COPAS (HEARTS) - 27

COPAS (HEARTS)
.
CHAPTER - 27
.
Thantei_LauraSean
.
H & E
.
"Police phone rawh." Muffin nu chu en zawkin Sawmzuala chu ka tham a. Ka tawng hleithei lo. Dik taka sawi chuan tunah hian a nunna laksak mai ka duh hial a ni.
.
"Eng thil nge maw thleng hi le?" chiai buai zet hian a che sun sun a, engmah a tikaw der lo. A awm tihpuina chin chu ka nei tho. Beisei loh thil a thlen thut hian mi then khat chu engmah ti thei lovin an chiai buai thin tih hi ka lo hmu tam ve tawk tawh bawk. Sawmzuala chu dim lo zetin k apaih let nawk a, ka phone phawrhin emergency number ka dial nghal a.
.
"Bawihte, i harh em? A harh miah lo a nia.. Engtin nge ni dawn? A lungphu pawh a dik lo." mangang hmel puin Muffin nu chuan min rawn en a, kei pawh ka mangang.
.
"Doctor ko rawh.. Khawiah nge Doctor?"
.
Ka va indaih lo tehlul em. An nufa chauha ka kalsan chuan Sawmzuala chu an tan a hlauhawm thei tih ka hria. Vanneihthlak zetin Doctor leh nurse an rawn lut a, Muffin chu an check ta zung zung a. Anni pawh thil thleng chuan a thawng tak zet tih an hmel atangin a hriat. An buai nawk nawk a, tihtheih ka nei ta rih lo. Police lo thlen hma chuan engmah tihtheih a ni tawh rih lo bawk a. Sawmzuala awmna ka en leh chuan a lo awm tawh  miah lo! Phiangsen chuan.. Engtik laiin nge a lo tawlh sawn hman..
.
Hmanhmawh lutuk in Cabin atang chuan ka tlan chhuak a, Sawmzuala hmel reng reng hmuhtur a awm lo. Thinrim tihtur ber hre lovin cabin pawnah chuan ka vei sek a.
.
Nurse arawn dak dek dek a, Cabin chhungah lut turin min duh tih lantir nan min hui zeuh a. Ka lut  rang ngang mai.
.
"Thil thlen dan mumal tak kan hriat phawt angai anih hi. Test kan tih pawh angai ang. Hetiang thil kan hospital-a a thleng hi a zahthlakin  a rapthlak ka ti hle mai. Pawnlam miin hre lo se tih hi ka duhthusam a ni" Doctor chu ka en reng a, engmah  ka la sawi lo. Thil thleng kha midang hriat laia sawi pawh ka duh bik hek lo.
.
"Tunah enge a an? A tha em?" ka tih chuan min chhang mai lovin min en ran ran a.
.
"Amah chu reiloteah arawn harh leh mai ang. A taksa hi lo khawih danglam rih loh erawh atul anga. Min lo zui la inbe phawt teh ang. A nu hi biak tlak a ni rih si lova." bu nghatin Doctor chu ka zui a, cabin atanga kan chhuah hnuah Police an lo thleng ve bawk. Tuna an tihtheih zawng chu Sawmzuala umzui a ni mai.
.
Doctor private office-ah lutin thil awmzia leh cabina ka thil hmuh chin zawng ka sawi a, an zavaiin thinrim lutuk hmel an pu vek. Kei pawh hi ka la pangngai lo.
.
"Sawmzuala chu arang thei ang bera hmuh a tul ber. Pawisak a nei lo hle ania."
.
"Hun rei nghah angai lovang. Kan hmu thuai ang."
"I sawi ang chu ni ngei rawh se."
.
Kan inthen darh leh hnu chuan cabin-ah ka let leh a, Muffin nu chu khum bulah thingthiin a fanu hmel dang bel mai chu a en a, phun sep sepin a mittui a luang zawih zawih tih ka hmu a, a bulah hian han sawi mai tur pawh ka hre lo.
.
Min rawn hmuh chuan min rawn pan thuai a.
"Eng thil nge maw ka naute chunga thleng ta hi le? Eng thil nge tihsak theih ka neih ang. Engtin nge ni dawn? Muanpuia ten an hriat ve ngei angai anga. Awi karei.. Enge maw i bulah hian ka sawi chiam le?" tihngaihna hre lo tih hriat reng hian a vei a, a pasal pawh a la be miah lo tih ka hria.
.
"Tihian kan khawih che lo reng mai dawn em ni? Sawmzuala chu ka va haw tehlul em!"
.
"Tunah hian a lo harh leh hmain test chu ti sela a that ka ring. Anmahni zawk khan engkim chinchang an hria a, an lo kal thuai ang." ka ti ta ngawt a.
.
Muffin bulah chuan kal hnaiin a hmel chu ka en a, ka thinlung chhungril ber hi a na tih hian a sawifiah zo lo. Kha Sawmzuala phiangsen khan a thiltum a ti hlawhtling em tih hre tur pawhin amah ber a biak theih loh a, thuchiang engmah a la hriat theih loh. A nu awm ve chu ka zah zo hek lo. A khum tlangah chuan thuin a biang vawt deuh thler chu ka kutin ka vuan vang vang a. A na lutuk a, awmngaihna ka hre lo a ni ber. Ka awm dan hi ka hrethiam lo. Muffin ka lainat lutuk vanga ka awm chhung hi na ngut ngut niin ka hria.
.
"Muffin_" tiin ka phun a, sawitur dang reng reng ka hre lo.
.
Cabin kawngkhar arawn inhawng ri rak a, ahmaa lo kal doctor leh mi dang pahnih an rawn lut leh a.
.
"Tunah hian test chu kan ti nghal mai ang. Kha misual khan thil a khawih pawi ngei em tih hriat vat in duh ka ring. Amah hi biak theih a ni rih chuang lova, a hriat loha lo tihfel hi a tha zawk ang. Khawngaihin min lo va chhuahsan mai ta che u." arawn ti charh charh a. Muffin nu nen chuan kan chhuahsan ta rih.
.
Khua a var a, result kan la hriat loh  vangin hospital-ah ka la awm ve ta reng a. Ka rilru hmanhmawh dan leh hospital-a hnathawkte chet dan raih raih hi a inmil hlawl lo.
.
"Rinmuan, Bawihtei pa a lo thleng tep a, min va hawsan tawh rawh. Buai lai takin nang ilo awm hlauh a ka lawm lutuk a nia."
Muffin nu hmel bui chak chu ka en a.
.
"Result han hre phawt ila__"
"Ni love, min hawsan tawh rawh." a ti deuh tlat. A awm nuam lo lutuk hmel chu a khawngaihthlak tak zet. Hnial lui duh lovin ka kalsan a. Hospital gate ka thlen chuan  Muffin pa pawh a lo thleng ve chiah. Min rawn hmuh lem loh vangin ka va pawh duh ta bik lo.
.
Ka in lam panin motor ka khalh a, ka rilru thlak thutin Sawmzuala awmna tur ni a ka rin lamah chak lutuk mah mah hian motor chu ka khalh leh ta zawk a. A hmel ka hmu anih chuan ka insum buai hauh lovang.
.
HMINGTHANSANGI*
.
"Min thlah rawh. Engmah ka ti lo.Ni lo.." Sawmzuala chu a te ruai ruai a, amah vuan bet tlattu chu eng thil nge tih ka hmuchiang thei lo.
"Min chhan rawh..Min chhan rawh.." mangang mengrang vek hian min rawn en a, ka pui dawn em ka inhre lo. Ka pui duh dawn em ni? Ka chunga..Ni lo..
.
"Tanpui tum duh suh.." thinrim lutuk tih hriat hian ka bulah Alawmi chu a ding a, mak ti zet hian Alawmi chu ka en a.
.
"Engtin nge heng thil hi a thlen? Alawm? Tabi pawh maw?"
.
"Misual hian an tuhrah an seng ngei tur a nia lawm. Tanpui pawh tum la i thei chuang lovang. Bestie, ka tan i beihna zawng zawng hi a thlawn miah lo ania. Malsawmna dawng ang che."
.
Thawklehkhatah Alawmi leh Tabi chu chhumzing chuai chuai karah chuan an bo a, ka ko vak vak chung pawhin an rawn hawilet tawh lo.
.
Min khawihtu awm vangin ka meng chhuak zawk a, tun maia ka thil hmuh kha ka mumang nge a tak tak tih pawh ka hrehrang thiam lo. Ka mumang anih ka ring zawk mah.
.
"Bawihte, i tha tiraw? I harh em?" ka nu chu ka en a, a mit bui chak chu a tah nasat vang a nih ngei ka ring. Ka nu leh apa tan hian rilru hahna tur thil ka va thlentir nasa em.
.
"Sawi a harsa ang tih ka hria. Mahse, nizan khan kha mihring tenawm khan a khawih hman che em? Result kan la hre lova.."
.
Ka chhang mai thei lo. Ti ila, ka hre lo a ni zawk e. Ka puansin a hlim tih kha leh a chet danah khan ka taksa hnuailam a khawih ngei tih chu ka mit hian a hmu a, mah se, engmah ka feel lo. Lalpa, khawngaihin ka ngaihtuahna rapthlak lutuk hi dik tir lo hram ang che. Ka tuar zo hauh lovang. Eleazer hmel ka hmuh khan thih ka duh tih ka saw hial a nih kha.
.
Ka chhan loh vangin ka nu pawh chu angawi ta vang vang a, a hmel atangin a rilru hreawm zia a lang reng a, amah hnem theitur khawpin tunah hian ka chak tawk bik si lo. Ka thin a ur hluah hluah a, engmah ka tithei bawk si lo.
.
Sawmzuala khan ka chungah eng thil nge a tih hman hre turin test result ka la hre bik lova, a chhe ber thleng pawh ni se kehchhe lo turin ka rilru ka siam.. Ka tuar zo dawn lo tih erawh ka hrechiang hle si.
.
"Nu, Muanpuia a lo kal em?"
Ka nu chu a bu nghat nghat a. "Thil thleng kha hrilh loh theih a ni si lova, ka hrilh ta mai asin. A lo let leh thuai ang.."
.
Muanpuia lo let leh hnu chuan ka nun min chhuahsan a, sawitur kan hre  hlawl lo. Ka tawng tam theih rih loh mai bakah min delhtu boruak a rit lutuk a, awmngaihna a awm lo a ni ber mai.
.
Ka kut arawn vawn chuan ka phu deuh zawk.
.
"Muanpui.."
"Engmah sawi rih suh." ka hmel min en lovin a kun deuh lap
.
"Ka taksa hnuailam hian engmah a hre miah lo niin ka hria. Ka mal hi han khawih chhin teh." ka tita ringawt. Mak min tih hmel deuh hian min en zet a, ka rilru buai dan tur hrethiam leh niawm takin tim hmel zet hian ka malte zawn arawn dek a, engmah ka feel lo. Ka awm dan hi a va duh lo em.
.
"Tikhan i hre thei em?" min tih chuan ka maimitchhing a, engmah ka feel lo tih lantir nan ka lu ka tiche dat dat a.
.
"Tunah chuan engmah ngaihtuah hah miah suh aw. I tha leh dawn. I tha leh ngei ngei dawn a nia." a tih leh chuan ka tap lo thei ta lo. Ka inhip hlawp hlawp a, ka mittui chu ka bekah a luang zawih zawih bawk.
.
Tihngaihna hre lovin rem lo zet hian min rawn kuah a, ka tah a chhuak zual deuh deuh.
.
"Hetianga ka awm chuan kan innei thei lovang. I hun tha neih hi ka khawhrak sak thei lo che."
.
"Chutiang sawi suh." a ni pawh a aw a pangngai bik lo.
"Min hnial suh. Khawngaihin.. Hun ka mamawh. Ka tithei lo."
.
"Ka thei lo. Eng chen pawh nghah ngai se ka rilru a danglam dawn lo."
"Ka__"
Kawngka hawng ri ah chuan a inlahrang thuai a.
Kawngkaa Eleazer ding hmel chu ka en rei duh lo. Ka nun hi engvanga buai nuai nuai reng bik nge maw anih le? A lo lut mai dawn emaw ka tih laiin a thawm a reh daih. Tim ru zet hian ka va en leh a, zawimuang leh ka lak atanga mit lasawn miah lo hian min rawn pan a. Muanpuia nen ka entawn a, an inmelh eih lo.
.
"I lo tha zel em?" aw pangngai taka min zawh chuan ka bu nghat a. Ka dinhmun tawn mek hi keimah inih loh chuan engtiang pawhin sawi ila min hriatthiam pui pha dawn lo tih ka hrechiang. Ka dinglamah ka pasal nimai tur a thu a, ka veilamah ka mipa hmangaih awmchhun a ding bawk a, chubakah hlauthawng reng rengin test result ka nghak bawk a. Dam hi enge a tulna awm le tiin ka ngaihtuah hial. Min hnaihtu apiang natna ka siamsak mai mai niin ka inhria. Tichuan, tunah hian engkim hi ka hua a, engmah ka hmachhawn peih hek lo.
.
"Min chhuasan ru." ka ti sap a.
An pahnih chuan inmelhin kal chhuak zawk nih an tum lo ve ve tih an hmelah a langchiang hle.
.
"Min chhuahsan ru. Keimah chauha awm ka duh." rak thei ni phei ila ka rak ring viau ta ve ang.  
.
Muanpuia chu a thutna atangin muangchang hian a tho a, Eleazer chu ngainat loh hmel zeta a en hnuah a kal chhuak a. Eleazer chu ala che leh eih lo.
.
"Enge i lo an?" a ti dam thlup a. A hmel ka la en duh lo.
.
"Chhuak rawh." ka ti sap ringawt.
.
"I tha em?" a ti leh a, ka chhang chuang lo. Tunah hian min ngaihsak viau a tulna enge awm? Ka dinhmun vanga khangaih hlawh nih ka duh miah lo.
.
"Min khawngaih suh!" ka tih chuan a thaw hawk.
.
"Muffin.."
.
"Min chhuahsan rawh ka tih chu." ka taksa a sa pup pup a, ka bulah hian tumah awm lo se ka duh. Tumah ka mamawh rih lo. Keimah chauha inngaihtuah ka duh.
.
Eleazer chuan min rawn hnaihin ka hmaia khawih tumin a kut arawn phar chhuak a, ka lo thle sawn tawp.
.
"Test result kha a chhuak chiah a." a thusawi ka hriat chuan ka awmchhung hi a rawn lian tut tutin ka hria. Result chu ka hre duh em? Ka hre duh lo__Ka hre duh.. Engpawh ni se ka hriat ngei tur a ni tho tho..
.
"Eng hnuhma mah a awm lo." a tih chuan ka zawi nghal vek. Ka tawng thei lo. Ka maimitchhing tawp. Eleazer hi lawmthu hrilh tur ka ni tih ka hria. Mahse engmah ka sawi chhuak thei chuang lo. Khatih hun lai khan second khat lek pawhin rawn tlai se emaw Sawmzuala khan ka lakah a thiltum kha tihlawhtling ta ni se dam ka duh hauh lovang tih ka hrechiang em em a ni.
.
Dawn awm lo hian min rawn kun hniam a, a tawng thei bik lo. Ka chalah a chalin min rawn si a, ka bianga rawn lum pap chu ka mittui nge Eleazer mittui tih pawh ka hre hrang tawh hek lo.
.
"Muffin_" tiin a phun mawlh mawlh a.
.
Kawngka kik ri kan hriat chuan a inlahrang a, a hmel ka en chuan nichina ka bianga lum pap awm kha ka mittui ni lovin Eleazer mittui ngei a lo ni zawk tih ka hria. Ka hmuh duh lo niawm tak hian rang lutuk in a mit a tui nawk a, a nui lui suk bawk.
.
"Pawnah sawn Muanpuia ka hmu a.." ka nu chu a ding chawt. Ni e, engkim hi a buai nuai nuai a, hriatthiam pawh a har ang. Kei pawh hian ka awm dan leh ka nuna mipa pahnihte awm dan hi ka hrethiam bik lo.
.
"Rinmuana chu i lo thlen lai ka lo hre miah lova." ka nu hmelah chuan thinrimna aiin hlimna ka hmu. Test result kha a hre ve tawh a ni maithei.
.
"Rinmuan, i chungah kan lawm e." tiin a nui ta sak a. "Muanpuia pawh result ka rawn hrilh chiah a, kan fanu in nangni ang thiantha a nei hi a vannei hle anih hi." a ti sarh sarh a. Zinglama a lungngai hmel kha lawmna in a thlak ta a nih hi.
.
Eleazer chu che vutin a kekawr ipte atangin a phone a phawrh a, phone-a rawn betu tawng chu ngaithlain a ngawi vung vung a.
"Ka lo kal nghal ang." a phone off in min en a, ka nu a en leh a.
.
"Sawmzuala ruang an chhar anih chu.."
.
Mak tia meng phawk hra chungin ka nu nen chuan "Maw??" kan ti rual thawt!  
.
Ka type hman tawkkk ka lo dah e. Naktuk hi keima HAPPY BIRTHDAY a nia, ka rawn update theih ka ring lo tih ka lo sawi lawk e aw... Engpawhnise, min chhiarsak thin avangin ka lawm em em e. Love U ALL