COPAS 1 - 17

COPAS
CHAPTER - 1
Thantei_LauraSean
.
.
H & E
.
"Hello"
Phone a min lo chhangtu chu ka tan mikhual a ni lo. Ka mit ka chhing sawk a.
.
"Hi, keimah. I pu, Eleazer__ Abrahama chhiahhlawh rinawm ni lo zawk kha ka lo be thei angem?" ka tawngkam hman vang chuan kei pawh ka ner sawk. Engvanga hetiang tawngkam hmang kher hi nge maw ka nih le? Nuih te pawh a za dawn alawm.. 'Nui' tih thumal ka ngaihtuah rualin ka awm veilam arawn na nghal vawt vawt mai. 
.
"Min lo  nghak lawk rawh aw." a tichang fak a. Ka chhang lo. Rei nghah ngai lovin a rawn tawng leh thuai a.
.
"Sir chu a la buai laklawh a, nakin ah i lo be leh mai dawn em niang?"
.
Chhang lovin phone ka off a, thawk ka la hawk a. Hetiang hian maw ka nilen leh dawn? Ni love. Vawiin chuan ni tawh love.
Ka phone chu nghet zeta humin Eleazer number ka dial leh a. Engvang pawhin ka call hi min chhang tur a ni. Min chhang hram rawh tiin ka phun mawlh mawlh a.
.
"Umm.." Eleazer muangchang leh thatchhiat hmel deuha arawn tawng ri thum chhak ka hriat chuan ka hmui petin ka lungphu rang nghal zawih zawih chu ka dawm a. A hriat ngei tura sawi ka tum ka lo ngaihtuah lawk zawng zawng te kha boruak mai a ni. Ka thluak atang hian an per bo nghal vek. A fair thlawt lo. A aw ka hriat ringawt pawhin hetiang hian ka danglam a nia.
.
"I sawi duh chu sawi rawh." ka ngawih reng vanga nin hmel zet hian a rawn phun nghut a. A hmel awm dan tur ka mitthla a lo lang chu duh lovin ka lu ka thing nawk a. Tunah sawi mai rawh.
.
"Hmuh che ka duh." ka duhthusam angin ka aw chu a ring lo.
.
"Vawi engzat nge ka hrilh dawn che? Office-a ka awm laiin min lo be tawh suh."
.
"Eleazer!"
Eng thawm emawni ka hriat chu a lungawi lo thawm a ni ngei ang. Eleazer tia ka koh a duh ngai lo a, engvang nge pawh ka hre phiangsen lo. Ka hre lo, ka thin a rim.. Engvangin nge alakah hian ka zah viau lem ang le?
.
"Kan inbiak a tul tih i hriat kha." ka tichang ta fak a. Ka aw a inrintawkna lang chhuak vang chuan ka lawm em em a ni tawp.
.
"Engkim kan sawifel tawh kha."
.
"Tenawm lo mai teh. Tunah ka lo kal dawn."
.
"Vawikhat chauh chu ka thusawi hi ngai pawimawh ve la. I tawngkam uluk rawh."
.
"Ka lo kal nghal. Lo awm ang che." min chhan leh hmain phone ka off a, ka tha a khur nasa lutuk tih ka hre chiah. Ka awm dan hian awmzia ava nei lo chiang em.
.
Ni e, sawi dun tur kan nei tiin inrintawk hmel takin ka tawng a. Kei hian eng thil nge maw ka la beisei le. Engkim atir atangin chiang takin kan sawi vek tawh a. Kei hian chu thil chu ka duh khawp lo a ni. Dik tak chuan ka beisei loh thil thleng ta vang hian ka huang chin ka pel a ni. Chu chu kei leh Eleazer hian chiang takin kan hre ve ve a. Mah se, ka bansan mai thei tawh si lo anih hi.
.
Khumah ka thu hnawk a, tun maia ka thiltih kha thla thum liamta ah kha chuan ka la ti dawn tih ka hrelawk lo mai pawh ni lovin ka ngaihtuah lo hrim hrim. Mipa laka a tlawm zawk chan chang nih hi ka duh ngai lo a, a tlawm zawk nih ka tum ngai hek lo. Tuna a lan dan chuan tlawm zawk chu ka ni si.
.
Ka kal tak tak dawn nge dawn lo? Va kal ila eng thil tha mah a thleng chuang pawhin ka ring lo. Eleazer thusawi kha a dik a ni! He thil hi kan tawp hun a thleng tawh a, kan tihtawp angai. Ka ngaihtuahna hi a buai zo vek tawh a nih hi. A rinawm leh rinawm loh chu ka tan hian enge a pawimawh viau na awm chuang.
.
Tuna ka awm dan hi keimah ka ni lo! Uluk takin inngaihtuah rawh.
.
Khami zan khan lo kal chhuak miah lo ni ila tuna thil thleng tawh nawhreh theih ka duh em em te hi a thleng lovang. A bul berah chuan keima thiam loh a ni. Ka at vang chauh a thleng a ni bawk.
.
.
FLASHBACK*
.
Lehkha kan zirpui thin RS-I pasal neih zan a ni a, chhun lama hun nuam tak kan hman kha duhtawk mai lovin zanah inneih lawmna hun hran an siam ah kei leh Priscilla, Malsawma leh Apuii kan awm tlang a. Boruak pawh beisei lawk ang chiahin a nuam khawp mai. Pris-i leh Apuii chu an ngaihzawngte an awm tho vangin hmun dangah an kalsawn a, Malsawma pawh a duh ber Angaihi a zui leh duan duan tawh bawk a. Kei erawh 'tinge ka la awm ve zel le?" tih ngaihtuah chungin mi dang che vel chu ka en kual zauh zauh a, an zavai chuan 'lenlai chen' dik tak an ni. Hlim hun a nih angin an hlim em em vek.
.
"Hey, Hmingthansang, inla lonely mi?" min rawn titu chu ka theih tawp takmeuh a rum hian ka melh a. Robert hi chu engtik lai pawn a chimawm thiam. Ka zahna tur tawk tawngkam hmang tur hian a inpeih reng ni maiin ka hria. Nui hawk hawk chungin min rawn pan hnai a, eng eng emaw min zawt luam a. Ka duh chuan a rual a ka haw theih thu a sawi chuan ka lawm khawp mai. Ka thiante ho nen kan haw rual leh thei dawn lo tih ka hrechiang sa a, hetiang thenawm tlangval, ngeiawm riau leh tangkai tak si ka nei hi vanduaina nge  vanneihna pawh ka hre love a.
.
"Hmingte, biak lawk che ka va duh ve." ka bula hmeichhe lo ding chu ka en a, eng a that tawk loh vangin tunge tih ka hre mai thei lo. Chiang zawka ka hmuh hnu chuan nui sakin ka bu nghat a.
A ni hi Tabithi a ni a, ka thian tha ber Lawmsangzuali u a ni a. Alawmi chu nikum khan natlawk em em awm lovin a thi thut a, kan zavaiin kan tuar em em a, anu phei chu tun thleng  hian ala pangngai thei lo hial a ni.
.
"Eng thil nge ni ta?" tiin ka pan hnaia, Robert chu haw dawnah ka call ang tih ka hrilh hnu chuan Tabithi chu ka zui a. Ka rin loh lam daih hmuna ka zui luh chuan mak ka ti khawp mai. Min biak a duh chhan chu thil pawimawh tak anih ka ring bawk.
.
Pindan chhung chu ahmaa kan awmna ang lo takin a eng tha hle a, mipa pahnih thudun ka hmuh te chu thutak hmel tak hian an titi a. An tawng ring lem lo bawk a an aw mumalin kan hre pha lo a, anni pawh chu kan lut tih hre awm pawhin an awm lo.
.
"Hetah hian thu ang." a ti sep a. Sofa man to tih hriat ngawih ngawih hnum hlurh ah chuan ka thu kang at a. Tabithi hi chu ka hriat ve theih chinah hmeichhe nunmawi leh zawiawi tak a ni reng thin a, tunah pawh a la danglam chuang lo anih hmel hi.
.
"Min biak duh chhan chu eng thil nge a? A pawimawh hmel sia." ka juice in tur min pek paha ka bula a lo thut chuan ka lo tawng thuai a.
.
"Alawmi chungchang ah a nia." atih chuan rilru buai deuh takin ka en a. "Ah..thil chiang phei chu ala awm chuang lova, mah se, thil hriatchian duh ka nei a. Usawmzuala bulah pawh ka la sawi lo." tih pahin kan piaha mi pakhat nena titi a pasal chu a melh zauh a.
.
"Eng thil nge a?" tiin ka hnaih sauh sauh a.
.
"Bawihi, kan haw tawh mai dawn mi?" Usawmzuala, Tabithi pasal leh a titipui mipa te chu an thutna atanga tho chhuakin kan thutna an rawn pan a. A tukhhum chauh ka hmuh theih vang leh ka lo ngaihven em em loh vangin nichin khan ka lo enchiang miah lo a ni. Usawmzuala bula mipa chuan 'mipa sawifiahna' tia ka lo suangtuah thin hmel leh pian a nei anih chu! A mak lutuk! Ka ngaihtuahna mai mai a nia, a tak takah an awm ka ring ngai miah lo. Aw thian kharh ri ka hriat chuan ka phu zawk a, ka mit ka lasawn rang khawp mai. Hamhaih engreng takin Tabithi chu ka en a, min hrethiam niawm tak hian a ni chu a lo nui seih a. Ka zak chem chem..chem chem tih hian a sawifiah zo lo.

"A nih chuan Hmingte, ni dangah kan inhmu leh mai dawn nia. Ka lo bia ang che.." atih chuan he pindan a ka kal ve chhan ber kha kan la sawi lo tih ka hrechhuak leh chiah.
.
"Ah.. Aw, nia. Ka lo ngaichang reng ang che." ka ti bah nak a. U sawmzuala bula mipa chuan min en reng ni a ka hriat vangin ka tim deuh chawih chawih lehnghal. Ka melh ngam tawh lo hrim hrim. Nichin mai khan hmuhnawm tih hmel deuhin ka lo en reng anih kha.. Zahthlak lutuk.
.
"A ni hi Alawmi thiannu kha a ni em?" Usawmzuala chuan a rawn ti hluai a. A beisei lohna hmuna min hmuh vang anih ka ring mak min tih hmel emai.
.
"Aw ni e." ka lo ti thuai a.
"Kan rualin i lo haw ve dawn nge Eleazer hian a thlah theih che ka ring a." awmze nei zet hian a bula mipa chu a melh a. Thian tha tak an ni ang tih an inen dan atang pawh chuan a lang chiang khawp mai.
.
"A ngai lo ang. Haw pui tur ka nei a."ka chhang rang mah mah an tih ka ring hial.
"A harsa chuang lo a nia. I thianpa chu a rualin i haw dawn lo tih hrilh mai la."
.
"In thenawm pa kha mi?" nui sang chungin Tabithi chuan a lo ti ve bawk a.
.
"Aw ni e. A ngai lo tak tak. Ka tibuai mai mai che u." ka ti leh zung zung a. An thianpa thlah nih ka hlau nge an bula haw ka hlau pawh ka hrelo. Dik tak chuan hlauh chhan tur ka nei lo ve ve.
.
"Keiman ka lo thlah ang che." a aw nghet charh ka hriat chuan ka en chiang ngang mai. Engtin nge anih theih zawk?? A hmel leh a pian awm tak tak tur pawha ka rin ngai loh anih tawh bakah a aw leh zel pawh maw!
.
A boruak ah han hnial luih tung tung chi anih tak loh vangin an thianpa ruala haw tur chuan mo lawmna hmun kan chhuahsan a. Ka thiante ho pawh ka haw san tih message in ka hrilh a ka duh tawk mai. An tlaivar leh deuhthaw dawn tho a. Ka message pawh zingah an hmu chauh ang.
.
Tabithi leh Usawmzuala te an tlan chhuah hnu chuan kan tlan chhuak ve nghal a. Min thlah ka remti kha ka inchhir veng veng mai.
.
"Engtin_" kan tirual chawt a. "Sawi hmasa rawh." ka tih chuan ka rin loh deuhin a nui sak a. A hmel chu ka en leh thin. Ka awm dan danglam tlat hi ka hrethiam lo. Tuna ka awm dan hi ka thiante chuan min hmu se mittui tla phungin an nui ngei ngei ang. Ka chhungril ah chuan ka lai chhe let der a, pawn lam lan danah erawh inringtawk tak anga lan ka tum lui tang tang thung. Mipa bulah hetiang hian ka la awm ngai lo. Ka dik loh ni lovin ka bula mipa huhang na lutuk dik loh zawk hi a ni ngei bawk ang chu.
.
"I hming?" arawn hawi zawk a, ka lo en reng vangin ka hawisawn rang khawp mai. Min hmuh hman tho chu ka ring.
"Hriat kher angai hleinem, kan inhmu zui dawn chuang lova..." sawi zawm mai tur hre lovin ka riat nawi ta vel mai mai a. Ka sawi tum loh dan deuhin ka tawng chhuak anih kha. Ka awm dan chu a mawi lem lo khawp mai.
.
"Chhun lam atang daih tawh khan ka lo chik viau che tih sawi ila min hlau angem?"
A thusawi vang chuan makti zetin ka en a, a ni chuan kawng a en ngur thung a. Chhan mai dan tur ka hre lo.
.
"Ka hlau lo che anih ka ring, tunah pawh min thlah hi."
.
"Ka beisei ang chiah." a tih chuan a hmel ka en a, ka chhang tawh lo. A hmela a ngaihtuahna lang miah lo vang hian chhan mai dan tur ka hre lo a ni.
.
Kan in peng kan thlen chuan ding turin ka hrilh a, kawngkhar min hawn sak hun nghak lovin ka chhuk thuai a.
.
"Ka lawm e." ka tih chuan "Welcome" tih zawngin min chhang..
.
Inchhung ka lut a, a motor thawm ri vang vang a reh hnu chuan ka thaw huai huai a. 'Khawiah mah kan inhmuh tawh loh ka beisei' tih ngaihtuah chungin ka room ka pan a.
.
Muangchang lovin ka inbual fai zung zung a, khum ah hahdam taka ka mut hnu chuan message check tumin ka phone ka zawng a, ka hmu miah lo.
Mo lawmna hmun atanga kan chhuah dawn pawh khan ka thiante message ka thawn a. Anih chuan.. Khapa motor ah khan ka thlauh palh tihna a ni thei angem? A ni ngei ngei ang.
.
Zing ka thawh chuan ni a lo chhuak ut tawh. Nizan khan ka chauh deuh vangin alarm ka set duh lo lui reng reng bawk a. Ka rilru a thil lo awm leh hmasa ber chu ka phone a ni. Engtin nge ka lak let ang? Nizan a min thlahtu khan a motor ah ka thlauh tih a hre lo maithei. Hria ni se engtin emaw tal ka phone a contact no hmang khan min rawn be tur a nia.
.
Choka ah lutin fridge ka pan a, ka nu chuan ngawi rengin chiang zet hian min lo en reng a.
.
"Nizan ah i phone i thlauh a ni awm e. Nichin mai khan min lo bia a, vawiin ah pek che a tum thu a sawi a. Khawnge maw lehkha kha ka dah le.. Aw, fridge chungah khan a awm ang."
Ka nu chu chhang lovin fridge chunga lehkha them chu lain ka en a. Ka duh emaw duh lo emaw ka phone neih leh ka duh chuan ka hmuh ngei angai dawn a ni.
.
Chaw ei khamah muangchang in ka insiam a, saturday anih tho vangin bazar ah kal angai tho a, ka nu lei tur list ziah keng chungin ka kal chhuak a. Kal tura min tihna hmun ka thlen chuan dar 11 a la ri lo. Ka lo thlen hma zawk leh a lo thlen rualin ka phone chu ka la anga, ka kalsan nghal ang.
.
Restaurant chhung ka lut a, ka rin aiin mi an tlem. Ka duh ber dawhkan kil tuma ka kal chu ka hmingpum a min ko ri ka hriat vangin ka ding chawt a. A aw atang chuan midang an ni dawn lo tih ka hrechiang hle bawk.
Muangchanga inherin ka pan a, ka nui lui sak a. A ni erawh a hmel a thutak khawp mai. A lam pana ka kal chu chiang zet hian min lo en reng a. Ka hriat zawng chu he mihring bulah hian ka inthlahdul thei ngai dawn lo tih hi a ni.
.
"Hun i vawng dik hle mai."
.
"Khawnge ka phone chu."
.
"Inremsiamna nei phawt teh ang." atih chuan awih lo zetin ka nuih a, chik zet hian min lo la en reng thung. Eng thil  nge maw a duh le?
.
"Ka phone chu min pe la, hmun danga kalna tur ka nei a ka hmanhmawh angreng." ka ti chiam a. Dawhkanah chuan a kiu dinglam nghatin a khabe a tuai zauh a. A chetphung chuan movie a a changtupate chezia ka duh em em thin min hriatchhuah tir leh hmanhmawh bawk.
.
"Ka serious viau a nia. I tih theih ngei ka ring."
A thutak hmel tak tak. Kei hian hetiang mi hausa awmngaihna hre lo tan hian eng thil nge tihsak theih ka neih le?
.
"Lawmman pawh a tha ang." a ti leh nghut a.
.
"Lawmman chungchang chu ka hre lo zawk law law mai ang. Ka hmanhmawh a nia."
.
"Tak zet reuh che hian. Ka serious ka tih chu." a awki hniam leh lutuk chu a hlauhawm zawk. A hmel chu ka en ta reng a.
.
Ka ngaihtuahna ah thil chi hrang hrang a lo lut nghal zut zut a. He mipa hian eng hna thawk turin nge min duh ang? A bialnu lema chang turin maw? Ni lo nilo.. Kei aia nalh leh hmeltha a bialnu lem.. Hei chu ngaihtuah lo zawk ang. A lem kher pawh ngai lovin atan hmeichhia hmanrua tur an tam dawn lutuk. A nupui lema chang turin maw? Chu pawh a la ni thei chuang lo. Raldo turin maw?? Nuihzatthlak zawk.. Ka hmaa thu hi mihring pawh a ni chiah em? Thlaraute hi a lo ni reng zawk ange!
.
"Heihi chiang takin chhiar la i thiltih tur chu chiang takin i hre thei ang."
.
Ka hmaa a thil rawn dah chu enin phawk hra hian amah leh ka hmaa a thil rawn dah chu ka en tawn a. A hmel atang chuan a fiamthu lo tih a chiang em em bawk si. Kan bul vel chu ka melh kual a, hnathawk pahnih tih loh chu tumah an awm tawh lo.
.
Ka awmna hmun hi a him hauh lo mai.
.
"Eng thil pawh nise ka ti thei lo." ka tih chuan a thle nghut a. Ka lak atangin a mit a la lasawn lo. A duh a hlawhtlin hma chu chet sawn a tum dawn miah lo tih a mitmeng atang chuan ka hrethiam mai. Luhlul leh ngeng lutuk, duh dan ang anga midang hmang thei a lo ni thin pawh a ni mahna. Ka duhthusam thin mipa hmel leh leh pian nei pawh ni mahse tunah chuan ka tan mihring ve mai a ni. Chu zawng chu.
Ka hmel awm dan atangin ka ngaihtuahna a hre thei niawm tak hian
.
"I la chhiar miah hleinem. Nuam i ti ngei ang tih ka hria alawm." a ti leh nghut a.
.
"Tenawm lutuk!"
Ka insum thei lo. Ka thutna chair atang chuan ka tho phat a.
.
NOTE – Tih dan pangngaiin Sunday off a ni anga, week days-ah chuan ka theih tawkin rawn regular  ka tum ang. Min chhiar saka ka lawm e….
.


COPAS
CHAPTER - 2
Thantei_LauraSean
.
.
H & E
.

"I rin ang thil kha a nih ka ring lo. I tanpuina ka dil anih ber hi."
.
"Tanpuina dil hmel chu i put si loh kha." ka ti nghat a. A mizia hi midang hnena khawngaih dil ngai lo leh tanpuina dil ngai miah lo ni awm tak a ni. Amah tanpui turin min ngen a ni ber tiin a sawi ve bawk a, a hmelah chuan mi dang mamawh hmel a lang der si lo. Nuam ka ti viau ang tih kha a sawi a, engpawhnise nuam ti viau dawn pawh ni ila ka rilru ka sawh sawn lovang.
.
"Ka phone chu min pe rawh. Ka hmanhmawh tih ka sawi tawh kha."
.
Ka rilru sawh sawn  mai ka tum dawn lo tih hrethiam ta niawm tak hian a thu ngil a, ka phone chu min pek mai a tum chuang lo aniang. Min melh run a, ka thut leh hun a  nghak anih ka ring.
.
Ka phone chu a ni hian min pe lo mah se Tabithi hmangin ka la let leh thei thovang. Helaia ka awm ve reng chhan tur hi ka hre lo.
Kalsawn tumin ka pen a, thaw deuh hawk ri ka hriat chu Eleazer thaw ri a ni chiang mai!
.
"I thiannu thi tawh Alawmi chungchang a ni tih sawi ila enge a an ang?" a tawng ring lo, mah se, a thusawi chu ka hre chiang lutuk tlat. Nge, ka hre sual zawk. Tunhmaa ka hriat ngai pawh nilo mihring hian Alawmi chungchang ah eng thu nge hriat duh a neih? Ka thiannu kha hmeichhe fel tak a ni a, eng buaina ah mah a inhnamhnawih lo tih kei aia hrechiang an awm lovang.
.
Ka ding chawt a, ka banreka arawn vawn chuan a thutna bulah ka ding tih ka hre chiah.
"Eng maw i sawi?" a tawng ang chiah a zawiin ka chhang a, ka chhungril chu mak deuhin hlauhthawnnain a khat nghal vek bawk. Engtin nge Alawmi chungchang a nih daih theih ang? Nuam ka ti ang tihte kha a sawi a, he mihring hian thiantha hlut zia leh hriat theih chin atanga thlah miah lova inkawm char char, thuruk neih zawng zawng pawh inhrilh vek, thawklehkhata thiantha ber chan thut nat zia pawh a a hre tawp lovang.   
.
"I thiannu, Alawmi. I hriat hauh loh thil vanga thi ni ta se engtin nge i ngaih ang?"
.
Ka thu hriat chu makti lutukin Eleazer chu ka en a, a awm dan a danglam lo. Thu leh turin min duh tih lantir nan ahmaa ka thutna chair lamah chuan a thle nghut a. Alawmi chungchang a nih chuan hriat ka duh ngei ang. Eng thil nge ka hriat loh awm? Thil mak tak a ni.
.
Ka banrek a vawnna chu a thlah theih nan ka che a, min thlah ve mai bawk. Muang changin ka thu leh a, tunah tak hian ngaihtuah mai tur pawh ka hre lo.
.
"Alawmi chungchang thuah eng thu nge i hriat? Eng thil nge hriat loh ka neih?" alamah awn deuhin chiang zet hian a mitah ka en a, a ner suk a. Ka hmuh tirha ka ngaih dan leh tuna ka hmuh dan hi a dang vek tawh. Rin tur nge rin loh tur tih ka hre lova, ka hriat duh zawng chu Alawmi chungchang chauh a ni.
.
"I ngaihven leh hle sia. Eng chungchang ni turah nge i lo ngaih a?"
.
"Ka ngaih dan chu i hriat angai ka ti lo." ka tih chuan lungawi hmel zet hian min en a, a thut dan thlakin a hahdam hmel leh ta bawk.
.
"Tunah chuan lehkha kha chhiar phawt rawh."
.
Amah en tawh lovin ka hmaa lehkha chu ka la kang a, inziak tam zawk chuan ka tan tangkaina a nei hran lo. Alawmi chungchang pawh a inziak tam chuang lo. Engvanga min chhiar tir nge maw anih le?
.
"He lehkha hian tangkaina ava neih hmel si loh ve. Nuam ka ti hle ang tih kha engvanga sawi nge i nih?" eng tawngkam pawh hmang ila ka pawi sa lo. He mipa laka lan that tumna lah ka nei hek lo.
.
"Phek tawp ber kha chhiar rawh."
.
Ka lehkha ken chu ka let thawk a.
.
Ka chhiar zawh chuan ka ngaih dan hriat tum niawm tak hian min en a. Ka thil chhiar zawh chiahah chuan nuam tih nachhan tur pakhatmah a awm lo. 
.
"Thla khat chhungin maw?"
"I chhiar zo chiah alawm."
"Thla khat chhung i bula atam thei ang ber awm hi enge a tulna?"
"I la hre mai ang!"
.
Tuna ka buaina hi ka chungchang ni lovin Alawmi chungchang a ni a. Eng pawh thleng dawn se ka tih ngei angai dawn a ni. Thla khat chhungin hmu tura min duh thil hi ka hmu thei reng angem?
.
"I lawmman tur chu__"
.
"Lawmman chungchang chu hriat chakna ka nei lo chauh pawh a ni lo, ka thiantha ber chungchang anih vangin eng lawmman mah ka duh lovang." ka tih chuan a mit tizim deuhin chik zet hian min en a.
Tunah chuan a lan dan a danglam leh tawh. Pawh theih loh hmel a put mai bakah uluk taka ngaihtuahna hmang hmel a pu a, engvanga hetiang thila inrawlh nge anih pawh ka hrethiam pha chuang lo.
.
"Tikhan a zo tiraw? Khawi ka phone chu_" a nui suk a, a kekawr ipte atangin ka phone chu a phawrh a, eng thil nge atih ka rin thiam hmain a hmet zung zung a, dawhkana a phone dah a nghawr dar dar hnu chuan ka lak theih turin arawn lek chhuak a.
.
"Zanah ka lo bia ang che." atih chuan ka thutna atanga thovin ka kalsawn hman der tawh. Chhang tawh lovin restaurant atang chuan ka kal chhuak a. Thil rit takin min delh ang mai hian ka awm a nuam ta lo.
.
Thla khat chhungin eng thil nge thleng zel ang?
 Ka tih hmasak ber tur chu lehkha ah khan chiang takin a inziak a, thil harsa lutuk a ni lovang. Ka 
pan hmasak ber tur ka ngaihtuah chuan mak tihna in ka khat thar leh rih bawk. Hetih vang hi a ni 
ngei ang kei kher min tihtir chhan! Thawk la hakin ka inngaihtuah harh a.
.
Ka nu list a leitur awm ka lei zawh hnu chuan muangchang lovin ka haw a, ka tihtur khan ka rilru a 
luah ngut ngut vangin ka inbual zawh veleh thil dang ti tawh lovin khumah ka thu a, ka phone a 
contact number chu ka scroll pawp pawp a.
.
Rin aiin a pick up har zek mai. Saturday anih vangin thil dang daih a tih ka ring lo.
.
"Hello_"
Robert aw ka hriat chuan ka thaw huai.
"Hey.." ka ti hluai a.
"Eng thil nge ni teh tlat? Nizan khan thlahtu i nei tha hle nimaw? Lo hmutu che an awm tlat mai."
.
"Man chak ve. Hre ve lo mai rawh.." ka tih chuan a nui hawk hawk a.
.
"Chuti tur maw  ni ang.."
.
"Tak takin, ka lo biak chhan che chu movie hmuhnawm deuh i neih leh tawh ka ring a." hei bak 
chhuanlam tur ka hre lo. Ka thil duh ber nei thei tur chuan an in a ka kal mai angai dawn a ni.
.
"Nei tha lehpek e. I duh chuan i lo kal angai ang." ka duhthusam chiah a ni.
.
"Ka lo kal ang. Dar engzat nge ka lo kal dawn?"
.
"Tunah pawh i duh chuan i lo kal thei a. Tlaiah ka chhuak dawn a, ka chhuah hmain lo kal la."
.
Minute 15 aral hmain Robert-a room-ah ka awm der tawh. Ka rinhlelh angin eng thil mah danglam a awm 
lova, nidang ang bawkin a titi bawrh bawrh a. Nizana min thlahtu chungchang pawh min zawt zui chuang 
lo. Eleazer khan rinhlelh tur dik lo a ringhlel a ni  ngei ngei ang.
.
"Tikhan i duh lo la la, ka inbual san dawn che."
Zai rut rut chungin bathroom-ah min luh san a, ka duh zawng turin hun thawl ka nei ngei dawn e. Ka 
tha khur der der chu engvang nge ka hre lo. Hetiang thil ka la tih ngai miah loh vang pawh a ni 
mahna le.
.
Movie a dahna folder a mi chu enchiang lem lovin ka select pawp pawp a, ka pendrive-ah ka thawn a. 
Chumi chhung chuan a lo chhuah leh hmaa ka thil duh ber hmuh hman tumin file dang ka en kual nghal 
zung zung bawk a. Thianho thlalak leh chhungkaw thlalak te, mi pangngai laptop-a awm thin bak thil 
mak leh danglam deuh hmuh tur a awm lo.
.
"I thlalak ka en kual dawn a nia, i phal em?" tiin Robert chu ka au a, a phal thu arawn sawi chuan 
ka thaw huai. Thilsual lian tak ti angah ka inngaih loh phah thei bawk ang chu.
.
Ka en kual zel a, Eleazer khan engvanga Robert hi ringhlel  nge anih ang tih ka hre chak ta hle. Mi 
pangngai ve mai, ho ve tak leh nula lawm ve tak hian thuruk thalo tak a neih ka ring ta lo lehzual.
.
A lo awm mial takin tih thuah ka thiam ve chin zawng chu ka enkual a, file pakhat awlsam taka hmuh 
theih loh tura a dah ka hawn chuan ka phu chiang lutuk! Engtin nge anih theih??
.
Alawmi ngei a ni.. Ka thiantha ber khan ka bulah Robert chungchang hi vawikhatte pawh a sawiri ngai 
lova, chuti chung chuan hetiang thlalak hi an lo nei reng si a maw!!
Thlalak chu select in ka inthawn hnuah chiang zet hian ka ennawn leh a. Thlalak a an lan dan chuan 
an harhfim chiah lo a ang. An inkuah chial a, Alawmi hmel lan dan chu ka la hmuh ngai loh ang a ni. 
A hlim hmel a, Robert hmel a en dan chuan a hmangaih hmel hluah hluah bawk. Kei hian eng thil nge 
hriat loh ka lo neih le? Ka thian tan khan a thuruk zawng zawng a sawichhuah ngam lohna tur khawpa 
thian rintlak loh ka lo ni em ni? Ka rilru na ru vawng vawng vang chuan ka hmui ka pet fan fan a.
.
Ka hnunglama thawm ka hriat chuan ka phu deuh zawk. Robert chu ka bulah a lo ding reng tawh a. Ka 
thil lo en vang chuan a lawm tehchiam lo tih a hmelah a lang bawk.
.
"Kha kha engtin nge i haichhuah theih a. Ka hide vek sia."
.
"Ka hre vek tho alawm." ka tih chuan mak ti hmel a pu zawk nain a inthup leh thuai a.
.
"Alawmi khan kei nena kan inkawp hi i pawmpui a ring lova.." rilru nat hmel zet hian ka bulah arawn 
thu a, sawi leh mai tur hre lovin min en a a hmai a tuai puat a.
.
"Hmingte,Alawmi kha ka hmangaih asin. Mahse__"
.
"Mahse__enge?"
.
"Aa..sawi mah ila awmzia a awm tawh lo. I duh i la zo tawh em?" sawi zawm a duh lo tih tihlan nan thu dang daih min zawt tih ka hrethiam a, tunah chuan zawh zui vak tumna ka nei lo. Mak erawh ka ti thlawt a ni. Alawmi khan vawikhatmah Robert chungchang hi min hrilh lo. Alawmi thihna ka tuarnat tluk zetin ka laka thuzep a lo nei reng hian min tina nawn leh a ni tih hi phat buai pawh ka tum lo.
.
Robert hi ka ring nghal bur tur tihna pawh a ni chuang lo ang. Eleazer hnen atangin thu awmze mumal ka la hre lova, tanpui tura min tih angin tunah hian thlalak ka nei ta phawt chu a nia. Thu awmzia mumal taka ka hre phawt anih loh chuan Eleazer hnenah thlalak hi ka pe lo bawk ang. Uluk taka ngaihtuahna ka hman angai dawn ani.
.
Robert chhuak tur nen an in atangin kan chhuak rual a, ka ngaihtuah let neuh neuh hian Alawmi awm loh hnua Robert mizia danglam hi ka hrethiam ta deuh chauh. Tunhma pawh khan hmeichhia alawm ve a, amah a hmelthat em bakah hmeichhe tam zawkin an um thin sum a lo ngah ve leh zel nen, thla tin bialnu a thlak tiin kan sawi thin reng kha a nia. Naupan lai atanga inthenawm reng tawh kan nih vang hian inkawm tam em em lo mah ila kan inhrechiang thawkhat viauin ka hre thin. Ka ngaih dan hi alo dik miahlo thei tho bawk.
.
Kan kal hran hnu chuan kan in ah ka lut thuai a. Chhun lama Eleazer nen kan inhmuh khan zanah min lo biak a tum thuin min thlah a nih kha.   
.
Ka room-ah lutin laptop ka on a, ka pendrive a thlalak ka inthawn ruk ho chu uluk zetin ka ennawn leh a.
.
"Alawm, mak ka va'n ti tak! Engtin nge engmah min hrilh miah loh theih le? Tunah ka hriat ngai pawh ni lovin i thih dan chungchang ah rinhlelh neiin amah tanpui turin min sawm a. Nge? Eleazer nen hian in lo hre daih tawh zawk? Ka hriat tura duh i nei em? Min hrilh rawh.." Alawmi thlalak en chungin ka phun mawlh mawlh a, thil thleng mek hi sawi fiah mai theih lohkhawpin mak ka ti em a ni e.
.
Ka phone rik lai ka hre miah lova, der zat en tuma ka phone ka on chuan 3 missed call a lo awm reng a. A number chu ka save loh vangin Eleazer ni turah ka ngai ngawt bawk. Call let tumna erawh ka nei chuang lo. Kei hian thil awmzia hrechiang turin ka mamawh let tawh zawk tih ka hre tho nain biak hmasak kher chu ka tum chuang der lo. Heihi chu ka rule ve pakhat a nia.. Mipa duh ruk deuh ka neih ka be hmasa ngai lo! Oh!! Ni leh lo.. Eleazer hi ka duh ru pawh ani chuang lova, han duh ringawt nachhan tur ka nei lo hrim hrim bawk. Amah anih vang hrim hrimin ka be hmasa lovang.
.
Ka phone arawn nghawr leh dar dar chuan nghak deuh hlekin  ka pick up a.
.
"Eng thil nge i tih? Nidangah chuan call nawn ngaiin awm tawh suh." thinrim hmel pawhin a tawng chuang lo. Mipa mak ve tak chu anih hi.
.
"Eng thil nge? Ka phone hi ka en reng hman lo tih lo hrelawk tawh rawh." ka tih chuan a nui huk a, engvanga nui nge anih ka hre lova, hriat pawh tul ka ti hran lo.
.
"Zan dar 8 ah ka lo hruai ang che. Kalna tur kan nei. Pangngai takin lo inchei ang che,"
.
"Pangngai chu enge?"
.
A reh deuh vang vang a.
"Hello_"
"Hmun pakhat ah ka hruai dawn che a, i zah lohna turin inchei ang che."
.
Engti pawhin inchei ila enge zahna tur awm. A bulah hmeichhe inchei nalh vak lo leh atana zahpuiawm tur khawpa inchei nalhlo an awm a duh lo tih a sawi tumna ah ka ngai.
.
"Chu chu ka thu ni rawh se." ka ti hmak a.
"A tha e."
Ka chhanna nghak tawh lovin phone a off a. Thil dang ngaihtuahna hun awm tawh lovin ka nu'n chaw kan ei dawn tiin min rawn au a, ka chaw ei a tui leh tui loh pawh ka hre lo. Nizan atanga thil thleng chi hrang hrang mak ka tih ruk leh hriatchian chak ka neihte chu ka ngaihtuah nauh nauh a.
.
Chaw eina ka tihfel hnu chuan muangchang lem lovin ka room-ah ka chho a, Eleazer min hrilh angin chhuak turin ka insiam a. Ka nu hnenah khan ka thiante damlo kan tur an awm thu ka sawi ta mai anih kha. Zanah ka chhuak ngai lem lova min ring ve mai bawk a.
.
Ka thawmhnaw bawm atangin jeans pawl duk ka phawrh a, t-shirt ka hak leh hnuah sneakers ka bun a, a vawh palh takin tih thuah jacket ka keng bawk a.
.
Ka phone a rik leh chuan 7:50 chiah a ni. In atangin ka chhuak a, kan in piah deuh a Eleazer motor lo ding lam chu ka pan a. Car chhunga ka luh hnu chuan tlanchhuak nghal mai lovin ka inchei dan chu min en a, min nuihzat dawn emaw ka tih laiin engmah a sawi lo teh tlat.
.
Ngawi rengin a tlanchhuak a, keipawh ka tawng bik lo. Minute 30 vel kan tlan hnuah in lian zet kawt ah kan ding a. Tun tum chu kawngkhar min hawnsak hun ka nghak ve ta tlap. Kan kalna tur in chu pawn lam atang pawhin a lan dan a ropui sa a, ka incheina vang hian ka zah loh ka beisei.
.
Inchhung kan luh chuan engahmah ngaih loh tum viau mah ila ka incheina vang chuan ka awm lohna tur hmunah ka awm niin ka inngai nghal. Ka inngai mai pawh a ni lo, hmeichhe awm ve dang te chuan min en hrek hrek a, kawr tawi te te leh chhing zet zet, tle zir zer nalh tak taka inchei zingah exercise la tur niawm taka inchei chu a zialo ve deuh chu a ni. Min en hrek hrek pawh chu a awm viau mai.
.
"Rinmuan, zanin chu ava mak teh tlat ve!" kan awmna lam pana hmeichhe lo kal chu a nalh lutuk mah mah a ni. A hmai a chei dan leh a thawmhnaw hak zawng zawng nen a lang dik thlap mai.
.
Eleazer chuan a chhang mai dawn emaw ka tia, chhang ta mai lo chuan min rawn en leh zet a. A hmel lan dan chu ka hrethiam lo.
Min rawn dinhnaihin ka kutah nghet zet hian min kai a. A chet dan chuan min thanwg khawp mai.
.
Kan awm dan a hmuh chuan hmeichhia chuan "Helamah lo kal ru. Nangmahni chiah kan nghak tawh che u." hlim hmel taka nui lui sang chungin a ti leh ta zawk a. A mita min melh dan erawh chuan ka inchei dan chu min pawmpui lo hle tih a tilang chiang khawp mai. Eleazer awm dan atang chuan ama tan ni lo keima tan inchei turin min hrilhlawk a ni tih ka hrethiam ta chiah bawk. Min zahpui emaw, ka bula awm duh lo hmel a pu lova, a awmdan ngaiin a cool ruih reng tho a.
.
Hmeichhe kalna lamah chuan min kai phei a, ka jacjet a vawh takin tih thua ka ken chu ka mamawh lo chiang teh e. Ka thlan ru bawrh bawrh mai.
.
"Khawi, kha kha.." ka jacket chu arawn ban a, ka pek hmain min laksak a, min kensak ta daih a. Min tanpui ah a inngai mai thei a, ka zak, nilo, ka inthiam lo zual sauh thung. Pangngai takin lo inchei ve mai ila tha tur.
.
"I va tlai ve a." an lo thu khawm thap a, an zavai mai chuan mi hausa tak anni vek ang tih a hriat theih. Ka duh emaw duh lo emaw chu chu ka rilrua thil lo lang hmasa ber a ni. Mihring reng reng an incheina atangin ka teh ngai miah lo tiin sawi ila dawt tlem ka sawi a ni ang. Incheina atang hian mihring dinhmun thenkhat chu a lang thin ngei alawm, a zawng zawng erawh a ni lo. Chet dan leh nungchang hian a tilang chiang zawk thin.
.
Mipa pakhat hi a thutna atangin arawn tho a, Eleazer chu arawn kuah thawk a. Zawhna a khat mitmeng hian min en zauh hnuah Eleazer chu a en leh a. 'A ni tak tak em?' tih a zawt nimai hian ka lo hria. Eng thil ber nge 'a ni tak tak em' tia a zawh tur thil chu ka hre chuang lo. Ka ngaihtuahna ka hmang nasa lutuk mah mah a niang. Mumalin ka awm thei lo.
.
"A ni em? Thiana??" tiin chupa chuan min melh leh a.
.
"Hei, in hmu reng alawm." tih pahin Eleazer chuan mak zet hian min melh vang vang a, ka lo mur sung sung thung. Ka  hlauh vang nge a mitmeng landan mak deuh vanga mur sung sung ka nih ka thiar hrang thiam lo.
.
"Mawizuala ka nia, in chibai ila." nelawm taka min nuih chungin a kut arawn phar chhuak a, ka lo chibai ve thuai a. Ka nui lui hleithei lo chu a ni e.
.
"I hrilhlawk miah lo tih ka hre mai." tih pahin Mawizuala chuan Eleazer chu a nek zauh a. Usawmzuala(Tabithi pasal) khan Eleazer tiin a ko a, a thian dangte hian Rinmuan tiin an ko thung a. Inkoh dan ringawt ah chuan danglamna a awm lem lo ah ngai ang.
.
Hmeichhe lo awm ve te chuan min biak pawh tum chuang lovin makti hmel pu hian Eleazer chu an en thap a.
.
"Thiana, i nemngheh ngei chu angai ang__" mipa dang rawn tawng chhuak chu  phawk zet hian ka en a, midang ho pawh chuan thawm nei hakin an en bawk a, an awm dan hi ka hrethiam lo. Hmeichhe ho chu phun ser serin an nui a, Eleazer nen chuan engtin nge kan awm dawn tih ngaichangin min en ta thap a.
.
Eleazer chuan ka kut a vawnna chu thlahin ka kawngah nghet zet hian min kuah a, ka inring hman lo. A lamah min pawt hnaiin ka hmuiah min fawp a. Min thlah mai dawn emaw ka tia, min fawp duhthawh telh telh lehnghal!! 
.
COPAS
CHAPTER – 3
Thantei_LauraSean
.
H & E
"A van tha em! A chiang e.." kut beng ri ka hriat chuan ka inla hrang rang lutuk tak zet. Engvanga min fawp ringawt nge anih! Thip zetin Eleazer chu ka en a, 'engahmah ngai suh' ti niawm tak hian a thle nghut a, ka inseh ruh ngawt ngawt thung. Ka inthunun zo dawn lovin ka hria.
.
Ka awm dan chu hrethiam niawm tak hian minkuah  bet leh vang vang a. Tal chhuah pawh ka tum buai ta lo. Tuna ka ngaihtuah ang hian ka talbuai anih chuan kan pahnih hian min nuihzat zual ngei ang. Eleazer tan ni lo, ka tan, mi nuihzat lehzual ka nih loh nan ka inthunun hram hram ang. Khawiah nge ka awm tih leh tuten nge min hmu tih ka ngaihtuah duh lo. Tun mai a thil thleng kha awmze nei lovin rak pui chiam pawh ni ila a nih tur ang a ni vek tawh. Eleazer chuan muangchangin min kuahna chu a phelh a, a inlakhran rualin ka biang sa vut vut chu ka kutin ka khawih ta ringawt a.
.
Thil awm dan hi ka hrethiam ta lo. Eleazer hian Alawmi chungchang a thu hriat duh a neih vang chauh a ka tanpuina dil a ni hauh lo mai.
.
"Hetah hian lo thurawh. Kan inhriatchian te pawh angai ve ang chu." kan thlen hlima hmeichhia khan a bula thutna awl awm chu a beng thak thak a. Eng tiang a awm tur nge ka hriat mai loh vangin Eleazer chu ka en a, a ngaihtuahna tilang miah lo hian min lo en vung vung ringawt a. Dik taka sawi chuan ka hamhaih zo vek a, ka thina rim ru teuh bawk. He mihring hian a duh dan ang anga min tikual emaw hmanruaa min hmang mai mai turin ka lakah eng thuneihna mah a nei lo. Mai mai hian!
Ka laka thuneihna nei lo tu tia ka ngaihtuah hian tun mai khan ka chungah a thuneihna a lantir zo chiah alawm le.. Mi dang hmuh lai lehnghal in! Tun kha a vawikhatna leh a tawpna ni nghal rawh se!
.
Ka kawnga min kuahna chu ka phelh a, a bula thu tura min betu lamah chuan ka kalsan a. Tawng mai tur pawhin ka la hamhaih lutuk a, ka aw a ri chhuak thei chuang pawhin ka ring lo.
.
"Rinmuan, engtin nge in intawn reng reng a?" Kawr dum tawngchham angreng tak ha hmeichhia chu min melh rawlh rawlh pahin a nui sawng a.
.
"Chutiang inzawhna hun a ni lo. Loretta, lo  ngawi mai mai rawh!" ka  bula thu chuan a tichang fak a. Nelawm taka nui chungin min en a, min chibai tumin a kut arawn phar chhuak a. "Zorini ka nia. I duh leh Zori tiin min ko dawn nia. Chuan anni hi.." lo awm ve ho chu an hming a sawi diat diat a, pariat chauh an awm nain an hming pawh ka chhinchhiah nghal vek thei chuang lo. Mawizuala leh Zori, Loretta,Masangi, Tetei, mipa te! an zavai chuan pangngai takin thil mak thleng awm lo ang mai hian an titi zui a.
.
"Hmeichhe dang  ngaihtuah chuan i danglam hle mai. Rinmuana hi i buaipui ve chung lo anih hmel.." Zori chu enin ka nui mai a. Eleazer nen hian kan inngaizawng lo mai pawh a ni lo, induh tawnna kan nei lo hrim hrim. Mahse Zori bula sawi hian awmzia a nei dawn chuang lo. Kan inzui chhan hi sawi ka tum lo hrim hrim bawk. Engvangin nge ka hmelhriat ngai pawh ni lo bulah ka insawifiah ngawt ang ni.
.

"Muffin, lo kal lawk."
.
Zori chu ka en a, a ni chuan ka hnunglam en zauhin a nui sang a.
"Muffin!"
.
"Ko duat vel maw!" tiin Zori chu a nui hak hak a, ka hnunglama Eleazer ding ka hmuh rual leh min rawn en tih ka hriat chuan Muffin tia a koh chu keimah ka ni tih ka hre chiah. He mihring hian eng thil nge a hriat a?? Ka ngaih dan a pel tawh tak zet. Engvanga a thiante zinga engkim sawi mai lo hi nge ka nih ka inhre lova, kan inngaihzawn loh thu sawi chiam ila anni ho hian an awih dawn chuanga ka rin loh vang a ni mahna. Chu lo rengah hmelhriat ngai loh bula insawi thiam chiam emaw thil nih dan sawi vak pawh a tangkai chuang hek lo. Ka lawm lohna chhan chu anni ho vang hi ni lovin Eleazer vang chauh hi a ni. Engvanga infawh tir nge ka nih pawh ka hre hrep lo. Ni lo, ka infawhtir reng reng lo.. Ka duh vanga thleng pawh a ni lo.
.
"Lo kal lawk la." arawn tih leh takah chuan engmah sawi lovin ka thutna ka thawhsan a, Eleazer chu ka zui a.
Pindana ka zui luh rualin ka ham bawrh bawrh lo chauh a ni. "Eng thil nge itih hi? I ngaihzawng ka ni lova, ka ni ngai bawk lovang. Nang hian eng thil nge i hriat?" rum zeta melhin ka hmachhawn a, a kut pahniha a kekawr ipte zen chungin inthiam lohna nei miah lo hmel pu hian min en a. Chu chuan ka thinrimna a tizual sauh bawk.
.
"Engvanga min fawp ringawt nge i nih?"
.
"Chu chu tuna inhnialna tur chhan a tling lo. Heta kan kal chhan hi i hriat duh ka ring a.."
.
"Duh lo! Engvanga i ngaihzawng anga min lantir nge i nih? I inngaisang viau pawh a ni thei, keichuan ka ngaisang lo che.. Ka lawm lo tak zet tih hre rawh__" min fawh ringawt vang pawh khan thinrim tak ka ni. Ka ngaihzawng pawh ni lo mipa hian min fawp ringawt ngam turin dikna a nei lo.
.
Che chang lovin ngawi reng hian min en ngur a, a awm dan hian ka thin a tirim lutuk.
.
"Ladybug tiin ko che ila a that zawk ka ring."
.
"I duh dan dana i koh tur pawh ka ni lo. Engvanga i bulhnaia awm nge maw ka nih le.. I thiante hmaa min fawp ngam tur khan mitmei ka hmuh reng reng che em?" ka ti chiam a.  Ka inthununna ka hloh chiang khawp mai. Tun hi hetianga ka awmna hmasa ber a ni. He mipa phiangsen vang hi a ni bawk.
.
"Min hnial hauh loh kha."
.
Thinrim zeta melhin ka chek tlak tlak a. Nasa min ti mah se pawi ka ti lo khawp mai. He mihring pui tura ka rilru ka lo siam ringawt kha ka tisual let der anih hi. Alawmi vang ni lo se ka ti hauh lo tur hi a nia.
.
"Tunah ka haw duh. I thiante zinga i hmeichhe kawp pakhat anga lan pawh hi ka duh lo.. Nangni ho nawmchenna hmanrua tur pawh hi ka ni lo!__ Bakah__"
.
"Duhtawk tawh rawh. I buaina leh kan thiltih tura ruahmanna ka neih hian inzawmna a nei lo." a ti nghut a. Ka buaina leh a ruahmanna maw?? Midang hmuh laia min fawp ringawt kha ka tan zahawm lohna lian tak a ni tih a hre miah lo maw?
.
"Ngawi hmak rawh. Engvanga helai hmuna min hruai hi nge inih? I duh duh hmeichhia i hruai kual thei tih lantir nan maw? - Ka thiantha ber vang chauha tanpui tum che ka ni tih hre rawh. Nang hian.." .
Min rawn kuah bet nawk a.
.
"Shh..hahdam rawh." hneh zeta min kuah betin a kut lian thlurh chuan ka hnungzang a zut hauh hauh a, ka hahdam phah lo nasa. Ka taksa min khawih tur hian ka duh lo. Ka tal ve tak nain awmzia a awm tam lo khawp mai. Min thlah mai a tum hmel loh hle lehnghal.

"Min thlah rawh."
.
"Hahdam phawt rawh." awki hniam ruiha tawngin arawn kun hniam deuh a, ka nghawngah a thaw lum ham ham ka hriat chuan ka duh reng vang pawh ni lovin ka ding ngil at a. Ka taksa zawi muanga inthlahdul chu ka hrereng mai. A ni lo zawnga ka ngaihtuahna peng tur chu duh lovin ka hmui hnuailam ka pet fan fan a.
.
Ka tal tak loh hnu chuan zawi muanga min kuahna chu thlahin ka dar tawn tawn ah min vuan a, chiang taka a hmel ka hmuh theih nan ka hmai zawnah arawn kun hniam deuh a. A hmel lan dan chu thil eng emaw ti lo tura insum a ang. Eng thila insum nge anih phei chu ka ngaihtuah thiam der lova. Alaka ka lungawilohna chu a la reh lo tih ka hmelah a hre ngei a niang, ka hmel min en chuan a mit chhing zawkin a thaw halh a.
.
"Heihi ka duh dan a ni bik lo. Anni hohi an lo awm dawn tih ka hrelawk bik lova. Chuan, kan awm chhung reilote chu engtiang pawn awm ila i lo tuar hram hram dawn nia."
A thusawi chu hrethiam lo zetin ka ner nang a.
.
"Eng thil nge hriatthiam tur awm? Helai hmun atang hian chhuah ka duh."
.
"Chu chu ala theih loh__"
.
"Rinmuan in rei, lo chhuak tawh ru.." hmeichhe pakhat a lo au lauh lauh a.
.
"Ka sawi ang chuan awm ang che. I theih phei chuan min duh tak angin lang thei la ka ti khawp mai."
.
"I mumangah pawh a thleng lovang." ka tih chuan ri lovin a nui suk a, a nuih dan chu ka lawm lem lo khawp mai. Thil tha lo a keng tel tlatin ka hria..
.
"I tih duh loh chuan keiman ka tithei alawm. Kal ang le. Nui la.." ka dara min vawnna chu thlahin ka kawngah min kuah a, pindan atanga kan chhuah thleng chuan ka hmel min en a, alama min kuah hnai leh sauhin ka chalah min rawn fawp zauh a. He mihring awmdan hi ka man pha hlawl lo mai.
.
"Eng thil nge in va tih a?" kawr dum ha nu bawk khan Eleazer nen chuan chik zetin min entawn zak zak a, a lawm lo hmel chu a thup thei ngang lo a nih hmel.
.
"Loretta, i tih ngai loh dan a nih bik loh kha.. Ni lawm ni Rinmuan?" mipa pakhat a hming ka hriat leh tawh loh chu a rawn tawng zauh a. A ni pawh chuan lawm hmel a pu chuang lo. Chu pa sawi hmang chuan Loretta leh Eleazer hi...
.
"Ngawi mai mai teh u. Hei, in tur a awm tawh a nia. Zanin chauh chu kan hlim viau ang chu. Kan zavaia kan inhmuhkhawm lohna chin pawh a rei tawh alawm.." Zori chu intur chawi chungin kan thutkhawmna pindan ah chuan a lo lut a. Eleazer erawh chuan hmun dang en lovin min en reng a, chu chuan ka awm a tinuam lo zo vek. Induh hmel taka lang turin min en char char tur a ni tih dan hi eng lehkhabu ah mah a inziak lovang! A thiante pawh chu an awm dan a danglam tam tehchiam chuang lo, a rukin min thlithlai reng tih ka hria. An zingah hian boruak dik tawk lo chu a awm ngei a nih hmel hi.
.
Eleazer chuan min thuthnaih sauh sauhin ka hnunglamah a ban dinglam a dah a, sakeibakneiin a sa eitur a veng tlat hi ka ang riauin ka hre pek.
.
"Rinmuan, tunlai in sumdawnna dinhmun a tha zel em? Hmanni thil thleng kha ka lo hria a." titu chu helai kan thlen atanga a vawikhat tawngna a niin ka hria. Eleazer chuan muangchangin a en a.
.
"Tha e. Thil chinfel har vak a ni lo hlauh a. Nangni lam in tha zel maw?" a tih chuan zawhna zawttu pa chu za vak lo hian a then sak a.
.
"Tha piah lam a ni." intur banin a in a, sawi leh mai tur a hre tawh lo a niang kan zavaiin kan ngawi ta thap a.
.
An zavai hian inkawm thin ang chuan an lang naa, an inkar a tha hlawm tehchiam lo a niang. Ka thiante nen kan inhmuhkhawm a kan awm thin dan nen ka tehkhin lo thei lova a inthlau lutuk. Inpawh taka titi bawrh bawrh pawh a awm lo.
.
Zori te in atanga kan chhuah chuan ka thaw deuh huai mai. Eleazer car kawngkhar min hawnsak ah chuan ka lut thuai a, a ni pawh muangchang lovin driver seat ah arawn thu luta kan tlanchhuak chu a ni nghal deuh mai.
.
"Thian ho niawm tak chuan in lang a, in inpawh hmel vak si lo anih kha.." ka tih chuan min melh zawk duh chauh. A ngawi vung vung a, keipawh sawitur ka hre bik chuang lo.
.
Kan in kawt kan thlen chuan car a tiding a, chhuk tumin car kawngkhar ka hawng a ka banrek a min rawn vawn chuan zawhna zawt mitmeng a enin ka thu tha leh rih a.
.
"Ka lawm e."
.
"Enge?"
"Min hnial buai loh vang khan. Ka tan a pawimawh zia min hriatthiam pui phak lovang." a hmel thutak dan atang chuan a rilru tak tak a sawi ngei niin ka  hria.
.
"Um, hrethiam hauh lo mai."
.
"Naktuk ah engkim ka hrilhfiah ang che." atih chuan ka lo nui hak a. Hmuh leh tumna ka nei tawh reng reng hleinem. A ni hian hmanruaah min hmang mai mai tih ka rilruin ka nemnghet hmiah a, Alawmi chungchang kha chu engpawhnise, Eleazer bul hnaihah hian ka awm duh tawh lo. Kan pahnih tan hian nidang awm leh turin ka duh tawh lo tihna anih chu. Ka tan hian a him dawn lo tlata hriatna ka nei thar thut a ni.
.
"I bula awm tumna ka nei tawh lo. Zanin kha chu tikhan liam rawh se."
.
"Alawmi thihna a thil dik lo awm hriatchhuah ngei i duh chuan i awm angai ngei ang. I tihtur kha i lo theihnghilh ange." tunah chuan a hmel lan dan a dang leh daih tawh. Engvanga Alawmi chungchang hi buaipui nge anih ka hriat ve angai.
.
"Alawmi hi i hrechiang pawh a ni lova, engvanga a chungchang hi buaipui nge inih? Thil tha lo tak inthup a awm in ka hria."
.
"Thil thalo chu enge anih kan hrechhuak dawn reng alawm."
.
"Tinge nang kher hian i buaipui. Kei kher lo pawh hi nangmah pui turin i sawm thei bawk a."'
.
"Chhan leh  vang tha  tak ka nei ang tih ring mai rawh. Tunah chuan engkim i hriat vek loh hi a tha zawk."
.
"Anih chuan ka pui dawn lo che tihna a nih chu."
.
"Min hnial buai reng lo hian i theih ang ang chu lo ti tawp mai rawh."
.
"Ka ti vek tawh maithei asin!" ka va han mawl tak. Sawi loh tur ka sawi tih inhrechhuak in ka ngawi chat a.
.
"I thiltih tawh chu ka hnena thlen nghal tur i ni tih i theihnghilh loh ka beisei."
.
"Eng thil nge itih chuan ang?"
.
"Tuna a buaithlak zawnga awm khan awmzia a nei tawh lo. Ka ruahmanna thenkhat i hre tawh a,  i duh emaw duh lo emaw ka ruala i kal zel angai tawh ang. Chuan i hnathawh tawh chu tunah khan i kawl tih ka hria a, tunah hian min pe rawh." a kut a rawn phar chhuak a, a hmel lan dan chu ka lo en ngar thung a. Eng emaw tal ka hre ve phawt anih loh chuan ka pe dawn lo chiang lutuk tih hi sawichhuah kher pawh ngai ka ti lo.
.
"I luhlulna hi thil tam takah chuan a tangkai dawn a, tunah tak chuan a tangkai lo. Robert nen hian an lo inkawp ngei tih chianna a awm chuan kawng chanve kan thleng a ni mai." thutak zet hian min melh run a.
.
.
Tuna fiahna tur ka neih hi Eleazer hnena ka pek hma leh ka fihlim hma a ni mai, chu bakah Alawmi tan thudik ka hailang thuai thei bawk ang.
.
Ka rilru thlakin ka bag ken chu ka hai rak rak a. Pendrive kha ka bag ah hian ka dah ngei sia.
.
"Light hi on teh."
Light chu a on vat a, ka jacket lain ka malchungah ka pharh a, ka bag a ka thil ah zawng zawng chu ka bun chhuak a. Pendrive chu a awm chuang lo. A mak hle mai!
.
"Enge i zawn?"
.
"Pendrive kha ka bag ah hian ka dah ngei sia."
.
Chik zet hian min en a, min ring lo emaw ni le?
.
"Min ring mai rawh. Nang angin dawt ka ngaina ve lo." ka tih chuan a rum nghat a.
.
"Engtin nge anih theih a. Tlaiah khan Robert te in ah kalin thlalak chu ka la ngei alawm."
.
"Pendrive chu a bo tih sawi suh." a bo anih chuan kei hian a ni aiin pawi ka ti ang. Robert hnenah chhuanlam dang siam a lak leh tum chi a ni tawh lo.
.
"Ka sawi kher ngai lovin ka bag ah a awm lo anih hi."
.
Pawi tih hmel zet hian a kut chuan car steering wheel chu a chum dat a.
.
"Aman thlalak chu i la tih a hria em? Ni lo!!"
.
Thil hriatchhuah nei ni awm tak hian a mit a chhing sawk a.
.
"Robert awm danah engmah danglamna a awm lo. Bakah Robert hian Alawmi chu a hmangaih tih min hrilh alawm."
.
"A thusawi chu i lo ring nghal ringawt amaw? Zorini te in ah khan..room-a ka koh luh che khan i bag hi i kalsan em?"
.
"Kalsan e."
.
A lu a thing nawk a. Min rawn en leh chuan mak deuh hian a mitmeng danglam zawkin min rawn hnaih ruak a, remlo zet hian min kuah bet a. A awm dan chu ka hrethiam lo. Tunah hian min hmutu tumah an awm lova, min kuah ngawt nachhan tur  a awm lo. Hun remchang chuhin he mihring hian min khawih theihna chance a zawng anih teh chuan..!
.
Car kawngkhar glass inkik ri kauh kauh ka hriat chuan ka thu ngil zawt mai. Eleazer erawh thawm chu hre lo ang hmiah a awmin a kut dinglam ka sam karah arawn zen a, ka tukhumah nghet zet hian min vuan a. Glass an rawn kik leh chuan ngaihtheih loh hmel zet hian inla hrangin glass a down a. Robert hmel ka hmuh chuan ka thin a phu nghal dawt dawt mai. A ni hian kan chhui ru reng a ni tih a hria a nih chuan a hlauhawm ngei ang.
.
"Khawngaihin motor hi i hung sawn deuh thei angem, ka motor a kal tlang thei lova. In laklawh hmel viau nain.. Nang.. Hming.. In pahnihin maw?" ahma khan keimah ka ni tih a hre lo a ni ngei ang, ka hmel a hmuh chuan a phu zawk mai. Ka lo nuih ta ngawt a. Min ngaih dan tur ngaihtuahin ka duh lo tak zet.
.
Eleazer ka hmuh atang leh a bulhnaia ka awm atang hian thil tha aiin thil tha lo  hlir a la thleng a nih hi. Ka tan chhiatna tur hmahruai a ni ngei ang.
.
"I hmelhriat ami?" Eleazer chu ka en hau a. Lemchan chu a lo hnehsawh hi le! Ka tawng chhuak thei lo. Za lo zeta nui lui sak chungin ka bu nghat a.
.
"Inthup thei ve a." Robert chu a nui lova, lawm vak lo hmel a pu ni zawk mahin ka hria. Eleazer nen hian an inhria ang tih ngaihna ka hre lo reng reng. Engkim a buai zo vek dawn anih hi.
.
"Ka han tawlhsawn ange. Inhmuh a khat hle mai." a thusawi inzawm loh zia chu hre awm pawhin an awm lo ve ve. An inmelh dan atang chuan an inlawm tehchiam lo tih mi mawl ber pawn an hrethiam ngei ang.
.
"A lawmawm khawp ang." ti liam puatin Robert chu a kalsawn nghal a.
.
"Ka chhuk dawn." tihleh motor atanga chhuk ka rual nghal bawk. Ka malchunga ka pharh ka jacket leh bag atanga ka thil ah zawng zawng ka phawrh kha car chhungah a baw vek bawk.Ka tal buai zo chu a nih tak ber hi. Car kawngkhar chu hawng lehin ka hmuh hmasak apiang ka la nawk nawk a. "Ka lo bia ang che" tia Eleazer min biakna pawh chu ka chhang tawh lo. Hmanhmawh zetin kan in gate-ah ka lut nghal a.
.
Ka rilru a nuam thei lo. Ka mut dawn thleng chuan Eleazer min lo biak hun ka ngaichangin ka phone chu ka melh chhen a. Robert leh Eleazer te hi engtin nge an inhriat? Eleazer khan engvangin nge min kuah kher? Robert hmuh laia infawp anga lan kha enge a tulna?
.
Ka muhil thei dawn lo tih ka hrechiang khawp mai. Zawhna chi hrang hrang ka thluakah a vir nuai nuai a, ka a mai dawnin ka hria.
.
Ka phone nghawr dar dar ka hriat rualin rang zet hian ka en vat a. Min rawn call tu chu min be tura ka rin list zingah a hnuhnung ber a ni ngei ang. Ka phone chu pick up mai lovin thawk ka la vang vang a.
.
Harsatna hran a awm a nih loh chuan sunday tih loh chu zan tin rawn update ka tum a nia. Min lo chhiarsak vangin ka lawm e.
.
COPAS
CHAPTER - 4
.
Thantei_LauraSean
.
H & E
.
"Tabithi?"
.
"I tha maw?" arawn ti zawi raih a.
"Tha alawm. Eng thil nge ni ta?" Tabithi hian phone-ah a hranpa ngatin min be ngai meuh lova, thil pawimawh tak a awm a nih ka ring.
.
"Hman zan khan engmah ka hrilh hman ta si lo che a. Ka zawh duh ber zawk che chu Alawmi khan in thenawm pa Robert chanchin kha i bulah a sawi thin em tih ka hre duh a. Thil awm dan hi kan beisei loh lam daih a ni mai thei a ni. Tunah hian ka theih dan danin chhui zui ka tum a." arawn ti duah a. Engtin nge ka chhan dawn ka hrethiam chiah lo. Eleazer khan kan pahnih chauha kan hriat tur anih thu kha min hrilh a. He thil hi ka la sawilang miah lovin ka hria. Eleazer pui tura kan inrem ni khan ka thiltih engkim, Alawmi kaihhnawih reng reng tumah hrilh lo turin message in min rawn hrilh anih kha. Tabithi hian Eleazer thiltih mek hi a hre miah lo tih a zawhna min zawh dan atang hian ka hre mai.
.
"Sawi miah lo." ka tih chuan thawk a la halh a.
"Engtin nge maw ka tih dawn le. I thiannu khan thil rinhlelhawm engmah a hnuchhiah lo chung hian ka rilru a rinhlelhna awm hi a reh thei si lova. Chanchin eng emaw hriat i neih chuan min lo hrilh thei angem? Hmingte, ka rilru hahna hi min hriatthiampui ka  beisei." ka inthiam lo angreng. Robert leh Alawmi kha an thlalak dun ka hmuh hma leh an lo inkawp ve ngei tih Robert sawi ka hriat hma kha chuan keipawh hian engmah ka hre lo mai pawh a ni lo, rinhlelhna pawh ka nei bik lo hrim hrim a ni. Thil dang a thleng leh a nih chuan Tabi hi ka hrilh ngei ang tiin phone kan dah hnu chuan ka ngaihtuah zawm neuh neuh a.
.
Mutthilh tumin ka bei ngial a, ka tum thlawn mai a ni. Ka harh telh telh zawkin ka hria.
Khum ah chuan ka thu chhuak ta nge nge a. Eleazer pawh chu min lo biak ngei ka ring a nia, a la reh vang vang mai. Zanin a thil thleng vang pawh khan min rawn be ngei tur a nia. Ka rilru a nuam miah lovang tih pawh ngaihtuah thiam tur a ni bawk a. Min ngaihtuah lo hrim hrim a niang! Nia, min  ngaihtuah ngawt nachhan tur a awm hleinem. Atan mi dang hmuh laia hmeichhe fawh chu a tih ngai loh pawh a ni hrep lovang. Infawh chungchang kha chu lo dahtha ta ila, Robert nen an lo inhre reng a ni tih chungchang tal kha chu min rawn hrilhfiah tur a ni. Aaa.. Ka lo ngaihtuaha ka lo dem vak vak hian min rawn biak a tum phah dawn chuang lo. A awm ang chiaha ngawi thei ka ni ve tho alawm! Awmze nei lo zet hian ka phone chu ka melh nghek a.
.
Khum atang chuan tho chhuakin ka room tukverh ka hawng a, ka dak vang vang a. Khawpui eng de chuah chuah bak hmuh tur a awm lo.
Chak taka motor tlan ri hlurh hlurh chu kan in piah deuhah a tawp chut a, ka ngaihtuahna dik tawk loh vang nge ka thil hmuh chu ka chik thar ta riau. Bakah, kan awmna lai hi zanrei tak tak ah chuan a reh deuh thin hrim hrim bawk a. Ka room tukverh chu kharin curtain ka pawt phui a, ka bih ta dek dek a. Eng thil nge hmuh ka beisei pawh ka hre chuang lo.
.
Robert-a te in zawnah mipa pakhat a ding a, tunang zanrei tawhah lehnghal thil pangngai a ni lo tawp mai. Chu mipa chuan hmun hla deuh a mi bia niawm tak hian kut vaiin signal an inpe a, piah deuh atang hian mipa pahnih hi hmanhmawh hmel takin an rawn tlan hlawk hlawk a, thim chin an thlen chuan ka hmu thei ta lo. Ka nghak deuh vang vang a, minute 15 vel aral hnu pawh chuan engmah hmuh zui tur a awm loh vangin ka ngaih a tha leh ta deuh a. Tunlai ka thil tawn thar vang hian ka  ngaihtuahna a kal dik lo mai mai anih ka ring.
.
Ka room tukverh chu uluk deuha kalhin ka mu leh a.
.
Thawm ri deuh nuai nuai ka hriat chuan ka phu chhuak zawk a, ngaihthat lohna in ka khat lehnghal vek. Rang zetin ka tho a, ka room tukverha ka dah ruala ka thil hmuh chu ka awih mai thei lo zawk.
.
Sana ka en a, minute 20 pawh ka muhil hman lo. Chutih chhung lek chuan hetiang thil hi a thleng hman a nia!
Robert-a te in dinglam, Robert-a room awmna zawn chu a alh eng hluah hluah a. Kang thelh tum thawm leh hmeichhe thlabar thawm vang chuan mutthilh theihna chi a ni lo hrim hrim mai.
.
Ka pindan atanga chhuakin inhnuai ah ka chhuk a, ka chhungte pawh an tho vek tih hriat tak hian kawngkapui a lo inhawng huau a. Pawna ka chhuah chuan ka nu'n min rawn pan vat a.
.
"I kal chhuak daih tawh zawk anih ka ring a. A rapthlak zia saw en teh." ka nu hmel ka en chuan a hlauhthawn hmel  ngang mai. "Engvang nge niang le?" a ti zui sap a. Ka hriat a ring emaw ni?
.
"Ka ring thiam bik lo. Current kal sual vang pawh a ni maithei a ni. Hliam an awm em?"
.
"Nichin khan pakhat chu an zawn chhuak a, ka va kal hnai ngam teuh lo mai. I pa lo let hunah kan hrechiang mai ang."
.
Kang nasa zualpui a reh hnu chuan kan in pana ka pa lo kal chu ka nu nen kan lo pan hnai vat a. Ka pa sawi dan chuan current kal sual vanga kang anih an ring a ni awm e. Kei chuan ka ring lo. Kangmei chhuah hma lawka mi ka hmuhte thiltih kha anih ka ring hmiah. Sawi chhuah erawh tul ka ti lo. Ka hlauthawng thar ta riau bawk. In thenawm mai kan ni a, Alawmi leh Robert chungchang ah khan ka lo inrawlh ve hman deuh bawk nen, ka awm a nuam tak zet mai.
.
Inchhung kan luh hnu chuan ka room-ah ka lut vat a. Ka phone ka on chuan missed call a lo awm teuh mai. Eleazer chu ka call back nghal a. A pick up rualin "Thil thleng hi i hria em?" ka ti nghal tawng a.
.
"Enge thleng? Ka muhil thei lova, chuvang a nia ka rawn call che."
.
"Robert-a room zawn a kang vak a."
"Amah enge a an? Inhliam an awm em? A va zialo ve." arawn tawng dan atang chuan pawi a tih tak tak leh tak tak loh a hriattheih loh. Sawi ve mai mai te pawh a ang zawk mah.
.
"Nia, thil chiang ka la hre bik lo. Naktuk zingah ka hre chauh ang. Thihna em a thleng lo a, a lawmawm.."
.
"Ka rawn biak chhan che chu ka rilru ah i awm a."
Awih lo zet hian ka nui hak a. Ka insum hman lo. Nuih hun pawh ani chiah em mawni? Chhiatna thleng sawi lai lai a, a rilrua ka awm thu arawn sawi daih chu a inhmeh lem loh mai bakah ka awih lo ve thlawt.
.
"Enge nuihzatthlak awm?" a rawn ti bul hmuk a.
.
"Ka duh hunah te chuan ka nui ve bawk ang chu. Ka'n mu leh tawh a nge, muttui."
Min chhan leh hmain phone chu ka off a. Ngaih dan nih vak loh hmel taka a thaw hraih ri erawh ka hre hman hram.
.
Ka alarm riin min tih harh chuan ka inlet thawk a. Ka tho peih lo hle mai. Boruak vawt deuh sur vang chuan nilenga mut mai ka chak bawk a.
.
"Bawihi, i harh tawh em? Tho teh." ka nu'n ka room kawngka arawn kik dat dat a. "Saw, Robert-a te in ah sawn va kal ve rawh. Nula thenkhat pawh an kal a nia."
.
"Umm, ka tho.."
.
Phur tehchiam lovin  ka tho a, tihtur a awm emaw awm lo emaw Robert-a te in a kal chu a tul hrim hrim.
.
Ka inphihfai zawh hnu chuan kawrlum hain in ka chhuah san a. Nizan a inchhung atanga hliam tuar an zawn chhuah kha Robert-a nau a lo nia, na lutuk erawh a ni lo a ni awm e. Kang mei chhuah nachhan kha eng chiah nge tih an hre lova, current kal sualah an puh deuh tawp a ni.
.
"Hming, lo kal lawk." Robert-a awmna lamah chuan ka kal thuai a. A hmel atang chuan mi tam zawkin kang mei chhuah chhan a sawi chu a ring biklo tih ka hre mai.
.
"Ka laptop a bo daih a nia!"
.
"A kang tel ve niang chu. A va mak awm ve."
.
"Kang lo tih ka hrechiang. Nizan khan ka room-ah ka riak lo hrim hrim a, David a riak a. Keichu ka  ngaih a tha miah lo." a tih chuan ka mit ka lasawn vat. Nimin tlai mai ah an inah kalin a laptop a Alawmi nen an thlalak ka inthawn ru a, min ringhlel mai angem le?
Robert hmel ka en leh chuan min en lovin a kun deuh a, rilru hah hmel deuh hian a sam a tuai puat puat a.
.
"Mak deuh hian ngaih that lohna ka neih rukna a rei tawh hrim hrim bawk a. Engvanga nangmah kher hi hrilh che nge ka nih pawh ka hre lo."
.
"I laptop ah chuan thil pawimawh a awm si ami?"
.
"Awww..awm lo se tihian ka buai nang. Min va hnem lo ve tak e aw.." nur nung chungin min en a. Tanpui dan tur ka hre hauh hleinem maw le. 
.
"Eng thil nge awm a?"
.
"I bula sawi hian awmzia a neih loh hmel emai." atih chuan ka zawt nawn duh tawh lo. Thil pawimawh bo, mipa puitling nasa taka awm nawm loh phahna tham a nih chuan thil eng emaw tak chu ani phawt ang.
.
Minute 30 vel hnuah Robert te in atangin ka haw a, a laptop bo chungchang chu tu hnenah mah sawi lo turin min chah nawn mawlh mawlh a.
.
In ka thlen chuan ka nu ka pui a, chaw kan ei kham hnuah dawra kal turin ka insiam a.
.
 Eng thil nge ka tih thin ka la sawi miah lovin ka hria. Nikum khan MA(Pub. Ad.) ka zo a, hna ka neih hma chu ka nu dawr ka nghah chhawk ve hrih a ni. Exam neuh neuh ka nei reng a, karleh hian interview hmachhawn tur ka nei bawk. Ka tling  ve hlauh anih chuan mahni ke a ding thei ka la ni ve ang chu. Ka pa hi Transport Department ah a thawk a, ka nu sumdawnna nen pangngai takin kan khawsa a, reithei tia sawi tur kan ni hran lo a, hausa pawh kan ni chuang lo. Engkim hi a pangngai tiin sawi ila a dik ber ang. Unau pianpui ka nei lova, keipawh hi ka nu'n harsa takin min hring a ni. Min duat em em rualin 'pangchang leh no nilh nelhin a awm ngai lo' tiin ka nu hian min sawi ve ziah thin. Inchhuanna tur a ni nge ni lo pawh ka hre chuang lo. Hmeichhia hi chu hmeichhia kan nih ang hian awm tawp ila, intih no leh hranpa angai lo tih hi ka thuvawn ve a nia. Mi vannei tak ka nihna thil tam tak a awm bawk.
.
Kurta var ka nu min leisak chu lachhuak in ka ha a, he kawr ka hak hi chuan nalh ka inti ve em em ziah!
Dawr pawh nidang ang bawkin kan lun leh phian mai.
.
"Hming.."  U Seni'n min rawn nghawk zauh a, ka hawichhuah chuan ka beisei loh deuhin ka hma zawnah Eleazer a lo ding reng a. Dawr chhung chu endiktu niawm tak hian a enkual rulh rulh bawk a. U Seni chu ka en leh a, hmuhnawm tih hmel zet hian Eleazer chu a lo en zak zak thung. A awm ve tho mai. Hetiang mipa chhelo lutuk te chu hmeichhia reng rengin an ennawn ziah ang chu maw le.
.
Min rawn en chuan ka lo nuih saih a. Awi, amah thlem tuma nuih erawh ka ni miah lo a nia. A ni pawh a khi ve suk.
.
"Enge i lo tih dawn?" ka tih chuan U Seni a lo thaw hak a, a hmel ka va en leh chuan 'i hria maw?" tih melh a min melh bakah zawhna tam tak a nei tih hriat zet hian min lo en phawk hra mai.
.
"Vawiin chu kalna tur pawimawh kan nei a."
Thu tura ka tih hun nghak lovin ka thutna bulah chuan arawn thu a, min si chet lo hian a thut theih reng sia, min tihbuai a tum ve hrim hrim pawh ani maithei. A lo tum anih chuan a hlawhtling! A rimtui hman rim na em em si lo, mipa rim zet chu hip reng mai ka duh. Hmanhmawh hian!
.
"Lo sawilawk ve tur a nia. Ka hman loh hmel anih hi."
U Seni chuan mi dang a va pun nge mawni, kan dawra kan chhawr ho chu tul vak lovah an rawn dak sek a, an rawn khi tha vek mai.
.
"Hrilhlawk che pawh ni ila hman i inti chuang lovang. Tunah kal nghal ila."
.
"Tunah chuan a theih loh."
"Nizan thil thleng kha hriat belh duh ka nei." ka beng bulah rawn kun hniamin a tawng zawi khawp mai. A hmel ka hmuh rual khan engvanga min rawn hmu nge anih tih ngaihtuah chhuak nghal tur ka nia, chutiang chu ti lovin thil ni lo lo ka lo  ngaihtuah hmanhmawh zawk a nih kha.
.
"Hriat belh  vak tur a awm hmel loh. Zingah Robert chu ka va hmu a. A laptop bo thu min hrilh a. Chu zawng chu." amah ang chiahin ka tawng zawi ve bawk. Sawi rin lawl lawl chi ni bik hek lo le. Laptop bo chungchang pawh hi sawichhuak lo tur ka ni a, ka inthiam chiah lo. Robert tan thil pawi lian tham a nih loh ring phawt mai ang.
 Hnai zetah min en run a, kan thil sawi tak kha a ngaihtuah nge ngaihtuah lo ka hrethiam lo. A mita ka en let chuan hawisawn tum lo ve ve in kan inen ta reng a.
.
"Ehrrmm.."
Ka hawi chhuak zawk a, U Seni'n min lo nuih var var mai. Pangngai thei ang berin U Seni chu ka en a.
.
"Ah, Order kha an lo la dawn a, i hriatpui loha lak tir chi a ni si lova."
.
"Aw, ka lo kal." tih leh thawh ka rual a. Ka chhuah hmain "Min lo nghak lawk mai." tiin Eleazer chu ka melh zauh ringawt. A bu nghut a. Min en zui reng tih ka hriat vang chuan ka tukhum a za mer mer a.
Keihi ka awm dan a dik lo. A hma zawng khan a bula ka awm in hetiang em em a nasa hian ka danglam lo. A tha dawn lo tawp mai. Ni e, a huhang chu a na ngei a, ngaihtuahna dik tak ka neih reng angai dawn thung anih hi. Amah hnaiha ka awm anih pawhin inngaihzawnna chungchang ka ngaihtuah tur a ni lo. Inngaihzawnna chungchang maw? Ka ngaihtuah tan chu anih ber hi a!
Khawi chen mah kan thleng chuang lovang. Ka bula a awm a tul nachhan pawh Alawmi chungchang  vang chauh anih kha. Ka hrereng ang.. Ka hrereng tur a ni.
.
Ka let leh chuan a thutna ngaiah a lo la thu rengin a phone a lo khawih a.
.
"Tlai dar 3 ah ka lo kal leh ang." min en chuang lova tawngin a phone chu ala khawih mawlh mawlh tho a.
"Vawiin chuan ka hman dawn lo anih hi. I hriat tur awm chu ka hrilh tawh che kha."
.
A thutna atangin a tho a, ka hman dawn lo tih chu a pawm ve mai aniang.
.
"Tlai dar 3 ah."
Ka chhan leh hmain a tho a, ka hman dawn lo tih ka sawi nawn leh pawh chu hre awmin a awm lo. A chhuak fel ta maw tih veleh U Seni chu phur zet hian ka bulah arawn kal a. A ni hi chu dawr kan neih tan atanga thawk tawh a ni a, a mawhphurhna a hlen thain kan inpawh khawp mai. A hriat ve tur chin leh inhung hran angaihna chin erawh a awm thung.
.
"Awi awi awi.. Kha pa kha.. Awiii.. Engtin nge.."
.
"Ka bialpa emaw i lo ti ngawt a ni maw?"
.
Ring zet hian a nui chiam a. "Ka kum ang zat i nih ve hunah chuan inmelh zeuh hian awmze hrang hrang a nei tih i hre ve thovang. Tek deuh chhiai chu a awm anih kha.. Aaa...khatiang kha tawng ila chu tun thleng hian ka nula lo chiang ang chu awww.." tiin a nui zui uar uar a. "Ngawi teh, a va mak tak.." awih loh hmel deuh hian min en leh rih a.
.
"A ni lo ka tih kha."
.
"Pha lo mai teh. In inhmeh tawp.. Khatiang kha zawng ve ila a tha ang." min dawr tum an lo kal tak vangin thaw huai chung hian min kal san a, ka nui tawp.
.
Kan buai zui mawp mawp a, Eleazer a lo lan leh chuan tlai lam dar thum a lo ni der tawh tih ka hre chiah. Ka ngaihtuah zui miah lo tih ka hrechhuak tel bawk a. Ka lawm ve ringawt bawk. Nilengin ka rilru ah a awm anih chuan a tha dawn lo em a..
.
"Kal ang le."
Hnial tumin ka en a, mah se, a hmel ka hmuh chuan a lo kal hmasak a ahmel lan dan nen a danglam tih ka hrethiam a. Ka hnial duh  ta lo.
.
"Ka inpeih a ni mai." Ka bag ah ka phone dahin Useni ka ko a, felfai taka ka kal chhuah atul chhan ka sawi hnuah Eleazer nen chuan kan inzui chhuak a.
.
Useni chuan "Tha deuhin aw." arawn tizui hram tho. A tawng chu Eleazera'n a hriat ve ka hlau hle bawk. Ngaihdan diklo tak a neih ka duh lo. Kan inngaizawng angin ka lo sawi kual vel ni anga angaih ka duh lo bur. Duh lo tak ka ni.
.
A cara kan tlan chhuah hnu chuan ka rin lohna lamah a inher ta daih a.
.
"Khawii nge kan kal dawn?"
.
"I hre mai ang." a ti zawi sup a. A mood inthlak chhan hi thil eng emaw tak a ni ngei ngei ang.
.
Ka hawichhuak a, falkland kan thleng der tawh. Helai ah hian eng thil nge tihtur kan neih le..
.
Car a tiding a, kawngkhar min hawn sak chuan ka chhuak ve mai bawk a. Khawi hmunah nge min kalpui chiah tih hriat tumin kan luhna tur building chu ka en a
.
BON APETITE!

Hei chu hman ni lawka restaurant hawn thar kha anih hi. Nawm hmel tiin an page te pawh ka check chiam tak alawm. 'Tunlai khawvel changkang tawh tak milin thalai leh thalai chauh lo tan pawh thian ho inhmuh khawmna atan hmun tha tak anih bakah inngaizawng leh inngaizawng lo tan pawh kal ngei ngei na tur hmun anih hi. Kan dawra thawk ho pawh dinner ka eipui ngei ngei ang' tia ka lo ngaihtuah kha a nia. Eleazer nen hian kan kal ang tih ka ngaihtuah miah lo.
.
Inchhung kan luh chuan a nuamin a hahdam thlak raih mai.
"Helam ah.." Eleazer chuan ka kutah min rawn vuan a, ka phu deuh zawk. A hmel ka en vat a, min en ve loh bakah thil dang daih ngaihtuah a ang ka ti. A ngaihtuahna hi hriat vek zel ka tum pawh a ngai lovang' tiin keimah leh keimah ka inhau leh rih a.
.
Kan thut hnu chuan eitur a chah a, a tawng mai loh vang leh a mood a fuh chiah lova ka hriat vangin ka tawng duh ta bik lo.
.
"I pendrive kha i hmu ta em?" a tih chuan tawngka a chhang lovin ka lu ka thing mat mat a.
.
"Tawngka in min chhang rawh." chiang zet hian min en a, a tawngkam chu a nem lo khawp mai. Ka chungah thinrim na chhan tur eng thil  nge maw a neih le?  A awm dan chu ka ngei hle tih ka thup thei lo. Dak vahin ka en a.
.
"Enge? Ka lakah i thinrim ve ringawt a?" ka tih chuan a mit chhingin thawk a la a. Keipawh ka tawng nem bik lo khawp mai.
.
Arawn men leh chuan a mitmeng danglam in a nem leh ta deuh. Ka kut arawn vuan a, phawk zetin ka en a. A awm dan hi hriatthiam theih pawh a ni lo anih hi.
.
"Ka duh che in ka hria!" a tawng ring lo nain a thusawi chu ka hrechiang lutuk. Rang zet hian ka kut chu ka lasawn a. Ka mitah chiang taka min la en reng chungin ka kut chu arawn vuan leh a. Laksawn leh theih miah lovin a kut zungtang sei tlurh chuan ka kut chu a hum bo hmak a.
.
COPAS
CHAPTER - 5
.
Thantei_LauraSean
.
H & E
.
"Hahdam rawh!" a  nui suk a, ka lak atangin a mit a lasawn chuang miah lo. A ngaihna hre chiah lovin ka nui hak a. Sawi mai tur pawh ka hre lo. Thu taka lak chi a ni em ka hre lova, a mitmeng atang ringawt hi chuan thil hriatchian theihna tur khawp thil engmah ka hmu lo. Min duh nia a inhria chu lawm tur nge lawm loh tur pawh ka hre hek lo.
.
Ka kut chu muangchangin ka lasawn a, min vuan zui ta lo hlauh bawk. Kan thil buaipui chungchang kan sawi anih loh chuan sawi tur a vang ta pharh mai. Vanneihthlak deuhin kan eitur order min rawn chhawp a, rilru lapeng tu a awm ta hlauh.
Kan pahnih chuan tawng leh mai lovin kan eitur chu kan ei a, Eleazer bula awm chu ni lo ila ka ei buan buan ngeiin ka ring.
.
"Ah, pendrive chungchang chu_ Engtin nge kan tih dawn?" ka tita ngawt a. Eng emaw tal ka sawi loh chuan kan awm dan hi nuam ka ti lo lutuk.
.
"Laptop bo leh ta si nen khan inzawmna a neih ka ring. Eng thil dik lo nge awm ang tih chu tunah mai chuan ka hre bik lova. Nangmah i tha hrim hrim em?"
.
A thusawi leh min zawhna inzawm lo lutuk vang chuan ka nui leh sak a. Tuna taka ka that leh that loh min zawt daih pawh chu a mak leh pek. Ka veilama thle deuhin ka en a, a awm dan danglam deuh chu lai te pawh a ang! Nuihzatthlak zawk hian..! Eleazer hi ka en vangin a lai lul lovang.
.
"Nizan i mut that loh hmel sia, nilengin i buai leh a. I dam that loh chuan ka tan i tangkai thei dawn lo a nia."
A mitmeng thuk ruih chu a thutak leh tawh a. Pawh theih loh leh ngeng tak hmel a pu leh tawh bawk. Ka nun hi mipa bulah ka hmang tam lo hrim hrim a, thian mipa ka kawm ngai lo nen a awm dan hi mipa tam zawk awm thin dan anih chuan mak ka ti ngawt ang. Ka thil ngaihtuah chu leh! Mipa zawng zawng awm dan chu a ni thei lo tih ka hrechiang hle alawm. Ngaihzawng ka lo neih ve tawh nen an zia hi a inpersan chiang lutuk a. Ka lo kawp ve tawh ber kha a lo a luakchhuaka min buaipui chiam mai chi a ni a, rei pawh kan inkawp lo ta reng a nih kha. Inngaihzawnna chungchang chu tuna lo ngaihtuah chiam hun pawh ani love.
.
"Thil pawimawh vanga chhuak kan ni khan ka hria a."
.
A bu nghut a, min chhang lovin a eitur chu a ei zawm mawlh mawlh a. Thil pawimawh awm tak tak vanga min hruaichhuak a ni lova hriatna ka neih chu ka sawichhuak lo thei lo.
.
"Thil pawimawh bik anih loh chuan tihtur tam tak ka nei ve tho a, hetia inzui fo hi ka duh dan ani lo a nia. Bakah, min lo hmutu ten ngaih dan dik lo an lo neih phah thei bawk a."
.
"Ka ngaihzawng anga sawi nih chu i duh vak lo tih sawi i tumna a ni em?" min nuihzat hmel deuh hian min en a, mite thusawi thinin a tibuai ve ngai lo a ni ngei ang chu. Keichu chutiang mi ka ni ve lo. Heihi ka nun a nia, ka duh dan danin ka hmang ang tih thu hi a chanve chu a dik ngei a, chutih rual chuan mi dang laka kan awm dan leh mi min sawi dan thenkhat hi chu thudik leh insiamthat kan ngaihna lai a awm thin vangin mi dang thusawi thenkhat hi chu a pawimawh thin.
.
"A dik alawm." ka ti hmak a. Kan inhriat chinah hian hmeichhe dang nen an awm dun lai emaw chumi nen chuan an inngaizawng tih thu ka la hre lem lova, chumi vang ringawt chuan a bulah hian ka awm tam tur tihna a ni chuang lo bawk.
.
"Kei hian duh tlat che ila engtin nge itih ang?"
.
"Ka chhanna tur chu keimah chauha hriat chi anih chu." ka tih chuan a thil eilai dahin ka lamah arawn awn a.
"Ka la hrechhuak ngei ngei ang." a mit a lasawn lo.
.
"Ka sawichhuak anih loh chuan i hre lovang."
Ngeiawm hauh si lo hian a hmui a tisawi zauh a. A hmel chu ka en reng duh ta lo. A duhawmna ka hmuh fuh chuan thil tha ani dawn lo tlat.
Kan thusawi lai chu thu dang daihin arawn thlak a, ka thaw deuh huai. Hetiang zawnga titi fo hi ka tan leh atan hian thil tul tak a ni lo hrim hrim a.
.
Bon Apetite atanga kan chhuah leh hnu chuan min thlah a. Alawmi chungchang emaw, min duhna tih lam emaw kan sawi tawh lo. Ka rin loh deuh deuh zawhna min zawt a, a tlangpuiin ka zirna chungchang leh hmeichhia pasal neih hnua hnathawk thinte tha ka tih leh tih lohte min zawt a. A ni pawh hi ka beisei loh mizia mak tak nei a ni tih ka la hriat belh dawn chauh a nih hi.
.
Kan in kan thlen chuan pangngai takin kan inthlah a, min lo biak a tum thu min hrilh miah lovin min inchhung ka luh hmain a tlan chhuak lehnghal a. Ka thil ngaihtuah chu duh lovin ka lu ka thing na na a, min lo biak a tum leh tum lohvin awmzia a nei lova, a tul aia tam a chungchang hi ka ngaihtuah tan tih ka inhrechhuak a ni. Chu mi vanga ka lu thing ka ni bawk.
A lan dan mipa tak leh hriatchian chakawm tak a mizia hian hmeichhe tam tak a hip thin ang bawkin min hip ve tan a ni ngei ang. thil tha lo tak a ni.
.
Kar khat aliam a, min la rawn be leh ta miah lo. U Seni hian a chanchin min zawt ziah lehnghal a. Tunah chuan arawn lan ngai tak miah loh vang hian kan inngaizawng lo tia ka sawi kha a awih ve tawh ang chu.
.
Nizan khan Robert arawn leng teh tlat bawk. A laptop bo a hmuh leh tawh thu min hrilh chuan ka chik viau tih thup thei ang berin ka zawt chiang a, a sawi tha duh lo viau lehnghal. A hma ang khan ka bulah a titi bawrh bawrh tawh lova, min chik riau hian ka hre bawk. Keihi ka fimkhur angai hle mai.
.
"Hming, hmanni movie i rawn lak khan Alawmi nen kan thlalak kha i inthawn tel em?" a tih chuan angaihna hriat loh hmel taka melhin ka lu ka thing a.
"Tinge a? Ka lak ngawt nachhan tur a awm hleinem." dem let zawk mah ang hian ka tawng lui ngat a. Ka chhungril ah chuan min ringhlel tlat ang tih hlauhna ka nei. Tawng tam palh ka hlau bawk si.
.
"Ka ringhlel che pawh a ni lova, mah se, Tabithi nen nimin khan inhmu a. Min en dan kha a mak lutuk a."
.
"I ngaihbel mai mai a niang. Tabi chuan i bulah sawi a nei mi?" ka tih sak chuan a hmel thutak runin min en a. Hetiang taka a serious hmel hi ka la hmu ngai miah lo.
.
"Nei chuang lo ve." a ti leh mai a. Reivaklo a thut hnu chuan a haw a, rilru hah hmel taka a awm vang khan ka ngaihtuah khawp mai. Thil vei eng emaw tak a nei  ngei ang tih a chiang em em  bawk si.
.
Muhil mai thei lovin ka let sek a. Eng tik laiin nge ka mutthilh tak ka hre miah lo.
.
"Hey, tinge min lo biak miah loh a?" hnai zeta min en in a hmui chuan ka biang a nul zai zai a, ka mur seng seng mai. A ban tha chak zet chuan min kuah chial bawk a. Min kuah dan chu a hahdamthlak bakah mak takin ka thla a timuang veng veng a, ka tal chhuak phal lo. Ka mit chhingin a awmah ka  bei thlar a. Ka awm dan chu a nuam veng veng.
.
Dawn awm lovin ka phu chhuak zawk a. Ka mumang a ni. A taka thleng ang maiin ka feel thei lehnghal. Ka alarm khum sir a ka dah chu lain ka off a. Nidang ka thawh hun nen khaikhin chuan ala hma viau nain ka harh chiang em a ka mutthilh leh  theih ka ring lo.
Ka tho a, ka inbual hnu chuan ka nu thawh hmain eirawng ka bawl tan a.
Ka hla ngaihthlak lai chu ka ringtone in arawn tibuai a, ka thil khawih laklawh lai dahin phone awmna lam ka pan a, caller ID ka hmuh chuan ka tim deuh zawk mai. Ka pick up ta thuai tho a.
.
"Hey, tinge min lo biak miah loh a?" a aw rik dan chu ka mumang ami ang chiah chiah. A aw atang chuan khum ala chhuahsan lovang tih a chiang reng.
.
"Tun ang zing zingah eng thil nge a?"
.
"Vawiin chu hmuh che ka duh a."
"Thil pawimawh thleng a awm vang a ni em?" ka tih chuan lungawi vak loh niawm tak hian a rum hraih a.
.
"A ni thei tho ang chu."
.
Zep miah loha sawi chuan keipawh hian hmuh ka chak ve lutuk tho. Engtin emaw tak angaihawm riau a, ka hlau ru deuh tho bawk. Ka rin aiin ka thinlung hian a  hnaih ta mah mah a ni ngei ang, ka thinlung ah warning bell a ri tlat.
.
Chhang leh mai lovin pawn lamah ka hawi chhuak a.
.
"Ruah a sur hmel sia, ka va chhuak peih awm lo ve."
"Chhuanlam ho tak anih chu."
.
"Bakah_"
"Nimin khan i nu ka hmu a, vawiin hian dawr i nghak dawn lo tih a sawi a."
.
"Engtin a? Ka nu nen engtin nge in inhriat teh daih a?" ka thil beisei loh ber zinga mi a ni chiang khawp mai.
.
"Kawng ka hria alawm. A nih chuan dar 10 velah ka lo hruai ang che." ka chhan leh hmain phone a off a, ka hamhaih angreng. Kan awm dan hi Alawmi chungchang kan buaipui vang chauh a ni ta lo tawp. Eleazer  ngaizawng tur hian ka inpeih em ka hre lo a ni. Aa.. inngaihzawn chungchang chu amah pawh hian a sawichhuak tawh kher nang. Ka ngaihtuahna a kal thui mah mah a nih zawk hi.
.
Rei vak loah min rawn call leh a , thil tul thut a awm vanga min lo hruai hman dawn loh thu leh keimaha Lazarus Hotel-a kal mai turin min rawn hrilh a. Mi tuemaw hmuh tur kan neih thu a sawitel bawk. Chumi vang chauh chuan ka kal dawn reng a ni.
.
Zing chaw kan eikham hnu chuan muangchang leh uluk angreng takin ka insiam a, ka nu nen kan chhuak rual a.
Lazarus Hotel ka thlen chuan ka luh veleh hmeichhe pakhat hian min lo pan vatin room 65 ah min hruailut a, tumah an lo la awm lo. Eleazer lo thlen hun nghakin ka thu ta ran a. Mi hmuh tur kan nei tia min hrilh kha a lo thleng har tawh bik lo maithei bawk.
.
Kawngka a ri rak ka hriat chuan ka thu ngil thuai a. Pindana lo lut chu ka beisei loh tawp a ni leh ta.
.
"Loretta ini tiraw?" ka hma zawna arawn din chuan ding chhuak ve in ka nui a, a ni chuan min nuih let hauh lo. Kan inhmuh hmasak ber ang chiah khan min melh ram ram a.
.
"Khawnge Rinmuana chu?"a tichang fal mai. Loretta hian Alawmi chungchang kan chhuina ah hian inrawlhna a neih ve theih nachhan tur ka lo ngaihtuah daih thung. Ka rin aiin a buai hnawk zek dawn niin a lang tlat.
.
"A lo hruai dawn che anih ka ring a. Thu ve phawt la." ka thusawi awih loh hmel lutuk hian a nui hak a, hnai set sawtah chiang lutuk hian min en a.
.
"Nang hi.. Hei, khatia inlak inno viau kha angai hran lo. I mizia ang hi chu ka lo tawnghnem ve tawh amaw... Rinmuana hi hnaih lo la itan leh ka tan a tha ang." a ner zui sak a. A nungchang mai mai chuh!
.
"Heta lo kal ve tur pangngai i ni lo mi? Eleazer khan_"
.
"Ehee! Eleazer tiin i ko elaw? A hriat laiin i ko tawh em? Nang hi.." min en dan chu ka ngaithei ta hlawl lo.
.
"I nungchang chu a mawi tehchiam lo hle mai." ka ti ve salh a.
.
"Hah... Nangni ang hian kan class nunphung hi in man pha hlawl lo. Ngawi hmenn rawh..!"
A kut rawn thawh vaih se chu kan insual ngei ngei ang. Ka insum hram hram a ni. Hetiang taka inngaihnep hi mihring hian a mihringpui chungah a tihlan duh ka lo ring ngai lo. Ni e, mi tha tak chu ka ni bik lova, mahse, heihi chu a lutuk mah mah chu a nih hi.
"Chuan, Rinmuana hi ka mipa a nia! Ka MIPA.." A thusawi chu ka hriatchian loh a hlau kalh kalh hle mai. "Hnaih lo la a tha tih ka hrilh che anih chu."
.
"Helai hmuna lo kal ve tur pangngai inih loh chuan lo va chhuak tawh rawh." thu ngil auhin ka kut ka kuangkuah a.
.
"Nizan mai pawh khan__"
.
"Loretta, hetah enge irawn tih?"
Loretta nen chuan kawngka lam kan hawi rual thawt a. Kan tawng eng chen chiah nge arawn hriat hman ka hre lo nain engemaw zat chu arawn hria tih a hmel atangin a lang reng mai.
.
"Henu hi i hlata a awm a nih loh chuan ka nasa viau dawn tih i hriat kha.." a rin angin a zam hauh lo. Eleazer rawn tawng ve hma chiaha a thusawi tum pawh kha ka ring thiam deuh ruak. Ka rin dik ngei pawh ka ring.
.
"Tikhan chinfel tur in neih chuan lo chingfel ta ula, ka lo va chhuak ange." ka thutna atangin ka tho a, ka bag ka ban nghal a.
Loretta sawi kha a dik hetiang ho nunphung pawisak nei lo lutuk hi ka paidam thei lo  mai a ni lo, ka hmu peih hlawl lo.
.
"Chhuak suh." Eleazer chu ka en a, a hmel chu rum tha tak a ni. A hmel tha hluah hluah bawk!
.
"Hey, I mutpui tawh vang ringawt khan nangmah chauhin i pumbilh dawn lo tih hria ang che!"
.
"Ngawi.rawh.!" a aw ri vang chuan Loretta chu a tim chawih a, sawi belh tum a neih chu eng thu pawh ni se a hmui a chip zui chiang khawp mai. Keipawh ka bang chuang lo, ka tim ve chawih tho. Ka thin a phu dawt dawt a, Loretta chu a samah ka va tham mai dawn em tiin ka rilru a insual mek bawk.
.
Eleazer chuan min rawn hnaihin ka banrek ah min vuan a, a kut zungpui chuan ka marphu zawih zawih chu a tuai a. A hmel lang rum  tak si leh a kutin min khawih dan dam thlap si chu a inrem hlawl lo. Ka mitmeng atang chuan ka thinrim hle tih min hriatpui niawm tak hian min melh vang vang a.
.
"Ka kal ang. Mahse, in inkawp hi ka remti dawn chuang lo."
.
Thinrim khur hlawk hlawkin Loretta chu pindan atangin a kal chhuak a, kawngka a khar rik thuai hnu chuan a reh zui nghal vung vung a.
.
A thui lo khawp mai. Dah loh aiah takmeuh ka rawn dah hram a ni e. Zanin chu ka ti hleithei lo, naktuk zanah a zia ang. Minchhiar saka ka lawm em em a nia…
.

  COPAS
CHAPTER - 6
.
Thantei_LauraSean
.
H & E
.
"Khatiang ka duh loh vang khan a nia ahma pawh khan mi hmuh tura awm dun fo ka duh loh." Ka thutna lam pana Eleazer muangchanga lo kal chu ka en a. Loretta kha a nungchang mawi lo viau mah se, khatianga a awm chhan kha a tha tawk viauin ka ring. Dik tak chuan mihring tha famkim kan awm lo chung hian a pawng ataka sual ringawt mihring an awm  ngai lo.
Ka ngaihtuah let a, Eleazer nen Zori te ina kan kal zan pawh khan Loretta min en dan kha dawnsawn a nuam lo tak zeta, Eleazer khan a hmuh laiin min la fawp leh ta nghal a nih kha. A rilru a na dawn lutuk! Hmeichhia ve bawk ka nih vangin a nat dan tur ka ngaihtuah thiam.
.
"Engtin nge a ni thlah miah lo chung khan a hmuh laiin min fawh theih zawk a. Heichu nunphung pangngai pel a ni."
.
"A ni kha chu engahmah ngai suh."
A thusawi chu awih lo lutuk in ka nui hawk a. He mihring hian thinlung a nei lo a ni ngei ang. Lainatna nei lo..
.
"Kan inkar a tawp tawh a, chiang takin ka sawi vek bawk. I thik anih loh chuan en liam mai mai rawh.." Leh zel chuan..! Tak zet hian a!
.
"Thik hauh lo mai. I lakah mi dang thik turin ka ngaihzawng i ni lo. I  inngai ropui mah mah a nih chu."
.
A nui suk a, "Ka ngaihzawng chu i ni tawh reng alawm." min rawn hnaih mah mah tawh. Ka thu tha sauh sauh a. A thusawi chu a fiamthu a ni ngei ang. Min duh nia a inhriat thu a sawi bak kha chu inngaihzawnna lam engmah kei hian ka sawi ve lo. Ka sawi lo  mai pawh ni lovin, ngaihzawn tumna ka nei lo. Heichu ka ti mah mah mai thei. Ka duh ve deuh ngei a.. Ni lo, ngaihtuah lo zawk ang. Ka lo duh mah mah tawh pawh a ni zawk mai thei! Chupawh ni se, amah a indah sang mah mah a nih hi. Hetiang mipa hi ka ngaizawng thei lo ang.
.
"Inngaihzawnna thil chu dah tha la, helai ka kal chhan hi tunah sawi rawh. Tunge mi dang kan hmuh tur chu?" ka ti zung zung a. A bulah hian rei tak awm ka duh lo. Ka hnial theih hauh loh turin awm palh ta se.. Ni e, a duh chuan a awm thei ngei ang chu. A bula awm a, hnar fithla thak thei tur hian ka inringtawk lo a ni.
.
"Hei vang hian a nia i bula awm hi a bul atanga tan tha leh zel ang ka nih. Ka phur khawp mai." a la ti tak deuh deuh a. A hmel lang thim raih chu ka en tha ngam tawh lo.
.
"I thluak ah khan thil dang a awm  miah lo a mi a? Kan inhmuh a tul chhan chu eng thil nge?" ka tinawn leh ngat a. Tunah chuan ka hma zawnah chiah a ding tawh. A pheikhawk nalh zet chu ka en ran a. Inringtawk zet hian a kekawr ipte a kut pahnihin a zen a, a hmel ka en chho leh chu ka tisual ta a ni. Ngeng ngulh leh a duhzawng ka ni tih thup hauh lo hian min en chhuk run a. Eng emaw nghah nei hmel a pu bawk.
.
"Enge?" inti huai luiin ka en chho ha a, min chhang lova min en reng vang chuan ka zam lehnghal chu a ni der.
.
"Ka duh che tih ka sawinawn leh ang. A danglam bawk."
"Mihring zawng zawng inang chiah kan awm hleinem."
.
"Chutiang chiah chuan.. Ka duh ang che tih hi ka hrelawk bik lo."
.
"I ngaih ang khan ka danglam bik lo mai thei. I duh loh thleng thleng ka umzui lovang che tih i hre miah lo."
.
A chhan ka hriat lohin a nui hawk hawk a, a nui hmel tha lutuk chu ka en reng a.
.
"A nih chuan kan enchhin dawn em  niang?" ka bulah arawn thu thla a, hahdam hmel zet hian a thu awn deuh a. A mal sei thlurh leh a rim fai zet te chu  ngaihtuahna tibuai tham chu a ni chiang a ni. A thawmhnaw hak zawng zawngte chu ata tur bik liau liau a siam anih ngei hi!
.
"Enchhin kher chakna pawh ka nei chuang lo. Chuan, tunge lo kal tur chu?" ka la ti ve tang tang a. Thil dang ka sawi pen loh chuan a tha dawn lo. A sir zawngin ka en a, a ni chu dak deuhin ceiling a en vang vang a. Hetiang khawpa  mipa nalh leh mi hip tak hian min duh tih a sawi a nia. A mak ka ti lo thei lo. Hmeichhe pangngai ve mai tan chuan a tha mah mah niin ka hria.
.
"A lo kal dawn lo." chiang zet hian min rawn en a, a thu ngil nghal bawk a.
.
"Anih chuan hetah hian eng titurin nge ka kal? Ka hun min khawhral sak reng hi a dik lo hulhual."
.
"Keimah nen inhmu turin. Chiang lova awm reng hi ka duh lo bawk a."
.
"Eleazer_"
.
A hminga ka ko chu duh chiah lo niawm tak hian a lu a thing deuh a.
"Tuna min koh dan kha ka duh tehchiam lo ania."
"I hming a nia.."
.
"Engkimah min hnialna tur i hre zel hi a mak. Chuan, ka ngaihzawng i nih dawn vangin ka thil chhui turah hian i tel thei tawh lo. Tunah chuan min tanpui angai tawh lovang."
.
"Mahse Alawmi chungchang hi hriatchian ka duh alawm. Chuan, ka ngaizawng dawn che tih ka sawi miah lo."
.
"Min duh ve tho tih ka hria." a inringtawk lutuk chu vawm chawrh ka chak lutuk.
.
"Ka duh che tih ka lo inhre hauh lo mai."
.
"Tak zet..?" min rawn hnaih hret hret a, ka tawlh hla ve zel a.
.
"Tawp rawh. Ni e, i hmel chu a tha alawm!" che zui lovin min en a, a mitmeng danglam zawk chu ka hrethiam lo. Ka sawi loh tawp tur ka sawi tih erawh ka hrechiang lutuk mah mah. Ka aw ka thian kharh a, "Hmeltha ka tih zawng apiang ka  ngaizawng duh tihna a ni lo tih lo hre tawh ang che." ka tho a, ka bag ka ban chuan ka banah min lo vuan chat a. Ka rinlawk dan chiah a ni nachungin ka thaw a sak nghal talh mai.
.
"I thinlung duh dan kha i hnial kher angai hleinem!" a lang thutakin a tawng zawi khawp mai. A kutzungpui chuan ka banreka ka mar phu dat dat chu a khawih a. Min hnaih lehzual thei turin arawn ding chhuak bawk a. "I rilru ah hmun ka chang ve ngei a ni tiraw?" a kut lehlamin ka biangah min vuan a, ka ngaihtuahna ka hmang hleithei lo. Ka duh chiah em? A ni nena inngaihzawn hi ka duh reng em? Oh! Nichin mai khan ngaihzawn ka tum loh thu ka ngaihtuah zo chauh a ni lawm ni? Duhzawng tak mipa nena inngaihzawn chu enge a pawina? Ka rilru mumal loh zia chu..
.
"Hahdam rawh.." ti supin arawn kun hniam a, dimte hian ka chal ah min fawpin ka hnar ah min fawp leh a, ka maimitchhing ta ringawt. Ka hmui a min fawh chuan ka mur chuai chuai ni hian ka inhre ber. Zori te in kan kal zana min fawh dan nen khan a inang miah lo. Ka lung phu dawt dawt ri chu a hre phak ngeiin ka ring. Ka khup a zawi deuh hnawk a.
Ka inhriat hma hauhin min fawhna chu ka chhanglet a, rum hakin ka tukhum ah min vuan a a duhthawh sawt khawp mai. Keipawh ka dang chuang lo. Hetiang hian mipa fawhna vangin awlsam takin ka danglam ang tih ka ngaihtuah ngai lo. A danglam lutuk.. A kut chuan ka hnungzang ah min zut zai zai a, ka mawngbawr ah khawihin amah hnaih lehzual turin min pawthnai a, ka kut chu thununtu awm ang mai hian a awmah ka nghat a, ka kut dinglamin a tukhum samah ka khawih bawk a. Ka pha thei lo, min fawh dan vang hian ka taksa awm dan a danglam vek. 
.
Tawngkama inbe lovin kan infawp mawlh mawlh a, ka kawr chhunga arawn zen chuan harhchhuak zawkin ka hmui ka lasawn a, la duhkhawp lo tih chiang zet hian a rum hraih thung.
.
"Ka_" ka kut pakhatin ka hmai ka hup a, ka ngaihtuahna buai nuai  nuai chu min hriatthiamsak tih min hrilh tum niawm tak hian min kuah bet ta thlar a.
.
"A pawi lo." a ti sup a. A thinphu zawih zawih ri chu ngaithlain a kawngah ka kuah let a. Ka hnungah min chul hauh hauh a.
.
Heti hian kan inngaizawng ta ringawt tihna a ni mai em?? A va mak dawn ve! Awlsam mah mah min ti angem? Min lo nuihzat ru viau ang a? Ka hnial a, ka infawh tir leh tho bawk si. Min fawp ringawt pawh a ni lo, kan infawp anih kha. Kei hian ka rilru zawng zawnga feel chungin ka fawplet alawm. Hetiang hian mipa lakah awlsam takin ka awm ngai miah lo tih hi a hrethiam angem? Zawhna ka ngah lutuk.
.
"I tha em?" ahmaa a awm dan kha a inthlak vek tawh. Min ngaihtuah hmel ngawih ngawih hmelpu hian min en a, ka tha tih hriattir nan ka bu nghat a. Ka awm dan hi ka nuih a za ringawt lehnghal. Ka insum hman hmain ka nui hak a. Mak tih hmel deuh hian zawhna min zawt mitmengin min en a.
.
"Tinge?"
"Engmah.." ka nuih leh chuan nui ve sukin, ka nuih chhan keipawhin ka hriatthiam loh chu min hriatthiam sak niawm tak hian ka hmuiah rang deuha min fawh leh zauh hnu chuan min kuah ta hlu hlu a. A nuam veng veng  nia..
.
Lazarus Hotel atanga kan chhuah hnu chuan hmun dangah kal lovin kan in ah min thlah a, lo leng turin ka sawm lo. A tul lem lovin ka hria.
.
Zanah kan inbia a, ngaihzawng nei ta hluah hluah hian ka inhria. Ka rin loh dan takin Eleazer ka ngaihtuah chuan ka hlim veng veng lehnghal. Khumah muin ka inngaihtuah vung vunga ka nui leh ringawt thin. Hetiang hian ka awm dan a danglam tih chu hria se min induh khum nghal duh hial ta ve ang. Tleirawl ngaihzawng nei  ngai miah lovin a vawikhat nan ngaihzawng a nei ve a, a hlimin a zangkahi ta em em ang hi ka intehkhin deuh ber.
.
Ka mutthilh dawn chuan ka phone message tone ri chu chiang lo riai in ka hria a, ka check peih tawh lo. Tui lutukin ka muhil zui nghal bawrh bawrh a.
.
Ni hnih chhung chu kan inhmu leh ta lo. Dawrah ka kal a, kan buai leh em em a, Eleazer ngaihtuah vakna hun pawh ka nei ta lo. Kan inbe reng tho a, a ni pawh a buai ve reng tho a min rawn pan turin ka phut lem lo bawk. Naupang chhia ang maia inngaizawng tih vanga inhmuh reng tum rual pawh kan ni hleinem maw le. Ka ngaihtuah lo emaw ka intih kar hian ka lo  ngaihtuah reng zawk a nih hi.
.
"Ka bialnu hi a lo tha em?" ka phu chiang lutuk! Dawhkanah thil ziak felin ka kun ngar ngar a, a thawm ka lo hre lawk miah lo a ni. Ka awm dawmin ka en chho ha a, min lo nuih suk a. A kawr var hak chuan a tilang lian zualin ka hria.
.
"Lo thu rawh." ka ti mai a. Dawr khar a hun dawn tawh tho vangin hnathawk ho pawh an inthlak a, keipawh ka insiam tan bawk a.
.
"Ka ngai tawh che a." ka kuta arawn vawn chuan nui chungin ka en ringawt a. Ingaihzawnna chungchang ah experience ka nei lo hle tih hi a lan lutuk loh ka beisei. "Dinner ei dun ang aw?" a tih chuan hnial ka tum zet nain ka hnial leh ta lo. A bula awm ka thlahlel ve em em tho tlat.
.
Hnathawk ho an haw kim hnu chuan dawr kharin keini pawh kan chhuak a. U Seni chuan signal min la rawn pe hram. A ni hian Eleazer chanchin min zawt sek a, a duh ang erawh ka hrilh ngai lo. Inhungna chin neih a tul tih thu kha ka sawi tawhin ka hria.
.
Hmun dangah chaw eiin ka chhuak dawn tih ka nu ka hrilh hnu chuan a car dahna lam kan pan nghal a.
.
LOOP'S Restaurant kawta kan din hnu chuan car atangin kan chhuak a. Helai hmunah hian ka la kal miah lo. Mimir tana kalna chi a ni lo hrim hrim bawk a. Hetiang hmuna min hruai hi mak ka ti dawn zeta Eleazer dinhmun ka ngaihtuahin thil awm lo a ni hauh lo tih ka ngaihtuah leh ta zawk a. Kan dinhmun a inchen lo em a, ka tana thil thar hi atan chuan engmah a nih dawn loh bakah ngaia a lo neih tawh vek a ni ngei ang.
.
Min lo hmutute chuan min en duh bik riau hian ka hre leh pek a. Kan thutna tur kan thlen hma hauh pawhin Eleazer chuan amah ngaihven taka lo betu a nei nual  mai. A hmelhriatte hlir an kal khawm emaw tih mai tur a ni. Ka kal hlatsan hlau niawm tak hian ka kutah min kai a, min ngaihsakna a lantir dan pakhatah ngaiin lawm takin ka lo vuan let ve bawk a.
.
Eitur a chah chhung chuan ka lo hawi kual ru rek rek a, dawr chhung chei dan chu hmuh a hahdamin engkim mai chu sum tam tak hu a ni vek ang tih a chiang.
.
"Ni hnih liamta chhung khan enge i lo tih le?" ka thil en lai atang chuan ka mit lasawnin Eleazer chu ka en a.
"Phone ah ka hrilh tawh che kha."
.
"Tunah ka hre leh duh alawm."
"Anih nangin enge i tih?" ka tih chuan nui sukin ka kut arawn vuan a, a hmer vang  vang a.
.
"Ka tan chuan engkim hi a thar ang mai a ni. Ka ngai che." amah aia nasa hian ka ngai ang tih ka ring. Ka rilrua ka thlakhlelh dan lutuk hi ka hlauthawng zawk hial kha a nia. Ka  hmui chhunglam ka seh  zauh a. A mitmeng lang thim raih leh thutak hmel chu ka en let kalin ka nui a.
"Ke__"
"Hey, Rinmuan, tha maw?" Mawizuala leh Tetei te maw? Mak ti vak tur ka ni lo. Anni ho hi helai hmunah ni lo khawi hmun dangah nge an kal chuan ang.
.
"Tha alawm."
.
"Kan lo zawm lo mai ang che u. Table hran kan lo hauh tawh sia. Kan inhmu leh thuai ang chu." Mawizuala chuan nui sung chungin a ti leh zung zung a. Min rawn melh zuk zuk bawk. Tetei chuan engmah sawi lovin chik tak hian min en kal thung a. Rilru tha lo hmel a pu hran lo.
.
"A nih phawt u."
An kalsawn chu ka enzui a, Eleazera'n ka kut arawn hmer leh zauh chuan amah ka en leh ta chauh. Mawizuala leh Tetei awm chhung zawng pawh khan ka kut hi a thlah miah lo.
.
Hmanhmawh hauh lovin dinner kan ei dun a, a hma zawnga kan awm duna thleng ngai miah lo angin kan boruak pawh a cool raih mai. Zawhna min zawtin a ni pawh chuan inhawng takin a chanchin thenkhat a sawi ve bawk a. Ka lo rin ang mihring a ni lo tih ka hre belh zel dawn anih hmel. Mihring pangngai ni ve lo leh, pawisak nei miah lo mihring a nih bik loh zia pawh ka hre chhawm zel ang chu. Chu aia pawimawh ber zawk chu min ngaihven tak zet tih a thup hauh lo chu a ni. Hetianga inngaihsakna bak hi hmeichhiain mipa lakah duh a nei bik hleinem.
.
Dinner kan ei zawh chuan Loop's atangin kan chhuak a.
.
"Hmun danga kal i duh em?"
"A la hma tho a, kal pawh pawi chuang lo."
.
"Um, a nih chuan ka in ah movie en ila, a tlai hmain ka thlah leh dawn che nia." a tih chuan ka lo bu nghat a.
.
Kan inkar thil hi a thleng chak mah mah em tih ka hre lo a, midang ngaih dan lak pawh ka tum chuang lo. Mi pahnih kan lungruala kan inngaizawng anih chuan inhrechiang tura hun kan hman dun chu sual pawh a ni chuang lo. Nu leh pa hriatpui tlak erawh ni se.
.
A in kan thleng a, a awm tam vak lo a nih ka ring a bungraw tam zawk leh thutna ho chu puan var hian a inkhuh dulh vek mai.
Thut khawmna pindan niawm tak lamah chuan a kal a, ka zui ve mai bawk a. Puan var chu pawt hlimin leather sofa ah kan thu dun a. Kan movie en duh kan select hnuah pheikhawk phelhin inkuah rialin kan thu dun a.
.
Minute 20 vel aral hnu chuan kan movie en chu kan ngaihsak zui tawh lo. Min rawn fawh chuan ka lo chhanglet ve mai a, duhthawh zawk pawh kan awm thei tawh lo. A kut chuan zei zet hian min chul kual ruai a, amah ang thoin ka thiam dan leh ka duh danin ka lo chhang let ve zel a. Ka kawr a phelh a, ka thawmhnaw hak dang pawh avaiin a phelh ta. Hnial tur ka ni a, mahse ka hnial phal lo a ni e! A taksa khauh tang leh nalh lutuk ka hmuh a ka khawih bawk hnu chuan ka rilru leh taksa zawng zawng chu alakah ka pe ta. Ka pasal lakah chauh ka inhlan ang tia ka lo intiam thin leh ka bawhchhiat ka rin ngai miah loh dan ka vawn tlat thin kha tun mai khan ka duh thu ngeiin kei hian ka bawhchhe ta a ni!
.
Zawi zetin khum atanga thawh tumin ka che a, Eleazer chuan min kuah bet leh vat a. Engtin nge khum hi kan thlen ka ngaihtuah let thiam miah lo. A ban thahrui ngah tih hriat zet.. Ka hre zo chiah! a banah chuan ka vuan a.
.
Inbeng kangin ka mitah min en a, ka samah min chul hauh hauh bawk a.
"Ka tih palh!" a tawng ring lo.
.
A tawngkam hman ka hriat chuan ka vawt sung sung mai. 'Ka tih palh' tih thu hi hetiang tih zawh chiaha hman tur thu dik tak a ni reng em? Mi zawng zawng hian... Ni lo! Ka ngaihtuah zawm duh lo!!
.
COPAS (HEARTS)
.
CHAPTER - 7
.
Thantei_LauraSean
.
H & E
.
Tawng tumin ka ang ziau a, ka aw a chhuak thei lo. A hmel pawh ka en ngam lovin thawh ka tum a, thawmhnaw engmah ka inbel lo tih hrechhuak thar lehin rilru na lutuk hian kan puansin chuan ka intuam a. Engmah a sawi zui loh vang chuan kan thiltih zawh chiah kha keimah ang thovin a inchhir hle ang tih pawh ka ring. Ka mawl leh at em vanga kha thil kha thleng a ni. Lo dang ni ila kan tisual hauh lovang. Dem tur awm chu amah hi ni lovin keimah hi ka ni. Keimah hi!
.
A hmaa ka ngaihtuah ngai miah loh keimahah bei tlat tura duhna ka neih khan sual lian ber min tihtir ta anih hi. Chetsual pui em tur hi chuan kan la inkawp rei lo mah mah asin. Mahse, tunah chuan inchhir a sawt tawh lo!
.
"I ngaihdan ang kha a ni lo nia. Ka_" nghet zet hian min rawn kuah chawt a, ka awm ang ang chuan min thlah tawh ngai lo tur ang mai hian min kuah nghet zual sauh sauh a. Ka la tawng chhuak thei chuang lo. "Ka tan i hlut zia i ngaihtuah thiam kher lo ang." zawite a tawngin ka samah min fawp vang vang a. Tlem chuan ka awm a nuam leh ta deuh. Ka thinlunga hlauhthawnna awm erawh a reh vek chuang lo. Tuna kan awm ang chiaha min thlahlel leh min thlah thei ngai miah lo tur hian engtin nge ka siam theih tak ang? Chu chu ka ngaihtuahna a thil lo lut leh hmasa ber a ni. Min kalsan anih chuan ka khawvel hi a chhe vek dawn. Chu thil chu a thlen ka remti ngai dawn lo.
.
Min kuahna chu thlahin a kut pahnihin ka biang tawn tawnah min vuan a, amah en turin min kuai dak deuh bawk a. Engmah a sawi tawh chuang lo nain a mitmeng dam thlap ka hmuh chuan a rilru tur awm ang ka hrethiamin ka inhria. Tawng tawh lovin kan inkuah ta vang vang a.
.
"Dar engzat nge? Haw tawh ila a tha ang" ka ti sep a. Eng chena rei nge ngawi renga kan awm ka hre lo.
.
Thawmhnaw kan inbel leh hnu chuan a in chu chhuah sanin min thlah a. Kan in pana kal kal lai te chuan a hmel chu ka lo en leh veng veng thin. Ka en reng a ni tih a hriat ka duh loh vangin pawn lam kan en ta daih a. He mipa, hmeichhe tam takin a bulhnaia awm an duh em em leh an theih dan ang anga hnaih an tum thin hi ka ta a ni. Ka ta chauh. Ka neih hlu ber ka pek a ni bawk.
Ka kut arawn vuan a, a hmel en in ka nui sak a.
.
Ka nin kan thlen chuan rawn chhuk ve tawh lovin kan infawp vang vang a, inchhung ah ka luh san a. Ka room ah lutin light ka on, a motor tlan chhuak thawm ka la hriat loh vangin tukverh ka hawng a, pawn lam ka en chuan a lo la awm reng. Min hmuh chuan a nui suk a, zaizirin phone-a min lo biak tur thu min hrilh hnuah muangchangin a tlan chhuak a, a tlan liam hma chu ka thlir zui vawng vawng mai.
.
Ka inbual leh zet hnuah ka mu fel than a, ka mut erawh chhuak lo tih piah lam a ni thung. Eleazer nen kan awm dun dan kha ka ngaihtuah let a, amah ka ngaiin ka thlahlel ta hluah hluah ni berin ka inhria.
.
In a thlen thu message a min rawn hrilh hnu chuan mutthilh tumin ka mit ka chhing lui a, ka hriat loh karin ka muhil ta hlauh.
.
Nidang aia hmaah thovin inchhung a tihtur awm ang ang ka ti zung zung a, ka taksa na deuh thum chu engvang nge tih ngaihtuahin ka nui sak a! Ka zahpuiawm hle mai a. Tunah tak hian nizan ang khan hlauhthawnna ka nei ta miah lo. A tha lamah ka ngai tawp mai ange.
.
Ka nu a dam that meuh loh vangin dawr kal turin ka insiam a, karleh hi interview ka neih hun tur a lo ni der tawh. Eleazer ka tawn hnu hian ka zirlai leh ka thil tumte ka lo mangnghilh titih der a lo ni. Harsa takin hna nei ve thei turin written test ah ka tling ve tawh a, interview pawh tha taka hmachhawn ka tum ngei ang.
.
Dawr ka thlen chuan a la hma angreng. Ka hawn hmain U Seni leh Chhuana an lo thleng ve chiah bawk a. 
Kan chanpual theuh kan thawk nghal mial mial a ni ber e. Chhun lamah Eleazer hmuh ka inring viau 
nain a lo kal miah lova, phone ah pawh kan inbe chuang lo. Be chak em em pawh ni ila amah hauh tlat leh engtiklai pawha a awm dan hriat tum anga lan erawh ka duh lo bur.
Nilengin thil thleng a awm lo. Dan pangngai, ka nundan pangngai angin hun ka hmang ral a ni mai e.
.
Zanah pawh min rawn be chuang lo. Ka ngaihtuahna a luah reng vangin a that leh that loh tal hriat ka duh a, message ka thawn pawh chu a check leh chuang lova. Min kalsan a duh nghal rum rum anih ka ring. Ka thil  ngaihtuah vang chuan ka thin a phu nghal dawt dawt mai. Ka awm ang hian hmeichhe tam tak, pasal neih hmaa chesualte hi an awm ve tho angem le? Alawmi bula ka sawi thin ka tawngkam ngeite kha ka hrechhuak uar uar a. Eleazer hian a nupui atan min nei anih phawt loh chuan thlamuangin ka nunng thei dawn lo tih ka hrechiang lehzual ta. Nizan a ka thil tihsual khan engtiang taka nasa in nge nghawng ala neih zel dawn le?
.
Ka phone arawn rik chuan ka mu tawh chu ka thuchhuak nghal hlawl a. Caller ID ka hmuh chuan ka thaw huai huai mai.
.
"Aw" ka tisap a.
"I mu tawh mi?"
"Mu love.__ Vawiin i buai em?"
.
"Um, buai khawp mai. I lo tha zel em tih hriat ka duh a." a thusawi awmzia chu ka hria. A ni chuan experience angah tawh a, engkim, ka awm dan tur nen lam a hrethiam vek ang chu. "Min lo ngaihtuah em?" awki hniam raiha arawn tih chuan a aw hriat nuamti zetin khumah chuan ka mu riai riai a.
.
"Ngaihtuah lo maithei."
"Ka rilru a na dawn anih chu." a aw chu fiamthu angin a lang  miah lo lehnghal. "Ngawi lawk aw." phone chu a off a, kar awm hman lovin min lo call lehnghal a. Video calling hi ka ngaina lem lo asin. Chutih rual chuan nilenga a hmel ka hmuh tawh loh vangin ka hmu chak em em tho. Ka sam ka hui mam sawk sawk a.
Ka pick up a, tawng lovin ka phone screen a a hmel lo lang chu chiang deuhin ka en a. A ni pawh a mu ve tawh tho anih hi.
.
"Ka bulah hian lo mu la?" ka chhan dan tur hriatchak hmel zet hian a mithmul a tiche zauh a.
.
"Chutiang khawpa min ngai anih chuan min lo pan tur inia lawm."
"A ni maw?" mak tih hmel deuhin a awm vel a. Eleazer hi mi hlim thei tak leh tuna zangkhai taka a 
awm ang hian hmuh ka lo inbeisei ngai hauh lo. A mizia thutak leh nelawm loh taka a lan thin phenah 
hian hetiang mizia hi  alo nei reng a ni tih mi nazawngin an hre dawn lo tih ka chiang.
.
"Ka ngai che.." ka tih chuan thaw huaiin hahdam hmel tak hian a mu tha a. Harhchhuak thut niawm tak hian "Lo nghak lawk rawh." tih leh dawn awm lova phone off a rual a. Eng thil nge tih a tum le? Tunang hunah chuan a lo kal peih ka ring si lo. Tihtur pawimawh a nei thut aniang. Naktuk ah chuan min hmu tura alo kal lo anih pawhin ka be hmasa anga hmuh ngei tawh ka duh ang. A bula awm leh min kuahna ringawt pawh ka thlahlel. Hmeichhe maksak takah ka chhuak ngei dawn anih hi. Ka pawi sa lo. Eleazer ka bulah a awm anih chuan engkim a tha vek.
.
Ka inlet thawk a, rilru hlim veng vengin ka maimitchhing a . Ka muhil dawn tep tihin ka phone rawn ri a, ka phu deuh zawk mai. Ka phone screen ka en a, Eleazer  hming ka hmuh chuan ka thuchhuak nghal hlawl a.
.
"Tinge? I muhil tawh a nih ka ring a."
.
"I room tukverh ah khan lo dak rawh."
"Maw??" a thusawi chu ka hrechiang lutuk. Khum atangin ka zuang tho a ni ber e. Ka room tukverh hawngin ka dak dek dek a. Kan in gate pawnah a car ka hmu a, amah ka hmu lo thung.
.
"Lo chhuak rawh. Minute 2 hun i nei." Phone a off nghal a. Thu min pe tawp lo khan tawngkam pangngai deuh pawhin a sawi theih reng sia. A lehpek ah chuan thu min pe tawh lo turin ka hrilh ngei ang.
.
Muangchang lovin khum bula ka kawr dah chu lain ka room atangin ka chhuak a. Ka nu leh pate an mutthilh tawh ka ring tho nain thawm ka dim khawp mai.
.
Gate pawnah ka chhuak a, amah ka la hmu mai lo. Amah anga min biain misualin min ko chhuak a ni thei angem? Ka hlauthawng deuh thut a, ka hnunglamah tawlh hlekin inchhunga luh leh tumin ka inher a.
.
Ka hnunglam atanga min rawn kuah thut chuan ka phu chiang lutuk. Ka te thawt lo chauh a ni. Ka hriat than tawh tak rimtui hak ka hriat chuan ka inthlahdul nghal thuai a.
.
"Min tihlau hman alawm." ka ti hlak a. Ka thin erawh a rim zui hran lo. Alam hawi turin min kuai hera, min en leh vung vung hnuah nghet zet hian min kuah ta chauh a. Ka ban chu ka thunun miah lova che ang mai hian a kawngah ka kuahlet ve thuai bawk a. Ka him tih ka inhriatna chuan ka awm a tinuam  veng veng lo thei lo.
.
"Miin min hmu ange?" a ualau angreng sia, miin min hmuh chuan ngaihdan dik lo tak an nei ngei ngei ang.
"Tihian awm rih ang." min kuah nghet sauh sauhin ka samah a hmai a phum a, thawk a la tih ka hre thei.
"I rimtui chek chek hi ka ngai tawh lutuk." zawi lutuk mah mah hian a tawng a, ka lo mur ar ar thung. Ka laka nghawng aneih hi amah hian hrethiam tak ang maw?? Hrethiam lo se a tha zawk ang.
.
"Lut ila." car-ah kan thu lut a, min la vuan reng tho. Kan thu fel chiah a duhthawh zet hian min fawp  nghal a. Kan inlakhran leh meuh chuan kan thawk dan a pangngai lo dun hle tawh. Ka hmel chiang zeta en chungin ka kawr chhungah a kut arawn zen lut a, ka beisei loh dan lutuk anih vangin ka ang pham a, a kut ka vuan vat bawk a.
.
"Hetah chuan ni lo.."
"Ka hria alawm. Lo hhnai la, ka lo kuah ang che." a tih chuan ka nui sak a. Tun aia inhnaih lehzual dan vak hi a awm tawh chuang lo.
.
"Eitur ka lo keng a." a ban veilama min la kuah reng chungin a eitur ken chu a ban a.
.
"Tunang hunah engmah ka ei thei tawh hleinem. I riltam chuan nangman ei la."
.
"Thau i hlau tih min hrilh duh suh."
"Tlemte in. Dul lianpui leh biang puar lian deuh ka nih chuan.." ka hmuiah min rawn fawp leh a... He mihring zunah hian ka uai lo thei lo. A awm dan leh a chetphung te, a thiltih duh dan leh a mizia, a vai hian ka duh a, ka mamawh vek.
"Eng ang pawhin awm la nangmah i ni tho alawm." ka hmui la si reng chungin a tawng a, sawi ve tur ka hre lo. A nghawngah ka ban pahnihin ka theih tawpa nghet hian ka kuah a.A ni a thaw huai thung.
.
Eleazer hi ka hmangaih a ni! Aw, ni e. Hmangaih lo ni ila ka thianghlimna pawh kha ka hlan hauh lovang. Ka hrechiang lutuk.. Mipa dangin min khawih a ka feel ngai miah loh chu Eleazer lakah hian ka feel a ni. Ka chhungril thlengin.. Amah chauh hi ka tana mipa awm chhun, ka damchhung atan ni ngei rawh se.
.
Minute 20 vel anih ka ring, kan thut duh vang vang hnu chuan inchhung ah ka luhsan a. Kan titi lem lo. Ngawi rengin kan inkuah a, kan lung a awi em em tho anih kha.
 A tlan chhuah leh hma chu ka room tukverh atangin ka en reng leh pek a. A tlan liam hnu chuan kan inhlat ta vawng vawng hian ka hre ringawt bawk. Ka a zo vek tawh a nih hi!
.
Ni a liam bek bek a, kan inngaihzawn atang khan kar hnih a lo liam ve leh reng tawh. Eleazer hi ka laka a awm danah sawisena tur ka hre lo. Chhun lamah inhmu thei lo mah ila, zanah kan in ah arawn kal mai a, Zantin rawn kal turin hun a nei bik lo tih pawh ka hria a, kan awm dun theih hun chhung chu inthlahlel takin kan hmang mai a ni.  A thiante nen pawh kan inhmu ngai ta meuh lo. Party naa kal turin an sawm reng thin  tih ka hria a, ka bula awm a duh zawk vangin a kal a tum lo tih pawh a sawi kher ngai lovin ka hrethiam ve mai. Mi tawng tam a ni lo hrim hrim bawk a, kum lamah rual pha lo hle mah ila kan inrem thlap.
.
Alawmi chungchang ka ngaihtuah chhuak fo a, a la chhui zel em tih ka zawh apiangin engmah a sawi tha duh lo thung a. Inrawlh turin min duh lo tak tak tih ka hrechiang thawkhat tawh a ka zawt zui duh tawh lo. Alawmi chungah khan thil dik lo a lo thleng ngei anih chuan Eleazer hian min hrilh dawn tho tih ka ring nghet hmiah a ni. Tlai lama kan inbiak khan zanin hi a lo kal hman dawn loh thu min hrilh a,  thil pawimawh buaipui tur a neih vangin lo kal turin ka ngen lui ngam lo ve bawk a ni.
.   
Kan in pawn lama thawm ri hluai ka hriat rualin ka piah lawka thu ka nu chu ka en phawk hra a. Ka nu pawh keimah ang tho. Inhrilh chawp pawh ngai lovin pawna thil thleng en tum chuan kawngka kan pan nghal rawk rawk a.
.
Police lo awm ka hmuh chuan eng thil nge thleng tih hriat ka chakna chu a nasa leh zual sauh bawk. Thawm a rawn awm leh a, Robert-a te in atanga lo chhuak a ni. Eng thil nge maw thleng le?
.
An kawngkapui chu a ri thuai thuai a, Police pahnih hian Robert an rawn hruai chhuak a. A hmela thinrimna nasa lutuklang chu ka lo hrethiam thuai bawk a. Ngaih that lohna in ka  khat nghal vek. Alawmi chungchang nena inzawmna nei thil a awm ngei ngei ang.
Kan bulhnai an lo thlen chuan kalna tur kawng kan lo kian a. An kalna kan dal pawh a ni chiah lo, an zavaia an hmel landan kha a tha lo em a, chuvanga kawngsir pan kan ni zawk mah. Kan zawn an rawn thlen chuan Robert chu a ding chawt a. Ka thin a phu nghal dawt dawt mai. Chiang lutuk a min enin a insehruh bawk a.
.
"Nangmah vek hi ini tiraw?" a insehchilh nasa lutuk a, a tawng tha hleithei lo. A khur deuh dawt dawt bawkin ka hria. A ngaihna hre lo zet hian ka en a, ka nu pawh chuti bawk. Ka nu chuan enge thil awmzia ti niawm tak hian min rawn melh zui zat bawk a. Engmah ka hre lo tih lantir nan ka lu ka thing a, Robert chu kha zet hian a lo nui hawk thung.
.
"I la hre khawp ang. Ka haw hle che tih lo inhre rawh." a tawng chu a la sehchilh nawk nawk tho.
.
"Kalpui r'u" Police pakhat arawn tawng chuan an kalsawn pui a. Robert chuan min la rawn enzui tak tawk tawk a.
.
Ka nu nen inchhung ah kan lut a, Robert awm dan khan ka awm a tinuam lo lutuk tak zet a ni. An man chhan kha eng thil nge naih ka hre lo chungin rin dan chu ka nei ngei a, mah se, kei min mawhpuh turin eng thil nge hriat a neih?
.
"Bawihte, Robert thusawi kha enge maw a awmzia le? A mak ka ti emai a.."
.
"Ka hre bik lo. Tunhnai teah phei hi chuan kan inhmu khat lutuk." tiin ka thaw halh a. Ka ngaihtuahna chu kan inchhung ah hian a awm lo chiang hle.
.
Ngaihtuah chhuah ka nei. Tunah ngei hian Eleazer ka biak angai a ni.
"Nu, ka room-ah ka chho a nia. Thil awmzia ka hriat chuan ka hrilh vat ang che." ka tih chuan ka nu chu min ngaihtuah hmel takin a bu ban khawp mai.
.
Ka room-ah tlan lutin Eleazer ka call a,a pick up thei miah lo lehnghal. A buai laklawk a niang. Minute 10 vel ka nghak a, ka call leh pawh chuan a la pick up thei chuang lo. A in ah ka va kal mai dawn em niang? Zan ala rei chuang lova ka nu pawn a phal maiin ka ring. Ka room atang chuan chhuah nghal ka tum zet a, a lo pick up tawh tak mialin tih thu ah Eleazer chu ka call leh a. A ring quit leh dawn emaw ka ti hman_ arawn pick up ta hlauh..
.
"Eleazer, thil pawimawh lutuk.."
.
"Sawmzuala zawk, Eleazer hian a phone a kalsan anih hi. Nakin ah lo call leh mai ta che aw, a rei lovang."
.
"U Sawmzual,keimah_Hmingtei_" U Sawmzuala hnenah hian engmah ka sawi thei lo. "Ah_aw, nakin ah ka lo call leh mai ang. Khawiah nge in awm hrim hrim a?"
.
"A in ah. Hei, thian ho kan inhmukhawm a. Tinge i biak duh teh tlat a? Phone number nei khawpin in inhria tih pawh ka lo hre lova." a nui a, thil mawi lo leh sawi awm loh sawi pawh a ni lova Eleazer nen kan inkar thu hrilh lovin ka nui ve mai a. Inkawm mah se Eleazer hian a la hrilh duh lo a ni ngei ang. Ka lo sawi thawt thawt nachhan tur a awm hek lo.
.
"Thil pawimawh han zawh lawk tur ka nei a. A nih phawt aw."
.
"A pawimawh viau chuan lo kal la. A in i hria ang chu tiraw?"
"Hria e. Aa, naktuk ah.."
.
"A sumdawnna thil anih phei chuan.."
.
"A nih phawt le. Ka hmanhmawh deuh a." min chhan leh hmain phone ka off a. A in a va kal chilh em nan chuan.. Ni lo, a pawimawh lutuk. A hrim hrimin zanin hian a hna vanga buai tur niin a insawi a, a thiante nen an inhmukhawm lehsi a maw?
.
Awm hle hle thei lovin ka vei kual sek a. Ka pa pawh a committee na atangin a lo haw na a rei tawh a, ka nu nen an mu diam tawh. An muhil tawh hial ang. Sana ka en a 12 a pel tawh.
.
Che over min ti anih pawhin a ti ti chuan lo ti mai rawh se. Zanin hian Eleazer ka hmuh ngei ngei angai anih hi. A thiante pawn an haw san tawh ka ring.
.
Ka kawrlum lain hmanhmawh zetin in ka chhuah san a, Eleazer in panin ka scooty chu chak angreng deuhin ka khalh a. Zan dang ang chu ni se tunang hunah hian ka chhuak hauh lovang tih ka chiang. Mahse, Robert min en dan atang khan thil dik lo tak a awm ngei ang tih ka chian em vang leh ka mut theih dawn chuan loh vangin ka kal chhuak mai lo thei lo a ni.
.
"Eleazer in ka thlen chuan a lo reh thiap a, a awm ngei tih chian nan leh a thiante awm an la awm em tih chian turin ka call leh a, a ring quit leh tho. Pawn lam atanga a lan danin a thim thap tawh bawk si. Kawngka kik tumin ka kut ka tin zet a ka tim leh deuh rih.
.
Helai chen chen ka kal tawh' tia inngaihtuah leh in kawngka chu ka kik a, inchhung lam thawm a la awm chuang lo. Kawngka chu ka nem deuh a, ka beisei loh zetin chhung lamah a lo inkalh lo. Ka lut ve tawp a, ka thusawi a hriat hunah hetia ka lut tawp hi awm a ti  ve tho ang.
.
"Eleazer., i awm em?" inchhung eng chu a dul ruih a, a room.. ah..ahmaa kan awm dun tawhna kha! ka tim deuh..
.
Hmun dang zawng thim deuh siin a room chu a eng pup tih ka hmuh chuan ka nui sak a. A la meng tihna a ni. Pawnlam atang khan a lang miah lo.
.
A room kawngka chu ka hawng a, an rawn hawi rual thawt a. Nia, 'AN' tia sawi angai. Amah hmachhawn zawngin a malchungah Loretta a lo thu a, thawmhnaw an inbel mumal lova an pahnih chiahin he pindan ah hian an awm bawk! Helaia ka kal chhan leh sawitur ka neih chu sawi ber tur hre lovin ka thluak ah an darh nuai nuai mai.
.
"What the fu*k! Enge i rawn tih dawn a?" Loretta chu a vin kher mai. Ka lei chu ka dangah a bet a niang, ka tawng thei lo. Ka ham haih lutuk. Eleazer chuan muangchangin Loretta chu a malchung atangin a chhuktir a.
.
"Enge i rawn tih dawn?" min rawn hmachhawn a, a hmel atangin hetianga an lo awm lai ka hmu hi a lawm nge a thinrim tih a hria theih loh. A hmel lan dan chu a blank vek, a rilru tur awm ang ka hre thei lo. Ka en tlawk tlawk a. ka la tawng thei chuang lo. Tawng ka tum a, min lo hmutu chuan ka awr puar awk awk chu a hmu thei ngei ang. Ka hriat dan a nia, ka nghawngah hian a inhnawh nasa lutuk a ni. Engmah ka sawichhuak thei lo.
.
"Heihi.." thawk ka la kawk a.
"Heihi.. Enge?" a ti vawt ruih a, tah chiah chuan a ni helai hmuna ka kal hi a lawm lo tih ka hriat tak!
A ngaihzawng, hmanni lawka a mutpui hmeichhia hi hetiang hian tunah min be lehsi maw?
.
"I sawi tum chu eng pawh ni se, hriat ka chak lo."
.
"Ka__"
.
"Tawng a harsa anih kha tawng tum lo mai rawh." a ti leh hmiah a. A awm dan hi a mak in rapthlak ka ti lutuk.
.
"Khawngaihthlak hian a..!" min nuihsawh tih hriat zet hian Loretta chu a lo nui sawng a. Thawmhnaw hak leh pawh a tum chuang lo a niang. Bra a ha lova, a dang chu a inbel leh inbel loh ka en duh lo. Ka hre lo. A zah loh ahnu..!
.
"I lo chhinchhiah miah lo tih ka hre mai. Nimin kha kan inremsiam atanga thla khatna chiah a nia. Tunah chuan ka zalen tawh alawm. I lo hre miah lo ani maw?" Eleazer hmel chu ka en ngam tawh lo.
.
Ka mit a thim mup a. A ni thei lo. He mipa, ka hmangaih, Eleazer hian ka thianghlimna kha infiam nan a lo hmang reng anih chu! Ka taksa ka insangmar vek a. Nikhaw hre lova ka tlu anih chuan engtin nge min tih zui ang? Ka ngaihtuah ngam lo. Ka inrin hmain ka mittui a baw zawih a. Ka mittui tla chu a hmuh loh nan rang lutuk in ka inher nghal vat a. Ka rang tawk em tih pawh ka hre chuang lo.
.
"In thiltih lai kha tizawm leh rawh u. Ka kalsan ang che u." engtin nge hetiang hian ka tawng chhuah theih zawk? Ka aw pawh ka rin aiin a ri a pangngai. Ka taksa khur nasa lutuk chu inthunun tum chungin ka kalsawn a, ka kal chak thei der lo. Cher khawng tlat ang mai hian ka awm.
.
An thawm ka hre zui lova, muangchangin, ka theih tawkkk a chakin ka kal a. Ka hriat chinah chak taka tlan theih ka la chak ber tum a ni chiang khawp mai. Kawngka chu dim tein ka khar a, chumi rual chuan ka khawvel hi a tawp ta! tih ka ngaihtuahna ah chiang lutuk hian a lo lang zawk a. Ka zawi nghal hnawk.
.
Inti chak luiin ka tha neih zawng zawng ka sawm khawm a, ka scooty chahbi ka vuah sual nawk nawk hnu chuan ka tlan chhuak thei ta hram. Ka rilru a mumal lova, kawng thlangah chuan ka tlan liam mai dawn em ni? A ni thei lo.. Ka tlan kawi nawk nawk a, vawihnih ka tluk hnu chuan ka ngaihtuahna fim deuh hun nghakin kawng sirah ka ding a. Ka ngaihtuahna a fim tak tak chuang lo. Scooty chu tinung lehin ka tlan chhuak leh a, ahma ai chuan a zia ta deuh.
.
Engtin tin emaw kan in ka inkhalh thleng a, ka nu leh pate tih harh hlau takin inchhung ah ka lut a. Ka room ka thlen chuan bathroom-ah ka lut a tap thei si lovin ka mittui a tla zawih zawih a.
.
END OF FLASHBACK
COPAS (HEARTS)
.
CHAPTER - 8
.
Thantei_LauraSean
.
H & E
.
Ka phone chu ka en ngawt ngawt a, ka awm dan danglam ta ah hian puh tur dang ka hre tawh lo. Ka theih tawp ka chhuah a, Eleazer hian ka lakah engmah a sawi duh dawn lo tih hre chungin ka be leh thin a. Ka chhungril takah hian beiseina nung mak tak ka neih reng hi a chhan leh vang ka ngaihtuah chhuak zo lo.
.
Zana Loretta nen a pindana ka hmuh hnu khan thu chiang zawk hriat duhin vawi hnih zet chu a office-ah ka kal chilh a, a landana hmeichhe nasa tak, a hnawl chung pawha amah hnaih talh duhtu hmeichhiate zingah ka tel ve ta reng mai tih ka inhre chung pawh hian ka bei talh talh lo thei lo a ni. Engvang nge tiin min zawt maw? Ka thianghlimna ka hlan mipa in min kalsan tih hi ngaihtuah ka duh lova, ka thianghlimna min laksaktu chuan ka damchhung in min kalsan tur a ni lo. Hmeichhe derdep leh dawm ngai ka nih hriain ka hmangaih vanga ka thilpek chu a ngaihlu em em tur a ni dawn lovem ni? Ka chhungrila hlauhthawnna ka neihte hi 'I ngaihtuahna hah mai mai anih kha, hlauthawng suh. Ka kalsan ngai lovang che.' tiin min hnem tur a ni. Ka thil neih hlu ber latu hian min ngaihlu miah lovang maw? A aia thil hlu pek tur ka nei hauh hleinem. Ka nei let leh ngei ngei tur a ni. Engpawh ka ti mai ang.
.
Ka va kal ni khatna ah chuan a secretary anga a neih, amah hmutu tur apiangin an appointment letter an pek luh zelna nu chuan min lo dang chat a.
"I appointment letter ka hmuh phawt loh chuan i lut thei lo." ner deuh nang hian min en a, hetiang khawpa tuihnai lo tak ang maia min entu hi tumah an la awm ngai lo. Ka la na khawp mai. Ka tan hian hmuh a tul em a, mawilo takin ka awm thei lo tih ngaihtuah chungin "Ka hming i sawi chuan min ko lut nghal dawn tho a, Hmingtei ka nia." tiin ka nuih lui sang a, ka thusawi chu a awih loh zia a mitmeng ah a langchiang nghal vek.
.
"Nangmah ang hi vawi tam tak an lo kal tawh thin alawm. Pu hian a ning tehmai a nia. In mawl hi ka ti.. Hetianga mihur ang maia mipa umzui hi zak ve deuh teh u, pasal te hmaah ni lo in inphelh ruak mai zel a.." min ti chiam a. A thusawi duh dan leh tawngkam chuan min tina teh e. Mahse, haw ngam tur ka ni lo. A duh phawt chuan  mihur tiin min sawi thei ang chu. Eleazer hi ka pasal a ni lova, pasal neih hmaa mipa mutpuitu chu mi tenawm ka ni reng a ni. Pathian mit hmuha sual lian ber a ni bawk. Eleazer laka ka inpek chhan 'hmangaihna' tih thumal hian min chhanhim thei chuang lo. Ka duh reng vanga mutpui ka nihna vang pawhin engti pawhin min ko se haw ngam tur ka la ni chuang lo. Insiamthat nan erawh ka hmang thei ang chu. Eleazer khan ka duh lo chung min vau beta min mutpui chu ni se a dan a dang daih. Tihluihna hmang min mutpui chu ni se la hetianga min koh vang hian ka sual let ngei bawk ang.
.
"Khawngaihin min hrilh sak rawh." ka ti ve tang tang a. Eleazer hmuh tuma pawnlama thu ho chu kan tawng an hriat phak leh phak loh hriat tumin ka melh zauh a. An hre pha lo a nih hmel. "Khawngaihin..?"
.
A lu thing mut mut chungin min en kul a, "Ka fanu rualpui inih vang chauhin ka hrilh ang. Lut rawh." a ti hmuk hmuk a. Hmaichhana tawngkam nalh lo taka min koh vang khan tlem chuan nuam lo a ti ve deuh a ni mahna le.
.
Intercom a Eleazer a biak hnu chuan a pindan ah chuan ka pen lut thuai a. A ni chu dawhkanah paper inchhawp hnawk nuaiin eng emaw hi a lo ziak mawlh mawlh a. Ka lut chu min lo en lo hrim hrim.
Ka zah theih lohna zawng zawng sawm khawmin thu tura min hrilh nghak lovin dawhkan bula chair ah chuan ka thu a.
.
"Eleazer.." min chhan hun nghakin ka ngawi dat a, ka hmel hi hmuh peih loh tur khawp em a chhia a ni bik lo tih ka hre chungin Eleazer tan hi chuan en peih loh tur khawp a hmuh ninawm a lo ni ngei a niang, arawn hawichhuak lo hrim hrim.
.
"Ka hun min khawhral sak turin lo kal nawn tawh suh." a ti hmuk a. Hmangaih taka ka lo kuah mipa hi tunah chuan ka tan mikhual ang mai a ni tawh.
.
"Awlsam takin ka kalsan dawn lo che." ka ti nghat a.
Min chhang mai lovin a rawn hawichhuak ve ta nge nge a. A pen ken lai chu a dahthla a. A hmel lan dan chu ka la hmuh ngai loh ang a ni.
.
"I tum emaw tum lo emaw hnawl inih chuan min kalsan chu angai si ang!" a tawngkam ka hriat chuan ka tum vang ni miah lo hian ka hrawk atangin ri arawn chhuak a, ka tap pawh a ni chiah lo. Ka kawchhung ril ber thleng hian min fan rawih rawih tih hian a sawifiah chiah em ka hre lo.
.
"Eleazer.. Ka_Ka__ Ka engkim ka hlan che kha.." za lo lutuk hian a nui suk a.
.
"A tawk e, sawitur ka nei lo. I chhuak thei ang."
.
Min ngaihsak zui miah lo hian dawhkan a paper chu lain a chhiar a. A nih ngei dawn hi. Atan chuan engmah ka ni lo. Ka mit ngeia ka hmuh hnu hian a chiang lehzual a, mahse ka beidawng dawn chuang lo!
.
"Ka bansan chuang lovang che. Bul kan tan dawn khan i duh loh chen chen ka umzui lovang che tih i hrelawk lo tih ka sawi lawk tawh kha."
.
"Min chhuahsan rawh.." a tichang bawng a. Min en dan atang chuan engmah sawi zui loh a fuh zawk ang tih ka hrethiam. Ka thutna atang chuan thovin ngawi rengin ka chhuahsan a.
.
A secretary ka hmachhawn hmain thawk ka la a, ka thinlung natna hi ka hmelah a lan chhuah ka duh lo. Min rawn hmuh chuan ka beisei loh dan takin a lo nui suk a.
.
"In inbe thei maw? Pindana i pen luh ruala thehchhuah i ni lo chu amak hle mai." a lo ti duh lek a. A hmelah chuan ka thlen tirha mi nikhua lo tak anga min en ang khan min en tawh lo thung.
.
"Min luhtir vangin ka lawm e. Ka kal phawt ange." ka ti sap a.
.
"A tha e."
.
Ka dawta lut tur arawn kal a, keipawh ka kal chhuak ve nghal bawk. Ka thinlung rit lutuk chu ka tuar zo lo mai dawnin ka hria. In ah haw nghal lovin ke in ka kal kual a, ka hah hnep hnu chuan muangchangin in lam ka pan leh ta chauh a.
.
.
In ah pawh ka nungchang pangngai ka hloh tih ka nu'n a hrethiam a, engmah ka sawi loh vangin eng thil nge thleng tih min zawt lo thung. Zanah ka muhil thei lova, ka tap thei hek lo. Ka ngaihtuahna ka kawm vak vak a. Nau pai ila tuna Eleazer awm dan hi a danglam angem tih ka ngaihtuah chuan ka harhchhuak zawk mai.
.
Ka hna turah ka interview hun a thleng a, ka va hmachhawn ve mai bawk a. Thil harsa em em leh ka hriat loh thil engmah min zawt lo. Ahmaa duhthusam ka neih ve thinte kha chu a thamral vek tawh a, tihchak ber pawh ka nei tawh lo.
.
Ni thum aral leh hnuah Eleazer hmu turin ka kal leh a. Mahni inngaihhlutna nei lo lutuk tia min dem duh anih pawhin pawi ka ti therte lo. Ka duh tak nei tur chuan ka theihtawpa ka beih a thiang alawm! Inlaichinna ah hian chuti chuan atha tia mi sawi nazawng hi zawm theih a ni lova, chhungrila ka ngaihtuahna luahtu leh ka tih duh hi ka ti phawt a nih loh chuan dam ni ka nei dawn lo tih hi ka ngaih dan a ni. Ngaihdan tha tak erawh a ni lem lo maithei bawk. Mahse, heihi ka nun a ni a, engpawh tawk ila thutlukna siamtu tur chu keimah tho ka ni. Chuvang chuan engpawh tawk dawn ila tha ka tih angin ka kal phawt ang. Tlawm ka intih vang ringawt hian ka bansan thei lo a ni. Min hrethiam thei dawn chuang lova, chuvang chuan min lo judge dawn anih pawhin ka tawn ang tawng ve tawh i nih loh chuan min judge fuh chuang lovang.
.
A vawihnihna atan Eleazer office ka thlen chuan ka rin loh takin a secretary chuan min lo nuih sang a, thil hriat a nei pawh a ni maithei.
.
"Appointment letter nei lo bawkin i lo kal lehpek em?" min tih chuan ka nui lui sak a. Tawngkamin ka chhang lo. "Luhtir tawh lo tur che a order ka hmuh loh vangin ka luhtir thei ang che." a thusawi chuan beiseina min neihtir a, mahse a daih rei lo kher mai.
.
Eleazer office ka pen luh rualin amah chauhin a awmlo tih ka hre nghal a, Loretta hmel ka hmuh chuan ka ding a, ka va pawh mai ngam chiah lo a ni. Ka dawihzep mange!
Loretta nen an awm dun vang hi ani ngei ang, ka luh min phalsak mai nachhan kha. Ka tan beisei tur a awm lo tih ka hriatchian lehzual theih nan te pawh a ni thei ang chu.
.
"Eng thil nge ka hmuh hi?" Loretta chu a thutna atanga thovin Eleazer awmna lamah a kal a, min hmuhchian zawk duh niawm tak hian a kut kuangkuah at in min hmachhawn a.
.
Tunah hian ka huaisen ve angai tih ka hria. Ka dinhmun hi duhawm lo hle mahse ka hmachhawn ngei ang.
.
"Eleazer hi biak ka duh a." Loretta chu ka en a. Zam miah lo anga lang turin ka insangmar nasa lutuk. "Kan inbiakna hi midang hriat atan i duh kher lovang." tiin Eleazer chu ka en leh a. Min en ngur a, ka keler atanga ka chhip thlengin hmaih palh neih hlau niawm tak hian min en bawk. Oh! Amah tina thei turin hmanrua ka keng em tih hriat a duh  pawh a ni mahna.. He mihring nunrawng hian a taksa hmelhem a duh hauh lo tak ang chu. Ka ngaihtuah na vang chuan ka nui sak a. Thawlehkhata ka mood inthlak thut thut thin hi engvang nge ka hre bik lo. Tunah tak hian ka zam miah lo bawk.
.
"Min lo va chhuahsan mai dawn em niang?" Loretta chu ka en a, awm dan tur hre mai lo niawm tak hian Eleazer nen chuan min entawn zak zak a. Ka hmuh tawh chinah mahni inringtawk lo a ka hmuh vawikhatna a ni hial ta ve ang. Huaisen tak anga ka lan hian mi thenkhat chu ka chhungril hmuhtir lovin mi huaisen angin ka lo lang thei reng a nih hi.
.
"Lo va chhuak rawh." Loretta chu a en zawk a. Kal chhuak zawk anih a inbeisei lo aniang chu a ang vei phawm a. A kal chhuah hma chuan Eleazer hmai zawnah a kun hniam a, a fawp dawn ni a ka hriat vangin ka en ngam lo. Ka kawr zut mar niawm tak hian ka kun daih a. Ka thinlung hi na leh tur chuang a awm tawh lo nia ka hriat vangin an infawp lai hmuh hi ka mamawh  lo hulhual.  Ka hawi chhuah leh chuan Loretta chuan min kal pel tawh. Ka huaisenna sawmkhawm tha lehin Eleazer chu ka hmachhawn a, ka sawitur hian engtiang takin nge a thawn dawn ka hre chak khawp mai.
.
"I lo dam tha em?" ka ti sap a. Ka thinlung a  tina em em chung hian duat takin min kuah leh se tih ka va'n chak em! Amah ka ngaih zia leh ka thlakhlelh zia ka aw a langchhuak chu a hre ngei ang. Mi chaklo nia inhre ngai miah lo hi tunah chuan ka chaklo em em tih ka inhria a, ka pawm lo thei hek lo. Ka thiltih zawng zawng leh ka tlawmna zawng zawng hian awmzia a la nei ngei  ang. Hetiang thil zawng zawng ka tih chhan hi amah ka hmangaih vang chauh a ni bawk tih hi a hre lo thei lovang.
.
"Eng thil nge ni leh ta?"
.
"Eleazer, ka ngai che." ka tawng chu a ri chang chang a ni. Amah ka en chuan thawk a la tih ka hria a, a mit a chhing deuh bawk.
.
"Chutiang ringawt ngaithla tur chuan hun ka nei lo."
.
"Tak zetin maw? Loretta khan i bulah hian enge a tih si?"
"I lo buaina tur a awm lo."
.
"Tunah hian nau pai ta ila, i hmeichhe kawp chungchang ah sawi theih ka nei a ngem?"
.
A in thunun nasa viau tih a bek tang pawng talh talh atang chuan ka hre thei a, a mitmeng erawh a ngai reng. A lang vawt raih tho.
.
"Nei chuang lo. Ka hnawl tawh che tih inhre reng rawh." a tawng ring bik lo. Ka beiseina neih thin kha mei alh de ve ve vur tui a leih hlum ang mai a ni ta.

A hmel chu en mai ngam tawh lovin ka malchunga ka kut ka dah chu ka khawih nauh nauh a, sawi leh mai tur pawh ka hre tawh lo. Eng thu nge ka sawi leh ang tih ka ngaihtuah a, ka tum dan ni hauh lo hian ka nui hul hak a. Hma lamah awn deuhin hnunglamah ka awn leh a, ka la kun reng tho. Ka rilru ah eng thu mah a awm lo. Sawitur ka hriat tawh loh chuan helai hmunah hian eng thil nge tihtur ka la neih? Engmah!
.
Ka thutna sir a ka dah ka bag chu la in nghet lutuk mah mah hian ka hum a, ka thutna atanga thovin ka inher a, a office atang chuan ngawi rengin ka kal chhuak a. Ka chhuah rualin Loretta chu a lut lehnghal hmiah bawk. Tihpalh ni hauh lo hian min su sawk a, chhanglet tur emaw sual let tur emaw pawhin ka tha ka seng thei lova, ka ngaihtuahna ka seng hah peih tawh hek lo. Lan mawi tuma nuih luih pawh ka thei ta hauh lo mai.
.
Eleazer secretary'n ka hmel min hmuh chuan ngaih tha chiah lo hmel pu hian min en a.
.
"Office number hi min pe thei angem? Ka rawn kal tawh loh takin."
"Pe thei e." a ti tha ve mai a. Card min pek ka lak hnu chuan amah pawh be tawh chuang lovin pawnah ka chhuak nghal vang vang a.
.
Ni hnih dang ral leh chhung chu office pawh ka be ta chuang lo. Chak taka awm turin ka inhrilh mawlh mawlh a, tunah chuan office-a va kal leh tumna ka nei tawh lo. Engtik ni ah emaw chuan Eleazer hian amah ka hmangaih vang chauha va kal a, tlawm taka ka hmu hram hram ka ni tih a la hre chhuak mahna. Hre chhuak lo tawp pawh nise enge pawi! A changin ka thinrim em em a, a chang leh khawhar ngawih ngawihin ka tap bawk a.
Ni hnih aral hnu atanga vawiin thleng hian Eleazer that leh that loh hriat ka duh vangin a secretary chu ka va be ta zauh zauh a. A that thu ka hriat hian ka thaw huai thin.
.
Vanneihthlak lutuk in ka interview naah khan ka tling ve hlauh a, nitin hna a kal angai ta hian ka ngaihtuahna thenkhat a la peng ta hlauh zawk a.
Muang lutukin hun a ral ve bek bek a, thla khat chuang zet chu Eleazer hmel ka hmu tawh lo chung hian ka ngaihtuahna erawh a luah reng. Hun herlet leh theih a engkim siam that leh ka chak thin zia hi chu sawi ngaiah pawh ka ruat tawh lo. Ka dam chhunga ka theihnghilh tawh ngai loh tur ka tawn vang khan ka thinlung chhungah hian hmun a chang reng tawh dawn tih hi ka hrechiang em em a, a chanchin dang hriat pawh ka duh chuang lo. A dam tha em tih chauh ka hriat hi a tawk. Hmeichhe dang nen an chanchin ka hria anih chuan tuar zo lovin thil atthlak tak ka ti leh lovang tih keimah ngei pawh hian ka chiang ngam lo tlat a ni
Mahse maw, zawimuangin ka ngaih dan thenkhat hi ka thlak a tul dawn. Ka hmangaih, a hun hmaa ka thianghlimna ka hlan ngei mihring hian engatan mah min ti tawh lo. Atan chuan ka tana thil hlu ber kha a infiamna hmanrua pakhat ve mai a lo ni a. 'Inchhirin ban a chen' tih thu hi ka tan chuan ka nep lutuk. A hun hmaa sex ka hman vang khan ka inchhirna hian ka ban chauh a chen lo, ka ban a pel a, van a tawng hial anih hi. Tawp chin a awm dawn lo. Hmeichhia kum tling lo leh mi tam tak ka tih ang tisual ve zingah harsatna tawk an tam tih ka hria a, a then chuan an nunna hial an la tih pawh ka hria. Inchhir vawng vawng hian engmah a siam tha thei tawh si lo. Ka thil tihsual vang hian midang tanpuitu tal ka ni thei mahna le.  Tisual ve lo tura hrilh pawh ka tih ngei tur a ni bawk ang.
.
“Bawihte, lo chhuk teh, inleng I nei a nia..”
.
Ka nu min ko ri ka hriat chuan ka ngaihtuahna atanga harhin ka tho chhuak a. Tun ang hunah tunge maw lo leng tur awm le?
.
Inhnuai ka thlen thlak chuan ka beisei loh lutuk ka hmu nghal pang mai.
.
"Nang maw?"
Robert hmel chu a tla kuam mai. Police-in an lak hnu khan Eleazer nen kan chungchang vangin ka lo  ngaihven zui llova, ka ngaihtuahna a lo luah tawh lo reng reng a ni. Khami ni khan min huat hmel takin min kalsan a nih kha.
"Enge i rawn tih dawn?" ka ti leh a. A hma anga amah ngaina tak leh pawh tak anga awm a theih loh. Engvanga lo kal nge anih pawh a la sawi lo.
.
"Biak che ka duh a. Hmuh i har hle mai." a ti churh a. Min huat hmel taka a awm lo pawh hi ka tan chuan a mak vek tawh.
.
"Eng thil nge a?" Ka tih chuan ka nu leh pa chu a en a, sawi mai hreh hmel a pu bawk a.
.
"Thil hriat duh ka nei a."
.
"Sawi la, eng thil nge a?" ka tinawn leh a. Ka nu leh pa chuan Robert awm dan chu hrethiam in an room ah min luh san a, Robert chu a thaw huai tih a hmel atangin ka hre mai. Keipawh ka thaw huai ve tho. Eleazer nen kan chungchang, kan thiltih te kha hriain a sawichhuak anih vaih chuan khaw eng ka hmu ngam hauh lovang.
.
"Thlalak chungchang kha a nia.. Ka laptop atang khan i la ngei em?"
Thu dik ka hrilh ngei atulin ka hria. Tunah hian thu chiang engmah ka hre lo a, thudik ka sawi vanga tuar tur a awm anih pawhin ka tuar  ve mai ang.
.
"La ngei e." ka tih chuan a thaw hawk a.
.
"Chuan..? Engkim min hrilh theih chuan ka lawm viau ang."
.
"Police-in an lak nachhan che kha hetiang thil vang hi a ni em?"
A lu thingin a nui hul hak a.
"Ni lo, thildang daih a ni. Thlalak chu engtin nge ni zel?"
.
"Ka lak kha ka pendrive ah khan a awm a, ka pendrive chawpin a bo daih a ni. Tun thlengin ka hmu leh tawh lo." thu dik ka sawi tih a hriat ngei theih nan a mitah ka en kal a, a bu nghat nghat a.
.
"Thudik min hrilh ang tih ka hria. Ka lawm e. Ka hawsan phawt ang che." thovin a kal nghal vut a, thil dang han zawh zui na tur hun pawh min pe lo.
.
Keimah chauhin tv ka en ta ran a. Mumal taka tv ka en hnuhnun ber pawh a rei tawh. Ka show duh ber ka en zawh hnu chuan channel ka hmet kual a. Ka en duh zawng a awm tawh loh vang chuan tv off in ka room-ah ka chho a. Awlsam takin ka muhil lehpek lovang.
.
Ka phone chu ka hmetkual ka hmetkual a, facebook group lar zet pakhatah lutin an thil post ka phone screen-a lo lang hmasa ber ka hmuh chuan ka phu chiang lutuk.
*INPHATSANNA TENAWM!*
Ka awih thei lo! Engtin nge hetiang thil hi a thlen theih..?     
.
COPAS (HEARTS)
.
CHAPTER - 9
.
Thantei_LauraSean
.
H & E
.
"Tabithi!" ka phun sep a, ka mit la sawn miah lovin khumah chuan ka thu chhuak a. Eng thil nge ni ngai? A mak lutuk mah mah anih hi.
.
Thalak chu mipa a hmel lang lo leh Tabithi hmel chiang taka a lanna a ni a, saruak deuh thawin an awm lehnghal! Hetiang thil i Tabithi hian a tithei dawn em ni?
.
Ka phone contact list ka scroll thla zung zung a, Tabithi number ah tawp chatin ka call nghal a. Post la hmuh kha darkar khat pawh la ral lo a mi a ni a, Tabi hian a hre tawh em tih pawh ka hre lo. A lo hre tawh anih chuan biak pawh theih lohin a phone a off tawh zawk hial mai thei.
.
A ring ral ral a, a pick up dawn lo emaw ka tih hnuah arawn pick up hlawl mai. Ka thaw huai ringawt.
.
"Post hi i hmu em?"
.
"Hmu e. Tihtheih ka nei lo." arawn ti zuai raih a.
"In zawh awm loh ka zawt che anih chuan min hrethiam la, ka  ngaih dan hi a dikin ka ring. He thil hi i ti miah lovang. I ti em?" ka ti nawk nawk a. Amah a den nat tluk em chuan min deng na lo maithei, keipawh ka chiai deuh thaw anih chuan amah phei chu a rilru a buai nasa dawn lutuk.
.
"Pathian in engkim a hria. Tihtheih engmah ka nei lo. Ka ngaihtuahna pawh ka hmang thei lo. U Sawmzuala pawh a thinrim lutuk. He thil titu hi tupawh lo ni se, enge hlawkna tur a neih?" a insut hlawp a. Ka va lainat tehlul em!
.
"Ka lo kal ang aw.." ka tita ngawt a. Eng thil nge tihsak neih ka neih ka hrelo nain, hnem theih ka duh tak zet a ni.
.
"Ka lawm viau ang. Tawngkam dengkhawng taka min tawngkhum loh vang ringawt pawh hian i chungah ka lawm lutuk.." A inhip leh hlawp a "Alawmi pawh awm se i tih ang chiah hian min ngaihtuah ngei ngei ang.." a tawng khur hlawk hlawk a, ka mittui a hnam sawk mai.
.
"Ka lo kal nghal ang." min chhan leh hmain ka phone ka dah a.
.
Group-a an thlalak post chu chiang lehzualin ka en a, engtinnge hetiang thil hi an theh darh theih zawk? Tabithi hian tu pawi nge a sawi tak? Mi nunrawng ber pawhin hetiang hi an ti duh dawn em ni? Mi mimal nuna inrawlh turin tu hian nge dikna nei? Comment ka en a, Tabithi hre tu leh hre miah lo tu pawhin tawngkam chhe theihtawp in an bei a, an dawn atana an duh miah loh tur anchhia leh tawngkam chhe tak tak a tam lutuk! Heihi hringnun chu a ni. Mi famkim lo hian mi famkim lo bawk dik lohna lai sawi nuam a ti em em a, ngaihtuah chiang miah lova puak phawng phawng tam tak an awm thin lah a chiang. Mi tamtak tana hlawkna awm thei leh hmasawnna thlen thei thil anih loh chuan hetiang a mimal beih leh intih mualpho hian awmzia a nei lo. Mi nun tihchhiatna mai a ni. Thudik tak leh fiahna chiang tak awm anih erawh chuan thu hran daih a ni.
.
Ka thaw hawk a, thovin ka thawmhnaw ka inbel mawlh mawlh a. Inhnuai ah chhukin ka nu ka kaitho a, thil awmze tlangpui ka hrilh zuai zuai hnuah in ka chhuahsan a. Zan a la rei lutuk lo bawk a, khawlai pawh a la reh vak lo.
.
U Sawmzuala te chenna ka in ka thlen chuan a lo reh deuh raih a. U Sawmzuala nu leh pate bula an chen lohna chin hi kum khat vel anih tawh ka ring. Chiang fakin ka hriatpui lo. Door bell ka hmet a, rei nghah ngai lovin kawngka arawn inhawng thuai a. Tabithi hmel ka hmuh chuan a mittui a seng fe tawh ang tih ka hre mai.
.
"Lo kal rawh. Ka rin aiin i lo thleng rang." nuihza miah lovin a then sak a. U Sawmzuala hmel ka hmu mai lo chu mak ka ti deuh.
.
"Khawnge U Sawmzual hi?"
.
"A kal chhuak ta anih kha. Ka la ngaihtuah ngai miah loh thilin min deng hian awm dan tur ber pawh min hriattir lo. Tui i duh em? Nge, intur dang i duh em?"
.
"Duh lo ve." Tabi chu ka en a, a tap insum hmel chu hmuh a hreawm ka ti em a ni.
.
"He thil hi a titu chhui chhuah a har loh tur thu U Sawmzuala chuan a sawi a. Khatiang thu sawi si khan rinhlelhna mitmengin min en a, ka tuar zo lo ang tih ka hlau a ni. Thlalak comment pawh ka en ngam lo. Keimah ni miah lo mah ila a lo hmutu tam tak khan keimah ni ngeiah an ngai awm sia.. Mi dang ngaih dan chiah ngaichang a nung ka ni lo nain he thil hi a tha lo tawpkhawk a ni.."
.
A thusawi chu dik ka ti khawp mai.
.
"I lo kal hlauh chu ka va'n lawm tak em!"
.
A rilru lapeng turin thu dang ka sawipui a, tunah hian lo buai khu ruai pawh ni ila awmzia a awm tam dawn lova, thudik kan hriat theih hun nghah tawp hi tuna kan tihtheih awm chhun a ni rih mai.
.
Dar 11 rik dawnah ka haw san a, an kawt atanga ka tlan chhuah hma chiahin U Sawmzuala pawh a lo thleng ve chiah bawk a. A ni pawh a hmel landan a dik lo khawp mai. Mi hriat hlawh annih vang hian hetiang thil duhawm lo thleng hian an sumdawnna ah eng emaw zawng talin nghawng ngei dawn a, chu chauh ni lovin thu diklo hria zawng zawng hian thu dik zawk an hre leh vek dawn lova, chu chu a pawi lai ber chu a ni.
Dawt mai mai anih chuan engahmah ngai lo se a ni mai alawm' tih rikngawt hian thil a siam tha lem lo hi a pawi lehzual lai a ni bawk ang chu. Mihring hi kan sual khawp a thil tha aiin thil thalo zawk hi kan inhriatsak reng thin. Sual a pai kan nih vang a ni ngei ang!
.
In ka thlen hnu chuan ka mu nghal deuh mai a, ka ngaihtuahna a vak kual nasa hle mai.
.
Ni hnih ral leh chhung chuan Tabi thlalak dik lo theh darh chungchang ah thu thar engmah a awm lova. Thil thleng chu aman min rawn hrilh reng vangin an in ah pawh ka va kal leh rih lo. Bakah Eleazer an in ah a kal fo tih a sawi vanga kal duh lo pawh ka ni tel tho mai. A chanchin a secretary hnenah zawt fo mah ila khatiang teh hrep a thlen hnu ah kha chuan hmaichhana hmuh chakna ka nei lo. Hmeichhe pangngai ve mai zak ve thei leh awlsam taka mahni inngaihtuah hah vak vak thin ka ni ve tho a, hmangaihna vanga ka thiltih tawh kha chu tih tawhin liam se ka duh ber a ni. Tunah hian Eleazer hi ka hnenah rawn let duh ta se ka lo hnawl thei angem tih pawh ka inhre hleinem! Aw le, ka chungchang ka ngaihtuah ngut  ngut hi chu ka bansan a tul tak zet.
.
"I chanpual kha i zo tawh em?" ka chung chiaha awm Pi Sangi chu enin ka nui a. Ka dawhkan a data lakkhawm leh chhutfel ngai ka tih zawh tawh chu lain ka pe thuai a.
.
"I awm chin chu tlemin kan hna pawh a chak ta deuh alawm." ti chungin a nui sung a. Tihian thawk ve bek bek ila, kum 5 hnuah promotion exam beiin ka tling anih chuan ka la  kai sang ve bek bek ang chu. Assistant hnaah hian ka lungawi reng lo maithei bawk a. Hma hun a hriat love. Mahni inchawm zo tia sawi theih ka nih ve tak vang hian thawven khat chuan thawveng tur ka ni. Mah se, mihring hi kan mak khawp a, kan chak em em ang pawh hian awm mah ila hmabak leh duh dan dang, hmasawn zel na tur hi a lo awm leh zel a, kan dam chhung chuan kan duhthusam ang thlap a awm hi a theih dawn loh hrim hrim tih hi mahni leh mahni inhrilh nawn a tul fo thin.
.
Office ban a hun a, ka rin loh deuhin Pi Sangi bawk chuan a fanu tana a thil leina tur hmun a kalpui turin min sawm teh tlat a. Innel em em na tur khawpa kan la awm dun tam loh vangin min sawm teh tlat chu mak pawh ka ti deuh. Ka kalpui tur thu chu ka hrilh ta tho a.
.
Office atangin kan inphur chhuak a, a fanu chanchin chu chhuang ve tih hriat tak hian a sawi suam suam a.
.
"Matei chu maw, a mak ve khawp a. Ngaihzawng a neih reng reng hian engkim ka hriatpui a, kan inkawmngeih khawp asin." ati suah suah a. Nu fel tak anih ngei ka ring. Chhan dan tur a awm lem loh vangin ka nui mai a.
"Sumdawng hausa zet mai Eleazer Rinmuana hi i lo hre ve tawh em? Ti ila, a, hrelo pawh an awm lovang a." Eleazer hming a sawi chuan ka beng a verh zar mai. Ka hria tih lantir nan ka bu nghauh a.
.
"Ka fanu nen hian an inzui ve teh tlat a. A fel khawp asin." ka awm a rit nghal churh mai. Pi Sangi hi a chetphung leh awm danah pawh chhungkaw pangngai chunglam a ni ngei ang tih a hriat a, a fanu pawh chu mi pangngai tak a ni ngei ang. Tupawh chu lo nise, Eleazer nen nghet taka inzui annih chuan hmuh emaw hriat emaw chakna ka nei therte lo.
.
"Ka nu nen inanna in nei chiang mai." Thudang sawi se ka duh. Eleazer chungchang hriat hi ka lo mamawh lo tawp anih hi. A bikin a hmeichhe kawp chungchang hriat hi ka mamawh hauh lo. Thudang sawi ka duh vang tih hrethiam lem lo hian ka thusawi vang chuan a nui sung a. A mizia tlang tak hi ka nu nen an inanna lai chu a ni. Ka nu erawh a mi hriatchian loh bulah thu tam tak sawi chi a ni lo thung. Engpawhnise, min hrechiang lo chunga ka bula thu a sawi bawrh bawrh mai hi min rintawk vangah ka ngai mai ang.
.
Sizzle Shop ah ka luhpui a, la kal ngai lo ni awm tak hian thawmhnaw thui sa nalh zet zet chu a en lawr dan dan a.
.
"Heihi min hak chhin sak ta che. Loretta nen chuan in intiat vel a, i tawk chuan a tawk thei mai ang."
Mak ka tihna chu tihlan loh hram ka duh. Pi Sangi hi Loretta nu a ni ang tih ka ring pha lo hulhual. Eleazer nen an inkawp tih a sawi pawh khan Loretta kher hi ka rilru ah a lang miah lo. Phur lo ru zet hian a kawr thlan chhuah chu ka la a.
.
Ka hakchhin zawh chuan min en vel a, lungawi tak hian a nui sung a.
"A nalh hle mai a. En tawp aiin i han hak chiah khan a nalh lehzual a nih kha. Matei chu a lawm teh  ang chu.."
.
"A nalh khawp mai." ka lo tihpui ve bawk a. Ka tui ta hlawl lo mai.
.
Dawr atangin kan chhuak a, Pi Sangi chu ka thlah ngai lovin taxi a hmang ta hlauh. Rilru a vei nei si, eng thil ber nge ka lawm lohna tih hre si lovin in lam panin ka inkhalh haw a. Ka ngui ruai ve tawp. Eleazer phiangsen vang a ni! He mihring hi lo tawng lo tawp ila tha tur. Ka huat zat zet hian amah ka duhna leh ka hmangaihna hi a nasa a, chu chuan ka thin a tirim ni berin ka hria.
.
Zanriah kan ei zawh chuan angai te bawkin ka room-ah ka inkhung a, ka rilru lak penna tur thil eng emaw tal tihtur ka mamawh niin ka hria.
.
Ka phone private message tone ka hriat chuan ka en rang teh e.
TABI* - Zanin ah birthday party ah ka kal dawn a, i hman chuan min kalpui la.
.
Ka call a, a pick up rang khawp mai.
.
"I hman hlauh vang a ni em min lo call?" arawn ti var a.
"Hman e. Min lo sawm teh tlat a, mak ka ti zawk a." ka tih chuan a nui hak a.
.
"Thil hrilh duh che pawh ka ngah tawh a. Chhungkaw aiawh a kal ka nih ai mahin i lo hman tak hlauh ah chuan kan pahnihin kan in date dawn a ni mai alawm.." a rawn ti zung zung a.
.
"U Sawmzuala a kal ve dawn lo mi?"
.
"Dawn lo. Kha, kan buaina vang bawk khan. Thil hi a chiang mai thei lova. Ka lo sawm phei dawn che nia."
"Aw le. Ka han insiam tan a nge."
.
Phone kan dah a, ka thawmhnaw bawm hawngin ka thawmhnaw hak tur ka lachhuak a. Ka insiam zawh hnu rei vak lovah Tabi a lo thleng a, kan chhuak nghal a.
.
Kan kalna tur ka la zawt miah lo tak e. Engpawhnise, khawiah pawh kal dawn ila boruak dang hip ka mamawh hrim hrim a, ka tan chuan a tha vek.
.
"A hma khan Eleazer khan a ngaihven hmel che ka lo tia. U Sawmzuala paw'n a ti tho a, engmah a awm ta lo ami?" a zawhna chuan min tiphu deuh zawk. Ka inthunun leh vat a. Eleazer khan engmah a lo sawi chhuak lo ngei anih dawn hi. Lawm tur nge lawm loh tur ka hrethiam lo. A thian thenkhat te hmaah min fawp leh lawi si! He mihring hi ka hrethiam teh nuai love. Tunah chuan ngaihtuah pawh ka duh lo. Amah vanga a ruka ka tuarna tam zia ngaihtuah phei hi chuan ka rilru a awm ve ringawt pawh hi a phu lo.
.
"Engmah awm love." ka tiliam puat a. Eleazer chungchang min zawtzui lo hram se ka ti hle mai.
Kan mudun hman tihte hria se mak ati dawn lutuk tih a lang reng bawk si.
.
"A that chu. Kan kalna tur hi min zawt miah lova." min rawn en zawk a.
.
"Khawii nge kan kal dawn?"
.
"Eleazer Birthday alawm."
"A nih chu_" ka ti sap a.
.
Ka awm a nuam ta lo hle. Ka awmdan danglam chu Tabi hriat hi ka duh hek lo. Eleazer birthday anih vang anih chu Pi Sangi khan a fanu tan kawr a lo lei sak. Awm dan tur ber pawh ka hre ta lo. Ka kal ve dawn nge, helai atang hian ka haw leh mai dawn?
.
"I awm ava nawm loh hmel ta ve."
.
"Nuam lo hran love. Khawiah nge a lawm dawn a?"
.
"Kan thleng chu a ni deuh mai." a titha ve mai a. Ka awm nawm loh chungchang kan sawi zui tawh lo chu ka thaw huai. Ka insangmar ru sauh sauh a. Hmaichhanah Eleazer ka hmu dawn tih ka inhriat vang ringawt pawh hian ka lungphu a danglam nasa lutuk.
.
Tabi'n motor a tiding a, kan kalna hmun tur ka hmuh chuan ka insangmar nasa lehzual. Ama chenna in a ni lova, he inah hian ka la kal miah lo bawk. A nu leh pate in a nih ka ring ve tawp.
.
Inchhung ah kan lut a, ka duh emaw duh lo emaw ka thil hmuh apiang chuan an hausak tur zia min ngaihtuah tir lo thei lo. Mihring an thahnem angreng a, ka lawm viau zawk. Mi tlemte chauh awmin Eleazer hmuh ngei  ngei ngaia awm ka hlau a ni.
.
"I va hmu ve kher duh em?" ka lu ka thing vat a, ka thing rang mah mah maithei a ni.
.
"Duh love. Va kal rawh. Hetah hian ka lo awm ang." ka ti leh thuai a. A gift box chu kengin inchung panna ah a chho a. Ka rin aia hmain a lo let leh thuai a. Inhnuai ah pawh heti zat hi kan awm a,  inchungah chuan eng thil tak thleng ang maw? Loretta pawh Eleazer bulah a awm ngei ang chu. Kei ka lo mi chuang awm ve mai mai a. Hetiang zawnga ngaihtuah tur hi ka ni lo tih ka inhria. Eleazer chuan chiang takin min hnawl tawh anih kha.
.
"Ka rin aiin i lo let leh hma." ka lo ti thuai a. Kan haw nghal mai theih ka ring.
.
"Nia, inchunga chhoh ve chu i duh lo maw? Inhnuai ai hian a nuam zawk daih a nia." Tabi hian ka awm nawm loh zia hi a hrethiam miah lo anih hi. Lawm zawk tur ka ni e. Ka ngaihtuahna thup kawngah hma ka sawn tihna nimai.
.
"Kan haw nghal thei tihna a nimai em?" ka tih chuan Tabi chu a nui hawk hawk a.
.
"Cake cut hmaa haw chu ka ti ve deuh a. Bakah, ka rawn sawm chhan che kha. Sawitur ka ngah a." a hawi kual zak zak a. "Helamah hian tuman min tibuai lovang." ka banah min kai a, pawnlam bathlar awl zau zetah min chhuahpui a. Ani hi chu a vawikhat kalna a ni lo tawp tih a chiang.
.
An in awm dan hi ka hrethiam chiah lo. Chhun khaw enga enchian fe tham a ni ngei ang. Light chi hrang hrangin an chei de sep sep a, kei ve mai ang tan chuan engkim hi a pui mah mah vek mai.
.
Thutna lo awm ah chuan kan thudun a, khaw hawi nan duhthusam a ni. Thli a thaw heuh heuh a, ka taksa awm nuam lo lutuk chu thli vawt sang sangin min chhem chuan ka inthlahdul ta deuh.
.
"Mihring hi kan mak iti ve thin em?" a tihdan ki chu ka hriatthiam chiah loh vangin a hmel chu ka en a, keimah min en lovin kan hma zawna khawpui veng thenkhat lang eng ut chu a thir dauh dauh a. A hmel atang chuan a sawi chhan ka hre nghal mai.
.
"Ti e." tiin a ka hmazawn ka en a.
.
"Tunah chuan nang chiah hi ka rinngam awmchhun i ni dawn ta anih hi. Alawmi zarah liau liau ka hrechiang em che a. I awm lovang tih hi ka hlau asin."
.
"Engmah tihsak theih che ka neih loh hi." ka ti mai a. Ka rilru dik tak a ni bawk.
.
"Thlalak darh atang khan ka thiante hi ka tan an ding ngam miah lo. Mak ka ti a, ka rilru a nat em em rualin ka tana thian dik tak anni lo tih ka hriatchhuah phah thung a. Enteh_" ka beng bulah rawn kun hnaiin a tawng zawi zual sauh a. "Thlalak post tu kha Robert a nih theihna chance a sang a ni awm e, U Sawmzuala chuan naktuk hian a chiang ang a tia. A mak ka ti lutuk. A hmaa Alawmi nen an inkawp leh inkawp loh chungchang ka zawh che atang khan Robert hi ka lo ringhlel tawh miah lova. Tunah amah hi lo ni ngei ta se, a tihchhan tur awmang pawh ka hrethiam chuang lo."
.
Tabi chu chhan dan tur ka hre lo, keipawh hian Robert chu ka ringhlel chiah lo a ni.
.
Cake an cut dawn tih mi pakhatin arawn sawi a, chhuanlam siamin Tabi chu ka lo nghah tur thu ka hrilh a, inchhung ah min luhsan leh rih a. Eleazer ka hmuh hreh vanga chhuanlam siam ka ni tih hre awmin a awm lo a, amah kalpui  ngawr ngawr ka nih vangin ka chhuanlam siam kha min pawmsak ve mai anih ka ring. Ngaihtuah chiang se chuan mak a ti  ngei ang.
.
Tabi'n min kalsan hnu chuan ka thutna chu ka thawhsan a, balcony hungna bar vuanin ka ding a, thli thaw heuh heuh chu dawngin ka dak vang vang a. Ka rilru a awm ta ber chu Robert a ni. Engvanga mak deuh deuh a rinhlelh ni tlat thin nge maw anih le? Amah hi mi thalo tak a lo  ni reng nge hetiang thil thleng mak deuh deuh phen ah hian mi dang an awm zawk. Tu dang nge ni chuang ang le?
.
Sana ka en loh vangin eng chen nge keimah chauha ka awm tawh ka hre lo. Minute 20 vel a ni tawh mai thei. Tabi pawh chu ka rin aiin arawn let har tawh.
Ka hnunglama thawm ka hriat chuan Tabi anih tawh ringin ka inher a, Eleazer ka hmuh chuan ka hnungtawlh deuh a. Amah ka hmuh vang leh ka zam vanga hnungtawlh ni anga min ngaih ka duh lo. Ka din dan chu siamrem in a hmel lang thim deuh raih chu ka en chho ha a.
.
"Nang maw? Hetah enge i tih?" a tawng zawi viau nain a awki a min hmuh a beisei loh zia chu ka hrechiang khawp mai.

"Min tiphu alawm!" thawk lain ka awm ka dawm a, a landan nalh leh pa lutuk vang hian ka zam lovang. Ka awm ka dawm lohna zawk ka kut chu ka hnunglamah dahin ka humruh nasa khawp mai.
.
"Hetah hian eng thil nge i rawn tih ka tia lawm?" a tawng dan atang chuan a lawm nge a thinrim a hriattheih miah loh lehnghal. A lawm lo tawp ang.
.
"Ka lo awm ve tawp chu a ni lo phawt a." ka nui lui ngial a. Ka aw rik chhuah dan chu ka beisei phak bak a ni bawk.

Arawn pen pawk pawk a, hlauhawm zeta a mit de sawr sawr ka hmuh chuan ka duh aiin min lo hnaih reng tawh. A awm a nem tumin ka ban ka lek kang a.
.
"Rinmuan_Khawiah__" hmeichhe aw chu a tawp chat a, tunge tih en tumin Eleazer lak atang chuan ka mit ka lasawn a, a ni erawh a che eih lo. Min din hliah vek vangin tunge rawn kal ka hmu thei miah lo lehnghal.
.
COPAS (HEARTS)
.
CHAPTER - 10
.
Thantei_LauraSean
.
H & E
.
"Nang maw?" Loretta hmel chu a phawk deuh hra a, Eleazer ang bawkin helai hmunah hian min hmuh a beisei lo tih a langchiang khawp mai. "Tsk tsk.. Ka rin i ang lo. Rinmuana tan hian enge inih hrilh nawn leh kher i mamawh dawn tihna a ni em?" zam lo zet hian min rawn hnaih a, Eleazer bulah dingin a hmel lan dan atang ringawt pawh chuan lam tang nei tha a intih hmel hluah hluah.
.
"Nang ang hmeichhe pangngai ve mai hian engtin nge a ni ang hi i neih theih ang. Naupai angin i insawi te chu a ni em lovang chu" A tawngkam chuan min deng na tak zet! He hmeichhia hian eng chen chiah nge a hriat? Eleazer hian kan mutdun thu kha a hrilh a ni thei angem? Ni lo hram rawh se.
Eleazer chu ka en a, ka hlauhna zawng zawng a bo vek. Ka kawchhung chu thinrimna vang in ka so bulh nimai hian ka inhria. Loretta hmel chu ka en a, a ti ta mah mah a ni. Chhang miah lova kalsan ka tum rilru zet tawh a, ka rilru ka thlak leh ang.
.
"I sawi duh i sawi zo tawh em?" nelawmna tel miah lovin Loretta chu ka en a, dawihzep taka ka ngawih reng a lo ring a ni ngei ang, a phawk leh ta hra mai. Eleazer chu a melh a, a hmel a rintawk lohna lang chu ka lo hmu chat bawk.
.
"Nangni pahnih hi__Rinmuan_?" min entawn zak zak a.
.
Za lo zet hian lo nui hak thung. Ka tumlawk pawh a ni chiah lo. A ban vuana ding reng chung hian ka chhuhsak a hlau a nih dawn hi. Eleazer chuan chiang zet hian min rawn en a. A ngaihtuahna erawh a thup hneh leh hle anih hi. Hetiang khawpa mahni inthunun thei anihna hi mi a hip  theih chhan pawh a ni ngei ang chu. Ka tan chuan hlauhawm chhinchhiahna bak ani ta lo.

"Nang nu hian i lo thlem vel a nimaw?"
.
"Ka thlem ang maw?_" Eleazer chu chiang lutuk in ka en a, a insehruh tih ka hmu thei. Ka thlem miah lo tih sawi ka tum lo. Ni e, min hnawl hnu pawh khan ka umzui ngei a, ka hmangaihna vang chauh a tlawm pawh sawi thei lova umzui ka ni. Ka inchhir hauh lo lehnghal. Mahse, engkim hian tawp chin a neih a tul thin. Neih talh tuma kan beih thil hian natna chauh min pe let anih chuan kan kalsan a tul tihna a ni!
.
"Hmeichhia i ni ve tho a i hrethiam ang chu. Hmeichhia hian duhtawk chin a nei thin tih hi. Mipa rintlak loh um reng duh tur khawpa thluak thawl ka ni hleinem. Ka harhchhuak tawh.. A nih phawt u. Duhsakna ka hlan kher che u pawh a tulin ka hre lo." ka inher a, dak vahin ka kal sawn a, Loretta thaw hak ri ka hriat chuan sawi tur dik tak ka sawifuh tih ka inhria.
.
An thawm ka hre zui lo. Inchhung lam thawm chuan a luahlan pawh a ni mahna. Na zeta ka bana min rawn pawhlet chuan thawm ka chhuah that a. Ka beisei hauh loh thil a ni chiang khawp mai. Ka insangmar nghal at a.

Ka hmai zawna Eleazer lo kun hniam chu zam miah lovin ka lo enlet a, ka awm dan danglam ta chuan a ti hrilhhai tih a hmel danglam dan atang chuan hai theih pawh a ni lo.
.
"Eng thu nge i sawi kha?"
"Eng thu nge ka sawi?" ngaih pawimawh loh hmel zeta zawhna ka zawt let chu a lawm lo hle tih a lang reng mai. Mahni inngaihlu lutuk anihna hi chu a bansan dawn lo anih hi. A duh duh hneh thei a a inngaih thinna pawh kei hian ka titawp ang. Natna nasa tak min lo thlen tawh khan chakna min pe let ngei rawh se.
.
"Tak zet che hian!" min vawnna chuan a kang emaw tih tur hian min thlah nawk a. "Theihnghilh rawh." A sam a tuai puat a, min rawn en leh chuan a hmel landan chu a mak lutuk.
"Ni lo, i theihnghilh lovang!" ka dar tawn tawnah min vuan a, min dim lem lo khawp mai. "Naute chungchang kha enge a awmzia? Nang hian ka fa i pai tak tak em?"
.
"Chu chu i lo buai ve na tur a ni em? Lo buai ve duh suh. Ka nunah hian inrawlh ve theihna chhan tur engmah i nei tawh lo. Min thlah rawh. Ka lak atangin i zalen tawh. Lawm hle zawk ta che." ka ti nghek a.
Engtiang pawhin tawngkhum ila min dem thei lovang. A office-a ka va hmuh vawihnihna a 'nau pai ta ila a hmeichhe kawp chungchang ah sawi theih ka nei em tih ka zawh khan sawi ve theih ka neih loh thu leh min hnawl thu min hrilh nawn ngat a nih kha. Engtin nge ka theihnghilh theih ang? Chuan tunah hian nau ka pai tak tak nge pai tak tak lo tih hre tur pawhin dikna a nei chuang lo. Thudik ka hrilh nachhan tur reng reng ka hre love.
.
A bulah Loretta rawn dingin min en a, a hmela a rilru nat zia lang chu thup a tum buai lo a ni  ngei ang. Kan thusawi kha rawn hre vek em tih erawh ka hre lo. Na tur pawh a ni e! A ngaihzawngin amah kalsan in min umzui a nia, khawngaih tur ka ni em ka inhre lo. Ka thinrimna hi nasa hle lo se chuan ka khawngaih viau mahna le.
.
"Min thlah rawh." ka dara min vawnna chu a phelh theih nan a kutah ka chelh a. A ni chuan min en ngawt ngawt thung. Eng tak ngaihtuah ang maw?
.
"Kal tir rawh." Loretta lo tawng ve chu hre awmin a awm lova, kei lahin zam miah lovin ka en let ve reng a. Thawklehkhatah rawn kun hniamin ka hmuiah min rawn fawp thut a, ka taksa pumpui hi a tek chhuak vek! Ka theihtawp takmeuhin a awmah ka nem a, a thiltih chu hrechhuak thut niawm fahran hian a inla hrang a, engmah sawi tawh lo leh Loretta pawh ngaihsak zui lovin min chak lutuk hian min kalsan nghal a. Loretta pawh ngawi rengin a kalsawn ve bawk.
.
Keimah chauha ka din hnu chuan ka zawi nghal hnawk mai.
.
"A mak hle mai a, kha chu ka beisei piahlam a ni." Tabithi tawng ka hriat chuan ka phu deuh zawk a.
.
"Rinmuana khatianga a awm lai kha ka la hmu ngai miah lo. I tha em?" ka dara min rawn kuah chuan  tawngkam a chhang lovin ka bu nghat a. Ka tha hlawl lo. "Haw tawh ang aw." a ti sap a. Pawnah inzui chhuakin kan in panin motor a khalh chhuak nghal a
.
"Eng emaw a awm ni a ka lo rinhlelh kha a lo dik ngei anih kha. Mipa thenkhat hi chuan thil an sawi tam lo nain an thinlungin a duh tawh chu an thlah tawh ngai lo a nia." Tabi chu ka en a, a hmel a thutakin a thusawi chuan Eleazer chungchang chauh a kawk lo ang tih ka ring. Thil awmzia hriat tuma min zawt talh lo chu ka lawm hle bawk.
.
Kan in zawn kan thlen chuan car atangin ka chhuk a, chanchinthar a awm anih chuan min hrilh tur thu a sawi hnuah car chu turn in a tlan chhuak lehnghal a. Zanin ka hun tawng khan min tichau zual niin ka hria. Engpawhnise, ngaihtuahna thar neiin ka hun ka hman a tul anih hi. Tuna ka dinhmuna ka awm chhan hi Eleazer ka puh vek thei lo. Ni e, min hnawl vang hian ka dem ngawt thei lo alawm. Kan thiltih dun kha ka tan hlu em em mahse mihring ngaihtuahna hrang nei a ni a, ka feel anga feel ve turin ka tilui thei hek lo. Ka huat kher hi a tul em ni? Ka natna erawh a thuk em a, ka dam chhung hian ka theihnghilh tawh dawn lo.
.
Van lam hawiin ka dak vang vang a, thla ral lam tawh chiang vak lova lang ka hmuh chuan thawk ka la huai a.
.
"I rilru ah chuan ka la awm reng tho a nih kha!" ka inher zawk a. Engtinnge helai hmunah hian a lo awm theih? Min rawn hnaih a, mahni inveng ru ranin ka lo hmachhawn a. Eng thu nge sawi duh a la neih?
.
"I danglam bik lo ava ang ve." ka tawngkam a hriat chuan a ner suk.
.
"Tabithi hi hnaih suh. I inrawlh lohna turah hian inrawlh talh i tum niin ka hria."
.
"Ka nun a nia, ka tihtur leh tih loh tur chu keiman ka thlang thei alawm. Ka huat nih i duh ngawr  ngawr anih loh chuan i hmel hi hmuh fo loh ka duh zawk a nia."
.
"I tawngkam hman duh dan chuh.. Tabithi bula ka hmu leh che anih chuan ka duh loh tawp thil ka ti tawh ang. Zak taka awm i duh anih loh chuan hetiang thil lakah hian rawn inhnamhnawih ve suh. Ka sawi chu hrereng ang che." min kalsan leh  mai tumin a inher a, a tawngkam hman chuan ka thinlung a chhun zak mai.
.
"La ding teh!" ka ti chang fal a. Min rawn en tawh lovin a ding a. "Ka zahna tur thil nia i hriat chu i duh apiang ti rawh. Engpawh chu nise a pawi ka ti lo. Kei pawh hian ka duh duh tithei turin zalenna ka nei ve bawk a nia.."
.
"A harsa zawngin eng thil mah ti suh. Nang hian engmah i hrelo." a ti leh nghut a.
.
"Nangpawh hian engkim i hre hleinem."
.
"Tunah hian hmangaihna chenpui leh tur che a min duh anih loh chuan min chhang tawh suh!"
.
"Tak zet che hian! Kan thiltih kha hmangaihna vanga ti pawh kan ni hrep lo" inher vutin min rawn pan hnaia "Min lo hnaih suh." ka ti that a, engahmah ngai lovin alamah  min pawthnai nawk a, ka tukhumah nghet lutuk hian min vuan a. Chetsawn ngaihna a awm lo.
.
"A hmasa ber chu ka nih ngei kha!" kan hmui a insi lo chauh! Min tihnat tum rana tawng a nih chuan keipawh hian ka ti ve thei tho. He mihring hian keimaha a chhe ber a cho chhuak zel chu a nih hi.
.
"Khatih lai tak khan nangmah i lo ni fuh kher a nih kha. Nangmah inih vanga inpe ka ni lo!" ka thusawiin ka hmui a chhuahsan rualin ka thuzawi tul loh zia leh dawt anih chian zia chu kei hian ka hrechiang.
Eleazer chuan min thlah chuang lovin a mit a chhing a, a inthunun nasa tih ka hria. A tha a khur dar dar mai.
"Anih chuan min hmangaih vanga min umzui i lo ni lo..?" min zawt ai amahin amah leh amah inrintir tuma tawng a ang  mah zawk. A tawng ring lova, kan hmai a insi deuhthaw chung pawhin a tawng ri chu ka hre thei chang chang a ni.
.
"I va ngaihtuah chhuak har ve!" ka tawngkam a hriat chuan min nem sawn dawrh a "Ngawi hmak rawh." a ti hrawk a. Ka pai deuh nawk min hmuh chuan ka tluk hmaa min dawm hman tum niawm tak hian min rawn hnaih leh a, "Min lo hnaih suh." ka ti ve thung a.
Keipawh ka tha a khur ve tho. Ka thusawi hi dawt vek a ni, dawt vek! Mahse Eleazer lakah hian tlawm leh tumna ka nei tawh lo. A hmaa ka chak loh zia lantirtu ka mittui a tlak hma ngei hian ka kalsawn angai.
.
"Kan inhmuh tawh loh ka beisei." ti sapin hriatthiam har zeta min en ngur chu engahmah ngai lo anga lang luiin ka inher a, kan in luhna tur gate hawngin ka pen lut nghal a. Min rawn umzui em tih hriattum a hawilet pawh ka ngam tawh lo. Min umzui lo se a tha zawk ang. Ka tha khur dawt dawt vang chuan ka kal chak thei lo. Ka mittui rawn luang zawih chu hru duh lovin ka kal lui ngar ngar a.
Inchhung ka lut a, kawngka ka khar rualin kawngkhar chu ka ngheng rawk rawk mai.
Ka room-ah lutin ka inthlak a, thil thleng tawh zawng zawng ngaihtuah letin ka rilru ka siam fel ta! Eng anga harsa pawh ni dawn se tun chinah Eleazer nen hian kan inhnaih tawh tur a ni lo. Heihi ka thu tiam a ni e. Chak takin hmalam ka pan anga, ka thiltih tawh siam that theih loh kha ka inpawhhniam tir dawn lo. An in a thil thleng kha Loretta-I’n a hmuh ve vangin min sawi zui ngei ang. Enge pawi!  Min hrechiang tu leh min hrechiang kher lo pawhin ka chanchin an sawi anih pawhin lo sawi mai rawh se. Ka tana tha tur thliar hrangin sang takah ka thlawk dawn a ni.
.
Kar khat chhung chu office ka kal bak pawnah ka chhuak tam lova, Tabi nen pawh kan inbe zeuh zeuh chauh. An buaina chungchang ah khan hma an sawn theih loh thu min rawn hrilh chuan mak ka ti khawp mai. Tunlaiah thiamna a sang tawh a, hriat chhuah duh tak taka chhui chu nise thil harsa em em tur a awm ka hre lo. Nge ka ngaih ai hian thil hi a lo harsa phian thei tho bawk a.
.
Office hna khawih tur ka hawn chu ka khumah dahin ka inbual san a, ka inbual zawh chuan khumah thuin ka hna chu ka khawih nghal mawlh  mawlh a. Ka room kawngka kik dat dat ri chu ka hre mai lo ani ngei ang, arawn inhawng ri rak a, Robert arawn dak hlawl a. Min tiphu deuh zawk mai.
.
"Ka lo lut thei angem?"
.
"Enge ni ta? A va pawimawh awm ve." ka lo tihsak mai a.
.
"Pawimawh, thil entir tur che ka nei." a hmel ka en chuan ka ngaih a tha ta lo hle. Ka room-ah chuan lo lutin ka bulah arawn thu a, pendrive phawrhin ka laptop ah chuan a vuah nawk nawk a. A chet dan atang chuan a tha a khur deuh tih hai teih pawh a ni lo. Min ti hlauthawng ve zo vek mai. Engmah sawi chuang lovin ka  ngaichang a.
.
"Hei, enteh.."
.
Laptop screen a thil lo lang chu chiang zetin ka en a, hetiang thil hi engvanga kei kher min rawn hmuhtir nge anih ka hre lo. Atan hian eng thil nge tihsak theih ka neih chuan.
.
"Heihi engtin nge i neih a? An siam danglam dan zawng zawng nen.."
.
"He thil ah hian rinhlelh ka nei. Sawi ila  min ring thei angem?"
.
"Han sawi la." ka rilru tak chuan hriat ka chak lutuk. "Nangman i siam danglam a ni lo maw?" fiamthu titak deuhin Robert chu ka en a, a ngaih dan a nih hmel chiah loh khawp mai.
.
"Ka siam danglam chu ni se ka buai hauh lo zawk ang. Ka hrilh leh lo ang che. Min ring lo anih kha." a ti hmak a. Thlalak pakhat chu zoom-in "Heihi en la, pakhat zawk nena a inan lohna chu i hrethiam mai ang. Alawmi u hi ka hlauhthawnpui zawk a ni. Amah beih tumtu hian hrechiang takin a la bei zui ngei ngei ang."
.
Thlalak chu ka en ve bawk a, chik taka en chuan an siam danglam dan chu a langchiang lutuk. Soial media a an post darh vak kha a nia.
.
"Robert, he thil hi engtin nge i neih daih theih?"
.
"Chu chu hrilh che ka tum lo. Keiman ka chhui dawn. Hmingchhe taka police in  min dawp nachhan pakhat kha a nia, ka lawm lo em a hetianga min awh buai tumtu hi ka zawng chhuak ngei ngei dawn. Chuan Tabithi hi fimkhur turin lo hrilh rawh. Amah beitu hian a hrechiang khawp mai." a ti leh ringawt a.
.
"Tunge i rinhlelh chu? I rinhlelh ber min hrilh tum si lovin min rawn tiabuai ve ringawt anih ber hi."
.
"Naktuk zanah ka hrilh ang che. I rin loh daih aniang. Keipawn mak ka ti."
.
"I ho set sut e a. Tunah min hrilh dawn chuan loh chuan hna ka ngah a nia.."
.
"Thlalak hi chu i laptop ah hian dah ve hrim hrim ang aw. Thil eng emaw thlen palh thil thuah pawh nang chu tuman an ringhlel dawn lo che a."
.
"I iti hlauhawm e a. Thil ni lo loah ka buai phah ange."
.
"I ngai serious lutuk anih kha. Ka tibuai rei tawh che. Ka'n haw ange. Tabithi chu lo be ngei ngei rawh aw." tih leh thawh a rual a. A awm dan hian ka ngaih a titha lo hle a ni. Thu buai eng emaw ah min tahluh tum ni tlat hian ka hre bawk.
Min chhuahsan hnu chuan ka ngaih a tha thei ngang lo, laptop-a a thlalak dah thar ho delete tumin ka en kual leh a. A pendrive pawh a lo phawi reng reng hleinem. A chet buai deuh vang khan a theihnghilh a ni ngei ngei ang.
.
Tabithi ka call a, a pick up thei miah lo lehnghal a. Robert thusawi kha dikin Tabi nunna hi hlauhthawnawm ah a awm tak tak a nih chuan a tha lo hle ang. Ka thin a phu nghal dawt dawt mai. Vawi thum ka call naah chuan mutchhuah hmel lutuk hian min rawn chhang ta hram a. Ka thaw huai mai.
.
"Ka mut a chhuak lutuk, naktukah kan inbe leh dawn nia.." arawn tih nuah nuah bak chu a muhil thaw ri chiah hriattur a awm tawh. A him chuan a tha a nimai tia thaw huaiin phone chu ka off a. Ka hna thawk zawm lehin Robert pawh ka ngaihtuah zui tawh lo. Dar 11 a pelh hnu chuan ka hna khawih zovin ka mu ve ta chauh a.
.
“Bawihte, tho teh.”
ka nu aw ka hriat chuan ka muhil ka harh a, ka alarm ka en thuai a. Zing lam dar 5 chiah a ni.
.
"Bawihi, tho teh..I harh em?" ka room kawngka a kik leh dawt dawt a, hlauhthawnna ka nei. Ka tho chhuak vat a, ka room kawngka ka va hawng a.
.
"Min tihlauthawng alawm. Enge a? Min kaitho hma__" ka nu hmel chu a dik miah lo.
.
"Robert a thi! A thih dan a mak lutuk."
"Enga?" min thawng lutuk.
.
"Nizan a lo kal khan eng thu nge a rawn sawi. Ka ngaih a tha lo nasa a nia." ka nu hmel dang sawp sawp chu phawk zetin ka en a. Hlauhthawn awm pawh a ni e, nizan mai khan nidanga a tih ngai miah loh danin ka room-ah meuh min rawn kal chilh a, ngaihthatna chi chu a ni mawlh lo alawm.
.
"Engmah thil danglam sawi a nei lo." ka tirilah min man a, keipawh ka khur ru nghal zawih zawih mai. Ka hlau a ni ber ang chu. Nizan khan thil danglam sawi chu a neih ngei kha. Mahse ka nu bulah hian engmah sawi chi a ni lo.
.
"Engtin nge an sawi a?" ka tih chuan inhnuaia chhuk turin min hrilh a, aman a sawi duh loh danah hian thih dan pangngaiin a thi lo tih a chiang lehzual.
.
Engvanga hlauthawng em em nge maw ka nih le? Robert thihna hian ka nunah danglamna a thlen dawn ang maiin ka hlauthawng nasa alawm le.

COPAS (HEARTS)
.
CHAPTER - 11
.
Thantei_LauraSean
.
H & E
.
"Tukin dar 4 vel khan an in pawna thawm awm vangin Pu Thangkima ava chhuak a, Robert-a chu hmuh hreawm khawpa ingeuh hian an kawtah a lo awm reng mai a, a mar an deh chuan a lo chatthla fel der tawh a ni awm e. Khawih sawn ngam lovin police an phone a, i nu'n a lo kaihthawh hma che khan inchhungah an inla lut fel chauh a ni. A makin a rapthlak khawp mai." ka pa chuan a ti charh charh a. Ka nu ang thovin ngaih tha lo tak hmel a pu ve tho.
.
"An in singsa fel hmanin ka ring lo, hmeichhe tihtur pawh a awm ang, va kal ve thuai la a tha ang."
.
"I sawi bak chu engmah han hriat belh tur a awm rih lo tihna mi?"
.
"Awm lo. Nizan khan thil mak deuh sawi a nei miah lo amaw?" ka pa chu ka en a, Robert rawn kal chhan kha ka pa hnenah pawh hian ka sawi thei chuang lo.
.
"Sawi lo. Thil thlen dan hi a mak hle mai." kan ngawi thap mai. "Ka han insiam ange." tiin ka thawhsan a. Robert thihna hian ka tiril ah min man tlat nia.
.
Ka room-ah chhovin ka inthlak zung zung a, Robert te in a kal turin ka chhuak nghal a. An in ka thlen chuan mi an lo la tam vak lo. Nu Hmangaihi chu a tap hawm hawm a, a lainatawm tak zet. Robert ruang chu post-mortem turin an lo phur chhuak leh tawh a, ka pa sawi hmang pawh khan thih dan pangngai a thi a ni lo tih a chiang sa reng a ni.
.
Hmeichhe tihtur ni a ka hriat chu ka va tihpui ve zung zung a, ka ngaihbel nge mawni mi dang lo awm ve te chuan min en duh riau hian ka hre pek. Kan tih felfai hnu chuan in ah ka haw leh a, ka room-ah uluk zet hian Robert chunga thil thleng chu ka ngaihtuah a. Engvak phei chu ka ngaihtuah chhuak hran lo. Hmeichhe pangngai ve mai tan chuan han tihtheih vak a awm lo bawk a ni.
.
Thil pakhat ka hrechhuak! A pendrive nizana a theihnghilh tak kha!
.
Ka khum sir dawhkana ka laptop chu on in Robert pendrive chu ka hawng a, folder a tam khawp mai. Folder hmasa ber atanga tanin ka hawng zel a, thil danglam ka la hmu lo.

Folder tawp ber 'new folder' tia a dah tawp ka hawn chuan ka thin a phu nghal dawt dawt mai. Thlalak awm ho chu uluk zetin ka en dan dan a, Eleazer thalak ka hmuh chuan ka nghing lawih. Robert hian he pendrive hi a tum reng vanga theihnghilh a ni angem? Tawngkama min hrilh turin nizan khan ka ring tawk lo tih ka tilang chiang em a, kha vang khan tunge a rinhlelh tih pawh min hrilh duh ta lo kha a nia. Eleazer kher hi chu ka ringhlel miah lo asin. Min tina em em tu ni mah se hetiang thil tha lova a inhnamhnawih hi ka beisei miah lo tak tak.
.
Video pahnih awm chu eng thil nge tih hriat tumin ka en leh a, ka phu nawn awn awn a ni ber e. He video hi engtin nge a neih tih zawt turin amah ber a awm tawh si lo. Heng thil zawng zawng hi police hnenah dah ila kei hian buaina ka tawk lehsi angem le? Buaina ka tawh ve ka hlauhna ai mahin engkim buai hnawk lehzuala a awm ka hlau a ni zawk mahin ka hria.
.
Tunah chuan engmah tihtheih ka nei rih lo.
.
Robert kan vui liam a, a thihnaa inhnamhnawih thei awm ka rinhlelh ho tumah ka hmu lo. Thlalak a lang ho kha a then chu ka hmelhriat an ni ngei a, thenkhat kha chu ka la hre ngai lo mai pawh a ni lo vawikhatmah ka la hmuh ngai miah loh te pawh an awm. A chhungte hian tumah rinhlelh tur an hre lo a, rilru na takin an indawm kun tlawk tlawk tawp mai a ni.
.
Kar a liam a, Robert thihna chu mi tam zawkin an ngaihven lo zui nghal mai a, a thih dan ngaihtuah pawh khan thih dan pangngai a ni lo tih a chian tawh mai bakah post-mortem result arawn chhuak a, thah a ni  ngei tih a chiang lehzual ta bawk a. A result ka hriat dan pawh Pu Thangkima’n ka pa hnena a lo sawi ka hriat chhawn leh a ni.
Tichuan, uluk taka ngaihtuahin leh Robert pendrive ka kawl atang hian amah thattu hi a ruka ka zawnchhuah theih ka ring. Ka thil ngaihtuah chuan keimah ngei pawh min thawng dawt mai. Hmeichhe pangngai ve mai ka ni a, tharum ngah tak ka ni lem lo bawk a, ka thil neih hi police  hnenah hlanin ka buai ve lo thei ngei mai a. Mahse, ka thutlukna ang hian ka awm dawn a ni.
Robert thihna vang chauha hetianga thutlukna siam hi ka ni lo tih chiang takin ka inhria a, Alawmi thihna nena inkaihhnawih kal zel vanga Robert hi thah a ni ngei ang tih ka ring nghet hmiah. Ka tan chuan an thihna hi ka ngaihtuah ngai hauh loh ka nun dan phung thenkhat thlak danglam hlawk tu a ni dawn ta anih hi. Nge ni a, chhungrila ka nihna dik tak hi ka lo la inhre miah lo zawk. Hmeichhe pangngai mai tih theih bak pawh ka lo tithei reng maithei asin!
.
Naupang kum 6 mi lek ka nih laia ka chunga thil thleng vang khan huaisenna ka nei pawh a ni mahna. Tunge hria ang? Hun eng emaw chen chu kha thil kha ngaihtuah chhuak lovin ka nun ka hmang mawp mawp a, ka thinlung na taka hliam anih hnu pawh hian ka ngaihtuah chhuak mai chuang lo. Engpawhnise, ka thiltih tum hi Eleazer ka theihnghilh theihna tura ka thinlung tana damdawi tha tak pawh a lo  reng mai thei bawk.
.
ELEAZER*
.
An office atanga zangkhai taka a lo kal chhuak chu ka lo en reng a, a bula mipa nen chuan eng thil nge an sawi ka hre pha lo nain chupa chuan a lawm zawng tak a sawi a ni ngei ang Muffin chu za zet hian a nui a.  Engvanga Muffin tia ko tlat nge ka nih ka inhre bik lova, hming mak tak taka inkoh hi ka tih ngai loh leh ka ngaihtuah ngai miah loh a ni. Hmeichhe danglam tak anih vanga hetianga ko hi ka ni ngei ang.
.
Chu pa phiangsen chuan eng thil nge a hriat a, ei mai duh hmel pua a en ngam zawk chu le. Amah lah sawn chu chu a hre miah loh tih a lang reng lehnghal. Ral khat atanga lo thlir ngawt hi a tawk zo tawh lo anih hi. Bakah vawiin hian amah hmuh tuma helai hmun pan hi ka ni hrim hrim bawk.
.
Ka lam pana lo kal an nih tho vangin car atangin ka chhuak a, min hmuh chuan rang zet hian a hawisawn a. Min hmuh chak lo mahse a hlatah ka awm tawh dawn lo.
.
"Hmingi, ka lo nghak che a." ka koh dan teh tawl vang chuan a ni lo ta deuh hu in ka hria. Mi hriat laiin amah ka rilrua a hming ka vawn tlat dan ang hian ko ila a lawm lo lehzual ngei ang. A ner sak a, min rawn melh chuang der lova. A bula mipa kal chu a banah a vuan a, min ngaihthah a min kalpelh mai theih a inring a nih chuan a tisual chiang khawp ang.
.
An kalna tur taka ka din takah chuan min en lo thei ta lo. Ngaihthah theih miah loha awm dan chu ka hre ve alawm.
.
"Enge itih dawn?" chiang zet hian min en a, a bula mipa ban a vawnna chu a tinghet sauh tih ka hmuh chuan ka rinlawk hauh lovin ka awm chhungah hian eng emaw arawn inhnawh ut a. A laka mawi lo taka ka chet hnu khan mipa dang nen ka la hmu dun miah lova chuvanga a bula mipa hi hmumawh ta riau pawh ka ni mahna.
.
"Ka lo nghak che. Hun i neih chuan biak che ka duh a." tlemin ka tawngkam a pangngai ta deuh. Mi hmuhlaia mawi lo leh awm ang lo taka ka chet hian amah hi ka tilang nep dawn a ka hriat vang chauh a nungchang mawi zawk lantir ka ni bawk. Tuna ka chunga thil thleng mek hi ka hrethiam lem lo khawp mai.
.
"Tunah chuan hun ka nei rih lo anih hi. Te, kal ila?" a bula mipa chu a en chho ha a. Chupa chu a bu nghat a.
.
"Muffin, tunah biak che ka duh!" ka ti nghet charh a.
Hamhaih hmel pu deuh hian nui hakin a ka a ang zuau a, a ngawi leh rih. A bula mipa ban a vawn chu thlahin min rawn hmachhawn tha leh a.
.
"Engtin maw min koh?" a mit chhing zawkin a dak vah a, a chezia zawng zawng chu hmaih palh ka nei lo. Hei tak hi a danglam bikna tam tak zinga pakhat a ni. Ngaihtuah chiang lovin engmah a sawi ve ngai lo ni hian ka hria. Min rawn hnaih a, hetianga a chet hi ka beisei loh em vangin ka hamhaih let ta zawk mah. Hmeichhia vang mai maia ka hamhaih ka la hre ngai hek lo.  "Khatianga min ko ngam tur khan i engmah ka ni lo." ka beng bulah arawn phun a, engmah ti ve hman miah lova min siamin a inla hrang a, a kalpui pa lamah letin "Kal ang." a ti sap a.
.
Ka en tawp! Tun hi a vawikhatna a ni. Engmah sawi tur hre miah lova ka awm vawikhatna!
.
A bula mipa chuan a bike a tinung a, Muffin chu bike hnungah chuan chuangin an tlan chhuak nghal a.  Thil danglam eng emaw tak chu a awm a ni. Thil danglam tak. Muffin hian.. Muffin tia ka ngaihtuah teivet le! Ka hmangaih emaw in lo ti ngawt ange! Hmeichhia te hi ka hmangaih tura siam an ni lo. Ka tan chuan hmanrua an ni reng thin a, tunah pawh hian chu thil chu a la danglam chuang lo. Engvanga kha hmeichhe lakah khan inthiam lohna nei tlat nge ka nih ka inhre hek lo.
.
Kan inhmuh hmasak ber tum khan a hmel nung sar leh min ngaihven miah lo anga alan vang khan ka mit ala a, hmeichhe pian pangngai tak nei leh hmel pawh zahpuiawm loh tak chu a ni. Ka tan chuan mak ve deuhna pakhat a nei. Chu chu hmeichhe tam zawk hian min hmuhin min ngaihven lo ngai meuh lo. Nu tling tawh kum upa tawh pawh an bang chuang hauh lo ania. Ngaiah ka lo neih mai mai thin a, mahse min hmuh veleh a min ngaihven miah lo hmeichhia ka hmuh takah khan a dan a dang ta deuh a ni. Min hmuh veleh khan en chu min en ngei a, zak niawm takin a hawisawn leh nghal a. Min ngaihven mitmeng emaw hmeichhe dang mitmeia ka hmuh thin ang amah ah khan ka hmu hauh lova. Chu chu ka tan chona a ni. Chona lian tak!
.
Vanneihthlak takin ka ti dawn nge, mak takin ka motor ah khan a phone a tlauh a. Chu bakah ka thianpa Sawmzuala nupui unaunu Alawmi thiantha ber tih ka hriat khan ka thil hriat duhah min puih theih beiseiin ka hnaih ta anih kha. Infiamna nuam tak a ni bawk. Hmeichhe laka that chhuah hian thil nuam tak pakhat a keng tel a, chu chu sex a ni! An rilru hneh lah ka tana thil harsa a ni hek lo. Mahse, Hmingthansangi, Muffin.. a hming chu engpawhnise, hmeichhe thianghlim a ni ang tih ka ring lawk lo hulhual a, ka lakah a rilru puthmang a thup loh rual rual khan ka thlenpui theih tur chin chu ka hre nghal mai bawk. Ka tan hmeichhe mutpui hi thilmak leh danglam bik pawh a ni lova, ka ti ta reng a. A ti duh ang tih pawh ka rin loh thleng min umzui ta reng a ni. Mahse, thil dang ka sawi hmaih theih miah loh tur thleng a awm! Alakah feelings nei miah lo a hmeichhe dang ang bawka a liam mai ka ring a, ka tisual ta a ni.
.
Chiang taka ka hnawl lai khan a mitmenga a thinlung natzia lang chhuak kha ka hmuh hmaih hauh lova, nuam tih lohna pawh ka nei ngei alawm. Mahse, rei a daih lem lo. Hmeichhe dang ka bula engtiklai pawha awm thei an awm reng lai chuan ka hrereng lem lo. Min bansan lovang tia min hrilh kha ka tan thil thar ala ni lo fo! Ka secretary hnenah ka chanchin a lo zawt thin tih ka hriat khan ka rin aiin min zar buai rei peih dawn  niin ka hria a, mak takin ka chhungril ah hian nuam tihna ka nei a ni. Margaret hian hmeichhe dang aia a danglam thu ka hnenah vawikhat chu a sawi a, ka dam that leh dam that loh chiah a zawt thin tih a sawi bawk. Ka kawp thin hmeichhe tam zawk hian ka dam that leh dam that loh aiin ka sum an hman theih dawn leh dawn loh an ngaihven zawk tih fiahna ka hmu fo a, keimah chauh a ka awm hian ka ngaihtuah chhuak ta fo a ni. A mak khawp mai.
.
Thil dang zawng zawng ka sawi chuan a thui dawn. Tun mai khan a vawikhat nan mipa dang nen ka hmu a, keimahah hian danglam a awm a ni. Chu chauh chu a ni lo, a hma pawh khan, a bula ka awm hian.. Danglam tur ka ni lo. Ka duh vang renga ka tihnat hmeichhia hi ka hnaih kher a tul nachhan tur eng thil mah a awm lo. A vai khan hun liam tawh a ni a, ngaihtuah thar leh a tul tawh lo.
.
"Ka duhtawk ang!" ka phun hluk a. Ka car-ah lutin ka tlan chhuak nghal a. 
.
Ka in ah ka haw tlang a, tui vawta ka inbual hnuah inthlak in laptop ka on a, chhuna ka endik bak statistic ka check nawn a, ka rilru ah a lut hleithei der lo mai. Thaw huaiin laptop chu ka shut down a, ka phone phawrhin Loretta ka bia a. Zanin chu chhuah harh ka mamawh a nih hi.
.
Zan dar riat a rik chuan kan kal tumna hmun thlengin pawnah car ka dah fel a, inchhung lam thawm chu a tha khawp mai. Loretta chuan ka banah min rawn kuahin inchhungah kan inzui lut a, kan thian thenkhat te pawh an lo awm der tawh bawk. Tum dang ang bawkin zanin chu an tal hiar leh khawp ang.
.
"Sawlamah sawn in tur a awm a nia." Mawizuala chu ka bulah rawn dingin ka darah min beng thawr a. Hei pawh hi keimah ang bawka nupui neih tum lo ve bawk a nia, inkawm tam lutuk lo mah ila hmelhriat tha tia sawi tur zing a mi a ni.
"Zanin chu mi thar ka rawn hruai a, a chhe lo tehmai a nia aw." ka beng bulah arawn ti sur sur a, kei aiin he mihring hian a hmeichhe khawp a thlak zing hial lovang maw?! A hmeichhe hruai a bula arawn kal chuan Mawizuala sawi ang em a nalh a ni leh lem hlei lova.
.
Darkar khat dawn ral hnu pawh chuan a vanglai kan thleng dawn chauh nimai hian ka hria. Thawm bengchheng lutuk chu ningin pawnah ka chhuak a, ka awmna hmun atanga hawi thlak chuan kan awmna in kawtzawl zau zet leh eng ut chu a langchiang khawp mai.
.
Gate ah chuan bike arawn tlan lut a, bike hnunga thu hmeichhia ka hmuh chuan ka ding ngil zawt mai. Hmuh chian lehzual tumin ka en chik a, ka hai lo chiang khawp. Amah ngei a ni. Helai hmunah te eng thil nge arawn tih  ve dawn? A bula mipa ka hmuh chu tlai lama ka hmuh tawh pa bawk kha a ni. Ka ner nawk a. Engvanga ka hmuh apianga danglam nge maw ka nih teivet ni!
.
Inchhung ah ka lut a, Loretta leh Tetei chu kai tawh zet hian kil khatah an lo thu zawi ngiai a. Min  hmuh chuan Loretta chu rawn thu chhuakin min rawn pan a, a mitmeng atang chuan eng thil nge a beisei ka hai lo. Mahse, zanin chu ka phurna a reh vek tawh. Khawih vel chakna ka nei lo!
.
"Heiii_Inchungah chho ila.." min melh sawr sawr a, a ding ngil hleithei lo.
.
"I rui tawh a nih kha. Haw zawk ila a tha ang."
Nui har harin min rawn kuah a.
.
"A la nuam alawm. Inchungah reilote mu ila ka harh leh mai ang."
.
Nia, a harh leh deuh phawt loh chuan hruai hawn chi pawh a ni lovang. Inchungah muttir turin ka kuah chho a, tunah mai hian ka hne hluah hluah a ni. Hmeichhe nalh tak a ni a, min hauh na thin viau bawk a. Pawi ka ti ngai lem lo kha ania. Engtiang pawhin awm se ka sawisel ngai hek lo. Ka dam chhung hun min hmanpui tur a ni lo tih ka hriatchian vang pawh ani mahna, a awm dan dik lo tak hi siam that emaw inthlak tura duhna ka nei ngai reng reng lo.
.
Inchung pindan ruakah ka kuah lut a, khumah chuan zawi zet hian thuin a bula mu turin ka nghawngah min kuah a.
"Tunah chuan a theih loh. I harhfim lo."
.
"Enge pawi.." a hmui a pet sawi a, he hmeichhia hi chu ka hrechiang alawm.
.
"Muhil rawh.."
.
Kan awmna room kawngkhar inhawng ri rak ka hriat chuan ka hawi chhuak vat a, ka beisei loh ber ka hmuh tak chu!
.
"Muffin!" ka phun hluk a, ka tawng ri chu keipawhin ka hre phak chuang lo. A ni pawh min hmuh chuan a ding chawt a. A hnungah a mipa hruai kha arawn lut ve nghal bawk. Chupa hmel ka hmuh chuan a chhan ka hriat miah loh hian thinrimna in ka khat nghal vek.
.
"Oh! Mi an awm!" za lo zet hian Mufiin chu a nui hak a, min hria angin a awm miah lo. Min hmuchiang lo aniang ti dawn ila room light a eng ut si. Loretta ban chu vuanin ka nghawnga min kuahna chu ka phelh a, ka ding ngil nghal vat a.
.
"Chhuak ang.." nui kar karin mipa chu a kai a, room atang chuan an chhuak lehnghal a. Ka umzui ve ringawt bawk.
Pindan ah khan eng tih tuma rawn lut nge an nih? Loretta rilru ang pu khan mu dun turin an lo kal ve anih chuan... Ding leh rihin ka hma zawna bang chu ka chum nghek a. Keimah ka ni lo. Hmeichhia vanga ka inthununna ka hloh thelh chu!
.
Thawk lain muangchang zawk hian inhnuai lamah ka chhuk a. Music ring lutuk vang chuan ka lu a tur lehnghal ut ut hialin ka hria. Ka mit ka len kual a, Muffin leh a mipa hruai kha ka hmu leh mai tawh lo. Room dangah kalin nuam an chen a ni ngei ang. Enge ka lo buai ve ngawt.
.
Insehruh teuhin Mawizuala bulah ka thu a, ka awm dan dik chiah lo chu a lo hre rang khawp mai.
.
"Thiana, tinge a?"
.
"Engmah." tih chiahin ka chhang. Ka hma dawhkan te a in tur an dah chu lain vawikhatah ka tlak nghal pawp a.
.
"Khawnge Loretta chu?"
"Inchungah a mu." ka tih chuan a ner suk a. Min ngaihven zui lovin a bula mi a hnaih hrut hrut a.
.
Ka hawichhuak a, kan piah lawk thutna a Muffin thu ka hmuh chuan ngaihtuah lawk lem lovin ka pan nghal ruak ruak a. A bula thutna awmah chuan thuin amah ka en a, min hre ngai miah lo ang hian a la awm ngar  ngar nia!
.
"I tha maw?" ka tih chuan muangchang hian min rawn en a, a intur ken chu a in hlak a. A hmui hnawih sen hlar chuan a lan dan a tidanglam khawp mai. Ka zawhna chu a hre lo a nih hmel. A hawisawn leh mai a. Mi ngaihthah luih chu a thiam hle dawn mai.
.
A intur ken chu laksak in ka in a, ka phuh chhuak leh lo chauh a ni. Juice maw? Nge thil dang a telh
.
"Hetah hian enge i rawn tih ve?" a beng bulah kun hnaiin ka bia a, ka tawng a hriat chuan min en ha a.
.
"Hei, min hmu reng alawm." music ring lutuk vang chuan awki pangngai pawhin kan tawng thei lo.
.
"I mipa hruai kha.." ka sawi loh tur ka sawi_ Ngaihven anga lan hi enge a tulna..
.
"Lo buai suh.." nui sang chung hian a mit a siai zauh a. A awm dan chuan min khei ngar ngar nimai hian ka hria.
.
"Nang hi.." serious zet hian ka en a, ka rilru a thil lo awm chu ka duh lo kher mai. Duh lo tur ka ni reng em? Hetiang a lo nih tak nachhan hi keimah ka ni angem? Keimah vang anih chuan..
.
"Hahdam rawh." arawn kun hnai lehzual a "Kan thiltih kha i ngaihtuah let anih chuan theihnghilh rawh. Kha thil vang khan lawmthu ka hrilh kher dawn che em?"
He hmeichhia hian min barakhaih chiang tak zet zet a ni e!
.
Ka chhan leh hmain a tho a, a mipa rawn kalpui pa awmna lam panin music rem chuan zei lutuk tak zet hian a kal phei a. Mit khap nachang pawh ka hre lo!                                                                                                                                                                                                                                                                               
COPAS (HEARTS)
.
CHAPTER - 12
.
Thantei_LauraSean
.
H & E
.
A thianpa bul a thlen chuan an lam dun a, a nghawnga a kuah ka hmuh chuan ka sa nghal pup pup mai. Sawtiang sawn a lam thei ang tih ka la ring chhin ngai lo hrim hrim. Ring chhin tur pawhin hetiang hmuna kal vak chi ni a ka hriat loh vang khan ka lo ngaihtuah lo hrim hrim bawk. Ka thutna chu thawh sanin an awmna lam chu ka pan a, keimahah hian eng thil nge dik lo ta pawh ka hre lo e. Rui khawpin engmah ka in hauh si lo. Lam ve turin ka lam ngai pawh a ni hek lo.
.
A bul ka thlen chuan a lam chawl chuang lova min rawn melhin a nui sak a. Min beisei a min nuih a ni lo tih langchiang. Ka ngaih dan anih loh zia chu ka sawi buai kual vel lo mai ang. Keimah ni lo mipa dang hnaih taka a lam chuan ka chhungrilah hian mak takin min hnawh a, a lam dan chu hmeichhia inlak itawm tuma insawih vel ang a ni hauh lo nain ka taksa ah hian danglamna a thlen si a ni.
.
A bula mipa a kuahna a thlah rual chuan a kawngah ka kuah a, min rawn enin ka khawihna chuan amah ah danglamna a thlen lo tih min hriattir tum ni zawk awm tak hian a then sak a.
.
"Engvanga hetianga awm hi nge i nih?" a beng bulah ka kun hniam a, ka thusawi chuan engtin nge hna a thawh tih hriat ka duh vangin a hmel ka en a, a ner sak. Chu zawng chu! Ka rin loh dan tak hian ka nghawngah min rawn kuah a. He hmeichhia hi Muffin tia ka hriat thin kha a ni tawh lo!
.
"Engtin nge ka awm?" a taksa chuan min rawn si thlap a, ka taksa hnuai lam danglam chu a hre ngei ang. Kei hi.. "I hmeichhe duh tak kha engtin nge i kalsan theih zawk a?" a rawn ti sap a. Ka rilru awm dan hi ka sawi thiam ta hauh lo mai.
.
"I thik tih sawi i tumna a ni em?"
"Keiman maw?" mak tih hmel deuh hian a meng phar ak a, ka nghawnga min la kuah reng chung chuan dak meuh hian a nui a. Kan bul vela thil dang awm zawng zawng chu an chawl thup ni hian ka hria! A nui hmel chu hmuhnawm ti takin ka en a. A mitmeng chu lang de sarin min cho zet hian min rawn en leh a. "Tupawh kawp la lo thik tur ka ni em ni?" a lu thing in "Ka thik lo hlauh.. A lawmawm lamah ngai mai ang aw.." he hmeichhia zet hian eng thil nge a hriat a. Nia, hmeichhia eng mi pawh kawp ila.. A dik thei lo.
Chhang lovin ka dar ka tiche zauh ringawt. Heti taka min hnehsawh thei hmeichhia hi ka la hmachhawn ngai lova kei mipa ah pawh mipa tak tak nia inchhal thin hian sawitur ka haihchham chu a nih ber hi.
.
"I la serious lutuk anih kha.." ka nghawnga min kuahna chu phelhin ka awm ah a kut pahnih a nghat a. Min khawihna lai apiang chu ka thluak hian a hrechiang hle.
.
"Ka haw a hun tawh a. A nih phawt.."
.
Tak zet hian!
.
Ka rilru ka lo pek miah loh vangin awlsam zet hian a kawnga ka kuahna chu a phelh a, min kalsan chu ani nghal mai. Ka en zui a, umzui ka tum zet nain ka thulh leh. Ka inngaihtuah leh zet a nih loh chuan hmachhawn tawh rih loh a finthlak zawk ang.
Khawi atangin nge a lo chhuah leh tih pawh hriat lohin a thianpa khan arawn pan thuai a, pawn lamah an chhuak nghal a.
.
Tunah hian helai hmun hi ka chhuahsan ve nghal angai. Ka thluak ka tih fim angai anih hi.
.
Inchungah chhovin Loretta khuma lo mu darh nuai chu ka kai tho a, a la harh chiang lo chung chuan ka kuah chhuakin ka haw pui nghal vang vang a. An in kan thlen chuan a harh chiang ta deuhin ka hria.
.
"Naktuk ah ka rawn hmu ang che." min rawn kuah tumin min ban a, ka hnunglamah awnin ka lo dang thuai a. Tunah chuan ka ngaihtuahna ah thil dang engmah a awm thei lo. Ka vawikhat tihna anih lem loh vangin a hmui hnuailam tipawrh tarh hian a nur nang nang a. "Eng thil nge diklo awm?"
.
"Chutiang engmah a awm lo. Lut tawh rawh." an in lam ka melh a, zan dang ang bawkin a thim leh thap tawh.
.
Loretta'n min kalsan hnu chuan in lam panin motor ka khalh a. Hmingthansangi hmel  hlir ka mitthla a awm vang chuan ka thinur hlur tawh. Ka in ah ka lut a, ka room-a lutin khumah ka mu nghal thawr a.
.
He khumah ngei hian ka rilru luah ngut nguttu hmeichhia khan a  thianghlimna min hlan a, a hunlai khan a thinlung zawng zawng min hlan tih a  mitmeng mawi taka min melh khan a lang chiang vek a, tunah khawvela thil thleng thei lo tur khawp a ngaih thil mak ber chu lo thlengin a danglam ta si.  A lehpek a awm ngai anih chuan a awm ang chiah khan ka tan engmah a ni tawh bik lo tih ka tilang khawp ang. Ka hnawl vanga hetianga danglam ta leh engahmah min ngai ta lo anih phei chuan a hnawltu zawk hian amah aia nasa in ka ngaihthah thei ngei bawk ang chu.
.
Ni hnih ral leh chhung chu office-a ka kal bak hmun dangah thiante hmu pawhin ka chhuak peih lo a, mahni chauha ngaihtuahna kawm ka mamawh rih ni a ka inhriat vang a ni pakhat. Eng teh vak phei chu ka ngaihtuah chhuak lem hlei lova. A ngai bawk a nimai.. Hmingthansangi bawk! Amah vang hian ka tihtur pawimawh tak pawh ka mangnghilh dawn dawn alawm le. Ka tan engmah a ni lo. Hmeichhe pakhat ka laka tlawm tawh, ka hnawl tawh a ni. Liam rawh se. Engtiang pawhin awm se ka tan engmah a ni lo. Ui tur ka ni em ni? Ka ui ang maw..? Huh.. Ka ui lul lo mai. Ka induhtawkna a khawih che hlek chauh a ni. Chu zawng chu.
.
Ka pen humlai chu ka ulh keh rawp a, ka hma zawnah thehin ka thutna atang chuan ka tho a. Kal duhna ka nei.
.
Ka car la chhuakin ka tlan chhuak nghal a, Sawmzuala te in ka thlen chuan tlai lam dar 5 a pel fel tawh. Door bell ka hmet a, min chhangtu an awm mai loh vang chuan ka hmet nawn leh a.
Hmel phelh phang hian Tabithi'n kawngka arawn hawng a, ka hmel a hmuh chuan inhui mam zung zungin a nui lui sak a.
.
"Sawmzuala a awm em?"
.
"Uh, awm lo. I lo kal dawn tih min chah miah lova." a nui hmel chu ka en a, a hmuiin a nui a, a mitmeng chuan thu dang daih a sawi thung. "I dam tha chiah lo a ni maw?" ka tiliam puat a. Ngaihthat loh hmel leh chik taka zawhna zawh vel ka duh chiah lo a ni. Thil dik lo a awm ang tih chu mi a ber pawn an hrethiam ang.
.
"Dam tha e. Ka chhun mu ka lo mu tlang daih a. Min rawn kaitho lo phei la tlai eirawngbawl ka tlai vek dawn anih hi. Lo thu ta che." a ti zung zung a. Sawmzuala ber a awm loh chuan Tabi nen hian han sawi dun tur kan nei lo. A nau chungchang a thil thleng kan chhui tih hi Sawmzuala'n a nupui hriat a duh hauh hleinem.
.
"Ka kal leh zawk mai ang. Naktuk ah pawh kan inhmu thei tho a."
.
"Chuti tur maw? A nih i lo kal tih ka lo hrilh dawn nia." tiin a meng dul leh ta lap a.
.
An in ka chhuahsan hnu chuan tihtur dang ka neih lem loh vangin ka nu leh pa chenna lam ka pan ve ta thung a. Tun thla chhung hian ka la tlawh miah lo. Ka nu ngaih dan a pel nasa tawh khawp ang. Ka u te nupa leh an fate pathum nen an cheng a, mahni chauha hun hman tam duh chi ka nih vang hian keimahin ka awm hrang ta a ni. Mi thenkhat chuan chhungkaw buaina vanga awm hrang angin min lo sawi chiam tih kan hria a, engahmah kan ngai lem lo tlang aniang. Engmah kan sawi ngai lo. Ka nu erawh hi chuan ka awm hran taka tang hian nupui nei thuai turin min nawr ve sek a, 'ka nei thuai dawn alawm.' tia chhangin nupui neih lam ka ngaihtuah chuang der lo.
.
Kan in ka thlen chuan naupang an lo ri niai niai a, min hmuh rualin an te ber Thomas chuan te chul chungin min rawn pan a, ka lo pawm vat a. Naupang hi ka ngaina lem lo ni a ka inhriat laiin an unau ho te hi chu ka ngaina ve khawp. Ka tiluam thiam lo mai pawh a.
.
Zanriah ei kham hnuah keimaha ka chenna hmun panin ka chhuak a, ka tum lawk pawh ni lem lo hian a kual zawngin ka kal a, Muffin te in ka tlan pelh lai chuan ka mit la tak thil ka hmu fuh ta tlat. Ka tlan muang lui a, ka mi hmuh pa chuan min rawn ngaihven hmelin a lang lo bawk a, uluk zet hian ka enzui a.
.
 Party naa ka hmuh pa ngei kha a ni. Nghah nei ni awm tak hian Muffin te in lam chu a hawi a, in kawngkhar chu rawn inhawngin hmeichhia arawn chhuak a. Ka tlan muang lui nain ka hmu zui thei ta lo.
An in piah deuhah chuan dingin ka ngaichang a, ka awmna lamah hian an rawn tlan dawn lo aniang a reh vang vang mai.
Tlema tlan sawn leh deuhin motor ka turn a, thil thleng tur awm tlata hriatna ka nei. Muffin hi tunhma zawng khan zan lama a chhuah vak ka hre lo. Ti ila, a chhuak vak ngaiin ka ring lo. A hma khan lo chik vak nachang ka hre lo a, mah se, a danglam tih erawh ka hrechiang fu si chu anih hi. Engtik atang khan nge a nunphung hi a lo danglam tak em em le? Kha pa nen khan an inzui tam viau bawk a nih hmel tlat. Chu thil chu ka pai dai thei tlat lo!
.
Thui pawh ka tlan hmain anmahni ni awm tak chu ka hmu ta thuai a, ka thaw deuh hawk. Ka rin lohna lamah an peng thut a, umzui zel tur anni nge ni lo ka hrethiam ta lo.
Ka duh loh tawp thil ka hmu ang tih hlauhthawnna  ka neih chu dahthain an penna kawngah chuan ka kal leh ta zawk a.
.
Thui vak lo ka zui hnu chuan an ding a, an kalna tur in atanga thawm lo chhuak ka hriat chuan hlimhlawp thilah an kal dawn tih ka chiang nghal mai.
Motor atanga chhuak lovin an lo chhuah leh hun  ka lo nghak mai ang tiin ka thu ta ran a.  Kei hian eng thil nge maw ka tih tak le? Hmeichhia ka umzui tak chiam mai chu.
.
Thawm danglam inchhung atanga lo chhuak ka hriat chuan ka thu ngil zawt a.
.
Hmeichhe thenkhat an te teng tung a, mipa rum hrawk hrawk thawm ka hriat chuan ka inhriat hmain motor atangin ka lo chhuak fel der tawh. Inchhung ah chuan ka lut a, mipa pahnih insual chu ka hmu nghal mai reng a. Thelh an tum hmel hlawm loh. Muffin hmel ka zawng a, ka hmu mai lo. Hetiang hmunah hian eng thil nge maw a tih phiangsen ni? A mipa zui khan a venghim thei lo anih teh chuan...
.
Ka rilru a thil lo lut zawk vang chuan ka mit ka chhing sawk a. A ni thei lovang..! Ahmaa inremsiamna ka neihpui thil ah khan a inrawlh zui anih chuan a him dawn lo chiang khawp!
.
Mipa awm ho chu ka melh kual thuak thuak a, ka hmelhriat ka hmu lo. Oh..! A mipa zui fo pa kha kil khatah hian a lo ding reng a, min rawn hmuh chuan a awm dan danglam lem lo hian min rawn nuih suk a. Ngaihtuah lawk lem lovin ka pan ve nghal hmiah. Muffin hmel ka hmu lo.
.
"Hetah te enge i rawn tih dawn teh tlat a?" pangngai zet hian min bia a, keipawh ka inthunun ve bawk.
.
"Kan inhmu leh ta hlawl alawm." min zawhna chu chhan ka tum lo. "I tha maw?" ka ti ta zawk a.
.
"Tha alawm." inchung lam a melh zauh chu ka hmu reng a, pangngai taka lang chungin ka kal pel a. Inchung lamah Muffin a awm ngei ang.
.
Inchunga chhoh tumin inchung panna step awm zui chu ka pan a, hmeichhe thenkhat chuan min ngaihven tih hriatreng hian min lo melh rawlh rawlh hlawm bawk a, a chep deuh bawk nen kan innek thuak thuak mai.
.
Inchung ka thleng a, ka rin loh deuhin inchung lamah pawh mi an lo awm teuh tho. Muffin chu ka la hmu ta chuang lova. Khawiah nge maw a kal reuh le? A mipa zui kha lo zawt ila tha tur.
.
Pindan chhuahsan tuma ka inher chuan kawngka ah arawn pen lut ve chiah. Min rawn hmuh chuan min beisei lo tih a hmelah a lang chiang khawp mai. A bulah kal hnaiin a banah ka vuan a.
.

.
HMINGTHANSANGI*
.
Eleazer maw! Hetah hian engtin nge arawn kal ve theih? Ka him chiah chiah a ni e.
.
Min ringhlelh hmel taka min en chik hnuah ka banah min rawn vuan a, pindan atang chuan min kai chhuak a. Hnial buaiin awmzia a nei dawn lo tih ka hria. A hmel hmuh fo hi ka duh lo asin. Tunah tak phei hi chuan ka mamawh loh ber mihring a ni chiang khawp.
.
"Eng thil nge itih?" min kalpui hlawk hlawk a, ka tawng chu hre awm pawhin a lang lo.
.
Pindan pakhatah min kai lut a, helai hmun hi a hrechiang viau anih ka ring. Ka inrin hma hauhin bang ngheng rawk hian min dawm bet a.
.
"Hetah hian enge I tih?" min hnaih lutuk mah mah a ni. A mitmeng thim raih chuan min en a, min zawhna chu chhan ka tum lo. Pindan a eng ut lo chu ka lawm tak zet. Chiang deuhin ka hmel hi hmu se min ringhlel lehzual dawn chiang. Ka thiltih hi a hre tur a ni lo. Amah chauh a ni lo, mi dang reng rengin kan thiltih an hriat hi a thiang lo. Te-a nen chauh kan hriat tur thil , thuruk tawpkhawk a ni.
.
"Enge itih zawk?" ka ti fak a. Ka chhan dan chu a beisei loh dan a ni ngei aniang, min vawnna chu tinghet zual sauhin a insehruh tih ka ka feel thei.
.
Tawng lova min rawn hnaih lehzualin ka chalah min rawn si a. A awm dan hi ka hrethiam lo. Min hmerna chu a thlah dul tial tial bawk a. Keipawhin sawi mai tur ka hre bik lova, ka hriat zawng chu tuna kan awm dan ang hian kan awm reng a nih chuan thil tha aiin thil tha lo a thleng ang tih hi a ni.
.
A kut dinglam chuan ka tukhumah  min rawn vuan a, a chet dan chu ka beisei loh em vangin ka hamhaih a ni ber. Ka ding tawp. Ka hamhaih ka tih rualin Eleazer hi ka thlahlel tih erawh ka pha thei hauh lo mai.
.
"Min kuah rawh!" kan hmui a insi lo chauh tawh a, a tawng zawi em em bawk. A tawng chu ka hresual anih ka ring zawk.  He mihring hian engatan mah min ti tak tak lova, tunah hian engvanga hetianga rawn awm nge anih reng reng? Kalsan ka tum ka thinlung natna hi tuna a awm dan vanga a thar ang maia tuar leh ka duh tawh lo. Ka tum lo bur. A va harsa tehlul em!
.
"Eleazer.."
.
"Shh!" a kutin ka hmui arawn tawk a. He thil hi ka tihtawp angai.
.
“Eleazer, duhtawk rawh. I tan engmah ka nih loh ang bawk hian ka tan engmah I ni tawh lo. Ka tan a harsa zawngin awm suh.” Ka tawng chu a ri chhuak chang chang a ni. Ka ngaihtuah thin  anga chak taka awm thei chu ni ila tunah hian an khumin ka tha neih zawng zawng seng meuhin  ka ham bawrh bawrh ngei ang. Ngaihtuah ang ngawt hi a ni thei thin si lo. Thinlunga inhmangaihna awm hi chaklohna thlentu chauh a ni e.
.
A awmah ka nem a, a che eih lo. A maimitchhing niin ka hria.
.
“Hetah hian enge irawn tih?” ka ti tha leh a. Min chhang lo. Tunah chuan ka aw pawh a pangngai ta deuh.
.
Min vawnna chu thlahin ka banah min vuan leh a, min dek lo hian awm se ka hahdam zawk ang.
“Chu zawhna chu keipawhin ka zawh che kha.” a ti nghut a.
.
“Eng thil nge ka tih.. chu chu ka buaina tur a nia. Min zui tawh suh.”
.
“Ka zui che ni a I ngai anih chuan theihnghilh rawh. I mipa zui thin hi hnaih lo bawk la a tha ang.”
.
Ka nui hak a, ahma lawka kan boruak kha a inthlak leh vek tawh.
.
“Chu chu ka buaina bawk. He pindan ah hian engvanga min hruailut nge I nih? Min zui lo anih chuan tunah hian ka kal nghal mai ang. A lawmawm e.” ti nghatin  min vawnna chu ka phelh a.
Kawngka ka pan a, kawngka hawng tura ka ban ka phar chiah tih hian ka nghing dawt a, au ka tum a, ka au chhuak thei lo. Eleazer hmel chu fiah lo ruai hian ka hmu a, min dawm tumin min rawn pan ngei a  ni. Ka hawi sawn hlek a, pindan chhungah chuan amah ni lo mi dang ka hmu bawk. Eng thil nge thleng hi??
COPAS (HEARTS)
.
CHAPTER - 13
.
Thantei_LauraSean
.
H & E
.
ELEAZER*
.
Muffin chu a tluk hmaa vawn hman tumin ka pan a, ka che rang tawk lo. Chhuatah chuan a tlu thlawrh mai. A tluk rual deuhthawin a bula mihring ruangam chu ka hmu ve chiah bawk. A hma khan khawiah nge a lo biruk ka hre lo. Nge, kan inbiak lai khan thil dang reng reng ka lo ngaihtuah lova, kan luh hmaa lo awm sa ni lovin kan inbiak lai khan a lo lut pawh a ni thei tho. Chu ruangam chuan min rawn hmachhawn a, engpawh thlen huamin ka hmachhawn ve hmiah bawk.
.
A kuta a thil ken chu enge a nih ka hre lo, ka lam hawiin a rawn lek a, ka lo indang hman hlauh. Tupawh chu nise a thil tum atih loh nan ka dan ngei angai tih ka hrechiang em em. A chet leh hmain ka hnek a, a fuh khawp aniang a ri no chawk a, a pai nghal chawn chawn mai. A thil ken chu a thlauh nghal bawk a. Ka chet leh hman hmain pai nawk nawk chung chuan kawngka a hawng a, a tlan chhuak  nghal a. Ka um dawn zet a, chhuata Muffin tlu reng chu na tuar tih hriat zet hian a rum hak a, ka rilru ah thil dang reng reng a awm tawh lo. Muffin bulah chuan thingthiin a nghawngah ka dawm kang a.
.
"I tha em?" eng thawm mah a chhuah lo. Room hi tih en phawt a tul anih hi. Muffin chu thawhsan in pindan chhung eng thalo zet rinchhan chuan light on na tur switch ka zawng kual a. Vannneihthlak zetin ka hmu har lo. Light ka on a, Muffin chu ka pan lehnghal a.
.
"I tha em?"
"Umm" a ti sap a. A hmelah  na tuar hmel a lang hran lo. A meng a riai a. Thut tuma a in nem kang chu ka lo pui  vat a. A mit a chhing vang vang a, a awm dan chu a hrethiam bik lo tih a hmel buai deuh nak atang chuan a hriattheih. A rawn men leh chuan a mitmeng a lang pangngai ta deuh. Zanin chu tum loh dan leh beisei loh thil a thleng ta teuh a nih hi.
.
"I ding thei angem?"
"Um.."
.
Tanpui tumin ka vuan a, ka vawnna chu duh lo niawm tak hian a kutin min lo dang a. Eng thil nge maw a hriat hrep ni.
.
"Ka tha tawh e. Tunge i lo hmu hman em?" a ti sap a. Chik zeta min enin a dul a dawm zauh a. A na ai chuan amah tihnat tumtu kha a ngaihven zawk tih a langchiang reng mai. Ka rin aiin a tawh a khirh reuh zek dawn a nih hi. A hmel en ang ngawta zuam chi pawh a ni reuh lo ang.
.
"A hmel ka hmu hman lo."
.
"Kha thil kha enge?" ka piah deuh chhuata thil let bal chu a kawk zauh a. A thil kawh chu enin ka pan a. Tun hmain hetiang thil hi ka la hmuh awm pawh ka hre lo. Ka chhar a, chiang deuha ka en chuan on leh off button chu ka hmu mai a. Ka on chhin chuan nghawr dar darin a hmawrah tek deuh chhek chhek a awm bawk. Current hmanga in shock-na chi khat a  nih ngei hi. Rei deuh mihring taksa nen a insik chuan khawlohna tham a ni thei ngei ang.
.
"Khawi min pe rawh." Muffin chuan ka hma zawnah a kut arawn phar a, ka thil ken chu off in ka jacket ipte ah ka ak nghal hmak a.
.
"Helai hmun hi chhuahsan teh ang. Eng tih tumin nge maw hetah hian i kal reng reng le." amah ka bia pawh ani chiah lo. Ka rilru a zawhna awm ka sawichhuak a ni mah zawk.
.
Kawngka ka haawng a, a banah vuanin ka chhuahpui a. Pawn kan thlen rual rualin ka vawnna chu a phelh nghal a.
.
"Hmun dangah kan intawn fuh tawh lo ka beisei." tiin min en tawh lovin min kal pel a. A nungchang danglam hi ka hrethiam teh nuai lo. Chuan, helaia ka zui luh chhan ber kha ka lo theihnghilh deuh der bawk. A inrawl lohna tur tawpah a inrawlh em tih hriat ka tum kha ania.
.
Inhnuai panna step-a a chhuk chu ka en reng a, a ban dah dan atang chuan a dul bawk a dawm leh niin a lang. Umzui erawh ka tum tawh lo.
.
Ka tum aia rei party na hmunah chuan ka awm a, room-a lo kal ve kha a ruangam atanga hriatchhuah theiha a lo la awm tak mialin tih thua awm khawtlai ka ni. Ka besisaei san loh ang chiahin han rinhleh tur pawh ka hmu zui lo.
.
Ka in ka thlen leh meuh chuan zing lam dar hnih a pel tawh. Ka ngaihtuahna ka hmang nasa deuh bawk nen ka chau deuh hnawkin ka hria. Ka inbual hnuah khumah ka let nghal tawp a, ka ngaihtuahna ka hman hma hauhin ka muhil der mai.
.
.
Ka phone ri vangin ka muhil ka harh hlawl a, office atangin min lo call tih ka hmuh chuan ka pick up vat a.
.
"Sir, i lo thleng dawn tawh em? Nangmah hmuh tum an lo thleng tawh a."
.
"Um, reiloteah ka lo thleng ang." tiin phone ka off a, khum atanga thovin ka insiam nghal zung zung a.
.
HMINGTHANSANGI*
.
Ka muhil thei lo zankhua thak. Pindan atanga kan chhuah hnu khan Tea hmuin kan haw nghal a, ka dul chu ka la hmu lo nain a na telh telh mai. Tu phiangsen nge min zui ru tu kha ni ta ang? Eleazer pawh khan engvanga min zui  nge anih? Ah, Eleazer kha chuan min zui pawh a ni kher lo thei tho. Party naah a kal fo a, khalai hmunah khan a lo kal ka lo ring lo ve ringawt a ni. Hei chu duhtawk ang. Na tuar deuh mah ila ka duh ber pakhat ka hmu tho alawm le!
.
Thil thleng kha Tea hnenah pawh ka sawi lo. In ka thlena ka room ka luh rualin ka duh chu ka en vat a, a lo duk/sen kual raih mai. Min dehna hmanrua kha hreciang turin Eleazer kha lo chuhlui ila tha tur.
Tui sa ver vawrin ka inbual a, ka dul na pawh a zia ta deuh. Ka mu nghal a, ka mut a chhuak lo nasa. Ka leh kual ka leh kual hnu chuan khum atangin ka tho a, ka khum bul drawer-a ka thil dah chu phawrhin ka en vang vang a.
.
Tihian Robert pendrive-a thlalak a lang ho pahnih chu ka chhui zui hlawhtling ta phawt! Robert thihna ah khan an lo inrawlh ngei em tih erawh a la chiang chuang lo. Engvanga buai hnawk em em nge maw anih le?
.
Te-a bulah hian engkim ka sawi thei rih lova, engkim ka hrilh lo tih a hriat ka duh lem lo bawk. Te-a hi Robert nen cousin anni tih ka la sawi lovin ka hria. Robert nen khan an inhnaih hle a, chuti chung chuan min pui thei thil hriat a nei tam lo. A hriat zawng chu Alawmi nen khan an lo inkawp ngei tih chauh hi a ni. Ka hriat hma daihin a lo hre tawh bawk a. Robert thihna khan a thawng ve takzet a, Alawmi tana thudik hriatchhuah ka duh ang bawkin Robert tan a theihtawp chhuah a duh ve bawk a, chu chu kan inthurual chhan leh engkim a kan inzui tak chhan a ni. Robert thih atanga kar khat vel aliam hnu khan kan in ah lo kalin kan titi dun a, a ni hian engtin nge rinhlelh a neih ka hre lo a, thil hriat ka neih beisei a min lo pan ve ngawt pawh hi a mak tho mai. Zawhna min zawh dan atangin ka rilru ang tho a pu tih ka hrechiang a, ka thil hriat thenkhat ka hrilh ta a ni. Tlaiah office ban veleh min rawn lam a, inthlakna tur keng lawk vekin office ka kal ta ziah bawk. Mahni ka inven theih nan eng emaw ka zir angai tih a sawi a, a sawi ang chiahin tlaiah mahni inven dan ka thiam theih nan an inhnuaiah ka inzir ta ziah a. Hmeichhia te hian mipa anga tharum kan ngah loh vangin thiam thil nei a inven dan kan thiam hi a lo tul takzet tih ka hrechiang dawn chauh anih hi.
.
.
Khawvar dawn hnaihah ka muhil sek a, mutthilh loh ngawt ai chuan a zia deuh. Office-ah thil thleng danglam awm lovin ka nileng a, tunlai te hian ka hna hian ka rilru a luah tam lo khawp mai. Phat theih pawh a ni lo.
.
Tea ka phone a, a lo kal theih dawn loh thu arawn sawi a. A pawi ka ti hran lo. Vawiin chu tlai lam chawlh ka nei dawn tihna a nimai.
Office ka chhuah san a, zingah Tea a lo kal thei dawn lo tih ka hriat lawk loh vangin taxi in ka kal a, tunah pawh taxi bawka ka haw mai angai dawn a nih hmel.
.
Office kawt ah dingin taxi ka chang a, ka hmaa car arawn din chuan tu car nge tih ka hre nghal mai.
.
"Ka lo thlah ang che."
.
"Angai lo mai. Taxi ka lo chang a. Ka lawm tho tho e." tia chhangin ka nui lui ngial a.
.
"Hmuh che ka duh chhan a awm tih i hriatthiam ka ring. Lo lut rawh." ka chet eih loh vangin car atang chuan chhuakin min rawn pan a.
.
"Nizan khan inzui tawh loh tur kan ti khan ka hria a." ka tih chuan a ner suk ringawt.
.
"Ka zui dawn lo che. Hriat duh ka nei a, i thil hriat duh tak ka lo hrereng maithei bawk. Nawrluih ngai lovin car-ah hian lut rawh." a hmel chu a thutak takzet. A ni hian ka thiltih mek hi a hria emawni le?
.
"I chungchang anih phei chuan hriat duh ka neih pawh ka hre lo."
.
Tawng tawh lovin nghet zet hian ka banrekah min chelh a. Tunah pawh kan innawrlui chu anih leh tak ber hi. Eleazer nen anih tawh chuan hnehna ka chang ngai lo.
.
A car-ah chuan lungawi chiah lovin ka thu lut a, a ni pawh driver seat lamah thulut in kan tlan chhuak nghal a. Khawilam nge kan pan dawn pawh ka zawt buai peih lo. Eng zawhna pawh min zawt se cool takin engkim ka hmachhawn ang.
.
A car a tih din chuan ka la ngawi ran a. Helai ang hmun fianrial pan ngai khawp hian eng thil nge hriat duh a neih le?
.
"Nizan khan i thil duh i hmu em?" a kut pahniha car steering wheel vuan chungin min en a, a mitmeng atang chuan enge a ngaihtuah a lang miah lo.
.
"Enge min zawh chu? Thil duh enge ka neih?"
.
"Zawhna ka zawt che anih chu. Zawhna pakhat ka zawt che a zawhna pahnih dawnglet turin ka zawhna kha ka zawt lo che."
Ka chhang lo.
.
"Inrawlh lo tura ka duhna che thil tul lo ah hian i inrawlh ngei tih ka hria ania."
.
"I lo buai ve na tur enge awm?" ka ti nghat a. Engmah sawi ka tum lo. Engtin nge min rinhlelh theih zawk. Amah hi engkim ah a lo inrawlh zawk pawh ani thei a, engmah a la hriat loh. Min vil tlat pawh hian chhan tha tak a nei ngei ang.
.
"Thiltih chu i lo nei ngei anih chu." a ti nghut a. Ka tawng sual zeuh tih ka inhria.
.
"I ngaihdan dan le.." ka ti sap a.
.
Min en reng chungin a lu a thing a, a nui suk bawk. A hmel chu ka enzui duh lo.
.
"Anih chuan kan pahnih chungchang hi sawi teh ang." he mihring hian ka inthununna min hloh tir talh a tum ni berin ka hria. A rin loh dan taka awm dan tur chu ka hre ve alawm.
.
"Eng ber kha nge kan sawi ang?" phur hmel fahrana lang lui chung hian ka thut dan siamthain ka hmachhawn a. A mithmul a tiche zauh ringawt.
.
"Tunah khan i lang nalh lutuk tih i inhria em?" a awm dan danglam miah lovin min en ngur a, zam tur ka ni lo, mah se a mitmeng danglam ka hmuh chuan ka zam lo tih inringtawk takin ka sawi thei tawh lo. Hetiang mitmeng hian min la en ngai miah lo bawk niin ka hria.
.
Nui luiin ka meng kual ralh a.
.
"Chu chu maw kan sawi tur. A va ho si ve. Infakna dawn chu a lawmawm alawm." ka tiliam puat a.
Ka kut arawn vuan a, a hmui bulah la chhovin ka banrek ah a fawp a. Ka kut chu laksawn leh mai tumin ka tang deuh a, min vuan nghet nasa mai. A kutzungpuiin ka banrek a marphu chu a tuai hauh hauh a. A mita ka en chuan a meng de sar bawk.
.
"Eng emaw chu ila feel ve reng tih i pha thei lovang." chhang lovin ka en tawp. Engmah ka feel lo tiin chhang ila dawt ka sawi chiang lutuk tih a hre ngei dawn a, chu chu a tul ka ti lo.
.
"Hmangaihna hi a awm tak tak i ring em?" a tawng a zawi khawp mai. A hmel a thutakin uluk taka ngaihtuah hmang a ang bawk. Hetiang hmelpu hian ka la hmu ngai lo. Ka inven vat angai dawn anih hi. Bakah inrunluih leh hnehsawh tak taka ka chhan reng hian hma ka sawn phah tlat lo. Ka cho chhuak zawk ni maiin ka hria.
.
"Mi thenkhat tan chuan a awm ang. Bakah, Eleazer.. Kan pahnih chungchang sawi i duh chhan chu eng ber nge ka hre lo nain_ kan inkara thil thleng tawh kha chu theihnghilh ang. Engmah.."
.
"Engmah thleng lo anga ngaih ka thei lo."
.
"Anih chuan i ngaih dan chu i ngaih dan ni sela, ka tan chuan engmah a ni lo."
.
"Dawt sawi suh."
.
"Enge dawt ka sawi  ngawt ang. Ka sawi tum tak zawk chu.."
.
Min rawn kuah bet thlawp a,a rem tehchiam lo khawp mai.
.
"Duhtawk tawh ang." ati hrawk a. A aw rik dan atang chuan tawng chhuah a harsa ang tih ka ring. Eng thil nge duhtawk a duh chu..? Engvang nge ka hriat  hauh lovin ka thin a rim thut bawk.
.
"Aw le, min chhaih kual hi a tawk tawh viau reng a ni. Min thlah rawh. Tlang takin ka sawi ang. I bulhnaia awm hi ka duh lo."
.
Harh chhuak thut niawm tak hian min kuahna chu min thlah a, dawn awm lovin motor a tinung a, chak zet hian kan tlan chhuak nghal a. Min melh tawh lova, keipawhin engmah ka sawi tawh lo. Kan inkar boruak awm dan chu kan inhlat ta vawng vawng ni hian ka hre ber. A hmel chu ka en zawk a, a thialpawn pawn talh talh dan atang chuan a inthunun nasa hle anih ka ring.
.
Amah hlata awm hi ka tan a tha zawk. Ka thinlung chhungril takah hian hmun chang mah se, amah hnaih loa ka awm hi a tha zawk! Ka ngaihtuahna chuan min tina nawn vawng vawng mai. Alawmi thihna ah lo inhnamhnawih ve ta se tuna ka nat aia nasa zawk hian amah hnaih loh tura ka beih angai ngei ang. Chu thil chu tuar ka duh tawh lo. Ka tuar tawh kha tawk rawh se.
.
Kan in kawtah a ding dawt a, engmah sawi lovin car atangin ka chhuak a. Amah en tawh lovin kan in lam ka pan a, inchhung ka luh hmain a tlan chhuak leh thawm tha zet chu ka hre nghal pang bawk.
.
Ni thum ral leh chhung chu ngaihtuahna mumal nei lovin ka hmang liam vel mai mai a, chanchinthar hriattur a awm lo.
.
Zanah ka room-a ka awm laiin Te-a arawn kal hlawl a, a ni pawh hi ni thum chhung khan kan inhmu lo chauh pawh ani lo, biak ka tum pawhin chhanna ka dawng ngai lo hrim hrim.
.
Ka bula arawn thut rualin "Eleazer chuan eng thil nge a hrilh che?" a tinghal tawng a.
.
"Enge i sawi awmzia?"
.
"Hmanni khan nangmah hnaih lo turin min hrilh alawm. Ka hnaih lui che anih chuan ka duh loh thil a thlen tur thu min hrilh bawk a. Hmingte, dik tak chuan, kan buai rukna thilah hian Eleazer hi a inhnamhnawih ang tih ka chiang. Engvanga Alawmi chungchang te hi  ngaihven nge anih? Sawmzuala nen an inkawm ve a nimai a, a ngaihven nachhan tur ka hre pha lo."
.
"Chuvang chu a ni em ka call pawh i chhan ngai loh?"
"Ni chuang lo. Kan hnaah ka buai zual a, chuvang chu ania." a hmel lan dan chu nidang a ang miah lo. Hlauhthawn nei ang mai hian a inring reng niin ka hria.
.
"Dawt i sawi tih ka hre vek a nia."
.
"Engmah ani lo. Eleazer hi hnaih lo la ka duh." a ti leh ringawt a.
.
"Ka hnaih hleinem. I awm dan hi amak a nia."
.
"Naktuk tlaiah ka lo hruai ang che."
Thil dang sawi leh hman hmain a tho vut a.
"Ka haw mai ang. Tihtur dang ka nei a."
.
Min chhuahsan a, eng thil nge a hriat ka hre lo nain ka ngaih a tha lo zual hle.
.
Thil tam tak ka ngaihtuah kual vak vak a, ka muhil leh thei pek lo.
.
Ka phone nghawr dar dar chu lain caller ID ka en a. U Sawmzuala maw? Tunang zan rei tawhah lehnghal. Phone ka pick up rualin "Eng thil nge ni ta?" ka tinghal a.
.
"Vawiin ah Tabi nen in inhmu em?"
.
"Hmu miah lo. Eng thil  nge ni ta?
.
"Zingah office ka kal dawn khan in inhmuh tur thu a sawi a, tlaiah in ka thlenin in ah a lo awm lova. Dar 8 vel thleng kha chu ka call in a phone a la ring a, mahse a pick up lova. Tunah ka phone tlang thei tawh lo."
.
"Biak pawh ka lo tum ve ang. Hlauthawng lo la, thil tha lo a thleng em lovang."
.
"Ka lawm khawp ang. Tunlai hi a awm dan a tha tawk lo bawk nen ka hauthawng khawp mai."
.
"Um, anih chu. Ka biak tlang theih emaw a chanchin hriat theih emaw ka neih chuan ka lo be vat dawn che nia. Lawk in, a nu leh pate i be tawh em?"
.
"Be tawh. Zanrei hnuah ka be lo. An hlauthawng nasa dawn chiang a.."
.
"Okay. Ka hrethiam e."'
.
Phone kan off a. Tabi.. Dar 8 vel atangin a biak tlang theih tawh loh. Te-a kha kan in a chhuahsan khan dar 8 vel bawr a nia.. Ni lo.. Engvanga Te-a ngaihtuah daih nge ka nih. Tabi awmna chu kan hriat vat angai.
.
Dar 10 a pelh tawh a, a la tlai chhe lutuk lo bawk a, a nu leh pate chu chanchin zawt ve pangngai angin ka be thei ang chu.
.
Nu Hmai chuan ka rin aiin a phone a pick up hma. Tabi chanchin ka zawh chuan a that a rin thu leh vawiin ah an inhmuh loh thu min hrilh a. Rinhlelhawm anga lang lo turin rei vak be lovin kan inbiakna chu ka titawp a. Ka kal chhuah ngei a ngai dawn anih hi.
.
Ka thawmhnaw hak thlakin inhnuaiah ka chhuk a, ka nu leh pa hnenah chhuanlam ka siam angai leh ta. Kan thawhpui zinga mi a pa damlo a zual vanga kal chhuah ngai angin ka insawi leh ta mai.
.
Scooty ka tinung a, Tabithi kalna awm ngaihtuah chungin ka khalh chhuak a. Enge ka ngaihtuah ka hre lo Te-a ka call a, vawi thum ka call naah thaw hluam hluam chung hian min rawn chhang a.
.
"I chhuak lawk hman em? I va thaw nasa ve." ka tih chuan a nui hak a.
.
"Ka laklawh alawm le. A tul viau ami?"
.
"Pawi lo mai." tiin phone ka off a. Ngati nge Te-a hi ka rinhlelh tlat le!?
.
Te-a te in lam panin ka tlan a, keimahah hian min mawlhtu a awm tlat. Ka chian phawt anih loh chuan ka hahdam dawn tlat lo. Tabithi chu Te-a hian.. A thawk hluam hluam dan te kha..
.
An in ka thlen dawn hnaih chuan ka tlan zawi deuh a. Te-a room hi an inhnuai ber, an in thlang kawngpui hrula awm a ni a, engtin tin emaw a room chhung hmuh dan pawh a awm mai thei.
.
Ka kawr hak chu siam thain Te-a room awmna lam chu ka pan a, ka thaw dep dep mai. Tunang zan rei tawh lama hmeichhia mahni chauha chet hi a him lo tih chu ka hria. A him lo tih ka hriat vang ringawtin in ah ka awm thei der si lo. Thil pawi a thleng em lovang chu.
.
Tukverh puanzar chhan atang chuan room chhung chu a eng dul raih a, a room hi pingdang in a awmna lehlam chiah hi tlaia ka inzirna pindan a ni. Thim chinah ka ding a, thawm dim thei ang berin bang ngheng chuan ka tawlh hret hret a.
.
Thawk leh khatah ka hnunglam atang hian min rawn kuah chawt a, ka au chhuah hmain min kuahtu chuan ka hmui arawn hup a. Hneh zetin min kuaiher a. Min vuantu hmel ka hmuh chuan ka rin loh lutuk ber a ni.
.
Eleazer!!
COPAS (HEARTS)
.
CHAPTER - 14
.
Thantei_LauraSean
.
H & E
.
ELEAZER*
.
Ka hmel min hmuh chuan a meng phar awk a. Mak a ti tih a lang chiang lutuk. Mak atih tluk zetin kei pawh hian mak ka ti.
.
"Hetah hian enge i tih?" a zawi thei ang berin ka tawng a. Tun ang hun zanrei tawh lamah hmeichhia amah chauh a a kal chhuak hi a him lo lutuk takzet. Tawh sual tawk palh ta se, amah a invenghim thei awm tawp si lo. A him loh zia ka hriatchian vang leh thil tha lo a chunga thleng thei ka ngaihtuah chuan ka thin a tawt ut ut thei hial. A hmui ka hupna chu min phelh tir tumin ka banrek ah min vuan a, ka thlah thuai a.
.
"Enge i tih zawk?" takzet reuh hian a!
.
"A him lo tih i hria em?"
.
"Lo buai suh." ngaih dan nih loh hmel zet hian min melh ram ram a. He hmeichhia hi ka hrethiam lo tawp mai.
.
"Lo kal teh.." kan awmna hmun atang chuan ka kai sawn dawr dawr a, min hnial duh teh mah se tharumah min hneh lo em a, a tang ve tak nain awmzia a nei tehchiam lo.
.
"Khatah khan eng thil nge itih?" a dar tawn tawnah ka vuan a, thin nawk nawk mai ka duh hial.
.
"Vawi engzat nge ka buaina a ni tih ka hrilh nawn dawn che. Min thlah rawh." hnai zetah min en in awki hniam tak hian min vin khar khar a, a mitmengah hlauhna a awm eih lo.
.
"Eng thil nge hriat i duh? Hriat duh i neih chuan min zawt rawh. Ka hria anih phawt chuan ka hrilh ang che. Tunang tlai tawha hmeichhia mahni chauha kal chhuah hi a him lo hulhual."
.
"Zawh duh che engmah ka nei lo." a ti leh fak a. A thianpa room lam chu a melh zauh zauh a. Helai hmun thleng tur hian eng thil nge a hriat ka hre lo nain ka duh loh ber thilah a intatlut tih erawh zawh buai ngai lovin ka hrethiam tawh. A him loh zia a hre tawk lo a ni ngei ang. Mipa zawk pawhin fimkhur thei ang bera ka chhui ruk laiin a ni hmeichhe tan hian a him lo.. A him lo lutuk takzet.
.
"I lamtang niin ka hre sia, engvanga enthlak ngai ta nge anih le?" tu chungchang nge ka sawi tih a hriat  theih nan a thianpa room lam chu ka melh a.
.
"Enge i sawi awmzia?"
.
"Tel ve lo tura ka duhna thilah che hian i tel ve tih phat buai tum duh suh." ka tih chuan a tang leh ta phat mai.
.
"Min thlah rawh."
"Teuh lo!"
.
Ka awmah a tha neih zawng zawng sawmkhawmin min nem a, kan insual chu a ni ta ber mai. Thawm chhuah vak na hun leh hmun a ni lova, tun anga min sual let ngam anih chuan midangin kan thawm an hre thuai dawn. He thil hi ka ti lo thei ta lo! A nghawnga a point-ah ka hmet zeuh a, a zawi nghal riai riai mai. Ti lo thei lova min sual let vang chauh a ti ka ni. Tang tur a awm tak lovah chuan ka pawm kang nawlh a, ka motor dahna lamah ka kalpui a. Motor hnunglam seat ah luh puiin ka la pawm ta reng a. A lo harh leh hma chu amaha muttir mai tur ka ni tih ka inhria, mah se ka thlah phal lo. A chunga thil tha lo tih tum ka ni hauh lo a nia. A harhfim laiin tuna ka kuah ang hian ka kuah thei lova__mipa tenawm tak ang mai ka nih zawh tak hi.
.
Minute 10 a ral chuan a rawn che talh talh a, ka kuahna chu thlahin motor seat-ah chuan ka thuttir a, minute 5 pawh tling lovah arawn pangngai leh dawn tih ka hriat sa vanga thlah vat ka ni.
A awmna hmun chu hriatthiam loh hmel tak hian a enkual a, ka hmel min hmuh chuan thut ngil tumin a bei a, a tha a la zawi tih hriain ka pui vat a.
.
"Ka chungah hian eng thil nge i tih?" a ti zawi raih a.
.
"Lo ngaithla rawh. Alawmi chungchang a ni emaw Robert chungchang a ni emaw, eng thilah mah hian inrawlh ve suh. Keiman engkim ka tifel vek dawn. I lo inrawlh  ve hian engmah i hmu chhuak dawn chuang lo. Ka sawi chu i hrechiang em?"
Arawn thu  ngil a, chiang zet hian min en a.
.
"Nang pawh hi i inrawlh ngei tih ka hre tawh." a thusawi chu a ringnghet hle tih a tilang chiang khawp mai.
.
"Eng maw?" Chu ngaih dan chu engvanga nei nge anih? A mitmenga min rih loh zia lang chhuak chuan ka chhungril ah hian min hnawh deuh up up.
"I dik lo." Ka ti leh nghut a..
"Eng thil nge ka hriat tih i hre hauh hleinem. I hria em ni? I hmel hmuh ringawt pawh hi ka tan a ninawm tehmai a nia." a tawngkam chuan min tina ngaih ngaih e! Chhang lovin ka mit ka chhing a, ka inthunun a tul. Thawk ka la kawk a. He hmeichhia hi ama duh thu ngei a ka laka a thianghlimna hlantu kha ani tih ka awih ta lo hial zawk. Ni e, hnaih miah lo tur ka ni. Ngaihtuah zui tawh lo tur ka ni bawk. Amah ka hmuh hian keimahah danglam awmin ka inthunun angai ziah a. Hmeichhe dangin ka hmel hmuh an nin thu hi min hrilh se engahmah ka ngai lovang. Mahse, a ni hi chu a dan a dang. Phiangsen hian..!
.
"Chhuak rawh!" ka ti hrawk a. A hmel ka hmuh hian ka duh loh dan tak leh tawp tawh tura ka duh em em amah mamawhna nasa tak ka nei ziah a, tunah hian ka bulah a awm reng anih chuan ka duh loh tawpin ka nawrlui ang tih ka hlau a ni. Ni e, mipa ka ni tlat a, ka taksa hi ka duh ang vekin a awm thei hek lo.
.
Dawn awm lova che phatin car atang chuan a chhuak a. "Ka lawm e!" tawngkam kha zeta tiin car kawngkhar chu na theihpatawp hian a khar nghal bur bawk. Za lo zetin ka nui hawk. He hmeichhia hi thunun anih loh chuan atthlak takin thil hlauhawm tawpkhawk ah amah leh amah a inbarhlut mek a ni. Amah hian a hre hauh lo tih a chiang reng lehnghal. Min ringhlel tel tih a thup hauh lo a nih kha. Ka en liam ringawt thei lo tawp mai.
.
Motor atang chuan chhuakin a lam panin ka pen pawk pawk a, a  banrek ah manin motor awmna lamah ka let pui leh a, min sual let tauh tauh a. Keimah ang bawkin thawm chhuah nasat chi ni lo tih a hre ve tho a, chuvang chu a ni ngei ang thawm nei miah lova min sual let ngat  ngat ni.
.
“Duhtawk rawh_Duhtawk rawh.” Aw ki hniam thei ang berin ka tawng a, a dar tawn tawnah vuanin car ngheng chuan ka dawm bet bawk a. Thimrim zet hian min melh a, keichuan ka dawm beh a tul chhan ka theihnghilh lo chauh tawh. A thinrim hmel lan dan duhawm zia chu a  inhre lo reng reng. Ka taksa in ka nek bet a, a chet nasat poh leh kan taksa a innawk nasa a nimai. Ka rilru a thil lo lut chu a hun lo takzet.
.
A hmai bulah kun hniamin “Che tawh suh..” ka ti leh a, hrilh loh ang chiah. “Fawp tur che a min duh anih loh chuan che tawh suh.” Kei pawh hian tun ang  hunah hetiang zawnga ka ngaihtuah leh ka vau hi mak ka ti zawk. Thinrim a vau bet tur ka ni a,a taksa ka sik rual hian ka thunun phak bakin ka danglam ziah si a ni. Ka chak lohna chu amah hi a ni e ! Ka duhna chauh a ni lo, ka mamawh a, ka thinlung ah hian hmun a chang tlat. Ka hnaih tawh lovang tiin ka ngaihtuah fo a, ka hnaih hian eng thil tha mah ka tan a thlen hek lo. Mahse, ka indang thei chuang si lo chu a nih hi. He thil hi hmangaihna  ni lo hram rawh se! Eng thil phiangsen nge ka ngaihtuah tak?!
.
“Muffin duhtawk rawh!” a hmai si lo chauhin ka tawng a, min cho zual sauh niawm fahran hian a tha neih zawng zawng sawmkhawmin a tal leh a.
“Chutiang chuan min ko suh. Min thlah rawh.”
.
Chhang tawh lovin a hmuiah dim lo zet hian ka fawp a, a thle sawn rang khawp mai.
.
“Ka hua che. “ a thaw hlawp hlawp a, ka dawm hneh em vangin engtin mah min ti thei chuang der lo. “Ka duh loh tawp thil sawi turin min nawrlui suh.”
.
“Chu chu eng thil nge?” ka vawnna chu ka la thlahdul chuang lo
.
“Eleazer..”
“Enge..” ngeng zetin ka en a.
.
“Nang ka lo hria che hi vawi engzat fako nge ka inchhir nawn dawn. Ka hua che. A chiang em? I kut hmawr pawh hian min khawih ngam tur I ni lo. I duh chuan min hmusit rawh, tawngkam bawlhhlawh tak tak pawhin min ko thei  ang. Mahse, min khawih suh.. Ka taksa I deh hian__!” a tawng tawp chawt a. Enge? A taksa ka deh hian engtin nge a awm?
.
“Engtin?”
“Min thlah rawh! Eleazer..”
.
“Sawi rawh?”
.
“Ka huatna che a zual a ni. Hmeichhe tam tak I khawihna kut bawlhhlawh hian min dek leh tawh suh!” a khur dar dar a, inthunun a tum nasa tih ka hria. Min ngaih dan hniam leh tenawm tak vang chuan ka vawnna ka thlah a. Ka chhungril ah hian ka na.. Mi thianghlim chu ka ni lo, ka hria e. Mah se, min ngaih dan ang em a che hniam leh tenawm chu ka ni bik lo asin. Dik taka sawi chuan amah nen kan mut duh hnu khan… A tawk e!
“Kal rawh.” Ka ti sap a. Ka hrawka min hnawh tlat tu thil awm chu eng enge anih ka hre lo.
.
Ka vuan tawh lo nain ka la din hnaih tho a, min khawih hreh hmel zet hian min nem sawn a, engmah sawi tawh lovin a kalsawn nghal a. A chet phung chuan ka awma thil rit takin min delh chawrh ang mai hian min nghawr dawt a ni. Mi tenawm chu ka ni reng em ni? Hetiang khawpa min deh hlek pawh duh lo tu hi engvanga umzui reng si nge ka nih? Pathian chauhin a hria ang! Keichuan ka chhungril a ka ngaihtuahna te hi ka hrethiam tawh lo. Ka hriat zawng chu he hmeichhia hian taksa leh ngaihtuahna chhungril berah hian hmun a chang a ni tih leh venhim ka duh a ni tih zawng hi ka hria. Tichuan, ka laka a awm dan vang khan ka na ngut ngut bawk.
.
Ka dinna ngaiah dingin ka enzui ta ringawt a.
.
A hawi vat vat a, a thianpa te in lam panin a kal leh ta ngauh ngauh a. Mi luhlul tak chu a va ni chiang em! Ka zui leh lo thei ta chuang lo. Eng thil nge thleng ka hriat ve angai. Tihnat anih loh nan ka venhim angai bawk. Thil a ti buaithlak zual ta vek mai. Hetiang em em a luhlul anih hi chu ka beisei hauh lo asin. Amah hnaih tum anga lang si lovin a chinchang ka hriat vek a tul lehzual dawn ta anih hi. Keimah chauh chuan ka indaih lo bawk ang. Thianpa Sawmzuala ka hrilh hriat a hun ta in ka hria.
 Engkim, hetiang zawng zawng bul intanna chu Sawmzuala hi a ni. A nupui unaunu Alawmi thihna khan a nupui duhtak Tabithi a ti a lo chauh a, Tabi hian sawi chhuak lo mah se a unaunu thihna kha a nat thut vang a ni lo tih rinhlelhna a nei tih a hriat ruk thu Sawmzuala hian min hrilh a. Keichuan Tabithi pawh hi ka ring ngam chuang lo. Eng emaw changa mak taka min melh lai ka hmu fuh zauh zauh tawh vanga ringtawk lo ka ni bawk. Muffin hnenah pawh hian Tabi hnaih lo turin ka hrilh tawh. Sawmzuala hi ka thiantha ber anih vanga tanpui inhuam chauh ka ni. Kan rinhlelh ber Alawmi'n a ruka a kawp Robert kha ka chhui zui ta ngar ngar a, fiahna ka neih theih nan Muffin hi hmanrua a hman mai tum kha ka ni bawk a. Tunah chuan engkim a danglam vek tawh.
Kan hriat loh lam atangin Robert khan beitu dang a lo nei a ni ngei ang, tikhan a tual thi ta mai a, a thih dan lah kha a rapthlak thei ang ber a ni bawk. Ka hnathawh tur hi muangchanga tih chi pawh a ni tawh lo.
.
.
Ka en reng a, inringtawk zet hian a thianpa room kawngka chu a kik a. Lehlawi si a! Nichin lawk khan tukverh atanga en ruk tum niawm takin a awm a, tunah ngampa takin a kawngka a kik leh si.
Kawngka chu a rawn inhawng a, an thusawi ka hre phak lo nain eng emaw chu an sawi ngei tih a chiang. Muffin chu a thianpa pindan ah chuan a pen lut ta thuai a. Pawn lam atanga hriat turin eng thawm mah a awm zui ta lo. Ka ngaichang deuh reng a, minute 15 vel zet tur room chhunga an awm hnu chuan kawngka rawn inhawngin  Muffin leh hmeichhe pakhat hi nui hak hak chungin an rawn inzui chhuak a, an hnungah a thianpa pawh arawn chhuak ve nghal bawk. Thil awmzia ka hre ta lo. Nichin lawkah a ruka en a tum a, tunah thiantha tak ang maiin an rawn inzui chhuak leh si. Engmah hlau lo ang maia a awm chhan hi thihna thlentu a lo nih reng zawk vang a ni thei angem? Ni lul lo rawh se!
.
Engtinnge chutiang chuan ka ngaihtuah theih zawk!
.
HMINGTHANSANGI*
.
Eleazer hnenah khan ka taksa a deh hian ka huatna a zual tiin ka sawi a, engtin nge ka hmui atang hian kha thu kha ka sawi theih zawk? A letling chiah a ni. A bulhnaia ka awm hian ka do tang tang thin amah ka duhna hi ka veng zo lo ang tih ka hlau zawk. Min fawhna hnial thei tur pawh khan ka theihna zawng zawng ka hmang tih hria se chuan min nuihzat ngawt ta ve ang. Point thenkhat ah chuan dawt muhlum sawi ka ni chuang lo.
.
Ka thinlung taka alaka ka inpek hnu khan hmeichhe dang a khawih leh tawh ngei ang! Ka ngaihtuah zawng ringawt pawhin ka thinlung nat lutuk vang hian ka thaw a tawp mai ang tih hlauhawm khawpin ka na lutuk takzet zawk a ni. Ka rilru letling chiah a hriat tura ka sawi lai khan amitah ka en ngam hek lo.
.
Ka mittui tla tur chu duh lovin ka mit ka khap sawk sawk a.
Tunah chuan tih theih pakhat chiah ka nei. Eleazer khan min enzui ka rin vangin ka insangmar a, Te-a te in lam panin ka kal lui leh ngat a. Ni e, Tabithi vang chauha helai hmun hi thleng ka nia lawm le. Tabi a him leh him loh ka hriat a tul alawm. Tunah hian Te-a room-ah khan a lo awm reng lovang tih pawh a sawi theih loh. Engvanga a ruka en thla kher kha nge maw ka nih le? Dik tak chuan ka hlauthawng lutuk.
.
La khur ru dar dar chungin Te-a room kawngka chu ka kik dat dat a, ka rin aiin arawn hawng har. Kik leh tuma ka ban ka la kang leh chiah tih chuan phun hluk chung hian arawn hawng a, min hmuh chuan a meng phar nasa mai.
.
"Enge i rawn tih dawn?"
.
"Ka lo biak che kha. I chhuak hman lo a nih chuan ka lo pan mai ang che chu. Dik lohna awm mi?" ka tilet zek a. A tukhum hiat nuah nuah pahin "Lo lut rawh." a ti nghut a, a hmela nuam lo tihna chu ka hmuh hmaih lo. Lut lo turin min hnial ngam lo ani ngei ang.
.
A room-a ka pen lut a, a khuma hmeichhe lo mu in min hmuh rual chuan a inkhuh nghal chawih chawih a. Zak lutuk tih hriat hian Te-a nen chuan min entawn zawk zawk mai. Thawmhnaw a inbel miah loh danah an thil tih lah a chiang! Helai kal tura ka chhuah hma khan Te-a hi ka ringhlel thut thut anih kha. Ka ringhlelh ang thil a thleng lo tih ka hriat rual chuan ka thaw huai mai.
.
"Te-a hi thil pawimawh zawh tur ka nei a. Ka rawn tibuai lo thei ta lo che i anih hi. A zia lo hle mai."
.
"Ah_Um_K_ Tunge i nih?" a ti bah nawk nawk a. Min ringhlel ve deuh pawh a ni maithei.
.
"Hmingte tiin min ko thei ang.." eng eng emaw ka sawi zui luam a, an mutdun chungchang ah ka fiam lo chauh ni lovin engahmah ngai lo anga ka lan vang chuan a ni pawh chu a inthlahdul thuai a. Dik taka sawi chuan sawisel ngam tur pawh ka ni bik hleinem. Kei ngei pawh Eleazer pindan ah.. Ni lo, he thil hi tuna ngaihtuah ka duh lo. Tunah chauh lo pawh.. Theihnghilh vang vang ka duh hluah hluah.
.
Minute 15 vel  hnuah Te-a room atang chuan kan chhuak a, anni an inthlah anga, keiin kan in lam ka pan thung ang. Ka chian duh ber leh ka rinhlelh thil engmah lo mai anih takah chuan tihtur dang ka nei tawh hrih lo. Tabithi pawh in ka thlen hunah biak pawh ka tum leh mai ang. Tunah chuan ani pawh an in ah a awm tawh zawk hial mai thei.
.
Te-a leh a bialnu an tlan chhuah hnu chuan keipawh ka tlan chhuak ve nghal a. Ka hnunglama min zui rutu awm tlata ka hriat vangin ka tlan chak khawp mai. In ka thleng a, ka room-a ka luh hnu chuan ka him ta niin ka inhre chauh.
.
Ka inthlak zung zung a, khumah thuin Tabithi number ka dial a. A ring nain a pick up lo. A hmaa ka call kha chuan a ring miah lo a. A tha lam niah ngaiin ka thaw deuh huai. Mahse biak theih ngei ka duh thung.
Ka mu a, ka maimitchhin rualin Eleazer hmel hlir ka hmu lehnghal pang mai. He mihring hian eng chen zet nge ka ngaihtuahna a tihbuai dawn le. Zanin kan inbiakna ngaihtuah kha chuan min hnaih duh tawh lo ngei ang. Ka duhthusam chiah a ni! Ka hre lo. Enge awmzia awm chuang? Hnaih duh pawh ni ila ka ringngam tawh dawn chuang lo. Ka duhthusam tak tak chu amah nen thlamuang taka awm dun.... Keihi ka mawl anih hi. Hmaichhan ah ka huat thu ka sawi tawh a, a ni ang mahni induhtawk leh kei ka ni ti chin chuan a mitsir pawhin min melh duh tawh lovang. Hmeichhe nalh leh kei aia tha zawk a kawp leh thuai anga, a ngaihsakin a hun tam zawk pawh a hmanpui thei.. Ni lo, ni lo.. Robert thihna ah khan a inhnamhnawih anih chuan a hausakna hian a hum dawn chuang lova, a dam chhung hun tam zawk jail-a a hman pawh angai maithei.. Engvanga ka thluak hi thil tullo pui pui ngaihtuaha function tha viau nge maw anih le!!
Ka thu chhuak hlawl a, ka mut a chhuak mai dawn lo tawp. Tihtur lah chu ka  hre der lova.
.
Laptop on in movie en tur ka zawng kual a, movie thar ka nei bawk si lo. Pawilo a hlui ka en ang.
.
The Last King en in ka lo tang ve teuh a, ka phone a nghawr dar dar ka hriat chuan ka thil en lai chu pause in ka phone ka la a. A ring tawp hman chiah. Tabithi maw?
Call back ka tum a, amah zawkin min lo call leh chuan rang lutuk hian ka pick up nghal.
.
"Hmingte, tanpui ka ngai.." a tawng zawi lutuk a ka hre thei chang chang. A aw a hlauhthawnna lang erawh a chiang khawp mai. A bulhnaiah tupawh awm se a tawng an hriat a hlau hle tih a chiang lutuk.
.
"Khawiah nge i awm?"
.
"Ka tawng i hre thei em? Hello.. Hmingte..Hello.. Eleazer__rawh__ello_Tuna_call__Ni lo.." a te thawt a, phone chu a tawp nghal hmuk a.
.
Enge thil awmzia? Eleazer hming kha engvanga rawn lam nge anih?
.
Ka contact list ka scroll pawp pawp a, Eleazer ka call ta ringawt. Min chhang duh kher lo mai thei. Vawikhat a ring quit chuan mangang zetin ka call nawn leh a, a la pick up chuang lo.
.
Ka rilru a vak kual zung zung a, ka thil ngaihtuah chhuah chhe lutuk hi thleng dik lo hram rawh se!
COPAS (HEARTS)
.
CHAPTER - 15
.
Thantei_LauraSean
.
H & E
.
Eleazer chu ka call nawn leh ngat a. A pick up chuan ka thaw hawk mai.
.
"Enge?" arawn ti bul hmuk a. Nichin lawkah ka huat thu leh hnaih ka duh loh thu hmaichhanah ka hrilh zo chauh a tuna ka call lehsi hi mak pawh a ti ang. Chutiang ngaihtuah kualna hun a ni lo.
.
"Tunah khawiah nge i awm?"ka tawng a hriat chuan a reh vung vung a. "Eleazer."
.
"Engatan nge i tih?"
.
"Lo ngai kawi suh. Tunah khawiah nge i awm?" ka rilru a hmanhmawh a, Tabi rawn awm dan kha ka hrilh nghal mai dawn em tih ka hrethiam lo. Tabi tawng ka hriat mumal theih loh vang khan ka sawi tlang ngawt ngam lo a  ni. Tunah Tabi bulah awmin a nunna a titawp dawn mek pawh ani thei!
.
"Ka awmna hmun hriat i mamawh leh si a maw? A chhan ka hre phawt thei angem? thatchhe zet hian a tawng a, a harhfim lo anih ka ring zawk hial.
.
"Tabithi bulah i awm em?" ka ti ta ringawt. Za lo lutuk hian a nui hawk a. Awm lo hram rawh. Ka ngaihtuahna tha lo tak tidik tur hian misual ni lul suh. Min chhan mai loh vang chuan ka chiai ta der bawk.
"Eleazer, tunah khan Tabi bulah i awm anih chuan tina suh. Khawngaihin.. Khawngaih ka dil che anih chu.. Ti suh.."
.
"Engmaw i sawi?
.
"Ka sawi chu i hriat kha. Tabi khan engmah tihsual a nei lo. Tina suh!" ka hlauhthawn lutuk vang nge 
Eleazer awm dan tur ka ngaihtuah vang ka hre lo, Tabi ka ngaihtuah lutuk zawk vang pawh a niang ka khur nasa lutuk.
.
"Sawi chiang rawh. I thusawi awmzia ka hre lo." min ngaihven hmel ta deuh.
.
"Tunah khan khawiah nge i awm? Ka_Tabi'n min lo call a, a dinhmun a tha lo. A bulah i awm lo anih chuan khawiah nge i awm? Tabi kha i tina anih chuan a chunga itih ang chiah kha i chungah a thleng ve ang." ka tita bawrh bawrh a. Ka thusawi inkalh nawk nawk chu ka pawi sa tawh lo.
.
"I thusawi awmzia chu ka hre lo. Tabi chu khawiah nge a awm?"
"Ka hre lo."
.
"Ka lo kal ang. In ah i awm tawh em?" a tawng dan atang chuan a che nghal zung zung a nih ka ring.
.
"Awm tawh. Enge tih theih ka neih? Ka hlauthawng.."
.
"Hlauthawng suh. Engtinmah a awm lovang. I phone kha off la thawmhnaw lum ha rawh. Ka lo thlen hunah ka lo call ang che." ka chhan leh hmain phone a off a, min hrilh ang chuan thawmhnaw lum ka ha a, ka nu leh pa hriat loha chhuah a tul dawn vangin thawm ka dim khawp  mai.
.
Engtik lai atang khan nge nu leh pa hriat loha chhuah hi engahmah ka ngaih tak loh pawh ka hre tawh 
lo. Thil tha tak chu a ni lo tih ka hria a, a tul tawpah chuan ka nu leh pa pawh engkim ka la hrilh tho angai ngei ang.
.
Minute 10 pawh aral hmain Eleazer chuan min rawn call a, a rang thei ang berin inchhung atang chuan ka kal chhuak nghal a. Car kawngkhar  alo hawn sa ah chuan lut nghalin chak zet hian a tlan chhuak lehnghal a. Hlauhthawnna nei miah lo a abula ka awm leh  mai pawh hi a mak! A ni chu min ngaihven hmel pawha lang lovin kawngpui a en ngur ngur a, a hmel atang chuan hlauhthawn a nei ve tho ang tih 
ka ring.
.
"Khawilam nge kan pan dawn?"
.
"Ka hrethiam chiah lo. An in pan ila a that ka ring."
.
"Dar 10 vel khan U Sawmzuala'n min rawn be tawh a, Tabi awmna a hriat loh thu min rawn hrilh a. 
Chuvang a nia Te-a te in ah khan ka kal."
.
"Tinge Tea te in ah kher?" Tea hming alam zawng chuan a ner suk a.
.
"Ka hre bik lo. Ka ringhlel a ni ber ang chu." min rawn melh zawk a, engmah a sawi zui tawh lo thung. "Mahse, Te-a chu a ni lo ang tih ka chiang tawh."
.
"I thluak chu i hmang ve nasa hle mai." a ti ro hulh a. A hmel atang chuan a rilru tur awm ang ka hrethiam leh tawh lo. "Hmeichhia i ni tih hi hrereng rawh. Mahni inveng thei lo tan i thil buaipui 
hi a u mah mah a ni."
.
"Ka inven theih leh theih loh i hre lo bawk." ka tih chuan a nui suk a. Engvanga nui nge anih ka hre lo. Ninawm, he mihring bulah hian chhan awm lova thinrimna tur tawk ka hmu reng chu anih ber hi.
Kan ngawi ta ran mai.
.
U Sawmzuala te in kan thlen chuan a lo reh thiap a, tukverh atanga eng lo chhuak atang chuan 
inchhung ah awm an awm ngei tih chu a hriat. Eleazer chuan min rawn melh zawk a, inhrilh ngai lovin motor atangin kan chhuak nghal a.
Eleazer chuan door bell a hmet a, rei vak lo ah kawngka chu rawn inhawngin U Sawmzuala chu  pawr chap hian arawn chhuak a. Kan pahniha min hmuh chuan makti hmel a pu deuh.
.
"Engtin nge in pahnih_"
.
"Tabithi awmna chu i hre tawh em?" ka lo tih khalh a. A lu a thing ringawt.
.
"Hre lo. Amah zawngin ka chhuak a, ka hmu zo lo. Ka beidawng a in ka thleng leh chiah a nih hi. Lo lut phawt ru." a hmel chu a lang ngui ruih mai.
.
"Nichin deuh khan Tabi chuan min lo call a." U Sawmzuala chu a phawk hra a, sawi vat vat turin min duh tih a ahmel atang chuan alang reng bawk.
"Chuan engtin"
.
"Ka_ A tawng ka hrechiang thei lova. Dinhmun hlauhawm ah a awm anih ka ring. Tih hlauhthawn che chu ka duh lo a mahse, mumal a kan inbiak hmain a te thawt a phone a tawp nghal bawk a."
.
"Ni lo.. Ni lo.." a inhip hlawp a, a hmai a hup nghal bawk a. A insum hman lo a ni e. A rilru mangan tur zia ka ngaihtuah pui phak kher lovang. Eleazer chuan a darah a kuah a, sawi tur a vang hle mai.
.
"Zanin hian police hnenah kan thlen nghal mai dawn em niang?" tiin U Sawmzuala chu a bia a, a chhang lo. A chiai vek ni ber hian ka hria.
.
"Zingah Tabi chu him takin a lo hawng leh ang." a tho thut a, tih ber tur hre lovin a vei kual vut vut a. Heta kan awm ringawt chuan Tabi hi kan hmu dawn lo.
.
"Eleazer" min rawn en a, U Sawmzuala chu kan bul hnaiah a awm rih loh vangin ka ngaih dan hi ka sawi ngei a tul. "Hetia kan awm ringawt hian awmzia a awm lo ania."
.
Enge kan tih chuan ang? A awmna tur awm ang kan hre hauh bawk si lo.
.
"Hmingtei hi va thlah la, kan pahnihin kan kal chhuak dawn nia." U Sawmzuala chu a hmel a phelh phung mai. A kalsawn lai khan a va tap a ni ngei ang.
.
"Kan rei lovang." ti nghutin Eleazer chuan ka banah min rawn kai a. Pawnah chhuakin a carah kan lut a. Kan in pana kan kal kawng tluan chuan kan inbe lo. Kan ngaihtuahna kan kawm ve ve ang tih ka chiang.
.
Kan in kan thlen chuan car atangin ka chhuak vat a, chanchinthar a awm chuan min lo hrilh vat turin ka chah a, bu nghatin a tlan chhuak lehnghal a. Zanin hian ka muhil bik hauh lovang le.
.
In a ka luh rual chiahin ka nu chu an room atangin a lo chhuak ve chiah. Min en ran ran a. Ka room ah ka awm lo tih a lo hrelawk tawh tih a hmel atang chuan ka hre mai.
.
"Khawiah nge i kal?" a ti hriam hraih a. Min en chik lutuk takzet. Phat buai ngaiin ka hre lo.
.
"Nu, lo thu lawk teh." ka ti sap a. A hlauthawng hmel chu hmuh nuam ka ti lo. Khawlo taka awm angah min ngai anih pawhin thiam lohna a nei hek lo. Hmeichhia zanrei tawha vak daw daw thin chuan thil tha tak ti pawh ni se, engmah hrechiang lo leh ngaihtuah chiang lovin hmeichhe khawlo ah kan society hian angaih zel chang a awm thin. Ka nu pawh hian hmeichhe zahawm tak ka nih tluka duh a nei lovang tih ka hrechiang.
.
"Eng thil nge? Thil tha lo tak iti a ni em lovang chu. Ka rintawk loh vangah che ngai lo la. Eng emaw chen atang khan zanah i chhuak tam zual hian ka ngaih a titha tawh lo." a ti nghal mial mial a.
.
"Nu.." sawi tan dan tur ka hre mai lo. "Tabithi chungchang a nia."
.
"Tabithi.. Alawmi u maw? A ni teh daih chu.. Eng thil  nge?" ka bulah arawn thu a, ka tawng hun a ngaichang ta ran a.
.
"Dar 10 vel khan U Sawmzuala'n min rawn bia a, Tabi awmna ka hriat leh hriat loh min rawn zawt a. 
Tun thlengin a awmna kan la hre lo. A dinhmun a that loh hmel bawk a.." thil thlen dan ka hrilh vek a, ka sawi zawh chuan thaw huai hmel a pu. Tabithi a ngaihtuah loh vang ni lovin khaw lo takin ka khawsa lo tih a hriat vanga thawveng te pawh a niang chu.
.
"Tunah chuan tihtheih a awm chuang lova, han mu phawt ila zingah kan va ngaihven ve dawn nia. Kha, i mu tlem anih kha i hmel pawh a dik lo. I room ah han hahdam phawt rawh. Ngaihtuah hah vak vak lo la, eng em a ti lovang. Alawmi thihna a tuar nat tehreng  nen tunah hetiang dinhmun a han din leh tak chu Tabi pawh chu a lainatawm hle mai."
.
Ka nu nen rei vaklo ka titi leh hnu chuan an room ah min luhsan a, keipawh ka room ah ka chho ve 
nghal a. Khumah ka mu nain ka mut a chhuak miah lo. Tabi no chu ka call ngat ngat a, min chhang dawn lo tih hrereng mah ila beiseina tlemte ka la neih vanga call ngar ngar ka ni.
.
Engtik karin nge ka mutthilh ka hre lo. Ka nu min ko thawmah ka harh a, rem lo zet hian khumah a khamphei zawngin ka mu a, ka phone ka la hum ran bawk.
.
"Bawihte, i harh em? Tabi chanchin kan hre ta anih chu."
Ka tho thuai a, lu rit bur chungin ka room kawngka ka va hawng a. Ka nu hmel ka hmuh chuan Tabi chanchin an hriat chu a lawmawm lam a ni lo tih ka hre nghal mai.
.
"Tabi chu engtin nge a awm?" ka ngaihthat loh zia chu ka hmelah pawh a lanchhuah  nghal vek ka ring.
.
"A ruang an chhar anih chu. A lainatawm emai ka ti.." ka nu pawh chu a mittui a tla zawih zawih mai. 
A insut hlap a, tah insum tak chung hian "Insiam la, an in ah kan va lang ve vat dawn nia." tiin min kalsan a.
.
Ka hrawk a tawt up up mai. "Tabi..a ni thei lo!" ka mittui a tla nghal zawih zawih a, insum pawh a tum buai lo. Eng ang taka thlabar in nge a awm ang? Amah tanpui theitu tur nia min ngaiin dinhmun hlauhawm taka awm chung khan min rawn be tawk tawk a nia. A va pawi tak em! Kei hian amah ka tanpui thei ta si lo.
Bathroom-ah lutin ka inbual a, ka inbual chung pawh chuan ka mittui a la tla zawih zawih tho. Tunah chuan Tabi chu Alawmi nen an inhmu tawh bik ngei ang! Ka inhnit leh hlawp hlawp a. A fair hlawl lo. 
An unau chunga thil thleng hi a fair hlawl lo.
.
Ka insiam peih hnu chuan ka nu leh pa nen Tabi te chenna hmun kan pan a, kan va thlen chuan mipui an lo tam khawp mai. A taksa endik turin Tabi ruang chu damdawiin ah a la awm a, an inchhung erawh an singsa fel vek tawh thung. Inchhung kan lut a, Tabi nu'n min hmuh chuan min rawn panin a tap hawm hawm a, keipawh ka insum thei lo. An tuar hi ana em a ni. Engtiang pawhin awm se an thiamawm vek.
.
Tabi ruang in an in arawn thlen chuan kan ri luih luih a ni ber mai. Insum thei khan awm lo. Hmuh hreawm ber chu U Sawmzuala a ni. A mitmeng a a ruai a, tah nachang pawh a hre lo. A hawi ruai ruai ringawt mai. Tabi hmel chu hnai lutuk a enin a fawp leh ngawih ngawih thin.
.
A bulah Eleazer a thu a, ngaihtuah thui tak nei hmelpu hian min rawn en reng a. Keichuan ka mit ka lasawn vat a.
.
.
Tabi kan vui liam atangin kar khat zet aral leh tawh. Police ho hian amah thattu chhui chhuak turin hma an la sawn tam lo khawp a ni awm e. Eleazer nen pawh kan inhmu leh tawh lo. Tabi bo zana thil thlen dan atang khan Eleazer hi ka ringhlel tawh lo bawk. Ti ila, pumhlum thak chu a la ni chuang lo. Tumah hi ka ring ta lo a ni ber. Tupawh mai hi ka chik zual a, landan phenah hian thil tam tak a inthup thin tih rilru puin tupawh hi ka en ta vek ni mai hian ka inhria. Te-a pawh ka hmuh theih 
chinah chuan chik tak ka ni. Mahse, amahah hian danglam a awm awm pawh ka hre lova, tlaiah kan la inhmu ziah tho. Amah lah hian Tabi chunga thil thleng hi mak atih zia a sawi tawp thei lo.
.
Ka ngaihtuah vang vang hian khami zan khan Tabi khan engvanga Eleazer hming rawn sawi  nge anih ang 
le tih hi ka inzawt tawp thei lo a ni. Eleazer hian thuruk hriat a nei reng angem? Thil engkim hi a inkawkalh vek mai hian ka hria. Ahma khan Eleazer hian Tabithi hnaih lo turin min hrilh a, tunah Tabi ber a thi leh a. Ka thluak hian fim takin thil a thliar hrang thiam tawh lo.
.
COPAS (HEARTS)
.
CHAPTER - 16
.
Thantei_LauraSean
.
H & E
.
Hun a ral bek bek a, kan nun dan pangngai theuhin kan nung mawp mawp ni maiin a lang. U Sawmzuala pawh vawihnih lai ka va tlawh tawh a, a la pangngai meuh lo tih a hmel enin a lang reng reng mai a, nupa tang then hi dar lehlam sahthlak ang a ni tiin an lo sawi thin a, U Sawmzuala tan chuan a dar pahnih sahthlak ang mai niin ka hria. Biak pawhin min chhang mumal ngai lo. Tabi nen an thawnthu pawh hi sawi fe tham a ni ngei ang. Eleazer pawhin a tlawh fo tih ka hria a, kan inhmu fuh ngai lo thung. A lawmawm lamah ka ngai zawk. Nge, ani hi thil buaipui a lo nei reng?
.
Nun dan pangngai theuhin kan nung mawp mawp ti khan ka sawi zo chiah nain Tabi bo zan atang khan eng emaw chang hian min zuitu awm a hriatna ka nei leh thin a, hlauthawngin awm reng lo mah ila min zuitu awma ka hriat chang chuan ka nun a nuam lo thin khawp mai. He thu hi Te-a hnenah pawh ka sawi lo. Thian dang ka kawm zau lova, tlai tin deuhthaw ka hmuh leh ka kawm deuh ber chu Te-a hi a ni deuh chawt a. A ni lah ahmaa ka rinhlelh deuh bak kha chu rinhlelh tur hian a awm leh ta lo reng reng bawk. Ka rilru a thil chhui chhuah tur nei inti si hian ka hna a sawt thei lova, ka nung vel mai mai a ni ber.
.
Ka hma dawhkana file intiang ar chu ka melh tlawk tlawk a. Vawiin hian hna kan khawp mai, hna ngah viau ni ah berkher ka ngaihtuahna a kal ding leh ta pek a nih hi. Inthing harhin file chu pakhat te tein ka en fel diat diat a, office ban a hun meuh chuan ka thaw deuh huai. Haw tura insiamin ka inkhung fel mawlh mawlh a, ka hmaa mipa ding chu min biak hma chuan ka lo hmu miah lo.
.
"Lehkha submit tur hi tu ber nge ka pek dawn?" phu deuh zawkin ka hawi chhuak a, tlangval lian thelh thawlh hian chiang zetin min lo en reng mai. Min nuih sukin a lehkha ken chu ka hmuh theih turin a lek kang va va a.
.
"Khawi maw ka lo enchiang ang?" ka tih chuan min pe ve mai. "Ka hnenah pawh a dah theih tho. Naktuk ah pu hnenah ka lo pe dawn nia."
.
"A lawmawm khawp ang." kal tumin a inher zet a arawn hawilet leh a. "Hmingtei i ni tiraw? Ka hre tlat che a ni." a tih chuan ka phawk leh ta hra mai. Ka awm dan hi a dik thei tawh meuh lo anih hi.
.
"Ah_aw_ni e." ka ti bah nak a.
.
"Min hre tawh lo tih ka hre mai. Lalmuanpuia ka nia. ML Memorial ah kan lut ho.." ka hre ta chiah!
.
"Ka hre ta chiah. I va danglam tawh ve.." nui chungin ka ti hliai a. A lunglenthlak zawk hle mai. Middle school kan kal ho ngei tak kha.
.
"Min hria chu a lawmawm e. Haw i tum hmel tawh thoin ka hria, i duh chuan ka lo thlah ang che. Hmanlai hun sawi leh pawh a chakawm alawm.." min nuih a, Lalmuanpuia hi hetiang taka nuimawi anih pawh ka hre ngai lo. Len leh hmel thatah Eleazer a tluk lo nain mizo mipa ah chuan a langsar pawl chu a ni pha tho ang. Ka ngaihtuahna zet chu leh! Engamah hmain Eleazer nen ka khaikhin ngawt chu.. Zahthlak zawk hian.
.
"Nia, pawi chuang lo. Nupui ila nei bik lo ani maw?" ka ti nghal zat a. Za zet hian a nui ta hawk hawk. "Ka thusawi chu la kawi kher lo la aw.." ka tih zui leh zat a..
.
"I lo danglam ta hle mai. A hma pawh khan.. Um..nakin ah ka sawi zawm ang. I hman chuan kal ila." a ti leh ta zawk a. Ngaih ngam takin office atang chuan kan inzui chhuak ta zan zan mai.
.
Kan in kan thlen hma zawng chuan kan titi a, a hnathawh leh a chanchin tlangpui chu a mawi tawkin min hrilh a,  a bak zawng chu kan naupan lai kan sawi char char a ni ber mai. Tlangval invawng tak anih hmel. A chhelo viau bawk! Nia, mit hian thil tha leh mawi hi chu a hmuh hmaih lo ve alawm! Ka zahpuiawm tan deuh tlat!
Kan in pawh a lo hria! A motor atanga ka chhuk hnu chuan 'kan inhmuh fo beisei ang che' tiin min thlah a, a thusawi awmzia chu ka hrethiam lo tiin sawi ila dawt chiang bal sawi ka ni ang! Ka nui sak ringawt.
.
Enge maw ka inthiam loh ringawt le? Tu ta mah ka ni hleinem! Tha tih zawng leh min hip zawng tak thil chu  mihring pangngai ka nih vangin ka nei ve ngei tur a ni dawn lawm ni. Eleazer laka ka rilru a zalen theihna tur hmanrua pawh ani maithei asin. A nih hlauh chuan ka tan malsawmna hlawm lian a ni ngei bawk ang chu.
.
Lalmuanpuia chu, a sawi lawk ang tak takin kan inhmu ta zauh zauh. Tawngkam tlang takin sawi lo mah se a mitmengah chuan min beisei ru tih ka hai bik lo. Mak takin kan inpawh riau bawk. A bulah pangngai tak leh amah pawh takin ka titi thei a, hei ringawt pawh hi ka tan chuan thil mak a tling tawh hrim hrim e. A hmingpum hian ka ko laklawh a, ka thlak mai thiam der lo lehnghal a. A hriat laiin ka la koh miah loh phah.
.
*Dik lo taka min ngaih ka duh lo a, mahse I bulhnaia awm ka duh.* tih message ka dawn chuan ka nui sak. Heihi ka tan bultan tharna a ni ve tawh ngei ang. Dinner min treat a tum thu a sawi chuan ka lo pawmpui ve ta mai.
*Naktuk tlaiah office ah ka lo hruai dawn che nia.* tiin min thlah leh thlap a. Eleazer nen khaikhin chuan a danglam lutuk. Lalmuanpuia hian chuan hmeichhia ka ni tih hriain dimdawi tak leh zaidawh takin min treat ni ber hian ka hria. Eleazer angin thu min pe thawr lova, mize hriatthiam har tak a nei ve hek lo. Eleazer pawh chu ka ngaihtuah chhuah sek le..
.
Zingkar ah office kal tura ka insiam chuan ka inchei uluk ve hle. Zai rat rat chungin ka thawmhnaw thlan chhuah chu ka ha a, darthlalang ah inen in ka lung pawh a awi e. Ka phone message lo thleng ka check hnu chuan mood fuh zetin in ka chhuah san ta nghal a.
.
Office ka thleng a, ka hna khawih tur chin khawih zung zungin dar zat pawh ka lo en lo.`
.
"Kan kal thei tawh em?"
Ka thutna bula Muanpuia lo ding reng tawh chu enin ka nui sak a. Sana ka en nghal vat. Ka lo haw thei reng tawh a nih hi.
.
"Thei tawh mai e. Ka han inkhung fel ang. Lo thu rawh." ka tih chuan thut tum hmel pawh a pu chuang lo. A hmanhmawh hmel phian.
.
Ka inkhung fel sawk sawk a, ka inpeih chuan kan inzui chhuak nghal a. Kan tlan chhuak nghal vang vang mai.
.
"Kal hlat kan va tum hmel." ka tih chuan min rawn enin a nui suk ringawt. Vawiin chu nidang a ang lo, a titi bawrh bawrh lo tlat. Ngaihtuah muk hmel deuh hian a awm leh thin a.
.
Motor a tiding a "Kan thleng e." a tih chuan kan kalna tur hmun chuan ngaihtuahna dang min neih tir.
.
"Oh! Hetah hian maw.."
"Kal ang le." ka hnungah a ban rawn dahin inchhung ah min luhpui a, hnathawk hovin min hmuh rualin kan thutna tur lam min lo kawhhmuh thuai a.
.
Bon Apetite ah hian Eleazer pawh khan min hruai tawh! Ngati nge tunah Eleazer ka ngaihtuah chhuah kher ang. A hun lo lutuk. A ni kha ngaihtuah chhan tur ka nei lo.
.
Kan eitur chah kan nghah chhung chuan sawitur hre lovin ka thu deuh tawp a, Muanpuia pawh a ngawi ve khuau mai. Min rawn en a, ka lo nui lui sak a. Sawitur ngaihtuah niawm tak hian a meng kual rulh a. A hmel hi chu a tha chiang a ni.
.
"Nuam i tih loh hmel." amah pawh a pangngai tawp si lova!
"Nuam ti e." ka ti sap ringawt.
.
A aw thian kharhin kan dawhkan kil chunga ka kut dah chu arawn vuan a. Thawk a la halh mai.
.
"Ka zep lovang, hetiang hian ka la nervous ngai miah lo. Kan pahnih hian pangngai taka inzui ka duh." ka chhan dan tur ngaichang niawm tak hian min en khuau a, a thaw tha ngam lo niin ka hria. Mipa lakah hetiang taka effect ka neih hi ka lo ring ngai miah lo.
.
Nui sakin ka bu nghat a, hriat theih hian a thaw huai mai. A awm dan chuan ka awm a tinuam ta viau zawk. Kan eitur chah a lo thleng a, eng eng emaw sawi pahin kan ei ta mial mial a.
.
"I puar em?"
"Puar lutuk."
"Tun atang chuan a tam thei ang ber i bulah hun hman ka duh ang." ka kut rawn vuan lehin a hmel a thutak ta ran mai.
.
"Chu thil chu a thleng thei kher lo ang." Muanpuia nen chuan kan hawi chhuak rual thawt a.
Eleazer!! Helai hmunah hian eng thil nge maw arawn tih le? Ka inthunun vat a, Muanpuia hamhaih hmel thinrim hmela inthlak mek chu ka hmuh hmaih lo. Ka kut chu la vuan reng chungin a thutna atangin a tho a, keipawh ka tho ve nghal bawk. Kan din chhuah fel chuan Eleazer chu kan hmachhawn lo thei ta lo. A hmel lan dan chu a mak lutuk. Kan kut chu en in a insehruh talh talh a.
.
"Tunge inih ka hre lo nain khatianga mi titi a inrawlh ringawt kha a mawi lo a nia." Ka inthunun hman lo, Muanpuia chu mak tiin ka en ha a, a ni chuan Eleazer chu hlau lo tih hriat ngawih ngawih hian a en run thung. Eleazer paw'n mit khap eih lo hian a lo enlet ve bawk. A tha dawn lo tawp mai.
.
"Muanpui kal ang." ka ti sap a. Ka tawng a hriat rualin Eleazer chuan Muanpuia lak atangin a mit a lasawn ta chauh.
.
"Thutlukna i siam hmain inngaihtuah chiang hmasa thin rawh. I chetsualpui leh hmain__" a ngawi chawt a, kei ka sa nghal pup pup thung. Eng thu maw a sawi kha? Ka tawng chhuak thei lo. Ka zak a, Eleazer ka chetsualpui tantirh leh min hnawl tantirh a ka awm ang chiah khan te chem chemin ka inhre nawn leh ta. Ka biang chhung lam ka seh ngar ngar mai.
.
Muanpuia chuan Eleazer nen chuan min entawn a, ka hlauhthawn ber thil hi thleng lo hram rawh se. Hetah hian Eleazer thusawi vang khan mualpho takin min kalsan duh hauh lovang. Mipa pangngai a nih chuan a ti thei lo.
Ka beisei loh zetin Muanpuia chuan ka kut a vawnna chu a tinghet zual sauh a, Eleazer chu chiang zet hian a en a.
.
"I ta ni lo hmeichhe bula awm dan i zir angai a nih kha." ka kut a vawnna chu thlahin ka kawngah min kuah a, dimdawi tih hriat tak hian ka beng bulah rawn kunhniamin "Kal ang le." a ti zawi ruih a. Ka tah a chhuak ut ut mai.
.
Eleazer kan kal pelh chuan inthunun tumin ka insangmar a, engvang mahin ka tap tur a ni lo. Muanpuia hi ka hmaizah lutuk. Awmngaihna pawh ka hre lova, awm loh  ngaihna pawh ka hre chuang lo.
.
A car dahna kan thlen chuan kawngkhar min hawn sakin ka thu lut thuai a, ka  hawichhuak ngam rih lo. Kha ka thil tihsual kha midang hmaa sawichhuah a nih ka ring pha ngai lo. Ka inchhir nawn eh ta vawng vawng anih hi. Tih loh tur tih chuan heihi a nih dan tur reng chu ani. A tuar ava nuam si lo em!
.
Muanpuia chu driver seat-ah rawn thulutin kan ngawi dun ran a, nuam lo ka tih zia chu sawi ngaihna a awm lo.
.
"Hreawm ti suh. Mumal taka inzui ka duh thu ka hrilh hma che khan thil thleng thei ka ngaihtuah lawk vek tawh. Nie, ka ngaihtuah lawk vek alawm.." min bia pawh a ang lo. A dar a tiche zauh a. Amah leh amah a inbia a ang ber.
.
"Tuna sawitur ka ni em ka inhre lo. Mahse, hmeichhe thianghlim ka ni tawh lo!" ka hrawk arawn inhnawh ut ut a, he thu rapthlak lutuk hi ka sawi chhuah a tul ang tih hi ka ring pha ngai lo chauh ni lovin hetiang hun hi a thlen ka ring ngai lo reng reng. Eleazer vang chauh kha a ni.
.
Min chhang lovin min en reng a, ngawi reng hian alamah min kuai hnaiin dam thlup hian min kuah ta zawk a. Tap lo turin ka insum nasa teh e!
.
Eng chena rei nge chutiang chuan kan awm ka hre lo. Min kuahna chu zawimuanga thlahin ka biang tawn tawnah a kutin min vuan a.
"Mihring hian tihsual kan nei thei theuh a, keipawh mi thianghlim ka ni bik lova. Engkim a tha leh vek ang. Khapa thusawi kha chu engahmah ngai suh. A tha em?" min nuih suk a. Hetiang mipa tha hi ka hriat lohin an lo awm reng chu a nia. A mak teh e.
Ka buk nghat hnu chuan ka biangah min fawp zauhin kan ila hrang ta chauh. A kekawr ipte a check vut vut a, chek tlakin min rawn en leh a.
.
"Chahbi inchhungah khan ka theihnghilh aniang. Lo awm la ka va en leh lawk ange. Ka rei lovang." tih leh car atanga chhuah a rual a. Inchhung lam pana a kal chu ka enzui reng a, inchhung a luh fel hnu lawkah Eleazer leh hmeichhe pakhat an rawn inzui chhuak ka hmuh chuan ka awm a nuam lo lehnghal. Eleazer hmel chu a la rum ul mai. A bana kuahtu hmeichhia chuan nui sanga en chho chung hian a be ser ser a, a ni chu a lo bu nghut ringawt a. Hmeichhia a chhuahpui ve reng chung sawn engtin nge khatianga mawi lo lutuk a ka chungchang Muanpuia hriattura a rawn sawi kher ni!
.
Ka thil ngaihtuah vang chuan meng tal tapin ka hawisawn a. Eleazer te hnunga Muanpuia lo kal chhuak ka hmuh chuan ka thaw huai mai. Muanpuia chuan arawn kal pel a, Eleazer chuan arawn enzui leh ta chiah mai. Min rawn hmuh chuan a inher hmuk a, a bula hmeichhia chuan a umzui dar dar a. Khawngaihthlak hian a..
.
Muanpuia arawn thu lut a, "Ka rei em?" a tih chuan ka lo tan nasat zia ka inhre chiah. Thaw halhin ka nuih a, ka lu la thing ta ringawt.
.
Kan in kan thlen chuan lo lenglut turin ka sawm ta lo mai. Bakah a ni pawhin tihtur a la neih thu a sawi tho a, eng eng emaw kan sawi duah nain thianghlimna chungchang kha chu kan sawiri leh ta lo. Ka lawm hle bawk.
.
Ni a ral bek bek a, Muanpuia nen pawh a khat tawkin kan inhmu ve reng a. "Inlaichinna puitling  neih kan duh chuan kan hmanhmawh vut vut tur a ni lo." a tih ang deuhin engkim hmanhmawh lo leh nghet charhin kan kalpui ni hian ka hria. Ka hre dik lem lo thei tho bawk. Nula leh tlangval inkara inlaichinna hi chu sawilawk dik hleihtheih pawh a ni love.
.
Chuan, Muanpuia nen kan inzui tak hnu hian tlaitin Te-a nen kan thiltih thin kha kan bawhpelh ta malh malh a ni ber. A pawi lo ah ngai tawh mai ang. Zir tur tam tak ka zir hman tawh tho.
.
Office ban a hun a, U Sawmzuala ka la hmuh leh miha loh vangin kan in pan lovin U Sawmzual te in lam ka pan a, tunah chuan ahma aiin hma a sawn ve tawh ka beisei.
An in ka thlen chuan a lo reh deuh thiap a, an in pawnlam pawh enkawl uluk a ni tawh lo tih a hriat hle. Tabi awmlai kha chuan engkim a fai hlarh thin kha a nia.
.
Door bell ka hmet a, ka rin aia hmain kawngka arawn inhawng a. Eleazer nen kan inhmachhawn lehta ran  mai. Hetah hian a lo awm ve dawn tih hrelawk ni ila ka kal hauh lovang.
"Lo lut rawh" a tu nghut a. Min en duh lo niawm tak hian min hawisan nghal hmuk bawk.
Inchhung ah kan inzui lut a, U Sawmzuala chu hahdam hmel zet hian common room-a mutna tur an siamah chuan a lo mu a. A hmel pawh ahma ai chuan hmuh a nuam ta deuh. A mutna bulah chuan thuin ka thil ken sak chu ka pe a.
.
"I lo tha zel em?"
Nui lui sukin a bu zauh a. Eleazer chu a melh zuk bawk. Awmze neia melh anih hmel. A awmzia phei chu ka hre chuang lova.
.
"Ka tha ve zel anih hi. I fel hle mai. Tlaiah chaw ei ve nghal ta che." a ti zung zung a, ka lo nial vat thung. Eleazer awm ve chuan min kam deuh run a, nuam ka ti tehchiam lo.
.
"Khawnge i mipa zui thin kha, i lo hruai ve lo nia." ka bula rawn thu pahin a tawng a, a aw rik dan atang chuan a hmuh rualin a hnek duh maiin ka lo ring ve ringawt.
.
"Nia, vawiin chu a buai zual deuh a." pangngai thei ang bera chhangin U Sawmzuala chu ka en san leh daih a. "Rei deuh awm hman pawh ka ni tawh lo, i lo tha zel dawn nia. Ka haw lehnghal mai ang aw."
.
Ka thutna atangin ka tho a, ka rin loh zet hian Eleazer chu arawn tho ve nghal vut a. Eng thil nge maw a hriat ni? A bulhnaia awm hi ka duh tehchiam lo tih hria se chuan ka tan hnawksakin a awm hauh lovang.
.
"Ka lo thlah ang che."
.
"A ngai lo." ka chhang rang mah mah maithei.
.
"Kawngka thleng chiah alawm ka tih." U Sawmzuala nui huk ka hriat chuan ka meng kual rawlh mai.
.
"Tikhan meng ziah suh.." tih leh ka bana rawn vawn a rual a, ka taksa min dek chu duh lovin ka ban chu laksawn ka tum a, min hmer nghet lutuk mah mah a ni. Min ngaichang lem lo hian kawngka awmna lam  panin min kai a, ka bag lain ka zui ve lo thei ta lo.
.
Verandah kan thlen chuan min vawnna chu thlahin  a thaw huai a.
.
"Hmanni kha a zialo khawp mai." a thusawi chu ka awih lo zawk. Eleazer hian thupha a chawi ang maw??
.
"Theihnghilh rawh." tiin ka kalsawn nghal a, min lo zui tih ka hriat chuan ka maimitchhing tawp.
.
"Muffin_"
"Engmah sawi suh. I thusawi kha dawt a ni hleinem. Ngaihtuah chiang lova chetsualpui che ka ni reng alawm." tawngkam pangngai thei ang bera tawng  ka duh. Ka hlawhtling reng em ka hre lo.
.
Thaw hawkin ka hnunglam atang hian min rawn kuah a. Hei chu ka va beisei lo chiang em! Khua a thim dawn ruai tawh a, miin min hmuh loh ka beisei.
.
"Eleazer.. Khawlai anih hi.." khawlai chu a ni chiah lo alawm. Mahse enge danglam chuang. Inchhung ah kan awm hleinem mawle. Gate chhung tual zawl a ni nain ka tan chuan khawlai a ni tho tho.
.
Min thlah a tum lo. Ka hnunglam atang chuan ka samah a hmai a phum a, thawk a la tih ka hria. Min kuahna chu a tinghet zual sauh a.
.
"Ka tan chuan kha thil kha tihpalh thil a ni lo ania." a tawng zawi khawp mai.
.
"Ka hria alawm. I tan chuan i hmeichhe hneh pakhat ka ni ve mai a. Ka hai bik hleinem."
.
"Ni lo.." a ti hrawih a. "Chutiang a ni lo. Ka sawi awmzia i hria. Ka tan a_"
.
"Hria e. Min thlah tawh rawh." ka ti sap a. Thinrima inhmachhawn na chi pawh niin ka hre lo. Tunah hian ngaihzawng nei lai ka ni a, mipa dangin min kuah hi Muanpuia phatsanna niin ka hria. Chu chu ka duh lo.
.
"Eleazer.." ka sam chhanah chuan ka nghawng hnunglamah min fawp a. Ka mit ka chhing sawk. A dik lo. He thil hi a dik hlawl lo. Min khawihna avang hian ka danglam tawh tur a ni lo, chu chauh ni lovin engvanga la inkuah tur nge ka nih? Ni love, ka inkuah tir hleinem. Ka thu hhmu lovin min kuah ringawt anih hi.
.
"Hmeichhia kawplai nei ka ni tih i hria a, i awm dan hi a diklo a nia."
.
"Tunge pawiti chuang!" ati leh nghut a, min kuahna chu thlah a la tum chuang lo. Ka dula a kut a nghah chu ka dawmin thawk ka la a. Engvanga ka thlahlel fo si  nge ka nih? Eleazer hi thlahlel tur ka ni tawh lo.
.
"Keimah! Kawppui laka rinawm lo mihring nih ka duh ve lo." ka tih chuan thawk a la ham ham a, ka nghawng hnunglam chu a thawkkhum lum ham ham mai.
.
"Anih chuan kal tawh rawh."
.
"Min kuahna hi i thlah loh chuan__"
.
"Aw le..Aw le!"
Min thlah hnu chuan ka scooty ka pan nghal thuai a, Eleazer chu a hmel en duh tawh lovin ka tlan chhuak nghal a. Ka tukhum mur chem chem dan atang chuan min enzui reng tih ka hria. 
Ngaihtuah zui duh lovin ka scooty khalh chauh chu ngaihtuah tum chungin  k atlan zel a, in awm tlemna lai ka thlen chuan ka scooty chu ri phurh phurhin a thi ta chut mai. U Sawmzuala te in pana ka kal lam pawhkhan engmah dik lo a awm miah si lo. Inchhunga ka awm chhung khan mi tuemaw in an lo khawih a ni chiang khawp.
Ka theih ang angin kawngsirah scooty chu ka nawr sawn a, englai  nge dik lo tih hriat tumin ka bih kual ve ngial naa dik lo lai ka hmu fuh mai thei lo. Khua a thim a ni tawh deuh mai si. Taxi kal vel a awm miah lo lehnghal.
.
“Muanpuia min hruai turin ka be mai ang.
.
Ka bag aka phone dah phawrhin ka contact list ka scroll a, motor chak zeta tlan thawm ka hriat rual deuhthawin ka piah pen sawm pawh tling lovah motor dum arawn ding chik tuarh a. Ka phu dawrh mai. Hlauhthawnna in ka khat nghal bawk.
Motor atang chuan mipa pakhat hmanhmawh zet hian arawn chhuak a, eng a tha tawh lo bawk nen tunge anih ka hmu fiah mai thei lo.
.
Keihi dinhmun tha lo takah ka ding mek anih hi.. Engtin nge chet ka lak dawn ka hre lo.
COPAS (HEARTS)
.
CHAPTER - 17
.
Thantei_LauraSean
.
H & E
.
Ngaihven lo anga lang luiin scooty chu ka en leh a, ka rilru chuan engtin pawh min rawn khawih se sual let turin ka inpeih at thung.
.
Rei ngaihchan a ngai lo, ka hnung lam atanga ka dara min rawn vawn chuan rang lutuk hian a banrek ah ka man chat a. Tun hun atan hian alawm mahni inven dan ka zir. Ka tha neih zawng zawng sawmkhawmin bin ka tum a, keimah aia a len zawk chu thuhran ni se, ka tha ka pek phat atang khan ka bin zo dawn lo tih ka hre nghal. Bakah a lo tang ve hman tlat. Thiam thil nei ve ni lo se tang hman tur a ni miah lo a nia.
.
Nui hawk ka hriat chuan rang lutuk bawk hian ka vawnna chu ka thlah a.
.
"Khatianga thil kha engtin nge i thiam zawk?"
Hawi chhuakin ka en a, Eleazer makti hmel leh a nui insum hmel inpawlh nuaih chuan ka thin a tirim lutuk takzet. Hlauthawng bawk thinrim bawkin ka insehruh a, chhan ka tum therte lo. Min rawn umzui ka ring pha lo hrim hrim bawk.
.
"Enge i rawn tih dawn?" ka tilet nghat a. Min tih hlauhthawn zia kha. Ka thinphu pawh a la pangngai lo. Hmanhmawh hmel lutuk leh minti thinthawng lutuk lo zawngin min rawn pan thei reng. A enga pawh chu nise engvanga min rawn umzui nge anih reng reng?
.
"Mahni inven dan kha khawi atanga i zir nge?"
.
"Lo buai suh.."
.
"Ka ti hlauthawng viau che tih ka hrethiam mai."
"Sawi lo zawk mai teh." min hmuh theih leh theih loh ka hre lo chungin ka melh rawm rawm a. Ka kut khur nasa lutuk chu ka hum ruh ngar ngar bawk.
.
"Tih palh.. Min lo zui rawh." ka banah min kaih tumin min ban a, ka tawlh hla vat a.
"Ka zui lovang che."
.
"Kha kha a chhia a ni lawm ni. Luhlul hun pawh a ni lo."
.
"Ke in ka kal thei." ka tih chuan a rum nghut.
.
Engvanga hmanhmawh taka rawn um che nge ka nih min zawt miah lo."
.
"Zawh che pawh ka tum lo"
.
Thaw huaiin min rawn dinhnaih zual a beidawn hmel zet hian "Muffin?" a ti zawi ruih a. Thip zetin ka enlet thung. "Tunah min zui rawh. Nawrluih ngaiin awm suh." thinrim hmelin a tawng lo na a, a aw ah chuan eng emaw a lang tel tih ka hai lova, mahse ka thin a la rim vangin ka pawi sa der lo.
.
"Khatianga hlauthawng taka min siam kher lo khan i rawn awm thei reng__"
Ka dan hman loh khawpa rangin min rawn kuah bet nawk a, ka tha khur dar dar chu a hre thei ngei ang. Min khawihna vang ni lovin ka hlauhthawn vanga khur ka ni tih pawh a hrethiam ang chu.
.
"Tih hlauhthawn che ka tum hauh lo ania. Tunah chuan min zui phawt angai." ka hahdam theih nan ka hnungah min chul hauh hauh a. "Tunah le." min kuahna chu phelhin ka banah min kai a, tang chiam pawh ni ila min thlah dawn miah lo tih ka hria. Bakah ke a kal ai chuan a bula ka kal hian a him zawk reng reng.
.
"Chahbi ka phawi lo a nia." min vawnna thlah chuang lovin scooty kan pan a, chahbi chu phawiin a ak nghal hmak a.
.
"Khawi, ka chahbi anih kha."
Ka tawng chu hre awm a awm miah lovin, a motor dahna lamah min kalpui a. A chet dan atang chuan hmanhmawh eng emaw tak chu anei ngei ang tih ka ring.
.
Kan tlan chhuak a, kan pahnihin kan ngawi reng a. Ka hawi chhuah chuan kan in lam kan pan lo tih ka hre chiah.
.
"Eng thil  nge thleng a? Khawiah nge kan kal dawn?"
.
"Thil eng emaw hmuh tir tur che ka nei. Hmanhmawh taka rawn pan chhan che ka nei bawk. Tun chinah chuan mahni chauhin khawiah mah i kal tawh lovang. A him lo." aw ki hniam zet hian a tawng chhum hmuk hmuk a.
"Engtin nge ka him lo tih i hriat? Nang hian dawt hmangin min hnaih i tum ani em lovang chu." amah pawh en lovin ka tawng a, min rawn melh zawk tih ka hre tho. Engmah sawi lovin a ngawi leh daih lawi a.
.
Khawpui pawn kan thleng a, kan kalna lam hi Durtlang lam niin ka hria. Ka ngaihtuahna buai deuh vang khan kan kalna lam hrechiang turin ka lo hawi chhunzawm miah lo a ni.
In pakhat kawt ah motor a tiding a, tawng lova chhukin ka thutna lam kawngkhar min rawn hawn sak chuan hnial buai lovin ka chhuk ve nghal mai. Kan kalna tur in chu a thim thuap a, tumah an cheng lo anih ka ring ve ringawt. A thim ruih chung chuan Eleazer chu a hawi kual a, ka banah min rawn vuan lehin muang lo zet hian in chu kan pan a.
Chahbi phawrhin kawngka kalhna hrawl zet chu a hawng a, inchhung kan luh chuan a thim tha khawp mai. Light a on chuan ka mit a vai chum chum a, inchhung awm dan pawh ka hmu chiang mai thei lo.
.
"Khatah khan lo thu rawh." min vawnna thlahin a kalsawn a, pindan pakhata a lut chu ka enzui reng a. a thut fel rualin arawn chhuak lehnghal. Thir bawm ni awm tak hi a rawn keng chhuak a. Heilai hmunah hian chhan leh vang fel tak neia min hruai chu anih ngei hmel.
.
"Kha kha enge?"
Min chhang lovin ka bulah arawn thu a, a bawm ken chu a malchungah dahin chahbi te takte hian a hawng a. Bawm chhunga thil awm chu enge ka hre ve mai lo.
.
"Henghi en la i hriat ho zawng min hrilh dawn nia." a tidam thluam a. A hmel atangin a ngaihtuahna a tilang miah lo thung.
.
Ka malchunga bawm arawn dah chuan ngawi rengin a chhunga thil awm ho chu ka en a.
.
"Heihi engtin nge i neih?"
.
"En zel phawt rawh." a ti leh ringawt.
.
Thlalak thenkhat chu Robert pendrive-a awm keimah ngeiin ka chhui zuite kha an ni. Min hrilh ang chuan ka en zel a, Alawmi thlalak hmuh nuam lo zet ka hmuh chuan inveng  hman miah lo a te thawt in bawm chu ka malchung tangin ka hnawl thla rawp a. Ka awih thei lo! Ka taksa a mur chhuak vek a, dan rual lohin ka mittui a tla nghal zawih zawih  bawk..
.
"Eng_Engtin nge a nih theih?" ka tap nghal hlawp hlawp mai. "Hetiang thil hi engtin nge a nih theih? A ni thei lo! Kei hian engmah ka lo hre miah lo.."
.
Ka awm dan chu uluk zeta min enin a rawn tho a, dam thlup hian min kuah ta hlu hlu a.
.
"I tan a na viau ang tih ka hria. Ka hriat chhuah tirh chuan keipawh min thawng khawp mai. Inrawlh zui tawh lo turin ka duh che tih i hria a, chuti chung chuan ka thusawi pawi sa lovin i inrawlh ta zel si a, he thil hi ka tum hun aia hmaah ka hmuhtir ta che anih hi. Venhim che ka duh bawk.." min kuah nghet sauh a. Ka tawng chhuak thei tawh rih lo.
.
Tuin nge ring pha ang? Ka thiantha ber Alawmi kha pawngsual a lo ni reng a! Pawngsual anih thu sawichhuak miah lovin amahin a tuar a, a taksa in a tawrh zawh loh thlengin rilru hreawmna nasa lutuk a lo tuar reng a nih chu. Chu chu kei, a thiantha ber nia inchhal hian engmah ka lo hriatpui lo! Ka indem a, na ka ti lutuk a ni. Ka thiantha neihchhun khan min ring zo lo em ni? Min hrilh ni se kei hian eng emaw kawng zawng talin ka tanpui thei maithei asin. Amah chauha tuar atan chuan a na_ana lutuk a ni e.
.
Ka inngaihtuah fim deuh a, tawng tumin ka aw ka thian kharh a.
.
“Tunge a titu?”
"Hahdam phawt la ka hrilh ang che." Eleazer tawng chu ka hre thei chang chang. Nghet lutuk hian min la kuah reng a, keipawn a kawngah ka lo kuah let reng tih ka inhre chiah. Ka hriatchhuah rualin ka kuahna chu ka thlah vat a. Ka rilru chiai vang chauha kuah ka ni  ngei ang. Ka chet danah inlak hran ka duh tih hrethiamin zawimuang hian min thlah a.
.
Sofa ah chuan thu lehin Eleazer chu ka bul setah arawn thu a, ka ngaihtuahna hriat tum niawm tak hian chik takin min en bawk.
.
"Khatiang thil titu kha tunge?" ka duh angin ka tawng ring thei der lo. Alawmi thlalak a taksa, a mal vela thisen kai ka mitthla a lo lang vang chuan ka mit ka chhing sawk a. He thil vang hian eng emaw chen chu ka pangngai dawn hauh lo tih ka inhre chiang lutuk.
.
"Robert kha ka rinhlelh ber chu a nia, mahse a thih dan vang khan Robert thiltih a ni thei ta lo a ni. He thil titu hi tupawh chu lo ni se tunah hian zalen takin a la awm tihna a nia. Fimkhur tluk a awm lo."
.
"Tabi kha..?" thawk la hlahin ka mittui tla leh tur chu dankir ka tum a, ka hlawhchham. Eleazer hmaah hian hmeichhe chak lo tak ang mai a tah ka duh lova, mahse tihngaihna a awm lo anih hi. Ka insum thei ngang lo. Ka kut pahnihin ka hmai ka hup a, ka mittui tla chu ka hru nawk nawk a.
.
"Tabi khan eng emaw tak chu a hre ru tih ka hria. Amah kha a chhan pawh ka hriat miah lohin ka ringhlel dawn dawn a, amah hnaih lo tur pawhin ka hrilh che kha. Mahse, a ni pawh_"
.
"Hreawm tak tuarin a thi ve tih a chiang reng a.. Tu tih nge ni ta ang?" ka hrawk a tawt ut ut a, tawng pangngai pawhin ka tawng thei lo.
.
"Eng emaw a hriat vanga khatiang thil kha a chunga thleng ni ngeiin ka ring. Engmah fiahna a la awm theih loh  vang hian ka ngaihtuah zual em em che a ni. Keipawhin i inhnamhnawih tih ka hriat chuan hetiang thil titu hian a hre ve ngei ang. Te-a kha_"
.
"Te-a chu a nih ka ring lo. Vawikhat kha chu ka ringhlel ngei a.. Mahse, Alawmi nen inzawmna an nei lo.."'
"Chu chu engtin nge i hriat? Robert leh Alawmi an inkawp tih a hria em?" a tih chuan ka bu nghat a.
.
"A lakah inveng ang che. Ka bulah tih loh chuan mipa reng reng hnaih emaw a fal emaw fal lo emaw pawhin hmu suh." chiang zet hian min en a.
.
"Chutiang ringawt a theih hleinem."
.
"I ngaihzawng pa pawh kha ani lo vang tih a sawi theih loh. Engvanga rawn hnaih ringawt che nge anih?"
.
"Chu kher chu i lo buaina tur anih loh chu. Muanpuia nen chuan Middle school kan kal lai atangin kan inhre tawh. Kan inhrechiang.."
.
"Duhtawk teh.. Eng chen zeta thui nge hriat i neih?"
.
"Ka chungah tha lo takin a awm dawn lo tih ka hrechiang."
.
A chek hluk a. Ka ngei tawk a tling lehnghal em em bawk.
.
"Tun hun hi ka ngaihzawng chungchang a i ngaih dan sawina hun pawh ani lo. Muanpuia chungchang engmah hriat i nei lova, chuvang chauh pawh chuan i ring chhe nghal ringawt thiang lo."
.
"Thiang leh thiang lo chu keiman ka thliar hrang ang."
.
"A tawk anih chu. In a haw ka duh." ka ti nghal hmak a. A hmela engmah langchhuak lo hian min en reng ringawt.
.
"Kha mihring thlavang i hauh ang khan vawikhat chauh pawh ka thlavang i hauh ve tawh em?"
A zawhna hi enge a awmzia? Kan thusawi lai leh amah hian inzawmna a nei lo reng reng.
.
"Min chhang rawh!" a tawngkam a chang kher mai.
.
"In ah ka haw duh tih ka sawi anih chu_"
.
"Ka zawhna che kha min chhang phawt rawh."
.
"Theihnghilh zawk rawh." ti hmakin ka thutna atangin ka tho phat a. Helai hmuna min hruai chhan ngaihtuahin tunah hian kan sawi loh tawp tur thupuiah kan lut a nih hi. A thlavang ka hauh leh hauh loh hian awmzia a nei lo? "Awmzia a awm lo.." ka ti leh sap a. Ka rin loh zet hian rawn ding ve thutin ka hmaah tak ka hmai min si lo chauhin arawn ding a, a hmel lan dan ka hmuh chuan ka ip deuh chawih mai. Min tihnat hlau tak si hian ka dar tawn tawnah min vuan a, a inthunun nasa hle ang tih ka ring.
.
"Ka tan awmzia a nei.. Nang_" inthlahdul hnakin ka chalah  min rawn si a "Muffin, ka tan engkim i ni! Chu chu engtin nge i hriat loh theih zawk?" min dem ni zawk awm tak hian a tawng chhuak a. Awlsam taka sawichhuak a ni lo tih erawh ka hrechiang hle. Engvanga chiang nge ka nih erawh ka hre hauh lo mai. A ban pahnihin ka kawngah min kuah a.
.
"Chu chu ka hre hauh lo. Ni lo, ka sawi tum chu__" min rawn fawp hmiah a, ka tawng zawm thei ta lo! Ka chungah eng thil nge atih leh tak hi? Min fawhna chu a dam nain ka chhungril a fan rawih rawih thung. Kei hi engvanga danglam ve leh ngawt nge ka nih? Muanpuia... Ni lo..!
.
Ka inla hrang vat a. Nia, ka hmui chiah a nia ka lakhran. Min kuahna chu a ngheh em vang pawh ni lovin a taksa lumna ka feel chu ka kalsan mai phal lo a ni. Ka rilru zet chu! Ka mit ka meng a, Eleazer maimitchhing chunga kun deuh hmel chu chiang takin ka en a. A la ngai reng. Ka duh emaw duh lo emaw Eleazer hi ka la hmangaih reng a ni! A mithmul sei sang chuan amit a khuh a, tunah chuan min hmu thei lo. A chal a tichuar deuhin a la maimitchhing ta reng a. Ka hmui pet fan fan chungin a bianga chul mai lo turin ka insum hial nia.

Kei hi rilru uire ka ni reng zawk anih hi. Ka tan Muanpuia a awm reng laiin tunah pawh Eleazer bulah ka awm a nia. Muanpuia hi mipa tha tak a ni. Min care em em bawk. Phatsan tur ka ni hauh lo. Chu mi hrereng chung chuan a bula ka feel ngai loh ka thinlunga eng emaw famkim lohna nei ni a ka hriat thin hi Eleazer bula ka awm hian engvanga tih famkima  awm ta nia inhria nge ka nih si le? Ka ngaihtuahna kal dik lo mai a ni lo tih ka hrechiang em em lehnghal. 
.
Muangchangin arawn meng a, ka en reng tih min hmuh pawh chuan a awm dan a danglam chuang lo. A aia chiang awm tawh chuang lo tur khawpa chiang hian ka mitah min en a.
.
“Ka hmangaih che!”
Ka meng phar kawk! Hnunglamah ka awn dawrh bawk. Min rawn vuan vat a. Za lo zet hian a nui hul hak hak a.
.
“ I  hmel lan dan chu ‘thah che ka duh’ tih thu hrilh ang  mai I nia lawm. Theihnghilh rawh. Haw I duh thu I sawi tak kha.. Lo kal rawh, ka thlah ang che.”
Chet nachang pawh ka la hre chuang lo. A hmel chu ka en a, a thusawi kha ka hre dik reng em tih ka ngaihtuah a ni.
.
“Theihnghilh rawh. I tan chuan thu hriat nuam a ni lo tawp tak ang. Sawi lo tawp tur ka nia..”
 A mitmeng a ka hmuh chu natna a ni. Natna nasa tak. Enge ka ngaihtuah ka hre lo, muangchang in ka pan hnai a.
.
“I sawi kha dik anih chuan. A nih chuan_Engvanga min hnawl si nge I nih?” ka tawng khur chu ka va haw em!
.
“Theihnghilh rawh ka tih kha.”
.
“Eleazer” ka ti vin that a. Hetiang taka vin hian ka la ko ngai miah lo. A sawi ang hian in a inthlah tir mai tawh tur ka nia. Mahse ka thei lo. Min hmangaih anih si chuan engvanga min hnawl si nge a nih? A chhan ka hriat hi a tul reng em?
  “Theihnghilh rawh ka tih chu.” A ti nghut a, a hmel lan dan chu a pangngai leh vek tawh. Phiangsen hian!
.
“A lo nih phiangsen chu!”
Dawn awm lovin sofa-a ka bag let ngat chu ka la nawk a, ka chhungril so bulh bulh hi ka thunun theih piah lam a ni. Amah pawh en tawh lovin vung lutuk hian kawngka lam ka pan nghal hmawk hmawk a. He mihring min thlah hi ka mamawh lo. A kut hmawr pawhin min khawih tawh lovang.
A pen thawm atang chuan min umzui tih ka hria. Ka ban arawn deh rual rualin “Min khawih suh” ka ti tuarh a, a kut chu ka theihtawpa na hian ka thingthla nghal bawk.
.
“Muffin..” a ti hrawih a, engmah ka pawi sa tawh lo.
.
“Chutiang chuan min ko suh..” thinrim lutuk in ka hmachhawn leh a, min rawn dawm a tum chuan ka duh lo tih nasa zet hian ka lantir  bawk. “I kut hmawr pawh khan min khawih suh. Ka hua che… Ka ten che.. I hmel hi vawikhat pawh hmuh ka duh tawh lo. Nang hian enge min pek? Engmah… Chuan_ Ka lak atang hian Kal. Bo. Rawh.” Thinrim lutuk a thaw kawk kawk chunga inher in  ka hma zawnah ka kal bawrh bawrh a. A thim zek. Ka awm dan hi nasa min ti pawh ni se pawi ka tih loh zia chu ka sawi peih lo zawk!
.
Thil eng emaw ka chhuih tawk a, dawn awm lo hian ka tlu bawkkhup nghal thlawrh. Thinrim lutuk bawk nen_Ka hrawkah arawn inhnawh up up a ka insawhna na bawk si nen ka ngik chhuak ta lehnghal! Ka tap pawh a ni lo, heti khawpa thinchhe nasa ka ni tih hi ka lo inhre ngai lo reng reng.
.
“I tha em?”
Eleazer chu ka bulah rawn thingthi nghal rawp rawpin min kaihthawh a tum a,  min vawn rual chuan “Min khawih suh.” Ka lo ti vin hlar a. Min thlah ve mai bawk.
.
“I tho thei angem?” a ti dam thlup a. A awm dan apiang hian tunah tak chuan ka pawi a sawi vek.
Ka chhang tawh lo. Thawh ka tum a, ka tho mai thei lo leh ta nghal a. Ka taksa hi khawilai ber nge na pawh ka hre lo, a vaiin a na vekin ka hria. Muangchang leh harsa ti zetin ka thu a, Eleazer chu a phone ti engin ka bulah a thu ngawi run a, engtin nge ka awm zel dawn tih min ngaichang ni awm tak hian min en reng tih ka hria. A phone eng rinchhan chuan a hmel ka en zawk a, a mitmeng a ka hmuh chu ka awih thei lo.
Khawvelah hian a aia thlakhlelh leh chuang nei lo hmel puin min en anih chu! Ka mumang a nih ka ring zawk hial.