunnem tak a ni tih a lan rualin a mitmeng a lungngaihna thuk tak awm chu ka hre thei. Ka tan thil harsa ni hek lo le! Ni tin darthlalang a ka hmuh ziah thin lungngaihna pai mitmeng a ni tlat a ni.
.
Gate-ah kan lut a, Nu Muani chu a hawi ruai ruai a. Engkim chu a hriat than em em a ni tih a awm dan chuan a tilang chiang khawp mai.
.
"A lo rei ta hle mai. Mahse, thil danglam a la tam lo." ti sep sepin min rawn en a, in chhung lama kan luh vat a that zawk vangin in chhung lam hawiin ka kut ka phar zauh a.
.
"In va rang ve" kawngkhar min hawnsak rualin Sangtea chu awki zang vahin a tawng a. A hmel atang pawhin a phur hle tih a hriat.
.
"Nu Muan, lo thu rawh. Engmah in ei hman ka ring lo. In tur ka'n la ang." tih leh choka lama kal a rual nghal a, ani chuan Nu Muani hming pawh a lo hre vek tawh. Engvang in nge a hriat loh ang? Ama zawnchhuah alawm le..
.
Reiloteah in tur kenga lo chhuak lehin kan bulah a thu a, a phur hmel leh lutuk chuan ka ngaih a titha lo zawk.
.
"Nu Muan, tunah hian thil thlen dan dik tak chu  min hrilh nghal theih chuan kan lawm hle ang." a ti nghal hmiah mai reng a. A tim eih lo. Nu Muani hian engkim chiang takin a hria tih a hrechiang lutuk tihna a ni thei ang chu. Thinphu dep depin Nu Muani chu ka en a, a in tur a in zauh hnu chuan thu ngilin hmun hla tak en ang mai hian a hawi vang vang a.
.
"Ni e, sawi tur a tam khawp mai. Tun hun hi a thlen ka ring ngai hauh lo va. Ka beiseina zawng zawng a thamral vek hnuah a thleng ta chauh a nih hi." chawl deuh datin thawk a la halh a. "Khami ni khan he in tlawh tum hian ka kal a_ Aa, chumi hma chuan he in hi ka thian tha ber Rohlui te chenna thin a ni a, ka fapa laka lakhran ka nih hnuah Aizawl ka kal leh hmasak ber tum a ni. Ralkhat atang tala ka fapa hmuh ka chak em vangin ka kal a, ka rin loh lutuk danin thil a kal ta a ni ber mai.. Ka fapa chenna hmun ka pan hmain ka thiannu chu hmuh phawt tha zawka ka hriat vanga kal kha ka nia. In ka thlen hian kawt zawla Rohlui lo tlu reng leh a bula naute kum 2/3 mi vel lo ding chu ka hmu hmasa ber a, an piah deuhah tleirawl a ding bawk. In chhung atanga Rohlui pasal lo chhuak kah anih chiah khan te thawtin gate hawn ka tum a, mahse tleirawl in naute pawma a tlan chhiat pui lai ka hmuh khan ka tlai tawh tih ka hria. Mak tiin ka ding a, in hnunglam atang sawn engkim min chhuhsaktu, ka fapa ngei pawh min chhuhsaktu Ramthari(Remtluanga nu hrawn) lo kal chhuak lai chiang takin ka hmu a, ani paw'n min hmu bawk a. A silai ken chuan dawn awm miah lo hian min kap a, ka bawp veilamah kap fuhin ka thingthi ta hnawk a. Ka che zui thei ta lo a ni."
.
Sangtea nen chuan uluk takin a thusawi chu kan ngaithla zel a.
.
"Ramthari chu ka bulah lo kalin ka hmel a hmu leh anih chuan ka fapa a thih tur thu min hrilh a.." a tawng lai chu tawpin a mittui a hru fap fap a. "A hunlai khan ka fapa himna ka duh vangin Ramthari thutiam kha ka zawm lo thei ta lova. Ka thiantha berte nupa thih chhan hrechiang tu awmchhun ka ni tih inhre chungin ka kal bo leh ta a ni. Keimah chauha Ramthari bei tur khan ka chak tawk lo va, ka 
neih zawng zawng min chhuhsak tawh vang khan duhthlan tur dang ka nei lo. Tunah kum tam a liam tawh hnu pawh hian nangni hian min rawn zawng hmulo chu ni ula ka damchhungin ka ngawih bopui ngei ang. Ramthari pawh khan min hmuh a in beisei tawh loh zia chu a hmel atang khan a hriat vek a, a ngawi bo miah lovang. A rapthlak zia in hre ve lo zawk a nih hi. Tual lo that tawh chuan tihnawn a hreh miah lovang." a tizui mial mial a. Zawh belh duh tam tak ka nei.
.
"Ramthari chuan engvangin nge i fapa a chhuhsak che? Engtin nge a tihtheih?" ka tih chuan a nui sak duh chauh.
.
"Sawitur a tam khawp mai. Chu thil hriat chuan in tan a tangkai lemlo bawk a, ka damchhung hian keimah chauha hriat ka la thlang fan mai ang e."
.
"I thiannu te  nupa a thah chhan chu i hria em? Naute tlanbopuitu nen? Nang i kal bo a, an nupa thihna chu police lam pawhin an chhui miah lo em ni?"
.
"Chutiang engmah a awm lo. Ramthari fin kherek zia hi mihring hriatthiam phak a ni pawhin ka hre hek lo. Thawkkhat lai khan helai hmun hi zawrh a ni tih ka lo hria a, a in neitute hmun danga an awm tak vek vanga mi dang tanpuina atan an ti tih thawm kha a awm tlat a ni. Fiahna erawh ka nei lo hlauh mai. Nangni'n in lo lei ta tihna a ni a.. Anni nupa kha mi tha tawp an nia sin.."
.
“Rohlui fanu chu I bula thu kha anih kha. ” Sangtea’n a tih chuan mitmeng lainatna a khat hian min enin ka kutah  min vuan a.
.
“A hmel ka hmuh phat khan ka ring ru deuh reng a ni. I va’n lainatawm tak em..” tih pahin ka samah min chul a. Hetianga khawngaih leh lainat nih hi ka duh ngai hauh lo kha a nia. Mahse, Nu Muani min khawihna chu a danglam tlat thung. A chhungril atanga chhuak lainatna tak tak anih vang a ni ngei ang.
.
“Chuan, he hmeichhia hi I hmu tawh ngai em?” Sangtea phone-a ka u thlalak chu uluk tak hian Nu Muani chuan a en a, a tawng mai lo. Chik zawk hian a en nawn leh thin a.
.
“Tlem chuan a danglam hlek nain naute tlanpui vaktu kha a ni ngeiin ka hria. A hunlai khan tleirawl mai a ni a, ama duhthlanna vanga ti a nih ka ring lo. Engtin nge in tih zel dawn?” Sangtea chu a en a, Sangtea’n min rawn en thung. Ngaihtuah fel vek tawh tih hriat  tak hian Nu Muani chu a chhang a.
.
“Kan tihtheih zawng zawng kan ti vek ang. He in ka lei dawn khan Remtluanga’n a phal lo nasa a, chuti chung chuan a nu hrawn sawn a hralh lui tho. A awmzia chu Remtluanga hian he in chungchang  hi eng emaw tal a hriat ka ring.”
.
“Ka fapa chu tunah ka hmu thei tawh angem?”
.
Ka rilru a zawhna lo awm chu tunhma zawng zawnga a fapa hmu ngam miah lovin tunah hmuh a nghakhlel em em si. Chu bakah Ramthari hlauh vanga tun hma zawng a fapa hmu ngam tawh lo khan tunah a ngam ta thut a? A lem mah mah lo maw? Nge kei hian tumah ka ring tawh lo zawk. Sangtea nen hian eng inremsiamna nge an neih ang?
.
“Lawk, zawhna ka la nei. Tunah hian engpawh  huam a I fapa hmuh I duh anih si chuan a hma khan engvanga pawh ngam lo nge I nih?”
.
“Chu thil chu keipawh hian vawitam ka inzawt asin. Sangtea hian min venhim tur thu min tiam lo ni se la tun hun hi ka thleng ngam hauh lovang.”
.
Sangtea ka en a, venhim a lo tiam ngei tih tihchian nan a lu a bu nghat a. Nu Muani hian thawnthu thui tak a nei  ngei ang.     
.
Kan hriat duh zawng a sawi zawh hnu chuan a fapa hmuh a duh thu a sawi leh a, Sangtea nen an inzui chhuak ta a. Kei erawh thil dang tihtur ka neih vangin ka kal ve ta lo. Remtluanga hmuh ka duh loh vang a ni pakhat.  Airport-a  kan inhmuh bak kha ka hmu leh ta miah lova, amah ka ngaihtuah ringawt pawh hian ka lungphu a danglam zel atin ni. Thil tam tak thleng tawh mah se amah ka duhna leh ka hmangaihna erawh ala ngai reng a, chu chuan min tihlau a ni.
.
Ka tihtur  neih lam ngaihtuah zui duh lovin Hotel ka pan a, vawiin atan chuan ka hahchawl tawh rih ang. Ka hriat duh  ber hre turin Sangtea zarah kawng chanve ka thleng ta niin ka inngai a, ka rilru erawh a hahchawl thei lo thung.
.
Khuma ka mu mai mai chu engtik laiin ka mutthilh hman ka hre lo. Kawngka inkik thawm ah ka harh hlawl a. Zan dar 7 a lo pel der tawh. Khum atang  chuan thovin kawngka ka hawng a, Sangtea hmel  ka hmuh chuan ka hriat hmain ka thaw deuh huai a.
.
“Lo lut rawh.”
.
“I phone I pick up thei lova min ti hlauthawng hman alawm le..” pindana lo lutin sofa-ah a thu a, chik zet hian min en a.
“Tap hrep hmel ka hmu lo chu ka lawm hle mai.” A ti leh ringawt a.
.
“Tunah chuan tahin awm zia a nei lo tih ka hre ve alawm. Min tanpuina vang hian engtin nge lawmthu ka hrilh dawn che ka hre lo. Ka lawm lutuk tak zet a nia.”
.
‘Vawikhat min kuah la a tawk mai.” A tih chuan a fiamthu anih ringin ka en a, a nui hauh lo  nia. A hmel thutak riau chuan ka awm a tinuam lo letling.
.
“Uang lo mai teh_” ka ti  ringawt a.
.
“Ka uang hleinem. Venhim che ka duh chhan hi I la ngaihtuah ngai miah lo tih ka hre mai.”
.
“Ka neih ngai loh ka unaupa ang chiah I nia lawm. Ka tan I theihtawp I chhuah tih pawh ka hria. Ka lawm tak zet.”
.
‘Lawmthu sawi chhen lo teh. Zanriah ka la ei lo a nia. Eng nge kan ei dawn?” kan topic a thlak chu ka lawm ru khawp mai. Min ngaina anih pawhin ka tan chuan unaupa a ni reng dawn a, kan inkar a that reng ka duh bawk. Ngaihzanwg angin ka en ngai dawn lo tih ka tawngkam khat lek vang khan a hrethiam a ni ngei ang. Mipa tha tak a ni tih tunah chuan ka hrechiang  tawh a, hmeichhe tha tak a phu a ni.
.
“Ka’n order ang e. Eng nge I ei duh?”
.
A duh a sawi chu order in a lo thlen hun kan nghak a.
.
“Remtluanga chu in hmu ta em?”
.
“Hmu lo. Naktuk hian Delhi atangin a lo let leh dawn chauh a ni awm e. Anu kha ka lainat tak tak a ni. Remtluanga hi ngaina ngai lo mah ila dam a a nu a hmu leh tur hi ka lawmpui khawp mai. Nu Muani sawi hmang khan Remtluanga hian a dam tih a hre lo a ni awm e. Kan misualnu pui saw hlin beh vat a ngai anih hi. Chuan, Ludy hi a fihlim ka ring lo nasa khawp mai. Mihring nun hi a mak a ni e.” sofa nghengin a thu awn ur ur a, a hmel ka en chian chuan a chau hle ang tih ka ring.
.
“Nu Muani chuan phone-a hrilh lawk a duh lo mi? Hrilh se chuan Remtluanga pawh a lo haw nghal  mai awm sia.”
.
‘Duh lo. Hmaichhan ngeia hmuh ka duh a ti tlat alawm. Ama duhthlanna a nia. I thil order chu a lo va thleng har reuh e..” a ti nung nung a.
.
Zanriah kan ei kham hnuah eng eng emaw sawiin kan titi zui nual a, Nu Muani’n keimah tel ngeia Remtluanga  hmuh a duh tih thu Sangtea’n a sawi chuan ka hnial na khawp mai. Mahse, Nu Muani’n ka tel ve a duhna chhan a sawi vek hnu chuan ka tan ni lo Nu Muani tan a ka din a tul tih ka hrethiam a, ka hnial duh ta lo. Kan rinlawk ang chiaha Remtluanga a khawsa anih chuan ka tel ve ngei a tul tlat a ni.
.
Remtluanga leh a nu inhmuh ni tur a thleng ta. Ka tana hun pawimawh be rang maiin ka helhhawlh a, inthunun ka tum fe a ngai dawn a nih hi. Zing ka thawh phat atang khan ka lungphu a dik thei tawh lo. Engkim fel takin kal vek thei se ka duh tak zet.
.
Zing dar 10 a rik chuan Hotel atanga chhuakin Sangtea in ka pan a. Nu Muani pawh Sangtea in ah ala chen ve bawk tho vangin kal rual a awlsam zawk dawn a ni. Sangtea in ka thlen chuan an lo inpeih thlap tawh.
.
Remtluanga hun hman dan ngaihtuahin office-ah a awm tawh zawk hmel a, kan pathum chuan office lam kan pan nghal a. Kan rinlawk ang chiah a ni. A secretary’n ka hmel a hmuh chuan mak tih hmel zet hian min en a, tawng mai nachang pawh a hre lo.
.
“Ka_Uh_ Jade. Eng nge I rawn tih dawn?” Sangtea leh nu Muani a hmuh chuan “In lo tih dawn ka tihna..” tiin hamhaih deuh tak hian a nui a, a chezia danglam nghal vek chu a chhan ka hre chak khawp mai.
.
“Remtluanga hmuh kan duh a, a awm em?”
.
“Um_Ah_Awm e. Mahse, tunah tak chuan a la laklawh deuh mai thei.” A tawng zawh rual deuh thawin Remtluanga office atang chuan hmeichhia a lo kal chhuak a. Hei chu ka hmelhriat a ni teh tlat! Amah paw’n min hria tih a mitmeng atangin a lang thei. Inbiak erawh kan tum lo ve ve. Han biak maid an tur pawh ka hrelo.
.
“E, in zo der elaw?” tiin a secretary chuan a lo be var a. Lawmsangi chu a kal nghal a ni deuh mai. A kal chhuah dawn chuan kawngka atangin min rawn en leh hram tih ka va hmu hman. Tunah chuan Remtluanga hmu tura insanmar tak tak hun a ni ta.
.
“Jade, ti khan in lut thei e aw.”
“Aw le.”
.
Remtluanga office bikah kan inzui lut thliah thliah a, kawngkhar hawn thawm a hre nain arawn hawi chhuak miah lo.
.
“Eng thil nge?” ti bul hmukin a pen kan lai chu a seh zauh a, kan chhan mai loh vanga a lo hawi chhuakin kan hmel a hmuh  chuan mak ti hmel a pu zawk. A insiamtha leh thuai a.
.
“Karei__” Nu Muani phun sep ka hriat rualin Remtluanga pawh chu  thutna atangin a ding hluai a. A hmela mak tihna chu a thup tawh lo. Mak a ti lutuk tak zet ngei ang. Thi tawh nia a hriat anu a hmu tlat alawm.
.
“A tak a ni em?” ani pawh chu a tawng ri chang chang a ni. Nu Muani chu insum zo lovin “Ka fapa_” tiin a tap chhuak ta hawk hawk a. An pahnih chuan an inpan a, nghet taka an inkuah lai chu Sangtea nen ngawi rengin kan en a. Remtluanga mittui tla sawk ka hmuh chuan ka hawisawn ta daih. Ka tah ve mai ka hlau a ni. Keichuan khawvel ah hian ka nu ka kuah ve ngai dawn lo tih ka hriatna chuan na takin min chhun ngawng ngawng nimai hian ka hria. Chutih rualin Remtluanga chu ka lawmpui em em bawk.
.
Eng emaw chen an inkuah hnu chuan harhchhuak thut niawm tak hian Remtluanga chuan a nu chu a kuahna chu a thlah a.
.
“Engtin nge a nih theih?” a tawng zawi khawp mai. A aw pawh a dik bik lo.
.
“Ka fapa..” Nu Muani chuan thlahlel tak hian a biangah vuanin a chul hliau hliau a. “I pa ang chiah chiah I ni.. Ka fapa__” tiin a kuah leh rih a. Sangtea nen chuan chhuahsan tumin kan in-signal a.
.
“Nang kha ka be duh che.” Remtluanga tawng kan hriat chuan kan hawilet zawk mai. Sangtea biak a duh a nih ka ring a, mahse a hmel ka hmuh chuan a ni lo. Keimah hi a ni a biak duh chu. Ka lakah hian eng thu nge sawi a duh?
JADE
(Soddisfazione)
.
Thantei_LauraSean
.
CHAPTER - 26
.
VASPI*
.
Sangtea leh Nu Muani chu chair-ah an thu a, pindan a awm tih pawh ka hriat loh ah Remtluanga chu ka zui lut thung a. Ka nervous tih piah lam a ni.
.
Pindan kawngka a inkhar ri khap a, ka mit ka chhing sawk mai. Ka men leh ruala ka hmuh hmasak ber chu ka hma zawn ah min hnaih taka Remtluanga ding chu a ni. A kut kuangkuahin a ding khawng luh a. A taksa awm dan atangin eng thil nge beisei tur ka hria.
.
"Hetiang thil ti tur hian engah nge i lo inngaih?" ati hriam hraih a, a pangngai thei ang ber leh a thusawi chuan min thawng miah lo anga lang turin ka kut ka humruh tawp.
.
"Eng thil nge ka tih?"
.
"Huh!" a nui suk a, a hmel lan dan chu a hlauhawm lek lek zawk.
.
"Engtikah nge ka nun atang hian i kalbo dawn?" ka inveng hman lo, ka thaw hak a.
.
"I nghahhlelh hmel hle mai." ka ti sap a.
.
"Nang te reuh hian ahma zawng zawng khan ka lak atangin ka nu hi ilo thukru em ni?" a mitah ka en a, ka en rei duh lo.
.
"Thukru lo." tih chiahin ka chhang. Alaka insawi thiam chiam a tulna ka hrelo. Min ngai chhe ta sa sa a, a duh dan danin min ngai rawh se.
.
"Sawi chiang rawh." awki hniam leh hlauhawm zeta tawngin min din hnaih lehzual a, a rimtui hman rim pawh ka hre thei. Hetianga awm lo hian duat taka min kuahin thil engkim a tha leh vek dawn tih min hrilh se ka duh zawk asin.. Ka ngaihtuahna atthlak lutuk vang chuan ka lu ka thing zauh a. Mahse ka tisual! Ani chuan thil dang vang niin a ngai tih a ner sawk dan atang chuan a langchiang khawp mai. Vawikhatmah a nu chungchang hi chiang takin ka hnenah a sawi lo hrim hrim a, an chanchin ka hriat tam loh zia hi ka hrechhuak dawn chauh zawk a ni. Anu lo thukru duh tura min ngai ringawt pawh hian min ngaih chhiat zia a tilang chiang lutuk. Ka kalsan dawna ka tawngkam kha a takin a thleng ta a nih hi. Kei hian engang pawhin hmangaih mah ila, atan chuan hnawmhne leh vawikhatmah a rin tawh loh tur hmeichhe pakhat ve mai ka ni tawh. Kan inkarah hian inrintawnna a awm thei tawh lovang. Thilmak thlentir a, ka duhthusam nei thei tur hian engmah tihtheih a awm tawh lo. Remtluanga leh kei hi inkawp rem  ngailo tura siam kan ni.
.
"Ka nu hmanruaa hmang hian min tihnat tum duh suh. Helaiah hian engvanga lo kal ve nge i nih reng reng? A chhan hi i sawi mai dawn nge, helai hmunah hian hmangaihna min chenpui duh vanga lo kal i nih chuan__" min nuihsawh niawm taka a ner leh sak chu ka tuar zo tawh lo.

"Kei chuan sawi chian tur ka nei lo. I duh chuan Sangtea emaw i nu emaw saw i zawt dawn nia. Chuan, i duh ang chiahin min hmuh tawh ngai loh ka beisei." ka ti zawi raih a. Ring taka tawng turin thahrui pawh ka nei lo ve. Ka mittui tla mai tur chu ka dang zo dawn lova ka hriat vangin ka hnungchhawn a. Tawng leh tum pawh ni ila ka hrawkah min hnawh vek tawh vangin ka tanwg thei tawh chuang lovang. Pindan atanga kal chhuah nghal mai hi ka tan a tha ber leh ka nat zual tawh lohna tur awmchhun a niin ka hria.
.
"La ding teh." atih chuan ka ding leh rih. Engvanga a thu hi zawm mai zel nge ka nih pawh ka hre tawh lo. "Khawia kal nge i tum?" min rawn dinhnaih lutuk mah  mah. Ka nghawng hnunglam arawn thawkkhum lam ham ham a, ka dul zawna min rawn kuah chuan ka insum zo ta lo. A kut chu vuanin a ri lovin ka tap a. He thil hi a thleng tur a ni lo. Ahmaah hian chaklo tak angin ka lang anih chuan min nuihzat lehzual dawn asin. Ka taksa min deh vangin ka tap tih a hre lo thei lova, ka tap tih a hriat chuan a insangmar ve deuhin ka hria. Ka ngaihtuahna mai mai pawh a ni thei bawk.
.
Tawng pangngai a ka tawng theih tawh loh vangin a kut chu ka lasawn a, hmanhmawh takin pindan tang chuan ka chhuak a. Ka hmel min hmuh rualin Sangtea chu a ding thuai a, Nu Muani erawh chuan a ngaihna hriat loh hmel takin min en thung.
.
"Bawihi, eng thil nge ni ta?"
Ka chhang mai thei lo. Ka hmui petin ka sangmar tha leh a, "Tlaiah kan inhmu dawn nia." tih pahin Remtluanga office atang chuan ka kal chhuak ta nghal a.
.
In hnuaiah chhukin garrage thim lai bang kilah ka ding a, insum thei tawh lovin ka tap hlawp hlawp a. Ka awm chhung hi kut tha chak takin a sawr ang maiin a na lutuk tak zet. Chuti chung chuan ka mit ka chhin in Remtluanga hmel chiah ka la hmu tho.
.
Ka tah chhuak zualpui a reh  hnuah ka mittui hru hulin garrage atang chuan ka kal chhuak a. Hotel ka pan ding nghal mai ang chu.
.
.
Nilengin pawn ka chhuak leh tawh lo. Ka tap a, ka muhil a, ka tap leh a..
Ka phone nghawr dar dar ka hriat chuan khua a thim fel der tawh. Tun ang hunah Sangtea lo chu min lo biak tum an awm hauh lovang.
.
"Hello."
"I tha lo tih ka hre mai. Tunah khawiah nge i awm?"
.
"Hotel ah. Min ngaihtuah suh, ka tha a lawm. Thil a kal tluang em?"
.
"Tluang e. Nu Muani pawh Remtluanga bulah a cheng nghal dawn a. Remtluanga nen chuan mumal pawhin kan inbe thei rih bik chuang lo. A pawilo ah ngai mai ang. " a ti zung zung a. "Lo kal chu a ngai lo maw?"
.
"Ngai lo. Hahchawl ve rawh. Naktuk ah kan inhmu dawn nia."
.
"Okay. A tha e. Tui deuhin i mu dawn nia." tiin phone a off zui a.
.
Engmah ka ti peih ngang lo. Chaw ka ei chak lova, mut reng pawh ka ning tho. Ka nun hi a awlsam lam aiin a harsa zual zel nia ka hriatna hian min tichau zo tawh a ni ber mai.
.
Ni thar a lo herchhuak a, Sangtea nen kan inzui chawt a. Ka nu leh pate kha an ruang hmuh tur pawh a awm loh  vangin an thihna chung chang chhui hi a awlsam dawn lo khawp mai. Sangtea in hi kan chhungkuaa kan chenna thin in anih vangin leh amah mi tha  tak a nih vangin ka nu leh pa thlanlung chu in hnunglam ah phun min phalsak a, thlan kan phun hnu chuan ka hun tam zawk chu kanu leh pa bulah ka hmang ta deuh chawt a ni ber. Remtluanga nu hrawn Ramthari pawh chhui reng a ni a, hmasawnna erawh a awm mawh khawp. Amah a inpuang a nih loh chuan mit ngeia thil thleng hmutu Nu Muani chiah kan tan chhan leh kan hmachhuan theih awm chhun a ni. Ramthari hi a inpuang dawn hauh lo tih lah thil chiang sa a la ni leh zel bawk.
.
In tihharh deuh ka duh vang leh mamawh neuh neuh ka neih vangin bazaar ah ka chhuak a, kekawr en tuma dawra ka lut chuan ka hmuh duh loh ber mai ka hmu ta. Airport-a hmeichhia kha a ni.
.
"Ehe! Hetah i la awm elaw?"
Min hmelhriat tha tak ang mai hian min bia a, min ti hamhaih zawk. A bula hmeichhe thu bengbulah chuan ka hriatphak si hian a phun zui sawr sawr a. "Hei, he nu hi lawm kan pa ex chu.." A chet dan chu mihring pangngaiin an tih duh ka ring lo hulhual.
"Remtluanga'n a sawi dan i hre duh em?" tih pah hian a thiannu chu enin a nui zui kawr kawr a. An tawng chu hriat loh ka duh zawk vangin dawr atang chuan ka kal chhuak ta ringawt. Kha hmeichhia kha Remtluanga kawplai a ni tih a tawngkam thenkhat atang khan a chiang tawk hle. Ngaihtuah zawm pawh ka duh lo.
.
Ka mamawh zual ka lei kim hnuah Hotel panin ka haw a, mahni chauha awm hian ngaihtuahna a kal ding zual duh tih ka hre tho nain midang bula awm ka ngaihtuah peih chuang lo. Ka phone ri chu enin Sangtea a ni tih ka hria a, phone chu pick up pawh ka tum lo. Tunhmaa ka la awm ngai miah loh danin ka ngaihtuahna let but but a, nun chhan tur ka nei ta lo takzet tih ka ngaihtuah chhuah chuan hlauin khumah ka thu hnawk a.
.
Eng thil nge ka hmabak ah awm? Engmah! Hmabak ka nei lo. Ka nu leh pa pawh khawvel ah hian an awm tawh lova, kei hi engvangin nge ka la dam reng? Remtluanga nen kan inkar chu ka dah tha ang. A hlimawm lai zawng chauh kha hriatreng atan ka duh. Beisei tur awm lo beisei tlat tur hian mi a ka ni em ni? Ni bik lo. Engkim hi chawlhsan vek ka duh a ni. Ka kham tawh. Thil zawng zawng hi engmah lo mai a ni tih ka lo hre har  mah mah anih hi. Ka nu leh pa chunga chhiatna tawp thlentir tute pawh a hun takah hremna an hmu dawn tho. Ka lo buaipui vak vak hian eng thil nge min thlen? Khawi hmunah nge min hruai thlen tak? Chutiang bawkin ka u pawh! Amah vanga ka nunkawng bumboh zia hre duh lovin min hawisan a, atan engmah ka ni lo. Ka tih tur chu chiang takin ka hria!
.
Khum atang chuan thovin ka thawmhnaw ka khung khawm a, Hotel atang chuan ka thawmhnaw zawng zawng nen ka kal chhuak a.
.
A tawp nan ka nu leh pa thlan ka tlawh leh hnu chuan tihtur pakhat chiah ka nei tawh. Remtluanga ka hmu ang! Ni e, ka hriat theih tirh atanga ka hlim ber hun chu Remtluanga bula ka awmlai kha a ni. Mak ti duh suh.. A bula ka awm chhan chu eng thil pawh  ni se ka chhungrila hlimna min pek ang kha tu lak atang mah hian ka la dawng ngai lo. Natna tawp min thlentu pawh a ni tel tho...'A hlimawm lai chiah hrereng rawh' tiin keimah leh keimah ka inhrilh nawn a.
.
Ka luggage chu Sangtea in ah hnuchiah in Remtluanga office ka pan a, a tawp nan.. A tawp nan tak tak vawikhat chiah ka kuah leh ang. Hlimna min thlensak te ka hriatreng theih nan leh ka thinlung neitu chu amah chauh hi a ni tih ka hriatreng theih nan.
.
Office kawt zawl ka thlen chuan in chhawng chu enin ka hawi chho vang vang a. Thil thalo engmah thleng ngai lo ang chiaha ngaih theih ka duh. Chutiang chiah chuan ka che bawk ang. Thawk la lehin ka nui a, a zangkhai thei ang berin Office chhunga lut tur chuan ke ka pen ta..
.
Ruatpuii a lo awm loh vangin Remtluanga office kawngka ka hawng ve tawp a. Ka tih hauh loh tur thil ka ti tih ka inhriat chhuah chuan ka tlai fel vek tawh.
.
Remtluanga chu chair-ah thuin amah hmachhawn zawng hian a malchungah hmeichhia a thu a, hmeichhia chuan a nghawngah a ban pahnihin a kuah bawk. An infawp tih ka hmuh rual chuan ka ip chawih  mai. Thawm ka nei tih pawh ka inhriat hmain an rawn hawi rual thawt a. An hmel awmdan chu ka theihnghilh leh tawh ngai lovang.
.
Ka tawng lo! Tawng tur pawh ka ni hleinem. Sawi tur ka hre lo hrim hrim. Eng thu  nge ka sawi chuan ang? 'In tha em?" ka ti ang maw? Eng sawi hun mah a ni lo. Hmanhmawh zetin kawngka chu ka khar leh a, office atang chuan ka tlan chhuak ta dawr dawr a. Kawngka a ka sut kha Ruatpuii niin ka hria. Mahse, ka hawilet tawh lo.
.
Taxi phar dingin Sangtea chenna in ka pan leh a, ka thawmhnaw kha ka lak angai. A tawp nan tia mangtha pawh ngai ka ti lo. Ka hma ka sial nia min ngai anih pawhin lo ngai mai rawh se. Engkim kalsan vek ka duh tawh tak zet! 
.
Sangtea in atang chuan ka thawmhnaw nen kal chhuakin gate pawnah ka ding a. A tawp nan tak tak hawi let lehin ‘MANGTHA’ tiin ka phun sep a.
.
JADE
(Soddisfazione)
.
Thantei_LauraSean
.
CHAPTER - 27
.
REMTLUANGA*
.
'Min kalsantu chu amah kha a ni. A hmel hmuh ka duh tawh lo va, ka hmaah hian vawikhatmah rawn inlan tawh lo tawp mah se pawi ka ti lo. Ka mitthlaa a hmel a cham reng hi ka duhtawk em em.'  He thu hi vawi engzat nge keimah leh keimah ka inhrilh nawn tawh? Chhiar sen a ni tawh lo. Min kalsan atang khan ka theihtawpin ka pumpelh a, phone-a biak chauh pawh ka duh hek lo. Mahse, heng ka beih hahna zawng zawng leh theihnghilh tuma ka beihna hi a lo thlawn mai a ni thung. He ka thinlung hian a mamawh a, min hmangaih ve ngai dawn lo tih ka hriatna hian nitin a tharin min vaw na reng chu anih si hi. Ka hma ka sial tih ka hria! Amah tina turin tawngkam ka hmang a, a thinlung na hmel ka hmuh khan kei hi a na zawk chu ka ni leh tho si. A thil duh awm chhun chu ka chhiat vek hi a ni. Min tihchhiat vek duhtu chuan engvangin nge min hmangaih teh lul ang?
.
Ka nu ka hnena arawn hruai hma ni chiah khan Ludy'n min lo bia a, a nau chuan a tih ai zawng zawng a tih vek thu leh, ka tluchhe lai hi nuamti taka an unaua min thlir tur thu min hrilh a nih kha. Vaspi hi ka hmangaih anih pawhin min tihchhiat ka remti thei ta bik lo a ni e. Tunah chuan Ludy lakah inthiam lohna ka nei tawh miah lo bawk. Remruata nen an inthurual a, thil thleng engkim_amah intihlum anga a lan tak dan zawng zawng te kha lemchan mai anih vangin kei hian inthiam lohna tur ka nei tawh lo.
.
Khami ni, Remruata'n Ludy hmuh a duh vanga an chenna hmun atanga ka hruai chhuah ni khan an thang kamah ka awk tih reng reng ka inhre lo. Ka thian tana ka inpekna chu ka tan thang hlauhawm ber  a lo ni a, ka hmeichhe hmangaih ka neih theih ngai loh tur ka tawn chhan a lo ni ta bawk anih hi.
.
Heng thil zawng zawng hi ngaihtuah tawh lovin hmalam ka pan ang. Tunah chuan ka beisei ngai loh leh ka duhthusam ni thin, thleng ngai lo tura ka ngaih ka nu ka bulah a awm tawh a, engkim a tha vek. Thil dang mamawh ka nei tawh lo! Ka nu thusawi hi ka ring a, keimah invenghim thei ka nih hma chuan min hnaih a ngam loh chhan chiang takin min hrilh tawh a, chu chu ka tan a tawk. Ka nuhrawn pawh hremna tam tak pek a ngai hek lo! A mamawh ber sum ka hnen atangin a hmu tawh dawn lova, chu thil chu atan hremna rapthlak ber a ni ngei ang tih ka chiang. Ka nu hian ka hnena sawi loh thil a la nei nge ang tih ka ring a, zawh luih talh erawh ka tum hran lo. Ka nu a ni a, ka tana tha ber tur a hria_Ka ringtawk em em. Tul a tih hunah hmaih nei miah lovin min la hrilh ngei  ngei dawn tih pawh ka chiang a ni.
.
Zing la hma deuh  takah office panin ka chhuak a, eng thilin nge min hmuak ngaihtuah miah lovin motor ka khalh a. Ni dang nen a danglam hran lo. Office ka thlen hnuaha hna thawk mawlh mawlh in sana en nachang pawh ka hre lehpek lo va. Ka office kawngkhar inhawng ri ka hriat chuan tunge lo lut dawn tih ka hriatlawk vangin hawichhuak lovin a file ken chu ka dawhkan ah dah turin ka hrilh a, ka beisei loh thil a thleng tan chu a ni der.
.
Lawmsangi chuan muangchanga min rawn pan hnaiin ahmaa ka hriat thin Lawmsangi kha a ni lo tih en thuak pawh chuan a chiang nghal vek. A incheina zawng zawng a thlak a, mi thar hlak ang a ni. Eng thil nge ka ngaihtuah ka hrelo, engtin nge a awm dawn ka ngaichang tawp a ni ber. Nui deuh rah rah chung hian ka malchungah arawn thu a, engvanga hnial lo nge maw ka nih le? Ka nghawngah min kuahin ka beng bulah a phun sar sar a.
.
"Khawngaihin min hnar suh." tih zawng a sawi. Ka hmuiah min fawp a, engtinmah ka awm lo! Mi dang ang bawk a ni. Ka taksaah danglamna a thlen lo mai ni lovin mi pakhat ka hriatchhuah leh phah ta thung. Thil danglam a thlen beisei hian eng emaw lai atang khan hmeichhia ka kawp kual tam tih pawh ka inhria a, ka beisei ang thil a thlen ngai loh vangin a dangah ka pakai ta zel a ni. Tunge ka mamawh tih chu chiang takin ka inhria a, ka pawm duh lo mai zawk a ni.
Thil danglam a thleng dawn em tih chian nawn nan Lawmsangi chu ka fawp nawn a, kawngka inhawng ri kan hriat rualin kawngka lamah kan hawi rual thawih a. Vaspi hmel phawk deuh hra leh dang lap, sawitur hre lova ang pham hmel ka hmuh chuan awmze neilo zet hian thil diklo tak ti leh phatsantu ni ang maiin ka inngai a nih chu! Nuihzatthlak zawk hian!
.
Thil dang tihna hun awm miah lo hian kawngka chu a khar a, hmanhmawh taka pen hlawk hlawk thawm a reh rualin Lawmsangi chu ka malchung atangin a chhuk a. Ka nawrtla a ni deuh ber zawk. Eng thil nge ka tih dawn pawh hre chuang lovin office atang chuan hmanhmawh zet hian ka kal chhuak ve nghal a, garrage ah ka motor chhunga ka thut fel vek hnu chuan ka tihtur ka hre miah lo tih inhre chhuakin motor pawh tinung ta lo chuan ka thu ta reng a.
.
He ka thinlung hi min phatsantu a ni! Ka duh ang leh ka ruahman angin a awm ngai lova, ka mit hian ka duh ang thil min mitthla tir ngai hek lo! Vaspi'n hlim taka min nuih lai hmel mitthla thin khan nichin maia a hmel dang lep mai chauh kha ka mitthla thei tawh.
.
Ka phone pawrh tumin ka kekawr ipte ka zen a, ka phone ka keng chhuak lo tih ka hriat chuan ka thaw hawk a.
Garrage atangin ka chhuak a, ka office-a ka let leh chuan Ruatpuii'n mak tih hmel takin min lo en a, engmah a sawi lo thung. Lawmsangi chu hmuh tur a awm tawh lo va, ka ngaihtuah zui hek lo. Ka ngaihtuahna chu mi pakhat chauhin a luah. Ka thinlung duh anga awm thei ka ni lo tih inhrilh nawn mawlh mawlh chungin chair-ah chuan ka thu thla hnawk a.
.
Darkar hnih vel tur zet engmah ti lova ka thut reng hnu chuan Ruatpuii'n a haw thei tawh em tih min lo zawt a, min chhuahsan hnuah pawh ka la che chang chuang lo.
.
*
A kut nel thep chuan ka nghawngah min khawihin a kut zungpuiin ka biang a khawih neuh neuh a, a rimtui chek chek pawh ka hre thei. Ka biangah min thawk khum lum ham hamin zawi te hian "Ka hmangaih che!" a ti sep a.
Ka phu chhuak zawk mai! Sana ka en thuai a, zan dar 7 a pel tawh. Ka mumang zet chuh! Ni lo, ka mumang a ni lo. Ka muhil miah lo... Ka hmai tuai pawkin chair chu ka thawh san a. Ka nu'n min lo  ngaihtuah tawh ngei ang.
.
Muangchang lova office chhuahsanin in ka pan nghal a. Ka nu’n kawngkhar arawn hawn a ka hmel a hmuh chuan a thaw huai mai.
.
“I lo haw mai si lova, ka lo ngaihtuah hman viau che a. I tha em? I hmel a va diklo ve..”
.
“Ka tha e.”
“Zanriah i ei tawh em? Engmah i lo sawi si lova ka lo ei san mai che a.”
“Ka ei chak hran lo..”
“Umm, a va tha lo ve. Zanriah ei loh ka phal miah lo a nia. Eitur ka han tilum anga i inthlak zawhah I ei dawn nia.”
Ka nu chu hnial duh lovin in chung room-ah ka chho a, ka inthlak hmain ka inbual leh zet phawt a. Ka awm a nuam chiah lo a ni.
.
In hnuaia ka chhuk leh chuan eitur rim a lo nam cham cham tawh a. Ka bula ka nu cheng ve ta hi ngaiah ka la neih thei lova, a hmel ka hmuh hian ka lawm thar leh thin. Ramngaihsanga hian engtin nge ka nu hi a zawn hmuh chiah ka hre lova, amah ngaina lo mah  ila lawmthu ka la hrilh ngei pawh angai ve ang chu. 
.
Ka eitur ka nu'n a chhawp chu ka lo pui zung zung a, ka chaw ei laiin ka bulah lo thu ve tura ka duh thu ka hrilh chuan min nuih in ka thutna bulah a thu ve mai a.
.
"Nu, hman ni a office-a lo hruaitu che hmeichhia kha i hmu leh tawh em?"
"La hmu leh lo. Hmuh leh ka duh viau asin. Min kalsan dan lah kha a mumal ta mang si lova." tih pahin ka thlengah eitur min dah belh sak a. A awki atang chuan min dem hreh deuh si, keimah vanga khatianga ka office chhuahsan ta a ni tih hre tho si a ang ber. Sawi zawm leh mai tur pawh ka hre ta lo.
.
"Keini nufa hi duh ang zanin kan la titi lo bawk a, zanin chu engkim i han sawi dawn teh ang." a ti seuh seuh a. Chaw ka ei chhung chu dawhthei takin min nghak a, reilote kan awm dun chhung ringawt pawh hian chaw ei laia titi leh thu pawimawh sawi a duh lo tih ka hre tawh. Ka nu hnen atang hian zirtur ka ngah khawp mai.
.
Zanriah ka ei kham hnu chuan kan pahnihin thutkhawmna lam kan pan a, tv on ka tum chu la on rih lo turin min hrilh a.
"Kan titi dawn alawm. La hrilh loh che thil tam tak ka nei a, vawikhatah ka sawi kim vek thei lo anih pawhin zanin hian a pawimawh ni a ka hriat ho chu ka hrilh vek ang che. Puitling tak tak i ni tawh tih ka hmuin ka hre tawh a, ka tan engmah zep a tul tawh lo ve."
.
"Ka lo ngaithla ang." ka tih chuan a bu nghauh nghauh a.
.
"Nichin a min zawh nula kha ka thiantha tak mai fanu a ni a."
"Eng maw? Tu i thian nge?"
"Ka han sawi anga uluk takin i lo ngaithla dawn nia. Ramthari chungchang hi a chanve pawh ka la hrilh hauh lo che a nia."
Ka nu hmel chu ka en tawp. Zawhna lo zawh chung chung hun a ni rih lo tih hriain eng thu nge a sawi leh dawn ka ngaichang ta zawk a.
.
"Kha nula Jade kha, a nu leh pate thattu chu Ramthari hi a ni! Tuna Sangtea chenna in saw Jade te chenna a ni thin. A nu leh pa thih ni khan thil thleng engkim ka hmu chungin vau beh ka nih vang khan engmah ka sawi chhuak thei lova. Tun hunah erawh hi chuan engmah ka hlau tawh lo. Ramthari hmanrua ber nang; ka fapa hi mi rintlak tak i ni tih ka hria. Thudik sawi  ngam tur pawh hian min venghim theitu an awm tih hriat loh chuan huaisen a lo har hle thin tih hi ka hre tawh a ni."
.
'Chuan, Jade chu?" ka inven hmain ka tawng chhuak.
.
"Ka hria alawm. I office-ah nangmah hmu tura min hruai tum pawh khan keimah vang chauha lo kal ve a ni a. Ka tilui a ni zawk mah. Lo kal ve a tum hauh lo kha a nia. In inhre tawh thin tih ka lo hrelo hrim hrim bawk a. Bakah engtin nge min lo dawnsawn dawn kan hriat lawk loh vang khan ka tana ding turin a lo tel ve a ni. A hmel i hmuh ruala i danglam zia kha ka lo hmu ve bawk a. U a nei niin Sangtea khan min hrilh a, mahse amah enkawl seiliantu a u anga a en kha a unau a ni lo mai ni lovin Ramthari pasal hmasa fa bik a ni. Ramthari leh a fahrawn khan ruahmanna fel tak an nei vek ang tih pawh ka ring. He thu tak hi Sangtea leh Jade bulah pawh khan ka sawi chiang lo. Hremna hmuh ngei hi an phu a ni. Ka awm loh hnuah an thiltum ber chu nangmah tihchhiat hi a nih ngei pawh ka ring. Ka sawi dik em?"
.
Ka nu thu sawi zawng zawng chu uluk takin ka ngaithla a, thu dik a sawi tih ka hria. Ka nuhrawn anga ka en thin leh Ludy thiltum pawh engmah ka hrilh lo chungin a sawi dik vek. Min tihchhiat an tum em em reng a ni. Chu aia min thawngtu thil chu Vaspi hi Ludy nen unau pianghmun an lo nih hauh loh thu hi a ni. Engtin nge anih theih? Hetiang a lo nih si chuan Vaspi khan a u tan dikna haihlan tumin min hnaih a. Min tihchhiat a tum thu pawh ka bulah ngei tlang takin a sawi ngei alawm. Mahse, eng thil chiah nge ka chungah hian a tih? Ngaihtuah chian chuan ka chungah hian eng thil pawi mah a ti miah lo! Mi a ka nih hi! Min tihchhiat a hnekin min tanpui zawk a nih kha..
.
"Thil dang ala awm em?"
.
"Sangtea hnenah pawh khan min zawn chhuah vangin lawmthu ka hrilh a, mahse a thiltih zawng zawng a tih chhan kha Jade anih thu min hrilh ta daih a. Amah kha chuan a ngainat ngai loh thu che leh i tan thil tha tih a tum hran loh thu a sawitlang hmiah mai a ni. Sangtea hian engvanga ngaina miah lo che nge anih ka lo ngaihtuah ve mai mai a. I sawi duh loh chuan min hrilh kher pawh angai chuang lo a."
.
Ramngaihsanga nen kan in ngainat ngai loh chhan hi sawitur tam tak a awm hran lo. Ka hmun ngainat em em thin leh a ruka ka kal fo na in ka nuhrawn lak atanga a lei dawn khan na takin ka do a, ka nuhrawn erawh chuan ka hmun ngainat ruk em em a ni tih a hriat khan hralh a tumruh zual sauh thung anih kha. Ka mihring ngainat loh chuan ka ngaina lo tih hriain min ngaina lo ve ta mai a ni. Duhsaki nen kan han inkawp tih ahriat tirh pawh khan Duhsaki thatna a duh vang  ni chuang hauh lo  hian min pawm lo hle tih pawh ka hria. Chuti chung chuan ani pawh hian Vaspi tanpui a duh vangin ka nu min zawn chhuah sak tho. Mihring nunah hian hriatchian theih ngai loh tur thil mak tam tak a lo inphum ru tam em a ni e.
.
"Ramngaihsanga ka ngainat loh chhan chu ka hmun ngainat ber ka nuhrawn hnen atanga min laksaktu anih vang a ni." ka tih chuan ka nu chu nui sakin ka kutah min vuan a.
.
"A tha e. Naupanchhiatthlak viau angin lang mah se i ngainat loh chhan chu ka hrethiam. Hun harsa leh hreawm tam tak I paltlang tih ka hria. Min mamawh laia itan ka awm lo kha hreawm ka tiin keimah ka inhaw ngawih ngawih thin. Kha nula ve thung kha le? Tun hmain  in lo inhre tawh thin tih hrelo tur khawpin ka mit a del bik hauh lo a nia."
.
"A chanchin sawitur ka nei rih lo__"
"A mitmeng atang khan hmeichhe tha tak anih ka ring."
"Mahse_"
"Mahse, eng thil nge?"
"Keimaha awm ka duh rih." ka ti ta ringawt a.
.
Ka nu chu thawh sanin in chungah ka chho a, a thusawi leh Vaspi nen kan intawn dan te, thil thleng zawng zawng te kha uluk takin ka ngaihtuah nawn a. Vaspi leh Ludy unau annih si loh chuan tunah hian engtin nge an awm ang? Ludy hian chhiatna tam tak min thlen a, a thiltih ah khan Vaspi hian a tanpui ngei niin ka hre bawk anih kha. Hmanni lawkah pawh an unaua ka tluche lai min thlir tue thu Ludy chuan min hrilh a… Thil awm dan hi ka hriatchian thuai a tul.
Ka nuhrawn vet hung hi__ min enkawl seiliantu tualthattu a lo ni reng tih ka han hriat hian min thawng na tak zet. Mi tha a ni ngai lo nain tual em that duh tur khawpa sualna thuk a nih ka ring ngai miah lo. Sum leh pai a atchilh nasat zia erawh ka hrechiang tawk a, sum duh vanga ti a nih ngei pawh ka ring. Sum ngainat hi sual tinreng bul a ni tih hi a lo daw hauh lo mai.
.
Ni hnih chhung chu Vaspi hmuh in beisei ru tak chungin ni ka hmang liam a, a hmel hmuh chu sawi loh a thawm hriattur eih pawh a awm lo thung. Hmaichhan ah keimah ngei hian thu awmzia zawh fiah ka duh leh ta si a nih ber hi. Dik taka sawi chuan min hnaih ngam lo tur khawpin a hmuh lai ngeiin ka khawsa tih ka hai bik lo va, a luhlul zia hrereng chung phei hi chuan min lo pan hauh lovang tih pawh ka hrechiang.
 Lawmsangi nen kan infawp min rawn hmuh ni khan eng vanga lo kal nge anih hriat ka duh lutuk tak zet zet. Thil pawimawh tak a awm a nih loh chuan ahma a ka nu chungchanga ka tawngkhum dan vang khan a lo kal hauh lovang. Khami ni khan ka lak atanga a kalbo hun tur ka zawt anih kha! Ka tawngkam hman ang kha min hman khum ve ta se__ Khatianga ka tawng khum chung pawhin tawngkam vin min hman khum chuang miah lo.. A nungchang hi mak ka la tinawn fo thin.
.
Office atanga haw tumin ka phone ka ak a, in a hawn tur file ka bag-a ka dah leh hnu chuan ka kal chhuak a.
.
“Vawiin chu tlemin haw hma deuh ila a pawi lovang.” Ka tih chuan lawm hmel tak hian Ruatpuii chu a nui sak a. Kan buai zualpui a reh tawh bakah chanchin lawmawm lo hriattur a awm rih lova, ni dang aia han hahdam ve hlek pawh a pawina a awm hran lo.
.
Garrage atangin  motor ka la chhuak a, kawngpui ah ka la tlan chhuak hman lo. Ka phone ri chu ka pick up leh rih a.
.
“Keimah Sangtea. Jade i hmu em?” teh ngawt a.
.
“Hmu lo. Hmuh nachhan tur ka nei hleinem.” ka tih chuan a rum nghat.
.
“In hmuh nachhan tur in neih leh neih loh ka zawt lo che. I hmuh chuan a rang lamin min lo hrilh thei la ka lawm hle ang. Ni hnih chhung chu ka be pawp thei tawh lo.” A thusawi chuan ka beng a verh ta zar mai.
.
“Khawiah nge a awm?”
“A awmna ka hriat loh vang alawm ka lo biak che. Hotel atangin a chhuak tawh a__ Chu chu itan a pawimawh ber lo lehpek ang. Mi tam tak zingah ka biak hnuhnun pawl tur ini tih i  inhriat ka ring.” A tawngkam ngeiawm tak chu haider luiin ka inthunun a.
.
“Hotel chu eng ni ah nge a chhuahsan?”
.
“Ni hnih liam ta khan! Hotel a chhuahsan atangin a chanchin engmah ka hre tawh lo. Ka mangang khawp mai. I hmuh chuan min lo hrilh ve dawn nia.” tiin ka chhan leh hma chuan phone a off hmak a.
.
Kei min rawn biak danah a mangang hle ang tih ka ring thiam. Harsatna kan tawhin kan mi ngainat loh te chu loh theih loh tawpah lo chuan kan be ngai lo theuh ang chu.
.
Hmun danga pengkawi lovin in ka pan a. Ka nu awm ve hnu hian in ah ka awm tam ve ta khawp mai tih ngaihtuahin ka nui sak a. Ka rilru lehlamah chuan Ramngaihsanga min lo biakna kha a awm reng thung.
.
Zanriah kan ei kham a, ka nu nen thu dunin a thei vel sa chu ka hmawm zauh zauh a.
.
“Chhiatna hi a thleng reng mai a. Chu, accident an tih leh tak chu.” Tih pahin tv volume a tisang a.
* Lengpui kawng, Lengpui khua thlen hma 1km vela kawng thlang lamah Taxi chhar a ni a. A driver ruang hi hmuh tawh niin mi phurh a nei ngei tih chianna luggage lian tawk tak hmuh a ni bawk. Mi ruang dang emaw mihring inhliam emaw hmuh tur an awm lo. He Taxi hi ni hnih emaw ni khat emaw liamta vela chesual nia rin a ni. Mi zawn hna hi beih mek zel a ni a__*
.
Ka phone nghawr dar dar chu enin Ramngaihsanga number a ni tih ka hriat chuan ka thin a phu dawt mai. Rang lutuk hian ka pick up a.
.
“Tv i en em? Luggage an chhar khi Jade ta a ni tih ka chiang. Tunah luggage an lakna hmunah khian ka kal dawn a, I duh chuan I lo kal ve thei ang.” A ti zung zung a. A aw atang pawhin a hlauthawng hle tih a hriat theih.
.
“Ka lo kal nghal ang.” tia phone off in ka tho hluai a. Ka nu chuan phawk zet hian min lo en ve bawk. Thil awmzia ka hrilh zung zung hnuah in atang chuan hmanhmawh takin ka kal chhuak nghal a.
.
Tuna thil thleng mek hi ka mit ngeia ka hmuh phawt loh chuan engmah ka ring dawn lo. Vaspi chu hmun himah a awm ngei ang tih ka chiang…
.
JADE
(Soddisfazione)
.
Thantei_LauraSean
.
CHAPTER - 28
.
REMTLUANGA*
.
"Fimkhur takin motor khalh rawh aw. Thil pawi lutuk a thleng em lovang. Amah a tel  ngei tih pawh a la chian loh chu." tia ka nu min thlahna tawngkam chuan min hnem eih lo. A bungrua chiah hmuh tur awm, amah hmuh tur awm lo chu engti zawng mahin thil tha lam a ni thei lo. Ka rilru thenkhat ah chuan an luggage hmuh chu Vaspi ta a nih loh ka la ring fan a ni.
.
Ramngaihsanga in ka thlen hma deuhin min lo call leh a.
.
"A luggage kha an chharna hmun atangin an lo hawn tawh a, Ramthar venga Pu Hlunmawia te in ah a awm tih min lo hrilh a. Police lamin an lak hmaa va hmuh hman a tha khawp mai."
.
"Tunah khawiah nge i awm tawh?"
"In ah ka la awm. I lo chhuah tawh chuan ka lo  nghak law law mai ang che."
.
"Ok. Thil dang chhar a awm em? Hriat i nei em?  A purse emaw_ thil dang hrim hrim. Luggage chu ama ta ngei a ni tih engtin nge i hriat?" ka ti leh a.
.
"Lo thleng phawt la." tih ringawta min chhan hnu chuan kan inbiakna kan titawp a. Ka chhungril ah hian hlauhthawnna nasa tak ka nei a, ka ngaihtuahna pawh a fim hleithei lo a ni ber.
.
Ramngaihsanga in ka thleng a, thu khawmuang lovin kan kal chhuak nghal a. Sawi tur kan ngah lo duh khawp. A khat tawkin thawk kan la dun hawk hawk ringawt.
.
Pu Hlunmawia te in chu zawt chawpin kan lut ta hlawl a. Vanneihthlak takin luggage pawh a lo la awm hlauh. A lock vek vangin kan hawng thei chuang lo va, tih dan tur a vang khawp mai. Pu Hlunmawia hi taxi hmu hmasatu zinga tel a nih vangin thil dang an hmuh leh hmuh loh kan zawt a, ani chu an room-ah lutin hmeichhe bag a rawn khai chhuak a.
Hetiang thil hi an ti  ngai tih ka lo hre lo. Police lamin an la nghal vek turah ka lo ngai mai a, mak ka ti ru deuh nain engmah ka sawi chhuak ta rih lo. Ramngaihsanga hmel ka va en a, ani paw'n ka ngaihdan ang tho a nei tih ka hrethiam mai. Thil bo then a lo awm tawh reng em tih pawh kan hre mai thei chuang lo.
.
Pu Hlunmawia chuan min ringhlel miah lovin bag chu min pe chhawng a, a chhungah purse a lo awm! Purse chhungah chuan Voter ID leh card pawimawh dang  neuh neuh a lo awm a. Tunah chuan phat rual lohin chetsualnaah Vaspi a tel  ngei tih he thil hian a nemnghet ta. A purse chu ka thlauh tawp a, Ramngaihsanga'n rang lutuk hian a lo chhar nghal. Kan inen dun ren rawn a.
.
"Amah ngei anih hi. Ka pu, inzawh awm a ni em ka hre lova, engtin nge a bungrua hi in hawn mai theih zawk? Police lam chan a ni lo em ni?" Ka ti ta nge nge a.
.
"A ni khawp mai. Kan thil hriat loh lutuk  na lamah a bo hlauin ka hawn ta ngawt mai anih kha. In duh chuan in la  nghal mai thei ang. Chhiatna thleng hi pawi ka tihpui khawp mai che u." a ti zung zung a. Pa tha tak chu a nih hmel si hi.
.
Ramngaihsanga nen luggage leh a bag te chu kengin chanchinthar ngaihven turin Police station lam kan pan nghal a. 
.
Police station kan thleng a, chetsualna thlenna hmun atangin chanchinthar engmah an la hriat loh thu leh an hriat veleh min hrilh nghal ang tih an sawi hnu chuan tih theih dang a awm rih loh  vangin kan chhuahsan lehnghal mai a.
.
In kan thleng hman lo. Ramngaihsanga'n phone a pick up a, phawk zet hian min rawn en a. A ngaihna hre lo zetin ka en let thung.
.
"An hmu a nih chu! A dinhmun a tha lem lo anih hmel. An lo tlan pui mek."
.
Ramngaihsanga chuan a rang thei ang bera an hruaina tura an sawi damdawiin lam pan a rawt a, kei chuan ka nghak zo dawn lo. Damdawiin a ka dah hnuah Lengpui lam panin ka tlan ta ngawt a. Speed a muang mawh khawp mai. Intawk pawh ni ila in dintirna hun a ni dawn lo tih ka hrethiam chungin amah hnaih thei ang bera awm ka duhna chuan thil dang  min ngaihtuahtir thei chuang lo.
.
.
Rangvamual ka pel fel awrh tihah kan intawk a. Ka rinlawk ang chiahin indintir theih a ni lo. Ka motor chu turn-in ka umzui lehnghal a. Damdawiin thlen hma chuan kan inzui mawp mawp a ni ber mai e.
.
Remchang hmasa berah tlan pelin an hmaah ka tlan a, damdawiin an lo thlen chuan an motor chu  ka pan nghal ruak ruak a.
.
"Kha, min lo dip suh u. Emergency_Emergency_" tiin mipa pakhat hi a au thawt thawt a, motor atanga an hlan thlak rualin an zawnna chu ka lo vuan vat a. Vaspi hmel ka hmuh chuan ka bing nghal mum mum mai. Thisen a hloh nasa ang tih a hmel dan(pale) vek dan atang chuan a hriat a, a hmui pawh a duk vek.
.
Hmahmawh thei ang berin Emergency room-ah an nawrlut a, duh  mah ila hmuh theih a ni ta rih lo. Pawnah chuan thu thei lovin ka vei sek a. Ramngaihsanga'n ka nu biak nachang a lo hria a ni ngei ang, hmanhmawh taka ka nu lo kal hlawk hlawk ka hmuh rualin ka pan thuai a. Kan thlen hma khan an lo awm diam tawh zawk a lo ni.
.
"Chanchin hriattur a awm tawh em?" tiin ka nu chu ka bulah a ding a.
"Lo nghah tawp hi a ni rih mai."
.
"Mama, i tha em?" ka nu chu tawngkaa chhang lovin ka bu ringawt.
.
"An hmuh dan kha sawlai ah sawn an sawi a. Khapa kha keimahni ngei pawhin zawhchian a va tha ve."
.
Kan piah deuha ding bawr laih atang chuan mipa pakhat hi kal hrangin min lo pan a.
.
"A chhungte in ni em?" a tih chuan "Ni e" tiin ka lo chhang thuai.
.
"In vannei hle mai. A dam chhuak a nih phei chuan in vannei lehzual ang. Motor kan hmuhna atanga hla deuh takah a lo awm a. Nikhua a la hriat laiin kawngpuia vah chhuah ve a tum a niang, a thi lo hi thil mak tawpkhawk a ni. Thisen a hloh hnem bakah a taksa pawh a vawt vek a. A mar a la awm tih ka hriat khan ka dam chhunga thilmak ber ka tawng tih ka inhre hmiah. A dam chhuah leh theih nan ka duhsakna sang ber ka hlan mawlh mawlh che u."
.
Lawmthu kan inhrilh mawlh mawlh hnu chuan a kal sawn ve leh mai a. Keichu ka la thu thei chuang lo. Ka ngaihtuah chian poh leh indemna tur  ka hre tam ting mai.
.
Inzaina pindan-a an nawrluh hnuah darkar hnih a liam ta. Kan ngawi thap a, pindan atanga lo chhuak an awm apiangin kan lo zawt zel a. Engmah a la hriat theih loh' tih chu kan chhanna dawn awmchhun a ni.
.
Darkar 3__ Darkar 4_!
.
Inzaina pindan atangin an lo chhuak ta. Doctor chu ka pan thuai a.
.
"Eng nge a an?" ka lo ti nghal.
"Tunah chuan chunglam kutah kan innghat tawp  mai a ni. Mihringin kan tihtheih chin zawng chu kan ti a, i tawngtai phawt mai ang u." a ti dam thlap a. ICU-a an dah dawn tih a sawi hnu chuan min kalsan leh mai a. Mihring tihtheih a va tlem tehlul em. Nunna hlut zia leh kan duh vanga nunna nei thei kan nih loh zia hi a chiang leh thin.
.
Enkawlna tha ber ber dawngin enkawl zui a ni a, hmasawnna erawh a thleng chak hran lo. Mahse, a lung a la phu tih hriat ringawt pawh ka tan chuan thil ropui a ni. Eng dinhmunah pawh awm se, engtiang pawhin awm se kei chuan ka kalsan dawn lo. A aw vawikhat chauh tal hriat leh pawh ka thlahlel tak zet zet.
.
A mutna pindan-ah chuan lutin a hmel chu ka en ngawih ngawih a. 'Dam hmel pawh a pu lo' tia ka  nu sawi ka hriat ruk kha awih duh lo mah ila thudik a ni. Dimtein a kut ka dek a, a lum chang chang chauh. A bulah hian sawitur reng reng ka hre hauh lo nia. Khawi atanga tan leh tur  nge tih pawh ka hrethiam hek lo. Lo dam leh phawt se, a aw  ri vawikhat chauh tal hre leh ila tih hi tuna ka ngaihtuah theih awm chhun chu a ni. "Ka hmangaih che." tiin ka phun sap a.
.
Thla khat zet a liam ta. Nitin a taksaah hmasawnna hmuh tur a awm ve tan a, rilru pawh a zangkhai ve thei ta deuh. Chutih rualin kan lawmna hi a la te tham rih em a, pangngai taka khawsa leh thei tur chuan hun a la duh rei ang tih kan hre vek a ni.
.
Hun eng emaw chen a reh deuh vang vang hnuah Ramngaihsanga arawn lang leh hlawl mai. A khat tawka chanchin min lo zawt tih loh chu damdawiin ah pawh a lo kal ngai meuh lo va. A chhan zawh erawh tul ka ti hran lo.
.
"Vawiin chu engkim hrilh che a thain ka hria. Ka lo kal hleihtheih loh chhan chu Ludy a lo chho leh tawh a. Jade chungchang hi engmah a hriat ka duh loh vangin lo kal lohah ka tlak ta ringawt anih hi. I enkawl dan vang hian ka lawm khawp mai."
A bulah thuin amah chu ka en a, Ramngaihsanga hian dawt a sawi mai mai lo tih hi hman deuh atang khan ka hre tawh. Ka la ngaina lem lo  nain ahma ngaihtuah chuan pangngai takin kan inbe thei a, hmasawnna nasa tak a ni tih pawhin a sawi theih ang. Vaspi a ngaihtuah takzet tih ka hria a, chu chu ka tan ngainatna tur chhan tha tawk tak a tling thei bawk ang chu.
.
"I nuhrawn leh Ludy chungchang hi eng emaw chen chu i hriat ka ring a, tunah hian an chungah rorelna dan lekkawh a nih vat loh chuan itan a pawi thei hle dawn a ni. Engtianga hmalak tur nge tih chu i ngaihtuah thiam maiin ka ring."
.
"Jade nu leh pate thattu kha Nu Ramthari hi a ni tih ka hre tawh a. A bak chu Ludy hian eng thil chiah nge a tih ve engmah chianga hriat ka la nei lo." thudik tak sawi hun a ni tih ka hria.
.
"A ni tak e. Ludy hian an sumdawnna leh an sum neih zawng zawng Jade hnen atang hian a chhuhsak vek tih i lo la hrelo chu mak ka ti hle mai. Tuna a lo chhoh leh hma hian engkim a chan vek a. Nihna lem leh  bumna tenawm tak hmangin Ludy hian engkim a chhuh vek a ni."
.
"Engtin nge anih theih?" ka ti hrawk a. Anih chuan Vaspi hi Ludy nen an lo tangdun ngai lo tihna a ni a. "Chiang zawkin i hriat chin min hrilh vek theih chuan ka lawm khawp ang."
.
"Ludy hian documents lem hmangin UDY-JA neitu nihna a chhuhsak vek a, tunah pawh hian a la duhtawk lo tih nizan khan ka hriat belh a ni. I thianpa Remruata pawh hi a fihlim lo nasa khawp mai. An thiltih dan hi mihring pangngai tih duh tur pawh a ni lo reng reng. Delhi-a Jade chenna hmun zawng zawng pawh a chhuhsak a. Chutiang thil a tih chhan chu Jade hian a tanpui che nia a hriat vang a ni. An inzawmna zawng zawng pawh a chhu chat vek tawh. Jade hian atana tha tur pawh ngaihtuah lovin a buaipui che a ni ber a, hetiang thu i bulah ka sawi tih hi hria se min haw ngei pawhin ka ring. Amah hian engmah a sawi chhuak dawn lo tih a mizia ka hriatchian em vangin ka hria a. Amah ang hmeichhia hi ka la hre ngai lo reng reng."
.
Ka thu hriat chu a mak tih piahlam a ni e. Sawitur hre lovin Ramngaihsanga chu ka en ngawt ngawt a.
.
"Jade hnenah hian nang hi hnaih lo tur che in vawitam ka hrilh a, engvanga amah tinat pawiti miah lo tu hi hnaih lui tlat  che nge a nih tih hi ka inzawt nawn fo thin. Nangmah vanga a tah hi a tam asin. Kawng lehlamah chuan amah chauha a tuar hi a tam em a, nun hahthlak tak atanga chawl tur hian Pathian pawhin a duh niin ka ngai hman hial a ni. Mahse, damchhuah duhin bei ve ni lo se la tun hun thleng hi a dam ka ring lo. I rilru siamfel ang che. Tunah hian amah tina thei tur thil engpawh i ti leh dawn a nih chuan keimah ngei hi atan ka ding ang. Eng natna mah a tuar belh leh ka phal tawh lo. A chunga thil diklo thleng zawng zawng chinfel hi ka tihtur niin ka hre bawk."
.
"Ni love. Tun chinah chuan engkim hi ka mawhphurhna a ni. Ka thil hriat loh tam tak min hrilh vangin i chungah ka lawm e. Ka hmangaih tan chuan eng pawh ka ti duh ngei ang." Ramngaihsanga chuan chik zet hian min en a, min ring dawn nge dawn lo tih a ngaihtuah pawh a ni mahna. A dinhmun angah hian awm ila ka tih ve tho ka ring.
.
Thu dang tam tak kan sawi a, tunah chuan Vaspi chungchang engkim ka hre ta  niin ka inhria. Tu chungah nge rorelna lekkawh tur tih pawh chiang takin ka hria. Ka hmeichhe hmangaihin amah chauhin hreawm tam tak a lo tuar tlang tih leh ka laka a natna tawrhte a lo zep vek tih hriat erawh na tak a ni. Ka lo ngaih dik lohna te, atana tawngkam hriat nuam lo leh na taka ka tawngkhum chang pawhin a thiamthu sawi miah lovin a ngawi a, tuar a, a tuar zel a.. A thiamthu vawikhat chauh pawh a sawi lo. Tun hun hi thleng lo ni se kei hian ka dam chhungin thudik ka hrelo tluan hial thei ani tih ka ngaihtuah chuan thinrimna leh pawi tihnain ka khat a ni ber mai.
.
Ramngaihsanga'n min hawsan hnu chuan cabin ah ka lut a, engmah sawi thei si lovin Vaspi chu ka en ngawih ngawih a. Ka hmeichhe hmangaih hian amah chauhin hreawmna a tuar leh tawh lovang. A hlim theihna tur anih chuan engpawh ka ti duh ngei dawn a ni tih hi ka chiang em em. Kan inhmuh hmasak ber atanga vawiin ni thlenga thil thleng te, hlimna tam tak min pek leh lungngaihna, thinlung natna min pek te, a vaiin ka pawm vek. A tha lai leh a thalo zawng zawng pawh, Vaspi chungchang a nih tawh chuan ka pawm vek a ni. Eng indona pawh hmachhawn se amah chauha ding lovin a hmaah ka ding zel tawh ang.
.
A kut che zeuh ka hmuh chuan ka phu zawk. A rang thei ang berin doctor ka ko a, a lo harhchhuak dawn ni a ka hriatna chuan hlimna nasa tak min neihtir a, ka hlimna a nasat ang  bawkin hlauhthawnna pawh ka la nei tho.
.
"A taksa che i hmuh kha chu a la dam ve tih hriatna mai chauh a nih kha. Aman a hriat lem lohin a che fo ang. A kut chauh ni lovin a mit te pawh a che tura ngaih a ni." ka beisei ang chhanna ka dawn loh vang hian ka beidawng tur a ni chuang lo.
.
Kar khat chuang a liam leh ta! Office lamah tihtur ka ngah vangin chawhma chhung office-ah ka awm tawh a, ka theih anga rangin hna ka thawk mawlh mawlh a. UDY-JA neitu inchhuh chungchanga thubuai pawh mi rinawm tak kutah dahin thubuai kan thehlut tawh a, Vaspi a harhchhuah phawt loh chuan ngaihtuah fel theih a nih rih chuan loh vangin rilru hmanhmawhin awmzia a nei rih lo. Vaspi hian a unaunu tan dikna haihlan a duh vangin min khinna lehkha a lo thehlut tih ka hria a, mahse chu lehkha chu Ludy'n engkim a chhuhsak hnuah thudik hriain Mizoram-a a lo kal leh hma khan a lo hnukdawk leh vek tawh bawk. A thiltih ka chhui chian theih chin zawng pawh hi keimah nen inkungkaihna nei a ni vek a, a nunah buaina bak ka thlen lo tih ka hriat hian hreawm ka ti tak zet. Heng thil thleng zawng zawng te hi theihnghilh tir turin tih theih engmah ka nei hek lo.
.
Ka phone nghawr dar dar chu en in, Hospital atanga lo call a ni tih ka hmuh rual chuan ka pick up vat a.
.
"Mama, hei Jade a harh a nia. Lo kal thuai rawh." ka nu thusawi chu ka hrechiang em tih chian nan ka zawt nawn leh ngat. A chiang e! Vaspi chu a harh ngei tih a chiang ta.
.
Hmanhmawh lutuk in office ka chhuahsan a, Hospital ka pan nghal dawr dawr a.
.
Hospital ka thleng a, kawtah ka nu’n min lo nghak ka hmuh chuan pan thuaiin in chhungah kan lut a, ka nu pawh chuan amah a la hmuh bik loh thu sawiin  doctor te thusawi min hrilh chhawng a. Ramngaihsanga pawh ka rin loh takin a lo awm diam tawh.
.
Vaspi awmna cabin ah chuan thawm dim takin ka lut a. A lo harh tawh tih ka hmuh chuan ka mittui a hnam sawk mai. A hmel erawh la diklo tak a ni. A dang bem mai. A mit khapin muangchang hian min en a, a tawng theih ka beisei ngam rih lo chungin a harh ve hrim hrim chu ka lawm tawk em em.
.
A khum bulah ka thu a, a mitmeng fiah kel kawl chuan min en reng a.
.
"Na i nei em?" ka tih chuan a rum tiah tiah a. A mit meng awm dan atang chuan sawi duh tam tak a neih ngei ka ring. Doctor te khan a la tawng mai theih an rin loh thu  min hrilh lawk tawh a nih kha.
"Hlauh tur a awm lo a nia. I tha leh mai ang. I  bulah ka awm reng ang." a kut chu dimtein ka vuan a, thei leh thei lo hian a kut chu rawn en a tum a.
"I theih rih loh chuan engmah tihluih tum suh. Rilru hahdam takin awm la, engkim a tha leh vek mai ang." ka tih chuan tah chhuak niawm tak hian a hmel a danglam a, a mittui a tla tih ka hmuh chuan ka chhungril ah hian che a awm leh ta. A tah ka phal hauh hleinem. "Hahdam takin awm rawh." ti lehin a chalah ka fawp vang vang a.
Ka awm theih hun chhung a zawh chuan cabin atangin ka chhuak a, ka nu leh Ramngaihsanga'n min lo pan rang khawp mai.
.
"A biak theih em? I tawng a hria em?"
.
"Hria e. A la tawng thei rih lova, doctor te sawi ang khan muangchang in a tha chhuak leh ngei ang." tiin ka chhang a. Ka rilru erawh a hmanhmawh ve tho. Tawng chhuak theiin thil thlen dan dan min hrilh thei tawh se la tih hi ka duhthusam a ni.
.
"A lo harh ve ta ringawt pawh hi thil ropui a tling alawm. A hmuna hmutu te khan a dam chhuah an ring miah lo zawk a nia. A vannei chungchuang tak zet a nih hi." ka nu'n a lo ti ve bawk a.
.
.
Ni a liam a, kar a liam a, Vaspi pawn hma a sawn ve hret hret zel a. Hmanhmawh ngawt theih erawh a ni lo. Engtiklai pawha awmpui theih a nih loh vangin ka hunawl neih zawng zawng chu cabin bulah ka hmang chawt a ni ber mai. A tuar ai tuar theih se tih hi vawi engzat fakau nge ka ngaihtuah pawh ka hre seng tawh lo. Ramngaihsanga nen kan inhmu zauh zauh a, Ludy leh Nu Ramthari chungchang thu thar awm chu min hrilh ve zel bawk a. In ngaina ngai hauh lo kha Vaspi vangin tunah chuan tangdun/pawl  khat kan lo ni thei ta anih hi. Ka la ngaihtuah ngai miah loh danin Ramngaihsanga pawh a tha zawngin ka ngaihtuah thei a, mi rinawm tak a ni ka ti lo thei lovang. Mihring hi han inbelhchian chuan chaklohna lai nei theuh ni thin mah ila, inrinna tur chhan tha tak alo awm zel thin. A thlirtu rilru erawh a ngil that a ngai fo thung.
.
Cabin pawnah thuin ka phone ah mail pawimawh thleng a awm em tih ka check mawlh mawlh a. Vaspi cabin atanga hmanhmawh taka Doctor lo kal chhuak ka hmuh chuan ka ding hluai a.
.
 "Tunah i lut thei ang. A lo tawng chhuak a. Remtluanga i ni em?"
"Aw, ni e. Ka lawm e." tiin Cabin ah chuan ka lut nghal hmiah.
.
Vaspi chu awn deuh hian hahdam hmel takin a lo thu mu a, a khum bulah kal hnaiin a kutah ka vuan chawt a.
.
"Doctor khan i tawng chhuak thei tih a sawi a." a dik alawm ti  niawm tak hian a maimitchhing zauh a.
.
"Ka chungah i tha hle mai. Engtin nge ka rulhlet theih ang che." a ti sep a.
.
"Chutiang thu chu ka lakah sawi suh." a bula sawitur hi thil tam tak ka ngaihtuah lawk a, tunah hian sawi tur ka hre miah lo. Ngaihtuah lawk loh ang chiah.
.
"Pathianin a la rul leh ngei ang che. Tunlai angah chuan hmelhriat ngai loh chunga hetiang thil ti thei hi an awm pawh ka lo ring lo va. Mi tha tak i ni ngei ngei ang."
A tawngkam chu ka hresual emaw tiin a hmel ka en a, a thutak tih a hriat si. Ahma khan chik nachang ka lo hriat loh vang nge a mitmeng en reng reng pawh hian hmelhriat ngai loh enin a ni min en!
.
"Hmelhriat ngai loh kan ni hleinem." ka tih chuan a nui sak a. Tawng leh tumin thawk a la halh bawk a.
.
"Ka lawm e." a ngawi dat a. "Doctor hnenah khan Remtluanga hmuh ka duh thu ka hrilh a. Amah hi a lo la kal  miah lo em?" a mitmeng pawisawi lo zet chuan min en a, ka tawng thei rih lo. "Ka va'n a tak. Sawi loh tur ka sawi anih chu. Amah chu i hre lovang tiraw? Min la haw reng ang. A lo kal miah lovang. Ka damchhungin ka a tawh dawn anih hi." a ti zui sep sep a. Min bia pawh a ni tawh lo. Amah leh amah inhrilh a ang zawk. Ka thinlung nat zia chu sawi ngaihna a awm lo. A hmel chu ka en ngawih ngawih a. Hmuh duha a hming a lam chu keimah ngei hi ka ni tih ka sawi thei rih lo.
.
"Min tanpui chhan hi min hrilh thei ang em?" nelawm leh pangngai tak anga lan tumin min nuih a, ka tuar zo ta lo. Dim tak siin ka kuah a, tihngaihna hrelo ang mai hian ka kuah ang ang chuan a awm tawp a.
.
"Ka unaupa ang mai i ni." tih pahin a kut chuan ka hnungah min vuan a, hriat tham loh hian a phun zui sep sep a. Ka kuahna chu thlahin a biang tawn tawnah ka vuan a,
.
"I unaupa ka ni lo_" ka thusawi a hriat ruala a mitmeng buai nak ka hmuh chuan engmah ka sawizawm duh ta lo. "Ka lo kal leh thuai ang." tiin cabin atang chuan ka kal chhuak hlawk hlawk a.
.
Cabin kawngka ka khar chiah chuan ka ngaihtuahna ah thil pakhat lo lut zawk a awm! 'Vaspi hian a tider a ni thei angem?"
.
Thawm nei miah loin Cabin kawngka chu ka hawng thut a, chik zet hian a hmel ka en nghal a. Ahma nen danglamna a awm lo. Ka hmel min hmuh chuan tider ni hauh lo hian nui sakin "Thil theihnghilh i nei anih ka ring." tih pahin a mutna bul vel chu a enkual ta reuh a. A ni thei lo! Engtin nge min hriat miah loh theih? Ka hming chu a hre tho si!
.
"Nei lo ve. Nichin khan ka lo kal leh thuai ang tih ka sawi em?" ka tih chuan za deuh a nui hak hakin a lu a thing nar nar a.
.
"Sawi miah lo.. Min ngaihtuah suh, ka tha alawm. I nupui fanau te bulah awm rawh_" ka nui hmel reh riai riai a hmuh chuan a nui tawp chat a. "Ka tawng tam mah mah a ni maw?" a ti zui sep a.
.
"Ka'n kal phawt ange." tih leh kawngka atanga kal chhuah ka rual lehnghal. Ka awm dan hi a tha lo tawp mai.
.
Vaspi dinhmun chu chiang zawka hriat duhin Doctor ka hmu nghal a. A hriatna a hloh tih sawi chuan hmanhmawh taka test ngai zawng zawng test nghal veka nih tur thu sawiin an phe nghal zung zung a. A thluak a che tih chu an hre ngei a, a harh phawt loh chuan a nih tur ang takin a function em tih an hre nghal thei bik lo a lo ni. 
.
Ni hnih a ral leh hnuah result kan hre leh ta a, Vaspi hian a hriatna a hloh ngei tih phat rual a ni ta lo. A nei let leh angem tih chu chunglam thu a ni ta. Amah hmu turin vawikhat chu a awmna ah ka lut leh a, mak min tih ka hlauh vangin engmah ka la sawi ta chuang lo. A hun kal tawh sawi hian a hriatna nei let leh turin a pui ngei angem tih Docotr te paw'n an sawichiang ngam lo va, enkawlna tha zawk dawng tura hmun danga kal pawh awmzia a awm kher lo thei bawk.
.
Ka nun phung a buai a, tih theih erawh ka nei der si lo. Keimah ang bawkin ka nu leh Ramngaihsanga pawh an rilru a buai tih ka hria. Ludy hian engmah a la hre lo niin kan hria a, engmah a hriat ve loh hi kan duhthusam pawh a ni. Vaspi damlohna tan chhan hian eng thil pawh a ti duh ngei ang tih hi  kan rin dan a ni hmiah.
.
Muhil mai thei lovin khumah ka thu reng a, Vaspi bak ka ngaihtuah thei lo. Ka thinlung hi a na a, a dam tha emaw dam thalo emaw, min hria emaw hrelo emaw pawh ni se a hlata awm ka tum lo bur. Min hmangaih emaw hmangaih lo emaw pawh ni se ka tan chuan ka hmeichhe hmangaih awmchhun Vaspi kha a la ni reng a ni.
.
Banga sana intar chu enin zing lam dar 2 a pel tawh tih ka hmuh chuan mut tumin ka thawmhnaw hak ka phelh a. Ka la mu fel hman lo, ka phone ri ka hriat chuan ka phu zawk mai. Tun ang huna Ramngaihsanga phone dawn hi thil pangngai a ni lo.
.
"Keimah, eng thil nge ni ta?"
.
"Hospital ah Jade a awm tawh lo!"
"Eng thil maw i sawi chu?" tiin ka tho chhuak nghal chu a ni der.
.
"Zan dar 9 vel khan a lo awm tawh lo."
.
Dar 9 rik hmain ka hawsan a, ama thu a kal chhuak a ni hauh lovang. A duh dan dana la che theilo mihring chu engtin nge amah chauhin a kal chhuah theih ang?
.
"Engtin nge kan tih ang ka hrethiam ta hauh lo mai. I la ngaithla em?" Ramngaihsanga tawng chu ka ngaithla a, tih theih kan neih tak mialin tih thuah kal chhuah hrim hrim a ngai.
.
Ka thawmhnaw ha sawk sawkin ka nu pawh kaitho duh lo vin ka kal chhuak a, Ramngaihsanga in ka thlen dawn hnaihah a kal chhuah tawh thu a lo sawi leh chuan inhmuhna tur hmun dang sawiin motor chu a chak thei ang berin ka khalh pur pur a.
.
Khua a var meuh chuan kan rinhlelh deuh hmun kan tlawh kim vek tawh. Tihngaihna a vang ta khawp mai.
.
"Ludy hian a hria a ni lo maw? Ani lo chu hetiang thil ti duh tur an awm ka hre lo." Ramngaihsanga'n a ti ta phawng mai. Ka lo ngaihtuah ruk ve tho thil a ni. "Ludy thiltih a nih chuan reiloteah Mizoram hi an chhuahsan ngei ngei ang. Ludy hnial thei turin Jade khan engmah a hre lo va___ He mihring Ludy phiangsen hi a zalen rei ta mah mah anih hi. Ka tan mitha tak angin lo awm tawh thin mah se tuna a thiltih zawng zawng te hi  ngaihdam theih a ni tawh lo."
.
"Ludy thiltih ni lo ta se tu thiltih nge ni ta ang?"
"Ka hre bik lo."
.
"Engpawhnise, thil thalo chuan lan chhuah hun a nei ngei ngei thin. Mahse, Vaspi a him ngei tih ka hriat phawt loh chuan engmah ka ti thei  lovang."
"Vaspi a?" tiin Ramngaihsanga chuan min en hu a. Ka koh dan bik hi a lo la hrelo a ni ngei ang chu. "Engmah a ni lo." ka ti ta ngawt a. Ani chu a lo nui suk thung. Hrilhfiah kher ngai lovin a hrethiam chiang em mai!
.
"Koh dan tha tak a nih chu. Dik takin ka hrilh ang che. Jade hi i phu lo ka ti. Sum i ngah a, i hausa a ni mai thei. Mahse thinlung tha tak nei hmeichhia hi sum a lei theih an ni ngai lo tih i hrechiang tawh ngawt ang a__ I englai hi nge a duh tlat le..?" a ti zui bui bui a, ka chhang buai peih lo. A thusawi sentence tawp ber tih loh hi chu Vaspi ka tawn tirh atang khan ka hre daih tawh!! Ka khi suk ringawt.
.
Ramngaihsanga in ah kan let a, ani chu harhchhuak thut niawm tak hian pindan pakhat ah lutin a lo chhuak leh thuai a.
.
“Ludy thiltih a ni tih ka chiang. A bungrua engmah a awm tawh lo. A va han  nasa tak e aw…” tiin lehkha them a ken chu min pe a. Lehkha ka chhiar hnu chuan kei pawhin thil chiang ah ka ngai hmiah.
.
Tuna kan buaina hi thil lian tham anih vangin mi pahnih khat maiin kan chingfel thei dawn lo tih kan hrechiang a, Police lama thlen mai kan rel thlu ta a ni. Muangchang lovin Police station kan pan nghal a. Case dang ang anih loh vangin Police lam pawh an che muang lo khawp mai.
.
Mizoram chhuahsan an tum ngei ang. Airport kan pan phawt angai a ni. Vaspi thlalak thawn darhin amah an hmuh hlauh chuan min hriattir nghal turin message kan hnuchhiah nghal zel a. Chanchinthar engmah a awm thei lo. Kan tihtheih zawng zawng tih loh kan nei hek lo.
.
Darkar tam a liam ta. Khua a thim leh meuh chuan Ludy dang turin engmah tihtheih kan nei ta lo. Vaspi chunga a chet duh dan ngaihtuahin kha hmeichhe rapthlak zet khan  nungdama a zuah ka ring si lo. Ngaihtuahna dang nei thei si lovin tihtur ber ka hre tawh chuang lo va, bawm chhung chep taka tang ang mai niin ka inhria. Chu ai pawh chuan a la hreawm zawk.
.
Ni hnih a ral leh hnuah pawh an kalna hmun tur nia kan rin India ram hmun danga information kan pek chhuahte hnen atangin eng chanchin mah hriat tur ala awm ta chuang lo va, thehhmeh ang vang vang a ni mai e.
.
Office-ah tihfel tur a inhnawh khawm tam tawh vangin loh theih lohin ka kal a, rilru ah hna lam a lang mawh khawp mai. Rilru mumal lo takin ka tih tur ang ang chu ka tifel ve bawk a. Tlai lamah office atanga ka haw chuan ka rin loh takin Ramngaihsanga a lo awm teh tlat a, eng thil emaw hriat a nei anih ka ring nghal ringawt. An hmel ngui zia ka hmuh rualin ngaih that lohna lian tak ka nei nghal bawk a, eng thu mah ka zawt nghal ngam lo.
.
  Ramngaihsanga chuan zawi sap hian chanchinthar an hriat thu a sawi a, ka hlauhthawnna nasa lutuk vangin ka la tawng ngam chuang lo.
.
“Tlai lamah khan ka hria a, pawi ka ti khawp mai. A ruang hi chu hmu lo la itan a tha zawk ang.” A ti zuai raih a. Ka la tawng ta chuang lo. Tawng pawh tum ila ka thei chuang lovang. Ka thaw hi a tawp mai dawnin ka hria. Thil tam tak ka mitthla ah a lo lang zut zut a, ka lu a hai chhulh a.
.
“Mama, kan nunah hian kan duh ber thil a thleng thei lo fo a, nitin kan chan tawka lungawi kan zir fo a tul tih i hriatthiam kha aw..” a ti dam diai a. Chu tawngkam chuan ka chhungril hi a tikeh chhe vek thung. ‘Kan nunah kan duh ber thil kan nei thei lo fo thin’ tih thu hi Vaspi pawh khan ka bulah ngei a sawi alawm. Kha thu a sawi lai khan tun ang dinhmun hi ka tawn ka ring chhin eih lo a nih kha. Hetiang thudik awm sa ni a ka ngaih leh mi dangte tawn tur chauha ka ngaih thin hi a tawngtu han nih  meuh chuan a va rapthlak em! An thusawi chu ngaithla zui duh lovin in chungah  ka tlan chho ta ngawt a. Awm dan tur ka hre hlawl lo. In chhung chu ka tan a zim lutuk a, ka puakkeh mai dawnin ka inhria.
.
Pen ri thlawk thlawk ka hriat chuan hlauthawngin min umzui hmiah tih ka hrethiam a. Ka chet dan hi thil tha ber a ni lo tih pawh ka ngaihtuah thiam nghal. Mahse.. Eng thil dang nge ka tih chuan ang? Ka hmangaih ber chan tur hian ka inpeih lo mai ni lovin ka phal thei lo! Ka hmangaih kha tanpuitu mamawh em em in a awm ngei ang. Mangang in ka hming pawh a lam mai thei asin! Min  mamawh hunah amah tanpui turin ka awm lo maw? Na ka va’n ti em!
.
Mangang tih ngaihna hre si lovin ka room ah chuan ka vei thuak thuak a, khumah ka thu ta hnawk a. Ka hmai tuai pawpin ka sam ka tham ngawt ngawt a, chu pawh chuan ka chhungrila na lutuk awm hi a chhawk zo chuang lo. A na em a ni!
Khum atang chuan ding chhuak hluaiin ka thawmhnaw bawm pakhat ka hawng a, hun rei tak chhung ka kawl tawh Vaspi tan liau liaua ka lei zungbun bawm leh thi awmna bawm chu keng in khumah ka let leh a. Heng thilte hi engtin nge ka tih tak ang? Ka hmangaih tan, atan chauh asin hetiang thil hi ka lei. Heng thil inbel tur hian damin ka hmu tawh lovang maw? Hetiang tuar zo tur hian tharum ngahin awmzia a nei lo! Hlim taka Vaspi nui hmel ka mitthlaa lo lang zawr zawr vang chuan ka mittui a hnam sawk a. Mipa ka ni a ka tap tur a ni lo tiin inti mipa takin ka awm thin. Mahse, tunah ka hmangaih  ber khawvelah a awm tawh lo tih hre chung hian inti mipa taka awm a tul kher em? Ka hmangaih ka sunna anih phawt chuan eng anga tam pawh ka mittui tla se a tawk zo chuang lo va, ka thinlung natna thuk zia a phochhuak vek seng hek lo.
.
“Mama, i tha em?” ka nu hlauthawng aw chu ka hria a, mahse, ka manganna khawvel atang hian min ko chhuak zo chuang lo. “Kawngka hi tichhe mai rawh. A manganthlak em mai..” tia a tawng khur hlawk hlawk chu ka thil hriat hnuhnun ber a ni ta. Ka mit a thim a, ka thil hmuh leh hriat awm chhun chu Vaspi chauh a ni.
.
A kut nel thep ka vawn tura arawn phar chhuah ka vawn chuan a nui var var a. He thil hi ka duh ber chu a ni. Ka thlah leh tawh lovang!
.
.
.
KUM HNIH HNUAH*
.
Ka hmangaih berin min kalsan atanga kum hnih chhung kha chu ka tan kum rapthlak ber a ni ka ti lo thei lovang. Vaspi kut vuan chunga ka chawlh hnu khan mak takin Hospital ah ka harhchhuak leh a. Ka nu min hrilh dan chuan Vaspi chanchin in min thawn nat lutuk vanga nikhawhrelova awm ka lo ni awm a. Ka harhchhuak leh pawi ka tih zia hi tuma hnena sawi chhuah chi pawh a ni lo ve.
.
Thinlung natna tuar chungin ka rilru leh ngaihtuahna zawng zawng phuba lak duhnain a khat a, chuti ni lo se tun hun hi ka thleng hauh lovang.
.
Nu Ramthari leh Ludy chungchang luh chilhin Vaspi thlalak hnuhnung ber Ramngaihsanga an lo thawn kha hmanraw tangkai tak a ni ta bawk. Nu Ramthari chu awlsam takin kan hling mai a, Ludy erawh chu mi thiltithei tak a nih vangin hlin a awlsam lo khawp. Vaspi nu leh pate thih dan leh Nu Ramthari thiltih zawng zawng haichhuah vek a ni a, anu leh pate ruang kan hai chhuah ni a kan lungngaihna nasat zia pawh sawi sen a ni lovang. Ramngaihsanga in hnunglam a Vaspi'n thlan a lo phun tawh ah an ruang(ruhro) chu zalh an ni ta a ni.
Nu Ramthari chu a thiltih sual rapthlak tak vangin dam chhung lung in tang tura a chungthu rel thluk a ni a. A hunlaia thil thleng hmutu  ka nu a awm vangin Nu Ramthari tan thiamthu sawi tur a awm hek lo.
Ludy chungchang pawh chhui zui reng a ni a, hming lem leh nihna lem hmanga a nun tak vangin thil a awlsam lo tak zet a, vawiin thlengin Ludy chungchang hi thu buai kal lai a la ni ta reng a ni. A chenna hmun an luhchhuah fuh hleithei lo va, UDY-JA pawh tunhma pha lo tak chungin a la kal ve reng bawk a. Hlin fuh a nih vek vek chuan a hmanrua a tang ho zawng zawng pawh hlin tel vek an ni ngei ngei bawk ang. Chu chu Vaspi hminga ka thutiam a ni! Ka chawlhsan dawn reng reng lo.
.
.
“Sir, lehkha hi sign phawt a ngai a.” dawhkan phena ding hmeichhiain paper min pek chu lain ka chhiar zet hnuah ka sign a.
“Tikhan gate hi i kal tlang thei ang.” Polite taka nui chungin a ti leh a. Gate ka kal tlang hnu chuan ka ruala kal tur ho awm khawmna hmun ka pan ding nghal a.
.
Vawiin hi sumdawnna lama kan thawhpui leh a hlawma inthlunzawm hote tan ni special tak a ni. Mi 20 vel zet kan ni a, hun eng emaw chen Visa leh thil tul dang buaipuia kan awm hnuah a hun a lo thleng ve ta hram anih hi. Tun atanga darkar khat a ral leh chuan Rome,Italy panin kan chhuak fel tawh ang. Kum hnih chhunga a vawikhat nan phurna tlem ka nei ve teh tlat!
.
Darkar eng emaw zat a ral hnu chuan kan tum ram kan thleng ta. Experience nei tawh theuh kan nih vangin kan chuanna flight kan thlak pawhin buaina kan  nei hran lo. Hetiang hunah hian thil nuihzatthlak leh hlimawm, buaithlak tak si a thleng ve fo a nia!
.
Kan thlenna tur Hotel ah fel fai takin ka thleng a, kan kal chhan ber inhmuhkhawm hunpui leh factory hrang hrang tlawh chu  naktuk lama tih tur anih vangin hunawl kan ngah khawp mai. Kan zavai maiin kan hunawl chu a lo thlawn  mai a hman kan tum lo tlang hle.
.
In tifaia ka inthlak fel hnuah Hotel chhuahsan in Rome khawpui, thawnthu ngaihnawm tam tak nei fang kual tur chuan ka kal chhuak ta a. Ka thil hmuh tam zawk chu TV-a kan hmuh fo leh ka beisei  lawk ang thil a ni tlangpui. Eitur erawh a tui tih piahlam a ni e.
.
Mipui zi hut hut kara awm hi eng emawti lai atang khan ka peih ta meuh lova, a chhan chiang takin ka hre bawk. Tuipui kam nuam tak leh reh raih si a awm ka duh vangin ka motor hawh chu map en chungin ka khalh zel a, ka tumna hmun ka thlen chuan ka tana duhthuasam hmun a ni mai hian ka hria. Mihring an tam lo khawp mai.
.
Tuipui luang ri a inchhawk ri nghulh nghulh a, tuipui sava hram neuh neuh chuan rin phak baka nasa hian ka lung a tileng thei nia. Ralkhat hla deuh takah chuan lawng lian tawk tak tur hi tuipui ral lam pan ni awm tak hian a leng delh delh a, ka awmna hmun atanga a hlat deuh vangin ka hmu te mai mai  niin ka hria. Chu lawngah chuan Vaspi a chuang nia hriatna neiin, tuipui luang ri hum hum te chuan min mangtha na thu an sawi ni te hian ka hre bawk a. Ka awm dan hi a tha lo tawp mai. Ka intih harh a ngai anih hi.
.
Ka pheikhawk bun lai chu phelhin ka khai a, tuipui lum deuh pup chu ka daiin muangchang hian tuipui thuk lam chu ka pan a.
.
Naupang te thawm ka hriat chuan ka hnunglam ka hawi zawk a. Mangang thawm ni lovin hlim thawm a ni ka hriat chu.. Ka rilru a dik thei lo. Mipa naupang sam buang ther mai chu enin Vaspi nen khan fa nei ve ta ila tuna naupang ka hmuh ang tiat hi chu a la ni thei lo. Naupang duhawm tak erawh a ni ngei ang. Vaspi ang maia mitmeng mawi leh nun mawi a ni ngei bawk ang chu__
.
Ka ngaihtuahna kal dan hi a tha lem lo khawp mai. Helai hmuna ka awm reng chuan thil thalo ka tih duh mai pawh ka ring hial.
.
In herin ka motor dahna lam ka pan a. Ka lam pana mipa naupang lo tlan chu nichin ami bawk kha a ni. A hnunglama amah rawn umtu ka hmuh chuan ka ding khawng ta reng a. Min rawn hnaih lehzual deuh a, chu hmeichhia chuan min hmu tih ka hria. Keimah ang bawkin min hmuh rual chuan a ding ve chawt a.
.
"Vaspi_!" amah a ni chiang lutuk! Mahse, engtin nge anih theih?
.
Chu hmeichhia chuan muangchang hian min rawn pan a, ka hma zawna a din chuan hlauthawng niawm tak hian a thaw halh halh a. A kut dinglam phar chhuak a ka hmai arawn khawih chuan milim ang mai hian ka ding khawng tawp.
.
"Nangmah hi i ni tiraw?" tiin ka chhanna pawh nghak lo chuan min kuah thlawp a. Ka mumang a ni ang tih hlauin ka meng ngam lo.
.
Muangchang hian min kuahna chu thlahin min en a. A hmai sen deuh ap ap dan atang chuan a zak leh hnuhnawh tih ka hrethiam.
.
"Ka tisual em? Nangmah hi min tanpuitu kha i ni tiraw? Helai hmunah hian ka hmuh che ka ring thin reng a ni."
.
"Vaspi__ I ni tak tak em?" ka ti ta ngawt a.
"Vaspi__ Vaspi maw? Chu hming chu ka hre tawh thin! A chanchin min hrilh thei angem?" hlim hmel taka nuiin min en a. Ka chhungrila ka duhna chu ka dang zo tawh lo. Engmah sawi lovin ka kuah bet ta thlawp a.
.
JADE
(Soddisfazione)
.
Thantei_LauraSean
.
CHAPTER - 29
.
REMTLUANGA*
.
Nui deuh hak chung hian "Min kuahna hi i thlah thei tawh em?" a ti sap a. Ka chet dan chu atan a nuam lo thei tih ka lo ngaihtuah tel tawh miah lo. Ka thlah ta thuai a. Mahni chauh in ngaihtuah chunga chet mai hi a awlsam thin reng a ni. Ka tan mikhual a nih loh laiin atan chuan mikhual, amah lo tanpui tawhtu mai chauh ka ni.
.
"Nung dama ila awm hi a mak. Hospital atang khan engtin nge i kal chhuah?" amah ka sun nasat zia leh hun harsa ka lo paltlang zawng zawngte kha hun ala awm te anih ngai chuan ka la hrilh ngei ang. Tunah erawh chutiang hun chu a la hla tih piah lam a ni rih.
.
"Ka hre bik lo. Thil mak deuh a awm tih chu ka hria a, ka ngaihtuah chhuak zo tawh lo a ni. Tun hmain engtin nge ka nun thin ka hre lo va, nitin hian thil eng emaw tak ngaihtuah chhuah ka tum ziah thin. Vawiin thleng hian awmzia a la awm lo chu anih hi."
.
Ngaihtuah ding tak nei niawm tak hian tuipui lam chu enin thawk a la halh a. Ralkhat atanga mipa pakhatin Jade tia arawn koh chuan kan bula ding ve reng mipa naupang chu enin a bia a, Italian a hman vangin a thusawi awmzia chu ka hre meuh lo. Mipa naupang chu ka en ve reng tih min hmuh chuan "Apa hnena kal turin ka hrilh anih kha_Nuam lo ilo tih takin" a nui sang a, a thusawiin min thawn nat zia chu a hre lovang.
.
"Apa maw? Pasal i nei tawh a maw?" ka zawhna atthlak zia chu ka tawng zawh rualin ka hre lehnghal. Kan inhmuh hnuhnun ber atanga chhutin kum hnih a ral tawh a, hetiang rual fa neihna hun a la awm lo hrim hrim. Ngawi lawk! Chu pawh ni se, fa nei tawh pasal ah a nei pawh a la ni thei tho!
.
Za zet hian a nui ta hak hak.
.
"Ka pasal tur chu tunah hian khawiah emaw a awm ka ring." ngawi leh datin "Hetah hian i awm rei dawn em?" amah nghaktute lam chu a melh zeuh tih ka hmu.
.
"Kar khat chhung ka la awm ang. Hmuh leh che ka duh dawn bawk a." tih pahin ka phone ka pe a, tawng lovin a number a type ve mai a. Phone min pe let pah chuan a nui sek. Min hmuh a duh ve tho tih hriat nan chu chu a tawk.
.
Mipa naupang chu zuiin a kai a, hmanhmawh tak hian anmahni lo nghaktu lam chu an pan ta a. Ka phone-a a number type sa chu dial in amah chu ka la enzui reng a, a pick up tih pawh ka la hmu thei. Hun rei tak kan inhmuh tawh loh hnuah pangngai taka min be ve thei mai hi mak ka ti ru khawp mai. Ka beiseina tihsan lutuk erawh a chi loh mai thei.
.
"Zan ah ka lo bia ang che."
Min chhang lova lo hawi letin a ban arawn phar zauh a. An kal liam ta. Minute reilote chhunga ka thil tawn hian ka nun a ti danglam vek dawn tih ka hria. Engkim a bul atanga tan turin ka rilru ka siamfel nghal vek bawk.
.
Zanah ka be ta ngei a, a u vanga a chhuah theih loh thu sawiin naktuk ah hun remchang a nei dawn tih min hrilh a. A u chungchang a sawi zauh chuan ka beng a verh zar mai. Ludy bak ka u tia koh tur a nei lo tih hrechiang bertute zing ami ka ni.
.
"A damlo a, hun rei a neih tawh loh vangin a bulah awm tam ka duh a__ A awmzia ka hre biklo, i bulah hian engmah venthawn nei lovin ka rilru a thil awm ka sawi phawng phawng a, ka hriat chhuah zawh loh hun liam tawhah khan inzawmna kan nei anih ka ring. Ka sawi chu a dik em?"
.
"Kan inhmuh hunah kan sawi dawn nia. Tui takin mu phawt rawh." min chhan leh hmain phone ka off ta rih. Tunah hian hun liam tawh leh Ludy thubuai kal mek hi hrilh vek chi a la ni kher lovang. Ka u tia a sawi kha Ludy pawh alo ni kher lo thei bawk. Lo ngaihtuah hah lawk rih lo phawt ang.
.
.
Khua a var a, inhmukhawm tura ka kal chhuah hnuah Vaspi chu ka hman hun tur message in ka hrilh a. Min lo ngaihchan reng tur thua min chhanna ka hmuh chuan ka nui sak. Tunah chuan nuih chhan tur dik tak ka nei leh ta alawm.
.
Darkar 4 chhung zet conference na hmun a kan awm hnuah factory pakhat kan tlawh leh a, khawl ropui tak tak hmanga hnathawhna hmun mit ngeia hmuh chu a manhla khawp mai.
.
Darkar hnih dang a ral leh hnu chuan vawiin atan kan zalen ta rih. Vaspi call nghalin a awmna hmunah ka hruai theih thu ka hrilh nghal bawk a. City Hospital-a a awm thu min hrilh hnu chuan a sawina hmun lam panin ka tlan chhuak a, ka phur ruk zia chu ka thup thei lo. Thil dang chu thil dang ni se, a hmel hmuh chauh pawh ka thlahlel tak zet.
.
Min nghahna hmun ka thlen chuan awlsam takin ka hmu nghal mai a, ka thleng tawh tih ka hrilh leh hmain ka thlir vang vang phawt! Kawrbah var a khup khuh pha lo tawk vela a fual hain pheikhawk kaih a ke tang nalh zet lang thei a bun a, a nghawngah chuan scarf rawng lar zet hi a suih bawk a. Bag te deuh tak a ak bawk. A sam chu engtin nge a tih ka hrethiam ve chiah lo. Boruak lum uap deuh churh hnuaiah amah aia hmuh nuam tur chuang thil dang reng reng ka hmu lo.
.
Tlem tawlh hlekin a dinna zawnah chuan car ka tiding a, car atanga ka chhuak min hmuh veleh nui sakin a luhna tura kawngkhar ka hawnsak lamah chuan a lo kal thuai a. Car chhunga a luh hnuah driver seat lamah thu lut ve thuaiin kan inen ren rawn a, kan innuih ta ngawt a. Sawi tur kan hrelo ve ve niin ka hria. Ka aw ka thian kharh a. Rawlthar ang maia lai rual pawh ka ni tawh hleinem mawle!
.
.
"Vawiin chu min hruaitu ah i tang ang chu." ka tih chuan a dar tiche zauhin nui sang chung hian a kut pahnih a phar chhuak hliai a.
"Hotu ka ni dawn anih chu__ Mi dang chunga thuneih  nuam ka ti viau a nia" a nui hmel duhawm lutuk chu va fawp mai lo tura inthunun tumin car steering wheel chu ka hum  nghet ta ringawt. Hetianga hlim leh zalen taka a awm lai hmuh hi ka duhthusam anih thin kha. Tunah pawh a la danglam lo. A hriatna a nei let emaw nei let tawh lo emaw pawh ni se, tuna ka tih ang hi ka ti zawm zel tho ang. Vaspi anih chhung chu ka tan engmah a danglam ve lo.
.
"Min en reng a. Ka awm a nuam lo a nia. Ka hmaiah thil kai a awm ami?" nui deuh chung hian a hmui a khawih zauh a. Ka lu thingin ka hawisawn ta hram. A sawi hma kha chuan ka en reng em tih lam ka lo ngaihtuah chang tawh lo.
.
“Hmun nuam deuh kalna tur ka hria. I ngainat ve ka ring.” a tih leh hnu chuan kan tlan chhuak ta a.
“Ding lamah sawn i peng dawn nia__” kalna tur a sawi zel a, 30 minutes vel zet kan tlan hnuah ding tura min hrilh hnu chuan kan dinna hmun chu chiang zawkin ka en thei ta. Mit ngeia ka hmuh ve tawh leh Pathian thil siam mawi ka ngaihtuah theih chin piah lama hmun mawi a ni. Boruak pawh hmun dang aiin a dai tih ka hre nghal mai. Ka hmel min hmuh chuan tifuh intih hmel zet hian min melh ralh ralh a.
.
Car atangin kan chhuak a, ko pang sang tak hnuaia tui luang ri pawh kan hre thei.
“Hetah chuan kan duh duh kan sawi thei ang..” ka bulah dingin a ban pahnih a phar chhuak a, a maimitchhing vang vang a. A sam nem hmel tak a phiar kim loh lai chu thli thawin a chhem zawng chuan a leng siau siau a. “Tuipui rim chu i hria em?”
.
“Um_”
“Maimitchhing la duhthu sam rawh_” a ti leh sep a, a la maimitchhing reng. A hmel chu ka en reng a, a thusawi chhanna tur chu ka thinlung hian chiang takin a hria.
.
"Ka duhthusam zawng zawng bultanna leh tawpna chu tunah hian ka bulah a awm!" Muangchang a rawn meng in hnai zetah kan inen a, a ban chu a dah thla riai riai a. Ka mitmeng atang chuan ka thutak zia hre tur khawpin a fing tih ka hrechiang.
.
"Chu chu engtin nge anih theih? Ka_i__" tiin a kun ta daih. Eng thil nge a ngaihtuah ang? Accident hnua a harhchhuah khan ka hming a lam ngei a, ka hmel a hmuh khan hming a lama chu keimah ka ni tih a hre lo. Tuna kan inhmuh leh hnuah pawh ka hming min la zawt chuang lo. Mahse,tuna min en dan kha__ 
"I sawi duh chu sawi rawh." tiin a hmel ka hmuhchian theih nan a khabe ah dawmin ka kuai dak hlek a.
.
"Engtin nge anih theih? Keimah vanga buaina i tawh zozai vang khan_ I tan buaina bak ka thlen lo_" tawng sual inti niawm tak hian a hawisawn a, a tawng kha ka hre sual anih loh chuan Vaspi hian a hriatna a nei let leh tawh anih loh pawhin a hriatna a hloh lo hrim hrim tihna a ni! Hun kal tawh a hria__kan inkara thil thleng pawh a hria tih a tawngkam tawite khan a tilang hman tlat..!
.
"Min hria tiraw?" chik lutuk in hnai lehzualah ka en a, a hmui a pet fan fan a. Eng thil nge ka sawi tak ang ti niawm tak hian min en let kiauin a bu ta nghat a.
.
Sawi mai tur ka hre lo. Ka thaw tawp deuh chawtin ka hre hial! Thil thleng mek hi ka mumang a ni lo_ A tak ngei a ni. Ka rilru ah zawhna alo lut nghal zut zut a. Eng chen nge ni tawh? A tir atang khan a ni em? Kum hnih chhung zawng khan min lo hrereng a maw?_ thi anga ka ngaih theihna tur a thlalak zawng zawng te.. Ka hmangaih hian min hria a nih chu! Chu aia thu lawmawm chu ka tan a awm thei lo hrim hrim.
.
"Min hua em?" tiin a tawlh hnung hlek a, thinrima ka hmachhawn a beisei tih a tilang chiang tawk khawp mai. Chu chu ka rilru a ni lo hulhual. Ka thin a ur lova, engkim hriat erawh ka duh thung.
.
"Min kuah phawt rawh!" ka tih chuan  meng phar awkin che miah lo hian min en ta reng a.
Min kuah hun ka nghak zo ta lo. Nghet takin ka kuah a, hun rei tak chhung ka neih tawh ngai miah loh hahdamna ka neih chu a mak ka ti zawk.
.
"Ka hmangaih che."
"He thil hi ka awih thei lo.." tia phun sep sepin min kuah nghet sauh a, a taksa khur dar dar chu vawt a tih vang ani lo ti ka hria. Tih hahdam tumin a hnungah ka chul hauh hauh a.
.
Eng emaw chen kan inkuah hnuah ka kuahna phelhin a hmui no chekah chuan ka fawp ta vawng vawng a. Tawngkam tam taka thusawi duah ai chuan chetzia hian thil tam tak a tifel mai thei tih a takin kan tilang mek a ni.
.
Eng emaw chen hnuah Car-ah lutin kan inhmachhawn a, sawi tur tam tak kan nei tih kan hre ve ve. A kutah vuanin a mitah ka en a.
.
"Ka hriatna ka neih let leh hnua i chanchin ka hriat hmasak ber chu nupui i neih thu a nia. Kehchhe leh tur chuang ka awm tawh loh vangin ka nung mawl ve tawp tawp a. I chanchin hrechiang tura ka ngaihven hnu rei vak lovah nupui i nei lo tih ka hria a. Rawn pan tur chein huaisenna erawh ka nei zo ta lo a ni. Ka tawngtai a, ka tana ruat inih chuan Pathianin hun tha arawn herchhuah tir ngei ang tih ka pawm mawl ve tawp a. Ka beidawn hnuah ilo lang ta anih hi. Keimah vanga i tuar nasat zia ka hria a. Ka tana i thiltih zawng zawng hi ka rul seng ngai hauh lovang che."
A tawng chu chhang lovin a hmui ah ka fawp zauh a, "Sawi zel rawh." ka ti ringawt a.
.
"Hospital atanga ka u in min hruai chhuah hnu leh thi anga thlalak a lo thawn hnu lawkah khan ka u hian a natna nei tih a hrechhuak a, a thiltih sual siamthat leh tumin nasa takin a bei ta a ni. Kum khat chhung kha chu engmah ka hrechhuak zo lo. Helai hmunah hian ka u in enkawlna tha zawk dawng turin min hruai a__ama tan pawh a ni tho bawk a_" a u chungchang a sawi chuan ka ngaihdan hriat tum ni awm tak hian min melh zauh a. Sawi zel turin ka mitmengin ka lo nawr thung. "Ka u hian thil sual tam tak a ti ngei a, itan pawh huat nachhan tur tam tak a awm bawk a. Hmeichhe pakhat a ni  ve mai a, ka pianpui ni lo mah se min enkawl seiliantu a nihna leh min hmangaih reng a ni tih a lanchian hnu hian kei pawhin ka ngaidam thei ta a ni. Mahse__ a thiltih te kha mihringin ngaidam mah ila danin a ngaidam thei lo tih ka hria a, chuvanga helai hmun a awm bo ta hi kan ni. A dam rei tawh dawn lo va__" kun lapin ka kut a khawih neuh neuh a. A tah a chhuak niin ka hria. "Thla khat min la dampui chuan thilmak a ni ang. Tunah hian a thi mek a ni__ A thluak 50% chu a thi tawh a. Kei pawh min hriat lohna a rei tawh. Chuti chung chuan hremna pek i la duh tho em?" mittui tling pama min en chuan ka lamah pawt hnaiin ka kuah a.
.
"Thil awmzia ala hriat lai khan hreawm tiin a tap fo va, 'ka natna hian sual ti lo turin min chhanchhuak a ni' tiin a sawi ziah thin. A natna hi a rang em a, thil tha ti leh tur pawhin hun a nei ta lo anih hi. Dam chhuak lehin ka hriatna ka nei let leh tih pawh a hre ve tawh lo. Ka hriat theih china a sawi tam ber chu a damchhung ngeiin a sualna vanga hremna chuan a umphak tih thu hi a ni."
.
"Amah chu ka hmu ve thei angem?" ka tih chuan mak tiin min en a.
"I duh phawt chuan engtik hunah pawh i hmu thei ang."
.
"Chuan, nupui ka neih thu chu tuin nge hrilh che?"
.
"Um_ Delhi a kan mi chhawr pakhat in! I chanchin a hriat leh hriat loh ka zawt a_"
"Keimah pawh min zawt thei reng a."
.
"Engtin nge ka ngam ang? Accident hmaa ka hmuh hnuhnun ber tum che khan_ ermm__" ka kut a hmer salh a. Ka nui ve tawp.. "Sawi lo zawk ang. Ka huat zia che kha hrereng la.." tiin min melh ram ram a. Min melh ram ram ka ti nain min huat hmel loh khawp. Zawhna pakhat ka la nei.
“Tuipui kama min hmuh khan__”
“Kha chu ka enchhin che anih kha! Rin har ka la ti__ Kan inpawh leh chu sawi loh pangngai taka kan inbiak leh pawh hi ka beisei pha ngai lo.” Thaw halhin min en a, inrin hmel zet hian a thu ngil auh a. Ka kut chu vuan nghet sauhin
“Ka hmangaih che..” a ti sep a.
“Sawi  nawn rawh.”
“Ka.Hmangaih.Che. Lalremtluang!” nui chungin ka lamah arawn awn deuh a, ka hmuiah min fawpin a ban zen thlerh chuan ka nghawngah min kuah ta chial a. Ka hmingpuma min ko lai khi chu ka ngaidam rih mai ang! Tun hi min hmangaih thu min hrilh vawikhatna a ni a, ka dam chhunga hriat nawn fo ka duh ber tur tawngkam a ni.
.
Darkar hnih vel tur zet kan thut  hnu chuan Hospital panin kan kal a, Ludy hmel ka hmu chu ka phu zawk thei nia! Mihring hmel pawh a pu tawh lo. A ruh chu vunin a tuam der der nimai hian ka hria. Biak theih a ni lova, dan hmanga hremna tuar tlak pawh a ni tawh lo. Vaspi’n a thi mek tia a sawi kha a sawi uar hauh lo tih ka mit ngei hian ka hmu bawk. 
.
Tichuan, kan inkara thil thleng tam takte, tawngkam tawi thei ang bera sawifiahna leh khaikhawm theihna chu *HMANGAIHNA hi HNEHTU a ni* tih hi nimai teh se. Tun chinah hun liam tawha buaina leh harsatna zawng zawng te kha sawi  nawn fo loh kan duh  tawh zawk ang. Thil liam tawh hmanga intihnat tum ai chuan thil tha zawk beisei a hmalam pana kal mai hi mihringin kan tih theih tha ber a ni.
.
.
KAR HNIH HNUAH*
.
“Tun mai khan ka u chuan min kalsan ta. Hahdam taka a chawlh ka beisei.”
.
“I bula awm theih ka duh hle mai. I mal lo tih inhre reng la.”
“Ka lawm e. Nu Ramthari kha ilo hrilh ve thei angem?”
“Ka lo tum ang.” Phone kan dah hnu chuan ka office ah ka la thu deuh reng a. Vaspi ka ngaihtua zia chu nasa tak a ni.
.
Aizawl ka thlen leh atanga kar hnihna chiah a ni a, Ludy dinhmun ngaihtuah in hetiang thu ka hriat hun hi ka lo ngaichang deuh reng tawh zawk a. Nunna thuah  mihring hian tihtheih kan nei lo em a, Ludy pawh hahdam takin chawl ngei se tih hi ka duhthusam a ni.
.
Chawhnu lamah Central Jail panin ka chhuak a, Ramngaihsanga pawh engmah ka la hrilh loh vangin ka kal chhuah hma khan ka phone a, tunah hian Jail panin a lo kal ve mek tho ka ring.
.
Nu Ramthari hmel ka hmuh chuan ka lainat ru khawp mai. A mitmeng a danglam a, tunhmaa min en ngai loh danin min en teh tlat bawk. A cher deuh duk a, a sam a lo tuak tam ta viau chuan a tilang upa ta khawp mai.
.
“Nang meuhin min rawn hmu chu thu pawimawh a awm a ni ngei ang maw_” a tizuai ruih a. A nungchang danglam dan chu mak tih loh rual a ni lo.
.
“Jade min ngen angin Ludy boral thu hrilh tur chein ka lo  kal a nih hi. Tukin khan Rome-ah a boral a.”
.
“Karei maw!” kut khur dar dar chungin a awm a dawm a, “Kha nau kha nungdama hmuh leh ka duh asin. Sawi fel tur tam tak kan nei__ Awi karei__Ani ai chuan kei hi kal hmasa tur ka ni. Engkim ka bultan a ni a_ A_ A pa nen an inhmu tawh ang chu maw__” sawi zawm thei lovin a tap ta hlawp hlawp a. Tih vak ngaihna ka hre lo.
.
Ka hnunglama thawm awm ka hriat chuan ka lehhawi vat a. Ramngaihsanga chu kan inhmuhna pindan kawngka bulah a lo ding tawh reng tih ka hmuh chuan ka bula thutna awl awm chu kawk in thu ve turin ka mitmei a. A hmel atang chuan kan thusawiin a deng dawt a ni tih a lang chiang khawp mai.
.
“I thusawi kha ka hresual lo tiraw?” ka bula thu pahin min en a, Vaspi hming ka lamrik pawh kha a hre hman ang tih ka ring.
.
“A dik alawm.”
“Ka lakah i zep rei hle mai.” a lungawi chiah lo tih a aw atangin a hriat a, awm ka tihpui  nain tuna a hriat hi a hun dik tak zawk a ni. “Ludy chu a kal ta maw? Dam ai chuan thih kha atan a tha reng a ni.” a ti bawl mai. Nu Ramthari chu thip zet hian a en a. “Misual in chan chhia an chang lai ka hmuh hian keichuan ka khawngaih ve ngai lo_ An duhthlanna vanga tisual annih ngat phei chuan ka khawngaih ngai lo hulhual ang. Jade leh nang hian in tuar nasa ber_”
“Duhtawk rih phawt rawh.” Ka ti sap a. A ngaihdan chu a ngaihdan a ni a, mihring kan inan loh  ang bawkin kan duh dan pawh a inang lo. Tun hunah hi chuan a lainat loh thu sawi hun niin ka hrelo thung. Mihring sual pumhlum tawp an awm ngai lo tih hi ka vawn tlat thin thu a ni a, mihringah hian a chhia leh a tha a awm vek, a chhe lamin hnehna a chan chuan mihring hian a duh loh tawp thil a ti thei tih pawh ka hrechiang em em. Nu Ramthari pawh hian a duhthlanna a hman sual vangin hremna a tuar mek tih mitin kan hmu reng a, a hliam a chi phulsak kher a tulna ka hrelo.
.
“Ramngaihsang, i duh duh sawi rawh. Tawngkam chhe tinreng dawng ila ka thiltih kha nawhreh theih phah ila ka duh ve tak zet a sin..” a ti khur dat dat a. A chetphung atang chuan a taksa a chak tawk lo hlein ka ring.
Kan pathum chuan kan ngawi ta thap a.
.
“Ludy chu engtikah nge an vui liam dawn?”
“Ni hnih hnuah an vui liam ang.”
Nu Ramthari chuan a aw thian kharhin a insangmar a, “Apa nen an inhmu anih chuan engkim a hrilh vek tawh ang. Kei hian an thlarau pawh ka hmu ngam dawn em ni? Apa boral dawn khan a fanu kha duat taka enkawl turin ka intiam a, a duh lo chung sual titurin ka nawrlui ta zawk si. Ludy  hmel ka hmuh khan anu hmel ka hmuh tel thin avangin ka thik tawp thei lo va, ka tih ang tih pawh ka rin ngai loh sual rapthlak ber thlengin ka khawih phah ta a ni. Vawitam inlamlet pawh ka duh ve bawk_Mahse, inlamlet turin ka kal thui tawh em fahran a. Ka nun hman dan atang hian duhthlanna hman sual pawi zia miten hre mawlh teh se. Lungawina ka zawn dan khan mi dang chauh ni lo keimah ngei pawh min tichhe ta vek chu anih hi__ Remtluang, I nu chu_”
“In hun neih a zo a nia.” tih pahin kan bulah guard arawn ding a, Nu Ramthari chu a duh sawi zawhna hun pawh nei lovin an kai hrang ta nghal a.
“I nu hnenah khan ngaihdam ka dil mawlh mawlh e tih i han hrilh dawn nia aw.” arawn ti zui lawm lawm a.
.
Boruak rit ru zet chu kal sanin Jail kan chhuahsan a, Ramngaihsanga chuan sawi duh a ngah ngang mai.
.
“Hmanni khan Remruata ka hmu a, zawr tak a ni, zawr tak. Hmel hmuh tlak pawh a nei tawh lo. Ludy khan sum tam tak hnuchhiahin ka kalsan a, a sum thianghlim lo chuan a eiral vek anih saw. Amah i hmu leh tawh reng reng em?”
.
“Hmu miah lo. Min phatsanna vang khan ngaidam turin ka la inpeih rih lo.” tih chiahin ka chhang.
“Jade chu ka hmu chak hle mai.” tih pahin a nui suk a. Remruata chungchang chu sawi zawm chi ah a ngai biklo a niang. “Kimchanga hriat pawh ka phu ve tho iti lo maw?”
.
“A duh chuan aman a la hrilh dawn che nia. A unaupa neihchhun te chu hrilh duh awm tak a nia.” Ka ti liam mai a. A nui zui huk huk mai.
.
“I tuar tam zia ka ngaihtuah hian tunah chuan i phu ve thei tawh reng.” a ti leh hluk a. “A chungchang sawi takah chuan engtik nge helamah arawn chuan chhuah theih ang?”
.
“Engmah kan la sawi lo. Helai arawn thlen hun chuan ka nupui a ni fel vek tawh dawn tih lo hrelawk la.”
“Hmm.. Chiang sa. Lawk, nang hi ilo che lawk thawt thawt a ni lo maw?”
.
“Ka hlei vak lo.” ka ti liam puat a. Vaspi chungchang ah hi chuan ka nunah hian sex aia thil pawimawh a awm tih ka hrechiang em a ni. Sex hi chu nupa kan nih hnuah kan inhmangaihna tizualtu tur thil pawimawh tak erawh a ni ngei ang. Ka ngaihtuahna vang chuan ka nui suk.
“Tenawm tha ve maw! Aizawl ah hian nang aia hlei an tam lo khawp ang.”
.
“I ta ve tur zawng vat la a tha ang.”
“Ka hmu diam tawh.” Intihtheih hmel zet hian a hawi kual lui vel a. A hmel chu enin ka nui a, thian kan ni ta mai hi mak ka la ti fo dawn anih hi.
.
.
In ka thlen hnu chuan ka nu hnenah thil awmzia ka hrilh zung zung a, a pawimawh chin ka sawi zawh chuan inthlak turin in chung lamah ka chhoh san ta rih a. Vaspi chungchang ka hrilh khan mak ti awmin a awm miah lo. ‘I nungchang atangin ka hre vek alawm.’ ati fel then. Nu chu NU anni a, a sawi bakah hian hriatna hnar a nei ngei ang. Vaspi  nen pawh an lo inbe tawh hial mai thei. Zawh buai ka tum hran lo.
.
Ka inthlak fel hnu chuan ka pindan tukverh ah dak chhuakin chair-ah hahdam takin ka thu a. Kum hnih chhung zet Vaspi ngaihtuah chunga  ka ngaihthlak thin Jim Croce hla ‘Time In A Bottle ‘1973’ chu ka play leh ta nge nge. Ahmaa ka la ngaihthlak ngai loh dan leh ka duh lai lai inngaihbel a rilru hlim ru tak chungin ka ngaithla vang vang a. Hetiang hla hlim taka ngaithla thei awmchhun ka ni hial lo maw! Hlimna in min hmuak ve ta tih ngaihtuahin, ka hun neih_ka hma hun lo la awm tur hi ka hmangaih ber bulah ka hmang thei tawh ang. Ka thiltih duh hmasa ber leh hnuhnung ber chu Vaspi bula ka nun hman hi a ni. ‘Ka hmangaihna, ka thinlung  leh ka lungawina kawltu_ka lunghlu thami_!’ Nui sakin ka maimitchhing a, thlifim chuan ka hlimna min tawmpui niawm tak hian min chhem heuh heuh a.
.

EPILOGUE*
.
KUM LI HNUAH*
.
“Vawiin chu ka lo va haw hma deuh mai ang aw. Ka nu khan a awm a nawm chiah loh thu a sawi sia.” ka biangah min fawp zauhin min nuih seih a. Hetianga a nuih tawh chuan hnial a har thin. Ka nu’n a awm a nawm loh thu a sawi lai pawh ka lo hre ve lehpek lo.
.
“Kei pawh ka lo haw har lovang.”
.
Min chhuahsan lai chu ka en reng a. Kawngka a khar tawh zet hnuah lo dak lehin engmah sawi lo hian a nui ringawt a. A kut a rawn phar leh zauh hnu chuan a kal tak tak ta aniang, a reh zui ta vang vang mai. Lawm chawp ngai lova nui chungin ka hna ka thawk zawm mawlh mawlh a.
.
Ludy thih atanga thla 3 a ral hnuah kan inhmu thei chiah. Delhi ah amah hmuakin ka kal a, kan hmel kan inhmuh leh hmasak ber chuan engmah sawi lovin kan inkuah vawng vawng anih kha. Kha hun kha nimin ang mai nia ka hriat laiin kum a lo vei ta nual mai. Kan inneih champha phak kum 3-na pawh kar hmasa khan kan lawm a. Vaspi chuan lawm kher a ngaih loh thu a sawi nain lawm loha raltir ka phal lo bur thung. Tun hun thleng thei tur hian kan tuar nasa in buaina tam tak kan paltlang a, kan pahnih pual anih tawh phawt chuan engkim hi ‘thil bik’ a ni vek mai.
.
Ramngaihsanga min zawh zin ber pawh ‘Engtin nge khang thil zawng zawng hnuah khan awlsam leh reilote chhunga in inkar hi a that leh theih?’ tih hi a ni. A chhanna a thui hran lo. ‘Kan thil tih dikloh palh leh natna kan inthlensak te, a tha lo lai zawng zawng te kha hmangaihna, khawvela hmanraw chak leh thil  ti thei ber hian a awlsam takin a hneh mai a ni’ tih hi. Nula leh tlangval inhmangaihna ah chauh lo pawh mihring nunah hian mi zawng zawngin kan mamawh ber chu hmangaihna dik tho hi a ni. ‘Hmangaihna dik’ tih tawngkamin a ken tel tam zia hi sawisen a ni ngai dawn lo.
.
Tlai dar 4 a pel hret tihah office ka chhuahsan a, eng thil nge ka hriat ni tlereuh zawrhna dawra pen a lang tlat. Vaspi hian ‘Nau ka pai hma chu thilpek engmah min pe suh.’ a ti fo a, ka sim chuang hlei lova. Kan inneih atanga kum khat chhung kha chu ngaihthatlohna nei miah lovin kan awm mai a, kum khat leh a chanve a ral hnu khan Vaspi hian inentir a rawt ta a ni. Kei chuan hlauhthawnna ka nei miah lo thung. Diklohna kan nei lo ve ve a, a  hun takah Pathianin min pe ngei ang tih ka ring nghet hmiah a ni. Min pe ta lo anih pawhin kan tana tha zawk tur a la ni fan ang. Chunglam rorel a sual ngai lo ve.
.
Dawr atanga ka chhuah leh hnu chuan in lam ka pan ding nghal a. In ka thleng a, a lo reh deuh thiap mai. Ka nu chu a pindan ah a awm anih ka ring. Kan nupa pindan ka pan a, Vaspi zai rat rat ri ka hriat chuan thawm dim tak hian pindan ah chuan ka pen lut a.
.
A hnunglam atanga kuahin a biangah ka fawp a. ‘I phu miah nange?” ka tih chuan a nui hak hak a.
“Kawngka-a ilo pen luh khan ka lo inring sa vek alawm.” tih pahin a inher a, ka nghawngah min kuah a. “Ka kekawr ipte hnunglam hi zen teh_”
Hrethiam chiah lovin ka en hu a. A sawi ang chuan ka ti ta tho. A ipte atanga ka thil phawrh chu enin a hmel ka en leh a.
“A ni maw?” tih chiah ka sawi thei.
“Pa i ni ve tawh dawn anih chu.” ka hmuia  min fawh chuan pawm kang nawlhin khum ka pan pui a, khumah dimtea nghatin kan infawhna chu kan inthlah lo.
A sirah ka mu thla a, ka dim lutuk vang nge ka tim deuh dui mai. Ka awm dan chu hrethiam niawm tak hian inlet thakin ka chungah a thu a, a kut pahnih ka awmah a nghat bawk a. Eng thil nge kan hmabak kan hre ve ve!
.
“Ka hmangaih che” a kawngah ka vuan a, ani chu rawn kunin kan infawp leh rih a.
.
“A pawi thei angem?” atih chuan ka harhchhuak zawk. Naupai chungchang hi tlem azawng chu ka hre ve nain mahni tawn anih chiah chuan mithiam zawk rawn lova lo chet ngawt a ngamawm miah loh. Vaspi leh naute tan a pawi theih ka hlauthawng a ni mah zawk ang chu.
.
Internet-a mi chi hrang hrangin an tarlan te awlsam takin kan en thei reng naa, Doctor rawn ngei kan duh ta zawk. A zir ngei leh hrechiang hnena thurawn lak hi kan tih ngei tur pawh a ni.
Ni hnih chhung chu lehkhabu tha leh thil dang a tha tih ka hriat zawng zawng lakhawmin ka buai a ni ta ber. A vawikhatna anih vang nge ka hre lo va, engkim hi a phurawm surh vek mai. Ka nu’n nau kan pai ve ta tih a hriata a hlim zia leh a phur zia pawh sawi ngai lo ni zawk mai rawh se. Miin over tia min lo sawi anih pawhin pawi ka ti lo nasa. Ka nupui duhtak ka tana hlu em em, ka inchhuan ruk veng  veng theihna tura hmeichhe thianghlim a ni tih ka hriatchian duat em em hi ka dam chhunga ka nin theih ngai loh tur a ni hrim hrim bawk.
.
Hun a liam ve bek bek a, zanlaia eitur zawnga thawh leh pawnlama kan ei chak zawng va zawn lawp lawp a tul chang vawitam kan paltlang hnuah Pathian venhimna zarah liau liau fapa duhawm tak kan nei ve ta! ‘Pathianin malsawmna ropui kan chungah a thlentir a, a hria apiangin min lawmpui vangin a hmingah Vanlallawmpuia ni rawh se’ tiin ka nu’n uluk takin a hming a phuah ngat a ni.
.
.
THLA THUM HNUAH*
.
“Vawiin chu i lo kal pawh ka ring lo zawk a.” titu hun rei tak chhung ka secretary hna thawk tawh tu Ruatpuii chu enin ka nuih a.
“Nang pawh kan beisei che tih sawinawn a ngailo turah kan ngai a nia.”
“Ka inpeih sa thlap.” tiin a nui var var a.
Call pawimawh ka dawn vangin ka office-ah ka luhsan ta rih a. UDY-JA [LUDY-JADE] Company chungchang report tura min lo betu Mrs. Rita nen 10 minutes vel zet kan inbiak hnuah file pawimawh ti felin ka buai zui ta char char a. Dar 12 hmaa haw hman ka duh  vangin rilru a hmanhmawh khawp mai. UDY-JA hi Ludy khan Vaspi hnenah engkim a hlan let a, ralkhat atanga engkim enkawl theih anih loh vangin Mrs. Rita kutah hian thil pawimawh tam tak a awm lo thei ta lo a ni. Vaspi hian a ngaihven em em lo tih ka hriat vangin tha taka a kal zel theih nan  ka theihtawp ka chhuah bawk. Tunhma pha leh tur erawh chuan hun a la duh deuh ngei ang.
.
Ka tihtur chin ka zawh hnu chuan Office chhuah sanin in lam ka pan nghal a. Ka la sawi lovin ka hria. Vawiin hi  kan chhungkaw tan ni pawimawh tak a ni a, kan fapa thla thum a tlin ni niin mihringa chhiar theih alo nih ve tak vang hian kan tan lawm loh theih a ni lo.
.
In ka thleng a, an lo ri laih laih tawh. Naute chu ka nu’n pawmin chhuang tak hian a chanchin a lo sawi siam siam a. Vaspi ka hmu mai lo. In chungah a awm anih ringin ka chho thuai a.
Ka nupui chu darthlalang hmaah dingin a inen a, muangchanga pan hnaiin ka kuah a.
“I lo va thleng hma zawk ve. I lo thlen hmaa lo inpeih hman ka tum nen.” Darthlalang ah min enin a nui sak a. A kut la kanga ka fawh hnuah a darah ka khabe nghatin a rimtui chek chek chu ka hip vang vang a. Thil dang tihtur ka la nei.
Lo nghak lawk tura ka hrilh hnuah ka kuahna chu phelhin hun rei tak chhung ka dah that tawh box awmna ka pan a. Eng thil nge beisei tur hre chiah lo hmelpu hian nui sang chungin min en reng a. Box la chhuakin ka pan a, a hmaah box ka hawn chuan a a thaw hak.
.
“A mawi lutuk”
“Ka tana lunghlu tha ber leh ka fapa tana nu tha ber tan..” box chu la mai lovin ka nghawngah min kuah a, a insut hraih a.
.
“Ka tap miah lo a nia.” tih pahin a nui hak hak a, a mittui a tla tih ka chiang.  A hmel ka en duh vangin ka tawlh hlek a, box ka ken lohna lamin a biangah ka vuan a. Lungngaih vang ni lo, hlim vanga a mittui tla chu thil hmuh hreawm a ni hran lo.
.
“Kum 5 aia tam he thi hian a nghak tawh che. Ka tan lunghlu tha ber ai pawhin i hlu zawk tih mi zawng zawng hian hria se ka duh a, ka ta chauh i ni reng tih chhinchhiah nan che pawh a ni tel tho.” ka tawngkam thiam lo lutuk chu ka induhkhawp lo hle.
.
“Ka hmangaih che. Hmeichhe vannei ber ka ni. Ka hmangaih che_ I hria tiraw?” min kuah leh hnuah ka biang tawn tawnah a kutin min vuan a, lungawi takin kan infawp vawng vawng a.

.
KA STORY DAHNA FB. GROUP JOIN DUH TAN - 29-AUGUST STORY (THANTEI_LAURASEAN) A JOIN THEIH E.