COPAS (HEARTS)-22

COPAS (HEARTS)
.
CHAPTER - 22
.
Thantei_LauraSean
.
H & E
.
Party naa kal ve ka tum si chuan a hmun ka hriat angai ang chu. Mawizuala khan khawiah ber nge an awm a sawi hauh hleinem mawle.
.
Mawizuala ka call leh a, nui huah huah chung hian a phone arawn pick up a.
.
"Hmm.. A hmun i hre i duh aniang maw?"
.
"Sawi nghal mai mai teh." ka tih chuan a nuih a za lehzual.
"I kuttum kha i lek dawn loh chuan ka hrilh ang che."
.
"Khawiah nge?"
"Thakimi kha i hria tiraw? Khami te in ah khan."
.
"Ka lo kal ang." tih leh phone off ka rual a. Thakimi te in ah teh daih an party chu mak pawh ka ti deuh. Mawizuala min lo thawn photo chu ennawn leh in ka delete nghal daih. Muffin mipa dang bula a awm hmuh ai chuan engpawh ka hmachhawn ngam sak. En liam a nuih pui mai mai thei lo khawpin alaka ka feeling hi a nasa em a ni.
.
Thakimi te in panin motor ka khalhchhuak a, ka mitthla ah nichin maia thlalak hlir kha alang. Thlalak a mipa kha Bon Apetite-a ka hmuh tawh mipa kha ani tih chiang takin ka hria a, an inhnaih zui zel tih erawh ka hrelo der mai ange. Muffin hlim taka nuihtir theitu chu eng ang mipa nge maw anih le? Ka inkhaikhin dawn lova, el lah ka tum hek lo! Ka thil ngaihtuah dan zawng chu duh lovin music ka play ta daih.
.
*Beyonce - Halo* he hla hi hlui deuh tawh mah se ka duh thar riau. Mipa ngaihthlak turah pawh ka lo ngaih lem loh kha a nia. Engtin nge ka playlist-ah hian a lo awm pawh ka hre lo.
.
Ka kal tumna in kawtah motor ka dah fel a, ka rin aiin pawn lam atang chuan inchhung lam thawm a ring lo. Inchhung ka lut a, Mawizuala'n min rawn hmu thuai. Min lo pan nghal vat a.
.
"Thiana hun pawimawh a thleng tep." tih pahin ka darah min beng thuk thuk a, a thusawi awmzia chu ka hre der lo.
.
"Khawnge mi dang hohi?"
"An lo thleng ve tep ang. Tunlai hi eng thil nge i buaipui hmuh i har hle mai." atih chuan chhan ka tum buai hran lo. A hrethiam ve aniang chu thu dang a sawi leh ta vat a. Engtiklai pawh hian ka buai em em reng tih a hrechiang a, a sawitur hre lovin a tawng ve mai mai tih ka hre bawk. Ka thiltih mek leh ka thil chhui ruk hi hria ni phei se mawnga hawlh ang maiin a za sek ta ve ang.
.
An lo thutkhawm laihna lamah chuan ka kal a, Muffin hmel ka hmu lo. Helaia ka kal chhan ber chu amah a nia, ka bia emaw be lo emaw a hmel hmuh hrim hrim ka chak hle tih ka inhriat chhuah chuan keihi alakah ka zawr hle tawh tih ka inhrechiang bawk. Eng thil phiangsen nge maw ka ngaihtuah leh tak hi.
.
Ka inhungna bang zawng zawng dawn awm lo leh ka hriat miah loha tihchim a awm vek chhan hi amah ngei hi a ni. Hmeichhia ka thinlunga ka ngaihven leh hmasak awmchhun__
.
"Helamah hian lo kal la.." tih ri ka hriat chuan ka hawi chhuak vat a. Keimah min be lo nain a nui hmel ka hmuh chuan ka lo hahdam ve huai ringawt. Muffin chuan hmeichhe pakhat chu alama kal turin a huih a, a hmel a lang thar mai. A bula Muanpuia rawn ding ka hmuh chuan dawn awm miah lo hian ka kut ka lo humruh nghal ngawt bawk. Hmeichhe pakhat an bula a thlen chuan an inbia a, Muffin chu za zet hian vanvadak meuhin a nui a.. A nui hmel chuan ka chhungril, ka thling zawng zawng nen min fan chhuak vek ni hian ka hria. Ka awm dan hi a tha hauh lo mai.
.
Ka thutna atanga tho chhuakin an dinna lam chu ka pan a, ka tih hauh loh tur thil ka ti mek tih ka inhriatchhuah chuan an bulah ka ding reng tawh. Muanpuia chuan a kut veilam ah a kai tlat a, tun ang huna a kai tlat hi a tulna pakhatmah a awm lo. Amah vuantu hi keimah chu ni ila thuhran! Muffin kutzungtanga a zungbun tle zauh ka hmuh chuan ka chhungril ah che a awm leh ta. Kan inhmuh hnuhnun ber pawh khan a bun tih ka hmu tawh a, ka zawt buai duh ta lo ani. Min chhan dan tur chu engpawh ni se ka lawmzawngin min chhang dawn lo tih ka hriatchian em vanga zawt buai duh ta lo kha ka ni bawk a.
An bula ka ding min hmuh chuan a nui hmel a reh riai riai a, chiang zet hian min en ta ran mai. Min lawm loh thu a hmui nalh zet atang hian ri chhuak lo mah se a hmel chuan a tilang vek thung.
.
"I tha em? Kan inhmu khat hle mai." ka ti ta ngawt. Muanpuia chu insangmar deuhin Muffin vengtu rinawm ni a inngai ang mai hian a din hnaih zual sauh a. A awm dan chuan ka ngeng a chhun tawk em em.
.
"Tha alawm. Engtin nge i lo kal ve theih zawk a?" a nui lui ve ta hram. Ka lakah chuan tihluihna leh mawi zawnna vang chauhin a nui a, he mihring pa bulah hian tihluihna hmang emaw nui lui hmel a pu ve miah lo anih kha. An bula hmeichhia awm ve chuan min en zak zak hian chhuanlam a siam a, a kalsawn ta hlauh bawk.
.
"Nia, tihtur dang ka lo nei lo hlauh a, ka rawn tel ve anih hi."
.
"Engtin nge i hriat zawk?" a ti leh a. Zawhna min zawt mawlh mawlh leh heta ka awm ve lawm chiah lo anga a lan chhan hi thil eng emaw tak chu a awm ngei ngei ang.
.
"Eng thil nge hriat tur awm?" ka ti ve ta thung. Muanpuia chu a melh zauh a. Muanpuia phiangsen chuan eizawh mai duh hmel pu hian a en tak dauh dauh a. A mit chu khaw hmu thei miah lo tura tuam ka chak hial mai. Ka ngaihtuahna chu leh.. Naupang ngaihtuahna ni awm tawk vel a ni.
.
"I lo kal chhan leh helaia kan thiltih tur hi i hre miah lo anih hmel." Muanpuia chu ka en a, hlim surh hmel hi a pu lehnghal a.
.
"Hre hauh lo mai." ka ti nghut ringawt. Ka lan mawl hmel viau ta ve ang.
.
"Zanin hi Hmingtei nen kan inneih tur lo lawm lawkna hun a ni tih pawh i hre hauh tak lovang." a aw ri ah chuan min tihelna hre thana ka inhriat chu. A ni nen kan inhmuh hmasak ber tum khan ka che mawi lem lo tih ka inhre nain min elhsen tur a ni bik hauh lo. A bula hmeichhia hi ka hmeichhe hmangaih a ni tih a hriatthiam vanga min tiel niin ka hre bawk. "Ni lawm ni My love?" Muffin chu a en a, a ni chu a lo  nui sak thung. Ka chhungril atang hian ka tek chhawk niin ka inhria.
.
Anni pahnih hi an innei ang maw? Engvangin? Engvangin nge an inneih ngawt ang? Ka awm dan inthunun in ka nui suk a.
"Oh! A ni maw? He in hi_"
"Ka nu te in pui a nia. Tupa upa ber ka nih angin ka hun ropui tawn tur lawm lawk nan helai hmun aia tha hi a awm chuang lova." hnehtu inti hmelpu, ka hmaa mipa ding ka hnek lohna chu tlemte  ani. A thusawi nemngheh tum niawm tak hian Muffin lu ah chuan a fawp zoh a. Kei hian engtin nge ka tih dawn le? Engtin nge ka awm dawn? Mawizuala khan helai an kal khawm chhan hre ran hian min ko a ni ngei ang. A chhan min hrilh lawk ni se ka kal loh tur chian zia a hre ngei bawk ang chu. Muffin laka ka rilru puthmang hi engtin nge a hriat ka hre hek lo. Ka ngei hle mai.
.
Muffin hmel chu ka en a, ka chhungril a na ut ut! He mipa hi neih duh khawp hialin a hnaihin a lo ngaina a maw? Ka tlawm chiang teh e! He hmeichhe lakah hian ka tlawm ta anih hi. Ka beidawng mai dawn lo tih erawh ka inhrechiang hle lawi si. Eng thil nge tih ka tum phei chu ka hre chuang hauh lo. Mah se awlsam takin Muffin hi ka thlah dawn lo. Ka pawnlam lan danah care lo angin lang mah ila ka chhungril chu a so bulh bulh a ni ber.
.
"Min lawmpui tura lo kal inih chuan kan lo lawm a che." Muanpuia chu enin ka nui lui suk a, ka bu nghat bawk.
.
"Lawmpuina hlan belh leh pawh i mamawh tawh lo anih kha. Anih phawt u." tia inher in ka kalsan ta.
.
Pawnah ka chhuak a, eng thil  nge tih ka tum pawh hre lovin ka car bul ka thleng der. Ka car chu ka nem dawt a, engtia awm tur nge ka hre hrep lo anih hi. Eng thil nge ka tih ang. Inchhung ah ka hmeichhe hmangaih awm chhun mipa dang  nei mai turin a awm a, kei hian eng thil nge ka lo tih ang? Ka kut pahnih a car nemin ka ding kun deuh a, ka in ngaihtuah fim angai.
.
"I tha em?" ka bula hmeichhe aw ka hriat chuan ka ding ngil thuai a. "Inchhung ah lut ila?" ahmaa Muffin nen inbia hmeichhia kha a ni. Ka hriat ngai  mi a ni lova, engvanga min rawn pawh ve ngawt nge anih pawh ka hre lo.
"Min hre lo  mai thei a, Ngaihawmi ka nia. Hmingtei cousin. I hmel ka hmuh khan Eleazer i ni tih ka lo hre nghal. I tha em?"
.
"Rinmuana" ka ti nghut. Tuna min koh dan duh lo thlan chu a mak viau ta ve ang.
.
"Hmingtei khan Eleazer ti khan a sawi mai che sia."
.
"Min sawi amaw?" ka aw a mak tihna chu ka thuo hman lo. A ni chu a lo nui hak a. Ngaihawmi maw kha. Hmeichhe fel tak a nih dawn hi.
.
"Um, hetiang hi a sawi tam ngai lova, i hming chu a sawi ve tlat. Engpawhnise, thil tha lo tih tum te pawh ka ang. Ka unaunu pasal nei mai tawh tur ngaihzawng hlui bula sawi ah chuan a fuh chiah lo anih hi." a nui zui leh hak hak a.
.
Min sawi tih hriat ringawt pawh ka tan chuan thil pawimawh ani tawh. Khatiang thil zawng zawng thlen hnu khan ka Muffin chuan engtin nge min lo sawi tih hriat chu ka tan a pawimawh em bawk a ni.
.
"Engtin nge a sawi a?" pangngai thei ang ber hian ka zawt nawn leh hram.
.
"A sawi dan che chu a pawimawh viau em ni a?"
"Pawimawh tiin sawi ila mak iti angem?"
.
"Ti lovang. A lakah hian i danglam tih ka hria__Oh! Ka luhsan phawt ang che." tawngsual intih vanga pawiti hmel pu chungin min kalsan nghal a, a thusawi chu ka ngaituah zawm thung. Ka Muffin lakah hian ka danglam maw? Engti zawngin nge niang? Natna chauh thlensaktu anga min ngaihtuah loh hram ka beisei. Ka duh loh dan berin hmangaihna vanga chak lo takin ka awm mek chu a nih si hi.
.
Inchhung ah chuan muangchang in ka lut leh a, pawnah khan eng chena rei nge ka awm ka hre lo. Helai an kalkhawm chhan ber an ti tawh tih an chezia atang chuan ka hre thei. Muffin leh Muanpuia chu an chibai sap sap a, inchhunga awm zawng zawng chuan hlim sar hmel an pu vek bawk. Lut tawh lo tawp tur ka nia, Muffin hmel hmuh leh ka duh vang chauha lut leh ka ni. Ka dinna atang chuan ka en deuh reng a, va pawh tawh lo leh min rawn hmuh leh hmain ka chhuak leh ta.
.
Hmanhmawh vak lovin motor ka khalh chhuak a, ka rilru a buai nuai nuai a ni ber e. Hetiang thil hi a thlen thut thut ka beisei lova, min thawng a ka hamhaih bawk. Tihtheih erawh ka nei tlem hle si. Ka thinlung zawng zawnga ka hmangaih hmeichhiain min kalsan lai  hmuh hi ka thil duh ber a ni lo chiang em asin.
Ka in lam pan lovin ka tlan zel a, khawpui pawn ka thlen chuan kawngsir ah ka ding ta chauh. Car atangin ka chhuak a, thli thaw heuh heuh chu dawngin ka dak vang vang mai. Ka chhungril ah hian ka ruak ta huai niin ka inhria.
.
Rei tawk tak ka awm hnu chuan sana ka en a, dar 1 a lo ri dawn reng mai. Khawpui eng ut chu ka en leh a, tuna ka awmna hmun atang hi chuan a reh ruihin a lang thlamuanthlak ruih mai. Ka chhungrila ka awm mek dan nen khaikhin chuan a inpersan chiang teh e.
.
Ka phone phawrhin ka contact list ka scroll sek a, Muffin number chu ka dial ta nge nge. Ka beisei loh lutuk in arawn pick up ta lehnghal. Tawng mai nachang pawh ka hre lo. Tuna ka awm dan ai hi chuan Muffin ka hriat hmaa ka nun dan kha ka duh zawk. Engmah pawisak nei lo leh zalen taka ka nun dan anga awm leh kha ka duh.
.
"I mu tawh ami?" ka tih rualin mut loh a hun tawh lo tih ka hrechhuak. Ka sawi hman tawh tho.
.
"Um.."mutchhuak aw tak hian chhang a. "Eng thil nge ni ta?" a tih chuan ka rilru ah sawi tur tam tak a lo lut nghal zut zut mai. Ka hmangaih thu hrilh leh ka duh a, a thinlung luahtu mipa awmchhun nih ka duh thu pawh sawi ka duh. A tel lova nun hman ka duh loh thu pawh hrilh ka duh. Mahse ka tawng chhuak lo.
.
"Hello..?" harhchiang ta deuh zawk hian arawn tawng leh a.
.
"Muffin.. Engvang nge?" ka ti ta thlawt. Ringawt maiin a!
.
"Eleazer! I tha em?"
Engvang nge? Tunah min ngaihtuah ni awm takin a tawng leh si a maw? Ka hrethiam thei lo. He hmeichhia hi ka hrethiam hlawl lo.
.
"Ka tha alawm."
"Oh" a ti sap a. Sawitur a hre ta lo aniang a ngawi zui ta daih.
.
"Kha pa kha i hmangaih em?" ka tih chuan a thaw hak niin ka hria.
.
"Chu chu itan a tangkaina a awm lo. Tunang huna inbiak hi a hlauhthawnawm tih i hriat  ve ka ring. Phone hi Ka dah dawn a nia."
.
"Dah suh. Hmuh che ka duh."
.
"A theih loh. Hmuh chhan tur che ka nei lo. Pasal ka nei dawn tih i hria a, chutiang thu chu engtin nge i sawi theih zawk. Inbiak ringawt pawh hi a dik lo."
.
"Naktuk ah ka rawn hmu ang che."
.
"Ti lo la a tha zawk ang. Ka dah ania." tih leh phone off a rual nghal. Min ngaithla tawh lo tih hre chungin "Ka hmangaih che" ka ti leh hram.
.
Ka phone chu akin car-ah ka lut a, tlem tal ka mut ve  atul ang chu. Ka in ka luh chuan inchhung thil engmah danglam zawm si lovin ruak ta riau hian ka hria. Ka chhungrila ka awm dan mak zet vang hi a ni ngei ang.
.
Tuivawt a ka inbual leh zet hnuah ka mu a, ka leh kual chhen hnu chuan khawvar tantirh ah ka muhil ve ta hram. Ka awm dan hi mipa awm dan tur pawh niin ka hre lo. Mahse hmangaihna hian khawvela mipa rorum ber berte pawh a tukzal thin a ni lawmni kha.
.
"Ka hmangaih che. I ta chauh ka ni reng ang." min kuah chial a, a rim pawh ka hre thei. Thawklehkhat ah ka lak atang chuan kalsawnin mipa dang kuah chung hian min en a, min nuihzat tih a hmel atangin a lang vek.
"Eleazer.. Ka hmangaih  ngai lo che tih hi ka hrilh bawk ang che. I lak atanga ka zalen hi ka lawm hle bawk. Mangtha."
Rosa hmel chu ka en a, ka hmangaih thin ngei alawm! Ni lo. Muffin hmel ka mitthla a lo lang vang chuan ka nui ta sak. He thil hi a thuk zawk. Ka chhungril thlenga min khawih danglam thei hmeichhia chu Muffin chauh hi a ni.
"I kal thei ang. Kei chuan ka Muffin ka nei."
.
"A ni pawh khan a kalsan mek che anih hi. Eleazer, khawngaihthlak." a nui hmel chu hmu lo ila ka va duh zawk chiang em. "I damchhunga hun hmanpui duh tur khawp che hmeichhia hi itan an awm lo ani ngei ang." a tizui leh a.
.
Ka thuchhuak nghal hlawl mai. Ka thaw rang hle tih ka inhriat chuan khum atangin ka tho vat a, bathroom-ah lutin tuivawtin ka inphuh nghal.
Rosa thusawi kha a dik reng em ni? Kha hmeichhe hnaisai lo vang khan hun harsa ka tawk a, Muffin tawnga ka hmangaih takzet a ni tih leh amah ka hmangaih aia nasa khan Muffin hi ka hmangaih a ni tih ka inpawm a ka inhriat hma kha chuan amah kha ka hmangaih niin ka lo inhre thin. Hetiang thil hi ka hrethiam tehnuai love. Rosa vang khan ka na hle a, ka mit hmuh lai ngeia ka nupui nimai tawh tur leh mipa dang mu dun hmuh kha a rapthlak, a tenawm tiin sawi ila a dik zawk ang. Kha thil vang khan reitak chhung chu ka nun phung a pangngai lo hial a nih kha. Eleazer tia miin min koh hian Rosa kha ka hriatchhuah thin vangin ka hming hmasa a koh leh biak nih hi ka duh ta ngai lo reng reng a ni. Hriatrengna tuihnai lo zet min kaihthawh sak thin vang a ni bawk ang chu.
Rosa hnuah Hmingthansangi chauh hian ka hming hmasain min ko leh a, mak takin a hmui nalh tak atanga ka hming alam ri ka hriat hian hriatrengna tuihnai lo tak kha ka hriatchhuah phah  ngai tawh lo. Chuti chunh chuan Muffin chauh lo chuan ka hming hmasaa min koh hi ka la duh ta chuang lo fo. MAHSE tunah ka Muffin pawn min kalsan mek chu a nih si hi.
.
Barthroom atanga chhuakin thawmhnaw ka inbel a, ka ngaihtuahna ti hahdam thei tur thil ka tih a tul tih ka hria. Inchhungah insawizawi lovin pawnlamah kal ila a that ka ring.        
.
Ka tlan a, ka tlan zel a. Thaw hleithei lo khawpa ka awm hma chu ka chawl lo. Ka thlen chin hre tura ka hawikual chuan ka lo thlenghla tawh hle tih ka hre chiah. In lam panin ka tlan let leh vang vang a.
.
Ka in awmna thlen hmaa ka thil hmuh vang chuan ding deuh chawtin thawm nei lo hian ka panhnai a. Hetah eng thil nge an tih? Thutak zet hian an inbe sawr sawr a, an hawikual deuh zak zak bawk. Ahmaa dawra an panhniha ka hmuh dun bak kha ka hmu leh ta miah lova, ruahmanna dang an nei dawn a ni ngei mai. A awmzia chu Muffin ka hmuh vat a tul tihna a ni.
.
Ringhlel awm anga lang lo turin ka tlan leh a, ka kawrhak lukhum chuan ka lu khuhin ka tlan pel thuak a. Min rawn enzui em tih ka hre lo.
.
Dar 9 rik hmain office ka thleng vang tawh. Muffin hmu tura chhuah ka tum vangin ka signature mamawh ziah fel ngai ho ka enfel zung zung a. Ka hna a sawt khawp mai.
.
12 rik hmaa office chhuahsanin ka kalna tur hmun ka chiang bawk a ka pan nghal vang vang. Muffin thawhna office ka thlen chuan tawi khawmuang lovin a awmna floor ka panding nghal a, a duh emaw duh lo emaw kan inhmuh ngei angai.
.
A dawhkan hmaa ka ding min hmuh chuan a meng phar ak a. Min hmuh a in beisei lo tih a chiang reng mai.
"Enge i lo tih dawn?" a ti ta nghal reng a.
.
"Nizan ah ka sawi tawh kha."
"Hmuh chhan tur che ka nei lo." min hawisanin dawhkana a lehkha dah chu a bih zui hmak. Engtia tihtur nge ka hria.
A lehkha enlai chu ka la a, min rawn en lo thei ta lo.
.
"Khawi min pe let rawh." a kut veilamin arawn ban a, a zungbun chuan ka mit a la leh ta.
.
"Zungbun nalh tak anih kha."
"Ka hria. Ka lawm e. Khawi lehkha kha."
.
"Kan inbiak angai. I thawhpui te zawng zawngin kan inbiakna hi an hriat i duh ka ring lo." min en vang vang hnu chuan thawk a la ta halh.
.
"A tha e. Tun bak chu hetiang thil hi ti tawh suh. Ka tan pawh thil mawi a nilo. ka duh miah lo a nia." a tih chuan chhang lovin a hmeltha zet chu ka en tawp. He hmeichhia hi ka ta tur chauh a ni. Chu chu a ni hian a inhre lo anih pawhin kei hian ka hriattir ngei ang.
.
Ka sawilawk hian ka thulh leh duh lutuk a, mahse naktuk chu thulh lo turah inngai chungin ka lo sawilawk leh tho mai. Inrinni a ni bawk a, type-na hun a awm em ang chu maw. Min chhiarsak avangin ka lawm em em e.